Акафист Пресвятой Богородице в честь иконы Ее Жировицкой

Празднование 7/20 мая

Кондак 1

Избра́нной от всех родо́в Царице и Владычице похвальныя песни принесе́м, яко Хода́таице и Заступнице рода христианскаго. Ты же, яко блага́я Предста́тельница пред Господом, умоли Сына Твоего и Бога нашего дарова́ти нам наследие благ вечных, да ра́дующеся о Тебе взываем: Радуйся, Премилосердная Владычице, предста́тельство наше и всерадостное заступление.

Икос 1

Архангел Гавриил, с небесе́ по́сланный к Тебе, Дево чистая, веща́ Ти: Радуйся, Благодатная, Господь с Тобою! Мы же, благодатию Божиею чрез Тебе озаре́ннии, восхвалим Тя песньми сицевы́ми: Радуйся, Предызбра́нная прежде веков Советом Божиим; радуйся, А́гнице, родившая А́гнца Божия, взе́млющаго грехи мира. Радуйся, Сокро́вищнице спасения нашего, превысшая сил ангельских; радуйся, Отрокови́це Пренепорочная и Мати Света. Радуйся, горо́ несеко́мая, источник воды живы́я источившая; радуйся, раю́ цветоносный, Божественное древо жизни произрасти́вый. Радуйся, богообра́дованная Мати, радость неба и земли́ родившая; радуйся, силою Всевышняго осене́нная, Божественный клас, Спасителя миру, прозябшая. Радуйся, Премилосердная Владычице, предста́тельство наше и всерадостное заступление.

Кондак 2

Видящи верная чада Твоя, в беда́х житейских унывающая и помощи небесныя от Тебе требующая, Ты, Богомати, наде́ждо христианом, чудесным явле́нием на древе святы́я Твоея́ иконы насельником ве́си Жиро́вицкия исполнила еси радостию и веселием скорбная сердца́ их, да вси благодарственно вопиют о Тебе Богу: Аллилуиа.

Икос 2

Разумом не уразуме́в тайны чудеснаго явле́ния на древе иконы Твоя, Пречистая Владычице, скры боля́рин Солта́н в ковче́жце явле́нный Тобою пречестны́й образ Твой. Ты же, Дево Богородице, сугубым явле́нием на том же древе иконы сея́ вразумила еси́ его, да вси позна́ют дар милосердия, людем Тобою низпосыла́емый, и в веселии возопию́т: Радуйся, кла́дезю неисчерпа́емый радости; радуйся, цве́те благоуха́нный неизрече́нныя сладости. Радуйся, явле́нием иконы Твоея́ на древе, аки древом жизни, верныя духовно услаждающая; радуйся, богатство неве́домое всем чтущим ю подающая. Радуйся, благодати Твоея́ и милости заблу́ждших не лишающая; радуйся, покровом Твоим всех притекающих к иконе Твоей осеня́ющая. Радуйся, гласу моления всех скорбя́щих послушная; радуйся, Мати милосердия неоску́дная. Радуйся, Премилосердная Владычице, предста́тельство наше и всерадостное заступление.

Кондак 3

Силою вразумления о явле́нии чудотворныя иконы Твоя просвещенный, позна́ боля́рин Солта́н, яко икона сия́ во утешение стра́ждущим Тобою свыше низпо́слана бысть, и, сле́зно моля́ся о неразумии своем, воздви́же храм на месте явле́ния ея, да вси лю́дие, молитвы в нем Богу вознося́ще, воздаю́т непрестанную о Тебе хвалу: Аллилуиа.

