(л. рѯ҃ѳ ѡ҆б.)
Знамєна́нїѧ къ солꙋ́нѧнѡмъ є҆пїсто́лїи, а҃.
[а҃] Похвала̀ солꙋ́нѧнѡмъ ѡ҆ досто́йныхъ подвиза́нїихъ а҆пⷭ҇льскихъ.
[в҃] Жела́нїе є҆гѡ̀ и҆ ра́дость ѡ҆ ни́хъ и҆ печа́ль, ꙗ҆́кѡ да соверша́тсѧ.
[г҃] Моли́тва къ бг҃ꙋ ѡ҆ прише́ствїи є҆гѡ̀ къ ни́мъ, и҆ растѣ́нїи и҆ ᲂу҆твержде́нїи и҆́хъ.
[д҃] Поꙋче́нїе, ꙗ҆́кѡ цѣломꙋ́дреннѡ и҆ пра́веднѡ жи́ти и҆̀мъ всегда̀.
[є҃] Оу҆че́нїе, ꙗ҆́кѡ и҆спраздни́сѧ сме́рть, въ ꙗ҆вле́нїи хрⷭ҇то́вѣ.
[ѕ҃] Ꙗ҆́кѡ внеза́пꙋ прїи́детъ хрⷭ҇то́съ: тѣ́мже подоба́етъ готѡ́вымъ бы́ти всѧ́кою добродѣ́телїю и҆ пра́ведными дѣ́лы.
[з҃] Моли́тва ѡ҆ ѡ҆сщ҃е́нїи дх҃а, и҆ дꙋшѝ и҆ тѣ́ла. (л. р҃ѻ)
Сказа́нїе къ солꙋ́нѧнѡмъ пе́рвагѡ посла́нїѧ ст҃а́гѡ а҆пⷭ҇ла па́ѵла.
Сїѐ посыла́етъ ѿ а҆ѳи́нъ, ви́дѣвъ и҆̀хъ пре́жде, и҆ пожи́въ ᲂу҆ ни́хъ. Вина́ же посла́нїѧ сїѧ̀: а҆пⷭ҇лъ мно́ги скѡ́рби претерпѣ̀ въ ве́рїи, и҆ въ фїлі́ппѣхъ, македо́нїи, и҆ въ корі́нѳѣ. вѣ́дый же є҆ли̑ка пострада̀ и҆ въ ѳессалонїкі́и, и҆ боѧ́сѧ, да не ка́кѡ слы́шавше ѳессалонїкі́ане, є҆ли̑ка пострада̀ въ предрече́нныхъ гра́дѣхъ, и҆скꙋше́ни бꙋ́дꙋтъ ѿ и҆скꙋша́ющагѡ сатаны̀, и҆ соблазнѧ́тсѧ. Є҆ще́ же ᲂу҆вѣ́дѣвъ, ꙗ҆́кѡ и҆ ѡ҆ ᲂу҆мира́ющихъ безмѣ́рнѡ скорбѧ́тъ, посыла́етъ тїмоѳе́а къ ни́мъ съ посла́нїемъ си́мъ. И҆ пе́рвѣе ᲂу҆́бѡ ᲂу҆твержда́етъ и҆̀хъ въ вѣ́рѣ, ꙗ҆́кѡ не поколеба́тисѧ и҆̀мъ скорбе́й ра́ди: и҆ ничто́же стра́нно пострада́вшымъ мнѣ́ти и҆̀мъ ѿ і҆ꙋдє́й, и҆̀же и҆ гдⷭ҇а ᲂу҆би́ша. хрⷭ҇тїа́нѡмъ бо сво́йственно є҆́сть, є҆́же скѡ́рби терпѣ́ти къ житїѝ се́мъ, глаго́летъ. Мно́гими же завѣща́въ и҆̀мъ си́це, ꙗ҆́коже прїѧ́ша ѿ негѡ̀, та́кѡ жи́тельствовати, пи́шетъ про́чее ѡ҆ ᲂу҆мира́ющихъ, ᲂу҆тѣша́ѧ и҆̀хъ, и҆ ᲂу҆чѧ̀, не вельмѝ скорбѣ́ти: нѣ́сть бо сме́рть поги́бель, но пꙋ́ть къ воскрⷭ҇нїю. Та́же и҆ ѡ҆ лѣ́тѣхъ и҆̀хъ ᲂу҆чи́тъ, да безвѣ́стенъ де́нь вѣ́дѧще, вы́нꙋ гото́ви быва́ютъ, и҆ да ни є҆ди́номꙋ внима́ютъ вѣща́ющемꙋ ѡ҆ не́мъ: бы́ти бо речѐ прише́ствїю та́кѡ, ꙗ҆́кѡ ѡ҆ста́вшымъ и҆ ѡ҆брѣта́ємымъ въ де́нь ѻ҆́нъ живы̑мъ, не предвари́ти востаю́щыѧ ѿ ме́ртвыхъ, вкꙋ́пѣ бо бы́ти всѣ́хъ премѣне́нїю ᲂу҆чи́тъ. Къ си́мъ же завѣщава́ѧ и҆̀мъ лꙋ́чшымъ быва́ти во ѻ҆бы́чаехъ, повелѣва́етъ и҆̀мъ всегда̀ ра́доватисѧ ѡ҆ ᲂу҆пова́нїи, и҆ моли́тисѧ и҆ благодари́ти и҆̀мъ всегда̀ гдⷭ҇ви, и҆ заклина́етъ и҆̀хъ прочита́ти посла́нїе сїѐ пред̾ все́ю бра́тїею, и҆ си́це скончава́етъ є҆̀. (л. р҃ѻ ѡ҆б.)
КЪ СОЛꙊ́НѦНѠМЪ ПЕ́РВОЕ
ПОСЛА́НІЕ СТ҃А́ГѠ А҆ПО́СТОЛА ПА́ѴЛА.
Глава̀ пе́рваѧ.
(заⷱ҇ сѯ҃в) сⷯ а҃ Па́ѵелъ ꙳ Въ понедѣ́льникъ к҃г-ѧ недѣ́ли: Па́ѵелъ ꙳ и҆ сїлꙋа́нъ и҆ тїмоѳе́й, цр҃кви солꙋ́нстѣй, ѡ҆ бз҃ѣ ѻ҆ц҃ѣ̀, и҆ гдⷭ҇ѣ і҆и҃сѣ хрⷭ҇тѣ̀: бл҃года́ть ва́мъ и҆ ми́ръ ѿ бг҃а ѻ҆ц҃а̀ на́шегѡ, и҆ гдⷭ҇а і҆и҃са хрⷭ҇та̀. [а҃] в҃ Благодари́мъ бг҃а всегда̀ ѡ҆ всѣ́хъ ва́съ, помина́нїе ва́ше творѧ́ще въ моли́твахъ на́шихъ: г҃ Непреста́ннѡ помина́юще ва́ше дѣ́ло вѣ́ры, и҆ трꙋ́дъ любвѐ, и҆ терпѣ́нїе ᲂу҆пова́нїѧ гдⷭ҇а на́шегѡ і҆и҃са хрⷭ҇та̀, пред̾ бг҃омъ и҆ ѻ҆ц҃е́мъ на́шимъ. д҃ Вѣ́дѧще бра́тїе возлю́бленнаѧ, ѿ бг҃а и҆збра́нїе ва́ше: є҃ Ꙗ҆́кѡ благовѣствова́нїе на́ше не бы́сть къ ва́мъ въ сло́вѣ то́чїю, но и҆ си́лою, и҆ дх҃омъ ст҃ы́мъ, и҆ во и҆звѣще́нїи мно́зѣ: ꙗ҆́коже и҆ вѣ́сте, каковѝ бы́хомъ въ ва́съ, ра́ди ва́съ.
Коне́цъ понедѣ́льникꙋ.
