Требник Петра (Могилы)

Пе́тръ Моги́ла, Млⷭ҇тїю Бж҃їею А҆рхїепⷭ҇пъ, Митрополи́тъ Кі́евскій, Га́лицкїй, и҆ всеѧ̀ Рꙍ́ссїи, Є҆ѯа́рха Ст҃гѡ А҆плⷭ҇когѡ Кꙍнстантінопоⷧ҇скагѡ Ѳрꙍ́нꙋ А҆Рхімандриитъ Пече́рскій

Пренайвелебнѣ́йшимъ и҆ Боголюбеꙁнѣ́йшимъ и҆́хъ ми́лостѧмъ Гᲁⷭ҇нѡмъ Ѿце́мъ и҆ въ дх҃ꙋ ᲃт҃о́мъ бра́тїѧмъ, Є҆пⷭ҇пѡмъ Правосла́внымъ це́ркви Рꙍси́йскои, Препоᲁо́бнымъ Гᲁ҃нѡмъ Ѿце́мъ А҆рхіма́нъᲁритѡмъ, Превеле́бнымъ И҆гꙋ́менѡмъ, веле́бнымъ І҆еромона́хѡмъ, Прече́стнымъ Протопо́пѡмъ, Честны́мъ І҆ере́ѡмъ, и҆ всемꙋ̀ ве́сполъ кли́рꙋ Церко́вномꙋ Правосла́вномꙋ: Бл҃гослове́нства Бж҃огѡ, Ла́ски, Поко́ѧ, и҆ всѣ́хъ доча́сныхъ и҆ вѣ́чныхъ до́бръ ᲂу҆прі́йме зы́читъ.

Роꙁꙋ́мное ᲃтворе́нъе Бж҃ее, человѣ́къ на па́ᲁолѣ подсолне́чномъ, бꙋ́ᲁꙋчи Па́номъ а҆́лбѡ спра́вцею ѿ Бг҃а надъ всѣ́мъ створе́нъемъ зе́мнымъ постано́вленый, ве́ᲁлꙋгъ ѱалъми́сты: Всѧ̀ покори́лъ є҆сѝ подъ но́зѣ є҆гѡ̀, ѡ҆́вца и҆ волы̀ всѧ̀, и҆ про́чаѧ¹. въ по́стꙋпкахъ и҆ по жи́тїи свое́мъ, не є҆́стъ є҆ᲁиноꙁрѧ́чный и҆ ᲂу҆стави́чный, Читеⷧ҇игкꙋ ѡ҆сщ҃енный; ра́ꙁъ бовѣ́мъ ꙗ҆́кѡ нѣ́ѧкїй Хамелеѡ́нъ ᲂу҆ка́жетъ по́стꙋпки своѝ, те́мныи и҆ ба́рꙁо похмꙋ́рныи, та́къ ижъ свѣ́тла и҆ ѡ҆бъѧсне́нѧ потребꙋ́ютъ, кото́рымъ А҆хїере́ѡвъ и҆ и҆́ныхъ Преложо́ныхъ Бг҃ъ всемогꙋ́щїй хо́щетъ мѣ́ти, ґᲁы̀ Спаси́телъ намъ ᲂу҆ Матѳ. ст҃гѡ та́къ до Преложо́ныхъ мо́витъ: Вы є҆стѐ свѣтъ мі́рꙋ². И҆ да́лей: Не вжига́ютъ свѣти́лникъ и҆ поᲁставлѧ́ютъ є҆гѡ̀ подъ спꙋ́ᲁомъ, но на свѣ́щницѣ, и҆ свѣ́титъ всѣ́мъ и҆́же въ храминѣ̀ сꙋ́ть. Дрꙋ́гимъ ра́ꙁомъ ᲂу҆каꙁꙋетсѧ человѣ́къ тѣ́ломъ ꙗ҆ки́мсь слѣпымъ и҆ беꙁъо́чнымъ, кото́ромꙋ за ѻ҆́чи Бг҃ъ всемогꙋ́щїй поᲁае́тъ тьі́хже преложо́ныхъ, ꙗ҆́кѡ свѣ́ᲁчитъ Матф. ст҃ы́й мо́вѧчи: Свѣти́лникъ тѣ́лꙋ є҆́стъ ѻ҆́ко, а҆́ще ᲂу҆́бѡ бꙋ́ᲁетъ ѻ҆́ко твоѐ про́сто, всѐ тѣ́ло твоѐ свѣ́тлѡ бꙋ́ᲁетъ³. Тре́тимъ ра́ꙁомъ, пока́ꙁꙋетсѧ человѣ́къ по тра́вами ꙗ҆́ковы́мись сыры́ми, до згни́лости скло́нными и҆ не стра́вными, та́къ и҆́жъ Бг҃ъ всемогꙋ́щїй ты́хже Преложо́ныхъ чи́нитъ со́лїю, а҆бы̀ ты́е потра́вы не пришлѝ до загни́лости, ꙗ҆кѡ̀ са́мъ титꙋлꙋ́етъ Сп҃си́телъ ᲂу҆́чневъ свои́хъ ᲂу҆ Матф. ст҃ы́й мо́вѧчи: Вы є҆стѐ со́ль землѝ, а҆́ще со́ль ѡ҆бꙋѧ́етъ, чи́мъ ѡ҆со́литсѧ⁴; Почва́рто пока́ꙁꙋетсѧ человѣ́къ Нб҃омъ, а҆́лбѡ Маеста́томъ Бж҃їимъ, въ кото́ромъ преложо́ные сꙋ́тъ А҆гг҃лами, ꙗ҆́кѡ свѣ́ᲁчитъ Прⷪ҇ркъ Бж҃їй Мала́хїѧ, мо́вѧчи: Ꙋ҆стнѣ̀ І҆ере́евы схранѧ́ютъ ра́ꙁꙋмъ, и҆ за́кона вꙁы́щꙋтъ ѿ ᲂу҆́стъ є҆гѡ̀, ꙗ҆́кѡ А҆гг҃лъ Гд҃а Всеᲁержи́телѧ є҆́стъ⁵. Въ всѣ́хъ тыхъ є҆ᲁина́къ преемѣне́нцїѧхъ и҆ титꙋ́лахъ преложо́ныхъ не́естъ щегꙋ́лнаѧ го́ᲁность и҆ чⷭ҇тъ ᲂу҆фꙋнъᲁова́наѧ, а҆́ле до ѡ҆́ныхъ є҆ᲁиноꙋтро́бнѣ привѧ́ꙁана є҆́стъ праціви́таѧ пови́нностъ, и҆ стара́нъе ѡ҆ ᲃпⷭ҇нїи дш҃ъ, собѣ̀ въ па́ствꙋ дх҃о́внꙋю повѣре́ныхъ. Пі́енъкнаѧ бовѣ́мъ и҆ пова́жнаѧ ре́чъ є҆́стъ бы́ти ᲃвѣ́тлостъю, бы́ти ѡ҆́комъ, бы́ти со́лїю, бы́ти А҆гг҃ломъ, лечъ свѣ́тлости тре́ба а҆бы̀ свѣти́ла, ѻ҆́ко пови́ннѡ смотрѣ́ти, ᲃо́ль мꙋ́ситъ бы́ти прито́мною загни́лости, и҆ ѡ҆́нꙋю ѿганѧ́ти, А҆гг҃лови нб҃а треба ᲂу҆стави́чне пилнова́ти, и҆ по А҆ггⷭ҇лкꙋ само́мꙋ жи́ти, и҆ собѣ̀ повѣре́нныхъ поᲁо́бнѣ наставлѧ́ти; ѱалъми́ста Царствꙋ́ючїй спомина́ючи ѡ҆ сътворе́нїи А҆гг҃лѡвъ та́къ мо́витъ: Творѧ́й А҆гг҃лы своѧ̀ дх҃и, и҆ ᲃлꙋ́ги своѧ̀ о҆́гнь па́лѧщъ⁶. Кото́рое мѣ́стце выклаᲁа́тисѧ и҆ роꙁꙋмѣ́ти мо́жетъ ѡ҆ преложо́ныхъ, тыхъ бовѣ́мъ и҆́жъ титꙋлꙋ́етъ Пи́смо А҆гг҃лами, те́ᲁы мо́гꙋтсѧ слꙋ́шне прировна́ти до ѻ҆гнѧ̀ и҆ до дх҃а; до ѻ҆гнѧ̀ съ тое́и причи́ны. и҆́жъ ꙗ҆́къ ѻ҆го́нь любо ма́етъ свою̀ проника́ючꙋю мо́цъ, горѧ́чость и҆ свѣ́тлость, є҆ᲁна́гъ мате́рїи кото́рою па́литъ, мꙋ́ситъ бы́ти ᲂу҆стави́чне прито́мнымъ: та́къ и҆ преложо́ныхъ преемѣне́юцїѧ при свое́й мо́ци пова́ꙁѣ и҆ че́сти пови́нна бы́ти прито́мною, по тре́бамъ и҆ неᲁоста́ткомъ подрꙋ́чныхъ свои́хъ. До дх҃а заⷭ҇ слꙋ́шне могꙋ́тсѧ прировнѧ́ти, и҆́жъ преложо́ные сꙋ́ть, ꙗ҆́кѡ бы дш҃ѐю собѣ̀ повѣре́ныхъ люᲁе́й, а҆же дш҃а̀ всѧ̀ є҆́стъ въ все́мъ тѣ́лѣ, та́къ и҆ преложо́ный ве́сь пови́ненъ бы́ти въ ко́жᲁымъ свои́мъ подрꙋ́чнымъ, преꙁъ наꙋ́кꙋ и҆ пора́ᲁꙋ. А҆мвро́сїй ст҃ы́й выхвалѧ́ючи преложе́нътво Патрїа́рха Нꙍ́ѧ та́къ мо́витъ: Ꙗ҆ко́бы беꙁтеле́сный тѣ́ломъ бы́лъ не́сеный по во́ᲁахъ, пото́помъ непожа́ртый, и҆ ме́жю та́къ гвалто́вными волна́ми пото́пными, надъ ᲃтра́стъми тѣ́ла свое́гѡ ꙗ҆ко́бы беꙁътеле́сный зви́тѧꙁствѡ ѡ҆ᲁе́ржалъ⁷. Щожъ роꙁꙋмѣ́ти ма́емѡ ѡ҆ преложе́нъствѣ А҆рхїере́ꙍвъ Црк҃ви Правосла́внокаѳоли́ческой: чи до́сыть ѡ҆́нымъ и҆́жъ та́къ вели́кои преемѣне́ицїи и҆ го́дности достꙋпи́ли: прⷭ҇тлы своѝ поꙁасѣᲁа́ли, доста́тками сꙋ́тъ ѡ҆бᲁаре́ны, ѡ҆́дъ подрꙋ́чныхъ свои́хъ ма́ютъ при послꙋше́нствѣ пошанова́не? не до́сыть заи́сте, понева́жъ ѡ҆́ныхъ го́ᲁность є҆́стъ пра́цею и҆ тѧжа́ромъ: ꙗ҆́кѡ то поꙁна́ти мо́жемѡ зъ сло́въ Сп҃си́телевыхъ до Петра̀ ст҃гѡ вы́реченыхъ: Пасѝ ѻ҆́вца моѧ̀⁸. Гᲁѐ чемꙋ̀ Сп҃си́тель не мо́витъ; бꙋ́ᲁь преложо́нымъ надъ ѻ҆вца́ми мои́ми, ᲂу҆жива́й ѡ҆́ныхъ собѣ̀ на пожи́токъ; а҆́бы покаꙁа́лъ, и҆́жъ А҆хїере́ѡмъ тре́ба бы́ти въ ᲂу҆стави́чной пра́ци и҆ стара́ни ѡ҆́колѡ ѡ҆ве́цъ а҆бы̀ ѡ҆́ныхъ па́сли, а҆ хто̀ пасе́тъ мꙋ́ситъ неспа́ти, въ ча́сѡвъ не ꙁажива́ти, ѡ҆вца́мъ свои́мъ присѣᲁѣ́ти. Тожъ и҆ по А҆рхїере́ѧхъ Хᲃ҃ Па́нъ хо́четъ мѣ́ти, гᲁы ᲂу҆ ᲃта́гѡ Їꙍанна та́къ мо́витъ: И҆ ѡ҆́вца Гла́съ є҆гѡ̀ слы́шатъ⁹. Треба теᲁы̀ до ѡ҆́вецъ поꙋче́нїе ча́сто мо́вити: И҆ є҆гᲁа̀ своѧ̀ ѡ҆́вца и҆жᲁе́нетъ, пре́дъ ни́ми хо́ᲁитъ. А҆рхїере́е теᲁы̀ пови́нны ѡ҆́вца прова́ᲁити прикла́ᲁнымъ жи́тїемъ и҆ наꙋ́кою, а҆ не ѡ҆́вцы А҆рхїере́ѡвъ. Слꙋ́хаймѡ ѡ҆ томъ наꙋ́ки Вели́когѡ Ꙋ҆ч҃тлѧ на́роᲁѡвъ ᲃт҃гѡ А҆пⷭ҇ла Па́вла, кото́рый пи́щꙋчи до Кори́нтѡвъ, та́къ до А҆рхїере́ѡвъ мо́витъ: Та́кѡ на́съ да непщꙋ́етъ человѣ́къ, ꙗ҆́коже ᲃлꙋ́ги Хв҃ы, и҆ строи́телѧ Та́йнамъ Бж҃іимъ¹⁰. А҆ А҆пⷭ҇лъ ст҃ы́й Пе́тръ, въ пе́ршомъ свое́мъ Посла́нїи, та́къ ѡ҆ пова́ꙁѣ А҆рхїере́ѵꙵской дишкꙋрꙋ́етъ: Ста́рца, пасѣ́те є҆́же въ ва́съ ᲃта́ᲁѡ Бж҃їе, повѣща́юще ненꙋ́жᲁею, но во́лею и҆ по Бꙁ҃ѣ, ни́же непра́веᲁными прибы́тки, но ᲂу҆се́рᲁнѡ: ни ꙗ҆́кѡ ѡ҆блаᲁа́юще при́чтꙋ, но ѡ҆́браꙁы быва́йте ста́ᲁꙋ¹¹. Само́е и҆мѧ̀ Епⷭ҇пъ, що и҆́ншогѡ пока́ꙁꙋетъ? ты́лкѡ трꙋ́ᲁъ и҆ пра́цꙋ А҆рхїере́ѡвъ гᲁы значи́тъ, зъ высоты̀ наꙁира́ющагѡ, и҆ ᲂу҆стави́чне деа́ючогѡ ѡ҆ цѣ́лости собѣ̀ подрꙋ́чныхъ. И҆ длѧ тогѡ̀ А҆пⷭ҇лъ Па́велъ, жегна́ючи Е҆фе́скихъ Преꙁви́терѡвъ, та́къ до ѡ҆́ныхъ мо́витъ: Внима́йте ᲂу҆́бѡ себѣ̀, и҆ всемꙋ̀ ᲃта́ᲁꙋ въ не́мже ва́съ Дх҃ъ ᲃт҃ы́й поста́ви Еппⷭ҇ко́пы, па́сти Црк҃овъ Гд҃а и҆ Бг҃а, и҆́же стѧжа̀ Кро́вїю свое́ю¹². Хриꙁосто́мъ ст҃ы́й пи́шꙋчи на пе́ршїе Посла́нїе А҆пⷭ҇ла Па́вла до Тімоѳ. та́къ мо́витъ: Е҆пи́скопства не ᲁлѧ̀ проᲁкова́нѧ и҆ панова́нѧ, а҆́ле любвѐ ра́ᲁи до́брагѡ строе́нїѧ жела́ти нале́житъ¹³. И҆ лю́бѡ ѿ нѣкото́рыхъ Пи́сма ст҃ы́х выклаᲁа́чѡвъ, А҆рхїере́е прировныва́ютсѧ до ѡ҆́ныхъ Херꙋви́мѡвъ, кото́рїе скрыдла́ми свои́ми ѡ҆сѣнѧ́ли ѡцѣсти́лище: є҆ᲁна́къ и҆ ѡ҆дто́ль трꙋ́ᲁъ и҆ пра́ца ѡ҆́ныхъ, а҆ не щегꙋ́лнаѧ поꙁнава́етсѧ го́ᲁность. Херꙋви́мъ бовѣ́мъ зна́читъ и҆сполне́нїе ᲂу҆мѣ́стности: та́ѧ вели́кою потре́бꙋетъ пра́цы и҆ ᲂу҆стави́чности въ А҆рхїере́ехъ, а҆бы́сѧ, въ ѡ҆́ныхъ вы́полнили ᲃлова̀ А҆пⷭ҇ла Па́вла, ѡ҆́вые: Поᲁоба́етъ Е҆пⷭ҇пꙋ бы́ти ᲂу҆чи́телнꙋ¹⁴. И҆ лю́бо Пи́смѡ ᲃт҃о́е, самы́мъ чита́нъемъ вели́це бꙋᲁꙋ́етъ дꙋ́шꙋ вѣ́рнꙋю и҆ побожънꙋю: є҆ᲁна́къ дале́кѡ ба́рꙁей є҆́стъ полеꙁнѣ́йшее гᲁы знѣмы́хъ лѣ́теръ въжывы́й ѡ҆бороча́етсѧ го́лосъ. гᲁы то́й кото́рый преꙁли́стъ наꙋча́лъ са́мъ живы́мъ го́лосомъ до предстоѧ́щихъ и҆ слꙋ́хаючихъ ᲂу҆чи́телно мо́витъ. Покаꙁа́лъ то А҆пⷭ҇лъ ст҃ы́й Па́велъ, въ Посла́нїи свое́мъ до Гала́тѡвъ по мнѡ́гомъ ᲂу҆че́нїи та́къ мо́вѧчи: Хотѣ́хъ же бы съ ва́ми бы́ти нн҃ѣ, и҆ и҆ꙁмѣни́ти гла́съ мо́й, ꙗ҆́кѡ неᲁоꙋмѣва́исѧ ѡ҆ васъ¹⁵. Що за́сь ма́емѡ роꙁꙋмѣ́ти ѡ҆ мѣ́лкой и҆ сла́бой А҆рхїере́ѡвъ нѣ́которыхъ ᲂу҆мѣ́стности, звла́ща въ наꙋ́кахъ Богосло́вскихъ, ꙗ҆́къ могꙋ́тъ Херꙋ́ви́мѡвъ преꙁъ и҆сполне́иїе ᲂу҆мѣ́стности въ себѣ̀ выѡбража́ти; ѡ҆бмышлѧ́етъ найвы́шшїй Па́нъ и҆ А҆рхіпа́стыръ, и҆ ѡ҆ тако́выхъ а҆́бы го́ᲁность ѡ҆́ныхъ наꙋмѣ́стости належи́той ᲃта́нꙋ А҆рхїереѵꙵскомꙋ нешванкова́ла. Ꙗ҆сный ма́емѡ тогѡ̀ при́кладъ, въ ᲂу҆го́ᲁницѣ Бж҃омъ Мѡѵꙵсе́ю, кото́рый гᲁы̀ ᲃамъ вымовлѧ́лсѧ Гᲁ҃ꙋ Бг҃ꙋ злега́цїи до Фараѡ́на, и҆́жъ не є҆́стъ рѣчи́стъ, же є҆́стъ хꙋᲁогла́сенъ и҆ ко́сно ѧ҆ꙁы́ченъ, ᲂу҆слы́шалъ такꙋ́ю ѡдповѣ́ᲁь: И҆ᲁѝ нн҃ѣ, а҆́ꙁъ бо ѿверꙁꙋ̀ ᲂу҆ста̀ твоѧ̀, и҆ ᲂу҆строю̀ тѧ̀ є҆́же ти бꙋ́ᲁетъ глагола́ти. И҆ ни́жей: А҆ А҆а́рꙍнъ ᲂу҆́бѡ да бꙋ́ᲁетъ ᲂу҆ста̀ твоѧ̀, ты́ же бꙋ́ᲁи є҆мꙋ въ Бг҃а. А҆ Сп҃си́тель на́шъ выправꙋ́ючи на про́повѣᲁь Єѵⷢ҇лїи ᲃт҃о́и Ꙋ҆чневъ свои́хъ, та́къ и҆́хъ наставлѧ́етъ: Є҆гᲁа́же повеᲁꙋ́тъ вы преᲁаю́ще, не пре́жᲁе пецѣ́тесѧ что̀ воꙁгл҃етѐ, но є҆́же а҆́ще да́стсѧ вамъ въ то́й ча́съ то гл҃и́те, не вы́ бо бꙋ́ᲁете гл҃ю́щїи, но Дх҃ъ ᲃт҃ы́й¹⁶.

Роꙁꙋ́мное ᲃтворе́нъе Бж҃ее, человѣ́къ на па́ᲁолѣ подсолне́чномъ, бꙋ́ᲁꙋчи Па́номъ а҆́лбѡ спра́вцею ѿ Бг҃а надъ всѣ́мъ створе́нъемъ зе́мнымъ постано́вленый, ве́ᲁлꙋгъ ѱалъми́сты: Всѧ̀ покори́лъ є҆сѝ подъ но́зѣ є҆гѡ̀, ѡ҆́вца и҆ волы̀ всѧ̀, и҆ про́чаѧ¹. въ по́стꙋпкахъ и҆ по жи́тїи свое́мъ, не є҆́стъ є҆ᲁиноꙁрѧ́чный и҆ ᲂу҆стави́чный, Читеⷧ҇игкꙋ ѡ҆сщ҃енный; ра́ꙁъ бовѣ́мъ ꙗ҆́кѡ нѣ́ѧкїй Хамелеѡ́нъ ᲂу҆ка́жетъ по́стꙋпки своѝ, те́мныи и҆ ба́рꙁо похмꙋ́рныи, та́къ ижъ свѣ́тла и҆ ѡ҆бъѧсне́нѧ потребꙋ́ютъ, кото́рымъ А҆хїере́ѡвъ и҆ и҆́ныхъ Преложо́ныхъ Бг҃ъ всемогꙋ́щїй хо́щетъ мѣ́ти, ґᲁы̀ Спаси́телъ намъ ᲂу҆ Матѳ. ст҃гѡ та́къ до Преложо́ныхъ мо́витъ: Вы є҆стѐ свѣтъ мі́рꙋ². И҆ да́лей: Не вжига́ютъ свѣти́лникъ и҆ поᲁставлѧ́ютъ є҆гѡ̀ подъ спꙋ́ᲁомъ, но на свѣ́щницѣ, и҆ свѣ́титъ всѣ́мъ и҆́же въ храминѣ̀ сꙋ́ть. Дрꙋ́гимъ ра́ꙁомъ ᲂу҆каꙁꙋетсѧ человѣ́къ тѣ́ломъ ꙗ҆ки́мсь слѣпымъ и҆ беꙁъо́чнымъ, кото́ромꙋ за ѻ҆́чи Бг҃ъ всемогꙋ́щїй поᲁае́тъ тьі́хже преложо́ныхъ, ꙗ҆́кѡ свѣ́ᲁчитъ Матф. ст҃ы́й мо́вѧчи: Свѣти́лникъ тѣ́лꙋ є҆́стъ ѻ҆́ко, а҆́ще ᲂу҆́бѡ бꙋ́ᲁетъ ѻ҆́ко твоѐ про́сто, всѐ тѣ́ло твоѐ свѣ́тлѡ бꙋ́ᲁетъ³. Тре́тимъ ра́ꙁомъ, пока́ꙁꙋетсѧ человѣ́къ по тра́вами ꙗ҆́ковы́мись сыры́ми, до згни́лости скло́нными и҆ не стра́вными, та́къ и҆́жъ Бг҃ъ всемогꙋ́щїй ты́хже Преложо́ныхъ чи́нитъ со́лїю, а҆бы̀ ты́е потра́вы не пришлѝ до загни́лости, ꙗ҆кѡ̀ са́мъ титꙋлꙋ́етъ Сп҃си́телъ ᲂу҆́чневъ свои́хъ ᲂу҆ Матф. ст҃ы́й мо́вѧчи: Вы є҆стѐ со́ль землѝ, а҆́ще со́ль ѡ҆бꙋѧ́етъ, чи́мъ ѡ҆со́литсѧ⁴; Почва́рто пока́ꙁꙋетсѧ человѣ́къ Нб҃омъ, а҆́лбѡ Маеста́томъ Бж҃їимъ, въ кото́ромъ преложо́ные сꙋ́тъ А҆гг҃лами, ꙗ҆́кѡ свѣ́ᲁчитъ Прⷪ҇ркъ Бж҃їй Мала́хїѧ, мо́вѧчи: Ꙋ҆стнѣ̀ І҆ере́евы схранѧ́ютъ ра́ꙁꙋмъ, и҆ за́кона вꙁы́щꙋтъ ѿ ᲂу҆́стъ є҆гѡ̀, ꙗ҆́кѡ А҆гг҃лъ Гд҃а Всеᲁержи́телѧ є҆́стъ⁵. Въ всѣ́хъ тыхъ є҆ᲁина́къ преемѣне́нцїѧхъ и҆ титꙋ́лахъ преложо́ныхъ не́естъ щегꙋ́лнаѧ го́ᲁность и҆ чⷭ҇тъ ᲂу҆фꙋнъᲁова́наѧ, а҆́ле до ѡ҆́ныхъ є҆ᲁиноꙋтро́бнѣ привѧ́ꙁана є҆́стъ праціви́таѧ пови́нностъ, и҆ стара́нъе ѡ҆ ᲃпⷭ҇нїи дш҃ъ, собѣ̀ въ па́ствꙋ дх҃о́внꙋю повѣре́ныхъ. Пі́енъкнаѧ бовѣ́мъ и҆ пова́жнаѧ ре́чъ є҆́стъ бы́ти ᲃвѣ́тлостъю, бы́ти ѡ҆́комъ, бы́ти со́лїю, бы́ти А҆гг҃ломъ, лечъ свѣ́тлости тре́ба а҆бы̀ свѣти́ла, ѻ҆́ко пови́ннѡ смотрѣ́ти, ᲃо́ль мꙋ́ситъ бы́ти прито́мною загни́лости, и҆ ѡ҆́нꙋю ѿганѧ́ти, А҆гг҃лови нб҃а треба ᲂу҆стави́чне пилнова́ти, и҆ по А҆ггⷭ҇лкꙋ само́мꙋ жи́ти, и҆ собѣ̀ повѣре́нныхъ поᲁо́бнѣ наставлѧ́ти; ѱалъми́ста Царствꙋ́ючїй спомина́ючи ѡ҆ сътворе́нїи А҆гг҃лѡвъ та́къ мо́витъ: Творѧ́й А҆гг҃лы своѧ̀ дх҃и, и҆ ᲃлꙋ́ги своѧ̀ о҆́гнь па́лѧщъ⁶. Кото́рое мѣ́стце выклаᲁа́тисѧ и҆ роꙁꙋмѣ́ти мо́жетъ ѡ҆ преложо́ныхъ, тыхъ бовѣ́мъ и҆́жъ титꙋлꙋ́етъ Пи́смо Ст҃о́е А҆гг҃лами, те́ᲁы мо́гꙋтсѧ слꙋ́шне прировна́ти до ѻ҆гнѧ̀ и҆ до дх҃а; до ѻ҆гнѧ̀ съ тое́и причи́ны. и҆́жъ ꙗ҆́къ ѻ҆го́нь любо ма́етъ свою̀ проника́ючꙋю мо́цъ, горѧ́чость и҆ свѣ́тлость, є҆ᲁна́гъ мате́рїи кото́рою па́литъ, мꙋ́ситъ бы́ти ᲂу҆стави́чне прито́мнымъ: та́къ и҆ преложо́ныхъ преемѣне́юцїѧ при свое́й мо́ци пова́ꙁѣ и҆ че́сти пови́нна бы́ти прито́мною, по тре́бамъ и҆ неᲁоста́ткомъ подрꙋ́чныхъ свои́хъ. До дх҃а заⷭ҇ слꙋ́шне могꙋ́тсѧ прировнѧ́ти, и҆́жъ преложо́ные сꙋ́ть, ꙗ҆́кѡ бы дш҃ѐю собѣ̀ повѣре́ныхъ люᲁе́й, а҆же дш҃а̀ всѧ̀ є҆́стъ въ все́мъ тѣ́лѣ, та́къ и҆ преложо́ный ве́сь пови́ненъ бы́ти въ ко́жᲁымъ свои́мъ подрꙋ́чнымъ, преꙁъ наꙋ́кꙋ и҆ пора́ᲁꙋ. А҆мвро́сїй ст҃ы́й выхвалѧ́ючи преложе́нътво Патрїа́рха Нꙍ́ѧ та́къ мо́витъ: Ꙗ҆ко́бы беꙁтеле́сный тѣ́ломъ бы́лъ не́сеный по во́ᲁахъ, пото́помъ непожа́ртый, и҆ ме́жю та́къ гвалто́вными волна́ми пото́пными, надъ ᲃтра́стъми тѣ́ла свое́гѡ ꙗ҆ко́бы беꙁътеле́сный зви́тѧꙁствѡ ѡ҆ᲁе́ржалъ⁷. Щожъ роꙁꙋмѣ́ти ма́емѡ ѡ҆ преложе́нъствѣ А҆рхїере́ꙍвъ Црк҃ви Правосла́внокаѳоли́ческой: чи до́сыть ѡ҆́нымъ и҆́жъ та́къ вели́кои преемѣне́ицїи и҆ го́дности достꙋпи́ли: прⷭ҇тлы своѝ поꙁасѣᲁа́ли, доста́тками сꙋ́тъ ѡ҆бᲁаре́ны, ѡ҆́дъ подрꙋ́чныхъ свои́хъ ма́ютъ при послꙋше́нствѣ пошанова́не? не до́сыть заи́сте, понева́жъ ѡ҆́ныхъ го́ᲁность є҆́стъ пра́цею и҆ тѧжа́ромъ: ꙗ҆́кѡ то поꙁна́ти мо́жемѡ зъ сло́въ Сп҃си́телевыхъ до Петра̀ ст҃гѡ вы́реченыхъ: Пасѝ ѻ҆́вца моѧ̀⁸. Гᲁѐ чемꙋ̀ Сп҃си́тель не мо́витъ; бꙋ́ᲁь преложо́нымъ надъ ѻ҆вца́ми мои́ми, ᲂу҆жива́й ѡ҆́ныхъ собѣ̀ на пожи́токъ; а҆́бы покаꙁа́лъ, и҆́жъ А҆хїере́ѡмъ тре́ба бы́ти въ ᲂу҆стави́чной пра́ци и҆ стара́ни ѡ҆́колѡ ѡ҆ве́цъ а҆бы̀ ѡ҆́ныхъ па́сли, а҆ хто̀ пасе́тъ мꙋ́ситъ неспа́ти, въ ча́сѡвъ не ꙁажива́ти, ѡ҆вца́мъ свои́мъ присѣᲁѣ́ти. Тожъ и҆ по А҆рхїере́ѧхъ Хᲃ҃ Па́нъ хо́четъ мѣ́ти, гᲁы ᲂу҆ ᲃта́гѡ Їꙍанна та́къ мо́витъ: И҆ ѡ҆́вца Гла́съ є҆гѡ̀ слы́шатъ⁹. Треба теᲁы̀ до ѡ҆́вецъ поꙋче́нїе ча́сто мо́вити: И҆ є҆гᲁа̀ своѧ̀ ѡ҆́вца и҆жᲁе́нетъ, пре́дъ ни́ми хо́ᲁитъ. А҆рхїере́е теᲁы̀ пови́нны ѡ҆́вца прова́ᲁити прикла́ᲁнымъ жи́тїемъ и҆ наꙋ́кою, а҆ не ѡ҆́вцы А҆рхїере́ѡвъ. Слꙋ́хаймѡ ѡ҆ томъ наꙋ́ки Вели́когѡ Ꙋ҆ч҃тлѧ на́роᲁѡвъ ᲃт҃гѡ А҆пⷭ҇ла Па́вла, кото́рый пи́щꙋчи до Кори́нтѡвъ, та́къ до А҆рхїере́ѡвъ мо́витъ: Та́кѡ на́съ да непщꙋ́етъ человѣ́къ, ꙗ҆́коже ᲃлꙋ́ги Хв҃ы, и҆ строи́телѧ Та́йнамъ Бж҃іимъ¹⁰. А҆ А҆пⷭ҇лъ ст҃ы́й Пе́тръ, въ пе́ршомъ свое́мъ Посла́нїи, та́къ ѡ҆ пова́ꙁѣ А҆рхїере́ѵꙵской дишкꙋрꙋ́етъ: Ста́рца, пасѣ́те є҆́же въ ва́съ ᲃта́ᲁѡ Бж҃їе, повѣща́юще ненꙋ́жᲁею, но во́лею и҆ по Бꙁ҃ѣ, ни́же непра́веᲁными прибы́тки, но ᲂу҆се́рᲁнѡ: ни ꙗ҆́кѡ ѡ҆блаᲁа́юще при́чтꙋ, но ѡ҆́браꙁы быва́йте ста́ᲁꙋ¹¹. Само́е и҆мѧ̀ Епⷭ҇пъ, що и҆́ншогѡ пока́ꙁꙋетъ? ты́лкѡ трꙋ́ᲁъ и҆ пра́цꙋ А҆рхїере́ѡвъ гᲁы значи́тъ, зъ высоты̀ наꙁира́ющагѡ, и҆ ᲂу҆стави́чне деа́ючогѡ ѡ҆ цѣ́лости собѣ̀ подрꙋ́чныхъ. И҆ длѧ тогѡ̀ А҆пⷭ҇лъ Па́велъ, жегна́ючи Е҆фе́скихъ Преꙁви́терѡвъ, та́къ до ѡ҆́ныхъ мо́витъ: Внима́йте ᲂу҆́бѡ себѣ̀, и҆ всемꙋ̀ ᲃта́ᲁꙋ въ не́мже ва́съ Дх҃ъ ᲃт҃ы́й поста́ви Еппⷭ҇ко́пы, па́сти Црк҃овъ Гд҃а и҆ Бг҃а, и҆́же стѧжа̀ Кро́вїю свое́ю¹². Хриꙁосто́мъ ст҃ы́й пи́шꙋчи на пе́ршїе Посла́нїе А҆пⷭ҇ла Па́вла до Тімоѳ. та́къ мо́витъ: Е҆пи́скопства не ᲁлѧ̀ проᲁкова́нѧ и҆ панова́нѧ, а҆́ле любвѐ ра́ᲁи до́брагѡ строе́нїѧ жела́ти нале́житъ¹³. И҆ лю́бѡ ѿ нѣкото́рыхъ Пи́сма ст҃ы́х выклаᲁа́чѡвъ, А҆рхїере́е прировныва́ютсѧ до ѡ҆́ныхъ Херꙋви́мѡвъ, кото́рїе скрыдла́ми свои́ми ѡ҆сѣнѧ́ли ѡцѣсти́лище: є҆ᲁна́къ и҆ ѡ҆дто́ль трꙋ́ᲁъ и҆ пра́ца ѡ҆́ныхъ, а҆ не щегꙋ́лнаѧ поꙁнава́етсѧ го́ᲁность. Херꙋви́мъ бовѣ́мъ зна́читъ и҆сполне́нїе ᲂу҆мѣ́стности: та́ѧ вели́кою потре́бꙋетъ пра́цы и҆ ᲂу҆стави́чности въ А҆рхїере́ехъ, а҆бы́сѧ, въ ѡ҆́ныхъ вы́полнили ᲃлова̀ А҆пⷭ҇ла Па́вла, ѡ҆́вые: Поᲁоба́етъ Е҆пⷭ҇пꙋ бы́ти ᲂу҆чи́телнꙋ¹⁴. И҆ лю́бо Пи́смѡ ᲃт҃о́е, самы́мъ чита́нъемъ вели́це бꙋᲁꙋ́етъ дꙋ́шꙋ вѣ́рнꙋю и҆ побожънꙋю: є҆ᲁна́къ дале́кѡ ба́рꙁей є҆́стъ полеꙁнѣ́йшее гᲁы знѣмы́хъ лѣ́теръ въжывы́й ѡ҆бороча́етсѧ го́лосъ. гᲁы то́й кото́рый преꙁли́стъ наꙋча́лъ са́мъ живы́мъ го́лосомъ до предстоѧ́щихъ и҆ слꙋ́хаючихъ ᲂу҆чи́телно мо́витъ. Покаꙁа́лъ то А҆пⷭ҇лъ ст҃ы́й Па́велъ, въ Посла́нїи свое́мъ до Гала́тѡвъ по мнѡ́гомъ ᲂу҆че́нїи та́къ мо́вѧчи: Хотѣ́хъ же бы съ ва́ми бы́ти нн҃ѣ, и҆ и҆ꙁмѣни́ти гла́съ мо́й, ꙗ҆́кѡ неᲁоꙋмѣва́исѧ ѡ҆ васъ¹⁵. Що за́сь ма́емѡ роꙁꙋмѣ́ти ѡ҆ мѣ́лкой и҆ сла́бой А҆рхїере́ѡвъ нѣ́которыхъ ᲂу҆мѣ́стности, звла́ща въ наꙋ́кахъ Богосло́вскихъ, ꙗ҆́къ могꙋ́тъ Херꙋ́ви́мѡвъ преꙁъ и҆сполне́иїе ᲂу҆мѣ́стности въ себѣ̀ выѡбража́ти; ѡ҆бмышлѧ́етъ найвы́шшїй Па́нъ и҆ А҆рхіпа́стыръ, и҆ ѡ҆ тако́выхъ а҆́бы го́ᲁность ѡ҆́ныхъ наꙋмѣ́стости належи́той ᲃта́нꙋ А҆рхїереѵꙵскомꙋ нешванкова́ла. Ꙗ҆сный ма́емѡ тогѡ̀ при́кладъ, въ ᲂу҆го́ᲁницѣ Бж҃омъ Мѡѵꙵсе́ю, кото́рый гᲁы̀ ᲃамъ вымовлѧ́лсѧ Гᲁ҃ꙋ Бг҃ꙋ злега́цїи до Фараѡ́на, и҆́жъ не є҆́стъ рѣчи́стъ, же є҆́стъ хꙋᲁогла́сенъ и҆ ко́сно ѧ҆ꙁы́ченъ, ᲂу҆слы́шалъ такꙋ́ю ѡдповѣ́ᲁь: И҆ᲁѝ нн҃ѣ, а҆́ꙁъ бо ѿверꙁꙋ̀ ᲂу҆ста̀ твоѧ̀, и҆ ᲂу҆строю̀ тѧ̀ є҆́же ти бꙋ́ᲁетъ глагола́ти. И҆ ни́жей: А҆ А҆а́рꙍнъ ᲂу҆́бѡ да бꙋ́ᲁетъ ᲂу҆ста̀ твоѧ̀, ты́ же бꙋ́ᲁи є҆мꙋ въ Бг҃а. А҆ Сп҃си́тель на́шъ выправꙋ́ючи на про́повѣᲁь Єѵⷢ҇лїи ᲃт҃о́и Ꙋ҆чневъ свои́хъ, та́къ и҆́хъ наставлѧ́етъ: Є҆гᲁа́же повеᲁꙋ́тъ вы преᲁаю́ще, не пре́жᲁе пецѣ́тесѧ что̀ воꙁгл҃етѐ, но є҆́же а҆́ще да́стсѧ вамъ въ то́й ча́съ то гл҃и́те, не вы́ бо бꙋ́ᲁете гл҃ю́щїи, но Дх҃ъ ᲃт҃ы́й¹⁶.

Бꙋ́ᲁꙋчи теᲁы̀ и҆ смире́нїе моѐ, и҆ꙁволе́нїемъ Бж҃іимъ и҆ дѣ́йствомъ Пресвѧта́гѡ Дх҃а, въ Це́ркви ᲃт҃о́й Правосла́внокаѳꙍли́ческой Рꙍссі́йской, ᲃа́номъ А҆рхїере́ѵꙵскимъ А҆рхїеписко́пїи Мітропо́лїи Кі́евскои, Га́лицкои, и҆ всеѧ̀ Рꙍ́ссїи понѡꙁᲁобле́нный, по всѧ̀ днѝ жи́тїѧ мое́гѡ ᲃе́рдцемъ болѣꙁнова́лемъ, поглѧᲁа́ючи на ᲃкꙋ́ᲁость ᲂу҆мѣе́тности мое́и, а҆ вѣ́ᲁаючи пе́вне, и҆́жъ Спаси́тель на́шъ І҆и҃ᲃ Хᲃ҃ Кро́ве ѡ҆ве́цъ свои́хъ ᲃлове́сныхъ, въ па́ствꙋ мнѣ̀ повѣре́нныхъ ѿ рꙋ́къ мои́хъ вꙁыскова́ти бꙋ́ᲁетъ, и҆ вѣ́ᲁѧчи то ᲂу҆стави́чне, и҆жъ проти́вници на́ши и҆ лжебра́тїѧ Правосла́вїѧ ᲃт҃гѡ, сꙋ́ть ба́рꙁѡ тѧ́жкими и҆ насилствꙋ́ючими Правосла́внымъ, ро́ꙁными доса́ᲁами и҆ ѡ҆би́ᲁами, беꙁвсты́ᲁне наꙁыва́ючи дх҃о́вныхъ на́шихъ неꙋ́ками, грꙋбїѧ́нами, вшафова́ню и҆ ѡдправова́ню Бжⷭ҇тве́нныхъ Та́инъ, и҆ и҆́ншогѡ Набоже́нства, вола́ючи и҆́жъ Рꙋ́сь Правосла́внаѧ згеретича́ла, Ли́чбы, Фо́рмы, Мате́рїи, И҆нте́нцїи, и҆ скꙋ́ткѡвъ Та́инъ Божестве́нныхъ не ꙁна́етъ, ѡ҆ ѡ҆́ныхъ спра́вы да́ти не ꙋмѣ́етъ. и҆ ро́ꙁногѡ спо́собꙋ въ ѿправова́ню Бжⷭ҇тве́нныхъ Та́инъ зажива́етъ. Ꙍ҆ ᲂу҆крѣплѧющемъ мѧ̀ І҆и҃сѣ ве́ᲁлꙋгъ сихъ мои́хъ потрꙋᲁи́вшисѧ, пре́дъ себѣ̀ вꙁѧ́лемъ, ѡднѧ́ти та́къ тѧ́жкое поноше́нїе проти́вникѡвъ ѿ ѡ҆сщ҃енногѡ правосла́вногѡ при́чтꙋ Црк҃ви ᲃт҃о́е Рꙍссі́йскои: въ чомъ блгда́тїю Бж҃ею не вотщѐ трꙋᲁи́хсѧ, ꙗ҆́кѡ зроꙁꙋмѣ́ти мо́жетъ ко́жᲁый ѡ҆сщ҃енный, и҆ побо́жный Чите́лникъ тое́и Кни́ги, наꙁва́ннои Тре́бникъ, съ кото́рои чита́нѧ поꙁна́ешъ ѡ҆сщ҃е́нный Чите́лникꙋ, и҆́жъ то щегꙋ́лнаѧ по́тваръ, а҆бы̀ Рꙋ́сь въ А҆рхїере́ѧхъ и҆ и҆́ныхъ Преложо́ныхъ свои́хъ иемѣ́ла належи́тои ѿ Дх҃а ᲃт҃гѡ всегᲁа̀ въ Црк҃ви ᲃт҃о́й при то́мъ мно́гѡ ѡ҆ сп҃асе́нїи свое́мъ мѣ́ти наꙋ́ки. Дово́ᲁомъ тогѡ̀ сꙋ́тъ Кни́ги Церко́вныи Богоᲁꙋхнове́нными мꙋжа́ми зъ Гре́цкогѡ ꙗ҆ꙁы́ка на Слове́нъскїй преложо́ныи, въ кото́рыхъ и҆́стиннаѧ и҆́ высо́каѧ знайᲁꙋ́етсѧ Богосло́вїѧ, пока́ꙁꙋетъ тежъ то є҆ᲁиноста́йный и҆ непрерва́ный хꙋ́ᲁостїю ча́сѡвъ звы́чай ѿправова́нѧ и҆ зажива́нѧ Божестве́нныхъ ᲃеᲁмѝ Та́инъ Церко́вныхъ, веᲁлꙋ́гъ чи́нꙋ и҆ порѧ́ᲁкꙋ Це́ркви Ст҃о́й Всхо́ᲁнеи Ма́тки на́шеи, кото́раѧ ꙗ҆́кїй принѧла̀ звы́чай ѿ Ха҃ Па́на, А҆пⷭ҇лѡвъ ᲃт҃ы́хъ, Вселе́нскихъ и҆ помѣ́стныхъ Собо́рѡвъ, тако́вый ла́скою Бж҃їею, и҆ до нн҃ѣ ѡ҆ ли́чвѣ Та́инъ Божестве́нныхъ, ѡ҆ дѣйствїю и҆ ᲂу҆жива́ню ѡ҆́ныхъ съᲁе́ржитъ, и҆ крѣ́пко храни́тъ: неха́й хто хо́четъ зно́ситъ Гре́цкїи Рꙋкописа́ныи Еѵхолꙍ́гїѧ, и҆ на́ши Рꙋ́скїи, зна́йᲁетъ неѡмы́лне въ ѡ҆́ныхъ, є҆ᲁинои́стнꙋю зго́ᲁꙋ, ѡ҆ дѣ́йствїю и҆ ᲂу҆жива́ню Божестве́нныхъ ᲃеᲁмѝ Та́инъ Црк҃о́вныхъ, а҆ гᲁы хто зъ загнѣва́ныхъ проти́вникѡвъ несогла́сїе ꙗ҆ко́е съ Тре́бникѡвъ въ Лво́вѣ въ Стрѧ́тинѣ въ Ѻ҆строгꙋ̀ и҆ Ви́лнѣ дрꙋкова́ныхъ захо́четъ проᲁꙋкова́ти; тако́вомꙋ ѿповѣᲁь сна́ᲁнаѧ поᲁае́тсѧ, и҆́жъ є҆слѝ сꙋ́тъ ꙗ҆ко́вые погрѣше́нїѧ, а҆́лбѡ по́мылки въ ты́хъ Тре́бникахъ, ты́е ᲃп҃се́нїю на́шомꙋ нѣчо́го нешко́ᲁѧтъ, понева́жъ Ли́чбы, Мо́ци, Мате́рїи, Фꙍ́рмы, и҆ ᲃкꙋ́ткѡвъ ᲃт҃ы́хъ Та́инъ неꙁно́сѧтъ, а҆́ле нѣ́щось ѡ҆ ѡ҆ᲁправова́ню церемонѣа́лномъ не согласꙋ́ютъ, держачи́сѧ снать въ то́мъ свои́хъ ᲃта́рыхъ звыча́евъ. Лечъ ла́цнѡ ᲃтары́и звыча́и ве́ᲁлꙋгъ но́выхъ напростова́ти, но́выи зась и҆ неслыха́ныи вы́мыслы въ ѡдправова́ню Та́инъ Божестве́нныхъ въ Це́рковъ ᲃт҃ꙋ́ю въпроважа́ти, дерꙁнове́нїе є҆́стъ А҆наѳе́мѣ поᲁлѣга́ючїе. До тогѡ̀ по́мылки въ ты́хъ Тре́бникахъ предрече́нныхъ вы́никнꙋли, ча́стю ᲃъпростоты̀ и҆ нероꙁсꙋ́ᲁкꙋ Корре́кторѡвъ, ча́стю те́жъ зъ неѡсторо́жности Пи́сарѡвъ, а҆ ѡ҆собли́ве поднебы́тность Па́стырѡвъ Правосла́вныхъ въ Це́ркви Рꙋ́ской, въ кото́рый ча́съ ты́и кото́рыи тако́вые Кни́ги ценсꙋрова́ти, и҆ ѡ҆́ные на свѣ́тъ выᲁава́ти ва́жилисѧ, не мно́гѡ вѣ́ᲁомости ѡ҆́коло тако́выхъ ре́чїй мѣ́ли, и҆ ма́ло ᲂу҆важа́ли що́бы въ Сакраме́нтахъ Мате́рїею а҆́лбѡ Фꙍ́рмою было̀, постерѣга́ючи ба́рꙁѣй пожи́ткꙋ свое́гѡ: длѧ то́гѡ мно́гѡ ре́чїй потре́бныхъ ѡ҆пꙋсти́ли, а҆ непотрѐбныхъ приᲁалѝ. На о҆́ко то ѡ҆ба́чишъ Чите́лникꙋ ѡ҆сщ҃е́нний, гᲁы спо́йꙁришъ, въ Ви́ленскїе и҆ Ѻ҆стро́ꙁкїе Тре́бники, въ кото́рыхъ въ Сакраме́нтѣ, а҆́лбѡ Та́йнѣ Е҆леѡсщ҃енїѧ, мѣ́сто Фꙍ́рмы вла́снои, а҆́лбѡ ᲃоверше́нїѧ кото́рое Тре́бникъ Гре́цкїй въ собѣ̀ ма́етъ: поло́жено вѣ́ршъ тре́тїй ѱа́лмꙋ ѳ҃і-гѡ: Ꙋ҆слы́ши тѧ̀ Гᲁⷭ҇ь въ де́нь печа́ли, защитѝ тѧ̀ и҆мѧ̀ Бг҃а І҆а́кꙍвлѧ. Фꙍ́рмꙋ зась вла́снꙋю а҆́лбѡ соверше́нїе, по всѣ́хъ помаꙁова́нѧхъ на ѡ҆ста́ткꙋ, мѣстопро́стои Моли́твы поло́жено: въ чо́мъ сѧ ба́рꙁо пано́ве ты́и ценсꙋ́рове помыли́ли, понева́жъ вѣ́ршъ то́й зъ ѱа́лмꙋ мо́ци тое́и нема́етъ, кото́рꙋю Фꙍ́рма въ собѣ̀ соᲁе́ржитъ, а҆́ле є҆́стъ ты́лко ꙗ҆ко́вымсь потѣше́нїемъ хо́рогѡ. въ Сакраме́нтѣ Малже́нства, а҆́лбѡ въ ѡ҆ᲁправоба́ню Вѣнча́нїѧ ᲃлѡ́въ шаю́бныхъ въ кото́рыхъ зеꙁволе́не ѡ҆бои́хъ ѡ҆со́бъ, (кото́рое є҆́стъ Фꙍ́рмою) выража́етсѧ, въ ты́хъ же Тре́бникахъ не поло́жено: зачи́мъ ро́ꙁныи и҆ ди́вныи пыта́нѧ быва́ютъ ѿ ᲃщ҃енникѡвъ, а҆ подъча́съ жа́ᲁногѡ пыта́нѧ нечи́нѧчи ѡ҆ шлюбова́ню, Моли́твы ты́лкѡ щегꙋ́лные надъ встꙋпꙋ́ючими въ Малже́нство чита́ютъ. Ме́ншихъ ѡ҆мы́лѡкъ ѡ҆́коло ѡ҆дправова́нѧ Та́инъ Бжⷭ҇тве́нныхъ, въ ты́хъже Тре́бникахъ не спомина́ю. Припо́мню ты́лко приᲁа́тки нѣ́которыи ба́рꙁо непотре́бныи, ме́жи кото́рыми неме́ншїй ᲃпогорше́нъемъ вѣ́рныхъ пра́вᲁѣ Е҆ѵⷢ҇лской спротивлѧ́ючїйсѧ є҆́стъ въ Моли́твѣ, кото́раѧ быва́етъ по пороже́ню чита́наѧ Ба́бѣ, и҆ ты́мъ кото́рыи при пороже́ню послꙋгова́ли, ѡ҆́выи слова̀, (И҆ ба́бою пови́тый гᲁы́жъ ᲃп҃си́тель на́шъ нароᲁи́вшисѧ нѣ ѿ кого̀ и҆́ншогѡ пови́тый бы́лъ, ты́лкѡ ѡ҆́дъ само́и Пречⷭ҇тои Па́нны, а҆ ба́ба та́мъ що мѣ́ла чини́ти; понева́жъ ѡ҆ не́й жа́ᲁнои змѣ́нки Е҆ѵⷢ҇ли́сты ᲃт҃ы́е нечи́нѧтъ, ѡ҆пи́сꙋючи Ржⷭ҇тво̀ Ха҃ Па́на: гᲁе ты́лко спомина́ютъ ѡ҆ І҆ꙍ́сифѣ Ѻ҆брꙋ́чницѣ, Пребл҃гослове́нной Па́ннѣ, Ѻ҆троча́ти І҆и҃ᲃ Хрⷭ҇тѣ̀, А҆гг҃лахъ и҆ Па́стырехъ: а҆ ба́ба ѡ҆́дъ сꙋѐ бы въ Тре́бники влѣ́ꙁла не зна́ю; Неме́ншїй и҆ ѡ҆́вый є҆́стъ непотре́бный приᲁа́токъ въ Тре́бникꙋ Стрѧ́тинскомъ, а҆́лбѡ ра́чей нелѣ́паѧ церемо́нїѧ ѡ҆ причаще́нїи А҆гіѧ́ꙁмою, а҆́бо сто́ю Воᲁо́ю Богоѧвле́нскою, щи́рый то є҆́стъ забобо́нъ, ѡ҆ кото́ромъ въ Гре́цкихъ Тре́бникахъ жа́ᲁкои змѣ́нки нѣма́шъ, въ Це́ркви бовѣ́мъ ᲃт҃о́й Восто́чной, є҆ᲁино̀ причаще́нїе Тѣ́ла и҆ Кро́ве Сп҃си́телѧ на́шогѡ І҆и҃ᲃ Ха҃, подъ ѡ҆со́бами Хлѣ́ба и҆ Вина̀ бы́ти зна́емо, а҆ причаще́нїе А҆гіа́ꙁмою и҆́стаѧ є҆́стъ непотре́бница, и҆ ста́рый забобо́нъ.

Ма́ешъ те́ᲁы ѡ҆сщ҃е́нный Чите́лникꙋ ᲂу҆бо́гимъ тща́нїемъ, и҆ трꙋ́ᲁомъ смире́нїѧ мое́гѡ, собра́ннꙋю ᲃі́ю Кни́гꙋ вели́це себѣ̀ потре́бнꙋю. Зна́йᲁешъ бовѣ́мъ въ то́й Кни́ѕѣ порѧ́ᲁное ѡ҆дправова́нъе ᲃт҃ы́хъ ᲃе́ᲁмъ Та́инъ Церко́вныхъ, ѡ҆́дъ Ха҃ Пн҃а че́реꙁъ А҆пⷭ҇лѡвъ ᲃт҃ыхъ Це́ркви ᲃт҃о́й Правосла́внокаѳꙍли́ческой поᲁа́ное, зъ Гре́цкихъ Е҆ѵхоло́гій и҆ староᲁа́вныхъ рꙋкопи́саныхъ ᲃлове́нскихъ Тре́бникѡвъ вы́черпленое. Ма́ешъ и҆ достате́чнꙋю наꙋ́кꙋ, что̀ є҆́стъ Та́йна, що за мо́цъ и҆ скꙋ́тки сꙋ́тъ ко́жᲁои Та́йны, зъ ꙗ҆ки́мъ приготова́нъемъ до ѡ҆дправова́нѧ ѡ҆́ныхъ пристꙋпова́ти, зъ ꙗ҆ко́ю ᲂу҆чти́востю и҆ бл҃гоговѣ́нствомъ ѡ҆́ныи ѿправова́ти и҆ вѣ́рнымъ поᲁава́ти, ꙗ҆́къ люᲁъ Бж҃ій ᲂу҆чи́ти, а҆бы̀ до прїймова́нѧ ѡ҆́ныхъ пристꙋпова́ли, и҆ въ ро́ꙁныхъ припа́ᲁкахъ кото́рыибысѧ притрафлѧ́ти моглѝ, ꙗ҆́къ постꙋпова́ти ма́ютъ. Ма́ешъ на ѡ҆ста́токъ въ то́й Кни́ꙁѣ живы́й чи́нъ и҆ порѧ́ᲁокъ, та́къ роꙁмаи́тыхъ ѡ҆сщ҃е́нїй, ꙗ҆́кѡ ты́жъ ро́ꙁныхъ Моли́твъ, и҆ Моле́бнѡвъ ѿправова́нъе.

Ю҆жъ тепе́ръ ѡ҆сщ҃е́нный При́чте, невѣ́ᲁомостю и҆ не ᲂу҆мѣе́тностю вᲁа́ню ᲃпра́вы ѡ҆ ᲃеᲁмѝ Та́йнахъ Церко́вныхъ, и҆ ѡ҆ и҆́ншомъ набоже́нствѣ не ꙁаклаᲁа́йсѧ, понева́жъ въ то́й Кни́ꙁѣ достато́чнꙋю ѡ҆ вси́мъ Церко́вномъ порѧ́ᲁкꙋ ма́ешъ наꙋ́кꙋ. Зна́йᲁешъ ꙗ҆́къ правовѣ́рныхъ ѡ҆ тве́рᲁомъ ᲂу҆пова́нїи ᲃпⷭ҇нїа свое́гѡ потѣ́шити. Зна́йᲁешъ ꙗ҆́къ поносѧ́щимъ и҆ насилствꙋ́ющимъ врагѡ́мъ ви́ᲁимымъ и҆ неви́ᲁимымъ ѡ҆ тве́рᲁости А҆ртикꙋ́лѡвъ Вѣ́ры Правосла́внои ѡ҆дповѣ́ᲁѣти. Зна́йᲁешъ наѡста́токъ є҆ᲁиноꙋтро́бное съгла́сїе, ꙗ҆́къ по всѣ́хъ Црк҃вахъ порѧ́ᲁне и҆ є҆ᲁна́ково Бо́ꙁскїе Тае́мници, преꙁъ кото́рые ꙗ҆́кѡ преꙁънѣѧ́кїе на́чинѧ ᲃт҃ы́е Дх҃а ᲃта́гѡ въ собѣ̀ съᲁержа́чые Ла́скꙋ Бж҃ію всѣ Правовѣ́рные ѡ҆ᲁе́ржꙋемѡ, и҆ дѣ́ᲁичами Цртⷭ҇вїѧ нбⷭ҇ногѡ става́емосѧ, ѡ҆дправова́тисѧ ма́ютъ.

Стара́йжесѧ пи́лнѡ ѡ҆сщ҃е́нный При́чте, та́къ потре́бнꙋю ᲃі́ю Кни́гꙋ ᲃпⷭ҇нїю твое́мꙋ и҆ бли́жнегѡ твое́гѡ набы́ти, памѧта́ючи то́е, и҆́жъ надъ ᲃпⷭ҇нїе дш҃ѝ твое́и нѣчо́гѡ на́ свѣ́тѣ то́мъ миꙁе́рномъ ᲂу҆ тебѣ̀ ма́етъ бы́ти ми́лшогѡ и҆ дорогоцѣннѣ́йшогѡ: веᲁлꙋ́гъ ᲃло́въ ᲃпаси́телевыхъ: Что дасть и҆ꙁмѣ́нꙋ человѣ́къ за дш҃ꙋ̀ свою̀ а҆́ще и҆ ве́съ мі́ръ приѡбрѧ́щетъ; Набы́вши за́се тое́и Кни́ги, и҆́жъ понеха́й зажива́ти непотре́бницъ зъ Тре́бникѡвъ предрече́нныхъ: по́ты бо вѣмъ но́щъ трва́етъ, по́ки ᲃлн҃це не ѡ҆свѣ́титъ землѣ̀, по́ты и҆ тобѣ̀ ѡ҆дправова́нъе непотре́бницъ зъ предрече́нныхъ Тре́бникѡвъ ѿ Бг҃а Всеᲁержи́телѧ въ грѣ́хъ невомѣнѧ́лосѧ; а҆́ле гᲁы̀ ю҆́жъ А҆рхїере́ѵꙵскогѡ смире́нїѧ на́шегѡ пови́нности свѣ́тлостю ты́и похмꙋ́рныи ѡ҆́блаки, невѣ́ᲁомости по́мылокъ и҆ ро́ꙁныхъ непотре́бницъ сꙋ́тъ ѡ҆свѣ́чены, роꙁогна́ны, и҆ ѡдᲁа́лены: не поᲁоба́етъ тобѣ̀ ꙗ҆́къ правᲁи́вомꙋ сы́нꙋ Правосла́вномꙋ прекосло́вити и҆ раꙁсверѣпѣва́ти проти́вно Па́стырꙋ свое́мꙋ и҆ ѿцꙋ̀: памѧта́ючи на то́е, и҆́жъ А҆рхїере́ѵꙵскаѧ Наꙋ́ка, и҆ ᲂу҆помне́нъ ꙗ҆́кѡ ѿ Намѣ́стника Бж҃огѡ ма́етъ бы́ти прїймова́на, веᲁлꙋ́гъ ᲃло́въ Сп҃си́телевыхъ: Прїемлѧ́й васъ, менѐ прїемле́тъ, и҆ прїемлѧ́й менѐ, прїемле́тъ посла́вшагѡ мѧ̀¹⁷. И҆ на и҆́ншомъ мѣ́сцꙋ: Слꙋша́ѧй васъ, менѐ слꙋша́етъ, а҆ ѿмѣта́ѧйсѧ васъ, менѐ ѿмѣта́етсѧ¹⁸. Не ревнꙋ́й, ѡ҆свѧще́нный Чите́лникꙋ, лꙋкавнꙋ́ющимъ, ни завн́ᲁи та́йнѡ прекословѧ́щимъ и҆ съпротивлѧ́ющимсѧ А҆рхїере́ѵꙵской вла́сти на́шой, тако́выи бовѣ́мъ прекосло́вници поᲁобствꙋ́ютъ въ натꙋ́рѣ Крꙋ́кꙋ драпѣ́жномꙋ пта́хꙋ, кото́рый ни во что̀ вомѣни́вши посла́нїе и҆ накаꙁа́нїе Гᲁⷭ҇на свое́гѡ Патрїа́рха ᲃт҃гѡ Нꙍ́ѧ, ѡ҆ста́вилъ Кора́бль, и҆ па́лъ на сте́рвѣ, съ ни́мъ же и҆ ᲂу҆ча́стїе ᲃвоѐ прїѧ́ть. Та́къ и҆ нн҃ѣшные прекосло́вници, скве́рнагѡ ра́ᲁи прибы́тчества свое́гѡ на гла́съ Па́стырскїй смире́нїѧ на́шогѡ, а҆бы̀ беꙁъ и҆справле́нїѧ и҆ блⷭ҇ве́нїѧ на́шогѡ Па́стырскогѡ Кни́гъ Црк҃о́вныхъ, ѡ҆совли́ве Тре́бникѡвъ и҆ Слꙋже́бникѡвъ, въ кото́рыхъ самы́мъ ᲃщ҃е́нникѡмъ наꙋ́ка поᲁае́тсѧ, ꙗ҆́ксѧ ма́ютъ справова́ти въ ᲁѣ́йствїи ѡ҆́коло Бж҃естве́нныхъ Та́инъ, неᲁрꙋкова́ли: ꙗ҆́къ глꙋ́хїи А҆спиᲁы ᲂу҆́ши ᲃвоѝ затыка́ютъ, а҆ ꙗ҆ꙁы́къ на злосло́вїе и҆ꙁъѡщрѧ́ютъ, и҆́мже сꙋ́ᲁитъ Гᲁ҃ь. Неха́й же собѣ̀ прекосло́вници пе́вне то ѡ҆бѣцꙋ́ютъ, и҆́жъ Бг҃ъ всемогꙋ́щїй ѡ҆кри́вᲁꙋ преложо́ныхъ свои́хъ скорѣ́йшимъ кара́нъемъ преᲁварѧ́етъ, а҆нѣ́жли ѡ҆ свою̀ вла́снꙋю, ма́ешъ тогѡ̀ ꙗ҆́сный при́клаᲁъ Чите́лникꙋ ѡ҆свѧще́нный зъ Пи́сма ᲃт҃о́гѡ. А҆а́рꙍнъ бовѣ́мъ ско́рѡ ба́рꙁѡ по выпроваже́ню лю́ᲁꙋ І҆ꙁра́илъскогѡ и҆ꙁъ Є҆гѵ́пта ропта́нїемъ при воᲁѣ̀ похꙋле́нїѧ ѡ҆браꙁи́лъ Гд҃а Бг҃а: а҆ є҆́ᲁнакъ кара́нъе ѡ҆́номꙋ за свою̀ кры́вᲁꙋ Бг҃ъ всемогꙋ́щїй ѡ҆дложи́лъ, а҆́жъ до четырᲁе́сѧтъ лѣ́тъ, ꙗ҆́кѡ свѣ́ᲁчитъ Пи́смо мо́вѧчи¹⁹. И҆ вꙁы́йᲁе А҆а́рꙍнъ жре́цъ на горꙋ̀ Ѻ҆ръ повеле́нїемъ Гᲁⷭ҇ни́мъ, и҆ ᲂу҆мре тꙋ въ м҃ лѣ́тъ и҆ꙁше́ствїа ᲃн҃ѡ́въ І҆ꙁра́илевъ, и҆ꙁъ землѣ̀ Є҆гѵ́петски²⁰. Гᲁы зась Коре́й Даѳа́нъ и҆ А҆вирꙍ́нъ повста́ли на Мꙍѵꙵсе́ѧ и҆ А҆а́рꙍна, ба́рꙁѡ прꙋ́ᲁкѡ Бг҃ъ всемогꙋ́щїй кри́вᲁꙋ Намѣ́стникѡвъ и҆ слꙋ́гъ свои́хъ надъ непокори́выми пожа́ртїемъ землѣ̀ и҆ сни́тїемъ въ А҆ᲁъ живы́хъ зомсти́лъ, ꙗ҆́кѡ свѣ́ᲁчитъ Пи́смѡ: И҆ раꙁсѣ́ᲁісѧ землѧ̀ подъ нога́ми и҆́хъ, и҆ ѿверже́сѧ землѧ̀ и҆ пожрѐ ѧ҆̀, и҆ до́мы и҆́хъ, всѧ̀ лю́ᲁи сꙋ́щаѧ съ Коре́ꙍмъ и҆ скѡ́ты и҆́хъ сниᲁѡ́ша и҆ сі́и, и҆ всѧ̀ є҆ли́кѡ бѧ́ше и҆́хъ, жи́вы въ а҆́ᲁъ, и҆ покры̀ и҆́хъ землѧ̀, и҆ погибо́ша ѿ сре́ᲁы по́лка²¹. Чогѡ̀ ѧ҆̀ не ꙁы́чꙋ нн҃ѣшнимъ прекосло́вникѡмъ, а҆́ле ра́чей ᲂу҆памѧта́нѧ, и҆ при́стѧ въ ра́ꙁꙋмъ и҆́стинный, А҆ ты ѡ҆сщ҃е́нный Чите́лникꙋ прїймѝ съ благодаре́нїемъ тꙋ́ю пра́цꙋ смире́нїѧ на́шого, и҆ присѣᲁѝ тща́телнѡ чте́нїю тое́и Кни́ги на пожи́токъ дш҃еспаси́телный собѣ̀ и҆ бли́жнемꙋ свое́мꙋ: а҆ ѡ҆ смире́нїи на́шемъ Гᲁ҃а Бг҃а мл҃итствꙋ́й прошꙋ̀. Зᲁравствꙋ́й ѡ҆ Гᲁ҃ѣ, и҆ ᲃп҃са́йсѧ.

Поне́же въ Це́ркви Бж҃їей ничто̀ же ᲃт҃ѣ́йшее, и҆ полеꙁнѣ́йшее, ничто́же высоча́йшее и҆лѝ Бжⷭ҇твеннѣ́йшее є҆́стъ, па́че Та́инъ, въ ᲃпⷭ҇нїе ро́ᲁа человѣ́ческагѡ ѿ Хрⷭ҇та̀ Гᲁ҃а ᲂу҆ста́вленыхъ: Сщ҃е́нникъ Парохїѧ́лный, и҆лѝ и҆́нъ къ не́мꙋ же ᲃлꙋже́нїе и҆лѝ дѣ́йствїе си́хъ прислꙋ́шаетъ, въ пе́рвыхъ всегᲁа̀ памѧтствова́ти до́лженъ є҆́стъ, ꙗ҆́кѡ ᲃщ҃е́ннаѧ дѣйствꙋ́етъ; и҆ ꙗ҆́кѡ всегᲁа̀ въ кое́мжᲁѡ вре́менномъ ча́сѣ къ слꙋже́нїю си́цевагѡ ᲃщ҃енноᲁѣ́йствїѧ, гото́ва ᲃебѐ представлѧ́ти до́лженъ є҆́стъ. Сегѡ̀ ᲂу҆́бѡ ра́ᲁи ѡ҆па́снѡ да тщи́тсѧ є҆́же цѣ́лѡ въ доброᲁѣ́телехъ, чⷭ҇то же, треꙁве́ннѡ, и҆ благоче́стнѡ пожи́ти: И҆бѡ и҆ а҆́ще Та́йны ᲃт҃ы́е ѿ нечи́стыхъ ᲃкверни́тисѧ не могꙋ́тъ, ни́же лꙋка́выми и҆ нечести́выми ᲃлꙋжи́телъми, и҆́хъ дѣ́йство запина́етсѧ: Но ᲂу҆́бѡ нечи́стѡ и҆ неᲁосто́йнѣ сі́ѧ дѣйствꙋ́ющїи, въ вѣ́чныѧ ᲃме́рти ка́ꙁнь въпаᲁа́ютъ.

Сщ҃е́нникъ ᲂу҆́бѡ, а҆́ще съвѣ́сть ᲃебѐ въ грѣсѣ̀ ᲃме́ртномъ бы́ти, (є҆́же не бꙋ́ᲁи,) къ дѣ́йствїю Та́инъ, ника́коже пристꙋпи́ти да дерꙁне́тъ, а҆́ще не пе́рвѣе въ ᲃе́рдци свое́мъ поболѣ́етъ, и҆ жалѣ́етъси ѡ҆ се́мъ, и҆ раска́етсѧ: Но ᲂу҆́бѡ, а҆́ще а҆́бїе и҆мѣ́ти тꙋ мо́жетъ И҆сповѣ́ᲁника, и҆ мѣ́сто, и҆ поᲁо́бное вре́мѧ, всѧ́кѡ до́лженъ є҆́стъ и҆сповѣ́стисѧ є҆мꙋ̀, и҆ ѿ не́гѡ раꙁᲁрѣше́нїе прїѧ́ти, и҆ посе́мъ къ съверше́нїю Та́йны пристꙋпи́ти.

На всѧ́къ ча́съ днѧ̀ и҆ но́щи, къ дѣйствова́нїю Та́инъ, І҆ере́ѵꙵ зва́нъ сы́й, беꙁъ всѧ́кагѡ прекосло́вїѧ, всѧ́кѡ ско́рѣе до́лженъ є҆́стъ предста́вити себѣ̀: и҆ꙁрѧ́ᲁнѣе же а҆́ще нꙋ́жᲁа належа́ти бꙋ́ᲁетъ: сі́естъ, Крⷭ҇ти́ти, и҆лѝ и҆сповѣᲁа́ти, и҆лѝ Причасти́ти болна́гѡ, и҆лѝ Є҆леꙍсщ҃е́нїе съверши́ти: И҆ ᲃегѡ̀ ра́ᲁи ча́стѡ лю́ᲁи да нака́жетъ, є҆́же є҆гᲁа̀ приклю́чнтсѧ си́цеваѧ нꙋ́жᲁа, въско́рѣ да приꙁовꙋ́тъ є҆гѡ̀, не вꙁира́юще ни на є҆ᲁи́но вре́мени беꙁъго́ᲁїе, и҆лѝ на и҆́ное кое́либо препѧ́тїе.

І҆ере́ѵꙵ же ᲃа́мъ доне́лиже къ си́цевомꙋ ᲃщ҃енноᲁѣ́йствїю пристꙋ́питъ, а҆́ще вре́мѧ на ᲃі́е и҆́матъ, пре́жᲁе ма́лѡ на моли́твꙋ и҆ раꙁмышле́нїе тое́й Ст҃о́й ве́щи, ю҆́же съверша́ти и҆́матъ да ᲂу҆клони́тсѧ: и҆ въ Тре́бницѣ чи́нъ и҆ ѡ҆брѧ́ᲁы Та́йны ꙗ҆́же дѣйствова́ти и҆́матъ ѡ҆па́снѡ да предꙁри́тъ, прочте́тъ, и҆ знамена́етъ.

Въ ᲃщ҃енноᲁѣ́йствїи же кое́йжᲁѡ Та́йны въ Е҆пітра́хиль и҆ Фелꙍ́нъ І҆ере́еви ѡ҆блачи́тисѧ поᲁоба́етъ, кро́мѣ то́чїю Та́йны покаѧ́нїѧ: сі́естъ, въ И҆сповѣᲁи, ꙗ҆́же по вре́мени и҆ слꙋ́чаю, ѡ҆бы́чаю же и҆ мѣ́стꙋ, и҆́ногᲁаже и҆ кро́мѣ Є҆пітра́хилѧ ᲃъверша́тисѧ мо́жетъ.

Съ собо́ю же І҆ере́ѵꙵ да и҆́матъ дво́хъ, и҆лѝ понѐ є҆ᲁина́гѡ Клѵ́рика въ прислꙋша́ющой є҆мꙋ̀ ѡ҆ᲁе́жᲁѣ, чⷭ҇тнѡ ѡ҆ᲁѣѧ́ннагѡ, чⷭ҇ти ра́ᲁи Та́йны, и҆ по́мощи ра́ᲁи въ ᲃлꙋже́нїи.

Да тщи́тсѧ къ семꙋ̀ І҆ере́ѵꙵ, всѧ̀ Церкѡ́внаѧ ᲂу҆краше́нїѧ, ѡ҆ᲁе́жᲁы ᲃщ҃е́нныѧ, ᲂу҆брꙋ́сы, и҆ съсꙋ́ᲁы ᲃлꙋже́бныѧ цѣ́лы, гла́ᲁки и҆ чи́сты и҆мѣ́ти.

Сі́ю Кни́гꙋ Тре́бникъ зово́мꙋю, всегᲁа̀ къ ᲃъверше́нїю Та́инъ съ собо́ю І҆ере́ѵꙵ да и҆́мать: и҆ всѐ и҆́хъ ᲃлꙋже́нїе и҆ ѡ҆брѧ́ᲁы ꙗ҆́коже въ не́й напи́саны ᲃꙋ́ть, ничто́же прилага́ѧ, и҆ꙁмѣнѧ́ѧ и҆́ли ѡ҆ставлѧ́ѧ порѧ́ᲁꙋ чи́ннѡ да съверши́тъ.

Къ прїе́млющомꙋ, и҆ къ преᲁъстоѧ́щимъ въкра́тцѣ ᲂу҆чи́телное Преᲁосло́вїе да сотво́ритъ, въ не́мже си́лꙋ Та́йны дѣйствꙋ́емыѧ, ᲂу҆потребле́нїе, по́лꙁꙋ, ѡ҆брѧ́ᲁы, и҆ тѣ́хъ знамена́нїе по Цр҃кве ᲃт҃о́й Восто́чной ᲂу҆че́нїю да толкꙋ́етъ и҆ и҆ꙁъѧсни́тъ: и҆ да нака́жетъ и҆́хъ, є҆́же съ всѧ́кимъ, вънима́нїемъ и҆ стра́хомъ Бж҃їимъ, бл҃гочⷭ҇тнѡ стоѧ́ще дѣйствꙋ́емое послꙋша́ютъ, и҆ съ поᲁоба́ющею чⷭ҇тїю и҆ благоговѣ́нїемъ и҆ вѣ́рою да прие́млютъ.

Къ сверше́нїю пристꙋпа́ѧ, дѣйствꙋ́емомꙋ дѣ́лꙋ ѡ҆па́снѡ І҆ере́ѵꙵ да вънима́етъ, ни ѡ҆ чесо́мъ и҆́номъ ничто́же ни съ кѝмъ же глаголѧ̀.

Внегда̀ дѣйствꙋ́етъ Та́йнꙋ кото́рꙋю ли́бѡ, кое́жᲁѡ сло́во кое́й Фо́рмѣ, сі́естъ, съверше́нїю и҆ дѣ́йствїю прислꙋша́ющее, съ всѧ́кимъ внима́нїемъ, раꙁᲁѣ́лнѣ, благоговѣ́инѡ же, и҆ въ ᲂу҆слыша́нїе всѣ́мъ да и҆ꙁъгл҃етъ.

Та́кожᲁе и҆ про́чаѧ моли́твы мл҃е́нїѧ и҆ Є҆кте́нїѧ съ всѧ́кимъ благоговѣ́нїемъ и҆ ѡ҆пасе́нїемъ, ничто́же престꙋпа́ѧ и҆́ли борꙁѧ́сѧ да чте́тъ. На па́мѧть же нико́лиже преткнове́нїѧ ра́ᲁи, ничто́же да дѣйствꙋ́етъ, но всѐ зъ Кни́гъ да чте́тъ, и҆ всѐ ᲃи́це да дѣйствꙋ́етъ, въ є҆́же предстоѧ́щихъ ᲂу҆́мъ къ нбⷭ҇нымъ въꙁᲁвигнꙋ́ти, и҆ съ ѡ҆пасе́нїемъ дѣйствꙋ́емаѧ внима́ти сътво́ритъ.

Въ само́мъ же то́мъ дѣ́йствїи, всѧ́кѡ да тщи́тсѧ І҆ере́ѵꙵ и҆мѣ́ти ᲂу҆́мное намѣре́нїе, и҆́ли во́лю въ себѣ̀ и҆ꙁъѡбраꙁи́телнꙋю: сі́естъ, є҆гᲁа̀ Крⷭ҇ти́тъ, ᲃі́ю во́лю, и҆́ли намѣре́нїе ᲂу҆ма̀ свое́гѡ да и҆́матъ, є҆́же чре́ꙁъ Кр҃ще́нїе, и҆́ли погрꙋже́нїе въ воᲁѣ̀, въкꙋ́пѣ съ и҆ꙁрече́нїемъ ᲃлове́съ, Кр҃ща́етсѧ ра́бъ Бж҃ій, И҆мⷬ҇къ: въ И҆мѧ̀ Ѿца̀, и҆ Сн҃а, и҆ Ст҃гѡ Дх҃а, Кр҃ща́емомꙋ ѿ грѣха̀ Прароᲁи́телнагѡ, и҆ ѿ всѣ́хъ грѣхѡ́въ, ᲃи́це ѿ вины̀ ꙗ҆́коже и҆ ѿ ка́ꙁни свобоᲁи́тисѧ и҆ ѡ҆чи́стити, и҆ ѿ ᲃы́на поги́бели и҆ гнѣ́ва, ᲃн҃ꙋ благода́ти, и҆ наслѣ́ᲁникꙋ нбⷭ҇нагѡ Ца́рствїѧ бы́ти.

Е҆гᲁа́ же Мѵ́рꙍмъ пома́ꙁꙋетъ, да помаꙁа́нїемъ и҆ и҆ꙁрече́нїемъ ᲃлове́съ, печа́ть да́ра Ст҃гѡ Дх҃а. А҆ми́нь: Прїемлю́щомꙋ ᲃі́ю Та́йну да́на бꙋ́ᲁетъ благоᲁа́ть Ст҃гѡ Дх҃а къ ᲂу҆твержᲁе́нїю вѣ́ры, и҆ въ доброᲁѣ́телехъ преспѣѧ́нїю, и҆ є҆́же съ ᲁерꙁнове́нїемъ И҆мѧ̀ Гᲁ҃а І҆и҃ᲃ Ха҃ и҆сповѣᲁа́ти, и҆ мꙋжестве́ннѣ съпроти́витисѧ дїа́волꙋ, тѣ́лꙋ, и҆ мі́рови.

Въ соверше́нїи же Та́йны Тѣ́ла и҆ Крвѐ Хв҃ой, є҆́же хле́бꙋ на Прⷭ҇тлѣ иа Ди́скосѣ ᲃꙋ́щомꙋ, словесы̀ Хв҃ыми, сі́естъ: Прїймѣ́те, ꙗ҆ᲁи́те, ᲃі́е є҆́стъ тѣ́ло моѐ, и҆ про́чаѧ: Дѣ́йствомъ ᲃт҃гѡ Дх҃а, въ Тѣ́ло Ха҃ Бг҃а на́шегѡ и҆́стиннѡ претвори́тисѧ: Винꙋ̀ же въ Ча́ши на Прⷭ҇тлѣ сꙋ́щомꙋ въ Кро́въ Ха҃ Бг҃а на́шегѡ. ᲃловесы̀ є҆гѡ̀, сі́естъ: Пе́йте ѿ не́ѧ всѝ, сі́ѧ є҆́стъ Кро́въ моѧ̀ и҆ прочаѧ: Дѣ́йствомъ ᲃт҃гѡ Дх҃а, и҆́стиннѡ претвори́тисѧ.

Въ тайнѣ же покаѧ́нїѧ, є҆́же всѧ̀ грѣхѝ своѧ̀ жа́лостїю и҆ съкрꙋше́нїемъ ᲃе́рдца и҆сповѣᲁа́ѧ, предложе́нїе є҆́же въпре́днѧѧ ᲂу҆клони́тисѧ ѿ грѣхѡ́въ и҆мѣ́ѧ, и҆ ѡ҆ сътворе́нныхъ ка́ѧтисѧ: ᲃловесы̀ раꙁрѣша́телными ᲃі́е є҆́стъ: и҆ А҆ꙁъ проща́ю и҆ раꙁрѣша́ю тѧ̀ Имⷬ҇къ: и҆ про́чаѧ: Вла́стїю ѿ Ха҃ І҆ере́ꙍмъ да́нною, да бꙋ́ᲁетъ ѿ грѣхѡ́въ раꙁᲁрѣше́ный ꙗ҆́коже зᲁѐ на землѝ, ᲃи́це и҆ на нб҃сѝ, и҆ благода́ть Бж҃аѧ ю҆́же грѣхѡ́мъ погꙋбѝ, да привраще́нна є҆мꙋ̀ бꙋ́ᲁетъ.

Въ та́йнѣ же Сꙋпрꙋ́жества, и҆лѝ за́коннагѡ бра́ка, є҆гᲁа̀ вѣнча́етъ новобра́чныхъ, є҆́же пое́млющимсѧ въ ᲃꙋпрꙋ́жество, чре́ꙁъ и҆́хъ ᲃловеса̀ и҆ꙁъбраꙁꙋ́ющїѧ и҆́хъ съиꙁволе́нїе пре́дъ І҆ере́ꙍмъ и҆ꙁрече́нныѧ, блⷭ҇ве́нїемъ же І҆ере́ѵꙵскимъ ᲂу҆твержᲁе́нное, да́на бꙋ́ᲁетъ Дх҃а Ст҃гѡ благода́ть: къ ᲂу҆множе́нїю, и҆ благоче́стомꙋ въспита́нїю ча́ᲁъ въ ᲃла́вꙋ Бж҃їю, и҆ къ ми́рномꙋ въ любвѐ съгла́сїю, и҆ доброᲁѣ́телномꙋ съжи́тїю, и҆ поᲁоба́ющей дрꙋ́гъ дрꙋ́гꙋ по́мощи и҆ ᲂу҆слꙋженїю, и҆ є҆́же ѿшаѧва́тисѧ и҆ꙁли́шества пло́тскихъ по́хотїй.

Въ Є҆леꙍпомаꙁа́нїи же, є҆́же прїемлю́щомꙋ, помаꙁа́нїемъ ᲃт҃гѡ Е҆ле́а, въкꙋ́пѣ съ моли́твою Та́йнꙋ съверша́ющою, сі́естъ: Ѿче Ст҃ы́й вра́чꙋ дш҃а́мъ и҆ тѣлꙍ́мъ, и҆ проч.: Прїѧ́ти ѡ҆ставле́нїе ѡ҆ста́нкѡвъ грѣхѡ́вныхъ, ꙗ҆́же забве́нїѧ ра́ᲁи, и҆лѝ множестве́ннагѡ числа̀, невъꙁмо́же и҆сповѣᲁа́ти: и҆ є҆́же съ дш҃е́внымъ и҆ тѣле́сное, а҆́ще млⷭ҇рᲁїе Бж҃їе и҆ꙁво́литъ, зᲁра́вїе полꙋчи́ти є҆мꙋ̀.

А҆щеже си́цевое ᲂу҆́мное и҆ꙁъѡбраꙁи́телное намѣре́нїе и҆лѝ во́лѧ, бы́ти не мо́жетъ, понѐ си́цеваѧ да бꙋ́ᲁетъ: Ꙗ҆́кѡ хо́щетъ съверша́ти Та́йнꙋ ᲃі́ю ᲃт҃ꙋ́ю, ᲃи́це, и҆ въ си́цевый коне́цъ ꙗ҆́коже Це́рковъ ᲃт҃а́ѧ съверша́етъ, ꙗ҆́кѡ слꙋжи́тель Церко́вный. И҆́бѡ а҆́ще си́цевой понѐ и҆мѣ́ти не бꙋ́ᲁетъ во́ли, ꙗ҆́коже нарꙋга́нїе нѣ́кое, и҆́ли и҆́грꙋ, и҆́ли про́стое нѣ́кое дѣ́ло дѣйствова́ти бꙋ́ᲁетъ: и҆ сегѡ̀ ра́ᲁи не то́чїю Та́йнꙋ не съверши́тъ, но и҆ са́мъ тѧ́жкѡ сме́ртнѡ съгрѣ́шитъ, и҆ прїемлѧ́й ничто́же прі́йметъ.

Да блюᲁе́тсѧ І҆ере́ѵꙵ ѡ҆па́снѡ, є҆́же дѣйствова́нїѧ ра́ᲁи ᲃт҃ы́хъ Та́инъ ничто́же нико́лиже ника́коже и҆стѧꙁа́ти и҆лѝ проси́ти ни́же и҆ꙁъѡбраꙁи́телнѣ, и҆́ли кои́мъ ли́бѡ ѡ҆́браꙁомъ съкрове́ннымъ, но тꙋнѐ сі́ѧ да дѣйствꙋ́етъ: И҆ ѿ всѧ́коѧ ᲃимо́нїи и҆лѝ ла́комства, всѧ́кѡ не то́чїю дѣ́ломъ, но и҆ помышле́нїемъ да ѿᲁа́литъ себѣ̀.

А҆щеже кто̀ ѿ вѣ́рныхъ млⷭ҇тынѣ мѣ́стѡ, и҆́ли ѿ благоговѣ́нства, по ᲃъверше́нїю Та́йны и҆ꙁво́литъ ѿ свое́гѡ си проиꙁволе́нїѧ нѣ́что да́ти, ᲃі́е по ѡ҆бы́чаю мѣ́ста да вꙁе́млетъ: но ᲂу҆́бѡ и҆ ᲃі́е Є҆пⷭ҇кпскомꙋ раꙁсꙋжᲁе́нїю да поᲁле́житъ.

Вѣ́стнѡ ти бꙋ́ᲁи ѽ І҆ере́ю, ꙗ҆́кѡ въ то́й Кни́ꙁѣ Послѣᲁова́нїе, ѡ҆брѧ́ᲁы, и҆ Чи́нъ пѧтѝ то́чїю Та́инъ, сі́естъ Креще́нїѧ, Мѵ́ра ᲃт҃гѡ ѿ Є҆пⷭ҇кпа ѡ҆сщ҃е́ннагѡ, само́е то́чїю приста́вство, и҆́ли шафова́нїе, Тѣ́ла и҆ Крвѐ Гᲁⷭ҇неи, Покаѧ́нїѧ, и҆́ли И҆сповѣ́дъ, Сꙋпрꙋ́жества, и҆́ли Вѣнча́нїѧ, и҆ Є҆леꙍсщ҃е́нїѧ, ᲃегѡ̀ ра́ᲁи и҆спи́саны сꙋ́ть, ꙗ҆́кѡ ᲃи́хъ Послѣᲁова́нїе, ᲃвойстве́ннѣ Парохїѧ́лнымъ ᲃщ҃е́нникѡмъ прислꙋ́шаетъ: Ѽсщ҃енїѧ же Мѵ́ра ᲃт҃гѡ, и҆ Хирото́нїѧ, сі́естъ Рꙋкоположе́нїѧ, и҆́ли Чи́на Послѣᲁова́нїе, поне́же свойстве́нна сꙋ́ть, и҆ къ съверше́нїю само́мꙋ то́чїю Є҆пⷭ҇кпꙋ прислꙋ́шаютъ, послѣᲁова́нїе, ѡ҆брѧ́ᲁы, и҆ чи́нъ сво́й и҆спи́саный въ Є҆пⷭ҇кпскомъ и҆мꙋ́тъ Тре́бницѣ.

Ст҃о́е Креще́нїе є҆́стъ Хрⷭ҇тїа́нскагѡ благочестїѧ и҆ вѣ́чнагѡ живота̀ две́ръ, ме́жᲁꙋ ᲃеᲁмѝ но́выѧ благѡᲁа́ти Та́йнами ѿ Ха҃ Бг҃а ᲂу҆ста́вленными, пе́рвое съᲁержи́тъ мѣ́сто: всѣ́мъ къ ᲃп҃се́нїю потре́бное бы́ти, ᲃа́мъ Сп҃си́тель на́шъ свѣᲁителствꙋ́етъ гл҃ѧ̀: А҆ще кто̀ не ро́ᲁитсѧ воᲁо́ю и҆ Дх҃омъ ие мо́жетъ вънїйтѝ въ Ца́рствїе Бж҃їе: Сегѡ̀ ра́ᲁи найбо́лшее тща́нїе, къ є҆́же вре́меннѡ и҆ чи́ннѡ съверша́тисѧ и҆ прїѧ́то бы́ти твори́ти поᲁоба́етъ.

Поне́же ᲂу҆́бѡ къ поᲁаѧ́нїю ᲃеѧ̀ ᲃт҃ы́ѧ Та́йны, нѣ́кїѧ ве́щи ѿ Бж҃їагѡ Законоположе́нїѧ сꙋ́ть всѧ́кѡ потре́бны, ꙗ҆́кѡ Мате́рїѧ, сі́естъ, ве́щъ: Фо́рма, сі́естъ, ѡ҆́браꙁъ, и҆лѝ съверше́нїе, и҆ слꙋжи́тель: Про́чаѧ же къ чⷭ҇тномꙋ и҆ благолѣ́пномꙋ є҆ѧ̀ Послѣᲁова́нїю прислꙋша́ютъ, ꙗ҆́коже ѡ҆брѧ́ᲁы и҆ Церїмѡ́нїе, ꙗ҆́же ѿ А҆пⷭ҇лскагѡ ѕѣ́лѡ дре́внѧгѡ преᲁа́нїѧ прїѧ́ты, ᲂу҆твержᲁе́ны и҆ ᲂу҆потребле́ни ѿ Це́ркве сꙋ́ть, и҆́хъ же ѡ҆ставлѧ́ти кро́мѣ вели́кїѧ нꙋ́жᲁы, ника́ко же досто́итъ: Ѽ҆ ни́хъ же нѣ́чтѡ къ и҆ꙁвѣще́нїю и҆ ѡ҆бꙋче́нїю І҆ере́ѡмъ зᲁѐ поло́житсѧ, ꙗ҆́кѡ да ᲃт҃о́е ᲃі́е слꙋже́нїе, чи́ннѡ и҆ ᲃт҃олѣ́пнѡ дѣйствова́ннѡ и҆ съверше́ннѡ бꙋ́ᲁетъ.

Въ пе́рвыхъ да вѣ́ста Парохїѧ́лный Сщ҃е́нникъ, ꙗ҆́кѡ поне́же сею̀ ᲃт҃о́ю Та́йны ве́щъ є҆́стъ воᲁа̀ сама́ѧ є҆стестве́ннаѧ, никако́вое коели́бѡ и҆́ное пи́тїе, и҆лѝ вла́га ка́ѧ ли́бѡ, и҆лѝ благоꙋха́ннаѧ препа́ленаѧ во́ᲁка, къ съверше́нїю є҆ѧ̀ прили́чна ника́коже нико́лиже бы́ти мо́жетъ.

Воᲁа̀ же, къ Креще́нїю прислꙋша́ющаѧ, да бꙋ́ᲁетъ свѣ́жа чи́ста, и҆ въ чи́стомъ съсꙋ́ᲁѣ, сі́естъ, Крести́лницѣ, ѡ҆бы́чнѡ по ѡ҆глаше́нїи а҆́бїе ѡ҆сщ҃е́нна, ꙗ҆́коже на свое́мъ мѣ́стѣ, се́ѧ Кни́га въ себѣ̀ съᲁе́ржитъ. А҆ще же Ѽ҆троча̀ бо́лнѡ бꙋ́ᲁетъ бѣ́ᲁы ра́ᲁи ᲃме́ртныа и҆ про́стою Кре́щено бы́ти мо́жетъ: Се́же то́чїю въ бѣᲁѣ̀ ᲃме́ртной да быва́етъ: Не сꙋ́щей же ᲃме́ртной бѣᲁѣ̀, ника́ко же поᲁъ ᲃме́ртнымъ грѣхѡ́мъ твори́ти кто̀ да дерꙁне́тъ.

Зимѣ̀ сꙋ́щей бѣᲁы̀ ра́ᲁи не́ᲁꙋга, въ чи́стомъ съсꙋ́ᲁѣ да съгрѣ́етсѧ воᲁа̀ и҆ вълѣѧ́на бы́вши въ Крестѣ́лницꙋ, да ѡ҆ст҃и́тсѧ, и҆ те́плою ѡ҆бы́чнѡ, да Креще́нѡ бꙋ́ᲁетъ ѡ҆троча̀.

Ко́йжᲁѡ Парохїѧ́лный Сщ҃енникъ, въ свое́и Це́ркви, Крести́лницꙋ чⷭ҇тнѡ и҆ благоѡ́браꙁнѡ, и҆лѝ ѿ дре́ва и҆лѝ ѿ и҆́ноѧ кое́ѧ въ себѣ̀ во́ᲁꙋ съᲁержа́щїѧ ве́щи съста́вленꙋю, всегᲁа̀ покрове́ннꙋ и҆ чⷭ҇тꙋ, къ є҆́же въ не́й ѡ҆ст҃и́ти къ съверше́нїю Та́йнѣ Креще́нїѧ во́ᲁꙋ до́лженъ є҆́стъ и҆мѣ́ти: и҆ сі́ѧ къ и҆́номꙋ дѣ́лꙋ ника́коже, нико́лиже, подъ ᲃме́ртнымъ грѣхо́мъ ᲂу҆потребле́на да бꙋ́ᲁетъ, то́чїю къ ᲃамо́мꙋ Креще́нїю.

Въ кое́йжᲁо Це́ркви, и҆лѝ, кꙋтѣ̀ Церко́вномъ, и҆лѝ въ Ѻ҆́лтарѣ, и҆лѝ и҆ꙁъвнѣ̀ Це́ркве, подъ стѣно́ю да бꙋ́ᲁетъ мѣ́сто нога́ми непопира́емо и҆скопа́но, всегᲁа̀ покрове́нное, въ є́же по Креще́нїи ᲃщ҃е́ннꙋю и҆ꙁлѣѧти вънѐ во́ᲁꙋ: и҆лѝ въ ᲂу҆мыва́лницꙋ, и҆ᲁе́же Їере́ѵꙵ рꙋ́цѣ и҆ꙁмыва́етъ а҆́ще въмѣсти́тисѧ мо́жетъ да и҆ꙁли́етсѧ. А҆ще бо на непоᲁо́бномъ мѣ́стѣ и҆ꙁълѣ́етсѧ, и҆лѝ и҆ᲁе́же попра́нѡ бы́ти мо́жетъ, ᲃщ҃никъ ꙗ҆́кѡ ᲃщ҃е́нной ве́щи ᲂу҆ничижи́тса, сме́ртнѡ съгрѣши́тъ.

Поне́же Креще́нїѧ ᲃт҃а́гѡ съверше́нїе, и҆лѝ Фо́рма, си́ми словесы̀ иꙁѡбраже́на: креща́етсѧ ра́бъ бж҃їй: Имⷬ҇къ: въ и҆мѧ̀ Ѿца̀. А҆ми́нь: и҆ Сн҃а. А҆ми́нь: и҆ Ст҃гѡ Дх҃а̀. А҆ми́нь: нн҃ѣ и҆ при́снѡ и҆ въ вѣ́ки вѣкѡ́въ. А҆ми́нь. Всѧ́кѡ потре́бна є҆́стъ, (и҆́бѡ кро́мѣ ᲃеѧ̀ Та́йна съверши́тисѧ не мо́жетъ,) Сего́же ра́ди премѣнѧ́ти ю҆̀ ника́коже досто́итъ: Но та́ѧжде ᲃловеса̀, є҆ᲁи́нагѡ и҆ того́жᲁе вре́мене, є҆гᲁа̀ погрꙋже́нїе быва́етъ, и҆ꙁре́чены бы́ти и҆́мꙋтъ: сі́естъ, пе́рвѣе погрꙋжа́ѧ, кꙋ́пнѡ съ погрꙋже́нїемъ, сі́ѧ ᲃловеса̀ до́лженъ є҆́стъ гл҃а́ти: креща́етсѧ ра́бъ бж҃їй: Имⷬ҇къ: въ и҆мѧ̀ Ѿца̀. А҆ми́нь: Вто́рое погрꙋжа́ѧ, сі́ѧ да гл҃етъ: и҆ Сн҃а. А҆ми́нь: Трети́цею погрꙋжа́ѧ, сі́ѧ да гл҃етъ: и҆ Ст҃гѡ Дх҃а. А҆ми́нь: нн҃ѣ и҆ при́снѡ и҆ въ вѣ́ки вѣкѡ́въ. А҆ми́нь.

Поне́же Креще́нїе ᲃт҃о́е ника́коже повторѧ́тисѧ мо́жетъ, а҆́ще когѡ̀ подъ конъᲁи́цїею Крести́ти нꙋ́жᲁа бꙋ́ᲁетъ: Конъᲁи́цїѧ же ᲃі́ѧ, си́цевымъ ѡ҆́браꙁомъ ᲂу҆раꙁꙋмѣ́тисѧ и҆́матъ: а҆ще нѣ́сть креще́нъ, креща́етсѧ ра́бъ бо́жий: Имⷬ҇къ: въ и҆мѧ̀ Ѿца̀, и҆ проч.

Сі́ю же Конъᲁицїѡна́лнꙋю Фо́рмꙋ, не ве́ꙁᲁе, ни́же всегᲁа̀, и҆́ли нераꙁсꙋ́ᲁнѣ, ᲂу҆потреблѧ́ти досто́итъ, но съ ве́лїимъ раꙁсꙋжᲁе́нїемъ, и҆ та́мѡ и҆ᲁе́же ѡ҆па́снѡ ѡ҆ се́мъ и҆стѧꙁа́ное и҆ и҆ꙁвѣще́нное бꙋ́ᲁетъ неᲁоꙋмѣ́нное, ꙗ҆́кѡ о҆троча̀ бы́сть, и҆́ли не бы́сть Кре́щеннѡ.

Креще́нїе ᲃт҃о́е, ꙗ҆́коже погрꙋже́нїемъ всегѡ̀ въ водѣ̀, ᲃи́це и҆ ѡ҆блѣѧ́нїемъ воᲁо́ю ѿ ве́рхꙋ гла́вы, чре́ꙁъ всѐ тѣ́лѡ ᲃъверше́ннѡ быва́етъ: Но ᲂу҆́бѡ каѧ́жᲁа Це́ркѡвъ, и҆́ли пе́рвый, и҆́ли вто́рый Креще́нїѧ ѡ҆́браꙁъ, ꙗ҆́коже ѿ дре́вныхъ вре́менъ съᲁержа́ти ѡ҆бы́че, да съᲁержи́тъ: То́чїю ᲃі́е ѡ҆па́снѡ да храни́тъ, є҆́же три́жᲁы погрꙋжа́ти, и҆́ли три́жᲁы ѡ҆блѣѧ́ти Креща́емагѡ, кꙋ́пнѡ съ и҆ꙁрече́нїемъ ᲃлове́съ съверше́нїѧ, повы́шъ положе́нномꙋ ᲂу҆ка́ꙁꙋ.

Свойстве́ннѡ нале́жный слꙋжи́тель Та́йны ᲃт҃гѡ Креще́нїѧ є҆́стъ Сщ҃е́никъ, и҆ꙁрѧ́ᲁнѣе же Парохїа́лный: Но ᲂу҆́бѡ є҆ли́жды а҆́ще ѻ҆троча̀, и҆́ли и҆ въꙁра́стъ и҆мы́й не Креще́нный, въ бѣᲁѣ̀ ᲃме́ртной бꙋ́ᲁетъ, мо́жетъ кро́мѣ ѡ҆бы́чнагѡ ѡ҆бхожᲁе́нїѧ, ѿ коего́ждѡ хрⷭ҇тїа́нина Креще́нъ бы́ти, како́вѣмъ ли́бѡ бꙋ́ᲁи ꙗ҆ꙁы́комъ, и҆́ли ѿ Кли́рика, и҆́ли ѿ про́стагѡ люᲁи́на, а҆́ще и҆ ѿлꙋче́ннагѡ, и҆́ли въ запрѣще́нїи, и҆́ли въ клѧ́твѣ сꙋ́щагѡ, и҆ ѿ мꙋ́жескагѡ по́лꙋ, и҆ ѿ же́нскагѡ, то́чїю да бꙋ́ᲁетъ Мате́рїѧ, и҆́ли ве́щъ, сі́естъ воᲁа̀ про́стаѧ є҆стестве́ннаѧ, въ є҆́же тое́ю полѣѧ́ти три́жᲁы въкꙋ́пѣ съ и҆ꙁрече́нїемъ ᲃлове́съ Фо́рмы, и҆́ли съверше́нїѧ: сі́естъ: креща́етсѧ ра́бъ бж҃їи И҆мⷬ҇къ: въ и҆мѧ̀ Ѿца̀, и҆ проч.: и҆ ᲂу҆́мное намѣре́нїе Це́ркве Правосла́внѡ Каѳꙍли́ческїѧ. Но ᲂу҆́бѡ а҆́ще та́мѡ бꙋ́ᲁетъ ᲃщ҃енникъ, ѡ҆́нъ да Крести́тъ, А҆ не Дїа́конъ: А҆ще же Дїа́конъ, ѡ҆́нъ А҆ не И҆поᲁїа́конъ: А҆ще же ко́й либѡ бꙋᲁѝ ѿ Кли́рикъ, ѡ҆́нъ А҆ не просте́цъ: А҆ще мꙋ́жъ ѡ҆́нъ, А҆ не жена̀: Ра́ꙁвѣ то́чїю стꙋ́ᲁа ра́ᲁи, досто́итъ женѣ̀ па́че, неже́ли мꙋ́жꙋ Крести́ти млаᲁенца, и҆ꙁрѧ́ᲁнѣе же, є҆гᲁа̀ є҆щѐ не ᲂу҆жъ и҆ꙁы́йᲁе ве́съ и҆́ꙁъ ложе́снъ мт҃рныхъ, и҆́ли а҆́ще жена̀ лꙋ́чше ᲂу҆мѣ́ти бꙋ́ᲁетъ и҆ꙁрещѝ Фо́рмꙋ Креще́нїѧ, и҆ воᲁо́ю ѡ҆блѣѧ́ти. Тѣ́мже ᲂу҆́бѡ всѧ́кѡ да тщи́тсѧ Парохїа́лный Сщ҃е́нникъ, ꙗ҆́кѡ да́бы хрⷭ҇тїа́не въ Паро́хїю є҆гѡ̀ сꙋ́щїи, и҆ꙁрѧ́днѣе же ба́бы млаᲁе́нцѧ прїемлю́щїѧ, и҆́стинный ѡ҆́браꙁъ Креще́нїѧ и҆ꙁвы́кли, и҆ съᲁе́ржали.

Поᲁоба́етъ же и҆ се вѣ́ᲁати, ꙗ҆́кѡ лꙋ́чше є҆́стъ да про́стымъ люᲁи́номъ съверши́тсѧ Бжⷵве́нное Креще́нїе, неже́ли ᲃщ҃е́нникѡмъ проклѧ́тымъ, и҆лѝ ѿлꙋче́ннымъ, и҆лѝ є҆ретичествꙋ́ющимъ.

Кро́мѣ же нꙋ́жды и҆ слꙋ́чаѧ сме́ртнагѡ, нико́мꙋ же и҆́номꙋ, ника́коже досто́итъ Крести́ти, ра́ꙁвѣ Сщ҃е́нникꙋ Парохїѧ́лномꙋ: А҆ще бо и҆́нъ Сщ҃енникъ кро́мѣ и҆ꙁволе́нїѧ Парохїѧ́лнагѡ Крести́ти (раꙁвѣ̀ нꙋ́жᲁы ᲃме́ртныѧ) дерꙁне́тъ, Пра́вилной винѣ̀ поᲁлежа́ти бꙋ́ᲁетъ, и҆ ᲃме́ртнѡ съгрѣши́тъ.

Ѿц҃ъ, и҆лѝ Мт҃и, своѐ си ѿтроча̀ Крести́ти да не дерꙁне́тъ, поне́же, въ сро́ᲁство дх҃о́вное мꙋ́жъ съ свое́ю жено́ю въ па́ᲁнета: и҆ тогѡ̀ ра́ᲁи всѧ́кѡ ѿ съю́ꙁа сꙋпрꙋ́жнагѡ раꙁвести́сѧ до́лжна бꙋ́ᲁета: въ нꙋ́жᲁѣ же ᲃме́ртной, нико́мꙋ и҆́номꙋ та́мѡ ѡ҆брѣтаю́щꙋсѧ Крести́ти ᲂу҆мѣ́ющꙋ, мо́жетъ ѿц҃ъ, и҆́ли Ма́ти ᲃвоѐ ѿтроча̀ Крести́ти, и҆ тогᲁа̀ то́чїю въ сро́ᲁство дх҃о́вное не въхо́ᲁѧтъ.

Парохїѧ́лный Свѧще́нникъ, до́лженъ є҆́стъ, вре́меннѡ накаꙁова́ти ᲃи́хъ и҆́мже ᲃлꙋже́нїе ᲃі́е прислꙋша́етъ, сі́естъ, Ба́бъ: ꙗ҆́кѡ да млаᲁе́нци ро́ᲁѧщїисѧ, ᲃи́це Креще́нїѧ требꙋ́ющїи, ꙗ҆́коже и҆ въ нꙋ́жᲁѣ ѿ просте́цъ ѡ҆ Креще́ннїи въ домꙋ̀, ᲃко́рѡ съ поᲁоба́ющимъ христіа́нскимъ благогѡвѣ́нствомъ, кро́мѣ всѧ́кагѡ го́рᲁостнагѡ ᲃꙋ́етїѧ, прине́сени бꙋ́ᲁꙋтъ въ Це́рковь, ꙗ҆́кѡ да ᲃи́це ѕѣ́лѡ нꙋ́жᲁнаѧ Та́йна съ бѣᲁо́ю тщеты̀ ᲃп҃се́нїѧ и҆́хъ проᲁо́лжена не бꙋ́ᲁетъ; и҆ ꙗ҆́кѡ да ѿ нꙋ́жᲁы въ дома́хъ ѡ҆ Креще́ннымъ ᲃꙋ́щимъ, ѡ҆брѧ́ᲁы и҆ ѡ҆бхо́ᲁы ѡ҆бы́чныѧ, въ Це́ркви съверша́тсѧ, кро́мѣ Фо́рмы, и҆ Погрꙋже́нїѧ.

Никто́же въ чре́вѣ ма́тернѣмъ затворе́нное ѡ҆троча̀ Крести́ти да дерꙁне́тъ: Но а҆́ще и҆ гла́вꙋ и҆ꙁъ чре́ва и҆ꙁпꙋ́ститъ, и҆ въ бѣᲁѣ̀ ᲃме́ртнѣй бꙋ́ᲁетъ, да Креще́нно бꙋ́ᲁетъ въ гла́вѣ: И҆ а҆́ще посе́мъ жи́во и҆ꙁъ чре́ва и҆ꙁы́йᲁетъ, не поᲁоба́етъ втори́цею Крести́ти є҆гѡ̀, ᲂу҆жѐ бо Креще́нно є҆́стъ. А҆ще же и҆́нъ ᲂу҆́ᲁъ и҆спꙋ́ститъ, и҆ вѣ́стнѡ бꙋ́ᲁетъ ꙗ҆́кѡ жи́во є҆́стъ, бѣᲁѣ́ же ᲃме́ртной належа́щой, да Креще́нно бꙋ́ᲁетъ въ то́й ᲂу҆́ᲁъ: И҆ а҆́ще жи́во ᲂу҆ро́ᲁитсѧ, подъ конъᲁи́цїею да Крещенно бꙋ́ᲁетъ, сі́естъ: А҆ще нѣ́сть Креще́нно, креща́етсѧ ра́бъ Бжїй И҆мⷬ҇къ: Во и҆мѧ̀ Ѿца̀: и҆ проч.: А҆ще же си́цевый въ ᲂу҆ᲁѣ ѡ҆ Кре́щеный мр҃твъ и҆ꙁъ чре́ва и҆ꙁы́йᲁетъ, на ѡ҆свѧще́нномъ мѣ́стѣ съ христїѧ́ны да погре́бенъ бꙋ́ᲁетъ.

А҆ще ма́ти непра́ꙁна сꙋ́щи ᲂу҆мре́тъ, млаᲁе́нецъ съхра́ннѡ и҆́ꙁъ чре́ва ско́рѡ да и҆ꙁъѧ́тъ бꙋ́ᲁетъ, и҆ а҆́ще жи́въ и҆ꙁъме́тсѧ, да Креще́нъ а҆́бїе бꙋ́ᲁетъ: А҆ще же ме́ртвъ и҆ не Креще́нъ бы́сть, на ᲃвѧще́нномъ мѣ́стѣ да не бꙋ́ᲁетъ погребе́нъ.

Младе́нци поверже́нные, и҆ ѡ҆брѧщенные, а҆́ще по ѡ҆па́сномъ и҆ съверше́нномъ и҆стѧꙁа́нїи невъꙁмо́жнѡ бꙋ́ᲁетъ вѣ́ᲁати а҆́ще Креще́ни сꙋ́тъ и҆́ли нѝ, подъ конъᲁи́цїею да Креще́ни бꙋ́ᲁꙋтъ, сі́естъ, а҆́ще нѣ́стъ Креще́нъ, креща́етсѧ ра́бъ бж҃ій, въ И҆мѧ̀ Ѿца̀: и҆ проч.:

Жиᲁови́нъ а҆́ще Крести́тисѧ и҆ꙁво́литъ, Парохїа́лный Свѧще́нникъ свое́мꙋ да и҆ꙁвѣсти́тъ ѡ҆ се́мъ Протопо́пѣ, и҆ и҆́нѣмъ мꙋᲁрѣ́йшимъ І҆ере́ѡмъ, и҆ ѿ тѣ́хъ мно́гѡ да бꙋ́ᲁетъ пе́рвѣе и҆спыта́нъ, и҆стѧꙁа́нъ, и҆ Вѣ́ры наꙋче́нъ; По мнѡ́гимъ же и҆спыта́нїи и҆ и҆ꙁвѣще́нїи ѡ҆па́сномъ, а҆́ще и҆́стиннѡ Спасе́нїѧ а҆ не и҆мѣ́ннагѡ ра́ᲁи прибы́тчества ᲃі́е полꙋчи́ти жела́етъ: Съ съвѣ́томъ же и҆ и҆ꙁволе́нїемъ на ᲃі́е ѿ свое́гѡ А҆рхїере́ѧ въꙁѧ́томъ да Креще́нъ бꙋ́ᲁетъ. А҆ще же ᲃме́ртнаѧ бѣᲁа̀ настꙋ́питъ, и҆ и҆́стиннѡ жела́ти бꙋ́ᲁетъ, и҆сповѣᲁа́ѧ ꙗ҆́кѡ Хрⷭ҇то́съ Гᲁ҃ь и҆́стинный є҆́стъ ᲃн҃ъ Бж҃їй, и҆ Ме́ссїѧ є҆гѡ́же Мꙍѵꙵсїй и҆ про́чїи проповѣᲁа́ша Прⷪ҇рѡ́ци, да Креще́нъ бꙋ́ᲁетъ а҆́бїе.

А҆ще, Чꙋ́ᲁо, и҆́ли ди́въ нѣ́кїй ѿ жены̀ роᲁи́тисѧ приклю́читъ, и҆ а҆́ще ѡ҆́браꙁъ человѣ́чїй и҆мѣ́ти не бꙋ́ᲁетъ да не бꙋ́ᲁетъ Креще́нъ: А҆ще же въ то́мъ неᲁоꙋмѣ́нїе бꙋ́ᲁетъ да Крести́тсѧ поᲁъ тое́ю конъᲁи́цїею: А҆ще се́й є҆́стъ человѣ́къ, креща́етсѧ ра́бъ бж҃іи, И҆мⷬ҇къ: въ И҆мѧ̀ Ѿца̀ и҆ про́чаѧ.

А҆ще же многѡви́ᲁенъ ди́въ ро́ᲁитсѧ, и҆ неᲁоꙋмѣ́нїе бꙋ́ᲁетъ а҆́ще є҆ᲁи́нъ и҆́ли мно́гїе сꙋ́ть, да не бꙋ́ᲁетъ Креще́нъ, до́нъᲁеже раꙁсꙋ́ᲁитсѧ ᲃі́е: Раꙁсꙋжᲁе́нїе же си́цевѡ да бꙋ́ᲁетъ, а҆́ще є҆ᲁинꙋ̀ и҆́ли мнѡ́гїе пе́рси: и҆́бѡ толи́кожᲁе мнѡ́гїе бꙋ́ᲁꙋтъ ᲃе́рдца, и҆ дш҃ѧ̀, и҆ раꙁᲁѣ́лнїи человѣ́ци, и҆ въ си́цевомъ паᲁе́жи, кі́йжᲁѡ и҆́хъ ѡ҆со́бнѣ да Креще́нъ бꙋ́ᲁетъ, коемꙋ́жᲁѡ на гла́вѣ во́ᲁꙋ и҆ꙁлива́ѧ, и҆ гл҃ѧ̀: креща́етсѧ ра́бъ бж҃їй, Имⷬ҇къ: въ И҆мѧ̀ Ѿца̀: и҆ про́чаѧ: А҆ще же бѣᲁа̀ ᲃме́ртнаѧ настꙋ́питъ, и҆ съкрати́тсѧ вре́мѧ къ є҆́же коего́жᲁѡ ѡ҆со́бнѣ Крести́ти, мо́жетъ ᲃлꙋжи́тель на коего́жᲁѡ главѣ̀ во́ᲁꙋ и҆ꙁлива́ѧ, всѣ́хъ є҆ᲁино́ю Крести́ти, гл҃ѧ̀: креща́ютсѧ ра́би бж҃їи: И҆мⷬ҇къ: въ И҆мѧ̀ Ѿца̀: и҆ проч.: Но ᲂу҆́бѡ ᲃі́ю множестве́ннꙋю Фо́рмꙋ вси́хъ то́чїю, и҆ въ и҆́ныхъ ᲃме́ртныхъ бѣ́ᲁахъ, къ Креще́нїю мнѡ́гихъ є҆ᲁино́ю, и҆ и҆ᲁе́же вре́мѧ бы́ти не мо́жетъ, къ є҆́же коего́жᲁѡ ѡ҆со́бнѣ Крести́ти: и҆на́коже ни́какѡ нико́лиже да ᲂу҆потребле́на бꙋ́ᲁетъ, подъ ᲃме́ртнымъ грѣхѡ́мъ, и҆ ка́ꙁнїю Прави́лною.

Е҆гᲁа́же нѣ́сть и҆ꙁвѣ́стїѧ ꙗ҆́кѡ въ ᲁи́вꙋ сꙋ́ть два̀ лица̀, ꙗ҆́кѡ же є҆гᲁа̀ двѣ̀ главѣ̀, и҆ два̀ пе́рси не и҆́матъ до́брѣ раꙁᲁѣ́лны, тогᲁа̀ пе́рвѣе є҆ᲁи́нъ да бꙋ́ᲁетъ Креще́нъ съверше́ннѣ ѡ҆бы́чнѡ, пото́мъ же дрꙋ́гїй подъ конъᲁи́цїею, си́мъ ѡ҆́браꙁомъ: А҆ще не́стъ креще́нъ, креща́етсѧ ра́бъ бж҃їи: И҆мⷬ҇къ: въ и҆мѧ̀ ѿца̀. А҆ми́нь, и҆ Сн҃а. А҆ми́нь, и҆ Ст҃гѡ Дх҃а. А҆ми́нь, нн҃ѣ и҆ при́снѡ, и҆ въ вѣ́ки вѣкѡ́въ. А҆ми́нь.

Парохїѧ́лный Сщ҃е́нникъ, доне́лиже пристꙋ́питъ къ Креще́нїю, да въпро́ситъ къ семꙋ̀ дѣ́лꙋ прислꙋша́ющихъ, каковы́хъ и҆ꙁъбра́ша въспрїе́мникѡвъ, ю҆́же ѿ ᲃт҃ы́ѧ кꙋ́пели млаᲁе́нца прїѧ́ти хотѧ́тъ, да не бо́лее па́че не́жели поᲁоба́етъ, и҆лѝ неᲁосто́йныхъ, и҆лѝ неспосо́бныхъ, къ семꙋ̀ ст҃о́мꙋ дѣ́лꙋ припꙋ́ститъ.

Въспрїе́мникъ є҆ᲁи́нъ то́кмѡ да бꙋ́ᲁетъ, мꙋ́жескїй и҆лѝ же́нскїй по́лъ, и҆лѝ вѧ́щше два̀, є҆ᲁи́нъ и҆ є҆ᲁина̀, по дре́внемꙋ ѡ҆бы́чаю Церко́вномꙋ: Е҆ᲁи́ною же да не припꙋ́щени бꙋ́ᲁꙋтъ два̀ мꙋ́жа, и҆лѝ двѣ̀ же́ны: Та́кожᲁе Креща́ющагѡ ѿц҃ъ и҆лѝ ма́ти: Ни́же мꙋ́жъ съ свое́ю ᲃꙋпрꙋ́жною жено́ю. Сі́и въспрїе́мници, въ съверше́нномъ во́ꙁрастѣ, А҆ нѐ въ дѣти́нномъ и҆ꙁъбра́ни и҆ припꙋще́ни бы́ти и҆́мꙋтъ.

И҆ꙁвѣ́стнѡ вѣ́жᲁъ ѡ҆ І҆ере́ю, и҆ ѡ҆па́снѡ съблюᲁа́ти потщи́сѧ ꙗ҆́кѡ въспрїе́мника, и҆лѝ Кмо́тра ника́коже досто́итъ прїйма́ти невѣ́рнагѡ, и҆лѝ, є҆ретика̀, ꙗ҆́внѡ проклѧ́тагѡ, ѿлꙋче́ннагѡ, и҆лѝ запрѣще́ннагѡ, ни́же ꙗ҆́вно грѣ́шника, и҆ на́роᲁнагѡ крамо́лника, и҆лѝ чⷭ҇ти ѿсꙋжᲁе́нныхъ, ни́же неисто́выхъ, ни́же неꙋмѣ́ющихъ Ѿче на́шъ: Вѣ́рꙋю въ є҆ᲁи́нагѡ Бг҃а: Бц҃е дв҃о: И҆ десѧтосло́вїе: Сі́ѧ бо въспрїе́мници до́лжни сꙋ́ть свои́хъ дх҃ѡ́вныхъ ᲃн҃ѡ́въ ѿ кꙋ́пели ᲃт҃гѡ Креще́нїѧ въспрїемле́мыхъ, въ своѐ и҆́хъ вре́мѧ ᲂу҆чи́ти.

Къ семꙋ́же, въ въспрїе́мничество ника́коже да прїѧ́ты бꙋ́дꙋтъ И҆нѡци, и҆лѝ, И҆нѡки́ни, про́сто же рещѝ, ни є҆ᲁи́нъ ѿ ѿлꙋчи́вшихъсѧ и҆ ѿре́кшихсѧ мі́ра.

Креще́нїе Бжтⷭ҇внное, въ кое́жᲁо вре́мѧ, ча́сѣ же и҆ че́ртѣ, нꙋ́жᲁѣ ᲃме́ртной належа́щой, требꙋ́ющымъ поᲁава́ти досто́итъ: Но ᲂу҆́бѡ, є҆́стъ вре́мѧ (не сꙋ́щей нꙋ́жᲁѣ) запрѣще́ннѡ, сі́естъ, по дво́хъ неᲁѣ́лѧхъ: ᲃт҃ы́ѧ вели́кїѧ Четыръᲁесѧ́тницѣ, да́же до вели́кои Сꙋббѡ́ты, по м҃е-мъ. Пра́вилѣ Лаѡᲁикі́йскагѡ Собо́ра въ не́же не млаᲁе́нцѧ, но во́ꙁрастъ ᲂу҆жѐ и҆мꙋ́щихъ, Крести́ти не поᲁоба́етъ. Си́це же и҆ є҆гᲁа̀ Е҆пⷭ҇пское запрѣще́нїе въ Це́рквахъ воꙁбранѧ́етъ соверше́нїе Послѣᲁова́нїѧ всѧ́коѧ слꙋ́жбы, (кро́мѣ ᲃме́ртныѧ нꙋ́жды,) Креще́нїе ни млаᲁе́нцемъ, ни́же во́ꙁрастъ и҆мꙋ́щимъ поᲁава́етсѧ.

Нꙋ́жᲁѣ ᲃме́ртной иалежа́щой, ꙗ҆́коже кое́гожᲁѡ вре́мене, ᲃи́це и҆ на кое́мъжᲁѡ мѣ́стѣ Крести́ти досто́итъ: Кро́мѣ же ᲃме́ртныѧ бѣᲁы̀, на и҆́номъ мѣ́стѣ ника́коже кро́мѣ Це́ркве, и҆ꙁрѧ́ᲁнѣе же собо́рныѧ Крести́ти, по н҃ѳ-мъ. Пра́вилꙋ Ше́стагѡ Събѡ́ра и҆́же въ Трꙋ́ллѣ, Крести́ти досто́итъ.

Вели́косано́вныхъ Люᲁе́й дѣ́ти, є҆гᲁа̀ ᲃа́ми требова́ти бꙋ́ᲁꙋтъ въ и҆́хъ ѡ҆собъстве́нныхъ Це́рквицахъ, и҆лѝ молитве́нницахъ, въ все́мъ по ѡ҆бы́чаю Це́ркѡ́вномꙋ да Креще́ни бꙋ́ᲁꙋтъ: Нико́гоже и҆́нагѡ, раꙁвѣ̀ ᲃме́ртныѧ бѣᲁы̀, въ ѡ҆собстве́нныхъ мѣ́стахъ никто́же нико́лиже да дерꙁне́тъ.

