Дополнения

Начинает предстоятель канон, творение кир Иоанна Дамаскина. Катавасия, ирмос тойже: Воскресе́ния день: И по нем, Христо́с воскре́се: весь трижды.

Канон, глас 1

Песнь 1

Ирмос: Воскресе́ния день, / просвети́мся, лю́дие, / Па́сха, Госпо́дня Па́сха: / от сме́рти бо к Жи́зни / и от земли́ к Небеси́ / Христо́с Бог нас преведе́ / побе́дную пою́щия.

Припев: Христо́с воскре́се из ме́ртвых. И на кийждо тропарь такожде.

Очи́стим чу́вствия и у́зрим / Непристу́пным Све́том / воскресе́ния Христа́ / блиста́ющася / и – ра́дуйтеся! – реку́ща, / я́сно да услы́шим, / побе́дную пою́ще.

Небеса́ у́бо досто́йно да веселя́тся, / земля́ же да ра́дуется, / да пра́зднует же мир, / ви́димый же весь и Неви́димый: / Христо́с бо воста́, / весе́лие ве́чное.

Богородичны господина Феофана и господина Иосифа. [Поем во всю седмицу Светлую, кроме перваго дне.]

Припев: Пресвята́я Богоро́дице, спаси́ нас.

Умерщвле́ния преде́л сломи́ла еси́, / ве́чную Жи́знь ро́ждшая, Христа́, / из Гро́ба возсия́вшаго днесь, /Де́во Всенепоро́чная, / и мир просвети́вшаго.

Воскре́сшаго ви́девши Сы́на Твоего́ и Бо́га, / ра́дуйся со апо́столы, Богоблагода́тная Чи́стая, / и е́же – ра́дуйся – пе́рвее, / я́ко всех ра́дости вина́, восприя́ла еси́, / Богома́ти Всенепоро́чная.

Ектения малая бывает по каждой песне в 1-й день.

Песнь 3

Ирмос: Прииди́те, пи́во пие́м но́вое, / не от ка́мене непло́дна чудоде́емое, / но нетле́ния исто́чник, / из гро́ба одожди́вша Христа́, / в Не́мже утвержда́емся.

Ны́не вся испо́лнишася Све́та: / Не́бо же, и земля́, и преиспо́дняя. / Да пра́зднует у́бо вся тварь / воста́ние Христо́во, / в не́мже утвержда́ется.

Вчера́ спогребóхся Тебе́, Христе́, / совостаю́ днесь / воскре́сшу Тебе́, / сраспина́хся Тебе́ вчера́, / Сам мя спросла́ви, Спа́се, во Ца́рствии Твое́м.

Богородичны:

На нетле́нную Жи́знь прихожду́ днесь / бла́гостию Ро́ждшагося из Тебе́, Чи́стая, / и всем конце́м Свет облиста́вшаго.

Бо́га, Его́же родила́ еси́ пло́тию, / из ме́ртвых, я́коже рече́, / воста́вша ви́девши, Чи́стая, лику́й / и Сего́ я́ко Бо́га, Пречи́стая, возвелича́й.

Ипакои, глас 4:

Предвари́вшия у́тро я́же о Мари́и / и обре́тшия ка́мень, отвале́н от гро́ба, / слы́шаху от А́нгела: / во Све́те Присносу́щнем Су́щаго, / с ме́ртвыми что и́щете, я́ко челове́ка? / Ви́дите гро́бныя пелены́, / тецы́те и ми́ру пропове́дите, / я́ко воста́ Госпо́дь, умертви́вый смерть, / я́ко есть Сын Бо́га, спаса́ющаго род челове́ческий.

Песнь 4

Ирмос: На Боже́ственней стра́жи / Богоглаго́ливый Авваку́м / да ста́нет с на́ми и пока́жет / светоно́сна А́нгела, / я́сно глаго́люща: / днесь спасе́ние ми́ру, / я́ко воскре́се Христо́с, / я́ко всеси́лен.

Му́жеский у́бо пол, / я́ко разве́рзый Де́вственную утро́бу, / яви́ся Христо́с / я́ко Челове́к же, / А́гнец нарече́ся. / Непоро́чен же, / я́ко невку́сен скве́рны, / на́ша Па́сха, / и, я́ко Бог И́стинен, / соверше́н рече́ся.

Я́ко единоле́тный А́гнец, / благослове́нный нам вене́ц – Христо́с, / во́лею за всех закла́н бысть, / Па́сха Чисти́тельная, / и па́ки из Гро́ба кра́сное / Пра́вды нам возсия́ Со́лнце.

Богооте́ц у́бо Дави́д / пред се́нным ковче́гом скака́ше, игра́я; / лю́дие же Бо́жии святи́и, / образо́в сбытие́ зря́ще, / весели́мся Боже́ственне, / я́ко воскре́се Христо́с, / я́ко всеси́лен.

Богородичны:

Созда́вый Ада́ма, Твоего́ пра́отца, Чи́стая, / зи́ждется от Тебе́, / и сме́ртное жили́ще разори́ Свое́ю сме́ртию днесь, / и озари́ вся Боже́ственными блиста́ньми Воскресе́ния.

Его́же родила́ еси́, Христа́, / прекра́сно из ме́ртвых возсия́вша, Чи́стая, зря́щи, / до́брая и непоро́чная в жена́х и кра́сная, / днесь во спасе́ние всех / со апо́столы ра́дующися, Того́ прославля́й.

Песнь 5

Ирмос: У́тренюем у́треннюю глубоку́, / и вме́сто ми́ра песнь принесе́м Влады́це, / и Христа́ у́зрим, / Пра́вды Со́лнце, / всем Жизнь возсия́юща.

Безме́рное Твое́ благоутро́бие / а́довыми у́зами содержи́мии зря́ще, / к Све́ту идя́ху, Христе́, / весе́лыми нога́ми, / Па́сху хва́ляще ве́чную.

Присту́пим, свещено́снии, / исходя́щу Христу́ из Гро́ба, я́ко Жениху́, / и спра́зднуим любопра́зднственны ми чи́нми / Па́сху Бо́жию спаси́тельную.

Богородичны:

Просвеща́ется / Боже́ственными луча́ми и живоно́сными / Воскресе́ния Сы́на Твоего́, / Богома́ти Пречи́стая, / и ра́дости исполня́ется благочести́вых собра́ние.

Не разве́рзл еси́ врата́ де́вства в воплоще́нии, / Гро́ба не разруши́л еси́ печа́тей, Царю́ созда́ния, / отону́дуже, воскре́сшаго Тя зря́щи, Ма́ти ра́довашеся.

Песнь 6

Ирмос: С низше́л еси́ в преиспо́дняя земли́, / и сокруши́л еси́ вереи́ ве́чныя, / содержа́щия свя́занныя, Христе́, / и тридне́вен, я́ко от ки́та Ио́на, / воскре́сл еси́ от Гро́ба.

Сохрани́в це́ла зна́мения, Христе́, / воскре́сл еси́ от Гро́ба, / ключи́ Де́вы невреди́вый в рождестве́ Твое́м, / и отве́рзл еси́ нам ра́йския две́ри.

Спа́се мой, / живо́е же и неже́ртвенное заколе́ние, / я́ко Бог, Сам Себе́ / во́лею приве́д Отцу́, / совоскре си́л еси́ всеро́днаго Ада́ма, / воскре́с от Гро́ба.

Богородичны:

Возведе́ся дре́вле держи́мое сме́ртию и тле́нием / Воплоти́вшимся от Твоего́ пречи́стаго чре́ва / к нетле́нней и присносу́щней Жи́зни, / Богоро́дице Де́во.

Сни́де в преиспо́дняя земли́, / в ложесна́ Твоя́, Чи́стая, Сше́дый, / и Всели́выйся, и Воплоти́выйся па́че ума́, / и воздви́же с Собо́ю Ада́ма, / воскре́с от Гро́ба.

Кондак, глас 8:

А́ще и во Гро́б снизше́л еси́, Безсме́ртне, / но а́дову разруши́л еси́ си́лу / и воскре́сл еси́, я́ко Победи́тель, Христе́ Бо́же, / жена́м мироно́сицам веща́вый: ра́дуйтеся! / и Твои́м апо́столом мир да́руяй, / па́дшим подая́й воскре́сение.

Икос:

Е́же пре́жде со́лнца Со́лнце, заше́дшее иногда́ во Гро́б, / предвари́ша ко у́тру, / и́щущия я́ко дне мироно́сицы де́вы, / и друга́ ко друзе́й вопия́ху: / о други́ни! прииди́те, воня́ми пома́жем Те́ло Живоно́сное и погребе́ное, / плоть воскреси́вшаго па́дшаго Ада́ма, лежа́щую во Гро́бе; / и́дем, потщи́мся, я́коже волсви́, и поклони́мся, / и принесе́м ми́ра, я́ко да́ры, / не в пелена́х, но в плащани́це обви́тому, / и пла́чим, и возопии́м: / о Влады́ко, воста́ни, па́дшим подая́й воскресе́ние.

Таже, глаголем:

Воскресе́ние Христо́во ви́девше, / поклони́мся Свято́му Го́споду Иису́су, / Еди́ному Безгре́шному. / Кресту́ Твоему́ покланя́емся, Христе́, / и свято́е Воскресе́ние Твое́ пое́м и сла́вим: / Ты бо еси́ Бог наш, / ра́зве Тебе́ ино́го не зна́ем, / И́мя Твое́ имену́ем. / Прииди́те, вси ве́рнии, / поклони́мся свято́му Христо́ву Воскресе́нию: / се бо прии́де Кресто́м ра́дость всему́ ми́ру. / Всегда́ благословя́ще Го́спода, / пое́м Воскресе́ние Его́: / распя́тие бо претерпе́в, / сме́ртию смерть разруши́. (Трижды)

Воскре́с Иису́с от Гро́ба, / я́коже прорече́, / даде́ нам Живо́т ве́чный / и ве́лию ми́лость. (Трижды)

Песнь 7

Ирмос: О́троки от пе́щи изба́вивый, / быв Челове́к, / стра́ждет, я́ко сме́ртен, / и стра́стию сме́ртное / в нетле́ния облачи́т благоле́пие, / еди́н благослове́н / отце́в Бог и препросла́влен.

Жены́ с ми́ры Богому́дрыя в след Тебе́ теча́ху, / Его́же, я́ко ме́ртва, со слеза́ми иска́ху, / поклони́шася, ра́дующияся Живо́му Бо́гу, / и Па́сху та́йную / Твои́м, Христе́, ученико́м благовести́ша.

Сме́рти пра́зднуем умерщвле́ние, / а́дово разруше́ние, / ино́го жития́ ве́чнаго нача́ло, / и, игра́юще, по ем Вино́внаго, / Еди́наго Благослове́ннаго, / отце́в Бо́га и Препросла́вленнаго.

Я́ко вои́стинну свяще́нная / и всепра́зднственная сия́ спаси́тельная нощь / и светоза́рная, / светоно́снаго Дне / Воста́ния су́щи провозве́стница, / в не́йже Безле́тный Свет из Гро́ба пло́тски всем возсия́.

