5-й день

Преподо́бнаго и Богоно́снаго отца́ на́шего Са́ввы Освяще́ннаго

Святи́теля Гурия, перваго архиепи́скопа Казанскаго.

Творе́ние свята́го Димитрия, митрополита Ростовскаго

НА МА́ЛОЙ ВЕЧЕ́РНИ

На Го́споди, воззва́х: стихи́ры на 4, глас 1.

Подо́бен: Всехва́льнии му́ченицы:

Зри́тель был еси́ умо́м мы́сленных Сил,/ я́ко де́телен Боже́ственных слове́с,/ полага́я во твое́м се́рдце,/ в не́мже и восхожде́ния,/ я́ко ле́ствицу, утверди́л еси́,/ преподо́бне Са́вво, о́тче наш,/ и ны́не моли́ся/ дарова́ти душа́м на́шим мир и ве́лию ми́лость.

Са́вво преподо́бнейше,/ твою́ из младе́нства возложи́л еси́ жи́знь Христу́ Бо́гу на́шему,/ от него́же укрепля́емь,/ плотски́я стра́сти по́мыслу повину́л еси́,/ ху́ждшее покаря́я лу́чшему./ Те́мже моли́ся/ дарова́ти душа́м на́шим мир и ве́лию ми́лость.

Богому́дре о́тче наш,/ свети́льник яви́лся еси́ велича́йший,/ просвеща́я подсо́лнечную чуде́с сия́ньми и Боже́ственными де́лы./ Те́мже по успе́нии Незаходи́мый тя Свет прия́т./ И ны́не моли́ся/ дарова́ти душа́м на́шим мир и ве́лию ми́лость.

Сла́ва, глас 2:

Преподо́бне о́тче,/ из младе́нства доброде́тели приле́жно обучи́вся,/ орга́н был еси́ Свята́го Ду́ха,/ и, от него́ прие́м чуде́с де́йство,/ увеща́л еси́ челове́ки преоби́дети сла́дкая./ Ны́не же, Боже́ственным све́том чисте́йше осиява́емь,/ просвети́ и наши мы́сли, Са́вво, о́тче наш.

И ны́не, Богоро́дичен:

Все упова́ние мое́ на Тя возлага́ю,/ Ма́ти Бо́жия,/ сохрани́ мя под кро́вом Твои́м.

На стихо́вне стихи́ры, глас 2.

Подо́бен: До́ме Евфра́фов:

Яви́лся еси́/ от ма́терних пеле́н,/ Богоно́се о́тче наш,/ освяще́нный сосу́д/ и дом Всесвята́го Ду́ха.

Стих: Честна́ пред Го́сподем/ сме́рть преподо́бных Его́.

Нося́ на ра́мех твои́х/ крест Го́сподень,/ де́монская мечта́ния,/ о́тче наш Са́вво,/ до конца́ истреби́л еси́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ле́сти лука́вых де́монов/ обличи́в креста́ си́лою,/ уясни́л же еси́/ сла́ву Христо́ву,/ Са́вво, о́тче наш.

Сла́ва, и ны́не, Богоро́дичен, подо́бен то́йже:

Влады́чице блага́я,/ святы́я Твоя́ руки́/ к Сы́ну Твоему́ вознеси́,/ душелюби́вому Соде́телю,/ уще́дрити рабы́ Твоя́.

Тропа́рь пи́сан на вели́цей вече́рни

Сла́ва, и ны́не, Богоро́дичен: И́же нас ра́ди рожде́йся:

НА ВЕЛИЦЕЙ ВЕЧЕРНИ

Блаже́н муж: 1-й антифо́н. На Го́споди, воззва́х: стихи́ры на 8, глас 5.

Подо́бен: Преподо́бне о́тче:

Са́вво Богому́дре,/ А́нгелов равностоя́телю,/ единосе́льниче преподо́бных,/ собесе́дниче проро́ков,/ му́чеников и апо́столов снасле́дниче,/ во Све́те Невече́рнем ны́не обита́яй./ Его́же луча́ми сия́я Боже́ственными,/ кра́йнейшим жела́нием,/ ему́же предстоя́ со дерзнове́нием,/ просвеще́н и наслажда́яся того́ виде́ньми/ и пита́яся того́ добро́тами непреста́нно,/ Христа́ моля́, Христа́ умоли́, преподо́бне,/ дарова́ти Це́ркви единомышле́ние,/ мир и ве́лию ми́лость.

Са́вво Богому́дре,/ воздержа́ния свети́ло неугаси́мое,/ свети́лъниче мона́шествующих пресве́тлейший,/ любве́ луча́ми просвеща́емь,/ сто́лпе непрекло́нный терпе́ния,/ утвержде́ние и си́ла ве́рою тя чту́щих,/ исцеле́ний сокро́вище,/ жи́телю пусты́нный я́ко вои́стинну,/ я́ко рай сию́ Боже́ственный показа́в,/ Боже́ственныя плоды́ принося́щу спаса́емых,/ Христа́ моля́, Христа́ умоли́, преподо́бне,/ дарова́ти Це́ркви единомышле́ние,/ мир и ве́лию ми́лость.

Са́вво Богому́дре,/ доброде́телей сто́лпе о́гненный,/ свети́льниче, и́же из мо́ря мирска́го лю́ди к приста́нищу Боже́ственному наставля́я,/ пре́лести ду́ха низложи́вый,/ Ду́ха Свята́го чи́стое прия́телище,/ наста́вниче мона́шествующих,/ изве́стная ме́ра воздержа́ния,/ смире́ния све́тлая высото́,/ исто́чниче, точа́щий врачева́ний пучи́ну,/ Христа́ моля́, Христа́ умоли́, преподо́бне,/ дарова́ти Це́ркви единомышле́ние, мир и ве́лию ми́лость.

Сла́ва, глас 6:

Е́же по о́бразу соблю́д невреди́мо,/ ум влады́ку на стра́сти па́губныя по́стнически поста́вив,/ во е́же по подо́бию, я́ко мо́щно, возше́л еси́,/ му́жески бо естество́ пону́див,/ потща́лся еси́ ху́ждшее покори́ти лу́чшему/ и плоть порабо́тити ду́ху./ Те́мже мона́шествующих яви́лся еси́ верх,/ жи́тель пусты́нный, благотеку́щих обучи́тель,/ пра́вило доброде́тели изве́стнейшее./ И ны́не на Небесе́х зерца́лом разре́шшимся,/ о́тче наш Са́вво,/ чи́сте зри́ши Святу́ю Тро́ицу,/ моля́ся несре́дственне о и́же ве́рою и любо́вию чту́щих тя.

И ны́не, Богоро́дичен: Кто Тебе́ не ублажи́т:

Вход. Проки́мен дне. Чтения 3.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (главы́ 5, 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни;/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины,/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости, испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы,/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком/ и во́зраст ста́рости – житие́ нескве́рное./ Благоуго́ден Бо́гу быв, возлю́блен бысть/ и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его,/ сего́ ра́ди потща́ся от среды́ лука́вствия./ Лю́дие же, ви́девше и не разуме́вше,/ ниже́ положи́вше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ра храма.

И свята́го самогла́сны, глас 2:

По́стническое обуче́ние собра́в на земли́, преподо́бне Са́вво,/ и страсте́й прило́ги тече́нием слез твои́х вся притупи́л еси́;/ ле́ствице Боже́ственная и честна́я, на Не́бо возводя́щая,/ всем позна́ся Богоприя́тное житие́ твое́,/ благоче́стия бо плоды́ в нем показа́в,/ врачу́еши и́ми не́мощи страсте́й ве́рно вопию́щих ти:/ ра́дуйся, восто́чная звездо́ златоза́рнейшая,/ и мона́шествующих лампа́до све́тлая, и па́стырю;/ ра́дуйся, приснопева́емый,/ пусты́нное зело́ добре́йшее воспита́ние/ и Це́ркве непоколеби́мое утвержде́ние;/ ра́дуйся, заблу́ждших вели́кий путево́жде;/ ра́дуйся, на́ша хвало́/ и вселе́нныя све́тлое ра́дование.

На земли́ А́нгела и на Небесе́х челове́ка Бо́жия,/ ми́ра благокрасо́тство,/ сла́дость благи́х и доброде́телей по́стнических похвалу́,/ Са́вву да почти́м:/ насажде́н бо в дому́ Бо́жии,/ процвете́ пра́ведно/ и, я́ко кедр в пусты́ни,/ умно́жи па́ству Христо́ву слове́сных ове́ц/ в преподо́бии и пра́вде.

И́же еди́н на святы́х опочива́яй Бог,/ освяще́нную ду́шу твою́ чи́стое обре́т жили́ще,/ в ню всели́ся и Боже́ственных благода́тей сию́ испо́лни,/ и́миже ко Све́ту наставля́еши пою́щих тя,/ освяще́нный Са́вво блаже́нне.

Сла́ва, глас 2:

Е́же па́че ума́ благи́х прие́м жела́ние,/ вся я́же в ми́ре кра́сная презре́л еси́, Богоприя́тне,/ отту́ду бо плодо́м не запя́лся еси́, я́коже Ада́м;/ зми́я же отрази́в воздержа́нием,/ а́нгельски житие́ пожи́л еси́/ и ны́не на Небесе́х водворя́ешися,/ наслажда́лся дре́ва жи́зненнаго,/ Бо́га моля́ о нас,/ ве́рно соверша́ющих, освяще́нне Са́вво, па́мять твою́.

И ны́не, Богоро́дичен: О, чудесе́ новаго!

На стихо́вне стихи́ры, глас 5.

Подо́бен: Ра́дуйся:

Ра́дуйся, по́стнических вои́стинну по́двигов благово́нный сосу́де:/ крест бо на ра́мо взем/ и Влады́це Христу́ себе́, всеблаже́нне, возложи́в,/ пло́ти попра́л еси́ долувлеку́щее мудрова́ние;/ доброде́тельми же ду́шу просвети́л еси́/ и к Боже́ственному впери́лся еси́ жела́нию./ Тем всесвяту́ю твою́ окружи́вше ра́ку, всехва́льне Са́вво,/ Боже́ственнаго Человеколю́бия про́сим получи́ти твои́ми моли́твами/ и ми́ру дарова́ти ве́лию ми́лость.

Стих: Честна́ пред Го́сподем/ смерть преподо́бных Его́.

Угль Богосия́нен огню прибли́жився, Богоно́се, ду́ха,/ показа́лся еси́ в ми́ре, Са́вво,/ просвеща́я ду́ши, ве́рно, Богому́дре,приступа́ющих к тебе́,/ к Све́ту путеводя́ ты́я Невече́рнему, преподо́бне;/ пусты́нное же, ороша́емь свы́ше Боже́ственною благода́тию,/ увяди́л еси́ у́глие./ Тем и побе́ды тебе́ проявле́нно даро́ва вене́ц, блаже́нне,/ Боже́ственныя пра́вды строи́тель Христо́с,/ Его́же моли́ дарова́ти душа́м на́шим ве́лию ми́лость.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ле́ствица Небоме́рная я́ве житие́ твое́ бысть, Богому́дре,/ е́юже на высоту́ возвы́сился еси́/ и Влады́це Христу́ бесе́довати, всеблаже́нне, сподо́бился еси́;/ ум просвети́в та́мо су́щими осия́нии,/ луча́ми же Того́ просвеща́емь,/ равноа́нгельну прия́л еси́ све́тлость./ Ему́же и ны́не предстоя́, моли́ся, преподо́бне,/ соверша́ющия Боже́ственную и всесвяще́нную па́мять твою́/ с тобо́ю предста́вити и ми́ру дарова́ти ве́лию ми́лость.

Сла́ва, глас 8:

Мона́хов мно́жества/ наста́вника тя почита́ем, о́тче наш Са́вво:/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных./ С ни́миже моли́ся Го́споду/ поми́ловатися душа́м на́шим.

И ны́не, Богоро́дичен: Безневе́стная Де́во:

На благослове́нии хлебов.

Тропа́рь, глас 8:

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́,/ и был еси́ свети́льник вселе́нней, сия́я чудесы́, Са́вво, о́тче наш,/ моли́ Христа́ Бо́га спасти́ся душа́м на́шим.

И Богоро́дице Дево:

НА У́ТРЕНИ

На Бог Госпо́дь: тропа́рь свята́го два́жды. Сла́ва, и ны́не, Богоро́дичен воскре́сен.

По 1-м стихосло́вии седа́лен, глас 1.

Подо́бен: Лик А́нгельскии:

Житие́ благоче́стно на земли́ сконча́в,/ прия́телище чи́стое ты ду́ха яви́лся еси́,/ просвеща́я ве́рою к тебе́ притека́ющия, блаже́нне./ Те́мже моли́ твоего́ Влады́ку просвети́ти ду́ши на́ша,/ воспева́ющих тя, Са́вво Богому́дре,о́тче наш.

