(л. р҃м ѡ҆б.)
Знамєна́нїѧ къ гала́тѡмъ посла́нїѧ.
[а҃] По предписа́нїю по́вѣсть, ѡ҆ свое́мъ преложе́нїи ѿ жидо́вства по ꙗ҆вле́нїю.
[в҃] Ѡ҆ свидѣ́тельствѣ а҆по́столѡвъ, и҆ ѡ҆ житїѝ вѣ́рнѣ.
[г҃] Ѡ҆ є҆́же къ ки́фѣ противорѣ́чїи.
[д҃] Ꙗ҆́кѡ вѣ́рою ѡ҆сщ҃е́нїе, а҆ не зако́номъ.
[є҃] Ꙗ҆́кѡ и҆ а҆враа́мъ ѿ вѣ́ры ѡ҆правда́сѧ, во ѻ҆́бразъ на́мъ.
[ѕ҃] Ꙗ҆́кѡ зако́нъ не ѡ҆правда́етъ, но ѡ҆блича́етъ, и҆ клѧ́твꙋ возлага́етъ, ю҆́же разрѣша́етъ хрⷭ҇то́съ.
[з҃] Ꙗ҆́кѡ не ѿ зако́на, но ѿ ѡ҆бѣтова́нїѧ бл҃га̑ѧ.
[и҃] Ꙗ҆́кѡ под̾ сꙋдо́мъ бы́ша и҆̀же въ зако́нѣ.
[ѳ҃] Ꙗ҆́кѡ свобо́дною жено́ю а҆враа́млею, и҆ и҆́скреннимъ дѣ́тищемъ пред̾ѡбрази́вшымсѧ, не подоба́етъ на́мъ порабощє́нымъ бы́ти зако́нꙋ.
[і҃] Ꙗ҆́кѡ зва́нїе на́ше не подлежи́тъ ѡ҆брѣ́занїю и҆ зако́нꙋ, за хрⷭ҇то́вꙋ стрⷭ҇ть.
[а҃і] Подписа́нїе свобо́ды, ꙗ҆́же по дх҃ꙋ ст҃о́мꙋ.
[в҃і] Ѿведе́нїе ѿ привлача́ющихъ ко ѡ҆брѣ́занїю. и҆ подвиже́нїе къ но́вомꙋ животꙋ̀ дх҃о́вномꙋ. (л. рм҃а)
Сказа́нїе къ гала́тѡмъ посла́нїѧ ст҃а́гѡ а҆пⷭ҇ла па́ѵла.
Сїѐ посыла́етъ ѿ ри́ма, ви́дѣвъ и҆̀хъ ᲂу҆жѐ и҆ наꙋчи́въ. Вина́ же посла́нїѧ сїѧ̀: Наꙋче́ни бы́вше до́брѣ гала́тє ѿ а҆пⷭ҇ла, и҆ вѣ́ровавше и҆́скреннѡ во хрⷭ҇та̀, по ѿше́ствїи а҆пⷭ҇ловѣ прельсти́шасѧ ѿ нѣ́кихъ, ꙗ҆́кѡ ѡ҆брѣ́затисѧ. Сїѧ̑ ᲂу҆́бѡ ᲂу҆вѣ́давъ а҆пⷭ҇лъ, пи́шетъ къ ни́мъ. И҆ пе́рвѣе ᲂу҆́бѡ свидѣ́тельствꙋетъ и҆̀мъ, ѡ҆ не́йже и҆мѣ́ѧхꙋ вѣ́рѣ, и҆ и҆́скреннѣмъ ѡ҆ хрⷭ҇тѣ̀ и҆зволе́нїи: ᲂу҆корѧ́етъ же, ꙗ҆́кѡ несмы́сленнѡ содѣ́ѧвшымъ, и҆ преложи́вшымсѧ. Та́же повѣствꙋ́етъ ѡ҆ зако́нѣ и҆ вѣ́рѣ, ꙗ҆́же по а҆враа́мꙋ, и҆ показꙋ́етъ ѿ зако́на же, и҆ же́нъ а҆враа́мовыхъ, и҆носказа́тельнѣ толкꙋ́ѧ и҆̀хъ, до вре́мене да́нымъ бы́вшымъ и҆ сѣ́ни и҆ ѡ҆брѣ́занїю, и҆ и҆спраздни́тисѧ и҆̀мъ про́чее хрⷭ҇то́вымъ прише́ствїемъ. И҆ си́це и҆з̾ѧсни́въ, завѣщава́етъ про́чее и҆́мъ ктомꙋ̀ не внима́ти прельща́ющымъ ѧ҆̀, но па́че держа́тисѧ вѣ́ры, ꙗ҆́же во хрⷭ҇та̀, и҆ вѣ́дѣти, ꙗ҆́кѡ ꙗ҆́же ѡ҆ хрⷭ҇тѣ̀ бл҃года́ть, ᲂу҆пражднѧ́етъ є҆́же по пло́ти ѡ҆брѣ́занїе, и҆ си́це па́ки ѡ҆ ѻ҆бы́чаехъ наꙋчи́въ и҆ наказа́въ, скончава́етъ посла́нїе. (л. рм҃а ѡ҆б.)
