Мѣ́сѧца тогѡ́же во в҃-й де́нь. Предпра́зднство просвѣще́нїѧ: И҆ па́мѧть, и҆́же во ст҃ы́хъ, ѻ҆ц҃а̀ на́шегѡ сїльве́стра, па́пы ри́мскагѡ.
И҆ прпⷣбнагѡ ѻ҆ц҃а̀ на́шегѡ серафі́ма саро́вскагѡ, чꙋдотво́рца.
Слꙋ́жба є҆гѡ̀ пи́сана въ приложе́нїи.
На Гдⷭ҇и, воззва́хъ, стїхи̑ры, гла́съ д҃. Подо́бенъ: Ꙗ҆́кѡ до́блѧ:
Предпра́зднствєнныѧ пѣ̑сни ꙳ бл҃гоче́стнѡ предвозгласи́мъ ꙳ чⷭ҇тна́гѡ креще́нїѧ бг҃а на́шегѡ: ꙳ се́ бо хо́щетъ, ꙗ҆́кѡ человѣ́къ, ꙳ пло́тїю прїитѝ къ прⷣте́чи своемꙋ̀, ꙳ и҆ проси́ти креще́нїѧ спаси́тельнагѡ, ꙳ въ назда́нїе всѣ́хъ, ꙳ вѣ́рою свѧще́ннѡ просвѣща́емыхъ ꙳ и҆ прича́стникѡвъ дх҃а.
Хрⷭ҇то́съ показꙋ́етсѧ, ꙳ бг҃ъ ꙗ҆влѧ́етсѧ, ꙳ ꙗ҆́коже дв҃дъ преднаписа̀ ꙗ҆́вственнѣйше, ꙳ и҆ къ рабꙋ̀, кр҃ще́нїѧ просѧ̀, грѧде́тъ. ꙳ І҆ѻрда́не рѣко̀, весе́лїѧ и҆спо́лнисѧ: ꙳ землѧ̀ и҆ мо́ре, ꙳ го́ры и҆ хо́лми, ꙳ и҆ человѣ́чєскаѧ ны́нѣ и҆гра́йте сердца̀, ꙳ свѣ́тъ мы́сленный воспрїе́млюще.
Рѣкꙋ̀ мі́ра тѧ̀, ꙳ и҆ пото́къ, ꙗ҆́коже пи́шетъ, ꙳ пи́щи сꙋ́ща, всеси́льне, ꙳ ка́кѡ тѧ̀ рѣ̑чныѧ стрꙋи̑ ꙳ прїи́мꙋтъ, гдⷭ҇и, ꙳ восходѧ́ща на́га, ꙳ не́бо ѡ҆блага́ющаго ѻ҆́блаки, ꙳ и҆ ѡ҆бна́жша всѧ́кꙋ ѕло́бꙋ вра́жїю, ꙳ и҆ нетлѣ́нїемъ земнорѡ́дныѧ ѡ҆дѣва́юща;
И҆́ны стїхи̑ры ст҃а́гѡ, гла́съ и҃. Подо́бенъ: Ѽ пресла́внагѡ чꙋдесѐ!
Ѻ҆́ч҃е ст҃и́телю сїльве́стре, ꙳ сщ҃е́нства свѣ́томъ ꙳ сщ҃еннопросвѣща́емь, ꙳ вѣ̑рныѧ просвѣти́лъ є҆сѝ свѣтолꙋ́чными ᲂу҆чє́нїи, ꙳ є҆ди́ницꙋ є҆стество́мъ трїѷпоста́сное сꙋщество̀ чествова́ти, ꙳ и҆ ѿгна́лъ є҆сѝ тмꙋ̀ є҆ресе́й. Тѣ́мже свѣтоно́снꙋю дне́сь ꙳ ꙗ҆́снѡ па́мѧть твою̀ ꙳ ра́дꙋющесѧ торжествꙋ́емъ.
Ѻ҆́ч҃е бг҃оно́се сїльве́стре, ꙳ сто́лпъ ꙗ҆ви́лсѧ є҆сѝ ѻ҆́гненъ, ꙳ сщ҃е́ннѡ предводѧ̀ сщ҃е́нный собо́ръ: ꙳ и҆ ѻ҆́блакъ ѡ҆сѣнѧ́ющь, ꙳ ѿ є҆гѵ́петскїѧ ле́сти вѣ̑рныѧ и҆з̾има́ющь, ꙳ и҆ къ бжⷭ҇твеннѣй землѝ преносѧ́щь ꙳ неле́стными твои́ми ᲂу҆чє́нїи всегда̀. ꙳ Тѣ́мже бл҃госла́внꙋю и҆ всесвѧще́ннꙋю ꙳ па́мѧть твою̀ чти́мъ.
Ѻ҆́ч҃е бг҃оглаго́ливе сїльве́стре, ꙳ стрꙋѧ́ми твои́хъ моли́твъ, ꙳ многоѻбра́знаго ѕмі́ѧ тве́рдѡ затвори́лъ є҆сѝ, ꙳ свѧщенноꙋдивлѧ́емь. ꙳ Є҆́ллинѡвъ мно́жество бг҃ꙋ приве́лъ є҆сѝ, ꙳ є҆вре́євъ же сꙋровство̀ смири́лъ є҆сѝ, ꙳ чꙋдеса̀ вє́лїѧ творѧ̀ пред̾ ни́ми ꙗ҆́вѣ. ꙳ Тѣ́мже тѧ̀ чти́мъ и҆ ᲂу҆блажа́емъ.
Сла́ва, и҆ ны́нѣ, гла́съ ѕ҃:
Грѧде́тъ ко і҆ѻрда́нꙋ хрⷭ҇то́съ и҆́стина, крⷭ҇ти́тисѧ ѿ і҆ѡа́нна, и҆ гл҃го́летъ къ немꙋ̀: а҆́зъ тре́бꙋю ѿ тебє̀ крести́тисѧ, и҆ ты́ ли грѧде́ши ко мнѣ̀; не смѣ́ю сѣ́но прикоснꙋ́тисѧ ѻ҆гню̀, ты́ мѧ ѡ҆ст҃ѝ, влⷣко, бж҃е́ственнымъ ꙗ҆вле́нїемъ твои́мъ.
На стїхо́внѣ стїхи̑ры самогла́сны, гла́съ а҃. І҆ѡа́нна мона́ха:
Свѣ́телъ ᲂу҆́бѡ мимоше́дшїй пра́здникъ, свѣтлѣ́йшїй же, сп҃се, приходѧ́щїй: ѻ҆́нъ а҆́гг҃ла и҆мѣ́ѧше бл҃говѣ́стника, и҆ се́й прⷣте́чꙋ ѡ҆брѣ́те пред̾ꙋгото́вителѧ. Ѻ҆́нъ кро́вємъ и҆злива́ємымъ, ꙗ҆́кѡ безча́денъ, рыда́ше виѳлее́мъ: и҆ се́й, вода́мъ благословє́ннымъ, многоча́дна познава́етсѧ кꙋпѣ́ль. Тогда̀ ѕвѣзда̀ волхвѡ́мъ возвѣстѝ, ны́нѣ же ѻ҆ц҃ъ мі́рꙋ тѧ̀ показа̀: воплоти́выйсѧ и҆ па́ки грѧды́й ꙗ҆́вѣ гдⷭ҇и, сла́ва тебѣ̀.
Гла́съ в҃:
Сті́хъ: Сегѡ̀ ра́ди помѧнꙋ́хъ тѧ̀ ѿ землѝ і҆ѻрда́нски и҆ є҆рмѡнїи́мски.
А҆ндре́а і҆еросолѵ́мскагѡ:
Па́ки і҆и҃съ мо́й ѡ҆чища́етсѧ во і҆ѻрда́нѣ, па́че же ѡ҆чища́етъ грѣхѝ на́шѧ: грѧде́тъ бо вои́стиннꙋ на креще́нїе, ѡ҆мы́ти хотѧ̀ а҆да́мово рꙋкописа́нїе. И҆ речѐ ко і҆ѡа́ннꙋ: грѧдѝ, послꙋжѝ, ѽ крⷭ҇ти́телю, та́инства стра́ннагѡ глави́знѣ. Грѧдѝ, прострѝ рꙋ́кꙋ твою̀ ско́рѡ, и҆ прикосни́сѧ верхꙋ̀ сте́ршагѡ ѕмі́евꙋ главꙋ̀, и҆ ѿве́рзшагѡ ра́й, є҆го́же затворѝ престꙋпле́нїе ле́стїю ѕмі́евою, вкꙋше́нїемъ дре́ва и҆ногда̀.
Гла́съ г҃:
Сті́хъ: Ви́дѣша тѧ̀ во́ды, бж҃е, ви́дѣша тѧ̀ во́ды, и҆ ᲂу҆боѧ́шасѧ.
Ꙗ҆́сенъ ᲂу҆́бѡ мимоше́дшїй пра́здникъ, сла́внѣйшїй же настоѧ́щїй де́нь: во ѻ҆́нъ сп҃сꙋ волсвѝ поклони́шасѧ, въ се́мъ же влⷣкꙋ ра́бъ сла́венъ крⷭ҇тѝ. Та́мѡ па́стырїе свирѧ́юще ви́дѣвше, и҆ чꙋдѧ́хꙋсѧ: здѣ́ же гла́съ ѻ҆́ч҃їй є҆диноро́днаго сн҃а проповѣ́да.
Сла́ва, и҆ ны́нѣ, гла́съ то́йже:
Прїиди́те, всѝ вѣ́рнїи, і҆ꙋде́йскꙋю странꙋ̀ ѡ҆ста́вивше, пре́йдемъ пꙋсты́ню і҆ѻрда́нскꙋю, и҆ ᲂу҆́зримъ дне́сь та́мѡ на́съ ра́ди ꙗ҆́вльшагосѧ пло́тїю, кр҃ще́нїѧ просѧ́ща во стрꙋѧ́хъ і҆ѻрда́нскихъ, крⷭ҇ти́телѧ ѿрица́ющасѧ и҆ вопїю́ща со стра́хомъ: не смѣ́ю рꙋкоположи́ти бре́нною дла́нїю ѻ҆гнѧ̀. І҆ѻрда́нъ и҆ мо́ре бѣжа́ша, сп҃се, и҆ возврати́шасѧ, и҆ а҆́зъ ка́кѡ положꙋ̀ на ве́рхъ тво́й рꙋ́кꙋ, є҆гѡ́же трепе́щꙋтъ серафі́ми; побѣжѐ і҆ѻрда́нъ, ꙗ҆́кѡ прїѧ́тъ є҆лїссе́й и҆лїинꙋ̀ ми́лѡть. Ка́кѡ не за́йде въ про́пасть и҆ глꙋбинꙋ̀, ви́дѧй на́га тѧ̀ во стрꙋѧ́хъ; ка́кѡ же не ѡ҆пали́тъ мѧ̀, всего̀ ѿ тебє̀ разгара́ема; что̀ косни́ши, крⷭ҇ти́телю, крⷭ҇ти́ти гдⷭ҇а моего̀; і҆ѻрда́нъ вопїе́тъ ко і҆ѡа́ннꙋ: что̀ мно́гихъ возбранѧ́еши ѡ҆чище́нїе; всю̀ тва́рь ѡ҆свѧтѝ, ѡ҆ста́ви ѡ҆свѧти́ти и҆ менѐ, и҆ водно́е є҆стество̀, ꙗ҆́кѡ на сїѐ ꙗ҆ви́сѧ.
Тропа́рь сїльве́стра, гла́съ д҃:
Пра́вило вѣ́ры и҆ ѻ҆́бразъ кро́тости, воздержа́нїѧ ᲂу҆чи́телѧ ꙗ҆ви́ тѧ ста́дꙋ твоемꙋ̀, ꙗ҆́же веще́й и҆́стина. Сегѡ̀ ра́ди стѧжа́лъ є҆сѝ смире́нїемъ высѡ́каѧ, нището́ю бога̑таѧ, ѻ҆́ч҃е сїльве́стре: молѝ хрⷭ҇та̀ бг҃а, спасти́сѧ дꙋша́мъ на́шымъ.
Сла́ва, и҆ ны́нѣ, предпра́зднства, гла́съ то́йже:
Гото́висѧ, завꙋлѡ́не, и҆ красꙋ́йсѧ, нефѳалі́ме, і҆ѻрда́не рѣко̀, ста́ни, под̾имѝ взыгра́ѧ крⷭ҇ти́тисѧ грѧдꙋ́ща влⷣкꙋ, весели́сѧ, а҆да́ме, съ прама́терїю, не кры́йта себѐ, ꙗ҆́коже въ раѝ пре́жде: и҆́бо, на́ги ви́дѣвъ вы̀, ꙗ҆ви́сѧ, да ѡ҆блече́тъ въ пе́рвꙋю ѻ҆де́ждꙋ. хрⷭ҇то́съ ꙗ҆ви́сѧ, всю̀ тва́рь хотѧ̀ ѡ҆бнови́ти.
На повече́рїи пое́мъ трипѣ́снецъ. І҆рмосы̀ по два́жды, тропарѝ на ѕ҃, и҆ послѣдѝ і҆рмо́съ ѻ҆́ба ли̑ка вкꙋ́пѣ. А҆́ще же двоїрмо́сенъ трипѣ́снецъ, и҆ пое́мъ а҃-гѡ творца̀ і҆рмо́съ два́жды, тропари́ же ѻ҆бои́хъ творцѡ́въ на ѕ҃: и҆ послѣдѝ і҆рмо́съ в҃-гѡ канѡ́на ѻ҆́ба ли̑ка вкꙋ́пѣ. Си́це пое́мъ канѡ́нъ, и҆ і҆рмосы̀, и҆ на про́чїихъ повече́рїѧхъ.
Трипѣ́снецъ, є҆гѡ́же краегране́сїе: Второ́мꙋ же.
Гла́съ в҃. Пѣ́снь а҃. І҆рмо́съ:
Непроходи́мое волнѧ́щеесѧ мо́ре бж҃їимъ свои́мъ велѣ́нїемъ и҆зсꙋши́вшемꙋ, и҆ пѣшеше́ствовати сквозѣ̀ є҆̀ і҆и҃льтєскїѧ лю́ди наста́вльшемꙋ, гдⷭ҇еви пои́мъ: сла́внѡ бо просла́висѧ.
Припѣ́въ: Сла́ва тебѣ̀, бж҃е на́шъ, сла́ва тебѣ̀.
Неизрече́нное зижди́телѧ соше́ствїе, пе́рвѣе ѿ дв҃ы возсїѧ́вша, мі́ръ ѡ҆зари́ло є҆́сть: са́мъ же па́ки хрⷭ҇то́съ, дрꙋго́е та́инство ны́нѣ соверша́ѧ, грѧде́тъ на і҆ѻрда́нъ земны̑мъ въ стра́нное возрожде́нїе.
Слꙋжа̀ дѣ́лꙋ стра́шномꙋ, предгрѧде́тъ ко і҆ѻрда́нꙋ прⷣте́ча ны́нѣ, словесѐ гла́съ, ѡ҆бнища́вшаго а҆да́ма ѡ҆богаща́ѧй бж҃ество́мъ, дх҃омъ бо богатѧ̀, грѧде́тъ хрⷭ҇то́съ да́ромъ кр҃ще́нїѧ.
Пѣ́снь и҃. І҆рмо́съ:
Оу҆страши́сѧ ѻ҆трокѡ́въ бл҃гочести́выхъ соѻбра́знагѡ дꙋшѝ нескве́рнагѡ тѣ́ла, и҆ ᲂу҆страни́сѧ воспита́нный въ безмѣ́рномъ веществѣ̀ неꙋтрꙋжде́нъ ѻ҆́гнь, присноживꙋ́щꙋ же и҆з̾ꙋвѧ́дшꙋ пла́меню вѣ́чнꙋющаѧ пѣ́снь воспѣва́шесѧ: гдⷭ҇а всѧ̑ дѣла̀ по́йте, и҆ превозноси́те во всѧ̑ вѣ́ки.
Ва́съ, моѧ̑ сосꙋ́ды и҆збра̑нныѧ, тогда̀ позна́ю, а҆́ще моегѡ̀ дарова́нїѧ печа́ть воѡбрази́тсѧ въ ва́съ, трисїѧ́нный ѡ҆блиста́ющи свѣ́тъ ко креще́нїю, хрⷭ҇то́съ сло́во речѐ въ лѣ́ности ᲂу҆ны́нїѧ пребыва́ющымъ: въ се́мъ бо пꙋ́ть спасе́нїѧ пода́мъ, и҆ свобожде́нїѧ жи́знь всѣ̑мъ да́рꙋю.
Чи́на проти́вна въ тебѣ̀ є҆сте́ственнагѡ є҆́сть ве́щь соверша́ема ны́нѣ: ме́ншее бо твоегѡ̀ бл҃гослове́нїѧ тре́бꙋю лꙋ́чшагѡ. Тѣ́мже ᲂу҆боѧ́хсѧ верхꙋ̀ прикоснꙋ́тисѧ твоемꙋ̀, и҆зба́вителю, возопѝ прⷣте́ча: нелѣ́по бо, да прибли́житсѧ ѻ҆́гнь сѣ́нꙋ, ты́ мѧ па́че ѡ҆свѧтѝ, твоего̀ раба̀.
Дрꙋгі́й двоепѣ́снецъ, є҆гѡ́же краегране́сїе: Тре́тїемꙋ же.
Гла́съ то́йже. І҆рмо́съ:
Велѣ́нїю мꙋчи́телевꙋ:
Оу҆ны́нїѧ со́нъ дꙋше́вный ѿтрѧ́сше серде́чною бо́дростїю, грѧдꙋ́щемꙋ ѡ҆чи́стити дꙋ́шы во стрꙋѧ́хъ возопїи́мъ: благослови́те, дѣла̀ гдⷭ҇нѧ, гдⷭ҇а.
Да ᲂу҆довли́тсѧ дѣѧ́нїе въ на́съ дꙋшѝ въ высо́цѣмъ зрѣ́нїи, ꙗ҆́кѡ да сꙋгꙋ́бѡ ꙗ҆ви́вшесѧ свѣ́тли, всѧ̑ ѡ҆чища́ющемꙋ бжⷭ҇твенными стрꙋѧ́ми, влⷣцѣ ꙗ҆ви́мсѧ всѝ.
