Акафист Пресвятой Богородице в честь иконы Ее «Умиление» (Псково-Печерской)

Празднование 21 мая/3 июня, 23 июня/6 июля, 26 августа/8 сентября, 7/20 октября и в 7-ю Неделю по Пасхе

Кондак 1

Избра́нней Заступнице рода христианскаго, покрывающей и спасающей люди правоверныя, иноком благоскорбя́щим Пода́тельнице вечнаго радования, благодарственная от души восклицаем пения. Ты же, яко наре́кшаяся Умиление, при́зри на ны милостивно и умиление нам да́руй, да со дерзновением воспеваем Ти радостно: Радуйся, Всеблага́я Владычице, умиление и спасение наше.

Икос 1

Ангели и архангели и множество сил небесных немо́лчно восхваляют Тя, Царицу всех и Владычицу. Ты же сподо́била еси и нас бренными устна́ми воспевати дарова́нную Тобою радость в явле́нии чу́дныя Твоея́ иконы с Предвечным Младенцем. Сего ра́ди приими́ от нас похвалы сия́: Радуйся, архангелы пева́емая; радуйся, ангелы славосло́вимая. Радуйся, небесными силами возноси́мая и окружаемая; радуйся, славо преподобных и мученик. Радуйся, верных чад Це́ркве несуме́нное радование; радуйся, иноком в по́двизех поспе́шествующая и наставляющая. Радуйся, умилением наре́кшаяся; радуйся, умиление прося́щим да́рующая. Радуйся, единая надеждо наша; радуйся, отрадо в смертный час. Радуйся, непрестанно Сына Твоего умоляющая; радуйся, Всеблага́я Владычице, умиление и спасение наше.

Кондак 2

Видяще небожители Тя, Всеблагу́ю Матерь, непрестанно моля́щуюся пред Престолом Божиим за человеческий род, прославиша Господа, дарова́вшаго таковую Заступницу верным, хвалебною песнию: Аллилуиа.

Икос 2

Разум дарова́ся верным, чудотворный лик Твой зря́щим и чудеса Тобою изливающаяся, слага́ти песни и пения ко прославле́нию имене Твоего честна́го, Всеблагословенная. Ты же милостивно приими́ от нас похвалы сия́: Радуйся, чудо чудес православия; радуйся, возводя́щая нас на небо. Радуйся, Милостивая, нас ми́лующая; радуйся, Своим омофо́ром от зла покрывающая. Радуйся, Господь с Тобою и Тобою с нами; радуйся, вся воздыхания наша милостивно приемлющая. Радуйся, в час скорби единая наша отрадо; радуйся, грешных усердная Спору́чнице. Радуйся, кающихся твердый сто́лпе; радуйся, о падших сле́зы проливающая. Радуйся, защищающая си́рых и вдови́ц; радуйся, Всеблага́я Владычице, умиление и спасение наше.

Кондак 3

Сила Господня осени́ Тя и подви́же на помощь и заступление всем, к чудотворней иконе Твоей прибегающим и поклоняющимся ей. Видяще сие́, лю́дие с трепетом припа́дающе Ти и песнопоя́ху Бога песнию: Аллилуиа.

Икос 3

Иму́щи древняя обитель Псково-Пече́рская Твой образ святы́й, Преблагословенная Богородице Дево, то́ки чудес источающий и обитель ограждающий от всякаго зла, исполнишася ве́лия радости и утешения. Се бо Матери Света крило́ма Своея́ Ма́терния любве́ ограждает ны, вопиющих умильно: Радуйся, радосте наша пресветлая; радуйся, ликование верных сердец. Радуйся, свет нам возсия́вшая; радуйся, обитель милостию Твое́ю посетившая. Радуйся, в залог любве́ икону Твою ей дарова́вшая; радуйся, яко тою иконою точа́тся исцеления. Радуйся, обитель Свою охраняющая; радуйся, живущим в ней при́сная Помощнице. Радуйся, иноков Мати чадолюбивая; радуйся, обе́тов и́ноческих страже неусыпная. Радуйся, радость всему миру нося́щая; радуйся, Всеблага́я Владычице, умиление и спасение наше.

