КАНОН БЛАГОДАРСТВЕННЫЙ

глас 4

Пресвятей Богородице, поемый

в субботу Акафиста

во святых обителех Святыя Горы⁷⁰

Песнь 1

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся све́тло торжеству́я, и воспо́ю ра́дуяся Тоя́ чудеса́.

Избра́ла еси́, Чи́стая, наро́д и ца́рский Град⁷¹, я́ко Цари́ца пра́вити и ца́рствовати над ним, да от поги́бели храни́ши ва́рвар вы́шший и чту́щий вели́чие Твое́.

Оле неизче́тных Твои́х о достоя́нии Твое́м, Всесвята́я, чуде́с, ка́ко невреди́ма, непотопля́ема соблюла́ еси́ его́, я́ко в пучи́не ва́рварскими окруже́на ветра́ми проти́вными.

Да пое́т Тебе́, Влады́чице, Дави́д, боже́ственный праоте́ц Твой: Ра́дованнаго гла́са послу́шай, Дщи, приклони́х ухо к наро́ду Твоему́, на вся́кое ле́то пою́щему благода́рственная.

Слава: Стрясла́ еси́, Влады́чице, и возмути́ла еси́ мо́ре, и в коне́ц потопи́ла еси́ корабли́, Христа́ ненави́дящия, ски́фскую поги́бель, я́коже Ага́ри [сыны]: наро́д же спасе́нный пое́т чудеса́.

И ныне: Па́жить многовре́менную, творя́щим напа́сти на град Твой, Де́во, возрази́ла еси́, лю́тым от Ага́ри, истреби́в во́инство их и в коне́ц потопи́в к до́му бежа́щих.

Песнь 3

Ирмос: Твоя́ песносло́вцы, Богоро́дице, живы́й и незави́стный исто́чниче, лик себе́ совоку́пльшия духо́вно утверди́ в Боже́ственней Твое́й сла́ве, венце́в сла́вы сподо́би.

Се язы́ком в зло́бе су́щим во́ды возшуме́ша, Чи́стая, Гра́ду Твоему́ в поги́бель кре́постию их: но я́ве си́лою Твое́ю при а́де разсе́яшася.

Лю́ди избра́нны, Де́во, язы́к свят Тебе́ я́ве и боже́ственное свяще́ние, ца́рствие избра́нное: Царьгра́д даде́ Твой Сын в достоя́ние.

Слава: Равноста́тное движе́ние пе́рсы со ски́фами подъе́мше в се́рдце свое́м я́ко ветр и бу́ря, Чи́стая, ко Гра́ду Твоему́ припадо́ша: но я́ко прах их разве́яла еси́.

И ныне: Изцеле́ сокруше́ние, Де́во, Твоея́ дще́ре⁷², и муче́ние чужды́й и ху́лник ско́ро претерпе́: коня́ бо низве́ргла еси́ и вса́дника пра́ведно.

Песнь 4

Ирмос: Неизсле́дный Бо́жий сове́т, е́же от Де́вы воплоще́ния Тебе́ Вы́шняго, проро́к Авваку́м усмотря́я, зовя́ше: сла́ва си́ле Твое́й, Го́споди.

Днесь пресла́вная ви́де, Чи́стая, Град, нача́льник градо́в, Тебе́ Де́ве воево́дствующей на враги́ на вся́кой су́ше, я́ко то́лща земли́ проседо́шася.

Ко́е Ти воздая́ние, Ма́ти Бо́жия, ны́не и́мамы возда́ти досто́йно, неключи́мии раби́, о всех и́миже нас облагоде́тельствовала еси́, те́мже от души́ Тя почита́ем.

Ага́ри исча́дия, и́мже прилага́ется Град служа́щий ни́жнему уде́лу, Влады́чице, приступи́вше я́ко вихрь к свобо́дному гра́ду Твоему́, я́ко ка́мень в пучи́не погрязо́ша.

Слава: Образы Всенепоро́чная, Твоего́ зра́ка в изображе́ниих то́чных иера́рх и все мно́жество с мольбо́ю о заступле́нии иму́ще, побе́ду на вра́ги воздвиго́ша.

И ныне: Ми́ра Тя Цари́цу Царьгра́д, над все́ми гра́дами ца́рствующий, а́ще и ве́дяще, оба́че Владычи́ца его́ [еси́], зело́ обогате́явыйся Тобо́ю, пребыва́ет врага́м непристу́пный.

Песнь 5

Ирмос: Ужасо́шася вся́ческая о Боже́ственней сла́ве Твое́й. Ты бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ безле́тнаго Сы́на, всем воспева́ющим Тя мир подава́ющая.

Ви́дно бысть сло́во, преподо́бно соверша́емое, еди́н бо погна́ ты́сящы, и два вспять двигно́ста вся тмы⁷³ в бе́гство, си́лою загради́вшеся Де́вы непобори́мою.

Ссече́ а́нгел, я́ко во изступле́нии пре́жде, Сеннахири́ма тмы, шата́вшагося на жива́го Бо́га⁷⁴; ны́не же неизче́тныя язы́ков до еди́наго умертви́ тмы Влады́чица.

Слава: Та́юще боле́зньми неуврачева́нными, ва́рвари вси, напа́дшии на насле́дие Твое́, Де́во, гла́дом и сне́дию птиц, и устраша́еми стра́шно, навыко́ша и́миже пострада́ша, я́ко Тебе́ презре́ша⁷⁵.

И ныне: Егда́ же Вы́шний язы́ки разделя́ше, я́ко да и́мут опека́ние у а́нгел, кро́вию Боже́ственною и́хже искупи́, достоя́ние ча́сти Ма́тери, Град спасе́, его́же храни́ши неруши́м.

Песнь 6

Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Ору́жие, щит и брань, врага́м попира́ющим, Богоневе́сто, достоя́ние Твое́, тще́тны и безде́льны показа́ла еси́, я́ко Градозасту́пница его́ щито́м закры́вшая.

Непра́ведно напа́дши Перси́да на Царя́ градо́в, на рабо́ту пра́ведную влады́чествующему осуди́ся, побо́рствующей тому́ Богома́тери.

Ку́пы изведе́ мо́ре, я́коже еги́птяны пре́жде, ага́рян ме́ртвых, и́хже погрузи́, напа́дшыя на насле́дие Богома́тере.

Слава: Соде́лавый Град хра́мом Тебе́, Де́во, просла́вленным, влады́ка лику́ет, ви́дяй Тя сей соблюда́ющую и тще́тно взыва́ющаго врага́ сокруши́вшую.

И ныне: Лю́дие и Град христолюби́вый изба́вльшеся стра́шнаго поглоще́ния, побо́рствующей Тебе́, ны́не благода́рственное всено́щное в неседа́льнем стоя́нии соверша́ют, сла́вяще Тя.

Песнь 7

Ирмос: He послужи́ша тва́ри богому́дрии па́че Созда́вшаго, но о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бог, благослове́н еси́.

Моле́бное Тебе́ моле́ние прино́сим, спасе́ни от стра́шнаго плене́ния, Чи́стая, изба́вится моля́щеся и от неви́димых враг, и́хже брань не в пло́ти и кро́ви есть, но уму́ супроти́вится.

Лу́цы вси си́льных сокруши́шася и изнемого́ша в себе́, немощни́и же я́ве препоя́сашася кре́постию и си́лою⁷⁶, я́ко непобори́мою разбогате́вше си́лою в упова́нии на Тя, Де́во.

Слава: Ху́льный угасе́ и истле́ язы́к пропове́дника гну́сныя же́ртвы, свы́ше бо пове́ржен бя́ше, паде́ж стра́шен, не вопия́й Ти: благослове́н, Влады́чице, Плод чре́ва Твоего́.