Икос 3

Иму́щи богатство милосердия неизрече́нное, не отринула еси промышле́нием избра́нных Твоих, в ско́рби вели́цей сущих. Егда бо храм, иде́же бе икона Твоя пречестна́я, огню предаде́ся, Ты, Всеблага́я Уте́шительнице, сохра́нши ю от огня неврежде́нну, паки яви́ла еси на ка́мени близ храма, огне́м сожженнаго. Лю́дие же, узре́вше таковое чудо, воспеша ти хвалебную песнь сицеву́ю: Радуйся, Купино́ Неопали́мая, неопально во огни́ пречестны́й Твой образ сохраншая; радуйся, скорбныя люди Твоя чудотворныя иконы не лишившая. Радуйся, кро́вом крилу́ Твое́ю христиан покрывающая; радуйся, Предста́тельством Твоим святыни Твоя охраняющая. Радуйся, на ка́мени пречестны́й Твой образ паки яви́вшая; радуйся, вразумлением Твоим на ка́мени веры стопы́ наша утвердившая. Радуйся, яко сте́ну нерушимую нашего прибежища Тебе стяжа́хом; радуйся, яко благомо́щную Покровительницу Тя позна́хом. Радуйся, Премилосердная Владычице, предста́тельство наше и всерадостное Заступление.

Кондак 4

Бу́рею страстей и искушений одержи́мии ве́рнии Твой, моля́щеся пред чудотворною иконою Твоею, покой и душевную радость обретают. Ты бо, Дево чистая, христиан Путеводи́тельнице, правому пути их наставля́еши и смысл бытия земна́го познати посо́бствуеши, да вси богокра́сною песнию восхваля́т Бога, пою́ще Ему: Аллилуиа.

Икос 4

Слышавше лю́дие, яко явле́нная Тобою икона даром чудес преизбы́точествует, с верою и упованием на милосердие Твое к ней притекают и, богатством щедрот Твоих обогати́вшеся, воспевают Ти хвалу таковую: Радуйся, Мати милосердия, море щедрот христианом изливающая; радуйся, радость всему миру принося́щая. Радуйся, священное прибежище верных; радуйся, Подательнице благ вечных. Радуйся, Усладительнице горестей наших; радуйся, крепкое востание всех падших. Радуйся, изнемогающих Заступнице и укрепление; радуйся, в страданиих наших при́сное утешение. Радуйся, Премилосердная Владычице, предста́тельство наше и всерадостное Заступление.

Кондак 5

Боготечней звезде, с востока возсия́вшей, подобна была еси, Пресвятая Дево, егда в лучеза́рнем сия́нии во о́бразе Жены красоты неизрече́нныя яви́лася еси де́тем, указу́ющи место явле́ния прече́стныя иконы Твоея́, чудесно Тобою от огня сохране́нныя. Не лишила еси и ма́лых сих Твоея́ благосты́ни, поучающи их о великом милосердии Твоем, да, подражающе де́тем Израилевым, восклицавшим Христу «Оса́нна!», воспою́т о Тебе хвалу Богу: Аллилуиа.

Икос 5

Видевше странное и преславное чудо, иконою Твоею явля́емое, Пречистая, егда деви́ца некая Ирина, в болезни сущая, подви́гшися на поклоне́ние святыни Твоей, на пути у́мре, иноком же нача́вшим свершати чин погребения ея пред иконою Твоею, воскре́се, вси лю́дие со трепетом восклица́ху: Радуйся, Слово жизни пло́тию родившая; радуйся, молитвами Твоими мертвую рабу Твою воскресившая. Радуйся, ковче́же жизни нашея, от потопа смертнаго нас сохраня́яй; радуйся, ра́зуме пресветлый, сладости жизни вечныя познание нам да́руяй. Радуйся, иконою Твое́ю источники чудес ве́лиих нам явля́ющая; радуйся, тьму лютых обстоя́ний от почитающих ю отгоняющая. Радуйся, зна́меньми непостижимыми моля́щихся Ти ободряющая; радуйся, ма́терними щедротами всех прибегающих к Тебе посещающая. Радуйся, Премилосердная Владычице, предста́тельство наше и всерадостное заступление.

Кондак 6

Проповедницы благосты́ни Твоея́ яви́шася вси притекающии к цельбоно́сней иконе Твоей, Владычице. Не отринула бо еси никогоже от них, в те́плей молитве ру́це свои к ней простира́ющих, да, позна́вше силу дара чудеснаго, Тобою в ней явля́емаго, возопию́т Богу благодарственную песнь: Аллилуиа.

