Молебное пѣ́нїе къ Гд҃ꙋ на́шемꙋ И҆исꙋ́сꙋ Христꙋ̀ пѣва́емое ѡ҆ ᲂу҆мире́нїи и҆ ᲃоедине́нїи Це́ркви, и҆ ᲃвобожде́нїи въ работѣ̀ и҆ плѣне́нїи А҆гарѧ́нскомъ сꙋ́щихъ, и҆ раꙁдрꙋше́нїи тѣ́хъ Хрⷭ҇тонена́вистныѧ вла́сти

І҆ере́ѵ꙼ ѡ҆бы́чнѡ наче́нъ,

Благослове́нъ Бг҃ъ на́шъ:

Чте́цъ: Трⷭ҇то́е, Прест҃а́ѧ Трⷪ҇це: Ѿч҃е на́шъ: Гд҃и поми́лꙋй: в҃і. Сла́ва: И҆ ны́нѣ: Прїйдѣте поклони́мсѧ гⷤ. Ѱало́м, ч҃:

Бг҃ъ ѿмще́нїй Гд҃ь, Бг҃ъ ѿмще́нїй:

Сла́ва: И҆ ны́нѣ: А҆ллил: гⷤ.

Та́же, Дїа́конъ глаголе́тъ Е҆кте́нїѧ.

Ми́ромъ Гд҃ꙋ помоли́мсѧ. И҆ про́чаѧ да́же до ѡ҆ плава́ющихъ. И҆ а҆́бїе прилага́етъ ᲃі́ѧ.

Ꙍ҆ є҆́же при́ꙁрѣти на ѡ҆ꙁлобле́нїе и҆ работꙋ̀ правовѣ́рныхъ рабѡ́въ свои́хъ, подъ и҆́гомъ мꙋчи́тельства беꙁбо́жныхъ А҆гарѧ́нъ сꙋ́щыхъ, и҆ ми́лостивнѡ свободи́ти и҆́хъ, Гд҃ꙋ помоли́мсѧ.

Ꙍ҆ є҆́же и҆спроврещѝ Бг҃оме́рꙁкое А҆гарѧ́нское Ца́рство и҆ вла́сть, и҆ ѡ҆чи́стити зе́млю лю́дїй свои́хъ ѿ беꙁбо́жїѧ и҆́хъ, Гд҃ꙋ помоли́мсѧ.

Ꙍ҆ є҆́же при́ꙁрѣти на ѡ҆пꙋстѣ́нїе Це́рквїй, и҆ раскопа́нїе Ѻ҆́лтарей, и҆ ѡ҆скверне́нїе ᲃт҃ы́нь свои́хъ, и҆ и҆скорени́ти сꙋро́вое А҆гарѧ́нское мꙋчи́тел̾ство и҆ вла́сть, и҆ ско́рѡ свободи́ти рабѡ́въ свои́хъ ѿ беꙁбо́жныѧ и҆́хъ рꙋкѝ, Гд҃ꙋ помоли́мсѧ.

Ꙍ҆ є҆́же не ѡ҆ста́вити до конца̀, вѣ́рныхъ рабѡ́въ свои́хъ въ рꙋ́ки беꙁбо́жныхъ А҆гарѧ́нъ мꙋ́читисѧ, но ско́рѡ свободи́ти и҆́хъ, Гд҃ꙋ помоли́мсѧ.

Ꙍ҆ є҆́же вѣ́рнымъ Царє́мъ преда́ти ца́рствѡ и҆ вла́сть Хрⷭ҇тоненави́стныхъ А҆гарѧ́нъ, сла́вы ра́ди и҆менѝ ᲃвое́гѡ, Гд҃ꙋ помоли́мсѧ.

Ꙍ҆ є҆́же постыди́ти беꙁбо́жныхъ а҆гарѧ́нъ дерꙁост̾, и҆ ниꙁложи́ти и҆́хъ си́лꙋ, и҆ преда́ти и҆́хъ въ рꙋ́ки вѣ́рныхъ рабѡ́въ свои́хъ, Гд҃ꙋ помоли́мсѧ.

Ꙍ҆ є҆́же не въ вѣ́ки враждова́ти на лю́ди согрѣ́шшїѧ: но ꙗ҆́кѡ Бг҃ъ ка́ющихсѧ ꙗ҆ви́ти на ѻ҆ꙁлобле́нныѧ рабы̀ своѧ̀ ско́рꙋю благода́ть и҆ милосе́рдїе своє̀, Гд҃ꙋ помоли́мсѧ.

Ꙍ҆ є҆́же ᲂу҆слы́шати ѿ це́ркве ᲃт҃ы́ѧ свое́ѧ во́пл̾ и҆ воꙁдыха́нїе ѡ҆кова́нных, и҆ ѿ пога́нъ порабоще́нныхъ рабѡ́въ свои́хъ, въ печа́ли и҆ въ ско́рби свое́й къ немꙋ̀ вопїю́щихъ, и҆ и҆ꙁвестѝ ѿ тлѧ̀ живо́тъ и҆́хъ Гд҃ꙋ помоли́мсѧ.

Ꙍ҆ є҆́же ѿра́дꙋ въ бѣда́хъ, и҆ свободꙋ̀ въ работѣ̀, и҆ ᲂу҆тѣше́нїе въ ско́рбехъ и҆ тѣснота́хъ люде́мъ свои́мъ ско́рое сътвори́ти, Гд҃ꙋ помоли́мсѧ.

Ꙍ҆ є҆́же ско́рѡ и҆спраꙁдни́ти ме́рꙁость запꙋстѣ́нїѧ стоѧ́щꙋю на мѣ́стѣ ᲃт҃о́мъ, и҆ въꙁдвигнꙋ́ти ро́гъ хрⷭ҇тїа́нскїй, и҆ сла́внѡ просла́вити въ ни́хъ И҆мѧ̀ своѐ Прⷭ҇то́е, Гд҃ꙋ помоли́мсѧ.

Ꙍ҆ є҆́же при́ꙁрѣти воско́рѣ на моли́твꙋ смире́нных, и҆ не ᲂу҆ничижи́ти моле́нїѧ и҆́хъ, и҆ ᲂу҆слы́шати воꙁдыха́нїе ѡ҆кова́нныхъ, раꙁдрѣши́ти же ᲃыны̀ ᲂу҆мерщвле́нныхъ, и҆ сла́внѡ въ ни́хъ просла́вити и҆мѧ̀ своє̀, Гд҃ꙋ помоли́мсѧ.

Ꙍ҆ є҆́же ᲂу҆мири́ти Це́рковь свою̀ ᲃт҃ꙋ́ю, и҆ невреди́мꙋ и҆ непоколѣби́мꙋ ю҆̀ соблюстѝ ѿ всѧ́кагѡ зла́гѡ ѡ҆бстоѧ́нїѧ всѣ́хъ сопроти́вныхъ а҆поста́тъ, Гд҃ꙋ помоли́мсѧ.

Ꙍ҆ є҆́же и҆скорени́ти всѧ̀ є҆́реси и҆ ѿстꙋ́пства, и҆ насади́ти всю́дꙋ благоче́стїе и҆ правовѣ́рїе, Гд҃ꙋ помоли́мсѧ.

Ꙍ҆ є҆́же ѡ҆брати́ти всѣ́хъ ѿстꙋ́пл̾шихъ и҆ заблꙋ́ждшихъ ѿ и҆́стинны, къ поꙁна́нїю Правосла́вныѧ вѣ́ры, и҆ съпричти́ти и҆́хъ и҆ꙁбра́нномꙋ свое́мꙋ ᲃта́дꙋ, Гд҃ꙋ помоли́мсѧ.

Застꙋпѝ, ᲃп҃сѝ, поми́лꙋй и҆ съхранѝ на́съ Бж҃е:

Прⷭ҇тꙋ́ю, чⷭ҇тꙋю, Преблⷭ҇ве́ннꙋю ᲃла́внꙋю Влады́чицꙋ:

І҆ере́ѵ꙼ же воꙁглаш:

Ꙗ҆́кѡ подоба́єтъ тѝ всѧ́каѧ сла́ва:

По Е҆кте́нїѧхъ же пою́тъ.

Бг҃ъ Гд҃ь и҆ ꙗ҆ви́сѧ на́мъ: Гла́съ, д҃. И҆ тропарѝ Гла́съ то́жъ.