Богородичны:

Умертви́в Сын Твой смерть, / Всенепоро́чная, днесь, / всем сме́ртным пребыва́ющий Живо́т / во ве́ки веко́в дарова́, / Еди́н Благослове́нный / отце́в Бог и Препросла́вленный.

Всем ца́рствуяй созда́нием, быв Челове́к, / всели́ся во Твою́, Богоблагода́тная, утро́бу, / и, распя́тие претерпе́в и смерть, / воскре́се Боголе́пно, / совозста́вив нас, я́ко всеси́лен.

Песнь 8

Ирмос: Се́й нарече́нный и Святы́й День, /еди́н суббо́т царь и госпо́дь, / пра́здников пра́здник / и торжество́ есть торже́ств, / во́ньже благослови́м Христа́ во ве́ки.

Прииди́те, но́ваго виногра́да рожде́ния, / Боже́ственнаго весе́лия / в наро́читом дни Воскресе́ния, / Ца́рствия Христо́ва приобщи́мся, / пою́ще Его́ / я́ко Бо́га во ве́ки.

Возведи́ о́крест о́чи твои́, Сио́не, и виждь: / се бо приидо́ша к тебе́, / я́ко Богосве́тлая свети́ла, / от за́пада, и се́вера, и мо́ря, / и восто́ка ча́да Твоя́, / в тебе́ благословя́щая Христа́ во ве́ки.

Троичен: Пресвята́я Тро́ице, Бо́же наш, сла́ва Тебе́.

О́тче Вседержи́телю, и Сло́ве, и Ду́ше, / треми́ соединя́емое во Ипоста́сех естество́, / Пресу́щественне и Пребоже́ственне, / в Тя крести́хомся / и Тя благослови́м во вся ве́ки.

Богородичны: Прии́де Тобо́ю в мир Госпо́дь, / Де́во Богоро́дице, / и чре́во а́дово расто́рг, / сме́ртным нам воскресе́ние даро́ва. / Те́мже благослови́м Его́ во ве́ки.

Всю низложи́в сме́рти держа́ву, / Сын Твой, Де́во, / Свои́м Воскресе́нием, / я́ко Бог кре́пкий, / совознесе́ нас и обожи́. / Те́мже воспева́ем Его́ во ве́ки.

Припевы на 9-й песни:

Диакон: Вели́чит душа́ моя́ / воскре́сшаго тридне́вно от Гро́ба / Христа́ Жизнода́вца.

И ирмос: Свети́ся, свети́ся:

Вторый припев к ирмосу: Вели́чит душа́ моя́ / во́лею страда́вша, и погребе́на, / и воскре́сшаго тридне́вно от Гро́ба.

И ирмос: Свети́ся, свети́ся:

Припевы к тропарю: О, Боже́ственнаго:

Христо́с – но́вая Па́сха, / Же́ртва жива́я, / А́гнец Бо́жий, / взе́мляй грехи́ ми́ра.

А́нгел вопия́ше Благода́тней: / Чи́стая Де́во, ра́дуйся, / и па́ки реку́: ра́дуйся! / Твой Сын воскре́се / тридне́вен от Гро́ба, / и ме́ртвыя воздви́гнувый. / Лю́дие, весели́теся.

Возбуди́л еси́, усну́в, ме́ртвыя от ве́ка, / ца́рски рыка́вый, / я́ко от Иу́ды лев.

Магдали́на Мари́я притече́ ко Гро́бу / и, Христа́ ви́девши, / я́ко вертогра́даря, вопроша́ше.

Припевы к тропарю: О, Па́сха ве́лия:

А́нгел облиста́яй жена́м вопия́ше: / преста́ните от слез, / я́ко Христо́с воскре́се.

Христо́с воскре́се, смерть попра́вый / и ме́ртвыя воздви́гнувый, / лю́дие, весели́теся.

Дне́сь вся́ка тварь весели́тся и ра́дуется, / я́ко Христо́с воскре́се / и ад плени́ся.

Дне́сь Влады́ка плени́ а́да, / воздви́гнувый ю́зники, / я́же от ве́ка имя́ше лю́те одержи́мыя.

Припевы к Богородичным тропарям:

Вели́чит душа́ моя́ / Триипоста́снаго и Неразде́льнаго / Божества́ держа́ву.

Ра́дуйся, Де́во, ра́дуйся, / ра́дуйся, Благослове́нная, / ра́дуйся, Препросла́вленная: / Твой бо Сын воскре́се / тридне́вен от Гро́ба.

Припев перед катавасией первый, таже ирмос: Свети́ся, свети́ся: и тропарь: Христо́с воскре́се: (Трижды)

Песнь 9

Ирмос: Свети́ся, свети́ся, / Но́вый Иерусали́ме, / сла́ва бо Госпо́дня / на тебе́ возсия́, / лику́й ны́не / и весели́ся, Сио́не, / Ты же, Чи́стая, красу́йся, Богоро́дице, / о воста́нии Рождества́ Твоего́.

О, Боже́ственнаго, о, любе́знаго, / о, сладча́йшаго Твоего́ гла́са! / С на́ми бо нело́жно обеща́лся еси́ бы́ти / до сконча́ния ве́ка, Христе́. / Его́же, ве́рнии, утвержде́ние наде́жди иму́ще, ра́дуемся.

О, Па́сха ве́лия и свяще́ннейшая, Христе́! / О, Му́дросте, и Сло́ве Бо́жий, и Си́ло! / Подава́й нам и́стее Тебе́ причаща́тися / в невече́рнем дни Ца́рствия Твоего́.

Богородичны:

Согла́сно, Де́во, Тебе́ блажи́м, ве́рнии: / ра́дуйся, две́ре Госпо́дня, / ра́дуйся, гра́де одушевле́нный, / ра́дуйся, Ея́же ра́ди нам ны́не возсия́ Свет / из Тебе́ рожде́ннаго из ме́ртвых Воскресе́ния.

Весели́ся и ра́дуйся, Боже́ственная две́ре Све́та: / заше́дый бо Иису́с во Гроб возсия́, / просия́в со́лнца светле́е, / и ве́рныя вся озари́в, / Богора́дованная Влады́чице.

Ексапостиларий. Самогласен:

Пло́тию усну́в, / я́ко мертв, / Царю́ и Го́споди, / тридне́вен воскре́сл еси́, / Ада́ма воздви́г от тли / и упраздни́в смерть, / Па́сха нетле́ния, / ми́ра Спасе́ние. (Трижды)

И по хвалитных стихирах поем стихиры Пасхи, глас 5:

Стих: Да воскре́снет Бог, / и расточа́тся врази́ Его́.

Па́сха / свяще́нная нам днесь показа́ся, / Па́сха но́ва свята́я, / Па́сха та́инственная, / Па́сха всечестна́я, / Па́сха – Христо́с Изба́витель, / Па́сха непоро́чная, / Па́сха вели́кая, / Па́сха ве́рных, / Па́сха, две́ри ра́йския нам отверза́ющая, / Па́сха, всех освяща́ющая ве́рных.

Стих: Я́ко исчеза́ет дым, / да исче́знут.

Прииди́те / от виде́ния, жены́ благове́стницы, / и Сио́ну рцы́те: / приими́ от нас ра́дости благове́щения Воскресе́ния Христо́ва, / красу́йся, лику́й / и ра́дуйся, Иерусали́ме, / Царя́ Христа́ узре́в, из Гро́ба, / я́ко Жениха́ происходя́ща.

Стих: Та́ко да поги́бнут гре́шницы от Лица́ Бо́жия, / а пра́ведницы да возвеселя́тся.

Мироно́сицы жены́, / у́тру глубоку́ / предста́вша Гро́бу Живода́вца, / обрето́ша А́нгела, / на ка́мени седя́ща, / и той провеща́в им, / си́це глаго́лаше: / что и́щете Жива́го с ме́ртвыми? / Что пла́чете Нетле́ннаго во тли? / Ше́дше, пропове́дите ученико́м Его́.

Стих: Сей День, его́же сотвори́ Госпо́дь, / возра́дуемся и возвесели́мся в онь.

Па́сха кра́сная, / Па́сха, Госпо́дня Па́сха, / Па́сха всечестна́я / нам возсия́. Па́сха! / Ра́достию друг дру́га обы́мем. / О, Па́сха! / Избавле́ние ско́рби, / и́бо из Гро́ба днесь, / я́ко от черто́га, / возсия́в Христо́с, / жены́ ра́дости испо́лни, глаго́ля: / пропове́дите апо́столом.

Сла́ва, и ны́не:

Воскресе́ния день, / и просвети́мся торжество́м, / и друг дру́га обы́мем. / Рце́м, бра́тие! / И ненави́дящим нас / прости́м вся Воскресе́нием, / и та́ко возопии́м: / Христо́с воскре́се из ме́ртвых, / сме́ртию смерть попра́в, / и су́щим во гробе́х живо́т дарова́в.

Таже: Христо́с воскре́се: (Трижды)

И прочее окончание Пасхальной утрени.

Часы Пасхи

По возгласе начинаем сице: Христо́с воскре́се: (Трижды)

Воскресе́ние Христо́во ви́девше, / поклони́мся Свято́му Го́споду Иису́су, / Еди́ному Безгре́шному. / Кресту́ Твоему́ покланя́емся, Христе́, / и свято́е Воскресе́ние Твое́ пое́м и сла́вим: / Ты бо еси́ Бог наш, / ра́зве Тебе́ ино́го не зна́́ем, / И́мя Твое́ имену́ем. / Прииди́те, вси ве́рнии, / поклони́мся свято́му Христо́ву Воскресе́нию: / се бо прии́де Кресто́м ра́дость всему́ ми́ру. / Всегда́ благословя́ще Го́спода, / пое́м Воскресе́ние Его́: / распя́тие бо претерпе́в, / сме́ртию смерть разруши́. (Трижды)

Предвари́вшия у́тро я́же о Мари́и / и обре́тшия ка́мень, отвале́н от гро́ба, / слы́шаху от Ангела: / во Све́те Присносу́щнем Су́щаго, / с ме́ртвыми что и́щете, я́ко челове́ка? / Ви́дите гро́бныя пелены́, / тецы́те и ми́ру пропове́дите, / я́ко воста́ Госпо́дь, умертви́вый смерть, / я́ко есть Сын Бо́га, спаса́ющаго род челове́ческий. (Единожды)

А́ще и во Гро́б снизше́л еси́, Безсме́ртне, / но а́дову разруши́л еси́ си́лу / и воскре́сл еси́, я́ко Победи́тель, Христе́ Бо́же, / жена́м мироно́сицам веща́вый: ра́дуйтеся! / и Твои́м апо́столом мир да́руяй, / па́дшим подая́й воскре́сение. (Единожды)

Во Гро́бе пло́тски, во а́де же с душе́ю я́ко Бог, / в раи́ же с разбо́йником и на Престо́ле был еси́, Христе́, со Отце́м и Ду́хом, / вся исполня́яй, Неопи́санный.

