Акафист умилительный Господу нашему Иисусу Христу Судии Праведнейшему и Мздовоздаятелю нашему, в память всеобщего воскресения и Страшного Суда совершаемый

Кондак 1

Предвечный Царю веков, Творче и Господи, Судие́ Праведнейший и нелицеприятный, множество содеянных мною лютых помышля́я, окая́нный аз, трепе́щу страшнаго Дне Суднаго, но надеяся на милость неизрече́ннаго благоутробия Твоего, дави́дски молю Тя: По вели́цей Твоей милости прости мя, недостойнаго, и не осуди мя по дея́нием моим, яко да благо́ю совестию очище́н, на всяк день и час ангельскую песнь приношу Ти: Свят, Свят, Свят еси, Господи Боже Вседержи́телю, И́же бе и Сый, и Гряды́й, помилуй нас!

Икос 1

Архангельския трубы́ возглашение, на Суд Господень, Страшный и последний, живыя и мертвыя от всех конец земли́ собирающее, уже во ушесе́х предносится. Душе́ моя, душе́ моя, возста́ни, что спи́ши? Конец приближается и и́маши смутитися. Воспряни́ убо, яко ма́ло есть еще время на покаяние; бодрствуй, молися и трезви́ся, и дела добрая твори, непрестанно вопиющи ко Владыце своему таковая: Свят еси, Господи Боже наш и Пресвят, и да святится и в сем грешнем и во зле лежащем мире имя Твое паче всякаго имени. Свят еси, Господи Боже наш, да прии́дет Твое славное Царствие. Свят еси, Господи Боже наш, да будет во всем воля Твоя святая на земли́, якоже пребывает и на небеси́. Свят еси, Господи Боже наш, хлеб земны́й насущный дая́й нам, паче же небесный даждь ми на всяк день. Свят еси, Господи Боже наш, остави ми согрешения моя, якоже и аз оставляю брату моему согрешения его. Свят еси, Господи Боже наш, не введи мя в напасть, но изба́ви мя от се́тей лукаваго миродержи́теля тьмы века сего, ибо поистине опасно ходим и дни́е наши лука́ви суть. Свят, Свят, Свят еси, Господи Боже Вседержи́телю, И́же бе и Сый, и Гряды́й, помилуй нас!

Кондак 2

Ви́жду, Господи мой, Господи, яко вся зна́мения кончины века сего уже исполняются: вера Твоя в людех оскуде́, беззакония умно́жишася и любовь охладе́; возстаю́т бо язык на язық, царство на царство, отец на сына и сын на отца, гла́ды и тру́сы, и па́губы изобилуют по ме́стом, прельстители и предатели яви́шася и гонения на верных Твоих воздвиго́шася, таже и Евангелия во свидетельство всем язы́ком проповедание уже совершается, и скорбь великая посреди верных по вселенней разпространяется. И по сим всем разумея, яко близ есть кончина века сего, со страхом вопию Ти: Аллилуиа.

Икос 2

Разум неуразуме́нный вре́мени страшнаго и неизглаго́ланнаго пришествия Твоего открыти верным хотя, Всеблаги́й Господи, дал еси нам в подобие того притчу смоко́вницы: «Егда бо, – глаголя, – ва́ия ея́ будут мла́ди и ли́ствие прозя́бнут, ве́дите, яко близ есть жа́тва. Та́ко и вы, егда ви́дите сия́ вся, бодрствуйте, яко близ есть, при две́рех». Темже и мы, пришедше на конец веков, со умилением зовем Ти: Свят еси, Господи Боже наш, притчами тайноводя́ нас во Царствие Свое, да всяк, име́яй уши духовная слышати, слышит; да́руй и нам уразуме́ние Твоего Евангельскаго проповедания, да плотски́я похоти попра́вше, духовно жительствуем и к жа́тве всемирной уготовляемся. Свят еси, Господи Боже наш, притчею жерно́вною поучаяй нас, яко от двоих вку́пе тружда́ющихся и живущих в той день един пое́млется и един оставляется, – не остави мене́ тогда со грешники, делающими беззаконие, но очищение да́руй и поими́ во Твое славное Царствие. Свят еси, Господи Боже наш, глаго́ляй: «Молитеся, да не будет бегство ваше в зиме или́ в субботу», – о ве́це кончины мира, яко о зиме, гада́тельствуя. Даждь ми, в сие́ осьмо́е тысящелетие живущему, стопы́ своя к бегству великому в сре́тение Твое угото́вати и непрестанно помышля́ти грядущее помози́ ми. Свят еси, Господи Боже наш, реки́й: «В чем застану, в том и сужду́», – возбуди́ мя, мно́жицею во грехи впада́юща, к частому покаянию, да не обря́щеши, пришед, мя неготоваго. Свят еси, Господи Боже наш, Праведный и Милостивый, не вни́ди в суд с рабом Твоим, яко не оправди́тся пред Тобою всяк живы́й, от лица же Твоего судьба моя изыдет. Свят еси, Господи Боже наш, реки́й: «Не всяк глаголяй Ми: Господи, Господи, внидет в Царство Небесное, но творя́й волю Отца Моего», – научи мя творити волю Твою. Свят, Свят, Свят еси, Господи Боже Вседержи́телю, И́же бе и Сый, и Гряды́й, помилуй нас!

Кондак 3

Силою Божества Твоего, Господи, воздвигл еси из гроба Лазаря, бездыха́нна четверодне́вна, и телеса́ усопших святых в час кре́стных страданий и смерти Твоея́ возставил еси; последи́ же и Сам тридневен воскресл еси от мертвых тою же силою Твое́ю. Веруем, яко грядет час и ныне уже есть, егда по гласу Твоему воскреснут мертвии и возстанут сущии во гробе́х, и изыдут сотво́ршии бла́гая в воскрешение живота, а сотво́ршии злая в воскрешение суда. Не осуди тогда и мя, Владыко, по дея́нием моим, но помилуй со всеми в вере и надежде жизни вечныя усопшими, и пети не возбрани: Аллилуиа.

Икос 3

Име́яй ключи ада и смерти, си́це глаго́лал еси, Господи, верному рабу Твоему Иоанну тайновидцу, стоя́вшему посреде́ седьми светильников: «Аз есмь Первый и Последний, и Живы́й, и бых мертв, и се, жив есмь во веки веков, аминь». Повелел же еси ему написати, имже подобает быти вскоре. Сия́ страшная и близкая скончания мира сего быти помышля́я, не с су́етным любопытством, но со страхом и трепетом взываю Ти: Свят еси, Господи Боже наш, Свидетелю верный, Первенец из мертвых и Кня́же царей земных, любя́й ны и омыва́яй ны от грех наших Кровию Свое́ю, и ключи Царства Небеснаго человеком вручи́вый, укрепи́ мя в вере Твоей, да николиже отреку́ся Тебе, но аще и́мам пону́дитися и до крове, постою за имя святое Твое. Свят еси, Господи Боже наш, гряды́й на о́блацех небесных, да у́зрит Его всяко око и и́же прободо́ша Его, и плач сотворя́т о Нем тогда вся колена земная; да́руй и мне прежде дне того страшнаго плач за грехи моя. Свят еси, Господи Боже наш, Альфа и Омега, Начало и Конец, Первый и Последний, скажи ми кончину мою и число дний моих возвести ми. Свят еси, Господи Боже наш, да́вый Открове́ние великому Иоанну, да уразуме́ем и мы, имже подобает быти вскоре; того молитвами спаси мя в день великий гнева Твоего, егда ни горы, ни ущелья, ни ка́мения не возмо́гут укрыти грешники, бежащия от лица Твоего. Свят еси, Господи Боже наш, апостолом Твоим Павлом поуча́яй, яко аще и́мам пророчество и вем тайны вся, и и́мам всю веру, якоже и го́ры переставляти, любве́ же не и́мам, ка́я ми польза есть? Даждь ми любовь нелицемерную, да тяготу́ брата моего, якоже и свою, понесу и душу мою положу за дру́ги своя. Свят еси, Господи Боже наш, Любы́ неизрече́нная, да́руй ми возлюби́ти Тя, якоже иногда возлюби́х грех мой, и сподо́би, принося́ плоды покаяния, поработати Тебе, якоже порабо́тах прежде сатане льстивому, да из глубины души воспою: Свят, Свят, Свят еси, Господи Боже Вседержи́телю, И́же бе и Сый, и Гряды́й, помилуй нас!

Кондак 4

Буря ве́лия, разрушающая горы, предыдя́ше, трус и мрак, гро́мы и молнии бя́ху, егда явля́шеся Господь Илии́ в Хори́ве и Моисею на Сина́е. Но сей страх ма́лый образ есть последняго дне мира, о немже глаго́ла Господь учеником на горе Елео́нстей и Иоанну на Па́тмосе. Тогда бо вся Вселенная сотрясе́тся, огнь, вода и вся стихии смяту́тся; и свет, и мрак, и кровь, и дым, и тру́бы ангельския и мертвеце́в возста́ние и вопль людски́й соединятся, возвещая второе пришествие Его и Страшный Суд, и час отмщения. О ужаснаго зрелища и испытания! Невозмо́жно есть нам и изобразити сие́. Горе грешным и слава праведным тогда. Милосерде Господи! Спаси мя тогда, молюся, да пою́ Тебе: Аллилуиа.