Къ Хꙋ҃ Бг҃ꙋ, ны́нѣ приле́жнѡ:

Сла́ва:

Не ᲂу҆мо́лчимъ, и҆ не престає́мъ нико́лиже:

И҆ ны́нѣ:

Богорадова́ннаѧ Влады́чце препѣ́таѧ Цр҃це:

И҆щѝ на за́дѣ на Ли́стѣ, ч҃е²⁰.

И҆ а҆́бїе по си́хъ Ѱало́мъ, н҃

Поми́лꙋй мѧ Бж҃е по вели́ц:

Канꙍ́н Гла́съ, и҃. Пѣ́снь, а҃. И҆рмо́съ:

Сокрꙋши́вый бра́ни мы́шцею высо́кою, и҆ вса́дники въве́ргїй въ мо́ре, помо́щникъ и҆ покрови́тель бꙋ́ди на́мъ въ спасе́нїе: Пѣ́снь тебѣ̀ побѣ́днꙋю пою́щимъ: ᲃла́внѡ просла́висѧ Бг҃ъ на́шъ.

Припѣ́лъ:

Многомлⷭ҇тиве Гд҃и и҆ꙁба́ви ѿ бѣ́дъ лю́ди своѧ̀.

Въ ско́рбехъ и҆ тѣснота́хъ, въ бѣда́хъ и҆ гоне́нїѧхъ, къ тебѣ̀ ᲃп҃се прибѣга́емъ, те́плѣ съ слеꙁа́ми въпїю́ще: да́ждъ на́мъ по́мощъ ѿ печа́ли, да всѝ вѣ́рнѡ въпїемъ тѝ: ᲃла́внѡ просла́висѧ Бг҃ъ на́шъ.

Воста́шѧ вѡ́лци тѧ́жци, неща́днѡ ᲃта́до твоѐ расхища́ющїи, но ты Хє҃ Цр҃ю си́лою твое́ю си́хъ ражденѝ, вѣ́рныхъ же твои́хъ ѿ лю́тыѧ работы̀ А҆гарѧ́нскїѧ свободѝ, и҆ Це́рковъ свою̀ ᲂу҆мирѝ, Кро́вїю твое́ю и҆скꙋпле́ннꙋю: Дх҃а всѝ вопїемъ тѝ: ᲃла́внѡ просла́висѧ Бг҃ъ на́шъ.

Сла́ва:

Заградѝ ᲂу҆ста̀ сопроти́вныхъ А҆поста́тѡвъ, раꙁори́ти тща́щихсѧ Це́рковъ твою̀ ᲃт҃ꙋ́ю, ᲂу҆ста́ же вѣ́рныхъ ѿверꙁѝ, дерꙁнове́нїе и҆́мъ ѿ себѐ подаѧ̀: Дх҃а всѝ вопіе́мъ тѝ: ᲃла́внѡ просла́висѧ Бг҃ъ на́шъ.

И҆ ны́нѣ:

Всѣ́хъ по́мощи, всѣхъ прибѣ́жище, и҆ ᲂу҆твержде́нїе ты є҆сѝ Прчⷭ҇таѧ Дв҃о, те́плыми тѝ ны́нѣ моли́твами, ᲃн҃а и҆ Бг҃а свое́гѡ ᲂу҆молѝ, и҆ꙁбавле́нїе и҆ свобожде́нїе ско́рое вѣ́рнымъ ѿ работы̀ А҆гарѧ́нскїѧ, ми́ръ же и҆ ѡ҆ти́шїе Це́ркви свое́й пода́ти, и҆ на́мъ пою́щимъ: ᲃла́внѡ просла́висѧ Бг҃ъ на́шъ.

Катавасїѧ:

Сп҃сѝ ѿ бѣ́дъ: зрѝ на за́дѣ на Ли́стъ, ч҃ꙁ²¹.

Пѣ́снь, г҃. И҆рмо́съ:

Ꙋ҆твердѝ Бж҃е: ᲂу҆твердѝ Хє҃ Цр҃ю, Вѣ́рꙋ Правосла́внꙋю, свобожде́нїе же ѿ пога́ныхъ А҆гарѧ́нъ вѣ́рнымъ, и҆ ми́ръ Це́ркви твое́й пода́ждъ, бл҃га́ѧ ѡ҆ не́й въ ᲃе́рдци Царе́вѣ совѣтꙋ́ѧ: є҆ди́нъ бо ты ᲃт҃ъ є҆сѝ и҆ пра́веденъ.

Не раꙁорѝ завѣ́та твое́гѡ Гд҃и, и҆ не ѿста́ви ми́лости твое́ѧ ѿ на́съ ни́ же преда́ждъ въ попра́нїе ᲃꙋпоста́тѡмъ на́шим Це́рковъ твою̀ ᲃт҃ꙋ́ю: є҆ди́нъ бо ты ᲃт҃ъ є҆сѝ и҆ пра́веденъ.

Сла́ва:

На ка́мени вѣ́ры ᲃоꙁда́вый Це́рковъ свою̀ Хє҃ Цр҃ю, на то́мъ въ вѣ́ки недвижи́мꙋ сохранѝ ю҆̀, и҆ ми́ромъ ᲃъверше́ннѣ ѡ҆градѝ: є҆ди́нъ бо ты ᲃт҃ъ є҆сѝ и҆ пра́веденъ.

И҆ ны́нѣ:

Ѿ чⷭ҇тыхъ тѝ Кровїй пло́ть Бг҃ꙋ вꙁаи́мъ да́вшаѧ Дв҃о, тогѡ̀ приле́жнѡ молѝ, ѿ кровопроли́тныѧ А҆гарѧ́нскїѧ вѣ́рныхъ свои́хъ рꙋкѝ, и҆ ѿ всѣ́хъ ѻ҆бстоѧ́нїй, Це́рковъ свою и҆ꙁба́вити: є҆ди́нъ бо то́й ᲃт҃ъ є҆́стъ и҆ пра́веденъ.

Катава́сїѧ:

Спасѝ ѿ бѣ́дъ:

Та́же Дїа́конъ Е҆кте́нїѧ ᲃі́ѧ.

Поми́лꙋй на́съ Бж҃е по вели́цѣй ми́лости твое́й моли́м:

Ми́лостивнымъ свои́мъ ѻ҆комъ, благоꙋтро́бнѡ при́ꙁри чл҃кѡлю́бче Гд҃и, на воꙁдыха́нїѧ, ᲃле́зы, стена́нїѧ, и҆ ѡ҆ꙁлобле́нїѧ вѣ́рныхъ рабѡ́въ твои́хъ бра́тїй на́шихъ, подъ и҆́гомъ лю́тыѧ работы̀ А҆гарѧ́нскїѧ сꙋ́щихъ, ꙗ҆́коже при́ꙁрѣлъ є҆сѝ и҆́ногда на І҆и҃лѧ въ Е҆гѵ́птѣ сꙋ́щагѡ, и҆ ско́рѡ свободѝ и҆́хъ: ᲃе́рдцемъ сокрꙋше́нномъ приле́жнѡ мо́лимъ тѝ сѧ, ᲂу҆слы́ши и҆ поми́лꙋй.

Не помѧнѝ чл҃кѡлю́бче Цр҃ю беꙁꙁакѡ́нїѧ, непра́вды, и҆ грѣхѝ люді́й твои́хъ, бра́тїй на́шихъ и҆ всѣ́хъ на́съ, и҆́миже прогнѣва́хѡмъ тѧ и҆ раꙁдражи́хѡмъ твоѐ долготерпѣ́нїе, и҆ не внидѝ въ сꙋ́дъ про́чее съ рабы̀ твои́ми, но ѡ҆бы́чнымъ твои́мъ милосе́рдїемъ ми́лостивнѡ и҆ꙁмѝ и҆́хъ и҆ꙁъ рꙋкѝ хрⷭ҇тонена́вистныхъ ꙗ҆ꙁы́къ: съ слеꙁа́ми моли́м̾тисѧ, ᲂу҆слы́ши и҆ ᲃко́рѡ поми́лꙋй.