Сла́ва: Я́ко Живоно́сец, я́ко рая́ красне́йший, / вои́стинну и черто́га вся́каго ца́рскаго показа́ся светле́йший, Христе́, Гроб Твой, / исто́чник на́шего воскресе́ния.

И ны́не: Вы́шняго освяще́нное Боже́ственное селе́ние, ра́дуйся, / Тобо́ю бо даде́ся ра́дость, Богоро́дице, зову́щим: / благослове́нна Ты в жена́х еси́, Всенепоро́чная Влады́чице.

Го́споди поми́луй (40). Сла́ва, и ны́не: Честне́йшую Херуви́м: Иерей: Моли́твами святы́х оте́ц: Мы же: Ами́нь. Христо́с воскре́се: (Трижды) Посем: Сла́ва, и ны́не: Го́споди поми́луй. (Трижды) Благослови́.

И отпуст часа.

Творим же пасхальное начало сице:

Настоятель возглашает: Благослове́но Ца́рство: и поет с прочими служители тропарь во святом алтаре:

Христо́с воскре́се из ме́ртвых, / сме́ртию смерть попра́в, / и су́щим во гробе́х живо́т дарова́в. (Трижды)

И лики поют тойже тропарь трижды.

Таже настоятель глаголет стихи:

Стих: Да воскре́снет Бог, и расточа́тся врази́ Его́:

И на каждый стих лик поет тропарь: Христо́с воскре́се: весь по единожды.

Стих: Я́ко исчеза́ет дым, да исче́знут: Тропарь.

Стих: Та́ко да поги́бнут гре́шницы от Лица́ Бо́жия, а пра́ведницы да возвеселя́тся. Тропарь.

Стих: Сей день, его́же сотвори́ Госпо́дь, возра́дуемся и возвесели́мся в онь. Тропарь.

Сла́ва: Тропарь. И ны́не: Тропарь.

Таже настоятель поет вышшим гласом:

Христо́с воскре́се из ме́ртвых, / сме́ртию смерть попра́в.

Лик: И су́щим во гробе́х живо́т дарова́в.

По велицей ектении поем антифоны Пасце.

Антифон 1-й, глас 2:

Стих: Воскли́кните Го́сподеви вся земля́.

Припев: Моли́твами Богоро́дицы, Спа́се, спаси́ нас.

И другий лик тойже стих: Воскли́кните Го́сподеви вся земля́, / по́йте же И́мени Его́, дади́те сла́ву хвале́ Его́.

Припев: Моли́твами Богоро́дицы:

Стих: Рцы́те Бо́гу: коль стра́шна дела́ Твоя́, / во мно́жестве си́лы Твоея́ со́лжут Тебе́ врази́ Твои́.

Припев: Моли́твами Богоро́дицы:

Стих: Вся земля́ да покло́нится Тебе́, и пое́т Тебе́, / да пое́т же И́мени Твоему́, Вы́шний.

Припев: Моли́твами Богоро́дицы:

Слава, и ныне: Моли́твами Богоро́дицы:

Ектения малая.

Антифон 2-й, глас 2:

Стих: Бо́же, уще́дри ны, и благослови́ ны.

Припев: Спаси́ ны, Сы́не Бо́жий, воскресы́й из ме́ртвых, пою́щия Ти: Аллилу́ия.

Стих: Бо́же, уще́дри ны, и благослови́ ны, / просвети́ Лице́ Твое́ на ны, и поми́луй ны. Припев.

Стих: Да позна́ем на земли́ путь Тво́й, / во всех язы́цех спасе́ние Твое́. Припев.

Стих: Да испове́дятся Тебе́ лю́дие, Бо́же, / да испове́дятся Тебе́ лю́дие вси. Припев.

Слава, и ныне: Единоро́дный Сы́не: Ектения малая.

Антифон 3-й, глас 5:

Стих: Да воскре́снет Бог, и расточа́тся врази́ Его́.

Тропарь: Христо́с воскре́се: весь.

Стих: Да воскре́снет Бог, и расточа́тся врази́ Его́, и да бежа́т от Лица́ Его́ ненави́дящии Его́. Тропарь.

Стих: Я́ко исчеза́ет дым, да исче́знут, я́ко та́ет воск от лица́ огня́. Тропарь.

Стих: Та́ко да поги́бнут гре́шницы от Лица́ Бо́жия, а пра́ведницы да возвеселя́тся, да возра́дуются пред Бо́гом. Тропарь.

И бывает вход. Входный стих: В це́рквах благослови́те Бо́га, Го́спода от исто́чник Изра́илевых.

И поем тропарь, глас 5:

Христо́с воскре́се из ме́ртвых, / сме́ртию смерть попра́в, / и су́щим во гробе́х живо́т дарова́в.

Ипакои, глас 4:

Предвари́вшия у́тро я́же о Мари́и / и обре́тшия ка́мень, отвале́н от Гро́ба, / слы́шаху от А́нгела: / во Све́те Присносу́щнем Су́щаго, с ме́ртвы ми что и́щете, я́ко челове́ка? / Ви́дите гро́бныя пелены́, / тецы́те и ми́ру пропове́дите, / я́ко воста́ Госпо́дь, умертви́вый смерть, / я́ко есть Сын Бо́га, / спаса́ющаго род челове́ческий.

Слава, и ныне, кондак, глас 8:

А́ще и во Гроб снизше́л еси́, Безсме́ртне, / но а́дову разруши́л еси́ си́лу / и воскре́сл еси́, я́ко Победи́тель, Христе́ Бо́же, / жена́м мироно́сицам веща́вый: ра́дуйтеся! / и Твоим апо́столом мир да́руяй, / па́дшим подая́й воскресе́ние.

И бывает Божественная Литургия Иоанна Златоустаго.

За Достойно: поем:

А́нгел вопия́ше Благода́тней: / Чи́стая Де́во, ра́дуйся, / и па́ки реку́: ра́дуйся! / Твой Сын воскре́се / тридне́вен от Гро́ба, / и ме́ртвыя воздви́гнувый. / Лю́дие, весели́теся.

Таже, ирмос: Свети́ся, свети́ся, / Но́вый Иерусали́ме, / сла́ва бо Госпо́дня / на тебе́ возсия́, / лику́й ны́не / и весели́ся, Сио́не, / Ты же, Чи́стая, красу́йся, Богоро́дице, / о воста́нии Рождества́ Твоего́.

Причастный стих: Те́ло Христо́во приими́те, исто́чника безсме́ртнаго вкуси́те. Аллилу́ия. (Трижды)

Егда же настоятель глаголет: Со стра́хом Бо́жиим и ве́рою приступи́те.

Лик, вместо: Благословен грядый во имя Господне: Христо́с воскре́се: единожды.

Егда настоятель глаголет: Спаси́, Бо́же, лю́ди Твоя́:

Лик: Христо́с воскре́се: единожды.

Егда же изглаголет иерей: Всегда́, ны́не и при́сно:

Лик: Ами́нь. Христо́с воскре́се: единожды. Аллилу́ия: (3)

Посем ектения и молитва заамвонная.

Вместо: Буди имя Господне: и псалма 33-го:

Лик: Христо́с воскре́се: (12 раз)

Таже настоятель: Благослове́ние Госпо́дне на вас: Лик: Ами́нь.

Посем настоятель вместо возгласа: Слава Тебе, Христе Боже: поет:

Христо́с воскре́се из ме́ртвых, / сме́ртию смерть попра́в...

Лик: ...И су́щим во гробе́х живо́т дарова́в.

Посем настоятель глаголет отпуст со крестом по обычаю.

На Рождество Богородицы

Месяца сентября в 8-й день

Велича́ем Тя, / Пресвята́я Де́во, / и чтим святы́х Твои́х роди́телей, / и всесла́вное сла́вим / рождество́ Твое́.

Сии избранныя от псалмов стихи поются по полиелеи во Владычныя праздники и во вся святыя, имущия полиелей:

Помяни́, Го́споди, Дави́да и всю кро́тость его́. / Я́ко кля́тся Го́сподеви, обеща́ся Бо́гу Иа́ковлю. / Се слы́шахом я́ во Евфра́фе, обрето́хом я́ в поля́х дубра́вы. / Пресла́вная глаго́лашася о Тебе́, гра́де Бо́жий. / Бог посреде́ его́, и не подви́жится. / Кля́тся Госпо́дь Дави́ду и́стиною и не отве́ржется ея́. / От плода́ чре́ва Твоего́ посажду́ на престо́ле Твое́м. / Я́ко избра́ Госпо́дь Сио́на, изво́ли его́ в жили́ще Себе́. / Освяти́л есть селе́ние Свое́ Вы́шний. / Святы́ня и велеле́пота во святи́ле Его́. / Свят храм Твой, ди́вен в пра́вде. / До́му Твоему́ подоба́ет святы́ня, Го́споди, в долготу́ дний. / Помяну́ и́мя Твое́ во вся́ком ро́де и ро́де. / Благослове́н Госпо́дь во век и в век ве́ка.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в, ами́нь.

Аллилу́ия, аллилу́ия, аллилу́ия, сла́ва Тебе́, Бо́же. (Трижды)

В Воздвижение Честнаго Креста

Месяца сентября в 14-й день Велича́ем Тя, / Живода́вче Христе́, / и чтим Крест Твой святы́й, / и́мже нас спасл еси́ / от рабо́ты вра́жия.

Псалом избранный: Суди́, Го́споди, оби́дящия мя, побори́ борю́щия мя. / Приими́ ору́жие и щит и воста́ни в помо́щь мою́. / Зна́менася на нас свет лица́ Твоего́, Го́споди. / Я́ко ору́жием благоволе́ния венча́л еси́ нас. / Дал еси́ зна́мение боя́щимся Тебе́, е́же убежа́ти от лица́ лу́ка. / Позна́ти на земли́ путь Твой, во всех язы́цех спасе́ние Твое́. / Ви́деша вси концы́ земли́ спасе́ние Бо́га на́шего. / Поклони́мся на ме́сто, иде́же стоя́сте но́зе Его́. / Тогда́ возра́дуются вся древа́ дубра́вная. / Бог же, Царь наш пре́жде ве́ка, соде́ла спасе́ние посреде́ земли́. / Возноси́те Го́спода Бо́га на́шего и покланя́йтеся подно́жию но́гу Его́, я́ко свя́то есть. / Благослови́ ны, Бо́же, Бо́же наш, благослови́ ны, Бо́же. / Спаси́ лю́ди Твоя́ и благослови́ достоя́ние Твое́. / И упаси́ я́, и возми́ я́ до ве́ка.

Сла́ва, и ны́не: Аллилу́ия: Трижды.

На Покров Пресвятыя Богородицы

Месяца октября в 1-й день

Велича́ем Тя, / Пресвята́я Де́во, / и чтим Покро́в Твой святы́й: / Тя бо ви́де святы́й Андре́й на возду́се, / за ны Христу́ моля́щуюся.

Ины величания:

Велича́ем Тя, / Пресвята́я Де́во, / Ма́ти Христа́, Бо́га на́шего, / и всесла́вный сла́вим Покро́в Твой.