Икос 4

Слышах слово Твое, Господи, усты́ Петровы глаголющее: яко нынешняя небеса и нынешняя земля Словом Твоим содержи́ма суть и огню блюдома на день Суда и погибели нечести́вых человек. Содрогаюся аз, но на неизрече́нное милосердие Твое дерза́я, новаго небесе́ и новыя земли́ по неложному Твоему обетованию чаю, в нихже вся правда живет. Сия́ убо земли́ желанныя жителя мя сотвори тогда, Спасе, зовуща: Свят еси, Господи Боже наш, неизследимый и непременимый вчера и днесь, и во веки Тойже еси, и лета Твоя не оскудеют; имели небеса и землю, яко ризу ветху, свити, в ризу нову нетленну облецы́ мя. Свят еси, Господи Боже наш, стоя́й у двери и толки́й, и слышащему глас Твой и двери сердца отверза́ющему, – входя́щий к нему и вечеря́ющий с ним; вниди в дом смиренный и грешныя души́ моея́ и свечеря́й со мною, якоже с Лукою и Клеопою, ибо преклонился уже есть день жизни моея́. Свят еси Господи Боже наш, Путь, Истина и Живот мой, настави мя на путь Твой и пойду во истине Твоей. Свят еси, Господи Боже наш, реки́й дре́вле: Ма́рфо, Ма́рфо, пече́шися и мо́лвиши о мно́зе, едино же есть на потре́бу, – даждь и ми не о едином земном пещи́ся, но и о небесном помышля́ти. Свят еси, Господи Боже наш, реки́й богатому: «Безумне! В сию́ же нощь душу твою истяжут от Тебе, а я́же уготовал еси кому будут?» – Помози́ ми сокровище не земное, а небесное собирати, иде́же ни червь, ни тля тлит, ни та́тие не подкопывают, ни кра́дут. Свят еси, Господи Боже наш, освяти существо мое во всей полноте, да всесовершенны дух мой и душа, и тело непорочно в пришествие Твое сохранятся. Свят, Свят, Свят еси, Господи Боже Вседержи́телю, И́же бе и Сый, и Гряды́й, помилуй нас!

Кондак 5

Боже, Боже мой, пришедый взыскати и спасти погибшаго, при́зри на скорбь души моея́: век бо мой скончава́ется и страшный Твой Престол предуготовля́ется; житие мое мимои́дет, Суд же мне предлежит, претя́ мне огненною мукою и пламенем неугасимым. Вонми́ убо молитве моей и не отри́ни слез моих, яко су́етных: кто убо прии́де к Тебе плача и не а́бие спасе́н бысть? Веру мою вместо дел вмени́ мне, Господи, и не взыщи дел отнюд оправда́ющих мя, яко тщуся творити та́я, но не и́мам их; но та вера моя да довлеет вместо всех, та да отвеща́ет, та да оправдит мя, та да покажет мя причастника славы Твоея́ вечныя в невечернем дни Царствия Твоего, воспевающа: Аллилуиа.

Икос 5

Прови́дя Даниил пророк, муж желаний, дре́вле ясно Божественное Твое второе пришествие, Владыко, глаго́ла: Престо́ли поста́вишася и Ветхий Де́ньми се́де, одежды Его белы́, аки снег, и власи́ главы́ Его, аки во́лна чиста́, и Престол Его пламень паля́щ; река огненная тече, исходя́щи пред Ним; тысящи тысящ служа́ху Ему, и тмы тем предстоя́ху Ему; на Суди́ще се́де, и книги отверзо́шася. Пощади убо, пощади, Спасе, тогда Твое создание, слезно вопиющее Ти сицева́я: Свят еси, Господи Боже наш, на Престоле славы почи́вый, Емуже даде́ся власть и честь, и Царство, и вси лю́дие, племена и язы́цы Тому́ работают; егоже власть – власть вечная, я́же не пре́йдет, и Царство Его не разорится. Свят еси, Господи Боже наш, ве́лий и страшный, егоже Даниил пророк святы́й видя, духом вострепета и смути́ся, аз же, грешный, ка́ко дерзну́ зрети Тя и отвеща́ти Тебе. Свят еси, Господи Боже наш, Боже милости и щедрот, и человеколюбия, изба́ви мя молитвами пророка Твоего потока страшнаго реке́ огненныя, хотя́щаго поглотити мя за грехи моя. Свят еси, Господи Боже наш, праведныя любя́й и грешныя ми́луяй, го́ры ме́рилом разума поста́вивый, лик звезда́м исчита́яй и капли ро́сныя ко ве́тров дыха́нию приложи́вый; услыши стенание души моея́ и вопль сердца моего. Свят еси, Господи Боже наш, Сердцеве́дче, Емуже вся, не то́кмо словеса́, но чувствия и помышле́ния, содеянная и несодеянная наша ве́дома суть; не осуди мя по благости Твоей за всякое слово праздное и помыслы скверныя, я́же аз изреко́х и помы́слих в житии моем. Свят еси, Господи Боже наш, продолжи́ ми век к покаянию и на посече́ние со смоко́вницею безплодною не осуди мене́. Свят, Свят, Свят еси, Господи Боже Вседержи́телю, И́же бе и Сый, и Гряды́й, помилуй нас!