Икос 6

Возсия́вшею луче́ю светозарною, путь жития благонравнаго озаряющею, яви́ся всечестна́я обитель Жиро́вицкая, под кровом святыни Твоея́, Богомати, воздвигнутая. Сей бо дом подвиго́в иноческих и училище божественнаго разуме́ния юношам освети землю Литовскую лучами истиннаго богове́дения, да вси Тебе, ума божественнаго Насадительницу, та́ко воспою́т в пе́снех достохвальных: Радуйся, Богородительнице Света непостижимаго; радуйся, заре́ Солнца незаходимаго. Радуйся, ле́ствице, к небеси́ возводя́щая; радуйся, немудрых разумом божественным умудря́ющая. Радуйся, училищ благочестия в стране нашей Насадительнице; радуйся, в познании учений Христовых Премудрая Руководительнице. Радуйся, ду́ши верных благодатно питающая; радуйся, верныя млеко́м премудрости насыщающая. Радуйся, Премилосердная Владычице, предста́тельство наше и всерадостное заступление.

Кондак 7

Хотя́ще воздати поклонение иконе Твоей, многими чудесы́ просия́вшей, посеща́ху обитель Жиро́вицкую не то́кмо худоро́днии, но и ца́рие земни́и, припа́дюще к пречистому Твоему образу, Владычице, и, ча́юще от Тебе великия и богатыя милости, приноша́ху Ти песнь хвалебную и Бо́гови воспева́ху: Аллилуиа.

Икос 7

Дивное воистину промышле́ние яви́ла еси, Владычице, верным Твоим; егда бо обитель Жиро́вицкая ле́стно и насилием от православия отторже́на бысть, Заступлением Твоим паки вдаде́ся людем православным. Сего ра́ди вси правыя веры поклонницы, прите́кше к пречистому образу Твоему, с веселием воспеша: Радуйся, в скорбных обстоя́ниих надежное наше прибежище; радуйся, ищущим спасения тихое пристанище. Радуйся, со апостолы веры Христовы Насадительнице; радуйся, глубине́ Слова Божия Премудрая Учительнице. Радуйся, светильниче Трисолнечнаго Света, истиною нас озаряяй; радуйся, сто́лпе огненный, путь правыя веры нам показу́яй. Радуйся, от па́губных учений наше охране́ние; радуйся, душевре́дных учений посрамление. Радуйся, Премилосердная Владычице, предста́тельство наше и всерадостное Заступление.

Кондак 8

Странная и преславная чудеса позна́ша о Тебе, Богомати, ве́рнии Твои, яко не то́кмо иконою Твоею благодатныя да́ры им явля́еши, но и вода́м источника, на месте явле́ния Твоея́ иконы происте́кшаго, дар неду́ги исцеляти подае́ши, да вси, великую и богатую милость от Тебе восприи́мше, воспою́т хвалебную песнь Бо́гови: Аллилуиа.

Икос 8

Вси к покрову Твоему прибегающии не отходят от Тебе то́щи и неуслышани; Ты бо, Богомати, ско́рби ма́терни при Кресте Сына Твоего восприя́вшая, ве́си тяготу́ скорбе́й наших. Темже к Тебе, Мати, в скорби искуше́нней, яко о́бщнице скорби и страданий Сына Твоего, та́ко взываем: Радуйся, ненаде́янных наде́яние; радуйся, скорбных утешение. Радуйся, печали наша утоляющая; радуйся, всему миру радость да́рующая. Радуйся, в беда́х сущим ру́ку помощи скоро подающая; радуйся, ма́тернюю любовь и милосердие нам явля́ющая. Радуйся, Твоими молитвами пред Богом наша Заступнице; радуйся, в напастех Превеликая Защитнице. Радуйся, Премилосердная Владычице, предста́тельство наше и всерадостное Заступление.