Велича́ем Тя, / Пресвята́я Де́во, / Ма́ти Христа́, Бо́га на́шего, / И́же к Сы́ну Свои́ ру́це простира́ющи, и о ми́ре моля́щися, / и честны́м Свои́м омофо́ром защища́ющи / град и лю́ди от враго́в на́ших.

Псалом избранный, афонский: Ве́лий Госпо́дь и хва́лен зело́, во гра́де Бо́га на́шего, в горе́ святе́й Его́. / Свят храм Твой, ди́вен в пра́вде. / Святы́ня и великоле́пие во святи́ле Его́. / Лицу́ Твоему́ помо́лятся бога́тии лю́дстии. / Распростре́ о́блак в покро́в им. / Покры́ю и́, я́ко позна́ и́мя Мое́. / В кро́ве крилу́ Твое́ю покры́еши мя. / Бог в ме́сте святе́м Свое́м, и в хра́ме Его́ вся́кий глаго́лет сла́ву. / Предста́ Цари́ца одесну́ю Тебе́. / Покры́й мя от со́нма лука́внующих. / В день зол мои́х покры́ мя. / Покры́еши мя от враг, озлобля́ющих мя. / Помяну́ и́мя Твое́ во вся́ком ро́де и ро́де. / Сего́ ра́ди лю́дие испове́дятся Тебе́ в век и в век ве́ка.

Сла́ва, и ны́не: Аллилу́ия: Трижды.

На Введение (Вход) Богородицы

Месяца ноября в 21-й день

Велича́ем Тя, / Пресвята́я Де́во, / Богоизбра́нная Отрокови́це, / и чтим е́же в храм Госпо́день / вхожде́ние Твое́.

Псалом избранный: Ве́лий Госпо́дь и хва́лен зело́, во гра́де Бо́га на́шего, в горе́ святе́й Его́. / Благокоре́нным ра́дованием всея́ земли́. / Пресла́вная глаго́лашася о Тебе́, гра́де Бо́жий. / Град Царя́ Вели́каго. / Я́коже слы́шахом, та́ко и ви́дехом. / Во гра́де Го́спода Сил, во гра́де Бо́га на́шего. / Бог основа́ и́ в век. / Освяти́л есть селе́ние Свое́ Вы́шний. / Святы́ня и великоле́пие во святи́ле Его́. / Свят храм Твой, ди́вен в пра́вде. / Сия́ врата́ Госпо́дня, пра́веднии вни́дут в ня. / Предста́ Цари́ца одесну́ю Тебе́. / В ри́зах позлаще́нных оде́яна, преиспещре́на. / Лицу́ Твоему́ помо́лятся бога́тии лю́дстии. / Дще́ри царе́й в че́сти Твое́й. / Вся сла́ва Дще́ре Царе́вы внутрь. / Ря́сны златы́ми оде́яна и преиспещре́на. / Приведу́тся Царю́ де́вы в след Ея́. / Бли́жняя Ея́ приведу́тся Тебе́. / Приведу́тся в весе́лии и ра́довании, введу́тся в храм Царе́в. / Слы́ши, Дщи, и виждь, и приклони́ у́хо Твое́. / И забу́ди лю́ди Твоя́ и дом отца́ Твоего́. / И возжела́ет Царь добро́ты Твоея́. / Помяну́ и́мя Твое́ во вся́ком ро́де и ро́де. / Сего́ ра́ди лю́дие испове́дятся Тебе́ в век и в век ве́ка.

Сла́ва, и ны́не: Аллилу́ия: Трижды.

На Рождество Господа Бога нашего Иисуса Христа

Месяца декабря в 25-й день

Велича́ем Тя, / Живода́вче Христе́, / нас ра́ди ны́не пло́тию ро́ждшагося / от Безневе́стныя / и Пречи́стыя Де́вы Мари́и.

Псалом избранный:

Воскли́кните Го́сподеви, вся земля́. / По́йте же И́мени Его́. / Дади́те сла́ву хвале́ Его́. / Пове́дите вся чудеса́ Его́. / Рцы́те Бо́гу: коль стра́шна дела́ Твоя́. / Да возвеселя́тся Небеса́, и возра́дуется земля́. / Воспо́йте Го́сподеви, по́йте И́мени Его́. / Испове́дание и великоле́пие де́ло Его́. / Избавле́ние посла́ лю́дем Свои́м. / Свя́то и стра́шно И́мя Его́. / От Сио́на благоле́пие красоты́ Его́. / Бог же наш на Небеси́ и на земли́, вся, ели́ка восхоте́, сотвори́. / Ми́лости Твоя́, Го́споди, во век воспою́. / Той воззове́т мя: Оте́ц мой еси́ Ты. / И покло́нятся Ему́ вси ца́рие зе́мстии. / Кто бог ве́лий, я́ко Бог наш? Ты еси́ Бог, творя́й чудеса́. / Мы́шцею си́лы Твоея́ разгна́л еси́ враги́ Твоя́. / Из чре́ва пре́жде денни́цы роди́х Тя. / Кля́тся Госпо́дь и не раска́ется. / Ты Иере́й во век по чи́ну Мелхиседе́кову. / Госпо́дь рече́ ко Мне: Сын Мой еси́ Ты. / Аз днесь роди́х Тя. / Проси́ от Мене́, и дам Ти язы́ки достоя́ние Твое́. / И одержа́ние Твое́ – концы́ земли́. / Жезл пра́вости, жезл Ца́рствия Твоего́. / Сего́ ра́ди пома́за Тя, Бо́же, Бог Твой еле́ем ра́дости. / Я́ко Ты насле́диши во всех язы́цех. / Благослове́н Госпо́дь во век, бу́ди, бу́ди.

Сла́ва, и ны́не: Аллилу́ия: Трижды.

На Обрезание Господа Бога нашего Иисуса Христа и память святителя Василия Великаго

Месяца января в 1-й день

Обрезанию: Велича́ем Тя, / Живода́вче Христе́, / и почита́ем пречи́стыя пло́ти Твоея́ / зако́нное обре́зание.

Святителю: Велича́ем тя, / святи́телю Христо́в Васи́лие, / благоче́стно Це́рковь Христо́ву / сохра́ншаго.

На Святое Богоявление Господа Бога нашего Иисуса Христа

Месяца января в 6-й день

Велича́ем Тя, / Живода́вче Христе́, / нас ра́ди ны́не пло́тию крести́вшагося / от Иоа́нна / в вода́х Иорда́нских.

Псалом избранный:

Бо́же, уще́дри ны и благослови́ ны. / Просвети́ лице́ Твое́ на ны и поми́луй ны. / Приступи́те к Нему́ и просвети́теся. / И ли́ца ва́ша не постыдя́тся. / Ре́чная устремле́ния веселя́т град Бо́жий. / Глас Госпо́день на вода́х, / Госпо́дь на вода́х мно́гих. / Взя́ша ре́ки, Го́споди, взя́ша ре́ки гла́сы своя́ / от гла́сов вод мно́гих. / Сего́ ра́ди помяну́х Тя от земли́ Иорда́нски и Ермонии́мски. / Я́ко у тебе́ исто́чник живота́, во Све́те Твое́м у́зрим Свет. / Мо́ре ви́де и побеже́, Иорда́н возврати́ся вспять. / Ты утверди́л еси́ си́лою Твое́ю мо́ре. / Ви́деша Тя во́ды, Бо́же, ви́деша Тя во́ды и убоя́шася. / В мо́ри путие́ Твои́, и стези́ Твоя́ в вода́х мно́гих. / Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́ия: Трижды.

На Сретение Господа нашего Иисуса Христа

Месяца февраля во 2-й день

Велича́ем Тя, / Живода́вче Христе́, / и чтим Пречи́стую Ма́терь Твою́, / Е́юже по зако́ну ны́не прине́слся еси́ / в храм Госпо́день.

Псалом избранный:

Отры́гну се́рдце мое́ сло́во бла́го, / глаго́лю аз дела́ моя́ царе́ви. / Язы́к мой – трость кни́жника скоропи́сца. / Красе́н добро́тою па́че сыно́в челове́ческих. / Препоя́ши меч Твой по бедре́ Твое́й, Си́льне, / и наляцы́, и успева́й, и ца́рствуй / и́стины ра́ди, и кро́тости, и пра́вды. / Возлюби́л еси́ пра́вду и возненави́дел еси́ беззако́ние. / Слы́ши, Дщи, и виждь, и приклони́ у́хо Твое́, / И возжела́ет Царь добро́ты Твоея́. / Я́ко Той есть Госпо́дь Твой, и поклони́шися Ему́. / Лицу́ Твоему́ помо́лятся бога́тии лю́дстии. / Госпо́дь во хра́ме святе́м Свое́м, Госпо́дь на Небеси́ престо́л Его́. / Свят храм Твой, ди́вен в пра́вде. / До́му Твоему́ подоба́ет святы́ня, Го́споди, в долготу́ дний. / Помяну́ и́мя Твое́ во вся́ком ро́де и ро́де, / Я́ко бла́го пред преподо́бными Твои́ми.

Сла́ва, и ны́не: Аллилу́ия: Трижды.

На Благовещение Пресвятыя Богородицы

Месяца марта в 25-й день

Арха́нгельский глас / вопие́м Ти, Чи́стая: / ра́дуйся, Благода́тная, / Госпо́дь с Тобо́ю.

Псалом избранный: Бо́же, суд Твой Царе́ви даждь / и пра́вду Твою́ Сы́ну Царе́ву, / суди́ти лю́дем Твои́м в пра́вде / и ни́щим Твои́м в суде́. / Су́дит ни́щим людски́м и спасе́т сы́ны убо́гих. / Благовести́те день от дне спасе́ние Бо́га на́шего. / Госпо́дь даст глаго́л благовеству́ющим си́лою мно́гою. / Кля́тся Госпо́дь Дави́ду и́стиною и не отве́ржется ея́. / От плода́ чре́ва Твоего́ посажду́ на престо́ле Твое́м. / Сни́дет, я́ко дождь на руно́, / и я́ко ка́пля, ка́плющая на зе́млю. / И приклони́ Небеса́, и сни́де, и мрак под нога́ма Его́. / Я́ко избра́ Госпо́дь Сио́на, изво́ли его́ в жили́ще Себе́. / Освяти́л есть селе́ние Свое́ Вы́шний. / Бог посреде́ его, и не подви́жится. / Пощади́т ни́ща и убо́га и ду́ши убо́гих спасе́т. / Вси язы́цы порабо́тают Ему́. / Весь день благословя́т Его́. / Бу́дет утверже́ние на земли́, на версе́х гор. / Бу́дет И́мя Его́ благослове́но во ве́ки. / И благословя́тся в Нем вся коле́на земна́я. / Благослове́н Госпо́дь Бог Изра́илев, творя́й чудеса́ Еди́н. / И благослове́но И́мя сла́вы Его́ в век и в век ве́ка. / И испо́лнится сла́вы Его́ вся земля́, бу́ди, бу́ди.

Сла́ва, и ны́не: Аллилу́ия: Трижды.

