Мѣ́сѧца тогѡ́же во в҃-й де́нь. Ст҃а́гѡ мꙋ́ченика ма́манта:
И҆ прпⷣбнагѡ ѻ҆тца̀ на́шегѡ і҆ѡа́нна по́стника, патрїа́рха царѧ̀ гра́да.
Ве́черъ, ѻ҆бы́чнаѧ каѳі́сма. На Гдⷭ҇и, воззва́хъ: стїхи̑ры гла́съ и҃. Поⷣ: Ѽ пресла́внагѡ чꙋдесѐ!
Кро́ви твое́й ка́плющи, ꙳ жизнода́вцꙋ хрⷭ҇тꙋ̀, ꙳ кро́вь свою̀ тебє̀ ра́ди и҆злїѧ́вшемꙋ, ꙳ приве́лсѧ є҆сѝ блаже́нне, ꙳ и҆́же и҆ ѻ҆́бщника тѧ̀ сла́вы содѣ́ѧ, ꙳ и҆ ца́рства своегѡ̀ сприча́стника, ꙳ ꙗ҆́кѡ до́бльствовавша на льсти́ваго, ꙳ и҆ лю́тыѧ сегѡ̀ кѡ́зни ꙳ до конца̀ ᲂу҆гаси́вша.
Сто́лпъ благоче́стїѧ бы́лъ є҆сѝ, ꙳ ѡ҆снова́нъ тве́рдѡ на ка́мени вѣ́ры, ꙳ и҆скꙋше́ньми неги́блемь, ꙳ и҆ бѣда́ми бл҃же́нне, ꙳ со мно́гою бо бꙋ́рею и҆ волне́нїемъ, ꙳ тебѣ̀ прирази́вшыѧсѧ во́лны, твоеѧ̀ не низложи́ша неꙋкло́нныѧ крѣ́пости: ꙳ мꙋ́ченическимъ бо вѣнце́мъ꙳ ᲂу҆краси́тисѧ вожделѣ́лъ є҆сѝ.
Вопло́щшемꙋсѧ бг҃ꙋ на́шемꙋ, ꙳ и҆ стрⷭ҇тїю кре́стною низложи́вшемꙋ мꙋчи́телѧ, ꙳ живонѡ́снымъ стопа́мъ꙳ страстоте́рпче, послѣ́дꙋѧ, въ мꙋ́ченическое ра́дꙋѧсѧ вше́лъ є҆сѝ сꙋди́лище, ꙳ и҆ ра́нами протерза́емь, ꙳ хва́лѧщагосѧ погꙋби́ти мо́ре, ꙳ съ пло́тїю, мꙋ́чениче, ᲂу҆ѧзви́лъ є҆сѝ, ꙳ и҆ на зе́млю низложи́лъ є҆сѝ.
И҆́ны стїхи̑ры прпⷣбнагѡ, гла́съ и҆ подо́бенъ то́йже:
Ѻ҆́ч҃е і҆ѡа́нне всече́стне, ꙳ мїрска́гѡ ѿстꙋпи́въ мѧте́жнагѡ смѣше́нїѧ, ꙳ хрⷭ҇то́вѣ же прите́клъ є҆сѝ꙳ тишинѣ̀ всепрпⷣбне: ꙳ и҆ видѣ́нїѧ и҆ бжⷭ҇твеннагѡ дѣѧ́нїѧ꙳ всебога́тными ꙗ҆́снѡ сїѧ̑нїи꙳ и҆́стиннѡ ѡ҆богати́лсѧ є҆сѝ, ꙳ и҆ вѣ̑рнымъ пре́далъ є҆сѝ, ꙳ бг҃олѣ́пнымъ житїе́мъ ᲂу҆ѧснѧ́емь блаже́нне.
Ѻ҆́ч҃е і҆ѡа́нне всече́стне, ꙳ ты̀ ѻ҆де́ждею че́стнѡ: ꙗ҆́коже а҆арѡ́нъ вторы́й ᲂу҆кра́шенъ, ꙳ ст҃ы́хъ ст҃а̑ѧ ꙳ ны́нѣ зри́ши, ꙳ внꙋ́трь бы́въ и҆ вторы́ѧ завѣ́сы. ꙳ ѽ неизрече́ннагѡ твоегѡ̀ па́че ᲂу҆ма̀ сїѧ́нїѧ, ꙳ і҆ера́рхѡвъ бжⷭ҇твенное ᲂу҆добре́нїе, ꙳ є҆мꙋ́же прича́стилсѧ є҆сѝ.
Ѻ҆́ч҃е і҆ѡа́нне всемꙋ́дре, ꙳ бг҃ови́дѣнъ бы́въ꙳ нра́ва простото́ю, ꙳ бг҃ꙋ ны́нѣ предстои́ши, ꙳ соедине́нїемъ лꙋ́чшимъ, ꙳ и҆ непреста́ннымъ манове́нїемъ ѡ҆божа́емь, ꙳ и҆ ѿѻнꙋ́днымъ свѣ́томъ и҆сполнѧ́емь, ꙳ ᲂу҆ма̀ чистото́ю и҆ дꙋшѝ свѣ́тлостїю, ꙳ і҆ера́рхѡвъ бжⷭ҇твенное ᲂу҆краше́нїе и҆ свѧще́ннѣйшее.