Кондак 6

Проповедник Твой, Господи, духоносный Иоанн Богослов, виде во откровении славный Престол небесный, и под Престолом ду́ши убие́нных за Слово Божие, от скорби вели́цей пришедших, и́же и возопиша велегла́сно, глаголюще: «Доколе, Владыко Святы́й и Истинный, не су́диши и не мстиши за кровь нашу живущим на земли́?» И даны́ бы́ша коемуждо их ризы белы́, и заповедано бысть им пожда́ти еще время ма́ло, до́ндеже скончаются соратницы их, подобно им иму́щии избие́ни быти, яко да восполнится предопределе́нное число. О великаго и неизрече́ннаго долготерпения Твоего, Владыко, яко и до сего дне отмщение нечести́вым отлагаеши! Но го́ре миру, егда Судия́ внеза́пу прии́дет и коегождо дея́ния обнажатся, тогда погибнут грешницы от лица Божия, а праведницы возвеселятся и возрадуются пред Богом, во веки зовуще Ему: Аллилуиа.

Икос 6

Возсия́л еси на Фаво́ре, Христе Боже наш, и ученицы́ Твои, ели́ка вмеща́ху, славу Твою видеша; но и убояшася, и вострепеташа, и ницы падо́ша. С тою же неизрече́нною, но пребо́льшую славою прии́деши и в День он суди́ти живыя и мертвыя на о́блацех, и яви́ши зна́мение великое, и́же есть Крест Твой Честны́й, от конец земли́ и до конец небес простирающся; егоже узре́вше, восплачут вся колена земная, ибо страх явле́ния лица Твоего земнородным страшне́е по премногу есть всякаго в мире сем разрушения и пременения. Ка́ко возмогу́ сре́тити Тя тогда, Боже мой, кий плач и ответ воздам Ти, не моги́й, бедный, вмести́ти и ио́ты славы Твоея́? Но на Твое несказа́нное милосердие уповаяй, всякий грех истинно кающагося побеждающее, дерза́ю прежде конца возопити Тебе: Свят еси, Господи Боже наш, во свете живы́й неприступнем, осени́ мя, грешнаго, светом лица Твоего и не опали огне́м Божества Твоего, егда прииде́ши во славе святе́й Своей. Свят еси, Господи Боже наш, дая́й зна́мения на небеси́ и на земли́, посылаяй огнь, язву и глад на люди за множество беззаконий их, сохрани мя от язв будущих и от чаши гнева Твоего проклятия, приключи́тися иму́щих в последния дни мира сего. Свят еси, Господи Боже наш, Слове необыме́нный, да́руй ми слово благо отвеща́ти на Страшнем Суде Твоем. Свят еси, Господи Боже наш, глаголяй: побежда́яй насле́дит вся и буду ему Бог, и той Мне будет в сына, помози́ мне греха победителем яви́тися. Свят еси, Господи Боже наш, реки́й, яко страшли́вых и неверных, скверных, убийц и блудоде́иц, идолослужителей и всех лживых часть в е́зере, горящем огне́м и се́рою, ожидает; спаси и изба́ви мя от части тоя́. Свят, Свят, Свят еси, Господи Боже Вседержи́телю, И́же бе и Сый, и Гряды́й, помилуй нас!

Кондак 7

Хотя́щу Ти, о преблагословенный Господи Иисусе Христе Боже наш, в день пакибытия, во второе пришествие яви́тися миру на о́блацех, яко Судии́ и Мздовоздая́телю, – о, каковы́й Страшный Суд будет тогда, ангелом во тма́х и ты́сящах собра́нным и апостолом предстоя́щим, человеком во ужасе вводи́мым, книгам разгибаемым и дело́м, и помысло́м истязу́емым! Кий суд будет мне, зача́тому во гресе́х? Кто ми пламень, жгущий мя, угаси́т? Кто ми тьму просвети́т? Кто мя тогда защити́т, аще не Ты Сам, Любы́ и Милосте безконечная, молитвами Пречистыя Матере Твоея́ и Ангела Хранителя моего спасеши мя, зовуща: Аллилуиа.