В Неделю ваий

Велича́ем Тя, / Живода́вче Христе́, / оса́нна в Вы́шних, / и мы Тебе́ вопие́м: / Благослове́н Гряды́й во И́мя Госпо́дне.

Псалом избранный: Го́споди, Госпо́дь наш, я́ко чу́дно И́мя Твое́ по всей земли́. / Я́ко взя́тся великоле́пие Твое́ превы́ше Небе́с. / Из уст младе́нец и ссу́щих соверши́л еси́ хвалу́. / Враго́в Твои́х ра́ди разруши́ши врага́ и ме́стника. / Запрети́л еси́ язы́ком, и поги́бе нечести́вый. / Ка́мень, Его́же небрего́ша зи́ждущии, Сей бысть во главу́ у́гла. / От Го́спода бысть Сей и есть ди́вен во очесе́х на́ших. / Госпо́дь в Сио́не вели́к и вы со́к есть над все́ми людьми́. / Та́мо сокруши́ кре́пости луко́в. / Возвести́те в Сио́не И́мя Госпо́дне и хвалу́ Его́ во Иерусали́ме. / Я́ко Бог спасе́т Сио́на, и сози́ждутся гра́ди иуде́йстии. / Тебе́ подоба́ет песнь, Бо́же, в Сио́не, и Тебе́ возда́стся моли́тва во Иерусали́ме. / Благослове́н Гряды́й во И́мя Госпо́дне. Бог Госпо́дь и яви́ся нам. / Соста́вите пра́здник во учаща́ющих до рог олтаре́вых, / в о дво́рех до́му Госпо́дня, посреде́ тебе́, Иерусали́ме. / Воцари́тся Госпо́дь во век, Бог твой, Сио́не, в род и род. / Хвала́ Его́ пребыва́ет в век и в век ве́ка.

Сла́ва, и ны́не: Аллилу́ия: Трижды.

В Новую неделю, яже есть Фомина

Велича́ем Тя, / Живода́вче Христе́, / нас ра́ди во ад сше́дшаго / и с Собо́ю вся / воскреси́вшаго.

Псалом избранный: Госпо́дь воцари́ся, в ле́поту облече́ся, / облече́ся Госпо́дь в си́лу и препоя́сася. / И́бо утверди́ вселе́нную, я́же не подви́жится. / Кто возглаго́лет си́лы Госпо́дни, слы́шаны сотвори́т вся хвалы́ Его́? / Да испове́дятся Го́сподеви ми́лости Его́ и чудеса́ Его́ сыново́м челове́ческим. / И изве́л еси́ ны от тьмы и се́ни сме́ртныя, / я́ко сокруши́ врата́ ме́дная и вереи́ желе́зныя сломи́. / Я́ко услы́ша убо́гия Госпо́дь / и окова́нныя Своя́ не уничижи́. / Воста́ я́ко спя Госпо́дь и порази́ враги́ Своя́. / Я́ко о́чи Госпо́дни на упова́ющия на ми́лость Его́, / услы́шати воздыха́ние оков́анных, / разреши́ти сы́ны умерщвле́нных. / Да воскре́снет Бог, и расточа́тся врази́ Его́ и да бежа́т от лица́ Его́. / Сей День, его́же сотвори́ Госпо́дь, возра́дуемся и возвесели́мся в онь. / Воскресни́, Го́споди Бо́же мой, да вознесе́тся рука́ Твоя́, не забу́ди убо́гих Твои́х до конца́. / Го́споди Бо́же мой, в век испове́мся Тебе́.

Сла́ва, и ны́не: Аллилу́ия: Трижды.

На Вознесение Господа нашего Иисуса Христа

Велича́ем Тя, / Живода́вче Христе́, / и почита́ем е́же на Небеса́ / с пречи́стою Твое́ю пло́тию / Боже́ственное вознесе́ние.

Псалом избранный: Вси язы́цы, восплещи́те рука́ми, воскли́кните Бо́гу гла́сом ра́дования. / Я́ко Госпо́дь Вы́шний стра́шен, Царь Ве́лий по всей земли́. / Покори́ лю́ди нам и язы́ки под но́ги на́ша. / Взы́де Бог в воскликнове́нии, Госпо́дь во гла́се тру́бне. / И взы́де на Херуви́мы, и лете́, / и возлете́ на крилу́ ве́треню. / Возми́те, врата́, кня́зи ва́ша, и возми́теся, врата́ ве́чная, и вни́дет Царь Сла́вы. / Госпо́дь на Небеси́ угото́ва Престо́л Свой, и Ца́рство Его́ все́ми облада́ет. / Рече́ Госпо́дь Го́сподеви Моему́: седи́ одесну́ю Мене́, до́ндеже положу́ враги́ Твоя́ подно́жие ног Твои́х. / Поклони́теся Ему́, вси А́нгели Его́. / Бог седи́т на Престо́ле святе́м Свое́м. / И Той су́дит вселе́нней в пра́вду. / Престо́л Твой, Бо́же, в век ве́ка. / Я́ко взя́тся великоле́пие Твое́ превы́ше Небе́с. / Вознеси́ся на Небеса́, Бо́же, и по всей земли́ сла́ва Твоя́. / Кто я́ко Госпо́дь Бог наш, на высо́ких живы́й? / Вознеси́ся, Го́споди, си́лою Твое́ю, воспое́м и пое́м си́лы Твоя́. / По́йте Бо́гу на́шему, по́йте, по́йте Царе́ви на́шему, по́йте.

Сла́ва, и ны́не: Аллилу́ия: Трижды.

В неделю Пятидесятницы

Велича́ем Тя, / Живода́вче Христе́, / и чтим Всесвята́го Ду́ха Твоего́, / Его́же от Отца́ посла́л еси́ / Боже́ственным ученико́м Твои́м.

Псалом избранный: Небеса́ пове́дают сла́ву Бо́жию, творе́ние же руку́ Его́ возвеща́ет твердь. / Ду́хом уст Его́ вся си́ла их. / С Небесе́ призре́ Госпо́дь, ви́де вся сы́ны челове́ческия. / Огнь пред Ним преды́дет, и о́крест Его́ бу́ря зе́льна. / У́глие возгоре́ся от Него́, и приклони́ Небеса́, и сни́де. / От облиста́ния пред Ним о́блацы проидо́ша. / Помяну́тся и обратя́тся ко Го́споду вси концы́ земли́. / И покло́нятся пред Ним вся оте́чествия язы́к. / Свиде́тельство Госпо́дне ве́рно, умудря́ющее младе́нцы. / Земля́ потрясе́ся, и́бо небеса́ ка́нуша от лица́ Бо́га Сина́ина. / Дождь во́лен отлучи́ши, Бо́же, достоя́нию Твоему́. / Поста́виши их кня́зи по всей земли́. / Во всю зе́млю изы́де веща́ние их и в концы́ вселе́нныя глаго́лы их. / По́слеши Ду́ха Твоего́, и сози́ждутся, и обнови́ши лице́ земли́. / Дух Твой Благи́й наста́вит мя на зе́млю пра́ву. / Се́рдце чи́сто сози́жди во мне, Бо́же, и Дух прав обнови́ во утро́бе мо́ей. / Не отве́ржи мене́ от лица́ Твоего́ и Ду́ха Твоего́ Свята́го не отыми́ от Мене́. / Возда́ждь ми ра́дость спасе́ния Твоего́ и Ду́хом Влады́чним утверди́ мя. / Госпо́дь даст глаго́л благовеству́ющим си́лою мно́гою. / Госпо́дь кре́пость лю́дем Свои́м даст, Госпо́дь благослови́т лю́ди Своя́ ми́ром.

Сла́ва, и ны́не: Аллилу́ия: Трижды.

На Рождество Предтечево

Месяца июня в 24-й день

Велича́ем тя, / Предте́че Спа́сов Иоа́нне, / и чтим е́же от непло́дове / пресла́вное рождество́ твое́.

Псалом избранный: Благослове́н Госпо́дь, Бог Изра́илев, я́ко посети́ и сотвори́ избавле́ние лю́дем Свои́м. / И воздви́же рог спасе́ния нам в дому́ Дави́дове, о́трока Своего́. / Кля́тся Госпо́дь Дави́ду и́стиною и не отве́ржется ея́. / Та́мо возращу́ рог Дави́ду, угото́вах свети́льник пома́занному Моему́. / Си́льно на земли́ бу́дет се́мя Его́. / Род пра́вых благослови́тся. / Служи́ти Ему́ в преподо́бии и пра́вде пред Ним вся дни живота́ на́шего. / И ты, отроча́, проро́к Вы́шняго нарече́шися. / Преды́деши бо пред лице́м Госпо́дним угото́вати пути́ Его́, / да́ти ра́зум спасе́ния лю́дем Его́ / во оставле́ние грехо́в их милосе́рдия ра́ди ми́лости Бо́га на́шего, / напра́вити но́ги на́ша на путь ми́ра.

Сла́ва, и ны́не: Аллилу́ия: Трижды.

На Преображение Господа Бога и Спаса нашего Иисуса Христа

Месяца августа в 6-й день

Велича́ем Тя, / Живода́вче Христе́, / и почита́ем пречи́стыя пло́ти Твоея́ / пресла́вное преображе́ние.

Псалом избранный: Ве́лий Госпо́дь и хва́лен зело́ во гра́де Бо́га на́шего, в горе́ святе́й Его́. / Прие́мля кро́ткия Госпо́дь, смире́нныя же возно́сит. / Кто взы́дет на го́ру Госпо́д ню? или́ кто ста́нет на ме́сте святе́м Его́? / Го́споди, кто обита́ет в жили́щи Твое́м? / или́ кто всели́тся в горе́ святе́й Твое́й? / Посли́ Свет Твой и и́стину Твою́. / Просвеща́еши Ты ди́вно от гор ве́чных. / Вселе́нную и исполне́ние ея́ Ты основа́л еси́. / Фаво́р и Ермо́н о И́мени Твое́м возра́дуетася. / Го́споди, во Све́те лица́ Твоего́ по́йдут / и о И́мени Твое́м возра́дуются весь день. / И бу́ди све́тлость Го́спода Бо́га на́шего на нас от ны́не и до ве́ка.

Сла́ва, и ны́не: Аллилу́ия: Трижды.

На Успение Пресвятыя Богородицы

Месяца августа в 15-й день

Велича́ем Тя, / Пренепоро́чная / Ма́ти Христа́ Бо́га на́шего, / и всесла́вное сла́вим / успе́ние Твое́.

