15-й день

Святы́х му́ченик и испове́дник Гу́рия, Само́на и Ави́ва

Преподо́бнаго Гу́рия, Ша́лочскаго чудотво́рца

Аллилу́ия

(уста́в зри день сей ни́же)

На Го́споди, воззва́х: стихи́ры, глас 4.

Подо́бен: Дал еси́ зна́мение:

Ави́в всему́дрый,/ и Само́н чу́дный,/ и Гу́рий сла́вный,/ о́бщий соста́вивше ве́рным лик,/ в ра́дости ны́не сликовству́ют нам страстоте́рпцы и свеселя́тся,/ душа́м бо му́ченическим от Бо́га сие́ даде́ся,/ зде быва́емая разу́мно зре́ти.

Боле́зни претерпе́вше нестерпи́мых мук/ и до́блественно пострада́вше,/ Тро́ицы равночи́сленнии,/ Само́не, и Ави́ве, и Гу́рие Богому́дре,/ ве́чнаго и кра́снаго насыща́етеся ны́не наслажде́ния/ трудо́в воздая́ние возмеря́ющу вам Христу́,/ Его́же те́пле моли́те/ спасти́ся душа́м на́шим.

Ко приста́нищу нево́лненному,/ и к жи́зни немяте́жней,/ и зати́шию благоути́шному,/ страстоте́рпцы му́ченицы,/ приста́вше преве́чнующему безстра́стнаго пребыва́ния,/ и до́льнее ны́не измени́сте,/ трудо́в воздая́ния и боле́зней по́чести от Бо́га прии́мше/ досто́йне, блаже́ннии.

И́ны стихи́ры Богоро́дицы.

Глас и подо́бен то́йже.

А́ще ли аллилу́ия, пое́м си́и стихи́ры пре́жде:

Одожди́ мне, Влады́чице, Твоея́ ми́лости бе́здну/ и опа́льшееся зно́ем страсте́й се́рдце мое́,/ я́ко ми́лостива, напо́й, Отрокови́це,/ и умиле́ния ка́пли точи́ти непреста́нно сотвори́, молю́ся,/ и́миже утеше́ния сподо́блюся, Чи́стая,/ е́же получи́ти и́мут и́же и́скренно пла́кавшиися.

Де́монскими коле́блема прило́ги/ и в ров поги́бели ре́ема,/ уще́дри, Влады́чице,/ и утверди́ мя на ка́мени доброде́телей,/ и, сове́ты враго́в разори́вши,/ сподо́би мя твори́ти повеле́ния Твоего́ Сы́на и Бо́га на́шего,/ я́ко да получу́ оставле́ние в день Суда́.

Скве́рну отмы́й окая́ннаго се́рдца моего́,/ Богоро́дице Всепе́тая,/ и вся уязвле́ния, и гное́ния, я́же от греха́, очи́сти, Чи́стая,/ и ума́ моего́ утиши́ нестоя́ние,/ я́ко да си́лу Твою́ и вели́кое защище́ние/ велича́ю стра́стный и неключи́мый раб Твой.

Сла́ва, и ны́не, Богоро́дичен:

Сла́бость и уны́ние,/ Де́во Ма́ти Всенепоро́чная,/ души́ моея́ преложи́ в здра́вие и си́лу,/ стра́хом и любо́вию/ твори́ти же и де́яти оправда́ния Христо́ва;/ я́ко да избе́гну огня́ нестерпи́маго/ и жре́бий Небе́сный, и жи́знь непрехо́дную/ Тобо́ю восприиму́, веселя́ся всегда́.

А́ще в сре́ду и́ли в пято́к, Крестобогоро́дичен.