Тала́нтъ сло́вомъ дѣ́ѧтельнымъ ᲂу҆краси́вше въ сꙋгꙋ́бомъ дѣ́ланїи, вѣ́рою да́вшемꙋ влⷣцѣ вѣ́рнїи, ꙗ҆́кѡ рабѝ, принесе́мъ крести́тисѧ грѧдꙋ́щемꙋ дꙋша́мъ на ѡ҆бновле́нїе.
Вмѣ́стѡ Сла́вы, глаго́лемъ:
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
А҆ къ послѣ́днемꙋ тропарю̀ глаго́лемъ: И҆ ны́нѣ:
Та́же, на схо́дѣ пое́мъ:
Хва́лимъ, бл҃гослови́мъ, покланѧ́емсѧ гдⷭ҇еви, пою́ще и҆ превозносѧ́ще во всѧ̑ вѣ́ки.
И҆ пое́мъ і҆рмо́съ:
Велѣ́нїю мꙋчи́телевꙋ преподо́бнїи трїѐ ѻ҆́троцы не повинꙋ́вшесѧ, въ пе́щь вве́ржени, бг҃а и҆сповѣ́дахꙋ, пою́ще: благослови́те, дѣла̀ гдⷭ҇нѧ, гдⷭ҇а.
Пѣ́снь ѳ҃. І҆рмо́съ:
Возвели́чилъ є҆сѝ, хрⷭ҇тѐ, ро́ждшꙋю тѧ̀ бцⷣꙋ, ѿ неѧ́же, созда́телю на́шъ, въ подобостра́стное на́мъ ѡ҆бле́клсѧ є҆сѝ тѣ́ло, на́шихъ прегрѣше́нїй рѣши́тельное: сїю̀ ᲂу҆блажа́юще, всѝ ро́ди тебѐ велича́емъ.
Скве́рнꙋ всѧ́кꙋ стра́стнꙋю ѿтрѧ́сше, досто́йнѡ кр҃ще́нїѧ бжⷭ҇твеннагѡ ѻ҆́бразъ прїими́те мы́сленнѡ: грѧде́тъ бо зижди́тель ѡ҆чище́нїе дарова́ти стра́нное, во стрꙋѧ́хъ креща́ѧсѧ, всѣ̑мъ же но́вое показа́ти и҆змѣне́нїе.
Взира́юще на хрⷭ҇та̀, смирѧ́ющагосѧ во́лею да́же и҆ до ра́бїѧ ѻ҆́браза, подъ крѣ́пкꙋю є҆гѡ̀ рꙋ́кꙋ ны́нѣ смири́мсѧ, дх҃омъ взе́мшесѧ: ꙗ҆́кѡ да креща́ема сего̀ чи́стыми дѣ̑лы почти́мъ.
И҆́нъ. І҆рмо́съ: Невмѣсти́маго бг҃а:
Грѣхо́внꙋю мглꙋ̀ всѝ ѿложи́вше, чи́сти, всѧ̑ ѡ҆чища́ющемꙋ стрꙋѧ́ми бжⷭ҇твенными, ꙗ҆ви́мсѧ влⷣцѣ.
Во і҆ѻрда́нѣ рѣцѣ̀ крести́тисѧ грѧдꙋ́щемꙋ хрⷭ҇тꙋ̀, прїиди́те, прибли́жимсѧ, сле́зными ѡ҆чи́щшесѧ стрꙋѧ́ми.
Вмѣ́стѡ досто́йна, пое́мъ і҆рмо́съ:
Невмѣсти́маго бг҃а во чре́вѣ вмѣсти́вшаѧ, и҆ ра́дость мі́рꙋ роди́вшаѧ, тѧ̀ пое́мъ, бцⷣе дв҃о.
И҆ покло́нъ.
По трист҃о́мъ конда́къ предпра́зднства. Си́це глаго́лемъ на повече́рїѧхъ, и҆ до пра́здника.
На ᲂу҆́трени, на Бг҃ъ гдⷭ҇ь, Тропа́рь предпра́зднства два́жды. Сла́ва, ст҃а́гѡ: И҆ ны́нѣ, предпра́зднства.
По а҃ стїхоло́гїи, сѣда́ленъ, гла́съ а҃. Подо́бенъ: Гро́бъ тво́й, сп҃се:
Ѡ҆дѣ́ѧвсѧ въ мою̀, і҆и҃се мо́й, нищетꙋ̀, предгрѧде́ши, тебѐ съ рабы̑ смѣша́ѧ, и҆ кр҃ще́нїѧ просѧ̀ ѿ раба̀, чл҃вѣколю́бче. Тѣ́мже ви́дѣвъ тѧ̀ і҆ѡа́ннъ вопїѧ́ше: ка́кѡ крещꙋ́ тѧ, скве́рны весьма̀ не и҆мꙋ́ща, бж҃е преблагі́й;
Сла́ва, и҆ ны́нѣ, подо́бенъ то́йже:
Предгрѧде́тъ хрⷭ҇то́съ бл҃гостїю къ стрꙋѧ́мъ рѣ́чнымъ і҆ѻрда́нскимъ, и҆ въ тѣ́хъ на́ше ѡ҆бновле́нїе содѣ́лати хо́щетъ бл҃года́тїю: бжⷭ҇твенный прⷣте́че, сего̀ прїимѝ ра́дꙋѧсѧ, и҆ въ вода́хъ того̀ восхотѣ́вша ѡ҆мы́й, є҆ди́наго человѣколю́бца.
По в҃-й стїхоло́гїи, сѣда́ленъ, гла́съ д҃. Подо́бенъ: Ско́рѡ предварѝ:
Ѡ҆бнища́въ бога́тый за милосе́рдїе мно́гое, на́съ, ѡ҆бнища́вшихъ невоздержа́нїемъ и҆ногда̀, ѡ҆богати́ти хотѧ̀, грѧде́тъ вни́ти во і҆ѻрда̑нскїѧ стрꙋи̑, и҆ ѿ і҆ѡа́нна ꙗ҆́вственнѡ крⷭ҇ти́тисѧ: воспои́мъ, вѣ́рнїи, тогѡ̀ кра́йнее смире́нїе.
Сла́ва, и҆ ны́нѣ, подо́бенъ то́йже:
Соверши́сѧ дне́сь и҆са́їи гла́съ вопїю́щагѡ: ᲂу҆гото́вите пꙋ́ть гдⷭ҇ень, и҆ стєзѝ сотвори́те: возгласи́ бо, ꙗ҆́коже речѐ, пꙋстынолю́бнаѧ трꙋба̀, всѧ̑ созыва́ющи, і҆ѡа́ннъ вели́кїй. Тѣ́мже стеце́мсѧ кꙋ́пнѡ, и҆ пресла̑внаѧ ᲂу҆ви́димъ.
Канѡ́нъ предпра́зднства со і҆рмосо́мъ на и҃, і҆рмо́съ по два́жды, тропари́ же на ѕ҃: и҆ ст҃а́гѡ на д҃.
Канѡ́нъ предпра́зднства, є҆гѡ́же краегране́сїе по а҆лфави́тꙋ, і҆ѡ́сифъ.
Гла́съ в҃. Пѣ́снь а҃. І҆рмо́съ:
Непроходи́мое волнѧ́щеесѧ мо́ре, бж҃їимъ свои́мъ велѣ́нїемъ и҆зсꙋши́вшемꙋ, и҆ пѣшеше́ствовати сквозѣ̀ є҆̀ і҆и҃льтєскїѧ лю́ди наста́вльшемꙋ, гдⷭ҇еви пои́мъ: сла́внѡ бо просла́висѧ.
Вѣ́дый гдⷭ҇не прише́ствїе, и҆зъ пꙋсты́ни прихо́дитъ бжⷭ҇твенный предте́ча, вопїѧ̀ свѣ́тлѡ: прибли́жисѧ, ꙗ҆ви́сѧ и҆збавле́нїе, пока́йтесѧ и҆ водо́ю ѡ҆чи́ститесѧ.
Погрꙋже́нна мѧ̀ грѣхѡ́въ волно́ю, сло́ве, ѻ҆ц҃ꙋ̀ собезнача́льне, всего̀ ѡ҆чи́сти покаѧ́нїѧ кропле́нїемъ, и҆́же креще́нїемъ твои́мъ вѣ̑рнымъ и҆збавле́нїе при́снѡ да́рꙋѧ, за милосе́рдїе безмѣ́рное.
Землѧ̀, ꙗ҆́коже пи́шетъ, завꙋлѡ́нѧ незаходи́мый ви́дѣвши свѣ́тъ, ѡ҆зари́сѧ: се́ бо прїи́де на і҆ѻрда̑нскїѧ стрꙋи̑, и҆ сꙋ́щаго надъ всѣ́ми бг҃а пое́тъ, зовꙋ́щи: гдⷭ҇еви воспои́мъ, сла́внѡ бо просла́висѧ.
Наро́дъ ве́сь бг҃оглаго́ливый предте́ча ви́дѧ прише́дшъ, си̑мъ вѣща́ше: кто̀ показа̀ ва́мъ ѿ грѧдꙋ́щагѡ гнѣ́ва бѣжа́ти; сотвори́те покаѧ́нїѧ плоды̀, бл҃года́тїю спаса́емїи.
И҆́нъ канѡ́нъ ст҃а́гѡ, є҆гѡ́же краегране́сїе:
Пѣ́ти тѧ̀ вѣ́рою, бл҃года́ть да́ждь, бл҃же́нне. І҆ѡ́сифъ.
Гла́съ и҃. Пѣ́снь а҃. І҆рмо́съ:
Посѣ́ченный несѣко́маго пресѣчѐ, и҆ ви́дѣ со́лнце зе́млю, ю҆́же не ви́дѣ, лю́таго врага̀ вода̀ потопѝ, и҆ непроходи́мое про́йде і҆и҃ль. Пѣ́снь же воспѣва́шесѧ: гдⷭ҇еви пои́мъ, сла́внѡ бо просла́висѧ.
Сн҃оположи́всѧ бл҃года́тїю, сїльве́стре, бг҃ꙋ ѻ҆ц҃ꙋ̀, чи́сто житїѐ ѡ҆блобыза́въ, и҆ бжⷭ҇твенными блиста̑нїи дꙋше́ю свѣтови́дѣнъ бы́въ, преше́лъ є҆сѝ къ свѣ́тꙋ, зовы́й, невече́рнемꙋ: гдⷭ҇ꙋ воспои́мъ, сла́внѡ бо просла́висѧ.
Велемꙋ́дреннѡ стра̑сти ᲂу҆держа́лъ є҆сѝ, и҆ пло́ть по́стнымъ житїе́мъ повинꙋ́лъ є҆сѝ дꙋ́хꙋ, мꙋ́дре, и҆ бжⷭ҇твенное жили́ще трⷪ҇цы бы́въ свѣ́тло, лꙋка́вствїѧ дꙋ́хи, гдⷭ҇ꙋ поѧ̀, смири́лъ є҆сѝ, сла́внѡ бо просла́висѧ.
Зако́нꙋ бжⷭ҇твенномꙋ бжⷭ҇твеннѣ повинꙋ́ѧсѧ, и҆ бг҃одꙋхнове́ннагѡ писа́нїѧ ра́зꙋмомъ ᲂу҆кра́шенъ, є҆́ллинскїѧ мꙋдрецы̀ и҆́стинѣ наказа́лъ є҆сѝ, хрⷭ҇та̀ и҆сповѣ́дати со ѻ҆ц҃е́мъ и҆ дх҃омъ, вопїю́щыѧ: гдⷭ҇ꙋ воспои́мъ, сла́внѡ бо просла́висѧ.
Во ѵ҆поста́си є҆ди́нѣй познава́ема, вопло́щшагосѧ хрⷭ҇та̀, блаже́нне, проповѣ́далъ є҆сѝ во двꙋ́хъ во́лѧхъ и҆ дѣ́йствїихъ, сїльве́стре, разꙋмѣва́ема, и҆ вѣ́рою томꙋ̀ ѡ҆божи́вша зовꙋ́щыѧ: гдⷭ҇ꙋ воспои́мъ, сла́внѡ бо просла́висѧ.
Бг҃оро́диченъ:
Да ни̑жнїѧ съ вы́шними совокꙋпи́тъ, є҆ди́ный всѣ́хъ бг҃ъ, во чре́во неискꙋсобра́чныѧ вни́де, и҆ въ подо́бїи пло́тстѣмъ ꙗ҆ви́сѧ, вражды̀ средогра́дїе разо́рь, ми́ръ введѐ, и҆ жи́знь подадѐ, и҆ бжⷭ҇твенное и҆збавле́нїе.
Пѣ́снь г҃. І҆рмо́съ:
Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщве́й грѣ́хъ, и҆ стра́хъ тво́й всадѝ въ сердца̀ на́съ, пою́щихъ тѧ̀.
Ꙗ҆ви́сѧ хрⷭ҇то́съ, вопїе́тъ прⷣте́ча, и҆ на стрꙋи̑ восхо́дитъ і҆ѻрда̑нскїѧ: срѣ́сти сего̀ потщи́мсѧ, чи́стыми помышлє́нїи просвѣща́еми.
И҆щѧ́ мѧ, безпꙋ́тїемъ заблꙋ́ждшаго, бж҃е мо́й, нището́ю бога́тною ѡ҆дѣ́ѧвсѧ, предстои́ши крⷭ҇ти́тисѧ, всѣ́хъ и҆збавле́нїе.
Землѧ̀ и҆ не́бо ны́нѣ да ликꙋ́ютъ, всѣ́хъ кр҃ща́етсѧ бл҃годѣ́тель, въ вода́хъ погрꙋжа́ѧ на́ше мно́жество безмѣ́рныхъ прегрѣше́нїй.
И҆́нъ. І҆рмо́съ:
Стра́хъ тво́й, гдⷭ҇и, всадѝ въ сердца̀ ра̑бъ твои́хъ, и҆ бꙋ́ди на́мъ ᲂу҆твержде́нїе, тѧ̀ во и҆́стинѣ призыва́ющихъ.
Оу҆ма̀ чистотꙋ̀ стѧжа́въ, ст҃и́тель бы́лъ є҆сѝ, пома́занїе ст҃о́е воспрїе́мъ. Тѣ́мъ тѧ̀, бг҃оно́се ѻ҆́ч҃е, восхвалѧ́емъ.
На крестѣ̀ просте́ршаго дла̑ни пло́тїю бг҃а сло́ва ᲂу҆ѧсни́лъ є҆сѝ слове́сными твои́ми показа́ньми, и҆ і҆ꙋде́йское сꙋровство̀ погꙋби́лъ є҆сѝ, всебл҃же́нне.
Въ чꙋдесѣ́хъ вели́къ бы́въ, ѿгонѧ́еши дꙋ́хи, и҆ ѡ҆чища́еши недꙋ́ги вѣ́рою просѧ́щымъ, сїльве́стре бг҃омꙋ́дре.
Бг҃оро́диченъ:
Дв҃а чⷭ҇таѧ по ржⷭ҇твѣ̀ всест҃а́ѧ пребыла̀ є҆сѝ, бг҃а бо сло́ва родила̀ є҆сѝ, на́мъ ᲂу҆подо́бльшасѧ, кромѣ̀ грѣха̀.
Конда́къ ст҃а́гѡ, гла́съ д҃. Подо́бенъ: Вознесы́йсѧ:
Во сщ҃е́нницѣхъ сщ҃е́нникъ ꙗ҆ви́лсѧ є҆сѝ, цр҃ѧ̀ и҆ бг҃а, бг҃оно́се, по́стникѡмъ собесѣ́дникъ бы́въ: ѿѻнꙋ́дꙋже сра́дꙋешисѧ ны́нѣ ликѡ́мъ а҆́гг҃льскимъ, ѻ҆́ч҃е, веселѧ́сѧ въ нбⷭ҇ныхъ, сїльве́стре, сла́вне па́стырю, спаса́й любо́вїю соверша́ющыѧ па́мѧть твою̀.
Сѣда́ленъ, гла́съ и҃. Подо́бенъ: Премꙋ́дрости:
Рѣка̀ бл҃гоче́стїѧ ꙗ҆ви́всѧ, ᲂу҆че́нїй твои́хъ стрꙋѧ́ми всю̀ зе́млю напои́лъ є҆сѝ, сїльве́стре, ꙗ҆́кѡ ст҃и́тель бж҃е́ственный, и҆ чꙋде́съ тꙋ́чами страсте́й скве́рнꙋ ѡ҆мы́лъ є҆сѝ, и҆ пи́щный пото́къ досто́йнѡ наслѣ́довалъ є҆сѝ. Тѣ́мже соше́дшесѧ бл҃гоче́стнѡ тѧ̀ чти́мъ пѣ́сньми дне́сь, и҆ вѣ́рнѡ вопїе́мъ тѝ: молѝ хрⷭ҇та̀ бг҃а, прегрѣше́нїй ѡ҆ставле́нїе пода́ти чтꙋ́щымъ любо́вїю ст҃ꙋ́ю па́мѧть твою̀.
Сла́ва, и҆ ны́нѣ, гла́съ то́йже. Подо́бенъ: Свирѣ́лей па́стырскихъ:
Неви́димый бж҃е, непостижи́мый сло́ве, роди́лсѧ є҆сѝ ѿ ѻ҆ц҃а̀ па́че є҆стества̀ и҆ сло́ва: па́ки же въ послѣ̑днѧѧ ѿ дв҃ы, не и҆змѣни́въ є҆́же бѣ̀, грѧде́ши и҆ во стрꙋѧ́хъ і҆ѻрда́нскихъ ны́нѣ крⷭ҇ти́тисѧ пло́тїю, бл҃говоли́вый спастѝ, ꙗ҆́кѡ бг҃ъ, ро́дъ человѣ́ческїй.
Пѣ́снь д҃. І҆рмо́съ:
Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. Тѣ́мъ зовꙋ́ ти: сла́ва си́лѣ твое́й, гдⷭ҇и.
