Исповедь

Прие́мляй помышле́ния челове́ческая, до́лжен е́сть бы́ти о́браз благ всех, и возде́ржник, смире́н и доброде́телен, моля́ся на всяк час Бо́гу да пода́ст ему́ сло́во ра́зума, во е́же исправля́ти притека́ющыя к нему́. Пре́жде всех до́лжен е́сть сам пости́тися сре́ду и пято́к всего́ ле́та, я́коже Боже́ственная пра́вила повелева́ют; да от ни́хже сам и́мать, и ины́м повелева́ет твори́ти. А́ще же сам неве́жа и невозде́ржник и сластолю́бец сый, ка́ко ины́х доброде́телей мо́жет учи́ти; Но и кто неразу́мен мо́жет послу́шати его́, о ни́хже и́мать глаго́лати, зря его́ безчи́нника, и пия́ницу, и ины́х уча́ща не упива́тися, или́ и́ну не́кую доброде́тель проходи́ти, ю́же сам не твори́т; О́чи бо уше́с ве́рнейши, глаго́лет Боже́ственное писа́ние. Те́мже внима́й себе́, о духовниче́; зане́, а́ще поги́бнет еди́на овца́ нераде́ния ра́ди твоего́, (не поле Иер.48:10) от рук твои́х изы́щется. Про́клят бо (глаго́лет Писа́ние), де́ло Госпо́дне с нераде́нием творя́й. Вели́кий же Васи́лий глаго́лет: блюди́, да не убои́шися челове́ка в паде́нии его́, да не преда́си Сы́на Бо́жия в ру́це недосто́йным, да не усрами́шися кого́ от сла́вных земли́, ниже́ Самого́ диади́му нося́щаго да не причасти́ши. Боже́ственная бо пра́вила не повелева́ют недосто́йным причасти́тися, я́ко язы́чницы бо вменя́ются. А́ще ли не обратя́тся, го́ре и тем и причаща́ющым их. (на поле: Зри иере́ю). Блюди́, глаго́лет, аз ве́щи не и́мам, ты у́зриши. Сия́ и сицева́ храня́, и пре́жде всех церко́вныя догма́ты недви́жимы соблюда́я, спасе́ши себе́ и послу́шающыя тя. А́ще кто без повели́тельныя гра́мматы ме́стнаго епи́скопа де́рзнет приима́ти помышле́ния, и и́споведи: сицевы́й пра́вильно ка́знь прии́мет, я́ко престу́пник Боже́ственных пра́вил; и зане́ не то́чию себе́ погуби́, но и ели́цы у него́ испове́дашася, не испове́дани су́ть: и ели́ка связа́, или́ разреши́, не испра́влена су́ть, по шесто́му пра́вилу, и́же в Карфаге́не Собо́ра, и по четы́редесять тре́тиему того́жде Собо́ра.