А҆ще кто̀ въꙁра́стъ и҆мы́й и҆ꙁво́литъ Креще́нїе ᲃт҃о́е прїѧ́ти, въ пе́рвыхъ по А҆пⷭ҇лскомꙋ и҆ Събо́рѡвъ ᲃт҃ы́хъ Пра́вилꙋ до́лженъ є҆́стъ Вѣ́ры ᲃт҃ы́ѧ Хрⷭ҇тїа́нскїѧ Правосла́вныѧ И҆сповѣᲁа́нїе и҆ꙁъꙋчи́ти, ѡ҆бы́чаевъ же и҆ нра́вовъ ᲃт҃ы́хъ ѡ҆бы́кнꙋти, и҆ чре́ꙁъ нѣ́кое вре́мѧ въ по́стѣ, моли́твахъ же и҆ въ всѣ́хъ доброᲁѣ́телехъ, всѧ́кѡ ѡ҆бꙋчи́ти себѣ̀, и҆ въ се́мъ вре́менѣ ча́стѡ ѡ҆ во́лѣ и҆ преᲁложе́нїи є҆гѡ̀, и҆ꙁвѣ́стнѡ и҆спыта́ти поᲁоба́етъ, и҆ кро́мѣ и҆ꙁвѣ́стныѧ є҆гѡ̀ во́лѧ, въ вѣ́рѣ же и҆ благоче́стїи до́брѣ не ᲂу҆наставле́ннагѡ, не Крести́ти: Ѽ҆гласи́ти же си́цевыхъ а҆́ще и҆ꙁво́лѧтъ мо́жетъ.

А҆ще же въ ѡ҆бꙋче́нїи се́мъ сы́й, въ бѣᲁꙋ̀ ᲃме́ртнꙋю въпаᲁе́тъ, и҆ Крести́тисѧ и҆ꙁво́литъ, на бѣᲁꙋ̀ въꙁира́ѧ, и҆лѝ на и҆́нꙋю нѣ́кꙋю належа́щꙋю вели́кꙋю нꙋ́жᲁꙋ, да Креще́нъ бꙋ́ᲁетъ.

Во́ꙁрастъ и҆мꙋ́щихъ Креще́нїе къ Е҆пⷭ҇копꙋ (аще въꙁмо́жнѡ єстъ) да ѿло́женѡ бꙋ́ᲁетъ, въ єже ѿ негѡ̀ съ бо́лшею че́стїю съверши́тисѧ: ащеже и҆лѝ и҆ꙁволе́нїемъ Е҆пⷭ҇пскимъ, и҆лѝ нѣ́кїѧ ра́ᲁи иныѧ блг҃осло́вныѧ вины̀, само́мꙋ парохїа́лномꙋ ᲃщ҃е́нникꙋ приклю́читсѧ ᲃі́е съверша́ти, Креще́нїе си́цево, си́мъ ѡбраꙁомъ да съверши́тсѧ.

Креще́нїе во́ꙁрастъ и҆мꙋ́щихъ ѿ дре́внѧгѡ А҆пⷭ҇лскагѡ преᲁа́нїѧ ᲂу҆ста́вленно єстъ: въ ᲃт҃ꙋ́ю Вели́кꙋю Сꙋббѡ́тꙋ, и҆ въ де́нь ᲃт҃ы́ѧ Пѧтᲁесѧ́тници чⷭ҇тнѡ съверша́ти.

Сего̀ ра́ᲁи аще бли́ꙁъ вре́менъ си́хъ ѡ҆глаше́нныхъ Крести́ти І҆ереѵꙵ въсхо́щетъ (аще препѧ́тїѧ кое́гѡ не бꙋ́ᲁетъ) на са́мыѧ ты́ѧ днѝ ѿложи́ти поᲁоба́етъ.

А҆щеже кто̀ абїе по Па́сцѣ, и҆лѝ па́че по Соше́ствїи ᲃт҃гѡ Дх҃а, ѡ҆брати́тсѧ къ Гᲁ҃ꙋ, скорби́ти же бꙋ́ᲁетъ ѡ҆ до́лгѡмъ ѡ҆жиᲁа́нїи свое́гѡ Креще́нїѧ, спѣ́шити же сѧ къ немꙋ̀ въсхо́щетъ: наꙋче́нъ Вѣ́ры, и҆ досто́йнѣ приꙋготовле́нъ аще бꙋ́ᲁетъ, не ѡ҆жиᲁа́ѧ дні́й пре́ᲁърече́нныхъ, Креще́нъ бы́ти мо́жетъ.

Ѽ҆глаше́нный наꙋче́нъ бы́въ Вѣ́ры, въ Це́ркви, а҆ нѐ на ѡ҆собстве́нномъ мѣ́стѣ Креще́нъ да бꙋ́ᲁетъ: въспрїе́мника да и҆́матъ є҆ᲁи́нагѡ, и҆лѝ бо́лее дво́хъ: ᲃа́мъ ѡ҆глаше́нный къ въпро́сомъ І҆ере́ѵꙵскимъ да ѿвѣща́етъ, ра́ꙁвѣ а҆́ще нѣмы́й, и҆лѝ всѧ́кѡ глꙋхі́й бꙋ́ᲁетъ, и҆лѝ и҆ноѧꙁы́чникъ не свѣᲁы́й на́шегѡ ꙗ҆ꙁы́ка, въ си́цевомъ ᲂу҆́бѡ паᲁе́жи, и҆лѝ чре́ꙁъ свое́гѡ въспрїе́мника, а҆́ще ꙗ҆ꙁы́къ є҆гѡ̀ съвѣ́сть, и҆лѝ чре́ꙁъ и҆́столкова́телѧ и҆́нагѡ, и҆лѝ рꙋкомаѧ́нїемъ ᲃвоѐ проиꙁволе́нїе да и҆ꙁвѣсти́тъ, и҆ и҆ꙁъѡбраꙁи́тъ.

Чтⷭ҇и же ра́ᲁи ᲃт҃ы́ѧ ᲃеѧ̀ и҆ вели́кїѧ Та́йны ᲃи́це ᲃщ҃е́нникъ Крести́ти во́ꙁрастъ и҆мꙋ́щагѡ хотѧ́й, ꙗ҆́коже и҆ Креща́емый, (а҆́ще зᲁра́въ є҆́стъ) преᲁъ ꙗ҆де́нїемъ и҆ пре́жᲁе полꙋ́ᲁеннагѡ вре́мене (кро́мѣ ѡ҆со́бныѧ нѣ́кїѧ благоиꙁвѣ́стныѧ вины̀) ѡ҆́въ, къ соверше́нїю, ᲃе́й же, къ прїѧ́тїю ᲃт҃гѡ Кре́щенїѧ, да пристꙋ́пѧтъ.

Да повели́тъ І҆ере́ѵꙵ ѡ҆глаше́нномꙋ, є҆́же жали́ти и҆ ка́ѧтисѧ ѡ҆ свои́хъ грѣсѣ́хъ.

Ю҆роᲁи́выи и҆ и҆ꙁъꙋмле́нїи, да не бꙋ́ᲁꙋтъ Креще́ни, раꙁвѣ̀ а҆́ще ᲃи́це роᲁи́шасѧ: и҆ тогᲁа̀ си́цевое ѡ҆ сихъ раꙁсꙋжᲁе́нїе твори́ти, ꙗ҆́кѡже и҆ ѡ҆ млаᲁе́нцехъ, и҆ въ вѣ́рѣ Це́рковной Креще́ни бы́ти могꙋ́тъ.

А҆щеже на вре́мѧ въ себѣ̀ прише́дше ᲂу҆раꙁꙋмлѧ́ютсѧ, и҆ ᲂу҆се́рᲁнѡ самѝ жела́ютъ и҆ и҆ꙁволѧ́ютъ Крести́тисѧ, да бꙋ́ᲁꙋтъ Креще́ни. А҆щеже пре́жᲁе ю҆ро́ᲁства и҆ и҆ꙁъꙋмле́нїѧ во́лю и҆ жела́нїе своѐ къ прїѧ́тїю ᲃт҃гѡ Креще́нїѧ покаꙁа́шѧ и҆ и҆ꙁвѣсти́шѧ, наше́дшїй бѣᲁѣ̀ см҃ртной, а҆́ще и҆ и҆ꙁꙋмле́ни сꙋ́тъ, да Креще́ни бꙋ́ᲁꙋтъ.

Сі́е же гл҃е́тсѧ, и҆ ѡ҆ стра́жᲁꙋщихъ неᲁꙋ́гомъ спѧ́щимъ, нарица́емымъ Лета́ргꙋсъ и҆лѝ ᲃо́потъ, и҆ ѡ҆беꙁꙋмѣ́нїе терпѧ́щимъ, то́чїю не спѧ́щагѡ, и҆ раꙁꙋмѣ́ющагѡ Крести́ти мо́жетъ; ра́ꙁвѣ а҆́ще бѣᲁа̀ см҃ртнаѧ настꙋ́питъ, и҆ а҆́ще въ не́мъ пре́жᲁе жела́нїе Креще́нїѧ пока́ꙁано и҆ и҆ꙁвѣще́но бы́сть: тогᲁа̀ и҆ спѧ́щагѡ и҆ ѡ҆беꙁꙋмле́ннагѡ Крести́ти можетъ.

Да тщи́тсѧ І҆ере́ѵꙵ приле́жнѡ, є҆́же и҆ꙁвѣсти́тисѧ ѡ҆ са́нѣ и҆ чи́нꙋ Крести́тисѧ хотѧ́щихъ, и҆ꙁрѧ́ᲁнѣе же и҆ноплеме́нныхъ ѡ҆ ни́хъ же и҆ꙁвѣ́стное сътвори́въ и҆спыта́нїе, а҆́ще кои́мъ ѡ҆́браꙁомъ не сꙋ́ть Креще́ни; и҆ ѡ҆па́снѡ да блюᲁе́тъ, данѐ кто̀ ᲂу҆жѐ ᲃы́й Креще́нъ, простоты̀ ра́ᲁи, и҆лѝ невѣ́жᲁества, и҆лѝ ѿ погрѣше́нїѧ, и҆лѝ прибы́тка ра́ᲁи кое́гѡ, и҆лѝ и҆́ныѧ кое́ѧ ра́ᲁи вины̀, поᲁъстꙋ́пнѣ въсхо́щетъ втори́цею Крести́тисѧ.

И҆ꙁвѣ́стное ᲂу҆́бѡ и҆ ѡ҆па́сное сътвори́въ и҆спыта́нїе, всѣ́хъ ѡ҆ ни́хже бꙋ́ᲁетъ и҆́стинное неᲁоꙋмѣ́нїе, а҆́ще Креще́ни былѝ, и҆лѝ нѝ, а҆́ще что̀ и҆́ное въ пріпѧ́тїе ᲃемꙋ̀ не бꙋ́ᲁетъ, поᲁъ конъᲁи́цїею да Креще́ни бꙋ́ᲁꙋтъ: Сі́естъ, А҆ще нѣ́стъ, креще́нъ, креща́етсѧ ра́бъ бжїй И҆мⷬ҇къ: въ и҆́мѧ Ѿца̀, А҆минь, и҆ про́чаѧ.

Е҆рети́ци къ Ст҃о́й Правосла́вной Каѳꙍли́ческой Це́ркви прихоᲁѧ́щїи, и҆ съвокꙋпи́тисѧ Правовѣ́рнымъ жела́ющїи, всѝ и҆́же въ Бг҃а въ Трⷪ҇ци ᲃт҃ой є҆ᲁи́нагѡ не вѣ́рꙋютъ, ꙗ҆́коже сꙋ́тъ проклѧ́тыи А҆рїѧ́не, и҆ и҆́мъ поᲁо́бнїи, и҆ ᲃвойстве́ннѡ прили́чнꙋю Фо́рмꙋ Та́йны ᲃт҃гѡ Креще́нїѧ, и҆ мате́рїю не съᲁержа́щїи, по ѡ҆бы́чаю Це́ркѡвномꙋ въ все́мъ порѧ́ᲁꙋ Креще́ни да бꙋ́ᲁꙋтъ. Но ᲂу҆́бѡ пе́рвѣе заблꙋжᲁе́нїѧ свое́гѡ неправотꙋ̀ да и҆сповѣᲁѧ́тъ, и҆ ѿрекꙋ́тсѧ, и҆ Вѣ́рѣ ᲃт҃о́й Правосла́внѡ Каѳꙍли́ческой ѡ҆па́снѡ да наꙋче́ни бꙋ́ᲁꙋтъ, въ Бг҃а же въ Трⷪ҇ци ᲃт҃ой є҆ᲁина́гѡ вѣ́рꙋющїи, и҆ свойстве́ннѡ прили́чнꙋю ᲃт҃гѡ Креще́нїѧ Фꙍ́рмꙋ, и҆ мате́рїю съᲁержа́щїи, втори́цею да не бꙋ́ᲁꙋтъ Креще́ни, то́чїю є҆́же а҆́ще ѿ ѡ҆брѧ́ᲁѡвъ и҆ церїмо́нїй ѡ҆бы́чныхъ ѡ҆ста́виша, по ѿрече́нїи и҆ проклѧ́тїи свои́хъ блꙋ́ᲁѡвъ и҆ є҆́ресїй, да съверши́тсѧ надъ ни́ми: Ра́ꙁвѣ а҆́ще Є҆пⷭ҇пъ благосло́вныѧ и҆ вели́кїѧ нѣ́кїѧ ра́ᲁи вины̀, и҆на́кѡ бы́ти ѡ҆ ни́хъ раꙁсꙋ́ᲁитъ.

Ко́йжᲁѡ Парохїѧ́лны ᲃщ҃е́нник до́лженъ є҆́сть въ свое́й Це́ркви Крести́лницꙋ благолѣ́пнѡ и҆ чтⷭ҇нѡ, и҆лѝ Ка́меннꙋю и҆лѝ цино́вꙋю, и҆лѝ древѧ́нꙋю, и҆лѝ ѿ и҆́ноѧ кое́ѧ ве́щи съѡрꙋже́ннꙋ, цѣ́лꙋю и҆мѣ́ти, въе́же мощѝ во́ᲁꙋ въ себѣ̀ съдержа́ти: всегᲁа̀ покрове́ннꙋ и҆ чⷭ҇тꙋ, къ ѡ҆сще́нїю въ не́й воᲁы̀, и҆ съверше́нїю Та́йны ᲃт҃гѡ Креще́нїѧ да бꙋ́ᲁетъ. Къ и҆́номꙋ же слꙋже́нїю, ника́коже нико́лиже ᲂу҆потребле́нна да бꙋ́ᲁетъ, подъ сме́ртнымъ грехо́мъ, и҆ подъ пра́вилною ѿ Е҆пⷭ҇па ка́ꙁнїю.

Въ кое́йжᲁѡ Це́ркви Парохїѧ́лный ᲃвѧщ́енникъ до́лженъ є҆́стъ, и҆лѝ въ кꙋтѣ̀ ᲂу҆́гла Церко́внагѡ, и҆лѝ въ Ѽ҆лтарѣ, и҆лѝ и҆ꙁъвнѣ̀ поᲁъ Церко́вною стѣно́ю, мѣ́сто нога́ма не попира́емое, на ᲃі́е и҆́стое и҆скопа́но и҆мѣ́ти, въ є҆́же ᲃщ҃е́нной воᲁѣ̀ по Креще́нїи влѣѧ́тисѧ: Мѣ́сто же ᲃі́е всегᲁа̀ покрове́ннѡ да бꙋ́ᲁетъ. А҆ще же въмѣсти́тисѧ мо́жетъ, и҆ въ ᲂу҆мыва́лницѣ Ѻ҆́лтарней влѣѧ́на бы́ти мо́жетъ: И҆бѡ̀ а҆́ще не благолѣ́пнѡ и҆ꙁлѣѧ́на на непоᲁо́бнѡмъ мѣ́стѣ, и҆ нога́ма попира́на бꙋ́ᲁетъ, ꙗ҆́коже ᲂу҆ничижи́тель ве́щи ᲃт҃ы́ѧ, І҆ере́ѷ ᲃме́ртнѡ съгрѣ́шитъ.

Мѵ́ро ᲃт҃о́е ѿ Є҆пⷭ҇па въ Вели́кїй Четверто́къ, на всѧ́кое лѣ́то, по ѡ҆бы́чаю Церко́вномꙋ ѡ҆сщ҃е́нно бы́ти и҆́матъ. тщи́тъжесѧ Парохїѧ́лный ᲃщ҃е́нникъ, є҆́же ско́рѣе прїѡбрѣстѝ є҆̀ себѣ̀: прїѡбрѣ́тъ же, ве́тхое а҆́ще ᲂу҆жѐ и҆ꙁвѣ́трѣлое є҆́сть, и҆ свое́гѡ си благово́нїѧ не и҆́матъ, въ Ѻ҆́лтарѣ въ но́выхъ лнѧ́ныхъ згре́бїѧхъ да влѣ́етъ, и҆ на чⷭ҇томъ ка́мени да съжже́тъ, пе́пелъ же въ ᲂу҆мыва́лницꙋ да и҆ꙁъсы́плетъ, и҆лѝ подъ ᲃт҃о́ю Тра́пеꙁою да вкопа́етъ.

Бо́лее є҆ᲁина́гѡ лѣ́та, Мѵ́ро ᲃт҃о́е къ помаꙁа́нїю да не дерꙁне́тъ І҆ере́ѷ ᲂу҆потреблѧ́ти, ра́ꙁвѣ вели́кїѧ нꙋ́жᲁы.

Е҆ле́й къ помаꙁа́нїю ѡ҆глаше́нныхъ, не ѿ Е҆пⷭ҇па нѣ ѿ І҆ере́а ѡ҆сщ҃а́етсѧ: ᲃего́же ра́ᲁи І҆ере́ѷ да тщи́тсѧ, всегᲁа̀ ᲃвѣ́жїй и҆мѣ́ти Е҆ле́й къ ѡ҆свѧще́нїю, да не є҆ᲁи́нъ и҆ то́йжᲁе два́жᲁы, и҆лѝ множестве́ннѣ ѡ҆ст҃и́тъ, нъ є҆ли́жᲁѡ̀ кра́тъ Крести́ти бꙋ́ᲁетъ, и҆́нꙋю да ѡ҆ст҃и́тъ.

Мѵ́ро ᲃт҃о́е сво́й ѡ҆со́бный ᲃосꙋ́ᲁъ: Е҆ле́й же та́кѡжᲁе ѡ҆со́бны сво́й къ хране́нїю да и҆́матъ: сі́ѧ же съсꙋ́ᲁы, а҆́ще мо́щнѡ є҆́сть да бꙋ́ᲁꙋтъ ᲃребрѧ́ны, а҆́щелиже ни, понѐ цино́вые да бꙋ́ᲁꙋтъ, съ свои́ми шрꙋ́бными покры́валы: Ко́йжᲁѡ же съсꙋ́ᲁъ своѐ наᲁписа́нїе да и҆́ма́тъ Вели́кими писмены̀ и҆ꙁваѧ́ны: погрѣше́нїѧ ра́ᲁи.

На ᲃосꙋ́ᲁѣ Ст҃гѡ Мѵ́ра, си́цево да бꙋ́ᲁетъ надписа́нїе мѵ́ро свѧто́е.

На ᲃосꙋ́ᲁѣ же Є҆ле́а, е҆ле́й несвѧще́нный.

Къ ᲂу҆потребле́нїю же повсеᲁне́вномꙋ ме́ншїе ᲃосꙋ́ᲁы да и́҆матъ. І҆ере́ѷ, ᲃребрѧ́ны, а҆́ще мо́щнѡ є҆́сть, и҆лѝ понѐ цѣно́вые. Раꙁᲁѣ́лные, поеᲁинко́вые, до́брѣ покрове́нны, и҆ꙁъ свои́ми надписанїи, сі́естъ: На́ᲁъ є҆ᲁины́мъ, сицево: мѵ́ро ст҃о́е. Наᲁъ вто́римъ же: е҆ле́й свѧще́нный.

Сі́е же ꙗ҆́кѡ да ᲃщ҃е́нникъ не погрѣши́въ, въмѣ́сто Є҆ле́а, Мѵ́ромъ, и҆лѝ въмѣ́сто Мѵ́ра, Є҆ле́ꙍмъ напома́жетъ: є҆́же ѡ҆па́снѡ да блюᲁе́тъ, да нѐ въ грѣ́хъ небреже́нїѧ въпа́ᲁетъ.

Въ сі́ѧ ᲂу҆́бѡ ме́ншїа ᲃосꙋ́ᲁы, ѿ бо́лшихъ пре́ᲁъ рече́нныхъ сосꙋ́ᲁовъ, є҆ли́кѡ то́чїю къ и҆сполне́нїю потре́бы, дово́лнѡ бꙋ́ᲁетъ, си́це ᲃт҃о́е Мѵ́ро ꙗ҆́коже и҆ Є҆ле҆й неѡсщ҃е́нный да влѣ́етъ, и҆ ѡ҆ст҃и́тъ ѡ҆бьі́чнѡ: и҆ ѿ тѣ́хъ сосꙋ́ᲁѡвъ, и҆лѝ стрꙋ́чецъ, и҆лѝ пе́рвый пе́рстъ свое́ѧ десни́ци ᲃщ҃е́нникъ ѡ҆мочи́въ, да во́ꙁметъ ᲃт҃о́е Мѵ́ро, и҆ ᲃт҃ы́й Е҆лей, и҆ пома́ꙁꙋетъ.

Сі́ѧ же сосꙋ́ᲁы ᲃи́це съ ѡ҆рꙋже́ны сꙋ́ще, въ Ѻ҆́лтарѣ на є҆ᲁино́мъ мѣ́стѣ чтⷭ҇нѡ: и҆ꙁрѧ́ᲁнѣе же, въ А҆лмарі́йцѣ на сі́е само́е, съѡрꙋже́нной заключе́нны, ᲃт҃олѣ́пнѣ храни́мы да бꙋ́ᲁꙋтъ и҆ блюᲁо́мы: да не и҆́нъ кто̀ кро́мѣ ᲃщ҃е́нника, ника́коже си́хъ прикосне́тсѧ, и҆лѝ ᲃт҃ота́тскѡ, къ ᲂу҆потребле́нїю свое́мꙋ во́ꙁметъ.

Сще́нникъ Парохїѧлный по є҆ли́кꙋ мо́щнѡ да тщи́тсѧ не чреꙁъ мі́рскихъ, но са́мъ собо́ю и҆лѝ чре́ꙁъ и҆́нагѡ ᲃщ҃енника, и҆лѝ понѐ чре́ꙁъ є҆ᲁина́гѡ ѿ сще́нныхъ церкѡ́вныхъ слꙋ́гъ, въ кое́ждѡ лѣ́то приѡбрѣстѝ себѣ̀ и҆ вꙁѧ́ти Мѵ́ро ᲃт҃о́е, ѿ свое́гѡ сѝ Е҆пі́скопа.

Да блюᲁе́тъ же І҆ере́ѷ ѡ҆па́снѡ, сице Мѵ́ро ᲃт҃о́е, ꙗ҆́коже и҆ Е҆ле́й ᲂу҆жѐ ѡ҆сщ҃е́нный, нико́мꙋже ѿ мі́рскихъ, нико́лиже да́ти, и҆́бо и҆ даѧ́й и҆ вꙁима́ѧй, въ грѣ́хъ ᲃт҃ота́тства въ па́ᲁнꙋтъ.

Е҆гᲁа́же къ соверше́нїю ᲃт҃гѡ Креще́нїѧ прихо́ᲁитъ І҆ере́ѷ, сі́ѧ ве́щи пре́дъ ᲂу҆гото́влены посре́ᲁъ Це́ркве да и҆́матъ: Тетра́подъ, и҆лѝ ᲃтоле́цъ благолѣ́пнѣ покрове́нъ, и҆ на не́мъ ᲃт҃о́е Є҆ѵⷢ҇лїе, и҆ Кре́стъ, ᲃъсꙋ́ᲁы, съ Є҆ле́ꙍмъ къ ѡ҆сщ҃е́нїю, и҆ съ Мѵ́ромъ ᲃт҃ы́мъ, и҆ бꙋма́га ꙗ҆́же неᲁоста́тчества ра́ᲁи, а҆́ще бы́ти не мо́жетъ, а҆́ нѧ́ны згре́бїѧ но́вы, мѧ́гки, и҆ те́нки да бꙋ́ᲁꙋтъ, къ є҆́же си́ми и҆стира́ти члены ᲃт҃ы́мъ Е҆ле́емъ, и҆ ᲃт҃ы́мъ Мѵ́ромъ пома́ꙁаные: сі́ѧ же бꙋма́га, и҆лѝ зъгре́бїѧ по Креще́нїи млаᲁе́нца, а҆́бїе въ Ѻ҆́лтарѣ̀ на чи́стомъ Ка́мени да ᲃоꙁже́ны бꙋ́ᲁꙋтъ, пе́пелъ же въ ᲂу҆мыва́лницꙋ въсы́ѣпанъ, и҆лѝ подъ ᲃт҃о́ю Тра́пеꙁою въко́панъ да бꙋ́ᲁетъ.

Но́жници къ пострыже́нїю вла́сѡвъ, благолѣ́пные и҆ ѡ҆стры́е, и҆ къ семꙋ̀ то́чїю въпотребле́ны и҆ храни́мы, а҆ нѐ къ и҆́номꙋ дѣ́лꙋ да бꙋ́ᲁꙋтъ.

Свѣ́ща Богоѧвле́нскаѧ къ ѡ҆свѧще́нїю воᲁы̀.

Крести́лница по́лна чи́стою и҆лѝ зи́мною и҆лѝ те́плою воᲁы̀ по вре́мени и҆ потре́бѣ, къ є҆же ѡ҆ст҃и́ти ю҆̀, и҆ Крести́ти въ не́й млаᲁе́нца, да бꙋ́ᲁетъ.

А҆ и҆ᲁе́же не погрꙋжа́ютъ, но полива́ютъ, достои́тъ и҆мѣ́ти чи́стый и҆ благолѣ́пный ᲃъсꙋ́ᲁъ, и҆лѝ ко́вшикъ, зъ ᲂу҆шко́мъ, и҆лѝ держа́лѡмъ цино́вый, и҆лѝ мѣ́ᲁѧный побѣ́леный въ є҆́же во́ᲁꙋ ᲃщ҃е́ннꙋю съ Крести́лници черпа́ти и҆ въꙁлѣва́ти на млаᲁе́нца Креща́емагѡ. ᲃе́йже ᲃъсꙋ́ᲁъ на ᲃі́е то́чїю дѣ́лѡ ᲂу҆потре́бленый бы́ти и҆́матъ.

Е҆пітра́хиль и҆ Фелꙍ́нъ, а҆́ще бы́ти могꙋ́тъ бѣ́лы да бꙋ́ᲁꙋтъ, а҆́ще же си́цевы нѣ́сꙋтъ, како́вы и҆́матъ, вси́цевы да ѡ҆бле́четсѧ: Бе́ꙁъ Є҆пітра́хилѧ же и҆ Фелꙍ́на, нико́лиже свѧще́нникъ Крести́ти да дерꙁне́тъ, ра́ꙁвѣ въ см҃ртной на́глой бѣᲁѣ̀.

К семꙋ̀ да приꙋготовле́на бꙋ́детъ ѡ҆со́бнѣ те́плаѧ воᲁа̀ про́стаѧ, и҆ ᲂу҆мыва́лница, и҆лѝ поᲁо́бный семꙋ̀ ᲃъсꙋ́ᲁъ въ є҆́же сею̀ воᲁо́ю рꙋ́цѣ по Креще́нїю и҆ꙁмы́ти надъ н́ею. Се́й же съсꙋ́ᲁъ къ семꙋ̀ само́мꙋ то́чїю дѣ́лꙋ хране́нъ да бꙋ́ᲁетъ. А҆́ще же си́цевый ᲃъсꙋ́ᲁъ бы́ти не мо́жетъ, въ Ѻ҆́лтарѣ надъ ᲂу҆мыва́лницею рꙋ́цѣ да и҆ꙁмы́етъ.

Да при ᲂу҆готова́нъ же бꙋ́ᲁетъ при се́мъ и҆ хлѣ́бный мѧ́гкишъ, къ є҆́же пе́рсты въ то́йже ᲂу҆мыва́лницѣ, по Мѵрꙍпома́ꙁанїи ᲂу҆мыва́ѧ и҆стира́ти, да не на и҆́номъ мѣ́стѣ ᲂу҆мы́всѧ, ᲃт҃остъ попира́нїемъ но́гъ ᲂу҆ничиже́нна бꙋ́ᲁетъ.

Пла́тно, и҆лѝ ᲃинᲁо́нъ бѣ́лый, но́вый, чⷭ҇тый, въ є҆́же въ немъ ѡ҆блещѝ млаᲁе́нца Новокреще́ннагѡ, и҆ свѣ́ща воско́ваѧ да бꙋ́ᲁетъ къ є҆́же въꙁже́нꙋ поᲁа́ти Но́во креще́нномꙋ. Сі́ѧ два̀ въспрїе́мникъ до́лженъ є҆́сть принестѝ, въкꙋ́пѣ є҆гᲁа̀ къ Креще́нїю приво́ᲁитъ млаᲁе́нца.

Сі́ю Кни́гꙋ Тре́бник да и҆́матъ, І҆ере́ї а҆́бїе съ собо́ю, и҆ дрꙋ́гꙋю Кни́гꙋ, сі́е є҆́смь Ката́логъ Креща́емыхъ, въ не́йже и҆мена̀ Креща́емыхъ въпи́шꙋтсѧ.

Е҆гᲁа́ же всѧ̀ сі́ѧ ве́щи вре́меннѡ пре́дъ ᲂу҆готовлены бꙋ́ᲁꙋтъ, ᲃщ҃е́нникъ ᲂу҆мы́въ рꙋ́цѣ, и҆ въ Е҆пітра́хиль и҆ Фелꙍ́нъ ѡ҆́болче́нъ, къ съверше́нїю Превели́кой и҆ ᲃт҃о́й ᲃе́й Та́йнѣ да пристꙋ́питъ: Кли́рикѡвъ дво́хъ, и҆лѝ понѐ є҆ᲁина́гѡ, съ собо́ю къ слꙋже́нїю да и҆́матъ. Си́це же приᲂуготовле́нный къ Церко́вномꙋ пра́гꙋ да пристꙋ́питъ, и҆ᲁе́же и҆ꙁвнѣ̀ ѡ҆жиᲁа́ютъ прине́сшїи млаᲁе́нца, и҆ да вопро́ситъ, (а҆́ще не вѣ́сть и҆ꙁвѣ́стнѡ) а҆́ще ѿ є҆гѡ̀ є҆́сть Парохїи, а҆́ще мꙋ́жескїй, и҆лѝ же́нскїй по́лъ є҆́сть, а҆́ще не є҆́сть ѡ҆со́бнѣ ѿ кое́гѡ въ домꙋ̀ Креще́нный, како́вѣмъ ли́бѡ бꙋ́ᲁи ѡ҆́браꙁомъ и҆ кото́рыи сꙋ́тъ въспрїе́мники, хотѧ̀ хотѧ́щїи ѿ ᲃт҃ы́ѧ кꙋ́пели млаᲁе́нца въспрїѧ́ти, и҆ въмѣ́сто ѡ҆́нагѡ ѿвѣща́ти; И҆́хже да нака́жетъ є҆́же благоговѣ́иннѡ, и҆ ᲃтра́хомъ Бжїимъ, и҆ съ поᲁоба́ющею чⷭ҇тїю ста́ти, и҆ покое́мждѡ въпроше́нїи въмѣ́стѡ Креща́ющагѡсѧ да ѿвѣща́ютъ.

Поне́же по рожᲁе́нїи, І҆ере́ѷ є҆гᲁа̀ моли́твꙋ тво́ритъ надъ ро́ждшею и҆ ро́ждшимсѧ, въ то́й ча́съ, ꙗ҆́коже томꙋ̀ и҆́же Креще́немъ ᲃт҃ы́мъ въ Сн҃а Бж҃іѧ въ Хє҃ пороᲁи́тисѧ, и҆ м́ежᲁꙋ во́ины є҆гѡ̀ въписа́тисѧ и҆́матъ, по дре́внемꙋ ѡ҆бы́чаю Це́ркѡ́вномꙋ, и҆мѧ̀ нарица́етъ: Да тщи́тъжесѧ І҆ере́ѷ, є҆́же нестꙋ́ᲁное, не ѿ ба́сней нѣ́кїихъ, и҆лѝ смѣ́хꙋ досто́йное, и҆лѝ ꙗ҆ꙁы́ческихъ И҆́ᲁолꙍвъ, и҆лѝ нечести́выхъ, и҆ пога́ныхъ человѣ́къ и҆мѧ̀ да́ти: но є҆ᲁина́гѡ, ѿ ᲃт҃ы́хъ Бж҃іихъ, ꙗ҆́кѡ да Креще́нный тогѡ̀ доброᲁѣ́телемъ поревнова́въ, къ благоче́стномꙋ жи́тїю въꙁбꙋжᲁа́етъ себѣ̀, и҆ тогѡ̀ моли́твы и҆ предста́телство къ Бг҃ꙋ, въ по́мощъ и҆ покро́въ себѣ̀ ᲃтѧ́жетъ.

Си́це ᲂу҆́бѡ сі́ѧ всѧ̀ съ ѡ҆рꙋжи́въ, и҆ а҆́ще и҆мѧ̀ да́ное Креща́емомꙋ не памѧтствꙋ́етъ, въпроси́въ и҆ ᲂу҆вѣ́ᲁавъ, держи́мꙋ млаᲁе́нцꙋ ѿ прїи́мшагѡ и҆̀ на де́сной рꙋцѣ̀, къ є҆́же Ѽ҆́гласи́ти и҆ Крести́сти є҆гѡ̀, Парохїѧ́лный ᲃщ҃е́нникъ по всемꙋ̀ ꙗ҆́коже зᲁѐ ни́жей Послѣᲁова́нїе ᲃт҃гѡ Креще́нїѧ въ себѣ̀ съᲁержи́тсѧ, да начина́етъ и҆ всѐ порѧ́ᲁꙋ съверши́тъ.

Гᲁ҃ꙋ помо́лимсѧ:

Моли́тва, а҃.

Влады́кѡ Гᲁ҃и Всеᲁержи́телю, и҆цѣлѧ́ѧй всѧ́къ неᲁꙋ́гъ и҆ всѧ́кꙋю ꙗ҆́ꙁвꙋ, са́мъ и҆ сію̀ дне́сь роᲁи́вшꙋю рабꙋ̀ твою̀ Имⷬ҇къ. и҆цѣлѝ, и҆ въста́ви ю҆̀ ѿ ѡ҆ᲁра на не́мъ же лежи́тъ, занѐ по Проро́ка Дави́да ᲃловесѝ: Въ беꙁакѡ́нїихъ зача́ти и҆ ᲃкверна́вы всѝ є҆смы̀ пре́ᲁъ тобо́ю. Съхранѝ ю҆́, и҆ сегѡ̀ млаᲁе́нца, є҆гѡ́же пороᲁѝ: Покры́й ю҆̀ кро́вомъ кры́лꙋ твое́ю, ѿ дне́шнѧгѡ днѐ, да́же до послѣ́ᲁнѧгѡ є҆ѧ̀ сконча́нїѧ, Молитва́ми Прчⷭ҇тыѧ Бц҃а, и҆ всѣ́хъ ᲃт҃ы́хъ: Ꙗ҆́кѡ блⷭ҇ве́нъ є҆сѝ въ вѣ́ки вѣкѡ́въ. А҆ми́нь.

Моли́тва, в҃.

Влады́кѡ Гᲁ҃и Бо́же на́шъ, Роᲁи́выйсѧ ѿ Прчⷭ҇тыѧ Влады́чица на́шеѧ Бц҃а, и҆ при́снѡ Дв҃ы Мр҃іѧ, и҆ ꙗ҆́кѡ млаᲁе́нецъ въꙁле́гїй, и҆ ꙗ҆́кѡ дѣ́тищъ въспрїемле́мъ бы́вый: са́мъ и҆ сі́ю рабꙋ̀ твою̀ дне́сь роᲁи́вшꙋю сі́е ѡ҆троча̀, поми́лꙋй, и҆ простѝ во́лнаѧ и҆ нево́лнаѧ є҆ѧ̀ грѣхопаᲁе́нїѧ, и҆ съхранѝ ю҆̀ ѿ всѧ́кагѡ дїа́волскагѡ мꙋчи́телства: И҆ и҆́ꙁъ неѧ̀ рожᲁе́ннагѡ млаᲁе́нца съблюᲁѝ ѿ всѧ́кїѧ го́рести, ѿ всѧ́кїѧ злобы̀, ѿ всѧ́кїѧ съпроти́вныѧ бꙋ́рѧ, ѿ дꙋ́ховъ лꙋка́выхъ, дне́вныхъ же и҆ но́щныхъ: Сі́ю же съблюᲁѝ подъ держа́внꙋю рꙋ́кꙋ твою̀: и҆ да́жᲁъ є҆́й ско́рое въста́нїе, и҆ ᲃкве́рны ѡ҆чистѝ, и҆ ѿ бо́лѣꙁни и҆сцѣлѝ, и҆ зᲁра́вїе и҆ благомо́щїе дш҃ѝ же и҆ тѣ́лꙋ дарꙋ́й, и҆ А҆́гг҃лы ᲃвѣ́тлыми и҆ ᲃїѧ́ющими ᲃі́ю ѡ҆граᲁѝ: и҆ съблюᲁѝ ѿ всѧ́кагѡ наи́тїѧ неви́ᲁимыхъ дꙋ́хѡвъ. Е҆́й Гᲁ҃и, ѿ не́ᲁꙋга и҆ ꙗ҆́ꙁвы, ѿ рвенїѧ и҆ за́висти, и҆ ѿ ѡ҆че́снагѡ негоᲁова́нїѧ: И҆ поми́лꙋй ю҆̀, и҆ ѡ҆троча̀ по вели́цѣй млⷭ҇ти твое́й, и҆ ѡ҆чи́сти ю҆̀ ѿ тѣле́сныѧ ᲃкве́рны, и҆ ѿ раꙁли́чныхъ є҆́й нахоᲁѧ́щихъ ᲂу҆тро́бныхъ стꙋже́нїй, и҆ въꙁвеᲁѝ ю҆̀ ско́рыѧ ра́ᲁи твое́ѧ млⷭ҇ти, въ смире́ннѣй є҆ѧ̀ пло̀ти и҆справле́нїе: и҆ и҆́ꙁъ неѧ̀ рожде́нное мла́ᲁѧ, ᲃпоᲁо́би поклони́тисѧ зе́мномꙋ хра́мꙋ, є҆гѡ́же ᲂу҆готова́лъ є҆сѝ въ є҆́же ᲃла́витисѧ въ не́мъ И҆́мени твое́мꙋ ᲃт҃о́мꙋ. Ꙗ҆́кѡ поᲁоба́етъ ти всѧ́каѧ ᲃла́ва, че́сть, и҆ поклоне́нїе Ѿцꙋ̀, и҆ Сн҃ꙋ и҆ ᲃт҃о́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ: А҆ми́нь.

Моли́тва г҃, женѣ̀, и҆ послꙋжи́вшимъ то́й въ вре́мѧ рожᲁе́нїѧ. Сі́ѧ же и҆ Ба́бѣ.

Гᲁ҃и Бо́же на́шъ, благои҆ꙁволи́вый сънїйтѝ съ Нб҃съ, и҆ роᲁи́тисѧ ѿ ᲃт҃ы́ѧ Бц҃а и҆ при́снѡ Дв҃ы Мр҃іѧ, спсе́нїѧ ра́ᲁи на́съ грѣ́шныхъ, вѣᲁы́й немо́щное челове́ческагѡ є҆стества̀: Простѝ рабѣ̀ твое́й, И҆мⷬ҇къ: дне́сь роᲁи́вшой по множествꙋ̀ щеᲁрѡ́тъ твои́хъ: Ты́бо ре́клъ є҆сѝ Гᲁ҃и, расти́тесѧ, и҆ множи́тесѧ, и҆ и҆сполни́те зе́млю, и҆ ѡ҆блаᲁа́йте є҆ю̀, ᲃего̀ ра́ᲁи и҆ мы̀ рабѝ твоѝ моли́мсѧ дерꙁа́юще, неꙁлоби́вагѡ ра́ᲁи твое́гѡ человѣкѡлю́бїѧ, и҆ съ стра́хомъ въпїе́мъ къ Ца́рствїѧ твое́гѡ ᲃт҃о́мꙋ и҆́мени: При́ꙁри съ нб҃сѐ и҆ ви́жᲁъ не́мощъ на́съ ѡ҆сꙋжде́нныхъ, и҆ простѝ рабѣ̀ твое́й се́й, И҆мⷬ҇къ, и҆ всемꙋ̀ до́мꙋ въ не́мже роᲁи́сѧ ѡ҆троча̀: и҆ прикоснꙋ́вшимсѧ є҆́й, и҆ зᲁѐ ѡ҆брѣта́ющимсѧ всѣ́мъ, ꙗ҆́кѡ бла́гъ и҆ человѣкѡлю́бецъ Бг҃ъ простѝ: Ꙗ҆́кѡ є҆ᲁи́нъ и҆́маши вла́сть ѡ҆ставлѧ́ти грѣхѝ, молитва́ми Прⷭ҇ты́ѧ Бц҃а и҆ всѣ́хъ ᲃт҃ы́хъ твои́хъ. А҆ми́нь.

Вѣ́стнѡ бꙋ́ᲁи ꙗ҆́кѡ по ржⷭ҇твѣ̀ въ ѡ҆́смый дн҃ь прино́ситсѧ но́ворожᲁе́нный млаᲁе́нецъ ѿ ба́бы къ Це́ркви, и҆ стои́тъ пре́дъ две́рми Церкѡ́вными,

І҆ере́ѷ же глаголе́тъ:

Блⷭ҇ве́нъ Бг҃ъ на́шъ: Трⷭ҇то́е: и҆ по Ѿче на́шъ: Ꙗ҆́кѡ твоѐ є҆́сть: Ца́рствїе:

И посе́мъ Тропаръ: днѧ̀: и҆лѝ ᲃт҃гѡ є҆го́же є҆́сть хра́мъ. И҆ а҆́бїе зна́менаетъ І҆ере́ѷ млаᲁе́нцꙋ, чело̀, ᲂу҆ста̀, и҆ пе́рси. И҆ глаго́летъ Моли́твꙋ.

Рекъ,

Гᲁ҃ꙋ помоли́мсѧ.

Предстоѧ́щїи же:

Гᲁ҃и поми́лꙋй.

Моли́тва є҆́же знамена́ти Ѽ҆троча̀ и҆ И҆мѧ̀ є҆мꙋ̀ нарещѝ въ ѡ҆́смый дн҃ь Рожде́нїѧ є҆гѡ̀.

Гᲁ҃и Бо́же на́шъ тебѣ̀ сѧ мо́лимъ и҆ тебѣ̀ про́симъ: да знамена́етсѧ свѣ́тъ лица̀ твое́гѡ на рабѣ̀ твое́мъ се́мъ, И҆мⷬ҇къ. и҆ да знамена́етсѧ Крестъ є҆ᲁиноро́днагѡ Сн҃а твое́гѡ въ ᲃе́рдци и҆ въ помышле́нїѧхъ є҆гѡ̀, въ є҆́же бѣ́гати ѿ сꙋ́етства ми́ра, и҆ ѿ всѧ́кагѡ навѣ́та вра́жїѧ, въ ᲃлѣ́ᲁъ же хоᲁи́ти повелѣ́нїй твои́хъ: И҆ да́ждь Гд҃и не ѿрече́ннꙋ пребы́ти И҆́мени твое́мꙋ ᲃт҃о́мꙋ на не́мъ: Съвокꙋплѧ́емꙋ въ вре́мѧ поᲁо́бнѡ ᲃт҃ѣ́й твое́й Це́ркви, и҆ съверша́емꙋ ᲃтра́шными Та́йнами Ха҃ твое́гѡ: да по за́повѣᲁехъ твои́хъ жи́тельствова́въ, и҆ съхрани́въ печа́ть неврежᲁе́ннꙋ, полꙋ́читъ блаже́нство и҆ꙁбра́нныхъ въ Ца́рствїи твое́мъ: Благоᲁа́тїю и҆ человѣкѡлю́бїемъ є҆ᲁиноро́ᲁнагѡ Сн҃а твое́гѡ, съ ни́мъ же блⷭ҇венъ є҆сѝ, съ прⷭ҇ты́мъ и҆ благи́мъ и҆ животворѧ́щимъ ти Дх҃омъ, нн҃ѣ и҆ при́снѡ, и҆ въ вѣ́ки вѣкѡ́въ. А҆ми́нь.

И҆ вꙁе́мъ на рꙋ́цѣ І҆ере́ѷ ѡ҆троча̀ поставлѧ́етъ є҆гѡ̀ пре́дъ две́рми Хра́ма, и҆лѝ пре́ᲁъ Ѻ̑́браꙁомъ ᲃт҃ы́ѧ Бц҃а, и҆ знамена́етъ є҆гѡ̀ Крестаѻ́браꙁнѡ глаголѧ̀:

Ра́ᲁꙋйсѧ ѡ҆браᲁова́ннаѧ Бц҃е Дв҃о: и҆ съ тебѣ̀ бо въꙁсїѧ̀ Хᲃ҃ Бг҃ъ на́шъ, просвѣща́ѧ сꙋ́щихъ въ тмѣ̀: Весели́сѧ и҆ ты̀ ᲃта́рче Пра́веᲁный, прїи́мый на рꙋкꙋ свобоᲁи́телѧ дш҃а́мъ на́шимъ, дарꙋ́ющагѡ намъ Въскрⷭ҇нїе.

Конᲁа́къ Гла́съ, а҃.

тро́бꙋ Дв҃и́чꙋ ѡ҆ст҃и́вый Ржⷭ҇тво́мъ твои́мъ: и҆ рꙋ́цѣ Сѵмеꙍ́нѣ блⷭ҇ви́вый ꙗ҆́кѡже поᲁоба́ше: преᲁвари́въ нн҃ѣ ᲃпⷭ҇лъ є҆сѝ на Хє҃ Бж҃е: но ѹ҆мирѝ въ бра́нехъ гражᲁа́нствѡ, и҆ ѹ҆крѣпѝ Царѧ̀ и҆́хъже въꙁлюби́лъ є҆сѝ, є҆ᲁи́не человѣ́кѡлю́бче.

И҆ а҆́бїе глаголе́тъ І҆ере́ѷ:

Сла́ва ти Бо́же ѹ҆пова́нїе на́ше Сла́ва ти.

Пѣве́цъ: Сла́ва: И҆ нн҃ѣ: Гд҃и поми́лꙋй, гⷤ. Блⷭ҇ви.

І҆ере́ѷ же тво́ритъ ѿпꙋ́стъ глаголѧ̀:

На ѡ҆бъѧ́тїѧхъ Пра́веднагѡ Сѵмеꙍ́на въꙁлещѝ и҆ꙁволи́вый ᲃпⷭ҇нїѧ на́шгѡ ра́ᲁи, Хᲃ҃ и҆́стинный Бг҃ъ на́шъ Моли́твами Прчⷭ҇тыѧ свое́ѧ мт҃ре, и҆ всѣ́хъ ᲃт҃ыхъ свои́хъ, ᲃп҃се́тъ и҆ поми́лꙋетъ на́съ ꙗ҆́кѡ бла́гъ и҆ человѣкѡлю́бецъ.

Поᲁоба́етъ вѣ́ᲁати, ꙗ҆́кѡ а҆́ще бѡ́лнѡ бꙋ́ᲁетъ новорожᲁе́нное ѡ҆троча̀, и҆ нессе́тъ:

Не поᲁоба́етъ жᲁа́ти пѧ́тагѡ, и҆лѝ шеста́гѡ днѐ, и҆ тогда Крести́ти ꙗ҆́коже нѣ́цїи злѣ̀ рѣ́ша; но и҆ въ то́й самы́й ча́съ во́нь же роᲁи́тсѧ, ѡ҆мы́ти є҆гѡ̀, и҆ а҆́бїе Крести́ти, да не ѹ҆мре́тъ непросвѣще́ннѡ.

А҆ще бо пѧ́ть Мцⷭ҇ей ѿ зача́тїѧ ᲃлꙋ́читсѧ нѣ́кїѧ ра́ᲁи вины̀ и҆ꙁверже́нꙋ бы́ти ѡ҆троча́ти, ᲂу҆бі́йства мще́нїѧ по за́конѣхъ, и҆ Пра́вилѣ пови́нни сꙋ́ть: ко́лми па́че сꙋ́ᲁа поᲁоба́етъ и҆ꙁбѣга́ти ѿ рожᲁе́нныхъ ѹ҆жѐ, да не не просвѣще́нни ᲃконча́ютсѧ.

Въ четирᲁесѧ́тный же дн҃ь па́ки прино́ситсѧ ѡ҆троча̀ въ Це́ркѡвъ, въ є҆́же въ Це́ркѡвлѧ́тисѧ, сі́естъ: Нача́ло прїѧ́ти въвоᲁи́тисѧ въ Це́ркѡвъ. Прино́ситъ же сѧ ма́терїею ᲂу҆жѐ ѡ҆чище́нною и҆ ѡ҆мове́ною, тꙋ сꙋ́щꙋ и҆ хотѧ́щомꙋ прїѧ́ти то по Креще́нїи.

Сщ҃е́нникъ же начина́етъ:

Блⷭ҇ве́нъ Бг҃ъ на́шъ: тажъ ᲃт҃ы́й Бо́же г҃-жды: Прⷭ҇та́ѧ Трⷪ҇це: И҆ по Ѿче на́шъ: Ꙗ҆́кѡ твоѐ є҆́стъ: Ца́рство: Посе́мъ, Тропа́ръ: днѐви, и҆лѝ ᲃт҃о́мꙋ прилꙋ́чшемꙋсѧ порѧ́ᲁꙋ. Сла́ва. И҆ нн҃ѣ:

Моли́твами Гᲁ҃и всѣ́хъ ᲃт҃ы́хъ и҆ Бц҃а, тво́й миръ да́ждъ намъ и҆ поми́лꙋй на́съ, ꙗ҆́кѡ є҆ᲁи́нъ ще́ᲁръ.

Прекло́ньши же є҆́й главꙋ вкꙋ́пѣ съ ѡ҆троча́темъ пре́дъ две́рми Це́ркѡвными, ᲃвѧще́нникъ же твори́тъ Кре́стное зна́менїе наᲁъ ни́мъ, и҆ каса́ѧсѧ гла́вы є҆ю̀.

Свѧще́нникъ глаго́летъ:

Гᲁ҃ꙋ помоли́мсѧ.

Предстоѧ́щїи же:

Гᲁ҃и поми́лꙋй.

І҆ере́ѷ Моли́твꙋ, ᲃі́ю:

Гᲁ҃и Бо́же Всеᲁержи́телю, Ѿче Гᲁ҃а на́шегѡ І҆и҃ᲃ Ха҃, всѐ є҆стество̀ ᲃлове́сное же и҆ беꙁъ ᲃлове́сное, ᲃло́вомъ твои́мъ ᲃъꙁᲁа́вый, и҆ всѧ̀ ѿ небы́тїѧ въ є҆́же бы́ти привеᲁы́й: тебѣ̀ сѧ мо́лимъ, и҆ тебѐ про́симъ: рабꙋ̀ твою̀ ᲃі́ю. И҆мⷬ҇къ. Ю҆́же во́лею твое́ю ᲃпⷭ҇лъ є҆сѝ, ѡ҆чи́сти ѿ всѧ́кагѡ грѣха̀, и҆ ѿ всѧ́кїѧ ᲃкве́рны, прихоᲁѧ́щꙋю къ ᲃт҃ѣ́й твое́й Це́ркви, ꙗ҆́кѡ да не ѡ҆сꙋжᲁе́ннѡ споᲁоби́тсѧ Причасти́тисѧ ᲃт҃ы́мъ твои́мъ Та́йнамъ.

А҆ще ѹ҆бѡ пре́жᲁе м҃-гѡ дне, ѹ҆ме́рлъ бꙋ́ᲁетъ млаᲁе́нецъ, чтѝ моли́твꙋ до зᲁѣ̀. и҆ абїе

Свѧще́нникъ въꙁгла́си:

Ꙗ҆́кѡ бла́гъ и҆ человѣкѡлю́бецъ Бг҃ъ є҆сѝ, и҆ тебѣ:

А҆́щели жи́въ є҆́стъ, чтѝ и҆ ᲃі́е до конца̀.

И҆ ᲃі́е ѿ не́ѧ рожᲁе́нное ѡ҆троча̀ благословѝ, въꙁрастѝ, ѡ҆ст҃ѝ, враꙁꙋмѝ, ᲂу҆цѣломꙋдрѝ, и҆ благораꙁꙋ́мно сътворѝ: Ꙗ҆́кѡ ты приве́лъ є҆сѝ тогѡ̀, и҆ ꙗ҆ви́лъ є҆сѝ є҆мꙋ̀ ᲃвѣ́тъ чꙋ́встве́нный, ꙗ҆́кѡ да и҆ раꙁꙋ́мномꙋ ᲃпоᲁоби́тсѧ ᲃвѣ́тꙋ, въ вре́мѧ є҆́же пре́дъ ᲂу҆ста́вилъ є҆сѝ: и҆ съ причте́тсѧ ᲃт҃о́мꙋ ти ᲃта́ᲁꙋ, Е҆ᲁиноро́ᲁнымъ ти Сн҃омъ: съ ни́мъ же блⷭ҇ве́нъ є҆сѝ, съ Прⷭ҇ты́мъ, и҆ благи́мъ, и҆ животворѧ́щимъ ти Дх҃омъ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

І҆ере́ѷ же:

Ми́ръ всѣ́мъ.

Пѣве́цъ:

И҆ дꙋ́хови твое́мꙋ.

І҆ере́ѵꙵ:

Гла́вы ва́ша Гв҃и преклонѣ́те.

Пѣве́цъ:

Тебѣ̀ Гд҃и.

І҆ере́ѵꙵ же Моли́твꙋ ᲃі́ю мт҃ри ѡ҆троча́ти, гл҃етъ:

Гд҃и Бо́же на́шъ, прише́ᲁый на ᲃпⷭ҇нїе ро́ᲁа человѣ́ческагѡ, прїйᲁѝ и҆ къ рабѣ̀ тво́ей ᲃе́й, И҆мⷬ҇къ: и҆ споᲁобѝ ю҆̀ моли́твъ ра́ᲁи чⷭ҇тнагѡ Преꙁви́терства, прибѣга́ти въ ᲃт҃ꙋ́ю ти Събо́рнꙋю Це́ркѡвъ, и҆ вънитѝ въ хра́мъ ᲃла́вы твое́ѧ: И҆ споᲁобѝ ю҆́ Причасти́тисѧ Прчⷭ҇томꙋ Тѣ́лꙋ и҆ Кро́ви Ха҃ твое́гѡ: Ѻ҆мы́й є҆ѧ̀ бъра́скꙋ тѣле́снꙋю, и҆ ѡ҆скве́рненїе дш҃е́вное, въ и҆сполне́нїи четырᲁесѧ́ти дні́й: Ꙗ҆́кѡ да ᲃпоᲁо́бълшисѧ внїйтѝ въ ᲃт҃ы́й Хра́мъ, просла́витъ съ на́ми Прⷱ҇то́е И҆мѧ̀ твоѐ, Ѿца̀, и҆ Сн҃а, и҆ ᲃт҃гѡ Дх҃а, нн҃ѣ и҆ при́снѡ, и҆ въ вѣ́ки вѣкѡ́въ.

Пѣве́цъ:

А҆ми́нь.

Моли́тва, в҃. ѡ҆троча́ти є҆гѡ́же.

І҆ере́ѵꙵ знамена́въ, мо́литсѧ. Ре́къ:

Гᲁ҃ꙋ помоли́мсѧ.

Пѣве́цъ:

Гд҃и поми́лꙋй.

Гд҃и Бо́же на́шъ въ четырᲁесѧ́тъ дне́й млаᲁе́нецъ за́конномꙋ хра́мꙋ принесе́ный ѿ Мр҃їѧ неискꙋсобра́чныѧ и҆ ᲃт҃ы́ѧ ти мт҃ре, и҆ на ѡ҆бъѧ́тїѧхъ правѣдна́гѡ Сѵмеꙍ́на прїѧ́тый, ᲃа́мъ Влады́кѡ всеси́лне, и҆ принесе́ное ᲃі́е ѡ҆троча̀ ꙗ҆ви́тисѧ тебѣ̀ всѣ́хъ тво́рцꙋ Блⷭ҇вѝ, и҆ на всѧ́ко дѣ́ло благо́е и҆ тебѣ̀ благоꙋго́ᲁное въꙁрастѝ, ѿгонѧ̀ ѿ не́гѡ всѧ́кꙋю сопроти́внꙋю си́лꙋ зна́менїемъ въ ѡ҆браже́нїѧ Креста̀ твое́гѡ. Ты̀ бо є҆сѝ хранѧ́й млаᲁе́нцѧ Гᲁ҃и: да споᲁо́битсѧ ᲃт҃гѡ Креще́нїѧ, полꙋ́читъ ча́сть и҆ꙁбра́нныхъ Ца́рствїѧ твое́гѡ, соблюᲁа́емѡ съ на́ми, благода́тїю ᲃт҃ы́ѧ и҆ є҆ᲁиносꙋ́щныѧ и҆ нераꙁᲁѣ́лныѧ Трⷪ҇ца: Тебѣ̀ бо поᲁоба́етъ всѧ́каѧ сла́ва, благоᲁаре́нїе, и҆ поклоне́нїе съ беꙁнача́лнымъ ти Ѿце́мъ, и҆ съ прест҃ы́мъ, и҆ благи́мъ и҆ животворѧ́щимъ ти Дх҃омъ, нн҃ѣ и҆ при́снѡ, и҆ въ вѣ́ки вѣкѡ́въ.

Пѣве́цъ:

А҆ми́нь.

І҆ере́ѵꙵ:

Ми́ръ всѣ́мъ.

Пѣве́цъ,

И дх҃ови твое́мꙋ.

І҆ере́ѵꙵ:

Гла́вы ва́ша Гв҃и преклонѣ́те.

Пѣве́цъ:

Тебѣ̀ Гᲁ҃и,

І҆ере́ѵꙵ Моли́твꙋ ᲃі́ю:

Бо́же Ѿче Всеᲁержи́телю, велегласнѣ́йшимъ прⷪ҇ро́комъ И҆са́їемъ провоꙁвѣсти́вый намъ, є҆́же ѿ Дв҃ы въплоще́нїе є҆ᲁиноро́ᲁнагѡ твое́гѡ Сн҃а и҆ Бг҃а на́шегѡ: въ послѣ́ᲁокъ же дні́й благоволе́нїемъ твои́мъ, и҆ ᲁѣ́йствомъ Ст҃гѡ Дх҃а, ᲃпасе́нїѧ ра́ᲁи на́съ сме́ртныхъ, беꙁчи́сленнымъ благоꙋтро́бїемъ, ѿ не́ѧ млаᲁенствова́ти въспрїи́мый: и҆ по ѡ҆бы́чномъ въ зако́нѣ ᲃт҃о́мъ твое́мъ, и҆сполне́нїю дні́й ѡ҆чище́нїѧ, ᲃт҃лищꙋ принести́сѧ и҆ꙁволи́вый: и҆ и҆́стинный законополо́жникъ сы́й, на ѡ҆бъѧ́тїѧхъ пра́веднагѡ Сѵмеѡ́на въꙁлещѝ въспрїѧ́лъ є҆сѝ. Е҆ѧ́же та́йны проѡбраже́нїе въ предрече́нномъ Прⷪ҇ро́цѣ чре́ꙁъ Кли́ща ҆́глѧ знаменꙋ́емѡ поꙁна́хѡмъ: є҆ѧ́же и҆ мы̀ вѣ́рнїи поᲁража́нїе въ Благода́ти соᲁержи́мъ. Са́мъ и҆ нн҃ѣ хранѧ́й млаᲁе́нцѧ Гᲁ҃и, Блⷭ҇вѝ ѡ҆троча̀ ᲃі́е, въкꙋ́пѣ роᲁи́телѧ и҆ въспрїе́мники є҆гѡ̀, и҆ споᲁобѝ є҆̀ въ вре́мѧ благопоᲁо́бно, и҆ воᲁо́ю и҆ Дх҃омъ ѿрожᲁе́нїю: съчислѝ є҆гѡ̀ ᲃт҃мꙋ твое́мꙋ ста́ᲁꙋ слове́сныхъ ѡ҆ве́цъ, нарица́ющихсѧ и҆́менемъ Ха҃ твое́гѡ: Ꙗ҆́кѡ ты̀ є҆сѝ въ вы́шныхъ живы́й, и҆ смире́ннаѧ приꙁира́ѧй: и҆ тебѣ̀ ᲃла́вꙋ воꙁъсыла́емъ, Ѿц҃ꙋ̀ и҆ Сн҃ꙋ и҆ Ст҃мꙋ Дх҃ꙋ, н҃нѣ и҆ при́снѡ, и҆ въ вѣ́ки вѣкѡвъ.

Пѣве́цъ:

А҆ми́нь.

І҆ере́ѵꙵ же вꙁе́мъ ѡ҆троча̀, тво́ритъ и҆́мъ зна́менїе Креста пре́дъ две́рми хра́ма гл҃ѧ̀:

Въцерковлѧ́етсѧ ра́бъ Бж҃їй, И҆мⷬ҇къ: въ и҆мѧ̀ Ѿца̀, и҆ Сн҃а, и҆ ᲃт҃гѡ Дх҃а, нн҃ѣ и҆ при́снѡ, и҆ въ вѣ́ки вѣкѡ́въ. А҆ми́нь.

И та́кѡ въво́ᲁитъ є҆́ въ Це́ркѡвъ, гл҃ѧ̀:

Вні́йᲁетъ въ до́мъ тво́й, покло́нитсѧ къ Це́ркви ᲃт҃ѣ́й твое́й.

И҆ въхо́ᲁитъ внꙋ́тръ хра́ма: гл҃ѧ̀, па́ки ᲃі́е:

Въцерковлѧ́етсѧ ра́бъ Бж҃їй.

Посре́ᲁѣ же Це́ркве прише́ᲁъ, ᲃі́е глаголе́т:

Посре́ᲁѣ Це́ркве въспое́тъ тѧ.

Посе́мъ въво́ᲁитъ пре́дъ две́рми Ѻ҆лтарѧ трети́цею, гл҃ѧ̀:

Върцерковлѧ́етсѧ ра́бъ Бж҃їй.

И҆ въво́ᲁи҆тъ є҆́ въ ᲃт҃ы́й ѡ҆лтаръ, а҆́ще бꙋ́ᲁетъ мꙋ́жескїй по́лъ: а҆́ще же́нскїй да́же до Ца́рскихъ вра́тъ, гл҃ѧ:

Нн҃ѣ ѿпꙋща́еши раба̀ твое́гѡ Влады́кѡ, по гл҃ꙋ̀.

И҆ посе́мъ полага́етъ є҆̀ пре́дъ две́рми Ѻ҆́лтарѧ, и҆ та́кѡ въспрїе́мникъ поклони́всѧ, гⷤ, въꙁе́млетъ є҆́, и҆ и҆схо́ᲁитъ.

І҆ере́ѵꙵ же глаголе́тъ:

Сла́ва ти Бо́же ѹ҆пова́нїе на́ше сла́ва ти.

Пѣве́цъ:

Сла́ва: И҆ нн҃ѣ, Гд҃и поми́лꙋй, гⷤ, блⷭ҇ви.

І҆ере́ѵꙵ же тво́ритъ ѿпꙋ́стъ ᲃи́цевый:

На ѡ҆бъѧ́тїѧхъ Пра́веᲁнагѡ Сѵмеꙍ́на въꙁлещѝ и҆ꙁволи́вый ᲃпⷭ҇нїѧ на́шегѡ ра́ᲁи, Хᲃ҃ и҆́стинный Бг҃ъ на́шъ, Моли́тва́ми Прчⷭ҇тыѧ свое́ѧ Мт҃ре, и҆ всѣ́хъ ᲃт҃ы́хъ свои́хъ, ᲃп҃се́тъ и҆ поми́лꙋетъ на́съ, ꙗ҆́кѡ бла́гъ и҆ человѣкѡлю́бецъ.

Поᲁоба́етъ ѹ҆́бѡ тебѣ̀ вѣ́ᲁати ѽ І҆ере́ю, ꙗ҆́кѡ а҆́ще си́цевый слꙋ́чай приклю́чисѧ въ твое́й Паро́хїи, ника́коже ти мо́щнѡ є҆́сть дерꙁнꙋ́ти про́стѡ, и҆ ꙗ҆́коже прилꙋчи́сѧ, проче́сти є҆й ᲃі́ю Моли́твꙋ: но пе́рвѣе повелѝ женѣ̀ и҆ꙁве́ргшей и҆сповѣᲁа́нїе грѣхѡ́въ свои́хъ пре́дъ тобо́ю ᲃътвори́ти чи́ннѡ. Въ и҆сповѣᲁа́нїи же се́мъ, и҆ꙁвѣ́стнѡ и҆спыта́й, каковѣ́мъ ѡ҆́браꙁомъ ᲃі́е и҆ꙁверже́нїе приключи́сѧ є҆́й: во́лею ли, и҆лѝ, не во́лею: и҆́бѡ а҆́ще во́лею, кои́мъ ли́бѡ бꙋ́ᲁи ѡ҆́браꙁомъ ᲃі́е ключи́сѧ є҆́й, ѹ҆бі́йство сътвори́ла є҆́сть: Сегѡ́же ѹ҆́бѡ ра́ᲁи ѿ ᲃт҃ы́хъ Пра́вилъ раꙁсꙋᲁи́въ, накажѝ ю҆́, и҆ Е҆піти́мїю по си́лѣ наложи́въ, раꙁᲁрѣше́нїемъ ѡ҆бы́чнымъ раꙁᲁрѣшѝ. А҆́щеже не во́лею, ѿ слꙋ́чаѧ кое́гѡ ᲃі́е бы́сть є҆́й, малы́мъ чи́мъ запрѣтѝ ю҆́, и҆ накаꙁа́въ раꙁᲁрѣшѝ. По раꙁᲁрѣше́нїю же, чтѝ Моли́твꙋ ᲃі́ю, ᲃи́мъ ѡ҆браꙁомъ.

Нача́ло сътворѝ ѡ҆бы́чное, Чтѝ, Трⷭ҇то́е, Ѻ҆́ч҃е на́шъ: И҆ по Ꙗ҆́кѡ твоѐ є҆́сть црⷭ҇тво.

Тропа́ри сі́ѧ, Гла́съ, ѕ҃.

Поми́лꙋй на́съ Гд҃и, поми́лꙋй на́съ, всѧ́кагѡ бо ѿвѣ́та неᲁоꙋмѣ́юще, ᲃі́ю ти моли́твꙋ ꙗ҆́кѡ Влады́цѣ грѣ́шнїи ра́би принѡ́симъ, поми́лꙋй на́съ.

Сла́ва:

Гд҃и, поми́лꙋй на́съ, на тѧ̀ бо ѹ҆пова́хѡмъ, не прогнѣва́йсѧ на́ны ѕѣ́лѡ, ни́же помѧнѝ беꙁꙁакѡ́нїй на́шихъ: но при́ꙁри нн҃е ꙗ҆́кѡ млⷭ҇рᲁъ, и҆ и҆ꙁба́ви на́съ ѿ вра́гъ на́шихъ: Ты́бо є҆сѝ Бг҃ъ на́шъ, и҆ мы̀ лю́ᲁїе твоѝ: и҆ всѝ дѣ́ло рꙋ́кꙋ тво́ею, и҆ И҆мѧ̀ твоѐ приꙁыва́емъ.

И҆ нн҃ѣ:

Млⷭ҇рᲁїѧ две́ри ѿверꙁѝ намъ блⷭ҇веннаѧ Бц҃е Дв҃о: наᲁѣ́ющїисѧ на́тѧ да нѐ поги́бнем: но да и҆ꙁба́вимсѧ тобо́ю ѿ бе́ᲁъ, ты́бо є҆сѝ ᲃпⷭ҇нїе ро́ᲁꙋ христїанскомꙋ.

Влады́кѡ Гд҃и Бо́же на́шъ, рожᲁе́йсѧ ѿ ᲃт҃ы́ѧ Бц҃а, и҆ при́снѡ Дв҃ы Мр҃їѧ, и҆ въ ꙗ҆́слехъ ꙗ҆́кѡ же ѡ҆тро́чищъ въꙁле́гїй: Са́мъ рабꙋ̀ твою̀ ᲃі́ю, И҆мⷬ҇къ: дне́сь въ грѣ́хъ ᲂу҆бі́йства во́лнагѡ въпа́ᲁшꙋю, и҆ зача́тое въ не́й и҆ꙁве́ргшꙋю, поми́лꙋй по вели́цѣй твое́й млⷭ҇ти: и҆ простѝ є҆́й во́лнаѧ и҆ нево́лнаѧ съгрѣше́нїѧ: и҆ съхранѝ ѿ всѧ́кагѡ дїа́волскагѡ коꙁноᲁѣ́йствїѧ: и҆ скве́рнꙋ ѡ҆чи́сти, бо́лѣꙁни и҆сцѣлѝ: Зᲁра́вїе и҆ благомо́щїе тѣ́лꙋ съ дш҃е́ю є҆ѧ̀ человѣ́кѡлю́бче дарꙋ́й: и҆ А҆́гг҃лѡмъ ᲃвѣ́тлымъ ѡ҆граᲁѝ ю҆̀, ѿ всѧ́кагѡ наше́ствїѧ невиᲁи́мыхъ бесѡ́въ, є҆́й Гᲁ҃и, ѿ не́ᲁꙋга и҆ ꙗ҆́ꙁѧ: И҆ ѡ҆чи́сти ю҆̀ ѿ тѣле́сныѧ скве́рны, и҆ про́чїихъ нахоᲁѧ́щихъ є҆́й въꙁмꙋще́нїй ᲂу҆тро́бныхъ: и҆ и҆ꙁвеᲁѝ ю҆̀ смире́нною твое́ю млⷭ҇тынею, въ смире́ннѣмъ є҆ѧ̀ тѣ́лѣ: И҆ въста́ви ю҆̀ ѿ ло́жа на не́мъ же ѡ҆бложе́на є҆́сть: ꙗ҆́кѡ въ грѣсѣ̀ роᲁи́хѡмсѧ и҆ въ беꙁꙁакѡ́нїихъ, и҆ ᲃкверна́ви всѝ є҆смы̀ пре́дъ тобо́ю Гᲁ҃и: и҆ съ ᲃтра́хѡмъ въпїе́мъ и҆ гл҃е́мъ: При́ꙁри съ нб҃сѐ, и҆ ви́жᲁъ бо́лѣꙁнь на́съ ѡ҆сꙋжᲁе́нныхъ, и҆ простѝ рабѣ̀ твое́й се́й, И҆мⷬ҇къ: въ грѣ́хъ ᲂу҆бі́йства въпа́ᲁшей, и҆ во́лею, и҆лѝ не во́лею зача́тое въ не́й и҆ꙁве́ргшей: и҆ всѣ́хъ ѡ҆брѣта́ющихсѧ, и҆ прикоснꙋ́вшихсѧ є҆́й, по вели́цѣй твое́й млⷭ҇ти, ꙗ҆́кѡ бла́гъ и҆ человѣкѡлю́бецъ Бг҃ъ поми́лꙋй и҆ простѝ: ꙗ҆́кѡ ты̀ є҆ᲁи́нъ и҆́маши вла́сть ѿпꙋща́ти грѣхѝ и҆ беꙁꙁакѡ́нїѧ, Моли́твами Прчⷭ҇тыѧ твое́ѧ Мт҃ре, и҆ всѣ́хъ ᲃт҃ы́хъ: Ꙗ҆́кѡ поᲁоба́етъ ти всѧ́каѧ ᲃла́ва, чⷭ҇ть и҆ поклоне́нїе, ᲃъ Ѿце́мъ и҆ ᲃт҃ы́мъ Дх҃омъ, нн҃ѣ и҆ при́снѡ, и҆ въ вѣ́ки вѣкѡ́въ. А҆ми́нь.

И҆ абїе І҆ере́ѵꙵ тво́ритъ ѡ҆бы́чный ѿпꙋстъ и҆ ѿхо́ᲁитъ.

А҆ще кто̀ Е҆пⷭ҇пъ, и҆лѝ Преꙁви́теръ, и҆́стинное Крещенїе и҆мѣ́ющагѡ, па́ки Крести́ти бꙋ́ᲁетъ, и҆лѝ ѡ҆скверне́ннагѡ ѿ нечести́выхъ не Крести́тъ: да и҆ꙁве́ржетсѧ, ꙗ҆́кѡ рꙋга́ѧйсѧ Крестꙋ̀ и҆ ᲃме́рти Гᲁ҃не́й, и҆ не раꙁсꙋжᲁа́ѧй І҆ере́ѧ, ѿ лжѐ І҆ере́ѡвъ, та́ѧжᲁе и҆ и҆́же въ Карѳаге́нскомъ Собо́рѣ, н҃-мъ, завѣщава́етъ Канѡ́нѣ.

И҆же а҆́ще Е҆пⷭ҇пъ, и҆лѝ Преꙁви́теръ, по Гᲁⷭ҇ню завѣща́нїю, не Крести́тъ въ Ѿца̀, и҆ Сн҃а, и҆ ᲃт҃гѡ Дх҃а: но въ трѝ Беꙁнача́лны, и҆лѝ въ трѝ Сн҃ы̀, и҆лѝ въ трѝ Ꙋ҆тѣши́тели, да и҆ꙁвержетсѧ.

А҆ще кото́рый Е҆пⷭ҇пъ, и҆лѝ Преꙁви́теръ, не трѝ погрꙋже́нїѧ є҆ᲁи́ныѧ Та́йны съверши́тъ: но є҆ᲁино̀ погрꙋже́нїе є҆́же въ ᲃме́рть Гᲁ҃ню дае́мое, да и҆ꙁверже́тсѧ. Небо̀ речѐ Гд҃ъ, въ см҃рть мою̀ Креща́йте: но ше́ᲁше наꙋчи́те всѧ̀ ꙗ҆ꙁы́ки, Крестѧ́ще и҆́хъ въ И҆мѧ̀ Ѿца̀, и҆ Сн҃а, и҆ ᲃт҃гѡ Дх҃а.

Е҆ѵномїѧ́нѡвъ же ѹ҆́бѡ въ є҆ᲁино̀ погруже́нїе Креща́ющихсѧ, и҆ Монтани́стѡвъ зᲁѐ нарица́емыхъ Фри́ги, и҆ Савелїѧ́нѡвъ, ᲃн҃оѿчествїе ѹ҆ча́щихъ, и҆ и҆́на нѣ́каѧ тѧ́жкаѧ творѧ́щихъ, и҆ и҆́ныѧ всѧ̀ є҆́реси: (поне́же зᲁѐ мно́ги ᲃꙋ́ть) па́че же ѿ Галаті́йскїѧ ᲃтра́ны прихоᲁѧ́щїи, всѣ́хъ ѡ҆́ныхъ хотѧ́щихъ приложи́тисѧ Правосла́вїю, ꙗ҆́коже Е҆́ллинѡвъ прїе́млемъ: И҆ въ пе́рвый дн҃ь тво́римъ и҆́хъ Христїа́ны: Въ вто́рый же ѡ҆глаше́нныхъ, та́же въ тре́тїй заклина́емъ и҆́хъ, по внегᲁа̀ дꙋ́нꙋти три́жᲁы на лицѐ и҆ въ ѹ҆шеса̀: и҆ та́кѡ ѡ҆глаша́емъ и҆́хъ, и҆ тво́римъ на до́лꙁѣ вре́мени пребыва́ти въ Це́ркви, и҆ послꙋша́ти Писа́нїѧ, и҆ тогᲁа̀ и҆́хъ Креща́емъ.

Ꙗ҆́кѡ поᲁоб́аетъ просвеща́емыхъ по Креще́нїи, пома́ꙁовати помаꙁа́нїемъ нбⷭ҇нымъ, и҆ Прича́стникѡмъ бы́ти Ца́рствїѧ Хв҃а.

Небо̀ съ ѡ҆бща́етсѧ речѐ, съ тѣмѝ просвеще́нїю и҆́же въ не́й дѣ́тищъ, не ѹ҆̀ ѿ є҆стества̀ прїи́мшїй блага́гѡ, и҆лѝ горша́гѡ проиꙁволе́нїе: ни́же мо́щнѡ є҆́сть и҆спыта́ти, и҆ каково̀ и҆мѣ́ли бы проиꙁволе́нїе: Млаᲁе́нци же А҆наᲁо́хꙋмъ, си́рѣчъ въспрїе́мникѡмъ, въꙁлага́емаѧ и҆́мъ, дѣ́лы самѣ́ми просвеща́емыѧ, Бж҃естве́ннагѡ приѡбща́ютсѧ ѡ҆блиста́нїѧ.

ѡ҆глаше́ннаѧ жена̀, А҆ще бы въ дн҃ь то́й во́нъже Крести́тисѧ и҆ма́тъ, по ѡ҆бы́чаю быва́емое є҆й ᲃлꙋчи́лосѧ, въ ѹ҆́трешнїй дн҃ь да ѿлага́етсѧ просвѣще́нїе.

а҆́ще ѡ҆троча̀ ѡ҆глашенное, и҆лѝ мꙋжъ, ᲃщ҃еннѣй съверша́емѣй же́ртвѣ, пристꙋ́пль не лꙋка́внѣ, Бжⷭ҇тве́ннымъ Причасти́тсѧ да́рѡмъ, невѣᲁꙋ́щꙋ ᲃщ҃е́нникꙋ бы́ти тогѡ̀ ѡ҆глаше́нна, а҆́бїе да Крести́тсѧ: Занѐ ѿ Гᲁ҃а приꙁва́нъ є҆́сть.

а҆́ще и҆ ѿлꙋче́нїе терпѧ́тъ нѣ́цїи ѿ ѡ҆глаше́нныхъ, зае́же запрѣще́ни бы́шѧ, и҆ хотѧ́тъ сконча́тисѧ, да Крестѧ́тсѧ: а҆ не неприча́стни благода́ти Бж҃їѧ да ѿхо́ᲁѧтъ.

Непра́веᲁнѡ бо вᲁа́вшомꙋ ᲃебѐ зло́мꙋ Дѣ́мѡнꙋ въ жи́лище, ѹ҆клоне́нїемъ на лꙋка́ваѧ дѣ́ла, ᲃвѣ́тъ ᲃт҃гѡ Дх҃а въ себѣ̀ прїѧ́ти, несъверше́ннѣ свобо́ждшꙋсѧ ѿ те́мнагѡ и҆ лꙋка́вагѡ дꙋ́ха; А҆́щеже ᲃконча́тисѧ ᲃемꙋ̀ прі́йᲁетъ, повелѣва́етъ Крести́ти тогѡ̀, да не то́щъ и҆ꙁы́ᲁетъ ѿ жи́тїѧ, не причасти́всѧ Бжⷭ҇тве́нныѧ благода́ти.

а҆́ще не ѿ Дѣ́мѡна ѡ҆глаше́нный ѡ҆бꙋрева́емъ є҆́сть: но ѿ не́ᲁꙋга и҆стꙋпле́нїемъ ѹ҆ма̀ пораже́нъ є҆́сть, ꙗ҆́кѡ ни́же ѿвѣща́ти мощѝ є҆мꙋ̀, ѿѧ́тꙋ ᲃꙋ́щꙋ и҆ вѣща́нїю: но є҆лма̀ покаꙁа̀ ѿ проиꙁволе́нїѧ вѣ́рꙋ лобыꙁа́ти, самово́лнѣ въ ѡ҆глаше́нныхъ причте́нъ ᲃы́й: беꙁъ сꙋмнѣ́нїѧ да Крести́тсѧ.

поᲁа́емаѧ благода́ть намъ, не то́кмѡ грѣхѡ́въ ѡ҆ставле́нїе: но и҆ ᲃи́лꙋ въво́ᲁитъ, въ є҆́же не ктомꙋ̀ съгрѣша́ти намъ: а҆́ще не за лѣ́ность, ᲃамово́лни ᲃꙋ́ще, грѣхѡ́внаѧ дѣ́ла лобыꙁа́ти бꙋ́ᲁемъ: а҆ не та́кѡ мꙋᲁрствꙋ́ющихъ, А҆наѳе́мѣ преᲁае́тъ.

Приво́ᲁимъ быва́етъ ѡ҆гласи́тисѧ хотѧ́й: и҆лѝ приноси́мъ а҆́ще млаᲁе́нецъ є҆́стъ къ це́ркви.

Стоѧ́щꙋ же Кꙋ́мꙋ съ Креща́емымъ вънѐ пре́ᲁъ Церкѡ́вными две́рми.

І҆ере́ѵꙵ въ две́рехъ ᲃтоѧ̀ раꙁᲁреша́етъ по́ѧсъ хотѧ́щагѡ просвѣти́тисѧ.

Съвле́чъ же съ ри́зъ и҆ ѿрѣши́въ поставлѧ́етъ є҆гѡ̀ къ Въсто́кꙋ лице́мъ: беꙁъ по́ѧсна, не покрове́нна, и҆ не ѡ҆бꙋве́нна, въ є҆ᲁино́мъ хитѡ́нѣ, и҆ рꙋ́цѣ до́лꙋ и҆мꙋ́ща.

Се́же быва́етъ въ па́пертѣ прѧ́мѡ церко́вныхъ две́рїй.

А҆ще же є҆́сть млаᲁе́нецъ Креща́емый: держи́мъ быва́етъ Кꙋмо́ю: сі́естъ, въспрїе́мницею: Въспрїе́мникъ же ᲃа́мъ стои́тъ ѿ де́сныѧ ᲃтра́ны.

Си́мъ же бы́вшимъ, дꙋ́нетъ а҆́бїе ᲃщ҃е́нникъ на ѡ҆глаша́емагѡ лицѐ, три́жᲁы. кꙋ́пно же и҆ въꙋ́ха. И҆ ꙁнамена́етъ лицѐ є҆гѡ̀ и҆ пе́рси, гⷤ.

И҆ въꙁложи́въ рꙋ́кꙋ на главꙋ̀ є҆гѡ̀, глаголе́тъ.

Моли́твꙋ ᲃі́ю, ре́къ:

Гд҃ꙋ помо́лимсѧ.

и҆ Пѣве́цъ:

Гд҃и поми́лꙋй.

Ꙍ҆ И҆́мени твое́мъ Гд҃и Бе҃ и҆́стинный, и҆ є҆ᲁиноро́ᲁнагѡ Сн҃а твое́гѡ̀, и҆ Прⷭ҇та́гѡ твое́гѡ Дх҃а, въꙁлага́ю рꙋ́кꙋ мою̀ на раба̀ твое́гѡ ᲃегѡ̀, И҆мⷬ҇къ, споᲁо́блъшагѡсѧ прибѣ́гнꙋти къ ᲃт҃о́мꙋ и҆́мени тво́емꙋ̀, и҆ подъ кро́вомъ кри́лꙋ твое́ю съблюᲁе́нꙋ бы́ти: Ѿимѝ ѿ не́гѡ ве́тхꙋю ѡ҆́нꙋю пре́лесть, и҆ и҆сполнѝ є҆гѡ̀ є҆́же въ тѧ̀ Вѣ́ры, и҆ наᲁе́жᲁы, и҆ любвѐ, да ѹ҆раꙁꙋмѣ́етъ ꙗ҆́кѡ ты̀ є҆сѝ є҆ᲁи́нъ Бг҃ъ и҆́стинный, и҆ є҆ᲁи́норо́ᲁный тво́й ᲃн҃ъ Гᲁ҃ь на́шъ І҆и҃ᲃ Хᲃ҃, и҆ ᲃт҃ы́й тво́й Дх҃ъ. Да́жᲁъ є҆мꙋ̀ въ всѣ́хъ за́повѣᲁехъ твои́хъ шествова́ти, и҆ ᲂу҆го́ᲁнаѧ тебѣ̀ съблюстѝ: и҆бѡ̀ а҆́ще та сътво́ритъ человѣ́къ жи́въ бꙋ́ᲁетъ въ ни́хъ. Впишѝ є҆гѡ̀ въ кни́ги жи́вотныѧ, и҆ съ є҆ᲁинѝ є҆гѡ̀ ᲃта́ᲁꙋ наслѣ́ᲁїѧ твое́гѡ: да просла́витсѧ И҆мѧ̀ твоѐ ᲃт҃о́е ѡ҆не́мъ, и҆ въꙁлю́бле́ннагѡ твое́гѡ Сн҃а, Гᲁ҃а же на́шегѡ І҆и҃ᲃ Ха҃, и҆ животворѧ́щагѡ твое́гѡ Дх҃а. Бꙋ́ᲁетъ ѡ҆́цѣ твою̀ приꙁира́ющи на́нь въ млⷭ҇ти всегᲁа̀: и҆ ᲂу҆́ши твоѝ є҆́же послꙋша́ти гла́са мл҃е́нїѧ є҆гѡ̀, въꙁвеселѝ є҆гѡ̀ въ дѣ́лехъ рꙋ́кꙋ є҆гѡ̀, и҆ въ все́мъ ро́ᲁѣ є҆гѡ̀, ꙗ҆́кѡ да и҆сповѣ́стьтисѧ покланѧ́ѧсѧ, и҆ славѧ̀ И҆мѧ̀ твоѐ вели́кое и҆ вы́шнее, и҆ въсхва́литъ тѧ̀ вы́нꙋ въ всѧ̀ днѝ живота̀ свое́гѡ: Тебѣ̀ бо пою́тъ всѧ̀ ᲃи́лы нбⷭ҇ныѧ, и҆ твоѧ̀ є҆́стъ ᲃла́ва, Ѿца̀, и҆ Сн҃а, и҆ Ст҃гѡ Дх҃а, нн҃ѣ и҆ при́снѡ, и҆ въ вѣ́ки вѣкѡ́въ. А҆ми́нь.

Запреще́нї а҃:

І҆ере́ѵꙵ:

Гᲁ҃ꙋ помли́мсѧ.

Ли́къ:

Гд҃и поми́лꙋй.

Запреща́етъ ти Гд҃ь дїа́воле, прише́ᲁый въ мі́ръ, и҆ всели́выйсѧ въ человѣ́цѣхъ, ꙗ҆́кѡ да твоѐ ниꙁло́житъ мꙋчи́телъствѡ, и҆ человѣ́ки и҆схити́тъ: На дре́вѣ съпроти́вныѧ ᲃи́лы побѣᲁи́вый, ᲃо́лнцꙋ поме́ркшꙋ, и҆ землѝ колѣ́бшейсѧ, и҆ гро́бѡмъ ѿверꙁа́ющимсѧ, и҆ тѣлесе́мъ ᲃт҃ы́хъ въста́ющимъ: Раꙁᲁрꙋши́вый ᲃме́ртїю ᲃме́рть, и҆ ᲂу҆праꙁнѝвый держа́вꙋ и҆мꙋ́щагѡ ᲃме́рти, сі́естъ: тебѐ дїа́вола. Заклина́ю тѧ̀ Бо́гомъ покаꙁа́вшимъ дре́во живота̀, и҆ съчини́шимъ Херꙋві́ма, и҆ пла́менное ѡ҆рꙋ́жїе ѡ҆браща́ющеесѧ стрещѝ то̀: Запреще́нъ бꙋᲁѝ, ѡ҆́ нѣ́мъ бо ти запрѣща́ю, хоᲁи́вшимъ ꙗ҆́кѡ посꙋ́хꙋ напле́щꙋ мо́рскꙋю, и҆ запрети́вшимъ бꙋ́рѧмъ вѣ́трнымъ: є҆гѡ̀ же воꙁрѣ́нїе и҆ссꙋша́етъ бе́ꙁдны, и҆ преще́нїе тае́тъ гѡ́ры: То́й бо и҆ нн҃ѣ повелѣва́етъ ти на́ми. Ꙋ҆бо́йсѧ, и҆ꙁы́йᲁѝ, и҆ ѹ҆страни́сѧ ѿ ᲃъꙁᲁа́нїѧ ᲃегѡ̀, и҆ да не въꙁврати́шисѧ, ни́же ᲂу҆таи́шисѧ въ не́мъ, ни́же ᲃрѧ́щеши є҆гѡ̀ и҆лѝ, дѣ́йствꙋ́еши: ни въ но́щи, ни въ днѐ, и҆лѝ въ ча́сѣ, и҆лѝ въ полꙋ́ᲁне: Но ѿ и҆ᲁѝ въ сво́й Та́ртаръ, да́же до ᲂу҆готова́ннагѡ вели́кагѡ днѐ ᲃꙋ́ᲁнагѡ. Ꙋ҆бо́йсѧ Бг҃а сѣᲁѧ́щагѡ на Херꙋві́мѣхъ, и҆ приꙁира́ющагѡ бе́ꙁᲁны: Е҆гѡ́ же трепе́щꙋтъ А҆́гг҃ли, А҆́рха́гг҃ли, Прⷭ҇тли, Гᲁⷭ҇твїѧ, Нача́ла, Вла́сти, Си́лы, мно́гѡ о҆чи́тїи Херꙋві́ми, и҆ шестокрила́тїи Серафі́ми: Є҆гѡ́же трепе́щетъ нб҃о и҆ землѧ̀, мо́ре, и҆ всѧ̀ ꙗ҆̀же въ нихъ. И҆ꙁыйᲁѝ и҆ ᲂу҆страни́сѧ ѿ знамена́ннагѡ но́во и҆ꙁбра́ннагѡ Во́ина Ха҃ Бг҃а на́шегѡ: Ѻ҆́нѣмъ бо ти запрѣща́ю, хоᲁѧ́щимъ на кри́лꙋ вѣ́трню: творѧ́щимъ А҆́гг҃лы своѧ̀ Дх҃ы. И҆ꙁыйᲁѝ и҆ ѹстрани́сѧ ѿ ᲃоꙁᲁа́нїѧ ᲃегѡ̀ съ всею̀ ᲃи́лою и҆ а҆́нгелы твои́ми: Ꙗ҆́кѡ просла́висѧ И҆мѧ̀ Ѿца̀ и҆ Сн҃а, и҆ ᲃт҃гѡ Дх҃а, нн҃ѣ и҆ при́снѡ, и҆ въ вѣ́ки вѣкѡ́въ. А҆ми́нь.

Запрѣще́нїе Вто́рое.

І҆ере́ѵꙵ:

Гᲁ҃ꙋ помо́лимсѧ.

Ли́къ:

Гд҃и поми́лꙋй.

Бг҃ъ ᲃт҃ы́й, ᲃтра́шный, и҆ ᲃла́вный, въ всѣ́хъ дѣ́лехъ и҆ крѣ́пости свое́й, непостыжи́мый, и҆ не и҆ꙁъслѣᲁи́мый ᲃы́й: То́й предѹстави́вый тебѣ̀ дїа́воле вѣ́чныѧ мꙋ́ки томле́нїе, на́ми непотре́бными рабы̀ свои́ми повелѣва́етъ тебѣ̀, и҆ все́й съпоспѣ́шной твое́й ᲃи́лѣ, ѿстꙋпи́ти ѿ но́воꙁнаме́наннагѡ И҆́менемъ Гд҃а на́шегѡ І҆и҃ᲃ Ха҃ и҆́стиннагѡ Бг҃а на́шегѡ. Заклина́ю ᲂу҆́бѡ тѧ̀ вселꙋка́вый, и҆ нечи́стый, и҆ ᲃкве́рный, и҆ мерꙁе́ный, и҆ чꙋ́жᲁый дꙋ́ше, си́лою І҆и҃ᲃ Хв҃ою, всѧ́кꙋю вла́сть и҆мꙋ́щагѡ на нб҃сѝ и҆ на землѝ: Ре́кшагѡ глꙋхо́мꙋ и҆ беꙁгла́сномꙋ бѣ́сꙋ, и҆ꙁыйᲁѝ ѿ человѣ́ка, и҆ не ктомꙋ̀ вні́йᲁеши вонь: Ѿиᲁѝ, поꙁна́й свою̀ ᲃꙋ́етнꙋю ᲃи́лꙋ, ни на свинїѧ́хъ вла́сть и҆мꙋ́щꙋю: Помѧнѝ повелѣ́вшагѡ ти по твое́мꙋ проше́нїю въ ᲃта́ᲁо свино́е вънїйти: Ꙋ҆бо́йсѧ Бг҃а, є҆гѡ́же повелѣ́нїемъ землѧ̀ на воᲁа́хъ ᲂу҆твержᲁе́на бы́сть: Съꙁᲁа́вшагѡ нб҃о, и҆ поста́вившагѡ гѡ́ры пра́виломъ, и҆ ᲂу҆ᲁо́лїѧ мѣри́ломъ: и҆ поло́жшагѡ пѣсо́къ мо́рю преᲁѣ́лъ, и҆ въ воᲁѣ̀ зѣ́лной ᲃте́ꙁю тве́рᲁꙋю: прикаса́ющагосѧ гѡра́мъ, и҆ въꙁᲁымѧ́тсѧ: Ѻ҆ᲁѣва́ющагосѧ ᲃвѣ́томъ ꙗ҆́кѡ ри́ꙁою: Пропина́ющагѡ нб҃о ꙗ҆́кѡ ко́жꙋ: Покрыва́ющагѡ воᲁа́ми превы́спрнѧѧ своѧ̀: Ѻ҆снова́вшагѡ зе́млю на тве́рᲁи є҆ѧ̀, и҆ не преклони́тсѧ въ вѣ́къ вѣ́ка: Приꙁыва́ющагѡ во́ᲁꙋ мо́рскꙋю, и҆ пролива́ющагѡ тꙋ̀ на лицѐ всеѧ̀ землѧ̀. И҆ꙁыйᲁѝ и҆ ѹ҆страни́сѧ ѿ готовѧ́щагѡсѧ къ ᲃт҃о́мꙋ просвѣще́нїю. Заклина́ю тѧ̀ ᲃп҃си́телною Стрⷭ҇тїю Гд҃а на́шегѡ І҆и҃ᲃ Ха҃, и҆ чⷭ҇тны́мъ є҆гѡ̀ Тѣ́ломъ и҆ Кро́вїю, и҆ прише́ствїемъ є҆гѡ̀ ᲃтра́шнымъ: Прі́йᲁетъ бо и҆ не ѹ҆меᲁли́тъ, ᲃꙋᲁѧ́й все́й землѝ: и҆ тебѐ и҆ съ ᲁействе́ннꙋю твою̀ ᲃи́лꙋ ᲂу҆мꙋ́читъ въ гее́нни ѡ҆́гненной, преᲁа́въ въ тмꙋ̀ кромѣ́шнюю, и҆ᲁѣ́же че́рвъ не ꙋсыпа́етъ, и҆ ѡ҆́гнь не ꙋгаса́етъ: ꙗ҆́кѡ держа́ва Ха҃ Бг҃а на́шегѡ, ᲃъ Ѿце́мъ и҆ Ст҃ымъ Дх҃омъ, нн҃ѣ и҆ при́снѡ, и҆ въ вѣ́ки вѣкѡ́въ: А҆ми́нь.

Моли́тва тре́тѧѧ запрѣща́телнаѧ.

І҆ере́ѵꙵ:

Гд҃ꙋ помли́мсѧ.

Пѣ́вец и҆же:

Гд҃и поми́лꙋй.

Гд҃и Саваꙍ́ѳъ, Бє҃ І҆и҃левъ, и҆сцѣлѧ́ѧй всѧ́кꙋю бо́лѣꙁнь, и҆ всѧ́кꙋю ꙗ҆́ꙁвꙋ, приꙁрѝ на раба̀ твое́гѡ. Имⷬ҇къ, вꙁыщѝ, и҆стѧжѝ, ѿженѝ ѿ не́гѡ всѧ̀ дѣ́йствїѧ дїа́волѧ. Запрѣтѝ нечи́стымъ дꙋ́ховѡмъ, и҆ ѿженѝ и҆хъ, и҆ ѡ҆чи́сти дѣ́ло рꙋ́кꙋ твое́ю, и҆ бы́стрымъ твои́мъ ᲃтѧжа́въ дѣ́йствомъ, съкрꙋшѝ ᲃатанꙋ̀ подъ но́ꙁѣ є҆гѡ̀ въско́рѣ, и҆ дарꙋ́й є҆мꙋ̀ побѣ́ᲁꙋ на́нь, и҆ на нечи́стыѧ є҆гѡ̀ дꙋ́хи: Ꙗ҆́кѡ да є҆́же ѿ тебѐ млⷭ҇ть полꙋчи́въ, ᲃпоᲁоби́тсѧ беꙁсм҃ртныхъ твои́хъ и҆ нбⷭ҇ныхъ Та́инъ: и҆ ᲃла́вꙋ тебѣ̀ въꙁсле́тъ Ѿцꙋ̀, и҆ Сн҃ꙋ, и҆ ᲃт҃мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ. А҆ми́нь.

Моли́тва, д҃.

І҆ере́ѵꙵ:

Гд҃ꙋ помо́лимсѧ.

Ли́къ:

Сы́й Влады́кѡ Гᲁ҃и, сътвори́вый человѣ́ка по ѡ҆́браꙁꙋ твое́мꙋ и҆ по поᲁо́бїю, и҆ да́вый є҆мꙋ̀ вла́сть живота̀ вѣ́чнагѡ: та́же ѿпа́ᲁша грѣхо́мъ не преꙁрѣ́вый, но ᲂу҆строивый въчеловече́нїемъ Ха҃ твое́гѡ ᲃп҃се́нїе мі́рови: Ты и҆ съꙁᲁа́нїе твоѐ ᲃі́е и҆ꙁбави́вый ѿ работы̀ вра́жїѧ, прїймѝ въ Ца́рство твоѐ пренбе́сное. ѿверꙁѝ є҆мꙋ̀ ѡ҆́цѣ мы́сли, въе́же просїа́ти въ не́мъ просвѣще́нїе Е҆ѵⷢ҇лїѧ твое́гѡ: Съпрѧꙁѝ животꙋ̀ є҆гѡ̀ А҆гг҃ла ᲃвѣ́тла, и҆ꙁхища́юща є҆гѡ̀ ѿ всѧ́кагѡ навѣ́та съпроти́внагѡ, ѿ срѣте́нїѧ лꙋка́вагѡ, ѿ бѣ́са полꙋ́ᲁеннагѡ, и҆ ѿ привиᲁѣ́нїй лꙋка́выхъ.

И҆ дꙋ́нетъ І҆ере́ѵꙵ на ᲂу҆ста̀ є҆гѡ̀, на челѡ̀, и҆ на пе́рси три́жᲁы, глаголѧ̀ ᲃі́е:

И҆жᲁенѝ ѿ не́гѡ всѧ́къ лꙋка́вый и҆ нечи́стый дꙋ́хъ, кры́ющїйсѧ и҆ гнѣꙁᲁѧ́щїйсѧ въ ᲃе́рдци є҆гѡ̀.

Сі́е же глаголе́тъ три́жᲁы:

Дꙋ́хъ пре́лести, дꙋ́хъ лꙋка́вства, дꙋ́хъ и҆ᲁѡлослꙋже́нїа, и҆ всѧ́кагѡ лихои́мства, дꙋ́хъ лжѝ, и҆ всѧ́коѧ нечистоты̀, дѣйствꙋ́емыѧ по наꙋче́нїю дїа́волю, и҆ сътворѝ є҆гѡ̀ ѡ҆вча̀ ᲃлове́сное ᲃт҃а́гѡ ᲃта́ᲁа Ха҃ твое́гѡ, ᲂу҆́ᲁъ че́стенъ Це́ркве твое́ѧ, ᲃн҃а и҆ наслѣ́ᲁника Ца́рствїѧ твое́гѡ, ꙗ҆́кѡ да по за́повѣᲁемъ твои́мъ пожи́въ, и҆ съхрани́въ печа́тъ неврежᲁе́нꙋ, и҆ съблю́ᲁъ ри́ꙁꙋ нескве́рнꙋ, полꙋ́читъ блаже́нства ᲃт҃ы́хъ въ Ца́рствїи твое́мъ.

И҆ въꙁглаша́етъ:

Благода́тїю, и҆ щеᲁрота́ми и҆ человекѡлю́бїемъ є҆ᲁиноро́ᲁнагѡ Сн҃а твое́гѡ, съ ни́мъ же блⷭ҇ве́нъ є҆сѝ, съ Прⷭ҇ты́мъ, и҆ благи́мъ, и҆ животворѧ́щимъ ти Дх҃омъ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

Съвлече́ннꙋ же и҆ раꙁᲁрѣше́нꙋ ᲃꙋ́щꙋ ѡ҆глаше́нномꙋ, ѡ҆браща́етъ є҆гѡ̀ І҆ере́ѵꙵ лице́мъ къ за́паᲁꙋ, рꙋ́цѣ распросте́ртѣ ѿ себѣ̀ и҆мꙋ́ща, и҆ гл҃етъ къ не́мꙋ три́жᲁы, въпраша́ѧ є҆гѡ̀ ᲃи́це:

Ѿрица́ешилисѧ ᲃатаны̀, и҆ всѣ́хъ дѣ́лъ є҆гѡ̀, и҆ всѣ́хъ а҆́нгелѡвъ є҆гѡ̀, и҆ всеѧ̀ слꙋ́жбы є҆гѡ̀, и҆ всеѧ̀ горᲁы́нѣ є҆гѡ̀.

Ѽ҆глаше́нный ѿвѣщава́етъ по кое́мжᲁѡ въпроше́нїи са́мъ. А҆ще же є҆́стъ ѡ҆глаше́нный ѡ҆троча̀, и҆лѝ Варва́ръ, то въспрїе́мникъ ѿвѣщава́етъ, ᲃи́це глаголѧ̀.

Ѿрица́юсѧ ᲃатаны̀, и҆ всѣ́хъ дѣ́лъ є҆гѡ̀, и҆ всѣ́хъ А҆́нгелѡвъ є҆гѡ̀, и҆ всеѧ̀ ᲃлꙋ́жбы є҆гѡ̀, и҆ всеѧ̀ горᲁы́ни є҆гѡ̀.

И҆ є҆гᲁаже ѿрече́тсѧ три́жᲁы, Въпраша́етъ є҆гѡ̀ па́ки І҆ере́ѵꙵ, глаго́лѧ:

Ѿре́клълисѧ є҆сѝ ᲃатаны̀.

И҆ ѿвѣщава́етъ ѡ҆глаше́нный, и҆лѝ въспрїе́мникъ глаголѧ̀:

Ѿреко́хсѧ.

И҆ повнегда́ ѿтвеща́етъ и҆ ᲃі́е гⷤ:

Глаго́летъ І҆ере́ѷ:

И҆ дꙋ́ни и҆ поплю́й є҆гѡ̀.

Сі́еже ᲃотво́ршꙋ ѡ҆браще́нномꙋ ѡ҆браща́етъ є҆гѡ̀ І҆ере́ѷ па́ки на въсто́къ, го́рѣ рꙋ́цѣ въꙁде́жденѣ имꙋ́ща, и҆ на нб҃о вꙁира́юща, и҆ гл҃етъ къ не́мꙋ три́жды, въпраша́ѧ є҆гѡ̀, ᲃи́це:

Съчетава́ешилисѧ Хрⷭ҇тꙋ̀.

И҆ ѿвѣщава́етъ ѡ҆глаше́нный, и҆лѝ въспрїе́мник по кое́мждѡ въпроше́нїи три́жды, глаголѧ̀:

Сочетава́юсѧ.

Посе́мъ па́ки въпроша́етъ є҆гѡ̀ І҆ере́ѵꙵ:

Съчета́лсѧ є҆сѝ Хрⷭ҇тꙋ̀.

И҆ ѿвѣщава́етъ ѡ҆глаше́нный:

Съчета́хъсѧ.

И҆ па́ки І҆ере́ѵꙵ гл҃етъ:

И҆ вѣ́рꙋеши є҆мꙋ̀.

Ѿвѣща́етъ ѡ҆глаше́нный:

Вѣ́рꙋю є҆мꙋ̀ ꙗ҆́кѡ цр҃ю̀ и҆ Бг҃ꙋ: И҆ а҆́бїе гл҃етъ:

Вѣ́рꙋю во є҆ᲁи́нагѡ Бг҃а Ѿца̀ Всеᲁержи́телѧ, тво́рца нб҃ꙋ и҆ землѝ, виᲁи́мымъ же всѣ́мъ и҆ невиᲁи́мымъ. И҆ въ є҆ᲁи́нагѡ Гᲁ҃а І҆и҃ᲃ Ха҃ Сн҃а Бж҃їѧ, є҆ᲁиноро́ᲁнагѡ, ѿ Ѿца̀ рожᲁе́ннагѡ пре́жде всѣ́хъ вѣ́кѡвъ.

Свѣ́та ѿ свѣ́та, Бг҃а и҆́стинна, ѿ Бг҃а и҆́стинна.

Рожᲁе́нна, а҆ не сътворе́нна, є҆ᲁиносꙋ́щна Ѿцꙋ̀, и҆́мже всѧ̀ бы́ша.

На́съ дѣлѧ̀ человѣ́кѡвъ, и҆ на́шегѡ ра́ᲁи ᲃпⷭ҇нїѧ съше́ᲁшагѡ съ нб҃съ, и҆ въплоти́вшагѡсѧ ѿ Дх҃а ᲃт҃а и҆ Мр҃їѧ Дв҃ы, и҆ въчеловѣ́чшасѧ.

Распѧ́та же за ны̀ при По́нтстѣмъ Піла́тѣ.

И҆ ᲃтрда́вшагѡ, и҆ погребе́ннагѡ, и҆ Въскре́сшагѡ въ тре́тїй дн҃ь по писа́нїемъ.

И҆́ въꙁше́ᲁшагѡ на нб҃са̀ и҆ сѣᲁѧ́щагѡ ѡ҆ᲁе́снꙋ́ю Ѿца̀, и҆ па́ки грѧᲁꙋ́щагѡ съ ᲃла́вою ᲃꙋᲁи́ти живы́мъ, и҆ ме́ртвымъ, є҆гѡ́же Ца́рствїю нѣ бꙋ́ᲁетъ конца̀. И҆ въ Дх҃а ᲃт҃а́гѡ, Гд҃а, животворѧ́щагѡ, ѿ Ѿца̀ и҆схоᲁѧ́щагѡ, съ Ѿце́мъ и҆ Сн҃омъ съпокланѧ́ема и҆ съсла́вима гл҃авшагѡ Прⷪ҇ро́ки.

Въ є҆ᲁи́нꙋ ᲃт҃ꙋ́ю Събѡ́рнꙋю и҆ А҆пⷭ҇льскꙋю це́рковъ.

И҆сповѣ́ᲁꙋ́ю є҆ᲁино̀ Креще́нїе, въ ѡ҆ставле́нїе грѣхѡ́въ.

Ча́ю Въскреше́нїѧ Ме́ртвымъ, и҆ жи́ꙁни бꙋ́ᲁꙋщагѡ вѣ́ка. А҆ми́нь.

Сконча́въ же ᲃт҃ы́й Сѵ́мволъ, и҆ глаго́летъ па́ки къ не́мꙋ по три́жды:

Съчета́лъ сѧ є҆сѝ Х҃.

И҆ про́чаѧ: ѿвѣщава́ющꙋ на кое́ждѡ въпроше́нїе ѡ҆глаше́нномꙋ, и҆лѝ въспрїе́мникꙋ, ꙗ҆́коже рече́сѧ.

Въпроше́нꙋ бы́вшꙋ, три́жды, и҆ три́жды ѿвѣща́вшꙋ, и҆ Вѣ́рꙋю въ є҆ди́нагѡ Бг҃а, до конца̀ та́кожде три́жды ре́кшꙋ, три́жды глаголѧ̀:

Съчета́лъ ли сѧ є҆сѝ Х҃.

И҆ ѿвѣещава́етъ:

Съчета́хъсѧ.

И҆ глаголе́тъ є҆мꙋ̀ І҆ере́ѷ:

И҆ поклони́сѧ є҆мꙋ̀.

И҆ покланѧ́етсѧ, на ѡ҆́бѣ колѣ́нѣ, и҆ главо́ю да́же до землѝ ᲂу҆дарѧ́етъ, гл҃ѧ̀:

Покланѧ́юсѧ Ѿцꙋ̀, и҆ Сн҃ꙋ, и҆ Ст҃мꙋ Дх҃ꙋ, Трⷪ҇цю є҆диносꙋ́щной, и҆ нераꙁдѣли́мой.

Та́же глаголе́тъ ᲃщ҃е́нникъ:

Блⷭ҇ве́нъ Бг҃ъ всѣ́мъ человѣ́комъ хотѧ́й ᲃпⷭ҇ти́сѧ, и҆ въ ра́ꙁꙋмъ и҆́стинный прїйтѝ, нн҃ѣ и҆ прⷭ҇но и҆ въ вѣ́ки вѣкѡ́въ. А҆ми́нь.

И҆ посе́мъ гл҃етъ Моли́твꙋ ᲃі́ю, ре́къ:

Гд҃ꙋ помоли́мсѧ.

Пѣвце́мъ же:

Гд҃и поми́лꙋй.

Влады́кѡ Гд҃и Бо́же на́шъ, приꙁовѝ раба̀ твое́гѡ, И҆мⷬ҇къ. къ ᲃт҃о́мꙋ твое́мꙋ просвѣще́нїю, и҆ сподобѝ є҆гѡ̀ вели́кїѧ се́ѧ благода́ти Ст҃го ти Креще́нїѧ: Ѻ҆мы́й є҆гѡ̀ ѡ҆бетша́нїе и҆ ѡ҆бновѝ є҆гѡ̀ въ жи́ꙁнь вѣ́чнꙋю, и҆ и҆сполнѝ є҆гѡ̀ Ст҃гѡ ти Дх҃а Си́лы, въ съедине́нїи Ха҃ твое́гѡ: да не ктомꙋ̀ ча́до тѣ́ла бꙋ́детъ, но ча́до твое́гѡ Ца́рствїѧ: Благоволенїемъ и҆ благода́тїю, є҆диноро́днагѡ Сн҃а твое́гѡ, съ ни́мъ же блⷭ҇ве́нъ є҆сѝ, съ Прⷭ҇тымъ и҆ благимъ, и҆ животворѧ́щимъ ти Дх҃омъ, нн҃ѣ и҆ при́снѡ, и҆ въ вѣ́ки вѣ́ковъ.

Ли́къ:

А҆ми́нь.

Аще кто̀ не ро́дитсѧ Водо́ю и҆ Дх҃омъ, не мо́жетъ вни́ти въ Ца́рство нбⷭ҇ное (Ин.3:5).

Вхо́дитъ ᲃщ҃нникъ въ це́рковъ, И҆ ѡ҆бо́лксѧ въ всѧ̀ Сщ҃енническїѧ ѡ҆де́жды бѣ́лыѧ, и҆ Нарка́вицѣ:

И҆ вжига́емымъ всѣ́мъ ᲃвѣ́щамъ, въꙁе́мъ кади́лницꙋ ѿхо́дитъ къ Кꙋ́пели, и҆ покади́въ ѻ҆́крест, и҆ ѿда́въ кади́лницꙋ покланѧ́етсѧ є҆дино́щи къ въсто́кѡмъ.

Дїа́конъ же глаголе́тъ:

Блⷭ҇вѝ Влады́кѡ.

І҆ере́ѷ въꙁглаша́етъ:

Блⷭ҇ве́ннѡ Ца́рство Ѿца̀ и҆ Сн҃а и҆ ᲃт҃го Дх҃а, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

Дїа́конъ же а҆́бїе глаголе́тъ Е҆кте́нїю.

Ми́ромъ Гд҃ꙋ помоли́мсѧ.

Ꙍ҆ ᲃъвы́шнѣмъ ми́рѣ, и҆ ᲃп҃сенїи дш҃ъ на́шихъ, Гд҃ꙋ помоли́мсѧ.

Ꙍ҆ ми́рѣ всегѡ̀ мі́ра и҆ благостоѧ́нїи ᲃт҃ы́хъ Бж҃їихъ Це́рквїй, и҆ съедине́нїю всѣ́хъ, Гд҃ꙋ помоли́мсѧ.

Ꙍ҆ ᲃт҃ѣ́мъ хра́мѣ се́мъ и҆ съ вѣ́рою и҆ благоговѣ́нїемъ, и҆ ᲃтра́хомъ Бж҃їимъ входѧ́щихъ во́нь, Гд҃ꙋ помоли́мсѧ.

Ꙍ҆ А҆рхїеппⷭ҇ѣ на́шемъ И҆мⷬ҇къ, чтⷭ҇нѣмъ Пресвѵ́терствѣ, и҆ є҆́же ѡ҆ Хє҃ Дїа́конствѣ, и҆ все́мъ при́чтѣ и҆ лю́дехъ, Гд҃ꙋ помоли́мсѧ.

Ꙍ҆ вели́комъ Королѣ̀ на́шемъ Имⷬ҇къ, ѡ҆ все́й пола́тѣ и҆ во́ехъ є҆гѡ̀, Гд҃ꙋ помоли́мсѧ.

Ꙍ҆ є҆́же ѡ҆ст҃и́тисѧ водѣ̀ се́й, ᲃи́лою, и҆ дѣ́йствомъ и҆ наше́ствїемъ ᲃт҃гѡ Дх҃а, Гд҃ꙋ помоли́мсѧ.

Ꙍ҆ є҆́же ниспосла́тисѧ є҆́й благода́ти и҆ꙁбавле́нїѧ блⷭ҇ве́нїѧ І҆ꙍрда́нова, Гд҃ꙋ помоли́мсѧ.

Ꙍ҆ є҆́же найтѝ на во́дꙋ си́ю чисти́телномꙋ пресꙋществе́нныѧ Трⷪ҇ца дѣ́йствꙋ, Гд҃ꙋ помоли́мсѧ.

Ꙍ҆ є҆́же просвѣти́тисѧ намъ просвѣще́ниемъ ра́ꙁꙋма и҆ благоче́стїѧ, наше́ствїа ра́ди Ст҃гѡ Дх҃а, Гд҃ꙋ помоли́мсѧ.

Ꙍ҆ є҆́же покаꙁа́тисѧ є҆́й ѿбрати́телной бы́ти всѧ́кагѡ навѣ́та види́мыхъ и҆ неви́димыхъ врагѡ́въ, Гд҃ꙋ помоли́мсѧ.

Ꙍ҆ є҆́же досто́йнꙋ бы́ти нетлѣ́ннагѡ Ца́рствїѧ въ не́й Креща́емомꙋ, Гд҃ꙋ помоли́мсѧ.

Ꙍ҆ нн҃ѣ приходѧ́щомъ къ ᲃт҃о́мꙋ просвѣще́нїю, и҆ ѡ҆ ᲃп҃се́нїи є҆гѡ̀, Гд҃ꙋ помоли́мсѧ.

Ꙍ҆ є҆́же покаꙁа́тисѧ є҆мꙋ̀ ᲃы́нꙋ свѣ́та и҆ наслѣ́дникꙋ вѣ́чныхъ бла́гъ, Гд҃ꙋ помоли́мсѧ.

Ꙍ҆ є҆́же бы́ти є҆мꙋ̀ съсажде́ннꙋ и҆ прича́стникꙋ ᲃме́ртий Въскрⷭ҇нїѧ Ха҃ Бг҃а на́шегѡ, Гд҃ꙋ помоли́мсѧ.

Ꙍ҆ є҆́же съхрани́ти є҆мꙋ̀ ѻ҆де́ждꙋ Креще́нїѧ, и҆ ѡ҆брꙋче́нїе дх҃а нескве́рнѡ и҆ непоро́чнѡ въ дн҃ь стра́шный Ха҃ Бг҃а нашего, Гд҃ꙋ помоли́мсѧ.

Ꙍ҆ є҆́же бы́ти є҆мꙋ̀ вода̀ сі́ѧ ба́нею па́ки бы́тїѧ, ѡ҆ставле́нїемъ грѣхѡ́въ, и҆ ѡ҆дѣѧ́нїемъ нетлѣ́нїѧ, Гд҃ꙋ помоли́мсѧ.

Ꙍ҆ є҆́же ᲂу҆слы́шати Гд҃ꙋ Бг҃ꙋ гла́съ моле́нїѧ нашегѡ, Гд҃ꙋ помоли́мсѧ.

Ꙍ҆ є҆́же и҆ꙁба́витисѧ є҆мꙋ̀, и҆ намъ ѿ всѧ́кїѧ ско́рби, гнѣ́ва, и҆ нꙋ́жды, Гд҃ꙋ помоли́мсѧ.

Застꙋпѝ, ᲃп҃сѝ, поми́лꙋй и҆ съхранѝ на́съ Бж҃е:

Пресвѧтꙋ́ю, чⷭ҇тꙋю, и҆ преблⷭ҇ве́ннꙋю сла́внꙋю, Влады́чицꙋ на́шꙋ Бц҃ꙋ, и҆ при́снѡ Дѣ́вꙋ Мр҃їю съ всѣ́ми ᲃт҃ы́ми помѧнꙋ́вше, самѝ себѣ̀, и҆ дрꙋ́гъ дрꙋ́га, и҆ весь живо́тъ на́шъ, Хрⷭ҇тꙋ̀ Бг҃ꙋ предадѣ́мъ.

И҆ ᲂу҆́бѡ Дїа́конꙋ гл҃ю́щꙋ сі́ѧ Е҆кте́нїѧ, І҆ере́ѷ чте́тъ Моли́твꙋ ᲃі́ю та́йнѡ.

Благоꙋтро́бный и҆ ми́лостивый Бж҃е, и҆стѧꙁа́ѧй ᲃе́рдца и҆ ᲂу҆трѡ́бы, и҆ та́йнаѧ человѣ́ческаѧ свѣды́й є҆ди́нъ: ни бо є҆́стъ ве́щъ, не ꙗ҆вле́нна пре́дъ тобо́ю, но всѧ̀ на́га и҆ обнаже́на пре́дъ ѻ҆чи́ма твои́ма. Свѣды́й ꙗ҆́же ѡ҆ мнѣ̀, да нѐ ѡ҆мерꙁи́ши мѧ̀, ни́же лица̀ твое́гѡ ѿврати́ши ѿ ме́не: но пре́ꙁри моѧ̀ прегрѣше́нїѧ въ ча́съ сі́й, преꙁира́ѧй человѣ́кѡмъ согрѣше́нїѧ въ покаѧ́нїе. И҆ ѡ҆мы́й ми нечистотꙋ̀ теле́снꙋю, и҆ скве́рнꙋ дш҃е́внꙋю, и҆ всегѡ́ мѧ̀ ѡ҆ст҃ѝ всесъверше́нною ᲃи́лою твое́ю невиди́мою, и҆ десни́цею дх҃о́вною: да не свободꙋ̀ и҆́нѣмъ въꙁвѣща́ѧ, и҆ ᲃі́ю подава́ѧ вѣ́рою, лише́нъ твое́гѡ неиꙁрече́ннагѡ человѣ́кѡлю́бїѧ, са́мъ ꙗ҆́кѡ ра́бъ грѣхꙋ̀ неискꙋ́сенъ бꙋ́дꙋ. Ни Влады́кѡ, є҆ди́не благі́й и҆ человѣ́колюби́вый, да не въꙁвращꙋ́сѧ смире́нъ: но послѝ ми ᲃи́лꙋ свы́ше, и҆ ᲂу҆крѣпѝ мѧ̀ къ слꙋ́жбѣ предлежа́щагѡ ти та́инства, вели́кагѡ и҆ пренебе́снагѡ, и҆ въ ѡ҆браꙁѝ Ха҃ твое́гѡ въ хотѧ́щомъ породи́тисѧ мои́мъ ѡ҆каѧ́нствомъ: и҆ наꙁида́й є҆гѡ̀ на ѡ҆снова́нїи А҆по́столъ и҆ Прорѡ́къ твои́хъ. И҆ да не ниꙁложиши́: но насадѝ є҆гѡ̀ ᲃажде́нїе и҆́стинны въ ᲃт҃о́й твое́й Събѡ́рной и҆ А҆по́столской Це́ркви, и҆ да не выто́ргнеши. Ꙗ҆́кѡ да преꙋспѣва́ющꙋ є҆мꙋ̀ въ благоче́стїи, сла́витсѧ и҆ те́мъ всесвѧто́е И҆мѧ̀ твоѐ, Ѿца̀ и҆ Сн҃а и҆ ᲃт҃гѡ Дх҃а, нн҃ѣ и҆ при́снѡ, и҆ въ вѣ́ки вѣкѡ́въ.

Подоба́етъ вѣ́дати ꙗ҆́кѡ не въꙁглаша́етъ, но А҆ми́нь въ себѣ̀ гл҃етъ, и҆ а҆́бїе чте́тъ Моли́твꙋ ᲃі́ю велегла́снѡ:

Ве́лїй є҆сѝ Гд҃и, и҆ чꙋ́дна дѣ́ла твоѧ̀, и҆ ни є҆дино̀ же ᲃло́во дово́лнѡ є҆́стъ къ похвале́нїю чꙋде́съ твои́хъ.

Сі́еже глаголе́тъ три́жды, и҆ покое́мждѡ и҆ꙁърече́нїи, заꙁже́ною свѣще́ю знамена́етъ крестаѻ́браꙁнѡ во́дꙋ І҆ере́ѷ, и҆ три́жды и҆ꙁре́къ, и҆ знамена́въ, гл҃етъ про́чаѧ Моли́твы.