Подо́бен: Я́ко до́бля:

Распина́ема Христа́ Человеколю́бца ви́дящи, Пречи́стая,/ и ре́бра ископова́ема копие́м,/ пла́чущи, вопия́ше:/ что сие́, Сы́не Мой?/ что Ти безблагода́тнии лю́дие возда́ша,/ за я́же сотвори́л еси́ до́брая им?/ и тщи́шися безча́дствовати Мя, Вселюбе́знейший./ Удивля́юся, Благоутро́бне, Твоему́ во́льному распя́тию.

А́ще ли Бог Госпо́дь: Сла́ва, глас 2.

Самогла́сен:

Еде́с весели́тся,/ я́ко ра́кою святы́х обогати́ся,/ Гу́рия, Само́на и Ави́ва,/ и, христолюби́вую па́ству созыва́я, вопие́т:/ прииди́те, мучениколю́бцы,/ просвети́теся в па́мяти све́тлей;/ прииди́те у́бо, празднолю́бцы, возвесели́теся;/ прииди́те и ви́дите свети́ла Небе́сная,/ на земли́ жи́тельствовавшия;/ прииди́те и услы́шите,/ какову́ смерть го́рькую до́блии адама́нти подъя́ша,/ безконе́чныя ра́ди жи́зни./ Те́мже, пору́чницы су́ще и́стины,/ деви́цу спасо́ша, жи́ву во гроб вве́ржену,/ и тех небре́гшаго всескве́рнаго па́губе преда́ша,/ я́ко уби́йцу и неми́лостивна./ И приле́жно мо́лят Святу́ю Тро́ицу/ изба́витися от тли, и искуше́ний, и вся́ческих бед/ ве́рою творя́щим па́мять их.

И ны́не, Богоро́дичен.

На стихо́вне Окто́иха.

Сла́ва, глас 2. Самогла́сен:

Прииди́те, мучениколю́бцы вси,/ Христо́вы ору́жники пе́сньми почти́м,/ Гу́рия, и Ави́ва, и Само́на,/ я́ко пресла́вно де́йствуют чудеса́;/ кля́твы бо не презре́ша предста́вити отрокови́цу,/ но, исполня́юще проше́ние, деви́цу спасо́ша,/ пребеззако́нному го́тфину мще́ние сотвори́вше./ Тех моли́твами, Христе́ Бо́же, спаси́ ны,/ я́ко Благ и Человеколю́бец.

И ны́не, Богоро́дичен.

Тропа́рь, глас 5:

Чудеса́ святы́х Твои́х му́ченик/ сте́ну необори́му, нам дарова́вый, Христе́ Бо́же,/ тех моли́твами сове́ты язы́ков разори́,/ Це́рковь святу́ю укрепи́,/ я́ко еди́н Благ и Человеколю́бец.

НА У́ТРЕНИ

О́ба кано́на Окто́иха и святы́х кано́н на 4, его́же краегране́сие: Три, ку́пно глаго́лющия, хвалю́ прему́дренно. Творе́ние Феофа́ново. Глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Тро́ицы единонача́лие, святи́и, Богосло́вяще че́стно,/ многонача́лия нестоя́нную мглу удо́бно разруши́сте,/ восто́ка, многосве́тлии, я́коже зве́зды возсия́вше.

Трие́ испове́дницы,/ благода́тию просвеща́еми Нача́льныя Тро́ицы я́вственно,/ лесть многобо́жную, терпели́вно противле́ние явля́юще, истреби́ша.

Вас, у́бо сыноположи́в, сла́внии, любо́вию Есте́ственный Сын,/ ны́не Ему́ насле́дию, дае́му я́ве,/ я́ко Благоутро́бен снасле́дники показа́/ и Ца́рствия соприча́стники.

Богоро́дичен: Му́дрости прему́дростныя ски́ния была́ еси́, Всенепоро́чная,/ Свой бо храм от Твои́х пречи́стых крове́й, Чи́стая, созда́ти благоволи́/ на спасе́ние душ на́ших.

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Те́ло му́кам во́лею и лю́тым ра́нам/ Христо́вы преда́ша испове́дницы и уго́дницы.

