17-й день

Святы́я великому́ченицы Мари́ны

Преподо́бнаго Ирина́рха, игу́мена Солове́цкаго

Преподо́бнаго Леони́да Устьнеду́мскаго

ВЕ́ЧЕР

На Го́споди, воззва́х: стихи́ры на 6, глас 8.

Подо́бен: О, преславнаго чудесе́:

О, пресла́внаго чудесе́!/ Превознесе́нную горды́ню/ зе́млю и мо́ре потреби́ти ре́кшаго/ к земли́ смири́ла есть/ млада́ отрокови́ца и всенепоро́чная,/ кова́рствия его́ победи́вши./ О, си́лы Креста́ и благода́ти!/ я́же нам всю утверди́ я́ве не́мощь.

Му́ченице Мари́но прехва́льная,/ ни муче́ния тя огнь, ни пи́щи наслажде́ние,/ ни мирски́я ра́дости, ни красота́ ю́ности/ я́же ко Христу́ любве́ отлучи́,/ жела́ющую красоты́, ю́же па́че ума́,/ честна́го Жениха́ твоего́ получи́ти,/ ея́же сподо́билася еси́, Богоблаже́нная.

Му́ченице Мари́но всесла́вная,/ в Небе́сных оби́телех всели́вшися досто́йно/ с деви́ческими чи́нми/ и му́ченик во́инствы,/ творя́щих ве́рою па́мять твою́/ и приступа́ющих ве́рно покро́ву твоему́/ спаса́й моли́твами твои́ми/ и согреше́ний оставле́ние у Бо́га испроси́, и избавле́ние,/ и ве́лию ми́лость.

Сла́ва, глас 2:

Во гра́де Бо́га на́шего, в горе́ святе́й Его́,/ ту всели́ся свята́я,/ свещу́ неугаси́му соблю́дши,/ услы́шим де́выя похвалу́./ О де́вство, Це́ркви Бо́жия!/ О де́вство, му́чеником сла́ва!/ О де́вство, А́нгелом соприча́стниче!

И ны́не, Богоро́дичен или́ Крестобогоро́дичен.

Подо́бен: Егда́ от Дре́ва:

Дре́ву Кре́стному Тя, Иису́се,/ пригвожде́на зря́щи Неискусобра́чная,/ пла́чущи, глаго́лаше:/ Ча́до сла́дкое,/ почто́ оста́вил еси́ Мене́, ро́ждшую Тя еди́ну?/ Све́те Непристу́пный Пребезнача́льнаго Отца́,/ потщи́ся и просла́вися,/ я́ко да сла́ву получа́т Боже́ственную/ и́же Боже́ственныя стра́сти Твоя́ сла́вящии.

На стихо́вне Окто́иха. Сла́ва, глас 2:

Во гла́се ра́дования и во псалме́х восклица́ния/ воспои́м Мари́ну му́ченицу,/ я́ко низложи́ на зе́млю и́дольскую пре́лесть/ и сопроти́внаго врага́ му́жески под но́зе свои́ подложи́./ Те́мже и, сконча́вшися, на Небеса́ возлете́,/ на главе́ вене́ц нося́щи и взыва́ющи:/ Тебе́, Женише́ мой, жела́ю/ и, жела́ния любо́вь иму́щи ,/ за Тя плоть мою́ огню́ преда́х,/ да вселю́ся у́бо в ве́чныя Твоя́ оби́тели,/ иде́же есть веселя́щихся жили́ще.

И ны́не, Богоро́дичен или́ Крестобогоро́дичен.

Подо́бен: Егда́ от Дре́ва:

Егда́ Нескве́рная А́гница ви́де Своего́ А́гнца,/ на заколе́ние я́ко Челове́ка во́лею влеко́ма,/ пла́чущи, глаго́лаше:/ безча́дствовати Мя ны́не тщи́шися, Христе́, ро́ждшую Тя,/ что́ сие́ сотвори́л еси́, Изба́вителю вся́ческих?/ Оба́че воспева́ю и сла́влю Твою́,/ ю́же па́че ума́ и сло́ва,/ кра́йнюю бла́гость, Человеколю́бче.

Тропа́рь, глас 4:

А́гница Твоя́, Иису́се, Мари́на/ зове́т ве́лиим гла́сом:/ Тебе́, Женише́ мой, люблю́,/ и, Тебе́ и́щущи, страда́льчествую,/ и сраспина́юся, и спогреба́юся креще́нию Твоему́,/ и стражду́ Тебе́ ра́ди,/ я́ко да ца́рствую в Тебе́,/ и умира́ю за Тя́, да и живу́ с Тобо́ю,/ но я́ко же́ртву непоро́чную приими́ мя, с любо́вию поже́ршуюся Тебе́./ Тоя́ моли́твами,/ я́ко Ми́лостив, спаси́ ду́ши на́ша.

НА У́ТРЕНИ

Кано́на о́ба Окто́иха без му́ченичнов и святы́я на 6, его́же краегране́сие: Христо́ву де́ву му́ченицу неве́сту пе́сньми пою́. Глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Лику́ющи, му́ченице, о Бо́зе и луча́ми исполня́ема от Него́,/ зарю́ мне пода́ждь светоно́сну твои́ми моли́твами, до́брая де́во.

Теку́щих и нестоя́тельное и тле́нное,/ му́дрым умо́м обложе́на, му́ченице Христо́ва, презре́ла еси́ разу́мно/ и пра́ведных сподо́билася еси́ вышния све́тлости.

Ра́бски прихожду́ к тебе́, честна́я,/ твои́ми мольба́ми жите́йских мя бед спаси́, му́ченице страстоно́сице,/ и страсте́й мои́х утиши́ смуще́ние.

Му́дростию и благода́тию просве́щся ум твой, Мари́но,/ мучи́телей преще́ния не устраши́лася еси́, му́ченице Спа́сова,/ Боже́ственною си́лою укрепля́ема.

Богоро́дичен: Стезю́ показа́ла еси́ жи́зни, Жизнь су́щую заче́нши/ и пло́тски ро́ждши Сию́, Богома́ти,/ и у́зы сме́ртныя расто́ргла еси́.

Песнь 3

Ирмо́с: Несть свят я́ко Госпо́дь,/ и несть пра́веден, я́ко Бог наш,/ Его́же пое́т вся тварь:/ несть пра́веден, па́че Тебе́, Го́споди.

Ни огнь, ниже́ ра́ны, ни ме́чное сече́ние,/ ни мучи́телей суровство́, ни смерть же, ни звере́й свире́пство/ Боже́ственныя отлучи́ тя любве́, прехва́льная.

Была́ еси́ непоколеби́м и непреклони́м во вре́мя обстоя́ния столп, всесла́вная,/ благоче́стия основа́ние положе́но ве́ры на ка́мени, преблаже́нная.

Де́ва в му́ченицах была́ еси́,/ в де́вах непобеди́ма му́ченица была́ еси́ ты, Христу́ уневе́стившися,/ сугу́б тебе́ подаю́щу вене́ц, всенепоро́чная.

Святы́х крове́й твои́х, до́брая де́во, то́ки излива́емы всю угаси́ша и́дольскую лесть,/ и собо́р привела́ еси́ му́ченик Жениху́ твоему́.

Богоро́дичен: Укре́пльшеся благода́тию, Богоро́дицу Тя единому́дренно сла́вим,/ плоть бы́вшаго, е́же бы́ти всем Даю́щаго, родила́ еси́/ и мир обнови́ла еси́.

Ин конда́к, глас 3.

Подо́бен: Де́ва днесь:

Мари́на днесь вра́жию главу́ сокруша́ет,/ побе́ды вене́ц с Небесе́ прие́мши./ Его́же бо проро́цы удержа́ти не возмого́ша,/ того́ она́, связа́вши, уязви́./ Сего́ ра́ди показа́ся му́чеником украше́ние, вку́пе же и похвала́.

Седа́лен, глас 4.

Подо́бен: Ско́ро предвари́:

Наста́, празднолю́бцы, све́тло торжество́, па́мять сла́вныя страстоно́сицы Христо́вы,/ веселя́щи вся́ческая, сия́ющи заря́ми чуде́с в ми́ре,/ нося́щи челове́ком непреста́нную благода́ть,/ тоя́ моли́твами, Христе́, спаси́ ду́ши на́ша.

Сла́ва, и ны́не, Богоро́дичен:

Де́во Всенепоро́чная, Я́же Пресу́щнаго Бо́га ро́ждшая,/ со Безпло́тными Того́ непреста́нно моли́/ оставле́ние прегреше́ний и исправле́ние жития́ дати нам пре́жде конца́,/ ве́рою и любо́вию пою́щим Тя по до́лгу, еди́на Всепе́тая.

Крестобогоро́дичен:

На Кресте́ Тя возвы́шена я́ко узре́ Пречи́стая Ма́ти Твоя́, Сло́ве Бо́жий,/ ма́терски рыда́ющи, веща́ше:/ что́ но́вое и стра́нное сие́ чу́до,/ Сы́не Мой?/ Ка́ко, Жизнь всех, вкуша́еши сме́рти, оживи́ти ме́ртвыя хотя́, я́ко Милосе́рд?

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты моя́ Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твоея́ сла́ва, Человеколю́бче.

Боголе́пно бысть вои́стинну житие́ твое́, А́нгелом яви́ся любе́зно,/ де́монскому же во́инству и слуга́м их свире́пству непристу́пно показа́ся./ Христу́ бо вопия́ла еси́:/ си́ле Твое́й сла́ва, Человеколю́бче.

На земли́ подвиза́вшися, всебога́тая, и вре́менныя боле́зни претерпе́вши,/ на Небесе́х ны́не воздая́ния от Влады́ки прие́млеши, му́ченице непобеди́мая,/ во ве́ки безконе́чныя, со А́нгелы вопию́щи:/ си́ле Твое́й сла́ва, Человеколю́бче.

Ны́не о тебе́ ра́дуется деви́ческий лик, ны́не му́ченик собо́р весели́тся,/ ны́не и мно́жество благочести́вых, собра́вшеся, лику́ют, ра́дующеся,/ Влады́це вопию́ще гла́сы немо́лчными:/ си́ле Твое́й сла́ва, Человеколю́бче.

Вся добра́ еси́, де́во, и нескве́рная,/ яви́лася еси́ неве́ста всенепоро́чная, душа́м добро́ты рачи́тельна,/ мучи́тельными разжже́нии, всеблаже́нная, яви́лася еси́ светле́йши, Христу́ пою́щи:/ си́ле Твое́й сла́ва, Человеколю́бче.

Богоро́дичен: Еди́на чиста́ и по рождестве́ пребыла́ еси́:/ Ты бо еди́на Сло́во, Ипоста́сное Отцу́, Сопресто́льна Сы́на, из Тебе́ воплоще́нна, родила́ еси́, Богоневе́сто,/ и но́сиши на руку́ Невмести́маго все́ми и вся концы́ Содержа́щаго.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

На суди́щи страда́лец тече́ние кре́пко, отрокови́це, прешла́ еси́./ Боже́ственное бо жела́ние же́нскую не́мощь укрепи́,/ проявле́нно показу́я, промышле́нием страда́ния самодержа́вна му́ченица су́щи.

Ка́пли твои́х крове́й, му́ченице, иска́пающе, багряни́цу многоце́нну/ и нетле́ннаго весе́лия ри́зу истка́ша,/ е́юже ны́не, Богому́драя, на Небесе́х оде́яна, у́мно Жениху́ предстои́ши.

У́зами моли́тв твои́х, отрокови́це, всехва́льнаго зми́я связа́вши,/ горды́ню пе́рвее превознесе́нную к земли́ смири́ла еси́:/ испо́лнити бо весть, я́ко Благ Всеве́дец, Того́ боя́щихся во́лю.

Превозноси́мыя тя сла́вы Боже́ственными венцы́ вои́стинну украси́ Жени́х, Сло́во,/ Его́ ра́ди страда́вшую обожа́я и огня́ пла́мень/ и бие́ния ран терпели́вно претерпе́вшую, сла́вная.