(заⷱ҇ сѯ҃г) ѕ҃ И҆ вы̀ ꙳꙳ Въ вто́рникъ к҃г-ѧ недѣ́ли: Бра́тїе, вы̀ ꙳꙳ подо́бницы бы́сте на́мъ и҆ гдⷭ҇ꙋ, прїе́мше сло́во въ ско́рби мно́зѣ, съ ра́достїю дх҃а ст҃а́гѡ: (л. рѻ҃а) з҃ Ꙗ҆́кѡ бы́ти ва́мъ ѻ҆́бразъ всѣ́мъ вѣ́рꙋющымъ въ македо́нїи и҆ а҆ха́їи. и҃ Ѿ ва́съ бо промче́сѧ сло́во гдⷭ҇не, не то́кмѡ въ македо́нїи и҆ а҆ха́їи: но и҆ во всѧ́ко мѣ́сто вѣ́ра ва́ша, ꙗ҆́же къ бг҃ꙋ, и҆зы́де: ꙗ҆́кѡ не тре́бовати на́мъ глаго́лати что̀. ѳ҃ Ті́и бо ѡ҆ на́съ возвѣща́ютъ, како́въ вхо́дъ и҆мѣ́хомъ къ ва́мъ, и҆ ка́кѡ ѡ҆брати́стесѧ къ бг҃ꙋ ѿ і҆́дѡлъ, рабо́тати бг҃ꙋ жи́вꙋ и҆ и҆́стиннꙋ: і҃ И҆ жда́ти сн҃а є҆гѡ̀ съ нб҃съ, є҆го́же воскресѝ и҆з̾ ме́ртвыхъ, і҆и҃са и҆збавлѧ́ющаго на́съ ѿ гнѣ́ва грѧдꙋ́щагѡ.
Коне́цъ вто́рникꙋ.
Глава̀ втора́ѧ.
(заⷱ҇ сѯ҃д) сⷯ а҃ Са́ми бо вѣ́сте бра́тїе ꙳ Въ сре́дꙋ к҃г-ѧ недѣ́ли: Бра́тїе, вѣ́сте ꙳ вхо́дъ на́шъ и҆́же къ ва́мъ, ꙗ҆́кѡ не вотщѐ бы́сть: в҃ Но предпострада́вше и҆ досажде́ни бы́вше, ꙗ҆́коже вѣ́сте, въ фїлі́ппѣхъ, дерзнꙋ́хомъ ѡ҆ бз҃ѣ на́шемъ, глаго́лати къ ва́мъ благовѣствова́нїе бж҃їе со мно́гимъ по́двигомъ. г҃ Оу҆тѣше́нїе бо на́ше, не ѿ пре́лести, нѝ ѿ нечистоты̀, ни ле́стїю: д҃ Но ꙗ҆́коже и҆скꙋси́хомсѧ ѿ бг҃а вѣ́рни бы́ти прїѧ́ти благовѣствова́нїе, та́кѡ глаго́лемъ, не а҆́ки человѣ́кѡмъ ᲂу҆гожда́юще, но бг҃ꙋ и҆скꙋша́ющемꙋ сердца̀ на́ша. є҃ Никогда́же бо въ словесѝ ласка́нїѧ бы́хомъ къ ва́мъ, ꙗ҆́коже вѣ́сте, нижѐ вино́ю лихоима́нїѧ: бг҃ъ свидѣ́тель. ѕ҃ Ни и҆́щꙋще ѿ человѣ̑къ сла́вы, ни ѿ ва́съ, ни ѿ и҆нѣ́хъ: з҃ Могꙋ́ще въ тѧготѣ̀ бы́ти, ꙗ҆́коже хрⷭ҇то́вы а҆пⷭ҇толи, но (л. рѻ҃а ѡ҆б.) бы́хомъ ти́си посредѣ̀ ва́съ, ꙗ҆́коже дои́лица грѣ́етъ своѧ̀ ча̑да: и҃ Та́кѡ жела́юще ва́съ, благоволи́хомъ пода́ти ва́мъ не то́чїю благовѣствова́нїе бж҃їе, но и҆ дꙋ́шы своѧ̀: зане́же возлю́блени бы́сте на́мъ.
Коне́цъ средѣ̀.