Сла́ва, мꙋ́ченика, гла́съ в҃. Вѷзанті́ево:
Но́въ са́дъ ꙗ҆́коже ма́слина на бж҃їи трапе́зѣ положи́лсѧ є҆сѝ, ꙗ҆́кѡ сы́нъ ходѧ́щихъ пꙋте́мъ гдⷭ҇нимъ: мꙋче́нїѧ ра́ди благослови́ тѧ гдⷭ҇ь, и҆ зри́ши блага̑ѧ го́рнѧгѡ сїѡ́на, наслажда́ѧсѧ бжⷭ҇твеннагѡ ра́дованїѧ, съ роди́тельми вы́нꙋ, ма́манте достойнопѣ́тый: и҆̀мже ѻ҆́бщники ны̀ мольба́ми твои́ми бы́ти сотворѝ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Є҆гда̀ ѿ дре́ва:
Є҆гда̀ нескве́рнаѧ а҆́гница ви́дѣ своего̀ а҆́гнца, на заколе́нїе ꙗ҆́кѡ человѣ́ка во́лею влеко́ма, рыда́ющи глаго́лаше: безча́дствовати мѧ̀ ны́нѣ тщи́шисѧ хрⷭ҇тѐ, тебѐ ро́ждшꙋю, что̀ сїѐ сотвори́лъ є҆сѝ и҆зба́вителю всѧ́ческихъ; ѻ҆ба́че воспѣва́ю и҆ сла́влю твою̀, ю҆́же па́че ᲂу҆ма̀ и҆ сло́ва, кра́йнюю бла́гость, чл҃вѣколю́бче.
На стїхо́внѣ, ѻ҆ктѡ́иха. Сла́ва, мꙋ́ченика, гла́съ д҃:
Прїиди́те, согла́снѡ вѣ́рнїи, па́мѧть соверши́мъ ма́манта мꙋ́ченика, се́й бо но́вый а҆́вель ꙗ҆ви́сѧ на́мъ: ꙗ҆́коже бо ѻ҆́нъ па́стырь ѻ҆ве́цъ бы́въ, а҆́гнца на же́ртвꙋ пе́рвый приведѐ, и҆ вѣне́цъ страда́нїѧ пе́рвый прїѧ́тъ: та́кѡ и҆ сла́вный страстоно́сецъ питѣ́нными ста́ды преизѧ́ществовавъ, себѐ сама́го же́ртвꙋ благопрїѧ́тнꙋ хрⷭ҇тꙋ̀ приведѐ мꙋче́нїемъ: и҆ дерзнове́нїе и҆мѣ́ѧ къ немꙋ̀, ми́ръ мі́рꙋ про́ситъ, и҆ дꙋша́мъ на́шымъ ве́лїю ми́лость.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Подо́бенъ: Ꙗ҆́кѡ до́блѧ въ мꙋ́ченицѣхъ:
Распина́ема ви́дѧщи, ꙳ и҆ въ ре́бра пробода́ема копїе́мъ, пречⷭ҇таѧ, ꙳ хрⷭ҇та̀ чл҃вѣколю́бца, пла́каше вопїю́щи: что̀ сїѐ сн҃е мо́й; ꙳ что̀ тебѣ̀ неблагода́рнїи лю́дїе возда́ша, вмѣ́стѡ ꙗ҆̀же сотвори́лъ є҆сѝ дѡ́браѧ и҆̀мъ: и҆ тщи́шисѧ безча́дствовати мѧ̀ вселюбе́знѣйше; дивлю́сѧ, бл҃гоꙋтро́бне твоемꙋ̀, во́льномꙋ распѧ́тїю.
Тропа́рь мꙋ́ченика, гла́са д҃:
Мꙋ́ченикъ тво́й, гдⷭ҇и, ма́мантъ, во страда́нїи свое́мъ вѣне́цъ прїѧ́тъ нетлѣ́нный ѿ тебє̀ бг҃а на́шегѡ: и҆мѣ́ѧй бо крѣ́пость твою̀, мꙋчи́телей низложѝ, сокрꙋшѝ и҆ де́мѡнѡвъ немощны̑ѧ де́рзѡсти. тогѡ̀ моли́твами спасѝ дꙋ́шы на́шѧ.
Сла́ва, прпⷣбнагѡ, гла́съ то́йже:
Пра́вило вѣ́ры, и҆ ѻ҆́бразъ кро́тости, воздержа́нїѧ ᲂу҆чи́телѧ ꙗ҆ви́ тѧ ста́дꙋ твоемꙋ̀, ꙗ҆́же веще́й и҆́стина: сегѡ̀ ра́ди стѧжа́лъ є҆сѝ смире́нїемъ высѡ́каѧ, нището́ю бога̑таѧ, ѻ҆́ч҃е і҆ѡа́нне, молѝ хрⷭ҇та̀ бг҃а, спасти́сѧ дꙋша́мъ на́шымъ.
И҆ ны́нѣ, бг҃оро́диченъ, по гла́сꙋ: и҆лѝ крⷭ҇тобг҃оро́диченъ.
На ᲂу҆́трени канѡ́нъ ѻ҆ктѡ́иха є҆ди́нъ, со і҆рмосо́мъ на ѕ҃: и҆ ст҃ы́хъ два̀.
Канѡ́нъ мꙋ́ченика, на д҃. Творе́нїе ѳеофа́ново.
Гла́съ и҃. Пѣ́снь а҃. І҆рмо́съ:
Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ и҆ раздѣли́въ мо́ре. і҆и҃лѧ же бѣглеца̀ пѣшехо́дца спасѐ, пѣ́снь бг҃ови воспѣва́юща.
Небеса̀ ѡ҆бходѧ̀ ꙗ҆́кѡ и҆зрѧ́денъ мꙋ́ченикъ бы́въ, и҆ трисїѧ́нныѧ зарѝ, сла́вне, и҆сполнѧ́ѧсѧ, на землѝ чествꙋ́ющыѧ тво́й честны́й и҆ свѣтоно́сный де́нь сконча́нїѧ, бжⷭ҇твеннагѡ просвѣще́нїѧ сподо́би.
Благоро́дїе и҆ по всѣ́мъ соверше́нное ᲂу҆ма̀ твоегѡ̀, провѣ́дый сло́во ма́манте, ѿ пеле́нъ тѧ̀ ра́зꙋма и҆спо́лни, и҆ до́брыхъ сла́достьми многови́днѡ ᲂу҆красѝ, мꙋ́чениче страстоте́рпче всехва́льне.