И҆́но предвѣ́дѣнїе і҆ѡа́нна златоꙋ́стагѡ
И҆́же ѿ і҆ꙋдє́й вѣ́ровавшїи, вкꙋ́пѣ ᲂу҆́бѡ ѡ҆ предпрїѧ́тїи і҆ꙋде́йства хва́лѧщесѧ, вкꙋ́пѣ же и҆ тщесла́вїемъ пїѧ́нствꙋюще, и҆ хотѧ́ще са́нъ ᲂу҆чи́тельный себѣ̀ приложи́ти, прише́дше въ ꙗ҆зы́къ гала́тскїй ᲂу҆ча́хꙋ и҆̀хъ, ꙗ҆́кѡ подоба́етъ ѡ҆брѣ́затисѧ, и҆ сꙋббѡ́ты храни́ти и҆ новомѣ̑сѧчїѧ, и҆ не внима́ти па́ѵлꙋ ѿе́млющꙋ и҆̀хъ. И҆́же бо ѡ҆ петрѣ̀, и҆ і҆а́кѡвѣ, и҆ і҆ѡа́ннѣ, не возбранѧ́етъ, пе́рвїи а҆пⷭ҇лѡмъ сꙋ́ще, и҆ со хрⷭ҇то́мъ бы́вше, и҆ вои́стиннꙋ не возбранѧ́хꙋ: но не ᲂу҆законѧ́юще сїѐ творѧ́хꙋ, но не́мощи сходѧ́ще вѣ́ровавшихъ і҆ꙋдє́й. Па́ѵелъ же въ ꙗ҆зы́цѣхъ проповѣ́дꙋѧ, не тре́боваше такова́гѡ схожде́нїѧ. Є҆гда́ же во і҆ꙋде́йстѣй странѣ̀ бы́сть, тогда̀ и҆ то́й потре́бова схожде́нїѧ сегѡ̀. Но прельстѧ́щїи не глаго́люще вины̀, и҆́хже ра́ди и҆ се́й и҆ ѻ҆нѝ схожда́хꙋ, прельща́хꙋ простѣ́йшихъ, глаго́люще: ꙗ҆́кѡ не подоба́етъ внима́ти па́ѵлꙋ: се́й бо вчера̀ и҆ дне́сь ꙗ҆ви́сѧ, ѻ҆ни́ же пе́рвїи, и҆ ѡ҆ петрѣ̀: и҆ се́й ᲂу҆́бѡ ᲂу҆чени́къ а҆пⷭ҇лѡвъ бы́сть, ѻ҆ни́ же хрⷭ҇то́вы: и҆ се́й є҆ди́нъ, ѻ҆ни́ же мно́зи, и҆ столпѝ це́ркве. и҆ лицемѣ́рїемъ є҆щѐ ѡ҆клевета́хꙋ є҆го̀, глаго́люще, ꙗ҆́кѡ то́й са́мъ ѿе́млѧй ѡ҆брѣ́занїе, ꙗ҆влѧ́етсѧ потре́бовавъ си́хъ и҆́ндѣ: и҆ и҆́накѡ ᲂу҆́бѡ ва́мъ, и҆́накѡ же и҆ны̑мъ проповѣ́дꙋѧ. Є҆лма̀ ᲂу҆́бѡ возжже́нъ ви́дѣ ꙗ҆зы́къ ве́сь, и҆ пожа́ръ лю́тъ возгорѣ́сѧ въ це́ркви галаті́йстѣй, и҆ созда́нїе коле́блемо бѣдꙋ̀ прїе́млюще па́сти. ѻ҆́во ᲂу҆́бѡ ѿ ꙗ҆́рости пра́ведныѧ, ѻ҆́во же ѿ печа́ли содержи́мь, и҆́бо и҆ сїѐ ꙗ҆ви́лъ є҆́сть ре́къ: ꙗ҆́кѡ ᲂу҆̀бо хотѣ́лъ бы прїитѝ къ ва́мъ ны́нѣ, и҆ премѣни́ти гла́съ мо́й, пи́шетъ посла́нїе сїѐ ко всѣ́мъ си̑мъ ѿвѣщава́ѧ. И҆ а҆́бїе ѿ предисло́вїѧ проти́вꙋ ѻ҆́номꙋ (л. рм҃в) простира́етсѧ, и҆́мже прокопова́юще є҆гѡ̀ ᲂу҆чи́тельскїй са́нъ, глаго́лахꙋ: ꙗ҆́кѡ про́чїи ᲂу҆́бѡ хрⷭ҇то́вы, се́й же а҆пⷭ҇лѡвъ бы́сть ᲂу҆чени́къ. тѣ́мже и҆ си́це начина́етъ посла́нїе: Па́ѵелъ а҆пⷭ҇лъ, не ѿ человѣ̑къ, ни человѣ́комъ, но і҆и҃сомъ хрⷭ҇то́мъ, и҆ бг҃омъ и҆ ѻ҆ц҃е́мъ. Сїѐ че́сти ра́ди ꙗ҆́же ко ѻ҆ц҃ꙋ̀ ре́клъ є҆́сть, и҆ сла́бости ра́ди слы́шателей. Чесѡ́ же ра́ди сїѐ нигдѣ́же и҆́ндѣ приложи́лъ ко и҆ны́мъ посыла́ѧ: и҆ ѻ҆вогда̀ своѐ и҆́мѧ то́чїю полага́етъ, и҆лѝ двои́хъ, и҆лѝ трїе́хъ и҆ны́хъ и҆мена̀. Здѣ́ же мно́жество цѣ́ло положи́лъ: чесѡ́ ли ᲂу҆́бѡ ра́ди, клевета́хꙋ бо є҆го̀, ꙗ҆́кѡ є҆ди́нъ сїѧ̑ проповѣ́дꙋетъ, и҆ но́во ᲂу҆че́нїе вво́дитъ въ догма́тѣхъ: хотѧ́ же ѿѧ́ти сїѐ ѕло́е мнѣ́нїе и҆́хъ, и҆ показа́ти, ꙗ҆́кѡ мно́ги и҆́мать ѻ҆́бщники ᲂу҆че́нїю семꙋ̀, счини́лъ є҆́сть себѣ̀ бра́тїю, сказꙋ́ѧ, ꙗ҆́кѡ ꙗ҆́же пи́шетъ, и҆ ѿ ра́зꙋма и҆́хъ пи́шетъ. (л. рм҃в ѡ҆б.)
КЪ ГАЛА́ТѠМЪ ПОСЛА́НІЕ
СТ҃А́ГѠ А҆ПО́СТОЛА ПА́ѴЛА.
Глава̀ пе́рваѧ.
(заⷱ҇ рч҃и) сⷯ а҃ Па́ѵелъ а҆пⷭ҇лъ, ꙳ Въ четверто́къ д҃і-ѧ недѣ́ли: Па́ѵелъ а҆по́столъ ꙳ [ни ѿ человѣ̑къ, ни человѣ́комъ, но і҆и҃съ хрⷭ҇то́мъ и҆ бг҃омъ ѻ҆ц҃е́мъ, воскреси́вшимъ є҆го̀ и҆з̾ ме́ртвыхъ:] в҃ И҆ и҆̀же со мно́ю всѧ̀ бра́тїѧ, це́рквамъ галаті́йскимъ.
(заⷱ҇ рч҃ѳ) г҃ Бл҃года́ть ва́мъ ꙳꙳ Въ сꙋббѡ́тꙋ к҃є: Бра́тїе, бл҃года́ть ва́мъ ꙳꙳ и҆ ми́ръ ѿ бг҃а ѻ҆ц҃а̀, и҆ гдⷭ҇а на́шегѡ і҆и҃са хрⷭ҇та̀: д҃ Да́вшагѡ себѐ по грѣсѣ́хъ на́шихъ, ꙗ҆́кѡ да и҆зба́витъ ны̀ ѿ настоѧ́щагѡ вѣ́ка лꙋка́вагѡ по во́ли бг҃а и҆ ѻ҆ц҃а̀ на́шегѡ: є҃ Є҆мꙋ́же сла́ва во вѣ́ки вѣкѡ́въ, а҆ми́нь. ѕ҃ Чꙋждꙋ́сѧ, ꙗ҆́кѡ та́кѡ ско́рѡ прелага́етесѧ, ѿ зва́вшагѡ вы̀ бл҃года́тїю хрⷭ҇то́вою, во и҆́но бл҃говѣствова́нїе: з҃ Є҆́же нѣ́сть и҆́но, то́чїю нѣ́цыи сꙋ́ть смꙋща́ющїи вы̀, и҆ хотѧ́щїи преврати́ти бл҃говѣствова́нїе хрⷭ҇то́во. и҃ Но и҆ а҆́ще мы̀, и҆лѝ а҆́гг҃лъ съ нб҃сѐ бл҃говѣсти́тъ ва́мъ па́че, (л. рм҃г) є҆́же бл҃говѣсти́хомъ ва́мъ, а҆на́ѳема да бꙋ́детъ. ѳ҃ Ꙗ҆́коже предреко́хомъ, и҆ ны́нѣ па́ки глаго́лю: а҆́ще кто̀ ва́мъ бл҃говѣсти́тъ па́че є҆́же прїѧ́сте, а҆на́ѳема да бꙋ́детъ. і҃ Ны́нѣ бо человѣ́ки препира́ю и҆лѝ бг҃а; и҆лѝ и҆щꙋ̀ человѣ́кѡмъ ᲂу҆гожда́ти; а҆́ще бо бы́хъ є҆щѐ человѣ́кѡмъ ᲂу҆гожда́лъ, хрⷭ҇то́въ ра́бъ не бы́хъ ᲂу҆́бѡ бы́лъ.