(заⷱ҇ сѯ҃є) ѳ҃ По́мните бо бра́тїе ꙳ Въ четверто́къ к҃г-ѧ недѣ́ли: Бра́тїе, по́мните ꙳ трꙋ́дъ на́шъ, и҆ по́двигъ: но́щь бо и҆ де́нь дѣ́лающе, ꙗ҆́кѡ не ѡ҆тѧготи́ти ни є҆ди́нагѡ ѿ ва́съ, проповѣ́дахомъ ва́мъ бл҃говѣствова́нїе бж҃їе. і҃ Вы̀ свидѣ́тели, и҆ бг҃ъ, ꙗ҆́кѡ преподо́бнѡ и҆ пра́веднѡ и҆ непоро́чнѡ ва́мъ вѣ́рꙋющымъ бы́хомъ: а҃і Ꙗ҆́коже вѣ́сте, занѐ є҆ди́наго кого́ждо ва́съ, ꙗ҆́коже ѻ҆ц҃ъ ча̑да своѧ̀, в҃і Молѧ́ще и҆ ᲂу҆тѣша́юще ва́съ, и҆ свидѣ́тельствꙋюще ва́мъ ходи́ти досто́йнѡ бг҃ꙋ, призва́вшемꙋ вы̀ во своѐ црⷭ҇тво и҆ сла́вꙋ. г҃і Сегѡ̀ ра́ди и҆ мы̀ бл҃годари́мъ бг҃а непреста́ннѡ, ꙗ҆́кѡ прїе́мше сло́во слы́шанїѧ бж҃їѧ ѿ на́съ, прїѧ́сте не а҆́ки сло́во человѣ́ческо, но [ꙗ҆́коже є҆́сть вои́стиннꙋ] сло́во бж҃їе, є҆́же и҆ дѣ́йствꙋетсѧ въ ва́съ вѣ́рꙋющихъ.
(заⷱ҇ сѯ҃ѕ) д҃і Вы́ бо подо́бницы бы́сте бра́тїе, ꙳꙳ Въ пѧто́къ к҃г-ѧ недѣ́ли: Бра́тїе, вы̀ подо́бницы бы́сте ꙳꙳ цр҃квамъ бж҃їимъ сꙋ́щымъ во і҆ꙋде́и, ѡ҆ хрⷭ҇тѣ̀ і҆и҃сѣ.
Коне́цъ четверткꙋ̀.
занѐ та̑ѧжде и҆ вы̀ пострада́сте ѿ свои́хъ сплемє́нникъ, ꙗ҆́коже и҆ ті́и ѿ і҆ꙋдє́й: є҃і И҆ ᲂу҆би́вшихъ гдⷭ҇а і҆и҃са, и҆ є҆гѡ̀ проро́ки, и҆ на́съ и҆згна́вшихъ, и҆ бг҃ꙋ (л. рѻ҃в) неꙋгоди́вшихъ, и҆ всѣ́мъ человѣ́кѡмъ проти́вѧщихсѧ: ѕ҃і И҆ возбранѧ́ющихъ на́мъ глаго́лати ꙗ҆зы́кѡмъ, да спасꙋ́тсѧ, во є҆́же и҆спо́лнити и҆̀мъ грѣхѝ своѧ̀ всегда̀: пости́же же на ни́хъ гнѣ́въ до конца̀. [в҃] з҃і Мы́ же бра́тїе ѡ҆сиротѣ́вше ѿ ва́съ ко вре́мени часа̀, лице́мъ а҆ не се́рдцемъ, ли́шше тща́хомсѧ лицѐ ва́ше ви́дѣти мно́гимъ жела́нїемъ. и҃і Тѣ́мже хотѣ́хомъ прїитѝ къ ва́мъ, а҆́зъ ᲂу҆́бѡ па́ѵелъ є҆ди́ною и҆ два́жды, и҆ возбранѝ на́мъ сатана̀. ѳ҃і Кто́ бо на́мъ ᲂу҆пова́нїе, и҆лѝ ра́дость, и҆лѝ вѣне́цъ похвале́нїѧ, не и҆ вы́ ли пред̾ гдⷭ҇емъ на́шимъ і҆и҃съ хрⷭ҇то́мъ, во прише́ствїи є҆гѡ̀;
Коне́цъ пѧткꙋ̀.
(заⷱ҇ сѯ҃з) Вы́ бо є҆стѐ ꙳ Въ понедѣ́льникъ к҃д-ѧ недѣ́ли: Бра́тїе, вы̀ є҆стѐ ꙳ сла́ва на́ша и҆ ра́дость.
Глава̀ тре́тїѧ.
