[Глава 19] Слу́жба о́бща преподо́бному́чеником двема́ и мно́гим

Ве́чер,

на Го́споди воззва́х, стихи́ры, гла́с 8.

Подо́бен: Что́ вы́ нарече́м:

Вельми́ подвиза́вшеся преподо́бнии, ꙳ мучи́тельския прило́ги претерпе́сте до́блественне: ꙳ ду́шы преда́сте мече́м любо́вию, ꙳ в му́ченическия оде́ястеся венцы́: ꙳ а́нгелом слику́ете досто́йно. ꙳ Мно́га ва́ша терпе́ния, и бо́льша дарова́ния, ꙳ моли́теся о душа́х на́ших.

До́бре пожи́сте святи́и, ꙳ му́ченическим уподо́бльшеся по́двигом до́блии: ꙳ вы́ бо о му́ках небрего́сте му́жески, ꙳ посто́м освяти́сте телеса́, ꙳ и любо́вию пролия́сте кро́ви, ꙳ я́ко да вку́пе облече́теся ꙳ в венцы́ страда́ний ва́ших, ꙳ моли́теся спасти́ся душа́м на́шым.

Преподо́бнии му́ченицы Христо́вы, ꙳ до́бре подвиза́стеся, о вре́меннем житии́ небре́гше, ꙳ во́лею попра́вше плотску́ю му́дрость му́жески: ꙳ и та́ко о Христе́ сконча́вшеся, ꙳ со а́нгелы водворя́етеся досто́йно, ꙳ сего́ ра́ди ва́шу па́мять чту́ще мо́лим: ꙳ моли́теся Го́сподеви, поми́ловатися душа́м на́шым.

Сла́ва, и ны́не, Богоро́дичен:

Кому́ уподо́билася еси́ окая́нная душе́, к покая́нию ника́коже возни́чущи, и огня́ не ужаса́ющися злы́х ожида́ющаго? Воста́ни, и еди́ну к заступле́нию ско́рую призови́, и возопи́й: Де́во Ма́ти, моли́ Твоего́ Сы́на и Бо́га на́шего, изба́вити мя́ от се́ти льсти́ваго.

Крестобогоро́дичен: А́гница А́гнца я́ко ви́де на дре́ве просте́рта во́лею кре́стнем, вопия́ше ма́терски боле́знующи с пла́чем: Сы́не Мо́й, что́ стра́нное сие́ виде́ние? все́м жи́знь дая́й я́ко Госпо́дь, ка́ко умерщвля́ешися Долготерпели́ве, земны́м подая́ воскресе́ние? сла́влю Твое́ мно́гое Бо́же Мо́й, снизхожде́ние.

А́ще и́мут самогла́сен. Сла́ва, гла́с 8:

Равноа́нгельное житие́ пожи́вше, боле́зньми по́стническими отцы́ преподо́бнии, воздержа́нием телеса́ порабо́тивше, покори́сте духово́м, де́латели бы́вше за́поведей Госпо́дних: испе́рва подо́бную добро́ту о́браза сохрани́сте, и страда́ния по́двиги от по́стных по́тов и муче́ния соверши́сте, сугу́быми венцы́ украси́стеся: приле́жно Спа́са моли́те спасти́ся на́м.

И ны́не, Богоро́дичен:

Кро́в тво́й Богоро́дице Де́во, врачевство́ е́сть духо́вное: в о́нь бо прибега́юще, от душе́вных неду́г избавля́емся.

Крестобогоро́дичен: Предстоя́щи Кресту́ Твоему́ Го́споди, без се́мене ро́ждшая Тя́, ма́терски рыда́ющи глаго́лаше: увы́ Мне́, Ча́до Мое́, ка́ко заше́л еси́ от о́чию мое́ю, Мы́сленное со́лнце, о́чию луче́? воста́ни Всеси́льне, просия́й све́т Тво́й все́м, испове́дающым Тебе́ и́стиннаго Бо́га и Челове́ка.