Сла́ва, и ны́не, Богоро́дичен:

Всех Творца́ и Бо́га же и Соде́теля, Всенепоро́чная Чи́стая,/ Ду́хом Боже́ственным в ложесна́х зачала́ еси́/ и без истле́ния родила́ еси́./ Его́же сла́вяще, Тя воспева́ем, Де́во,/ я́ко пала́ту Царя́ всех и ми́ра защище́ние.

По 2-м стихосло́вии седа́лен, глас 4.

Подо́бен: Яви́лся еси́ днесь:

Возсия́в, я́коже со́лнце, луча́ми облиста́еши, преподо́бне,/ всему́ ми́ру, далечесия́тельными уче́нии твои́ми,/ чу́дный Са́вво светоно́сче, преподо́бных похвало́.

Сла́ва, и ны́не, Богоро́дичен:

В кров Твой, Всечи́стая Де́во,/ прибега́ющих нас мольбу́ прие́мши,/ не преста́й моля́щи Челове́колюбца спасти́ рабы́ Твоя́.

По полиеле́и седа́лен, глас 8.

Подо́бен: Прему́дрости:

Из утро́бы освяти́лся еси́ я́ко вои́стинну свяще́ннейший, Са́вво,/ и на земли́, я́ко А́нгел, пожи́л еси́:/ плоть бо умертви́л еси́ воздержа́нием,/ Евфи́мия бо Вели́каго нра́ву досто́йно поревнова́л еси́/ и Тро́ицы показа́лся еси́ уго́дник, блаже́нне./ Те́мже и к ре́вности Боже́ственнаго твоего́ жития́/ ли́ки совоку́пи́л еси́ мона́шествующих,/ приснопа́мятне, Богоно́се о́тче наш,/ моли́ся Христу́ Бо́гу грехо́в оставле́ние пода́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Небе́сную дверь и киво́т,/ всесвяту́ю гору, све́тлый о́блак воспои́м,/ неопали́мую купину́, слове́сный рай,/ Е́вы воззва́ние, вселе́нныя всея́ вели́кое сокро́вище,/ я́ко спасе́ние в Ней соде́яся ми́ра/ и оставле́ние дре́вних согреше́ний./ Сего́ ра́ди и вопие́м Ей:/ моли́ся Сы́ну Твоему́ прегреше́ний оставле́ние дарова́ти/ благоче́стно покланя́ющимся всесвято́му Рождеству́ Твоему́.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми. Вся́кое дыха́ние: Ева́нгелие от Луки́, зачало 24.

По 50-м псалме́ стихи́ра, глас 6:

Преподо́бне о́тче,/ во всю зе́млю изы́де веща́ние исправле́ний твои́х./ Тем на Небесе́х обре́л еси́ мзду́ трудо́в твои́х,/ де́монския погуби́л еси́ полки́/ и А́нгельския дости́гл еси́ чи́ны,/ и́хже житию́ непоро́чно поревнова́л еси́./ Дерзнове́ние име́я ко Христу́ Бо́гу,/ мир испроси́ душа́м на́шим.

Кано́н Пресвяты́я Богоро́дицы на 6, глас 2, его́же краегране́сие: Пою́ хвалу́ Живоно́сней Отрокови́це.

Песнь 1

Ирмо́с: Нетре́ну, необы́чну,/ немо́кренно морску́ю ше́ствовав стезю́,/ избра́нный вопия́ше Изра́иль:/ Господе́ви пои́м, я́ко просла́вися.

Невеще́ственная дре́вле ле́ствица/ и стра́нно олядене́вщий путь мо́ря/ Твое́ явля́ше Рождество́, Чи́стая,/ Ю́же пое́м вси, я́ко просла́вися.

Си́ла Вы́шняго, ипоста́сь соверше́нная, Бо́жия Му́дрость,/ вопло́щшаяся, Пречи́стая, из Тебе́,/ челове́ком бесе́дова, я́ко просла́вися.

Про́йде сквозе́ дверь непрохо́дную/ заключе́нный утро́бы Твоея́ пра́вды Со́лнце, Чи́стая,/ и ми́ру возсия́, я́ко просла́вися.

Кано́н преподо́бнаго на 8, глас 8, его́же краегране́сие: Всеизря́днаго в по́стницех Са́вву любе́зно пою́. Творе́ние Феофа́ново.

Песнь 1

Ирмо́с: Колесницегони́теля фарао́ня погрузи́/ чудотво́ряй иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Светозаре́нием Свята́го Ду́ха, Са́вво,/ озари́ благоче́стною любо́вию пе́сньми восхваля́ющия тя,/ по́стников похвалу́, мона́шествующих сла́ву,/ пусты́ни украси́теля, бла́гочестия учи́теля.

Всю любо́вь к Бо́гу возложи́в от ю́ности,/ и к Нему́, ра́дуяся, все твое́ жела́ние име́я,/ пло́ти дви́жения и страсте́й нахо́ды воздержа́нием умертви́л еси́,/ Са́вво Богоно́се всехва́льне.

Победи́в плодо́м, сокрове́ннаго зми́я попра́л еси́/ и того́ се́ти легко́ премину́л еси́,/ Богоче́стия кри́лы впери́вся, о́тче;/ жи́знь же, ра́дуяся, объя́л еси́ от са́да кре́стнаго.

Просвеща́емь Све́том благода́ти, во огнь вшел еси́,/ я́коже трие́ о́троцы пребы́л еси́ неопале́н,/ Бо́гу тя сохра́ншу/ и явля́ющу всем бу́дущее тебе́ преспе́яние,/ по́слежде, о́тче, и соверше́ние.

Богоро́дичен: Неуде́ржными на нас смерть стремле́ньми я́тся,/ но, Твоему́ Рождеству́ прибли́жившися, поги́бе/ и, прирази́вшися, упраздни́ся, Богоро́дице Де́во,/ Жи́знь бо вои́стинну присносу́щную воплоти́вшуюся родила́ еси́.

Катава́сия: Спасе́ лю́ди чудоде́йствуяй Влады́ка:

Песнь 3

Ирмо́с: Лук сокруши́ся си́льных/ держа́вою Твое́ю, Христе́,/ и си́лою не́мощствующии/ препоя́сашася.

И́же вре́мене вне вся́каго, я́ко време́н Творец,/ из Тебе́, Де́во, во́льно Младе́нец созда́ся.

Чре́во, простра́ншее Небе́с, воспои́м,/ и́мже Ада́м на Небесе́х, ра́дуяся, жи́тельствует.

Ин

Ирмо́с: Утвержде́н в нача́ле Небеса́ ра́зумом/ и зе́млю на вода́х основа́вши,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.

Ум влады́ку над страстьми́, всебога́те, поста́вив,/ пода́тель пра́вды показа́лся еси́,/ лу́чшему бо я́ве ху́ждшее повину́л еси́./ Те́мже, я́ко фи́никс, о́тче, в пусты́нях процве́л еси́.

После́довати разуме́в стопа́м Влады́ки,/ пресе́льник оте́чества был еси́/ и, в пусты́ни обита́я, побе́ду воздви́гл еси́ на противобо́рныя,/ Боже́ственною си́лою укрепля́емь.

Тве́рдостию ра́зума, всеблаже́нне, укрепля́емь,/ разли́чная вра́жия кова́рства обличи́л еси́, му́дре,/ и всем яви́л еси́/ и горды́ню о́наго возвы́шенную низложи́л еси́.

Свяще́нна тя душе́ю/ и простоты́ изволе́ния доброде́тельми укра́шена ви́дя,/ светле́йшая звезда́ Евфи́мий прия́т,/ проро́чески веща́я твою́, всеблаже́нне, све́тлость.

Богоро́дичен: Спаси́тельнаго нас ра́ди Сло́ва строе́ния/ све́тлая Ты, Ма́ти Де́во, дверь позна́лася еси́ вои́стинну:/ Ты бо нам ввела́ еси́ у́мную лучу́ Пребоже́ственнаго Божества́.

Катава́сия: При́зри на пе́ния рабо́в, Благоде́телю:

Седа́лен, глас 8.

Подо́бен: Прему́дрости:

Земна́я вся оста́вив, в ми́ре сый теле́сно,/ ду́хом был еси́ А́нгелом соприча́стник:/ настоя́щий бо стра́сти теле́сныя умертви́в,/ Тро́ицы показа́лся еси́ служи́тель, блаже́нне./ Те́мже и неду́гующих врачу́еши стра́сти/ и сло́вом ду́хи отгони́ши благода́тию, Богоно́се о́тче наш;/ моли́ся Христу́ Бо́гу прегреше́ний оставле́нию дарова́тися/ пра́зднующим любо́вию святу́ю па́мять твою́.

Сла́ва:

Молвы́ жите́йския оста́вив,/ крест твой на ра́мена взем,/ всего́ возложи́л еси́ тебе́ Бо́гу,/ пло́ти же и ми́ра вне быв,/ Ду́ху был еси́ Свято́му собесе́дник./ Те́мже и к ре́вности лю́ди воздвиза́я,/ гра́ды истощи́л еси́/ и пусты́ни гра́ды сотвори́л еси́, Богоно́се о́тче наш,/ моли́ Христа́ Бо́га прегреше́ний оставле́нию дарова́тися/ пра́зднующим любо́вию святу́ю па́мять твою́.

И ны́не, Богоро́дичен:

Я́ко Всенепоро́чная Неве́сто Творца́,/ я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Всепе́тая,/ беззако́нию мя су́ща скве́рное оби́телище/ и де́моном игра́лище в разуме́ бы́вша,/ потщи́ся и тех злоде́йствия мя изба́вити/ и све́тлое жили́ще доброде́телей соверши́, Светоно́сная, Нетле́нная,/ отжени́ о́блак страсте́й и Вы́шняго прича́стия сподо́би/ и Све́та Невече́рняго моли́твами Твои́ми.

Песнь 4

Ирмо́с: Услы́шах, Го́споди,/ сла́вное Твое́ смотре́ние/ и просла́вих, Человеколю́бче,/ непостижи́мую Твою́ си́лу.

Се превозвы́сися Боже́ственная гора́ дому́ Госпо́дня превы́шше сил,/ Богома́терь я́вственнейший.

Зако́нов есте́ственных кроме́, Еди́на Де́во,/ ро́ждши Влады́чествующего тва́рию,/ сподо́билася еси́ Боже́ственнаго зва́ния.

Ин

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Душе́вное о́чища́я устрое́ние/ и разширя́я Боже́ственными виде́нии,/ вме́стну сию́ вои́стинну Боже́ственных дарова́ний соде́лал еси́, Богоблаже́нне:/ возложе́нием же рук твои́х не́мощствующия исцели́л еси́,/ подража́тель Влады́ки быв.

И́же на тя, о́тче, лю́те разсвире́пев,/ поглоти́ся, я́ко Дафа́н окая́нный, и, я́ко Авиро́н, потреби́вся:/ тя бо неви́димо Боже́ственная храня́ше благода́ть,/ мно́гих промышля́ющи спасе́ние, всеблаже́нне,/ сла́вный Са́вво Богому́дре.

Зако́ном Бо́жиим наказа́в, Богоглаго́ливе, чу́вства,/ к разуме́нию безтеле́сных и мы́сленных/ твою́ худо́жную упра́вил еси́ мысль,/ проходя́ неосла́бно от сла́вы в сла́ву,/ от си́лы, о́тче, в си́лу.

Благоде́тельствовати единоплеме́нныя предложи́в,/ в пусты́ни гра́ды созда́л еси́ Боголе́пны и душеполе́зны,/ и в земли́ жа́ждущей исто́чники вод изве́л еси́,/ и ту́чи с Небесе́ пресла́вно, Богому́дре,/ в безво́дных се́лех низве́л еси́.

Богоро́дичен: Новоцве́тный безсме́ртия рай/ и красе́н вои́стинну показа́лася еси́,/ Дре́во жи́зни, в Тебе́ насажде́нное, Богонача́льнейше чревонося́щи и ражда́ющи,/ всем искапа́ющее спаси́тельныя наде́жды,/ ве́рно Богоро́дицу му́дрствующим Тя.

Катава́сия: Ро́да челове́ча обновле́ние:

Песнь 5

Ирмо́с: Угль Иса́ии проявле́йся,/ Со́лнце из де́вственныя утро́бы,/ возсия́ во тьме заблу́ждшим,/ Богоразу́мия просвеще́ние да́руя.

О́блацы, весе́лия сла́дость кропи́те су́щим на земли́,/ я́ко Отроча́ даде́ся, Сый пре́жде век,/ из Де́вы вопло́щся Бог наш.

Житию́ и пло́ти мое́й Свет возсия́/ и дря́хлость греха́ разруши́,/ напосле́док из Де́вы без се́мене вопло́щся, Высоча́йший.

