На рождение младенца

Го́споду помо́лимся.

Влады́ко Го́споди Вседержи́телю, исцеля́яй вся́кий неду́г, и вся́кую я́зю, Сам и сию́ дне́сь роди́вшую рабу́ Твою́, и́мярек, исцели́, и возста́ви ю̀ от одра́, на не́мже лежи́т; зане́, по проро́ка Дави́да словеси́, в беззако́ниих зача́хомся, и скверна́ви вси есмы́ пред Тобо́ю. Сохрани́ сию́ и сего́ младе́нца, его́же ро́ди; покры́й ю̀ под кро́вом крилу́ Твое́ю, от дне́шняго дне, да́же до после́дняго ея́ сконча́ния, моли́твами Пречи́стыя Богоро́дицы и всех святы́х: я́ко благослове́н еси́ во ве́ки веко́в, ами́нь. Го́споду помо́лимся.

Влады́ко Го́споди Бо́же наш, роди́выйся от Пречи́стыя Влады́чицы на́шея Богоро́дицы, и Присноде́вы Мари́и, и я́ко Младе́нец во я́слех возлеги́й, и я́ко де́тищ восприе́млемь бы́вый; сам и сию́ рабу́ Твою́, дне́сь роди́вшую сие́ отроча́, поми́луй, и про́сти во́льная и нево́льная ея́ прегреше́ния, и сохрани́ ю̀ от вся́каго диа́вольскаго мучи́тельства; и из нея́ рожде́ннаго младе́нца соблюди́ от вся́каго я́да, от вся́кия лю́тости, от вся́кия бу́ри сопроти́внаго, от духо́в лука́вых, дневны́х же и нощны́х. Сию́ же соблюди́ под держа́вною руко́ю Твое́ю, и да́ждь ей ско́рое воста́ние, и от скве́рны очи́сти, и боле́зни исцели́, и здра́вие и благомо́щие души́ же и те́лу да́руй, и а́нгелы све́тлыми и сия́ющими сию́ огради́; и соблюди́ от вся́каго наи́тия неви́димых духо́в, ей Го́споди, от неду́га и сла́бости, от ре́вности и за́висти, и от оче́с призо́ра, и поми́луй ю̀ и младе́нца, по вели́цей ми́лости Твое́й, и очи́сти ю̀ от теле́сныя скве́рны, и разли́чных ей находя́щих утро́бных стуже́ний, и изведи́ ю ско́рою ми́лостию Твое́ю во смире́нном ея́ те́ле во исправле́ние: и из нея́ рожде́ннаго младе́нца сподо́би поклони́тися земно́му хра́му, его́же угото́вал еси́ славосло́витися и́мени Твоему́ Свято́му.

Я́ко подоба́ет Тебе́ вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Го́споду помо́лимся.

Го́споди Бо́же наш, благоволи́вый сни́ти с Небе́с, и роди́тися от святы́я Богоро́дицы и Присноде́вы Мари́и, спасе́ния ра́ди нас гре́шных, ве́дый немощно́е челове́ческаго естества́, про́сти ра́бе Твое́й и́мярек, дне́сь роди́вшей, по мно́жеству щедро́т Твои́х. Ты бо рекл еси́ Го́споди: расти́теся, и умно́житеся, и испо́лните зе́млю, и облада́йте е́ю. Сего́ ра́ди и мы раби́ Твои́ мо́лимся, и дерза́юще незло́бивым Твои́м человеколю́бием, со стра́хом вопие́м к Ца́рствия Твоего́ Свято́му и́мени: при́зри с Небесе́ и ви́ждь не́мощь нас осужде́нных, и про́сти рабе́ Твое́й сей и́мярек, и всему́ до́му, в не́мже роди́ся отроча́, и прикосну́вшымся ей, и зде обрета́ющымся всем, я́ко Благ и Человеколю́бец Бог про́сти: я́ко еди́н и́маши вла́сть оставля́ти грехи́, моли́твами Пресвяты́я Богоро́дицы и всех святы́х Твои́х, ами́нь.

Ве́домо бу́ди, я́ко по рождестве́ во осмы́й де́нь прино́сится младе́нец от ба́бы к хра́му, и стои́т пред врата́ми хра́ма. Свяще́нник же твори́т: Благослове́н Бог наш: Трисвято́е. Пресвята́я Тро́ице: И по О́тче наш; Я́ко Твое́ е́сть Ца́рство: Та́же отпусти́тельный тропа́рь дне, или́ свята́го хра́ма. Свяще́нник же зна́менует его́ чело́, уста́ и пе́рси, и глаго́лет моли́тву:

Го́споду помо́лимся.

Го́споди Бо́же наш, Тебе́ мо́лимся, и Тебе́ про́сим, да зна́менается свет Лица́ Твоего́ на рабе́ Твое́м сем (или́ на рабе́ Твое́й сей), и́мярек, и да зна́менается крест единоро́днаго Сы́на Твоего́ в се́рдце и в помышле́ниих его́ (или́ ея́), во е́же бе́гати суеты́ ми́ра, и от вся́каго лука́ваго наве́та вра́жия, после́довати же повеле́нием Твои́м. И да́ждь Го́споди не отрече́нну пребы́ти и́мени Твоему́ Свято́му на нем (или́ на ней), совокупля́емем (или́ совокупля́емей) во вре́мя благопотре́бно святе́й Твое́й це́ркви, и соверша́емем (или́ соверша́емей) стра́шными та́йнами Христа́ Твоего́; да по за́поведем Твои́м жи́тельствовав (или́ жи́тельствовавши), и сохрани́в (или́ сохрани́вши) печа́ть неруши́му, полу́чит блаже́нство избра́нных во Ца́рствии Твое́м, благода́тию и человеколю́бием единоро́днаго Сы́на Твоего́, с ни́мже благослове́н еси́, с Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

Та́же в ру́це взем отроча́, стои́т пред враты́ хра́ма, или́ пред о́бразом Пресвяты́я Богоро́дицы, и твори́т креста́ о́браз, глаго́ля:

Ра́дуйся благода́тная Богоро́дице Де́во, из Тебе́ бо возсия́ со́лнце пра́вды Христо́с Бог наш, просвеща́яй су́щыя во тьме́: весели́ся и ты ста́рче пра́ведный, прие́мый во объя́тия свободи́теля душ на́ших, да́рующаго нам воскресе́ние.

И быва́ет отпу́ст

Подоба́ет ве́дати, я́ко рожде́нный младе́нец, а́ще у́бо немоществу́яй не ссет, но к сме́рти зрит, не подоба́ет ожида́ти, (я́коже не́цыи зле глаго́лют), шеста́го или́ осма́го дне, и та́ко креща́ти его́, но в час во́ньже роди́ся, то́кмо омы́ти его́, и а́бие крести́ти, да не сконча́ется непросвеще́н. Пяти́ бо ме́сяцев непра́здней, а́ще случи́тся от не́кия я́звы младе́нца уязви́ти, а́ки уби́йству по зако́ном и пра́вилом пови́нни су́ть; кольми́ па́че суда́ подоба́ет избега́ти рожде́нных, да не непросвеще́ни сконча́ются.

В четыредеся́тный же де́нь па́ки прино́сится отроча́ к хра́му, во е́же вцерковля́тися, си́есть, нача́ло прия́ти вводи́тися в це́рковь. Прино́сится же ма́терию уже́ очище́нною и омове́нною су́щею, предстоя́щу и хотя́щему прия́ти то по креще́нии. Свяще́нник же твори́т: Благослове́н Бог наш: Трисвято́е. Пресвята́я Тро́ице: И О́тче наш; Я́ко Твое́ е́сть Ца́рство: Та́же отпусти́тельный тропа́рь дне, или́ свята́го прилучи́вшагося.

Сла́ва, И ны́не: Моли́твами Го́споди, всех святы́х и Богоро́дицы, Твой мир да́ждь нам, и поми́луй нас, я́ко Еди́н щедр.

Прикло́нши же ей главу́ вку́пе со младе́нцем, твори́т свяще́нник креста́ зна́мение над ним, и каса́яся главы́ его́, глаго́лет моли́тву:

Го́споду помо́лимся.

Го́споди Бо́же Вседержи́телю, О́тче Го́спода На́шего Иису́са Христа́, все естество́ слове́сное же и безслове́сное сло́вом Твои́м созда́вый, и вся от не су́щих во е́же бы́ти приведы́й, Тебе́ мо́лимся, и Тебе́ про́сим: Твое́ю во́лею спасл еси́ рабу́ Твою́, и́мярек, очи́сти от вся́каго греха́, и от вся́кия скве́рны, приходя́щую ко святе́й Твое́й це́ркви, да неосужде́нно сподо́бится причасти́тися Святы́х Твои́х та́ин.

Ве́домо бу́ди, я́ко а́ще не обрета́ется в живы́х младе́нец, чте́тся да́же до зде моли́тва. Та́же возгла́сно:

Таже возглас: Я́ко Благ и Человеколю́бец Бог еси́, и Тебе́: А́ще ли жив е́сть, чти и сие́ до конца́:

И от нея́ рожде́нное отроча́ благослови́, возрасти́, освяти́, вразуми́, уцелому́дри, удоброму́дрстви; я́ко Ты приве́л еси́ ѐ, и показа́л еси́ ему́ свет чу́вственный, да и у́мнаго сподо́бится све́та, во вре́мя е́же определи́л еси́, и сопричте́тся Свято́му Твоему́ ста́ду, единоро́дным Твои́м Сыно́м; с Ни́мже благослове́н еси́, с Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

Мир всем. Главы́ ва́шя Го́сподеви приклони́те.

Моли́тва ма́тери отроча́те:

Го́споди Бо́же наш, прише́дый на спасе́ние ро́да челове́ческаго, прииди́ и на рабу́ Твою́, и́мярек, и сподо́би ю честны́м Твои́м пресви́терством, вхо́да хра́ма сла́вы Твоея́; омы́й ея́ скве́рну теле́сную, и скве́рну душе́вную во исполне́нии четы́редесяти дний; творя́й ю досто́йну и причаще́ния честна́го Те́ла и Кро́ве Твоея́. Я́ко освяти́ся и просла́вися пречестно́е и великоле́пое и́мя Твое́, со Отце́м и Святы́м Ду́хом, ны́не и при́сно, и во ве́ки веко́в, ами́нь.

Моли́тва 2, отроча́ти, его́же свяще́нник зна́менуяй мо́лится.

Го́споду помо́лимся.

Го́споди Бо́же наш, в четыредеся́тный де́нь младе́нец зако́нному хра́му принесе́нный от Мари́и неискусобра́чныя и святы́я Твоея́ ма́тере, и на объя́тиях пра́веднаго Симео́на носи́мый, Сам Влады́ко всеси́льне, и принесе́ннаго сего́ младе́нца, яви́тися Тебе́ всех Творцу́, благослови́ и на вся́кое де́ло благо́е, и Тебе́ благоуго́дное возрасти́, отгоня́я от него́ вся́кую сопроти́вную си́лу зна́мением воображе́ния Креста́ Твоего́. Ты бо еси́ храня́й младе́нцы Го́споди; да сподо́бився свята́го креще́ния, полу́чит ча́сть избра́нных Ца́рствия Твоего́, соблюда́емь с на́ми благода́тию святы́я, и единосу́щныя, и неразде́льныя Тро́ицы; Тебе́ бо подоба́ет вся́кая сла́ва, благодаре́ние, и поклоне́ние, со безнача́льным Твои́м Отце́м, и Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

Мир всем. Главы́ ва́шя Го́сподеви приклони́те.

Бо́же О́тче Вседержи́телю, велегла́снейшим проро́ком Иса́ием предвозвести́вый нам, е́же от Де́вы воплоще́ние единоро́днаго Твоего́ Сы́на, и Бо́га на́шего, И́же в после́дния дни благоволе́нием Твои́м, и соде́йствием Свята́го Ду́ха, спасе́ния ра́ди нас челове́ков, безме́рным благоутро́бием, от нея́ младе́нствовати изво́ливый, и по обы́чаю в зако́не свято́м Твое́м, по исполне́нии дней очище́ния, святи́лищу принести́ся претерпе́ и́стинный законополо́жник сый; и на объя́тиях пра́веднаго Симео́на носи́тися изво́ли, его́же та́инства проображе́ние в предрече́нном проро́це, клеща́ми у́гля явле́нное позна́хом; его́же и мы ве́рнии подража́ние благода́тию держи́м; Сам и ны́не сохраня́яй младе́нцы Го́споди, благослови́ отроча́ сие́, вку́пе с роди́тели и восприе́мники его́, и сподо́би ѐ во вре́мя благопотре́бное и водо́ю и Ду́хом отрожде́ния, сопричти́ е свято́му Твоему́ ста́ду слове́сных ове́ц, нарица́ющихся и́менем Христа́ Твоего́; я́ко Ты еси́ в вы́шних живы́й, и на смире́нныя призира́яй, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