Роди́телїе твоѝ непоро́чныѧ вѣ́ры предбѣ́дствꙋюще, во и҆згна́нїи пре́лести, заключа́еми въ темни́цахъ, бж҃їими велѣ́ньми, прозѧбо́ша тебѐ, разори́вшагѡ многобо́жїѧ соꙋ́зъ.
Бг҃оро́диченъ:
Пресла̑внаѧ ѡ҆ тебѣ̀ глаго́лашасѧ въ ро́дѣхъ родѡ́въ, ꙗ҆̀же бг҃а сло́ва во чре́вѣ вмѣсти́вши, чиста́ же пребыва́еши бцⷣе марі́е. тѣ́мъ тѧ̀ всѝ чествꙋ́имъ, по бз҃ѣ преста́тельство на́ше.
И҆́нъ канѡ́нъ прпⷣбнагѡ і҆ѡа́нна на д҃. Творе́нїе ге́рманово.
Гла́съ то́йже. Пѣ́снь а҃. І҆рмо́съ:
И҆стрѧ́сшемꙋ въ мо́ри мꙋчи́тельство фараѡ́не, и҆ і҆и҃лѧ сꙋ́шею наста́вльшемꙋ пои́мъ хрⷭ҇тꙋ̀, ꙗ҆́кѡ просла́висѧ во вѣ́ки.
Возсїѧ́вшемꙋ въ мі́рѣ і҆ера́рха мꙋ́драгѡ, ца́рствїѧ сїѧ́ющаго велѣ̑нїи, воспои́мъ хрⷭ҇тꙋ̀, ꙗ҆́кѡ просла́висѧ во вѣ́ки.
Просїѧ́вшаго въ мі́рѣ благоче́стїѧ свѣ́томъ, и҆ нече́стїѧ мглꙋ̀ ѿгна́вшаго почти́мъ вѣ́рнїи, ꙗ҆́кѡ і҆ера́рха вели́каго і҆ѡа́нна.
Ꙗ҆́кѡ предстоѧ̀ со а҆́гг҃лы непристꙋ́пномꙋ цр҃ю̀, соверша́ющымъ твою̀ па́мѧть молѝ дарова́тисѧ ѡ҆чище́нїю, свѧщеннопроповѣ́дниче всеблаже́нне і҆ѡа́нне.
Бг҃оро́диченъ:
Ꙗ҆́кѡ заче́нши превѣ́чное безнача́льное сло́во ѻ҆́ч҃ее, и҆ пло́тїю ро́ждши па́че сло́ва всепѣ́таѧ, молѝ прилѣ́жнѡ, є҆́же и҆зба́витисѧ на́мъ ѿ бѣ́дъ.
Пѣ́снь г҃. І҆рмо́съ:
Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Ꙗ҆́кѡ свѣтоза́рнꙋ ѕвѣздꙋ̀, страстоте́рпца ма́манта положѝ хрⷭ҇то́съ на высотѣ̀ цр҃кве своеѧ̀, страда́нїй свѣ́тлостьми, и҆ пресла́вныхъ чꙋде́съ, всю̀ подсо́лнечнꙋю просвѣща́юща.
Возше́дъ на го́рꙋ и҆́стиннагѡ зна́нїѧ, и҆ ѡ҆блиста́всѧ видѣ̑нїи ᲂу҆ма̀ чистото́ю, є҆стество̀ безслове́сное, къ слове́сномꙋ пѣснопѣ́нїю, бжⷭ҇твенными повелѣ̑нїи, блаже́нне, воздви́глъ є҆сѝ.
Ю҆́ноша красе́нъ добро́тою бы́лъ є҆сѝ. тѣ́мъ беззако́ннѡ и҆́щꙋщымъ ꙗ҆́ти тѧ̀, ꙗ҆ви́лсѧ є҆сѝ непристꙋ́пенъ, прише́дшемꙋ на стрⷭ҇ть, ꙗ҆́кѡ всѣ́хъ гдⷭ҇ꙋ приведе́сѧ.
Бг҃оро́диченъ:
Не́бо простры́й, и҆ земны́й, пречⷭ҇таѧ, крꙋ́гъ содержа́й ве́сь, є҆стество́мъ бжⷭ҇тва̀, на ѡ҆б̾ѧ́тїихъ твои́хъ пло́тїю держи́мь бы́сть, и҆ вѣ̑рнымъ тѧ̀ ᲂу҆твержде́нїе всѣ̑мъ показа̀.
И҆́нъ. І҆рмо́съ:
Оу҆тверже́й сло́вомъ небеса̀, и҆ зе́млю ѡ҆снова́вый на вода́хъ мно́гихъ: ᲂу҆твердѝ мѧ̀ къ пѣ́нїю славосло́вїѧ твоегѡ̀, гдⷭ҇и.
Воздержа́нїемъ ѻ҆́ч҃е, и҆ моли́твою неꙋкло́нною, возше́лъ є҆сѝ къ вы́шнемꙋ гра́дꙋ добродѣ́телей, бг҃оно́се, и҆дѣ́же сла́дости пото́къ, пита́ешисѧ.
Ꙗ҆́кѡ дерзнове́нїе и҆мѣ́ѧ къ бг҃ꙋ, і҆ера́рше прпⷣбне і҆ѡа́нне мꙋ́дре, молѝ спасти́сѧ вѣ́рою соверша́ющымъ па́мѧть твою̀.
Ꙗ҆́кѡ благочести́выхъ догма́тѡвъ наста́вникъ, и҆ мꙋ́дрыхъ слове́съ сказа́тель и҆́стиненъ, вѣнце́мъ ᲂу҆вѧ́злсѧ є҆сѝ на є҆́рєси, прпⷣбне.
Бг҃оро́диченъ:
Ꙗ҆́кѡ не́бо и҆ престо́лъ тѧ̀ бж҃їй, воспѣва́емъ всѝ, бг҃ороди́тельнице чⷭ҇таѧ, ꙗ҆́кѡ и҆зъ тебє̀ ꙗ҆ви́сѧ і҆и҃съ хрⷭ҇то́съ и҆́стина.