сⷯ а҃ Тѣ́мже ᲂу҆жѐ не терпѧ́ще, благоволи́хомъ ѡ҆ста́тисѧ во а҆ѳи́нѣхъ є҆ди́ни. в҃ И҆ посла́хомъ тїмоѳе́а бра́та на́шего, и҆ слꙋжи́телѧ бж҃їѧ, и҆ споспѣ́шника на́шего во благовѣ́стїи хрⷭ҇то́вѣ, ᲂу҆тверди́ти ва́съ и҆ ᲂу҆тѣ́шити ѡ҆ вѣ́рѣ ва́шей: г҃ Ꙗ҆́кѡ ни є҆ди́номꙋ смꙋща́тисѧ въ ско́рбехъ си́хъ: са́ми бо вѣ́сте, ꙗ҆́кѡ на сїѐ и҆́стое ꙾лежи́мъ꙾꙾ᲂу҆чине́ни є҆смы̀꙾. д҃ И҆́бо є҆гда̀ ᲂу҆ ва́съ бѣ́хомъ, предреко́хомъ ва́мъ, ꙗ҆́кѡ и҆́мамы скорбѣ́ти, є҆́же и҆ бы́сть, и҆ вѣ́сте. є҃ Сегѡ̀ ра́ди и҆ а҆́зъ ктомꙋ̀ не терпѧ̀, посла́хъ разꙋмѣ́ти (л. рѻ҃в ѡ҆б.) вѣ́рꙋ ва́шꙋ, да не ка́кѡ и҆скꙋси́лъ вы̀ бꙋ́детъ и҆скꙋша́ѧй, и҆ вотщѐ бꙋ́детъ трꙋ́дъ на́шъ. ѕ҃ Ны́нѣ же прише́дшꙋ тїмоѳе́ю къ на́мъ ѿ ва́съ, и҆ благовѣсти́вшꙋ на́мъ вѣ́рꙋ ва́шꙋ и҆ любо́вь, и҆ ꙗ҆́кѡ и҆́мате па́мѧть ѡ҆ на́съ бла́гꙋ, всегда̀ жела́юще на́съ ви́дѣти, ꙗ҆́коже и҆ мы̀ ва́съ. з҃ Сегѡ̀ ра́ди ᲂу҆тѣ́шихомсѧ бра́тїе ѡ҆ ва́съ, во всѧ́кой ско́рби и҆ нꙋ́ждѣ на́шей, ва́шею вѣ́рою. и҃ Ꙗ҆́кѡ мы̀ ны́нѣ жи́ви є҆смы̀, а҆́ще вы̀ стоитѐ ѡ҆ гдⷭ҇ѣ.
Коне́цъ понедѣ́льникꙋ.
(заⷱ҇ сѯ҃и) ѳ҃ Ко́е бо бл҃годаре́нїе ꙳ Вто́рникъ к҃д недѣ́ли: Бра́тїе, ко́е благодаре́нїе ꙳ бг҃ꙋ мо́жемъ возда́ти ѡ҆ ва́съ, ѡ҆ всѧ́кой ра́дости, є҆́юже ра́дꙋемсѧ ва́съ ра́ди, пред̾ бг҃омъ на́шимъ; і҃ Но́щь и҆ де́нь преизли́ха молѧ́щесѧ ви́дѣти лицѐ ва́ше, и҆ соверши́ти лише́нїе вѣ́ры ва́шеѧ. [г҃] а҃і Са́мъ же бг҃ъ и҆ ѻ҆ц҃ъ на́шъ и҆ гдⷭ҇ь на́шъ і҆и҃съ хрⷭ҇то́съ, да и҆спра́витъ пꙋ́ть на́шъ къ ва́мъ. в҃і Ва́съ же гдⷭ҇ь да ᲂу҆мно́житъ, и҆ да и҆збы́точествитъ любо́вїю дрꙋ́гъ ко дрꙋ́гꙋ, и҆ ко всѣ́мъ, ꙗ҆́коже и҆ мы̀ къ ва́мъ: г҃і Во є҆́же ᲂу҆тверди́ти сердца̀ ва́ша непорѡ́чна въ ст҃ы́ни, пред̾ бг҃омъ и҆ ѻ҆ц҃е́мъ на́шимъ, въ прише́ствїе гдⷭ҇а на́шегѡ і҆и҃са хрⷭ҇та̀ со всѣ́ми ст҃ы́ми є҆гѡ̀. а҆ми́нь.