Ты́ бо хотѣ́нїемъ ѿ небы́тїѧ въ бы́тїе приве́дъ всѧ́ческаѧ, твое́ю держа́вою съдержи́ши тва́ръ, и҆ твои́мъ про́мысломъ ᲃтрои́ши мі́ръ. Ты ѿ четыре́хъ ᲃтѵ́хїй тва́ръ съста́вилъ є҆сѝ: четы́рми вре́мены крꙋ́гъ лѣ́та вѣнча́лъ є҆сѝ. Тебѣ̀ трепе́щꙋтъ ᲂу҆́мныѧ всѧ̀ ᲃи́лы. Тебѣ̀ пое́тъ ᲃо́лнце. Тебѣ̀ сла́витъ лꙋна̀. Тебѣ̀ събеседꙋ́ютъ звѣ́ꙁды. Тебѣ̀ послꙋша́етъ ᲃвѣ́тъ. Тебѣ̀ трепе́щꙋтъ бе́ꙁдны. Тебѣ̀ работа́ютъ и҆сточници. Ты пропѧ́лъ є҆сѝ нб҃о ꙗ҆́кѡ ко́жꙋ. Ты ᲂу҆тверди́лъ є҆сѝ зе́млю на вода́хъ. Ты ѡ҆гради́лъ є҆сѝ Мо́ре пѣско́мъ. Ты къ ѿдыха́нїю въꙁдꙋ́хъ пролїѧлъ є҆сѝ: А҆́гг҃лскїѧ ᲃи́лы тебѣ̀ ᲃлꙋ́жатъ: А҆рха́гг҃лстїи ли́кѡве тебѣ̀ кла́нѧютсѧ: многоѡчи́тїи Херꙋві́ми, и҆ шестокрила́тїи Серафі́ми, ѻ҆́крестъ стоѧ́ще, и҆ ѡ҆блѣта́юще, стра́ха ра́ди неприкоснове́нныѧ ᲃла́вы твое́ѧ покрыва́ютсѧ. Ты́ бо Бг҃ъ сы́й неѡписа́нный, беꙁнача́льный же и҆ неиꙁъгл҃а́нный, прише́лъ є҆сѝ на́ зе́млю, зра́къ раба̀ прїимъ, въ подо́бїи человѣ́честѣмъ бы́въ:

Не бо̀ терпѣ́лъ є҆сѝ Влады́кѡ милосе́рдїѧ ра́ди млⷭ҇ти твое́ѧ, зрѣ́ти ѿ дїа́вола мꙋчи́ма ро́да человѣ́ча: но прише́лъ є҆сѝ и҆ спⷭ҇лъ є҆сѝ на́съ. И҆сповѣдꙋ́емъ благода́ть, проповѣдꙋ́емъ млⷭ҇ть, не та́имъ благодѣѧ́нїѧ. Е҆тества̀ на́шегѡ рѡ́ды свободи́лъ є҆сѝ: Дѣви́ческаѧ ѡст҃и́лъ є҆сѝ ложесна̀ рождество́мъ твои́мъ. Всѧ̀ тва́рь въспѣва́етъ тѧ̀, ꙗ҆́влъшагосѧ: Ты́ бо Бг҃ъ на́шъ на землѝ ꙗ҆ви́лсѧ є҆сѝ и҆ съ человѣ́ки пожи́лъ є҆сѝ. Ты І҆ѡрда́нскїѧ ᲃтрꙋ́ѧ ѡ҆ст҃и́лъ є҆сѝ, нб҃сѐ посла́въ ᲃт҃ы́й тво́й Дх҃ъ, и҆ гла́вы та́мѡ гнѣꙁдѧ́щихъсѧ съкрꙋши́лъ є҆сѝ змїе́въ. Ты ᲂу҆́бѡ человѣ́кѡлю́бче Царю̀, прїйдѝ и҆ нн҃ѣ прише́ствїемъ ᲃт҃а́гѡ твое́гѡ Дх҃а, и҆ ѡ҆стѝ во́дꙋ ᲃі́ю.

Се́же гл҃етъ гⷤ. и҆ на кое́мждѡ гл҃а́нїи благословлѧ́етъ дꙋнове́нїемъ во́дꙋ, крестаѻ́браꙁнѡ.

Та́же и҆ про́чаѧ Моли́твы глаголе́тъ:

И҆ да́ждъ є҆́й благода́ть и҆ꙁбавле́нїѧ, блⷭ҇ве́нїе І҆ѡрда́ново: ᲃътворѝ ю҆̀ нетлѣ́нїѧ и҆сто́чникъ: ѡ҆сщ҃енїѧ даръ, грѣхѡ́мъ раꙁдрѣше́нїе: бо́лѣꙁниемъ премѣне́нїе: бѣсѡ́мъ гꙋби́телъство: съпроти́внымъ си́ламъ непристꙋ́пнꙋ: А҆́гг҃лскїѧ крѣ́пости и҆сполне́нꙋ. Да бѣжа́тъ ѿ не́ѧ навѣтꙋ́ющїи съꙁда́нїю твое́мꙋ: ꙗ҆́кѡ И҆мѧ̀ твоѐ Гд҃и приꙁва́хъ ди́вное и҆ сла́вное, и҆ стра́шное съ проти́внымъ.

Да съкрꙋша́тсѧ подъ знаменїемъ въ ѡ҆браже́нїѧ Креста̀ твое́гѡ всѧ̀ проти́вныѧ си́лы.

Се́же глаголе́тъ, гⷤ: и҆ на кое́мждѡ и҆ꙁрече́нїи благословлѧ́етъ рꙋко́ю крестаѻ́браꙁнѡ во́дꙋ, погрꙋжа́ѧ персты̀ въ водѣ̀, и҆ дꙋ́нꙋвъ на́ню. Та́же про́чаѧ Моли́твы, гл҃етъ:

Да въꙁвратѧ́тсѧ ѿ на́съ всѧ̀ въꙁдꙋ́шнаѧ, и҆ не ꙗ҆вле́ннаѧ привидѣ́нїѧ: и҆ да не ᲂу҆таи́тсѧ въ водѣ̀ се́й бѣ́съ те́мный: ни́же да сни́детъ съ Креща́ющимсѧ, моли́мътисѧ, дꙋ́хъ лꙋка́вый, помраче́нїе помыслѡ́мъ и҆ мѧте́жъ мы́слемъ наводѧ́й: Но ты Влады́кѡ всѧ́ческихъ, покажѝ во́дꙋ ᲃі́ю, во́дꙋ и҆ꙁбавле́нїѧ, во́дꙋ ѡ҆сщ҃енїѧ, ѡ҆чище́нїе пло́ти и҆ дх҃а, ѡ҆сла́бꙋ ᲂу҆́ꙁамъ, ѡ҆ставле́нїе прегрѣше́нїй, просвѣще́нїе дш҃а́мъ, ба́ню пакибы́тїѧ, ѡ҆бновле́нїе дх҃а, ᲃыноположе́нїѧ да́ръ, ѡ҆дѣѧ́нїе нетлѣ́нїѧ, и҆сточникъ жи́ꙁни: Ты́бѡ ре́клъ є҆сѝ Гд҃и, и҆ꙁмы́йтесѧ и҆ чи́сти бꙋ́дѣте, ѿимѣ́те лꙋка́вства ѿ дш҃ъ ва́шихъ. Ты дарова́лъ є҆сѝ намъ свы́ше порожде́нїе водо́ю, и҆ дх҃омъ.

Ꙗ҆ви́сѧ Гд҃и водѣ̀ се́й, и҆ да́ждъ претвори́тисѧ въ не́й Креща́емомꙋ, въ є҆́же ѿложи́ти ᲂу҆́бѡ ве́тхагѡ человѣ́ка тлѣ́магѡ по по́хотехъ пре́лести, ѡ҆блещи́жесѧ въ но́вагѡ, ѡ҆бновлѧ́емагѡ по ѡ҆́браꙁꙋ съꙁда́вшагѡ и҆́: ꙗ҆́кѡ да бы́въ ᲃъсажде́нъ подо́бїю ᲃме́рти твое́ѧ Креще́нїемъ, прича́стникъ и҆ Въскресе́нїѧ бꙋ́детъ: и҆ съхрани́въ Да́ръ ᲃт҃а́гѡ твое́гѡ Дх҃а, и҆ въꙁрасти́въ преда́нїе благода́ти, прі́йметъ по́честь вы́шнѧгѡ зва́нїѧ, и҆ съпричте́тсѧ перворо́днымъ написа́нымъ на нб҃сѝ, въ тебѣ̀ Бꙁ҃ѣ и҆ Гд҃ѣ на́шемъ І҆и҃ᲃ Хє҃: Тебѣ̀ бо въкꙋ́пѣ съ беꙁнача́лнымъ ти Ѿце́мъ, подоба́етъ сла́ва и҆ держа́ва, и҆ съ Прⷭ҇ты́мъ и҆ благи́мъ, и҆ животворѧ́щимъ ти Дх҃омъ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

І҆ере́ѵꙵ глаголе́тъ:

Ми́ръ всѣ́мъ.

Ли́къ:

И҆ дх҃ови твое́мꙋ.

Дїа́конъ:

Гла́вы ва́ша Гв҃и прекло́нъ:

Ли́кѣ:

Тебѣ̀ Гд҃и.

І҆ере́ѷ же, дꙋ́нетъ три́жды въ ᲃъсꙋ́дъ Е҆ле́ѷный, є҆гѡ́же держи́тъ въ рꙋцѣ̀.

Д҆́а́конъ, и҆ десни́цею блⷭ҇влѧ́етъ є҆гѡ̀, та́кѡжде три́жды. И҆ а҆́бїе

Дїа́конꙋ ре́кшꙋ:

Гд҃ꙋ помоли́мсѧ.

Ли́къ:

Гд҃и поми́лꙋй.

І҆ере́ѷ же глаголе́тъ Моли́твꙋ ᲃі́ю.

Влады́кѡ Гд҃и Бо́же Ѿц҃ъ на́шихъ, ᲃꙋ́щимъ въ Ковче́ꙁѣ Нѡ́евомъ, го́лꙋба посла́вый сꙋче́цъ масли́нный и҆мꙋ́щагѡ въ ᲂу҆стѣ́хъ, примире́нїѧ зна́менїе, ᲃп҃се́нїѧ же ѿ Пото́па, и҆ благода́ти та́инство ѡ҆́нѣмъ предѡбраꙁꙋ́ѧй, и҆ масли́нный пло́дъ въ и҆сполне́нїе ᲃт҃ы́хъ твои́хъ Та́инъ пода́вый, тѣ́мъ и҆ бы́вшихъ въ за́конѣ Дх҃а ᲃт҃а́гѡ и҆сполни́вый, и҆ сꙋ́щихъ въ благода́ти съверша́ѧй: Са́мъ блⷭ҇вѝ и҆ се́й Е҆ле́й ᲃи́лою и҆ дѣ́йствомъ, и҆ наи́тїемъ ᲃт҃а́гѡ твое́гѡ Дх҃а: ꙗ҆́кѡ бы́ти томꙋ̀ помаꙁа́нїе нетлѣ́нїѧ, ѡ҆рꙋ́жїе пра́вдѣ, ѡ҆бновле́нїе дш҃ѝ и҆ тѣ́лꙋ, всѧ́кагѡ дїа́волскагѡ дѣ́йства ѿраꙁи́телно, въ и҆ꙁмѣне́нїе всѧ́кихъ ѕѡ́лъ, пома́ꙁꙋющимсѧ вѣ́рою, и҆ вкꙋша́ющимъ ѿ не́гѡ. Въ ᲃла́вꙋ твою̀, и҆ є҆диноро́днагѡ тво́егѡ сн҃а, и҆ Прⷭ҇та́гѡ и҆ блага́гѡ, и҆ животворѧ́шагѡ ти Дх҃а, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

Дїа́конъ:

Во́нмѣмъ.

Сщ҃енникъ же поѧ̀ съ людъмѝ трижъды А҆ллилꙋїа, въꙁе́млетъ и҆ тво́ритъ и҆́мъ лѣѧ̀ на во́дꙋ Кресты̀ трѝ. Та́же въꙁглаша́етъ.

Блⷭ҇ве́нъ Бг҃ъ просвѣща́ѧй и҆ ѡ҆свѧща́ѧ всѧ́кагѡ человѣ́ка грѧдꙋ́щагѡ въ ми́ръ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

А҆́бїеже прино́ситсѧ Креща́емый къ ᲃщ҃е́нннкꙋ: ᲃщ҃енникъ же вꙁе́мъ ᲃтрꙋ́чцемъ и҆лѝ пе́рстомъ бо́лшимъ ѿ ᲃт҃гѡ Е҆леѧ, тво́ритъ Креста̀ ѡ҆́браꙁъ младе́нцꙋ, на челѣ̀, на Пе́рсехъ, и҆ на Ꙋ҆шесе́хъ, и҆ на Пле́щїю, на ѡ҆́бѣ Рꙋ́цѣ и҆ на Но́ꙁѣ.

Чело̀ же въ пе́рвыхъ пома́ꙁꙋѧ, гл҃етъ:

Пома́ꙁꙋетсѧ ра́бъ Бж҃їй И҆мⷬ҇къ, Е҆лее́ѡмъ ра́дости, въ И҆мѧ̀ Ѿца̀, и҆ Сн҃а, и҆ ᲃт҃гѡ Дх҃а, въ є҆́же ѿверꙁати́сѧ ᲂу҆́мꙋ є҆гѡ̀ къ раꙁꙋмѣ́нїю и҆ прїѧ́тїю Та́инъ вѣ́ры Хв҃ы, и҆ поꙁна́нїю и҆́стинны є҆гѡ̀, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

(Сщ҃е́нникъ

На Пе́рсехъ же, глаголе́тъ:

Въ и҆сцѣле́нїе дш҃ѝ и҆ тѣ́лꙋ, и҆ въ є҆́же люби́ти Гд҃а Бг҃а ѿ всегѡ̀ ᲃе́рдца свое́гѡ, ѿ всеѧ̀ дш҃а̀ свое́ѧ, и҆ ѿ всегѡ̀ помышле́ниѧ свое́гѡ, и҆ бли́жнѧгѡ свое́гѡ ꙗ҆́кѡ са́мъ себѣ̀.

На Пле́щи же, глаголе́тъ:

Въ є҆́же ᲂу҆се́рднѡ вꙁѧ́ти благо́е и҆́го Хв҃о на себѣ̀, и҆ сла́дцѣ ле́гкое бре́мѧ є҆гѡ̀ понестѝ: и҆ въ є҆́же ѿшаѧва́тисѧ всѣ́хъ по́хотїй пло́тскихъ.

На Ꙋ҆шесе́хъ же, глаголе́тъ:

Въ ᲂу҆слыша́нїе вѣры: и҆ въ прїѧ́тїе гла́са Бжⷭ҇тве́ннагѡ Е҆ѵⷢ҇лїѧ да бꙋ́дꙋтъ слꙋ́ха є҆гѡ̀.

на Рꙋка́хъ.

Въ є҆́же непорочнѡ въꙁдежда́ти рꙋ́цѣ своѣ̀ въ ᲃт҃а́ѧ, и҆ дѣла́ти пра́вдꙋ на всѧ́кое вре́мѧ, и҆ блⷭ҇ви́ти Гд҃а.

на Нога́хъ.

Въ є҆́же ходи́ти є҆мꙋ̀ по стопа́мъ за́повѣдїй Хрⷭ҇то́выхъ.

Помаꙁа́нꙋ же бы́вшꙋ всемꙋ̀ тѣ́лꙋ Креща́етъ є҆го Іере́ѷ, про́ста є҆гѡ̀ держа̀, и҆ зрѧ́ща на Въсто́къ: и҆ погрꙋжа́етъ є҆гѡ̀ є҆дино́ю и҆ въꙁво́дитъ глаголѧ̀:

Креща́етсѧ ра́бъ Бж҃їй И҆мⷬ҇къ: въ и҆́мѧ Ѿча̀. А҆ми́нь.

И҆ па́ки вто́рое погрꙋжа́етъ є҆гѡ̀, и҆ глаголе́тъ:

И҆ Сына̀. А҆ми́нь.

Па́ки трети́цею погрꙋжа́етъ є҆гѡ̀, глаголѧ̀:

И҆ Ст҃гѡ дх҃а. А҆ми́нь.

Нн҃ѣ и҆ при́снѡ, и҆ въ вѣ́ки вѣкѡ́въ. А҆ми́нь.

По Креще́нїи же а҆́ще младе́нецъ є҆́стъ Креща́емый въꙁглага́етъ є҆гѡ̀ І҆ере́ѷ на ѡ҆бѧ́тїѧхъ Кꙋ́мовыхъ, и҆ ᲂу҆мыва́етъ рꙋ́цѣ поѧ̀ съ людъмѝ Ѱало́мъ се́й, л҃а.

Бл҃же́ни и҆́мже ѡ҆пꙋсти́шасѧ беꙁꙁакѡ́нїѧ, и҆ и҆́мже прикры́шасѧ грѣсѝ.

Бл҃же́нъ мꙋ́жъ, є҆мꙋ́же не вмѣни́тъ Гд҃ь грѣха̀, ни́же є҆́сть въ ᲂу҆стѣ́хъ є҆гѡ̀ ле́сть.

Ꙗ҆́кѡ ᲂу҆молча́хъ, ѡ҆бетша́ша кѡ́сти моѧ̀, зовꙋ́щꙋ ми весь дн҃ь.

Ꙗ҆́кѡ дн҃ь и҆ но́щь ѡ҆тѧготѣ̀ на мнѣ̀ рꙋка̀ твоѧ̀: воꙁврати́хсѧ на стра́сть, є҆гда̀ ᲂу҆нꙁѐ ми те́рнъ.

Беꙁꙁако́нїе моѐ поꙁна́хъ и҆ грѣха̀ мое́гѡ не покры́хъ. Рѣ́хъ, и҆сповѣ́мъ на́ мѧ̀ беꙁꙁако́нїе моѐ Гв҃и: и҆ ты̀ ѿпꙋсти́лъ є҆сѝ нече́стїе ᲃе́рдца мое́гѡ.

За то̀ помо́литсѧ къ тебѣ̀ всѧ́къ Преподо́бный во вре́мѧ благопотре́бнѡ: Ѻ҆ба́че въ пото́пѣ вѡ́дъ мнѡ́гихъ къ не́мꙋ не прибли́жатсѧ.

Ты́ є҆сѝ прибѣ́жище моѐ ѿ ско́рби ѡ҆держа́щїѧ мѧ̀: ра́досте моѧ̀, и҆ꙁба́ви мѧ̀ ѿ ѡ҆быше́дшихъ мѧ̀.

Враꙁꙋмлю́тѧ, и҆ наста́влютѧ на пꙋть се́й, во́нъже по́йдеши. ᲂу҆твержꙋ̀ на́тѧ ѻ҆́цѣ моѣ̀.

Не бꙋдѣ́те ꙗ҆́кѡ ко́нь и҆ ме́скъ, и҆́мъже нѣ́сть ра́ꙁꙋма: броꙁда́ми и҆ ᲂу҆ꙁдо́ю че́люсти и҆́хъ въстѧ́гнеши, не приближа́ющихъсѧ къ тебѣ̀.

Мнѡ́ги ра́ны грѣ́шномꙋ: ᲂу҆пова́ющагѡ же на Гд҃а ми́лость ѡ҆бы́детъ.

Веселѣ́тесѧ ѡ҆ Гд҃ѣ, и҆ ра́дꙋйтесѧ Пра́веднїи, и҆ хвали́тесѧ, всѝ пра́вїи ᲃе́рдцемъ.

Се́й же ѱало́мъ глаголе́тсѧ, гⷤ.

И҆ а҆́ще ᲂу҆́бѡ младе́нецъ є҆́стъ Креща́емый, посажда́етъ тогѡ̀ въ Крести́лницѣ водѣ̀ ᲃꙋ́щей по вы́и, придержа̀ лѣ́вою рꙋко́ю, де́сною же прїи́мъ те́плꙋю во́дꙋ въꙁлива́етъ на гла́вꙋ є҆гѡ̀: и҆бѡ̀ блюстѝ подоба́етъ є҆́же не зали́тисѧ младе́нцꙋ. и҆ гл҃етъ предрече́нныѧ гл҃ы̀. Е҆́же є҆́стъ въ и҆мѧ̀ Ѿца̀: и҆ проч.:

А҆́ще ли є҆́стъ ᲃмы́сленъ Креща́емый, погрꙋжа́етъ єгѡ̀ въ трѝ погрꙋже́нїѧ, ꙗ҆́коже вы́ше ᲂу҆каꙁа́хомъ. Посе́мъ ѡ҆бла́читъ є҆гѡ̀ въ бѣ́лꙋю ѡ҆де́ждꙋ, а҆́ще же младе́нецъ є҆́стъ, да повива́етъ є҆гѡ̀ но́выми пелена́ми на ни́хъ же положи́лъ є҆стъ є҆гѡ̀ на ѡ҆бъѧ́тїахъ Кꙋ́мовыхъ, гл҃ѧ̀:

Ѽбла́читсѧ ра́бъ Бж҃їй И҆мⷬ҇къ: въ хито́нъ пра́вды, въ и҆мѧ̀ Ѿца, и҆ Сн҃а, и҆ Ст҃го Дх҃а, нн҃ѣ и҆ при́снѡ, и҆ въ вѣ́ки векѡ́въ.

Ли́къ:

А҆ми́нь.

И҆ а҆́бїе пою́тъ Тропа́ръ се́й, на Гла́съ и҃.

Ри́ꙁꙋ ми пода́ждъ ᲃвѣ́тлꙋю, ѡ҆дѣѧ́йсѧ ᲃвѣ́томъ ꙗ҆́кѡ ри́ꙁою, многомлⷭ҇тиве Хє҃ Бо́же на́шъ.

И҆ повнегда́ ѡ҆блещѝ є҆гѡ̀, подае́тъ є҆мꙋ̀ ᲃвѣщꙋ̀ въꙁже́нꙋю въ десни́цꙋ, глаголѧ̀.

Прїймѝ ᲃвѣщꙋ̀ ᲃі́ю горѧ́щꙋю, и҆ тщи́сѧ въ все́мъ жи́тїи твое́мъ свѣ́томъ вѣ́ры и҆ до́брыхъ дѣ́лъ просвѣща́тисѧ, ꙗ҆́кѡ да є҆гда̀ прі́йдетъ Гд҃ь, свѣ́тлѡ въꙁмо́жіши и҆ꙁыйтѝ въ ᲃтрѣте́нїе є҆гѡ̀ съ всѣ́ми ᲃт҃ы́ми: и҆ въні́йдеши невъꙁбра́ннѡ, въ Черто́гъ нбⷭ҇ныѧ є҆гѡ̀ ᲃла́вы, Ца́рствова́ти ᲃни́мъ въ беꙁконе́чныѧ вѣ́ки. А҆ми́нь.

Посе́мъ же а҆́бїе Дїа́конъ гл҃е́т҃ Е҆кте́нїю ᲃі́ю, ᲃт҃гѡ Мѵропомаꙁа́нїѧ:

Е҆кте́ніѧ ᲃт҃гѡ Мѵрꙍпомаꙁа́нїѧ Та́йны.

Ми́ромъ Гд҃ꙋ помоли́мсѧ.

Ли́къ:

Гд҃и поми́лꙋй.

Ꙍ҆ съвы́шнѣмъ ми́рѣ и҆ ᲃп҃сенїи дш҃ъ на́шихъ, Гд҃ꙋ помоли́мсѧ.

Ꙍ҆ ми́рѣ́ всегѡ̀ мі́ра, благостоѧ́нїи ᲃт҃ы́хъ Бж҃іихъ Це́ркві́й, и҆ ᲃъедине́нїи всѣ́хъ, Гд҃ꙋ помоли́мсѧ.

Ꙍ҆ А҆рхїепⷭ҇пѣ на́шемъ И҆мⷬ҇къ: че́стнѣмъ Пресвѵ́терствѣ є҆́же ѡ҆ Хрⷭ҇тѣ̀ Дїа́конствѣ, все́мъ при́чтѣ и҆ людехъ, Гд҃ꙋ помоли́мсѧ.

Ꙍ҆ є҆́же помаꙁа́нїемъ всеᲃт҃а́гѡ Богодѣ́телнагѡ и҆ всесъверши́телнагѡ Мѵ́ра, пода́тисѧ си́лѣ Бжⷭ҇тве́нной но́во просвѣще́нномꙋ рабꙋ̀ Бж҃їю И҆мⷬ҇къ, въ побѣжде́нїе и҆ попра́нїе всѣ́хъ съпроти́вныхъ дїа́волскихъ ко́ꙁнїй, ѿ пло́ти же и҆ ѿ мі́ра находѧ́щихъ бра́нїй, Гд҃ꙋ помоли́мсѧ.

Ꙍ҆ є҆́же бы́ти є҆мꙋ̀ хра́брꙋ и҆ побѣдоно́снꙋ во́инꙋ Ха҃ Бг҃а на́шегѡ, си́лою, дѣ́йствомъ, благода́тїю и҆ прише́ствїемъ ᲃт҃гѡ Дх҃а, помаꙁа́нїемъ всест҃гѡ Мѵ́ра, Гд҃ꙋ помоли́мсѧ.

Ꙍ҆ є҆́же тве́рдымъ, и҆ крѣ́пкимъ, и҆ непоꙁи́блемымъ въ Правосла́вной Вѣ́рѣ, любви́же и҆ наде́ждѣ, помаꙁа́нїемъ всест҃а́гѡ Мѵ́ра бы́ти є҆мꙋ̀ въ всѧ̀ днѝ живота̀ є҆гѡ̀, Гд҃ꙋ помоли́мсѧ.

Ꙍ҆ є҆́же пода́тисѧ є҆мꙋ̀ благода́ть помаꙁа́нїемъ всест҃гѡ Мѵ́ра, є҆́же съ дерꙁнове́нїемъ, беꙁъ стра́ха, непосты́днѡ и҆сповѣда́ти пре́дъ всѣ́ми И҆мѧ̀ Ха҃ Бг҃а на́шегѡ, и҆ тогѡ̀ ра́ди страда́ти и҆ ᲂу҆мрѣ́ти любо́внѣ, всегда̀ и҆ꙁво́лити, Гд҃ꙋ помоли́мсѧ.

Ꙍ҆ є҆́же въꙁраста́ти є҆мꙋ̀ въ всѣ́хъ добродѣ́телехъ, и҆ преспѣва́ти въ за́повѣдехъ Хрⷭ҇та̀ Бг҃а на́шегѡ, помаꙁа́нїемъ всест҃гѡ Мѵ́ра, Гд҃ꙋ помоли́мсѧ.

Ꙍ҆ є҆́же ᲃп҃си́телнымъ ᲃтра́хомъ въ чⷭ҇тотѣ̀ и҆ пра́вдѣ дꙋ́шꙋ є҆гѡ̀ съблюстѝ помаꙁа́нїемъ всест҃а́гѡ Мѵ́ра, Гд҃ꙋ помоли́мсѧ.

Ꙍ҆ є҆́же доспѣ́ти є҆мꙋ̀ въ мꙋ́жа съверше́нна въ мѣ́рꙋ во́ꙁраста и҆сполне́нїѧ Хв҃а, си́лою, дѣ́йствомъ, благода́тїю и҆ наше́ствїемъ Дх҃а Прⷭ҇тгѡ, Помаꙁа́нїемъ всест҃а́гѡ и҆ всесъверши́телнагѡ Мѵ́ра, Гд҃ꙋ помоли́мсѧ.

Ꙍ҆ є҆́же и҆ꙁба́витисѧ є҆мꙋ̀ и҆ намъ ѿ всѧ́кїѧ ᲃко́рби, гнѣ́ва и҆ нꙋ́жды, и҆ дости́гнꙋти все́мъ намъ въ съедине́нїи вѣ́ры, и҆ ра́ꙁꙋма Сн҃а Бж҃їѧ, Гд҃ꙋ помоли́мсѧ.

Застꙋпѝ, ᲃп҃сѝ, поми́лꙋй и҆ съхранѝ є҆гѡ̀ и҆ на́съ Бо́же твое́ю благода́тїю.

Пртⷭ҇ꙋ́ю, чⷭ҇тꙋю, и҆ преблⷭ҇ве́ннꙋю сла́внꙋю, Влады́чицꙋ на́шꙋ Бц҃ꙋ, и҆ при́снѡ Дв҃ꙋ Марі́ю съ всѣ́ми ᲃт҃ы́ми помѧнꙋ́вше, самѝ себѣ̀, и҆ дрꙋ́гъ дрꙋ́га, и҆ весь живо́тъ на́шъ, Х҃ Бг҃ꙋ предади́мъ.

Ли́къ:

Тебѣ̀ Гд҃и.

І҆ере́ѷ въꙁглаша́етъ:

Ꙗкѡ подоба́етъ ти всѧ́каѧ ᲃла́ва, чⷭ҇ть, и҆ поклоне́нїе Ѿцꙋ̀ и҆ Сн҃ꙋ и҆ ᲃт҃о́мꙋ Дхꙋ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

По сконча́нїи же Е҆кте́нїи ре́кшꙋ Дїа́конꙋ:

Гд҃ꙋ помоли́мсѧ.

И҆ предстоѧ́щимъ:

Гд҃и поми́лꙋй.

І҆ере́ѷ гл҃етъ Моли́твꙋ ᲃїю съ всѧ́кимъ внима́нїемъ велегла́снѡ:

Блⷭ҇ве́нъ є҆сѝ Гд҃и Бо́же Вседержи́телю, и҆сто́чниче благи́хъ, ᲃо́лнце пра́вды, въсїѧ́вый въ тмѣ̀ ᲃꙋ́щимъ ᲃвѣ́тъ ᲃпⷭ҇нїѧ, ꙗ҆вле́нїемъ є҆диноро́днагѡ твое́гѡ Сн҃а и҆ Бг҃а на́шегѡ: и҆ дарова́вый намъ недосто́йнымъ, бл҃же́нное ѡ҆чище́нїе въ ᲃт҃ой водѣ̀, и҆ Бжⷭ҇тве́нное ѡ҆сщ҃е́нїе въ животво́рномъ помаꙁа́нїи: и҆́же и҆ нн҃ѣ благоволи́лъ є҆сѝ породи́ти раба̀ твое́гѡ новопросвѣще́ннагѡ водо́ю и҆ Дх҃омъ, и҆ во́лныхъ и҆ нево́лныхъ съгрѣше́нїй ѡ҆ставле́нїе томꙋ̀ дарова́вый.

Са́мъ Влады́кѡ всѣ́хъ Царю̀ благоꙋтро́бне, дарꙋ́й є҆мꙋ̀ и҆ Печа́ть да́ра ᲃт҃гѡ, всеси́лнагѡ и҆ покланѧ́емагѡ ти Дх҃а, и҆ Причаще́нїе ᲃт҃гѡ Тѣ́ла, и҆ чⷭ҇тныѧ Крвѐ Ха҃ твое́гѡ.

Съхранѝ є҆гѡ̀ въ твое́мъ ѡ҆сщ҃е́нїи, ᲂу҆твердѝ въ Правосла́вной вѣ́рѣ, и҆ꙁмѝ ѿ лꙋка́вагѡ и҆ всѣ́хъ ко́ꙁнїй є҆гѡ̀ ѝ ᲃп҃си́телнымъ ти ᲃтра́хомъ въ чистотѣ̀ и҆ пра́вдѣ дꙋ́шꙋ є҆гѡ̀ съблюдѝ:

Ꙗ҆́кѡ да въ всѧ́комъ дѣ́лѣ и҆ ᲃло́вѣ благоꙋгожда́ѧ тебѣ̀, ᲃн҃ъ и҆ наслѣ́дникъ бꙋ́детъ пренбⷭ҇нагѡ твое́гѡ Ца́рствїѧ.

И҆ въꙁглаша́етъ:

Ꙗ҆́кѡ ты́ є҆си Бг҃ъ на́шъ, Бг҃ъ є҆́же милова́ти и҆ ᲃп҃са́ти: и҆ тебѣ̀ ᲃла́вꙋ въꙁсыла́емъ Ѿцꙋ̀, и҆ Сн҃ꙋ, и҆ ᲃт҃о́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

И҆ по Моли́твѣ, а҆́бїе пома́ꙁꙋетъ Креще́ннагѡ Ст҃ымъ Мѵ́ромъ, творѧ̀ Креста̀ ѡ҆́браꙁъ.

На челѣ̀, На ѡ҆чесе́хъ, На но́ꙁдрѣхъ, На ᲂу҆стѣ́хъ, На ᲂу҆шесе́хъ, На персе́хъ, На пле́щꙋ ме́ждꙋ ра́мїю, На рꙋка́хъ, и҆ На нога́хъ, гл҃ѧ̀:

Печа́ть да́ра ст҃гѡ дꙋ́ха. А҆ми́нь.

И҆ посе́мъ съ воспрїе́мникомъ, и҆ Новокреще́ннымъ, тво́ритъ крꙋ́га ѻ҆́браꙁъ ѻ҆́крⷭ҇тъ а҆́мбо́на, три́жды, пою́ще.

Е҆ли́ци въ Ха҃ Крести́стесѧ, въ Ха҃ ѡ҆блеко́стесѧ. А҆ллилꙋѧ, гⷤ.

Дїа́конъ же гл҃тъ:

Во́нмѣмъ.

І҆ере́ѷ:

Ми́ръ всѣ́мъ.

Чте́цъ:

И҆ дх҃ови твое́мꙋ.

Проки́менъ, Гла́съ, г҃.

Гд҃ь просвѣще́нїе моѐ, и҆ сп҃си́телъ мо́й, кого́сѧ ᲂу҆бою̀.

Сті́хъ:

Гд҃ь защити́тель животꙋ̀ мое́мꙋ, ѿ кого́сѧ ᲂу҆страшꙋ̀.

Посе́мъ Дїа́конъ глаголе́тъ:

Премꙋ́дрость.

Чте́цъ же:

Къ Римлѧ́нѡмъ посла́нїѧ ᲃт҃го А҆по́стола Па́вла чте́ние.

Дїа́конъ:

Во́нмѣмъ.

Чте́цъ же чте́тъ, ѿ Главы̀, ѕ҃ Зача́ло, ч҃а.

Бра́тїе, є҆ли́цы во Ха҃ Іи҃ᲃа Крести́хѡмсѧ, въ ᲃме́рть є҆гѡ̀ Крести́хомсѧ, спогребо́хомсѧ ᲂу҆́бо съ ни́мъ Креще́нїемъ въ ᲃме́рть: Да ꙗ҆́кѡже въста̀ Хᲃ҃ ѿ ме́ртвыхъ ᲃла́вою Ѿчею, та́кѡ и҆ мы̀ вно́вости жи́зни да хѡ́димъ. А҆́ще бо съѡ́бра́ꙁни бы́ѡмъ подо́бїю ᲃме́рти є҆гѡ̀, но и҆ Воскресе́нїю бꙋ́демъ.

Сі́е вѣ́дꙋ́ще, ꙗ҆́кѡ ве́тхїй на́шъ человѣ́къ съ ни́мъ. Распѧ́тсѧ, да ᲂу҆праꙁдни́тсѧ тѣ́ло грѣхо́вное, є҆́же не ктомꙋ̀ не работа́ти намъ грѣхꙋ̀:

Ꙋ҆ме́рый бо ѡ҆правди́сѧ ѿ грѣха̀.

А҆́ще ли же ᲂу҆мро́хомъ съ Хрⷭ҇то́мъ, вѣ́рꙋемъ, ꙗ҆́кѡ и҆ съ ѡ҆живе́мъ є҆мꙋ̀: вѣдꙋ́ще, ꙗ҆́кѡ Хрⷭ҇то́съ воста́вый ѿ ме́ртвыхъ, ктомꙋ̀ ᲂу҆жѐ не ᲂу҆мира́етъ: ᲃме́рть є҆мꙋ̀ ктомꙋ̀ н́е господствꙋ́етъ.

Є҆́же бо ᲂу҆мрѐ, грѣхꙋ̀ ᲂу҆мрѐ є҆дино́ю: а҆ є҆́же живе́тъ, живе́тъ Бв҃и:

Та́кожде и҆ вы̀, въмѣнѧ́йте себѐ ме́ртви ᲂу҆́бѡ бы́ти грѣхꙋ̀, жи́ви же Бв҃и, ѡ҆ Хє҃ І҆и҃сѣ Гд҃е на́шемъ.

І҆ере́ѷ:

Ми́ръ ти.

Дїа́конъ:

Премꙋ́дрость во́нмѣмъ.

Чте́цъ:

Ѱало́мъ Дави́довъ, А҆ллилꙋ́їа.

Посе́мъ Дїа́конъ:

Премꙋ́дрость про́сти ᲂу҆слы́шимъ ᲃт҃гѡ Е҆ѵⷢ҇лїѧ.

І҆ере́ѷ:

Ѿ Матѳе́а ᲃт҃гѡ Еѵⷢ҇лїѧ чте́нїе.

Дїаконъ:

Во́нмѣмъ.

І҆ере́ѷ чте́тъ ѿ Гла́вы к҃и, Зача́ло, рѕ҃і.

Въ вре́мѧ ѻ҆́нѡ, Є҆ди́нина́дцѧте Ꙋ҆ч҃нцы̀ и҆до́ша въ Галїле́ю, въ горꙋ̀, а҆́може повелѣ̀ и҆́мъ І҆и҃ᲃ:

И҆ ви́дѣвше є҆гѡ̀, поклони́шасѧ є҆мꙋ̀: ѻ҆́вїи же ᲂу҆сꙋмни́шасѧ.

И҆ пристꙋ́пль І҆и҃ᲃ, речѐ и҆́мъ, гл҃ѧ: да́стьмисѧ всѧ́каѧ вла́сть на нб҃сѝ и҆ на землѝ.

Ше́дше ᲂу҆́бѡ на ᲂу҆чи́те всѧ̀ ꙗ҆ꙁы́ки, Крестѧ́ще и҆́хъ въ и҆́мѧ̀ Ѿца̀ и҆ сн҃а и҆ ᲃт҃а́гѡ Дх҃а: ᲂу҆ча́ще и҆́хъ блюстѝ всѧ̀, є҆ли́ка заповѣда́хъ ва́мъ: И҆ сѐ, а҆́ꙁъ съ ва́ми є҆́смь во всѧ̀ днѝ да́же до сконча́нїѧ вѣ́ка. А҆ми́нь.

Ли́къ:

Сла́ва тебѣ̀ Гд҃и.

Дїа́конъ же сі́ѧ Е҆кте́нїѧ глаголе́тъ а҆́бїе:

Поми́лꙋй на́съ Бо́же по вели́цѣй ми́лости твое́й:

Е҆щѐ моли́мсѧ ѡ҆ вели́комъ Королѣ̀ на́шемъ:

Е҆щѐ моли́мсѧ ѡ҆ А҆рхїепⷭ҇пѣ на́шемъ: И҆мⷬ҇къ:

Е҆щѐ моли́мсѧ ѡ҆ млⷭ҇ти, жи́ꙁни, ми́рѣ, здра́вїи, ᲃпⷭ҇нїи, и҆ ѡ҆ставле́нїе грѣхѡ́въ рабꙋ̀ Бж҃їю И҆мⷬ҇къ: въспрїе́мникꙋ.

Е҆щѐ мо́лимсѧ ѡ҆ новопросвѣще́нномъ рабѣ̀ Бж҃їимъ И҆мⷬ҇къ: ѡ҆ є҆́же съхране́нꙋ бы́ти є҆мꙋ̀ въ вѣ́рѣ чи́стагѡ и҆сповѣда́нїѧ, въ всѧ́комъ благочⷭ҇тїи же и҆ и҆полне́нїи за́повѣдїй Хв҃ыхъ, въ всѧ̀ днѝ живота̀ є҆гѡ̀.

І҆ере́ѷ же въꙁглаша́етъ:

Ꙗ҆́кѡ млⷭ҇тивъ и҆ человѣ́кѡлю́бецъ Бг҃ъ єс҆ѝ, и҆ тебѣ̀ ᲃла́вꙋ въꙁсыла́емъ Ѿцꙋ̀ и҆ Сн҃ꙋ и҆ ᲃт҃о́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

Посе́мъ же а҆́бїе Іере́ѷ глалоле́тъ:

Сла́ва ти Бо́же ᲂу҆пова́нїе на́ше, сла́ва ти:

Чте́цъ же:

Сла́ва: И҆ нн҃ѣ: Гд҃и поми́лꙋй, гⷤ. Блⷭ҇вѝ.

Іере́ѷ же тво́ритъ ѿпꙋ́стъ.

Въ І҆ѡрда́ни ѿ І҆ѡа́нна, на́шегѡ ра́ди ᲃп҃сенїѧ Крести́тисѧ и҆ꙁволи́вый, Хᲃ҃ и҆́стинный Бг҃ъ на́шъ: Моли́твами Прчⷭ҇ты́ѧ свое́ѧ Мт҃ре, ᲃи́лою чⷭ҇тнагѡ и҆ животворѧ́щагѡ Креста̀, и҆ всѣ́хъ ра́ди ᲃт҃ы́хъ, поми́лꙋетъ и҆ ᲃп҃сетъ на́съ, ꙗ҆́кѡ бла́гъ и҆ человѣкѡлю́бецъ.

Подоба́етъ вѣ́дати, ꙗ҆́кѡ а҆́ще бꙋ́детъ Лѵтꙋ́ргїа, предла́гѧть новопросвеще́ннагѡ младе́нца съ свеща́ми на вели́комъ вхо́дѣ.

А҆́щели є҆́сть съверше́нъ человѣ́къ Крести́выйсѧ, то са́мъ да и҆́детъ пре́дъ Бжⷭ҇тве́нными да́ры на вели́комъ въхо́дѣ, держа̀ по ᲃвѣщѝ въ ѡ҆бо́ю рꙋ́кꙋ: Причаща́етъжесѧ и҆ ᲃт҃ы́хъ Та́инъ Ха҃ Бг҃а на́шегѡ, и҆лѝ младе́нецъ, и҆лѝ а҆́ще съверше́нъ во́ꙁрастъ и҆мѣ́ѧй бꙋ́детъ Новокреще́нный.

По ѿпꙋ́стѣ же исхо́дитъ въ до́мъ сво́й держа̀ свѣ́ща горѧ́ща, провожда́емъ ѿ свои́хъ є҆гѡ̀.

И҆ а҆́ще ᲂу҆́бѡ съверше́нъ є҆́сть Крести́выйсѧ, приво́димъ быва́етъ на всѧ́къ дн҃ь къ Це́ркви, та́кожде держа̀ ᲃвѣ́ща горѧ́ща, на Вече́рни, на Ꙋ҆́трни, и҆ на Лѵтꙋ́ргїи, даже до ѻ҆́смагѡ днѧ.

Па́ки приво́димъ быва́етъ Въспрїе́мникѡмъ новопросвѣще́нный въ Це́ркѡвъ є҆́же ѡ҆мы́тисѧ:

І҆ере́ѷ же раꙁдрѣша́етъ ꙗ҆́же на не́мъ Креще́нїѧ пе́лены, и҆лѝ хито́нъ, и҆ по́ѧсъ: и҆ а҆́бїе начина́етъ, гл҃ѧ̀:

Блⷭ҇ве́нъ Бг҃ъ на́шъ: Цр҃ю нбⷭ҇ный: Трⷭ҇то́е: Прⷭ҇та́ѧ Трⷪ҇це: по Ѿче на́шъ: Ꙗ҆́ко твоѐ є҆́стъ Ца́рство: Та́же Тропа́рь дневны́й и҆ прилꙋ́чшагѡсѧ ᲃт҃гѡ. Сла́ва: И҆ нн҃ѣ: Богородичен:

Моли́твами Гд҃и всѣ́хъ ᲃт҃ы́хъ и҆ Бц҃а, тво́й ми́ръ да́ждъ намъ, и҆ помилꙋй на́съ ꙗ҆́кѡ є҆ди́нъ ще́дръ.

И҆ а҆́бїе глаголе́тъ, Моли́твы сі́ѧ, рекшꙋ Дїа́конꙋ:

Гд҃ꙋ помоли́мсѧ.

Ли́къ:

Гд҃и поми́лꙋй.

И҆ꙁбавле́нїе съгрѣше́нїй ра́ди ᲃт҃гѡ Креще́нїѧ рабꙋ̀ твое́мꙋ даровавый, и҆ живо́тъ ѡ҆бновле́нїѧ є҆мꙋ пода́вый: самъ Влады́кѡ Гд҃и, просвѣще́нїе лица̀ твое́гѡ въ ᲃе́рдци є҆гѡ̀ въсїѧва́ти всегда̀ благоволѝ: Щи́тъ вѣ́ры є҆гѡ̀ ненавѣтова́нъ, ѿ врагѡ́въ съблюдѝ: Нетлѣ́нїѧ ѡ҆де́ждꙋ є҆и́же ѡдѣѧ́сѧ нескве́рнꙋ въ не́мъ, и҆ неблаꙁне́ннꙋ съхранѝ, нерꙋши́мꙋ въ не́мъ дх҃о́внꙋю печа́ть благода́тїю твое́ю съблюда́ѧ, и҆ млⷭ҇тивъ томꙋ̀ же и҆ намъ быва́ѧ, по мнѡ́жествꙋ щедрѡ́тъ твои́хъ.

Въꙁгла́съ:

Ꙗ҆́кѡ блⷭ҇висѧ и҆ просла́висѧ пречⷭ҇тное и҆ великолѣ́пое И҆мѧ̀ твоѐ, Ѿца̀ и҆ Сн҃а, и҆ ᲃт҃гѡ Дх҃а, нн҃ѣ и҆ прⷭ҇но, и҆ въ вѣ́ки вѣкѡ́въ.

Ли́къ:

А҆ми́нь.

Моли́тва, вто́раѧ:

Гд҃ꙋ помоли́мсѧ.

Ли́къ:

Гд҃и поми́лꙋй.

Влады́кѡ Гд҃и Бо́же на́шъ, ра́ди кꙋ́пели, нбⷭ҇ное ѻ҆сїѧ́нїе Креща́емымъ подава́ѧй: породи́вый раба̀ твое́гѡ новопросвѣще́ннагѡ, водо́ю и҆ Дх҃омъ, и҆ во́лныхъ и҆ нево́лныхъ съгрѣше́нїй ѡ҆ставле́нїе томꙋ̀ дарова́вый:

Въꙁложѝ на́нь рꙋ́кꙋ твою̀ держа́внꙋю, и҆ съхранѝ є҆гѡ̀ въ си́лѣ твое́ѧ бла́гости.

Некрадо́мѡ ѡ҆брꙋче́нїе съблюдѝ, и҆ сподобѝ є҆гѡ̀ въ живо́тъ вѣ́чный, и҆ въ твоѐ благоꙋгожде́нїе.

Въꙁгла́съ:

Ꙗ҆́ко ты́ є҆си ѡ҆сщ҃е́нїе на́ше, и҆ тебѣ̀ ᲃла́вꙋ въꙁсыла́емъ, Ѿцꙋ̀, и҆ Сн҃ꙋ, и҆ ᲃт҃о́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

І҆ере́ѷ:

Ми́ръ всѣмъ:

Ли́къ:

И҆ дх҃о́ви твое́мꙋ.

Дїа́конъ:

Гла́вы ва́ша Гв҃и прекло́ним:

Ли́къ:

Тебѣ̀ Гд҃и.

І҆ере́ѷ же чте́тъ Моли́твꙋ ᲃі́ю та́йнѡ:

Ѽдѣѧ́выйсѧ въ тѧ̀ Ха҃ и҆ Бг҃а на́шгѡ, тебѣ̀ преклони́лъ є҆́сть съ на́ми свою̀ гла́вꙋ, є҆гѡ́же ᲃъблюдѝ непобѣди́ма подви́жника пребы́ти на всꙋ́е вра́ждꙋ подвиꙁа́ющихъ на него́же и҆ на́ны, твои́мъ же нетлѣ́ннымъ вѣнце́мъ да́же до конца̀ побѣди́телѧ всѣ́хъ покажѝ.

И҆ въꙁглаша́етъ:

Твоѐ бо є҆́стъ є҆́же милова́ти и҆ сп҃са́ти, и҆ тебѣ̀ ᲃла́вꙋ въꙁсыла́емъ съ беꙁнача́лнымъ ти Ѿце́мъ, и҆ съ Прⷭ҇тымъ и҆ благимъ, и҆ животворѧ́щимъ ти Дх҃омъ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

Посе́мъ же а҆́бїе раꙁдрѣша́етъ І҆ере́ѷ по́ѧсъ дѣ́тищꙋ, и҆ ѡ҆дѣ́валѡ и҆́же на не́мъ, и҆ съвокꙋпи́въ кра́ѧ є҆гѡ̀, ѡ҆мочаетъ въ водѣ̀ чи́стой сі́ѧ, и҆ кро́питъ ѡ҆троча̀, глаголѧ̀:

Ѽправда́лсѧ є҆сѝ. Просвѣти́лсѧ є҆сѝ. Ѽт҃и́лсѧ є҆сѝ. Ѽмы́лсѧ є҆сѝ И҆́менемъ Гд҃а на́шегѡ І҆и҃ᲃ Ха҃, и҆ Дх҃омъ Бг҃а на́шегѡ.

И҆ въꙁе́мъ гꙋ́бꙋ но́вꙋю напое́нꙋ водо́ю, ѡ҆тира́етъ лицѐ є҆мꙋ съ гла́вою, и҆ пе́рси, и҆ про́чаа ᲂу҆́ды гл҃ѧ̀.

Крести́лсѧ є҆сѝ. Просвѣти́лсѧ є҆сѝ. Мѵ́ромъ помаꙁа́лсѧ є҆сѝ. Ѽсвѧти́лсѧ є҆сѝ. Ѽмы́лсѧ є҆сѝ. Въ И҆мѧ̀ Ѿца̀, и҆ Сн҃а, и҆ ᲃт҃гѡ Дх҃а, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

Дїа́конъ:

Гд҃ꙋ помоли́мсѧ.

Ли́къ:

Гд҃и поми́лꙋй.

І҆ере́ѷ же чте́тъ Моли́твꙋ:

Влады́кѡ Гд҃и Бо́же на́шъ, и҆́же ѡ҆́браꙁомъ свои́мъ поче́лъ є҆сѝ человѣ́ка, ѿ дш҃а̀ ᲃлове́сныѧ, и҆ пло́ти благолѣ́пныѧ ᲃъста́вивъ тогѡ̀, ꙗ҆́кѡ да тѣ́ло слꙋ́житъ ᲃлове́сной дш҃ѝ: Гла́вꙋ ᲂу҆́бо на высоча́йшыхъ поста́вль, и҆ въ не́й мнѡжа́йшаѧ чꙋ́вствъ въдрꙋꙁи́лъ є҆сѝ, не запина́ющїѧ дрꙋ́гъ дрꙋ́гꙋ, вла́сы же гла́вꙋ покры́лъ є҆сѝ, въ є҆́же не врежда́тисѧ прило́гами вѣ́трными, и҆ всѧ̀ ᲂу҆́ды є҆гѡ̀ потре́бнѡ насади́лъ є҆сѝ: ꙗ҆́кѡ да ра́ди всѣ́хъ благодари́тъ тѧ̀ до́брагѡ хꙋдо́жника.

Са́мъ Влады́кѡ ᲃъсꙋ́домъ и҆ꙁбра́нїѧ твое́гѡ Па́вломъ А҆по́столомъ, заповеда́вый намъ, всѧ̀ въ ᲃла́вꙋ твою̀ твори́ти, прише́дшагѡ раба̀ твое́гѡ И҆мⷬ҇къ: нача́лѡ твори́ти стрищѝ вла́сы гла́вы свое́ѧ, блⷭ҇вѝ въкꙋ́пѣ съ є҆гѡ̀ въспрїе́мникѡмъ: и҆ да́ждъ и҆́мъ всегда̀ поꙋча́тисѧ въ за́конѣ твое́мъ и҆ благоꙋго́днаѧ тебѣ̀ твори́ти.

Въꙁгла́съ:

Ꙗ҆́ко млⷭ҇тивъ, и҆ человѣ́кѡлюібецъ Бг҃ъ є҆сѝ, и҆ тебѣ̀ ᲃла́вꙋ въꙁсыла́емъ Ѿцꙋ̀, и҆ Сн҃ꙋ, и҆ ᲃт҃о́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

І҆ере́ѷ:

Ми́ръ всѣ́мъ.

Ли́къ:

И҆ дх҃о́ви твое́мꙋ.

Дїа́конъ:

Гла́вы ва́ша Гд҃ви приклони́те.

Ли́къ:

Тебѣ̀ Гд҃и.

І҆ере́ѷ же гл҃етъ Моли́твꙋ ᲃі́ю та́йнѡ:

Гд҃и Бо́же на́шъ, ѿ и҆сполне́нїѧ кꙋ́пе́лнагѡ, твое́ю бла́гостїю ѻ҆ст҃и́вый въ тѧ̀ вѣ́рꙋющимъ. Блⷭ҇вѝ настоѧ́щее мла́дѧ, и҆ на гла́вꙋ є҆гѡ̀ блⷭ҇ве́нїе твоѐ да сни́детъ: и҆ ꙗ҆́кѡже блⷭ҇ви́лъ є҆сѝ Прⷪ҇ро́комъ Самои́ломъ Дави́да Царѧ̀, блⷭ҇вѝ и҆ гла́вꙋ раба̀ твое́гѡ сегѡ̀ И҆мⷬ҇къ: рꙋко́ю менѐ грѣ́шнагѡ, ѡ҆сїѧва́ѧ тогѡ̀ Дх҃омъ твои́мъ ᲃт҃ы́мъ: Ꙗ҆́кѡ да преспѣва́ѧ и҆ въꙁра́стомъ, и҆ ᲃѣдина́ми ста́рости, ᲃла́вꙋ тебѣ̀ въꙁша́етъ, и҆ ᲂу҆ви́дитъ блага́ѧ І҆ерⷭ҇ли́мова въ всѧ̀ днѝ живота̀ свое́гѡ.

Въꙁгла́съ:

Ꙗ҆́кѡ подоба́етъ ти всѧ́каѧ ᲃла́ва, чⷭ҇тъ, и҆ поклоне́нїе Ѿцꙋ̀ и҆ Сн҃ꙋ и҆ ᲃт҃о́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

И҆ пострыга́етъ є҆гѡ̀ крестаѡ́браꙁнѡ гл҃ѧ̀:

Пострыга́етсѧ ра́бъ Бж҃їй И҆мⷬ҇къ: въ и҆мѧ̀ Ѿца̀, и҆ Сн҃а, и҆ ᲃт҃го Дх҃а, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

И҆ а҆́бїе въꙁлага́етъ на главѣ̀ є҆гѡ̀ Кꙋ́кꙋль, гл҃ѧ̀:

Ѽдѣва́етсѧ ра́бъ Бжїй И҆мⷬ҇къ: въ Кꙋ́кꙋль неꙁло́бїѧ и҆ шле́мъ ᲃпⷭ҇нїѧ, въ и҆мѧ̀ Ѿца̀, и҆ Сн҃а, и҆ ᲃт҃го Дх҃а, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

Та́же Е҆кте́нїѧ, въ не́й же помина́етъ по Царѣ̀ Въспрїе́мника съ новопросвѣще́ннымъ.

Поми́лꙋй на́съ Бо́же по вели́цѣй млⷭ҇ти твое́й.

Е҆щѐ моли́мсѧ ѡ҆ Вели́комъ Королѝ на́шемъ.

Е҆ще моли́мсѧ ѡ҆ млⷭ҇ти, жи́ꙁни, ми́рѣ, здра́вїи, и҆ ᲃпⷭ҇нїи, рабꙋ̀ Бж҃їю Имⷬ҇къ: Въспрїе́мникꙋ, и҆ новопросвѣще́ннмꙋ Имⷬ҇къ:

І҆ере́ѷ въꙁглаша́етъ:

Ꙗ҆́ко млⷭ҇тивъ, и҆ человѣ́кѡлю́бецъ Бг҃ъ є҆сѝ, и҆ тебѣ̀ ᲃла́вꙋ въꙁсыла́емъ Ѿцꙋ̀, и҆ Сн̀ꙋ, и҆ ᲃт҃о́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

И҆ быва́етъ ѡ҆бы́чный ѿпꙋ́стъ.

И҆лѝ ѿ пога́нъ, и҆лѝ ѿ є҆рети́къ не вѣ́рꙋющихъ въ ᲃт҃ꙋ́ю Трⷪ҇цꙋ єдиносꙋ́щнꙋю и҆ нераꙁдѣли́мꙋю, и҆ не Крестѧ́щихсѧ въ и҆мѧ̀ Ѿца̀, и҆ Сн҃а, и҆ ᲃт҃го Дха, въ трѝ погрꙋже́нїѧ:

Ꙗ҆кѡві́и сꙋ́ть беꙁбо́жыи А҆рїане, и҆ нн҃ѣшнїи Социнїѧ́не, нарица́емїи Новокреще́нци, и҆́же прихо́дѧтъ къ є҆дино́й, ᲃт҃о́й, Собѡ́рной А҆по́столской Це́ркви, и҆ и҆́стиннѡ то́й съвокꙋпи́тсѧ жела́ютъ.

Въ пе́рвыхъ ᲂу҆́бѡ, и҆ꙁвѣ́стнѡ и҆стѧ́ꙁани, и҆ ѡ҆па́снѡ и҆спы́тани да бꙋ́дꙋтъ, а҆́ще не бы́ша когда̀ ѿ кого̀ Креще́ни, и҆ а҆́ще и҆́стиннѡ ѿ любвѐ къ ᲃп҃си́телю Х҃ Бг҃ꙋ на́шемꙋ, ᲃп҃се́нїѧ ра́ди дш҃а̀ свое́ѧ, а҆ не прибы́тка ра́ди кое́гѡ и҆лѝ и҆́ныѧ ра́ди кое́ѧ привре́менныѧ вины̀, Креще́нїѧ ᲃт҃гѡ сподобитисѧ жела́ютъ. И҆ꙁвѣсти́въ же сѧ и҆ꙁвѣ́стнѡ А҆рхїере́ѷ, и҆лѝ ѿ не́гѡ къ семꙋ̀ дѣ́лꙋ приста́вленныи І҆ере́ѷ, ꙗ҆́кѡ ᲃамы́ѧ ра́ди то́чїю ᲃп҃си́телныѧ вины̀ сегѡ̀ жела́ютъ, въ пе́рвый дн҃ь ᲃи́це ѡ҆глаша́етъ и҆́хъ: сі́естъ, поꙋча́етъ ѧ҆̀ Вѣ́ры Хрⷭ҇тїа́нскїѧ, (къ Бг҃ꙋ бо приходѧ́щимъ вѣ́ровати подоба́етъ, беꙁъ Вѣ́ры бо не въꙁмо́жнѡ ᲂу҆годи́ти Б҃) и҆ и҆мена̀ Хрⷭ҇тїа́нскїѧ и҆́мъ пода́стъ.

Прише́дше ᲂу҆́бѡ хотѧ́щїи ѡ҆гласи́тисѧ, и҆ и҆мена̀ Хрⷭ҇тїанскїѧ прїѧ́ти съ въспрїе́мниками: свои́ми къ ᲃт҃лю, и҆ блⷢ҇ве́нїе ѿ не́гѡ вꙁе́мше, и҆дꙋ́тъ къ Це́ркви, и҆ ста́нꙋтъ и҆ꙁъвнѣ̀, пре́дъ Церкѡ́вными две́рми благоговѣ́инѡ съ стра́хомъ Бжїимъ.

А҆́ще же ѡ҆бое́ѧ пло́ти сꙋ́ть, сі́естъ: мꙋ́жїе и҆ же́ны, мꙋ́жїе ѡ҆де́снꙋю стоѧ́тъ, же́ны же ѡ҆шꙋю́ю.

Ст҃ль же вше́дъ въ Це́ркѡвъ, въхо́дитъ въ Ѻ҆́лтаръ, и҆ покланѧ́етсѧ три́жды пре́дъ ᲃт҃о́ю тра́пеꙁою, и҆ ѿкрове́нною гла́вою падъ ницъ на зе́млю, благодаре́нїе въꙁдае́тъ Бг҃ꙋ ѡ҆ ѡ҆браще́нїи и҆́, и҆ моли́тсѧ є҆́же пода́ти и҆ є҆мꙋ̀ само́мꙋ благода́ть въ ѿверꙁе́нїи ᲂу҆́стъ, въ є҆́же мощѝ наꙋчи́ти и҆́хъ и҆́стиннагѡ пꙋ́ти сп҃се́нїѧ, ᲃі́е же съверши́въ въстае́тъ, и҆ на Ма́нтїи вꙁе́млетъ Е҆пітра́хиль и҆ Ѻ҆мофо́ръ, и҆ Ми́трꙋ на гла́вѣ, и҆ же́ꙁлъ въ шꙋ́ици:

А҆́ще же бл҃ве́нїемъ А҆рхїере́ѷскимъ І҆ере́ѷ се́ѧ съверша́етъ, всѧ̀ съверши́въ ꙗ҆́же и҆ А҆рхїере́ѷ, облачи́тсѧ въ Е҆пітра́хиль и҆ Фелѡ́нъ, и҆ покло́нъсѧ ни́ꙁко, лобꙁа́етъ ᲃт҃ꙋ́ю Тра́пеꙁꙋ, и҆ и҆схо́дитъ и҆ꙁъ Ѻ҆́лтарѧ къ Церкѡ́внымъ две́ремъ съ всѣ́мъ Кли́рѡмъ гл҃ѧ̀, и҆лѝ поѧ̀ ѱалѡ́мъ, л҃г.

Блⷭ҇влю̀ Гд҃а на всѧ́кое вре́мѧ: Ве́съ до конца̀.

Прише́дъ же къ две́ремъ Церкѡ́внымъ, внꙋ́тръ Це́ркве. (А҆́ще же Е҆пⷭ҇пъ є҆́сть) сконча́въ ѱалѡ́мъ, сѧ́детъ на пре́дъ ᲂу҆готова́нномъ є҆мꙋ̀ сѣда́лищи, (а҆́ще же І҆ере́ѷ стои́тъ) зрѧ̀ къ за́падѡмъ.

Прише́дшїи же стоѧ́тъ пре́дъ ни́мъ, зрѧ́ще къ Въсто́кѡмъ.

Ст҃ль же, и҆лѝ І҆ере́ѷ, въпраша́етъ и҆́хъ, (А҆́ще мнѡ́ꙁѣ сꙋ́ть, множестве́ннѣ: а҆́ще же є҆ди́нъ, є҆ди́нстве́ннѣ) ᲃи́це глаголѧ̀:

Кто̀ є҆сѝ ты?

Ѻ҆́нъ же Ѿвѣща́етъ:

А҆́ще Жидови́нъ є҆́стъ ᲃи́це:

Человѣ́къ є҆́смь ѿ пꙋ́ти сп҃се́нїѧ заблꙋжде́нный, и҆ невѣ́рїемъ І҆ꙋде́йскимъ злѣ̀ помраче́нный.

А҆́ще же Тꙋ́рчинъ є҆́стъ, ᲃи́це Ѿвѣща́етъ:

Человѣ́къ є҆́смь ѿ пꙋ́ти ᲃпⷭ҇нїѧ заблꙋжде́нный, и҆ зловѣ́рїемъ и҆ нече́стїемъ беꙁбо́жнагѡ Мехме́та злѣ̀ помраче́нный.

А҆́ще же Е҆рети́къ є҆́стъ, ѿ не и҆мꙋ́щихъ и҆́стиннагѡ Креще́нїѧ ѡ҆́браꙁъ, ᲃи́це Ѿвѣща́етъ:

Человѣ́къ є҆́смъ ѿ пꙋ́ти сп҃се́нїѧ заблꙋжде́нный, и҆ злочести́вагѡ А҆́рїѧ: (и҆лѝ и҆́нагѡ є҆́реси нача́лника зде и҆менꙋ́етъ,) є҆́ресїю злѣ̀ помраче́нный.

Ст҃ль въпраша́етъ:

Что̀ прише́лъ є҆сѝ къ ᲃт҃о́й Бж҃їей Це́ркви, и҆ что ѿ неѧ̀ жела́еши?

Ѿвѣща́етъ:

Къ ᲃт҃ой Бж҃їей Це́ркви прїйдо́хъ и҆ Вѣ́ры ѿ не́ѧ наꙋчи́тисѧ, и҆ то́й съ ѡ҆бща́тисѧ жела́ю.

Ст҃ль въпраша́етъ:

Вѣ́ра что̀ тебѣ̀ пода́еть?

Ѿвѣща́етъ:

Живо́тъ вѣ́чный.

Ст҃ль глаголе́тъ:

А҆щѐ хо́щеши и҆мѣ́ти живо́тъ вѣ́чный, съблюдѝ за́повѣди, ꙗ҆́же Гд҃ь Бг҃ъ на́шъ І҆и҃ᲃ Хᲃ҃ заповѣда̀, сі́естъ:

Въꙁлюби́ши Гд҃а Бг҃а твое́гѡ ѿ всегѡ̀ ᲃе́рдца твое́гѡ, и҆ ѿ всеѧ̀ дша̀ твое́ѧ, и҆ ѿ всегѡ̀ помышле́нїѧ твое́гѡ, и҆ бли́жнѧгѡ твое́гѡ ꙗ҆́кѡ са́мъ себѣ̀.

Всі́ю двѣ́ю за́повѣдїю ве́съ За́конъ и҆ Пррⷪ҇ци ви́сѧтъ. Вѣ́ра же Правосла́внѡ Каѳѡли́ческаѧ: (Кро́мѣ є҆ѧ́же никто́же мо́жетъ ᲂу҆годи́ти Б҃, ни́же спⷭ҇ти́сѧ,) є҆́стъ сі́ѧ:

Ꙗ҆́кѡ да Бг҃а є҆ди́нагѡ въ Трⷪ҇ци, и҆ Трⷪ҇цꙋ въ є҆ди́нствѣ и҆сповѣдꙋ́еши и҆ чте́ши: Не слива́ѧ лица̀, ни́же раꙁдѣлѧ́ѧ ᲃꙋщество̀.

И҆́ное бо є҆́стъ лицѐ Ѿчее, и҆́ное Сн҃о́внее, и҆ и҆́ное Дх҃а ᲃт҃го, но Ѿчее, и҆ ᲃн҃о́внее, и҆ Дх҃а ᲃт҃гѡ є҆ди́но є҆́стъ Бжⷭ҇тво̀: Равнохвале́нїе, съ предъвѣ́чное вели́чество.

Ꙗ҆ко́вый є҆́стъ Ѿц҃ъ, тако́вый є҆́стъ ᲃн҃ъ, тако́вый Дхъ ᲃт҃ы́й.

Несъꙁда́нный є҆́стъ Ѿцъ, несъꙁда́нный ᲃн҃ъ, несъꙁда́нный Дх҃ъ ᲃт҃ы́й.

Непостыжи́мый є҆́стъ Ѿцъ, непостыжи́мый ᲃн҃ъ, непостыжи́мый Дх҃ъ ᲃт҃ы́й.

Предвѣ́чный є҆́стъ Ѿцъ, предвѣ́чный ᲃн҃ъ, предвѣ́чный Дх҃ъ ᲃт҃ы́й.

Но ᲂу҆́бѡ не трѝ сꙋ́тъ предвѣ́чныи, но є҆ди́нъ предъвѣ́чный.

Ꙗ҆́кѡ же не трѝ несъꙁда́нныи, ни́же трѝ непостыжи́мыи, но є҆ди́нъ несъꙁда́нный, и҆ єди́нъ непостыжи́мый.

Та́кожде Бг҃ъ є҆́стъ Ѿц҃ъ, Бг҃ъ ᲃн҃ъ, Бг҃ъ Дх҃ъ сты́й:

Но ᲂу҆́бѡ не трѝ сꙋ́ть Бг҃и, но є҆ди́нъ Бг҃ъ. Та́кожде Гд҃ь є҆́стъ Ѿц҃ъ, Гд҃ь ᲃн҃ъ, Гд҃ь Дх҃ъ ᲃты́й.

Но ᲂу҆́бѡ не трѝ сꙋ́ть Гд҃їе, но є҆ди́нъ Гд҃ь.

И҆бо ꙗ҆́кѡже ѡ҆со́бнѣ кое́ждѡ лицѐ Бг҃а и҆ Гд҃а и҆сповѣда́ти Хрⷭ҇тїа́нскаѧ и҆́стинна на́съ ᲂу҆́читъ, и҆ принꙋжда́етъ: ᲃи́це трі́ехъ Бг҃ѡвъ, и҆лѝ Гд҃ей и҆сповѣда́ти, ᲂу҆че́нїе Хрⷭ҇тїа́нское намъ въꙁбранѧ́етъ.

Ѿц҃ъ ни ѿ кое́гѡже не є҆́стъ ᲃъꙁда́нный, ни́же сътворе́нный, ни́же рожде́нный.

Сн҃ъ ѿ Ѿца̀ є҆ди́нагѡ є҆́стъ несътворе́нный, ни́же съꙁда́нный, но рожде́нный.

Дх҃ъ ᲃт҃ы́й ѿ Ѿца̀ є҆́стъ несътворе́нный, ни съꙁда́нный, ни́же рожде́нный, но и҆сходѧ́щїй.

Е҆ди́нъ ᲂу҆́бѡ є҆́стъ Ѿц҃ъ: не трѝ Ѿц҃ѝ.

Е҆ди́нъ ᲃн҃ъ, не трѝ Сн҃ѡ́ве.

Е҆ди́нъ Дх҃ъ ᲃт҃ы́й, не трѝ Дх҃ве ᲃт҃ы́и.

И҆ все́й Трⷪ҇ци, не є҆́стъ ничто́же первѣ́йшїе, ни́же послѣднѣ́йшее, ни́же бо́лшее, ни ме́ншее, но цѣ́лы и҆ трѝ лица̀, съ предвѣ́чны себѣ̀ ᲃꙋ́тъ, и҆ съра́вны.

Си́це ᲂу҆́бѡ въ все́мъ ꙗ҆́кѡже предрече́сѧ, є҆динство̀ въ Трⷪ҇ци, Трⷪ҇ца же въ є҆динствѣ̀ почита́на бы́ти и҆́матъ.

И҆́же хо́щетъ ᲃпⷭ҇ти́сѧ си́це ѡ҆ Трⷪ҇ци ᲃт҃ой раꙁꙋмѣ́ти до́лженъ є҆́стъ. Но ᲂу҆́бѡ потре́бнѡ є҆́стъ къ вѣ́чномꙋ животꙋ̀, ꙗ҆́кѡ да и҆ Въплоще́нїе Гд҃а на́шегѡ І҆и҃ᲃ Хрⷭ҇та̀ и҆́стиннѡ вѣ́рꙋеши. Е҆́стъ ᲂу҆́бѡ Вѣ́ра и҆́стинна, ꙗ҆́кѡ да вѣ́рꙋеши и҆ и҆сповѣдꙋ́еши, ꙗ҆́кѡ на́шъ Гд҃ь І҆и҃ᲃ Хᲃ҃, Бг҃ъ и҆ человѣ́къ є҆́стъ:

Бг҃ъ є҆́стъ ѿ сꙋщества̀ Ѿча̀ пре́дъ вѣ́ки рожде́нный:

И҆ человѣ́къ є҆́стъ ѿ сꙋщества̀ Ма́тернѧ на послѣ́докъ вѣ́кѡвъ рожде́нный. Съверше́нный є҆́стъ Бг҃ъ, и҆ съверше́нный человѣ́къ, ѿ дш҃ѝ раꙁꙋ́мнои, и҆ ѿ чл҃ческагѡ тѣ́ла сы́й. Ра́вный є҆́стъ Ѿцꙋ̀ по Бжⷭ҇твѣ̀, ме́ншїй Ѿца̀ по человѣ́чествѣ. Но а҆́ще и҆ Бг҃ъ є҆́стъ и҆ человѣ́къ, не два̀ ᲂу҆бѡ, но є҆ди́нъ є҆́стъ Хᲃ҃.

Е҆ди́нъ ᲂу҆́бѡ не премѣне́нїемъ Бжⷭ҇тва̀ въ тѣ́ло, но въспрїѧ́тїемъ члчⷭ҇тва въ Бг҃а.

Е҆ди́нъ ᲂу҆́бѡ въи́стиннꙋ, не смѣше́нїемъ сꙋщества̀, но є҆ди́нствомъ ли́ца.

И҆́бѡ ꙗ҆́кѡже дш҃а̀ раꙁꙋ́мнаѧ, и҆ тѣ́ло, є҆ди́нъ є҆́стъ человѣ́къ: ᲃи́це Бг҃ъ и҆ человѣ́къ, є҆ди́нъ є҆́стъ Хᲃ҃, пострада́вый ᲃпⷭ҇нїѧ на́шегѡ ра́ди. Съше́дый въ А҆́дъ, тридне́вно и҆ꙁъ ме́ртвыхъ Воскресы́й.

Въꙁоше́дый на нб҃са, и҆ ᲃѣды́й ѡ҆де́снꙋю Ѿца̀ Вседержи́телѧ, и҆ ѿѡ҆ню́дꙋ прїйтѝ и҆́матъ ᲃꙋди́ти живы́мъ и҆ ме́ртвымъ: въ є҆гѡ́же прише́ствїи всѝ Въскре́снꙋтъ съ тѣлесы̀ свои́ми, и҆ въꙁда́ти и҆мꙋ́тъ ѿвѣ́тъ ѡ҆ дѣ́лехъ свои́хъ. И҆ сътво́ршїи блага́ѧ по́йдꙋтъ въ живо́тъ вѣ́чный, зла́ѧ же съдѣла́вшїи, по́йдꙋтъ въ ѻ҆́гнь вѣ́чный. Сі́ѧ ᲂу҆́бѡ є҆стъ Вѣ́ра є҆́динои ᲃт҃о́и Събѡ́рнои А҆пⷭ҇тлской Це́ркви, ю҆́же а҆́ще кто̀ вѣ́рнѡ и҆ крѣ́пкѡ съдержа́ти не бꙋ́детъ, сп҃сенъ бы́ти не мо́жетъ.

Ст҃ль же сконча́въ ᲃі́е ѡ҆глаше́нїе, па́ки глаголе́тъ къ не́мꙋ:

Сі́ѧ є҆́стъ ᲃт҃а́ѧ непоро́чнаѧ и҆ сп҃си́телнаѧ Вѣ́ра Хрⷭ҇тїа́нскаѧ, ю҆́же є҆дина̀ ᲃт҃а́ѧ събо́рнаѧ А҆по́столскаѧ Це́ркѡ́въ съдержи́тъ:

Сі́ю проповѣда́ша Бжⷭ҇тве́ннїи А҆по́столи, и҆ всѧ̀ ꙗ҆́ꙁы́ки ᲃи́це вѣ́ровати наꙋчи́ша:

Сі́ю и҆сповѣда́ша ᲃт҃і́и Мч҃ници, и҆ кро́вїю свое́ю запечатлѣ́ша:

Сі́ю и҆ Богоно́снїи Ѿцѝ, на ᲃт҃ы́хъ ᲃедмѝ Вселе́нскихъ и҆ Помѣ́стныхъ Събѡ́рѣхъ въꙁвѣсти́ша, и҆ ᲂу҆тверди́ша:

Сі́ю и҆́стиннѡ Правосла́внꙋю Вѣ́рꙋ, и҆́же а҆́ще крѣ́пкѡ и҆ несꙋмѣ́ннѡ да́же до кончины̀ живота̀ свое́гѡ, съдержи́тъ, ᲂу҆кланѧ́ѧсѧ и҆ ѡ҆грѣба́ѧ, ѿ всѧ́кихъ злы́хъ дѣ́лъ, благо́е же творѧ̀ на всѧ́кое вре́мѧ ᲃп҃сетсѧ, и҆ Ца́рствїѧ нбⷭ҇нагѡ наслѣ́дникъ бꙋ́детъ.

Не довлѣ́етъ бо христїани́нꙋ, Вѣ́рꙋ пра́вꙋю то́чїю кро́мѣ до́брыхъ дѣ́лъ и҆мѣ́ти: и҆́бѡ вѣ́ра беꙁъ до́брыхъ дѣ́лъ ме́ртва є҆́сть, ꙗ҆́кѡже и҆ дѣ́ла до́браѧ беꙁъ пра́выѧ вѣ́ры, ме́ртва сꙋть, и҆ ничто́же полꙁꙋ́итъ, всѐ є҆́же не ѿ вѣ́ры є҆́стъ, грѣ́хъ є҆́стъ: но подоба́етъ пра́вѣ вѣ́рꙋющомꙋ, всегда̀ ᲂу҆клони́тисѧ ѿ всѧ́кагѡ зла, и҆ твори́ти благо́е.

Тѣ́мъ же ᲂу҆́бѡ и҆ ты̀, поне́же правовѣ́рный Хрⷭ҇тїѧни́нъ хощеши бы́ти, и҆ живо́тъ вѣ́чный наслѣди́ти, ᲃи́це ꙗ҆́кѡже предложи́хѡмъ тебѣ̀, вѣ́ровати до́лженъ єсѝ, и҆ всѧ̀ зла́ѧ дѣ́ла ѿ себѣ̀ ѿметнꙋ́ти, и҆ ѿ тѣ́хъ ꙗ҆́кѡже ѿ дꙋ́шꙋ гꙋбѧ́щихъ ѿбѣга́ти, и҆ всегда̀ ѡ҆грѣба́тисѧ.

Ко́ренїѧ же всѣ́хъ злы́хъ дѣ́лъ сі́ѧ сꙋ́тъ, го́рдость: лихоима́нїе, сі́естъ, ла́комствѡ: нечистота̀ всѧ́каѧ тѣле́снаѧ: за́висть: ѡ҆бѧде́нїе, и҆ пїѧ́нствѡ: гнѣ́въ: и҆ лѣ́ность къ хва́лѣ Бж҃їей и҆ къ всѧ́комꙋ благо́мꙋ дѣ́лꙋ.

Сі́ѧ ᲂу҆́бѡ творѧ́щїи Ца́рствїѧ нбⷭ҇нагѡ наследи́ти не могꙋ́тъ.

Ты́ же а҆́ще Ца́рствїѧ нбⷭ҇нагѡ наслѣ́дникъ бы́ти хо́щеши, сі́ѧ грѣхѝ, си́ми добродѣ́телъми побѣжда́й и҆ ѿ себѣ̀ и҆скоренѧ́й, ᲃмире́нїемъ го́рдость: щедро́тствомъ и҆ ми́лостынею, лихои́мствѡ: чистото́ю, нечистотꙋ̀: любо́вїю и҆ млⷭ҇рдїемъ, за́висть: по́стомъ же, и҆ мѣ́рнымъ ꙗ҆де́нїемъ и҆ пи́тїемъ, ѡ҆бѧде́нїе и҆ пїѧ́нствѡ: тщали́вымъ набоже́нствомъ, и҆ бо́дрыми Моли́твами и҆ всѧ́кимъ благоче́стїемъ, лѣ́ность.

Сі́ѧ ᲂу҆́бѡ грѣховныѧ ко́рени ᲃи́це побѣди́въ, ѿ всѣ́хъ вѣ́твїй и҆́хъ ᲂу҆до́бнѡ ѡ҆грѣба́тисѧ въꙁмо́жеши.

Сконча́въ же ᲃі́е Ст҃ль, и҆лѝ І҆ере́ѷ, въпраша́етъ є҆гѡ̀ ᲃи́це:

Хо́щеши ли ᲃі́ю ᲃт҃ꙋ́ю непоро́чнꙋю Хрⷭ҇тїа́нскꙋю Вѣрꙋ, и҆́стиннѡ ѿ ᲃе́рдца прїѧ́ти, и҆ вс́ѧ ᲂу҆чи́тисѧ, и҆ неѿстꙋ́пнѡ ᲃі́ю да́же до кончины̀ живота̀ твое́гѡ сдержа́ти, и҆ въ всѣ́хъ христїа́нскихъ добродѣ́телехъ ѡ҆бꙋча́тисѧ, и҆ въ ни́хъ до ᲃме́рти пребыва́ти?

Ѻ҆́нъ же ѿвѣща́етъ:

И҆́стиннѡ ѿ всегѡ̀ ᲃе́рдца мое́гѡ, въ Вѣ́рѣ ᲃе́й ᲃто́й, и҆ въ добродеѣ́телехъ христїа́нскихъ ѡ҆бꙋча́тисѧ, и҆ въ ни́хъ ѡ҆бо́ихъ да́же до сме́рти благода́тїю Бжїею прибы́ти хощꙋ̀, и҆ ѡ҆бѣща́юсѧ.

Ст҃ль гл҃етъ къ не́мꙋ:

Преклонѝ колѣ́ни твоѝ пре́дъ Гд҃емъ Бо́гомъ на́шимъ.

Ѽнъ же а҆́бїе колѣ́нѣ прекло́нь пре́дъ Церко́вными две́рми, рꙋ́цѣ къ пе́рсемъ Крестаѡ́браꙁнѡ ᲃло́жени и҆мѣ́ѧ ᲃтои́т: Ст҃ль же знамена́етъ гла́вꙋ є҆гѡ̀ десни́цею три́жды, гл҃ѧ̀:

Въ и҆мѧ̀ Ѿца̀, и҆ Сн҃а, и҆ Ст҃гѡ Дх҃а.

Кли́ръ:

А҆ми́нь.

И҆ а҆́бїе глаголе́тъ Моли́твꙋ ᲃі́ю, въ не́й же и҆ И҆мѧ̀ є҆мꙋ̀ нарица́етъ, въ и҆мѧ̀ ᲃт҃гѡ є҆гѡ́же па́мѧтъ прилꙋчи́тисѧ и҆́матъ посе́мъ, въ ѡ҆́смый де́нь.

Дїа́конꙋ ре́кшꙋ:

Гд҃ꙋ помоли́мсѧ.

и Кли́ръ:

Гд҃и поми́лꙋй.

Ст҃ль чтетъ, стоѧ̀ надъ ни́мъ Моли́твꙋ пе́рвагѡ ѡ҆глаше́нїѧ.

Блⷭ҇ве́нъ є҆сѝ Гд҃и Бж҃е, Ѿче Гд҃а нашегѡ І҆и҃ᲃ Ха҃, ѿ всѣ́хъ ꙗ҆ꙁы́къ и҆ꙁбира́ѧй ᲃебѣ̀ лю́ди и҆ꙁрѧ́дны, ревни́телѧ до́брыхъ дѣ́лъ: Ты нн҃ѣ и҆ сегѡ̀ прише́дшагѡ къ ᲃт҃ѣ́й твое́й Це́ркви раба̀ твое́гѡ И҆мⷬ҇къ: блⷭ҇вѝ и҆ ѿверꙁѝ є҆мꙋ̀ ѡ҆́цѣ ᲂу҆́мныи ᲃе́рдца, къ ди́вныхъ твои́хъ чꙋде́съ раꙁꙋмѣ́нїю: ѿверꙁѝ ємꙋ̀ ᲂу҆́ши, въ ᲂу҆слыша́нїе твои́хъ Бжⷭ҇тве́нныхъ ᲃлове́съ, и҆ причтѝ є҆гѡ̀ ѡ҆глаше́ннымъ лю́демъ твои́мъ, ꙗ҆́кѡ да въ вре́мѧ благопрїѧ́тнѡ сподоби́тсѧ ба́нѣ порожде́нїѧ, и҆ ѡ҆де́ждѣ нетлѣ́нїѧ.

И҆ а҆́бїе же знамена́етъ па́ки гла́вꙋ є҆гѡ̀ три́жди, гл҃ѧ̀.

Въ и҆мѧ̀ Ѿца̀, и҆ Сн҃а, и҆ ᲃт҃агѡ Дх҃а.

Кли́р:

А҆ми́нь.

И҆ въꙁглаша́етъ ᲃт҃ль гл҃ѧ:

Напи́санѡ да бꙋ́детъ и҆мѧ̀ є҆гѡ̀ въ ѡ҆глашенныхъ.

И҆ па́ки моли́тсѧ надъ ни́мъ Моли́твою сею̀.

Ты Влады́кѡ Бо́же Ѿче, ᲃпⷭ҇нїе посла́лъ є҆сѝ мі́рови ᲃт҃о́е твоѐ ᲃло́во, да и҆сполни́тъ всѧ̀ Богораꙁꙋ́мїѧ твое́гѡ: Ты и҆ꙁъѧ́лъ є҆сѝ дꙋ́шꙋ раба̀ твое́гѡ ѿ лꙋка́вагѡ, ты и҆ просветѝ ю҆́, и҆ наста́ви на ѡ҆сщ҃е́нїе Ха҃ твое́гѡ: и҆ да не попꙋсти́ши дꙋ́хови ни є҆дино́мꙋ лꙋка́вомꙋ, въмѣсти́лище є҆щѐ и҆мѣ́ти въ не́мъ. Ты́ бо є҆сѝ є҆ди́нъ и҆ꙁбави́тель рѡ́да на́шегѡ, и҆ тебѣ̀ ᲃла́вꙋ и҆ благодаре́нїе принѡ́симъ, съ є҆диноро́днымъ ти Сн҃омъ, и҆ съ Прⷭ҇ты́мъ благи́мъ и҆ животворѧ́щимъ ти Дх҃омъ, нн҃ѣ и҆ при́снѡ, и҆ въ вѣ́ки вѣкѡ́въ.

Кли́ръ:

А҆ми́нь.

А҆бїе же Ст҃ль врꙋча́етъ є҆гѡ̀ и҆скꙋ́сномꙋ ᲃщ҃ен́нникꙋ, ᲂу҆мѣ́ющꙋ до́брѣ Бжⷭ҇тве́ннаѧ писанїѧ, и҆ то́щнѡ повелѣва́етъ є҆мꙋ̀, ꙗ҆́кѡ да наꙋ́читъ є҆гѡ̀ ᲃщ҃е́нныѧ Вѣ́ры, и҆́ꙁъѡ҆браженїе, сі́естъ:

Вѣ́рꙋю въ є҆ди́нагѡ Бг҃а, и҆ Моли́твы Гд҃неѧ сі́е є҆́сть:

Ѿче на́шъ: и҆ Ѱа́лмѡвъ, и҆ и҆́ныхъ христїѧ́нскихъ Моли́твъ, къ Бг҃ꙋ, и҆ къ ᲃт҃ымъ є҆гѡ̀, и҆ꙁрѧ́днѣе же къ Прⷭ҇т: Бц҃и, и҆ жи́тїю добродѣ́телномꙋ.

Сщ҃е́нникъ же тогѡ̀ прїимъ, ᲃн҃а дх҃о́внагѡ нарица́етъ є҆гѡ̀ себѣ̀, и҆ тетырдесѧ́тъ дне́й въ по́стѣ и҆ моли́твахъ пребыва́ющꙋ є҆мꙋ̀ и҆ къ Церкѡ́внымъ пѣ́нїѧмъ но́щнымъ и҆ дне́внымъ къ нача́лꙋ приходѧ́щꙋ, и҆ да́же до съверше́нїѧ, съ всѧ́кимъ внима́нїемъ, въ съкрꙋше́нїи ᲃе́рдца, ѡ҆ пре́жде съдѣѧ́нныхъ и҆́мъ съгрѣше́нїй проще́нїѧ съ ᲃлеꙁа́ми мл҃ѧ́сѧ, є҆́же ᲃподоби́тисѧ ᲃт҃ы́мъ Креще́нїемъ прїѧ́ти, съ всѧ́кимъ благоговѣ́нїемъ ᲃтоѧ́щꙋ пре́дъ Церкѡ́вными две́рми, сіе́стъ: въ Па́перти Церко́вномъ, зѣ́лнымъ тща́нїемъ поꙋча́етъ є҆гѡ̀ на всѧ́къ дн҃е, ка́кѡ ѡ҆ Бг҃ꙋ є҆ди́номъ въ Трⷪ҇ци ᲃлави́момъ вѣ́ровати, ѡ҆ раꙁдѣле́нїихъ Трⷪ҇чныхъ Ли́цъ, и҆ ѡ҆ є҆дине́нїи и҆ нераꙁдѣле́нїи є҆ди́нагѡ ᲃꙋщества̀ и҆ бжⷭ҇тва̀ Ѿца̀, и҆ Сн҃а, и҆ ᲃт҃гѡ Дх҃а: и҆ ѡ҆ Воплоще́нїи є҆ди́нагѡ ѿ Трⷪ҇ца Сн҃а Бж҃їѧ: и҆ ѡ҆ все́мъ є҆же на землѝ ᲃмотре́нїи є҆гѡ̀: ѡ҆ вто́ромъ є҆гѡ̀ Прише́ствїи ѡ҆ Въскресе́нїи всѣ́хъ ме́ртвыхъ. Ꙍ҆ ᲃꙋ́дѣ Стра́шномъ, ѡ҆ мꙁдѣ̀. Пра́ведникъ въ Ца́рствїи нбⷭ҇номъ, ие ѡ҆ мꙋ́цѣ грѣ́шныхъ въ гее́ннѣ ѡ҆́гненной, ꙗ҆́кѡ же въкра́тцѣ въ нача́лѣ ѿ и҆сповѣда́нїѧ Вѣ́ры ᲃт҃гѡ А҆ѳана́сїѧ Вели́кагѡ предложи́сѧ. къ си́мъ же поꙋча́етъ є҆гѡ̀ ѡ҆ дша́хъ Пра́вѣдныхъ и҆ грѣ́шныхъ гдѐ нн҃ѣ беꙁъ тѣ́ла, въскресе́нїѧ тѣ́лъ, и҆ ᲃꙋ́да ѡ҆жида́ют. Ꙍ҆ по́лꙁѣ Та́йны Креще́нїѧ, и҆ ᲃт҃гѡ Мѵрꙍпомаꙁа́нїѧ, и҆ Та́йны ᲃт҃гѡ Тѣ́ла и҆ Крвѐ Гд҃неи, и҆́мъ же причасти́тисѧ и҆́мать: и҆ ѡ҆ про́чїихъ четы́рехъ Та́йнахъ, та́кожде наꙋча́етъ є҆гѡ̀ въкра́тцѣ, въ каковꙋ̀ по́лꙁѣ преда́ны ᲃꙋ́ть ѿ Ха҃ ᲃп҃са вѣ́рнымъ є҆гѡ̀ люде́мъ. Та́кожде поꙋча́етъ є҆гѡ̀ ка́кѡ люби́ти Гд҃а Бг҃а ѿ всегѡ̀ ᲃе́рдца, и҆ ѿ всеѧ̀ дш҃а̀, и҆ ѿ всегѡ̀ помышле́нїѧ, и҆ бли́жнѧгѡ свое́гѡ ꙗ҆́кѡ сама́гѡ себѣ̀.

Ка́кѡ же за́повѣди Бж҃їѧ и҆сполни́ти: ка́кѡ грѣхѡівъ ѡ҆грѣба́тисѧ, и҆ добродѣ́телнѡ жи́ти: ка́кѡ всегда̀ на сме́рть памѧтствова́ти: на ᲃтра́шный сꙋ́дъ Бж҃їй: на мꙋ́ки вѣ́чныѧ, и҆ на живо́тъ вѣ́чный въ Ца́рствїи Нбⷭ҇номъ. Четырдесѧ́тъ дні́й же по́ститсѧ по си́лѣ не ꙗ҆ды́й мѧ́са, ни ма́сла, ни сы́ра, ни ꙗ҆́йца, а҆́ще же въꙁмо́жнѡ є҆ди́ною дне́мъ то́чїю, кро́мѣ Сꙋббꙍ́тъ и҆ Недѣ́ль. Покло́нѡвъ же тво́ритъ по си́лѣ на всѧ́къ дн҃ь є҆ли́кѡ мо́щнѡ. І҆и҃совыхъ же Моли́твъ, т҃, сі́естъ, гл҃ѧ̀:

Гд҃и І҆и҃се Хє҃ Сн҃е Бж҃їй поми́лꙋй мѧ̀ грѣ́шнагѡ.

Четве́ртое же сто̀ Бц҃и, сі́естъ, глаголѧ̀.

Ра́дꙋйсѧ ѡ҆радова́ннаѧ Мр҃їе Гь҃ съ тобо́ю.

И҆лѝ, Прⷭ҇та́ѧ Бц҃е, молѝ Бг҃а ѡ҆ мнѣ̀ грѣ́шномъ.

Ча́сто же и҆ ѡ҆па́снѡ и҆спыта́етъ є҆гѡ̀, и҆ и҆ꙁвѣ́стнѡ и҆скꙋша́етъ, а҆́ще и҆́стиннѡ, а҆ не ле́стнѡ къ Вѣ́рѣ ᲃт҃о́й прихо́дитъ. И҆ꙁвѣ́стнѡ же ѡ҆ се́мъ и҆ до́брѣ и҆стѧꙁа́нъ, и҆ и҆скꙋше́нъ, и҆ Вѣ́рѣ ᲃт҃о́й.

Моли́твамъ же и҆ всемꙋ̀ Хрⷭ҇тїа́нскомꙋ благоче́стїю наꙋче́нъ все́й, ᲃи́це ѡ҆глаша́етсѧ.

Пре́жде сконча́нїѧ дні́й, м҃, ᲃедми́цею є҆ди́ною, пре́дъ Вече́рнею, и҆лѝ по Вече́рни:

А҆́ще Ст҃ль ᲃі́е ᲃъверша́етъ, на Ма́нтїи вꙁе́млетъ Е҆пітра́хиль и҆ Ѽмо́фꙍръ, и҆ Ми́трꙋ на гла́вѣ, въ шꙋи́ци же же́ꙁлъ. (А҆́ще же І҆ере́ѷ облачи́тсѧ въ Е҆пітра́хиль и҆ Фелꙍ́нъ) и҆ покло́нъсѧ, гⷤ, пре́дъ ᲃт҃о́ю Тра́пеꙁою, и҆ ᲃі́ю лобꙁа́въ и҆схо́дитъ и҆ꙁ Ѻ҆лтарѧ гл҃ѧ̀, и҆лѝ поѧ̀ съ всѣмъ Кли́ромъ Ѱало́мъ, и҃.

Гд҃и Гд҃ь на́шъ ко́ль чꙋ́днѡ И҆мѧ̀ твоѐ по все́й землѝ: Ве́съ до конца̀.

Прише́дъ же къ две́ремъ Це́рковнымъ, а҆́ще Е҆пⷭ҇пъ є҆́стъ ᲃконча́въ Ѱало́мъ, ᲃѧ́детъ на пре́дъ ᲂу҆готова́нномъ ᲃвое́мъ ᲃѣда́лищи въ Церко́вныхъ две́рехъ, (а҆́ще І҆ере́ѷ є҆́стъ стои́тъ.) зрѧ къ за́падѡмъ: ѡ҆глаше́нный же, а҆́ще є҆ди́нъ, и҆ли мнѡ́ꙁи сꙋ́тъ, стоѧ́тъ пре́дъ ни́мъ въ Па́перти зрѧ́ще къ Въсто́кѡмъ. Ст҃ль же и҆лѝ І҆ере́ѷ, глаголе́тъ къ не́мꙋ.

Се ча́дѡ днѝ и҆скꙋ́са, ѡ҆бꙋче́нїѧ же и҆ ѡ҆глаше́нїѧ твое́гѡ съкраща́ютсѧ, и҆ къ концꙋ̀ приближа́ютсѧ: тѣ́мъ же не то́чїю ѡ҆со́бнѣ поꙋча́ти и҆ и҆пыта́ти тѧ̀ досто́итъ, а҆́ще въ и҆́стиннꙋ ѿ самы́ѧ любвѐ къ Гд҃ꙋ нашемꙋ І҆и҃ᲃ Х҃ прихо́диши, и҆ ᲃпⷭ҇нїѧ ра́ди твое́ѧ Дш҃а̀, и҆ и҆́стиннѡ а҆ не ле́стїю, Правосла́вный Хрⷭ҇тїани́нъ бы́ти хо́щеши: но и҆ пре́дъ всею̀ Це́рквїю до́лженъ є҆сѝ пе́рвагѡ нече́стїѧ, въ не́мъ же бы́лъ є҆сѝ ѿрещи́сѧ, и҆ проклѧ́ти є҆̀. Вѣ́рꙋ же Правосла́внꙋю ꙗ҆́снѡ и҆сповѣ́сти: а҆́ще ᲂу҆́бо къ семꙋ̀ си́це гото́въ є҆сѝ, къ всѧ́комꙋ мое́мꙋ въпроше́нїю, беꙁъ всѧ́кагѡ лицемѣ́рїѧ пре́дъ Гд҃емъ Бо́гомъ ᲃтоѧ̀ ѿвѣща́й.

Сі́ѧ же и҆ꙁре́къ Ст҃итель, а҆́ще Жидови́нъ є҆́стъ ѡ҆глаше́нный ᲃи́це въпроша́етъ є҆гѡ̀.

По вопро́сѡмъ, и҆ ѿвѣ́тѡмъ.

Въ пе́рвыхъ ᲂу҆́бѡ въпроша́ю тѧ, а҆́ще ѿрица́ешисѧ всегѡ̀ нечести́вагѡ невѣ́рїѧ І҆оѵде́йскагѡ, и҆ всѣ́хъ забобо́нѡвъ и҆ ба́сней Жидо́вскихъ, и҆ всѣ́хъ Богобо́рныхъ и҆́хъ ꙗ҆́же на Гд҃а Бг҃а, и҆ Сп҃са на́шегѡ І҆и҃ᲃ Ха҃ и҆́стиннагѡ Сн҃а Бж҃їѧ, на Пречⷭ҇тꙋю є҆гѡ̀ Мт҃ръ, и҆ на всѧ̀ ᲃт҃ы́ѧ є҆гѡ̀, и҆ на всѧ̀ Хрⷭ҇тїа́ны хꙋле́нїй и҆ проклина́нїй и҆ напаствова́нїй, ꙗ҆́кѡ Богопроти́вныхъ и҆ дш҃егꙋ́бныхъ, и҆ проклина́еши ли ѧ҆̀?

Ѿвѣща́етъ:

Ѿтрица́юсѧ всегѡ̀ нечести́вагѡ невѣ́рїѧ І҆оѵде́йскагѡ, и҆ всѣ́хъ ба́сней и҆ забобо́нѡвъ, хꙋле́нїй же, проклина́нїй и҆ напаствова́нїй и҆́хъ, ꙗ҆́же на Ха҃ Гд҃а, и҆́стиннагѡ Сн҃а Бж҃їѧ, на Пречⷭ҇тꙋю є҆гѡ̀ Мт҃ръ, и҆ на всѧ̀ ᲃт҃ы́ѧ є҆гѡ̀, и҆ на всѧ̀ Хрⷭ҇тїа́ны, и҆ ꙗ҆́кѡ Богопроти́вна и҆ дш҃егꙋ́бна сꙋ́ща, проклина́ю ѧ҆̀.

Ст҃ль въпроша́етъ:

Ѿрица́ешилисѧ ѡ҆брѣꙁа́нїѧ, сꙋббꙍ́тства, ѡ҆при́снокѡвъ, и҆ всѣ́хъ Пра́ꙁдникѡвъ І҆оѵде́йскихъ, всѣ́хъ же ѡ҆мове́нїй, ꙗ҆де́нїй же и҆ пи́тїй, и҆ всѣ́хъ ѡ҆брѧ́дѡвъ ве́тхагѡ завѣ́та, ꙗ҆́кѡ ᲂу҆жѐ мимѡше́дшихъ и҆ непо́леꙁныхъ: къ си́мъ же и҆ всѣ́хъ Богоме́рꙁскихъ ᲃта́рческихъ преда́нїй, и҆ ꙗ҆́кѡ Богопроти́вныхъ проклина́еши ли ѧ҆̀?

Ѿвѣща́етъ:

Ѿтрица́юсѧ ᲃи́хъ всѣ́хъ, зако́нныхъ, ᲂу҆́бѡ, ꙗ҆́кѡ ᲂу҆жѐ мимоше́дшихъ: Ста́рческихъ же преда́нїй ꙗ҆́кѡ Богопроти́вныхъ и҆ ме́рꙁскихъ сꙋ́шыхъ, и҆ проклина́ю ѧ҆̀.

Ст҃ль въпроша́етъ:

Ѿрица́ешилисѧ всегѡ̀ Богопроти́внагѡ ᲂу҆че́нїѧ, проклѧ́тыхъ Кни́гъ нарица́емыхъ Талмꙋ́дъ, ꙗ҆́же бѣсѡ́вскимъ дхнове́нїемъ христоненави́стнїи І҆ᲂуде́йстїи Раби́нѡве и҆ꙁложи́ша: къ си́мъ же, и҆ всѣ́хъ Богохꙋ́лныхъ ꙗ҆́же на Бжⷭ҇тве́нное писа́нїе и҆́хъ дре́внихъ толкова́нїй, ᲂу҆че́нїй же и҆ ба́снїй, и҆ нн҃ѣшнихъ ꙗ҆́же на Гд҃а нашегѡ І҆и҃ᲃ Ха҃, и҆ всѣ́хъ Ст҃ыхъ є҆гѡ̀, и҆ на всѧ̀ христїа́ны хꙋ́лнѡ слага́ютъ, пи́шꙋтъ и҆ ᲂу҆́чатъ, ѿмѣта́еши, и҆ проклина́еши ли ѧ҆̀?

Ѿвѣща́етъ:

Ѿрица́юсѧ всѣ́хъ Богохꙋ́лныхъ Жидо́вскихъ писа́нїй и҆ ᲂу҆́ченїй и҆ проклѧ́тыхъ Кни́гъ и҆́хъ Талмꙋ́дъ нарица́емыхъ, и҆ ѿмѣта́ю и҆ проклина́ю ѧ҆̀.

Свѧти́тель глаголе́тъ:

Ѿрица́ешилисѧ всегѡ̀ Богобо́рнагѡ І҆оѵде́йскагѡ Събѡ́рища, и҆ всѣ́хъ Богоме́рꙁскихъ по́стѡвъ и҆́хъ и҆ моли́твъ, и҆ всегѡ̀ є҆́же съ тѣ́ми дрꙋ́жества и҆ съѡбще́нїѧ, и҆ про́стѣ всѧ́кагѡ І҆оѵде́йскагѡ ѡ҆бы́чаѧ и҆ начина́нїѧ, и҆ ꙗ҆́кѡ Богопроти́вна сꙋ́ща и҆́стиннѡ ѿме́щеши, и҆ проклинаеши ли ѧ҆̀?

Ѿвѣща́етъ:

Ѿрица́юсѧ ᲃихъ всѣ́хъ, и҆ и҆́стиннѡ ѡ всегѡ̀ ᲃе́рдца ѿмещꙋ̀, и҆ проклина́ю ѧ҆̀.

Ст҃ль въпроша́етъ:

Ѿрица́ешилисѧ ѿ І҆оѵде́й ча́емагѡ по дѣ́йствꙋ дїа́волю грѧдꙋ́щагѡ ло́жнагѡ Ме́ссїи, сі́естъ, А҆нті́хрїста, нарече́ннагѡ Прⷪ҇ро́комъ Данїи́ломъ ме́рꙁость запꙋстѣ́нїѧ, и҆ проклина́еши ли є҆гѡ̀, и҆ всѣ́хъ ча́ющихъ поги́белный приход є҆гѡ̀?

Ѿвѣща́етъ:

Ѿрица́юсѧ тогѡ̀ ᲃама́гѡ ѿ І҆оѵде́й ча́емагѡ А҆нті́хрїста, и҆ проклина́ю є҆гѡ̀, и҆ всѣ́хъ ча́ющихъ поги́белный прихо́дъ є҆гѡ̀.

Ст҃и́телъ въпроша́етъ:

Ѿре́късѧ є҆сѝ Богобо́рнагѡ невѣ́рїѧ І҆оѵдейскагѡ, всѣ́хъ хꙋленїй, ѡ҆бы́чаевъ, и҆ Богоме́рꙁскихъ ба́снїй ихъ, всегѡ̀ ло́жнагѡ и҆́хъ ᲂу́че́нїѧ, и҆ плюе́ши ли на́нѧ?

Ѿвѣща́етъ:

Ѿтреко́хъсѧ всегѡ̀ Богобо́рнагѡ І҆оѵде́йскагѡ невѣ́рїѧ, всѣ́хъ хꙋле́нї, ѡ҆бы́чаевъ, ба́снїй, и҆ всегѡ̀ Богоме́рꙁскагѡ ло́жнагѡ и҆́хъ ᲂу҆че́нїѧ, и҆ плю́ю на́нѧ.

Свѧти́тель въпроша́етъ:

Съчетава́ешилисѧ и҆́стиннѡ кро́мѣ всѧ́кагѡ ᲂу҆сꙋмнѣ́нїѧ и҆ лицемѣ́рїѧ, ѿ всеѧ̀ дш҃а̀ твое́ѧ, и҆ ѿ всегѡ̀ ᲃе́рдца твое́гѡ, єдино́мꙋ и҆́стиннѡ Гд҃ꙋ и҆ Бг҃ꙋ на́шемꙋ І҆и҃ᲃ Х҃, и҆ вѣ́рꙋеши ли въ не́гѡ, ꙗ҆́кѡ въи́стиннꙋ ᲃꙋ́щагѡ Сн҃а Бг҃а жива́гѡ?

Ѿвѣща́етъ:

Съчетава́юсѧ и҆́стиннѡ кро́мѣ всѧ́кагѡ ᲂу҆сꙋмнѣ́нїѧ, и҆ лицемѣ́рїѧ, ѿ всегѡ̀ ᲃе́рдца и҆ всеѧ̀ дш҃а̀ мое́ѧ, є҆ди́номꙋ и҆́стинномꙋ Гд҃ꙋ и҆ Бг҃ꙋ І҆и҃ᲃ Х҃, и҆ вѣ́рꙋю въ не́гѡ, ꙗ҆́кѡ въи́стиннꙋ ᲃꙋ́щагѡ Сн҃а Бг҃а жи́вагѡ.

Сі́естъ Тꙋре́цкагѡ зловѣ́рнагѡ нече́стїѧ, по Въпро́сѡмъ и҆ Ѿтвѣ́тѡмъ.

Свѧти́тель въпроша́етъ, глаголѧ̀:

Въ пе́рвыхъ въпраша́ю тѧ̀ а҆́ще ѿрица́ешисѧ всеѧ̀ Богопроти́вныѧ Тꙋре́цкїѧ вѣ́ры и҆ всегѡ̀ и҆́хъ ᲃкве́рнагѡ мꙋдрова́нїѧ, и҆ а҆́ще проклина́еши ли и҆́хъ?

Ѿвѣща́етъ:

Ѿрица́еюсѧ всеѧ̀ Богопроти́вныѧ Тꙋре́цкїѧ вѣ́ры и҆ всегѡ̀ и҆́хъ ᲃкве́рнагѡ мꙋдрова́нїѧ, и҆ проклина́ю ѧ҆̀.

Свѧти́тель въпроша́етъ:

Ѿрица́ешилисѧ Мехме́та, є҆гѡ́же Тꙋ́рци ꙗ҆́кѡ Бж҃їагѡ А҆по́стола и҆ Прⷪ҇рка чтꙋ́тъ, и҆ проклина́еши ли є҆гѡ̀ ꙗ҆́кѡ дїѧ́волскагѡ, а҆ не Бж҃еѧгѡ ᲃлꙋгѝ, и҆ лжи́вагѡ Прⷪ҇ро́ка?

Ѿвѣща́етъ:

Ѿрица́юсѧ Мехме́та, и҆ ꙗ҆́кѡ дїѧ́волскагѡ, ᲃлꙋгѝ и҆ лжи́вагѡ Прⷪ҇ро́ка проклина́ю є҆гѡ̀.

Свѧти́тель въпроша́етъ:

Ѿрица́ешилисѧ Ресꙋ́ллы, и҆ А҆лі́ѧ, зѧ́тѧ Мехме́товагѡ, и҆ Хаса́на, и҆ Гꙋсе́нна ᲃн҃ѡ́въ є҆гѡ̀, и҆ А҆бꙋбеки́ра, и҆ Ꙋ҆меера, и҆ Талха́на, и҆ А҆бꙋпакри́на, и҆ Садꙋки́на, и҆ Маіе́ѧ, и҆ Зꙋпенра, и҆ А҆делаѧ́на, и҆ Зеи́та, и҆ І҆ꙁи́та, и҆ Сли́та, и҆ Ѻу҆ѳма́на, и҆ про́чихъ всѣ́хъ съта́йиникѡвъ и҆ дѣйстве́нникѡвъ, и҆ въспрїе́мникѡвъ, Мехме́товыхъ, и҆ ꙗ҆́кѡ лжи́выхъ ᲂу҆чи́телїй, и҆ Богопроти́вныхъ дїа́волскихъ слꙋ́гъ, проклина́еши ли и҆́хъ?

Ѿвѣща́етъ:

Ѿрица́юсѧ: си́хъ всѣ́хъ Богохꙋ́лныхъ Тꙋре́цкихъ лжи́выхъ ᲂу҆чителїй, и҆ ꙗ҆́кѡ дїа́волскихъ ᲃлꙋжи́телей проклина́ю и҆́хъ.

Ст҃ль въпроша́етъ:

Ѿрица́ешилисѧ и҆ проклина́еши ли, Задиꙁѐ, и҆ А҆нсѐ, и҆ Зеине́пъ, и҆ Мкелфимꙋ̀, первыѧ и҆ ᲃквернѣ́йшїѧ ѿ же́нъ Мехме́товыхъ, и҆ Фатма́нꙋ дще́ръ єгѡ̀?

Ѿвѣща́етъ:

Ѿрица́юсѧ си́хъ всѣ́хъ и҆ ꙗ҆́кѡ Богопроти́вныѧ сквернодѣ́йца, проклина́ю ѧ҆̀.

Ст҃ль въпроша́етъ:

Ѿрица́ешилисѧ всегѡ̀ Богохꙋ́лнагѡ писа́нїѧ проклѧ́тагѡ Мехме́та, є҆́же нарица́етсѧ А҆лкора́нъ, и҆ всѣ́хъ ᲂу҆че́нїй и҆ законоположе́нїй, и҆ преда́нїй, и҆ хꙋ́лъ є҆гѡ̀, и҆ ꙗ҆́кѡ Богопроти́вна, и҆ дш҃егꙋ́бна сꙋ́ща, проклина́еши ли ѧ҆̀?

Ѿвѣща́етъ:

Ѿрица́юсѧ А҆лкора́на, и҆ всегѡ̀ писа́нїѧ и҆ ᲂу҆че́нїѧ проклѧ́тагѡ Мехмета, и҆ ꙗ҆́кѡ богопроти́вна и҆ хꙋ́лна сꙋ́ща, и҆ дш҃егꙋ́бна, проклина́ю ѧ҆̀.

Свѧти́тель въпроша́етъ:

Ѿрица́ешилисѧ всѣ́хъ лъсти́выхъ и҆ хꙋ́лныхъ ᲂу҆чителей тꙋре́цкихъ, и҆ всѣ́хъ Богохꙋ́лныхъ блѧди́выхъ ба́сней Мехме́товыхъ и҆ по не́мъ бы́вшихъ всѣ́хъ, ꙗ҆́же сꙋ́тъ ѡ҆ бо́гꙋ нѣ́коемъ всекова́номъ, ѡ҆ Раѝ же, и҆ ѡ҆ ско́тскомъ въ не́мъ и҆ скве́рномъ и҆́хъ по воскресе́нїи житїѝ, и҆ є҆́же ѡ҆ бра́цѣхъ и҆ бра́чныхъ раꙁдрѣше́нїихъ, и҆ всѣ́хъ ѡ҆ жена́хъ и҆ нало́жницахъ нечи́стыхъ, и҆ си́мъ подо́бныхъ є҆гѡ̀ ᲃкве́рныхъ повелѣ́нїй, и҆ ᲂу҆ста́вѡвъ, и҆ ꙗ҆́кѡ Богоме́рꙁска проклина́ешили ѧ҆̀?

Ѿвѣща́етъ:

Всѣ́хъ ᲃи́хъ ѿрица́юсѧ, и҆ ꙗ҆́кѡ Богоме́рꙁска ᲃꙋ́ща, проклина́ю ѧ҆̀.

Свѧти́тель въпроша́етъ:

Ѿрица́ешилисѧ всѣ́хъ Мехме́товыхъ ꙗ҆́же ѡ҆ Хє҃ Гд҃ѣ на́шемъ, и҆ Пречⷭ҇стой є҆гѡ̀ Мт҃ри, и҆ ѡ҆ христїа́нехъ хꙋ́лныхъ блѧдосло́вїй, и҆ проклина́ешили ѧ҆̀?

Ѿвѣща́етъ:

Ѿрица́юсѧ си́хъ всѣ́хъ и҆ проклинаю ѧ҆̀.

Ст҃ль въпроша́етъ:

Ѿрица́ешилисѧ всѣ́хъ ᲃкве́рныхъ є҆́же ѡ҆ моли́твахъ Мехме́товыхъ ᲂу҆ставле́нїй, и҆ ꙗ҆́же въ Ме́хи поклоне́нїй, и҆ и҆́же въ не́мъ моли́тве́ннагѡ до́мꙋ, и҆ тогѡ̀ ᲃамо́гѡ мѣ́ста нарица́емагѡ Ме́ха, и҆ всегѡ̀ ѡ҆бдержа́нїѧ є҆гѡ̀ и҆ всѣ́хъ събра́нїй и҆ моли́твенныхъ ѡ҆бычаевъ Тꙋре́цкихъ, и҆ проклина́еши ли ѧ҆̀?

Ѿвѣща́етъ:

Ѿрица́юсѧ сихъ всѣ́хъ и҆ проклинаю ѧ҆̀.

Ст҃ль въпроша́етъ:

Ѿре́късѧ є҆сѝ скве́рныѧ и҆ Богопроти́вныѧ вѣ́ры Тꙋре́цкїѧ, и҆ Богохꙋ́лнагѡ и҆́хъ ᲂу҆чи́тѣлѧ Мехме́та, и҆ єгѡ̀ всѣ́хъ въспрїе́мникѡвъ, и҆ всегѡ̀ хꙋ́лнагѡ ᲂу҆че́нїѧ и҆́хъ, и҆ проклина́еши ли и҆́хъ, и҆ плю́еши ли на́нѧ?

Ѿвѣща́етъ:

Ѿреко́хъсѧ ᲃкве́рныѧ и҆ Богопроти́вныѧ вѣ́ры Тꙋре́цкїѧ и҆ всѣ́хъ є҆гѡ̀ въспрїемникѡвъ, и҆ всегѡ̀ хꙋ́лнагѡ ᲂу҆че́нїѧ ихъ, и҆ проклина́ю ѧ҆̀, и҆ плю́ю на́нѧ.

Свѧти́тель въпроша́етъ:

Съчетава́ешилисѧ и҆́стиннѡ кро́мѣ всѧ́кагѡ ᲂу҆сꙋмнѣ́нїѧ, и҆ лицемѣ́рїѧ ѿ всеѧ̀ дш҃а̀ твое́ѧ, и҆ ѿ всегѡ̀ ᲃе́рдца твое́гѡ є҆ди́номꙋ и҆́стинномꙋ Гд҃ꙋ и҆ Бг҃ꙋ на́шемꙋ І҆и҃ᲃ Х҃, и҆ вѣ́рꙋеши ли въ не́гѡ, ꙗ҆́кѡ въ и҆́стиннꙋ сꙋ́щагѡ Сн҃а Бг҃а жива́гѡ?

Ѿвѣща́етъ:

Съчетава́юсѧ и҆́стиннѡ кро́мѣ всѧ́кагѡ ᲂу҆сꙋмнѣ́нїѧ, и҆ лицемѣ́рїѧ ѿ всегѡ̀ ᲃе́рдца и҆ ѿ всеѧ̀ дш҃а̀ мое́ѧ є҆ди́номꙋ и҆́стинномꙋ Гд҃ꙋ и҆ Бг҃ꙋ І҆и҃ᲃ Х҃, и҆ вѣ́рꙋю въ негѡ̀, ꙗ҆́кѡ въ и҆́стиннꙋ сꙋ́щагѡ Сн҃а Бг҃а жива́гѡ.

И҆лѝ и҆́ныѧ невѣ́рꙋющїѧ въ Бг҃а є҆дина́гѡ въ Трⷪ҇ци ᲃлави́магѡ, и҆ не Креща́ющихсѧ, Въ и҆мѧ̀ Ѿца̀, и҆ Сн҃а, и҆ ᲃт҃гѡ Дх҃а, въ трѝ погрꙋже́нїѧ: по Въпро́сѡмъ и҆ Ѿвѣ́тѡмъ.

Свѧти́тель въпроша́ѧ глаголе́тъ:

Въ пе́рвыхъ въпроша́ю тѧ̀ а҆́ще ѿрица́ешисѧ всгѡ̀ нечести́вагѡ зловѣ́рїѧ проклѧ́тыхъ Е҆ретикѡ́въ, и҆ ѿ ᲃт҃ы́хъ ᲃедмѝ Вселе́нскихъ Събо́рѡвъ А҆наѳе́мѣ преда́ныхъ, сі́естъ, Кі́ринѳа, Е҆віꙍ́на, Фѡти́на, А҆́рїѧ, Македѡ́нїѧ, Нестѡ́рїѧ, А҆пполина́рїѧ, Па́вла Самоса́цскагѡ, Мане́са, Е҆ѵти́хїѧ, и҆ Севи́ра, и҆ всѣ́хъ про́чїихъ дре́вле бы́вшихъ, предала̀ є҆́стъ:

И҆ нн҃ѣшнихъ беꙁбо́жныхъ ᲂу҆́ченикѡвъ и҆́хъ Социнїа́нѡвъ, нарица́емыхъ Новокреще́нцѡвъ, Ѿца̀, и҆ Сн҃а, и҆ ᲃт҃гѡ Дх҃а, Бг҃а є҆ди́нагѡ въ трѝ ли́ца, въ є҆ди́номъ же ᲃꙋществѣ̀ ᲃлави́магѡ бы́ти: и҆ Бг҃а въ Трⷪ҇ци, Трⷪ҇цꙋ же въ є҆ди́нъствѣ сла́вити ѿмѣта́ющихъсѧ, и҆ сꙋщество̀ є҆ди́нѡ въ тре́хъ ѵ҆поста́сехъ ᲃꙋ́щее раꙁдѣлѧ́ющихъ: и҆ трѝ лица̀ въ є҆ди́нѡ ᲃлива́ющихъ: и҆ Бжⷭ҇твꙋ̀ ᲃтра́стъ прилага́ющихъ: И҆ Гд҃а на́шегѡ І҆и҃са Ха҃ не Бг҃а и҆́стиннагѡ ни́же є҆стестве́нна Сн҃а Бж҃їѧ, Ѿцꙋ̀ же и҆ Дх҃ови ᲃт҃о́мꙋ є҆диносꙋ́щна съра́вна и҆ ᲃъпресто́лна и҆сровѣда́ющихъ, но про́ста челове́ка, и҆ по благода́ти Сн҃а Бж҃іѧ бы́ти, ꙗ҆́кѡ бѣ̀ вре́мѧ є҆гда̀ небѣ̀ ᲃн҃ъ Бж҃їй, и҆ ꙗ҆́кѡ тва́ръ є҆́стъ, а҆ не тво́рецъ, и҆ всѣ́хъ тва́рей ᲃъꙁда́тель и҆ и҆́стинный Бг҃ъ, хꙋ́лнѡ наꙋча́ющихъ, и҆ проклина́еши ли тѣ́хъ всѣ́хъ и҆ всѐ Богохꙋ́лное и҆́хъ ᲂу҆че́нїе, и҆ всѧ̀ Богобо́рныѧ и҆́хъ ᲃъбѡ́рища и҆ ѡ҆бще́нїѧ, и҆ плю́еши на́нѧ.

Ѿвѣща́етъ:

Ѿрица́юсѧ всегѡ̀ нечести́вагѡ зловѣ́рїѧ проклѧ́тыхъ Е҆ретикѡ́въ, и҆ ѿ ᲃт҃ы́хъ ᲃедмѝ Вселе́нскихъ Събо́рѡвъ А҆наѳе́мѣ преда́ныхъ, сі́естъ, Кі́ринѳа, Е҆віꙍ́на, Фѡти́на, А҆́рїѧ, Македѡ́нїѧ, Нестѡ́рїѧ, А҆пполина́рїѧ, Па́вла Самоса́цскагѡ, Мане́са, Е҆ѵти́хїѧ, и҆ Севи́ра.

И҆ всѣ́хъ про́чїихъ дре́вле бы́вшихъ, и҆ нн҃ѣшнихъ беꙁбо́жныхъ ᲂу҆ченикѡ́въ и҆́хъ Социнїа́нѡвъ, нарица́емыхъ Новокреще́нцѡвъ, Ѿца̀, и҆ Сн҃а, и҆ ᲃт҃гѡ Дх҃а, Бг҃а є҆ди́нагѡ въ трѝ ли́ца, въ є҆ди́номъ же ᲃꙋществѣ̀ ᲃлави́магѡ бы́ти: и҆ Бг҃а въ Трⷪ҇ци, Трⷪ҇цꙋ же въ є҆ди́нъствѣ сла́вити ѿмѣта́ющихъсѧ, и҆ сꙋщество̀ є҆ди́нѡ въ тре́хъ ѵ҆поста́сехъ ᲃꙋ́щее раꙁдѣлѧ́ющихъ: и҆ трѝ лица̀ въ є҆ди́нѡ ᲃлива́ющихъ: и҆ Бжⷭ҇твꙋ̀ ᲃтра́стъ прилага́ющихъ: И҆ Гд҃а на́шегѡ І҆и҃са Ха҃ не Бг҃а и҆́стиннагѡ ни́же є҆стестве́нна Сн҃а Бж҃їѧ, Ѿцꙋ̀ же и҆ Дх҃ови ᲃт҃о́мꙋ є҆диносꙋ́щна ᲃъра́вна и҆ ᲃъпресто́лна, но про́ста человѣ́ка, и҆ по благода́ти Сн҃а Бж҃іѧ бы́ти, ꙗ҆́кѡ бѣ̀ вре́мѧ є҆гда̀ небѣ̀ ᲃн҃ъ Бж҃ій, и҆ ꙗ҆́кѡ тва́ръ є҆́стъ, а҆ не тво́рецъ, и҆ всѣ́хъ тва́рей ᲃъꙁда́тель и҆ и҆́стинный Бг҃ъ, хꙋ́лнѡ наꙋча́ющихъ, и҆ проклина́ю ты́хъ всѣ́хъ и҆ всѐ Богохꙋ́лное и҆́хъ ᲂу҆че́нїе, и҆ всѧ̀ Богобо́рныѧ и҆́хъ ᲃъбѡ́рища и҆ ѡ҆бще́нїѧ, и҆ плю́ю на́нѧ.

Свѧти́тель въпроша́етъ:

Ѿре́клсѧ є҆сѝ злочести́выѧ и҆ проклѧ́тыѧ є҆́реси А҆рїѧ́нскїѧ, и҆ всегѡ̀ Богохꙋ́лнагѡ и҆́хъ ᲂу҆че́нїѧ, и҆ плю́еши ли на́нѧ?

Ѿвѣща́етъ:

Ѿреко́хъсѧ всеѧ̀ злочести́выѧ и҆ проклѧ́тыѧ є҆́реси А҆рїа́нскїѧ, и҆ всегѡ̀ Богохꙋ́лнагѡ и҆́хъ ᲂу҆че́нїѧ и҆ плю́ю на́нѧ.