Изба́витися от лю́тых грехо́вных по́мысл, святи́и,/ ва́шу па́мять ве́рою соверша́ющим умоли́те.

На дре́ве терпели́вно воздви́жени, честни́и свиде́телие/ всеблагоче́стно невре́дно испове́дание соблюдо́ша.

Богоро́дичен: Целе́ний Тя исто́чник в Твою́ утро́бу Вше́дый показа́,/ Ма́ти Бо́жия, Пречи́стая,/ мою́ у́бо ду́шу исцели́.

Седа́лен, глас 8.

Подо́бен: Прему́дрости:

Кресто́м вооружи́вшеся Христо́вым,/ в нем мучи́телей всю кре́пость му́жески низложи́сте, я́ко ве́ры побо́рницы;/ безбо́жие все и́дольское обличи́сте/ и Тро́ицу, святи́и, усе́рдно пропове́давше./ Тем досто́йно от Нея́ венцы́ побе́ды прия́сте, я́ко зако́нно пострада́вше,/ страстоте́рпцы всесла́внии,/ моли́те Христа́ Бо́га грехо́в оставле́ние пода́ти/ пра́зднующим любо́вию святу́ю па́мять ва́шу.

Сла́ва, ин, глас 8. Подо́бен то́йже:

Христу́ порабо́тавше му́ченически,/ поработи́сте лесть мучи́тельскую,/ непорабоще́нну иму́ще ду́шу и му́дрость,/ и́бо Тро́ичною ве́рою уязви́вшеся, прехва́льнии,/ многобо́жия сла́ву несла́вную обличи́сте./ Тем, я́ко зве́зды, све́тло в ми́ре блиста́нием сия́ете чуде́с, блаже́ннии./ Страстоте́рпцы всехва́льнии,/ моли́те Христа́ Бо́га грехо́в оставле́ние пода́ти/ чту́щим любо́вию святу́ю па́мять ва́шу.

И ны́не, Богоро́дичен:

Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ огнь бо всели́ся в Тя Божества́,/ и я́ко Младе́нца дои́ши Зижди́теля и Го́спода./ Тем А́нгельский и челове́ческий род досто́йно сла́вим пресвято́е Рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му Рождеству́ Твоему́.

Крестобогоро́дичен:

А́гнца, и Па́стыря, и Изба́вителя, А́гница, зря́щи на Кресте́,/ восклица́ше, пла́чущи, и, го́рько рыда́ющи, вопия́ше:/ мир у́бо ра́дуется, прие́мля Тобо́ю избавле́ние,/ утро́ба же Моя́ гори́т, зря́щи Твое́ распя́тие,/ е́же терпи́ши за милосе́рдие ми́лости,/ Долготерпели́ве Го́споди, ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственныя стра́сти Твоя́.

Песнь 4

Ирмо́с: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Тро́ицы равночи́сленнии вене́чницы/ трисия́нною свеще́ю ны́не соверша́ющия па́мять всесвяще́нную тех озаря́ют,/ всем исцеле́ния пода́юще.

С благогове́нием притеце́м к светоно́сней и светоза́рней, Богому́дрии, ра́це му́ченик,/ то́чит бо врачева́ния ве́рою зову́щим:/ сла́ва си́ле Твое́й, Го́споди.

Испове́дающе Боже́ственное строе́ние и па́че ума́ та́инство,/ Богосло́вными язы́ки все безбо́жие мучи́телей/ Боже́ственнии и всему́дрии испове́дницы попра́ша.

Богоро́дичен: Па́че ума́ родила́ еси́, о Де́во!/ и по рождестве́ яви́лася еси́, де́вствующи па́ки./ Тем немо́лчными гла́сы, ра́дуйся, Тебе́, Влады́чице,/ ве́рою несомне́нною вопие́м.

Песнь 5

Ирмо́с: Ты, Го́споди, мой свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Све́тлостию я́ве подвиго́в сия́юще,/ посрами́ша мучи́телей свире́пый нрав/ ве́ры побо́рницы.