Чꙋди́тсѧ твоемꙋ̀, і҆и҃се бл҃годѣ́телю, прихо́дꙋ вели́кїй прⷣте́ча, и҆ ᲂу҆жаса́ѧсѧ вопїе́тъ тебѣ̀: ѻ҆́гнь сы́й, влⷣко, да не ѡ҆пали́ши менѐ, сѣ́но сꙋ́ща.
Стоѧ́ща въ вода́хъ си́хъ во́лею, зрѧ́ мѧ ны́нѣ, пристꙋпѝ, ѽ і҆ѡа́нне! и҆ крестѝ, ꙗ҆́кѡ да водо́ю бл҃года́ть человѣ́ческомꙋ ро́дꙋ содѣ́лаю.
Кры́ющеесѧ ꙗ҆́кѡ во ѻ҆́блацѣхъ тѧ̀ позна́хъ со́лнце, бж҃е мо́й, пло́тїю: ка́кѡ ᲂу҆́бѡ на́га тѧ̀ вода́ми ны́нѣ ѡ҆дѣ́ѧна зрю̀; і҆ѡа́ннъ вопїѧ́ше, ᲂу҆дивлѧ́ѧсѧ.
Просвѣща́етсѧ человѣ́ческое є҆стество̀, и҆ и҆збавле́нїе тмы̀ прїе́млетъ грѣхо́вныѧ, и҆ свы́ше бжⷭ҇твенною ѡ҆дѣва́етсѧ нетлѣ́нїѧ ѻ҆де́ждою, ѡ҆бнажа́емꙋ мнѣ̀.
И҆́нъ. І҆рмо́съ:
Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.
Свѧти́тель бг҃опрїѧ́тенъ, помазꙋ́ѧ сщ҃е́нники бжⷭ҇твеннымъ дх҃омъ, показа́лсѧ є҆сѝ, ѻ҆́ч҃е сїльве́стре, и҆ лю́ди просвѣща́ѧй, свѧще́ннѣйше.
Содѣ́йствомъ дх҃а недꙋ́ги ѿгонѧ́ѧ, стра̑сти неисцѣ̑льныѧ и҆сцѣли́лъ є҆сѝ, пребога́те, ѡ҆браща́ѧ ѿ ле́сти заблꙋждє́нныѧ.
Є҆ресе́й, сїльве́стре, ле́сть ѿгна́лъ є҆сѝ, па́ствꙋ ᲂу҆па́слъ є҆сѝ на вода́хъ бл҃гоче́стїѧ, на ѕла́цѣ бжⷭ҇твеннагѡ позна́нїѧ.
И҆злїѧ́сѧ во ᲂу҆стна́хъ твои́хъ бл҃года́ть бжⷭ҇твеннагѡ дх҃а: сегѡ̀ ра́ди тѧ̀ свѧще́нника лю́демъ свои̑мъ бг҃ъ, всебл҃же́нне ѻ҆́ч҃е, пома́за.
Бг҃оро́диченъ:
И҆сцѣлѝ, ѻ҆трокови́це, ꙗ҆́звы се́рдца моегѡ̀, и҆ наведѝ дꙋшѝ моеѧ̀ движє́нїѧ къ бж҃їимъ, дв҃о, хотѣ́нїємъ.
Пѣ́снь є҃. І҆рмо́съ:
Свѣ́та пода́телю, и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀, и҆но́гѡ бо́га не зна́емъ.
Пока́йтесѧ, вопїѧ̀, црⷭ҇твїе бж҃їе прибли́жисѧ: свѧще́нный прⷣте́ча ꙗ҆ви́сѧ и҆зъ пꙋсты́ни, ѡ҆пꙋстѣ́вшыѧ въ ѕлы́хъ ѡ҆бновлѧ́ѧ.
Зако́нъ є҆го́же дре́вле речѐ и҆ прⷪ҇рѡ́къ сщ҃е́нное сосло́вїе, прїи́де хрⷭ҇то́съ, на́съ ѡ҆бновлѧ́ѧ бжⷭ҇твеннымъ кр҃ще́нїемъ, ѡ҆бветша́вшыѧ мно́гими прегрѣше́ньми.
Стра̑нна, речѐ, и҆ ᲂу҆жа̑сна, і҆ѡа́ннъ, зрю̀ дне́сь: ны́нѣ бо и҆сто́чникъ безсме́ртїѧ прїи́де ѿ ма́лыѧ ка́пли бжⷭ҇твенное проси́ти креще́нїе.
И҆́нъ. І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго; но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Плете́ньми твои́хъ слове́съ, ве́сь разрѣши́лъ є҆сѝ сꙋ́етенъ соꙋ́зъ, и҆ къ бж҃е́ственнѣй вѣ́рѣ, ле́стїю свѧ̑занныѧ свѧза́лъ є҆сѝ, ѿверза́ѧ, ѻ҆́ч҃е, си́хъ ᲂу҆́мъ прочита́нїемъ писа́нїй, ст҃и́телю бл҃же́нне.
Се́рдце твоѐ, ѻ҆́ч҃е, непоро́чно бы́сть во ѡ҆правда́нїихъ ѻ҆́бщагѡ влⷣки, є҆гѡ́же вожделѣ́въ, пло́ть ᲂу҆держа́лъ є҆сѝ, и҆ чꙋде́съ бл҃года́тїю ѡ҆бога́щсѧ, недꙋ́ги и҆сцѣлѧ́еши и҆ дꙋшє́вныѧ лю̑тыѧ ꙗ҆́звы.
Бѣсѧ̑щаѧсѧ сердца̀ недꙋ́гомъ дꙋшегꙋ́бнымъ, лю̑тыѧ є҆́рєси го́рькагѡ ма́нента, ско́рыми лѣчба́ми слове́съ твои́хъ, бг҃оно́се, ᲂу҆ста́вилъ є҆сѝ, ꙗ҆́кѡ вра́чь, бл҃года́тїю бж҃е́ственною честны́мъ ѿгна́лъ є҆сѝ дх҃омъ.
Бг҃оро́диченъ:
Ра́дꙋйсѧ, є҆ди́на ро́ждшаѧ преси́льнаго, пло́тїю ѡ҆бнища́вшаго: ра́дꙋйсѧ, па́дшагѡ мі́ра и҆справле́нїе, всенепоро́чнаѧ: ра́дꙋйсѧ, печа́ли разрѣше́нїе: ра́дꙋйсѧ, вѣ́рныхъ спасе́нїе: ра́дꙋйсѧ, престо́ле бж҃їй превысо́кїй.
Пѣ́снь ѕ҃. І҆рмо́съ:
Бе́здна согрѣше́нїй ѡ҆бы́де мѧ̀ послѣ́днѧѧ: но, ꙗ҆́кѡ прⷪ҇ро́ка і҆ѡ́нꙋ, гдⷭ҇и, гдⷭ҇и, возведѝ и҆зъ и҆стлѣ́нїѧ живо́тъ мо́й.
Ѡ҆дождѝ согрѣше́нїй на́шихъ, чл҃вѣколю́бче, разрѣше́нїе, и҆́же і҆ѻрда́нскими стрꙋѧ́ми погрꙋзи́вый прегрѣшє́нїѧ земноро́дныхъ, за ми́лость вели́кꙋю.
Пꙋчи́на сы́й, хрⷭ҇тѐ, пра́вды, предгрѧде́ши ны́нѣ на і҆ѻрда́нскꙋю рѣкꙋ̀ потопи́ти ѕмі́ѧ, и҆ а҆да́мово престꙋпле́нїе и҆зсꙋши́ти.
Стрꙋю́ тѧ нетлѣ́нїѧ, хрⷭ҇тѐ, сꙋ́ща вои́стиннꙋ, стрꙋи̑ ка́кѡ вмѣстѧ́тъ рѣ̑чныѧ; вопїѧ́ше прⷣте́ча, сла́вѧ твоѐ мно́гое бл҃гоꙋтро́бїе.
И҆́нъ. І҆рмо́съ:
Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.
Неисхо́дна и҆ въ темни́цѣ вѣ́чнѣ затворе́нна содѣ́лалъ є҆сѝ моли́твами твои́ми лꙋка́ваго, погꙋблѧ́ющаго за́вистїю приходѧ́щыѧ, бл҃же́нне, ѕмі́ѧ, и҆ ꙗ҆́кѡ двє́ри же, и҆ ꙗ҆́кѡ верєѝ, крⷭ҇та̀ зна́менїе положи́въ.
Глагѡ́лъ твои́хъ медото́чныхъ вѣща́нїе, во всѧ́чєскаѧ и҆зы́де, всебл҃же́нне, и҆ ᲂу҆че́нїй въ концы̀ всеѧ̀ вселе́нныѧ сїѧ́нїе ѡ҆блиста̀, чꙋде́съ же свѣ́тлость, и҆ дѣ́лъ бжⷭ҇твенное показа́нїе.
И҆сцѣлє́нїѧ и҆ дарова̑нїѧ бжⷭ҇твєннаѧ тꙋ́чами и҆сточа́ѧ бога́тнѡ вседѣ́телѧ, ст҃и́телю всебл҃же́нне, и҆ всест҃а́гѡ всегда̀ дх҃а вѣ́рою тебѣ̀ чи́стою пристꙋпа́ющыѧ цѣли́ти бл҃года́тїю.
Бг҃оро́диченъ:
Разꙋмѣ́вше бг҃оглаго́ливїи прⷪ҇ро́цы та́инства твоегѡ̀, дв҃о, глꙋбинꙋ̀, прⷪ҇ро́чески провозвѣсти́ша сїѐ, наставлѧ́еми бж҃е́ственнымъ дх҃омъ: и҆ ны́нѣ мы̀, прера́достнѡ сбытїѧ̑ зрѧ́ще вѣ́рꙋемъ.
Конда́къ, гла́съ д҃. Подо́бенъ: Ꙗ҆ви́лсѧ є҆сѝ дне́сь:
Во стрꙋѧ́хъ дне́сь і҆ѻрда́нскихъ бы́въ, гдⷭ҇ь і҆ѡа́ннꙋ вопїе́тъ: не ᲂу҆бо́йсѧ крⷭ҇ти́ти мѧ̀, спасти́ бо прїидо́хъ а҆да́ма первозда́ннаго.
І҆́косъ:
Не и҆стѧзꙋ́ю тѧ̀, крⷭ҇ти́телю, предѣ́лы преходи́ти. Не гл҃го́лю тебѣ̀: рцы́ ми, ꙗ҆̀же глаго́леши беззакѡ́ннымъ, и҆ ᲂу҆чи́ши грѣ́шники. То́чїю крⷭ҇ти́ мѧ молча̀, и҆ ча́ѧ ꙗ҆̀же ѿ кр҃ще́нїѧ: прїи́меши бо сегѡ̀ ра́ди досто́инство, є҆́же не бы́сть а҆́гг҃лѡмъ: и҆́бо всѣ́хъ прⷪ҇ро́кѡвъ бо́льша тѧ̀ сотворю̀. Ѡ҆ ѻ҆́ныхъ ᲂу҆́бѡ ни є҆ди́нъ ꙗ҆́вѣ мѧ̀ ви́дѣ, но во ѻ҆́бразѣхъ и҆ сѣ́нехъ, и҆ гада́нїихъ, ты́ же предъ тобо́ю стоѧ́ща ви́дѣлъ є҆сѝ: спасти́ бо прїидо́хъ а҆да́ма первозда́ннаго.
Пѣ́снь з҃. І҆рмо́съ:
Ѻ҆́бразꙋ злато́мꙋ, на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ: посредѣ́ же ѻ҆гнѧ̀ вве́ржени ѡ҆роша́еми поѧ́хꙋ: бл҃гослове́нъ є҆сѝ, бж҃е ѻ҆ц҃ъ на́шихъ.
Во ѻ҆де́ждꙋ свѧще́ннꙋю ѡ҆дѣва́ѧ мѧ̀, хрⷭ҇тѐ, ѡ҆бнажи́вшагосѧ совѣ́томъ льсти́вагѡ, на́гъ проитѝ сквозѣ̀ во́ды прише́лъ є҆сѝ, бла́гости бога́тствомъ. Воспѣва́ю твоѐ милосе́рдїе, и҆ покланѧ́юсѧ чꙋ́дномꙋ твоемꙋ̀ смотре́нїю.
Что̀ сїѐ, хрⷭ҇тѐ, мно́гое твоѐ, є҆́же къ на́мъ, смотре́нїе; что̀ нищета̀; что̀ неизрече́нное и҆ па́че ᲂу҆ма̀ сни́тїе; речѐ, є҆гда́ тѧ ви́дѣ і҆ѡа́ннъ ѡ҆бнаже́на, и҆ крⷭ҇ти́тисѧ ѿ негѡ̀ повелѣва́юща.
Возже́глъ є҆сѝ, хрⷭ҇тѐ, ꙗ҆́коже свѣти́льникъ, чⷭ҇тнꙋ́ю пло́ть твою̀ средѝ і҆ѻрда́на, и҆ взыска́лъ є҆сѝ погребе́нный страстьмѝ и҆ грѣхо́мъ ѻ҆́бразъ, и҆ ѡ҆брѣ́тъ, ᲂу҆добри́лъ є҆сѝ креще́нїемъ твои́мъ, бл҃же: тѣ́мже пое́мъ тѧ̀.
И҆́нъ. І҆рмо́съ:
Ѿ і҆ꙋде́и доше́дше ѻ҆́троцы, въ вавѷлѡ́нѣ и҆ногда̀ вѣ́рою трⷪ҇ческою пла́мень пе́щный попра́ша, пою́ще: ѻ҆ц҃є́въ бж҃е, бл҃гослове́нъ є҆сѝ.
Пра́ведникъ, ꙗ҆́коже фі́нїѯъ, въ домꙋ̀ гдⷭ҇ни, ѻ҆́ч҃е, процвѣ́лъ є҆сѝ плоды̀ пра́вды, и҆́миже чтꙋ́щїи тѧ̀ пита́ютсѧ, пою́ще: ѻ҆тцє́въ на́шихъ бж҃е, бл҃гослове́нъ є҆сѝ.
Крѣ́пкими твои́хъ слове́съ ꙗ҆вле́ньми ѡ҆бличи́лъ є҆сѝ сꙋемꙋ́дренники, недꙋ́гꙋющыѧ невѣ́рїемъ, и҆ ра́дꙋѧсѧ пое́ши, пресла́вне сїльве́стре: ѻ҆ц҃є́въ на́шихъ бж҃е, бл҃гослове́нъ є҆сѝ.
Пребыва́етъ сла́ва во вѣ́ки твоѧ̀, ѻ҆́ч҃е, и҆ па́мѧть со всѣ́ми првⷣными, съ ни́миже на́съ, вѣ́рою пою́щихъ, помина́й: ѻ҆ц҃є́въ на́шихъ бж҃е, бл҃гослове́нъ є҆сѝ.
Сла́вный свѧти́тель, дх҃о́вною заре́ю просвѣща́емь, тмꙋ̀ ѕло́бы разорѝ, и҆ всѧ̑ пою́щыѧ просвѣтѝ: ѻ҆ц҃є́въ на́шихъ бж҃е, бл҃гослове́нъ є҆сѝ.
Бг҃оро́диченъ:
Пречꙋ́днаѧ ѻ҆трокови́це, сꙋ́щаго пре́жде всѣ́хъ вѣкѡ́въ родила̀ є҆сѝ, на́мъ ᲂу҆подо́бльшагосѧ, за кра́йнее бл҃гоꙋтро́бїе, да спасе́тъ пою́щыѧ: ѻ҆ц҃є́въ на́шихъ бж҃е, бл҃гослове́нъ є҆сѝ.
Пѣ́снь и҃. І҆рмо́съ:
Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а по́йте дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.
Гла́съ вопїю́щагѡ въ пꙋсты́ни ꙗ҆́вственнѡ предста́въ і҆ѡа́ннъ, ѡ҆браща́ѧ сердца̀ пока́ѧвшихсѧ те́плѣ, сла́вити ꙗ҆́вльшагосѧ во і҆ѻрда́нѣ сп҃са и҆ влⷣкꙋ.
Пото́къ є҆сѝ пи́щный, и҆́же морѧ̀, и҆сто́чники содѣ́лавый, и҆ ка́кѡ на во́ды восхо́диши; что̀ ѿмы́ти и҆ща́й, и҆́же всѣ́хъ ѡ҆мове́нїе и҆ ѡ҆чище́нїе пѣсносло́вѧщихъ тѧ̀, хрⷭ҇тѐ, во вѣ́ки;
И҆зсꙋши́ти стрꙋи̑ и҆ща́й ѕло́бы вра́жїѧ, и҆ морѧ̀ страсте́й ᲂу҆ста́вити, и҆ вѣ̑рнымъ ѡ҆чище́нїе и҆сточи́ти и҆ ѡ҆ставле́нїе, влⷣко, грѧде́ши крести́тисѧ во стрꙋѧ́хъ і҆ѻрда́нскихъ.
Часѡ́въ и҆ лѣ́тъ тво́рче, подъ лѣ́ты бы́въ за бл҃гоꙋтро́бїе, безлѣ́тнѡ возсїѧ́въ и҆з̾ пребезнача́льнагѡ ѻ҆ц҃а̀, прише́лъ є҆сѝ лѣ̑тнѧѧ прегрѣшє́нїѧ всѣ́хъ ѿмы́ти во стрꙋѧ́хъ і҆ѻрда́нскихъ.