Возлю́бленное в ду́се свято́е ча́до, и́мярек, бла́го прише́л глаго́л еси́ ко свято́му покая́нию; и́бо тем я́ко духо́вною купе́лию омы́еши грехи́ души́ твоея́, я́ко небе́сным врачевство́м исцеле́н бу́деши от смертоно́сных язв ея́; то́чию потщи́ся сокруши́тися се́рдцем твои́м о всех гресе́х твои́х, и ты́я Го́споду Бо́гу Твоему́, неви́димо с на́ми су́щу, предо мно́ю смире́нным, вла́сть разреше́ния от Него́ прие́мшим и́стинно испове́дати, ничто́же тля, и ничто́же прилага́я, но я́ко что соде́лал еси́, и по́мниши, та́ко и испове́дуй; зане́ утаение греха́ е́сть пре́лесть душегубная, приложе́ние же клевета́ смертоно́сная; обою́ ра́ди вси греси́ испове́дании не проща́ются. И та́йне не соверша́ющейся де́лом того́ ра́ди препя́тия, но́вый грех сме́ртный ражда́ется. Не и́маши же греха́ таи́ти и еди́наго, ни сра́ма ра́ди, зане́же и аз е́смь челове́к подобостра́стен, могущ в подо́бныя грехи́ впа́дати, и и́мам иску́сство не́мощи челове́ческия. А егда́ сам презре́в, обличи́ши тебе́ предо мно́ю еди́нем, не и́маши обличе́н бы́ти от грехо́в тех пред а́нгелы Бо́жиими и пред все́ми челове́ки на суди́щи стра́шном; а́ще же утаи́ши предо мно́ю еди́нем, то пред всемирным тогда́ Собо́ром обличе́н бу́деши, и ве́чныя ка́зни не гонзнеши. Да не утаи́ши что и боя́зни ра́ди, и́бо аз тя не и́мам озло́бити, и никогда́ никому́же греха́ твоего́ яви́ти; но и́мам тя в ду́се кро́тости врачева́ти. Во испове́дании же облича́й, а не извиняй тебе́; твоя́ грехи́, а не чужие открывай. Лиц обществующих во гресе́х с тобо́ю да не сказуеши мне, то бо е́сть зло ослабле́ние бли́жних. То́чию твоя́ грехи́ да исповедуеши, не простобеседно, но со жела́нием серде́чным, и с до́брым наме́рением, е́же впре́дь храни́тися от тем подо́бных согреше́ний; без того́ бо не мо́жет бы́ть и́стинное покая́ние. Си́це у́бо устро́ив се́рдце твое́, да́ждь сла́ву Го́сподеви; испове́ждь сам на тя беззако́ния твоя́ предо мно́ю гре́шным, да прие́м разреше́ние, свободи́шися от уз грехо́вных, очи́стишися, и исцеле́н бу́деши душе́вно благода́тию Бо́га.

Приво́дит духо́вный оте́ц хотя́щаго испове́датися еди́наго, а не два или́ мно́гия, пред ико́ну Го́спода на́шего Иису́са Христа́ непокрове́нна. И твори́т стих нача́лу. Та́же, Трисвято́е. По О́тче наш; Го́споди поми́луй, 12. Сла́ва, И ны́не: Прииди́те поклони́мся: три́жды.

Та́же, Псало́м 50: Поми́луй мя Бо́же:

И настоя́щыя тропари́ сия́, глас 6:

Поми́луй нас Го́споди, поми́луй нас: вся́каго бо отве́та недоуме́юще, сию́ Ти моли́тву я́ко Влады́це гре́шнии прино́сим: поми́луй нас.

Сла́ва: Го́споди поми́луй нас, на Тя бо упова́хом: не прогне́вайся на ны зело́, ниже́ помяни́ беззако́ний на́ших, но при́зри и ны́не, я́ко благоутро́бен, и изба́ви ны от враг на́ших; Ты бо еси́ Бог наш, и мы лю́дие Твои́, вси дела́ ру́ку Твое́ю, и и́мя Твое́ призыва́ем.

И ны́не: Милосе́рдия две́ри отве́рзи нам, Благослове́нная Богоро́дице, наде́ющиися на Тя да не поги́бнем, но да изба́вимся Тобо́ю от бед: Ты бо еси́ спасе́ние ро́да Христиа́нскаго.

Та́же, Го́споди поми́луй, 40.

Свяще́нник глаго́лет: Го́споду помо́лимся. И моли́тву сию́:

Бо́же, Спаси́телю наш, И́же проро́ком Твои́м Нафа́ном пока́явшемуся Дави́ду о свои́х согреше́ниих оставле́ние дарова́вый, и манасси́ину в покая́ние моли́тву прие́мый, Сам и раба́ Твоего́ (или́ и рабу́ Твою́), и́мярек, ка́ющагося (или́ ка́ющуюся), о ни́хже соде́ла согреше́ниих, приими́ обы́чным Твои́м человеколю́бием, презира́яй ему́ (или́ ей) вся соде́янная, оставля́яй непра́вды, и превосходя́й беззако́ния. Ты бо рекл еси́ Го́споди: хоте́нием не хощу́ сме́рти гре́шника, но я́ко е́же обрати́тися, и жи́ву бы́ти ему́: и я́ко се́дмьдесят седмери́цею оставля́ти грехи́. Поне́же я́ко вели́чество Твое́ безприкла́дное, и ми́лость Твоя́ безме́рная: а́ще бо беззако́ния на́зриши, кто постои́т; Я́ко Ты еси́ Бог ка́ющихся, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Го́споду помо́лимся. И моли́тва ина́я:

