24-й день

Предпра́зднство Рождества́ Христо́ва, и па́мять святы́я преподобному́ченицы Евге́нии

После́дование часов, пева́емых в на́вечерии Рождества́ Христо́ва

На Го́споди, воззва́х: стихи́ры предпра́зднства, глас 5.

Подо́бен: Ра́дуйся:

Но́сиши Ада́мов зрак,/ во о́бразе Бо́жии Сый всесоверше́нный,/ и хо́щеши рука́ми держа́тися,/ руко́ю вся содержа́й си́лою Твое́ю,/ Чи́стая Всенепоро́чная провещава́ше глаго́лющи:/ ка́ко Тя пелена́ми повию́ я́ко Младе́нца,/ ка́ко сосца́ми пита́ю Тя, вся́ческая пита́ющаго,/ ка́ко Твое́й па́че ума́ нищете́ удивлю́ся,/ ка́ко Тя Сы́на Моего́ нареку́, Раба́ Твоя́ ны́не су́щи?/ Пою́, благословлю́ Тя,/ подаю́щаго ми́ру ве́лию ми́лость.

Младе́нца, воплоща́ема из Нея́,/ предве́чнаго Бо́га, Всенепоро́чная зря́щи,/ рука́ми держа́щи, и облобыза́ющи ча́сто,/ и ра́дости исполня́ющися, провещава́ше Ему́:/ Бо́же Вы́шний, Царю́ Неви́димый,/ ка́ко зрю Тя и разуме́ти та́инства не могу́,/ безме́рныя нищеты́ Твоея́?/ Верте́п бо мале́йший и сей чу́ждий/ внутрь вмеща́ет Тя, ро́ждшагося,/ и де́вства нереши́вша,/ ложесна́ соблю́дшаго, я́ко пре́жде рождества́,/ и даю́щаго ве́лию ми́лость.

Сия́ ра́бски Чи́стая, ужа́сно веща́ющи,/ услы́шаше волхво́в пред верте́пом,/ ку́пно предстоя́щих, и к ним рече́:/ Кого́ и́щете вы?/ Я́ко ви́жду бо, от инода́льныя страны́ приидо́сте,/ пе́рсский о́браз и мудрова́ние иму́ще./ Стра́нен исхо́д и ше́ствие сотвори́сте/ и к стра́нствовавшему свы́ше/ и стра́нно в Мя Все́льшемуся, я́ко весть,/ со тща́нием приидо́сте Тому́ поклони́тися,/ да́рующему ми́ру ве́лию ми́лость.

И́ны стихи́ры святы́я, глас 8.

Подо́бен: О, пресла́внаго чудесе́:

Ми́ра оста́вльши красоту́,/ души́ благоро́дие,/ благоро́дия свы́ше/ добро́тами уясни́ла еси́,/ Евге́ние всехва́льная,/ о́браза благода́ть нему́тну житие́м сохра́ньши,/ му́ченице непобеди́мая,/ де́вства забра́ло Богови́дно/ и цве́те естества́ всеблагоро́днейший.

Сло́вом, и житие́м, и благода́тию,/ и терпе́нием души́ украси́вшися,/ привела́ еси́ страда́лец во́инства/ и дев собо́р от Де́вы Возсия́вшему/ и свиде́тельства я́ве Отве́рзшему всем вход,/ Евге́ние всему́драя,/ с ни́миже и ны́не Сего́ умоли́/ спасти́ ста́до твое́.

Пра́вды Строи́тель/ тя, я́ко де́ву чи́сту/ и я́ко сла́вну му́ченицу,/ сугу́быми венцы́ благоле́пно украси́,/ красе́н черто́г тебе́ дарова́в,/ светоявле́ньми просвеще́нный,/ иде́же все́льшися,/ ве́чнующим, неве́сто Христо́ва,/ ны́не блаже́нством я́ве обогати́лася еси́.

Сла́ва, и ны́не, предпра́зднства, глас 2:

Се вре́мя прибли́жися спасе́ния на́шего,/ гото́вися, верте́пе, Де́ва приближа́ется роди́ти;/ Вифлее́ме, земле́ Иу́дова, красу́йся и весели́ся,/ я́ко из тебе́ возсия́ Госпо́дь наш./ Услы́шите, го́ры и хо́лми и окре́стныя стра́ны Иуде́йския,/ я́ко гряде́т Христо́с,/ да спасе́т, его́же созда́, челове́ка,/ я́ко Человеколю́бец.

На стихо́вне стихи́ры предпра́зднства, глас 1.

Подо́бен: Всехва́льнии му́ченицы:

Да́ры Тебе́ принося́ще, Сы́не,/ ца́рие приидо́ша восто́чнии,/ царя́ Тя уве́девше роди́тися,/ лива́н, и сми́рну, и зла́то,/ и се́ стоя́т пред две́рьми./ Сим повели́ ви́дети Тя, Младе́нца,/ на руку́ Мое́ю держи́ма,/ дре́вняго Ада́ма старе́йша.

Стих: Бог от ю́га прии́дет/ и Святы́й из горы́ приосене́нныя ча́щи.

Прииди́те, вни́дите со тща́нием,/ Де́ва рече́ дре́вле волхво́м,/ и ви́дите Неви́димаго,/ ви́дима я́вльшася и Младе́нца бы́вша./ Они́ же со усе́рдием внидо́ша, и поклони́шася,/ и да́ры принесо́ша,/ проро́чество Боже́ственное испо́лнивше.

Стих: Го́споди, услы́шах слух Твой и убоя́хся,/ Го́споди, разуме́х дела́ Твоя́ и ужасо́хся.

Ношу́ Тя я́ко Младе́нца рука́ми,/ вся́ческая нося́щаго,/ и удивля́юся, глаго́лаше Нескусобра́чная:/ ка́ко Тя млеко́м воспита́ю,/ пита́ющаго вся, Сы́не Мой и Тво́рче Мой?/ Сла́влю Твое́ безме́рное к челове́ком снизше́ствие,/ и́мже спаса́еши мир погиба́ющий.

Сла́ва, и ны́не, предпра́зднства, глас 6:

Сио́не, торжеству́й,/ Иерусали́ме, весели́ся,/ гра́де Христа́ Бо́га,/ подъими́ Зижди́теля, в верте́пе и я́слех вмеща́емаго,/ отве́рзите мне врата́/ и, вшед в ня, узрю́ я́ко Младе́нца, пелена́ми, повива́емаго,/ дла́нию же содержа́щаго тварь,/ Его́же пою́т А́нгели непреста́нным гла́сом,/ Жизнода́вца Го́спода,/ спаса́ющаго род наш.

Тропа́рь, глас 4:

Написова́шеся иногда́ со ста́рцем Ио́сифом,/ я́ко от се́мене Дави́дова, в Вифлее́ме Мариа́м,/ чревонося́щи безсе́менное Рожде́ние./ Наста́ же вре́мя рождества́,/ и ме́сто ни еди́ноже бе обита́лищу,/ но, я́коже кра́сная пала́та,/ верте́п Цари́це показа́шеся./ Христо́с ражда́ется пре́жде па́дший воскреси́ти о́браз.

Тропа́рь преподобному́ченице, глас 4:

А́гница Твоя́, Иису́се, Евге́ния/ зове́т ве́лиим гла́сом:/ Тебе́, Женише́ мой, люблю́,/ и, Тебе́ и́щущи, страда́льчествую,/ и сраспина́юся, и спогреба́юся креще́нию Твоему́,/ и стражду́ Тебе́ ра́ди,/ я́ко да ца́рствую в Тебе́,/ и умира́ю за Тя, да и живу с Тобо́ю,/ но, я́ко же́ртву непоро́чную, приими́ мя с любо́вию поже́ршуюся Тебе́./ Тоя́ моли́твами, я́ко ми́лостив, спаси́ ду́ши на́ша.

НА ПОВЕЧЕ́РИИ

Кано́н, глас 6, его́же краегране́сие: Днесь же суббо́ту пою́ вели́кую.Ирмосы́ по два́жды, тропари́ же на 6.

Песнь 1

Ирмо́с: Волно́ю морско́ю/ Скры́вшаго дре́вле/ гони́теля мучи́теля–/ в я́слех сокрыва́емаго уби́ти и́щет И́род,/ но мы с волхвы́ пои́м:/ Го́сподеви воспои́м, сла́вно бо просла́вися.

Го́споди Бо́же мой,/ рожде́ственное пе́ние и предпра́зднственную песнь Тебе́ воспою́,/ рожде́нием Твои́м Боже́ственным возрожде́ние даю́щему мне/ и к пе́рвому мя благоро́дию возводя́щу.

Горе́ Тя на Престо́ле и до́ле в я́слех преми́рная и земна́я разуме́вше, Спа́се мой,/ дивля́хуся держа́ве Твое́й,/ яви́лся еси́ бо па́че ума́, сугу́б естество́м, Богочелове́к.

Да Твоея́ сла́вы вся́ческая испо́лниши, приклони́в Небеса́, на зе́млю прише́л еси́:/ я́ко бо на руно́, низше́л еси́ дождь во чре́во де́вственное,/ из Нея́же ны́не роди́тися сугу́б гряде́ши,/ Бог же и Челове́к.

Последи́ же ирмо́с оба ли́ка вку́пе.

Песнь 3

Ирмо́с: Тебе́, на вода́х/ пове́сившаго всю зе́млю неодержи́мо,/ тварь, ви́девши в верте́пе ражда́ющася,/ ужа́сно содрога́шеся,/ несть свят,/ па́че Тебе́, Го́споди, зову́щи.

О́бразы неизрече́ннаго Твоего́ воплоще́ния проявля́я, Ще́дре,/ умно́жил еси́ виде́ния и проро́чествия вдохну́л еси́,/ я́же, ны́не прише́д, испо́лнил еси́,/ пло́тию ражда́яся из Чи́стыя Отрокови́цы во гра́де Дави́дове.

Простре́ земля́ плещи́ своя́/ и прие́млет прие́млющаго Зижди́теля сла́ву от А́нгел,/ от Небе́с же звезду́, от па́стырей хвале́ние, от волхво́в же да́ры/ и от всего́ ми́ра позна́ние.

Волхва́, звездоче́тца Валаа́ма, гада́ния ны́не исполня́ются, возсия́ бо звезда́ от Иа́кова/ и наста́ви к Со́лнцу сла́вы да́ры нося́щия волхвы́,/ от Перси́ды цари́.

Песнь 4

Ирмо́с: От Де́вы прише́ствие Твое́/ прови́дяй Авваку́м,/ ужа́сся, вопия́ше:/ Ты от ю́га, воплоща́яся, прише́л еси́, Изба́вителю,/ Ада́ма отринове́ннаго воззва́ти.

Приближа́ется и прихо́дит ны́не Госпо́дь,/ жда́ние язы́ков и спасе́ние ми́ра;/ угото́ви верте́п, гра́де Вифлее́ме,/ и с волхвы́ па́стырие, теку́ще, приспе́йте.

Кре́постию Божества́ сраствори́вся челове́ком едине́нием несли́тным,/ пло́ти в подо́бии, Спа́се, Ада́ма обновля́еши/ и спаса́еши восприя́тием.

Сло́во, плоть яви́вся, одебелева́ет/ и вселя́ется в ны неизрече́нным про́мыслом./ Прииди́те, ве́рнии, у́зрим сла́ву Его́,/ сла́ву я́ко Единоро́днаго от Бо́га и Отца́.

Песнь 5

Ирмо́с: Богоявле́ния Твоего́, Христе́,/ е́же к нам ми́лостивно бы́вшаго,/ Иса́ия, Свет ви́дев Невече́рний,/ от но́щи у́треневав, взыва́ше:/ се Де́ва во чре́ве прии́мет/ и породи́т воплоща́емое Сло́во,/ и вси земноро́днии возра́дуются.

Новотвори́ши земноро́дныя, пе́рстен быв, Зижди́телю./ Я́сли же, и пелены́, и верте́п – Твоего́ смире́ния о́бразы./ Обру́чник же Твоея́ Ма́тере, Твой мни́мый оте́ц по пло́ти,/ ро́ждшаго Тя Отца́ ны́не вообража́ет сове́т.

Сми́рною смерть, зла́том ца́рскую держа́ву,/ лива́ном же Божества́ преиму́щество проявля́ют ца́рие язы́ков,/ нача́тки даронося́ще Тебе́, в верте́пе рожде́нному Вифлее́мстем/ из Неискусому́жныя Ма́тере.

Из безму́жныя проше́д, Отца́ соприсносу́щное Сло́во,/ пло́тски всели́лся еси́ в верте́п, я́ко Престо́л, я́сли вмени́в;/ удивля́еши же стра́шным строе́нием Твои́м волхвы́ и па́стыри,/ А́нгелы же ужаси́л еси́:/ сла́ва держа́ве Твое́й.

Песнь 6

Ирмо́с: Ят бысть,/ но не удержа́н в пе́рсех ки́товых Ио́на:/ Твой бо о́браз нося́,/ Ро́ждшагося и пло́тию Я́вльшагося,/ я́ко от черто́га, от зве́ря изы́де./ Рожде́нный бо ны́не пло́тию,/ во гроб и смерть хоте́л еси́ вни́ти,/ и па́ки воскре́снути тридне́вен.

Поги́бе ны́не и разори́ся дре́вния вражды́ средосте́ние/ плотски́м Твои́м прише́ствием, Христе́,/ и пла́менное ору́жие всем дае́т плещи́,/ живоно́снаго же Еде́мскаго дре́ва причаща́юся ве́рно,/ безсме́ртных са́дов а́бие Де́латель показу́яся.

Ца́рствует со грехо́м ад, от Ада́ма да́же до Тебе́,/ но погиба́ет тех безсту́дное мучи́тельство/ пло́тию ражда́ющуся Тебе́, Изба́вителю, от пле́мене Дави́дова,/ и на Престо́ле Ца́рствия Его́ посажде́ну я́ве,/ и во ве́ки ца́рствующу.

Детоуби́йца, но не христоуби́йца яви́ся И́род лю́тый:/ а́ще бо и младе́нцы пожа́т го́рько, я́ко траву́,/ но Кла́са жи́зни не возмо́же удержа́ти и умертви́ти,/ жи́зни бо Сый Пода́тель утаи́ся,– я́ко Бог, Боже́ственною си́лою,– гони́теля.

Песнь 7

Ирмо́с: Неизрече́нное чу́до:/ в пещи́ изба́вивый преподо́бныя о́троки из пла́мене,/ в я́слех убо́гих Младе́нец возлеже́/ во спасе́ние нас, пою́щих:/ Изба́вителю Бо́же,/ благослове́н еси́.

Уязви́ся льстец враг,/ Бо́га ви́дя я́ко Младе́нца, лежа́ща в я́слех худы́х,/ и кре́пкою руко́ю Боже́ственною убива́ется во спасе́ние нас, пою́щих:/ Изба́вителю Бо́же, благослове́н еси́.

Блаже́нны я́сли,/ в себе́ бо прие́мше я́ко Младе́нца Соде́теля,/ я́ко херуви́мский Престо́л показа́шася во спасе́ние нас, пою́щих:/ Изба́вителю Бо́же, благослове́н еси́.

Зако́ном челове́ческим в пелена́х положе́ние прие́млеши, Младе́нец я́влься,/ и́миже у́зы реши́ши прегреше́ний на́ших,/ свобо́ду да́руя вопию́щим:/ Изба́вителю Бо́же, благослове́н еси́.

Песнь 8

Ирмо́с: Ужасни́ся, боя́йся, Не́бо,/ и да подви́жатся основа́ния земли́:/ се бо пелена́ми повива́ется вся Нося́й дла́нию/ и во я́слех ма́лех странноприе́млется,/ Его́же, о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Разреши́ся свя́занный Ада́м,/ свобо́да же всем ве́рным дарова́ся, пелена́ми, Спа́се, повива́ему Тебе́/ и в верте́пе ма́лем и в я́слех безслове́сных положе́ну./ Тем Тебе́, ра́дующеся,/ предпра́зднственную песнь в Твое́м Рождестве́ прино́сим ве́рою.

Преста́ пре́лесть Пе́рсская,/ звездосмотри́теле бо, ца́рие восто́чнии,/ ро́ждшемуся да́ры прино́сят Христу́ Всецарю́, зла́то же и сми́рну с лива́ном./ Его́же, о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

О, чуде́с но́вых!/ О, благосты́ни!/ О, неизрече́ннаго терпе́ния!/ Се бо я́ко Младе́нец вменя́ется в Вы́шних живы́й/ и бе́гает Бог во́лею И́рода./ Его́же,/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Песнь 9

Ирмо́с: Не диви́ся ны́не, о Ма́ти,/ ви́дящи я́ко Младе́нца,/ Его́же из чре́ва пре́жде денни́цы роди́ Оте́ц:/ возста́вити бо и сопросла́вити/ челове́ческое па́дшее естество́ приидо́х я́вственно,/ ве́рою и любо́вию Тя велича́ющее.

В стра́ннем Твое́м Рождестве́,/ боле́зней избе́гши преесте́ственно, ублажи́хся, Безнача́льне Сы́не;/ ны́не же Тя зря́щи, И́рода бе́гающа,/ ору́жием печа́ли смуща́юся душе́ю, взыва́ющи:/ спаса́й Тебе́ почита́ющия.

