Въ а҃-й де́нь: Нача́ло і҆нді́кта, си́рѣчь но́вагѡ лѣ́та: И҆ па́мѧть прпⷣбнагѡ ѻ҆тца̀ на́шегѡ сѷмеѡ́на сто́лпника и҆ а҆рхїмандрі́та: И҆ ма́тере є҆гѡ̀ ма́рѳы:

И҆ собо́ръ прест҃ы́ѧ бцⷣы, и҆́же въ мїасі́нѣхъ:

И҆ ст҃а́гѡ мч҃ника а҆їѳала̀: И҆ ст҃ы́хъ мч҃ницъ м҃ же́нъ:

И҆ ст҃а́гѡ а҆ммꙋ́на дїа́кона, и҆ ᲂу҆чи́телѧ и҆́хъ: И҆ ст҃ы́хъ мꙋ́чєникъ каллі́сты, є҆ѵо́да и҆ є҆рмоге́на, самобра́тїй:

И҆ па́мѧть пра́веднагѡ і҆и҃сꙋ́са, сы́на наѵи́на:

Ве́черъ, Блаже́нъ мꙋ́жъ, а҃ а҆нтїфѡ́нъ:

А҆́ще же въ сꙋббѡ́тꙋ, стїхологисꙋ́емъ каѳі́смꙋ всю̀.

На Гдⷭ҇и, воззва́хъ, поста́вимъ стїхѡ́въ і҃, и҆ пое́мъ стїхи̑ры і҆нді́кта, г҃. Гла́съ а҃. Подо́бенъ: Небе́сныхъ чинѡ́въ:

Самосла́внагѡ и҆ бжⷭ҇твеннагѡ ᲂу҆че́нїѧ хрⷭ҇то́ва, ꙳ моли́твѣ наꙋчи́вшесѧ, ꙳ на всѧ́къ де́нь возопїи́мъ зижди́телю: ꙳ ѻ҆́ч҃е на́шъ, и҆́же на небесѣ́хъ ѡ҆бита́ѧй, ꙳ насꙋ́щный хлѣ́бъ подава́й на́мъ, ꙳ презира́ѧ на̑ша прегрѣшє́нїѧ.

И҆́же на сїна́йстѣй горѣ̀, ꙳ скрижа̑ли написа́въ и҆ногда̀, ꙳ са́мъ и҆ ны́нѣ во гра́дѣ назаре́тѣ по пло́ти, ꙳ кни́гꙋ прїѧ́лъ є҆сѝ прⷪ҇ро́ческꙋю почестѝ, хрⷭ҇тѐ бж҃е, ꙳ и҆ сїю̀ согнꙋ́въ ᲂу҆чи́лъ є҆сѝ лю́ди, ꙳ и҆спо́лнитисѧ писа́нїю ѡ҆ тебѣ̀.

Ꙗ҆́коже є҆вре́євъ тѣлеса̀ въ пꙋсты́ни и҆ногда̀, ꙳ не покори́вшихсѧ и҆́стиннѡ тебѣ̀ всѣ́хъ влⷣцѣ, ꙳ досто́йнѡ падо́ша: ꙳ та́кѡ и҆ ны́нѣ кѡ́сти разсы́пли, ꙳ ѕлочести́выхъ и҆ невѣ́рныхъ а҆га́рѧнъ, ꙳ ѱало́мски, при а҆́дѣ, хрⷭ҇тѐ.

И҆́ны стїхи̑ры, прпⷣбнагѡ, гла́съ є҃. Подо́бенъ: Прпⷣбне ѻ҆́ч҃е:

Прпⷣбне ѻ҆́ч҃е, а҆́ще бы возмо́жно столпꙋ̀ вѣща́ти, не бы̀ преста́лъ вопи́ти твоѧ̑ бѡлѣ́зни, трꙋды̀ и҆ рыда̑нїѧ. но ѻ҆́нъ носи́мь бѧ́ше, не́же ноша́ше, ꙗ҆́кѡ дре́во наплѧ́емо слеза́ми твои́ми. ᲂу҆диви́шасѧ а҆́гг҃ли, ᲂу҆чꙋди́шасѧ человѣ́цы, ᲂу҆страши́шасѧ де́мѡни терпѣ́нїѧ твоегѡ̀, сѷмеѡ́не прпⷣбне: молѝ спасти́сѧ дꙋша́мъ на́шымъ.

Прпⷣбне ѻ҆́ч҃е, си́лою бжⷭ҇твеннагѡ дх҃а, влⷣцѣ твоемꙋ̀ подо́бѧсѧ, на сто́лпъ вше́лъ є҆сѝ ꙗ҆́кѡ на крⷭ҇тъ: но ѻ҆́нъ рꙋкописа́нїе всѣ́хъ растерза̀, ты́ же воста̑нїѧ страсте́й разрꙋши́лъ є҆сѝ. ѻ҆́нъ ꙗ҆́кѡ ѻ҆вча̀, ты́ же ꙗ҆́кѡ заколе́нїе: ѻ҆́нъ взы́де на крⷭ҇тъ, ты́ же на сто́лпъ. сѷмеѡ́не прпⷣбне, молѝ спасти́сѧ дꙋша́мъ на́шымъ.

Прпⷣбне ѻ҆́ч҃е, тѣ́ло ѡ҆мочи́въ слеза́ми, и҆ дꙋ́шꙋ ѡ҆чи́стивъ, на высотꙋ̀ возше́лъ є҆сѝ добродѣ́телей: чꙋ́вственное ᲂу҆́бѡ жили́ще и҆мѣ́ѧ сто́лпъ тво́й, мы́сленный же и҆ нбⷭ҇ный гра́дъ го́рнїй сїѡ́нъ, а҆́гг҃лы ᲂу҆диви́лъ є҆сѝ, человѣ́ки ᲂу҆жаси́лъ є҆сѝ, де́мѡны посрами́лъ є҆сѝ, добродѣ́тельми твои́ми. сѷмеѡ́не прпⷣбне, молѝ спасти́сѧ дꙋша́мъ на́шымъ.

Дрꙋгі̑ѧ стїхи̑ры ст҃а́гѡ, гла́съ в҃. самогла́сны:

Ѿ ко́рене блага́гѡ благі́й прозѧбѐ пло́дъ, ѿ младе́нства свѧще́нный сѷмеѡ́нъ, благода́тїю па́че, не́же млеко́мъ воспита́нъ. и҆ на ка́мень тѣ́ло возвы́сивъ, къ бг҃ꙋ же превозвы́сивъ ра́зꙋмъ, небе́сное созда̀ добродѣ́тельми жили́ще: и҆ съ бжⷭ҇твенными си́лами лико́внѣ ше́ствꙋѧ, хрⷭ҇та̀ бы́сть жили́ще бг҃а и҆ сп҃са дꙋ́шъ на́шихъ.

Па́мѧть твоѧ̀ во вѣ́къ пребыва́етъ, прпⷣбне ѻ҆́ч҃е сѷмеѡ́не, и҆ кро́тость се́рдца твоегѡ̀, ᲂу҆го́дниче хрⷭ҇то́въ (с. 7) блаже́нне: а҆́ще бо и҆ преста́вилсѧ є҆сѝ ѿ на́съ, па́стырю до́брый, но не ѿстꙋпа́еши ѿ на́съ дꙋ́хомъ, къ любвѝ бг҃ꙋ предстоѧ̀, и҆ со а҆́гг҃лы ликꙋ́ѧ на нб҃сѣ́хъ. съ ни́миже молѝ, спасти́сѧ дꙋша́мъ на́шымъ.

Кѷпрїа́ново:

Моще́й твои́хъ ра́ка, всехва́льне ѻ҆́ч҃е, и҆сточа́етъ и҆сцѣлє́нїѧ, и҆ ст҃а́ѧ твоѧ̀ дꙋша̀ со а҆́гг҃лы совокꙋ́пльшисѧ, досто́йнѡ ра́дꙋетсѧ: и҆мѣ́ѧ ᲂу҆́бѡ ко гдⷭ҇ꙋ, прпⷣбне, дерзнове́нїе, и҆ со безпло́тными ликꙋ́ѧ на небесѣ́хъ, съ ни́миже молѝ, спасти́сѧ дꙋша́мъ на́шымъ.

Ге́рманово:

Возлюби́лъ є҆сѝ, бг҃оно́се, го́рнѣйшее любомꙋ́дрїе, и҆ внѣ̀ мі́ра бы́лъ є҆сѝ, живы́й вы́шше ви́димыхъ, и҆ зерца́ло нескве́рно бж҃їе, бжⷭ҇твенно показа́лсѧ є҆сѝ: и҆ сы́й при́снѡ соединѧ́ѧсѧ свѣ́тꙋ, свѣ́тъ прїима́лъ є҆сѝ, и҆ ꙗ҆снѣ́йшїй блаже́нне полꙋчи́лъ є҆сѝ коне́цъ. моли́сѧ ѡ҆ дꙋша́хъ на́шихъ, мꙋ́дре сѷмеѡ́не.

Сла́ва, гла́съ ѕ҃. Ге́рманово:

Бжⷭ҇твеннаѧ бл҃года́ть ѡ҆сѣнѧ́етъ ра́кꙋ моще́й твои́хъ, ѡ҆свѧще́нный сѷмеѡ́не: тѣ́мже и҆ къ воню̀ мѵ́ра чꙋде́съ твои́хъ притека́юще, недꙋ́гѡвъ и҆сцѣле́нїе почерпа́емъ. но ѻ҆́ч҃е прпⷣбне, хрⷭ҇та̀ бг҃а молѝ ѡ҆ дꙋша́хъ на́шихъ.

И҆ ны́нѣ, і҆нді́кта, гла́съ то́йже. Вѷзанті́ево:

И҆́же со дх҃омъ ст҃ы́мъ соедине́нъ, безнача́льне сло́ве и҆ сн҃е, всѣ́хъ ви́димыхъ и҆ неви́димыхъ содѣ́телю и҆ зижди́телю, вѣне́цъ лѣ́та благословѝ, сохранѧ́ѧ въ ми́рѣ правосла́вныхъ мно́жєства, моли́твами бцⷣы, и҆ всѣ́хъ ст҃ы́хъ твои́хъ.

Та́же вхо́дъ, прокі́менъ днѐ, и҆ чтє́нїѧ.

Прⷪ҇ро́чества и҆са́їина чте́нїе.

[Глава̀ ѯ҃а] Дх҃ъ гдⷭ҇ень на мнѣ̀, є҆гѡ́же ра́ди пома́за мѧ̀, благовѣсти́ти ни́щымъ посла́ мѧ, и҆сцѣли́ти сокрꙋшє́нныѧ се́рдцемъ, проповѣ́дати плѣ́нникѡмъ ѿпꙋще́нїе, и҆ слѣпы̑мъ прозрѣ́нїе: Проповѣ́дати лѣ́то гдⷭ҇не прїѧ́тно, и҆ де́нь воздаѧ́нїѧ бг҃а на́шегѡ, ᲂу҆тѣ́шити всѧ̑ пла́чꙋщыѧ: да́ти пла́чꙋщымъ сїѡ́нъ, сла́вꙋ вмѣ́стѡ пе́пела, помаза́нїе весе́лїѧ пла́чꙋщымъ, ѡ҆дѣѧ́нїе сла́вы вмѣ́стѡ дꙋ́ха ᲂу҆ны́нїѧ: и҆ нарекꙋ́тсѧ ро́ди пра́вды, насажде́нїе въ сла́вꙋ. И҆ сози́ждꙋтъ пꙋсты̑ни вѣ̑чныѧ, запꙋстѣ́вшыѧ пре́жде воздви́гнꙋтъ, и҆ ѡ҆бновѧ́тъ гра́ды пꙋсты̑ѧ, запꙋстѣ́вшыѧ ѿ ро́да въ ро́дъ. И҆ прїи́дꙋтъ и҆норо́днїи, пасꙋ́ще ѻ҆́вцы твоѧ̑, и҆ и҆ноплеме́нницы ѻ҆ра́тели, и҆ вїногра́дари ва́ши. Вы́ же свѧще́нницы гдⷭ҇ни нарече́тесѧ, слꙋжи́телїе бг҃а ва́шегѡ. рече́тсѧ ва́мъ: крѣ́пость ꙗ҆зы́кѡвъ поѧ́сте, и҆ въ бога́тствѣ и҆́хъ чꙋ́дни бꙋ́дете. вмѣ́стѡ стыдѣ́нїѧ ва́шегѡ сꙋгꙋ́багѡ, и҆ вмѣ́стѡ срамоты̀, возра́дꙋетсѧ ча́сть и҆́хъ. Сегѡ̀ ра́ди зе́млю свою̀ втори́цею наслѣ́дѧтъ, и҆ весе́лїе вѣ́чное надъ главо́ю и҆́хъ. А҆́зъ бо є҆́смь гдⷭ҇ь любѧ́й пра́вдꙋ, и҆ ненави́дѧй хище́нїѧ ѿ непра́вды: и҆ да́мъ трꙋ́дъ и҆́хъ пра́ведникѡмъ, и҆ завѣ́тъ вѣ́ченъ завѣща́ю и҆̀мъ. И҆ позна́етсѧ во ꙗ҆зы́цѣхъ сѣ́мѧ и҆́хъ, и҆ внꙋ́цы и҆́хъ посредѣ̀ люде́й. всѧ́къ ви́дѧй и҆̀хъ, позна́етъ ѧ҆̀, ꙗ҆́кѡ сі́и сꙋ́ть сѣ́мѧ благослове́нное ѿ бг҃а. И҆ весе́лїемъ возвеселѧ́тсѧ ѡ҆ гдⷭ҇ѣ.