Го́споди Иису́се Христе́, Сы́не Бо́га жива́го, па́стырю и а́гнче, взе́мляй грех ми́ра, И́же заимова́ния дарова́вый двема́ должнико́ма, и гре́шнице да́вый оставле́ние грехо́в ея́. Сам Влады́ко осла́би, оста́ви, про́сти грехи́, беззако́ния, согреше́ния во́льная и нево́льная, я́же в ве́дении, и не в ве́дении, я́же в преступле́нии и преслуша́нии бы́вшая от рабо́в Твои́х сих. И а́ще что я́ко челове́цы пло́ть нося́ще и в ми́ре живу́ще от диа́вола прельсти́шася. А́ще же в сло́ве, или́ в де́ле, или́ в ве́дении, или́ в неве́дении, или́ сло́во свяще́нническое попра́ша, или́ под кля́твою свяще́нническою бы́ша, или́ под свою́ ана́фему падо́ша, или́ под кля́тву ведо́шася; Сам я́ко Благ и незло́бивый Влады́ко, сия́ рабы́ Твоя́ сло́вом разреши́тися благоволи́, проща́я им и свою́ их ана́фему и кля́тву, по вели́цей Твое́й ми́лости. Ей, Влады́ко Человеколю́бче Го́споди, услы́ши нас моля́щихся Твое́й бла́гости о рабе́х Твои́х сих, и пре́зри я́ко многоми́лостив, прегреше́ния их вся, измени́ их ве́чныя му́ки. Ты бо рекл еси́ Влады́ко: ели́ка а́ще свя́жете на земли́, бу́дут свя́зани на небеси́; и ели́ка а́ще разреши́те на земли́, бу́дут разреше́ни на небеси́. Я́ко Ты еси́ еди́н безгре́шен, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Посе́м глаго́лет к нему́: Се ча́до, Христо́с неви́димо стои́т, прие́мля испове́дание твое́, не усрами́ся, ниже́ убо́йся, и да не скры́еши что от Мене́: но не обину́яся рцы вся, ели́ка соде́лал (или́ соде́лала) еси́, да прии́меши оставле́ние от Го́спода на́шего Иису́са Христа́. Се и ико́на Его́ пред на́ми: аз же то́чию свиде́тель е́смь, да свиде́тельствую пред Ним вся, ели́ка рече́ши мне; а́ще ли что скры́еши от Мене́, сугу́б грех и́маши. Внемли́ у́бо, поне́же бо прише́л (или́ пришла́) еси́ во враче́бницу, да не неисце́лен (или́ не неисцеле́на) оти́деши. И та́ко вопроша́ет его́ (или́ ея́) приле́жно еди́но по еди́ному, и ожида́ет его́ (или́ ю̀), доне́леже отвеща́ет проти́ву коего́ждо вопроше́ния.

Пре́жде всех вопроша́ет его́ о ве́ре, глаго́ля:

Рцы ми ча́до: а́ще ве́руеши, я́ко Це́рковь кафоли́ческая апо́стольская, на восто́це насажде́ная и возраще́ная, и от восто́ка по всей вселе́нней разсе́яная, и на восто́це и досе́ле недви́жимо и непреме́нно пребыва́ющая, предаде́ и научи́; И а́ще не сумни́шися в ко́ем преда́нии;