В зе́млю у́бо иду́ Еги́петскую,/ но Еги́петская, о Ма́ти, рукотворе́нная низложу́ тру́сом;/ души́ же Моея́ всу́е и́щущия враги́ пошлю́ во ад,/ я́ко Еди́н держа́вен,/ вознесу́ и спасу́ Тебе́ почита́ющия.

Да ра́дуется тварь: зи́ждется бо Зижди́тель, и, пре́жде Сый,/ ны́не нов познава́ется Бог;/ с да́ры волсви́ да предсрета́ют,/ па́стырие чу́до да пле́щут ве́рне,/ и челове́цы со А́нгелы да веселя́тся.

НА У́ТРЕНИ

На Бог Госпо́дь: тропа́рь предпра́зднства, три́жды.

По 1-й кафи́зме седа́лен, глас 6.

Подо́бен: А́нгельския си́лы:

Проро́ческая рече́ния ны́не испо́лнишася:/ Бог бо наш у́тре ражда́ется из Де́вы Мари́и па́че сло́ва,/ и пребыва́ет, я́коже бе пре́жде рождества́./ Собира́ются волсви́, да́ры нося́ще;/ свиря́ют па́стырие, да припева́ем и мы:/ И́же от Де́вы рожде́йся, Го́споди, сла́ва Тебе́.

Сла́ва, и ны́не, то́йже.

По 2-й кафи́зме седа́лен, глас 8:

Свире́лей па́стырских преставля́ющее пе́сни,/ во́инство А́нгельское возгласи́, к ним глаго́ля:/ преста́ните, свиря́юще,/ и́же над чреда́ми пасо́мых старе́йшины, возопи́йте, пою́ще,/ я́ко роди́ся Христо́с Госпо́дь,/ благоволи́вый спасти́ я́ко Бог род челове́ческий.

Сла́ва, и ны́не, то́йже.

Кано́н предпра́зднства со ирмосо́м на 8 и святы́я на 4. Предпра́зднства кано́н, глас 2, его́же краегране́сие по алфави́ту. Творе́ние Ио́сифово.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть:/ препросла́вленный Госпо́дь сла́вно бо просла́вися.

Написа́лся еси́ ке́саревым повеле́нием,/ хотя́ написа́ти в кни́зе жи́зни, Всецарю́, челове́ка;/ стра́нно во Своя́ прише́л еси́,/ лю́те устра́ньшагося от рая́ на Не́бо призыва́я.

Вифлее́ме, приими́ Христа́,/ к тебе́ бо Воплоти́выйся прихо́дит, Еде́м отверза́я мне;/ угото́вися, верте́пе, Невмести́маго узри́ши, вмеща́ющася в тебе́ пресла́вно,/ бога́тством благоутро́бия ны́не обнища́вша.

Роди́тися гряде́т Христо́с,/ стра́нное возрожде́ние су́щим из Ада́ма я́ко Бог да́руя./ Возвесели́ся, пусты́не неражда́ющая, земны́х естество́ все:/ прии́де бо Влады́ка тя многоча́дну соде́яти.

Кано́н святы́я, глас то́йже, творе́ние Феофа́ново. Его́же краегране́сие: Евге́нии вели́кую сла́ву в пе́снех изря́дно пою́.

Песнь 1. Ирмо́с то́йже

Евге́ние, му́ченице Христо́ва,/ ны́не ликовству́ющи ра́достно со а́нгельскими во́инствы,/ я́ко де́ва непоро́чна и я́ко му́ченица, венцено́сица всебога́тая,/ благода́ть дарова́ти моли́ся любо́вию воспева́ющим тя.

Песнопе́ния, неве́сто Христо́ва, Боже́ственнаго послу́шавши,/ к высо́кому впери́лася еси́ благоро́дию:/ я́ко бо свет возсия́ в се́рдце твое́, пе́сней Ду́ха Богосло́вие,/ вся́ко безбо́жие отгоня́.

Же́нское естество́ твой ум забы́в,/ к му́жеским дея́нием востече́, вмужи́вся благода́тию,/ и Бо́гу промы́сленне управля́яся, му́ченице Евге́ние,/ Боже́ственнаго благоро́дия тезоимени́тная.

Осия́вшися све́том у́мным,/ мно́жайшия осия́ния сопричасти́тися соде́лала еси́, Богому́драя;/ его́же ны́не пою́щия тя избавля́ющи греха́,/ сподо́би твои́ми мольба́ми, му́ченице Евге́ние всеблаже́нная.

Богоро́дичен: Умерщвле́ни бы́вше зна́ния са́дом,/ дре́вом жи́зни, Чи́стая, к жи́зни, ве́рнии, воззва́хомся,/ из Тебе́ прозя́бшим па́че смы́сла, Богоро́дице, Христо́м Бо́гом;/ Ему́же со дерзнове́нием моли́ся/ спасти́ся душа́м на́шим.

Песнь 3

Ирмо́с: Процвела́ есть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием Твои́м,/ в не́йже утверди́ся мое́ се́рдце.

Уз избавля́я мя злых, Го́споди,/ пови́тися пелена́ми, я́коже младе́нец, прихо́диши, Человеколю́бче./ Покланя́юся Боже́ственному Твоему́ низхожде́нию.

В ле́то бы́вша Тя, безле́тно возсия́вша из Отца́, предгряде́т Де́ва роди́ти,/ ле́тныя разреша́юща стра́сти душ на́ших.

Иски́й мя, заблу́ждшаго преступле́нием,/ верте́п, я́коже не́бо, оби́тель сотвори́л еси́,/ оби́тели ми благоуготовля́я та́мошния,/ Ще́дре Многоми́лостиве.

Ин

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́бося дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.

Я́коже же́ртва непоро́чна Влады́це принесла́ся еси́ мы́слию соверше́ннейшею/ и бога́тство тле́емое отри́нула еси́, вопию́щи, всему́драя:/ Ты еси́ Бог наш, и несть свят, па́че Тебе́, Го́споди.

Всечи́стая, позна́ся твоя́ чистота́,/ просия́ страда́ний Твои́х кре́пость,/ дея́ние бо восхожде́ние виде́ния соде́лала еси́, вопию́щи:/ Ты еси́ Бог наш, и несть свят, па́че Тебе́, Го́споди.

Целому́дрия жела́нием одержа́ся,/ соблюла́ еси́ хвалу́ чистоты́,/ была́ еси́ прия́тна прему́дрости, Христу́ вопию́щи:/ Ты еси́ Бог наш, и несть свят, па́че Тебе́, Го́споди.

Богоро́дичен: Мари́ю, Пречи́стую Богоро́дицу, воспои́м,/ я́ко Хода́таицу спасе́ния я́вльшуюся, Богому́дрии, и вопие́м:/ несть чи́сты, я́коже Ты, Пречи́стая,/ и несть непоро́чны, па́че Тебе́, Влады́чице.

Конда́к святы́я, глас 2

Подо́бен: Тве́рдый:

Благоро́дия нра́вом тя честноподо́бне украси́в обожи́вый Госпо́дь,/ в ра́бии о́бразе от Де́вы нам соедини́ся,/ И́же тя в лик дев свещено́сиц вчини́/ и с му́ченики сочета́, Евге́ние,/ я́ко вои́стинну благоро́дия Боже́ственныя сла́вы вене́ц улучи́.

Седа́лен, глас 8.

Подо́бен: Прему́дрости:

Воздержа́вшися в труде́х страда́льческих,/ просла́вилася еси́ по́двиги му́ченическими,/ мно́ги приве́дши спасае́мыя Зижди́телю твоему́:/ Боже́ственною бо любо́вию оста́вивши привре́менная,/ му́жеския по́двиги соверши́ла еси́, сла́вная./ Те́мже по кончи́не безконе́чную обрела́ еси́ жи́знь,/ пребыва́ющи с Женихо́м твои́м всегда́, Евге́ние равноа́нгельная./ Моли́ Христа́ Бо́га прегреше́ний оставле́ние дарова́ти/ чту́щим любо́вию всечестну́ю па́мять твою́.

Сла́ва, и ны́не:

Не́бо мне показа́ся днесь земля́,/ на ней бо ражда́ется Творе́ц/ и в я́слех восклоня́ется в Вифлее́ме Иуде́йстем./ Со А́нгелы пою́т па́стырие непреста́нно:/ в Вы́шних сла́ва, мир в ми́ре;/ ви́деша бо звезду́, путеше́ствующу с волхвы́,/ ско́ро же теку́ще принести́ да́ры, зла́то, смирну и лива́н,/ я́ко всех су́щему Бо́гу, и Царю́ ве́чному, и Зижди́телю вся́ческих,/ в верте́пе за милосе́рдие ро́ждшемуся.

Песнь 4

Ирмо́с: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Тварь ны́не обветша́ние все отве́ржи,/ Зижди́теля, зи́ждема и обновля́юща тя, ви́дящи, младе́нца бы́вша,/ и к пе́рвой тя добро́те возводя́ща.

Дивя́щеся пресла́вному Рождеству́, стоя́ху волсви́,/ путеводи́мы Боже́ственною звездо́ю,/ и ви́деша Со́лнце, восходя́щее из де́вственнаго о́блака,/ да́ры Тому́ принесо́ша.

Се прихо́дит Де́ва, я́ко ю́ница,/ нося́щи юнца́ во чре́ве упита́ннаго, отъе́млющаго ми́ра грехи́,/ да ра́дуется тварь, пра́зднующи.

Про́поведи проро́ков, Христо́во возъявле́ние возвеща́ющия,/ прия́ша днесь коне́ц спаси́тельный:/ прии́де бо просвети́ти пло́тию во тьме бе́дствующия.

Ин. Ирмо́с то́йже

Прише́л еси́, воплоти́вся от Де́вы, Вы́шний,/ Себе́ обручи́в дев соста́вы,/ Тебе́ Еди́наго возлю́бльшия, де́вственнаго Жениха́ зна́емаго.

Рождества́ плотска́го совлекла́ еси́ покрыва́ло:/ па́ки рожде́ния же нетле́нную оде́жду, му́ченице всесла́вная,/ светови́дно облекла́ еси́ Креще́нием.

Возсия́ светоно́сная заря́ се́рдцу твоему́,/ ле́сти отгоня́щи излия́нный мрак блиста́нием благода́ти,/ му́ченице Христо́ва Евге́ние, до́брая де́во.

Удобре́нно твое́ и красно́ житие́ просвети́ла еси́,/ воздержа́нием пе́рвее плотски́я стра́сти увяди́вши,/ последи́ же страда́нием пресве́тло, Евге́ние, сия́ющи.

Богоро́дичен: Превы́шшая А́нгел была́ еси́, Всепе́тая,/ О́тча ро́ждши сове́та вели́каго А́нгела,/ Челове́ка бы́вша за мно́гое благоутро́бие, Человеколю́бца.

Песнь 5

Ирмо́с: Хода́тай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику, Отцу́ Твоему́/ от но́щи неве́дения/ приведе́ние и́мамы.

Лю́дие, иногда́ во тьме седя́щии,/ да ви́дят Свет возсия́вший Невече́рний:/ Его́жe звезда́ дре́вле возвести́ огнь почита́ющим от Перси́ды царе́м.

В ма́лый вни́ти Царь вели́кий тщи́тся верте́п,/ ума́ленна мя я́ко да возвели́чит/ и обнища́вша безме́рным бога́тством обогати́т, Пребоже́ственный.

Ны́не из Иа́кова, я́коже Валаа́м рече́, ражда́ется Христо́с:/ язы́ки же огоспо́дствует, и возвы́сится благода́тию Ца́рство Его́,/ пребыва́ющее непрее́мно.

Ин

Ирмо́с: Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, бо́га не знаю.

Тече́ние твое́ направля́емо ви́дя ко спасе́нию,/ змий душепа́губный, страстоно́сице, воздвиза́ет искуше́ния тебе́ разли́чная,/ твою́ кре́пость разсла́бити покуша́яся;/ сего́ же, Богому́драя чи́стая, попра́ла еси́.

Вся добра́ до́брых Да́телю, и Благоде́телю,/ и Жениху́ душ, Христу́, яви́лася еси́,/ укра́шена в по́стницех воздержа́нием/ и му́ченическим страда́нием сия́ющи,/ му́ченице Евге́ние, Христо́ва до́брая де́во.

Вене́ц твоему́ верху́ наложи́ся дарова́ний:/ Боже́ственную бо почти́ла еси́ му́дрость,/ бога́тство и сла́ву оте́ческую презре́вши,/ и с кре́постию после́довала еси́ возлю́бленному Жениху́ твоему́, всечестна́я.

Богоро́дичен: Из Тебе́ Жи́знь, возсия́вши ми́ру, Богороди́тельнице,/ пре́жде сме́ртию удержа́нныя воззыва́ет к жи́зни присносу́щней причаще́нием, ве́рою вопию́щия:/ ино́го, ра́зве Тебе́, бо́га не зна́ем.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну;/ от тли, Бо́же, мя возведи́.

Страннообра́зне Христо́с во Своя́ прихо́дит,/ устрани́м себе́ грехо́в и Сeго́ прии́мем,/ в кро́тких душа́х обита́ющаго.

Ника́коже мале́йший во граде́х, Вифлее́ме, бу́деши:/ в тебе́ бо ражда́ется Царь и Госпо́дь,/ па́ствити лю́ди бога́тныя.

Ка́ко ма́лый Тя прии́мет верте́п, ми́ру невмести́маго, Недомы́сленне?/ Ка́ко у́зришися, Младе́нец, Отцу́ соу́мственный, Безнача́льный?

Ин. Ирмо́с то́йже

Дрема́ния твои́м ве́ждом не дала́ еси́,/ до́ндеже сладостра́стие все угаси́ла еси́/ и чи́стую Зижди́телю твоему́ тебе́ саму́ю соверши́ла еси́ оби́тель.

Еги́птяныни, нра́вом поревнова́вши, очерне́вшая де́лом и и́менем,/ клевета́ти остри́тся честно́е житие́ твое́, всечестна́я.

Тве́рдую показа́вши све́тлость/ и врачева́ний благода́тию обогати́вшися бога́тством ве́ры,/ чернори́зиц составле́нию бысть учи́тельница.

Богоро́дичен: Та́инственно уча́хуся несказа́нному вси проро́цы Твоему́, Всечи́стая, Рождеству́,/ духо́вно образу́юще и предглаго́люще всем бу́дущая.

Конда́к, глас 3.

Подо́бен: Де́ва днесь:

Де́ва днесь Преве́чное Сло́во/ в верте́пе гряде́т роди́ти неизрече́нно;/ лику́й, вселе́нная, услы́шавши,/ просла́ви со А́нгелы и па́стырьми/ хотя́щаго яви́тися Отроча́ Мла́до, Преве́чнаго Бо́га.

И́кос:

Свяще́нная проро́ков рече́ния коне́ц прия́ша: се бо Де́ва ражда́ет Всесоверше́ннаго в Вифлее́ме гра́де, внутрь верте́па./ Тварь вся, новосотвори́ся, ра́дуйся и лику́й: с рабы́ пожи́ти Влады́ка всех прии́де,/ влады́чества чужда́го избавля́я ны, низведе́нныя тле́ю,/ и зри́тся я́ко Младе́нец, пелена́ми повива́емь в я́слех,/ Отроча́ Мла́до, Преве́чный Бог.

Песнь 7

Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ есть./ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Да кропя́т свы́ше во́ду о́блацы,/ о́блаки полага́яй Себе́ че́стне на восхожде́ние о́блаком, носи́мь Де́вою,/ гряде́т возсия́ти Свет Невече́рний су́щим пре́жде помраче́нным и бе́дствующим.

Во́инство благоугото́вися Боже́ственных А́нгел/ воспе́ти неизрече́нное Госпо́дне низхожде́ние,/ волсви́, пости́гните, па́стырие, потщи́теся:/ прии́де, Ему́же належа́ше, Христо́с,/ ожида́ние язы́ков и избавле́ние.

Что́ сие́ стра́нное и велича́йшее чу́до?/ Ка́ко понесу́ Тя, нося́щаго глаго́лом вся́ческая?/ Неизглаго́ланное Рождество́, Сы́не Мой Безнача́льне,/ глаго́лаше Всечи́стая,/ Христа́ на дла́нех ужа́сно держа́щи.

Ин. Ирмо́с то́йже

Изъясни́ла еси́ всем Богодухнове́нных писа́ний и́стину,/ же́нское естество́ ому́жествивши, и вся удиви́ла еси́ пресла́вно, честна́я,/ я́же привела́ еси́ све́тлы ве́ровавшия Христу́, всебога́тая.

Я́вственно обличи́ла еси́ и́дольское неи́стовство, всехва́льная,/ Боже́ственными твои́ми уче́ньми, и дев неизче́тное мно́жество обручи́вши все́ми ца́рствующему Христу́ све́тлое му́ченическою кро́вию.

Ви́девши житие́ твое́ светоно́сное, Васи́лла сла́вная,/ Боже́ственне поревнова́вши и Христу́ обручи́ся,/ оста́вльши плотско́е все сладостра́стие,/ и ны́не му́ченическия ра́дости сподо́бися.

Богоро́дичен: Па́жить исцели́ла еси́ сме́ртную,/ безсе́менно ро́ждши Жи́знь Ипоста́сную, Де́во Всенепоро́чная, Богороди́тельнице Чи́стая./ Тем же Тя, ра́дующеся, исто́чник безсме́ртия имену́ем.