Леѵі́тскихъ кни́гъ чте́нїе.

[Глава̀ к҃ѕ] Гл҃го́ла гдⷭ҇ь сынѡ́мъ і҆и҃лєвымъ гл҃го́лѧ: а҆́ще въ повелѣ́нїихъ мои́хъ хо́дите, и҆ за́пѡвѣди моѧ̑ сохранитѐ, и҆ сотворитѐ ѧ҆̀: и҆ да́мъ ва́мъ до́ждь во вре́мѧ є҆гѡ̀, и҆ землѧ̀ да́стъ рождє́нїѧ своѧ̑, и҆ древа̀ пѡ́льнаѧ ѿдадѧ́тъ пло́дъ сво́й. И҆ пости́гнетъ ва́съ млаче́нїе, ѡ҆бра́нїе вїна̀, и҆ вїна̀ ѡ҆бра́нїе пости́гнетъ сѣ́ѧтвꙋ: и҆ снѣ́сте хлѣ́бъ ва́шъ въ сы́тость, и҆ вселите́сѧ съ тве́рдостїю на землѝ ва́шей. И҆ да́мъ ми́ръ въ землѝ ва́шей, и҆ ᲂу҆́спнете, и҆ не бꙋ́детъ ва́съ ᲂу҆страша́ѧй. и҆ погꙋблю̀ ѕвѣ́ри лю̑тыѧ ѿ землѝ ва́шеѧ, и҆ бра́нь не про́йдетъ сквозѣ̀ зе́млю ва́шꙋ. пожене́те врагѝ ва́шѧ, и҆ падꙋ́тъ предъ ва́ми ᲂу҆бїе́ни. И҆ пожене́те пѧ́ть и҆зъ ва́съ сто̀, и҆ сто̀ ва́съ пожене́те тмы̑, и҆ падꙋ́тъ вразѝ ва́ши предъ ва́ми мече́мъ. И҆ при́зрю на вы̀, и҆ возблагословлю́ вы, и҆ возращꙋ́ вы, и҆ ᲂу҆мно́жꙋ вы̀, и҆ положꙋ̀ завѣ́тъ мо́й съ ва́ми. И҆ снѣ́сте вє́тхаѧ, и҆ вє́тхаѧ ве́тхихъ, и҆ вє́тхаѧ ѿ лица̀ но́выхъ и҆знесе́те. И҆ положꙋ̀ завѣ́тъ мо́й въ ва́съ, и҆ не возгнꙋша́етсѧ дꙋша̀ моѧ̀ ва́ми. И҆ похождꙋ̀ въ ва́съ, и҆ бꙋ́дꙋ ва́мъ бг҃ъ, и҆ вы̀ бꙋ́дете мнѣ̀ лю́дїе. А҆́ще же не послꙋ́шаете менѐ, нижѐ сотворитѐ повелѣ́нїй мои́хъ си́хъ: но ни покорите́сѧ и҆̀мъ, и҆ сꙋде́бъ мои́хъ вознегодꙋ́етъ дꙋша̀ ва́ша, ꙗ҆́коже ва́мъ не твори́ти всѣ́хъ за́повѣдей мои́хъ, и҆ ꙗ҆́кѡ разори́ти завѣ́тъ мо́й. И҆ а҆́зъ сотворю̀ си́це ва́мъ: наведꙋ̀ на вы̀ скꙋ́дость, и҆ сѣ́ете вотщѐ сѣ́мена ва̑ша, и҆ и҆з̾ѧдѧ́тъ трꙋды̀ ва́шѧ проти́внїи ва́ши. И҆ поста́влю лицѐ моѐ на вы̀, и҆ паде́те предъ враги̑ ва́шими, и҆ поженꙋ́тъ вы̀ ненави́дѧщїи ва́съ, и҆ побѣ́гнете никомꙋ́же гонѧ́щꙋ ва́съ. И҆ сокрꙋшꙋ̀ досажде́нїе горды́ни ва́шеѧ: и҆ положꙋ̀ не́бо ва́мъ ꙗ҆́кѡ желѣ́зно, и҆ зе́млю ва́шꙋ ꙗ҆́кѡ мѣ́дѧнꙋ. И҆ бꙋ́детъ вотщѐ крѣ́пость ва́ша, и҆ землѧ̀ ва́ша не да́стъ сѣ́мене своегѡ̀, и҆ древа̀ сє́льнаѧ не дадѧ́тъ плода̀ своегѡ̀. И҆ послю̀ на вы̀ ѕвѣ́ри ди́вїѧ земны̑ѧ, и҆ поѧдѧ́тъ ва́съ и҆ потребѧ́тъ скоты̀ ва́шѧ, и҆ ᲂу҆ма́лены сотворю̀ вы̀, и҆ погꙋби́тъ вы̀ находѧ́й ме́чь. И҆ бꙋ́детъ землѧ̀ ва́ша пꙋста̀: и҆ дворы̀ ва́ши бꙋ́дꙋтъ пꙋ́сты, ꙗ҆́кѡ вы̀ ходи́сте ко мнѣ̀ страно́ю, и҆ ꙗ҆́рости страно́ю: гл҃го́летъ гдⷭ҇ь бг҃ъ ст҃ы́й і҆и҃левъ.

Прпⷣбнагѡ: Премꙋ́дрости соломѡ́ни чте́нїе:

[Глава̀ д҃] Пра́ведникъ, а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ: сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости, житїѐ нескве́рное. Благоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ преста́вленъ бы́сть. Восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: ᲂу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ: лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ благода́ть и҆ ми́лость въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.

На стїхо́внѣ стїхи̑ры і҆нді́кта, гла́съ а҃. самогла́сны, і҆ѡа́нна мона́ха:

Наста̀ вхо́дъ лѣ́та, созыва́ющь почита́ти того̀ просвѣща́ющыѧ, каллі́стꙋ, є҆ѵо́да и҆ є҆рмоге́на, самобра́тныѧ страда́льцы: сѷмеѡ́на равноа́гг҃льнаго, и҆ і҆исꙋ́са наѵи́на: и҆̀же во є҆фе́сѣ седмочи́слєнныѧ ѻ҆́троки: и҆ четверодесѧтосвѣ́тлый ст҃ы́хъ же́нъ ли́къ. и҆́хже па́мѧтемъ приѡбща́ющесѧ празднолю́бцы, возопїи́мъ благоче́стнѡ: гдⷭ҇и, благословѝ дѣла̀ рꙋ́къ твои́хъ, и҆ сподо́би ны̀ до́брѣ преитѝ лѣ́та ѡ҆бхожде́нїѧ.

Сті́хъ: Тебѣ̀ подоба́етъ пѣ́снь бж҃е въ сїѡ́нѣ, и҆ тебѣ̀ возда́стсѧ моли́тва во і҆ерꙋсали́мѣ.

Хрⷭ҇тѐ бж҃е на́шъ, и҆́же мꙋ́дростїю всѧ̑ содѣ́ѧвый, и҆ и҆зъ не сꙋ́щихъ во є҆́же бы́ти приведы́й, благословѝ вѣне́цъ лѣ́та, и҆ гра́ды на́шѧ сохранѧ́й невре́дны, и҆ вѣ̑рныѧ лю́ди си́лою твое́ю возвеселѝ, побѣ̑ды даѧ̀ є҆мꙋ̀ на сопоста́ты, бцⷣы ра́ди да́рꙋѧ мі́рꙋ ве́лїю ми́лость.

Гла́съ в҃:

Сті́хъ: И҆спо́лнимсѧ во благи́хъ до́мꙋ твоегѡ̀, свѧ́тъ хра́мъ тво́й, ди́венъ въ пра́вдѣ.

Кѷпрїа́ново:

Ди́венъ є҆сѝ, бж҃е, и҆ чꙋ́дна дѣла̀ твоѧ̑, и҆ пꙋтїѐ твоѝ неизслѣ́дими: є҆си́ бо мꙋ́дрость бж҃їѧ, и҆ ѵ҆поста́сь соверше́нна, и҆ си́ла: собезнача́ленъ же и҆ соприсносꙋ́щенъ: и҆ содѣ́тельною всеси́льною вла́стїю въ мі́ръ прише́лъ є҆сѝ, и҆щѧ̀ є҆́же ᲂу҆добри́ти созда́нїе твоѐ, неизрече́ннѣ ѿ неискꙋсомꙋ́жныѧ мт҃ре, не превра́щсѧ бжⷭ҇тво́мъ, завѣща́въ ᲂу҆ста́вы и҆ лѣ̑та, во спасе́нїе на́ше неизмѣ́нне, сегѡ̀ ра́ди вопїе́мъ тѝ: бл҃гі́й гдⷭ҇и, сла́ва тебѣ̀.

Сті́хъ: Благослови́ши вѣне́цъ лѣ́та бла́гости твоеѧ̀, гдⷭ҇и.

Дамаски́ново:

И҆́же въ мꙋ́дрости всѧ̑ содѣ́тельствовавый превѣ́чное сло́во ѻ҆́ч҃ее, и҆ всѧ́ческꙋю тва́рь всеси́льнымъ сло́вомъ твои́мъ соста́вивый, благословѝ вѣне́цъ лѣ́та бла́гости твоеѧ̀, и҆ є҆́рєси низложѝ бцⷣы ра́ди, ꙗ҆́кѡ бл҃гъ и҆ чл҃вѣколю́бецъ.

Сла́ва, ст҃а́гѡ, гла́съ є҃:

Прпⷣбне ѻ҆́ч҃е, добрꙋ̀ и҆з̾ѡбрѣ́лъ є҆сѝ лѣ́ствицꙋ, є҆́юже возше́лъ є҆сѝ на высотꙋ̀, ю҆́же ѡ҆брѣ́те и҆лїа̀ колесни́цꙋ ѻ҆́гненнꙋ. но ѻ҆́нъ ᲂу҆́бѡ восхо́да и҆ны̑мъ не ѡ҆ста́ви, ты́ же и҆ по сме́рти и҆́маши сто́лпъ тво́й. небе́сный человѣ́че, земны́й а҆́гг҃ле, свѣти́льниче неꙋсы́пный вселе́нныѧ, сѷмеѡ́не прпⷣбне, молѝ є҆́же спасти́сѧ дꙋша́мъ на́шымъ.

И҆ ны́нѣ, і҆нді́кта, гла́съ то́йже. і҆ѡа́нна мона́ха.

Ты̀, цр҃ю̀, сы́й при́снѡ, и҆ пребыва́ѧй, и҆ во вѣ́ки безконє́чныѧ, прїимѝ моле́нїе грѣ́шныхъ просѧ́щихъ спасе́нїѧ, и҆ пода́ждь, чл҃вѣколю́бче, землѝ твое́й благопло́дїе, благорастворє́ны воздꙋ́хи да́рꙋѧ: спобо́рствꙋй на безбѡ́жныѧ ва́рвары, ꙗ҆́коже и҆ногда̀ дв҃дꙋ, ꙗ҆́кѡ прїидо́ша сі́и во ѻ҆би́тєли твоѧ̑, и҆ всест҃о́е мѣ́сто ѡ҆скверни́ша, сп҃се. но ты̀ да́рꙋй побѣ̑ды, хрⷭ҇тѐ бж҃е, моли́твами бцⷣы: побѣ́да бо ты̀ правосла́вныхъ и҆ хвала̀.

Тропа́рь і҆нді́кта, гла́съ в҃:

Всеѧ̀ тва́ри содѣ́телю, времена̀ и҆ лѣ̑та во свое́й вла́сти положи́вый, благословѝ вѣне́цъ лѣ́та бла́гости твоеѧ̀, гдⷭ҇и, сохранѧ́ѧ въ ми́рѣ лю́ди и҆ гра́дъ тво́й, моли́твами бцⷣы, и҆ спаси́ ны.

Сла́ва, прпⷣбнагѡ, гла́съ а҃:

Терпѣ́нїѧ сто́лпъ бы́лъ є҆сѝ, ревнова́вый пра́ѻтцємъ, прпⷣбне, і҆́ѡвꙋ во страсте́хъ, і҆ѡ́сифꙋ во и҆скꙋше́нїихъ, и҆ безпло́тныхъ жи́тельствꙋ, сы́й въ тѣлесѝ, сѷмеѡ́не ѻ҆́ч҃е на́шъ, молѝ хрⷭ҇та̀ бг҃а спасти́сѧ дꙋша́мъ на́шымъ.

И҆ ны́нѣ, бцⷣы, гла́съ то́йже:

Ра́дꙋйсѧ, ѡ҆бра́дованнаѧ бцⷣе дв҃о, приста́нище и҆ предста́тельство ро́да человѣ́ческагѡ, и҆зъ тебє́ бо воплоти́сѧ и҆зба́витель мі́ра: є҆ди́на бо є҆сѝ мт҃и и҆ дв҃а, присноблагослове́ннаѧ, и҆ препросла́вленнаѧ, молѝ хрⷭ҇та̀ бг҃а ми́ръ дарова́ти все́й вселе́ннѣй.

На ᲂу҆́трени, на Бг҃ъ гдⷭ҇ь, тропа́рь і҆нді́кта, два́жды.

Сла́ва, прпⷣбнагѡ: И҆ ны́нѣ, бцⷣы.