Богоро́дичен: Очища́емо зря́ще де́вства Твоего́ рождество́м, Всенепоро́чная,/ земны́х естество́ от пе́рвыя кля́твы, сла́вим из Тебе́ Рожде́ннаго, единоча́даго за милосе́рдие,/ Его́же моли́, Де́во, спасти́ нас.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Возложе́на Христу́, яви́лася еси́ добра́ и нескве́рна, и я́ко исто́чник чист,/ и вертогра́д многопло́ден, Мари́но всесла́вная,/ и бли́жняя неве́сто, и рай неокра́дом.

Отрокови́ца всеблаголе́пна вслед Тебе́ после́дова,/ теку́щи ко благово́нию ми́ра Твоего́, Влады́ко,/ пречи́стей стра́сти Твое́й терпе́нием подо́бящися и пречестне́й.

Претерпе́ла еси́ му́жески по́двиги, му́ченице многострада́льная,/ и пе́рвее умовре́дно вельми́ хва́лящагося с шу́мом погуби́ла еси́ кре́стною си́лою,/ о Мари́но господоимени́тая!

Богоро́дичен: Мари́е, чи́стый и пречи́стый сосу́де всех Соде́теля,/ души́ очисти́лище, пода́ждь ми сле́зы/ и услы́ши мольбу́ мою́, Всенепоро́чная.

Конда́к, глас 3.

Подо́бен: Де́ва днесь:

Де́вства добро́тами преиспещре́нна, де́во,/ нетле́нными венцы́ венча́лася еси́, Мари́но,/ кровьми́ же му́ченичества обагре́на,/ чудесы́ просвети́вшися исцеле́ний,/ благоче́стно, му́ченице, прия́ла еси́ по́честь побе́ды твоего́ страда́ния.

И́кос:

Жениху́ Христу́ раче́нием се́рдца твоего́ от младе́нства, честна́я, разже́гшися,/ потекла́ еси́, я́ко еле́нь, жа́ждущи исто́чником приснотеку́щим, девому́ченица,/ страда́нием же тебе́ саму́ю соблю́дша,/ в нетле́нном су́щно Зижди́теля твоего́, неве́сто благосла́вная, черто́зе дости́гла еси́,/ укра́шена и упещре́нна, венцено́сица победи́тельная, свещено́сица благоцвету́щая,/ нетле́ннаго неве́стника получи́вши и прие́мши, я́ко зла́то,/ по́честь побе́ды твоего́ страда́ния.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

Свет непристу́пный, Мари́но, просвети́ досто́йно ду́шу твою́ / и свеща́ми све́тлыми озари́ пою́щия:/ благослове́н еси́, Го́споди Бо́же, во ве́ки.

Взя́тся к Боже́ственней вои́стинну высоте́, высо́к бо ты стяжа́ла еси́ ра́зум/ и в черто́г све́тел всели́лася еси́, вопию́щи:/ благослове́н еси́, Го́споди Бо́же, во ве́ки.

Неве́ста бли́жняя Влады́це показа́лася еси́, Мари́но Богоно́сная,/ и я́ко му́ченица непобеди́ма Тому́ зове́ши:/ благослове́н еси́, Го́споди Бо́же, во ве́ки.

Богоро́дичен: Князь не ктому́ от Иу́ды оскуде́,/ из Тебе́ бо Влады́ка, язы́ков наде́жда, возсия́ несказа́нно:/ благослове́н, Пречи́стая, Плод Твоего́ чре́ва.

Песнь 8

Ирмо́с: Мусики́йским орга́ном согласу́ющим/ и лю́дем безчи́сленным, покланя́ющимся о́бразу в Деи́ре,/ три о́троцы не повину́вшеся,/ Го́спода воспева́ху/ и славосло́вяху во вся ве́ки.

Тверд нрав стяжа́вши, тве́рдо страда́ния терпи́ше,/ и венцы́ побе́дными венча́ся, пою́щи:/ Го́спода по́йте и превозноси́те Его́ во ве́ки.

Та́йный, Мари́но, тебе́ черто́г душ Жени́х, Бог сло́во, угото́ва на Небесе́х,/ Его́же ви́дящи, зове́ши:/ Го́спода по́йте и превозноси́те Его́ во ве́ки.

Доброде́тельми разли́чными укра́шена, даро́в мно́жайших сподо́бися,/ кра́йнее жела́ний зря́щи и вопию́щи:/ Го́спода по́йте и превозноси́те Его́ во ве́ки.

Спасе́ния яви́лася еси́, страстоте́рпице, мно́гим вина́/ и му́ченик собо́ры Христу́ привела́ еси́, согла́сно вопию́щи:/ Го́спода по́йте и превозноси́те Его́ во ве́ки.

Богоро́дичен: Очище́ние нам, Богороди́тельнице, Тобо́ю даде́ся:/ Ты бо еди́на отдала́ еси долг, всех заче́нши Го́спода, Де́во,/ Его́же превозно́сим во ве́ки.

Песнь 9

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.

Мари́но, му́ченице Христо́ва,/ жизнь ве́чную и неги́бнущую в ра́йстей пи́щи приле́жно вои́стинну объя́ла еси́,/ обраща́ющееся бо без вре́да ору́жие премину́ла еси́,/ му́ченическими кровьми́ сия́ющи издале́ча, до́брая де́во.

Попали́ всеве́щную и любомирску́ю, де́во, мысль жела́ние Боже́ственное/ и тверде́йшу показа́ му́ченицу,/ де́вственными сия́ньми пе́рвее сия́ющую, Мари́но всему́драя./ Те́мже вси тя, ве́рнии, ублажа́ем.

Разреши́ ми, неве́сто избра́нная, согреше́ний плени́цы моли́твами твои́ми,/ и рукописа́ние грехо́вное расто́ргни, му́ченице,/ предстоя́щи благоле́пно Христу́, Жениху́ твоему́ Всеще́дрому,/ и страсте́й мои́х мглу разори́.

Преста́ шата́ние лю́тое льсти́ваго:/ се бо отрокови́ца, забыва́ющи же́нское естество́, пострада́,/ и на него́ све́тло побе́ду взе́мши, и ны́не прама́тернее назда́ я́ве паде́ние.

Богоро́дичен: Зре́лу пожина́ю жизнь, невреди́м дре́вом ра́зума:/ Ты бо, Пресвята́я, жи́зни дре́во, Христа́ прозябла́ еси́, вхо́ды жи́зни всем показа́вшаго./ Те́мже Тя, Всечи́стая, благоче́стно Богоро́дицу пропове́даем.

Свети́лен.

Подо́бен: Жены́, услы́шите:

Укре́пльшися, до́брая де́во, Кресто́м Го́спода твоего́,/ мучи́телей погуби́ла еси́ горды́ню, пострада́вши, му́ченице, му́жески,/ и от Христа́ прия́ла еси́ по́чести побе́ды, всему́драя Мари́но господоимени́тая,/ о нас моля́щи, тя почита́ющих любо́вию.

Богоро́дичен:

Стоя́ще о́крест Тебе́ де́вы Богому́дрыя, Богороди́тельнице Мари́е,/ я́ко Цари́це ро́да, Твоему́ Сы́ну приведо́шася,/ женихоле́пно, Пречи́стая, я́ко Царю́ вся́ческих,/ Его́же, Ма́ти Де́во Отрокови́це, о нас умоли́.

На стихо́вне, Окто́иха. Сла́ва, глас 1:

Я́ко на ка́мени тве́рде испове́дания Бо́жия утве́рждшися,/ Мари́но прехва́льная,/ уби́йцу врага́ в про́пасть потопи́ла еси́/ и вене́ц побе́дный досто́йно прия́ла еси́.

И ны́не, Богоро́дичен или́ Крестобогоро́дичен.

Подо́бен: Всехва́льнии му́ченицы:

Своего́ А́гнца/ А́гница и Непоро́чная Влады́чица/ на Кресте́ я́ко ви́де, зра́ка не иму́ща, ниже́ добро́ты,/ увы́ Мне,– рыда́ющи, глаго́лаше,–/ где добро́та Твоя́ за́йде, Сладча́йший?/ Где благоле́пие?/ Где благода́ть блиста́ющая о́браза Твоего́,/ Сы́не Мой любе́знейший?

НА ЛИТУРГИ́И

Блаже́нны Окто́иха, на 4. И святы́я песнь 3-я, на 4. Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Апо́стол к Кори́нфяном, зача́ло 181. Аллилу́ия, глас 1: Терпя́, потерпе́х Го́спода, и внят ми. Ева́нгелие от Луки́, зача́ло 33. Прича́стен: В па́мять ве́чную бу́дет пра́ведник:

Святая великомученица Марина пострадала за веру в Христа во времена гонения на христиан императора Диоклитиана (284–305). Она родилась в Антиохии Писидийской в Малой Азии в семье языческого жреца Едесия. Еще будучи грудным ребенком, святая Марина лишилась матери, и отец отдал ее на воспитание кормилице, жившей в селении, расположенном в окрестностях Антиохии.

Во время гонения на христиан многие клирики и учители слова Божия скрывались в пещерах, в пустынях и в небольших селениях. Они продолжали учить вере Христовой и обращали язычников к Истинному Богу. Когда Марине исполнилось двенадцать лет, она услышала от одного из таких проповедников о Христе Спасителе и уверовала в Него. Узнав, что святая Марина – христианка, отец отрекся от нее. В течение трех лет святая отроковица укреплялась в вере и любви ко Господу. Подражая святым мученикам, она решила принять святое Крещение через пролитие своей крови за Господа Иисуса Христа.

Однажды святая Марина вышла в поле, чтобы посмотреть овец своего отца. В это время в Антиохию ехал епарх (правитель) восточных областей Олимврий, который был жестоким гонителем христиан. Увидев святую Марину, он был очарован красотой пятнадцатилетней девушки и предложил ей стать его женой. Во время беседы с епархом святая Марина простосердечно отвечала на вопросы и не скрыла, что она христианка. Тогда Олимврий приказал своим слугам вести святую Марину с собой в город. Там он отдал ее на попечение знатной женщине, надеясь, что та уговорит святую Марину отречься от Христа. На другой день, призвав святую, епарх сам пытался уговорить ее принести жертвы идолам, обещал ей почести и богатство, но святая Марина отвергла все предложения епарха.

Тогда ее подвергли страшным пыткам: сначала избили, а затем, пригвоздив к доске, стали строгать тело трезубцами до тех пор, пока не показались кости. Народ плакал от жалости, сам епарх не смог смотреть на такие истязания и закрыл лицо руками. Святую Марину бросили в глубокую и мрачную темницу, где она всю ночь молилась, чтобы Господь исцелил ее растерзанное тело и обновил душу святым Крещением. В темнице святую постигло искушение: ей явился диавол в образе чудовища. Но святая Марина не поколебалась в вере и уповании на милость Божию. Господь послал ей утешение через видение святого Креста и обетование блаженной жизни. Благодатью Христовой святая Марина была исцелена от ран.

Утром Олимврий, увидев святую невредимой, стал убеждать ее принести благодарственные жертвы идолам за исцеление, но мученица вновь исповедала себя христианкой. Тогда ее подвесили и стали опалять тело огнем. Во время пыток святая молилась Господу: «Господи, Ты сподобил меня за Имя Твое пройти через огонь, сподоби меня пройти и через воду святого Крещения». Услышав, что святая Марина говорит о воде, епарх приказал утопить ее в большом чане. Когда святую Марину стали топить, земля содрогнулась, оковы спали с рук мученицы, над ее головой засиял необыкновенный свет, в котором кружила голубица с золотым венцом в клюве. Затем все увидели восходящий к небу огненный столп, на котором сиял крест. Голубица взлетела и села на крест. В это время раздался голос свыше: «Мир тебе, Христова невеста Марина! Ныне получишь неувядаемый венец от Господа и почиешь в Царстве Небесном со святыми!» Пораженный этим чудом народ стал вместе с великомученицей Мариной славить Святую Троицу. Разгневанный епарх приказал казнить святую мученицу и тех, кто уверовал в Господа. По дороге на казнь святая Марина молилась о всех и укрепляла народ в вере во Христа Спасителя.

Страдания святой великомученицы Марины описаны очевидцем Феотимом. В тот же день вместе с ней были обезглавлены пятнадцать тысяч мучеников. Честные мощи святой великомученицы Марины находились в Константинополе, в монастыре Пантепонта (Всевидца-Христа), до взятия города в 1204 году крестоносцами. По другим сведениям, они хранились в Антиохии, откуда в 908 году были перенесены в Тоскану (Италия).