Икос 7

Новое и последнее торжество яви́ти сатане льстивому в мире попусти́ши, Владыко мой и Господи, егда пред кончиною века сего открыется человек беззакония, сын погибели, си́речь антихрист, егоже пришествие со всякою силою и зна́меньми и чудесы́ ложными будет; и́же число звериное име́яй, совратит многия люди от пути праваго и печать свою страшную на ты́я положи́т, гонение на верныя ве́лие воздви́гнет и ме́рзость запусте́ния на месте свя́те поставит, и три лета с половиною владычествовати будет, егоже и последи́ убие́ши Духом уст Твоих. О го́ре мне, грешному, в день той тогда! Ка́ко спасение обря́щу и отцу лжи противоста́ну, егда избра́нных часть прельстится, и праведник едва спасется? Но, о Премилостиве! Аще и не понесо́х тяготы́ и зноя дневнаго, оба́че с наемники единонадеся́таго часа́ сопричти́ мя и веру кре́пку во дни искушений во мне утверди́, да зову Тебе таковая: Свят еси, Господи Боже наш, по неизрече́нному промышле́нию Твоему попусти́ти име́яй в после́дния дни воцари́тися сыну гордому и погибельному, да верныя прославятся, неверныя же в конец посрамя́тся. Свят еси, Господи Боже наш, два свидетеля тогда с небеси́ послати име́яй, да избра́нныя укрепят и антихристу окаянному противостанут, и истину Твою смертию свое́ю засвидетельствуют. Свят еси, Господи Боже наш, прежде всех предреки́й нам сия́, бы́ти иму́щая, да зрим и не ужасаемся, и избра́нных ра́ди сократи́ти дни оныя хотя́й. Свят еси, Господи Боже наш, в терпении ду́ши нам стяжа́ти запове́давый и до конца сия́ претерпевшему спасение обещавый: посли и мне дух кротости и терпения с упованием перенести напасти тыя. Свят еси, Господи Боже наш, изми́ мя тогда от се́тей лукавых века сего и печати анти́христовы изба́ви мя. Свят еси, Господи Боже наш, сохрани мя в малом стаде Твоем, емуже дати Царство благоволи́л еси. Свят, Свят, Свят еси, Господи Боже Вседержи́телю, И́же бе и Сый, и Гряды́й, помилуй нас!

Кондак 8

Страннаго и страшнаго втораго Твоего, Господи, пришествия помышля́я сре́тение, трепе́щу преще́ния Твоего, боюся и гнева Твоего, егда прии́деши грешныя мучити, праведныя же спасти. Плачу и рыдаю, день оный воспоминая, и молю Тя прежде сего: Спа́се мой, спаси́ мя! Да не прии́ду тогда в землю плача, да не вижду места тьмы, Христе Спасе мой! Ниже́ свя́зан буду по рука́ма, и нога́ма вне чертога Твоего изве́рженный, одежду нетления имы́й оскверне́нную и не моги́й проглаго́лати, якоже глаголю Тебе ныне: Аллилуиа.

Икос 8

Весь еси желание и сладость моя, Сладчайший Господи Иисусе, упование всех концев земли́. Поуча́еши ныне о дне славнаго пришествия Твоего, глаголя: «Бдите и молитеся, не ве́сте бо дне и часа́, во́ньже Сын Человеческий прии́дет. Сие́ же ве́дите, яко аще ведал бы домовладыка, в ку́ю стражу нощи́ тать прии́дет, бдел бы убо и не бы дал подкопати храма своего, сего ра́ди и вы бу́дите готови». Внимая убо сему словеси Твоему, благодарне взываю Ти: Свят еси, Господи Боже наш, на всякое время и на всякий час бде́ти и ожидати дне великаго пришествия Твоего верным повеле́вый. Свят еси, Господи Боже наш, о дне том и часе́ никомуже откры́вый: ни людем праведным, ниже́ ангелом Своим, но якоже Молния исходит от восток и явля́ется до запад, та́ко пришествие Свое, я́ве и внеза́пу иму́щее быти, изобрази́вый. Свят еси, Господи Боже наш, обнови́вый водою во дни Ноя мир, грехми́ растлевший, егда внеза́пу потопи́ люди нечести́выя, ныне же огне́м попали́ти хотя́й землю беззаконную с человеки неверными. Свят еси, Господи Боже наш, яко пра́ви путие́ Твои и словеса́ Твоя суть истина непреложна, и не мимои́дут они, аще небо и земля пре́йдут. Свят еси, Господи Боже наш, не даждь ми отягчи́ти сердце мое объяде́нием, пиа́нством и печальми житейскими, или́ иным непотребством, да не внеза́пу на́йдет на мя день той. Свят еси, Господи Боже наш, реки́й, яко на Святаго Духа хули́вшему не оставится ни в сем ве́це, ни в будущем, – соблюди мя не износи́ти хулу́ ни словесную, ни мысленную на имя святое Твое. Свят, Свят, Свят еси, Господи Боже Вседержи́телю, И́же бе и Сый, и Гряды́й, помилуй нас!