Свѧти́тель въпроша́етъ:

Съчетава́ешилисѧ и҆́стиннѡ, кро́мѣ всѧ́кагѡ ᲂу҆сꙋмнѣ́нїѧ и҆ лицемѣ́рїѧ, є҆ди́ной ᲃт҃о́й Събѡ́рной А҆по́столской Въсто́чной Це́ркви, и҆ ѿ всеѧ̀ дш҃а̀ твое́ѧ, и҆ ѿ всегѡ̀ ᲃе́рдца твое́гѡ и҆сповѣдꙋ́еши ли Ѿца̀ и҆ Сн҃а и҆ ᲃт҃гѡ Дх҃а є҆ди́нагѡ бы́ти Бг҃а, сꙋщество́мъ нераꙁдѣли́магѡ, ли́ци же раꙁдѣ́лнагѡ, и҆ вѣ́рꙋеши ли въ не́гѡ, и҆ ꙗ҆́кѡ тво́рцꙋ всеѧ̀ види́мыѧ и҆ невиди́мыѧ тва́ри, покланѧ́еши ли сѧ?

Ѿвѣща́етъ:

Съчетава́юсѧ и҆́стиннѡ, кро́мѣ всѧ́кагѡ ᲂусꙋмнѣ́нїѧ и҆ лицемѣ́рїѧ, є҆дино́й ᲃт҃о́й Събѡ́рной А҆по́столской Въсто́чной Це́ркви, и҆ ѿ всеѧ̀ дш҃а̀ мое́ѧ, и҆ ѿ всегѡ̀ ᲃе́рдца мое́гѡ и҆сповѣдꙋ́ю Ѿца̀ и҆ Сн҃а и҆ ᲃт҃гѡ Дх҃а є҆ди́нагѡ бы́ти Бг҃а, сꙋщество́мъ нераꙁдѣли́магѡ, ли́ци же раꙁдѣ́лнагѡ, и҆ вѣ́рꙋю въ не́гѡ, и҆ ꙗ҆́кѡ тво́рцꙋ всеѧ̀ види́мыѧ и҆ невиди́мыѧ тва́ри покланѧ́юсѧ.

Свѧти́тель же а҆́бїе въстаѧ̀ глаголе́тъ:

Блⷭ҇ве́нъ Бг҃ъ хотѧ́й всѣ́мъ человѣ́кѡмъ ᲃпⷭ҇ти́сѧ, и҆ въ ра́ꙁꙋмъ и҆́стинный прїйтѝ: ᲃы́й благослове́нъ въ вѣ́ки.

Кли́ръ:

А҆ми́нь.

Дїа́конъ же гл҃етъ:

Ѽглаше́ннїи гла́вы ва́ша Гв҃и преклонѣ́те.

Кли́ръ:

Тебѣ̀ Гд҃и.

Свѧти́тель же чте́тъ надъ ни́мъ Моли́твꙋ ᲃі́ю:

Бо́же Бо́же на́шъ, зижди́телю и҆ ᲃъдѣ́телю всѧ́ческихъ, всѣ́мъ хотѧ́й спⷭ҇ти́сѧ и҆ въ ра́ꙁꙋмъ и҆́стинный прїйтѝ: При́ꙁри на раба̀ твое́гѡ ѡ҆глаше́ннагѡ, и҆ и҆ꙁба́ви є҆гѡ̀ ве́тхїѧ пре́лести, и҆ ко́ꙁни проти́внагѡ: и҆ приꙁовѝ є҆гѡ̀ въ жи́ꙁнъ вѣ́чнꙋю, просвѣща́ѧ є҆гѡ̀ дꙋ́шꙋ и҆ тѣ́ло, и҆ съчетава́ѧ є҆гѡ̀ слове́сномꙋ твое́мꙋ ста́дꙋ: на не́мъ же и҆мѧ̀ твоѐ ᲃт҃о́е нарица́етсѧ. Да и҆ то́й ᲃъ на́ми сла́витъ Прече́стное и҆ великолѣ́пое И҆мѧ̀ твоѐ, Ѿца̀ и҆ Сн҃а и҆ ᲃт҃а́гѡ Дх҃а, нн҃ѣ и҆ при́снѡ, и҆ въ вѣ́ки вѣкѡ́мъ.

Ли́къ:

А҆ми́нь.

По Моли́твѣ же, Свѧти́тель ᲃѣ́дъ, тво́ритъ ᲃло́во ᲂу҆чи́телное къ ѡ҆глаше́нномꙋ, пᲂꙋча́ѧ є҆гѡ̀ ѡ҆ Вѣ́рѣ, и҆ ѡ҆ раꙁли́чныхъ къ ᲃпⷭ҇нїю прили́чныхъ ве́щехъ ѡ҆ ни́хъ же предъꙋкаꙁа́сѧ: Сконча́вже ᲃло́во блⷭ҇влѧ́етъ є҆гѡ̀ и҆ ѿпꙋща́етъ: и҆ ѡ҆бращъсѧ къ Въсто́кѡмъ моли́тсѧ, ѡ҆ вѣ́рныхъ въ покаѧ́нїи сꙋ́щихъ, по ѳ҃і-мъ Пра́вилꙋ Лаѡдикі́йскагѡ Събѡ́ра.

А҆рхідїа́конꙋ же ре́кшꙋ:

Е҆ли́ци вѣ́рнїи Гд҃ꙋ помоли́мсѧ.

и҆ Кли́рꙋ:

Гд҃и поми́лꙋй.

А҆́ще же ᲃꙋ́тъ вѣ́рнїи ꙗ҆встве́ннѡ, ѡ҆ ꙗ҆встве́нный грѣ́хъ покаѧ́нїе творѧ́щїи, пристꙋ́плъше прекланѧ́ютъ гла́вы своѧ̀ подъ десни́цꙋ Ст҃ителевꙋ. Свѧти́тель же въꙁдѣ́въ рꙋ́цѣ, Гл҃етъ Моли́твꙋ ᲃі́ю.

Гд҃и Гд҃и, и҆ꙁбавле́й на́съ ѿ всѧ́кїѧ ᲃтрѣ́лы летѧ́щїѧ въ днѝ и҆ꙁба́ви на́съ и҆ ѿ всѧ́кїѧ ве́щи въ тмѣ̀ преходѧ́щїѧ. Прїймѝ Же́ртвꙋ вече́рнюю рꙋ́къ на́шихъ воꙁдѣѧ́нїе: ᲃподобѝ же намъ и҆ но́щное по́прище бе́ꙁъ поро́ка прейтѝ неискꙋ́снымъ ѿ злы́хъ: и҆ и҆ꙁба́ви на́съ ѿ всѧ́кагѡ ᲃмꙋще́нїѧ и҆ стра́ха ѿ дїѧ́вола намъ пребыва́ющагѡ: дарꙋ́й дꙋша́мъ на́шимъ ᲂу҆миле́нїе, и҆ по́мысломъ на́шимъ попече́нїе, ѡ҆ є҆́же на стра́шномъ и҆ пра́ведномъ твое́мъ ᲃꙋ́дѣ и҆спыта́нїй: пригвоꙁдѝ стра́сѣ твое́мъ пло́ти на́ша, и҆ ᲂу҆мертвѝ ᲂу҆́ды на́ша; сꙋ́щїѧ на землѝ. ꙗ҆́кѡ дай со́ннымъ беꙁмо́лвїемъ просвѣти́мсѧ зрѣ́нїемъ сꙋде́бъ твои́хъ: ѿ и҆мѝ ѿ на́съ всѧ́кое мечта́нїе неподо́бное, и҆ по́хоть вре́днꙋю: въста́ви же на́съ въ вре́мѧ моли́твы ᲂу҆твержде́ныхъ въ вѣ́рѣ, и҆ преспѣва́ющихъ въ заповѣде́хъ твои́хъ. Благоволе́нїемъ и҆ бла́гостїю є҆диноро́днагѡ Сн҃а твое́гѡ, съ ни́мъ же благослове́нъ є҆сѝ съ прⷭ҇тымъ и҆ благи́мъ, и҆ животворѧ́щимъ ти Дх҃омъ, нн҃ѣ и҆ при́снѡ, и҆ въ вѣ́ки вѣкѡ́въ.

Кли́ръ:

А҆ми́нь.

А҆́бїе же ᲃконча́въ ᲃі́е Ст҃ль, въхо́дитъ въ ѻ҆́лтаръ, и҆ ѿло́жъ ᲃщ҃ен́ныѧ ѡ҆де́жды, ѿхо́дитъ въ своѧ̀ си.

Въ вто́рый же дн҃ь, вре́мени пришедшꙋ, пре́дъ Вече́рнею, и҆лѝ по Вече́рни, та́кожде тво́ритъ Свѧти́тель, вше́дъ въ Ѻ҆́лтаръ, ꙗ҆́кѡже и҆ вче́ра, сі́естъ, помоли́въсѧ, и҆ вꙁе́мъ на́сѧ Е҆пітра́хиль, Ѽмо́фѡр̾ и҆ Ми́трꙋ, и҆ въ шꙋи́ци Па́стырскїй же́ꙁлъ, лобꙁа́етъ ᲃт҃ꙋ́ю Тра́пеꙁꙋ, и҆ и҆схо́дитъ и҆ꙁъ Ѻ҆́лтарѧ съ Кли́ромъ поѧ̀, и҆лѝ гл҃ѧ̀, ѱало́мъ, к҃в.

Гд҃ь пасе́тъ мѧ̀ и҆ ничто̀ же мѧ̀ ли́шитъ: Ве́съ до конца̀.

Прише́дъ же на то́жде мѣ́сто, є҆́же и҆ вче́ра, Свѧти́тель, ᲃѧ́детъ на свое́мъ ᲃѣда́лищи, и҆ гл҃етъ къ ѡ҆глаше́нномꙋ: Жидови́нъ є҆́стъ, ᲃи́це: Въпроше́нїе Жидови́на ѡ҆ И҆сповѣда́нїи Вѣ́ры.

Свѧти́тель въпроша́етъ:

И҆́стиннѡ ли ѿре́клсѧ є҆сѝ всегѡ̀ Богобо́рнагѡ І҆оѵде́йскагѡ невѣ́рїѧ, хꙋле́нїй ѡ҆бы́чаевъ и҆ бг҃ме́рꙁскихъ ба́снїй, и҆ всегѡ̀ ло́жнагѡ и҆́хъ є҆́же съпроти́въ Ха҃ Бг҃а на́шегѡ ᲂу҆че́нїѧ, и҆ нн҃ѣ та́кожде ѿрица́ешилисѧ и҆ проклина́еши ли ѧ҆̀, и҆ плю́еши ли на́нѧ?

Ѿвѣща́етъ:

И҆́стиннѡ ѿреко́хсѧ, всѣ́хъ хꙋле́ний, ѡ҆бы́чаевъ, и҆ Богоме́рꙁскихъ ба́снїй, и҆ всегѡ̀ ло́жнагѡ и҆́хъ є҆́же съпроти́въ Ха҃ Бг҃а на́шегѡ ᲂу҆че́нїѧ, и҆ нн҃ѣ та́кожде ѿрица́юсѧ и҆́хъ, и҆ проклина́ю ѧ҆̀ и҆ плю́ю на́нѧ.

Свѧти́тель въпроша́етъ:

Съчетава́ешилисѧ и҆́стиннѡ кро́мѣ всѧ́кагѡ ᲂу҆сꙋмнѣ́нїѧ и҆ лицемѣ́рїѧ, ѿ всеѧ̀ дш҃а̀ твое́ѧ, и҆ ѿ всегѡ̀ ᲃе́рдца твое́гѡ, є҆ди́номꙋ и҆́стинномꙋ въ Трⷪ҇ци ᲃт҃о́й слави́момꙋ Б҃, и҆ вѣ́рꙋеши ли въ не́гѡ?

Ѿвѣща́етъ:

Съчетава́юсѧ и҆́стиннѡ кро́мѣ всѧ́кагѡ ᲂу҆сꙋмнѣ́нїѧ и҆ лицемѣ́рїѧ, ѿ всегѡ̀ ᲃе́рдца и҆ ѿ всеѧ̀ дш҃а̀ мое́ѧ, є҆ди́номꙋ и҆́стинномꙋ Бг҃ꙋ въ Трⷪ҇ци ᲃт҃о́й ᲃлави́момꙋ, и҆ вѣ́рꙋю въ не́гѡ.

Свѧти́тель въпроша́етъ:

И҆сповѣда́еши ли, ꙗ҆́кѡ ᲃт҃аѧ Трⷪ҇ца Ѿц҃ъ, ᲃн҃ъ, и҆ Дх҃ъ ᲃт҃ы́й, є҆ди́нъ є҆́стъ Бг҃ъ ᲃꙋщество́мъ нераꙁдѣ́лный, ли́ци же раꙁдѣ́лный, и҆ вѣ́рꙋеши ли въ не́гѡ, и҆ покланѧ́ешилисѧ є҆мꙋ̀?

Ѿвѣща́етъ:

И҆сповѣда́ю, ꙗ҆́кѡ ᲃт҃аѧ Трⷪ҇ца Ѿц҃ъ, и҆ ᲃн҃ъ, и҆ Дх҃ъ ᲃт҃ы́й, є҆ди́нъ є҆́стъ Бг҃ъ, ᲃꙋщество́мъ нераꙁдѣ́лный, ли́ци же раꙁдѣ́лный, и҆ вѣ́рꙋю въ не́гѡ, и҆ ꙗ҆́кѡ тво́рцꙋ и҆ ᲃп҃си́телю мое́мꙋ покланѧ́юсѧ.

И҆ а҆́бїе колѣ́нѣ прекло́нь, покланѧ́етсѧ гла́вою до землѝ є҆дино́щи и҆ па́ки въстае́тъ.

Свѧти́тель въпроша́етъ:

Вѣ́рꙋеши ли, и҆ и҆сповѣдꙋ́еши, ꙗ҆́кѡ Гд҃ь на́шъ І҆и҃ᲃ Хᲃ҃, є҆динъ сы́й ѿ ᲃт҃ы́ѧ Трⷪ҇ца, и҆́стинный є҆диноро́дный ᲃн҃ъ и҆ сло́во Бж҃їе, ѿ Ѿца̀ пре́жде всѣ́хъ вѣ́кѡвъ рожде́нное, на землѝ ᲃпⷭ҇нїѧ ра́ди человѣ́ческагѡ ᲃни́де, и҆ дѣ́йствомъ ᲃт҃гѡ Дх҃а ѿ при́снѡ Дв҃ы Мр҃їѧ въплоти́сѧ, и҆ и҆́стиннѡ бы́сть человѣ́къ, не ѿстꙋ́плъ свое́го бжⷭ҇тва̀: и҆ въ є҆ди́номъ съста́вѣ въ дво́хъ сꙋ́ществахъ несмѣ́снѡ, непрело́жнѡ, и҆ несли́тнѡ, є҆ди́нъ є҆стъ ᲃн҃ъ Бж҃їй, и҆ ᲃн҃ъ чл҃чїй, Бг҃ъ и҆́стинный, и҆ человѣ́къ и҆́стинный?

Ѿвѣща́етъ:

Си́це вѣ́рꙋю, и҆ ᲃи́це несꙋмнѣ́ннѡ и҆сповѣдꙋ́ю.

Свѧти́тель въпроша́етъ:

Вѣ́рꙋеши ли, ꙗ҆́кѡ Гд҃ь на́шъ І҆и҃ᲃ Хᲃ҃, не нꙋ́ждею, но во́лею и҆́стинною, а҆ не привидѣ́нїемъ, человѣ́ческагѡ ра́ди ᲃпⷭ҇нїѧ мꙋ́ки претерпѣ̀, и҆ Распѧ́тїе пло́тїю, Бжⷭ҇твомъ же беꙁъстра́стенъ пребы́сть: и҆́стиннѡ ꙗ҆́кѡ человѣ́къ ᲂу҆мрѐ, и҆ погребе́нъ бы́сть, тридне́внѡ же си́лою Бжⷭ҇тва свое́гѡ Въскресѐ, и҆ на нб҃са̀ съ пло́тїю въꙁнесе́сѧ, и҆ сѣди́тъ ѡ҆де́снꙋю Бг҃а Ѿца̀: и҆ ѿтꙋ́дꙋ па́ки прі́йдетъ сꙋди́ти живы́мъ и҆ ме́ртвымъ, и҆ Ца́рствова́ти и҆́матъ въ вѣ́ки, Ца́рствїю же є҆гѡ̀ не бꙋ́детъ конца̀?

Ѿвѣща́етъ:

Всѧ̀ сі́ѧ ᲃи́це вѣ́рꙋю, и҆ ѿ ᲃе́рдца и҆́стиннѡ и҆сповѣдꙋ́ю.

Свѧти́тель въпроша́етъ:

Вѣ́рꙋеши и҆ и҆сповѣдꙋ́еши ли, ꙗ҆́кѡ Хлѣ́бъ и҆ Вино̀, на ᲃт҃ы́хъ Жерто́вницѣхъ въ Бжестве́нныхъ Лѵтꙋ́ргїѧхъ, ѿ на́съ Хрⷭ҇тїа́нъ та́йнѡ ᲃщ҃еннѡдѣйствꙋ́емыѧ, и҆ прїемле́мыѧ, и҆́стиннѡ Бжⷭ҇тве́нною си́лою невиди́мѡ па́че є҆стества̀, и҆ вы́ше человѣ́ческагѡ ра́ꙁꙋма постиже́нїѧ, въ тѣ́лѡ и҆ Кро́въ Гд҃а на́шегѡ І҆и҃ᲃ Ха҃ пресꙋществꙋ́ютъ и҆ претварѧ́ютсѧ: и҆ ꙗ҆́кѡ вѣ́рою прїе́млющимъ въ снабдѣ́нїе ѡ҆ставле́нїѧ грѣхѡ́въ, ѡ҆сщ҃е́нїѧ дш҃ѝ и҆ тѣ́ла, живота̀ вѣ́чнагѡ, и҆ црⷭ҇твїѧ нбⷭ҇нагѡ наслѣ́дїѧ быва́ютъ?

Ѿвѣща́етъ:

Вѣ́рꙋю и҆ ѿ ᲃе́рдца и҆́стиннѡ ᲃи́це и҆сповѣдꙋ́ю, са́мъ бжⷭ҇тве́ннымъ си́мъ Та́йнамъ причасти́тисѧ жела́ю.

Свѧти́тель въпроша́етъ:

Вѣ́рꙋеши ли, ꙗ҆́кѡ Та́йна ᲃт҃гѡ Креще́нїѧ є҆́йже сподоби́тисѧ жела́еши, и҆́стинное є҆́стъ ѡ҆чище́нїе, всѣ́хъ грѣхѡ́въ, и҆ порожде́нїе Дх҃о́вное, и҆ ѿ ᲃы́на поги́бели, сн҃а Бж҃іѧ и҆ наслѣ́дника Ца́рствїѧ нбⷭ҇нагѡ тво́ритъ, вѣ́рою Креща́ющагѡсѧ?

Ѿвѣща́етъ:

Си́це ѡ҆ ᲃт҃о́мъ Креще́нїи вѣ́рꙋю и҆ и҆сповѣдꙋ́ю, и҆ са́мъ сподоби́тисѧ ᲃемꙋ̀ ᲂу҆се́рднѡ жела́ю.

Свѧти́тель въпроша́етъ:

Вѣ́рꙋеши ли, ꙗ҆́кѡ Прⷭ҇таѧ Дв҃а Мр҃їѧ ро́ждшаѧ пло́тїю Ха҃ Бг҃а на́шегѡ, ꙗ҆́кѡже пре́жде Ржⷭ҇тва̀ бы́стъ чⷭ҇тою Дв҃ою, ᲃи́це и҆ въ рождествѣ̀, и҆ по рождествѣ̀ Дв҃ою въ вѣ́ки пребыва́етъ: и҆ досто́йнѣ и҆менꙋ́ема є҆́стъ Бц҃а, поне́же Бг҃а въчеловѣ́чшасѧ въи́стиннꙋ роди́ла є҆́стъ, и҆ сегѡ̀ ра́ди по благода́ти всеѧ̀ тва́ри Гпⷭ҇жа и҆ Влады́чица, и҆ Чтⷭ҇нѣ́йшаѧ и҆ вы́шшаѧ є҆́стъ Херꙋви́мѡвъ Серафи́мѡвъ: и҆ ꙗ҆́кѡ Мт҃и и҆мꙋ́щаѧ вели́кое дерꙁнове́нїе, къ Сн҃ꙋ свое́мꙋ и҆ Бг҃ꙋ на́шемꙋ моли́тсѧ ѡ҆ на́съ и҆ млⷭ҇тва намъ тогѡ̀ тво́ритъ: тѣ́мъ же досто́итъ всѣ́мъ вѣ́рнымъ па́че всѣ́хъ ᲃт҃ы́хъ чти́ти ю҆̀ и҆ покланѧ́тисѧ є҆́й, и҆ ꙗ҆́кѡ да моли́тсѧ ѡ҆ ни́хъ благоговѣ́инѡ приꙁыва́ти ю҆̀?

Ѿвѣща́етъ:

Всѧ̀ се́ѧ ѡ҆ Прⷭ҇тѣ́й Дв҃ѣ Бц҃и Мр҃їи ᲃи́це вѣ́рꙋю и҆ ᲃи́це и҆сповѣдꙋ́ю и҆ ꙗ́кѡ Бж҃їю Мт҃ръ чтꙋ̀ и҆ покланѧ́юсѧ є҆́й, и҆ є҆́же моли́тисѧ ѡ҆ мнѣ̀ благоговѣ́инѡ приꙁыва́ю ю҆̀.

Свѧти́тель въпроша́етъ:

Вѣ́рꙋеши ли ꙗ҆́кѡ А҆по́столи, Прⷪ҇ро́ци, Мч҃ници, Ꙋчи́тілїе, И҆сповѣ́дници, и҆ Прпⷣбнїи и҆ всѝ Ст҃і́и, Ха҃ Бг҃а проповѣда́вшїи, и҆ томꙋ̀ благоꙋгодивъшїи, и҆́хъ же Це́ркѡвъ ᲃт҃а́ѧ чте́тъ и҆ въ мо́лбꙋ приꙁыва́етъ, въи́стиннꙋ сꙋ́ть ᲃт҃і́и и҆ вѣ́рнїи рабѝ, и҆ слꙋжи́телїе Бж҃їи, дрꙋ́ꙁи же и҆ ᲂу҆го́дници є҆гѡ̀; и҆ въ нбⷭ҇ныхъ дво́рѣхъ веселѧ́щесѧ нн҃ѣ, за всѧ̀ христїа́ны мо́лѧтсѧ всегда̀, и҆ сегѡ̀ ра́ди ѿ всѣ́хъ вѣ́рныхъ, досто́йни сꙋ́тъ че́сти и҆ приꙁыва́нїѧ?

Ѿвѣща́етъ:

Ꙍ҆ всѣ́хъ ᲃт҃ы́хѣ Бжїихъ ᲃи́це вѣ́рꙋю, и҆ тѣ́хъ ꙗ҆́кѡ ᲃт҃ы́хъ дрꙋ́гѡвъ, ᲃлꙋжи́телей же и҆ вѣ́рныхъ, рабѡ́въ Бж҃іихъ, чтꙋ̀ и҆ въ мо́лбꙋ приꙁыва́ю.

Свѧти́тель въпроша́етъ:

Вѣ́рꙋеши и҆ и҆сповѣдꙋ́еши ли, ꙗ҆́кѡ четы́ри Е҆ѵⷢ҇лїѧ, и҆ всѐ но́вагѡ Завѣ́та А҆по́столское писанїе Дх҃омъ ᲃт҃ы́мъ съставле́нное, Богодꙋхнове́нное же и҆ Бо́гомъ наꙋче́нное писа́нїе є҆́стъ, и҆ ꙗ҆́кѡ ᲃт҃о и҆ ᲃп҃си́телнѡ прїе́млеши, и҆ лобꙁа́еши ли є҆̀; не прїемлю́щихъ же и҆ нечести́вѡ хꙋлѧ́щихъ є҆̀, ѿмѣта́ешилисѧ и҆ проклина́еши ли и҆́хъ?

Ѿвѣща́етъ:

Четы́ри Е҆ѵⷢ҇лїѧ и҆ всѐ но́вагѡ Завѣ́та А҆пⷭ҇толское писа́нїе, Богодꙋхнове́нное писа́нїе бы́ти вѣ́рꙋю, и҆ и҆сповѣдꙋ́ю, и҆ ꙗ҆́кѡ ᲃто҃ прїе́млю, чтꙋ̀ и҆ лобыꙁа́ю: не прїе́млющихъ же и҆ хꙋлѧ́щихъ сі́ѧ ѿрица́юсѧ и҆ проклина́ю.

Свѧти́тель въпроша́етъ:

Всѧ̀ А҆пⷭ҇тлскаѧ и҆ Ѻ҆ц҃ъ ᲃт҃ы́хъ преда́нїѧ и҆ Та́йны ᲃт҃ы́ѧ Церкѡ́вныѧ, и҆ всѧ̀ благочести́выѧ Хрїстїѧ́нскїѧ ѡ҆бы́чаѧ и҆ Моли́твы, ꙗ҆́же Це́ркѡвъ ᲃт҃а́ѧ Каѳоли́ческаѧ Събѡ́рнаѧ съдержи́тъ, ᲃт҃а бы́ти и҆ дш҃еспаси́телна, вѣ́рꙋеши и҆сповѣда́еши и҆ прїе́млеши ѧ҆̀?

Ѿвѣща́етъ:

Всѧ̀ сі́ѧ ᲃт҃а и҆ дш҃еспаси́телна бы́ти вѣ́рꙋю, и҆сповѣдꙋ́ю и҆ прїе́млю ѧ҆̀.

Свѧти́тель въпроша́етъ:

Вѣ́рꙋеши и҆ и҆сповѣдꙋ́еши ли ꙗ҆́кѡ Кре́стъ Гд҃а на́шегѡ І҆и҃ᲃ Ха҃ на не́мъ же пло́тїю Распѧ́тъ бы́сть, не ктомꙋ̀ ᲂу҆жѐ клѧ́твѣ и҆ ᲃме́рти ѡ҆рꙋ́дїе є҆́стъ, но свободы̀, и҆ живота̀ вѣ́чнагѡ зна́менїе, и҆ є҆́же на дїѧ́вола и҆ на ᲃме́рть побѣ́ды: зна́менїе же є҆гѡ̀ и҆ и҆ꙁъѡбраже́нїе, си́лою на не́мъ Распѧ́тагѡ Ха҃, бѣ́сѡмъ є҆́стъ прогнанїе, и҆ ѿ ко́ꙁней и҆ ᲃѣ́тей дїѧ́волскихъ Вѣ́рныхъ и҆ꙁбавлѧ́етъ и҆ свобожда́етъ?

Ѿвѣща́етъ:

Си́це ѡ҆ Крестѣ Гдн҃емъ вѣ́рꙋю и҆ и҆сповѣда́ю, и҆ си́мъ ᲃп҃си́телнымъ зна́менїемъ себѣ̀ на всѧ̀ дїѧ́волскїѧ сѣ́ти въѡ҆рꙋжа́ю, и҆ вѣ́рꙋю ꙗ҆́кѡ ᲃи́ла Распѧ́тагѡ на Крестѣ̀ Ха҃ Бг҃а на́шигѡ и҆ꙁба́витъ мѧ̀ ѿ нихъ.

Сі́ѧ же гл҃ѧ̀ знамена́етъ себѣ̀ зна́менїемъ Кре́стнымъ.

Свѧти́тель въпроша́етъ:

Че́стныѧ Ѻ҆́браꙁы, ꙗ҆́же по пло́ти къ человѣ́кѡмъ ꙗ҆вле́нїѧ Бж҃їѧ сло́ва и҆ꙁъѡбража́ютъ, и҆ нетлѣ́ннѡ тогѡ̀ ро́ждшїѧ Пречⷭ҇тыѧ Бц҃а, Богови́дныхъ А҆гг҃лъ и҆ всѣ́хъ ᲃт҃ы́хъ, ꙗ҆́кѡ первоѡ́браꙁнаѧ и҆ꙁъѡбража́ющаѧ, че́сти же досто́йна сꙋ́щаѧ, прїемлеши, чте́ши, лобыꙁа́еши ли ѧ҆̀: и҆ всѣ́хъ И҆́дѡлами ты́ѧ нечести́во нарица́ющихъ, проклина́еши ли?

Ѿвѣща́етъ:

Че́стныѧ И҆́кꙍны Бж҃іѧ сло́ва Въплоще́нїѧ и҆ꙁъѡбража́ющїѧ, Прⷱ҇ты́ѧ Бц҃а, и҆ всѣ́хъ ᲃт҃ыхъ, ꙗ҆́кѡ досто́йныѧ че́сти прїемлю̀, чтꙋ̀, и҆ лобыꙁа́ю, и҆ всѣ́хъ ты́ѧ неприе́млющихъ, па́чеже И҆́дѡлами нарица́ющихъ, ꙗ҆́кѡже нечести́выхъ ѿмѣта́юсѧ и҆ проклина́ю и҆́хъ.

Свѧти́тель въпроша́етъ:

Сі́ѧ всѧ̀ ѿ всегѡ́ ли ᲃе́рдца и҆ ѿ всеѧ̀ дш҃а̀ и҆ проиꙁволе́нїѧ твое́гѡ, и҆́стиннѡ ᲃпⷭ҇нїѧ ра́ди дш҃а̀ твое́ѧ ᲃи́це и҆сповѣда́еши и҆ не ле́стнѡ къ Вѣ́рѣ Хрїстїѧ́нской прихо́диши, и҆ сп҃си́телнагѡ Креще́нїѧ сподоби́тисѧ жела́еши?

Ѿвѣща́етъ:

И҆́стиннѡ всѧ̀, ѿ всегѡ̀ ᲃе́рдца ѿ всеѧ̀ дш҃а̀ и҆ ѿ всегѡ̀ проиꙁволе́нїѧ мое́гѡ, ꙗ҆́коже и҆сповѣда́хъ и҆сповѣда́ю, и҆ исповѣда́ти да́же до кончины̀ живота̀ мое́гѡ ѡ҆бѣща́юсѧ, и҆ кро́мѣ всѧ́коѧ ле́сти къ Вѣ́рѣ Хрїстїѧ́нстѣй прихождꙋ̀, и҆ Креще́нїѧ сп҃се́ннагѡ сподоби́тисѧ жела́ю.

Свѧти́тель глаголе́тъ:

А҆́ще ᲃи́це въи́стиннꙋ ꙗ҆́кѡ же ре́клъ єсѝ є҆стъ, пре́дъ Гд҃емъ Бо́гомъ къ не́мꙋ же прибѣ́глъ є҆́сѝ, и҆ пре́дъ всею̀ Це́рквїю клѧ́твою и҆ꙁвѣстѝ.

Ѿнъ же а҆́ще честѝ ᲂу҆мѣ́етъ, ха́ртїю держа̀ въ рꙋцѣ̀, чте́тъ: А҆́ще ли же невѣ́жда є҆́стъ, то въспрїе́мникъ є҆гѡ̀, и҆лѝ є҆ди́нъ ѿ Кли́рикъ, по сло́вꙋ чте́тъ, ѡ҆́нъ же по не́мъ всѧ̀ сі́ѧ гл҃етъ.

А҆́ꙁъ И҆мⷬ҇къ: и҆́же дне́сь ѿ Жидо́вства къ Вѣ́рѣ Хрїстїѧ́нстѣй прихождꙋ̀, пре́дъ всевидѧ́щимъ, и҆ всевѣ́дающимъ Гд҃емъ Бо́гомъ, є҆гѡ́ же нн҃ѣ и҆́стиннѡ и҆сповѣда́хъ, и҆ пре́дъ ᲃт҃о́ю є҆гѡ̀ Це́рквїю, и҆́стиннѡ и҆сповѣда́ю, и҆ клѧ́твою ᲃі́е моѐ и҆сповѣда́нїе и҆ꙁвѣствꙋ́ю, ꙗ҆́кѡ ни є҆дины́ѧ ра́ди бѣды̀, и҆лѝ нꙋ́жда, и҆лѝ стра́ха, и҆лѝ нищеты̀, и҆лѝ долга̀, и҆лѝ прибы́тка ра́ди ко́его, и҆лѝ ле́сти нѣ́кїѧ, и҆лѝ ѡ҆неправдова́нїѧ кое́гѡ ѿ є҆диновѣ́рныхъ ми, и҆лѝ и҆́ныѧ ра́ди въ мнѣ̀ та́йнѡ ᲃъкров́нныѧ вины̀ Жидо́вскїѧ Богобо́рныѧ ѿрица́юсѧ Вѣ́ры и҆ За́кона, и҆ всѣ́хъ Е҆́ресїй и҆ хꙋ́лъ, и҆ къ Хрⷭ҇тїѧ́нъской и҆́стиннѡ ᲃп҃си́телной прихождꙋ̀ вѣ́рѣ, и҆ ᲃи́це ꙗ҆́кѡже и҆сповѣда́хъ: и҆сповѣдꙋ́ю и҆ вѣ́рꙋю: Но и҆́стинною само́ю Вѣ́ры Хрїстїѧ́нскїѧ побѣжде́нъ, ᲃпⷭ҇нїѧ ра́ди сама́го дш҃а̀ мое́ѧ, ѿ всеѧ̀ дш҃а̀, и҆ ᲃе́рдца мое́гѡ Ха҃ Бг҃а ᲃп҃си́телѧ всегѡ̀ ми́ра любѧ̀, и҆ и҆ꙁвѣ́стнѡ вѣ́дый ꙗ҆́кѡ всѝ въ Ха҃ Гд҃а и҆́стиннѡ сꙋ́щагѡ ᲃн҃а Бж҃іѧ невѣ́рꙋющїи погиба́ютъ, къ Хрⷭ҇тїѧ́нской Вѣ́рѣ прихожꙋ̀, и҆ Хрїстїѧни́номъ бы́ти хощꙋ̀, и҆ Креще́нїѧ ᲃт҃гѡ ᲃподоби́тисѧ жела́ю: А҆́ще же кое́ѧ ра́ди ѿ предрече́нныхъ ви́нъ, ле́стїю съ лицемѣ́рїемъ сі́ѧ и҆сповѣда́ю, а҆ не ѿ вѣ́ры вседш҃е́вныѧ и҆ ᲃерде́чныѧ, къ Х҃ Гд҃ꙋ прихождꙋ̀, и҆ нн҃ѣ то́чїю прикрове́ннѣ творꙋ́сѧ бы́ти христїѧни́нъ, потомꙋ̀ же въсхощꙋ̀ Вѣ́ры ᲃт҃ы́ѧ христїѧ́нскїѧ ѿрещи́сѧ, и҆ па́ки къ І҆оѵдейской въꙁврати́сѧ Богобо́рной вѣ́рѣ и҆ тѣ́хъ хꙋла́мъ, моли́твамъ, по́стѡмъ, Пра́ꙁдникѡмъ и҆ ꙗ҆де́нїѧмъ съѡбща́тисѧ, и҆ та́йнѡ съ ни́ми бе́сѣдꙋѧ христїѧ́нство ᲂу҆карѧ́ти, а҆ нѐ па́че тѣ́хъ ᲂу҆странѧ́тисѧ, и҆ ꙗ҆́вѣ си́хъ нече́стїе ѡ҆блича́ти: да прі́йдꙋтъ на́мѧ нн҃ѣ, и҆ въ всѧ̀ днѝ живота̀ мое́гѡ, всѧ̀ клѧ́тъвы ꙗ҆́же въ второꙁако́нїи Мꙍѵꙵсїй написа̀, и҆ трѧсе́нїе Ка́їновѡ, и҆ прока́ꙁа Гіе́ꙁїева: къ си́мъ же и҆ ка́ꙁнемъ гра́скихъ за́конѡвъ да бꙋ́дꙋ пови́ненъ неѿло́жнѡ: Въ бꙋ́дꙋщомъ же вѣ́цѣ да бꙋ́дꙋ проклѧ́тъ, и҆ трепроклѧ́тъ, и҆ дш҃а̀ моѧ̀ да бꙋ́детъ ᲂу҆чине́нна съ ᲃатано́ю, и҆ съ бѣ́сы въ гее́ннѣ ѡ҆́гненной, и҆ въ мꙋ́цѣ вѣ́чной. А҆ми́нь.

А҆́ще Сараци́нъ є҆́стъ ѡ҆глаше́нный, Свѧти́тель въпраша́етъ є҆гѡ̀ ᲃи́це.

И҆́стиннѡ ли ѿре́клсѧ є҆сѝ ᲃкве́рныѧ Тꙋре́цкїѧ бгопроти́вныѧ вѣ́ры, и҆ Богохꙋ́лнагѡ ᲂу҆чтлѧ и҆́хъ Мехме́та, и҆ є҆гѡ̀ всѣ́хъ въспрїе́мникѡвъ, и҆ всегѡ̀ и҆́хъ хꙋ́лнагѡ ᲂу҆че́нїѧ, и҆ проклина́еши и҆́хъ, и҆ плю́еши ли на́нѧ?

Ѿвѣща́етъ:

Въи́стиннꙋ ѿреко́хсѧ ᲃкве́рныѧ Тꙋре́цкїѧ Богопроти́вныѧ вѣ́ры, и҆ Богохꙋ́лнагѡ ᲂу҆чи́телѧ и҆́хъ Мехме́та, и҆ є҆гѡ̀ всѣ́хъ въспрїе́мникѡвъ, и҆ всегѡ̀ и҆хъ хꙋ́лнагѡ ᲂу҆че́нїѧ, и҆ проклина́ю и҆́хъ, и҆ плю́ю на́нѧ.

Свѧти́тель въпраша́етъ:

И҆сповѣда́еши ли, ꙗ҆́кѡ Ста́ѧ Трои́ца, Ѿц҃ъ, и҆ ᲃн҃ъ, и҆ Дх҃ъ ᲃт҃ы́й, є҆ди́нъ є҆́стъ Бг҃ъ, ᲃꙋщество́мъ нераꙁдѣ́лный, ли́ци же раꙁдѣ́лный, и҆ вѣ́рꙋеши ли въ не́гѡ ꙗ҆́кѡ въ є҆дина́гѡ и҆́стиннагѡ Бг҃а, и҆ покланѧ́ешилисѧ є҆мꙋ̀?

Ѿвѣща́етъ:

И҆сповѣда́ю, ꙗ҆́кѡ ᲃт҃аѧ Трⷪ҇ца Ѿц҃ъ, и҆ ᲃн҃ъ, и҆ Дх҃ъ ᲃт҃ы́й, є҆ди́нъ є҆́стъ Бг҃ъ, ᲃꙋщество́мъ нераꙁдѣ́лный, ли́ци же раꙁдѣ́лный, и҆ вѣ́рꙋю въ не́гѡ, ꙗ҆́кѡ въ є҆ди́нагѡ и҆́стиннагѡ Бг҃а, и҆ томꙋ̀ ꙗ҆́кѡ тво́рцꙋ и҆ ᲃпаси́телю мое́мꙋ покланѧ́юсѧ.

Свѧти́тель въпраша́етъ:

Вѣ́рꙋеши и҆ и҆сповѣдꙋ́еши ли, ꙗ҆́кѡ Гд҃ь на́шъ І҆и҃ᲃ Хᲃ҃, є҆динъ сы́й ѿ ᲃт҃ы́ѧ Трⷪ҇ца, и҆́стинный є҆диноро́дный ᲃн҃ъ и҆ ᲃло́во Бж҃їе, ѿ Ѿца̀ пре́жде всѣ́хъ вѣ́кѡвъ рожде́нное, на землю ᲃпасе́нїѧ ра́ди человѣ́ческагѡ ᲃни́де, и҆ дѣ́йствомъ ᲃт҃гѡ Дх҃а ѿ при́снѡ Дв҃ы Мр҃їѧ въплоти́сѧ, и҆ и҆́стиннѡ бы́сть человѣ́ъ, не ѿстꙋ́плъ свое́го Бжⷭ҇тва̀: и҆ въ є҆ди́номъ съста́вѣ въ дво́хъ ᲃꙋ́ществахъ несмѣ́снѡ, непрело́жнѡ, и҆ не ᲃли́тнѡ, є҆ди́нъ є҆стъ ᲃн҃ъ Бж҃їй, и҆ ᲃн҃ъ ч҆ловѣчий, Бг҃ъ и҆́стинный, и҆ человѣ́къ и҆́стинный?

Ѿвѣща́етъ:

Си́це вѣ́рꙋю, и҆ ᲃи́це несꙋмнѣ́ннѡ и҆сповѣдꙋ́ю.

Свѧти́тель въпраша́етъ:

Вѣ́рꙋеши ли, ꙗ҆́кѡ Гд҃ь на́шъ І҆и҃ᲃ Хᲃ҃, не нꙋ́ждею, но во́лею и҆́стинною, а҆ не привидѣ́нїемъ, человѣ́ческагѡ ра́ди ᲃпⷭ҇нїѧ мꙋ́ки претерпѣ̀, и҆ Распѧ́тїе пло́тїю, Бжⷭ҇твомъ же беꙁъстра́стенъ пребы́стъ: и҆ и҆́стиннѡ ꙗ҆́кѡ человѣ́къ ᲂу҆мрѐ, и҆ погребе́нъ бы́сть, тридне́внѡ же ᲃи́лою Бжⷭ҇тва свое́гѡ Въскресѐ, и҆ на нб҃са̀ съ пло́тїю въꙁнесе́сѧ, и҆ сѣди́тъ ѡ҆де́снꙋю Бг҃а Ѿца̀: и҆ ѿтꙋ́дꙋ па́ки прі́йдетъ ᲃꙋди́ти живы́мъ и҆ ме́ртвымъ, и҆ Царствова́ти и҆́матъ въ вѣ́ки, Ца́рствїю же є҆гѡ̀ не бꙋ́детъ конца̀?

Ѿвѣща́етъ:

Всѧ̀ сі́ѧ ᲃи́це вѣ́рꙋю, и҆ ѿ ᲃе́рдца и҆́стиннѡ и҆сповѣдꙋ́ю.

Свѧти́тель въпраша́етъ:

Вѣ́рꙋеши и҆ и҆сповѣдꙋ́еши ли, ꙗ҆́кѡ Хлѣ́бъ и҆ Винѡ̀, на ᲃт҃ы́хъ Жерто́вницѣхъ въ Бжⷭ҇твнной Лѵтꙋ́ргїи, ѿ на́съ Хрⷭ҇тїа́нъ та́йнѡ ᲃщ҃еннѡдѣйствꙋ́емыѧ, и҆ прїемле́мыѧ, и҆́стиннѡ Бжⷭ҇тве́нною ᲃи́лою невиди́мѡ па́че є҆стества̀, и҆ вы́шше человѣ́ческагѡ ра́ꙁꙋма постыже́нїѧ, въ Тѣ́лѡ и҆ Кро́въ Гд҃а І҆и҃са Хрⷭ҇та пресꙋществꙋ́ютъ и҆ претварѧ́ютсѧ: и҆ ꙗ҆́кѡ вѣ́рою прїе́млющимъ въ снабдѣ́нїе ѡ҆ставле́нїѧ грѣхѡ́въ, ѡ҆сщ҃е́нїѧ дш҃ѝ и҆ тѣ́ла, живота̀ вѣ́чнагѡ, и҆ Ца́рствїѧ нбⷭ҇нагѡ наслѣ́дїѧ быва́ютъ?

Ѿвѣща́етъ:

Вѣ́рꙋю и҆ ѿ ᲃе́рдца и҆́стиннѡ ᲃи́це и҆сповѣдꙋ́ю, и҆ са́мъ ᲃи́мъ Бжⷭ҇тве́ннымъ Та́йнамъ причасти́тисѧ жела́ю.

Свѧти́тель въпраша́етъ:

Вѣ́рꙋеши ли, ꙗ҆́кѡ Та́йна ᲃт҃гѡ Креще́нїѧ є҆́йже сподоби́тисѧ жела́еши, и҆ и҆́стинное є҆́стъ ѡ҆чище́нїе, всѣ́хъ грѣхѡ́въ, и҆ порожде́нїе дх҃о́вное, и҆ ѿ ᲃн҃а поги́бели, Сн҃а Бж҃іѧ и҆ наслѣ́дника Ца́рствїѧ нбⷭ҇нагѡ тво́ритъ, вѣ́рою Креща́ющагѡсѧ?

Ѿвѣща́етъ:

Си́це ѡ҆ ᲃт҃о́мъ Креще́нїи вѣ́рꙋю и҆ и҆сповѣдꙋ́ю, и҆ ᲃа́мъ ᲃподоби́тисѧ семꙋ̀ ᲂу҆се́рднѡ жела́ю.

Свѧти́тель въпраша́етъ:

Вѣ́рꙋеши ли, ꙗ҆́кѡ Прⷭ҇таѧ Дв҃а Мрїѧ ро́ждшаѧ пло́тїю Ха҃ Бг҃а на́шегѡ, ꙗ҆́кѡже пре́жде Ржⷭ҇тва̀ бы́стъ чⷭ҇тою Дв҃ою, ᲃи́це и҆ въ Рождествѣ̀, и҆ по Рождествѣ̀ Дв҃ою въ вѣ́ки пребыва́етъ: и҆ досто́йнѣ и҆менꙋ́ема є҆́стъ Бц҃а, поне́же Бг҃а въчеловѣ́чшасѧ въи́стиннꙋ роди́ла є҆стъ, и҆ сегѡ̀ ра́ди по благода́ти всеѧ̀ тва́ри є҆́стъ Гжⷭ҇а и҆ Влады́чица, и҆ чтⷭ҇нѣ́йшаѧ и҆ вы́шшаѧ є҆́стъ Херꙋви́мѡвъ и҆ Серафи́мѡвъ: и҆ ꙗ҆́кѡ Мт҃и и҆мꙋ́щаѧ вели́кое дерꙁнове́нїе, къ Сн҃ꙋ свое́мꙋ и҆ Бг҃ꙋ на́шемꙋ, мо́литсѧ ѡ҆ на́съ и҆ млⷭ҇тива намъ тогѡ̀ тво́ритъ: тѣ́мъ же досто́итъ всѣ́мъ вѣ́рнымъ па́че всѣ́хъ ᲃт҃ы́хъ чти́ти ю҆̀ и҆ покланѧ́тисѧ є҆́й, и҆ ꙗ҆́кѡ да моли́тсѧ ѡ҆ ни́хъ благоговѣ́инѡ приꙁыва́ти ю҆̀?

Ѿвѣща́етъ:

Всѧ̀ сі́ѧ ѡ҆ Прⷭ҇тѣ́й Дв҃ѣ Бц҃и Ма́рїи ᲃи́це вѣ́рꙋю и҆ си́це и҆сповѣдꙋ́ю и҆ ꙗ҆́кѡ Бж҃їю Мт҃ръ чтꙋ̀ и҆ покланѧ́юсѧ є҆́й, и҆ є҆́же моли́тисѧ ѡ҆ мнѣ̀ благоговѣ́инѡ приꙁыва́ю ю҆̀.

Свѧти́тель въпроша́етъ:

Вѣ́рꙋеши ли ꙗ҆́кѡ А҆по́столи, Проро́ци, Мч҃ници, Ꙋ҆ч҃телїе, И҆сповѣ́дници, и҆ Преподо́бнїи и҆ всѝ ᲃт҃ы́и, Ха҃ Бг҃а проповѣда́вшїи, и҆ томꙋ̀ благоꙋгоди́вшїи, и҆́хъ же Це́ркѡвъ ᲃт҃а́ѧ чте́тъ и҆ въ мо́лбꙋ приꙁыва́етъ, въи́стиннꙋ сꙋ́ть ᲃт҃ы́и и҆ вѣ́рнїи рабѝ, и҆ слꙋжи́телїе Бж҃їи, дрꙋ́ꙁи же и҆ ᲂу҆го́дници є҆гѡ̀; и҆ въ нбⷭ҇ныхъ дво́рѣхъ веселѧ́щесѧ нн҃ѣ, за всѧ̀ Хрⷭ҇тїаѧ́ны мо́лѧтсѧ всегда̀, и҆ сегѡ̀ ра́ди ѿ всѣ́хъ вѣ́рныхъ, досто́йни сꙋ́тъ че́сти и҆ приꙁыва́нїѧ?

Ѿвѣща́етъ:

Ꙍ҆ всѣ́хъ ᲃт҃ы́хѣ Бжїихъ ᲃи́це вѣ́рꙋю, и҆ тѣ́хъ ꙗ҆́кѡ ᲃт҃ы́хъ дрꙋ́гѡвъ, слꙋжи́телей же и҆ вѣ́рныхъ, рабѡ́въ Бж҃іихъ, чтꙋ̀ и҆ въ мо́лбꙋ приꙁыва́ю.

Свѧти́тель въпроша́етъ:

Вѣ́рꙋеши и҆ и҆сповѣдꙋ́еши ли, ꙗ҆́кѡ четы́ри Е҆ѵⷢ҇лїѧ, и҆ всѐ но́вагѡ завѣ́та А҆по́столскаѧ писа́нїѧ Дх҃омъ ᲃт҃ы́мъ ᲃъставле́нное, Богодꙋхнове́нное же и҆ Богонаꙋче́нное є҆́стъ писа́нїе, и҆ ꙗ҆́кѡ ᲃт҃о и҆ ᲃп҃си́телна прїе́млеши, и҆ лобыꙁа́еши ли ѧ҆̀; Непрїемлю́щихъ же и҆ нечести́вѡ хꙋлѧ́щихъ ѧ҆̀, ѿмѣта́ешилисѧ и҆ проклина́еши ли?

Ѿвѣща́етъ:

Четы́ри Е҆ѵⷢ҇лїѧ и҆ всѧ̀ но́вагѡ завѣ́та А҆пⷭ҇толскаѧ писа́нїѧ, Богодꙋхнове́нное писа́нїе бы́ти вѣ́рꙋю, и҆ и҆сповѣдꙋ́ю, и҆ ꙗ҆́кѡ ᲃт҃а прїе́млю, чтꙋ̀ и҆ лобыꙁа́ю: непрїе́млющихъ же и҆ хꙋлѧщихъ сі́ѧ ѿрица́юсѧ и҆ проклина́ю.

Ст҃ль въпроша́етъ:

Всѧ̀ А҆пⷭ҇тлскаѧ и҆ Ѿц҃ъ ᲃт҃ыхъ преда́нїѧ и҆ Та́йны ᲃт҃ы́ѧ Церкѡ́вныѧ, и҆ всѧ̀ благочести́выѧ Хрїстїѧ́нскїѧ ѡ҆бы́чаѧ и҆ Моли́твы, ꙗ҆́же Це́ркѡвъ ᲃт҃а́ѧ Каѳꙍли́ческаѧ Събѡ́рнаѧ съдержи́тъ, ᲃт҃а бы́ти и҆ дш҃еспаси́телна, вѣ́рꙋеши и҆сповѣда́еши и҆ прїе́млеши ѧ҆̀?

Ѿвѣща́етъ:

Всѧ̀ сі́ѧ ᲃт҃а и҆ дш҃еспаси́телна бы́ти вѣ́рꙋю, и҆ и҆сповѣдꙋ́ю и҆ прїе́млю ѧ҆̀.

Ст҃ль въпроша́етъ:

Вѣ́рꙋеши и҆ и҆сповѣдꙋ́еши ли ꙗ҆́кѡ Кре́стъ Гд҃а на́шегѡ І҆и҃са Ха҃ на не́мъ же пло́тїю Распѧ́тъ бы́сть, не ктомꙋ̀ ᲂу҆жѐ клѧ́твѣ и҆ ᲃме́рти ѡ҆рꙋ́дїе є҆́стъ, но свободы̀, и҆ живота̀ вѣ́чнагѡ зна́менїе, и҆ є҆́же на дїѧ́вола и҆ на ᲃме́рть побѣ́ды: зна́менїе же є҆гѡ̀ и҆ и҆ꙁъѡбраже́нїе, ᲃи́лою на не́мъ Распѧ́тагѡ Ха҃, бѣ́сѡмъ є҆́стъ прогна́нїе, и҆ ѿ ко́ꙁней и҆ сѣ́тей дїѧ́волскихъ Вѣ́рныхъ и҆ꙁбавлѧ́етъ и҆ свобожда́етъ?

Ѿвѣща́етъ:

Си́це ѡ҆ Крестѣ̀ Гдн҃емъ вѣ́рꙋю и҆ и҆сповѣдꙋ́ю, и҆ са́мъ ᲃп҃си́телнымъ ᲃи́мъ зна́менїемъ ᲃебѐ на всѧ̀ дїѧ́волскїѧ ᲃѣ́ти въѡрꙋжа́ю, и҆ вѣ́рꙋю ꙗ҆́кѡ ᲃи́ла Распѧ́тагѡ на Крестѣ̀ Ха҃ Бг҃а на́шгѡ и҆ꙁба́витъ мѧ̀ ѿ нихъ.

Сі́ѧ же гл҃ѧ̀ знамена́етъ себѣ̀ зна́менїемъ Крестнымъ.

Свѧти́тель въпроша́етъ:

Че́стныѧ И҆́коны, є҆́же по пло́ти къ человѣ́кѡмъ ꙗ҆вле́нїѧ Бж҃їѧ ᲃло́ва и҆ꙁъѡбража́ющаѧ, и҆ нетлѣ́ннѡ тогѡ̀ ро́ждшїѧ Пречⷭ҇тыѧ Бц҃а, Богови́дныхъ А҆гг҃лъ и҆ всѣ́хъ ᲃт҃ы́хъ, ꙗ҆́кѡ первоѡ́браꙁнаѧ и҆ꙁъѡбража́ющїѧ, и҆ чⷭ҇тиже досто́йны сꙋ́щїѧ, прїе́млеши ли, чте́ши, и҆ лобыꙁа́еши ли ѧ҆̀: и҆ всѣ́хъ И҆́дѡлами ты́ѧ нечести́во нарица́ющихъ, проклина́еши ли?

Ѿвѣща́етъ:

Че́стныѧ И҆́кꙍны Бж҃іѧ ᲃло́ва въплоще́нїѧ и҆ꙁъѡбражающїѧ, Прⷱ҇ты́ѧ Бц҃а, и҆ всѣ́хъ ᲃт҃ыхъ, ꙗ҆́кѡ досто́йныѧ че́сти прїемлю̀, чтꙋ̀, и҆ лобыꙁа́ю, и҆ всѣ́хъ ты́ѧ не прїемлю́щихъ, па́чеже И҆́дѡлами нарица́ющихъ, ꙗ҆́кѡже нечести́выхъ ѿмѣта́юсѧ и҆ проклина́ю и҆́хъ.

Свѧти́тель въпроша́етъ:

Всѧ̀ сі́ѧ ѿ всегѡ́ ли ᲃе́рдца и҆ ѿ всеѧ̀ дш҃а̀ и҆ проиꙁволе́нїѧ твое́гѡ, и҆́стиннѡ ᲃпⷭ҇нїѧ дш҃евнагѡ ра́ди ᲃи́це и҆сповѣда́еши и҆ не ле́стнѡ къ Вѣ́рѣ Хрїстїѧ́нской прихо́диши, и҆ сп҃си́телнагѡ Креще́нїѧ ᲃподоби́тисѧ жела́еши?

Ѿвѣща́етъ:

И҆́стиннѡ сі́ѧ всѧ̀, ѿ всегѡ̀ ᲃе́рдца ѿ всеѧ̀ дш҃а̀ и҆ ѿ всегѡ̀ проиꙁволе́нїѧ мое́гѡ, ꙗ҆́коже и҆сповѣда́хъ и҆сповѣдꙋ́ю, и҆ исповѣда́ти да́же до кончины̀ живота̀ мое́гѡ ѡ҆бѣща́юсѧ, и҆ кро́мѣ всѧ́коѧ ле́сти къ Вѣ́рѣ Хрїстїѧ́нской прихождꙋ̀, и҆ Креще́нїѧ ᲃп҃си́телнагѡ жела́ю.

Свѧти́тель глаголе́тъ:

А҆́ще ᲃи́це въи́стиннꙋ ꙗ҆́кѡ же ре́клъ єсѝ є҆стъ, пре́дъ Гд҃емъ Бо́гомъ къ не́мꙋ же прибѣ́глъ є҆́сѝ, и҆ пре́дъ всею̀ Церквїю клѧ́твою сі́ѧ и҆ꙁвѣстѝ.

Ѿнъ же а҆́ще честѝ ᲂу҆мѣ́етъ, ха́ртїю держа̀ въ рꙋцѣ̀, чте́тъ: А҆́ще ли же невѣ́жда є҆́стъ, то въспрїе́мникъ є҆гѡ̀, и҆лѝ є҆ди́нъ ѿ Кли́рикъ, по сло́вꙋ чте́тъ, ѡ҆́нъ же по не́мъ всѧ̀ сі́ѧ гл҃етъ:

А҆́ꙁъ И҆мⷬ҇къ: и҆́же дне́сь ѿ нече́стїѧ Тꙋре́цкиго къ Вѣ́рѣ Хрїстїѧ́нстѣй прихождꙋ̀, пре́дъ всевидѧ́щимъ, и҆ всевѣ́дающимъ Гд҃емъ Бо́гомъ, є҆гѡ́же нн҃ѣ и҆́стиннѡ и҆сповѣда́хъ, и҆ пред ᲃт҃о́ю є҆гѡ̀ Це́рквїю, и҆́стиннѡ и҆сповѣда́ю, и҆ клѧ́твою ᲃі́е моѐ и҆сповѣда́нїе и҆ꙁвѣствꙋ́ю, ꙗ҆́кѡ ни є҆дины́ѧ ра́ди бѣды̀, и҆лѝ нꙋ́жда, и҆лѝ прибы́тка ра́ди ко́его привре́меннагѡ ни́же ле́стїю и҆лѝ съ лицѣ́мерїемъ, нечести́выѧ и҆ бг҃проти́вныѧ Тꙋре́цкиѧ ѿрица́юсѧ вѣ́ры и҆ всѣ́хъ ба́снїй и҆ хꙋ́лъ прокллѧ́тыхъ Мехме́товыхъ и҆ всегѡ̀ беꙁꙁа́коннагѡ и҆́хъ за́кона, и҆ къ Хрⷭ҇тїѧ́нъской ᲃп҃си́телной и҆ непоро́чной прихождꙋ̀ Вѣ́рѣ, и҆ ᲃи́це ꙗ҆́кѡже и҆сповѣда́хъ: и҆сповѣдꙋ́ю и҆ вѣ́рꙋю: но и҆́стиною само́ю вѣ́ры Хрїстїѧ́нскїѧ побѣжде́нъ, и҆ сама́го ра́ди ᲃпⷭ҇нїѧ дш҃а̀ мое́ѧ, ѿ всеѧ̀ дш҃а̀, и҆ ѿ всегѡ̀ ᲃе́рдца мое́гѡ Ха҃ Бг҃а ᲃп҃си́телѧ всегѡ̀ ми́ра любѧ̀, и҆ и҆ꙁвѣ́стнѡ вѣ́дый ꙗ҆́кѡ всѝ въ Ѿца̀, и҆ Сн҃а, и҆ ᲃт҃а́гѡ Дх҃а є҆ди́нагѡ Бг҃а въ тре́хъ ли́цехъ ᲃꙋ́щагѡ, невѣ́рꙋющїи вѣ́чнѡ погиба́ютъ, къ Хрїстїѧ́нстѣй Вѣ́рѣ прихождꙋ̀, и҆ Хрїстїѧни́нъ бы́ти хощꙋ̀, и҆ Креще́нїѧ ᲃт҃а́гѡ ᲃподоби́тисѧ жела́ю. А҆́ще же ле́стїю и҆ лицемѣ́рнѡ сі́ѧ и҆сповѣдꙋ́а́ю, а҆ не ѿ вѣ́ры вседш҃ныѧ и҆ ᲃерде́чныѧ вѣ́ры, къ Хв҃ой прихождꙋ̀ вѣ́рѣ, да бꙋ́дꙋ проклѧ́тъ, и҆ трепроклѧ́тъ и҆ дш҃а̀ моѧ̀ да бꙋ́детъ въчине́нна съ ᲃатано́ю, и҆ съ бѣ́сы є҆гѡ̀ въ гее́ннѣ ѡ҆гне́нной, и҆ въ мꙋ́цѣ вѣ́чной, А҆минь.

и҆лѝ и҆́нагѡ є҆ретика̀ невѣ́рꙋющагѡ въ є҆дина́гѡ Бг҃а въ Трⷪ҇ци слави́магѡ, и҆ не Креща́ющагосѧ въ И҆мѧ̀ Ѿца̀ и҆ Сн҃а и҆ ᲃт҃а́гѡ Дх҃а, въ трѝ погрꙋже́нїѧ, ѡ҆ и҆сповѣда́нїи Вѣ́ри.

А҆́ще бо ѿ си́цевыхъ Е҆рети́къ є҆́стъ ѡ҆глаше́нный.

Свѧти́тель въпраша́етъ є҆гѡ̀ ᲃи́це:

И҆́стиннѡ ли ѿре́клсѧ є҆сѝ всегѡ̀ нечести́вагѡ зловѣ́рїѧ, и҆ всѣ́хъ проклѧ́тыхъ Е҆рети́кѡвъ, ѿ ᲃт҃ы́хъ ᲃедмѝ Вселе́нскихъ Събо́рѡвъ А҆наѳе́мѣ преда́ныхъ, и҆ всегѡ̀ Богохꙋ́лнагѡ и҆ Це́ркви ᲃт҃о́й Правосла́внѡ Каѳꙍли́цкой проти́внагѡ и҆́хъ ᲂу҆че́нїѧ, и҆ проклина́еши ли и҆́хъ, и҆ плю́еши ли на́нѧ?

Ѿвѣща́етъ:

Въи́стиннꙋ ѿреко́хсѧ всегѡ̀ нечести́вагѡ зловѣ́рїѧ, всѣ́хъ проклѧ́тыхъ є҆рети́кѡвъ, ѿ ᲃт҃ы́хъ ᲃедмѝ Вселе́нскихъ Събо́рѡвъ А҆наѳе́мѣ преда́ныхъ, и҆ всегѡ̀ Богохꙋ́лнагѡ и҆ Це́ркви ᲃт҃о́й Правосла́внѡ Каѳꙍли́цкой проти́внагѡ и҆́хъ ᲂу҆че́нїѧ и҆ проклина́ю и҆́хъ, и҆ плю́ю на́нѧ.

Свѧти́тель въпраша́етъ:

Поне́же ѿре́клсѧ є҆сѝ всѣ́хъ проклѧ́тыхъ и҆ Богоме́ръꙁкихъ є҆́ресей, и҆ и҆́стиннымъ христїѧ́ниномъ бы́ти хо́щеши, пре́дъ все́ю Црк҃вїю Хв҃ою и҆́стиннѡ и҆сповѣждъ, ка́кѡ Вѣ́рꙋеши въ є҆дина́гѡ Бг҃а въ Трⷪ҇ци слави́магѡ?

Ѿвѣща́етъ:

Вѣ́рꙋю въ є҆дина́го Бг҃а, въ тре́хъ Ли́цехъ раꙁдѣ́лнѡ, нераꙁдѣ́лнꙋю Трⷪ҇цꙋ славѧ̀ въ є҆ди́нствѣ, и҆ є҆диницꙋ въ Трⷪ҇ци почита́ѧ.

Свѧти́тель въпраша́етъ:

Кото́рое є҆́стъ въ ᲃт҃ѣ́й Трⷪ҇ци пе́рвое лицѐ, и҆ ка́кѡ ѡ҆не́мъ вѣ́рꙋеши?

Ѿвѣща́етъ:

Вѣ́рꙋю пе́рвое бы́ти лицѐ въ ᲃт҃ѣ́й Трⷪ҇ци, Ѿца̀ и҆́же є҆́стъ беꙁнача́лный, не рожде́нный, и҆ беꙁвино́вный: ᲃа́мъ же є҆́стъ беꙁнача́лное нача́ло, и҆сто́чникъ, ко́рень, и҆ вина̀, ᲃн҃ꙋ въ беꙁнача́лномъ ᲂу҆мо́мъ непостыжи́момъ рожде́нїи, и҆ Дх҃ꙋ ᲃт҃о́мꙋ въ предъвѣ́чномъ нескаꙁа́нномъ и҆схожде́нїи, и҆ ꙗ҆́кѡ се́й є҆́стъ съꙁда́тель и҆ тво́рецъ нб҃а и҆ землѝ, и҆ всѣ́хъ види́мыхъ и҆ невиди́мыхъ тва́рей зижди́тель.

Свѧти́тель въпраша́етъ:

Кото́рое є҆́стъ вто́рое въ ᲃт҃ѣ́й Трⷪ҇ци лицѐ, и҆ ка́кѡ ѡ҆не́мъ вѣ́рꙋеши?

Ѿвѣща́етъ:

Вѣ́рꙋю второ́е бы́ти въ ᲃт҃ѣ́й Трⷪ҇ци лицѐ, Сн҃а, и҆́же ѿ Ѿца̀ пре́жде всѣ́хъ вѣ́кѡвъ несъꙁда́нный ни ᲃътворе́нный, но беꙁстра́стнѡ вы́шше всѧ́кагѡ ᲂу҆ма̀ постыже́нїѧ є҆́стъ рожде́нный, Ѿцꙋ̀ же и҆ Дх҃ови ᲃт҃о́мꙋ, є҆́стъ събеꙁнача́лный, є҆диносꙋ́щный, ᲃъестестве́нный, съра́вный, съпрⷭ҇носꙋ́щный, и҆ съпресто́лный, и҆ зижди́тель и҆ тво́рецъ всѣ́хъ види́мыхъ и҆ невиди́мыхъ тва́рей.

Свѧти́тель въпраша́етъ:

Кото́рое є҆́стъ тре́тие въ ᲃт҃ѣ́й Трⷪ҇ци лицѐ, и҆ ка́кѡ ѡ҆не́мъ вѣ́рꙋеши?

Ѿвѣща́етъ:

Вѣ́рꙋю тре́тие бы́ти въ ᲃт҃ѣ́й Трⷪ҇ци лицѐ, Дх҃а ᲃт҃а́гѡ, Гд҃а животворѧ́щагѡ, и҆́же ѿ Ѿца̀ є҆дина́гѡ несъꙁда́нный ни сътворе́нный є҆́стъ, но нача́лѡ събеꙁнача́лное є҆стестве́ннымъ и҆схожде́нїемъ и҆ма́тъ: Ѿцꙋ̀ же и҆ Сн҃ови є҆́стъ є҆диносꙋ́щенъ, ᲃъестестве́нъ, ᲃъбеꙁнача́ленъ, ᲃъра́венъ, ᲃъпресто́ленъ, ᲃъприсносꙋ́щенъ, ᲃъслави́мъ же и҆ ᲃъпокланѧ́емъ: Проро́ки и҆ А҆по́столы глагола́вый: Мч҃ники ᲂу҆крѣпи́вый: Ѿцѧ̀ ᲃт҃ы́ѧ ᲂу҆ч҃тли Цркѡ́вныѧ на Собѡ́рѣхъ и҆ въ писа́нїихъ въдхнꙋ́вый и҆ ѡ҆корми́вый: и҆́же ᲃъ Ѿц҃емъ и҆ Сн҃омъ є҆́стъ всѣ́хъ тва́рей види́мыхъ и҆ невиди́мыхъ тво́рецъ, зижди́тель, и҆ Бг҃ъ.

Свѧти́тель въпраша́етъ:

Ꙍ҆ всѣ́хъ си́хъ тре́хъ Бжⷭ҇твенныхъ ли́цехъ ка́кѡ вѣ́рꙋеши?

Ѿвѣща́етъ:

Вѣ́рꙋю, Ѿца̀ бы́ти Бг҃а, Сна Бг҃а, и҆ Дх҃а ᲃта҃гѡ Бг҃а, но не трѝ сꙋ́тъ Бг҃ѝ, но є҆ди́нъ Бг҃ъ, є҆ди́нъ ᲃъꙁда́тель, и҆скꙋпи́тель, и҆ ѡ҆ст҃и́тель тва́ри: ᲃꙋщество́мъ съвокꙋплѧ́емый, ли́ци же раꙁдѣлѧ́емый: є҆дино̀ Бжⷭ҇тво̀, є҆динꙋ̀ ᲃи́лꙋ, є҆динꙋ̀ власть, во́лю же и҆ дѣ́йство и҆мꙋ́щагѡ: и҆ ᲃи́це єдина́гѡ Бг҃а въ Трⷪ҇ци, и҆ Трⷪ҇цꙋ въ є҆динъствѣ славлю̀ и҆ и҆сповѣдꙋ́ю.

Свѧти́тель въпраша́етъ:

Чи́мъ лицѐ є҆дино̀, ѿ дрꙋ́га раꙁдѣлѧ́етсѧ?

Ѿвѣща́етъ:

Вѣ́рꙋю, ꙗ҆́кѡ лицѐ ѿчее, ѿ Сн҃а ѿчествомъ, и҆ беꙁнача́лствомъ; ѿ Дх҃а же ᲃт҃а́гѡ, и҆ беꙁнача́лствомъ и҆ проиꙁво́дствомъ, и҆лѝ дхне́нїемъ ꙗ҆́кѡ пе́рвое въ Бжⷭ҇твѣ̀ лицѐ раꙁдѣлѧ́етсѧ. Сн҃о́внее же лицѐ ѿ Ѿца̀ ꙗ҆́кѡ ѿ пе́рвагѡ вто́рое лицѐ, и҆ ѿ тре́тїѧгѡ Дх҃а ᲃт҃а́гѡ Сн҃овствомъ, и҆ рожде́нїемъ раꙁдѣлѧ́етсѧ. Дх҃а же ᲃт҃а́гѡ лицѐ ѿ Ѿца̀ ꙗ҆́кѡ ѿ первагѡ, ѿ Сн҃а же, ꙗ҆́кѡ ѿ вторагѡ въ Бжⷭ҇твѣ́ лица̀, и҆схожде́нїемъ раꙁдѣлѧ́етсѧ.

Свѧти́тель въпраша́етъ:

Ꙍ҆ въплоще́нїи Сн҃а Бж҃їѧ ка́кѡ вѣ́рꙋеши?

Ѿвѣща́етъ:

Вѣ́рꙋю ꙗ҆́кѡ Гд҃ь на́шъ І҆и҃ᲃ Хᲃ҃ ᲃн҃ъ Бж҃їй є҆диноро́дный, є҆ди́нъ ѿ ᲃт҃ы́ѧ Трⷪ҇ца, свѣ́тъ сы́й беꙁлѣ́тный, ѿ Ѻ҆ц҃а̀ свѣ́та беꙁнача́лнагѡ, Бг҃ъ и҆́стинный ѿ Бг҃а и҆́стиннагѡ рожде́нный, а҆ не сътворе́нный, Бг҃ꙋ же Ѿц҃ꙋ и҆ Дх҃ови ᲃт҃о́мꙋ є҆диносꙋ́щный, на́съ дѣ́лѧ человѣ́кѡвъ, и҆ на́шегѡ ра́ди ᲃпⷭ҇нїѧ, ᲃни́де съ нб҃съ, и҆ въплоти́сѧ ѿ Дх҃а ᲃт҃а́гѡ, и҆ ѿ при́снѡ Дв҃ы Мр҃іѧ Бц҃а, и҆ человѣ́къ бы́сть въ все́мъ намъ подо́бенъ ра́ꙁвѣ грѣха̀. Не прело́жъ члчⷭ҇тва въ Бжⷭ҇тво̀, ни́же Бжⷭ҇тва̀ въ члчⷭ҇тво, но Е҆ди́нъ сы́й ᲃн҃ъ Бж҃ій, Бг҃ъ и҆стинный, и҆ ч҃лкъ съверш́нный въ вѣ́ки пребыва́етъ. И҆ ꙗ҆́кѡ человѣ́къ ᲂу҆́бѡ въꙁалка́лъ, въꙁжажда́лъ, ᲂу҆трꙋди́лсѧ, и҆ прослеꙁи́лсѧ є҆́стъ: ꙗ҆́кѡ Бг҃ъ же мо́рю и҆ вѣ́трѡмъ запрѣ́ти́лъ, бѣ́сѡмъ и҆ꙁыйтѝ, и҆ ме́ртвымъ въста́ти повелѣ́лъ, и҆ беꙁчисле́ннаѧ чꙋдодѣствова́лъ є҆́стъ. И҆ то́йжде Хᲃ҃ Бг҃ъ на́шъ, во́лею, а҆ не нꙋ́ждею, ни́же привидѣ́нїемъ, и҆́стинною пло́тїю, є҆ю́же прїѧ́лъ є҆́стъ ѿ при́снѡ Дв҃ы Ма́рїѧ, ᲃпⷭ҇нїѧ на́шегѡ ра́ди, и҆́стиннѡ ꙗ҆́кѡ человѣ́къ, беꙁста́стный ᲃы́й Бжⷭ҇тво́мъ, стрⷭ҇ти лю́тыѧ, и҆ бо́лѣꙁни раꙁли́чныѧ, Распѧ́тїе на Крестѣ̀, ᲃме́рть же, и҆ погребе́нїе при По́нтстѣмъ Піла́тѣ претерпѣ́лъ є҆́стъ. И҆ въ гро́бѣ пло́тїю ꙗ҆́кѡ ме́ртвъ положе́нъ бы́сть, ꙗ҆́кѡ Бг҃ъ же ме́ртвыѧ ᲃи́лою свое́ю вꙁдви́глъ є҆́стъ: и҆ съ дш҃е́ю и҆ Бжⷭ҇тво́мъ въ а҆́дъ съше́дъ, раꙁдрꙋши́лъ є҆́стъ держа́вꙋ и҆мꙋ́щагѡ держа́вꙋ ᲃме́рти: и҆ дш҃ѧ̀ ᲂу҆сопшихъ ᲃт҃ы́хъ та́мѡ съдержи́мыхъ, ѿ ᲂу҆́ꙁъ свободи́въ, Бжⷭ҇тве́нною свое́ю си́лою съ собо́ю держа́внѡ и҆ꙁве́лъ є҆́сть.

Свѧти́тель въпраша́етъ:

Ка́кѡ ѡ҆ пло́ти Гд҃а на́шегѡ І҆и҃ᲃ Ха҃, и҆ ѡ҆ тридне́вномъ є҆гѡ̀ и҆ꙁъ ме́ртвыхъ Въскрⷭ҇нїи вѣ́рꙋеши?

Ѿвѣща́етъ:

Вѣ́рꙋю, ꙗ҆́кѡ Хᲃ҃ Бг҃ъ на́шъ Бжⷭ҇твенною свое́ю ᲃи́лою, пло́ть свою̀ и҆́стиннѡ ᲃтрада́вшꙋю, ᲂу҆мершꙋю же и҆ погребе́ннꙋю, въ тре́тїй дн҃ь, по Проро́ческѡмъ писа́нїи Въскреси́лъ є҆́стъ: и҆ пресла́внѡ Ꙋч҃никѡмъ свои́мъ, не привидѣ́нїемъ, но и҆́стинною, многа́жды по Въскрⷭ҇нїи ꙗ҆ви́сѧ, и҆ две́рми затворе́нными съ тѣ́ломъ, не ѿверꙁа́ѧ тѣ́хъ, въше́лъ є҆́стъ, и҆ ꙗ҆́лъ є҆́стъ съ ни́ми, и҆ Ребра̀ прободе́нїе, и҆ гво́ꙁдныѧ ꙗ҆́ꙁвы покаꙁа́въ, Ѳꙍмꙋ̀ ᲂу҆вѣри́лъ є҆́стъ. И҆ та́ѧжде прⷭ҇та́ѧ пло́тъ Ха҃ Бг҃а на́шегѡ, и҆́же ѿ Дх҃а ᲃт҃агѡ, и҆ ѿ при́снѡ Дв҃ы Мр҃їѧ Бг҃ъ сы́й и҆́стинный вꙁѧ́лъ є҆́стъ, пре́дъ Въскрⷭ҇нїемъ ѿ четыре́хъ ᲃти́хїй ᲃло́жено сꙋ́щи, ᲃтрада́нїѧмъ, ᲃме́рти, и҆ тлѣ́нїю подле́жнѡ бѣ̀: въ гро́бѣ жѣ и҆стлѣ́нїѧ не ᲂу҆ви́дѣ: по Въскресе́нїи же пресла́вное, нетлѣ́нное, и҆ беꙁстра́стное въ вѣ́ки пребыва́етъ и҆ по сп҃си́телномъ свое́мъ Въскрⷭ҇нїи, Бжⷭ҇тво́мъ нераꙁлꙋ́ченъ сы́й ѿ Ѿца̀, пло́тїю пресла́вною на землѝ ꙗ҆влѧ́ѧсѧ Ꙋч҃никѡ́мъ свои́мъ, четыридесѧ́тъ дні́й пожи́лъ є҆́стъ: четыридесѧ́тагѡ же днѐ съ тое́южде пло́тїю и҆ꙁъ ме́ртвыхъ Въскрⷭ҇шею, на Е҆леꙍ́нскꙋю въꙁше́дъ горꙋ̀, самовла́стнѡ въꙁнесе́сѧ на́ нб҃о, и҆ сѣдѐ ѡ҆де́снꙋю Бг҃а Ѿца̀, и҆ въ то́мжде тѣ́лѣ, и҆́мже ѡ҆́браꙁѡмъ вꙁы́йде на нб҃сѐ, съ ᲃла́вою прі́йдетъ ᲃꙋди́ти живы́мъ и҆ ме́ртвымъ, Пра́веднымъ и҆ грѣ́шнымъ, и҆ въꙁда́ти комꙋ́ждѡ по дѣ́лѡмъ є҆гѡ̀.

Свѧти́тель въпраша́етъ:

Ка́кѡ ѡ҆ Ца́рствїи Хв҃омъ вѣ́рꙋеши?

Ѿвѣща́етъ:

Вѣ́рꙋю, ꙗ҆́кѡ Хᲃ҃ Бг҃ъ на́шъ Бг҃ъ и҆ человѣ́къ сы́й, є҆ди́нъ ᲃн҃ъ Бж҃ій и҆ Дв҃ыѧ, Царъ вѣ́кѡвъ, Ца́ръ ᲃла́вы, Царъ І҆и҃левъ, Ца́ръ нб҃а и҆ землѝ въ вѣ́ки є҆́стъ, и҆ бꙋ́детъ, и҆ вѣ́чномꙋ Ца́рствїю є҆гѡ̀ нѣ́сть, и҆ не бꙋ́детъ конца̀ въ вѣ́ки вѣкѡ́въ.

Свѧти́тель въпраша́етъ:

Ꙍ҆ Мт҃ри Гд҃а на́шегѡ І҆и҃ᲃ Ха҃, ка́кѡ вѣ́рꙋеши?

Ѿвѣща́етъ:

Вѣ́рꙋю, ꙗ҆́кѡ Мт҃и Ха҃ Бг҃а на́шегѡ, ꙗ҆́кѡже пре́жде Ржⷭ҇тва̀ бы́сть Пречⷭ҇тою Дв҃ою, си́це въ Рождествѣ̀, и҆ по Рождесвѣ̀ нетлѣ́нню Дв҃ою, надъ є҆стестве́нныхъ за́кѡны, въ вѣ́ки пребыва́етъ. и҆ поне́же въи́стиннꙋ Бг҃а пло́тїю роди́ла є҆́стъ, Бц҃ꙋ тꙋ и҆менꙋ́ю, и҆ по благода́ти Цари́цꙋ нб҃а и҆ землѝ и҆ Чтⷭ҇нѣ́йшꙋю Херꙋві́мѡвъ, и҆ Серафі́мѡвъ, и҆ всѣ́хъ тва́рей нбⷭ҇ныхъ и҆ зе́мныхъ, ᲃлавнѣ́йшꙋю и҆ вы́шшꙋю бы́ти въꙁвѣща́ю: и҆ ꙗ҆́кѡ Мт҃и дерꙁнове́нїе па́че всѣ́хъ ᲃт҃ы́хъ и҆мꙋ́щаѧ къ Сн҃ꙋ свое́мꙋ и҆ Бг҃ꙋ, за всѧ̀ Хрїстїѧ́ны въ нбⷭ҇ныхъ дво́рѣхъ вы́шше всѣ́хъ ᲃт҃ыхъ въдворѧ́ѧсѧ всегда̀ мл҃итсѧ, и҆сповѣдꙋ́ю.

Свѧти́тель въпраша́етъ:

Ка́кѡ ѡ҆ є҆дино́й, ᲃт҃о́й Събѡ́рной, А҆по́столской Це́ркви вѣ́рꙋеши?

Ѿвѣща́етъ:

Вѣ́рꙋю въ є҆динꙋ̀ нбⷭ҇нꙋю побѣдоно́снꙋю, и҆ зе́мнꙋю борꙋ́щꙋюсѧ, ᲃт҃ꙋ́ю Събѡ́рнꙋю Апⷭ҇лскꙋю Це́ркѡвъ нераꙁдѣ́лнꙋю, на ѡ҆снованїи Апⷭ҇толъ и҆ Прорѡ́къ, на Хє҃ Гд҃ѣ краеꙋго́лномъ Ка́мени, ꙗ҆́кѡ на пе́рвомъ ѡ҆снова́нїи, ѿ дш҃ъ вѣ́рныхъ, въ є҆дино́мъ и҆сповѣда́нїи пра́выѧ Вѣ́ры ᲃъꙁда́ннꙋю. И҆ тое́й Це́ркви є҆дино́й, ꙗ҆́кѡ є҆дино́мꙋ тѣ́лꙋ ѿ мнѡ́гихъ ᲂу҆́дѡвъ съставле́нномꙋ, є҆дино́ю бы́ти гла́вою, и҆ вѣ́чнымъ ᲃтарѣ́йшимъ вы́шшимъ А҆рхїере́емъ, и҆ А҆рхїпастыремъ, є҆дина́гѡ І҆и҃ᲃ Ха҃ Богочлове́ка бы́ти и҆сповѣдꙋ́ю, ѿ негѡ́ же мнѡ́ꙁи вѧ́щшїи и҆ ме́ншїи ᲃщ҃е́нници, Па́стырїе, и҆ Ꙋ҆ч҃тлїе чре́ꙁъ А҆по́столѡвъ дрꙋгопрїима́телнѣ, чи́на ра́ди, правле́нїѧ же и҆ ᲃтрои́телства ᲃт҃ы́хъ єгѡ̀ Та́инъ, вѣ́рнымъ ᲂуставле́ни сꙋть. И҆ ꙗ҆́кѡ въ то́й є҆дино́й Це́ркви, всѝ и҆́же въ Вѣ́рѣ Правосла́вной неꙁибле́мѡ, нада́ждею и҆ любо́вїю ᲂу҆твержде́ни пребыва́ютъ, ꙗ҆́кѡ въ Но́евомъ Ковче́ꙁѣ ѿ пото́па вѣ́чныѧ поги́бели ᲃп҃аса́ютсѧ, благода́ти же Бж҃іѧ здѐ на землѝ сꙋ́ще, по ᲃме́рти же жи́ꙁни беꙁконе́чныѧ въ Ца́рствїи нбⷭ҇номъ сподоблѧ́ютсѧ. И҆ тое́йжде є҆дино́й ᲃт҃о́й, ᲃъбѡ́рной, А҆по́столской Це́ркви, прави́телѧ и҆ ко́рмчїю на ᲃт҃ыхъ Вселе́нскихъ и҆ Помѣ́стныхъ Събѡ́рахъ, и҆ всегда̀ въ Ꙋчт҃лѧхъ, и҆ Па́стырехъ є҆ѧ̀ Дх҃а ᲃт҃а́гѡ бы́ти, несꙋмнѣ́ннѡ и҆сповѣдꙋ́ю.

Свѧти́тель въпраша́етъ:

Ка́кѡ ѡ҆ ᲃт҃о́мъ писа́нїи ве́тхагѡ и҆ но́вагѡ Завѣ́та вѣ́рꙋеши?

Ѿвѣща́етъ:

Вѣ́рꙋю, ꙗ҆́кѡ Писа́нїе ве́тхагѡ и҆ но́вагѡ Завѣ́та, ᲃт҃о́е Богонаꙋченное и҆ Богодꙋхнове́нное є҆́стъ, и҆ Це́ркви ѿ Бг҃а ꙗ҆́кѡ Лѵди́йскїй Ка́мень, въ и҆ꙁъѧвле́нїе свое́ѧ и҆́стинны, въ ѡ҆бличе́нїе ле́сти пода́нѡ є҆́стъ: є҆гѡ́же и҆столкова́тель, и҆ и҆ꙁъꙗсни́тель є҆́стъ Дх҃ъ ᲃт҃ы́й въ ᲃщ҃е́нныхъ Ꙋ҆чи́телехъ Церкѡ́вныхъ, и҆́мъ же да́нѡ є҆́стъ раꙁꙋмѣ́ти Та́йны Ца́рствїѧ нбⷭ҇нагѡ, а҆ не Мі́рскимъ, им҆́же въ при́тчахъ то́чїю раꙁꙋмѣ́нїе да́нѡ є҆́стъ и҆ ꙗ҆́кѡ не писа́нїе Бжⷭ҇тве́нное надъ Це́рквїю, но Це́ркѡвъ надъ писа́нїемъ Бжⷭ҇тве́ннымъ вѧ́щшаѧ є҆́стъ: поне́же пре́жде Бжⷭ҇тве́ннагѡ писа́нїѧ, Це́ркѡвъ Бо́гомъ ᲂу҆ставле́на є҆́стъ: и҆ не писа́нїю Цр҃ѡвъ, но писа́нїе Бжⷭ҇тве́нное Це́ркви, ѿ Бг҃а къ наꙋче́нїю, и҆ и҆столкова́нїю пода́нѡ є҆стъ, и҆сповѣдꙋ́ю.

Свѧти́тель въпраша́етъ:

Ка́кѡ ѡ҆ ᲃт҃ы́хъ Та́йнахъ Це́ркѡ́вныхъ, и҆ ѡ҆ числѣ̀ и҆́хъ вѣ́рꙋеши?

Ѿвѣща́етъ:

Вѣ́рꙋю, ꙗ҆́кѡ Хᲃ҃ Бг҃ъ, въ є҆дино́й, ᲃт҃о́й Събѡ́рной А҆по́столской Въсто́чной свое́й Це́ркви, ᲃедмѝ Та́йнами свои́ми собо́ю ᲂу҆становле́нными, вѣ́рнымъ, ᲃщ҃е́нными ᲃлꙋжи́телъми ᲃвои́ми, грѣхѡ́въ ѡ҆чище́нїе, ѡ҆сщ҃е́нїе, ᲂу҆сн҃вле́нїе, благода́ть, себѣ̀ присвое́нїе и҆ съедине́нїе, и҆ наслѣ́дїе Ца́рствїѧ нбⷭ҇нагѡ; дарꙋ́етъ.

Свѧти́тель въпраша́етъ:

Ка́ѧ є҆́стъ пе́рваѧ Та́йна, и҆ ка́кѡ ѡ҆ не́й вѣ́рꙋеши?

Ѿвѣща́етъ:

Вѣ́рꙋю и҆ исповѣдꙋ́ю, пе́рвꙋю въ Та́йнахъ бы́ти є҆дино̀ Креще́ниїе, въ и҆мѧ̀ Ѿца̀, и҆ Сн҃а, и҆ ᲃт҃гѡ Дх҃а, въ трѝ погрꙋже́нїѧ быва́емое, ꙗ҆́же є҆́стъ пꙋть и҆ две́ръ къ прїѧ́тїю благода́ти въ про́чїихъ Та́йнахъ сꙋ́щей, и҆ къ наслѣ́дїю нбⷭ҇нагѡ Ца́рствїѧ, сі́ѧ Та́йна ѡ҆ставле́нїе грѣхѡ́въ, перворо́днагѡ же, въ не́мъ же всѝ земноро́днїи ражда́ютсѧ, и҆ всѣ́хъ каковѣ́хъ ли́бѡ прибы́тныхъ, ᲂу҆сн҃овле́нїе же, и҆ благода́ть, и҆ наслѣ́дїе Ца́рствїѧ нбⷭ҇нагѡ и҆ ᲃпⷭ҇нїе подае́тъ всѣ́мъ вѣ́рою прїемлю́щимъ ю҆̀.

К семꙋ̀ и҆сповѣдꙋ́ю ꙗ҆́кѡ сі́ѧ Та́йна характи́ръ, сі́естъ, знаменїе ᲂу҆сн҃овленїѧ, нико́лиже и҆стира́тисѧ могꙋ́щее, на дш҃ѝ Креща́ющагосѧ тво́ритъ, и҆ сегѡ̀ ра́ди ника́коже повторѧ́тисѧ мо́жетъ. И҆ ꙗ҆́кѡ кро́мѣ Креще́нїѧ трои́чнымъ въ водѣ̀ погрꙋже́нїемъ, въ И҆мѧ̀ Ѿца̀ и҆ Сна, и҆ ᲃт҃гѡ Дх҃а, по гл҃ꙋ̀ Гд҃ню, никто́же вні́йдетъ въ Ца́рство нбⷭ҇ное.

Свѧти́тель въпраша́етъ:

Ка́кѡ ѡ҆ Креще́нїи младе́нческомъ вѣ́рꙋеши?

Ѿвѣща́етъ:

Вѣ́рꙋю, ꙗ҆́кѡ Креще́нїе ᲃт҃о́е младе́нцемъ нꙋ́жнѡ потре́бнѡ и҆ ᲃп҃сителнѡ є҆́стъ (и҆бѡ̀ кро́мѣ Креще́нїѧ, ника́коже ᲃпⷭ҇ти́сѧ могꙋ́тъ,) и҆ ꙗ҆́кѡ тѣ́мъ Це́ркѡвъ Кмо́трами ве́рꙋ къ Креще́нїю потре́бнꙋю, ꙗ҆́кѡ є҆щѐ несъверше́ннымъ заимствꙋ́етъ.

Свѧти́тель въпраша́етъ:

Кото́раѧ є҆́стъ втора́ѧ Та́йна, и҆ ка́кѡ ѡ҆ не́й вѣ́рꙋеши?

Ѿвѣща́етъ:

Вѣ́рꙋю, ꙗ҆́кѡ вто́раѧ Та́йна є҆́стъ Мѵропомаꙁа́нїе, ѿ Ха҃ Бг҃а ᲂу҆ставле́наѧ, є҆ю́же вѣ́рнымъ благода́ть и҆ да́ръ ᲃт҃гѡ Дх҃а подава́етсѧ, въ крѣ́постъ и҆ мꙋ́жество, въ ᲂу҆твержде́нїе же вѣ́ры, и҆ въ беꙁбоѧꙁне́нное и҆сповѣда́нїе И҆́мени Хв҃а: и҆ ꙗ҆́кѡ а҆́бїе по Креще́нїи Хрїстїѧ́не, пома́ꙁꙋеми, характи́ръ, и҆лѝ печа́ть неи́стира́емꙋѣю на дш҃ѝ, ꙗ҆́кѡ во́ини Хв҃и прїе́млютъ.

Свѧти́тель въпраша́етъ:

Кото́раѧ є҆́стъ тре́тѧѧ Та́йна, и҆ ка́кѡ ѡ҆ не́й вѣ́рꙋеши?

Ѿвѣща́етъ:

Вѣ́рꙋю, ꙗ҆́кѡ тре́тѧѧ Та́йна є҆́стъ, Е҆вхари́стїѧ, и҆́же Хᲃ҃ Бг҃ъ на́шъ на Та́йнѣй свое́й Вече́ри ᲂу҆ставѝ, є҆гда̀ Пречи́стыма свои́ма рꙋ́ка́ма вꙁе́мъ хлѣ́бъ блⷭ҇ви́въ преломи́въ, и҆ Бжⷭ҇тве́нными свои́ми ᲃловесы̀, сі́естъ: Прїймѣ́те, ꙗ҆ди́те, сі́естъ Тѣ́ло моѐ, и҆ проч.: сꙋщество̀ є҆гѡ̀ въ Тѣ́ло своѐ претворѝ, Ꙋч҃никѡмъ свои́мъ подадѐ.

Та́кожде и҆ Вина̀ въ ча́ши ᲃꙋ́щагѡ є҆стество̀, въ Бжⷭ҇тве́ннꙋю свою̀ Кро́въ си́ми словесы̀, сі́естъ: Пі́йте ѿ не́ѧ всѝ, сі́ѧ є҆́стъ Кро́въ моѧ̀ Но́вагѡ завѣ́та и҆ проч.: и҆́стиннѡ пресꙋществова̀. И҆ ꙗ҆́кѡ же тогда̀ є҆дино́ю ᲂу҆ста́вилъ є҆́сть, и҆ нн҃ѣ, всегда̀ ᲃщ҃еннослꙋжи́телъми свои́ми на ᲃт҃ы́хъ Жерто́вницѣхъ, то́йжде Хᲃ҃ Бг҃ъ на́шъ въ Бжⷭ҇тве́нной Лѵтꙋ́ргїи предложе́ный пшени́чный въ ква́сѣ и҆спе́ченый Хлѣ́бъ, и҆ Вино̀ и҆́стинное ѿ пло́да ло́ꙁнагѡ ма́лѡ водо́ю растворе́нное, дѣ́йствомъ прест҃агѡ Дх҃а Бжⷭ҇тве́нными свои́ми предърече́нными словесы̀, въ Тѣ́лѡ и҆ Кро́въ свою̀ преестестве́ннѡ претворѧ́етъ: и҆ ᲂу҆жѐ ктомꙋ̀ не Хлѣ́бъ ни́же Вино̀ є҆́стъ но подъ ви́домъ Хлѣ́ба и҆ Вина̀, ꙗ҆́же непремѣ́нны пребыва́ютъ, и҆́стинное Тѣ́ло, и҆ и҆́стиннаѧ Кро́въ Хв҃а: и҆ си́ми вѣ́рою прїе́млющихъ ѧ҆̀, ѿ грѣ́хъ ѡ҆чища́етъ, ѡ҆сщ҃а́етъ, и҆ себѣ̀ съвокꙋплѧ́етъ.

При се́мъ и҆сповѣдꙋ́ю, ꙗ҆́кѡ є҆дино́ю Хлѣ́ба и҆ Вина̀ сꙋщество̀ въ Тѣ́ло и҆ Кро́въ Хв҃ꙋ претворе́нное, и҆лѝ въ ча́ши, и҆лѝ въ и҆́номъ съсꙋ́дѣ, на Прⷭ҇то́лѣ, и҆лѝ на и҆́номъ мѣ́стѣ стоѧ́щи, и҆́стинное Тѣ́ло и҆ Кро́въ Хв҃а ᲃꙋ́тъ, доне́лиже ви́дъ Хлѣ́ба и҆ Вина̀ цѣ́ло пребыва́етъ, а҆ не то́чїю є҆гда̀ вѣ́рнїи Причаща́ютсѧ: и҆ ᲃегѡ̀ ра́ди Бжⷭ҇тве́нныѧ то́чїю Та́йны Тѣ́ла и҆ Кровѐ Гд҃не́й, слꙋже́бнѡ покланѧ́еми сꙋ́тъ. къ семꙋ̀ и҆сповѣдꙋ́ю ꙗ҆́кѡ сі́ѧ Та́йна въ Лѵтꙋ́ргїи Бжⷭ҇тве́нной, є҆́стъ и҆ и҆сти́нною Тайною, и҆ ᲂу҆блага́лною Же́ртвою: Поели́кѡ ᲂу҆́бѡ є҆́стъ Та́йна, ѡ҆сщ҃енїе вѣ́рнымъ подае́тъ и҆ Хв҃и ᲃъвокꙋплѧ́етъ, и҆ сегѡ̀ ра́ди ко́йждѡ вѣ́рный до́лженъ є҆́стъ и҆сповѣда́нїемъ грехѡ́въ пре́дъ ѡ҆чисти́въ ᲃебѐ, къ Та́йнѣ се́й пристꙋпа́ти, и҆бо̀ недосто́йнѣ ꙗ҆дꙋ́щїи и҆ пі́ющїи, сꙋдъ себѣ̀ ꙗ҆дѧ́тъ и҆ пі́ютъ. По є҆ли́кꙋ же жертво́ю є҆́стъ, грѣхѝ вѣ́рнымъ ѡ҆чища́етъ, и҆ сегѡ̀ ра́ди живы́хъ, и҆ въ вѣ́рѣ ᲂу҆сопшихъ прино́ситсѧ.

Свѧти́тель въпраша́етъ:

Ѿчесогѡ̀ въ Та́йнѣ Е҆ѵхари́стїи Тѣ́лѡ и҆ Кро́въ быва́етъ?

Ѿвѣща́етъ:

Вѣ́рꙋю ꙗ҆́кѡ не ѿ сꙋщества̀ Хлѣ́ба Тѣ́ло Хв҃о, ни́же ѿ сꙋщества̀ Вина̀ Кро́въ є҆гѡ̀ съставлѧ́етсѧ и҆ быва́етъ: но сꙋщество̀ Хлѣ́ба, въ Тѣ́ло Хв҃о ѿ Дх҃а ста́гѡ, и҆ ѿ Пречⷭ҇тыѧ Дв҃ы вꙁѧ́тое, и҆ на нб҃сѝ ѡ҆де́снꙋю Бг҃а Ѿца̀ сѣдѧ́щее, и҆ сꙋщество̀ Вина̀ въ Пречⷭ҇тꙋю є҆гѡ̀ Кро́въ, преестве́ннѡ дѣ́йствомъ Прⷭ҇та́гѡ Дх҃а претварѧ́етсѧ. и҆ є҆ди́нъ и҆ то́йжде Хᲃ҃ Бг҃ъ, є҆ди́нъ є҆́стъ Богочеловѣ́къ ѡ҆де́снꙋю Ѿца̀ сѣдѧ́й, и҆́же и҆ на землѝ въ Це́рквахъ на Прⷭ҇толѣхъ, въ Е҆ѵхари́стїи Та́йнахъ подъ ви́домъ Хлѣ́ба и҆ Вина̀, въ то́мжде є҆ди́номъ ѡ҆дꙋшевле́нномъ и҆ ѡ҆ Бж҃е́нномъ Тѣ́лѣ, є҆ди́нъ ᲃы́й нераꙁдѣ́лный Богочеловѣ́къ. Ксемꙋ̀ вѣ́рꙋю, ꙗ҆́кѡ то́йжде Хᲃ҃ Гд҃ь, по є҆ли́кꙋ є҆́стъ то́чїю Бг҃ъ, ве́ꙁде є҆́стъ, и҆ всѧ̀ и҆сполнѧ́етъ, по є҆ли́кꙋ же Богочеловѣ́къ, съ тѣ́ломъ на нб҃сѝ ѡ҆де́снꙋю Ѿца̀, и҆ на землѝ въ Та́йнахъ Е҆ѵхари́стїи то́чїю є҆стъ, и҆ пребыва́етъ.

Свѧти́тель въпраша́етъ:

Кото́раѧ є҆́стъ четве́ртаѧ Та́йна, и҆ ка́кѡ ѡ҆ не́й вѣ́рꙋеши?

Ѿвѣща́етъ:

Вѣ́рꙋю, ꙗ҆́кѡ четве́ртаѧ Та́йна є҆́стъ, Покаѧ́ние, ѿ Ха҃ Бг҃а ᲂу҆ставле́ннаѧ, є҆ю́же вѣ́рнымъ по Креще́нїи въ грѣ́хъ въпа́дшимъ, ѡ҆ставле́нїе грѣхѡ́въ дае́тсѧ: и҆ ᲃі́ѧ Та́йна къ ᲃтрое́нїю, и҆ раꙁдаѧ́нїю то́чїю ᲃщ҃е́нникѡмъ, ѿ Ха҃ Гд҃а въвѣре́на є҆́стъ, внегда̀ рещѝ А҆по́столѡмъ, Прїймѣ́те Дх҃ъ ᲃт҃ы́й, и҆́мъ же ѿпꙋ́стите грѣхѝ ѿпꙋстѧ́тсѧ, и҆ и҆́мъ же держитѐ, держа́тсѧ. И҆ ꙗ҆́кѡ и҆́стиннѡ ка́ющїисѧ, и҆ ѡ҆ставле́нїѧ по Креще́нїю створе́нныхъ грѣхѡ́въ полꙋчи́ти хотѧ́щїи, трѝ ча́сти ᲃеѧ̀ Тайны, и҆спо́лнити до́лжни сꙋ́тъ, сі́естъ:

Пе́рвое съкрꙋше́нїе болѣꙁне́нное, ᲃъжалѣ́нїемъ ѡ҆ грѣсе́хъ, въ ᲃе́рдцꙋ ᲃвое́мъ и҆мѣ́ти.

Вто́рое же пре́дъ І҆ере́емъ вла́сть свѧꙁа́ти и҆ рѣша́ти и҆мꙋ́щомъ, и҆́стиннѡ всѧ̀ ᲃъгрѣше́нїѧ своѧ̀ и҆сповѣ́сти, проще́нїѧ и҆ раꙁдрѣше́нїѧ ꙗ҆́кѡ ѿ Бг҃а и҆мꙋ́щагѡ вла́сть вѣ́рою проси́ти.

Тре́тее, ᲂу҆се́рднѡ Е҆пити́мїю ѡ҆ грѣсе́хъ ѿ І҆ере́ѧ ᲂу҆ста́вленнꙋю, ᲂу҆се́рднѡ прїѧ́ти, и҆ и҆сполни́ти ско́рѣе тща́тисѧ. и҆ си́цевымъ ѡ҆́браꙁомъ раꙁдрѣше́нїѧ сподоблѧ́ющїисѧ на землѝ є҆щѐ живꙋ́щїи, ꙗ҆́кѡ же преставлѧ́ющїисѧ, и҆ на нб҃сѝ проще́ни, и҆ раꙁдрѣше́ни сꙋ́тъ.

Свѧти́тель въпраша́етъ:

Кото́раѧ є҆́стъ пѧ́таѧ Та́йна, и҆ ка́кѡ ѡ҆ не́й вѣ́рꙋеши?

Ѿвѣща́етъ:

Вѣ́рꙋю, ꙗ҆́кѡ пѧ́таѧ Та́йна є҆́стъ, Е҆леꙍсвѧще́нїе, ѿ Ха҃ Бг҃а ᲂу҆ста́вленаѧ, є҆ю́же І҆ере́ѧми свои́ми въ помаꙁа́нїи Е҆ле́ѧ съ Моли́твою, ѡ҆ставле́нїе ѡ҆ста́нкѡкъ грѣхѡ́вныхъ бо́лнымъ ѡ҆чища́етъ, и҆ Бжⷭ҇твеннымъ свои́мъ смотре́нїемъ по вре́мени и҆ потре́бѣ и҆ здра́вїе дарꙋ́етъ.

Свѧти́тель въпраша́етъ:

Кото́раѧ є҆́стъ ше́стаѧ Та́йна, и҆ ка́кѡ ѡ҆ не́й вѣ́рꙋеши?

Ѿвѣща́етъ:

Вѣ́рꙋю, ꙗ҆́кѡ ше́стаѧ Та́йна є҆́стъ ᲃщ҃е́нство, ѿ Ха҃ Бг҃а ᲂу҆ста́вленаѧ, въ словесе́хъ ѿ негѡ̀ Апⷭ҇лѡмъ рече́нныхъ, ᲃі́е твори́те въ моѐ воспомина́нїе, є҆ю́же дае́тсѧ ѿ Бг҃а рꙋкоположе́нїемъ А҆рхїере́ѵꙵскимъ І҆ере́еви вла́стъ, стро́ити Та́йнами Це́ркѡ́вными, и҆ сі́ѧ ѡ҆сща́ти.

Свѧти́тель въпраша́етъ:

Кото́раѧ є҆́стъ ᲃе́дмаѧ Та́йна, и҆ ка́кѡ ѡ҆ не́й вѣ́рꙋеши?

Ѿвѣща́етъ:

Вѣ́рꙋю, ꙗ҆́кѡ ᲃе́дмаѧ Та́йна є҆́стъ за́конный Бра́къ, и҆лѝ вѣнча́нное ᲃꙋпрꙋ́жество, ѿ Бг҃а въ Раѝ блⷭ҇веннѡ, ѿ Хрⷭ҇та же Гд҃а въ Ка́не галїле́и ᲂу҆твержде́ннѡ, и҆ внегда̀ рещѝ, є҆жѐ Бг҃ъ съчета̀, человѣ́къ да не раꙁлꙋча́етъ. Та́йною ᲂу҆ста́влено є҆́стъ є҆ю́же мꙋ́жъ и҆ жена̀, блⷭ҇ве́нїемъ Це́ркѡ́внымъ съчетава́ютсѧ, є҆́же бы́ти съчета́нїе и҆́хъ Бра́комъ чⷭ҇тнымъ, и҆ ло́жемъ нескве́рнымъ, въ ᲂу҆множе́нїе ᲃѣ́мене къ ᲃла́вѣ Бж҃їей, и҆ въ є҆́же блꙋ́днагѡ раждеже́нїѧ ѡ҆грѣба́тисѧ.

Свѧти́тель въпраша́етъ:

Ка́кѡ ѡ҆ ѡ҆брѧ́дахъ и҆ Церемѡ́нїѧхъ Церко́вныхъ вѣ́рꙋеши?

Ѿвѣща́етъ:

Вѣ́рꙋю, ꙗ҆́кѡ всѧ̀ благоѡ́браꙁныѧ чи́ны, ѡ҆брѧ́ды же ѡ҆де́жды и҆ съсꙋ́ды ᲃщ҃енныѧ, и҆ всѧ̀ про́чаѧ Це́ркѡ́внаѧ ᲂу҆краше́нїѧ, ꙗ҆́же Це́ркѡвъ ᲃт҃а́ѧ Събѡ́рнаѧ А҆по́столскаѧ Въсто́чнаѧ благоче́стнѡ ѿ дре́внихъ А҆по́столскихъ вре́менъ прїѧ́тъ и҆ съде́ржитъ, Бг҃ꙋ ᲂу҆годна и҆ любе́ꙁна, Хрїстїѧ́номъ же дш҃еспаси́телна сꙋ́тъ.

Свѧти́тель въпраша́етъ:

Ка́кѡ ѡ҆ Мни́шескомъ чи́нꙋ вѣ́рꙋеши?

Ѿвѣща́етъ:

Вѣ́рꙋю, ꙗ҆́кѡ Мни́шескїй Двⷭ҇тве́нный и҆ цѣломꙋ́дрный чи́нъ, въ не́мъ же ᲃт҃ы́и Бж҃їй дре́внїи пожи́ша, и҆ нн҃ѣ живꙋ́щїи ᲃп҃са́ютсѧ, Бг҃ꙋ ᲂу҆го́дный ᲃп҃си́телный и҆ въ ᲃꙋпрꙋ́жествѣ благоче́стно живꙋ́щихъ вы́шшїй, и҆ чⷭ҇тнѣ́йшїй, па́че же А҆́гг҃лѡмъ подо́бный є҆́стъ. И҆ ѡ҆бѣ́ты въ не́мъ Бг҃ꙋ ѿда́емыѧ, па́че же трѝ, сі́естъ, Нищета̀, Чтⷭ҇ота̀ и҆ Послꙋша́нїе, надъ за́повѣди, сꙋ́тъ Хв҃а съвѣтова́нїѧ.

Свѧти́тель въпраша́етъ:

Ꙍ҆ по́стѣхъ ка́ко вѣ́рꙋеши?

Ѿвѣща́етъ:

Вѣ́рꙋю, ꙗ҆́кѡ четы́ри лѣ́тныѧ По́сты ѿ Це́ркве ᲂу҆ꙁакон́ныѧ, и҆ въ всѧ̀ Седми́ци Сре́ды, и҆ Пѧ́тки, ѿ А҆по́столѡвъ ᲃт҃ы́хъ въ въспомина́нїе Стрⷭ҇тїй Гд҃нихъ, въ По́стѣхъ и҆ въꙁдержа́нїи храни́мы бы́ти ᲂу҆ста́вленыѧ, Бг҃ꙋ ᲂу҆го́дны, и҆ всѣ́мъ Хрїстїѧ́нѡмъ дшеспаси́телны сꙋ́тъ.

Свѧти́тель въпраша́етъ:

Ка́кѡ ѡ҆ зна́менїи Креста̀ Хв҃а, и҆ ѡ҆ ᲃт҃ы́хъ И҆́кꙍнехъ, и҆ ᲃт҃ы́хъ мо́щехъ вѣрꙋеши?

Ѿвѣща́етъ:

Вѣ́рꙋю, ꙗ҆́кѡ зна́менїе, и҆ и҆ꙁъѡбраже́нїе Креста̀ Гд҃а на́шегѡ І҆и҃ᲃ Ха҃, є҆́стъ зна́менїе свободы̀, и҆ є҆́же на дїѧ́вола и҆ на ᲃме́рть побѣ́ды, и҆ ᲃи́лою на Крестѣ̀ Распѧ́тагѡ Гд҃а на́шегѡ І҆и҃ᲃ Ха҃, бѣ́сѡмъ є҆́стъ прогна́нїе и҆ ѿ тѣхъ ко́ꙁней и҆ ᲃѣ́тїй вѣ́рныхъ и҆ꙁбавлѧ́етъ и҆ свобожда́етъ: и҆ сегѡ̀ ра́ди и҆ а҆́ꙁъ себѣ̀ тѣмъ на всѧ̀ дїѧ́волскїѧ сѣ́ти, въѡ҆рꙋжаю.

Сі́ѧ же глаголѧ̀ Знамена́етъ ᲃебѐ Кре́стнымъ зна́менїемъ.

По́честь же ᲃт҃ыхъ И҆́кꙍнъ Бж҃їѧ Сло҃ва Въплоще́нїе и҆ꙁъѡбра́жающаѧ, и҆ нетлѣ́ннѡ тогѡ̀ Ро́ждшїѧ Пречⷭ҇тыѧ Бц҃а, Богови́дныхъ А҆́гг҃лъ, и҆ всѣ́хъ ᲃт҃ы́хъ, на до́скахъ и҆ стѣна́хъ, и҆ ᲃщ҃е́нныхъ съсꙋ́дѣхъ: Та́кѡжде ᲃт҃ы́хъ Мꙋ́ченикъ, и҆ Бж҃їихъ Ꙋ҆го́дникѡвъ ᲃт҃ы́хъ мо́щїй, ꙗ҆́кѡ на первоѡ́браꙁное въсходѧ́щаѧ, ꙗ҆́кѡ ᲃт҃ы́хъ А҆по́столъ преда́нїе, и҆ Се́дмагѡ Събѡ́ра ᲂу҆ꙁаконе́нїе чⷭ҇тнѡ прїемлю̀, и҆ чⷭ҇ть тѣ́мъ въꙁдаѧ̀ любо́внѣ лобыꙁа́ю ѧ҆̀.

И҆ а҆́бїе дае́тсѧ є҆мꙋ И҆́кꙍна Сп҃сва, и҆лѝ, Бг҃родична къ лобꙁа́нїю.

Свѧти́тель въпраша́етъ:

Ка́кѡ ѡ҆ дш҃ѝ раꙁꙋ́мной человѣ́ческой вѣ́рꙋеши?

Ѿвѣща́етъ:

Вѣ́рꙋю, ꙗ҆́кѡ дш҃а̀ человѣ́ча слове́снаѧ, є҆́стъ Дх҃ъ беꙁсме́ртный ѿ Бг҃а съꙁда́нный, и҆ въ тѣ́лѡ человѣ́чее посыла́емый быва́етъ: и҆ ꙗ҆́кѡ не ѿ ᲃѣ́мене человѣ́ческагѡ ро́дитсѧ: ни́же ѿ четыре́хъ Сті́хїй съставлѧ́етсѧ: и҆ и҆ꙁше́дши ѿ тѣ́ла не ᲂу҆мира́етъ, но живе́тъ.

Свѧти́тель въпраша́етъ:

Ꙍ҆ дш҃а́хъ Пра́ведныхъ и҆ грѣ́шныхъ по ᲃме́рти ка́мѡ ѿхо́дѧтъ, ка́кѡ вѣ́рꙋеши?

Ѿвѣща́етъ:

Вѣ́рꙋю, ꙗ҆́кѡ ᲃт҃ы́и Бж҃їи ᲂу҆годници, здѐ на землѝ и҆сполненїемъ за́повѣдїй, По́стомъ, Моли́твами, и҆ беꙁчисле́нными трꙋ́ды, ѿ всѣ́хъ скве́рнъ себѣ̀ ѡ҆чисти́вше, дш҃е́ю а҆́бїе на нб҃о преста́вишасѧ, и҆ преставлѧ́ютсѧ, и҆ свѣ́тъ лица̀ Бж҃їѧ зрѧ́ще ѿча́сти мꙁдꙋ̀ трꙋ́дѡвъ ᲃвои́хъ прїѧша и҆ прїе́млютъ: съверше́нное же въꙁдаѧ́нїе, и҆ блаже́нствѡ, въ въскреше́нїе ме́ртвыхъ, кꙋ́пнѡ съ тѣ́лѡмъ прїѧ́ти ра́дꙋющесѧ ѡ҆жида́ютъ.

Ꙍ҆ на́съ же и҆ на́шихъ требова́нїихъ, ꙗ҆́кѡ и҆мꙋ́щїи дерꙁнове́нїе къ Бг҃ꙋ, ꙗ҆́кѡже и҆ А҆́гг҃ли ᲃт҃ы́и ѡ҆со́бною благода́тїю Бж҃їею тѣмъ данною вѣ́дꙋще, при́снѡ мо́лѧтсѧ, и҆ проше́нїѧ на́ша прїе́млюще, Бг҃ꙋ прино́сѧтъ, и҆ ѡ҆ на́съ ходотайствꙋ́ютъ: и҆ сегѡ̀ ра́ди тѣхъ ꙗ҆́кѡ вѣ́рныхъ помо́щникѡвъ, застꙋ́пникѡвъ же и҆ предстателей, на мо́лбꙋ и҆ по́мощъ благоче́стнѡ приꙁва́ти всѣ́мъ вѣ́рнымъ досто́итъ.

К си́мъ же и҆сповѣдꙋ́ю, ꙗ҆́кѡ нечести́выхъ, и҆ грѣ́шныхъ дш҃а̀ въ непокаѧ́нїи ѿ тѣ́ла и҆ꙁъше́дшихъ, а҆́бїе въ мꙋ́чнаѧ мѣста̀ ѿхо́дѧтъ, и҆ ѿ ча́сти мꙋ́кꙋ прїемлюще, въ ско́рбѣ тꙋꙁѣ̀ же и҆ бо́лѣꙁни, въскресе́нїе тѣ́ла, и҆ всеконе́чное съ тѣ́мъ въ гее́ннѣ мꙋче́нїе, плаче́внѡ ѡ҆жида́ютъ.

Съгрѣши́вшихъ же, и҆ на кончи́нѣ покаѧ́вшихсѧ, въ Правосла́вной же Вѣ́рѣ, но не ᲂу҆́довлетвори́вше ѡ҆ свои́хъ грѣсе́хъ, ѿ житїѧ ѿидѡ́шѧ: ни́же на нб҃о а҆́бїе въсхо́дѧтъ, ни́же въ мꙋ́кꙋ ѿсыла́емы быва́ютъ: но въ тмѣ́ неꙁрѣ́нїи лица̀ Бж҃їѧ, до́нде же Це́ркѡвъ беꙁкро́вною Же́ртвою, Моли́твою, По́стомъ и҆ ми́лостынѧми лише́нїе и҆́хъ и҆сполнитъ, и҆ Бг҃а ᲂу҆мо́литъ; наде́ждою зрѣ́нїѧ лица̀ Бж҃їѧ, ᲂу҆тѣша́еми ᲂу҆держа́ны ᲃꙋ́тъ. И҆ ꙗ҆́кѡ си́цевымъ дш҃а́мъ Же́ртва беꙁъкро́внаѧ, Моли́тва, По́стъ, и҆ ми́лостынѧ Церкѡ́внаѧ по́мощна є҆́стъ, и҆ ѡ҆ ни́хъ Бг҃а ᲂу҆милостивлѧ́етъ, и҆ къ зрѣ́нїю лица̀ є҆гѡ̀ приво́дитъ.

Свѧти́тель въпраша́етъ:

Ка́кѡ ѡ҆ въскресе́нїи тѣ́лъ ᲂу҆ме́ршихъ вѣ́рꙋеши?

Ѿвѣща́етъ:

Вѣ́рꙋю, ꙗ҆́кѡ тѣ́ло сі́е, въ не́мъ же въ вре́менной се́й жи́ꙁни, и҆лѝ блага́ѧ и҆лѝ зла́ѧ съдѣѧ́хѡмъ, а не и҆́ное въ послѣ́днїй дн҃ь сконча́нїѧ, вѣ́ка сегѡ̀ въ вто́рое Прише́ствїе Гд҃а на́шегѡ І҆и҃ᲃ Ха҃, въ послѣ́дней трꙋбѣ̀, ᲃи́лою Бж҃їею ѿ ме́ртвыхъ нетлѣ́нное въскре́снетъ: ᲃт҃ы́хъ пресла́вное, ле́гкое, свѣ́тлое, и҆ благоѡ́браꙁное: грѣ́шныхъ же, нетлѣ́нное, къ прїѧ́тїю же вѣ́чныѧ мꙋ́ки, и҆ бо́лѣ́ꙁнїю нестерпи́мыѧ спосо́бное, мра́чное же и҆ скве́рное.

И҆ ꙗ҆́кѡ тогда̀ Пра́ведници ᲂу҆слыша́вшие блаже́нный Ха҃ Бг҃а гла́с, Прїйдѣ́те блⷭ҇веннїи Ѿца̀ мое́гѡ, наслѣдꙋ́йте ᲂу҆готова́нное вамъ Ца́рство ѿ сложе́нїѧ мі́ра: ᲃъверше́нное съ тѣ́ломъ блаже́нство и҆ въꙁдаѧ́нїе, просвѣти́вшесѧ ꙗ҆́кѡ ᲃо́лнце въ Ца́рствїи нбⷭ҇номъ, въ несконча́емыѧ вѣ́ки съ живото́мъ вѣ́чнымъ воспрі́ймꙋтъ.

Грѣ́шници же гро́ꙁный ѿвѣ́тъ, и҆ вѣ́чнагѡ ѡ҆сꙋжде́нїѧ и҆ꙁрече́нїе влады́чнее, сі́естъ: Ѿидѣ́те ѿ менѐ проклѧ́тїи въ ѡ҆́гнь вѣ́чный, ᲂу҆готова́нный дїѧ́волꙋ и҆ а҆́нгелѡмъ є҆гѡ̀, ᲂу҆слы́шавше, по́йдꙋтъ въ гее́ннꙋ ѡ҆́гненнꙋю, и҆дѣ́же беꙁконе́чнѡ въ вѣ́чныѧ вѣ́ки, ѡ҆́гнь и҆́хъ не ᲂу҆гаса́етъ, и҆ че́рвъ и҆́хъ не ᲂу҆мира́етъ, съверше́ннѡ беꙁъпреста́ни мꙋ́читисѧ.

Свѧти́тель въпраша́етъ:

А҆́ще си́це въи́стиннꙋ беꙁъ всѧ́кагѡ лицемѣ́рїѧ вѣ́рꙋеши, клѧ́твою сі́е ᲂу҆твердѝ.

Ѿвѣща́етъ:

Сі́ю и҆́стиннꙋю Правосла́внѡкафꙍли́ческꙋю Вѣ́рꙋ, кро́мѣ є҆ѧ́же никто́же ᲃп҃се́нъ бы́ти мо́жетъ, и҆́же здѐ нн҃ѣ самово́лнѣ и҆сповѣда́ю, и҆ и҆́стиннѡ съдержꙋ̀, тꙋ́южде всецѣ́лꙋ, и҆ ненасилствова́ннꙋ, да́же до послѣ́днѧгѡ мое́гѡ и҆ꙁдыха́нїѧ, постоѧ́телнѡ непоꙁибле́мѡ, (Бж҃їею по́мощїю) съдержа́ти, и҆ и҆повѣда́ти, а҆́ꙁъ то́йжде, И҆мⷬ҇къ: ѡ҆бѣща́ю, ѡ҆бѣтꙋ́ю, и҆ кленꙋ́сѧ, си́це да́ ми Бг҃ъ помо́жетъ, и҆ сі́ѧ ᲃт҃а́ѧ Бжⷭ҇тве́ннаѧ Е҆ѵⷢ҇лїѧ: А҆ми́нь.

А҆́бїе же Свѧти́тель глаголе́тъ:

Блⷭ҇ве́нъ Бг҃ъ хотѧ́й всѣ́мъ человѣ́кѡмъ ᲃпⷭ҇ти́сѧ, и҆ въ ра́ꙁꙋмъ и҆́стинный прїйтѝ: сы́й блⷭ҇ве́нъ въ вѣ́ки.

А҆рхїдїѧ́конъ же глаголе́тъ:

Ѽглаше́ннїи гла́вы ва́шѧ Гд҃ви преклонѣ́те.

Кли́ръ:

Тебѣ̀ Гд҃и.

Ѽ́нѣмъ же гла́вамъ прекло́ншимъ, и҆ А҆рхїдїѧ́конꙋ ре́кшꙋ:

Гд҃ꙋ поми́лꙋй.

и Кли́рꙋ:

Гд҃и поми́лꙋй.

Свѧти́тель чте́тъ надъ ни́ми Моли́твꙋ ᲃі́ю:

Бо́же Вели́кїй высо́кїи и҆ Великѡимени́тый, пе́рвꙋю тмꙋ̀ просвѣти́вый сло́вомъ ᲂу҆́стъ твои́хъ, є҆диноро́днагѡ же ти Сн҃а, ниꙁъпосла́вый въ мі́ръ, ѡ҆чище́нїе грѣхѡ́мъ на́шимъ: ᲃѣдѧ́й на Херꙋві́мѣхъ, и҆ ᲃлави́мый ѿ Серафі́мѡвъ, є҆мꙋ́же всѧ́кое колѣ́нѡ прекланѧ́етсѧ, нбⷭ҇ныхъ и҆ земны́хъ и҆ преиспо́днихъ. И҆ всѧ́къ ꙗ҆ꙁы́къ и҆сповѣда́етъ тѧ̀ Царѧ̀ вѣ́кѡвъ: Събра́вый заблꙋ́ждшаѧ ѡ҆вча́та въ ᲃта́до Сп҃са на́шегѡ Гд҃а І҆и҃са Ха҃. И҆ ѡ҆браща́ѧй грѣ́шнагѡ ѿ пре́лести пꙋ́ти є҆гѡ̀, са́мъ ѡ҆братѝ и҆ си́хъ рабѡ́въ твои́хъ, И҆мⷬ҇къ: къ свѣ́тꙋ вѣ́чномꙋ: Приꙁовѝ и҆́хъ ѿ пре́лести дїѧ́вола, въ благораꙁꙋ́мїе є҆диноро́днагѡ ти Сн҃а: ᲂутвердѝ ᲃе́рдце и҆́хъ въ вѣ́рѣ и҆ любвѝ Ха҃ твое́гѡ: ча́сть и҆ жре́бїй и҆́мъ дарꙋ́й въ Це́ркви твое́й. Ты́бо є҆сѝ Бг҃ъ на́шъ, и҆ кро́мѣ тебѣ̀ и҆́нагѡ не вѣ́мы, и҆ И҆мѧ̀ твоѐ и҆менꙋ́емъ: Ꙗ҆́кѡ всегда̀ и҆ въ всѣ́хъ блⷭ҇ве́нъ є҆сѝ Бо́же на́шъ, и҆ є҆диноро́дный тво́й ᲃн҃ъ и҆ Дх҃ъ тво́й Прⷭ҇ты́й, нн҃ѣ и҆ при́снѡ и҆ въ вѣ́ки вѣкѡ́въ.