Часть святых мощей (рука) находится в Ватопедском монастыре на Афоне. В Проскинитарии 1701 года (описание святых мест) говорится, что от мощей святой великомученицы Марины исцеляются бесноватые и больные.

Литература:

1. Жития святых, на русском языке изложенные по руководству Четьих-Миней святителя Димитрия Ростовского. Кн. 11. М., 1910, с. 376–385.

2. Филарет (Гумилевский), архиепископ. Жития святых, чтимых Православною Церковью. Июль. Изд. 3-е. СПб., 1900, с. 150–153.

3. Извольский С. П. Жития святых. Месяц июль. М., 1877, с. 151–154.

НА МА́ЛОЙ ВЕЧЕ́РНИ

На Го́споди, воззва́х: стихи́ры на 4, глас 4:

Па́мять равноа́нгельнаго твоего́ жития́,/ преподо́бне Ирина́рше,/ днесь созыва́ет мона́шествующих лик/ воспе́ти по достоя́нию по́двиги твоя́,/ и́миже на высоту́ доброде́телей возше́л еси́/ и был еси́ нача́льник мона́хов,/ моли́ Христа́ Бо́га спасти́ся душа́м на́шим.

В честне́й па́мяти твое́й/ ликовству́ет ве́рных собра́ние,/ име́юще тя хода́тая к Бо́гу непосты́днаго,/ подаю́щаго благода́ть приходя́щим с ве́рою/ к ра́це моще́й твои́х,/ о́тче Ирина́рше, моли́твенниче о душа́х на́ших.

Све́тло возсия́ нам па́мять твоя́, блаже́нне Ирина́рше,/ све́тлостию жития́ твоего́ озаря́ющи нас;/ сию́ у́бо пра́зднующии/ и к ра́це моще́й твои́х притека́ющии,/ ра́дости исполня́емся,/ просвеще́ние прие́млюще душа́м на́шим.

О́крест честны́я твоея́ ра́ки стоя́ще,/ пе́сньми хвале́бными воспева́ем/ блаже́нное успе́ние твое́, о́тче Ирина́рше,/ ты же, ны́не в Небе́сных селе́ниих водворя́яся,/ моли́ся непреста́нно о душа́х на́ших.

Сла́ва, глас 6:

Чу́вственныя стра́сти укроти́в воздержа́ния брозда́ми/ и ничто́же плотско́е па́че душе́вныя добро́ты вожделе́в,/ а́ки безпло́тен, пожи́л еси́ на земли́, Богому́дре Ирина́рше,/ те́мже и насле́дие прия́л еси́ со святы́ми,/ с ни́миже дерзнове́ние име́я ко Го́споду,/ моли́ся о чту́щих честну́ю па́мять твою́.

И ны́не, Богоро́дичен:

Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми апо́столы,/ поми́ловати ду́ши на́ша.

На стихо́вне стихи́ры, глас 2:

Жили́ще Свята́го Ду́ха был еси́, преподо́бне,/ от Него́же прия́л еси́ благода́ть моли́тися за ны,/ с ве́рою к тебе́ прибега́ющия.

Стих: Честна́ пред Го́сподем/ смерть преподо́бная Его́.

О́браз доброде́телей был еси́ всем во оби́тели твое́й/ и по кончи́не явля́еши свя́тость жития́ твоего́,/ Ирина́рше преподо́бне.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Богоуго́дно пожи́в на земли́,/ ли́ку преподо́бных сочета́лся еси́ на Небесе́х,/ блаже́нне Ирина́рше, мона́хов нача́льниче.

Сла́ва, глас то́йже:

Прииди́те, ублажи́м преподо́бнаго отца́ на́шего Ирина́рха,/ пусты́ннаго граждани́на и доброде́телей подви́жника,/ мона́шескаго жития́ наста́вника,/ и́же, мно́га ле́та в по́стничестве подвиза́вся/ и па́стырь быв слове́сному ста́ду,/ мзду пра́ведную прие́млет на Небеси́ от Христа́ Бо́га/ и мо́лится о душа́х на́ших.

И ны́не, Богоро́дичен:

Все упова́ние мое́ на Тя возлага́ю,/ Ма́ти Бо́жия,/ сохрани́ мя под кро́вом Твои́м.

Тропа́рь пи́сан на вели́цей вече́рни. Сла́ва, и ны́не, Богоро́дичен.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8, глас 2:

Вся кра́сная ми́ра сего́ оста́вив/ и крест свой на ра́мо взем,/ Христо́ви после́довал еси́ невозвра́тным по́мыслом,/ и те́сный по́стничества путь проше́л еси́, ра́дуяся,/ и а́нгельским лико́м прича́стник показа́лся еси́,/ Богому́дре Ирина́рше преподо́бне,/ с ни́миже моли́ся о чту́щих честну́ю па́мять твою́.

Егда́ Боже́ственное раче́ние на́йде на тя, Ирина́рше прему́дре,/ тогда́ оте́чество твое́ оста́вль,/ в пусты́нный морски́й о́стров отше́л еси́/ и, та́мо ли́ку и́ноков совокупи́вся,/ с ни́ми усе́рдно порабо́тал еси́ Христу́,/ побе́ду на стра́сти дарова́вшему тебе́ и насле́дие со святы́ми,/ с ни́миже моли́ся о чту́щих честну́ю па́мять твою́.

Пло́ти умерщвле́нием/ и неосла́бным со враги́ безпло́тными боре́нием/ да́ры духо́вныя стяжа́л еси́, о́тче преподо́бне Ирина́рше,/ те́мже по́честь Вы́шняго зва́ния прия́л еси́,/ нача́льник мона́хов быв,/ и по сме́рти сла́вен показа́лся еси́,/ чуде́сно в мо́ри пла́вающим явля́яся/ и от поги́бели тех избавля́я./ Сего́ ра́ди почита́ем святу́ю па́мять твою́.

Сла́ва, глас 6:

Е́же по о́бразу соблю́д невреди́мо,/ ум влады́ку на стра́сти па́губныя по́стнически поста́вив,/ и на подо́бие, я́коже мо́щно, возше́л еси́:/ му́жески бо естество́ пону́див,/ потща́лся еси́ ху́ждшее покори́ти лу́чшему/ и плоть порабо́тити ду́ху./ Те́мже мона́шествующих яви́лся еси́ вождь,/ жи́тель пусты́нный, благотеку́щих обучи́тель,/ пра́вило доброде́тели изве́стнейшее,/ и ны́не на Небесе́х, о́тче наш Ирина́рше,/ чи́сте зри́ши Святу́ю Тро́ицу,/ моля́ся о и́же ве́рою и любо́вию чту́щих тя.

И ны́не, Богоро́дичен: Кто Тебе́ не ублажи́т:

Вход. Проки́мен дне. И чте́ния 3 преподо́бническая (зри день 19-й).

На лити́и стихи́ры, глас 1:

Небе́снаго граждани́на и во пло́ти А́нгела,/ о́браз доброде́телей, по́стников похвалу́,/ Ирина́рха Богоно́снаго почти́м:/ и́же, сосу́д избра́нный Бо́гу быв,/ благода́ти Свята́го Ду́ха испо́лнен,/ при́сно мо́лится о душа́х на́ших.

Похва́льное твое́ житие́ в пе́снех воспева́юще днесь,/ честну́ю па́мять твою́ све́тло торжеству́ющии,/ приснопа́мятне Ирина́рше,/ моли́твами твои́ми благода́ть прие́млем/ во спасе́ние душ на́ших.

Светоно́сный твой, Богому́дре Ирина́рше, приспе́ пра́здник,/ созыва́яй мона́хов собо́р,/ я́ко да воспою́т честно́е твое́ успе́ние,/ прося́ще от Христа́ хода́тайством твои́м/ ми́ра и ве́лия ми́лости душа́м на́шим.

Сла́ва, глас 8:

О преподо́бне о́тче Ирина́рше!/ Ты в житии́ твое́м благоугоди́л еси́ Христу́,/ ходя́ стезя́ми, вводя́щими в живо́т,/ и вруче́нное ти от Него́ ста́до слове́сных ове́ц/ упа́сл еси́ в преподо́бии и пра́вде,/ те́мже мзду блага́го и ве́рнаго раба́/ прия́л еси́ от Го́спода своего́,/ Ему́же моли́ся о нас, ча́дех твои́х,/ благоче́стне па́мять твою́ пра́зднующих,/ изба́витися нам от наве́т вра́жиих,/ я́ко да, до́бре сконча́вше жи́тельство на земли́,/ сонасле́дницы бу́дем с тобо́ю Ца́рствия Небе́снаго.

И ны́не, Богоро́дичен.

На стихо́вне стихи́ры, глас 2:

Прииди́те днесь, ли́цы мона́шестии,/ притеце́м ко гро́бу преподо́бнаго Ирина́рха,/ благоче́стия ревни́теля,/ мона́шескаго жития́ учи́теля,/ и доброде́телем его́ поревну́им,/ да благоуго́дни Го́сподеви яви́мся, и ми́лость прии́мем,/ и благода́ть обря́щем во благовре́менную по́мощь.

Стих: Честна́ пред Го́сподем/ смерть преподо́бных Его́.

Воспои́м днесь, о празднолю́бцы,/ блаже́нное успе́ние преподо́бнаго отца́ на́шего,/ труды́ и по́двиги того́ в пе́снех восхваля́юще/ и житию́ его́ поуча́ющеся,/ я́ко да моли́твами его́ досто́йни яви́мся, и ми́лость прии́мем,/ и благода́ть обря́щем во благовре́менную по́мощь.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Мо́щи твоя́, преподо́бне Ирина́рше,/ а́ще и в не́дрех земли́ сокрыва́ются,/ но и́мя твое́, на Небесе́х напи́санное,/ в чуде́сных явле́ниих сам ве́рным возвеща́еши,/ сего́ ра́ди па́мять твою́ почита́ем,/ я́ко Бо́жия уго́дника и всем святы́м соприча́стника.

Сла́ва, глас 8:

Мона́хов мно́жества,/ наста́вника тя почита́ем, о́тче наш Ирина́рше:/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче и преподо́бному Елеаза́ру соприча́стниче,/ с ни́ми же моли́ся Го́сподеви/ поми́ловатися душа́м на́шим.

И ны́не, Богоро́дичен: Безневе́стная Де́во:

Тропа́рь, глас 4:

По́стническое по Бо́зе житие́ возлюби́в,/ вся плотска́я мудрова́ния ду́ху покори́л еси́/ и воздержа́нием стра́сти умертви́л еси́,/ во труде́х, и бде́ниих, и моли́твах о́браз быв доброде́тели,/ тем мона́шескаго жития́ наста́вник показа́лся еси́,/ о́тче преподо́бне Ирина́рше./ Моли́ Христа́ Бо́га спасти́ся душа́м на́шим.

Ин тропа́рь, глас 8:

Бо́дростию ума́ жизнь твою́ управля́я,/ прилежа́нием Бо́га взыску́я,/ отону́дуже и ста́ду мона́хов предста́тель показа́лся еси́,/ и, благода́ть прие́м цели́ти ду́ши и телеса́/ приходя́щим с ве́рою к честно́му гро́бу твоему́,/ Ирина́рше, о́тче наш,/ моли́ Христа́ Бо́га спасти́ся душа́м на́шим.

НА У́ТРЕНИ

На Бог Госпо́дь: тропа́рь свята́го, дважды. Сла́ва, и ны́не, Богоро́дичен.

По 1-м стихосло́вии седа́лен, глас 4.

От ю́ности мона́шеское житие́ возлюби́в, су́етнаго ми́ра удали́лся еси́/ и, во оби́тель преподо́бных оте́ц Зоси́мы и Савва́тия прише́д,/ тех житию́ подража́тель был еси́, о́тче преподо́бне Ирина́рше;/ ны́не с ни́ми предстоя́ Престо́лу Христа́ Бо́га,/ моли́ся о воспева́ющих по́двиги твоя́ и святу́ю па́мять твою́ пра́зднующих.

Сла́ва, и ны́не, Богоро́дичен:

Моли́твы Твои́х раб приими́, Богоро́дице,/ и изба́ви нас от вся́кия беды́,/ я́ко ро́ждшая Христа́ Спа́са, Изба́вителя душ на́ших.