Песнь 8

Ирмо́с: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

Высоту́ вои́стинну неизрече́ннаго та́инства, Небеса́ ра́зумом покры́вшему,/ Непоро́чная зря́щи, дивля́шеся и глаго́лаше:/ Престо́л Небе́сный пла́менствуется, Тебе́ держа́й,/ и ка́ко, Сы́не Мой, понесу́ Тя?

Но́сиши Оте́ческое подо́бие, Сы́не Мой,/ и ка́ко раба́ подо́бие, обнища́в, восприя́л еси́?/ Ка́ко в я́слех восклоню́ Тя безслове́сных,/ избавля́ющаго вся от безслове́сия?/ Песносло́влю Твое́ благоутро́бие.

Ра́дуйся, вся земле́,/ се́ Христо́с приближа́ется, в Вифлее́ме ражда́яйся;/ мо́ре, возвесели́ся, проро́ческий сонм, взыгра́й, сбытие́ зря днесь Твои́х слове́с,/ и вси, ра́дуйтеся, пра́веднии.

Ин

Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода/ и превозноси́те во вся ве́ки.

В реце́ ю́ношески,/ во огни́ же терпели́вно искуси́лася еси́:/ проти́вная бо естества́ кре́пко прешла́ еси́,/ Христа́ по́йте, дела́, зову́щи, и превозноси́те во вся ве́ки.

Странноле́пно явле́йся Христо́с тебе́, в темни́це держи́мей,/ препитава́ет бога́тно и Рождество́м Свои́м совокупля́ет Го́рним во́инством/ тя, славосло́вящую Его́ во ве́ки.

Твой Жени́х благоле́пно венцы́ тя сугу́быми украша́ет, Евге́ние Богому́драя,/ и тебе́ черто́г све́тел пра́ведно, я́ко пра́ведный, дае́т./ Его́же превозно́сим во вся ве́ки.

Благода́ть Бо́жия, светови́дно облиста́вши тя,/ ны́не озаря́ет во оби́телех Небе́сных,/ Ея́же напо́лнитися твои́ми моли́твами непреста́нно моли́/ соверша́ющим твою́ па́мять, Богому́драя.

Богоро́дичен: Безсме́ртныя зари́ исто́чник ве́мы Тя, Богоро́дице,/ я́ко ро́ждшую Сло́во Безсме́ртнаго Отца́,/ вся сме́рти избавля́ющаго превозноша́ющия Его́ во ве́ки.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем всепе́тую Богоро́дицу велича́ем.

Да пою́т, ра́дующеся, ца́рствия вся земна́я,/ оте́чествия же язы́ков да веселя́тся;/ го́ры, и удо́лия, и хо́лми, ре́ки, мо́ре/ и вся тварь Го́спода, ны́не ро́ждшагося, велича́ет.

Ви́делся еси́, я́ко мо́щно бе проро́ком Тя ви́дети;/ в после́дняя же времена́ Челове́к быв,/ всем яви́лся еси́ челове́ком, в Вифлее́ме, гра́де Иуде́йстем,/ звезда́ показу́ющи Тя звездосло́вцем, Несказа́нне.

О Ча́до Сладча́йшее, ка́ко пита́ю Тя, пита́ющаго?/ ка́ко держу Тя, держа́щаго вся ма́нием?/ ка́ко же пелена́ми повию́ повива́ющаго всю зе́млю мгло́ю?/ – вопия́ше Всечи́стая Влады́чица,/ Ю́же непреста́нно велича́ем.

Ин. Ирмо́с то́йже

Во оби́тели все́льшися Небе́сныя, сла́вная,/ ны́не сла́дости ра́йския сподо́билася еси́ я́вственно с де́вами,/ я́ко му́ченица всеи́стинна и с му́ченицами де́ва всенепоро́чная,/ Евге́ние всеблаже́нная.

Жела́ние получи́ла еси́ па́че ума́ и смы́сла,/ жела́ний кра́йнейшему предстоя́щи све́тло/ и светоза́рными луча́ми Нача́льныя Тро́ицы, Богому́драя, я́вственно сия́ющи,/ Евге́ние, до́брая де́во.

Свещу́ держа́щи де́вства неуга́сну,/ му́ченическим венце́м украси́лася еси́,/ и ны́не моля́щи не преста́й благоче́стно тя любо́вию почита́ющим спасти́ся моли́твами твои́ми,/ Евге́ние всесла́вная.

К Боже́ственному ны́не изшла́ еси́ прохлажде́нию, вседо́бляя,/ ран проше́дши огнь нестерпи́мый/ и непостоя́нную во́ду искуше́ний, му́ченице Евге́ние./ Христа́ у́бо моли́ спасти́ ду́ши на́ша.

Богоро́дичен: Я́ко руно́, Всенепоро́чная, дождь Небе́сный во чре́ве заче́нши,/ нам родила́ еси́ безсме́ртие даю́щаго,/ благоче́стно Того́ воспева́ющим/ и Тя, Всенепоро́чную Богоро́дицу, велича́ющим.

Свети́лен предпра́зднства.

Подо́бен: Со ученики́:

И́же во све́те живы́й непристу́пнем и содержа́й вся́ческая/ за благоутро́бие неизрече́нное от Де́вы ражда́ется/ и пелена́ми повива́ется, я́ко Младе́нец,/ в верте́пе и в я́слех безслове́сных восклоня́ется,/ потщи́мся спе́шно приити́ в Вифлее́м на поклоне́ние Его́ с волхвы́,/ плоды́ изря́днейших дея́ний нося́ще я́ко да́ры.

Сла́ва, и ны́не:

Пе́ние, ве́рнии, принесе́м Де́ве Мари́и:/ се бо ны́не предгряде́т во гра́де Вифлее́ме роди́ти Христа́ Спа́са,/ те́мже, волсви́, с да́ры со звездо́ю тецы́те с на́ми поклони́тися,/ па́стырие же, возопи́ти потщи́теся со А́нгелы ражда́емому:/ сла́ва Тебе́, в верте́пе и я́слех лежа́щему.

На хвали́тех стихи́ры, глас 6, на 4.

Подо́бен: А́нгельския предъиди́те:

Звезда́ возсия́ от Иа́кова в верте́пе,/ прии́дем и мы, предпра́зднственная соверша́юще,/ теце́м с волхвы́, с па́стырьми и́дем,/ ви́дим Бо́га в пелена́х,/ ви́дим Де́ву млекопита́ющую./ О, ужа́сно виде́ние!/ Царь Изра́илев, Христо́с прихо́дит.

Пе́сньми лик А́нгельский ны́не почита́ет Тебе́,/ све́тлую и Неискусому́жную Ма́терь,/ ра́дуяся, лику́ет Рождество́м Твои́м, Пречи́стая,/ ра́дуйся, наде́жда правосла́вных,/ ра́дуйся, предста́тельство Тебе́ пою́щих./ Те́мже рцем:/ благослове́н прише́дый Бо́же наш, сла́ва Тебе́.

Цвет изы́дет из ко́рене Иессе́ева,/ от све́тлаго пропове́дася проро́ка,/ зрим бо Де́ву, па́че естества́ ро́ждшую/ ши́пок любе́зный в верте́пе,/ сопресто́лен Отцу́ в Вы́шних./ Лю́дие, рцем:/ благослове́н прише́дый Бо́же наш, сла́ва Тебе́.

Днесь Ада́м воззва́ся от пре́лести/ и от мра́чныя сопроти́вника ле́сти,/ Христо́с бо из Де́вы воплоща́ется я́ко Челове́к,/ И́же, Ада́ма обнови́в, отъя́т кля́тву Де́вою./ Лю́дие, рцем:/ благослове́н прише́дый Бо́же наш, сла́ва Тебе́.

Сла́ва, глас и подо́бен то́йже:

Гряди́, Вифлее́ме,/ гото́ви рожде́ственная,/ прииди́, Ио́сифе, напиши́ся с Мари́ею,/ пречестны́я я́сли, Богоно́сныя пелены́,/ в ни́хже Жи́знь пови́вшися/ плени́цы сме́ртныя расто́ргнет,/ стяга́ющи к нетле́нию челове́ки,/ Христо́с Бог наш.

И ны́не, подо́бен то́йже:

О, блаже́нное Богоотрокови́цы чре́во,/ я́же мы́сленне Небесе́ бо́льши показа́ся!/ Его́же бо не вмеща́ет Не́бо,/ Ты содержи́ши, в Себе́ нося́щи./ О, блаже́нны сосцы́ Де́вы,/ я́же соссе́т пита́яй вся́ко дыха́ние Христо́с,/ в ложесна́х плоть Себе́ созда́в/ Безму́жныя Отрокови́цы!

На стихо́вне стихи́ры предпра́зднства, глас 2.

Подо́бен: До́ме Евфра́фов:

Дом Вседе́теля/ показа́лася еси́, о Де́во!/ в Тебе́ бо всели́вся,/ Госпо́дь сла́вы/ роди́тися ны́не происхо́дит.

Стих: Бог от ю́га прии́дет/ и Святы́й из горы́ приосене́нныя ча́щи.

Мла́до в Вифлее́ме/ Де́тище из Де́вы,/ Бог преве́чный,/ в я́слех безслове́сных ражда́ется,/ о, чудесе́!

Стих: Го́споди, услы́шах слух Твой и убоя́хся;/ Го́споди, разуме́х дела́ Твоя́ и ужасо́хся.

Чи́ни у́мнии а́нгельстии,/ в Вы́шних Бо́гу/ с па́стырьми воспо́йте/ и с волхвы́ ражда́ющемуся:/ сла́ва Тебе́.

Сла́ва, подо́бен тойже:

Сла́ва Тебе́, О́тче,/ Сы́не и Ду́ше,/ И́мже устро́ися/ та́инство ужа́сное/ челове́ком на возрожде́ние.

И ны́не, подо́бен то́йже:

Ра́дуйся, Я́же Жи́знь/ ро́ждшая ми́ру,/ Де́во Богоро́дице,/ от Ду́ха Свята́го/ всех на избавле́ние.

Подоба́ет ве́дати, а́ще случи́тся Неде́ля пред Рождество́м Христо́вым, святы́х оте́ц, декабря́ в 24-й день.

В суббо́ту на ма́лой вече́рни стихи́ры воскресны 4.Сла́ва, и ны́не, предпра́зднства, глас 6: Вертепе, благоукраси́ся: На стихо́вне стихи́ра воскресна и Богоро́дицы, по обы́чаю. Сла́ва, и ны́не, Богоро́дичен. По трисвято́м тропа́рь воскресе́н. Сла́ва, и ны́не, предпра́зднства. Та́же ектения ма́лая и отпу́ст.

На вели́цей вече́рни, по обы́чном псалме́, поем Блаже́н муж: кафизму всю. на Го́споди, воззва́х: стихи́ры на 10: отцев на 6, глас 6, Подо́бен: Всю отложи́вше: и предпра́зднства на 4, глас и подо́бен то́йже. Сла́ва, отцев, глас то́йже: Даниил, муж жела́ний: И ны́не, предпра́зднства, глас то́йже: Верте́пе, благоукраси́ся: та́же вход. Проки́мен дне и чте́ния отцев 3. На лити́и стихи́ры предпра́зднства, пи́саны на ряду, на Го́споди, воззва́х: в 24-й день, глас 5, Подо́бен: Ра́дуйся: Сла́ва, отцев, глас 3: Пра́отец собо́р: И ны́не, глас то́йже Благоукраси́ся, Вифлее́ме:На стихо́вне стихи́ры предпра́зднства, глас 2, самоподо́бен: До́ме Евфра́фов: Припев: Бог от ю́га прии́дет: та́же два самогла́сна: Вифлее́ме, земле́ Иу́дова: Припев: Го́споди, услы́шах слух Твой и убоя́хся: Прииди́те вси, Христо́во Рождество́: Сла́ва, глас то́йже: Ра́дуйтеся, проро́цы: И ны́не, предпра́зднства, глас то́йже: Се время прибли́жися: На благослове́нии хлебов тропа́рь отцев, глас 2: Ве́лия ве́ры исправле́ния: два́жды и предпра́зднства еди́ножды, и чте́ние в Посланиих апо́стольских.

На у́трени, на Бог Госпо́дь: тропа́рь воскресе́н два́жды. Сла́ва, отцев: Ве́лия ве́ры: И ны́не, предпра́зднства: Написова́шеся иногда́: По 1-й кафизме седа́лен отцев, глас 4. Подо́бен: Удиви́ся: Во отцех, Бо́же: Сла́ва, и ны́не, то́йже. И чте́ние во Ева́нгелии толковом Матфе́я: Кни́га родства Иису́са Христа́: По 2-й кафизме седа́лен, глас 8. Подо́бен: Прему́дрости: Пра́здник пра́зднуем, вернии: Сла́ва, и ны́не, то́йже, и чте́ние. По непоро́чнах, тропари их, и ектения, и седа́льны отцев, глас 8. Подо́бен: Прему́дрости: Авраа́ма, Исаа́ка же и Иа́кова: Сла́ва, и ны́не, глас и подо́бен то́йже: Из недр Оте́ческих: и чте́ние. Степе́нна гла́са, проки́мен и Ева́нгелие воскресное. Воскресе́ние Христо́во: Псалом 50, стихи́ра воскресна. Кано́н отцев, глас 6, на 8. Ирмос: Волно́ю морскою: по два́жды, тропари на 6. (В сем бо кано́не по 2 стиха воскресна, сего́ ра́ди кано́н воскресе́н не поется), и други́й кано́н предпра́зднства на 6, глас 1. Катава́сия: Христо́с ражда́ется: оба ли́ка вку́пе. По 3-й пе́сни ипакои́ отцев, глас 8: А́нгел отроко́в ороси́ пещь: и чте́ние в Богосло́ве. По 6-й пе́сни конда́к отцев, глас 1: Весели́ся, Вифлее́ме: и и́кос, и чтем Пролог. На 9-й пе́сни поем Честне́йшую: Свети́лен отцев: От се́мене вво́дится Авраа́мля: Сла́ва, Патриа́рхов избра́ннии: И ны́не, Весели́ся, Вифлее́ме: На хвали́тех стихи́ры отцев, 3, глас 5. Подо́бен: Ра́дуйся: Возвыси твой глас: И предпра́зднства 3, глас 4. Подо́бен: Зва́нный свы́ше: Иса́иин глас соверша́ется: Сла́ва, отцев, глас 8: Зако́нных учений: И ны́не: Преблагослове́нна еси́, Богоро́дице Дево: Славосло́вие вели́кое, тропа́рь воскресе́н, и проча́я, и отпу́ст, и обы́чное исхождение. Сла́ва, и ны́не, стихи́ра ева́нгельская, и час первый в притворе. На часех тропа́рь воскресе́н, Сла́ва отцев. И ны́не, Богоро́дичен часов. По трисвято́м конда́к отцев и предпра́зднства глаго́лем, пременя́юще.

На Литурги́и: Блаже́нны от кано́на отцев песнь 3-я на 4 и предпра́зднства песнь 6-я на 4. По входе тропа́рь воскресе́н, и отцев, и предпра́зднства, Сла́ва, конда́к отцев. И ны́не, предпра́зднства. Проки́мен, песнь отцев, глас 4: Благослове́н еси́, Го́споди Бо́же оте́ц на́ших: Стих: Я́ко пра́веден еси́ о всех: Апо́стол к Евре́ем, зача́ло 328. Аллилу́ия, глас 4: Бо́же, уши́ма на́шима: Ева́нгелие от Матфе́я, зача́ло 1. Ряд же неде́ли оставля́ется. Прича́стен: Хвали́те Го́спода с Небе́с: Други́й: Ра́дуйтеся, пра́веднии, о Го́споде:

Преподобномученица Евгения

Преподобномученица Евгения, римлянка, жила в Александрии. Отец ее Филипп был назначен императором Коммодом (180–192) наместником Египта. Своим детям – сыновьям Авиту и Сергию и дочери Евгении – Филипп и его жена Клавдия дали разностороннее образование. Евгения обладала удивительной памятью, поэтому учение ей давалось легко. Она в совершенстве владела латинским и греческим языками, занималась философией. Многие знатные юноши, видя красоту и целомудрие Евгении, желали взять ее в жены, но она не соглашалась на брак, как бы приуготовляя себя к принятию христианства и монашества.

Чтение Посланий святого апостола Павла привело Евгению к познанию Истинного Бога Иисуса Христа и побудило отвергнуть идолопоклонство. В то время отец Евгении, следуя римским законам, изгонял из Александрии христиан, но позволял им селиться в предместьях города. Евгения поехала в свое ближайшее поместье, чтобы увидеться с христианами. Уговорив двух рабов – Прота и Иакинфа, она переоделась в мужское платье и вместе с ними тайно пришла в мужской монастырь, построенный Илиопольским епископом Еллием (память 14 июля). Блаженному Еллию в сонном видении было открыто, что Евгения будет мужественной исповедницей веры Христовой. Он крестил ее вместе с Протом и Иакинфом и принял в свой монастырь.

Блаженная дева под видом инока смиренно несла в монастыре самые трудные послушания. Иноки Прот и Иакинф пребывали с ней неотлучно, подражая ее Богоугодной жизни.