(И а́ще младе́нец креще́н е́сть, твори́т иере́й воцерковле́ние, а́ще же ни, твори́т сие́ по креще́нии. Моли́твам же зде твори́т отпу́ст). Та́же прие́м свяще́нник отроча́, начертава́ет крест им пред враты́ хра́ма, глаго́ля: Воцерковля́ется раб Бо́жий и́мярек (или́ раба́ Бо́жия), и́мярек, во и́мя Отца́, и Сы́на, и Свята́го Ду́ха, ами́нь. Та́же вво́дит е во храм, глаго́ля: Вни́дет в дом Твой, покло́нится ко хра́му свято́му Твоему́. И вхо́дит посреде́ хра́ма, глаго́ля: Воцерковля́ется раб Бо́жий (или́ раба́ Бо́жия): Та́же глаго́лет: Посреде́ це́ркве воспое́т Тя. Та́же вво́дит пред две́рьми же́ртвенника, глаго́ля: Воцерковля́ется раб Бо́жий (или́ раба́ Бо́жия): И вво́дит е во святы́й же́ртвенник, а́ще бу́дет му́жеский пол; а́ще же же́нский, да́же до ца́рских врат, глаго́ля: Ны́не отпуща́еши раба́ Твоего́ (или́ рабу́ Твою́), Влады́ко: И по сих полага́ет е при две́рех же́ртвенника, и та́ко восприе́мник поклони́вся три́жды, взе́млет ѐ, и исхо́дит. И свяще́нник твори́т, я́ко обы́чай, отпу́ст.

Твори́т свяще́нник: Благослове́н Бог наш: Трисвято́е. Пресвята́я Тро́ице: О́тче наш: Я́ко Твое́ е́сть Ца́рство: И отпусти́тельный тропа́рь дне.

Та́же: Го́споду помо́лимся.

Влады́ко Го́споди Бо́же наш, рожде́йся от святы́я Богоро́дицы и Присноде́вы Мари́и, и во я́слех я́ко Младе́нец возлеги́й, Сам рабу́ Твою́ сию́ дне́сь су́щу во гресе́х, во уби́йство впа́дшую во́лею, или́ нево́лею, и зача́тое в ней изве́ргшую, поми́луй по вели́цей Твое́й ми́лости; и про́сти ея́ во́льная и нево́льная прегреше́ния; и сохрани́ от вся́каго диа́вольскаго козноде́йствия, и скве́рну очи́сти, боле́зни исцели́; здра́вие и благомо́щие те́лу с душе́ю ея́ Человеколю́бче да́руй; и а́нгелом све́тлым сию́ соблюди́, от вся́каго наше́ствия неви́димых де́монов, ей Го́споди, от неду́га и ослабле́ния. И очи́сти ю от теле́сныя скве́рны, и разли́чных ей находя́щих стуже́ний утро́бных, и изведи́ ю мно́гою Твое́ю ми́лостию, во смире́ннем ея́ те́ле. И возста́ви ю от одра́, на не́мже лежи́т; я́ко во гресе́х роди́хомся, и в беззако́ниих, и скверна́вы вси есмы́ пред Тобо́ю Го́споди, и со стра́хом вопие́м и глаго́лем: при́зри с Небесе́, и ви́ждь не́мощь нас осужде́нных, и про́сти рабе́ Твое́й сей, и́мярек, су́щей во гресе́х, уби́йству впа́дшей, во́лею или́ нево́лею, и в ней зача́тое изве́ргшей. И всех обрета́ющихся и прикосну́вшихся ей, по вели́цей Твое́й ми́лости, я́ко Благ и Человеколю́бец Бог поми́луй и про́сти , я́ко Ты еди́н и́маши вла́сть оставля́ти грехи́ и беззако́ния, моли́твами Пречи́стыя Твоея́ ма́тере, и всех святы́х.

Я́ко подоба́ет Тебе́ вся́кая сла́ва, че́сть и поклоне́ние, со Отце́м и Святы́м Ду́хом, ны́не и при́сно, и во ве́ки веко́в, ами́нь.

И быва́ет отпу́ст.