[зри́] А́ще пра́зднуеши с полиеле́ем, глаго́ли Богоро́дичен воскре́сный: Ца́рь Небе́сный:

Вхо́д. Проки́мен дне́.

Чте́ния преподо́бническая, [пи́сана в конце́ кни́ги сея́.]

На стихо́вне стихи́ры, гла́с 8:

Подо́бен: Му́ченицы тво́й Го́споди:

Преподо́бнии Твои́ му́ченицы Го́споди, подо́бящеся безпло́тным, моли́твами и воздержа́нием стра́сти отгна́ша плотски́я, и чудоде́йствы просия́ша, все́х сердца́ просвети́ша: те́х моле́нием, да́руй лю́дем Твои́м ве́лию ми́лость.

Сти́х: Честна́ пред Го́сподем сме́рть преподо́бных Его́.

Преподо́бнии му́ченицы, ре́вность доброде́тельную восприе́мше, А́риеву е́ресь и Несто́риеву разори́ша я́ве, и правосла́вным побо́рницы бы́вше, сла́ву от все́х прия́ша: те́х Христе́, моли́твами, да́руй лю́дем Твои́м ве́лию ми́лость.

Сти́х: Блаже́н му́ж боя́йся Го́спода, в за́поведех Его́ восхо́щет зело́.

Зве́зды тве́рди воздержа́ния я́вльшеся, просвети́сте ду́шы мона́шествующих, и тьму́ бесо́в отгна́сте преподо́бнии му́ченицы: те́мже по кончи́не ублажа́етеся, моля́щеся спасти́ся все́м творя́щым святу́ю па́мять ва́шу.

Сла́ва, гла́с 6:

Блаже́ни есте́ преподо́бнии му́ченицы Христа́ Бо́га на́шего: преподо́бнии у́бо, я́ко пра́вду возлюби́сте, и благода́ть прия́сте: му́ченицы же, я́ко ме́чь ва́с не отлучи́ от любве́ Христо́вы: и сего́ ра́ди ра́дуетеся, я́ко мзда́ ва́ша мно́га на небесе́х.

И ны́не, Богоро́дичен:

Никто́же притека́яй к Тебе́, посра́млен от Тебе́ исхо́дит Пречи́стая Богоро́дице Де́во: но про́сит благода́ти, и прие́млет дарова́ние к поле́зному проше́нию.

Крестобогоро́дичен: Ви́дящи Тя́ распина́ема Христе́, Тебе́ ро́ждшая, вопия́ше: что́ стра́нное е́же ви́жу, та́инство, Сы́не Мо́й? ка́ко на дре́ве умира́еши пло́тию пове́шен, Жи́зни пода́телю?

Тропа́рь во уста́ве.

А́ще ли не́сть уста́ва, глаго́ли се́й тропа́рь, гла́с 4:

Бо́же оте́ц на́ших, творя́й при́сно с на́ми по Твое́й кро́тости, не отста́ви ми́лость Твою́ от на́с, но моли́твами и́х в ми́ре упра́ви живо́т на́ш.

Сла́ва, и ны́не, Богоро́дичен, или́ Крестобогоро́дичен.

На у́трени,

на Бо́г Госпо́дь, тропа́рь то́йже.

По 1-й кафи́сме, седа́лен, гла́с 4.

Подо́бен: вознесы́йся:

Землены́х и тле́ющих наслажде́ния небрего́сте, и в пусты́ни житие́ возлюби́сте, ми́ра красоты́ и пи́щи вре́менныя возненави́девше, и отсю́ду сподо́бистеся му́ченическому и по́стническому сочта́тися ли́ку: с ни́миже моли́те спасти́ рабы́ ва́шя. [Два́жды.]

Сла́ва, и ны́не, Богоро́дичен:

На Престо́ле херуви́мстем седя́й, и в не́дрех О́тчих водворя́яйся, я́ко на Престо́ле святе́м седи́т свое́м, Влады́чице, в не́дрех Твои́х: вопло́щься я́ко Бо́г, вои́стинну воцари́ся над все́ми язы́ки, и разу́мно ны́не пое́м Ему́: Его́же умоли́ спасти́ся рабо́м Твои́м.