Через три года скончался игумен того монастыря, и братия единодушно просили инока Евгения быть их игуменом. Евгения была в раздумии. Она открыла святое Евангелие и первые слова «кто хочет между вами быть большим, да будет вам слугою: и кто хочет между вами быть первым, да будет вам рабом» (Мф.20:26, 27) поняла как указание Божие и приняла игуменство. Святая Евгения удвоила свои подвиги, непрестанно трудясь для братии: носила для всех воду, рубила дрова, убирала келлии, а в сердце творила Иисусову молитву. Господь даровал ей власть над нечистыми духами: она изгоняла их из людей и совершала многие чудеса и исцеления.

Одна богатая женщина, по имени Мелания, после того, как получила от святой Евгении исцеление, по диавольскому наущению воспылала нечистой страстью к игумену и призналась ему в этом. Святая Евгения тщетно пыталась образумить ее. Отвергнутая Мелания оклеветала игумена в попытке насилия над ней. Весть о позоре монаха распространилась по всей Александрии и ее окрестностям. Игумен и иноки обители предстали на суд перед правителем Египта, которым был отец подвижницы. Святая Евгения была вынуждена раскрыть свою тайну. Родные обрадовались, что нашли ту, которую так долго оплакивали. По примеру святой Евгении ее близкие приняли святое Крещение, а вместе с ними крестилось множество народа. В Египте установился мир и согласие с Церковью Христовой, о чем донесли римскому императору. Филипп был смещен с поста наместника Египта. Александрийские христиане избрали его своим епископом.

Новый наместник Египта, опасаясь народного гнева, не стал открыто казнить епископа Филиппа, а подослал к нему убийц. Во время уединенной молитвы епископу нанесли раны, от которых он через три дня мученически скончался. Епископа Филиппа похоронили в построенной им церкви. Овдовев, Клавдия с дочерью и слугами уехала в свое поместье недалеко от Рима. Там она устроила странноприимный дом и сама смиренно служила страждущим. Святая Евгения продолжала иноческую жизнь и привела ко Христу много дев.

Вскоре император Галлиен (260–268) вновь начал гонения на христиан. Многие из них нашли убежище у святых Клавдии и Евгении. В то время святая Евгения через своих сподвижников Прота и Иакинфа обратила в христианство одну молодую римлянку из царского рода – Василлу. Приняв христианство, Василла отказала в браке своему жениху Помпею. Помпей обратился к императору с жалобой на христиан. На суде, где Василлу напрасно пытались склонить к отказу от христианства, она была заколота мечом. Святых Прота и Иакинфа схватили и привели в идольский храм для принесения жертвы, но, когда они вошли туда, идол разбился. Святые мученики были обезглавлены.

Когда святую Евгению насильно привели к храму Дианы, капище вместе с идолами рухнуло. Тогда ее бросили в реку Тибр с камнем на шее, но камень соскользнул с шеи мученицы, она встала и пошла по воде. Также невредимой она осталась и в огне. Ее бросили в ров и десять дней морили голодом. Там ей явился Спаситель и возвестил, что она войдет в Царство Небесное в день его Рождества. В канун великого праздника в 262 году палач умертвил святую преподобномученицу Евгению мечом. Вскоре предали смерти и ее мать Клавдию.

Подоба́ет ве́дати, о часех в на́вечерии Рождества́ Христо́ва.

А́ще случи́тся Рождество́ Христо́во в неде́лю или́ в понеде́льник, часы поем пре́жде в пяток. А́ще ли Рождество́ Христо́во во вторник, в среду, в четверток, в пяток и в суббо́ту, часы поем в на́вечерии.

В нача́ле втораго часа́ зна́менует в кампа́н. И собра́вшимся во храм облачится иере́й в фелонь, диакон же в стихарь. И поставля́ет параекклисиа́рх анало́гий укра́шен пря́мо ца́рских врат и вжига́ет свещу́ на све́щнице. Иере́й же исхо́дит со Ева́нгелием во храм или́ в трапе́зу ца́рскими враты́, предходя́щу ему́ диакону с кади́лом. И полага́ет иере́й свято́е Ева́нгелие на аналогии и, став пред аналогом, твори́т нача́ло по обы́чаю. И по нача́ле чтец: Сла́ва Тебе́, Бо́же наш, сла́ва Тебе́. И Царю́ Небе́сный: и проча́я. И по возгла́се кади́т свяще́нник свято́е Ева́нгелие на аналогии о́крест и прочия ико́ны, и храм весь, и настоя́теля, и бра́тию. Чтец же чтет:

Псалом 5:

Глаго́лы моя́ внуши́, Го́споди,/ разуме́й зва́ние мое́./ Вонми́ гла́су моле́ния моего́,/ Царю́ мой и Бо́же мой,/ я́ко к Тебе́ помолю́ся, Го́споди./ Зау́тра услы́ши глас мой./ Зау́тра предста́ну Ти, и узри́ши мя./ Я́ко Бог, не хотя́й беззако́ния, Ты еси́,/ не присели́тся к Тебе́ лука́внуяй,/ ниже́ пребу́дут беззако́нницы пред очи́ма Твои́ма./ Возненави́дел еси́ вся, де́лающия беззако́ние./ Погуби́ши вся, глаго́лющия лжу,/ му́жа крове́й и льсти́ва гнуша́ется Госпо́дь./ Аз же мно́жеством ми́лости Твоея вни́ду в дом Твой,/ поклоню́ся ко хра́му свято́му Твоему́ во стра́се Твое́м./ Го́споди, наста́ви мя пра́вдою Твое́ю,/ враг мои́х ра́ди испра́ви пред Тобо́ю путь мой./ Я́ко несть во усте́х их и́стины,/ се́рдце их су́етно,/ гроб отве́рст горта́нь их,/ язы́ки свои́ми льща́ху./ Суди́ им, Бо́же, да отпаду́т от мы́слей свои́х,/ по мно́жеству нече́стия их изри́ни я,/ я́ко преогорчи́ша Тя, Го́споди./ И да возвеселя́тся вси, упова́ющии на Тя,/ во век возра́дуются, и всели́шися в них./ И похва́лятся о Тебе́ лю́бящии и́мя Твое́./ Я́ко Ты благослови́ши пра́ведника, Го́споди,/ я́ко ору́жием благоволе́ния венча́л еси́ нас.

Псалом 44:

Отры́гну се́рдце мое́ сло́во бла́го,/ глаго́лю аз дела́ моя́ Царе́ви,/ язы́к мой – трость кни́жника скоропи́сца./ Красе́н добро́тою па́че сыно́в челове́ческих,/ излия́ся благода́ть во устна́х Твои́х,/ сего́ ра́ди благослови́ Тя Бог во век./ Препоя́ши меч Твой по бедре́ Твое́й, Си́льне./ Красото́ю Твое́ю и добро́тою Твое́ю/ и наляцы́, и успева́й, и ца́рствуй/ и́стины ра́ди, и кро́тости, и пра́вды,/ и наста́вит Тя ди́вно десни́ца Твоя́./ Стре́лы Твоя́ изощре́ны, Си́льне,/ лю́дие под Тобо́ю паду́т в се́рдцы враг царе́вых./ Престо́л Твой, Бо́же, в век ве́ка:/ жезл пра́вости, жезл Ца́рствия Твоего́./ Возлюби́л еси́ пра́вду и возненави́дел еси́ беззако́ние:/ сего́ ра́ди пома́за Тя, Бо́же, Бог Твой еле́ем ра́дости па́че прича́стник Твои́х./ Сми́рна, и ста́кти, и касси́я от риз Твои́х, от тя́жестей слоно́вых,/ из ни́хже возвесели́ша Тя./ Дще́ри царе́й в че́сти Твое́й./ Предста́ Цари́ца одесну́ю Тебе́,/ в ри́зах позлаще́нных оде́яна, преиспещре́на./ Слы́ши, Дщи, и виждь, и приклони́ у́хо Твое́,/ и забу́ди лю́ди Твоя́ и дом отца́ Твоего́,/ и возжела́ет Царь добро́ты Твоея́:/ зане́ Той есть Госпо́дь Твой, и поклони́шася Ему́./ И дщи Ти́рова с да́ры,/ лицу́ Твоему́ помо́лятся бога́тии лю́дстии./ Вся сла́ва Дще́ре Царе́вы внутрь,/ ря́сны златы́ми оде́яна и преиспещре́на./ Приведу́тся Царю́ де́вы в след Ея́./ И́скренния Ея́ приведу́тся Тебе́,/ приведу́тся в весе́лии и ра́довании, введу́тся в храм Царе́в./ Вме́сто оте́ц Твои́х бы́ша сы́нове Твои́,/ поста́виши я кня́зи по всей земли́./ Помяну́ И́мя Твое́ во вся́ком ро́де и ро́де./ Сего́ ра́ди лю́дие испове́дятся Тебе́ в век и во век ве́ка.

Псало́м 45:

Бог нам прибе́жище и си́ла,/ Помо́щник в ско́рбех, обре́тших ны зело́./ Сего́ ра́ди не убои́мся, внегда́ смуща́ется земля́/ и прелага́ются го́ры в сердца́ морска́я./ Возшуме́ша и смято́шася во́ды их,/ смято́шася го́ры кре́постию Его́./ Ре́чная устремле́ния веселя́т град Бо́жий:/ освяти́л есть селе́ние Свое́ Вы́шний./ Бог посреде́ его́, и не подви́жится,/ поможе́т ему́ Бог у́тро зау́тра./ Смято́шася язы́цы,/ уклони́шася ца́рствия,/ даде́ глас Свой Вы́шний, подви́жеся земля́./ Госпо́дь сил с на́ми, Засту́пник наш Бог Иа́ковль./ Прииди́те и ви́дите дела́ Бо́жия,/ я́же положи́ чудеса́ на земли́./ Отъе́мля бра́ни до коне́ц земли́,/ лук сокруши́т, и сломи́т ору́жие, и щиты́ сожже́т огне́м./ Упраздни́теся и разуме́йте, я́ко Аз есмь Бог:/ вознесу́ся во язы́цех, вознесу́ся на земли́./ Госпо́дь Сил с на́ми,/ Засту́пник наш Бог Иа́ковль.

Сла́ва, и ны́не, аллилу́ия, три́жды. Го́споди поми́луй, три́жды.

Сла́ва, тропа́рь предпра́зднства, глас 4:

Написова́шеся иногда́ со ста́рцем Ио́сифом,/ я́ко от се́мене Дави́дова, в Вифлее́ме Мариа́м,/ чревонося́щи безсе́менное Рожде́ние./ Наста́ же вре́мя Рождества́,/ и ме́сто ни еди́ноже бе обита́лищу,/ но, я́коже кра́сная пала́та, верте́п Цари́це показа́шеся./ Христо́с ражда́ется пре́жде па́дший воскреси́ти о́браз.

И ны́не, Богоро́дичен:

Что Тя нарече́м, о Благода́тная?/ Не́бо, я́ко возсия́ла еси́ Со́лнце Пра́вды./ Рай, я́ко прозябла́ еси́ цвет нетле́ния./ Де́ву, я́ко пребыла́ еси́ нетле́нна./ Чи́стую Ма́терь, я́ко име́ла еси́ на святы́х Твои́х объя́тиях Сы́на, всех Бо́га./ Того́ моли́ спасти́ся душа́м на́шим.

Таже тропари́ сия́ по два́жды пое́м. Творе́ние Софрония, патриа́рха Иерусали́мскаго, глас 8:

Вифлее́ме, угото́вися,/ благоукраси́теся, я́сли,/ верте́пе, приими́: И́стина прии́де./ Сень мимотече́, и Бог челове́ком от Де́вы яви́ся,/ вообрази́вся я́коже мы и обожи́в плоть./ Тем Ада́м обновля́ется, со Е́вою зову́ще:/ на земли́ благоволе́ние яви́ся спасти́ род наш.

Вторый лик, то́йже тропа́рь без припева́.

Посе́м стих: Бог от ю́га прии́дет/ и Святы́й из Горы́ приосене́нныя ча́щи.

Глас 3:

Ны́не проро́ческое прорица́ние испо́лнитися гряде́т,/ та́йно глаго́лющее:/ и ты, Вифлее́ме, земле́ Иу́дова,/ ника́коже нарече́шися ме́нши во влады́ках,/ предуготовля́ющи верте́п:/ из тебе́ бо ми изы́дет Игу́мен язы́ков во пло́ти,/ от Де́вы Отрокови́цы Христо́с Бог,/ И́же упасе́т лю́ди Своя́ но́ваго Изра́иля;/ дади́м Ему́ вси вели́чие.

Стих: Го́споди, услы́шах слух Твой и убоя́хся;/ Го́споди, разуме́х дела́ Твоя́ и ужасо́хся.

Па́ки то́йже тропа́рь. Та́же Сла́ва, глас 8:

Сия́ глаго́лет Ио́сиф к Де́ве:/ Мари́е, что де́ло сие́, е́же в Тебе́ зрю?/ Недоуме́ю, и удивля́юся, и умо́м ужаса́юся;/ о́тай²⁷ у́бо от Мене́ бу́ди вско́ре./ Мари́е, что де́ло сие́, е́же в Тебе́ ви́жу?/ За честь – срамоту́, за весе́лие – скорбь,/ вме́сто е́же хвали́тися, укори́зну ми принесла́ еси́./ Ктому́ не терплю́ уже́ поноше́ний челове́ческих,/ и́бо от иере́й из Це́ркве Госпо́дни я́ко непоро́чную Тя прия́х,/ и что ви́димое?

И ны́не, па́ки то́йже.

Посе́м проки́мен, глас 4: Госпо́дь рече́ ко Мне:/ Сын Мой еси́ Ты, Аз днесь роди́х Тя. Стих: Проси́ от Мене́, и дам Ти язы́ки достоя́ние Твое́, и одержа́ние Твое́ концы́ земли́. Та́же паремия́.

Проро́чества Михе́ина чте́ние (глава́ 5):

Та́ко глаго́лет Госпо́дь:/ и ты, Вифлее́ме, до́ме Евфра́фов,/ еда́ мал еси́ е́же бы́ти в ты́сящах Иу́довых./ Из тебе́ бо Мне изы́дет Старе́йшина,/ е́же бы́ти в кня́зя во Изра́или,/ и исхо́ди Его́ из нача́ла от дней ве́ка./ Сего́ ра́ди даст я,/ до вре́мене ражда́ющия роди́т,/ и про́чии от бра́тий Его́ обратя́тся к сыно́м Изра́илевым./ И ста́нет, и у́зрит,/ и упасе́т ста́до Свое́ кре́постию Госпо́дь./ И в сла́ве и́мени Го́спода Бо́га Своего́ пребу́дут,/ зане́ ны́не возвели́чится да́же до коне́ц земли́.

Ко Евре́ем посла́ния свята́го апо́стола Па́вла чте́ние (зача́ло 303):

Многоча́стне и многообра́зне дре́вле Бог, глаго́лавый отце́м во проро́цех./ В после́док дний сих глаго́ла нам в Сы́не,/ Его́же положи́ насле́дника всем,/ И́мже и ве́ки сотвори́./ И́же Сый сия́ние сла́вы и о́браз Ипоста́си Его́,/ нося́ же вся́ческая глаго́лом си́лы Своея́,/ Собо́ю очище́ние сотвори́в грехо́в на́ших,/ се́де одесну́ю Престо́ла вели́чествия на высо́ких./ Толи́ко лу́чший быв А́нгел,/ ели́ко пресла́внее па́че их насле́дствова и́мя./ Кому́ бо рече́ когда́ от А́нгел:/ Сын Мой еси́ Ты,/ Аз днесь роди́х Тя;/ и па́ки: Аз бу́ду Ему́ во Отца́,/ и Той бу́дет Мне в Сы́на./ Егда́ же па́ки вво́дит Перворо́днаго во вселе́нную, глаго́лет:/ и да покло́нятся Ему́ вси А́нгели Бо́жии./ И ко А́нгелом у́бо глаго́лет:/ творя́й А́нгелы Своя́ ду́хи/ и слуги́ Своя́ огнь паля́щ./ К Сы́ну же:/ престо́л Твой, Бо́же, в век ве́ка,/ жезл пра́вости, жезл Ца́рствия Твоего́./ Возлюби́л еси́ пра́вду и возненави́дел еси́ беззако́ние,/ сего́ ра́ди пома́за Тя, Бо́же,/ Бог Твой еле́ем ра́дости/ па́че прича́стник Твои́х./ И па́ки:/ в нача́ле Ты, Го́споди, зе́млю основа́л еси́,/ и дела́ руку́ Твое́ю суть небеса́./ Та́ поги́бнут, Ты же пребы́ваеши,/ и вся, я́коже ри́за, обетша́ют,/ и, я́ко оде́жду, свие́ши их, и изменя́тся;/ Ты же то́йжде еси́, и ле́та Твоя́ не оскуде́ют.

Диакон: Прему́дрость, про́сти, услы́шим свята́го Ева́нгелия.