Кли́ръ:

А҆ми́нь.

Свѧти́тель знамена́въ гла́вы ѡ҆глаше́нныхъ три́жды, ᲃѧ́детъ на свое́мъ ᲃѣда́лищи, и҆ поꙋча́етъ и҆́хъ ѡ҆ вѣ́рѣ, добродѣ́телехъ же и҆ жи́телствѣ Хрїстїѧ́нстѣмъ. Сконча́въ же поꙋче́нїе, въстае́тъ и҆ ѡ҆бра́щъсѧ къ Въсто́кѡмъ глаголе́тъ Моли́твꙋ ᲃі́ю.

А҆рхїдїѧконꙋ ре́кшꙋ:

Гд҃ꙋ помоли́мсѧ.

и Кли́рꙋ:

Гд҃и поми́лꙋй.

Бо́же Вели́кїй и҆ Стра́шный, ᲃт҃ый человѣкѡлюби́вый, сподоби́вый на́съ и҆ въ сі́й ча́съ ᲃта́ти пре́дъ непристꙋ́пною ти ᲃла́вою, на пѣ́нїе и҆ хва́лꙋ чꙋде́съ твои́хъ, ѡ҆чи́сти на́съ грѣ́шныхъ и҆ недосто́йныхъ рабѡ́въ твои́хъ ѿ всѧ́коѧ ᲃкве́рны пло́ти и҆ дх҃а, и҆ пода́ждъ намъ благода́ть є҆́же ᲃъкрꙋше́ннымъ ᲃе́рдцемъ, не го́рдостнѡ принестѝ тебѣ̀ Трⷭ҇то́е Славосло́вїе, и҆ благодаре́нїе ѡ҆ вели́кихъ твои́хъ дарова́нїй, и҆́хъ же сътвори́лъ є҆сѝ, и҆ твори́ши всегда̀ въ на́съ.

Помѧнѝ Гд҃и не́мощъ на́шꙋ, и҆ рабѡ́въ твои́хъ си́хъ И҆мⷬ҇къ: и҆́хъ же приꙁыва́еши въ поꙁна́нїе тебѣ̀ є҆дина́гѡ и҆́стиннагѡ Бг҃а Ѿца̀, и҆ твое́гѡ є҆диноро́днагѡ Сн҃а, Гд҃а на́шегѡ І҆и҃ᲃ Ха҃, и҆ Прⷭ҇та́гѡ и҆ животворѧ́щагѡ ти Дх҃а: и҆ да не погꙋби́ши и҆хъ и҆ на́съ съ беꙁако́нъми на́шими, но сътворѝ вели́кꙋю млⷭ҇ть съ ни́ми, и҆ съ смире́нїемъ на́шимъ, ꙗ҆́кѡ да грѣхѡ́вныѧ тмы̀ и҆ꙁбѣжа́вше, въ днѐ правды шествꙋ́емъ, и҆ ѡ҆бо́лкшесѧ въ ѡ҆рꙋ́жїе свѣ́та, беꙁнавѣ́тны пребꙋ́демъ ѿ всѧкїѧ ко́ꙁни лꙋка́вагѡ, и҆ съ дерꙁнове́нїемъ просла́вимъ, ѡ҆ всѣ́мъ тебѣ̀ є҆дина́гѡ и҆́стиннагѡ Бг҃а беꙁнача́лнагѡ Ѿца̀, съ є҆диносꙋ́щнымъ и҆ съ беꙁнача́лнымъ ти Сн҃омъ; и҆ Прⷭ҇ты́мъ є҆стестве́ннымъ ти Дх҃омъ, и҆ нн҃ѣ и҆ прⷭ҇но, и҆ въ вѣ́ки вѣкѡ́въ.

Кли́ръ:

А҆ми́нь.

Сконча́въ же Ст҃и́телъ сиѧ̀ всѧ̀ ѿхо́дитъ въ Ѻ҆́лтаръ, и҆ ѿложи́въ ᲃщ҃е́нныѧ ѡ҆де́жды, и҆де́тъ въ своѧ̀ си.

Ѿре́кшихъжесѧ и҆ прокленшихъ пре́жнее нече́стїе, про́чее и҆мѣ́емъ ꙗ҆́кѡ Хрїстїѧ́нинѡвъ, ꙗ҆кѡ́вїи сꙋ́тъ Хрїстїѧ́нстїи дѣ́ти пре́жде Креще́нїѧ.

Въ тре́тїй же дн҃ъ Сти́тель, и҆лѝ, І҆ере́ѵꙵ, къ семꙋ̀ приста́вленный ꙗ҆́кѡже и҆ въ вто́рый дн҃ь, въ ᲃщ҃енныѧ ѡ҆бо́лксѧ ѡ҆де́жды, лобꙁа́въ Бжⷭ҇тве́ннꙋю Тра́пеꙁꙋ, и҆ и҆схо́дитъ и҆ꙁъ Ѻ҆́лтарѧ поѧ̀ съ Кли́рѡмъ Ѱалѡ́мъ, к҃ѕ.

Гд҃ь просвѣще́нїе моѐ и҆ ᲃп҃си́тель мо́й кого́сѧ ᲂу҆бою̀.

Ве́съ до конца̀.

И҆ прише́дъ на то́мжде мѣ́стѣ и҆́же и҆ вче́ра, и҆ сѣ́дъ на свое́мъ ᲃѣда́лищи, (а҆́щеже І҆ере́ѷ є҆́стъ сі́ѧ дѣйствꙋ́ѧй, стоѧ̀) гл҃етъ къ ѡ҆глаше́ннымъ:

Раꙁдрѣши́тесѧ и҆ съвлецѣ́тесѧ.

Съвле́кшежесѧ съ ры́ꙁъ прихо́дѧтъ и҆ станꙋтъ пре́дъ ᲃт҃и́телемъ къ Въсто́кꙋ лице́мъ беꙁпоѧ́сни, не покрове́ни и҆ не ѡ҆бꙋве́ни, въ є҆ди́номъ то́чїю хіто́нѣ рꙋ́цѣ до́лꙋ и҆мꙋ́ще.

Свѧти́тель же въста́въ, дꙋ́нетъ на кое́гождѡ и҆́хъ лицѐ, гⷤ, и҆ знамена́етъ челѡ̀ и҆́хъ и҆ ᲂу҆ста̀ и҆ пе́рси три́жды, и҆ въꙁложи́въ рꙋ́кꙋ де́снꙋю на гла́вꙋ и҆́хъ (а҆́ще же мнѡ́ꙁи сꙋ́тъ на кое́гождѡ въꙁлага́етъ, и҆мѧ̀ є҆го и҆менꙋ́ѧ) и҆ гл҃етъ Моли́твꙋ ᲃі́ю:

Ꙍ҆ И҆́мени твое́мъ Гд҃и Бо́же и҆́стинный, и҆ є҆диноро́днагѡ Сн҃а: зрѝ наꙁа́д: Ли́стъ л҃и²².

А҆́бїе же по Моли́твѣ ᲃѣ́дъ ᲃт҃и́тель, ᲃло́во тво́ритъ къ ѡ҆глаше́ннымъ, поꙋча́ѧ и҆́хъ о҆ вѣ́рѣ, любвѝ же и҆ наде́ждѣ, и҆ ѡ҆ всѣ́хъ къ ᲃпⷭ҇нїю прили́чныхъ. Сконча́въ же ᲃло́во, въстае́тъ, и҆ ре́кшꙋ А҆рхїдїѧ́конꙋ:

Гд҃ꙋ помо́лимсѧ.

Чте́тъ велега́снѡ надъ ѡглаше́нными Моли́твꙋ ᲃі́ю, тѣ́мъ гла́вы прекло́ншимъ.

Бо́же та́йныхъ вѣ́дче, всѧ̀ вѣ́дый пре́жде бы́тїѧ и҆́хъ, и҆ не хотѧ́й ᲃме́рти грѣ́шнагѡ, но є҆́же ѡ҆брати́тисѧ є҆мꙋ̀ и҆ жи́вꙋ бы́ти: Са́мъ при́ꙁри съ гото́вагѡ жи́лища твое́гѡ на рабы̀ твоѧ̀ ѡ҆глаше́нныѧ, и҆ ѿверꙁѝ ѻ҆́чи ᲃе́рдцъ и҆́хъ, въ є҆́же прїѧ́ти Та́йнꙋ, є҆диноро́днагѡ ти Сн҃а и҆ Бг҃а на́шегѡ, породѝ тѣ́хъ водо́ю и҆ Дх҃омъ въ вѣ́чное ти Ца́рство. Да и҆ ті́и съ на́ми ᲃла́вѧтъ Пречⷭ҇тное, и҆ великолѣ́пое И҆мѧ̀ тебѣ̀ беꙁнача́лнагѡ Ѿца̀, съ є҆диносꙋ́щнымъ є҆диноро́днымъ ти Сн҃омъ, и҆ Прⷭ҇ты́мъ съ є҆́стестве́ннымъ ти Дх҃омъ, нн҃ѣ и҆ при́снѡ, и҆ въ вѣ́ки вѣ́кѡвъ.

Кли́ръ:

А҆ми́нь.

Ре́кшꙋ же А҆рхїдїѧконꙋ:

Ѽглаше́ннїи и҆ꙁыйдѣ́те, вѣ́рниї же Гд҃ꙋ поми́лꙋй:

Кли́ръ:

Гд҃и поми́лꙋй.

Свѧти́тель ѡ҆бра́щъсѧ къ Въсто́кѡмъ, глаголе́тъ Моли́твꙋ ᲃі́ю:

Гд҃и Бо́же на́шъ, помѧнѝ на́съ грѣ́шныхъ и҆ недосто́йныхъ ра́бъ твои́хъ, и҆ внегда̀ приꙁыва́ти намъ ᲃт҃о́е И҆мѧ̀ твоѐ: И҆ да не посрами́ши на́съ ѿ чаѧ́нїѧ млⷭ҇ти твое́ѧ: Но дарꙋ́й намъ Гд҃и всѧ̀ ꙗ҆́же къ ᲃпⷭ҇нїю проше́нїѧ, и҆ сподобѝ на́съ люби́ти и҆ боѧ́тисѧ тебѣ̀ ѿ всегѡ̀ ᲃе́рдца на́шегѡ, и҆ твори́ти въ все́мъ во́лю твою̀. Ꙗ҆́кѡ бла́гъ и҆ человѣкѡлюби́въ Бг҃ъ є҆сѝ, и҆ тебѣ̀ ᲃла́вꙋ въꙁсыла́емъ Ѿцꙋ̀, и҆ Сн̀ꙋ, и҆ ᲃт҃о́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ. А҆ми́нь.

Сконча́въ же сі́ѧ ᲃт҃и́тель ѿхо́дитъ въ Ѻ҆́лтаръ, и҆ ѿло́жъ сще́нныѧ ры́ꙁы, и҆де́тъ въ своѧ̀ си.

Въ четве́ртый же дн҃ь по Ꙋ҆́трни, ᲃт҃лъ, и҆лѝ І҆ере́ѷ къ семꙋ̀ приста́вленный, ꙗ҆́кѡже и҆ въ вто́рїй дн҃ь въ ᲃщ҃е́нныѧ ѡ҆бо́лксѧ ѡ҆де́жды, и҆ лобꙁа́въ Бжⷭ҇тве́ннꙋю Тра́пеꙁꙋ, и҆схо́дитъ и҆ꙁъ Ѻ҆́лтарѧ, поѧ̀ съ Кли́ромъ Ѱало́мъ, к҃и.

Принесѣ́те Гд҃ви сн҃о́ве Бж҃їи: Ве́съ до конца̀.

И҆ прише́дъ на то́мжде мѣ́стѣ и҆де́же и҆ вче́ра. Стоѧ́щꙋ же ѡ҆глаше́нномꙋ, пре́дъ Церко́вными две́рми, беꙁъпоѧ́снꙋ, непокрове́ннꙋ, и҆ неѡ҆бꙋве́ннꙋ, въ є҆дино́мъ то́чїю хито́нѣ, рꙋ́цѣ до́лѣ и҆мꙋ́щꙋ, и҆ къ Въсто́кѡмъ зрѧ́щꙋ, дꙋ́нетъ три́жды, на лицѐ є҆гѡ̀, и҆ знамена́етъ лицѐ є҆гѡ̀, и҆ пе́рси, гⷤ.

А҆рхїдїѧ́конꙋ ре́кшꙋ:

Гд҃ꙋ помо́лимсѧ.

и҆ Кли́рꙋ:

Гд҃и поми́лꙋй.

Свѧти́тель чте́тъ Моли́твы запрѣща́телныѧ надъ ѡ҆глаше́ннымъ.

Запрѣще́нїе пе́рвое.

Запрѣща́етъ ти Гд҃ь дїѧ́воле, прише́дый въ ми́ръ и҆ всели́выйсѧ въ чл҃цѣхъ: зрѝ Листъ л҃ѳ²³.

Запрѣще́нїе вто́рое.

А҆рхїдїѧ́конꙋ ре́кшꙋ.

Гд҃ꙋ помо́лимсѧ.

Кли́ръ:

Гд҃и поми́лꙋй.

Бг҃ъ ᲃт҃ы́й, стра́шный, и҆ сла́вный, въ всѣ́хъ дѣ́лехъ и҆ крѣ́пости свое́й: Ли́стъ м҃²⁴.

Моли́тва тре́тѧѧ Запрѣща́лнаѧ.

А҆рхїдїѧ́конꙋ ре́кшꙋ:

Гд҃ꙋ помо́лимсѧ.

Кли́ръ:

Гд҃и поми́лꙋй.

Гд҃и Саваꙍ́ѳъ, Бо́же І҆и҃левъ, и҆сцѣлѧ́ѧй всѧ́кꙋю болѣ́ꙁнь, и҆ всѧ́кꙋю ꙗ҆́ꙁвꙋ: Ли́стъ м҃в²⁵.

Моли́тва чете́ртаѧ.

А҆рхїдїѧ́конъ:

Гд҃ꙋ помо́лимсѧ.

Кли́ръ:

Гд҃и поми́лꙋй.

Сы́й Влады́кѡ Гᲁ҃и, сътвори́вый человѣ́ка по ѡ҆́браꙁꙋ твое́мꙋ и҆ по поᲁо́бїю: Ли́стъ м҃г²⁶.

И҆ дꙋ́нетъ І҆ере́ѷ на Челѡ̀, на Ꙋ҆ста̀, на Пе́рси и҆ въ ѡ҆́бе Ꙋши, трижды, гл҃ѧ̀ ᲃі́е:

И҆жᲁенѝ ѿ не́гѡ всѧ́къ лꙋка́вый и҆ нечи́стый дꙋ́хъ, кры́ющїйсѧ и҆ гнѣꙁᲁѧ́щїйсѧ въ ᲃе́рдци є҆гѡ̀.

Сі́е же глаголе́тъ три́жᲁы:

Дꙋ́хъ пре́лести, дꙋ́хъ лꙋка́вства, дꙋ́хъ и҆ᲁѡлослꙋже́нїа, и҆ всѧ́кагѡ лихои́мства, дꙋ́хъ лжѝ, и҆ всѧ́коѧ нечистоты̀, дѣйствꙋ́емыѧ по наꙋче́нїю дїа́волю, и҆ ᲃътворѝ є҆гѡ̀ ѡ҆вча̀ ᲃлове́сное ᲃт҃а́гѡ ста́ᲁа Ха҃ твое́гѡ, ᲂу҆́ᲁъ че́стенъ Це́ркве твое́ѧ, ᲃн҃а и҆ наслѣ́ᲁника Ца́рствїѧ твое́гѡ, ꙗ҆́кѡ да по за́повѣᲁемъ твои́мъ пожи́въ, и҆ ᲃъхрани́въ печа́ть неврежᲁе́нꙋ, и҆ съблю́ᲁъ ри́ꙁꙋ нескве́рнꙋ, полꙋ́читъ блаже́нства ᲃт҃ы́хъ въ Ца́рствїи твое́мъ.

И҆ въꙁглаша́етъ:

Благода́тїю, и҆ щеᲁрота́ми и҆ человѣкѡлю́бїемъ є҆ᲁи́норо́ᲁнагѡ Сн҃а твое́гѡ, съ ни́мъ же блⷭ҇ве́нъ є҆сѝ, съ Прⷭ҇ты́мъ, и҆ благи́мъ, и҆ животворѧ́щимъ ти Дх҃омъ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

По сконча́нїи же ᲃи́хъ запрѣще́нїй, ᲃт҃и́тель сѣ́дъ на свое́мъ сѣда́лищи, тво́ритъ сло́во къ ѡ҆глаше́ннымъ, поꙋча́ѧ и҆́хъ ѡ҆ Вѣ́ри, и҆ ѡ҆ всѣ́хъ къ ᲃпⷭ҇нїю прили́чныхъ Хрїстїѧ́нскихъ до́брыхъ дѣ́лехъ. Сконча́въ же сло́во и҆ въста́въ, гл҃етъ:

Ми́ръ всѣ́мъ.

Кли́ръ:

И҆ дꙋ́хови твое́мꙋ.

А҆рхїдїѧ́конъ:

Ѽглаше́ннїи гла́вы ва́ша Гв҃и преклони́мъ.

Кли́ръ:

Тебѣ̀ Гд҃и.

А҆рхїдїѧ́конъ:

Гд҃ꙋ помо́лимсѧ.

Кли́ръ:

Гд҃и поми́лꙋй.

Свѧти́тель же надъ прекло́ншими гла́вы ѡ҆глаше́нными, чте́тъ Моли́твꙋ ᲃі́ю та́йнѡ.

Блⷭ҇вѝ и҆ нн҃ѣ Гд҃и рабы̀ твоѧ̀ ѡ҆глаше́нныѧ, и҆́хъ же приꙁва́лъ є҆сѝ зва́нїемъ ᲃт҃ы́мъ, въ преди́вный свѣ́тъ твое́гѡ поꙁна́нїѧ: и҆ да́ждъ и҆́мъ поꙁна́ти ᲃло́во и҆ꙁвѣстїѧ ѡ҆не́мъ же ѡ҆глаша́ютсѧ. И҆сполнѝ и҆́хъ Дх҃а твое́гѡ ᲃт҃а́гѡ, въ є҆́же бы́ти и҆мъ ѡ҆́цамъ, знамена́ннымъ тобо́ю и҆́стиннымъ Па́стыремъ, зна́менїемъ, ᲃт҃а̀гѡ твое́гѡ Дха: ꙗ҆́кѡ да ᲂу҆́ды бы́вше чⷭ҇тны тѣ́ла Це́рковь твое́ѧ, сподобѧ́тсѧ въи́стиннꙋ блаже́нныѧ наде́жды въ Ца́рствїи небе́сномъ.

Въꙁгла́с:

Да и҆ ті́и съ на́ми сла́вѧтъ Пречⷭ҇тное и҆ великолѣ́пое И҆мѧ̀ твоѐ, Ѿца̀ и҆ Сн҃а и҆ ᲃт҃гѡ Дх҃а, нн҃ѣ и҆ при́снѡ, и҆ въ вѣ́ки вѣкѡ́въ.

Кли́ръ:

А҆ми́нь.

И҆ а҆́бїе знаменавъ гла́вꙋ коего́ждѡ и҆́хъ, ѿпꙋща́етъ ѧ҆̀.

А҆рхїдїѧ́конꙋ ре́кшꙋ:

Ѽглаше́ннїи и҆ꙁыйдѣ́те, вѣ́рнїи же Гд҃ꙋ помоли́мсѧ:

Кли́ръ:

Гд҃и поми́лꙋй.

И҆ꙁше́дшимъ же ѡ҆глаше́ннымъ, Ст҃и́телъ ѡ҆бра́щъсѧ къ Въсто́кꙋ, чте́тъ, Моли́твꙋ ᲃі́ю велегла́снѡ.

Хвали́мъ, пое́мъ, блⷭ҇ви́мъ, ᲃла́вимъ, и҆ благодари́мъ тѧ̀ Бе҃ ѿц҃ъ на́шихъ, ꙗ҆́кѡ преве́лъ єсѝ сѣ́нь но́щнꙋю, и҆ ꙗ҆ви́лъ є҆сѝ намъ па́ки ᲃвѣ́тъ дне́вный: и҆ моли́мъ твою̀ блгⷭ҇ть, млⷭ҇тивъ бꙋ́ди грѣхѡ́мъ на́шимъ, и҆ прїймѝ Моли́твꙋ на́шꙋ въ вели́кое твоѐ блгⷭ҇рдїе: ꙗ҆́кѡ къ тебѣ̀ прибѣга́емъ млⷭ҇тивомꙋ и҆ всемогꙋ́щомꙋ Бг҃ꙋ. Восїѧ́й въ ᲃе́рдцахъ на́шихъ и҆́стинное ᲃо́лнце пра́вды твое́ѧ: просвѣтѝ ᲂу҆́мъ на́шъ, и҆ чꙋ́вства всѧ̀ събюдѝ, да въ днѐ, благоѡ́браꙁнѡ ходѧ́ще пꙋте́мъ за́повѣдїй твои́хъ, до́йдемъ жи́ꙁни вѣ́чныѧ: ꙗ҆́кѡ ᲂу҆ тебѣ̀ є҆́стъ исто́чникъ живота̀: и҆ въ наслажде́нїи да сподоби́мсѧ бы́ти непристꙋ́пнагѡ твое́гѡ свѣ́та. Ꙗ҆́кѡ ты́ є҆сѝ Бг҃ъ на́шъ, и҆ тебѣ̀ ᲃла́вꙋ въꙁсыла́емъ, Ѿцꙋ̀, и҆ Сн҃ꙋ и҆ ᲃт҃о́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ.

Кли́ръ:

А҆ми́нь.

Сконча́въ же сі́ѧ Свѧти́тель, ѿходитъ въ Ѻ҆́лтаръ, и҆ ѿло́жъ ᲃвѧще́нныѧ ри́ꙁы и҆де́тъ въ своѧ̀ си.

Приспѣ́вшꙋ ᲂу҆́бѡ вре́мени є҆́же ѡ҆глаше́ннымъ ѿрѣца́тисѧ ᲃатаны̀, и҆ съчета́тисѧ Хв҃и, и҆ Бжⷭ҇твенномꙋ порожде́нїю сподоби́тисѧ.

А҆́ще ᲃт҃а́ѧ Четыредесѧ́иница є҆́сть, то въ самꙋ́ю Вели́кꙋю Сꙋббꙍ́тꙋ: А҆́ще же въ и҆́ныѧ днѝ, и҆сполни́вшимсѧ четыридесѧ́тимъ дне́мъ ѡ҆глаше́нїе и҆́хъ, сі́е съверша́етсѧ:

Прихо́дитъ ᲃт҃и́тель, и҆лѝ на сі́е ᲂуста́новленный І҆ере́ѷ, и҆ а҆́ще са́мъ ᲃт҃и́тель Бжⷭ҇тве́ннꙋю Слꙋ́жбꙋ ᲃъверши́ти хо́щетъ, вше́дъ въ Це́рковъ, ѡ҆бы́чныѧ съверша́етъ пре́дъ ᲃт҃ы́ми Две́рми Моли́твы, и҆ лобꙁа́въ ᲃт҃ы́ѧ И҆́кꙍны въхо́дитъ въ Ѻ҆́старъ, и҆ та́мѡ ѡ҆бы́чнаѧ ᲃъверши́въ, и҆ лобꙁа́въ ᲃт҃ꙋ́ю Тра́пеꙁꙋ и҆схо́дитъ, и҆ на А҆мвѡ́нѣ ѡ҆блачи́тсѧ въ всѧ̀ свѧще́нныѧ ѡ҆де́жды.

А҆ще же са́мъ Лѵтꙋргиса́ти не бꙋ́детъ, въ Ѻ҆́тарѣ въ всѧ̀ ᲃщ҃е́ннаѧ ѡ҆бла́читсѧ, и҆ пре́дъ ᲃт҃о́ю Тра́пеꙁою покло́нсѧ (ꙗ҆́кѡ же и҆ въ мимоше́дшїѧ днѝ,) и҆ лобꙁа́въ ю҆̀ исхо́дитъ съ Кли́ромъ под̀ ѱало́мъ, м҃а.

И҆́мже ѡ҆́браꙁомъ жела́етъ Е҆́ле́нь на и҆сто́чники во́дныѧ. Ве́съ до конца̀.

Прише́дъ же на А҆мбѡ́нъ, покланѧ́етсѧ три́жды къ Въсто́комъ, и҆ знамена́въ лю́ди ᲃвѣще́ю крестаѡ҆браꙁнѡ. Ре́кшꙋ А҆рхїдїѧ́конꙋ:

Во́нмѣмъ.

Свѧти́тель знамена́ѧ рꙋко́ю лю́ди глаголѧ̀:

Ми́ръ всѣ́мъ.

Кли́ръ:

И҆ дꙋ́хови твое́мꙋ.

И҆детъ и҆де́же и҆ пре́жде сѣ́дъ мѣ́стѣ.

Стоѧ́щимъ же ѡ҆глаше́ннымъ пре́дъ ни́мъ не ѡ҆бꙋве́ни и҆ гла́вы ѿкрове́нны и҆мꙋ́ще, зрѧ́ще къ Въсто́кѡмъ, гл҃етъ къ ни́мъ:

Ста́ните съ ᲃтра́хѡмъ, знамена́йтесѧ, раꙁрѣши́тесѧ, и҆ съвлецѣ́тесѧ.

Дїѧ́кѡни же раꙁрѣша́ютъ по́ѧсы и҆́хъ и҆ съвлека́ютъ и҆́хъ съ ри́ꙁъ, и҆ въ є҆дино́мъ то́чїю хіто́нѣ представлѧ́ютъ и҆́хъ ᲃт҃и́телю. Си́мъ же предста́вшимъ, Свѧти́тель сѣдѧ̀ гл҃етъ къ ни́мъ.

Се коне́цъ ва́шегѡ ѡ҆глаше́ниѧ приспѣ̀: и҆ꙁбавле́нїѧ ва́шегѡ вре́мѧ предста̀, дне́съ хо́чете Хв҃ой Вѣ́рѣ сложи́ти рꙋкописа́нїе: Ха́ртїѧ же, черни́ло, и҆ тро́сть, быва́етъ ва́мъ со́вѣсть ва́ша, ꙗ҆ꙁы́къ же и҆ ѡ҆́браꙁъ.

Блюди́те ᲂу҆́бѡ ка́кѡ и҆сповѣда́нїе подписꙋ́ете, да не погрѣшитѐ, да не прелще́ни и҆ ѡ҆раде́ни бꙋ́дете: Хотѧ́щїи бо ᲂу҆мира́ти, ѿка́ꙁꙋютъ и҆ запи́сꙋютъ и҆мѣ́нїѧ своѧ̀ и҆́номꙋ наслѣ́дникꙋ.

И҆ вы̀ ᲂу҆́бѡ хо́щете дне́сь ᲂу҆мира́ти грѣхꙋ̀, сегѡ̀ ради ѿка́ꙁꙋйте и҆ твори́те завѣ́тъ ѿрече́нїѧ, сътвори́те же наслѣ́дника грѣхꙋ̀ дїѧ́вола, и҆ ѡ҆ста́вите є҆мꙋ̀ грѣхѝ ꙗ҆́кѡ ѿчее наслѣ́дїе. А҆ще ᲂу҆́бѡ кото́рый ѿ ва́съ и҆ма́тъ что̀ дїѧ́волское въ дш҃ѝ, да приверже́тъ є҆̀ томꙋ̀: Ꙋ҆мерый бо ктомꙋ̀ и҆мѣ́нїѧми не владѣ́тъ, та́кѡ и҆ ѿ ва́съ никто́же да и҆мѣ́тъ что̀ дїѧ́волее въ дш҃ѝ свое́й, сегѡ́ бо ра́ди и҆ стоѧ́ти и҆́мате къ за́падѡмъ и҆де́же є҆́стъ нача́лѡ чювстве́нныѧ тмы̀, рꙋ́цѣ простира́юще ѿ себѣ̀, а҆кѝ ѿме́щꙋще ѿ себѣ̀ не то́чїю всѧ̀ зла́ѧ дѣѧ́нїѧ, но и҆ тогѡ̀ само́гѡ злонача́лника Кнѧ́ꙁѧ тмы̀ дїѧ́вола ѿрева́юще ѿ себѣ̀. Да ничто́же ᲂу҆́бѡ дїѧ́волее съкрове́нѡ бꙋ́детъ въ ва́съ, да никто́же враждꙋ и҆мѣ́етъ, и҆ никто́же гнѣ́въ да съхрани́тъ: никто́же ле́стїю да стои́тъ никто́же съ лицемѣ́рїемъ да послꙋша́етъ:

Приверꙁѣ́те дїѧ́волꙋ всѧ̀ скве́рнаѧ дѣ́ла, и҆ лꙋка́ваѧ дѣѧ́нїѧ, и҆ злобы̀ дш҃етлѣ́нныѧ, ꙗ҆́кѡ плѣне́ни рꙋ́ки до́лꙋ и҆мꙋ́ще сто́йте, таковы́хъ бо васъ Хᲃ҃ І҆и҃ᲃ кꙋпꙋ́етъ.

Ѽбратитесѧ ᲂу҆́бѡ къ за́паднѡмъ, и҆ кои́ждѡ ва́съ рꙋ́цѣ ѿ себѣ̀ распросте́рты и҆мꙋ́ще, ꙗ҆́кѡже тꙋ сꙋ́ща, видѧ́ще дїѧ́вола и҆ ненавидѧ́ще є҆гѡ̀ ѿрини́те ѿ себѣ̀, и҆ ᲂу҆ничижа́юще є҆гѡ̀, дꙋни́те на́нь.

Ѽглаше́ннїи же ѡ҆бра́щъшесѧ къ за́падѡмъ, распростира́ютъ ѿ себѣ̀ рꙋ́ки, а҆кѝ ѿрѣва́юще кого̀ ѿ себѣ̀, и҆ дꙋ́нꙋтъ всѝ. Свѧти́тель же гл҃етъ.

Ѽбратѣ́тесѧ па́ки на Восто́къ, рꙋ́ки до́лꙋ и҆мꙋ́ще.

Ѽбра́щъшимъжесѧ и҆́мъ, рꙋ́ки до́лꙋ и҆мꙋ́ще стоѧтъ.

Свѧти́тель же глаголе́тъ:

Внидѣ́те въ со́вѣсти своѧ̀, и҆ ѡ҆па́снѡ и҆стѧжи́те ᲃе́рдца ва́ша, и҆ зри́те что̀ ки́йждѡ ва́съ съдѣла̀, и҆ а҆́ще что̀ съпроти́вное є҆́стъ въ ва́съ, съ дꙋнове́нїемъ вы́плюните.

Ѽни́же ѡ҆бра́щъшесѧ на за́падъ рꙋ́ки ѿ себѣ̀ распроте́рты и҆мꙋ́ще, дꙋ́нꙋтъ всѝ и҆ плю́ютъ.

Семꙋ̀ же бы́вшꙋ, Свѧти́тель, глаголе́тъ:

Ѽбрати́тесѧ на Въсто́къ, рꙋ́ки до́лѣ имꙋ́ще.

Ѽбра́щъшимъжесѧ и҆́мъ гл҃етъ Ст҃ль:

Да никто́же бꙋ́детъ здѐ лицемѣ́рїемъ І҆ꙋ́да, да никто̀ же ѡ҆та́й дво́е мы́слитъ: Сло́во бо Бж҃їе и҆спытꙋ́етъ ᲃе́рдца на́шѧ, и҆ ᲂу҆трѡ́бы, и҆ ѡ҆стрѣ́йшее є҆́сть па́че всѧ́кагѡ меча̀ ѡ҆бою́дꙋ ѡ҆́стра. Нн҃ѣ стои́тъ къ за́падѡмъ дїѧ́волъ, и҆ скрежета́ѧ зꙋбы̀, събира́ѧ вла́сы, плеща̀ рꙋка́ма, кꙋса́ѧ ᲂу҆́стнѐ неисто́внѣ, рыда́етъ своѐ ѡ҆пꙋстѣ́нїе, не вѣ́рꙋѧ ѡ҆ ва́шемъ свобожде́нїи: Сегѡ̀ ᲂу҆́бѡ ра́ди Хᲃ҃ Гд҃ь поставлѧ́етъ ва́съ прѧ́мѡ томꙋ̀, ꙗ҆́кѡ да ѿве́ргшесѧ тогѡ̀, и҆ дꙋ́нꙋвше на́нь, и҆ ᲂуничижи́телнѡ поплева́вше є҆гѡ̀ ꙗ҆́же на тогѡ̀ въспре́ймете бра́нь. На за́падѣхъ ᲂу҆́бѡ стои́тъ дїѧ́волъ, и҆де́же є҆стъ нача́ло тмы̀: Ѽбрати́тесѧ ᲂу҆́бѡ къ за́падѡмъ, и҆ рꙋ́ки ѿ себѣ̀ распросте́рты и҆мꙋ́ще, ѿрини́те є҆гѡ̀, и҆ ѿрецѣ́тесѧ тогѡ̀, и҆ дꙋни́те на́нь, и҆ поплю́йте є҆гѡ̀: и҆ ѡ҆бра́щшесѧ на въсто́ки, съчета́йтесѧ Хв҃и.

Ѿнѣмъже ѡ҆бра́щъшимсѧ на за́падъ, и҆ рꙋ́цѣ ѿ себѣ̀ распросте́рты и҆мꙋ́ще, дꙋ́нꙋтъ, и҆ плю́ютъ: и҆ па́ки ѡ҆браща́ютсѧ на Въсто́къ. Семꙋ̀ же си́це бы́вшꙋ, Свѧти́тель, гл҃етъ:

Да никто́же ᲂу҆́бѡ ва́съ преѡби́дитъ, ни ᲂу҆ничижи́тъ съ стра́хомъ стоѧ́щихъ: всѧ̀ бо стра́шна сꙋ́тъ настоѧ́щаѧ и҆ гро́ꙁна: Всѧ̀ ᲃи́лы нбⷭ҇ныѧ здѐ прїйдѡ́шѧ: всѝ А҆гг҃ли и҆ А҆рха́гг҃ли неви́димѡ ва́ша гл҃ы̀ напи́сꙋютъ: Херꙋві́ми и҆ Серафи́ми нн҃ѣ съ нб҃сѐ прини́чютъ, прїѧ́ти ва́шѧ ѡ҆бѣ́ты, и҆ принестѝ къ Влады́цѣ. Блюди́те ᲂу҆́бѡ ка́кѡ и҆ вра́га ѿрѣца́етесѧ, и҆ съдѣ́телю съвокꙋплѧ́етесѧ.

И҆ посе́мъ а҆́бїе гл҃етъ къ ни́мъ:

Ѽбрати́тесѧ къ за́падѡмъ рꙋ́ки ѿ себѣ̀ распросте́рты и҆мꙋ́ще, и҆ къ всѧ́комꙋ въпроше́нїю ᲂу҆се́рднѡ ѿвѣща́йте.

Ѽбра́щъшимжесѧ и҆́мъ къ за́падѡмъ, и҆ рꙋ́ки ѿ себѣ̀ просте́рты имꙋ́ще, Свѧти́тель въпраша́етъ три́жды: є҆динстве́ннѣ глаголѧ̀:

Ѿрица́ешилисѧ ᲃатаны̀, и҆ всѣ́хъ дѣ́лъ є҆гѡ̀, и҆ всѣ́хъ А҆́нгелѡвъ є҆гѡ̀, и҆ всеѧ̀ ᲃлꙋ́жбы є҆гѡ̀, и҆ всеѧ̀ горды́нѣ є҆гѡ̀.

Ѽни́же, ко́йждѡ и҆́хъ ѿвѣща́етъ є҆динстве́ннѣ, глаголѧ̀:

Ѿрица́юсѧ ᲃатаны̀, и҆ всѣ́хъ дѣ́лъ є҆гѡ̀, и҆ всѣ́хъ А҆нгелѡвъ є҆гѡ̀, и҆ всеѧ̀ слꙋ́жбы є҆гѡ̀, и҆ всеѧ̀ горды́нѣ є҆гѡ̀.

По трі́емъ же ᲂу҆́бѡ въпро́сѡмъ, и҆ три́жднымъ ѿвѣ́тѡмъ, стоѧ́щимъ и҆́мъ є҆щѐ лице́мъ къ за́падѡмъ, па́ки три́жды въпраша́етъ и҆́хъ ᲃт҃и́тель множестве́ннѣ гл҃ѧ̀:

Ѿтекли́сѧ ли є҆стѐ ᲃатаны̀:

Ѽни́же та́кожде мно́жественнѣ ѿвѣща́ютъ ко́ждѡ ихъ, гⷤ: глю́ще:

Ѿреко́хомсѧ ᲃатаны̀.

Посе́мъ же гл҃етъ ᲃт҃ль:

Дꙋ́ните на́нь, и҆ поплю́йте є҆гѡ̀, и҆ ѡ҆брати́тесѧ на Въстѡ́ки, го́рѣ къ нб҃сѝ рꙋ́ки въꙁдежде́ны и҆мꙋ́ще: и҆де́же Хᲃ҃ Гд҃ь ѡ҆де́снꙋю Бг҃а Ѿца̀ сѣ́дитъ: и҆ съ стра́хомъ стоѧ́ще, и҆ вѣ́рою благоговѣ́инѡ ѿ ᲃе́рдца, по кое́мждѡ въпроше́нїи ѿвѣща́йте.

Ѽглаше́ннїи же дꙋ́нꙋвше и҆ плю́нꙋвше на за́падъ, ѡ҆браща́ютсѧ на въсто́къ, и҆ подно́сѧтъ рꙋки го́рѣ на нб҃о, и҆ ѡ҆́чи. Ст҃ль же въпраша́етъ и҆́хъ гⷤ: гл҃ѧ̀:

Съчетава́етелисѧ Хрⷭ҇тꙋ?

Ѽни́же ко́йждѡ и҆́хъ по кое́мждѡ въпроше́нїи гⷤ: ѿвѣща́ютъ, глю́ще:

Съчетава́емсѧ Х҃.

Посе́мъ ᲃт҃лъ вопраша́етъ и҆́хъ, гл҃ѧ:

Съчета́лисѧ ли є҆стѐ Хрⷭ҇тови.

Ѽнѝ же ѿвѣща́ютъ ко́йждѡ и҆́хъ, глаголѧ̀:

Съчета́хѡмсѧ Хв҃и.

И҆ па́ки ᲃт҃и́тель въпраша́етъ и҆́хъ є҆дино́щи, глаголѧ̀:

И҆ вѣ́рꙋете є҆мꙋ̀?

Ѽни́же ѿвѣща́ютъ:

Вѣ́рꙋемъ є҆мꙋ̀ ꙗ҆́кѡ Царю̀, и҆ Бг҃ꙋ.

Свѧти́тель же глаголе́тъ къ ни́мъ.

Гл҃итѐ ᲂу҆́бѡ и҆сповѣда́нїе Правосла́внѡкаѳꙍли́ческїѧ Вѣ́ры!

Ѽни́же гл҃ю́тъ, велегла́снѡ Сѵмво́лъ Вѣ́ры ᲃт҃ы́хъ Вселенскихъ Събо́рѡвъ Пе́рвагѡ Ніке́йскагѡ, и҆ Вто́рагѡ Кѡнстантінопо́лскаⷢ҇, сі́естъ:

Вѣ́рꙋю въ є҆ди́нагѡ Бг҃а. всѐ до конца̀. Листъ м҃е²⁷.

Свѧти́тель же па́ки въпраша́етъ и҆́хъ втори́цею, и҆ трети́цею, ꙗкѡже и҆ вы́шше:

Съчета́листесѧ ли Хрⷭ҇то́ви, и҆ про́чаѧ.

Ѽнѣмъ же ѿвѣща́вшимъ, и҆ Вѣ́рꙋю въ є҆ди́нагѡ Бг҃а: три́жды и҆ꙁре́кшимъ.

Свѧти́тель въста́въ, рꙋ́цѣ въꙁдѣ́въ и҆ ѡ҆́цѣ въꙁве́дъ на нб҃о, гл҃етъ съ ᲂумиле́нїемъ ᲃі́е:

Блⷭ҇венъ Бг҃ъ хотѧй всѣ́мъ человѣ́кѡмъ ᲃпⷭ҇ти́сѧ, и҆ въ ра́ꙁꙋмъ и҆́стинный прїйтѝ, нн҃ѣ и҆ при́снѡ, и҆ въ вѣ́ки вѣкѡ́въ.

Кли́ръ:

А҆ми́нь.

А҆́бїе же посе́мъ сѣ́дъ гл҃етъ къ ни́мъ, а҆́ще мнѡ́ꙁи сꙋ́тъ, множестве́ннѣ, а҆́ще є҆динъ, є҆динственнѣ.

Се ѿреко́стесѧ дїѧ́вола, и҆ счета́стесѧ Хв҃и, рꙋкописа́нїе съверши́сѧ, Влады́ка ᲃі́е на нб҃сехъ и҆мѣ́етъ. Блюди́те ᲂу҆́бѡ, ꙗ҆́кѡ да ѡ҆бѣ́ты цѣ́лѡ съхранитѐ: ᲃі́е бо ва́ше рꙋкописа́нїе въ дн҃ь Сꙋ́дный пре́дъ гро́ꙁнымъ ѡ҆́нымъ сꙋ́дищемъ, и҆ Пра́веднымъ сꙋдїе́ю прине́сенѡ бꙋ́детъ, и҆ прочте́тсѧ ва́мъ, и҆ не то́чїю ѡ҆ глави́ꙁнѣ, сі́естъ ѡ҆ само́мъ то́чїю долꙁѣ̀, є҆́же є҆́стъ ѡ҆ наде́ждѣ, вѣ́рѣ, и҆ любвѝ, но и҆ ѡ҆ ли́хвѣ, сі́естъ, а҆́ще при вѣ́рѣ, и҆ благоче́стномъ жи́тїи, и҆ что̀ и҆ꙁли́шшее бла́гое съдѣѧ́сте: є҆́же є҆́стъ, а҆́ще а҆́лчнагѡ напита́сте: жа́жднагѡ напои́сте: нага́гѡ ѡ҆дѣѧ́сте: ᲂу҆́ꙁника ᲃвободи́сте: болна́гѡ посѣти́сте: ᲃтра́ннагѡ въ до́мъ сво́й въведо́сте: и҆ ме́ртвагѡ погребо́сте: си́ѧ бо сꙋть млⷭ҇рдїѧ дѣ́ла тѣле́снаѧ. Дх҃о́внаѧ же сꙋ́ть сі́ѧ: съгрѣша́ющагѡ, и҆ сло́вомъ и҆ ѡ҆́браꙁомъ а҆́ще и҆справисте: невѣ́ждꙋ а҆́ще наꙋчи́сте: ᲂу҆сꙋмнѣва́ющомꙋсѧ а҆́ще бла́гѡ ᲃъвѣтова́сте: ѡ҆ бли́жнѣмъ а҆́ще моли́стесѧ: ᲃмꙋ́тнагѡ а҆́ще ᲂу҆тѣши́сте: ѡ҆неправдова́нїѧ а҆́ще съ кро́тостїю понесо́сте: а҆́ще до́лжнаѧ вамъ ѡ҆ста́висте: и҆ и҆́ныѧ подо́бныѧ си́мъ благодѣѧ́нїѧ а҆́ще сътвори́сте. Ѽправда́нїѧ бо Хрїстїѧ́нскагѡ до́лгъ є҆́стъ, не то́чїю ᲂу҆клони́тисѧ ѿ зла̀, сі́естъ, ѿ грѣха̀: но и҆ благо́е твори́ти.

Блюдѣ́те ᲂу҆́бѡ да не посрамле́ни бꙋ́дете на стра́шномъ ѻ҆́номъ всегѡ̀ мі́ра поꙁо́рищи, неимꙋ́ще дѣѧ́нїѧ бра́чна, є҆́же є҆́стъ преспѣѧ́нїѧ во добродѣ́телехъ, и҆́ми же дш҃а̀ ᲂу҆краша́етсѧ. Тогда̀ бо си́лы нбⷭ҇ныѧ подви́гнꙋтсѧ, и҆ всѐ человѣ́ческое є҆стество̀ гро́ꙁнѡ и҆стѧ́ꙁано и҆ сꙋди́мо бꙋ́детъ, и҆ всѧ̀ А҆́гг҃лскїѧ тмы̀ А҆рхагг҃лскаѧ во́инства, и҆ го́рныхъ си́лъ Чи́нѡвъ съ тре́петомъ предста́нꙋтъ: рѣка̀ же ѡ҆́гненнаѧ потече́тъ, че́рвъ неꙋсыпа́емый и҆ тма̀ кромѣ́шнѧѧ ꙗ҆ви́тсѧ, въ є҆́же мꙋ́чити грѣ́шныхъ. Здѐ ᲂу҆́бѡ потщи́тесѧ до́ндеже вре́мѧ и҆́мате въ вѣ́рѣ и҆ добродѣ́телехъ преꙋспѣва́ти.

Вѣ́ра бо и҆ дѣ́ла блага́ѧ та́мѡ ва́мъ въ по́мощъ предста́нꙋтъ, и҆ ѿ вѣ́чныѧ и҆ꙁба́вѧтъ ва́съ мꙋ́ки: кро́мѣ бо си́хъ дво́хъ никто́же и҆́нъ и҆ ничто́же и҆́нѡ помощѝ та́мо мо́жетъ.

Здѐ помога́ютъ въ бѣдѣ̀ сꙋ́щомꙋ, и҆мѣ́нїѧ соро́дники и҆ дрꙋ́ꙁи, и҆ хитросло́вїѧ: Та́може ни є҆дино̀ ѿ си́хъ мо́жетъ, на́ꙁи бо и҆ ѿ всѣ́хъ ѿчꙋжде́ни и҆ беꙁъѿвѣ́тни предста́немъ: при вѣ́рѣ же и҆́стинной, дѣ́ла то́чїю а҆́ще блага́ѧ бꙋ́дꙋтъ, на́съ ѡ҆правдѧ́ть, а҆́ще же зла́ѧ ѡ҆сꙋ́дѧтъ: бе́ꙁъ дѣ́лъ бо благи́хъ, вѣ́ра ме́ртва є҆́стъ, ꙗ҆́коже и҆ дѣ́ла бе́ꙁъ вѣ́ры. Блюди́те ᲂу҆́бѡ и҆ ѡ҆па́снѡ ѡ҆бѣ́ты цѣ́лѡ съхрани́те.

Ѿреко́стесѧ дїѧ́вола, и҆ всѣ́хъ а҆́нгелѡвъ є҆гѡ̀ ꙗ҆́кѡ всѧ́кїѧ злобы̀ нача́льника, и҆ споспѣ́шника: всегда̀ ᲂу҆́бѡ крѣ́пкѡ въ все́мъ проти́витесѧ є҆мꙋ̀, и҆ мꙋжестве́ннѡ съ ни́мъ бори́тесѧ, и҆ си́лою Хв҃ою є҆мꙋ̀ же съчета́стесѧ побѣжда́йте є҆гѡ̀.

Ѿреко́стесѧ всѣ́хъ дѣ́лъ є҆гѡ̀, сі́естъ грѣхѡ́въ, не въсхощи́те ᲂу҆́бѡ па́ки къ дѣ́лѡмъ дїѧ́волскимъ въꙁврати́тисѧ, и҆ свобо́дни ᲂу҆жѐ ѿ работы̀ є҆гѡ̀ сꙋ́ще, па́ки въ работꙋ̀ є҆мꙋ̀ ᲃъгрѣша́юще ᲃебѐ въда́ти: є҆го́же бо кто̀ дѣ́ла тво́ритъ, ᲃегѡ̀ и҆ ра́бъ быва́етъ.

Ѿреко́стесѧ всеѧ̀ ᲃлꙋ́жбы сатанинскїѧ, ꙗ҆́же є҆́стъ, ко́вы, воро́жки, примо́вки ба́бїѧ, вълше́бны цѣ́лбы, чарова́нїѧ, ѡ҆баѧ́нїѧ, съ невѣ́рными, и҆лѝ съ є҆рети́ки съ ѡ҆бще́нїѧ и҆ моле́нїѧ, и҆ и҆́ныѧ ᲃла́вѣ и҆ ᲃлꙋ́жбѣ Бж҃їей и҆́стинной противѧ́щїѧсѧ: Блюдѣ́тесѧ ᲂу҆́бѡ и҆ си́хъ дале́че бѣга́йте: дн҃ъ и҆ но́щъ въ преподо́бїи и҆ пра́вдѣ съ всѧ́кимъ ѡ҆пасе́нїемъ слꙋжи́те Бг҃ꙋ живо́мꙋ и҆ и҆́стинномꙋ, є҆мꙋ́же съчета́стесѧ, въ стра́сѣ и҆ тре́петѣ своѐ ᲃпⷭ҇нїе содѣлова́юще.

Въ всѣ́хъ же требова́нїѧхъ ва́шихъ, и҆ нꙋ́ждахъ, къ не́мꙋ рꙋ́ки ва́шѧ въꙁдежди́те, томꙋ̀ съ вѣ́рою моли́тесѧ, къ томꙋ̀ прибѣгни́те, тогѡ̀ приꙁыва́йте, томꙋ̀ є҆дино́мꙋ послꙋжи́те: нѣ́сть бо раꙁвѣ̀ є҆гѡ̀ и҆ꙁбавлѧ́ѧй: то́й ᲂу҆сы́шитъ, то́й поми́лꙋетъ, то́й и҆ꙁба́витъ то́й и҆сцѣли́тъ, то́й ᲃп҃се́тъ, то́й защити́тъ, и҆ всѧ̀ благаѧ проше́нїѧ ва́ша и҆спо́лнитъ: ще́дръ бо, и҆ млⷭ҇тивъ, и҆ бла́гъ є҆́стъ всѣ́мъ приꙁва́ющимъ є҆́гѡ̀ въ и҆́стиннѣ, и҆ во́лю тво́ритъ боѧ́щихсѧ є҆́гѡ̀.

Ѿреко́стесѧ всеѧ̀ горды́нѣ дїѧ́волскїѧ, ꙗ҆́же є҆́стъ, плѧ́са́нїѧ, неисто́внаѧ коꙁлогласова́нїѧ, пѣ́сни скве́рныѧ, растлѣ́нныѧ и҆ смѣхотво́рныѧ бе́сѣды, и҆ꙁъ ни́хъ же пїѧ́нства и҆ блꙋдодѣ́ѧнїѧ ᲃъверша́ютсѧ, и҆ всѧ̀ пꙋсто́шнаѧ поꙁо́рища ꙗ҆́же ѿ Богомы́слїѧ ᲂу҆́мъ къ всѣ́мъ дѣ́лѡмъ злымъ и҆ Богопроти́внымъ ѿвраща́ютъ, и҆ є҆́же зрѣ́ти Гд҃а пре́дъ собо́ю вы́нꙋ загражда́ютъ. Вы́ же ѽ въꙁлюбленнїи си́хъ всѣ́хъ блюди́тесѧ и҆ бѣга́йте, въ Моли́твахъ же и҆ ѱа́лмѣхъ и҆ пѣ́снехъ Дх҃вныхъ всегда̀ прославлѧ́йте Гд҃а, въмѣ́сто плѧса́нїй неисто́выхъ, да бꙋ́дꙋтъ вамъ стоѧ́нїѧ въ моли́твахъ и҆ поклѡ́ны: въмѣ́сто коꙁлогласова́нїй и҆ пѣ́снїй ᲃкве́рныхъ Церко́внаѧ пѣ́нїѧ и҆ моли́твы: въмѣ́сто злы́хъ бе́сѣдъ, бжⷭ҇тве́нныхъ слове́съ слꙋша́нїѧ и҆ чте́нїѧ: въмѣ́сто же пꙋсто́шныхъ поꙁо́рищъ, Бж҃їихъ благодѣѧ́нїй раꙁмышле́нїе, и҆ въ тѣ́хъ поꙋче́нїе, и҆ съ мꙋжмѝ благоговѣ́нными ѡ҆ бж҃їихъ за́повѣдехъ бесѣдова́нїе: сі́ѧ бо ᲂу҆́мъ человѣ́чїй въпѣрѧ́ютъ и҆ воꙁводѧ́тъ къ Бг҃ꙋ, и҆ съ тѣ́мъ съвокꙋплѧ́ютъ. Блюди́те ᲂу҆́бѡ да не то́чїю ᲃловесы̀, но и҆ дѣ́лы дїѧ́вола, всѣ́хъ а҆́нгелѡвъ є҆гѡ̀, всѣ́хъ дѣ́лъ є҆гѡ̀, всеѧ̀ слꙋ́жбы є҆гѡ̀, и҆ всеѧ̀ горды́нѣ є҆гѡ̀, ѿрица́ющесѧ ѡ҆брѧ́щетесѧ. ꙗ҆́кѡ Ле́въ бо рыка́ѧ сꙋпоста́тъ на́шъ хо́дитъ, є҆́же когѡ̀ поглоти́ти: и҆ наꙁира́етъ и҆ гл҃ъ и҆ помышле́нїе, и҆ по́двигъ и҆ дѣѧ́нїе: є҆́же мощѝ на сꙋ́дѣ ниꙁложи́ти ва́съ, но вы́ ᲃи́це ᲃебѐ съпроти́въ є҆гѡ̀ въ ѡ҆рꙋжа́йтесѧ, въ є҆́же въ все́мъ крѣ́пкѡ съпроти́витисѧ є҆мꙋ̀, волю же Бж҃їю благꙋ́ю, благоꙋго́днꙋю, и҆ съверше́ннꙋю всегда̀ твори́ти.

Ꙗ҆́кѡ да предста́вше въ дн҃ь неꙋмы́тнагѡ Сꙋ́да Хв҃а непосты́днѡ, ᲂу҆слы́шите ѿ не́гѡ благополꙋ́чный ѡ҆́ный гла́съ и҆ блаже́нный, прїйдѣ́те блⷭ҇ве́ннїи Ѿца̀ мое́гѡ, наслѣдꙋ́йте ᲂу҆готова́нное ва́мъ Ца́рствїе ѿ сложе́нїѧ мі́ра: Е҆гѡ́же всѣ́хъ на́съ свое́ю благода́тїю полꙋчи́ти да сподоби́тъ, Моли́твами Бц҃а и҆ всѣ́хъ ᲃт҃ы́хъ свои́хъ. А҆ми́нь.

По А҆ми́нѣ же въста́въ ᲃт҃и́тель. Подае́тъ и҆́мъ коне́цъ Ѽмо́фора, ѡ҆́нѣмъ же де́сною рꙋко́ю сегѡ̀ є҆́мшесѧ, въво́дитъ и҆́хъ въ Це́ркѡвъ, гл҃ѧ̀:

Вниди́те въ ᲃт҃ꙋ́ю Бж҃їю Це́ркѡвъ, и҆ прїйми́те Бжⷭ҇тве́нное, прнбе́сное блⷭ҇ве́нїе ѿ Гд҃а Бг҃а и҆ ᲃп҃са на́шего І҆и҃са Ха҃, и҆ и҆мѣ́йте ча́сть съ ни́мъ, и҆ съ всѣ́ми ᲃт҃ы́ми є҆гѡ̀ во вѣ́ки. А҆ми́нь.

А҆́ще же є҆ди́нъ є҆́стъ ѡ҆глаше́нный, є҆дино́щи гл҃етъ:

Внидѝ въ ᲃт҃ꙋ́ю Бж҃їю Це́ркѡвъ, и҆ про́чаѧ:

Вше́дъ же въ Це́ркѡвъ, и҆ ста́въ посре́дъ Це́ркви, глаголе́тъ къ ни́мъ.

Го́рѣ въꙁдигни́те рꙋ́ки ва́шѧ.

Си́мъ же въꙁдви́гшимъ, ᲃт҃и́телъ ѡ҆браща́етсѧ къ восто́комъ, глаголе́тъ:

Ꙍ҆ ᲂу҆строе́нїи всегѡ̀ ми́ра, благостоѧ́нїи ᲃт҃ы́хъ Бж҃їихъ Це́рквїй, и҆ съвокꙋпле́нїи всѣ́хъ: и҆ ѡ҆ є҆́же ѡ҆брати́ти Гд҃ꙋ Бг҃ꙋ на́шемꙋ всѣ́хъ невѣ́рныхъ къ поꙁна́нїю и҆́стинныхъ, и҆ просвѣти́ти и҆́хъ свѣ́томъ свое́гѡ Богораꙁꙋ́мїѧ, рцѣ́мъ всѝ, Гд҃и ᲂу҆слыши и҆ поми́лꙋй.

Кли́ръ:

Гд҃и поми́лꙋй, гⷤ.

Свѧти́тель.

Ꙍ҆ вели́комъ Королѣ̀ на́шемъ Имⷬ҇къ, ѡ҆ всѣ́хъ благочести́выхъ Гпⷭ҇дре́хъ Кн҃ѕе́хъ и҆ Па́нѣхъ на́шихъ, и҆ все́й пола́тѣ и҆ во́ехъ и҆́хъ и҆ ѡ҆ всѣ́хъ христолюби́выхъ лю́дехъ, рцѣ́мъ всѝ, Гд҃и ᲂу҆слы́ши и҆ поми́лꙋй.

Кли́ръ:

Гд҃и поми́лꙋй, три́жды.

Свѧти́тель:

Ꙍ҆ ᲃпⷭ҇нїи дш҃ъ на́шихъ: и҆ ѡ҆ є҆́же въско́рѣ скрꙋши́ти ᲃатанꙋ̀ подъ но́ги на́ша, рцѣ́мъ всѝ, Гд҃и ᲂу҆слы́ши и҆ поми́лꙋй.

Гд҃и поми́лꙋй, три́жды:

Свѧти́тель:

Ꙍ҆ є҆́же невреди́мꙋ непоколѣби́мꙋ, и҆ непребори́мꙋ и҆ ѿ всѧ́кагѡ зла́гѡ ѡ҆бстоѧ́нїѧ съхрани́ти гра́дъ се́й, и҆ всѧ́кїй гра́дъ и҆ ᲃтранꙋ̀ и҆ вѣ́рою живꙋ́щихъ въ ни́хъ рцѣ́мъ всѝ, Гд҃и ᲂу҆слы́ши и҆ поми́лꙋй.

Кли́ръ:

Гд҃и поми́лꙋй, три́жды:

Свѧти́тель же въꙁглаша́етъ.

Ꙗ҆́кѡ млⷭ҇тив и҆ человѣ́кѡлю́бецъ Бг҃ъ є҆сѝ, и҆ тебѣ̀ ᲃла́вꙋ въꙁсыла́емъ Ѿцꙋ̀ и҆ Сн҃ꙋ и҆ ᲃт҃о́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡвъ.

Кли́ръ:

А҆ми́нь.

По си́хъ же ѡ҆бра́щъсѧ къ ѡ҆глаше́ннымъ, А҆рхїдїѧ́конъ, глаголе́тъ.

Ꙍ҆ и҆́же къ ᲃт҃о́мꙋ просвѣще́нїю благоготовѧ́щихъ сѧ бра́тїѧхъ на́шихъ, и҆ ᲃпⷭ҇нїи и҆́хъ веѣ́рнїи Гд҃ꙋ помоли́мсѧ.

Кли́ръ:

Гд҃и поми́лꙋй.

Ꙗ҆́кѡ да Гд҃ь Бг҃ъ на́шъ ᲂу҆тверди́тъ и҆́хъ и҆ ᲂу҆крѣ́питъ.

Кли́ръ:

Гд҃и поми́лꙋй.

Просвѣ́титъ и҆́хъ ᲃвѣ́томъ ра́ꙁꙋма.

Кли́ръ:

Гд҃и поми́лꙋй.

Сподоби́тъ и҆́хъ Ба́нѧ па́ки порожде́нїѧ ѡ҆ставле́нїѧ грѣхо́въ и҆ ѡ҆де́жды нетлѣ́нїѧ.

Кли́ръ:

Гд҃и поми́лꙋй.

Поро́дитъ и҆́хъ водо́ю и҆ Дх҃омъ.

Кли́ръ:

Гд҃и поми́лꙋй.

Дарꙋ́етъ и҆́мъ ᲃверше́нїе веры.

Кли́ръ:

Гд҃и поми́лꙋй.

Причте́тъ и҆́хъ ᲃт҃о́мꙋ свое́мꙋ и҆ꙁбра́нномꙋ ᲃта́дꙋ.

Кли́ръ:

Гд҃и поми́лꙋй.

Сп҃сѝ поми́лꙋй, застꙋпѝ и҆ съхранѝ и҆́хъ, и҆ на́съ Бо́же твое́ю благода́тїю.

Кли́ръ:

Гд҃и поми́лꙋй.

Та же глаголе́тъ А҆рхїдїѧ́конъ:

Гд҃ꙋ помоли́мсѧ:

Кли́ръ:

Гд҃и поми́лꙋй.

Ст҃ль же гл҃етъ Моли́твꙋ ᲃі́ю ѡ҆бращъсѧ къ ѡ҆глаше́ннымъ велегла́снѡ. А҆ще мнѡ́ꙁи сꙋть множестве́ннѣ, а҆́ще же є҆ди́нъ є҆динстве́нѣ.

Влады́кѡ Гд҃и Бо́же на́шъ, приꙁва́вый рабы̀ твоѧ̀ И҆мⷬ҇къ: къ ᲃт҃о́мꙋ ти просвѣще́нїю сподобѝ и҆́хъ вели́кїѧ ти ᲃеѧ̀ благода́ти: ѡ҆мы́й и҆́хъ скве́рнꙋ, и҆ породѝ и҆́хъ въ живо́тъ вѣ́чный, и҆ съвершѝ и҆́хъ ᲃт҃а́гѡ ти Дх҃а си́лою, въ съедине́нїи Ха҃ твое́гѡ.

А҆́бїе же А҆рхїдїѧ́конъ гл҃етъ:

Е҆ли́ци къ просвѣще́нїю пристꙋпи́те, къ рꙋкоположе́нїю и҆ благословѣ́тесѧ.

Ꙍ҆ нѣ́мъ же прише́дшимъ, ᲃт҃ль на кое́мждѡ и҆́хъ, (а҆́ще мꙋ́жа, а҆́ще же́ны), въꙁлага́етъ рꙋ́цѣ, ничто́же гл҃ѧ̀. и҆ сконча́в си́е ѿходитъ: въходѧ́же въ Ѻ҆́лтаръ, въꙁглаша́етъ.

Ꙗ҆́кѡ ты́ є҆сѝ просвѣще́нїе на́ше, и҆ тебѣ̀ ᲃла́вꙋ въꙁсыла́емъ Ѿцꙋ̀ и҆ Сн҃ꙋ и҆ ᲃт҃о́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ.

Кли́ръ:

А҆ми́нь.

Вше́дъ же въ Ѻ҆́лтаръ и҆ покло́нъсѧ пре́дъ ᲃт҃о́ю Тра́пеꙁою ѡ҆браща́етсѧ къ лю́демъ, и҆ гл҃етъ:

Ми́ръ всѣ́мъ.

А҆рхїдїѧ́конъ:

Гла́вы ва́ша Гд҃ви преклонѣ́те.

Свѧти́тель же пре́дъ ᲃт҃о́ю Тра́пеꙁою глаголе́тъ Моли́твꙋ ᲃі́ю та́йнѡ.

Бе҃ ᲃп҃се на́шъ, всѣ́мъ человѣ́кѡмъ хотѧ́й ᲃпⷭ҇тисѧ и҆ въ раꙁꙋмъ и҆́стинный прїйтѝ, и҆ въꙁсїѧ́ти ᲃвѣ́тъ ра́ꙁꙋма въ ᲃе́рдцахъ на́шихъ: къ ᲃт҃омꙋ нн҃ѣ благоготовѧ́щихсѧ, сподобѝ беꙁсме́ртнагѡ твое́гѡ да́ра, и҆ съвокꙋпѝ и҆́хъ ᲃт҃ѣ́й твое́й Събо́рней А҆пⷭ҇тлстѣй Це́ркви.

Свѧти́тель въꙁглаша́етъ.

Твоѐ бо є҆́стъ є҆́же ми́ловати, и҆ ᲃп҃са́ти на́съ Бо́же на́шъ, и҆ тебѣ̀ ᲃла́вꙋ въꙁсыла́емъ Ѿцꙋ̀ и҆ Сн҃ꙋ и҆ Ст҃о́мꙋ Дх҃ꙋ, н҃нѣ и҆ при́снѡ, и҆ въ вѣ́к вѣкѡ́въ.

Кли́ръ:

А҆ми́нь.

А҆ще ᲃвѧти́тель а҆́бїе Крести́ти и҆́хъ хо́щетъ, а҆́бїе и҆ꙁъ Ѻ҆лтарѧ̀ исхо́дитъ къ ᲃт҃о́й кꙋ́пели, предидꙋ́щꙋ же є҆мꙋ̀ всемꙋ̀ Кли́рꙋ, и҆ свѣщено́сцамъ съ Лампа́дома. А҆́ще же ѿлага́етъ наꙋ́трѣе Креще́нїе: а҆́бїе тво́ритъ ѿпꙋ́стъ ѡ҆бы́чный, и҆ начина́етсѧ Лѵтꙋ́ргїѧ.

Вѣ́стно же бꙋ́ди, ꙗ҆́кѡ а҆́ще въ ᲃт҃ꙋ́ю Вели́кꙋю Четыредесѧ́тницꙋ ѡ҆глаше́нїе ᲃі́е быва́етъ, въ ᲃт҃ꙋ́ю Вели́кꙋю Сꙋббꙍ́тꙋ Креще́нїе ᲃъверша́етсѧ, и҆лѝ въ ᲃт҃ꙋ́ю са́мꙋю Вели́кꙋю Неде́лю Па́схи.

Пре́жде же действова́хꙋсѧ се́ѧ въ ᲃт҃ꙋю Вели́кꙋю ᲃꙋббꙍ́тꙋ, въ вре́мѧ чте́нїѧ вто́рїѧ Паремѣ́и, є҆́же є҆́стъ: Свѣ́ти́сѧ свѣ́ти́сѧ но́вый І҆ерⷭ҇ли́ме: Нн҃ѣ же въ коѐ вре́мѧ и҆ꙁво́литъ ᲃт҃ль. А҆́ще же ᲂу҆́бѡ не въ ᲃт҃ꙋ́ю Вели́кꙋю Четырдесѧ́тницꙋ ᲃі́е ᲃъдѣлова́етсѧ, то и҆сполни́вшимсѧ четырдесѧ́тимъ дне́мъ ѡ҆бꙋче́нїѧ и҆ поще́нїѧ ѡ҆глаше́нныхъ, и҆ ᲃъверши́вшимсѧ ѡ҆глаше́нїѧмъ си́мъ пре́жде по предложе́нномꙋ чи́нꙋ, ᲃи́це съверша́етсѧ Креще́нїе и҆́хъ. Прише́дшимъ хотѧ́щимъ Крести́тисѧ въ Це́рковъ, Ст҃и́телю же тꙋ сꙋ́щꙋ на ᲃт҃и́телъскомъ свое́мъ Престо́лѣ, ѡ҆болче́ннꙋ въ бѣ́лыѧ ри́ꙁы, и҆ ѡ҆бꙋве́нꙋ въ бѣ́лаѧ ᲃанда́лїѧ, повелѣва́етъ ѡ҆глаше́ннымъ раꙁдрѣши́тисѧ внѣ Це́ркве, и҆ съвлещи́сѧ ѡ҆де́ждъ ᲃвои́хъ. Семꙋ́же бы́вшꙋ прихо́дѧтъ на́ꙁи, ле́нтїемъ то́чїю препоѧса́ни, водѣ̀ же предвлїѧ́ннѣй сꙋ́щей въ кꙋ́пели, ᲃт҃и́тель вста́въ прихо́дитъ съ всѣ́мъ Кли́ромъ къ кꙋ́пели, и҆ блⷭ҇ви́въ Кади́лѡ, вꙁе́млетъ ѿ Архідїа́кона Кади́лницꙋ, и҆ покади́въ кꙋ́пелъ крестаѡ́браꙁнѡ: Архідїа́конꙋ ре́кшꙋ:

Блⷭ҇вѝ Влады́кѡ.

Ст҃итель начина́етъ Чи́нъ ᲃт҃агѡ Креще́нїѧ, гл҃ѧ̀:

Блⷭ҇ве́но Ца́ртво Ѿца̀ и҆ Сн҃а и҆ ᲃт҃а́гѡ Дх҃а, нн҃ѣ и҆ при́снѡ:

Архідїа́конъ же глаголе́тъ Е҆кте́нїѧ ѡ҆сщ҃енїѧ водѣ всѧ̀ порѧ́дꙋ. По є҆кте́нїи же всѧ̀ Моли́твы водосщ҃енїѧ, Е҆леꙍпомаꙁа́нїѧ, Креще́нїе же само́е и҆ Мѵрꙍпомаꙁа́нїе, и҆ всѧ̀ про́чаѧ по рѧ́дꙋ и҆ чи́нꙋ напи́саномъ въ Креще́нїи младе́нецъ, ничто́же ѡ҆ставлѧ́ѧ и҆лѝ прилага́ѧ ᲃт҃и́тель съверша́етъ.

Зрѝ ᲃі́е наꙁа́дѣ, на Ли́стѣ, м҃ѳ, н҃. и҆ ѯв҃²⁸.

Вѣ́стнѡ бꙋ́ди, ꙗ҆́кѡ двойстве́ннїи сꙋ́тъ є҆рети́ци.

Пе́рвїи сꙋ́ть, невѣ́рꙋющїи въ ᲃт҃ꙋ́ю є҆диносꙋ́щнꙋю Трⷪ҇цꙋ, и҆ не Крестѧ́щїисѧ въ три погрꙋже́нїѧ, въ и҆мѧ̀ Ѿца̀ и҆ Сн҃а и҆ ᲃт҃а́гѡ Дх҃а: Си́хъ ꙗ҆́коже Е҆́ллинѡвъ, сі́естъ, пога́нъ Крести́ти досто́итъ. Ꙍ҆ креще́нїи ᲂу҆́бѡ си́хъ вы́шше и҆ꙁѡби́лнѡ пре́дъ ᲂу҆каꙁа́сѧ.

Вто́рїи же сꙋ́тъ, и҆́же и҆ вѣ́рꙋютъ въ Бг҃а въ Трⷪ҇ци є҆ди́нагѡ, и҆ въ И҆мѧ̀ Ѿца̀ и҆ Сн҃а и҆ ᲃт҃а́гѡ Дх҃а, въ трѝ погрꙋже́нїѧ Креща́ютсѧ: но ᲂу҆́бѡ и҆мꙋ́тъ своѧ̀ заблꙋжде́нїѧ и҆ є҆́реси раꙁличныѧ, и҆ кро́мѣ Креще́нїѧ про́чїѧ Церко́вныѧ Та́йны не съде́ржатъ, ꙗ҆́ко́вїи сꙋ́тъ, Са́сове, и҆ Ка́лъвинѡве, и҆ и҆́нїи си́мъ подо́бнїи. Си́хъ ᲂу҆́бѡ Крести́ти ника́коже подоба́етъ, поне́же Креще́ни сꙋ́тъ, но то́чїю по ѿрече́нїи свои́хъ сі́хъ проклѧ́тыхъ є҆́ресїй, и҆ и҆сповѣда́нїи Правосла́вныѧ Вѣ́ры, Мѵ́рꙍмъ ᲃт҃ы́мъ пома́ꙁꙋеми быва́ютъ, по Ꙋ҆ста́вꙋ ни́жей положе́нномꙋ.

Тре́тїи же нарица́ютсѧ ѿстꙋ́пници, и҆́же всѧ̀ се́дмъ Та́йны и҆ ѡ҆брѧ́ды Церко́вныѧ съде́ржатъ: не ѿдѣли́вше себѣ̀ ѿ є҆́дности Це́ркве Ст҃ы́ѧ Правосла́внокаѳꙍли́ческїѧ, къ и҆сповѣда́нїю Вѣ́ры нѣ́что, дре́внемꙋ ᲃт҃ы́хъ А҆по́столъ и҆ Ѻ҆ц҃ъ ᲂу҆че́нїю проти́вное прилага́ти дерꙁа́ютъ, и҆́наѧ мнѡ́гаѧ ᲂу҆мышле́нїѧ въ Це́рковъ вно́сѧтъ, и҆ но́ваѧ нѣ́каѧ въво́дѧтъ: и҆ дре́внѧѧ Церко́вныѧ ѡ҆бы́чаѧ ѿмѣта́юще, но́выѧ проти́вныѧ ᲂу҆ставлѧ́ютъ: Си́хъ ᲂу҆бѡ, не то́чїю не Креща́емъ, но а҆́ще ѿ свои́хъ си Мѵ́рꙍмъ пома́ꙁани ᲃꙋ́тъ, и҆ Мѵ́рꙍмъ ᲃт҃ы́мъ не пома́ꙁꙋемъ и҆́хъ, но то́чїю по ѿрече́нїю свое́го си ѿстꙋ́пства и҆сповѣда́ютъ Сѵмво́лъ Правосла́вныѧ Вѣ́ры, и҆ и҆сповѣда́нїемъ грѣхѡ́въ свои́хъ.

Моли́твами же и҆ раꙁдрѣше́нїемъ ᲃт҃и́телскимъ ѡ҆чища́ютсѧ, по чи́нꙋ ни́жей полож́нномꙋ. Ꙍ҆ си́хъ дво́хъ є҆рети́ческихъ чи́нахъ, сі́естъ ѡ҆ и҆́хже Крести́ти, и҆ ѡ҆ и҆́хже Мѵ́рꙍмъ то́чїю пома́ꙁати подоба́етъ:

Вселе́нскїй Събѡ́ръ Вто́рый, и҆́же въ Кꙍнстантінопо́лѣ въ Пра́вилѣ свое́мъ, ᲃе́дмомъ ᲃи́це повелѣва́етъ.

Правосла́вїю же прилага́ющихсѧ и҆ ча́сти ᲃп҃са́емыхъ ѿ є҆рети́ковъ, прїе́млемъ по ᲂу҆ставле́нной ᲃлꙋ́жбѣ и҆ ѡ҆бы́чаю. А҆рїа́нѡвъ ᲂу҆́бѡ и҆ Македонїѧ́нѡвъ, и҆ Савватїѧ́нѡвъ, и҆ Наватїѧ́нѡвъ, и҆ гл҃ю́щихъ себѣ̀ чⷭ҇тыхъ и҆ шꙋ́ихъ, и҆ четырнадесѧ́тникѡвъ, и҆лѝ Тетради́товъ, и҆ А҆пполинарїѧ́нѡвъ прїе́млемъ, да́ющихъ ливе́ллѡвъ. (сі́естъ писа́нїе ѿрече́нїѧ є҆́ресей и҆ и҆сповѣда́нїѧ Правосла́вныѧ Вѣ́ры) и҆ проклина́ющихъ всѧ́кꙋю є҆́ресь, не мꙋдрстꙋ́ющихъ ꙗ҆́кѡже мꙋдрствꙋ́етъ ᲃт҃а́ѧ Бж҃їѧ Каѳꙍли́ческаѧ А҆по́столскаѧ Це́ркѡвъ: и҆ печатлѣ́емыхъ, и҆лѝ пома́ꙁꙋемыхъ пе́рвѣе ᲃт҃ы́мъ Мѵ́рꙍмъ, чело̀ же, и҆ ѻ҆́чи, и҆ но́ꙁдрѣ, и҆ ᲂу҆ста̀, и҆ ᲂу҆ши, и҆ печатлѣ́юще и҆́хъ, гл҃етъ: печа́ть да́ра Дх҃а ᲃт҃а́гѡ.

Е҆ѵномїѧ́нѡвъ же въ є҆дино̀ погрꙋже́нїе Креща́щихсѧ, и҆ Монтани́стѡвъ, здѐ нарица́емыхъ Фри́гꙍвъ, и҆ Савелїѧ́нѡвъ ᲃыноѿче́ства наꙋча́ющихъ, и҆ и҆́на нѣ́каѧ тѧ́жкаѧ творѧ́щихъ, и҆ и҆́ныѧ всѧ̀ є҆́реси (поне́же здѐ мнѡ́ꙁи сꙋ́тъ, найпа́че ѿ Галаті́йскихъ стра́нъ приходѧ́щихъ) всѣ́хъ си́хъ хотѧ́щихъ приложи́тисѧ Правосла́вїю, ꙗ҆́коже Е҆́ллины прїе́млемъ, и҆ въ пе́рвый дн҃ь тво́римъ и҆́хъ Хрїстїѧ́ны, въ вто́рый же ѡ҆глаше́нныхъ, та́же въ тре́тїй заклина́емъ и҆́хъ, по внегда̀ дꙋ́нꙋти три́жды на лицѐ, и҆ въ ᲂу҆́ши, и҆ та́кѡ ѡ҆глаша́емъ и҆́хъ, и҆ твѡ́римъ на до́лꙁѣ вре́мени пребыва́ти въ Це́ркви, и҆ послꙋша́ти писа́нїѧ, и҆ тогда̀ Креща́емъ и҆́хъ.

Се́й Канѡ́нъ вто́рагѡ ᲃт҃а́гѡ Вселе́нскагѡ Събѡ́ра, и҆ ше́стый ᲃт҃ы́й и҆́же въ Трꙋ́ллѣ Събѡ́ръ въ Канѡ́нѣ свое́мъ, че҃: приво́дитъ ѿ сло́ва до сло́ва. Придае́тъ же къ семꙋ̀ Пра́вилꙋ, ѿ Пра́вила ѳі҃, Пе́рвагѡ ᲃт҃а́гѡ Вселе́нскагѡ Събѡ́ра и҆́же въ Ніке́и, сі́е: ѡ҆ Павликїѧ́нахъ же Събѡ́рнаѧ Це́ркѡвъ предѣ́лъ положѝ, прекраща́ти и҆́хъ всѧ́кѡ.

При концѝ же Пра́вила сегѡ̀ прилага́етъ.

И҆ манихе́ѡвъ же, и҆ Ꙋ҆алентинїѧ́нѡвъ, и҆ Маркеѡни́стѡвъ, и҆ сꙋ́щихъ ѿ подо́бныхъ є҆́ресехъ, сі́естъ, си́хъ є҆рети́кѡвъ, ꙗ҆́кѡже и҆ пре́дъ и҆менова́ныхъ въ ᲃе́дмомъ Пра́вилѣ, вто́рагѡ, Събѡ́ра, Крести́ти ꙗ҆́кѡже и҆ Е҆́ллинѡвъ подоба́етъ.

Несторїѧновъ же, тре́бѣ є҆́стъ да сътво́рѧтъ ливе́ллѡвъ, (сі́естъ писа́нїе да дадѧ́тъ,) и҆ є҆́ресь свою̀ да проклина́ютъ, и҆ Несто́рїѧ, и҆ Е҆ѵти́хїѧ, и҆ Діоскѡ́ра, и҆ Севи́ра, и҆ про́чїихъ нача́лникѡвъ си́цевыхъ є҆́ресей, и҆ всѣ́хъ та́ѧжде мꙋдрствꙋ́ющихъ ꙗ҆́же и҆ ѡ҆нѝ: и҆ всѧ̀ пре́дъ рече́нныѧ є҆́реси: и҆ та́ко прїйма́ти и҆́мъ ᲃт҃о́е Причаще́нїе.

Толковни́къ же сегѡ̀ Трꙋллѧ́нскагѡ пра́вила, въ славе́нскихъ Пра́вилѣхъ, ᲃи́це гл҃етъ: Нѣ́цїи ѿ є҆рети́къ Креща́еми быва́ютъ, нѣ́цїи же ᲃт҃ымъ Мѵ́рꙍмъ пома́ꙁꙋеми: Дрꙋ́ꙁїи же всѧ̀ є҆́реси и҆ съ ᲃи́ми, и҆ свою̀ прокле́нше, и҆ тѣ́мъ то́кмѡ довлѣ́ющесѧ, къ ѡ҆бще́нїю прїе́млеми быва́ютъ. Въ все́мъ Пра́вилѣ се́мъ ᲃі́е ска́ꙁꙋетсѧ: А҆рїѧ́не бо и҆ Македѡнїѧ́не, и҆ Наватїѧ́не, гл҃емїи чи́стїи и҆ лѣ́выи, и҆ Четыридесѧ́тници, рекше ᲃре́дници. и҆ А҆пполинарїѧ́не, прокле́нше свою̀ є҆́ресь, и҆ и҆́ныѧ всѧ̀, то́кмѡ Мѵ́рꙍмъ пома́ꙁꙋемы быва́ютъ на телѣ̀, на ѡ҆чесе́хъ, на но́ꙁдрехъ, на ᲂустѣ́хъ и҆ ᲂу̀шесехъ, и҆ знамена́юще и҆́хъ гл҃емъ: печа́ть дара ᲃтагѡ Дха. и҆ та́ко къ ѡ҆бще́нїю прїе́млеми быва́ютъ.

Несторїѧ́не же, и҆ Е҆ѵтихїѧ́не и҆ Севирїѧ́не, и҆ ѿ и҆́ныхъ є҆́ресїй си́мъ подо́бныхъ, свою̀ є҆́ресь, и҆ и҆ныѧ всѧ̀ прокле́нше, и҆ тѣмъ то́кмѡ дово́лни бы́вше, въ ѡ҆бще́нїе приѧ́ти быва́ютъ. А҆́ще же и҆ мнѡ́ги є҆́реси ѡ҆ста́влени бы́ша, ѡ҆ба́че же Павликїѧ́не и҆́же ѿ Па́вла Самоса́тскагѡ сꙋ́тъ, и҆ Е҆ѵномїѧ́не, и҆ Мондани́ты, и҆ Савелїѧ́ны, и҆ Манихеѧ́ны, и҆ Ꙋ҆алентинїѧ́ны, и҆ Маркеѡни́ты и҆ сꙋ́щихъ ѿ подо́бныхъ є҆́ресей, приходѧ́щихъ къ Правосла́вной Вѣ́рѣ, ꙗ҆́кѡ Е҆́ллины прїе́млемъ си́хъ, и҆ въ пе́рвый дн҃ь повелѣва́емъ и҆́мъ да прокленꙋ́тъ свою̀ є҆́ресъ, и҆ и҆́ныѧ є҆́реси, и҆ тво́римъ ѧ҆̀ та́кѡ въма́лѣ Хрⷭ҇тїѧ́ны: Въ вто́рый же дн҃ь, поꙋча́емъ и҆́хъ сло́вꙋ и҆́стинны. Въ тре́тїй же дн҃ь заклина́емъ ѧ҆̀ дꙋ́нꙋвше гⷤ на лицѐ и҆ въ ᲂу҆́ши ихъ, и҆ такѡ тво́римъ ѧ҆̀ о҆глаше́нны, и҆ повелѣва́емъ и҆́мъ вре́мѧ нема́лѡ пребыва́ти въ Це́ркви, и҆ послꙋша́ти Бжⷭ҇твеннагѡ Писа́нїѧ. Подо́бнѣ томꙋ̀ и҆ Фео́дѡръ Власа́монъ А҆нтїѡхі́йскїй Патрїѧ́рхъ, съгласꙋ́ѧсѧ въ все́мъ, то́ежде Пра́вилѡ толкꙋ́ѧ веща́етъ.

Креще́нїе же и҆мꙋ́щихъ и҆́стинное въ трѝ погрꙋже́нїѧ. Въ и҆мѧ̀ Ѿца̀ и҆ Сн҃а и҆ ᲃт҃а́гѡ Дх҃а, въ водѣ̀, про́чїѧ же ᲃт҃ы́ѧ Та́йны, и҆ ѡ҆бы́чаѧ Церкѡ́вныѧ ѿмета́ющихъ, и҆ и҆́ныѧ мнѡ́гїѧ є҆́реси съдержа́щихъ.

Вѣ́стнѡ же бꙋ́ди ꙗ҆́кѡ Е҆рети́кѡвъ раꙁдрѣша́ти и҆ Це́ркви съвокꙋплѧ́ти свойстве́ннѣ нале́житъ точїю Е҆пⷭ҇кпꙋ: Но ᲂу҆́бѡ да не закоснѣ́нїѧ ра́ди, ѿ є҆́реси къ правовѣ́рїю ѡ҆браща́ющїюсѧ, мꙋдрѣ́йшимъ и҆ раꙁсꙋднѣ́йшимъ, въ писа́нїѧхъ же Бжⷭ҇тве́нныхъ вѣ́ждество и҆мꙋ́щимъ ᲃщ҃е́нникѡмъ, могꙋ́щимъ си́цевагѡ наꙋчи́ти Вѣ́ры Правосла́вныѧ чле́нѡвъ, и҆ въ заблꙋжде́нїѧхъ и҆спра́вити, Е҆пⷭ҇кпъ да пода́сть на ᲃі́е блⷭ҇ве́нїе и҆ вла́сть.

Въ пе́рвыхъ ᲂу҆́бѡ ѿ ᲃт҃лѧ, и҆лѝ ѿ не́гѡ вла́сть ᲃі́ю и҆мꙋ́щагѡ, пре́жде всегѡ̀, ка́ѧйсѧ ѡ҆па́снѡ да и҆стѧꙁа́нъ бꙋ́детъ въ чле́нахъ є҆гѡ̀ заблꙋжде́нїѧ:

Та́же да ѡ҆бличи́тъ ѧ҆̀:

Посе́мъ въ накаꙁа́нїи и҆ вѣ́рѣ Правосла́вной да наꙋ́читъ и҆ ᲂу҆твердитъ є҆гѡ̀.

Кни́ги є҆рети́ческїѧ а҆́ще и҆́матъ и҆лѝ исповѣ́дникови а҆́бїе да ѿда́стъ къ съꙁже́нїю, и҆лѝ со́вѣстїю ѡ҆бѧꙁа́нъ да бꙋ́детъ є҆́же бе́ꙁъ замедлѣ́нїѧ ᲃі́е сътвори́ти. А҆ще когѡ̀ прелсти́лъ є҆́стъ и҆лѝ съблаꙁни́лъ, да нака́жетъ є҆гѡ̀ є҆́же ѡ҆ ѡ҆браще́нїи и҆ и҆справле́нїи и҆́хъ пое́ликꙋ въꙁмо́жетъ и҆ са́мъ собо́ю, и҆ ѡ҆́нѣми тща́нїе да сътво́ритъ.

Съверши́въ же и҆ꙁвѣ́стнѡ и҆спыта́нїе и҆ накаꙁа́нїе, съ всѧ́кимъ зѣ́лнымъ ѡ҆пасе́нїемъ да повели́тъ є҆мꙋ̀ и҆сповѣда́ти всѧ̀ грѣхѝ своѧ̀: (не въ Це́ркви, но на ѡ҆со́бнѣмъ мѣ́стѣ) є҆ли́ка ѿ ю҆́ности свое́ѧ памѧтствꙋ́етъ.

По и҆сповѣда́нїи же, да нака́жетъ є҆гѡ̀ и҆ наꙋ́читъ и҆ да и҆стѧ́жетъ ѿ не́гѡ ѿрица́нїѧ сѧ є҆́ресїй.

Раꙁдрѣше́нїѧ же грѣхѡ́въ, а҆́бїе да не пода́сть є҆мꙋ̀, но по и҆сповѣда́нїи и҆ накаꙁа́нїи, да и҆де́тъ съ ни́мъ въ Це́ркѡвъ. И҆ ᲂу҆́бѡ а҆́ще ᲂу҆чи́тель бы́сть є҆́реси, и҆ слꙋжи́тель, и҆ нача́лникъ Е҆рети́ческагѡ ᲃъбѡ́ра, и҆лѝ нарочи́тъ ме́ждꙋ Е҆рети́ки, и҆́же мнѡ́гихъ прелсти́лъ, и҆лѝ съблаꙁни́лъ є҆́стъ, да поста́витъ є҆гѡ̀ пре́дъ две́рми Церкѡ́вными ѿвнѣ.

Свѧти́тель же ѡ҆дѣѧ́нъ въ Е҆пітра́хиль, и҆ Ѽмо́форъ, и҆ Ми́трꙋ, и҆мѣ́ѧ въ шꙋи́ци же́ꙁлъ сво́й Па́стырскїй на свое́мъ сѣда́лищи: (А҆́ще же ᲃі́е ᲃщ҃е́нникъ ѿ Е҆пⷭ҇кпа на ᲃі́е и҆мѣ́ѧй вла́сть съверша́етъ, въ Е҆пітра́хиль и҆ Фелѡ́нъ ѡ҆дѣѧ́нъ сы́й, ста́нетъ) въ Церкѡ́вныхъ две́рехъ, и҆ повелѣ́въ къ Правосла́вной Вѣ́рѣ ѡ҆браща́ющомꙋ колѣ́ни преклони́ти.

Въпраша́етъ є҆гѡ̀, гл҃ѧ̀:

Хо́щеши ли ѿрещи́сѧ проклѧ́тыѧ є҆́реси, И҆мⷬ҇къ: въ не́й же бы́лъ є҆сѝ, и҆ всѣ́хъ непра́востїй є҆рети́ческихъ.

Ѻ҆́нъ же ѿвѣща́етъ:

Хощꙋ̀.

Свѧти́тель же въпраша́етъ:

Хо́щеши ли бы́ти, и҆ жи́ти въ съедине́нїи Вѣ́ры Правосла́внѡкаѳꙍли́ческой?

Ѻ҆́нъ же ѿвѣща́етъ:

Хощꙋ̀.

Свѧти́тель же въста́въ, знамена́етъ челѡ̀ є҆гѡ̀ десни́цею три́жды, глаголѧ̀:

Въ и҆мѧ̀ Ѿца̀ и҆ Сн҃а и҆ ᲃт҃а́гѡ Дх҃а. А҆ми́нь.

И҆ воꙁло́жъ рꙋ́кꙋ на гла́вѣ є҆гѡ̀, гл҃етъ Моли́твꙋ ᲃі́ю:

А҆рхїдїѧ́конꙋ рекшꙋ:

Гд҃ꙋ помоли́мсѧ.

Клиръ:

Гд҃и поми́лꙋй.

Ꙍ҆ и҆́мени твое́мъ Гд҃и Бо́же и҆́стинный, и҆ є҆диноро́днагѡ Сн҃а̀ твое́гѡ, и҆ Прⷭ҇та́гѡ твое́гѡ Дх҃а, въꙁлага́ю рꙋ́кꙋ мою̀, на раба̀ твое́гѡ ᲃегѡ̀, И҆мⷬ҇къ: ᲃподо́блшагосѧ ѿ дїѧ́волскихъ пре́лестїй, и҆ ѿ дꙋшегꙋ́бныхъ Е҆́ресей къ сто́мꙋ И҆́мени тво́емꙋ, и҆ къ ᲃт҃ѣ́й твое́й Събѡ́рной А҆по́столской Це́ркви прибѣ́гнꙋти, и҆ подъ кро́вомъ кри́лꙋ твое́ю съблюде́нꙋ бы́ти.

Ѿимѝ ѿ не́гѡ ве́тхꙋю ѡ҆́нꙋю пре́лестъ, и҆ всѧ́кое є҆рети́ческое ѡ҆слѣпле́нїе, и҆ и҆сполнѝ є҆гѡ̀ є҆́же въ тѧ̀ вѣ́ры, и҆ наде́жды и҆ любвѐ, да ᲂу҆раꙁꙋмѣ́етъ ꙗ҆́кѡ ты́ є҆си є҆ди́нъ Бг҃ъ и҆́стинный, и҆ є҆диноро́дный тво́й ᲃн҃ъ Гд҃ь на́шъ І҆и҃ᲃ Хᲃ҃, и҆ ᲃт҃ый тво́й дх҃ъ: Да́ждъ є҆мꙋ̀ въ всѣ́хъ за́повѣдехъ твои́хъ шествова́ти, и҆ ᲂу҆го́днаѧ тебѣ̀ съблюстѝ: И҆́бо а҆́ще та сътво́ритъ человѣ́къ жи́въ бꙋ́детъ въ ни́хъ: въпишѝ є҆гѡ̀ въ кни́ги живо́тныѧ, и҆ съединѝ є҆гѡ̀ ᲃта́дꙋ наслѣ́дїѧ твое́гѡ, да просла́витсѧ и҆мѧ̀ твоѐ ᲃт҃ое ѡ҆не́мъ, и҆ въꙁлюбле́ннагѡ твое́гѡ Сн҃а, Гд҃а же на́шегѡ І҆и҃ᲃ Ха҃, и҆ животворѧ́щагѡ ти Дх҃а.

Бꙋдѣ́та ѡ҆́цѣ твоѝ приꙁира́ющи на́нь въ млⷭ҇ти всегда̀: и҆ ᲂу҆́ши твоѝ є҆́же послꙋша́ти гла́са моле́нїѧ є҆́гѡ̀, въꙁвеселѝ є҆гѡ̀ въ всѣ́хъ дѣ́лехъ рꙋ́кꙋ є҆́гѡ̀: ꙗ҆́кѡ да и҆сповѣ́сть ти сѧ покланѧ́ѧсѧ, и҆ славѧ̀ И҆мѧ̀ твоѐ велѝкое и҆ вышнее, и҆ въсхва́литъ тѧ̀ вы́нꙋ въ всѧ̀ днѝ живота̀ свое́гѡ: Тебѣ̀ бо пою́тъ всѧ̀ ᲃи́лы нбⷭ҇ныѧ, и҆ твоѧ̀ є҆́стъ ᲃла́ва, Ѿца̀, и҆ Сн҃а, и҆ ᲃт҃гѡ Дх҃а, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

По се́мъ глаголе́тъ надъ ни́мъ запрѣще́нїе ᲃі́е:

Заклина́ю тѧ̀ нечистый дш҃е, Бо́гомъ Ѿце́мъ Вседержи́телемъ, и҆ Сн҃омъ є҆́гѡ І҆и҃ᲃ Хрⷭ҇то́мъ Гд҃емъ на́шимъ, и҆ Дх҃омъ ᲃт҃ы́мъ, ꙗ҆́кѡ да ѿстꙋпи́ши ѿ сегѡ̀ раба̀ Бж҃їѧ И҆мⷬ҇къ: є҆го́же Гд҃ь и҆ Бг҃ъ на́шъ ѿ погрѣше́нїй и҆ пре́лестїй твои́хъ свободи́ти, и҆ къ Це́ркви ᲃт҃ѣ́й Събо́рной А҆по́столской Мт҃ри на́шей приꙁва́ти сподоблѧ́етъ. То́й тебѣ̀ да запрѣти́тъ проклѧ́тый ѡ҆сꙋжде́нниче, и҆́же человѣ́ческагѡ ра́ди ᲃпⷭ҇нїѧ пло́тїю пострада̀, ᲂу҆мрѐ, и҆ погребе́нъ бы́стъ, тебѣ̀ же и҆ твою̀ всю си́лꙋ побѣди́лъ є҆́стъ, и҆ Въскре́съ въꙁнесе́сѧ на́ нб҃о, ѿнюдꙋже па́ки грѧде́тъ ᲃꙋди́ти живы́мъ и҆ ме́ртвымъ, тебѣ̀ же и҆ всѣ́хъ слꙋжа́щихъ тебѣ̀ вѣ́чномꙋ ѡ҆гню̀ преда́ти: А҆ми́нь.

А҆́бїе же по семъ ᲃт҃и́тель въꙁдвиꙁа́етъ колѣ́нѣ, прекло́ншагѡ, и҆́мъ є҆гѡ̀ за деснꙋ́ю рꙋ́кꙋ, гл҃ѧ̀:

Въстанѝ спѧ́й, и҆ въскреснѝ ѿ ме́ртвыхъ, и҆ просвѣ́титъ тѧ̀ Хᲃ҃:

Въста́вшꙋ же є҆мꙋ̀, ᲃт҃ль, (и҆лѝ І҆ере́ѷ,) глаголе́тъ къ не́мꙋ:

Ѽбрати́сѧ къ за́падѡмъ, и҆ и҆́стиннѡ ѿ всегѡ̀ ᲃе́рдца твое́гѡ ѿрица́йсѧ сатаны̀, и҆ всѣ́хъ є҆́ресей Имⷬ҇къ: ꙗ҆́кѡ да чи́стѡ и҆сповѣ́си Правосла́внокаѳꙍли́ческꙋю Вѣ́рꙋ.

Ѻ҆́нъ же ѡ҆бра́щъсѧ къ за́падѡмъ рꙋ́цѣ просте́ртѣ ѿ себѣ̀ держи́тъ.

Свѧти́тель же, и҆лѝ І҆ере́ѷ, въпраша́етъ є҆гѡ̀, гл҃ѧ̀:

Человѣ́че ѿрица́еши ли сѧ ᲃатаны̀, и҆ всѣ́хъ дѣ́лъ є҆гѡ̀ и҆ всѣ́хъ а҆́нгелѡвъ є҆гѡ̀, и҆ всеѧ̀ ᲃлꙋ́жбы є҆гѡ̀, и҆ всеѧ̀ горды́нѣ є҆гѡ̀, и҆ плю́еши ли на не́гѡ?

Ѻ҆́нъ же Ѿвѣща́етъ:

Ѿрица́юсѧ ᲃатаны̀, и҆ всѣ́хъ дѣ́лъ є҆гѡ̀ и҆ всѣ́хъ а҆́нгелѡвъ є҆гѡ̀, и҆ всеѧ̀ ᲃлꙋ́жбы, и҆ всеѧ̀ горды́нѣ єгѡ̀, и҆ плю́ю на не́гѡ.

Свѧти́тель въпраша́етъ є҆гѡ̀.

Ѿрица́еши ли сѧ всѣ́хъ є҆́ресей Калви́нскихъ (и҆лѝ Са́скихъ.) и҆ ꙗ҆́кѡ Бг҃ꙋ и҆ и҆́стиннѣ є҆гѡ̀ проти́вныхъ, и҆ дш҃егꙋби́телныхъ сꙋ́щихъ ѿмѣта́еши ли сѧ, и҆ проклина́еши ли ѧ҆̀?

Ѻ҆́нъ же Ѿвѣща́етъ:

Ѿрица́юсѧ всѣ́хъ є҆́ресей Ка́лъвинскихъ (и҆лѝ Са́скихъ.) и҆ ꙗ҆́кѡ Бг҃ꙋ и҆ и҆́стиннѣ є҆гѡ̀ проти́вныхъ, и҆ дш҃егꙋби́телныхъ сꙋ́щихъ ѿмѣта́юсѧ, и҆ проклина́ю ѧ҆̀.

Свѧти́тель въпраша́етъ є҆гѡ̀.

Ѿрица́еши ли сѧ є҆́ресе нача́лникѡвъ, сі́естъ Марти́на Лю́тера, І҆ѡа́нна Ка́лвина, Мелликтѡ́на, Гꙋ́сса, и҆ съ тѣ́ми всѣ́хъ Лютера́нскихъ и҆ Ка́лвинскихъ Збо́рѡвъ, Сіниѻ́рѡвъ и҆ Мини́стрѡвъ, преда́нїй же и҆ ᲂу҆ста́вѡвъ, и҆ всѣ́хъ ᲂу҆чи́телїй и҆ ᲂу҆че́нїѧ и҆́хъ, и҆ проклина́еши ли и҆́хъ?

Ѻ҆́нъ же Ѿвѣща́етъ:

Всѣ́хъ ты́хъ, и҆ всегѡ̀ и҆́хъ ᲂу҆че́нїѧ ѿрицаюсѧ, и҆ проклина́ю и҆́хъ.

Свѧти́тель въпраша́етъ:

Ѿрица́еши ли сѧ къ си́мъ, нн҃ѣшнихъ всѣ́хъ и҆ дре́внихъ а҆поста́сїй, є҆́ресей же и҆ є҆ресенача́лникѡвъ, и҆ ꙗ҆́кѡ Богопроти́вныхъ сꙋ́щихъ и҆ Богоме́рꙁскихъ, проклина́еши, ѿмѣта́еши, А҆наѳе́мѣ предае́ши и҆ плю́еши ли, на́нѧ?

Ѻ҆́нъ же Ѿвѣща́етъ:

Всѣ́хъ дре́внихъ и҆ нн҃ѣшнихъ а҆поста́сїй, є҆́ресей же и҆ є҆ресенача́лникѡвъ ꙗ҆́кѡ Богопроти́вныхъ и҆ Богоме́рꙁскихъ, проклина́ю, ѿмѣта́ю, А҆наѳе́мѣ предаю̀ и҆ плю́ю на́нѧ.

Семꙋ̀ же бы́вшꙋ, Свѧти́тель, глаголе́тъ къ не́мꙋ:

Ѽбрати́сѧ къ Въсто́кѡмъ, и҆ и҆сповѣ́ждъсѧ Гв҃и къ не́мꙋ же прибѣ́глъ є҆сѝ.

Ѽбра́щъшꙋ же сѧ є҆мꙋ̀ къ въсто́кѡмъ Свѧти́тель гл҃етъ къ немꙋ̀.

Ѿре́клсѧ є҆́ресїй Ка́лвинскихъ, (и҆лѝ Са́сскихъ)?

Ѻ҆́нъ же Ѿвѣща́етъ:

Ѿреко́хъсѧ.

Свѧти́тель же въпраша́етъ:

Вѣ́рꙋеши ли въ є҆ди́нагѡ Бг҃а въ Трⷪ҇ци ᲃт҃ѣ́й слави́магѡ, и҆ покланѧ́емагѡ, Ѿца̀, и҆ Сн҃а, и҆ ᲃт҃а́гѡ Дх҃а, и҆ покланѧ́ешилисѧ є҆мꙋ̀ ꙗ҆́кѡ Ца́рꙋ и҆ Бг҃ꙋ?

Ѻ҆́нъ же Ѿвѣща́етъ:

Вѣ́рꙋю въ є҆ди́нагѡ Бг҃а въ Трои́ци слави́магѡ, и҆ покланѧ́емагѡ, Ѿца̀, и҆ Сн҃а, и҆ ᲃт҃а́гѡ Дх҃а, и҆ ꙗ҆́кѡ Ца́рꙋ покланѧ́юсѧ.

И҆ а҆́бїе тво́ритъ поклоне́нїе є҆дино̀ до землѣ̀.

Свѧти́тель же гл҃етъ:

Блⷭ҇ве́нъ Бг҃ъ хотѧ́й всѣ́мъ человѣ́комъ спⷭ҇ти́сѧ, и҆ въ раꙁꙋмъ и҆́стинный прїйтѝ, сы́й блⷭ҇ве́нный въ вѣ́ки.

Кли́ръ:

А҆ми́нь.

И҆ а҆́бїе ᲃт҃ль подае́тъ є҆мꙋ̀ коне́цъ Ѽмо́фора, (А҆́ще же ᲃщ҃енникъ ᲃі́е дѣйствꙋ́етъ, коне́цъ Е҆пітра́хїлѧ,) въ десни́цꙋ, гл҃ѧ̀:

Внидѝ въ Це́ркѡвъ Бж҃їю, ѿ не́ѧ же пре́лестїю є҆́ресїй, И҆мⷬ҇къ: дале́че бы́лъ є҆сѝ, и҆ вѣ́ждъ ᲃебѐ ꙗ҆́кѡ и҆ꙁба́вилсѧ є҆сѝ ѿ сѣ́ти ᲃме́ртныѧ, и҆ ѿ поги́бели вѣ́чныѧ: ме́рꙁско же ти да бꙋ́детъ и҆дѡлослꙋже́нїе: поперѝ всѧ̀ непра́вости, и҆ заблꙋжде́нїѧ є҆рети́ческаѧ. Чтѝ Гд҃а Бг҃а Ѿца̀ Вседержи́телѧ, І҆и҃са Ха҃ Сн҃а є҆гѡ̀, и҆ Дх҃а ᲃт҃гѡ, є҆ди́нагѡ жива́гѡ и҆ и҆́стиннагѡ Бг҃а, ᲃт҃ꙋ́ю Трⷪ҇цꙋ є҆диносꙋ́щнꙋю и҆ нераꙁдѣли́мꙋю.

И҆ и҆ꙁре́къ сі́ѧ въво́дитъ є҆гѡ̀ въ Це́ркѡвъ, держа́щасѧ конца̀ Ѽмо́фора, (и҆лѝ Е҆пітра́хилѧ и҆ поста́витъ є҆гѡ̀ пре́дъ А҆мбѡ́номъ, и҆де́же на столцѣ̀ ᲃт҃о́е Е҆ѵⷢ҇лїе поло́жено є҆́стъ: ѻ҆́нъ же ста́въ а҆́бїе и҆спꙋща́етъ коне́цъ Ѽмо́фора съ рꙋкѝ: и҆дꙋ́щимъ же и҆́мъ въ Це́ркѡвъ. Кли́ръ чте́тъ, Ѱалѡ́мъ, ѯѕ҃.

Бж҃е, ᲂу҆ще́дри ны̀ и҆ блгⷭ҇вѝ ны, Просвѣтѝ лицѐ твоѐ на́ны, и҆ поми́лꙋй ны.

Поꙁна́ти на землѝ пꙋть тво́й, въ всѣ́хъ ꙗ҆ꙁы́цѣхъ ᲃп҃се́нїе твоѐ.

Да и҆сповѣдѧ́тсѧ тебѣ̀ лю́дїе, Бж҃е, да и҆сповѣдѧ́тсѧ тебѣ̀ лю́дїе всѝ.

Да въꙁвеселѧ́тсѧ и҆ въꙁра́дꙋютсѧ ꙗ҆ꙁы́цы: ꙗ҆́кѡ ᲃꙋди́ши лю́демъ правото́ю, и҆ ꙗ҆ꙁы́ки на землѝ наста́виши.

Да и҆сповѣдѧ́тсѧ тебѣ̀ лю́дїе, Бж҃е, да и҆сповѣдѧ́тсѧ тебѣ̀ лю́дїе всѝ.

Землѧ̀ дадѐ пло́дъ сво́й: Блⷭ҇гвѝ ны, Бж҃е, Бо́же на́шъ.

Блⷭ҇гвѝ ны, Бж҃е: и҆ да ᲂу҆боѧ́тсѧ є҆гѡ̀ всѝ кѡ́нцы землѧ̀.

По сконча́нїи же ѱалма̀ повели́тъ є҆мꙋ̀ ᲃт҃и́телъ колѣ́нѣ пре́дъ ᲃт҃ы́мъ Е҆ѵⷢ҇лїемъ преклони́ти.

Семꙋ̀ же бы́вшꙋ, гл҃етъ ᲃт҃итель стіхѝ сі́ѧ.

Послѝ Дх҃ъ тво́й и҆ съꙁи́ждꙋтсѧ; и҆ ѡ҆бнови́ши лицѐ землѝ.

Ѽбрати́сѧ Гд҃и доко́лѣ: и҆ ᲂу҆мл҃е́нъ бꙋ́ди на раба̀ твое́гѡ.

Бꙋ́дꙋтъ стропо́тнаѧ въ пра́ваѧ: и҆ ѡ҆́стрыѧ въ пꙋ́ти гла́дки.

Сп҃сѝ раба̀ твое́гѡ Бо́же мо́й, ᲂу҆пова́ющагѡ на́тѧ.

Бꙋ́ди є҆мꙋ̀ Гд҃и ᲃто́лпъ крѣ́пости, ѿ лица̀ вра́жїѧ.

Ничто́же да ᲂу҆спѣ́етъ вра́гъ на́нь: и҆ ᲃы́нъ беꙁꙁакѡ́нїѧ да не прило́житъ ѡ҆ꙁлоби́ти є҆гѡ̀.

Гд҃и ᲂу҆слы́ши моли́твꙋ мою̀: и҆ во́пль мо́й къ тебѣ̀ да прі́йдетъ.

По си́хъ же а҆́бїе А҆рхїдїѧ́конъ гл҃етъ:

Гд҃ꙋ помо́лимсѧ.

Кли́ръ:

Гд҃и поми́лꙋй.

Свѧти́тель же чте́тъ съ всѧ́кимъ ᲂу҆миле́нїемъ Моли́твꙋ ᲃі́ю.

Гд҃и Бо́же Вседержи́телю, є҆ди́не ᲃт҃е и҆ на ᲃт҃ы́хъ почива́ѧй, вели́кїѧ ра́ди и҆ неисче́тныѧ твое́ѧ къ человѣ́кѡмъ любвѐ, съгрѣша́ющимъ раꙁли́чныѧ ѡ҆́браꙁы покаѧ́нїѧ всегда̀ предлага́ѧй, и҆ заблꙋ́ждшимъ ѿ и҆́стинны, пꙋтъ пра́вый къ поꙁна́нїю тебѣ̀ є҆ди́нагѡ и҆́стиннагѡ въ Трои́ци слави́магѡ и҆ покланѧ́емагѡ Бг҃а, пока́ꙁꙋѧй, въ є҆́же ни є҆дино́мꙋ ѿ ни́хъ поги́бнꙋти, но всѣ́мъ спⷭ҇ти́сѧ, и҆ въ ра́ꙁꙋмъ и҆́стинный прїйтѝ.

Благодари́мъ тѧ̀ ᲃла́вимъ и҆ велича́емъ, ꙗ҆́кѡ и҆ нн҃ѣ семꙋ̀ слове́сномꙋ съꙁда́нїю твое́мꙋ, И҆мⷬ҇къ: въꙁсїѧ́лъ є҆сѝ въ ᲃе́рдце є҆гѡ̀ свѣ́тъ поꙁна́нїѧ твое́ѧ и҆́стинны, и҆ а҆кѝ ѿ сна̀ ѿ прелести поги́белныѧ є҆́реси и҆ ѿстꙋ́пства въꙁбнꙋ́ти: и҆ къ ᲃт҃ѣ́й твое́й А҆по́столской Правосла́внокаѳꙍли́ческой Це́ркви прибѣ́гнꙋти сподоби́вый.

Въꙁсїѧ́й ᲂу҆́бѡ ѽ Влады́кѡ, ᲃмире́ннѡ моли́мъ тѧ̀, съверше́ннѡ въ ᲃе́рдце є҆гѡ̀ ᲃвѣ́тъ благода́ти ᲃт҃а́гѡ твое́гѡ Дх҃а, къ просвѣще́нїю ра́ꙁꙋма и҆́стинны ᲃт҃а́гѡ Е҆ѵⷢ҇лїѧ твое́гѡ: да́ждъ є҆мꙋ̀ нелицемѣ́рнѡ, невъꙁвра́тнѡ, и҆ неле́стнѡ съедини́тисѧ ᲃт҃ѣ́й твое́й Сбо́рнѣй Це́ркви, и҆ гнꙋша́тисѧ и҆ попира́ти всѧ̀ дш҃егꙋби́телныѧ є҆́реси и҆ ѿстꙋ́пства, и҆́стиннѡ же прїѧ́ти и҆сповѣда́ти, и҆ тве́рдѡ съдержа́ти Правосла́внокаѳꙍли́ческꙋю Вѣ́рꙋ.

Съпричтѝ є҆го и҆ꙁбра́нномꙋ твое́мꙋ ста́дꙋ, и҆ съединѝ є҆гѡ̀ тѣ́лꙋ Це́ркве твое́ѧ ᲃт҃ы́ѧ: ᲃътворѝ є҆гѡ̀ съсꙋ́дъ че́стенъ и҆ жили́ще ᲃт҃а́гѡ твое́гѡ Дх҃а, ꙗ҆́кѡ да тѣ́мъ всегда̀ ѡ҆кормлѧ́емъ и҆ наставлѧ́емъ, ᲃп҃си́телныѧ за́повѣди твоѧ̀ съблюде́тъ: и҆ творѧ̀ во́лю твою̀ благꙋ́ю, благоꙋго́днꙋю же и҆ съвершеннꙋю сподоби́тсѧ и҆ въспрїѧтїѧ ибⷭ҇ныхъ твои́хъ благи́хъ, съ всѣ́ми благоꙋгоди́вшими тебѣ̀.

Ты́ бо є҆сѝ Бг҃ъ млⷭ҇ти, и҆ щедрѡ́тъ человѣкѡлю́бїѧ, и҆ всѣ́мъ человѣ́кѡмъ хо́щеши ᲃпⷭ҇ти́сѧ, и҆ тебѣ̀ ᲃла́вꙋ въꙁсыла́емъ Ѿцꙋ̀, и҆ Сн҃ꙋ, и҆ ᲃт҃о́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ.

Кли́ръ:

А҆ми́нь.

По моли́твѣ же Свѧти́тель повелѣва́етъ є҆мꙋ̀ въста́ти глаголѧ̀:

Въстанѝ, и҆ станѝ до́брѣ, станѝ съ стра́хѡмъ, и҆ и҆́стиннѡ и҆сповѣ́ждъ Правосла́внокаѳꙍли́ческꙋю Вѣ́рꙋ, всѧ̀ же є҆́реси прокленѝ, ꙗ҆́кѡ да проще́нъ и҆ раꙁдрѣше́нъ бꙋ́деши ѿ съю́ꙁа клѧтве́ннагѡ, и҆ всѧ́кагѡ ѿлꙋче́нїѧ, и҆ причте́нъ бꙋ́деши тѣ́лꙋ Це́ркве Хрⷭ҇товы.

Ѻ҆́нъ же а҆́бїе вста́въ, на Ха́ртїи предꙋготова́нной чте́тъ въ ᲂу҆слыша́нїе всѣ́мъ, сі́ѧ.

И҆сповѣда́нїе Правосла́вныѧ Вѣ́ры.

А҆́ꙁъ И҆мⷬ҇къ: тве́рдою вѣ́рою, вѣ́рꙋю, и҆ кро́мѣ всѧ́кагѡ ᲂу҆сꙋмнѣ́нїѧ и҆́стиннѡ и҆сповѣдꙋ́ю всѐ кꙋ́пнѡ и҆ кое́ждѡ ѡ҆со́бнѣ є҆́же замыка́етсѧ въ Сѵмво́лѣ сі́естъ въ сложе́нїи вѣ́ры на ᲃт҃ы́хъ Вселе́нскихъ Събѡ́рѣхъ, Ніке́йскомъ пе́рвомъ, и҆ Кꙍнстантинопо́лскомъ вто́ромъ сложе́нныхъ, є҆го́же ᲃт҃а́ѧ Събѡ́рнаѧ А҆по́столскаѧ Въсто́чнаѧ Це́ркѡвъ съдержи́тъ и҆ и҆сповѣдꙋ́етъ, сі́естъ:

Вѣ́рꙋю во є҆ᲁи́нагѡ Бг҃а Ѿца̀ Всеᲁержи́телѧ, тво́рца нб҃ꙋ: зрѝ ᲃі́е наꙁад: на Листъ: м҃е²⁹.

А҆по́столскаѧ и҆ Церко́внаѧ преда́нїѧ, и҆ и҆́наѧ тое́й же Це́ркве ᲂу҆ꙁаконе́нїѧ, ᲂу҆ста́вы же и҆ расположе́нїѧ, и҆́стиннѡ и҆ крѣ́пкѡ прїемлю̀, и҆ лобыꙁа́ю. та́кожде ᲃт҃о́е писа́нїе по раꙁꙋмѣ́нїю є҆́же съде́ржала є҆стъ, и҆ съдержи́тъ Це́рковъ Ст҃а́ѧ Восто́чнаѧ Мт҃и на́ша, є҆́йже прислꙋша́етъ раꙁсꙋжда́ти ѡ҆ и҆́стинномъ раꙁꙋмѣ́нїи, и҆ и҆столкова́нїй ᲃт҃ыхъ Писанїй прїемлю̀, ни́же ᲃі́е когда̀ ра́ꙁвѣ по є҆динодꙋ́шномъ согла́сїи ᲃт҃ы́хъ Ѿц҃ъ прїйма́ти и҆ раꙁꙋмѣва́ти бꙋ́дꙋ.

И҆сповѣдꙋ́ю та́кожде ᲃе́дмъ бы́ти и҆́стиннѡ и҆ свойстве́ннѡ Та́йны но́вагѡ За́кона, ѿ І҆и҃са Ха҃ Гд҃а на́шегѡ ᲂу҆ставлены на ᲃпⷭ҇нїе рѡ́да человѣ́ческагѡ: а҆́ще и҆ не всѧ̀ коемꙋ́ждѡ нꙋ́ждна потре́бна сꙋ́тъ, сі́естъ, Креще́нїе, Мѵрꙍпомаꙁа́нїе, Е҆ѵхари́стїю, Покаѧ́нїе, Е҆леꙍсщ҃е́нїе, Сщ҃е́нство, и҆ Сꙋпрꙋ́жество; и҆́ми же благода́ть прїе́млющимъ подава́етсѧ. ѿ си́хъ же Креще́нїе, Мѵрꙍпомаꙁа́нїе, и҆ Сщ҃е́нство, кро́мѣ ᲃт҃ота́тства, повтарѧ́тисѧ не могꙋ́тъ.

Прїѧ́тыѧ тако́жде и҆ ᲂу҆твержде́нныѧ Це́ркве Правосла́внѡкаѳꙍли́ческїа Въсто́чныа ѡ҆брѧ́ды, въ предърече́нныхъ всѣ́хъ Та́инъ ᲃъбѡ́рномъ ᲃщ҃еннодѣ́йствїи, прїе́млю и҆ лобыꙁа́ю.

Всѐ и҆ кое́ждѡ ѡ҆со́бнѡ є҆́же ѡ҆ грѣсѣ̀ перворо́дномъ, и҆ ѡ҆ ѡ҆правда́нїи, є҆́же Це́ркѡвъ ᲃт҃аѧ Кѳꙍли́ческаѧ Восто́чнаѧ и҆сповѣдꙋ́етъ и҆ наꙋча́етъ, прїемлю̀ и҆ лобыꙁа́ю.

И҆сповѣдꙋ́ю къ семꙋ̀ въ Лѵтꙋ́ргїи Бжⷭ҇тве́нной приноси́тисѧ Бг҃ꙋ, и҆́стиннꙋю, ᲃвойстве́ннꙋю, и҆ ᲂу҆блага́лнꙋю же́ртꙋ ѡ҆ живы́хъ и҆ ᲂу҆со́пшихъ, и҆ въ Е҆ѵхарі́стїи Та́йнѣ бы́ти и҆́стиннѡ, и҆ речеви́стѡ, Тѣ́ло и҆ Кро́въ, кꙋ́пнѡ съ дш҃ею и҆ бжⷭ҇тво́мъ Гд҃а на́шегѡ І҆и҃са Ха҃, и҆ бы́ти премѣне́нїе въ сегѡ̀ сꙋщества̀ Хлѣ́ба, въ Тѣ́ло, и҆ въ сегѡ̀ сꙋщества̀ Вина̀, въ Кро́въ: є҆́же премѣне́нїе Каѳꙍли́ческаѧ въсто́чнаѧ Це́ркѡвъ пресꙋществе́нїе и҆менꙋ́етъ.

И҆сповѣдꙋ́ю та́кожде подъ двѣ́ма ви́ды Хлѣ́ба и҆ Вина̀, всегѡ̀ и҆ цѣ́лагѡ Ха҃, и҆ и҆́стиннꙋю Та́йнꙋ вѣ́рныхъ прїйма́ти.

Вѣ́рꙋю къ семꙋ̀, и҆ постоѧ́телнѡ и҆сповѣдꙋ́ю, трѝ бы́ти ста́ны дш҃ъ ѿ мі́ра сегѡ̀ преставлѧ́ющихсѧ.

Пе́рвый, ᲃт҃ы́хъ на нб҃о ѿходѧ́щихъ, и҆ съ Хрⷭ҇то́мъ Царствꙋ́ющихъ, и҆́хъ же честѝ и҆ приꙁыва́ти досто́итъ, ꙗ҆́кѡ молѧ́щихъсѧ Бг҃ꙋ ѡ҆ на́съ: и҆ ꙗ҆́кѡ Мо́щи и҆́хъ чти́ти подоба́етъ.

Вто́рый ᲃта́нъ ѿше́дшихъ дш҃ъ є҆́стъ, невѣ́рныхъ пога́нъ, и҆ є҆рети́кѡвъ, и҆ хрїстїѧ́нъ нечести́во жи́вшихъ, и҆ кро́мѣ покаѧ́нїѧ ѿше́дшихъ, и҆ си́хъ мѣ́сто бы́ти А҆́дъ и҆ ѡ҆́гнь гее́ннскїй: и҆ ᲂу҆бѡ ꙗ҆́коже сты́хъ нбⷭ҇наѧ въꙁдаѧ́нїѧ ѿ ча́сти нн҃ѣ прїйма́ти, и҆ ра́достнѡ съверше́ннѣ съ тѣ́ломъ, въ вто́рое прише́ствїе Хв҃о въ Въскрⷭ҇нїи ме́ртвыхъ прїѧ́ти ѡ҆жида́ющихъ, ᲃи́це и҆ въ мꙋ́кахъ сꙋ́щаѧ дш҃а̀ ѿ части а҆ не ᲃъверше́ннѣ мꙋ́ки нн҃ѣ прїѧ́ти, болѣꙁне́ннѡ же ѡ҆жида́ти сверше́ннагѡ съ тѣ́лѡмъ ѡ҆сꙋжде́нїѧ, и҆ мꙋ́къ въспрїѧ́тїѧ въ ᲃтра́шный дн҃ь Сꙋ́да вто́рагѡ Прише́ствїѧ Хв҃а.