Кондак 9

Все естество́ земных и преисподних ужасом многим содрогнется и силы небесныя подвигнутся в той час, егда солнце померкнет, луна не даст света своего и зве́зды спаду́т с небесе́, небеса же с шумом мимои́дут, земле пламенем горящей и человеком рыдающим, и возопию́т вси ко Владыце всяческих, к Богу Страшному со тре́петом: Аллилуиа.

Икос 9

Вити́и мира безумствуют, якоже и во дни Давида царя, глаголюще: Несть Бог, не ви́дим Его! О, слепи́и! Почто не помышля́ете, яко неверием окамене́ннаго сердца своего огнь вечный себе уготовляете и богоотступле́нием, и прочими беззаконьми кончину мира приближаете! Не слышасте ли из Писаний, яко невидимая Его, от создания мира творе́ньми помышля́ема, видима суть, и присносущная сила Его, и Божество. Очистите убо сердца́ своя и Бога у́зрите. Но пощади, Господи, от таковаго ожесточеннаго заблуждения и неверия ум, сердце и душу мою, да с верою, упованием и любовию образ пришествия Твоего вы́ну себе представляю и зову Ти: Свят еси, Господи Боже наш, праведным судом Твоим всем нам в землю, от нея́же взя́ты есмы́, возвратитися повеле́вый и паки в день всеобщаго воскресения из нея́ возстати положи́вый. Свят еси, Господи Боже наш, солнцу, луне и звезда́м некогда померкнути, а земли́ и всему, я́же на ней, огне́м преобразитися предопредели́вый, да на место их яви́тся небо но́во и земля но́ва, в нихже правда живет. Свят еси, Господи Боже наш, утаи́вый день, в о́ньже предстанут на Суд вся племена́ и язы́цы, да восприи́мет кийждо по дело́м своим. Свят еси, Господи Боже наш, Пастырю добрый и Судие́ праведнейший, име́яй сести в день воздаяния Твоего на Престоле разсуждения. Разлучи́ши же вся народы друг от друга, якоже пастырь разлучает о́вцы от ко́злищ; поста́виши о́вцы одесну́ю Себе, а ко́злища ошу́юю и рече́ши праведным сладкий глас: «Прииди́те, благословеннии Отца Моего и наследуйте Царствие, угото́ванное вам от сложения мира». Свят еси, Господи Боже наш, от Него же нераска́яннии грешницы услышат тогда со страхом: «Отыди́те от Мене́, проклятии, во огнь вечный, угото́ванный диа́волу и ангелом его». Свят еси, Господи Боже наш, обеща́вый Церковь Свою до конца мира непоколеби́му соблюсти, во е́же неодоле́нной быти ей от врат адовых. Свят, Свят, Свят еси Господи Боже Вседержи́телю, И́же бе и Сый, и Гряды́й, помилуй нас!

Кондак 10

Спасти хотя дре́вле Ло́та праведнаго от запале́ния с содо́млянами нечести́выми, Владыко Господи, изве́л еси его вон из града и рекл еси рабу Своему Аврааму, яко аще бы и десять праведник имел град сей, не бы тогда погибл есть, но оскудения ра́ди святых в нем и мерзости грешных огню предае́тся. Последи́ же и учеником Своим в притче пле́вел се́льных глаго́лал еси, яко пле́велы и пшеница, обоя́ ку́пно и́мут расти до жа́твы, да не когда, прежде жа́твы восторга́юще пле́велы, восто́ргнут ку́пно с ними и пшеницу. От сего убо и назидаемся, яко то́кмо праведники Твоими мир сей стоит доселе, и ра́ди святых Твоих, в мире живущих, даеши еще время и мне, грешному, покаятися, Неизсле́димый Боже, сего ра́ди благодарно вопию Ти: Аллилуиа.