Ин

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Неукло́нною мы́слию к твоему́ Жела́емому простира́яся,/ от Него́ благода́ть велича́йших чуде́с незави́стну прия́л еси́, о́тче,/ и ве́рно приходя́щия сострада́тельно уврачева́л еси́, преподо́бне.

Плотски́х тя́жестей дебельство́ отло́жив,/ сосу́д Богоде́ланен избра́н был еси́ Свята́го, чу́дне, Ду́ха,/ оша́янием сне́дей, и моли́твою, и терпе́нием, и сми́реномудрием украша́емь.

Пропове́дник Боже́ственных догма́т велегла́снейший рукоположе́н еси́,/ собо́ров, о́тче, святы́х соо́бщник был еси́, цари́ умудря́я,/ и́миже я́ве, благода́тию Боже́ственною огражда́емь, яви́лся еси́, блаже́нне.

От Бо́га да́вшаяся благода́ть тебе́, Богодохнове́нне, провозгласи́ся,/ раздаде́ся всем бо вселе́нныя концы́,/ я́ве творя́щи боголе́пно показа́ния чуде́с Боже́ственное де́йство.

Богоро́дичен: Ве́рных Предста́тельница,/ стена́ неразруши́ма благохва́лящих Тя,/ я́ко всему́ ро́ду челове́ческому я́вльшееся спасе́ние,/ Бо́га ро́ждши теле́сне я́вльшася,/ ду́шу мою́ спаси́, Пречи́стая.

Катава́сия: Из но́щи дел омраче́нныя пре́лести:

Песнь 6

Ирмо́с: Глас глаго́л моле́бных/ от боле́зненныя, Влады́ко, души́ услы́шав,/ от лю́тых мя изба́ви:/ Еди́н бо еси́ на́шего спасе́ния вино́вен.

Естество́ челове́ческое, рабо́тающее греху́, Влады́чице Чи́стая,/ Тобо́ю свобо́ду улучи́:/ Твой бо Сын я́ко А́гнец за всех закала́ется.

Вопие́м Ти вси и́стинней Ма́тери Бо́жии:/ прогне́вавшия рабы́ изба́ви,/ Еди́на бо дерзнове́ние к Сы́ну и́маши.

Ин

Ирмо́с: Очи́сти мя, Спа́се,/ многа́ бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Любо́вь к Бо́гу и бли́жнему стяжа́в,/ зако́на и проро́ков исполня́я глави́зну,/ преиму́щую бо всех несосу́дно доброде́тель, о́тче, испра́вил еси́.

Равноа́нгельное на земли́ ты жи́тельство стяжа́л еси́,/ равноа́нгельну же честь Христо́с тебе́ дарова́,/ святы́х чи́ны спутьше́ствующия души́ твое́й посла́в.

Прему́дрости поро́д яви́вся,/ нача́ло прему́дрости возжеле́л еси́ – страх Бо́жий,/ и́мже укрепля́емь, к соверше́нию вме́стному челове́ком, о́тче, дости́гл еси́.

Богоро́дичен: Спа́са и Изба́вителя, Бо́га всех и Го́спода ро́ждши,/ нам пло́тию приобщи́вшася,/ спаса́й, Пречи́стая, призыва́ющия Тя от бед, Влады́чице.

Катава́сия: Обита́я Ио́на:

Конда́к, глас 8.

Подо́бен: Взбра́нной:

Я́ко от младе́нства Бо́гу же́ртва непоро́чная/ прине́слся еси́ доброде́телию, Са́вво блаже́нне,/ садоде́латель быв благоче́стия;/ те́мже был еси́ преподо́бных удобре́ние,/ граждани́н же пусты́нный достохва́лен./ Те́мже зове́м ти:/ ра́дуйся, Са́вво пребога́те.

И́кос:

О отце́в верхо́вниче и преподо́бных красото́,/ по́стников ко Христу́ дерзнове́ние,/ пусты́нный граждани́не и садоде́лателю./ Ка́ко воспою́ твое́ житие́, преподо́бне?/ блиста́еши бо конце́м, я́ко со́лнце./ Тем вопию́ ти:/ ра́дуйся, кра́сная каппадо́ков сла́во;/ ра́дуйся, честно́е вселе́нныя зна́мение;/ ра́дуйся, пусты́ни добре́йшее прозябе́ние;/ ра́дуйся, пра́ведных Боже́ственное наслажде́ние;/ ра́дуйся, я́ко презре́л еси́ теку́щая и тле́нная;/ ра́дуйся, я́ко на Небесе́х со А́нгелы обита́еши;/ ра́дуйся, мона́шествующих исправле́ние и пра́вило;/ ра́дуйся, леня́щихся к Бо́гу воздви́жение;/ ра́дуйся, исто́чниче чуде́с Богото́чный:/ ра́дуйся, честны́й Ду́ха орга́не;/ ра́дуйся, и́мже украси́ся восто́к;/ ра́дуйся, и́мже за́падная сия́ют;/ ра́дуйся, Са́вво пребога́те.

Песнь 7

Ирмо́с: Вити́и яви́шася о́троцы любому́дрейшии дре́вле,/ от Богоприя́тныя бо души́, богосло́вяще устна́ми, поя́ху:/ Пребоже́ственный отце́в и наш Бо́же,/ благослове́н еси́.

Зря́ше в нощи́ у́бо Иа́ков я́ко в гада́нии Бо́га,/ воплоще́н же из Тебе́, све́тлостию яви́ся пою́щим:/ Пребоже́ственный отце́в Бог и препросла́влен.

Зна́мения, е́же в Тебе́, неизрече́ннаго проявля́я сплете́ния,/ со Иа́ковом бо́рется,/ чрез е́же во́льно соедини́ся челове́ком, Чи́стая,/ Пребоже́ственный отце́в Бог и препросла́влен.

Ме́рзок не пропове́дуяй Еди́наго Де́вы Тя Сы́на от Всепе́тыя Тро́ицы,/ и несомне́нною мы́слию, и язы́ком вопия́:/ Пребоже́ственный отце́в Бог и препросла́влен.

Ин

Ирмо́с: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Отло́жил еси́ привре́менная, ве́чными возме́здився,/ и со А́нгелы лику́еши, я́ко А́нгельское пожи́в житие́./ С ни́миже и пел еси́:/ благослове́н Бог оте́ц на́ших.

Вопие́т бла́годарно ко Го́споду твоя́ вели́кая и всечестна́я Ла́вра,/ жи́теля, и зижди́теля, и граждани́на тя предлага́ющи, му́дре,/ и хва́лящися зове́т:/ благослове́н Бог оте́ц на́ших.

Непреста́нно моли́ Го́спода, Са́вво Богому́дре, о па́стве твое́й,/ приле́жно же испроси́ твои́м трудо́м ве́чновати при́сно/ плодонося́щим и любо́вию зову́щим:/ благослове́н Бог оте́ц на́ших.

Богоро́дичен: Неве́стник Пречи́ст па́че словесе́ Сло́ва воплоще́ния,/ и черто́г, и престо́л пра́вая му́дрствующий Тя имену́ем/ и, ра́дующеся, Твоему́ Сы́ну зове́м:/ благослове́н Бог оте́ц на́ших.

Катава́сия: Всецаря́ любо́вию уловле́ннии о́троцы:

Песнь 8

Ирмо́с: О подо́бии зла́те небре́гше треблаже́ннии юноши,/ неизме́нный и живы́й Бо́жий о́браз ви́девше,/ среди́ огня́ воспева́ху:/ осуществова́нная да пое́т Го́спода вся тварь/ и превозно́сит во вся ве́ки.

Ви́ден бысть на земли́ Тобо́ю/ и с челове́ки поживе́, И́же бла́гостию несравне́нный и си́лою./ Ему́же, пою́ще, вси ве́рнии, зове́м:/ осуществова́нная да пое́т Го́спода вся́кая тварь/ и превозно́сит во вся ве́ки.

Вои́стинну Тя, Чи́стую, возвеща́юще, сла́вим, Богоро́дице./ Ты бо Еди́наго родила́ еси́, от Тро́ицы воплоще́нна./ Ему́же со Отце́м и Ду́хом вси пое́м:/ да пое́т Го́спода вся́кая тварь/ и превозно́сит во вся ве́ки.

Ин

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

С весе́лием, преподо́бне, святы́х чи́ны чисте́йшей твое́й души́ предтеку́т/ на место отра́дно в све́тлая селе́ния,/ иде́же пра́ведных ли́цы веселя́тся./ С ни́миже ны́не пое́ши:/ свяще́нницы, воспо́йте, лю́дие, превозноси́те Христа́ во ве́ки.

Стра́нна твоя́ чудеса́:/ зве́ри бо укроти́л еси́, ути́шив страсте́й во́лны,/ предглаго́леши бу́дущая проро́ческим да́ром,/ полки́ де́монския прогоня́я,/ язви́ши благомо́щными бде́нии же и моли́твами, и поще́ньми,/ и креста́ си́лою непобеди́мою, Богоно́се.

И́же Моисе́ю пе́рвее от столпа́ веща́вый,/ столп от земли́ до небесе́ всесве́тел просте́рт тебе́ показа́,/ иде́же ны́не лежи́т терпели́вое твое́ и многострада́льное те́ло./ Ему́же, ве́рою предстоя́ще, благоче́стно пое́м:/ лю́дие, превозноси́те Христа́ во ве́ки.

Ра́достно па́мять твоя́ соверша́ется, всехва́льне:/ в радостотво́рную бо оде́ялся еси́ доброде́тель,/ и́стинную ри́зу спасе́ния, и чи́стую,/ и светови́дную весе́лия оде́жду,/ в не́йже ны́не, красу́яся, пое́ши непреста́нно:/ свяще́нницы, воспо́йте, лю́дие, превозноси́те Христа́ во ве́ки.

Богоро́дичен: Неискусобра́чно родила́ еси́, Де́ва пребы́вши,/ и стра́нным Рождество́м Твои́м совокупи́ла еси́ вся,/ вре́менную брань и да́льнее разстоя́ние разруши́вши,/ Христа́, ми́ра да́теля, нося́щи в не́дрех Твои́х./ Его́же ве́рно пое́м и превозно́си́м во ве́ки.

Катава́сия: Утро́бу неопа́льно образу́ют:

Песнь 9

Ирмо́с: Весь еси́ жела́ние, весь сла́дость,/ Сло́ве Бо́жий, Де́вы Сы́не,/ Бо́же бого́в, Го́споди, святы́х Пресвяты́й,/ тем Тя вси с Ро́ждшею велича́ем.

Жезл кре́пости даде́ся естеству́ тле́нному/ Сло́во Бо́жие во утро́бе Твое́й, Чи́стая,/ и сие́ возста́ви, ко а́ду попо́лзшееся./ Те́мже Тя, Всечи́стая, я́ко Богоро́дицу велича́ем.

Ю́же изво́лил еси́, Влады́ко,/ приими́ ми́лостивно моли́твенницу, Ма́терь Твою́, о нас,/ и Твоея́ бла́гости вся́ческая испо́лня́тся;/ да Тя вси я́ко Благоде́теля велича́ем.

Ин

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Благоуха́ет твоя́ ра́ка духо́вное благово́ние,/ бога́тно веселя́щи твоя́ сы́ны, тя обстоя́щия и́скренно,/ помина́ющия, преподо́бне, А́нгельское твое́ пребыва́ние,/ и тебе́ да́нную све́тлость, и сла́ву, и присносу́щную красоту́.

Прото́ржеся в пусты́ни вода́,/ и земля́ жа́ждущая в бла́то бысть, моли́твами претвори́тся, о́тче, твои́ми:/ по́стничестии бо полки́ сию́ населя́ют, я́ко ре́чну,/ страна́ Иорда́нова процвете́, я́ко крин,/ напая́ема твои́ми слеза́ми.

Све́тлость святы́х на Небесе́х/ я́ко пра́веднику тебе́ возсия́, о́тче,/ Христа́ бо пра́вду и́стинную проявле́нно возлюби́л еси́;/ Его́же жи́тельству после́дуя, всеблаже́нне,/ уподо́бився Сего́ живоно́сней, я́ко мо́щно бе, святы́ни.

Бога́тным, Богоно́се, сия́я Све́том и ли́ки А́нгельския ви́дя,/ светови́дны обходя́щия Тро́ический Све́т/ и прие́млющия благода́тию Боговиде́ния лучи́,/ не преста́й моля́ оставле́ния грехо́в сподо́битися пою́щим тя.

Богоро́дичен: Я́ко всех превы́шши земноро́дных несравне́нными, Чи́стая, пе́рвенствы:/ Бо́га бо, всех тва́рей Творца́, во утро́бу Твою́ вмести́ла еси́./ Того́ моли́ я́ко Ми́лостива/ единомышле́ние, мир, благостоя́ние ти́хое Це́рквам дарова́ти.