По а҃-й стїхоло́гїи сѣда́ленъ і҆нді́кта, гла́съ д҃.

Подо́бенъ: Оу҆диви́сѧ і҆ѡ́сифъ:

Ꙗ҆́кѡ влⷣцѣ всѣ́хъ, и҆ пода́телю благи́хъ, тебѣ̀ припа́даемъ вѣ́рнѡ, вопїю́ще прилѣ́жнѡ: ѿ твоегѡ̀ ᲂу҆молѧ́емь бл҃гоꙋтро́бїѧ, сп҃се, и҆ моли́твами ро́ждшїѧ тѧ̀, и҆ всѣ́хъ при́снѡ благоꙋгожда́ющихъ тебѣ̀, лѣ́то бл҃гопрїѧ́тно принестѝ тебѣ̀, ꙗ҆́кѡ бл҃гъ сподо́би, во двꙋ̀ сꙋщєствꙋ̀ чествꙋ́ющихъ, и҆ вѣ́рнѡ сла́вѧщихъ тѧ̀.

Сла́ва, прпⷣбнагѡ, гла́съ и҃. Подо́бенъ: Премꙋ́дрости:

Крⷭ҇тъ гдⷭ҇ень взе́мъ мꙋ́дре, и҆ томꙋ̀ до конца̀ послѣ́довавъ, ᲂу҆мо́мъ не возврати́лсѧ є҆сѝ въ мі́ръ, бг҃омꙋ́дре, воздержа́нїемъ и҆ трꙋды̑ стра̑сти ᲂу҆мертви́въ, и҆ хра́мъ ᲂу҆гото́вилъ є҆сѝ себѐ гдⷭ҇ꙋ твоемꙋ̀. тѣ́мже и҆ дарова́нїй возме́здїе прїѧ́лъ є҆сѝ, и҆сцѣлѧ́ти недꙋ̑жныѧ, и҆ дꙋ́хи ѿгони́ти, сѷмеѡ́не прпⷣбнѣйшїй, молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти пра́зднꙋющымъ любо́вїю свѧтꙋ́ю па́мѧть твою̀.

И҆ ны́нѣ, і҆нді́кта: Ꙗ҆́кѡ влⷣцѣ всѣ́хъ: Зрѝ вы́ше.

По в҃-й стїхоло́гїи сѣда́ленъ, гла́съ и҃.

Подо́бенъ: Премꙋ́дрости и҆ сло́ва:

Воздержа́нїемъ и҆ трꙋды̑ и҆ моли́твами дꙋ́шꙋ твою̀ ѡ҆бꙋчи́въ бг҃олѣ́пнѣ, бы́лъ є҆сѝ соприча́стникъ мꙋ́ченикѡмъ блаже́нне, и҆ чꙋде́съ и҆́стиннѡ дарова̑нїѧ прїѧ́лъ є҆сѝ и҆сцѣлѧ́ти недꙋ́ги, вѣ́рою чествꙋ́ющихъ тѧ̀. тѣ́мже и҆ де́мѡнскїѧ ѿгонѧ́еши полкѝ, на сїѧ̑ свы́ше вла́стїю да́нною тебѣ̀, сѷмеѡ́не преблаже́нне, молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти, пра́зднꙋющымъ любо́вїю свѧтꙋ́ю па́мѧть твою̀.

Сла́ва, гла́съ д҃. Подо́бенъ: Ско́рѡ предварѝ:

Вошла̀ є҆сѝ въ по́двигъ мꙋче́нїѧ вѣ́рнѡ, каллі́сто, проповѣ́дающи, со двѣма̀ бра́ты, хрⷭ҇та̀ бг҃а на́шего: жела́нїемъ бо воспита́на, мы́сленныѧ сосꙋ́ды и҆́стиннѡ хрⷭ҇то́вы цр҃кве, соверши́ла є҆сѝ си́хъ. тѣ́мже и҆ сочета́ласѧ є҆сѝ и҆̀мъ, мч҃нице, въ вы́шнюю жи́знь.

И҆ ны́нѣ, бг҃оро́диченъ:

Ско́рѡ прїимѝ, влⷣчце, мольбы̑ на́шѧ, и҆ сїѧ̑ принесѝ твоемꙋ̀ сн҃ꙋ и҆ бг҃ꙋ, гпⷭ҇жѐ всечⷭ҇таѧ: разрꙋшѝ ѡ҆бстоѧ̑нїѧ къ тебѣ̀ притека́ющихъ, разрѣшѝ навѣ́ты, и҆ де́рзѡсти, дв҃о, ны́нѣ воѡрꙋжа́ющихсѧ на рабы̑ твоѧ̑.

(А҆́ще є҆́сть хра́мъ прпⷣбнагѡ сѷмеѡ́на),

По полѷеле́и сѣда́ленъ прпⷣбнагѡ, гла́съ и҃. Поⷣ: Премꙋ́дрости:

Превозше́лъ є҆сѝ вѣ́рою, ѻ҆́ч҃е мꙋ́дре, и҆ привре́мєннаѧ всѧ̑ презрѣ́въ, хрⷭ҇тꙋ̀ послѣ́довалъ є҆сѝ си́лою дꙋ́ха: воздержа́нїемъ и҆ста́илъ є҆сѝ тѣ́ло твоѐ, прпⷣбне, нбⷭ҇нꙋю сла́вꙋ при́снѡ прови́дѧ, тѣ́мже и҆ ѡ҆брѣ́лъ є҆сѝ къ восхо́дꙋ бж҃е́ственномꙋ столпа̀ лѣ́ствицꙋ, твоегѡ̀ жела́нїѧ прили́чнꙋ, сѷмеѡ́не сщ҃е́ннѣйшїй: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти, пра́зднꙋющымъ любо́вїю свѧтꙋ́ю па́мѧть твою̀.

Сла́ва, гла́съ є҃. Подо́бенъ: Собезнача́льное:

Воздержа́нїемъ житїѐ ᲂу҆краси́лъ є҆сѝ, ᲂу҆мертви́въ тѣ́ло твоѐ: въ ничто́же ѡ҆брати́лъ є҆сѝ вра́жїѧ прило́ги, ѻ҆́ч҃е бл҃же́нне, и҆ преста́вилсѧ є҆сѝ къ бг҃ꙋ въ вѣ́чнꙋю жи́знь, ꙗ҆́кѡ досто́инъ наслѣ́дникъ. тѣ́мже не преста́й молѧ́сѧ, поми́ловатисѧ дꙋша́мъ на́шымъ.

И҆ ны́нѣ, бг҃оро́диченъ:

Прест҃а́ѧ дв҃о, на́съ поми́лꙋй, прибѣга́ющихъ вѣ́рою къ тебѣ̀ бл҃гоꙋтро́бнѣй, и҆ просѧ́щихъ те́плагѡ твоегѡ̀ застꙋпле́нїѧ: мо́жеши бо ꙗ҆́кѡ блага́ѧ всѣ́хъ спастѝ, ꙗ҆́кѡ сꙋ́щи мт҃и бг҃а вы́шнѧгѡ, мт҃рними твои́ми мольба́ми, при́снѡ ᲂу҆молѧ́ющи бг҃облагода́тнаѧ.

Степє́нна, а҃ а҆нтїфѡ́нъ д҃-гѡ гла́са. Прокі́менъ, є҆ѵⷢ҇лїе и҆ стїхи́ра хра́ма: Та́же ѱало́мъ н҃.

Канѡ́ны г҃: і҆нді́кта, гла́съ а҃, со і҆рмосо́мъ на ѕ҃. Творе́нїе кѵ́ръ і҆ѡа́нна мона́ха, і҆рмо́съ по два́жды. Тропарѝ на д҃.

Пѣ́снь а҃. І҆рмо́съ:

Пои́мъ всѝ лю́дїе, ѿ го́рькїѧ рабо́ты фараѡ́ни і҆и҃лѧ и҆змѣ́ншемꙋ, и҆ во глꙋбинѣ̀ морстѣ́й нога́ми немо́крыми наста́вльшемꙋ, пѣ́снь побѣ́днꙋю, ꙗ҆́кѡ просла́висѧ.

Воспои́мъ всѝ хрⷭ҇тꙋ̀, и҆́мже соста́вишасѧ всѧ́чєскаѧ, и҆ въ не́мже соверши́шасѧ неразлꙋ̑чна, ꙗ҆́кѡ и҆зъ безнача́льнагѡ (с. 15) ро́ждшꙋсѧ бг҃а ѻ҆ц҃а̀ ѵ҆поста́сномꙋ сло́вꙋ, пѣ́снь побѣ́днꙋю, ꙗ҆́кѡ просла́висѧ.

Воспои́мъ всѝ хрⷭ҇тꙋ̀, ѻ҆́ч҃имъ бл҃говоле́нїемъ ꙗ҆́вльшꙋсѧ и҆зъ дв҃ы, и҆ проповѣ́давшꙋ лѣ́то гдⷭ҇не прїѧ́тно, на́мъ на и҆збавле́нїе, пѣ́снь побѣ́днꙋю, ꙗ҆́кѡ просла́висѧ.

Въ назаре́тъ прише́дъ пода́тель зако́на, въ де́нь сꙋббѡ́тный ᲂу҆ча́ше, закононолага́ѧ є҆вре́ємъ прише́ствїѧ своегѡ̀ неизрече́ннагѡ: и҆́мже ꙗ҆́кѡ ми́лостивъ спаса́етъ ро́дъ на́шъ.

Бг҃оро́диченъ:

Пою́ще всѝ вѣ́рнїи преди́внꙋю ѻ҆трокови́цꙋ, хрⷭ҇та̀ вселе́ннѣй возсїѧ́вшꙋю, и҆ ра́дости всѧ́чєскаѧ и҆ и҆спо́лнившꙋю, присносꙋ́щныѧ жи́зни, при́снѡ восхвалѧ́емъ, ꙗ҆́кѡ просла́висѧ.

И҆́нъ канѡ́нъ ст҃ы́хъ же́нъ, на д҃, є҆гѡ́же краегране́сїе: Тве́рдыхъ же́нъ мч҃ницъ пою̀ болѣ̑зни.

Гла́съ д҃. Пѣ́снь а҃. І҆рмо́съ:

Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.

Тве́рдѡ на противобо́рца подвиза́стесѧ мꙋ́чєницы, посто́мъ ᲂу҆́бѡ пе́рвѣе, второ́е же кро́внымъ страда́нїемъ: сегѡ̀ ра́ди ва́шѧ па̑мѧти вѣ́рою почита́емъ.

Оу҆ѧзви́вшесѧ любо́вїю на́съ ра́ди претерпѣ́вшагѡ крⷭ҇тъ же и҆ сме́рть, сегѡ̀ стопа́мъ послѣ́доваша ст҃ы̑ѧ жєны̀, плотскꙋ́ю не́мощь забы́вше.

Є҆́ллинскїѧ жє́ртвы, и҆ де́мѡнскаѧ водрꙋжє́нїѧ ѻ҆рꙋ́жїемъ вѣ́ры низложи́сте, и҆ принесо́стесѧ ко хра́мꙋ нбⷭ҇номꙋ, сосꙋ́ди ѡ҆дꙋшевле́ннїи, мꙋ́чєницы всечестні́и.

Бг҃оро́диченъ:

Оу҆крѣ́пльшесѧ бл҃года́тїю, ѿ твоеѧ̀ возсїѧ́вшагѡ ᲂу҆тро́бы, всенепоро́чнаѧ, ѻ҆трокови̑цы дѣ̑вы, ѿрази́ша мꙋ́къ треволне́нїе, и҆ въ слѣ́дъ тебє̀ приведо́шасѧ, ра́дꙋющесѧ.

И҆́нъ канѡ́нъ прпⷣбнагѡ на д҃, є҆гѡ́же краегране́сїе: Прїимѝ пѣ́нїе, ѽ сѷмеѡ́не всеблаже́нне. І҆ѡа́нна мона́ха.

Гла́съ и҃:

Пѣ́снь а҃. І҆рмо́съ:

Пои́мъ гдⷭ҇еви всѝ лю́дїе, въ мо́ри чермнѣ́мъ фараѡ́на погрꙋзи́вшемꙋ, побѣ́днꙋю пѣ́снь пою́ще, ꙗ҆́кѡ просла́висѧ.

Да́ждь мнѣ̀ ѻ҆рга́номъ ꙗ҆зы́ка гнилы́мъ, ѽ бг҃оно́се сѷмеѡ́не, пѣ́снь тебѣ̀ плетꙋ́щемꙋ, мольба́ми твои́ми, зна́нїѧ свѣ́тъ бг҃онаꙋче́нъ.

Позна́ша мꙋ́дрость, ѻ҆́ч҃е, твою̀, пе́рсѧне, є҆ѳїѡ́плѧне, і҆нді́ане, и҆ скѵ́ѳѧне, и҆ а҆ра́вѡвъ мно́жество, и҆ просла́виша хрⷭ҇та̀, тобо́ю прославлѧ́емаго.

Благода́ти и҆спо́лнивсѧ дꙋхо́вныѧ, ѿ пастꙋ́шескихъ бо ста́нищъ, ꙗ҆́кѡ і҆а́кѡвъ, дв҃дъ и҆ мѡѷсе́й, началово́ждь слове́сныхъ ꙗ҆ви́лсѧ є҆сѝ па́ствъ, блаже́нне.

Бг҃оро́диченъ:

Пречⷭ҇таѧ бцⷣе, ра́дꙋйсѧ, честна́ѧ, невмѣсти́маго бг҃а во ᲂу҆тро́бѣ твое́й вмѣсти́вшаѧ, и҆зба́витисѧ лю́тыхъ и҆спросѝ пою́щымъ тѧ̀.

Катава́сїа:

Крⷭ҇тъ начерта́въ мѡѷсе́й, прѧ́мѡ жезло́мъ чермно́е пресѣчѐ, і҆и҃лю пѣшеходѧ́щꙋ, то́же ѡ҆бра́тнѡ фараѡ́нѡвымъ колесни́цамъ ᲂу҆да́ривъ совокꙋпѝ, вопрекѝ написа́въ непобѣди́мое ѻ҆рꙋ́жїе. тѣ́мъ хрⷭ҇тꙋ̀ пои́мъ бг҃ꙋ на́шемꙋ, ꙗ҆́кѡ просла́висѧ.

Пое́мъ и҆ до ѿда́нїѧ честна́гѡ крⷭ҇та̀.

Пѣ́снь г҃. І҆рмо́съ:

Оу҆твердѝ менѐ хрⷭ҇тѐ, на недви́жимомъ ка́мени за́повѣдей твои́хъ, и҆ просвѣти́ мѧ свѣ́томъ лица̀ твоегѡ̀: нѣ́сть бо свѧ́тъ па́че тебє̀ человѣколю́бче.

Оу҆твердѝ, бл҃же, є҆го́же насадѝ любо́вїю на землѝ десни́ца твоѧ̀, плодови́тъ вїногра́дъ, сохранѧ́ѧ твою̀ це́рковь, всеси́льне.

Въ дѣ́лехъ дꙋхо́вныхъ бг҃окра́сныхъ красѧ́щыѧсѧ, наста́вшее, гдⷭ҇и, лѣ́то сїѐ, преведѝ, влⷣко, и҆̀же вѣ́рою тѧ̀ пѣсносло́вѧщыѧ, бж҃е всѧ́ческихъ.

Ти́хїй мѝ, хрⷭ҇тѐ, лѣ́тнїй крꙋ́гъ дава́й, ще́дре, и҆ насы́ти мѧ̀ слове́съ бжⷭ҇твенныхъ твои́хъ, ꙗ҆̀же ꙗ҆ви́лсѧ є҆сѝ глаго́лѧ і҆ꙋде́ємъ въ сꙋббѡ́тахъ.

Бг҃оро́диченъ:

Ꙗ҆́кѡ є҆ди́нꙋ, преесте́ственнѡ па́че человѣ́ка благода́ть во твою̀ ᲂу҆тро́бꙋ прїе́мшꙋю, и҆ невра́щнѡ ро́ждшꙋю хрⷭ҇та̀ бг҃а на́шего, при́снѡ тѧ̀ сла́вимъ.

И҆́нъ. І҆рмо́съ:

Лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою: сегѡ̀ ра́ди ᲂу҆тверди́сѧ въ гдⷭ҇ѣ се́рдце моѐ.

Крѣ́постїю всеси́льною ᲂу҆крѣплѧ́еми, противобо́рцєвъ попра́сте си́лꙋ: сегѡ̀ ра́ди ꙗ҆́кѡ побѣдонѡ́сицы, ѿ хрⷭ҇та̀ вѣнча́стесѧ.

Ꙗ҆ви́шасѧ ѕвѣ̑рскаѧ зїѧ̑нїѧ, бжⷭ҇твенною си́лою хрⷭ҇то́вою недѣ́йствєнна: и҆ и҆зба́вистесѧ бг҃онѡ́сицы невреди́мы, бг҃а почита́юще.

Воззрѣ́нїемъ къ бг҃ꙋ ѡ҆божа́еми, многобо́жїѧ хла́дъ ѿри́нꙋсте, и҆ къ теплотѣ̀ вы́шнїѧ сла́вы страстонѡ́сицы достиго́сте.

Бг҃оро́диченъ:

Зна́юще благоче́стнѡ проповѣ́даемъ тѧ̀ всеи́стиннꙋю бж҃їю мт҃рь, всенепоро́чнаѧ: тобо́ю бо на́мъ созда́тель приѡбщи́тисѧ сподо́би.

И҆́нъ. І҆рмо́съ:

Стра́хъ тво́й, гдⷭ҇и, всадѝ въ сердца̀, ра̑бъ твои́хъ, и҆ бꙋ́ди на́мъ ᲂу҆твержде́нїе, тѧ̀ во и҆́стинѣ призыва́ющихъ.

Ско́рѡ и҆збѣ́гъ зи́мныѧ бѣды̀ дꙋхѡ́въ, ко спаси́тельнѣй ᲂу҆стреми́лсѧ є҆сѝ ѻ҆би́тели, сѷмеѡ́не, и҆зъ неѧ́же и҆ нестарѣ́емꙋю жи́знь прїѧ́лъ є҆сѝ.

Приклони́лъ є҆сѝ ра́дꙋѧсѧ, покорли́вый слꙋ́хъ тво́й, всебл҃же́нне, влⷣцѣ блажа́щꙋ, и҆ бл҃же́ннꙋю ѡ҆брѣ́лъ є҆сѝ жи́знь.

Сло́ва прїе́мъ сѣ́мена, се́рдца твоегѡ̀ бразда́ми, и҆ сле́зъ напоє́нїи, хрⷭ҇тꙋ̀ ᲂу҆мно́женъ кла́съ добродѣ́телей пожа́лъ є҆сѝ.

Бг҃оро́диченъ:

Неизрече́ннѡ зачала̀ є҆сѝ, бг҃оневѣ́сто, сп҃са и҆ гдⷭ҇а, и҆збавлѧ́ющаго ны̀ ѿ лю́тыхъ, тѧ̀ во и҆́стинѣ призыва́ющыѧ.

Катава́сїа:

Же́злъ во ѻ҆́бразъ та́йны прїе́млетсѧ, прозѧбе́нїемъ бо предразсꙋжда́етъ свѧще́нника, неплодѧ́щей же пре́жде це́ркви, ны́нѣ процвѣтѐ дре́во крⷭ҇та̀, въ держа́вꙋ и҆ ᲂу҆твержде́нїе.

Конда́къ і҆нді́кта, гла́съ в҃:

Въ вы́шнихъ живы́й, хрⷭ҇тѐ цр҃ю̀, всѣ́хъ ви́димыхъ и҆ неви́димыхъ тво́рче и҆ зижди́телю, и҆́же дни̑ и҆ нѡ́щи, времена̀ и҆ лѣ̑та сотвори́вый, благословѝ ны́нѣ вѣне́цъ лѣ́та, соблюдѝ и҆ сохранѝ въ ми́рѣ гра́дъ и҆ лю́ди твоѧ̑, многоми́лостиве.

Та́же сѣда́ленъ і҆нді́кта, гла́съ и҃. Подо́бенъ: Премꙋ́дрости:

И҆́же времена̀ плодонѡ́сна, и҆ дождѝ съ небесѐ подаѧ̀ сꙋ́щымъ на землѝ, и҆ ны́нѣ прїе́млѧ мольбы̑ рабѡ́въ твои́хъ, ѿ всѧ́кїѧ и҆зба́ви нꙋ́жды гра́дъ тво́й: щедрѡ́ты бо твоѧ̑ и҆́стиннѡ на всѣ́хъ дѣ́лѣхъ твои́хъ. тѣ́мже вхо́ды благословѝ, и҆ и҆схо́ды, дѣла̀ и҆спра́ви въ на́съ рꙋ́къ на́шихъ, и҆ согрѣше́нїй проще́нїе да́рꙋй на́мъ, бж҃е: ты́ бо и҆зъ несꙋ́щихъ всѧ́чєскаѧ во є҆́же бы́ти, ꙗ҆́кѡ си́ленъ, приве́лъ є҆сѝ.

И҆́нъ сѣда́ленъ прпⷣбнагѡ, гла́съ и҆ подо́бенъ то́йже:

Земна̑ѧ всѧ̑ ѡ҆ста́вивъ, и҆ въ мі́рѣ сы́й тѣле́снѣ, дх҃омъ бы́лъ є҆сѝ небе́сный а҆́гг҃лъ, находѧ́щыѧ бо стра̑сти (с. 19) ᲂу҆мертви́въ пло́тїю, трⷪ҇цы ꙗ҆ви́лсѧ є҆сѝ ᲂу҆го́дникъ блаже́нне. тѣ́мже недꙋ́гꙋющихъ и҆сцѣлѧ́еши стра̑сти, и҆ сло́вомъ дꙋ́хи ѿгонѧ́еши бл҃года́тїю, сѷмеѡ́не пребл҃же́нне, молѝ хрⷭ҇та̀ бг҃а, согрѣше́нїй проще́нїе дарова́ти чествꙋ́ющымъ любо́вїю свѧтꙋ́ю па́мѧть твою̀.

Сла́ва, и҆́нъ сѣда́ленъ ст҃ы́хъ же́нъ, гла́съ а҃.

Подо́бенъ: Гро́бъ тво́й сп҃се:

А҆́гницы словє́сныѧ, а҆́гнцꙋ и҆ па́стырю приведо́стесѧ вѣ́рнѡ мꙋче́нїемъ, тече́нїе соверши́вше и҆ вѣ́рꙋ соблю́дше. тѣ́мъ ра́достнѡ дне́сь восхвалѧ́емъ, досточꙋ́днїи, свѧще́ннꙋю ва́шꙋ па́мѧть, хрⷭ҇та̀ велича́юще.

И҆ ны́нѣ, бг҃оро́диченъ:

Наста́ви ны̀ на пꙋ́ть покаѧ́нїѧ, ᲂу҆клонѧ́ющыѧсѧ при́снѡ къ ѕлы̑мъ безпꙋ́тїємъ, и҆ пребл҃га́го прогнѣ́вающыѧ гдⷭ҇а, неискꙋсобра́чнаѧ, бл҃гослове́ннаѧ марі́е, прибѣ́жище ѿча́ѧнныхъ человѣ́кѡвъ, бж҃їе ѡ҆бита́лище.

Пѣ́снь д҃. І҆рмо́съ:

Разꙋмѣ́хъ, всеси́льне, твоѐ смотре́нїе, и҆ со стра́хомъ просла́вихъ тѧ̀, сп҃се.

Нача́ло тебѣ̀ лѣ́та лю́дїе твоѝ прино́сѧтъ, а҆́гг҃льскими пѣ́сньми славосло́вѧще тѧ̀, сп҃се.

Ꙗ҆́кѡ чл҃вѣколю́бецъ сподо́би наче́ншымъ лѣ́то, и҆ сконча́ти тебѣ̀ благоꙋго́днѡ, хрⷭ҇тѐ.

Вседержи́телю є҆ди́не гдⷭ҇и, лѣ́тъ ѡ҆бхождє́нїѧ ᲂу҆ти́шивъ, мі́рꙋ да́рꙋй.

Бг҃оро́диченъ:

Ꙗ҆́кѡ приста́нище ны́нѣ дꙋ́шъ на́шихъ, и҆ тве́рдꙋ наде́ждꙋ, бцⷣꙋ всѝ воспои́мъ.

И҆́нъ. І҆рмо́съ:

Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.

Претерпѣ́вше мꙋ̑ки, и҆ сокрꙋше́нїе тѣ́ла разли́чными (с. 20) ѻ҆́бразы, раздробле́нїе же ᲂу҆де́съ и҆ ѡ҆пале́нїе, небє́снаѧ селє́нїѧ наслѣ́довасте, насла́ждшесѧ дре́ва жи́зни, досточꙋ́днїи.

Дѣви́цъ блаже́нныхъ по́двигꙋ ᲂу҆диви́шасѧ небє́сныѧ си̑лы, ꙗ҆́кѡ врага̀ побѣди́ша въ же́нстѣмъ є҆стествѣ̀, ᲂу҆крѣплѧ́еми си́лою ѿ жены̀ возсїѧ́вшагѡ.

Ѿве́ргше мі́ра сꙋетꙋ̀ всю̀, бг҃ꙋ є҆ди́номꙋ все́ю дꙋше́ю прилѣпи́стесѧ. тѣ́мъ воздержа́нїѧ болѣ̑зни, и҆ страда̑нїѧ претерпѣ́сте, невѣ̑сты хрⷭ҇тѡ́вы терпѣли́вїи.

Прекрѣ́пкое ꙗ҆́кѡ ѻ҆рꙋ́жїе, крⷭ҇тъ ѡ҆бносѧ́ще, къ сопоста̑тнымъ противоста́сте ѡ҆полче́нїємъ, со хрⷭ҇то́мъ же побѣ́дꙋ ѿнесо́сте, побѣди́вшимъ мі́ръ си́лою бжⷭ҇тва̀.

Бг҃оро́диченъ:

Сни́де ꙗ҆́кѡ до́ждь на рꙋно̀, во ᲂу҆тро́бꙋ твою̀, бг҃оглаго́ливый дре́вле речѐ прⷪ҇ро́къ, всенепоро́чнаѧ: є҆го́же во двꙋ̀ сꙋщєствꙋ̀ родила̀ є҆сѝ. є҆мꙋ́же взыва́емъ: сла́ва, хрⷭ҇тѐ, си́лѣ твое́й.