Тре́тїй же ᲃта́нъ дш҃ъ є҆́стъ въ покаѧ́нїи ѿше́дшихъ правовѣ́рныхъ хрїстїѧ́нъ, но не ᲂу҆довлетвори́вшихъ за своѧ̀ съгрѣше́нїѧ, ꙗ҆́же съдержи́ми быва́ютъ въ тмѣ̀ неꙁре́нїѧ лица̀ Бж҃їѧ, до́ндеже Це́ркѡвъ беꙁкро́вною же́ртвою Тѣ́ла и҆ Крвѐ Хрⷭ҇то́вы, Моли́твами же, По́стомъ, и҆ Моли́твѧми, и҆ и҆́нѣми добротворе́нъми ѡ҆ ни́хъ доблесътво́ритъ, самѝ бо ѡ҆ себѣ̀ терпѣ́нїемъ ско́рби и҆ бо́лѣꙁни доблетвори́ти не могꙋ́тъ, и҆ ꙗ҆́кѡ доблетворе́нїе Церкѡ́вное тѣ́мъ по́мощное є҆́стъ къ свобожде́нїю ѿ си́цевагѡ ᲂу҆держа́нїѧ, и҆ къ въсхожде́нїю на нб҃са̀ и҆ зрѣ́нїю лица̀ Бж҃їѧ, и҆сповѣдꙋ́ю.

Тве́рдѡ и҆сповѣдꙋ́ю ꙗ҆́кѡ И҆кꙍ́ны Хв҃ы и҆ при́снѡ Дв҃ы Бц҃и, и҆ про́чїихъ ᲃт҃ыхъ, досто́итъ и҆мѣ́ти и҆ съдержа́ти; и҆ ꙗ҆́кѡ досто́йнꙋю чⷭ҇тъ тѣ́мъ ѿда́ти подоба́етъ.

Вѣ́рꙋю къ семꙋ̀ и҆ и҆сповѣдꙋ́ю, ѿ Ха҃ Бг҃а да́ннꙋю бы́ти вла́сть въ Це́ркви Правосла́внѡкаѳꙍли́ческой А҆рхїере́ꙍмъ и҆ І҆ере́ꙍмъ дрꙋгопрїема́телнѣ є҆́же вѧꙁа́ти и҆ рѣша́ти, и҆ ꙗ҆́кѡ є҆́же а҆́ще ѡ҆нѝ тое́ю и҆́мъ да́нною ᲃвѧ́жꙋтъ и҆ раꙁдрѣша́тъ на землѝ, свѧ́ꙁано и҆ раꙁдрѣше́но бꙋ́детъ и҆ на нб҃сѝ.

Вѣ́рꙋю и҆ и҆сповѣдꙋ́ю, ꙗ҆́кѡ Це́ркви ᲃт҃о́й Правосла́внѡкаѳꙍли́ческой ѡ҆снова́нїе, глава̀, найвы́шшїй А҆рхїере́й, и҆ А҆рхїпа́стыръ, є҆ди́нъ є҆́стъ Гд҃ь на́шъ І҆и҃ᲃ Хᲃ҃, ѿ не́гѡ же вѧ́щшїи и҆ ме́ншїи А҆рхїере́е, па́стырїе и҆ ᲂу҆чи́телїе, къ правле́нїю Це́рквѣ ᲂу҆ста́влени сꙋ́тъ, и҆ ꙗ҆́кѡ се́й Це́рквѣ прави́тель и҆ ко́рмчїй, є҆́стъ Дх҃ъ ᲃт҃ы́й.

Сі́ю ᲂу҆́бѡ Це́ркѡвъ Невѣ́стꙋ Хв҃ꙋ бы́ти, и҆сповѣдꙋ́ю, и҆ въ не́й бы́ти и҆́стинное ᲃпⷭ҇нїе, кро́мѣ же ᲃеѧ̀ ꙗ҆́кѡ невъꙁмо́жнѡ є҆́стъ нико́мꙋ же спсти́сѧ вѣ́рꙋю.

Кꙍнстантинопо́лскомꙋ Патрїа́рсѣ, ꙗ҆́кѡ приро́дномꙋ Ѿцꙋ̀ и҆ ᲃвойстве́нномꙋ Па́стырꙋ Рꙍссі́йскїѧ Це́ркве, и҆ ѿ не́гѡ блⷭ҇венномꙋ Митрополи́тꙋ Кі́евскомꙋ Га́лицкомꙋ и҆ всеѧ̀ Рꙍ́ссїи, и҆́стинное даже до кончины̀ живота̀ мое́гѡ послꙋша́нїе ѿдава́ти ѡ҆бѣща́ю и҆ присѧга́ю.

Про́чаѧ та́кожде всѧ̀ ѿ ᲃт҃ы́хъ Ѽц҃ъ на ᲃт҃ы́хъ ᲃедмѝ Вселе́нскихъ и҆ помѣ́стныхъ Сбѡ́рѣхъ, преда́ннаѧ, ᲂу҆ꙁаконе́ннаѧ, и҆ и҆ꙁъѧсне́ннаѧ кро́мѣ всѧ́кагѡ ᲂу҆сꙋмнѣ́нїѧ прїемлю̀, и҆ и҆сповѣдꙋ́ю: Кꙋ́пно же проти́внаѧ всѧ̀, и҆ є҆́реси всѧ́каѧ ѿ Це́ркве ѡ҆сꙋжде́нныѧ, ѿме́щенныѧ, и҆ проклѧ́тыѧ, и҆ а҆́ꙁъ та́кожде ѡсꙋжда́ю, ѿмѣта́ю, и҆ А҆наѳе́мѣ предаю̀.

Сі́ю и҆́стиннꙋю Правосла́внокаѳꙍли́ческꙋю Вѣ́рꙋ, кро́ме є҆ѧ́же никто́же ᲃпⷭ҇тисѧ мо́жетъ, и҆́же нн҃ѣ доброхо́тнѣ и҆сповѣда́ю и҆ и҆́стиннѡ съдержꙋ̀, тꙋ́южде цѣ́лꙋ и҆ ненасилствова́ннꙋ, да́же до коне́чнагѡ мое́гѡ и҆ꙁдыха́нїѧ, постоѧ́телнѡ, (Бг҃ꙋ помога́ющꙋ) съдержа́ти и҆ и҆сповѣда́ти, и҆ ѿ подрꙋ́чныхъ ми, и҆лѝ ѿ тѣ́хъ и҆́мже тща́нїе къ мое́й пови́нности прислꙋша́ти бꙋ́детъ держа́ти, ᲂу҆чи́ти, проповѣда́тисѧ, є҆ли́кѡ мо́щнѡ ли бꙋ́детъ тща́тисѧ бꙋ́дꙋ.

А҆ꙁъ то́йжде, И҆мⷬ҇къ, ѡ҆бѣща́ю ѡ҆бѣтꙋ́ю, и҆ присѧга́ю, та́кѡ ми Бг҃ъ да помо́жетъ, и҆ сі́ѧ ᲃт҃ы́ѧ Бжⷭ҇тве́нныѧ Хв҃ы Е҆ѵⷢ҇лїѧ. А҆ми́нь.

Подае́тъ же є҆мꙋ̀ Свѧти́тель а҆́бїе къ лобꙁа́нїю ᲃт҃о́е Е҆ѵⷢ҇лїе, по лобза́нїи же ᲃт҃ль гл҃тъ:

Благослове́нъ Бг҃ъ и҆ꙁволи́вый ᲃи́це.

И҆ посе́мъ глаголе́тъ къ не́мꙋ:

Преклонѝ колѣ́ни твоѝ пре́дъ Гд҃емъ Бо́гомъ є҆гѡ́же и҆сповѣда́лъ є҆сѝ, и҆ прі́ймеши ѡ҆ставле́нїе грѣхѡ́въ твои́хъ.

Ѻ҆́нъ же прекланѧ́етъ колѣ́нѣ и҆ гла́вꙋ свою̀ зрѧ̀ до́лꙋ.

Свѧти́тель же, (и҆лѝ на ᲃі́е ѿ негѡ̀ вла́сть и҆мы̀й,) раꙁдрѣша́етъ є҆гѡ̀, ᲃи́це.

Гд҃ь и҆ Бг҃ъ на́шъ І҆и҃ᲃ Хᲃ҃ Ключа̀ Ца́рствїѧ нбⷭ҇нагѡ А҆по́столѡмъ свои́мъ врꙋчи́вый, и҆ да́вый и҆́мъ всю̀ вла́сть свое́ю благода́тїю, є҆́же вѧꙁа́ти и҆ раꙁдрѣша́ти человѣ́ки ѿ грѣхѡ́въ на землѝ: То́й самъ неиꙁрече́нныѧ ра́ди млⷭ҇ти свое́ѧ, да прости́тъ и҆ раꙁдрѣши́тъ тѧ. И҆ а҆́ꙁъ всеси́лною є҆гѡ̀ вла́стїю, и҆ ᲃт҃ы́хъ є҆гѡ̀ А҆по́столъ Петра̀ и҆ Па́вла, и҆ про́чїихъ двана́десѧти, (А҆́ще же І҆ере́ѷ ᲃі́е дѣйствꙋ́етъ, прилага́етъ и҆ ᲃі́е, И҆ преѡсвщ҃е́ннагѡ А҆рхїепⷭ҇кпа на́шегѡ Митрополи́та, И҆мⷬ҇къ: и҆лѝ Боголюби́вагѡ Е҆пⷭ҇панш҃гѡ, И҆мⷬ҇къ:) мнѣ̀ а҆́ще недосто́йномꙋ А҆рхїере́ю (и҆лѝ, І҆ере́ю) да́нною, проща́ю и҆ раꙁдрѣша́ю тѧ̀ ча́до, И҆мⷬ҇къ: ѿ съю́ꙁа клѧтве́ннагѡ, и҆ ѿ всѧ́кагѡ запрѣще́нїѧ, и҆ ѿ всѣ́хъ грѣхѡ́въ твои́хъ, и҆ съедине́нїю вѣ́рныхъ и҆ тѣ́лꙋ Це́ркве Хв҃и ᲃъвокꙋплѧ́ю, и҆ Бж҃стве́ннымъ Та́йнамъ Це́ркѡ́внымъ приѡбща́ю тѧ̀, въ и҆мѧ̀ Ѿца̀🕂 и҆ Сн҃а🕂 и҆ ᲃт҃а́гѡ Дх҃а🕂 А҆ми́нъ.

Семꙋ̀ же бы́вшꙋ Свѧти́тель глаголе́тъ къ не́мꙋ:

Въстанѝ, бра́те, и҆ ꙗ҆́кѡ вѣ́рный І҆и҃ᲃ Хв҃ъ рабъ помоли́сѧ є҆мꙋ̀ съ на́ми, ꙗ҆́кѡ да сподоби́тъ тѧ̀ въ помаꙁа́нїи Ст҃гѡ Мѵ́ра прїѧ́ти благода́ть Ст҃гѡ Дх҃а.

Ѻ҆́нъ же а҆́бїе въста́въ съ всѧ́кимъ ᲂу҆миле́немъ стои́тъ.

По съверше́нїи предположе́нногѡ Чи́на, є҆ди́нъ ѿ І҆ере́ѷ, и҆лѝ А҆рхїдїѧ́конъ (а҆́ще Свѧти́тель са́мъ съверша́етъ ᲃі́е.) съсꙋ́дъ съ ᲃт҃ы́мъ Мѵ́ромъ, и҆ Бꙋма́гꙋ, и҆лѝ Гꙋ́бꙋ мо́рскꙋю, и҆ въ ма́ломъ съсꙋ́дѣ во́дꙋ те́плꙋю, нъ є҆́же Бꙋма́гꙋ ѡ҆мочи́вши мѣ́ста Мѵропомаꙁ́анные и҆стира́ти, и҆ полага́етъ ѧ҆̀ на столцѣ̀, на не́мъ же Бжⷭ҇твенное Е҆ѵⷢ҇лїе лежи́тъ, къ семꙋ̀ же двѣ̀ свѣщѝ заꙁже́нѣ на ᲃвѣти́лницѣхъ на то́мъ же столцѣ̀ полага́ютсѧ.

Си́мъ же си́це приꙋготовле́ннымъ. Свѧти́тель (и҆лѝ І҆ере́ѷ) покланѧ́етсѧ три́жды къ Въсто́кѡмъ съ всѣ́ми предстоѧ́щими, и҆ ре́кшꙋ А҆рхїдїѧ́конꙋ:

Блⷭ҇вѝ Влады́кѡ.

Глаголе́тъ:

Блⷭ҇ве́ннѡ Ца́рство Ѿца̀, и҆ Сн҃а и҆ ᲃт҃а́гѡ Дх҃а, нн҃ѣ и҆ при́снѡ, и҆ въ вѣ́ки вѣкѡ́въ.

Кли́ръ:

А҆ми́нь.

И҆ а҆́бїе пою́тъ стихи́рꙋ, гла́съ ѕ҃.

Цр҃ю нбⷭ҇ный ᲂу҆тѣши́телю дш҃е и҆́стинный:

По сконча́нїи же пѣ́нїѧ, А҆рхїдїѧ́конъ а҆́бїе гл҃етъ Е҆кте́нїю ᲃі́ю ᲃт҃гѡ Мѵропомаꙁа́нїѧ.

Ми́ромъ Гд҃ꙋ помоли́мсѧ.

Ли́къ:

Гд҃и поми́лꙋй.

Ꙍ҆ свы́шнѣмъ ми́рѣ, и҆ ᲃп҃сенїи дш҃ъ на́шихъ, Гд҃ꙋ помоли́мсѧ.

Ꙍ҆ ми́рѣ всегѡ̀ мі́ра и҆ благостоѧ́нїи ᲃт҃ы́хъ Бж҃їихъ Це́рквїй, и҆ съедине́нїю всѣ́хъ, Гд҃ꙋ помоли́мсѧ.

Ꙍ҆ А҆рхїеппⷭ҇ѣ на́шемъ И҆мⷬ҇къ, чтⷭ҇нѣмъ Пресвѵ́терствѣ, и҆ є҆́же ѡ҆ Хє҃ Дїа́конствѣ, и҆ все́мъ при́чтѣ и҆ лю́дехъ, Гд҃ꙋ помоли́мсѧ.

Ꙍ҆ є҆́же помаꙁа́нїемъ всест҃а́гѡ благодѣ́телнагѡ и҆ всесъверши́телнагѡ Мѵ́ра, пода́тисѧ ᲃи́лѣ Бжⷭ҇тве́нной нн҃ѣ Це́ркви ᲃт҃ѣ́й, ᲃъбо́рнѣй съвокꙋпле́нномꙋ рабꙋ̀ Бж҃їю, И҆мⷬ҇къ: въ побѣжде́нїе и҆ попра́нїе всѣ́хъ ᲃъпроти́вныхъ дїѧ́волскихъ ко́ꙁнїй ѿ пло́ти же и҆ ѿ мі́ра находѧ́щихъ бра́нїй, Гд҃ꙋ помоли́мсѧ.

Ꙍ҆ є҆́же бы́ти є҆мꙋ̀ хра́брꙋ и҆ побѣдоно́снꙋ во́инꙋ Ха҃ Бг҃а на́шего, ᲃи́лою дѣ́йствомъ, благода́тїю и҆ прише́ствїемъ ᲃт҃а́гѡ Дх҃а, помаꙁа́нїемъ всест҃гѡ Мѵ́ра, Гд҃ꙋ помоли́мсѧ.

Ꙍ҆ є҆́же тве́рдымъ, и҆ крѣ́пкимъ, и҆ непоꙁыбле́мымъ въ Правосла́вной Вѣ́рѣ, любвѣ̀ же и҆ наде́ждѣ, помаꙁа́нїемъ всест҃а́гѡ Мѵ́ра бы́ти є҆мꙋ̀ въ всѧ̀ днѝ живота̀ є҆гѡ̀, Гд҃ꙋ помоли́мсѧ.

Ꙍ҆ є҆́же пода́тисѧ є҆мꙋ̀ благода́ти помаꙁа́нїемъ всест҃а́гѡ Мѵ́ра, є҆́же съ дерꙁнове́нїемъ бе́ꙁъ стра́ха непосты́днѡ и҆сповѣда́ти пре́дъ всѣмѝ и҆мѧ̀ Ха̀ Бг҃а на́шегѡ, и҆ тогѡ̀ ра́ди ᲃтрада́ти и҆ ᲂу҆мрѣ́ти любо́внѣ, всегда̀ и҆ꙁволи́ти, Гд҃ꙋ помоли́мсѧ.

Ꙍ҆ є҆́же въꙁраста́ти є҆мꙋ̀ въ всѣ́хъ добродѣ́телехъ, и҆ преспѣва́ти въ за́повѣдехъ Хрⷭ҇та Бг҃а на́шегѡ, помаꙁа́нїемъ всест҃а́гѡ Мѵ́ра, Гд҃ꙋ помоли́мсѧ.

Ꙍ҆ є҆́же ᲃп҃си́телнымъ ᲃтра́хомъ въ чⷭ҇тотѐ и҆ пра́вдѣ дꙋ́шꙋ є҆гѡ̀ съблюстѝ, помаꙁа́ннїемъ всест҃а́гѡ Мѵ́ра, Гд҃ꙋ помоли́мсѧ.

Ꙍ҆ є҆́же доспѣ́ти є҆мꙋ̀ въ мꙋ́жа ᲃъверше́нна въ мѣ́рꙋ во́ꙁраста и҆сполне́нїѧ Хрⷭ҇то́ва, ᲃи́лою, дѣ́йствомъ, благода́тїю и҆ наше́ствїемъ Дх҃а Прест҃гѡ, помаꙁанїемъ всест҃а́гѡ и҆ всесъверши́телнагѡ Мѵ́ра, Гд҃ꙋ помоли́мсѧ.

Ꙍ҆ є҆́же и҆ꙁба́витисѧ є҆мꙋ̀ и҆ намъ ѿ всѧ́кїѧ ᲃко́рби, гнѣ́ва и҆ нꙋ́жды, и҆ дости́гнꙋти всѣ́мъ намъ въ є҆дине́нїе вѣ́ры, и҆ ра́ꙁꙋма Сн҃а Бж҃їѧ, Гд҃ꙋ помоли́мсѧ.

Застꙋпѝ, ᲃп҃сѝ, поми́лꙋй и҆ съхранѝ є҆гѡ̀ и҆ на́съ Бо́же твое́ю благода́тїю.

Пртⷭ҇ꙋ́ю, чⷭ҇тꙋю, Преблⷭ҇ве́ннꙋю сла́внꙋю, Влады́чицꙋ на́шꙋ Бц҃ꙋ, и҆ при́снѡ Дѣ́вꙋ Мр҃їю съ всѣ́ми ᲃт҃ы́ми помѧнꙋ́вше, ᲃамѝ себѣ̀, и҆ дрꙋ́гъ дрꙋ́га, и҆ весь живо́тъ на́шъ, Хрⷭ҇тꙋ̀ Бг҃ꙋ предадѣ́мъ.

Ли́къ:

Тебѣ̀ Гд҃и.

І҆ере́ѷ Въꙁгла́съ:

Ꙗкѡ подоба́етъ ти всѧ́каѧ ᲃла́ва, че́сть, и҆ поклоне́нїе Ѿцꙋ̀ и҆ Сн҃ꙋ и҆ ᲃт҃о́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

По сконча́нїи же Е҆кте́нїи ре́кшꙋ А҆рхїдїа́конꙋ:

Гд҃ꙋ помоли́мсѧ.

и҆ Ли́кꙋ:

Гд҃и поми́лꙋй.

Свѧти́тель глаголе́тъ Моли́твꙋ ᲃїю съ всѧ́кимъ вънима́нїемъ велегла́снѡ:

Блⷭ҇ве́нъ є҆сѝ Гд҃и Бо́же Вседержи́телю, и҆сто́чниче благи́хъ, ᲃо́лнце пра́вды, въсїѧ́вый въ тмѣ̀ сꙋ́щимъ ᲃвѣ́тъ ᲃпⷭ҇нїѧ, ꙗ҆вле́нїемъ є҆диноро́днагѡ твое́гѡ Сн҃а и҆ Бг҃а на́шегѡ: и҆ дарова́вый намъ недосто́йнымъ, блаже́нное ѡ҆чище́нїе въ ᲃт҃ой водѣ̀, и҆ Бжⷭ҇тве́нное ѡ҆сщ҃е́нїе въ животво́рномъ помаꙁа́нїи: и҆́же и҆ нн҃ѣ благоволи́лъ є҆сѝ рабꙋ̀ твое́мꙋ семꙋ̀, И҆мⷬ҇къ: въꙁбнꙋ́ти ѿ пре́лести є҆рети́ческїѧ и҆ поꙁна́ти твою̀ и҆́стиннꙋ, и҆ въ покаѧ́нїи прибѣ́гнꙋти къ твое́мꙋ благоꙋтро́бїю, и҆ съедини́тисѧ ᲃт҃о́мꙋ твое́мꙋ и҆ꙁбра́нномꙋ ста́дꙋ, и҆ ѡ҆ставле́нїѧ грѣхѡ́въ, и҆ ᲂу҆́ꙁъ клѧтве́нныхъ раꙁдрѣше́нїе мно́ю недосто́йнымъ рабѡ́мъ твои́мъ томꙋ̀ дарова́вый. Са́мъ Влады́кѡ все́хъ Ца́рю благоꙋтро́бне, дарꙋ́й є҆мꙋ̀ печа́ть да́ра ᲃт҃а́гѡ всеси́лнагѡ и҆ покланѧ́емагѡ ти Дх҃а, и҆ Причаще́нїе ᲃт҃а́гѡ Тѣ́ла, и҆ чⷭ҇тныѧ Крвѐ Ха҃ твое́гѡ: ᲃъхранѝ є҆гѡ̀ въ твое́мъ ѡ҆сщ҃е́нїи, ᲂу҆твердѝ въ Правосла́вной Вѣ́рѣ, и҆ꙁмѝ ѿ лꙋка́вагѡ, и҆ всѣ́хъ ко́ꙁнїй є҆гѡ̀. И҆ сп҃си́телнымъ ти ᲃтра́хѡмъ въ чистотѣ̀ и҆ пра́вдѣ дꙋ́шꙋ є҆гѡ̀ съблюдѝ.

Ꙗ҆́кѡ да въ всѧ́комъ дѣ́лѣ и҆ ᲃло́вѣ благоꙋгожда́ѧ тебѣ̀, ᲃн҃ъ ие наслѣ́дникъ бꙋ́детъ пренбⷭ҇нагѡ твое́гѡ Ца́рствїѧ. Ꙗ҆́кѡ ты́ є҆сѝ Бг҃ъ на́шъ, Бг҃ъ є҆́же ми́ловати и҆ ᲃпⷭ҇тѝ, и҆ тебѣ̀ ᲃла́вꙋ въꙁсыла́емъ Ѿцꙋ̀ и҆ Сн҃ꙋ и҆ ᲃт҃о́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

По моли́твѣ же а҆́бїе А҆рхїдїѧ́конъ, и҆лѝ є҆ди́нъ ѿ предстоѧ́щихъ І҆ере́ѷ, вълива́етъ ѿ ᲃт҃а́гѡ Мѵ́ра є҆ли́кѡ дово́лнѡ къ помаꙁа́нїю, въ съсꙋ́децъ, и҆ прино́ситъ къ Ст҃и́телю. Свѧти́тель же ѡ҆мочи́въ, пе́рстъ бо́лшїй де́сныѧ свое́ѧ рꙋкѝ въ ᲃт҃о́е Мѵ́ро, пома́ꙁꙋетъ новоприцѣпле́ннагѡ, творѧ̀ креста̀ ѡ҆́браꙁъ на Челѣ̀, на Ѽчесе́хъ, на Но́ꙁдрѣхъ, на Ꙋ҆стѣ́хъ, и҆ на Ꙋ҆шесе́хъ, гл҃ѧ:

Печа́ть да́ра ᲃт҃а́гѡ Дх҃а. А҆ми́нь.

Посе́мъ а҆́бїе ѡ҆тира́етъ пе́рстъ сво́й мѧ́гкишомъ хлѣ́ба бѣ́логѡ, и҆ те́плою водо́ю ѡ҆мыва́етъ.

Семꙋ̀ же бы́вшꙋ гл҃етъ Моли́твꙋ ᲃі́ю. А҆рхїдїѧ́конꙋ: рекшꙋ:

Гд҃ꙋ помоли́мсѧ.

и҆ Кли́рꙋ:

Гд҃и поми́лꙋй.

Гд҃и Бо́же на́шъ, сподоби́вый съверше́нна покаꙁа́ти раба̀ твое́гѡ ᲃегѡ̀, Имⷬ҇къ: вѣ́рою пра́вою ꙗ҆́же въ тебѣ̀, и҆ печа́тїю да́ра ᲃт҃а́гѡ Дх҃а, въ ᲃт҃о́мъ твое́мъ и҆ пренбⷭ҇номъ помаꙁа́нїи: Ты Влады́кѡ всѣ́хъ и҆́стиннꙋю Вѣ́рꙋ въ не́мъ ᲃъблюдѝ, въспита́й є҆гѡ̀ въ пра́вдѣ и҆ и҆́стиннѣ, и҆ всѣ́ми дарова́нїи твои́ми ᲂу҆красѝ.

Ꙗ҆́кѡ ты́ є҆́си Бг҃ъ на́шъ, и҆ тебѣ̀ ᲃла́вꙋ въꙁыла́емъ Ѿцꙋ̀, и҆ Сн҃ꙋ, и҆ ᲃт҃о́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

Моли́тва вто́раѧ по Мѵропомаꙁа́нїи пре́дъ и҆ꙁмыве́нїемъ, А҆рхїдїѧ́конъ:

Гд҃ꙋ помоли́мсѧ.

Ли́къ:

Гд҃и поми́лꙋй.

И҆ꙁбавле́нїе съгрѣше́нїй покаѧ́нїѧ ра́ди и҆ ѿ пре́лестїй є҆рети́ческихъ къ и҆́стиннѣ твое́й ѡ҆браще́нїѧ рабꙋ̀ твое́мꙋ дарова́вый, и҆ живо́тъ ѡ҆бновле́нїѧ пода́вый: Са́мъ Влады́кѡ Гд҃и, просвѣще́нїе лица̀ твое́гѡ въ ᲃе́рдци є҆гѡ̀ въсїѧва́ти всегда̀ благоволѝ: щи́тъ вѣ́ры є҆гѡ̀ ненавѣтова́нъ ѿ врагѡ́въ съблюдѝ: истлѣ́нїѧ ѡ҆де́ждꙋ є҆ю́же ѡ҆дѣѧ́сѧ нескве́рнꙋ и҆ неблаꙁне́ннꙋ съхранѝ: нерꙋши́мꙋ въ не́мъ дх҃о́внꙋю Печа́ть благода́тїю твое́ю съблюда́ѧ: млⷭ҇тивъ же томꙋ̀ и҆ намъ быва́ѧ, по множествꙋ̀ щедрѡ́тъ тво́ихъ.

Ꙗ҆́кѡ благослови́сѧ, и҆ просла́висѧ прече́стное и҆ великолѣ́пое и҆мѧ̀ твоѐ, Ѿца̀, и҆ Сн҃а, и҆ Ст҃го Дх҃а, нн҃ѣ и҆ при́снѡ, и҆ въ вѣ́ки векѡ́въ.

Ли́къ:

А҆ми́нь.

Вꙁе́мъ же а҆́бїе Бꙋма́гꙋ, и҆лѝ Гꙋ́бꙋ, и҆ ѡ҆мочи́въ ю҆̀ въ те́плой водѣ̀, ѡ҆тира́етъ места̀ Мѵ́ромъ помаꙁа́нныѧ, гл҃етъ.

Ѽправда́лсѧ є҆сѝ, просвѣти́лсѧ є҆сѝ, ѡ҆ст҃и́лсѧ є҆сѝ, ѡ҆мы́лсѧ є҆сѝ И҆́менемъ Гд҃а на́шегѡ І҆и҃ᲃ Ха҃, и҆ Дх҃омъ Бг҃а на́шегѡ, и҆ Мѵ́ромъ пома́ꙁалсѧ є҆сѝ, въ И҆мѧ̀ Ѿца̀, и҆ Сн҃а, и҆ Ст҃а́го Дх҃а, нн҃ѣ и҆ при́снѡ, и҆ въ вѣ́ки векѡ́въ.

Ли́къ:

А҆ми́нь.

По се́мъ Свѧти́тель глаголе́тъ:

Ми́ръ всѣ́мъ.

Ли́къ:

И҆ дх҃о́ви твое́мꙋ.

А҆рхїдїа́конъ:

Гла́вы ва́ша Гд҃ви приклони́те.

Ли́къ:

Тебѣ̀ Гд҃и.

Всѣ́мъ же гла́вы прекло́ншимъ Свѧти́тель глаголе́тъ въ та́йнѣ Моли́твꙋ ᲃі́ю.

Ѽдѣѧ́выйсѧ въ тѧ̀ Ха҃ Бг҃а на́шегѡ, тебѣ́ преклони́лъ є҆́сть ᲃъ на́ми свою̀ гла́вꙋ, є҆гѡ́же съблюдѝ непобѣди́ма подви́жника пребы́ти, на всꙋ́е вра́ждꙋ подвиꙁа́ющихъ на не́гоже и҆ на́ны: твои́мъ же нетлѣ́ннымъ вѣнце́мъ да́же до конца̀ побѣди́телѧ всѣ́хъ покажѝ.

Въꙁгла́съ:

Твоѐ бо є҆́стъ є҆́же ми́ловати и҆ ᲃпⷭ҇тѝ, и҆ тебѣ̀ ᲃла́вꙋ въꙁсыла́емъ съ беꙁнача́лнымъ ти Ѿце́мъ, и҆ съ прⷭ҇ты́мъ и҆ благи́мъ, и҆ животворѧ́щимъ ти Дх҃омъ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

И҆ тво́ритъ а҆́бїе ѡ҆бы́чный ѿпꙋ́стъ Ст҃ль, и҆ ѿхо́дитъ въ своѧ̀ си.

Новосажде́нномꙋ же Причасти́тисѧ Прⷭ҇ты́мъ Та́йнамъ Тѣ́ла и҆ Крвѐ Гд҃не́й блⷭ҇влѧ́етъ на Лѵтꙋ́ргїи Бжⷭ҇твенной.

Сі́ѧ бо пре́дъ Бжⷭ҇тве́нною Лѵтꙋ́ргїею ᲃъверша́ютсѧ.

И҆́хъ же Мѵ́ромъ сты́мъ пома́ꙁати не подоба́етъ, по че҃-му Пра́вилꙋ ᲃт҃а́гѡ ѕ҃ ᲃъбо́ра и҆́же въ Трꙋ́ллѣ.

Вѣ́стнѡ ᲂу҆́бѡ бꙋ́ди ꙗ҆́кѡ двойстве́нни сꙋ́тъ Е҆рети́ци, и҆лѝ ѿстꙋ́пници и҆́хъже Мѵ́ромъ ᲃт҃ы́мъ пома́ꙁати нетре́бѣ є҆́стъ:

Пе́рвыи ᲂу҆́бѡ сꙋ́ть, и҆́же Креще́ни и҆ Мѵ́ромъ пома́ꙁани бы́ша, и҆ въспи́таны въ Це́ркви Ст҃о́й Православнокаѳоли́ческой, пре́лестїю же дїѧ́волскою, и҆ ᲂу҆ма̀ свое́гѡ нераꙁсꙋ́днымъ и҆ꙁволе́нїемъ ᲂу҆ве́дшесѧ, не то́чїю ѿ Це́ркве Каѳоли́ческїѧ, но и҆ ѿ Вѣ́ры ꙗ҆́же въ ᲃт҃ꙋ́ю є҆диносꙋ́щнꙋю и҆ нераꙁдѣли́мꙋю Трои́цꙋ, сі́естъ въ Ѿца̀ и҆ Сн҃а и҆ ᲃт҃а́гѡ Дх҃а ѿстꙋпи́ша, и҆ невѣ́рїю І҆оѵде́йскомꙋ, и҆лѝ нече́стїю Тꙋре́цкомꙋ, и҆лѝ беꙁбо́жїю А҆рїѧ́нскомꙋ приѡбщи́шасѧ.

Вто́рїи же сꙋ́тъ на дво́е раꙁдѣлѧ́ющїисѧ: є҆динѝ и҆́же ѿ Це́ркве и҆ Вѣ́ры Правосла́вныѧ Креще́ни и҆ Мѵ́ромъ пома́ꙁани бы́вше, къ є҆́ресемъ Ка́лвинскимъ и҆лѝ Лютера́нскимъ, и҆лѝ и҆́нымъ си́мъ подо́бнымъ и҆лѝ къ ѿстꙋ́пническимъ ѿстꙋпи́ша. Дрꙋ́ꙁїи же сꙋ́тъ, и҆́же не са́ми но въ Пра́родителехъ и҆лѝ роди́телехъ свои́хъ си́цевомꙋ ѿстꙋ́пствꙋ и҆лѝ є҆́реси приста́вше, въ не́й же и҆ Креще́нїе и҆́стинное и҆ Мѵропомаꙁа́нїе съде́ржитсѧ, и҆ въ си́цевой ро́ждшесѧ, и҆ Креще́ни и҆ Мѵ́ромъ пома́ꙁани бы́ша, Дх҃а ᲃт҃а́гѡ въдохнове́нїемъ, къ пра́вой Вѣ́рѣ (кро́мѣ є҆ѧ́же никто̀ ᲂу҆ꙁритъ Бг҃а) прихо́дѧтъ и҆ Це́ркви съвокꙋплѧ́тисъ ᲃъбѡ́рной жела́ютъ. Ме́ждꙋ же си́ми сꙋть нѣкото́рїи ѿстꙋ́пници. и҆́хъ же при ᲃт҃омъ Креще́нїи Мѵ́ромъ ᲃт҃ы́мъ І҆ере́е не пома́ꙁꙋютъ, то́чїю Е҆пⷭ҇пи: и҆ не младе́нцѡвъ, но то́чїю во́ꙁрастъ и҆мꙋ́щихъ.

Сегѡ̀ же ра́ди мнѡ́ꙁи не сꙋ́тъ Мѵ́ромъ пома́ꙁани:

Тѣ́мъ ᲂу҆́бѡ приходѧ́щихъ, и҆ꙁрѧ́днѣе же ѿ Лати́нъ къ Правосла́вной Вѣ́рѣ, и҆ꙁвѣ́стнѡ и҆спыта́ти подоба́етъ а҆́ще сꙋ́тъ Мѵ́ромъ пома́ꙁани и҆лѝ ни. А҆ще же сꙋ́тъ пома́ꙁани, не тре́бѣ є҆́стъ пома́ꙁовати и҆́хъ. а҆ є҆́же не сꙋ́тъ всѧ́кѡ подоба́етъ и҆́хъ Мѵ́ромъ ᲃт҃ы́мъ пома́ꙁати, по вы́ше ꙋка́ꙁанномꙋ Чи́нꙋ Мѵропомаꙁа́нїѧ ѿ Е҆ретикъ приходѧ́щихъ, къ Правосла́вной Вѣ́рѣ. зри Листъ рп҃д³⁰.

Вѣ́стнѡ же бꙋ́ди, ꙗ҆́кѡ трѝ Та́йны сꙋ́ть и҆́хъ же повторѧ́ти ника́ко же подоба́ет, сі́ѧже сꙋ́ть, Креще́нїе Миропомаꙁа́нїе, Сщ҃енство. Сегѡ̀ же ᲂу҆́бѡ ра́ди не повтора́ютсѧ сі́ѧ ᲃт҃ы́а Та́йны, и҆́бѡ характи́ръ сі́естъ, печа́ть и҆лѝ зна́менїе нико́лиже и҆стира́емое на дш҃ѝ прїемлю́щагѡ тво́рѧтъ:

Креще́нїе ᲂу҆́бѡ знамена́етъ, и҆лѝ печатлѣ́етъ дꙋ́шꙋ въ є҆́же поꙁнава́емꙋ бы́ти Креще́нномꙋ ѿ не Креща́емагѡ, ꙗ҆́кѡ є҆́стъ ѡ҆вча̀ ста́да Хв҃а въ писа́нное въ Кни́ги живо́тныѧ:

Мѵропомаꙁа́нїе же, въ є҆́же поꙁна́нꙋ бы́ти Мѵропомаꙁа́нномꙋ, ѿ не Мѵропомаꙁа́ннагѡ, ꙗ҆́кѡ въпи́санъ є҆́стъ въ Ката́стихъ во́инѡвъ Хв҃ых:

Сщ҃енство же знамена́етъ дꙋ́шꙋ, въ є҆́же поꙁна́нꙋ бы́ти ᲃщ҃е́нникꙋ ѿ не ᲃщ҃е́ннагѡ, ꙗ҆́къ и҆́мать вла́сть дх҃о́внꙋю вѣ́чнꙋю, и҆ благода́ть благода́тно творѧ́ща є҆гѡ̀, є҆ю́же да воꙁмо́жетъ Сщ҃е́нникъ, порѧ́днѣ съверша́ти своѐ слꙋже́нїе.

Дерꙁа́й же повторѧти се́ѧ трѝ ᲃт҃ы́ѧ Та́йны, ᲃт҃ота́тство съверша́етъ и҆ Ха҃ втори́цею Распина́етъ, и҆ рꙋга́етсѧ є҆мꙋ̀. По А҆по́столꙋ и҆́же въ посла́нїи свое́мъ къ Е҆ѵре́ꙍмъ, Гла́ва: ѕ҃. Зач: тв҃і. гл҃етъ.

Ѽ҆ста́влше нача́ло Хв҃а сло́во, на съверше́нїе веде́мсѧ, не па́ки ѡ҆снованїе Покаѧ́нїѧ полага́юще ѿ ме́ртвыхъ дѣ́лъ, и҆ Вѣ́ры въ Бг҃а, Креще́нїи ᲂу҆че́нїѧ, и҆ вꙁложе́нїѧ рꙋ́кꙋ, (сі́естъ Мѵропомаꙁа́нїѧ) Воскресе́нїѧ же ме́ртвыхъ, и҆ ᲃꙋ́да вѣ́чнагѡ.

Невоꙁмо́жно бо просвѣще́нныѧ є҆ди́ною (сі́естъ Креще́нныѧ) и҆ вкꙋси́вшїѧ да́ра нбⷭ҇нагѡ, и҆ прича́стники бы́вшїѧ Дх҃а ᲃт҃а́гѡ, (сі́естъ чре́ꙁъ Мѵропомаꙁа́нїе) и҆ до́брагѡ вкꙋси́вшїѧ Бж҃їѧ глагола̀ и҆ ᲃи́лы грѧдꙋ́щагѡ вѣ́ка, и҆ ѿпа́дшїѧ па́ки ѡ҆бновлѧ́ти въ Покаѧ́нїе, (сі́естъ Крести́ти) вто́рое распина́ющїѧ ᲃн҃а Бж҃їѧ и҆ порꙋга́ющїѧ.

Въ пе́рвыхъ ᲂу҆бѡ прїемлѧ́й си́цевагѡ, и҆ꙁвѣ́стнѡ долженъ є҆́стъ и҆спыта́ти: а҆́ще и҆́стиннѡ ка́етсѧ, и҆ ѿ всегѡ̀ ᲃе́рдца си́цевѡ бы́вшее своѐ паде́нїе, и҆ ѿ вѣ́ры ѿстꙋпства жалѣ́етъ, и҆ а҆́ще сама́гѡ ра́ди ᲃпⷭ҇нїѧ, а не и҆́ныѧ ра́ди кое́ѧ привре́менныѧ вины̀ къ правовѣ́рїю ѡ҆браща́етсѧ. И҆ꙁвѣсти́в же сѧ до́брѣ ѡ҆ си́хъ, да наꙋ́читъ є҆гѡ̀ чле́нѡвъ вѣ́ры Правосла́вныѧ, и҆ да ѡ҆бли́читъ І҆оѵде́йское, и҆лѝ пога́нское и҆лѝ А҆рїа́нское заблꙋжде́нїѧ нече́стїе. Накаꙁа́въ же ᲂу҆́бѡ и҆ въ чле́нахъ вѣ́ры ᲂу҆тверди́въ є҆гѡ̀ ѡ҆па́снѡ, да повели́тъ є҆мꙋ̀ въ По́стѣ и҆ Моли́твахъ ѡ҆́смъ дні́й пребыва́ѧ приꙋготовлѧ́ти себѣ̀ къ и҆сповѣда́нїю всѣ́хъ грѣхѡ́въ свои́хъ ꙗ҆́же чре́ꙁъ ве́съ живо́тъ сво́й съдѣѧ̀. Въ ѡ҆́смый же дн҃ь повелѣва́етъ є҆мꙋ̀ исповѣда́тисѧ, но ᲂу҆́бѡ не въ Це́ркви, но и҆́нде на мѣ́стѣ ѡ҆со́бнѣмъ: накаꙁа́въ же є҆гѡ̀ отрещи́сѧ и҆ преста́ти грѣхѡ́въ, и҆ жи́тїѧ благоче́стнагѡ хрїстїѧ́нскагѡ, и҆ Бж҃їихъ Еѵⷢ҇лскихъ за́повѣдїй хране́нїѧ наꙋчи́въ, и҆ Е҆піти́мїю за ѿстꙋ́пство ѿ вѣ́ры и҆ за грѣхѝ по си́лѣ ка́ющагѡсѧ, и҆ по здра́вомъ свое́мъ раꙁсꙋжде́нїи наложи́въ, не раꙁдрѣша́етъ є҆гѡ̀ а҆́бїе, но по пе́рвомꙋ ᲂу҆ка́ꙁꙋ прїѧ́тїѧ Е҆ретикѡ́въ въ Це́ркви подае́тъ є҆мꙋ̀ ᲃі́е.

Вѣ́стнѡ ᲂу҆́бѡ бꙋ́ди, ꙗ҆́кѡ троистве́ннѣ сꙋ́тъ ѿстꙋпа́ющїи ѿ вѣ́ры.

Пе́рвїи ᲂу҆бѡ сꙋ́тъ, въ дити́нномъ во́ꙁрастѣ ѿ нераꙁꙋ́мїѧ сі́ѧ творѧ́щїи.

Вто́рїи же стра́хомъ мꙋ́къ ѿмѣта́ющїисѧ.

Тре́тїи же во́ꙁрастъ и҆мꙋ́щїи, не то́чїю нѣ́коимъ принꙋжде́нїемъ, но свое́гѡ ᲃи ᲂу҆ма̀ нераꙁсꙋ́днымъ и҆ во́лнымъ и҆ꙁволе́нїемъ ᲂу҆ведшесѧ прелще́ни ѿ дїѧ́вола, ѿстꙋпи́ша.

Всѣ́хъ ᲂу҆́бѡ си́хъ Е҆пітимиса́ти подоба́етъ, но не ра́внѡ:

Пе́рвыхъ ᲂу҆́бѡ ꙗ҆́кѡ въ дити́нномъ во́ꙁрастѣ недоспѣ́ломъ, ᲂу҆́мъ же и҆ раꙁсꙋжде́нїе съверше́нное не и҆мѣ́вшихъ, и҆ сі́ѧ ѿ сама́гѡ то́чїю беꙁꙋ́мїѧ и҆ невѣ́ждества сътво́ршихъ, человѣкѡлю́бїю сподоблѧ́еми, и҆ мало́ю Е҆піти́мїею каꙁни́ми быва́ютъ: сі́естъ, а҆́ще дѣ́ти и҆лѝ є҆щѐ мла́дїи ѡ҆троча́та сꙋ́тъ, ᲃе́дмъ днїй по си́ле да по́стѧтсѧ, Моли́твы же и҆ поклоне́нїѧ на всѧ́къ дн҃ь да тво́рѧтъ: въ ѻ҆́смый же дн҃ь прїе́млемъ и҆́хъ по Ꙋ҆ста́вꙋ ни́жей положе́номъ, въкра́тцѣ ѿрица́нїѧ, и҆ ѡ҆бы́чное и҆сповѣда́нїе Правосла́вныѧ Вѣ́ры: сі́естъ Вѣ́рꙋю въ є҆динагѡ Бг҃а творѧ́щихъ, прїе́млемъ и҆́хъ и҆ Це́ркви Ст҃о́й съвкꙋплѧ́емъ.

Вто́рыхъ же и҆ си́хъ млⷭ҇ти и҆ человѣкѡлю́бїю, поне́же не во́лею и҆ стра́хомъ мꙋ́къ сі́ѧ съдѣѧ́ша, сподоблѧ́емъ: ѡ҆ба́че по ᲂу҆ста́вꙋ Меѳѡ́дїѧ ᲃт҃ѣ́йшагѡ Патрїѧ́рхи Кꙍнстантінопо́лскагѡ, двѣ четыридесѧ́тници по́ститисѧ повелѣва́емъ и҆́мъ, ᲂу҆пражнѧ́ти же сѧ въ Моли́твахъ, съверша́юще по си́лѣ колѣ́нное преклоне́нїе, съ прилѣ́жнымъ моле́нїемъ, и҆ ᲃле́ꙁнымъ а҆́ще въꙁмо́жнѡ ᲂу҆миле́нїемъ. Приближа́ющꙋ же сѧ ѡ҆бо́ихъ четыридесѧ́тницъ съверше́нїю, прїе́млеми быва́ютъ по ни́жей ᲂу҆ставле́нномꙋ Чи́нꙋ, и҆ сподоблѧ́еми ᲃт҃ы́мъ и҆ Бжⷭ҇тве́ннымъ Та́йнамъ Причаще́нїю.

Третїи же во́лнимъ си проиꙁволе́нїімъ кро́мѣ всѧ́коѧ нꙋ́жды ѿвергшїисѧ, стра́шное и҆мꙋ́тъ запрѣще́нїе, но млⷭ҇ти ра́ди, двѣ̀ лѣ́тѣ да по́стѧтсѧ, ᲂу҆далѧ́ющісѧ мѧ́съ и҆ сыроѧде́нїѧ, и҆ ꙗ҆е́цъ и҆ вина̀, творѧ́ще колѣ́нопоклоне́нїѧ, а҆́ще ᲂу҆́бѡ мла́ди сꙋ́ть и҆ крѣ́пци, на всѧ́къ дн҃ь по р҃. покло́нѡвъ, и҆ по ᲃ҃ Моли́твъ І҆и҃совыхъ: а҆́ще беꙁси́лни сꙋ́тъ, по си́лѣ да творѧ́тъ: Сконча́вшимъ же сѧ двои́мъ лѣ́томъ да съверши́тсѧ ѿ ни́хъ сей ни́жей положе́ный Чи́нъ.

Се́й ᲂу҆́бѡ си́цевый Ꙋ҆ста́в є҆́стъ ᲃт҃ѣ́йшагѡ Меѳѡ́дїѧ Патрїѧ́рхи. Мы же ᲃла́бость, въ вѣ́рѣ, стꙋ́день къ благоче́стїю, и҆ скꙋ́дость въ любвѝ, лѣ́ность же въ По́стѣхъ и҆ Моли́твахъ и҆ ѡ҆ всѣ́хъ добродѣ́телехъ вели́кое небреже́нїе въ лю́дехъ вѣ́ка сегѡ̀ раꙁсматрѧ́юще, раꙁсꙋжда́емъ, ꙗ҆́кѡ да дѣти́нный во́ꙁрастъ и҆мꙋ́щїи три дни съ Поклѡ́ны и҆ Моли́твами пости́вшесѧ по чи́нꙋ ни́жей положе́нномꙋ прїѧ́ти, и҆ Це́ркви съвокꙋпле́ни бꙋ́дꙋт: по прїѧ́тїю же да и҆спо́лнѧтъ Е҆піти́мїю по си́лѣ и҆́хъ, и҆́мъ ѿ Е҆пⷭ҇па, и҆лѝ ѿ не́гѡ на сі́е вла́стъ и҆мꙋ́щагѡ дꙋхо́вника раꙁсꙋ́днѡ наложе́ннꙋю.

Тре́тїихъ же, зрѝ ѡ҆ дх҃овниче, да ꙗ҆́кѡ же пе́рвыхъ до́лгимъ ѿложенїемъ прѧ́тїѧ и҆́хъ и҆ съвокꙋпле́нїѧ Це́ркви, и҆ тѧ́жкїѧ Е҆піти́мїѧ наложе́нїемъ не ѿстра́шишъ, да не ѿпа́дꙋтъ ѿ вѣ́ры, и҆ въꙁвратѧ́тсѧ вспѧ́тъ къ свое́мꙋ нече́стїю, и҆ бꙋ́деши пови́ненъ пре́дъ Гд҃емъ поги́бели и҆́хъ: но поꙋчи́въ и҆́хъ до́брѣ и҆́стинныѧ Вѣ́ры, хрїстїѧ́нскимъ же благи́мъ ѡ҆бы́чаемъ и҆ добродѣ́телемъ, не ᲂу҆медлѝ по ѡ҆смодне́вномъ по си́лѣ и҆́хъ по́стѣ, по чи́нꙋ ни́жей положе́нномꙋ прїѧ́ти, и҆ Це́ркви съвокꙋпи́ти. Прича́стїе же Бжⷭ҇тве́нныхъ Та́инъ а҆́ще раꙁсꙋди́ши ѿложе́нно бы́ти, до́ндеже ѿ тебѣ̀ по си́лѣ и҆́хъ наложе́ннꙋю и҆́мъ Е҆пити́мїю по́лъ съверша́етъ, и҆лѝ съверше́ннѣ и҆сполнѧ́тъ, и҆лѝ а҆́бїе по прїѧ́тїю и҆ съвъкꙋпле́нїю и҆́хъ Це́ркви, мꙋ́дромꙋ раꙁсꙋжде́нїю твое́мꙋ да подле́житъ.

Симъ ᲂу҆бо си́це съверше́ннымъ, по пе́рвомꙋ ᲂу҆каꙁꙋ на Ли́стѣ о҃ѕ³¹.

Свѧти́тель, и҆лѝ І҆ере́ѷ сі́ѧ съверша́ѧй ѡ҆дѣѧ́нъ, ста́въ въ Церкѡ́вныхъ две́рехъ, повелѣва́етъ ка́ющомꙋсѧ ѿвнѣ стоѧ́щꙋ колѣ́нѣ преклони́ти, и҆ въпраша́етъ є҆гѡ̀, глаголѧ̀.

Ѿ всегѡ́ли ᲃе́рдца твое́гѡ жалѣ́еши, и҆ и҆́стиннѡ ка́ешилисѧ, ꙗ҆́кѡ ѿ вѣ́ры ᲃт҃о́й ꙗ҆́же въ Ѿца̀ и҆ Сн҃а и҆ ᲃт҃а́гѡ Дх҃а, Бг҃а є҆дина́гѡ и҆́стиннагѡ ѿстꙋпи́лъ є҆сѝ (къ невѣ́рїю же и҆ забобо́нѡмъ Жидѡ́вскимъ, и҆лѝ къ беꙁбо́жїю и҆ нече́стїю Тꙋре́цкомꙋ, и҆лѝ А҆рїѧ́нскомꙋ,) прилѣпи́лъ сѧ є҆сѝ былъ?

Ѿвѣща́етъ:

Ѿ все́гѡ ᲃе́рдца мое́гѡ жалѣ́ю ѡ҆ се́мъ, и҆ и҆́стинно ка́юсѧ.

Въпраша́етъ:

И҆́стиннѡ ли хо́щеши ѿрещи́сѧ Жидо́вскагѡ неверїѧ, и҆ все́хъ забобо́новъ и҆́хъ, (и҆лѝ Тꙋре́цкагѡ, и҆лѝ А҆рїѧⷩнскагѡ беꙁбо́жнагѡ нече́стїѧ,) и҆ всѣ́хъ непра́востїй и҆́х?

Ѿвѣща́етъ:

И҆́стиннѡ хощꙋ̀.

Въпраша́етъ:

Вѣ́рꙋеши ли въ є҆ди́нагѡ Бг҃а въ Трⷪ҇ци ᲃт҃ѣ́й ᲃлави́магѡ и҆ покланѧ́емагѡ, сꙋщество́мъ съвокꙋпле́ннагѡ ли́ци же раꙁдѣ́лнагѡ, и҆́же є҆́стъ Ѿц҃ъ Сн҃ъ и҆ Дх҃ъ ᲃт҃ы́й?

Ѿвѣща́етъ:

Вѣ́рꙋю.

Въпраша́етъ:

Хо́щеши ли бы́ти, и҆ жи́ти въ съедине́нїи Вѣ́ры Правосла́внокаѳоли́ческой?

Ѿвѣща́етъ:

Хощꙋ̀.

Посе́мъ а҆́бїе ᲃт҃и́тель, и҆лѝ І҆ере́ѷ знамена́етъ Чело̀ є҆гѡ̀ десни́цею три́жды, глаго́лѧ.

Въ и҆мѧ̀ Ѿца̀, и҆ Сн҃а, и҆ ᲃт҃а́гѡ Дх҃а. А҆ми́нь.

И҆ въꙁложъ рꙋ́кꙋ на гла́вѣ є҆гѡ̀, гл҃етъ Моли́твꙋ ᲃі́ю.

Ре́кшꙋ Дїа́конꙋ:

Гд҃ꙋ помоли́мсѧ.

и҆ Кли́ру:

Гд҃и поми́лꙋй.

Гд҃и Бо́же Вседержи́телю, Ѿче Гд҃а на́шегѡ І҆и҃ᲃ Ха҃, Хотѧ́й всѣ́мъ человѣ́комъ спⷭ҇ти́сѧ, и҆ въ ра́ꙁꙋмъ и҆́стинный прїйтѝ, поги́бшагѡ ра́ди ѡ҆вча́те є҆диноро́днагѡ ти Сн҃а посла́вый въ ми́ръ ᲃп҃са и҆ и҆ꙁбави́телѧ, ꙗ҆́кѡ да тво́й вꙁы́щетъ и҆ приѡбрѧ́щетъ ѡ҆́браꙁъ: Тебѣ̀ про́симъ и҆ тебѣ̀ мо́лимъ, прїймѝ раба̀ твое́гѡ сегѡ̀ И҆мⷬ҇къ: къ щедрота́мъ твои́мъ прибѣга́ющагѡ, ѡ҆брѣ́тшагѡ ᲂу҆́бѡ и҆ꙁдѣ́тства пра́вꙋю и҆ непоро́чнꙋю ꙗ҆́же въ тѧ̀ вѣ́рꙋ ᲃт҃а́гѡ ра́ди Креще́нїѧ: прелестїю же дре́внѧгѡ человѣ́коꙋбі́йца змїѧ̀ ᲂу҆мо́мъ прелсти́вшагѡсѧ, и҆ ѿ неѧ̀ ѿпадшагѡ.

Нн҃ѣ же поꙁна́нїемъ свое́гѡ паде́нїѧ, покаѧ́нїемъ же и҆ и҆́стиннымъ и҆сповѣда́нїемъ ѡ҆браща́ющагѡсѧ, и҆ къ твое́й па́ки прибѣга́ющагѡ бла́гости, и҆ и҆ꙁлі́й на́нь твое́гѡ человѣкѡлю́бїѧ благоꙋтро́бїе, прїймѝ є҆гѡ̀ ꙗ҆́коже блꙋ́днагѡ сн҃а къ тебѣ̀ Бг҃ꙋ и҆ Ѿцꙋ̀ ѡ҆браща́ющагосѧ: ѿженѝ ѿ не́гѡ всѧ́кꙋю пре́лесть и҆ ко́ꙁнь вра́жїю: съчинѝ є҆гѡ̀ слове́сныхъ ти ѡ҆ве́цъ ᲃт҃о́мꙋ ᲃта́дꙋ: ᲂу҆красѝ є҆гѡ̀ нн҃ѣ ᲃла́вою Прⷭ҇та́гѡ И҆́мени Ха҃ твое́гѡ, и҆ ѡ҆бе́щника сътворѝ є҆гѡ̀ съ всѣ́ми вѣ́рными твои́ми сты́мъ Церкѡ́внымъ твои́мъ Та́йнамъ. въ ѡ҆ставле́нїе ᲂу҆́бѡ пре́жде бы́вшихъ съгрѣше́нїй, въ крѣ́пость же бꙋ́дꙋщагѡ жи́тїѧ є҆гѡ̀ и҆ вѣ́ры, и҆ въ съблюде́нїе дш҃ѝ є҆гѡ̀ и҆ тѣ́ла: и҆ да́ждъ є҆мꙋ̀ на всѧ́кое вре́мѧ и҆ мѣ́стѡ къ тебѣ̀ прибѣга́ти, ᲂу҆пражнѧ́тижесѧ въ Моли́твахъ, и҆ прилежа́ти въ Церква́хъ твои́хъ, блгоꙋго́днаѧ тебѣ̀ всегда̀ творѧ̀: ꙗ҆́кѡ да вѣ́ры ра́ди ꙗ҆́же въ тѧ̀ и҆́стинныѧ и҆ благи́хъ дѣ́лъ, нбⷭ҇нагѡ Ца́рствїѧ ꙗ҆ви́тсѧ наслѣ́дникъ, є҆го́же и҆ на́съ съ ни́мъ сподобѝ благодатїю и҆ щедрота́ми Хрⷭ҇та̀ твое́гѡ, съ ни́мъ же блⷭ҇ве́нъ є҆сѝ съ Прⷭ҇ты́мъ и҆ благи́мъ и҆ животворѧ́щимъ ти Дх҃омъ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

По се́мъ глаголе́тъ надъ ни́мъ запрѣще́нїе сі́е:

Заклина́ю тѧ̀ нечи́стый дш҃е, Бо́гомъ Ѿце́мъ Вседержи́телемъ, и҆ Сн҃омъ є҆́гѡ І҆и҃ᲃ Хрⷭ҇то́мъ Гд҃емъ на́шимъ, и҆ Дх҃омъ ᲃт҃ы́мъ, ꙗ҆́кѡ да ѿстꙋпи́ши ѿ сегѡ̀ раба̀ Бж҃їѧ И҆мⷬ҇къ: є҆го́же Гд҃ь и҆ Бг҃ъ на́шъ ѿ погрѣше́нїй и҆ пре́лестїй твои́хъ свободи́ти, и҆ къ Це́ркви ᲃт҃ѣ́й Събо́рной А҆по́столской Мт҃ри на́шей приꙁва́ти ᲃподоблѧ́етъ. То́й тебѣ̀ да запрѣти́тъ проклѧ́тый ѡ҆сꙋжде́нниче, и҆́же человѣ́ческагѡ ра́ди ᲃпⷭ҇нїѧ пло́тїю пострада̀, ᲂу҆мрѐ, и҆ погребе́нъ бы́стъ, тебѣ̀ же и҆ твою̀ всю̀ си́лꙋ побѣди́лъ є҆́стъ, и҆ Въскре́съ въꙁнесе́сѧ на́ нб҃о, ѿню́дꙋ же па́ки грѧде́тъ ᲃꙋди́ти живы́мъ и҆ ме́ртвымъ, тебѣ̀ же и҆ всѣ́хъ ᲃлꙋжа́щихъ тебѣ̀ вѣ́чномꙋ ѡ҆гню̀ преда́ти: А҆ми́нь.

А҆бїе же по се́мъ ᲃт҃и́тель вꙁдвиꙁа́етъ колѣ́нѣ прекло́ншагѡ, и҆́мъ є҆гѡ̀ за де́снꙋю рꙋ́кꙋ, глѧ̀:

Въстанѝ спѧ́й, и҆ въскреснѝ ѿ ме́ртвыхъ, и҆ просвѣти́тъ тѧ̀ Хᲃ҃.

Въста́вшꙋ же є҆мꙋ̀, ᲃт҃и́тель, (и҆лѝ І҆ере́ѷ) гл҃етъ къ не́мꙋ.

Ѽбрати́сѧ къ за́падѡмъ, и҆ и҆стиннѡ ѿ всегѡ̀ ᲃе́рдца твое́гѡ ѿрица́йсѧ ᲃатаны̀, и҆ всѣ́хъ є҆́ресїй И҆мⷬ҇къ: ꙗ҆́кѡ да чи́стѡ и҆сповѣ́си Правосла́внокаѳꙍли́ческꙋю Вѣ́рꙋ.

Ѻ҆́нъ же ѡ҆бра́щсѧ къ за́падѡмъ, рꙋ́цѣ просте́ртѣ ѿ себѣ̀ держи́тъ.

А҆ще же ѿ І҆оѵде́й ѡ҆браща́ѧйсѧ є҆́стъ, ᲃт҃и́тель въпраша́етъ є҆гѡ̀ по всемꙋ̀ ꙗ҆́кѡ же вы́шшей положе́нѡ є҆стъ въ ѡ҆́браꙁѣ ѿрица́нїѧ сѧ І҆оѵде́йскагѡ невѣ́рїѧ, є҆́же и҆щѝ наꙁадѣ́ на Ли́стѣ, п҃и³².

А҆́ще же ѿ Тꙋре́цкагѡ є҆́стъ нече́стїа и҆щѝ на Листе ч҃в³³.

А҆́ще ѿ А҆рїѧ́нскїѧ є҆́реси, и҆щѝ на Листе, ч҃ѕ³⁴.

Сі́ѧ ᲂу҆́бѡ всѧ̀ въ пе́рвомъ ѡ҆брѧ́щеши ѡ҆глаше́нїи.

Сконча́въ же ѿрица́нїѧ, ᲃт҃и́тель гл҃тъ къ не́мꙋ.

Ѽбрати́сѧ къ въсто́кѡмъ, и҆ и҆сповѣ́жсѧ Гв҃и, къ не́мꙋ же прибѣ́глъ єсѝ.

И҆ въпраша́етъ є҆́гѡ̀ ѡ҆ и҆сповѣда́нїи вѣ́ры.

А҆́ще ѿ Жидѡ́въ є҆́стъ ѿвѣщева́ѧй, и҆щи въпроше́нїѧ въ ѡ҆глаше́нїи вто́ромъ на задѣ̀ на Ли́стѣ, рв҃³⁵.

А҆́ще ѿ Тꙋ́ркѡвъ и҆щи на Ли́стѣ, р҃і³⁶.

А҆́ще же ѿ А҆рїѧ́нъ и҆щѝ на Ли́стѣ, ри҃і³⁷.

И҆ по всемꙋ̀ ᲃи́це є҆гѡ̀ въпраша́й и҆ ѿвѣща́ти сътворѝ. Всѣ́мъ же въпроше́нїѧмъ и҆ ѿвѣ́томъ по рѧ́дꙋ сконча́вшимсѧ, ᲃт҃ль гл҃етъ.

Блⷭ҇ве́нъ Бг҃ъ хотѧ́й всѣ́мъ человѣ́комъ спⷭ҇ти́сѧ, и҆ въ раꙁꙋмъ и҆́стинный прїйтѝ, сы́й блⷭ҇ве́нный въ вѣ́ки,

Кли́ръ:

А҆ми́нь.

И҆ а҆́бїе ᲃт҃ль подае́тъ є҆мꙋ̀ коне́цъ Ѽмо́фора, (а҆́ще же ᲃщ҃енникъ ᲃі́е дѣйствꙋ́етъ, коне́цъ Е҆пітра́хїлѧ,) въ десни́цꙋ, гл҃ѧ̀:

Внидѝ въ Це́ркѡвъ Бж҃їю, ѿ не́ѧ же пре́лестїю дїѧ́волею (и҆ невѣ́рїемъ І҆оѵде́йскимъ, и҆лѝ нече́стїемъ Тꙋре́цкимъ, и҆лѝ А҆рїѧ́нскимъ) дале́че ѿпа́лъ є҆сѝ бы́лъ. И҆ вѣ́ждъ себѣ̀ ꙗ҆́кѡ и҆ꙁбавилсѧ є҆сѝ ѿ сѣ́ти сме́ртныѧ, и҆ ѿ поги́бели вѣ́чныѧ: Ме́рꙁко же ти да бꙋ́детъ и҆дѡлослꙋже́нїе, невѣ́рїе же и҆ всѧ́кое нече́стїе, поперю̀ всѧ̀ непра́вости и҆ заблꙋжде́нїѧ є҆рети́ческаѧ. Чтѝ Бг҃а Ѿца̀ Вседержи́телѧ, І҆и҃са Ха҃ Сн҃а є҆гѡ̀, и҆ Дх҃а ᲃта҃гѡ, є҆дина́гѡ жива́гѡ и҆ и҆́стиннагѡ Бг҃а, ᲃт҃ꙋю Трⷪ҇цꙋ є҆диносꙋ́щнꙋю и҆ нераꙁдѣли́мꙋю.

И҆ и҆ꙁре́къ сі́ѧ въво́дитъ є҆гѡ̀ въ Це́ркѡвъ, держа́щасѧ конца̀ Ѽмо́фора, (и҆лѝ Е҆пітра́хилѧ и҆ поста́витъ є҆гѡ̀ пре́дъ А҆мбѡ́номъ: Ѻ҆́нъ же въста́въ а҆́бїе и҆спꙋща́етъ коне́цъ Ѽмо́фора съ рꙋкѝ: И҆дꙋ́щимъ же и҆́мъ въ Це́ркѡвъ. Кли́ръ чте́тъ, Ѱалѡ́мъ, н҃ѕ.

Поми́лꙋй мѧ̀, Бж҃е, поми́лꙋй мѧ̀: ꙗ҆́кѡ на́тѧ ᲂу҆пова̀ дш҃а̀ моѧ̀, И҆ на сѣ́нь кры́лꙋ твое́ю надѣ́юсѧ, до́ндеже пре́йдетъ беꙁꙁако́нїе.

Въꙁꙁовꙋ̀ къ Бг҃ꙋ вы́шнемꙋ, Бг҃ꙋ благодѣѧ́вшемꙋ мнѣ̀.

Послѝ съ нб҃сѐ и҆ ᲃп҃сѐ мѧ̀: дадѐ въ поноше́нїе попира́ющыѧ мѧ̀. Посла̀ Бг҃ъ млⷭ҇ть свою̀ и҆ и҆́стиннꙋ свою̀.

И҆ и҆ꙁъѧ́тъ дꙋ́шꙋ мою̀ ѿ сре́ды скѵ́мнѡвъ: поспа́хъ смꙋще́нъ. Сн҃ове человѣ́честїи, зꙋ́бы и҆́хъ ѡ҆рꙋ́жїѧ и҆ стрѣ́лы, и҆ ꙗ҆ꙁы́къ и҆́хъ ме́чь ѡ҆́стръ.

Въꙁнесы́йсѧ на нб҃са̀, Бж҃е, и҆ по все́й землѝ ᲃла́ва твоѧ̀.

Сѣ́ть ᲂу҆гото́ваша нога́мъ мои́мъ, и҆ смири́ша дꙋ́шꙋ мою̀: И҆скопа́ша пре́дъ лице́мъ мои́мъ ꙗ҆́мꙋ, и҆ въпадо́ша въ ню̀.

Гото́во ᲃе́рдце моѐ, бж҃е, гото́во ᲃе́рдце моѐ: пою̀ и҆ въспою̀ въ сла́вѣ мое́й.

Въста́ни, ᲃла́ва моѧ̀, въста́ни, Ѱалты́ри и҆ Гꙋ́сли: въста́нꙋ ра́нѡ.

И҆сповѣ́мсѧ тебѣ̀ въ лю́дехъ, Гд҃и, пою̀ тебѣ̀ въ ꙗ҆ꙁы́цѣхъ.

Ꙗ҆́кѡ въꙁвели́чисѧ до нб҃съ млⷭ҇ть твоѧ̀ и҆ да́же до ѡ҆́блакъ и҆́стинна твоѧ̀.

Въꙁнеси́сѧ на Нб҃са̀, Бж҃е, и҆ по все́й землѝ ᲃла́ва твоѧ̀.

По сконча́нїи же ѱалма̀ повели́тъ є҆мꙋ̀ Ст҃ль Колѣ́нѣ преклони́ти пре́дъ А҆мбѡ́номъ, на не́мже на нало́и поло́жено є҆́стъ Ст҃ое Е҆ѵⷢ҇лїе, гл҃ѧ̀.

Преклонѝ колѣ́ни твоѝ пре́дъ Гд҃емъ Бо́гомъ є҆гѡ́же и҆сповѣда́лъ є҆сѝ, ꙗ҆́кѡ да проще́нъ и҆ раꙁдрѣш́енъ бꙋ́деши ѿ сою́ꙁа клѧтве́ннагѡ, и҆ всѧкагѡ ѿлꙋче́нїѧ, и҆ ѿ всѣ́хъ грѣхѡ́въ твои́хъ, и҆ причте́нъ бꙋ́деши Тѣ́лꙋ Це́ркве Хв҃ы.

Семꙋ̀ же бы́вшꙋ, Ст҃ль съ всѣ́мъ Кли́рѡмъ чте́тъ сі́ѧ ѱалмы̀ съ всѧ́кимъ ᲂу҆миле́нїемъ.

Ѱало́мъ н҃.

Поми́лꙋй мѧ̀, Бж҃е, по вели́цѣй млⷭ҇ти твое́й:

Ѱало́мъ л҃з.

Гд҃и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ:

Ѱало́мъ рм҃в.

Гд҃и, ᲂу҆слы́ши Моли́твꙋ мою̀, внꙋшѝ моле́нїе моѐ:

Сконча́ннымъ же Ѱалмѡ́мъ. Ре́кшꙋ Архїдїѧ́конꙋ.

Гд҃ꙋ помолимсѧ.

и҆ Кли́ру:

Гд҃и поми́лꙋй.

Ст҃ль чтетъ Млт҃вꙋ ᲃі́ю:

Гд҃и Гд҃и, всѧ́ческихъ тво́рче и҆ Влады́кѡ, и҆сто́чниче благи́хъ, и҆ спⷭ҇телю всѣ́мъ человѣ́комъ, па́че же вѣ́рнымъ: не преꙁрѣ́вый человѣ́ка дїѧ́волскою ко́ꙁнїю во глꙋбинꙋ̀ поги́бели и҆ пре́лести ниꙁведе́ннагѡ, но спⷭ҇телнымъ въчл҃че́нїемъ є҆диноро́днагѡ твое́гѡ ᲃн҃а̀ Гд҃а и҆ ᲃпс҃а на́шегѡ І҆и҃ᲃ Ха҃, ᲃегѡ̀ вꙁыска́вый и҆ ᲃпс҃ы́й, и҆ къ себѣ̀ въꙁведы́й:

Са́мъ Влады́кѡ человѣ́колю́бче и҆ нн҃ѣ при́ꙁри на раба̀ твое́гѡ И҆мⷬ҇къ: ѡ҆вча̀ слове́снагѡ тѝ ᲃта́да ᲃꙋ́щагѡ, є҆го́же сподоби́лъ є҆сѝ ѿ пре́лести поги́белныѧ и҆ ѿстꙋ́пства воꙁбнꙋ́ти, и҆ къ ᲃт҃ѣ́й твое́й и҆ А҆по́столской Правосла́внокаѳꙍли́ческой Це́ркви прибѣ́гнꙋти: Въꙁсїѧ́й ѽ Влады́кѡ, ᲃмире́ннѡ мо́лимъ тѧ̀, съверше́ннѡ въ ᲃе́рдце є҆гѡ̀ свѣ́тъ благода́ти ᲃт҃агѡ твое́гѡ Дх҃а, къ просвѣще́нїю ра́ꙁꙋма и҆ и҆́стинны ᲃт҃а́гѡ Е҆ѵⷢ҇лїѧ твое́гѡ: въꙁгорѝ въ не́мъ и҆́скрꙋ ᲃп҃си́телнагѡ Креще́нїѧ лежа́щꙋю въ дш҃ю̀ є҆гѡ̀, въ є҆́же ражꙁдиꙁа́тисѧ въ не́мъ пла́менѣ дх҃овномꙋ твое́ѧ благода́ти, къ и҆сполне́нїю твои́хъ за́повѣдїй, и҆ къ ѿраже́нїю всѧ́кїѧ дїѧволскїѧ ле́сти: да́ждъ є҆мꙋ̀ нелицемѣ́рнѡ, невъꙁвра́тнѡ, и҆ неле́стнѡ, съедини́тисѧ ᲃт҃ѣ́й твое́й ᲃъбо́рнѣй Це́ркви, и҆ гнꙋша́тисѧ и҆ попира́ти всѧ̀ дш҃егꙋби́телныѧ пре́лести, є҆́реси же и҆ ѿстꙋ́пства, и҆́стиннѡ же всегда̀ и҆сповѣда́ти и҆ тве́рдѡ съдержа́ти Правосла́внокаѳꙍли́ческꙋю Вѣ́рꙋ: съпричтѝ є҆гѡ̀ и҆ꙁбра́нномꙋ твое́мꙋ ᲃта́дꙋ, и҆ съединѝ є҆гѡ̀ тѣ́лꙋ Це́ркве твое́ѧ ᲃт҃ыѧ: ѿста́ви ѿ негѡ̀ всѧ̀ мы́сли, дѣѧ́нїѧ же и҆ беꙁбо́жныѧ ѡ҆бы́чаѧ: ѡ҆ста́ви є҆мꙋ̀ всѧ̀ съгрѣше́нїѧ во́лнаѧ и҆ не во́лнаѧ, и҆ ѡ҆чистѝ є҆гѡ̀ ѿ всѧ́кїѧ ᲃкве́рны пло́ти и҆ Дх҃а: сътворѝ є҆гѡ̀ съсꙋ́дъ че́стенъ, и҆ жи́лище ᲃт҃а́гѡ твое́гѡ Дх҃а, ꙗ҆́кѡ да тѣ́мъ всегда̀ ѡ҆кормлѧ́емъ и҆ наставлѧ́емъ, ᲃп҃си́телныѧ за́повѣди твоѧ̀ съблюде́тъ: и҆ творѧ̀ во́лю твою̀ благꙋ́ю, благоꙋго́днꙋю же и҆ съверше́ннꙋю, сподоби́тсѧ, и҆ въспрїѧ́тїѧ нбⷭ҇ныхъ твои́хъ благи́хъ, съ всѣ́ми, благоꙋгоди́вшими тебѣ̀. Ты̀ бо є҆сѝ Бг҃ъ млⷭ҇ти, и҆ щедроѡ́тъ и҆ человѣкѡлю́бїѧ, и҆ всѣ́мъ человѣ́кѡмъ хо́щеши спⷭ҇ти́сѧ, и҆ тебѣ̀ ᲃла́вꙋ въꙁсыла́емъ Ѿцꙋ̀, и҆ Сн҃ꙋ, и҆ ᲃт҃о́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ.

Кли́ръ:

А҆ми́нь.

Свѧти́тель:

Ми́ръ всѣ́мъ.

Кли́ръ:

И҆ дꙋ́хови твое́мꙋ.

А҆рхїдїѧ́конъ:

Гла́вы ва́ша Гв҃и преклонѣ́те.

Свѧти́тель же прекло́нь гла́вꙋ съ всѣ́ми, гл҃етъ Моли́твꙋ ᲃі́ю:

Гд҃и І҆и҃ᲃ Хє҃ Бо́же на́шъ преклони́вый Нб҃са, и҆ съше́дый на ᲃпⷭ҇нїе ро́да человѣ́ческагѡ, и҆ Кресто́мъ свои́мъ Пра́дѣдныѧ клѧ́твы свободи́вый нас, и҆ къ Божестве́нной жи́ꙁни въꙁведы́й: рекі́й быва́ти ра́достъ на Нб҃сѝ ѡ҆ є҆дино́мъ ка́ющомсѧ, прїймѝ нн҃ѣ поги́бшее тѝ ᲃлове́сное ѡ҆вча̀, и҆ съвокꙋпѝ є҆̀ ᲃт҃о́мꙋ твое́мꙋ и҆ꙁбра́нномꙋ ᲃта́дꙋ: въсхити́вшихъ же є҆гѡ̀ во́лкѡвъ ѿ не́гѡ ѿста́ви, и҆ сподобѝ є҆гѡ̀ настꙋпа́ти на змїю̀ и҆ на ско́рпїю, ѡ҆гражда́ема сꙋ́ща Кресто́мъ твои́мъ, и҆ съблюда́ема сла́вою покланѧ́емагѡ ти И҆менѝ, и҆менꙋ́емагѡ на на́съ рабѣ́хъ твои́хъ.

Въꙁгла́съ:

Ты́ бо є҆си Бг҃ъ на́шъ, Бг҃ъ є҆́же ми́ловати и҆ ᲃпⷭ҇тѝ, и҆ тебѣ̀ ᲃла́вꙋ въꙁсыла́емъ съ беꙁнача́лнымъ ти Ѿце́мъ, и҆ съ Преᲃт҃ы́мъ, и҆ благи́мъ и҆ животворѧ́щимъ ти Дх҃омъ, нн҃ѣ и҆ при́снѡ, и҆ въ вѣ́ки вѣкѡ́въ.

Кли́ръ:

А҆ми́нь.

Свѧти́тель же (и҆лѝ на сі́е ѿ не́гѡ вла́сть и҆мы́й) раꙁдрѣша́етъ є́гѡ̀ ᲃи́це.

Гд҃ь и҆ Бг҃ъ на́шъ І҆и҃ᲃ Хᲃ҃ Ключа̀ Ца́рствїѧ нбⷭ҇нагѡ А҆по́столѡмъ свои́мъ врꙋчи́вый, и҆ да́вый и҆́мъ всю̀ вла́сть свое́ю благода́тїю, є҆́же вѧꙁа́ти и҆ раꙁдрѣша́ти человѣ́ки ѿ грѣхѡ́въ на землѝ: То́й Са́мъ неиꙁрече́нныѧ ра́ди млⷭ҇ти свое́ѧ, да прости́тъ и҆ раꙁдрѣши́тъ тѧ. И҆ а҆́ꙁъ всеси́лною є҆гѡ̀ вла́стїю, и҆ ᲃт҃ы́хъ є҆гѡ̀ А҆по́столъ Петра̀ и҆ Па́вла, и҆ про́чїихъ двана́десѧти, (А҆́ще же І҆ере́ѷ ᲃі́е дѣйствꙋ́етъ, прилага́етъ и҆ ᲃі́е, и҆ Преѡсвщ҃еннагѡ А҆рхїепⷭ҇па на́шегѡ Митрополи́та, И҆мⷬ҇къ: и҆лѝ Боголюби́вагѡ Е҆пⷭ҇панш҃гѡ, И҆мⷬ҇къ мнѣ̀ а҆́ще недосто́йномꙋ А҆рхїере́ю (и҆лѝ, І҆ере́ю) да́нною, проща́ю и҆ раꙁдрѣша́ю тѧ̀ ча́до, И҆мⷬ҇къ: ѿ сою́ꙁа клѧтве́ннагѡ, и҆ ѿ всѧ́кагѡ ѿлꙋче́нїѧ мала́го же и҆ вели́кагѡ, и҆ ѿ всѧ́кагѡ запрѣще́нїѧ, въ нѧ́же ѿстꙋ́пствомъ ѿ пра́выѧ вѣ́ры въпа́лъ бы́лъ є҆сѝ, ѿ всѣ́хъ грѣхо́въ твои́хъ, и҆ соедине́нїю вѣ́ныхъ, и҆ тѣ́лꙋ Це́ркве хв҃ы съвъкꙋплѧ́ю, и҆ Бжⷭ҇тве́ннымъ Та́йнамъ Церко́внымъ приобща́ю тѧ̀, въ и҆мѧ̀ Ѿца̀🕂 и҆ Сн҃а🕂 и҆ ᲃт҃а́гѡ Дх҃а🕂 А҆ми́нъ.

Семꙋ̀ же бы́вшꙋ глаголе́тъ къ не́мꙋ Свѧти́тель.

Въста́ни, бра́те, и҆ ста́ни до́брѣ, станѝ съ стра́хомъ, и҆ ꙗ҆́кѡ вѣ́рный І҆и҃ᲃ Хв҃ъ ра́бъ пребꙋ́ди въ Вѣ́рѣ и҆ и҆́стиннѣ, и҆ съблюдѝ всѧ̀ за́повѣди Гд҃нѧ, и҆ прі́ймеши благода́ть ѿ не́гѡ и҆ Ца́рствїю Нбⷭ҇номꙋ сподоби́шисѧ.

Въста́вшꙋ же дае́тъ є҆мꙋ̀ Свѧти́тель лобꙁа́ти Кре́стъ и҆ ᲃт҃о́е Е҆ѵⷢ҇лїе, и҆ а҆́бїе тво́ритъ ѡ҆бы́чный ѿпꙋ́стъ.

и҆́же и҆лѝ правовѣ́рни бы́вше ѿстꙋпиша, и҆лѝ въ ѿстꙋпствѣ роди́вшесѧ Креще́ни и҆ Мѵ́ромъ пома́ꙁани ѿ свои́хъ си ѿстꙋ́пническихъ І҆ере́ѷ бы́ша. По пре́дъ ᲂу҆каꙁанномꙋ ᲂу҆бѡ ᲂу҆ста́вꙋ на Ли́стѣ рч҃а³⁸.

Ѽпа́снѡ и҆спыта́ни, наꙋче́ни, и҆ исповѣда́ни бы́вше, прїѧ́ти и҆ Це́ркви ᲃъвокꙋпле́ни ᲃи́мъ ѡ҆́браꙁомъ да бꙋ́дꙋтъ.

Свѧти́тель и҆лѝ на ᲃі́е ѿ негѡ̀ вла́сть и҆мы́й І҆ере́ѷ, по преднаписа́нномꙋ ᲂу҆ста́вꙋ въ ᲃщ҃е́ннаѧ ѡ҆дѣѧ́нъ, приходѧ́щагѡ же къ Правосла́вной Вѣ́рѣ, въ Па́пертъ въвестѝ повелѣва́етъ, и҆ поста́вити є҆гѡ̀ пре́дъ Церко́вными две́рми. самъ же ᲃт҃и́тель сѧ́детъ (а҆́ще же І҆ере́ѷ, ста́нетъ) въ самы́хъ две́рехъ, и҆ повели́тъ прише́дшемꙋ преклони́ти колѣ́нѣ.

Семꙋ̀ же бы́вшꙋ, а҆́ще ѿ тѣ́хъ и҆́же Правосла́вни бы́ша ѿстꙋпѝ.

Въпраша́етъ є҆гѡ̀ ᲃи́це, гл҃ѧ̀:

Ѿ всегѡ̀ ли ᲃе́рдца твое́гѡ жалѣ́еши, и҆ и҆́стиннѡ ли ка́ешисѧ, ꙗ҆́кѡ ѿ ᲃт҃ы́ѧ Правосла́внокаѳꙍли́ческїѧ А҆по́столскїѧ Це́ркве Въсто́чныѧ и҆ ѿ є҆ди́ности Пра́выѧ Вѣ́ры ѿстꙋпи́лъ є҆сѝ, заблꙋжде́нїю же и҆ погрѣше́нїѧмъ ѿстꙋ́пническимъ прилѣпи́лсѧ є҆сѝ бы́л?

Ѿвѣща́етъ:

Ѿ всегѡ̀ ᲃе́рдца мое́гѡ жалѣ́ю ѡ҆ се́мъ, и҆ и҆́стиннѡ ка́юсѧ.

Роди́вшагожесѧ въ ѿстꙋ́пствѣ ѿсе́лѣ начина́етъ въпраша́ти: ѿстꙋпи́вшагѡ же ѿ пе́рвагѡ наче́нъ, да́же до конца̀ въпраша́етъ:

И҆́стиннѡ ли хо́щеши ѿрещи́сѧ всѣ́хъ ѿстꙋ́пническихъ заблꙋжде́нїй ᲂу҆мышле́нїй же и҆ погрѣше́нїй въ ни́хъ же досе́лѣ бы́лъ є҆сѝ?

Ѿвѣща́етъ:

И҆́стиннѡ хо́щꙋ̀.

Въпраша́етъ:

Хо́щеши ли въ всѣ́мъ послꙋ́шнымъ бы́ти Це́ркви ᲃт҃о́й Правосла́внокаѳꙍли́ческой Въсто́чной, и҆ въ съедине́нїи Вѣ́ры Правосла́вныѧ до кончины̀ живота̀ твое́гѡ неѿстꙋ́пнѡ пребы́ти?

Ѿвѣща́етъ:

Хощꙋ̀.

А҆́бїе же ᲃт҃лъ, и҆лѝ І҆ере́ѷ, знамена́етъ чело̀ є҆гѡ̀, гⷤ, гл҃ѧ:

Въ и҆мѧ̀ Ѿца̀ и҆ Сн҃а и҆ ᲃт҃а́гѡ Дх҃а А҆ми́нъ.

Та́же въꙁло́жъ десни́цꙋ, на главѣ̀ є҆гѡ̀, гл҃етъ Моли́твꙋ ᲃі́ю,

ре́кшꙋ Дїѧ́конꙋ:

Гд҃ꙋ помоли́мсѧ.

и Кли́рꙋ:

Гд҃и поми́лꙋй.

А҆́ще є҆́стъ ѿстꙋ́пникъ ѿ Вѣ́ры, чтѝ Моли́твꙋ ᲃі́ю.

Гд҃и Бо́же Вседержи́телю, Ѿче Гд҃а на́шегѡ І҆и҃ᲃ Ха҃.

Ю҆́же и҆щѝ на задѣ̀ на Ли́стъ рч҃ѕ³⁹.

А҆́ще же въ ѿстꙋ́пствѣ роди́выйсѧ, гл҃ѝ ᲃі́ю.

Гд҃и Бо́же Вседержи́телю, є҆ди́не ᲃт҃е и҆ на ᲃт҃ы́хъ почива́ѧй.

Ю҆́же и҆щѝ на задѣ̀ на Ли́стъ ро҃е⁴⁰.

Сконча́въ же Моли́твы, гл҃етъ къ не́мꙋ.

Въстанѝ, и҆ ѡ҆брати́сѧ къ за́падѡмъ, и҆ ѿреци́сѧ всѣ́хъ заблꙋжде́нїй ѿстꙋ́пническихъ въ ни́хъ же пребы́лъ є҆сѝ досе́ле.

Ѽбра́щъшꙋжесѧ є҆мꙋ̀ на за́падъ, въпраша́етъ є҆гѡ̀, гл҃ѧ:

Ѿрица́ешилисѧ всѣ́хъ заблꙋжде́нїй, и҆ погрѣше́нїй ᲃъбо́рища И҆мⷬ҇къ: ѿстꙋ́пническагѡ, въ не́мъ же досе́лѣ бы́лъ є҆́сѝ?

Ѿвѣща́етъ:

Ѿрица́юсѧ всѣ́хъ заблꙋжде́нїй, и҆ погрѣше́нїй ᲃъбо́рища, И҆мⷬ҇къ: ѿстꙋ́пническагѡ, въ не́мъ же досе́лѣ пребы́хъ.

Въпраша́етъ:

Проклина́еши ли всѧ̀ є҆́реси и҆ ѿстꙋ́пства, ꙗ҆́кѡ Бж҃їей и҆́стиннѣ и҆ Це́ркви є҆гѡ̀ ᲃт҃ѣй противѧ́щихсѧ?

Ѿвѣща́етъ:

Проклина́ю всѧ̀ є҆́реси и҆ ѿстꙋ́пства, ꙗ҆́кѡ Бж҃їей и҆́стиннѣ и҆ Це́ркви є҆гѡ̀ ᲃт҃ѣ̀ проти́вныхъ сꙋ́щихъ.

Посе́мъ Ст҃итель и҆лѝ І҆ере́ѷ глаголе́тъ къ не́мꙋ:

Ѽбрати́сѧ къ Въсто́кѡмъ и҆ поклони́сѧ Гв҃и къ не́мꙋ же прибѣ́глъ є҆сѝ.

Ѻ҆́нъ же о҆бра́щъсѧ къ Восто́кѡмъ покланѧ́етсѧ є҆дино́щи до землѝ, глаголѧ̀:

Покланѧ́юсѧ Ѿцꙋ̀, и҆ Сн҃ꙋ и҆ ᲃт҃о́мꙋ Дх҃ꙋ Бг҃ꙋ є҆дино́мꙋ въ Трⷪ҇ци ᲃт҃ѣ́й нераꙁдѣ́лнѡ слави́момꙋ и҆ покланѧ́емомꙋ.

Ст҃ль же гл҃етъ:

Блⷭ҇ве́нъ Бг҃ъ хотѧ́й всѣ́мъ человѣ́кѡмъ ᲃпⷭ҇ти́сѧ и҆ въ ра́ꙁꙋмъ и҆́стинный прїйтѝ, сы́й блⷭ҇ве́нъ въ вѣ́ки.

Кли́ръ:

А҆ми́нь.

И҆ а҆́бїе ᲃт҃и́телъ подае́тъ ємꙋ коне́ц Ѽмо́фора, (а҆́ще же ᲃщ҃е́нникъ, Е҆пітра́хилѧ) въ десни́цꙋ, глаголѧ̀.

Внидѝ въ Це́ркѡвъ Бж҃їю, ѿ не́ѧ же пре́лестїю ѿстꙋ́пства, И҆мⷬ҇къ: дале́че бы́лъ є҆сѝ, и҆ вѣ́ждъ себѣ̀ ꙗ҆́кѡ и҆ꙁба́вилсѧ є҆сѝ ѿ сѣ́ти сме́ртныѧ, и҆ ѿ поги́бели вѣ́чныѧ: ме́рꙁско же ти да бꙋ́детъ всѧ́кое ѿстꙋ́пство, и҆ всѧ́каѧ є҆́ресь: поперѝ всѧ̀ непра́вости, и҆ заблꙋжде́нїѧ є҆рети́ческаѧ же и҆ ᲃхісмати́ческїѧ. Чтѝ правосл́авнѡ Бг҃а Ѿца̀ Вседержи́телѧ, І҆и҃са Ха҃ Сн҃а є҆гѡ̀, и҆ Дх҃а ᲃт҃гѡ, є҆динагѡ жива́гѡ и҆ и҆́стиннагѡ Бг҃а, ᲃт҃ꙋ́ю Трⷪ҇цꙋ є҆диносꙋ́щнꙋю и҆ нераꙁдѣли́мꙋю.

И҆ и҆ꙁре́къ сі́ѧ въво́дитъ є҆гѡ̀ въ Це́ркѡвъ, держа́щасѧ конца̀ Ѽмо́фора, (и҆лѝ Е҆пітра́хилѧ) и҆ поста́витъ є҆гѡ̀ пре́дъ А҆мбѡ́номъ, и҆де́же на сто́лцѣ ᲃт҃о́е Е҆ѵⷢ҇лїе поло́жено є҆́сть.

Ѻ҆́нъ же ста́въ а҆́бїе и҆спꙋща́етъ коне́цъ Ѽмофо́ра съ рꙋкѝ: и҆дꙋ́щимъ же и҆́мъ въ Це́ркѡвъ,

Кли́ръ: чте́тъ, Ѱаломъ, к҃ѕ:

Гд҃ь просвѣще́нїе моѐ и҆ ᲃп҃си́тель мо́й, кого́сѧ ᲂу҆бою̀; Гд҃ь защи́титель животꙋ̀ мое́мꙋ, ѿ кого́сѧ ᲂу҆страшꙋ̀;

Внегда̀ приближа́тисѧ на́мѧ зло́бꙋющымъ, є҆́же снѣ́сти плѡ́ти моѧ̀.

Ѽскорблѧ́ющїи мѧ̀ и҆ вра́ꙁи моѝ, ті́и и҆ꙁнемого́ша и҆ падо́ша.

А҆́ще ѡ҆полчи́тсѧ на́мѧ по́лкъ, не ᲂу҆бои́тсѧ ᲃе́рдце моѐ: А҆́ще воста́нетъ бра́нь, на́нь а҆́ꙁъ ᲂу҆пова́ю.

Є҆ди́но проси́хъ ѿ Гд҃а, то̀ вꙁы́щꙋ: є҆́же жи́ти ми въ домꙋ̀ гд҃ни всѧ̀ днѝ живота̀ мое́гѡ, зрѣ́ти ми красоты̀ гд҃нѧ, и҆ посѣща́ти Це́ркѡвъ ᲃт҃ꙋ́ю є҆гѡ̀.

Ꙗ҆́кѡ скры́ мѧ̀ въ кро́вѣ свое́мъ въ дн҃ь зла̀ мое́гѡ, покры́ мѧ̀ въ та́йнѣ кро́ва своегѡ̀. На ка́мень въꙁнесѐ мѧ̀:

И҆ нн҃ѣ сѐ, въꙁнесѐ гла́вꙋ мою̀ на врагѝ моѧ̀: Ѽбыйдо́хъ, и҆ пожро́хъ въ кро́вѣ є҆гѡ̀ же́ртвꙋ хвале́нїѧ и҆ въскликнове́нїѧ: въпою̀ и҆ пою̀ Гв҃и.

Ꙋ҆слы́ши гла́съ мо́й, и҆́мже воꙁꙁва́хъ, поми́лꙋй мѧ̀ и҆ ᲂу҆слы́ши мѧ̀.

Тебѣ̀ речѐ ᲃе́рдце моѐ: Гд҃а вꙁыщꙋ̀: вꙁыска̀ тебѐ лицѐ моѐ, лица̀ твое́гѡ, Гд҃и, вꙁыщꙋ̀.

Не ѿвратѝ лица̀ твое́гѡ ѿ ме́не и҆ не ᲂу҆клони́сѧ гнѣ́вомъ ѿ раба̀ твое́гѡ. Помо́щникъ ми бꙋ́ди: не ѿринѝ менѐ и҆ не ѡ҆ста́ви менѐ, Бж҃е, ᲃп҃си́телю мо́й.

Ꙗ҆́кѡ ѡ҆тецъ мо́й и҆ ма́ти моѧ̀ ѡ҆ста́виста мѧ̀, Гд҃ь же воспрїѧ́ть мѧ̀.

Законоположѝ ми, Гд҃и, въ пꙋ́ти твое́мъ, и҆ наста́ви мѧ̀ на пꙋть пра́вый вра́гъ мои́хъ ра́ди.

Не преда́ждь менѐ въ дш҃а̀ стꙋжа́ющихъ мѝ: ꙗ҆́кѡ въста́ша на мѧ̀ свѣди́теле непра́ведни, и҆ солга̀ непра́вда себѣ̀.

Вѣ́рꙋю ви́дѣти блага́ѧ Гд҃нѧ на землѝ живы́хъ.

Потерпѝ Гд҃а, мꙋжа́йсѧ, и҆ да крѣпи́тсѧ ᲃе́рдце твоѐ, и҆ потерпѝ Гд҃а.

По сконча́нїи Ѱалма̀, повели́тъ є҆мꙋ̀ ᲃт҃ль колѣ́нѣ пре́дъ ᲃт҃ы́мъ Е҆ѵⷢ҇лїемъ преклони́ти.

Семꙋ̀ же бы́вшꙋ. Дїа́конъ глаголе́тъ.

Гд҃ꙋ помоли́сѧ.

Кли́ръ:

Гд҃и поми́лꙋй.

Ст҃ль же чте́тъ Моли́твꙋ ᲃі́ю надъ колѣ́нопреклоншимъ:

Гд҃и Гд҃и, всѧ́ческихъ тво́рче и҆ Влады́кѡ.

Ю҆́же и҆щѝ на задѣ̀ на Ли́стѣ св҃⁴¹.

По Моли́твѣ же ᲃт҃и́тель повелѣва́етъ є҆мꙋ̀ въста́ти, глаголѧ̀.

Въстанѝ, и҆ станѝ до́брѣ, станѝ съ стра́хѡмъ, и҆ и҆́стинноѡ и҆сповѣ́ждъ Правосла́внокаѳꙍли́ческꙋю Вѣ́рꙋ, всѧ̀ є҆́реси прокленѝ, ꙗ҆́кѡ да проще́нъ и҆ раꙁдрѣше́нъ бꙋ́деши ѿ съю́ꙁа клѧтве́ннагѡ, и҆ всѧ́кагѡ ѿлꙋче́нїѧ, и҆ причте́нъ бꙋ́деши тѣ́лꙋ Це́ркве Хрⷭ҇товы.

Ѻ҆́нъже а҆́бїе въста́въ, на Ха́ртїи пре́дъ ᲂу҆готова́нной чте́тъ въ ᲂу҆слыша́нїе всѣ́мъ, и҆сповѣда́нїе Правосла́вныѧ Вѣ́ры, и҆щѝ на задѣ̀ на Ли́стѣ м҃е⁴².

Сконча́в же И҆сповѣда́нїе, подае́тъ є҆мꙋ̀ ᲃт҃ль ᲃт҃о́е Е҆ѵⷢ҇лїе къ лобꙁа́нїю, и҆ семꙋ̀ бы́вшꙋ, гл҃етъ:

Блс҃ве́нъ Бг҃ъ и҆ꙁволи́вый ᲃи́це.

И҆ посемъ гл҃тъ къ не́мꙋ.

Преклонѝ колѣ́нѣ твоѝ пре́дъ Гд҃емъ Бо́гомъ є҆гѡ́же и҆сповѣда́лъ є҆сѝ, и҆ прі́ймеши ѡ҆ставле́нїе грѣхѡ́въ твои́хъ, и҆ раꙁдрѣше́нїе ѿ всѧ́коѧ клѧ́твы.

Ѻ҆́нъ же прекланѧетъ гла́вꙋ свою̀ и҆ колѣ́нѣ своѝ зрѧ̀ до́лꙋ, ᲃт҃и́тель, и҆лѝ на сі́е ѿ не́гѡ вла́сть и҆мы́й І҆ере́ѷ, глаголе́тъ надъ ни́мъ съ всѧ́кимъ ᲂу҆миле́нїемъ. А҆́ще ли въꙁмо́жнѡ и҆ съ слеꙁа́ми Моли́твꙋ ᲃі́ю.

Ре́кшꙋ Дїѧ́конꙋ:

Гд҃ꙋ помоли́мсѧ.

и҆ Кли́рꙋ:

Гд҃и поми́лꙋй.

Влады́кѡ мнѡ́гомлⷭ҇тиве Гд҃и І҆и҃се Хє҃ Бо́же на́шъ. Верхо́вномꙋ твое́мꙋ А҆по́столꙋ Пе́трꙋ, и҆ про́чїимъ А҆по́столѡмъ твои́мъ Клю́ча Ца́рствїѧ небе́сногѡ врꙋчи́вый, и҆ твое́ю Благода́тїю всей и҆́мъ да́тисѧ въсхотѣ́вый вла́сти. Да́же свѧꙁа́нымъ бы́ти, и҆ на нб҃сѝ є҆ли́ка ѿ ни́хъ свѧ́ꙁана сꙋ́ть: и҆ раꙁдрѣше́нѡмъ бы́ти та́кожде на нб҃сѝ, є҆ли́ка ѿ ни́хъ на землѝ раꙁдрѣше́на сꙋ́тъ. Наслѣ́дники же на́съ хꙋды́хъ и҆ недосто́йныхъ неиꙁрече́ннымъ твои́мъ человѣкѡлю́бїемъ данныѧ и҆́мъ вла́сти сподоби́вый бы́ти, дабы̀ и҆ намъ та́кожде вѧꙁа́ти и҆ рѣша́ти въ лю́дехъ твои́хъ прилꙋча́ющаѧсѧ. Са́мъ преблагїй Ца́рꙋ и҆ нн҃ѣ ѿ пре́лести ѿстꙋ́пства, ꙗ҆́кѡ ѿ сн҃а̀ поги́белнагѡ въꙁбнꙋ́вшагѡ, и҆ въ ра́ꙁꙋмъ и҆́стинный прїйтѝ и҆ꙁволи́вшагѡ раба̀ твое́гѡ сегѡ̀ И҆мⷬ҇къ: Це́ркви твое́й съвокꙋпи́тисѧ жела́ющагѡ, ꙗ҆́кѡ человѣ́кѡлюби́вый и҆ до́брый Па́стыръ, млⷭ҇тивнѡ прїймѝ, Ты́ бо ре́клъ є҆сѝ и҆́ныѧ ѡ҆́вца и҆́мамъ, ꙗ҆́же нѣ́сꙋтъ ѿ двора̀ сегѡ̀: и҆ ты́ѧ мѝ подоба́етъ привестѝ, и҆ гла́съ мо́й ᲂу҆слы́шатъ, и҆ бꙋ́детъ є҆дино̀ ста́дѡ и҆ є҆ди́нъ Па́стыръ. И҆ мно́ю недосто́йнымъ рабо́мъ твои́мъ раꙁдрѣшѝ є҆гѡ̀ ѿ всѧ́кагѡ ᲃъю́ꙁа клѧтве́ннагѡ, и҆ ѿ всѧ́кагѡ ѿлꙋче́нїѧ, и҆ а҆́ще что̀ въ настоѧ́щемъ жи́тїи ꙗ҆́кѡ человѣ́къ съгрѣши́лъ є҆́стъ, сло́вомъ и҆лѝ дѣ́ломъ и҆лѝ помышле́нїемъ, простѝ и҆́ ѿпꙋсти є҆мꙋ̀, и҆ ѿ всѧ́кагѡ поро́ка дꙋше́внагѡ благода́тїю твое́ю того̀ ѡ҆мы́въ, чи́ста въ дво́ръ тво́й въведѝ, и҆ съпричтѝ є҆гѡ̀ ѡ҆вца́мъ и҆ꙁбра́ннагѡ, и҆ съединѝ є҆гѡ̀ тѣ́лꙋ Це́ркве твое́ѧ ᲃт҃ы́ѧ: сътворѝ є҆гѡ̀ съсꙋ́дъ че́стенъ и҆ жи́лище твое́гѡ ᲃт҃а́гѡ Дх҃а, ꙗ҆́кѡ да тѣ́мъ всегда̀ ѡ҆кормлѧ́емъ и҆ наставлѧ́емъ, ᲃп҃си́телныѧ за́повѣди твоѧ̀ ᲃъблюде́тъ: и҆ творѧ̀ во́лю твою̀ благꙋ́ю, благоꙋго́днꙋю же и҆ съверше́ннꙋю, ᲃподоби́тсѧ и҆ въспрїѧтїѧ нбⷭ҇ныхъ твои́хъ благи́хъ, съ всѣ́ми благоꙋгоди́вшими тебѣ̀. Твоѐ бо є҆́стъ є҆́же ми́ловати и҆ ᲃп҃са́ти на́съ Бо́же на́шъ, и҆ ты є҆сѝ Бг҃ъ всѣ́мъ человѣ́кѡмъ хотѧ́й ᲃпⷭ҇ти́сѧ и҆ въ ра́ꙁꙋмъ и҆́стинный прїйтѝ, и҆ тебѣ̀ ᲃла́вꙋ воꙁъсыла́емъ, съ беꙁнача́лнымъ ти Ѿце́мъ, и҆ съ Прⷭ҇ты́мъ благи́мъ и҆ животворѧ́щимъ ти Дх҃омъ, нн҃ѣ и҆ при́снѡ, и҆ въ вѣ́ки вѣкѡ́въ.

Кли́ръ:

А҆ми́нь.

А҆бїе же по се́й Моли́твѣ раꙁдрѣша́етъ є҆гѡ̀ ᲃи́це.

Гд҃ь и҆ Бг҃ъ на́шъ І҆и҃ᲃ Хᲃ҃ Ключа̀ Ца́рствїѧ нбⷭ҇нагѡ:

Ю҆́же и҆щѝ на задѣ̀ на Ли́стѣ рп҃г⁴³.

Семꙋ̀ же бы́вшꙋ, ᲃт҃и́тель глаголе́тъ къ не́мꙋ.

Встанѝ бра́те, и҆ станѝ до́брѣ, станѝ съ стра́хомъ, и҆ ꙗ҆́кѡ вѣ́рный І҆и҃ᲃ Хв҃ъ ра́бъ пребꙋ́ди въ вѣ́рѣ и҆ и҆́стиннѣ, съблюда́ѧ всѧ̀ за́повѣди є҆гѡ̀, и҆ прі́ймеши благода́ть ѿ не́гѡ, и҆ Ца́рствїю нбⷭ҇номꙋ сподоби́шисѧ.

Сі́е же гл҃етъ, а҆́ще є҆́сть ѿ Мѵропомаꙁа́нныхъ. И҆ а҆́бїе въста́вшꙋ є҆мꙋ̀ тво́ритъ ѡ҆бы́чный ѿпꙋ́стъ, и҆ ѿхо́дѧтъ восвоѧ́си. А҆щеже ᲂу҆́бѡ ѿ не Мѵропомаꙁа́нныхъ є҆́стъ, гл҃етъ ᲃі́е.

Встанѝ бра́те, и҆ ꙗ҆́кѡ вѣ́рный І҆и҃ᲃ Хв҃ъ ра́бъ, помоли́сѧ є҆мꙋ̀ съ на́ми, ꙗ҆́кѡ да сподоби́тъ тѧ̀ въ помаꙁа́нїи ᲃт҃гѡ Мѵ́ра прїѧ́ти благода́ть Ст҃гѡ Дх҃а.

Ѻ҆́нъ же а҆́бїе въста́въ съ всѧ́кимъ ᲂу҆миле́нїемъ стои́тъ, ᲃт҃и́тель же начина́етъ Чи́нъ ᲃт҃а́гѡ Мѵропомаꙁа́нїѧ и҆ съверша́етъ по всемꙋ̀ ꙗ҆́коже вы́шей написа́нъ є҆́стъ ничто̀ же ѡ҆ставлѧ́ѧ: є҆го́же и҆щѝ на Ли́стѣ, рп҃д⁴⁴.

Вѣ́стно ᲂу҆́бѡ бꙋ́ди ꙗ҆́кѡ по предънаписа́нномꙋ ᲂу҆ка́ꙁꙋ ѿстꙋпи́вшихъ ѿ Правосла́вныѧ Вѣ́ры, и҆ па́ки ѡ҆браща́ющихсѧ ника́коже Мѵ́ромъ пома́ꙁовати досто́итъ, и҆́бѡ по ᲃт҃мъ Креще́нїи, а҆́бїе соверше́ннѡ пома́ꙁаны бы́ша.

Въ ѿстꙋ́пствѣ же роди́вшихсѧ, и҆ ѿ ѿстꙋпническихъ І҆ере́ѷ Креще́нїе прїе́мшихъ, а҆́ще ѿ и҆́хъ Е҆пⷭ҇пѡвъ не Мѵропомаꙁа́ни бы́ша, всѧ́кѡ Мѵ́ромъ ᲃт҃ымъ пома́ꙁовати, ꙗ҆́коже предъре́хомъ, досто́итъ. Но ᲂу҆́бѡ и҆ ᲃі́е вѣ́ждъ, ꙗ҆́кѡ ѿстꙋ́пническое Креще́нїе и҆ Е҆рети́ческое, и҆́же въ ᲃт҃ꙋ́ю нераꙁдѣ́лнꙋю Трⷪ҇цꙋ вѣ́рꙋютъ, и҆ въ и҆́мѧ̀ Ѿца̀, и҆ Сн҃а, и҆ ᲃт҃гѡ Дх҃а, въ трѝ погрꙋже́нїѧ ꙗ҆́кѡже предърѣ́хъ крⷭ҇тѧ́тъ. Це́ркѡвъ ᲃт҃а́ѧ Правосла́внокаѳꙍли́ческаѧ всѧ́ко коне́чнѣ прїѧ́тѡ бы́ти ᲂу҆ка́ꙁꙋетъ.

Ꙍ҆ Мѵропомаꙁа́нїи же ѿтсꙋ́пническомъ и҆лѝ є҆рети́ческомъ ничто́же ꙗ҆встве́ннѡ, ра́ꙁвѣ є҆́же пре́дъ ᲂу҆каꙁа́хѡмъ ᲂу҆ꙁакони́ла є҆́стъ намъ.

Тѣ́мъ же А҆рме́нъ ꙗ҆́кѡ събо́рнѣ тріклѧ́тыхъ є҆ретикѡ́въ по семꙋ̀ чи́нꙋ послѣ́днемꙋ ꙗ҆́кѡже и҆ и҆́ныхъ ѿстꙋ́пникѡвъ прїе́млемъ, и҆ Мѵ́ромъ ᲃт҃ы́мъ пома́ꙁꙋемъ.

Захо́дныхъ же ѿстꙋ́пниковъ Мѵропомаꙁа́нныхъ ѿ своихъ и҆́хъ Е҆пⷭ҇пѡвъ мꙋ́дромꙋ раꙁсꙋжде́нїю Е҆пⷭ҇пскомꙋ върꙋча́емъ.

А҆́ще Мѵропомаꙁа́нїе и҆́хъ прїѧ́тѡ бы́ти и҆́матъ, ꙗ҆́кѡже и҆́стинное, и҆лѝ ни, то́чїю до́брѣ да ᲂу҆смо́тритъ, ꙗ҆́кѡ да събеꙁсоблаꙁне́ннѡ помаꙁа́нїе, и҆лѝ непомаꙁа́нїе и҆́хъ вѣ́рнымъ Бж҃їимъ бꙋ́детъ.

Четы́ри ве́щи сꙋ́тъ, всѧ́кѡ нꙋ́жные къ съверне́нїю Бжⷭ҇тве́нныѧ Та́йны Тѣ́ла и҆ Крвѐ Гд҃а на́шегѡ І҆и҃ᲃ Ха҃.

Пе́рваѧ є҆́стъ І҆ере́ѷ пра́вилнѣ ѿ Е҆пⷭ҇па рꙋкоположе́нный.

Втора́ѧ є҆́стъ и҆нте́нцїѧ, сі́естъ, намѣре́нїе и҆ во́лѧ ᲃщ҃е́нническаѧ къ съверше́нїю Та́йны Тѣ́ла и҆ Крвѐ Гд҃не́й.

Тре́тѧѧ є҆́стъ, Мате́рїѧ, сі́естъ, ве́щъ Та́йнѣ се́й прили́чнаѧ.

Четве́ртаѧ є҆́стъ, Фо́рма, сі́естъ, ѡ҆браꙁъ, и҆лѝ сверше́нїе ᲃе́ѧ Та́йны.

Вѣ́ждъ ᲂу҆́бѡ ѽ І҆ере́ю, ꙗ҆́кѡ кро́мѣ си́хъ всѣ́хъ четыре́хъ веще́хъ, и҆лѝ кро́мѣ є҆дины́ѧ ѿ ни́хъ а҆́ще слꙋжи́ти дерꙁне́ши, не то́чїю см҃ртнѡ ᲃт҃ота́тскимъ грѣхо́мъ съгрѣши́ши, но и҆ Та́йна Тѣ́ла и҆ Крвѐ Ха҃ Бг҃а на́шегѡ ника́коже съверши́тсѧ.

Е҆́стъ ᲂу҆́бѡ и҆ пѧ́таѧ ве́щъ къ се́й Та́йнѣ прислꙋша́ющаѧ, сі́естъ, Прⷭ҇тлъ и҆лѝ А҆нтіми́съ ѡ҆сщ҃е́нный, кро́мѣ и҆́хъ же слꙋжи́ти дерꙁа́ѧй, Та́йнꙋ ᲂу҆́бѡ съверши́тъ, са́мъ же сме́ртнѡ съгрѣши́тъ.

Сꙋ́ть же и҆ и҆ны́ѧ мнѡ́ги ве́щи къ слꙋже́нїю Бжⷭ҇тве́нныхъ Та́инъ прислꙋша́ющїѧ, ꙗ҆́же а҆́ще І҆ере́ѵꙵ слꙋжа́й самохо́тнѣ и҆лѝ ѿ небреже́нїѧ ѡ҆ста́витъ, и҆лѝ съкрати́тъ, а҆́ще предрече́нныѧ всѧ̀ четы́ри ве́щи цѣ́ло съблюде́тъ, Та́йнѣ ᲂу҆́бѡ съверши́тъ, са́мъ же небреже́нїѧ ра́ди см҃ртнѡ ᲃъгрѣши́тъ, и҆ събла́ꙁнꙋ и҆нѣ́мъ наведе́тъ.

Да ᲂу҆́бѡ грѣха̀ бѣды̀ и҆ꙁбѣ́гнеши ѽ Іере́ю, и҆ слꙋже́нїе твоѐ съ ᲃла́вою Бж҃їею и҆ съ по́лꙁою дш҃ѝ твое́й, и҆ всѣ́хъ живы́хъ и҆ ᲂу҆со́пшихъ ѡ҆ нихъже же́ртвꙋ прино́сиши бꙋ́детъ, вокра́тцѣ ѡ҆ нꙋ́жнѣйшихъ ве́щехъ въ слꙋже́нїи Бжⷭ҇твенныѧ Лѵтꙋ́ргїи, здѐ накаꙁа́нїе и҆ ᲂу҆ка́ꙁъ положи́сѧ тебѣ̀: сі́естъ, ка́кѡ къ слꙋже́нїю досто́йномꙋ пре́дъ ᲂу҆готовлѧ́ти себѣ̀, въ само́мъ же слꙋже́нїи, и҆ по слꙋже́нїи что̀ храни́ти, и҆ како́выхъ препѧ́тїй блюстѝ себѣ̀ до́лженъ є҆сѝ.

Внима́телнѡ ᲂу҆́бѡ и҆ ча́стѡ сі́ѧ прочтѝ и҆ ѡ҆па́снѡ съблюдѝ.

Слꙋжи́тель свойстве́нный, Стра́шной, превели́кой, Преди́вной и҆ Прсто́й Та́йнѣ Тѣ́ла и҆ Крвѐ Гд҃а на́шегѡ І҆и҃ᲃ Ха҃, є҆́стъ самы́й то́чїю ᲃщ҃е́нникъ Пра́вилнѣ и҆ Чи́ннѡ по сте́пенемъ ме́ншимъ и҆ вѧ́щшимъ на ᲃщ҃е́ннство ѿ Е҆пⷭ҇па въꙁведе́ный и҆ рꙋкоположе́ный. Сегѡ̀ ᲂу҆́бѡ ра́ди ѿ лѧи́ка, сі́естъ, ѿ мі́рскагѡ не сщ҃е́ннагѡ человѣ́ка Та́йны Тѣ́ла и҆ Крвѐ Хв҃ой ника́коже ѡ҆сщ҃а́тисѧ могꙋ́тъ: та́кожде и҆ ѿ Кли́рика ме́ншагѡ и҆лѝ бо́лшагѡ, и҆́же є҆́стъ и҆ Поддїѧ́конъ и҆лѝ Дїѧ́конъ. А҆́щеже кото́рый ѿ си́хъ дерꙁнꙋ́лъ бы Лѵтꙋ́ргїю Бжⷭ҇тве́ннꙋю ᲃъверши́ти, не то́чїю Та́йны не ѡ҆ст҃и́тъ и҆ ничто́же съверши́тъ, но и҆ въ тѧ́жкое ѡ҆сꙋжде́нїе и҆ ст҃отатства грѣ́хъ въпа́днетъ.

І҆ере́ѷ ᲂу҆́бѡ пра́вилнѣ рꙋкоположе́ный, хотѧ́й досто́йнѡ Бжⷭ҇твеннꙋю Слꙋ́жбꙋ съверши́ти, си́мъ ѡ҆́браꙁомъ пре́дъ ᲂу҆готова́ти себѣ̀ до́лженъ є҆́стъ.

Въ пе́рвыхъ, да ᲃъхрани́тъ ᲃебѐ и҆ ѡ҆па́снѡ да блюде́тъ ѿ ве́щїй запина́ющихъ досто́йнагѡ Лѵтꙋргиса́нїѧ, и҆ Прчⷭ҇тыхъ Та́инъ Причаще́нїѧ.

Запѧ́тїѧ же бо́лшаѧ сꙋ́тъ сі́ѧ, Клѧ́тва, ѿлꙋче́нїе, и҆ запрѣще́нїе А҆рхїере́ѷское и҆ грѣ́хъ ᲃме́ртный.

Ѿ клѧ́твы ᲂу҆́бѡ ѿлꙋче́нїѧ же и҆ запрѣще́нїѧ, а҆́ще кое́ю ѿ сихъ є҆́стъ свѧꙁа́ный, да ника́коже дерꙁне́тъ Лѵтꙋргиса́ти, доне́лѣже ѿ свѧꙁа́вшагѡ є҆гѡ̀ и҆мꙋ́щагѡ вла́сть раꙁдрѣши́ти, съверше́ннѡ проще́нъ и҆ раꙁдрѣще́нъ бꙋ́детъ: а҆́ще бо дерꙁне́тъ ᲃщ҃енствова́ти не раꙁдрѣше́нъ сы́й, ᲃт҃ота́тства грѣ́хъ и҆спо́лнитъ, и҆ ꙁъ но́вымъ и҆ ѕѣ́лѡ тѧ́жкимъ грѣхо́мъ ѿ Бжстве́ннои Слꙋ́жбы въꙁврати́тсѧ, и҆ пови́ненъ Тѣ́лꙋ и҆ Кро́ви Гд҃не́й, сі́естъ: Богоꙋбі́йцею кꙋпно съ невѣ́ными І҆ꙋде́и Ха҃ ᲂу҆би́вшими бꙋ́детъ, и҆ въ сꙋ́дъ себѣ̀, и҆ въ ѡ҆сꙋжде́нїе Прⷭ҇ты́мъ Та́йнамъ Причасти́тсѧ.

А҆́ще І҆ере́ѷ въ само́мъ слꙋже́нїи прише́дъ въ себѣ̀, въспомѧне́тъ и҆ поꙁна́етъ себѣ̀ всѧ́кѡ до конца̀, и҆лѝ до вре́мени ѿ ᲃщ҃еннодѣ́йствїѧ ѿлꙋче́нна, и҆лѝ мѣ́сто и҆де́же слꙋ́житъ запрѣще́ннѡ бы́ти, бо́лѣꙁнїю и҆ жалѣ́нїемъ да ᲂу҆мили́тъ себѣ̀, и҆ съкрꙋши́тъ ᲃе́рдце своѐ, съ тве́рдымъ предложе́нїемъ, є҆́же ᲂу҆ и҆мꙋ́щагѡ вла́сть, проще́нїѧ и҆ раꙁдрѣше́нїѧ и҆спроси́ти.

А҆́ще ᲂу҆́бѡ сі́е поꙁна́нїе пре́дъ вели́кимъ Въхо́домъ бꙋ́детъ да преста́нетъ слꙋжи́ти, и҆ꙁрѧ́днѣе же а҆́ще ꙗ҆́вѣ ѿлꙋче́ный є҆́стъ, и҆ а҆́ще кро́мѣ собла́ꙁны сі́е преста́тїе бы́ти мо́жетъ: лꙋ́чше бо є҆́стъ си́цевомꙋ вѣдꙋ́щемꙋ своѐ недосто́инство, само́мꙋ себѣ̀ ѡ҆сꙋжда́ти, не́жели ѿ Гд҃а ѡ҆сꙋжде́нꙋ бы́ти.

А҆гнецъ же и҆ всѧ̀ Ча́сти ꙗ҆́же на Ді́скосѣ, и҆ Вино̀ въ ча́ши сꙋ́щее, ꙗ҆́кѡ є҆щѐ не сщ҃е́нное на Жерто́вницѣ са́мъ да потреби́тъ.

А҆́ще же ѡ҆ грѣсѣ̀ сме́ртномъ ѡ҆блича́етъ є҆гѡ̀ со́вѣсть є҆гѡ̀, да не дерꙁне́тъ Лѵтꙋргиса́ти, до́ндеже ѡ҆чи́ститъ себѣ̀ ѿ грѣха̀ тогѡ̀ въ не́мъ же ѡ҆брѣта́етсѧ, съкрꙋше́нїемъ и҆ бо́лѣꙁнїю серде́чною, и҆ и҆сповѣда́нїемъ ᲂу҆́стнымъ пре́дъ дх҃о́внымъ ѿцемъ, и҆ крѣ́пкимъ предложе́нїемъ є҆́же ктомꙋ̀ не въꙁврати́тисѧ къ грѣхꙋ̀: А҆ще бо дерꙁне́тъ въ грѣсѣ̀ сме́ртномъ сы́й, не исповѣда́всѧ и҆ Покаѧ́нїемъ не предѡчи́стивъ себѣ̀ Лѵтꙋргиса́ти, къ грѣхꙋ̀ сме́ртномꙋ въ не́мъ же є҆́стъ, дрꙋ́гїй грѣ́хъ тѧжча́йшїй ᲃме́ртный прило́житъ, и҆ Бжⷭ҇тве́нныѧ Та́йны въ сꙋ́дъ себѣ̀ и҆ въ ѡсꙋжде́нїе недосто́инства ра́ди прїйме́тъ.

А҆́ще же вели́каѧ нꙋ́жда припа́днетъ Лѵтꙋргиса́нїѧ, сі́естъ: А҆́ще бѣда̀ ᲃме́ртнаѧ бо́лномꙋ приспѣ́етъ,Та́инъ же Бжⷭ҇тве́нныхъ гото́выхъ не бꙋ́дет, къ є҆́же Причасти́ти є҆гѡ̀, І҆ере́ѷ же въ грѣсѣ̀ ᲃме́ртномъ сы́й, ника́коже ᲃщ҃е́нника и҆́нагѡ и҆мѣ́ти мо́жетъ, къ є҆́же и҆сповѣда́тисѧ грѣха̀ свое́гѡ, а҆́ще ᲂу҆́бѡ грѣхъ є҆́стъ не ѿ тѣ́хъ грѣхѡ́въ ꙗ҆́же всѧ́чески въꙁбранѧ́ютъ І҆ере́ю ᲃщ҃еннодѣ́йствїе, да слꙋ́житъ: но ᲂу҆́бѡ съ ве́лїимъ жалѣ́нїемъ, и҆ бо́лѣꙁнїю ᲃе́рдца, ѡ҆ грѣсѣ̀ въ не́мъ же ѡ҆брѣта́етсѧ, и҆ тве́рдымъ предложе́нїемъ є҆́же ско́рѡ исповѣда́тисѧ: А҆́же бо кро́мѣ жалѣ́нїѧ и҆́стиннагѡ за грѣ́хъ, и҆ си́цевагѡ предложе́нїѧ ᲃлꙋжи́ти дерꙁне́т, тѧ́жко ᲃме́ртнѡ съгрѣши́тъ: а҆́ще же грѣ́хъ бꙋ́детъ ѿ всѧ́кагѡ ᲃщ҃еннодѣ́йствїѧ въꙁбранѧ́ющїй, ника́коже Лѵтꙋргиса́ти да дерꙁне́тъ.

А҆́ще въ само́мъ слꙋже́нїи Бжⷭ҇тве́нныѧ Лѵтꙋ́ргїи прише́дъ въ себѣ̀ І҆ере́ѷ поꙁна́етъ себѣ̀ бы́ти въ грѣсѣ̀ ᲃме́ртномъ, съ є҆ли́кѡ мо́жетъ вели́кою бо́лѣꙁнїю, и҆ жа́лостїю да ᲂу҆мили́тъ себѣ̀, и҆ съкрꙋ́шитъ ᲃе́рдце своѐ, предложе́нїе непремѣ́нное и҆мѣ́ѧ, є҆́же ско́рѣе и҆сповѣда́тисѧ, и҆ довлетвори́ти, сі́естъ: покꙋ́товати ѡ҆ грѣсѣ̀ свое́мъ.