Катава́сия: Люби́ти у́бо нам:

Свети́лен:

Пусты́ню град сотвори́л еси́ любому́дрыми нра́вы,/ отце́в красото́, Са́вво, о́тче Богому́дре,/ и сию́ соверши́л еси́ мы́сленный рай,/ цвету́щь цве́ты Боже́ственными, единонра́вных мно́жества,/ досто́йно соверша́ющих твою́ честну́ю па́мять.

Сла́ва, и ны́не, Богоро́дичен:

Я́ко иму́щи сострада́тельное и ми́лость ве́лию,/ при́зри, Всепе́тая Богоро́дице Де́во, на мое́ смире́ние/ и страсте́й молву́, и собла́знов жития́ разори́, Отрокови́це,/ и огня́ гее́нскаго изба́ви мя моли́твами Твои́ми.

На хвали́тех стихи́ры, на 4, глас 1.

Подо́бен: Небе́сных чино́в:

Презира́тель до́льних и пресе́льник,/ рачи́тель Го́рних/ и пусты́нный граждани́н, Са́вво Богому́дрый,/ всем нам пра́здновати повелева́ет/ к Бо́гу отше́ствия его́ ве́рно день спаси́тельный.

Вне пло́ти и ми́ра доброде́тельми быв,/ и те́ми на земли́ в житии́/ просла́вил еси́ Го́спода сла́вы, о́тче му́дре,/ и по достоя́нию от Него́ просла́вился еси́,/ и врачева́ний показа́лся еси́ Боже́ственный исто́чник,/ Са́вво Богоприя́тне.

Смире́н, незло́бив, кро́ток, прост,/ молчали́в я́ко был еси́, о́тче,/ па́че челове́ка вои́стинну,/ и невеще́ствен в вещи дом Бо́жий яви́лся еси́, вседосто́йный,/ я́же от Него́ прибы́вшая тебе́ дарова́ния/ ми́лостивно подава́я нам.

Сла́ва, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду́ трудо́в твои́х,/ де́монския погуби́л еси́ полки́/ и А́нгельския дости́гл еси́ чи́ны,/ и́хже житию́ непоро́чно поревнова́л еси́./ Дерзнове́ние име́я ко Христу́ Бо́гу,/ мир испроси́ душа́м на́шим.

И ны́не: Богоро́дице, Ты еси́ лоза́ и́стинная:

Славосло́вие вели́кое. И отпу́ст.

НА ЛИТУРГИ́И

Блаже́нны от кано́на свята́го, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зачало 213. Аллилу́ия, глас 8: Блаже́н муж, боя́йся Го́спода: Стих: Си́льно на земли́ бу́дет се́мя его́. Ева́нгелие от Матфе́я, зачало 43. Прича́стен: В па́мять ве́чную бу́дет пра́ведник:

Преподобный Савва Освященный

Преподобный Савва Освященный родился в 438 году в каппадокийском селении Муталаске (восточная область Малой Азии), в христианской семье Иоанна и Софии. В пятилетнем возрасте Савва был оставлен на воспитание брату матери – Ермию, так как родители надолго уехали в Александрию, куда отец был переведен по службе. Жена Ермия плохо обращалась с отроком, и вскоре он перешел жить к брату отца – Григорию. Но и здесь Савва оставался недолго, так как родственники постоянно ссорились из-за оставленного ему родителями состояния. Святой Савва, не желая вражды, оставил свое наследство и тайно ушел в Флавианову обитель. Там восьмилетний отрок принял монашеский постриг.

Святой Савва прилежно изучал Священное Писание и иноческий устав. Он во всем старался подражать жизни подвижников.

Со всяким плотским желанием преподобный Савва боролся воздержанием. Работая однажды в саду, он залюбовался красивым яблоком и хотел было без спроса съесть его, но, вспомнив о первом грехе прародителей, с досадой на свою прихоть сорвал яблоко и растоптал его. С тех пор преподобный Савва дал обет никогда не есть яблок.

Непрестанной молитвой, постом, послушанием и неленостным трудом святой Савва еще юношей достиг высокой степени духовного совершенства. Господь прославил его даром чудотворений. Об этом свидетельствует следующий случай: один инок положил в печь для просушки свою одежду, забыл о ней и вспомнил, когда печь затопили. Преподобный Савва, желая утешить огорченного брата, с верой в помощь Божию вошел в печь и вынес неповрежденную одежду брата, и сам не пострадал.

Примирившиеся Ермий и Григорий уговаривали преподобного Савву уйти из монастыря, жениться и жить в своем имении, но он отвечал: «Как от змей, убегаю я от тех, которые советуют мне сойти с пути Божия, ибо худые сообщества развращают добрые нравы».

Десять лет преподобный Савва подвизался в той обители, а затем ушел в Иерусалим. Прожив зиму в монастыре преподобного Пассариона (V в., память 11 августа и в субботу Сырной седмицы), он пришел в Лавру преподобного Евфимия Великого († 473, память 20 января). Преподобный Евфимий провидел в юноше будущего наставника многих иноков. Он благословил его жить в обители своего ученика – преподобного Феоктиста († 467, память 3 сентября). С большим усердием преподобный Савва продолжал свои монашеские подвиги и исполнял послушания на новом месте. Он наблюдал за скотом, приносил для братий дрова и воду.

Через некоторое время преподобному Савве пришлось сопровождать некоего инока в Александрию. Там он встретился со своими родителями, которые просили его оставить монашескую жизнь. Но святой Савва, сдерживая естественную любовь к родителям, отвечал словами Евангелия: «Кто любит отца или мать более, нежели Меня, не достоин Меня...» (Мф.10:37).

После смерти преподобного Феоктиста святой Савва по благословению преподобного Евфимия затворился в пещере недалеко от монастыря. Пять дней недели он пребывал в затворе в непрестанной молитве и труде, занимаясь плетением корзин. На шестой день он приходил в обитель, где слушал церковные службы, потом принимал пищу и уходил снова в затвор.

Через 5 лет преподобный Евфимий, все время следивший за духовным возрастанием своего ученика «юноши-старца», вызвал преподобного Савву к себе в Лавру и на всю святую Четыредесятницу удалился с ним и иноком Домитианом (память в субботу Сырной седмицы) в пустыню Руву.

Во время этого странствования преподобный Савва многому научился от мудрого наставника.

Когда преподобный Евфимий Великий преставился ко Господу, блаженный Савва удалился в пустыню и поселился в пещере неподалеку от обители преподобного Герасима Иорданского († 475, память 4 марта). Там он выдержал брань с бесами, которые устрашали его, являясь в образе разных зверей. Нападали на святого и разбойники-сарацины, но Господь сохранял жизнь Своего избранника.

В конце четвертого года пребывания преподобного в пустыне ему явился Ангел Господень и показал долину, где он должен основать Лавру. Святой Савва поселился на указанном месте в пещере, вход в которую был очень неудобен: нужно было спускаться в нее по веревке. За водой святому приходилось ходить за 15 стадий. Сначала он питался травами, росшими около пещеры, затем пищу ему приносили сарацины, случайно открывшие его жилище. они полюбили святого отшельника за незлобие и кротость.

Через пять лет к преподобному Савве стали приходить иноки – образовался монастырь. Он с любовью принимал братий и указывал места для поселения. По благословению преподобного на горе была построена башня, а в долине возведена церковь, в которой совершали службу приходившие в обитель пресвитеры. Сам же преподобный по смирению не принимал священного сана и не благословлял на это никого из братий. Место то было безводное, но по молитве преподобного Саввы был найден обильный источник воды.

Однажды, во время ночной молитвы, преподобный Савва увидел огненный столп. Он пошел на место видения и обнаружил там большую и светлую пещеру. В ней преподобный устроил церковь в честь Пречистой Божией Матери. Рядом он построил себе келлию и проделал тайный ход в церковь, чтобы незаметно ходить в нее молиться.

Лавра преподобного Саввы разрасталась: за короткое время в ней собралось 70 иноков, затем число братий увеличилось до 150. Среди них нашлись ненавистники, которые перестали подчиняться своему Авве, клеветали на него Иерусалимскому Патриарху и просили назначить другого игумена. Но Патриарх не поверил клевете. Прибыв в Лавру, он посвятил преподобного Савву в священный сан и благословил братию подчиняться поставленному им Богом игумену.

Преподобный Савва был уже в преклонных годах, когда в Александрии умер его отец. Мать распродала все имение и по совету сына приняла монашеский постриг. В скором времени она скончалась. На оставленные ею средства в монастыре и в Иерихоне были построены странноприимные дома, а оставшаяся часть денег истрачена на нужды монастыря.

Преподобный Савва через монаха Анфа сблизился с преподобным Феодосием († 529, память 11 января). Молодых иноков он отсылал в монастырь преподобного Феодосия, где они учились правилам монастырской жизни. По повелению Патриарха Саллюстия (484–494) преподобный Феодосий начальствовал над общежительными монастырями, а преподобный Савва – над отцами-отшельниками.

Преподобный Савва основал еще несколько монастырей. Настоятелями в них он назначил своих учеников. Преподобный поочередно посещал новые обители, чтобы утвердить братий на пути духовного совершенствования. Между тем в его Лавре прежние недоброжелатели снова начали возмущать спокойствие насельников. Преподобный, желая сохранить мир, ушел из Лавры в пустыню. Но и туда к нему стали приходить иноки, и возникла еще одна обитель–киновия. Клеветники распустили слух о смерти святого Саввы и известили об этом Патриарха. На праздник Обновления храма Воскресения блаженный Савва с верными ему иноками пришел в Иерусалим, и клеветники были разоблачены. Патриарх Илия II (494–517) приказал не желающим покоряться руководству преподобного Саввы покинуть Лавру. Ушедшие монахи бедствовали на новом месте поселения. Преподобный узнал об этом и, исполняя заповедь Христову о любви к врагам, отправил им все необходимое, а затем сам посетил их и построил там церковь.

Император-еретик Анастасий I Дикор (491–518), отвергавший определения IV Халкидонского Вселенского Собора (449), свергнул с патриаршего престола блаженного Патриарха Илию и требовал от его преемника, Патриарха Иоанна III (517–524), чтобы он предал анафеме Халкидонский Вселенский Собор. Преподобный Савва вместе с другими старцами-пустынниками встал на защиту Православия. Они убедили Патриарха Иоанна не страшиться угроз императора, но твердо стоять за православные догматы. Патриарх предал анафеме всех противников Православия и подтвердил постановления Халкидонского Собора. Вместе с ним на амвоне стояли преподобные Савва и Феодосий.

По молитвам преподобного Саввы семь монастырей, им основанных, во время голода не испытывали нужды: Господь посылал им помощь через неизвестных благотворителей. Преподобный молился также о прекращении засухи, и на землю пролился дождь. Преподобный Савва ездил в Константинополь к новому императору Юстину I (519–527) и испросил освобождение от дани для жителей Палестины, разоренных пятилетней засухой и войной с самарянами.

Приближался конец земной жизни преподобного. Ему был открыт день смерти. Призвав братию, он простился со всеми, причастился Святых Таин Христовых и со словами «Отче, в руки Твои предаю дух мой»,– мирно скончался. Это произошло в 532 году; преподобному Савве было 94 года. Многочисленные чудеса по кончине святого и судьба его Лавры показали, как угодна Богу жизнь преподобного Саввы Освященного.

Преподобным Саввою был написан устав церковных служб, так называемый «Иерусалимский», принятый всеми палестинскими монастырями. С XIV века этот устав распространился и в России.

НА МА́ЛОЙ ВЕЧЕ́РНИ

Стихи́ры, глас 1.

Подо́бен: Небе́сных чино́в:

Небе́сным причте́н бы́ти жела́я,/ земна́я презре́ от ю́ности,/ предпочте́ Го́рняя па́че до́льних/ святи́тель Христо́в Гу́рий,/ на его́же святы́я за ны к Бо́гу моли́твы/ упова́ние возложи́хом.

Небе́сным присоедини́ся чино́м,/ земны́й А́нгел, Небе́сный челове́к,/ во пло́ти Безпло́тных был подража́тель,/ с ни́мже ны́не предстоя́ Христо́ви,/ мо́лится о рабе́х свои́х,/ упова́ние по Бо́зе нань возлага́ющих.

Небе́сный граждани́не, А́нгелов сожи́телю,/ иера́рхов соприча́стниче,/ насле́дниче Ца́рствия Христо́ва,/ о нас, ча́дех твои́х, моли́ся,/ упова́ние на тя возло́жших.

Сла́ва, глас 2:

Прииди́те, христоимени́тии лю́дие,/ Христо́ва служи́теля па́мять че́стне почти́м,/ иера́рха Гу́рия свята́го:/ той бо, а́ще и оты́де от нас душе́ю,/ оба́че прису́тствует нам честны́ми мощми́ свои́ми./ Со А́нгелы водвори́лся,/ челове́ком же посо́бствует,/ оста́вил земна́я, но не оста́вил чад свои́х,/ отлучи́лся ста́да своего́ па́стырь наш до́брый,/ но от Го́рняго восше́ствия назира́ет о́вцы своя́/ и мо́лится Христу́ Бо́гу о душа́х на́ших.

И ны́не, Богоро́дичен:

Спаси́ от бед рабы́ Твоя́, Богоро́дице,/ я́ко вси по Бо́зе к Тебе́ прибега́ем,/ я́ко неруши́мей стене́ и предста́тельству.

На стихо́вне стихи́ры, глас 2.

Подо́бен: До́ме Евфра́фов:

Дом Ду́ха Свята́го/ от ю́ности соде́яся/ уго́дник Бо́жий Гу́рий,/ ны́не же в Небе́сный дом/ душе́ю пресели́ся от земны́х.

Стих: Уста́ моя́ возглаго́лют прему́дрость и поуче́ние се́рдца моего́ ра́зум.

Храм бысть Ду́ху Свято́му/ де́вственное те́ло его́,/ сосу́д духо́внаго ми́ра,/ того́ ра́ди почте́ся/ от Бо́га нетле́нием чу́дным.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Дом Пречи́стыя Богома́тере,/ име́я в себе́ честны́я твоя́ мо́щи,/ Гу́рие святи́телю,/ весели́тся о источа́емых от Тебе́ це́льбах/ и ра́достно прославля́ет чудеса́ твоя́.

Сла́ва, глас 8:

Душе́вную чистоту́ и теле́сную возлюби́в,/ уго́дниче Бо́жий, добронра́вие стяжа́л еси́,/ сми́рением и кро́тостию украси́лся еси́,/ того́ ра́ди господи́н твой земны́й почти́л тя па́че све́рстник твои́х./ Ты же, преподо́бне, ве́рне тому́ рабо́тая,/ вся чу́вственная устро́ивал че́стне,/ ду́хом же Христу́ угожда́л еси́,/ присвоя́яся Тому́ доброде́тельми./ Он же тебе́ в Небе́снем Ца́рствии Свое́м/ возме́здие даде́ ве́чно,/ сотвори́в тя насле́дника неконча́емых Свои́х благ,/ на земли́ же честны́я твоя́ мо́щи чудесы́ обогати́л есть./ Ты же, ему́ ны́не предстоя́,/ моли́ся о чту́щих па́мять твою́.

И ны́не, Богоро́дичен гла́са.

Тропа́рь пи́сан на вели́цей вече́рни.

НА ВЕЛИЦЕЙ ВЕЧЕРНИ

На Го́споди, воззва́х: стихи́ры, глас 5.

Подо́бен: Ра́дуйся:

Ра́дуйся, иера́рше Христо́в,/ вели́кий уго́дниче Бо́жий,/ служи́телю Боже́ственных та́ин досто́йный,/ чи́стый и честны́й сосу́де Свята́го Ду́ха,/ носи́вый Бо́га в се́рдце твое́м вы́ну,/ во уста́х же благода́ть излива́ющуюся име́вый,/ па́стырю до́брый, учи́телю прему́дрый,/ наста́вниче изря́дный, ко́рмчию корабля́ церко́внаго иску́сный,/ прави́телю чу́дный, путеводи́телю изве́стный,/ о́тче святи́телю Гу́рие,/ его́же моли́твами почерпа́ем от Христа́ Бо́га ве́лию ми́лость.

Ра́дуйся, ле́пото Росси́йская,/ сла́ва новопросвеще́нному твоему́ гра́ду,/ красото́ церко́вная, добро́то престо́ла архиере́йска,/ честь иера́рхов, похвало́ мона́шествующих,/ весе́лие люде́й ве́рных,/ ра́дование печа́льных, целе́бниче больны́х,/ безме́здный врачу́ неду́жных,/ помо́щниче безпо́мощных,/ сла́досте огорче́нных беда́ми,/ исто́чниче неоску́дный к тебе́ притека́ющим,/ и́мже почерпа́ем от Христа́ Бо́га ве́лию ми́лость.

Ра́дуйся, новопросвеще́нный гра́де Каза́нь,/ такова́го сподо́бивыйся име́ти в себе́ граждани́на,/ и́же я́ко дар свы́ше от Бо́га дарова́ся тебе́,/ и я́ко бога́тство неоску́дное посла́ся тебе́,/ и я́ко дража́йшее сокро́вище вве́рися ти–/ нетле́нныя цельбопода́тельныя мо́щи вели́каго Бо́жия архиере́я Гу́рия,/ апо́стольски в стране́ твое́й потруди́вшагося,/ тьму нече́стия от Тебе́ отгна́вшаго,/ свет же ве́ры в ро́дех твои́х возсия́вшаго,/ защи́тника и засту́пника твоего́,/ стеною моли́тв свои́х кре́пце тя огражда́ющаго,/ Бо́гу о тебе́ предста́тельствующаго и моля́щагося вы́ну,/ да прие́млеши всегда́ ве́лию ми́лость.

Ины стихи́ры, глас 2.

Подо́бен: Ки́ими похва́льными венцы́:

Ки́ими похва́льными венцы́/ венча́ем святи́теля, предстоя́щаго на Небеси́ Бо́гу?/ Не оставля́ющаго же нас ду́хом,/ Каза́нстей Це́ркви предстоя́теля,/ трудо́в пропове́днических прича́стника,/ нра́вов апо́стольских подража́теля./ Сей бо вои́стинну есть достои́н безсме́ртныя сла́вы,/ его́же венча́ет на Небеси́ Христо́с Бог наш,/ име́яй ве́лию ми́лость.

Ки́ими пе́сненными добро́тами/ восхва́лим Гу́рия святи́теля?/ Хвалу́ воспе́вшаго Бо́жию посре́де ро́да неве́рных/ и Богопозна́нием мно́гих вразуми́вшаго,/ гре́шныя от заблужде́ния обрати́вшаго/ и А́нгелам мно́гу ра́дость сотво́ршаго./ Сей вои́стинну достои́н уста́ Бо́жия нарещи́ся/ и прия́ти вене́ц на Небеси́ от Христа́ Бо́га на́шего,/ иму́щаго ве́лию ми́лость.

Ки́ими духо́вными пе́сньми/ похва́лим святи́теля?/ Ми́ро от моще́й свои́х источи́вша,/ боле́зни от челове́к прогна́вша,/ це́льбам исто́чник я́вльшася,/ Каза́ни прекра́сное удобре́ние/ и всея́ Росси́и украше́ние,/ но́ваго чудотво́рца́, безме́зднаго врача́./ Его́же прославля́ет Христо́с Бог наш,/ име́яй ве́лию ми́лость.

Сла́ва, глас 6:

Святи́теля вели́каго,/ во иера́рсех изря́днаго,/ в ликостоя́нии святы́х сла́внаго,/ в чудотво́рца́х чу́днаго, архиере́я свята́го,/ соше́дшеся в па́мять его́, о пра́зднолюбцы,/ пе́сненными похвала́ми ублажи́м, глаго́люще:/ ра́дуйся, пра́ведне, его́же душа́ в руце́ Бо́жии,/ и не прико́снется ей му́ка;/ ра́дуйся, преподо́бне, дости́гнувый Небе́сныя сла́вы/ и возра́довавыйся на ло́жи поко́я ве́чнаго./ Ра́дуйся, блаже́нне, чи́стый се́рдцем, я́сно ны́не Бо́га зря́й;/ ра́дуйся, свя́те, всех святы́х Святе́йшему благоугоди́вый./ Ра́дуйся, иера́рше, в Го́рняя че́стне прия́тый;/ ра́дуйся, до́брый ра́бе Го́сподень, вше́дый в ра́дость Го́спода своего́,/ Ему́же ны́не моли́ся/ о чту́щих любо́вию всечестно́е твое́ преста́вление.

И ны́не, Богоро́дичен:

Посла́н бысть с Небесе́ Гаврии́л Арха́нгел/ бла́говести́ти Де́ве зача́тие/ и, прише́д в Назаре́т, помышля́ше в себе́, чудеси́ удивля́яся:/ О, ка́ко в Вы́шних непостижи́м Сый от Де́вы ражда́ется!/ Име́яй престо́л Не́бо и подно́жие зе́млю,/ во утро́бу вмеща́ется Деви́чу,/ на Него́же Шестокрила́тии и Многоочи́тии зре́ти не мо́гут,/ сло́вом еди́ным от сея́ воплоти́тися благоизво́ли,/ Бо́жие есть Сло́во настоя́щее./ Что у́бо стою́ и не глаго́лю Де́ве:/ ра́дуйся, Благода́тная, Госпо́дь с Тобо́ю;/ ра́дуйся, Чи́стая Де́во;/ ра́дуйся, Неве́сто Неневе́стная;/ ра́дуйся, Ма́ти Живота́,/ благослове́н Плод чрева Твоего́.

Вход. Проки́мен дне. Чтения три святи́тельская

При́тчей чте́ние (главы́ 10, 3, 8):

Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти,/ не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ есть./ Долгота́ бо дней и ле́та живота́ в десни́це ея́,/ в шу́йце же ея́ бога́тство и сла́ва./ От уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да!/ честна́я бо реку́:/ и блаже́н челове́к, и́же пути́ моя́ сохрани́т:/ исхо́ди бо мои́ – исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас и предлага́ю мой глас сыново́м челове́ческим./ Я́ко аз, прему́дрость, устро́их сове́т,/ и ра́зум, и смысл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая,/ я́ко и́стине поучи́тся горта́нь моя́,/ ме́рзски же пре́до мно́ю устны́ лжи́выя./ С пра́вдою вси глаго́лы уст мои́х:/ ничто́же в них стро́потно, ниже́ развраще́но./ Вся пра́ва суть разумева́ющим/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

При́тчей чте́ние (главы́ 10 и 11):

Уста́ пра́веднаго ка́плют прему́дрость,/ язы́к же непра́веднаго поги́бнет./ Устне́ муже́й пра́ведных ка́плют благода́ти,/ уста́ же нече́стивых развра́щаются./ Ме́рила льсти́вая – ме́рзость пред Го́сподем,/ вес же пра́ведный прия́тен ему́./ Иде́же а́ще вни́дет досажде́ние, та́мо и безче́стие;/ уста́ же смире́нных поуча́ются прему́дрости./ Соверше́ние пра́вых наста́вит их/ и поползнове́ние отрица́ющихся упасе́т их./ Не по́льзуют и́мения в день я́рости,/ пра́вда же изба́вит от сме́рти./ У́мер пра́ведный, оста́ви раска́яние;/ нару́чна же быва́ет и посмея́тельна нече́стивых па́губа./ Пра́вда непоро́чнаго исправля́ет пути́,/ в нече́стие же па́дает непра́вда./ Пра́вда муже́й пра́вых изба́вит их,/ безсове́тием же пленя́ются беззако́ннии./ Сконча́вшуся му́жу пра́ведну не поги́бнет наде́жда,/ похвала́ же нече́стивых поги́бнет./ Пра́ведник от ло́ва убе́гнет,/ в него́же ме́сто предае́тся нече́стивый./ Во усте́х нече́стивых сеть гра́жданом,/ чу́вство же пра́ведных благоспе́шное./ Во благи́х пра́ведных испра́вится град,/ и в поги́бели нечести́вых ра́дование./ Во благослове́нии пра́вых возвы́сится град,/ усты́ же нечести́вых раскопа́ется./ Руга́ется гра́жданом лише́нный ра́зума,/ муж же му́дрый безмо́лвие во́дит.

Прему́дрости Соломо́ни чте́ние (гла́ва 4)

Пра́ведник, а́ще пости́гнет сконча́тися, в поко́и бу́дет./ Ста́рость бо честна́, не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Бла́гоугоден Бо́гу быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́живше в помышле́нии таково́е,/ я́ко благода́ть и ми́лость в преподо́бных его́/ и посеще́ние во избра́нных его́.

На лити́и стихи́ры, глас 3:

Архиере́ю преосвяще́нне Гу́рие,/ Каза́нский свети́льниче, па́стырю добре́йший,/ смотря́яй свы́ше на ста́до твое́,/ подо́бниче верхо́внейшаго Петра́:/ я́коже бо тому́ па́ству слове́сных ове́ц Христо́с вручи́л есть,/ си́це поста́вил тя па́стыря новопросвеще́нным лю́дем Свои́м,/ да наставля́еши я на стезю́ спасе́ния/ и введе́ши в огра́ду Небе́сную./ Виждь собра́вшияся ча́да твоя́ в па́мять твою́/ и любе́зно пра́зднующим честно́е преставле́ние твое́/ и моли́ па́стырей Нача́льника соблю́стися па́стве твое́й ненаве́тованней,/ и гра́ду твоему́ от ви́димых и неви́димых враго́в изба́витися,/ и спасти́ся душа́м на́шим.

Глас 5:

Небе́сный челове́че, земны́й А́нгеле,/ благоче́стия о́бразе, до́ме доброде́телей духо́вных,/ учи́телей украше́ние благоле́пное,/ сла́вий добропе́снивый, воспева́вый догма́ты Христо́вы ве́ры,/ язы́че о́гненный, опали́вый Магоме́тово злочести́вое уче́ние,/ Каза́нский свети́льниче, Гу́рие святи́телю,/ Христа́ моли́ пода́ти правосла́вным на ага́ряны одоление.

Сла́ва, глас 2:

Орга́не добро́гласный,/ возгреме́вый Христо́во Ева́нгелие исма́ильтяном/ и тем возвести́вый Сло́ва Бо́жия смотре́ние,/ у́ме Го́рний, доле жи́тельствуя/ и в Небе́сных Бо́гомы́слием пребыва́вый:/ ты, управля́я Каза́нскую па́ству,/ умно́жил еси́ церко́вная ча́да,/ от тьмы неве́рия в свет ве́ры приве́д я/ и усынови́в я Небе́сному Отцу́./ И ны́не, святи́телю Гу́рие,/ не забу́ди, моли́ся о рабе́х твои́х,/ всеблаже́нную па́мять твою́ ра́достно пра́зднующих.

И ны́не, Богоро́дичен.

На стихо́вне стихи́ры, глас 2.

Подо́бен: Егда́ от Дре́ва:

Егда́ зави́стнии клевре́ти твои́ оклеветаша тя к господи́ну,/ непра́вду сплета́юще на тя, пра́веднаго,/ и́стинный ра́бе Христо́в Гу́рие,/ непови́нна рука́ма и чи́ста се́рдцем, тогда́, я́ко дре́вняго в Еги́пте Ио́сифа,/ мра́чная темни́ца тя прия́т,/ те́сныя тя у́зы угнето́ша,/ злострада́ние же и глад истни́ твое́ те́ло./ Оба́че Бог тя не оста́ви,/ и в те́мнем бо ме́сте чистота́ со́вести твоея́, я́коже заря́, пред Всеви́дцем сия́ше,/ целому́дрие же твое́ и А́нгелом бысть изве́стно,/ и гото́вяхуся тебе́ за терпе́ние све́тлые венцы́./ Ты же благода́рно воспева́л еси́:/ сла́ва смотре́нию Твоему́, Человеколю́бче.

Стих: Уста́ моя́ возглаго́лют прему́дрость/ и поуче́ние се́рдца моего́ ра́зум.

Егда́ нечелове́ческою сне́дию в темни́це был еси́ пита́ем, страда́льче,/ на три дни по еди́ному снопу́ овса́ прие́мля,/ тогда́ не́кий от друго́в твои́х, та́йно приходя́ к узи́лищу твоему́,/ обеща́шеся тебе́ приноси́ти пи́щу./ Ты же отню́д не восхоте́л еси́,/ довле́яся скотоподо́бным пита́нием:/ сло́во бо Бо́жие насыща́ше ду́шу твою́/ и наде́жда в Бо́зе укрепля́ше тя,/ непови́нность же твоя́ бысть, я́ко пирова́ние,/ сле́зы же твоя́ бы́ша тебе́ хлеб день и нощь,/ от се́рдца же твоего́ благода́рно к Бо́гу взыва́л еси́:/ сла́ва сицево́му Твоему́ о мне устрое́нию, Человеколю́бче.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Егда́ по двуле́тнем злострада́нии восхоте́ тя Госпо́дь извести́ на свобо́ду,/ тогда́ свет возсия́ тебе́ в две́рех темни́цы,/ и невозбра́нное изше́ствие угото́вася тебе́./ Услы́шал бо Вы́шний моли́тву твою́,/ и воздыха́ния твоя́ проидо́ша о́блаки,/ сле́зы же твоя́ пред Бо́га взыдо́ша,/ смотре́ние же Влады́чне, я́коже Ио́сифа Еги́пту,/ предустроя́ше тя духо́внаго пита́теля а́лчущей сло́ва Бо́жия стране́ ага́рянстей/ и престо́л тебе́ в ней гото́вяше,/ да управля́еши но́выя Христо́вы лю́ди/ и насыща́еши я бра́шном, пребыва́ющим в живо́т ве́чный./ Ты же, о всем благода́ря Творца́ своего́,/ ра́дуяся, воспева́л еси́:/ сла́ва мно́гому милосе́рдию Твоему́, Человеколю́бче.

Сла́ва, глас 6:

И́ноков похвалу́, иера́рхов удобре́ние и отце́в сла́ву,/ исто́чника целе́бнаго ми́ра,/ чудесе́м ре́ку, ми́ру Росси́йскому духо́вное напое́ние,/ а́лчущим пита́теля, си́рым и вдови́цам засту́пника/ и всем скорбя́щим уте́шителя, Гу́рия преблаже́ннаго,/ пе́рваго архиере́я сла́внаго гра́да Каза́ни,/ соше́дшеся, о пра́зднолюбцы, пе́сненными похвала́ми воспое́м, глаго́люще:/ ра́дуйся, Каза́нский пе́рвый учи́телю,/ ва́рваров просвети́телю и правосла́вных ти́хий наказа́телю,/ в моли́твах сто́лпе преутвержде́нный./ Ра́дуйся, в ю́ности твое́й темни́цу моли́твами просвети́вый/ и ску́дныя ра́ди та́мо пи́щи а́нгельский хлеб насле́довавый./ Ра́дуйся, в жи́зни твое́й кре́пкий подви́жниче/ и неле́ностный виногра́да Христо́ва де́лателю./ И ны́не, вели́кий святи́телю Гу́рие,/ не преста́й моля́ся Христу́ Бо́гу/ за весь освяще́нный собо́р и за вся лю́ди,/ ве́рою и любо́вию чту́щия пречестну́ю па́мять твою́,/ да изба́вимся вси от ва́рварскаго нахожде́ния/ и от вся́ких наве́тов ви́димых и неви́димых враго́в на́ших/ моли́твами твои́ми.

И ны́не, Богоро́дичен.

Тропа́рь, глас 4:

Пра́вило ве́ры и о́браз целому́дрия,/ учи́теля до́брых дел/ и наста́вника спасе́ния даде́ тя Госпо́дь/ новопросвеще́нному гра́ду Каза́ни,/ в не́мже приобре́л еси́ но́выя от язы́к лю́ди/ и приве́л еси́ я Христо́ви./ Сего́ ра́ди в па́мять твою́ ра́достно соше́дшеся,/ че́стне пра́зднуем свято́е твое́ успе́ние,/ ты же, о́тче наш, святи́телю Христо́в Гу́рие,/ моли́ Христа́ Бо́га/ спасти́ся душа́м на́шим.

Ин тропа́рь, глас 4:

От младости удаля́яся земна́го мудрова́ния/ и после́довав ско́рбным путе́м Законоположи́телю своему́ Христу́ Бо́гу./ Те́мже и Он тя воздарова́ на земли́ нетле́нием,/ на Небесе́х же со угоди́вшими ему́ архиере́и ликовству́еши,/ Гу́рие святи́телю,/ моли́ Христа́ Бо́га/ пода́ти оте́честву на́шему на враги́ побе́ду,/ и мир ми́рови,/ и душа́м на́шим ве́лию ми́лость.

НА У́ТРЕНИ

На Бог Госпо́дь: тропа́рь два́жды. Сла́ва, и ны́не, Е́же от ве́ка утае́нное:

По 1-м стихосло́вии седа́лен, глас 5:

По́стником во удобре́ние и мона́шествующим во удивле́ние/ бысть житие́ твое́ во оби́тели твое́й:/ безропти́во бо и со усе́рдием прохо́дил еси́ вся рабо́ты монасты́рския,/ повину́яся наста́вником, по рече́нию апо́стольску, и покоря́яся им,/ ве́дый изве́стно, я́ко нача́льствующии пеку́тся о душа́х, вве́ренных им,/ поне́же сло́во о них возда́ти и́мут пра́ведному Судии́./ Того́ ра́ди ты, и́стинный ра́бе Христо́в, наста́внику твоему́, я́ко Христу́, покоря́лся еси́,/ и ра́дость тому́ сми́ре́нием и послуша́нием твои́м соде́лывал еси́, а не воздыха́ние,/ тем у́бо от Бо́га и ты наста́вник люде́й его́ учине́н был еси́.

Сла́ва, и ны́не, Богоро́дичен:

Боже́ственнаго естества́ о́бщницы бы́хом Тобо́ю, Богоро́дице Де́во:/ Бо́га бо нам воплоще́нна родила́ еси́./ Те́мже Тя по до́лгу вси благоче́стно почита́ем и ве́рно ублажа́ем.

По 2-м стихосло́вии седа́лен, глас 8:

Уче́нием Боже́ственных слове́с твои́х,/ а́ки мре́жею ры́бы, ага́ряны привлача́л еси́ во свято́е Креще́ние,/ во е́же благоче́стно им ве́ровати во Отца́ и Сы́на и Свята́го Ду́ха,/ и благоприя́тными твои́ми моли́твами, а́ки со́лнце, озари́л еси́ престо́льный град твой и Све́том Невече́рним того́ просвети́л еси́./ Те́мже, святи́телю Гу́рие, соше́дшеся, вопие́м ти:/ моли́ Христа́ Бо́га пода́ти грехо́в оставле́ние любо́вию притека́ющим к тебе́/ и с ве́рою каса́ющимся ковче́гу честны́х моще́й твои́х.

Сла́ва, и ны́не, Богоро́дичен:

Небе́сную дверь и ковче́г,/ всесве́тлый о́блак и несеко́мую гору,/ неопали́мую купину́, слове́сный рай, Е́вино воззва́ние,/ всей вселе́нней вели́каго благода́ти сосу́да, воспои́м Ма́терь Бо́жию,/ я́ко спасе́ние То́ю соде́лася ми́ру и оставле́ние до́лга дре́вняго./ Те́мже и воззове́м к Ней:/ моли́ Христа́ Бо́га согреше́нием оставле́ние дарова́ти/ благоче́стно покланя́ющимся Пресвято́му Рождеству́ Твоему́.

По полиеле́и седа́лен, глас 1:

Бо́жия Ду́ха светозаре́нием,/ служи́тель быв Христу́, вся́ческих Влады́це,/ тьму разруши́л еси́ ага́рянскаго нече́стия,/ и научи́л еси́ лю́ди, и просвети́л еси́ Боже́ственным Креще́нием./ Те́мже, пропове́дника тя вси и́стины иму́ще, святи́телю Гу́рие, вопие́м к тебе́:/ моли́ Христа́ Бо́га спасти́ся душа́м на́шим.

Сла́ва, и ны́не, Богоро́дичен:

Наста́ви нас на путь покая́ния,/ уклоня́ющихся всегда́ безпути́ем к заблу́ждению и преблага́го Бо́га прогневля́ющих,/ Неискусобра́чная Де́во, Марие́ Чи́стая, Сло́ву две́ре, Бо́жие вселе́ние,/ прибе́жище бо еси́ отча́янным и спасе́ние душа́м челове́ческим.

Степе́нна, 1-й антифо́н 4-го гла́са. Проки́мен: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Иоа́нна, зачало 36.

По 50-м псалме́ стихи́ра, глас 6:

Ты еси́ па́стырь до́брый,/ взыска́вый заблу́ждшия лю́ди/ и поги́бшия ду́ши обрати́вый,/ коз́лища во о́вцы претвори́вый/ и во Христо́ву приве́дый я огра́ду./ Те́мже днесь о́вцы твоя́,/ в па́мять твою́ соше́дшеся,/ еди́ногласно восхваля́ем, глаго́люще:/ ра́дуйся, святи́телю Бо́жий, пе́рвый Каза́ни архиере́ю;/ ра́дуйся, пропове́дниче ве́ры и о́бразе до́брых дел./ Ра́дуйся, гра́ду твоему́ утвержде́ние;/ ра́дуйся, учи́телю, научи́вый ага́рянский род покланя́тися в Тро́ице еди́ному Бо́гу,/ Отцу́ и Сы́ну и Свято́му Ду́ху./ Ему́же ны́не предстоя́ со святи́тели,/ моли́ся о спасе́нии пра́зднующих святу́ю и всечестну́ю па́мять твою́.

Кано́н Богоро́дице со ирмосо́м на 6 и святи́телю Гу́рию на 8, глас 8.

Песнь 1

Ирмо́с: Изра́иля от рабо́ты изба́вил еси́, Го́споди,/ десни́цею Твое́ю держа́вною,/ я́ко о́наго спасл еси́,/ ны́не нас спаси́.

Тро́ице Пресвята́я,/ песнь Тебе́ принести́ и досто́йными похвала́ми уго́дника Твоего́, святи́теля Гу́рия, воспе́ти пода́ждь ми,/ да, ра́дуяся, сла́влю Тя во ве́ки.

Повеле́нием самоде́ржца царя́ и вели́каго князя/ первопресто́льник церко́вный гра́ду новопросвеще́нному явля́ешися/ и апо́стольски научи́л еси́ ве́ровати Тро́ице во Еди́ном Существе́.

Моли́твенный храм в дому́ твое́м име́я,/ в том многотру́дне подвиза́лся еси́,/ всено́щная стоя́ния и моли́твы принося́ вы́ну Бо́гу.

Богоро́дичен: Бо́жия Ма́ти,/ ро́ждшая еди́наго от Святы́я Тро́ицы,/ слове́сное ми недоуме́ние разреши́/ и сло́во ми пода́ждь, и́мже Тя просла́влю.

Песнь 3

Ирмо́с: Утвержде́й сло́вом Небеса́/ и зе́млю основа́вый на вода́х мно́гих,/ утверди́ мя к пе́нию славосло́вия Твоего́, Го́споди.

А́гнца Непоро́чнаго, Бо́жие Сло́во Соприсносу́щное, святи́телю Гу́рие, моли́,/ да пода́ст стране́ на́шей благоде́нство и на сопроти́вных побе́ду.

Его́же измла́да возлюби́л еси́, Того́ наслажда́тися жела́я,/ вся тле́нная ми́ра сего́ в ничто́же вмени́л еси́, преходя́щая презре́в,/ да в бу́дущем утверди́шися сла́вити Го́спода.

Благове́рных зако́ну наказу́я благоче́стия,/ неве́рныя же научи́л еси́ позна́ти ве́ру благочести́ву и и́стинну/ и пе́ти при́сно песнь, А́нгелы пева́емую в Тро́ице Бо́гу:/ Свят еси́, Го́споди.

Богоро́дичен: Под кров Твой держа́вный с ве́рою прибега́ем, Богоро́дице:/ покры́й и соблюди́, Госпоже́, моли́твами Твои́ми/ и спаси́ от бед и от злых челове́к рабо́в Твои́х,/ при́сно пою́щих Тя.

Конда́к, глас 6:

И́стине основа́ние и ве́ры утвержде́ние/ и в поуче́ниих преизя́щнаго све́мы тя благоче́стию споспе́шника,/ апо́столом сопресто́льника, страстоте́рпцем соприча́стника,/ по́стником ку́пно ревни́теля, похваля́ем тя, Гу́рие святи́телю,/ и ве́лия таи́нника Бо́жия благода́ти.

И́кос:

Храм Ду́ха Пресвята́го был еси́,/ и река́, вод духо́вных наполня́ема,/ и Це́ркве огражде́ние неподви́жимо,/ гра́ду же Каза́ни звезда́ пресве́тлая, чистото́ю душе́вною и теле́сною сия́ющая,/ Боже́ственныя уче́ния гром воспуща́я,/ трубо́ю же духо́вною глас ве́ры всем провозвеща́я/ и сим ага́рянское злоче́стие отсека́я,/ Тро́ицу во еди́нице пе́ти научи́л еси́, о́тче наш, вели́кий святи́телю Гу́рие,/ вели́кий таи́нниче Бо́жия благода́ти.

Седа́лен, глас 5:

Чу́ден вои́стинну измла́да был еси́,/ посто́м и моли́твами и долулега́нием Бо́гу угоди́в,/ и терпе́нием твои́м темни́цу отве́рзл еси́;/ чу́дно же и пресла́вно и Той о тебе́ соде́ла,/ а́ки друга́го Па́вла с Небеси́ позва́в,/ на архиере́йский престо́л по жре́бию тя избра́л есть./ Того́ ра́ди мо́лим тя, вели́кий святи́телю Гу́рие,/ моли́ спасти́ся душа́м на́шим.

Сла́ва, и ны́не, Богоро́дичен:

Стра́шно чу́до зача́тия и несказа́нен о́браз Боже́ственнаго рождества́ в Тебе́ позна́ся, Чи́стая Присноде́во,/ ужаса́ет ми ум и удивля́ет помышле́ния,/ сла́ва Твоя́, Богоро́дице, всем воспростре́ся на спасе́ние душа́м на́шим.

Песнь 4

Ирмо́с: Из горы́ приосене́нныя, Сло́ве, проро́к,/ еди́ныя Богоро́дицы,/ хотя́ща воплоти́тися Богови́дно усмотри́/ и со стра́хом славосло́вяше си́лу Твою́.

Благ нрав и послуша́ние к твоему́ наста́внику име́л еси́/ и, во Све́те Святы́я Тро́ицы свеселя́ся, с ним пое́ши:/ сла́ва си́ле Твое́й, Го́споди.

Благослове́нием первосвяти́теля поставля́ешися па́стырь и учи́тель новопросвеще́нному гра́ду Каза́ни,/ иде́же пре́лестию врага́ омраче́нныя лю́ди све́том Богора́зу́мия просвети́л еси́.

И́ова пра́веднаго терпе́нию подража́л еси́,/ в боле́зни слежа́ на одре́,/ но а́ще те́лом изнемога́л еси́, оба́че ду́хом был еси́ си́лен,/ поя́ Творцу́ твоему́ пе́ние непреста́нно.

Богоро́дичен: Богоневе́сто и Богома́ти,/ Плотоно́сца без боле́зни ро́ждши и по рождестве́ Де́ва я́вльшися,/ Того́ моли́, Влады́чице, да изба́вимся бед и скорбе́й.

Песнь 5

Ирмо́с: Мрак души́ моея́ разжени́, Светода́вче Христе́ Бо́же,/ началоро́дную тьму изгна́в бе́здны,/ и да́руй ми свет повеле́ний Твои́х, Сло́ве,/ да, у́тренюя, сла́влю Тя.

Архиере́й сый, архиере́ем на́шим в моли́твах спосо́бствуй,/ да возмо́гут стране́ на́шей, благоче́стие содержа́щей,/ и всему́ христиа́нскому наро́ду испроси́ти у Христа́ ми́ра и ве́лия ми́лости.

Ны́не, преблаже́нне Гу́рие, душа́ твоя́ почива́ет на Небесе́х, предстоя́ Престо́лу Христо́ву,/ честны́я же твоя́ мо́щи, нетле́нием почте́ны,/ даю́т исцеле́ния приходя́щим с ве́рою.

Дре́вле помраче́нный зми́евою пре́лестию,/ ны́не же просвеще́нный Христо́вою благода́тию град Каза́нь,/ ви́дя в себе́ мо́щи твоя́, ра́дуется;/ мы же, ча́да твоя́, чудесы́ обогаща́емы, весели́мся/ и, Христа́ сла́вяще, зове́м: спаси́ нас, Го́споди.

Богоро́дичен: Богоро́дице, всех Цари́це,/ стране́ на́шей на враги́ побе́ду да́руй,/ и сопроти́вных сове́ты разори́, и от междоусо́бныя бра́ни изба́ви,/ и клеветнико́в че́люсти сокруши́, Влады́чице,/ и от всех бед моли́твами Твои́ми спаси́ нас.

Песнь 6

Ирмо́с: Я́ко во́ды морски́я, Человеколю́бче,/ волна́ми жите́йскими обурева́юся./ Те́мже, я́ко Ио́на, та́ко вопию́ Ти:/ возведи́ от тли живо́т мой, Благоутро́бне Го́споди.

Утеша́я скорбя́щия, заступа́я оби́димыя,/ накормля́я а́лчущия и вся всем подава́я неоску́дно,/ Гу́рие святи́телю, Христа́ Бо́га моли́ спасти́ся нам.

Недосто́йное на́ше моле́ние, усе́рдное пе́ние/ и приноси́мое твои́м трудо́м похвале́ние, преподо́бне чудотво́рче, не отри́ни,/ но приими́ и моли́ Христа́, да изба́вит нас шу́ияго стоя́ния.

Тече́ние наче́н до́бре, путь по́двига соверши́л еси́ пресла́вно/ и зе́млю непло́дную моли́твами твои́ми добро́пло́дну показа́л еси́;/ умоли́ у́бо Христа́ и о нас, принося́щих тебе́ пе́ние сие́, святи́телю,/ да пода́ст нам принести́ покая́ния плоды́ и изба́вит ны ве́чнаго муче́ния.

Богоро́дичен: Богоблаже́нная, и от А́нгел покланя́емая,/ и от земны́х всегда́ славосло́вимая,/ Творца́ Твоего́ и Бо́га, Его́же родила́ еси́, Пресвята́я Де́во,/ моли́ спасти́ся нам.

Конда́к, глас 4:

Чу́вственныя стра́сти победи́в, чистото́ю, я́ко со́лнце, возсия́л еси́,/ чи́сто житие́ до конца́ сохрани́в,/ и от неве́рия в ве́ру мно́гих ко Христу́ приве́л еси́;/ того́ ра́ди от Бо́га нетле́нием почте́н, чудесы́ твои́ми вся удиви́л еси́./ Мо́лим у́бо тя, святи́телю Гу́рие,/ моли́твами твои́ми от бед изба́ви нас, да зове́м ти:/ ра́дуйся, о́тче преди́вный,/ гра́ду Каза́ни похвала́ и утвержде́ние.

И́кос:

Пе́рвый сея́тель был еси́ духо́вных доброде́телей,/ и пе́рвый па́стырь, и Це́ркви нача́льник,/ пе́рвый архиере́й и учи́тель христиа́нскому зако́ну в новопросвеще́ннем гра́де Каза́ни,/ ве́рныя лю́ди пита́я хле́бом уче́ния благода́тнаго зако́на,/ напоя́я пи́вом духо́вныя благода́ти,/ неве́рныя же уча́ позна́ти и́стину и крести́тися святы́м Креще́нием,/ и мно́жество наро́да от неве́рия в ве́ру ко Христу́ приве́л еси́,/ чи́стым житие́м Бо́гу угоди́ти наста́вив их./ Сего́ ра́ди Христо́с свято́му и трудолюби́вому твоему́ те́лу дарова́ нетле́ние и дар чудотворе́ния:/ приходя́щии бо с ве́рою к цельбоно́сным твои́м моще́м прие́млют неоску́дныя страсте́й премене́ния,/ и боле́зней исцеле́ния, и грехо́в проще́ние/ твои́ми, свя́те, ко Христу́ моли́твами./ Те́мже зове́м ти:/ ра́дуйся, о́тче преди́вный, гра́ду Каза́ни похвала́ и утвержде́ние.

Песнь 7

Ирмо́с: О́троцы Богочести́вии в Вавило́не/ о́бразу злато́му не поклони́шася,/ но посреди́ пе́щи о́гненныя, ороша́еми,/ песнь воспева́ху, глаго́люще:/ превозно́си́мый отце́в и нас Бо́же, благослове́н еси́.

Не то́кмо те́ло твое́ нетле́нием просла́ви Бог, святи́телю Гу́рие,/ но и погреба́льная вся пребы́ша крепча́е но́вых./ Мы же, сим дивя́щеся, зове́м:/ благослове́н Бог оте́ц на́ших.

Подвиго́в твои́х ра́ди и трудо́в, преподо́бне,/ те́ло твое́ нетле́нно показа́ Подвигополо́жник,/ гро́бу же и ри́зам вместо тле́ния кре́пость дарова́,/ благослове́н Бог оте́ц на́ших.

Не еди́но те́ло твое́, святи́телю, тле́нию бысть неприча́стно,/ но и погре́бшихся с ве́рою во еди́ной гробни́це с тобо́ю:/ моли́твами твои́ми дву и́ноков нетле́нием одари́ Бог. Ему́же зове́м:/ благослове́н еси́, Го́споди, Бо́же оте́ц на́ших.

Богоро́дичен: О всепе́тая и всенепоро́чная Влады́чице, моли́ Сы́на Твоего́, Христа́ Бо́га на́шего, да изба́вит нас ве́чнаго муче́ния, да пое́м: благослове́н Бог оте́ц на́ших.

Песнь 8

Ирмо́с: Покрыва́яй вода́ми превы́спренняя Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,/ я́ко Соде́телю всех во ве́ки.

Пречестна́я ра́ка, в не́йже положе́но бысть че́стное те́ло твое́, святи́телю Гу́рие,/ ми́ра благоуха́нна преиспо́лнися,/ и́мже с ве́рою ма́жущиися неоску́дна исцеле́ния прии́маху, зову́ще:/ да благослови́т тварь вся Го́спода/ и превозноси́т его́ во ве́ки.

Новопросвеще́нному гра́ду Каза́ни первопресто́льник посла́н быв,/ мно́жество неве́рных к твоему́ Влады́це Христу́ приве́л еси́ и научи́л я еси́ пе́ти:/ благослови́те, по́йте и превозноси́те Го́спода во ве́ки.

Па́стырский жезл прие́м, святи́телю,/ но́вым лю́дем учи́тель был еси́, пресла́вне Гу́рие,/ и мно́ги лю́ди ага́рянска язы́ка святы́м Креще́нием обнови́л еси́,/ да вси с тобо́ю зову́т:/ благослови́те, по́йте и превозноси́те Го́спода во ве́ки.

Богоро́дичен: Богоизбра́нная, еди́на Всенепоро́чная, Пречи́стая Богоневе́сто Богома́ти,/ приими́ мольбы́ ве́рою упова́ющих на Тя/ и сотвори́ моле́ние ко Свя́тей Тро́ице, изба́витися нам от всех бед,/ Тя сла́вящим и превознося́щим Го́спода во ве́ки.

Песнь 9

Ирмо́с: Сне́дию дре́ва ро́ду прибы́вшая смерть/ Кресто́м упраздни́ся днесь,/ и́бо прама́терняя всеро́дная кля́тва разруши́ся прозябе́нием/ Чи́стыя Богома́тере,/ Ю́же вся си́лы Небе́сныя велича́ют.

Прия́л еси́ от Христа́ Боже́ственное дарова́ние:/ от мно́гих бо лет сокро́венны честны́я твоя́ мо́щи/ в три́десять второ́е ле́то обрето́шася, ничи́мже вреди́мы,/ исцеле́ния разли́чна подава́юще.

Па́мять преста́вления твоего́ наста́ нам све́тло пра́зднество,/ пречу́дный святи́телю Христо́в, прехва́льне Гу́рие,/ душа́ бо твоя́ свята́я, рука́ма Бо́жиима прия́та бы́вши, всели́ся в Небе́сныя,/ те́ло же твое́ честно́е прия́т от Го́спода благода́ть нетле́ния и чуде́сных целе́б./ Те́мже ти зове́м:/ уврачу́й на́ша душе́вныя боле́зни и теле́сныя неду́ги/ и изба́ви нас от враг на́ших.

Благода́рственныя пе́сни принесе́м Христу́ Бо́гу на́шему,/ такова́го нам святи́теля дарова́вшему,/ Це́ркви Свое́й пречестно́е удобре́ние/ и гра́ду Каза́ни вели́кое утвержде́ние.

Богоро́дичен: Умири́ мир, Христе́, мольба́ми Чи́стыя Богоотрокови́цы,/ и низложи́ вра́жия си́лы, и тишину́ неизглаго́ланну устро́й и во ве́ки сохрани́.

Свети́лен.

Подо́бен: Пло́тию усну́в:

Плоть умертви́л еси́, Гу́рие, посто́м, и бде́нием, и сухояде́нием,/ и диа́вола посрами́л еси́, и си́лу его́, свя́те, разруши́л еси́,/ нечести́вым Тро́ицу пропове́дав, треблаже́нне.

Сла́ва, и ны́не, Богоро́дичен:

О Ма́ти Де́во Пречи́стая,/ еди́ному от Тро́ицы Ты была́ еси́ Прия́телище,/ Ада́мово воззва́ние и Е́вино от кля́твы свобожде́ние,/ спаси́ нас от диа́вольскаго лука́вства и нахожде́ния.

На хвали́тех стихи́ры, глас 8:

Благода́ть духо́вная от ю́ности в тя всели́ся/ и научи́ тя правове́рным смы́слом сия́ти,/ и блиста́ти доброде́телей светлостьми́,/ и озаря́ти ве́рных испо́лне́ние,/ де́монскую же тьму отгоня́ти,/ те́мже я́ко прича́стника тя Невече́рнему Све́ту/ ублажа́ем благочестно́ вси,/ досточу́дне о́тче наш святи́телю Гу́рие.

Благода́тию духо́вною име́я ду́шу обогаще́нну,/ стяжа́л еси́ чист по́мысел и се́рдце бо́дро,/ ве́ру небла́зненну и любо́вь вои́стинну нелицеме́рну;/ от земли́ же преста́вився к Небе́сным,/ с ли́ки пра́ведных водворя́ешися./ Те́мже чтим тя свяще́нными пе́сньми/ и благоче́стно вси сла́вим успе́ние твое́, святи́телю Гу́рие.

Благода́тию духо́вною ага́рянская ча́да просвети́в,/ стра́сти и́дольския от душ их отгна́л еси́/ и Святе́й Тро́ице покланя́тися научи́л еси́,/ селе́ние Той преочи́щенно соде́лал еси́,/ те́мже к Небе́сней жи́зни преста́вился еси́./ Бог же соблюде́ честны́я твоя́ мо́щи на земли́ нетле́нны,/ архиере́ю, о́тче наш Гу́рие.

Сла́ва, глас 8:

Егда́ от царя́ земна́го повеле́ние/ и от всего́ свяще́ннаго собо́ра/ на Каза́нскую па́ству по жре́бию благоволе́ние даде́ся свято́му Гу́рию,/ тогда́ и той неле́ностно попече́ние творя́ше о ста́де Христо́вых слове́сных ове́ц,/ наипа́че же во всено́щных бде́ниях при́сно Бо́гови предстоя́,/ моля́шеся о обраще́нии в ве́ру ага́рянских чад,/ всем же лю́дем в поще́нии и моли́твах сам о́браз быва́ше/ и о любви́ поуча́ше я./ Ага́ря́не же, ви́дяще нелицеме́рное его́ во всем целому́дрие,/ сла́достне уче́нию его́ внима́ху/ и мно́зи Креще́ние прие́мляху,/ ве́рующе во Святу́ю Тро́ицу,/ Отца́ и Сы́на и Свята́го Ду́ха./ Егда́ же прибли́жися к блаже́нней кончи́не свое́й,/ даде́ ему́ Бог предуве́дати преставле́ние за четверонощедне́вное вре́мя,/ и та́ко, все упова́ние возло́жи́в на Христа́ и на Пречи́стую Его́ Ма́терь,/ пре́йде ра́достно от зде́шних зре́ти непреста́нно сла́ву Бо́жию.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Славосло́вие вели́кое и отпу́ст.

НА ЛИТУРГИ́И

Блаже́нны от кано́на свята́го, пе́сни 3-я и 6-я. Проки́мен: Уста́ моя́ возглаго́лют прему́дрость/ и поуче́ние се́рдца моего́ ра́зум. Стих: Услы́шите сия, вси язы́цы, внуши́те, вси живу́щии по вселе́нней. Апо́стол ко Евре́ем, зачало 311, от полу́. Аллилу́ия. Стих: Уста́ пра́веднаго поуча́тся прему́дрости, и язы́к его́ возглаго́лет суд. Ева́нгелие от Матфе́я, зачало 11. Прича́стен: В па́мять ве́чную:

Святитель Гурий

Святитель Гурий (в миру Григорий Григорьевич Руготин) был первым архиепископом учрежденной в 1555 году Казанской епархии. Он родился в подмосковном городке Радонеже в дворянской семье. Родители его были небогаты, поэтому ему с юных лет пришлось служить у помещика князя Ивана Пенькова в должности управляющего имением. С молодости Григорий был благочестивым, смиренным и незлобивым. Он честно и с большим усердием служил князю, который стал ему во всем доверять. Слуги завидовали Григорию и, чтобы погубить юношу, оклеветали его в преступной связи с супругой князя.

Князь приказал казнить Григория. Спас юношу находчивый сын князя. Он удостоверился в невинности святого Григория и просил отца расследовать дело, чтобы не навлекать позора на семью. Святой Григорий был заключен в подземелье. Икона Божией Матери с предвечным Младенцем была его единственным сокровищем. В темнице святой Григорий получил то, чего не имел в миру – уединение. Однажды его друг предложил та́йно приносить узнику пищу. Но вместо этого святой Григорий просил принести бумагу, чернила и перья. Он стал писать азбуку для обучения детей грамоте, а вырученные деньги раздавал нищим и употреблял на покупку новой бумаги. Так исполнял он два своих заветных желания: учить детей читать Слово Божие и помогать нуждающимся.

Прошло два года. Освободился святой чудесным образом. Днем дверь темницы оказалась открытой и в доме князя никого не было. Узник взял икону Божией Матери и беспрепятственно покинул темницу. Святой Григорий немедля отправился в Иосифо-Волоколамский монастырь, славившийся своим строгим уставом. Там он был пострижен в мантию с именем Гурий («пришлец»), для непрестанного напоминания о том, что он странник и пришелец на земле, а истинная его жизнь на Небесах.

В 1543 году святой Гурий был избран братией игуменом Иосифо-Волоколамского монастыря. Он управлял обителью почти 9 лет, а затем оставил игуменство и два года подвизался как простой монах. Перед епископством святой Гурий в течение года управлял Троицким Селижаровым монастырем в Тверской епархии.

3 февраля 1555 года святой Гурий был по жребию избран на новоучрежденную Казанскую кафедру. Рукоположение нового архипастыря совершил Московский Митрополит Макарий. Вместе со святителем Гурием в далекий Казанский край отправились бывший архимандрит Старицкого Успенского монастыря, который жил тогда на покое в Иосифо-Волоколамской обители, святой Герман († 1567, память 6 ноября) и игумен Песношского монастыря святой Варсонофий († 1576, память 11 апреля). В них святитель Гурий провидел своих верных помощников и преемников.

Само путешествие святителя Гурия в Казанскую епархию стало миссионерским и патриотическим. На Красной площади в Москве 26 мая 1555 года, в Неделю святых отцов, он освятил основание каменного Покровского собора (который впоследствии стал именоваться храмом Василия Блаженного), заложенного царем Иоанном Грозным в благодарность за взятие Казани. В соборной церкви Симонова монастыря святитель Гурий совершил Божественную Литургию. В Симоновом монастыре в 1380 году были погребены тела героев Куликовской битвы, преподобных схимонахов Александра и Андрея. Святитель Гурий как бы брал у них благословение на продолжение их подвига – проповедь Православия в мусульманском мире, защита Отечества, просвещение татарского народа и вовлечение его в культурное общение с Россией. В течение всего путешествия совершались молебны, освящались города и села, читалась особая молитва, составленная первым русским Митрополитом святителем Иларионом († ок. 1053, память 21 октября).

28 июля 1555 года, в воскресенье, святитель Гурий прибыл в Казань. После Божественной Литургии в соборе был читан Синодик так, как он читался ранее в первую неделю Великого поста, чтобы новоосвященная епархия не потерпела в себе никакого лжеучения, но утверждалась в Православии.

На Казанской кафедре святитель Гурий приводил к православной вере магометан и язычников, всех новокрещеных учил жить по заповедям Спасителя, ходатайствовал о нуждах татар, даже если они не принимали Крещения. Труден был подвиг святителя. Татары, только что присоединенные Русским государством, переносили свою вражду и на христианскую веру. Каждый воскресный и праздничный день святитель Гурий проповедовал пастве. Он нес мир, любовь и доверие. Чтобы миссионерское дело развивалось успешно, святитель Гурий основал на второй год после своего прибытия Зилантов монастырь. В нем была устроена школа, в которой монастырские старцы обучали татарских детей читать, писать и правильно понимать Священные Книги. Обучение детей шло так успешно, что казанцы и впоследствии никогда не начинали учить своих детей грамоте, не испросив благословения от святителя Гурия при его мощах усердной молитвой.

За восемь лет, проведенных святителем Гурием в Казанской епархии, было устроено четыре монастыря, более десятка городских церквей, выстроен Благовещенский кафедральный собор.

В 1561 году святитель Гурий тяжело заболел. Только в самые великие праздники его приносили в храм к Божественной Литургии. Во время службы святитель Гурий сидел или лежал, не имея сил стоять. Но душа святителя была так же бодра и ревностна к делу Божию, словно не было болезни. «Душевные силы,– говорил святитель Гурий,– увеличиваются по мере того, как уменьшается удовлетворение плоти... Все настоящее время есть время трудов. Вознаграждение получается в жизни будущей. Небесные радости будут дарованы только тому, кто на земле подвизается и для получения благ нетленных оставляет тленные. Должно подвизаться, несмотря ни на какие трудности и неудовольствия, ибо «нынешние временные страдания ничего не стоят в сравнении с тою славою, которая откроется в нас» (Рим.8:18)».

2 декабря 1563 года святитель Гурий принял от святого Варсонофия великую схиму. Скончался он 5 декабря около 2 часов ночи и был погребен за алтарем соборной церкви Преображенского монастыря, созданного его любимым учеником святым Варсонофием.

4 октября 1595 года были обретены нетленные мощи святителей Гурия и Варсонофия. Митрополит Казанский, святитель Ермоген (будущий Патриарх Московский и всея Руси, †1613; память 17 февраля и 12 мая), присутствовал при их обретении и описал это событие в житии святителей. 20 июня 1630 года мощи святителя Гурия были перенесены из Преображенского монастыря в Благовещенский кафедральный собор. Ныне они находятся в кладбищенском храме города Казани во имя святых благоверных князей Феодора Муромского и чад его Давида и Константина.