И҆́нъ. І҆рмо́съ:

Оу҆слы́шахъ, гдⷭ҇и, слꙋ́хъ тво́й, и҆ ᲂу҆боѧ́хсѧ, разꙋмѣ́хъ дѣла̀ твоѧ̑, и҆ просла́вихъ держа́вꙋ твою̀, гдⷭ҇и.

Не на песцѣ̀, преблаже́нне, но на глꙋбоча́йшихъ трꙋдѣ́хъ твои́хъ положи́въ ѡ҆снова́нїе воздержа́нїѧ, добродѣ́телей созда́лъ є҆сѝ сто́лпъ непоколеби́мъ.

Всели́въ тѣ́ло твоѐ въ жили́ще же́стоко, стра́хомъ пригвозди́лъ є҆сѝ дꙋ́ха, и҆ жили́ще наслѣ́дїѧ бжⷭ҇твеннагѡ ѡ҆брѣ́лъ є҆сѝ, прпⷣбне.

Оу҆кроти́лъ є҆сѝ тѣлє́сныѧ сокровє́нныѧ стра̑сти, пребога́те, въ гноѝ лежѧ̀ черве́й, ѻ҆́ч҃е, благово́нїе ѡ҆брѣ́лъ є҆сѝ.

По стра́сти во́льнѣй, жизнотвори́вомꙋ мертвецꙋ̀ подо́бѧсѧ, ꙗ҆́коже гро́бꙋ, ро́вꙋ те́мномꙋ са́мъ себѐ жи́ва пре́далъ є҆сѝ.

Бг҃оро́диченъ:

Бг҃а, є҆го́же родила̀ є҆сѝ пречⷭ҇таѧ марі́е, молѝ всегда̀ рабѡ́мъ твои̑мъ дарова́ти согрѣше́нїй проще́нїе.

Катава́сїа:

Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̀, и҆ просла́вихъ твоѐ бж҃ество̀.

Пѣ́снь є҃. І҆рмо́съ:

Ѿ но́щи ᲂу҆́тренююще пое́мъ тѧ̀ хрⷭ҇тѐ, ѻ҆ц҃ꙋ̀ собезнача́льна, и҆ сп҃са дꙋ́шъ на́шихъ, ми́ръ мі́рови пода́ждь, чл҃вѣколю́бче.

И҆сполнѧ́ѧй всѧ́чєскаѧ бл҃гости, хрⷭ҇тѐ, ты̀ благорастворе́нїемъ и҆ благопло́дїемъ, бл҃гослове́ньми вѣнча́емо, многокрꙋ́жное лѣ́то рабѡ́мъ твои̑мъ да́рꙋй.

Лѣ́тное воздаѧ́нїе покажѝ на́мъ, преложе́нїе къ лꙋ́чшымъ: ми́рное же ᲂу҆строе́нїе вѣ́дꙋщымъ тѧ̀, сло́ве бж҃їй, ᲂу҆подо́бльшасѧ человѣ́кѡмъ.

На зе́млю прише́лъ є҆сѝ, собезнача́льне ѻ҆ц҃ꙋ̀, плѣ́нникѡмъ ѿпꙋще́нїе, слѣпы̑мъ же прозрѣ́нїе ѿ ѻ҆ц҃а̀ возвѣща́ѧ, и҆ вре́мѧ прїѧ́тно.

Бг҃оро́диченъ:

На́ши надє́жды, бцⷣе чⷭ҇таѧ, и҆ на́ше жела́нїе на тѧ̀ возлага́емъ, ми́лостива на́мъ да́ждь дв҃о, є҆го́же родила̀ є҆сѝ.

И҆́нъ. І҆рмо́съ:

Нечести́вїи не ᲂу҆́зрѧтъ сла́вы твоеѧ̀, хрⷭ҇тѐ. но мы̀ тѧ̀, є҆диноро́дне, ѻ҆ч҃ескїѧ сла́вы сїѧ́нїе бжⷭ҇тва̀, ѿ но́щи ᲂу҆́тренююще, воспѣва́емъ тѧ̀, чл҃вѣколю́бче.

Ꙗ҆́кѡ а҆́гницы непорѡ́чныѧ, ꙗ҆́кѡ жє́ртвы прїѧ̑тныѧ, а҆́гнцꙋ и҆́стинномꙋ, и҆ па́стырю, мꙋ́чєницы, принесо́стесѧ, приношє́нїѧ всебога̑таѧ, и҆ прїѧ̑тна всесожжє́нїѧ.

Оу҆мерщвле́ни бы́вше тѣ́ломъ, ѡ҆жи́сте дꙋше́ю, ᲂу҆мертви́вшемꙋ крѣ́пость сме́рти, мꙋ́чєницы, ꙗ҆́кѡ ᲂу҆подо́бльшесѧ и҆ крестꙋ̀ и҆ сме́рти и҆ стрⷭ҇ти во́льнѣй.

Є҆ди́нъ ра́зꙋмъ и҆мꙋ́ще въ тѣлесѣ́хъ мно́гихъ, є҆ди́наго гдⷭ҇а і҆и҃са, разли́чными ра́нами стрꙋ́жеми, и҆ ѻ҆гне́мъ сожига́еми, и҆сповѣ́дахꙋ бг҃омꙋ̑дрыѧ.

Бг҃оро́диченъ:

Воздви́гни па́дша мѧ̀ въ ро́вѣ и҆скꙋше́нїй, и҆ ᲂу҆пра́ви, бг҃а ко́рмчїю ро́ждшаѧ, є҆ди́на всенепоро́чнаѧ, пе́рвѣе соедини́вшаго разстоѧ́щыѧсѧ, бл҃гостїю.

И҆́нъ. І҆рмо́съ:

Просвѣтѝ на́съ повелѣ̑нїи твои́ми гдⷭ҇и, и҆ мы́шцею твое́ю высо́кою, тво́й ми́ръ пода́ждь на́мъ, чл҃вѣколю́бче.

Но́ваго, данїи́ла сѷмеѡ́не, хрⷭ҇то́съ тѧ̀ показа̀, и҆зъ ро́ва бо ѕвѣ́рска тѧ̀ ꙗ҆вле́нїемъ неврежде́на возвратѝ.

Ве́сь са́мъ себѐ гдⷭ҇ꙋ возложи́въ, слотѣ̀, и҆ мра́зꙋ, и҆ зно́ю, проти́внымъ ѡ҆ѕлобле́нїемъ, ѡ҆бнажи́лсѧ є҆сѝ.

Но́вый мѡѷсе́й и҆ и҆лїа̀ показа́лсѧ є҆сѝ, є҆ди́нощи чре́зъ всю̀ четыредесѧ́тницꙋ пи́щꙋ прїе́млѧ, во все́й жи́зни твое́й, прпⷣбне.

Ꙗ҆́кѡ златоза́рнымъ, сѷмеѡ́не, мони́стомъ, преподо́бне, ᲂу҆́жемъ ѡ҆блага́емь, небоше́ственникъ показа́лсѧ є҆сѝ бжⷭ҇твенными кри́лы.

Бг҃оро́диченъ:

Молѝ при́снѡ сн҃а твоего̀ и҆ бг҃а на́шего, неискꙋсобра́чнаѧ марі́е чⷭ҇таѧ, низпосла́ти на́мъ вѣ̑рнымъ ве́лїю ми́лость.

Катава́сїа:

Ѽ треблаже́нное дре́во, на не́мже распѧ́сѧ хрⷭ҇то́съ, цр҃ь и҆ гдⷭ҇ь, и҆́мже падѐ, дре́вомъ прельсти́вый, тобо́ю прельсти́всѧ, бг҃ꙋ пригвозди́вшꙋсѧ пло́тїю, подаю́щемꙋ ми́ръ дꙋша́мъ на́шымъ.

Пѣ́снь ѕ҃. І҆рмо́съ:

Прⷪ҇ро́ка спа́слъ є҆сѝ ѿ ки́та, чл҃вѣколю́бче, и҆ менѐ и҆зъ глꙋбины̀ прегрѣше́нїй возведѝ, молю́сѧ.

Житїѐ нача́ти, благоꙋго́дно тебѣ̀, влⷣко, съ лѣ́тнымъ начина́нїемъ, на́съ сподо́би.

Дне́й дꙋхо́вныхъ, въ поꙋче́нїи зако́на твоегѡ̀, покажѝ и҆спо́лнены, ще́дре сп҃се, пою́щыѧ тѧ̀.

Бг҃оро́диченъ:

Ро́ждшаѧ гдⷭ҇а, бцⷣе всенепоро́чнаѧ, и҆зба́ви ѿ бѣ́дъ, вѣ́рою пою́щыѧ тѧ̀, пречⷭ҇таѧ.

И҆́нъ. І҆рмо́съ:

Возопѝ, проѡбразꙋ́ѧ погребе́нїе тридне́вное, прⷪ҇ро́къ і҆ѡ́на, въ ки́тѣ молѧ́сѧ: ѿ тлѝ и҆зба́ви мѧ̀, і҆и҃се цр҃ю̀ си́лъ.

Раздраже́на, и҆ нога́ми же́нскими попира́ема, зрѧ́щи прама́терь, бжⷭ҇твеннѣ ра́дꙋетсѧ, тꙋ́ю ле́стїю и҆зъ раѧ̀ пе́рвѣе и҆згна́вшаго.

Воздержа́нїемъ къ страда́нїю ᲂу҆се́рднѡ совокꙋ́пльшесѧ, женихꙋ̀ дꙋ́шъ ны́нѣ нетлѣ́ннѣ совокꙋпи́стесѧ, и҆ въ черто́зѣ бжⷭ҇твеннѣмъ, ра́достною дꙋше́ю водворѧ́етесѧ.

Возвыша́емаѧ мꙋ́къ свирѣ̑паѧ волнє́нїѧ, мꙋ́ченицъ корабле́й потопи́ти не возмого́ша: держа́вною бо рꙋко́ю къ бжⷭ҇твєннымъ приста́нищємъ достиго́ша.

Бг҃оро́диченъ:

Глаго́лѡвъ твои́хъ сбытїѧ̑ зрѧ́щи, возвели́чи наипа́че, бг҃ома́ти, тѧ̀ возвели́чившаго: ро́ди бо вси́ тѧ ны́нѣ, и҆́стиннѡ ᲂу҆блажа́ютъ.

И҆́нъ. І҆рмо́съ:

Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ, ꙗ҆́кѡ ри́зою, многомлⷭ҇тиве хрⷭ҇тѐ бж҃е на́шъ.

Зна́менїй и҆ чꙋде́съ тѧ̀ хрⷭ҇то́съ самодѣ́телѧ показа̀, бжⷭ҇твеннагѡ блаже́нне дѣ́йства, прїѧ́тнѡ жили́ще.

Возне́слъ є҆сѝ тѣ́ло твоѐ, сѷмеѡ́не, ꙗ҆́кѡ на кре́стъ на сто́лпъ. тѣ́мъ спросла́вилсѧ є҆сѝ, на дре́во тебє̀ ра́ди возне́сшемꙋсѧ хрⷭ҇тꙋ̀.

Вы́шнее ше́ствїе ѡ҆брѣ́тъ, сѷмеѡ́не чꙋ́дне, къ высотѣ̀ небе́снѣй пою́щыѧ тѧ̀ вѣ́рнѡ возведѝ.

Бг҃оро́диченъ:

Го́рꙋ, ю҆́же прови́дѣ данїи́лъ, и҆зъ неѧ́же несѣко́мый ка́мень вѣ́ры ѿсѣче́сѧ хрⷭ҇то́съ, тѧ̀ познава́емъ.

Катава́сїа:

Во́днагѡ ѕвѣ́рѧ во ᲂу҆тро́бѣ, дла̑ни і҆ѡ́на крⷭ҇тови́днѡ распросте́ръ, спаси́тельнꙋю стрⷭ҇ть проѡбража́ше ꙗ҆́вѣ. тѣ́мъ тридне́венъ и҆зше́дъ, премі́рное воскрⷭ҇нїе прописа́ше пло́тїю пригвожде́ннагѡ хрⷭ҇та̀ бг҃а, и҆ тридне́внымъ воскрⷭ҇нїемъ мі́ръ просвѣ́щшагѡ.

Конда́къ прпⷣбнагѡ сѷмеѡ́на, гла́съ в҃:

Вы́шнихъ и҆щѧ́й, вы̑шнимъ совокꙋплѧ́ѧйсѧ, и҆ колесни́цꙋ ѻ҆́гненнꙋю сто́лпъ содѣ́лавый: тѣ́мъ собесѣ́дникъ а҆́гг҃лѡмъ бы́лъ є҆сѝ, прпⷣбне, съ ни́ми хрⷭ҇тꙋ̀ бг҃ꙋ молѧ́сѧ непреста́ннѡ ѡ҆ всѣ́хъ на́съ.

І҆́косъ:

Сѷмеѡ́ново непоро́чное житїѐ, кі́й ѧ҆зы́къ человѣ́чь довлѣ́етъ когда̀ къ похвалѣ̀ и҆сповѣ́дати; ѻ҆ба́че воспою̀, бж҃їею мꙋ́дростїю, до́блѧгѡ сегѡ̀ и҆споли́на страда́нїе же и҆ по́двиги, ꙗ҆̀же на землѝ, ꙗ҆́кѡ свѣти́льника ꙗ҆́вльшасѧ, всѣ̑мъ человѣ́кѡмъ, мно́гимъ терпѣ́нїемъ, въ ли́цѣ а҆́гг҃льстѣмъ возсїѧ́вша. съ ни́ми бо поѧ̀ непреста́ннѡ хрⷭ҇тꙋ̀, воздержа́нїемъ чистотꙋ̀ стѧжа̀, молѧ́сѧ непреста́ннѡ ѡ҆ всѣ́хъ на́съ.