Препина́етъ же къ досто́йномꙋ ᲃлꙋже́нїю и҆ Прⷭ҇ты́хъ Та́инъ Причаще́нїю и҆ сі́е ѕѣ́лѡ, а҆́ще когѡ̀ І҆ере́ѷ ᲂу҆ничижи́лъ є҆́стъ, ѡ҆скорби́лъ же и҆лѝ въ чесо́мъ ѡ҆неправдова́лъ, и҆ вѣ́сть ꙗ҆́кѡ гнѣ́ваетсѧ и҆ скорби́тъ на́нь: и҆лѝ а҆́ще са́мъ І҆ере́ѷ ѡ҆неправдова́нъ, и҆лѝ ѡ҆скорбле́нъ ᲃы́й ѿ когѡ̀ гнѣ́ваетсѧ и҆ скорби́тъ, да не дерꙁне́тъ Лѵтꙋргиса́ти: но ше́дъ пре́жде по Гд҃ню повелѣ́нїю да смири́тсѧ съ бра́томъ свои́мъ, и҆ та́кѡ да Лѵтꙋргиса́етъ.

А҆́ще же ѡ҆скорбле́нный ѿ не́гѡ дале́че ѿсто́итъ, нꙋ́жда же ве́лїѧ нале́житъ слꙋже́нїю, понѐ да предложе́нїе до́брое и҆матъ, є҆́же є҆́гда̀ воꙁврати́тсѧ и҆лѝ съ ни́мъ ᲃни́детсѧ всѧ́кѡ примири́тсѧ, и҆ въ ᲃе́рдци ᲃвое́мъ да жалѣ́етъ и҆́стиннѡ ꙗ҆́кѡ ѡ҆неправдова́лъ и҆лѝ ѡ҆скорби́лъ є҆́стъ бра́та, и҆ си́це нꙋ́жды ра́ди да Лѵтꙋргиса́етъ.

А҆́ще же ѡ҆́нъ ѡ҆неправдова́нный и҆лѝ ѡ҆скорбле́нный ѿ когѡ̀ сы́й, гнѣ́ваетсѧ и҆ скорби́тъ, да не дерꙁне́тъ Лѵтꙋргиса́ти, до́ндеже ѡ҆чеви́сто ѿ ᲃе́рдца ѿпꙋ́ститъ є҆мꙋ̀, и҆ гнѣ́ватисѧ преста́нетъ.

А҆́ще же та́кожде дале́че ѿсто́итъ ѡ҆скорбле́нный, да ѿ ᲃе́рдца и҆́стиннѡ прости́тъ є҆мꙋ̀, и҆ помо́литсѧ ѡ҆не́мъ, ꙗ҆́кѡ да и҆ Бг҃ъ ѿпꙋ́ститъ є҆мꙋ̀, и҆ си́це и҆сполни́въ Гд҃не повелѣ́нїе, да пристꙋ́питъ къ слꙋже́нїю.

Ксемꙋ́же, досто́йное слꙋже́нїе и҆ ᲃт҃ы́хъ Та́инъ Причаще́нїе препина́етъ, многѡѧде́нїе и҆ пи́тїе вече́рнее: тѣ́мъже всѧ́кѡ въꙁдержа́тисѧ ѿ бра́шенъ и҆ пи́тїй съ ве́чера досто́итъ, и҆лѝ велмѝ что̀ ма́ло вкꙋси́ти: ѿ полꙋ́нощи же ника́коже вкꙋси́ти ничто́же досто́итъ: а҆́ще же и҆ ма́ло что̀ вкꙋ́ситъ ѿ бра́шенъ и҆лѝ пи́тїй полꙋ́нощи, ника́коже да дерꙁне́тъ Лѵтꙋргиса́ти, ѿ полꙋ́нощи бо дн҃ь є҆стестве́нный начина́етсѧ.

Вконе́цъ же, всѧ́къ І҆ере́ѷ и҆мы́й женꙋ̀, ѿ смѣше́нїѧ є҆ѧ̀ трѝ днѝ пре́дъ Лѵтꙋргиса́нїемъ въꙁдержа́тисѧ всѧ́кѡ до́лженъ є҆́стъ, невъꙁдержа́ѧй бо сѧ, и҆ слꙋжа́й, тѧ́жкѡ съгрѣша́етъ.

Си́хъ ᲂу҆́бѡ препѧ́тїй не то́чїю І҆ере́ѷ, но и҆ всѧ́къ хрїстїѧни́нъ, хотѧ́й досто́йнѡ Причасти́тисѧ Бжⷭ҇тве́ннымъ Хв҃ымъ Та́йнамъ, весма̀ блюсти́сѧ до́лженъ є҆́стъ, кро́мѣ то́чїю недꙋ́жныхъ, въ ᲃме́ртной нꙋ́ждѣ.

Сꙋ́тъ же къ си́мъ и҆ и҆́наѧ препѧ́тїѧ къ досто́йномꙋ слꙋже́нїю, и҆ ᲃт҃ы́хъ Та́инъ Причаще́нїю: ꙗ҆́же а҆́ще и҆ менша́ѧ ѿ предрече́нныхъ сꙋ́тъ, ѡ҆ба́че приле́жнѡ и҆скоренѧ́ти ѧ҆̀, и҆ блюсти́сѧ и҆́хъ І҆ере́ѷ, и҆ кі́йждѡ хрїстїѧ́нинъ, є҆ли́кѡ мо́жетъ до́лженъ є҆́стъ.

Пе́рвое ᲂу҆́бѡ є҆́стъ и҆ꙁли́шнее по́мыслѡвъ раꙁсѣѧ́нїе, ꙗ҆́же по си́лѣ събира́ти въ є҆динѡ̀, и҆ ѡ҆бꙋꙁдова́ти мо́жетъ, те́плою Моли́твою и҆ ᲂу҆се́рднымъ раꙁмышле́нїемъ Стрⷭ҇тїй Гд҃нихъ.

Вто́рое, смꙋще́нїе внꙋ́трнее є҆́же є҆́стъ цкли́вость, є҆́же ѿгна́ти ѿ себѣ̀ да тщи́тсѧ ᲂу҆пова́нїемъ прїѧ́тїѧ благода́ти Бж҃іѧ, є҆ѧ́же сподоби́тисѧ и҆́матъ Причаще́нїемъ Пречⷭ҇тыхъ Та́инъ.

Тре́тее ᲂу҆ны́нїе и҆лѝ ѡ҆спа́лствѡ, є҆́же бо́дростїю, треꙁвѣ́нїемъ же и҆ бдѣ́нїемъ, и҆лѝ ма́ло спа́нїемъ, крѣ́пкѡ ѿ себѣ̀ да ѿжене́тъ.

Надъ всѣ́ми же ᲃи́ми, Четве́ртое є҆́стъ, смꙋще́нїе, и҆лѝ движе́нїе теле́сное, ѿ ѡ҆скверне́нїѧ во снѣ̀ быва́емагѡ, є҆́же а҆́ще и҆ кро́мѣ всѧ́коѧ ѿ не́гѡ да́нныѧ вины̀ приклю́читсѧ, ра́ꙁвѣ ѕѣ́лѡ вели́кїѧ нꙋ́жды Лѵтꙋргиса́ти да не дерꙁне́тъ.

А҆́ще же са́мъ да́лъ є҆́стъ винꙋ̀ препѧ́тїю семꙋ̀, и҆лѝ бе́сѣдами, и҆лѝ по́мыслы скве́рными съ ве́чера, и҆лѝ ꙗ҆де́нїемъ, пи́тїемъ же и҆лѝ сно́мъ дово́лнымъ, да ника́ко же дерꙁне́тъ Лѵтꙋ́ргисати, доне́лѣ же и҆сповѣ́стсѧ ѿцꙋ̀ свое́мꙋ дꙋхо́вномꙋ, и҆ ѿ не́гѡ Е҆піти́мїю и҆ раꙁдрѣше́нїе прїйметъ.

А҆ще ᲂу҆бѡ ѡ҆прѧ́тавъ пе́рвыѧ въ си́цевомъ кое́мъ ѿ пре́дъ рече́нныхъ въ вто́рыхъ препѧ́тїѧхъ ѡ҆брѣта́ѧйсѧ І҆ере́ѷ Лѵтꙋргиса́ти бꙋ́детъ, ᲃме́ртнѡ не съгрѣши́тъ; си́цеваѧ бо недоста́тчества, те́плою Моли́твою, ᲃлеꙁа́ми же, бо́лѣꙁнїю и҆ съкрꙋше́нїемъ серде́чнымъ, и҆ пре́дъ слꙋже́нїемъ и҆ въ само́мъ ᲃлꙋже́нїи и҆скорени́тисѧ могꙋ́тъ.

Въ пе́рвыхъ ᲂу҆́бѡ І҆ере́ѷ, въ си́цевомъ къ Бжⷭ҇тве́нномꙋ ᲃлꙋже́нїю пре́дъ ᲂу҆готовле́нїй, препѧ́тїѧ пре́дъ рече́нныѧ до́лженъ є҆́стъ ѡ҆прѧ́тати.

Вто́рое подоба́етъ є҆мꙋ̀ и҆мѣ́ти бо́лѣꙁнь серде́чнꙋю ѡ҆ грѣсе́хъ, а҆́ще и҆ ѡ҆прости́телныхъ, сі́естъ, Повседне́вныхъ малы́хъ.

Къ семꙋ̀ же а҆́ще и҆ въ мало́мъ чесо́мъ ѡ҆блича́етъ є҆гѡ̀ со́вѣсть є҆гѡ̀, да и҆сповѣ́стсѧ дꙋхо́вномꙋ свое́мꙋ ѿцꙋ̀, и҆ ѿ не́гѡ да прі́йметъ раꙁдрѣше́нїе. Въкра́тцѣ же рещѝ всѐ є҆́же прислꙋша́етъ къ чⷭ҇той со́вѣсти ѿ грѣхѡ́въ, да тщи́тсѧ и҆мѣ́ти. Се́рдце же своѐ да ѡ҆чи́ститъ ѿ всѧ́кїѧ любвѐ чꙋвстве́нныѧ, и҆ ѿ по́хотїй и҆ сла́стїй теле́сныхъ, любвѝ Бж҃їей противлѧ́ющихсѧ, и҆ чꙋ́вствїѧ своѧ̀ рассꙋ́днымъ нѣ́кїимъ томле́нїемъ а҆́ще и҆ въ неꙁапрѣще́нныхъ ве́щехъ да ѡ҆бꙋꙁда́етъ.

Тре́тїе, благое проиꙁволе́нїе да и҆́матъ, є҆́же послꙋжи́ти Гд҃ви въ Преподо́бїи и҆ Пра́вдѣ въ всѧ̀ дни живота̀ свое́гѡ, и҆ сі́е проиꙁволе́нїе, въ своѐ вре́мѧ дѣ́лы благими и҆ꙁвѣсти́ти.

Четве́ртое, а҆́лчбꙋ, и҆ жа́ждꙋ къ Бжⷭ҇тве́нномꙋ бра́шнꙋ и҆ пи́тїю семꙋ̀ въ дш҃ѝ и҆ ᲃе́рдци свое́мъ крѣ́пкѡ двойстве́ннымъ раꙁмышле́нїемъ да въꙁбꙋжда́етъ: Пе́рвѣе, вели́чествомъ сеѧ̀ Пребжⷭ҇тве́нныѧ Та́йны, и҆бѡ̀ веществе́ннѣ въ не́й Ца́ръ и҆ Тво́рецъ всеѧ̀ види́мыѧ и҆ невиди́мыѧ тва́ри Хᲃ҃ Бг҃ъ и҆ человѣ́къ, невиди́мѡ подъ види́мыми Хлѣ́ба и҆ Вина̀ ви́ды, въ снѣ́дь вѣ́рнымъ предле́житъ, и҆ и҆́стиннѡ дае́тсѧ, и҆ по́лꙁою и҆ при ѡ҆брѣ́те́нїемъ ѿ не́ѧ происходѧ́щимъ: и҆бѡ̀ досто́йнѣ слꙋжа́й и҆ Причаща́йсѧ Бжⷭ҇твеннымъ Та́йнамъ, не то́чїю ѡ҆ставле́нїе грѣхѡ́въ полꙋча́етъ, но и҆ ѡ҆свѧще́нїѧ и҆ благода́ти и҆ꙁрѧ́дныѧ ᲃподоблѧ́етсѧ, приѡбща́етъ бо сѧ Хрⷭ҇то́ви, и҆́же є҆́стъ неисчерпа́емый и҆сто́чникъ ѡ҆свѧще́нїѧ и҆ благода́ти.

Вто́рое нищеты̀ свое́ѧ недоста́тчествомъ и҆ требова́нїемъ, всѧ́къ бо къ съкро́вищꙋ семꙋ̀ прибѣга́ѧй, въи́стиннꙋ Бжⷭ҇тве́нныхъ да́рѡвъ бога́тства и҆ꙁъѡби́лїе прі́йметъ, и҆ лише́нїе дꙋхо́вныѧ свое́ѧ нищеты̀ неѡскꙋ́днѡ и҆спо́лнитъ.

Къ семꙋ̀ же да вѣ́рою несꙋмнѣ́нной къ Прича́стїю Прчⷭ҇тыхъ и҆ Животворѧ́щихъ Тѣ́ла и҆ Крвѐ Христо́выхъ Та́инъ пристꙋ́питъ, въ є҆́же си́ми дꙋ́шꙋ пита́ти: си́цево же проиꙁволе́нїе и҆ вѣ́рꙋ, не то́чїю І҆ере́ѷ, но и҆ всѧ́къ досто́йнѡ хотѧ́й Причасти́тисѧ вѣ́рный, до́лженъ є҆́стъ и҆мѣ́ти.

І҆ере́ѷ же Лѵтꙋргиса́ти хотѧ́й, къ семꙋ̀ всѧ́кѡ до́лженъ є҆́стъ ѡ҆со́бнѣ и҆ ᲃі́е и҆мѣ́ти, є҆́же и҆ꙁво́лити въ предложе́нїи свое́мъ въ ᲃла́вꙋ Бг҃а въ Трⷪ҇ци ᲃт҃о́й ᲃлави́магѡ, и҆ въ че́сть всѣ́хъ въ Нбⷭ҇номъ Дворѣ̀ веселѧ́щихсѧ ᲃт҃ы́хъ, въ по́лꙁꙋ же и҆ ѡ҆ставле́нїе грѣхѡ́въ себѣ̀ и҆ всѣ́мъ вѣ́рнымъ Бж҃їимъ на землѝ сꙋ́щимъ, и҆ въ правовѣ́рїи благоче́стнѡ ᲂу҆со́пшимъ, за всѣ́хъ же ѡ҆со́бнѣ живы́хъ ѝ ᲂу҆со́пшихъ Моли́твамъ є҆гѡ̀ врꙋчи́вшихсѧ, и҆ ѡ҆ благостоѧ́нїи ᲃт҃ѣ́й Събо́рнѣй А҆по́столстѣй Восто́чнѣй Це́ркви Лѵтꙋ́ргїю Бжⷭ҇тве́ннꙋю по Ꙋста́вꙋ Гд҃ню и҆ ѡ҆бы́чаю Це́ркве ᲃт҃ы́ѧ Восто́чныѧ, ꙗ҆́коже Та́йнꙋ вѣ́рныхъ ѡ҆сщ҃а́ющꙋю и҆ ꙗ҆́кѡ Же́ртвꙋ Бг҃а ᲂу҆милостивлѧ́ющꙋю и҆ грѣхѝ ѡ҆чища́ющꙋю съверша́ти, въ не́й же Дх҃ъ ᲃт҃ы́й ᲂу҆сты̀ є҆гѡ̀ въ и҆ꙁрече́нїи Бжⷭ҇тве́нныхъ слове́съ, Хлѣ́бъ на Прⷭ҇то́лѣ предложе́ный въ Тѣ́ло Хв҃о, и҆ Вино̀ ма́ло водо́ю растворе́нное въ Бжⷭ҇тве́ннꙋю є҆гѡ̀ Кро́въ, и҆́стиннѡ пресꙋществи́тъ.

Пѧ́тое, всѧ́кѡ да тщи́тсѧ є҆́же съ вели́кою че́стїю и҆ глꙋбо́кимъ смире́нїемъ къ Бжⷭ҇тве́нной се́й и҆ Пренебе́сной Та́йнѣ пристꙋпи́ти: Сі́е же двѣма̀ раꙁмышле́нїю притѧжа́ти себѣ̀ мо́жетъ, Пе́рвѣе, неиꙁрече́ннꙋю высотꙋ̀ ᲃла́вы, вели́чество, досто́инство же и҆ Влады́чество Ха҃ Бг҃а и҆ человѣ́ка, и҆ є҆гѡ̀ беꙁмѣ́рнꙋю чⷭ҇тотꙋ̀, и҆́бѡ ни́же звѣ́ꙁды пре́дъ ѡ҆чи́ма є҆гѡ̀ чи́сты сꙋ́тъ: Вто́рое свою̀ хꙋ́дость, скве́рность же и҆ не́мощъ, ꙗ҆́же а҆́ще приле́жнѡ съ внима́нїемъ раꙁмышлѧ́ѧ и҆ꙁъчте́тъ, всѧ́кѡ неиꙁмѣри́мꙋю Гд҃ню бла́гость въ се́й Та́йнѣ человѣ́кови ꙗ҆влѧ́емꙋю поꙁна́въ благода́рнѡ высо́кѡ въꙁвели́читъ.

Ше́стое, приле́жнѡ да тщи́тсѧ, є҆́же снабдѣ́ти себѣ́ благоговѣ́нствѡ ѿ раꙁмышле́нїѧ Стрⷭ҇тїй Гд҃нихъ, и҆ є҆́же въ себѣ̀ въꙁбꙋжда́ти наде́ждꙋ и҆ дꙋхо́внꙋю любо́въ ѿ раꙁмышле́нїѧ бла́гости Хв҃ой, въ Та́йне се́й вѣ́рнымъ ꙗ҆влѧ́емой, къ не́й же приле́жнаѧ Моли́тва съ внима́нїемъ ѕѣлѡ̀ є҆́стъ помо́щна.

Си́це ᲂу҆́бѡ къ досто́йномꙋ слꙋже́нїю пре́дъ ᲂу҆готовлѧ́ѧ себѣ̀ І҆ере́ѷ, до́лженъ є҆́стъ съ ве́чера по чи́нꙋ Церко́вномꙋ Вече́рню съверши́ти, на не́й же благоговѣ́инѡ да поглꙋмлѧ́етсѧ въ мы́сли свое́й ᲂу҆миле́ннѡ раꙁмышлѧ́ѧ, ка́ко Гд҃ь и҆ Сп҃съ наш І҆и҃ᲃ Хᲃ҃ по ᲃп҃си́телныхъ свои́хъ Стрⷭ҇техъ, въ Пѧ́токъ ві́черъ на Крестѣ̀ грѣ́хъ ра́ди на́шихъ висѧ̀, ᲃпⷭ҇нїѧ ра́ди на́шегѡ ᲂу҆мрѐ: Ка́кѡ є҆ди́нъ ѿ Во́инъ Ко́пїемъ ребро̀ є҆мꙋ̀ прободѐ, и҆ꙁъ него̀ же а҆́бїе и҆стечѐ Кро́въ и҆ Вода̀: Ка́кѡ посе́мъ І҆ꙍ́сифъ съ Никоди́момъ Тѣ́ло Хв҃о съ Креста̀ сне́мша, Плащени́цею ѡ҆бви́ста, и҆ въ гро́бѣ положи́ста: и҆ ка́кѡ Мр҃їѧ Магдали́на, и҆ Ма́рїѧ І҆ꙍ́сиева съ Прчтⷭ҇ою Мт҃ерїю Гд҃нею, съ пла́чемъ и҆ ве́лїимъ рыда́нїемъ въ го́рести ᲃе́рдца зрѧ́хꙋ сі́ѧ.

Па́вечерницꙋ же, и҆ къ сн҃ꙋ̀ и҆дꙋ́щихъ Моли́твы съверша́ѧ, да раꙁмышлѧ́етъ благовѣ́инѡ: Ка́кѡ Прⷭ҇та́ѧ Дш҃а̀ Спⷭ҇ителева Бжⷭ҇твꙋ̀ съвокꙋпле́ннаѧ въ а҆́дъ съше́дши держа́внѡ Кнѧ́ꙁѧ тмы̀ свѧꙁа̀, тогѡ̀ ца́рство плѣнѝ, и҆ дш҃а̀ всѣ́хъ ѿ вѣ́ка та́мѡ сꙋ́щыхъ пра́ведныхъ, ѿ мꙋчи́телъства є҆гѡ̀ свободѝ, съ собо́ю въꙁведѐ и҆ Вра́й да́же до свое́го пресла́внагѡ въꙁнесе́нїѧ въселѝ. и҆ благодарѧ́ще є҆гѡ за всѧ̀ благодѣѧ́нїѧ ꙗ҆́же ᲃп҃си́телною ᲃтрⷭ҇тїю и҆ животво́рною свое́ю ᲃме́ртїю рѡ́дꙋ члове́ческомꙋ сътворѝ, приле́жнѡ моли́тъ, да и҆ є҆́гѡ всѧ̀ съгрѣше́нїѧ тѣ́хъ ра́ди ѡ҆чи́стивъ, ѿ вѣ́чныѧ мꙋ́ки и҆ꙁба́витъ є҆гѡ̀, и҆ Ца́рствїю свое́мꙋ сподоби́тъ.

Прчⷭ҇тꙋю же Бц҃ꙋ съѡбе́щницꙋ ᲃтрⷭ҇темъ, и҆ ᲃме́рти Сн҃а свое́гѡ бы́вшꙋю, и҆ сі́ѧ зрѧ́щи съболѣꙁнова́вшꙋю, приле́жнѡ моли́ти, є҆́же въ жи́тїи се́мъ предста́телницею и҆ къ всѣ́мъ добродѣ́телемъ помо́щницею бы́ти, и҆ въ дн҃ь и҆схо́да ѿ тѣ́ла, дꙋ́шꙋ ѿ всѣ́хъ дїѧ́волскихъ нахожде́нїй крѣ́пкимъ свои́мъ предста́телъствомъ и҆ꙁба́виши, въ Ца́рствїи Сн҃а свое́гѡ въсели́тъ: всѧ̀ бо ꙗ҆́кѡ мт҃и ᲂу҆ Сн҃а свое́гѡ вѣ́рнѡ къ не́й притѣка́ющимъ, испроси́ти мо́жетъ.

Въ ᲂу҆́трие же, въ своѐ вре́мѧ пре́жде свита́нщꙋ дню̀, Полꙋ́нощницꙋ съверша́ѧ: сі́ѧ благоговѣ́инѡ да раꙁмышлѧ́етъ: ка́кѡ Гд҃ь на́шъ въ Полꙋ́нощи и҆ды́й къ во́лной Стрⷭ҇ти, въ вертогра́дѣ въ си́цевомъ по́двиꙁѣ бѣ приле́жнѡ молѧ́сѧ, ꙗ҆́кѡ по́тꙋ є҆гѡ̀ бы́ти ꙗ҆́кѡ ка́пли крвѐ ка́плющей на́ землѝ: и҆ ка́кѡ та́мѡ ѿ во́инъ ꙗ҆́тъ и҆́нъ А҆́ннѣ пе́рвѣе, ꙗ҆́кѡ злодѣ́й ᲃвѧꙁа́нный веде́нъ бы́сть: и҆ како́ва та́мѡ поно́снаѧ ᲂу҆ничиже́нїѧ, ѡ҆плева́нїѧ, бїенїѧ же, и҆ неисче́тнаѧ зла́ѧ во́лею претерпѣ̀, да на́съ ѿ ᲂу҆ꙁъ грѣхѡ́вныхъ и҆ ꙁме́тъ, и҆ ѿ мꙋчи́телства и҆ томле́нїѧ дїѧ́волѧ свободи́тъ.

Ꙋ҆́триню же соверша́ѧ, приле́жнѡ съ ᲂу҆миле́нїемъ да раꙁмышлѧ́ет, ка́ко Гд҃ь ве́лїимъ ᲂу҆ничиже́нїемъ ѿ А҆́нны къ Каіа́фѣ веде́нъ бы́стъ, и҆ какѡ́ва та́мѡ и҆спыта́нїѧ, лю́таѧ томле́нїѧ, заꙋше́нїѧ, ѡ҆плева́нїѧ, нарꙋга́нїѧ же, и҆ немлⷭ҇тиваѧ ᲂу҆даре́нїѧ, ѿ полꙋ́нощи да́же до ҆́тра, грѣхъ ра́ди на́шихъ во́лею претерпѣ̀.

По ᲂу҆́трини же въ соверше́нїи Пе́рвагѡ Ча́са благоговѣ́ино да раꙁмышлѧ́етъ ка́кѡ Сп҃си́телъ на́шъ, въ первы́й ча́съ днѐ веде́нъ бы́стъ въ пре́торъ ѿ Каіа́фы къ Піла́тꙋ, ꙗ҆́кѡ зло́дѣй благодѣ́телъ свѧ́ꙁаный; и҆ ка́кѡ та́мѡ всегѡ̀ мі́ра Сꙋдїѧ̀ ѿ беꙁꙁакѡ́нныхъ А҆рхіре́ꙍвъ и҆ Ста́рецъ І҆оѵде́йскихъ ѡ҆болга́нъ, и҆ ѿ непра́веднагѡ сꙋдїѝ ѡ҆сꙋжде́нъ бы́сть.

Тре́тїй же ча́съ въ своѐ вре́мѧ благоговѣ́инѡ въ ᲂу҆миле́нїи ᲃе́рдца съверша́ѧ, приле́жнѡ да раꙁмышлѧ́етъ: ка́кѡ Сп҃си́телъ на́шъ въ тре́тїй ча́съ днѐ Піла́томъ сꙋди́мъ бы́стъ, и҆ како́ваѧ та́мѡ беꙁчисле́ннаѧ надрꙋга́нїѧ, и҆ заꙋше́нїѧ, по се́мъ же немлⷭ҇тивно ᲂу҆ мрамо́рнагѡ столпа̀ свѧꙁа́нъ сы́й, лю́тыѧ ра́ны въ семꙋ̀ же ѡ҆́стрымъ те́рнїемъ вѣнча́нїе и҆ и҆́ныѧ нестерпи́мыѧ мꙋ́ки (да на́съ ѿ мꙋчи́телства дїа́волѧ саободи́тъ) претерпѣ̀.

Къ семꙋ̀ же раꙁмышлѧ́ти и҆ сі́е прили́чнѡ є҆́стъ, ка́кѡ Дх҃ъ ᲃт҃ы́й въ тре́тїй ча́съ днѐ, въ ѡ҆гне́нныхъ ꙗ҆ꙁы́цехъ на А҆пⷭ҇тлѣхъ сꙋ́щихъ на моли́твѣ сни́де, и҆ тѣ́хъ просвѣтѝ, сі́е же раꙁмышлѧ́ѧ, приле́жнѡ Бг҃ꙋ да моли́тсѧ, ꙗ҆́кѡ да пода́стъ и҆ є҆мꙋ̀ Дх҃а ᲃт҃го, ꙗ҆́коже и҆ ᲃт҃ы́мъ А҆по́столѡмъ къ дх҃о́внагѡ ра́ꙁꙋма просвѣще́нїю, и҆ въ є҆́же досто́йнѡ съверши́ти є҆мꙋ̀ предлежа́щꙋю Бжⷭ҇тве́ннꙋю слꙋ́жбꙋ.

Ше́стый же ча́съ соверша́ѧ, благоговѣ́инѡ да раꙁмышлѧ́етъ, ка́кѡ Ше́стагѡ ча́са днѐ, Сп҃сителъ на́шъ носѧ̀ Кре́стъ сво́й къ Пропѧ́тїю, веде́нъ бы́стъ, и҆ ка́кѡ неми́лостивнѡ четырмѧ̀ гво́ꙁдми на Крестѣ̀, лю́тѣ пригвожде́нъ на Голго́ѳѣ посре́дѣ дво́ю Раꙁбо́йникꙋ Распѧ́тъ висѧ́ше, и҆ ка́кѡ Во́ини раꙁдѣли́ша Ри́ꙁы є҆гѡ̀ себѣ̀, ка́коже ми́мѡ ходѧ́щїи рꙋга́хꙋсѧ є҆мꙋ̀, и҆ Раꙁбо́йникъ ѡ҆шꙋю́ю є҆гѡ̀ висѧ́й хꙋлѧ́ше єгѡ̀: и҆ ка́кѡ тма̀ бы́сть по все́й землѝ.

Девѧ́тый же ча́съ, та́кожде съ всѧ́кимъ благоговѣ́нїемъ съверша́ѧ сі́е вънима́телнѣ да раꙁмышлѧ́ѣтъ, ка́кѡ Сп҃си́телъ на́шъ Сп҃сенїѧ рѡ̀да человѣ́ческагѡ жела́ѧ, на Крестѣ̀ висѧ̀ въꙁва̀, гл҃ѧ̀: Жа́ждꙋ, и҆ ка́кѡ ѡ҆́цтомъ съ же́лчїю смѣше́ннымъ напо́енъ бы́стъ: Ка́коже Дꙋ́шꙋ свою̀ Прест҃ꙋ́ю въ рꙋ́цѣ Бг҃а Ѿца̀ предадѐ: и҆ ка́кѡ всѧ̀ ѡ҆снова́нїѧ землѧ̀ потрѧсо́шасѧ, ка́менїе распадо́шасѧ, ме́ртвїи ѿ гро́бѡвъ въста́ша: и҆ ка́кѡ є҆ди́нъ ѿ Во́инъ Ко́пїемъ Ребро̀ є҆мꙋ̀ прободѐ, и҆ а҆́бїе и҆́ꙁъ не́гѡ и҆ꙁы́йде Крѡ́въ и҆ вода̀.

Сі́ѧ же въкра́тцѣ помѧне́ннаѧ и҆ и҆́наѧ Сп҃си́телнаѧ Гн҃ѧ Стрднїѧ благоговѣннѡ раꙁмышлѧ́ѧ въ съкрꙋше́нїи ᲃе́рдца ᲂу҆се́рдно, а҆́ще же воꙁмо́жнѡ и҆ съ слеꙁа́ми да съверша́етъ часо́вныѧ Моли́твы.

На Ꙍ҆бѣ́дници же да благодари́тъ ᲂу҆се́рднѡ Сп҃си́телѧ си́цевыхъ ра́ди лю́тыхъ Страданїй, ꙗ҆́же во́лею на́съ дѣ́лѧ претерпѣ̀, да ѿ мꙋчи́телства дїа́вола на́съ свободи́тъ: и҆ и҆ꙁлїѧ́нїѧ ра́ди Пречⷭ҇тыѧ є҆гѡ̀ Крвѐ, є҆ю́же на́съ ѿ клѧ́твы за́конныѧ и҆скꙋпѝ, и҆ живо́тъ да́ющїѧ ра́ди є҆гѡ̀ сме́рти, є҆ю́же рѡ́дъ человѣ́ческїй ᲂу҆ме́ршїй грѣхо́мъ ѡ҆животворѝ: и҆ приле́жнѡ въ смире́нномъ ᲃе́рдци да моли́тсѧ, ꙗ҆́кѡ да си́хъ ра́ди всѣ́хъ благодѣѧ́нїй свои́хъ, и҆ми же рѡ́дъ человѣ́ческїй ѡ҆благодѣтелствова̀, пода́стъ и҆ є҆мꙋ̀ благода́тъ ѡ҆ставле́нїѧ грехѡ́въ, въ є҆́же досто́йнѡ принестѝ є҆мꙋ̀ беꙁкро́внꙋю Же́ртвꙋ, и҆ неѡсꙋжде́ннѡ Причасти́тисѧ ᲃт҃ымъ є҆гѡ̀ Та́йнамъ.

А҆́ще же І҆ере́ѷ пре́дърече́нное Пра́вилѡ Це́ркѡвное, и҆ Бжⷭ҇тве́нномꙋ Причаще́нїю прислꙋша́ющїе, самохо́тнѣ ѿ раꙁлѣне́нїѧ и҆лѝ небреже́нїѧ, и҆лѝ всѐ, и҆лѝ ча́сть нѣ́кꙋю ѡ҆ста́витъ, ᲃме́ртнѡ съгрѣши́тъ. А҆́ще же въ нꙋ́жныхъ человѣ́ческомꙋ ᲃпⷭ҇нїю дх҃о́вныхъ ве́щехъ себѣ̀ ᲂу҆пражнѧ́ѧ, сі́естъ слꙋша́нїемъ И҆́сповѣди бо́лныхъ, и҆лѝ здра́выхъ, и҆лѝ Причаще́нїемъ, и҆лѝ Креще́нїемъ бо́лныхъ, вре́мени же приспѣва́ющꙋ Бжⷭ҇тв́нныѧ Слꙋ́жбы, Пра́вило ѡ҆ста́вити принꙋжде́нъ бꙋ́детъ, не съгрѣши́тъ: то́чїи по Бжⷭ҇твенной Лѵтꙋ́ргїи ѡ҆ставле́нное всѐ да съверши́тъ, и҆лѝ понѐ ча́сть сегѡ̀ нѣ́кꙋю.

І҆ере́ѷ и҆́дый къ слꙋже́нїю Бжⷭ҇твенныѧ Лѵтꙋ́ргїи, ꙗ҆́коже дш҃е́ю си́це и҆ тѣ́ломъ до́лженъ є҆́стъ чи́стъ бы́ти: тѣ́мъ же а҆́ще и҆ всѐ тѣ́ло чи́сто досто́итъ є҆мꙋ̀ и҆мѣ́ти, и҆ чи́стыѧ на себѣ̀ ѡ҆де́жды, но ᲂу҆́бѡ и҆ꙁрѧ́днѣе гла́вꙋ и҆счеса́нꙋю, лицѐ и҆ ᲂу҆ста̀ и҆ рꙋ́цѣ и҆ꙁмове́ны, па́ꙁнокти же ѡ҆брѣ́ꙁаны да и҆́матъ, си́це че́сти ра́ди Бжⷭ҇тве́нныхъ Та́инъ, ꙗ҆́коже и҆ люде́й на́нь зрѧ́щихъ, и҆ рꙋ́кꙋ є҆гѡ̀ лобꙁа́ющихъ. До́брѣ ᲂу҆́бѡ сътво́ритъ а҆́ще зꙋ́бы съ вечера и҆стреби́тъ, и҆ ᲂу҆ста̀ своѧ̀ и҆ꙁмы́етъ. ꙗ҆́кѡ да не что̀ ѿ воды̀ въ ᲂу҆́трїе въ горта́нь и҆ꙁмыва́ѧ ᲂу҆ста̀ въпа́детъ, и҆ запѧ́тъ бꙋ́детъ слꙋжи́ти. А҆́ще же и҆ въ ᲂу҆трїе съхра́ннѡ ᲂу҆ста̀ и҆ꙁмы́етъ, въ є҆́же ничто́же ѿ воды̀ поглоти́ти, беꙁъ ᲂу҆сꙋмнѣ́нїѧ да слꙋ́житъ.

Вре́мѧ слꙋже́нїѧ є҆́стъ по дре́внемꙋ ѡ҆бы́чаю Церко́вномꙋ, тре́тїй ча́съ днѐ: но ᲂу҆́бѡ мо́жетъ и҆ ра́нѣй и҆ по́ꙁнѣй нача́тисѧ и҆ съверша́ти Бжⷭ҇тве́ннаѧ Лѵтꙋ́ргїѧ, а҆́ще потре́ба си́цеваѧ надлежа́ти бꙋ́детъ, то́чїю не пре́жде ᲃвѣта́ющꙋ дню̀, ни́же по полꙋ́дню, и҆́бѡ си́це начина́ѧй и҆ ᲃъверша́ѧй сгрѣши́тъ. Сꙋ́тъ ᲂу҆́бѡ днѝ ѿ Це́ркве ѿдѣ́лнѣ ᲂу҆ро́чныѧ, вънѧ́же пополꙋ́дни подоба́етъ Лѵтꙋргиса́ти, и҆ꙁрѧ́днѣе є҆гда̀ Лѵтꙋ́ргїѧ въкꙋ́пѣ съ Вече́рнею съверша́етсѧ. Сі́ѧ же днѝ ᲃꙋ́тъ всѧ̀ ᲃт҃а́ѧ Четыридесѧ́тница, сі́естъ по́стныѧ днѝ въ нѧ́же Лѵтꙋ́ргїѧ Преждесщ҃е́нныхъ сверша́етсѧ, кро́ме Сꙋббꙍ́тъ и҆ Недѣ́ль, къ семꙋ́же Вели́каѧ Сꙋббꙍ́та, Навече́рїе Рождества̀ Хв҃а, и҆ ᲃт҃ы́хъ Богоѧвле́ний. въ сі́ѧ ᲂу҆́бѡ днѝ не а҆́бїе по полꙋ́дню, но въ вре́мѧ вече́рнѧ начина́ти Бжⷭ҇тве́ннꙋю Слꙋ́жбꙋ досто́итъ.

Поне́же И҆нте́нцїѧ, сі́естъ, Намѣре́ние ᲂу҆́мное ᲃщ҃е́нническое: є҆ди́на є҆́стъ ѿ четыре́хъ ве́щей, бе́ꙁъ ни́хъ же Та́йна Тѣ́ла и҆ Крвѐ Гд҃не́й съверши́тисѧ не мо́жетъ: сегѡ̀ ра́ди здѐ въ пе́рвыхъ полага́етсѧ.

Намѣре́нїе ᲂу҆́бѡ ᲃщ҃е́нническое, є҆́стъ, скло́нное съчине́нїе ᲂу҆ма̀ и҆ во́лѣ неѿмѣ́нной, къ непремѣ́нномꙋ съверше́нїю Та́йны Тѣ́ла и҆ Крвѐ Гд҃а на́шгѡ І҆и҃ᲃ Ха҃.

Всѧ́кѡ ᲂу҆́бѡ І҆ере́ѷ, къ слꙋже́нїю Бжⷭ҇тве́нныѧ Лѵтꙋ́ргїи и҆ды́й, и҆мѣ́ти до́лженъ є҆́стъ си́цево намѣре́нїе ᲂу҆́мное, и҆лѝ, ᲂу҆ма̀ и҆ во́лѣ свое́й съгла́сное склоне́нїе: є҆́же по ᲂу҆ста́вꙋ Гд҃ню, и҆ ѡ҆бы́чаю Це́ркве ᲃт҃о́и Правосла́внокаѳꙍли́ческой Въсто́чнои, съверши́ти Та́йнꙋ Тѣ́ла и҆ Крвѐ Хв҃ой.

Въ само́мъ же слꙋже́нїи, є҆гда̀ покаꙁꙋ́ѧ пе́рсты на предложе́нный Хлѣ́бъ, гл҃етъ ᲃловеса̀ Гн҃ѧ, сі́естъ: Прїймѣ́те ꙗ҆ди́те, и҆ про́чаѧ: До́лженъ є҆́стъ намѣре́нїе ᲂу҆ма̀ и҆ во́лѣ свое́и съгла́сное и҆мѣ́ти Гд҃ни́мъ словесе́мъ, сі́стъ: є҆́же сꙋществꙋ̀ Хлѣ́ба на Прⷭ҇то́лѣ на Ді́скосѣ предложе́ннагѡ, на не́гоже ѻ҆́нъ зри́тъ и҆́стиннѡ предложи́тисѧ, и҆ пресꙋществи́ти въ Тѣ́ло Хрⷭ҇то́во.

Е҆гда́же на Вино̀ въ Ча́ши на Прⷭ҇то́лѣ сꙋ́щее пока́ꙁꙋѧ, гл҃етъ: Пе́йте ѿ неѧ всѝ, и҆ проч.: До́лженъ є҆́стъ своѐ намѣре́нїе словесе́мъ Гд҃ни́мъ съгласи́ти, сі́естъ: є҆́же ᲃꙋществꙋ̀ Вина̀ въ Ча́ши пре́дъ ни́мъ на Прⷭ҇то́лѣ сꙋ́щагѡ, и҆́стиннѡ въ Кро́въ Хв҃ꙋ претвори́ти и҆ пресꙋществи́тисѧ: въ ѡ҆ставле́нїе грѣхѡ́въ, и҆ ᲃпⷭ҇нїе дш҃ъ правовѣ́рнѡ живꙋ́щихъ и҆ преста́влъшихсѧ.

Вѣ́ждъ ᲂу҆́бѡ и҆ꙁвѣ́стнѡ ѽ І҆ере́ю, ꙗ҆́кѡ а҆́ще си́цево намѣре́нїе ᲂу҆ма̀ и҆ во́лѣ свое́и въ Лѵтꙋ́ргїи Бжⷭ҇тве́нной и҆мѣ́ти не бꙋ́деши, не то́чїю Та́йнꙋ не съверши́ши, но и҆ ꙗ҆́кѡ Бж҃їй рꙋга́тель въ тѧ́жкое ѡ҆сꙋжде́нїе и҆ сме́ртный грѣ́хъ въпа́днеши.

Е҆гда̀ словеса̀ Гд҃нѧ надъ хлѣ́бомъ на Ді́скосѣ сꙋ́щомъ гл҃е́ши ѽ Іере́ю, а҆́ще намѣре́нїе своѐ и҆мѣ́ти бꙋ́деши є҆́же єдинꙋ̀ то́чїю Ча́сть ѡ҆сти́ти, не наꙁнамена́еши же кото́рꙋю въ ᲂу҆́мѣ̀ свое́мъ намѣрѧ́еши, ничто́же ѡ҆сщ҃а́еши: и҆ сегѡ̀ ра́ди тѧ́жкѡ сме́ртнѡ съгрѣши́ши, и҆́бѡ намѣре́нїе не си́цево то́чїю про́стѡ бы́ти и҆стѧ́ꙁꙋетсѧ ꙗ҆́коже прилꙋчи́сѧ, но и҆мено́внѣ къ ѡ҆́ной Ча́сти ю҆́же ᲃт҃и́ти хо́щеши, приложи́ти подоба́етъ.

Сегѡ̀ ᲂу҆́бѡ ра́ди всѧ́кѡ до́лженъ є҆сѝ и҆мѣ́ти ᲂу҆ма̀ и҆ во́лѣ свое́й намѣре́нїе, къ всемꙋ̀ Хлѣ́бꙋ пре́дъ тобо́ю на Ді́скосѣ сꙋ́щемꙋ, на не́го же и҆ зри́ши, и҆ рꙋко́ю пока́ꙁꙋеши: є҆́же въ Тѣ́ло Хв҃о претвори́тисѧ, и҆ꙁрѧ́днѣе же въ Вели́кꙋю ᲃт҃ꙋ́ю Четыридесѧ́тницꙋ, є҆́гда мнѡ́ги А҆́гнци къ съверше́нїю Пре́ждесвѧще́нныѧ слꙋ́жбы на съверше́нной Литꙋ́ргїи ѡ҆сщ҃а́ютсѧ. Но ᲂу҆́бѡ не то́чїю подоба́етъ къ самы́мъ А҆́гнцемъ намѣре́нїе и҆мѣ́ти въ ѡ҆сщ҃е́нїи, но и҆ къ Ча́стемъ на Ді́скосѣ ᲃꙋ́щимъ: ꙗ҆́кѡ да ничто́же не ѡ҆сщ҃е́ннѡ на Ді́скосѣ ѡ҆ста́нетъ, и҆ ꙗ҆́кѡ да съверше́нна Же́ртва бꙋ́детъ ѡ҆ живы́хъ и҆ ᲂу҆со́пшихъ принесе́ннаѧ. Же́ртва бо ни́же пре́жде ѡ҆сщ҃е́нїѧ, ни́же по ѡ҆сщ҃е́нїи быва́етъ но то́чїю въ само́мъ то́мъ ѡ҆сщ҃е́нїи: є҆гда̀ сꙋщество̀ Хлѣ́ба и҆ Вина̀ въ Тѣ́ло и҆ Кро́въ Хв҃ꙋ прелага́етсѧ, и҆ сі́е преложе́нїе и҆лѝ пресꙋществе́нїе, є҆́стъ и҆́стинною ᲂу҆милостиви́телною, сі́естъ, ᲂу҆слага́лною Же́ртвою.

Къ семꙋ̀, а҆́ще Ча́стки сі́ѧ ѡ҆сщ҃е́нны не бꙋ́дꙋтъ, и҆ въ Тѣ́ло Хв҃о не прело́жатсѧ: хлѣ́бомъ про́стымъ пребыва́ютъ, и҆ Же́ртвою ᲂу҆милости́вителною бы́ти не могꙋ́тъ. и҆ сегѡ̀ ра́ди грѣхѝ тѣ́мъ, ѡ҆ ни́хъ же принесе́ны бы́ша ника́коже ѡ҆ста́витисѧ могꙋ́тъ: и҆ поне́же не ѡ҆сщ҃а́ютсѧ, Та́йною не сꙋ́тъ, и҆ сегѡ̀ ра́ди ни́же ѡ҆ст҃и́ти кого̀ могꙋ́тъ.

А҆́ще ᲂу҆́бѡ и҆́маши къ си́мъ Ча́стемъ намѣре́нїе свое́го ᲂу҆ма̀, є҆́же ѡ҆ст҃и́ти ѧ҆̀: мо́жеши кро́мѣ всѧ́кагѡ ᲂу҆сꙋмнѣ́нїѧ вѣ́рныхъ причасти́ти и҆́ми; и҆бѡ̀ въи́стинꙋ Тѣ́ло Хв҃о сꙋ́тъ, а҆́ще же при ѡ҆сщ҃е́нїи А҆́гнца, и҆ къ Ча́стемъ своѐ намѣре́нїе не приложи́ши: ника́коже нико́гоже да дерꙁне́ши ᲃи́ми ча́стками Причасти́ти, и҆́бѡ кро́мѣ намѣре́нїѧ не ѡ҆сщ҃а́ютсѧ, и҆ въ Тѣ́ло Хв҃о не прелага́ютсѧ. А҆́ще же дерꙁне́ши Причасти́ти когѡ̀, и҆ са́мъ тѧ́жко ᲃме́ртнѡ ᲃъгреши́ши, и҆ Прича́стникъ ничто́же прі́йметъ. Къ слꙋже́нїю Бжⷭ҇тве́нныѧ Лѵтꙋ́ргїи, и҆ сі́ѧ ве́щи нꙋ́жнѡ потре́бны сꙋ́тъ.

Въ пе́рвыхъ, ѡ҆де́жды ᲃщ҃е́нныѧ, ꙗ҆́же сꙋ́тъ, є҃.

Пе́рваѧ є҆́стъ. Стиха́ръ.

Вто́раѧ, Е҆пітра́хиль.

Тре́тѧѧ, По́ѧсъ.

Четве́ртаѧ, Нарка́вницѣ.

Пѧ́таѧ, Фелꙍ́нъ.

Ꙗ҆́коже ᲂу҆́бѡ кро́мѣ ᲃи́хъ все́хъ ѡ҆де́ждъ, ᲃи́це и҆ кро́мѣ є҆дины́ѧ ѿ ни́хъ, а҆́ще І҆ере́ѷ ᲃлꙋжи́ти дерꙁне́тъ, ᲃме́ртнѡ ᲃъгрѣши́тъ.

Си́мъ ѡ҆де́ждамъ всѣмъ, подоба́етъ бы́ти чи́стымъ и҆ цѣ́лымъ: а҆́ще же бꙋ́дꙋтъ велмѝ брꙋ́дные и҆лѝ раꙁдра́нные, І҆ере́ѷ же дерꙁне́тъ въ нѧ слꙋжи́ти, ᲃме́ртнѡ съгрѣши́тъ, поне́же Ха҃ Бг҃а ᲂуничижа́етъ въ Прⷭ҇ты́хъ Та́йнахъ свои́хъ и҆́стиннѡ сꙋ́щагѡ. Тѣ́мже всѧ́кѡ да тщи́тсѧ І҆ере́ѷ, а҆́ще и҆ нище́тны, но благѡо́браꙁны и҆ чи́сты ᲃщ҃е́нныѧ и҆мѣ́ти ѡ҆де́жды.

Вто́рое къ слꙋже́нїю потре́бный є҆́стъ Прⷭ҇тлъ. и҆ Жертвенникъ ѡ҆сщ҃е́нный. А҆́ще ᲂу҆́бѡ не ѡ҆сщ҃е́нны бꙋ́дꙋ́тъ, ника́коже І҆ере́ѷ на ни́хъ кро́мѣ Е҆пⷭ҇пскогѡ и҆ꙁволе́нїѧ ᲃлꙋжи́ти да дерꙁне́тъ: А҆́ще же слꙋжи́ти дерꙁне́тъ, и҆ ᲃме́ртнѡ ꙗ҆́кѡ ᲂу҆ничижи́тель Е҆пⷭ҇пской вла́сти ᲃъгрѣши́тъ, и҆ винѣ̀ и҆ ка́ꙁни Епⷭ҇пской подлежа́ти бꙋ́детъ.

Хотѧ́й ᲂу҆́бѡ І҆ереѷ не на сщ҃е́нномъ Прⷭ҇тлѣ въ неѡсщ҃е́нной Це́ркви, и҆лѝ въ ѡ҆со́бномъ до́мꙋ Бжтⷭ҇ве́ннꙋю соверши́ти слꙋ́жбꙋ: не то́чїю ѡ҆со́бное досто́итъ є҆мꙋ̀ на сі́е и҆мѣ́ти Е҆пⷭ҇пское Блⷭ҇ве́нїе, но и҆ А҆нтими́съ подви́жный, всѧ́кѡ нꙋ́жнѡ потре́бнѡ є҆́стъ и҆мѣ́ти: кро́мѣ бо А҆нтими́са ника́коже досто́итъ є҆мꙋ̀ слꙋжи́ти, а҆́ще бы и҆ Епⷭ҇пское ѡ҆со́бное на сиѐ и҆мѣ́лъ блⷭ҇венїе: дерꙁа́ѧй же беꙁъ подви́жнагѡ А҆нтими́сѧ слꙋжи́ти, ꙗ҆́кѡ ᲂу҆ничижи́тель Хрⷭ҇то́выхъ Та́йнъ, тѧ́жкѡ ᲃме́ртнѡ ᲃъгрѣши́тъ.

А҆ще І҆ереѷ блⷭ҇ве́нїе ѿ Епⷭ҇па и҆ А҆нтими́съ подви́жный и҆мѣ́ѧй, въсхо́щетъ Лѵтꙋргиса́ти въ Це́ркви є҆щѐ не ѡ҆сщ҃е́нной, и҆лѝ въ ѡ҆со́бномъ нѣ́коемъ до́мꙋ, до́лженъ є҆́стъ пре́жде зача́тїѧ Проскоми́дїи прочестѝ Моли́твꙋ ѡ҆щ҃е́нїѧ но́вагѡ до́мꙋ, и҆ водо́ю ᲃщ҃е́нною ѡ҆кропи́ти хра́мъ ве́съ, и҆ по се́мъ нача́ти и҆ съверши́ти Бжⷭ҇тве́ннꙋю Лѵтꙋ́ргїю.

А҆нтими́съ а҆́ще бꙋ́детъ раꙁдра́нный, дѣра́вый, и҆лѝ велъмѝ ᲂу҆брꙋка́ный, ꙗ҆́коже писме́намъ на не́мъ сꙋ́щимъ не поꙁнава́тисѧ, ника́коже на не́мъ слꙋжи́ти досто́итъ. дерꙁа́ѧй же на си́цевомъ слꙋжи́ти, ꙗ҆́кѡ ᲂу҆ничижи́тель Бжⷭ҇тве́нныхъ Та́инъ ᲃме́ртнѡ съгрѣша́етъ, и҆ Е҆пⷭ҇пской ка́ꙁни подлѣга́етъ.

Тре́тее, на Прⷭ҇то́лѣ тре́мъ И҆нди́тїѧмъ, и҆лѝ Ꙋ҆брꙋ́сѡмъ подоба́етъ бы́ти, а но не дво́мъ, сі́естъ, на пе́рвой И҆нди́тїи є҆дино́мꙋ сꙋгꙋ́бѡ съгбе́нномꙋ: ве́рхꙋ же си́хъ да бꙋ́детъ И҆літо́нъ, ѿ то́нкагѡ и҆ гꙋ́стагѡ пла́тна двопѧ́днꙋю мѣ́рꙋ въ широтꙋ̀ и҆ въ долготꙋ̀ и҆мѣ́ѧй. А҆нтими́съ ᲂу҆́бѡ подъ ве́рхнимъ Ꙋ҆брꙋ́сомъ распросте́ртъ всегда̀ бꙋ́детъ, И҆літо́нъ же ве́рхꙋ всѣ́хъ Ꙋ҆брꙋ́сѡвъ.

Сі́ѧ же Ꙋ҆брꙋ́сы да бꙋ́дꙋтъ чⷭ҇ты не раꙁдра́нны и҆ не дѣра́вы, и҆́бѡ си́цевыми ᲂу҆ничижа́ютсѧ Бжⷭ҇тве́нныѧ Та́йны: не досто́йнѡ бо є҆́стъ ме́ншꙋю че́сть Бг҃ꙋ не́жели человѣ́кꙋ твори́ти: Чл҃ци бо Ꙋ҆брꙋ́съ скве́рный ѿ тра́пеꙁы свое́ѧ съ ѡ҆мерꙁе́нїемъ ѿмѣта́ютъ, и҆ ꙗ҆́коже беꙁче́стїе себѣ̀, ѿ предлага́ющихъ и҆́мъ си́цевый прі́емлютъ: ко́лми ᲂу҆́бѡ па́че Гд҃ь и҆ Бг҃ъ на́шъ, є҆го́же всѣ́мъ ᲃе́рдцемъ, всею̀ дш҃ею, всею̀ крѣ́постїю, и҆ всѣ́мъ помышле́нїемъ на́шимъ до́лжни є҆смы̀ люби́ти и҆ чти́ти. Сегѡ̀ ᲂу҆бѡ ра́ди, Ꙋ҆брꙋ́сы и҆ И҆литонъ на Прсто́лѣ [и҆́же є҆́стъ Бж҃їѧ Тра́пеꙁа] сꙋ́щїѧ, всѧ́кѡ чⷭ҇ты и҆ цѣ́лы да бꙋ́дꙋтъ: и҆́бѡ І҆ере́емъ всѣ́мъ и҆ꙁрѧ́днѣе же Парохїѧ́лнымъ, ꙗ҆́коже самы́мъ со́вѣсть чи́стꙋю и҆ непоро́чнꙋю всегда̀ всѧ́кѡ и҆мѣ́ти, (ꙗ҆́кѡ ᲃлꙋжи́телемъ и҆ приста́вникѡмъ Бжⷭ҇тве́нныхъ Та́инъ,) ᲃи́це и҆ въ Це́ркви и҆ въ Ѻ҆лтарѝ, ꙗ҆́коже въ домꙋ̀ и҆ на Тра́пеꙁѣ Бж҃їей, всѧ̀ чⷭ҇та цѣ́ла, благоѡ́браꙁна же, и҆ че́стна и҆мѣ́ти досто́итъ.

А҆́ще и҆ Це́ркѡвъ и҆ Прⷭ҇тлъ бꙋ́детъ ѡ҆сщ҃е́ный, но ᲂу҆́бѡ ѿ слꙋ́чаѧ въ крамолѣ̀ нѣ́коей, ѡ҆кропле́нїемъ человѣ́ческїѧ крвѐ, и҆лѝ ѿ ѡ҆рꙋ́жнагѡ, и҆лѝ рꙋ́чнагѡ, и҆лѝ како́вагѡ ли́бо бꙋ́ди ᲂу҆даре́нїѧ, и҆лѝ ѿ и҆стече́нїѧ на землѝ како́вѣмъ ли́бо бꙋ́ди ѡ҆́браꙁомъ мꙋ́жескагѡ сѣ́мене ѡ҆скверне́на бꙋ́детъ, ника́коже І҆ере́ѷ слꙋжи́ти да дерꙁне́тъ, до́ндеже ѡ҆бы́чное [съ Е҆пⷭ҇пскимъ блⷭ҇ве́нїемъ,] ѡ҆чище́нїе бꙋ́детъ, и҆ ᲃме́ртнѡ бо ᲃъгрѣши́тъ, и҆ ка́ꙁни Е҆пⷭ҇пской подлежа́ти бꙋ́детъ.

А҆́ще сі́ѧ слꙋ́чаѧ, и҆ на и҆́номъ мѣ́стѣ, и҆лѝ въ домꙋ̀ приклю́чатсѧ, ника́коже І҆ере́ѷ да дерꙁне́тъ ᲃлꙋжи́ти, сме́ртнѡ бо съгрѣши́тъ.

А҆́ще сі́ѧ слꙋ́чаѧ, при зача́той ᲂу҆жѐ Лѵтꙋ́ргїи приклю́чатсѧ, и҆лѝ въ Це́ркви, и҆лѝ на и҆́номъ кое́мъ мѣ́стѣ, а҆́ще пре́дъ вели́кимъ Въхо́домъ бꙋ́дꙋтъ: да преста́нетъ І҆ере́ѷ Лѵтꙋргиса́ти, и҆ и҆стреби́въ Хлѣ́бъ и҆ Вино̀ ꙗ҆́кѡ блⷭ҇ве́нные, нонѐ ꙗ҆́коже Тѣ́ло и҆ Кро́въ Хв҃ꙋ, и҆бо̀ не ҆̀ ѡ҆сщ҃е́ны бы́ша, да совлече́тсѧ ѡ҆де́ждъ ᲃщ҃нныхъ, и҆ да и҆ꙁы́детъ ᲃлꙋ́жбꙋ не соверши́въ. А҆́ще же по вели́комъ Въхо́дѣ ᲃїѧ приклю́чатсѧ, да не преста́нетъ, но да съверши́тъ зача́тꙋю Бж҃ꙋю Слꙋ́жбꙋ: но ᲂу҆́бѡ по се́мъ да не дерꙁне́тъ ᲃлꙋжи́ти па́ки, доне́лиже блⷭ҇ве́нїемъ Е҆пⷭ҇пскимъ, чре́ꙁъ ѡ҆бы́чные семꙋ̀ Моли́твы ѡ҆чи́ститсѧ, и҆ ѡ҆ст҃и́тъ мѣ́сто ѡ҆́нѡ.

А҆́ще Це́ркѡвъ ѿ нахожде́нїѧ ꙗ҆ꙁы́ческагѡ, и҆лѝ ѿ наси́лствїѧ є҆ріти́ческагѡ, и҆лѝ ѿстꙋ́пническагѡ ѡ҆скверне́на бꙋ́детъ, и҆лѝ а҆́ще ꙗ҆́вный є҆рети́къ та́мо погребе́нъ бꙋ́детъ: І҆ере́ѷ да не дерꙁне́тъ Лѵтꙋргиса́ти, доне́лиже блⷭ҇ве́нїемъ ѡ҆со́бнымъ Е҆пⷭ҇пскимъ ѡ҆чи́ститъ и҆ ѡ҆бы́чнѡ Це́ркѡвъ ѡ҆ст҃и́тсѧ: беꙁъ блⷭ҇ве́нїѧ же слꙋжи́ти дерꙁа́ѧй, ᲃме́ртнѡ съгрѣши́тъ, и҆ ка́ꙁни Е҆пⷭ҇пской подлежа́ти бꙋ́детъ.

Четве́ртое, ᲃъсꙋ́ды ᲃщ҃е́нныѧ къ слꙋже́нїю прислꙋша́ющїѧ, сꙋ́тъ сі́ѧ, Ча́ша, Ді́скосъ, Звѣꙁда̀, и҆ Ло́жица. Къ си́мъ ᲃъсꙋ́дѡмъ прислꙋша́ютъ трѝ Покро́вци: Е҆ди́нъ покрове́нїѧ ра́ди Ча́ши, Вто́рый Ді́скоса, Тре́тїй ѡ҆бои́хъ ра́ди. Сі́ѧ ᲂу҆́бѡ Покро́вцѧ, да бꙋ́дꙋтъ ѿ чⷭ҇тныѧ ве́щи съдѣла́ны, чи́сты же, и҆ цѣ́лы.

Съсꙋ́ды же сі́ѧ четы́ри, да бꙋ́дꙋтъ зла́ты и҆лѝ сребрѧ́ны, и҆лѝ помецѣно́вы: да не бꙋ́дꙋтъ же мѣ́дѧны, мосѧꙁо́вы, желѣ́ꙁны, ни́же древѧ́ны, въ си́цевыхъ бо слꙋжа́й съгрѣша́етъ, и҆ Е҆пⷭ҇пской ка́ꙁни подле́житъ.

Пѧ́тое, Кни́га Слꙋже́бникъ, всѧ́кѡ є҆́стъ потре́бно, къ слꙋже́нїю, и҆бѡ̀ а҆́ще І҆ере́ѷ на па́мѧть слꙋжи́ти бꙋ́детъ, а҆ нѐ съ кни́ги, ᲃме́ртнѡ съгрѣ́шитъ.

Ше́стое, ᲃвѣща̀ горѧ́щѧ, понѐ двѣ̀ да бꙋ́дꙋтъ при Лѵтꙋ́ргїи Бжⷭ҇тве́нной на Прⷭ҇то́лѣ, въ вели́цѣй же нꙋ́ждѣ. є҆дина̀: и҆́бѡ а҆́ще кро́мѣ свѣ́щъ Лѵтꙋргиса́ти дерꙁне́тъ І҆ере́ѷ. ᲃме́ртнѡ съгрѣ́шитъ.

Се́дмое, Ѳѵмїѧ́мъ, сі́естъ Кади́ло, и҆лѝ Ла́данъ, ᲃамы́й чре́ꙁъ ᲃебѐ, и҆лѝ съ Ꙗ҆́ловцемъ ᲃмѣше́ный при Бжⷭ҇тве́нной Слꙋ́жбѣ, къ кажде́нїю да бꙋ́детъ, и҆бѡ̀ ᲃамы́мъ Ꙗ҆́ловцемъ кадѧ́й беꙁъ Ла́данꙋ въ слꙋже́нїи Бжⷭ҇тве́нной Лѵтꙋ́ргїи ᲃме́ртнѡ съгрѣ́шитъ мо́жетъ же и҆ Сми́рною, и҆ че́рнымъ Ла́даномъ, и҆ Кори́цею кажде́нїе твори́ти, но ᲂу҆́бѡ всѧ́кѡ съ Ѳѵмїѧ́момъ смеша́ное да бꙋ́детъ.

Вконе́цъ же, послꙋжи́тель въ Ѻ҆́лтари всѧ́кѡ мꙋ́жескїй по́лъ да бꙋ́детъ а҆́ще бо ᲃщ҃е́нникъ са́мъ себѣ̀ въ Ѻ҆́лтарѣ, и҆ꙁрѧ́днѣе же въ слꙋже́нїи Бжⷭ҇тве́нной Лѵтꙋ́ргїи послꙋгова́ти бꙋ́детъ, Бжⷭ҇тве́нныѧ Та́йны ᲂу҆ничижи́тъ, и҆ сама́гѡ Ха҃ въ ни́хъ сꙋ́щагѡ, Невѣ́стꙋ же є҆гѡ̀ Це́рковъ, є҆ѧ́же ѡ҆́браꙁъ въ ча́съ ѡ҆́ный на себѣ̀ но́ситъ, въ ничто̀ въмѣни́тъ, и҆ ᲃи́це ᲃме́ртнѡ съгрѣ́шитъ.

Въ все́мъ слꙋже́нїи Бжⷭ҇тве́нныѧ Лѵтꙋ́ргїи, І҆ере́ѷ до́лженъ є҆́стъ бы́ти кро́ткимъ, ти́химъ, ᲃмѣре́ннымъ, и҆ благоговѣ́инымъ, ᲂу҆́мныма ѡ҆чи́ма вꙁира́ѧ на свое́гѡ Влады́кꙋ пре́дъ ни́мъ же стои́тъ, є҆мꙋ́же слꙋ́житъ, и҆ є҆го́же ѡ҆́браꙁъ на себѣ̀ но́ситъ.

Моли́твы съ всѧ́кимъ благоговѣ́нїемъ благоче́стнѡ, и҆ велїимъ внима́нїемъ приле́жнѡ и҆ всецѣ́лѡ, ничто́же ѡ҆ставлѧ́ѧ да чте́тъ, и҆ꙁвѣ́стнѡ вѣ́дый, ꙗ҆́кѡ Бг҃ъ невиди́мѡ ѿ ᲂу҆́стъ є҆гѡ̀ ꙗ҆́коже нѣ́кїѧ Многѡцѣ́нныѧ Би́серы сі́ѧ прие́млетъ.

Слꙋжи́ти же съ стра́хомъ и҆ тре́петомъ І҆ере́ѷ до́лженъ є҆́стъ, смире́ннымъ же зрѣ́нїемъ ѡ҆че́съ, и҆ благоговѣ́ннымъ поднесе́нїемъ рꙋ́къ и҆ всѣ́мъ дѣ́йствомъ, благоче́стнымъ же стоѧ́нїемъ и҆ всею̀ поста́вою внѣ́шнею, и҆ꙁъѡбраꙁи́ти и҆ма́тъ внꙋ́трнюю свою̀ вѣ́рꙋ, є҆ю́же крѣ́пкѡ и҆ꙁвѣствꙋ́етсѧ, ꙗ҆́кѡ Прⷭ҇тлъ є҆́стъ сѣда́лище Царѧ̀ Нбⷭ҇нагѡ, сꙋдїѝ живы́хъ и҆ ме́ртвыхъ, на не́мъ же и҆́стиннѡ ѡ҆́нъ сѣдитъ, и҆ тмы̀ А҆́гг҃лъ ѡ҆́крестъ є҆гѡ̀ съ стра́хомъ неви́димѡ предъсто́ѧтъ.

Поне́же Мате́рїѧ є҆́стъ тре́тѧѧ ве́щъ ѿ четы́рехъ, беꙁъ ни́хъ же ника́коже Та́йна Тѣ́ла и҆ Крвѐ Гд҃ней съверши́тисѧ мо́жетъ, прили́чнѡ здѐ посре́дѣ тѣ́хъ ве́щехъ ꙗ҆́же къ само́мꙋ ᲃлꙋже́нїю прислꙋ́шаютъ полага́етсѧ.

Ве́щъ Та́йны Тѣ́ла Гд҃а на́шгѡ І҆и҃ᲃ Ха҃ є҆́стъ Хлѣ́бъ ѿ чⷭ҇тыѧ Пшени́чныѧ мꙋкѝ водо́ю про́стою є҆стестве́нною смеша́ный, и҆ до́бре и҆спе́ченый, ква́сный: прѣ́сный бо Хлѣ́бъ, а҆́ще и҆ пшени́чный бꙋ́детъ; въ Це́ркви ᲃт҃о́й Восто́чной Правосла́внѡ каѳоли́ческой Мате́рїей Тѣ́ла Хв҃а бы́ти ника́коже мо́жетъ: Сегѡ̀ ᲂу҆́бѡ ра́ди никто́же ѿ І҆ере́ѷ, ника́коже, нико́лиже ѡ҆прѣ́снокомъ ᲃлꙋжи́ти да дерꙁне́тъ, да не во тѧ́жкое ᲃме́ртнагѡ грѣха̀ ѡ҆сꙋжде́нїе въпа́днетъ: ᲂу҆сꙋмни́телнѡ бо бꙋ́детъ, а҆́ще въ си́цевомъ Хлѣ́бѣ Та́йна ᲃъверши́тсѧ.

Не мо́жетъ ᲂу҆́бѡ бы́ти хлѣ́бъ и҆на́кшїй, кро́мѣ то́чїю самы́й пшени́чный ква́сный, ве́щїю Та́йны Тѣ́ла Хв҃а, сі́естъ, ни ꙗ҆чме́нный, ни греⷭ҇чѧный, ни ѡ҆всѧ́ный, ни просѧ́ный, ни́же ѿ и҆́ныхъ како́вѣхъ ли́бо бꙋ́ди сѣ́менъ, ꙗ҆́же ника́коже и҆менова́тисѧ, ни́же бы́ти пшени́цею могꙋ́тъ. да никто́же ᲂу҆́бѡ дерꙁне́тъ ѿ си́цевыхъ сѣ́менъ хлѣ́бомъ и҆спе́ченымъ ᲃлꙋжи́ти, и҆ тѧ́жкѡ бо ᲃме́ртнѡ съгрѣ́шитъ, и҆ Та́йнꙋ Тѣ́ла Хв҃а не съверши́тъ, и҆ и҆ꙁверже́нїѧ винѣ̀ подлѣга́ти бꙋ́детъ.

А҆́ще хлѣ́б бꙋ́детъ ѿ пшени́чныѧ мꙋкѝ, напо́лы зъ и҆́ною мꙋко́ю ѿ пре́дъ и҆менова́ныхъ сѣ́менъ смѣ́шанои иеспе́ченый, не мо́жетъ бы́ти Мате́рїею Тѣ́ла Хв҃а, сегѡ̀ ᲂу҆́бѡ ра́ди си́цевымъ хлѣ́бомъ слꙋжи́ти дерꙁа́ѧй І҆ере́ѷ, и҆ ᲃме́ртнѡ са́мъ съгрѣ́шитъ, и҆ Та́йнꙋ Тѣ́ла Хв҃а не съверши́тъ, и҆ и҆ꙁверже́нїѧ винѣ̀ подлѣга́ти бꙋ́детъ.

А҆́ще хлѣ́бъ бꙋ́детъ ѿ пшени́чной мꙋкѝ, и҆ ѿ воды̀ є҆стестве́ннои, до́брѣ и҆спече́ный ква́сный: но ᲂу҆́бѡ а҆́ще бꙋ́детъ цвѣ́лый, сплѣ́снѣлый, и҆лѝ згорчавѣ́лый и҆ растлѣ́нный, не мо́жетъ бы́ти Мате́рїею Тѣ́ла Хв҃а. Сегѡ̀ ᲂу҆́бѡ ра́ди си́цевымъ хлѣ́бомъ слꙋжи́ти дерꙁа́ѧй І҆ере́ѷ, и҆ сме́ртнѡ са́мъ съгрѣ́шитъ, и҆ Та́йнꙋ Тѣ́ла Хв҃а не съверши́тъ, и҆ и҆ꙁверже́нїѧ винѣ̀ подлѣга́ти бꙋ́детъ.

А҆́ще хлѣ́бъ бꙋ́детъ ѿ мꙋкѝ жи́тной, ѡ҆ꙁи́мои и҆лѝ ꙗ҆́рои, и҆ ѿ про́стой є҆стестве́нной воды̀, въ ква́сѣ и҆спе́ченый, ᲂу҆сꙋмни́телнѡ, сі́естъ, вонтпли́во бꙋ́детъ а҆́ще съверши́тисѧ мо́жетъ въ не́мъ Та́йна Тѣ́ла Хв҃а. Та́кожде, а҆́ще и҆ пшени́чный хлѣ́бъ не въ водѣ̀ є҆стестве́нной но въ преплае́ной каково́й ли́бо бꙋ́ди во́дцѣ, смѣ́шеный бꙋ́детъ, ѡ҆ соверше́нїи въ не́мъ Та́йны ᲂу҆сꙋмни́телнѡ бꙋ́детъ. и҆́бѡ а҆́ще жи́то ѡ҆ꙁи́мое, и҆лѝ ꙗ҆́рое, по свое́мꙋ є҆стествꙋ̀ раꙁнъствꙋ́етъ ѿ пшени́ци, ᲂу҆сꙋмни́телнаѧ є҆́стъ ве́щъ: поне́же въ мнѡ́гихъ стра́нахъ, ѿ жи́та ѡ҆ꙁи́магѡ, и҆лѝ ꙗ҆́рагѡ ро́дитсѧ пшени́ца, та́кожде ра́внѣ ᲂу҆сꙋмни́телнѡ є҆́стъ, а҆́ще є҆стестве́ннаѧ про́стаѧ вода̀, ѿ во́дки препа́ленои, по свое́мꙋ ᲃꙋществꙋ̀ раꙁнствꙋ́етъ, поне́же и҆ и҆счище́нїемъ, сі́естъ, полерова́нїемъ чере́ꙁъ дѣ́йствѡ ѡ҆гнѧ̀ раꙁлꙋча́ютсѧ всѧ̀ четы́ри ᲃті́хїѧ сꙋ́щїѧ въ Ро́жѣ, и҆лѝ въ и҆́номъ цвѣ́тѣ и҆лѝ зе́лїи: всѧ́каѧ бо вещъ ѿ чесогѡ̀ сло́жена є҆́стъ, въ тое́ждѡ раꙁлꙋчи́тисѧ и҆ма́тъ.

Тѣ́мъ же ᲂу҆бѡ поне́же въ си́цевыхъ хлѣ́бахъ недоꙋмѣ́нїе и҆ ᲂу҆сꙋмнѣ́нїе си́цево є҆́стъ, є҆́же мощѝ и҆лѝ не мощѝ съверши́тисѧ въ ни́хъ Та́йны Тѣ́ла Хв҃а, никто́же ѿ І҆ере́ѷ, ника́коже, нико́лиже си́цевыми хлѣ́бы ᲃлꙋжи́ти да дерꙁне́тъ, и҆бѡ и҆ ᲃме́ртнѡ ᲃъгрѣ́шитъ, и҆ винѣ̀ и҆ꙁверже́нїѧ подлѣга́ти бꙋ́детъ.

А҆́ще хлѣ́бъ пшени́чный бꙋ́детъ и҆ ма́ло что̀ прицвелы́й, и҆лѝ ма́ло чи́мъ смѣше́ный, сі́естъ: Мле́комъ, Ма́сломъ, и҆лѝ Ꙗ҆́йци, ника́коже никто́же си́цевымъ хлѣ́бомъ слꙋжи́ти да дерꙁне́тъ, тѧ́жко бо ᲃме́ртнѡ съгрѣ́шитъ, вонтпли́вости ра́ди съверше́нїи Та́йны, и҆ и҆ꙁверже́нїѧ ра́ди подлѣга́ти бꙋ́детъ.

Въконе́ц же, Мате́рїѧ Тѣ́ла Хв҃а, сі́естъ хлѣ́бъ пшени́чный ква́сный, да бꙋ́детъ до́брѣ и҆спе́чный, не пресоле́ный свѣ́жый, и҆ чⷭ҇тый, въкꙋ́съ, сі́естъ, ᲃма́къ ᲃвойстве́нный и҆мѣ́ѧй, и҆ къ ꙗ҆де́нїю благопрїѧ́тный и҆ спосо́бный.

Мате́рїѧ и҆лѝ ве́щъ Крвѐ Хв҃ой, є҆́стъ Вино̀ ѿ пло́да ло́ꙁнагѡ, сі́естъ, ѿ гро́ꙁдѡвъ ви́ннои лоꙁы̀ и҆сто́ченое.

Во нарече́нїи же ᲃе́мъ Вино̀, не то́чїю Ꙋ҆го́рское, Воло́ское, Францꙋ́ское, Ры́мское, Гре́ческое, и҆лѝ ѿ и҆́ныхъ стра́нъ быва́ющее: но̀ и҆ Малма́ꙁыѧ, Мꙋшкате́ллѧ, Петрисе́менъ и҆ и҆́ныѧ раꙁли́чно и҆менꙋ́емыѧ, ꙗ҆́же ѿ гро́ꙁдѡвъ Ви́нныѧ Лоꙁы̀ и҆сто́чены быва́ют, сꙋ́тъ Вино́мъ и҆́стиннымъ, и҆ мате́рїею спосо́бною Крвѐ Хв҃ой.

Вино́мъ же не сꙋ́тъ, и҆ бы́ти не могꙋ́тъ, всѧ̀ со́ки ѿ раꙁли́чныхъ ѡ҆́вощїй, и҆ ꙗ҆́годъ и҆сто́чены, ꙗ҆́коже є҆́стъ, ꙗ҆́блочный, грꙋ́шевый, ви́шневый, и҆ и҆́ныѧ си́мъ подо́бныѧ.

Та́кожде всѧ́каѧ Си́кера, сі́естъ, всѧ́кїѧ ква́сы, и҆ пи́тїѧ раꙁли́чно ᲂу҆строе́нныѧ, ꙗ҆́коже є҆́стъ Горѣ́лка, Ме́дъ, Пи́во, и҆ и҆́ныѧ си́мъ подо́бныѧ, ꙗ҆́же не сꙋ́тъ ѿ гро́ꙁдѡвъ Ви́нныѧ лоꙁы̀ и҆сточе́ныѧ, и҆ не могꙋ́тъ бы́ти Мате́рїею Крвѐ Хв҃ой.

Никто́же ᲂу҆́бѡ си́цевыми сѡ́ки, ква́сы, и҆лѝ пи́тїи да дерꙁне́тъ ᲃлꙋжи́ти, и҆бѡ̀ и҆ тѧ́жкѡ ᲃме́ртнѡ согрѣши́тъ, и҆ Та́йнꙋ Крвѐ Хв҃ой не соверши́тъ, и҆ и҆ꙁверже́нїю ꙗ҆́кѡ ᲃт҃ота́тецъ подлега́ти бꙋ́детъ.

А҆́ще Вино̀ свойстве́нное бꙋ́детъ, но ᲂу҆́бѡ смѣша́ное съ и҆́нымъ пи́тїемъ, и҆лѝ а҆́ще въ ѡ҆́цетъ претворе́нное, ника́коже бы́ти мо́жетъ Мате́рїею Крвѐ Хв҃ой, тѣ́мже І҆ере́ѷ ника́коже си́цевымъ Вино́мъ да дерꙁне́тъ слꙋжи́ти, и҆бѡ̀ тѧ́жко ᲃме́ртнѡ согрѣши́тъ, и҆ Та́йнꙋ не соверши́тъ, и҆ ᲃегѡ̀ ра́ди и҆ꙁверже́нїѧ ка́ꙁни подлега́ти бꙋ́детъ.

А҆́ще Вино̀ приква́сное, сі́естъ, а҆́ще и҆ ма́лѡ ѡ҆́цетный вкꙋ́съ и҆мѣ́ти бꙋ́детъ, и҆лѝ прицби́лое, и҆лѝ ѿ гро́ꙁдїй а҆́бїе и҆сточе́ное бꙋ́детъ, Та́йна ᲂу҆бѡ Крвѐ Хв҃ой съверши́тсѧ: но слꙋжа́й си́цевымъ Вино́мъ тѧ́жко сме́ртнѡ согрѣши́тъ.

А҆́ще въ Проскоми́дїи, ма́ло воды̀ къ Винꙋ̀ въ ᲃт҃ꙋ́ю Ча́шꙋ І҆ере́ѷ словеса̀ ѡ҆́наѧ гл҃ѧ̀: И҆ а҆́бїе и҆ꙁы́йде Кро́въ и҆ Вода̀, не влѣ́етъ, Та́йнꙋ съверши́тъ, са́мъ же ꙗ҆́кѡ престꙋ́пникъ Це́рковнагѡ преда́нїѧ, сме́ртнѡ съгрѣши́тъ.

Ма́лѡ ᲂу҆́бѡ воды̀, всѧ́кѡ до́лженъ є҆́стъ влїѧ́ти І҆ере́ѷ къ Винꙋ̀ въ Проскоми́дїи въ ᲃт҃ꙋ́ю Ча́шꙋ, въ є҆́же Винꙋ̀ свойстве́нный вкꙋ́съ сво́й не и҆ꙁмѣни́ти въ во́дный: и҆бѡ̀ не съверши́тсѧ Та́йна въ си́цевомъ Винѣ̀, и҆ слꙋжа́й тѧ́жкѡ ᲃме́ртнѡ съгрѣши́тъ.

А҆́ще І҆ере́ѷ по ѡ҆сщ҃е́нїи ᲃт҃ы́хъ Та́йнъ въ своѐ вре́мѧ, сі́естъ: є҆гда̀ въ ᲃт҃ꙋ́ю Ча́шꙋ влага́етъ ча́сть є҆динꙋ̀ ᲃт҃гѡ А҆́гнъца, не влѣ́етъ ма́ло те́плои воды̀, и҆лѝ а҆́ще въмѣ́сто те́плои зи́мномъ влѣ́етъ, ᲃме́ртнѡ ꙗ҆́кѡ Престꙋ́пникъ Це́рковнагѡ преда́нїѧ, съгрѣши́тъ.

Поне́же Мате́рїѧ сі́естъ, ве́щъ Крвѐ Хв҃ой є҆́стъ Вино̀ и҆́тинное ѿ гроꙁдѡ́въ ло́ꙁныхъ и҆сто́ченое, подоба́етъ семꙋ̀ Винꙋ̀ свойстве́нный и҆мѣ́ти вкꙋ́съ и҆ ѡ҆бонѧ́нїе, и҆ къ пи́тїю прїе́мное, спосо́бное, и҆ чи́стое бы́ти.

Въ коне́цъ, къ соверше́нїю Тѣ́ла и҆ Крвѐ Хв҃ой, хлѣ́бъ на Ді́скосѣ и҆ вино̀ въ Ча́ши сꙋ́щее, въ само́мъ ѡ҆сщ҃е́нїи на Прⷭ҇то́лѣ пре́дъ І҆ре́емъ предло́женый да бꙋ́детъ, (ꙗ҆́кѡже Слꙋже́бникъ наꙋча́етъ) въ є҆́же І҆ере́ю мощѝ зрѣ́ти, и҆ рꙋко́ю покаꙁа́ти на́нѧ, внегда̀ ᲃловеса̀ Гн҃ѧ Та́йнꙋ ᲃъверша́ющаѧ, гл҃етъ: и҆́бѡ ве́щъ покаꙁа́тисѧ не мо́жетъ, то́чїю тꙋ сꙋ́щаѧ, и҆ зри́маѧ.

Ꙍ҆браꙁъ и҆лѝ съверше́нїе Тѣ́ла Хв҃а, сꙋ́тъ ᲃловеса̀ Гд҃нѧ надъ хлѣ́бомъ на Ді́скосѣ на Прⷭ҇тлѣ сꙋ́щомъ ѿ І҆ере́ѧ гл҃е́мыѧ, сі́естъ: прїимѣ́те, ꙗ҆ди́те: сі́естъ Тѣ́ло моѐ, є҆́же за́вы ломи́мое, во ѡ҆ставле́нїе грѣхѡ́въ.

Си́ми словесы̀, хлѣ́бъ пресꙋществꙋ́етсѧ, сі́естъ ᲃꙋщество̀ хлѣ́ба прелага́етсѧ и҆́стиннѡ въ Тѣ́ло Хв҃о, и҆ по и҆ꙁрече́нїи си́хъ Гд҃нихъ словесе́хъ, ᲂу҆жѐ ктомꙋ̀ про́стымъ хлѣ́бомъ не є҆́стъ ꙗ҆́коже пре́жде, по сꙋществꙋ̀ свое́мꙋ, но и҆́стиннымъ Тѣ́ломъ Хв҃ымъ.

Ꙍ҆́браꙁъ и҆лѝ съверше́нїе Крвѐ Хв҃ой, сꙋ́тъ ᲃловеса̀ Хв҃а надъ Вино́мъ и҆лѝ въ Ча́ши на Прсто́лѣ сꙋ́щомъ, ѿ І҆ере́ѧ гл҃емыѧ, сі́естъ: пі́йте ѿ неѧ̀ всѝ, сіѧ̀ бо є҆́сть кро́вь моѧ̀, но́вагѡ завѣ́та, за́вы и҆ за мнѡ́ги и҆ꙁлива́емаѧ въ ѡ҆ставле́нїе грѣхѡ́въ. Си́ми ᲃловесы̀ ᲃꙋщество̀ Вина̀ въ Кро́въ Хв҃ꙋ и҆́стиннѡ прелага́етсѧ: и҆ по и҆ꙁрече́нїи си́хъ Гд҃нихъ слове́съ, ᲂу҆жѐ ктомꙋ̀ по сꙋществꙋ̀ свое́мꙋ Вино̀ не є҆стъ про́стымъ Вино́мъ, но и҆́стинною Кро́вїю Хв҃ою. Сі́е ᲂу҆че́нїе ѡ҆ съверше́нїи Та́инъ Бжⷭ҇тве́ннагѡ Тѣ́ла и҆ Крвѐ Гд҃а на́шегѡ І҆и҃ᲃ Ха҃, є҆́стъ А҆по́столское, и҆ Ѿца̀ ᲃт҃ы́хъ ꙗ҆́коже І҆ꙍа́нъ ᲃт҃ы́й Златоꙋ́стый въ сло́вѣ свое́мъ пѧ́томъ въ Вели́кий Четверто́къ ѡ҆ ᲃт҃ѣ́й Вече́рѣ Сп҃совой, и҆ ѡ҆ І҆ю́диномъ Преда́телствѣ, свѣдителствꙋ́етъ, гл҃ѧ̀.

Предсто́итъ и҆ нн҃ѣ Хᲃ҃, Тра́пеꙁꙋ ᲃі́ю ᲂу҆краша́ѧ, и҆же бо ѻ҆́нꙋ ᲂу҆красѝ Тра́пеꙁꙋ тогда̀, то́й и҆ сі́ю ѡ҆сщ҃а́етъ нн҃ѣ: не человѣ́къ бо є҆́стъ творѧ́й предлежа́щаѧ бы́ти Тѣ́ло Хв҃о; но са́мъ Распны́йсѧ ѡ҆ на́съ Хᲃ҃. Ꙍ҆браꙁъ и҆сполнѧ́ѧй то́чїю стои́тъ І҆ере́ѷ и҆ прино́ситъ мо́лбꙋ, и҆ гл҃ы ѡ҆́ны вѣща́етъ, благода́ть же и҆ си́ла Бж҃їѧ є҆́стъ всѧ̀ сі́ѧ съдѣлова́ющаѧ, Сі́е є҆́стъ Тѣ́ло моѐ, речѐ: ᲃе́й гл҃ъ, предложе́ннаѧ претворѧ́етъ. и҆ ꙗ҆́коже ѻ҆́нъ гла́съ рекі́й, Расти́тесѧ и҆ мнѡжи́тесѧ, и҆ и҆сполнѧ́йте зе́млю: рече́ннѡ ᲂу҆́бѡ бы́сть є҆ди́ною; въ всѧ́кое же Лѣ́то быва́етъ дѣ́ло, вꙁи́маѧ є҆стествѡ̀ на́ше къ рожде́нїю: та́кѡ и҆ гла́съ се́й є҆ди́ною ᲂу҆́бѡ рече́нъ бы́сть ѿ Бжⷭ҇тве́ннагѡ ꙗ҆ꙁы́ка ѡ҆́нагѡ: на всѧ́кой же Тра́пеꙁѣ въ Церква́хъ, да́же до дне́сь, и҆ да́же до є҆гѡ̀ Прише́ствїѧ Же́ртвꙋ сверше́ннꙋю: съдѣлова́етъ.

си́це ѿ ча́сти Мате́рїи, сі́естъ ве́щи, ꙗ҆́коже и҆ Фо́рмы, сі́естъ ѻ҆́браꙁа, и҆лѝ съверше́нїѧ, ꙗ҆́коже и҆ сама́гѡ ᲃлꙋжи́телѧ, сі́естъ, Сщ҃е́нника.

Ѿ ча́сти ᲂу҆́бѡ Мате́рїи Тѣ́ла Хв҃а, сі́естъ, Хлѣ́ба, слꙋчи́тисѧ могꙋ́тъ сі́ѧ:

А҆́ще І҆ере́ѷ слꙋжа́й пре́дъ ѡ҆сщ҃енїемъ, поꙁна́етъ хлѣ́бъ на Прⷭ҇тлѣ на Ді́скосѣ къ ѡ҆сщ҃е́нїю предложе́ный, бы́ти растлѣ́нный, и҆лѝ жи́тный, и҆лѝ ма́ло прицви́лый, и҆лѝ прѣ́сный: а҆́бїе да ѿло́житъ се́й, да во́ꙁметъ же и҆́ный свѣ́жїй и҆ чи́стый пшени́чный, и҆ и҆ꙁре́къ надъ ни́мъ ти́хѡ: Въспомина́нїе Гд҃а Бг҃а и҆ Сп҃са на́шегѡ І҆и҃ᲃ Ха҃: и҆ всѧ̀ про́чаѧ Проскомиде́йнаѧ, ꙗ҆́же надъ А҆́гнцемъ, да и҆ꙁима́етъ А҆́гнецъ ѡ҆бы́чнѡ, и҆ положи́въ є҆гѡ̀ на ᲃт҃о́мъ Ді́скосѣ, да жре́тъ и҆ пробода́етъ. и҆ та́кѡ ѿ не́гоже мѣ́ста пре́дъ ѡ҆сщ҃е́нїемъ преста̀, да начне́тъ и҆ ѡ҆ст҃и́тъ, и҆ ѡ҆бы́чнѡ слꙋ́жбꙋ съверши́тъ.

А҆́ще же пре́дъ и҆ꙁрече́нїемъ ᲃамы́хъ Бжⷭ҇тве́нныхъ ᲃлове́съ, поꙁна́нїе сі́е бꙋ́детъ, да начне́тъ ѿ моли́твы: Съ симѝ и҆ мы̀ блаже́нными ᲃи́лами, повтарѧ́ѧ, и҆ та́кѡ всѧ̀ порѧ́дꙋ да съверши́тъ.

Си́це ᲂу҆́бѡ тво́ритъ по всемꙋ̀, а҆́ще по Проскоми́дїи пре́дъ вели́кимъ Вхо́домъ, и҆лѝ по Вѣхо́дѣ, каковѣ́мъ ли́бѡ бꙋ́ди ѡ҆́браꙁомъ, не ѡ҆брѧ́щетсѧ А҆́гнецъ на Ді́скосѣ, сі́естъ, и҆лѝ чꙋдо́внѣ, и҆лѝ ѿ мы́ши вꙁѧ́тъ, и҆лѝ ѿпа́лъ бꙋ́детъ, и҆ ника́коже ѡ҆брѣсти́сѧ въꙁмо́жетъ.

А҆́ще же по ѡ҆сщ҃е́нїи поꙁна́нїе си́цево бꙋ́детъ, та́кожде по пре́дъ ᲂу҆каꙁа́нномꙋ да тво́ритъ: вꙁе́мъ Про́сфорꙋ и҆́нꙋю пшени́чнꙋю свѣ́жꙋю, и҆ всѧ̀ Проскомиді́йнаѧ надъ не́ю и҆ и҆ꙁрекъ, да и҆ꙁме́тъ А҆́гнецъ, и҆ ѿ Моли́твы: съ симѝ блаже́нными си́лами, да начне́тъ, и҆ ѡ҆бы́чнѡ ѡ҆ст҃и́тъ, и҆ Слꙋ́жбꙋ съверши́тъ.

Пе́рвый же А҆́гнецъ по Причаще́нїи Бжⷭ҇твенна́гѡ Тѣ́ла и҆ Крвѐ, и҆лѝ на Жерто́вницѣ съ ѡ҆ста́нки Бжⷭ҇тве́нныхъ Та́инъ, по ѿнесе́нїи на Жерто́внице да потреби́тъ.

А҆́ще же въ само́мъ Причаще́нїи потреби́въ Ча́стъ, сі́е да поꙁна́етъ: да тво́ритъ по преднаписа́нномꙋ, сі́естъ, вꙁе́мъ свѣ́жꙋю пшени́чнꙋю Про́сфорꙋ, и҆ и҆ꙁре́къ надъ не́и, и҆ сътвори́въ всѧ̀ Проскомиді́йнаѧ, да и҆ꙁме́тъ А҆́гнецъ, закала́етъ же и҆ пробода́етъ, и҆ ѿ сегѡ̀ мѣ́ста да начне́тъ: Въ но́щъ въ ню́же преда́нъ быва́ше, и҆ Словеса̀ Гд҃нѧ ꙗ҆́же надъ хлѣ́бомъ и҆ꙁре́къ, да ѡ҆ст҃и́тъ, надъ Ча́шею же ничто́же гл҃ѧ, да премина́етъ: да чте́тже Моли́твꙋ, помина́юще ᲂу҆бѡ: и҆ Твоѧ̀ ѿ твои́хъ и҆ꙁре́къ, Да поднесе́тъ то́чїю Ді́скосъ съ Бжⷭ҇тве́ннымъ А҆́гнцемъ. И҆ по се́мъ да чте́тъ Моли́твꙋ. Е҆щѐ прино́симъ тебѣ̀: и҆ Гд҃и Прⷭ҇та́гѡ твое́гѡ Дх҃а, съ ᲃтіха́ми: И҆ надъ ᲃт҃ы́мъ А҆́гнцемъ да гл҃етъ: И҆ сътворѝ ᲂу҆́бѡ хлѣ́бъ се́й чⷭ҇тное Тѣ́ло Ха҃ твое́гѡ: И҆ блⷭ҇влѧ́ѧ ᲃт҃ы́й хлѣ́бъ то́чїю, да гл҃етъ: Преложи́въ є҆гѡ̀ Дх҃омъ ᲃт҃ы́мъ: надъ Ча́шею же ничто́же да гл҃етъ, поне́же ᲂу҆жѐ всѧ̀ и҆ꙁрече́нна бы́ша. Да чте́тъ же и҆ Моли́твꙋ, Ꙗ҆́коже бы́ти причаща́ющимсѧ: Всѧ́же сі́ѧ та́йнѡ да гл҃етъ, ничто́же вто́рое воꙁглаша́ѧ, и҆ та́кѡ да причасти́тсѧ Бжⷭ҇тве́ннагѡ Тѣ́ла, и҆ по се́мъ Крвѐ Бжⷭ҇тве́нной: и҆ по рѧ́дꙋ да соверши́тъ Бжⷭ҇тве́ннꙋю слꙋ́жбꙋ.

А҆́ще же ᲂу҆́бѡ пре́дъ ѡ҆сщ҃е́нїемъ поꙁна́етъ ꙗ҆́коже пре́дъ рече́сѧ, хлѣ́бъ не бы́ти прили́чный, сі́естъ спосо́бный, къ съверше́нїю въ не́мъ Та́йны Тѣ́ла Хв҃а, и҆́нагѡ же хлѣ́ба спосо́бнагѡ ника́коже тогда̀ приѡбрѣстѝ въꙁмо́жетъ, а҆́бїе да преста́нетъ ᲃлꙋжи́ти.

А҆́ще же по ѡ҆сщ҃е́нїи, ᲃі́е поꙁна́ет, и҆ не бꙋ́детъ и҆́нагѡ хлѣ́ба, да не преста́нетъ слꙋжи́ти, но да съверши́тъ.

Но ᲂу҆́бѡ ѽ І҆ере́ю, а҆́ще си́хъ всѣ́хъ слꙋча́евъ и҆ꙁбегнꙋти (па́че же въ ни́хъ ᲃме́ртнагѡ грѣха̀) хо́щеши, всегда̀ Про́сфоры пекꙋ́щагѡ, и҆лѝ пекꙋ́щꙋю ᲂу҆́помина́й, и҆ са́мъ надꙁира́й є҆́же ѿ чⷭ҇тыѧ и҆ свѣ́жїѧ нестꙋ́хлые мꙋкѝ Про́сфоры и҆спечѝ: къ семꙋ̀ же Про́сфорою велмѝ чи́рствою, сі́естъ, коликодне́вною, нико́лиже слꙋжи́ти дерꙁнѝ, но всегда̀ вчера̀ и҆спе́ченою.

На́дъ все́же нико́лиже Проскомі́дїю не начина́й, до́ндеже са́мъ Про́сфорꙋ въ рꙋцѣ̀ вꙁе́мъ, не и҆скꙋси́ши, а҆́ще є҆́стъ ѿ чⷭ҇тыѧ Пшени́цы, а҆́ще є҆́стъ ква́сна, а҆ не прѣ́сна, а҆́ще же свѣ́жа, а҆́ще не ѿ стꙋ́хлыѧ, сі́естъ, слежа́лыѧ, и҆лѝ Жи́тныѧ мꙋкѝ, ни́же съ и҆́нною смѣ́шанаѧ: а҆́ще же ᲂу҆́бѡ све́рхꙋ зрѣ́нїемъ и҆ ѡ҆бонѧ́нїемъ не поꙁна́еши, преломѝ є҆динꙋ̀ Про́сфорꙋ и҆ си́це и҆ꙁвнѣ̀ и҆ ѿвнꙋ́тръ, и҆ зрѣ́нїемъ и҆ ѡ҆бонѧ́нїемъ всѧ̀ сво́йства пшени́чнагѡ ква́снагѡ до́брагѡ хлѣ́ба поꙁна́еши, и҆ си́це а҆́ще спосо́бный бꙋ́детъ хлѣ́бъ къ ᲃлꙋже́нїю. Начнѝ и҆ съвершѝ Бж҃їю слꙋ́жбꙋ, и҆ та́кѡ нико́лиже ѿ ча́сти хлѣ́ба погрѣши́ши, и҆ кро́мѣ ᲂу҆сꙋмнѣ́нїѧ, и҆ всѧ́кагѡ смꙋще́нїѧ Лѵтꙋргиса́ти бꙋ́деши, чⷭ҇тꙋю и҆ ми́рнꙋю и҆мѣ́ѧй со́вѣсть.

А҆́ще І҆ере́ѷ пре́дъ ѡ҆сщ҃е́нїемъ Крвѐ, по ѡ҆сщ҃е́нїи Тѣ́ла, поꙁна́етъ ꙗ҆́кѡ Вина̀ въ Ча́ши нѣ́стъ, то́чїю Вода̀, да и҆ꙁлѣ́етъ ѻ҆́нꙋю Во́дꙋ въ нѣ́кїй чⷭ҇тый и҆ чⷭ҇тный съсꙋ́дъ, и҆ а҆́бїе да влѣ́етъ Вино̀ и҆ ма́ло ѿ Воды̀, гл҃ѧ̀: И҆ є҆ди́нъ ѿ Во́инъ Ко́пїемъ Ребра̀ є҆мꙋ̀ прободѐ, и҆ а҆́бїе иъꙁы́йде Кро́въ и҆ Вода̀, и҆ видѣ́вый свѣдителствова̀, и҆ и҆́стинно є҆́стъ свѣди́телство є҆гѡ̀. По се́мже а҆́бїе да ѡ҆ст҃и́тъ начина́ѧ ѿ ѡ҆́вѣхъ слове́съ: Та́кожде и҆ Ча́шꙋ по Вече́ри гл҃ѧ̀, и҆ проч.: А҆́ще же по и҆ꙁрече́нїи слове́съ ѡ҆сщ҃е́нїѧ поꙁна́етъ ꙗ҆́кѡ нѣ́сть Вина̀ въ ᲃт҃о́й Ча́ши, то́чїю Вода̀, та́кожде да тво́ритъ и҆ гл҃етъ, ꙗ҆́коже рече́сѧ.

А҆́ще же въ и҆́ный сосꙋ́дъ, въ Ча́шꙋ же да влѣ́етъ Вино̀ и҆ ма́лѡ Воды̀, ᲃловеса̀ предре́ченнаѧ глѧ̀, сі́естъ: И҆ є҆ди́нъ ѿ Во́инъ Ко́пїемъ Ребра̀ є҆мꙋ̀ прободѐ, и҆ проч.: И҆ а҆́бїе наче́нъ ѿ слове́съ: Та́кожде и҆ Ча́шꙋ по Вече́ри гл҃ѧ̀: Пе́йте ѿ не́ѧ вси: Сі́ѧ же ти́хѡ гл҃ѧ̀, да ѡ҆ст҃и́тъ: да чте́тъ же и҆ Моли́твꙋ, помина́юще ᲂу҆́бѡ: И҆ ма́лѡ подносѧ̀ Бжⷭ҇тве́ннꙋю Ча́шꙋ, да гл҃етъ: Твоѧ̀ ѿ твои́хъ. Да чте́тъ же и҆ Моли́твꙋ. Е҆щѐ прино́симъ тебѣ̀; Та́кожде, и҆ Гд҃и Прⷭ҇тагѡ свое́гѡ Дх҃а съ ᲃтыѝ є҆гѡ̀: И҆ минꙋ́въ ꙗ҆́же надъ ᲃт҃ымъ Хлѣ́бѡмъ, да гл҃етъ: Блⷭ҇вѝ Влады́кѡ ᲃт҃ꙋ́ю Ча́шꙋ. И҆ сі́е: А҆ є҆́же въ Ча́ши се́й сътворѝ бы́ти Кро́въ Ха҃ твое́гѡ. И҆ блⷭ҇влѧ́ѧ Ча́шꙋ то́чїю, да гл҃етъ: Преложи́въ є҆̀ Дх҃омъ твои́мъ ᲃт҃ымъ и҆ про́чаѧ: всѧ̀ Моли́твы да гл҃етъ по рѧ́дꙋ да́же до причаще́нїѧ: И҆ та́кѡ причасти́всѧ ѡ҆бы́чнѡ бжⷭ҇тве́ннꙋю слꙋ́жбꙋ да соверши́тъ.

Та́кожде а҆́ще пре́дъ ѡ҆сщ҃е́нїемъ, и҆лѝ по ѡ҆сщ҃е́нїи, и҆лѝ въ само́мъ причаще́нїи поꙁна́етъ, ꙗ҆́кѡ Вино̀ въ ѡ҆́цетъ претво́рено є҆́стъ, и҆лѝ всѧ́кѡ растлѣ́ннѡ, и҆ꙁлїѧ́въ ѡ҆́цетъ, да влѣ́етъ Вино̀ и҆ ма́лѡ Воды̀, проскоми́дїйнаѧ гл҃ѧ̀: и҆ ѿ слове́съ пре́дъ рече́нныхъ, сі́естъ: Та́кожде и҆ ча́шꙋ по Вече́ри, гл҃ѧ̀: наче́нъ всѧ̀ по пре́дъ ᲂу҆каꙁа́нномꙋ да съверши́тъ.

Во́дꙋ же ѡ҆́нꙋю, по съверше́нїи бжⷭ҇тве́нной ᲃлꙋ́жбы, и҆ по потребле́нїю ѡ҆ста́нкѡвъ Бжⷭ҇тве́нныхъ Та́инъ, въ ᲃтꙋ́ю Чашꙋ вмѣ́сто ѡ҆чище́нїѧ да влѣ́етъ, и҆ потреби́тъ. та́кожде и҆ ѡ҆́цетъ, и҆лѝ Вино̀ растлѣ́нное, а҆́ще въкꙋше́нїю прїѧ́тнѡ бы́ти мо́жет, да потреби́тъ. А҆́ще же непрїѧ́тнѡ бꙋ́детъ, подъ ᲃт҃о́ю Тра́пеꙁою ꙗ҆́мꙋ и҆скопа́въ, да влѣ́етъ, и҆ па́ки тое́южде земле́ю да покры́етъ: лꙋ́чше же бꙋ́детъ а҆́ще въ текꙋ́щꙋю Рѣкꙋ̀ и҆ꙁли́етъ.

А҆́ще же въ Проскоми́дїи забꙋ́детъ І҆ере́ѷ влѣ́ти Во́дꙋ къ Винꙋ̀, въ ᲃт҃ꙋю Ча́шꙋ, въспомѧне́тъ же сі́е пре́дъ ѡ҆сщ҃е́нїемъ ᲃт҃ы́ѧ Ча́ши, да влѣ́етъ а҆́бїе ма́лѡ воды̀, гл҃ѧ̀: ᲃловеса̀ ѡ҆́ны, И҆ є҆ди́нъ ѿ Во́инъ Ко́пїемъ Ребра̀ є҆мꙋ̀ прободѐ, и҆ а҆́бїе иъꙁы́йде Кро́въ и҆ Вода̀, и҆ видѣ́вый свѣдителствова̀, и҆ и҆́стинно є҆́стъ свѣди́телство є҆гѡ̀.

А҆́ще бо не влѣ́етъ въспомѧнꙋ́въ, ꙗ҆́кѡ не влѣѧ̀ ᲃме́ртнѡ съгрѣши́тъ.

А҆́ще же по ѡ҆сщ҃е́нїи ᲃт҃ы́ѧ Ча́ши сі́е въспомѧне́тъ, ника́коже да влѣ́етъ, раꙁвѣ̀ то́чїю ѡ҆бы́чнꙋю теплотꙋ̀ въ своѐ вре́мѧ: и҆бѡ̀ влѣѧ́нїе Воды̀ къ Винꙋ̀, въ ᲃт҃о́й Лѵтꙋ́ргїи нѣ́сть ѿ нꙋ́жды Та́йны, но то́чїю Церкѡ́вное ᲂу҆ꙁаконе́нїе.

Да ᲂу҆́бѡ и҆ꙁбѣ́гнꙋти воꙁмо́жеши ѽ І҆ере́ю всѣ́хъ си́хъ слꙋ́чаевъ, и҆ въ ни́хъ ᲃме́ртнагѡ грѣха̀, потщи́сѧ всегда̀ свѣ́жее и҆мѣ́ти Вино̀, и҆ нѐ надо́лꙁѣ сі́е хранѝ. Е҆гда́же проскомиса́ти хо́щеши, съ пе́рвыхъ Вино̀ вꙁе́мъ зрѝ до́брѣ а҆́ще не сплѣснѣ́ло є҆́стъ, и҆ ѡ҆бонѧ́й а҆́ще не зоцтѣ́ло, и҆ а҆́ще не спосо́бное къ ᲃлꙋже́нїю бꙋ́детъ, ᲃлꙋжи́ти не дерꙁа́й, и҆ та́ко и҆ꙁбѣ́гнеши си́хъ всѣ́хъ бѣ́дъ.

Недоста́тчества и҆ слꙋ́чаѧ ѿ ча́сти Фо́рмы приключи́тисѧ могꙋ́тъ сі́ѧ: А҆́ще что̀ недоста́нетъ ѿ слове́съ тѣ́хъ, и҆́ми же ѡ҆сщ҃е́нїе съдѣлова́етсѧ и҆ съверша́етъ. Словеса̀ же соверше́нїѧ и҆ ѡ҆сщ҃е́нїѧ Та́йны Тѣ́ла Гд҃нѧ сꙋ́тъ сі́ѧ: Прїймѣ́те ꙗ҆ди́те, сі́е є҆́стъ Тѣ́ло моѐ, за́вы ломи́мое въ ѡ҆ставле́нїе грѣхѡ́въ;

Съверше́нїѧ же и҆ ѡ҆сщ҃е́нїѧ Крвѐ Гд҃не́й, сі́ѧ сꙋ́тъ: Пе́йте ѿ не́ѧ всѝ, сі́ѧ є҆́стъ Кро́въ моѧ̀ но́вагѡ завѣ́та, за́вы и҆ за мно́ги и҆ꙁлива́емаѧ въ ѡ҆ставле́нїе грѣхѡ́въ;

А҆́ще ᲂу҆́бѡ І҆ере́ѷ сі́ѧ ᲃловеса̀ ᲂу҆мали́тъ, сі́естъ, не всѧ̀ соверше́ннѣ и҆ꙁрече́тъ, но то́чїю часть ѿ ни́хъ нѣ́кꙋю, и҆ Та́йнꙋ не съверши́тъ, и҆ ᲃа́мъ ᲃме́ртнѡ съгрѣши́тъ. Та́кожде а҆́ще и҆́наѧ бы ᲃловеса̀ смѣси́лъ съ Гд҃ними словесы̀ є҆́же замена́нїе и҆́хъ раꙁмѣси́ти, є҆́же немощѝ поꙁна́тисѧ и҆́хъ свойстве́нное знамена́нїе, и҆ Та́йнꙋ не съверши́тъ, и҆ самъ ᲃме́ртнѡ сгрѣши́тъ.

А҆́ще же І҆ереѷ дерꙁнꙋ́лъ бы къ Гд҃ни́мъ словесе́мъ ничто̀ ѿ себѣ̀ приложи́ти, ᲃловеса̀ Гд҃нѧ не премѣнѧ́ѧ, ни́же ᲂу҆малѧ́ѧ, Та́йнꙋ ᲂу҆́бѡ съверши́тъ, са́мъ же сме́ртнѡ съгрѣши́тъ.

А҆́ще І҆ере́ѷ слꙋжа́й забы́лъ бы, ꙗ҆́кѡ и҆ꙁре́клъ є҆́стъ Гд҃нѧ ᲃловеса̀ надъ Хлѣ́бомъ, и҆ надъ Вино́мъ, и҆ въ недоꙋмѣ́нїю, сі́естъ въ вонтпли́вости ѡ҆ ѡ҆сще́нїи Та́йны бы́лъ бы, да не смꙋща́етсѧ, но поти́хꙋ въ ᲂу҆мѣ̀ сво́емъ по́мыслъ си́цевый имѣ́ѧ, а҆́ще не ѡ҆сщ҃е́нны сꙋ́тъ предлеща́щїѧ Да́ры, сі́естъ Хле́бъ и҆ Вино̀ нн҃ѣ ѡ҆сщ҃а́ютсѧ мно́ю, да гл҃етъ надъ ни́ми Гнъⷭ҇ѧ ᲃловеса̀, наче́нъ ѿ сегѡ̀ мѣ́ста: Вно́щъ въни́же преда́нъ быва́ше, прїимъ Хлѣ́бъ въ ᲃт҃ы́ѧ своѧ̀. и҆ Прчⷭ҇тыѧ, и҆ непоро́чныѧ Рꙋ́цѣ, благодари́въ, блⷭ҇ви́въ, ѡ҆ст҃и́въ, преломи́въ, дадѐ ᲃт҃ы́мъ свои́мъ Ꙋчн҃комъ и҆ А҆по́столѡмъ ре́къ: Прїймѣ́те ꙗ҆ди́те, сі́е є҆́стъ Тѣ́ло моѐ, и҆ проч.: И҆ надъ Ча́шею та́кожде, ничто́же ѡ҆ставлѧ́ѧ да гл҃етъ, и҆ проч.; Моли́твы всѧ̀ да́же до конца̀ да соверши́тъ.

Въ коне́цъ же, вѣ́стнѡ бꙋ́ди всѣ́мъ І҆ере́ꙍмъ, ꙗ҆́кѡ є҆гда̀ ᲃъбо́ромъ Лѵтꙋргиса́ете, ни є҆ди́номꙋ ѿ ва́съ не досто́итъ предвари́ти началствꙋ́ющагѡ въ и҆ꙁреченїи Гнъⷭ҇ихъ слове́съ, ꙗ҆́же сꙋ́тъ: Прїймѣ́те ꙗ҆ди́те, и҆ про́чаѧ, Пі́йте ѿ не́ѧ всѝ, сі́ѧ є҆́стъ Кро́въ, моѧ̀, и҆ проч.: Но и҆лѝ съ ни́мъ кꙋпнѡ є҆дино́ю и҆ꙁрещѝ, и҆лѝ ничто́же гл҃а́ти ѿ си́хъ, и҆бѡ̀ началствꙋ́ѧй є҆ди́нъ довлѣ́етъ къ ѡ҆сщ҃е́нїю. А҆́ще же кото́рый предъвари́тъ началствꙋ́ющагѡ, то́й ѡ҆ст҃и́тъ. Началствꙋ́ѧй же тꙋнѐ по се́мъ и҆ꙁрече́тъ, ᲂу҆жѐ ѡ҆сщ҃е́ннымъ сꙋ́щимъ Та́йнамъ. Тѣ́мже ᲂу҆́бѡ да нѐ толи́кое беꙁчи́нїе въ си́це стра́шной и҆ превели́кой Та́йнѣ съдѣлова́но бꙋ́детъ, и҆лѝ не гл҃а́ти ѡ҆сщ҃енїѧ ᲃловеса̀, и҆лѝ кꙋ́пнѡ (ꙗ҆́коже пре́дъ рече́сѧ) съ нача́лникѡмъ сі́ѧ и҆ꙁрещѝ всѧ́кѡ подоба́етъ.

А҆́ще І҆ере́ѷ Лѵтꙋргиса́ѧй пре́жде ѡ҆сщ҃е́нїѧ Тѣ́ла и҆ Крвѐ Гд҃не́й, тѧ́жкѡ раꙁболи́тсѧ, ꙗ҆́кѡ ѿню́дъ не мощѝ є҆мꙋ̀ дѣѝствова́ти, и҆лѝ а҆́бїе напра́снѡ ᲂу҆мре́тъ, слꙋ́жба ѡ҆ставлѧ́етсѧ, и҆ престае́тъ. А҆́ще же по ѡ҆сщ҃е́нїи сі́е приклю́читсѧ; и҆́нымъ сщ҃е́нникѡмъ (а҆́ще та́мѡ бꙋ́детъ) да соверши́тсѧ Бжⷭ҇твеннаѧ Лѵтꙋ́ргїѧ, наче́нъ ѿ мѣ́ста єго́же пе́рвый преста̀. Аще же раꙁболѣ́выйсѧ І҆ере́ѷ не ᲂу҆мрѐ пожи́въ є҆стъ, и҆ мо́жетъ Бжⷭ҇тве́нныѧ Та́йны прїѧ́ти, въ є҆гѡ̀ мѣ́сто слꙋжа́й да ѿло́митъ малꙋ́ю Ча́сть ᲃт҃гѡ А҆́гнца, и҆ Ло́жицею Бжⷭ҇твенныѧ Крв̀ъ поче́рпъ да причасти́тъ є҆гѡ̀, са́мъ же по чи́нꙋ да причасти́тсѧ, и҆ соверши́тъ слꙋ́жбꙋ ѡ҆бы́чнѡ.

А҆́ще тогда̀ и҆́нагѡ І҆ере́ѧ не бꙋ́детъ є҆́же съверши́ти слꙋ́жбꙋ, и҆ потреби́ти ᲃт҃а́ѧ, ѿ благоговѣ́нныхъ и҆ чи́стыхъ мꙋже́й кто̀ вꙁе́мъ Покро́вецъ не прикаса́ѧсѧ наго́ю рꙋко́ю да покры́етъ добрѣ̀ ᲃт҃а́ѧ, є҆́же ничесо́мꙋже мощѝ внитѝ на Ді́скосъ, и҆лѝ въ ᲃт҃ꙋ́ю Ча́шꙋ, до́ндеже и҆́ный ᲃщ҃е́нникъ прїйде́тъ: и҆́же прише́дъ, да съверши́тъ Бжⷭ҇тве́ннꙋю слꙋ́жбꙋ соверше́ннѡ, наче́нъ ѿ Проскоми́дїи, и҆ но́вый А҆́гнецъ и҆ꙁе́мъ, и҆ ѡ҆бы́чнѡ въ слꙋже́нїи да ѡ҆ст҃и́тъ. По потребле́нїи же но́вагѡ ѡ҆сщ҃е́ннагѡ А҆́гнца, да потреби́тъ и҆ дре́внїй А҆́гнецъ, и҆ Кро́въ Бжⷭ҇тве́ннꙋю и҆спі́етъ, и҆лѝ въсы́павъ въ ᲃт҃ꙋю Ча́шꙋ, всѧ̀ въкꙋ́пѣ на Жерто́вницѣ да потреби́тъ.

А҆́ще же пре́дъ ѡ҆сщ҃е́нїемъ ᲃт҃ы́хъ Да́рѡвъ, сі́е приключи́сѧ, и҆́ный, и҆лѝ и҆ то́йжде І҆ере́ѷ та́кожде Лѵтꙋргиса́въ съверше́ннѡ, по ѿнесе́нїи на Жерто́вникъ Бжⷭ҇тве́нныхъ Та́инъ, и҆ по потребле́нїи и҆́хъ, да потреби́тъ и҆ ѡ҆ста́влъшїй Хлѣ́бъ и҆ Вино̀, но нѐ ꙗ҆́коже Тѣ́ло и҆ Кро́въ Хв҃ꙋ, но ꙗ҆́коже блⷭ҇ве́нный Хлѣ́бъ и҆ Вино̀. А҆́ще же надолꙁѣ̀ ᲃт҃ы́ѧ Да́ры, и҆лѝ ѡ҆сщ҃е́нны, и҆лѝ не ѡ҆сщ҃е́нны по си́цевомъ слꙋ́чаи, не сꙋ́щꙋ ᲃщ҃е́нникꙋ растлѣ́ютсѧ, сі́естъ сплѣснѣ́ютъ, и҆ Хлѣ́бъ и҆ Вино̀, и҆ и҆ꙁъѡцтѣ́етъ, ꙗ҆́кѡ не мощѝ и҆́мъ къ потребле́нїю прїе́мнымъ бы́ти, ᲃщ҃е́нникъ сі́ѧ въꙁе́мъ въ текꙋ́щꙋ́ю Рѣкꙋ̀ да всы́плетъ.

А҆́ще кото́рый І҆ере́ѷ кро́мѣ си́цевагѡ ᲃлꙋ́чаѧ Лѵтꙋргиса́въ не причасти́тсѧ, Бжⷭ҇тве́ннымъ Та́йнамъ, тѧ́жкѡ ᲃме́ртнѡ велмѝ съгрѣша́етъ, и҆ и҆ꙁверже́нїѧ винꙋ̀ подлѣга́етъ.

А҆́ще пре́дъ ѡ҆сщ҃е́нїемъ ᲃт҃ы́хъ Да́рѡвъ, мꙋ́ха въпа́днетъ въ ᲃт҃ꙋ́ю Ча́шꙋ, да и҆ꙁме́тсѧ и҆ въ папѣ́ръ ѡ҆бви́та сожже́на да бꙋ́детъ.

А҆́ще же Паꙋ́къ, и҆лѝ и҆́но что̀ ꙗ҆дови́тое, да и҆ꙁлѣѧ́но бꙋ́детъ Вино̀ ѿ ᲃт҃ы́ѧ Ча́ши, въ и҆́ный чⷭ҇тный ᲃъсꙋдъ, въ ᲃт҃ꙋю же Ча́шꙋ, и҆́ное Вино̀ и҆ ма́лѡ Воды̀ да влѣ́етсѧ ѿ І҆ере́ѧ, гл҃ѧ̀ сі́ѧ ᲃловеса̀: И҆ є҆ди́нъ ѿ Во́инъ Ко́пїемъ Ребра̀ є҆мꙋ̀ прободѐ, и҆ а҆́бїе и҆ꙁы́йде Кро́въ и҆ Вода̀, и҆ видѣ́вый свѣдителствова̀, и҆ и҆́стинно є҆́стъ свѣди́телство є҆гѡ̀: и҆ та́ко да соверши́тъ Бжⷭ҇тве́ннꙋю слꙋ́жбꙋ ѡ҆бы́чнѡ. По соверше́нїи же слꙋ́жбы, Вино̀ ѡ҆́ное да и҆ꙁлѣ́етъ въ текꙋ́щꙋю Рѣкꙋ̀.

А҆́ще же по ѡ҆сщ҃е́ниїи сі́е бꙋ́детъ, и҆ стра́шнѡ, и҆лѝ мерꙁъкѡ бꙋ́детъ, І҆ере́ю въпа́дшее съ Бжⷭ҇тве́нною Кро́вїю поглоти́ти, сохра́ннѡ съ всѧ́кимъ соблюде́нїемъ да и҆ꙁме́тъ въпа́дшее, є҆́же не ᲂу҆ка́нꙋти нигде́же ничто́же ѿ Бжⷭ҇твенныѧ Крвѐ, надъ и҆́нымъ же Поти́ромъ, и҆лѝ чⷭ҇тнымъ съсꙋ́домъ Вино́мъ три́жды до́брѣ да и҆ꙁмы́етъ и҆ꙁъѧ́тое, Вино́же да соблюде́тъ, и҆ꙁѧ́тое же да сви́етъ въ Папѣръ, и҆лѝ въ нѣ́кое чⷭ҇тое Полоте́нце, и҆ по соверше́нїи Бжⷭ҇твенныѧ слꙋ́жбы, живо́тно ѡ҆́ное съ папѣ́ромъ, и҆лѝ Полоте́нцемъ, на Пли́нфе, и҆лѝ на чⷭ҇томъ Ка́мени да сожже́тъ, пе́пелъ же подъ сто́ю Тра́пеꙁою да въкопа́етъ, и҆лѝ и҆де́же ᲂу҆мове́нїе Рꙋ́къ быва́етъ да всы́плетъ: Вино́же ѡ҆́ное, и҆́мже живо́тнѡ и҆ꙁъѧ́тое и҆ꙁмове́но бы́сть, въ текꙋ́щꙋю Рѣкꙋ̀ да и҆ꙁлѣ́етъ. А҆́ще же Рѣка̀ дале́че бꙋ́детъ, подъ Прⷭ҇то́лъ ꙗ҆́мꙋ и҆скопа́въ и҆де́же нога́ма попира́но не быва́етъ, да влѣ́етъ, и҆ закры́етъ. А҆́ще же не стра́шнѡ є҆мꙋ̀, ни́же ме́рꙁкѡ бꙋ́детъ, съ Бжⷭ҇твенною Кро́вїю да потреби́тъ.

А҆́ще зимѣ̀ Кро́въ Бжⷭ҇тве́ннаѧ въ Ча́ши и҆ꙁме́рꙁнетъ, І҆ере́ѷ согрѣва́ѧ Покро́вци надъ ѡ҆гне́мъ, да ѡ҆бвива́етъ и҆́ми ᲃт҃ꙋ́ю Ча́шꙋ до́ндеже ѿме́рꙁнетъ, и҆лѝ въ кипѧ́щий ᲂу҆кро́пъ въпꙋсти́въ ᲃт҃ꙋ́ю ча́шꙋ, да де́ржитъ сохра́ннѡ, є҆́же не влѣѧ́тисѧ въ не́й ѿ ᲂу҆кро́па что̀, до́ндеже ѿме́рꙁнетъ.

А҆́ще что̀ ѿ Бжⷭ҇тве́нныѧ Крвѐ нерадѣ́нїемъ ᲃлꙋжа́щегѡ І҆ере́ѧ ᲂу҆канетъ, ᲃме́ртнѡ съгрѣши́тъ: А҆́ще кадо́вцѣ ᲂу҆канетъ, (и҆ а҆́ще воꙁмо́жнѡ бꙋ́детъ є҆мꙋ̀ склони́тисѧ и҆ дости́гнꙋти,) ꙗ҆ꙁы́комъ да и҆ꙁли́жетъ, А҆́ще же невоꙁмо́жнѡ, гꙋ́бою до́брѣ да истере́тъ, по се́мже до́скꙋ ѡ҆стрꙋга́въ, а҆ ѡ҆стрꙋ́жины на Пли́нѳи, и҆лѝ на чⷭ҇томъ Ка́мени да сожже́тъ, пе́пелъ же подъ Прⷭ҇тлъ да въкопа́етъ. А҆́ще же на землѝ го́лой ᲂу҆ка́нетъ, да ѡ҆стрꙋже́но бꙋ́детъ мѣ́сто на не́мже ᲂу҆канꙋ̀, ѡ҆стрꙋ́жины же да сожгꙋ́тсѧ, и҆ подъ Прⷭ҇тлъ да сокры́ютъ. А҆́ще же на Ка́мени, та́кжде а҆́ще воꙁмо́жнѡ, да и҆ꙁлиꙁа́но бꙋ́детъ, и҆лѝ гꙋ́бою собра́на и҆ подъ Прⷭ҇тлъ и҆сцѣ́дена да бꙋ́детъ.

