Акафист Пресвятой Богородице в честь иконы Ее Калужской
Празднование 2/15 сентября и 12/25 октября
Кондак 1
Взбра́нной Воеводе Пренепорочней Деве Богородице, земли́ Калужския Изба́вительнице, хвалебныя песни приносим Ти, раби́ Твои, яко иконы Твоея́ явле́нием дарова́вшей нам стража неусы́пна. Ты же моления нашего, пред иконою Твое́ю возноси́маго, не отве́ржи, но защити ны, Владычице, от всех врагов видимых и невидимых и изба́ви ны от всяких болезней душевных и телесных, да во умилении сердец зовем Ти: Радуйся, Владычице, милость Свою нам и заступление явля́ющая.
Икос 1
Ангелов множество сла́вят Тя, Царицу всех и Богородицу, Ты бо исполнила еси радостию сердца́ наша явле́нием чудотворныя иконы Твоея́ в Тинко́ве и чудесы́ во храме имене Рождества Твоего в ве́си Калужке, ейже покланя́ющеся, Тебе, Богоизбра́нная Дево, моления возносим, со страхом и любовию глаголюще: Радуйся, от патриархов прообразова́нная и от пророков предвозвеще́нная; радуйся, А́гнице, рождшая А́гнца, взе́мшаго грехи мира. Радуйся, Адама и Е́ву от древняго проклятия свободи́вшая; радуйся, чудотворною иконою Твое́ю всю землю Калужскую озаряющая. Радуйся, святую икону Твою в зна́мение милости Твоея́ нам да́вшая; радуйся, яко на икону Твою взирающе, Самой Тебе истинней Богородице покланя́емся. Радуйся, Владычице, милость Свою нам и заступление явля́ющая.
Кондак 2
Видя начерта́ние ли́ка Твоего, деви́ца Евдоки́я в развраще́нии се́рдца своего дерзновенно оплева́нием поруга́ся ему, не ве́дущи, яко сей Твой лик есть, Пресвятая Дево; Ты же, вразумления ра́ди, наказала еси ю разслабле́нием всего телесе́, сляче́нием руку́ и ногу́, ослепле́нием о́чию и отъятием язы́ка и сим показала ей, яко начерта́ние лика сего есть икона Твоя чудотворная, да вси лю́дие вопиют к рождшемуся от Тебе Богу Слову: Аллилуиа.
Икос 2
Разум человеческий не может пости́гнуги великаго Твоего милосердия, Пресвятая Богородице, яко искреннее покая́ние боля́щей деви́цы прия́ла еси и совершенное исцеление ей дарова́ла еси, да молитвы приносит пред иконою Твое́ю, взывающи си́це: Радуйся, ле́ствице небесная, Иа́ковом предви́денная; радуйся, тайну воплощения Сына Божия, от веков в Бозе сокровенную, открывшая. Радуйся, ве́дущим брань проти́ву плоти, мира и диа́вола добрая Споспе́шнице, радуйся, от грехопадений наших, имже несть числа́, избавляющая. Радуйся, яко призывающии имя Твое от падения стра́стнаго воста́ша; радуйся, благодатное безстрастие ищущим его усердно подаю́щая. Радуйся, Владычице, милость Свою нам и заступление явля́ющая.
Кондак 3
Силою, данною Ти свыше, чудотворную икону Твою, Пресвятая Богородице, дарова́ла еси нам в зна́мение милости Твоея́, я́вльшися но́щию родителем тоя́ деви́цы, и рекла́ еси им: «Буду хода́тайствовати о граде Калуге и всех людех страны сея́». Мы же, взирающе на икону Твою и множество чудес, от нея́ изливающихся, видяще, с радостию к ней припа́даем и из глубины́ се́рдца благодарим Тя, дивную Заступницу, воспевающе Богу: Аллилуиа.
Икос 3
Иму́щи о Церкви Христовой попече́ние и видевши, яко посреде́ обитателей земли́ Калужския живут люди не́цыи, Святы́я Христовы Церкве отве́ргшиися, Пресвятая Богородице, непременное желание изрекла́ еси: «Да вси чтут Православную Церковь». Родителем же тоя́ деви́цы повелела еси, да совершено будет моле́бствие пред Твое́ю иконою с освящением воды, и да окропи́т иере́й ею дщерь их, болезнию пораженную, яко да исцеле́ет от неду́га своего, нас же спаси, Госпоже́ Богородице, верою и любовию воспевающих Ти: Радуйся, в защиту Церкве Православныя чудеса показу́ющая; радуйся, хули́телей православныя веры невидимо наказу́ющая. Радуйся, православныя веры ограждение и утверждение; радуйся, крепкая стено́ Церкве Православныя. Радуйся, святителей веселие и благоговейных иере́й похвало́; ра́дуйся, и́ноков и и́нокинь благочести́вых изрядная Покровительнице и обителей их неусыпная Блюстительнице. Радуйся, Владычице, милость Свою нам и заступление явля́ющая.
Кондак 4
Бурю напастей прови́дя, угрожавших краю на́шему от озлобле́ния Наполеона, устремившагося на землю Калужскую, святитель Евла́мпий моля́шеся пред Твое́ю иконою, Богородице, о избавлении града Калуги и всея́ ея области от врагов, весть же прие́м, яко во́инство вражие поражено бысть на реце́ Черну́шке, благодарственно Богу возопи: Аллилуиа.
Икос 4
Слышавше милость Твою, Богородице, чрез Твою икону на поле брани близ ве́си Тару́тино нам ниспо́сланную, егда яви́ла еси ю на возду́се иноплеме́нником, якоже свиде́тельствоваху плене́ннии от них, и та́ко дарова́ла еси победу во́ем российским, мы же, радующеся о Твоей, Владычице, помощи, с упованием воспеваем Ти си́це: Радуйся, Купино́ Неопали́мая, боговидцем Моисе́ем предзри́мая; радуйся, от потопа греховнаго нас спасшая. Радуйся, кади́льнице злата́я, яко фимиам благоуха́нный, молитвы Твоя за ны к Богу, Сыну Твоему, при́сно вознося́щая; радуйся, праведно дви́жимый гнев Божий на ны молением Своим скоро утоляющая. Радуйся, яко явле́нием на возду́се иконы Твоея́ страх и трепет нападе́ на враги́ иноплеме́нныя; радуйся, яко явле́нием иконы Твоея́ во время брани победу российской рати подала́ еси. Радуйся, Владычице, милость Свою нам и заступление явля́ющая.
Кондак 5
Боготе́чная звезда яви́лася еси нам, Богородице, наша смыслы озаряющая и на путь спасительный наставля́ющая, врагом же нашим была́ еси яко молния, устраша́ющи их и отражающи от нас, егда Наполеон, поразив близ града Малояросла́вца рать нашу, пону́ди ю отъити́ ко граду Калуге, сам же, услышав сие́ по Твоему, милостивая Заступнице, повеле́нию, неверным же неве́домыя ра́ди ви́ны, вместо е́же ко граду Калуге, и́де по пути, егоже сам разори́ и опустоши, ко граду Гжа́тску и та́ко рать свою погуби́. Сего ра́ди, Твое крепкое заступление ве́дуще, со умилением глаголем Богу: Аллилуиа.
Икос 5
Прояви́вши ве́лию любовь к лю́дем, живущим во стране́ Калужской, Пресвятая Богородице, яко землю нашу сохранила еси и множество врагов, обышедших ю, дале́че от нея́ отгна́ла еси; сии́ враги́ наши уве́деша, коль крепка́ есть помощь Божия Матере. Мы же Твое всемо́щное заступление, нам бывшее, до́бре ве́дуще, в радости се́рдца воспеваем Ти си́це: Радуйся, кле́ще та́инственная, Иса́ием прови́денная; радуйся, примирение наше с Богом соделавшая. Радуйся, Спасителя падшему человеку рождшая; радуйся, в годи́ну брани по́мощию Твое́ю уповающих на Тя не оставля́ющая. Радуйся, всемо́щным заступлением Твоим от меча́ иноплеме́нных нас избавляющая; радуйся, без пролития кро́ве одоление православным воином дарова́вшая. Радуйся, Владычице, милость Свою нам и заступление явля́ющая.
Кондак 6
Проповедница благознамени́таго чудесе́ яви́ся некая жена во граде Бо́ровске, ю́же вра́чеве ника́коже возмого́ша исцелити и реко́ша, яко належи́т ей не по мно́зе времени умре́ти. Она же, веру иму́щи, яко сила Божия всемогу́щая есть, не закосни́ проси́ти, да в ве́си Калу́жке пред Твое́ю, Богородице, иконою совершено будет о здравии ея моле́бствие, и по вере своей а́бие от неду́га своего исцеле́на бысть. Темже и мы, благодарственно прославляюще Бога, вопием Ему: Аллилуиа.
Икос 6
Возсияла еси икона Твоя, Богородице, чудеснаго ра́ди исцеле́ния жены, живущия во граде Бо́ровске, даже и посреде́ жителей его, в расколе пребывающих; сего ра́ди и синкли́т гра́дский, в немже по преизбы́точеству бя́ху лю́дие, в раско́ле упорствующии, уста́ви: да будет совершено на сто́гнах града моле́бное пение пред Твое́ю иконою, я́же принесе́на бысть во град сей, прежде же николи́же вонь бя́ше приноси́ма. Темже, яко Блага́я Владычице, научи ны разуме́ти промышле́ние Божие о спасении людей, да взываем Ти радостно: Радуйся, двере, Иезекии́лем прорече́нная; радуйся, вочеловечению Единаго от Святы́я Троицы непорочно послужившая. Радуйся, рождением Сына Твоего спасение миру явля́ющая; радуйся, с верою имя Твое призывающих от смерти спасающая. Радуйся, раскольников на путь благи́й обращающая; радуйся, яко Божественную веру прославила еси, прелесть же раскола посрами́ла еси. Радуйся, Владычице, милость Свою нам и заступление явля́ющая.
Кондак 7
Хотя́щи возгре́ти в сердцах людей страны́ Калужския любовь к иконе Твоей, Заступнице наша, то́ки чудес излива́еши от Твоея́ иконы: молитвою бо, к Тебе возноси́мою, глухому внеза́пу слух дарова́ся; ослепшему зрение откры́ся; разсла́бленному крепость во удесе́х его возврати́ся; здравие душе́ю стра́ждущей и бесо́м одержи́мей даде́ся; лю́те боля́щей и врачами оста́вленней житие в здравии на многая ле́та продолжи́ся; темже и мы, с любовию к иконе Твоей припа́дающе и прославля́юще Бога, вопием Ему: Аллилуиа.
Икос 7
Необори́мая еси ограда, охраняющая ны от всяких болезней душевных и телесных, Пресвятая Богородице, и заступающая всех к Тебе прибегающих с молитвою. Темже и мы, припа́дающе к иконе Твоей, молим Тя, Владычице, изба́ви ны от всяких болезней душевных и телесных, вопиющих Ти из глубины́ се́рдца: Радуйся, солнце селения Христова, Псалмопе́вцем предъя́вленное; радуйся, рождшая Изба́вителя, беззакония наша ту́не очищающаго. Радуйся, ста́мно пресвятая, в нейже алчущим правды соблюдается Хлеб жизни вечныя; радуйся, яко всякия болезни душевныя и телесныя милостивно врачу́еши с верою к чудотворней Твоей иконе приходя́щих. Радуйся, болезнующих, оставленных врачами, от смерти избавляющая; радуйся, яко молитвами Твоими престаю́т тлетво́рныя ве́тры и смертоносныя язвы. Радуйся, Владычице, милость Свою нам и заступление явля́ющая.
Кондак 8
Великое и уму человеческому неудобопостижи́мое чудо яви́ла еси, Владычице мира, егда внеза́пу исцели́ла и укрепила еси в трезвенном житии некую жену, в области града Жи́здры живущую, я́же пия́нству пре́дана бысть; совестию свое́ю терза́шеся, яко страстию порока порабоще́на бысть, и сея́ ра́ди вины обрати́ся с верою к Тебе, Владычице, моля́щеся пред Твое́ю иконою и от Тебе исцеление желая получити. Сего ра́ди и мы, на милость Твою уповающе, восхваляем Твое милосердие, взывающе Богу: Аллилуиа.
Икос 8
Видят и слышат жители Калужския земли́ новую купе́ль Силоа́мскую, паче оныя древния я́вльшуюся, Пресвятая Богородице, в храме Рождества Твоего в ве́си Калужке, в немже покланя́ются чудотворней иконе Твоей, не единожды бо в лето и не точию пе́рвее входя́щий здравие прие́млет, но вы́ну всяк неду́г врачу́еши всех с верою к Тебе прибегающих. Сего ра́ди вопием Ти: Радуйся, Ея́же ра́ди ад сте́нает и ду́си зло́бы трепе́щут; радуйся, Ея́же ра́ди врата́ рая всем нам отверза́ются. Радуйся, помощь Твою святую благовре́менно подаю́щая всякой душе, верно Тебе моля́щейся; радуйся, от страсти к пия́нству обратившихся к Тебе с молитвою избавляющая. Радуйся, от рова погибельнаго безнадежных извлача́ющая; радуйся, притекающих к покрову Твоему сладкое успокоение. Радуйся, Владычице, милость Свою нам и заступление явля́ющая.
Кондак 9
Вси гордынею одержи́мии страх Божий скоро забывают. Си́це две же́не, в стране Калу́жской живущии, гордынею преиспо́лненнии, ясно явля́сте сомнение свое, яко икона Твоя цельбоно́сна есть, Владычице, и сим толи́ко прогне́васте Бога, яко праведным судом Его тяжкими неду́гами наказание прия́сте. Мы же, таковое вразумление видяще, с любовию покланя́емся Твоему образу, взывающе Богу: Аллилуиа.
Икос 9
Вити́и века сего отрицают поклонение иконе Твоей, Пречистая Дево, не разумеют бо в свое́м суему́дрии, яко честь, иконе воздаваемая, на Первообра́зное восходит. Мы же, не токмо сие́ ве́дуще, но и благодея́ния, иконою Твое́ю нам явля́емая, видевше, душе́ю радующеся, Тебе, Богородице, глаголем: Радуйся, ста́мно всезлата́я, в нейже Плоть и Кровь Божественнаго Агнца угото́вашася; радуйся, трапе́зо свята́я, хлебом жизни нас питающая. Радуйся, су́етную мудрость нечести́вых вити́й посрамля́ющая и ослепле́нных ею на путь правый наставля́ющая; радуйся, яко по благостыни Своей угашаеши в нас огнь нече́стия пла́менем огня Божественнаго. Радуйся, вразумляющая зна́меньми и чудесы́ колеблемых в вере; радуйся, Богоблагода́тная, страх Божий и смирение в сердца́ наша вселяющая. Радуйся, Владычице, милость Свою нам и заступление явля́ющая.
Кондак 10
Спасти хотя́щи лю́ди, покланя́ющияся Твоей иконе, от бед, благоволи́ла еси, Богородице, яви́тися не́коей деви́це, в Луже́цком, близ гра́да Можа́йска, монастыре́ жи́тельствовавшей, и предвари́ти, да не и́мать общения с женою развраще́нною, и тем сохранила еси ю от гряду́щей беды. Темже и мы прославляем Господа Бога, давшаго благодать таковую иконе Твоей, и вопием Ему: Аллилуиа.
Икос 10
Стена еси крепкая, ограждающая род человеческий от бед, Пресвятая Богородице, и скорую помощь явля́еши от Твоея́ иконы всем, чтущим ю во градех, ве́сех и обителех. Сего ра́ди и мы, осеня́емии Твоим, Богомати, заступлением, на Твой взирающе пречистый образ, молим Тя: да изба́виши ны от всяких клеве́т, бед и скорбе́й, вопиющих Тебе: Радуйся, я́вльшая миру обетова́ннаго Сокрушителя главы́ зми́евы; радуйся, радость вечную – Спасителя миру рождшая. Радуйся, рождением Сына Божия двери Царствия Христова нам отверзшая; радуйся, казнь Божию за беззакония наша от глав наших отклоняющая. Радуйся, лю́бящих и чтущих Тя от всяких бед и скорбе́й избавляющая; радуйся, радосте всего мира, е́юже сле́зы скорбя́щих отъе́млются. Радуйся, Владычице, милость Свою нам и заступление явля́ющая.
Кондак 11
Пение непрестанное приноша́ше Ти, Пресвятая Богородице, некий житель Жи́здринския ве́си, с верою пред Твое́ю иконою моля́ше Тя, да да́руеши ему дщерь. Ты же, Богородице, благоволи́ла еси вняти мольбам его и даровала еси ю ему. Мы же, зряще на Твою икону и видяще то́ки чудес, от нея́ излива́емыя, Блага́я Богороди́тельнице, из глубины́ се́рдца благодарим Тя, Царицу нашу дивную, воспевающе Богу: Аллилуиа.
Икос 11
Светлыми лучами чудес икона Твоя сияет, Богомати Пречистая, и прогоняет всякое вражие де́йство силою Божиею, от Нея́ исходя́щею; темже и мы, гре́шнии, иму́ще таковое зна́мение Твоего к нам благоволе́ния, радуемся, глаго́люще: О Пресвятая Богородице! Умоли́ Господа, да спасе́т ны, имиже весть судьба́ми, да не поги́бнем в нераскаянии о наших грехопаде́ниих, и услыши похвалы́ сия́, Тебе возноси́мыя: Радуйся, Творца небесе́ и земли́ безсе́менно воплотившая; радуйся, осене́нием святы́я иконы Твоея́ всякое вражие де́йство от нас отгоняющая. Радуйся, проше́ния наша на пользу исполняющая; радуйся, неоскудева́емый источниче благословений и милостей Божиих к людем Твоим. Радуйся, благочести́вых супружеств незримое ограждение; радуйся, молитв ра́ди усердных плод безча́дным ниспосыла́ющая. Радуйся, Владычице, милость Свою нам и заступление явля́ющая.
Кондак 12
Благодать умиления молитвеннаго, от Твоея́, Владычице, иконы источаемая, да испо́лнит ду́ши наша, аще грех ра́ди в безчувствие впадаем. Пробуди́ наше душевное усыпление, да не погибнем лю́те без покая́ния, и приими́ нас в вечныя кро́вы, Богороди́тельнице, да радующеся, пое́м Богу, Тобою нас спасающему: Аллилуиа.
Икос 12
Пою́ще чудеса, явля́емая от Твоея́ иконы, Мати Христа Бога нашего, и припа́дающе к ней, молим Тя, Владычице: Бу́ди нам защище́ние в день кончины нашея, егда и́мамы предста́ти на суд пред страшным Престолом славы Сына Твоего, Господа нашего, да вопием Ти: Радуйся, от власти лютаго мироде́ржца уповающих на Тя избавляющая; радуйся, гнев Божий от рода православнаго отводя́щая. Радуйся, благу́ю христианскую кончину ублажающим Тя подающая; радуйся, славящих Тя на воздушных мыта́рствах заступающая. Радуйся, Заступнице усердная рода православнаго и крепкая надеждо вечнаго спасения; радуйся, отверзающая райския двери православному роду, при́сно Тя блажа́щему. Радуйся, Владычице, милость Свою нам и заступление явля́ющая.
Кондак 13
О Всепетая Мати Христа Бога нашего! Приими́ милостиво сие́ моление наше, е́же принесо́хом пред Твое́ю иконою, и в час смертный яви́ся нам Сама, Пречистая, простирающи руку помощи, отгоняющи ду́хи злобы, ищущия поглоти́ти ду́ши наша при разлучении от телесе́, и умоли́ приснопокланя́емую Троицу изба́вити ны мучения вечнаго, да предста́тельством Твоим наследуем Царствие Небесное и сподо́бимся со святыми пети Богу: Аллилуиа.
Этот кондак читается трижды, затем 1-й икос «Ангелов множество славят Тя...» и 1-й кондак «Взбранной Воеводе...».
Молитва
О Пресвятая Дево, Мати Христа Бога нашего, дивная Царице небесе́ и земли́! Вонми́ многоболе́зненному воздыханию сердец наших; призри с высоты святы́я Твоея́ на нас, с верою и любовию предстоя́щих пред чудотворною Твое́ю иконою и со умилением моля́щихся Тебе, Владычице! Не преда́ждь умале́нию Церковь Православную, помози́ нам, Пресвятая Богородице, святоотеческую православную веру до конца дней наших непорочно сохранити, во всех за́поведех Господних неуклонно ходи́ти и изба́ви ны от па́губных душевредных учений. На Твою, дивная Царице небесе́ и земли́, милость уповаем, раби́ Твои: очисти умы наша от греховных помыслов, душевнаго разслабления, обурева́ния страстей, от искушений, соблазнов и грехопадений; Ты бо еси, Владычице, крепкое прибежище грешников кающихся. Воздвигни нас из глубины́ греховныя и истинным покая́нием ороси́ изсохшия сердца́ наша, просвети сердечныя очи наша к зрению спасения, и прельще́нных бесо́вскою прелестию на путь правый настави; всякое дело злое и богопроти́вное разруши́; всякому же благо́му и богоуго́дному делу научи и споспе́шествуй; вложи́, Владычице, в сердца́ наша дух страха Божия, дух благочестия, дух кротости, смирения, терпения, незлобия; умягчи́ злая сердца́ наша и злая бла́ги сотвори́, ниспосли́ нам ревность о спасении бли́жних Вразуми́ и научи ны, о Всемилостивая Заступнице наша, ка́ко безгрешно ходи́ти по пути земнаго сего жития, яко Ты, Пресвятая, ве́си и веру нашу и упование наше видиши, Владычице мира! Скорбя́щих уте́ши, бедствующим помози́; сохрани от молниеноснаго грома, тлетворных ветр, лютых болезней, смертоносныя язвы, междуусобныя брани, нашествия врагов иноплеме́нных. Пресвятая Богородице! Изба́ви ны от внезапныя и насильственныя смерти; всем нам да́руй обращение на путь исинный и христианскую кончину живота нашего безболезненну непостыдну, мирну, Святых Таин прича́стну. Во время исхода на́шего предстани нам, Дево Богородице, и изба́ви ны от власги бесо́вския, воздушных горьких мыта́рств и огня вечнаго. Скончавшимся внезапною сме́ртию милостива быти Сына Твоего умоли и о всех усопших, и́же не и́муг сро́дников, о упокое́нии их Сына Твоего умоляющих, Сама бу́ди непрестанная и теплая Молитвенница и Хода́таица. Преста́вльшихся же в вере и покая́нии от вре́меннаго жития сего отцы́, бра́тию и се́стры наша сподо́би Твоим хода́тайством всели́тися во обителех небесных со ангелы и со всеми святыми, иде́же непреста́ннии гла́сы празднующих и радостно славящих Пресвятую Троицу, Отца и Сына и Святаго Духа, ныне и при́сно и во веки веков. Аминь.