Акафист Пресвятой Богородице в честь иконы Ее Озерянской
Празднование 30 октября/12 ноября
Кондак 1
Взбра́нной Воеводе, Невечерняго Света Роди́тельнице, Божественное зна́мение спасения – Христа Богомладенца – на руку́ Свое́ю держащей, молитвам Це́ркве земны́я внемлющей, струи́ животворныя от явле́нныя иконы Своея́ Озеря́нския всем верным источающей, благодарственная воспису́ем Ти раби́ Твои, Богородице. Но яко иму́щая державу непобедимую, от всяких нас бед свободи́ и щедротами Сына Твоего ду́ши наша озари, да зовем Ти: Радуйся, Благословенная в жена́х Богородице, светом любве́ Христовы нас озаряющая.
Икос 1
Архангел Гавриил, спасение наше предвозвещая, Благословенную в жена́х пронарече́ Тя, Богородице. Мы же, благовестнику Бога Вышняго вне́млющие, ве́лию та́инству дивя́щеся, радуемся, Тя, зна́мение лика Своего Озеря́нскаго нам дарова́вшую, Матерь Господа нашего исповедуем и, яко Матери милосердия и щедрот, со благогове́нием вопием Ти: Радуйся, священное сокровище славы Божией, свещено́сно во Святая святых введе́нная; радуйся, благоволения Божия предображе́ние и человеков спасения пропове́дание. Радуйся, пророческих прорече́ний сбы́тие многоценное, Христа всем предвозвестившая; радуйся, о Тебе бо небесная вся удиви́шася, зря́ще Духа Святаго в Тя все́льшася. Радуйся, глави́зно нашего спасения, Триипоста́сное Божество в едином естестве́ всему миру яви́вшая; радуйся, Отроча́ Мла́до, Отчее сияние, мир просветившее, нам родившая. Радуйся, Мати Пречистая, прежде рождества и по рождестве Дева пребывшая; радуйся, яко о Рождестве Сына Твоего вси земнороднии, спасающеся, возвеселишася. Радуйся, Благословенная в жена́х Богородице, светом любве́ Христовы нас озаряющая.
Кондак 2
Видя благочести́вый муж ве́си Озеря́нския, егда изы́де на делание свое, святую икону Твою, Владычице, внеза́пу косою его разсече́нную, со слеза́ми умиления к лику Твоему пове́ржеся и со благогове́нием разсече́нныя части в дом свой принесе́, слезно прося́ умилостивления о гресе́ своем. Егда же воу́трии сих не обре́те, страхом и ско́рбию объят бысть, помы́сли бо гневу Божию на доме своем быти, и со умилением возопи Богу: Аллилуиа.
Икос 2
Разуме́ти хотя тайны сея́ силу, е́юже сокры́ся из дому его святая икона Твоя, Владычице, муж сей на место разсече́ния ея́ ускори́. И егда же паки сраще́нну сию́ обре́те, зна́мение ве́лие в сем уразуме́, о немже иерею Фео́дору пове́да, и людем веси Озерянския о чудеси́ ве́лием возвести́. Ти́и же о Твоем, Богомати, милосердии слышавше, гласом радования благодарне возопиша: «Откуду нам сие́, да Мати Господа нашего к нам прии́де!» Си́це умиляющеся, воспева́ху Ти таковая: Радуйся, Благодатная, Господь с Тобою, Имже мир от греха спасе́ся; радуйся, Благословен бо Плод чрева Твоего, Имже глава зми́ева сокрушися. Радуйся, Це́ркве Христовы, седмию́ Вселенскими Соборы утвержде́нныя, при́сное украшение; радуйся, веры православныя, Духом Святым ограждаемыя, непоколебимое утверждение. Радуйся, Препрославленная, во дни нашествия иноплеме́нник всемо́щно нас охраняющая; радуйся, мольбы верных Своих, пред пречистым Твоим образом приноси́мыя, милостиво приемлющая. Радуйся, сращением святы́я Твоея́ иконы мужа праведна зело́ возвеселившая; радуйся, разсече́нное диа́волом естество́ наше Рождеством Сына Твоего паки с Богом соединившая. Радуйся, Благословенная в жена́х Богородице, светом любве́ Христовы нас озаряющая.
