Мѣ́сѧца тогѡ́же въ к҃а-й де́нь. Прпⷣбнагѡ ѻ҆ц҃а̀ на́шегѡ маѯі́ма и҆сповѣ́дника:
И҆ ст҃а́гѡ мч҃ника неофѵ́та:
И҆ ст҃ы́хъ мꙋ́ченикѡвъ: є҆ѵге́нїа, кані́дїа, ᲂу҆алерїа́на и҆ а҆кѵ́лы.
Слꙋ́жба и҆́хъ пое́тсѧ на повече́рїи.
И҆ прпⷣбнагѡ ѻ҆ц҃а̀ на́шегѡ маѯі́ма гре́ка.
Слꙋ́жба є҆гѡ̀ пи́сана въ приложе́нїи.
На Гдⷭ҇и, воззва́хъ, стїхи̑ры маѯі́ма, на ѕ҃, гла́съ д҃. Поⷣ: Ꙗ҆́кѡ до́блѧ:
За милосе́рдїе бы́вша человѣ́ка, ꙳ ꙗ҆́кѡ благоизво́ли, во двꙋ̀ хотѣ́нїихъ, ꙳ дѣ́йствахъ же разꙋмѣва́ема, преподо́бне, ꙳ проповѣ́далъ є҆сѝ, маѯі́ме, ꙳ загражда́ѧ скве́рныхъ ꙳ незатворє́ннаѧ ᲂу҆ста̀, ꙳ є҆диново́льна, є҆динодѣ́йственна того̀ сла́вѧщихъ, ꙳ и҆скꙋше́нїемъ дїа́вольскимъ ꙳ ѕло́бꙋ содѣ́лавшаго.
Жи́лами ᲂу҆че́нїй твои́хъ, ꙳ пѵ́рра, ѻ҆́ч҃е, ᲂу҆дави́лъ є҆сѝ, ꙳ бꙋесло́вѧща, маѯі́ме, ѕломꙋ́дреннаго, и҆ гонє́нїѧ претерпѣ́лъ є҆сѝ, ꙳ и҆ скѡ́рби, приснопа́мѧтне, ꙳ ᲂу҆ранѧ́емь лю́тѣ, ꙳ и҆ ѧ҆зы́къ ѿрѣ́зꙋемь, ꙳ и҆ ю҆́же всегда̀ къ бг҃ꙋ простира́емꙋю бж҃е́ственнꙋю рꙋ́кꙋ, ꙳ є҆́юже пишѧ̀, соверши́лъ є҆сѝ высѡ́каѧ словеса̀.
Скоропи́сца ꙗ҆́кѡ тро́сть, ꙳ наѡстре́на дх҃омъ, ꙳ ст҃ы́й бы́сть, бл҃же́нне, ѧ҆зы́къ тво́й, ꙳ добропи́шꙋщъ бл҃года́тїю ꙳ на скрижа́лѣхъ серде́цъ на́шихъ, ꙳ зако́нъ бж҃е́ственныхъ добродѣ́телей, ꙳ и҆ ᲂу҆че́нїемъ и҆звѣ́стїе, ꙳ и҆ воплоще́нїе во двꙋ̀ сꙋщества́хъ человѣ́кѡмъ, ꙳ и҆ є҆ди́нѣй ѵ҆поста́си ꙗ҆ви́тисѧ восхотѣ́вшагѡ.
И҆́ны стїхи̑ры мꙋ́ченика неофѵ́та, гла́съ и҃. Поⷣ: Ѽ пресла́внагѡ чꙋдесѐ!
Ѽ пресла́внагѡ чꙋдесѐ! ꙳ го́лꙋбь бесѣ́дꙋетъ неофѵ́тꙋ мч҃никꙋ ꙳ человѣ́ческимъ вѣща́нїемъ, ꙳ ѿ вы́шнихъ прише́дшїй, ꙳ є҆гѡ́же ра́ди и҆ ѡ҆блиста́етъ житїѐ равноа́гг҃льно, ꙳ и҆́мже ю҆́ношствꙋѧ стра́ждетъ крѣ́пкѡ. ꙳ Ѽ бжⷭ҇твенныхъ дѣѧ́нїй пѧтострада́льнагѡ мч҃ника! ꙳ є҆гѡ́же мл҃твами спасѝ дꙋ́шы на́шѧ, хрⷭ҇тѐ, ꙳ ꙗ҆́кѡ бл҃гоꙋтро́бенъ.
Ѽ пресла́внагѡ чꙋдесѐ! ꙳ ѿ пеле́нъ самѣ́хъ совершенномꙋ́дрый неофѵ́тъ ꙳ соверша́етъ чꙋдеса̀ дѣ́йствомъ дх҃а: ꙳ и҆з̾ ка́мене во́дꙋ моли́твами и҆сточа́етъ, ме́ртвꙋю воздвиза́етъ, є҆ѧ́же ꙗ҆ви́сѧ поро́дъ. ꙳ Ѽ бж҃е́ственныхъ дѣѧ́нїй пѧтострада́льнагѡ мꙋ́ченика! ꙳ є҆гѡ́же мл҃твами спасѝ дꙋ́шы на́шѧ, хрⷭ҇тѐ, ꙗ҆́кѡ бл҃гоꙋтро́бенъ.
Ѽ пресла́внагѡ чꙋдесѐ! ꙳ за хрⷭ҇та̀ стражда̀ требл҃же́нный неофѵ́тъ, ꙳ врагѝ ᲂу҆страшѝ и҆зрѧ́дными видѣ̑нїи, ꙳ ѻ҆́гнь ᲂу҆гаса́етъ, семꙋ̀ вмета́емꙋ, ꙳ свирѣ̑пыѧ ѕвѣ́ри ᲂу҆страши́вшыѧсѧ показꙋ́етъ. ꙳ Ѽ держа́во непобѣди́маѧ, ꙳ въ не́йже ᲂу҆дивлѧ́етсѧ страда́лецъ! ꙳ но мл҃твами є҆гѡ̀ спаси́ ны, бж҃е.
Сла́ва, преподо́бнагѡ, гла́съ ѕ҃:
Преподо́бне, ѻ҆́ч҃е, во всю̀ зе́млю и҆зы́де вѣща́нїе и҆справле́нїй твои́хъ. тѣ́мъ на нб҃сѣ́хъ ѡ҆брѣ́лъ є҆сѝ мздꙋ̀ трꙋдѡ́въ твои́хъ, дє́мѡнскїѧ погꙋби́лъ є҆сѝ полкѝ, и҆ а҆́гг҃льскїѧ дости́глъ є҆сѝ чи́ны, и҆́хже житїю̀ безъ поро́ка поревнова́лъ є҆сѝ: дерзнове́нїе и҆мѣ́ѧ ко хрⷭ҇тꙋ̀ бг҃ꙋ, ми́ръ и҆спросѝ дꙋша́мъ на́шымъ.
И҆ ны́нѣ, бг҃оро́диченъ.
А҆́ще среда̀, и҆лѝ пѧто́къ, крⷭ҇тобг҃оро́диченъ. Подо́бенъ: Всѐ ѿло́жше:
А҆́гнца своего̀ ꙳ а҆́гница нескве́рнаѧ дре́вле и҆ непоро́чнаѧ влⷣчца ꙳ на дре́вѣ кре́стнѣмъ ꙗ҆́кѡ ᲂу҆зрѣ̀, ꙳ ма́терски восклица́ше, и҆ дивѧ́щисѧ вопїѧ́ше: ꙳ ча́до сладча́йшее, ꙳ что̀ зрѣ́нїе сїѐ но́вое и҆ пресла́вное; ка́кѡ со́нмъ безблагода́тный ꙳ сꙋди́щꙋ пїла́товꙋ предадѐ тѧ̀, ꙳ и҆ ѡ҆сꙋжда́етъ на сме́рть ꙳ жи́знь всѧ́ческихъ; ꙳ но воспѣва́ю твоѐ неизрече́нное, ꙳ сло́ве, снизхожде́нїе.
На стїхо́внѣ ѻ҆ктѡ́иха. Сла́ва, гла́съ и҃:
Мона́хѡвъ мно́жества наста́вника тѧ̀ почита́емъ, ѻ҆́ч҃е на́шъ маѯі́ме: твое́ю бо стезе́ю вои́стиннꙋ пра́вѡ ходи́ти позна́хомъ. Блаже́нъ є҆сѝ хрⷭ҇тꙋ̀ рабо́тавъ, и҆ вра́жїю ѡ҆бличи́лъ є҆сѝ си́лꙋ, а҆́гг҃лѡвъ собесѣ́дниче, преподо́бныхъ соприча́стниче и҆ пра́ведныхъ. Съ ни́миже моли́сѧ гдⷭ҇еви, поми́ловатисѧ дꙋша́мъ на́шымъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
Подо́бенъ: Ѽ пресла́внагѡ чꙋдесѐ!:
Что̀ зри́мое видѣ́нїе, ꙳ є҆́же мои́ми ѻ҆чесы̀ ви́дитсѧ, ѽ влⷣко! ꙳ содержа́й всю̀ тва́рь, ꙳ на дре́во воздви́женъ бы́въ, ꙳ и҆ ᲂу҆мира́еши всѣ̑мъ даѧ́й жи́знь; ꙳ бцⷣа пла́чꙋщи глаго́лаше, ꙳ є҆гда̀ ᲂу҆зрѣ̀ на крⷭ҇тѣ̀ возноси́ма ꙳ и҆зъ неѧ̀ неизрече́ннѡ возсїѧ́вшаго ꙳ бг҃а и҆ чл҃вѣ́ка.
Тропа́рь, гла́съ и҃:
Правосла́вїѧ наста́вниче, бл҃гоче́стїѧ ᲂу҆чи́телю и҆ чистоты̀, вселе́нныѧ свѣти́льниче, мона́шествꙋющихъ бг҃одꙋхнове́нное ᲂу҆добре́нїе, маѯі́ме премꙋ́дре, ᲂу҆че́ньми твои́ми всѧ̑ просвѣти́лъ є҆сѝ, цѣвни́це дх҃о́внаѧ, молѝ хрⷭ҇та̀ бг҃а, спасти́сѧ дꙋша́мъ на́шымъ.
Дрꙋгі́й тропа́рь мꙋ́ченика, гла́съ д҃:
Мч҃никъ тво́й, гдⷭ҇и, неофѵ́тъ, во страда́нїи свое́мъ вѣне́цъ прїѧ́тъ нетлѣ́нный ѿ тебє̀, бг҃а на́шегѡ: и҆мѣ́ѧй бо крѣ́пость твою̀, мꙋчи́телей низложѝ, сокрꙋшѝ и҆ де́мѡнѡвъ немощны̑ѧ де́рзѡсти: тогѡ̀ моли́твами спасѝ дꙋ́шы на́шѧ.
Послѣ́дованїе мч҃никѡвъ пое́тсѧ на повече́рїи.
Канѡ́нъ, є҆гѡ́же краегране́сїе:
Четвери́цꙋ пою̀ мꙋ́ченикѡвъ побѣдоно́сныхъ.
Гла́съ в҃. Пѣ́снь а҃. І҆рмо́съ:
Нетре́нꙋ, неѡбы́чнꙋ, немо́креннѡ морскꙋ́ю ше́ствовавъ стезю̀, и҆збра́нный вопїѧ́ше і҆и҃ль: гдⷭ҇еви пои́мъ, ꙗ҆́кѡ просла́висѧ.
Свѣ́тлостїю трисо́лнечныѧ благода́ти сла́внїи мч҃ницы ѡ҆зарѧ́еми, воспѣва́ющыѧ ва́шꙋ па́мѧть всечестнꙋ́ю просвѣти́те, ѿ тмы̀ и҆збавлѧ́юще страсте́й, и҆ ѡ҆бстоѧ́нїй.
Ѡ҆свѣща́еми всест҃ы́мъ дх҃омъ, мі́ра ѡ҆ста́вльше бꙋ́рю, ᲂу҆дали́стесѧ въ гора́хъ, мꙋ́дрїи мч҃ницы сла́внїи, къ бж҃е́ственномꙋ страда́нїю ѡ҆бꙋча́еми, є҆́же и҆ свѣ́тлѡ соверши́сте.
Оу҆твержда́еми держа́вною зижди́телѧ и҆ всекрѣ́пкою си́лою, бж҃е́ственнїи мꙋ́чєницы, ѡ҆бꙋрева́ньми мно́гими ꙗ҆ви́стесѧ непрекло́нни въ мꙋ́кахъ, всю̀ попра́вше врагѡ́въ си́лꙋ.
Бг҃оро́диченъ:
Ми́лости мѧ̀, бл҃гослове́ннаѧ влⷣчце, бж҃е́ственныѧ полꙋчи́ти сподо́би предста́тельствы твои́ми, ро́ждшаѧ (с. 499) пло́тїю сло́во ми́лостивѣйшее и҆ благопремѣни́тельное, прїе́млющее къ немꙋ̀ притека́ющыѧ.
Пѣ́снь г҃. І҆рмо́съ:
На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́босѧ дꙋ́хъ моѝ, внегда̀ пѣ́ти: нѣ́сть ст҃ъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и.
Любо́вїю ᲂу҆ѧзвлѧ́еми влⷣчнею, мꙋ̑ки претерпѣ́сте многоѻбра̑зныѧ: жи́лами бо сꙋро́вѣйше страда́льцы бїе́ми, ѻ҆гне́мъ же ѿвсю́дꙋ лю́тѡ ѡ҆палѧ́еми, непрекло́нни пребы́сте.