Сѣда́ленъ мꙋ́ченика, гла́съ и҃. Подо́бенъ: Премꙋ́дрости:
Благоче́стїѧ сы́й рожде́нїе че́стно, нече́стїѧ показа́лсѧ є҆сѝ потреби́тель, ма́манте всехва́льне, си́лою дх҃а: въ три́знищи бо ле́сть і҆́дѡльскꙋю ѡ҆бличи́лъ є҆сѝ, и҆ бл҃годе́рзостпѡ трⷪ҇цꙋ пѣ́ти проповѣ́далъ є҆сѝ. тѣ́мже и҆ ѕвѣрє́мъ вда́нъ бы́въ страстоно́сче, ѕвѣ́рѧ ᲂу҆мори́лъ є҆сѝ, и҆ ѕлонача́льнаго ѕмі́ѧ. сегѡ̀ ра́ди вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти, чествꙋ́ющымъ любо́вїю свѧтꙋ́ю па́мѧть твою̀.
Сла́ва, прпⷣбнагѡ, гла́съ г҃. Подо́бенъ: Бжⷭ҇твенныѧ вѣ́ры:
Сосꙋ́дъ бжⷭ҇твенный воздержа́нїѧ, бога́тство некра́домо благоче́стїѧ показа́лсѧ є҆сѝ, і҆ѡа́нне блаже́нне, въ безстра́стїи ᲂу҆ѧсни́въ житїѐ твоѐ: тре́бꙋющыѧ ѡ҆богати́въ ми́лостынею ѻ҆́ч҃е прпⷣбне, хрⷭ҇та̀ бг҃а молѝ, дарова́ти на́мъ ве́лїю ми́лость.
И҆ ны́нѣ, бг҃оро́диченъ:
Бжⷭ҇твеннаѧ ски́нїа была̀ є҆сѝ сло́ва, є҆ди́на пречⷭ҇таѧ дв҃ома́ти, чистото́ю а҆́гг҃лы превозше́дшаѧ, па́че всѣ́хъ менѐ пе́рсть бы́вша, ѡ҆скве́рнена плотски́ми прегрѣше́ньми, ѡ҆чи́сти моли́твъ твои́хъ бжⷭ҇твенными вода́ми, подаю́щи чⷭ҇таѧ, ве́лїю ми́лость.
Крⷭ҇тобг҃оро́диченъ:
Нескве́рнаѧ а҆́гница сло́ва, нетлѣ́ннаѧ дв҃ома́ти, на крⷭ҇тѣ̀ зрѧ́щи повѣ́шена, и҆зъ неѧ̀ безболѣ́зненнѡ прозѧ́бшаго, мт҃ролѣ́пнѡ рыда́ющи взыва́ше: ᲂу҆вы̀ ча́до моѐ, ка́кѡ стра́ждеши, хотѧ̀ и҆зба́вити ѿ страсте́й безче́стїѧ человѣ́ка;
Пѣ́снь д҃. І҆рмо́съ:
Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.
Самово́льнѣ къ подвигѡ́мъ ѿлꙋчи́лсѧ є҆сѝ, неꙋжа́снѡ сла́вне мꙋ́дростїю: хрⷭ҇та́ бо и҆мѣ́лъ є҆сѝ помога́юща бжⷭ҇твенною си́лою, не́мощь твою̀ ᲂу҆твержда́юща, и҆ свидѣ́телѧ показꙋ́юща свои́хъ страда́нїй, и҆ вы́шнѣй свѣ́тлости прича́стника.
Ꙗ҆́кѡ помо́щникъ и҆́же ѿ бг҃а спꙋ́тникъ тво́й, покарѧ́шесѧ ꙗ҆́коже слове́снѣйшїй ди́вїй ѕвѣ́рь: бжⷭ҇твенною бо любо́вїю ты̀ покори́лъ є҆сѝ стра̑сти безслове́снѣйшыѧ, красе́нъ ꙗ҆ви́лсѧ є҆сѝ по́мысломъ мꙋдрѣ́йшимъ, безслове́сїе врагѡ́въ побѣ́ждь.
Предъ сꙋди́лище мꙋчи́телей ты̀ предста́лъ є҆сѝ, сло́ва воплоще́нїе, блаже́нне, проѧвле́ннѡ возглаша́ѧ, и҆ безбо́жїѧ низлага́ѧ свирѣ́пство, и҆ всѧ̑ несомнѣ́ннѡ пѣ́ти наꙋча́ѧ: си́лѣ твое́й сла́ва чл҃вѣколю́бче.
Бг҃оро́диченъ:
Рожде́нїемъ преесте́ственнымъ ржⷭ҇тва̀ твоегѡ̀, болѣ́зней грѣ́хъ разрѣши́сѧ, и҆ ѿ клѧ́твы земноро́дныхъ є҆стество̀ и҆змѣни́сѧ, бг҃ороди́тельнице всенепоро́чнаѧ, и҆ ѿверзо́шасѧ дѡ́льнымъ тебє̀ ра́ди гѡ́рнѧѧ, и҆ со а҆́гг҃лы человѣ́цы ликꙋ́ютъ.
И҆́нъ. І҆рмо́съ:
Та́йнѡ прⷪ҇ро́къ предзрѧ̀, ѿ дв҃ы тѧ̀, сло́ве, воплоща́ема, пѣ́сненнѡ вопїѧ́ше: сла́ва си́лѣ твое́й, гдⷭ҇и.
І҆ера́рха всѝ мꙋ́драго, въ пѣ́снехъ восхва́лимъ глаго́люще: бг҃оно́се і҆ѡа́нне, моли́сѧ гдⷭ҇ꙋ прилѣ́жнѡ, спасти́сѧ на́мъ.
Ꙗ҆́кѡ благочести́выхъ догма́тѡвъ насади́тесѧ, и҆ мꙋ́дра і҆ера́рха тѧ̀ и҆мꙋ́ще, бг҃облаже́нне ѻ҆́ч҃е, пѣ́сньми и҆ пѣ́ньми восхвалѧ́емъ тѧ̀.