Кондак 3
Сила благодати неисповедимая не то́кмо от святы́я иконы Твоея́, Пречистая, верным источа́шеся, но и во исто́чнице, на месте чу́днаго явле́ния ея, хромым хождение, глухим слы́шание, слепым прозрение обильно подава́шеся. Та́ко бо Твоего Ма́терняго милосердия бездну неизсле́димую лю́дие ви́девше, от неду́гов душевных и телесных исцеля́хуся, сердца́ же своя в любви Божией утвержда́ху, с веселием пою́ще Ему: Аллилуиа.
Икос 3
Имея сие́ неописуемое сокровище веры – Твоего, о Богомати, лика пречистаго благословение и в нем покров и земли́ нашея благодатное украшение, иерей Божий Фео́дор, умиля́ся, все имение свое разда́ и в пределех веси Озеря́нския святую обитель, хра́мину лику Твоему, со пустыннолю́бцем Севастианом воздви́же, себе же в жертву живую, е́же и́ночествовати в ней, Сыну Твоему и Богу нашему приведе́, иде́же со и́неми пустыннолю́бцы о Тебе, Благодатная, радуяся, сынолю́бно воспе́ таковая: Радуйся, Мудрость, Слово и Силу – Сына О́тча, из Тебе воплотившагося, – миру яви́вшая; радуйся, Христа, Пасху нетленную, мертвым, живым и грядущим уготовившая. Радуйся, Владычице милостивая, Свой божественный покров на нас простирающая; радуйся, голубице чадолюбивая, утешение благо́е в сердца́ наша низпосылающая. Радуйся, покро́ве ши́рший о́блака, явле́нием иконы Твоея́ ми́лостивно нас посетившая; радуйся, любвеобильная Мати, землю Харьковскую благодатно осиявшая. Радуйся, Божия Сло́ва предивное селение, град наш и люди от нашествия вражия охраняющая; радуйся, незримая Путеводи́тельнице, к небесному отечеству нас руководя́щая. Радуйся, Благословенная в жена́х Богородице, светом любве́ Христовы нас озаряющая.
Кондак 4
Бурю житейских скорбе́й и напастей в людех утолити хотя́щи, святую икону Твою на утешение нам дарова́ла еси, Владычице, ю́же, аки Саму Тя с нами сущую, зря́ще, недоуме́юще, взываем: «Ку́ю Ти похвалу принесе́м, Заступнице усердная, яко источник благодатных исцелений пред пречистым Твоим образом с верою моля́щимся и Твоея́ помощи прося́щим всещедро источаеши и си́це непрестанно нас милуеши?» Оба́че, неисчерпа́емыя щедроты Твоя величающе, благодарственно вопием Триединому Богу: Аллилуиа.
Икос 4
Слышавше ближнии и дальнии лю́дие о пречуднем я́влении иконы Твоея́ и о чудесе́х, от нея́ бываемых, со умилением в святую обитель Озеря́нскую притека́ху и во всяких ско́рбех житейских и в дни нашествия иноплеме́нников в надежде спасения своего о Тебе, Всепетая Мати, уверя́хуся, и, си́це ликовству́юще, Господа любовию прославля́ху. Темже и мы, надежду радости сея́ приемше, о Господе радуемся, Тебе же гласом хваления приносим таковая: Радуйся, А́гнице, рождшая Агнца, вземшаго грехи мира, небесе́ и земли́ Царице и Владычице; радуйся, всех верных от зол ограждение и священное прибежище. Радуйся, блага́я Уте́шительнице, нечаянную радость в святе́й иконе Твоей нам принесшая; радуйся, душ немощны́х Целительнице, благость любве́ Божия нам открывшая. Радуйся, упование на милосердие Божие в сердца́ наша благодатно вселяющая; радуйся, теплотою любве́ божественныя сердца́ наша оживотворя́ющая. Радуйся, одушевленный храме, Великаго Царя Божественное жилище; радуйся, селение небесное, херувим пребо́льшее и серафим превысшее. Радуйся, Благословенная в жена́х Богородице, светом любве́ Христовы нас озаряющая.