Согрѣши́хомъ, и҆ беꙁꙁаконова́хѡмъ, ѡ҆неправди́хѡмъ пре́дъ тобо́ю, и҆ не сотвори́хомъ ꙗ҆́коже заповѣда́лъ є҆сѝ на́мъ, да бла́го на́мъ бꙋ́детъ, но не преда́ждъ рабѡ́въ твои́хъ до конца̀, ни въ вѣ́къ враждова́въ соблюдѝ зо́лъ на́шихъ. Но пролі́й гнѣ́въ тво́й на беꙁ̾бо́жныѧ А҆гарѧ́ны и҆мѧ̀ твоѐ хꙋлѧ́щїѧ, и҆ и҆спровержѝ и҆́хъ Бг҃охꙋ́лное ца́рство, и҆ мꙋчи́телскꙋю ѿимѝ и҆́хъ вла́сть, и҆ преда́ждъ хрⷭ҇толюби́вымъ правовѣ́рнымъ рабѡ́мъ твои́мъ: съ ᲂу҆миле́ниемъ мо́лимтисѧ всемогі́й Гд҃и, ми́лостивнѡ ᲂу҆слы́ши, и҆ въско́рѣ поми́лꙋй.

Ѻ҆́лтарѧ твоѧ̀ ᲃт҃ы́ѧ скве́рнїи вра́ꙁи твоѝ, хрⷭ҇тонена́вистнїи А҆гарѧ́не, раскопа́ша Гд҃и: Цр҃квы̀ и҆ жи́лища и҆менѝ твое́гѡ ѡ҆скверни́ша, и҆ рабы̀ твоѧ̀ тѧ́жкѡ ѡ҆ꙁлоби́ша: при́ꙁри ᲂу҆́бѡ с нб҃сѐ и҆ ви́ждъ, и҆ неꙋничижѝ моле́нїѧ на́шѧ, ни́ же ѿринѝ до конца̀, но ско́рѡ въстанѝ въ по́мощъ рабѡ́мъ твои́мъ, и҆ꙁъсꙋ́ни ме́чъ, и҆ и҆ссѣцѝ гла́вы си́лныхъ, и҆ ѡ҆чи́сти зе́млю люді́й свои́хъ ѿ злоче́стїѧ и҆́хъ, дꙋ́хомъ смире́ннымъ си́лномꙋ въ крѣ́пости, и҆ ди́вномꙋ въ совѣ́техъ Бг҃ꙋ на́шемꙋ моли́мтисѧ, благоꙋтро́бнѡ ᲂу҆слы́ши, и҆ ᲃко́рѡ поми́лꙋй.

Ꙋ҆млⷭ҇рди́сѧ Гд҃и Бж҃е ѡ҆те́цъ на́шихъ на вѣ́рныѧ, а҆́ще и҆ согрѣ́шшїѧ людѝ твоѧ̀, и҆́хже пра́веднымъ твои́мъ сꙋ́домъ преда́л є҆сѝ въ рꙋ́ки вра́гъ беꙁꙁакѡ́нныхъ ме́рꙁкихъ ѿстꙋ́пникѡвъ, и҆ Царе́ви нечестивонепра́ведномꙋ, и҆ лꙋкавнѣ́йшомꙋ па́че всеѧ̀ землѧ̀, и҆ не преда́ждъ и҆́хъ до конца̀ и҆́мени твое́гѡ ра́ди, и҆ не раꙁорѝ завѣ́та твое́гѡ, и҆ не ѿста́ви ми́лости твое́ѧ ѿ ни́хъ, и҆ ѿ на́съ: но и҆ꙁмѝ и҆́хъ ѿ лю́тагѡ мꙋчи́телства, раꙁори́въ беꙁбо́жное хрⷭ҇тоненавистное А҆гарѧ́нское ца́рство, крѣ́пость же и҆ ᲃи́лꙋ, болѣꙁне́ннѡ ка́ющесѧ млⷭ҇рдномꙋ Бг҃ꙋ на́шемꙋ мо́лимтисѧ, ꙗ҆́кѡ благоꙋветли́въ ско́рѡ ᲂу҆слы́ши, и҆ млⷭ҇тивнѡ поми́лꙋй.

И҆ꙁъ чре́ва а҆́дова, и҆ꙁъ рꙋкѝ Бг҃охꙋ́лнагѡ мꙋчи́телства А҆гарѧ́н̾скагѡ, вѣ́рныхъ люді́й твои́хъ Гд҃и, въ го́ркой печа́ли, бо́лѣꙁни же и҆ ᲃко́рби свое́й въпїю́щихъ къ тебѣ̀, горкоболѣꙁне́нный во́пль млⷭ҇тивнѡ ᲂу҆слы́шавъ, ꙗ҆́кѡ І҆ꙍ́нꙋ и҆ꙁведѝ и҆стлѧ̀ живо́тъ и҆́хъ, къ сла́вѣ ᲃвое́й млⷭ҇тиве, мл҃и́мтисѧ ᲂу҆слы́ши, и҆ ско́рѡ поми́лꙋй.

Въ вѣ́ки пребыва́ѧй млⷭ҇рде Гд҃и, запрѣтѝ ꙗ҆ꙁы́кѡмъ, въ достоѧ́нїе твоє̀ прише́дшимъ, и҆ ѡ҆скверни́вшимъ це́рковъ ᲃт҃ꙋ́ю твою̀, поженѝ и҆́хъ бꙋ́рею твое́ю, и҆ гнѣ́вомъ твои́мъ смꙋтѝ и҆́хъ, и҆спо́лни лица̀ и҆́хъ беꙁче́стїѧ, да постыдѧ́тсѧ и҆ смѧтꙋ́тсѧ въ вѣ́къ вѣ́ка, да посрамѧ́тсѧ, и҆ и҆ще́ꙁнꙋтъ, и҆ да поги́бнꙋтъ нечести́вїи: ѡ҆рꙋ́жїѧ и҆́хъ сокрꙋши въ коне́цъ, и҆ гра́ды и҆́хъ раꙁдрꙋшѝ, и҆ и҆мѧ̀ и҆́хъ въ вѣ́къ вѣ́ка потребѝ, и҆ па́мѧтъ и҆́хъ съ шꙋ́момъ погꙋбѝ, да ᲂувѣ́дѧтъ ꙗ҆́кѡ и҆мѧ тебѣ̀ Гд҃ь: ро́гъ же хрⷭ҇тїѧ́нскїй воꙁвысѝ, и҆ въ рабѣ́хъ твои́хъ сла́внѡ просла́ви И҆мѧ̀ твоє̀ прⷭ҇то́е, смѣре́ннѡ припада́юще мо́лимъ, ско́рѡ ᲂу҆слы́ши и҆ млⷭ҇тивнѡ поми́лꙋй.

Ꙍ҆брати́сѧ съ небесѐ Гд҃и, и҆ ви́ждъ ѿ до́мꙋ ᲃт҃го твое́гѡ, и҆ сла́вы твое́ѧ, и҆ поми́лꙋй на́съ, да понѐ ма́лѡ наслѣ́димъ горы̀ ᲃт҃ы́ѧ твое́ѧ, проти́вници бо на́ши попра́ша ст҃и́ню твою̀, бы́хѡмъ ꙗ҆́кѡ ѿ нача́ла є҆гда̀ не владѣ́лъ є҆сѝ на́ми, ни́ же бѣ̀ нарече́ннѡ и҆мѧ̀ твоє̀ на на́съ, ѿверꙁѝ нб҃о, и҆ тре́петъ прїймꙋтъ го́ры ѿ тебѐ, и҆ раста́ютсѧ ꙗ҆́коже та́єтъ во́скъ ѿ лица̀ ѻ҆гнѧ̀, и҆ пожжетъ ѻ҆́гн̾ сꙋпоста́ты твоѧ̀, и҆ ꙗ҆́вѣ бꙋ́детъ и҆мѧ̀ твоє̀ въ сопроти́вныхъ, и҆ ѿ лица̀ твое́гѡ ꙗꙁы́ци воꙁмѧтꙋ́тсѧ, въ бо́лѣꙁни ᲃе́рдца съ ᲂу҆миле́нїемъ мо́лимтисѧ, ᲂу҆слы́ши и҆ поми́лꙋй.