Икос 10

Царю Царе́й, Господи, Спасе, Агнче Непорочный, на Престоле славы седя́й, яко лев от колена Иудова и корень Давидов возсия́вый и мир победивый. Ты един достоин еси разгнути Книгу Жизни великую и разрешити печати ея! Ты, яко Агнец закале́нный, достоин еси прия́ти силу, богатство и премудрость, крепость и честь, и славу, и благоволе́ние, – та́ко воспевают Ти чи́ни ангельстии и ду́си праведных на небеси́. Сподо́би убо и мя, недостойнаго, с ними славити Тя в день великий, и в сей час звати си́це: Свят еси, Господи Боже наш, Соде́телю и Промыслителю наш, сия́яй светом солнечным и дождя́й на добрыя и злыя, наказу́яй и милуяй, нарица́яй не сущая яко сущая, низводя́й даже до ада и паки возводя́й. Свят еси, Господи Боже наш, име́яй праведники просветити, яко солнце, во Царствии Своем, не погуби мя ра́ди святых Твоих, но в Книзе Животней напиши мя и имя Твое начерта́й на челе́ моем. Свят еси, Господи Боже наш, день весь жития моего совершен, свят, ми́рен и безгрешен да́руй ми. Свят еси, Господи Боже наш, ангела ми́рна, ве́рна наставника и хранителя души и тела моего на всяко время неотлучна посли ми. Свят еси, Господи Боже наш, по благодати Твоей изобильно на ны излия́нной, пре́зри моя прегрешения и пода́ждь вся добрая и полезная души моей. Свят еси, Господи Боже наш, прочее время живота моего сподо́би мя в мире и покаянии скончати, ожидающа дне славнаго явле́ния Твоего. Свят, Свят, Свят еси, Господи Боже Вседержи́телю, И́же бе и Сый, и Гряды́й, помилуй нас!

Кондак 11

Пение всеумиле́нное приношу Ти, Господи, Спасе и Соде́телю мой, и молю Тя: Егда прии́деши суди́ти миру всему на о́блацех, не постыди́ мя, сту́дная дела сотво́ршаго, и не погуби мя, якоже погубил еси Вавилон – великую блудни́цу, но веры ра́ди моея́ и любве́ к Тебе жителя Сио́на Горняго соделай мя, иде́же есть глас ве́лий народа многаго, яко глас вод многих, и яко глас грома крепкаго, глаголющих: Аллилуиа.

Икос 11

Светильник мой угасе́, еле́я же благи́х дел, во е́же возжещи́ и, несть ми; и где обря́щуся окаянный, сном греховным отягче́нный, егда постигнет мя внеза́пу полунощь – час кончины моея́, или́ Суд Божий, яко тать, на́йдет на вся живущия на земли́. Но да не услышу и аз, якоже юро́дивыя девы, грознаго гласа Жениха: Не вем тя. Помози́ ми, о Господи, наполнити сосуд души моея́ еле́ем благи́х дел, паче же милосердия и смирения, и звати Тебе: Свят еси, Господи Боже наш, даждь ми послужи́ти меньшей братии Твоей, якоже Самому Тебе: алчущия и жаждущия насытити, странныя приютити, нагия одети, больныя и в темницех стра́ждущия посещати, да сподо́блюся части десны́я стоя́ния на Суде Твоем. Свят еси, Господи Боже наш, отыми́ от Мене́ дух гордости, праздности и уныния бесо́вскаго и пода́ждь мне дух смиренномудрия, целомудрия, кротости и радости духовныя. Свят еси, Господи Боже наш, вложи в мысль мою мудрость сына Сира́хова: «Помина́й последняя твоя и во веки не согрешиши». Свят еси, Господи Боже наш, Женише́, кра́сный добро́тою паче всех человек, Гряды́й в полунощи; с мудрыми девами в рай введи мя. Свят еси, Господи Боже наш, приими́ мольбу о нас и предста́тельство всех святых Твоих, паче же простирающия к Тебе вы́ну о нас ру́це Свои Девы Пречистей, Тебе рождшия. Свят еси, Господи Боже наш, огради нас святыми Твоими ангелы и отжени́ от нас духо́в злобы поднебесных. Свят, Свят, Свят еси, Господи Боже Вседержи́телю, И́же бе и Сый, и Гряды́й, помилуй нас!

Кондак 12

Благодать Твою, Господи Боже наш, грешныя милующую, све́дуще, аще и недостойное житие яви́хом, оба́че надежду воскресения и жизни вечныя иму́ще, христианския кончины живота нашего безболезненны, непостыдны, ми́рны, Божественных Таин причастны, и добраго ответа на Страшном Суди́ще Твоем вы́ну просим, во умилении зовуще: Аллилуиа.