Иере́й: От Матфе́я свята́го Ева́нгелия чте́ние (зача́ло 2):

Иису́с Христо́во Рождество́ си́це бе:/ обруче́нней у́бо бы́вши Ма́тери Его́ Мари́и Ио́сифови,/ пре́жде да́же не сни́тися и́ма,/ обре́теся иму́щи во чре́ве от Ду́ха Свя́та./ Ио́сиф же, муж Ея́, пра́веден сый/ и, не хотя́ Ея́ обличи́ти,/ восхоте́ тай пусти́ти Ю./ Сия́ же ему́ помы́слившу,/ се А́нгел Госпо́день во сне яви́ся ему́, глаго́ля:/ Ио́сифе, сы́не Дави́дов,/ не убо́йся прия́ти Мариа́м, жены́ твоея́:/ ро́ждшее бо ся в Ней от Ду́ха есть Свя́та./ Роди́т же Сы́на,/ и нарече́ши и́мя Ему́ Иису́с./ Той бо спасе́т лю́ди Своя́ от грех их./ Сие́ же все бысть, да сбу́дется рече́нное от Го́спода проро́ком, глаго́лющим:/ Се́ Де́ва во чре́ве прии́мет и роди́т Сы́на,/ и нареку́т и́мя Ему́ Емману́ил,/ е́же есть сказа́емо, с на́ми Бог./ Воста́в же Ио́сиф от сна,/ сотвори́, я́коже повеле́ ему́ А́нгел Госпо́день,/ и прия́т Жену́ свою́./ И не зна́яше Ея́, до́ндеже роди́ Сы́на Своего́ пе́рвенца,/ и нарече́ и́мя Ему́ Иису́с.

Посе́м тропа́рь:

Стопы́ моя́ напра́ви по словеси́ Твоему́/ и да не облада́ет мно́ю вся́кое беззако́ние./ Изба́ви мя от клеветы́ челове́ческия, и сохра́ню за́поведи Твоя́./ Лице́ Твое́ просвети́ на раба́ Твоего́/ и научи́ мя оправда́нием Твои́м.

Да испо́лнятся уста́ моя́ хвале́ния Твоего́, Го́споди,/ я́ко да воспою́ сла́ву Твою́, весь день великоле́пие Твое́.

Таже Трисвято́е и по О́тче наш:

Конда́к, глас 3:

Де́ва днесь Преве́чное Сло́во/ в верте́пе гряде́т роди́ти неизрече́нно:/ лику́й, вселе́нная, услы́шавши,/ просла́ви со А́нгелы и па́стырьми/ хотя́щаго яви́тися Отроча́ Мла́до, Преве́чнаго Бо́га.

Го́споди, поми́луй, 40. И моли́тва:

И́же на вся́кое вре́мя и на вся́кий час,/ на Небеси́ и на земли́, покланя́емый и сла́вимый, Христе́ Бо́же,/ Долготерпели́ве, Многоми́лостиве, Многоблагоутро́бне,/ И́же пра́ведныя любя́й и гре́шныя ми́луяй,/ И́же вся зовы́й ко спасе́нию обеща́ния ра́ди бу́дущих благ./ Сам, Го́споди, приими́ и на́ша в час сей моли́твы/ и испра́ви живо́т наш к за́поведем Твои́м,/ ду́ши на́ша освяти́, телеса́ очи́сти,/ помышле́ния испра́ви, мы́сли очи́сти/ и изба́ви нас от вся́кия ско́рби, зол и боле́зней,/ огради́ нас святы́ми Твои́ми А́нгелы,/ да ополче́нием их соблюда́еми и наставля́еми, дости́гнем в соедине́ние ве́ры/ и в ра́зум непристу́пныя Твоея́ сла́вы,/ я́ко благослове́н еси́ во ве́ки веков, ами́нь.

Го́споди, поми́луй, три́жды.

Сла́ва Отцу́, и Сы́ну, и Свято́му Ду́ху и ны́не, и при́сно, и во ве́ки веков, ами́нь.

Честне́йшую Херуви́м и сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.

И́менем Госпо́дним благослови́, о́тче.

Свяще́нник возглаша́ет:

Боже, уще́дри ны и благослови́ ны,/ просвети́ лице́ Твое́ на ны и поми́луй ны.

Та́же моли́тву сию́:

Христе́, Све́те и́стинный,/ просвеща́яй и освяща́яй вся́каго челове́ка, гряду́щаго в мир,/ да зна́менается на нас свет Лица́ Твоего́,/ да в нем у́зрим Свет непристу́пный,/ и испра́ви стопы́ на́ша к де́ланию за́поведей Твои́х/ моли́твами Пречи́стыя Твоея́ Ма́тере/ и всех Твои́х святы́х, ами́нь.

Час третий

Прииди́те, поклони́мся: три́жды.

Таже псало́м 66:

Бо́же, уще́дри ны, и благослови́ ны,/ и просвети́ лице́ Твое́ на ны, и поми́луй ны:/ позна́ти на земли́ путь Твой,/ во всех язы́цех спасе́ние Твое́./ Да испове́дятся Тебе́ лю́дие, Бо́же,/ да испове́дятся Тебе́ лю́дие вси./ Да возвесели́тся и да возра́дуются язы́цы,/ я́ко су́диши лю́дем правото́ю и язы́ки на земли́ наста́виши./ Да испове́дятся Тебе́ лю́дие, Бо́же,/ да испове́дятся Тебе́ лю́дие вси./ Земля́ даде́ плод свой./ Благослови́ ны, Бо́же, Бо́же наш./ Благослови́ ны, Бо́же,/ и да убоя́тся Его́ вси концы́ земли́.

Псало́м 86:

Основа́ния Его́ на гора́х святы́х,/ люби́т Госпо́дь врата́ Сио́ня па́че всех селе́ний Иа́ковлих./ Пресла́вная глаго́лашася о тебе́, гра́де Бо́жий./ Помяну́ Раа́в и Вавило́на ве́дущим Мя;/ и се инопле́менницы, и Тир,/ и лю́дие Ефио́пстии, си́и бы́ша та́мо./ Ма́ти Сио́н рече́т:/ Челове́к и Челове́к роди́ся в нем,/ и Той основа́ и́ Вы́шний./ Госпо́дь пове́сть в писа́нии люде́й/ и князе́й сих, бы́вших в нем./ Я́ко веселя́щихся всех жили́ще в Тебе́.

Псало́м 50:

Поми́луй мя, Бо́же, по вели́цей ми́лости Твое́й/ и по мно́жеству щедро́т Твои́х, очи́сти беззако́ние мое́./ Наипа́че омы́й мя от беззако́ния моего́/ и от греха́ моего́ очи́сти мя./ Я́ко беззако́ние мое́ аз знаю/ и грех мой предо мно́ю есть вы́ну./ Тебе́ еди́ному согреши́х/ и лука́вое пред Тобо́ю сотвори́х./ Я́ко да оправди́шися во словесе́х Твои́х/ и победи́ши внегда́ суди́ти Ти./ Се бо в беззако́ниих зача́т есмь,/ и во гресе́х роди́ мя ма́ти моя́./ Се бо и́стину возлюби́л еси́,/ безве́стная и та́йная прему́дрости Твоея́ яви́л ми еси́./ Окропи́ши мя иссо́пом, и очи́щуся;/ омы́еши мя, и па́че сне́га убелю́ся./ Слу́ху моему́ да́си ра́дость и весе́лие,/ возра́дуются ко́сти смире́нныя./ Отврати́ лице́ Твое́ от грех мои́х/ и вся беззако́ния моя́ очи́сти./ Се́рдце чи́сто сози́жди во мне, Бо́же,/ и Дух прав обнови́ во утро́бе мое́й./ Не отве́ржи мене́ от лица́ Твоего́/ и Ду́ха Твоего́ Свята́го не отыми́ от Мене́./ Возда́ждь ми ра́дость спасе́ния Твоего́/ и Ду́хом Влады́чним утверди́ мя./ Научу беззако́нныя путе́м Твои́м,/ и нечести́вии к Тебе́ обратя́тся./ Изба́ви мя от крове́й, Бо́же, Бо́же спасе́ния моего́,/ возра́дуется язы́к мой пра́вде Твое́й./ Го́споди, устне́ мои́ отве́рзеши,/ и уста́ моя́ возвестя́т хвалу́ Твою́./ Я́ко а́ще бы восхоте́л еси́ же́ртвы, дал бых у́бо:/ всесожже́ния не благоволи́ши./ Же́ртва Бо́гу – дух сокруше́н,/ се́рдце сокруше́нно и смире́нно Бог не уничижи́т./ Ублажи́, Го́споди, благоволе́нием Твои́м Сио́на,/ и да сози́ждутся сте́ны Иерусали́мския./ Тогда́ благоволи́ши же́ртву пра́вды, возноше́ние и всесожега́емая,/ тогда́ возложа́т на олта́рь Твой тельцы́.

Сла́ва, и ны́не, Аллилу́ия, три́жды. Го́споди, поми́луй, три́жды.

Сла́ва, тропа́рь, глас 4:

Написова́шеся иногда́ со ста́рцем Ио́сифом,/ я́ко от се́мене Дави́дова, в Вифлее́ме Мариа́м,/ чревонося́щи безсе́менное Рожде́ние./ Наста́ же вре́мя Рождества́,/ и ме́сто ни еди́ноже бе обита́лищу,/ но, я́коже кра́сная пала́та, верте́п Цари́це показа́шеся./ Христо́с ражда́ется пре́жде па́дший воскреси́ти о́браз.

И ны́не, Богоро́дичен:

Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми апо́столы/ поми́ловати ду́ши на́ша.

Та́же тропари́ сия́ по два́жды пое́м. Глас 6:

Сей Бог наш,/ не вмени́тся ин к Нему́,/ роди́выйся от Де́вы, и с челове́ки поживе́;/ во я́слех убо́гих/ Сын Единоро́дный лежа́щь ви́дится челове́к/ и пелена́ми повива́ется, и́же сла́вы Госпо́дь./ И волхво́м звезда́ возвеща́ет в Его́ поклоне́ние./ И мы пои́м:/ Тро́ице Свята́я, спаси́ ду́ши на́ша. _{(Два́жды)}

Та́же пое́м, глас 8:

Стих: Бог от ю́га прии́дет/ и Святы́й из Горы́ приосене́нныя ча́щи.

Пре́жде Рождества́ Твоего́,/ тре́петно зря́ще та́инство Твое́, Го́споди,/ разу́мная во́инства дивля́хуся:/ я́коже бо Младе́нец роди́тися благоизво́лил еси́,/ не́бо украси́вый звезда́ми,/ и во я́слех безслове́сных возлежи́ши,/ дла́нию содержа́й всея́ земли́ концы́./ Таковы́м бо смотре́нием уве́дено бысть милосе́рдие Твое́, Христе́,/ ве́лия ми́лость Твоя́, сла́ва Тебе́.

Стих: Го́споди, услы́шах слух Твой и убоя́хся;/ Го́споди, разуме́х дела́ Твоя́ и ужасо́хся.

И па́ки пое́м то́йже тропа́рь. Посе́м Сла́ва, глас 3:

Ио́сифе, рцы нам:/ ка́ко, Ю́же от святы́х прия́л еси́,/ Де́ву непра́здну приво́диши в Вифлее́м?/ Аз, рече́, проро́ки испыта́х/ и, весть прие́м от А́нгела, уве́рихся,/ я́ко Бо́га роди́т Мари́я несказа́нно;/ Ему́же на поклоне́ние волсви́ от восто́ков прии́дут,/ с да́ры честны́ми служа́ще./ Воплоти́выйся нас ра́ди, Го́споди,/ сла́ва Тебе́.

И ны́не, па́ки то́йже тропа́рь.

Проки́мен, глас 4: Отроча́ роди́ся нам,/ Сын, и даде́ся нам. Стих: Его́же нача́льство бысть на ра́ме Его́.

Проро́чества Вару́хова чте́ние (главы́ 3 и 4):

Сей Бог наш,/ и не приложи́тся ин к Нему́./ Изобре́те всяк путь худо́жества,/ и даде́ и́ Иа́кову, о́троку Своему́,/ и Изра́илю, возлю́бленному от Него́./ Посе́м же на земли́ яви́ся/ и с челове́ки поживе́./ Сия́ кни́га повеле́ний Бо́жиих,/ и зако́н сый во ве́ки;/ вси, держа́щиися ея́, в живо́т вни́дут,/ оста́вившии же ю, у́мрут./ Обрати́ся, Иа́кове, и ими́ся ея́./ Пойди́ к сия́нию пря́мо све́та ея́./ Не даждь ино́му сла́вы твоея́/ и поле́зных тебе́ язы́ку чужде́му./ Блаже́ни есмы́, Изра́илю,/ я́ко уго́дная Бо́гу нам разу́мна суть.

Та́же Апо́стол. К Гала́том посла́ния свята́го апо́стола Па́вла чте́ние (зача́ло 208):

Бра́тие,/ пре́жде прише́ствия ве́ры,/ под зако́ном стрего́ми бе́хом,/ затворе́ни в хотя́щую ве́ру откры́тися./ Те́мже зако́н пе́стун нам бысть во Христа́,/ да от ве́ры оправди́мся./ Прише́дшей же ве́ре,/ уже́ не под пе́стуном есмы́./ Вси бо вы сы́нове Бо́жии есте́ ве́рою о Христе́ Иису́се:/ ели́цы бо во Христа́ крести́стеся, во Христа́ облеко́стеся./ Несть иуде́й, ни е́ллин,/ несть раб, ни свобо́дь,/ несть му́жеский пол, ни же́нский:/ вси бо вы еди́но есте́ о Христе́ Иису́се./ А́ще ли вы Христо́вы:/ у́бо Авраа́мле се́мя есте́/ и по обетова́нию насле́дницы.

Диакон возглаша́ет: Прему́дрость, про́сти, услы́шим свята́го Ева́нгелия.

Иере́й: От Луки́ свята́го Ева́нгелия чте́ние (зача́ло 5):

Во днех о́нех/ изы́де повеле́ние от ке́саря А́вгуста написа́ти всю вселе́нную./ Сие́ написа́ние пе́рвое бысть,/ владя́щу Сири́ею Кирини́ю./ И идя́ху вси написа́тися, ко́ждо во свой град./ Взы́де же и Ио́сиф от Галиле́и/ из гра́да Назаре́та во Иуде́ю,/ во град Дави́дов, и́же нарица́ется Вифлее́м,/ зане́ бы́ти ему́ от до́му и оте́чества Дави́дова,/ написа́тися с Мари́ею, обруче́нною ему́ Жено́ю, су́щею непра́здною./ Бысть же, егда́ бы́ша та́мо,/ испо́лнишася дни́е роди́ти Ей./ И роди́ Сы́на Своего́ пе́рвенца,/ и пови́т Его́,/ и положи́ Его́ в я́слех,/ зане́ не бе им ме́ста во оби́тели./ И па́стырие бе́ху в то́йже стране́,/ бдя́ще и стрегу́ще стра́жу нощну́ю о ста́де свое́м./ И се А́нгел Госпо́день ста в них,/ и сла́ва Госпо́дня осия́ их,/ и убоя́шася стра́хом ве́лиим./ И рече́ им А́нгел:/ не бо́йтеся, се бо благовеству́ю вам ра́дость ве́лию,/ я́же бу́дет всем лю́дем,/ я́ко роди́ся вам днесь Спас,/ и́же есть Христо́с Госпо́дь, во гра́де Дави́дове./ И се вам зна́мение:/ обря́щете Младе́нца пови́та, лежа́ща в я́слех./ И внеза́пу бысть со А́нгелом мно́жество вой Небе́сных,/ хва́лящих Бо́га и глаго́лющих:/ сла́ва в Вы́шних Бо́гу, и на земли́ мир, в челове́цех благоволе́ние./ И бысть, я́ко отыдо́ша от них на Не́бо А́нгели,/ и челове́цы па́стырие ре́ша друг ко дру́гу:/ пре́йдем до Вифлее́ма/ и ви́дим глаго́л сей бы́вший,/ его́же Госпо́дь сказа́ нам./ И приидо́ша, поспе́шшеся,/ и обрето́ша Мариа́м же и Ио́сифа/ и Младе́нца, лежа́ща во я́слех./ Ви́девше же, сказа́ша о глаго́ле, глаго́ланном им о Отроча́ти Сем./ И вси слы́шавшии диви́шася о глаго́ланных от па́стырей к ним./ Мариа́м же соблюда́ше вся глаго́лы сия́,/ слага́ющи в се́рдцы Свое́м. И возврати́шася па́стырие, сла́вяще и хва́ляще Бо́га/ о всех я́же слы́шаша и ви́деша,/ я́коже глаго́лано бысть к ним.

Та́же: Госпо́дь Бог благослове́н,/ благослове́н Госпо́дь день дне,/ поспеши́т нам Бог спасе́ний на́ших,/ Бог наш, Бог спаса́ти.

Посе́м Трисвято́е, и поО́тче наш:

Конда́к, глас 3:

Де́ва днесь Преве́чное Сло́во/ в верте́пе гряде́т роди́ти неизрече́нно:/ лику́й, вселе́нная, услы́шавши,/ просла́ви со А́нгелы и па́стырьми/ хотя́щаго яви́тися Отроча́ Мла́до, Преве́чнаго Бо́га.

Го́споди, поми́луй, 40, и моли́тва:

И́же на вся́кое вре́мя: Го́споди, поми́луй, трижды. Сла́ва, и ны́не: Честне́йшую Херуви́м: И́менем Госпо́дним благослови́, о́тче.

Иере́й: Моли́твами святы́х оте́ц на́ших:

Посе́м моли́тва:

Влады́ко Бо́же, О́тче Вседержи́телю,/ Го́споди, Сы́не Единоро́дный, Иису́се Христе́, и Святы́й Ду́ше,/ еди́но Божество́, еди́на си́ла,/ поми́луй мя, гре́шнаго,/ и, и́миже ве́си судьба́ми, спаси́ мя, недосто́йнаго раба́ Твоего́,/ я́ко благослове́н еси́ во ве́ки веков, ами́нь.