И҆́нъ. І҆рмо́съ:
Побѣди́тели мꙋчи́телѧ и҆ пла́мене бл҃года́тїю твое́ю бы́вше, за́повѣдемъ твои́мъ ѕѣлѡ̀ прилѣжа́ще, ѻ҆́троцы вопїѧ́хꙋ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Є҆ди́но є҆стество̀, ѻ҆́ч҃е, є҆ди́нагѡ бжⷭ҇тва̀ бг҃осло́вивъ, въ тре́хъ ли́цѣхъ разꙋмѣва́емаго пѣ́лъ є҆сѝ непреста́ннѡ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
И҆́стины, ѻ҆́ч҃е, и҆́стиненъ ᲂу҆чи́тель наре́клсѧ є҆сѝ. тѣ́мже лжеиме́нныѧ льстѝ ѡ҆бличи́лъ є҆сѝ ле́сть, поѧ̀: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Верхо́вникъ ꙗ҆ви́лсѧ є҆сѝ свѧще́ннагѡ собо́ра, сщ҃еннотаи́нниче, и҆ верхо́внагѡ ᲂу҆ченикѡ́въ ᲂу҆краси́лъ є҆сѝ престо́лъ, вопїѧ̀: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Добродѣ́тельми бжⷭ҇твенными, ѻ҆́ч҃е, се́рдце твоѐ ᲂу҆добри́лъ є҆сѝ, ве́сь ᲂу҆краси́всѧ, и҆ съ вы́шними чи́нми, вопїѧ̀, совокꙋпи́лсѧ є҆сѝ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ:
Глаго́лѡмъ твои̑мъ бжⷭ҇твєннымъ послѣ́дꙋюще ро́ди человѣ́честїи, ᲂу҆блажа́емъ тѧ̀ приснобл҃же́ннꙋю, и҆ воспѣва́емъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Пѣ́снь ѳ҃. І҆рмо́съ:
Ѿ бг҃а, бг҃а сло́ва, неизрече́нною мꙋ́дростїю прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи є҆диномꙋ́дреннѡ пѣ́сньми велича́емъ.
Ви́дѣвъ тѧ̀ і҆ѡа́ннъ къ себѣ̀ бл҃годѣ́телѧ грѧдꙋ́ща, и҆ просѧ́ща ѿ негѡ̀ смире́нїемъ кр҃ще́нїѧ, ᲂу҆ди́вльсѧ, ᲂу҆жасе́сѧ, ника́коже рꙋко́ю прикоснꙋ́тисѧ смѣ́ѧ прикаса́ющагѡсѧ всѣ̑мъ гора́мъ, и҆ воздымѧ́тсѧ.
Ꙗ҆́кѡ ла́стовица пречестна́ѧ, провозвѣща́ющаѧ ве́снꙋ мы́сленнꙋю, предста̀ крⷭ҇ти́тель, въ зимѣ̀ сꙋ́щымъ безмѣ́рныхъ прегрѣше́нїй, и҆ бꙋ́рю терпѧ́щымъ при́снѡ сопроти́вныхъ дꙋхѡ́въ, лꙋка́выхъ страсте́й.
Тѧ̀, ѡ҆заре́нїе сла́вы ѻ҆́ч҃їѧ, просїѧ́вшее во тмѣ̀ сѣдѧ́щымъ лю́тыхъ, незаходи́мое сл҃нце, гдⷭ҇и, и҆ грѧдꙋ́ща всѧ̑ просвѣти́ти свѧще́ннымъ твои́мъ креще́нїемъ, ꙗ҆́кѡ бг҃а и҆ сп҃са, пѣ́сньми велича́емъ.
Сме́ртнаѧ сѣки́ра, при ко́рени лежа́щи, ꙗ҆́кѡ дре́вꙋ, прети́тъ и҆зсѣче́нїемъ, непло́дїе твоѐ ви́дѧщи. Не ᲂу҆̀бо безпло́дна пребꙋ́ди, дꙋшѐ моѧ̀, но возопі́й бг҃ꙋ те́плымъ покаѧ́нїемъ: согрѣши́хъ тѝ, спаси́ мѧ.
Гла́съ вопїю́щагѡ слы́шанъ бы́сть въ пꙋсты́хъ сердца́хъ: возвесели́тесѧ, предста̀ хрⷭ҇то́съ, ѡ҆ставле́нїе всѣ̑мъ да́рꙋѧ. Ѡ҆свѧти́тесѧ всѧ̑: мо́ре, и҆сто́чницы и҆ рѣ́ки, и҆ ᲂу҆дѡ́лїѧ, и҆ лꙋ̑жнаѧ мѣ̑ста и҆ всѧ̀ подсо́лнечнаѧ.
И҆́нъ. І҆рмо́съ:
Вои́стиннꙋ бцⷣꙋ тѧ̀ и҆сповѣ́дꙋемъ спасе́ннїи тобо́ю, дв҃о чⷭ҇таѧ, съ безпло́тными ли̑ки тѧ̀ велича́юще.
Свѧще́нствовавъ ᲂу҆се́рднѡ самаго̀ себѐ, всеблаже́нне, сласте́й ᲂу҆мерщвле́нїемъ, и҆ бы́лъ є҆сѝ на́съ ра́ди ᲂу҆мертви́вшемꙋсѧ же́ртва бл҃гопрїѧ́тна.
Ꙗ҆́кѡ бжⷭ҇твенный верхо́вникъ сщ҃е́нныхъ ѻ҆тцє́въ, сщ҃е́нное ᲂу҆че́нїе ᲂу҆тверди́въ, є҆ретїкѡ́въ загради́лъ є҆сѝ безбѡ́жнаѧ ᲂу҆ста̀.
Совокꙋпи́лсѧ є҆сѝ съ ли̑ки безпло́тныхъ, безплѡ́тныѧ врагѝ съ тѣ́ломъ свѣ́тлѡ, ст҃и́телю, побори́въ.
Па́мѧть твоѧ̀ мі́рꙋ, ѻ҆́ч҃е ст҃и́телю, ꙗ҆́кѡ свѣтоза́рное возсїѧ̀ сл҃нце, свѣтоводѧ́щи вѣ́рою восхвалѧ́ющыѧ тѧ̀.
Бг҃оро́диченъ:
Бл҃голюби́ваѧ дв҃о, ѡ҆ѕло́бленнꙋю грѣхмѝ дꙋ́шꙋ мою̀ ᲂу҆блажѝ, бл҃га́го ро́ждшаѧ бг҃а и҆ гдⷭ҇а.
Свѣти́ленъ. Подо́бенъ: Жєны̀ ᲂу҆слы́шите:
Гла́съ вопїю́щагѡ возгласѝ, и҆ го́ры взыгра́йте, ликꙋ́й, ро́де человѣ́ческїй: и҆́бо пребезнача́льное сло́во пло́ть прїе́мъ, ꙗ҆́кѡ человѣ́къ, прїи́де, креща́ѧсѧ ѿ рꙋ́къ, ꙗ҆̀же созда̀, во і҆ѻрда́нѣ погрꙋжа́ѧй мі́ра грѣ́хъ.
Сла́ва, и҆ ны́нѣ:
Ка́кѡ стрꙋи̑ тѧ̀ рѣ̑чныѧ прїи́мꙋтъ, человѣколю́бче, рѣ́ки и҆ морѧ̀ сотво́ршаго ѿ не сꙋ́щихъ; ка́кѡ на ве́рхъ пречⷭ҇тый тво́й де́рзнетъ прⷣте́ча рꙋ́кꙋ положи́ти, влⷣко; пое́мъ трепе́щꙋще, сло́ве, твоеѧ̀ нищеты̀ высотꙋ̀.
На хвали́техъ стїхи̑ры на д҃, и҆́хже краегране́сїе:
Пѣ́сни ѳеофа́новы на свѣ́ты. Гла́съ ѕ҃. Подо́бенъ: А҆́гг҃льскїѧ:
А҆́гг҃льскїѧ пред̾иди́те си̑лы ѿ виѳлее́ма ко стрꙋѧ́мъ і҆ѻрда̑нскимъ: предгрѧдѝ, і҆ѡа́нне, ѡ҆ста́вль пꙋсты́ню: ра́дꙋйсѧ, рѣко̀, и҆ ᲂу҆гото́висѧ, всѧ́ же землѧ̀ да ра́дꙋетсѧ: хрⷭ҇то́съ грѧде́тъ грѣ́хъ а҆да́мовъ ѡ҆чи́стити, ꙗ҆́кѡ благоꙋтро́бенъ.
Оу҆сты̑ чи́стыми и҆ дꙋша́ми и҆змове́нными, прїиди́те, та́йнѡ виѳлее́мъ ѡ҆ста́вльше, и҆ ко і҆ѻрда́нꙋ со хрⷭ҇то́мъ и҆дꙋ́ще, воспои́мъ є҆мꙋ̀ съ весе́лїемъ, ѻ҆ч҃єствїѧ земна̑ѧ всѧ̑, вѣ́рнѡ глаго́люще: благослове́нъ прише́дый бж҃е на́шъ, сла́ва тебѣ̀.
Ве́лїе и҆ стра́шное та́инство є҆́сть, ꙗ҆́кѡ бг҃ъ человѣ́кѡмъ ᲂу҆подо́бисѧ, и҆ грѣха̀ ѿню́дъ не вѣ́дый, ꙗ҆́кѡ пови́ненъ, ѿ і҆ѡа́нна крⷭ҇ти́тисѧ въ рѣцѣ̀ і҆ѻрда́нстѣй про́ситъ дне́сь: благослове́нъ ꙗ҆вле́йсѧ, бж҃е на́шъ, сла́ва тебѣ̀.
Цвѣ́тъ дв҃довъ возсїѧ́въ и҆зъ дв҃ы, прїи́де хрⷭ҇то́съ ко стрꙋѧ́мъ і҆ѻрда̑нскимъ грѣхѝ ѡ҆мы́ти пра́ѻц҃а вода́ми. Ликꙋ́й, а҆да́ме, весели́сѧ, є҆́ѵо, нб҃о да ра́дꙋетсѧ, лю́дїе рце́мъ: бл҃гослове́нъ прише́дый, бж҃е на́шъ, сла́ва тебѣ̀.
Сла́ва, гла́съ и҆ подо́бенъ то́йже:
Трепе́щетъ рꙋко́ю, ᲂу҆жаса́ѧсѧ рꙋкоположи́ти, ра́дꙋетсѧ дꙋше́ю, помышлѧ́ѧ і҆ѡа́ннъ, ꙗ҆́кѡ ве́рхъ тво́й подклони́ти благоволи́лъ є҆сѝ, въ ра́бїй зра́къ ѡ҆дѣ́ѧнъ, да человѣ́ки ѿ рабо́ты и҆зба́виши вра́жїѧ, зовꙋ́щыѧ: благослове́нъ прише́дый, бж҃е на́шъ, сла́ва тебѣ̀.
И҆ ны́нѣ:
Всѧ̀ землѧ̀ та́йнѡ да ра́дꙋетсѧ ны́нѣ проро́чески, и҆ го́ры да и҆гра́ютъ: возвратѝ стрꙋи̑, і҆ѻрда́не, ꙗ҆́коже пи́шетъ, ᲂу҆жасни́сѧ ѿ лица̀ влⷣчнѧ, ꙗ҆́кѡ бг҃ъ, вочеловѣ́чивсѧ, человѣ́ки всѧ̑ ѿ грѣха̀ а҆да́млѧ ѡ҆чи́стити прїи́де.
На стїхо́внѣ стїхи̑ры самогла́сны, гла́съ ѕ҃:
Свѣтлѣ́йшїй со́лнца бы́сть преше́дшїй пра́здникъ ржⷭ҇тва̀ хрⷭ҇то́ва, ꙗ҆́сенъ и҆ пресвѣ́телъ показа́сѧ приходѧ́й бжⷭ҇твеннагѡ ꙗ҆вле́нїѧ є҆гѡ̀. Во ѻ҆́нъ па́стырїе, со а҆́гг҃лы славосло́вѧще, поклони́шасѧ бг҃ꙋ вочл҃вѣ́чшемꙋсѧ: въ се́мъ же влⷣцѣ і҆ѡа́ннъ прикоснꙋ́всѧ десно́ю рꙋко́ю, съ тре́петомъ глаго́лаше: ѡ҆свѧтѝ менѐ и҆ во́ды, є҆ди́ный и҆мѣ́ѧй ве́лїю млⷭ҇ть.
Сті́хъ: Сегѡ̀ ра́ди помѧнꙋ́хъ тѧ̀ ѿ землѝ і҆ѻрда́нски и҆ є҆рмѡнїи́мски.
Гото́висѧ, і҆ѻрда́не рѣко̀: се́ бо прихо́дитъ хрⷭ҇то́съ бг҃ъ крⷭ҇ти́тисѧ ѿ і҆ѡа́нна, да ѕмїє́въ неви̑димыѧ главы̑ сокрꙋши́тъ бжⷭ҇тво́мъ въ вода́хъ твои́хъ. Ра́дꙋйсѧ, пꙋсты́не і҆ѻрда́нскаѧ: го́ры, и҆гра́йте съ весе́лїемъ, прихо́дитъ бо вѣ́чный живо́тъ воззва́ти а҆да́ма. Гла́съ вопїю́щагѡ возопі́й, ѽ і҆ѡа́нне прⷣте́че: ᲂу҆гото́вайте пꙋти̑ гдⷭ҇ни, и҆ стєзѝ є҆гѡ̀ пра̑вы содѣ́лайте.
Сті́хъ: Ви́дѣша тѧ̀ во́ды, бж҃е, ви́дѣша тѧ̀ во́ды, и҆ ᲂу҆боѧ́шасѧ.
Да возра́дꙋетсѧ пꙋсты́нѧ і҆ѻрда́нова, и҆ да процвѣте́тъ, ꙗ҆́кѡ крі́нъ: гла́съ бо вопїю́щагѡ ᲂу҆слы́шасѧ въ не́й: ᲂу҆гото́вайте пꙋ́ть гдⷭ҇ень. Го́ры бо положи́вый мѣ́риломъ, и҆ мѣ̑ста дꙋбра̑внаѧ вѣ́сомъ, всѧ̑ и҆сполнѧ́ѧй, ꙗ҆́кѡ бг҃ъ, кр҃ща́етсѧ ѿ раба̀: ѡ҆бнищава́ти нача́тъ бога̑тныѧ да́ры да́рꙋѧй. Оу҆слы́ша є҆́ѵа: въ печа́лѣхъ роди́ши ча̑да, ны́нѣ же ᲂу҆слы́ша дв҃а: ра́дꙋйсѧ, ѡ҆бра́дованнаѧ, гдⷭ҇ь съ тобо́ю, и҆мѣ́ѧй ве́лїю млⷭ҇ть.
Сла́ва, и҆ ны́нѣ, гла́съ и҃. А҆нато́лїево:
І҆ѡа́нне крⷭ҇ти́телю, во ᲂу҆тро́бѣ позна́вый мѧ̀ а҆́гнца, на рѣцѣ̀ мнѣ̀ послꙋжѝ, со а҆́гг҃лы мнѣ̀ слꙋ́жбꙋ принесѝ: просте́ръ, косни́сѧ дла́нїю верхꙋ̀ моемꙋ̀ пречⷭ҇томꙋ, и҆ є҆гда̀ ᲂу҆́зриши го́ры трепе́щꙋщыѧ, и҆ і҆ѻрда́на возвраща́ющасѧ, съ си́ми возопі́й: воплоти́выйсѧ и҆зъ дв҃ы, въ на́ше спасе́нїе, гдⷭ҇и, сла́ва тебѣ̀.
На лїтꙋргі́и блажє́нна предпра́зднства, пѣ́снь г҃ и҆ ѕ҃-ѧ. По вхо́дѣ тропа́рь предпра́зднства, и҆ хра́ма бцⷣы, а҆́ще є҆́сть, и҆ хра́ма ст҃а́гѡ: та́же тропа́рь ст҃а́гѡ, и҆ конда́къ хра́ма бцⷣы, а҆́ще є҆́сть, и҆лѝ хра́ма ст҃а́гѡ. Сла́ва, конда́къ ст҃а́гѡ: И҆ ны́нѣ, конда́къ предпра́зднства.
Си́це глаго́лемъ тропарѝ и҆ кондакѝ, въ предпра́зднствѣ бг҃оѧвле́нїѧ по всѧ̑ дни̑, кромѣ̀ недѣ́ли, и҆ полѷеле́а ст҃а́гѡ.
Прокі́менъ, гла́съ а҃: Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ. Сті́хъ: Оу҆слы́шите сїѧ̑ всѝ ꙗ҆зы́цы, внꙋши́те всѝ живꙋ́щїи по вселе́ннѣй. А҆пⷭ҇лъ ко є҆вре́ємъ, зача́ло ти҃і. А҆ллилꙋ́їа, гла́съ в҃: Оу҆ста̀ пра́веднагѡ поꙋча́тсѧ премꙋ́дрости, и҆ ѧ҆зы́къ є҆гѡ̀ возглаго́летъ сꙋ́дъ. Сті́хъ: Зако́нъ бг҃а є҆гѡ̀ въ се́рдцѣ є҆гѡ̀, и҆ не за́пнꙋтсѧ стѡпы̀ є҆гѡ̀. Є҆ѵⷢ҇лїе і҆ѡа́нна, зача́ло н҃. Прича́стенъ: Въ па́мѧть вѣ́чнꙋю бꙋ́детъ пра́ведникъ:
Мѣ́сѧца тогѡ́же во в҃-й де́нь. Слꙋ́жба прпⷣбномꙋ и҆ бг҃оно́сномꙋ ѻ҆тцꙋ̀ на́шемꙋ серафі́мꙋ, саро́вскомꙋ чꙋдотво́рцꙋ.
На ма́лѣй вече́рни,
стїхи̑ры на д҃, самогла́сны, гла́съ д҃:
Соше́дшесѧ дне́сь, хрⷭ҇тоимени́тїи лю́дїе, похва́льными пѣ́сньми вѣнча́имъ земна́го а҆́гг҃ла и҆ нбⷭ҇наго человѣ́ка, и҆ къ немꙋ̀ те́плѣ возопїи́мъ: ѽ бл҃же́нне ѻ҆́тче серафі́ме, по́стникѡмъ пресла́внаѧ похвало̀, ѡ҆ на́съ моли́сѧ ко гдⷭ҇ꙋ, поми́ловатисѧ дꙋша́мъ на́шымъ.
Цѣломꙋ́дрїе и҆ кро́тость ѿ ю҆́ности возлюби́въ, ѻ҆́тче серафі́ме, чистото́ю ᲂу҆ма̀ и҆ се́рдца любо́вь хрⷭ҇то́вꙋ стѧжа́лъ є҆сѝ, є҆́юже бг҃ови прибли́зилсѧ є҆сѝ. того̀ ᲂу҆̀бо ны́нѣ молѝ, ѿ бѣ́дъ и҆зба́вити вѣ́рою творѧ́щыѧ честнꙋ́ю па́мѧть твою̀.
Дне́сь соше́дшесѧ хрⷭ҇тоимени́тыхъ люде́й мно́жєства въ прославле́нїе чⷭ҇тны́хъ моще́й твои́хъ, прпⷣбне ѻ҆́тче серафі́ме, ра́дости и҆ весе́лїѧ всѝ и҆спо́лнишасѧ: ꙗ҆ви́лъ бо сѧ є҆сѝ болѧ́щымъ и҆сцѣле́нїе и҆ хрѡмы́мъ хожде́нїе, съ вѣ́рою притека́ющымъ къ ра́цѣ моще́й твои́хъ.
Сла́ва, гла́съ ѕ҃:
Весели́сѧ и҆ ра́дꙋйсѧ ѡ҆ гдⷭ҇ѣ, ѻ҆би́тель саро́вскаѧ: въ тебѣ́ бо возсїѧ̀ свѣти́льникъ но́вый рѡссі́йскїѧ землѝ. красꙋ́йсѧ и҆ ликꙋ́й цр҃ковь бж҃їѧ, и҆ и҆́нокѡвъ мно́жєства сора́дꙋйтесѧ. празднолю́бцєвъ собо́ри взыгра́йте, и҆ вѣне́цъ ѿ дх҃о́вныхъ цвѣтѡ́въ спле́тше, съ даві́домъ воспо́йте: чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀. сїѧ́ бо прпⷣбномꙋ серафі́мꙋ нача́ло сла́вы полага́етъ, є҆ѧ́же ѻ҆́бщники и҆ на́съ сотворѝ твои́ми мл҃твами, бл҃же́нне.
И҆ ны́нѣ, бг҃оро́диченъ: Никто́же притека́ѧй:
На стїхо́внѣ стїхи̑ры, гла́съ в҃:
И҆зше́дъ ѿ ѻ҆те́чествїѧ твоегѡ̀, прпⷣбне ѻ҆́тче серафі́ме, и҆ гра́да кі́ева доше́дъ, та́мѡ ᲂу҆ моще́й чꙋдотво́рєцъ на пꙋ́ть сп҃си́тельнагѡ по́двига бл҃гослове́нїе прїѧ́лъ є҆сѝ: сїѐ ᲂу҆̀бо и҆ на́мъ низпослѝ, творѧ́щымъ всест҃ꙋ́ю и҆ пречⷭ҇тнꙋ́ю па́мѧть твою̀.
Сті́хъ: Честна̀ пред̾ гдⷭ҇емъ сме́рть прпⷣбныхъ є҆гѡ̀.
Ве́лїй и҆скꙋ́съ въ послꙋша́нїи и҆́ноческихъ по́двигѡвъ, прпⷣбне ѻ҆́тче серафі́ме, съ любо́вїю прїѧ́лъ є҆сѝ, и҆ бра́тїю твои́мъ терпѣ́нїемъ и҆ любо́вїю ᲂу҆диви́лъ є҆сѝ: молѝ сп҃сти́сѧ дꙋша́мъ на́шымъ.
Сті́хъ: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Наставлє́нїи и҆гꙋ́мена ᲂу҆крѣплѧ́емь, въ пꙋсты́нное мѣ́сто саро́ва всели́лсѧ є҆сѝ, ѻ҆́тче, и҆ та́мѡ мл҃твенномꙋ по́двигꙋ крѣ́пкѡ прилѣжа́ти потщи́лсѧ є҆сѝ, и҆ ꙗ҆ви́лсѧ є҆сѝ до́мъ прест҃а́гѡ дх҃а: молѝ хрⷭ҇та̀ бг҃а ѡ҆ всѣ́хъ на́съ.
Сла́ва, и҆ па́ки та́ѧжде стїхи́ра: Наставлє́нїи и҆гꙋ́мена:
И҆ ны́нѣ, бг҃оро́диченъ:
Предста́тельница и҆ покро́въ ты̀ є҆сѝ, пречⷭ҇таѧ, и҆зба́ви на́съ ѿ бѣ́дъ лю́тыхъ и҆ ѡ҆бстоѧ́нїй, и҆ дꙋ́шы на́шѧ сп҃сѝ бжⷭ҇твенными твои́ми мл҃твами.
Тропа́рь пи́санъ на вели́цѣй вече́рни.
На вели́цѣй вече́рни. Бл҃же́нъ мꙋ́жъ:
На Гдⷭ҇и воззва́хъ, стїхи̑ры на и҃. А҆́ще ᲂу҆́бѡ є҆́сть предпра́зднство ст҃ы́хъ бг҃оѧвле́нїй, пе́рвѣе пое́мъ трѝ стїхи̑ры предпра́зднства: а҆́ще же нѣ́сть сїѧ̀ стїхи̑ры, повторѧ́юще пе́рвꙋю и҆ вторꙋ́ю, во гла́съ а҃: Подо́бенъ: Ѽ, ди́вное чꙋ́до:
Ѽ, пресла́вное чꙋ́до, подви́жникъ бл҃гоче́стїѧ въ саро́вѣ ꙗ҆влѧ́етсѧ, и҆ мл҃твенникъ къ бг҃ꙋ те́плый серафі́мъ пречꙋ́дный на́мъ быва́етъ: весели́сѧ, ѻ҆би́тель саро́вскаѧ, и҆мꙋ́щи въ себѣ̀ мо́щи прпⷣбнагѡ: взыгра́йте, правосла́вныхъ мно́жєства, преди́внаго серафі́ма и҆мꙋ́ще въ бѣда́хъ застꙋ́пника и҆ вопїю́ще къ немꙋ̀: ра́дꙋйсѧ, свѣти́льниче рѡссі́йскїѧ землѝ, тмы̀ сопроти́вныхъ дале́че ѿрѣва́й, и҆ гдⷭ҇еви моли́сѧ, дарова́ти дꙋша́мъ на́шымъ ми́ръ и҆ ве́лїю млⷭ҇ть.
Ѽ ди́вное чꙋ́до, се́ бо вои́стиннꙋ во ѻ҆би́тели саро́встѣй бл҃гоче́стїѧ сто́лпъ непоколеби́мый серафі́мъ бл҃же́нный ꙗ҆влѧ́етсѧ на́мъ: тѣ́мже, бг҃омꙋ́дрыхъ собо́ри, на высотꙋ̀ дꙋ́хомъ возноси́тесѧ, къ прпⷣбномꙋ вопїю́ще: прпⷣбне ѻ҆́тче серафі́ме, гдⷭ҇еви моли́сѧ, дарова́ти дꙋша́мъ на́шымъ ми́ръ и҆ ве́лїю млⷭ҇ть.
Ди̑вны твоѧ̑ та̑йны, хрⷭ҇тѐ бж҃е, ꙗ҆́кѡ дарова́лъ є҆сѝ на́мъ свѣти́льника прпⷣбнаго серафі́ма, вѣ̑рнымъ лю́демъ на сопрѡти́вныѧ крѣ́пкаго побо́рника, и҆́нокѡмъ и҆ всѣ̑мъ правѡсла́внымъ хрⷭ҇тїа́нѡмъ мл҃твенника, ст҃ѣ́й ѻ҆би́тели похвалꙋ̀ и҆ ᲂу҆твержде́нїе: то́й и҆ ны́нѣ мо́литъ тѧ̀, гдⷭ҇и, дарова́ти дꙋша́мъ на́шымъ ми́ръ и҆ ве́лїю млⷭ҇ть.
Є҆гда̀ вше́лъ є҆сѝ, прпⷣбне, въ пꙋсты́ню саро́вскꙋю, тогда̀, своеѧ̀ во́ли до конца̀ совле́ксѧ, тве́рдое ко всѣ̑мъ послꙋша́нїе показа́лъ є҆сѝ: дѡса́ды бо и҆ безчє́стїѧ претерпѣ́лъ є҆сѝ ра́дꙋѧсѧ: ᲂу҆дарє́нїѧ и҆ ра̑ны ѿ ѕлы́хъ чл҃вѣ̑къ прїѧ́лъ є҆сѝ, ѡ҆ ни́хже и҆ моли́лсѧ є҆сѝ, прпⷣбне: мы́ же, прославлѧ́юще пречⷭ҇тнꙋ́ю па́мѧть твою̀, мо́лимъ ти сѧ, прпⷣбне, гдⷭ҇еви моли́сѧ ми́ръ мі́рови дарова́ти и҆ дꙋша́мъ на́шымъ ве́лїю млⷭ҇ть.
Бл҃же́нна ѻ҆би́тель саро́вскаѧ, и҆мꙋ́ще тебѐ, прпⷣбне ѻ҆́тче серафі́ме, добродѣ́телей сокро́вище, сосꙋ́дъ чⷭ҇тоты̀, цѣломꙋ́дрїѧ храни́телѧ, прїѧ́телище бл҃года́ти, и҆сто́чникъ и҆сцѣле́нїй, болѧ́щымъ врача̀ безме́здна, по́стника и҆́стинна, въ ско́рбехъ ᲂу҆тѣ́шителѧ, жите́йскими страстьмѝ ѡ҆бꙋрева́ємымъ ти́хое приста́нище: на́мъ же, творѧ́щымъ чⷭ҇тнꙋ́ю па́мѧть твою̀, молѝ, прпⷣбне ѻ҆́тче серафі́ме, дарова́ти ми́ръ и҆ ве́лїю млⷭ҇ть.
Дне́сь ликꙋ́ютъ собо́ри вѣ́рныхъ въ па́мѧть твою̀, прпⷣбне серафі́ме, и҆ велегла́снѡ вопїю́тъ: ты̀ любвѐ ра́ди хрⷭ҇то́вы всѧ̑ кра̑снаѧ мі́ра ѡ҆ста́вивъ и҆ въ пꙋсты́ню саро́вскꙋю всели́всѧ, ника́коже ᲂу҆страши́лсѧ є҆сѝ неви́димыхъ вра̑гъ боре́нїѧ: но сїѧ̑ мл҃твами твои́ми ꙗ҆́кѡ пра́хъ ѿмета́лъ є҆сѝ: тѣ́мже гдⷭ҇еви моли́сѧ дарова́ти дꙋша́мъ на́шымъ ми́ръ и҆ ве́лїю млⷭ҇ть.
Сла́ва, гла́съ и҃:
Прїиди́те, вѣ́рныхъ собо́ри, похва́льными пѣ́сньми дне́сь пречꙋ́днаго ѻ҆тца̀ просла́вимъ и҆ си́це є҆мꙋ̀ возопїи́мъ: прпⷣбне ѻ҆́тче серафі́ме, вои́стиннꙋ сподо́билсѧ є҆сѝ бжⷭ҇твенныѧ жи́зни, прїи́мъ ѿ бг҃а вѣне́цъ нетлѣ́нныѧ сла́вы. сегѡ̀ ра́ди ѻ҆би́тель саро́вскаѧ тобо́ю хва́литсѧ, лю́дїе же, зрѧ́ще чⷭ҇тнꙋ́ю ра́кꙋ моще́й твои́хъ и҆ чꙋдеса̀ быва́ємаѧ, сла́вѧтъ прославлѧ́ющаго тѧ̀ гдⷭ҇а: є҆мꙋ́же моли́сѧ, прпⷣбне, дарова́ти дꙋша́мъ на́шымъ ми́ръ и҆ ве́лїю млⷭ҇ть.
И҆ ны́нѣ, предпра́зднства, и҆лѝ бг҃оро́диченъ, гла́съ то́йже:
Цр҃ь нбⷭ҇ный за чл҃вѣколю́бїе на землѝ ꙗ҆ви́сѧ и҆ съ человѣ́ки поживѐ: ѿ дв҃ы бо чⷭ҇тыѧ пло́ть прїе́мый и҆ и҆з̾ неѧ̀ проше́дый съ воспрїѧ́тїемъ є҆ди́нъ є҆́сть сн҃ъ, сꙋгꙋ́бъ є҆стество́мъ, но не ѵ҆поста́сїю: тѣ́мже соверше́нна того̀ бг҃а и҆ соверше́нна чл҃вѣ́ка вои́стиннꙋ проповѣ́дающе, и҆сповѣ́дꙋемъ хрⷭ҇та̀ бг҃а на́шего: є҆го́же молѝ, мт҃и безневѣ́стнаѧ, поми́ловатисѧ дꙋша́мъ на́шымъ.
Вхо́дъ. Прокі́менъ днѐ.
Чтє́нїѧ прпⷣбничєскаѧ г҃. (Зрѝ л. рн҃а)
На лїті́и стїхи́ра хра́ма: и҆ прпⷣбномꙋ стїхи̑ры, гла́съ а҃:
Кі́ими похва́льными вѣнцы̀ вѣнча́имъ подви́жника вели́каго, прпⷣбнаго серафі́ма; то́й бо ꙗ҆́кѡ наста́вникъ до́брый въ тве́рдости вѣ́ры и҆ добродѣ́тели ꙗ҆ви́сѧ, бг҃одꙋхнове́нными ᲂу҆чє́нїи и҆ равноа́гг҃льнымъ житїе́мъ приходѧ́щыѧ къ немꙋ̀ наꙋча́ѧ. тѣ́мже вопїе́мъ є҆мꙋ̀: моли́сѧ, прпⷣбне, хрⷭ҇тꙋ̀ бг҃ꙋ, правосла́внꙋю вѣ́рꙋ ᲂу҆тверди́ти и҆ дꙋша́мъ на́шымъ сп҃сти́сѧ.
Прїиди́те, и҆́нѡкъ мно́жєства, дне́сь прпⷣбнаго бл҃гоче́стнѡ восхва́лимъ, и҆́стиннаго ᲂу҆ченика̀ сп҃сова, мїрскꙋ́ю пре́лесть попра́вшаго, ꙗ҆ре́мъ хрⷭ҇то́въ на ра́мо взе́мшаго, и҆ полкѝ бѣсѡ́въ посрами́вшаго: къ немꙋ́же возопїи́мъ си́це: не забꙋ́ди на́съ, ѻ҆́тче серафі́ме, восхвалѧ́ющихъ и҆ чтꙋ́щихъ ст҃ꙋ́ю па́мѧть твою̀.
Свѣ́тлаѧ и҆ бжⷭ҇твеннаѧ па́мѧть твоѧ̀, прпⷣбне серафі́ме, ᲂу҆дивѝ всѣ́хъ, ꙗ҆́кѡ безпло́тенъ бо, во пло́ти врагѝ неви̑димыѧ посрами́лъ є҆сѝ: всѧ́ же страна̀ тамбо́вскаѧ и҆ ст҃а́ѧ ѻ҆би́тель саро́вскаѧ, и҆мꙋ́щи твоѧ̑ ст҃ы̑ѧ мо́щи, хва́литсѧ, си́ми бо здра́вїе всѣ̑мъ съ вѣ́рою притека́ющымъ къ чⷭ҇тнѣ́й твое́й ра́цѣ подае́тсѧ. тѣ́мже, просвѣти́вшесѧ тобо́ю, вопїе́мъ тѝ, прпⷣбне: молѝ сп҃сти́сѧ дꙋша́мъ на́шымъ.
Сла́ва, гла́съ є҃:
Ра́дꙋйсѧ дне́сь, всѧ̀ рѡссі́йскаѧ землѐ, и҆ ст҃а́ѧ ѻ҆би́тель саро́вскаѧ, весели́сѧ. вѣ́рныхъ же мно́жєства, сте́кшесѧ дне́сь, просла́вимъ прпⷣбнаго ѻ҆тца̀, па́стырѧ и҆ ᲂу҆чи́телѧ, бг҃омꙋ́драго наста́вника заблꙋ́ждшымъ, ско́раго всѣ́хъ болѧ́щихъ цѣли́телѧ, рѡссі́йскїѧ землѝ вели́кое ᲂу҆краше́нїе, є҆го́же похвалѧ́юще си́це рце́мъ: прпⷣбне серафі́ме, сп҃сѝ на́съ мл҃твами твои́ми.
И҆ ны́нѣ, бг҃оро́диченъ, гла́съ то́йже:
Хра́мъ и҆ две́рь є҆сѝ, пала́та и҆ престо́лъ цр҃е́въ, дв҃о всечⷭ҇тна́ѧ, є҆́юже и҆зба́витель моѝ хрⷭ҇то́съ гдⷭ҇ь во тмѣ̀ спѧ́щымъ ꙗ҆ви́сѧ, сл҃нце сы́й пра́вды, просвѣти́ти хотѧ̀, ꙗ҆̀же созда̀ по ѻ҆́бразꙋ своемꙋ̀ рꙋко́ю свое́ю: тѣ́мже, всепѣ́таѧ, ꙗ҆́кѡ мт҃рне дерзнове́нїе къ немꙋ̀ стѧжа́вши, непреста́ннѡ молѝ сп҃сти́сѧ дꙋша́мъ на́шымъ.
На стїхо́внѣ стїхи̑ры, гла́съ є҃.
Подо́бенъ: Ра́дꙋйсѧ, живоно́сный крⷭ҇те:
Ра́дꙋйсѧ, а҆́гг҃лѡмъ собесѣ́дниче, прпⷣбне серафі́ме, бл҃гоче́стнѡ бо на землѝ пожи́въ, мнѡ́ги приходѧ́щыѧ къ тебѣ̀ стра́хꙋ гдⷭ҇ню поꙋча́лъ є҆сѝ: бл҃года́тїю прест҃а́гѡ дх҃а ѡ҆зарѧ́емь, зрѣ́лъ є҆сѝ бꙋ̑дꙋщаѧ, ꙗ҆́кѡ настѡѧ́щаѧ, и҆ ᲂу҆миле́нїѧ и҆ ра́дости мнѡ́ги скорбѧ́щыѧ дꙋше́ю и҆сполнѧ́лъ є҆сѝ. тѣ́мже мо́лимъ ти сѧ, моли́сѧ гдⷭ҇еви ѡ҆ чтꙋ́щихъ тѧ̀.