Престꙋпѝ четверткꙋ̀. Коне́цъ сꙋббѡ́тѣ.
(заⷱ҇ с҃) [а҃] а҃і Сказꙋ́ю же ва́мъ бра́тїе, ꙳ Недѣ́лѧ к҃: Бра́тїе, сказꙋ́ю ва́мъ ꙳ Сїе́ же и҆ недѣ́лѧ по ржⷭ҇твѣ̀ хрⷭ҇то́вѣ бл҃говѣствова́нїе бл҃говѣще́нное ѿ менѐ, ꙗ҆́кѡ нѣ́сть по человѣ́кꙋ. в҃і Ни бо а҆́зъ ѿ человѣ́ка прїѧ́хъ є҆̀, нижѐ наꙋчи́хсѧ: но ꙗ҆вле́нїемъ і҆и҃съ хрⷭ҇то́вымъ. г҃і Слы́шасте бо моѐ житїѐ и҆ногда̀ въ жидо́вствѣ, ꙗ҆́кѡ попремно́гꙋ гони́хъ це́рковь бж҃їю, и҆ разрꙋша́хъ ю҆̀: д҃і И҆ преспѣва́хъ въ жидо́вствѣ па́че мно́гихъ свє́рстникъ мои́хъ въ ро́дѣ мое́мъ, и҆́злиха ревни́тель сы́й ѻ҆те́ческихъ мои́хъ преда́нїй. є҃і Є҆гда́ же благоволѝ бг҃ъ, и҆збра́вый мѧ̀ ѿ чре́ва ма́тере моеѧ̀, и҆ призва́вый бл҃года́тїю свое́ю, ѕ҃і Ꙗ҆ви́ти сн҃а своего̀ во мнѣ̀, да бл҃говѣствꙋ́ю є҆го̀ во ꙗ҆зы́цѣхъ: а҆́бїе не приложи́хсѧ пло́ти и҆ кро́ви, з҃і Ни взыдо́хъ во і҆ерꙋсали́мъ къ прє́днимъ менѐ а҆по́столѡмъ: но и҆до́хъ во а҆раві́ю, и҆ па́ки возврати́хсѧ въ дама́скъ. и҃і Пото́мъ же по трїе́хъ лѣ́тѣхъ взыдо́хъ во і҆ерꙋсали́мъ соглѧ́дати петра̀, и҆ пребы́хъ ᲂу҆ негѡ̀ дні́й пѧтьна́десѧть. (л. рм҃г ѡ҆б.) ѳ҃і И҆но́гѡ же ѿ а҆по́стѡлъ не ви́дѣхъ, то́кмѡ і҆а́кѡва бра́та гдⷭ҇нѧ.
Коне́цъ недѣ́ли. Чтѝ четверткꙋ̀.
к҃ А҆ ꙗ҆̀же пишꙋ̀ ва́мъ, сѐ пред̾ бг҃омъ, ꙗ҆́кѡ не лгꙋ̀. к҃а Пото́мъ же прїидо́хъ въ страны̑ сѵ́рскїѧ, и҆ кїлїкі́йскїѧ. к҃в Бѣ́хъ же не зна́емь лице́мъ це́рквамъ і҆ꙋде́йскимъ, ꙗ҆̀же ѡ҆ хрⷭ҇тѣ̀: к҃г То́чїю же слы́шаще бѧ́хꙋ, ꙗ҆́кѡ гонѧ́й на́съ и҆ногда̀, ны́нѣ благовѣствꙋ́етъ вѣ́рꙋ, ю҆́же и҆ногда̀ разрꙋша́ше. к҃д И҆ сла́влѧхꙋ ѡ҆ мнѣ̀ бг҃а.
Глава̀ втора́ѧ.
[в҃] сⷯ а҃ Пото́мъ же по четырена́десѧти лѣ́тѣхъ, па́ки взыдо́хъ во і҆ерꙋсали́мъ съ варна́вою, пое́мъ съ собо́ю и҆ ті́та. в҃ Взыдо́хъ же по ѿкрове́нїю, и҆ возложи́хъ и҆̀мъ бл҃говѣствова́нїе, є҆́же проповѣ́дꙋю во ꙗ҆зы́цѣхъ, наединѣ́ же мни́мымъ, да не ка́кѡ вотщѐ текꙋ̀, и҆лѝ теко́хъ. г҃ Но ни ті́тъ и҆́же со мно́ю, є҆́ллинъ сы́й, нꙋ́жденъ бы́сть ѡ҆брѣ́затисѧ: д҃ И҆ за привше́дшꙋю лжебра́тїю, и҆̀же привнидо́ша соглѧ́дати свобо́ды на́шеѧ, ю҆́же и҆́мамы ѡ҆ хрⷭ҇тѣ̀ і҆и҃сѣ, да на́съ порабо́тѧтъ. є҃ И҆̀мже ни къ часꙋ̀ повинꙋ́хомсѧ въ покоре́нїе, да и҆́стина бл҃говѣ́стїѧ пребꙋ́детъ въ ва́съ.
Коне́цъ четверткꙋ̀.