* * *

На тре́тием и шестом часе́х кади́т диа́кон Ева́нгелие и ико́ны, и настоя́теля, и ли́ки то́кмо.

И глаго́лем час шесты́й

Прииди́те, поклони́мся: три́жды.

И псало́м 71:

Бо́же, суд Твой царе́ви даждь/ и пра́вду Твою́ сы́ну царе́ву:/ суди́ти лю́дем Твои́м в пра́вде и ни́щим Твои́м в суде́./ Да восприи́мут го́ры мир лю́дем и хо́лми пра́вду./ Су́дит ни́щим людски́м,/ и спасе́т сы́ны убо́гих, и смири́т клеветника́./ И пребу́дет с со́лнцем/ и пре́жде луны́ ро́да родо́в./ Сни́дет, я́ко дождь на руно́,/ и, я́ко ка́пля, ка́плющая на зе́млю./ Возсия́ет во днех Его́ пра́вда и мно́жество ми́ра,/ до́ндеже оты́мется луна́./ И облада́ет от мо́ря до мо́ря/ и от рек до коне́ц вселе́нныя./ Пред ним припаду́т ефио́пляне,/ и врази́ Его́ персть поли́жут./ Ца́рие Фарси́йстии и о́строви да́ры принесу́т./ Ца́рие Ара́встии и Сава́ да́ры приведу́т./ И покло́нятся Ему́ вси ца́рие зе́мстии,/ вси язы́цы порабо́тают Ему́./ Я́ко изба́ви ни́ща от си́льна/ и убо́га, Ему́же не бе помо́щника./ Пощади́т ни́ща и убо́га/ и ду́ши убо́гих спасе́т./ От ли́хвы и от непра́вды изба́вит ду́ши их,/ и честно́ И́мя Его́ пред ни́ми./ И жив бу́дет, и да́стся Ему́ от зла́та арави́йска,/ и помо́лятся о Нем вы́ну:/ весь день благословя́т Его́./ Бу́дет утвержде́ние на земли́ на версе́х гор,/ превознесе́тся па́че лива́на плод Его́./ И процвету́т от гра́да, я́ко трава́ земна́я./ Бу́дет И́мя Его́ благослове́нно во ве́ки,/ пре́жде со́лнца пребыва́ет и́мя Его́,/ и благословя́тся в Нем вся коле́на земна́я,/ вси язы́цы ублажа́т Его́./ Благослове́н Госпо́дь, Бог Изра́илев,/ творя́й чудеса́ еди́н./ И благослове́но и́мя сла́вы Его́ во век и в век ве́ка;/ и испо́лнится сла́вы Его́ вся земля́:/ бу́ди, бу́ди.

Псало́м 131:

Помяни́, Го́споди, Дави́да и всю кро́тость его́./ Я́ко кля́тся Го́сподеви,/ обеща́ся Бо́гу Иа́ковлю:/ а́ще вни́ду в селе́ние до́му моего́/ или́ взы́ду на одр посте́ли моея́,/ а́ще дам сон очи́ма мои́ма,/ и ве́ждома мои́ма дрема́ние,/ и поко́й скраниа́ма мои́ма,/ до́ндеже обря́щу ме́сто Го́сподеви,/ селе́ние Бо́гу Иа́ковлю./ Се́ слы́шахом я во Евфра́фе,/ обрето́хом я в поля́х дубра́вы./ Вни́дем в селе́ния Его́,/ поклони́мся на ме́сто, иде́же стоя́сте но́зе Его́./ Воскресни́, Го́споди, в поко́й Твой,/ Ты и киво́т святы́ни Твоея́./ Свяще́нницы Твои́ облеку́тся пра́вдою,/ и преподо́бнии Твои́ возра́дуются./ Дави́да ра́ди раба́ Твоего́/ не отврати́ лице́ пома́заннаго Твоего́./ Кля́тся Госпо́дь Дави́ду и́стиною и не отве́ржется ея́:/ от плода́ чре́ва твоего́ посажду́ на престо́ле твое́м./ А́ще сохраня́т сы́нове твои́ заве́т Мой/ и свиде́ния Моя́ сия́, и́мже научу́ я,/ сы́нове их до ве́ка ся́дут на престо́ле твое́м./ Я́ко избра́ Госпо́дь Сио́на,/ изво́ли и в жили́ще Себе́./ Сей поко́й Мой во век ве́ка,/ зде вселю́ся, я́ко изво́лих и́./ Лови́тву его́ благословля́яй благословлю́,/ ни́щия его́ насыщу́ хле́бы./ Свяще́нники его́ облеку́ во спасе́ние,/ и преподо́бнии его́ ра́достию возра́дуются./ Та́мо возращу́ рог Дави́дови,/ угото́вах свети́льник пома́занному Моему́./ Враги́ его́ облеку́ студо́м,/ на не́мже процвете́т святы́ня Моя́.

Псало́м 90:

Живы́й в по́мощи Вы́шняго,/ в кро́ве Бо́га Небе́снаго водвори́тся./ Рече́т Го́сподеви:/ засту́пник мой еси́ и прибе́жище мое́,/ Бог мой, и упова́ю на Него́./ Я́ко Той изба́вит тя от се́ти ло́вчи и от словесе́ мяте́жна./ Плещма́ Свои́ма осени́т тя,/ и под криле́ Его́ наде́ешися,/ ору́жием обы́дет тя и́стина Его́./ Не убои́шися от стра́ха нощна́го,/ от стрелы́, летя́щия во дни,/ от ве́щи, во тьме преходя́щия,/ от сря́ща и бе́са полу́деннаго./ Паде́т от страны́ твоея́ ты́сяща/ и тьма одесну́ю тебе́,/ к тебе́ же не прибли́жится./ Оба́че очи́ма твои́ма смо́триши/ и воздая́ние гре́шников у́зриши./ Я́ко Ты, Го́споди, упова́ние мое́,/ Вы́шняго положи́л еси́ прибе́жище Твое́./ Не прии́дет к тебе́ зло,/ и ра́на не прибли́жится телеси́ твоему́./ Я́ко А́нгелом Свои́м запове́сть о тебе́/ сохрани́ти тя во всех путе́х твои́х./ На рука́х во́змут тя,/ да не когда́ преткне́ши о ка́мень но́гу твою́./ На а́спида и васили́ска насту́пиши/ и попере́ши льва и зми́я./ Я́ко на Мя упова́,/ и изба́влю и́; покры́ю и́, я́ко позна́ и́мя Мое́./ Воззове́т ко Мне, и услы́шу его́;/ с ним есмь в ско́рби,/ изму́ его́ и просла́влю его́./ Долгото́ю дней испо́лню его́/ и явлю́ ему́ спасе́ние Мое́.

Сла́ва, и ны́не, Аллилу́ия, три́жды. Го́споди, поми́луй, три́жды.

Сла́ва, тропа́рь, глас 4:

Написова́шеся иногда́ со ста́рцем Ио́сифом,/ я́ко от се́мене Дави́дова, в Вифлее́ме Мариа́м,/ чревонося́щи безсе́менное Рожде́ние./ Наста́ же вре́мя Рождества́,/ и ме́сто ни еди́ноже бе обита́лищу,/ но, я́коже кра́сная пала́та, верте́п Цари́це показа́шеся./ Хри́стос ражда́ется пре́жде па́дший воскреси́ти о́браз.

И ны́не, Богоро́дичен:

Я́ко не и́мамы дерзнове́ния за премно́гия грехи́ на́ша,/ Ты и́же от Тебе́ Ро́ждшагося моли́, Богоро́дице Де́во,/ мно́го бо мо́жет моле́ние Ма́тернее ко благосе́рдию Влады́ки./ Не пре́зри гре́шных мольбы́, Всечи́стая,/ я́ко ми́лостив есть и спасти́ моги́й,/ И́же и страда́ти о нас изво́ливый.

Та́же тропари́ сия́, глас 1:

Прииди́те, ве́рнии, возведе́мся Боже́ственне/ и ви́дим схожде́ние Боже́ственное свы́ше,/ в Вифлее́ме к нам явле́нне,/ и, умо́м очи́стившеся, житие́ принесе́м доброде́тели,/ вме́сто ми́ра предуготовля́юще ве́рно рожде́ственныя вхо́ды,/ от душе́вных сокро́вищ зову́ще:/ в Вы́шних сла́ва Бо́гу,/ су́щему в Тро́ице,/ Его́же ра́ди в челове́цех благоволе́ние яви́ся,/ Ада́ма избавля́я перворо́дныя кля́твы, я́ко Человеколю́бец. _{(Два́жды)}

Стих: Бог от ю́га прии́дет/ и Святы́й из Горы́ приосене́нныя ча́щи.

Глас 4:

Слы́ши, Не́бо, и внуши́, земле́,/ да подви́жатся основа́ния,/ да прии́мут тре́пет преиспо́дняя:/ я́ко Бог же и Творе́ц в плотско́е оде́яся зда́ние,/ и И́же держа́вною руко́ю созда́вый тварь,/ утро́бы зри́тся зда́ние./ О, глубина́ бога́тства, и прему́дрости, и ра́зума Бо́жия!/ Я́ко неиспы́таны судьбы́ Его́/ и неизсле́довани путие́ Его́.

Стих: Го́споди, услы́шах слух Твой и убоя́хся,/ Го́споди, разуме́х дела́ Твоя́ и ужасо́хся.

И па́ки то́йже.

Сла́ва, глас 5:

Прииди́те, христоно́снии лю́дие, да ви́дим чу́до,/ вся́кий ра́зум ужаса́ющее и обдержа́щее,/ и, благоче́стно воспева́юще, ве́рнии, поклони́мся./ Днесь к Вифлее́му непра́здна су́щи Де́ва прихо́дит роди́ти Го́спода,/ ли́цы же а́нгельстии предтеку́т./ И, сия́ ви́дев, вопия́ше Ио́сиф обру́чник:/ что е́же в Тебе́ стра́нное та́инство, Де́во?/ И ка́ко хо́щеши роди́ти, Неискусобра́чная Ю́нице?

И ны́не, па́ки то́йже.

Та́же проки́мен, глас 4: Из чре́ва пре́жде денни́цы роди́х Тя,/ кля́тся Госпо́дь и не раска́ется. Стих: Рече́ Госпо́дь Го́сподеви моему́: седи́ одесну́ю Мене́. И пареми́я.

Проро́чества Иса́иина чте́ние (главы́ 7 и 8):

Приложи́ Госпо́дь глаго́лати ко Аха́зу, глаго́ля:/ проси́ себе́ зна́мения у Го́спода Бо́га твоего́/ во глубину́ или́ в высоту́./ И рече́ Аха́з:/ не и́мам проси́ти, ниже́ искуси́ти Го́спода./ И рече́ Иса́ия:/ услы́шите у́бо, до́ме Дави́дов:/ еда́ мал вам труд дая́ти челове́ком,/ и ка́ко Го́споду труд даете́?/ Сего́ ра́ди даст Госпо́дь Сам вам зна́мение:/ се Де́ва во чре́ве прии́мет и роди́т Сы́на,/ и нареку́т и́мя Его́ Емману́ил;/ ма́сло и мед и́мать сне́сти,/ пре́жде не́же уве́дети Ему́ или́ изво́лити лука́вое,/ избере́т благо́е./ Зане́ пре́жде, не́же разуме́ти Отроча́ти благо́е или́ злое,/ отри́нет лука́вая, избере́т благо́е./ И рече́ Госпо́дь ко мне:/ приими́ себе́ сви́ток нов, вели́к/ и напиши́ в нем писа́лом челове́ческим,/ е́же ско́ро плене́ние сотвори́ коры́стей, настоя́т бо./ И свиде́тели мне сотвори́ ве́рны челове́ки,/ Ури́ю иере́я и Заха́рию, сы́на Варахи́ина./ И приступи́х ко проро́чице,/ и во чре́ве прия́т и роди́ сы́на./ И рече́ мне Госпо́дь:/ нарцы́ и́мя ему́,/ ско́ро плени́ и напра́сно испрове́рзи./ Зане́ пре́жде, не́же разуме́ти отроча́ти назва́ти отца́ или́ ма́терь,/ прии́мет си́лу дама́скову/ и коры́сти самари́йския пря́мо царю́ ассири́йскому./ С на́ми Бог, разуме́йте, язы́цы, и покаря́йтеся./ Услы́шите да́же до после́дних земли́,/ могу́щии, покаря́йтеся,/ а́ще бо па́ки возмо́жете/ и па́ки побежде́ни бу́дете./ И и́же а́ще сове́т совещава́ете, разори́т Госпо́дь,/ и Сло́во, е́же а́ще возглаго́лете, не пребу́дет в вас,/ я́ко с на́ми Бог.

Ко Евре́ем посла́ния свята́го апо́стола Па́вла чте́ние (зача́ло 304):

В нача́ле Ты, Го́споди, зе́млю основа́л еси́,/ и дела́ руку́ Твое́ю суть Небеса́./ Та поги́бнут, Ты же пребыва́еши,/ и вся, я́коже ри́за, обетша́ют,/ и, я́ко оде́жду, свие́ши их, и изменя́тся,/ Ты же то́йжде еси́, и ле́та Твоя́ не оскуде́ют./ Кому́ же от А́нгел рече́ когда́:/ седи́ одесну́ю Мене́,/ до́ндеже положу́ враги́ Твоя́ подно́жие ног Твои́х./ Не вси ли суть служе́бнии ду́си,/ в служе́ние посыла́еми за хотя́щих насле́довати спасе́ние?/ Сего́ ра́ди подоба́ет нам ли́шше внима́ти слы́шанным,/ да не когда́ отпа́днем./ А́ще бо глаго́ланное А́нгелы сло́во бысть изве́стно/ и вся́ко преступле́ние и ослуша́ние,/ пра́ведное прия́т мздовоздая́ние./ Ка́ко мы убежи́м, о толи́цем неради́вше спасе́нии,/ е́же зача́ло прие́мше, глаго́латися от Го́спода/ слы́шавшими в нас извести́ся?

Диакон: Прему́дрость, про́сти, услы́шим свята́го Ева́нгелия.

Иере́й: От Матфе́я свята́го Ева́нгелия чте́ние (зача́ло 3):

Иису́су ро́ждшуся в Вифлее́ме Иуде́йстем/ во дни И́рода царя́,/ се́ волсви́ от восто́к приидо́ша во Иерусали́м, глаго́люще:/ где есть рожде́йся Царь Иуде́йский?/ ви́дехом бо звезду́ Его́ на восто́це/ и приидо́хом поклони́тися Ему́./ Слы́шав же, И́род царь смути́ся,/ и весь Иерусали́м с ним./ И собра́в вся первосвяще́нники и кни́жники людски́я, вопроша́ше от них:/ где Христо́с ражда́ется?/ Они́ же реко́ша ему́:/ в Вифлее́ме Иуде́йстем;/ та́ко бо пи́сано есть проро́ком:/ и ты, Вифлее́ме, земле́ Иу́дова,/ ничи́мже ме́ньши еси́ во влады́ках Иу́довых,/ из тебе́ бо изы́дет Вождь,/ и́же упасе́т лю́ди Моя́ Изра́иля./ Тогда́ И́род тай призва́ волхвы́/ и испы́товаше от них вре́мя я́вльшияся звезды́./ И, посла́в их в Вифлее́м, рече́:/ ше́дше, испыта́йте изве́стно о Отроча́ти;/ егда́ же обря́щете, возвести́те ми,/ я́ко да и аз, шед, поклоню́ся Ему́./ Они́ же, послу́шавше царя́, идо́ша./ И се́ звезда́,/ ю́же ви́деша на восто́це,/ идя́ше пред ни́ми,/ до́ндеже, прише́дше, ста верху́,/ иде́же бе Отроча́./ Ви́девше же звезду́,/ возра́довашася ра́достию ве́лиею зело́./ И, прише́дше в хра́мину,/ ви́деша Отроча́ с Мари́ею, Ма́терию Его́,/ и, па́дше, поклони́шася Ему́,/ и, отве́рзше сокро́вища своя́,/ принесо́ша Ему́ да́ры, зла́то, и лива́н, и сми́рну./ И, весть прие́мше во сне, не возврати́тися ко И́роду,/ ины́м путе́м отыдо́ша во страну́ свою́.

Та́же: Ско́ро да предваря́т ны щедро́ты Твоя́, Го́споди,/ я́ко обнища́хом зело́;/ помози́ нам, Бо́же, Спа́се наш,/ сла́вы ра́ди И́мене Твоего́, Го́споди, изба́ви нас/ и очи́сти грехи́ на́ша, И́мене ра́ди Твоего́.

Та́же Трисвято́е, и по О́тче наш:

Конда́к, глас 3:

Де́ва днесь Преве́чное Сло́во/ в верте́пе гряде́т роди́ти неизрече́нно:/ лику́й, вселе́нная, услы́шавши,/ просла́ви со А́нгелы и па́стырьми/ хотя́щаго яви́тися Отроча́ Мла́до, Преве́чнаго Бо́га.