По 2-м стихосло́вии седа́лен, глас 1:

Безмо́лвия люби́теля и пустынножи́тия на А́нзерстем о́строве устрои́теля,/ преподо́бнаго Елеаза́ра духо́вный друг и собесе́дник был еси́, о́тче Ирина́рше,/ ему́же и сонасле́дник Небе́сныя сла́вы яви́лся еси́/ и сомоли́твенник о нас, во оби́телех ва́ших жи́тельствующих,/ и всех, с любо́вию па́мять ва́шу соверша́ющих.

Сла́ва, и ны́не, Богоро́дичен:

Изба́ви нас от нужд на́ших, Ма́ти Христа́ Бо́га,/ ро́ждшая всех Творца́, да вси зове́м Ти:/ ра́дуйся, Предста́тельнице душ на́ших.

По полиеле́и седа́лен, глас 3:

Жела́нием безмо́лвия объя́т быв, блаже́нне,/ напосле́док дний получи́л еси́ жела́емое/ и во уедине́нии сконча́л еси́ житие́ твое́;/ час же кончи́ны твоея́ прови́дев,/ сотаи́нник твой преподо́бный Елеаза́р возвести́ ученико́м свои́м о твое́м преставле́нии,/ и вси ублажи́ша исхо́д твой,/ его́же и мы благоче́стно воспева́ем, Ирина́рше, о́тче наш.

Сла́ва, и ны́не, Богоро́дичен:

Нечи́стых помышле́ний мои́х обурева́ния,/ и безпло́тных враго́в обстоя́ния, и е́же от них озлобле́ния/ избавле́ние ми да́руй, Всенепоро́чная.

Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Кро́тостию и незло́бием,/ милосе́рдием и долготерпе́нием/ стра́сти душе́вныя потреби́л еси́,/ посто́м же и моли́твою плотска́я похоте́ния умертви́в,/ бе́сы посрами́л еси́,/ А́нгелы же возвесели́л еси́/ и был еси́ мона́хов начало во́ждь,/ о́тче преподо́бне Ирина́рше,/ темже и́ноческое сосло́вие тобо́ю хва́лится.

Кано́н Богоро́дицы со ирмосо́м на 6и преподо́бнаго на 8, глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Отве́рзи, Го́споди, уста́ моя́ на похвалу́ уго́дника Твоего́, преподо́бнаго Ирина́рха,/ его́же благоволи́л еси́ поста́вити нача́льника мона́хом во оби́тели Солове́цстей,/ пасти́ ста́до Твое́ во сла́ву и́мене Твоего́ свята́го.

Испо́лнен любве́ Боже́ственныя был еси́, преподо́бне, па́че всех,/ сего́ ра́ди па́стырь поста́влен был еси́ Христо́ву ста́ду,/ е́же упа́сл еси́ му́дре на па́жити животворя́щих Госпо́дних за́поведей.

Тяготу́ нача́льства восприе́м,/ сло́вом и де́лом поуча́л еси́ бра́тию твою́, о́тче, указу́я пути́ спаси́тельныя,/ и́миже сам ше́ствовал еси́ от земны́х к Небе́сным.

Богоро́дичен: Без се́мене О́тчею во́лею от Боже́ственнаго Ду́ха/ заче́нши во чре́ве Твое́м, Пречи́стая,/ родила́ еси́ Сы́на и Бо́га,/ те́мже Тя я́ко Де́ву и Ма́терь, ве́рнии, велича́ем.

Катава́сия: Отве́рзу уста́ моя́:

Песнь 3

Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Возмуще́ния мо́ря жите́йскаго избега́я,/ в пусты́ню всели́лся еси́, блаже́нне Ирина́рше,/ и в ней ти́хое приста́нище, ра́дуяся, обре́л еси́.

Свобо́ден быв жите́йских попече́ний,/ день и нощь в зако́не Госпо́дни поуча́лся еси́, Богому́дре,/ плоть твою́ ду́хови покоря́я и проти́ву страсте́й воздержа́нием подвиза́яся.

Моли́твою непреста́нною, я́ко копие́м, низложи́л еси́ враги́ неви́димыя/ и, я́ко победи́тель, венча́лся еси́ от Бо́га,/ на такову́ю брань тя укрепи́вшаго, пресла́вне Ирина́рше.

Богоро́дичен: Ве́дуще Тя и́стинную Бо́жию Ма́терь,/ Всенепоро́чная Де́во, благоче́стно пропове́даем,/ я́ко Тобо́ю Зижди́тель нас, земноро́дных, с Небе́сными си́лами совокупи́.

Седа́лен, глас 6:

Благи́ми нра́вы украша́яся,/ я́ко А́нгел пребыва́л еси́ на земли́, о́тче преподо́бне,/ Го́рняя вы́ну му́дрствуяй, до́лу же влеку́щая презира́яй;/ те́мже путеводи́тель ко спасе́нию мно́гим был еси́/ и по сме́рти прия́л еси́ благода́ть от Бо́га/ в мо́ри бе́дствующим помога́ти и погиба́ющия спаса́ти./ Приле́жно моли́ся о нас, обурева́емых грехи́ мно́гими,/ спасти́ся душа́м на́шим.

Сла́ва, и ны́не, Богоро́дичен:

Милосе́рдия две́ри отве́рзи нам, Благослове́нная Богоро́дице,/ наде́ющиися на Тя, да не поги́бнем,/ но да изба́вимся Тобо́ю от бед:/ Ты бо еси́ спасе́ние ро́да христиа́нскаго.

Песнь 4

Ирмо́с: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Оте́чество твое́, я́коже дре́вле Авраа́м пра́отец, оста́вил еси́/ и, земно́е стра́нствие сконча́в,/ во обетова́нную зе́млю Го́рняго Иерусали́ма ра́достно вшел еси́, Ирина́рше преподо́бне.

Послуша́ния до́брый рачи́тель был еси́, блаже́нне,/ со вся́ким смире́нием и терпе́нием тружда́яся с бра́тиею/ и сих доброде́телей о́браз всем быва́я,/ те́мже мона́шествующих вождь яви́лся еси́.

Чистоты́ ра́ди жития́ твоего́ прича́стник Боже́ственныя благода́ти был еси́,/ и, то́ю просвеща́емь, вся мы́сленныя прило́ги бесо́в от души́ твоея́ отгна́л еси́,/ и вене́ц сла́вы прия́л еси́ от Бо́га.

Богоро́дичен: В прегреше́ния безчи́сленная впадо́х, окая́нный,/ искуша́емь от враг неви́димых, к Тебе́ взыва́ю, Богома́ти:/ по́мощи ми ру́ку простри́/ и от наси́лия бесо́вскаго изба́ви ду́шу мою́.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Вся стра́сти душе́вныя и теле́сныя по́стническими по́двиги потреби́в,/ безстра́стия дости́гл еси́, преподо́бне,/ и равноа́нгельное житие́ показа́л еси́.

Те́ло твое́ посто́м, и бде́нием, и труды́ удруча́я,/ ду́шу твою́ очи́стил еси́ от вся́кия скве́рны/ и сосу́д избра́нный Ду́ха Пресвята́го яви́лся еси́, Ирина́рше Богоприя́тне.

Еди́ному Бо́гу ве́доми по́двизи и труди́ твои́ и вну́тренняя боре́ния,/ я́же подъя́л еси́ спасе́ния ра́ди души́ твоея́,/ те́мже Ве́дый та́йная воздаде́ тебе́ я́ве.

Богоро́дичен: Иму́ще Тя сте́ну необори́мую и град прибе́жища, Всепе́тая Богоро́дице,/ и Твои́м заступле́нием при́сно спаса́еми,/ по до́лгу Тя вси благоче́стно велича́ем.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Дар прозре́ния яви́л еси́, преподо́бне о́тче,/ прорица́я о сконча́нии живота́ твоего́, и о прее́мнице твое́м,/ и о иму́щих бы́ти нестрое́ниих во оби́тели по кончи́не твое́й.

А́ще и чрез все вре́мя жития́ твоего́ в па́мяти сме́ртней поуча́лся еси́, блаже́нне,/ но на конце́ дний твои́х в безмо́лвие отше́л еси́,/ да та́мо наипа́че о сме́ртнем часе́ помышля́еши.

Кончи́ною благо́ю сконча́л еси́ вре́менное житие́ твое́/ и на ве́чный поко́й ра́достно преше́л еси́,/ иде́же с ли́ки святы́х прославля́ешися/ и мо́лишися о нас, Ирина́рше приснопа́мятне.

Богоро́дичен: Ра́дуйся, Пречи́стая Де́во;/ ра́дуйся, ми́ру утвержде́ние;/ ра́дуйся, я́ко родила́ еси́ Сы́на, всех Бо́га./ Того́ моли́, Богороди́тельнице, спасти́ся душа́м на́шим.

Конда́к, глас 8:

Чистото́ю душе́вною Боже́ственныя благода́ти да́ры стяжа́в,/ блаже́нную жизнь соверши́л еси́,/ и путь ко спасе́нию всем указа́л еси́,/ и богому́дрый нача́льник мона́хов яви́лся еси́./ Те́мже име́я дерзнове́ние ко Святе́й Тро́ице,/ помина́й нас, чту́щих па́мять твою́, да зове́м ти:/ ра́дуйся, преподо́бне Ирина́рше, мона́шествующих похвало́.

И́кос:

Да ликовству́ет днесь благочести́вых собра́ние в свяще́нней па́мяти преподо́бнаго отца́ на́шего Ирина́рха,/ честно́е успе́ние его́ в пе́снех воспева́юще и взыва́юще ему́ такова́я:/ ра́дуйся, и́ноческих по́двигов ревни́телю;/ ра́дуйся, безмо́лвнаго жития́ люби́телю./ Ра́дуйся, посто́м и моли́твою всю си́лу вра́жию низложи́вый;/ ра́дуйся, равноа́нгельно на земли́ пожи́вый./ Ра́дуйся, бе́дственно пла́вающим в мо́ри явля́яся, и́мя твое́ извести́вый;/ ра́дуйся, труд их оби́льною лови́твою удовли́вый./ Ра́дуйся, пусты́ни Солове́цкия Небе́сное насажде́ние;/ ра́дуйся, преподо́бне Ирина́рше, мона́шествующих похвало́.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Си́лою Христо́вою вооружи́вся, преподо́бне,/ стра́шен яви́лся еси́ бесо́м и над страстьми́ воцари́лся еси́./ Те́мже Ца́рствия Христо́ва насле́дник яви́лся еси́, вопия́:/ Бо́же, благослове́н еси́.

Вои́стинну, я́ко сна упокое́ние смерть твоя́ бысть, Богоблаже́нне,/ е́юже разреши́лся еси́ соу́зов плотски́х/ и преше́л еси́ к нетле́нней и присносу́щней жи́зни, ра́достно поя́:/ Бо́же, благослове́н еси́.

Со́бранное тобо́ю слове́сное ста́до весели́тся днесь в ле́тней па́мяти твое́й,/ предстоя́ще честны́м моще́м твои́м, о́тче Ирина́рше, и пою́ще песнь:/ Бо́же, благослове́н еси́.

Богоро́дичен: Пла́менем любве́ Боже́ственныя согре́й, Пречи́стая, хла́дное се́рдце мое́,/ я́ко да ро́ждшемуся от Тебе́ Спа́су душ на́ших досто́йно воспева́ю:/ Бо́же, благослове́н еси́.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

По́двигом до́брым подвиза́лся еси́ на земли́,/ сего́ ра́ди сла́вою венча́лся еси́ на Небеси́,/ ли́ку преподо́бных сочета́вся, блаже́нне Ирина́рше, моли́твенниче о душа́х на́ших.

Даде́ся тебе́ благода́ть моли́тися за ны, преподо́бне,/ те́мже святу́ю па́мять твою́ пра́зднующе и к ра́це моще́й твои́х припа́дающе,/ грехо́в разреше́ние моли́твами твои́ми прие́млем.

В со́нных виде́ниих явля́яся скорбя́щим о разлуче́нии твое́м ученико́м твои́м,/ утеша́л еси́ их, глаго́ля,/ я́ко обре́л еси́ благода́ть у Бо́га и в жи́зни блаже́нней пребыва́еши.