Пѣ́снь з҃. І҆рмо́съ:

Ѻ҆́троцы, благоче́стїю совоспи́тани, ѕлочести́вагѡ велѣ́нїѧ небре́гше, ѻ҆́гненнагѡ преще́нїѧ не ᲂу҆боѧ́шасѧ, но посредѝ пла́мене стоѧ́ще, поѧ́хꙋ: ѻ҆тцє́въ бж҃е, бл҃гослове́нъ є҆сѝ.

Начина́ющїи лѣ́то и҆ пѣ́сней нача́токъ сотворѧ́емъ ца́рствꙋющемꙋ хрⷭ҇тꙋ̀, црⷭ҇твомъ безконе́чнымъ, правосла́внїи лю́дїе, благоче́стнѡ пою́ще: ѻ҆тцє́въ бж҃е бл҃гослове́нъ є҆сѝ.

Сы́й пре́жде вѣ̑къ, на вѣ́къ же, и҆ є҆щѐ гдⷭ҇ь, воспѣва́ющымъ тѧ̀, хрⷭ҇тѐ, и҆сто́чникъ бла́гости, благи́хъ твои́хъ дарѡ́въ лѣ́то сїѐ и҆спо́лни: ѻ҆тцє́въ бж҃е, бл҃гослове́нъ є҆сѝ.

Бг҃оро́диченъ:

Ꙗ҆́кѡ рабѝ влⷣцѣ на моли́твꙋ, чⷭ҇тꙋю мт҃рь твою̀ тебѣ̀ предлага́емъ, хрⷭ҇тѐ, ѿ всѧ́кагѡ ѡ҆бстоѧ́нїѧ лю́ди твоѧ̑, бл҃же, и҆зба́вити, пою́щыѧ: ѻ҆тцє́въ бж҃е, бл҃гослове́нъ є҆сѝ.

И҆́нъ. І҆рмо́съ:

Спасы́й во ѻ҆гнѝ а҆враа̑мскїѧ твоѧ̑ ѻ҆́троки, и҆ халдє́и ᲂу҆би́въ, ꙗ҆̀же пра́вда пра́веднѡ ᲂу҆ловлѧ́ше: препѣ́тый гдⷭ҇и, бж҃е ѻ҆тє́цъ на́шихъ, бл҃гослове́нъ є҆сѝ.

Ко́ль непобѣди́мо твоѐ мꙋдрова́нїе, а҆ммꙋ́не бг҃оно́се: и҆́бо нача́льникъ ли́ка дѣ́въ, мꙋ́къ не ᲂу҆боѧ́лсѧ є҆сѝ, съ ни́ми скончева́ѧсѧ, ꙗ҆́кѡ дїа́конъ и҆ таи́нникъ бжⷭ҇твенныѧ сла́вы, пѣ́лъ є҆сѝ: препѣ́тый гдⷭ҇и бж҃е ѻ҆тє́цъ, бл҃гослове́нъ є҆сѝ.

Ꙗ҆́кѡ невѣстоводи́тель мꙋ́дръ, словесы̀ помазꙋ́еши мꙋ́жества, къ женихꙋ̀ взира́ти, и҆ плотскі̑ѧ терпѣ́ти болѣ̑зни, зовꙋ́щыѧ мꙋ́чєницы: препѣ́тый гдⷭ҇и бж҃е ѻ҆тє́цъ, бл҃гослове́нъ є҆сѝ.

Да не ѡ҆блѣни́мсѧ, сѐ ѿве́рзесѧ три́знище, ѻ҆трокови̑цы, ста́немъ мꙋ́жески: хрⷭ҇то́съ вѣнцы̀ простира́етъ, тѣ́ла на́шегѡ не пощади́мъ, вопїѧ́хꙋ до́блїи на три́знищи: препѣ́тый гдⷭ҇и бж҃е ѻ҆тє́цъ, бл҃гослове́нъ є҆сѝ.

Бг҃оро́диченъ:

Бл҃гослове́нъ пло́дъ бл҃гослове́ннагѡ чре́ва твоегѡ̀, є҆го́же благословѧ́тъ нбⷭ҇ныѧ си̑лы, и҆ человѣ́честїи собо́ри, на́съ и҆зба́вльшаго клѧ́твы дре́внїѧ, бл҃гослове́ннаѧ.

И҆́нъ. І҆рмо́съ:

Ѻ҆́троцы благочести́вїи въ вавѷлѡ́нѣ ѻ҆́бразꙋ злато́мꙋ не поклони́шасѧ, но посредѣ̀ пе́щи ѻ҆́гненныѧ ѡ҆роша́еми, пѣ́снь воспѣва́хꙋ глаго́люще: превозноси́мый ѻ҆тцє́въ и҆ на́шъ бж҃е, благослове́нъ є҆сѝ.

Разрѣши́лъ є҆сѝ ᲂу҆́бѡ сꙋхотꙋ̀ недоꙋмѣ́ющымсѧ, и҆ врата̀ тѣ̑мъ дождє́вныѧ ѿве́рзлъ є҆сѝ, и҆ зе́млю коле́блющꙋюсѧ моли́твами ᲂу҆ста́вилъ є҆сѝ, и҆ лю́ди зва́ти наꙋчи́лъ є҆сѝ: бл҃гослове́нъ бг҃ъ ѻ҆тцє́въ на́шихъ.

Ꙗ҆́кѡ велича́йшїй свѣти́льникъ цр҃ко́вный, и҆ многосвѣ́тлое, сѷмеѡ́не, со́лнце, всю́дꙋ лꙋчы̀ и҆спꙋща́ѧ, просвѣти́лъ є҆сѝ, и҆ лю́ди зва́ти наꙋчи́лъ є҆сѝ: бл҃гослове́нъ бг҃ъ ѻ҆тцє́въ на́шихъ.

Во́ды ѿвсю́дꙋ стеко́шасѧ, ᲂу҆го́дниче хрⷭ҇то́въ, чл҃вѣ́кѡвъ пꙋчи́на, во ѻ҆гра́дѣ твоегѡ̀ собра́сѧ воздержа́нїѧ ѿ тебє̀ вопи́ти наказꙋ́еми: бл҃гослове́нъ бг҃ъ ѻ҆тцє́въ на́шихъ.

Дре́вле ᲂу҆́бѡ ста́рца ѡ҆б̾ѧ̑тїи, скрижа́льми же твоегѡ̀ се́рдца, прпⷣбне, неви́димою си́лою, хрⷭ҇то́съ ᲂу҆поко́исѧ, сѷмеѡ́не. тѣ́мже взыва́лъ є҆сѝ: благослове́нъ бг҃ъ ѻ҆тцє́въ на́шихъ.

Бг҃оро́диченъ:

Подоба́ше безсѣ́меннѡ вопло́щшемꙋсѧ и҆зъ тебє̀ проитѝ, дв҃о чⷭ҇таѧ: ты́ бо ꙗ҆ви́ласѧ є҆сѝ чистото́ю всѣ́хъ пребо́льши. є҆мꙋ́же вопїю́ще пѣ́сньми зове́мъ: бл҃гослове́нъ бг҃ъ ѻ҆тцє́въ на́шихъ.

Катава́сїа:

Безꙋ́мное велѣ́нїе мꙋчи́телѧ ѕлочести́вагѡ лю́ди поколеба̀, ды́шꙋщее преще́нїе и҆ ѕлохꙋле́нїе бг҃оме́рзкое: ѻ҆ба́че трѝ ѻ҆́троки не ᲂу҆страшѝ ꙗ҆́рость ѕвѣ́рскаѧ, ни ѻ҆́гнь снѣда́ѧй, но противоды́шꙋщꙋ росоно́сномꙋ дꙋ́хꙋ, со ѻ҆гне́мъ сꙋ́ще поѧ́хꙋ: препѣ́тый ѻ҆тцє́въ и҆ на́съ бж҃е, бл҃гослове́нъ є҆сѝ.

Пѣ́снь и҃. І҆рмо́съ:

Пѣсносло́вцы въ пещѝ спа́сшаго дѣ́ти, и҆ громопла́меннꙋю прело́жшаго на ро́сꙋ, хрⷭ҇та̀ бг҃а по́йте, и҆ превозноси́те во всѧ̑ вѣ́ки.

Ꙗ҆́кѡ нача́льникꙋ спасе́нїѧ, хрⷭ҇тѐ, нача́токъ тебѣ̀ прино́ситъ лѣ́тный, честна́ѧ цр҃ковь зовꙋ́щи: по́йте и҆ превозноси́те хрⷭ҇та̀ во вѣ́ки.

И҆зъ не сꙋ́щихъ всѧ́чєскаѧ мꙋ́дрѣ ѡ҆бнови́вшаго созда́телѧ, и҆ производѧ́щаго време́нъ ѡ҆бращє́нїѧ хотѣ́нїемъ, по́йте и҆ превозноси́те є҆го̀ во вѣ́ки.

И҆зводѧ́щемꙋ всѧ́чєскаѧ бг҃ꙋ, и҆ времена̀ и҆змѣнѧ́ющемꙋ, на многоѻбра́зное человѣ́кѡвъ ᲂу҆правле́нїе, пое́мъ: хвали́те и҆ превозноси́те хрⷭ҇та̀ во вѣ́ки.

Бг҃оро́диченъ:

Бг҃ома́терь дв҃ꙋ чⷭ҇тꙋю, лѣ́тъ ѡ҆бхожде́ньми же и҆ ѡ҆браще́ньми, правосла́внѡ человѣ́честїи собо́ри, пое́мъ тѧ̀ ꙗ҆́кѡ бцⷣꙋ, и҆ всѣ́хъ спасе́нїе.

И҆́нъ. І҆рмо́съ:

Ѻ҆́троки благочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

Свѣ́тлы себѣ̀ ѿ крове́й ри̑зы мꙋ́ченическихъ ѡ҆бложи́сте, совле́кшесѧ и҆́стиннѡ тлѣ́емагѡ грѣха́ми человѣ́ка, и҆ воспѣва́юще: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

Ѻ҆би́льнагѡ свѣ́та свѣтоли́тїѧми, сл҃нца мы́сленнагѡ бжⷭ҇твенными свѣтлостьмѝ, мч҃нцы ѡ҆свѧща́еми, но́щь претеко́сте безбо́жїѧ, пою́ще є҆диномышле́нїемъ дꙋшѝ: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

Ꙗ҆́кѡ а҆́гницы, ꙗ҆́кѡ несквє́рныѧ ю҆́ницы, ꙗ҆́кѡ бжⷭ҇твєнныѧ голꙋби̑цы, ꙗ҆́кѡ самовѡ́льнаѧ заколє́нїѧ, приведо́стесѧ, мꙋ́чєницы, зижди́телю, и҆ ꙗ҆́кѡ жє́ртвы непоро́чны, согла́снѡ пою́ще: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

Повелѣ́нїемъ мꙋчи́телей пребеззако́нныхъ, непра́веднꙋю под̾ѧ́сте сме́рть, на ᲂу҆́ды ссѣца́еми, па́лицами сокрꙋша́еми, неми́лостивнѣ бїе́ми, ѻ҆гне́мъ всесожига́еми, мече́мъ посѣка́еми: тѣ́мъ безсмє́ртнаѧ прїѧ́сте съ ра́достїю бога̑тнаѧ воздаѧ̑нїѧ.

Бг҃оро́диченъ:

Во слѣ́дъ тебє̀ теко́ша жєны̀, мѵ́ра благово́ннаго вѣ́дꙋще, всечестна́ѧ бг҃оневѣ́сто, є҆ди́на неискꙋсобра́чнаѧ, и҆зъ ᲂу҆тро́бы твоеѧ̀ возсїѧ́вшаго є҆диноро́днаго сн҃а, и҆ съ тобо́ю црⷭ҇твꙋютъ и҆́стиннѡ, пѣсносло́вѧще хрⷭ҇та̀ во вѣ́ки. (с. 28)

И҆́нъ. І҆рмо́съ:

На горѣ̀ свѧтѣ́й просла́вльшасѧ, и҆ въ кꙋпинѣ̀ ѻ҆гне́мъ приснодв҃ы мѡѷсе́ови та́йнꙋ ꙗ҆́вльшаго, гдⷭ҇а по́йте, и҆ превозноси́те во всѧ̑ вѣ́ки.

Ѿ всѧ́кагѡ ѿлꙋчи́всѧ пристра́стїѧ, и҆ ма́терню не́мощь ᲂу҆ще́дривъ, ꙗ҆́кѡ живѣ́й ꙗ҆ви́лсѧ є҆сѝ по сме́рти, гдⷭ҇а по́йте, и҆ превозноси́те є҆го̀, вопїѧ̀, во вѣ́ки.

Ю҆́ношꙋ стѧ́гнꙋлъ є҆сѝ разсла́бленна, и҆ ѻ҆́дръ фѵ́лархꙋ повелѣва́еши на ра́мꙋ нестѝ свѧще́ннѣйше вопїѧ̀: гдⷭ҇а по́йте, и҆ превозноси́те є҆го̀ во всѧ̑ вѣ́ки.

Благослови́мъ ѻ҆ц҃а̀, и҆ сн҃а, и҆ ст҃а́гѡ дх҃а, гдⷭ҇а.

Оу҆ѧсни́вый і҆́ѡва стра́стїю, согни́вшїѧ пло́ти твоеѧ̀ гни́лость, въ би́серъ претворѝ многоцѣ́ненъ, тѧ̀ хрⷭ҇то́въ ᲂу҆го́дниче, сѷмеѡ́не, сла́вѧй во всѧ̑ вѣ́ки.

И҆ ны́нѣ, бг҃оро́диченъ:

Ѿ а҆́гг҃ла ра́дость прїе́мшꙋю, и҆ ро́ждшꙋю гдⷭ҇а сла́вы, и҆ свѣ́тъ мі́рꙋ возсїѧ́вшꙋю, вси́ тѧ пое́мъ, дв҃о бцⷣе, во всѧ̑ вѣ́ки.

Та́же:

Хва́лимъ, благослови́мъ, покланѧ́емсѧ гдⷭ҇еви, пою́ще и҆ превозносѧ́ще во всѧ̑ вѣ́ки.

Катава́сїа:

Благослови́те ѻ҆́троцы, трⷪ҇цы равночи́сленнїи, содѣ́телѧ ѻ҆ц҃а̀ бг҃а, по́йте снизше́дшее сло́во, и҆ ѻ҆́гнь въ ро́сꙋ претво́ршее, и҆ превозноси́те всѣ̑мъ жи́знь подава́ющаго, дх҃а всест҃а́го, во вѣ́ки.

І҆ере́й же покади́въ свѧтꙋ́ю трапе́зꙋ, возгласи́тъ: Бцⷣꙋ и҆ мт҃рь. свѣ́та въ пѣ́снехъ возвели́чимъ. И҆ покади́въ ст҃ы́й ѻ҆лта́рь, и҆ всю̀ цр҃ковь, и҆ бра́тїю, є҆́же повсегда̀ на ѳ҃-й пѣ́сни ᲂу҆́трени не ѡ҆ставлѧ́етсѧ. Мы́ же стїхологисꙋ́емъ ѳ҃-ю пѣ́снь пою́ще велегла́снѡ, на гла́съ ѕ҃: Вели́читъ дꙋша̀ моѧ̀ гдⷭ҇а: Припѣва́емъ же: Честнѣ́йшꙋю херꙋві̑мъ: (На ѳ҃-й бо пѣ́сни, ꙗ҆́кѡ а҆́ще нѣ́сть пра́здникъ гдⷭ҇ьскїй, то всегда̀, а҆́ще и҆ вели́кое славосло́вїе, и҆лѝ хра́мъ ст҃а́гѡ ко́егѡ бꙋ́детъ, стїхологисꙋ́емъ Честнѣ́йшꙋю).

Пѣ́снь ѳ҃. І҆рмо́съ:

Ѻ҆́бразъ чⷭ҇тагѡ ржⷭ҇тва̀ твоегѡ̀, ѻ҆гнепали́маѧ кꙋпина̀ показа̀ неѡпа́льнаѧ. и҆ ны́нѣ на на́съ напа́стей свирѣ́пѣющꙋю ᲂу҆гаси́ти мо́лимсѧ пе́щь. да тѧ̀, бцⷣе, непреста́ннѡ велича́емъ.

Сло́во бж҃їе, и҆ си́ла, и҆́стиннаѧ мꙋ́дрость и҆ ѵ҆поста́снаѧ, содержа́щаѧ и҆ пра́вѧщаѧ всѧ́чєскаѧ мꙋ́дрѣ, и҆ ны́нѣ наста́вшее рабѡ́мъ твои̑мъ вре́мѧ, во ᲂу҆стро́енїи ти́сѣ произведѝ.

Всѧ̑ дѣла̀ твоѧ̑, гдⷭ҇и: небеса̀, землѧ̀, свѣ́тъ, и҆ мо́ре: во́ды, и҆ всѝ и҆сто́чницы: со́лнце же, лꙋна̀, и҆ тма̀, ѕвѣ́зды, ѻ҆́гнь, человѣ́цы и҆ ско́ти, со а҆́гг҃лы восхвалѧ́ютъ тѧ̀.

Є҆ди́нъ є҆сѝ превѣ́чный, ꙗ҆́кѡ творе́цъ вѣкѡ́въ: и҆ ца́рствꙋющее трїѷпоста́сное є҆ди́но бжⷭ҇тво̀ нераздѣ́льное, мольба́ми чⷭ҇тыѧ бг҃ома́тере, лѣ́то плодоно́сно наслѣ́дїю твоемꙋ̀ покажѝ.

Бг҃оро́диченъ:

Сп҃се всегѡ̀, и҆ строи́телю и҆ зижди́телю и҆ вседержи́телю тва́ри, мольба́ми безсѣ́меннѡ ро́ждшїѧ тѧ̀, ми́ръ мі́рꙋ твоемꙋ̀ пода́ждь, соблюда́ѧ цр҃ковь всегда̀ немѧте́жнꙋ.

И҆́нъ. І҆рмо́съ:

Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же, дв҃о бцⷣе, прозѧбе́нїемъ чревоноше́нїѧ, мі́рови благослове́нїе процвѣла̀ є҆сѝ. тѣ́мъ тѧ̀ всѝ велича́емъ.

Подаю́тъ и҆сцѣле́нїй то́ки тре́бꙋющымъ, ꙗ҆́кѡ ѿ и҆сто́чника всеблаже́нныѧ: ᲂу҆ставлѧ́ютъ па́гꙋбꙋ недꙋ́гѡвъ, и҆ страсте́й ѿгонѧ́ютъ зно́й: сердца̀ бг҃олюби́выхъ напаѧ́ютъ къ благопло́дїю бжⷭ҇твенныхъ дѣѧ́нїй.

Бжⷭ҇твенный дїа́конъ а҆ммꙋ́нъ, келсі́на же, и҆ къ си̑мъ четы́редесѧть, бжⷭ҇твєнныѧ и҆ бг҃омꙋ̑дрыѧ жєны̀ пострада́вше зако́ннѡ вѣнча́шасѧ, и҆ ны́нѣ со а҆́гг҃лы ликꙋ́ютъ, ꙗ҆̀же по до́лгꙋ ᲂу҆блажа́емъ.

Вознесо́стесѧ держа́вꙋ на врагѝ взе́мше, и҆ а҆́гг҃лѡмъ (с. 30) ᲂу҆подо́бистесѧ, дре́ва наслажда́етесѧ невозбра́ннѡ жи́зненнагѡ въ раѝ бг҃оневѣ́сты, и҆сто́чникъ ны́нѣ до́брыхъ прїѧ́сте, ѡ҆ мі́рѣ молѧ́щесѧ.

Бг҃оро́диченъ:

Мꙋ́дрости вмѣсти́лище па́че ᲂу҆ма̀ лꙋ́чшагѡ ꙗ҆ви́ласѧ є҆сѝ, ѻ҆трокови́це непоро́чнаѧ, ѡ҆дꙋшевле́нъ престо́лъ же и҆ две́рь: тѣ́мъ ꙗ҆́кѡ цр҃и́цꙋ возлюби́ша дѣ̑вы тѧ̀ дв҃о, въ слѣ́дъ тебє̀ приведо́шасѧ, бг҃оѻтрокови́це.

И҆́нъ. І҆рмо́съ:

Проѧвле́нное на горѣ̀ законополо́жникꙋ во ѻ҆гнѝ и҆ кꙋпинѣ̀, ржⷭ҇тво̀ приснодв҃ы, въ на́ше вѣ́рныхъ спасе́нїе, пѣ́сньми немо́лчными велича́емъ.

Воцари́вшасѧ надъ страстьмѝ терпѣ́нїемъ, хрⷭ҇то́съ тѧ̀ прїѧ́тъ, сѷмеѡ́не бг҃оно́се, своемꙋ̀ ѻ҆́бщника ца́рствꙋ: тѣ́мъ тѧ̀ пѣ́сньми почита́емъ.

Цѣле́бнѣй благода́ти сподо́бивсѧ, ѿ некра́домыхъ дх҃а сокро́вищъ, бг҃оно́се сѷмеѡ́не, и҆сцѣлє́нїѧ подае́ши торжествꙋ́ющымъ па́мѧть твою̀.

Возше́дъ, преподо́бне, небе́снагѡ тече́нїѧ на добродѣ́тельный воздꙋ́хъ, страда́ньми препоѧ́санъ, возлетѣ́въ къ ски́нїѧмъ нбⷭ҇нымъ, молѝ спасти́сѧ дꙋша́мъ на́шымъ.

Бг҃оро́диченъ:

Кꙋпина̀ горѧ́щаѧ ѻ҆гне́мъ, и҆ неѡпалѧ́ема ꙗ҆ви́ласѧ є҆сѝ, влⷣчце, заче́нши безсѣ́меннѡ бг҃а и҆ сп҃са мі́ра, є҆го́же непреста́ннѡ велича́емъ.

Катава́сїа:

Та́инъ є҆сѝ, бцⷣе, ра́й, невоздѣ́ланнѡ возрасти́вшїй хрⷭ҇та̀, и҆́мже кре́стное живоно́сное на землѝ насади́сѧ дре́во. тѣ́мъ ны́нѣ возноси́мꙋ, покланѧ́ющесѧ є҆мꙋ̀, тѧ̀ велича́емъ.

Дрꙋгі́й:

Снѣ́дїю дре́ва, ро́дꙋ прибы́вшаѧ сме́рть, крⷭ҇то́мъ ᲂу҆праздни́сѧ дне́сь: и҆́бо прама́тернѧѧ всеро́днаѧ клѧ́тва разрꙋши́сѧ, прозѧбе́нїемъ чⷭ҇тыѧ бг҃ома́тере: ю҆́же всѧ̑ си̑лы нбⷭ҇ныѧ велича́ютъ.

Свѣти́ленъ і҆нді́кта. Подо́бенъ: Оу҆ченикѡ́мъ:

Бж҃е богѡ́въ и҆ гдⷭ҇и, трїѷпоста́сное є҆стество̀, непристꙋ́пне, присносꙋ́щне, несозда́нне, и҆ всѣ́хъ содѣ́телю вседержи́телю, тебѣ̀ припа́даемъ всѝ, и҆ тѧ̀ мо́лимъ: настоѧ́щее лѣ́то сїѐ ꙗ҆́кѡ бл҃гъ благослови́въ, сохранѝ въ ми́рѣ всѧ̑ лю́ди твоѧ̑, ще́дре.

Сла́ва, прпⷣбнагѡ, подо́бенъ то́йже:

Ꙗ҆́коже свѣти́ло, преподо́бне, свѣтоно́сное твоѐ житїѐ ѡ҆блиста́вшее просвѣтѝ подсо́лнечнꙋю всю̀ чꙋде́съ лꙋча́ми: столпо́мъ бо, ѻ҆́ч҃е, возше́лъ є҆сѝ, ꙗ҆́кѡ лѣ́ствицею къ бг҃ꙋ, и҆дѣ́же всѣ́хъ жела́нїй, сѷмеѡ́не, коне́чное и҆́стиннѡ воспрїѧ́тїе є҆́сть, ѡ҆ на́съ молѧ́сѧ, чествꙋ́ющихъ тѧ̀, бл҃же́нне.

И҆ ны́нѣ, і҆нді́кта, подо́бенъ то́йже:

Содѣ́телю и҆ прави́телю всеѧ̀ тва́ри сы́й, времена̀ и҆ лѣ̑та положи́въ въ твое́й вла́сти, лѣ́тнїй крꙋ́гъ, благослове́ньми, ще́дре, бла́гости вѣнча́й, въ ми́рѣ сохранѧ́ѧ твоѧ̑ лю́ди неврє́дны, и҆ цѣ̑лы, мо́лимсѧ, моли́твами ро́ждшїѧ тѧ̀, и҆ бжⷭ҇твенныхъ а҆́гг҃лъ.

На хвали́техъ стїхи̑ры самогла́сны і҆нді́кта, на д҃, гла́съ г҃. І҆ѡа́нна мона́ха:

Превѣ́чное сло́во ѻ҆́ч҃ее, и҆́же во ѻ҆́бразѣ бж҃їи сы́й, и҆ соста́вивый тва́рь и҆зъ не сꙋ́щагѡ во є҆́же бы́ти, времена̀ и҆ лѣ̑та въ свое́й вла́сти положи́вый, благословѝ вѣне́цъ лѣ́та бла́гости твоеѧ̀, да́рꙋѧ ми́ръ це́рквамъ твои̑мъ, и҆ побѣ̑ды правосла̑внымъ хрⷭ҇тїа́нѡмъ, благопло́дїе же землѝ, и҆ на́мъ ве́лїю ми́лость.

Гла́съ д҃, тогѡ́же:

Црⷭ҇твїе твоѐ, хрⷭ҇тѐ бж҃е, црⷭ҇тво всѣ́хъ вѣкѡ́въ, и҆ влады́чество твоѐ во всѧ́комъ ро́дѣ и҆ ро́дѣ: всѧ̑ бо мꙋ́дростїю сотвори́лъ є҆сѝ, времена̀ и҆ лѣ̑та на́мъ предложи́въ. тѣ́мже благодарѧ́ще ѡ҆ всѣ́хъ и҆ за всѧ̑ вопїе́мъ: благословѝ вѣне́цъ лѣ́та бла́гости твоеѧ̀, и҆ сподо́би на́съ неѡсꙋжде́ннѡ вопи́ти тебѣ̀: гдⷭ҇и, сла́ва тебѣ̀.

А҆ндре́а пѵ́рскагѡ:

Ше́ствїѧ твоѧ̑, бж҃е, шє́ствїѧ вє́лїѧ и҆ чꙋ̑дна: тѣ́мъ строе́нїѧ твоегѡ̀ си́лꙋ велича́емъ, ꙗ҆́кѡ свѣ́тъ ѿ свѣ́та прише́лъ є҆сѝ въ ѻ҆каѧ́нный мі́ръ тво́й, и҆ пе́рвꙋю погꙋби́лъ є҆сѝ клѧ́твꙋ ве́тхагѡ а҆да́ма, ꙗ҆́кѡ благоволи́лъ є҆сѝ, сло́ве, и҆ на́мъ, мꙋ́дростїю времена̀ и҆ лѣ̑та положи́лъ є҆сѝ, є҆́же сла́вити вседѣ́тельнꙋю твою̀ бла́гость: гдⷭ҇и, сла́ва тебѣ̀.

Ст҃ы́хъ же́нъ, гла́съ в҃. Ге́рманово:

Є҆гда̀ стра́стїю твое́ю, гдⷭ҇и, вселе́ннꙋю ᲂу҆тверди́лъ є҆сѝ, тогда̀ и҆ немощствꙋ́ющїи препоѧ́сашасѧ си́лою, жєны̀ мꙋ́жествоваша на горча́йшаго мꙋчи́телѧ, и҆ побѣжде́нїе ма́тернее и҆спра́вивше, па́ки въ сла́дости ра́йстѣй бы́ша, въ сла́вꙋ твою̀ ро́ждшагѡсѧ ѿ жены̀, и҆ спа́сшагѡ ро́дъ человѣ́ческїй.

Сла́ва, прпⷣбнагѡ, гла́съ то́йже:

Ѿ ко́рене блага́гѡ благі́й прозѧбѐ пло́дъ, и҆́же ѿ младе́нства свѧще́нный сѷмеѡ́нъ, благода́тїю па́че, не́же млеко́мъ воспита́нъ, и҆ на ка́мень тѣ́ло возвы́сивъ, къ бг҃ꙋ же превозвы́сивъ ра́зꙋмъ, небе́сное созда̀ добродѣ́тельми жили́ще: и҆ съ бжⷭ҇твенными си́лами лико́внѣ ше́ствꙋѧ, хрⷭ҇та̀ бы́сть жили́ще, бг҃а и҆ сп҃са дꙋ́шъ на́шихъ.

И҆ ны́нѣ, і҆нді́кта гла́съ и҃. Ге́рманово:

Неизрече́нною мꙋ́дростїю, соста́вивый всѧ́чєскаѧ, сло́ве хрⷭ҇тѐ бж҃е, времена̀ и҆ лѣ̑та на́мъ предложи́вый, дѣла̀ рꙋ́къ твои́хъ благословѝ, и҆ вѣ̑рныѧ лю́ди твоѧ̑ си́лою твое́ю возвеселѝ, подаѧ̀ є҆мꙋ̀ на ва́рвары крѣ́пость, ꙗ҆́кѡ є҆ди́нъ бл҃гъ и҆ чл҃вѣколю́бецъ.

Та́же Славосло́вїе вели́кое.

И҆ по трист҃о́мъ, тропа́рь і҆нді́кта: Сла́ва, ст҃а́гѡ: И҆ ны́нѣ, Ра́дꙋйсѧ ѡ҆бра́дованнаѧ: є҆ктєнїѝ, и҆ ѿпꙋ́стъ, и҆ ча́съ а҃-й. На а҃-мъ часѣ̀ тропа́рь і҆нді́кта: Сла́ва, ст҃а́гѡ: И҆ ны́нѣ, бг҃оро́диченъ часѡ́въ. По трист҃о́мъ, конда́къ і҆нді́кта, и҆ ст҃а́гѡ, глаго́лемъ премѣнѧ́юще. И҆ прѡ́чаѧ, и҆ соверше́нный ѿпꙋ́стъ.

На лїтꙋргі́и: бл҃жє́нна ѿ канѡ́на і҆нді́кта, пѣ́снь г҃- ѧ, на д҃, и҆ прпⷣбнагѡ, пѣ́снь ѕ҃-ѧ, на д҃. По вхо́дѣ тропа́рь, пре́жде і҆нді́кта, и҆ бцⷣы: Ра́дꙋйсѧ ѡ҆бра́дованнаѧ: и҆ прпⷣбнагѡ. Сла́ва, конда́къ ст҃а́гѡ: И҆ ны́нѣ, конда́къ і҆нді́кта (а҆́ще же хра́мъ бцⷣы: И҆ ны́нѣ, хра́ма бцⷣы: і҆нді́кта же конда́къ глаго́ли въ нача́лѣ). Прокі́менъ і҆нді́кта, гла́съ г҃: Ве́лїй гдⷭ҇ь на́шъ, и҆ ве́лїѧ крѣ́пость є҆гѡ̀, и҆ ра́зꙋма є҆гѡ̀ нѣ́сть числа̀. Сті́хъ: Хвали́те гдⷭ҇а, ꙗ҆́кѡ бла́гъ ѱало́мъ. И҆ прпⷣбнагѡ: прокі́менъ, гла́съ з҃: Честна̀ предъ гдⷭ҇емъ сме́рть прпⷣбныхъ є҆гѡ̀. А҆пⷭ҇лъ къ тїмоѳе́ю, зача́ло сп҃в: Ча́до тїмоѳе́е, молю̀ ᲂу҆́бѡ пре́жде: И҆ прпⷣбнагѡ къ колосса́ємъ, зача́ло сн҃и: Бра́тїе, ѡ҆блецы́тесѧ ᲂу҆́бѡ: А҆ллилꙋ́їа, гла́съ д҃: Тебѣ̀ подоба́етъ пѣ́снь, бж҃е, въ сїѡ́нѣ: Сті́хъ: Благослови́ши вѣне́цъ лѣ́та бла́гости твоеѧ̀, гдⷭ҇и. И҆ прпⷣбнагѡ: Блаже́нъ мꙋ́жъ, боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀. Є҆ѵⷢ҇лїе лꙋкѝ, зача́ло г҃і: Во вре́мѧ ѻ҆́но, вни́де і҆и҃съ въ назаре́тъ, и҆дѣ́же бѣ̀ воспита́нъ: И҆ прпⷣбнагѡ, матѳе́а, зача́ло м҃г: Всѧ̑ мнѣ̀ предана̑ сꙋ́ть: Прича́стенъ: Благослови́ши вѣне́цъ лѣ́та бла́гости твоеѧ̀, гдⷭ҇и: Дрꙋгі́й: Въ па́мѧть вѣ́чнꙋю: [Зрѝ] Дневны́й же а҆пⷭ҇лъ и҆ є҆ѵⷢ҇лїе вычита́емъ на предѝ.

🕅 Подоба́етъ вѣ́дати: А҆́ще прилꙋчи́тсѧ пе́рвый де́нь мѣ́сѧца септе́мврїа въ недѣ́лю, ѡ҆ставлѧ́етсѧ слꙋ́жба ст҃ы́хъ же́нъ, и҆ пое́тсѧ є҆гда̀ є҆кклисїа́рхъ разсꙋ́дитъ. Пое́тсѧ же воскрⷭ҇на слꙋ́жба со возслѣ́дованїемъ і҆нді́кта, и҆ прпⷣбнагѡ сѷмеѡ́на си́це:

На ма́лѣй вече́рни стїхи̑ры воскрⷭ҇ны, и҆ бцⷣы, по ѻ҆бы́чаю. Тропа́рь воскрⷭ҇нъ. Сла́ва, и҆ ны́нѣ, бг҃оро́диченъ.

На вели́цѣй вече́рни пое́мъ: Блаже́нъ мꙋ́жъ: каѳі́смꙋ всю̀. На Гдⷭ҇и, воззва́хъ: стїхи̑ры воскрⷭ҇ны г҃: и҆ ꙾восто́ченъ꙾ ¹ є҆ди́нъ: и҆ і҆нді́кта трѝ: и҆ ст҃а́гѡ трѝ: Сла́ва, і҆нді́кта, И҆ ны́нѣ, бг҃оро́диченъ гла́са. И҆ чте́нїй і҆нді́кта два̀: и҆ ст҃а́гѡ є҆ди́но. На лїті́и стїхи́ра хра́ма: и҆ і҆нді́кта стїхи̑ры стїхѡ́вныѧ. Сла́ва, ст҃а́гѡ: И҆ ны́нѣ, і҆нді́кта, пи́санъ на хвали́техъ. На стїхо́внѣ, стїхи̑ры воскрⷭ҇ны, по а҆лфави́тꙋ, съ припѣ́вы и҆́хъ. Сла́ва, ст҃а́гѡ: и҆ ны́нѣ, і҆нді́кта. На благослове́нїи хлѣ́бѡвъ, Бцⷣе дв҃о ра́дꙋйсѧ: два́жды, и҆ і҆нді́кта, є҆ди́ножды. И҆ чте́нїе въ посла́нїихъ а҆пⷭ҇льскихъ.

На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ, два́жды: Сла́ва, ст҃а́гѡ. И҆ ны́нѣ, і҆нді́кта. По каѳі́смахъ сѣда́льны воскрⷭ҇ны съ бг҃орѡ́дичны и҆́хъ, и҆ чте́нїе въ толкова́нїихъ є҆ѵⷢ҇льскихъ, є҆́же на рѧдꙋ̀. По непоро́чныхъ тропарѝ, и҆ ѵ҆пакоѝ, и҆ чте́нїе. Степє́нны, и҆ прокі́менъ гла́са, и҆ Всѧ́кое дыха́нїе: є҆ѵⷢ҇лїе воскрⷭ҇ное. Воскрⷭ҇нїе хрⷭ҇то́во: ѱало́мъ н҃. Стїхи́ра воскрⷭ҇на. Канѡ́нъ воскрⷭ҇нъ со і҆рмосо́мъ на д҃: и҆ бцⷣы на два̀: и҆ і҆нді́кта на д҃: и҆ ст҃а́гѡ на д҃. Катава́сїа: Крⷭ҇тъ начерта́въ: По г҃-й пѣ́сни, конда́къ і҆нді́кта, и҆ ст҃а́гѡ: и҆ сѣда́ленъ ст҃а́гѡ, два́жды. Сла́ва, и҆ ны́нѣ, і҆нді́кта. И҆ чте́нїе житїѧ̀ ст҃а́гѡ сѷмеѡ́на. По ѕ҃-й пѣ́сни, конда́къ воскрⷭ҇нъ, и҆ і҆́косъ. И҆ чте́мъ про́логъ. На ѳ҃-й пѣ́сни пое́мъ, Честнѣ́йшꙋю: Свѣти́ленъ воскрⷭ҇ный: Сла́ва, ст҃а́гѡ: И҆ ны́нѣ, і҆нді́кта. На хвали́техъ стїхи̑ры воскрⷭ҇ны д҃, и҆ і҆нді́кта трѝ, гла́съ г҃: Превѣ́чное сло́во: съ припѣ́вомъ і҆нді́кта. Та́же самогла́сенъ ст҃а́гѡ, гла́съ в҃, съ припѣ́вомъ: Честна̀ предъ гдⷭ҇емъ сме́рть прпⷣбныхъ є҆гѡ̀. Ѿ ко́рене блага́гѡ: Сла́ва, стїхи́ра є҆ѵⷢ҇льскаѧ: И҆ ны́нѣ, Пребл҃гослове́нна є҆сѝ: Славосло́вїе вели́кое. По трист҃о́мъ, тропа́рь воскрⷭ҇нъ то́чїю. Є҆ктєнїѝ. И҆ ѿпꙋ́стъ. И҆ ѡ҆глаше́нїе. И҆ ѻ҆бы́чное и҆схожде́нїе. И҆ ча́съ а҃, въ притво́рѣ. И҆ коне́чный ѿпꙋ́стъ. На часѣ́хъ, глаго́лемъ тропа́рь воскрⷭ҇нъ. Сла́ва, і҆нді́кта: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ: конда́къ і҆нді́кта. На г҃-мъ часѣ̀, тропа́рь воскрⷭ҇нъ. Сла́ва, ст҃а́гѡ: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ: конда́къ ст҃а́гѡ. Та́кожде и҆ на про́чихъ часѣ́хъ, конда́къ воскрⷭ҇нъ, и҆ і҆нді́кта, и҆ ст҃а́гѡ, глаго́лемъ премѣнѧ́юще.

На лїтꙋргі́и: бл҃жє́нна воскрⷭ҇на гла́са, на д҃: и҆ ѿ канѡ́на і҆нді́кта пѣ́снь г҃, на д҃: и҆ ст҃а́гѡ пѣ́снь ѕ҃, на д҃. По вхо́дѣ тропа́рь воскрⷭ҇нъ, и҆ і҆нді́кта, и҆ ст҃а́гѡ. Конда́къ воскрⷭ҇нъ: Сла́ва, ст҃а́гѡ: И҆ ны́нѣ, і҆нді́кта. Прокі́менъ, а҆пⷭ҇лъ, а҆ллилꙋ́їа, и҆ є҆ѵⷢ҇лїе, пре́жде і҆нді́кта, воскрⷭ҇но же подъ зача́ло: та́же, ст҃а́гѡ. Прича́стенъ і҆нді́кта: пото́мъ ст҃а́гѡ.