Помѧнѝ Гд҃и Бє҃ на́шъ прⷭ҇ты́ѧ ᲃтрⷭ҇тѝ твоѧ̀, лю́тыѧ же бо́лѣꙁни, ꙗ҆́же во́лею на́съ дѣ́лѧ претерпѣ́лъ є҆сѝ, и҆ прчⷭ҇тыхъ тѝ кр҃ві́й и҆ꙁлїѧ́нїѧ, и҆́ми же на́съ ѿ мꙋчи́тел̾ства дїѧ́волѧ свободи́лъ є҆сѝ, и҆ животво́рнꙋю свою̀ ᲃм҃рть, є҆ю́же на́съ вѣ́чнѡ ᲂу҆мершихъ пресла́внѡ ѡ҆живи́лъ є҆сѝ, и҆ ᲂу҆мирѝ це́рковь твою̀ ᲃт҃ꙋ́ю, и҆ꙁба́вивъ ю҆̀ въско́рѣ ѿ всѣ́хъ бѣ́дъ и҆ нꙋ́ждъ, и҆ ѿ всѧ́кагѡ зла́гѡ ѻ҆бстоѧ́нїѧ и҆ лю́тагѡ гоне́нїѧ сопроти́вныхъ а҆поста́тъ: мо́лимтисѧ всеще́дрый Влады́ко, ско́рѡ ᲂу҆слышъ, и҆ млⷭ҇тивно поми́лꙋй.

І҆ере́ѵ꙼ воꙁглаш:

Ꙋ҆слы́ши ны Бє҃ сп҃си́телю на́шъ:

Седа́ленъ Гла́съ, ѕ҃.

При́ꙁри ско́рѡ на Моли́твꙋ на́шꙋ съ нб҃се Гд҃и, и҆ по́мощъ твою̀ Це́ркви твое́й ниꙁпослѝ: ꙗ҆́рость же и҆ горды́ню А҆гарѧ́нскꙋю, и҆ шата́нїѧ ѿстꙋ́пническаѧ ᲂу҆толѝ, и҆ ᲂу҆ста̀ и҆́хъ хꙋ́лнаѧ заградѝ, вѣ́рнымъ тѝ ᲃло́во въ ᲂу҆стѣ́хъ дѣйстви́телное дарꙋ́ѧ: всѧ́ бо ты ꙗ҆́кѡ Бг҃ъ мо́жеши хотѧ́й.

Сла́ва: И҆ ны́нѣ: Бг҃оро́диченъ:

Ско́рѡ предварѝ на Моли́твꙋ и҆ потщи́сѧ на ᲂу҆моле́нїе, Мт҃и Бж҃іѧ: да не воꙁра́дꙋетсѧ вра́гъ ѡ҆ поги́бели на́шей, ни́ же ѡ҆ раꙁоре́нїи Це́ркве ᲃн҃а твое́гѡ воꙁвесели́тсѧ: всѧ́ бо ты є҆дина̀ ꙗ҆́кѡ Мт҃и, ѿ негѡ̀ на́мъ испроси́ти мо́жеши хотѧ́щи.

Пѣ́снь, д҃. И҆рмо́съ:

Ꙋ҆слыша́въ Пррⷪ҇къ прише́ствїе твоє̀, ᲂу҆боѧ́сѧ, мы́ же раꙁꙋмѣ́вше дѣла̀ твоѧ̀ тре́петомъ ᲂу҆диви́хѡмсѧ: спасти́ бо лю́ди и҆ помаꙁа́нныѧ своѧ̀ прише́лъ є҆сѝ, и҆ вѣ́рнѡ воꙁопи́хѡмъ: ᲃла́ва си́лѣ твое́й Гд҃и.

Припѣ́лъ:

Многѡмлⷭ҇тиве Гд҃и:

Тропа́ръ:

Въ гнѣ́вѣ твоє́мъ Гд҃и, ми́лость свою̀ помѧнѝ, и҆ не ѡ҆ста́ви воꙁмꙋща́тисѧ це́ркви твое́й ѿстꙋ́пническими нахожде́н̾мѝ: но въско́рѣ ми́ръ и҆ ᲂу҆твержде́нїє пода́ждъ е҆́й: да всѝ вопїе́мъ тѝ: ᲃла́ва си́лѣ твое́й Гд҃и.

Ѿ ле́сти всѧ́кїѧ и҆ꙁба́ви, и҆ ѿ вра́жїагѡ плѣненїѧ Це́рковь твою̀ Хє҃ Бє҃, и҆ ми́ръ є҆́й дарꙋ́ѧ, во и҆стиннѣ твое́й ᲂу҆твердѝ, вѣ́рныхъ се́рдца Дх҃омъ ᲃт҃ы́мъ ᲂу҆мꙋдрѧ́ѧ: да всѝ правовѣ́рнѡ всегда̀ вопіє́мъ тѝ: ᲃла́ва си́лѣ твое́й Гд҃и.

Сла́ва:

Е҆́ресей воста́нїѧ, превоꙁнесе́ннꙋю же а҆гарѧ́нскꙋю горды́ню ниꙁложѝ Гд҃и, и҆ ѿстꙋ́пническаѧ хꙋле́нїѧ: ро́гъ же вѣ́рных свои́хъ воꙁносѧ̀, ми́ръ це́ркви дарꙋ́й: царе́ви же ѡ҆ не́й всегда̀ блага́ѧ въ ᲃе́рдци гл҃ѧ, ми́рнаѧ и҆ꙁрещѝ повелѣва́й: да́ тѝ вѣ́рнѡ вопїе́мъ, сла́ва си́лѣ твое́й Гд҃и.

И҆ ны́нѣ:

Посредстве́ннѣ Ржⷭ҇тво́въ тѝ Дв҃о, ро́дъ члчⷭ҇кїй Бг҃ꙋ примири́вшаѧ, и҆ на́съ ни́нѣ грѣха́ми тогѡ̀ прогнѣва́вшихъ, Ма́тернею си Моли́твой примирѝ, а҆гарѧ́нскꙋю вла́сть раꙁдрꙋшѝ, и҆ плѣ́нники свободѝ, ᲃн҃ꙋ твое́мꙋ вѣ́рнѡ вопи́ти: ᲃла́ва си́лѣ твоей Гд҃и.

Пѣ́снь, є҃. И҆рмо́съ:

Ѿ но́щи ᲂу҆треню́юще мо́лимъ тѧ чл҃кѡлю́бче, ми́ръ Це́ркви твое́й пода́ждъ, и҆ наста́ви на́съ на повелѣ́нїѧ твоѧ̀, и҆ наꙋчѝ на́съ ᲃп҃се, твори́ти во́лю твою̀.

Припѣ́лъ:

Многомлⷭ҇тиве Гд҃и, и҆ꙁбавѝ ѿ бѣ́дъ лю́ди своѧ̀.

Тропа́риѡнъ:

Ка́мень вѣ́ры краеꙋго́л̾ный же, и҆ ѻ҆снова́нїє це́ркви свое́й, са́мъ сы́й Хє҃ Бж҃е, не ѡ҆ста́ви ю҆̀ ѿ вѣ́трѡвъ колеба́тисѧ проти́вныхъ: но ꙗ҆́кѡ бла́гъ, наꙋчѝ на́съ твори́ти во́лю твою̀.

Кро́вїю ᲃвое́ю, ѿ работы̀ вра́жїѧ и҆скꙋпи́вый Це́рковъ, не преда́ждъ ю҆̀ въ рꙋ́ки врагѡ́въ, но и҆ꙁмѝ и҆ ᲂу҆мирѝ ю҆̀, и҆ невреди́мꙋ соблюдѝ, наꙋча́ѧ на́съ твори́ти во́лю твою̀.

Сла́ва:

Дв҃ꙋ чⷭ҇тꙋ Це́рковь себѣ̀ въ невѣ́стꙋ ѡ҆брꙋчи́вый Хє҃, врагѡ́мъ ѿстꙋ́пнымъ не преда́ждъ въ ѡ҆скверне́нїє, но въ ми́рѣ глꙋбо́цѣ чи́стꙋ ю҆̀ соблюда́ѧ, наꙋчѝ на́съ твори́ти во́лю твою̀.

И҆ ны́нѣ:

Чтⷭ҇аѧ Дв҃о ѿ ѻ҆бстоѧ́нїй и҆ бѣ́дъ, и҆ наважде́нїй ѿстꙋ́пническихъ, ᲃн҃а свое́гѡ молѝ, Це́рковь свою̀ и҆ꙁба́вити, и҆ соверше́ннѣ ᲂу҆мири́ти ю҆̀: да сла́вимъ крѣ́пкꙋю по́мощъ твою̀.

Пѣ́снь, ѕ. И҆рмо́съ:

Въ печа́ли на́шей вопїемъ къ тебѣ̀ Бж҃е на́шъ, и҆ꙁъ чре́ва грѣхо́внагѡ а҆́да: ᲂу҆слы́ши во́пль на́шъ, мо́лимтисѧ Бла́же, и҆ и҆ꙁведѝ и҆ꙁъ тлѧ̀ живо́тъ на́шъ многомлⷭ҇тиве.

Припѣ́лъ:

Многомлⷭ҇тиве Гд҃и, и҆ꙁбавѝ ѿ бѣ́дъ лю́ди своѧ̀.

Тропа́риѡнъ:

Ю҆́ꙁы претерпѣ́вый, ра́ны же и҆ заꙋше́нїѧ во́лею Хє҃, це́ркве твое́ѧ ра́ди, Дх҃а и҆ꙁба́виши ю҆̀ ѿ пре́лести вра́жїѧ: ᲃі́ю и҆ ны́нѣ ѿ ѿстꙋ́пническихъ ле́стїй и҆ꙁбавѝ, многомлⷭ҇тиве.

Кро́вь свою̀ и҆ꙁлїѧ́вый на Крⷭ҇тѣ Хє҃, це́ркве ра́ди твое́ѧ ᲃт҃ы́ѧ, и҆ ны́нѣ тоѧ̀ ра́ди и҆ꙁлїѧ́нїѧ, ѿ всѣ́хъ пре́лестїй свобо́днꙋ покажѝ, и҆ ско́рѡ ᲂу҆мирѝ ю҆̀, многомлⷭ҇тиве.

Сла́ва:

Сла́вити тѧ пра́вѡ съ Ѿц҃емъ и҆ Дх҃омъ Бг҃а є҆ди́нагѡ Хє҃, въ ми́рѣ, це́ркви твое́й дарꙋ́й вла́сть а҆гарѧ́нскꙋю, и҆ всѣ́хѣ хрⷭ҇тоненави́децъ ꙗ҆ꙁы́къ ѝскоренѧ́ѧ, вѣ́рныѧ ѿ тѣ́хъ работы̀ свобожда́ѧ, бла́гости твое́ѧ ра́ди, многомлⷭ҇тиве.

И҆ ны́нѣ:

Мр҃іє Бгоневѣ́сто, те́плымъ си предста́тел̾ствомъ, ᲂу҆молѝ ᲃн҃а свое́гѡ, ѿ работы̀ а҆гарѧ́нскїѧ ско́рое свобожде́нїе вѣ́рным, и҆ ми́ръ люде́мъ свои́мъ дарова́ти, це́ркви же соедине́нїе, и҆ заблꙋ́ждшимъ къ себѣ̀ ѻ҆браще́нїе: є҆динъ бо є҆́стъ многомлⷭ҇тивый.

Катава́сїѧ:

Спасѝ ѿ бѣ́дъ рабы̀ своѧ̀:

Та́жъ, Е҆кте́нїѧ мала́ѧ.

По Во́ꙁгласѣ же. Код: Гла́съ, в҃.

Предста́ни въ по́мощъ на́шꙋ ско́рѡ Распны́йсѧ за́ны Хє҃ Бж҃е, и҆ ᲂу҆скорѝ и҆ꙁѧ́ти ѿ беꙁбо́жныѧ рꙋкѝ а҆гарѧ́нскїѧ ро́дъ хрⷭ҇тїѧ́нскїй, ᲂу҆мири́ти це́рковь свою̀, чⷭ҇тною си и҆скꙋпле́ннꙋю кро́вїю: вра́ѕи бо хꙋ́лѧтъ тѧ и҆ прѣтѧ́тъ на́мъ: но ты̀ пораꙁѝ и҆́хъ Крⷭ҇то́мъ свои́мъ, Дх҃а ᲂу҆раꙁꙋмѣ́ютъ коли́кѡ мо́жетъ правосла́вныхъ вѣ́ра: Моли́твами Бц҃а, є҆ди́не чл҃кѡлю́бче.

І҆ко́съ:

Воꙁдвигнѝ Гд҃и ско́рѡ крѣ́пкꙋю тѝ си́лꙋ, и҆ прїйдѝ спастѝ на́съ: ѡ҆бнища́хѡмъ бо ѕѣ́лѡ, и҆ па́че всѣ́хъ ꙗ҆ꙁы́къ ᲂу҆мали́хѡмъ сѧ, и҆ є҆смы̀ смире́нни дне́сь грѣ́хъ ра́ди на́шихъ, ѿ стꙋжа́нїа и҆ ѡ҆бстоѧ́нїѧ ѿстꙋпи́вшихъ ѿ Церкве твое́ѧ ᲃт҃ы́ѧ, и҆ тща́щихсѧ всегда̀ нш҃а вкꙋ́пѣ тѣле́снаѧ же и҆ дꙋше́внаѧ бл҃га́ѧ плѣни́ти, и҆ Це́рковь твою раꙁори́ти: Тѣ́мже съ слеꙁа́ми въ покаѧ́нїи къ тебѣ̀ припада́емъ, и҆ ᲂу҆миле́ннѡ тѝ вопїе́мъ: не ѿвратѝ лица̀ твое́гѡ ѿ ѻ҆трѡ́къ твои́хъ, и҆ не ѿста́ви млⷭ҇тѝ твое́ѧ ѿ на́съ, а҆́ще и҆ согрѣши́хѡмъ: но ѡ҆ста́вивъ на́мъ прегрѣше́нїѧ на́шѧ, крѣ́пкою тѝ рꙋко́ю всѧ̀ навѣ́ты ви́димыхъ и҆ неви́димыхъ врагѡ́въ, на правосла́внꙋю ратꙋ́ющихъ Вѣ́рꙋ, раꙁорѝ и҆ потребѝ: да ᲂу҆раꙁꙋмѣ́ютъ всѝ ѡ҆бидѧ́щїи рабѡ́въ твои́хъ, и҆ ꙗ҆́вѣ поꙁна́ютъ кѡ́ль мнѡ́го мо́жетъ правосла́вныхъ Вѣ́ра:

Моли́твами Бц҃а є҆ди́не чл҃кѡлю́бче:

Посе́мъ Степе́нна д҃-гѡ Гла́са. Прок: Гла́съ, д҃.

Да воскре́снетъ Бг҃ъ и҆ раꙁы́йдꙋтсѧ вра́ѕи є҆гѡ̀.

Сті́хъ.

Ꙗ҆́кѡ и҆щеꙁа́етъ ды́мъ да и҆ще́ꙁнꙋтъ:

Е҆ѵⷢ҇: Маѳ: Зач: н҃а. Речѐ Гд҃ь свои́мъ ᲂу҆ч҃нкѡ́мъ: И҆мѣ́йте вѣ́рꙋ Бж҃ію.

Коне́цъ: Ни Ѻ҆ц҃ъ ва́ш и҆́же є҆́стъ на нб҃сехъ ѿпꙋ́ститъ ва́мъ согре́ше́нїѧ ва́шѧ.

Та́жъ Сла́ва: Гла́съ, ѕ҃.

Ѿч҃е, ᲃло́ве:

И҆ ны́нѣ:

Моли́твъ ра́ди прⷭ҇ты́ѧ Бц҃а: Помл҃ꙋй на́съ Бж҃е:

И҆ а҆́бїе ᲃтхі́рꙋ Гла́съ, ѕ҃. Под:

Все воꙁло́жше: Не ѡ҆ста́ви на́съ въ члчⷭ҇кое застꙋпле́нїе:

Зрѝ на за́дѣ Ли́стъ р҃ѕ²².

Посе́мъ І҆єре́ѵ꙼, и҆лѝ Дїа́конъ:

Спасѝ Бж҃е лю́ди своѧ̀:

Во́ꙁгласъ:

Ми́лостїю и҆ щедрот:

Пѣ́снь, з҃. И҆рмо́съ:

Согрѣши́хомъ и҆ беꙁꙁаконова́хѡмъ, ѡ҆неправди́хѡмъ пре́дъ тобо́ю, ни́ же соблюдо́хѡмъ, ни́ же сотвори́хѡмъ, ꙗ҆́коже заповѣдалъ є҆сѝ на́мъ: но не преда́ждъ на́съ до конца̀, ѿческїй Бж҃е.

Припѣ́лъ:

Многомлⷭ҇тиве Гд҃и:

Тропа́риѡнъ:

Съгрѣши́хѡмъ пре́дъ тобо́ю ᲃп҃се, но не ѿстꙋпи́хѡмъ ѿ тебѐ, тѣ́мже моли́мсѧ, не ѿвратѝ лица̀ твое́гѡ ѿ на́съ, и҆ не ᲂу҆клони́сѧ гнѣ́вом ѿ рабѡ́въ твои́хъ, но ми́ръ тво́й да́ждъ на́мъ, ѿц҃ъ на́шихъ Бж҃е.

Не гнѣ́вомъ твои́мъ покажѝ, ни́ же ꙗ҆́ростїю твое́ю ѡ҆бличѝ на́съ Гд҃и: но ми́лостїю си пода́ждъ ско́рое вѣ́рнымъ твои́мъ, ѿ Бг҃опроти́вныхъ и҆ христохꙋ́лных А҆гарѧ́нъ свобожде́нїе, и҆ ми́ръ Це́ркви твое́й, и҆ꙁба́виже ю҆̀ ѿ съпроти́вныхъ бѣ́дъ, и҆ ѡ҆бстоѧ́нїй, ѿц҃ъ на́шихъ Бж҃е.

Сла́ва:

Ꙗ҆́коже ѡ҆бѣща́лъ є҆сѝ ᲃп҃се, неѡдолѣ́тисѧ Це́ркви твое́й а҆́довыми вра́ты, є҆рети́ческими ᲂу҆сты̀: та́кѡ ны́нѣ наню̀, ꙗ҆́ростнѣ тѣ́хъ зїѧ́ющихъ заградѝ смра́дныѧ ᲂу҆ста̀, ле́сти и҆́хъ раꙁорѧ́ѧ, ѿц҃ъ на́шихъ Бж҃е.

И҆ ны́нѣ: Бг҃ро́диченъ.

Предста́телнице и҆ покро́ве ро́да на́шегѡ, ны́нѣ ᲂу҆скорѝ, ны́нѣ помоꙁѝ, ѿ тѧ́жкїѧ же вѣ́рныхъ работы̀ и҆ плѣне́нїѧ А҆гарѧ́нскагѡ, и҆ лю́тыхъ ѡ҆бстоѧ́нїй Це́рковъ, твои́ми моли́твами и҆ꙁмѝ: Дх҃а ᲃн҃ꙋ твое́мꙋ въпїе́мъ: ѿц҃ъ на́шихъ блⷭ҇ве́ный Бж҃е.

Пѣ́снь, и҃. И҆рмо́съ:

Црⷭ҇кихъ Ѻ҆тро́къ Моли́тва въ пе́щи, въ хла́де всепалѧ́щїй преложѝ ѻ҆́гнь, мꙋчи́телевꙋ же беꙁстꙋ́днꙋю го́рдость постыдѝ, и҆ ꙗ҆́кѡ въ черто́ꙁѣ, и҆ꙁрѧ́дныѧ пѣвца̀, тріе́хъ покаꙁа̀ пою́щихъ: дѣ́ла всѧ̀ Гд҃а по́йте, и҆ превоꙁноси́те є҆гѡ̀ въ вѣ́ки.

Припѣ́лъ:

Многомлⷭ҇тиве Гд҃и:

Тропа́риѡнъ:

Вѣрныхъ тѝ мл҃бы въ и҆мѧ̀ твоѐ събра́нныхъ прїѧ́ти ᲃп҃се, и҆ посре́дѣ и҆́хъ бы́ти ѡ҆бѣща́вый, прїймѝ Моли́твы на́шѧ, на́ тѧ ᲂу҆пова́ющихъ: и҆ ско́рѡ пода́ждъ и҆ꙁбавле́нїе ѿ хрⷭ҇тоненави́дныхъ пога́нъ вѣ́рнымъ, и҆ ми́ръ дарꙋ́й Це́ркви твое́й да тѧ сла́вимъ вѣ́рнѡ въ вѣ́ки.

Воста́ша Гд҃и тѧ́жцїи вѡ́лцы, на твои́хъ ѡ҆ве́цъ ᲃт҃о́е ста́до, распꙋди́ти то хотѧ́щїи: но ты̀ Па́стырю до́брый, жеꙁломъ Крⷭ҇та твое́гѡ тѣ́хъ ражденѝ, да въ ми́ре тебѣ̀ вопїе́мъ: Гд҃а всѧ̀ дѣ́ла пойте, и превоꙁноси́те въ всѧ̀ вѣ́ки.

Сла́ва:

Крⷭ҇то́мъ вра́га ниꙁложи́вый, Крⷭ҇то́мъ а҆́дъ плѣни́вый Хє҃: тѣ́мъ и҆ ме́рꙁских Бг҃охꙋлныхъ А҆гарѧ́нъ ниꙁложѝ: вою́ющим же Це́рковъ твою̀ запрѣтѝ, и҆ тѣ́хъ де́рꙁостъ ᲂу҆кротѝ, да всѝ въ ми́рѣ тебѣ̀ ꙗ҆́кѡ побѣди́телю, вопїемъ: Гд҃а воспѣва́йте дѣла̀, и҆ превоꙁноси́те є҆гѡ̀ въ вѣ́ки.

И҆ ны́нѣ:

Вѣ́рныхъ моли́твы прїе́млющаѧ, и҆ скорбѧ́щимъ радова́нїе, прчⷭ҇таѧ Дв҃о, мл҃ѝ и҆ꙁъ тебѐ ро́ждшагосѧ ᲃп҃са, ста́до своѐ спастѝ ѿ во́лкѡвъ гꙋбѧ́щихъ є҆̀, и҆ Це́рковъ ᲂу҆мири́ти, всегда̀ пою́щꙋю, Гд҃а воспѣва́йте дѣла̀, и҆ превоꙁноси́те є҆гѡ̀ въ вѣ́ки.

Пѣ́снь, ѳ҃. И҆рмо́съ:

Тѧ̀ па́че ᲂу҆ма̀ єстестве́ннꙋю Дв҃ꙋ, и҆ па́че є҆́стества Бг҃а ро́ждшꙋю Мт҃ръ, Е҆́винꙋ клѧ́твꙋ потреби́вшагѡ, и҆ А҆да́ма ѿ тлѧ̀ свободи́вшагѡ, ꙗ҆́кѡ Бц҃ꙋ вѣ́рнѡ велича́юще сла́вимъ.

Припѣ́лъ:

Многомлⷭ҇тиве Гд҃и:

Тропа́риѡнъ:

Глава̀ сы́й Тѣ́ла Це́ркве твое́ѧ Хє҃, ѱѡ́въ неща́днѣ тꙋ́ю на ᲂу҆́ды растерꙁа́ющихъ въско́рѣ предста́въ распꙋ́ди, и҆ тѣ́хъ злохи́трїемъ, воꙁмꙋще́ннꙋю ᲂу҆тѣшѝ, соверше́ннѡ ᲂу҆мирѝ ю҆̀: да тѧ въ вѣ́ки ᲃла́вимъ.

Вѣ́рꙋ Правосла́внꙋю, на́съ дѣлѧ̀ пострада́вый Хє҃ ᲂу҆твердѝ, Це́рковъ ᲂу҆мирѝ, ѿ всѧ́коѧ же пре́лести ско́рѡ и҆ꙁба́ви, и҆ свобо́дꙋ покажѝ и҆̀, моли́мтѧ чл҃кѡлю́бче: да тѧ є҆динодꙋ́шнѡ во вѣ́ки сла́вимъ.

Сла́ва:

При́ꙁри Бж҃е на воꙁдыха́нїѧ и҆ ѡ҆ꙁлобле́нїѧ є҆диновѣ́рных бра́тїй на́шихъ, въ вла́сти и҆ рабо́тѣ̀ А҆гарѧ́нской сꙋ́щихъ, и҆ тѣ́хъ беꙁбо́жнꙋю вла́стъ ско́рѡ раꙁори́въ, ѿ хрⷭ҇тоненави́дныѧ рꙋкѝ и҆ꙁба́ви: да́тѧ съ ни́ми въ вѣ́ки ᲃла́вимъ.

И҆ ны́нѣ:

Покро́ве и҆ застꙋпле́нїе рѡ́да хрⷭ҇тїѧ́нскагѡ, хрⷭ҇тоненави́децъ, беꙁбо́жныхъ А҆гарѧ́нъ, си́лою твои́хъ Дв҃о моли́твъ, го́сподство и҆скоренѝ, и҆ всѣ́хъ вѣ́рныхъ въ вла́сти и҆ плѣне́нїи и҆́хъ сꙋ́щихъ свободѝ: да твое́гѡ ᲃн҃а, съ ни́ми въ вѣ́ки сла́вимъ.

Катава́сиѧ:

Спасѝ ѿ бѣ́дъ: Та́жъ, Досто́йнѡ є҆́стъ: Тртⷭ҇о́е. и҆ по Ѻ҆ч҃е на́шъ: Тропа́рїѧ, Поми́лꙋй на́съ Гд҃и поми́лꙋй на́съ:

Сла́ва:

Гд҃и поми́лꙋй на́съ:

И҆ ны́нѣ:

Милосе́рдиѧ две́ръ:

По си́х же Дїа́конꙋ ре́кшꙋ,

Съ ᲂу҆миле́нїемъ всѝ колѣ́нѣ прекло́нше, Гд҃ꙋ помоли́мсѧ.

І҆ере́ѵ꙼ съ всѣ́ми предстоѧ́щими колѣ́нѣ прекло́нь, съ всѧ́кимъ ᲂу҆миле́нїемъ чте́тъ Моли́твꙋ ᲃі́ю.

Неꙁлоби́ве, беꙁгрѣ́шне, долготерпе́ливе, чл҃кѡлю́бче, и҆ благопремѣни́телю Гд҃и, беꙁнача́лнагѡ Ѿц҃а̀ ᲃъпрⷭ҇нѡсꙋ́щный ᲃн҃е и҆ събеꙁнача́лне, въ пло́ть члчⷭ҇кагѡ ра́ди ᲃпⷭ҇нїѧ ѻ҆болкі́йсѧ, и҆ распны́йсѧ во́лею, и҆ ᲂу҆ме́рый и҆ погребы́йсѧ, и҆ тре́тїй де́нь воскр҃сый, и҆ съ собо́ю є҆́стество нш҃е на нб҃са̀ воꙁнесы́й, и҆ ѡ҆де́снꙋю Бг҃а, є҆стестве́ннагѡ тѝ и҆ є҆диносꙋ́щнагѡ Ѿц҃а̀ сопосади́вый: не хотѧ́й см҃рти грѣ́шныхъ, но ѡ҆браще́нїѧ и҆́хъ терпели́внѣ ѡ҆жида́ѧй, и҆ покаѧ́нїе ско́рѡ и҆ чл҃кѡлю́бнѡ прїемлѧ́й:

При́ꙁри мо́лимсѧ, на воꙁдыха́нїѧ, сле́ꙁы, стена́нїѧ, и҆ приле́жнаѧ моле́нїѧ, грѣ́шныхъ, ᲂу҆богихъ и҆ недосто́йныхъ рабѡ́въ свои́хъ, и҆ ᲂу҆слы́ши на́съ въ ча́съ се́й, є҆гда̀ ᲂу҆ныва́етъ ᲃе́рдце на́ше, и҆ скончава́ютсѧ въ сꙋетѣ̀ дні́е на́ши, и҆ лѣ́та на́шѧ въ воꙁдыха́нїихъ, и҆ поми́лꙋй на́съ: и҆щеꙁа́етъ бо въ бо́лѣꙁни крѣ́постъ на́ша, и҆ вмѣни́хѡмсѧ ꙗ҆́кѡ ѻ҆́вцѧ на заколе́нїе: воста́ни въскꙋ́ю спи́ши Гд҃и: воскр҃снѝ и҆ не ѿринѝ до конца̀: дѣ́ло бо рꙋ́къ твои́хъ и҆ ѻ҆́вцѧ па́жити твое́ѧ є҆смы̀: неѡста́ви на́съ въ попра́нїе и҆ порꙋга́нїе врагѡ́мъ на́шимъ, и҆ въ подражне́нїе и҆ смѣ́хъ сꙋ́щимъ ѻ҆́крестъ на́съ: но пощадѝ, ᲂу҆щедрѝ, и҆ млⷭ҇твнѣ пом҃лꙋй. а҆́ще бо и҆ согрѣши́хѡмъ и҆ беꙁꙁаконова́хѡмъ, и҆ ѡ҆неправди́хѡмъ пре́дъ тобо́ю, и҆ за́повѣдїй твои́хъ не соблюдо́хѡмъ, ни́ же сотвори́хомъ, ꙗ҆́коже заповѣдалъ є҆сѝ на́мъ: но не ѿстꙋпи́хѡмъ ѿ тебѐ Бг҃а, ᲃп҃са, И҆ꙁбави́телѧ и҆ и҆скꙋпи́телѧ на́шегѡ.

Не преда́ждъ ᲂу҆́бѡ на́съ до конца̀, и҆ не раꙁорѝ завѣ́та твое́гѡ, и҆ не ѿста́ви ми́лости твое́ѧ ѿ на́съ.

Прише́лъ бо є҆сѝ не пра́ведныхъ, но грѣ́шныхъ въ покаѧ́нїе приꙁва́ти, и҆ поги́бшихъ спастѝ.

Тѣ́мъ же и҆ ны́нѣ внꙋши́въ моле́нїю на́съ грѣ́шныхъ, Це́рковъ свою̀ ᲃт҃ꙋ́ю Православнѡкаѳꙍли́ческꙋю, въ Рꙍ́ссїи же и҆ по все́й вселе́ннѣй сꙋ́щꙋю, (и҆́же прчⷭ҇тною тѝ, на Крⷭ҇тѣ̀ и҆ꙁлїѧнною и҆скꙋпи́лъ є҆сѝ Кро́вїю, и҆ себѣ̀ тꙋ є҆ди́нꙋ чⷭ҇тꙋю ѻ҆брꙋчи́лъ є҆сѝ Невѣ́стꙋ ѿ навѣтова́нїй и҆ ѡ҆ꙁлобле́нїй ѿстꙋ́пническихъ, ѿ всѣ́хъ же є҆рети́ческихъ па́гꙋбныхъ пре́лестїй ᲃко́рѡ и҆ꙁба́ви, и҆ по нело́жномꙋ тѝ ѡ҆бѣща́нїю, ѿ а҆́довыхъ вра́тъ, хꙋлноклеве́тныхъ и҆́хъ ᲂу҆стъ, неѡдолѣ́емꙋ, непреобори́мꙋ сохранѝ ю҆̀, и҆ съ не́й неѿстꙋ́пнѡ пребыва́ѧ, ꙗ҆́коже глава̀ тѣ́ло своѐ, ѿ всѣ́хъ бѣ́дъ и҆ ско́рбїй всегда̀, да́же до сконча́нїѧ вѣ́ка, защища́ѧ и҆ꙁба́ви и҆ соверше́ннѣ ᲂу҆мирѝ ю҆̀: да не когда̀ рекꙋ́тъ и҆новѣ́рныхъ стра́ны и҆ злодѣ́ющих на́мъ рꙋга́тел̾нїи пѡ́лци: где є҆́стъ Бг҃ъ и҆́хъ на не́гоже ᲂу҆пова́шѧ; но па́че ты ско́рымъ ниꙁпосла́нїемъ на́мъ твое́ѧ по́мощи си́цеваѧ хꙋлѧ́щихъ постыдѝ: держа́вномꙋ же Гдⷭ҇рꙋ на́шемꙋ вел: Королю̀ И҆мⷬ҇къ: и҆ всѣ́мъ преиꙁѧ́щнымъ є҆гѡ̀ ᲃовѣ́тникѡмъ, ми́рнаѧ и҆ благопо́леꙁнаѧ въ ᲃе́рдци воꙁбꙋжда́й, совѣтꙋ́й же и҆ гл҃ѝ, Ца́рство є҆гѡ̀ ми́ромъ ѡ҆гражда́ѧ, да и҆ мы̀ въ тишинѣ̀ є҆гѡ̀, ти́хѡ и҆ беꙁмо́лвнѡ жи́тїе пре́йдемъ, правовѣ́рнѡ тѧ славѧ́ще.

И҆ па́ки, пребога́тый превели́кїй же и҆ ми́лоствый Цр҃ю, и҆ Вседержи́телю Гд҃и, колѣ́нѣ дш҃ъ и҆ теле́съ на́ших прекло́н̾ше, моли́мътисѧ и҆ милидѣ́емъ, при́ꙁри всеми́лостивнымъ тѝ ѻ҆́комъ и҆ на рабы̀ твоѧ̀ на́шꙋ же бра́тїю, подъ мꙋчи́телною ѻ҆́бластїю, въ го́ркой работѣ̀ и҆ плѣне́нїи, ᲂу҆ беꙁбо́жныхъ и҆ невѣ́рныхъ, тебе́ же Ха҃ Бг҃а на́шегѡ и҆ Пречⷭ҇тꙋю тѝ Мт҃ръ прⷭ҇нѡ Дв҃ꙋю, беꙁстꙋ́днѣ хꙋлѧ́щихъ нечи́стыхъ и҆ скве́рныхъ А҆гарѧ́нъ, сꙋ́щыѧ правовѣ́рныѧ Хрⷭ҇тїѧ́ны:

Помѧни́ же и҆́хъ въско́рѣ ꙗ҆́кѡ крѣ́пкїй и҆ си́лный, и҆ ѿ мꙋчи́тел̾скихъ кровопроли́тныхъ рꙋ́къ и҆́хъ и҆ꙁба́ви, ᲃвободѝ и҆ и҆ꙁмѝ: ме́рꙁское же Бг҃охꙋ́лное, и҆ всеѡскверне́ное, стоѧ́щее ни́нѣ на мѣ́стѣ ᲃт҃о́мъ, тѣ́хъ нечи́стыхъ пога́нъ ца́рство и҆ госпо́дство, си́лꙋ же и҆ вла́ст̾, ꙗ҆́коже ме́рꙁость запꙋстѣ́нїѧ, кꙋ́пнѡ съ и҆́хъ беꙁъбо́жнымъ, хꙋ́л̾нымъ, беꙁъгла́внымъ же и҆ ю҆родивобѣсѧщимсѧ, и҆ꙁꙋмле́ннагѡ же и҆ всепроклѧ́тагѡ Мехме́та ᲂу҆че́нїемъ, раꙁдрꙋшѝ, и҆скоренѝ, ни во что́ же ѡ҆братѝ и҆ подъ нѡ́ги вѣ́рнымъ Хрⷭ҇тїѧ́нскимъ Цр҃емъ ниꙁве́ргъ покорѝ: ѿ землѧ́ же всеконе́чнѣ нечести́вꙋю па́мѧть и҆́хъ потреби́въ, Хрⷭ҇тїѧ́нскїй правовѣ́рный рогъ воꙁнесѝ: нечести́выхъ всѣ́хъ и҆скоренѝ: и҆́стинное Правосла́вїе и҆ благоче́стїе воꙁрастѝ и҆ повсю́дꙋ ᲂу҆множѝ: є҆́реси же, ѿстꙋ́пства и҆ всѧ̀ зло́бныѧ пре́лести погꙋбѝ: и҆ ѿ тѣ́хъ ѡ҆браща́ющихсѧ благода́тнѣ прїймѝ, и҆ ᲃт҃мꙋ тѝ причтѝ и҆ совокꙋпѝ ᲃта́дꙋ: найпа́че же Правовѣ́рныхъ твои́хъ рабѡ́въ повсю́дꙋ сꙋ́щихъ въдово́лъ блⷭ҇вѝ, ѿ дре́вле же вожделѣ́ннымъ ми́ромъ ѡ҆градѝ, и҆ ѿ всѧ́кагѡ зла̀ неврежде́нных соблюдѝ: Держа́внагѡ Гпⷭ҇дрѧ̀ на́шегѡ вел: Королѧ̀ И҆мⷬ҇къ: въ здра́вїи и҆ благоде́нствїи въ мнѡ́га лѣ́та сохранѝ: на всѧ̀ ᲃꙋпоста́ты, и҆ꙁрѧ́днѣ же на Крⷭ҇тонена́вистныѧ твоѧ̀ и҆ твое́гѡ всест҃а́гѡ и҆́мени врагѝ, Мехометанскїа ᲂу҆ченики, скве́рныѧ А҆гарѧ́ны, и҆ на всѧ̀ невѣ́рныѧ ꙗ҆ꙁы́ки, всегда̀ побѣ́ды дарꙋ́й, тѣ́хъ подъ нѡ́ги є҆мꙋ̀ покарѧ́ѧ: на́съ же ны́нѣ тебѣ̀ здѐ и҆ повсю́дꙋ молѧ́щихсѧ, по вели́цѣй твое́й ми́лости, пощадѝ, поми́лꙋй, и҆ ѿ всѣ́хъ вра́жїихъ ѡ҆ꙁлобле́нїй и҆ꙁмѝ: въ ми́рѣ же глꙋбо́цѣ всегда̀ живо́тъ на́шъ ᲂу҆странѧ́ѧ, ѡ҆ставле́нїе грѣхѡ́въ на́мъ дарꙋ́й. (а҆́ще въ Монастырѝ мл҃и́шисѧ, гл҃ѝ ᲃт҃ꙋ́ю ѻ҆би́тел̾ сі́ю, и҆ всѧ́кꙋю ѻ҆би́тель: (а҆́ще во гра́дѣ, гл҃ѝ гра́дъ се́й. (а҆́ще въ Ве́си, гл҃ѝ ве́сь сі́ю: и҆ всѧ́кїй гра́дъ, и҆ ве́сь, и҆ ᲃтра́нꙋ, и҆ вѣ́рою живꙋ́щихъ въ ни́хъ, ѿ гла́да, гꙋби́тел̾ства, трꙋ́са, пото́па, гра́да, ѻ҆гнѧ̀, меча̀, наше́ствїѧ и҆ноплеме́нникъ, междосо́бныѧ ра́ти, и҆ всѧ́кїѧ смертоно́сныѧ ꙗ҆́ꙁвы, и҆ напра́сныѧ ᲃме́рти всегда̀ и҆ꙁба́ви.

Въ бо́лѣꙁнехъ и҆ не́дꙋꙁѣхъ лежа́щихъ, посѣтѝ и҆ и҆сцѣлѝ.

Въ темни́цахъ и҆ ᲂу҆ꙁы́лищахъ заключе́нныхъ, свободѝ.

По мо́рю и҆ по вода́хъ плава́ющимъ, во́ждъ и҆ прави́телъ бꙋ́ди.

Въ пꙋ́т̾ шествꙋ́ющим сопꙋт̾шествꙋ́ѧ, поспѣшѝ и҆ всѣ́хъ правовѣ́рнѡ, въ всѧ́кой нꙋ́жде, приꙁыва́ющихъ и҆мѧ̀ твоѐ ᲃт҃о́е, на всѧ́комъ мѣ́сте и҆ на всѧ́кое вре́мѧ, ꙗ҆́кѡ ще́дръ, ско́рѡ ᲂу҆слы́ши, помѧнѝ, поми́лꙋй, ᲂу҆щедрѝ, и҆ꙁба́ви, ᲃпасѝ, и҆ Ца́рствїѧ твое́гѡ наслѣ́дники съ всѣ́ми ᲃт҃ы́ми твои́ми сотворѝ.

Ты́ бо Бг҃ъ ми́лостїй, щедрѡ́тъ и҆ чл҃кѡлю́бїѧ є҆сѝ, и҆ тебѣ̀ ᲃла́вꙋ воꙁсыла́ємъ, съ беꙁнача́лнымъ тѝ Ѿц҃емъ, и҆ съ прⷭ҇тымъ, и҆ благи́м, и҆ животворѧ́щимъ тѝ Дх҃ом, ны́нѣ прⷭ҇нѡ, и҆ во вѣ́ки вѣ́ков.

По Моли́твѣ же тво́ритъ ѡ҆бычный дне́вный ѿпꙋ́стъ.