(л. рѻ҃є)
Знамєна́нїѧ в҃ є҆пїсто́лїи къ солꙋ́нѧнѡмъ.
[а҃] Похвала̀ солꙋ́нѧнѡмъ ѡ҆ вѣ́рѣ и҆ любвѝ и҆ терпѣ́нїи.
[в҃] Ѡ҆ ѻ҆́бщей кончи́нѣ, и҆ ѡ҆ а҆нті́хрїстѣ, и҆́же тогда̀ по́сланъ бꙋ́детъ на ѡ҆бличе́нїе і҆ꙋде́ємъ не вѣ́ровавшымъ хрⷭ҇тꙋ̀.
[г҃] Бл҃годаре́нїе къ бг҃ꙋ ѡ҆ призва́нїи и҆́хъ.
[а҃] Въ не́мже бѣжде́нїе пребыва́нїѧ, и҆ моли́тва ко гдⷭ҇ꙋ і҆и҃сꙋ хрⷭ҇тꙋ̀ ѡ҆ ᲂу҆твержде́нїи и҆́хъ.
[д҃] Завѣща́нїе, ꙗ҆́кѡ да мо́лѧтсѧ ѡ҆ не́мъ, да сло́во є҆ѵⷢ҇льское тече́тъ.
[а҃] Въ не́мже моли́тва ѡ҆ ни́хъ въ любо́вь бж҃їю.
[є҃] Моле́нїе дѣ́ланїѧ, и҆ ѿлꙋче́нїе ѕлодѣ́латєль.
[ѕ҃] Моле́нїе ѡ҆ ми́рѣ, и҆́же ѿ бг҃а. (л. рѻ҃є ѡ҆б.)
Сказа́нїе къ солꙋ́нѧнѡмъ втора́гѡ посла́нїѧ ст҃а́гѡ а҆пⷭ҇ла па́ѵла.
Сїѐ посыла́етъ ѿ ри́ма, вина́ же посла́нїѧ сїѧ̀: нѣ́цыи ѿ ѳессалонїкі́и пра́здни и҆ безчи́нни, ѡ҆бходѧ́ще бра́тїю прельща́хꙋ, ꙗ҆́кѡ ᲂу҆жѐ прише́ствїю гдⷭ҇ню наста́вшꙋ. Прельща́хꙋ же слы́шащихъ, ꙗ҆́кѡ а҆пⷭ҇лꙋ сказꙋ́ющꙋ сїѐ, и҆ ѿ дх҃а слы́шавше. Сїѧ̑ ᲂу҆́бѡ ᲂу҆вѣ́дѣвъ а҆пⷭ҇лъ, пи́шетъ посла́нїе сїѐ. И҆ пе́рвѣе ᲂу҆́бѡ хва́литъ вѣ́рꙋ и҆́хъ растѧ́щꙋ, и҆ ꙗ҆́кѡ ѡ҆ ни́хъ хвалѧ́шесѧ до́блественнѣ терпѧ́щихъ скѡ́рби за хрⷭ҇та̀. Оу҆тѣша́етъ же и҆̀хъ, ꙗ҆́кѡ ѿмще́нїю хотѧ́щꙋ бы́ти и҆̀мъ ѿ бг҃а на ѡ҆би́дѧщыѧ и҆̀хъ. Та́же ѡ҆ прише́ствїи гдⷭ҇ни ᲂу҆чи́тъ, не послꙋ́шати и҆̀мъ ни є҆ди́номꙋ, нижѐ смꙋща́тисѧ, нижѐ дх҃омъ, нижѐ а҆́ки самомꙋ̀ списа́вшꙋ, нижѐ ѿню́дъ мнѣ́ти наста́вшее прише́ствїе є҆гѡ̀. Не пре́жде бо бы́ти є҆мꙋ̀, а҆́ще не ѿстꙋпле́нїе пре́жде прїи́детъ, и҆ пото́мъ а҆нті́хрїстъ сы́нъ поги́бельный, є҆гѡ́же прише́ствїе въ зна́менїихъ и҆ чꙋдесѣ́хъ ло́жныхъ, по дѣ́йствꙋ сатанинꙋ̀ бы́ти сказꙋ́етъ. Та́же завѣща́въ и҆̀мъ стоѧ́ти до́блественнѣ, и҆ держа́ти преда́нїе, и҆̀мже наꙋче́ни бы́ша ѿ негѡ̀. Повелѣва́етъ ни є҆ди́но соѻбще́нїе и҆мѣ́ти съ ходѧ́щими безчи́ннѡ, но ѿгна́ти и҆̀хъ: бы́ти бо речѐ лꙋка́вымъ, и҆ льсти́вымъ, сказа̀ сицевы́хъ. Ѿню́дъ же повелѣва́етъ не послꙋ́шающаго слове́съ є҆гѡ̀, сего̀ и҆з̾ цр҃кве и҆згна́ти. И҆ про́чее помо́льсѧ ѡ҆ ми́рѣ и҆́хъ, скончава́етъ посла́нїе, цѣлова́нїе свое́ю рꙋко́ю написа́въ, є҆́же зна́менїю бы́ти всѧ́кагѡ посла́нїѧ сказꙋ́етъ. (л. рѻ҃ѕ)
КЪ СОЛꙊ́НѦНѠМЪ ВТОРО́Е
ПОСЛА́НІЕ СТ҃А́ГѠ А҆ПО́СТОЛА ПА́ѴЛА.
Глава̀ пе́рваѧ.
(заⷱ҇ сѻ҃д) [а҃] сⷯ а҃ Па́ѵелъ и҆ сїлꙋа́нъ ꙳ Понедѣ́льникъ к҃є-ѧ недѣ́ли: Па́ѵелъ и҆ сїлꙋа́нъ꙳ и҆ тїмоѳе́й, цр҃кви солꙋ́нстѣй, ѡ҆ бз҃ѣ ѻ҆ц҃ѣ̀ на́шемъ, и҆ гдⷭ҇ѣ і҆и҃сѣ хрⷭ҇тѣ̀: в҃ Бл҃года́ть ва́мъ и҆ ми́ръ, ѿ бг҃а ѻ҆ц҃а̀ на́шегѡ, и҆ гдⷭ҇а і҆и҃са хрⷭ҇та̀. г҃ Бл҃годари́ти до́лжни є҆смы̀ бг҃а всегда̀ ѡ҆ ва́съ бра́тїе, ꙗ҆́коже досто́йно є҆́сть, ꙗ҆́кѡ превозраста́етъ вѣ́ра ва́ша, и҆ мно́житсѧ любо́вь є҆ди́нагѡ коегѡ́ждо всѣ́хъ ва́съ дрꙋ́гъ ко дрꙋ́гꙋ: д҃ Ꙗ҆́кѡ самѣ́мъ на́мъ хвали́тисѧ ѡ҆ ва́съ въ цр҃квахъ бж҃їихъ, ѡ҆ терпѣ́нїи ва́шемъ, и҆ вѣ́рѣ, во всѣ́хъ гоне́нїихъ ва́шихъ и҆ ско́рбехъ, и҆̀хже прїе́млете: є҃ Показа́нїе пра́веднагѡ сꙋда̀ бж҃їѧ, во є҆́же сподо́битисѧ ва́мъ црⷭ҇твїѧ бж҃їѧ, є҆гѡ́же ра́ди и҆ стра́ждете. ѕ҃ А҆́ще ᲂу҆́бѡ пра́ведно ᲂу҆ бг҃а, возда́ти ско́рбь ѡ҆скорблѧ́ющымъ ва́съ: з҃ А҆ ва́мъ ѡ҆скорблѧ́ємымъ ѿра́дꙋ съ на́ми, во ѿкрове́нїи гдⷭ҇а і҆и҃са съ нб҃сѐ, со а҆́гг҃лы си́лы своеѧ̀, и҃ Во ѻ҆гнѝ пла́меннѣ (л. рѻ҃ѕ ѡ҆б.) даю́щагѡ ѿмще́нїе невѣ́дꙋщымъ бг҃а, и҆ не послꙋ́шающымъ благовѣствова́нїѧ гдⷭ҇а на́шегѡ і҆и҃са хрⷭ҇та̀. ѳ҃ И҆̀же мꙋ́кꙋ прїи́мꙋтъ, поги́бель вѣ́чнꙋю, ѿ лица̀ гдⷭ҇нѧ, и҆ ѿ сла́вы крѣ́пости є҆гѡ̀: і҃ Є҆гда̀ прїи́детъ просла́витисѧ во ст҃ы́хъ свои́хъ, и҆ ди́венъ бы́ти во всѣ́хъ вѣ́ровавшихъ.
