Акафист покаянный на основе Великого канона преподобного Андрея Критского²

Кондак 1

Возбра́нный Воеводо и Господи, радосте кающихся рабов Твоих, к Тебе аз, грешный, в покаянии прибегаю. Приими́ мя, Отче, кающагося, не отри́ни слез моих и воздыханий сердечных и не пре́зри во умилении Тебе зовущаго: Милостиве, помилуй мя падшаго.

Икос 1

Адаму первозданному поревнова́х в преступлении, разорих заповеди Бога моего, душу бо и тело оскверни́х дея́ньми лютыми. Откуду же начну плакати скверное свое житие? Кое же положу начало нынешнему рыданию? Но прииди́, окаянная моя душе́, с плотию твое́ю, исповедайся Создателю всех и возопи Ему со слеза́ми: Милостиве, воззри на мя о́ком Твоим благоутробным и приими́ мое теплое покаяние. Милостиве, согреших аз паче всех человеков, един аз согреших пред Тобою, но Ты яко Бог помилуй создание Твое. Милостиве, яко блудница проливаю и аз сле́зы, помилуй мя по благоснизхождению Твоему. Милостиве, аз оскверних ризу пло́ти моея́ и очерни́х в себе созда́нное по образу Твоему и подобию. Милостиве, помрачи́х аз душу мою стра́стными сластьми́ и весь ум содеях прахом. Милостиве, наг лежу от добродетелей и стыжду́ся. Милостиве, помилуй мя падшаго.

Кондак 2

Виждь, душе́ моя, яко конец приближается, близ при две́рех Судия́ есть. Пробуди́ся, помысли о де́лех своих, я́же содеяла еси, предста́ви я пред очи твои и пролей капли слез; пове́ждь со дерзновением дела и помышле́ния твоя Христу и во умилении сердца возопи Ему: Аллилуиа.

Икос 2

Разуме́х, Спасителю мой, яко не бысть в житии греха, ни дея́ния, ни зла, коими не согреших умом, словом и произволением паче всех человеков. Совесть обличает мя, совесть осуждает мя в злых де́лех моих. Но, о Судие́, Изба́вителю мой и Ве́дче, пощади, изба́ви и спаси мя, раба Твоего, Тебе вопиющаго: Милостиве, согреших, согреших, прода́в душу свою греховным обычаем, якоже братия Иосифа. Милостиве, яко Каин и аз принесо́х жертву порочную: дея́ния скверная и житие непотребное, темже и осуди́хся. Милостиве, от юности заповеди Твоя преступа́х, уны́нно житие преидо́х, спаси мя милостию Твое́ю. Милостиве, яко блудный сын расточих и аз богатство свое в блуде и гладом душевным истаява́ю, темже и вопию́ Ти: Ще́дре, душу мою благодатию Твое́ю напитай. Милостиве, весь уязви́хся помышле́ньми моими, весь исполни́хся ран, яко впадый в разбойники, но Ты, пришед, исцели мя. Милостиве, вне́мли стенанием души моея́, приими́ сле́зы оче́с моих и очисти мя, кающагося. Милостиве, помилуй мя падшаго.

Кондак 3

Силою Твое́ю, Спасе, изгна́н бысть достойно Адам из Едема, яко не сохранив едину заповедь Твою; и седя́ше сей прямо рая́, и свою наготу горько рыдая, вопия́ше: «Увы мне раю́, раю́ мой прекрасный!» Аз же что постражду́ Господи мой и Боже, отметая всегда животворная Твоя словеса́? Но даждь ми время, да пла́чуся дел моих горько и Тебе воспою́: Аллилуиа.

Икос 3

Име́яй во уме, множество соде́янных мною лютых, трепещу́ окая́нный. И что убо сотворю, егда прии́дет Господь со тмами ангел суди́ти вселенней? Увы мне, увы! Боже отец, прежде даже не затворивши ми двери Твоего милосердия, к Тебе прибегаю, Ще́дре, и вку́пе с Давидом вопию́: Милостиве, во гресе́х рожден бых аз и приложих к язвам своим иныя раны, но помилуй мя, отец Боже. Милостиве, яко Давид согреших Тебе и аз: ура́них бо душу свою стрелою прелюбодейства, но якоже и он вопию́ Ти: Помилуй мя по милости Твоей. Милостиве, возбуди́ ум мой ко обращению, приими́ мя кающагося, умилосердися взывающему: согреших Ти, спаси́. Милостиве, ни странника, ни путника не введо́х аз под кров свой, отринув Соманитя́нки благо́е произволе́ние, темже и рыдаю: не лиши мя Твоего чертога. Милостиве, сребролюбием одержи́мь есмь, темже, яко Гиези́й, и осуждаюся. Милостиве, произволением бых убийца совести душевней, вооружася на ню лукавыми моими дея́ньми. Милостиве, помилуй мя падшаго.