Псалом избранный: Воскли́кните Го́сподеви, вся земля́, / по́йте же И́мени Его́. / Воскли́кните пред Царе́м Го́сподем. / Испове́дайтеся Ему́, хвали́те И́мя Его́ / во гра́де Го́спода Сил, во гра́де Бо́га на́шего. / Бысть в ми́ре ме́сто Его́ и жили́ще Его́ в Сио́не. / Пресла́вная глаго́лашася о Тебе́, гра́де Бо́жий. / Бог основа́ и́ в век. / Освяти́л есть селе́ние Свое́ Вы́шний. / Святы́ня и великоле́пие во святи́ле Его́. / Воспою́ и пою́ во сла́ве мое́й. / Ча́шу спасе́ния прииму́ и И́мя Госпо́дне призову́. / В ми́ре вку́пе усну́ и почи́ю. / Обрати́ся, душе́ моя́, в поко́й твой, я́ко Госпо́дь благоде́йствова тя. / Госпо́дь пра́веден, ссече́ вы́и гре́шников. / Воскресни́, Го́споди, в поко́й Твой, Ты и киво́т святы́ни Твоея́. / До́му Твоему́ подоба́ет святы́ня, Го́споди, в долготу́ дний. / Помяну́ и́мя Твое́ во вся́ком ро́де и ро́де.

Сла́ва, и ны́не: Аллилу́ия: Трижды.

На Усекновение и обретение главы Иоанна Предтечи

Месяца августа в 29-й день, и февраля в 24-й, и мая в 25-й

Велича́ем тя, / Крести́телю Спа́сов Иоа́нне, / и почита́ем вси / честны́я твоея́ главы́ / *усекнове́ние *.

На праздник обретения:*обре́тение *.

Псалом избранный: Блаже́н муж, боя́йся Го́спода, / в за́поведех Его́ восхо́щет зело́. / Сла́ва и бога́тство в дому́ Его́. / И пра́вда Его́ пребыва́ет в век ве́ка. / В па́мять ве́чную бу́дет пра́ведник. / Пра́ведник, я́ко фи́никс, процвете́т, я́ко кедр, и́же в Лива́не, умно́жится. / Возвесели́тся пра́ведник о Го́споде и упова́ет на Него́. / Се устна́м мои́м не возбраню́, Го́споди. / Ты разуме́л еси́ пра́вду мою́ и и́стину мою́, / и язы́к мой поучи́тся пра́вде Твое́й, весь день хвале́ Твое́й. / Свет возсия́ пра́веднику, и пра́вым се́рдцем весе́лие. / Род пра́вых благослови́тся. / Сла́вою и че́стию венча́л еси́ его́. / Я́ко Ты благослови́ши пра́ведника, Го́споди. / Я́ко ору́жием благоволе́ния венча́л еси́ нас. / В ни́хже посети́ нас Восто́к с высоты́, / яви́тися во тьме и се́ни сме́ртней седя́щим, / напра́вити но́ги на́ша на путь ми́рен.

Сла́ва, и ны́не: Аллилу́ия: Трижды.

Святым апостолом Петру и Павлу

Месяца июня в 29-й день

Велича́ем вас, / апо́столи Христо́вы Пе́тре и Па́вле, / весь мир уче́ньми свои́ми просвети́вшия / и вся концы́ / ко Христу́ приве́дшия.

Святым апостолом общий

Велича́ем тя, / апо́столе Христо́в [имярек], / и чтим боле́зни и труды́ твоя́, / и́миже труди́лся еси́ / во благове́стии Христо́ве.

Псалом избранный: Небеса́ пове́дают сла́ву Бо́жию, творе́ние же руку́ Его́ возвеща́ет твердь. / Испове́дят Небеса́ чудеса́ Твоя́, Го́споди. / Вме́сто оте́ц Твои́х бы́ша сы́нове Твои́. / Поста́виши я́ кня́зи по всей земли́. / Бог бого́в Госпо́дь глаго́ла и призва́ зе́млю. / От восто́к со́лнца до за́пад хва́льно И́мя Госпо́дне. / Освети́ша мо́лния Его́ вселе́нную, / возвести́ша Небеса́ пра́вду Его́, / и ви́деша вси лю́дие сла́ву Его́. / Кня́зи Иу́довы влады́ки их. / Воцари́ся Бог над язы́ки. / Бог прославля́емь в сове́те святы́х. / Ве́лий и стра́шен есть над все́ ми окре́стными Его́. / Рцы́те во язы́цех, я́ко Госпо́дь воцари́ся. / Во всю зе́млю изы́де веща́ние их, /и в концы́ вселе́нныя глаго́лы их. / Покори́ лю́ди нам и язы́ки под но́ги на́ша. / Ве́лий Госпо́дь наш и ве́лия кре́пость Его́. / Той даст си́лу и держа́ву лю́дем Свои́м: благослове́н Бог.

Сла́ва, и ны́не: Аллилу́ия: Трижды.

Святым мучеником общий

Велича́ем тя, / страстоте́рпче святы́й [имярек], / и чтим честна́я страда́ния твоя́, / я́же за Христа́ / претерпе́л еси́.

Псалом избранный: Бог нам прибе́жище и си́ла, / Помо́щник в скорбе́х, обре́тших ны зело́. / Сего́ ра́ди не убои́мся, внегда́ смуща́ется земля́. / Бо́же, кто уподо́бится Тебе́? Да не премолчи́ши, ниже́ укроти́ши, Бо́же. / Я́ко Тебе́ ра́ди умерщвля́еми есмы́ весь день. / Вмени́хомся, я́ко о́вцы заколе́ния. / Положи́л еси́ нас в при́тчу во язы́цех. / И бых язве́н весь день. / Разже́гл еси́ ны, я́коже разжиза́ется сребро́. / Проидо́хом сквозе́ огнь и во́ду, и изве́л еси́ нас в поко́й. / Весели́теся о Го́споде и ра́дуйтеся, пра́веднии. / Я́ко Госпо́дь в ро́де пра́ведных, / и насле́дие их в век бу́дет. / Воззва́ша пра́веднии, и Госпо́дь услы́ша их. / Свет возсия́ пра́веднику, и пра́вым се́рдцем весе́лие. / В па́мять ве́чную бу́дет пра́ведник. / Святы́м, и́же суть на земли́ Его́, удиви́ Госпо́дь вся хоте́ния Своя́ в них. / Ди́вен Бог во святы́х Свои́х. / Пра́ведник, я́ко фи́никс, процвете́т, я́ко кедр, и́же в Лива́не, умно́жится. / Возвесели́тся пра́ведник о Го́споде и упова́ет на Него́. / И похва́лятся вси пра́вии се́рдцем.

Сла́ва, и ны́не: Аллилу́ия: Трижды.

Святителем общий

Велича́ем тя, / святи́телю о́тче [имярек], / и чтим святу́ю па́мять твою́: / ты бо мо́лиши за нас / Христа́, Бо́га на́шего.

Псалом избранный: Услы́шите сия́, вси язы́цы, внуши́те, вси, живу́щии по вселе́нней. / Уста́ моя́ возглаго́лют прему́дрость, и поуче́ние се́рдца моего́ ра́зум. / Прииди́те ча́да, послу́шайте мене́, стра́ху Госпо́дню научу́ вас. / Благовести́х пра́вду в Це́ркви вели́цей. / И́стину Твою́ и спасе́ние Твое́ рех. / Пове́м И́мя Твое́ бра́тии мое́й, посреде́ Це́ркве воспою́ Тя. / Услы́ша ти ми глас хвалы́ Твоея́ и пове́дати вся чудеса́ Твоя́. / Возненави́дех це́рковь лука́внующих и с нечести́выми не ся́ду. / Я́ко сохрани́х пути́ Госпо́дни и не нече́ствовах от Бо́га моего́. / Уста́ пра́веднаго поуча́тся прему́дрости, и язы́к его́ возглаго́лет суд. / Пра́вда Его́ пребыва́ет в век ве́ка. / Свяще́нницы Твои́ облеку́тся пра́вдою, и преподо́бнии Твои́ возра́дуются. / Блаже́ни, живу́щии в дому́ Твое́м, в ве́ки веко́в восхва́лят Тя.

Сла́ва, и ны́не: Аллилу́ия: Трижды.

Преподобным общий

Ублажа́ем тя, / преподо́бне о́тче [имярек], / и чтим святу́ю па́мять твою́, / наста́вниче мона́хов / и собесе́дниче А́нгелов.

Псалом избранный: Терпя́, потерпе́х Го́спода, и внят ми, и услы́ша моли́тву мою́. / Поста́ви на ка́мени но́зе мои́ и испра́ви стопы́ моя́. / Се удали́хся, бе́гая, и водвори́хся в пусты́ни. / Уподо́бихся нея́сыти пусты́нней. / Бдех и бых, я́ко пти́ца, осо́бящаяся на зде. / Коле́на моя́ изнемого́ста от поста́, / и плоть моя́ измени́ся еле́я ра́ди. / Предзре́х Го́спода пре́до мно́ю вы́ну, я́ко одесну́ю мене́ есть, да не подви́жуся. / В си язы́цы обыдо́ша мя, и И́менем Госпо́дним противля́хся им. / Благослове́н Госпо́дь, И́же не даде́ нас в лови́тву зубо́м их. / Храни́т Госпо́дь ду́ши преподо́бных Свои́х. / Восхва́лятся преподо́бнии во сла́ве и возра́дуются на ло́жах свои́х. / Честна́ пред Го́сподем смерть преподо́бных Его́. / По́йте Го́сподеви, преподо́бнии Его́, и испове́дайте па́мять святы́ни Его́, во всех лю́дех чудеса́ Его́.

Сла́ва, и ны́не: Аллилу́ия: Трижды.

Святым Безплотным общий

Велича́ем вас, / Арха́нгели и А́нгели и вся во́инства, / Херуви́ми и Серафи́ми, / сла́вящия Го́спода.

Ино величание:

Велича́ем вас, / Арха́нгели, А́нгели, Нача́ла, Вла́сти, Престо́ли, / Госпо́дьствия, Си́лы и Херуви́ми, / и стра́шныя Серафи́ми, / прославля́ющия Го́спода.

Псалом избранный: Испове́мся Тебе́, Го́споди, всем се́рдцем мои́м / и пред А́нгелы воспою́ Тебе́. / Творя́й А́нгелы Своя́ ду́хи и слуги́ Своя́ пла́мень о́гненный. / Благослови́те Го́спода, вси А́нгели Его́, / благослови́те Го́спода, вся си́лы Его́. / Поклони́теся Ему́, вси А́нгели Его́. / Седя́й на Херуви́мех яви́ся. / Ополчи́тся А́нгел Госпо́день о́крест боя́щихся Его́. / Сло́вом Госпо́д ним Небеса́ утверди́шася / и Ду́хом уст Его́ вся Си́ла их. / И се́де на Херуви́мы, и лете́. / Сла́вою и че́стию венча́л еси́ Его́. / Хвали́те Го́спода с Небе́с, хвали́те Его́ в Вы́шних. / Хвали́те Его́, вси А́нгели Его́. / Хвали́те Его́, вся Си́лы Его́. / Вся́кое дыха́ние да хва́лит Го́спода.

Сла́ва, и ны́не: Аллилу́ия: Трижды.

Святой равноапостольной княгине Ольге

Месяца июля в 11-й день

Велича́ем тя, / блаже́нная и равноапо́стольная княги́не О́льго, / и чтим святу́ю па́мять твою́, / и́долы попра́вшую / и мно́гия лю́ди росси́йския / святы́м креще́нием просвети́вшую.