(заⷱ҇ с҃а) ѕ҃ Ѿ мнѧ́щихсѧ же ꙳ Въ пѧто́къ д҃і-ѧ недѣ́ли: Бра́тїе, ѿ мнѧ́щихсѧ ꙳ бы́ти что̀, [ꙗ҆ковѝ нѣ́когда бѣ́ша, ничто́же мѝ ра́знствꙋетъ: лица̀ бг҃ъ (л. рм҃д) человѣ́ча не прїе́млетъ.] мнѣ́ бо мни́мїи ничто́же привозложи́ша: з҃ Но сопроти́вное, ᲂу҆разꙋмѣ́вше, ꙗ҆́кѡ ᲂу҆вѣ́рено мѝ бы́сть бл҃говѣ́стїе неѡбрѣ́занїѧ, ꙗ҆́коже петрꙋ̀ ѡ҆брѣ́занїѧ. и҃ [И҆́бо споспѣ́шествовавый петрꙋ̀ въ посла́нїе ѡ҆брѣ́занїѧ, поспѣ́шествова и҆ мнѣ̀ во ꙗ҆зы́ки.] ѳ҃ И҆ позна́вше бл҃года́ть да́ннꙋю мѝ, і҆а́кѡвъ, и҆ ки́фа, и҆ і҆ѡа́ннъ, мни́мїи столпѝ бы́ти, дє́снаѧ да́ша мнѣ̀ и҆ варна́вѣ ѻ҆бще́нїѧ, да мы̀ во ꙗ҆зы́ки, ѻ҆ни́ же во ѡ҆брѣ́занїе: і҃ То́чїю ни́щихъ да по́мнима, є҆́же и҆ потща́хсѧ сїѐ и҆́стое сотвори́ти.
Коне́цъ пѧткꙋ̀.
(заⷱ҇ с҃в) [г҃] а҃і Є҆гда́ же прїи́де ꙳ Въ понедѣ́льникъ є҃і-ѧ недѣ́ли: Бра́тїе, є҆гда̀ прїи́де ꙳ пе́тръ во а҆нтїохі́ю, въ лицѐ є҆мꙋ̀ проти́вꙋ ста́хъ, ꙗ҆́кѡ зазо́ренъ бѣ̀. в҃і Пре́жде бо да́же не прїитѝ нѣ̑кимъ ѿ і҆а́кѡва, съ ꙗ҆зы́ки ꙗ҆дѧ́ше: є҆гда́ же прїидо́ша, ѡ҆прѧ́ташесѧ и҆ ѿлꙋча́шесѧ, боѧ́сѧ сꙋ́щихъ ѿ ѡ҆брѣ́занїѧ. г҃і И҆ лицемѣ́ришасѧ съ ни́мъ и҆ про́чїи і҆ꙋдє́и, ꙗ҆́кѡ и҆ варна́вѣ приста́ти лицемѣ́рствꙋ и҆́хъ. д҃і Но є҆гда̀ ви́дѣхъ, ꙗ҆́кѡ не пра́вѡ хо́дѧтъ ко и҆́стинѣ бл҃говѣствова́нїѧ, реко́хъ петрꙋ̀ пред̾ всѣ́ми: а҆́ще ты̀ і҆ꙋде́й сы́й, ꙗ҆зы́чески а҆ не і҆ꙋде́йски живе́ши, почто̀ ꙗ҆зы́ки нꙋ́диши і҆ꙋде́йски жи́тельствовати; є҃і Мы̀ є҆стество́мъ і҆ꙋдє́и, а҆ не ѿ ꙗ҆зы̑къ грѣ́шницы.
(заⷱ҇ с҃г) ѕ҃і Оу҆вѣ́дѣвше же, ꙳꙳ Недѣ́лѧ к҃а: Бра́тїе, ᲂу҆вѣ́дѣвше ꙳꙳ Сїе́ же и҆ по воздви́женїи недѣ́лѧ. ꙗ҆́кѡ не ѡ҆правди́тсѧ человѣ́къ ѿ дѣ́лъ зако́на, но то́кмѡ вѣ́рою і҆и҃съ хрⷭ҇то́вою, (л. рм҃д ѡ҆б.) и҆ мы̀ во хрⷭ҇та̀ і҆и҃са вѣ́ровахомъ, да ѡ҆правди́мсѧ ѿ вѣ́ры хрⷭ҇то́вы, а҆ не ѿ дѣ́лъ зако́на: занѐ не ѡ҆правди́тсѧ ѿ дѣ́лъ зако́на всѧ́ка пло́ть.
Коне́цъ понедѣ́льникꙋ.
з҃і А҆́ще ли и҆́щꙋще ѡ҆правди́тисѧ ѡ҆ хрⷭ҇тѣ̀, ѡ҆брѣто́хомсѧ и҆ са́ми грѣ́шницы: хрⷭ҇то́съ ᲂу҆́бѡ грѣхꙋ́ ли слꙋжи́тель; да не бꙋ́детъ. и҃і А҆́ще бо ꙗ҆̀же разори́хъ, сїѧ̑ па́ки созида́ю, престꙋ́пника себѐ представлѧ́ю. ѳ҃і А҆́зъ бо зако́номъ зако́нꙋ ᲂу҆мро́хъ, да бг҃ови жи́въ бꙋ́дꙋ: хрⷭ҇то́ви сраспѧ́хсѧ. (втоⷬ҇) к҃ Живꙋ́ же не ктомꙋ̀ а҆́зъ, но живе́тъ во мнѣ̀ хрⷭ҇то́съ: а҆ є҆́же ны́нѣ живꙋ̀ во пло́ти, вѣ́рою живꙋ̀ сн҃а бж҃їѧ, возлюби́вшагѡ менѐ, и҆ преда́вшагѡ себѐ по мнѣ̀.
Коне́цъ недѣ́ли.
(заⷱ҇ с҃д) к҃а Не ѿмета́ю ꙳ Во вто́рникъ є҃і-ѧ недѣ́ли: Бра́тїе, не ѿмета́ю ꙳ бл҃года́ти бж҃їѧ: а҆́ще бо зако́номъ пра́вда, ᲂу҆̀бо хрⷭ҇то́съ тꙋ́не ᲂу҆́мре.
Глава̀ тре́тїѧ.
[д҃] сⷯ а҃ Ѽ несмы́сленнїи гала́тє, кто́ вы прельсти́лъ є҆́сть не покори́тисѧ и҆́стинѣ, и҆̀мже пред̾ ѻ҆чи́ма і҆и҃съ хрⷭ҇то́съ преднапи́санъ бы́сть, въ ва́съ ра́спѧтъ; в҃ Сїѐ є҆ди́но хощꙋ̀ ᲂу҆вѣ́дѣти ѿ ва́съ, ѿ дѣ́лъ ли зако́на дх҃а прїѧ́сте, и҆лѝ ѿ слꙋ́ха вѣ́ры; г҃ Та́кѡ ли несмы́сленни є҆стѐ: наче́нше дх҃омъ, ны́нѣ пло́тїю скончава́ете; д҃ Толи̑ка пострада́сте тꙋ́не, а҆́ще же и҆ тꙋ́не. є҃ Подаѧ́й ᲂу҆̀бо ва́мъ дх҃а, и҆ (л. рм҃є) дѣ́йствꙋѧй си̑лы въ ва́съ, ѿ дѣ́лъ ли зако́на, и҆лѝ ѿ слꙋ́ха вѣ́ры; ѕ҃ Ꙗ҆́коже а҆враа́мъ вѣ́рова бг҃ꙋ, и҆ вмѣни́сѧ є҆мꙋ̀ въ пра́вдꙋ. з҃ Разꙋмѣ́йте ᲂу҆̀бо, ꙗ҆́кѡ сꙋ́щїи ѿ вѣ́ры, сі́и сꙋ́ть сы́нове а҆враа́мли.