Свѧще́ннꙋю твою̀ па́мѧть вѣ́рнїи, первонача́льниче пита́телю сла́вне, і҆ера́рше гдⷭ҇ень, пѣ́ньми и҆ пѣ́сньми пра́зднꙋемъ.
Бг҃оро́диченъ:
Безневѣ́стнаѧ невѣ́сто, и҆ чⷭ҇таѧ и҆ нескве́рнаѧ мт҃и хрⷭ҇та̀ бг҃а, того̀ непреста́ннѡ молѝ, спастѝ дꙋ́шы пою́щихъ тѧ̀.
Пѣ́снь є҃. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Стрꙋ́жемь, ника́коже ѡ҆ тѣлесѝ сла́вный ма́мантъ попече́сѧ, тлѣ́нїѧ дебельство̀ растерза́тисѧ ѿложи́въ, и҆ кѡ́жныѧ совле́къ ри̑зы, и҆ ѻ҆де́ждꙋ нетлѣ́нїѧ прїе́мъ.
Благода́рственнꙋю хвалꙋ̀ пѣ́лъ є҆сѝ зижди́телю твоемꙋ̀, и҆скопова́емь въ ре́бра, всеблаже́нне, и҆ гла́съ съ небесѐ ᲂу҆слы́шалъ є҆сѝ, ᲂу҆твержда́ющь па́че по́мыслъ тво́й къ лꙋ́чшемꙋ, и҆ страда́нїй болѣ́знь ѡ҆блегча́ющь.
Въ темни́цѣ заключе́нꙋ ꙗ҆ви́сѧ съ нб҃сѐ тебѣ̀ носѧ́щи пресла́вно видѣ́нїе, страстоте́рпче всебл҃же́нне многострада́льне, пи́щꙋ нетлѣ́нїѧ, голꙋби́ца краснѣ́йша: тлѣ́нїѧ бо предѣ́лы преминꙋ́лъ є҆сѝ.
Бг҃оро́диченъ:
Воплоще́нїѧ бжⷭ҇твеннагѡ, и҆ премѣне́нїѧ несказа́ннагѡ ты̀ была̀ є҆сѝ хода́таица, ꙗ҆́же пре́жде со́лнца и҆зъ ѻ҆ц҃а̀ (с. 43) рожде́ннаго ро́ждши: тобо́ю бо є҆стество̀ земны́хъ бг҃ꙋ совокꙋпи́сѧ, и҆ на прⷭ҇то́лѣ сла́вы посади́сѧ.
И҆́нъ. І҆рмо́съ:
Ѿ но́щи невѣ́дѣнїѧ, бг҃овѣ́дѣнїемъ просвѣти́вый концы̀, просвѣти́ мѧ ᲂу҆́тромъ чл҃вѣколю́бїѧ твоегѡ̀, гдⷭ҇и.
Па́стырски пома́залсѧ є҆сѝ благоче́стїѧ мѵ́ромъ, бг҃омꙋ́дре: тѣ́мъ ꙗ҆́кѡ і҆ера́рха всѝ восхвалѧ́емъ тѧ̀, прпⷣбне.
Ꙗ҆́кѡ подража́тель сы́й а҆пⷭ҇лѡвъ, бг҃омꙋ́дре сла́вне, болѣ́зньми и҆ бдѣ̑нїи, цр҃кѡ́внымъ предста́тельствовалъ є҆сѝ лю́демъ.
Ревни́телю и҆лїѝ, и҆ мѡѷсе́ю бг҃ови́дцꙋ поревнова́лъ є҆сѝ, ѻ҆́ч҃е свѧщенноѧвле́нне, и҆ є҆ресенача́льники посрами́лъ є҆сѝ.
Бг҃оро́диченъ:
Ꙗ҆́кѡ цр҃и́цꙋ всѝ, и҆ цр҃ѧ̀ всѣ́хъ ро́ждшꙋю, прїиди́те со а҆́гг҃ломъ бл҃гослове́ннꙋю почти́мъ.
Пѣ́снь ѕ҃. І҆рмо́съ:
Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.
Ре́вностїю къ бг҃ꙋ распала́емь свѧще́ннѣйше, ѡ҆ поджига́ющемъ пла́мени ника́коже попе́клсѧ є҆сѝ, бжⷭ҇твеннымъ ѡ҆роша́емь съ небесѐ дожде́мъ, страда́льче до́блественнѣйше.
Ю҆́ношамъ трїе́мъ претвори́вый пе́щь въ ро́сꙋ свѣтоѧвле́ннѡ, бг҃омꙋ́дре всебл҃же́нне, ѿ пла́мене и҆схити́ тѧ, и҆ ѻ҆гнѧ̀ показа̀ пресла́внѡ си́льнѣйша.
Велича́йшыѧ претерпѣва́ѧ по́двиги, ꙗ҆ви́лсѧ є҆сѝ превелича́йшъ, въ страда́льцѣхъ чꙋ́денъ, въ мꙋ́ченицѣхъ же и҆скꙋ́сенъ. тѣ́мъ и҆ велича́йшихъ тѧ̀ подвигополо́жникъ воздаѧ́нїй сподо́би.
Бг҃оро́диченъ:
Бы́хомъ ѻ҆́бщницы бжⷭ҇твенномꙋ є҆стествꙋ̀, пречⷭ҇таѧ, бжⷭ҇твеннымъ ржⷭ҇тво́мъ твои́мъ: и҆ поко́й нбⷭ҇ный, со а҆́гг҃льскими чи́нми тѧ̀ восхвалѧ́ющїй, во хрⷭ҇тѣ̀ наслѣ́дствовахомъ.
И҆́нъ. І҆рмо́съ:
Ꙗ҆́коже прⷪ҇ро́ка и҆зба́вилъ є҆сѝ и҆зъ глꙋбины̀ преиспо́днїѧ, хрⷭ҇тѐ бж҃е, и҆ менѐ ѿ грѣхѡ́въ мои́хъ и҆зба́ви ꙗ҆́кѡ чл҃вѣколю́бецъ, и҆ ᲂу҆пра́ви живо́тъ мо́й, молю́сѧ.