Икос 12

Пою́ще Твое непостижимое о людех и о мире, Тобою сотворе́нном, промышле́ние, Вседержи́телю Отче, Сыне и Ду́ше, Господи наш, славим Тя, создание и раби́ Твои, и, яко чада Це́ркве Православныя, ча́ем воскресения мертвых и жизни будущаго века. В ве́це же настоящем молим Тя, Бла́же: Изба́ви ны искушений от мира, плоти и диа́вола находя́щих на ны, и укрепи́ в вере несумне́нной и любви к Тебе, да благочестне, чисте и святе прочее время живота поживем, и сподо́бимся части правыя в день па́кибытия, зовущия Ти: Свят еси, Господи Боже наш, Мздовоздая́телю Праведный, суди́ти име́яй на вели́цем Престоле Своем, от егоже лица побегнут небо и земля, и место их не обря́щется. Свят еси, Господи Боже наш, всем нам яви́тися пред Суди́ще Твое положи́вый, да возда́си коемуждо по делом, я́же с телом содела, блага́я или злая; аще определил еси мне прежде дне того скончатися, даждь ми безбедно прейти мыта́рства воздушная бесо́вская и оправдатися на первом частном суде Твоем. Свят еси, Господи Боже наш, сатану и ангелы его, зверя и лжепророка во е́зеро огненное на мучения вечная архангелом Твоим Михаи́лом вве́ргнути име́яй; того предста́тельством изба́ви мя муки страшныя, та́ртара и тьмы кромешныя, и гее́ны огненныя, иде́же червь не умирает, и огнь не угасает. Свят еси, Господи Боже наш, всех Твоих ра́ди святых, изряднее же святых Твоих щедрот и Крови Твоея́, за ны пролия́нныя, жителя мя сотвори Иерусалима Небеснаго, иде́же несть ни смерть, ни плач, ни вопль, ни болезнь и ничтоже скверно, но жизнь безконечная, и слава Твоя при́сно осеня́ет его. Свят еси, Господи Боже наш, прежде сих всех помози́ ми соблюда́ти словеса́ Евангельская, творити волю Твою и прилежно внима́ти пророчеству Апокали́псиса Иоа́ннова, яко время близ есть. Свят еси, Господи Боже наш, реки́й в конец Богослову, яко до́ндеже суд прии́дет, скверный да скверни́тся еще, а святы́й да святится еще; ей, гряду скоро, и мзда Моя со Мною есть, аминь. Ей, гряди, Господи Иисуce! – молит Тя Церковь Твоя, зовущи: Свят, Свят, Свят еси, Господи Боже Вседержи́телю, И́же бе и Сый, и Гряды́й, помилуй нас!

Кондак 13

О, Великий и Непостижимый Боже! Альфа и Омега, Начало и Конец всему сущему, И́же вчера, днесь и во веки Тойже, у Него же несть пременения, егоже и ле́та не оскудеют! Приими́ сие́ ма́лое акафистное моление мое в память грядущаго и Страшнаго Суда Твоего, вы́ну мною Тебе приноси́мое, и по множеству щедрот Твоих очисти беззакония моя, и имя мое в Книзе Живота напиши, и во юдо́ль плача не осуди, егда суди́ти сядеши, и от пресветлаго лица Твоего не отлучи мене́. Егда скончаются дни́е века сего, и небеса и земля сии́ мимои́дут, и светила, яко воск, истают, тогда, о Всемилостиве, да узрю́ и аз стены Горняго Иерусалима, ихже прови́де тайнозритель Твой Иоанн во откровении Твоем, и ку́пно со избра́нными десны́ми Твоими овца́ми вни́ду во святы́й град сей, и тамо с теми у тебе насы́щуся славы Твоея́, и буду пети Тебе песнь но́ву во веки веков: Аллилуиа.

Этот кондак читается трижды, затем 1-й икос «Архангельския трубы…» и 1-й кондак «Предвечный Царю...».

Молитва

Владыко Вседержи́телю, Непостижи́ме, Начало света и преумная Си́ло, Иже Ипостаснаго Слова Господа нашего Иисуса Христа Отче, и Единосущнаго Твоего Духа Святаго Испустителю, милосердия ра́ди и неизрече́нныя благости Твоея́ от небытия в бытие нас воззва́вый и по грехопадении нашем не презре́вый человеческаго естества́, тьмо́ю греха содержимаго, но Божественным светом священных учений, законом и пророки свети́вый миру, последи же Тому Единородному Твоему Сыну благоволи́вый плотию возсия́ти, Кровию Его и Крестом нас искупи́ти и с Тобою примири́ти, и ко осия́нию нас Твоего просвещения Духом Твоим Святым наставити. Да будут уши Твои вне́млюще гласу моления нашего, и да́руй нам, Боже, бде́нным и трезвенным сердцем всю настоящего жития нощь прейти, ожидающим пришествия Сына Твоего и Бога нашего, Судии́ всех; да не возлежаще и спяще, но бодрствующе и воздви́жени в де́лании заповедей Твоих обря́щемся и в радость Его совни́дем, иде́же празднующих глас непрестанный и неизрече́нная сладость зря́щих Твоего лица добро́ту неизглаго́ланную, яко Благ и Человеколюбец Бог еси, и Тебе славу возсылаем, Отцу и Сыну и Святому Духу ныне и при́сно и во веки веков. Аминь.