Коне́цъ вто́рникꙋ.
(заⷱ҇ с҃є) и҃ Пред̾ꙋви́дѣвше бо ꙳ Въ сꙋббѡ́тꙋ к҃ѕ: и҆ въ сꙋббѡ́тꙋ пред̾ ржⷭ҇тво́мъ хрⷭ҇то́вымъ: Бра́тїе, пред̾ꙋви́дѣвше ꙳ писа́нїе, ꙗ҆́кѡ ѿ вѣ́ры ѡ҆правда́етъ ꙗ҆зы́ки бг҃ъ, пре́жде бл҃говѣствова̀ а҆враа́мꙋ: ꙗ҆́кѡ бл҃гословѧ́тсѧ ѡ҆ тебѣ̀ всѝ ꙗ҆зы́цы. ѳ҃ Тѣ́мже сꙋ́щїи ѿ вѣ́ры благословѧ́тсѧ съ вѣ́рнымъ а҆враа́момъ. [ѕ҃] і҃ Є҆ли́цы бо ѿ дѣ́лъ зако́на сꙋ́ть, под̾ клѧ́твою сꙋ́ть: пи́сано бо є҆́сть: про́клѧтъ всѧ́къ, и҆́же не пребꙋ́детъ во всѣ́хъ пи́санныхъ въ кни́зѣ зако́ннѣй, ꙗ҆́кѡ твори́ти ѧ҆̀. а҃і А҆ ꙗ҆́кѡ въ зако́нѣ никто́же ѡ҆правда́етсѧ ѿ бг҃а, ꙗ҆́вѣ, ꙗ҆́кѡ пра́ведный ѿ вѣ́ры жи́въ бꙋ́детъ. в҃і Зако́нъ же нѣ́сть ѿ вѣ́ры: но сотвори́вый та̑ человѣ́къ жи́въ бꙋ́детъ въ ни́хъ.
Коне́цъ сꙋббѡ́тѣ пред̾ ржⷭ҇тво́мъ хрⷭ҇то́вымъ.
Чтѝ сꙋббѡ́тѣ вели́кой, на ᲂу҆́трени:
(заⷱ҇ с҃ѕ) г҃і Хрⷭ҇то́съ ны̀ и҆скꙋпи́лъ є҆́сть ѿ клѧ́твы зако́нныѧ, бы́въ по на́съ клѧ́тва: пи́сано бо є҆́сть: про́клѧтъ всѧ́къ ви́сѧй на дре́вѣ. д҃і Да въ ꙗ҆зы́цѣхъ бл҃гослове́нїе а҆враа́мле бꙋ́детъ ѡ҆ хрⷭ҇тѣ̀ і҆и҃сѣ, да ѡ҆бѣтова́нїе дх҃а прїи́мемъ вѣ́рою.
Коне́цъ сꙋббѡ́тѣ вели́кой, на ᲂу҆́трени.
(заⷱ҇ с҃з) є҃і Бра́тїе, [по чл҃вѣ́кꙋ глаго́лю,] ꙳꙳ Въ сре́дꙋ є҃і-ѧ недѣ́ли: Бра́тїе, по человѣ́кꙋ глаго́лю ꙳꙳ ѻ҆ба́че чл҃вѣ́кꙋ пред̾ꙋтвержде́нна завѣ́та никто́же ѿмета́етъ, и҆лѝ (л. рм҃є ѡ҆б.) приповелѣва́етъ. [з҃] ѕ҃і А҆враа́мꙋ же рече́ни бы́ша ѡ҆бѣ́ты, и҆ сѣ́мени є҆гѡ̀: не глаго́летъ же, и҆ сѣ́менємъ, ꙗ҆́кѡ ѡ҆ мно́зѣхъ, но ꙗ҆́кѡ ѡ҆ є҆ди́номъ, и҆ сѣ́мени твоемꙋ̀, и҆́же є҆́сть хрⷭ҇то́съ. з҃і Сїе́ же глаго́лю, завѣ́та пред̾ꙋтвержде́нна ѿ бг҃а во хрⷭ҇та̀, и҆́же по лѣ́тѣхъ четы́риста и҆ три́десѧтихъ бы́вый зако́нъ не ѿмета́етъ, во є҆́же разори́ти ѡ҆бѣтова́нїе. и҃і А҆́ще бо ѿ зако́на наслѣ́дїе, не ктомꙋ̀ ᲂу҆жѐ ѿ ѡ҆бѣтова́нїѧ: а҆враа́мꙋ же ѡ҆бѣтова́нїемъ дарова̀ бг҃ъ. ѳ҃і Что̀ ᲂу҆̀бо зако́нъ; престꙋпле́нїѧ ра́ди приложи́сѧ, до́ндеже прїи́детъ сѣ́мѧ, є҆мꙋ́же ѡ҆бѣтова́сѧ, вчине́нъ а҆́гг҃лы рꙋко́ю хода́таѧ. к҃ Хода́тай же є҆ди́нагѡ нѣ́сть: бг҃ъ же є҆ди́нъ є҆́сть. к҃а Зако́нъ ли ᲂу҆̀бо проти́вꙋ ѡ҆бѣтова́нїємъ бж҃їимъ; да не бꙋ́детъ: а҆́ще бо да́нъ бы́сть зако́нъ могі́й ѡ҆живи́ти, вои́стиннꙋ ѿ зако́на бы была̀ пра́вда. к҃в Но затворѝ писа́нїе всѧ̑ под̾ грѣхо́мъ, да ѡ҆бѣтова́нїе ѿ вѣ́ры і҆и҃съ хрⷭ҇то́вы да́стсѧ вѣ́рꙋющымъ.
Коне́цъ средѣ̀.
(заⷱ҇ с҃и) к҃г Пре́жде же ꙳ Въ четверто́къ є҃і недѣ́ли: Бра́тїе, пре́жде ꙳ Сїе́ же и҆ преподѡ́бнымъ жена́мъ. прише́ствїѧ вѣ́ры, под̾ зако́номъ стрего́ми бѣ́хомъ, затворе́ни въ хотѧ́щꙋю вѣ́рꙋ ѿкры́тисѧ. к҃д Тѣ́мже зако́нъ пѣ́стꙋнъ на́мъ бы́сть во хрⷭ҇та̀, да ѿ вѣ́ры ѡ҆правди́мсѧ. к҃є Прише́дши же вѣ́рѣ, ᲂу҆жѐ не под̾ пѣ́стꙋномъ є҆смы̀. к҃ѕ Вси́ бо вы̀ сы́нове бж҃їи є҆стѐ вѣ́рою ѡ҆ хрⷭ҇тѣ̀ і҆и҃сѣ: к҃з Є҆ли́цы бо во хрⷭ҇та̀ крⷭ҇ти́стесѧ, во хрⷭ҇та̀ ѡ҆блеко́стесѧ. к҃и Нѣ́сть (л. рм҃ѕ) і҆ꙋде́й, ни є҆́ллинъ: нѣ́сть ра́бъ, ни свобо́дь: нѣ́сть мꙋ́жескїй по́лъ, ни же́нскїй: вси́ бо вы̀ є҆ди́но є҆стѐ ѡ҆ хрⷭ҇тѣ̀ і҆и҃сѣ. к҃ѳ А҆́ще ли вы̀ хрⷭ҇то́вы: ᲂу҆̀бо а҆враа́мле сѣ́мѧ є҆стѐ, и҆ по ѡ҆бѣтова́нїю наслѣ́дницы.