И а́ще ве́рит правосла́вно и несумне́нно, да чтет симво́л ве́ры: Ве́рую во еди́наго бо́га. И сие́ сконча́в, вопроша́ет его́: Рцы ми ча́до: не был ли еси́ ерети́к, или́ отсту́пник; Не держа́лся ли еси́ с ни́ми, их ка́пища посеща́я, поуче́ния слу́шая, или́ кни́ги их прочи́товая; Не лю́биши ли чесого́ мирски́х, па́че Творца́ твоего́; Не лжесвиде́тельствовал ли еси́; Не преступи́л ли еси́ ко́его обе́та Бо́гу обеща́ннаго; Писа́ния Боже́ственная на кощу́ны не приимова́л ли еси́; Рцы ми, ча́до: не растли́л ли еси́ де́вства твоего́ малаки́ею; Не мала́кствуеши ли; Рцы ми: не мужело́жствовал ли еси́ кого́, или́ ин тебе́; Не соблуди́л ли еси́ со жено́ю; И с коли́цеми па́лся; И ка́я лица́ бы́ша; Пущени́ца ли, или́ име́ющая му́жа; Зане́же пады́йся с мужа́тицею, е́сть прелюбоде́й. Та́кожде и мужа́тица па́дшая со ины́м, прелюбоде́йца глаго́лется.

И па́ки вопроша́ет его́ о кровосмеше́нии.

Рцы ми ча́до: не па́лся ли еси́ в ро́де твое́м с не́коим лице́м, или́ с кумо́ю твое́ю; Сия́ су́ть глаго́лемая кровосмеше́ния. Рцы ми: не па́лся ли еси́ со ското́м, или́ со пти́цею; Не па́лся ли еси́ со жено́ю твое́ю чрез естество́; или́ обруче́ну су́щу тебе́ еще́, и пре́жде бра́ка па́лся еси́ с не́ю; Не па́лся ли еси́ со иноплеме́нным те́лом;

О́но бо запреща́ется тяжча́йше блуда́.

Рцы ми ча́до: не уби́л ли еси́ челове́ка во́лею, или́ нево́лею;

Рцы ми ча́до: не укра́л ли еси́ что, и сотворя́ше кля́тву за то; Или́ укра́де ин, а ты прия́л еси́ то; И а́ще укра́де что, да возврати́т: а егда́ то возврати́т, да тече́т ко архиере́ю прия́ти проще́ние, и сотвори́ти кано́н свой. А́ще же не сотворя́ше кля́тву, то́чию да испо́лнит, а́ще возмо́жно, кано́н та́тя. Рцы ми ча́до: не роти́лся ли еси́, и ка́ко роти́лся, во́лею или́ нево́лею, и по ну́жде; Не пре́дал ли еси́ немощна́го в ру́це си́льнаго; Не оби́диши ли кого́; Или́ оби́дел еси́ в ку́плях, или́ во ино́м чесо́м;

И а́ще оби́дел е́сть, или́ оби́дит, да пла́тит ѐ.

Рцы ми ча́до: Не чароде́йствовал ли еси́, или́ волхву́я лия́л еси́ воск, или́ о́лово; Не приводи́л ли еси́ волхва́ в дом твой, и извожда́ше ти чарова́ния; Или́ сия́ сам твори́ши, или́ сотвори́л еси́ когда́; Или́ сотвори́л еси́ волхвова́ние на вред кому́; Не превязу́еши ли живо́тная, да не сне́сть ѐ волк; или́ пре́дал еси́, и превяза́ше ти; Не превяза́л ли еси́ му́жа и жену́, или́ и́но превяза́ние не́мощи; Не но́сиши ли храни́тельная от бы́лия;

И а́ще у́бо обря́щется, я́ко творя́ше не́что от сих, или́ творя́ху ему́ ини́и, запреща́ется лет ше́сть, я́коже повелева́ют пра́вила. А худо́жник, и́же сия́ твори́т, запреща́ется я́ко уби́йца: си́речь два́десять лет, я́коже глаго́лет Вели́кий Васи́лий.

И па́ки глаго́ли:

Рцы ми ча́до: не укори́л ли еси́ роди́телей твои́х, или́ свяще́нника, или́ мона́ха, или́ ко́еголибо от челове́к; Не и́маши ли с не́киим вражду́; То да сотвори́ши любо́вь.

И́бо а́ще и́маши на кого́ вражду́, или́ за́висть, да́ры твоя́ и моли́твы не су́ть прия́тны Бо́гу; ниже́, а́ще что твори́ши Бо́га ра́ди, прия́тно е́сть.