Во вся я́вственно вселе́нныя концы́ чудеса́ му́ченик пропове́дашася/ и вся ве́рою утверди́ша.

Я́коже земля́ блага́я, благода́ти се́мена прие́мши,/ житие́м трудолю́бно бога́тство блаже́ннии соде́яша.

Богоро́дичен: Еди́н Благи́й, пучи́ною благосты́ни вся́ческая, Богома́ти, содержа́й,/ Твои́ми объя́тии держа́тися сподо́би.

Песнь 6

Ирмо́с: Пожру́ Ти, со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися,/ ра́ди ми́лости от ребр Твои́х/ исте́кшею Кро́вию.

Зако́нно, я́ко до́брии во́ини, Богому́дрии, удержа́вше вся/ и я́сно ве́ру соблю́дше,/ Боже́ственныя пра́вды прия́сте венцы́.

Пре́жде у́бо Авваку́м высо́це возвыша́ется Влады́чним повеле́нием,/ чрез вас же отрокови́ца му́чима, Богоглаго́ливии,/ к воспита́вшей возврати́ся.

Сия́ет ра́ка му́ченик чудесы́/ и ре́ки источа́ет исцеле́ний всем, приходя́щим ве́рою/ и тех терпе́нию дивя́щимся.

Богоро́дичен: Тя еди́ну посреде́ те́рния обре́т, я́ко чисте́йший крин/ и во удо́лиих цвет, о Богома́ти,/ Жени́х у́мный в Тя всели́ся.

Конда́к, глас 2.

Подо́бен: Вы́шних ища́:

С высоты́, му́дрии, благода́ть прие́мше,/ су́щим во искуше́ниих предстои́те, всехва́льнии./ Те́мже отрокови́цу, святи́и, от сме́рти го́рькия изба́висте,/ вы бо вои́стинну есте́ Еде́су сла́ва и ми́ру ра́дость.

И́кос:

Вра́жия мя рабо́ты изба́ви, Иису́се Жизнода́вче,/ Твои́х страда́лец мольба́ми умоля́емь,/ я́ко да непорабоще́нну стяжа́в от страсте́й ду́шу мою́ и те́ло,/ восхвалю́ тех скоре́йшую по́мощь,/ я́коже во гро́бе затворе́ная му́жа лука́вствием,/ и сию́ ско́ро предвари́вше, от сме́рти изба́виша, зову́щу:/ Еде́су сла́ва и ми́ру ра́дость.

Песнь 7

Ирмо́с: В пещи́ Авраа́мстии о́троцы перси́дстей/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Авраа́мския в пещи́ де́ти изба́вивый,/ Сый и стра́нную отрокови́цу лю́таго обстоя́ния спасе́/ хода́тайством ны́не святы́х уго́дник, я́ко Благоутро́бен.

Суро́вейшаго безчелове́чия му́ку да́вый,/ всех зол а́бие истя́зан уби́йца злоимени́тый/ судо́м пра́ведным Твои́м, Сло́ве Бо́жий, му́дросте и си́ла.

Укрепля́ема к вам наде́ждею, сла́внии,/ отрокови́ца, заключе́нная во гро́бе с ме́ртвыми, ча́яния не погреши́, зову́щи:/ благослове́н еси́, Го́споди Бо́же оте́ц на́ших.

Богоро́дичен: Я́ко новосмеше́ное и светоза́рное пуща́я зерца́ло,/ Зарю́ Боже́ственнаго, Де́во, сия́ния, приложи́вшуюся Тебе́, вмести́ла еси́./ Благослове́на Ты в жена́х, Всенепоро́чная Влады́чице.

Песнь 8

Ирмо́с: Ру́це распросте́р Дании́л,/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те вся дела́ Госпо́дня Го́спода.