Коне́цъ вто́рникꙋ.
Глава̀ четве́ртаѧ.
(заⷱ҇ сѯ҃ѳ) сⷯ а҃ Тѣ́мже ᲂу҆́бѡ бра́тїе, про́симъ вы̀ ꙳꙳ Въ сре́дꙋ к҃д недѣ́ли: Бра́тїе, про́симъ вы̀ ꙳꙳ и҆ мо́лимъ ѡ҆ хрⷭ҇тѣ̀ і҆и҃сѣ: да ꙗ҆́коже прїѧ́сте ѿ на́съ, ка́кѡ подоба́етъ ва́мъ ходи́ти и҆ ᲂу҆гожда́ти (л. рѻ҃г) бг҃ови, та́кожде и҆ ходи́те, да и҆збы́точествꙋете па́че: (втоⷬ҇) в҃ Вѣ́сте бо какова̀ повелѣ̑нїѧ да́хомъ ва́мъ, гдⷭ҇емъ і҆и҃сомъ. г҃ Сїѧ́ бо є҆́сть во́лѧ бж҃їѧ, ст҃ость ва́ша, храни́ти себѐ самѣ́хъ ѿ блꙋда̀: д҃ И҆ вѣ́дѣти комꙋ́ждо ѿ ва́съ сво́й сосꙋ́дъ стѧжава́ти во ст҃ы́ни и҆ че́сти: є҃ А҆ не въ стра́сти по́хотнѣй, ꙗ҆́коже и҆ ꙗ҆зы́цы не вѣ́дѧщїи бг҃а. ѕ҃ И҆ є҆́же не престꙋпа́ти и҆ лихои́мствовати въ ве́щи бра́та своегѡ̀: занѐ мсти́тель є҆́сть гдⷭ҇ь ѡ҆ всѣ́хъ си́хъ, ꙗ҆́коже и҆ пре́жде реко́хомъ къ ва́мъ, и҆ засвидѣ́тельствовахомъ. з҃ Не призва́ бо на́съ бг҃ъ на нечистотꙋ̀, но во ст҃ость. [д҃] и҃ Тѣ́мже ᲂу҆́бѡ ѿмета́ѧй, не человѣ́ка ѿмета́етъ, но бг҃а, да́вшаго дх҃ъ сво́й ст҃ы́й въ на́съ. ѳ҃ Ѡ҆ братолю́бїи же, не тре́бꙋете, да пи́шетсѧ къ ва́мъ: са́ми бо вы̀ бг҃омъ ᲂу҆че́ни є҆стѐ, є҆́же люби́ти дрꙋгъдрꙋ́га: і҃ И҆́бо творитѐ то̀ ко все́й бра́тїи, сꙋ́щей во все́й македо́нїи. мо́лимъ же вы̀ бра́тїе, и҆збы́точествовати па́че, а҃і И҆ любе́знѡ прилѣжа́ти є҆́же безмо́лвствовати, и҆ дѣ́ѧти своѧ̑, и҆ дѣ́лати свои́ми рꙋка́ми, ꙗ҆́коже повелѣ́хомъ ва́мъ: в҃і Да хо́дите бл҃гоѻбра́знѡ ко внѣ́шнимъ, и҆ ни є҆ди́нагѡ же тре́бовати.
Коне́цъ средѣ̀.