Рцы ми ча́до: не ял ли еси́ мертвечи́ны, или́ кро́ве, или́ уда́вленное, или́ волкохи́щное, или́ пти́цею пораже́нное; Не оскверни́лся ли еси́ от ино́го чесого́, я́же запове́дана су́ть в свяще́нных пра́вилех, или́ во святу́ю 40-цу, или́ в сре́ду, или́ в пято́к от мяса́ или́ сы́ра; Не пре́дал ли еси́ не́коего челове́ка диа́волу, или́ поху́лил еси́, или́ укори́л еси́ ве́ру, или́ Зако́н, или́ не́кую хулу́ рекл еси́, или́ клял еси́ челове́ка; Не глаго́лал ли еси́ лжу, или́ клене́шися ло́жне; или́ тщесла́вуеши, или́ упива́ешися, и́хже ра́ди ду́шу и те́ло погубля́еши;

И про́чыя воспомина́ет грехи́ сме́ртныя.

Го́рдость, лихоиме́ние, блуд, за́висть, чревобе́сие, гнев, лени́вство, и вся грехи́ седми́ ма́терей ражда́ющыяся, со вся́ким разсу́дным испыта́нием сматря́я разли́чие лиц, и потому́ испыта́ние творя́. И́нако бо духо́вна, и́нако люди́на, и́нако мона́ха, и́нако ми́рска, и́нако ю́на, и́нако ста́рца.

От сих всех от ны́не до́лжен еси́ блюсти́ся, поне́же вторы́м креще́нием креща́ешися, по та́инству христиа́нскому, и да положи́ши нача́ло благо́е, помога́ющу тебе́ Бо́гу; па́че же не поглуми́ся на то́жде обраща́яся, да не твори́ши челове́ком сме́ха, сия́ бо христиа́ном не су́ть прили́чна: но че́стно, и пра́во, и благогове́йно пожи́ти да помо́жет тебе́ Бог Свое́ю благода́тию.

И егда́ сия́ вся к нему́ изрече́ши, и опа́сно испыта́еши, и он па́ки вся я́же о себе́ без студа́ откры́ет. И рече́ши ему́: Поклони́ся. Тогда́ преклоня́ет главу́ испове́дуемый, духо́вный же глаго́лет моли́тву сию́:

Го́споду помо́лимся.

Го́споди Бо́же спасе́ния рабо́в Твои́х, ми́лостиве, и ще́дре, и долготерпели́ве, ка́яйся о на́ших зло́бах, не хотя́й сме́рти гре́шника: но е́же обрати́тися, и жи́ву бы́ти ему́; сам и ны́не уми́лостивися о ра́бе Твое́м (или́ о ра́бе Твое́й), и́мярек, и пода́ждь ему́ (или́ ей) о́браз покая́ния, проще́ние грехо́в и отпуще́ние, проща́я ему́ (или́ ей) вся́кое согреше́ние, во́льное же и нево́льное: примири́, и соедини́ его́ (или́ ю̀) святе́й Твое́й Це́ркви, о Христе́ Иису́се Го́споде на́шем; с Ни́мже Тебе́ подоба́ет держа́ва и великоле́пие, ны́не и при́сно, и во ве́ки веко́в, ами́нь.

По моли́тве же разреша́ет иере́й ка́ющагося ни́зу лежа́щаго, си́це глаго́ля: Соверше́ние та́йны свята́го покая́ния.

Госпо́дь и Бог наш Иису́с Христо́с, благода́тию и щедро́тами Своего́ человеколю́бия, да про́сти т ти ча́до, и́мярек, вся согреше́ния твоя́; и аз недосто́йный иере́й, вла́стию Его́ мне да́нною, проща́ю и разреша́ю тя от всех грехо́в твои́х, во и́мя Отца́, и Сы́на, и Свята́го Ду́ха, ами́нь.

Коне́ц же разреше́ния его́ глаго́ля, иере́й зна́менует крестообра́зно десни́цею ка́ющагося. Та́же, Досто́йно е́сть: Сла́ва, И ны́не:

И отпу́ст. И твори́т поуче́ние оте́ц духо́вный к ча́ду духо́вному, по и́споведи грехо́в его́.