Кондак 4

Буря грехов обыде мя и кто прострет ми руку помощи, аще не Ты, возсия́вый от Девы, Иисусе. Спаси мя, вопию́ Ти, спаси, яко спасл еси Петра утопавшаго; да не потопит мене́ буря страсте́й. Приведи мя ко пристанищу безмятежному, да с любовию воспою́ Ти: Аллилуиа.

Икос 4

Слышав, яко одожди́в иногда Господь огнь, попали́ землю Содомскую, – увы! – вопию́. Душе́, возстани! Да не опали́т тебе огнь гее́нский. Бежи́ запале́ния, бежи́ горящаго Содома, бежи́ Божественнаго пламене, на горе́ спасайся, якоже Лот, взывающи к Богу: Милостиве, аще и согреших, но вем, яко Человеколюбец еси, наказуеши милостивно и милосердствуеши те́пле, и поспешаеши, яко Отец, призывая блуднаго. Милостиве, ризу скверную истка́ ми грех во обличение моих самовластных страсте́й, обнажив мя первыя боготканныя одежды. Милостиве, прилепи́хся аз веще́м земным и тяжким бременем обложе́н есмь. Милостиве, украси́х аз кумир плоти моея́ одея́нием скверных помысло́в, презре́в внутреннюю богообра́зную ски́нию. Милостиве, погребо́х страстьми́ перваго образа красоту, ю́же, яко некогда драхму, взыскав, обря́щи. Милостиве, согреших, взываю Ти, яко блудница: е́дин аз согреших пред Тобою, но приими́, яко оныя, и моя сле́зы. Милостиве, помилуй мя падшаго.

Кондак 5

Боготечную кровь, Ты, Спасе, излил еси на Кресте, да омыеши мя; дух пре́дал еси, да мя приведе́ши Твоему Родителю; Едем затворе́нный отве́рзеся, вся тварь и вси язы́цы спасе́ннии поклоняются Тебе и воспевают при́сно: Аллилуиа.

Икос 5

Видите, видите, яко Аз есмь Бог: вне́мли, душе моя, Господу вопиющу, удалися прежняго греха и убойся Господа, яко Праведнаго Судию́ и Бога. Обратися, покайся, открый сокровенная, припади́ к Нему, яко блудный сын со слеза́ми и, бия́ в пе́рси, глаго́ли Богу вся ве́дущему: Милостиве, изранен и изъя́звлен есмь аз: се стре́лы врага пронзо́ша душу и тело, темже и прибего́х к Тебе со слеза́ми. Милостиве, яко мыта́рь вопию́ Ти: Очисти, очисти мя, никтоже бо от сущих из Адама, якоже аз, согреших Тебе. Милостиве, возми тяжкое бремя грехов моих и остави ми прегреше́ния. Милостиве, вольная моя и невольная согрешения, явная и тайная, ве́домая и неве́домая простив, спаси мя. Милостиве, буря страсте́й потопляет мя, и несть ми спасения, но простри́ и мне Твою руку, яко Петро́ви. Милостиве, не затвори двери милосердия Твоего в День судный, но отверзи́ я кающемуся Тебе го́рце. Милостиве, помилуй мя падшаго.

Кондак 6

Пустыннолюбная го́рлица, глас вопиющаго, Христов светильник Предтеча всем возгласи́ людем: Покайтеся и предочиститеся, Иудея же вся и Самария слышавше теча́ху и испове́даху грехи своя. Тецы́ убо и ты, душе́ моя, к Источнику жизни, да не увязнеши в беззаконныя сети, облобызай убо покаяние и воспой Христу: Аллилуиа.