Богоро́дичен: А́нгелов Святе́йшая яви́лася еси́, Влады́чице,/ я́ко на Него́же ти́и зре́ти не мо́гут,/ Ты Сего́ родила́ еси́ и я́ко Младе́нца на руку́ Твое́ю носи́ла еси́./ Его́же моли́ о нас, чту́щих Тя, я́ко Ма́терь Бо́га на́шего.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная, Богоро́дице,/ Чи́стая Присноде́во.

Бу́ри ве́тряней со сне́гом в ле́те бы́ти предсказа́л еси́,/ в наказа́ние Бо́жие за грехи́ бра́тии,/ запове́дая игу́мену моле́бная пе́ния соверша́ти/ и со кресты́ хожде́ние во избавле́ние от бе́дствия такова́го.

Егда́ воспе́ша бра́тия надгро́бное пе́ние на ме́сте погребе́ния твоего́,/ а́бие сту́день в теплоту́ преложи́ся и дождь оби́лен излия́ся,/ моли́твами твои́ми, преподо́бне.

Та́ко по кончи́не твое́й чудотве́рец показа́лся еси́, о́тче Ирина́рше,/ и яви́л еси́, я́ко ве́лие дерзнове́ние и́маши у Бо́га моли́тися за ны,/ чту́щия досто́йно святу́ю па́мять твою́.

Богоро́дичен: Моли́твами уго́дника Твоего́/ поми́луй нас, недосто́йных раб Твои́х, о Госпоже́ Богоро́дице,/ и от всех злых свободи́, и Ца́рствия Небе́снаго сподо́би,/ да вку́пе со преподо́бным Ирина́рхом во ве́ки Тя велича́ем.

Свети́лен:

Столп доброде́телей яви́лся еси́, о́тче Богому́дре Ирина́рше,/ и оби́тели преподо́бных Зоси́мы и Савва́тия сла́ва и украше́ние;/ те́мже с ни́ми ку́пно предстоя́ Святе́й Тро́ице,/ помина́й нас, чад твои́х, почита́ющих честну́ю па́мять твою́.

Сла́ва, и ны́не, Богоро́дичен:

Тя Предста́тельницу вси иму́ще, гре́шнии, о Пресвята́я Де́во,/ мо́лим Ти ся, ма́терними Твои́ми моли́твами/ благопремени́тельна сотвори́ти нам Сы́на Твоего́/ в день пра́веднаго воздая́ния кому́ждо по дело́м Его́.

На хвали́тех стихи́ры на 4, глас 8.

О́тче преподо́бне Ирина́рше,/ ты, мирска́я пристра́стия оста́вив,/ вся́ку доброде́тель и́ноческаго зва́ния испра́вити потща́лся еси́,/ те́мже нача́льник мона́хов был еси́/ и благода́ти Свята́го Ду́ха испо́лнен яви́лся еси́./ Моли́ Христа́ Бо́га о нас, досто́йно почита́ющих тя/ и ку́пно со все́ми просла́вленными и непросла́вленными преподо́бными отцы́/ па́мять твою́ пра́зднующих.

О́тче Богому́дре Ирина́рше,/ вои́стинну пресла́вно твое́ житие́,/ я́ко по́стничеством Бо́гови благоугоди́л еси́,/ от Него́же возме́здие по достоя́нию прия́л еси́/ и с ли́ки преподо́бных ублажа́ешися,/ с ни́миже предстоя́ Го́сподеви,/ помина́й нас, к ра́це моще́й твои́х припа́дающих/ и в пе́снех по́двиги твоя́ и честно́е успе́ние днесь воспева́ющих.

Отче Богоблаже́нне Ирина́рше,/ ты в житии́ мно́ги ско́рби претерпе́л еси́,/ и́миже в Ца́рствие Небе́сное воше́л еси́/ и насле́дие прия́л еси́ со святы́ми,/ те́мже по преставле́нии твое́м чудоде́йствуеши,/ в мо́ри пла́вающия от бед избавля́я./ И нас, лю́те обурева́емых жите́йскими страстьми́,/ ко приста́нищу безстра́стия напра́ви предста́тельством твои́м.

Сла́ва, глас то́йже:

Днесь слове́сными венцы́ увенча́им Ирина́рха приснопа́мятнаго,/ по́стническаго жития́ до́браго подви́жника,/ и́же, во пло́ти сый, враги́ безпло́тныя низложи́/ и всех доброде́телей о́бразы показа́;/ вси у́бо после́дуим стопа́м его́,/ я́ко да, благоче́стно пожи́вше на земли́,/ моли́твами его́ сподо́бимся в Небе́снем Ца́рствии/ ку́пно с ним сла́вити Го́спода во ве́ки.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Славосло́вие вели́кое. Ектении́. И отпу́ст.

НА ЛИТУРГИ́И

Блаже́нны от кано́на свята́го, пе́сни 3-я и 6-я на 8. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода,/ в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник:

Моли́тва

О преподо́бне о́тче Ирина́рше, уго́дниче Бо́жий и моли́твенниче о душа́х на́ших! Услы́ши нас, ны́не моля́щихся тебе́, я́ко иму́щему дерзнове́ние ко Го́споду, да пода́ст нам вся, я́же на по́льзу в сем житии́ на́шем и во уготовле́ние к ве́чному животу́. Бу́ди нам наста́вник в духо́внем жи́тельстве, ути́шитель бу́ри страсте́й, помо́щник в ско́рбех и засту́пник от враг неви́димых, борю́щих ны, да и мы, богоуго́дно преше́дше по́прище сея́ жи́зни, бу́дем насле́дницы Ца́рствия Небе́снаго и сподо́бимся вку́пе с тобо́ю сла́вити Отца́, и Сы́на, и Свята́го Ду́ха во ве́ки веко́в. Ами́нь.

Преподобный Иринарх Соловецкий, постриженик Преображенской Соловецкой обители, в подвигах благочестия подражал преподобным Зосиме и Савватию Соловецким (совместная память 8 августа). Он настолько преуспел в добродетельной жизни, что после смерти игумена преподобного Антония, в 1614 году, был поставлен его преемником. В то время Соловецкий монастырь имел большое значение в защите северной России от шведов и датчан. Поэтому преподобный Иринарх прилагал немало трудов по укреплению оборонной мощи обители. С восточной стороны монастыря была построена вторая каменная стена с двумя огромными башнями, с северной и южной сторон выкопаны глубокие рвы, обложенные затем камнем. Внутри обители на случай военных действий построили два корпуса для солдат. За счет монастыря были также сделаны новые укрепления в Сумском и Кемском острогах. Обитель содержала увеличенные гарнизоны этих острогов и свой собственный. Заботы преподобного Иринарха о защите Отечества имели большое значение и еще при жизни святого подвижника принесли свои плоды. Так, в 1623 году датчане на военных кораблях появились у Корельского острова, но, увидев хорошо укрепленную крепость – Соловецкий монастырь, не рискнули начать военные действия и вернулись в свои воды.

Заботясь об ограждении обители от внешних бед, преподобный Иринарх неустанно заботился и о духовном возрастании иноков. Примером своей жизни он учил их богомыслию, смирению и кротости. Святой игумен отличался кротостью и снисходительностью в отношении к другим и строгостью к самому себе. Под духовным руководством преподобного Иринарха вырос ряд подвижников, среди которых особенно известен преподобный Елеазар Анзерский (†1656; память 13 января).

За два года до блаженной кончины преподобный Иринарх оставил управление обителью и усилил подвиг безмолвной молитвы. 17 июля 1628 года святой подвижник мирно отошел к Богу. Святые мощи преподобного Иринарха почивали под спудом в часовне его имени.

О преподобном Иринархе сохранились записи, составленные Иларионом, иноком Соловецкого монастыря, а затем игуменом (1640–1643) Макариевой Троицкой обители в Калязине Тверской епархии.

Литература:

1. Филарет (Гумилевский), архиепископ. Жития святых, чтимых Православною Церковью. 3-е изд., дополн. Июль. СПб., 1900, с. 154–156.

2. Димитрий (Самбикин), архиепископ. Месяцеслов святых, всею Русскою Церковью или местно чтимых. Вып. 11, июль. Тверь, 1901, с. 207.

3. Настольная книга священнослужителя, т. 3. М., изд. Московской Патриархии, 1979, с. 592–593.

4. Соловецкий Патерик. СПб., 1914.

НА МА́ЛОЙ ВЕЧЕ́РНИ

На Го́споди, воззва́х: стихи́ры на 4, глас 5.

Подо́бен: Преподо́бне о́тче:

Избра́нный уго́дниче,/ сла́вным житие́м твои́м Ду́ха Свята́го обита́лище быв,/ И́же тя сла́вна яви́ стране́ Се́верней,/ ны́не мы, соше́дшеся,/ ве́рою похва́льная воспису́ем ти,/ просвети́телю во тьме пребыва́ющих/ и звездо́ путево́дная мона́шествующих.

Богоблаже́нне Леони́де,/ в ми́ре живя́, Небе́снаго Оте́чества взыска́л еси́,/ путь широ́кий, веду́щий в па́губу, презре́в,/ дом и сро́дники Христа́ ра́ди оста́вил еси́,/ и́ноческое житие́ возлюби́в/ и дерзнове́ние сыно́внее ко Го́споду сниска́в,/ Того́ моли́, преподо́бне,/ моли́твами твои́ми от вся́ких зол свободи́ти чту́щия тя.

О́тче преподо́бне,/ а́нгел быв о́бразом, земны́й же естество́м,/ любо́вию к Бо́гу се́рдце пламене́ющее име́л еси́,/ сего́ ра́ди узре́л еси́ Ма́терь Бо́жию,/ Я́же призва́ тя на путь мона́шескаго жития́,/ украша́ющи за по́двиги небе́сными да́ры./ Той помоли́ся, преподо́бне,/ дарова́ти душа́м на́шим мир и ве́лию ми́лость.

Сла́ва, глас 6:

Днесь прииди́те, ве́рнии,/ предста́теля на́шего пред Бо́гом, Леони́да, восхва́лим,/ су́етная попра́вшаго/ и житие́ непоро́чно возлюби́вшаго,/ и с ра́достию возопии́м ему́:/ ра́дуйся, смире́нный подви́жниче,/ плоть свою́ возненави́девый;/ ра́дуйся, слез тече́нием Бо́га уми́лостивый/ и вся ко́зни вра́жия си́лою Его́ победи́вый;/ ра́дуйся, ра́зум чист и свобо́ден от страсте́й стяжа́вый;/ ра́дуйся, лику́яй со А́нгелы у Престо́ла Бо́жия;/ испроси́ нам, уго́дниче Христо́в,/ благ нетле́нных.

И ны́не, Богоро́дичен: Богоро́дице, Ты еси́ лоза́ и́стинная:

На стихо́вне стихи́ры, глас 6:

Пречи́стыя Богоро́дицы служи́телю,/ Леони́де преподо́бне,/ си́лою Ея́ ко́зни вра́жия победи́л еси́/ и в безпло́дней пусты́ни дре́во мона́шества насади́л еси́,/ во е́же сла́вити и́мя Мари́и Де́вы, Одиги́трии,/ Путеводи́тельницы на́шея в Го́рняя селе́ния.

Стих: Честна́ пред Го́сподем/ смерть преподо́бных Его́.

Си́лою Бо́жиею укрепля́емь,/ мона́шеское житие́ возлюби́л еси́, Леони́де,/ мирска́я вся оста́вил еси́,/ и, в оби́тель всели́вся,/ и́ноческое постриже́ние восприя́л еси́,/ и те́сным путе́м Небе́снаго оте́чества дости́гл еси́./ Ны́не же, па́мять твою́ пра́зднующе, вопие́м ти:/ моли́ Христа́ Бо́га спасти́ся душа́м на́шим.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Тече́нии слез и страда́ний терпе́нием/ оде́жду души́ твоея́ очи́стил еси́, Богому́дре,/ возсия́в, я́ко у́тро, среде́ те́ни сме́ртныя,/ кра́я се́вернаго просвети́телю./ Сего́ ра́ди воспева́ем ти:/ моли́ Христа́ Бо́га о спасе́нии душ на́ших.