Ча́до мое́ в Ду́се Свя́те возлю́бленное, и́мярек, непобеди́мая ми́лость человеколю́бца Бо́га, ни еди́ному от гре́шников хотя́щая поги́бели, но вся призыва́ющая к покая́нию, насле́дия ра́ди бу́дущих благ, не оста́ви и тебе́ во гресе́х истлевати душе́вно, и унедостоятися жи́зни ве́чныя; но благоволи́ зе́ницы благоутро́бия своего́ обрати́ти на тя, и пе́рстом благода́ти Ду́ха Свята́го прикосну́тися тебе́, возбуждающи тя, е́же ти воспомяну́ти от сна грехо́внаго, воста́ти от одра́ беззако́ний, и восприя́ти изве́стнейшее врачевство́ вредов душетле́нных, покая́ние свято́е; яви́ти же неду́г свой чрез испове́дание грехо́в пред мои́м недостоинством, и восприя́ти ра́достно кано́н доблетворения о гресе́х. О сем до́лжен еси́ ты ве́лие твори́ти ему́ при́сно благода́рствие, я́ко не по грехо́м твои́м сотвори́л е́сть с тобо́ю, ни по беззако́нием твои́м возда́л е́сть тебе́, но по щедро́там бла́гости Своея́ поми́лова тя, и даде́ ти сподо́битися проще́ния согреше́ний твои́х, я́же вся я́ко прах от лица́ земли́ ве́тром, от души́ твоея́ Ду́ха Свята́го благода́тию развеяшася, я́ко прока́за неема́нова иорда́нскими вода́ми, слез твои́х ра́ди очи́стишася, и я́ко Сло́вом Госпо́дним де́сять прокажении здра́ви на телесе́х соде́яшася; та́ко душа́ твоя́ дне́сь, сло́вом разреше́ния от Го́спода нам поданнаго, безвре́дна сотвори́ся. Наконе́ц, я́коже разсла́бленный, и́же 38 лет лежа́ще при купе́ли о́вчей, Сло́вом Госпо́дним исцеле́в, услы́ша от Го́спода: се здрав был еси́, ктому́ не согреша́й. Та́ко ты его́ сама́го благода́тию, и сло́вом проще́ния мно́ю гре́шным поданнаго ти, от разслабле́ния душе́внаго свобод сый, слы́шиши от моея́ ху́дости: се здрав был еси́, ктому́ не согреша́й. Не согреша́й, глаго́лю, да честна́го би́сера благода́ти Бо́жия покая́нием обретеннаго не погуби́ши, и украше́ния да не лиши́шися Небесе́ досто́йнаго. Не согреша́й, да не угаси́ши па́ки свети́льника души́ твоея́, огне́м любви́ Бо́жия возжженнаго, в его́же сия́нии мра́чный пу́ть жи́зни сея́ удо́бь прейти́ возмо́жеши, и во страну́ немерца́ющаго све́та вни́ти удо́бно ти бу́дет; без него́ па́ки, и в пути́ сем при́сное бе́дство от сете́й вра́жиих и заблужде́ния страда́ти; и прите́кши ко две́рем черто́га жениха́ небе́снаго, ну́жда бу́дет с бу́ими де́вами, уга́сшия име́вшим свети́льники, вне того́ оста́ти. Сокраще́нне глаго́лю, не согреша́й ктому́, да не уподо́бишися ското́м несмы́сленным, по о́ной от Петра́ Свята́го при́тче поло́женной: случи́ся им и́стинная при́тча: пес возврати́ся на свою́ блево́тину, и свиния́ омы́вшися в кал ти́нный. Сицевыи бо скотоподобницы не вни́дут во Ца́рствие небе́сное. Не согреша́й у́бо впре́дь, а за преше́дшыя грехи́ ка́ятися не преста́ни; но кано́н, тебе́ наложенный, со тща́нием и благоговенством тщи́ся соверши́ти, и вы́ше того́, ели́ко ти возмо́жно е́сть, довлетвори́ти; зане́ той не по коли́честву преступле́ний, но по рассуждению не́мощей челове́ческих обыко́хом возлага́ти, упова́юще на милосе́рдие Бо́жие, и́же в невозможных, и е́же благохотети прие́млет же и венча́ет. А пребыва́я в при́сном покая́нии о гресе́х, тщи́ся блага́я делеса умножа́ти; да не то́чию ве́чныя му́ки гонзеши покая́нием, но и бесконечныя жи́зни сподо́бишися от Го́спода за благотворе́ния; от Него́ же бу́ди ти посо́бие вы́ну во всех благоначинаниях твои́х, к соверше́нию делес до́брых, ми́лость же и благослове́ние во вся дни живота́ твоего́, и в бу́дущем ве́це ве́чныя жи́зни дароване прия́ти да сподо́бишися.