Ино величание:

Велича́ем тя, / свята́я равноапо́стольная княги́не О́льго, / я́ко зарю́ у́треннюю в земли́ на́шей возсия́вшую / и свет ве́ры правосла́вныя / наро́ду своему́ предвозвестившую.

Псалом избранный: Блаже́н муж, боя́йся Го́спода: зри на странице 216.

Иной псалом избранный: Взыска́х Го́спода, и услы́ша мя. / Сказа́л ми еси́ пути́ живота́. / Благословлю́ Го́спода, вразуми́вшаго мя. / Предзре́х Го́спода пре́до мно́ю вы́ну, я́ко одесну́ю мене́ есть.

Сла́ва, и ны́не: Аллилу́ия: Трижды.

Всем святым, в земле Русской просиявшим

В неделю 2-ю по Пятидесятнице

Велича́ем Тя, / Триипоста́сный Влады́ко, / ве́рою правосла́вною зе́млю Ру́сскую просвети́вшаго / и ве́лий сонм святы́х сро́дников на́ших / в ней просла́вльшаго.

Ины величания:

Досто́йно есть велича́ти Тя, / Богоро́дице, / земли́ Ру́сския Цари́цу Небе́сную / и люде́й правосла́вных / Влады́чицу Держа́вную.

Ублажа́ем вас, / чудотво́рцы на́ши сла́внии, / зе́млю Ру́сскую доброде́тельми ва́шими озари́вшии / и о́б раз спасе́ния нам / светоявле́нно показа́вшии.

Псалом избранный: Воскли́кните Го́сподеви, вся земля́, по́йте же И́мени Его́, дади́те сла́ву хвале́ Его́. / Я́ко Бог ве́лий Госпо́дь, и Царь ве́лий по всей земли́, я́ко в руце́ Его́ вси концы́ земли́ и высоты́ гор Того́ суть. / Прииди́те, поклони́мся и припаде́м Ему́ и воспла́чемся пред Го́сподем, сотво́ршим нас. / Бо́же, уши́ма на́шима услы́шахом и отцы́ на́ши возвести́ша нам де́ло, е́же соде́лал еси́ во днех их, во днех дре́вних. / Не утаи́шася от чад их в род ин, возвеща́юще хвалы́ Госпо́дни и си́лы Его́, и чудеса́ Его́, я́же сотвори́. / Не бо мече́м свои́м насле́диша зе́млю, и мы́шца их не спасе́ их. / Но десни́ца Твоя́ и мы́шца Твоя́ и просвеще́ние лица́ Твоего́, я́ко благоволи́л еси́ в них. / Бог нам прибе́жище и си́ла, Помо́щник в ско́рбех, обре́тших ны зело́. / Бо́ же, отри́нул ны еси́ и низложи́л еси́ нас, разгнева́лся еси́ и уще́дрил еси́ нас. / Я́ко а́ще не Госпо́дь бы был в нас, внегда́ воста́ти челове́ком на ны, у́бо живы́х поже́рли бы́ша нас. / По́мощь на́ша во И́мя Го́спода, сотво́ршаго Не́ бо и зе́млю. / Не нам, Го́споди, не нам, но И́мени Твоему́ даждь сла́ву о ми́лости Твое́й и и́стине Твое́й. / Госпо́дь сил с на́ми, Засту́пник наш Бог Иа́ковль. / По́йте Бо́гу на́шему, по́йте, по́йте Царе́ви на́шему, по́йте, я́ко Царь всея́ земли́ Бог, по́йте разу́мно. / Госпо́дь Царь во век и в век ве́ка, поги́бнете, язы́цы, от земли́ Его́. / Мы же лю́дие Твои́ и о́вцы па́жити Твоея́, испове́мыся Тебе́, Бо́же, во век, в род и род возвести́м хвалу́ Твою́. / Благослове́н Госпо́дь Бог Изра́илев, творя́й чудеса́ еди́н, и благослове́но и́мя сла́вы Его́ во век и в век ве́ка, и испо́лнится сла́вы Его́ вся земля́, бу́ди, бу́ди.

Сла́ва, и ны́не: Аллилу́ия: Трижды.

егда не поем Честне́йшую:

На Рождество Богородицы

На 9-й песни поем припев праздника: Велича́й, душе́ моя́, / пресла́вное рождество́ Бо́жия Ма́тере.

Посем ирмос: Я́же пре́жде со́лнца:

Припев к тропарям 1-го канона тойже.

Припев к тропарям 2-го канона: Велича́й, душе́ моя́, / от непло́дове ро́ждшуюся Де́ву Мари́ю.

Катавасия: Та́ин еси́, Богоро́дице, рай:

В Воздвижение Честнаго Креста

На 9-й песни:

Велича́й, душе́ моя́, / Пречестны́й Крест Госпо́день.

Посем ирмос: Та́ин еси́, Богоро́дице, рай:

Припев к тропарям 1-го канона тойже.

Припев к тропарям 2-го канона: Велича́й, душе́ моя́, / Животворя́щаго Креста́ Госпо́дня Воздви́жение.

Катавасия: Та́ин еси́, Богоро́дице, рай: Таже: Сне́дию дре́ва:

На Покров Пресвятыя Богородицы

Сии припевы поются на 9-й песни на Святой Афонской Горе:

А́нгели, По́кров Пречи́стыя зря́ще, удиви́шася, / ка́ко покры́ в це́ркви моля́щияся лю́ди.

А́нгели, окружа́юще Де́ву, удиви́шася, / ќако омофо́ром во Влахе́рне покры́ благове́рныя лю́ди.

А́нгели, с ли́ки святы́х предстоя́ще Де́ве, удиви́шася, / ка́ко моля́шеся с ни́ми приле́жно о ми́ре.

А́нгели Богоро́дицу пе́сньми велича́ют, / ка́ко при́ с но покрыва́ет с ве́рою к Ней прибега́ющих.

А́нгели и вси святи́и Тя, Богома́ти, славосло́вят, / ка́ко покрыва́еши от зол И́мя Твое́ призыва́ющих.

А́нгели и челове́цы Покро́в чтут Влады́чицы, / заступа́ет бо всегда́ тре́бующих Ея́ по́мощи.

С Небе́сными, зе́мнии, Тя, Госпоже́, воспева́ем, / покрыва́еши бо от бед на Тя упова́ющих.

Велича́й, душе́ моя́, / пречестны́й Покро́в Бо́жия Ма́тере.

Велича́й, душе́ моя́, / Боже́ственный Покро́в Богоблагода́тныя Присноде́вы.

Велича́й, душе́ моя́, / держа́вный Покро́в Пресла́вныя Влады́чицы.

Велича́й, душе́ моя́, / необори́мый Покро́в Небесе́ и земли́ Цари́цы.

Велича́й, душе́ моя́, / Покро́в святы́й Присноблаже́нныя Богоневе́сты.

Велича́й, душе́ моя́, / Благослове́нную в жена́х, Пресвяты́я Тро́ицы светоно́сное селе́ние.

Велича́й, душе́ моя́, / Честне́йшую го́рних во́инств / Де́ву Пречи́стую Богоро́дицу.

Ины:

Велича́й, душе́ моя́, / честны́й Покро́в Де́вы Богоро́дицы.

Велича́й, душе́ моя́, / ко Христу́ Моле́бницу за мир, Богоро́дицу Де́ву Мари́ю.

На Введение Пресвятыя Богородицы

На 9-й песни: А́нгели, вхожде́ние Пречи́стыя зря́ще, удиви́шася, / ка́ко Де́ва вни́де во свята́я святы́х.

Посем ирмос: Я́ко одушевле́нному Бо́жию киво́ту:

Припевы к тропарям 1-го канона:

А́нгели, вхожде́ние Всечестны́я зря́ще, удиви́шася, / ка́ко со сла́вою вни́де во свята́я святы́х.

А́нгели, вхожде́ние Де́вы зря́ще, удиви́шася, / ка́ко пресла́вно вни́де во свята́я святы́х.

А́нгели и челове́цы, Де́вы вхожде́ние почти́м, / я́ко со сла́вою вни́де во свята́я святы́х.

А́нгели, вхожде́ние Де́вы зря́ще, удиви́шася, / ка́ко Богоуго́дне вни́де во свята́я святы́х.

А́нгели, взыгра́йте со святы́ми, де́вы, сликовству́йте, / и́бо Богоотрокови́ца вни́де во свята́я святы́х.

А́нгели и челове́цы, Де́ву пе́сньми возвели́чим, / Боголе́пно бо вни́де во свята́я святы́х.

Припев к тропарям 2-го канона: Велича́й, душе́ моя́, / Приведе́нную во храм Госпо́день и Благослове́нную рука́ми иере́евыми.

Вместо же, Слава: Велича́й, душе́ моя́, / Триипоста́снаго и Неразде́льнаго Божества́ держа́ву.

Вместо, И ныне: Велича́й, душе́ моя́, / честне́йшую и сла́внейшую Го́рних во́инств Де́ву, Пречи́стую Богоро́дицу.

Таже припев перваго канона: А́нгели, вхожде́ние: И катавасия: Та́инство стра́нное ви́жу:

На Рождество Христово

На 9-й песни: Величай, душе́ моя́, / честне́йшую и сла́внейшую Го́рних во́инств / Де́ву, Пречи́стую Богоро́дицу.

Посем ирмос: Та́инство стра́нное ви́жу:

Припевы к тропарям 1-го канона:

Велича́й, душе́ моя́, / от Де́вы Бо́га, пло́тию ро́ждшагося.

Велича́й, душе́ моя́, / в верте́пе ро́ждшагося Царя́.

Велича́й, душе́ моя́, / от волхво́в Бо́га покланя́емаго.

Велича́й, душе́ моя́, / от звезды́ волхво́м Возвеще́ннаго.

Велича́й, душе́ моя́, / Чи́стую Де́ву и еди́ну Богоро́дицу, / ро́ждшую Христа́ Царя́.

Волсви́ и па́стырие приидо́ша поклони́тся Христу́, / ро́ждшемуся во Вифлее́ме гра́де.

Припевы к ирмосу 2-го канона:

Днесь Де́ва ражда́ет Влады́ку / внутрь верте́па.

Днесь Влады́ка ражда́ется я́ко Младе́нец / от Ма́тере Де́вы.

Посем ирмос: Люби́ти у́бо нам:

Припевы к тропарям 2-го канона: Днесь па́стырие ви́дят Спа́са, пелена́ми обви́та / и лежа́ща во я́слех.

Днесь Влады́ка ру́бищем пелена́ется, / неося́зный, я́ко Младе́нец.

Днесь вся́ка тварь весели́тся и ра́дуется, / я́ко Христо́с роди́ся от Де́вы Отрокови́цы.

Небе́сныя си́лы ро́ждшагося Спа́са Го́спода и Влады́ку / возвеща́ют ми́ру.

Вместо же, Слава: Велича́й, душе́ моя́, / Триипоста́снаго и Неразде́льнаго Божества́ держа́ву.

Вместо, И ныне: Велича́й, душе́ моя́, / Изба́вльшую нас от кля́твы.