Сла́ва, глас 8:

О Леони́де блаже́нне,/ ты дре́во яви́лся еси́, насажде́нное при исхо́дищих вод,/ е́же насади́ десни́ца Бо́жия;/ цветы́ чуде́с и плоды́ доброде́телей украша́еши страну́ на́шу/ и сла́ве Госпо́дней предстои́ши,/ испроси́ утомле́нным си́лу,/ изнемога́ющим кре́пость и упова́ние непрело́жно/ и твои́ми святы́ми моли́твами/ напо́й ду́ши на́ша/ вода́ми ве́ры и благоче́стия.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Тропа́рь, глас 1 (зри на вели́цей вече́рни).Сла́ва, и ны́не, Богоро́дичен.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8, глас 6.

Подо́бен: Все отло́жше:

Труды́ мно́гими, о́тче,/ моли́твою и покая́нием/ поборо́л еси́ враги́ спасе́ния,/ в не́мощи те́ла и нищете́ духо́вней/ соверша́я твой по́двиг со стра́хом и тре́петом;/ вся сия́ подъя́в Бо́га ра́ди и в уго́ду Ему́,/ восприя́л еси́ благода́ть Ду́ха Свята́го, чудотво́рче.

Наставля́емь, о́тче, от отце́в,/ я́ко всяк, отрица́яйся ми́ра и быва́яй мона́х,/ прие́млет меч духо́вный, я́ко во́ин Христо́в,/ и исхо́дит на брань проти́ву духо́в зло́бных,/ отража́я сих кова́рства глаго́лом в ра́зуме,/ вся сия́ испо́лнил еси́ моли́твами святы́х оте́ц/ и восприя́л еси́ благода́ть Ду́ха Свята́го, чудотво́рче.

Сво́йственно есть не́мощи челове́честей/ поползнове́ние име́ти ко греху́/ треми́ си́лами души́,/ ра́зумом, вожделе́нием и я́ростию,/ помышле́нием, сло́вом и де́лом,/ но, распаля́емь жела́нием спасе́ния, му́дре Леони́де,/ внима́л еси́ гла́су со́вести/ и, не терпя́ тоя́ обличе́ний,/ вопия́л еси́ непреста́нно к Бо́гу,/ сле́зно ка́яся и моля́ся,/ ища́ поми́ловану бы́ти,/ сего́ и нам моли́ сподо́битися, преподо́бне.

Глаго́л Бо́жий, храня́щий врата́ серде́чная,/ носи́л еси́ во усте́х твои́х,/ преподо́бне Леони́де,/ ум и се́рдце сим очища́я, о́тче,/ непреста́нно взыва́л еси́:/ Иису́се, Сы́не Бо́жий, поми́луй мя;/ и победи́л еси́ прило́ги вра́жия,/ ги́бельныя стра́сти и злы́я по́мыслы;/ моли́ Бо́га о спасе́нии на́шем.

Несть мо́щно кому́ си́лою челове́ческою/ убежа́ти де́йствия страсте́й/ и сложе́ния лука́вых по́мыслов,/ о ни́хже истя́зани бу́дем в час сме́рти/ и отве́т дади́м на Суди́щи Стра́шнем;/ сего́ ра́ди мо́лим тя, о́тче преподо́бне Леони́де,/ моли́ Го́спода о на́шем спасе́нии.

Восприя́л еси́ зако́н духо́вный,/ на скрижа́лех се́рдца твоего́ пе́рстом Бо́жиим напи́сан,/ блаже́нне Леони́де,/ и сего́ ра́ди сподо́бился еси́ несре́дственне херуви́мски/ бесе́довати ко Христу́ чи́стою моли́твою;/ Того́, я́ко Бла́га, моли́/ поми́ловати ду́ши на́ша.

Восхище́н име́я ум Ду́хом Святы́м/ в виде́ние Боже́ственное/ и созерца́я та́инства стра́шна,/ наслажде́ние пра́ведных и ра́йския добро́ты,/ радостнопеча́льныя излива́л еси́ сле́зы, о́тче преподо́бне,/ у креста́ моля́ся в пусты́ни.

Сла́ва, глас 4:

Я́ко от сосу́да Боже́ственныя благода́ти,/ истекли́ суть от чре́ва твоего́ ре́ки воды́ живы́я,/ по́двиги со́бранныя во глубине́ се́рдца твоего́ та́инственно,/ уго́дниче Бо́жий Леони́де,/ напая́юще духо́вная ча́да твоя́,/ ста́до, тобо́ю пасо́мое,/ возводя́ще их к по́чести Вы́шняго зва́ния.

И ны́не, Богоро́дичен.

Вход. Проки́мен дне. И чте́ния 3 преподо́бническая (зри день 19-й).

На лити́и стихи́ры, глас 2:

Прииди́те, ве́рнии, любо́вию соше́дшеся,/ и́стиннаго подви́жника почти́м днесь, Леони́да,/ ра́достно ше́ствовавшаго путе́м Влады́чним,/ преодоле́вшаго те́рния и страсте́й во́лны,/ и ве́рою возопии́м:/ о всеблаже́нне, преподо́бных сожи́телю и по́стников похвало́,/ моли́ся о нас ко Го́споду,/ спасти́ся душа́м на́шим.

Преподо́бне о́тче Леони́де,/ ты ра́ди Христа́ вся, я́же в ми́ре сем, оста́вил еси́/ и в пусты́ни мир Бо́жий обре́л еси́ в се́рдцы Твое́м,/ не убоя́вся кова́рствия ви́димых и неви́димых враг,/ побежда́я зло́бу сих ве́рою кре́пкою и терпе́нием ди́вным./ Го́спода непреста́нно моли́ о спасе́нии на́шем.

Днесь Росси́йская Це́рковь весели́тся,/ и́бо ча́да ея́, от исто́чников ева́нгельских испи́вше,/ торжеству́ют духо́вно в сей пра́здник до́браго па́стыря,/ лобыза́юще любе́зно ико́ну его́ и пою́ще:/ спаса́й нас моли́твами твои́ми,/ Леони́де чудотво́рче.

Сла́ва, глас 6: Днесь прииди́те: пи́сана на ма́лой вече́рни. И ны́не, Богоро́дичен.

На стихо́вне стихи́ры, глас 1.

Подо́бен: Небе́сных чино́в:

Со́лнца светле́йший твой пра́здник/ наста́, преподо́бне,/ озаря́я ду́ши притека́ющих к тебе́ с ве́рою,/ припа́дающих к честне́й ра́це и вопию́щих:/ спаса́й ду́ши на́ша/ моли́твами твои́ми, Богому́дре.

Стих: Честна́ пред Го́сподем/ смерть преподо́бных Его́.

Пло́ти и ми́ра жела́ния ду́ху покори́в,/ воздержа́ния бразда́ми/ те́ло и ду́шу укрепля́я, блаже́нне,/ стяжа́л еси́ внутрь Небе́сное бога́тство/ и насле́дник жи́зни ве́чныя яви́лся еси́;/ моли́ся о душа́х на́ших.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Свя́те Леони́де,/ чи́стым се́рдцем Бо́га возлюби́л еси́,/ ви́дя в Нем Ве́чный Живо́т,/ Исто́чник све́та, си́лы, ми́ра и ра́дости,/ не устраши́лся еси́ враго́в ополче́ния, наста́вник и́ноков быв;/ моли́ся о спасе́нии душ на́ших.

Сла́ва, глас 8:

Собра́ние мно́гое и́ноков и миря́н,/ па́стыря тя, Леони́де, почита́юще до́браго,/ вслед тебе́ ше́ствующе, пра́вый путь обрето́ша./ Мы же, дивя́щеся твои́м ве́лиим трудо́м и подвиго́м мно́гим,/ и́миже Бо́гу угоди́л еси́,/ еди́ными усты́ усе́рдно вопие́м:/ моли́ся Го́споду о спасе́нии на́шем.

И ны́не, Богоро́дичен: Безневе́стная Де́во:

Тропа́рь, глас 1:

Боже́ственною любо́вию и житие́м духо́вным/ от ю́ности распали́вся, преподо́бне,/ и вся, я́же в ми́ре кра́сная, возненави́дев,/ Христа́ еди́наго от души́ возлюби́л еси́, о́тче,/ ле́гкое и́го на ра́мо взем,/ Боже́ственным Про́мыслом и Пречи́стыя Богоро́дицы чу́дным явле́нием направля́емь,/ дости́же пусты́ни/ и в ней многоле́тне подвиза́лся еси́/ в труде́х мно́гих и слеза́х,/ вся́ким злострада́нием плоть свою́ изнуря́я./ Отоню́дуже Бог, твоя́ труды́ ви́дев,/ умно́жи тебе́ ча́да в пусты́ни./ Но я́ко име́я дерзнове́ние к Бо́гу,/ моли́ о нас, рабе́х твои́х, о́тче преподо́бне Леони́де,/ да изба́вит нас от всех наве́т вра́жиих/ и спасе́т ду́ши на́ша.

НА У́ТРЕНИ

На Бог Госпо́дь: тропа́рь свята́го, дважды. Сла́ва, и ны́не, Богоро́дичен.

По 1-м стихосло́вии седа́лен, глас 8.

Подо́бен: Прему́дрости:

Возсия́л еси́, преподо́бне, свя́тостию жития́ твоего́;/ вои́стинну свети́льник весь освяще́н и Богоно́сен показа́лся еси́ ми́ра, добро́ты и све́тлости;/ вся ви́димыя добро́ты преходя́щия отри́нув, смире́нием и нището́ю Христу́ после́довал еси́/ и собра́л еси́ мона́хов в оби́тель свою́,/ науча́я их ми́ра зло́бу побежда́ти и те́сным путе́м ше́ствовати ко спасе́нию./ Моли́ Го́спода согреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко Всенепоро́чная Неве́ста Творца́,/ я́ко Неискусому́жная Ма́ти Изба́вителя,/ Прия́телище я́ко су́щи Уте́шителя, Всепе́тая,/ беззако́ния мя су́ща скве́рное жили́ще и де́монов игра́лище в ра́зуме бы́вша,/ потщи́ся и сих злоде́йствия мя изба́вити,/ све́тло жили́ще доброде́тельми соде́лавши,/ Светода́тельная и Нетле́нная, разжени́ о́блак страсте́й и вы́шняго прича́стия сподо́би/ и Све́та невече́рняго моли́твами Твои́ми.

По 2-м стихосло́вии седа́лен, глас 3.

Подо́бен: Красоте́ де́вства:

Вети́и многовеща́ннии не возмо́гут по достоя́нию изобрази́ти сла́ву,/ от Бо́га угото́ванную святы́м,/ ея́же ты причасти́лся еси́, о́тче Леони́де,/ и дерзнове́нно предстои́ши лицу́ Бо́жию, и приклоня́еши к нам, гре́шным, милосе́рдие Его́;/ сподо́би и нас моли́твами твои́ми дости́гнути блаже́нства Небе́снаго.

Сла́ва, и ны́не, Богоро́дичен:

Я́ко невозде́ланна, Де́во, лоза́,/ прекра́сный грозд, Христа́, возрасти́ла еси́,/ источа́юща нам вино́ спаси́тельное, всех веселя́щее ду́ши и телеса́;/ те́мже я́ко вино́вну Тя до́брых ублажа́юще,/ при́сно со А́нгелом вопие́м:/ ра́дуйся, Обра́дованная.

По полиеле́и седа́лен, глас 8.

Подо́бен: Прему́дрости:

А́нгели небе́снии ра́достно прия́ша ду́шу твою́, преподо́бне, во оби́тели ра́йския,/ иде́же Госпо́дь Сла́вы Христо́с венча́ тя и нам, земны́м, засту́пника дарова́./ Хотя́щим спасти́ся бу́ди помо́щник, преподо́бне Леони́де,/ избавля́я нас заступле́нием твои́м от грехо́в, напа́стей и бед вся́ческих,/ низводя́ притека́ющим к тебе́, о́тче, Бо́жие благослове́ние.

Сла́ва, и ны́не, Богоро́дичен:

О Тебе́ ра́дуется, Благода́тная, вся́кая тварь,/ а́нгельский собо́р и челове́ческий род,/ освяще́нный хра́ме и раю́ слове́сный,/ де́вственная похвало́,/ из Нея́же Бог воплоти́ся и Младе́нец бысть, пре́жде век сый Бог наш,/ ложесна́ бо Твоя́ престо́л сотвори́ и чре́во Твое́ простра́ннее небе́с соде́ла./ О Тебе́ ра́дуется, Благода́тная, вся́кая тварь, сла́ва Тебе́.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Светопода́тельна свети́льника,/ пред Престо́лом Бо́жиим предстоя́ща/ и мрак страсте́й на́ших луча́ми моли́тв твои́х разгоня́юща,/ ви́дим тя, преподо́бне о́тче Леони́де;/ озари́ у́бо и на́ша сердца́, всеблаже́нне,/ да вопие́м ти любо́вию:/ о́тче наш кро́ткий и ми́лостивый,/ усе́рдный служи́телю Ма́тере Бо́жия,/ моли́ о душа́х на́ших.