Кондак 9

Вся ангельская во́инства Тебе, Богомати, яко высшую небес и чи́стшую све́тлостей солнечных, величают; Бога бо зачала́ еси пло́тию и Света све́тов родила еси. Темже и мы, земнороднии, яко Честнейшую херувим и Славнейшую без сравнения серафим, величающе Тя, вопием о Тебе Бо́гови: Аллилуиа.

Икос 9

Вити́йство всякое земнородных не довлеет к прославлению иконы, Тобою явле́нныя, от нея́же, яко от приснотеку́щаго источника, притекающии обилие благ почерпа́ют. Темже, недоумевающе восхвали́ти Тя по достоя́нию, яко первоисточник благ сих, со умилением се́рдца взываем си́це: Радуйся, Домострои́тельнице нашего спасения, житие наше земное до́бре устроя́ющая; радуйся, Путеводи́тельнице, к небесному отечеству нас возводя́щая. Радуйся, благи́х виновная, благ вечных грешников не лишающая; радуйся, Предста́тельнице наша пред Богом, праведный гнев Божий на милость претворяющая. Радуйся, су́етная мира сего презира́ти нас научающая; радуйся, прозрением ума нашего к любви божественней нас привлекающая. Радуйся, от всех бед скорое избавление; радуйся, отча́янных надежное спасение. Радуйся, Премилосердная Владычице, предста́тельство наше и всерадостное Заступление.

Кондак 10

Спасти́ся хотя́щим нам и под кров Твой прибегающим, бу́ди, Пресвятая Дево, Помощница неоску́дная. Сохрани нас от бед и напастей, наипа́че же от отчаяния и падения греховнаго, да преспева́юще в добродетелех Христовых, с радостию о предивнем Твоем застутении благодарственно возопие́м: Аллилуиа.

Икос 10

Стена крепкая Церкви Православней была еси, Пресвятая Дево, во дни тяжких испытаний ея, темже молим Тя: Заступи́, покры́й и соблюди ю и во дни наша лука́вы от враг злоко́зненных, возстающих на ню, да вси радостно о Тебе возопие́м: Радуйся, Церкве Христовы ограждение и православия Поборнице; радуйся, яко заступлением Твоим Церковь Христова све́тло красуется. Радуйся, яко отступницы веры праоте́ческия Тобою вразумляются; радуйся, яко Тобою ко́зни врагов православия посрамля́ются. Радуйся, яко вразумлением Твоим истинная вера в стране нашей насаждается; радуйся, яко пышущая на ню злоба вражия утишается. Радуйся, твердое православия укрепление; радуйся, ерети́чествующих посрамле́ние. Радуйся, Премилосердная Владычице, предста́тельство наше и всерадостное Заступление.

Кондак 11

Пение всякое не довлеет восхвали́ти по достоянию щедро́ты Твоя, Пречистая, людем Тобою явле́нныя. Несть бо разума, могу́ща позна́ти глубину́ милосердия Твоего, ниже́ слова, во е́же достойне воспети Тя. Оба́че, Блага́я су́щи, приими́ и наша убогая хвале́ния, да и мы, величие Твое прославляюще, воспое́м о Тебе песнь Богу: Аллилуиа.

Икос 11

Светозарною луче́ю помощи благодатныя, пречистому образу Твоему присущия, озари, Владычице, путь жития нашего прискорбный, да вси от бед, скорбе́й и лютых напастей Тобою изба́вленнии, возмо́жем право стоя́ти в законе Господни, благодаря́ще Тя и пою́ще си́це: Радуйся, чудесы́, иконою Твоею явля́емыми, яко омофо́ром, нас покрывающая; радуйся, безчисленныя щедро́ты всем подающая. Радуйся, страсти наша и помыслы плотски́я утишающая; радуйся, всякия болезни наша телесныя и душевныя исцеляющая. Радуйся, Твоим хода́тайством от всех бед избавляющая; радуйся, в ско́рбех и печа́лех скоро нас утешающая. Радуйся, вдов заступление и си́рых призрение; радуйся, юных исправление и старцев утешение. Радуйся, Премилосердная Владычице, предста́тельство наше и всерадостное заступление.