Го́споди, поми́луй,40. И моли́тва: И́же на вся́кое вре́мя: Го́споди, поми́луй, три́жды: Сла́ва, и ны́не, Честне́йшую Херуви́м: И́менем Госпо́дним благослови́, о́тче. Иере́й: Моли́твами святы́х оте́ц на́ших:

Посе́м моли́тва Вели́каго Васи́лия:

Бо́же и Го́споди сил и всея́ тва́ри Соде́телю,/ И́же за милосе́рдие безприкла́дныя ми́лости Твоея́/ Единоро́днаго Сы́на Твоего́, Го́спода на́шего Иису́са Христа́,/ низпосла́вый на спасе́ние ро́да на́шего,/ и честны́м Его́ Кресто́м рукописа́ние грех на́ших растерза́вый,/ и победи́вый тем нача́ла и вла́сти тьмы./ Сам, Влады́ко Человеколю́бче,/ приими́ и нас, гре́шных, благода́рственныя сия́ и моле́бныя моли́твы/ и изба́ви нас от вся́каго всегуби́тельнаго и мра́чнаго прегреше́ния/ и всех озло́бити нас и́щущих ви́димых и неви́димых враг./ Пригвозди́ стра́ху Твоему́ пло́ти на́ша/ и не уклони́ серде́ц на́ших в словеса́ или́ помышле́ния лука́вствия,/ но любо́вию Твое́ю уязви́ ду́ши на́ша,/ да, к Тебе́ всегда́ взира́юще/ и е́же от Тебе́ све́том наставля́еми,/ Тебе́, непристу́пнаго и присносу́щнаго зря́ще Све́та,/ непреста́нное Тебе́ испове́дание и благодаре́ние возсыла́ем,/ Безнача́льному Отцу́ со Единоро́дным Твои́м Сыно́м/ и Всесвяты́м, и Благи́м, и Животворя́щим Твои́м Ду́хом/ ны́не, и при́сно, и во ве́ки веков, ами́нь.

Та́же час девятый

Прииди́те, поклони́мся: три́жды и псало́м 109:

Рече́ Госпо́дь Го́сподеви моему́:/ седи́ одесну́ю Мене́,/ до́ндеже положу́ враги́ Твоя́ подно́жие ног Твои́х./ Жезл си́лы по́слет Ти Госпо́дь от Сио́на,/ и госпо́дствуй посреде́ враго́в Твои́х./ С Тобо́ю нача́ло в день си́лы Твоея́,/ во све́тлостех святы́х Твои́х./ Из чре́ва пре́жде Денни́цы роди́х Тя./ Кля́тся Госпо́дь и не раска́ется,/ Ты Иере́й во век, по чи́ну Мелхиседе́кову./ Госпо́дь одесну́ю Тебе́ сокруши́л есть в день гне́ва Своего́ цари́./ Су́дит во язы́цех, испо́лнит паде́ния,/ сокруши́т главы́ на земли́ мно́гих./ От пото́ка на пути́ пие́т,/ сего́ ра́ди вознесе́т главу́.

Псало́м 110:

Испове́мся Тебе́, Го́споди, всем се́рдцем мои́м/ в сове́те пра́вых и со́нме./ Ве́лия дела́ Госпо́дня,/ изы́скана во всех во́лях Его́./ Испове́дание и вели́коле́пие де́ло Его́,/ и пра́вда Его́ пребыва́ет в век ве́ка./ Па́мять сотвори́л есть чуде́с Свои́х,/ ми́лостив и щедр Госпо́дь:/ пи́щу даде́ боя́щимся Его,/ помяне́т в век завет Свой./ Кре́пость дел Свои́х возвести́ лю́дем Свои́м,/ да́ти им достоя́ние язы́к./ Дела́ рук Его́, и́стина и суд:/ ве́рны вся за́поведи Его́,/ утверже́ны в век ве́ка,/ сотворе́ны во и́стине и правоте́./ Избавле́ние посла́ лю́дем Свои́м,/ запове́да в век заве́т Свой,/ свя́то и стра́шно И́мя Его́./ Нача́ло прему́дрости – страх Госпо́день,/ ра́зум же благ всем творя́щим и́./ Хвала́ Его́ пребыва́ет в век ве́ка.

Псало́м 85:

Приклони́, Го́споди, у́хо Твое́ и услы́ши мя,/ я́ко нищ и у́бог есмь аз./ Сохрани́ ду́шу мою́, я́ко преподо́бен есмь;/ спаси́ раба́ Твоего́, Бо́же мой, упова́ющаго на Тя./ Поми́луй мя, Го́споди,/ я́ко к Тебе́ воззову́ весь день./ Возвесели́ ду́шу раба́ Твоего́,/ я́ко к Тебе́ взях ду́шу мою́./ Я́ко Ты, Го́споди, благ, и кро́ток,/ и многоми́лостив всем, призыва́ющим Тя./ Внуши́, Го́споди, моли́тву мою́/ и вонми́ гла́су моле́ния моего́./ В день ско́рби моея́ воззва́х к Тебе́,/ я́ко услы́шал мя еси́./ Несть подо́бен Тебе́ в бозе́х, Го́споди,/ и несть по дело́м Твои́м./ Вси язы́цы, ели́ки сотвори́л еси́,/ прии́дут, и покло́нятся пред Тобо́ю, Го́споди,/ и просла́вят И́мя Твое́,/ я́ко ве́лий еси́ Ты и творя́й чудеса́, Ты еси́ Бог еди́н./ Наста́ви мя, Го́споди, на путь Твой,/ и пойду́ во и́стине Твое́й:/ да возвесели́тся се́рдце мое́ боя́тися И́мене Твоего́./ Испове́мся Тебе́, Го́споди Бо́же мой,/ всем се́рдцем мои́м/ и просла́влю И́мя Твое́ в век./ Я́ко ми́лость Твоя́ ве́лия на мне,/ и изба́вил еси́ ду́шу мою́ от а́да преиспо́днейшаго./ Бо́же, законопресту́пницы воста́ша на мя,/ и сонм держа́вных взыска́ша ду́шу мою́/ и не предложи́ша Тебе́ пред собо́ю./ И Ты, Го́споди Бо́же мой,/ ще́дрый и ми́лостивый,/ долготерпели́вый, и многоми́лостивый, и и́стинный,/ при́зри на мя и поми́луй мя,/ даждь держа́ву Твою́ о́троку Твоему́/ и спаси́ сы́на рабы́ Твоея́./ Сотвори́ со мно́ю зна́мение во бла́го,/ и да ви́дят ненави́дящии мя и постыдя́тся,/ я́ко Ты, Го́споди, помо́гл ми и уте́шил мя еси́.

Сла́ва, и ны́не, аллилу́ия, три́жды. Го́споди, поми́луй, три́жды.

Сла́ва, тропа́рь, глас 4:

Написова́шеся иногда́ со ста́рцем Ио́сифом,/ я́ко от се́мене Дави́дова, в Вифлее́ме Мариа́м,/ чревонося́щи безсе́менное Рожде́ние./ Наста́ же вре́мя Рождества́,/ и ме́сто ни еди́ноже бе обита́лищу,/ но, я́коже кра́сная пала́та, верте́п Цари́це показа́шеся./ Христо́с ражда́ется пре́жде па́дший воскреси́ти о́браз.

И ны́не, Богоро́дичен:

И́же нас ра́ди рожде́йся от Де́вы/ и распя́тие претерпе́в, Благи́й,/ испрове́ргий сме́ртию смерть и воскресе́ние явле́й я́ко Бог,/ не презри́, я́же созда́л еси́ руко́ю Твое́ю./ Яви́ человеколю́бие Твое́, Ми́лостиве./ Приими́ ро́ждшую Тя Богоро́дицу, моля́щуюся за ны./ И спаси́, Спа́се наш, лю́ди отча́янныя.

Та́же тропари́ сия́, глас 7:

Удивля́шеся И́род,/ зря волхво́в благоче́стие,/ и, гне́вом побежда́емь,/ ле́та испыта́ше разстоя́ния;/ ма́тери безча́дствуемы быва́ху,/ и безвре́менный во́зраст младе́нцев го́рце пожина́шеся,/ сосцы́ ссыха́хуся,/ и исто́чницы мле́чнии удержава́хуся,/ ве́лие бя́ше лю́тое./ Те́мже благоче́стно, ве́рнии, соше́дшеся,/ поклони́мся Христо́ву Рождеству́. _{(Два́жды)}

Та́же стих: Бог от ю́га прии́дет/ и Святы́й из Горы́ приосене́нныя ча́щи.

Тропа́рь, глас 2:

Егда́ Ио́сиф, Де́во, печа́лию уязвля́шеся,/ к Вифлее́му идя́, вопия́ла еси́ к нему́:/ что Мя зря непра́здну дря́хлуеши и смуща́ешися,/ не ве́дый вся́ко е́же во Мне стра́шнаго та́инства?/ Про́чее отложи́ страх всяк, пресла́вное познава́я:/ Бог бо низхо́дит на зе́млю ми́лости ра́ди,/ во чре́ве Мое́м ны́не а́ще и плоть прия́т./ Его́же, ражда́ема, у́зриши, я́коже благоизво́ли,/ и, ра́дости испо́лнився, поклони́шися я́ко Зижди́телю твоему́,/ Его́же А́нгели пою́т непреста́нно/ и славосло́вят со Отце́м и Ду́хом Святы́м.

Стих: Го́споди, услы́шах слух Твой и убоя́хся;/ Го́споди, разуме́х дела́ Твоя́ и ужасо́хся.

Па́ки то́йже тропа́рь.

Та́же, став посреде це́ркве, кано́нарх прочитает велегла́сно всю стихи́ру сию.

Глас 6:

Днесь ражда́ется от Де́вы/ руко́ю всю содержа́й тварь,/ пелена́ми, я́коже зе́мен, повива́ется,/ И́же существо́м неприкоснове́нен Бог./ В я́слех возлежи́т/ утверди́вый Небеса́ сло́вом в нача́лех,/ от сосце́в млеко́м пита́ется,/ И́же в пусты́ни ма́нну одожди́вый лю́дем,/ волхвы́ призыва́ет Жени́х церко́вный,/ да́ры сих прие́млет Сын Де́вы./ Покланя́емся Рождеству́ Твоему́, Христе́;/ покланя́емся Рождеству́ Твоему́, Христе́;/ покланя́емся Рождеству́ Твоему́, Христе́:/ покажи́ нам и Боже́ственная Твоя́ Богоявле́ния.

И твори́м три поклоны.

Потом глаго́лет велегла́сно многоле́тны свяще́нник или́ диа́кон:

Вели́кому Господи́ну и Отцу́ на́шему Святе́йшему Патриа́рху Моско́вскому и всея́ Руси́, [Свя́то-Тро́ицкия Се́ргиевы Ла́вры священноархимандри́ту] (и́мя рек), Свяще́нному Сино́ду, Преосвяще́нным митрополи́том, архиепи́скопом и епи́скопом, и господи́ну на́шему Преосвяще́нному (и́мя рек, его́ же есть о́бласть), настоя́телю свята́го хра́ма сего́ и всему́ освяще́нному собо́ру, Богохрани́мей стране́ на́шей, власте́м и во́инству ея, мно́га лета.

Всем правосла́вным христиа́ном пода́ждь, Го́споди, тишину́, и благоде́нствие, и изоби́лие плодо́в земны́х, и мно́га ле́та.

А́ще ли в монасты́ре:

Спаси́, Христе́ Бо́же, преподо́бнаго отца́ на́шего игу́мена [или

архимандри́та] (и́мя рек), е́же о Христе́ с бра́тиею, и святу́ю оби́тель сию́ в ми́ре сохрани́ и храм сей святы́й утверди́ во ве́ки веков, ами́нь.

И пою́т трижды: Спаси́, Христе́ Бо́же:

Ве́домо же бу́ди, я́ко сие́ многоле́тное поздравле́ние в собо́рных це́рквах при архиере́ех и и́нде, где прили́чно, твори́тся в на́вечерии по отпу́сте святы́я Литурги́и или́ по вече́рни, егда́ быва́ет на́вечерие в суббо́ту и неде́лю; во оби́телех же во всех Ти́пиках чин положе́н сему́ быва́ти на часе́х в сем ме́сте.

Та́же оба ли́ка вку́пе пою́т предрече́нную стихи́ру.

Сла́ва, и ны́не, глас 6:

Днесь ражда́ется от Де́вы/ руко́ю всю содержа́й тварь,/ пелена́ми, я́коже зе́мен, повива́ется,/ И́же существо́м неприкоснове́нен Бог./ В я́слех возлежи́т/ утверди́вый Небеса́ сло́вом в нача́лех,/ от сосце́в млеко́м пита́ется,/ И́же в пусты́ни ма́нну одожди́вый лю́дем,/ волхвы́ призыва́ет Жени́х церко́вный,/ да́ры сих прие́млет Сын Де́вы./ Покланя́емся Рождеству́ Твоему́, Христе́;/ покланя́емся Рождеству́ Твоему́, Христе́;/ покланя́емся Рождеству́ Твоему́, Христе́:/ покажи́ нам и Боже́ственная Твоя́ Богоявле́ния.

На девя́том часе́ кади́т диа́кон весь храм. Та́же проки́мен, глас 4: Ма́ти Сио́н рече́т:/ Челове́к, и Челове́к роди́ся в нем. Стих: Основа́ния Его́ на гора́х святы́х.

Проро́чества Иса́иина чте́ние (глава́ 9):

Отроча́ роди́ся нам,/ Сын, и даде́ся нам,/ Его́же нача́льство бысть на ра́ме Его́;/ и нарица́ется И́мя Его́:/ вели́каго сове́та А́нгел,/ чу́ден Сове́тник,/ Бог Кре́пок,/ Власти́тель,/ Нача́льник ми́ра,/ Оте́ц бу́дущаго ве́ка,/ приведе́т бо мир на нача́льники,/ и здра́вие Его́,/ и ве́лие нача́льство Его́,/ и ми́ра Его́ несть преде́ла,/ на престо́л Дави́дов и на ца́рство Его́,/ испра́вити е́ и заступи́ти е́ судьбо́ю и пра́вдою/ от ны́не и до ве́ка./ Ре́вность Го́спода Савао́фа сотвори́т сия́.

Ко Евре́ем посла́ния свята́го апо́стола Па́вла чте́ние (зача́ло 306):

Бра́тие,/ святя́й и освяща́емии, от Еди́наго вси,/ ея́же ра́ди вины́ не стыди́тся бра́тию нарица́ти их, глаго́ля:/ возвещу́ И́мя Твое́ бра́тии Мое́й,/ посреде́ Це́ркве воспою́ Тя./ И па́ки:/ Аз бу́ду наде́яся Нань./ И па́ки:/ се Аз и де́ти, я́же Ми дал есть Бог./ Поне́же у́бо де́ти приобщи́шася пло́ти и кро́ви,/ и Той прии́скренне приобщи́ся те́хже,/ да сме́ртию упраздни́т иму́щаго держа́ву сме́рти,/ си́речь диа́вола,/ и изба́вит сих,/ ели́цы ста́хом сме́рти чрез все житие́ пови́нни бе́ша рабо́те./ Не от А́нгел у́бо когда́ прие́млет,/ но от се́мене Авраа́мова прие́млет;/ отню́дуже до́лжен бе по всему́ подо́битися бра́тии,/ да ми́лостив бу́дет/ и ве́рен первосвяще́нник в тех, я́же к Бо́гу,/ во е́же очи́стити грехи́ людски́я./ В не́мже бо пострада́, Сам искуше́н быв,/ мо́жет и искуша́емым помощи́.

Диа́кон: Прему́дрость, про́сти, услы́шим свята́го Ева́нгелия.

Иере́й: От Матфе́я свята́го Ева́нгелия чте́ние (зача́ло 4):

Отше́дшим волхво́м,/ се́ А́нгел Госпо́день во сне яви́ся Ио́сифу, глаго́ля:/ воста́в, поими́ Отроча́ и Ма́терь Его́,/ и бежи́ во Еги́пет,/ и бу́ди та́мо, до́ндеже реку́ ти:/ хо́щет бо И́род иска́ти Отроча́те,/ да погуби́т Е́./ Он же, воста́в, поя́т Отроча́ и Ма́терь Его́ но́щию/ и оты́де во Еги́пет./ И бе та́мо до уме́ртвия И́родова,/ да сбу́дется рече́нное от Го́спода проро́ком, глаго́лющим:/ от Еги́пта воззва́х Сы́на Моего́./ Тогда́ И́род, ви́дев,/ я́ко пору́ган бысть от волхво́в,/ разгне́вася зело́/ и, посла́в, изби́ вся де́ти, су́щия в Вифлее́ме/ и во всех преде́лех его́,/ от двою́ ле́ту и нижа́йше/ по вре́мени, е́же изве́стно испыта́ от волхво́в./ Тогда́ сбы́стся рече́нное Иереми́ем проро́ком, глаго́лющим:/ глас в Ра́ме слы́шан бысть,/ плач, и рыда́ние, и вопль мног./ Рахи́ль пла́чущися чад свои́х/ и не хотя́ше уте́шитися, я́ко не суть./ Уме́ршу же И́роду,/ се А́нгел Госпо́день во сне яви́ся Ио́сифу во Еги́пте, глаго́ля:/ воста́в, поими́ Отроча́ и Ма́терь Его́/ и иди́ в зе́млю Изра́илеву:/ изомро́ша бо и́щущии души́ Отроча́те./ Он же, воста́в, поя́т Отроча́ и Ма́терь Его́/ и прии́де в зе́млю Изра́илеву./ Слы́шав же, я́ко Архела́й ца́рствует во Иуде́и/ вме́сто И́рода, отца́ своего́,/ убоя́ся та́мо ити́./ Весть же прие́мь во сне, оты́де в преде́лы Галиле́йския./ И, прише́д, всели́ся во гра́де, нарица́емем Назаре́т./ Я́ко да сбу́дется рече́нное проро́ки,/ я́ко Назоре́й нарече́тся.