Оу҆крѣплѧ́еми си́лою гдⷭ҇нею, и҆зыдо́сте къ боре́нїю врага̀, и҆ сего̀ низложи́сте страстоте́рпцы, хрⷭ҇тꙋ̀ зовꙋ́ще: ты̀ є҆сѝ бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и.
Со а҆́гг҃лы ликꙋ́ющи въ вы́шнихъ, и҆ съ собѡ́ры соединѧ́еми мч҃никѡвъ, съ ни́ми моли́тесѧ, и҆зба́вити всѧ́кїѧ ско́рби и҆ ѡ҆бстоѧ́нїѧ ва́съ чтꙋ́щыѧ, бж҃е́ственнїи мч҃ницы.
Бг҃оро́диченъ:
Согла́снѡ тѧ̀, всепѣ́таѧ, благосло́вимъ, є҆́юже на́мъ возсїѧ̀ неизрече́ннѡ сїѧ́нїе невече́рнее, и҆ вопїе́мъ: спаса́й рабы̑ твоѧ̑ всѧ́кагѡ ѡ҆ѕлобле́нїѧ, вѣ́рныхъ бо помо́щница ты̀ є҆сѝ.
Пѣ́снь д҃. І҆рмо́съ:
Пою́ тѧ, слꙋ́хомъ бо, гдⷭ҇и, ᲂу҆слы́шахъ и҆ ᲂу҆жасо́хсѧ, до менє́ бо и҆́деши, менѐ и҆щѧ̀ заблꙋ́ждшаго. тѣ́мъ мно́гое твоѐ снизхожде́нїе, є҆́же на мѧ̀, прославлѧ́ю, многоми́лостиве.
Пою́ще благоче́стнѡ, почти́мъ є҆ѵге́нїево дерзнове́нїе, а҆кѵ́лы противле́нїе, кані́дїево же терпѣ́нїе, кꙋ́пнѡ съ ни́ми почита́юще и҆ ᲂу҆алерїа́новꙋ крѣ́пость.
Неи́стовствомъ ѡ҆держа́нъ мꙋчи́тель, ᲂу҆́жами растѧ́гнена неми́лостивнѡ би́ти тѧ̀ повелѣва́етъ, и҆ желѣ́зомъ вельмѝ строга́ти тѧ̀, є҆ѵге́нїе, и҆ свѣща́ми ѡ҆палѧ́ти тѣ́ло твоѐ.
Непщева́въ пребезꙋ́мный мꙋчи́тель тве́рдость ва́шꙋ мꙋ́ками разори́ти, мꙋ́дрїи мч҃ницы, мꙋ́камъ подлага́етъ (с. 500) ва́съ горча́йшымъ: но благода́тїю вседѣ́телѧ хрⷭ҇та̀, сего̀ посрами́сте.
Бг҃оро́диченъ:
Ꙗ҆́кѡ є҆ди́на вѣ́рныхъ по́моще, всеблагослове́ннаѧ бцⷣе, ѿ всѧ́кихъ и҆зба́ви скорбе́й твоѧ̑ рабы̑, те́плѣ блажа́щыѧ тѧ̀, и҆ въ бж҃е́ственный кро́въ тво́й притека́ющыѧ.
Пѣ́снь є҃. І҆рмо́съ:
Просвѣще́нїе во тмѣ̀ лежа́щихъ, спасе́нїе ѿча́ѧнныхъ, хрⷭ҇тѐ сп҃се мо́й, къ тебѣ̀ ᲂу҆́тренюю цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо ра́звѣ тебє̀ бо́га не зна́ю.
Мч҃ническое показꙋ́ѧ вои́стиннꙋ терпѣ́нїе, ста́лъ є҆сѝ ꙗ҆́кѡ а҆дама́нтъ, гѡ́ркїѧ мꙋ̑ки под̾е́млѧ, и҆ взыва́ѧ зижди́телю бл҃года́рнѡ, мч҃ниче є҆ѵге́нїе: и҆но́го бо ра́звѣ тебє̀ бо́га не зна́емъ.
Безвѣ́стїю бо́ги і҆́дѡльскїѧ препосла́лъ є҆сѝ сщ҃е́ннѣйшими твои́ми къ зижди́телю моли́твами: под̾ѧ́лъ є҆сѝ ра̑ны многоѻбра̑зныѧ, по всемꙋ̀ тѣ́лꙋ, мꙋ́чениче є҆ѵге́нїе, па́лицами неща́днѡ ᲂу҆ранѧ́емь.
Бг҃оро́диченъ:
И҆зба́ви на́съ, всест҃а́ѧ дв҃о, всѧ́кагѡ вре́да, ты́ бо предста́тельница є҆сѝ на́ша, надѣ́ющихсѧ на тѧ̀, бцⷣе, и҆ вопїю́щихъ бж҃е́ственномꙋ ржⷭ҇твꙋ̀ твоемꙋ̀: и҆но́гѡ бо ра́звѣ тебє̀ бо́га не зна́емъ.
Пѣ́снь ѕ҃. І҆рмо́съ:
Ко гдⷭ҇ꙋ ѿ ки́та і҆ѡ́на возопѝ: ты́ мѧ возведѝ и҆зъ глꙋбины̀ а҆́да, молю́сѧ: да ꙗ҆́кѡ и҆зба́вителю во гла́сѣ хвале́нїѧ, и҆́стины же дх҃омъ пожрꙋ̀ тебѣ̀.
Простира́еми на дре́вѣ, и҆ желѣ́зомъ стрꙋ́жеми, ꙗ҆́ростїю сꙋдѧ́щагѡ, и҆ жи́лами ссѣка́еми по плещє́мъ неща́днѡ, и҆ ѻ҆гне́мъ ѡ҆палѧ́еми, добропобѣ́днїи мч҃ницы ра́довахꙋсѧ.
Терпѣ́лъ є҆сѝ тѣ́ломъ, свѣща́ми ѡ҆палѧ́емь, и҆ на дре́вѣ, сла́вне, протѧза́емь, є҆ѵге́нїе, и҆ со́лїю ра̑ны неща́днѡ посыпа́ємы, беззако́ннагѡ мꙋчи́телѧ сꙋровство́мъ.
Бг҃оро́диченъ:
Да и҆зба́вимсѧ всѧ́кагѡ навѣ́та и҆ ско́рби, бг҃ора́дованнаѧ, и҆̀же въ тво́й покро́въ притека́ющїи, и҆ любо́вїю тѧ̀ при́снѡ благоче́стнѡ сла́вѧще, ꙗ҆́кѡ мт҃рь бж҃їю всенепоро́чнꙋю.
Сѣда́ленъ, гла́съ д҃. Подо́бенъ: Ꙗ҆ви́лсѧ є҆сѝ дне́сь:
Красота̀ просїѧ́вши тве́рдыхъ мꙋ́ченикѡвъ, четвери́ца ѡ҆зарѝ четы́ре концы̀ мі́ра зарѧ́ми, страда́ньми мꙋ́ченикѡвъ и҆ си́лами, ѿ ни́хже сїѧ́етъ вели́кїй є҆ѵге́нїй.
Пѣ́снь з҃. І҆рмо́съ:
Ѻ҆́бразꙋ злато́мꙋ, на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ: посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.
По́двиги свѣ́тлыми ѡ҆бле́клсѧ є҆сѝ мꙋ́жески на пре́лесть, и҆ побѣдоно́сецъ, ѽ є҆ѵге́нїе! бж҃е́ственнымъ манове́нїемъ бы́въ, ѡ҆брѣ́лъ є҆сѝ воздаѧ̑нїѧ трꙋдѡ́въ, со а҆́гг҃лы же пое́ши: бл҃гослове́нъ є҆сѝ, бж҃е ѻ҆ц҃є́въ на́шихъ.
Крⷭ҇тъ хрⷭ҇то́въ и҆мꙋ́ще, страда́льцы, ꙗ҆́кѡ бж҃е́ственное ѻ҆рꙋ́жїе, дїа́воле ѡ҆полче́нїе и҆ мꙋчи́телей противле́нїе, вкꙋ́пѣ низложи́сте, побѣ́ды вѣнцы̀ прїе́мше ѿ жизноно́сныѧ десни́цы страстополо́жника бг҃а.
Оу҆мо́мъ чи́стымъ мꙋ́къ прилѡ́ги не поколеба́лсѧ є҆сѝ, но непреста́ннѡ, ѽ є҆ѵге́нїе, па́лицами бїе́мь, и҆зрѧ́днѣйше посѣ́клъ є҆сѝ, мꙋ́чениче, сопротивле́нїемъ страда́нїй твои́хъ, главы̑ врагѡ́въ и҆ неви́димыхъ сꙋпоста́тѡвъ.
Бг҃оро́диченъ:
Сѐ вои́стиннꙋ, ꙗ҆́кѡ прорекла̀ є҆сѝ, ро́ди тѧ̀, всечⷭ҇таѧ, всѝ досто́йнѡ ᲂу҆блажа́емъ, и҆ по до́лгꙋ сла́вимъ: ты́ бо собезнача́льное сло́во ѻ҆́ч҃ее родила̀ є҆сѝ, за є҆́же спастѝ человѣ́ки, воплоще́нное и҆зъ тебє̀.
Пѣ́снь и҃. І҆рмо́съ:
Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте, дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.
Всѧ́комꙋ лꙋка́вномꙋ кова́рствꙋ гони́телей сопроти́висѧ ᲂу҆алерїа́нъ же, и҆ сла́вный съ ни́мъ а҆кѵ́ла, и҆ бж҃е́ственный є҆ѵге́нїй, кꙋ́пнѡ со страда́льцемъ кані́дїемъ до́блественнымъ.
Бг҃оза́рнаѧ чꙋ́дныхъ стрⷭ҇тоте́рпцєвъ хрⷭ҇то́выхъ наста̀ па́мѧть, ᲂу҆алерїа́на же и҆ є҆ѵге́нїа кꙋ́пнѡ, а҆кѵ́лы бж҃е́ственнагѡ и҆ кані́дїа, ю҆́же ра́достнѡ соверша́емъ любо́вїю.
Свѣтови́дными лꙋча́ми ѡ҆блиста́ющи на́мъ свѣ́тлѡ, наста̀ лѣ́тнѧѧ па́мѧть стрⷭ҇тоте́рпцєвъ хрⷭ҇то́выхъ, а҆кѵ́лы бж҃е́ственнагѡ, и҆ кані́дїа кꙋ́пнѡ, и҆ є҆ѵге́нїа и҆ ᲂу҆алерїа́на.
Бг҃оро́диченъ:
Соприсносꙋ́щный ѻ҆ц҃ꙋ̀, и҆ собезнача́льный сн҃ъ и҆зъ тебє̀ про́йде въ послѣ̑днѧѧ лѣ̑та, за є҆́же спасти́ ны дв҃о чⷭ҇таѧ неискꙋсобра́чнаѧ: є҆го́же не преста́й на́мъ ᲂу҆милостивлѧ́ющи.
Пѣ́снь ѳ҃. І҆рмо́съ:
Ѿ бг҃а бг҃а сло́ва, неизрече́нною мꙋ́дростїю прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи, є҆диномꙋ́дреннѡ пѣ́сньми велича́емъ.
Стремле́нїе побѣди́лъ є҆сѝ мꙋчи́телей, по мно́жайшихъ мꙋ́кахъ преше́дъ къ бг҃ꙋ прера́достнѡ, побѣ́ды по́чєсти прїе́мъ ꙗ҆́кѡ ѻ҆рꙋ́жникъ до́блественный, ꙗ҆́кѡ вели́къ хра́брникъ, ꙗ҆́кѡ и҆збра́нный хрⷭ҇то́въ во́инъ, є҆ѵге́нїе всеизѧ́щнѣйшїй.
Со а҆́гг҃льскими ли́ки и҆ мч҃ническими собо́ры совокꙋ́пльшесѧ, и҆ пра́ведныхъ чи́ны, ны́нѣ съ ни́ми моли́тесѧ, ва́съ воспѣва́ющымъ дарова́ти ѡ҆чище́нїе грѣхѡ́въ, и҆ всѧ́кихъ бѣ́дъ, мꙋ́чєницы, и҆збавле́нїе.
Ѡ҆ на́съ соверша́ющихъ свѣ́тлꙋю ва́шꙋ па́мѧть, є҆ѵге́нїе бг҃омꙋ́дре, благоче́стнѡ, мꙋ́чениче а҆кѵ́ло всесла́вне, и҆ ᲂу҆алерїа́не съ кані́дїемъ сострада́льцемъ, прилѣ́жнѡ ᲂу҆моли́те хрⷭ҇та̀ преблага́го.
Бг҃оро́диченъ:
Тѧ̀, всест҃а́ѧ дв҃о, а҆́гг҃лѡвъ мно́жєства и҆ всѣ́хъ человѣ̑къ ро́ди прера́достнѡ ᲂу҆блажа́ютъ: всѣ́хъ бо сп҃са, и҆ зижди́телѧ, и҆ влⷣкꙋ и҆ бг҃а породила̀ є҆сѝ, є҆го́же ѡ҆ на́съ молѝ.