Кондак 4

Бурею злочести́вых нашествий одержи́мии, благовернии лю́дие града Пскова, Тя чтуще и цельбоносную Твою икону «Умиление» прие́мше, воздви́гша ту на стены града проти́ву во́ев Бато́риевых. Ты же, чудо де́ющи, защитила еси град от смертоносных стрел вражиих, и подвигла еси верных пети благодарне рожде́нному Тобою Богу: Аллилуиа.

Икос 4

Слышаша жи́телие града Пскова и всея́ страны́ Российския величие чудес Твоих, ка́ко яви́ла еси их во испытании бывшим от во́ев зверонравных, прославиша Тя, великую Заступницу стра́ждущих, пении сими: Радуйся, скорби наша на радость претворяющая; радуйся, прибегающим к Тебе скоро помогающая. Радуйся, града Пскова ограждение; радуйся, злую дерзость во́ев попра́вшая. Радуйся, сте́ны града охранившая; радуйся, от смертоносных стрел врага покрывшая. Радуйся, темже люди Твоя возвеселившая; радуйся, надеждею православных снабде́вшая. Радуйся, кре́посте наша и защищение; радуйся, благоуханная цевни́це Небеснаго Царя. Радуйся, кроткая го́рлице мира; радуйся, Всеблага́я Владычице, умиление и спасение наше.

Кондак 5

Боготечную звезду, честну́ю икону Твою, показала еси обители и ве́си Пече́рской, Владычице мира! К нейже ве́рнии зря́ще и любовию ю лобыза́юще, взываем: Бу́ди нам щит и ограждение, да вопием Богу: Аллилуиа.

Икос 5

Видеша ближнии и дальнии, ка́ко Твой образ святы́й «Умиление» точит исцеле́ния всем немощству́ющим, прибего́ша к Тебе в ско́рбех и болезнех, и никтоже от Тебе тощь и неутешен отыде, и бысть во отраду Твой образ святы́й. Сего ра́ди ве́рнии благодарне зовут: Радуйся, не́мощей наших отгнание; радуйся, смертоносных язв исцеление. Радуйся, в беда́х скорая Уте́шительнице; радуйся, бесо́в Прогони́тельнице. Радуйся, града Пскова украшение; радуйся, обители Пече́рския стено́ и ограждение. Радуйся, иноков Небесная Игу́мение; радуйся, о добродетельном житии промысли́тельно пекущаяся. Радуйся, в напастех Стено́ Неруши́мая; радуйся, отча́янных грешников при́стане. Радуйся, недоумева́ющих разуме; радуйся, Всеблага́я Владычице, умиление и спасение наше.

Кондак 6

Проповедницы бы́ша чудес от святы́я иконы Твое́я, Владычице, ка́ко слепи́и прозирают, боля́щии исцеле́ния получают, ве́рнии лю́дие во множестве во обитель стека́хуся, ча́юще получити милости Твоя, Всеблага́я Царице небесе́, ли́ки своя со и́ноческими гла́сы совокупля́ху и в веселии зва́ху: Аллилуиа.

Икос 6

Возсия́ благодать Божественная чрез икону Твою чудотворную, Владычице, верою и любовию Тя Матерь Божию исповедующим, в нейже приемлюще и душевных неду́г врачевание и к Царствию Небесному приобщение, смиренно возгласи́ша Ти си́це: Радуйся, не телесе́ то́кмо, но и души́ Спасительнице; радуйся, сле́зы чад Своих отирающая. Радуйся, силу любве́ нам явля́ющая; радуйся, безприютных вечный черто́же. Радуйся, бездны греховныя бане; радуйся, чаше, омывающая совесть. Радуйся, веры лучезарное сокровище; радуйся, надежды на спасение каменю. Радуйся, адама́нте Христовы любве́; радуйся, скорбя́щим Пода́тельнице вечнаго радования. Радуйся, покро́ве чистоты и девства; радуйся, Всеблага́я Владычице, умиление и спасение наше.

Кондак 7

Хотя́ще оставити мир сей растленный, на святе́й горе́ боголюбезнии старцы преподобнии Марк и Ио́на подвиза́вшеся, и обитель Святы́я и Пречистыя Девы созда́ша, преподобный же игу́мен Корни́лий образ Владычицы ту водвори́, да ве́рнии надежную Помощницу и́мут и взывают согласно: Аллилуиа.

Икос 7

Новую и преславную Твою икону «Умиление» ви́дяще, на ограждение обители Псково-Пече́рския предпосланную, и радующеся вельми́, боголюби́вии и́ноцы и ве́рнии лю́дие возопи́ша приле́жне: Радуйся, славо пророков прекрасная; радуйся, Благодатное Небо. Радуйся, в ску́дости пище обильная; радуйся, духовною радостию всех питающая. Радуйся, в по́двизе поста́ Помощнице; радуйся, печали всякия утоляющая. Радуйся, злобная сердца́ умягчающая; радуйся, наша пред Сыном Спору́чнице. Радуйся, с Богом прине́сшая мир; радуйся, тайны от века явле́ние. Радуйся, Цве́те Благоуханный девства; радуйся, Всеблага́я Владычице, умиление и спасение наше.

Кондак 8

Странное и преславное чудо бысть Твой лик, Преблагословенная, верным с иконы сияющий. Еще бо преподобный Корни́лий пред образом Твоим моля́шеся, да огради́ши верных чад обители от всякаго зла, нас же научи́ши воспевати Всеблаго́му Богу, дарова́вшему нам Тебе, Матерь Свою: Аллилуиа.

Икос 8

Весь бе грехми́ отягче́н и отча́ян в своем житии, кающийся грешник в слезной молитве к Тебе прибеже́, прося́, да испро́сиши пред Сыном Твоим и Богом прощение грехов его, и восклица́ше Тебе зва́ньми сими: Радуйся, кающихся грешников утешение; радуйся, и грехов прощение. Радуйся, всяку слезу отъемлющая; радуйся, солнце, согревающее люди. Радуйся, отрадо, да́руемая верным; радуйся, христиан Небесная Мати. Радуйся, нераскаянных грешников исправление; радуйся, благоухание Небеснаго Царя. Радуйся, молитве нас научающая; радуйся, помоще в беда́х обильная. Радуйся, страх нощны́й прогоняющая; радуйся, Всеблага́я Владычице, умиление и спасение наше.

Кондак 9

Всяких сил ангельских Превышшую Деву, немо́лчно Тя хвалят наша сердца́, Тя истинно чистейшую све́тлостей солнечных непрестанно величают. Ты же Хода́таица о нас бу́ди в день Страшнаго Суда к Сыну Твоему и Богу, воспомяни́ тогда грешных моления и сподо́би пети Богу: Аллилуиа.

Икос 9

Вити́й многогла́сных язык не возможет воспети достойно Твой сладостный лик, о Дево и Мати Владычице, чудных Твоих даро́в и неизрече́нных красот умноже́ние сердца́ исполня́ет умиления и да́рует очесе́м источники слез, и подвиза́ет вопити в сокрушении: Радуйся, серде́ц pocó умиления; радуйся, надеждо всех безнадежных. Радуйся, всех правды лишенных прибежище; радуйся, демонов злых Прогони́тельнице. Радуйся, яко грозно беса́м запрещаеши; радуйся, унылых духом востание. Радуйся, яко вся возможна Тебе; радуйся, стро́потных душ вразумление. Радуйся, па́лице спящим сном греховным; радуйся, сладосте всем, в горьких работах сущим. Радуйся, всех скорбя́щих Радосте; радуйся, Всеблага́я Владычице, умиление и спасение наше.

Кондак 10

Спасти хотя́щи верныя люди, яви́лася еси о них Предста́тельница пред Богом на сто́гнах града Пскова, милость Свою яви́, икону Свою чудотворную предпоста́ви изряднее во́ем Бато́риевым. Лю́дие же, чудо видяще, ве́лиим гласом пе́ша Тебе: «Царице моя Преблага́я!» и восклица́ша Богу: Аллилуиа.

Икос 10

Стена еси иноком, Пречистая Дево, от вражиих ко́зней, от бед, скорбе́й и напастей, Тебе бо вручи́ша нас преподобнии Марк, Ио́на и Корни́лий. Бысть же хода́таицею и праведная Ва́сса. Сего ра́ди смятенный наш дух возносим в смиренной мольбе, взывающе: Радуйся, верных Своих утверждение; радуйся, чад Своих лю́бящая. Радуйся, граде Царя, всеми прославляемый; радуйся, Це́ркве Святы́я похвало́ и радование. Радуйся, горних умов ликование; радуйся, неверных ко Христу приводя́щая. Радуйся, Заступнице наша усердная; радуйся, спасающая сущих в беда́х. Радуйся, нечести́вых во́ев попра́ние; радуйся, добродетельми украше́нная. Радуйся, иноков ликование обильное; радуйся, Всеблага́я Владычице, умиление и спасение наше.

Кондак 11

Пение хвалебное принося́ще Ти, Всепетая, неудобства всякаго избавляемся. Твой образ честны́й усердно целующе, молим Тя: Да́руй нам веру несумне́нную, братолюбие и мир душа́м нашим низпосли́, да в мире и тишине вопием: Аллилуиа.

Икос 11

Светоприе́мная свеща́ была еси, Пречистая Дево, светом небесным озаряющи наш путь, и дале́че отступи́ от нас всякая неправда и беззаконие. Сего ра́ди благодарственно вопием Ти: Радуйся, свете немеркнущий жития нашего; радуйся, ле́ствице, возводя́щая к небесе́м. Радуйся, о́блаче всесветлый; радуйся, ски́ние Небеснаго Царя. Радуйся, Рождшая Зижди́теля вселенныя; радуйся, Тя бо блажа́т вси ро́ди. Радуйся, воспеваемая херувимы и серафимы; радуйся, дождю́, орошающий благочести́выя ду́ши. Радуйся, кла́дезю любве́ и милосердия; радуйся, грозная Отмсти́тельнице кляну́щихся всу́е. Радуйся, от клеветы нас избавляющая; радуйся, Всеблага́я Владычице, умиление и спасение наше.

Кондак 12

Благодать Ти дана́ от Господа Своим святым покровом покрывати Церковь Православную от неверия, ересе́й и раскола. А чад верных Це́ркви ми́ром ограждати и вразумляти на добродетели, да непрестанно славят Бога песнию: Аллилуиа.

Икос 12

Пою́ще Тя, Дево Всепетая, и чтуще чудотворную икону Твою «Умиление», во обители Псково-Пече́рстей сущую, радуемся по долгу ве́дуще Тя, Заступницу и Помощницу усердную всем, хотя́щим жати спасение и воспевати на всяк день: Радуйся, Мати, Тебе мое моленис; радуйся, кри́не удо́лия рая́. Радуйся, райския пищи Приемнице; радуйся, се́ю пищею и нас питающая. Радуйся, иноком благоскорбя́щим Пода́тельнице вечныя радости; радуйся, праведных жен украшение. Радуйся, кра́ю благи́х желаний; радуйся, мученик всех дерзновение. Радуйся, Це́ркве хору́гве пречестна́я; радуйся, жития сокровище вечное. Радуйся, све́щнице веры златая; радуйся, Всеблага́я Владычице, умиление и спасение наше.

Кондак 13

О Всепетая Мати, Царице небесе́ и земли́! Иноков блага́я Врата́рнице, верных покрове и умиление! Нынешнее прие́мши пение, от всякаго изба́ви ны злаго обстоя́ния и не лиши ны радости Царства Небеснаго, да вопием прилежно: Аллилуиа.

Этот кондак читается трижды, затем 1-й икос «Ангели и архангели...» и 1-й кондак «Избранней Заступнице...».

Молитва

О Преблагословенная Дево Богородице Владычице! Мати всех стра́ждущих и боле́знующих сердцем! Страны́ нашея и града Защитнице! Обители Псково-Пече́рския красото́ и славо! При́зри на нас смиренных, обремене́нных грехи́ многими, отягче́нных скорбьми́ и печальми, и с сокрушением и слеза́ми взирающих на пречистый лик Твой, в чудотворней иконе явле́нный. Сохрани от всякаго зла святую обитель сию́, ю́же преподобный Корни́лий со старцы Ма́рком и Ио́ною Тебе вручи́ и всех в вере и надежде подвиза́ющихся в ней. Спаси и град сей, и вся люди, правоверно живущия и к Тебе прибегающия, от нашествия иноплеме́нных, от всякаго страха и труса, от мора и глада, от злых человек и всякия ско́рби. Приникни к нам милосердием Твоим, яко ликом Твоим божественным любезне приникла еси к лани́те Богомладенца. Согрей нас дыханием Твоея́ любве́ и никогдаже отступай от нас, ни в сей жизни, ни в будущей, да ча́юще Твою всесильную Ма́тернюю помощь, сподо́бимся безбедно дойти вечныя жизни и прославляти Небеснаго Отца и Сына и Святаго Духа, в Троице сла́вимаго Бога, во веки веков. Аминь.