Икос 6

Вонми́ небо, и возглаго́лю: Земле́ внуши глас кающийся к Богу. Кто бо от человек согреши та́ко якоже аз: ум ура́нен, боле́знует тело, немощству́ет дух, умно́жишася стру́пы. Врачу благодатный, прежде даже до конца не погибну, спаси мя, та́ко Тебе вопиющаго: Милостиве, Ты еси Бог, испытуяй сердца, истяза́яй намерения и изобличаяй дея́ния, попали терние грехов моих и яви́ мя чиста пред Тобою. Милостиве, Ты еси Пастырь Добрый, взыщи мене́, яко овча́, в тернии грехов погибающее. Милостиве, Ты еси мой Создатель, Тобою, Спасе, оправдаюся. Милостиве, Ты еси жизни Источник, источи душе́ моей жизнь, оживотвори ю, до́ндеже не постигнет мя кончина. Милостиве, подобник бых тем, и́же при Нои грехи сотвориша, темже, якоже оныя в вода́х потопа погружаюся. Милостиве, не покрых аз ближняго срамоты́, совесть оскверни́х наглым языковеща́нием, уподоби́хся сим Хаму отцеубийце. Милостиве, помилуй мя падшаго.

Кондак 7

Хотя́й всем спастися и в разум истины приити́, Ты, Сыне Божий, снизошел еси на землю вочеловечитися, и призвав к покаянию разбойники и блудницы, отверзл еси двери Царствия всем кающимся. Покаяния двери и мне отве́рзи, Жизнодавче, к Тебе бо утреннюю и Тебе вопию́: Аллилуиа.

Икос 7

Дивное покаяние Богу принесо́ша ниневи́тяне, егда Иона пророк возгласи́ им о погибели их; сии́ бо облеко́шася во вре́тища и пепелом главы своя посыпа́ша и плач ве́лий сотвори́ша, глаголюще: Да отвратит Господь гнев Свой праведный. Восплачи убо и ты, душе́ моя, возстени́ к Богу, яко ниневи́тяне и та́ко глаго́ли: Милостиве, изгна́н бе Измаил яко порождение рабы́нино, да не постигнет убо и мя сие́ любострастия моего ра́ди. Милостиве, волею раболепствовах аз греху и, якоже Ага́рь, породи́х новаго Измаила – дерзость. Милостиве, не отрини моления воспевающих Тя и прося́щим с верою прощение да́руй. Милостиве, помилуй, вопию́ Ти, помилуй мя, е́гда прииде́ши со ангелы воздати коемуждо по достоянию дея́ний. Милостиве, не при́зри создания Своего, аще и согреших паче всех человек. Ты еси Господь Вселенныя, аз же есмь персть, и во Твоей есть власти отпустити грехи моя. Милостиве, аще и оскверни́х душу и тело, но Ты, Спасителю мой, очисти, омый, соделай мя беле́е, паче нежели снег. Милостиве, помилуй мя падшаго.

Кондак 8

Странна Тебе (чужда Тебе) себе сотвори́х, Иисусе, предпочтох бо кладези ханане́йских помысло́в паче ка́мене Твоего с источником премудрости, и свиная мяса́ паче пищи небесныя. Темже, яко блудный сын гладом истаява́ю, не разумея пети: Аллилуиа.

Икос 8

Весь аз уязви́хся помышле́ньми моими, и исполнихся ран, яко впадый в разбойники; и видя мя, священник мимои́де, и леви́т та́кожде, узре́в лежа́ща в беде, презре́. Но Ты Сам, Христе, возлей елей и вино на мя, та́ко Тебе вопиющаго: Милостиве, да будет ми купе́лью очищения Кровь Твоя и вода истекшая из ребр Твоих, питие́м отрады: живи мя Собою. Милостиве, яко фарисей горжуся, и якоже оный дерзость пред Тобою сотворяю, но убий во мне грех и сердце смиренно ми да́руй. Милостиве, вем, яко согреших пред Тобою, но каюся аз: Приими́ мя, исповедаюся – возстави, да не буду стяжа́ние, ни снедь врага, Сам умилосердися надо мною. Милостиве, не послушах гласа Твоего, ни Писанию Твоему покаря́хся, темже и наг предстою пред Тобою. Милостиве, нощь греха бысть ми тьма и глубокий мрак, но Ты, Спасителю, сыном дне мя соделай. Милостиве, увы мне, яко ум оскверни́х нечистотою, но молю благость Твою, омый мя в купе́ли слез моих и яко снег убели одежду плоти моея́. Милостиве, помилуй мя падшаго.