Цр҃ко́внꙋю сла́вꙋ ᲂу҆краси́лъ є҆сѝ і҆ѡа́нне бл҃же́нне, бжⷭ҇твенными твои́ми дѡгма́ты и҆ мꙋ́дрыми наказа̑нїи, є҆́рєси же и҆счезнове́ны сотвори́лъ є҆сѝ.
Ꙗ҆́кѡ свѣти́льникъ благоче́стїѧ, догма́тѡвъ твои́хъ добро́тою ѡ҆блиста́лъ є҆сѝ по все́й тва́ри, бг҃омꙋ́дре ᲂу҆чи́телю, и҆ помрачи́лъ є҆сѝ є҆́рєси сло́вомъ бж҃їимъ.
Вмѣ́стѡ меча̀ ѧ҆зы́комъ и҆ сло́вомъ воѡрꙋжи́всѧ, прпⷣбне, лжи́ваѧ ѿсѣ́клъ є҆сѝ ᲂу҆чє́нїѧ всѧ̑, и҆ ᲂу҆ѧсни́лъ є҆сѝ всѣ̑мъ трⷪ҇цꙋ ꙗ҆́вѣ.
Бг҃оро́диченъ:
Рожде́йсѧ и҆зъ дв҃ы и҆ мі́ръ просвѣще́й, хрⷭ҇тѐ бж҃е, и҆ менѐ ѿ прегрѣше́нїй мои́хъ и҆зба́ви ꙗ҆́кѡ чл҃вѣколю́бецъ, и҆ ᲂу҆пра́ви жи́знь мою̀, молю́сѧ.
Конда́къ, гла́съ г҃. Подо́бенъ: Дв҃а дне́сь:
Жезло́мъ, свѧ́те, ѿ бг҃а тебѣ̀ да́ннымъ, лю́ди твоѧ̑ ᲂу҆пасѝ, на па́житехъ живоно́сныхъ: ѕвѣ́ри же неви̑димыѧ и҆ неꙋкроти̑мыѧ сокрꙋшѝ подъ но́ги тѧ̀ пою́щихъ: ꙗ҆́кѡ всѝ, и҆́же въ бѣда́хъ, предста́телѧ тѧ̀ те́пла, ма́манте, и҆́мꙋтъ.
І҆́косъ:
И҆́же по все́й землѝ пресла́внаго тѧ̀ мч҃ника, и҆ на нб҃сѣ́хъ со а҆́гг҃лы ликꙋ́юща, воспои́мъ, ма́манте, пе́рвѣе є҆лє́ни въ пꙋсты́нѧхъ ꙗ҆́вѣ доѧ́ща, и҆ ны́нѣ бога̑тныѧ лю́ди гдⷭ҇нѧ, жезло́мъ си́лы ꙗ҆́кѡ па́стырѧ добра̀ пасꙋ́ща, и҆ пꙋтеводѧ́ща на мѣ́сто ѕла́чно, и҆дѣ́же є҆́сть и҆́стиннѡ ра́йскаѧ сла́дость. тоѧ́ бо ра́ди мі́ръ ѡ҆ста́вилъ є҆сѝ, ꙗ҆́кѡ да вси́ тѧ предста́телѧ, ма́манте, те́пла и҆́мꙋтъ.
Пѣ́снь з҃. І҆рмо́съ:
Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀: сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.
Пе́щи ви́дъ, ꙗ҆́коже хла́да потре́бное тебѣ̀ и҆спо́лни: на дни̑ бо мнѡ́гїѧ въ то́й, ма́манте, затворе́нъ, не ѡ҆пали́лсѧ є҆сѝ, вопїѧ̀ сотво́ршемꙋ: бл҃гослове́нъ бг҃ъ ѻ҆тє́цъ на́шихъ.
А҆́гг҃лы спрїе́мники, слико́вники тебѣ̀, и҆ ѻ҆́бщники неизгл҃го́ланныхъ пѣ́сней, посредѣ̀ пла́мене, мꙋ́чениче, и҆мѣ́лъ є҆сѝ. съ ни́миже всѣ́хъ влⷣцѣ взыва́лъ є҆сѝ: бл҃гослове́нъ бг҃ъ ѻ҆тє́цъ на́шихъ.
Ꙗ҆́кѡ ши́покъ неꙋвѧда́емь, ꙗ҆́кѡ ѿ черто́га жени́хъ и҆сходѧ̀ краснѣ́йшїй и҆́стиннѡ, ѿ пе́щи попали́въ безꙋ̑мныѧ, и҆ зрѧ́щыѧ просвѣти́въ зовꙋ́щыѧ: бл҃гослове́нъ бг҃ъ ѻ҆тє́цъ на́шихъ.
Бг҃оро́диченъ:
Сѐ ны́нѣ и҆спо́лнисѧ бг҃оглаго́ливагѡ прорече́нїе: во ᲂу҆тро́бѣ бо, дв҃о, бг҃а сло́ва и҆мѣ́ла є҆сѝ, и҆ родила̀ є҆сѝ жизнода́вца. є҆мꙋ́же всѝ зове́мъ: бл҃гослове́нъ бг҃ъ ѻ҆тє́цъ на́шихъ.
И҆́нъ. І҆рмо́съ:
Въ нача́лѣ зе́млю ѡ҆снова́вый, и҆ небеса̀ сло́вомъ ᲂу҆тверди́вый, бл҃гослове́нъ є҆сѝ во вѣ́ки, гдⷭ҇и, бж҃е ѻ҆тє́цъ на́шихъ.
И҆́же на землѝ свѣти́льника показа́вый, благочести́ваго и҆ мꙋ́драго і҆ера́рха, бл҃гослове́нъ є҆сѝ во вѣ́ки, гдⷭ҇и бж҃е ѻ҆тє́цъ на́шихъ.