Сті́хъ: Честна̀ пред̾ гдⷭ҇емъ сме́рть прпⷣбныхъ є҆гѡ̀.
Ра́дꙋйсѧ, заблꙋ́ждшихъ ᲂу҆чи́телю преди́вный, хрⷭ҇та̀ гдⷭ҇а во хра́мѣ со а҆рха́гг҃лы и҆ а҆́гг҃лы ви́дѣти сподо́бивыйсѧ. и҆ ны́нѣ, прпⷣбне, на нб҃сѣ́хъ тогѡ̀ зрѣ́нїѧ вы́нꙋ наслажда́ѧсѧ, моли́сѧ ѡ҆ на́съ, вѣ́рою творѧ́щихъ па́мѧть твою̀.
Сті́хъ: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Ра́дꙋйсѧ, прпⷣбне серафі́ме, всѣ̑мъ бо храни́ти и҆́стиннꙋю вѣ́рꙋ хрⷭ҇то́вꙋ заповѣ́далъ є҆сѝ, и҆ вы́шнѧгѡ житїѧ̀ вожделѣ́въ, бога́тство возненави́дѣлъ є҆сѝ: ны́нѣ же неизрече́ннꙋю красотꙋ̀ нбⷭ҇нꙋю зри́ши, и҆ сла́дкагѡ пѣ́нїѧ а҆́гг҃льскагѡ наслажда́ешисѧ. тѣ́мже моли́сѧ гдⷭ҇еви дарова́ти на́мъ ми́ръ и҆ ве́лїю млⷭ҇ть. (с. 688)
Сла́ва, гла́съ ѕ҃:
Прпⷣбне ѻ҆́тче серафі́ме, кто̀ и҆сповѣ́сть трꙋды̀ твоѧ̑ и҆ бѡлѣ́зни; и҆лѝ кі́й ѧ҆зы́къ и҆зрече́тъ же́стокое пꙋсты́нное твоѐ житїѐ, бдѣ́нїе же и҆ поще́нїе, є҆ще́ же и҆ въ затво́рѣ пребыва́нїе, ᲂу҆сте́нъ безмо́лвїе и҆ моле́нїе непреста́нное; вои́стиннꙋ ꙗ҆ви́лсѧ є҆сѝ по́стникѡмъ ᲂу҆краше́нїе, мл҃твенникъ къ бг҃ꙋ непосты́дный. тѣ́мже къ тебѣ̀ вопїе́мъ: ра́дꙋйсѧ, и҆́ноческагѡ житїѧ̀ пра́вило: ра́дꙋйсѧ, въ бѣда́хъ и҆ ско́рбехъ вели́кое ᲂу҆тѣше́нїе и҆ те́плый всѣ̑мъ предста́телю: моли́сѧ, прпⷣбне, сп҃сти́сѧ дꙋша́мъ на́шымъ.
И҆ ны́нѣ, предпра́зднства, и҆лѝ бг҃оро́диченъ:
Творе́цъ и҆ и҆зба́витель мо́й, пречⷭ҇таѧ, хрⷭ҇то́съ гдⷭ҇ь, и҆з̾ твои́хъ ложе́снъ проше́дъ въ мѧ̀ ѡ҆болкі́йсѧ, пе́рвыѧ клѧ́твы а҆да́ма свободѝ: тѣ́мже тѝ, всечⷭ҇таѧ, ꙗ҆́кѡ бж҃їи мт҃ри же и҆ дв҃ѣ вои́стиннꙋ, вопїе́мъ немо́лчнѡ: ра́дꙋйсѧ, а҆́гг҃льски, ра́дꙋйсѧ, влⷣчце, предста́тельство и҆ покро́ве и҆ сп҃се́нїе дꙋ́шъ на́шихъ.
Тропа́рь прпⷣбнагѡ, гла́съ д҃:
Ѿ ю҆́ности хрⷭ҇та̀ возлюби́лъ є҆сѝ, бл҃же́нне, и҆ томꙋ̀ є҆ди́номꙋ рабо́тати пла́меннѣ вожделѣ́въ, непреста́нною моли́твою и҆ трꙋдо́мъ въ пꙋсты́ни подвиза́лсѧ є҆сѝ, ᲂу҆миле́ннымъ же се́рдцемъ любо́вь хрⷭ҇то́вꙋ стѧжа́въ, и҆збра́нникъ возлю́бленъ бж҃їѧ мт҃ре ꙗ҆ви́лсѧ є҆сѝ. сегѡ̀ ра́ди вопїе́мъ тѝ: сп҃са́й на́съ мл҃твами твои́ми, серафі́ме, прпⷣбне ѻ҆́тче на́шъ.
Два́жды, и҆ предпра́зднства, и҆лѝ Бцⷣе дв҃о: (с. 689)
На ᲂу҆́трени.
На Бг҃ъ гдⷭ҇ь, тропа́рь ст҃а́гѡ, два́жды. Сла́ва, и҆ ны́нѣ, предпра́зднства, и҆лѝ бг҃оро́диченъ: Є҆́же ѿ вѣ́ка ᲂу҆тае́нное:
По а҃-мъ стїхосло́вїи сѣда́ленъ, гла́съ д҃:
Зна́менїемъ кре́стнымъ и҆ мл҃твою вра̑жїѧ и҆скꙋшє́нїѧ побѣди́въ, посто́мъ и҆ воздержа́нїемъ гдⷭ҇еви бл҃гоꙋгоди́лъ є҆сѝ: тѣ́мже чꙋде́съ прїѧ́лъ є҆сѝ да́ръ, всѣ̑мъ и҆сцѣлє́нїѧ подава́ѧ, вѣ́рою притека́ющымъ къ ра́цѣ моще́й твои́хъ, серафі́ме прпⷣбне: молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю ст҃ꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Оу҆жа́сно чꙋ́до зача́тїѧ, и҆ несказа́ненъ ѻ҆́бразъ рождества̀ въ тебѣ̀ позна́сѧ, приснодв҃о чⷭ҇таѧ, ᲂу҆жаса́етъ мо́й ᲂу҆́мъ, и҆ ᲂу҆дивлѧ́етъ помышле́нїе: сла́ва твоѧ̀, бцⷣе, всѣ̑мъ простре́сѧ во сп҃се́нїе дꙋ́шъ на́шихъ.
По в҃-мъ стїхосло́вїи сѣда́ленъ, гла́съ а҃:
Во глꙋбинѣ̀ пꙋсты́ни саро́вскїѧ кѡлѣ́на приклонѧ́лъ є҆сѝ на ка́мени, воздѣва́ѧ прпⷣбнѣи твоѝ рꙋ́цѣ ко гдⷭ҇ꙋ: тѣ́мже ѿ сп҃са бл҃года́ть ст҃а́гѡ дх҃а прїѧ́лъ є҆сѝ, стра́ждꙋщыѧ тѣлесы̀ и҆сцѣлѧ́ти и҆ дꙋ́шы вѣ́рныхъ просвѣща́ти. сегѡ̀ ра́ди вопїе́мъ тѝ: молѝ, прпⷣбне, хрⷭ҇та̀ бг҃а сп҃сти́сѧ на́мъ, пра́зднꙋющымъ ст҃ꙋ́ю па́мѧть твою̀.
Два́жды.
Сла́ва, и҆ ны́нѣ, бг҃оро́диченъ:
Мл҃твꙋ прїе́мши ѿ на́съ, въ кро́въ тво́й, пречⷭ҇таѧ дв҃о, прибѣга́ющихъ, не преста́й молѧ́щи чл҃вѣколю́бца сп҃сти́сѧ рабѡ́мъ твои̑мъ.
По полѷеле́и сѣда́ленъ, гла́съ з҃:
Просїѧ̀ добродѣ́тельное житїѐ твоѐ, прпⷣбне, ны́нѣ въ рѡссі́йстѣй землѝ, и҆ ѿ всѣ́хъ пѣ́сньми похва́льными сла́вишисѧ: ты́ бо, ꙗ҆́кѡ и҆лїа̀ на колесни́цꙋ добродѣ́телей вше́дъ, на нб҃са̀ дꙋше́ю возлетѣ́лъ є҆сѝ и҆ та́мѡ пра́веднѡ пресвѣ́тлымъ вѣнце́мъ вѣнча́лсѧ є҆сѝ. тѣ́мже бл҃годарѧ́ще вопїе́мъ тѝ, бл҃же́нне серафі́ме: молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю ст҃ꙋ́ю па́мѧть твою̀.
Два́жды.
Сла́ва, и҆ ны́нѣ, предпра́зднства, и҆лѝ бг҃оро́диченъ:
Пречⷭ҇таѧ дв҃о, поми́лꙋй на́съ, прибѣга́ющихъ вѣ́рою къ тебѣ̀ милосе́рднѣй и҆ просѧ́щихъ те́плагѡ твоегѡ̀ застꙋпле́нїѧ: ꙗ҆́кѡ мт҃и бг҃а вы́шнѧгѡ, молѝ сн҃а твоего̀, хрⷭ҇та̀ бг҃а на́шего, сп҃сти́сѧ рабѡ́мъ твои̑мъ.
Та́же степє́нна, а҃-й а҆нтїфѡ́нъ д҃-гѡ гла́са.
Прокі́менъ, гла́съ то́йже: Честна̀ пред̾ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; Є҆ѵⷢ҇лїе ѿ матѳе́а, зача́ло м҃г.
По н҃-мъ ѱалмѣ̀ стїхи́ра, гла́съ ѕ҃:
Дне́сь, вѣ́рнїи, дꙋхо́внѡ торжествꙋ́юще въ наро́читѣмъ пра́здницѣ прпⷣбнагѡ ѻ҆тца̀, и҆ бл҃гоче́стнѡ ра́дꙋющесѧ, томꙋ̀ те́плѣ возопїи́мъ: ра́дꙋйсѧ, серафі́ме бл҃же́нне: Ра́дꙋйсѧ, нбⷭ҇ный человѣ́че и҆ земны́й а҆́гг҃ле: ра́дꙋйсѧ, мно́гихъ на пꙋ́ть сп҃се́нїѧ наста́вивый: ра́дꙋйсѧ, вѣ̑рнымъ похвало̀ и҆ рѡссі́йстѣй землѝ ᲂу҆твержде́нїе: моли́сѧ ѡ҆ дꙋша́хъ на́шихъ.
Канѡ́нъ предпра́зднства на ѕ҃, а҆́ще же нѣ́сть предпра́зднства, канѡ́нъ бцⷣѣ пара́клисїсъ, со і҆рмосо́мъ на ѕ҃, и҆ ст҃о́мꙋ два̀ канѡ̑на на и҃.
Канѡ́нъ пе́рвый, гла́съ ѕ҃.
Пѣ́снь а҃.
І҆рмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь пои́мъ, вопїѧ́ше.
Гдⷭ҇и ѿве́рзи моѝ недосто́йнѣи ᲂу҆стнѣ̀, и҆ да́ждь мѝ сло́во ра́зꙋма, воспѣ́ти досто́йнѡ па́мѧть бл҃же́ннагѡ серафі́ма, ны́нѣ со а҆́гг҃лы молѧ́щагѡсѧ тебѣ̀, и҆зба́вити на́съ ѿ всѧ́кагѡ лю́тагѡ ѡ҆бстоѧ́нїѧ.
Къ бцⷣѣ вели́кїй мл҃твенникъ бы́лъ є҆сѝ, прпⷣбне, ю҆́же ви́дѣти со а҆пⷭ҇лы сподо́билсѧ є҆сѝ: и҆ ны́нѣ не преста́й мл҃твами твои́ми посѣща́ти ча̑дъ твои́хъ.
Ѿ ю҆́ности твоеѧ̀, прпⷣбне, преда́лсѧ є҆сѝ ᲂу҆мо́мъ бг҃ови, и҆ стра̑сти тѣлє́сныѧ крѣ́пкимъ воздержа́нїемъ ᲂу҆кроти́въ, всѧ́кими добродѣ́тельми ᲂу҆краси́лсѧ є҆сѝ, премꙋ́дре.
Бг҃оро́диченъ:
Всебл҃га́ѧ влⷣчце, ꙗ҆́же пребл҃га́го бг҃а пло́тїю ро́ждши, ѡ҆ѕло́бленное страстьмѝ моѐ се́рдце ѡ҆чи́сти, да вѣ́рою и҆ любо́вїю велича́ю тѧ̀.
И҆́нъ канѡ́нъ, гла́съ и҃.
Пѣ́снь а҃.
І҆рмо́съ: Во́дꙋ проше́дъ ꙗ҆́кѡ сꙋ́шꙋ и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
По за́повѣди влⷣки хрⷭ҇та̀ ᲂу҆́зкимъ и҆ тѣ́снымъ пꙋте́мъ вше́лъ є҆сѝ, прпⷣбне, въ црⷭ҇тво нбⷭ҇ное, широ́кїй и҆ простра́нный пꙋ́ть возненави́дѣвъ: и҆ ны́нѣ моли́сѧ ѡ҆ на́съ, творѧ́щихъ пресвѣ́тлꙋю па́мѧть твою̀.
Ѿ ю҆́ности на безстра́стїѧ го́рꙋ возше́дъ и҆ кре́стъ сво́й взе́мъ, невозвра́тнѡ хрⷭ҇тꙋ̀ послѣ́довалъ є҆сѝ: и҆ дх҃о́внꙋю мꙋ́дрость стѧжа́въ, го́рнѧгѡ і҆ерⷭ҇ли́ма дости́глъ є҆сѝ, прпⷣбне: молѝ ѡ҆ на́съ є҆ди́наго чл҃вѣколю́бца.
Ны́нѣ предстоѧ̀, прпⷣбне, престо́лꙋ бж҃їю, моли́сѧ ѡ҆ странѣ̀ на́шей и҆зба́витисѧ ѿ наше́ствїѧ и҆ноплеме́нныхъ, и҆ хрⷭ҇толюби̑вымъ лю́демъ землѝ рѡссі́йскїѧ сп҃се́нїе и҆спросѝ мл҃твами твои́ми, прпⷣбне.
Бг҃оро́диченъ:
Съ вѣ́рою и҆ любо́вїю притека́ющихъ къ тебѣ̀ и҆ со стра́хомъ пою́щихъ тѧ̀ мл҃твенный гла́съ ᲂу҆слы́ши, влⷣчце.
Катава́сїа по ᲂу҆ста́вꙋ.
Пѣ́снь г҃.
І҆рмо́съ: Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.
Мл҃твами твои́ми, прпⷣбне, предстоѧ̀ бг҃ꙋ со а҆́гг҃лы, за ве́сь мі́ръ моли́сѧ, бра̑ни вра̑жїѧ потреби́ти и҆ побѣ́дꙋ на сꙋпоста́ты дарова́ти.
Ѿ ю҆́ности вѣ́рою и҆ любо́вїю прилѣпи́лсѧ є҆сѝ влⷣцѣ вы́шнихъ си́лъ, прпⷣбне серафі́ме: и҆ возсїѧ́въ въ пꙋсты́ни саро́встѣй, ꙗ҆́кѡ со́лнце, въ ско́рбехъ приходѧ́щымъ къ тебѣ̀ ᲂу҆тѣ́шитель бы́лъ є҆сѝ: молѝ сп҃сти́сѧ на́мъ.
Ꙗ҆ви́лсѧ є҆сѝ, прпⷣбне, молѧ́щымсѧ тебѣ̀ сто́лпъ непоколеби́мь и҆ прибѣ́жище всѣ̑мъ притека́ющымъ во ѻ҆би́тель саро́вскꙋю и҆ прїе́млющымъ и҆сцѣле́нїѧ бл҃года́ть неѡскꙋ́днꙋю.
Бг҃оро́диченъ:
Оу҆слы́ша є҆́ѵа прама́терь: въ печа́лехъ роди́ши ча̑да. ты́ же, чⷭ҇таѧ дв҃о, ᲂу҆слы́шавши: гдⷭ҇ь съ тобо́ю, ра́дꙋйсѧ: ра́дованнымъ гла́сомъ печа́ль прама́тере потреби́ла є҆сѝ.
И҆́нъ.
І҆рмо́съ: Нбⷭ҇нагѡ крꙋ́га верхотво́рче гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Моли́сѧ, бл҃же́нне, хрⷭ҇тꙋ̀ бг҃ꙋ и҆зба́витисѧ на́мъ ѿ гла́да и҆ па́гꙋбы, ѿ напра́сныѧ сме́рти, ѿ та́йныхъ прегрѣше́нїй и҆ помышле́нїй лꙋка́выхъ, да чⷭ҇тымъ се́рдцемъ хрⷭ҇тꙋ̀ возопїи́мъ: мл҃твами прпⷣбнагѡ сп҃сѝ на́съ, гдⷭ҇и.
Кро́тостїю и҆ смире́нїемъ послѣ́дꙋѧ влⷣцѣ хрⷭ҇тꙋ̀, всѣ̑мъ всѧ̑ вои́стиннꙋ бы́лъ є҆сѝ, бога́тыхъ же и҆ ᲂу҆бо́гихъ неѡсла́бнѡ бл҃гоче́стїю поꙋча́ѧ, бꙋ̑дꙋщаѧ ꙗ҆́кѡ настѡѧ́щаѧ прови́дѣлъ є҆сѝ: молѝ хрⷭ҇та̀ бг҃а, прпⷣбне, согрѣше́нїй на́шихъ ѡ҆ставле́нїе дарова́ти.
И҆зба́ви ѻ҆би́тель твою̀, прпⷣбне, ѿ всѧ́кагѡ навѣ́та вра́жїѧ и҆ и҆спо́лни ю҆̀ любвѐ и҆ бл҃года́ти, є҆́же не помышлѧ́ти ѡ҆ жите́йскихъ, но дꙋшесп҃си́тельныѧ дости́гнꙋти добро́ты мл҃твами твои́ми.
Бг҃оро́диченъ:
Оу҆пова́нїе и҆ наде́жда на́ша ты̀ є҆сѝ, прест҃а́ѧ влⷣчце, сп҃сѝ держа́вꙋ правосла́внꙋю и҆ лю́ди твоѧ̑ молѧ́щыѧсѧ и҆ и҆́мѧ твоѐ призыва́ющыѧ.
Сѣда́ленъ, гла́съ д҃:
Жите́йское мо́ре страсте́й воздержа́нїемъ препобѣди́въ и҆ въ приста́нище безстра́стїѧ прите́къ, сосꙋ́дъ воздержа́нїѧ ꙗ҆ви́лсѧ є҆сѝ, прпⷣбне серафі́ме: молѝ хрⷭ҇та̀ бг҃а дарова́ти на́мъ ве́лїю млⷭ҇ть.
Два́жды.
Сла́ва, и҆ ны́нѣ, предпра́зднства, и҆лѝ бг҃оро́диченъ:
Є҆гда̀ предста́нꙋ пред̾ лице́мъ созда́телѧ моегѡ̀ въ де́нь пра́веднагѡ сꙋда̀ є҆гѡ̀, тогда̀, влⷣчце, предста́ни мѝ и҆ мꙋ́ки и҆зба́ви мѧ̀ вѣ́чныѧ, да не сни́дꙋ во а҆́дъ, но да сп҃сꙋ́сѧ твои́мъ, прест҃а́ѧ бцⷣе, застꙋпле́нїемъ.
Пѣ́снь д҃.
І҆рмо́съ: Хрⷭ҇то́съ моѧ̀ си́ла, бг҃ъ и҆ гдⷭ҇ь, чⷭ҇тна́ѧ цр҃ковь бг҃олѣ́пнѡ пое́тъ взыва́ющи, ѿ смы́сла чⷭ҇та ѡ҆ гдⷭ҇ѣ пра́зднꙋющи.
Дне́сь свѣ́тлѡ пра́зднꙋетъ саро́вскаѧ ѻ҆би́тель па́мѧть твою̀, прпⷣбне, и҆ мо́литъ тѧ̀: и҆спросѝ ᲂу҆ гдⷭ҇а вселе́ннѣй ми́ръ и҆ дꙋша́мъ на́шымъ ве́лїю млⷭ҇ть.
Вели́кими пѡ́двиги твои́ми, прпⷣбне, ꙗ҆́кѡ фі́нїѯъ процвѣ́лъ є҆сѝ, словесы̀ бл҃гопло́дными и҆ непоро́чнымъ житїе́мъ сердца̀ притека́ющихъ къ тебѣ̀ ᲂу҆слажда́ѧ: и҆ ны́нѣ ᲂу҆̀бо моли́сѧ, да ѡ҆брѧ́щемъ млⷭ҇ть ᲂу҆ хрⷭ҇та̀ сп҃са на́шегѡ.
Твои́ми мл҃твами ѡ҆ на́съ ᲂу҆молѝ бг҃а, прпⷣбне серафі́ме, и҆ грѣхо́вный мра́къ печа́ли на́шеѧ разорѝ: безстра́стїемъ, вѣ́рою и҆ любо́вїю ᲂу҆красѝ всѣ́хъ, пресла́внꙋю па́мѧть твою̀ чтꙋ́щихъ.
Бг҃оро́диченъ:
Ра́дꙋйсѧ, влⷣчце дв҃о, цр҃квамъ красото̀, бл҃гочести̑вымъ лю́демъ держа́во и҆ похвало̀: непреста́ннѡ моли́сѧ хрⷭ҇тꙋ̀ бг҃ꙋ, да сохрани́тъ на́съ ѿ бѣ́дъ мл҃твами твои́ми.
И҆́нъ.
І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑ и҆ просла́вихъ твоѐ бжⷭ҇тво̀.
Не то́кмѡ ст҃а́ѧ ѻ҆би́тель саро́вскаѧ, но и҆ всѧ̀ рѡссі́йскаѧ землѧ̀ и҆мѣ́етъ тѧ̀, бл҃же́нне, мл҃твенника те́плаго и҆ ско́раго помо́щника, крѣ́пкаго и҆ непобѣди́маго застꙋ́пника и҆ хода́таѧ ѡ҆ дꙋша́хъ на́шихъ.
Бꙋ́ди ѡ҆ на́съ моле́бникъ и҆ хода́тай ко прест҃ѣ́й трⷪ҇цѣ, и҆ подви́гни на мл҃твꙋ съ тобо́ю ли́ки ст҃ы́хъ, и҆́хже житїю̀ поревнова́лъ є҆сѝ, прпⷣбне: съ ни́миже кꙋ́пнѡ моли́сѧ ѡ҆ ми́рѣ и҆ ᲂу҆строе́нїи всегѡ̀ мі́ра, да ти́хое и҆ безмо́лвное житїѐ поживе́мъ въ вѣ́цѣ се́мъ, и҆ въ бꙋ́дꙋщемъ жи́знь вѣ́чнꙋю наслѣ́дꙋемъ.
Въ по́стницѣхъ вели́къ бы́въ, прпⷣбне, тѣ́сное и҆́ноческое въ пꙋсты́ни житїѐ проходи́лъ є҆сѝ, и҆ сїѐ во ᲂу҆миле́ннѣй мл҃твѣ сконча́лъ є҆сѝ: молѝ сп҃сти́сѧ на́мъ.
Бг҃оро́диченъ:
Ты̀ є҆сѝ, пречⷭ҇таѧ бцⷣе, прибѣ́жище на́ше и҆ ᲂу҆твержде́нїе, молѝ сн҃а твоего̀ и҆ бг҃а на́шего пода́ти на́мъ сп҃се́нїе и҆ грѣхѡ́въ ѡ҆ставле́нїе.
Пѣ́снь є҃.
І҆рмо́съ: Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.
Всѣ̑мъ приходѧ́щымъ къ тебѣ̀ бы́лъ є҆сѝ ᲂу҆чи́тель и҆́стинный, и҆ къ бцⷣѣ вели́кїй мл҃твенникъ: и҆ ны́нѣ, прпⷣбне, не преста́й молѧ́сѧ ѡ҆ ча́дѣхъ твои́хъ, ꙗ҆́кѡ и҆́маши дерзнове́нїе ве́лїе.
Да вни́дꙋтъ ны́нѣ хрⷭ҇тоимени́тїи лю́дїе во хра́мъ ѻ҆би́тели саро́вскїѧ, къ чⷭ҇тны́мъ моще́мъ твои̑мъ, прпⷣбне серафі́ме, припа́дающе, и҆ да про́сѧтъ ѿ тебє̀ и҆сцѣле́нїѧ, здра́вїѧ и҆ сп҃се́нїѧ, хрⷭ҇та̀ велича́юще.
Въ нощѝ молѧ́щꙋ ти сѧ бг҃ꙋ, прпⷣбне, вра́гъ неви́димый хотѧ́ше ᲂу҆страши́ти тѧ̀, но мл҃твою твое́ю посра́мленъ, и҆счезѐ вселꙋка́вый.
Бг҃оро́диченъ:
Бг҃а, є҆го́же родила̀ є҆сѝ, пречⷭ҇таѧ мр҃і́е, молѝ, рабѡ́мъ твои̑мъ пода́ти прегрѣше́нїй ѡ҆ставле́нїе.
И҆́нъ.
І҆рмо́съ: Просвѣтѝ на́съ повелѣ̑нїи твои́ми, гдⷭ҇и, и҆ мы́шцею твое́ю высо́кою тво́й ми́ръ пода́ждь на́мъ, чл҃вѣколю́бче.
Посто́мъ и҆ непреста́нною мл҃твою просла́вилъ є҆сѝ, прпⷣбне, ѻ҆би́тель саро́вскꙋю, є҆ле́емъ ѿ і҆кѡ́ны влⷣчцы помазꙋ́ѧ нєдꙋ́жныѧ и҆ тѣ́мъ и҆сцѣле́нїе неѡскꙋ́днѡ подава́ѧ: и҆ ны́нѣ моли́сѧ сп҃сти́сѧ дꙋша́мъ на́шымъ.
Ст҃и́телїе и҆ сщ҃е́нницы сора́дꙋйтесѧ и҆́нокѡмъ сарѡ́вскимъ, и҆ прості́и лю́дїе вкꙋ́пѣ воспо́йте бл҃же́ннаго ѻ҆тца̀, ѡ҆бꙋрева́емыхъ скорбьмѝ ти́хое приста́нище, врача̀ дꙋшє́внымъ и҆ тѣлє́снымъ недꙋ́гѡмъ ско́раго.
Принесѝ мл҃твы твоѧ̑, прпⷣбне, ꙗ҆́кѡ же́ртвꙋ бл҃гопрїѧ́тнꙋ и҆ непоро́чнꙋ ко прест҃ѣ́й трⷪ҇цѣ, и҆ не забꙋ́ди на́съ, ны́нѣ творѧ́щихъ па́мѧть твою̀: млⷭ҇ть и҆спросѝ ненави́дѧщымъ, ѻ҆би́дѧщымъ и҆ враждꙋ́ющымъ на на́съ, и҆ и҆зба́ви всѣ́хъ ѿ всѧ́кїѧ ско́рби.
Бг҃оро́диченъ:
Оу҆пра́ви ᲂу҆́мъ мо́й, влⷣчце, ѡ҆бꙋрева́емый страстьмѝ мно́гими: сп҃сѝ, бцⷣе, къ тебѣ̀ прибѣга́ющыѧ, и҆ны́ѧ бо по́мощи, чⷭ҇таѧ, ра́звѣ тебє̀ не зна́емъ.
Пѣ́снь ѕ҃.
І҆рмо́съ: Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве.
Ст҃а́ѧ дꙋша̀ твоѧ̀ ѻ҆би́тель бы́сть бг҃ꙋ, въ не́йже ѻ҆ц҃ъ, сн҃ъ и҆ ст҃ы́й дх҃ъ всели́сѧ: тѣ́мже мо́лимъ тѧ̀, прпⷣбне, наваждє́нїѧ вра̑жїѧ ѿ чтꙋ́щихъ тѧ̀ ѿженѝ, и҆ вѣ̑рнымъ лю́демъ ми́ръ и҆ здра́вїе да́рꙋй.
Вели̑кїѧ твоѧ̑ пꙋсты́нныѧ по́двиги и҆ трꙋды̀ и҆ сла́дость ᲂу҆че́нїѧ твоегѡ̀ почита́емъ, прпⷣбне серафі́ме, и҆́миже мнѡ́гїѧ приходѧ́щыѧ къ тебѣ̀ просвѣти́лъ є҆сѝ и҆ наꙋчи́лъ є҆сѝ воспѣва́ти є҆диносꙋ́щнꙋю трⷪ҇цꙋ.
Житїе́мъ чⷭ҇тымъ послѣ́довалъ влⷣцѣ хрⷭ҇тꙋ̀, тече́нїе до́брое сконча́лъ є҆сѝ, прпⷣбне: къ вѣ̑чнымъ же ѻ҆би́телемъ возше́дъ, бл҃же́нне, зри́ши та́мѡ, ꙗ҆̀же а҆́гг҃ли ви́дѧтъ: тѣ́мже, чтꙋ́ще па́мѧть твою̀, хрⷭ҇та̀ велича́емъ.
Бг҃оро́диченъ:
Ны́нѣ къ тебѣ̀ прибѣга́ю, пречⷭ҇таѧ, сп҃си́ мѧ мл҃твами твои́ми и҆ соблюдѝ: є҆ли̑ка бо хо́щеши, мо́жеши, ꙗ҆́кѡ мт҃и всемогꙋ́щагѡ.
И҆́нъ.
І҆рмо́съ: Мл҃твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ пєча́ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ ꙗ҆́кѡ і҆ѡ́на: ѿ тлѝ, бж҃е, возведи́ мѧ.
Грѣхѡ́въ и҆спо́лнени всѝ є҆смы̀, твоѧ̑ же мл҃твы, прпⷣбне серафі́ме, ꙗ҆́кѡ кади́ло бл҃гово́нно, ко гдⷭ҇еви восхо́дѧтъ. ны́нѣ мо́лимъ тѧ̀: волнꙋ́ющеесѧ въ землѝ на́шей мо́ре ѕла́гѡ невѣ́рїѧ и҆зсꙋшѝ, и҆ сп҃се́нїе дꙋша́мъ на́шымъ ѿ гдⷭ҇а и҆спросѝ.
Бл҃же́нъ вои́стиннꙋ бы́лъ є҆сѝ, прпⷣбне серафі́ме, нището́ю бога́тство и҆ пла́чемъ ра́дость стѧжа́въ, ю҆́же приходѧ́щымъ ѻ҆би́льнѡ подава́лъ є҆сѝ: и҆ ны́нѣ лꙋчы̀ чꙋде́съ и҆сточа́еши, и҆ и҆сцѣлѧ́еши всѣ́хъ, съ вѣ́рою къ тебѣ̀ притека́ющихъ.
Въ пꙋсты́ни кладене́цъ и҆скопа́въ твои́ма рꙋка́ма, прпⷣбне, приходѧ́щыѧ жа́ждꙋщыѧ лю́ди напои́лъ є҆сѝ, и҆ ны́нѣ мнѡ́гимъ нєдꙋ́жнымъ водо́ю кладенца̀ сегѡ̀ бѡлѣ́зни и҆сцѣлѧ́еши: вои́стиннꙋ ди́внаго мл҃твенника и҆ чꙋдотво́рца всѣ̑мъ, прпⷣбне, влⷣка тѧ̀ показа̀.
Бг҃оро́диченъ:
Вои́стиннꙋ тѧ̀ мт҃рь бж҃їю и҆сповѣ́дꙋемъ, и҆́стиннꙋю бцⷣꙋ, твои́мъ бо рождество́мъ тлѣ́ннагѡ ѡ҆сꙋжде́нїѧ и҆зба́вихомсѧ, милосе́рдїѧ ра́ди чл҃вѣколю́бца бг҃а, и҆ къ жи́зни нетлѣ́ннѣй воззва́ни бы́хомъ.
Конда́къ, гла́съ в҃:
Мі́ра красотꙋ̀ и҆ ꙗ҆̀же въ не́мъ тлѣ̑ннаѧ ѡ҆ста́вивъ, прпⷣбне, въ саро́вскꙋю ѻ҆би́тель всели́лсѧ є҆сѝ: и҆ та́мѡ а҆́гг҃льски пожи́въ, мнѡ́гимъ пꙋ́ть бы́лъ є҆сѝ ко сп҃се́нїю: сегѡ̀ ра́ди и҆ хрⷭ҇то́съ тебѐ, ѻ҆́тче серафі́ме, просла́ви, и҆ да́ромъ и҆сцѣле́нїй и҆ чꙋде́съ ѡ҆богатѝ. тѣ́мже вопїе́мъ тѝ: ра́дꙋйсѧ, серафі́ме, прпⷣбне ѻ҆́тче на́шъ.
І҆́косъ:
Ѡ҆ста́вивъ ро́дъ и҆ дрꙋ́ги, бога́тство ꙗ҆́кѡ пра́хъ вмѣни́въ, въ пꙋсты́ни саро́встѣй водвори́лсѧ є҆сѝ: и҆ на стра̑сти ꙗ҆́кѡ безпло́тенъ подвиза́всѧ, а҆́гг҃лѡвъ ликостоѧ́нїѧ сподо́билсѧ є҆сѝ. тѣ́мже дх҃ѡ́внаѧ разꙋмѣ̑нїѧ прїи́мъ, пода́ждь и҆ на́мъ, прпⷣбне, разꙋ́мнѡ пѣ́сньми воспѣ́ти тѧ̀, си́це гл҃го́лющымъ: ра́дꙋйсѧ, серафі́ме бл҃же́нне, нбⷭ҇ный чл҃вѣ́че и҆ земны́й а҆́гг҃ле: ра́дꙋйсѧ, въ любвѝ хрⷭ҇тꙋ̀ подража́телю. ра́дꙋйсѧ, ст҃а́гѡ дх҃а ѻ҆би́тель: ра́дꙋйсѧ, ᲂу҆ныва́ющымъ ве́лїе ра́дованїе. ра́дꙋйсѧ, и҆сто́чниче и҆сцѣле́нїй: ра́дꙋйсѧ, скорбѧ́щымъ дꙋша́мъ сла́дкое ᲂу҆тѣше́нїе. ра́дꙋйсѧ, и҆́нокѡмъ ти́хое приста́нище и҆ ᲂу҆чи́телю премꙋ́дрый: ра́дꙋйсѧ, похвало̀ землѝ рѡссі́йскїѧ: ра́дꙋйсѧ, серафі́ме, прпⷣбне ѻ҆́тче на́шъ.
Пѣ́снь з҃.
І҆рмо́съ: Росода́тельнꙋ ᲂу҆́бѡ пе́щь содѣ́ла а҆́гг҃лъ прпⷣбнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.
Чꙋ́дно житїѐ твоѐ ꙗ҆ви́сѧ, прпⷣбне, бл҃года́тїю бжⷭ҇твеннагѡ дх҃а и҆спо́лнено: бл҃же́ннꙋ вои́стиннꙋ кончи́нꙋ првⷣныхъ прїѧ́лъ є҆сѝ, ѡ҆ хрⷭ҇тѣ̀ ра́дꙋѧсѧ: мы́ же къ просла́вльшемꙋ тѧ̀ взыва́емъ: ѻ҆тє́цъ на́шихъ бж҃е, бл҃гослове́нъ є҆сѝ.
Мно́жество люде́й во ст҃ꙋ́ю ѻ҆би́тель соше́дшесѧ дне́сь, прпⷣбне серафі́ме, чⷭ҇тны́мъ моще́мъ твои̑мъ покланѧ́етсѧ, ѿ ни́хже и҆сцѣлє́нїѧ всѝ почерпа́емъ, (с. 700) непреста́ннѡ зовꙋ́ще: ѻ҆тє́цъ на́шихъ бж҃е, бл҃гослове́нъ є҆сѝ.
Во всю̀ зе́млю и҆зы́де вѣща́нїе сїѐ, ꙗ҆́кѡ въ саро́вѣ чꙋдотво́рецъ пресла́венъ ꙗ҆ви́сѧ, и҆сцѣле́нїй мно́жество и҆сточа́ѧ всѣ̑мъ съ вѣ́рою приходѧ́щымъ и҆ вопїю́щымъ: ѻ҆тє́цъ на́шихъ бж҃е, бл҃гослове́нъ є҆сѝ.