Кондак 9

Ветхаго Завета вся привожду́ ти, душе́ моя, к подобию: подражай праведных боголюбивая дея́ния, избегни же паки лукавых грехов, да пощадит тя Христос в день Судный и да сподо́бишися воспети Ему со всеми святыми: Аллилуиа.

Икос 9

Вити́я многовеща́ннии недоумеют ки́ими словесы́ к покаянию мя пробуждати: ожесточися бо сердце во мне и не и́мам слез, ниже́, плача. Милостиве, Ще́дре, коснися сердца моего благостию Свое́ю и Духом Владычним утверди мя, тучу слез пошли ми, рабу Твоему, Тебе моля́щемуся: Милостиве, яко кровоточивая, прибегох к Тебе, воскрилия риз Твоих касаяся, рцы и мне, якоже оной: вера твоя спасе тя. Милостиве, источи ми струи́ живительныя из пречистых жил Твоих, напои мя, яко самаря́нку, да не вжа́ждуся во веки. Милостиве, да будут ми Силоа́мом сле́зы моя, да омыю ими зе́ницы души моея́ и умом узрю́ свет Твой присносущный. Милостиве, приношу Тебе сле́зы о́чию мое́ю и глубокая воздыхания. Вопиет сердце во мне: Боже, согреших пред Тобою, умилосердися, прости. Милостиве, яко Дафа́н и Авирон, удалися Тебе душа моя, темже и зову Ти: Пощади, да не поглоти́т мя земля якоже оных. Милостиве, волны грехов моих покрыша мя, якоже всадники египетския Чермно́е море, но воззови мя из ада преисподняго и изба́ви от тления живот мой. Милостиве, помилуй мя падшаго.

Кондак 10

Спастися хотя́й божественнаго пламене, бежа́ Лот из Содома, якоже повеле́ ему Господь. Душе́ моя, аще и ты хощеши спастися, праведному подражай, бежи́ пламене греха, бежи́ запаления, вожделением безумным возжженнаго, не бу́ди столп сла́ный, возвратившися вспять; образ да устрашит Тя содомский, Богу воспой: Аллилуиа.

Икос 10

Царю Святы́й, время жития моего мало есть и исполнено болезней и лукавства, но в покаянии, мя приими́ и в разум призови, да не буду стяжа́ние, ни брашно чужд ему, Сам мя уще́дри, вопиющаго: Милостиве, Ты еси пристанище необуреваемое, ускори и изми́ мя из глубины греха, да не отчаяния поглотит мя огнь. Милостиве, аз есмь дра́хма погибшая, взыщи мя, возжзи́ свет Свой и обря́щи Свой образ. Милостиве, Давид убо сугубо согреши, оба́че плакася горько, аз же паче сего зло содеяв, плоды не принесо́х Ти покаяния. Милостиве, Соломон иногда премудрый возлюби́ распутных жен, отступи от Бога, сему же аз подража́х в помыслах постыдным сладострастием. Милостиве, увы мне! В мерзостех уподоби́хся аз Аха́ву, душу бо содеях свою обиталищем плотских нечистот и сосудом гнусных страсте́й. Милостиве, очернися вся добро́та во мне, и от страсте́й светильник угасе, но умилосердися и возврати ми, якоже пое́т Давид, веселие. Милостиве, помилуй мя падшаго.

Кондак 11

Песнь чудную преднаписа́ Ти иногда Давид, е́юже дея́ние обличает, е́же содея, да ты, душе́ моя, покаешися и восстенеши, оставиши злая дела своя, и якоже он возгласивши: Помилуй мя, Тебе бо Единому согреших всех Богу, Сам очисти мя по милости Твоей; и да возмо́жеши чистым сердцем пети Ему: Аллилуиа.

Икос 11

Светода́вче Господи, низпосли свет Твой и просвети сердце мое, душу мою от всякаго греха очисти, к Тебе бо яко Иона вопию́, си́це глаго́ля: Милостиве, исчезают дние мои, яко соние, темже и плачу, яко Езеки́я на ложе; приложи мне лета живота, да омыю своя согрешения. Милостиве, яко разбойник вопию́: Помяни мя! яко Петр плачу горце, яко мыта́рь взываю: Прости мя, Спасителю. Милостиве, яко блудница проливаю сле́зы, приими́ мое рыдание, якоже иногда жены ханане́йския. Милостиве, Ты еси един Врач, уврачу́й язвы души моея́, возложи́ на ню пластырь, возлей елей и вино, и да́руй ми умиление и сле́зы. Милостиве, яко кровоточивая прикасаюся краю риз Твоих и плачу, яко Марфа и Мария над Лазарем. Милостиве, изливаю сле́зы моя Тебе, яко сосуд мира на главу, приношу моление мое и прошу прощение ми дарова́ти. Милостиве, помилуй мя падшаго.

Кондак 12

Благодать Твою не отыми от Мене́, благи́й Иисусе, аще бо и согреших паче всех человек; Ты еси Бог милосердый не хощеши смерти грешника, прощаеши кающияся и заблуждшия призываеши. Освяти мя благодатию Свое́ю, и Дух правый обнови во утробе моей. Тебе бо в покаянии зову: Аллилуиа.

Икос 12

Плачу и рыдаю, Господи, содеянных мною злых и благость Твою молю: Плодов достойных покаяния не истяжи́ от Мене́, ибо крепость моя во мне оскуде́: сердце мне да́руй при́сно сокруше́нное, нищету же духовную, да сия́ Тебе принесу, яко приятную жертву. Спаси мя Тебе вопиющаго: Милостиве, виждь страх мой, виждь сокрушение души моея́ и прощение ми да́руй. Милостиве, Ты еси Судия́ мой и Бог, да внемлет сему душа моя и да отступит от всякаго греха, якоже Ты повелеваеши. Милостиве, не вни́ди со мною в суд, не истяжи́ моя дея́ния, но пре́зри яко Щедр моя злодеяния и спаси мя, Всесильне. Милостиве, Тебе припа́даю, согреших Ти, очисти, возми бремя от Мене тяжкое греховное, и яко благоутробен, даждь ми слезы умиления. Милостиве, поведах Ти грехи, я́же соде́ях, и души, и телесе́ моего язвы, я́же внутрь убийственнии помыслы разбойнически на мя возложи́ша. Милостиве, повержена мя пред враты́ Твоими поне́ на старость, не низри́ни мене́ во ад, яко непотребнаго, но прежде конца даждь ми оставление прегрешений. Милостиве, помилуй мя падшаго.

Кондак 13

О Преблаги́й и Всещедрый Иисусе, вся тайная сердца моего и вся, я́же соде́ях от юности моея́ даже до дне сего испове́дах Ти, Судии́ моему. Виждь страдание мое, виждь скорбь мою и вонми́ суду моему ныне, и Сам мя помилуй, яко благоутробен, Тебе вопиющаго: Аллилуиа.

Этот кондак читается трижды, затем 1-й икос «Адаму первозданному поревновах...» и 1-й кондак «Возбранный Воеводо...».

Молитва

Господи, Господи, се предстою пред Тобою, яко блудный сын, исповедуя грехи своя благости Твоей. Согреших Ти, Спасителю мой, согреших. От юности бо моея́ грех соде́ях и оскверни́х душу и тело дея́ньми лютыми. Согреших Ти, якоже Адам и Ева, преслушав заповеди Твоя; согреших, якоже Каин и яко вси грешницы Ветхаго и Новаго Завета. Ум очерни́х помыслы неподобными, сердце исполних нечистотою и всяким греховным чувством; осла́бих произволение леностию и склонностью ко греху. Весь обложе́н язвами греховными, якоже впадый в разбойники; вся раны души моея́ источают гной. Кто исцелит мя? Или кто возставит мя из глубины греховнаго жития, аще не Ты, Врачу благодатный? Сего ра́ди к Тебе прибего́х, Царю мой и Боже мой, слезно моля́ся. Уврачу́й и исцели мя: ум мой очисти от непотребных помыслов, свободи́ сердце от нечистоты греховныя, до возмогу́ чистым сердцем и умом славити Тя, Создателя моего и Бога. Произволение же укрепи на дела блага́я, во е́же то́чию угодная Тебе творити ми. Прости ми всякое согрешение вольное и невольное, и вся, я́же в ве́дении и в неве́дении содеянная мною. Ты весь еси благость и весь любы, и и́маши власть отпущати грехи, и Тебе славу возсылаем со Отце́м и Святым Духом ныне и при́сно и во веки веков. Аминь.