Таже припев перваго канона. И катавасия: Та́инство стра́нное ви́жу:

Посем втораго канона припев и катавасия: Люби́ти у́бо нам:

На Обрезание Христа Бога нашего

Месяца января в 1-й день

На 9-й песни: Велича́й, душе́ моя́, / по зако́ну пло́тию обре́завшагося Го́спода.

Посем ирмос: Я́же пре́жде со́лнца:

Припевы к тропарям 1-го канона:

Велича́й, душе́ моя́, / во осмы́й день обре́зание Прие́млюща.

Днесь Влады́ка обре́зуется пло́тию я́ко Младе́нец, / исполня́я зако́н.

Днесь Влады́ка пло́тию обре́зася, / Иису́с нарече́ся.

Припевы к тропарям канона Василия Великаго:

Велича́й, душе́ моя́, / во иера́рсех Васи́лия Вели́каго.

Велича́й, душе́ моя́, / вселе́нныя пресве́тлаго свети́льника.

Величай, душе́ моя́, / от Кесари́и Васи́лия Вели́каго.

Вместо, Слава: Велича́й, душе́ моя́, / украси́вшаго Христо́ву Це́рковь.

Вместо же, И ныне: Велича́й, душе́ моя́, / Честне́йшую Небе́сных во́инств, / Де́ву, Пречи́стую Богоро́дицу.

Таже припев перваго канона: Велича́й, душе́ моя́, / по зако́ну: и катавасия: Недоуме́ет всяк язы́к: Посем припев Богородице: Велича́й, душе́ моя́, / Честне́йшую Небе́сных во́инств: и катавасия: О, па́че ума́:

На Богоявление Господне

На 9-й песни: Велича́й, душе́ моя́, / Честне́йшую го́рних во́инств / Де́ву, Пречи́стую Богоро́дицу.

Посем ирмос: Недоуме́ет всяк язы́к:

Припевы к тропарям 1-го канона: Велича́й, душе́ моя́, / от Предте́чи Креще́ния Прося́ща.

Велича́й, душе́ моя́, / во Иорда́не Прише́дшаго крести́тися.

Велича́й, душе́ моя́, / от Оте́ческаго гла́са Свиде́тельствованна.

Велича́й, душе́ моя́, / Еди́наго от Тро́ицы, прекло́ньшаго вы́ю / и Креще́ние прие́мша.

Проро́че, прииди́ ко Мне, / простри́ ру́ку и крести́ Мя ско́ро.

Проро́че, оста́ви ны́не и крести́ Мя, хотя́ща, / испо́лнити бо приидо́х вся́ку пра́вду.

Припев к ирмосу 2-го канона:

Днесь Влады́ка преклоня́ет вы́ю / под ру́ку Предте́чеву. И ирмос: О, па́че ума́:

Припевы к тропарям 2-го канона:

Днесь Иоа́нн креща́ет Влады́ку / во струя́х Иорда́нских.

Днесь Влады́ка вода́ми погреба́ет / челове́ческий грех.

Днесь Влады́ка свы́ше свиде́тельствуется, / Сын Возлю́бленный.

Днесь Влады́ка прии́де / освяти́ти естество́ вод но́е.

Днесь Влады́ка Креще́ние прие́млет / руко́ю Предте́чевою.

Таже первый припев праздника: Велича́й, душе́ моя́: и катавасия: Недоуме́ет всяк язы́к: Посем втораго канона припев: Днесь Влады́ка: и катавасия: О, па́че ума́:

На собор Иоанна Предтечи

Месяца января в 7-й день

К тропарем Предтечевым припев: Велича́й, душе́ моя́, / во проро́цех вели́каго Предте́чу.

Прочее же как и на самый праздник Богоявления.

Трием святителем: Василию Великому, Григорию Богослову и Иоанну Златоусту.

Месяца января в 30-й день

На 9-й песни: Велича́й, душе́ моя́, / Честне́йшую Небе́сных во́инств / Де́ву, Пречи́стую Богоро́дицу.

Таже ирмос Богородичного канона. Посем тойже припев поем и к прочим Богородичным тропарем.

К каноном же святых на кийждо тропарь поем припевы сии:

Велича́й, душе́ моя́, / во иера́рсех свети́ла три вели́кая.

Велича́й, душе́ моя́, / трисия́тельныя Христо́вы Це́ркве.

Велича́й, душе́ моя́, / просвеща́ющия Христо́ву Це́рковь.

Велича́й, душе́ моя́, / Честне́йшую Небе́сных во́инств / Де́ву, Пречи́стую Богоро́дицу.

Велича́й, душе́ моя́, / Пресвя́тыя Тро́ицы три па́стыри.

Велича́й, душе́ моя́, / от Трисо́лнечнаго свети́ла три вели́кая.

Вместо, Слава: Велича́й, душе́ моя́, / Триипоста́снаго и Неразде́льнаго Божества́ держа́ву.

Вместо, И ныне: Велича́й, душе́ моя́, / Честне́йшую Небе́сных во́инств / Де́ву, Пречи́стую Богоро́дицу.

Катавасия: В зако́не се́ни и писа́ний:

На Сретение Господне

Богоро́дице Де́во, / упова́ние христиа́ном, / покры́й, соблюди́ и спаси́ на Тя упова́ющих.

Богоро́дице Де́во, / ми́ру Блага́я помо́щнице, / покры́й и соблюди́ от вся́кия ну́жды и печа́ли.

Богоно́се Симео́не, / прииди́, подыми́ Христа́, / Его́же роди́ Де́ва Чи́стая Мари́я.

Объе́млет рука́ми ста́рец Симео́н / Соде́теля Зако́на / и Влады́ку вся́ческих.

Не ста́рец Мене́ держи́т, / но Аз держу́ его́: / той бо от Мене́ отпуще́ния про́сит.

Кле́ще та́инственная, / ка́ко угль но́сиши? / ка́ко пита́еши Пита́ющаго вся? О дщи Фану́илева! / прииди́, ста́ни с на́ми / и благодари́ Христа́ Спа́са, Сы́на Бо́жия.

А́нна целому́дренная / провеща́ет стра́шная, / испове́дающи Христа́, Творца́ Не́бу и земли́.

Непостижи́мо есть / соде́янное о Тебе́ А́нгелом и челове́ком, / Ма́ти, Де́во Чи́стая.

Чи́стая голуби́ца, / Нескве́рная А́гница / А́гнца и Па́стыря прино́сит в це́рковь.

О Христе́, всех Царю́! / побе́ды на враги́ / ве́рным лю́дем Твои́м да́руй.

О Христе́, всех Царю́! / пода́ждь ми сле́зы теплы́, / да пла́чу мою́ ду́шу, ю́же зле погуби́х.

Вместо, Слава: Трисия́тельное / и Триипоста́сное Божество́ / благоче́стно да похва́лим.

Вместо, И ныне: О Деви́це Мари́е! / просвети́ мою́ ду́шу, / помраче́нную лю́те жите́йскими сластьми́.

Посем припев первый: Богоро́дице Де́во, / упова́ние христиа́ном: Катавасия: В зако́не се́ни:

На Благовещение Пресвятыя Богородицы

На 9-й песни: Благовеству́й, земле́, ра́дость ве́лию, / хвали́те, Небеса́, Бо́жию сла́ву.

Таже ирмос: Я́ко одушевле́нному:

Припев к тропарям канона тойже.

У трипеснца к тропарем припеваем: Сла́ва Тебе́, Бо́же наш, сла́ва Тебе́. К Богородичным трипеснца припев праздника.

На Вознесение Господне

На 9-й песни: Велича́й, душе́ моя́, / возне́сшагося от земли́ на Не́бо Христа́ Жизнода́вца.

Таже ирмос перваго канона: Тя па́че ума́:

Припев к тропарям 1-го канона тойже.

Припевы к тропарям 2-го канона:

А́нгели, восхожде́ние Влады́ки зря́ще, ужаса́хуся, / ка́ко со сла́вою взя́тся от земли́ на Го́рняя.

Катавасия: Ра́дуйся, Цари́це:

В Неделю Пятидесятницы

(По уставу Троице-Сергиевой Лавры и Киево-Печерской Лавры)

На 9-й песни: Апо́столи, соше́ствие Уте́шителя зря́ще, удиви́шася, / ка́ко в ви́де о́гненных язы́к яви́ся Дух Святы́й.

Таже ирмос: Не тле́ния искуше́нием ро́ждшая:

Припев к тропарям 1-го канона:

Велича́й, душе́ моя́ / и́же от Отца́ исходя́щаго Свята́го Ду́ха.

Припев к тропарям 2-го канона:

Велича́й, душе́ моя́ / в Трие́х Ли́цех су́щее Еди́но Божество́.

Катавасия: Ра́дуйся, Цари́це:

Великомученику и целителю Пантелеимону Сии припевы поются 27-го июля на Святой Афонской Горе.

На 9-й песни: Велича́й, душе́ моя́, / Честне́йшую го́рних во́инств / Де́ву, Пречи́стую Богоро́дицу.

Таже ирмос Богородичного канона.

К тропарям канона Богородицы припев тойже.

Припевы к тропарям 1-го канона:

Велича́й, душе́ моя́, / в страстоте́рпцех вели́каго свети́льника.

Велича́й, душе́ моя́, / безсре́бренников похвалу́ и украше́ние.

Велича́й, душе́ моя́, / цели́теля неду́жных, по зва́нии всех ми́лующаго.

К Богородичному тропарю: Велича́й, душе́ моя́, / Чи́стую Де́ву и Еди́ну Богоро́дицу.

Припевы к тропарям 2-го канона:

А́нгели, страда́ние твое́ зря́ще, удиви́шася, / ка́ко в те́ле, свя́те, безпло́тнаго прехва́льне победи́л еси́.

А́нгели, зря́ще тя, лесть низложи́вшаго, / ублажа́ху тебе́, твердому́дренне.

А́нгели свеселя́тся челове́ком в па́мяти Пантелеи́мона, / Тро́ице предстоя́щаго.

К Богородичному тропарю: Со А́нгелы ро́ди вси, блажи́м Тя, / Богоневе́стная Мари́е.

Таже первый припев канона Богородицы.

Посем катавасия: Всяк земноро́дный:

На Преображение Господне

На 9-й песни: Велича́й, душе́ моя́, / на Фаво́ре преобрази́вшагося Го́спода.

Таже ирмос: Рождество́ Твое́:

Припев к тропарям канона тойже.

Катавасия: Та́ин еси́, Богоро́дице, рай:

На Успение Пресвятыя Богородицы

На 9-й песни: Ро́ди вси, блажи́м Тя, / Еди́ну Богоро́дицу.

Или: А́нгели, успе́ние Пречи́стыя ви́девше, удиви́шася, / ка́ко Де́ва восхо́дит от земли́ на Не́бо.

Таже ирмос: Побежда́ются естества́ уста́вы:

Припев к тропарям 1-го канона тойже.

Припев к тропарям 2-го канона: Велича́й, душе́ моя́, / от земли́ на Не́бо честно́е преставле́ние Бо́жия Ма́тере.

Катавасия: Всяк земноро́дный: