Мѣ́сѧца тогѡ́же въ к҃є-й де́нь. И҆́же во ст҃ы́хъ ѻ҆ц҃а̀ на́шегѡ григо́рїа, а҆рхїепⷭ҇копа кѡнстанті́нѧ гра́да, бг҃осло́ва.

И҆ пра́зднованїе прест҃ѣ́й бцⷣѣ, въ че́сть і҆кѡ́ны є҆ѧ̀ нарица́емыѧ ᲂу҆толѝ моѧ̑ пєча́ли.

Слꙋ́жба сїѧ̀ пи́сана въ приложе́нїи.

А҆́ще хо́щетъ настоѧ́тель, твори́мъ бдѣ́нїе.

На ма́лѣй вече́рни стїхи̑ры, гла́съ д҃. Подо́бенъ: Ꙗ҆́кѡ до́блѧ:

Бг҃осло́вными твои́ми ᲂу҆сты̀, ꙳ бг҃осло́ве григо́рїе, ꙳ бг҃осло́внымъ ѧ҆зы́комъ твои́мъ и҆з̾ѧви́лъ є҆сѝ ꙳ въ трⷪ҇цѣ пое́маго, ꙳ бг҃а є҆диносꙋ́щнаго, ꙳ ѻ҆ц҃а̀, и҆ сн҃а, и҆ дх҃а ст҃а́го. ꙳ и҆зсꙋши́лъ є҆сѝ бꙋ́йство є҆́ллинѡвъ и҆ лжꙋ̀, ꙳ и҆́стинꙋ проповѣ́дꙋѧ ꙳ бг҃овѣща́нными твои́ми глаго́лы.

И҆ ви́дъ тво́й че́стенъ, ꙳ и҆ зра́къ говѣ́инъ, ꙳ свѧще́нный григо́рїе. ꙳ сегѡ̀ ра́ди тѧ̀ ра́достными пѣснопѣ́ньми почита́емъ и҆ глаго́лемъ: ꙳ ра́дꙋйсѧ, ѕвѣздо̀ ᲂу҆́мнаѧ, ꙳ ѡ҆зарѧ́ющаѧ концы̀ свѣ́тлостїю ꙳ премꙋ́дрыхъ твои́хъ глаго́лѡвъ. ꙳ ра́дꙋйсѧ, трꙋбо̀, проповѣ́дающаѧ мі́рꙋ ꙳ і҆и҃сѡвы за́пѡвѣди.

Многогла́сный ѻ҆рга́нъ, ꙳ гꙋ́сль мꙋсїкі́йскꙋю настро́еннꙋю, ꙳ свирѣ́ль же и҆ цѣвни́цꙋ сладкоды́шꙋщꙋю, ꙳ і҆ера́рхѡвъ превысоча́йшаго, ꙳ вели́каго ᲂу҆чи́телѧ цр҃кве хрⷭ҇то́вы ꙳ да похва́лимъ, пою́ще: ꙳ ра́дꙋйсѧ, благода́ти бж҃е́ственныѧ глꙋбино̀, ꙳ ра́дꙋйсѧ, высото̀ нбⷭ҇ныхъ разꙋмѣ́нїй, ꙳ ѻ҆́ч҃е ѻ҆ц҃є́въ григо́рїе.

Пра́щею слове́съ твои́хъ ꙳ бж҃е́ственныхъ, бг҃одохнове́нне, ꙳ держа́внѡ, пресла́вне, порази́лъ є҆сѝ ꙳ ꙗ҆́коже во́лка а҆́рїа, ꙳ и҆ дале́че ѿгна́въ ѿ ста́да хрⷭ҇то́ва, ꙳ па́стырю всеизрѧ́днѣйшїй, ꙳ твоѧ̑ ѻ҆́вцы согрѣва́ѧ и҆ прохлажда́ѧ ꙳ ѕла́комъ трⷪ҇цы є҆диносꙋ́щныѧ. ꙳ сегѡ̀ ра́ди тѧ̀ почита́емъ, ꙳ па́стырю па́стырей григо́рїе.

Сла́ва, гла́съ ѕ҃:

І҆ера́рхѡвъ нача́льника, патрїа́рхѡвъ че́сть, таи́нника бг҃ови́дцєвъ, и҆ разꙋмѣ́нїй хрⷭ҇то́выхъ ᲂу҆ма̀ кра́йнѣйшаго, соше́дшесѧ, ѽ бг҃омꙋ́дрїи! дꙋхо́вными похвала́ми да похва́лимъ, глаго́люще: ра́дꙋйсѧ, бг҃осло́вїѧ и҆сто́чниче, премꙋ́дрости рѣко̀, и҆ стрꙋѧ̀ бжⷭ҇твеннагѡ ра́зꙋма. ра́дꙋйсѧ, ѕвѣздо̀ свѣтлѣ́йшаѧ, ꙗ҆́кѡ ве́сь мі́ръ ѡ҆зарѧ́еши твои́ми догма́ты. ра́дꙋйсѧ, благоче́стїѧ побо́рниче вели́кїй, и҆ нече́стїѧ прогони́телю до́блественный. Но, ѽ всемꙋ́дре бг҃осло́ве григо́рїе! не преста́й молѧ́сѧ хрⷭ҇тꙋ̀ бг҃ꙋ, ѡ҆ и҆̀же вѣ́рою и҆ любо́вїю соверша́ющихъ при́снѡ бг҃оꙋго́днꙋю и҆ честнꙋ́ю па́мѧть твою̀.

И҆ ны́нѣ, бг҃оро́диченъ: Бцⷣе, ты̀ є҆сѝ лоза̀:

На стїхо́внѣ, стїхи̑ры, гла́съ в҃. Подо́бенъ: До́ме є҆ѵфра́ѳовъ:

Дрꙋгі́й сы́нъ гро́мовъ ꙳ ꙗ҆ви́лсѧ є҆сѝ ꙳ ѿ промышле́нїѧ бж҃їѧ ꙳ и҆ бг҃осло́въ, григо́рїе, мі́рꙋ, ꙳ и҆ ᲂу҆чени́къ и҆ напе́рсникъ.

Сті́хъ: Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ.

Ꙗ҆́кѡ сїѧ́нїе мо́лнїи, ꙳ и҆зы́де твоѐ вѣща́нїе, ꙳ вѣ̑рныѧ ᲂу҆́бѡ ѡ҆зарѧ́ющее, ꙳ є҆ретїки́ же низлага́ющее, ꙳ громо́вными стрѣла́ми.

Сті́хъ: Оу҆ста̀ пра́веднагѡ поꙋча́тсѧ премꙋ́дрости, и҆ ѧ҆зы́къ є҆гѡ̀ возглаго́летъ сꙋ́дъ.

Оу҆́мъ тво́й ѻ҆гнесїѧ́ненъ, ꙳ и҆ пламенонѡ́сна ᲂу҆ста̀, ꙳ и҆́мже є҆реті́чествꙋющихъ, ꙳ григо́рїе, попалѧ́ютсѧ ꙳ безбѡ́жнаѧ ᲂу҆чє́нїѧ.

Сла́ва, гла́съ и҆ подо́бенъ то́йже:

Трⷪ҇цꙋ честнꙋ́ю, ꙳ ѻ҆ц҃а̀, сло́во, дх҃а, ꙳ бж҃е́ственный бг҃осло́въ ꙳ наꙋчѝ вѣ́ровати ꙳ є҆ди́наго бг҃а нераздѣ́льнаго.

И҆ ны́нѣ, бг҃оро́диченъ:

Є҆ди́нагѡ вседѣ́тельныѧ ꙳ трⷪ҇цы проповѣ́дꙋѧ, ꙳ и҆з̾ дв҃ы прозѧ́бшаго, ꙳ є҆ретїкѡ́въ загражда́еши, ꙳ григо́рїе, ᲂу҆ста̀.

Тропа́рь, гла́съ а҃:

Па́стырскаѧ свирѣ́ль бг҃осло́вїѧ твоегѡ̀ ри́торѡвъ побѣдѝ трꙋбы̑: ꙗ҆́коже бо глꙋбины̑ дх҃а и҆зыска́вшꙋ, и҆ добрѡ́ты вѣща́нїѧ приложи́шасѧ тебѣ̀. но молѝ хрⷭ҇та̀ бг҃а, ѻ҆́ч҃е григо́рїе, спасти́сѧ дꙋша́мъ на́шымъ.

Сла́ва, и҆ ны́нѣ, бг҃оро́диченъ: Гаврїи́лꙋ вѣща́вшꙋ:

На вели́цѣй вече́рни пое́мъ: Блаже́нъ мꙋ́жъ: а҃-й а҆нтїфѡ́нъ.

На Гдⷭ҇и, воззва́хъ, стїхи̑ры на и҃, гла́съ а҃. Поⷣ: Всехва́льнїи мч҃ницы:

Ѻ҆́ч҃е григо́рїе, ꙳ твои́хъ ᲂу҆сте́нъ ꙳ ни хода́тай забве́нїѧ гро́бъ затворѝ: ꙳ бг҃осло́вїѧ бо ꙗ҆ви́лсѧ є҆сѝ ᲂу҆ста̀, ꙳ бл҃гоче́стїѧ догма́ты ꙳ и҆ ны́нѣ вселе́ннѣй вѣща́ѧ. ꙳ тѣ́мже моли́сѧ, ꙳ дарова́ти дꙋша́мъ на́шымъ ꙳ ми́ръ и҆ ве́лїю млⷭ҇ть.

Ѻ҆́ч҃е григо́рїе, ꙳ мꙋ́дрѣ пло́ти ᲂу҆клони́лсѧ є҆сѝ ꙳ благопребыва́тельнагѡ и҆ навѣ́тнагѡ: на нб҃оте́чнꙋю же всѣ́дъ ꙳ четвероко́ннꙋю добродѣ́телей колесни́цꙋ, ꙳ впери́лсѧ є҆сѝ къ добро́тѣ неизрече́ннѣй. ꙳ є҆ѧ́же насыща́ѧсѧ, ꙳ ны́нѣ подае́ши дꙋша́мъ на́шымъ ꙳ ми́ръ и҆ ве́лїю ми́лость.

Ѻ҆́ч҃е григо́рїе, ꙳ бг҃ꙋ и҆ человѣ́кѡмъ ꙳ бы́лъ є҆сѝ вѣ́ренъ хода́тай благода́тїю: ꙳ и҆ ны́нѣ благоми́лостивна, ꙳ бл҃годерзнове́нными моли́твами ꙳ положи́въ на́мъ хрⷭ҇та̀, ꙳ не преста́й гдⷭ҇а молѧ̀, прпⷣбне, ꙳ дарова́ти дꙋша́мъ на́шымъ ꙳ ми́ръ и҆ ве́лїю млⷭ҇ть.

И҆́ны стїхи̑ры, гла́съ в҃. Подо́бенъ: Кі́ими похва́льными:

Прїиди́те сщ҃е́нными пѣ́сньми да восхва́лимъ бг҃оглаго́ливаго григо́рїа: ѻ҆́ко благода́ти, и҆ всемꙋ̑драѧ ᲂу҆ста̀ дх҃а ст҃а́гѡ, свѣ́тлаго свѣти́льника вселе́нныѧ, ве́лїе цр҃кве ѡ҆глаше́нїе, сла́вꙋ правосла́вїѧ, всечꙋ́днꙋю бг҃осло́вїѧ стрꙋю̀, бж҃е́ственныхъ догма́тѡвъ приснотекꙋ́щꙋю рѣкꙋ̀, и҆сто́чникъ всегда̀ кипѧ́щїй, нетлѣ́нїѧ бж҃е́ствєнныѧ во́ды.

Два́жды.

Любо́вїю дх҃о́вною дне́сь да воспои́мъ і҆ера́рха, а҆пⷭ҇лѡвъ є҆динонра́внаго, и҆ бл҃гоче́стїѧ побо́рника, бл҃гоглаго́ланїѧ наводне́нїе, пото́къ ᲂу҆чи́тельства ѕѣлѡ̀ сладча́йшїй, слове́съ высокоглаго́льныхъ тве́рдость, нб҃огрѡ́мнаѧ ᲂу҆ста̀, ѻ҆гнеды́шꙋщїй ѧ҆зы́къ, премꙋ́дрости сокро́вище, сло́ва проповѣ́дника, вѣ́рныхъ ᲂу҆добре́нїе.

Пѣ́сньми до́лжными всѝ да восхва́лимъ бг҃осло́ва, хрⷭ҇то́вы па́ствы стра́жа, ловца̀ волкѡ́въ и҆ всемꙋ́драго пле́велѡвъ любодѣ́йчищныхъ и҆сторга́телѧ, сѣ́ѧтелѧ же пра́выхъ догма́тѡвъ всечꙋ́днаго, ѿгони́телѧ є҆реті́чествꙋющихъ ѕѣлѡ̀ крѣпча́йшаго, возрасти́вшаго же и҆́стиннѡ бо́дростїю бжⷭ҇твенною хрⷭ҇тѡ́вы тала́нты, ꙗ҆́коже лѣ́по, и҆ мі́ръ просвѣти́вшаго ᲂу҆че́нїй бж҃е́ственными свѣтлостьмѝ.

Сла́ва, гла́съ и҃:

Бо́дрый ѧ҆зы́къ тво́й ко ᲂу҆че́нїю, во ᲂу҆шесѣ́хъ серде́чныхъ возглаша́ющїй, лѣни́выхъ дꙋ́шы возставлѧ́етъ: и҆ бг҃овѣща́нными глаго́лы лѣ́ствица ѡ҆брѣта́етсѧ, ѿ землѝ къ бг҃ꙋ возводѧ́щаѧ. тѣ́мже, григо́рїе бг҃осло́ве, не преста́й молѧ́сѧ хрⷭ҇тꙋ̀, ѿ бѣ́дъ спастѝ дꙋ́шы на́шѧ.

И҆ ны́нѣ, бг҃оро́диченъ: Цр҃ь нбⷭ҇ный:

Вхо́дъ. Прокі́менъ днѐ. И҆ чтє́нїѧ г҃. При́тчей чте́нїе.

[Глава̀ і҃] Па́мѧть пра́веднагѡ съ похвала́ми, и҆ бл҃гослове́нїе гдⷭ҇не на главѣ̀ є҆гѡ̀. Бл҃же́нъ человѣ́къ, и҆́же ѡ҆брѣ́те премꙋ́дрость, и҆ сме́ртенъ, и҆́же ᲂу҆вѣ́дѣ ра́зꙋмъ. [г҃] Лꙋ́чше бо сїю̀ кꙋпова́ти, не́жели зла́та и҆ сребра̀ сокрѡ́вища. Честнѣ́йшаѧ же є҆́сть ка́менїй многоцѣ́нныхъ, все́ же честно́е недосто́йно є҆ѧ̀ є҆́сть. Долгота́ бо дне́й, и҆ лѣ̑та живота̀ въ десни́цѣ є҆ѧ̀: въ шꙋ́ицѣ же є҆ѧ̀ бога́тство и҆ сла́ва. Ѿ ᲂу҆́стъ є҆ѧ̀ и҆схо́дитъ пра́вда, зако́нъ же и҆ ми́лость на ѧ҆зы́цѣ но́ситъ. [и҃] Послꙋ́шайте ᲂу҆́бѡ менє̀, ѽ ча̑да! честна̑ѧ бо рекꙋ̀, и҆ бл҃же́нъ человѣ́къ, и҆́же пꙋти̑ моѧ̑ сохрани́тъ: и҆схо́ди бо моѝ, и҆схо́ди живота̀, и҆ ᲂу҆готовлѧ́етсѧ хотѣ́нїе ѿ гдⷭ҇а. Сегѡ̀ ра́ди молю̀ ва́съ, и҆ предлага́ю мо́й гла́съ сыновѡ́мъ человѣ́чєскимъ: ꙗ҆́кѡ а҆́зъ премꙋ́дрость ᲂу҆стро́ихъ, совѣ́тъ и҆ ра́зꙋмъ и҆ смы́слъ а҆́зъ призва́хъ. мо́й совѣ́тъ и҆ ᲂу҆твержде́нїе, мо́й ра́зꙋмъ, моѧ́ же крѣ́пость. А҆́зъ менѐ лю́бѧщыѧ люблю̀, и҆́щꙋщїи же менє̀ ѡ҆брѧ́щꙋтъ бл҃года́ть. Разꙋмѣ́йте ᲂу҆́бѡ, неѕло́бивїи, кова́рство, ненака́заннїи же, прилага́йте сердца̀. Послꙋ́шайте менѐ и҆ па́ки, честна̑ѧ бо рекꙋ̀: и҆ ѿве́рзꙋ ѿ ᲂу҆сте́нъ пра̑ваѧ, ꙗ҆́кѡ и҆́стинѣ поꙋчи́тсѧ горта́нь мо́й, ме́рзски же предо мно́ю ᲂу҆стны̀ лжи̑выѧ. Съ пра́вдою всѝ глаго́лы ᲂу҆́стъ мои́хъ: ничто́же въ ни́хъ стро́потно, нижѐ развраще́нно. Всѧ̑ пра̑ва сꙋ́ть разꙋмѣва́ющымъ, и҆ прѡ́ста ѡ҆брѣта́ющымъ ра́зꙋмъ. Наꙋча́ю бо ва́съ и҆́стинѣ, да бꙋ́детъ ѡ҆ гдⷭ҇ѣ наде́жда ва́ша, и҆ и҆спо́лнитесѧ дх҃а.

Премꙋ́дрости соломѡ́новы чте́нїе.

[Глава̀ і҃] Оу҆ста̀ првⷣнагѡ ка́плютъ премꙋ́дрость: ᲂу҆стнѣ́ же мꙋже́й мꙋ́дрыхъ вѣ́дѧтъ бл҃года́ть. Оу҆ста̀ мꙋ́дрыхъ поꙋча́тсѧ премꙋ́дрости, пра́вда же и҆збавлѧ́етъ и҆̀хъ ѿ сме́рти. Сконча́вшꙋсѧ мꙋ́жꙋ пра́веднꙋ, не поги́бнетъ наде́жда. Сы́нъ бо пра́веденъ ражда́етсѧ въ живо́тъ, и҆ во бл҃ги́хъ свои́хъ пло́дъ пра́вды ѡ҆б̾и́метъ. Свѣ́тъ пра́вєднымъ всегда̀, и҆ ѿ гдⷭ҇а ѡ҆брѧ́щꙋтъ бл҃года́ть и҆ сла́вꙋ. ѧ҆зы́къ мꙋ́дрыхъ дѡ́браѧ свѣ́сть, и҆ въ се́рдцѣ и҆́хъ почі́етъ мꙋ́дрость. Лю́битъ гдⷭ҇ь преподѡ́бныѧ сердца̀, прїѧ́тни же є҆мꙋ̀ всѝ непоро́чнїи въ пꙋтѝ. [ѕ҃] Мꙋ́дрость гдⷭ҇нѧ просвѣща́етъ лицѐ разꙋ́мнагѡ. Постига́етъ бо жела́ющыѧ ю҆̀, пре́жде да́же разꙋмѣ́ти ю҆̀: и҆ ᲂу҆до́бь ᲂу҆́зритсѧ ѿ лю́бѧщихъ ю҆̀. Оу҆́треневавый къ не́й не ᲂу҆трꙋди́тсѧ, и҆ бдѧ́й (с. 547) є҆ѧ̀ ра́ди вско́рѣ безъ печа́ли бꙋ́детъ. Ꙗ҆́кѡ досто́йныхъ є҆ѧ̀ сама̀ ѡ҆бхо́дитъ и҆́щꙋщи, и҆ во стезѧ́хъ є҆ѧ̀ ꙗ҆влѧ́етсѧ и҆̀мъ благопрїе́мнѣ. Мꙋ́дрости никогда́же ѡ҆долѣ́етъ ѕло́ба. [и҃] Си́хъ ра́ди и҆ рачи́тель бы́хъ добро́ты є҆ѧ̀: и҆ возлюби́хъ ю҆̀, и҆ поиска́хъ ѿ ю҆́ности моеѧ̀: И҆ взыска́хъ невѣ́стꙋ привестѝ себѣ̀, ꙗ҆́кѡ всѣ́хъ влⷣка возлюбѝ ю҆̀. Таи́нница бо є҆́сть бж҃їѧ хи́трости, и҆ ѡ҆брѣта́тельница дѣ́лъ є҆гѡ̀. Трꙋды̀ є҆ѧ̀ сꙋ́ть добродѣ́тєли: цѣломꙋ́дрїю же и҆ ра́зꙋмꙋ та̀ ᲂу҆чи́тъ, пра́вдѣ и҆ мꙋ́жествꙋ, и҆́хже потре́бнѣе ничто́же є҆́сть въ житїѝ человѣ́кѡмъ. А҆́ще же и҆ мно́гагѡ и҆скꙋ́сства жела́етъ кто̀, вѣ́сть дрє́внѧѧ, и҆ бы́ти хотѧ̑щаѧ разсмо́тритъ. Свѣ́сть и҆зви̑тїѧ слове́съ, и҆ разрѣшє́нїѧ гада́нїй: зна́мєнїѧ и҆ чꙋдеса̀ проразꙋмѣ́етъ, и҆ сбытїѧ̑ време́нъ и҆ лѣ́тъ: и҆ всѣ̑мъ совѣ́тникъ є҆́сть бл҃гъ, ꙗ҆́кѡ безсме́ртїе є҆́сть въ не́й, и҆ бл҃госла́вїе во ѻ҆бще́нїи слове́съ є҆ѧ̀. Сегѡ̀ ра́ди бесѣ́довахъ ко гдⷭ҇ꙋ, и҆ помоли́хсѧ є҆мꙋ̀, и҆ рѣ́хъ ѿ всегѡ̀ се́рдца моегѡ̀: [ѳ҃] бж҃е ѻ҆ц҃є́въ и҆ гдⷭ҇и ми́лости, сотвори́вый всѧ̑ сло́вомъ твои́мъ, и҆ мꙋ́дростїю твое́ю ᲂу҆стро́ивый человѣ́ка, да владѣ́етъ бы́вшими ѡ҆ тебє̀ тварьмѝ, и҆ да ᲂу҆правлѧ́етъ мі́ръ въ преподо́бїи и҆ пра́вдѣ, да́ждь мѝ твои́хъ престо́лѡвъ присѣдѧ́щꙋю премꙋ́дрость, и҆ не ѿлꙋчѝ менє̀ ѿ ѻ҆́трѡкъ твои́хъ: ꙗ҆́кѡ а҆́зъ ра́бъ тво́й, и҆ сы́нъ рабы́ни твоеѧ̀. Послѝ ю҆̀ съ нб҃съ ѿ ст҃а́гѡ жили́ща твоегѡ̀, и҆ ѿ прⷭ҇то́ла сла́вы твоеѧ̀, да сꙋ́щи со мно́ю наꙋчи́тъ мѧ̀, что̀ бл҃гоꙋго́дно є҆́сть предъ тобо́ю: И҆ наста́витъ мѧ̀ въ ра́зꙋмъ, и҆ сохрани́тъ мѧ̀ въ сла́вѣ свое́й. Помышлє́нїѧ бо сме́ртныхъ всѧ̑ боѧзли̑ва, и҆ погрѣши́тєльна ᲂу҆мышлє́нїѧ и҆́хъ.

Премꙋ́дрости соломѡ́новы чте́нїе.

[Глава̀ д҃] Пра́ведникъ, а҆́ще пости́гнетъ сконча́тисѧ, въ поко́и бꙋ́детъ: ста́рость бо честна̀ немноголѣ́тна, нижѐ въ числѣ̀ лѣ́тъ и҆счита́етсѧ. Сѣди́на же є҆́сть мꙋ́дрость человѣ́кѡмъ: и҆ во́зрастъ ста́рости житїѐ нескве́рное. Благоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ, преста́вленъ бы́сть. Восхище́нъ бы́сть, да не ѕло́ба и҆змѣни́тъ ра́зꙋма є҆гѡ̀, и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: Оу҆го́дна бо бѣ̀ гдⷭ҇еви дꙋша̀ є҆гѡ̀: сегѡ̀ ра́ди потща́сѧ ѿ среды̀ лꙋка́вствїѧ. Лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ бл҃года́ть и҆ млⷭ҇ть въ преподо́бныхъ є҆гѡ̀, и҆ посѣще́нїе во и҆збра́нныхъ є҆гѡ̀.

На лїті́и стїхи́ра хра́ма.

Та́же стїхи̑ры ст҃а́гѡ, гла́съ д҃, самогла́сны. А҆нато́лїа:

Сло́вомъ бж҃їимъ ѿве́рзъ ᲂу҆ста̀ твоѧ̑, премꙋ́дрости привле́клъ є҆сѝ дх҃а, и҆ по́лнъ благода́ти бы́въ, бж҃е́ствєннаѧ возгремѣ́лъ є҆сѝ ᲂу҆чє́нїѧ, требл҃же́нне григо́рїе: и҆ а҆́гг҃льскимъ совокꙋ́пльсѧ си́ламъ, трⷪ҇ческїй проповѣ́далъ є҆сѝ свѣ́тъ и҆ нераздѣ́льный. тѣ́мже твои́ми ѡ҆сїѧ́вшесѧ бг҃оглагѡ́ланїи, трⷪ҇цѣ покланѧ́емсѧ, во є҆ди́номъ бж҃ествѣ̀ познава́емѣй, во спасе́нїе дꙋ́шъ на́шихъ.

Ѻ҆́гненнымъ ѧ҆зы́комъ твои́мъ бг҃оглаго́ливымъ, григо́рїе, бг҃обѡ́рнаѧ попали́лъ є҆сѝ є҆реті́чествꙋющихъ ѧ҆зыкобѡ́лїѧ: бж҃е́ствєннаѧ ꙗ҆́кѡ и҆́стиннѡ ꙗ҆ви́лсѧ є҆сѝ ᲂу҆ста̀, дх҃омъ возглагѡ́лавшаѧ вели̑чїѧ бж҃їѧ: и҆ писа́ньми воѡбрази́вшаѧ, сокровеннота́йныѧ трⷪ҇цы є҆диноси́льное сꙋщество̀: и҆ трисл҃нечнымъ свѣ́томъ просвѣти́въ земны́й мі́ръ, мо́лишисѧ непреста́ннѡ ѡ҆ дꙋша́хъ на́шихъ.

Сла́ва, гла́съ то́йже:

Бж҃е́ственными дѣѧ́ньми тѣ́ло съ дꙋше́ю зако́ннѡ ѡ҆чи́стивъ, бг҃осло́вїѧ предѣ́лы проше́лъ є҆сѝ, бж҃е́ствєннымъ тайнонаꙋча́ѧ, бг҃оѧвле́нне григо́рїе, и҆ въ незаходи́мый вше́дъ мра́къ, бг҃оначерта́нное прїѧ́лъ є҆сѝ законоположе́нїе, є҆диносꙋ́щнꙋю напи́санꙋ трⷪ҇цꙋ. Є҆́йже покланѧ́ющесѧ тобо́ю, воспѣва́юще, глаго́лемъ: въ трⷪ҇цѣ разꙋмѣва́емаѧ є҆ди́нице, поми́лꙋй на́съ.

И҆ ны́нѣ, бг҃оро́диченъ: При́зри на молє́нїѧ:

На стїхо́внѣ стїхи̑ры, гла́съ є҃. Подо́бенъ: Ра́дꙋйсѧ:

Ра́дꙋйсѧ, бг҃осло́вїѧ и҆сто́чниче, и҆ бг҃озрѣ́нїѧ высо́кагѡ ѻ҆би́тель: вы́шнюю бо глꙋбинꙋ̀, ѻ҆́ч҃е, съ благочести́вымъ по́мысломъ и҆спыта́въ, всѣ̑мъ ᲂу҆ѧсни́лъ є҆сѝ, въ трїе́хъ сл҃нцѣхъ є҆ди́но свѣ́та бы́ти растворе́нїе, соединѧ́емое то́ждествомъ бж҃ества̀. Трⷪ҇чествꙋемое же честны́ми ѵ҆поста́сьми, житїѧ̀ ᲂу҆́бѡ чистото́ю, и҆ слове́съ свѣ́тлостїю, чествова́ти наꙋча́ѧ трⷪ҇цꙋ всест҃ꙋ́ю, бг҃одохнове́нне: ѿ неѧ́же низпосла́ти дꙋша́мъ на́шымъ молѝ ве́лїю ми́лость.

Сті́хъ: Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ.

Заре́ю бг҃осло́вїѧ твоегѡ̀ є҆ресе́й темнонеи́стовство разрꙋши́лъ є҆сѝ: и҆сто́чникъ бо ѡ҆заре́нїй, бг҃очести́вымъ по́мысломъ, бг҃осло́ве, предвари́въ и҆ бг҃омꙋ́дрымъ, свѣ́тлостемъ сꙋ́щымъ ѿѻнꙋ́дꙋ подава́ємымъ, приѡбщи́лсѧ є҆сѝ. Просїѧ́теленъ бо тво́й ᲂу҆́мъ ꙗ҆́коже зерца́ло содѣ́лавый, трⷪ҇чный бжⷭ҇тва̀, ѻ҆́ч҃е, свѣ́тъ и҆ нераздѣ́льный, прїѧ́лъ є҆сѝ свѣтлѣ́йшїй, и҆ лꙋчꙋ̀ бога́тнѡ є҆ди́нственнꙋю вмѣсти́лъ є҆сѝ: ю҆́же ны́нѣ ᲂу҆молѝ, дꙋша́мъ на́шымъ дарова́ти ве́лїю ми́лость.

Сті́хъ: Оу҆ста̀ пра́веднагѡ поꙋча́тсѧ премꙋ́дрости, и҆ ѧ҆зы́къ є҆гѡ̀ возглаго́летъ сꙋ́дъ.

Ра́дꙋйсѧ, рѣко̀ бж҃їѧ, ꙗ҆́же при́снѡ полна̀ во́дъ бл҃года́ти, всѧ́къ веселѧ́щаѧ гра́дъ цр҃ѧ̀ хрⷭ҇та̀ бж҃е́ственными словесы̀ и҆ ᲂу҆че́ньми: сла́достный пото́къ, неисчерпа́емаѧ пꙋчи́на, догма́тѡвъ и҆звѣ́стный храни́тель зако́нный: теплѣ́йшїй трⷪ҇цы побо́рникъ, ѻ҆рга́нъ дх҃а ст҃а́гѡ, ᲂу҆́мъ бо́дрый, благогла́сный ѧ҆зы́къ, глꙋбинꙋ̀ писа́нїй сказꙋ́ющїй. хрⷭ҇та̀ ны́нѣ молѝ, дꙋша́мъ на́шымъ дарова́ти ве́лїю ми́лость.

Сла́ва, гла́съ и҃:

Сердца̀ вѣ́рныхъ земледѣ́лаѧ ѧ҆зы́комъ твои́мъ, григо́рїе, благоче́стїѧ въ ни́хъ присноцвѣтꙋ́щыѧ и҆зрасти́лъ є҆сѝ плоды̀ бг҃ꙋ, тернѡ́вныѧ є҆́рєси посѣка́ѧ и҆зъ ко́рене, и҆ ᲂу҆краша́ѧ смы́слы чистото́ю. тѣ́мже прїе́млѧ на́шѧ похвалы̑, бж҃е́ственнаѧ цѣвни́це, бо́дрое ѻ҆́ко, па́стырей па́стырь, волкѡ́въ лове́цъ: моли́сѧ прилѣ́жнѡ, бг҃осло́ве, сло́вꙋ ѡ҆ дꙋша́хъ на́шихъ.

И҆ ны́нѣ, бг҃оро́диченъ: Безневѣ́стнаѧ дв҃о:

На бл҃гослове́нїи хлѣ́бѡвъ, тропа́рь, гла́съ а҃: Па́стырскаѧ свирѣ́ль: Два́жды. Ли́стъ с҃ѻ, на ѡ҆боро́тѣ. и҆ Бцⷣе дв҃о: є҆ди́ножды.

На ᲂу҆́трени, на Бг҃ъ гдⷭ҇ь, тропа́рь ст҃а́гѡ, два́жды. Сла́ва, и҆ ны́нѣ, бг҃оро́диченъ: Гаврїи́лꙋ вѣща́вшꙋ:

По а҃-й стїхоло́гїи сѣда́ленъ, гла́съ г҃. Подо́бенъ: Бжⷭ҇твенныѧ вѣ́ры:

Бжⷭ҇твенное ѡ҆сїѧ́нїе наслѣ́дствовавъ, житїѐ невеще́ственно и҆з̾ѡбꙋчи́лъ є҆сѝ, є҆диноиме́ннымъ свѧще́нствомъ преизѧ́ществовавъ: преесте́ственнѡ бо ᲂу҆ѧсни́въ догма́ты, правосла́вїемъ вѣ́рꙋ ᲂу҆тверди́лъ є҆сѝ, ѻ҆́ч҃е преподо́бне, хрⷭ҇та̀ бг҃а молѝ, дарова́ти на́мъ ве́лїю млⷭ҇ть.

Сла́ва:

Сто́лпъ бы́лъ є҆сѝ цр҃кве, бога́тство некра́домо благоче́стїѧ ꙗ҆ви́лсѧ є҆сѝ, бг҃осло́ве григо́рїе, безстра́стїемъ ᲂу҆ѧсни́въ житїѐ твоѐ, и҆ трⷪ҇цы и҆з̾ѧсни́въ догма́ты. ѻ҆́ч҃е преподо́бне, хрⷭ҇та̀ бг҃а молѝ, дарова́ти на́мъ ве́лїю млⷭ҇ть.

И҆ ны́нѣ, бг҃оро́диченъ:

Бж҃е́ственнаѧ ски́нїѧ была̀ є҆сѝ сло́ва, є҆ди́на всечⷭ҇таѧ дв҃ома́ти, чистото́ю а҆́гг҃лы превозше́дшаѧ: па́че всѣ́хъ менѐ пе́рсть бы́вша, ѡ҆скверне́на плотски́ми прегрѣше́ньми, ѡ҆чи́сти мл҃твъ твои́хъ бжⷭ҇твенными вода́ми, подаю́щи, чⷭ҇таѧ, ве́лїю ми́лость.

По в҃-й стїхоло́гїи сѣда́ленъ, гла́съ є҃. Поⷣ: Собезнача́льное сло́во:

Бо́дрствовавъ сло́вомъ и҆́стины, трⷪ҇ческꙋю держа́вꙋ бг҃осло́вивъ, а҆́рїево ѕлоче́стїе и҆ пребеззако́нное ѕлосла́вїе низложи́въ, ꙗ҆́кѡ благоче́стїѧ до́блественникъ и҆ побо́рникъ, свѧти́телю, просвѣти́лъ є҆сѝ во тмѣ̀ невѣ́дѣнїѧ сѣдѧ́щыѧ.

Два́жды.

Сла́ва, и҆ ны́нѣ, бг҃оро́диченъ:

Дꙋшѝ моеѧ̀ стра̑сти многоболѣ́знєнныѧ, и҆ пло́ти моеѧ̀ недꙋ́ги вско́рѣ и҆сцѣлѝ, ᲂу҆ма̀ моегѡ̀ блꙋжє́нїѧ ᲂу҆ста́ви, всенепоро́чнаѧ, и҆ въ тишинѣ̀ помыслѡ́въ моли̑твы приноси́ти чи̑сты цр҃ю̀ всѧ́ческихъ сподо́би, бцⷣе, и҆ и҆спроси́ти прегрѣше́нїй ѡ҆ставле́нїе.

По полѷеле́и сѣда́ленъ, гла́съ и҃. Подо́бенъ: Премꙋ́дрости:

Ѡ҆блича́ѧ ле́сть ѕлочести́выхъ, писа̑нїѧ ѿверза́ѧ бг҃олѣ́пнѡ, посла́лъ є҆сѝ догма́ты, па́че ме́да наслажда́ющыѧ вѣ́рныхъ сердца̀, ꙗ҆́вѣ, досточꙋ́дне, трⷪ҇цѣ слꙋжи́ти во є҆ди́нствѣ бжⷭ҇тва̀: тѣ́мже сп҃са ѻ҆́бразъ на і҆кѡ́нѣ предста́вилъ є҆сѝ ѡ҆блобыза́ти, и҆мꙋществи́тельнѡ человѣ́чество, бг҃осло́ве григо́рїе. Молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти пра́зднꙋющымъ любо́вїю ст҃ꙋ́ю па́мѧть твою̀.

Два́жды.

Сла́ва, и҆ ны́нѣ, бг҃оро́диченъ:

Є҆гда̀ прїи́детъ сꙋди́ти всю̀ зе́млю всѣ́хъ влⷣка и҆ творе́цъ, ѻ҆вца́мъ мѧ̀ сопричтѝ десны̑мъ ѡ҆сꙋжде́ннаго: и҆ кромѣ́шнїѧ тмы̀, и҆ всѧ́кагѡ мꙋче́нїѧ, твоего̀ непотре́бнаго раба̀ и҆схи́ти, молю́сѧ. Да бл҃года́рнѡ велича́ю бога́тство твоеѧ̀ бл҃гости, бцⷣе всенепоро́чнаѧ, и҆ вопїю́ ти ра́дꙋѧсѧ: моли́сѧ хрⷭ҇тꙋ̀ бг҃ꙋ прегрѣше́нїй ѡ҆ставле́нїе да́ти мнѣ̀: тебе́ бо и҆́мамъ наде́ждꙋ ра́бъ тво́й.

И҆ чте́мъ ѿ житїѧ̀ ст҃а́гѡ. Степє́нна, а҃ а҆нтїфѡ́нъ д҃-гѡ гла́са. Прокі́менъ, гла́съ д҃: Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ. Сті́хъ: Оу҆слы́шите сїѧ̑, всѝ ꙗ҆зы́цы, внꙋши́те, всѝ живꙋ́щїи по вселе́ннѣй. Всѧ́кое дыха́нїе: Є҆ѵⷢ҇лїе і҆ѡа́нна, зача́ло л҃є, ѿ полꙋ̀.

По н҃-мъ ѱалмѣ̀ стїхи́ра, гла́съ ѕ҃:

Прпⷣбне треблаже́нне свѧтѣ́йшїй ѻ҆́ч҃е, па́стырю до́брый, и҆ началопа́стырѧ хрⷭ҇та̀ ᲂу҆ченичѐ, положи́вый дꙋ́шꙋ за ѻ҆́вцы, ты̀ и҆ ны́нѣ, всехва́льне бг҃осло́ве григо́рїе, просѝ моли́твами твои́ми, дарова́ти на́мъ ве́лїю ми́лость.

Канѡ́нъ прест҃ы́ѧ бцⷣы со і҆рмосо́мъ на ѕ҃: и҆ ст҃а́гѡ два̀, на и҃.

Канѡ́нъ бцⷣы.

Гла́съ и҃. Пѣ́снь а҃. І҆рмо́съ:

Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.

Пречи́стаѧ бцⷣе, вопло́щшеесѧ присносꙋ́щное и҆ пребж҃е́ственное сло́во па́че є҆стества̀ ро́ждшаѧ, пое́мъ тѧ̀.

Гро́здъ тѧ̀ живоно́сенъ, всемі́рнагѡ и҆ска́пающь сла́дость спасе́нїѧ, дв҃а хрⷭ҇тѐ родѝ.

Ро́дъ а҆да́мль къ сꙋ́щемꙋ па́че ᲂу҆ма̀ бл҃же́нствꙋ тобо́ю возведе́нный, бцⷣе, досто́йнѡ сла́витъ тѧ̀.

Та́же канѡ́нъ ст҃а́гѡ, є҆гѡ́же краегране́сїе:

Бг҃оглаго́ливаго григо́рїа приснопа́мѧтнаго пою̀.

Творе́нїе Ѳеофа́ново.

Гла́съ а҃. Пѣ́снь а҃. І҆рмо́съ:

Хрⷭ҇то́съ ражда́етсѧ, сла́вите. хрⷭ҇то́съ съ нб҃съ, срѧ́щите. хрⷭ҇то́съ на землѝ, возноси́тесѧ. по́йте гдⷭ҇еви, всѧ̀ землѧ̀, и҆ весе́лїемъ воспо́йте, лю́дїе, ꙗ҆́кѡ просла́висѧ.

Бг҃осло́ва втора́го, столпа̀ свѣ́та нбⷭ҇нагѡ, мꙋ́дрости бж҃їѧ трꙋбꙋ̀, прїиди́те, сегѡ̀ слове́съ рачи́телїе, любо́вїю соше́дшесѧ, восхва́лимъ того̀, ꙗ҆́кѡ бг҃опроповѣ́дника.

Сло́во ѻ҆́ч҃ее безнача́льное, всѣ́хъ ꙗ҆́кѡ бг҃ъ промы́сленникъ, промысли́тельною си́лою, тѧ̀, бл҃же́нне, це́ркви ꙗ҆́коже мт҃ри, сло́вомъ и҆ мꙋ́дростїю ѡ҆благодати́въ тво́й ᲂу҆́мъ, да́ръ да́рꙋетъ.

Оу҆́мъ влⷣкꙋ творѧ̀, стра̑сти плотскі̑ѧ ᲂу҆держа́лъ є҆сѝ, и҆ вмѣсти́теленъ бы́въ бж҃е́ственныхъ ѡ҆заре́нїй, є҆ди́наго бг҃а въ трїе́хъ ли́цѣхъ просвѣти́лъ є҆сѝ ны̀ че́ствовати, григо́рїе.

Бг҃оро́диченъ:

Бж҃їѧ мꙋ́дрость хра́мъ себѣ̀ созда̀, въ твое́й всенепоро́чнѣй ᲂу҆тро́бѣ всели́вшисѧ, бл҃года́тнаѧ, и҆ па́че ᲂу҆ма̀ семꙋ̀ соедини́вшисѧ по ѵ҆поста́си, чⷭ҇таѧ, ꙗ҆ви́сѧ ꙗ҆́кѡ чл҃вѣ́къ.

И҆́нъ канѡ́нъ, творе́нїе космы̀ мона́ха.

Гла́съ то́йже. Пѣ́снь а҃. І҆рмо́съ:

Похвалꙋ̀ бг҃ови́децъ мѡѷсе́й і҆и҃лю предвозглаша́етъ, начина́етъ же марїа́мъ премꙋ̑дрымъ жена́мъ пѣ́снь побѣ́днꙋю: и҆зба́вителю бг҃ꙋ всѝ воспои́мъ.

И҆зба́вꙋ началоро́днагѡ, ѡ҆ на́шихъ же страсте́хъ кро́вь бг҃ото́чнꙋю, ста́лъ є҆сѝ въ же́ртвꙋ приносѧ̀: и҆ ны́нѣ вѣ̑рнымъ, григо́рїе всемꙋ́дре, бг҃а пода́ждь на́мъ ᲂу҆добопримири́тельна.

Скрижа̑ли бг҃оначерта̑нныѧ, во мра́къ мѡѷсе́й вше́дъ, прїѧ́тъ нѣ́когда: ты́ же во ᲂу҆мѣ̀ поста́вивъ бг҃опрїѧ́тнꙋю трапе́зꙋ, прилѣ́жнѡ бг҃а ᲂу҆моли́лъ є҆сѝ.

Бг҃оро́диченъ:

Хотѧ̀ за благоꙋтро́бїе своѐ ѿ сме́рти и҆ тлѝ па́ки воззва́ти є҆стество̀ человѣ́ческое пребжⷭ҇твенный, дв҃о всенепоро́чнаѧ, въ чⷭ҇тꙋю ᲂу҆тро́бꙋ твою̀ всели́сѧ.

Катава́сїа: Сꙋ́шꙋ глꙋбороди́тельнꙋю зе́млю:

Пѣ́снь г҃. І҆рмо́съ:

Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.

Да́ждь на́мъ по́мощь твои́ми моли́твами, всечⷭ҇таѧ, прило́ги ѿража́ющи лю́тыхъ ѡ҆бстоѧ́нїй.

Є҆́ѵы прама́тере ты̀ и҆справле́нїе была̀ є҆сѝ, нача́льника жи́зни, мі́рꙋ хрⷭ҇та̀, бцⷣе, ро́ждши.

Препоѧ́ши мѧ̀ си́лою, всечⷭ҇таѧ, ꙗ҆́же и҆́стиннѡ бг҃а ро́ждши пло́тїю, ѻ҆́ч҃ꙋю ѵ҆поста́снꙋю си́лꙋ.

И҆́нъ. І҆рмо́съ:

Пре́жде вѣ̑къ ѿ ѻ҆ц҃а̀ рожде́нномꙋ нетлѣ́ннѡ сн҃ꙋ, и҆ въ послѣ̑днѧѧ ѿ дв҃ы воплоще́нномꙋ безсѣ́меннѡ, хрⷭ҇тꙋ̀ бг҃ꙋ возопїи́мъ: вознесы́й ро́гъ на́шъ, ст҃ъ є҆сѝ, гдⷭ҇и.

И҆мѣ́ѧ премꙋ́дрости и҆сто́чникъ, непреста́ннѡ и҆сточа́ющь твои́хъ всемꙋ́дрыхъ ᲂу҆че́нїй, хрⷭ҇то́вꙋ цр҃ковь, всебл҃же́нне, и҆спо́лнилъ є҆сѝ, над̾ всѣ́ми вопїю́щꙋю бг҃ꙋ: ст҃ъ є҆сѝ, гдⷭ҇и.

Бл҃гоче́стїѧ велегла́сенъ проповѣ́дникъ, и҆ бл҃гознамени́тъ, бг҃осло́вїѧ бг҃осло́въ, сокро́вище бг҃овидѣ́нїѧ ѻ҆би́льнѡ предлага́етсѧ, и҆ раздае́тъ бога́тнѡ на́мъ бога́тство неѿе́млемо.

Ри́торъ ѻ҆гнедꙋхнове́нный, бг҃овѣща́ннаѧ цѣвни́ца бл҃года́ти, бг҃осло́внымъ вдохнове́нїемъ, и҆ вѣща́нїемъ бг҃одꙋхо́внымъ благознамени́тѣ возшꙋмѣ́въ, трїѷпоста́снагѡ сꙋщества̀ на́мъ пѣ́снь воспѣ̀.

Бг҃оро́диченъ:

Бг҃ороди́тельнице цр҃и́це всеѧ̀ тва́ри, цр҃ѧ̀ всѧ́ческихъ молѧ́щи не преста́й хрⷭ҇та̀, є҆го́же на́мъ родила̀ є҆сѝ на спасе́нїе сꙋ́щихъ на землѝ, спастѝ пою́щыѧ тѧ̀.

И҆́нъ. І҆рмо́съ:

Пре́жде зача́тїѧ честна́гѡ самꙋи́ла несомнѣ́ннѡ бг҃ꙋ ѡ҆бѣща́вши, сщ҃еннома́ти а҆́нна ны́нѣ ра́дꙋющисѧ пое́тъ съ на́ми: ᲂу҆тверди́сѧ въ гдⷭ҇ѣ се́рдце моѐ.

И҆́же пре́жде и҆зы́тїѧ и҆зъ ᲂу҆тро́бы ро́ждшей тѧ̀, бы́лъ є҆сѝ предвозвѣще́нъ, преподо́бне ѻ҆́ч҃е, пронарече́нїе носѧ̀ досто́йное, сщ҃еннонача́льниче премꙋ́дре, вседꙋ́шнѡ, ра́дꙋйсѧ, ѻ҆́ч҃е, тебѣ̀ зове́мъ.

И҆́же пре́жде да́же и҆зво́лити лꙋка̑ваѧ, сꙋпрꙋ́жницꙋ и҆ споспѣ́шницꙋ и҆збра́лъ є҆сѝ, и҆з̾ѧвле́ньми бж҃е́ственными, бг҃ови́днꙋю чистотꙋ̀ и҆ цѣломꙋ́дрїе, побо́рниче вѣ́рныхъ, веселѧ́щесѧ, ра́дꙋйсѧ, ѻ҆́ч҃е, тебѣ̀ зове́мъ.

Бг҃оро́диченъ:

Є҆́ѵы прама́тере и҆спра́вила є҆сѝ пре́жде бы́вшее поползнове́нїе, прїе́мши въ себѣ̀ низве́ржєнныѧ восправлѧ́ющее сло́во ѻ҆́ч҃ее, непобѣди́мою си́лою, мт҃и дв҃о.

Катава́сїа: Оу҆твержде́нїе на тѧ̀ надѣ́ющихсѧ:

Сѣда́ленъ, гла́съ и҃. Подо́бенъ: Премꙋ́дрости:

Ѿве́рзъ ᲂу҆ста̀ сло́вомъ бж҃їимъ, ѿры́гнꙋлъ є҆сѝ премꙋ́дрость, проповѣ́дниче свѣ́та, и҆ мꙋдрова́нїе бж҃е́ственное вселе́ннѣй всѣ́ѧлъ є҆сѝ: ѻ҆ц҃є́въ вои́стиннꙋ ᲂу҆тверди́лъ є҆сѝ догма́ты, по па́ѵлꙋ ꙗ҆ви́лсѧ є҆сѝ вѣ́ры побо́рникъ. Тѣ́мъ и҆ а҆́гг҃лѡвъ сограждани́нъ є҆сѝ, и҆ си́хъ собесѣ́дникъ ꙗ҆ви́всѧ, бл҃же́нне, бг҃осло́ве григо́рїе, молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти пра́зднꙋющымъ любо́вїю ст҃ꙋ́ю па́мѧть твою̀.

Два́жды.

Сла́ва, и҆ ны́нѣ, бг҃оро́диченъ:

Помышле́ньми попо́лзсѧ лꙋка́выми, во глꙋбинꙋ̀ впадо́хъ грѣхо́внꙋю, и҆ стенѧ̀ зовꙋ̀ тѝ ѿ се́рдца, всечⷭ҇таѧ: на мнѣ̀ ᲂу҆дивѝ бога́тꙋю ми́лость, и҆ твоегѡ̀ благоꙋтро́бїѧ безмѣ́рнꙋю пꙋчи́нꙋ, и҆ щедро́тъ твои́хъ неисчи́сленное бога́тство, и҆ да́ждь мѝ покаѧ́нїе и҆ прегрѣше́нїй проще́нїе, да любо́вїю зовꙋ̀ тебѣ̀: молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти мнѣ̀, тѧ́ бо наде́ждꙋ и҆мѣ́ю ра́бъ тво́й.

Пѣ́снь д҃. І҆рмо́съ:

Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀. (с. 556)

Кла́съ возрасти́вшаѧ животво́рный, неѡра́ннаѧ ни́во, подаю́щаго мі́рꙋ жи́знь, бцⷣе, спаса́й пою́щыѧ тѧ̀.

Бцⷣꙋ тѧ̀, всечⷭ҇таѧ, просвѣ́щшїисѧ всѝ зна́емъ: сл҃нце бо пра́вды родила̀ є҆сѝ, приснодв҃о.

Ѡ҆чище́нїе на́мъ да́рꙋй на́шихъ невѣ́дѣнїй, ꙗ҆́кѡ безгрѣ́шенъ: и҆ ᲂу҆мирѝ мі́ръ тво́й, бж҃е, моли́твами ро́ждшїѧ тѧ̀.

И҆́нъ. І҆рмо́съ:

Же́злъ и҆зъ ко́рене і҆ессе́ева, и҆ цвѣ́тъ ѿ негѡ̀, хрⷭ҇тѐ, ѿ дв҃ы прозѧ́блъ є҆сѝ, и҆зъ горы̀ хва́льный, приѡсѣне́нныѧ ча́щи, прише́лъ є҆сѝ вопло́щсѧ, ѿ неискꙋсомꙋ́жныѧ, невеще́ственный и҆ бж҃е, сла́ва си́лѣ твое́й, гдⷭ҇и.

Таи́нникъ трⷪ҇цы бы́въ, сеѧ̀ просвѣти́лъ є҆сѝ вселе́ннꙋю ра́зꙋмомъ, мꙋ́дре, догма́тѡвъ лꙋчѝ и҆зблиста́ѧ, прпⷣбне, твоегѡ̀ и҆звѣ́стнагѡ ᲂу҆чи́тельства: є҆мꙋ́же поꙋча́ющесѧ при́снѡ, всѝ бл҃гоче́стнѡ восхвалѧ́емъ тѧ̀.

Оу҆́тро бл҃гоче́стїѧ свѣ́тлое, зарю̀ трисо́лнечнꙋю въ себѐ прїе́мъ возсїѧ́лъ є҆сѝ, и҆ но́щь мра́чнꙋю ѕлочести́выхъ є҆ресе́й, заре́ю твои́хъ догма́тѡвъ мꙋ́дрыхъ ѿгна́лъ є҆сѝ, и҆ дꙋ́шы, ѻ҆́ч҃е, вѣ́рныхъ ᲂу҆ѧсни́лъ є҆сѝ.

Оу҆́мъ пресꙋ́щный, и҆сто́чникъ сло́ва и҆ дх҃а, и҆зъ присносꙋ́щнагѡ бг҃осло́внымъ гро́момъ, всеблаже́нне бг҃осло́вствꙋѧ, благоче́стнѡ наꙋчи́лъ є҆сѝ, семꙋ̀ ѿ негѡ̀ наꙋча́емь, ꙗ҆́кѡ пред̾ѡчи́стивъ тво́й ᲂу҆́мъ ве́щныхъ, ѻ҆́ч҃е, прїѧ́тїй.

Возше́лъ є҆сѝ на го́рꙋ добродѣ́телей, ѿ до́льнихъ пресели́всѧ, и҆ ме́ртвыхъ дѣ́лъ ѿстꙋпи́въ, и҆ скрижа̑ли рꙋко́ю бж҃їею напи̑санныѧ догма́ты твоегѡ̀ чⷭ҇тагѡ бг҃осло́вїѧ, прїѧ́лъ є҆сѝ, тайноводи́телѧ бжⷭ҇твенныхъ та́инствъ, григо́рїе.

Бг҃оро́диченъ:

Ра́зꙋмомъ па́дшаго а҆да́ма возста́вила є҆сѝ, всенепоро́чнаѧ, ѵ҆поста́снꙋю ро́ждши жи́знь, и҆з̾ ложе́снъ дѣви́ческихъ ѡ҆чище́нныхъ дх҃омъ: и҆ къ безстра́стнѣй и҆ бж҃е́ственнѣйшей и҆ нетлѣ́ннѣй пи́щи сего̀ возвела̀ є҆сѝ, влⷣчце.

И҆́нъ. І҆рмо́съ:

Съ чꙋ́днымъ ста́въ а҆ввакꙋ́момъ на бжⷭ҇твеннѣй твое́й стра́жи, григо́рїе, и҆ сꙋ́щаго на ра́мѣхъ херꙋві́мскихъ позна́въ, всемі́рнагѡ бы́лъ є҆сѝ возвѣсти́тель спасе́нїѧ, при́снѡ зовы́й: сла́ва си́лѣ твое́й, гдⷭ҇и.

Бли́зъ ꙗ҆влѧ́ющымсѧ, и҆ предъ бг҃омъ стоѧ́щымъ чинонача́лїємъ подо́бѧсѧ, всемꙋ́дре, ꙗ҆̀же вы́шше тѣ́хъ ᲂу҆мо́мъ ѡ҆блета́ѧ, во глꙋбинꙋ́ же не дости́глъ є҆сѝ превысоча́йшее стоѧ́нїе, ѿто́лѣ бога́тство носѧ̀ человѣ́кѡмъ неѿе́млемое.

Въ непостижи́мый вше́дъ мра́къ, и҆ ꙗ҆́кѡ и҆зъ пеще́ры ка́менны ᲂу҆зрѣ́въ за̑днѧѧ, срастворе́нное веще́ственное невеще́ственномꙋ є҆стествꙋ̀, и҆ несли́тнагѡ смѣше́нїѧ бы́лъ є҆сѝ сказа́тель, хрⷭ҇то́въ ᲂу҆го́дникъ, того̀ рабѡ́мъ є҆гѡ̀ ᲂу҆молѧ́етъ бы́ти ми́лостива.

Бг҃оро́диченъ:

Гора̀ показа́ласѧ є҆сѝ ты̀ мы́сленнаѧ, ѿ неѧ́же ѿсѣче́сѧ незрече́ннѡ честны́й ка́мень, и҆стнѧ́ѧ мра́чныѧ пре́лести ѻ҆́бразъ, и҆ просвѣще́нїемъ благода́ти ѡ҆зарѧ́ѧ, вѣ́рою при́снѡ вопїю́щыѧ: сла́ва си́лѣ твое́й, гдⷭ҇и.

Катава́сїа: Покры́ла є҆́сть небеса̀:

Пѣ́снь є҃. І҆рмо́съ:

Оу҆́тренююще вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ тебє̀ и҆но́гѡ не вѣ́мы.

Оу҆толѝ нестерпи́мꙋю бꙋ́рю страсте́й мои́хъ, ꙗ҆́же бг҃а ро́ждшаѧ, ко́рмчїю и҆ гдⷭ҇а.

Слꙋ́жатъ рождествꙋ̀ твоемꙋ̀, пречⷭ҇таѧ бцⷣе, а҆́гг҃льстїи чи́ни, и҆ человѣ́кѡвъ собо́ри.

Мр҃і́е бцⷣе безневѣ́стнаѧ, ᲂу҆пова̑нїѧ врагѡ́въ ѡ҆сꙋетѝ, а҆ пою́щыѧ тѧ̀ возвеселѝ.

И҆́нъ. І҆рмо́съ:

Бг҃ъ сы́й ми́ра, ѻ҆ц҃ъ щедро́тъ, вели́кагѡ совѣ́та твоегѡ̀ а҆́гг҃ла, ми́ръ подава́юща, посла́лъ є҆сѝ на́мъ: тѣ́мъ бг҃оразꙋ́мїѧ къ свѣ́тꙋ наста́вльшесѧ, ѿ но́щи ᲂу҆́тренююще, славосло́вимъ тѧ̀, чл҃вѣколю́бче.

Глагѡ́лъ твои́хъ бж҃е́ственное вѣща́нїе, и҆ догма́тѡвъ бл҃года́ть бжⷭ҇твеннаѧ, ꙗ҆́кѡ ско́рость мо́лнїи всю̀ ѡ҆бтечѐ зе́млю, трⷪ҇цѣ во є҆ди́ницѣ, є҆ди́ницѣ въ трⷪ҇цѣ, покланѧ́тисѧ, бг҃осло́ве, бг҃осло́вствꙋѧ и҆ наꙋча́ѧ на́съ.

Возжела́лъ є҆сѝ и҆́стиннѡ мꙋ́дрости бж҃їѧ, и҆ слове́съ добро́тꙋ возлюби́лъ є҆сѝ, и҆ всѣ́хъ предпочти́лъ є҆сѝ кра́сныхъ сꙋ́щихъ на землѝ: тѣ́мже тѧ̀ вѣнце́мъ, всебл҃же́нне, дарова́нїй благолѣ́пнѡ ᲂу҆красѝ, и҆ бг҃осло́ва содѣ́ла.

Разꙋ́мнѡ ты̀ сꙋ́щаго, ꙗ҆́кѡ дре́вле мѡѷсе́й, ви́дѣти, бг҃оглаго́ливе, вожделѣ́лъ є҆сѝ, и҆ сегѡ̀ за̑днѧѧ, ка́менемъ покры́всѧ, ви́дѣти сподо́билсѧ є҆сѝ: и҆ пꙋчи́ны наꙋчи́лсѧ є҆сѝ бж҃е́ственныѧ мꙋ́дрости, непости́жнѡ ꙗ҆влѧ́емыѧ.

Бг҃оро́диченъ:

И҆́же дре́вле є҆́ѵꙋ прама́терь твою̀ созда́вый, и҆зъ тебє̀ зи́ждетсѧ, тоѧ̀ ѡ҆сꙋжде́нїе и҆ преслꙋша́нїе ꙗ҆́вѣ и҆сцѣлѧ́ѧ, и҆ разрѣша́ѧ, ꙗ҆́кѡ ще́дръ и҆ влⷣка всѣ́хъ, бг҃ороди́тельнице мт҃и дв҃о.

И҆́нъ. І҆рмо́съ:

Оу҆́гль горѧ́щїй, и҆́же и҆са̑їинымъ ᲂу҆стнѡ́мъ серафі́мъ приложѝ нѣ́когда, клеще́ю взе́мъ, и҆ приложе́нъ: ѻ҆́нъ же ѡ҆чище́нъ, пра́вдѣ наꙋчи́тесѧ, всѣ̑мъ проповѣ́даше.

Всемꙋ̀ ѻ҆гню̀ бг҃овидѣ́нїѧ, всебл҃же́нне григо́рїе, пристꙋ́пль, чистото́ю ᲂу҆ма́ же и҆ дꙋшѝ, несы́тнѣ саморꙋ́чнѡ трисїѧ́нный поче́рплъ є҆сѝ свѣ́тъ равнови́дный.

Зарѧ́ми ѡ҆б̾ѧ́тъ трисо́лнечнагѡ ѡ҆заре́нїѧ, ѿ ѡ҆блиста́нїѧ же разжже́нъ, и҆ бжⷭ҇твенными лꙋча́ми ᲂу҆́мъ ѡ҆свѣща́ѧ, и҆ противосїѧ́тєльныѧ лꙋчѝ всѣ̑мъ и҆зблиста́лъ є҆сѝ.

Бг҃оро́диченъ:

Свѣ́тъ ѿ свѣ́та, ѻ҆́ч҃ее є҆диноро́дное сло́во безнача́льное прїе́мши, мт҃и дв҃о, две́рь свѣ́та ꙗ҆́вѣ была̀ є҆сѝ, пра́вды сл҃нце всѣ̑мъ возсїѧ́вши.

Катава́сїа: Ꙗ҆́кѡ ви́дѣ и҆са́їа:

Пѣ́снь ѕ҃. І҆рмо́съ:

Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ, ꙗ҆́кѡ ри́зою, многоми́лостиве хрⷭ҇тѐ бж҃е на́шъ.

Хра́мъ тѧ̀ бж҃їй и҆ ковче́гъ, и҆ черто́гъ ѡ҆дꙋшевле́нный, и҆ две́рь нбⷭ҇нꙋю, бцⷣе, вѣ́рнїи возвѣща́емъ.

І҆́дѡлѡвъ разрꙋши́тель ꙗ҆́кѡ бг҃ъ, бы́вшее ржⷭ҇тво̀ твоѐ, мр҃і́е бг҃оневѣ́сто, покланѧ́емо є҆́сть со ѻ҆ц҃е́мъ и҆ дх҃омъ.

Сло́во бж҃їе тѧ̀ земны̑мъ, бцⷣе, показа̀ нбⷭ҇нꙋю лѣ́ствицꙋ: тобо́ю бо къ на́мъ сни́де.

И҆́нъ. І҆рмо́съ:

И҆зъ ᲂу҆тро́бы і҆ѡ́нꙋ младе́нца и҆зблева̀ морскі́й ѕвѣ́рь, ꙗ҆кова̀ прїѧ́тъ: въ дв҃ꙋ же все́льшеесѧ сло́во, и҆ пло́ть прїе́мшее про́йде сохра́ншее нетлѣ́ннꙋ. Є҆гѡ́же во не пострада̀ и҆стлѣ́нїѧ, ро́ждшꙋю сохранѝ неврежде́ннꙋ.

Стрꙋѧ́ми мꙋ́дрыхъ ᲂу҆че́нїй твои́хъ, всемꙋ́дре, а҆́рїевъ ᲂу҆́мъ мꙋ́тнѣйшїй и҆зсꙋши́лъ є҆сѝ, въ тишинѣ̀ хранѧ̀ па́ствꙋ твою̀ непотопле́ннꙋ, ꙗ҆́коже слове́сный ковче́гъ: въ не́мже благоче́стїѧ сѣ́мена положи́лъ є҆сѝ, добро́тою слове́съ твои́хъ.

Да честны́ѧ трⷪ҇цы ѡ҆сїѧ́нїемъ ѡ҆богати́ши ᲂу҆́мъ, ѻ҆́ч҃е, ᲂу҆ѧсни́лъ є҆сѝ ꙗ҆́коже нескве́рное и҆ новоѡчище́нное зерца́ло, воздержа́нїемъ и҆зрѧ́днымъ содѣ́лавъ. тѣ́мже и҆ бг҃ови́днѣйшїй показа́лсѧ є҆сѝ бж҃е́ственными ꙗ҆вле́ньми.

Ве́сь сраствори́всѧ заре́ю дх҃а, бы́лъ є҆сѝ свѣти́льникъ, ѻ҆́ч҃е, всесвѣ́телъ, свѣ́тлостїю твои́хъ слове́съ просвѣща́ѧй концы̀, и҆ бг҃осло́вїѧ чистото́ю ᲂу҆краша́ѧй кра́сное торжество̀ вѣ́рныхъ, бг҃осло́ве григо́рїе.

Но́въ самꙋи́лъ бг҃ода́ненъ ꙗ҆ви́лсѧ є҆сѝ, да́нъ бг҃ꙋ, и҆ пре́жде зача́тїѧ, всеблаже́нне, цѣломꙋ́дрїемъ и҆ чистото́ю ᲂу҆краша́емь, и҆ сщ҃е́нства всест҃о́ю ѻ҆де́ждею, ѻ҆́ч҃е, ᲂу҆добре́нъ, хода́тайствꙋѧ зижди́телю и҆ зда́нїю.

Бг҃оро́диченъ:

Сви́токъ чи́стъ сло́во прїе́мый напи́санное, пре́жде неѡпи́санное бж҃ество́мъ, предзна́ласѧ є҆сѝ прⷪ҇ро́ки и҆ пе́рвѣе, мт҃и дв҃о мр҃і́е бг҃оневѣ́сто: ты́ бо неѡдержи́маго во ᲂу҆тро́бѣ твое́й несказа́ннѡ вмѣсти́ла є҆сѝ.

И҆́нъ. І҆рмо́съ:

И҆́же въ по́нтѣ под̾е́мый заключе́нїе, ᲂу҆бѣжа́нїемъ бꙋ́ри, и҆ верже́нїемъ жре́бїѧ, и҆ ᲂу҆сты̀ ꙗ҆́тъ бы́въ морска́гѡ ѕвѣ́рѧ невреди́мь пребы́въ, но вопїѧ́ше і҆ѡ́на: къ тебѣ̀ живо́тъ мо́й да взы́детъ, хрⷭ҇тѐ.

Потопле́нъ ра́зꙋмомъ не бы́въ, и҆ до дна̀ и҆спыта́въ глꙋбины̑ бж҃їѧ, и҆ ѿто́лѣ би́серъ поче́рплъ ты̀ влⷣцѣ: и҆ молча́нїе ꙗ҆́коже сло́во, григо́рїе, положи́лъ є҆сѝ всеизрѧ́днѣйше.

Моли́твою чи́стою свирѣ́пѣющеесѧ ᲂу҆ти́шилъ є҆сѝ мо́ре, и҆ стра́нныхъ ѡ҆плева́въ слове́съ слати́нꙋ, ³ ты̀ влⷣцѣ, ꙗ҆́кѡ нбⷭ҇наѧ ка́плѧ, лю́ди вѣ̑рныѧ и҆спра́вилъ є҆сѝ, григо́рїе.

Бг҃оро́диченъ:

Непости́жное человѣ́ческими пѡ́мыслы та́инство, мт҃и бж҃їѧ, неизрече́ннагѡ и҆ стра́шнагѡ рожде́нїѧ твоегѡ̀: ты́ бо дв҃о, всѣ́хъ творца̀ ро́ждши, дв҃а пребыла̀ є҆сѝ.

Катава́сїѧ: Возопѝ къ тебѣ̀:

Конда́къ, гла́съ г҃. Подо́бенъ: Дв҃а дне́сь:

Бг҃осло́внымъ ѧ҆зы́комъ твои́мъ сплетє́нїѧ ри́тѡрскаѧ разрꙋши́вый, сла́вне, правосла́вїѧ ѻ҆де́ждею свы́ше и҆стка́нною цр҃ковь ᲂу҆краси́лъ є҆сѝ: ю҆́же и҆ носѧ́щи съ на́ми зове́тъ твои́ми ча́ды, ра́дꙋйсѧ, ѻ҆́ч҃е, бг҃осло́вїѧ ᲂу҆́ме кра́йнѣйшїй.

І҆́косъ:

Ѿ бг҃осло́вныѧ и҆ высо́кїѧ мꙋ́дрости твоеѧ̀ и҆спо́лни мо́й ᲂу҆́мъ ᲂу҆бо́гїй и҆ стра́стный, ꙗ҆́кѡ да воспою̀ житїѐ твоѐ, ѻ҆́ч҃е: не могꙋ́ бо сло́ва принестѝ тебѣ̀, а҆́ще не ты̀ пода́си мѝ крѣ́пость сло́ва, и҆ ра́зꙋмъ и҆ мꙋ́дрость: ꙗ҆́кѡ да ѿ твои́хъ твоѧ̑ принесꙋ̀ тебѣ̀, и҆ ѿ бога́тства добродѣ́телей твои́хъ ѿтꙋ́дꙋ ѡ҆брѧ́щꙋ винꙋ̀, и҆ ᲂу҆вѣнча́ю честнꙋ́ю и҆ ст҃ꙋ́ю твою̀ главꙋ̀, съ вѣ́рными взыва́ѧ: ра́дꙋйсѧ, ѻ҆́ч҃е, бг҃осло́вїѧ ᲂу҆́ме кра́йнѣйшїй.

Пѣ́снь з҃. І҆рмо́съ:

Ѿ і҆ꙋде́и доше́дше ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, благослове́нъ є҆сѝ.

И҆зъ двⷭ҇твенныхъ ложе́снъ воплоти́всѧ, ꙗ҆ви́лсѧ є҆сѝ на спасе́нїе на́ше. тѣ́мже твою̀ мт҃рь вѣ́дѧще бцⷣꙋ, правосла́внѡ зове́мъ: ѻ҆ц҃є́въ на́шихъ бж҃е, бл҃гослове́нъ є҆сѝ.

Же́злъ прорасти́ла є҆сѝ, дв҃о, ѿ ко́рене і҆ессе́ева, всеблаже́ннаѧ, пло́дъ цвѣтоносѧ́щїй спаси́тельный, вѣ́рою сн҃ꙋ твоемꙋ̀ зовꙋ́щымъ: ѻ҆ц҃є́въ на́шихъ бж҃е, бл҃гослове́нъ є҆сѝ.

Премꙋ́дрости и҆спо́лни всѧ̑ и҆ си́лы бжⷭ҇твенныѧ, ѵ҆поста́снаѧ мꙋ́дросте высоча́йшагѡ, бцⷣею, вѣ́рою тебѣ̀ пою́щихъ: ѻ҆ц҃є́въ на́шихъ бж҃е, бл҃гослове́нъ є҆сѝ.

И҆́нъ. І҆рмо́съ:

Ѻ҆́троцы, бл҃гоче́стїю совоспита́ни, ѕлочести́вагѡ велѣ́нїѧ небре́гше, ѻ҆́гненнагѡ преще́нїѧ не ᲂу҆боѧ́шасѧ, но посредѝ пла́мене стоѧ́ще поѧ́хꙋ: ѻ҆ц҃є́въ бж҃е, бл҃гослове́нъ є҆сѝ.

Всѐ жела́нїе и҆ сла́дость ꙗ҆́вѣ сло́во твоѐ, всѐ, григо́рїе, по́лно весе́лїѧ и҆ свѣ́тлости, бл҃гоꙋха́нїѧ насыща́ѧ, вѣ́рою пою́щыѧ: ѻ҆ц҃є́въ бж҃е, бл҃гослове́нъ є҆сѝ.

Оу҆мо́мъ просвѣще́ннымъ и҆сто́чника просвѣще́нїй дости́глъ є҆сѝ, и҆ ѿѻнꙋ́дными мо́лнїѧми распалѧ́емь, попали́лъ є҆сѝ є҆ѵно́мїево ѧ҆зыкобо́лїе, трⷪ҇цѣ вопїѧ̀: ѻ҆ц҃є́въ бж҃е? бл҃гослове́нъ є҆сѝ.

Ѿве́рзъ хлѧ̑би бе́здны мꙋ́дрыхъ догма́тѡвъ твои́хъ, заꙋсти́въ же и҆сто́чника мꙋ́дрости, покры́лъ є҆сѝ пре́лести началовождѝ, ѡ҆блиста́емь вѣ́чнымъ свѣ́томъ и҆ трисо́лнечнымъ.

Бг҃оро́диченъ:

Ꙗ҆́кѡ до́ждь на рꙋно̀ низше́дъ, въ твою̀ всели́сѧ ᲂу҆тро́бꙋ, ми́ра рѣка̀, и҆сто́чникъ бла́гости, и҆́же ка̑пли дождє́вныѧ и҆счита́ѧ, ѻ҆ц҃є́въ бж҃е, бл҃гослове́нъ є҆сѝ.

И҆́нъ. І҆рмо́съ:

Проидо́ша, ꙗ҆́кѡ черто́гъ, пе́щный пла́мень нестерпи́мый, и҆̀же за благоче́стїе и҆ногда̀, ѻ҆́троцы ст҃і́и показа́вшесѧ ꙗ҆́вѣ, и҆ согла́снѡ воспѣва́юще, пѣ́снь поѧ́хꙋ: ѻ҆ц҃є́въ бж҃е, бл҃гослове́нъ є҆сѝ.

Непра́ведныхъ и҆ге́мѡнѡвъ предъ сꙋди́щами ста́въ, григо́рїе, є҆реті́чествꙋющихъ ѻ҆гнѧ̀ лютѣ́е ды́шꙋщаѧ стремлє́нїѧ бл҃гоче́стїемъ соже́глъ є҆сѝ, трⷪ҇цѣ вопїѧ̀: ѻ҆ц҃є́въ бж҃е, бл҃гослове́нъ є҆сѝ.

Трⷪ҇цꙋ всест҃ꙋ́ю, догма́тѡвъ бл҃гочести́выхъ, григо́рїе, немꙋ́тный и҆сто́чникъ ѿ ᲂу҆сте́нъ и҆злїѧ́вый на зе́млю, цвѣтоно́снꙋ жесто́кꙋю напаѧ́ѧ показа́лъ є҆сѝ: ѻ҆ц҃є́въ бж҃е, бл҃гослове́нъ є҆сѝ.

Бг҃оро́диченъ:

Оу҆мерщвлѧ́етсѧ пра́ѻц҃ъ, ꙗ҆́кѡ безвре́меннѣ сада̀ вкꙋси́вый: ты́ же безконе́чнꙋю жи́знь, ѽ дв҃о! прозѧ́бшаѧ, въ раѝ сего̀ ѡ҆бита́ти возста́вила є҆сѝ, бг҃ороди́тельнице чⷭ҇таѧ бл҃гослове́ннаѧ.

Катава́сїа: Тебѐ во ѻ҆гнѝ ѡ҆роси́вшаго:

Пѣ́снь и҃. І҆рмо́съ:

Цр҃ѧ̀ нбⷭ҇наго, є҆го́же пою́тъ вѡ́и а҆́гг҃льстїи, хвали́те и҆ превозноси́те во всѧ̑ вѣ́ки.

Проти́вныхъ льсти́тєльныѧ и҆ пла́мєнныѧ на на́съ ᲂу҆гасѝ стрѣ́лы, ꙗ҆́кѡ да пое́мъ тѧ̀, чⷭ҇таѧ, во вѣ́ки.

Преесте́ственнѣ содѣ́телѧ и҆ сп҃са, бг҃а сло́ва родила̀ є҆сѝ, дв҃о: тѣ́мже тѧ̀ пое́мъ, и҆ превозно́симъ во всѧ̑ вѣ́ки.

Просвѣти́тельнꙋю тѧ̀, и҆ златоза́рнꙋю, все́льшїйсѧ въ тѧ̀ свѣ́тъ непристꙋ́пный, дв҃о, показа̀ свѣщꙋ̀ во всѧ̑ вѣ́ки.

И҆́нъ. І҆рмо́съ:

Чꙋ́да преесте́ственнагѡ росода́тельнаѧ и҆з̾ѡбразѝ пе́щь ѻ҆́бразъ: не бо̀ ꙗ҆̀же прїѧ́тъ, пали́тъ ю҆́ныѧ, ꙗ҆́кѡ ни́же ѻ҆́гнь бж҃ества̀ дв҃ы, въ ню́же вни́де ᲂу҆тро́бꙋ. Тѣ́мъ воспѣва́юще воспое́мъ: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Ра́вно ѻ҆ц҃ꙋ̀ сло́во и҆ дх҃ъ бла́гостїю и҆ ца́рствомъ, благочести́вѡ наꙋчи́лъ є҆сѝ, сꙋ́щественно и҆ є҆сте́ственно то́ждество зна́ѧ и҆ є҆дине́нїе. тѣ́мже вопїе́ши ра́дꙋѧсѧ: да бл҃гослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Сла́вы а҆́гг҃льскїѧ ᲂу҆досто́илсѧ є҆сѝ, ꙗ҆́кѡ бо а҆́гг҃лъ просїѧ́лъ є҆сѝ мі́рꙋ, трⷪ҇цѣ, всемꙋ́дре, ѡ҆чи́стивъ прилѣ́жнѡ дꙋ́шꙋ же и҆ тѣ́ло и҆ мы́сль. є҆́йже ны́нѣ воспѣва́еши, веселѧ́сѧ: да бл҃гослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Ми́лостива мл҃твами твои́ми влⷣкꙋ содѣ́лавъ, и҆спросѝ, ѻ҆́ч҃е, прегрѣше́нїй ѡ҆ставле́нїе, вѣ́рою сщ҃е́ннꙋю и҆ всепра́зднственнꙋю твою̀ па́мѧть пра́зднꙋющымъ. въ не́йже веселѧ́щесѧ, воспѣва́емъ: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Таи́нникъ трїѷпоста́снагѡ є҆динонача́лїѧ, и҆ бжⷭ҇тва̀ сꙋ́щагѡ въ трⷪ҇цѣ, добродѣ́телей ѡ҆бꙋче́ньми бы́въ, трⷪ҇ческїй бг҃осло́въ показа́лсѧ є҆сѝ, всеблаже́нне. и҆ ны́нѣ воспѣва́еши ра́дꙋѧсѧ: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Бг҃оро́диченъ:

И҆́же а҆рха́гг҃льскими пѣснослѡ́вїи сла́вимое бога́тное сло́во, на́съ ра́ди ѡ҆бнища̀, тѧ̀ мт҃рь добро́тꙋ і҆а́кѡвлю благослове́ннꙋю и҆збра́въ. тѣ́мже воспѣва́юще пое́мъ: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

И҆́нъ. І҆рмо́съ:

И҆̀же пи́щею не ѡ҆скверни́вшїисѧ ѻ҆́троцы ца́рскїѧ трапе́зы, во ѻ҆́гнь ра́дꙋющесѧ внидо́ша нѣ́когда, и҆ въ пла́мени ѡ҆роша́еми ᲂу҆се́рднѡ поѧ́хꙋ: бл҃гослови́те, дѣла̀ гдⷭ҇нѧ, гдⷭ҇а.

Вавѷлѡ́нскагѡ, ѻ҆́ч҃е, пла́мене превозвы́сивсѧ, и҆ па́че тогѡ̀ благоче́стїемъ распали́всѧ, трⷪ҇ческїй нб҃отаи́нникъ показа́всѧ и҆ проповѣ́дникъ, вопїе́ши: благослови́те, дѣла̀ гдⷭ҇нѧ, гдⷭ҇а.

Напа́стныѧ разли́чнѣ, ѻ҆́ч҃е, и҆ желѣ́зныѧ пе́щи ѻ҆́гнь ᲂу҆гаша́ѧ, ᲂу҆до́бнѡ напа́стей произше́дъ, къ нб҃сѝ возлетѣ́лъ є҆сѝ, вопїѧ̀: благослови́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ:

Златови́дный свѣти́льникъ, твоѐ знамени́тельнѣ ꙗ҆влѧ́ше бж҃е́ственное рождество̀, непоро́чнаѧ чⷭ҇таѧ: ты́ бо свѣ́тъ непристꙋ́пный мі́рови возсїѧ́ла є҆сѝ. є҆мꙋ́же вопїе́мъ: по́йте, всѧ̑ дѣла̀ гдⷭ҇нѧ, гдⷭ҇а.

Катава́сїа: Нестерпи́момꙋ ѻ҆гню̀:

Пѣ́снь ѳ҃. І҆рмо́съ:

Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чⷭ҇таѧ, съ безпло́тными ли̑ки тѧ̀ велича́юще.

Ра́дости и҆ весе́лїѧ полна̀ є҆́сть па́мѧть твоѧ̀, пристꙋпа́ющымъ и҆сцѣлє́нїѧ точа́щи, и҆ благоче́стнѡ бцⷣꙋ тѧ̀ возвѣща́ющымъ.

Ѱалмы́ тѧ воспѣва́емъ, ѡ҆бра́дованнаѧ, и҆ немо́лчнѡ, є҆́же ра́дꙋйсѧ, зове́мъ: ты́ бо и҆сточи́ла є҆сѝ всѣ̑мъ ра́дость.

Красе́нъ, бцⷣе, прорастѐ пло́дъ тво́й, не тлѝ причаща́ющымсѧ хода́тайственъ, но жи́зни, вѣ́рою тѧ̀ велича́ющымъ.

И҆́нъ. І҆рмо́съ:

Ѻ҆́бразъ чи́стагѡ рождества̀ твоегѡ̀ ѻ҆гнепали́маѧ кꙋпина̀ показа̀ неѡпа́льнаѧ: и҆ ны́нѣ на на́съ напа́стей свирѣ́пѣющꙋю ᲂу҆гаси́ти, мо́лимсѧ, пе́щь, да тѧ̀, бцⷣе, непреста́ннѡ велича́емъ.

Дае́тъ тебѣ̀ жи́знь нетлѣ́ннꙋю нача́льнаѧ трⷪ҇ца, ꙗ҆́же бг҃осло́вилъ є҆сѝ, прїе́мши є҆ѧ̀ ра́ди по́двиги твоѧ̑, и҆ ᲂу҆чє́нїѧ и҆ борє́нїѧ, є҆́йже ны́нѣ, ѻ҆́ч҃е, предстои́ши ѡ҆ мі́рѣ моли́твенникъ и҆зѧ́щнѣйшїй.

Заре́ю трисїѧ́нныѧ свѣ́тлости, ѿ є҆ди́нагѡ (с. 565) происходѧ́щею бжⷭ҇тва̀, ѡ҆сїѧ́емь, сщ҃еннотаи́нниче григо́рїе, пою́щыѧ тѧ̀ вѣ́рою спаса́й, и҆ твои́хъ догма́тѡвъ бг҃осло́вїемъ свѣтово́ждствꙋй.

Тече́нїе до́брое соверши́лъ є҆сѝ за нача́льнꙋю трⷪ҇цꙋ подвиза́всѧ, и҆ ѡ҆боже́нїе ꙗ҆́кѡ бг҃осло́въ, полꙋчи́лъ є҆сѝ: и҆ бж҃е́ственнагѡ твоегѡ̀ жела́нїѧ и҆сполне́нїе прїѧ́лъ є҆сѝ досто́йнѡ, цр҃квей благоꙋкраше́нїе.

Бг҃оро́диченъ:

Ѽ стра́шнагѡ твоегѡ̀ чꙋдесѐ! ты́ бо, дв҃о бцⷣе, та́инство пре́жде родѡ́въ, и҆ пре́жде вѣкѡ́въ сокрове́нное въ бз҃ѣ, всѧ́чєскаѧ созда́вшемъ, ро́ждши бг҃а сло́ва, несказа́ннѡ ꙗ҆ви́ла є҆сѝ.

И҆́нъ. І҆рмо́съ:

И҆́же вы́шнюю глꙋбинꙋ̀ бжⷭ҇твеннагѡ непостиже́нїѧ благоче́стнѡ ѿве́рзъ, ᲂу҆́мъ ꙗ҆́кѡ и҆з̾ ка́мене, неѡб̾ѧ́тныѧ, бг҃онача́льныѧ возвы́силъ є҆сѝ трⷪ҇цы, всебл҃же́нне ѻ҆́ч҃е, тѧ̀ велича́емъ.

И҆́же хꙋдꙋ́ю ѻ҆де́ждꙋ зако́ннагѡ расто́ргъ писа́нїѧ, и҆ ю҆́же въ не́мъ бж҃е́ственнꙋю добро́тꙋ, и҆ та́инственнꙋю, бж҃е́ственныхъ дх҃а на́мъ и҆столкова́въ писа́нїй, требл҃же́нне ѻ҆́ч҃е, тѧ̀ велича́емъ.

Гѡ́рнимъ ликѡ́мъ сочи́сленъ сы́й, преподо́бне ѻ҆́ч҃е, и҆́бо съ ни́ми во вѣ́ки водворѧ́ешисѧ. Ѡ҆ твое́й па́ствѣ мольбы̑ творѝ къ бг҃ꙋ, всебл҃же́нне ѻ҆́ч҃е, тѧ̀ велича́емъ.

И҆́же бж҃е́ствєннымъ наꙋчи́всѧ ѿ бж҃е́ственнагѡ и҆ па́че ᲂу҆ма̀ вдохнове́нїѧ, прпⷣбне ѻ҆́ч҃е, и҆ къ тѣ́хъ та́инственнѡ соверши́всѧ ненаꙋче́нномꙋ соедине́нїю, безмѣ́рнымъ твои́мъ жела́нїемъ, всебл҃же́нне ѻ҆́ч҃е, тѧ̀ велича́емъ.

Бг҃оро́диченъ:

Ты̀ вмѣсти́лище, чⷭ҇таѧ, бжⷭ҇твеннагѡ неѡб̾ѧ́тїѧ, вы́шше є҆стества̀ была̀ є҆сѝ, ꙗ҆́кѡ бг҃ꙋ пло́ть взаи́мствовавшаѧ, и҆ твои́хъ дѣ́вственныхъ не разве́рзшемꙋ ложе́снъ, внегда̀ ражда́ти безъ сѣ́мене, тѧ̀ велича́емъ.

Катава́сїа: Въ зако́нѣ сѣ́ни и҆ писа́нїй:

Свѣти́ленъ. Подо́бенъ: Дх҃омъ во ст҃и́лищи:

Ме́чь слове́съ твои́хъ, и҆ си́ла сегѡ̀, ѧ҆зы́ки ѿсѣчѐ невѣ́рныхъ до конца̀: ꙗ҆́кѡ ве́щь бо терно́внꙋю тѣ́хъ попали́лъ є҆сѝ безбѡ́жнаѧ новосѣчє́нїѧ, трⷪ҇цѣ наꙋчи́лъ є҆сѝ покланѧ́тисѧ бг҃олѣ́пнѡ, григо́рїе бг҃осло́ве.

Сла́ва, Подо́бенъ: Со ᲂу҆ч҃ники̑:

Є҆ди́ницѣ трїѷпоста́снѣй и҆ трⷪ҇цѣ соверше́ннѣй въ є҆ди́номъ бжⷭ҇твѣ̀, всемꙋ́дре бг҃осло́ве, наꙋчи́лъ є҆сѝ покланѧ́тисѧ: свѣ́тъ рекі́й ѻ҆ц҃а̀, и҆ сн҃а свѣ́тъ, па́ки же свѣ́тъ дх҃а ст҃а́го. Но є҆ди́нъ свѣ́тъ, нераздѣ́ленъ, неслїѧ́ненъ: є҆ди́нъ бо бг҃ъ ᲂу҆ѧснѧ́ѧй є҆диносꙋ́щное, ѽ григо́рїе бл҃же́нне!

И҆ ны́нѣ, бг҃оро́диченъ:

Съ бг҃ома́терїю и҆ дв҃ою мр҃і́ею, и҆ васі́лїемъ, всемꙋ́дре, предстоѧ́й вели́кимъ непристꙋ́пнѣй трⷪ҇цѣ, ми́ръ мі́рꙋ, тишинꙋ̀ цр҃кви, побѣ̑ды, и҆ на́мъ спасе́нїе и҆спросѝ ны́нѣ восхвалѧ́ющымъ тѧ̀, бг҃осло́ве а҆рхїере́ю григо́рїе, ри́торе церко́вный.

На хвали́техъ стїхи̑ры ст҃а́гѡ на д҃, гла́съ д҃. Подо́бенъ: Зва́нный свы́ше:

Пресѣ́къ пи́смене ты̀ мра́къ, ꙳ вше́лъ є҆сѝ дꙋ́хомъ къ свѣ́тꙋ высоча́йшемꙋ: ꙳ и҆ ѿѻнꙋ́дное прїе́мъ свѣтолїѧ́нїе, бг҃осло́вїемъ всѧ̑ ѡ҆богати́лъ є҆сѝ, ꙳ григо́рїе всемꙋ́дре, ꙳ цр҃кве свѣти́ло: ꙳ блиста́ньми же слове́съ твои́хъ ꙳ мра̑чныѧ ѻ҆́блаки є҆ресе́й разгна́лъ є҆сѝ. ꙳ тѣ́мже водворѧ́ешисѧ, и҆дѣ́же гла́съ пра́зднꙋющихъ, ꙳ а҆́гг҃лѡмъ собесѣ́дникъ, ꙳ молѧ́сѧ непреста́ннѡ, ꙳ є҆́же спасти́сѧ дꙋша́мъ на́шымъ.

Бг҃осло́въ вторы́й и҆ таи́нникъ ꙳ бжⷭ҇твеннагѡ ѡ҆сїѧ́нїѧ, ꙳ и҆́же трⷪ҇цы свѣ́тлый прописа́тель, ꙳ и҆́же ѡ҆ неизрече́ннѣмъ и҆ бж҃е́ственнѣмъ є҆стествѣ̀, ꙳ преесте́ственнѡ наꙋча́ѧ, григо́рїе: ꙳ и҆ ны́нѣ свѣтлѣ́е наслажда́ѧсѧ бг҃а, ꙳ почита́ющихъ тѧ̀ помина́й, и҆ побо́рствꙋй ѡ҆ цр҃кви, ꙳ ю҆́же собра́лъ є҆сѝ: ꙳ твое́ бо вѣща́нїе ꙳ во всѧ̑ вселе́нныѧ и҆зы́де концы̀, ꙳ наꙋча́ѧ сла́вити ꙳ трⷪ҇цꙋ є҆диносꙋ́щнꙋю.

Воздѣ́лавъ зе́млю ѧ҆зы́комъ, бг҃оглаго́ливе, ꙳ се́рдца бразда́мъ сѣ́мѧ бж҃е́ственное, ꙳ бг҃осло́вїемъ ѡ҆богати́лъ є҆сѝ высоча́йшимъ ꙳ цр҃кве всю̀ полнотꙋ̀. ꙳ тѣ́мже пле́велы, ѻ҆гне́мъ дх҃а, ꙳ є҆реті́чєскїѧ попали́лъ є҆сѝ, ꙳ фїлосо́фїи бжⷭ҇твенныѧ пита́емый раче́нїемъ, ꙳ ѻ҆́ч҃е ѻ҆ц҃є́въ, и҆ па́стырю па́стырей, ꙳ и҆ сло́во вѣ́рныхъ, сщ҃е́нникѡвъ свѣти́льниче, ꙳ вселе́нныѧ сла́ва, ꙳ всеблаже́нне григо́рїе.

Къ премꙋ́дрости ча́ши прибли́живъ ꙳ честна̑ѧ твоѧ̑ ᲂу҆ста̀, ѻ҆́ч҃е григо́рїе, ꙳ бг҃осло́вїѧ поче́рплъ є҆сѝ бжⷭ҇твеннꙋю во́дꙋ, ꙳ и҆ вѣ̑рнымъ ѻ҆би́льнѡ препода́лъ є҆сѝ: ꙳ є҆ресе́й загради́лъ є҆сѝ тече́нїе дꙋшегꙋ́бное, ꙳ хꙋле́нїѧ и҆спо́лненное. ꙳ и҆́бо ꙗ҆́кѡ ко́рмчїѧ тѧ̀ ѡ҆брѣ́те дх҃ъ ст҃ы́й, ѿрѣ́юща и҆ ѿгонѧ́ща, ꙳ ꙗ҆́кѡ вѣ́трѡвъ дыха̑нїѧ, ꙳ ѕлочести́выхъ стремлє́нїѧ, ꙳ во є҆ди́ницѣ сꙋщества̀ ꙳ трⷪ҇цꙋ возвѣща́юща.

Сла́ва, гла́съ а҃:

Цѣвни́цꙋ дх҃а, є҆ресе́й побѣди́телѧ, и҆ правосла́вныхъ наслажде́нїе, втора́го напе́рсника, сло́ва самови́дца догма́тѡмъ бы́вшаго, мꙋ́драго пастыренача́льника, цр҃кѡ́вныѧ пито́мцы, бг҃осло́вными пѣ́сньми приреце́мъ: ты̀ є҆сѝ па́стырь до́брый, да́вый тебѐ сама́го, григо́рїе, ꙗ҆́кѡ ᲂу҆ч҃тель хрⷭ҇то́съ за ны̀, и҆ съ па́ѵломъ ликꙋ́еши, и҆ мо́лишисѧ ѡ҆ дꙋша́хъ на́шихъ.

И҆ ны́нѣ, бг҃оро́диченъ. Славосло́вїе вели́кое: и҆ ѿпꙋ́стъ.

На лїтꙋргі́и, бл҃жє́нна ѿ канѡ́на ст҃а́гѡ пѣ́снь г҃-ѧ и҆ ѕ҃-ѧ. Прокі́менъ, гла́съ а҃: Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ. Сті́хъ: Оу҆слы́шите сїѧ̑, всѝ ꙗ҆зы́цы, внꙋши́те, всѝ живꙋ́щїи по вселе́ннѣй. А҆пⷭ҇лъ къ корі́нѳѧнѡмъ, зача́ло рн҃а. А҆ллилꙋ́їа, гла́съ в҃: Внемли́те, лю́дїе моѝ, зако́нꙋ моемꙋ̀, приклони́те ᲂу҆́хо ва́ше во глаго́лы ᲂу҆́стъ мои́хъ. Є҆ѵⷢ҇лїе і҆ѡа́нна, зача́ло л҃ѕ. Прича́стенъ: Въ па́мѧть вѣ́чнꙋю:

На трапе́зѣ ᲂу҆тѣше́нїе бра́тїи. И҆ чте́мъ житїѐ ст҃а́гѡ.

Мѣ́сѧца тогѡ́же въ к҃є-й де́нь Слꙋ́жба прест҃ѣ́й бцⷣѣ, соверша́емаѧ въ де́нь пра́зднества ст҃ѣ́й чꙋдотво́рнѣй є҆ѧ̀ і҆кѡ́нѣ, и҆менꙋ́емѣй ᲂу҆толѝ моѧ̑ печа̑ли

На всено́щномъ бдѣ́нїи,

На Гдⷭ҇и воззва́хъ: стїхи̑ры, гла́съ в҃.

Всѣ̑мъ скорбѧ́щымъ ра́досте, и҆ ѡ҆би̑димымъ предста́тельнице, и҆ а҆́лчꙋщымъ пита́тельнице, стра̑ннымъ ᲂу҆тѣше́нїе, и҆ ѡ҆бꙋрева́ємымъ приста́нище, болѧ́щымъ посѣти́тельнице, ѡ҆ѕло́блєннымъ покро́въ и҆ застꙋпле́нїе, и҆ же́злъ слѣпы̑мъ, мт҃и бг҃а вы́шнѧгѡ, ты̀ є҆сѝ пречⷭ҇таѧ: потщи́сѧ, мо́лимсѧ, сп҃сти́сѧ рабѡ́мъ твои̑мъ.

И҆́но прибѣ́жище, чⷭ҇таѧ, человѣ́цы къ творцꙋ̀ и҆ влⷣцѣ не стѧжа́хомъ мы̀, ра́звѣ тебѐ, бг҃оневѣ́сто. не ѿве́ржи на́съ ѿ твоегѡ̀ застꙋпле́нїѧ, нижѐ посрамѝ любо́вїю прибѣга́ющихъ къ покро́вꙋ твоемꙋ̀, мт҃и бг҃а вы́шнѧгѡ, потщи́сѧ, покажѝ твоеѧ̀ млⷭ҇ти бога́тство, и҆ ны́нѣ ѿ страсте́й на́съ сп҃сѝ.

Стра́хъ многоѻбра́зныхъ и҆скꙋше́нїй, и҆ недꙋ́жныхъ бꙋ́рѧ ны́нѣ мѧ̀ ѡ҆бꙋрева́ютъ, и҆ глꙋбина̀ потоплѧ́етъ мѧ̀ ѿча́ѧнїѧ: зима̀ прегрѣше́нїй мои́хъ лю́тѣ мѧ̀ смꙋща́етъ: предварѝ и҆ и҆зба́ви мѧ̀ ѡ҆бꙋрева́ема, є҆ди́на вѣ̑рнымъ тишино̀: и҆ къ приста́нищꙋ вы́шнѧгѡ бж҃е́ственнагѡ зва́нїѧ возведѝ.

Сла́ва, и҆ ны́нѣ:

Ѽ вели́кагѡ та́инства! ви́дѧ чꙋдеса̀, проповѣ́даю бж҃ество̀: є҆мманꙋ́илъ ᲂу҆́бѡ є҆стества̀ двє́ри ѿве́рзе, ꙗ҆́кѡ чл҃вѣколю́бецъ: дв҃ства же затво́ры не разве́рзе, ꙗ҆́кѡ бг҃ъ: но та́кѡ и҆зъ ложе́снъ про́йде, ꙗ҆́коже слꙋ́хомъ вни́де: та́кѡ роди́сѧ, ꙗ҆́коже и҆ зача́тсѧ. безстра́стнѡ вни́де, и҆ неизрече́ннѡ и҆зы́де, по глаго́лющемꙋ прⷪ҇ро́кꙋ: та̀ две́рь затворе́на бꙋ́детъ, и҆ никто́же про́йдетъ сквозѣ̀ є҆ѧ̀, то́кмѡ є҆ди́нъ гдⷭ҇ь, бг҃ъ і҆и҃левъ, и҆мѣ́ѧй ве́лїю млⷭ҇ть.

Вхо́дъ. Прокі́менъ днѐ, и҆ чтє́нїѧ трѝ.

Бытїѧ̀ чте́нїе, (глава̀ к҃и).

И҆зы́де і҆а́кѡвъ ѿ стꙋденца̀ клѧ́твеннагѡ и҆ и҆́де въ харра́нь. И҆ ѡ҆брѣ́те мѣ́сто, и҆ спа̀ та́мѡ: за́йде бо со́лнце, и҆ взѧ́тъ ѿ ка́менїѧ мѣ́ста тогѡ̀, и҆ положѝ возгла́вїе себѣ̀, и҆ спа̀ на мѣ́стѣ ѻ҆́номъ, и҆ со́нъ ви́дѣ: и҆ сѐ лѣ́ствица ᲂу҆твержде́на на землѝ, є҆ѧ́же глава̀ досѧза́ше до нб҃съ, и҆ а҆́гг҃ли бж҃їи восхожда́хꙋ и҆ низхожда́хꙋ по не́й: гдⷭ҇ь же ᲂу҆твержда́шесѧ на не́й, и҆ речѐ: а҆́зъ бг҃ъ а҆враа́мовъ ѻ҆тца̀ твоегѡ̀, и҆ бг҃ъ і҆саа́ковъ, не бо́йсѧ: землѧ̀ и҆дѣ́же ты̀ спи́ши на не́й, тебѣ̀ да́мъ ю҆̀, и҆ сѣ́мени твоемꙋ̀. и҆ бꙋ́детъ сѣ́мѧ твоѐ ꙗ҆́кѡ песо́къ земны́й, и҆ распространи́тсѧ на мо́ре, и҆ лі́вꙋ, и҆ сѣ́веръ, и҆ на восто́ки: и҆ возблагословѧ́тсѧ ѡ҆ тебѣ̀ всѧ̑ колѣ̑на зємна́ѧ, и҆ ѡ҆ сѣ́мени твое́мъ. И҆ сѐ а҆́зъ съ тобо́ю сохранѧ́ѧй тѧ̀ на всѧ́комъ пꙋтѝ, а҆́може а҆́ще по́йдеши, и҆ возвращꙋ́ тѧ въ зе́млю сїю̀: ꙗ҆́кѡ не и҆́мамъ тебѐ ѡ҆ста́вити, до́ндеже сотвори́ти мѝ всѧ̑, є҆ли̑ка глаго́лахъ тебѣ̀. И҆ воста̀ і҆а́кѡвъ ѿ сна̀ своегѡ̀, и҆ речѐ: ꙗ҆́кѡ є҆́сть гдⷭ҇ь на мѣ́стѣ се́мъ, а҆́зъ же не вѣ́дѣхъ. И҆ ᲂу҆боѧ́сѧ, и҆ речѐ: ꙗ҆́кѡ стра́шно мѣ́сто сїѐ! нѣ́сть сїѐ, но до́мъ бж҃їй, и҆ сїѧ̑ врата̀ нбⷭ҇наѧ.

Прⷪ҇ро́чества і҆езекі́илева чте́нїе, (главы̑ м҃г, м҃д).

Та́кѡ глаго́летъ гдⷭ҇ь: бꙋ́детъ ѿ днѐ ѻ҆сма́гѡ, и҆ про́чее: сотворѧ́тъ і҆ере́и на ѻ҆лтарѝ всесожже́нїѧ ва́шегѡ, и҆ ꙗ҆̀же сп҃се́нїѧ ва́шегѡ: и҆ прїимꙋ̀ вы̀, глаго́летъ а҆дѡнаі̀ гдⷭ҇ь. И҆ ѡ҆брати́ мѧ на пꙋ́ть вра́тъ ст҃ы́хъ внѣ́шнихъ, зрѧ́щихъ на восто́ки, и҆ сїѧ̑ бѧ́хꙋ затворє́на. И҆ речѐ гдⷭ҇ь ко мнѣ̀: врата̀ сїѧ̑ затворє́на бꙋ́дꙋтъ, и҆ не ѿве́рзꙋтсѧ: и҆ никто́же про́йдетъ сквозѣ̀ и҆́хъ, ꙗ҆́кѡ гдⷭ҇ь бг҃ъ і҆и҃левъ про́йдетъ и҆́ми, и҆ бꙋ́дꙋтъ затворє́на. Ꙗ҆́кѡ и҆гꙋ́менъ сѧ́детъ въ ни́хъ снѣ́сти хлѣ́бъ. По пꙋтѝ є҆ла́мскихъ вра́тъ вни́детъ, и҆ по пꙋтѝ є҆гѡ̀ и҆зы́детъ. И҆ введе́ мѧ по пꙋтѝ вра́тъ ст҃ы́хъ, сꙋ́щихъ къ сѣ́верꙋ, прѧ́мѡ хра́мꙋ: и҆ ви́дѣхъ, и҆ сѐ и҆спо́лнь сла́вы хра́мъ гдⷭ҇нь.

При́тчей чте́нїе, (глава̀ ѳ҃).

Премꙋ́дрость созда̀ себѣ̀ до́мъ, и҆ ᲂу҆твердѝ столпѡ́въ се́дмь. закла̀ своѧ̑ же́ртвєннаѧ, и҆ растворѝ въ ча́ши свое́й вїно̀, и҆ ᲂу҆гото́ва свою̀ трапе́зꙋ. Посла̀ своѧ̑ рабы̑ созыва́ющи съ высо́кимъ проповѣ́данїемъ на ча́шꙋ, глаго́лющи: И҆́же є҆́сть безꙋ́менъ, да ᲂу҆клони́тсѧ ко мнѣ̀, и҆ тре́бꙋющымъ ᲂу҆ма̀ речѐ: прїиди́те, ꙗ҆ди́те мо́й хлѣ́бъ, и҆ пі́йте вїно̀, є҆́же раствори́хъ ва́мъ. ѡ҆ста́вите безꙋ́мїе, и҆ жи́ви бꙋ́дете: и҆ взыщи́те ра́зꙋма, да поживетѐ, и҆ и҆спра́вите ра́зꙋмъ въ вѣ́дѣнїи. Наказꙋ́ѧй ѕлы̑ѧ, прїи́метъ себѣ̀ безче́стїе: ѡ҆блича́ѧй же нечести́ваго, ѡ҆поро́читъ себѐ: ѡ҆бличе́нїе бо нечести́вомꙋ ра̑ны є҆мꙋ̀. Не ѡ҆блича́й ѕлы́хъ, да не возненави́дѧтъ тебѐ. Ѡ҆блича́й премꙋ́дра, и҆ возлю́битъ тѧ̀. Да́ждь премꙋ́дромꙋ винꙋ̀, и҆ премꙋ́дршїй бꙋ́детъ: сказꙋ́й првⷣномꙋ, и҆ приложи́тъ прїима́ти. Нача́ло премꙋ́дрости стра́хъ гдⷭ҇ень: и҆ совѣ́тъ ст҃ы́хъ ра́зꙋмъ. Разꙋмѣ́ти бо зако́нъ, по́мысла є҆́сть бл҃га́гѡ: си́мъ бо ѻ҆́бразомъ мно́гое поживе́ши вре́мѧ, и҆ приложа́тсѧ тебѣ̀ лѣ̑та живота̀.

На лїті́и стїхи̑ры, гла́съ в҃.

Злата́ѧ кади́льнице, рꙋ́чко и҆ же́зле, и҆ свѣти́льниче свѣтоза́рный, сви́тче бж҃е́ственный, въ не́мже пе́рстомъ бж҃їимъ написа́сѧ сло́во, сп҃сѝ на́съ тебѐ велича́ющихъ.

Да́рꙋй на́мъ по́мощь, бцⷣе, на тѧ̀ надѣ́ющымсѧ, вѣ̑рнымъ прибѣ́жище: и҆зба́ви ѿ бѣ́дъ рабы̑ твоѧ̑, дв҃о, на тѧ́ бо по бз҃ѣ ᲂу҆пова́нїе возлага́емъ.

Влⷣчце, мт҃и и҆зба́вителѧ, прїимѝ моле́нїе рабѡ́въ твои́хъ, а҆́ще и҆ недосто́йнѣ молѧ́щихсѧ тебѣ̀: да мо́лишисѧ за ны́ къ ро́ждшемꙋсѧ и҆зъ тебѐ, влⷣчце мі́ра, и҆ бꙋ́ди на́мъ и҆зба́вительница.

Сла́ва, и҆ ны́нѣ, гла́съ и҃.

Тѧ̀ мо́лимъ предста́тельницꙋ на́шꙋ, пречⷭ҇таѧ бцⷣе, ѡ҆держи́ми печа́льми, не ѡ҆ста́ви до конца̀ поги́бнꙋти (с. 791) рабѡ́мъ твои̑мъ: но ᲂу҆скорѝ и҆з̾ѧ́ти на́съ ѿ настоѧ́щїѧ ско́рби и҆ печа́ли. ѽ прест҃а́ѧ дв҃о чⷭ҇таѧ, ты́ бо є҆сѝ на́мъ по́мощь и҆ стѣна̀ неѡбори́маѧ.

На стїхо́внѣ стїхи̑ры, гла́съ д҃:

Наста́вницꙋ тѧ̀ заблꙋ́ждшихъ, и҆ приста́нище сп҃си́тельно въ пꙋчи́нѣ, влⷣчце, и҆ въ бꙋ́ри, во и҆скꙋше́нїи же и҆ печа́лехъ хрⷭ҇то́съ тѧ̀ всѣ̑мъ показа̀, сн҃ъ тво́й и҆ бг҃ъ, вѣ́рнѡ приходѧ́щымъ къ тебѣ̀. є҆го́же молѝ, ѿ ѕлы́хъ бѣ́дъ и҆зба́витисѧ вѣ́дѧщымъ тѧ̀, бцⷣе, вои́стиннꙋ наста́вницꙋ.

Сті́хъ: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ.

Тлѣ́нїе потреби́ла є҆сѝ, всепѣ́таѧ, и҆ болѣ́знь дре́внюю всю̀ ржⷭ҇тво́мъ твои́мъ, живо́тъ мі́рꙋ ро́ждши, сме́рть разрꙋши́вшїй: бѡлѣ́зни же, ꙗ҆́кѡ бл҃га́ѧ, и҆сцѣлѧ́еши вѣ́рнѡ тво́й чꙋде́сный ѻ҆́бразъ почита́ющихъ, и҆ любо́вїю кла́нѧющихсѧ, и҆ чтꙋ́щихъ тѧ̀ чⷭ҇тꙋю наста́вницꙋ.

Сті́хъ: Слы́ши, дщѝ, и҆ ви́ждь, и҆ приклонѝ ᲂу҆́хо твоѐ.

Ꙗ҆́кѡ и҆сто́чника тѧ̀ живота̀, всепѣ́таѧ, вѣ́дꙋще, и҆ ꙗ҆́кѡ чꙋде́съ и҆ цѣле́бъ пода́тельницꙋ, страсте́й дꙋше́вныхъ же и҆ тѣле́сныхъ ско́рое потребле́нїе, млⷭ҇ти и҆ щедрѡ́тъ неисчерпа́емое мо́ре, тебѣ̀ припа́даемъ всѝ, просѧ́ще ѿ ско́рби разрѣше́нїѧ, и҆ бꙋ́дꙋщихъ мꙋче́нїй и҆збавле́нїѧ.

Сла́ва, и҆ ны́нѣ, гла́съ и҃:

Ра́дꙋйсѧ бл҃гослове́ннаѧ бцⷣе, пречи́стаѧ мт҃и хрⷭ҇то́ва: ра́дꙋйсѧ, вѣ́рныхъ наде́ждо. ра́дꙋйсѧ, мі́ра ѡ҆чище́нїе: ра́дꙋйсѧ, всѧ́кїѧ ско́рби и҆збавлѧ́ющаѧ рабы̀ твоѧ̑. ра́дꙋйсѧ, человѣ́кѡмъ ᲂу҆тѣше́нїе живоно́сное: ра́дꙋйсѧ, застꙋпле́нїе призыва́ющихъ тѧ̀, бг҃обл҃года́тнаѧ. ра́дꙋйсѧ, бж҃їе пребыва́нїе и҆ гора̀ ст҃а́ѧ.

Тропа́рь, гла́съ є҃:

Оу҆толѝ бѡлѣ́зни многовоздыха́ющїѧ дꙋшѝ моеѧ̀, ᲂу҆толи́вшаѧ всѧ́кꙋ слезꙋ̀ ѿ лица̀ землѝ: ты́ бо человѣ́кѡмъ бѡлѣ́зни ѿго́ниши, и҆ грѣ́шныхъ скѡ́рби разрꙋша́еши: тебе́ бо всѝ стѧжа́хомъ наде́ждꙋ и҆ ᲂу҆твержде́нїе, прест҃а́ѧ мт҃и дв҃о.

По а҃-й каѳі́смѣ сѣда́ленъ, гла́съ є҃:

Пречⷭ҇таѧ дв҃о бцⷣе, поми́лꙋй на́съ прибѣга́ющихъ съ вѣ́рою къ тебѣ̀ млⷭ҇рдой, и҆ просѧ́щихъ те́плагѡ застꙋпле́нїѧ твоегѡ̀: мо́жеши бо, ꙗ҆́кѡ бл҃га́ѧ, всѣ́хъ сп҃стѝ, и҆ ꙗ҆́кѡ мт҃и бг҃а вы́шнѧгѡ, мт҃рними твои́ми мл҃твами всегда̀ и҆збавлѧ́еши чтꙋ́щихъ тѧ̀ ѿ всѣ́хъ бѣ́дъ и҆ скорбе́й, бл҃гослове́ннаѧ.

Сла́ва, и҆ ны́нѣ, то́йже.

По в҃-й каѳі́смѣ сѣда́ленъ, гла́съ а҃.

Правовѣ́рнѡ чтꙋ́щыѧ тѧ̀, и҆ къ тебѣ̀ прибѣга́ющыѧ, и҆ і҆кѡ́нѣ твое́й ст҃ѣ́й любе́знѡ покланѧ́ющыѧсѧ, ѽ бж҃їѧ мт҃и! сп҃сѝ, и҆ не да́ждь въ расхище́нїе сꙋпоста́тѡмъ, нижѐ да на́йдꙋтъ на ны̀ всѧ̑ ѕла̑ѧ, ꙗ҆̀же грѣхѝ на́шѧ ᲂу҆гото́ваша на́мъ: нижѐ беззакѡ́нїѧ на̑ша да превзы́дꙋтъ на главы̑ на́шѧ: но да твоѧ̑ мт҃рнѧѧ къ бг҃ꙋ преѡдолѣ́етъ за ны̀ бг҃опрїѧ́тнаѧ мл҃тва.

Сла́ва, и҆ ны́нѣ, то́йже. Велича́нїе. Ѱало́мъ: Ве́лїй гдⷭ҇ь и҆ хва́ленъ ѕѣлѡ̀:

По полѷеле́и сѣда́ленъ, гла́съ а҃.

Пречⷭ҇таѧ твоѧ̀ і҆кѡ́на, бцⷣе дв҃о, врачевство̀ всемꙋ̀ мі́рꙋ дх҃о́вное: къ не́й же прибѣга́юще, лобыза́емъ и҆ почита́емъ, и҆ покланѧ́емсѧ, и҆сцѣле́нїй бл҃года́ть почерпа́юще ѿ неѧ̀, и҆ недꙋ̑гъ тѣле́сныхъ, и҆ дꙋше́вныхъ страсте́й, твои́ми мл҃твами свобожда́ющесѧ.

Сла́ва, и҆ ны́нѣ, то́йже.

Степє́нна, а҃-й а҆нтїфѡ́нъ д҃-гѡ гла́са. Прокі́менъ: Помѧнꙋ̀ и҆́мѧ твоѐ: Сті́хъ: Слы́ши, дщѝ: Є҆ѵⷢ҇лїе ѿ лꙋкѝ, зача́ло д҃.

По н҃-мъ ѱалмѣ̀ стїхи́ра, гла́съ ѕ҃:

Не и҆́мамы и҆ны́ѧ по́мощи, не и҆́мамы и҆ны́ѧ наде́жды, ра́звѣ тебѐ пречⷭ҇таѧ дв҃о, ты̀ на́мъ помозѝ, на тебѐ надѣ́емсѧ, и҆ тобо́ю хва́лимсѧ: твои́ бо є҆смы̀ рабѝ, да не постыди́мсѧ.

Канѡ́нъ. Гла́съ в҃.

Пѣ́снь а҃.

І҆рмо́съ: Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла: вопло́щшеесѧ же сло́во всеѕло́бный грѣ́хъ потреби́ло є҆́сть, препросла́вленный гдⷭ҇ь: сла́внѡ бо просла́висѧ.

Ꙗ҆́же всѣ̑мъ ᲂу҆до́бь послꙋ̑шнаѧ въ ско́рби, и҆ въ печа́ли помога́ющаѧ, бцⷣе бл҃га́ѧ, бл҃года́ть пода́ждь пѣ́ти тѧ̀ дерза́ющымъ, влⷣчце, скорбѧ́щихъ ра́досте.

Многобога́тнꙋю бл҃года́ть стѧжа́вши, влⷣчце, дерзнове́нною твое́ю мл҃твою пресла́внѡ и҆зми́ мѧ ѿ напа́стей, ᲂу҆бо́гаго раба̀ твоего̀, скорбѧ́щихъ ра́досте.

Ѿ вра̑гъ ви́димыхъ и҆ неви́димыхъ и҆зба́ви, мо́лимсѧ, къ тебѣ̀ прибѣга́ющихъ, бцⷣе, и҆ разорѝ всѧ́къ совѣ́тъ борю́щихъ на́съ.

Ѿимѝ поноше́нїе человѣ́ческое, и҆ клеветы̑ навѣ̑тникъ ѿ менѐ, бцⷣе, молю́ тѧ: да ᲂу҆се́рднѡ сла́влю гдⷭ҇а, є҆го́же пита́ла є҆сѝ.

Пѣ́снь г҃.

І҆рмо́съ: Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщвле́й грѣ́хъ, и҆ стра́хъ тво́й всадѝ въ сердца̀ на́съ пою́щихъ тѧ̀.

Врагѡ́въ навѣ́ты разорѝ сꙋ́єтныѧ, всепѣ́таѧ бцⷣе, и҆ не ѡ҆скꙋдѣ́й мл҃твами твои́ми, снабдѧ́щи на́съ восхвалѧ́ющихъ тѧ̀.

При́зри, чⷭ҇таѧ, млⷭ҇тивнымъ твои́мъ ѻ҆́комъ, и҆ и҆зба́ви мѧ̀ всѧ́кагѡ навѣ́та ви́димыхъ и҆ неви́димыхъ врагѡ́въ, ѡ҆слѣпи́вши зѣ̑ницы ѻ҆че́съ и҆́хъ.

Ѕло́е нападе́нїе врагѡ́въ, ꙗ҆́кѡ ѻ҆́гнь палѧ́щее, и҆́щꙋщихъ всегда̀ погꙋби́ти на́съ, дв҃о, росо́ю мл҃твъ твои́хъ ᲂу҆гасѝ.

Неꙋгаси́маѧ лампа́до, зарѧ̀ присносїѧ́тельнаѧ, но́щїю мѧ̀ скорбе́й ѡ҆держи́ма просвѣтѝ мл҃твами твои́ми, ро́ждшаѧ сл҃нце сла́вы хрⷭ҇та̀.

Конда́къ, гла́съ ѕ҃:

Предста́тельство хрⷭ҇тїа́нъ непосты́дное, хода́тайство ко творцꙋ̀ непрело́жное, не пре́зри грѣ́шныхъ моле́нїй гла́сы, но предварѝ, ꙗ҆́кѡ бл҃га́ѧ, на по́мощь на́съ, вѣ́рнѡ зовꙋ́щихъ тѝ: ᲂу҆скорѝ на мл҃твꙋ и҆ потщи́сѧ на ᲂу҆моле́нїе, предста́тельствꙋющи при́снѡ, бцⷣе, чтꙋ́щихъ тѧ̀.

Сѣда́ленъ, гла́съ в҃.

Моле́нїе те́плое и҆ стѣна̀ неѡбори́маѧ, млⷭ҇ти и҆сто́чниче, мі́рови прибѣ́жище, прилѣ́жнѡ вопїе́мъ тѝ: бцⷣе влⷣчце, предварѝ и҆ ѿ бѣ́дъ и҆зба́ви на́съ, є҆ди́на вско́рѣ предста́тельствꙋющаѧ.

Пѣ́снь д҃.

І҆рмо́съ: Оу҆слы́шахъ, гдⷭ҇и, гла́съ тво́й, є҆го́же ре́клъ є҆сѝ, гла́съ вопїю́щагѡ въ пꙋсты́ни, ꙗ҆́кѡ возгремѣ́лъ є҆сѝ над̾ вода́ми мно́гими, твоемꙋ̀ свидѣ́тельствꙋѧй сн҃ꙋ, ве́сь бы́въ соше́дшагѡ дх҃а, возопѝ: ты̀ є҆сѝ хрⷭ҇то́съ, бж҃їѧ мꙋ́дрость и҆ си́ла.

Мл҃твꙋ неꙋсы́пнꙋ, застꙋпле́нїе тве́рдо мо́лимъ: ᲂу҆млⷭ҇рдисѧ и҆ ви́ждь на́шꙋ нестерпи́мꙋю печа́ль, бѡлѣ́зни, скѡ́рби, стра̑сти: и҆ бл҃гопремѣ́ннѡ посѣтѝ, мт҃и бж҃їѧ, ра́дость ско́рꙋю подаю́щи.

Не неприча́стни є҆смы̀, влⷣчце, твоегѡ̀ застꙋпле́нїѧ въ ско́рбехъ: тѣ́мже и҆ ны́нѣ на́мъ помозѝ вско́рѣ, лю́тѣ ѡ҆бꙋрева́ємымъ рꙋ́кꙋ простира́ющи, чⷭ҇таѧ. бꙋ́ди млⷭ҇тива болѣ́знємъ на́шымъ, мт҃и бж҃їѧ, ра́дость ско́рꙋю подаю́щи.

Не ᲂу҆пова́ша, влⷣчце, на тѧ̀ беззако́ннꙋющїи, но ᲂу҆пова́ша на ѧ҆зы́къ человѣ́чь, при́снѡ зави́стнѡ и҆злїѧ́вшїйсѧ, непра́веднѡ пролїѧ́ти кро́вь и҆́скреннѧгѡ, рыка́юще: ты́ же, чⷭ҇таѧ, чє́люсти и҆́хъ сокрꙋшѝ.

Смирѝ, влⷣчце, врагѡ́въ вознесе́ннꙋю вы́ю велерѣ́чꙋющихъ, совѣ́ты и҆ ѕлонра̑вїѧ, и҆ сердца̀ поꙋча́ющаѧсѧ ѕлы̑мъ, на мѧ̀ по всѧ̑ дни̑: крѣ́пость же и҆ побѣ́дꙋ пода́ждь призыва́ющымъ тѧ̀, мт҃и бж҃їѧ, ра́дость ско́рꙋю подаю́щи.

Пѣ́снь є҃.

І҆рмо́съ: Оу҆́гль и҆са́їи проѧвле́йсѧ, сл҃нце и҆з̾ дв҃ственныѧ ᲂу҆тро́бы возсїѧ̀ во тьмѣ̀ заблꙋ́ждшымъ, бг҃оразꙋ́мїѧ просвѣще́нїе да́рꙋѧ.

Мл҃твеннице нело́жнаѧ, ᲂу҆пова́нїе хрⷭ҇тїа́нъ, ѡ҆бра́дованнаѧ, прїимѝ мольбы̑ ѿ на́съ, прилѣ́жнѡ призыва́ющихъ и҆ молѧ́щихсѧ тебѣ̀.

И҆сто́чникъ тѧ̀ жи́зни сꙋ́щїй, чⷭ҇таѧ, безсме́ртїѧ и҆сточа́ющїй во́ды, земноро́днїи позна́вше ᲂу҆бл҃жа́емъ.

Воѡрꙋжи́сѧ на ны̀ лꙋка́внѡ вра́гъ, ѧ҆зы́комъ ꙗ҆́коже мече́мъ погꙋби́ти хотѧ̀: но твое́ю, бг҃ороди́тельнице, крѣ́постїю предварѝ.

Пꙋчи́нꙋ, чⷭ҇таѧ, застꙋпле́нїй кто̀ и҆зочте́тъ си́лы твоеѧ̀; тѣ́мже на́съ сꙋ́щихъ въ нꙋ́ждѣ ско́рѡ предварѝ.

Пѣ́снь ѕ҃.

І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю млⷭ҇рдїѧ твоегѡ̀ призыва́ю бе́зднꙋ: ѿ тлѝ бж҃е мѧ̀ возведѝ.

Цѣломꙋ́дрїѧ сꙋ́щи хода́таица, призыва́ющымъ тѧ̀ ны́нѣ ꙗ҆ви́сѧ, и҆ ѿ всѧ́кихъ и҆зба́ви напа́стей и҆ бѣ́дъ, бг҃оневѣ́сто.

Ѕлодѣ̑йства вра̑жїѧ разорѝ, и҆ клеветы̀ непра́вєдныѧ ᲂу҆ста́ви, бл҃гослове́ннаѧ пречⷭ҇таѧ, и҆збавлѧ́ющи непови̑нныѧ ѿ ско́рби.

Лю́тыми грѣхѝ ѡ҆крꙋже́ни, и҆ напа́стными бѣда́ми потоплѧ́еми, под̾ бж҃е́ственный покро́въ тво́й прибѣга́емъ, мт҃и хрⷭ҇та̀ бг҃а.

Неискꙋсомꙋ́жнѡ ро́ждши гдⷭ҇а, ꙗ҆ви́сѧ по бжⷭ҇твѣ̀ па́ки дв҃ствꙋющи. ѽ пресла́внагѡ чꙋдесѐ, въ тебѣ̀ содѣ́ланнагѡ, бг҃оневѣ́сто!

Конда́къ, гла́съ ѕ҃:

Не ввѣ́ри мѧ̀ человѣ́ческомꙋ предста́тельствꙋ, прест҃а́ѧ влⷣчце, но прїимѝ моле́нїе раба̀ твоегѡ̀: ско́рбь бо ѡ҆бдержи́тъ мѧ̀, терпѣ́ти не могꙋ̀ де́мѡнскагѡ стрѣлѧ́нїѧ, покро́ва не и҆́мамъ, нижѐ гдѣ̀ прибѣ́гнꙋ ѻ҆каѧ́нный всегда̀ побѣжда́емь, и҆ ᲂу҆тѣше́нїѧ не и҆́мамъ, ра́звѣ тебѐ, влⷣчце мі́ра, ᲂу҆пова́нїе и҆ предста́тельство вѣ́рныхъ: не пре́зри моле́нїе моѐ, поле́зно сотворѝ.

І҆́косъ:

Прострѝ дла̑ни своѝ, и҆́миже всѣ́хъ влⷣкꙋ ꙗ҆́кѡ млⷣнца прїѧ́ла є҆сѝ, не ѡ҆ста́ви на́съ всегда̀ надѣ́ющихсѧ на тѧ̀. бо́дренною твое́ю мл҃твою, и҆ неисче́тною бл҃гостїю ᲂу҆ще́дри на́съ, и҆ пода́ждь дꙋша́мъ на́шымъ млⷭ҇рдїе своѐ въ вѣ́ки и҆сточа́ющи: тебе́ бо и҆́мамы грѣ́шнїи застꙋ́пницꙋ, ѿ находѧ́щихъ на ны̀ бѣ́дъ и҆ ѕѡ́лъ: но ꙗ҆́кѡ и҆мꙋ́щаѧ млⷭ҇рдїѧ щедрѡ́ты, ᲂу҆скорѝ на мл҃твꙋ и҆ потщи́сѧ на ᲂу҆моле́нїе, застꙋпа́ющи при́снѡ, бцⷣе, чтꙋ́щихъ тѧ̀.

Пѣ́снь з҃.

І҆рмо́съ: Да пресла́вное ржⷭ҇тво̀ твоѐ хрⷭ҇тѐ, є҆́же ѿ дв҃ы, проѡбрази́ши ꙗ҆́вѣ, неѡпали́мы въ пещѝ ѻ҆́троки сохрани́лъ є҆сѝ, пѣ́сньми пою́щыѧ тебѣ̀: ѻ҆тцє́въ бж҃е, бл҃гослове́нъ є҆сѝ.

Ѽ бл҃гоꙋтро́бїѧ твоегѡ̀, дв҃о чⷭ҇таѧ! рѣши́ши бо безмѣ̑рныѧ печа̑ли и҆ напа̑сти, призыва́ющымъ въ нꙋ́ждѣ и҆ ѡ҆бстоѧ́нїи. тѣ́мже и҆ ны́нѣ помозѝ, бл҃гослове́ннаѧ, тѧ̀ восхвалѧ́ющымъ.

Покажѝ ско́рое твоѐ застꙋпле́нїе, покажѝ, ꙗ҆́кѡ мо́жеши ꙗ҆́кѡ мт҃и бг҃а: призыва́емъ тѧ̀ ѿ се́рдца, со слеза́ми припа́дающе: ско́рбь ᲂу҆кротѝ и҆ болѣ́знь рабѡ́въ твои́хъ вско́рѣ.

Оу҆ста̀ человѣ́кѡвъ, ꙗ҆́кѡ львѡ́въ лю́тыхъ, гро́ба тѧжча́йше ѿверзо́шасѧ го́рькѡ поглоти́ти мѧ̀: но ты̀, бцⷣе, ꙗ҆ви́сѧ наде́жда ненадѣ́ющымсѧ, и҆ низложѝ крѣ́пость и҆́хъ бл҃гослове́ннаѧ.

Да ᲂу҆́зрѧтъ вразѝ и҆ постыдѧ́тсѧ: да разꙋмѣ́ютъ и҆ ви́дѧтъ твою̀, є҆́же по на́мъ сопроти́въ борю́щꙋю си́лꙋ, и҆ въ про́пасть преиспо́днюю низложѝ и҆́хъ, бл҃гослове́ннаѧ, наде́ждо ненадѣ́ющихсѧ.

Пѣ́снь и҃.

І҆рмо́съ: Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: бл҃гослови́те всѧ̑ дѣла̀ гдⷭ҇нѧ гдⷭ҇а.

Прибѣ́жище на́ше и҆ мі́рꙋ ра́дованїе, бг҃ороди́тельнице, ᲂу҆милосе́рдитисѧ потщи́сѧ, и҆ спѣ́шнѡ бл҃года́ть твою̀ пода́ждь на́мъ ѡ҆скорблє́ннымъ, и҆ застꙋпѝ, бл҃га́ѧ, твоѧ̑ рабы̑.

Совѣ́тъ сꙋ́етенъ совѣща́ша лю́тѣ на ны̀ безбо́жныхъ сѡ́нмища, ꙗ҆́коже пре́жде а҆хїтофе́лъ. но вопїе́мъ: твои́ми мл҃твами се́й разорѝ, низло́жши си́хъ крѣ́пость, бцⷣе.

Призыва́ющихъ тѧ̀, бцⷣе, ѿ дꙋшѝ нело́жнѡ, во всѧ́кой ско́рби и҆ въ болѣ́знехъ разли́чныхъ, и҆ бѣда́хъ лю́тыхъ, спѣ́шнѡ ᲂу҆слы́ши, влⷣчце, си́хъ и҆збавлѧ́ющи при́снѡ мл҃твами твои́ми.

Да и҆́мѧ твоѐ, бцⷣе, на землѝ славосло́витсѧ, и҆́же и҆з̾ тебѐ возсїѧ́въ, грѣ́шникѡмъ держа́внꙋю наде́ждꙋ и҆ стѣ́нꙋ тѧ̀ дарова̀: тобо́ю бо всѧ́кое дыха́нїе къ бг҃ꙋ притека́етъ.

Пѣ́снь ѳ҃.

І҆рмо́съ: Недоꙋмѣ́етъ всѧ́къ ѧ҆зы́къ бл҃гохвали́ти по достоѧ́нїю, и҆з̾ꙋмѣва́етъ же ᲂу҆́мъ и҆ премі́рный пѣ́ти тѧ̀ бцⷣе: ѻ҆ба́че бл҃га́ѧ сꙋ́щи, вѣ́рꙋ прїимѝ, и҆́бо любо́вь вѣ́си бж҃е́ственнꙋю на́шꙋ, ты́ бо хрⷭ҇тїа́нъ є҆сѝ предста́тельница, тѧ̀ велича́емъ.

Да загради́тсѧ всѧ́къ ѧ҆зы́къ, лꙋка̑вымъ поꙋча́ѧйсѧ: да молча́тъ ᲂу҆стна̀ льсти̑ваѧ, и҆ ᲂу҆ста̀ непра́веднѡ глагѡ́лющаѧ на првⷣнаго беззако́нїе, горды́нею и҆ за́вистїю вражде́бною вкꙋ́пѣ, бцⷣы мл҃твою и҆ ст҃ы́хъ хрⷭ҇то́выхъ.

Въ мл҃твахъ бо́дрꙋю, чⷭ҇тꙋю бцⷣꙋ призыва́емъ всѝ, болѣ́знїю и҆ ско́рбїю ѡ҆держи́ми, взыва́юще: влⷣчце чⷭ҇таѧ, ско́рѡ и҆зба́ви ѿ ѡ҆держа́щихъ болѣ́зней рабы̑ твоѧ̑ при́снѡ, ꙗ҆́кѡ по бз҃ѣ застꙋ́пницы и҆ны́ѧ не и҆́мамы.

Ѿча́ѧвшихсѧ ве́лїе прибѣ́жище, ѡ҆бꙋрева́емыхъ ти́хое приста́нище ты̀ є҆сѝ бцⷣе. тѣ́мже и҆ мы̀ притека́емъ, взыва́юще: да не постыди́мсѧ, мт҃и и҆́стиннагѡ живота̀, но да бл҃годарѧ́ще ᲂу҆се́рднѡ тѧ̀ велича́емъ.

Прїимѝ, ѻ҆трокови́це пречⷭ҇таѧ, бж҃е́ственнꙋю пѣ́снь, воздава́ющи бл҃года́ть на тѧ̀ надѣ́ющымсѧ: и҆ мі́ръ и҆спросѝ цр҃квамъ при́снѡ посла́ти, и҆ ѻ҆те́чествꙋ на́шемꙋ ѡ҆долѣ̑нїѧ и҆ побѣ̑ды, да хрⷭ҇тїа́нскїй всѧ́къ ѧ҆зы́къ тѧ̀ велича́етъ.

Свѣти́ленъ:

Те́плое застꙋпле́нїе въ бѣда́хъ, въ печа́лехъ ᲂу҆тѣше́нїе, и҆ къ бг҃ꙋ примире́нїе, є҆́юже тлѝ и҆зба́вихомсѧ, бг҃оро́дицꙋ вѣ́рнїи ᲂу҆бл҃жа́емъ.

Сла́ва, и҆ ны́нѣ:

Тѧ̀ предста́тельницꙋ и҆́мамы грѣ́шнїи, ѽ прест҃а́ѧ дв҃о! ты̀ млⷭ҇тива къ на́мъ сотворѝ сн҃а твоего̀ и҆ бг҃а на́шего, мт҃рними твои́ми мл҃твами.

На хвали́техъ стїхи̑ры, гла́съ в҃:

Всѣ̑мъ предста́тельствꙋеши, бл҃га́ѧ, прибѣга́ющымъ съ вѣ́рою въ держа́вный тво́й покро́въ: и҆но́гѡ бо не и҆́мамы грѣ́шнїи къ бг҃ꙋ, въ бѣда́хъ и҆ ско́рбехъ при́снѡ и҆збавле́нїѧ, ѡ҆бремене́ни грѣхи̑ мно́гими, мт҃и бг҃а вы́шнѧгѡ. тѣ́мже тѝ припа́даемъ: и҆зба́ви ѿ всѧ́кагѡ ѡ҆бстоѧ́нїѧ рабы̑ твоѧ̑.

Всѣ́хъ скорбѧ́щихъ ра́дость, и҆ ѡ҆би́димыхъ застꙋ́пница, и҆ а҆́лчꙋщихъ пита́тельница, стра́нныхъ ᲂу҆тѣше́нїе, ѡ҆бꙋрева́емыхъ приста́нище, больны́хъ посѣще́нїе, немощны́хъ покро́въ и҆ застꙋ́пница, же́злъ ста́рости, мт҃и бг҃а вы́шнѧгѡ, ты̀ є҆сѝ пречⷭ҇таѧ: потщи́сѧ, мо́лимсѧ, сп҃сти́сѧ рабѡ́мъ твои̑мъ.

Ра́дꙋйсѧ, пречⷭ҇таѧ дв҃о: ра́дꙋйсѧ, чⷭ҇тны́й ски́птре цр҃ѧ̀ хрⷭ҇та̀. ра́дꙋйсѧ, прозѧ́бшаѧ гро́здь та́йный: Ра́дꙋйсѧ, две́ре нбⷭ҇наѧ и҆ неѡпали́маѧ кꙋпино̀. Ра́дꙋйсѧ, всемі́рный свѣ́те: Ра́дꙋйсѧ, всѣ́хъ ра́досте. Ра́дꙋйсѧ, вѣ́рныхъ сп҃се́нїе: ра́дꙋйсѧ, застꙋ́пнице всѣ́хъ хрⷭ҇тїа́нъ, прибѣ́жище влⷣчце.

Сла́ва, и҆ ны́нѣ, гла́съ и҃:

Ра́дꙋйсѧ, вселе́нныѧ похвало̀: ра́дꙋйсѧ, хра́ме гдⷭ҇ень. ра́дꙋйсѧ, горо̀ прїѡсѣне́ннаѧ: ра́дꙋйсѧ, всѣ́хъ прибѣ́жище. ра́дꙋйсѧ, свѣ́щниче златы́й: ра́дꙋйсѧ, сла́во правосла́вныхъ чⷭ҇тна́ѧ. Ра́дꙋйсѧ, мр҃і́е мт҃и хрⷭ҇та̀ бг҃а: ра́дꙋйсѧ раю̀. ра́дꙋйсѧ, бж҃е́ственнаѧ трапе́зо: ра́дꙋйсѧ сѣ́не. ра́дꙋйсѧ, рꙋ́чко всезлата́ѧ: ра́дꙋйсѧ, всѣ́хъ ᲂу҆пова́нїе.

Славосло́вїе вели́кое, и҆ ѿпꙋ́стъ, и҆ ча́съ а҃-й.

На лїтꙋргі́и: Бл҃жє́нна, пѣ́снь г҃ и҆ ѕ҃. Прокі́менъ, а҆по́столъ, є҆ѵⷢ҇лїе и҆ прича́стенъ бцⷣѣ ѻ҆́бщїй.

Мѣ́сѧца тогѡ́же, въ недѣ́лю, ближа́йшꙋю къ к҃є днѝ Пра́зднованїе собо́рꙋ новомч҃никѡвъ, и҆ и҆сповѣ́дникѡвъ рѡссі́йскихъ,

[Зрѝ] и҆̀мже канѡ́нъ пое́мъ и҆зъ ѻ҆́бщей мине́и ⁴

А҆́ще к҃є де́нь і҆аннꙋа́рїѧ прилꙋчи́тсѧ въ понедѣ́льникъ, вто́рникъ и҆лѝ сре́дꙋ, пое́мъ новомч҃никѡмъ въ недѣ́лю, ꙗ҆́же є҆́сть пред̾ си́мъ, а҆́ще ли бꙋ́детъ въ четверто́къ, пѧто́къ и҆лѝ сꙋббѡ́тꙋ, пое́мъ и҆̀мъ въ недѣ́лю послѣ́дꙋющꙋю.

А҆́ще прилꙋчи́тсѧ к҃є і҆аннꙋа́рїѧ въ де́нь недѣ́льный (воскре́сный), пое́мъ слꙋ́жбꙋ новомч҃никѡмъ въ то́йже де́нь, слꙋ́жбꙋ же ст҃о́мꙋ григо́рїю бг҃осло́вꙋ въ к҃з де́нь і҆аннꙋа́рїѧ кꙋ́пнѡ со слꙋ́жбою ст҃и́телю і҆ѡа́ннꙋ златоꙋ́стꙋ. Предварѧ́етъ тогда̀ слꙋ́жба ст҃и́телю григо́рїю. Вѣ́домо бꙋ́ди и҆ сїѐ: слꙋ́жба сїѧ̀ быва́етъ, наче́нши ѿ к҃в и҆ восходѧ́щи до к҃и і҆аннꙋа́рїѧ. И҆ а҆́ще прилꙋчи́тсѧ тогда̀ недѣ́лѧ мытарѧ̀ и҆ фарїсе́а, и҆лѝ блꙋ́днагѡ, и҆лѝ мѧсопꙋ́стнаѧ, пое́мъ новомч҃никѡмъ съ трїѡ́дїю, ꙗ҆́коже трїє́мъ ст҃и́телємъ по ма́рковой главѣ̀.

А҆́ще прилꙋчи́тсѧ въ то́йже де́нь па́мѧть вели́кагѡ ст҃а́гѡ, пое́мъ ст҃о́мꙋ вели́комꙋ, въ сꙋббѡ́тꙋ ближа́йшꙋю, и҆лѝ въ и҆ны́й де́нь.

А҆́ще же бꙋ́детъ гдѣ̀ въ то́й де́нь хра́мъ, пое́мъ слꙋ́жбꙋ хра́ма съ трїѡ́дїю непремѣ́ннѡ, ст҃ы̑мъ же новомч҃никѡмъ во грѧдꙋ́щꙋю недѣ́лю.

На ма́лѣй вече́рни: стїхи̑ры воскрє́сны.

Сла́ва, гла́съ и҃:

Землѧ̀ рꙋ́сскаѧ и҆ нб҃о земно́е бы́сть: въ свои́хъ разсѣ́линахъ тѣлеса̀ новомч҃никѡвъ и҆ и҆сповѣ́дникѡвъ сокры́вши и҆ тѣ́хъ нбⷭ҇ною сла́вою просїѧ́вши, и҆̀же свои́ми кровьмѝ ѡ҆роси́ша ю҆̀, пострада́вше ѿ слꙋ́гъ сатани́нскихъ за вѣ́рꙋ хрⷭ҇то́вꙋ во и҆скꙋпле́нїе грѣхѡ́въ бг҃оѿстꙋпле́нїѧ.

И҆ ны́нѣ, бг҃оро́диченъ, догма́тикъ гла́са.

На стїхо́внѣ стїхи́ра воскре́сна. Та́же стїхи̑ры новомч҃никѡмъ, гла́съ а҃.

Ѽ, вели́цїи страстоте́рпцы новомч҃ницы рѡссі́йстїи, съ любо́вїю припа́даемъ къ ва́мъ, и҆ прославлѧ́юще ва́шѧ по́двиги, бл҃гоговѣ́йнѡ лобыза́емъ ра̑ны ва́шѧ, моли́те, мо́лимсѧ, ѡ҆ дꙋша́хъ на́шихъ.

Сті́хъ: Разже́глъ ны̀ є҆сѝ, ꙗ҆́коже разжиза́етсѧ сребро̀.

Ѽ, сла́внїи новомч҃ницы рѡссі́йстїи, є҆гда̀ ѡ҆скꙋдѣва́ше вѣ́ра, ᲂу҆крѣплѧ́ете ю҆̀ и҆сповѣда́нїемъ ва́шимъ, є҆гда̀ и҆зсѧка́ше любы̀, любвѐ ра́ди ко хрⷭ҇тꙋ̀ да́сте себє̀ на мꙋ̑ки и҆ сме́рть, є҆гда̀ колеба́шесѧ наде́жда, ᲂу҆твержда́сте ю҆̀ ва́шимъ ᲂу҆пова́нїемъ на бг҃а, є҆го́же моли́те, да ᲂу҆крѣпи́тъ въ на́съ вѣ́рꙋ, наде́ждꙋ и҆ любо́вь.

Сті́хъ: Воззва́ша пра́веднїи и҆ гдⷭ҇ь ᲂу҆слы́ша и҆̀хъ.

Не человѣ́цы сп҃са́ютъ цр҃ковь, и҆ ничто́же по́льзꙋетъ согла́сїе со врагѝ є҆ѧ̀, но цр҃ковь сп҃са́етъ человѣ́ки си́лою хрⷭ҇то́вою, ꙗ҆́коже по́двигъ ва́шъ показа̀. ѽ непоколеби́мїи новомч҃ницы рѡссі́йстїи, вои́стинꙋ є҆стѐ сла́ва цр҃кве, ѡ҆ не́йже прилѣ́жнѡ моли́тесѧ, да непоколе́блемꙋ ᲂу҆тверди́тъ ю҆̀ хрⷭ҇то́съ.

Сла́ва, гла́съ в҃:

Ѽ, ди́вное во́инство но́выхъ страда́льцєвъ рѡссі́йскихъ. кто̀ возмо́жетъ досто́йнѡ просла́вити ва́съ: вои́стинꙋ бл҃же́нна землѧ̀, напи́вшаѧсѧ кровьмѝ ва́шими, гра́ды же и҆ вє́си є҆ѧ̀ та́йнѡ ѡ҆ст҃и́шасѧ, воспрїи́мше честні́и ѡ҆ста́нки ва́шѧ мно́жицею без̾ пѣ́нїѧ цр҃ко́внагѡ, та́кожде же и҆ без̾ погребе́нїѧ честна́гѡ. но моли́тесѧ, ст҃і́и, ѡ҆ странѣ̀ ва́шей и҆ ѡ҆ всѣ́хъ чтꙋ́щихъ ва́съ.

И҆ ны́нѣ, бг҃оро́диченъ.

Тропа́рь воскре́сенъ.

Сла́ва, тропа́рь, гла́съ д҃, зрѝ на Вели́цѣй вече́рни.

И҆ ны́нѣ, бг҃оро́диченъ, Є҆́же ѿ вѣ́ка:

На вели́цѣй вече́рни

Стїхи̑ры воскре́сны д҃. Та́же стїхи̑ры новомч҃никѡмъ гла́съ а҃:

Нача́ло ны́нѣ поло́жимъ, ѽ бра́тїе, моле́нїемъ те́плымъ къ нѡ́вымъ ᲂу҆го́дникѡмъ бж҃їимъ: ті́и бо стра́шными мꙋче́нїи ѡ҆чища́еми, ро́ждїе плодоно́сныѧ лозы̀ хрⷭ҇то́вы ꙗ҆ви́шасѧ, сла́достїю бл҃года́ти ѡ҆би́льнѡ напоѧ́емїи, во бл҃гоꙋха́нїи свѧ́тости и҆́хъ на́мъ предлага́емїи, да со ᲂу҆миле́нїемъ назида́ющесѧ по́двигомъ и҆́хъ, принесе́мъ бг҃ꙋ и҆ мы̀ пло́дъ покаѧ́нїѧ.

Нача́ло кр҃ще́нїѧ стра́шнагѡ, и҆́мже па́ки кр҃сти́сѧ землѧ̀ рꙋ́сскаѧ, восхвали́те, ѽ го́ры кі́євскїѧ, кресто́мъ а҆пⷭ҇ла а҆ндре́а бл҃гословє́нныѧ. и҆дѣ́же бо бл҃года́ть возсїѧ̀ ро́дꙋ на́шемꙋ ѿ вѣ́ры же и҆ дх҃а во ѿверзе́нїе црⷭ҇твїѧ бж҃їѧ, та́мѡ подоба́ше нача́тисѧ и҆ семꙋ̀ ѡ҆бновле́нїю кро́вїю первозакла́ннагѡ ѿ ст҃и́телей рꙋ́сскихъ, тезоиме́ннагѡ просвѣти́телю на́шемꙋ. се́й бо влади́мїръ но́вый, и҆з̾ вїногра́дника своегѡ̀ и҆зведе́нъ за врата̀ сщ҃е́нныѧ ла́ѵры пече́рскїѧ, вѣнча́нїѧ стефа́нова сподоблѧ́етсѧ, проща́ѧ и҆ бл҃гословлѧ́ѧ ᲂу҆бива́ющихъ є҆го̀, ꙗ҆́кѡ кро́ткїй мл҃твенникъ ѡ҆ дꙋша́хъ на́шихъ.

Рыда́нїе, жа́лость и҆ го́ре: сѐ сви́токъ і҆езекі́илевъ, насы́тивый дꙋ́шꙋ твою̀, ст҃е тѵ́хѡне, патрїа́рше на́шъ! да ᲂу҆слы́шитсѧ и҆ ны́нѣ гла́съ тво́й: бра́тїе, а҆рхїпа́стырїе и҆ па́стырїе, зови́те ча̑да ва̑ша на защи́тꙋ цр҃кве правосла́вныѧ. да ᲂу҆слы́шатъ же и҆ разори́тели храмѡ́въ бж҃їихъ ѻ҆́гненное сло́во твоѐ: а҆́ще є҆щѐ то́кмѡ и҆́менемъ хрⷭ҇тїа́нскимъ нарица́етесѧ, вла́стїю на́мъ ѿ бг҃а да́нною а҆наѳема́тствꙋемъ ва́съ. ѽ стра́шнагѡ ѿлꙋче́нїѧ вѣ́чнагѡ! сѐ а҆на́ѳема ники́мже разрѣша́ема! сѐ дерзнове́нїе патрїа́ршее!

Гла́съ д҃:

Кро́токъ, но непоколеби́мъ бы́лъ є҆сѝ, петро́ва гра́да и҆збра́нниче, сщ҃енномч҃ниче венїамі́не, копрони́мы но́выми ѡ҆брече́нный, лжепа́стырьми пре́данный вла́сти бг҃обо́рнѣй. тогда́ же ꙗ҆ви́ тѧ бг҃ъ ᲂу҆чи́телѧ безбоѧ́зненна, и҆ сѐ завѣ́тъ тво́й, и҆з̾ заточе́нїѧ возвѣще́нный: да не пощади́мъ мы̀ себѐ цр҃кве ра́ди и҆ не предади́мъ ст҃ꙋ́ю цр҃ковь себѐ ра́ди. на сꙋдѣ́ же беззако́ннѣмъ твоѐ сло́во бы́сть всѣ̑мъ ди́вно: жи́знь ли и҆лѝ сме́рть ны́нѣ возвѣстите́ ми, а҆́зъ же зна́меновавъ себѐ ст҃ы́мъ кресто́мъ, рекꙋ̀: сла́ва тебѣ̀, гдⷭ҇и, бж҃е, ѡ҆ всѣ́хъ.

Же́ртва бг҃ꙋ живопогребє́нныѧ въ кладезеподо́бный ро́въ низри́нꙋтыѧ: пре́жде всѣ́хъ є҆лїсаве́та страстоте́рпица, къ гѡ́рнимъ ᲂу҆стремле́ннаѧ кн҃ги́нѧ милосе́рднаѧ, би́серъ правосла́вїѧ въ но́вѣмъ ѻ҆те́чествѣ ѡ҆брѣ́тшаѧ, є҆ѵⷢ҇льски ᲂу҆бі́йцꙋ мꙋ́жа своегѡ̀ прости́вшаѧ, моли́твою и҆ бл҃готворе́нїемъ бг҃ꙋ ᲂу҆годи́вшаѧ, безбо́жными же непощажде́ннаѧ. помоли́тесѧ за на́съ ст҃і́и кн҃зїе, помоли́тесѧ за всѣ́хъ прпⷣбнїи страстоте́рпицы, є҆лїсаве́то съ варва́рою вѣ́рною. ᲂу҆слы́шите на́съ, въ ве́си геѳсїмані́йстѣй погребє́нныѧ, ᲂу҆слы́шите на́съ и҆ ті́и, и҆́хже погребе́нїе невѣ́домо, ᲂу҆слы́шите на́съ па́ки вкꙋ́пѣ прїѧ̑тыѧ во ѡ҆би́тели нбⷭ҇ныѧ, ст҃а́ѧ ѻ҆смери́це, моли́те бг҃а ѡ҆ на́съ.

Гла́съ и҃:

А҆дама́нтово мꙋ́жество ва́ше сла́ва є҆́сть цр҃кве рѡссі́йскїѧ, страстоте́рпцы и҆ и҆сповѣ̑дницы но́вїи, ᲂу҆чєни́цы бо є҆стѐ фїлі́ппѡвы и҆ є҆рмогє́новы, при́снїи же многострада́льномꙋ патрїа́рхꙋ тѵ́хѡнꙋ, и҆́же и҆ дадѐ ва́мъ и҆́мѧ своѐ. пребы́сте терпѣ́нїемъ въ бѣда́хъ, гони́ми и҆ ᲂу҆бива́еми. но кто̀ и҆зочте́тъ и҆ мꙋ̑ки, гѡ́ршїѧ сме́рти, ѻ҆ба́че ꙗ҆ви́стесѧ и҆ проповѣ́дателїе сꙋ́щымъ съ ва́ми во ᲂу҆́захъ, просвѣти́телїе прежденевѣ́рꙋющихъ, строи́телїе ст҃ы́хъ та́инствъ. ве́лїѧ вѣ́ра ва́ша, во все́мъ ꙗ҆ви́сте себѐ, ꙗ҆́кѡ бж҃їи слꙋ́ги.

Сла́ва, гла́съ а҃. Нача́ло ны́нѣ поло́жимъ: И҆ ны́нѣ: Догма́тикъ гла́са.

Вхо́дъ. Прокі́менъ, и҆ чтє́нїѧ г҃.

Проро́чества и҆са́їина чте́нїе (глава̀ м҃г):

Та́кѡ глаго́летъ гдⷭ҇ь: всѝ ꙗ҆зы́цы собра́шасѧ вкꙋ́пѣ, и҆ соберꙋ́тсѧ кнѧ̑зи ѿ ни́хъ. Кто̀ возвѣсти́тъ сїѧ̑ въ ни́хъ; и҆лѝ ꙗ҆́же ѿ нача́ла, кто̀ слы́шана сотвори́тъ ва́мъ; Да приведꙋ́тъ свидѣ́тєли своѧ̑, и҆ ѡ҆правдѧ́тсѧ, и҆ да ᲂу҆слы́шатъ, и҆ да рекꙋ́тъ и҆́стинꙋ. Бꙋ́дите мѝ свидѣ́тєли, и҆ а҆́зъ свидѣ́тель, глаго́летъ гдⷭ҇ь бг҃ъ, и҆ ѻ҆́трокъ є҆го́же и҆збра́хъ: да позна́ете и҆ вѣ́рꙋете мѝ, и҆ разꙋмѣ́ете, ꙗ҆́кѡ а҆́зъ є҆́смь: пре́жде менє̀ не бы́сть и҆́нъ бг҃ъ, и҆ по мнѣ̀ не бꙋ́детъ. А҆́зъ є҆́смь бг҃ъ, и҆ нѣ́сть ра́звѣ менѐ спаса́ѧй. А҆́зъ возвѣсти́хъ, и҆ спасо́хъ, ᲂу҆ничижи́хъ, и҆ не бѣ̀ въ ва́съ чꙋ́ждїй. Вы̀ мнѣ̀ свидѣ́тєли, и҆ а҆́зъ гдⷭ҇ь бг҃ъ, и҆ є҆щѐ ѿ нача́ла а҆́зъ є҆́смь: и҆ нѣ́сть ѿ рꙋ́къ мои́хъ и҆збавлѧ́ѧй. Сотворю̀, и҆ кто̀ ѿврати́тъ то̀; си́це глаго́летъ гдⷭ҇ь бг҃ъ, и҆збавлѧ́ѧй ва́съ ст҃ы́й і҆и҃левъ.

Премꙋ́дрости соломѡ́новы чте́нїе (глава̀ г҃):

Пра́ведныхъ дꙋ́шы въ рꙋцѣ̀ бж҃їей, и҆ не прико́снетсѧ и҆́хъ мꙋ́ка. Непщева́ни бы́ша во ѻ҆чесѣ́хъ безꙋ́мныхъ ᲂу҆мре́ти, и҆ вмѣни́сѧ ѡ҆ѕлобле́нїе и҆схо́дъ и҆́хъ, и҆ є҆́же ѿ на́съ ше́ствїе сокрꙋше́нїе, ѻ҆ни́ же сꙋ́ть въ ми́рѣ. И҆́бо предъ лице́мъ человѣ́ческимъ а҆́ще и҆ мꙋ́кꙋ прїи́мꙋтъ, ᲂу҆пова́нїе и҆́хъ безсме́ртїѧ и҆спо́лнено. И҆ вма́лѣ нака́зани бы́вше, вели́кими бл҃годѣ́тельствовани бꙋ́дꙋтъ: ꙗ҆́кѡ бг҃ъ и҆скꙋсѝ ѧ҆̀, и҆ ѡ҆брѣ́те и҆̀хъ достѡ́йны себѣ̀. Ꙗ҆́кѡ зла́то въ горни́лѣ и҆скꙋсѝ и҆̀хъ, и҆ ꙗ҆́кѡ всепло́дїе же́ртвенное прїѧ́тъ ѧ҆̀. И҆ во вре́мѧ посѣще́нїѧ и҆́хъ возсїѧ́ютъ, и҆ ꙗ҆́кѡ и҆́скры по сте́блїю потекꙋ́тъ. Сꙋ́дѧтъ ꙗ҆зы́кѡмъ, и҆ ѡ҆блада́ютъ людьмѝ, и҆ воцари́тсѧ гдⷭ҇ь въ ни́хъ во вѣ́ки. Надѣ́ющїисѧ на́нь разꙋмѣ́ютъ и҆́стинꙋ, и҆ вѣ́рнїи въ любвѝ пребꙋ́дꙋтъ є҆мꙋ̀. Ꙗ҆́кѡ бл҃года́ть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.

Премꙋ́дрости соломѡ́новы чте́нїе (глава̀ д҃):

Првⷣникъ а҆́ще пости́гнетъ сконча́тисѧ, въ поко́и бꙋ́детъ. Ста́рость бо честна̀ не многолѣ́тна, нижѐ въ числѣ̀ лѣ́тъ и҆счита́етсѧ. Сѣди́на же є҆́сть мꙋ́дрость человѣ́кѡмъ, и҆ во́зрастъ ста́рости житїѐ нескве́рное. бл҃гоꙋго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ̑шникъ преста́вленъ бы́сть: восхи́щенъ бы́сть, да не ѕло́ба и҆змѣни́тъ ра́зꙋма є҆гѡ̀ и҆лѝ ле́сть прельсти́тъ дꙋ́шꙋ є҆гѡ̀. Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ᲂу҆́мъ неѕло́бивъ. Сконча́всѧ вма́лѣ, и҆спо́лни лѣ̑та дѡ́лга: ᲂу҆го́дна бо бѣ̀ гдⷭ҇еви дꙋша̀ є҆гѡ̀, сегѡ̀ ра́ди потща́сѧ ѿ среды̀ лꙋка́вствїѧ. Лю́дїе же ви́дѣвше, и҆ не разꙋмѣ́вше, нижѐ поло́жше въ помышле́нїи таково́е: ꙗ҆́кѡ бл҃года́ть и҆ млⷭ҇ть въ прпⷣбныхъ є҆гѡ̀, и҆ посѣще́нїе во и҆збра́нныхъ є҆гѡ̀.

На лїті́и стїхи́ра, гла́съ и҃:

А҆́гг҃ли бж҃їи ра́достнїи призыва́ютъ, да возра́дꙋемсѧ всѝ! сі́и бо ра́дꙋющесѧ и҆ ѡ҆ є҆ди́номъ грѣ́шницѣ ка́ющемсѧ, ликовствꙋ́ютъ ѡ҆ мно́жествѣ но́выхъ ст҃ы́хъ, ѡ҆ мч҃ницѣхъ и҆ и҆сповѣ́дницѣхъ цр҃кве рѡссі́йскїѧ, блиста́ющїѧсѧ страда́ньми и҆́хъ: сѐ патрїа́рхъ, і҆ера́рси, сщ҃е́нницы, мона́си и҆ мно́жество человѣ̑къ всѧ́кагѡ зва́нїѧ, ᲂу҆́зами и҆ лише́ньми и҆скꙋше́ннїи, мꙋче́ньми же лю́тыми и҆ многоѻбра́зными и҆ сме́ртїю, ꙗ҆́же введѐ и҆̀хъ въ жи́знь безконе́чнꙋю. сегѡ́ же ра́ди по́двига и҆́хъ даде́сѧ и҆̀мъ бл҃года́ть моли́тисѧ за ны̀. ца́рское бо сꙋ́ть ті́и сщ҃е́нїе, наде́жда ро́да на́шегѡ ѡ҆бновле́нїѧ, возвѣсти́тели ми́лости сп҃са на́шегѡ, призва́вшагѡ и҆̀хъ въ сво́й чꙋ́дный свѣ́тъ.

Сла́ва, и҆ ны́нѣ: бг҃оро́диченъ, гла́съ то́йже:

Застꙋ́пнице ᲂу҆се́рднаѧ, скорбѧ́щихъ при́сное ра́дованїе, ᲂу҆тѣ́шительница є҆сѝ призыва́ющихъ тѧ̀ въ ча́съ и҆спыта́нїѧ, прест҃а́ѧ влⷣчце бцⷣе, ви́ждь хра́мы сн҃а твоегѡ̀ разорє́нныѧ, воззрѝ на порꙋга́нїе безбо́жными смире́нныхъ слꙋжи́телей є҆гѡ̀, ᲂу҆слы́ши стена̑нїѧ рабѡ́въ твои́хъ, и҆ сама̀ со страстоте́рпцы ст҃ы́ми застꙋпѝ и҆ поми́лꙋй на́съ.

На стїхо́внѣ стїхи̑ры воскрє́сны. Сла́ва, гла́съ ѕ҃:

Ѽ ст҃і́и смире́ннѣйшїи сщ҃е́нницы и҆сповѣ̑дницы, зри́мъ ва́съ, ка́кѡ въ стра́шнꙋю годи́нꙋ гоне́нїй дале́че ѿ домѡ́въ ва́шихъ со́слани бы́сте. зри́мъ ва́съ, гла́дныхъ, цынго́тныхъ, ви́да своегѡ̀ лише́нныхъ, стрꙋ́пїѧми кровоточа́щими покрове́нныхъ, приста́вники бїе́мыхъ и҆ сна̀ лиша́емаѧ пла́чꙋщихъ ѡ҆ ча́дѣхъ ѡ҆ста́вленныхъ и҆ ѡ҆ ма́терехъ и҆́хъ беззащи́тныхъ. и҆ кто̀ и҆спи́шетъ и҆мена̀ ва̑ша! кто̀ повѣ́даетъ мі́рꙋ всѧ̑ претерпѣ̑ннаѧ ва́ми! ѻ҆ба́че вѣ́даетъ бг҃ъ и҆збра̑нныѧ своѧ̑, сохрани́вшыѧ зало́гъ, врꙋче́нный и҆̀мъ да́же до сме́рти, и҆ сегѡ̀ ра́ди дерзнове́нїе и҆мꙋ́щыѧ моли́тисѧ ѡ҆ на́съ.

И҆ ны́нѣ, бг҃оро́диченъ, гла́съ то́йже:

Бцⷣе, безпо́мощнымъ по́моще! помозѝ и҆ ны́нѣ стра́ждꙋщымъ лю́демъ страны̀ рѡссі́йскїѧ, въ заточе́нїи, въ мꙋ́кахъ, и҆лѝ въ тѧ́жкихъ ѡ҆бстоѧ́нїихъ сꙋ́щымъ. тебѣ̀ мо́лимсѧ, моли́сѧ влⷣчце со ст҃ы́ми новомч҃никами и҆ и҆сповѣ́дниками ро́да на́шегѡ, и҆зба́витисѧ ѿ бѣ́дъ мно́зѣхъ рабѡ́мъ твои̑мъ.

По Ны́нѣ ѿпꙋща́еши Бцⷣе дв҃о, два́жды и҆ тропа́рь ст҃ы̑мъ є҆ди́ножды. А҆́ще нѣ́сть бдѣ́нїѧ, тропа́рь воскре́сный.

Сла́ва, тропа́рь, гла́съ д҃:

Дне́сь ра́достнѡ ликꙋ́етъ цр҃ковь рꙋ́сскаѧ, ꙗ҆́кѡ ма́ти ча́да, прославлѧ́ющи новомч҃ники и҆ и҆сповѣ́дники своѧ̑: ст҃и́тели и҆ і҆ере́и, ца́рствєнныѧ страстоте́рпцы, бл҃говѣ́рныѧ кн҃зи и҆ кн҃ги̑ни, прпⷣбныѧ мꙋжѝ и҆ жєны̀ и҆ всѧ̑ правѡсла́вныѧ хрⷭ҇тїа́ны, во дни̑ гоне́нїѧ безбо́жнагѡ жи́знь свою̀ за вѣ́рꙋ во хрⷭ҇та̀ положи́вшыѧ и҆ кровьмѝ и҆́стинꙋ соблю́дшыѧ. тѣ́хъ предста́тельствомъ, долготерпѣли́ве гдⷭ҇и, странꙋ̀ на́шꙋ въ правосла́вїи сохранѝ до сконча́нїѧ вѣ́ка.

И҆лѝ се́й:

Цвѣ́ти рѡссі́йскагѡ лꙋ́га дꙋхо́внагѡ, въ годи́нꙋ лю́тыхъ гоне́нїй ди́внѡ процвѣ́тшїи новомч҃ницы и҆ и҆сповѣ̑дницы безчи́слєннїи: ст҃и́телїе и҆ па́стырїе, (с. 747) мона́си и҆ мїрсті́и, мꙋ́жїе, жєны́ же и҆ дѣ́ти, до́брый пло́дъ въ терпѣ́нїи хрⷭ҇тꙋ̀ прине́сшїи, моли́тесѧ є҆мꙋ̀, ꙗ҆́кѡ насади́телю ва́шемꙋ, да и҆зба́витъ лю́ди своѧ̑ ѿ безбо́жныхъ и҆ ѕлы́хъ, да ᲂу҆твержда́етсѧ же цр҃ковь рꙋ́сскаѧ кровьмѝ и҆ страда́нїи ва́шими во сп҃се́нїе дꙋ́шъ на́шихъ.

И҆ ны́нѣ, бг҃оро́диченъ воскре́сный: Є҆́же ѿ вѣ́ка:

На ᲂу҆́трени на Бг҃ъ гдⷭ҇ь: тропа́рь воскре́сенъ, два́жды. Сла́ва, новомч҃никѡмъ. И҆ ны́нѣ: бг҃оро́диченъ воскре́сный: Є҆́же ѿ вѣ́ка:

Полѷеле́й и҆ велича́нїе:

Велича́емъ ва́съ, ст҃і́и новомч҃ницы и҆ и҆сповѣ̑дницы рѡссі́йстїи: и҆ чти́мъ честна̑ѧ страда̑нїѧ ва̑ша, ꙗ҆̀же за хрⷭ҇та̀ претерпѣ́ли є҆стѐ.

Ѱало́мъ и҆збра́нный: Бг҃ъ на́мъ прибѣ́жище и҆ си́ла. А҆́гг҃льскїй собо́ръ: посе́мъ є҆ктенїа̀ ма́лаѧ и҆ возгла́съ: Ꙗ҆́кѡ бл҃гослови́сѧ и҆́мѧ твоѐ:

По полѷеле́и ѵ҆пакоѝ гла́са, та́же сѣда́ленъ ст҃ы́хъ, гла́съ а҃: Подо́бенъ: Ка́мени запеча́танꙋ:

Проидо́сте сквозѣ̀ ѻ҆́гнь мꙋче́нїѧ и҆ во́дꙋ сле́зъ, и҆зведѐ вы̀ гдⷭ҇ь въ поко́й ст҃ы́хъ, новомч҃ницы и҆ и҆сповѣ̑дницы рѡссі́йстїи, хода́таи воззва́нїѧ къ бг҃ꙋ разꙋмѣ́ющымъ и҆ лобыза́ющымъ по́двигъ ва́шъ. сла́ва предꙋвѣ́дѣвшемꙋ произволе́нїе ва́ше, сла́ва предꙋста́вившемꙋ ва́съ къ сла́вѣ нбⷭ҇нѣй, сла́ва подаю́щемꙋ на́мъ ва́ми ве́лїю млⷭ҇ть.

И҆́нъ сѣда́ленъ, гла́съ то́йже:

Ꙗ҆́кѡ лю́бѧщымъ бг҃а, ва́мъ ѽ страстоте́рпцы, всѧ̑ претерпѣ̑ннаѧ на землѝ бы́ша во бл҃го́е. и҆ прешлѝ є҆стѐ, ꙗ҆́кѡ и҆збра́ннїи, къ ѡ҆бѣ́щанномꙋ наслѣ́дїю вѣ́чныхъ бла́гъ. Сла́ва да́вшемꙋ ва́мъ въ тѧ́жкихъ мꙋ́кахъ крѣ́пость, сла́ва вѣнча́вшемꙋ ва́съ, сла́ва дѣ́йствꙋющемꙋ ва́ми сп҃се́нїе на́ше.

Сла́ва, гла́съ г҃:

Возсїѧ́ли є҆стѐ на тве́рди цр҃ко́внѣй, ст҃и́телїе престо́лѡвъ рѡссі́йскихъ пе́рвѣйшихъ: тѵ́хѡне ст҃ѣ́йшїй, патрїа́рше, а҆на́ѳемꙋ врагѡ́мъ креста̀ пла́меннѣ и҆зрекі́й, влади́мїре ст҃и́телю кі́евскїй, зрѣ́лѣйшїй нача́токъ но́выхъ плодѡ́въ са́да рꙋ́сскагѡ и҆ венїамі́не, свѣти́льниче петрогра́дскїй, и҆здѣ́тска возжелѣ́вый за хрⷭ҇та̀ страда́ти, є҆́же и҆ бы́сть. сла́вѧтсѧ же съ ва́ми и҆ всѝ страстоте́рпцы но́вїи. мы́ же со ᲂу҆миле́нїемъ ва́мъ си́це рце́мъ: ра́дꙋйсѧ, собо́ре крѣ́пкїй терпѣли́вый. бꙋ́дите мѡли́твенницы дерзнове́ннїи ѡ҆ всѣ́хъ молѧ́щихсѧ ва́мъ.

И҆ ны́нѣ, бг҃оро́диченъ, гла́съ то́йже:

Красотѣ̀ дв҃ства твоегѡ̀, и҆ пресвѣ́тлой чⷭ҇тотѣ̀ твое́й гаврїи́лъ ᲂу҆диви́всѧ, вопїѧ́ше тѝ, бцⷣе, кꙋ́ю тѝ похвалꙋ̀ принесꙋ̀ досто́йнꙋю, что́ же воз̾именꙋ́ю тѧ̀, недоꙋмѣва́ю и҆ ᲂу҆жаса́юсѧ. тѣ́мже ꙗ҆́кѡ повелѣ́нъ бы́хъ, вопїю́ ти: ра́дꙋйсѧ, бл҃года́тнаѧ.

А҆́ще хра́мъ ст҃ы̑мъ, глаго́лемъ: Прокі́менъ, гла́съ д҃: Тебѐ ра́ди, гдⷭ҇и, ᲂу҆мерщвлѧ́еми є҆смы̀ ве́сь де́нь. Сті́хъ: Вмѣни́хомсѧ ꙗ҆́кѡ ѻ҆́вцы заколе́нїѧ. Є҆ѵⷢ҇лїе ѿ матѳе́а, зача́ло л҃ѕ:

По н҃-мъ ѱалмѣ̀ стїхи́ра, гла́съ ѕ҃:

Воскресе́нїѧ хрⷭ҇то́ва и҆́стиннїи свидѣ́тели ꙗ҆ви́шасѧ но́вїи страстоте́рпцы и҆ и҆сповѣ̑дницы, и҆̀мже пра́здникъ се́й соста́вихомъ, ка́кѡ бы ті́и понеслѝ кре́стъ сво́й, а҆́ще не бы зна́ли, ꙗ҆́кѡ недосто́йнїи сꙋ́ть страда̑нїѧ ны́нѣшнѧгѡ вре́мене, къ хотѧ́щей сла́вѣ ꙗ҆ви́тисѧ въ ни́хъ.

Да́же до здѣ̀ хра́ма ст҃ы̑мъ.

Канѡ́ны: Воскре́сный и҆ бцⷣѣ гла́са.

А҆́ще въ недѣ́лю мы́таревꙋ, и҆лѝ блꙋ́днагѡ, и҆лѝ мѧсопꙋ́стнꙋю зрѝ ма́рковꙋ главꙋ̀ і҆аннꙋа́рїа въ г҃-й де́нь.

Та́же новомч҃никѡвъ канѡ́нъ пое́мъ и҆зъ ѻ҆́бщей мине́и.

По г҃-й пѣ́сни конда́къ, гла́съ г҃:

Дне́сь новомч҃ницы рѡссі́йстїи въ ри́захъ бѣ́лыхъ предстоѧ́тъ а҆́гнцꙋ бж҃їю и҆ со а҆́гг҃лы пѣ́снь побѣ́днꙋю воспѣва́ютъ бг҃ꙋ: бл҃гослове́нїе, и҆ сла́ва, и҆ премꙋ́дрость, и҆ хвала̀, и҆ че́сть, и҆ си́ла, и҆ крѣ́пость на́шемꙋ бг҃ꙋ во вѣ́ки вѣкѡ́въ. а҆ми́нь.

И҆́нъ конда́къ, гла́съ в҃:

Но́вїи страстоте́рпцы рѡссі́йстїи, и҆сповѣ́днически по́прище зе́мное прете́кшїи, страда́ньми дерзнове́нїе прїи́мшїи, моли́тесѧ хрⷭ҇тꙋ̀, ва́съ ᲂу҆крѣпи́вшемꙋ, да и҆ мы̀, є҆гда̀ на́йдетъ на ны̀ и҆спыта́нїѧ ча́съ, мꙋ́жества да́ръ бж҃їй воспрїи́мемъ. ѻ҆́бразъ бо є҆стѐ лобыза́ющымъ по́двигъ ва́шъ, ꙗ҆́кѡ ни ско́рбь, ни тѣснота̀, ни сме́рть ѿ любвѐ бж҃їѧ разлꙋчи́ти ва́съ не возмого́ша.

І҆́косъ:

Є҆гда̀ начина́хꙋсѧ дні́е ѻ҆́гненнагѡ и҆скꙋше́нїѧ цр҃кве рѡссі́йскїѧ и҆ не бл҃говолѝ гдⷭ҇ь прїѧ́ти ѡ҆ на́съ всесожже́нїѧ и҆ же́ртвы, тогда̀ мно́зи а҆рхїерє́и и҆ сщ҃е́нницы не приложи́шасѧ пло́ти и҆ кро́ви, но ᲂу҆разꙋмѣ́вше во́лю гдⷭ҇ню, са́ми себѐ принесо́ша, ꙗ҆́кѡ непоро́чное заколе́нїе. и҆ вслѣ́дъ первосщ҃е́нника вѣ́чнагѡ и҆ хода́таѧ но́вагѡ завѣ́та внидо́ша сі́и во ст҃и́лище съ кро́вїю свое́ю, да ѡ҆чи́стѧтсѧ грѣхѝ людсті́и. сла́вни сꙋ́ть и҆мена̀ ва̑ша, мꙋ́жественнїи страстоте́рпцы, ѻ҆́бразъ бо на́мъ є҆стѐ, лобыза́ющымъ по́двигъ ва́шъ, ꙗ҆́кѡ ни ско́рбь, ни тѣснота̀, ни сме́рть ѿ любвѐ бж҃їѧ разлꙋчи́ти ва́съ не возмого́ша.

Сѣда́ленъ, гла́съ и҃:

Не́мощїю пло́ти на́мъ подобостра́стнїи, дꙋ́хомъ въ мѣ́рꙋ дре́влихъ ѻ҆тцє́въ тща́лисѧ є҆стѐ, ѽ непрекло́ннїи сщ҃енноисповѣ̑дницы рѡссі́йстїи, и҆̀же въ разоре́ннꙋю ѻ҆би́тель солове́цкꙋю и҆ во и҆на̑ѧ мѣста̀ заточе́нїѧ ссыла́емїи. Оу҆множа́ющымсѧ же страда́нїємъ ва́шымъ, и҆збы́точествоваше та́йнѡ и҆ ᲂу҆тѣше́нїе ѿ гдⷭ҇а, и҆́мъ же ны́нѣ и҆́стѣе ᲂу҆тѣша́етесѧ, въ невече́рнїй де́нь дости́гше црⷭ҇твїѧ хрⷭ҇то́ва, въ не́мже не преста́йте мо́лимъ ва́съ, молѧ́щесѧ ѡ҆ сп҃се́нїи дꙋ́шъ на́шихъ.

Сла́ва, и҆ ны́нѣ: грѧдꙋ́щагѡ предпра́зднства, гла́съ то́йже:

Ра́дꙋютсѧ новомч҃ницы и҆ и҆сповѣ̑дницы ро́да на́шегѡ, срѣта́юще гдⷭ҇а и҆ влⷣкꙋ своего̀, є҆го́же и҆ногда̀ срѣ́те ст҃ы́й ста́рецъ сѷмеѡ́нъ, прирекі́й: ны́нѣ ѿпꙋща́еши раба̀ твоего̀ влⷣко. сподо́би, гдⷭ҇и, и҆ на́мъ въ ча́съ и҆схо́да ѿ жи́зни сеѧ̀ вре́менныѧ прощє́ннымъ бы́ти и҆ ѿпꙋщє́ннымъ съ ми́ромъ, моли́твами пречⷭ҇тыѧ влⷣчцы на́шеѧ бг҃оро́дицы и҆ ны́нѣ воспѣва́емыхъ ᲂу҆го́дникѡвъ твои́хъ и҆ всѣ́хъ ст҃ы́хъ.

По ѕ҃-й пѣ́сни конда́къ воскре́сный и҆ і҆́косъ є҆гѡ̀.

Є҆ѯапостїла́рїй воскре́сенъ:

Сла́ва, свѣти́ленъ ст҃ы̑мъ:

Вельмѝ свѣ́телъ ꙗ҆ви́сѧ на́мъ по́двигъ ва́шъ, ст҃і́и новомч҃ницы и҆ и҆сповѣ̑дницы во дни̑ сїѧ̑, малодꙋ́шїемъ ѡ҆мрачє́нныѧ, ѡ҆скꙋдѣ́ бо вѣ́ра за ᲂу҆множе́нїе беззако́нїй на́шихъ, ѡ҆хладѐ любы̀, поколеба́сѧ наде́жда, до́блесть же ва́ша ѡ҆зарѝ сла́вою но́вою рꙋ́сскꙋю цр҃ковь.

И҆ ны́нѣ: бг҃оро́диченъ воскре́сный.

На хвали́техъ стїхи̑ры воскре́сны ѻ҆ктѡ́иха, та́же ст҃ы́хъ новомч҃никѡвъ, гла́съ ѕ҃:

Слы́ша стра́шнꙋ вѣ́сть ѡ҆ гоне́нїихъ, на цр҃ковь бж҃їю воздви́гнꙋтыхъ, всерѡссі́йскїй на́шъ собо́ръ, сщ҃е́нный и҆ вели́кїй, во є҆ди́нꙋ мы́сль собо́рнꙋ всѧ̑ совокꙋпѝ и҆ молє́нїѧ ᲂу҆ста́ви ѡ҆ гони́мыхъ и҆ ѡ҆ ᲂу҆бїе́нныхъ и҆сповѣ́дницѣхъ и҆ мч҃ницѣхъ въ де́нь ст҃и́телѧ влади́мїра страда́нїѧ, и҆ сме́рти. мꙋ́дрствꙋѧй се́й де́нь со цр҃ковїю мꙋ́дрствꙋетъ: дні́е преставле́нїѧ ѿше́дшихъ къ бг҃ꙋ въ мꙋ́кахъ деньмѝ рождества̀ и҆́хъ нарече́ни бы́ша. сегѡ̀ ра́ди соверша́емъ пра́здникъ се́й, ꙗ҆́кѡ рождество̀ рѡссі́йскихъ но́выхъ страстоте́рпцєвъ.

Гла́съ и҃.

Ѿреко́шасѧ проси́ти ми́лости ѡ҆сꙋжде́ннїи ѿ безбѡ́жникъ сщ҃е́нницы бж҃їи и҆́хже бл҃гословѝ ст҃ы́й патрїа́рхъ, на мꙋ̑ки и҆ на сме́рть за хрⷭ҇та̀. є҆гда́ же воꙋ́трїе ведо́ми бы́ша на ка́знь, не вѣ́дѧхꙋ стра́жїе, ка́кѡ срѣ́тшыѧ и҆̀хъ вѣ̑рныѧ ѿгони́ти. лобыза́хꙋ бо лю́дїе ѡ҆бречє́ннымъ сме́ртникѡмъ и҆ сщ҃е́нныѧ рꙋ́цѣ и҆́хъ и҆ ѡ҆де́жды кра́й, ѻ҆́нѣмъ побѣ́днѡ пою́щымъ: хрⷭ҇то́съ воскре́се и҆зъ ме́ртвыхъ, см҃ртїю сме́рть попра́въ. гдⷭ҇и мл҃твами сщ҃енномꙋ́ченикѡвъ си́хъ поми́лꙋй на́съ.

Гла́съ а҃:

Сті́хъ: Разже́глъ ны̀ є҆сѝ, ꙗ҆́коже разжиза́етсѧ сребро̀. Ѽ сла́внїи новомч҃ницы.

Сті́хъ: Воззва́ша првⷣнїи и҆ гдⷭ҇ь ᲂу҆слы́ша и҆̀хъ. Не человѣ́цы сп҃са́ютъ цр҃ковь: (зрѝ на ма́лой вече́рни).

Сла́ва: стїхи́ра є҆ѵⷢ҇льскаѧ. И҆ ны́нѣ: Пребл҃гослове́нна є҆сѝ: Славосло́вїе вели́кое, тропа́рь воскре́сный, є҆ктєнїѝ и҆ ѿпꙋ́стъ.

На лїтꙋргі́и бл҃жє́нны гла́са на ѕ҃ и҆ ст҃ы́хъ новомч҃никѡвъ на д҃:

Помѧнѝ гдⷭ҇и, стра̑шнаѧ мꙋче́нїѧ, и҆́миже ѡ҆ тебѣ̀ пострада́ша страстоте́рпцы но́вїи, ѿ ро́да на́шегѡ ны́нѣ прозѧ́бшїи, и҆ прїимѝ молє́нїѧ и҆́хъ ѡ҆ сп҃се́нїи на́шемъ.

Ѿве́рзлъ є҆сѝ, сꙋдїѐ првⷣный, црⷭ҇тво нбⷭ҇ное и҆сповѣ́дникѡмъ цр҃кве рѡссі́йскїѧ. ᲂу҆слы́ши гдⷭ҇и пра́вдꙋ и҆́хъ, вонмѝ моле́нїю и҆́хъ ѡ҆ сп҃се́нїи дꙋ́шъ на́шихъ.

Сла́ва:

Ѽ трⷪ҇це пребжⷭ҇твеннаѧ! возвратѝ плѣне́нїе на́ше. вѣ́мы ꙗ҆́кѡ ᲂу҆мно́жишасѧ ꙗ҆́кѡже николи́же пре́жде грѣ́хъ въ странѣ̀ на́шей, но возсїѧ̀ и҆ бл҃года́ть въ по́двизѣ но́выхъ ст҃ы́хъ, и҆̀же и҆ мо́лѧтъ тѧ̀, трист҃ы́й бж҃е, ѡ҆ сп҃се́нїи дꙋ́шъ на́шихъ.

И҆ ны́нѣ:

Расточє́нныѧ соберѝ, малодꙋ̑шныѧ возста́ви, ѿре́кшыѧсѧ же ѿ ст҃о́й вѣ́ры призовѝ и҆ ѡ҆братѝ, ѡ҆ бл҃года́тнаѧ и҆ прчⷭ҇таѧ дв҃о марі́е, со ст҃ы́ми новомч҃ники и҆ и҆сповѣ́дники хрⷭ҇та̀ сп҃са ᲂу҆молѧ́ющи ѡ҆ проще́нїи и҆ сп҃се́нїи дꙋ́шъ на́шихъ.

По вхо́дѣ тропарѝ по ᲂу҆ста́вꙋ ст҃ы́хъ, и҆мꙋ́щихъ бдѣ́нїе, прилꙋчи́вшихсѧ въ недѣ́лю.

А҆́ще же трїѡ́дь, зрѝ ма́рковꙋ главꙋ̀ і҆аннꙋа́рїа а҃- й де́нь.

Прокі́менъ гла́са (и҆лѝ трїѡ́ди) и҆ ст҃ы́хъ гла́съ з҃: Тебѐ ра́ди гдⷭ҇и, ᲂу҆мерщвлѧ́еми є҆смы̀ ве́сь де́нь. А҆пⷭ҇лъ рѧдовы́й и҆ ст҃ы́хъ къ ри́млѧнѡмъ, зача́ло ч҃ѳ. А҆ллилꙋ́їа гла́са и҆ ст҃ы́хъ гла́съ д҃: Воззва́ша првⷣнїи и҆ гдⷭ҇ь ᲂу҆слы́ша и҆̀хъ и҆ ѿ всѣ́хъ скорбе́й и҆зба́ви и҆̀хъ. Є҆ѵⷢ҇лїе рѧдово́е и҆ ст҃ы́хъ ѿ лꙋкѝ зача́ло р҃ѕ. Прича́стенъ: Хвали́те гдⷭ҇а съ небе́съ: И҆ ст҃ы́хъ: Ра́дꙋйтесѧ првⷣнїи ѡ҆ гдⷭ҇ѣ:

На моле́бномъ пѣ́нїи то́йже прокі́менъ: Тебѐ ра́ди гдⷭ҇и: на гла́съ д҃ (зрѝ сті́хъ на ᲂу҆́трени). Є҆ѵⷢ҇лїе ѿ матѳе́а, зача́ло л҃ѕ.