Стїхи̑ры, гла́съ в҃. Подо́бенъ: Є҆гда̀ ѿ дре́ва тѧ̀:
Пѣ́сньми восхва́лимъ, вѣ́рнїи, и҆́стиннѡ бж҃е́ствєнныѧ ѻ҆рꙋ́жники и҆ страда́льцы хрⷭ҇тѡ́вы: мꙋ́драго є҆ѵге́нїа и҆ ᲂу҆алерїа́на, кані́дїа сла́внаго и҆ сострада́льца, кꙋ́пнѡ со а҆кѵ́лою, вѣ́рнѡ ᲂу҆блажа́юще сїѧ̑, ꙗ҆́кѡ пострада́вшыѧ стра́ннѡ, ꙗ҆́кѡ въ ча́съ ѡ҆сꙋжде́нїѧ на́съ и҆з̾е́млютъ мꙋче́нїѧ.
Мꙋ́чениче страстоте́рпче хрⷭ҇то́въ, твоѐ вервьмѝ тѣ́ло налѧца́емо, ꙗ҆́ростїю мꙋчи́телѧ ѕѣ́льнѡ строга́шесѧ, неща́днѡ же ѡ҆палѧ́шесѧ, бїе́мо, мꙋ́чениче, свѣща́ми ѡ҆палѧ́емо, и҆ притрыва́емо со́лїю, и҆ ѻ҆́цтомъ лютѣ́йшимъ: ты́ же претерпѣ́лъ є҆сѝ всѧ̑, є҆ѵге́нїе бл҃же́нне, ра́ди гдⷭ҇а.
Зако́нъ спаси́тельный ꙗ҆́вѣ и҆мѣ́ѧ въ се́рдцы твое́мъ, мꙋ́чениче, мі́ръ ѡ҆ста́вилъ є҆сѝ, гора́мъ же прибли́жилсѧ є҆сѝ, къ бж҃е́ственномꙋ страда́нїю ѡ҆бꙋча́ѧсѧ, блаже́нне, вои́стиннꙋ соверше́нномꙋ: є҆́же и҆ прїе́млѧ ра́дꙋѧсѧ претерпѣ́лъ є҆сѝ всѐ тѣлесѐ строга́нїе, и҆ ѻ҆гнѧ̀ лютѣ́йшее, ᲂу҆алерїа́не мꙋ́чениче, попале́нїе.
Сла́ва, и҆ ны́нѣ, бг҃оро́диченъ:
Ра́дꙋйсѧ, всѧ̀ тва́рь тебѣ̀ вопїе́тъ: ра́дꙋйсѧ, всест҃а́ѧ дв҃о: ра́дꙋйсѧ, ски́птре даві́довъ: ра́дꙋйсѧ, прозѧ́бшаѧ гро́здъ та́йный: ра́дꙋйсѧ, две́ре нбⷭ҇наѧ и҆ неѡпали́маѧ кꙋпино̀: ра́дꙋйсѧ, свѣ́те всемі́рный: ра́дꙋйсѧ, всѣ́хъ ра́досте: ра́дꙋйсѧ, застꙋпле́нїе: ра́дꙋйсѧ, чи́стѣ притека́ющихъ въ твою̀ по́мощь, всенепоро́чнаѧ.
Крⷭ҇тобг҃оро́диченъ:
Є҆гда̀ нескве́рнаѧ а҆́гница ви́дѣ своего̀ а҆́гнца, на заколе́нїе ꙗ҆́кѡ человѣ́ка во́лею влеко́ма, пла́чꙋщи глаго́лаше: безча́дствовати мѧ̀ ны́нѣ тщи́шисѧ, хрⷭ҇тѐ, ро́ждшꙋю тѧ̀, что̀ сїѐ сотвори́лъ є҆сѝ, и҆зба́вителю всѧ́ческихъ; ѻ҆ба́че воспѣва́ю и҆ сла́влю твою̀, ю҆́же па́че ᲂу҆ма̀ и҆ сло́ва, кра́йнюю бла́гость, чл҃вѣколю́бче.
На ᲂу҆́трени є҆ди́нъ канѡ́нъ ѻ҆ктѡ́иха: и҆ ст҃ы́хъ два̀.
Канѡ́нъ прпⷣбнагѡ, є҆гѡ́же краегране́сїе кромѣ̀ бг҃оро́дичнѡвъ:
Всевелича́йшїй маѯі́мъ да сла́витсѧ. Творе́нїе і҆ѡа́нна мона́ха.
Гла́съ и҃. Пѣ́снь а҃. І҆рмо́съ:
Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.
Всю̀ мнѣ̀ бг҃одꙋхнове́ннꙋю ѿ медото́чнагѡ и҆ сла́дкагѡ твоегѡ̀ и҆ска́пай ѧ҆зы́ка, бж҃е́ственный маѯі́ме, благода́ть дх҃а.
Ѻ҆́гнь горѧ́щь ꙗ҆ви́лсѧ є҆сѝ на є҆́рєси, блаже́нне: ꙗ҆́кѡ бо тро́стїе сїѧ̑ и҆знꙋри́лъ є҆сѝ ре́вностїю дх҃а.
Безслове́сное предложи́сѧ ѿ ѕлочести́вѣйшагѡ произволе́нїѧ, є҆диново́льное ᲂу҆че́нїе: словесы́ же твои́ми, ѻ҆́ч҃е, ѡ҆бличи́сѧ.
Бг҃оро́диченъ:
Ве́сь жела́нїе, и҆зъ ᲂу҆тро́бы твоеѧ̀, бг҃оневѣ́сто, благоизво́ливый роди́тисѧ, и҆ сла́дость є҆́сть и҆ свѣ́тъ незаходи́мый.
Канѡ́нъ мꙋ́ченика, гла́съ то́йже є҆гѡ́же краегране́сїе:
Хрⷭ҇то́въ са́дъ тѧ̀, мч҃ниче, благохвалю̀ но́вый. Творе́нїе і҆ѡ́сифово.
Пѣ́снь а҃. І҆рмо́съ:
Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Хрⷭ҇то́въ тѧ̀, всеблаже́нне, но́вый са́дъ, въ вертогра́дѣ процвѣ́тшїй мꙋ́ченичестѣмъ, и҆ свѧщє́нныѧ плоды̀ бл҃гоче́стїѧ и҆зрасти́вша, позна́вше пое́мъ, неофѵ́те.
Глаго́лѡвъ бж҃е́ственныхъ и҆спо́лнитель показа́всѧ, блаже́нне, ѿ младе́нства благꙋ́ю ча́сть мꙋ́дрѣ и҆збра́лъ є҆сѝ, и҆ наста́вникъ заблꙋ́ждшымъ бы́лъ є҆сѝ.
Ви́дѣти жела́ѧ хрⷭ҇та̀, пло́тїю и҆з̾ дв҃ы младе́нствовавшаго на́съ ра́ди, младе́нецъ сы́й, младе́нцєвъ къ соверше́нствꙋ водѧ́й мꙋдрова́нїе.
И҆ска́паѧй, бг҃омꙋ́дре, сла́дость бг҃оразꙋ́мїѧ и҆з̾ ᲂу҆́стъ свѧще́нныхъ, дꙋ́шы ѡ҆чарѡ́ванныѧ ѕло́бою чꙋжда́гѡ че́стнѡ ᲂу҆слади́лъ є҆сѝ.
Бг҃оро́диченъ:
Ро́ждшаѧ є҆стество́мъ содѣ́телѧ, ѡ҆божи́ла є҆сѝ всѐ сꙋщество̀ земноро́дныхъ: тѣ́мже тѧ̀ вои́стиннꙋ бцⷣꙋ и҆сповѣ́дꙋемъ, дв҃о бг҃оневѣ́сто.
Пѣ́снь г҃. І҆рмо́съ:
Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.
Велича́йшїй маѯі́мъ бл҃гочести́выѧ хрⷭ҇то́вы вѣ́ры всеи́стиннѡ проповѣ́дникъ же и҆ мꙋ́ченикъ показа́сѧ кро́вїю.
Маѯі́ме блаже́нне, ты̀ поще́нїемъ бы́лъ є҆сѝ бг҃олѣ́пное любомꙋ́дрїѧ и҆ чи́стое жили́ще.
И҆злїѧ̀ ѧ҆зы́къ тво́й рѣкꙋ̀ хрⷭ҇то́выхъ ᲂу҆че́нїй, бл҃гоче́стне, маѯі́ме всебл҃же́нне, премꙋ́дрости пита́тель.
Бг҃оро́диченъ:
Да стезю̀, влⷣко, ко ст҃ы́ни ведꙋ́щꙋю, пока́жеши на́мъ, во ᲂу҆тро́бꙋ всест҃ꙋ́ю всест҃ѡ всели́лсѧ є҆сѝ.
И҆́нъ. І҆рмо́съ то́йже.
Всего̀ возложе́на тѧ̀ всеще́дромꙋ сло́вꙋ, чи́стый дꙋ́хъ соблюда́ше невреди́ма, сла́вне.
Воспѣ́ша гдⷭ҇а мно́жєства люде́й вѣ́рныхъ, ви́дѣвше тобо́ю, мꙋ́чениче, ро́ждшїѧ тѧ̀ и҆з̾ ме́ртвыхъ воста́нїе.
Свѣ́томъ ѡ҆блиста́ющаѧ голꙋби́ца гла́сомъ живы́мъ тѧ̀ и҆ пꙋте́мъ спаси́тельнымъ призыва́етъ, неофѵ́те.
Бг҃оро́диченъ:
Пѣ́нїе ра́достное ро́дъ человѣ́ческїй при́снѡ приноша́етъ тебѣ̀, мт҃и бж҃їѧ, безсме́ртїе тебє̀ ра́ди воспрїе́мшїй.
Конда́къ, гла́съ и҃. Подо́бенъ: Взбра́нной:
Трⷪ҇цы рачи́телѧ и҆ вели́каго маѯі́ма, наꙋча́юща ꙗ҆́снѡ вѣ́рѣ бжⷭ҇твеннѣй, є҆́же сла́вити хрⷭ҇та̀ во двꙋ̀ є҆стества́хъ, во́лѧхъ же и҆ дѣ́йствахъ сꙋ́ща, въ пѣ́снехъ досто́йныхъ, вѣ́рнїи, почти́мъ взыва́юще: ра́дꙋйсѧ, проповѣ́дниче вѣ́ры.
Та́же сѣда́ленъ, гла́съ є҃. Подо́бенъ: Собезнача́льное сло́во:
Гонє́нїѧ претерпѣ́въ за вѣ́рꙋ, ѿгна́лъ є҆сѝ, ѻ҆́ч҃е, всѧ́кꙋ є҆́ресь, ѿсѣ́ченъ же съ рꙋко́ю ѧ҆зы́къ, маѯі́ме, и҆сповѣ́данїѧ благолѣ́пный ѿ рꙋкѝ творца̀ прїѧ́лъ є҆сѝ вѣне́цъ, блаже́нне. є҆го́же ны́нѣ непреста́ннѡ молѝ, поми́ловатисѧ дꙋша́мъ на́шымъ.
Сла́ва, мꙋ́ченика, гла́съ д҃. Подо́бенъ: Вознесы́йсѧ на крⷭ҇тъ:
Новоцвѣ́тный ꙗ҆́коже са́дъ прозѧ́блъ є҆сѝ, въ вертогра́дѣхъ хрⷭ҇то́выхъ страстоте́рпцєвъ, плоды̀ бж҃е́ственнагѡ ра́зꙋма прине́слъ є҆сѝ, и҆́миже пита́ютсѧ вѣ́рнѡ тѧ̀ чтꙋ́ще, сла́вне неофѵ́те, страда́льче доблемꙋ́дренный. но твои́ми моли́твами на́съ всегда̀ спаса́й, бг҃ꙋ предстоѧ̀.
И҆ ны́нѣ, бг҃оро́диченъ:
По бз҃ѣ въ тво́й, бцⷣе, прибѣ́гъ смире́нный покро́въ бж҃е́ственный, припа́даѧ молю́сѧ: поми́лꙋй, пречи́стаѧ, ꙗ҆́кѡ превзыдо́ша главꙋ̀ мою̀ грѣсѝ, и҆ бою́сѧ, влⷣчце, мꙋ́къ, и҆ трепе́щꙋ. Моле́нїе сотворѝ, чⷭ҇таѧ, къ сн҃ꙋ твоемꙋ̀, ѿ си́хъ и҆зба́вити мѧ̀.
Крⷭ҇тобг҃оро́диченъ:
И҆з̾ безнача́льнагѡ ѻ҆ц҃а̀ рожде́ннаго, напослѣ́докъ тѧ̀ пло́тїю ро́ждшаѧ, на крестѣ̀ ви́сѧща зрѧ́щи, хрⷭ҇тѐ, ᲂу҆вы̀ мнѣ̀, любе́знѣйшїй і҆и҃се, вопїѧ́ше: ка́кѡ сла́вимый ꙗ҆́кѡ бг҃ъ ѿ а҆́гг҃лъ, ѿ беззако́нныхъ ны́нѣ человѣ́кѡвъ, сн҃е, хотѧ̀ распина́ешисѧ; пою́ тѧ, долготерпѣли́ве.
Пѣ́снь д҃. І҆рмо́съ:
Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀. (с. 507)
Земноро́дныхъ тѧ̀ почита́ютъ, и҆ небе́сныхъ чи́ни чꙋдѧ́тсѧ: любо́вїю бо мꙋ́дрости показа́лсѧ є҆сѝ, ѻ҆́ч҃е, ꙗ҆́кѡ безпло́тенъ.
Сꙋ́ровъ ᲂу҆́бѡ мꙋчи́тель, но терпѣ́нїе твоѐ непрекло́нно: тѣ́мъ ты̀ ᲂу҆́бѡ ᲂу҆блажи́лсѧ є҆сѝ, вселꙋка́вый же и҆зве́ржесѧ.
Состра́ждетъ тебѣ̀, маѯі́ме, ᲂу҆ченикѡ́въ дво́ица преблаже́ннаѧ, твои̑мъ страда́нїємъ приѡбщи́вшесѧ: тѣ́мже и҆ по́честей ра́внѡ полꙋчи́ша.
Тече́нїемъ твоеѧ̀ кро́ве напаѧ́ема цр҃ковь хрⷭ҇то́ва, прозѧба́етъ ѻ҆те́ческагѡ преда́нїѧ бжⷭ҇твенное сѣ́мѧ, твои́мъ ᲂу҆че́нїемъ, преподо́бне.
Бг҃оро́диченъ:
И҆зба́вльшесѧ ржⷭ҇тво́мъ твои́мъ грѣхо́внагѡ до́лга, всенепоро́чнаѧ, ра́достное пѣ́нїе возсыла́емъ тебѣ̀, бг҃оневѣ́сто.
И҆́нъ. І҆рмо́съ то́йже.
Житїѧ̀ твоегѡ̀ непоро́чное, и҆ ра́зꙋма неꙋжа́сное, мно́жєства премнѡ́га зрѧ́ще, къ бг҃ꙋ пристꙋпи́ша, мꙋ́чениче сла́вне.
Го́рꙋ дости́гъ всели́лсѧ є҆сѝ, бж҃е́ственнымъ наставлѧ́емь, бл҃же́нне, дх҃омъ: ѿ а҆́гг҃ла же пита́емь, а҆́гг҃лѡвъ ꙗ҆ви́лсѧ є҆сѝ равностоѧ́теленъ.
Сострада́тельнѡ расточи́въ, да́лъ є҆сѝ ᲂу҆бѡ́гимъ, ꙗ҆́коже повелѣ́но бы́сть, возме́здїе прїе́млѧ, блаже́нне, во вѣ́ки непреходи̑мыѧ.
Бг҃оро́диченъ:
Во́льнѡ ѡ҆бнища́вшаго бога́тствомъ бл҃гости, пребж҃е́ственнаго, бцⷣе, родила̀ є҆сѝ, на́шꙋ нищетꙋ̀ ᲂу҆ще́дрившаго.
Пѣ́снь є҃. І҆рмо́съ:
Оу҆́тренююще вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ тебє̀, и҆но́гѡ не вѣ́мы.
Ра́зꙋмъ земноро́дныхъ собра́въ и҆ нбⷭ҇ныхъ, впра́вдꙋ фїлосо́фъ и҆менꙋ́етсѧ маѯі́мъ.
Премꙋ́дрости безмѣ́рнымъ жела́нїемъ, хрⷭ҇та̀ твоегѡ̀ подо́бникъ и҆зрѧ́днѣйшїй ꙗ҆ви́лсѧ є҆сѝ, сла́вный маѯі́ме.
Гнѣ́вомъ и҆згна́нъ бы́лъ є҆сѝ мꙋчи́телѧ, ѡ҆брѣ́лъ же є҆сѝ, бл҃же́нне, і҆и҃са ᲂу҆тѣше́нїе.
Бг҃оро́диченъ:
Тѧ̀ бцⷣꙋ невѣ́дꙋщїи бг҃ома́ти, свѣ́та да не ᲂу҆́зрѧтъ ро́ждшагѡсѧ и҆зъ тебє̀, пречⷭ҇таѧ.
И҆́нъ. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Та̑инъ неизрече́нныхъ и҆спо́лненъ бы́въ, досточꙋ́дне, къ предлежа́щымъ страда́нїѧ ра́дꙋѧсѧ ѿлꙋчи́лсѧ є҆сѝ мꙋ́жєскимъ подвигѡ́мъ, не ᲂу҆боѧ́всѧ мꙋ́къ, нижѐ сме́рти, мꙋ́чениче неофѵ́те.
Неизрече́ннымъ промышле́нїемъ твоѧ̑ направлѧ́ющагѡ шє́ствїѧ, сла́вне, предста́вше бж҃е́ственнїи а҆́гг҃ли, къ по́двигꙋ влеча́хꙋ тѧ̀ ѿ горы̀, ꙗ҆́коже дрꙋга́го мѡѷсе́а, просла́вленна лице́мъ бж҃е́ственными свѣтлостьмѝ.
Глаго́лъ жи́въ въ се́рдцѣ и҆мѣ́ѧ, всесла́вне мꙋ́чениче неофѵ́те, дерзнове́ннымъ ᲂу҆мо́мъ гони́телємъ вопїѧ́лъ є҆сѝ: самозва́нъ не и҆́щꙋщымъ мѧ̀ ѡ҆брѣто́хсѧ ны́нѣ, ѡ҆бличи́ти ва́шеѧ вѣ́ры не́мощь.
Бг҃оро́диченъ:
Є҆́же пре́жде всѣ́хъ вѣкѡ́въ, ѻ҆трокови́це всенепоро́чнаѧ, бж҃е́ственное та́инство сокрове́нное тобо́ю позна́сѧ концє́мъ, сн҃ъ и҆ сло́во бж҃їе, пло́ть бы́въ, и҆ ѡ҆божи́въ, дв҃о, человѣ́ка.
Пѣ́снь ѕ҃. І҆рмо́съ:
Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ, ꙗ҆́кѡ ри́зою, многоми́лостиве хрⷭ҇тѐ бж҃е на́шъ.
Непреста́ннѡ прино́сиши бг҃ꙋ, бг҃омꙋ́дре, мольбꙋ̀, дꙋше́вныхъ же и҆ тѣле́сныхъ страсте́й и҆ тлѣ́нїѧ мѧ̀ и҆зба́вити.
И҆зсꙋши́сѧ є҆ресе́й и҆сто́чникъ мꙋ́тный ве́сь, сла́вне маѯі́ме, загражда́емь шꙋ́момъ ѧ҆зы́ка твоегѡ̀.
Ѡ҆чи́сти мѧ̀, є҆ди́не бл҃же, и҆ и҆сто́чникъ бл҃года́ти, хрⷭ҇тѐ, се́рдцꙋ моемꙋ̀ твоегѡ̀ преподо́бнагѡ моли́твами и҆сточѝ.
Бг҃оро́диченъ:
Краснѣ́йшїй па́че всѣ́хъ человѣ̑къ, сн҃ъ тво́й, всечⷭ҇таѧ, добро́тою бж҃ества̀, а҆́ще и҆ пло́ть на́съ ра́ди бы́сть.
И҆́нъ. І҆рмо́съ:
Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.
Возвыша́емь на дре́вѣ, всебл҃же́нне, желѣ́зомъ по ре́брѡмъ стро́ганъ бы́лъ є҆сѝ неми́лостивнѡ, и҆ льсти́вагѡ ѡ҆бличе́ньми ѡ҆жесточе́нное се́рдце расто́рглъ є҆сѝ, повелѣва́ющагѡ жре́ти богѡ́мъ, и҆ бг҃а ѿврещи́сѧ безсме́ртнагѡ.
Растерза́емь и҆ вѧ́жемь, мч҃ниче, свѧза́лъ є҆сѝ до конца̀ ле́сть, и҆ врага̀ безчи̑ннаѧ шє́ствїѧ бездѣ̑льна показа́лъ є҆сѝ си́лою дх҃а, и҆ поте́клъ є҆сѝ къ нб҃сѝ вѣнцено́сецъ гдⷭ҇ꙋ предста́ти.
Оу҆слади́всѧ добро́тами влⷣки, и҆ томꙋ̀ прилѣпи́лсѧ є҆сѝ, зовы́й: сло́ве бж҃їй, тебє̀ ра́ди поже́ршагѡсѧ во́лею а҆́зъ закала́юсѧ, подо́бѧсѧ преѧ́вственнѣ честны̑мъ твои̑мъ и҆ бж҃е́ствєннымъ страда́нїємъ.
Бг҃оро́диченъ:
Пресвѣ́тлый ꙗ҆ви́ласѧ є҆сѝ прⷭ҇то́лъ цр҃ѧ̀ нбⷭ҇нагѡ, дв҃о, на не́мже пло́тїю воспочѝ во́лею, и҆ мно́гїй на́шъ до́лгъ ѿѧ́тъ: и҆ посадѝ на ѻ҆́ч҃емъ прⷭ҇то́лѣ человѣ́ка, ꙗ҆́коже благоволи́лъ є҆́сть.
Конда́къ, гла́съ ѕ҃. Подо́бенъ: Є҆́же ѡ҆ на́съ и҆спо́лнивъ:
Свѣ́тъ трисїѧ́нный, все́льшїйсѧ въ дꙋ́шꙋ твою̀, сосꙋ́дъ и҆збра́нъ показа́ тѧ, всебл҃же́нне, ꙗ҆влѧ́юща бж҃е́ствєннаѧ концє́мъ, неꙋдобопости́жныхъ разꙋмѣ́нїй ты̀ сказꙋ́ѧй, бл҃же́нне, и҆ трⷪ҇цꙋ всѣ̑мъ, маѯі́ме, возпроповѣ́дꙋѧй ꙗ҆́снѡ, пресꙋ́щнꙋю безнача́льнꙋю.
І҆́косъ:
Подража́тель ꙗ҆ви́всѧ сп҃совыхъ стрⷭ҇те́й, и҆ того̀ въ дꙋшѝ твое́й и҆мѣ́ѧ, всебл҃же́нне, восхождє́нїѧ въ се́рдцы твое́мъ возложи́лъ є҆сѝ, пребога́те: то́й же тебѣ̀ подадѐ благода́ть съ нб҃сѐ. Сопроти́вилбосѧ є҆сѝ мꙋчи́телємъ, мꙋ́дре, мꙋ́жески, безнача́льнꙋю и҆ бж҃е́ственнꙋю и҆ є҆диносꙋ́щнꙋю трⷪ҇цꙋ проповѣ́дꙋѧ, и҆ ѡ҆блича́ѧ ѕлосла̑вныѧ и҆ бг҃обѡ́рныѧ: безчи́слєнныѧ претерпѣ́лъ є҆сѝ напа̑сти, всехва́льне, ѧ҆зы́ка ѿрѣ́занїе бг҃осло́внагѡ, преподо́бне, и҆ твоеѧ̀ рꙋкѝ вкꙋ́пѣ: не преста́лъ же є҆сѝ ты̀ со дерзнове́нїемъ глаго́лѧ и҆ ᲂу҆твержда́ѧ вѣ̑рныѧ бжⷭ҇твенными твои́ми ᲂу҆чє́нїи, трⷪ҇цꙋ всѣ̑мъ лю́демъ проповѣ́дꙋѧ ꙗ҆́снѡ, пресꙋ́щнꙋю безнача́льнꙋю.
Пѣ́снь з҃. І҆рмо́съ:
Ѿ і҆ꙋде́и доше́дше ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, благослове́нъ є҆сѝ.
Є҆ди́но є҆стество̀ трⷪ҇цы, є҆ди́но хотѣ́нїе ре́клъ є҆сѝ, є҆ди́но дѣ́йство: бг҃а же вопло́щшагосѧ во двою̀ є҆стествꙋ̑, хотѣ̑нїю же и҆ дѣ̑йствꙋ проповѣ́далъ є҆сѝ, ѻ҆ц҃є́въ на́шихъ бж҃е, бл҃гослове́нъ є҆сѝ.
Не вѡ́ли двѣ̀ раздѣлѧ́ємыѧ, ра́зꙋма проти́вностїю, ка́чествомъ же па́че проповѣ́далъ є҆сѝ, ѻ҆́ч҃е, є҆сте́ственнымъ ра́знствꙋющыѧ, ѻ҆ц҃є́въ на́шихъ бж҃е, блгⷭ҇лове́нъ є҆сѝ.
Сто́лпъ правосла́вїѧ, бжⷭ҇твєннаѧ твоѧ̑ словеса̀, ѻ҆́ч҃е, держа́ще, є҆ди́наго ѿ трⷪ҇цы во двꙋ́хъ сꙋщества́хъ и҆ во́лѧхъ почита́емъ, ѻ҆ц҃є́въ на́шихъ бж҃е, бл҃гослове́нъ є҆сѝ.
Бг҃оро́диченъ:
Ю҆́наго носѧ́щи млⷣнца пре́жде всѣ́хъ вѣкѡ́въ бг҃а, всенепоро́чнаѧ, и҆зъ тебє̀ вопло́щшагосѧ, не преста́й молѧ́щи спастѝ пою́щыѧ: ѻ҆ц҃є́въ на́шихъ бж҃е, бл҃гослове́нъ є҆сѝ.
И҆́нъ. І҆рмо́съ:
Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.
Пе́щь живогорѧ́щꙋ сотвори́въ пребеззако́нный, въ се́й заключа́етъ на трѝ дни̑, не ѡ҆пали́лсѧ же є҆сѝ ѿню́дъ, вопїѧ̀, неофѵ́те: бл҃гослове́нъ є҆сѝ, гдⷭ҇и бж҃е, во вѣ́ки.
Наслажда́ешисѧ пѣ́сней пресла́внѡ, стоѧ́щꙋ тѝ посредѣ̀ пла́мене, бл҃же́нне, роса́ бо бж҃їѧ прохлажда́ше тѧ̀, мꙋ́чениче, вопїю́ща: бл҃гослове́нъ є҆сѝ, гдⷭ҇и бж҃е, во вѣ́ки.