И ныне: Да отве́рзутся врата́ Твои́, Цари́це всех гра́дов, и да вни́дут свобо́дными нога́ми пре́жде у́зники Твои́ и су́щий в затво́ре, бию́щаго бо яре́м сокруши́ся, воево́дствующей Де́ве.

Песнь 8

Ирмос: Отроки благочести́выя в пещи́ Рождество́ Богоро́дичо спасло́ есть: тогда́ у́бо образу́емое, ны́не же де́йствуемое, вселе́нную всю воздвиза́ет пе́ти Тебе́: Го́спода по́йте дела́ и превозноси́те Его во вся ве́ки.

Пе́рсы и ми́ды, и и́же от гу́ннов, вра́жии ро́ди стяза́хуся: прииди́те и да удержи́м наро́д избра́нный, посреде́ бо них никто́же есть ца́рствуяй ны́не. Но обличи́шася в шата́нии то́чию, всех бо изъя́ла есть я́ко траву́ Де́ва.

Царь Тебе́ град, Богоро́дице, и́мже благоче́стие возмога́ет, всено́щное на вся́ко ле́то пое́т пра́вило и пра́зднует с весе́лием Царьгра́да изба́вительная и спаси́тельная я́ве, песносло́вя, Де́во, Рождество́ Твое́ стра́нное.

Слава: Разседо́шася ладии́ безбо́жников, друг на дру́га в тру́се и бу́ре гро́зней зе́льне ударя́ша, друзи́и уто́пли суть, вси до еди́наго погибо́ша и изчезо́ша, пла́чется же и племенонача́льник, ви́дяй де́ло, бы́вшыя и уцеле́вшыя мечи́.

И ныне: Погибо́ша язы́цы пресла́вно на достоя́ние Твое́ напа́дшии, воздвиго́ша уста́ бо к высоте́ небе́сней и укори́зненный их язы́к наставля́ша в зе́млю велича́ву, Де́во, я́коже Рапса́к⁷⁷, с ни́мже и истле́ша.

Песнь 9

Ирмос: Яко одушевле́нному Бо́жию киво́ту, да ника́коже ко́снется рука́ скве́рных. Устне́ же ве́рных Богоро́дице немо́лчно, глас а́нгела воспева́юще, с ра́достию да вопию́т: ра́дуйся, благода́тная, Госпо́дь с Тобо́ю.

Ди́вна Твоя́ есть ски́ния, пала́та всех Царя́, Дух бо Тя осени́, Богоро́дице, стра́шный устро́и Тя черто́г, ны́не же Град Твой сей насле́дие, но сохраня́еши сей от вра́жиих ва́рвар невреди́ма.

Ловя́тся, Богоро́дице Чи́стая, непра́ведно и́миже уловля́ша пра́ведных Град и наро́д из Перси́ды напа́вшии, на них напа́вшему стра́шно губи́тельству, воево́дствующей Тебе́, Де́во, на сих и совоево́дствующей ве́рному царю́.

Законоположи́тель пре́жде Моисе́й, вообража́яй дла́ньми Крест, наро́д Изра́илев от гну́сныя руки́ Амали́ка борца́ избавля́ет, ны́не же Кресто́м и о́бразы боже́ственными враго́в побежда́ют ру́це муже́й благочести́вых.

Слава: Яко одушевле́нным Бо́жиим киво́том избавля́емся Тобо́ю, Богороди́тельнице, в коне́ц водо́ю потопля́емей бра́ни язы́к покрыва́ющих земли́ лице́ и над хо́лмы вознося́щихся, Твои́м же потребля́емых попече́нием вско́ре, Чи́стая.

И ныне: Превозлета́ют, Богома́ти, Твоя́ чудеса́ си́лу сло́вес, кре́постию бо Твое́ю непобори́мою изба́вила еси́ иноплеме́нников нападе́ния, Чи́стая, на насле́дие Твое́, те́мже благода́рственно да вопию́ Ти: Ты еси́ мое́, Богоро́дице, избавле́ние, заступле́ние и прибе́жище.

БОГОРОДИЧНИК.

Каноны Божией Матери на каждый день.