Та́же. Не преда́ждь нас до конца́ И́мене Твоего́ ра́ди,/ и не разори́ заве́та Твоего́,/ и не отста́ви ми́лости Твоея́ от нас/ Авраа́ма ра́ди, возлю́бленнаго от Тебе́,/ и за Исаа́ка, раба́ Твоего́,/ и Изра́иля, свята́го Твоего́.

Та́же, Трисвято́е, поО́тче наш:

Конда́к, глас 3:

Де́ва днесь Преве́чное Сло́во/ в верте́пе гряде́т роди́ти неизрече́нно:/ лику́й, вселе́нная, услы́шавши,/ просла́ви со А́нгелы и па́стырьми/ хотя́щаго яви́тися Отроча́ Мла́до, Преве́чнаго Бо́га.

Го́споди, поми́луй, 40. И моли́тва: И́же на вся́кое вре́мя: Го́споди, поми́луй, три́жды. Сла́ва, и ны́не: Честне́йшую Херуви́м: И́менем Госпо́дним благослови́, о́тче. Иере́й: Моли́твами святы́х оте́ц на́ших:

Та́же моли́тва Вели́каго Васи́лия:

Влады́ко Го́споди, Иису́се Христе́, Бо́же наш,/ долготерпе́вый о на́ших согреше́ниих/ и да́же до ны́нешняго часа́ приведы́й нас,/ в о́ньже, на Животворя́щем Дре́ве ви́ся,/ благоразу́мному разбо́йнику и́же в рай путесотвори́л еси́ вход/ и сме́ртию смерть разруши́л еси́:/ очи́сти нас, гре́шных и недосто́йных раб Твои́х,/ согреши́хом бо и беззако́нновахом/ и не́смы досто́йни возвести́ очеса́ на́ша/ и воззре́ти на высоту́ Небе́сную,/ зане́ оста́вихом путь пра́вды Твоея́/ и ходи́хом в во́лях серде́ц на́ших./ Но мо́лим Твою́ безме́рную бла́гость:/ пощади́ нас, Го́споди, по мно́жеству ми́лости Твоея́,/ и спаси́ нас И́мене Твоего́ ра́ди свята́го,/ я́ко исчезо́ша в суете́ дни́е на́ши,/ изми́ нас из руки́ сопроти́внаго,/ и оста́ви нам грехи́ на́ша,/ и умертви́ плотско́е на́ше мудрова́ние,/ да, ве́тхаго отложи́вше челове́ка, в но́ваго облеце́мся/ и Тебе́ поживе́м, на́шему Влады́це и Благоде́телю./ И та́ко, Твои́м после́дующе повеле́нием, в ве́чный поко́й дости́гнем,/ иде́же есть всех веселя́щихся жили́ще./ Ты бо еси́ вои́стинну и́стинное весе́лие и ра́дость лю́бящих Тя, Христе́ Бо́же наш,/ и Тебе́ сла́ву возсыла́ем/ со Безнача́льным Твои́м Отце́м,/ и Пресвяты́м, и Благи́м, и Животворя́щим Твои́м Ду́хом,/ ны́не, и при́сно, и во ве́ки веков, ами́нь.

Посе́м, псало́м 102:

Благослови́, душе́ моя́, Го́спода,/ и вся вну́тренняя моя́ И́мя свято́е Его́./ Благослови́, душе́ моя́, Го́спода/ и не забыва́й всех воздая́ний Его́./ Очища́ющаго вся беззако́ния твоя́,/ исцеля́ющаго вся неду́ги твоя́./ Избавля́ющаго от истле́ния живо́т твой,/ венча́ющаго тя ми́лостию и щедро́тами./ Исполня́ющаго во благи́х жела́ние твое́,/ обнови́тся, я́ко о́рля, ю́ность твоя́./ Творя́й ми́лостыни Госпо́дь и судьбу́ всем обиди́мым./ Сказа́ пути́ Своя́ Моисе́ови,/ сыново́м Изра́илевым хоте́ния Своя́./ Щедр и ми́лостив Госпо́дь,/ долготерпели́в и многоми́лостив./ Не до конца́ прогне́вается, ниже́ в век вражду́ет./ Не по беззако́нием на́шим сотвори́л есть нам,/ ниже́ по грехо́м на́шим возда́л есть нам./ Я́ко по высоте́ Небе́сней от земли́,/ утверди́л есть Госпо́дь ми́лость Свою́ на боящихся Его́./ Ели́ко отстоя́т восто́цы от за́пад,/ удали́л есть от нас беззако́ния на́ша./ Я́коже ще́дрит оте́ц сы́ны, уще́дри Госпо́дь боя́щихся Его́./ Я́ко Той позна́ созда́ние на́ше,/ помяну́, я́ко персть, есмы́./ Челове́к, я́ко трава, дни́е его́,/ я́ко цвет се́льный, та́ко оцвете́т./ Я́ко дух про́йде в нем, и не бу́дет,/ и не позна́ет ктому́ ме́ста своего́./ Ми́лость же Госпо́дня от ве́ка и до ве́ка на боя́щихся Его́./ И пра́вда Его́ на сыне́х сыно́в, храня́щих заве́т Его́/ и по́мнящих за́поведи Его́ твори́ти я./ Госпо́дь на Небеси́ угото́ва престо́л Свой,/ и Ца́рство Его́ все́ми облада́ет./ Благослови́те Го́спода, вси А́нгели Его́,/ си́льнии кре́постию, творя́щии сло́во Его́,/ услы́шати глас слове́с Его́./ Благослови́те Го́спода, вся си́лы Его́,/ слуги́ Его́,/ творя́щии во́лю Его́./ Благослови́те Го́спода, вся дела́ Его́,/ на вся́ком ме́сте Влады́чества Его́;/ благослови́, душе́ моя́, Го́спода.

Сла́ва Отцу́, и Сы́ну, и Свято́му Ду́ху.

Псало́м 145:

Хвали́, душе́ моя́, Го́спода,/ восхвалю́ Го́спода в животе́ мое́м./ Пою́ Бо́гу моему́, до́ндеже есмь./ Не наде́йтеся на кня́зи, на сы́ны челове́ческия,/ в ни́хже несть спасе́ния./ Изы́дет дух его́ и возврати́тся в зе́млю свою́,/ в той день поги́бнут вся помышле́ния Еѓо́./ Блаже́н, ему́же Бог Иа́ковль помо́щник его́,/ упова́ние его́ на Го́спода Бо́га своего́,/ сотво́ршаго Не́бо и зе́млю,/ мо́ре и вся, я́же в них,/ храня́щаго и́стину в век,/ творя́щаго суд оби́димым,/ даю́щаго пи́щу а́лчущим./ Госпо́дь реши́т окова́нныя,/ Госпо́дь уму́дряет слепцы́,/ Госпо́дь возво́дит низве́рженныя,/ Госпо́дь лю́бит пра́ведники,/ Госпо́дь храни́т прише́льцы,/ си́ра и вдову́ прии́мет/ и путь гре́шных погуби́т./ Воцари́тся Госпо́дь во век,/ Бог Твой, Сио́не, в род и род.

И ны́не, и при́сно, и во ве́ки веко́в, ами́нь.

Единоро́дный Сы́не и Сло́ве Бо́жий, Безсме́ртен Сый/ и изво́ливый спасе́ния на́шего ра́ди воплоти́тися от Святы́я Богоро́дицы и Присноде́вы Мари́и,/ непрело́жно вочелове́чивыйся,/ распны́йся же, Христе́ Бо́же,/ сме́ртию смерть попра́вый,/ Еди́н Сый Святы́я Тро́ицы,/ спрославля́емый Отцу́ и Свято́му Ду́ху,/ спаси́ нас.

Та́же:

Во Ца́рствии Твое́м помяни́ нас, Го́споди,/ егда́ прии́деши, во Ца́рствии Твое́м.

Блаже́ни ни́щии ду́хом,/ я́ко тех есть Ца́рство Небе́сное.

Блаже́ни пла́чущии,/ я́ко ти́и уте́шатся.

Блаже́ни кро́тции,/ я́ко ти́и насле́дят зе́млю.

Блаже́ни а́лчущии и жа́ждущии пра́вды,/ я́ко ти́и насы́тятся.

Блаже́ни ми́лостивии,/ я́ко ти́и поми́ловани бу́дут.

Блаже́ни чи́стии се́рдцем,/ я́ко ти́и Бо́га узрят.

Блаже́ни миротво́рцы,/ я́ко ти́и сы́нове Бо́жии нареку́тся.

Блаже́ни изгна́ни пра́вды ра́ди,/ я́ко тех есть Ца́рство Небе́сное.

Блаже́ни есте́, егда́ поно́сят вам,/ и изжену́т, и реку́т всяк зол глаго́л на вы, лжу́ще Мене́ ра́ди.

Ра́дуйтеся и весели́теся,/ я́ко мзда ва́ша мно́га на Небесе́х.

Не глаго́лем же на блаже́ннах пе́сней, я́же в Минеи, ни Апо́стола, ни Ева́нгелия.

Сла́ва, и ны́не:

Помяни́ нас, Го́споди,/ егда́ прии́деши,во Ца́рствии Твое́м.

Помяни́ нас, Влады́ко,/ егда́ прии́деши, во Ца́рствии Твое́м.

Помяни́ нас, Святы́й,/ егда́ прии́деши,во Ца́рствии Твое́м.

Лик Небе́сный пое́т Тя и глаго́лет:/ Свят, Свят, Свят Госпо́дь Савао́ф,/ испо́лнь Не́бо и земля́ сла́вы Твоея́.

Приступи́те к Нему́ и просвети́теся,/ и ли́ца ва́ша не постыдя́тся.

Лик Небе́сный пое́т Тя и глаго́лет:/ Свят, Свят, Свят Госпо́дь Савао́ф,/ испо́лнь Не́бо и земля́ сла́вы Твоея́.

Сла́ва:

Лик святы́х А́нгел и Арха́нгел/ со все́ми Небе́сными си́лами пое́т Тя и глаго́лет:/ Свят, Свят, Свят Госпо́дь Савао́ф,/ испо́лнь Не́бо и земля́ сла́вы Твоея́.

И ны́не:

Испове́дание Правосла́вныя ве́ры, Перваго Собо́ра.

(А́ще есть Литургия, зде не глаго́лем, но по И ны́не, глаго́лем: Ослаби, оста́ви: и проча́я.)

Ве́рую во Еди́наго Бо́га Отца́ Вседержи́теля,/ Творца́ Не́бу и земли́, ви́димым же всем и неви́димым./ И во Еди́наго Го́спода Иису́са Христа́, Сы́на Бо́жия Единоро́днаго,/ И́же от Отца́ рожде́ннаго пре́жде всех век./ Све́та от Све́та,/ Бо́га и́стинна от Бо́га и́стинна,/ рожде́нна, не сотворе́нна, Единосу́щна Отцу́, И́мже вся бы́ша./ Нас ра́ди челове́к, и на́шего ра́ди спасе́ния сше́дшаго с Небе́с,/ и воплоти́вшагося от Ду́ха Свя́та и Мари́и Де́вы, и вочелове́чшася./ Распя́таго же за ны при Понти́йстем Пила́те,/ и страда́вша, и погребе́нна,/ и воскре́сшаго в тре́тий день, по пи́санием./ И возше́дшаго на Небеса́,/ и седя́ща одесну́ю Отца́./ И па́ки гряду́щаго со сла́вою суди́ти живы́м и ме́ртвым,/ Его́же Ца́рствию не бу́дет конца́.

Втораго Собо́ра.

И в Ду́ха Свята́го,/ Го́спода Животворя́щаго,/ И́же от Отца́ исходя́щаго,/ И́же со Отце́м и Сыно́м спокланя́ема/ и ссла́вима глаго́лавшаго проро́ки./ Во еди́ну Святу́ю, Собо́рную и Апо́стольскую Це́рковь./ Испове́дую еди́но Креще́ние во оставле́ние грехо́в./ Ча́ю воскресе́ния ме́ртвых/ и жи́зни бу́дущаго ве́ка, ами́нь.

Та́же моли́тва:

Осла́би, оста́ви, прости́, Бо́же, прегреше́ния на́ша во́льная и нево́льная,/ я́же в сло́ве и в де́ле,/ я́же в ве́дении и не в ве́дении,/ я́же во дни и в нощи́,/ я́же во уме́ и в помышле́нии,/ вся нам прости́, я́ко Благ и Человеколю́бец.

И по О́тче наш:

Конда́к, глас 3:

Де́ва днесь Преве́чное Сло́во/ в верте́пе гряде́т роди́ти неизрече́нно:/ лику́й, вселе́нная, услы́шавши,/ просла́ви со А́нгелы и па́стырьми/ хотя́щаго яви́тися Отроча́ Мла́до, Преве́чнаго Бо́га.

Го́споди, поми́луй, 40.

Та́же моли́тву сию́:

Всесвята́я Тро́ице,/ Единосу́щная Держа́во,/ Неразде́льное Ца́рство,/ всех благи́х Вина́:/ благоволи́ же и о мне, гре́шнем,/ утверди́, вразуми́ се́рдце мое́/ и всю мою́ отыми́ скве́рну./ Просвети́ мою́ мысль,/ да вы́ну сла́влю, пою́, и покланя́юся, и глаго́лю:/ Еди́н Свят, Еди́н Госпо́дь Иису́с Христо́с/ во сла́ву Бо́га Отца́, ами́нь.

Та́же, Досто́йно есть: И отпу́ст дне. И быва́ет росход до часа́ вече́рняго. Вече́рня же быва́ет с Литурги́ею Васи́лия Вели́каго во свое́ вре́мя. Псало́м же, Благословлю Го́спода: глаго́лем на Литурги́и по заамво́нной моли́тве.

А́ще же несть Литурги́и, глаго́лем зде:

Бу́ди И́мя Госпо́дне благослове́но от ны́не и до ве́ка. _{(Три́жды)}

Сла́ва, и ны́не, псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тции и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя/ и от всех скорбе́й мои́х изба́ви мя./ Приступи́те к Нему́ и просвети́теся,/ и ли́ца ва́ша не постыдя́тся./ Сей ни́щий воззв́а, и Госпо́дь услы́ша и,/ и от всех скорбе́й его́ спасе́ и./ Ополчи́тся А́нгел Госпо́день о́крест боя́щихся Его́/ и изба́вит их./ Вкуси́те и ви́дите, я́ко благ Госпо́дь./ Блаже́н муж, и́же упова́ет Нань./ Бо́йтеся Го́спода вси святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша,/ взыска́ющии же Го́спода не лиша́тся вся́каго бла́га./ Прииди́те, ча́да, послу́шайте мене́,/ стра́ху Госпо́дню научу́ вас./ Кто есть челове́к, хотя́й живо́т,/ любя́й дни ви́дети бла́ги?/ Удержи́ язы́к твой от зла/ и устне́ твои́, е́же не глаго́лати льсти́./ Уклони́ся от зла и сотвори́ бла́го;/ взыщи́ ми́ра и пожени́ и./ О́чи Госпо́дни на пра́ведныя/ и уши Его́ в моли́тву их./ Лице́ же Госпо́дне на творя́щия зла́я,/ е́же потреби́ти от земли́ па́мять их./ Воззва́ша пра́веднии, и Госпо́дь услы́ша их/ и от всех скорбе́й их изба́ви их./ Близ Госпо́дь сокруше́нных се́рдцем,/ и смире́нныя ду́хом спасе́т./ Мно́ги ско́рби пра́ведным,/ и от всех их изба́вит я Госпо́дь./ Храни́т Госпо́дь вся ко́сти их,/ ни еди́на от них сокруши́тся./ Смерть гре́шников люта́,/ и ненави́дящии пра́веднаго прегреша́т./ Изба́вит Госпо́дь ду́ши раб Свои́х,/ и не прегреша́т вси, упова́ющии на Него́.

Досто́йно есть: И отпу́ст.

* * *

Подоба́ет ве́дати: А́ще в суббо́ту или́ в неде́лю бу́дет на́вечерие, Литургия Златоустова поется. Вели́каго же Василия Литургия поется на самый пра́здник. Та́кожде твори́м и на пра́здник святы́х Богоявле́ний. Блюди́, я́ко егда́ несть суббо́ты или́ неде́ли в на́вечерие, тогда́ быва́ет Литурги́я Васи́лия Вели́каго, а в день пра́здника Литурги́я Златоу́стова быва́ет. Си́це же и в пра́здник Богоявле́ния.

* * *

Разу́мно же бу́ди и о сем, я́ко от Христо́ва Рождества́ и до святы́х Богоявле́ний ника́коже пост, ни коленопоклонения быва́ют, ниже́ в це́ркви, ниже́ в келлиях.

Ве́домо же бу́ди: а́ще случи́тся Рождество́ Христо́во или́ Богоявле́ние в неде́лю, воскресно ничто́же поем.