Велича́йшее чꙋ́до ᲂу҆дивлѧ́ѧ всѧ́къ ᲂу҆́мъ, въ тебѣ̀ содѣ́ѧнное, и҆́бо ѻ҆́гнь ника́коже ѡ҆пали́ тѧ, бг҃омꙋ́дре, разлїѧ́всѧ попалѝ ѻ҆гнѧ̀ наслѣ́дники.
Бг҃оро́диченъ:
Ꙗ҆ви́ласѧ є҆сѝ а҆́гг҃лѡвъ превы́шши, совѣ́та вели́кагѡ а҆́гг҃ла ро́ждши, бцⷣе чⷭ҇таѧ, є҆мꙋ́же всѝ пѣснопое́мъ: благослове́нъ є҆сѝ, гдⷭ҇и бж҃е, во вѣ́ки.
Пѣ́снь и҃. І҆рмо́съ:
Побѣди́тели мꙋчи́телѧ и҆ пла́мене бл҃года́тїю твое́ю бы́вше, за́повѣдемъ твои̑мъ ѕѣлѡ̀ прилѣжа́ще, ѻ҆́троцы вопїѧ́хꙋ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Весьма̀ возлюби́въ превозлюби́вшаго ро́дъ человѣ́ческїй, крⷭ҇тъ тво́й взѧ́лъ є҆сѝ, и҆ томꙋ̀, бл҃же́нне, сраспѧ́лсѧ є҆сѝ, благослови́те поѧ̀, дѣла̀ гдⷭ҇нѧ, гдⷭ҇а.
Оу҆страни́всѧ всѧ́кїѧ сла́сти, бл҃же́нне, смертоно́сныѧ, тебѐ содѣ́лалъ є҆сѝ всего̀ нескве́рно зерца́ло бж҃е́ственное, поѧ̀: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Живоно́снꙋ зарю̀ ѿ є҆ди́нагѡ бжⷭ҇тва̀ трїѷпоста́снагѡ прїе́мъ, ꙗ҆ви́лсѧ є҆сѝ сꙋ́щымъ во тмѣ̀ со́лнце заблꙋ́ждшымъ, бл҃гослови́те, поѧ̀, всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ:
Жи́зни тѧ̀ мт҃рь и҆ бг҃а роди́тельницꙋ позна́вше, правосла́вною вѣ́рою всѝ блажи́мъ, бг҃ороди́тельнице, бл҃госло́вѧще кꙋ́пнѡ ржⷭ҇тво̀ твоѐ, чⷭ҇таѧ, и҆ превозносѧ́ще во вѣ́ки.
И҆́нъ. І҆рмо́съ:
Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Ю҆́нымъ, всебл҃же́нне, тѣ́ломъ, и҆ соверше́ннымъ мꙋдрова́нїемъ, началоѕло́бнагѡ лꙋка́вство погꙋби́лъ є҆сѝ, са́дъ краснѣ́йшїй прозѧ́бшїй во дво́рѣхъ, ѿ і҆ессе́ева и҆зра́стшагѡ ко́рене, къ немꙋ́же вопїѧ́лъ є҆сѝ непреста́ннѡ: сщ҃е́нницы, воспо́йте, лю́дїе, превозноси́те во всѧ̑ вѣ́ки.
На сꙋди́щи ѕвѣ́рїе тебѐ, страстоте́рпче, ᲂу҆стыдѣ́шасѧ, ꙗ҆́коже данїи́ла свѧще́ннагѡ пе́рвѣе: хрⷭ҇то́выхъ бо тѧ̀ позна́ша страда́нїй свидѣ́телѧ. є҆го́же и҆сповѣ́дꙋѧ, нестерпи̑мыѧ мꙋ̑ки претерпѣ́лъ є҆сѝ, взыва́ѧ: сщ҃е́нницы, воспо́йте, лю́дїе, превозноси́те во всѧ̑ вѣ́ки.
Позна́вый тѧ̀ пе́рвѣе въ горѣ̀, неофѵ́те, ле́въ превели́кїй, на сꙋди́щи свѧ́занꙋ приведе́нъ напꙋща́етсѧ, въ мꙋче́нїи твое́мъ, страда́льче: и҆ позна́въ поклонѧ́шесѧ тебѣ̀ со стра́хомъ, стꙋдо́мъ ѡ҆держи́мь, и҆ и҆сто́чники ᲂу҆миле́нїемъ сле́зъ благочꙋ́вственнѣ пролива́ѧ, бг҃облаже́нне.
Бг҃оро́диченъ:
Но́во ѻ҆троча̀ родила̀ є҆сѝ, пре́жде всеѧ̀ тва́ри ро́ждшагосѧ и҆з̾ ѻ҆ц҃а̀ несказа́ннѡ, всечⷭ҇таѧ, того̀ ᲂу҆́бѡ молѝ, ѡ҆бветша́вшаго прегрѣше́ньми ны́нѣ ѡ҆бнови́ти, и҆ вопїю́ща мѧ̀ спастѝ: ѻ҆́троцы, бл҃гослови́те, сщ҃е́нницы, воспо́йте, лю́дїе, превозноси́те во всѧ̑ вѣ́ки.
Пѣ́снь ѳ҃. І҆рмо́съ:
Проѧвле́нное на горѣ̀ законополо́жникꙋ во ѻ҆гнѝ и҆ кꙋпинѣ̀, ржⷭ҇тво̀ приснодв҃ы, въ на́ше вѣ́рныхъ спасе́нїе, пѣ́сньми немо́лчными велича́емъ.
Є҆щѐ твоѧ̀, ꙗ҆́кѡ а҆́велева, кро́вь и҆ во вѣ́ки бг҃одохнове́нныѧ догма́ты гла́сомъ ꙗ҆́снымъ хрⷭ҇то́вѣ цр҃кви проповѣ́дꙋетъ, маѯі́ме всебл҃же́нне и҆ превели́кїй.
Ѿсѣче́сѧ рꙋка̀, пи́шетъ же бж҃е́ственнымъ пе́рстомъ, ꙗ҆́кѡ тро́стїю и҆ черни́ломъ, ѿрѣ́заннымъ ѧ҆зы́комъ, и҆ твое́ю кро́вїю честно́ю вѣ́рꙋ въ сердца́хъ правосла́внꙋю.
Ста́лъ є҆сѝ пред̾ прⷭ҇то́ломъ бж҃е́ственнымъ съ мꙋ́ченики, и҆́хже ре́вности и҆ вѣ́ры приѡбщи́лсѧ є҆сѝ, ѻ҆́ч҃е, и҆ на́съ ᲂу҆сво́й влⷣцѣ, и҆ твоѧ̑ подража́тели содѣ́лай.
Бг҃оро́диченъ:
Ты̀ є҆сѝ, бцⷣе, ѻ҆рꙋ́жїе на́ше и҆ стѣна̀, ты̀ є҆сѝ застꙋпле́нїе къ тебѣ̀ прибѣга́ющихъ: тѧ̀ и҆ ны́нѣ на мл҃твꙋ предлага́емъ, да и҆зба́вимсѧ ѿ врагѡ́въ на́шихъ.
И҆́нъ. І҆рмо́съ:
Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ чл҃вѣ́къ. тѣ́мже пречⷭ҇тꙋю бцⷣꙋ, вѣ́рнїи, велича́емъ.
Ста́лъ є҆сѝ ꙗ҆́коже а҆́гнецъ, къ заколе́нїю во́льнѣ предлежа̀, ᲂу҆бива́ющымъ тѧ̀ гѡ́рькимъ мꙋчи́телємъ, мч҃ниче неофѵ́те: и҆ прободе́нъ въ твоѧ̑ ре́бра копїе́мъ, бл҃же́нный коне́цъ воспрїѧ́лъ є҆сѝ, страстоте́рпче хрⷭ҇то́въ, до́блественнѣйше.
Ꙗ҆́кѡ же́ртва, ꙗ҆́кѡ добро̀ а҆́гнѧ, ꙗ҆́кѡ честно́е заколе́нїе, ꙗ҆́коже возложе́нїе хра́ма ст҃а́гѡ, ꙗ҆́коже приноше́нїе чи́сто, ꙗ҆́коже пти́ца и҆збра́нна, ꙗ҆́коже ю҆не́цъ многоцѣ́ненъ, ꙗ҆́коже но́въ, бл҃же́нне, са́дъ ра́йскїй, бг҃ꙋ прине́слсѧ є҆сѝ.
Соѻбра́зенъ бы́лъ є҆сѝ стрⷭ҇те́мъ пострада́вшагѡ на́съ ра́ди бла́гостїю, и҆ ра́венствомъ копїѧ̀, мꙋ́чениче, вои́стиннꙋ просла́вилсѧ є҆сѝ: и҆ ны́нѣ живе́ши на нб҃сѣ́хъ, побѣ́ды дїади́мою ᲂу҆краша́емь и҆ ра́дости непрее́мныѧ и҆сполнѧ́емь.
Бг҃оро́диченъ:
Носѧ́щи ꙗ҆́коже клеща̀ нбⷭ҇ный, бцⷣе, ᲂу҆́гль, хвра̑стныѧ моегѡ̀ се́рдца стра̑сти всѧ̑ попалѧ́ющїй, и҆ гее́нскагѡ ѻ҆гнѧ̀ и҆зба́ви мѧ̀, молю́сѧ: да прославлѧ́ю тѧ̀, наде́ждꙋ вѣ́рныхъ, всенепоро́чнаѧ.
Свѣти́ленъ. Подо́бенъ: Свѣ́те неизмѣ́нный:
Трꙋба̀ ꙗ҆ви́лсѧ є҆сѝ премꙋ́дрости, бл҃гогла́снымъ ѧ҆зы́комъ твои́мъ проти́вныхъ ᲂу҆жаса́ѧ полкѝ, маѯі́ме, свѣ́тъ мона́шествꙋющихъ: тѣ́мже твои́ми пита́ющесѧ словесы̀, ра́зꙋмъ познава́емъ сꙋ́щихъ.
Бг҃оро́диченъ:
Свѣ́тъ мы́сленнагѡ весе́лїѧ возсїѧ́ла є҆сѝ въ мі́рѣ, бг҃ороди́тельнице дв҃о, и҆зба́вителѧ и҆ влⷣкꙋ: тѣ́мже помоли́сѧ, дꙋшѝ моеѧ̀ зѣ̑ницы просвѣти́ти свѣ́томъ свѣ́тлости бжⷭ҇твенныѧ.
На лїтꙋргі́и, прокі́менъ, гла́съ д҃: Ст҃ы̑мъ, и҆̀же сꙋ́ть на землѝ є҆гѡ̀, ᲂу҆дивѝ гдⷭ҇ь всѧ̑ хотѣ́нїѧ своѧ̑ въ ни́хъ. Сті́хъ: Предзрѣ́хъ гдⷭ҇а предо мно́ю вы́нꙋ, ꙗ҆́кѡ ѡ҆деснꙋ́ю менє̀ є҆́сть, да не подви́жꙋсѧ. А҆пⷭ҇лъ ко є҆вре́ємъ, зача́ло т҃л. А҆ллилꙋ́їа, гла́съ д҃: Воззва́ша првⷣнїи, и҆ гдⷭ҇ь ᲂу҆слы́ша и҆̀хъ. Є҆ѵⷢ҇лїе лꙋкѝ, зача́ло ѯ҃д. Прича́стенъ: Ра́дꙋйтесѧ, пра́веднїи, ѡ҆ гдⷭ҇ѣ:
Мѣ́сѧца тогѡ́же во к҃а-й де́нь Слꙋ́жба прпⷣбнагѡ маѯі́ма гре́ка
На вели́цѣй вече́рни,
На Гдⷭ҇и воззва́хъ, стїхи̑ры, гла́съ в҃: Подо́бенъ: Є҆гда̀ ѿ дре́ва:
Є҆гда̀ всѧ̑ мїрска̑ѧ мꙋдрова̑нїѧ ѿве́рглъ є҆сѝ, ѻ҆́тче маѯі́ме, кресто́мъ ра́зꙋмъ просвѣти́въ, ѡ҆брѣ́лъ є҆сѝ безцѣ́нный би́серъ хрⷭ҇та̀, и҆́же тѧ̀ премꙋ́дра показа̀, ᲂу҆лови́въ мре́жею вѣ́ры. сегѡ̀ ра́ди мо́лимсѧ тѝ, ѻ҆́тче маѯі́ме: молѝ хрⷭ҇та̀ бг҃а ᲂу҆мꙋдри́ти на́съ и҆ сп҃стѝ дꙋ́шы на́шѧ.
Є҆гда̀ хрⷭ҇та̀ ра́ди стра̑нствїѧ под̾ѧ́лъ є҆сѝ, премꙋ́дре маѯі́ме, кресто́мъ всѧ̑ стрѣ̑лы лꙋка́вагѡ разжже́нныѧ ᲂу҆гаси́въ, стѧжа́лъ є҆сѝ бл҃года́ть ст҃а́гѡ дх҃а, и҆́же тѧ̀ чꙋдото́чца просла́ви, ꙗ҆влѧ́ѧ и҆сцѣлє́нїѧ и҆ цѣльбы̑. сегѡ̀ ра́ди мо́лимсѧ тѝ, ѻ҆́тче маѯі́ме: молѝ хрⷭ҇та̀ бг҃а бл҃года́ть пода́ти на́мъ и҆ спастѝ дꙋ́шы на́шѧ.