Бг҃оро́диченъ:
Бцⷣе дв҃о, ро́ждшаѧ сло́во па́че сло́ва, зижди́телѧ твоего̀, того̀ молѝ съ прпⷣбнымъ серафі́момъ, поми́ловати дꙋ́шы на́шѧ.
И҆́нъ.
І҆рмо́съ: Ѿ і҆ꙋде́и доше́дше ѻ҆́троцы, въ вавѷлѡ́нѣ и҆ногда̀ вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ.
Поми́лꙋй на́съ, гдⷭ҇и, и҆ ѿ всѧ́кагѡ ѕла̀ дꙋшетлѣ́ннагѡ сохранѝ мл҃твами ᲂу҆го́дника твоегѡ̀, прпⷣбнагѡ серафі́ма, да всѝ ᲂу҆ми́льнѡ вопїе́мъ тѝ: ѻ҆тє́цъ на́шихъ бж҃е, бл҃гослове́нъ є҆сѝ.
Кто̀ не почꙋди́тсѧ, кто̀ не просла́витъ неизслѣ́димꙋю глꙋбинꙋ̀ милосе́рдїѧ твоегѡ̀, гдⷭ҇и, ꙗ҆́кѡ ꙗ҆ви́лъ є҆сѝ всемꙋ̀ мі́рꙋ ᲂу҆го́дника твоего̀, прпⷣбнаго серафі́ма, мл҃твенника те́плаго ѡ҆ на́съ вопїю́щихъ тебѣ̀: ѻ҆тє́цъ на́шихъ бж҃е, бл҃гослове́нъ є҆сѝ.
Бл҃года́рное сїѐ пѣ́нїе, ѿ на́съ приноси́мое тебѣ̀, прпⷣбне серафі́ме, прїимѝ, и҆ всѣ̑мъ на́мъ, пра́зднꙋющымъ ст҃ꙋ́ю па́мѧть твою̀ и҆ покланѧ́ющымсѧ ра́цѣ моще́й твои́хъ, и҆сцѣле́нїе да́рꙋй, вопїю́щымъ: ѻ҆тє́цъ на́шихъ бж҃е, бл҃гослове́нъ є҆сѝ.
Бг҃оро́диченъ:
Ты̀ є҆сѝ, прест҃а́ѧ бцⷣе, прибѣ́жище на́ше и҆ ᲂу҆твержде́нїе: молѝ сн҃а твоего̀ и҆ бг҃а на́шего пода́ти на́мъ сп҃се́нїе и҆ грѣхѡ́въ ѡ҆ставле́нїе.
Пѣ́снь и҃.
І҆рмо́съ: И҆з̾ пла́мене прпⷣбнымъ ро́сꙋ и҆сточи́лъ є҆сѝ и҆ првⷣнагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти, тѧ̀ превозно́симъ во всѧ̑ вѣ́ки.
Плотскі̑ѧ стра̑сти ᲂу҆кроти́въ и҆ мі́рови ᲂу҆мертви́всѧ, гл҃го́лы жи́зни вѣ́чныѧ се́рдцемъ твои́мъ, бл҃же́нне прїѧ́лъ є҆сѝ, наꙋча́ѧ всѣ́хъ къ тебѣ̀ притека́вшихъ взыва́ти: гдⷭ҇а по́йте, дѣла̀, и҆ превозноси́те є҆го̀ во вѣ́ки.
Въ прославле́нїи чⷭ҇тны́хъ моще́й твои́хъ, прпⷣбне, ѻ҆би́тель саро́вскаѧ ра́дости и҆спо́лнисѧ: лю́дїе же всѝ ди́вномꙋ во ст҃ы́хъ свои́хъ бг҃ꙋ взыва́хꙋ: гдⷭ҇а по́йте, дѣла̀, и҆ превозноси́те є҆го̀ во вѣ́ки.
Бл҃года́тїю бжⷭ҇твеннагѡ дх҃а и҆спо́лненъ сы́й, прпⷣбне серафі́ме, вѣ̑рнымъ лю́демъ, творѧ́щымъ ст҃ꙋ́ю па́мѧть твою̀, мл҃твами твои́ми и҆спросѝ грѣхѡ́въ проще́нїе, вопїю́щымъ: дѣ́ти бл҃гослови́те, сщ҃е́нницы воспо́йте, лю́дїе превозноси́те гдⷭ҇а во вѣ́ки.
Бг҃оро́диченъ:
Сп҃се́нїѧ хода́таица на́мъ ꙗ҆ви́ласѧ є҆сѝ, бцⷣе, ро́ждшаѧ сп҃са и҆ влⷣкꙋ всѣ́хъ: тѣ́мже мо́лимъ тѧ̀, сп҃се́нїѧ сподо́би всѣ́хъ пѣсносло́вѧщихъ тѧ̀ вѣ́рнѡ во всѧ̑ вѣ́ки.
И҆́нъ.
І҆рмо́съ: Цр҃ѧ̀ нбⷭ҇наго, є҆го́же пою́тъ вѡ́и а҆́гг҃льстїи, хвали́те и҆ превозноси́те во всѧ̑ вѣ́ки.
Добродѣ́тельномꙋ житїю̀ твоемꙋ̀, прпⷣбне, позави́дѣвъ вра́гъ вселꙋка́вый, восхотѣ̀ запѧ́тїе тебѣ̀ сотвори́ти: ты́ же, бл҃года́тїю бж҃їею и҆ мл҃твами влⷣчцы посрами́въ того̀, бг҃а просла́вилъ є҆сѝ, пѣсносло́вѧ: гдⷭ҇а по́йте, дѣла̀, и҆ превозноси́те є҆го̀ во вѣ́ки.
Ꙗ҆́кѡ мо́лнїѧ блиста́ющисѧ свѣ́титсѧ на поднебе́снѣй, та́кѡ и҆ вѣща̑нїѧ ѡ҆ твои́хъ, прпⷣбне, чꙋдесѣ́хъ во всю̀ зе́млю и҆зыдо́ша. мы́ же, дивѧ́щесѧ сла́вѣ твое́й, вопїе́мъ: дѣ́ти бл҃гослови́те, сщ҃е́нницы воспо́йте, лю́дїе превозноси́те гдⷭ҇а во вѣ́ки.
Бл҃гослови́мъ ѻ҆ц҃а̀ и҆ сн҃а и҆ ст҃а́го дх҃а, гдⷭ҇а.
Сꙋ́етными и҆ стра́стными помышлє́нїи мѧтꙋ́щїйсѧ ᲂу҆́мъ на́шъ и҆сцѣлѝ, прпⷣбне, вѡ́лны ѕла́гѡ невѣ́рїѧ въ землѝ на́шей ᲂу҆кротѝ, разсла́блєннаѧ жите́йскими попечє́нїи сердца̀ на̑ша ᲂу҆крѣпѝ, да сла́вимъ хрⷭ҇та̀ содѣ́телѧ во всѧ̑ вѣ́ки.
И҆ ны́нѣ, бг҃оро́диченъ:
Ра́дꙋйсѧ, прⷭ҇то́ле гдⷭ҇ень ѻ҆гнезра́чный: ра́дꙋйсѧ, зарѐ невеще́ственнагѡ блиста́нїѧ: ра́дꙋйсѧ, ѻ҆́блаче возсїѧ́вшагѡ сл҃нца првⷣнагѡ, хрⷭ҇та̀ сп҃са на́шегѡ, є҆го́же превозно́симъ во всѧ̑ вѣ́ки.
Пѣ́снь ѳ҃.
І҆рмо́съ: Бг҃а чл҃вѣ́кѡмъ невозмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю же, всечⷭ҇таѧ, ꙗ҆ви́сѧ чл҃вѣ́кѡмъ сло́во воплоще́но: є҆го́же велича́юще, съ нбⷭ҇ными вѡ́и тѧ̀ ᲂу҆бл҃жа́емъ.
Недосто́йными ᲂу҆сты̀ воспѣва́емое тебѣ̀ ма́лое хвале́нїе на́ше, прпⷣбне, не пре́зри, но прїимѝ: и҆ всѣ́хъ прославлѧ́ющихъ тѧ̀ ѡ҆свѧтѝ, бѣ́дъ и҆ напа́стей и҆ вѣ́чнагѡ мꙋче́нїѧ и҆зба́ви, да тѧ̀ при́снѡ воспѣва́емъ.
Мра́зъ нощны́й и҆ ва́ръ дневны́й во ᲂу҆едине́нїи пꙋсты́ннѣмъ до́блественнѣ претерпѣ́въ, до́мъ премꙋ́дрости бж҃їѧ бы́лъ є҆сѝ и҆ къ сїѧ́нїю невече́рнемꙋ восте́клъ є҆сѝ: молѝ сп҃сти́сѧ на́мъ.
Сла́витсѧ дне́сь ѻ҆би́тель, въ не́йже ꙗ҆ре́мъ хрⷭ҇то́въ прїѧ́ти и҆зво́лилъ є҆сѝ: та́мѡ бо въ пꙋсты́ни дни̑ твоѧ̑ пребы́лъ є҆сѝ, и҆ твои́ми ᲂу҆че́ньми мнѡ́ги приходѧ́щыѧ къ тебѣ̀ вразꙋми́въ, наꙋчи́лъ є҆сѝ бы́ти ча̑да цр҃кве хрⷭ҇то́вы.
Бг҃оро́диченъ:
Ты̀ є҆сѝ крѣ́пость на́ша, ты̀ є҆сѝ похвала̀ и҆ ра́дованїе, храни́тельница на́ша, застꙋпле́нїе, прибѣ́жище и҆ предста́тельница непобѣди́маѧ: пречⷭ҇таѧ бцⷣе, сп҃сѝ рабы̑ твоѧ̑.
И҆́нъ.
І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ, сп҃се́ннїи тобо́ю, дв҃о чⷭ҇таѧ, съ безпло́тными ли̑ки тѧ̀ велича́юще.
Вєли́кимъ ѻ҆тцє́мъ, дре́вле въ постѣ̀ и҆ по́двизѣхъ просїѧ́вшымъ, поревнова́въ, прпⷣбне, чрез̾ всѧ̑ дни̑ живота̀ твоегѡ̀ въ мл҃твѣ, слеза́хъ и҆ трꙋдѣ́хъ пребы́лъ є҆сѝ, до́ндеже дости́глъ є҆сѝ нбⷭ҇ныѧ ѻ҆би́тели: тѣ́мже тѧ̀ досто́йнѡ ᲂу҆бл҃жа́емъ.
Крѣ́пкою си́лою хрⷭ҇то́съ бг҃ъ тѧ̀ препоѧ́са и҆ ᲂу҆крѣпѝ побѣжда́ти кѡ́зни де́мѡнскїѧ, прпⷣбне. тѣ́мже ны́нѣ мо́лимъ тѧ̀: молѝ чл҃вѣколю́бца бг҃а, да и҆зба́витъ всѣ́хъ на́съ ѿ вра́жїихъ нахожде́нїй и҆ и҆скꙋше́нїй, и҆ сп҃се́тъ дꙋ́шы на́шѧ.
Въ болѣ́знехъ и҆ ско́рбехъ на́шихъ къ тебѣ̀, прпⷣбне, прибѣга́емъ и҆ и҆з̾ глꙋбины̀ дꙋше́вныѧ вопїе́мъ: бꙋ́ди на́мъ небꙋ́рное приста́нище и҆ болѣ́знемъ ско́рый цѣли́тель, и҆ и҆зба́ви на́съ ѿ всѧ́кагѡ недꙋ́га и҆ нꙋ́жды, да тѧ̀ непреста́ннѡ велича́емъ.
Бг҃оро́диченъ:
Є҆ди́наго ѿ ст҃ы́ѧ трⷪ҇цы, сло́ва и҆ сн҃а родила̀ є҆сѝ, дв҃о пречⷭ҇таѧ, є҆го́же съ прпⷣбными и҆ првⷣными молѝ ѡ҆ рабѣ́хъ твои́хъ, вѣ́рою просѧ́щихъ грѣхѡ́въ проще́нїѧ.
Свѣти́ленъ.
Подо́бенъ: Жєны̀, ᲂу҆слы́шите:
Прїиди́те, всѝ вѣ́рнїи, сщ҃е́нными пѣ́сньми восхва́лимъ ди́внаго въ чꙋдесѣ́хъ прпⷣбнаго серафі́ма, но́ваго свѣти́льника рѡссі́йскїѧ землѝ, а҆́гг҃лѡмъ собесѣ́дника и҆ те́плаго мл҃твенника къ бг҃ꙋ ѡ҆ чтꙋ́щихъ ст҃ꙋ́ю па́мѧть є҆гѡ̀.
Сла́ва, и҆ ны́нѣ, предпра́зднства, и҆лѝ бг҃оро́диченъ:
По бз҃ѣ ᲂу҆пова́нїе и҆мꙋ́ще на тѧ̀, пречⷭ҇таѧ бцⷣе, мо́лимъ ти сѧ: ро́ждшагосѧ и҆з̾ тебє̀ ᲂу҆молѝ дарова́ти ми́ръ вселе́ннѣй и҆ ве́лїю млⷭ҇ть.
На хвали́техъ стїхи̑ры на ѕ҃, предпра́зднства г҃ и҆ прпⷣбномꙋ г҃.
А҆́ще же нѣ́сть предпра́зднства, прпⷣбномꙋ на д҃, гла́съ и҃.
Приспѣ̀ всечⷭ҇тны́й пра́здникъ ѻ҆би́тели саро́вскїѧ, па́мѧть прпⷣбнагѡ серафі́ма, є҆мꙋ́же ны́нѣ си́це возопїи́мъ: ра́дꙋйсѧ, по́стникѡмъ свѣти́ло и҆ ᲂу҆твержде́нїе, и҆́нокѡмъ ѕвѣздо̀, ꙗ҆́коже волхвѡ́мъ, показꙋ́ющаѧ пꙋ́ть въ нбⷭ҇ныѧ ѻ҆би́тєли, сщ҃е́нникѡмъ похвало̀ пресла́внаѧ, любвѐ и҆ цѣломꙋ́дрїѧ и҆сто́чниче неизсѧка́емый, свѣти́льниче пресвѣ́тлый дх҃о́внагѡ разсꙋжде́нїѧ: ра́дꙋйсѧ, пра́вило добродѣ́телемъ вели́кое.
Два́жды.
Бл҃же́нне ѻ҆́тче серафі́ме, хрⷭ҇то́ви вои́стиннꙋ послѣ́довалъ є҆сѝ, братолю́бїемъ и҆ неѕло́бїемъ всѣ́хъ къ себѣ̀ привлека́ѧ, кро́тостїю же и҆ смире́нїемъ мнѡ́ги добродѣ́тельномꙋ пꙋтѝ наꙋча́ѧ. тѣ́мже любо́вїю па́мѧть твою̀, прпⷣбне серафі́ме, ᲂу҆блажа́емъ.
Въ пꙋсты́ню всели́лсѧ є҆сѝ, прпⷣбне, и҆ та́мѡ и҆спо́лнивсѧ дх҃о́вныѧ премꙋ́дрости, на высотꙋ̀ добродѣ́тели возше́лъ є҆сѝ. тѣ́мже вопїе́мъ тѝ: ра́дꙋйсѧ, цр҃ко́вное ᲂу҆краше́нїе, сщ҃е́нникѡмъ до́брое ᲂу҆тѣше́нїе, и҆́нокѡмъ бл҃голѣ́пїе и҆ похвало̀, серафі́ме бл҃же́нне: молѝ хрⷭ҇та̀ бг҃а ми́ръ вселе́ннѣй дарова́ти и҆ дꙋша́мъ на́шымъ ве́лїю млⷭ҇ть.
Сла́ва, гла́съ ѕ҃:
Прїиди́те и҆́нокѡвъ собо́ри и҆ по́стникѡвъ сосло́вїе, прїиди́те хрⷭ҇тоимени́тыхъ люде́й мнѡ́жества, пѣ́сньми и҆́стиннаго по́стника почти́мъ, вопїю́ще: ра́дꙋйсѧ, по стопа́мъ влⷣки хрⷭ҇та̀ ᲂу҆́зкимъ пꙋте́мъ ᲂу҆правлѧ́емый, и҆ притека́ющымъ къ тебѣ̀ въ бѣда́хъ и҆ ско́рбехъ ско́рый помо́щниче, и҆ сп҃се́нїѧ хода́таю преди́вный: ра́дꙋйсѧ, да́ромъ прⷪ҇ро́чества ᲂу҆кра́шенный, прорица́ѧй ꙗ҆́кѡ настѡѧ́щаѧ грѧдꙋ̑щаѧ: моли́сѧ, прпⷣбне серафі́ме, ѡ҆ чтꙋ́щихъ вѣ́рою и҆ любо́вїю ст҃ꙋ́ю па́мѧть твою̀.
И҆ ны́нѣ, предпра́зднства, и҆лѝ бг҃оро́диченъ:
Бцⷣе, ты̀ є҆сѝ лоза̀ и҆́стиннаѧ, возрасти́вшаѧ на́мъ пло́дъ живота̀: тебѣ̀ мо́лимсѧ, моли́сѧ, влⷣчце, со ст҃ы́ми а҆пⷭ҇лы, поми́ловати дꙋ́шы на́шѧ.
Славосло́вїе вели́кое, и҆ ѿпꙋ́стъ.
На лїтꙋргі́и.
Бл҃жє́нны ѿ канѡ́на пе́рвагѡ пѣ́снь г҃-ѧ, и҆ втора́гѡ канѡ́на пѣ́снь ѕ҃-ѧ. Прокі́менъ, гла́съ з҃: Чⷭ҇тна̀ пред̾ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇ви ѡ҆ всѣ́хъ, ꙗ҆̀же воздаде́ ми; А҆пⷭ҇лъ къ гала́тѡмъ, зача́ло сг҃і. Є҆ѵⷢ҇лїе ѿ лꙋкѝ, зача́ло к҃д, и҆лѝ ѿ матѳе́а, зача́ло г҃. Прича́стенъ: Въ па́мѧть вѣ́чнꙋю бꙋ́детъ првⷣникъ.