По 2-й кафи́сме, седа́лен, гла́с 8.

Подо́бен: Прему́дрости:

Иоа́нна нра́вы Крести́теля, и Илию́ Фесви́тянина доброде́тели посто́м подража́юще, безпло́тно пожи́сте, со а́нгелы сла́вяще святу́ю Тро́ицу Боже́ственную, и бесо́вская нахожде́ния победи́сте му́жеством: те́м и страда́нии кре́пко подвиза́стеся, Христо́ву Боже́ственному воплоще́нию кла́няющеся с Божество́м. И́мярек, блаже́ннии, моли́те Христа́ Бо́га, грехо́в оставле́ние дарова́ти, пра́зднующым любо́вию святу́ю па́мять ва́шу. [Два́жды.]

Сла́ва, и ны́не, Богоро́дичен:

Я́ко Де́ву и еди́ну в жена́х, Тя́ безсе́менно ро́ждшую Бо́га пло́тию, вси́ ублажа́ем ро́ди челове́честии: о́гнь бо всели́ся в Тебе́ Божества́, и я́ко Младе́нца дои́ши Зижди́теля и Го́спода, те́м а́нгельский и челове́ческий ро́д досто́йно сла́вим просто́е рождество́ Твое́, и согла́сно вопие́м Ти́: моли́ Христа́ Бо́га, прегреше́ний оставле́ние дарова́ти, досто́йно пою́щым сла́ву Твою́.

По Хвали́те и́мя Госпо́дне:

Припе́в:

Ублажа́ем ва́с преподо́бнии му́ченицы, и чте́м святу́ю па́мять ва́шу, наста́вницы мона́хов, и собесе́дницы а́нгелов.

Псало́м избра́нный: Терпя́ потерпе́х Го́спода:

По полиеле́и седа́лен, гла́с 8.

Подо́бен: Прему́дрости:

Све́том Тро́ическим све́тло осия́вшеся, отцы́ светови́днии, тьму́ оста́висте сласте́й глубо́кую, и свети́льницы де́лы Боже́ственными просвеща́юще ве́рных сердца́, блаже́ни, яви́стеся поще́нием и страда́нии, те́мже светоно́сную и честну́ю ва́шу па́мять почита́ем дне́сь, и согла́сно взыва́ем: Богогла́снии пребога́тии, моли́те Христа́ Бо́га, согреше́ний оставле́ние дарова́ти, чту́щым любо́вию святу́ю па́мять ва́шу. [Два́жды.]

Сла́ва, и ны́не, Богоро́дичен:

Я́ко Всенепоро́чная Неве́сто Творца́, я́ко Неискусому́жная Ма́ти Изба́вителя, прия́телище я́ко су́щи Уте́шителя Всепе́тая, беззако́нию мя́ су́ща скве́рно жили́ще, и де́монов игра́лище в ра́зуме бы́вша, потщи́ся от си́х злоде́йствия мя́ изба́вити, све́тло жили́ще доброде́тельми соде́лавши, светода́тельная и нетле́нная, разжени́ о́блак страсте́й, и вы́шняго прича́стия сподо́би, и све́та невече́рняго моли́твами Твои́ми.

Степе́нна, 1-й антифо́н 4-го гла́са.

Проки́мен: Честна́ пред Го́сподем сме́рть преподо́бных Его́.

Сти́х: Что́ возда́л Го́сподеви о все́х, я́же воздаде́ ми?

Вся́кое дыха́ние:

Ева́нгелие пи́сано в конце́ кни́ги сея́.

По 50-м псалме́ стихи́ра, гла́с 4.

Пресве́тлыми сия́ньми преподо́бнии, озари́вше своя́ ду́шы светоно́сно, доброде́тельми украси́сте зе́млю, иму́ще в сердца́х свои́х Христа́, просвеща́юще я́ко со́лнце незаходи́мое язы́ческия собо́ры, му́ченическими добро́тами на́с удобря́юще, преподо́бнии му́ченицы.

Кано́н, гла́с 4.

Пе́снь 1.

Ирмо́с: Мо́ря Чермну́ю пучи́ну, невла́жными стопа́ми, дре́вний пешеше́ствовав Изра́иль, крестообра́зныма Моисе́овыма рука́ма, Амали́кову си́лу в пусты́ни победи́л е́сть.

Поще́нием светоза́рнии бы́вше преблаже́ннии, Богозра́чная показа́стеся свети́ла излия́нием крове́й ва́ших: те́м ра́дуетеся с по́стники Христо́выми и му́ченики.

В мо́ри сле́з ва́ших му́дрии, пе́рвее потопи́вше фарао́на мы́сленнаго, последи́ же в кро́вных пото́цех победи́сте его́, и поги́бели преда́сте.

Преподо́бныя отцы́ закла́ни бы́вшя за Христа́, по́стнически пожи́вшыя му́ченики восхва́лим, пою́ще изба́вителю Бо́гу на́шему: я́ко просла́вися.

Богоро́дичен: Сы́й естество́м Госпо́дь, все́м невмести́мый в Тебе́ вмести́ся Богоро́дице Де́во, зе́мен бы́в за милосе́рдие, да земны́я спасе́т за неизрече́нную ми́лость Свою́.

Пе́снь 3.

Ирмо́с: Не му́дростию, и си́лою, и бога́тством хва́лимся, но Тобо́ю О́тчею ипоста́сною му́дростию Христе́: не́сть бо свя́т, па́че Тебе́ Человеколю́бче.

Сокруше́нною со́вестию Бо́гу угоди́вше, сокруши́сте вра́жия велича́ния блаже́ннии, мечи́ сокруша́еми и умерщвля́еми.

Смотря́юще бу́дущих му́дрии присносу́щества, непостоя́нных и тле́нных до́лу влеку́щих отрази́сте: сего́ ра́ди ублажа́еми есте́ преподо́бнии му́ченицы.

Хва́лящеся держа́вою Твое́ю Богоно́снии, кре́пце губи́теля ополче́ния победи́ша, и убие́ни за Тя́ Спа́се, сугу́бы по́двиги показа́вше, те́ми венча́шася.

Богоро́дичен: Пречи́стая, я́же Бо́жие просто́е Сло́во ро́ждшая, освяти́ на́ша ду́шы и телеса́, блажа́щих Тя́ Пренепоро́чную.

Седа́лен, гла́с 4:

Подо́бен: Ско́ро предвари́:

Я́ко прише́льцы я́вльшеся, и пресе́льницы на земли́, ку́щи потко́ша в пусты́нях, кре́пко подвиза́стеся преподо́бнии нагото́ю украси́вшеся в доброде́тели оде́ждах, сообра́зни бы́вше Христо́вым страсте́м: сего́ ра́ди претерпе́сте мучи́тельское заколе́ние.

Сла́ва, и ны́не, Богоро́дичен:

К Богоро́дице приле́жно ны́не притеце́м гре́шнии и смире́ннии, и припаде́м, в покая́нии зову́ще из глубины́ души́: Влады́чице, помози́, на ны́ милосе́рдовавши: потщи́ся, погиба́ем от мно́жества прегреше́ний: не отврати́ Твоя́ рабы́ тщы́, Тя́ бо и еди́ну наде́жду и́мамы.

Крестобогоро́дичен: Де́ва и А́гница ви́девши на Кресте́, без се́мене из нея́ А́гнца ро́ждшагося, и копие́м прободе́на, печа́ли уя́звена стрела́ми, вопия́ше боле́зненно восклица́ющи: что́ но́вое сие́ та́инство? ка́ко умира́еши, и́же живота́ еди́н Госпо́дь? те́мже воскресни́, па́дшаго воздвиза́я пра́отца.

Пе́снь 4.

Ирмо́с: Вознесе́на Тя́ ви́девши це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Страсте́м плотски́м не повину́вшеся преблаже́ннии, врага́ повину́сте, и убие́ни бы́вше мече́м, к животу́ безсме́ртному ра́дующеся вку́пе преложе́ни бы́сте.

Умори́вше себе́ пре́жде сме́рти воздержа́нием, свое́ю во́лею преподо́бнии, от беззако́нных нево́лею мече́м лю́те побие́ни бы́сте, жи́ти и по сме́рти ве́рующе.

А́ще и мечи́ от беззако́нных убива́еми отцы́, от жития́ сего́ отступи́сте: но пре́жде исхо́да напа́сти го́рькия претерпе́сте, ме́ртви бы́вше ми́рови.

Богоро́дичен: Обновля́ет челове́чество но́во Отроча́ преве́чный Бо́г, я́влься от Де́вы, и челове́к бы́в. Тому́ воспои́м: сла́ва си́ле Твое́й Го́споди.

Пе́снь 5.

Ирмо́с: Ты́ Го́споди мо́й, све́т в ми́р прише́л еси́, Све́т святы́й, обраща́яй из мра́чна неве́дения, ве́рою воспева́ющыя Тя́.

Ра́й кра́сный, дре́во живо́тное Го́спода яви́стеся посреде́ иму́ще, кро́ви ва́шя, я́же я́ко же́ртву чи́сту прии́мшаго.

Кро́вныя ка́пли со сле́зными смеси́вше струя́ми, Богоно́сцы, многообра́знаго зми́я в си́х погрузи́сте.

Красоту́ Бо́жию зре́ти сподо́бистеся, и ве́чное весе́лие, вме́сто трудо́в и боле́зней блаже́ннии прия́сте.

Богоро́дичен: Родила́ еси́ Бо́га, па́че сло́ва и ра́зума: и пребыла́ еси́ по рождестве́, я́ко и пре́жде рождества́ Де́ва, чи́стая Богоневе́стная.

Пе́снь 6.

Ирмо́с: Пожру́ Ти со гла́сом хвале́ния Го́споди, це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Отве́ргше пристра́стия сою́з поще́нием, и ну́жною сме́ртию сою́зов теле́сных разреши́стеся, и при́звани бы́сте к неруши́мей добро́те Влады́чней.

Я́ко го́ры высо́ким житие́м показа́вшеся, и́же погуби́ти го́ры, и всю́ тва́рь претя́щаго, си́лою Христо́вою под но́зе свои́ повину́сте.

Воздержа́нием и труды́ те́ло истончи́сте отцы́ святи́и, и кровьми́ Христо́ви пожро́стеся до́блии, и зако́нно венча́стеся.

Богоро́дичен: Успи́ страсте́й мои́х непостоя́нную бу́рю, неусы́пною Твое́ю моли́твою Де́во, молю́ Тя: и не да́ждь ми́ сно́м грехо́вным усну́ти, и тя́жким.

Конда́к во уста́ве.

А́ще ли не́сть уста́ва, глаго́ли се́й конда́к, гла́с 2:

Подо́бен: Вы́шних ищя́:

Волне́ний мно́жество невла́жно преходя́ще, безпло́тныя враги́ струя́ми сле́з ва́ших кре́пко погрузи́ли есте́ Богому́дрии, преподо́бнии му́ченицы, и чуде́с да́р прии́мше, моли́те непреста́нно о все́х на́с.

И́кос: И́же на земли́ пло́ть умертви́вше, живоно́сною ме́ртвостию, Христа́ Бо́га стра́сть вообрази́вше, пе́рвее в до́брем поще́нии, и второ́е па́ки во страда́ниих: те́мже Христо́с сугу́бы венцы́ низпосла́ ва́м, преподо́бнии му́ченицы, и угото́ва ва́м жили́ще небе́сное и ме́сто ве́чное, иде́же ра́достно всели́стеся, му́чеником и преподо́бным единокро́вницы. Те́мже моли́те непреста́нно о все́х на́с.

Пе́снь 7.

Ирмо́с: В пещи́ Авраа́мстии о́троцы перси́дстей, любо́вию благоче́стия па́че, не́жели пла́менем опаля́еми, взыва́ху благослове́н еси́ в хра́ме сла́вы Твоея́ Го́споди.

Укра́шени доброде́тельными заря́ми, и страстьми́ свяще́нными просвеща́еми, преидо́сте к све́ту незаходи́мому, и сы́нове дне́ показа́стеся.

Хоте́нием от мирски́х сласте́й отлуча́ющеся, стра́нно челове́ком я́вльшемуся пло́тию присво́истеся, бу́дущая и нетле́нная блага́я стяжа́вше святи́и.

Благослове́н еси́ Бо́же, соверши́вый тече́ние страда́лец Богоно́сных оте́ц дне́сь, и я́вль и́х о́бщники небе́снаго Твоего́ Ца́рствия.

Богоро́дичен: Тебе́ нося́щую во чре́ве Твое́м живо́тную ма́нну, дре́вле манноприя́тная ста́мна, я́ко вои́стинну прообража́ше я́вственно: благослове́на Ты́ в жена́х пренепоро́чная Влады́чице.

Пе́снь 8.

Ирмо́с: Ру́це распросте́р Дании́л, льво́в зия́ния в ро́ве затче́, о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: благослови́те вся́ дела́ Госпо́дня Го́спода.

Вели́кий ли́к преподо́бных му́ченик, по́стническими хра́брствы украша́емь дне́сь, вся́ ликостоя́тели Боже́ственны показу́ет хва́лящих, и с ни́ми Христа́ пою́щих: благослови́те вся́ дела́ Госпо́дня Го́спода.

Ста́сте я́ко а́гнцы, мучи́тельскими посека́еми мечи́, и принесе́ни бы́сте поже́ршемуся сло́ву соверше́нная же́ртва, и в селе́ниих пе́рвенец яви́стеся пою́ще: благослови́те вся́ дела́ Госпо́дня Го́спода.

Те́ло и ду́шу освяти́сте Го́сподеви преподо́бнии, воздержа́нием по́тов подви́гшеся, и кро́вными струя́ми изсуши́вше мучи́тельское зло́е мо́ре, пою́ще: благослови́те вся́ дела́ Госпо́дня Го́спода.

Богоро́дичен: Отверза́ется Тобо́ю па́ки пе́рвый ра́й Богора́дованная чи́стая, и вво́дится и́же пе́рвее осужде́нный челове́к, и обожа́ется вои́стинну, челове́ков на обновле́ние, вопию́щих: благослови́те вся́ дела́ Госпо́дня Го́спода.

Пе́снь 9.

Ирмо́с: Ка́мень нерукосе́чный, от несеко́мыя горы́ Тебе́ Де́во, краеуго́льный отсече́ся, Христо́с, совокупи́вый разстоя́щаяся естества́. Те́м веселя́щеся, Тя́ Богоро́дице велича́ем.

Священносло́вием прииди́те, свяще́нныя отцы́ преподо́бныя, в пусты́нях и в пеще́рах пожи́вшыя в преподо́бии и благоче́стно пострада́вшыя, велегла́сно восхва́лим.

Я́ко прехва́льнии ва́ши труды́, и́же в по́стничестве страстоте́рпцы: я́ко изря́днии по́двизи и́миже лестца́ низверго́сте: я́ко ди́вна страда́ния, и́миже зако́нно страда́сте, и венча́ни бы́сте.

Богозра́чная ва́ша па́мять восто́ками озаря́ема трудо́в ва́ших, я́же за Христа́ подъя́сте: и со́вести все́х просвеща́ет, благода́тию вседе́тельнаго Свята́го Ду́ха.