И҆́стиннаго і҆ѡа́нна вели́каго па́ствѣ твое́й па́стырѧ показа́вый, бл҃гослове́нъ є҆сѝ во вѣ́ки, гдⷭ҇и бж҃е ѻ҆тє́цъ на́шихъ.
Плотска̑ѧ привоста̑нїѧ, ѻ҆́ч҃е, низложи́въ, хрⷭ҇тꙋ̀ вопїѧ́лъ є҆сѝ: бл҃гослове́нъ є҆сѝ во вѣ́ки, гдⷭ҇и бж҃е ѻ҆тє́цъ на́шихъ.
Бг҃оро́диченъ:
На́съ ра́ди роди́выйсѧ и҆зъ дв҃ы, и҆ ѿ врага̀ и҆зба́вивый мі́ръ, бл҃гослове́нъ є҆сѝ во вѣ́ки, гдⷭ҇и бж҃е ѻ҆тє́цъ на́шихъ.
Пѣ́снь и҃. І҆рмо́съ:
Седмери́цею пе́щь халде́йскїй мꙋчи́тель, бг҃очести̑вымъ неи́стовнѡ разжжѐ, си́лою же лꙋ́чшею, спасе́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы благослови́те, свѧще́нницы воспо́йте, лю́дїе превозноси́те во всѧ̑ вѣ́ки.
Ꙗ҆́кѡ данїи́лъ зїѧ̑нїѧ ѕвѣре́й заꙋсти́лъ є҆сѝ, бжⷭ҇твеннымъ влⷣки призва́нїемъ, сла́вне, ѕмі́ѧ ᲂу҆мертви́лъ є҆сѝ, ѕлочести̑выѧ посрами́лъ є҆сѝ, и҆ ꙗ҆́кѡ побѣди́тель на нб҃сѣ́хъ поѧ̀, живе́ши въ весе́лїи: свѧще́нницы, бл҃гослови́те, лю́дїе, превозноси́те во всѧ̑ вѣ́ки.
Побива́хꙋ ка́менїемъ тѧ̀, бл҃же́нне, ка́менїю слꙋжа́щїи, и҆ ѡ҆камене́ннїи дꙋше́ю пребеззако́ннїи, ѻ҆́ко воздвиза́юща свѧще́нныѧ, твоеѧ̀ мч҃ниче, дꙋшѝ, къ неразсѣ́дномꙋ и҆ неꙋкло́нномꙋ ка́меню, и҆ пою́ща ᲂу҆се́рднѡ: свѧще́нницы, благослови́те, лю́дїе, превозноси́те во всѧ̑ вѣ́ки.
Подвигополо́жникъ свы́ше тебѣ̀ простира́ѧ вѣне́цъ ꙗ҆́коже побѣди́телю, и҆ до́брый проше́дшꙋ по́двигъ пребога́те, возглаша́етъ тебѣ̀ є҆́же къ немꙋ̀ спѣши́ти, честно́е и҆ сладча́йшее ше́ствїе, ᲂу҆се́рднѡ пою́щꙋ: свѧще́нницы бл҃гослови́те, лю́дїе превозноси́те во всѧ̑ вѣ́ки.
Бг҃оро́диченъ:
Преесте́ственнѡ зачала̀ є҆сѝ сꙋ́щаго и҆зъ ѻ҆ц҃а̀ безъ ма́тере, пребы́вши дв҃а и҆ по ржⷭ҇твѣ̀ чⷭ҇таѧ: бж҃їе бо соедине́нїе ѡ҆бновлѧ́етъ є҆стєства̀ въ тебѣ̀, и҆ ѡ҆бновлѧ́ютсѧ сꙋщества̀ предѣ́лы. тѣ́мъ тѧ̀ правосла́внѡ ꙗ҆́кѡ бг҃а ро́ждшꙋю и҆́стиннѡ бцⷣꙋ пое́мъ во вѣ́ки.
И҆́нъ. І҆рмо́съ:
На горѣ̀ ст҃ѣ́й просла́вльшасѧ, и҆ въ кꙋпинѣ̀ ѻ҆гне́мъ приснодв҃ы мѡѷсе́ови та́йнꙋ ꙗ҆́вльшаго, гдⷭ҇а по́йте, и҆ превозноси́те во всѧ̑ вѣ́ки.
Мѡѷсе́ю подо́бѧсѧ, треблаже́нне, на го́рꙋ возше́лъ є҆сѝ и҆ во мра́къ мы́сленный, бл҃года́ти прїе́мъ зако́нъ, і҆ера́рше: тѣ́мъ воспѣва́емъ хрⷭ҇та̀ во вѣ́ки.
Лю́ди твоѧ̑ ᲂу҆па́съ, і҆ера́рше, є҆гѵ́петскꙋю пре́лесть ѿрази́лъ є҆сѝ, и҆ вавѷлѡ́на страсте́й ᲂу҆бѣжа́въ, сїѡ́нъ го́рншїй ѡ҆брѣ́лъ є҆сѝ жили́ще во всѧ̑ вѣ́ки.
Ꙗ҆́кѡ мѵ́ромъ пома́завсѧ, свѧщенноѧвле́нне, сло́вомъ и҆ дѣ́ломъ благоче́стїѧ, свѧщеннодѣ́йствꙋеши бжⷭ҇твєннаѧ, свѧще́ннѣйше. тѣ́мъ трⷪ҇цꙋ во є҆ди́номъ сꙋществѣ̀ пое́ши во всѧ̑ вѣ́ки.
Бг҃оро́диченъ:
Въ ложесна̀ всели́вшагосѧ дв҃ы, и҆ сеѧ̀ ра́ди ᲂу҆жа́снѡ и҆ па́че сло́ва, ве́тхаго а҆да́ма ѡ҆бнови́вша, гдⷭ҇а по́йте, и҆ превозноси́те во всѧ̑ вѣ́ки.