Є҆гда̀ мнѡ́гїѧ кни̑ги ѿ гре́ческагѡ на слове́нскїй ꙗ҆зы́къ преве́лъ є҆сѝ, прпⷣбне маѯі́ме, кресто́мъ вѣ́рꙋ ᲂу҆ѧсни́въ, ѡ҆клеве́танъ бы́лъ є҆сѝ и҆ въ темни́цꙋ ѡ҆сꙋжде́нъ, и҆дѣ́же ст҃о́мꙋ дх҃ꙋ канѡ́нъ написа́лъ є҆сѝ, не и҆мꙋ́щꙋ тѝ черни́лъ, ᲂу҆гле́мъ по стѣ́намъ. сегѡ̀ ра́ди мо́лимсѧ тѝ, многострада́льне маѯі́ме: молѝ хрⷭ҇та̀ бг҃а ᲂу҆крѣпи́ти на́съ и҆ сп҃стѝ дꙋ́шы на́шѧ.
Є҆гда̀ ле́стный мра́къ ᲂу҆ны́нїѧ просвѣти́лъ є҆сѝ, ст҃е маѯі́ме, кресто́мъ дꙋ́шꙋ ᲂу҆тверди́въ, позна́лъ є҆сѝ бг҃а и҆́стиннаго ѻ҆тца̀, и҆́же тѧ̀, ꙗ҆́кѡ сы́на, въ црⷭ҇твїе нбⷭ҇ное призва̀, па́че снѣ́га ᲂу҆бѣли́въ. сегѡ̀ ра́ди мо́лимсѧ тѝ, ѻ҆́тче маѯі́ме: молѝ хрⷭ҇та̀ бг҃а ᲂу҆мири́ти на́съ и҆ сп҃стѝ дꙋ́шы на́шѧ.
Сла́ва, гла́съ а҃:
Въ преставле́нїи твое́мъ къ бг҃ꙋ, прпⷣбне маѯі́ме, жа́лостїю сердца̀ на̑ша и҆сполнѧ́ютсѧ, и҆ сле́знїи и҆сто́чницы и҆злива́ютсѧ, и҆ мона́хѡвъ мно́жество ᲂу҆ми́льными словесы́ тѧ, ѻ҆тца̀, и҆ ᲂу҆чи́телѧ, и҆ наста́вника вѣнчава́ютъ, всѧ́ же страна̀ рѡссі́йскаѧ безпреста́ни красꙋ́етсѧ сла́дкими словесы̀ твои́ми.
И҆ ны́нѣ, бг҃оро́диченъ:
Вхо́дъ. Прокі́менъ днѐ. Чтє́нїѧ трѝ прпⷣбническаѧ (зрѝ л. рн҃а).
На стїхо́внѣ стїхи̑ры, гла́съ в҃:
Подо́бенъ: До́ме є҆ѵфра́ѳовъ:
До́мъ дх҃а ст҃а́гѡ и҆ црⷭ҇твїѧ наслѣ́дникъ ты̀ є҆сѝ, маѯі́ме, моли́сѧ ѡ҆ на́съ, чтꙋ́щихъ ст҃ꙋ́ю па́мѧть твою̀.
Сті́хъ: Честна̀ пред̾ гдⷭ҇емъ сме́рть прпⷣбныхъ є҆гѡ̀.
До́мъ бл҃года́ти ꙗ҆ви́лсѧ є҆́сть гро́бъ тво́й, маѯі́ме премꙋ́дре, моли́сѧ ѡ҆ на́съ, притека́ющихъ къ тебѣ̀.
Сті́хъ: Бл҃же́нъ мꙋ́жъ, боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
До́мъ тво́й но́вый ст҃а́ѧ ла́ѵра, вкꙋ́пѣ и҆ а҆ѳѡ́нъ пѣ́сненнѡ да восхва́лѧтъ по́двиги и҆ страда̑нїѧ твоѧ̑. (с. 756)
Сла́ва, гла́съ то́йже.
До́ме ст҃ы́ѧ трⷪ҇цы, красꙋ́йсѧ и҆ ликꙋ́й, и҆мѣ́ѧ свѣти́льникъ, и҆́же подъ спꙋ́домъ сїѧ́етъ па́че со́лнечныхъ лꙋ̑чъ.
И҆ ны́нѣ, гла́съ то́йже.
До́мъ бж҃їй, и҆ пала́та црⷭ҇каѧ, и҆ черто́гъ нбⷭ҇ный ты̀ є҆сѝ, прчⷭ҇таѧ, ᲂу҆пова́нїе и҆ покро́въ.
Тропа́рь, гла́съ и҃:
Заре́ю дх҃а ѡ҆блиста́емь, виті́йствꙋющихъ бг҃омꙋ́дреннѡ сподо́билсѧ є҆сѝ разꙋмѣ́нїѧ, невѣ́дѣнїемъ ѡ҆мрачє́ннаѧ сердца̀ человѣ́кѡвъ свѣ́томъ бл҃гоче́стїѧ просвѣща́ѧ, пресвѣ́телъ ꙗ҆ви́лсѧ є҆сѝ правосла́вїѧ свѣти́льникъ, маѯі́ме прпⷣбне, ѿѻнꙋ́дꙋже ре́вности ра́ди всеви́дѧщагѡ ѻ҆те́чества чꙋ́ждъ и҆ стра́ненъ, рѡссі́йскїѧ страны̀ бы́лъ є҆сѝ пресе́льникъ, страда̑нїѧ темни́цъ и҆ заточе́нїѧ ѿ самодержа́внагѡ претерпѣ́въ, десни́цею вы́шнѧгѡ вѣнча́ешисѧ и҆ чꙋдодѣ́йствꙋеши пресла̑внаѧ. и҆ ѡ҆ на́съ хода́тай бꙋ́ди непрело́женъ, чтꙋ́щихъ любо́вїю ст҃ꙋ́ю па́мѧть твою̀.
И҆ ны́нѣ, бг҃оро́диченъ.
На ᲂу҆́трени
По а҃-мъ стїхосло́вїи сѣда́ленъ, гла́съ и҃:
Тве́рдыѧ и҆ бг҃овѣща̑нныѧ глаго́лы со тща́нїемъ и҆з̾ѧснѧ́ѧ и҆ нечєсти́выѧ писа̑нїѧ ѡ҆блича́ѧ, ᲂу҆́мъ сво́й впери́въ въ го́рнѧѧ къ бг҃ꙋ, ᲂу҆́зы страда́льческїи ѿ навѣ̑тъ проти́вныхъ претерпѣ́лъ, маѯі́ме прпⷣбне, и҆ си́хъ ра́ди и҆́нокѡмъ ꙗ҆ви́лсѧ є҆сѝ ѻ҆́бразъ, па́че же и҆ похвала̀.
Сла́ва, и҆ ны́нѣ, бг҃оро́диченъ:
Тѧ̀, превосходѧ́щꙋю безплѡ́тныѧ бжⷭ҇твенныѧ чи́ны несравне́нною чистото́ю, молю̀, всепѣ́таѧ: скве́рнꙋю мою̀ дꙋ́шꙋ ѡ҆чи́сти ѿ беззако́нныхъ помышле́нїй, ꙗ҆́кѡ да досто́йнѡ сла́влю тѧ̀.
По в҃-мъ стїхосло́вїи сѣда́ленъ, гла́съ и҃:
Всѐ своѐ ᲂу҆́мное жела́нїе къ бг҃ꙋ впери́лъ є҆сѝ, и҆ тогѡ̀ зва́нїю невозвра́тнѡ ѿ дꙋшѝ послѣ́довалъ є҆сѝ, во ѻ҆би́тель прпⷣбнагѡ се́ргїа коне́чнѡ всели́всѧ, и҆ та́мѡ а҆́гг҃льски пожи́въ, мнѡ́гимъ пꙋ́ть бы́лъ є҆сѝ ко сп҃се́нїю, сегѡ̀ ра́ди и҆ гдⷭ҇ь тебє̀ просла́ви, чꙋдесы̀ ѡ҆богати́въ, тѣ́мже всѝ вопїе́мъ тѝ: ра́дꙋйсѧ ѻ҆би́тели трⷪ҇цкїѧ чꙋдесото́чное похвало̀, маѯі́ме ѻ҆́тче на́шъ.
Сла́ва, и҆ ны́нѣ, бг҃оро́диченъ:
Молю́ тѧ, пречⷭ҇таѧ, не пре́зри менѐ, потоплѧ́ема лю́тѣ въ скве́рнꙋю ти́нꙋ грѣха̀, но и҆змы́й менѐ ѿ ѕлосмра́дїѧ бл҃гоꙋха́ннымъ мѵ́ромъ моле́нїй твои́хъ и҆ свѣ́томъ сладча́йшимъ бжⷭ҇твенныѧ твоеѧ̀ любвѐ всю̀ тьмꙋ̀ дꙋшѝ моеѧ̀ просвѣтѝ.
По полѷеле́и сѣда́ленъ, гла́съ д҃:
Ꙗ҆́кѡ ѕвѣзда̀ пресвѣ́тлаѧ, ѡ҆бте́кшаѧ востѡ́чныѧ стра́ны и҆ къ сѣ́верꙋ прише́дшаѧ, ѡ҆зарѧ́етъ мглꙋ̀, те́мность мра́ка просвѣща́ѧ всѧ́ческꙋю, та́кѡ и҆ ты̀ прпⷣбне маѯі́ме, ᲂу҆подо́билсѧ є҆сѝ се́й, держа́внагѡ и҆спроше́нїемъ стра́ненъ ꙗ҆ви́лсѧ є҆сѝ и҆ пресе́льникъ ѿ а҆ѳѡ́на въ вели́цѣй рѡссі́и, въ и҆справле́нїи бжⷭ҇твенныхъ писа́нїй преди́венъ, и҆зѧ́щенъ показа́сѧ, но навѣ́тꙋющими льсти́вагѡ борца̀ наꙋще́нїи пострада́лъ (с. 758) є҆сѝ, и҆ за страда̑нїѧ своѧ̑ и҆ въ темни́цѣ заточє́нїѧ ѿ бг҃а свы́ше прїѧ́тъ чꙋдодѣ́йствїѧ да́ръ, и҆ ны́нѣ мо́лимъ тѧ̀: при́снѡ просѝ хрⷭ҇та̀ ми́ръ вселе́ннѣй дарова́ти и҆ дꙋша́мъ на́шымъ ве́лїю ми́лость.
Сла́ва, и҆ ны́нѣ, бг҃оро́диченъ:
Оу҆ще́дри менѐ, влⷣчца, къ тебѣ̀ прибѣга́ющаго, и҆ и҆зба́ви мѧ̀ стꙋ́днагѡ наси́лїѧ ѕло́бныхъ предста́телей лю́тагѡ ѕмі́ѧ, и҆̀же, ꙗ҆́кѡ є҆хі̑дны, ᲂу҆ѧзвлѧ́ютъ дꙋ́шꙋ мою̀. а҆́ще бо а҆́зъ и҆ неключи́мый ра́бъ тво́й, влⷣчце, но ᲂу҆пова́ю на тѧ̀.
Степє́нна, а҃-й а҆нтїфѡ́нъ д҃-гѡ гла́са.
Прокі́менъ, гла́съ д҃: Честна̀ пред̾ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; Всѧ́кое дыха́нїе: Є҆ѵⷢ҇лїе ѿ матѳе́а, зача́ло м҃г:
По н҃-мъ ѱалмѣ̀ стїхи́ра, гла́съ ѕ҃: Подо́бенъ: Є҆гда̀ преставле́нїе:
Є҆гда̀ страда̑нїѧ претерпѣва́лъ є҆сѝ, прпⷣбне маѯі́ме, тогда̀, пла́ча и҆ рыда́ѧ, моли́лъ є҆сѝ ст҃и́телѧ мака́рїа: да́ждь мѝ ᲂу҆зрѣ́ти ст҃ꙋ́ю го́рꙋ моли́твенницꙋ ѡ҆ вселе́ннѣй. ѻ҆́нъ же со слеза́ми вопїѧ́ше тѝ: ѽ маѯі́ме! ви́ждꙋ тѧ̀ невино́вна моли́твенника и҆ сокрꙋша́юсѧ, ᲂу҆́зы твоѧ̑ ꙗ҆́кѡ є҆ди́нагѡ ѿ ст҃ы́хъ цѣлꙋ́ю, а҆ помощѝ не могꙋ́ ти. но, ѽ прпⷣбне ѻ҆́тче, моли́сѧ прилѣ́жно бг҃ꙋ и҆ мт҃ре є҆гѡ̀ сп҃сти́сѧ сѣ́тей вра́жїихъ на́мъ невреди̑мымъ.
Канѡ́нъ прест҃ѣ́й бцⷣѣ ра́ди є҆ѧ̀ і҆кѡ́ны, нарица́емыѧ ватопе́дскїѧ, и҆ прпⷣбномꙋ маѯі́мꙋ гре́кꙋ канѡ́нъ, гла́съ а҃:
Пѣ́снь а҃.
І҆рмо́съ: Пои́мъ, всѝ лю́дїе, ѿ го́рькїѧ рабо́ты фараѡ́ни і҆и҃лѧ и҆змѣ́ншемꙋ и҆ во глꙋбинѣ̀ морстѣ́й нога́ми немо́крыми наста́вльшемꙋ пѣ́снь побѣ́днꙋю, ꙗ҆́кѡ просла́висѧ.
Воспѣ́ти кі́й ꙗ҆зы́къ возмо́жетъ по достоѧ́нїю твоѧ̑, преди́вный ѻ҆́тче, вє́лїѧ и҆справлє́нїѧ, высо́кое ᲂу҆чи́тельство, въ темни́цѣ и҆ во ᲂу҆́захъ мꙋ́ченическое страда́нїе и҆ долготерпѣ́нїе.
Ка́кѡ воспое́мъ и҆ что́ тѧ нарече́мъ, предо́блїй ѻ҆́тче; прⷪ҇рка ли, ꙗ҆́кѡ провѣща̀ неꙋдо́бь разꙋмѣва́ємаѧ и҆ вѣ́дѡмаѧ на́мъ, а҆пⷭ҇ла ли, ꙗ҆́кѡ зы́блемꙋю проти́вными на́мъ вѣ́тры ᲂу҆твердѝ хрⷭ҇тїа́нскꙋю вѣ́рꙋ бжⷭ҇твенныхъ писа́нїй ᲂу҆че́нїи, ᲂу҆чи́телѧ ли, но вои́стиннꙋ ничи́мъ же хꙋ́ждши и҆ ни́жши є҆сѝ вели́кихъ ѻ҆́нѣхъ вселе́нскихъ ᲂу҆чи́тель.
Воспѣ́ти ст҃а́го и҆ поклонѧ́емаго паракли́та въ темни́цѣ и҆звѣще́нїе ѿ а҆́гг҃ла прїи́мъ, сотвори́лъ є҆сѝ канѡ́нъ ст҃о́мꙋ дх҃ꙋ, и҆́мже є҆щѐ въ во́ли просвѣще́нъ, сщ҃е́нныѧ и҆ бг҃одꙋхновє́нныѧ кни́ги соста́вилъ є҆сѝ.
Бг҃оро́диченъ:
Пои́мъ, всѝ лю́дїе, ст҃ы́ню и҆ сла́вꙋ пречⷭ҇тыѧ и҆ всепѣ́тыѧ бж҃їѧ мт҃ре, вы́шшꙋю небе́съ и҆ всѣ́хъ ᲂу҆́мныхъ си́лъ, поноси́вшꙋю въ пречⷭ҇той свое́й ᲂу҆тро́бѣ є҆мманꙋ́ила, ꙗ҆́кѡ свѧ́та и҆ пресла́вна є҆́сть.
Пѣ́снь г҃:
І҆рмо́съ: Оу҆твердѝ менѐ, хрⷭ҇тѐ, на недви́жимомъ ка́мени за́повѣдей твои́хъ и҆ просвѣти́ мѧ свѣ́томъ лица̀ твоегѡ̀: нѣ́сть бо ст҃ъ, па́че тебѐ, человѣколю́бче.
Оу҆тверди́лъ є҆сѝ, прпⷣбне маѯі́ме, въ се́рдцѣ свое́мъ бжⷭ҇твенный стра́хъ, всѧ̑ пѡ́хоти плѡтскі́ѧ возненави́дѣвъ, сегѡ̀ ра́ди ᲂу҆мꙋдри́лсѧ є҆сѝ, ꙗ҆́коже про́стъ младе́нецъ, и҆ вслѣ́дъ гдⷭ҇еви восте́клъ є҆сѝ.
Оу҆твержде́нїемъ и҆мѣ́ѧ распе́ншагосѧ гдⷭ҇а і҆и҃са хрⷭ҇та̀, стра́ненъ, незна́емъ, бездо́менъ, без̾ѻте́чественъ, без̾име́ненъ, безсмы́сленъ бы́лъ є҆сѝ, прпⷣбне маѯі́ме, пред̾ свои́ми сро́дники, зна́емыми и҆ дрꙋ́ги.
Оу҆твержда́ѧсѧ на за́повѣдехъ гдⷭ҇нихъ, ѿ го́рести темни́чныѧ бы́лъ є҆сѝ на мно́гъ ча́съ, ꙗ҆́кѡ ме́ртвъ, но дѣ́ѧлъ є҆сѝ ѡ҆ ѕлонра́вныхъ моли́твꙋ, си́це глаго́лѧ: гдⷭ҇и, і҆и҃се хрⷭ҇тѐ, сн҃е бг҃а жива́гѡ, не поста́ви и҆̀мъ грѣха̀ сегѡ̀, клеве́щꙋщихъ на мѧ̀ непра́вдꙋ.
Бг҃оро́диченъ:
Оу҆твердѝ на́съ къ хвале́нїю твоемꙋ̀, дв҃о, и҆ сохранѝ безъ вреда̀ ѿ всѧ́кїѧ ко́зни лꙋка́вагѡ, и҆ сподо́би стоѧ́нїѧ ѡ҆деснꙋ́ю є҆диноро́днагѡ сн҃а твоегѡ̀, є҆мꙋ́же подоба́етъ всѧ́каѧ сла́ва, че́сть и҆ поклоне́нїе во вѣ́ки вѣкѡ́въ.
Сѣда́ленъ, гла́съ д҃:
Оу҆́мъ ᲂу҆краси́въ поꙋче́нїи бг҃одохнове́нныхъ писа́нїй, тре́звенною моли́твою и҆ бдѣ̑нїи бг҃оꙋго́дными, ᲂу҆тверди́лъ є҆сѝ се́рдце своѐ въ гдⷭ҇ѣ и҆сполне́нїемъ за́повѣдей сп҃си́тельныхъ є҆гѡ̀, сегѡ̀ ра́ди прославлѧ́ютъ тѧ̀ вы́нꙋ рѡссі́йстїи лю́дїе и҆ а҆ѳѡ́нъ, и҆ ѻ҆би́тель ватопе́дскаѧ вкꙋ́пѣ съ на́ми вопїе́тъ: маѯі́ме премꙋ́дре, не ѡ҆ста́ви на́съ, молѧ́щихсѧ тебѣ̀.
Сла́ва, и҆ ны́нѣ, бг҃оро́диченъ:
Молю́ тѧ, пречⷭ҇таѧ мт҃и бг҃а вы́шнѧгѡ, є҆ди́но дꙋшѝ моеѧ̀ ᲂу҆тѣше́нїе, ᲂу҆пова́нїе, сла́досте, бжⷭ҇твенный покро́ве, свѣ́те, застꙋпле́нїе и҆ сп҃се́нїе. сподо́би мѧ̀ твои́ми моли́твами ᲂу҆слы́шати гла́съ, бл҃гослове́нныхъ призыва́ющїй внꙋ́трь черто́га влⷣки.
Пѣ́снь д҃.
І҆рмо́съ: Ве́лїѧ та́йна твоегѡ̀, хрⷭ҇тѐ, смотре́нїѧ: сїю́ бо свы́ше прови́дѧ бг҃озри́тельнѡ, а҆ввакꙋ́мъ, и҆зше́лъ є҆сѝ, вопїѧ́ше тебѣ̀, во сп҃се́нїе люде́й твои́хъ, человѣколю́бче.
Ѿ та́йныхъ є҆реті́ческихъ лжеꙋче́нїй ничто́же ᲂу҆таи́сѧ ѿ тебѐ, прпⷣбне маѯі́ме, но бл҃года́тїю ст҃а́гѡ и҆ поклонѧ́емагѡ дх҃а всѧ̑ тебѣ̀ ѿкрове́на сꙋ́ть.
Та́инственныхъ догма́тѡвъ правосла́вныѧ вѣ́ры не то́чїю побо́рника и҆́стинна и҆ вѣ́рна себѐ показа̀, но и҆ па́че преѻ́стра сѣки́ра на всѧ̑, ꙗ҆̀же под̾ небесе́мъ, є҆́рєси ꙗ҆ви́лсѧ є҆сѝ.
Ꙗ҆́кѡ та́инъ ст҃а́гѡ дх҃а строи́тель, и҆ небе́снагѡ жи́тельства рачи́тель, и҆ зако́на гдⷭ҇нѧ ᲂу҆чи́тель вои́стиннꙋ показа́лсѧ є҆сѝ, премꙋ́дре маѯі́ме.
Бг҃оро́диченъ:
Ве́лїю та́инствꙋ мѡѷсе́й бг҃ови́децъ наꙋче́нъ, зрѧ̀ кꙋпинꙋ̀ неѡпали́мꙋ: кꙋпина̀ не́мощь человѣ́ческагѡ є҆стества̀, ѻ҆́гнь же бжⷭ҇тво̀ є҆диноро́днагѡ сн҃а вы́шнѧгѡ, и҆́бо бг҃ъ на́шъ ѻ҆́гнь є҆́сть, поѧда́ѧй грѣхѝ на́шѧ, ꙗ҆́коже бжⷭ҇твенный а҆пⷭ҇лъ речѐ.
Пѣ́снь є҃.
І҆рмо́съ: Ѿ но́щи ᲂу҆́тренююще, пое́мъ тѧ̀, хрⷭ҇тѐ, ѻ҆ц҃ꙋ̀ собезнача́льна и҆ сп҃са дꙋ́шъ на́шихъ, ми́ръ мі́рови пода́ждь, человѣколю́бче.
Но́щїю лꙋна̀, дне́мъ со́лнце просвѣща́ютъ и҆ веселѧ́тъ тва́рь всю̀ ви́димꙋю, житїе́ же и҆ премꙋ́дрость ст҃ы́хъ просвѣща́ютъ и҆ веселѧ́тъ дꙋ́шы всѣ́хъ человѣ́кѡвъ, хотѧ́щихъ сп҃сти́сѧ и҆ въ ра́зꙋмъ и҆́стины прїитѝ. си́це и҆ писа̑нїѧ прпⷣбнагѡ маѯі́ма гре́ка, ꙗ҆́кѡ бг҃одꙋхновє́нныѧ трꙋды̀, велегла́снѡ вопїю́тъ.
Въ нощѝ молѧ́щꙋсѧ тебѣ̀ въ темни́цѣ, бг҃онача́льныѧ и҆ пребл҃гі́ѧ трⷪ҇цы про́мысломъ вне́мъ а҆́гг҃лъ гдⷭ҇нь и҆ речѐ: ѽ ста́рче! си́ми мꙋ́ками и҆збꙋ́деши вѣ́чныхъ мꙋ́къ.
Въ нощѝ, ꙗ҆́кѡ сладкогла́сный и҆ добропѣ́снивый сла́вїй, воспѣ́лъ є҆сѝ, премꙋ́дре маѯі́ме: не тꙋжѝ, не скорбѝ, нижѐ тоскꙋ́й ѡ҆ ни́хже, любе́зна мѝ дꙋшѐ, стра́ждеши бе́зъ пра́вды, твоѧ́ бо мзда̀ ве́лїѧ на нб҃сѣ́хъ.
Бг҃оро́диченъ:
Ѿ но́щи ᲂу҆́тренююще, пое́мъ тѧ̀, дв҃о, дще́рь цр҃е́вꙋ, рѧ̑сны златы́ми ѡ҆дѣ́ѧнꙋ и҆ преиспещре́нꙋ, лѣ́ствицꙋ, ю҆́же і҆а́кѡвъ ви́дѣ, го́рꙋ, ю҆́же благоволѝ бг҃ъ жи́ти въ не́й, и҆́бо гдⷭ҇ь всели́тсѧ до конца̀.
Пѣ́снь ѕ҃.
І҆рмо́съ: Прⷪ҇ро́ка спа́слъ є҆сѝ ѿ ки́та, человѣколю́бче, и҆ менѐ и҆зъ глꙋбины̀ прегрѣше́нїй возведѝ, молю́сѧ.
Прⷪ҇ро́чески, прпⷣбне маѯі́ме, лю́ди ѡ҆блича́лъ є҆сѝ, къ покаѧ́нїю приводѧ̀: заблꙋди́хомъ, заблꙋди́хомъ ѿ пра́ваго и҆ незаблꙋ́днагѡ жи́тельства прпⷣбныхъ и҆́нѡкъ и҆ безъ ᲂу҆ма̀ тече́мъ къ по́чести вы́шнѧгѡ зва́нїѧ.
Прⷪ҇ро́къ покаѧ́нїѧ ꙗ҆ви́лсѧ є҆сѝ, прпⷣбне маѯі́ме, дꙋшѝ трезве́нїе снабдѣ́ваѧ бжⷭ҇твенными словесы̀ и҆ и҆зъ ро́ва страсте́й возводѧ̀ ѡ҆мраче́нныхъ грѣхмѝ.
Прⷪ҇рѡ́ческїѧ писа̑нїѧ, въ та́йнѣ глагѡ́ланныѧ, ꙗ҆́вны содѣ́лалъ є҆сѝ, премꙋ́дре маѯі́ме, сегѡ̀ ра́ди послꙋ́шаютъ тѧ̀ ѻ҆би́льнѡ всѝ лю́дїе.
Бг҃оро́диченъ:
Прⷪ҇ро́ки тѧ̀ провозвѣсти́ша, дв҃о чⷭ҇таѧ, а҆пⷭ҇ли проповѣ́даша, ст҃і́и всѝ ᲂу҆блажи́ша, мы́ же со а҆рха́гг҃ломъ вопїе́мъ: ра́дꙋйсѧ, бл҃года́тнаѧ, гдⷭ҇ь съ тобо́ю.
Конда́къ, гла́съ и҃: Подо́бенъ: Премꙋ́дрости:
Бг҃одꙋхнове́ннымъ писа́нїемъ и҆ бг҃осло́вїѧ проповѣ́данїемъ невѣ́рствꙋющихъ сꙋемꙋ́дрїе ѡ҆бличи́лъ є҆сѝ, всебога́те, па́че же, въ правосла́вїи и҆справлѧ́ѧ, на стезю̀ и҆́стиннагѡ позна́нїѧ наста́вилъ є҆сѝ, ꙗ҆́коже свирѣ́ль бг҃огла́снаѧ, ᲂу҆слажда́ѧ слы́шащихъ ра́зꙋмы, непреста́ннѡ весели́ши, маѯі́ме досточꙋ́дне, сегѡ̀ ра́ди мо́лимъ тѧ̀: молѝ хрⷭ҇та̀ бг҃а грѣхѡ́въ ѡ҆ставле́нїе низпосла́ти вѣ́рою пою́щымъ всест҃о́е твоѐ ᲂу҆спе́нїе, маѯі́ме, ѻ҆́тче на́шъ.
І҆́косъ:
Ка́кѡ воспое́мъ велича́йшемꙋ тезоимени́таго, маѯі́ма предо́блѧго, прпⷣбныхъ кра́сна вѣнца̀, страда́льцєвъ тве́рдаго пра́вила, є҆ретїкѡ́въ нело́жнаго посрамле́нїѧ, цр҃кви столпа̀ непоколеби́маго, дѣ̑вственникъ и҆звѣ́стнаго наста́вника и҆ сꙋпрꙋ́жества честна́го застꙋ́пника, фїло́софѡвъ премꙋ́дршаго мꙋдреца̀, и҆́стины и҆сто́чника приснотекꙋ́щаго, и҆́нѡкъ похвалꙋ̀ и҆ всѣ́хъ люде́й вои́стиннꙋ ᲂу҆краше́нїе; сегѡ̀ ра́ди мо́лимъ тѧ̀, досточꙋ́дне маѯі́ме: молѝ хрⷭ҇та̀ бг҃а грѣхѡ́въ ѡ҆ставле́нїе низпосла́ти вѣ́рою пою́щымъ всест҃о́е твоѐ ᲂу҆спе́нїе, маѯі́ме, ѻ҆́тче на́шъ.
Пѣ́снь з҃.
І҆рмо́съ: Ѻ҆́бразꙋ слꙋжи́ти, мꙋсїкі́йскомꙋ согла́сїю созыва́ющꙋ лю́ди, ѿ пѣ́сней сїѡ́нскихъ пою́ще ѻ҆те́чески, ѻ҆́троцы даві́дѡвы мꙋчи́телево разори́ша ѕлочести́вое велѣ́нїе и҆ пла́мень въ ро́сꙋ преложи́ша, пѣ́снь воспѣва́юще: превозноси́мый ѻ҆тцє́въ и҆ на́шъ бж҃е, бл҃гослове́нъ є҆сѝ.
Ѻ҆́бразꙋ промышле́нїѧ прст҃ы́ѧ трⷪ҇цы пѣ́снь бл҃года́рственнꙋ возда́въ, прпⷣбне маѯі́ме, всѧ̑ ны̀ призва́лъ є҆сѝ бл҃гослови́ти небла́зненнѡ ѻ҆ц҃а̀, и҆ сн҃а, и҆ ст҃а́го дх҃а, є҆ди́наго бг҃а въ трїе́хъ ѵ҆поста́сехъ.
Ѻ҆́бразъ ѕлострада́нїѧ, терпѣ́нїѧ и҆ моли́твы показа́лсѧ є҆сѝ, ст҃е маѯі́ме, па́че же и҆ ᲂу҆пова́нїѧ, ꙗ҆́кѡ бг҃ъ сꙋдїѧ̀ пра́веденъ, и҆ крѣ́покъ, и҆ долготерпѣли́въ є҆́сть, и҆ то́й возда́стъ коемꙋ́ждо по дѣлѡ́мъ є҆гѡ̀.
Ѻ҆́бразъ превы́спреннѧгѡ бг҃осло́вїѧ стѧжа́лъ є҆сѝ, премꙋ́дре маѯі́ме, сі́и є҆́сть догма́ты бжⷭ҇твенныхъ а҆пⷭ҇лъ и҆ ѻ҆тє́цъ, ѿ свѧта́гѡ паракли́та и҆злїѧ̑нныѧ, и҆́мже и҆ на́съ наꙋча́еши бг҃омꙋ́дрыми свои́ми писа́нїи.
Бг҃оро́диченъ:
Ѻ҆́бразъ пречⷭ҇тагѡ твоегѡ̀ рождества̀, дв҃о мт҃и, неизрече́ненъ и҆ невѣ́домъ є҆́сть, ты́ бо вселе́нїе превѣ́чнагѡ є҆диноро́днагѡ сн҃а ѻ҆́ч҃а была̀ є҆сѝ, не ѡ҆пали́вшисѧ ѿ негѡ̀.
Пѣ́снь и҃.
І҆рмо́съ: Въ пла́мени ѻ҆́гненнѣ горѧ́щїѧ пе́щи сохра́ншаго дѣ́ти и҆ во зра́цѣ а҆́гг҃ла снизше́дшаго къ ни́мъ, по́йте гдⷭ҇а и҆ превозноси́те є҆го̀ во вѣ́ки. (с. 765)
Пла́мене бжⷭ҇твеннагѡ паракли́това ѡ҆блиста́нїѧ возжелѣ́въ, прпⷣбне маѯі́ме, сегѡ̀ ра́ди и҆ сладча́йшимъ свѣ́томъ ᲂу҆че́нїѧ и҆ чꙋде́съ ѻ҆гне́мъ ѿгна́лъ є҆сѝ всѧ́кїй мра́къ бѣсо́вскїй.
Пла́мене гее́ннскагѡ бѣ́гати лю́ди наꙋчи́лъ є҆сѝ, прпⷣбне маѯі́ме, си́хъ призыва́ѧ дѣ́ломъ соверша́ти за́пѡвѣди хрⷭ҇тѡ́вы и҆ ѿстꙋпи́ти ѕло́бы, блꙋда̀, лжѝ, го́рдости, льстѝ и҆ хище́нїѧ непра́веднагѡ чꙋжи́хъ и҆мѣ́нїй.
Пла́меннѡ нече́стїе є҆реті́ческое попали́лъ є҆сѝ, премꙋ́дре маѯі́ме, вѣ́ры же хрⷭ҇тїа́нскїѧ непоро́чныѧ бжⷭ҇твенное и҆сповѣ́данїе и҆з̾ѧсни́въ.
Бг҃оро́диченъ:
Въ пла́мени ѻ҆́гненнѣ горѧ́щїѧ кꙋпины̀ ви́дѣ тѧ̀ мѡѷсе́й бг҃ови́децъ, провозвѣсти́въ безсѣ́менное рождество̀ твоѐ, дв҃о прчⷭ҇таѧ, сегѡ̀ ра́ди и҆ на́съ плотски́хъ страсте́й свободѝ.
Пѣ́снь ѳ҃.
І҆рмо́съ: Тебѐ, свѣ́тлꙋю свѣщꙋ̀ и҆ мт҃рь бж҃їю, пречꙋ́днꙋю сла́вꙋ и҆ вы́шшꙋю всѣ́хъ тва́рей, пѣ́сньми велича́емъ.
Тебѐ, свѣ́тлꙋю свѣщꙋ̀, и҆ ᲂу҆́мъ кра́йнѣйшїй, и҆ сто́лпъ непоколеби́мъ вѣ́мы, па́че же наста́вника мона́хѡвъ и҆ є҆ресе́й наказа́телѧ проповѣ́дꙋемъ.
Свѣ́тлѡ ѿ полꙋ́денныхъ стра́нъ возсїѧ́лъ є҆сѝ, прпⷣбне маѯі́ме, свѣ́тло житїѐ показа́въ, мра́къ лꙋка́вствїѧ прогонѧ́ѧ и҆ бл҃гопрїѧ́тною моли́твою просїѧ́въ.
Свѣща̀ бжⷭ҇твеннагѡ ра́зꙋма бы́въ, дости́глъ є҆сѝ въ позна́нїе сн҃а бж҃їѧ, въ мꙋ́жа соверше́нна, въ мѣ́рꙋ (с. 766) во́зраста хрⷭ҇то́ва, сегѡ̀ ра́ди и҆ мы̀ вопїе́мъ тѝ: бл҃же́нъ ты̀ є҆сѝ вои́стиннꙋ по всемꙋ̀, и҆ по́двиги, и҆ сла́вою, и҆ бл҃года́тїю, ꙗ҆̀же є҆сѝ свы́ше полꙋчи́лъ.
Бг҃оро́диченъ:
Тебѐ, и҆ свѣ́тлꙋю свѣщꙋ̀ въ нощѝ страсте́й, и҆ покро́въ бл҃госты́ни, и҆ стѣ́нꙋ неѡбори́мꙋ ѿ навѣ̑тъ вра́жїихъ, пѣ́сньми велегла́снѡ велича́емъ.
Свѣти́ленъ:
Свѣ́тъ возсїѧ́лъ є҆́сть прпⷣбномꙋ маѯі́мꙋ бжⷭ҇твенныхъ слове́съ и҆ повелѣ́нїй, сегѡ̀ ра́ди ꙗ҆́кѡ свѣ́тъ вторы́й и҆ ᲂу҆́мъ кра́йнѣйшїй на́мъ ꙗ҆ви́сѧ.
Сла́ва, и҆ ны́нѣ, бг҃оро́диченъ:
Оу҆жасо́шасѧ а҆́гг҃льскїѧ си̑лы, зрѧ́ще дв҃ꙋ, свѣ́тъ ѿ свѣ́та въ рꙋка́хъ держа́щꙋ, чи́стѣ ро́ждшей вопїѧ́ше: свѣ́тъ возсїѧ́лъ є҆́сть на́мъ ѿ дв҃и́ческихъ ложе́снъ.
На хвали́техъ стїхи̑ры, гла́съ и҃:
Ѿре́клсѧ є҆сѝ себѐ, прпⷣбне маѯі́ме, и҆ стра́нна себѐ показа̀ всегѡ̀ житїѧ̀ сегѡ̀ сꙋ́етнагѡ, ни пи́щѣ сла́дкой, ни сла́вѣ, ни и҆мѣ́нїемъ ктомꙋ̀ ра́дꙋѧсѧ, нижѐ дрꙋ́жбамъ си́льныхъ. всѧ̑ же вкꙋ́пѣ ѿри́нꙋлъ є҆сѝ нестѧжа́тельнымъ житїе́мъ, и҆ слеза́ми, и҆ безмо́лвїемъ, моли́твами, и҆ бдѣ́нїи, и҆ кни́жными прочита́нїи, бжⷭ҇твенною добро́тою мы́сленнѡ пита́ѧсѧ, ра́дꙋешисѧ, весе́лїѧ при́снѡ наполнѧ́емь.
Маѯі́мъ прпⷣбный, ꙗ҆́коже и҆ дре́вле ѻ҆тцы̀, не хꙋ́дѣ борє́нїѧ показа̀, ѻ҆́во є҆ретїкѝ словесы̀ свои́ми бїѧ̀, ѻ҆́во же вѣ̑рныѧ неподвижи́мѡ вѣ́рѣ стоѧ̑нїѧ ᲂу҆крѣплѧ́ѧ, не поколеба́ша бо сегѡ̀ ѻ҆тца̀ лю́тыѧ (с. 767) бꙋ́ри приражє́нїѧ, ни темни́ца, ни ᲂу҆́зы, тѣ́ло держа́щїи, а҆ дꙋ́шꙋ просвѣща́ющїи.
Маѯі́мъ премꙋ́дрый, вторы́й земны́й и҆ многострада́льный херꙋві́мъ, бжⷭ҇твеннꙋю трапе́зꙋ на́мъ предлага́етъ въ па́мѧти свое́й, ᲂу҆се́рднѡ теце́мъ, ѽ празднолю́бцы, на пресла́дкїй се́й и҆ и҆з̾ѻби́льный и҆сто́чникъ, распали́вшꙋюсѧ жа́ждꙋ ѿ ло́жныхъ є҆реті́ческихъ ᲂу҆че́нїй ᲂу҆гаша́юще и҆ дꙋ́шы въ гѡ́рнїѧ ѡ҆би́тели возводѧ́ще.
Сла́ва, гла́съ г҃:
Сп҃сѝ на́съ твое́ю бл҃года́тїю, прест҃а́ѧ трⷪ҇це, содѣ́телю всѣ́хъ и҆ содержа́телю, сохранѝ на́съ чи̑сты, въ настоѧ́щемъ ᲂу҆̀бо житїѝ бл҃говѣ́рнѡ слꙋжа́щихъ тѝ, въ бꙋ́дꙋщемъ вѣ́цѣ сподо́би соꙋчини́тисѧ на́мъ бжⷭ҇твенномꙋ ли́кꙋ и҆збра́нныхъ твои́хъ, и҆дѣ́же шꙋ́мъ чи́стъ пра́зднꙋющихъ и҆ гла́съ неизрече́ннагѡ весе́лїѧ.
И҆ ны́нѣ, бг҃оро́диченъ:
Славосло́вїе вели́кое.
На лїтꙋргі́и слꙋ́жба прпⷣбническаѧ.