(заⷱ҇ с҃ѻ) [є҃] г҃і Не хощꙋ́ же ва́съ бра́тїе ꙳ Сїе́ же мє́ртвымъ: Бра́тїе, не хощꙋ̀ ва́съ ꙳ невѣ́дѣти ѡ҆ ᲂу҆ме́ршихъ, да не скорбитѐ, ꙗ҆́коже и҆ про́чїи не и҆мꙋ́щїи ᲂу҆пова́нїѧ. д҃і А҆́ще бо вѣ́рꙋемъ, ꙗ҆́кѡ і҆и҃съ ᲂу҆́мре и҆ воскре́се, та́кѡ и҆ бг҃ъ ᲂу҆ме́ршыѧ ѡ҆ і҆и҃сѣ (л. рѻ҃г ѡ҆б.) приведе́тъ съ ни́мъ. є҃і Сїе́ бо ва́мъ глаго́лемъ сло́вомъ гдⷭ҇нимъ: ꙗ҆́кѡ мы̀ живꙋ́щїи ѡ҆ста́вшїи въ прише́ствїе гдⷭ҇не, не и҆́мамы предвари́ти ᲂу҆ме́ршихъ. ѕ҃і Ꙗ҆́кѡ са́мъ гдⷭ҇ь въ повелѣ́нїи, во гла́сѣ а҆рха́гг҃ловѣ, и҆ въ трꙋбѣ̀ бж҃їи сни́детъ съ нб҃сѐ, и҆ ме́ртвїи ѡ҆ хрⷭ҇тѣ̀ воскре́снꙋтъ пе́рвѣе. з҃і Пото́мъ же мы̀ живꙋ́щїи ѡ҆ста́вшїи, кꙋ́пнѡ съ ни́ми восхище́ни бꙋ́демъ на ѻ҆́блацѣхъ, въ срѣ́тенїе гдⷭ҇не на воздꙋ́сѣ: и҆ та́кѡ всегда̀ съ гдⷭ҇емъ бꙋ́демъ.
Коне́цъ мє́ртвымъ.
и҃і Тѣ́мже ᲂу҆тѣша́йте дрꙋгъдрꙋ́га въ словесѣ́хъ си́хъ.
Глава̀ пѧ́таѧ.
(заⷱ҇ сѻ҃а) [ѕ҃] сⷯ а҃ А҆ ѡ҆ лѣ́тѣхъ и҆ ѡ҆ временѣ́хъ бра́тїе, ꙳ Въ четверто́къ к҃д недѣ́ли: Бра́тїе, ѡ҆ лѣ́тѣхъ и҆ ѡ҆ временѣ́хъ ꙳ не тре́бѣ є҆́сть ва́мъ писа́ти. в҃ Са́ми бо вы̀ и҆звѣ́стнѡ вѣ́сте, ꙗ҆́кѡ де́нь гдⷭ҇нь, ꙗ҆́коже та́ть въ нощѝ, та́кѡ прїи́детъ. г҃ Є҆гда́ бо рекꙋ́тъ ми́ръ и҆ ᲂу҆твержде́нїе, тогда̀ внеза́пꙋ нападе́тъ на ни́хъ всегꙋби́тельство, ꙗ҆́коже и҆ болѣ́знь во чре́вѣ и҆мꙋ́щей: и҆ не и҆́мꙋтъ и҆збѣжа́ти. д҃ Вы́ же бра́тїе, нѣ́сте во тмѣ̀, да де́нь ва́съ ꙗ҆́коже та́ть пости́гнетъ. є҃ Вси́ бо вы̀ сы́нове свѣ́та є҆стѐ, и҆ сы́нове днѐ: нѣ́смы но́щи, нижѐ тмы̀. ѕ҃ Тѣ́мже ᲂу҆́бѡ да не спи́мъ ꙗ҆́коже и҆ про́чїи, но да бо́дрствꙋимъ и҆ трезви́мсѧ: з҃ Спѧ́щїи бо, въ нощѝ спѧ́тъ, и҆ ᲂу҆пива́ющїисѧ, въ нощѝ ᲂу҆пива́ютсѧ. и҃ Мы́ же сы́нове (л. рѻ҃д) сꙋ́ще днѐ, да трезви́мсѧ, ѡ҆бо́лкшесѧ въ броню̀ вѣ́ры и҆ любвѐ, и҆ шле́мъ ᲂу҆пова́нїѧ спасе́нїѧ.
Коне́цъ четверткꙋ̀.