Пѣ́снь ѳ҃. І҆рмо́съ:
Оу҆жасе́сѧ ѡ҆ се́мъ не́бо, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ а҆́гг҃лѡвъ и҆ человѣ̑къ чинонача̑лїѧ велича́ютъ.
Возложи́лъ є҆сѝ дꙋ́шꙋ твою̀ и҆зба́вителю, и҆ къ семꙋ̀ ᲂу҆се́рднѡ восте́клъ є҆сѝ, добро́тами ᲂу҆кра́шенъ свѣ́тлѡ свѧще́нныхъ подвигѡ́въ твои́хъ, и҆ боре́нїй чꙋ́дныхъ, всехва́льне ѻ҆рꙋ́жниче, свѣти́ло вселе́нныѧ, церко́вное ᲂу҆добре́нїе.
Совокꙋпи́лсѧ є҆сѝ со а҆́гг҃лы, а҆́гг҃льское на землѝ жи́тельство стѧжа́въ, и҆ съ ни́ми пое́ши во хвале́нїи ра́достнѡ свѧще́нное пѣснопѣ́нїе, ма́манте, трⷪ҇цѣ всехва́льнѡ, ѡ҆божа́емь бжⷭ҇твенными прича̑стїи, и҆ сла́вою непрее́мною ѡ҆богаща́емь.
Ꙗ҆́кѡ и҆мѣ́ѧ дерзнове́нїе къ бг҃ꙋ, бжⷭ҇твенное твоѐ сїѐ торжество̀ ра́достнѡ, мч҃ниче, соверша́ющыѧ, и҆ честно́е и҆ свѧще́нное твоѐ страда́нїе вѣ́рою чи́стою хва́лѧщыѧ помина́й, всебл҃же́нне, и҆ бꙋ́ри и҆ бѣ́дъ и҆ напа́стей ны̀ спасѝ.
Бг҃оро́диченъ:
Неискꙋсомꙋ́жнꙋю ма́терь сꙋ́щихъ на землѝ, ѻ҆троча̀ ражда́ющꙋ, кто̀ слы́ша когда̀, и҆ рожде́нное, безнача́льна бг҃а же и҆ соесте́ственна, ѻ҆ц҃ꙋ̀ пребезнача́льномꙋ же и҆ ро́ждшей преесте́ственнѡ; ѽ стра́ннагѡ та́инства! ѽ бжⷭ҇твеннагѡ ѻ҆бще́нїѧ, и҆́мже бг҃ꙋ соедини́хомсѧ!
И҆́нъ. І҆рмо́съ:
Проѧвле́нное на горѣ̀ законополо́жникꙋ во ѻ҆гнѝ и҆ кꙋпинѣ̀ ржⷭ҇тво̀ приснодв҃ы, въ на́ше вѣ́рныхъ спасе́нїе, пѣ́сньми немо́лчными велича́емъ.
Безстра́стїемъ и҆ вѣ́рою, наде́ждею и҆ любо́вїю, словеса̀ на́мъ жи́зни вѣ́чныѧ показа́въ, мꙋ́дре і҆ѡа́нне, молѝ спасти́сѧ дꙋша́мъ на́шымъ.
Жезло́мъ дх҃а ст҃а́гѡ, лю́ди ꙗ҆́кѡ ᲂу҆па́сша честны́ѧ цр҃кве, и҆ ѿгна́вша бг҃обѡ́рныѧ є҆́рєси, всѝ і҆ера́рха восхвалѧ́емъ тѧ̀.
Ꙗ҆́кѡ церко́внаго свѣти́льника и҆ і҆ера́рха, во ѱалмѣ́хъ и҆ пѣ́нїихъ чествꙋ́емъ тѧ̀ немо́лчнѡ, и҆ ра́кꙋ моще́й твои́хъ бл҃же́нне ѻ҆́ч҃е і҆ѡа́нне великоимени́те.
Бг҃оро́диченъ:
Ра́дꙋйсѧ присноживо́тный и҆сто́чниче нетлѣ́нїѧ: ра́дꙋйсѧ всесвѣ́тлый сл҃нца мы́сленнагѡ ѻ҆́блаче: ра́дꙋйсѧ носи́ло бжⷭ҇тва̀ всегѡ̀: ра́дꙋйсѧ ковче́же свѧще́нїѧ.
Свѣти́ленъ. ѻ҆ктѡ́иха. Сла́ва, мꙋ́ченика. Подо́бенъ: Оу҆ченикѡ́мъ:
Млеко́мъ воспита́лсѧ є҆сѝ є҆ле́ней, въ гора́хъ живы́й, мꙋ́чениче ма́манте: но ꙗ҆ви́лсѧ є҆сѝ па́ки на три́знищи страда́въ ᲂу҆се́рднѣйше, и҆ побѣ́ды взе́мъ вѣне́цъ, ко гдⷭ҇ꙋ ѿше́лъ є҆сѝ.
Бг҃оро́диченъ:
И҆́же жи́зни бжⷭ҇твеннѣй и҆ блаже́ннѣй, позави́дѣвъ мѝ дре́вле въ раѝ вра́гъ льсти́вѣйшїй, и҆ вселꙋка́вый, и҆ є҆де́ма и҆згна́на сотвори́ мѧ, ᲂу҆мерщвлѧ́етсѧ твои́мъ ржⷭ҇тво́мъ, дв҃о.
На лїтꙋргі́и: Прокі́менъ, гла́съ з҃: Возвесели́тсѧ првⷣникъ ѡ҆ гдⷭ҇ѣ, и҆ ᲂу҆пова́етъ на него̀. Сті́хъ: Оу҆слы́ши, бж҃е, гла́съ мо́й: А҆пⷭ҇лъ къ ри́млѧнѡмъ, зача́ло ч҃ѳ. А҆ллилꙋ́їа, гла́съ д҃: Првⷣникъ ꙗ҆́кѡ фі́нїѯъ процвѣте́тъ: Є҆ѵⷢ҇лїе і҆ѡа́нна, зача́ло н҃. Прича́стенъ: Ра́дꙋйтесѧ: