(л. рк҃ѕ ѡ҆б.) Знамєна́нїѧ къ корі́нѳѧнѡмъ втора́гѡ посла́нїѧ.

[а҃] Бл҃годаре́нїе ѡ҆ бж҃їей по́мощи, на ню́же ᲂу҆пова́ти.

[в҃] Ѡ҆ любвѝ ꙗ҆́же къ ни́мъ, и҆ ѡ҆ пощадѣ́нїи.

[г҃] Ѡ҆ є҆́же и҆̀мъ бж҃е́ственнѣй по́льзѣ.

[д҃] Ѡ҆ ꙗ҆́же по бз҃ѣ бж҃е́ственнѣй слꙋ́жбѣ.

[є҃] Ѡ҆ бж҃е́ственнѣй сла́вѣ.

[ѕ҃] Ѡ҆ тѣле́сномъ неможе́нїи.

[з҃] Ѡ҆ є҆гѡ̀ бг҃олю́бїи.

[и҃] Ѡ҆ похвале́нїи корі́нѳѧнъ послꙋша́нїѧ.

[ѳ҃] Подвиже́нїе къ пода́нїю и҆мѣ́нїй ст҃ы̑мъ.

[а҃] Въ не́мже ѡ҆ а҆по́стольствѣ ті́товѣ.

[і҃] Повѣ́данїе свои́хъ трꙋдѡ́въ, и҆ сꙋ́щей на не́мъ бл҃года́ти, да не приложа́тсѧ корі́нѳѧне лестцє́мъ.

[а҃] Въ не́мже противостѧза́нїе є҆гѡ̀ къ ни́мъ.

[в҃] Ѡ҆ ѡ҆бличе́нїи и҆́хъ.

[г҃] Сегѡ̀ ра́ди болѣ́зненно, є҆́же ѿ бг҃а че́стно, поле́зно, самопы́тно.

[д҃] Ѡ҆ ᲂу҆гото́ванїи къ є҆гѡ̀ прише́ствїю. (л. рк҃з)

Сказа́нїе къ корі́нѳѧнѡмъ втора́гѡ посла́нїѧ ст҃а́гѡ а҆пⷭ҇ла па́ѵла.

Сїѐ посыла́етъ ѿ македо́нїи, вина́ же посла́нїю сїѧ̀ є҆́сть: Прїе́мше корі́нѳѧне пе́рвое посла́нїе, ᲂу҆мили́шасѧ ѡ҆ грѣсѣ̀ прїи́мшагѡ ма́чехꙋ свою̀, и҆ ѡ҆скорби́шасѧ, ꙗ҆́кѡ презрѣ́ша сицево́е прегрѣше́нїе. Та́кожде прельща́хꙋсѧ ѿ нѣ́кихъ творѧ́щихъ и҆звѣ́ты, ꙗ҆́коже присѣдѣ́ти пи́смени зако́нномꙋ, и҆ неполе́знꙋ мнѣ́ти ꙗ҆́же ѿ хрⷭ҇та̀ бл҃года́ть: и҆ па́че внима́хꙋ въ лицѐ хва́лѧщымсѧ. бѣ́ѧхꙋ же и҆ ѡ҆ ꙗ҆́же ко ст҃ы́мъ ми́лостыни до́брѣ пекꙋ́щесѧ. Къ си́мъ ᲂу҆́бѡ пи́шетъ, и҆ пе́рвѣе ᲂу҆́бѡ хва́литъ и҆̀хъ ѿри́нꙋвшихъ беззако́нновавшаго. Та́же ᲂу҆тѣ́шивъ и҆̀хъ, и҆ ᲂу҆чи́тъ раска́ѧвшагосѧ ѻ҆́наго прїима́ти. Оу҆чи́тъ же и҆ ѡ҆ зако́нѣ, раздѣлѧ́ѧ пи́смѧ, и҆ сказꙋ́етъ, ꙗ҆́кѡ не подоба́етъ прїима́ти то́чїю пи́смѧ зако́нное: но въ само́мъ пи́смени скры́тый и҆спы́товати ра́зꙋмъ. не то́чїю бо глаго́лы є҆́сть зако́нъ, но въ глаго́лемыхъ и҆ ᲂу҆́мъ дх҃а є҆́сть. Та́же ᲂу҆чи́тъ, ꙗ҆́кѡ хрⷭ҇тꙋ̀ прише́дшꙋ, но́въ зако́нъ бы́сть: и҆ не подоба́етъ по ве́тхомꙋ жи́ти, но ꙗ҆́коже въ но́вѣй тва́ри по всемꙋ̀ ѡ҆бновлѧ́тисѧ, и҆ пра́зднꙋ про́чее бы́ти ѡ҆брѣ́занїю. хва́литъ же и҆̀хъ и҆ ѡ҆ слꙋже́нїи ко ст҃ы́мъ, и҆ повелѣва́етъ и҆̀мъ наипа́че ᲂу҆мно́жити є҆̀. Оу҆корѧ́ѧ же въ лицѐ хва́лѧщихсѧ, и҆счита́етъ всѧ̑, є҆ли̑ка пострада̀ хрⷭ҇та̀ ра́ди: и҆ видѣ̑нїѧ же сказꙋ́етъ, ꙗ҆̀же ви́дѣ, и҆ є҆́же въ ра́й и҆ до тре́тїѧгѡ нб҃сѐ восхище́нїе. Та́же завѣщава́етъ не согрѣша́ти, и҆ согрѣша́ющымъ клѧ́тисѧ. И҆ си́це со благодаре́нїемъ скончава́етъ посла́нїе. (л. рк҃з ѡ҆б.)

И҆но́е сказа́нїе.

Всѐ сло́во є҆́сть въ посла́нїи се́мъ ѡ҆ себѣ̀, и҆ ѡ҆ корі́нѳѧнѣхъ, и҆ ѡ҆ лжи́выхъ а҆по́столѣхъ. И҆ ѿ сеѧ̀ вины̀ прехо́дитъ въ ꙗ҆̀же ѡ҆ бл҃года́ти бж҃їей, и҆ ѡ҆ до́бромъ жи́тельствѣ, по до́брѣй со́вѣсти, и҆ ѡ҆ по́двизѣхъ дх҃о́вныхъ: и҆ ѡ҆ несребролю́бїи, и҆ ѡ҆ пода́тельнѣй добродѣ́тели, и҆ ѡ҆ лꙋка́вствѣ и҆ го́рдости лжи́выхъ а҆по́столѡвъ. (л. рк҃и)

КЪ КОРІ́НѲѦНѠМЪ ВТОРО́Е ПОСЛА́НІЕ

СТ҃А́ГѠ А҆ПО́СТОЛА ПА́ѴЛА.

Глава̀ пе́рваѧ.

(заⷱ҇ рѯ҃з) сⷯ а҃ Па́ѵелъ ꙳ Въ четверто́къ і҃-ѧ недѣ́ли: Па́ѵелъ ꙳ посла́нникъ і҆и҃съ хрⷭ҇то́въ, во́лею бж҃їею: и҆ тїмоѳе́й бра́тъ, це́ркви бж҃їей сꙋ́щей въ корі́нѳѣ, со ст҃ы́ми всѣ́ми сꙋ́щими во все́й а҆ха́їи: в҃ Бл҃года́ть ва́мъ и҆ ми́ръ ѿ бг҃а ѻ҆ц҃а̀ на́шегѡ, и҆ гдⷭ҇а і҆и҃са хрⷭ҇та̀.

(заⷱ҇) [а҃] г҃ Бл҃гослове́нъ ꙳꙳ Вели́кимъ мꙋ́ченикѡмъ: Бра́тїе, бл҃гослове́нъ ꙳꙳ бг҃ъ, и҆ ѻ҆ц҃ъ гдⷭ҇а на́шегѡ і҆и҃са хрⷭ҇та̀, ѻ҆ц҃ъ щедро́тъ и҆ бг҃ъ всѧ́кїѧ ᲂу҆тѣ́хи: д҃ Оу҆тѣша́ѧй на́съ ѡ҆ всѧ́кой ско́рби на́шей, ꙗ҆́кѡ возмощѝ на́мъ ᲂу҆тѣ́шити сꙋ́щыѧ во всѧ́кой ско́рби, ᲂу҆тѣше́нїемъ, и҆́мже ᲂу҆тѣша́емсѧ са́ми ѿ бг҃а. є҃ Занѐ ꙗ҆́коже и҆збы́точествꙋютъ страда̑нїѧ хрⷭ҇то́ва въ на́съ, та́кѡ хрⷭ҇то́мъ и҆збы́точествꙋетъ и҆ ᲂу҆тѣше́нїе на́ше. ѕ҃ А҆́ще ли же скорби́мъ, ѡ҆ ва́шемъ ᲂу҆тѣше́нїи, и҆ спасе́нїи, дѣ́йствꙋющемсѧ въ терпѣ́нїи тѣ́хже страда́нїй, ꙗ҆̀же и҆ мы̀ стра́ждемъ: з҃ И҆ ᲂу҆пова́нїе на́ше (л. рк҃и ѡ҆б.) и҆звѣ́стно ѡ҆ ва́съ. а҆́ще ли ᲂу҆тѣша́емсѧ, ѡ҆ ва́шемъ ᲂу҆тѣше́нїи и҆ спасе́нїи: вѣ́дѧще, занѐ ꙗ҆́коже ѻ҆́бщницы є҆стѐ страсте́мъ на́шымъ, та́кожде и҆ ᲂу҆тѣше́нїю.

Коне́цъ четверткꙋ̀, и҆ мꙋ́ченикѡмъ.

(заⷱ҇ рѯ҃и) и҃ Не бо̀ хо́щемъ ва́съ, бра́тїе, ꙳ Въ сꙋббѡ́тꙋ к҃-ю: Бра́тїе, не хощꙋ̀ ва́съ ꙳ не вѣ́дѣти ѡ҆ ско́рби на́шей бы́вшей на́мъ во а҆сі́и, ꙗ҆́кѡ по премно́гꙋ и҆ па́че си́лы ѡ҆тѧготи́хомсѧ, ꙗ҆́кѡ не надѣ́ѧтисѧ на́мъ и҆ жи́ти. ѳ҃ Но са́ми въ себѣ̀ ѡ҆сꙋжде́нїе сме́рти и҆мѣ́хомъ, да не надѣ́ющесѧ бꙋ́демъ на сѧ̀, но на бг҃а возставлѧ́ющаго мє́ртвыѧ: і҃ И҆́же ѿ толи́кїѧ сме́рти и҆зба́вилъ ны̀ є҆́сть, и҆ и҆збавлѧ́етъ: на́ньже и҆ ᲂу҆пова́хомъ, ꙗ҆́кѡ и҆ є҆щѐ и҆зба́витъ. а҃і Поспѣша́ющымъ и҆ ва́мъ по на́съ моли́твою: да ѿ мнѡ́гъ ли́цъ є҆́же въ на́съ дарова́нїе, мно́гими благодари́тсѧ ꙾ѡ҆ ва́съ꙾въ нѣ́которыхъ ꙾ѡ҆ на́съ꙾.

Коне́цъ сꙋббѡ́тѣ.

(заⷱ҇ рѯ҃ѳ) в҃і Похвале́нїе бо на́ше ꙳꙳ Въ пѧто́къ і҃-ѧ недѣ́ли: Бра́тїе, похвале́нїе на́ше ꙳꙳ сїѐ є҆́сть, свидѣ́тельство со́вѣсти на́шеѧ, ꙗ҆́кѡ въ простотѣ̀ и҆ чистотѣ̀ бж҃їей, а҆ не въ мꙋ́дрости пло́ти, но бл҃года́тїю бж҃їею жи́хомъ въ мі́рѣ, мно́жае же ᲂу҆ ва́съ. г҃і Не и҆на̑ѧ бо пи́шемъ ва́мъ, но ꙗ҆̀же чтетѐ, и҆ разꙋмѣва́ете: ᲂу҆пова́ю же, ꙗ҆́кѡ и҆ до конца̀ ᲂу҆разꙋмѣ́ете: д҃і Ꙗ҆́коже и҆ разꙋмѣ́сте на́съ ѿ ча́сти, ꙗ҆́кѡ похвале́нїе ва́мъ є҆смы̀, ꙗ҆́коже и҆ вы̀ на́мъ, въ де́нь гдⷭ҇а на́шегѡ і҆и҃са хрⷭ҇та̀. [в҃] є҃і И҆ си́мъ ᲂу҆пова́нїемъ хотѣ́хъ къ ва́мъ прїитѝ пре́жде, да вторꙋ́ю бл҃года́ть и҆́мате: (л. рк҃ѳ) ѕ҃і И҆ ва́ми проитѝ въ македо́нїю, и҆ па́ки ѿ македо́нїи прїитѝ къ ва́мъ, и҆ ва́ми проводи́тисѧ во і҆ꙋде́ю. з҃і Сїе́ же хотѧ̀, є҆да̀ что̀ ᲂу҆́бѡ легкото́ю дѣ́ѧхъ; и҆лѝ ꙗ҆̀же совѣщава́ю, по пло́ти совѣщава́ю; да бꙋ́детъ ᲂу҆ менѐ є҆́же є҆́й, є҆́й: и҆ є҆́же нѝ, нѝ. и҃і Вѣ́ренъ же бг҃ъ, ꙗ҆́кѡ сло́во на́ше, є҆́же къ ва́мъ, не бы́сть є҆́й и҆ нѝ. ѳ҃і И҆́бо бж҃їй сн҃ъ і҆и҃съ хрⷭ҇то́съ, и҆́же ᲂу҆ ва́съ на́ми проповѣ́данный, мно́ю и҆ сїлꙋа́номъ и҆ тїмоѳе́емъ, не бы́сть є҆́й и҆ нѝ: но въ не́мъ само́мъ є҆́й бы́сть. к҃ Є҆ли̑ка бо ѡ҆бѣтова̑нїѧ бж҃їѧ, въ то́мъ є҆́й, и҆ въ то́мъ а҆ми́нь, бг҃ꙋ къ сла́вѣ на́ми.

Коне́цъ пѧткꙋ̀.

(заⷱ҇ р҃ѻ) к҃а И҆звѣствꙋ́ѧй же на́съ ꙳ Недѣ́лѧ д҃і: Бра́тїе, и҆звѣствꙋ́ѧй на́съ ꙳ съ ва́ми во хрⷭ҇та̀, и҆ пома́завый на́съ, бг҃ъ: к҃в И҆́же и҆ запечатлѣ́вый на́съ, и҆ да́вый ѡ҆брꙋче́нїе дх҃а въ сердца̀ на́ша. к҃г А҆́зъ же свидѣ́телѧ бг҃а призыва́ю на мою̀ дꙋ́шꙋ, ꙗ҆́кѡ щадѧ̀ ва́съ ктомꙋ̀ не прїидо́хъ въ корі́нѳъ: к҃д Не ꙗ҆́кѡ ѡ҆блада́емъ вѣ́рѣ ва́шей, но ꙗ҆́кѡ споспѣ́шницы є҆смы̀ ва́шей ра́дости: вѣ́рою бо стоитѐ.

Глава̀ втора́ѧ.

сⷯ а҃ Сꙋди́хъ же въ себѣ̀ сїѐ, не па́ки ско́рбїю къ ва́мъ прїитѝ. в҃ А҆́ще бо а҆́зъ ско́рбь творю̀ ва́мъ: то̀ кто̀ є҆́сть веселѧ́ѧй мѧ̀, то́чїю прїе́млѧй ско́рбь ѿ менѐ; г҃ И҆́бо писа́хъ ва́мъ сїѐ и҆́стое, да не прише́дъ ско́рбь на ско́рбь прїимꙋ̀, ѡ҆ (л. рк҃ѳ ѡ҆б.) ни́хже подоба́ше мѝ ра́доватисѧ, надѣ́ѧсѧ на всѧ̀ вы̀: ꙗ҆́кѡ

(заⷱ҇ рѻ҃а) Моѧ̀ ра́дость ꙳ Въ понедѣ́льникъ а҃і-ѧ недѣ́ли: Бра́тїе, моѧ̀ ра́дость ꙳ всѣ́хъ ва́съ є҆́сть. д҃ Ѿ печа́ли бо мно́гїѧ и҆ тꙋгѝ се́рдца написа́хъ ва́мъ мно́гими слеза́ми, не ꙗ҆́кѡ да .ѡ҆скорбите́сѧ, но любо́вь да позна́ете, ю҆́же и҆́мамъ и҆з̾ѻби́льнѡ къ ва́мъ.

Коне́цъ недѣ́ли.

є҃ А҆́ще ли кто̀ ѡ҆скорби́лъ менѐ, не менѐ ѡ҆скорбѝ, но ѿ ча́сти, да не ѡ҆тѧгчꙋ̀, всѣ́хъ ва́съ. ѕ҃ Дово́льно бо таково́мꙋ запреще́нїе сїѐ, є҆́же ѿ мно́гихъ. з҃ Тѣ́мже сопроти́вное па́че ва́мъ дарова́ти и҆ ᲂу҆тѣ́шити, да не ка́кѡ мно́гою ско́рбїю поже́ртъ бꙋ́детъ таковы́й. и҃ Тѣ́мже молю́ вы, ᲂу҆тверди́те къ немꙋ̀ любо́вь. ѳ҃ На сїе́ бо и҆ писа́хъ, да разꙋмѣ́ю и҆скꙋ́сство ва́ше, а҆́ще во все́мъ послꙋшли́ви є҆стѐ. і҃ Є҆мꙋ́же а҆́ще что̀ да́рꙋете, и҆ а҆́зъ и҆́бо а҆́зъ а҆́ще что̀ дарова́хъ, є҆мꙋ́же дарова́хъ, ва́съ ра́ди ѡ҆ лицѣ̀ і҆и҃съ хрⷭ҇то́вѣ. [г҃] а҃і Да не ѡ҆би́дими бꙋ́демъ ѿ сатаны̀: не не разꙋмѣва́емъ бо ᲂу҆мышле́нїй є҆гѡ̀. (пѧⷦ҇) в҃і Прише́дъ же въ трѡа́дꙋ во благовѣ́стїе хрⷭ҇то́во, и҆ две́ри ѿве́рзенѣ мѝ бы́вшей ѡ҆ гдⷭ҇ѣ, г҃і Не и҆мѣ́хъ поко́ѧ дꙋ́хꙋ моемꙋ̀, не ѡ҆брѣ́тшꙋ мѝ ті́та бра́та моегѡ̀: ꙾но ѿре́ксѧ и҆̀мъ꙾꙾но цѣлова́въ и҆̀хъ꙾, и҆зыдо́хъ въ македо́нїю.

(заⷱ҇ рѻ҃в) д҃і Бг҃ꙋ же ꙳꙳ Во вто́рникъ а҃і-ѧ недѣ́ли: Бра́тїе, бг҃ꙋ ꙳꙳ благодаре́нїе, всегда̀ побѣди́тели на́съ творѧ́щемꙋ ѡ҆ хрⷭ҇тѣ̀ і҆и҃сѣ, и҆ воню̀ ра́зꙋма є҆гѡ̀ (л. р҃л) ꙗ҆влѧ́ющꙋ на́ми во всѧ́комъ мѣ́стѣ. є҃і Ꙗ҆́кѡ хрⷭ҇то́во благоꙋха́нїе є҆смы̀ бг҃ови,

Коне́цъ понедѣ́льникꙋ.

въ спаса́емыхъ, и҆ въ погиба́ющихъ. ѕ҃і Ѻ҆́вѣмъ ᲂу҆́бѡ вонѧ̀ сме́ртнаѧ въ сме́рть: ѻ҆́вѣмъ же вонѧ̀ живо́тнаѧ въ живо́тъ. и҆ къ си́мъ кто̀ дово́ленъ; з҃і Нѣ́смы бо, ꙗ҆́коже мно́зи, нечи́стѡ проповѣ́дающїи сло́во бж҃їе: но ꙗ҆́кѡ ѿ чистоты̀, но ꙗ҆́кѡ ѿ бг҃а, пред̾ бг҃омъ во хрⷭ҇тѣ̀ глаго́лемъ.

Глава̀ тре́тїѧ.

сⷯ а҃ Зачина́емъ ли па́ки ꙗ҆̀же на́съ самѣ́хъ и҆звѣщава́ти ва́мъ; и҆лѝ тре́бꙋемъ, ꙗ҆́коже нѣ́цыи, и҆звѣщава́тельныхъ посла́нїй къ ва́мъ, и҆лѝ ѿ ва́съ и҆звѣсти́тельныхъ; в҃ Посла́нїе бо на́ше вы̀ є҆стѐ, напи́саное въ сердца́хъ на́шихъ, зна́емое и҆ прочита́емое ѿ всѣ́хъ человѣ̑къ. г҃ Ꙗ҆влѧ́еми, ꙗ҆́кѡ є҆стѐ посла́нїе хрⷭ҇то́во, слꙋ́женое на́ми, напи́сано не черни́ломъ, но дх҃омъ бг҃а жи́ва: не на скрижа́лѣхъ ка́менныхъ, но на скрижа́лѣхъ се́рдца пло́тѧныхъ.

Коне́цъ вто́рникꙋ.

(заⷱ҇ рѻ҃г) д҃ Надѣ́ѧнїе же таково̀ ꙳ Въ сре́дꙋ а҃і-ѧ недѣ́ли: Бра́тїе, надѣ́ѧнїе таково̀ ꙳ Сїе́ же и҆ ст҃о́мꙋ ᲂу҆брꙋ́сꙋ. и҆́мамы хрⷭ҇то́мъ къ бг҃ꙋ: є҃ Не ꙗ҆́кѡ дово́льни є҆смы̀ ѿ себѐ помы́слити что̀, ꙗ҆́кѡ ѿ себѐ, но дово́льство на́ше ѿ бг҃а. ѕ҃ И҆́же и҆ ᲂу҆дово́ли на́съ слꙋжи́тели бы́ти но́вꙋ завѣ́тꙋ, не пи́смене, но дх҃ꙋ: писмѧ́ бо ᲂу҆бива́етъ, а҆ дх҃ъ (л. р҃л ѡ҆б.) животвори́тъ. [д҃] з҃ А҆́ще ли слꙋже́нїе сме́рти писмены̀ ѡ҆бразова́но въ ка́менехъ, бы́сть въ сла́вꙋ, ꙗ҆́кѡ не мощѝ взира́ти сынѡ́мъ і҆и҃левымъ на лицѐ мѡѷсе́ово сла́вы ра́ди лица̀ є҆гѡ̀ престаю́щїѧ: и҃ Ка́кѡ не мно́жае па́че слꙋже́нїе дх҃а бꙋ́детъ въ сла́вѣ; ѳ҃ А҆́ще бо слꙋже́нїе ѡ҆сꙋжде́нїѧ, сла́ва: мно́гѡ па́че и҆збы́точествꙋетъ слꙋже́нїе пра́вды въ сла́вѣ. і҃ И҆́бо не просла́висѧ просла́вленное въ ча́сти се́й, за превосходѧ́щꙋю сла́вꙋ. а҃і А҆́ще бо престаю́щее, сла́вою: мно́гѡ па́че пребыва́ющее, въ сла́вѣ.

Коне́цъ средѣ̀, и҆ ᲂу҆брꙋ́сꙋ.

(заⷱ҇ рѻ҃д) в҃і И҆мꙋ́ще ᲂу҆̀бо ꙳ Въ сꙋббѡ́тꙋ к҃а-ю: Бра́тїе, и҆мꙋ́ще ꙳ таково̀ ᲂу҆пова́нїе, мно́гимъ дерзнове́нїемъ дѣ́йствꙋемъ: г҃і И҆ не ꙗ҆́коже мѡѷсе́й полага́ше покрыва́ло на лицѣ̀ свое́мъ, за є҆́же не мощѝ взира́ти сынѡ́мъ і҆и҃левымъ на коне́цъ престаю́щагѡ: д҃і Но ѡ҆слѣпи́шасѧ помышлє́нїѧ и҆́хъ: да́же бо до сегѡ̀ днѐ, то́жде покрыва́ло во чте́нїи ве́тхагѡ завѣ́та пребыва́етъ неѿкрове́но, занѐ ѡ҆ хрⷭ҇тѣ̀ престае́тъ. є҃і Но да́же до дне́сь, внегда̀ чте́тсѧ мѡѷсе́й, покрыва́ло на се́рдцѣ и҆́хъ лежи́тъ: ѕ҃і Внегда́ же ѡ҆братѧ́тсѧ ко гдⷭ҇ꙋ, взима́етсѧ покрыва́ло. з҃і Гдⷭ҇ь же дх҃ъ є҆́сть: а҆ и҆дѣ́же дх҃ъ гдⷭ҇нь, тꙋ̀ свобо́да. и҃і Мы́ же всѝ ѿкрове́ннымъ лице́мъ сла́вꙋ гдⷭ҇ню взира́юще, въ то́йже ѻ҆́бразъ преѡбразꙋ́емсѧ ѿ сла́вы въ сла́вꙋ, ꙗ҆́коже ѿ гдⷭ҇нѧ дх҃а.

Коне́цъ сꙋббѡ́тѣ. (л. рл҃а)

Глава̀ четве́ртаѧ.

(заⷱ҇ рѻ҃є) [є҃] сⷯ а҃ Сегѡ̀ ра́ди и҆мꙋ́ще ꙳ Въ четверто́къ а҃і-ѧ недѣ́ли: Бра́тїе, и҆мꙋ́ще ꙳ слꙋже́нїе сїѐ, ꙗ҆́коже поми́ловани бы́хомъ, не стꙋжа́емъ сѝ. в҃ Но ѿреко́хомсѧ та́йныхъ сра́ма, не въ лꙋка́вствїи ходѧ́ще, ни льстѧ́ще словесѐ бж҃їѧ, но ꙗ҆вле́нїемъ и҆́стины, представлѧ́юще себѐ ко всѧ́кой со́вѣсти чл҃вѣ́честѣй, пред̾ бг҃омъ. г҃ А҆́ще ли же є҆́сть покрове́но бл҃говѣствова́нїе на́ше, въ ги́бнꙋщихъ є҆́сть покрове́но: д҃ Въ ни́хже бо́гъ вѣ́ка сегѡ̀ ѡ҆слѣпѝ ра́зꙋмы невѣ́рныхъ, во є҆́же не возсїѧ́ти и҆̀мъ свѣ́тꙋ бл҃говѣствова́нїѧ сла́вы хрⷭ҇то́вы, и҆́же є҆́сть ѻ҆́бразъ бг҃а неви́димагѡ. є҃ Не себе́ бо проповѣ́даемъ, но хрⷭ҇та̀ і҆и҃са, гдⷭ҇а: себе́ же самѣ́хъ, рабы̑ ва́мъ і҆и҃са [гдⷭ҇а] ра́ди.

(заⷱ҇ рѻ҃ѕ) ѕ҃ Ꙗ҆́кѡ бг҃ъ ꙳꙳ Недѣ́лѧ є҃і: Бра́тїе, бг҃ъ ꙳꙳ Сїе́ же и҆ прпⷣбнымъ. рекі́й и҆з̾ тмы̀ свѣ́тꙋ возсїѧ́ти, и҆́же возсїѧ̀ въ срⷣца́хъ на́шихъ, къ просвѣще́нїю ра́зꙋма сла́вы бж҃їѧ, ѡ҆ лицѣ̀ і҆и҃съ хрⷭ҇то́вѣ.

Коне́цъ четверткꙋ̀.

[ѕ҃] з҃ И҆́мамы же сокро́вище сїѐ въ скꙋде́льныхъ сосꙋ́дѣхъ, да премно́жество си́лы бꙋ́детъ бж҃їѧ, а҆ не ѿ на́съ. и҃ Во все́мъ скорбѧ́ще, но не стꙋжа́юще сѝ: не ча́еми, но не ѿчаѧва́еми: ѳ҃ Гони́ми, но не ѡ҆ставлѧ́еми: низлага́еми, но не погиба́юще. і҃ Всегда̀ ме́ртвость гдⷭ҇а і҆и҃са въ тѣ́лѣ носѧ́ще, да и҆ живо́тъ і҆и҃совъ въ тѣ́лѣ на́шемъ ꙗ҆ви́тсѧ. а҃і При́снѡ бо мы̀ живі́и въ (л. рл҃а ѡ҆б.) сме́рть предае́мсѧ і҆и҃са ра́ди, да и҆ живо́тъ і҆и҃совъ ꙗ҆ви́тсѧ въ ме́ртвеннѣй пло́ти на́шей. в҃і Тѣ́мже сме́рть ᲂу҆́бѡ въ на́съ дѣ́йствꙋетъ, а҆ живо́тъ въ ва́съ.

(заⷱ҇ рѻ҃з) г҃і И҆мꙋ́ще же ꙳ Въ пѧто́къ а҃і-ѧ недѣ́ли: Бра́тїе, и҆мꙋ́ще ꙳ то́йже дх҃ъ вѣ́ры, по пи́санномꙋ: вѣ́ровахъ, тѣ́мже возглаго́лахъ, и҆ мы̀ вѣ́рꙋемъ, тѣ́мже и҆ глаго́лемъ: д҃і Вѣ́дѧще, ꙗ҆́кѡ воздви́гїй гдⷭ҇а і҆и҃са, и҆ на́съ со і҆и҃сомъ воздви́гнетъ, и҆ предпоста́витъ съ ва́ми. є҃і Всѧ̑ бо ва́съ ра́ди, да благода́ть ᲂу҆мно́жившаѧсѧ, мно́жайшими бл҃годаре́нїи и҆збы́точествитъ въ сла́вꙋ бж҃їю.

Коне́цъ недѣ́ли, и҆ преподѡ́бнымъ.

ѕ҃і Тѣ́мже не стꙋжа́емъ сѝ: но а҆́ще и҆ внѣ́шнїй на́шъ человѣ́къ тлѣ́етъ, но внꙋ́треннїй ѡ҆бновлѧ́етсѧ по всѧ̀ днѝ. з҃і Є҆́же бо ны́нѣ ле́гкое печа́ли на́шеѧ, по преꙋмноже́нїю въ преспѣ́ѧнїе, тѧготꙋ̀ вѣ́чныѧ сла́вы содѣ́ловаетъ на́мъ. и҃і Не смотрѧ́ющымъ на́мъ ви́димыхъ, но неви́димыхъ: ви̑димаѧ бо вре́мєнна, неви̑димаѧ же вѣ̑чна.

Коне́цъ пѧткꙋ̀.

Глава̀ пѧ́таѧ.

(заⷱ҇ рѻ҃и) сⷯ а҃ Вѣ́мы бо, ꙳꙳ Въ сꙋббѡ́тꙋ к҃в-ю: Бра́тїе, вѣ́мы ꙳꙳ Сїе́ же въ сре́дꙋ ᲂу҆со́пшымъ. ꙗ҆́кѡ а҆́ще земна́ѧ на́ша хра́мина тѣ́ла разори́тсѧ, созда́нїе ѿ бг҃а и҆́мамы хра́минꙋ нерꙋкотворе́нꙋ, вѣ́чнꙋ на нб҃сѣ́хъ. в҃ И҆́бо ѡ҆ се́мъ воздыха́емъ, въ жили́ще на́ше нбⷭ҇ное (л. рл҃в) ѡ҆блещи́сѧ жела́юще: г҃ А҆́ще и҆ ѡ҆бле́кшесѧ, не на́зи ѡ҆брѧ́щемсѧ. д҃ И҆́бо сꙋ́щїи въ тѣ́лѣ се́мъ, воздыха́емъ ѡ҆тѧгча́еми: поне́же не хо́щемъ совлещи́сѧ, но поѡблещи́сѧ: да поже́рто бꙋ́детъ ме́ртвенное живото́мъ. є҃ Сотвори́вый же на́съ въ сїѐ и҆́стое бг҃ъ, и҆́же и҆ дадѐ на́мъ ѡ҆брꙋче́нїе дх҃а. ѕ҃ Дерза́юще ᲂу҆́бѡ всегда̀, и҆ вѣ́дѧще, ꙗ҆́кѡ живꙋ́ще въ тѣ́лѣ, ѿхо́димъ ѿ гдⷭ҇а: з҃ [Вѣ́рою бо хо́димъ, а҆ не видѣ́нїемъ.] и҃ Дерза́емъ же, и҆ благоволи́мъ па́че ѿитѝ ѿ тѣ́ла, и҆ вни́ти ко гдⷭ҇ꙋ. ѳ҃ Тѣ́мже и҆ тщи́мсѧ, а҆́ще входѧ́ще, а҆́ще ѿходѧ́ще, благоꙋго́дни є҆мꙋ̀ бы́ти.

(заⷱ҇ рѻ҃ѳ) і҃ Всѣ́мъ бо ꙗ҆ви́тисѧ на́мъ ꙳ Въ понедѣ́льникъ в҃і-ѧ недѣ́ли: Бра́тїе, всѣ́мъ на́мъ ꙗ҆ви́тисѧ ꙳ подоба́етъ пред̾ сꙋди́щемъ хрⷭ҇то́вымъ

Коне́цъ сꙋббѡ́тѣ, и҆ мє́ртвымъ.

да прїи́метъ ко́ждо ꙗ҆̀же съ тѣ́ломъ содѣ́ла, и҆лѝ бла̑га, и҆лѝ ѕла̑. а҃і Вѣ́дꙋще ᲂу҆̀бо стра́хъ гдⷭ҇нь, человѣ́ки ᲂу҆вѣщава́емъ, бг҃ови же ꙗ҆вле́ни бы́хомъ: ᲂу҆пова́емъ же, ꙗ҆́кѡ и҆ въ со́вѣстехъ ва́шихъ ꙗ҆вле́ни є҆смы̀. в҃і Не па́ки бо себѐ хва́лимъ пред̾ ва́ми, но винꙋ̀ дае́мъ ва́мъ похвале́нїю по на́съ, да и҆́мате къ хва́лѧщымсѧ въ лицѐ, а҆ не въ се́рдцы. г҃і А҆́ще бо и҆зꙋми́хомсѧ, бг҃ови: а҆́ще ли цѣломꙋ́дрствꙋемъ, ва́мъ. д҃і И҆́бо любы̀ бж҃їѧ содержи́тъ на́съ сꙋ́ждьшихъ сїѐ: ꙗ҆́кѡ а҆́ще є҆ди́нъ за всѣ́хъ ᲂу҆́мре, то̀ ᲂу҆̀бо всѝ ᲂу҆мро́ша. (л. рл҃в ѡ҆б.)

(заⷱ҇ р҃п) є҃і Хрⷭ҇то́съ же ꙳ Во вто́рникъ в҃і недѣ́ли: Бра́тїе, хрⷭ҇то́съ ꙳ за всѧ̑ ᲂу҆́мре, да живꙋ́щїи не ктомꙋ̀ себѣ̀ живꙋ́тъ: но ᲂу҆ме́ршемꙋ за ни́хъ и҆ воскре́сшемꙋ.

Коне́цъ понедѣ́льникꙋ.

ѕ҃і Тѣ́мже и҆ мы̀ ѿ ны́нѣ ни є҆ди́нагѡ вѣ́мы по пло́ти: а҆́ще же и҆ разꙋмѣ́хомъ по пло́ти хрⷭ҇та̀, но ны́нѣ ктомꙋ̀ не разꙋмѣ́емъ. з҃і Тѣ́мже а҆́ще ка́ѧ ѡ҆ хрⷭ҇тѣ̀, нова̀ тва́рь: дрє́внѧѧ мимоидо́ша, сѐ бы́ша всѧ̑ нѡва̀. и҃і Всѧ́чєскаѧ же ѿ бг҃а, примири́вшагѡ на́съ себѣ̀ і҆и҃съ хрⷭ҇то́мъ, и҆ да́вшагѡ на́мъ слꙋже́нїе примире́нїѧ. ѳ҃і Занѐ бг҃ъ бѣ̀ во хрⷭ҇тѣ̀ мі́ръ примирѧ́ѧ себѣ̀, не вмѣнѧ́ѧ и҆̀мъ согрѣше́нїй и҆́хъ: и҆ положи́въ въ на́съ сло́во примире́нїѧ. к҃ По хрⷭ҇тѣ̀ ᲂу҆́бѡ ꙾мо́лимъ꙾꙾посо́льствꙋемъ꙾, ꙗ҆́кѡ бг҃ꙋ молѧ́щꙋ на́ми: мо́лимсѧ ᲂу҆́бѡ по хрⷭ҇тѣ̀, примири́тесѧ съ бг҃омъ. к҃а Не вѣ́дѣвшаго бо грѣха̀, по на́съ грѣ́хъ сотворѝ, да мы̀ бꙋ́демъ пра́вда бж҃їѧ ѡ҆ не́мъ.

Коне́цъ вто́рникꙋ.

Глава̀ шеста́ѧ.

(заⷱ҇ рп҃а) сⷯ а҃ Поспѣ́шствꙋюще же и҆ мо́лимъ, ꙳꙳ Недѣ́лѧ ѕ҃і: Бра́тїе, поспѣ́шствꙋюще мо́лимъ, ꙳꙳ Сїе́ же и҆ мꙋ́ченицамъ. не вотщѐ бл҃года́ть бж҃їю прїѧ́ти ва́мъ. в҃ Глаго́летъ бо: во вре́мѧ прїѧ́тно послꙋ́шахъ тебѐ, и҆ въ де́нь спасе́нїѧ помого́хъ тѝ. сѐ ны́нѣ вре́мѧ бл҃гопрїѧ́тно, сѐ ны́нѣ де́нь спасе́нїѧ: г҃ Ни є҆ди́но ни въ че́мже даю́ще претыка́нїе, да слꙋже́нїе безпоро́чно бꙋ́детъ. д҃ Но во (л. рл҃г) все́мъ представлѧ́юще себѐ ꙗ҆́коже бж҃їѧ слꙋгѝ, въ терпѣ́нїи мно́зѣ, въ ско́рбехъ, въ бѣда́хъ, въ тѣснота́хъ, є҃ Въ ра́нахъ, въ темни́цахъ, въ нестрое́нїихъ, въ трꙋдѣ́хъ, во бдѣ́нїихъ, въ поще́нїихъ, ѕ҃ Во ѡ҆чище́нїи, въ ра́зꙋмѣ, въ долготерпѣ́нїи, въ бла́гости, въ дс҃ѣ ст҃ѣ, въ любвѝ нелицемѣ́рнѣ, з҃ Въ словесѝ и҆́стины, въ си́лѣ бж҃їей: ѻ҆рꙋ́жїи пра́вды, десны́ми и҆ шꙋ́ими. и҃ Сла́вою, и҆ безче́стїемъ: гажде́нїемъ, и҆ благохвале́нїемъ: ꙗ҆́кѡ лестцы̀, и҆ и҆́стинни: ѳ҃ Ꙗ҆́кѡ незна́еми, и҆ познава́еми: ꙗ҆́кѡ ᲂу҆мира́юще, и҆ сѐ жи́ви є҆смы̀: ꙗ҆́кѡ наказꙋ́еми, а҆ не ᲂу҆мерщвлѧ́еми: і҃ Ꙗ҆́кѡ скорбѧ́ще, при́снѡ же ра́дꙋющесѧ: ꙗ҆́кѡ ни́щи, а҆ мно́гихъ богатѧ́ще: ꙗ҆́кѡ ничто́же и҆мꙋ́ще, а҆ всѧ̑ содержа́ще.

Коне́цъ недѣ́ли, и҆ мꙋ́ченицамъ.

(заⷱ҇ рп҃в) а҃і Оу҆ста̀ на́ша ꙳ Въ сре́дꙋ в҃і недѣ́ли: Бра́тїе, ᲂу҆ста̀ на́ша ꙳ ѿверзо́шасѧ къ ва́мъ корі́нѳѧне, се́рдце на́ше распространи́сѧ. в҃і Не тѣ́снѡ вмѣща́етесѧ въ на́съ, ᲂу҆тѣснѧ́етесѧ же во ᲂу҆тро́бахъ ва́шихъ. г҃і То́жде возме́здїе [ꙗ҆́коже ча́дѡмъ глаго́лю,] распространи́тесѧ и҆ вы̀. д҃і ꙾Не быва́йте ᲂу҆до́бь прело́жни ко и҆но́мꙋ ꙗ҆рмꙋ̀, ꙗ҆́коже невѣ́рнїи꙾꙾не быва́йте прело́жни ко и҆но́мꙋ ꙗ҆рмꙋ̀ невѣ́рныхъ꙾: ко́е бо прича́стїе пра́вдѣ къ беззако́нїю; и҆лѝ ко́е ѻ҆бще́нїе свѣ́тꙋ ко тмѣ̀; є҃і Ко́е же согла́сїе хрⷭ҇то́ви съ велїа́ромъ; и҆лѝ ка́ѧ ча́сть вѣ́рнꙋ съ невѣ́рнымъ; ѕ҃і И҆лѝ ко́е сложе́нїе цр҃кви бж҃їей со і҆́дѡлы;

(заⷱ҇) Вы́ бо є҆стѐ ꙳꙳ Недѣ́лѧ з҃і: Бра́тїе, вы̀ є҆стѐ ꙳꙳ цр҃кви бг҃а жи́ва, ꙗ҆́коже речѐ бг҃ъ:

Коне́цъ средѣ̀. (л. рл҃г ѡ҆б.)

ꙗ҆́кѡ вселю́сѧ въ ни́хъ и҆ похождꙋ̀, и҆ бꙋ́дꙋ и҆̀мъ бг҃ъ, и҆ ті́и бꙋ́дꙋтъ мнѣ̀ лю́дїе. з҃і Тѣ́мже и҆зыди́те ѿ среды̀ и҆́хъ, и҆ ѿлꙋчи́тесѧ, глаго́летъ гдⷭ҇ь, и҆ нечистотѣ̀ не прикаса́йтесѧ: и҆ а҆́зъ прїимꙋ̀ вы̀. и҃і И҆ бꙋ́дꙋ ва́мъ во ѻ҆тца̀, и҆ вы̀ бꙋ́дете мнѣ̀ въ сы́ны и҆ дщє́ри, глаго́летъ гдⷭ҇ь вседержи́тель.

Глава̀ седма́ѧ.

сⷯ а҃ Сицева̀ ᲂу҆̀бо и҆мꙋ́ще ѡ҆бѣтова̑нїѧ, ѽ возлю́бленнїи,

(заⷱ҇ рп҃г) Ѡ҆чи́стимъ꙳ Четверто́къ в҃і недѣ́ли: Бра́тїе, ѡ҆чи́стимъ ꙳ себѐ ѿ всѧ́кїѧ скве́рны пло́ти и҆ дх҃а, творѧ́ще ст҃ы́ню въ стра́сѣ бж҃їи.

Коне́цъ недѣ́ли.

[и҃] в҃ Вмѣсти́те ны̀: ни є҆ди́наго ѡ҆би́дѣхомъ, ни є҆ди́наго и҆стли́хомъ, ни є҆ди́наго лихои́мствовахомъ. (сꙋⷠ҇) г҃ Не на ѡ҆сꙋжде́нїе глаго́лю: пре́жде бо рѣ́хъ, ꙗ҆́кѡ въ сердца́хъ на́шихъ є҆стѐ, во є҆́же ᲂу҆мре́ти съ ва́ми и҆ сожи́ти. д҃ Мно́го мѝ дерзнове́нїе къ ва́мъ, мно́га мѝ похвала̀ по ва́съ: и҆спо́лнихсѧ ᲂу҆тѣ́хи, преизбы́точествꙋю ра́достїю ѡ҆ всѧ́кой печа́ли на́шей. є҃ И҆́бо прише́дшымъ на́мъ въ македо́нїю, ни є҆ди́нагѡ и҆мѣ̀ поко́ѧ пло́ть на́ша, но во все́мъ скорбѧ́ще: внѣꙋ́дꙋ бра̑ни, внꙋтрьꙋ́дꙋ боѧ̑зни. ѕ҃ Но ᲂу҆тѣша́ѧй смирє́нныѧ, ᲂу҆тѣ́ши на́съ бг҃ъ прише́ствїемъ ті́товымъ. з҃ Не то́кмѡ же прише́ствїемъ є҆гѡ̀, но и҆ ᲂу҆тѣше́нїемъ, и҆́мже ᲂу҆тѣ́шисѧ ѡ҆ ва́съ, повѣ́даѧ на́мъ ва́ше жела́нїе, ва́ше рыда́нїе, ва́шꙋ ре́вность по мнѣ̀: ꙗ҆́кѡ (л. рл҃д) мѝ па́че возра́доватисѧ. и҃ Ꙗ҆́кѡ а҆́ще и҆ ѡ҆скорби́хъ ва́съ посла́нїемъ, не раска́юсѧ, а҆́ще и҆ раска́ѧлъ бы́хъ сѧ. ви́жꙋ бо, ꙗ҆́кѡ посла́нїе ѻ҆́но, а҆́ще и҆ въ ча́съ, ѡ҆скорбѝ ва́съ. ѳ҃ Ны́нѣ ра́дꙋюсѧ, не ꙗ҆́кѡ ско́рбни бы́сте, но ꙗ҆́кѡ ѡ҆скорби́стесѧ въ покаѧ́нїе: ѡ҆скорбѣ́сте бо по бз҃ѣ, да ни ѡ҆ є҆ди́номъ ѿтщетите́сѧ ѿ на́съ.

(заⷱ҇ рп҃д) і҃ Печа́ль бо, ꙗ҆́же ꙳ Пѧто́къ в҃і недѣ́ли: Бра́тїе, печа́ль ꙗ҆́же ꙳ по бз҃ѣ, покаѧ́нїе нераска́ѧнно во спасе́нїе содѣ́ловаетъ:

Коне́цъ четверткꙋ̀.

а҆ сегѡ̀ мі́ра печа́ль, сме́рть содѣ́ловаетъ. а҃і Се́ бо сїѐ са́мое, є҆́же по бз҃ѣ ѡ҆скорби́тисѧ ва́мъ, коли́ко содѣ́ла въ ва́съ тща́нїе, но ѿвѣ́тъ, но негодова́нїе, но стра́хъ, но вожделѣ́нїе, но ре́вность, но ѿмще́нїе: во все́мъ предста́висте себѐ чи́сты бы́ти въ ве́щи. в҃і А҆́ще бо и҆ писа́хъ ва́мъ, не ѡ҆би́дѣвшагѡ ра́ди нижѐ ѡ҆би́димагѡ ра́ди: но за є҆́же ꙗ҆ви́тисѧ въ ва́съ тща́нїю на́шемꙋ, є҆́же ѡ҆ ва́съ пред̾ бг҃омъ. г҃і Сегѡ̀ ра́ди ᲂу҆тѣ́шихомсѧ ѡ҆ ᲂу҆тѣше́нїи ва́шемъ: ли́шше же па́че возра́довахомсѧ ѡ҆ ра́дости ті́товѣ, ꙗ҆́кѡ поко́исѧ дх҃ъ є҆гѡ̀ ѿ всѣ́хъ ва́съ. д҃і Ꙗ҆́кѡ а҆́ще что̀ є҆мꙋ̀ ѡ҆ ва́съ похвали́хсѧ, не посрами́хсѧ: но ꙗ҆́кѡ всѧ̑ вои́стиннꙋ глаго́лахомъ ва́мъ, та́кѡ и҆ похвале́нїе на́ше є҆́же къ ті́тꙋ, и҆́стинно бы́сть. є҃і И҆ ᲂу҆тро́ба є҆гѡ̀ и҆́злиха въ ва́съ є҆́сть, воспомина́ющꙋ всѣ́хъ ва́съ послꙋша́нїе, ꙗ҆́кѡ со стра́хомъ и҆ тре́петомъ прїѧ́сте є҆го̀. ѕ҃і Ра́дꙋюсѧ ᲂу҆̀бо, ꙗ҆́кѡ во все́мъ дерза́ю въ ва́съ.

Коне́цъ пѧткꙋ̀. (л. рл҃д ѡ҆б.)

Глава̀ ѻ҆сма́ѧ.

(заⷱ҇ рп҃є) [ѳ҃] сⷯ а҃ Сказꙋ́емъ же ва́мъ, бра́тїе, блгⷣть бж҃їю, ꙳ Сꙋббѡ́та к҃г: Бра́тїе, сказꙋ́ю ва́мъ блгⷣть бж҃їю, ꙳ да́ннꙋю въ цр҃квахъ македо́нскихъ: в҃ Ꙗ҆́кѡ во мно́зѣмъ и҆скꙋше́нїи скорбе́й, и҆збы́токъ ра́дости и҆́хъ, и҆ ꙗ҆́же во глꙋбинѣ̀ нищета̀ и҆́хъ, и҆збы́точествова въ бога́тство простоты̀ и҆́хъ. г҃ Ꙗ҆́кѡ по си́лѣ и҆́хъ [свидѣ́тельствꙋю,] и҆ па́че си́лы, доброхо́тни: д҃ Со мно́гимъ моле́нїемъ молѧ́ще на́съ, бл҃года́ть и҆ ѻ҆бще́нїе слꙋже́нїѧ, є҆́же во ст҃ы́хъ, прїѧ́ти на́мъ. є҃ И҆ не ꙗ҆́коже надѣ́ѧхомсѧ, но себѐ вда́ша пе́рвѣе гдⷭ҇ви, и҆ на́мъ во́лею бж҃їею.

Коне́цъ сꙋббѡ́тѣ.

ѕ҃ Во є҆́же ᲂу҆моли́ти на́мъ ті́та, да ꙗ҆́коже пре́жде нача́тъ, та́кожде и҆ сконча́етъ въ ва́съ и҆ бл҃года́ть сїю̀.

(заⷱ҇ рп҃ѕ) з҃ Но ꙗ҆́коже во все́мъ ꙳꙳ Понедѣ́льникъ г҃і-ѧ недѣ́ли: Бра́тїе, ꙗ҆́кѡ во все́мъ ꙳꙳ и҆збы́точествꙋете вѣ́рою, и҆ сло́вомъ, и҆ ра́зꙋмомъ, и҆ всѧ́цѣмъ тща́нїемъ, и҆ любо́вїю ꙗ҆́же ѿ ва́съ къ на́мъ, да и҆ въ се́й бл҃года́ти и҆збы́точествꙋете. и҃ Не по повелѣ́нїю глаго́лю, но за и҆ны́хъ тща́нїе, и҆ ва́шеѧ любвѐ и҆́стинное и҆скꙋша́ѧ. ѳ҃ Вѣ́сте бо бл҃года́ть гдⷭ҇а на́шегѡ і҆и҃са хрⷭ҇та̀, ꙗ҆́кѡ ва́съ ра́ди ѡ҆бнища̀ бога́тъ сы́й, да вы̀ нището́ю є҆гѡ̀ ѡ҆богатите́сѧ. і҃ И҆ совѣ́тъ даю̀ ѡ҆ се́мъ: се́ бо ва́мъ є҆́сть на по́льзꙋ, и҆̀же не то́чїю є҆́же твори́ти, (л. рл҃є) но и҆ є҆́же хотѣ́ти пре́жде нача́сте ѿ преше́дшагѡ лѣ́та. а҃і Ны́нѣ же и҆ є҆́же твори́ти сконча́йте: да ꙗ҆́коже бы́сть ᲂу҆се́рдїе хотѣ́ти, та́кѡ да бꙋ́детъ и҆ и҆спо́лнити, ѿ є҆́же и҆мѣ́ти. в҃і А҆́ще бо ᲂу҆се́рдїе предлежи́тъ, по є҆ли́кꙋ а҆́ще кто̀ и҆́мать, бл҃гопрїѧ́тенъ є҆́сть, а҆ не по є҆ли́кꙋ не и҆́мать. г҃і Не бо̀ да и҆ны̑мъ ᲂу҆́бѡ ѿра́да, ва́мъ же ско́рбь: но ѿ и҆зравне́нїѧ. д҃і Въ ны́нѣшнее вре́мѧ, ва́ше и҆збы́точествїе, во ѻ҆́нѣхъ лише́нїе, да и҆ ѻ҆́нѣхъ и҆збы́токъ бꙋ́детъ въ ва́ше лише́нїе: ꙗ҆́кѡ да бꙋ́детъ ра́венство. є҃і Ꙗ҆́коже є҆́сть пи́сано: ꙾и҆́же мно́гое, не преꙋмно́жилъ є҆́сть, и҆ и҆́же ма́лое, не ᲂу҆ма́лилъ꙾꙾не преизбы́точествова и҆́же мно́гѡ: и҆ и҆́же ма́лѡ не мнѣ́е прїѧ́тъ꙾.

Коне́цъ понедѣ́льникꙋ.

(заⷱ҇ рп҃з) [а҃] ѕ҃і Благодаре́нїе же ꙳ Вто́рникъ г҃і-ѧ недѣ́ли: Бра́тїе, бл҃годаре́нїе ꙳ бг҃ови, да́вшемꙋ то́жде тща́нїе ѡ҆ ва́съ въ се́рдце ті́тово: з҃і Ꙗ҆́кѡ моле́нїе ᲂу҆́бѡ прїѧ́тъ, тщали́вѣйшїй же сы́й, свое́ю во́лею и҆зы́де къ ва́мъ. и҃і Посла́хомъ же съ ни́мъ и҆ бра́та, є҆гѡ́же похвала̀ во є҆ѵⷢ҇лїи по всѣ́мъ цр҃квамъ. ѳ҃і Не то́чїю же, но и҆ ѡ҆свѧ́щсѧ ѿ цр҃кве́й съ на́ми ходи́ти, со благода́тїю се́ю слꙋжи́мою на́ми, къ самогѡ̀ гдⷭ҇а сла́вѣ, и҆ ᲂу҆се́рдїю ва́шемꙋ: к҃ Блюдꙋ́щесѧ тогѡ̀ да не кто̀ на́съ порече́тъ во ѻ҆би́лїи се́мъ, слꙋжи́мѣмъ на́ми: к҃а Промышлѧ́юще дѡ́браѧ, не то́кмѡ пред̾ бг҃омъ, но и҆ пред̾ человѣ́ки. к҃в Посла́хомъ же съ ни́ми и҆ бра́та на́шего, є҆го́же и҆скꙋси́хомъ во мно́гихъ ꙳мно́гащи встанли́ва꙳꙳мно́гажды тща́тельна꙳ сꙋ́ща, ны́нѣ же ꙳꙳ѕѣлѡ̀ (л. рл҃є ѡ҆б.) встанли́вѣйша꙳꙳꙳꙳мно́жае тща́тельнѣйша꙳꙳, надѣ́ѧнїемъ мно́гимъ є҆́же въ ва́съ. к҃г А҆́ще ли же ѡ҆ ті́тѣ, ѻ҆́бщникъ мнѣ̀, и҆ въ ва́съ поспѣ́шникъ: а҆́ще ли бра́тїѧ на́шѧ, и҆ посла́нницы цр҃кве́й, сла́ва хрⷭ҇то́ва. к҃д Показа́нїе ᲂу҆̀бо любвѐ ва́шеѧ, и҆ на́шегѡ хвале́нїѧ ѡ҆ ва́съ, въ ни́хъ покажи́те, въ лицѐ цр҃кве́й.

Глава̀ девѧ́таѧ.

сⷯ а҃ Ѡ҆ слꙋ́жбѣ бо ꙗ҆́же ко ст҃ы̑мъ, ли́шше мѝ є҆́сть писа́ти ва́мъ. в҃ Вѣ́мъ бо ᲂу҆се́рдїе ва́ше, и҆́мже ѡ҆ ва́съ хвалю́сѧ македо́нѧнѡмъ, ꙗ҆́кѡ а҆ха́їа пригото́висѧ ѿ мимоше́дшагѡ лѣ́та, и҆ ꙗ҆́же ѿ ва́съ ре́вность, раздражѝ мно́жайшихъ. г҃ Посла́хъ же бра́тїю, да не похвале́нїе на́ше, є҆́же ѡ҆ ва́съ, и҆спра́зднитсѧ въ ча́сти се́й: но да [ꙗ҆́коже глаго́лахъ] пригото́вани бꙋ́дете. д҃ Да не ка́кѡ а҆́ще прїи́дꙋтъ со мно́ю македо́нѧне, и҆ ѡ҆брѧ́щꙋтъ вы̀ не пригото́ваныхъ, постыди́мсѧ мы̀, [да не глаго́лемъ вы̀] въ ча́сти се́й похвале́нїѧ. є҃ Потре́бно ᲂу҆̀бо ᲂу҆мы́слихъ ᲂу҆моли́ти бра́тїю, да пре́жде прїи́дꙋтъ къ ва́мъ, и҆ пред̾ꙋгото́вѧтъ пре́жде возвѣще́нное бл҃гослове́нїе ва́ше, сїѐ гото́во бы́ти, та́кѡ ꙗ҆́коже бл҃гослове́нїе, а҆ не ꙗ҆́кѡ лихои́мство.

Коне́цъ вто́рникꙋ.

(заⷱ҇ рп҃и) ѕ҃ Се́ же глаго́лю: сѣ́ѧй скꙋ́достїю, ꙳ Недѣ́лѧ и҃і: Бра́тїе, сѣ́ѧй скꙋ́достїю, ꙳ скꙋ́достїю и҆ по́жнетъ: а҆ сѣ́ѧй ѡ҆ бл҃гослове́нїи, ѡ҆ (л. рл҃ѕ) бл҃гослове́нїи и҆ по́жнетъ. з҃ Ко́ждо ꙗ҆́коже и҆зволе́нїе и҆́мать се́рдцемъ не ѿ ско́рби, ни ѿ нꙋ́жды: доброхо́тна бо да́телѧ лю́битъ бг҃ъ. и҃ Си́ленъ же бг҃ъ всѧ́кꙋ бл҃года́ть и҆з̾ѡби́ловати въ ва́съ, да ѡ҆ все́мъ всегда̀ всѧ́ко дово́льство и҆мꙋ́ще, и҆збы́точествꙋете во всѧ́ко дѣ́ло бла́го. ѳ҃ Ꙗ҆́коже є҆́сть пи́сано: расточѝ, дадѐ ᲂу҆бѡ́гимъ: пра́вда є҆гѡ̀ пребыва́етъ во вѣ́ки. і҃ Даѧ́й же сѣ́мѧ сѣ́ющемꙋ, и҆ хлѣ́бъ въ снѣ́дь да пода́стъ, и҆ ᲂу҆мно́житъ сѣ́мѧ ва́ше, и҆ да возрасти́тъ жи̑та пра́вды ва́шеѧ. а҃і Да ѡ҆ все́мъ богатѧ́щесѧ во всѧ́кꙋ простотꙋ̀, ꙗ҆́же содѣва́етъ на́ми благодаре́нїе бг҃ꙋ.

Коне́цъ недѣ́ли.

(заⷱ҇ рп҃ѳ) в҃і Ꙗ҆́кѡ рабо́та ꙳ Среда̀ г҃і-ѧ недѣ́ли: Бра́тїе, рабо́та ꙳ сегѡ̀ слꙋже́нїѧ, не то́кмѡ є҆́сть и҆сполнѧ́ющаѧ лишє́нїѧ ст҃ы́хъ, но и҆ и҆збы́точествꙋющаѧ мно́гими благодаре́ньми бг҃ови. г҃і И҆скꙋше́нїемъ слꙋже́нїѧ сегѡ̀, сла́вѧще бг҃а въ покоре́нїи и҆сповѣ́данїѧ ва́шегѡ, въ бл҃говѣствова́нїе хрⷭ҇то́во, и҆ простотѣ̀ соѻбще́нїѧ къ ни́мъ, и҆ ко всѣ́мъ. д҃і И҆ тѣ́хъ мл҃твою по ва́съ, возжелѣ́ющымъ ва́съ, за премно́гꙋю бл҃года́ть бж҃їю на ва́съ. є҃і Бл҃годаре́нїе же бг҃ови ѡ҆ неисповѣди́мѣмъ є҆гѡ̀ да́рѣ.

Глава̀ десѧ́таѧ.

[і҃] сⷯ а҃ Са́мъ же а҆́зъ па́ѵелъ молю̀ вы̀ кро́тостїю и҆ ти́хостїю хрⷭ҇то́вою, и҆́же на лицѣ̀ ᲂу҆́бѡ смире́нъ въ ва́съ, не сы́й же ᲂу҆ ва́съ дерза́ю въ (л. рл҃ѕ ѡ҆б.) ва́съ. в҃ Молю́ же є҆́же не сы́й тꙋ̀ дерза́ти надѣ́ѧнїемъ, и҆́мже помышлѧ́ю смѣ́ти на нѣ́кїѧ непщꙋ́ющыѧ на́съ, ꙗ҆́кѡ по пло́ти ходѧ́щихъ. г҃ Во пло́ти бо ходѧ́ще, не по пло́ти во́инствꙋемъ: д҃ Ѻ҆рꙋ́жїѧ бо во́инства на́шегѡ не плотска̑ѧ, но си̑льна бг҃ови, на разоре́нїе тве́рдємъ, помышлє́нїѧ низлага́юще, є҃ И҆ всѧ́ко возноше́нїе вз̾има́ющеесѧ на ра́зꙋмъ бж҃їй, и҆ плѣнѧ́юще всѧ́къ ра́зꙋмъ въ послꙋша́нїе хрⷭ҇то́во. ѕ҃ И҆ гото́во и҆мꙋ́ще ѿмсти́ти всѧ́ко преслꙋша́нїе, є҆гда̀ и҆спо́лнитсѧ ва́ше послꙋша́нїе. з҃ Ꙗ҆̀же ли пред̾ лице́мъ, зри́те;

(заⷱ҇ р҃ч) А҆́ще кто̀ ꙳ Четверто́къ г҃і-ѧ недѣ́ли: Бра́тїе, а҆́ще кто̀ ꙳ надѣ́етсѧ себѐ хрⷭ҇то́ва бы́ти, да помышлѧ́етъ па́ки ѿ себѐ, занѐ ꙗ҆́коже ѻ҆́нъ хрⷭ҇то́въ, та́кожде и҆ мы̀ хрⷭ҇то́вы.

Коне́цъ средѣ̀.

и҃ А҆́ще бо и҆ ли́шше что̀ похвалю́сѧ ѡ҆ вла́сти на́шей, ю҆́же дадѐ на́мъ гдⷭ҇ь въ созда́нїе, а҆ не на разоре́нїе ва́ше, не постыжꙋ́сѧ. [а҃] ѳ҃ Но да не ꙗ҆влю́сѧ ꙗ҆́кѡ страшѧ̀ ва́съ посла́ньми. і҃ Ꙗ҆́кѡ посла̑нїѧ ᲂу҆́бѡ, речѐ, тѧ́жки и҆ крѣ́пки, а҆ прише́ствїе тѣ́ла не́мощно, и҆ сло́во ᲂу҆ничиже́нно. (нлⷣѧ) а҃і Сїѐ да помышлѧ́етъ таковы́й, ꙗ҆́кѡ ꙗ҆́цы же є҆смы̀ сло́вомъ посла́нїй, ѿстоѧ́ще: такові́и и҆ тꙋ̀ сꙋ́ще є҆смы̀ дѣ́ломъ. в҃і Не смѣ́емъ бо ꙾сꙋди́ти꙾꙾присовокꙋплѧ́ти꙾, и҆лѝ прикла́довати себѐ и҆ны̑мъ, хва́лѧщымъ себѐ самѣ́хъ: но са́ми въ себѣ̀ себѐ и҆змѣрѧ́юще, и҆ прилага́юще себѣ̀, себѐ не разꙋмѣва́ютъ. г҃і Мы́ же не (л. рл҃з) въ безмѣ̑рнаѧ похва́лимсѧ: но по мѣ́рѣ пра́вила, є҆го́же раздѣлѝ на́мъ бг҃ъ мѣ́рꙋ, достиза́ти да́же и҆ до ва́съ. д҃і Не ꙗ҆́кѡ бо не досѧ́жꙋще до ва́съ, па́че простира́емъ себѐ: да́же бо и҆ до ва́съ достиго́хомъ бл҃говѣ́стїемъ хрⷭ҇то́вымъ. є҃і Не въ безмѣ̑рнаѧ хва́лѧщесѧ, нижѐ въ чꙋжди́хъ трꙋдѣ́хъ, ᲂу҆пова́нїе же и҆мꙋ́ще, растꙋ́щей вѣ́рѣ ва́шей, въ ва́съ велича́тисѧ по пра́вилꙋ на́шемꙋ и҆з̾ѡби́льнѡ. ѕ҃і Во є҆́же и҆ въ да́льшихъ ва́съ [страна́хъ] благовѣсти́ти, не чꙋжи́мъ пра́виломъ въ готѡ́ваѧ похвали́тисѧ. з҃і Хвалѧ́йсѧ же, ѡ҆ гдⷭ҇ѣ да хва́литсѧ. и҃і Не хвалѧ́й бо себѐ се́й и҆скꙋ́сенъ: но є҆го́же бг҃ъ восхвалѧ́етъ.

Коне́цъ четверткꙋ̀.

Глава̀ перваѧна́десѧть.

(заⷱ҇ рч҃а) [в҃] сⷯ а҃ Ѽ да бы́сте ма́лѡ ꙳ Сꙋббѡ́та к҃д: Бра́тїе, ѽ да бы́сте ма́лѡ ꙳ потерпѣ́ли безꙋ́мїю моемꙋ̀, но и҆ потерпи́те мѧ̀. в҃ Ревнꙋ́ю бо ѡ҆ ва́съ бж҃їею ре́вностїю: ѡ҆брꙋчи́хъ бо ва́съ є҆ди́номꙋ мꙋ́жꙋ, дв҃ꙋ чи́стꙋ предста́вити, хрⷭ҇то́ви. г҃ Бою́сѧ же, да не ка́кѡ ꙗ҆́коже ѕмїѧ̀ є҆́ѵꙋ прельстѝ лꙋка́вствомъ свои́мъ, та́кѡ и҆стлѣ́ютъ и҆ ра́зꙋмы ва́шѧ ѿ простоты̀ ꙗ҆́же ѡ҆ хрⷭ҇тѣ̀. д҃ А҆́ще бо грѧды́й и҆́наго і҆и҃са проповѣ́даетъ, є҆гѡ́же не проповѣ́дахомъ, и҆лѝ дꙋ́ха и҆на́го прїе́млете, є҆го́же не прїѧ́сте, и҆лѝ бл҃говѣствова́нїе и҆́но, є҆́же не прїѧ́сте, до́брѣ бы́сте потерпѣ́ли. (л. рл҃з ѡ҆б.)

(заⷱ҇ рч҃в) є҃ Непщꙋ́ю бо ꙳ Пѧто́къ г҃і недѣ́ли: Бра́тїе, непщꙋ́ю ꙳ ничи́мже лиши́тисѧ пре́днихъ а҆по́стѡлъ. ѕ҃ А҆́ще бо и҆ невѣ́жда сло́вомъ, но не ра́зꙋмомъ, ꙾но вездѣ̀ ꙗ҆́вльшесѧ ѡ҆ все́мъ въ ва́съ꙾꙾но во все́мъ ꙗ҆вле́нны є҆смы̀ во всѣ́хъ къ ва́мъ꙾.

Коне́цъ сꙋббѡ́тѣ.

з҃ И҆лѝ грѣ́хъ сотвори́хъ, себѐ смирѧ́ѧ, да вы̀ вознесе́тесѧ, ꙗ҆́кѡ тꙋ́не бж҃їе бл҃говѣствова́нїе благовѣсти́хъ ва́мъ; и҃ Ѿ и҆ны́хъ церкве́й ᲂу҆и́мъ, прїи́мъ ѡ҆бро́къ къ ва́шемꙋ слꙋже́нїю, и҆ прише́дъ къ ва́мъ, и҆ въ скꙋ́дости бы́въ, не стꙋжи́хъ ни є҆ди́номꙋ. ѳ҃ Скꙋ́дость бо мою̀ и҆спо́лниша бра́тїѧ прише́дше ѿ македо́нїи: и҆ во все́мъ без̾ стꙋже́нїѧ ва́мъ себѐ соблюдо́хъ, и҆ соблюдꙋ̀. і҃ Є҆́сть и҆́стина хрⷭ҇то́ва во мнѣ̀, ꙗ҆́кѡ похвале́нїе сїѐ не загради́тсѧ ѡ҆ мнѣ̀ въ страна́хъ а҆ха́йстѣхъ. а҃і Почто̀; занѐ не люблю́ ли ва́съ; бг҃ъ вѣ́сть. а҆ є҆́же творю̀, и҆ сотворю̀, в҃і Да ѿсѣкꙋ̀ винꙋ̀, хотѧ́щымъ вины̀: да, ѡ҆ не́мже хва́лѧтсѧ, ѡ҆брѧ́щꙋтсѧ ꙗ҆́коже и҆ мы̀. г҃і Такові́и бо лжи́ви а҆по́столи, дѣ́латели льсти́вїи, преѡбразꙋ́ющесѧ во а҆по́столы хрⷭ҇то́вы. д҃і И҆ не ди́вно: са́мъ бо сатана̀ преѡбразꙋ́етсѧ во а҆́гг҃ла свѣ́тла. є҃і Не ве́лїе ᲂу҆́бѡ, а҆́ще и҆ слꙋжи́телїе є҆гѡ̀ преѡбразꙋ́ютсѧ ꙗ҆́кѡ слꙋжи́тели пра́вды, и҆̀мже кончи́на бꙋ́детъ по дѣлѡ́мъ и҆́хъ. ѕ҃і Па́ки глаго́лю, да никто́же мни́тъ мѧ̀ безꙋ́мна бы́ти: а҆́ще ли нѝ, понѐ ꙗ҆́кѡ безꙋ́мна прїими́те мѧ̀, да и҆ а҆́зъ ма́лѡ что̀ похвалю́сѧ. з҃і А҆ є҆́же глаго́лю, не глаго́лю по гдⷭ҇ѣ, но ꙗ҆́кѡ въ безꙋ́мїи, въ се́й ча́сти похвалы̀. и҃і Поне́же (л. рл҃и) мно́зи хва́лѧтсѧ по пло́ти, и҆ а҆́зъ похвалю́сѧ: ѳ҃і Любе́знѡ бо прїе́млете безꙋ̑мныѧ, мꙋ́дри сꙋ́ще. к҃ Прїе́млете бо, а҆́ще кто̀ ва́съ порабоща́етъ, а҆́ще кто̀ поѧда́етъ, а҆́ще кто̀ не влѣ́потꙋ ꙾прото́ритъ꙾꙾ѿе́млетъ꙾, а҆́ще кто̀ по лицꙋ̀ бїе́тъ вы̀, а҆́ще кто̀ велича́етсѧ. к҃в По досажде́нїю, глаго́лю, занѐ ꙗ҆́кѡ мы̀ и҆знемого́хомъ.

Коне́цъ пѧткꙋ̀.

(заⷱ҇ рч҃г) [г҃] Ѡ҆ не́мже ꙳ І҆ꙋ́нїа к҃ѳ, ст҃ы́мъ а҆пⷭ҇толѡмъ: Бра́тїе, ѡ҆ не́мже ꙳ а҆́ще дерза́етъ кто̀, [несмы́сленнѡ глаго́лю:] дерза́ю и҆ а҆́зъ: к҃в Є҆вре́и ли сꙋ́ть; и҆ а҆́зъ: і҆и҃льте ли сꙋ́ть; и҆ а҆́зъ: сѣ́мѧ а҆враа́мле ли сꙋ́ть; и҆ а҆́зъ: к҃г Слꙋжи́телїе ли хрⷭ҇то́вы сꙋ́ть; [не въ мꙋ́дрости глаго́лю,] па́че а҆́зъ: въ трꙋдѣ́хъ мно́жае, въ ра́нахъ пребо́лѣ, въ темни́цахъ и҆́злиха, въ сме́ртехъ мно́гащи. к҃д Ѿ і҆ꙋдє́й пѧтькра́ты четы́ридесѧть, ра́звѣ є҆ди́ныѧ, прїѧ́хъ. к҃є Три́щи па́лицами бїе́нъ бы́хъ, є҆ди́ною ка́меньми наме́танъ бы́хъ, трикра́ты кора́бль ѡ҆прове́ржесѧ со мно́ю: но́щь и҆ де́нь во глꙋбинѣ̀ сотвори́хъ. к҃ѕ Въ пꙋ́тныхъ ше́ствїихъ мно́жицею: бѣды̑ въ рѣка́хъ, бѣды̑ ѿ разбѡ́йникъ, бѣды̑ ѿ срѡ́дникъ, бѣды̑ ѿ ꙗ҆зы̑къ, бѣды̑ во градѣ́хъ, бѣды̑ въ пꙋсты́ни, бѣды̑ въ мо́ри, бѣды̑ во лжебра́тїи. к҃з Въ трꙋдѣ̀ и҆ по́двизѣ, во бдѣ́нїихъ мно́жицею, во а҆́лчбѣ и҆ жа́жди, и҆ въ поще́нїихъ мно́гащи, въ зимѣ̀ и҆ наготѣ̀. к҃и Кромѣ̀ внѣ́шнихъ, нападе́нїе є҆́же по всѧ̀ днѝ, и҆ попече́нїе всѣ́хъ цр҃кве́й. к҃ѳ Кто̀ и҆знемога́етъ, и҆ не и҆знемога́ю; кто̀ соблазнѧ́етсѧ, и҆ а҆́зъ не (л. рл҃и ѡ҆б.) разжиза́юсѧ; л҃ А҆́ще хвали́тисѧ мѝ подоба́етъ, ꙗ҆̀же ѡ҆ не́мощи мое́й похвалю́сѧ.

(заⷱ҇ рч҃д) л҃а Бг҃ъ ꙳ Недѣ́лѧ ѳ҃і: Бра́тїе, бг҃ъ ꙳ и҆ ѻ҆ц҃ъ гдⷭ҇а на́шегѡ і҆и҃са хрⷭ҇та̀ вѣ́сть, сы́й благослове́нъ во вѣ́ки, ꙗ҆́кѡ не лгꙋ̀. л҃в Въ дама́сцѣ ꙗ҆зы́ческїй кнѧ́зь а҆ре́ѳы царѧ̀ стрежа́ше дама́скъ гра́дъ, ꙗ҆́ти мѧ̀ хотѧ̀: и҆ ѻ҆ко́нцемъ въ ко́шницѣ свѣ́шенъ бы́хъ по стѣнѣ̀, и҆ и҆збѣго́хъ и҆з̾ рꙋкꙋ̀ є҆гѡ̀.

Глава̀ втораѧна́десѧть.

сⷯ а҃ Похвали́тисѧ же не по́льзꙋетъ мѝ: прїидꙋ́ бо въ видѣ̑нїѧ и҆ ѿкровє́нїѧ гдⷭ҇нѧ. в҃ Вѣ́мъ человѣ́ка ѡ҆ хрⷭ҇тѣ̀, пре́жде лѣ́тъ четырина́десѧти: [а҆́ще въ тѣ́лѣ, не вѣ́мъ, а҆́ще ли кромѣ̀ тѣ́ла, не вѣ́мъ: бг҃ъ вѣ́сть:] восхище́на бы́вша такова́го до тре́тїѧгѡ нб҃сѐ. г҃ И҆ вѣ́мъ такова̀ человѣ́ка, [а҆́ще въ тѣ́лѣ, и҆лѝ кромѣ̀ тѣ́ла, не вѣ́мъ: бг҃ъ вѣ́сть:] д҃ Ꙗ҆́кѡ восхище́нъ бы́сть въ ра́й, и҆ слы́ша неизрече́нны глаго́лы, и҆́хже не лѣ́ть є҆́сть человѣ́кꙋ глаго́лати. є҃ Ѡ҆ таковѣ́мъ похвалю́сѧ, ѡ҆ себѣ́ же не похвалю́сѧ, то́кмѡ ѡ҆ не́мощехъ мои́хъ. ѕ҃ А҆́ще бо восхощꙋ̀ похвали́тисѧ, не бꙋ́дꙋ безꙋ́менъ, и҆́стинꙋ бо рекꙋ̀: щаждꙋ́ же, да не ка́кѡ кто̀ вознепщꙋ́етъ ѡ҆ мнѣ̀ па́че, є҆́же ви́дитъ мѧ̀, и҆лѝ слы́шитъ что̀ ѿ менѐ. з҃ И҆ за премнѡ́гаѧ ѿкровє́нїѧ да не превозношꙋ́сѧ, даде́сѧ мѝ па́костникъ пло́ти а҆́ггелъ сатани́нъ, да мѝ па́кѡсти дѣ́етъ, да не превозношꙋ́сѧ. и҃ Ѡ҆ се́мъ трикра́ты гдⷭ҇а моли́хъ, да и҆ (л. рл҃ѳ) ѿстꙋ́питъ ѿ менѐ. ѳ҃ И҆ рече́ ми: довлѣ́етъ тѝ бл҃года́ть моѧ̀: си́ла бо моѧ̀ въ не́мощи соверша́етсѧ. сла́дцѣ ᲂу҆̀бо похвалю́сѧ па́че въ не́мощехъ мои́хъ, да всели́тсѧ въ мѧ̀ си́ла хрⷭ҇то́ва.

Коне́цъ недѣ́ли, и҆ а҆пⷭ҇толѡмъ.

(заⷱ҇ рч҃є) і҃ Тѣ́мже бл҃говолю̀ ꙳ Понедѣ́льникъ д҃і недѣ́ли: Бра́тїе, благоволю̀ ꙳ въ не́мощехъ, въ досажде́нїихъ, въ бѣда́хъ, во и҆згна́нїихъ, въ тѣснота́хъ по хрⷭ҇тѣ̀: є҆гда́ бо немощствꙋ́ю, тогда̀ си́ленъ є҆́смь. а҃і Бы́хъ несмы́сленъ хвалѧ́сѧ: вы́ мѧ понꙋ́дисте. а҆́зъ бо до́лженъ бѣ́хъ ѿ ва́съ хвали́мь быва́ти: ничи́мже бо лиши́хсѧ пе́рвѣйшихъ а҆по́стѡлъ, а҆́ще и҆ ничто́же є҆́смь. в҃і Зна́мєнїѧ бо а҆по́столова содѣ́ѧшасѧ въ ва́съ во всѧ́комъ терпѣ́нїи, въ зна́менїихъ и҆ чꙋдесѣ́хъ и҆ си́лахъ. г҃і Что́ бо є҆́сть, є҆гѡ́же лиши́стесѧ па́че про́чихъ цр҃квей, а҆́ще то́чїю ꙗ҆́кѡ а҆́зъ са́мъ не стꙋжи́хъ ва́мъ; дади́те мѝ непра́вдꙋ сїю̀. д҃і Сѐ тре́тїе гото́въ є҆́смь прїитѝ къ ва́мъ, и҆ не стꙋжꙋ̀ ва́мъ: не и҆щꙋ́ бо ва́шихъ, но ва́съ. не до́лжна бо сꙋ́ть ча́да роди́телємъ сниска́ти и҆мѣ́нїѧ но роди́тели ча́дѡмъ. є҃і А҆́зъ же въ сла́дость и҆ждивꙋ̀ и҆ и҆ждиве́нъ бꙋ́дꙋ по дꙋша́хъ ва́шихъ: а҆́ще и҆ и҆зли́шше ва́съ любѧ̀, ме́ньши люби́мь є҆́смь. ѕ҃і Бꙋ́ди же а҆́зъ не ѡ҆тѧгчи́хъ ва́съ: но кова́ренъ сы́й, ле́стїю ва́съ прїѧ́хъ. з҃і Є҆да̀ ко́имъ ѿ по́сланныхъ къ ва́мъ лихои́мствовахъ ва́съ; и҃і Оу҆моли́хъ ті́та, и҆ съ ни́мъ посла́хъ бра́та: є҆да̀ лихои́мствова чи́мъ ва́съ ті́тъ; (л. рл҃ѳ ѡ҆б.) не тѣ́мже ли дх҃омъ ходи́хомъ; не тѣ́ми же ли стопа́ми; ѳ҃і Па́ки ли мнитѐ, ꙗ҆́кѡ ѿвѣ́тъ ва́мъ твори́мъ; пред̾ бг҃омъ ѡ҆ хрⷭ҇тѣ̀ глаго́лемъ: всѧ̑ же возлю́бленнїи, ѡ҆ ва́шемъ созда́нїи [и҆ ᲂу҆твержде́нїи].

Коне́цъ понедѣ́льникꙋ.

(заⷱ҇ рч҃ѕ) [д҃] к҃ Бою́сѧ же, є҆да̀ ꙳ Во вто́рникъ д҃і недѣ́ли: Бра́тїе, бою́сѧ, є҆да̀ ꙳ ка́кѡ прише́дъ не ꙗ҆́цѣхъ же хощꙋ̀, ѡ҆брѧ́щꙋ ва́съ: и҆ а҆́зъ ѡ҆брѧ́щꙋсѧ ва́мъ, ꙗ҆кова́ же не хо́щете: да не ка́кѡ [бꙋ́дꙋтъ] рвє́нїѧ, за́висти, ꙗ҆́рѡсти, рє́ти, клеветы̑, шепта̑нїѧ, кичє́нїѧ, нестроє́нїѧ. к҃а Да не па́ки прише́дша мѧ̀ смири́тъ бг҃ъ мо́й ᲂу҆ ва́съ, и҆ воспла́чꙋсѧ мно́гихъ пре́жде согрѣ́шшихъ, и҆ не пока́ѧвшихсѧ ѡ҆ нечистотѣ̀, и҆ блꙋже́нїи, и҆ стꙋдоло́жствїи, ꙗ҆̀же содѣ́ѧша.

Глава̀ третїѧна́десѧть.

сⷯ а҃ Трети́цею сѐ грѧдꙋ̀ къ ва́мъ: при ᲂу҆стѣ́хъ двою̀ и҆лѝ трїе́хъ свидѣ́телей ста́нетъ всѧ́къ глаго́лъ. (пнⷣе) в҃ Пре́жде рѣ́хъ, и҆ предглаго́лю, ꙗ҆́кѡ ᲂу҆ ва́съ бы́въ второ́е, и҆ не сы́й ны́нѣ пишꙋ̀, пре́жде согрѣ́шшымъ и҆ про́чымъ всѣ́мъ: ꙗ҆́кѡ а҆́ще прїидꙋ̀ па́ки, не пощажꙋ̀.

Коне́цъ вто́рникꙋ.

(заⷱ҇ рч҃з) г҃ Поне́же ꙳꙳ Въ сре́дꙋ д҃і недѣ́ли: Бра́тїе, поне́же ꙳꙳ и҆скꙋше́нїѧ и҆́щете глаго́лющагѡ во мнѣ̀ хрⷭ҇та̀, и҆́же въ ва́съ не и҆знемога́етъ, но мо́жетъ въ ва́съ. д҃ И҆́бо а҆́ще и҆ ра́спѧтъ бы́сть ѿ не́мощи, но жи́въ є҆́сть ѿ си́лы бж҃їѧ: и҆́бо и҆ мы̀ (л. р҃м) немощствꙋ́емъ въ не́мъ, но жи́ви бꙋ́демъ съ ни́мъ ѿ си́лы бж҃їѧ въ ва́съ. є҃ Себѐ и҆скꙋша́йте, а҆́ще є҆стѐ въ вѣ́рѣ, себѐ и҆скꙋша́йте: и҆лѝ не зна́ете себѐ, ꙗ҆́кѡ і҆и҃съ хрⷭ҇то́съ въ ва́съ є҆́сть, а҆́ще то́чїю чи́мъ неискꙋ́сни є҆стѐ; ѕ҃ Оу҆пова́ю же, ꙗ҆́кѡ разꙋмѣ́ти и҆́мате, ꙗ҆́кѡ мы̀ нѣ́смы неискꙋ́сни. з҃ Мо́лимсѧ же къ бг҃ꙋ, не сотвори́ти ва́мъ ни є҆ди́нагѡ ѕла̀: не ꙗ҆́кѡ да мы̀ и҆скꙋ́сни ꙗ҆ви́мсѧ, но да вы̀ до́брое сотворитѐ, мы́ же ꙗ҆́кѡ неискꙋ́сни бꙋ́демъ. и҃ Ничто́же бо мо́жемъ на и҆́стинꙋ, но по и҆́стинѣ. ѳ҃ Ра́дꙋемсѧ же, є҆гда̀ мы̀ немощствꙋ́емъ, вы́ же си́льни быва́ете: се́ бо и҆ мо́лимсѧ ѡ҆ ва́шемъ соверше́нїи. і҃ Сегѡ̀ ра́ди не сы́й ᲂу҆ ва́съ сїѧ̑ пишꙋ̀, да прише́дъ, не безща́днѡ сотворю̀ по вла́сти, ю҆́же гдⷭ҇ь да́лъ мѝ є҆́сть въ созда́нїе, а҆ не на разоре́нїе. а҃і Про́чее же бра́тїе, ра́дꙋйтесѧ, соверша́йтесѧ, ᲂу҆тѣша́йтесѧ, то́жде мꙋ́дрствꙋйте, ми́ръ и҆мѣ́йте: и҆ бг҃ъ любвѐ и҆ ми́ра бꙋ́детъ съ ва́ми. в҃і Цѣлꙋ́йте дрꙋгъдрꙋ́га лобза́нїемъ ст҃ы́мъ: цѣлꙋ́ютъ вы̀ ст҃і́и всѝ. г҃і Бл҃года́ть гдⷭ҇а на́шегѡ і҆и҃са хрⷭ҇та̀, и҆ любы̀ бг҃а [и҆ ѻ҆ц҃а̀] и҆ ѻ҆бще́нїе ст҃а́гѡ дх҃а со всѣ́ми ва́ми. а҆ми́нь.

Коне́цъ средѣ̀.

Коне́цъ втора́гѡ посла́нїѧ къ корі́нѳѧнѡмъ, є҆́же написа́сѧ ѿ фїлїпписі́и, ті́томъ и҆ лꙋко́ю: и҆́мать въ себѣ̀ гла́въ г҃і: зача́лъ цр҃ко́вныхъ, л҃в: стїхѡ́въ, сн҃ѕ: знамена́нїй че́рныхъ, і҃: послѣ́дꙋющихъ же и҆̀мъ червле́ныхъ, є҃.