Всеми́рный днесь нам наста́ пра́здник му́ченик Христо́вых,/ озаря́ющ благода́тию чуде́с приходя́щия ве́рою и ра́достию духо́вною/ и любо́вию зову́щия:/ благослови́те вся дела́ Госпо́дня Го́спода.

Удо́бно испове́дницы Твоего́ Божества́ все упраздни́ша безбо́жие, Влады́ко,/ мучи́телей не убоя́вшеся преще́ний злоу́мных,/ ве́рою укрепля́еми, взыва́юще:/ благослови́те вся дела́ Госпо́дня Го́спода.

Всему́дрии испове́дницы, предстоя́ще Боже́ственному повеле́нию,/ враго́в полки́ побежда́ющи, мече́м закала́еми,/ побе́ду пресла́вно я́ве и пресия́щу показа́ша,/ па́дающе бо, проти́вныя победи́ша.

Богоро́дичен: Естествы́ ви́димаго двема́, Христа́ родила́ еси,/ еди́ну нося́ща я́ве Ипоста́сь сло́жну Божества́ и челове́чества,/ сте́кшуся есте́ственному и́стинно по соедине́нию:/ тем Тя благослови́м, Мари́е Богоневе́стная.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́,/ Тем, веселя́щеся, Тя, Богоро́дице, велича́ем.

Словесе́м после́дующе Боже́ственным и Богодухновенным Христо́вым,/ испове́дницы Богосве́тлии,/ крест на ра́мена, ра́дующеся, взя́сте,/ жизноно́сным стопа́м после́дующе, достосла́внии.

Всему́ све́ту Тро́ицы с весе́лием до́блии испове́дницы вме́щшеся,/ подвиго́в че́сти воспринима́ют,/ Безпло́тных чино́в сподо́бльшеся соводворе́ния.

Ны́не не в зерца́ле зри́те блаже́нных наде́жды, испове́дницы Спа́совы;/ и́стины же па́че, всему́дрии, добро́ту зри́те,/ венцено́сцы всечестни́и.

Я́ко Пребоже́ственныя Тро́ицы я́ве равночи́сленнии я́вльшеся испове́дницы, Богоглаго́ливии,/ Тоя́ заря́ми просвеща́етеся,/ я́ко Тоя́ ра́ди пострада́вше,/ Жи́зни нетле́нныя ны́не улучи́ша.

Богоро́дичен: Пло́тию приити́ восхоте́в, украси́вый вся,/ Сло́во в Тя всели́ся, Еди́ну святе́йшу всех обре́т,/ и Богоро́дицу вои́стинну я́ви, Ма́ти Де́во.

Свети́лен:

Подо́бен: Небо звезда́ми:

И́же от гро́ба отрокови́цу изба́вльше дре́вле,/ Гу́рие, и Само́не, и Ави́ве,/ му́ченицы Христо́вы, предвари́те,/ я́ко от гро́ба прегреше́ний ны избавля́юще.

Богоро́дичен: Кре́пким Твои́м покро́вом от наве́т вра́жиих ны, Чи́стая,/ Твоя́ рабы́, сохрани́ невреди́мы,/ Тя бо стяжа́хом Еди́ну прибе́жище в беда́х.

НА ЛИТУРГИ́И

Проки́мен, глас 4: Святы́м, и́же суть на земли́ Его́: Стих: Предзре́х Го́спода пре́до мно́ю вы́ну: Апо́стол ко Ефесе́ом, зача́ло 233. Аллилу́ия, глас 4: Воззва́ша пра́веднии, и Госпо́дь услы́ша их. Стих: Мно́ги ско́рби пра́ведным: Ева́нгелие от Луки́, зача́ло 64: Прича́стен: Ра́дуйтеся, пра́веднии, о Го́споде:

* * *

Ве́стно бу́ди, я́ко а́ще случи́тся нача́ло поста́ сего́ в суббо́ту, в пято́к ве́чера, на Го́споди, воззва́х: стихи́ры святы́х на 6. А́ще ли в неде́лю, стихи́ры пре́жде Окто́иха и святы́х, 3. Сла́ва, святы́х. И ны́не, Богоро́дичен. На стихо́вне Окто́иха. Сла́ва, святы́х. И ны́не, Богоро́дичен. Ве́чер и на у́трени, на Бог Госпо́дь: тропа́рь святы́х. Сла́ва, и ны́не, Богоро́дичен.

В про́чия же дни от понеде́льника до пятка́ пое́м аллилу́ия: по́чести ра́ди нача́ла свята́го поста́.

На Го́споди, воззва́х: пое́м стихи́ры пре́жде Богоро́дицы 3 и святы́х 3. Сла́ва, и ны́не, Богоро́дичен или́ Крестобогоро́дичен. Вме́сто проки́мна пое́м аллилу́ия: на гла́с 6-й. На стихо́вне Окто́иха. Сла́ва, и ны́не, Богоро́дичен или́ Крестобогоро́дичен. На у́трени вме́сто Бог Госпо́дь: пое́м аллилу́ия: и тро́ичны; а по 6-й пе́сни конда́к святы́х.

Мученики и исповедники Гурий, Самон († 304–306) и Авив († 322).

В начале IV века в окрестностях города Эдессы (Македония) были известны своей строгой подвижнической жизнью два друга-христианина Гурий и Самон, проповедники Слова Божия. Несмотря на воздвигнутое императором Диоклитианом (284–305) гонение на христиан, они продолжали благовестие истинной веры среди язычников, обращая их ко Христу примером своей глубокодуховной и добродетельной жизни. Приходящих к ним собратий по вере Гурий и Самон назидали и укрепляли в твердом исповедании Господа Иисуса Христа. Узнав об этом, наместник Эдессы Антонин подверг их пыткам, а затем потребовал отречься от Христа и принести жертву языческому божеству Дию (Юпитеру).

«Мы никогда не откажемся от святой и непорочной нашей веры, памятуя слова Спасителя: «Всякого, кто исповедает Меня пред людьми, того исповедаю и Я пред Отцем Моим Небесным; а кто отречется от Меня пред людьми, отрекусь от того и Я пред Отцем Моим Небесным» (Мф. 10:32–33),– ответили ему святые Гурий и Самон. Антонин приказал бросить их в темницу.

В то время в Эдессу прибыл присланный императором для усиления преследований христиан правитель области Музоний. В ответ на его угрозы предать их смерти, святые Гурий и Самон сказали: «Мы более боимся вечных мучений, нежели тех, какие ты перечислил... Если внешний наш человек и тлеет, то внутренний со дня на день обновляется» (2Кор. 4:16).»

Музоний велел подвесить святых за руки, привязав к их ногам тяжелые камни. В таком положении они терпеливо висели несколько часов, после чего были заключены в темницу. В темнице святые Гурий и Самон пробыли с 1 августа по 9 ноября, мучимые голодом, жаждой и невозможностью передвигаться (ноги их были забиты в деревянные колодки). Когда святых по прошествии трех с лишним месяцев привели к правителю, они вновь непоколебимо исповедали веру Христову. Святой Гурий, уже совершенно обессилевший, едва живой, был сразу же возвращен в темницу. Святой Самон, физически более выносливый, подвергся прежней пытке: семь часов его держали подвешенным, после чего отнесли в темницу (он не мог идти и даже стоять, так как коленные суставы оказались повреждены).

15 ноября (304 или 306 г.), когда едва начинало рассветать и жители Эдессы еще спали, святые мученики Гурий и Самон были доставлены к правителю Музонию. Музоний в последний раз предложил им жизнь ценой вероотступничества.

«... Довольно для нас и минувшего времени, в которое мы насмотрелись на дневной потухающий свет; души наши желают теперь перейти к немерцаемому дню»,– ответили ему мученики.

По распоряжению Музония их отвезли далеко за город и обезглавили. Святые мощи мучеников Гурия и Самона были взяты и с честью погребены христианами.

Через несколько лет император Ликиний (307–324) вновь воздвиг гонение на христиан. В то время в Эдессе жил проповедник диакон Авив, родом из села Фелсея. Градоначальник Эдессы Лисаний, сообщив Ликинию, что диакон Авив «наполнил весь город христианским учением», получил приказ расправиться с ним. Когда воины искали святого Авива, он сам вышел к их военачальнику Феотекну и добровольно отдался в руки стражников. Приведенный к Лисанию, диакон Авив отказался поклониться языческим идолам. Его подвесили и стали строгать кожу железными когтями, после чего осудили на сожжение. К месту казни за святым Авивом следовали мать, родные и близкие. Преподав им последнее целование, святой Авив вошел в огонь и принял мученическую кончину († 322). Тело святого Авива чудесным образом осталось неопаленным. Его мученичество также совершилось 15 ноября, почему святые мощи его были взяты и погребены при гробе пострадавших прежде святых мучеников Гурия и Самона.

Впоследствии христиане возвели на этом месте церковь во имя трех святых мучеников и положили их мощи в одной гробнице. Они были прославлены чудесными знамениями и исцелениями. Особенно известно чудесное заступничество святых, оказанное благочестивой девушке Евфимии.

Некий воин-гот, оказавшийся в Эдессе во время похода, взял Евфимию в жены, дав у гробницы святых ложную клятву, что он неженат. Много страданий и унижений пришлось испытать Евфимии на родине гота, где он отдал ее в рабство своей прежней жене. Впоследствии, по молитвам Евфимии к трем святым мученикам Гурию, Самону и Авиву, она была избавлена от смерти и чудесно перенесена в Эдессу, а гот-клятвопреступник и злодей понес заслуженное возмездие. Прославляя святых мучеников в акафисте, Церковь Христова обращается к ним: «Радуйтеся, Гурие, Самоне и Авиве, честнаго брака Небеснии покровителие».

Святые мученики Гурий, Самон и Авив издавна почитались на Руси, как покровители семейной жизни, а также как обличители всякого нечестия.

Моли́тва

О преподо́бне и Богоно́сне о́тче Гу́рие!

Услы́ши ны́не нас, к тебе́ усе́рдно моля́щихся и припа́дающих зде, на земли́, соверша́ющих всечестну́ю па́мять твою́. Ты же, ду́хом на Небесе́х Пресвяте́й Тро́ице предстоя́ со А́нгелы и преподо́бных оте́ц ли́ки, моли́ся о нас, ча́дех твои́х, да изба́вимся от вся́ких скорбе́й, боле́зней, бед и обстоя́ний, и благоче́стно поживе́м в настоя́щем житии́, ходя́ще в за́поведех и оправда́ниих Госпо́дних безпоро́чно, и да яви́мся свята́го твоего́ жития́ подража́тели. Испроси́ нам же и всем, к тебе́ притека́ющим, грехо́в проще́ние, телесе́м здра́вие, жития́ исправле́ние и ве́чное спасе́ние, я́ко да, твои́м те́плым предста́тельством спаса́еми, сла́ву возсыла́ти сподо́бимся в Тро́ице сла́вимому Бо́гу на́шему – Отцу́, и Сы́ну, и Свято́му Духу, ны́не, и при́сно, и во ве́ки веко́в. Ами́нь.

Преподобный Гурий

Преподобный Гурий был первым игуменом Шалочской Богородичной пустыни, расположенной в 35-ти верстах от Устюжны. Он игуменствовал в 1603 году. (Строев, «Списки иерархов», с. 120). В «Иконописном Подлиннике» преподобный Гурий описан под 14 ноября: «подобием сед, брада, аки Никона Радонежскаго, ризы преподобническия» (Филимонов с. 39).