Богоро́дичен: Устраша́ются херуви́ми зря́щя е́же на ни́х, неизрече́нным сло́вом седя́щаго Сло́ва, ма́терними твои́ми рука́ми Младе́нца носи́ма пречи́стая Влады́чице, превы́шша всея́ тва́ри.

Свети́лен.

Подо́бен: Ду́хом во святи́лищи:

Боле́зньми воздержа́ния злонача́льнаго зми́я до конца́ уби́сте, при кончи́не же вене́ц муче́ния прия́сте, отце́в похвала́ и му́чеников Сла́ва, преподо́бному́ченик мно́жество чу́дных оте́ц.

Богоро́дичен: Е́же па́че ума́ Твоего́ рождества́, пресла́вное чу́до удивля́ет вся́к у́м, и а́нгелов и челове́ков: Де́вою су́щи родила́ еси́, Де́вою пребыла́ еси́, я́ко и пре́жде рождества́ Де́во. О стра́ннаго та́инства! О рождества́ чу́днаго и пре́славнаго!

На хвали́тех стихи́ры, гла́с 4.

Подо́бен: Я́ко до́бля:

Му́дрыя му́ченики, ꙳ и преподо́бныя отцы́ воспое́м све́тло, ꙳ Христо́вым бо повеле́нием повину́ющеся, ꙳ и служе́ние вся́кою скве́рное упраздни́вше, ꙳ святи́и че́стно и благонаде́жно послужи́ша, ꙳ еди́наго Бо́га и Го́спода, пред лице́м мучи́телей, ꙳ благодерзнове́нно испове́дающе, и венча́еми свы́ше. [Два́жды.]

Жития́ до́лу влеку́щая, ꙳ и пи́щи наслажде́ния, ꙳ и цвету́щую сла́ву прехва́льнии, ꙳ оста́вльше я́ко вре́менну, ꙳ Христу́ прилепи́стеся, ꙳ Того́ добро́тою кра́сною распала́еми, ꙳ и приступи́сте я́ко благоуха́ннии шипцы́, ꙳ и венце́м нетле́ннаго Ца́рства, ꙳ Боголе́пно венча́стеся.

И́же ми́р возненави́девше, ꙳ преми́рни яви́стеся, ꙳ в це́ркви перворо́дных совокупи́стеся, ꙳ и со а́нгелы поете́ пе́снь непреста́нную, ꙳ пред Бо́гом предстоя́ще вку́пе: ꙳ и́же скве́рную и́дольскую ле́сть ꙳ отри́нувше му́ченически, ꙳ мучи́телей безу́мие посрами́сте.

Сла́ва, гла́с 6:

Испещре́ни оде́ждою чистоты́, и просвеще́ни Боже́ственною моли́твою, живу́ща же иму́ще Христа́ в себе́, от Де́вы ро́ждшагося, любо́вию ми́ра сего́ не восхити́стеся, ни сла́сти плотски́я прия́сте: но взыдо́сте усе́рдно на тождерабо́тный о́гнь, Боже́ственным огне́м вре́менный и стра́стный о́гнь попали́сте. Те́мже моли́теся преподо́бнии му́ченицы блаже́ннии, и на́м всепа́губнаго и ве́чнаго огня́ изба́витися.

И ны́не, Богоро́дичен:

Бо́га из Тебе́ воплоти́вшагося разуме́хом, Богоро́дице Де́во, Того́ моли́ о спасе́нии ду́ш на́ших.

Крестобогоро́дичен: Лю́ди беззако́ннейшыя, без пра́вды пригвожда́ющыя Тя́ на дре́ве, Де́ва и чи́стая Ма́ти Твоя́ зря́щи, я́коже Симео́н прорече́, утро́бою Спа́се уязвля́шеся.

А́ще и́мать на стихо́вне Сла́ву, глаго́ли вече́рний.

И ны́не, Богоро́дичен, или́ Крестобогоро́дичен.