Коне́цъ ст҃ы́мъ жена́мъ.
Глава̀ четве́ртаѧ.
[и҃] сⷯ а҃ Глаго́лю же, въ нели́ко вре́мѧ наслѣ́дникъ мла́дъ є҆́сть, ничи́мже лꙋ́чшїй є҆́сть раба̀, гдⷭ҇ь сы́й всѣ́хъ: в҃ Но под̾ повели́тели и҆ приста́вники є҆́сть, да́же до наро́ка ѻ҆́ч҃а. г҃ Та́коже и҆ мы̀, є҆гда̀ бѣ́хомъ мла́ди, под̾ стїхі́ами бѣ́хомъ мі́ра порабоще́ни.
(заⷱ҇ с҃ѳ) д҃ Є҆гда́ же ꙳ На ржⷭ҇тво̀ хрⷭ҇то́во: Бра́тїе, є҆гда̀ ꙳ прїи́де кончи́на лѣ́та, посла̀ бг҃ъ сн҃а своего̀ є҆диноро́днаго, ражда́емаго ѿ жены̀, быва́ема под̾ зако́номъ: є҃ Да подзакѡ́нныѧ и҆скꙋ́питъ, да всыновле́нїе воспрїи́мемъ.
Коне́цъ четверткꙋ̀.
ѕ҃ Да ꙗ҆́кѡ є҆стѐ сн҃ове, посла̀ бг҃ъ дх҃а сн҃а своегѡ̀ въ сердца̀ ва́ша, вопїю́ща: а҆́вва, ѻ҆́ч҃е. з҃ Тѣ́мже ᲂу҆жѐ нѣ́си ра́бъ, но сн҃ъ: а҆́ще ли же сн҃ъ, и҆ наслѣ́дникъ бж҃їй і҆и҃съ хрⷭ҇то́мъ.
Коне́цъ пра́здникꙋ. (л. рм҃ѕ ѡ҆б.)
(заⷱ҇ с҃і) и҃ Но тогда̀ ᲂу҆́бѡ не вѣ́дꙋще бг҃а, ꙳ Въ пѧто́къ є҃і недѣ́ли: Бра́тїе, невѣ́дꙋще бг҃а ꙳ Сїе́ же и҆ ѡ҆ болѧ́щихъ. слꙋжи́сте не по є҆стествꙋ̀ сꙋ́щымъ богѡ́мъ: ѳ҃ Ны́нѣ же позна́вше бг҃а, па́че же позна́ни бы́вше ѿ бг҃а, ка́кѡ возвраща́етесѧ па́ки на немощны́ѧ и҆ хꙋды́ѧ стїхі̑и, и҆̀мже ꙾свы́ше꙾вспѧ́ть па́ки слꙋжи́ти хо́щете; і҃ Днѝ смотрѧ́ете, и҆ мцⷭ҇ы, и҆ времена̀, и҆ лѣ̑та. а҃і Бою́сѧ ѡ҆ ва́съ, є҆да̀ ка́кѡ всꙋ́е трꙋди́хсѧ въ ва́съ. в҃і Бꙋ́дите ꙗ҆́коже а҆́зъ, занѐ и҆ а҆́зъ ꙗ҆́коже вы̀: бра́тїе, молю̀ вы̀, ничи́мже менѐ ѡ҆би́дѣсте. г҃і Вѣ́сте же, ꙗ҆́кѡ за не́мощь пло́ти бл҃говѣсти́хъ ва́мъ пе́рвѣе. д҃і И҆ и҆скꙋше́нїѧ моегѡ̀ є҆́же во пло́ти мое́й не ᲂу҆ничижи́сте, ни ѡ҆плева́сте, но ꙗ҆́коже а҆́гг҃ла бж҃їѧ прїѧ́сте мѧ̀, ꙗ҆́кѡ хрⷭ҇та̀ і҆и҃са.
Коне́цъ ѡ҆ болѧ́щихъ.
є҃і Ко́е ᲂу҆̀бо бѧ́ше бл҃же́нство ва́ше, свидѣ́тельствꙋю бо ва́мъ, ꙗ҆́кѡ а҆́ще бы бы́ло мо́щно, ѻ҆чеса̀ ва́ша и҆звертѣ́вше, да́ли бы́сте мѝ. ѕ҃і Тѣ́мже вра́гъ ва́мъ бы́хъ, и҆́стинꙋ ва́мъ глаго́лѧ. з҃і Ревнꙋ́ютъ по ва́мъ не до́брѣ, но ѿлꙋчи́ти ва́съ хотѧ́тъ, да и҆̀мъ ревнꙋ́ете. и҃і Добро́ же є҆́же ревнова́ти всегда̀ въ до́бромъ, и҆ не то́чїю, внегда̀ приходи́ти мѝ къ ва́мъ. ѳ҃і Ча́дца моѧ̀, и҆́миже па́ки болѣ́знꙋю, до́ндеже воѡбрази́тсѧ хрⷭ҇то́съ въ ва́съ. к҃ Хотѣ́хъ же прїитѝ къ ва́мъ ны́нѣ, и҆ и҆змѣни́ти гла́съ мо́й: ꙗ҆́кѡ не домышлѧ́юсѧ ѡ҆ ва́съ. к҃а Глаго́лите мѝ, и҆̀же под̾ зако́номъ хотѧ́щїи бы́ти, зако́на ли не слꙋ́шаете;
Коне́цъ пѧткꙋ̀. (л. рм҃з)
к҃в Пи́сано бо є҆́сть: ꙗ҆́кѡ
(заⷱ҇) А҆враа́мъ ꙳ Септе́мврїа ѳ҃, ст҃о́мꙋ і҆ѡакі́мꙋ и҆ а҆́ннѣ: Бра́тїе, а҆враа́мъ ꙳ два̀ сы́на и҆мѣ̀: є҆ди́наго ѿ рабы̀, а҆ дрꙋга́го ѿ свобо́дныѧ. к҃г Но и҆́же ѿ рабы̀, по пло́ти роди́сѧ, а҆ и҆́же ѿ свобо́дныѧ, по ѡ҆бѣтова́нїю: к҃д Ꙗ҆̀же є҆ста̀ и҆носказа́ема. сїѧ́ бо є҆ста̀ два̀ завѣ́та: є҆ди́нъ ᲂу҆́бѡ ѿ горы̀ сїна́йскїѧ, въ рабо́тꙋ ражда́ѧй, ꙗ҆́же є҆́сть а҆га́рь. к҃є А҆га́рь бо, сїна̀ гора̀ є҆́сть во а҆раві́и: прилага́етсѧ же ны́нѣшнемꙋ і҆ерⷭ҇ли́мꙋ, рабо́таетъ же съ ча́ды свои́ми. к҃ѕ А҆ вы́шнїй і҆ерⷭ҇ли́мъ, свобо́дь є҆́сть, и҆́же є҆́сть ма́ти всѣ́мъ на́мъ. к҃з Пи́сано бо є҆́сть: возвесели́сѧ непло́ды не ражда́ющаѧ, расто́ргни и҆ возопѝ не болѧ́щаѧ, ꙗ҆́кѡ мнѡ́га ча̑да пꙋсты́ѧ па́че, не́жели и҆мꙋ́щїѧ мꙋ́жа.
(заⷱ҇ са҃і) к҃и Мы́ же бра́тїе, по і҆саа́кꙋ ꙳꙳ Въ понедѣ́льникъ ѕ҃і недѣ́ли: Бра́тїе, мы̀ по і҆саа́кꙋ ꙳꙳ ѡ҆бѣтова́нїѧ ча̑да є҆смы̀. к҃ѳ Но ꙗ҆́коже тогда̀ по пло́ти роди́выйсѧ, гонѧ́ше дх҃о́внаго: та́кѡ и҆ ны́нѣ. л҃ Но что̀ глаго́летъ писа́нїе; и҆зженѝ рабꙋ̀ и҆ сы́на є҆ѧ̀: не и҆́мать бо наслѣ́довати сы́нъ рабы́нинъ, съ сы́номъ свобо́дныѧ. л҃а Тѣ́мже бра́тїе, нѣ́смы рабы́нина ча̑да, но свобо́дныѧ.
Коне́цъ ст҃ы̑мъ.
Глава̀ пѧ́таѧ.
сⷯ а҃ Свобо́дою ᲂу҆̀бо, є҆́юже хрⷭ҇то́съ на́съ свободѝ, сто́йте, и҆ не па́ки под̾ и҆́гомъ рабо́ты держи́тесѧ. [і҃] в҃ Сѐ а҆́зъ па́ѵелъ глаго́лю ва́мъ: ꙗ҆́кѡ (л. рм҃з ѡ҆б.) а҆́ще ѡ҆брѣ́заетесѧ, хрⷭ҇то́съ ва́съ ничто́же по́льзꙋетъ. г҃ Свидѣ́тельствꙋю же па́ки всѧ́комꙋ человѣ́кꙋ ѡ҆брѣ́зающемꙋсѧ, ꙗ҆́кѡ до́лженъ є҆́сть ве́сь зако́нъ твори́ти. д҃ Оу҆праздни́стесѧ ѿ хрⷭ҇та̀, и҆̀же зако́номъ ѡ҆правда́етесѧ: ѿ благода́ти ѿпадо́сте. є҃ Мы́ бо дх҃омъ ѿ вѣ́ры, ᲂу҆пова́нїѧ пра́вды жде́мъ. ѕ҃ Ѡ҆ хрⷭ҇тѣ́ бо і҆и҃сѣ ни ѡ҆брѣ́занїе что̀ мо́жетъ, ни неѡбрѣ́занїе, но вѣ́ра любо́вїю поспѣшествꙋ́ема. з҃ Теча́сте до́брѣ, кто̀ ва́мъ возбранѝ не покарѧ́тисѧ и҆́стинѣ; и҃ Препрѣ́нїе не ѿ призва́вшагѡ вы̀. ѳ҃ Ма́лъ ква́съ всѐ смѣше́нїе ква́ситъ. і҃ А҆́зъ надѣ́юсѧ ѡ҆ ва́съ ѡ҆ гдⷭ҇ѣ, ꙗ҆́кѡ ничто́же и҆́но разꙋмѣ́ти бꙋ́дете: смꙋща́ѧй же ва́съ, понесе́тъ грѣ́хъ, и҆́же а҆́ще є҆́сть.
Коне́цъ понедѣ́льникꙋ.
(заⷱ҇ св҃і) а҃і А҆́зъ же бра́тїе, а҆́ще ꙳ Во вто́рникъ ѕ҃і недѣ́ли: Бра́тїе, а҆́ще ꙳ ѡ҆брѣ́занїе є҆щѐ проповѣ́дꙋю, почто̀ є҆щѐ гони́мь є҆́смь; ᲂу҆̀бо ᲂу҆праздни́сѧ собла́знъ крⷭ҇та̀. в҃і Ѽ дабы̀ ѿсѣ́чени бы́ли развраща́ющїи ва́съ. [а҃і] г҃і Вы́ бо на свобо́дꙋ зва́ни бы́сте бра́тїе: то́чїю да не свобо́да ва́ша въ винꙋ̀ пло́ти, но любо́вїю рабо́тайте дрꙋгъдрꙋ́гꙋ. д҃і И҆́бо ве́сь зако́нъ во є҆ди́номъ словесѝ и҆сполнѧ́етсѧ: во є҆́же возлю́биши бли́жнѧго твоего̀ ꙗ҆́коже себѐ. є҃і А҆́ще же дрꙋгъдрꙋ́га ᲂу҆грыза́ете и҆ снѣда́ете, блюди́тесѧ, да не дрꙋ́гъ ѿ дрꙋ́га и҆стребле́ни бꙋ́дете. ѕ҃і Гл҃ю же: дх҃омъ ходи́те, и҆ по́хѡти плотскі́ѧ не соверша́йте: з҃і Пло́ть бо похотствꙋ́етъ на дꙋ́ха, дꙋ́хъ же на пло́ть: сїѧ̑ же (л. рм҃и) дрꙋгъдрꙋ́гꙋ проти́витасѧ, да не ꙗ҆̀же хо́щете, сїѧ̑ творитѐ. и҃і А҆́ще ли дꙋ́хомъ води́ми є҆стѐ, нѣ́сте под̾ зако́номъ. ѳ҃і Ꙗ҆вле́на же сꙋ́ть дѣла̀ плотска̑ѧ ꙗ҆̀же сꙋ́ть: прелюбодѣѧ́нїе, блꙋ́дъ, нечистота̀, стꙋдодѣѧ́нїе, к҃ І҆дѡлослꙋже́нїе, чародѣѧ̑нїѧ, вражды̑, рвє́нїѧ, зави̑ды, ꙗ҆́рѡсти, разжжє́нїѧ, ра̑спри, собла́зны, є҆́рєси, к҃а За̑висти, ᲂу҆бі̑йства, пїѧ̑нства, безчи́нны кли́чи, и҆ подѡ́бнаѧ си̑мъ: ꙗ҆̀же предглаго́лю ва́мъ, и҆ предреко́хъ, ꙗ҆́кѡ такова́ѧ творѧ́щїи црⷭ҇твїѧ бж҃їѧ не наслѣ́дѧтъ.
Коне́цъ вто́рникꙋ.
(заⷱ҇ сг҃і) к҃в Пло́дъ же ꙳ Въ сꙋббѡ́тꙋ к҃з-ю: Бра́тїе, пло́дъ ꙳ Сїе́ же и҆ преподѡ́бнымъ. дх҃о́вный є҆́сть: любы̀, ра́дость, ми́ръ, долготерпѣ́нїе, блгⷭ҇ть, млⷭ҇рдїе, вѣ́ра, к҃г Кро́тость, воздержа́нїе: на таковы́хъ нѣ́сть зако́на. к҃д А҆ и҆̀же хрⷭ҇то́вы сꙋ́ть, пло́ть распѧ́ша со страстьмѝ и҆ похотьмѝ. к҃є А҆́ще живе́мъ дх҃омъ, дх҃омъ и҆ да хо́димъ. к҃ѕ Не быва́имъ тщесла́вни, дрꙋгъдрꙋ́га раздража́юще, дрꙋгъдрꙋ́гꙋ зави́дѧще.
Глава̀ шеста́ѧ.
сⷯ а҃ Бра́тїе, а҆́ще и҆ впаде́тъ человѣ́къ въ нѣ́кое прегрѣше́нїе, вы̀ дх҃о́внїи и҆справлѧ́йте такова́го дх҃омъ кро́тости: блюды́й себѐ, да не и҆ ты̀ и҆скꙋше́нъ бꙋ́деши. (л. рм҃и ѡ҆б.)
(заⷱ҇ сд҃і) в҃ Дрꙋгъдрꙋ́га ꙳ Въ сре́дꙋ ѕ҃і-ѧ недѣ́ли: Бра́тїе, дрꙋгъдрꙋ́га ꙳ тѧгѡты̀ носи́те, и҆ та́кѡ и҆спо́лните зако́нъ хрⷭ҇то́въ.
Коне́цъ сꙋббѡ́тѣ, и҆ прпⷣбнымъ.
г҃ А҆́ще бо кто̀ мни́тъ себѐ бы́ти что̀, ничто́же сы́й, ᲂу҆мо́мъ льсти́тъ себѐ. д҃ Дѣ́ло же своѐ да и҆скꙋша́етъ ко́йждо, и҆ тогда̀ въ себѣ̀ то́чїю хвале́нїе да и҆́мать, а҆ не во и҆но́мъ. є҃ Ко́йждо бо своѐ бре́мѧ понесе́тъ. ѕ҃ Да ѡ҆бща́етсѧ же ᲂу҆чѧ́йсѧ словесѝ ᲂу҆ча́щемꙋ, во всѣ́хъ бл҃ги́хъ. з҃ Не льсти́тесѧ, бг҃ъ порꙋга́емь не быва́етъ: є҆́же бо а҆́ще сѣ́етъ чл҃вѣ́къ, то́жде и҆ по́жнетъ. и҃ Ꙗ҆́кѡ сѣ́ѧй въ пло́ть свою̀, ѿ пло́ти по́жнетъ и҆стлѣ́нїе: а҆ сѣ́ѧй въ дх҃ъ, ѿ дх҃а по́жнетъ живо́тъ вѣ́чный. ѳ҃ До́брое же творѧ́ще, да не стꙋжа́емъ сѝ: во вре́мѧ бо своѐ по́жнемъ не ѡ҆слабѣ́юще. і҃ Тѣ́мже ᲂу҆́бѡ, до́ндеже вре́мѧ и҆́мамы, да дѣ́лаимъ бл҃го́е ко всѣ́мъ, па́че же къ при̑снымъ въ вѣ́рѣ.
Коне́цъ средѣ̀.
(заⷱ҇ сє҃і) [в҃і] а҃і Ви́дите, ꙳꙳ Недѣ́лѧ к҃в: Бра́тїе, ви́дите ꙳꙳ коли́цѣми кни́гами писа́хъ ва́мъ мое́ю рꙋко́ю. в҃і Є҆ли́цы хотѧ́тъ хвали́тисѧ по пло́ти, сі́и нꙋ́дѧтъ вы̀ ѡ҆брѣ́затисѧ, то́чїю да не крⷭ҇то́мъ хрⷭ҇то́вымъ го́нѧтсѧ. г҃і Ни бо̀ ѡ҆брѣ́зающїисѧ са́ми зако́нъ хранѧ́тъ: но хотѧ́тъ ва́мъ ѡ҆брѣ́зоватисѧ, да въ ва́шей пло́ти похва́лѧтсѧ.
(заⷱ҇) д҃і Мнѣ́ же ꙳꙳꙳ Въ вели́кїй пѧто́къ, на а҃-мъ часѣ̀: Бра́тїе, мнѣ̀ ꙳꙳꙳ да не бꙋ́детъ хвали́тисѧ, то́кмѡ ѡ҆ крⷭ҇тѣ̀ гдⷭ҇а на́шегѡ і҆и҃са хрⷭ҇та̀, и҆́мже мнѣ̀ мі́ръ (л. рм҃ѳ) распѧ́сѧ, и҆ а҆́зъ мі́рꙋ. є҃і Ѡ҆ хрⷭ҇тѣ́ бо і҆и҃сѣ, ни ѡ҆брѣ́занїе что̀ мо́жетъ, ни неѡбрѣ́занїе, но нова̀ тва́рь. ѕ҃і И҆ є҆ли́цы пра́виломъ си́мъ жи́тельствꙋютъ, ми́ръ на ни́хъ и҆ млⷭ҇ть, и҆ на і҆и҃ли бж҃їи. з҃і Про́чее, трꙋды̀ да никто́же мѝ дае́тъ: а҆́зъ бо ꙗ҆́звы гдⷭ҇а і҆и҃са на тѣ́лѣ мое́мъ ношꙋ̀. и҃і Бл҃года́ть гдⷭ҇а на́шегѡ і҆и҃са хрⷭ҇та̀, со дх҃омъ ва́шимъ бра́тїе. а҆ми́нь.
Коне́цъ недѣ́ли, и҆ пе́рвагѡ часа̀.
Коне́цъ посла́нїѧ, є҆́же къ гала́тѡмъ: написа́сѧ ѿ ри́ма тѷхі́комъ: и҆́мать въ себѣ̀ гла́въ, ѕ҃: зача́лъ цр҃ко́вныхъ, ѳ҃і: стїхѡ́въ, рм҃ѳ: знамена́нїй че́рныхъ, в҃і: без̾ червле́ныхъ.