Кано́н свята́го глас 8. его́же краегране́сие сицево́: Уго́днику Твоему́, Го́споди, пою хвалу́ сию́.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца, спасе́,/ песнь Бо́гови воспева́юща.

Умертви́в плотска́я мудрова́ния, подвиза́яся многоле́тне в труде́х тя́жких и слеза́х,/ смире́нием Христу́, нас ра́ди смири́вшемуся, подража́в,/ со А́нгелы ны́не песнь Бо́гу вопие́ши, Леони́де преподо́бне.

Го́рести уедине́ния возлюби́л еси́ па́че вся́каго всепло́дия, блаже́нне,/ обре́т в пусты́ни небе́сный поко́й и сла́дость духо́вную,/ и на высоту́ безстра́стия возше́л еси́.

О́тче избра́нный и чудотво́рче,/ свя́тостию жития́ твоего́, я́ко свети́льник све́тлый, украша́еши край се́верный,/ мра́чныя си́лы де́монския, я́ко паучи́ну, разоря́я.

Богоро́дичен: Де́во, родила́ еси́ Законода́вца, Бо́га и Челове́ка бы́вша;/ Того́, я́ко Бла́га, моли́, Всенепоро́чная,/ на́ша беззако́ния презре́ти и спасе́ние дарова́ти.

Песнь 3

Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.

Небе́снаго оте́чества взыска́вый, свя́те,/ о́браз был еси́ ученико́м твои́м, уча́ сих отлуча́тися мирска́го пристра́стия/ и во спасе́ние их ду́ши привлека́я.

И́же а́нгела о́бразом, земна́го су́ща естество́м, зря́ще тя, о́тче преподо́бне,/ прославля́ем Го́спода, просла́вльшаго тя,/ вопию́ще Ему́ песнь трисвяту́ю.

Край твой Пошехо́нский оста́вив, свя́те,/ стопы́ своя́ в Кожеезе́рскую оби́тель напра́вил еси́,/ избра́в мона́шеское житие́ се́рдцем твои́м, к Бо́гу пламене́ющим.

Богоро́дичен: Ужасе́ся не́бо, ви́дяще Тя, Богоро́дице, Херуви́мов и Серафи́мов превы́шши,/ Ты бо еди́на прия́ла еси́ Невмести́маго Бо́га во чре́ве Твое́м;/ те́мже Тя вси, ве́рнии, Чи́стая, пе́сньми ублажа́ем.

Седа́лен, глас 4.

Подо́бен: Вознесы́йся на Крест:

Путь широ́кий, веду́щий в па́губу, презре́в, о́тче,/ Христу́ от души́ после́довал еси́, терни́стым путе́м в Небе́сное Ца́рство ше́ствовав,/ наде́ждею ве́чных благ се́рдце свое́ увеселя́я, преподо́бне Леони́де,/ моли́ Бо́га о спасе́нии на́шем.

Сла́ва, и ны́не, Богоро́дичен:

Сло́во Тя челове́ческое не мо́жет, Де́во, восхвали́ти досто́йно,/ из Тебе́ бо без се́мене Жизнода́вец Христо́с воплоти́тися благоволи́, Пречи́стая,/ Его́же моли́ спасти́ся рабо́м Твои́м.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Тле́нная и преходя́щая оста́вив, о́тче Богому́дре,/ храм Ду́ха Свята́го был еси́ и жи́зненных вод исто́чник,/ по́стников утвержде́ние и мона́шествующих весе́лие.

Всяк день слеза́ми зе́млю ороша́я,/ взира́л еси́, Леони́де преподо́бне, на Крест Христо́в,/ до́ндеже изсуши́л еси́ душевре́дных страсте́й пучи́ну,/ те́мже па́мять твою́ чтим, достоблаже́нне.

Отца́ Небе́снаго уго́дниче, ты ра́зум чист стяжа́л еси́,/ моли́твою и посто́м ко́зни вра́жия побежда́я,/ помози́ и нам, смире́нный подви́жниче, житие́ непоро́чно возлюби́ти.

Богоро́дичен: Еди́н Ве́дый челове́ческаго существа́ не́мощь,/ из Тебе́ прозябе́, Чи́стая, Цвет Нетле́нный,/ спасе́ние да́руяй всему́ челове́честву.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Ма́тере Бо́жия послу́шник быв,/ из оби́тели Солове́цкия в пу́стынь Морже́вскую пресели́лся еси́,/ иде́же, труды́ к трудо́м прилага́я,/ бога́тство доброде́телей стяжа́л еси́, преподо́бне.

Умо́м вы́ну на Небесе́х пребыва́я,/ бу́рю искуше́ний и бед от челове́к зло́бных с кро́тостию претерпева́л еси́, преподо́бне,/ труды́ ве́лия подъя́в, ужа́лен бысть змие́ю, но безвре́ден пребы́л еси́,/ моли́твою к Бо́гу укрепля́емь.

Госпо́дню во́лю сотвори́вый, и́ны твори́ти во́лю Бо́жию науча́л еси́,/ ли́ка и́ноческаго предстоя́телю богому́дрый,/ бра́тии твоея́ о́тче чадолюби́вый и ми́лостивый.

Богоро́дичен: О стено́ и заступле́ние на́ше, Де́во Пречи́стая,/ Твое́ю сла́вою Боже́ственною хва́лящеся, Тя ублажа́ем,/ Ты бо на́ших душ еси́ ра́дость и весе́лие, Чи́стая.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Све́тло и изве́стно твое́ житие́, преподо́бне Леони́де, яви́ся кра́ю Прилу́зскому,/ доброде́тели ева́нгельския испо́лнено,/ ве́рности и любве́ ко Христу́ Человеколю́бцу.

Па́мять твою́ творя́щим, о́тче, не преста́й моли́ти Творца́ и Изба́вителя/ долго́в разреше́ние дарова́ти/ и восприя́ти блаже́нство небе́сное.

О Христе́ укрепля́емь, свя́те Леони́де, по́двигов ме́сто издале́ча облобыза́л еси́,/ с ико́ною Одиги́трии на реку́ Лу́зу прише́д, ту водвори́ся,/ да оби́тель чу́дную воздви́гнеши.

Богоро́дичен: Де́ва Всенепоро́чная, рождество́м из Тебе́ Бо́га и Спа́са/ зако́н изнемо́же и пре́йде сень,/ па́че ума́ яви́вшейся благода́ти, Всепе́тая.

Конда́к, глас 8:

Все свое́ умно́жив жела́ние и к Бо́гу впери́в/ и Тому́ невозвра́тно от души́ после́довав,/ в пусты́ню всели́ся и в ней мно́гия труды́ в Бо́зе показа́л еси́./ В непрохо́дных ме́стех исто́чники водны́я ископа́л еси́/ и умертви́л еси́ по́двиги твои́ми теле́сная мудрова́ния,/ мно́гим путь был еси́ ко спасе́нию./ Те́мже мо́лим тя:/ спаси́ нас и и́же собра́, му́дре, да зове́м ти:/ ра́дуйся, Леони́де преподо́бне, пусты́нный жи́телю.

И́кос:

Светопода́тельна свети́льника, пред Престо́лом Бо́жиим предстоя́ща/ и мрак страсте́й на́ших луча́ми моли́тв твои́х разгоня́юща,/ ви́дим тя, преподо́бне о́тче Леони́де./ Озари́ сия́нием духо́вным и на́ша сердца́, блаже́нне, да достодо́лжно вопие́м ти си́це:/ ра́дуйся, лучу́ пресве́тлый, от Со́лнца Христа́ возсия́вый;/ ра́дуйся, и по преставле́нии твое́м с на́ми пребыва́еши./ Ра́дуйся, храм Пресвяты́я Богоро́дицы и оби́тель в честь Ея́ Введе́ния постро́ивый;/ ра́дуйся, украси́вый ме́сто сие́ и́ноческим песнопе́нием./ Ра́дуйся, сей храм, мо́щи твоя́ и реку́ Неду́му нам в зало́г любве́ твоея́ оста́вивый;/ ра́дуйся, преподо́бне о́тче наш Леони́де, пусты́нный жи́телю.

Песнь 7

Ирмо́с: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

И́стины ревни́тель и стена́ кре́пкая ве́рным был еси́, о́тче,/ защища́я их от лжи и клеветы́ зави́стника,/ де́монския стре́лы угаша́я, и боле́зни исцеля́я,/ и науча́я всех воспева́ти:/ благослове́н Бог оте́ц на́ших.

Пещь искуше́ний проше́л еси́, преподо́бне, и ороси́ тя благода́ть Боже́ственная,/ напая́ющи се́рдце любо́вию и благоче́стием/ и всем показу́ющи тя подви́жника ди́вна, зову́щим:/ благослове́н Бог оте́ц на́ших.

О сла́вне Леони́де, ты на земли́ я́ко безпло́тен пожи́л еси́/ и ны́не со А́нгелы песнь Бо́гу немо́лчно вопие́ши./ Тем тя ве́рою почита́ем, досточу́дне.

Богоро́дичен: Ю́же А́нгели воспе́ти не мо́гут по достоя́нию,/ мы, земни́и, воспева́ем Тя, Богоро́дице Де́во,/ и ве́рою Сы́ну Твоему́ вопие́м:/ оте́ц на́ших Бо́же, благослове́н еси́.

Песнь 8

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Христоимени́тии лю́дие, днесь собра́вшеся/ на твой светоно́сный пра́здник, преподо́бне Леони́де,/ ча́ют улучи́ти моли́твами твои́ми ра́дость и весе́лие духо́вное,/ иму́ще тя засту́пника пред Бо́гом вели́каго и воспева́юще:/ де́ти, благослови́те, свяще́нницы, воспо́йте, лю́дие, превозноси́те Его́ во ве́ки.

Всеумиле́нное пе́ние прино́сим ти, свя́те, жа́ждуще ми́лости от Тебе́ получи́ти./ Ты же нас посети́ и да́нною тебе́ от Бо́га благода́тию исцели́, да Го́сподеви пое́м:/ де́ти, благослови́те, свяще́нницы, воспо́йте, лю́дие, превозноси́те Его́ во ве́ки.

А́нгели небе́снии ра́достно прия́ша ду́шу твою́, преподо́бне, во оби́тели ра́йския,/ иде́же Госпо́дь Сла́вы венча́ тя за поще́ние кре́пкое, моли́тву неле́ностную и терпе́ние во искуше́ниих./ И ны́не мы, тобо́ю укрепля́еми, зове́м:/ де́ти, благослови́те, свяще́нницы, воспо́йте, лю́дие, превозноси́те Его́ во ве́ки.

Богоро́дичен: Лю́дие ве́рнии вопию́т Ти непреста́нно:/ ра́дуйся, Чи́стая, из Тебе́ бо произы́де Спас наш,/ и́стинно облеки́йся во всего́ мя, челове́ка, за милосе́рдие непостижи́мое,/ превозноси́мый Бог благослове́нный.

Песнь 9

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Учи́теля тя мона́шествующим показа́ благода́ть Ду́ха Свята́го, в тя всели́вшися,/ и лука́вых духо́в прогони́теля, и боле́зней цели́теля,/ и душ врачева́теля пречу́днаго.

Све́та духо́внаго испо́лненный свети́льник был еси́, преподо́бне Леони́де,/ озаря́я сердца́ к тебе́ притека́ющих/ и к Го́рнему оте́честву им путь освеща́я.

И́же а́нгельскими пе́сньми прославля́емый Христо́с Подвигополо́жник/ ди́вна тя подви́жника нам показа́,/ душетле́нных страсте́й победи́теля и и́стиннаго па́стыря ста́да слове́снаго.

Богоро́дичен: Ю́нице Всечи́стая, осия́нная Ду́хом Святы́м,/ родила́ еси́ нам Христа́ Бо́га, Сло́во воплоще́нное:/ песнь сию́ приими́ от нас, Де́во, благода́ть воздаю́щи многосве́тлую.

Свети́лен:

Ду́хом Всесвяты́м просвеща́емь и доброде́тельми облиста́емь,/ не оскверни́л еси́ души́ твоея́ добро́ту;/ в ста́рости масти́тей преста́вился еси́ ко Го́споду,/ окруже́нный ли́ком и́ноков, тобо́ю со́бранных./ Ны́не о нас, чту́щих всечестну́ю па́мять твою́, Хри́ста Бо́га моли́,/ Леони́де, о́тче преподо́бне.

Сла́ва, и ны́не, Богоро́дичен:

Сла́вою Твое́ю Боже́ственною хва́лящеся,/ Тя ублажа́ем, я́коже прорекла́ еси́, Пречи́стая./ Ты бо душа́м на́шим источа́еши весе́лие и ра́дование моли́твами уго́дника Твоего́.

На хвали́тех стихи́ры на 4, глас 4.

Подо́бен: Зва́нный свы́ше:

Повину́яся Ма́тере Бо́жия повеле́нию, преподо́бне,/ земна́я вся оста́вил еси́/ и в пусты́ню всели́ся,/ иде́же терпе́л еси́ Бо́га ра́ди ско́рби и лише́ния мно́гая,/ до́ндеже вмести́лище бысть Ду́ху Свято́му./ Оби́тель устро́ил еси́/ и собра́ на те́сный путь и́ноческий мона́хов мно́жество,/ уча́ их жа́ждати благ небе́сных/ и плоть ду́хови покоря́ти./

Помина́й у Престо́ла Влады́чня нас, чту́щих твою́ па́мять, Леони́де,/ да спасе́т ду́ши на́ша.

Похва́льная днесь воспису́ем ти,/ любо́вию творя́щии па́мять твою́,/ уго́дниче Христо́в и чудотве́рче Леони́де,/ стране́ се́верней возсия́вый, я́ко звезда́ богосве́тлая./ Притека́ющии к тебе́ исцеле́ния да́ры прие́млют,/ и́маши бо дерзнове́ние ко Го́споду/ и моли́твами твои́ми свобожда́еши всех бед и напа́стей/ чту́щих тя ве́рою.

А́нгелоподо́бным твои́м житие́м, преподо́бне Леони́де,/ облагоуха́л еси́ пусты́ню,/ в не́йже во́лю Госпо́дню сотвори́в,/ и и́ны ю́ твори́ти научи́л еси́,/ ли́ка и́ноческаго предстоя́телю богому́дрый и о́тче чадолюби́вый./ Вся́ким злострада́нием плоть свою́ изнури́в,/ умертви́л еси́ по́двиги теле́сная мудрова́ния,/ те́мже тя ублажа́ем, Христа́ велича́юще.

Сла́ва, глас 2:

По́двиги и труды́ твоя́ воспева́ем, Леони́де,/ и све́тлое твое́ житие́ богоуго́дное прославля́ем,/ ты бо зми́я дре́вняго победи́л еси́,/ избра́в путь те́сный и ско́рбный,/ вся́каго дово́льства теле́снаго лише́нный,/ испо́лненный же мра́за и зно́я, а́лчбы и жа́жды./ Сего́ ра́ди на высоту́ безстра́стия возше́л еси́,/ и моли́тва твоя́ ко Го́споду, я́ко фимиа́м благово́нный, восхожда́ше./ Ны́не же Бо́гу предстоя́,/ моли́ся о спасе́нии на́шем, о́тче преподо́бне.

И ны́не, Богоро́дичен:

Все упова́ние мое́ на Тя возлага́ю,/ Ма́ти Бо́жия,/ сохрани́ мя под кро́вом Твои́м.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник:

Моли́тва

О свяще́нная главо́, преподо́бне о́тче наш Леони́де, земны́й а́нгеле и небе́сный челове́че, свети́льниче пресве́тлый, край наш Прилу́зский озаря́яй! Тебе́, уго́дниче Бо́жий, неистощи́мое от Всеблага́го Влады́ки благода́ти и даро́в даде́ся сокро́вище: с ве́рою к тебе́ приходя́щих утеша́ти, теле́сныя и душе́вныя неду́ги отгоня́ти. К тебе́ у́бо прибега́ем, припа́дающе, мо́лимся: не пре́зри нас, моля́щихся и твоея́ прося́щих по́мощи; испроси́ нам у Христа́, да сотвори́т с на́ми зна́мение во бла́го и преобрази́т на́ше мра́чное житие́, се́рдце на́ше прокаже́нное очи́стит и оби́тель сотвори́т для Своего́ вселе́ния, я́ко без Него́ не мо́жем твори́ти ничесо́же, да вся́кое на́ше во бла́го жела́ние испо́лнит. Да та́ко, угожда́юще Ему́, победи́м борю́щаго нас диа́вола, вни́дем иде́же вси святи́и пребыва́ют и прославля́ют Отца́, и Сы́на, и Свята́го Ду́ха во ве́ки. Ами́нь.

Преподобный Леонид Устьнедумский родился в 1551 году в Пошехонско-Ярославской земле в семье благочестивых крестьян Филиппа и Екатерины. Родители воспитали сына в страхе Божием и научили его чтению. До 50-летнего возраста он занимался земледелием.

В 1603 году преподобный Леонид удостоился в сонном видении явления Божией Матери. Она повелела ему идти на реку Двину, в Моржевскую Николаевскую пустынь, неподалеку от Холмогор в Архангельской земле, взять там Ее икону «Одигитрия» и перенести на реку Лузу к Туринской горе, в пределы современной Кировской области, и, построив в честь Ее храм, оставаться при нем до кончины. Преподобный Леонид, считая себя недостойным особого Божественного откровения, положил отнестись к видению как к обычному сну и никуда не пошел. Так он сделал по своему великому духовному опасению, осмотрительности и высокому смирению.

Через некоторое время он отправился в Кожеезерский монастырь, в Архангельской земле, и принял там монашеский постриг. После основания монастыря в 1565 году преподобным Серапионом (†27 июня 1611), третьим игуменом в 1643–1646 годах там был Никон, впоследствии Патриарх Московский и всея Руси.

Кожеезерская обитель, окруженная водами озера Коже, находилась вдали от людских поселений. Преподобный Леонид прожил здесь около года, исполняя послушание келаря и подвизаясь вместе с братией обители в условиях сурового климата и постоянно испытывая недостаток в пище. Его духовным руководителем был преподобный старец Серапион. Здесь прежнее видение повторилось, но святой и на этот раз не дерзнул исполнить повеление.

Из Кожеезерской обители святой Леонид ушел в Преображенский Соловецкий монастырь. Он три года терпеливо трудился здесь в пекарне и уже начал забывать о видении, как вдруг, в третий раз, явилась преподобному Божия Матерь и повторила приказание. Старец рассказал о троекратном видении Богородицы игумену монастыря Антонию и просил благословения оставить обитель. Игумен отпустил его, и преподобный Леонид отправился в Моржевскую пустынь. Он не сразу открыл настоятелю Корнилию (Кочергин; 1599–1623) причину своего прибытия и целый год провел в обители на тяжелых послушаниях.

Пресвятая Богородица явилась ему здесь в четвертый раз с тем же повелением. Тогда преподобный рассказал настоятелю и братии о явлении Пресвятой Богородицы и указал святую икону, которую ему было повелено перенести к Туринской горе. Благочестивый настоятель и братия, отслужив молебен пред иконой Богородицы Одигитрии, передали святой образ старцу Леониду.

Преподобный со святыней отправился в назначенное ему место, хотя никогда и не бывал в тех краях. На реке Лузе, в двух верстах от Туринской горы, при устье речки Якутицы (Якушицы), впадающей в Лузу, в 80 верстах от Великого Устюга, преподобный Леонид построил небольшое жилище и жил в нем некоторое время, проводя дни и ночи в посте и молитве.

Здесь надлежало святому устроить иноческую обитель, как ему было сказано в видении. Однако местные жители не позволили ему приступить к постройке. Со святой иконой в руках пошел преподобный Леонид лесом, по берегу реки Лузы, из глубины души взывая к Богу о своей скорби. Вскоре он встретился с крестьянином Никитой Назаровым. Преподобный Леонид рассказал ему о бывших видениях, показал образ Божией Матери и просил указать место, где можно было бы построить храм для святой иконы. Видя слезы старца, Никита предложил ему строить храм на месте их встречи. Никита помог старцу построить келлию, а затем начал посещать его для духовной беседы и совместной молитвы. Окрестные жители, узнав о старце Леониде, стали приходить к пустыннику и молились пред святой иконой. Вскоре благочестивые крестьяне построили часовню.

В 1608 году преподобный Леонид, видя в народе возрастающее благоговейное почитание святой иконы Божией Матери и по просьбе желавших проходить под его руководством иноческие подвиги, отправился в Ростов к митрополиту Филарету (впоследствии Патриарх Московский и всея Руси; 1619–1633), чтобы получить его благословение на построение храма и устройство обители. Митрополит Ростовский благословил выдать старцу антиминс и все необходимые для богослужения священные принадлежности, а самого преподобного рукоположил во иеромонаха, определив ему быть начальником новоустраивающейся иноческой обители.

Вскоре была воздвигнута церковь в честь Введения во храм Пресвятой Богородицы. При освящении храма 17 февраля 1608 года в него была перенесена святая икона Богородицы Одигитрии. Место, на котором находилась обитель, было сырое, болотистое. Для осушения болот 60-летний трудолюбивый старец Леонид сам прокопал канал от реки Лузы до Черного озера, от Черного до Святого озера, а затем до Черной речки. Общая длина канала составила около двух километров. (Канал существует и ныне, исполняя свое назначение). Во время этого тяжелейшего труда святой Леонид был ужален у Черного озера ядовитой змеей. Немного встревожившись, он затем решил не думать об этом. Так, с одним упованием на Богородицу, не предпринимая ничего, преподобный остался здоров. В связи с этим он, как гласит предание, назвал вырытый канал Недумойрекой, откуда и обитель стала именоваться Устьнедумской. Хотя канал осушил болота, но река Луза весной, в разлив, затопляла место обители. Поэтому преподобный Леонид решил перенести храм и обитель на более возвышенное место – высокий мыс у Черного озера. (Ныне здесь расположен поселок Озера).

По благословению митрополита Ростовского Варлаама новосозданная церковь, также в честь Введения во храм Пресвятой Богородицы, с приделом во имя великомученицы Параскевы, была освящена 23 мая 1652 года (каменный храм сооружен на этом месте в 1763 году) архимандритом Устюжского Михаило-Архангельского монастыря Арсением.

Своим подвигом в крае, называемом «Лузскою Пермцою», что значит малая часть страны пермяков при реке Лузе, и как один из первых просветителей этих земель, преподобный Леонид заслужил справедливое почитание. Это подтверждает акафист преподобному, где он величается «пермцев просветителем» (икос 3) и «просветителем края Северного» (кондак 5).

Устроив обитель, иеромонах Леонид передал управление его строителю Арсению, а сам, желая высшего духовного совершенства, большую часть времени проводил в келлии в уединении и безмолвии, выходя из нее только на богослужение в храм. Как светильник, тихо догорала жизнь святого иеромонаха Леонида, и, исполненный дней от своих трудов, он переселился в Вечные Обители. Это было 17 июля 1654 года. Мощи преподобного Леонида были положены под спудом в Устьнедумском Введенском храме, где долго хранилась его жесткая и тяжелая власяница – свидетель подвижнических трудов святого.

При Введенской Устьнедумской обители велась запись многих знамений милости Божией, явленных по молитвам к преподобному Леониду.

Литература:

1. Иоанн Верюжский, священник. Преподобный Леонид Устьнедумский. – В кн.: Исторические сказания о жизни святых, подвизавшихся в Вологодской епархии. Вологда, 1880.

2. Филарет (Гумилевский), архиепископ. Жития святых, чтимых Православною Церковью. Июль. СПб., 1885.

3. Лебедев В. Вологодская святыня. – Церковное слово (Прибавление к Вологодским епархиальным ведомостям), 1907, № 19.

4. Трифон, игумен. Празднование памяти преподобного Леонида Устьнедумского в Лальске. – Журнал Московской Патриархии, 1981, № 7.