Тогда́ кано́н даст ему́ проти́ву согреше́ния его́. А́ще у́бо и́мать мно́гия грехи́, даст ему́ кано́н вя́щший, си́речь, и́же и́мать мно́жайшая ле́та, и ина́я с си́ми разреша́ются.

И глаго́лет к нему́:

Ча́до, толи́ка ле́та повелева́ют Боже́ственнии и свяще́ннии зако́ни, да не причасти́шися Боже́ственных та́ин, то́чию да пие́ши агиа́сму вели́кую, (си́есть святы́х богоявле́ний во́ду), и а́ще удержи́шися от Боже́ственнаго прича́стия, разреша́тся греси́ твои́; а́ще же престу́пиши, и приобщи́шися, вторы́й Иу́да бу́деши. А́ще же изнемо́жеши к сме́рти, да причасти́шися. А́ще ли воста́неши, па́ки ста́ни во урече́нных ле́тех, и приложи́ в ме́ру, е́же содержа́ти па́ки, и ин кано́н за прича́стие, да наверши́ши ме́ру.

Внемли́ и сему́:

Отне́леже оста́вит челове́к грех, тогда́ кано́н прие́млет, по 39-му пра́вилу Васи́лиа Вели́каго, ели́ко же твори́т грех, а́ще и не причаща́ется, не вменя́ется ему́ то. Егда́ же па́ки удержи́тся на вре́мя от причаще́ния, и па́ки низпа́дает в грех, па́ки нача́ло полага́ет в кано́н.

А́ще ли случи́тся ему́ па́сти во ин грех, пре́жде соверше́ния кано́на, подоба́ет сматря́ти мно́жайшая ле́та от несоверше́нных кано́на, и секра́тых, си́речь, новоприлу́чшихся, и ка́я су́ть мно́жайшыя, ты́я да держи́т. А́ще ли па́ки по оша́янии греха́, удержа́ вре́мя от прича́стия, или́ сам о себе́, или́ от ина́го духовника́, чи́слятся и та́я ле́та в кано́н.

Внемли́ и сему́:

Егда́ обря́щется челове́к благогове́йный, и произво́лит твори́ти не́колико мета́ний на нощеде́нство по си́ле свое́й, отпусти́ ему́ еди́но ле́то от ме́ры кано́на прича́стия. А́ще же произво́лит сотвори́ти ми́лостыню по ме́ре свое́й, оста́ви ему́ и друго́е ле́то. А́ще ли пости́тся сре́ду и пято́к, по Боже́ственным пра́вилом, оста́ви ему́ и еще́ друго́е ле́то. А́ще ли и понеде́льник восхо́щет воздержа́тися от мяса́, друго́е па́ки отпусти́ ему́ ле́то, на сыр и я́ица, друго́е. Та́кожде и и́ну доброде́тель а́ще сотвори́т, друго́е па́ки отпусти́ ему́ ле́то. А́ще ли челове́к той нижа́е три́десяти лет е́сть, друго́е ле́то па́ки оста́ви ему́. А́ще же е́сть и от два́десяти нижа́е, мне́е запреща́ется. А́ще же не изво́лит напи́санных, да испо́лнит це́ло определе́нная ле́та.