Кондак 12

Благодать с небесе́ от Бога испроси́ нам, Владычице, к пречистому образу Твоему притекающим, и Тебе, Матерь Света, в пе́снех величающим, да осеня́еми покровом Твоим, во всяком благочестии и чистоте поживе́м и Престолу Царя́ Славы неосужде́нно предстати сподо́бимся, пою́ще о Тебе хвалебную песнь: Аллилуиа.

Икос 12

Пою́ще величия Твоя, Пресвятая Дево, восхваляем Тя вси, и, яко твердую Предстательницу спасения нашего, усердно молим: Бу́ди нам всем ко благу Помощница и услыши ны, умильно взывающия Ти: Радуйся, праваго пути ко Христу Премудрая Указательнице; радуйся, чистоты и целомудрия Предивная Охранительнице. Радуйся, алчущих и жаждущих правды Пита́тельнице; радуйся, ищущим предста́тельства Твоего неусыпная Заступнице. Радуйся, изнемогающим поможе́ние; радуйся, всему миру защище́ние. Радуйся, Путеводи́тельнице наша, на всех путе́х жизни нас ограждающая; радуйся, и по смерти на воздушных мыта́рствах от духо́в злобы нас защищающая. Радуйся, Премилосердная Владычице, предста́тельство наше и всерадостное заступление.

Кондак 13

О Пресвятая Владычице, Дево Богородице, ангельскими чи́нми на небеси́ песносло́вимая, приими́ и от нас, недостойных раб Твоих, сие́ ма́лое моление, в похвалу́ Ти приноси́мое, и, от падений греховных нас избавля́ющи, наследники Царствия Небеснаго соде́лай, да с Тобою во веки пое́м Богу: Аллилуиа.

Этот кондак читается трижды, затем 1-й икос «Архангел Гавриил...» и 1-й кондак «Избранной от всех родов...».

Молитва

О Премилосердная Госпоже́, Дево Богородице! Ки́има устна́ма прикоснуся ко святыни Твоей, или ки́ими словесы́ испове́м щедроты Твоя, людем явля́емыя; никто́же бо, притека́яй к Тебе, отходит тощ и неуслышан. От юности моея́ взыска́х помощи и заступления Твоего, и николи́же лишен бых милосердия Твоего. Зри́ши, Госпоже́, скорби сердца моего и язвы души моея́ ве́си. И ныне, коленопреклоне́нно предстоя́ пред пречистым Твоим о́бразом, моления моя приношу Ти. Не лиши мя всесильнаго хода́тайства Твоего в день скорби моея́, и в день печали моея́ заступи мя. То́ка слез моих не отврати́ся, Владычице, и радости мое сердце испо́лни. Прибежище и предста́тельство бу́ди мне, Милостивая, и света Твоего заря́ми ум мой просвети. И не то́кмо о себе молю Тя, но и о людех, притекающих к заступлению Твоему. Церковь Сына Твоего во благости соблюди́ и огради́ ю от злоко́зненных наветов враг, возстаю́щих на ню. Архипастырем нашим посли́ помощь Твою во апостольстве и сохрани́ их здравы, долгоде́нствующи, право пра́вящи слово истины Господни. Пастырем испроси́ у Бога Сына Твоего ревность и бдение о душа́х врученнаго им стада слове́снаго и дух разума и благочестия, чистоты и правды Божественныя им низпосли́. Испроси́ та́кожде, Владычице, у Господа власте́м предержа́щим и градоправителем мудрость и силу, судия́м правду и нелицеприя́тие, всем же притекающим к Тебе дух целомудрия, смиренномудрия, терпения и любве́. Еще же молю Тя, Премилосердная, осени́ страну нашу кровом Твоея́ благосты́ни и изба́ви ю от бедствий стихийных, нашествия иноплеме́нников и междоусобных нестрое́ний, да вси живу́щии в ней, в любви и мире пребывающе, тихое и безмятежное житие поживу́т и, блага́ вечная молитвами Твоими унасле́дивше, возмо́гут ку́пно с Тобою восхваля́ти Бога на небеси́ во веки. Аминь.