(заⷱ҇) Ꙗ҆́кѡ ᲂу҆вѣ́рисѧ ꙳ Во вто́рникъ к҃є-ѧ недѣ́ли: Бра́тїе, ᲂу҆вѣ́рисѧ ꙳ свидѣ́тельство на́ше въ ва́съ въ де́нь ѻ҆́нъ.
Коне́цъ понедѣ́льникꙋ.
а҃і За є҆́же и҆ мо́лимсѧ всегда̀ ѡ҆ ва́съ, да вы̀ сподо́битъ зва́нїю бг҃ъ на́шъ, и҆ и҆спо́лнитъ всѧ́ко бл҃говоле́нїе бла́гости, и҆ дѣ́ло вѣ́ры въ си́лѣ: в҃і Ꙗ҆́кѡ да просла́витсѧ и҆́мѧ гдⷭ҇а на́шегѡ і҆и҃са хрⷭ҇та̀ въ ва́съ, и҆ вы̀ въ не́мъ, по бл҃года́ти бг҃а на́шегѡ и҆ гдⷭ҇а і҆и҃са хрⷭ҇та̀.
Глава̀ втора́ѧ.
(заⷱ҇ сѻ҃є) [в҃] сⷯ а҃ Мо́лимъ же вы̀ бра́тїе, ꙳꙳ Въ сре́дꙋ к҃є недѣ́ли: Бра́тїе, мо́лимъ вы̀, ꙳꙳ ѡ҆ прише́ствїи гдⷭ҇а на́шегѡ і҆и҃са хрⷭ҇та̀, и҆ на́шемъ собра́нїи ѡ҆ не́мъ, в҃ Не ско́рѡ подвиза́тисѧ ва́мъ ѿ ᲂу҆ма̀, ни ᲂу҆жаса́тисѧ, нижѐ дх҃омъ, нижѐ сло́вомъ, ни посла́нїемъ а҆́ки ѿ на́съ по́сланнымъ, ꙗ҆́кѡ ᲂу҆жѐ настои́тъ де́нь хрⷭ҇то́въ.
Коне́цъ вто́рникꙋ. (л. рѻ҃з)
г҃ Да никто́же ва́съ прельсти́тъ ни по є҆ди́номꙋ же ѻ҆́бразꙋ: ꙗ҆́кѡ а҆́ще не прїи́детъ ѿстꙋпле́нїе пре́жде, и҆ ѿкры́етсѧ человѣ́къ беззако́нїѧ, сы́нъ поги́бели, д҃ Проти́вникъ, и҆ превозносѧ́йсѧ па́че всѧ́кагѡ глаго́лемагѡ бо́га и҆лѝ чти́лища: ꙗ҆́коже є҆мꙋ̀ сѣ́сти въ цр҃кви бж҃їей а҆́ки бо́гꙋ, показꙋ́ющꙋ себѐ ꙗ҆́кѡ бо́гъ є҆́сть. є҃ Не по́мните ли, ꙗ҆́кѡ є҆щѐ живы́й ᲂу҆ ва́съ, сїѧ̑ глаго́лахъ ва́мъ; ѕ҃ И҆ ны́нѣ ѡ҆держа́щее вѣ́сте, во є҆́же ꙗ҆ви́тисѧ є҆мꙋ̀ въ своѐ є҆мꙋ̀ вре́мѧ. з҃ Та́йна бо ᲂу҆жѐ дѣ́етсѧ беззако́нїѧ, то́чїю держѧ́й ны́нѣ, до́ндеже ѿ среды̀ бꙋ́детъ: и҃ И҆ тогда̀ ꙗ҆ви́тсѧ беззако́нникъ, є҆го́же гдⷭ҇ь і҆и҃съ ᲂу҆бїе́тъ дх҃омъ ᲂу҆́стъ свои́хъ, и҆ ᲂу҆праздни́тъ ꙗ҆вле́нїемъ прише́ствїѧ своегѡ̀: ѳ҃ Є҆гѡ́же є҆́сть прише́ствїе по дѣ́йствꙋ сатанинꙋ̀, во всѧ́кой си́лѣ, и҆ зна́менїихъ и҆ чꙋдесѣ́хъ ло́жныхъ: і҃ И҆ во всѧ́кой льстѝ непра́вды въ погиба́ющихъ, занѐ любвѐ и҆́стины не прїѧ́ша во є҆́же спасти́сѧ и҆̀мъ. а҃і И҆ сегѡ̀ ра́ди по́слетъ и҆̀мъ бг҃ъ дѣ́йство льстѝ, во є҆́же вѣ́ровати и҆̀мъ лжѝ: в҃і Да сꙋ́дъ прїи́мꙋтъ всѝ невѣ́ровавшїи и҆́стинѣ, но благоволи́вше въ непра́вдѣ.
Коне́цъ средѣ̀.
(заⷱ҇ сѻ҃ѕ) [г҃] г҃і Мы́ же до́лжни ꙳ Въ четверто́къ к҃є-ѧ недѣ́ли: Бра́тїе, мы̀ до́лжни꙳ є҆смы̀ благодари́ти бг҃а всегда̀ ѡ҆ ва́съ, бра́тїе возлю́блєннаѧ ѿ гдⷭ҇а: ꙗ҆́кѡ и҆збра́лъ є҆́сть ва́съ бг҃ъ ѿ нача́ла во спасе́нїе, во ст҃ы́ни дх҃а и҆ вѣ́ры и҆́стины: д҃і Въ не́же призва̀ ва́съ (л. рѻ҃з ѡ҆б.) бл҃говѣствова́нїемъ на́шимъ, въ полꙋче́нїе сла́вы гдⷭ҇а на́шегѡ і҆и҃са хрⷭ҇та̀. [а҃] є҃і Тѣ́мже ᲂу҆́бѡ бра́тїе, сто́йте, и҆ держи́те преда̑нїѧ, и҆̀мже наꙋчи́стесѧ, и҆лѝ сло́вомъ, и҆лѝ посла́нїемъ на́шимъ. ѕ҃і Са́мъ же гдⷭ҇ь на́шъ і҆и҃съ хрⷭ҇то́съ, и҆ бг҃ъ и҆ ѻ҆ц҃ъ на́шъ, возлюби́вый на́съ, и҆ да́вый ᲂу҆тѣше́нїе вѣ́чно, и҆ ᲂу҆пова́нїе бла́го въ бл҃года́ти: з҃і Да ᲂу҆тѣ́шитъ сердца̀ ва́ша, и҆ да ᲂу҆тверди́тъ ꙾ ꙾꙾ва́съ꙾ во всѧ́комъ сло́вѣ и҆ дѣ́лѣ бла́зѣ.
Глава̀ тре́тїѧ.
[д҃] сⷯ а҃ Про́чее же моли́тесѧ ѡ҆ на́съ бра́тїе, да сло́во гдⷭ҇не тече́тъ и҆ сла́витсѧ, ꙗ҆́коже и҆ въ ва́съ: в҃ И҆ да и҆зба́вимсѧ ѿ ѕлы́хъ и҆ лꙋка́выхъ человѣ̑къ: не всѣ́хъ бо є҆́сть вѣ́ра. (срⷣе) г҃ Вѣ́ренъ є҆́сть гдⷭ҇ь, и҆́же ᲂу҆тверди́тъ вы̀, и҆ сохрани́тъ ѿ лꙋка́вагѡ. д҃ Оу҆пова́емъ же на гдⷭ҇а ѡ҆ ва́съ, ꙗ҆́кѡ ꙗ҆̀же повелѣва́емъ ва́мъ, и҆ творитѐ, и҆ сотворитѐ. [а҃] є҃ Гдⷭ҇ь же да и҆спра́витъ сердца̀ ва́ша въ любо́вь бж҃їю, и҆ въ терпѣ́нїе хрⷭ҇то́во.
Коне́цъ четверткꙋ̀.
(заⷱ҇ сѻ҃з) [є҃] ѕ҃ Повелѣва́емъ же ва́мъ бра́тїе ꙳ Пѧто́къ к҃є-ѧ недѣ́ли: Бра́тїе, повелѣва́емъ ва́мъ ꙳ ѡ҆ и҆́мени гдⷭ҇а на́шегѡ і҆и҃са хрⷭ҇та̀, ѿлꙋча́тисѧ ва́мъ ѿ всѧ́кагѡ бра́та, безчи́ннѡ ходѧ́ща, а҆ не по преда́нїю, є҆́же прїѧ́ша ѿ на́съ. з҃ Са́ми бо вѣ́сте, ка́кѡ лѣ́по є҆́сть ва́мъ подо́битисѧ на́мъ, ꙗ҆́кѡ не безчи́нновахомъ ᲂу҆ ва́съ, и҃ Ни тꙋ́не хлѣ́бъ ꙗ҆до́хомъ ᲂу҆ когѡ̀: но въ трꙋдѣ̀ и҆ по́двизѣ, но́щь и҆ де́нь дѣ́лающе, да не (л. рѻ҃и) ѡ҆тѧгчи́мъ никогѡ́же ѿ ва́съ. ѳ҃ Не ꙗ҆́кѡ не и҆́мамы вла́сти, но ꙗ҆́кѡ да себѐ ѻ҆́бразъ да́мы ва́мъ, во є҆́же ᲂу҆подо́битисѧ на́мъ. і҃ И҆́бо є҆гда̀ бѣ́хомъ ᲂу҆ ва́съ, сїѐ завѣщава́хомъ ва́мъ: ꙗ҆́кѡ а҆́ще не хо́щетъ кто̀ дѣ́лати, нижѐ да ꙗ҆́стъ. а҃і Слы́шимъ бо нѣ́кїѧ безчи́ннѡ ходѧ́щыѧ ᲂу҆ ва́съ, ничто́же дѣ́лающыѧ, но лꙋка́внѡ ѡ҆бходѧ́щыѧ. в҃і Таковы̑мъ запреща́емъ, и҆ мо́лимъ ѡ҆ гдⷭ҇ѣ на́шемъ і҆и҃сѣ хрⷭ҇тѣ̀, да съ безмо́лвїемъ дѣ́лающе сво́й хлѣ́бъ ꙗ҆дѧ́тъ. г҃і Вы́ же бра́тїе, не стꙋжа́йте сѝ до́брое творѧ́ще. д҃і А҆́ще ли же кто̀ не послꙋ́шаетъ словесѐ на́шегѡ, посла́нїемъ сего̀ назна́менꙋйте, и҆ не примѣша́йтесѧ є҆мꙋ̀, да посрами́тсѧ. є҃і И҆ не а҆́ки врага̀ и҆мѣ́йте є҆го̀, но наказꙋ́йте ꙗ҆́коже бра́та. ѕ҃і Са́мъ же гдⷭ҇ь ми́ра, да да́стъ ва́мъ ми́ръ всегда̀, во всѧ́комъ ѻ҆́бразѣ. гдⷭ҇ь со всѣ́ми ва́ми. з҃і Цѣлова́нїе мое́ю рꙋко́ю па́ѵлею, є҆́же є҆́сть зна́менїе, во всѧ́комъ посла́нїи, си́це пишꙋ̀: и҃і Бл҃года́ть гдⷭ҇а на́шегѡ і҆и҃са хрⷭ҇та̀ со всѣ́ми ва́ми. а҆ми́нь.
Коне́цъ пѧткꙋ̀.
Коне́цъ втора́гѡ посла́нїѧ, є҆́же къ ѳессалоні́кѡмъ: напи́сано бы́сть ѿ а҆ѳи́нъ: и҆́мать въ себѣ̀ главы̑, г҃: зача́лъ цр҃ко́вныхъ, є҃: стїхѡ́въ м҃г: знамена́нїй че́рныхъ, ѕ҃: послѣ́дꙋющихъ же и҆̀мъ червле́ныхъ в҃.