Внемли́ и сему́:

Я́ко а́ще по согреше́нии восхо́щет кто бы́ти мона́х, две ча́сти да держи́т, а тре́тию ча́сть лет оста́ви ему́. А́ще же восхо́щет отити́ во о́бщее житие́, оста́ви ему́ пол. А́ще ли по прия́тии о́браза паде́т, уста́вленая да испо́лнит це́ло.

О жена́х:

От жен вопроша́ти: Еда́ ноша́ху бы́лие, во е́же не сотвори́ти отроча́, или́ а́ще ка́я напои́ ложесна́, е́же не зача́ти, или́ яде́ бы́лие, или́ пресы́тися, и изве́рже отроча́ самохо́тне; и егда́ обря́щется, я́ко не́что сотвори́, и изве́рже самохо́тне, уби́йца е́сть, и запреща́ется я́ко уби́йца. А́ще же нево́лею по ну́жди не́коей изве́рже де́тища своего́, еди́но ле́то да не причасти́тся. А нося́щая бы́лие, да оста́вит ѐ, и да запрети́тся ше́сть лет, по шестьдеся́тому пра́вилу, е́же в Тру́лле. Та́кожде и обви́тия, си́речь, шо́лки или́ кону́ры, а́ще на де́ти своя́, или́ на живо́тная возлага́ют, или́ прохо́дят чароде́йства. А́ще же яде́ бы́лие, или́ и́но что, и отрави́ ложесна́ своя́, и ктому́ де́ти не ражда́ет, я́ко уби́йца запреща́ется. А́ще же волше́бствова, да ве́сть, ко́е де́тище роди́т, или́ да позна́ет что от неве́домых, ше́сть лет да не причасти́тся, по 60-му пра́вилу Шеста́го Собо́ра. Вопроша́ет же и о ины́х гресе́х блуда́, и волше́бства и малаки́и, и уби́йства, и татьбы́, я́ко и муже́й, а наипа́че чрез естество́ с свои́ми му́жы не падошалися. А́ще же исхода́таила кому́ блуд, и та я́ко блудни́ца запреща́ется.

Ка́ко подоба́ет духо́вным отце́м стро́ити испове́дающихся им.

Пра́вило дванадеся́тое, е́же в Нике́и Пе́рваго Собо́ра, и Агки́рскаго второ́е, но и пя́тое, еще́ же и шесто́е, епи́скопом оставля́ет вла́сть, или́ умно́жити, или́ ума́лити запреще́ния, те́плее я́ве, не́жели ле́ностне покая́ние указу́ющым: да сматря́ется же сих пре́жде житие́, и е́же пото́м, или́ целому́дренно, или́ разсла́бленно живу́т, и ле́ностно, и та́ко человеколю́бие да ме́рится. А́ще же неотсту́пно держа́тся свои́х обы́чаев, и сласте́м плотски́м па́че рабо́тати восхо́щут, не́жели Го́сподеви, и ева́нгельскаго жития́ не прие́млют, ни еди́но нам о́бщее к ним сло́во. Мы бо в лю́дех непокори́вых и прекосло́вных научи́хомся слы́шати: спаса́яй, спаси́ твою́ ду́шу.

От Матфе́а, 40, соста́ва, глава́ 7.

Во днех святе́йшаго Луки́, во́ину не́коему уби́йство во́льное соде́лавшу, епи́скоп не́кий на кра́ткое вельми́ вре́мя напи́сано даде́ ему́ разреше́ние, и потяза́емь сый от Собо́ра, пра́вило предлага́ше, е́же епи́скопом попуща́ет вла́сть, или́ ослабева́ти, или́ расти́ти запреще́ния ка́ющымся. Но услы́ша, я́ко архиере́ем даде́ся у́бо сие́, но не безистязательно и преизли́шно твори́ти схожде́ние, (и я́ко паучи́нами не подоба́ет вяза́ти, я́же треми́ кодо́лами свя́зоватися должна́ су́ть). Те́мже во́ина у́бо пра́вильному запреще́нию собо́р предаде́; архиере́а же обвини́, е́же во урече́нное вре́мя литурги́и пожда́нием.