(заⷱ҇ сѻ҃в) ѳ҃ Ꙗ҆́кѡ не положѝ ꙳ Въ пѧто́къ к҃д недѣ́ли: Бра́тїе, не положѝ ꙳ на́съ бг҃ъ въ гнѣ́въ, но въ полꙋче́нїе спасе́нїѧ, гдⷭ҇емъ на́шимъ і҆и҃съ хрⷭ҇то́мъ, і҃ Оу҆ме́ршимъ за на́съ: да а҆́ще бди́мъ, а҆́ще ли спи́мъ, кꙋ́пнѡ съ ни́мъ и҆ ѡ҆живе́мъ. а҃і Сегѡ̀ ра́ди ᲂу҆тѣша́йте дрꙋгъдрꙋ́га, и҆ созида́йте ко́йждо бли́жнѧго, ꙗ҆́коже и҆ творитѐ. в҃і Мо́лимъ же вы̀ бра́тїе, зна́йте трꙋжда́ющихсѧ ᲂу҆ ва́съ, и҆ настоѧ́телей ва́шихъ ѡ҆ гдⷭ҇ѣ, и҆ наказꙋ́ющихъ вы̀. г҃і И҆ и҆мѣ́йте ѧ҆̀ по преизли́ха въ любвѝ, за дѣ́ло и҆́хъ ми́рствꙋйте въ себѣ̀.
Престꙋпѝ пѧткꙋ̀.
(заⷱ҇ сѻ҃г) д҃і Мо́лимъ же вы̀ бра́тїе, ꙳꙳ Сꙋббѡ́та л҃в: Бра́тїе, мо́лимъ вы̀, ꙳꙳ вразꙋмлѧ́йте безчи̑нныѧ, ᲂу҆тѣша́йте малодꙋ́шныѧ, застꙋпа́йте немощны́ѧ, долготерпи́те ко всѣ́мъ. є҃і Блюди́те, да никто́же ѕла̀ за ѕло̀ комꙋ̀ возда́стъ: но всегда̀ до́брое гони́те, и҆ дрꙋ́гъ ко дрꙋ́гꙋ, и҆ ко всѣ́мъ. ѕ҃і Всегда̀ ра́дꙋйтесѧ: з҃і Непреста́ннѡ моли́тесѧ. и҃і Ѡ҆ все́мъ благодари́те: сїѧ́ бо є҆́сть во́лѧ бж҃їѧ ѡ҆ хрⷭ҇тѣ̀ і҆и҃сѣ въ ва́съ. ѳ҃і Дх҃а не ᲂу҆гаша́йте: к҃ Проро́чествїѧ не ᲂу҆ничижа́йте: к҃а Всѧ̑ же и҆скꙋша́юще, дѡ́браѧ держи́те. к҃в ꙾Ѿ всѧ́кїѧ ве́щи ѕлы́ѧ꙾꙾ѿ всѧ́кагѡ ви́да ѕла́гѡ꙾ ѿгреба́йтесѧ. к҃г Са́мъ же бг҃ъ ми́ра да ѡ҆свѧти́тъ вы̀, всесоверше́ны ѡ҆ все́мъ: и҆ всесоверше́нъ ва́шъ дх҃ъ, и҆ дꙋша̀, и҆ тѣ́ло непоро́чно, въ прише́ствїе гдⷭ҇а на́шегѡ і҆и҃са хрⷭ҇та̀ да сохрани́тсѧ.
Коне́цъ сꙋббѡ́тѣ. (л. рѻ҃д ѡ҆б.)
Чтѝ пѧткꙋ̀:
к҃д Вѣ́ренъ призва́вый ва́съ, и҆́же и҆ сотвори́тъ. к҃є Бра́тїе, моли́тесѧ и҆ ѡ҆ на́съ. к҃ѕ Цѣлꙋ́йте бра́тїю всю̀ лобза́нїемъ ст҃ы́мъ. к҃з Заклина́ю вы̀ гдⷭ҇емъ, прочестѝ посла́нїе сїѐ пред̾ все́ю ст҃о́ю бра́тїею. к҃и Бл҃года́ть гдⷭ҇а на́шегѡ і҆и҃са хрⷭ҇та̀ съ ва́ми. а҆ми́нь.
Коне́цъ пѧткꙋ̀.
Коне́цъ пе́рвагѡ посла́нїѧ, є҆́же къ ѳессалоні́кѡмъ: напи́сано бы́сть ѿ а҆ѳи́нъ: и҆́мать въ себѣ̀ гла́въ, є҃: зача́лъ цр҃ко́вныхъ, в҃і: стїхѡ́въ, п҃ѳ: знамена́нїй че́рныхъ, з҃: без̾ червле́ныхъ.