Кондак 5
Боготечней звезде икона Твоя, о Богомати, уподо́бися, егда святы́я обители Озеря́нскую, Куря́жскую и Харьковскую обтека́ше и цельбоно́сными струя́ми, неоскудно от нея́ источающимися, изобильно верных напая́ше и, благодатию Святаго Духа тех оживотворя́ющи, теле́сне и душе́вне, по вере их, исцеля́ше. Мы же душе́внеи очи наши к Тебе, Первообразу ея́, возводим, неду́гов наших исцеления, грехов прощения и Небесным Уте́шителем душ наших посещения умильно просим, с верою вопиюще о Тебе Богу: Аллилуиа.
Икос 5
Видевше икону Твою, Владычице, косою разсече́нную и чудодейственно сраще́нную, и то́ки чудес от нея́ изливаемыя, вси лю́дие, со усердием к ней притека́юще, Ма́терний покров Твой и защищение, надежду и умилостивление в ней разумева́ху. Си́це и мы, стрела́ми врага разсекаемии и волна́ми страстей потопля́емии, душевне изнемогающе, в Тебе, о Всеблага́я, надежду нашего спасения иму́ще, дерзающе, молимся: Услыши нас, грешными усты́ глаголющих Ти сицева́я: Радуйся, Преблага́я Покровительнице града нашего, Твоими бо молитвами ро́ди христианстии спасаются; радуйся, всех греховне блуждающих на путь вечныя жизни до́бре наставляющая. Ра дуйся, от безумства, лени и страстей силою любве́ Твоея́ нас милостиво спасающая; радуйся, бедныя ду́ши наша огне́м Духа Святаго на подвиг любве́ согревающая и укрепляющая. Радуйся, всех под Твой покров и защище́ние Ма́терне приемлющая; радуйся, в подвизе веры изнемогающих молитвам внемлющая. Радуйся, боля́щия и безнадежныя от одра́ болезни возставляющая; радуйся, верная Спутнице, путешествующих и по морю плавающих от всяких бед избавляющая. Радуйся, Благословенная в жена́х Богородице, светом любве́ Христовы нас озаряющая.
Кондак 6
Проповедник немо́лчен благодатныя помощи Богоматере яви́ся человек некий, су́ху ру́ку имы́й, и́же со слеза́ми умиления к иконе Ея святе́й припа́дая, удо́бь исцеление прия́т и о чудеси́, на нем бывшем, с радостию и благодарением всей Церкви пове́да. Мы же, иму́ще сию́ источник благодатных исцелений, наипаче же пред Престолом Божиим Заступницы нашея усердное за всех нас Ма́тернее заступление, со дерзновением вопием лю́бящему нас Богу: Аллилуиа.
Икос 6
Возсия́ нам паче луч солнечных святая икона Твоя, Владычице, в пределех Озеря́нских, егда губительная язва на страну нашу на́йде и многи острием смерти изсече́. Лю́дие же, гнев Божий видяще, со слеза́ми умиления ко святе́й иконе Твоей, о Богомати, поверга́хуся, и не то́кмо православнии, но и иновернии, к источнику Твоего милосердия притекавшии с верою, исцеля́хуся. Толи́ку убо милость Божию Твоими Ма́терними молитвами на себе видяще, со благодарением воспева́ху Ти таковая: Радуйся, в дни мора язвеннаго непреложная наша надеждо и Спасительнице; радуйся, всех в неудо́бь исце́льных неду́зех стра́ждущих Премилосердная Целительнице. Радуйся, ум наш, небрежением омраче́нный, благодатными струя́ми, от иконы Твоея́ изливаемыми, озаряющая; радуйся, близ смерти сущия и душевне изнемогающия милостиво к жизни возвращающая. Радуйся, светлое благодати познание, о Тебе бо вся силы небесныя хва́лятся; радуйся, надеждо благ вечных, Тобою бо земнороднии к жизни ве́чней приуготовля́ются. Радуйся, Мати Предвечнаго Бога, целебную радость всем источающая; радуйся, честно́ю кровию Сына Твоего грехи мира омывающая. Радуйся, Благословенная в жена́х Богородице, светом любве́ Христовы нас озаряющая.
Кондак 7
Хотя́щи яви́ти лю́дем стра́ждущим Твоея́ Ма́терния любве́ неисчерпа́емую щедрот бездну, аки студенцы́ в пусты́ни знойней, чудотворныя иконы Твоя и новая зна́мения от них, о Богомати, дарова́ла еси, да вси, в болезнех душевных и телесных неисцельно изнемогающии и ко Твоему милосердию с верою притекающии, спасение обретают. Та́ко у иконы Твоея́ Озеря́нския немощни́и и одержи́мии, исцеления душ и телес приемлюще, с веселием и благодарением воспеша Богу: Аллилуиа.
Икос 7
Новую песнь хваления принесе́ Ти па́жить Харьковская, Мати Врача душ и теле́с наших, егда некая слепая отрокови́ца, с ма́терию свое́ю слезныя молитвы у иконы Твоея́ Озеря́нския творя́щи, внеза́пу ве́лиим гласом радования возопи: «О мати моя! Свет Божий вижу, тьму непроходную оче́с моих просвещающий!» Лю́дие же, ви́девше Твоего, о Богомати, благодатнаго врачевания силу, Твоему милосердию себе вверя́ху, с верою и любовию ко святе́й иконе Твоей припа́дающе, таковыми взыва́ху похвалами: Радуйся, источниче милосердия неисчерпаемый, неисце́льных болезней врачевание содержащий; радуйся, всех оставленных врачи Твое́ю благодатною силою исцеляющая. Радуйся, дев благоче́стивых Невести́тельнице и усердная о нас Молитвеннице; радуйся, во искуше́ниих и соблазнах житейских блуждающих ко спасению Путеводи́тельнице. Радуйся, звездо́ неугасимая, зрети Бога Вышняго нас просвещающая; радуйся, растления душевнаго и совести лука́вства нас избавляющая. Радуйся, о Тебе бо матери и дщери и невесты Христовы надежду иму́ще, спасаются; радуйся, божественную радость и вечное спасение уповающим на Тя приуготовляющая. Радуйся, Благословенная в жена́х Богородице, светом любве́ Христовы нас озаряющая.
Кондак 8
Страшное и ужасное виде́ние людем Божиим бысть, егда у святы́я иконы Твоея́, Владычице, чудо ве́лие и неизрече́нное совершися: деви́ца бо некая, бе́сом томимая, хулу́ страшную на сию́ изрека́ше, оба́че молитв ра́ди Святы́я Це́ркве, наипаче же Твоего предста́тельства силою, от своего лука́вства спасена бысть и на славословие Твое, Пречистая, подви́жеся. Мы же радуемся и веселимся, яко не посмеются о нас врази́ наши, ниже́ погуби́т нас Господь грех ра́ди наших, молитвами Твоими. Сего ра́ди, благодаря́ще, о Тебе вопием Богу: Аллилуиа.
Икос 8
Вся в вышних пребывающи и нижних, к лику Твоему святому припа́дающих, ника́коже оставля́еши, Богородице. Се бо человек, духа злаго имы́й, с верою моляся пред пречистым Твоим образом Озеря́нским, Владычице, исцеле́н бысть и в радости душевней о благодея́нии, на нем бывшем, благодарение Тебе принесе́. С нимже и нас, о Всеблага́я, во время благопотребно посети и от ловле́ния диа́воля ду́ши наша сохрани, да не постыдимся, ниже́ посра́мимся, принося́ще Ти сицевы́я похвалы́: Радуйся, яко именем Твоим, паче всякаго имене, пленения диа́воля и всея́ силы вражия челове́цы свобождаются; радуйся, яко призывающии имя Твое от клеветы человеческия и внезапныя смерти Тобою избавляются. Радуйся, бедствующим на всяком месте Всеусердная Предста́тельнице; радуйся, за оби́димых, озлобленных и уничиже́нных при́сная Хода́таице. Радуйся, Ты бо кающихся грешников из че́люстей духо́в злобы изымаеши; радуйся, Ты бо всех на Тя уповающих в любовь Божию вво́диши. Радуйся, красотою девства Твоего воспева́ти величие Божие нас научающая; радуйся, Рождеством Сына Твоего грозное смерти жало притупляющая. Радуйся, Благословенная в жена́х Богородице, светом любве́ Христовы нас озаряющая.
Кондак 9
Вси сущии в беда́х, болезнех и печалех, радостно восхва́лим святую Заступницу нашу Богородицу, обретшую благодать у Бога, во е́же неду́жныя исцеля́ти, немощны́я укрепляти, плененныя свобождати и стра́ждущия от духо́в нечистых и прочих бед избавляти. Темже, яко несумненней Предста́тельнице нашей, умильно глаголем Ти: Помози́ и научи нас, о милосердствующая Мати, волю Божию всегда твори́ти и пребывати в любви Его, и, яко кади́ло благовонное, непрестанно приноси́ти Ему: Аллилуиа.
Икос 9
Вити́и многовеща́ннии недоуме́ют, что глаго́лати о Тебе, Мати Божия, видяще тайну необъемлемую и величие неописуемое святаго лика Твоего, Дево Чистая, даром чудотворений сияющаго и всех припа́дающих с верою цельбоно́сными дары́ снабдева́ющаго. Мы же, неисче́тная благодеяния сия́ ве́дуще, аще и от скверных усте́н наших, оба́че умиленною душе́ю и сердцем сокруше́нным, дерзаем воспевати Тебе сия́ похвалы́: Радуйся, Отца Небеснаго благоволе́ния предображе́ние, кающихся грешников милосердием Божиим снабдева́ющая; радуйся, едина Мати милосердия, вдов и сиро́т милующая и питающая. Радуйся, на горе Афо́нстей, Поча́евстей и в иных обителех иконами Твоими преславно чудодействующая; радуйся, новую купе́ль Силоа́мскую в пусты́ни Озеря́нстей верным на утешение источившая. Радуйся, иноков благоподвиза́ющихся ко Отечеству Небесному верная Предводи́тельнице; радуйся, супружеств христианских благословение и чад их Преблага́я Покровительнице. Радуйся, Це́ркве Небесныя при́сное радование, земны́я же от всех козней вражиих непреодолимое избавление; радуйся, в вечнем Царствии Сына Твоего радости неизрече́нныя верным уготовление. Радуйся, Благословенная в жена́х Богородице, светом любве́ Христовы нас озаряющая.
Кондак 10
Спасительное прибежище и Твоего предста́тельства увере́ние, и милосердия Твоего явле́ние икона Озеря́нская нам, Владычице, показа́ся, пред неюже ду́ши наша в молитве изливаем и верою Тебе вопие́м: Воззри, Милосердая, на люди Твоя, вся скорби наша и печали утоли, утешение благо́е в сердца́ наша низпосли́, и спасение вечное душа́м нашим, Пречистая, испроси́, да, спасаеми Тобою, Сыну Твоему и Богу нашему благодарно зовем: Аллилуиа.
Икос 10
Стену тверду и от бед ограждение, проти́ву козней диа́вольских спасительное прибежище, неду́гов исцеление и и́ны да́ры многи в святе́й иконе Твоей, Владычице, обильно дарова́ла еси нам. Сию́ благоверный христолюбец, и́же ушесы́ своими зело́ страда́ше, в трикратном явле́нии видев, со умилением к той припа́дая, благодатнаго исцеления сподо́бися. Та́ко видяще любве́ Твоея́, Богомати, неисчерпа́емое море, дерзающе, молимся: Услыши нас убогих, грешными усты́ глаголющих Ти сицева́я: Радуйся, Предвечнаго Царя Родительнице, Це́ркве Православныя забра́ло и ограждение; радуйся, народа нашего от бед Хранительнице и от всех врагов избавление. Радуйся, наша Всеусердная Благодетельнице, па́ству Харьковскую матери́нски опекающая; радуйся, цве́те небеснаго благоухания, благодатным миром сердца́ наша растворяющая. Радуйся, незримая Предста́тельнице, Ты бо воистинну еси крепость наша и спасение; радуйся, благоутробная и милостивая к человеком, болезней наших надежное исцеление. Радуйся, блага́я Хлебодательнице, дожди́ ранними и поздними землю нашу наполняющая; радуйся, от враг видимых и невидимых, возстающих на ны, нас избавляющая. Радуйся, Благословенная в жена́х Богородице, светом любве́ Христовы нас озаряющая.
Кондак 11
Пение всеумиле́нное приносим Ти, Всемилостивая Владычице! Не ве́мы бо, что сотвори́м, егда внеза́пу на́йдет на нас страшный час смерти. На Тя все упование наше возлагаем и к Твоей святе́й иконе, ю́же на утешение нам дарова́ла еси, припа́дающе просим: Бу́ди милостива к нам грешным и не пре́зри молений наших, но всели́ в сердца́ наша печаль по Бозе Спасителе нашем, да пламенною любовию зовем Ему: Аллилуиа.
Икос 11
Светоза́рную свещу́ во мра́це жития сущим неугасимую зрим святую икону Твою, Всенепорочная, Твоего милосердия источник, благодать всем источающий, у негоже мно́зи грешницы, кающеся, спасение улучиша и Твоим хода́тайством Царствие Небесное обрето́ша. Помози́ и нам, Всемилостивая, да Твоими Ма́терними молитвами с мудрыми девами Царствию Христову приобщимся, иде́же веселящеся, вопие́м Ти таковая: Радуйся, приятное молитвы кади́ло, за спасение мира у Престола Святы́я Троицы при́сно благоухающая; радуйся, орга́не молитвы неумолкающия, милосердия Божия миру прося́щая. Радуйся, равноапостолов и проповедников евангельския истины благодатное вдохновение; радуйся, верных иерархов Це́ркве Христовы правило веры и от скорбе́й избавление. Радуйся, храмов Божиих усердных строителей и верных в них служителей любовию Христовою обогащение; радуйся, трудолюбивых земледельцев хлебом жизни вечныя насыщение. Радуйся, Божественною красотою Сына Твоего и Бога нашего наслаждающаяся; радуйся, егоже, яко Судию́ и Бога, о спасении мира неотступно умоляющая. Радуйся, Благословенная в жена́х Богородице, светом любве́ Христовы нас озаряющая.
Кондак 12
Благодати Твоея́ земное зна́мение дати восхотевши, источник чудес неисчетных па́жити Харьковстей в иконе Твоей Озеря́нской отве́рзла еси, Владычице, в ней бо Божественная благодать, е́юже Всевышний облагода́тствова Тя, зна́мения и чудеса вы́ну содева́ет и душевных и телесных неду́гов исцеление всем с верою притекающим подает. Темже и нам благодати сея́ помощь у Сына Твоего, Пречистая, испроси́, да не погибнем люте, но, Тобою спасаемии, немолчно пое́м Богу: Аллилуиа.
Икос 12
Пою́ще любве́ Твоея́ бездну неизрече́нную, ю́же изливаеши роду христианскому, благодарно припа́дающе, молим Тя, Богородице: Яко в животе сем, та́ко и в страшный час смерти не остави нас, но ускори́ на помощь и, яко воистину Мати Божия и над всеми владычествующая, от лютых мыта́рств и руки́ бесо́вския нас исхити́ и Сыну Твоему и Богу нашему спасе́ны приведи, да якоже на земли́, та́ко и на небеси́, со всеми святыми воспеваем Ти таковыя похвалы́: Радуйся, щедрот бездно, от начала веков во глави́зну нашего спасения предызбра́нная; радуйся, источниче любве́ неизрече́нныя, яко Мати милостивая, Страстотерпцем Голгофским указа́нная. Радуйся, у Креста Сыну Своему сострадавшая и с Ним мир возлюбившая; радуйся, Церковь Сына Твоего от всех зол избавляющая, род христианский возвеличившая. Радуйся, цве́те девства неувядаемаго, венец всех добродетелей в Себе спле́тшая; радуйся, радуго Божественнаго зна́мения, небесныя и земны́я у Престола Божия Собою совоку́пльшая. Радуйся, всесвяты́й бо лик Твой, благодатию и жизнию дышущий, яко рай Божественный на Тя взирающим; радуйся, превыше небес превознесе́нная, отра́до и утешение непрестанно Тя величающим. Радуйся, Благословенная в жена́х Богородице, светом любве́ Христовы нас озаряющая.
Кондак 13
О Преблагословенная Мати Христа Бога нашего, Це́ркве Небесныя украшение, земны́я же щит и утверждение, всем во всяких ско́рбех Ма́тернее заступление и среди соблазнов мира сего благодатное душ наших озарение! Приими́, Владычице, сие́ убогое моление наше, пред пречистым образом Твоим Тебе приноси́мое, и умоли Всеблага́го Бога яви́ти милость Свою на народы наша, во е́же, в силе и благодати Духа Святаго всякое зло препобеждающе, николи́же любве́ Божией насытитися и та́ко чистым сердцем зде и в будущем ве́це воспева́ти святых Святейшее слово: Аллилуиа.
Этот кондак читается трижды, затем 1-й икос «Архангел Гавриил...» и 1-й кондак «Взбранной Воеводе...».
Молитва
О Преблагословенная Владычице наша Богородице! К Тебе, обретшей благодать пред Богом, во е́же родити миру Спасителя душ наших, и Матери Света нарече́нней, припа́дающе, молимся: При́зри, Всемилостивая, на нас, Предвечным Советом Пресвятыя Троицы к благодатному наследию жизни вечныя со́зданных, жалом же греховным уя́звленных и смерти телесней и душевней подверженных, и, якоже икону Твою Озеря́нскую, пречу́дне срастивши, всем верным источник чудес от нея́ источила еси, си́це же и нас, на Твою, Богомати, икону благоговейно взирающих, душевне и телесне исцели и немощно́е естество́ наше, сечением греховным разсекаемое, паки с Богом соедини и чада Его Божественныя любве́ силою и действием Свята́го Духа соде́лай. Сердца же наша, Всемилостивая, благодатию Христовою раствори и волю нашу ко исполнению заповедей Божиих спе́шну сотвори, ноги же наша на путь мирен напра́ви и та́ко, о Всеблага́я, все естество наше любовию к Богу воспламени́.
Владычице Пресвятая, якоже в тяжком нашествии иноплеме́нников в пределы наша святою иконою Твое́ю Озеря́нскою православныя люди укрепила еси, та́ко и ныне зна́мением лика сего пресвятаго па́ству харьковскую и вся верная чада страны нашея в единомыслии веры утверди и от тлетворных расколов и ересе́й злочестивых и иных бед сохрани, отечеству же нашему незыблемаго мира от Бога испроси́ и от всех враг, мыслящих нам злая, нас изба́ви. Верных же Твоих, пред святою иконою Твое́ю припа́дающих и в ско́рбех Тебе моля́щихся, проше́ния исполни и вся я́же ко спасению потребная всем нам да́руй. Убогия же слезы и воздыхания наша благоприятны пред Богом сотвори́ и прощение грехов наших испроси́. И та́ко, Преблагословенная Мати, воздвигни нас на благодарственное Ти славословие и, в подвизе покая́ния нас укрепля́юща, неосужде́нны причастники Пречистаго Тела и Честны́я Кро́ве Господа нашего Иисуса Христа при кончине жития нашего быти нас милостиво сподо́би. В час же исхода нашего молитву Ма́тернюю о нас пред Богом сотвори́ и бедныя ду́ши наша чрез мыта́рства лютая, нача́ла и власти тьмы невозбра́нно в Царствие Небесное, иде́же мир и радость безконечная, приведи, во е́же в Церкви Небесней, Тобою, Честнейшею херувим и Славнейшею без сравнения серафим украше́нней, непрестанно славословити и воспева́ти смерти Победителя, Агнца Божия, взе́мшаго грехи мира, Емуже, о Благодатная, Тебе ра́ди, оса́нна и благодарение, слава, честь и поклонение, со Безначальным Его Отце́м и со Пресвятым и Благи́м и Животворящим Его Духом Уте́шителем, ныне и при́сно и во веки веков. Аминь.