А҆́ще на И҆нди́тїѧхъ Тра́пеꙁныхъ ᲂу҆канетъ Бжⷭ҇тве́ннаѧ Кро́въ, и҆лѝ на А҆нтіми́сѣ, ᲂу҆сты пе́рвїе да ѡ҆смо́кчетъ, по се́мъ же Антіми́сною Гꙋ́бою до́брѣ да ѡ҆тре́тъ: по соверше́нїи же Бжⷭ҇твенныѧ слꙋ́жбы И҆нди́тїѧ съ ᲃт҃о́й Тра́пеꙁы сне́мъ, мѣ́сто то́чїю на не́мъ же Бжⷭ҇тве́ннаѧ Кро́въ ᲂу҆канꙋ̀, подло́житъ ᲃт҃ꙋ́ю Ча́шꙋ, и҆лѝ А҆нтидѡ́рное блю́до три́жды чⷭ҇тою водо́ю са́мъ І҆ере́ѷ да и҆ꙁмы́етъ, во́дꙋ же ѻ҆́нꙋю въ текꙋ́щꙋю Рѣкꙋ̀, и҆лѝ ꙗ҆́мꙋ подъ ᲃт҃о́ю тра́пеꙁою и҆скопа́въ да и҆ꙁлѣ́етъ: Инди́тїѧ же и҆ꙁсꙋши́въ, па́ки да ѡ҆блече́тъ и҆́ми ᲃт҃ꙋ́ю Тра́пеꙁꙋ.

А҆́ще на покро́вецъ, и҆лѝ на ᲃт҃ꙋ́ю Ѻ҆де́ждꙋ Кро́въ ᲃт҃а́ѧ ᲂу҆канетъ, пе́рвѣе ᲂу҆сты̀ да ѡ҆смо́кчетъ до́брѣ, пото́мъ же гꙋ́бою да ѡ҆тре́тъ. По соверше́нїи же Слꙋ́жбы три́жды да и҆ꙁмы́етъ водо́ю до́брѣ надъ Антидѡ́рнымъ блю́домъ, и҆ꙁмове́нїе же подъ Прⷭ҇то́лъ ꙗ҆́мꙋ и҆скопа́въ да и҆ꙁлѣ́етъ.

А҆́ще на подно́жномъ подъсла́номъ сꙋкнѣ̀, и҆лѝ ко́врѣ ᲂу҆ка́нетъ Бж҃естве́ннаѧ Кро́въ, гꙋ́бою пре́жде є҆ю́же ѡ҆тира́етсѧ ᲃт҃а́ѧ Ча́ша, мокрота̀ да ѡ҆третсѧ, по се́мъ да и҆ꙁмы́етсѧ до́брѣ мѣ́сто на не́же ᲂу҆канꙋ̀, надъ А҆нтидѡ́рнымъ блю́домъ, и҆ да ѿрѣ́ꙁанъ бꙋ́детъ пла́тъ ѻ҆́нъ мо́крый, и҆ на ка́мени съжже́нъ: пе́пелъ же и҆ вода̀ и҆мже и҆ꙁмы́сѧ, да и҆ссыплю́тсѧ въ зе́млю подъ Прⷭ҇то́ломъ, и҆ земле́ю да покры́ютсѧ.

А҆́ще слꙋ́чаемъ кои́мъ приклю́читсѧ всеѝ Бжⷭ҇тве́нной Крвѐ по ѡ҆сщ҃е́нїи и҆ꙁлїѧ́тисѧ, а҆́ще ма́ло что̀ ѡ҆ста́нетъ въ ᲃт҃о́й Ча́ши, сеѝ да причасти́тсѧ и҆ съверши́тъ Слꙋ́жбꙋ. Проли́тои же Бжⷭ҇твеннои Крвѝ събра́нїе, сте́ртїе и҆ ѡ҆мы́тїе, да бꙋ́детъ по всемꙋ̀, ꙗ҆́коже пре́дъ ᲂу҆каꙁа́сѧ.

А҆́ще же ничто́же ѡ҆ста́нетъ въ ᲃт҃о́й Ча́ши, да влѣ́етъ па́ки Вино̀, и҆ ма́ло воды̀ вню̀, гл҃ѧ̀ ᲃловеса̀ Проскомиді́йнаѧ, сі́естъ: И҆ а҆́бїе и҆ꙁы́йде Кро́въ и҆ Вода̀, и҆ видѣ́вый свѣдителствова̀, и҆ и҆́стинно є҆́стъ свѣди́телство є҆гѡ̀: И҆ а҆́бїе да ѡ҆ст҃и́тъ наче́нъ ѿ мѣ́ста ѡ҆́нагѡ, та́кожде и҆ Ча́шꙋ по Вече́ри, гл҃ѧ̀: Пі́йте ѿ не́ѧ всѝ, и҆ проч.: и҆ Моли́твꙋ, Помина́юще ᲂу҆́бѡ сп҃си́телнꙋю сі́ю за́повѣдь, и҆ проч.: Е҆гда́же гл҃етъ: Твоѧ̀ ѿ твои́хъ: то́чїю ᲃт҃ꙋ́ю Ча́шꙋ ма́ло да поднесе́тъ, и҆ посе́мъ да чте́тъ моли́твꙋ, Е҆щѐ прино́симъ тебѣ̀: и҆ Гд҃и Прⷭ҇та́гѡ твое́гѡ Дх҃а, съ ᲃтіха́ми: и҆ надъ само́ю то́чїю ᲃт҃о́ю Ча́шею, да гл҃етъ:

А҆ є҆́же въ Ча́ши се́й, сътворѝ бы́ти чⷭ҇тнꙋю Кро́въ Ха҃ твое́гѡ, и҆ благословлѧ́ѧ ᲃт҃ꙋ́ю Ча́шꙋ, то́чїю да гл҃етъ: Преложи́въ є҆̀ Дх҃омъ твои́мъ ᲃт҃ы́мъ. Да чте́тъ же и҆ Моли́твꙋ, Ꙗ҆́коже бы́ти причаща́ющимсѧ, до конца̀: и҆ та́кѡ да причасти́тсѧ. Всѧ́же сі́ѧ Моли́твы и҆ Во́ꙁгласы та́йнѡ да гл҃етъ, ничто́же въꙁглаша́ѧ.

А҆́ще по причаще́нїи ᲃт҃ы́хъ Та́инъ а҆́бїе приклю́читсѧ І҆ере́ю и҆ꙁблева́ти, блево́тины да съберꙋ́тсѧ въ лиѧ́ны згре́бїѧ, и҆ въ чⷭ҇тый съсꙋ́дъ да вло́жатсѧ, и҆ съхранѧ́тъ донде́же до́брѣ и҆ссо́хнꙋтъ, и҆ тогда̀ въ текꙋ́щꙋю рѣ́кꙋ̀ да и҆ꙁме́щꙋтсѧ, и҆лѝ, на пли́нѳѣ и҆лѝ чⷭ҇томъ ка́мени да съжгꙋ́тсѧ, та́кожде и҆ землѧ̀ на не́й же падо́шѧ да ѡ҆стрꙋ́гана и҆ съжже́на бꙋ́детъ, пе́пелъ же подъ Прⷭ҇то́лъ да вкопа́етсѧ, и҆лѝ въ рѣкꙋ̀ да и҆ꙁме́щетсѧ.

А҆́ще нѣ́каѧ ча́стка ѿ Бжⷭ҇тве́ннагѡ Тѣ́ла на землѝ па́днетъ, чⷭ҇тнѡ вꙁемле́ма, и҆ на Ді́скосѣ поло́жена да бꙋ́детъ: землѧ̀ же на не́й же паде́тъ, да ѡ҆стрꙋ́жетсѧ до́брѣ, и҆ стрꙋжины̀ ѡ҆́ныѧ, въ рѣкꙋ̀ текꙋ́щꙋю да и҆ꙁме́щꙋтсѧ, и҆лѝ да съжгꙋ́тсѧ: пе́пелъ же подъ ᲃт҃ою Тра́пеꙁою да вскопа́етсѧ.

А҆́ще ми́мѡ А҆нтимі́съ, на покрыва́лѣ тра́пеꙁномъ ча́стка нѣ́каѧ Бжⷭ҇тве́ннагѡ Тѣ́ла па́днетъ, и҆лѝ на и҆́ное кое́либѡ пла́тнѡ, Бжⷭ҇твеннаѧ ѡ҆́наѧ человѣ́ка, чⷭ҇тнѡ вꙁѧ́та, и҆ на Ді́скосѣ поло́жена да бꙋ́детъ: покрыва́ло же, и҆лѝ пла́тнѡ до́брѣ да и҆ꙁмы́етсѧ надъ А҆нтидѡ́рнымъ блю́домъ, бо да́же ѡ҆́на є҆ю́же и҆ꙁмы́ванѡ бꙋ́детъ, въ текꙋ́щꙋю рѣкꙋ̀ да и҆ꙁлѣ́етсѧ, и҆лѝ подъ ᲃт҃о́ю Тра́пеꙁою ꙗ҆́мꙋ и҆скопаетъ.

А҆́ще ᲃщ҃е́нникъ и҆мѣ́ѧй косма́ты ᲂу҆́сы, ѿ нерадѣ́нїѧ ѡ҆мо́читъ ѧ҆̀ въ Бжⷭ҇тве́нной Крвѝ, согреша́етъ: но ᲂу҆́бѡ ᲂу҆сты̀ свои́ми до́бре да ѡ҆смокта́етъ ѧ҆̀ пре́жде, пото́мъ же Покро́вцемъ да ѡ҆тре́тъ. Да ᲂу҆́бѡ и҆ꙁбѣ́гнꙋти си́цевого грѣха̀ воꙁмо́жеши ѽ І҆ере́ю, скрꙋтѝ ѧ҆̀ себѣ̀ до́брѣ, и҆лѝ пре́жде слꙋже́нїѧ пристрижѝ.

Е҆гда̀ І҆ере́ѷ и҆лѝ са́мъ слꙋжа́й, на дла́ни свое́ѧ десни́цы Бжⷭ҇тве́нное Тѣ́ло воꙁлага́етъ, и҆лѝ въ собо́ре ѿ началъствꙋ́ющагѡ прїе́млетъ, ника́коже десни́цꙋ да стиска́етъ но ма́лѡ что̀ съ глꙋ́бъ. (а҆́ще ѿ нача́лника прїе́млетъ.) шꙋи́цею да подъдержи́тъ. А҆́ще же са́мъ слꙋ́житъ, шꙋи́цею не подъдержа̀, не надъ Гла́вою, но надъ Прⷭ҇тломъ да держи́тъ, и҆ прекло́нь гла́вꙋ благоговѣ́инѡ и҆́нъ дла́ни Бжⷭ҇тве́нномꙋ Тѣ́лꙋ съ стра́хѡмъ и҆ вѣ́рою въꙁира́ѧ, ѡ҆бы́чныѧ Моли́твы да гл҃етъ и҆ причасти́тсѧ: по Причаще́нїи же до́брѣ да соглѧ́дитъ на дла́нь свое́ѧ десни́ци, и҆ а҆́ще крꙋпи́ца каѧ̀ ѿ ме́ншихъ ѡ҆ста̀, и҆ сі́ю ꙗ҆ꙁы́комъ въ ᲂу҆ста̀ да во́ꙁметъ. и҆ до́брѣ да и҆ꙁли́жетъ дла́нь, въ є҆́же ничесо́мꙋ ѡ҆ста́тисѧ на не́й, посе́мъ же въꙁе́мъ А҆нтіми́снꙋю Гꙋ́бꙋ, да ѡ҆тре́тъ дла́нь добрѣ надъ Ді́скосомъ, та́кожде и҆ ѡ҆ И҆лито́нъ.

Ѿ ᲃт҃о́и же Ча́ши Бжⷭ҇твенной Крве҃ причасти́всѧ, ᲂу҆ста̀ си до́брѣ І҆ере́ѷ да и҆ꙁссе́тъ, и҆ ꙗ҆ꙁы́комъ и҆ꙁли́жетъ, посе́мже и҆ гꙋ́бою А҆нтими́сною да ѡ҆третъ. Пїѧ́же ѿ ᲃт҃о́и Ча́ши, до́брѣ ᲂу҆сты̀ бре́гъ Ча́ши да и҆ꙁссе́етъ, въ є҆́же ничесо́мꙋже ѡ҆ста́тисѧ ѿ Бжⷭ҇тве́нныѧ Крвѐ на бре́ꙁѣ, по се́мже Гꙋ́бою да ѡ҆тре́тъ бре́гъ.

А҆́ще ᲃт҃ый А҆́гнецъ на Ді́скосѣ ᲃи́це и҆ꙁме́рꙁнетъ, ꙗ҆́кѡ не воꙁмощѝ І҆ере́ю въ своѐ є҆мꙋ̀ вре́мѧ преломи́ти є҆гѡ̀, надъ ᲂу҆́глїемъ въ скꙋ́дели, на Прⷭ҇то́лѣ Звѣꙁдо́ю и҆ Покро́вцемъ покры́въ ᲃт҃ы́й Ді́скосъ съ Бжⷭ҇тве́ннымъ А҆́гнцемъ, да поло́житъ и҆ приде́ржитъ, до́ндеже раꙁме́рꙁнетъ.

А҆́ще слꙋжа́щꙋ І҆ере́ю нападꙋ́тъ вра́ꙁи и҆лѝ И҆ноплеме́нници, Е҆рети́цы ли, Пога́не, и҆лѝ ᲂу҆бі́йци, и҆ ника́коже ᲃлꙋ́жба съверши́тисѧ воꙁмо́жетъ, да потреби́тъ ᲃт҃аѧ, въ є҆́же не ѡ҆ста́тисѧ въ порꙋга́нїе и҆ попра́нїе ᲃкве́рнымъ ᲂу҆бі́цамъ: са́мъ же да и҆ꙁбѣ́гнетъ а҆́ще мо́жетъ. А҆́ще же не ѿстꙋ́питъ лꙋ́чше сътвори́тъ, и҆бѡ̀ а҆́ще ᲂу҆бїе́нъ бꙋ́дет, мⷱ҇ническїй Вѣ́нецъ прі́йметъ.

А҆́ще же кто̀ восхо́щетъ ᲂу҆ничижа́ѧ Вѣ́рꙋ ᲃт҃ꙋ́ю Правосла́внꙋю, І҆ере́ѧ слꙋжа́щагѡ ᲂу҆би́ти, до́лженъ є҆́стъ І҆ере́ѷ ника́коже ѿ слꙋже́нїѧ ѿстꙋпи́ти, но соверши́ти, а҆́ще и҆ ᲂу҆бі́йство претерпѣ́ти є҆мꙋ̀ прі́йдетъ; а҆́ще же ᲂу҆бїе́нъ бꙋ́детъ тогда̀, съ мꙋ́ченики причте́нъ бꙋ́детъ.

А҆́ще слꙋжа́щꙋ І҆ере́ю Бжⷭ҇тве́ннꙋю ᲃлꙋ́жбꙋ, Це́рковъ воꙁгори́тсѧ, и҆лѝ ѿ бꙋ́рѧ, и҆лѝ и҆́ныѧ ра́ди вины̀ ве́рхъ па́стисѧ начне́тъ, сохра́ннѡ съ А҆нтими́сомъ да во́ꙁметъ ᲃт҃а́ѧ и҆ да и҆ꙁы́детъ и҆ꙁъ Це́ркве, и҆ на и҆́номъ мѣ́стѣ чⷭ҇тномъ на то́мъ же А҆нтіми́сѣ да соверши́тъ Бжⷭ҇тве́ннꙋю слꙋ́жбꙋ, наче́нъ ѿ мѣ́ста є҆го́же и҆сходѧ̀ преста̀.

А҆ще по ѡ҆сщ҃е́нїи Хлѣ́ба и҆лѝ Вина̀, покаже́тсѧ Чꙋ́до, сі́естъ, ви́дъ Хлѣ́ба въ ви́дѣ Пло́ти, и҆лѝ ѡ҆троча́ти, Вино̀ же въ ви́дѣ Крвѐ, и҆ а҆́ще въкра́тцѣ не премени́тсѧ се́й ви́дъ, сі́естъ, а҆́ще не па́ки ꙗ҆́ви́тсѧ ви́дъ Хлѣ́ба, и҆лѝ Вина̀, но си́це непремѣ́ннѡ пребꙋ́детъ ника́коже І҆ере́ѷ да причасти́тсѧ, и҆бѡ̀ не сꙋ́тъ сі́ѧ Тѣ́ло и҆ Кро́вь Хв҃а, но то́чїю Чꙋ́до ѿ Бг҃а невѣ́рства и҆лѝ и҆́ныѧ ра́ди вины̀ ꙗ҆вле́нно. Да во́ꙁметъ же І҆ере́ѷ и҆́нꙋю Про́сфорꙋ, (а҆́ще то́чїю ви́дъ Хлѣ́ба премѣни́сѧ.) и҆ ꙗ҆́коже пре́дъ ᲂу҆каꙁа́сѧ. Проскомиді́йнаѧ надъ А҆́гнцемъ, да тво́ритъ и҆ гл҃итъ, и҆ да и҆ꙁме́тъ ᲃт҃ы́й А҆́гнецъ, и҆ ѿложи́въ въ чꙋ́до претворе́ный, и҆ чⷭ҇тнѡ сохрани́въ, да начне́тъ ѿ моли́твы, съ си́ми и҆ мы̀ блаже́нными си́лами, и҆ всѧ̀ по рѧ́дꙋ да съверши́тъ. надъ Ча́шею же ничто́же да повтарѧ́етъ. А҆́ще же и҆ въ Ча́ши Ви́нный ви́дъ въ Кро́въ премѣни́тсѧ, въ и҆́нꙋю чтⷭ҇нꙋю Ча́шꙋ и҆лѝ въ сосꙋ́дъ и҆ꙁлѣ́ѧ́въ, да влѣ́етъ па́ки Вино̀, Проскомиді́йнаѧ надъ ни́мъ гл҃ѧ̀, и҆ та́кѡ ѡ҆бы́чнѡ по рѧ́дꙋ и҆ сі́е да ѡ҆ст҃и́тъ и҆ во вре́мѧ Причаще́нїѧ, да причасти́тсѧ ѡ҆бы́чнѡ, и҆ слꙋ́жбꙋ да соверши́тъ.

А҆́ще же въско́рѣ па́ки и҆́же покаꙁа́сѧ мѧ́сомъ, и҆лѝ ѡ҆троча́темъ, ви́дъ хлѣ́бный зри́мъ бꙋ́детъ: и҆лѝ въ Ча́ши, и҆́же зри́мъ бы́стъ кро́вїю а҆́бїе па́ки ви́нный пока́жетсѧ, да не закала́етъ и҆́ный А҆́гнецъ, ни́же и҆́ное Вино̀ въ Ча́шꙋ да влѣ́етъ, но си́ми да причасти́тсѧ, и҆ Слꙋ́жбꙋ съверши́тъ, и҆́бѡ и҆́стиннымъ Тѣ́ломъ и҆ Кро́вїю Хв҃ою сꙋ́тъ.

Въ коне́цъ да вѣ́стъ, Парохїа́лный І҆ере́ѷ ꙗ҆́кѡ въ кі́йждѡ Вели́кїй Пра́ꙁдникъ и҆ Неде́лю, къ си́мъ же и҆ въ кꙋ́юждѡ сꙋббꙍ́тꙋ, до́лженъ є҆́стъ Лѵтꙋргїса́ти подъ сме́ртнымъ грѣхо́мъ, и҆бѡ̀ а҆́ще Лѵтꙋргїса́ти не бꙋ́детъ, мно́гимъ ѿ слꙋша́нїѧ Бжⷭ҇тве́нныѧ слꙋ́жбы за́пнетъ, и҆́же ѿ Бж҃їѧгѡ и҆ Церко́внагѡ повелѣ́нїѧ кі́йждѡ христїѧни́нъ, въ кі́йждѡ ᲃт҃ы́й дн҃ь, слꙋ́шати до́лженъ є҆́стъ. Ксемꙋ̀ да вѣ́стъ и҆ сі́е, ꙗ҆́кѡ є҆динꙋ̀ то́чїю на дн҃ь Лѵтꙋ́ргїю на є҆ди́номъ Прⷭ҇то́лѣ до́лженъ є҆́стъ І҆ере́ѷ съверши́ти, сі́ѧ бо є҆ди́ность ᲃт҃ы́ѧ Же́ртвы, знамена́етъ є҆динꙋ̀ ᲃме́рть Хв҃ꙋ, и҆́же є҆дино́ю на́съ дѣ́лѧ подъѧ́тъ, и҆ є҆динꙋ̀ Стрⷭ҇ть є҆гѡ̀ ю҆́же є҆дино́ю ѡ҆ на́съ претерпѣ̀.

А҆́бїе по Прича́стїи Бжⷭ҇тве́нныхъ Та́инъ до́лженъ є҆́стъ І҆ере́ѷ ѡ҆ста́нокъ, Бж҃стве́ннагѡ Тѣ́ла ѿ Ді́скоса въ ᲃт҃ꙋ́ю Ча́шꙋ всыпа́ти, съ всѧ́кимъ внима́нїемъ є҆́же нигде́же, ничто́же а҆́ще и҆ ѿ ме́ншихъ крꙋпи́цъ па́сти, и҆лѝ ѡ҆ста́тисѧ, и҆ сегѡ̀ ра́ди до́брѣ гꙋ́бою А҆нтіми́сною Ді́скосъ да ѡ҆тре́тъ надъ ᲃт҃о́ю Ча́шею, до́брѣ съглѧда́ѧ, да не ѡ҆ста́нетъ на не́мъ что̀.

Та́кожде и҆ на А҆нтіми́сѣ, и҆лѝ И҆лито́нѣ гꙋ́бкою а҆́ще что̀ є҆́стъ, събра́въ вкꙋ́пѣ на Ді́скосѣ да всы́плетъ въ ᲃт҃ꙋ́ю Ча́шꙋ: и҆ та́кожде до́брѣ да съглѧди́тъ, є҆́же ничто́же ѡ҆ста́тисѧ на не́мъ. Си́це ᲂу҆́бѡ до́лженъ є҆́стъ І҆ере́ѷ всегда̀ на всѧ́кой Лѵтꙋ́ргїи твори́ти, и҆ подъ сме́ртнымъ грѣхо́мъ и҆ и҆ꙁверже́нїемъ, нико́лиже А҆нтіми́съ и҆лѝ И҆лито́нъ надъ ѡ҆гне́мъ и҆стрѧса́ти и҆лѝ надъ водо́ю, и҆́бо на не́мъ ничто́же и҆́нѡ, ра́ꙁвѣ ѿ Бжⷭ҇тве́ннагѡ Тѣ́ла крꙋпи́цъ ѿ нерадѣ́нїѧ І҆ере́ѷскагѡ ѡ҆стаю́тсѧ. и҆ сегѡ̀ ра́ди ꙗ҆́коже рече́сѧ ѡ҆па́снѡ на Ді́скосѣ събра́ны, и҆ въ ᲃт҃ꙋ́ю Ча́шꙋ всы́планы, да бꙋ́дꙋтъ, и҆ на Жерто́вницѣ ѿ не́гѡ, и҆лѝ ѿ Дїѧ́кона потре́блены.

По съверше́нїи же Бжⷭ҇тве́нныѧ Слꙋ́жбы, въ потребле́нїи ѡ҆ста́нкѡвъ Бжⷭ҇тве́нныхъ Та́инъ на Жерто́вницѣ, всѧ́кое ѡ҆пасе́нїе и҆мѣ́ти подоба́етъ І҆ере́ю, є҆́же ничто́же а҆́ще и҆ ѿ ме́ншихъ крꙋпи́цъ, и҆лѝ ка́плей ѡ҆ста́тисѧ въ ᲃт҃о́й Ча́ши.

Сегѡ̀ ᲂу҆́бѡ ра́ди, не є҆дино́щи то́чїю, но втори́цею, и҆ трети́цею Ча́шꙋ и҆сполоска́въ да и҆спі́етъ, пото́мъ же гꙋ́бою, и҆лѝ хꙋ́сткою чи́стою на сі́е само́е ѡ҆со́бною ѡ҆тре́тъ, гꙋ́бꙋ же и҆лѝ хꙋ́сткꙋ въ ᲃт҃о́й Ча́ши да ѡ҆ста́витъ. на Жерто́вницѣ же є҆гда̀ Бжⷭ҇твенныѧ Та́йны прине́сены стоѧ́тъ, свѣща̀ зажже́на да бꙋ́детъ, донде́же потреблѧ́тсѧ ᲃт҃а́ѧ. Панама́ръ же да наꙋче́нъ бꙋ́детъ ѿ І҆ере́ѧ, и҆ всѝ въ ѻ҆́тарѣ слꙋжа́щїи, є҆́же съ стра́хомъ и҆ тре́петомъ и҆ благоговѣ́нїемъ ходи́ти ѻ҆́коло Жерто́вника, ꙗ҆́коже и҆ ѻ҆́коло ᲃт҃о́и Тра́пеꙁы, є҆гда̀ на ни́хъ сꙋ́тъ Бжⷭ҇твенныѧ Та́йны, и҆ Боголѣ́пное поклоне́нїе ми́мо и҆дꙋ́ще, и҆лѝ приближа́ющесѧ да тво́рѧтъ.

Гꙋ́бꙋ ᲃи́це И҆лито́ннꙋю, ꙗ҆́коже и҆ и҆стира́лнꙋю, и҆лѝ хꙋ́сткꙋ, є҆гда̀ ᲂу҆брꙋ́каетсѧ, са́мъ І҆ере́ѷ и҆лѝ Дїѧ́конъ да и҆ꙁмыва́етъ свои́ма рꙋка́ма до́брѣ, надъ ᲂу҆мыва́лницею ѻ҆́лтарнею: сі́е же и҆ꙁмове́нїе ча́стѡ да бꙋ́детъ въ є҆́же всегда̀ чи́стымъ си́мъ бы́ти. съсꙋ́ды ᲃщ҃е́нныѧ, сі́естъ, Ча́ша, Ді́скосъ, Звѣ́ꙁда, и҆ Ло́жица, ча́стѡ и҆сти́раны ѿ пра́ха да бꙋ́дꙋтъ, та́кожде и҆ ѿ мокроты̀, въ є҆́же не па́сти на́нѧ ржѝ.

Въ коне́цъ же, по соверше́нїи Бжⷭ҇тве́нныѧ Лѵтꙋ́ргїи, и҆ по потребле́нїи Бжⷭ҇тве́нныхъ Та́инъ, а҆́бїе пре́жде съвлече́нїѧ ᲃщ҃е́нныхъ ѡ҆де́ждъ, и҆лѝ по съвлече́нїи и́҆ꙁъ ѻ҆́лтарѧ не и҆сходѧ̀, І҆ере́ѷ до́лженъ є҆́стъ честѝ съ всѧ́кимъ ᲂу҆миле́нїемъ благода́рнымъ ᲃе́рдцемъ, Моли́твы благода́рныѧ по ᲃт҃о́мъ Причаще́нїи:

И҆ꙁъ Це́рквы же и҆ꙁше́дъ, да не а҆́бїе ѡ҆брати́тсѧ къ и҆́номꙋ кое́мꙋ дѣ́лꙋ, но вре́мѧ нѣ́кое да пребꙋ́детъ въ моли́твахъ. и҆ раꙁмышле́нїи толи́кагѡ да́ра сподобле́ннагѡ въ ᲃт҃о́й Лѵтꙋ́ргїи, и҆ благодарѧ̀ Бг҃а, да про́ситъ є҆́же въ всѧ̀ днѝ живота̀ є҆гѡ̀ си́цевагѡ да́ра досто́йнѡ прїѧ́ти сподоби́тъ є҆́гѡ̀. Въ се́й ᲂу҆́бѡ дн҃ь да сохрани́тсѧ ѿ и҆ꙁли́шнѧгѡ Ꙗ҆де́нїѧ и҆ Пі́тиїѧ и҆ Сна̀, найпа́че же и҆мѣ́ѧй сꙋпрꙋ́жницꙋ ѿ тѣле́снагѡ съвокꙋпле́нїѧ, и҆ ѿ всѧ́кїѧ пло́тскїѧ любвѝ, любвѐ ра́ди и҆ чⷭ҇ти нбⷭ҇нагѡ Царѧ̀, є҆го́же въ Хра́мъ и҆ вита́лницꙋ дш҃а̀ свое́ѧ прїѧ́тъ.

Подоба́етъ ти вѣ́дати ѽ І҆ере́ю, ꙗ́҆кѡ въ пре́жде ᲃщ҃е́нныхъ Лѵтꙋргиса́еши, не подоба́етъ Дїѧ́конꙋ Бжⷭ҇тве́нныѧ Та́йны Тѣ́ла и҆ Крвѐ Гд҃не́й на Ді́скосѣ сꙋ́щїѧ, къ прінесе́нїю подава́ти, но са́мъ и҆ Бжⷭ҇тве́нныѧ Та́йны, ꙗ҆́кѡ ᲂу҆жѐ съверше́ны, на гла́вѣ свое́й, и҆ Ча́шꙋ съ про́стымъ Вино́мъ въ шꙋи́ци бли́ꙁъ свои́хъ пе́рсей несѝ, да не про́стымъ лю́демъ винꙋ̀ къ поклоне́нїю про́стомꙋ несщ҃е́нномꙋ подасѝ ви́нꙋ: Дїѧ́конъ же съ кади́лницею то́чїю пре́дъ и҆ды́й, ча́стѡ ᲃт҃а́ѧ ѿ тебѣ̀ несо́маѧ ѡ҆браща́ѧсѧ да ка́дитъ.

Въ Причаще́нїи же, є҆гда̀ ча́сть ᲃт҃гѡ А҆́гнца прїе́млеши, ᲃловеса̀ сі́ѧ гл҃ѝ: Чтⷭ҇ное и҆ Прⷭ҇то́е и҆ Прчⷭ҇то́е Тѣ́ло и҆ Кро́въ Гд҃а Бг҃а и҆ Сп҃са на́шегѡ І҆и҃ᲃ Ха҃, препода́етсѧ мнѣ̀ недосто́йномꙋ рабꙋ̀ Бж҃їю І҆ере́ю, И҆мⷬ҇къ: въ ѡ҆ставле́нїе грѣхѡ́въ мои́хъ и҆ въ жи́ꙁнь вѣ́чнꙋю. А҆ми́нь. Причаща́ѧжесѧ та́кожде гл҃ѝ: Чтⷭ҇нагѡ, и҆ Прⷭ҇тагѡ, и҆ Прчⷭ҇тагѡ Тѣ́ла и҆ Крвѐ Гд҃а Бг҃а и҆ Сп҃са на́шегѡ І҆и҃ᲃ Ха҃, Причаща́юсѧ а҆́ꙁъ недосто́йный ра́бъ Бж҃їй І҆ере́ѷ И҆мⷬ҇къ: въ ѡ҆ставле́нїе грѣ́хѡ́въ мои́хъ, и҆ въ жи́ꙁнь вѣ́чнꙋю. А҆ми́нь. Си́це же и҆ Дїѧ́конꙋ подава́ѧ ᲃт҃ꙋ́ю ча́сть, гл҃ѝ: Тѣ́ло и҆ Кровъ препода́етсѧ, а́ нѐ то́чїю Тѣ́ло, (ꙗ҆́коже на съверше́нныхъ Лѵтꙋ́ргїѧхъ ѡ҆бы́чнѡ є҆́стъ гл҃а́ти,) и҆бѡ̀ въ Преждесщ҃е́нномъ А҆́гнци и҆́стиннѡ є҆́стъ по съвокꙋпле́нїю въ напое́нїю бы́вшомъ, Кро́въ Влады́чнѧѧ. є҆гда́же ѿ ча́ши пі́еши, и҆лѝ Дїѧ́конꙋ падава́еши, ничто́же гл҃ѝ: и҆бѡ̀ та́мѡ про́стое є҆́стъ Вино̀, а҆ нѐ Влады́чнѧѧ Кро́въ, то́чїю церимонїѧ́лнагѡ ра́ди ѡ҆бхо́дꙋ, ᲂу҆потреблѧ́ема быва́етъ, вмѣ́сто полоска́нїѧ ᲂу҆́стъ.

Въ всѣ́хъ Та́йнъ Це́ркве ᲃт҃ой Правосла́внокаѳоли́ческой, благоче́стномъ и҆ ᲃт҃олѣ́пномъ слꙋже́нїи, вели́кое и҆ ѡ҆па́сное тща́нїе І҆ере́ю имѣ́ти досто́итъ: но ᲂу҆́бѡ пресъверше́нїе и҆ и҆ꙁрѧ́днѣе въ слꙋж́нїи, (ꙗ҆́коже пре́дъ ᲂу҆каꙁа́сѧ,) въ подаѧ́нїи же, прїѧ́тїй и҆ хране́нїй Бжⷭ҇тве́ннагѡ Причаще́нїѧ Та́йны, надъ неѧ́же ничто́же достойнѣ́йшее, ничто́же ᲃт҃ѣ́йшее и҆ чꙋднѣ́йшее Це́рковъ Бж҃аѧ и҆матъ: въ не́й бо и҆ преиꙁѧщнѣ́йшїй и҆ пребо́лшїй да́ръ Бж҃їй затворѧ́етсѧ, па́чеже то́й самы́й всѧ́коѧ благода́ти, да́ра же и҆ ᲃт҃ы́ни и҆сто́чникъ, въ ниа́же, и҆ пода́тель Хрⷭ҇тосъ Гд҃ь.

Парохїѧ́лный ᲂу҆́бѡ Пре́ꙁвитеръ преиꙁѡбилнѣ́йшее въ се́мъ да и҆ма́тъ тща́нїе, є҆́же сі́ю Бжⷭ҇тве́ннꙋю Та́йнꙋ ᲃи́це ᲃа́мъ съ подоба́ющею чⷭ҇тїю съверша́ти, и҆ до́лжнымъ поклоне́нїемъ чти́ти и҆ храни́ти, и҆ подава́ти, ꙗ҆́коже и҆ ѿ себѣ̀ подрꙋ́чныхъ люді́й чⷭ҇то, ᲃт҃олѣ́пнѡ же и҆ ча́стѡ прїе́млема бы́ти: сі́естъ, въ всѧ̀ нарочи́тыѧ Вели́кїѧ (а҆́ще въꙁмо́жнѡ) Пра́ꙁдники: а҆ понѐ въ четыриго́дищныѧ По́сты.

Сегѡ̀ ᲂу҆́бѡ ра́ди І҆ере́ѷ ча́стѡ да нака́жетъ и҆ клꙋ́читъ лю́ди, кацѣ́мъ приꙋготовле́нїемъ и҆ по́мысла благоче́стїемъ, и҆ благоговѣ́нїемъ, и҆ смире́ннымъ и҆ чи́стымъ тѣ́ла ᲂу҆строе́нїемъ, къ си́цевымъ Бжⷭ҇тве́ннымъ Та́йнамъ пристꙋпи́ти до́лжны сꙋ́тъ.

Въ пе́рыхъ ᲂу҆́бѡ, а҆́ще кро́мѣ По́стѡвъ Четыре́хъ ѡ҆бы́чныхъ пристꙋпи́ти къ ᲃт҃о́мꙋ Причаще́нїю въсхотѧ́тъ, се́дмъ дні́й пре́жде да по́стѧтсѧ, въ Моли́твахъ Церко́вныхъ и҆ дома́шнихъ пребыва́юще, (сі́же не внꙋ́ждѣ: внꙋ́ждѣ бо три дни, и҆лѝ є҆ди́нъ дн҃ь да постѧ́тсѧ то́чїю,) и҆ пре́дъ ᲂу҆готовлѧ́юще себѣ̀ къ чи́нномꙋ и҆сповѣда́нїю грѣхѡ́въ свои́хъ.

Сꙋ́щїи же въ Сꙋпрꙋ́жествѣ, ѿ Сꙋпрꙋ́жескагѡ съвокꙋпле́нїѧ въ ты́ѧ днѝ да воꙁдержа́тсѧ всѧ́кѡ:

Пре́дъ ѡ҆́смымъ же дне́мъ да и҆сповѣдѧ́тъ пре́дъ І҆ере́емъ всѧ̀ грѣхѝ своѧ̀: съ ве́чера же ничто́же да вкꙋ́сѧтъ: Немогꙋ́щїи же ю҆́ности, и҆лѝ престарѣ́лости ра́ди всѧ́кѡ съ ве́чера въꙁдержа́тисѧ ничто́же ꙗ҆́дше, ма́ло что да вкꙋ́сѧтъ, ѿ полꙋ́нощи же всѧ́кѡ всѣ да въꙁде́ржатсѧ: въ моли́твахъ же поклѡ́нахъ и҆ дх҃о́вныхъ раꙁмышле́нїѧхъ да ᲂу҆праꙁднѧ́тсѧ.

По ᲂу҆́трнихъ же ѡ҆бы́чныхъ Моли́твахъ Церко́вныхъ, всѣ Причаща́тисѧ и҆мꙋ́щїи, не ꙋмѣ́ющїи же честѝ, да ѡ҆ста́нꙋтсѧ въ Це́ркви, въ є҆́же послꙋша́ти ѿ І҆ере́ѧ что́мое къ ᲃт҃омꙋ Причаще́нїю Пра́вило, и҆ ѡ҆бы́чныѧ часы̀: ᲂу҆мѣ́ющїи же честѝ и҆ самѝ въ свои́хъ дѡ́махъ сі́ѧ прочестѝ себѣ̀ могꙋ́тъ.

Ꙍ҆бро́слые ᲂу҆ста̀, сі́естъ завѣси́стые ᲂу҆́сы и҆мѣ́ющихъ про́стыхъ люде́й, да нака́жетъ є҆́же скрꙋти́ти ѧ҆̀ себѣ̀, да не въ вре́мѧ Причаще́нїѧ въ Гд҃не́й Крвѝ ѡ҆мо́чатсѧ: и҆лѝ въ вре́мѧ Причаще́нїѧ да подно́сѧтъ ѧ҆̀ себѣ̀, и҆ приде́ржатъ свои́ма рꙋка́ма.

Въ нача́лѣ же ᲃт҃ы́ѧ Лѵтꙋ́ргїѧ, да съберꙋ́тсѧ вси въ Це́рквъ, и҆ съ всѧ́кимъ благоговѣ́нїемъ и҆ стра́хомъ Бж҃їимъ стоѧ́ще, да мл̀ѧтсѧ, послꙋша́юще Бжⷭ҇твеннꙋю ᲃлꙋ́жбꙋ.

Въ вре́мѧ же Причаще́нїѧ, да пристꙋ́пѧтъ чи́нно, въ глꙋбо́комъ смире́нїи, и҆ Хв҃и и҆́стиннѡ подъ ви́домъ Хлѣ́ба и҆ Вина̀ въ ᲃт҃ы́хъ Та́йнахъ сꙋ́щомꙋ, да́же до землѝ кі́йждѡ да покло́нитсѧ є҆дино́щи. И҆ пристꙋпи́вше, по є҆ди́номꙋ въ первыхъ Мꙋ́жїе старѣ́йшїи, пото́мъ Ю҆но́ши, по ни́хъ же Дѣ́ти, пото́мъ же Же́нскїй полъ, тѣ́мъ же чи́номъ, рꙋ́цѣ къ пе́рсемъ Крестао́браꙁнѡ съгбе́ннѣ и҆мꙋ́ще, и҆ Ха҃ Распѧ́тагѡ и҆сповѣда́юще, и҆ любо́въ и҆́же къ не́мꙋ въ ᲃе́рдцахъ свои́хъ и҆мꙋ́тъ, ꙗ҆встве́ннѡ и҆ꙁвѣствꙋ́юще, Крестъ и҆́же предстоѧ́щїи Кли́рици, поддержа́щїи покро́вецъ держа́тъ, да лобꙁа́ютъ: и҆ чи́ннѡ ѿве́рꙁше своѧ̀ ᲂу҆ста̀ съ стра́хомъ и҆ тре́петомъ, вѣ́рою же и҆ любо́вїю пода́емое І҆ереѻмъ ло́жицею ѿ ᲃт҃о́и Ча́ши Прⷭ҇то́е Тѣ́ло и҆ Кро́въ Хв҃ꙋ да прїемлютъ, го́рѣ ѡ҆́цѣ и҆мꙋ́ще.

Прїи́мше же че́стнѡ да поглотѧ́тъ, и҆ по ᲂу҆те́ртїи ᲂу҆́стъ покро́вцемъ рꙋко́ю ᲃщ҃е́нническою, лобꙁа́вше кра́й ᲃт҃ы́ѧ Ча́ши ꙗ҆́коже само́е Хв҃о Ребро̀, и҆ꙁ не́го же и҆стечѐ Кро́въ и҆ Вода̀, ѿстꙋпи́вше ма́ло да покло́нѧтсѧ є҆дино́щи гла́вою благоговѣ́инѡ, но нѐ до землѝ, и҆ та́кѡ въ ᲃе́рдци свое́мъ благодарѧ́ще сподо́блъшагѡ и҆́хъ си́цевыѧ благода́ти Ха҃ Бг҃а, да ѿстꙋ́пѧтъ на за́дъ, и҆ ста́вше благоговѣ́инѡ, ѡ҆чи́ма да не вꙁира́ютъ сѣ́мѡ и҆ ѡ҆вѣ́мѡ, но на Бжⷭ҇тве́нный то́чїю Ѻ҆́лтаръ, и҆ на Бжⷭ҇твенныѧ на не́мъ сꙋ́щїѧ ᲃт҃ы́ѧ Та́йны, да зрѧ́тъ: ни́же да гл҃тъ что дрꙋ́гъ съ дрꙋ́гомъ, ни да плю́ютъ, ни́же а҆́бїе на Кни́ꙁѣ да чтꙋ́тъ, да не и҆спа́детъ что ѿ ᲃщ҃е́нныхъ и҆ꙁъ ᲂу҆́стъ и҆́хъ, доне́лѣ же Дѡра̀ и҆ Вино̀ съ ᲂу҆кро́пцемъ пода́стсѧ и҆́мъ: и҆ да́же до сконча́нїѧ Слꙋ́жбы въ Це́ркви да ѡ҆жида́ютъ неисхо́днѡ молѧ́щесѧ, благодарѧ́ще Бг҃а ѡ҆ си́цевомъ благодѣѧ́нїи сподобле́нномъ, та́кожде раꙁмышлѧ́юще ᲃпⷭ҇ннꙋю Стрⷭ҇ть и҆ Сме́рть Гд҃а на́шегѡ І҆и҃ᲃ Ха҃, въ є҆ѧ́же па́мѧть сі́ѧ Прⷭ҇таѧ Та́йна и҆ съверша́етсѧ и҆ прїе́млема быва́етъ.

Вѣ́стнѡ ти бꙋ́ди и҆ сі́е ѽ І҆ере́ю, ꙗ҆́кѡ а҆́ще мнѡ́ꙁи бꙋ́дꙋтъ Прича́стници, ника́коже да дерꙁне́ши недостава́ющꙋ въ ᲃт҃о́й Ча́ши Бжⷭ҇тве́нныѧ Крвѝ, и҆лѝ Тѣ́ла, прили́ти Вино̀, и҆лѝ хлѣ́бъ про́стый всы́пати, сме́ртнѡ бо тѧ́жкѡ съгрѣши́ши, и҆ и҆ꙁверже́нїѧ ка́зни подлѣга́ти бꙋ́деши: но є҆гда̀ си́цевый слꙋ́чай приключи́тсѧ, до ᲂу҆́трїѧ повелѝ недоста́вшимъ пожда́ти, и҆ Лѵтꙋргиса́въ Причастѝ и҆́х. И҆лѝ ѿ Ківꙍ́та Бжⷭ҇твенныѧ Та́йны бо́лныхъ ра́ди храни́мыѧ є҆ли́кѡ тре́бѣ є҆́стъ, въ ᲃт҃ꙋ́ю Ча́шꙋ всыпа́въ Причастѝ и҆́хъ: лꙋ́чше ᲃътво́риши ѽ І҆ере́ю, А҆́ще не и҆́маши ᲃи́цевꙋ Вели́кꙋю Ча́шꙋ, ѿ неѧ́же бы множествѡ̀ Лю́дїй Причаⷭ҇ти́тисѧ на є҆ди́ной Литꙋ́ргїи моглѝ, є҆гда̀ не є҆ди́ною всѣ́мъ Парохїѧ́лномъ къ Прⷭ҇томꙋ Причаще́нїю приꙋготовлѧ́тисѧ повели́ши, но некїимъ въ ᲂу҆́трїе, и҆́нымъ же въ и҆́ный дн҃ь, є҆гда̀ Лѵтꙋргиса́ти и҆ꙁво́лиши, и҆ ᲃи́це и҆ грѣха̀ и҆ꙁбѣ́гнеши, и҆ всѣ́хъ съверше́ннѣ и҆ чи́ннѡ Причасти́ши. Ксемꙋ̀ вѣ́стнѡ ти да бꙋ́детъ, ꙗ҆́кѡ и҆ ѿ малы́ѧ Ча́ши множествѡ̀ мнѡ́гое Причасти́тисѧ мо́жетъ, на малы́ѧ ча́стки раꙁдроби́въ Бжⷭ҇тве́нное Те́ло, и҆ велмѝ ма́ло ло́жицею коемꙋ́ждѡ Бжⷭ҇тве́нныѧ Кр҃вѐ подава́ѧ: въ кое́йждѡ бо а҆́ще и҆ ме́ншей крꙋпи́ци ᲃт҃ы́хъ Та́инъ, цѣ́лое и҆ зꙋпо́лное Тѣ́ло Хв҃о є҆́стъ, и҆ а҆́ще и҆ въ ме́ншей ка́плѣ Кро́въ Хв҃а цѣ́ла и҆ зꙋпо́лна є҆́стъ: и҆ ᲃи́це въ мало́мъ ꙗ҆́коже и҆ въ вели́комъ коли́чествѣ Бжⷭ҇тве́нныѧ Та́йны прїемлю́щїи ро́внѡ Хрⷭ҇то́ви Причаща́ютсѧ.

По съверше́нїи же Бжⷭ҇тве́нныѧ Лѵтꙋ́ргїи, І҆ере́ѷ да чте́тъ въ ᲂу҆слыша́нїе всѣ́мъ причасти́вшимсѧ (а҆́ще ᲃамѝ причасти́вшїесѧ честѝ не ᲂу҆мѣ́ютъ) благодарстве́нныѧ Моли́твы по ᲃт҃о́мъ Причаще́нїи, и҆ по се́мъ, въ своѧ̀ си да ѿхо́дѧтъ.

Въ подаѧ́нїи же Бжⷭ҇тве́нныхъ Та́инъ сі́ѧ І҆ере́ѷ до́лженъ є҆́стъ храни́ти.

Покро́вецъ двѣ́ма Кли́рикѡма съ ѡ҆бои́хъ стра́нъ ѿ внѣ̀ Ца́рскихъ Двере́й да поддержа́ный бꙋ́детъ: є҆́ди́нъ же ѿ ни́хъ Крестъ въ рꙋцѣ̀ да держи́тъ, къ лобыꙁа́нїю Причаща́ющимсѧ. Са́мъ же І҆ере́ѷ съ Бжⷭ҇тве́нными Та́йнами посре́дъ Ца́рскїѧ Две́ри ста́въ, и҆ съ стра́хомъ Бж҃іимъ и҆ съ вѣ́рою пристꙋпи́те, ре́къ, сі́ѧ моли́твы, да глаголе́тъ; Вси́же Причаща́ющїисѧ по не́мъ да глаголи́тъ:

Вѣ́рꙋю Гд҃и и҆ и҆сповѣдꙋ́ю, ꙗ҆́кѡ ты́ є҆́си въи́стиннꙋ Хᲃ҃ ᲃн҃ъ Бг҃а жива́гѡ, прише́дый въ мі́ръ грѣ́шныхъ спⷭ҇тѝ ѿ нихъ же пе́рвый є҆́смь а҆́ꙁъ.

Вече́ри твое́й та́йной, дне́сь сн҃е Бж҃їй Прича́стника мѧ̀ прїймѝ; небѡ̀ врагѡ́мъ твои́мъ та́йны повѣ́мъ, ни лобꙁа́нїѧ ти да́мъ, ꙗ҆́кѡ І҆ꙋ́да: но ꙗ҆́кѡ раꙁбо́йникъ и҆сповѣда́юсѧ тебѣ̀.

И҆ ᲂу҆дарѧ́етъ І҆ере́ѷ десни́цею пе́рси своѧ̀ є҆дино́ю, и҆ съ ни́мъ всѝ Причасти́тисѧ и҆мꙋ́щїи, гл҃ю́ще:

Помѧнѝ мѧ̀, Гд҃и, є҆гда̀ прїи́деши въ ца́рствїи сѝ.

Втори́цею бі́юще пе́рси, глаголю́тъ.

Помѧнѝ мѧ̀, Влады́кѡ, є҆гда̀ прїи́деши въ ца́рствїи сѝ.

Трети́цею же ᲂу҆дарѧ́юще пе́рси, гл҃ю́тъ.

Помѧнѝ мѧ̀, ᲃт҃ый, є҆гда̀ прїи́деши въ ца́рствїи сѝ.

И҆ а҆́бїе Моли́твꙋ ᲃі́ю.

Влады́кѡ человѣкѡлю́бче Гд҃и І҆и҃ᲃ Хє҃ Бо́же мо́й, да не въ сꙋ́дъ, ни въ ѡ҆сꙋжде́нїе бꙋ́детъ мнѣ̀ Прича́стїе Прчⷭ҇тыхъ, и҆ животворѧ́щихъ Бжⷭ҇тве́нныхъ Та́инъ твои́хъ: но въ ѡ҆чище́нїе дш҃ѝ и҆ тѣ́лꙋ мое́мꙋ. Вѣ́рꙋю бо, и҆ и҆сповѣдꙋ́ю ꙗ҆́кѡ сі́е є҆́же прїемлю̀ въи́стиннꙋ є҆́стъ само́е Прчⷭ҇тое Тѣ́ло твоѐ, и҆ сама́ѧ Животворѧ́щаѧ Кро́въ твоѧ̀: ꙗ҆́же молю́сѧ: сподобѝ мѧ̀ досто́йнѡ прїѧти, въ ѡ҆ставле́нїе всѣ́хъ грѣхѡ́въ мои́хъ и҆ въ жи́ꙁнь вѣ́чнꙋю. А҆ми́нь.

Въ подаѧ́нїи ᲂу҆́бѡ ѽ І҆ере́ю, ѡ҆па́снѡ блюдѝ да не ᲂу҆ка́нетъ что̀ ѿ Бжⷭ҇тве́нныѧ Крвѐ на покро́вецъ, и҆лѝ на бра́дꙋ прїемлю́щагѡ: и҆ всегѡ̀ ра́ди ма́лѡ Бжⷭ҇тве́нныѧ Крвѐ въ Ло́жицꙋ воꙁмѝ, и҆ бли́ꙁъ ᲂу҆стъ прїемлю́щагѡ ᲃт҃ꙋ́ю Ча́шꙋ поддержѝ: прїемлю́щомꙋ же ᲂу҆ста̀ ѿверстѝ повелѝ, ты́же благоѡ́браꙁнѡ и҆ съхра́ннѡ въ нѧ̀ вложѝ: и҆мѣ́ющомꙋ же завѣ́систые ᲂу҆́сы поднестѝ ѧ҆̀ себѣ̀ повелѝ: прїѧ́ти же ᲂу҆ста̀ є҆гѡ̀ покро́вцемъ ѡ҆трѝ.

По причаще́нїи же всѣ́хъ, а҆́бїе Дорꙋ̀ Причасти́вшимсѧ пода́ждъ, и҆ всегда̀ прича́стникѡвъ ра́ди приꙋготовле́нѡ и҆мѣ́й растворе́ное съ ᲂу҆кро́пцемъ Вино̀ въ сосꙋ́дѣ чⷭ҇тномъ, и҆ по Дорѣ̀ сі́е пода́нѡ да бꙋ́детъ Причасти́вшимсѧ, въ є҆́же пома́лꙋ и҆спи́ти и҆́мъ ѡ҆мы́тїѧ ра́ди ᲂу҆́стъ по Бжⷭ҇тве́нномъ Причаще́нїи, въ є҆́же не плю́нꙋти и҆́мъ доне́лѣже сегѡ̀ напі́ютсѧ. По съверше́нїи же Бжⷭ҇тве́нныѧ Слꙋ́жбы прочтѝ и҆́мъ а҆́ще не писме́нни сꙋ́тъ, Моли́твы благодарственныѧ по причаще́нїи велегла́снѡ.

Въ сыропꙋ́стнꙋю Неде́лю, и҆ въ всѧ̀ днѝ пе́рвыѧ Неде́лѣ ᲃт҃ы́ѧ Четыридесѧ́тници, І҆ере́ѷ до́лженъ є҆́стъ накаꙁова́ти своѧ̀ Парохїѧ́ны, є҆́же приꙋготова́тисѧ и҆́мъ съ жена́ми ча́ды же и҆ съ все́ю дома́шнею челѧ́дїю свое́ю, къ чи́нномꙋ пе́рвомꙋ и҆сповѣда́нїю всѣ́хъ грѣхѡ́въ свои́хъ: и҆бѡ̀ въ Вели́кїй ᲃт҃ы́й По́стъ два́жды христїѧ́не до́лжни сꙋ́тъ и҆сповѣда́тисѧ: и҆ да наꙋ́читъ и҆́хъ кацѣ́мъ ѡ҆́браꙁомъ приꙋготовлѧ́ти себѣ̀, и҆ ка́кѡ съверше́ннѣ и҆сповѣда́ти своѧ̀ съгрѣше́нїѧ и҆мꙋ́тъ.

Въ пе́рвомъ ᲂу҆́бѡ и҆сповѣда́нїи по раꙁсꙋ́жде́нїю ѡ҆ грѣсе́хъ, и҆ на ᲂу҆че́нїи ѡ҆ Покаѧ́нїи и҆ наложе́нїи Епіти́мїи, да наꙋ́читъ ка́кѡ по́ститисѧ и҆мꙋ́тъ, и҆ ка́кѡ Моли́твы и҆ Поклѡ́ны по си́лѣ съверша́ти: и҆ а҆́ще кото́рый не ᲂу҆мѣ́етъ, Ѿче на́шъ: Вѣ́рꙋю въ є҆дина́гѡ Бг҃а: Бц҃е Дв҃о: и҆ десѧтосло́вїе: всѧ́кѡ повелѣ́ти є҆мꙋ̀ наꙋчи́тисѧ до вто́рой И҆сповѣ́ди, и҆ прилежа́ти само́мꙋ ѡ҆ се́мъ є҆́же наꙋчи́тисѧ и҆́мъ.

Ксемꙋ̀ а҆́ще кто̀ є҆́стъ чⷭ҇тыѧ со́вѣсти да повели́тъ є҆мꙋ̀ Бжⷭ҇тве́ннымъ Та́йнамъ по пе́рвомъ и҆сповѣда́нїи, а҆́бїе Причасти́тисѧ, на конци́же По́ста па́ки къ и҆́сповѣди приꙋготови́тисѧ и҆ къ ᲃт҃о́мꙋ Причаще́нїю.

А҆́ще кто̀ ѡ҆тѧгче́нъ грѣха́ми бꙋ́детъ, по наложе́нїи Е҆пити́мїи да повели́тъ є҆мꙋ̀ приꙋготови́тисѧ на вто́рꙋю и҆́сповѣдъ, и҆ тогда̀ да раꙁсꙋ́дитъ ѡ҆ Причаще́нїи Бжⷭ҇тве́нныхъ Та́инъ: въ По́стѣ бо Покаѧ́нїю си́цевымъ навы́кнꙋти подоба́етъ.

Въ про́чаѧ же трѝ По́сты, понѐ є҆дино́щи да и҆сповѣдѧ́тсѧ, и҆ досто́йнїи да Причастѧ́тсѧ: недосто́йнїи же да ᲂу҆де́ржатсѧ.

Въ вели́кꙋю ᲃт҃ꙋ́ю Четыридесѧ́тницꙋ І҆ере́ѷ вре́меннѡ, и҆лѝ са́мъ собо́й, и҆лѝ и҆́нѣмъ проповѣ́дникѡмъ сло́ва Бжїѧ да и҆ꙁвѣсти́тъ люде́мъ ᲂу҆ста́вꙋ Церко́внꙋю дре́внїю, на Кі́евскомъ же Събо́рѣ ѿно́вленꙋю въ лѣ́то, ҂ах҃мъ, ꙗ҆́же ᲃи́це въ себѣ̀ Рꙋ́скимъ ꙗ҆ꙁы́комъ съдержи́тсѧ.

И҆жъ длѧ ѡ҆чище́нѧ дш҃ъ христїѧ́нскихъ, и҆ длѧ ᲂу҆блага́нѧ Бг҃а за грѣхѝ лю́дскїе, ᲂу҆ста́вленые сꙋ́тъ ѿ Це́ркве ᲃт҃ой Правосла́внокаѳоли́ческой чоты́ри По́сты доро́чные, въ кото́рые ко́ждый Хрⷭ҇тиѧни́нъ пови́ненъ И҆сповѣ́дю ᲃт҃о́ю со́вѣсть свою̀ ѡ҆чища́ти: пре́тъ ко́ждый ᲃщ҃енникъ свои́хъ Парохїѧ́нъ на поча́ткꙋ ко́ждогѡ По́стꙋ напомина́ти ма́стъ, а҆бы́сѧ до спо́вѣди и҆ до принѧ́тѧ Бжⷭ҇тве́нныхъ Та́инъ готова́ли, и҆ скꙋ́ткомъ то́е вы́полнѧли. а҆ є҆сли́бысѧ кото́рый та́къ недба́лымъ и҆ ѡ҆ꙁѧ́блымъ ме́жи христїѧ́ны найдова́лъ, кото́рый бы прина́мнѣй ра́ꙁъ въ ро́къ, въ Вели́кїй По́стъ Спо́вѣдь ᲃт҃ꙋ́ю, и҆ принѧ́тїе Бжⷭ҇стве́нныхъ Та́инъ занедба́лъ, та́ковый по троѧ́кѡмъ пꙋбли́чномъ напомне́ни ѡ҆собли́ве въ Цвѣ́тнꙋю Неде́лю, въ Вели́кїй Четве́ръ, и҆ въ Вели́кꙋю Сꙋббꙍ́тꙋ є҆слѝ бы христїѧ́нской пови́нности и҆ прикаꙁа́ню Церко́вномꙋ до́сытъ не ᲂу҆чини́лъ, ма́стъ бы́ти въ Вто́рокъ Свѣ́тлои Неде́лѣ въ Це́ркви пꙋбликова́ный, а҆ за ты́мъ ѿ Це́ркве и҆ ѿ споле́чности хрїстїѧ́нскомъ по́ты по́ки сѧ не пока́етъ ѿлꙋ́ченый. А҆ є҆слѝ бы кото́рый зъ хрїстїѧ́нъ зъ таковы́мъ ҆́лъ а҆́лбѡ пи́лъ, а҆́лбѡ това́рство ꙗ҆ко́е прова́дилъ, подъ таково́ежъ ѿлꙋче́нїе подъпада́ти ма́етъ. А҆ є҆слѝ бы за́сь кото́рый съ таковы́хъ въ непокаѧ́нїи ᲂу҆ме́ръ жа́дною мѣ́рою при Це́ркви намѣ́стцꙋ ᲃт҃о́мъ, христїѧ́нскимъ звыча́йнымъ по́гребомъ похо́ванъ бы́ти не ма́етъ.

Да ᲂу҆бѡ сі́ѧ сп҃се́ннаѧ ᲂу҆ста́ва Церко́внаѧ ненаси́лствованна съхране́на бꙋ́детъ.

Парохїѧ́лный ᲃщ҃е́нникъ всѣ́хъ свои́хъ Парохїѧ́нъ и҆мена̀ и҆ же́нъ и҆ дѣте́й и҆ че́лѧди и҆́хъ и҆списа́ныхъ да и҆́матъ, и҆ и҆́же въ предрече́нное вре́мѧ не и҆сповѣ́сть и҆ не Причасти́тсѧ; по Свѣ́тлой Неде́ли, ꙗ҆́коже рече́сѧ въ Вто́рокъ, забы́вшихъ своѐ ᲃпⷭ҇нїе, и҆ по множестве́нномъ накаꙁанїи, Церко́вномꙋ повелѣ́нїю не покори́вшихсѧ, всѣ́мъ ꙗ҆встве́нныхъ да сътво́ритъ, ꙗ҆́кѡ ѿ всѣ́хъ благодѣѧ́нїй Церко́вныхъ ѿлꙋ́ченыхъ, є҆́же нико́мꙋже съ ни́ми съ ѡ҆бща́тисѧ дерꙁа́ти.

Въ хране́нїи Бжⷭ҇тве́нныхъ Та́инъ бо́лныхъ ра́ди, сі́ѧ до́лженъ є҆́стъ І҆ере́ѷ всѧ́кѡ и҆мѣ́ти, блюстѝ и҆ храни́ти.

Сщ҃е́нникъ Парохїѧ́лный да не пе́рвѣе тща́нїе тво́ритъ, є҆́же и҆мѣ́ти въ свое́й Це́ркви ᲃребрѧ́ный Крестъ, и҆́же є҆́стъ зна́менїе то́чїю Ха҃ Распѧ́тагѡ, и҆лѝ кади́лницꙋ, ꙗ҆́же є҆́стъ съсꙋ́дъ потре́бный къ слꙋже́нїю Бжⷭ҇тве́нныхъ Та́инъ, и҆ про́чїихъ Церко́вныхъ ᲃлꙋже́нїй: и҆лѝ Е҆ѵⷢ҇лїе ᲃре́бромъ и҆лѝ зла́томъ ѡ҆ко́ваное, ꙗ҆́же є҆́стъ Бжⷭ҇тве́нное Хв҃о сло́во: а҆́ще и҆ ᲃт҃олѣ́пнѡ и҆ благоче́стнѡ дѣ́ло є҆́стъ сі́е и҆ похва́лы досто́йное: но ᲂу҆бѡ въ пе́рвыхъ всѧ́кѡ да тщи́тсѧ и҆мѣ́ти зла́ты и҆лѝ ᲃребрѧ́ны съсꙋ́ды къ слꙋже́нїю прислꙋша́ющаѧ, сі́естъ, Ча́шꙋ, Ді́скосъ, Звѣꙁдꙋ̀, и҆ Ло́жицꙋ, въ ни́хъ же ѡ҆сщ҃а́ютсѧ и҆ съверша́ютъ Бжⷭ҇тве́нныѧ Та́йны, и҆ Ківꙍ́тъ и҆лѝ Гро́бницꙋ, къ хране́нїю тѣ́хжде Бжⷭ҇тве́ныхъ Та́инъ, Тѣ́ла и҆ Крвѐ Гд҃не́й, въ ни́хъ же и҆́стиннѡ и҆ дѣ́ломъ самы́мъ є҆́стъ ᲃа́мъ Хᲃ҃ въплоще́нный Гд҃ь и҆ Бг҃ъ на́шъ. Сі́ѧ же съѡрꙋжи́въ, ѡ҆ предърече́ннаѧ да тщи́тсѧ: и҆бѡ̀ Це́ркви въ пе́рвыхъ вита́лницꙋ и҆ пола́тꙋ приꙋготовлѧ́ти досто́итъ, пото́мъ же къ Ца́рскомꙋ ᲃлꙋже́нїю прислꙋша́ющимъ. а҆́щеже ѿ вели́кїѧ нищеты̀ зла́ты и҆лѝ ᲃребрѧ́ны бы́ти сі́ѧ не могꙋ́тъ, понѐ цино́вы всѧ́кѡ да бꙋ́дꙋтъ, подъ ка́ꙁнїю и҆ вино́ю Епⷭ҇піною пра́вилною.

Ківꙍ́тъ да бꙋ́детъ а҆́ще мо́жнѡ є҆́стъ, ꙗ҆́коже Ча́ша высо́ка съѡрꙋже́нна, и҆ съ покрыва́ломъ, Кре́стъ наве́рхꙋ и҆мѣ́ющомъ, и҆ до́брѣ заключа́ющомсѧ.

А҆́ще же не мо́щнѡ скꙋ́дости ра́ди вели́кꙋ бы́ти, и҆ ни́ꙁкїй ꙗ҆́коже Ківꙍ́тъ, сі́естъ ᲃкры́нѧ да бꙋ́детъ то́чїю благолѣ́пнѡ съ покрыва́ломъ Крестъ на верхꙋ̀ и҆мѣ́ющомъ съѡрꙋже́нъ: всегда́же на Прⷭ҇толѣ да стои́тъ, а҆ нѐ на и҆́номъ кое́мъ мѣ́стѣ.

Не сщ҃е́нна, сі́естъ: Мі́рскаѧ рꙋ́ка̀, нико́лиже ᲃегѡ̀ да косне́тсѧ, под̀ сме́ртнымъ грѣхо́мъ, и҆ подъ вели́кою є҆піти́мїею.

Пра́ха же ра́ди, све́рхꙋ чⷭ҇тымъ покрыва́ломъ покрове́нъ да бꙋ́детъ.

Бжⷭ҇тве́нныѧ Та́йны, не то́чїю въ Вели́кїй Четверто́къ, но и҆ въ и҆́ныѧ днѝ, мнѡ́гихъ ра́ди ви́нъ, по ꙋста́вꙋ вели́кагѡ Четвертка̀ въ слꙋже́бникахъ напи́саномъ ѡ҆сщ҃е́нны, сꙋ́шены, и҆ храни́мы бы́ти могꙋ́тъ.

Ѽсш҃е́ннымъ же и҆ и҆ссꙋ́шенымъ сꙋ́щимъ Бжⷭ҇тве́ннымъ Та́йнамъ, а҆́ще Кивѡ́тъ є҆́стъ зла́тый, и҆лѝ сребрѧ́ный: внꙋ́тръ поꙁлаще́ный, беꙁъ папѣ́рꙋ вло́жены въ не́мъ да бꙋ́дꙋтъ:

А҆́ще же ᲃребрѧ́нъ не поꙁлаще́нъ, и҆лѝ цино́вый є҆́стъ, чⷭ҇тый папѣ́ръ и҆ но́вый нико́лиже на и҆́но что̀ ᲂу҆потребле́ный въ Ківѡ́тѣ подсла́ный да бꙋ́детъ, и҆ на не́мъ Бжⷭ҇тве́нныѧ Та́йны да вло́жатсѧ.

Бжⷭ҇тве́нныѧ Та́йны въ Ківѡ́тѣ храни́мыѧ, ча́сто съ всѧ́кою достодо́лжною че́стїю ѿкрове́нною гла́вою поклоне́нїе створи́въ, рꙋ́цѣ же и҆ꙁмове́ны и҆мѣ́ѧ, на всѧ́къ дн҃ь ѽ І҆ере́ю посѣща́й: А҆́ще же невоꙁмо́жнѡ на всѧ́къ дн҃ь, понѐ въ вто́рый и҆лѝ тре́тїй дн҃ь, ѿкрывъ съсꙋ́дъ приꙁира́й да не ка́кѡ нерадѣ́нїѧ, и҆ неприꙁира́нїѧ ра́ди твое́гѡ сплѣснѣ́ютъ, и҆лѝ растлѣ́ютъ ѿ мокроты̀: и҆ сегѡ̀ ра́ди ꙗ҆́кѡ ᲂу҆ничижи́телъ Бжⷭ҇тв. Та́инъ, и҆ тѧ́жкѡ сме́ртнѡ съгрѣши́ши, и҆ и҆ꙁверже́нїѧ винѣ̀ подлѣга́ти бꙋ́деши.

А҆́ще ᲂу҆́бѡ ᲂу҆́ꙁриши, ꙗ҆́кѡ къ мокротѐ преклони́шасѧ, раꙁві́й А҆нтими́съ на ᲃт҃о́мъ Прⷭ҇тлѣ, и҆ съ всѧ́кимъ ѡ҆пасе́нїемъ ѿ Ківѡ́та на ᲃт҃ы́й Ді́скосъ вложѝ и҆ ѡ҆́кна ѿве́рꙁъ просꙋшѝ. са́мъ блюды́й донде́же и҆сшꙋ́тъ, да на мꙋ́ха и҆лѝ и҆нѡ что ѿ си́цевыхъ косне́тсѧ и҆мъ, и҆ та́кѡ тѧ́жкѡ ᲃме́ртнѡ съгрѣши́ши.

А҆́ще же ѿ небреже́нїѧ Бжⷭ҇тве́нныѧ Та́йны сꙋщѧ̀, припа́лиши, и҆лѝ каковѣ́мъ ли́бо бꙋ́ди ѡ҆́браꙁомъ ѿ мокроты̀ и҆ꙁплѣ́снити, и҆лѝ растли́тисѧ ѡ҆ста́виши, ᲃме́ртнѡ тѧ́жкѡ съгрѣши́ши. и҆ и҆ꙁверже́нїѧ винѣ̀ подлѣга́ти бꙋ́деши.

А҆́ще ᲂу҆́бѡ си́цевый слꙋча́й є҆́же не бꙋдѝ, когда̀ приклю́читсѧ, ника́коже никого́же да не дерꙁне́ши Причасти́ти си́цевыми Та́йнами: но и҆́ный А҆́гнецъ по ᲂу҆ста́вꙋ ниже́й написа́нномꙋ, ничто́же ѿлага́ѧ, къ ᲃлꙋже́нїю себѣ̀ приꙋготова́въ, въ ᲂу҆́трїй дн҃ь по ѡ҆щꙋтѣ́нїи сегѡ̀ Лѵтꙋ́ргїи Бжⷭ҇тве́ннꙋю наче́нъ, и҆ꙁмѝ, ѡ҆ст҃ѝ, и҆ и҆ꙁсꙋши́въ съхранѝ, и҆ си́мъ бо́лныхъ и҆ требꙋ́ющихъ Причастѝ: сплѣснѣ́лыѧ же и҆лѝ растлѣ́нныѧ Та́йны, на то́йжде Лѵтꙋ́ргїи на Жерто́вницѣ съ ѡста́нки Бжⷭ҇тве́нныхъ Та́инъ въ ча́ши и҆ссыпа́въ, потребѝ.

Хо́щеши ли ᲂу҆́бѡ ᲃи́цевыхъ ᲃлꙋ́чаевъ бѣ́дныхъ и҆ꙁбѣ́гнꙋти, въ кі́йждѡ Мцⷭ҇ъ, но́выѧ Бжⷭ҇твенныѧ Та́йны ѡ҆ст҃ѝ и҆ хранѝ, древнѣ́йшаѧ же при слꙋже́нїи Бжⷭ҇тве́нныѧ Лѵтꙋ́ргїи въ ᲃт҃ꙋю Ча́шꙋ всыпа́въ потребѝ.

Е҆гда̀ кро́мѣ Вели́кагѡ Четвертка̀ ѽ І҆ере́ю но́вый А҆́гнецъ бо́лныхъ ра́ди и҆мѣ́ти хо́щеши, си́це съдѣлова́й: приꙋготови́въ себѣ̀ ᲃт҃олѣ́пнѡ къ ᲃлꙋже́нїю бжⷭ҇тве́нныѧ Лѵтꙋ́ргїи, на Проскоми́дїю два̀ А҆гнца и҆ꙁмѝ, въ пе́рвыхъ ᲂу҆́бѡ є҆ди́нъ и҆ꙁе́мъ, всѐ надъ ни́мъ ꙗ҆́коже ᲃт҃а́ѧ Проскоми́дїѧ ᲂу҆ка́ꙁꙋетъ, и҆ творѝ и҆ гл҃ѝ: та́кожде и҆ надъ вто́рымъ, ничто́же ѡ́ставлѧ́ѧ ѿ Проскомиді́йныхъ, сі́естъ: Въспомина́нїе Гд҃а Бг҃а: и҆ ꙗ҆́кѡ ѡ҆вча̀: и҆ жре́тсѧ: и҆ є҆ди́нъ ѿ во́инъ: и҆ положѝ є҆гѡ̀ съ пе́рвымъ на ᲃт҃о́мъ Ді́скосѣ, и҆ а҆́бїе влѣ́й вино̀ въ стꙋ́ю Ча́шꙋ є҆ли́кѡ дово́лнѡ къ слꙋже́нїю, и҆ воды̀ ма́ло, гл҃ѧ̀ ѡ҆бы́чнаѧ: и҆ покрыва́й ѧ҆̀ ᲃт҃ы́ми Покро́вцы: и҆ кадѝ, глаголѧ̀, Моли́твꙋ предъложе́нїѧ.

Наче́нъ же Бжⷭ҇тве́ннꙋю Лѵтꙋ́ргїю съвершѝ ю҆̀ ѡ҆бы́чнѡ всю̀.

Е҆гда́же пренесе́ныѧ ᲂу҆жѐ ᲃт҃ы́ѧ А҆́гнци, по вели́комъ въхо́дѣ хо́щеши ѡ҆сти́ти, приложѝ намѣре́нїе ᲂу҆ма̀ и҆ во́лѧ твое́ѧ къ ѡ҆бо́има А҆́гнцѡма, є҆́же ѡ҆бѣ́мъ ѡ҆ст҃и́тисѧ, гл҃ѧ̀ Словеса̀ Хв҃а, сі́естъ: Прїймѣ́те, ꙗ҆ди́те, и҆ прочаѧ. Е҆гда́же гл҃еши, сътворѝ ᲂу҆́бѡ хлѣ́бъ се́й, є҆динстве́ннѡ, а҆ нѐ множестве́ннѡ гл҃ѝ. И҆ є҆гда̀ въꙁноси́ти и҆́маши, ѡ҆́ба вкꙋ́пѣ є҆дино́ю въꙁносѝ, въꙁглаша́ѧ: Ст҃а́ѧ ᲃт҃ы́мъ.

Въ раꙁдробле́нїи же є҆ди́нъ то́чїю Ст҃ы́й А҆́гнецъ раꙁдроблѧ́й, и҆ ѿ не́гѡ ча́стъ є҆ди́нꙋ ѡ҆бы́чнѡ въ Ст҃ꙋ́ю Ча́шꙋ вложѝ, и҆ терлотꙋ̀ влѣ́й.

Вто́рый же ᲃт҃ы́й А҆́гнецъ, преврати́въ ᲃт҃ы́мъ закла́нїемъ го́рѣ въꙁмѝ є҆гѡ̀, двѣ́ма пе́рсты свое́ѧ шꙋи́цы, съ всѧ́кимъ внима́нїемъ съхра́ннѡ, є҆́же не па́сти ѿ не́гѡ ничто́же нигде́же, десни́цею же въꙁмѝ ᲃт҃ꙋ́ю гꙋ́бꙋ сꙋ́щꙋю на ᲃт҃о́мъ А҆нтими́сѣ, и҆ вꙁемлѧ̀ ᲃт҃ы́й А҆́гнецъ ѿ ᲃт҃а́гѡ Ді́скоса, поддержѝ ю҆̀ подъ ᲃт҃ы́й А҆́гнецъ шꙋи́цею держи́мымъ: подне́съ же ᲃт҃ы́й А҆́гнецъ держѝ є҆гѡ̀ надъ ᲃт҃о́ю Ча́шею, ᲃт҃ꙋ́ю же гꙋ́бꙋ ѿрѧ́съ въ ᲃт҃ꙋ́ю Ча́шꙋ, положѝ ю҆̀ на ᲃт҃о́мъ А҆нтими́сѣ, и҆ вꙁе́мъ ᲃт҃ꙋію Ло́жицꙋ, черплѝ є҆ѝ Бжⷭ҇тве́ннꙋю Кро́въ ѿ ᲃт҃о́и Ча́ши, и҆ напава́й є҆ѝ ᲃт҃ы́й А҆́гнецъ, лїѧ̀ пома́лꙋ на сре́днее є҆гѡ̀, донде́же дово́лнѡ напои́ши. Впꙋсти́въ же Ло́жицꙋ въ ᲃт҃ꙋ́ю Ча́шꙋ, въꙁмѝ па́ки ᲃт҃ꙋ́ю гꙋ́бꙋ, и҆ подло́жъ подъ ᲃт҃ы́й А҆́гнецъ, ниꙁъ. пꙋстѝ є҆гѡ̀ съхра́ннѡ, и҆ положѝ на ᲃт҃о́мъ Ді́скосѣ ма́лѡ, до́ндеже раꙁы́йдетсѧ по немꙋ̀ Бжⷭ҇тве́ннаѧ Кро́въ, въ є҆́же не ѡ҆мочи́тисѧ є҆ѝ папѣ́рꙋ сꙋ́щемꙋ въ Кивꙍ́тѣ: По потребле́нїи же ᲃт҃ы́хъ Та́инъ, и҆ по съ стра́хомъ Бж҃їимъ ѡ҆бра́щсѧ, ᲃт҃ы́й А҆́гнецъ вложѝ въ Ківꙍ́тъ: Аще же Ківꙍ́тъ зла́тый и҆лѝ внꙋ́тръ поꙁлаше́нный, є҆́стъ, а҆́бїе въ Ківꙍ́тъ вложѝ.

Но ᲂу҆́бѡ ѽ І҆ере́ю блюдѝ, да не преиꙁоби́лнѡ влѣ́еши ѿ ᲃт҃о́й Крвѐ, въ є҆́же ка́кѡ промо́къ ᲃт҃ы́й А҆́гнецъ, на съсꙋ́дъ во́нже влага́еши, и҆ꙁрѧ́днѣе же на папи́ръ въ не́мъ сꙋ́щїй истече́тъ Влады́чнѧѧ Кро́въ, и҆ не бе́ꙁъ грѣха̀, ꙗ҆́коже ᲃт҃а́ѧ пренебрегі́й бꙋ́деши: но то́чїю є҆ли́кѡ всемꙋ̀ ѡ҆мочи́тисѧ Ст҃о́мꙋ А҆́гнцꙋ влі́й.

Въ ᲂу҆́трешнїй ᲂу҆́бѡ дн҃ъ, чⷭ҇то ᲃебѐ ᲃъблю́дъ ѿ всѧ́кїѧ скве́рны пло́ти и҆ дꙋ́ха, на Ꙋ҆́трню пре́дъ Е҆ѯа́ѱалмомъ ѡ҆дѣѧ́нъ въ всѧ̀ ᲃще́нныѧ ѡ҆де́жды, покади́въ Це́рковъ ѡ҆бы́чнѡ, и҆ вше́дъ въ Ѻ҆́лтаръ ᲃта́ни пре́дъ ᲃт҃о́ю Тра́пеꙁою, и҆ сътво́ръ благоговѣ́нное ᲃт҃ы́мъ Та́йнамъ поклоне́нїе, покадѝ ѧ҆̀ ѡ҆бы́чнѡ, Крестао́браꙁнѡ ѡ҆бходѧ̀ ᲃт҃ꙋ́ю Тра́пеꙁꙋ, ѿда́в же кади́лницꙋ ᲂу҆мы́й рꙋ́цѣ и҆ раꙁви́въ А҆нтіми́съ положѝ на не́мъ ᲃт҃ы́й Ді́скосъ, и҆ вꙁе́мъ ᲃт҃ы́й Ківꙍ́тъ съ Бжⷭ҇тве́нными Та́йнами, положѝ є҆гѡ̀ на кра́й А҆нтіми́са, и҆ ѿкры́въ въꙁмѝ па́ки кади́лницꙋ, и҆ кадѧ̀, въꙁгласѝ: Сла́ва ᲃт҃о́й, и҆ є҆диносꙋ́щной, и҆ нераꙁдѣли́мой Трⷪ҇ци, и҆ про́чаѧ: и҆ ѿда́въ кади́лницꙋ, и҆ꙁмѝ ѿ Ківꙍ́та ᲃт҃ы́й А҆́гнецъ съ всѧ́кимъ внима́нїемъ и҆ стра́хомъ, и҆ положѝ є҆гѡ̀ на ᲃт҃о́мъ Ді́скосѣ, на А҆нтіми́сѣ сꙋ́щомъ, и҆ ᲃт҃ы́мъ Ко́пїемъ раꙁдраблѧ́й є҆гѡ̀ съ всѧ́кимъ внима́нїемъ и҆ благоговѣ́нїемъ на дро́бныѧ ча́стки.

Сконча́ннꙋ же Е҆ѯа́ѱалмꙋ, а҆́ще нѣ́сть Дїѧ́кона, и҆лѝ и҆́нагѡ ᲃщ҃е́нника, въ є҆́же Е҆кте́нїѧ пре́дъ Ца́рскими Вра́ты гл҃а́ти, ты не ѿстꙋпѝ ѿ мѣ́ста на не́мъ же пре́дъ ᲃт҃о́ю Тра́пеꙁою стои́ши, но то́чїю престанѝ ѿ раꙁдробле́нїѧ, и҆лѝ сꙋше́нїѧ, и҆ та́мѡ благоговѣ́инѡ стоѧ̀, гл҃ѝ Е҆кте́нїѧ всѧ̀: по сконча́нїи же си́хъ предънача́тое дѣйствꙋ́й, си́це:

По раꙁдробле́нїи всегѡ̀ ᲃт҃а́гѡ А҆́гнца, положѝ пли́тѧный ка́мень, и҆лѝ пли́нфꙋ при краѝ Антими́са, ѿ десныѧ ᲃебѐ стра́ны, и҆ ве́рхꙋ ка́мени скꙋде́ль но́вый съ ᲂу҆́глїемъ горѧ́щимъ, и҆ покло́нсѧ благоговѣ́инѡ въꙁмѝ ᲃт҃ы́й Ді́скосъ Бжⷭ҇тве́нными Та́йнами раꙁдробле́нными, съ всѧ́кимъ внима́нїемъ, и҆ въꙁложѝ є҆гѡ̀ верхꙋ̀ скꙋде́лника, ѡ҆па́снѡ блюды́й да пома́лꙋ и҆ꙁсохнꙋтъ Бжⷭ҇тве́нныѧ Та́йны, превраща́ѧ ѧ҆̀ ᲃт҃ы́мъ Ко́пїемъ, да не ка́кѡ пригорѧ́тъ. є҆гда́же до́брѣ съгрѣ́етсѧ ᲃт҃ыій Ді́скосъ, снима́й є҆гѡ̀ и҆ полага́й на ᲃт҃о́мъ А҆нтіми́сѣ, да не велмѝ раꙁгорѣ́всѧ и҆ спа́литъ Бжⷭ҇тве́нныѧ Та́йны: ѡ҆стꙋди́въ же сѧ ма́лѡ, па́ки въꙁлага́й є҆гѡ̀ ве́рхꙋ Скꙋде́лника. Сі́еже творѝ и҆ многа́жды, донде́же до́брѣ и҆ꙁсо́хнꙋтъ Бжⷭ҇тве́нныѧ Та́йны. Сꙋхы́ѧ же, съ всѧ́кимъ внима́нїемъ вложѝ въ ᲃт҃ы́й Ківꙍ́тъ, и҆ покры́въ, положѝ на свое́мъ мѣ́стѣ, и҆ сътвори́въ достодо́лжное поклоне́нїе, ᲃві́й па́ки А҆нтіми́съ.

Лꙋ́чше ᲂу҆́бѡ ти и҆ беꙁбѣ́днѡ бꙋ́детъ ѽ І҆ере́ю, а҆́ще беꙁъ ѻ҆гнѧ̀ раꙁдроби́въ на Ді́скосѣ, сꙋ́щемъ на раꙁви́томъ А҆нтіми́сѣ, самы́е Бжⷭ҇тве́нные Та́йны ѿ вѣ́трꙋ и҆ссо́хнꙋтъ: но ᲂу҆́бѡ ѡ҆па́снѡ са́мъ и҆ неѿхо́днѡ блюдѝ и҆ приꙁира́й, до́ндеже и҆ссо́хнꙋтъ, да не па́днетъ на́нѧ плѣ́снь, ни́же мꙋ́ха и҆лѝ и҆́но что̀ ѿ живо́тныхъ прикосне́тсѧ, подъ тѧ́жкимъ ᲃме́ртнымъ грѣхо́мъ.

Мо́жеши а҆́ще и҆ꙁво́лиши и҆ въ всѧ́кꙋю седми́цꙋ но́вый А҆́гнецъ ѡ҆ст҃и́ти, и҆ че́реꙁъ се́дмъ дні́й то́чїю храни́ти, и҆лѝ ѿ Лѵтꙋ́ргїи до Лѵтꙋ́ргїи, и҆ частѣ́й сегѡ̀ ѿмѣни́ти.

А҆ и҆де́же по всѧ̀ днѝ Слꙋ́жба Бжⷭ҇твеннаѧ съверша́етсѧ, ꙗ҆́коже въ гра́дѣхъ Вели́кихъ быва́етъ, и҆лѝ въ Монастыре́хъ, и҆ кро́мѣ всѧ́кагѡ сꙋше́нїѧ Бжⷭ҇тве́нныѧ Та́йны бы́ти могꙋ́тъ, си́цевымъ ѡ҆́браꙁомъ: Не два̀ А҆́гнца закала́ѧ, но є҆ди́нъ, ѿ сегѡ̀ ᲂу҆́бѡ ᲃта́гѡ А҆́гнца ча́сть є҆динꙋ̀ Бж҃ественною Кро́вїю напои́въ ꙗ҆́коже предꙋкаꙁа́сѧ, до ᲂу҆́трїѧ слꙋ́чаѧ ра́ди кое́гѡ ᲃме́ртнагѡ храни́ти: и҆ та́кѡ на всѧ́къ дн҃ь творѧ̀ потре́бѣ бꙋ́детъ сꙋше́нїѧ, къ семꙋ́же ᲃи́це творѧ́й, и҆ всѣ́хъ бѣ́дъ и҆ꙁбѣ́гнетъ, и҆ ничто́же беꙁмѣ́стное, и҆лѝ Це́ркви проти́вное, па́чеже Боголѣ́пное и҆ дш҃еполеꙁное дѣ́ло сътво́ритъ. беꙁъ всѧ́кагѡ ᲂу҆сꙋмнѣ́нїѧ, и҆лѝ недоꙋмѣ́нїѧ.

Поне́же ѿ ᲂу҆че́нїѧ сама́гѡ Гд҃а на́шегѡ І҆и҃ᲃ Ха҃, ре́кшагѡ, ᲃі́е є҆́стъ Тѣ́ло моѐ, и҆ ᲃі́ѧ є҆́стъ Кро́въ моѧ̀, и҆ ᲃт҃ы́хъ А҆по́столѡвъ є҆гѡ̀, и҆ и҆́хъ въспрїе́мникѡвъ ѿц҃ъ ᲃт҃ы́хъ и҆ ᲂу҆чт҃лей Церкѡ́вныхъ, и҆ꙁвѣствова́ни є҆смы̀ ꙗ҆́кѡ сꙋщество̀ Хлѣ́ба и҆ Вина̀ на Бжⷭ҇твенной Лѵтꙋ́ргїи на Прⷭ҇тлѣ предло́женныхъ, въ ѡ҆сщ҃е́нїи, въ Тѣ́ло и҆ Кро́въ Ха҃ Бг҃а на́шегѡ прелага́етсѧ, по ѡ҆сщ҃е́нїиже не ѡ҆́браꙁъ Тѣ́ла и҆ Крвѐ, но подъ ви́домъ Хлѣ́ба и҆ Вина̀ самъ и҆́стинный Хрⷭ҇то́съ Богочеловѣ́къ въи́стиннꙋ є҆́стъ. Сегѡ̀ ра́ди съ всѧ́кимъ благоговѣ́нїемъ стра́хомъ и҆ тре́петомъ си́мъ прикаса́тисѧ, храни́ти ѧ҆̀ и҆ Бжⷭ҇тве́нное чⷭ҇тїю чти́ти сі́ѧ подоба́етъ.

Тѣ́мже ѽ І҆ере́ю Бжⷭ҇твенныѧ Та́йны всегда̀ на Бжⷭ҇тве́нномъ Прⷭ҇толѣ въ Ківѡ́тѣ ᲃт҃омъ всегда̀ всечⷭ҇тнѡ и҆мѣ́й, и҆ є҆гда̀ входи́ши въ Це́ркѡвъ зрѧ́хꙋ къ Ѻ҆́лтарꙋ си́мъ благоговѣ́инѡ ꙗ҆́кѡ Бг҃ꙋ поклони́сѧ, и҆ нача́токъ твои́хъ Моли́твъ въ глꙋбо́комъ смѣре́нїи съ вѣ́рою и҆ наде́ждею въ любвѝ принесѝ, съ стра́хомъ и҆ тре́петомъ ꙗ҆́кѡже Даві́дъ гл҃етъ, въ ѱа́лмѣхъ и҆ Пѣ́нїихъ и҆ Моли́твахъ работа́й Гд҃ви тꙋ ѡ҆бе́цнѣ сꙋ́щомꙋ.

Въ Ѻ҆́лтаръ же входѧ̀ всегда̀ пре́жде гла́вꙋ ѿкры́въ, и҆ поклоне́нїе ни́ꙁкое ство́ръ внидѝ: въше́дъ же и҆ къ Бжⷭ҇тве́нномꙋ Прⷭ҇то́лꙋ пристꙋпи́въ, нижа́йшее сътворѝ поклоне́нїе, и҆ всѐ є҆́же а҆́ще въ Ѻ҆́лтари дѣ́еши съ всѧ́кимъ смѣре́нїемъ и҆ благоговѣ́нїемъ, ꙗ҆́кѡ пре́дъ лице́мъ Бг҃а тꙋ сꙋ́щагѡ ѡ҆бе́цнѣ дѣйствꙋ́й: И҆сходѧ́же, та́кожде пе́рвѣе Бжⷭ҇тве́ннымъ Та́йнамъ ни́ꙁкѡ покло́нъсѧ и҆ꙁыйдѝ.

Е҆гда̀ Е҆кті́нїѧ пре́дъ ᲃт҃ы́ми Ца́рскими Вра́ты глаголе́ши, всегда̀ пе́рвѣе благоговѣ́инѡ гла́вꙋ ѿкры́въ поклони́сѧ, и҆ тогда̀ начина́й, та́кожде же сконча́въ, поклони́сѧ и҆ ѿидѝ. Си́мъ же ѡ҆́браꙁомъ и҆ є҆гда̀ приключа́етсѧ ми́мѡ ᲃт҃ы́хъ Ца́рскихъ Две́рехъ и҆тѝ, нико́лиже ми́мѡ и҆дѝ непокло́нъсѧ.

На конецъ же съверши́въ Но́щное, Ꙋ҆́трнее, и҆лѝ Дне́вное, и҆лѝ Вече́рнее Церко́вное Слꙋже́нїе, ꙗ҆́коже нача́токъ, ᲃи́це и҆ съверше́нїе є҆гѡ̀ благоговѣ́инѡ ѿдаѧ̀ Гд҃ви на Прⷭ҇то́лѣ сѣдѧ́щомꙋ, ни́ꙁко поклони́сѧ приле́жнѡ, є҆́же прїѧ́тнѡ є҆мꙋ̀ всѐ ѿ тебѣ̀ и҆ ѿ всѣ́хъ люді́й бы́ти. Вѣ́ждъ же и҆ꙁвѣ́стнѡ, ꙗ҆́кѡ сама́гѡ ра́ди сегѡ̀ поклоне́нїѧ ᲃт҃ы́мъ Бжⷭ҇тве́ннымъ є҆гѡ̀ Та́йнамъ съ вѣ́рою и҆ и҆́стиннымъ благоговѣ́нїемъ твори́магѡ, ѡ҆со́бнꙋю и҆ꙁъѡби́лнꙋю благода́ть ѿ Ха҃ Бг҃а прі́ймеши.

Ѻ҆́лтареви слꙋжа́щихъ сі́естъ: Панама́рѡвъ, до́лженъ є҆сѝ ѽ І҆ере́ю то́щнѡ ᲂу҆чи́ти, ꙗ҆́кѡ да ве́лїимъ стра́хомъ и҆ тре́петомъ и҆ всѧ́кимъ благоговѣ́нїемъ вхо́дѧтъ въ ᲃт҃ы́й Бж҃їй Ѻ҆́лтаръ, и҆ своѐ и҆́мъ нале́жное дѣ́ло соверша́тъ, вѣдꙋ́ще ꙗ҆́кѡ ѡ҆бличнѣ та́мѡ на Прⷭ҇тлѣ є҆́стъ Хᲃ҃ Бг҃ъ на́шъ. Входѧ́ще же и҆ и҆сходѧ́ще ни́ꙁкѡ да покло́нѧтсѧ: Прⷭ҇то́ла же Бжⷭ҇тве́ннагѡ, па́чеже самы́ѧ Бжⷭ҇тве́нныѧ на не́мъ сꙋ́щїѧ Та́йны, та́кожде съсꙋ́довъ слꙋже́бныхъ, и҆ и҆́ныхъ ᲃщ҃е́нныхъ ве́щїй ника́коже прикоснꙋ́тисѧ да дерꙁнꙋтъ, (да нѐ въ грѣ́хъ впа́днꙋтъ,) раꙁвѣ̀ свѣти́лникѡвъ и҆ свѣ́щъ, кади́лници же, и҆ и҆́ныхъ мнѣ́й ᲃщ҃е́нныхъ ве́щїй.

Че́сти ра́ди Бжⷭ҇тве́нныхъ Та́инъ никто́же ѿ несщ҃е́нныхъ въ ᲃт҃ы́й Ѻ҆́лтаръ да вхо́дитъ (же́ны же ника́коже нико́лиже) ра́ꙁвѣ на сѐ ѿдѣле́нїи въ Чистотѣ̀ Дѣвстве́нной и҆лѝ Сꙋпрꙋ́жеской чⷭ҇тнѡ живꙋ́щїи, Панамарѝ, частѡ и҆сповѣда́ющїисѧ и҆ Бжⷭ҇тве́ннымъ Та́йнамъ Причаща́ющїисѧ, треꙁве́нно же и҆ благоче́стнѡ въ добродѣ́телехъ пребыва́ющїи.

Сі́и Панамарѝ до́лжни сꙋ́тъ Про́сфѡры, Вино̀, Во́дꙋ, Ѳѵмїѧ́мъ, и҆ ѡ҆́гнь въ Ѻ҆́лтаръ внестѝ, свѣ́щѧ же вжига́ти и҆ ᲂу҆гаша́ти, кади́лницꙋ же, и҆ теплотꙋ̀ приꙋготовлѧ́ти и҆ І҆ере́ю подава́ти: Ѻ҆́лтаръ ве́съ чи́ннѡ и҆ ча́стѡ ᲂу҆местѝ, и҆ ѡ҆чища́ти, ᲃи́це зе́млю ѿ всѧ́кихъ ᲂу҆ме́тїй, ꙗ҆́коже и҆ стѣ́ны и҆ сте́ли ѿ пра́ха и҆ паꙋчи́ны. Прⷭ҇толъ же и҆ Жерто́вникъ І҆ере́ю то́чїю и҆ Дїѧ́конꙋ, и҆лѝ Поддїѧ́конꙋ досто́итъ ѡ҆чища́ти и҆ и҆стира́ти, въ є҆́же нико́лиже ѡ҆брѣсти́сѧ на ни́хъ пра́хꙋ, и҆лѝ ᲂу҆ме́тїю кое́мꙋ, Прⷭ҇то́лъ бо Бж҃їй ᲃт҃ы́й є҆́стъ, да не съ грѣхо́мъ косне́тсѧ ᲃщ҃е́нныхъ рꙋка̀ не ᲃщ҃е́ннаѧ. Въ Це́ркви же и҆ Па́пертѣ Панамарѝ, та́кожде Ѻ҆́браꙁы, стѣ́ны, сте́ли ѿ пра́ха и҆ паꙋчи́ны, зе́млю же ѿ ᲂу҆ме́тїй ча́сто ѡ҆чища́ти до́лжни ᲃꙋ́тъ.

Ꙋ҆ме́ти, пра́хъ, ѿ Прⷭ҇то́ла и҆ Жерто́вника и҆ꙁме́теный, ᲃи́це и҆ Ѻ҆́лтарнїй ника́коже во́нъ на неподо́бное мѣ́сто и҆ꙁмещѝ, но и҆лѝ въ рѣкꙋ̀ текꙋ́щꙋю сі́ѧ въсыплѝ, и҆лѝ подъ стено́ю Церко́вною ꙗ҆́мꙋ и҆скопа́въ вложѝ и҆ закопа́й.

Не довлѣ́етъ ᲂу҆́бѡ само́мꙋ то́чїю І҆ере́ю, и҆ Ѻ҆́лтарнымъ слꙋжи́телемъ є҆гѡ̀, поклоне́нїемъ Бголѣ́пнымъ Ха҃ въ Бжⷭ҇тве́нныхъ є҆гѡ̀ Та́йнахъ чти́ти, но и҆ всѣмъ христїѧ́нѡмъ ᲃпⷭ҇ти́сѧ хотѧ́щимъ, сі́е всѧ́ко твори́ти подоба́етъ.

Тѣ́мъ же до́лженъ є҆́сть І҆ере́ѷ, своѧ̀ Парохїѧ́ны ᲂу҆чи́ти, и҆ то́щнѡ нака́ꙁовати, є҆́же внегда̀ въхо́дѧтъ въ Це́ркѡвъ, не про́стѡ, ни́же ꙗ҆́коже прилꙋчи́сѧ поклонѧ́тисѧ, но и҆ серде́чныма и҆ чювстве́нныма ѡ҆чи́ма къ Ѻ҆́лтарю зрѧ́ще, съ всѧ́кимъ благоговѣ́нїемъ несꙋмни́телною Вѣ́рою Хв҃и въ Бжⷭ҇тве́нныхъ Та́йнахъ и҆́стиннѡ сꙋ́щомꙋ, нача́токъ свои́хъ Моли́твъ приносѧ́ще смѣре́ннѡ да покло́нѧтсѧ, приле́жнѡ просѧ́ще є҆́же благопрїѧ́тнымъ бы́ти є҆мꙋ̀ и҆́хъ молба́мъ и҆ трꙋ́дѡмъ, приноси́тисѧ ѿ ни́хъ и҆мꙋ́щимъ: про́чее же благоѡ́браꙁнѡ съ стра́хомъ и҆ тре́петомъ є҆мꙋ̀ предстоѧ́ще и҆ молѧ́щесѧ, Пѣ́нїѧ и҆ Моли́твы Церко́вныѧ да послꙋша́ютъ, по съверше́нїи же всегѡ̀, та́кожде да покло́нѧтсѧ благоговѣ́инѡ ѿда́юще томꙋ́жде Хв҃и Бг҃ꙋ принесе́нныѧ своѧ̀ Моли́твы. Къ си́мъ же да нака́жетъ и҆́хъ є҆́же при Бжⷭ҇тве́нной Лѵтꙋ́ргїи є҆гда̀ І҆ере́ѷ гл҃етъ: Прїймѣ́те ꙗ҆ди́те, и҆ Пе́йте ѿ неѧ̀ всѝ благоговѣ́инѡ ни́ꙁкѡ да покло́нѧтсѧ, гл҃ю́ще. А҆ми́нь: Та́кожде, є҆гда̀ І҆ере́ѷ въꙁглаша́етъ, Твоѧ̀ ѿ твои́хъ, и҆ Ст҃а́ѧ ᲃт҃ы́мъ, поклоне́нїе да ство́рѧтъ нижа́йшее: є҆гда́же на скончанїи Бжⷭ҇тве́нныѧ Слꙋ́жбы съ ᲃт҃ы́ми Та́йнами въ две́рехъ Ца́рскихъ ста́въ І҆ере́ѷ, гл҃етъ: Съ стра́хомъ Бж҃іимъ, всѝ колѣ́нѣ прекло́нше съ стра́хомъ и҆ тре́петомъ и҆ вѣ́рою благоговѣ́инѡ гла́вою до землѝ Хрⷭ҇тꙋ Бг҃ꙋ въ Та́йнахъ да покло́нѧтсѧ, подне́вшежесѧ на колѣ́нѣхъ стоѧ́ще да пребꙋ́дꙋтъ, донде́же І҆ере́ѷ съ Бжⷭ҇тве́нными Та́йнами къ Жерто́вникꙋ ѿходѧ̀ въꙁгласи́тъ: Всегда̀ нн҃ѣ и҆ при́снѡ: и҆ тогда̀ па́ки до землѝ покло́ншесѧ, да въста́нꙋтъ.

И҆ сегѡ̀ то́щнѡ до́лженъ є҆сѝ своѧ̀ Парохїѧ́ны ᲂу҆чи́ти ѽ І҆ере́ю, є҆́же є҆гда̀ въ Лѵтꙋ́ргїи ᲃт҃гѡ Васи́лїѧ, и҆ Златоꙋ́стагѡ на Вели́комъ Въхо́дѣ Бжⷭ҇тве́нныѧ Да́ры приноси́мы быва́ютъ, до землѝ покло́нꙋ не твори́ти и҆мъ, и҆бѡ̀ є҆щѐ не ѡ҆сщ҃е́нны Да́ры сꙋ́тъ, но то́чїю блⷭ҇ве́ный Хлѣ́бъ и҆ Вино̀ къ ѡ҆сщ҃е́нїю прено́сѧтсѧ, то́чїю стоѧ́ще гла́вы прекло́нше да мо́лѧтсѧ съ І҆ере́емъ Да́ры преносѧ́щимъ, ꙗ҆́кѡ да помѧне́тъ и҆́хъ Гд҃ь въ Ца́рствїи свое́мъ. Семꙋ́же ᲃи́це бы́ти, сегѡ̀ ра́ди подоба́етъ, ꙗ҆́кѡ да Е҆рети́ци, ѿстꙋ́пници, пога́не же и҆ Жидо́ве, не въꙁмогꙋ́тъ на́съ ѡ҆болга́ти, нарица́юще, А҆ртоннола́трами, сі́естъ, Хлѣбовинопокло́нниками, всѣ́мъ бо беꙁпреткнове́ни въ все́мъ бы́ти намъ Правовѣ́рнымъ подоба́етъ, (ꙗ҆́коже Бжⷭ҇твенный А҆по́столъ гл҃етъ, а҃ Коринѳ. Глава̀ і҃, Зача́лѡ, рм҃ꙁ.) І҆ꙋдеꙍмъ же и҆ Е҆́ллиномъ и҆ Це́ркви Бж҃їей, и҆ не полага́ти претыка́нїѧ бра́тꙋ, и҆лѝ со́блаꙁны: Римъ. Глава̀ ді҃. Зача́ло, рд҃і. Въ преждесщ҃е́нной же Лѵтꙋ́ргїи на Вели́комъ Въхо́дѣ, поне́же съверше́ннѡ ѡ҆сщ҃е́нны сꙋ́тъ Бжⷭ҇тве́нныѧ Та́йны, Боголѣ́пное поклоне́нїе до землѝ твори́ти поклоне́нїе до́лжни сꙋ́тъ всѝ христїа́не.

Да наꙋ́читъ же І҆ере́ѷ Лю́ди и҆ сегѡ̀ то́щнѡ, є҆́же є҆гда̀ І҆ере́ѧ ᲂу҆́ꙁрѧтъ съ Бжⷭ҇тве́нными Та́йнами къ бо́лномꙋ и҆дꙋ́ща, та́кожде на колѣ́нѣ па́дше кі́йждѡ съ благоговѣ́нїемъ Хв҃и въ Та́йнахъ сꙋ́щомꙋ да покло́нитсѧ.

Вѣ́ждъ и҆ сі́е ѽ І҆ере́ю, ꙗ҆́кѡ и҆́мъже ѡ҆́браꙁомъ всѝ христїѧ́не правовѣ́рнїи, ᲃт҃ы́мъ Креще́нїемъ ѿрожде́ни, не и҆мѣ́ющїи ѿлꙋченїѧ и҆лѝ клѧ́твы на себѣ̀, благоче́стно же живꙋ́щїи и҆ чре́ꙁъ Та́йнꙋ Покаѧ́нїѧ въ и҆сповѣданїи, со́вестъ чⷭ҇тꙋю съ подоба́ющимъ приꙋготовле́нїемъ ᲃе́рдце съ мы́слїю къ Бг҃ꙋ поднесеннꙋю и҆мѣ́ющїи: кро́мѣ ѿ дх҃овника на вре́мѧ запрѣще́нїю сꙋ́щїи: къ си́мъ же по преда́нїю А҆по́столскомꙋ Це́рковъ ᲃт҃а́ѧ Правосла́внокаѳꙍли́ческаѧ Въсто́чнаѧ съде́ржитъ, и҆ младе́нци и҆ подро́слые ѡ҆троча́та, и҆́мъ же ꙗ҆́коже на ᲃт҃о́мъ Креще́нїи, ᲃи́це и҆ къ прїѧ́тїю си́хъ Бжⷭ҇тве́нныхъ Та́инъ чре́ꙁъ приносѧ́щихъ и҆́хъ, Це́рковъ ᲃт҃а́ѧ Вѣ́рꙋ заимстꙋ́етъ, досто́йни сꙋ́тъ сподобле́ни бы́ти прїѧ́тїю ᲃт҃ы́хъ Бжⷭ҇тве́нныхъ Та́инъ Тѣ́ла и҆ Крвѐ Гд҃не́й.

Недосто́йни же сꙋ́тъ па́ки, и҆ всѧ́кѡ ѿ причаще́нїѧ ᲃт҃ы́хъ Та́инъ да бꙋ́дꙋтъ ѿда́лены ꙗ҆́вѣ не досто́йни, ꙗ҆ко́вїи сꙋ́тъ клѧ́твꙋ на себѣ̀ Епⷭ҇кпомъ и҆мѣ́юшїи, и҆ въ ѿлꙋче́нїи сꙋ́щїи. и҆ всѝ ꙗ҆́вно грѣ́шници, ꙗ҆ко́вїи сꙋ́тъ, блꙋ́дници, и҆ блꙋ́дницѧ, нало́жница и҆мѣ́ющїи, и҆ самы́ѧ ты́ѧ нало́жница, прелюбодѣ́е, лихвои́мци, чародѣ́е, ворожбиты̀ всѧ́кїи, ᲃт҃ота́тци, карто́вници, косты́рници, хꙋ́лници, и҆ и҆́нїи си́мъ подо́бнїи ꙗ҆́вно грѣ́шници. Сі́и доне́лѣже и҆́стиннѡ не пока́ютсѧ, и҆ плѡ́ды досто́йны покаѧ́нїѧ не сътво́рѧтъ и҆ сбла́ꙁнꙋ и҆́же ꙗ҆́вѣ съдѣѧ́ша и҆ съдѣлова́ютъ, покаѧ́нїемъ свои́мъ ꙗ҆́вѣ не потребѧ́тъ. Прича́стїѧ ᲃт҃ы́хъ Та́йнъ ника́коже да ᲃподобѧ́тсѧ.

Съкрове́нныхъ же грѣ́шникѡвъ, а҆́ще та́йнѡ на и҆сповѣда́нїи про́сѧтъ сподоби́тисѧ Бжⷭ҇тве́нныхъ Та́инъ Прича́стїѧ, не и҆справле́нныхъ же си́хъ а҆́ще зри́ши, не сподобѝ и҆́хъ: А҆́ще же ꙗ҆́вѣ про́сѧтъ, и҆ а҆́ще кро́мѣ со́блаꙁны и҆́ныхъ сі́е бы́ти мо́жетъ. Причастѝ и҆́хъ, да не ꙗ҆́внымъ запрѣще́нїемъ та́йныхъ ра́ди грѣхѡ́въ, бо́лшаѧ и҆ꙁрасте́тъ со́блаꙁна.

И҆ꙁꙋмле́ннымъ, Бжⷭ҇тве́нныѧ Та́йны подава́ти, ника́коже досто́итъ, то́чїю є҆гда̀ къ себѣ̀ прихо́дѧтъ, и҆ ᲂу҆́мны быва́ютъ, и҆ є҆гда̀ въ съкрꙋше́нїи ᲃерде́чномъ и҆сповѣда́нїе грѣхо́въ свои́хъ тво́рѧтъ, къ Це́ркви прихо́дѧтъ, Бг҃ꙋ мо́лѧтсѧ, и҆ благоче́стнѡ Церко́вныѧ Моли́твы слꙋ́шаютъ, и҆ꙁрѧ́днѣе же а҆́ще ни є҆дина̀ бѣда̀ недосто́инства въ ни́хъ ѡ҆брѣта́етсѧ, да Причастѧ́тсѧ.

По предънапи́санномꙋ ᲂу҆́бѡ ᲂу҆ста́вꙋ, предъꙋготова́въ ᲃебѐ І҆ере́ѷ, и҆ свою̀ ᲃо́вѣсть пре́дъ ѡ҆чисти́въ, и҆ благоговѣ́инѡ Часы̀ всѧ̀ съ свои́мъ и҆́хъ дх҃о́внымъ раꙁмышле́нїемъ съверши́въ, на Ꙍ҆бѣ́дницѣ по Блаже́ннахъ съ внима́нїемъ да чте́тъ А҆по́столъ се́й къ Коринѳі́ѡмъ, Зача́ло, рм҃д.

И҆ послѣдꙋ́ющее Е҆ѵⷢ҇лїе.

Бра́тїе, а҆́ꙁъ прїѧ́хъ ѿ Гд҃а, є҆́же и҆ преда́хъ ва́мъ. Ꙗ҆́кѡ Гд҃ь І҆и҃ᲃ, въ но́щъ въ ню́же преда́нъ быва́ше, прїи́мъ Хлѣ́бъ и҆ благодари́въ преломѝ, и҆ речѐ: Прїймѣ́те, ꙗ҆ди́те, сі́е є҆́стъ Тѣ́ло моѐ за́вы ломи́мое, сі́е твори́те въ моѐ въспомина́нїе. Та́кожде и҆ Ча́шꙋ по Вече́ри, гл҃ѧ̀: сі́ѧ Ча́ша Но́вый Завѣ́тъ є҆́стъ въ мое́й Крвѝ: сі́е твори́те, Е҆ли́жды а҆́ще пі́ете, въ моѐ въспомина́нїе: Е҆ли́жды бо а҆́ще ꙗ҆́сте Хлѣ́бъ се́й и҆ Ча́шꙋ сі́ю пі́ете, ᲃме́рть Гд҃ню въꙁвѣща́ете, до́ндеже прїйде́тъ. Тѣ́мже и҆́же а҆́ще ꙗ҆́сть Хлѣ́бъ сі́й, и҆лѝ пі́етъ Ча́шꙋ Гд҃ню недосто́йнѣ, пови́ненъ бꙋ́детъ Тѣ́лꙋ и҆ Крвѝ Гд҃не́й. Да и҆скꙋша́етъ же человѣ́къ себѣ̀, и҆ та́кѡ ѿ Хлѣ́ба да ꙗ҆́сть и҆ ѿ Ча́ши да пі́етъ. Ꙗ҆ды́й бо и҆ пїѧ́й, недосто́йнѣ, ᲃꙋ́дъ себѣ̀ ꙗ҆́сть и҆ пі́етъ, не раꙁсꙋжда́ѧ Тѣ́ла Гд҃нѧ. Сегѡ̀ ра́ди въ ва́съ мнѡ́ꙁи не́мощни и҆ недꙋжли́ви, и҆ спѧ́тъ дово́лни. А҆́ще бо бы́хѡмъ себѣ̀ раꙁсꙋжда́ли, не бы́хомъ ѡ҆сꙋжде́ни бы́ли.

Сꙋди́ми же ѿ Гд҃а нака́ꙁꙋемсѧ, да не съ мі́ромъ ѡ҆сꙋди́мсѧ.

Ѿ І҆ꙍа́нна Ст҃а́гѡ Е҆ѵⷢ҇лїѧ чте́нїе.

Зача́ло, кг҃.

Речѐ Гд҃ь къ прише́дшимъ къ не́мꙋ І҆ꙋде́ѡмъ.

А҆́ꙁъ є҆́смь Хлѣ́бъ живо́тный:

Ѿцы̀ ва́ши ꙗ҆дѡ́ша Ма́ннꙋ въ пꙋсты́ни, и҆ ᲂу҆мрѡ́ша:

Се́й є҆́сть Хлѣ́бъ сходѧ́й съ нб҃сѐ, да, а҆́ще кто̀ ѿ негѡ̀ ꙗ҆́сть, не ᲂу҆́мретъ:

А҆́ꙁъ є҆́смь Хлѣ́бъ Живо́тный, съше́дый съ нб҃сѐ: А҆́ще кто̀ снѣ́сть ѿ Хлѣ́ба сегѡ̀, жи́въ бꙋ́детъ въ вѣ́ки: и҆ Хлѣ́бъ, є҆гѡ́же а҆́ꙁъ да́мъ, пло́ть моѧ̀ є҆́сть, ю҆́же а҆́ꙁъ да́мъ за живо́тъ мі́ра.

Прѧ́хꙋсѧ же ме́ждꙋ собо́ю Жи́дове, гл҃ю́ще: ка́кѡ мо́жетъ се́й намъ да́ти пло́ть свою̀ ꙗ҆́сти.

Речѐ же и҆́мъ І҆и҃съ: А҆ми́нь. А҆ми́нь гл҃ю̀ ва́мъ: а҆́ще не снѣ́сте Пло́ти Сн҃а Чловѣ́ческагѡ, и҆ не пі́ете Крвѐ є҆гѡ̀, живота̀ не и҆́мате въ себѣ̀.

Ꙗ҆ды́й мою̀ Пло́ть и҆ пїѧ́й мою̀ Кро́вь и҆́матъ Живо́тъ Вѣ́чный, и҆ а҆́ꙁъ Въскрешꙋ̀ є҆гѡ̀ въ послѣ́днїй Дн҃ь.

И҆ по Е҆ѵⷢ҇лїи.

Помѧнѝ на́съ Гд҃и:

И҆ про́чаѧ Ꙍ҆бѣ́дницѣ всѧ̀ сконча́въ.

Начина́етъ съ всѧ́кимъ внима́ниїемъ и҆ благоговѣ́нїемъ, и҆ ᲃтра́хомъ Бж҃їимъ, ничто́же помышлѧ́ѧ ѡ҆ зе́мныхъ, ра́ꙁвѣ то́чїю ѡ҆ вели́чествѣ Та́йны Тѣ́ла и҆ Крвѐ Гд҃не́й, и҆ ѡ҆ свое́мъ недосто́инствѣ своѧ̀ грѣхѝ и҆ꙁчита́ѧ, и҆ ѡ҆ проще́нїи тѣ́хъ приле́жнѡ съ вѣ́рою молѧ́сѧ. И҆ гл҃етъ въ ᲂу҆миле́нїи и҆ съкрꙋше́нїи ᲃерде́чномъ, а҆́ще же въꙁмо́жнѡ и҆ съ слеꙁа́ми.

Благослове́нъ Бг҃ъ на́шъ, всегда̀ нн҃ѣ и҆ пр҃нѡ, и҆ въ вѣ́ки вѣко́въ. А҆ми́нь.

Цр҃ꙋ Нбⷭ҇ный: Трⷭ҇то́е: по Ѿче на́шъ. Гд҃и поми́лꙋй, ві҃. Прїйдѣ́те покло́нимсѧ, гⷤ. Та́жъ, Ѱало́мъ, ка҃.

Бж҃е, бж҃е мо́й, во́нъми ми, вскꙋ́ю ѡ҆ста́вилъ мѧ̀ є҆сѝ; дале́че ѿ ᲃпⷭ҇нїѧ мое́гѡ словеса̀ грѣхопаде́нїй мои́хъ.

Бо́же мо́й, въꙁꙁовꙋ̀ во днѝ, и҆ не ᲂу҆слы́шиши, и҆ въ но́щи, и҆ не въ беꙁꙋ́мїе мнѣ̀.

Ты́же въ ᲃт҃о́мъ живе́ши, хвало̀ І҆и҃лева.

На́тѧ ᲂу҆пова́ша Ѿцы̀ на́ши: ᲂу҆пова́ша, и҆ и҆ꙁба́вилъ є҆сѝ и҆́хъ.

Къ тебѣ̀ въꙁꙁва́ша, и҆ спасо́шасѧ: на́тѧ ᲂу҆пова́ша, и҆ не постыдѣ́шасѧ.

А҆́ꙁъ же є҆́смь че́рвь, а҆ не человѣ́къ, поноше́нїе человѣ́кѡмъ и҆ ᲂу҆ничиже́нїе люде́мъ.

Всѝ видѧ́щїи мѧ̀ порꙋга́шамисѧ, глагола́ша ᲂу҆стна́ми, покива́ша гла́вою:

Ꙋ҆пова̀ на Гд҃а, да и҆ꙁба́витъ и҆̀, да сп҃се́тъ є҆гѡ̀, ꙗ҆́кѡ хо́щетъ є҆гѡ̀.

Ꙗ҆́кѡ ты̀ є҆сѝ и҆сто́ргїй мѧ̀ и҆ꙁъ чре́ва, ᲂу҆пова́нїе моѐ ѿ ᲃѡ́сцꙋ Мт҃ре мое́ѧ.

Къ тебѣ̀ приве́рженъ є҆́смь ѿ ложе́снъ, Ѿ чре́ва Мт҃ре мое́ѧ Бг҃ъ мо́й є҆сѝ ты̀: не ѿстꙋ́пѝ ѿ менѐ. Ꙗ҆́кѡ ско́рбь бли́ꙁъ, ꙗ҆́кѡ нѣ́сть помога́ѧй мѝ.

Ѽбы́йдоша мѧ̀ те́льцы мно́ꙁи, ю҆́нцы тꙋ́чнїи ѡ҆бдержа́ша мѧ̀:

Ѿверꙁо́ша на́мѧ ᲂу҆ста̀ своѧ̀, ꙗ҆́кѡ Ле́въ въсхища́ѧй и҆ рыка́ѧй.

Ꙗ҆́кѡ вода̀ и҆ꙁлїѧ́сѧ, и҆ раꙁсы́пашасѧ всѧ̀ ко́сти моѧ̀. Бы́сть ᲃе́рдце моѐ ꙗ҆́кѡ во́скъ та́ѧй посре́дѣ чре́ва мо́гѡ.

И҆́сшѐ ꙗ҆́кѡ ᲃкꙋде́ль крѣ́пость моѧ̀, и҆ ꙗ҆ꙁы́къ мо́й прильпѐ горта́ни мое́мꙋ, и҆ въ пе́рсть ᲃме́рти съве́лъ мѧ̀ є҆сѝ.

Ꙗ҆́кѡ ѡ҆быдѡ́ша мѧ̀ ѱѝ мнѡ́ꙁи, ᲃо́нмъ лꙋка́выхъ ѡ҆держа́ша мѧ̀: И҆скопа́ша рꙋ́цѣ моѝ и҆ но́ꙁѣ моѝ, и҆ꙁчето́ша всѧ̀ кѡ́сти моѧ̀: Ті́и же ᲃмотрѣ́ша и҆ преꙁрѣ́ша мѧ̀.

Раꙁдѣли́ша ри́ꙁы моѧ̀ себѣ̀, и҆ ѡ҆ ѻ҆де́жди мое́й мета́ша жре́бїѧ.

Ты́же, Гд҃и, не ᲂу҆далѝ по́мощи твое́ѧ ѿ менѐ, на застꙋпле́нїе моѐ во́нъми.

И҆ꙁмѝ ѿ ѡ҆рꙋ́жїѧ дꙋ́шꙋ мою̀, и҆ и҆ꙁъ рꙋкѝ пе́сїѧ є҆диноро́днꙋю мою̀.

Сп҃си́мѧ ѿ ᲂу҆́стъ Льво́въ, и҆ ѿ рѡ́гъ є҆динорѡ́ждъ ᲃмире́нїе моѐ.

Повѣ́мъ И҆мѧ̀ твоѐ Бра́тїи мое́й, посре́дѣ Це́ркве воспою̀ тѧ.

Боѧ́щїисѧ Гд҃а, въсхвали́те є҆гѡ̀, всѐ ᲃѣ́мѧ І҆а́кꙍвле, просла́вите є҆гѡ̀, да ᲂу҆бои́тъжесѧ ѿ не́гѡ всѐ ᲃѣ́мѧ І҆и҃лево:

Ꙗ҆́кѡ не ᲂу҆ничижѝ, ни негодова̀ моли́твы ни́щагѡ, ни ѿврати́же лица̀ свое́гѡ ѿ ме́не, и҆ є҆гда̀ въꙁꙁва́хъ къ не́мꙋ, ᲂу҆слыша́мѧ.

Ѿ тебѣ̀ похва́ла моѧ̀, въ Це́ркви вели́цѣ и҆сповѣ́мсѧ тебѣ̀: Моли́твы моѧ̀ въꙁда́мъ пре́дъ боѧ́щимисѧ є҆гѡ̀.

Ꙗ҆дѧ́тъ ни́щїи, и҆ насытѧ́тсѧ, и҆ въсхва́лѧтъ Гд҃а вꙁыска́ющїи є҆гѡ̀: жи́ва бꙋ́дꙋтъ ᲃе́рдца и҆́хъ въ вѣ́къ вѣ́ка.

Помѧнꙋ́тсѧ и҆ ѡ҆братѧ́тсѧ къ Гд҃ꙋ всѝ ко́нцы землѧ̀, и҆ покло́нѧтсѧ пре́дъ ни́мъ всѧ̀ ѿче́ствїѧ ꙗ҆ꙁы́кѡвъ:

Ꙗ҆́кѡ Гд҃не є҆́сть Ца́рствїе, и҆ то́й ѡ҆блада́етъ ꙗ҆ꙁы́ки.

Ꙗ҆дѡ́ша и҆ поклони́шасѧ всѝ тꙋ́чнїи землѧ̀: пре́дъ ни́мъ припа́дꙋтъ всѝ ниꙁходѧ́щїи въ зе́млю: И҆ дш҃а̀ моѧ̀ томꙋ̀ живе́тъ.

И҆ сѣ́мѧ моѐ поработа́етъ є҆мꙋ̀: Вꙁвѣсти́тсѧ Гв҃и рѡ́дъ грѧдꙋ́щїй,

и҆ въꙁвѣстѧ́тъ пра́вдꙋ є҆гѡ̀ лю́демъ роди́мымъ, и҆́хъ же сътворѝ Гд҃ь.

Ѱало́мъ Дави́довъ, кв҃.

Гд҃ь пасе́тъ мѧ̀, и҆ ничто́же мѧ̀ лиши́тъ.

На мѣ́стѣ зла́чнѣ, та́мѡ вселѝ, на водѣ̀ поко́йнѣ воспита́ мѧ̀,

Дꙋ́шꙋ мою̀ ѡ҆братѝ. Наста́ви мѧ̀ на ᲃтеꙁѧ̀ пра́вды, и҆́мене ра́ди є҆гѡ̀.

А҆́ще бо и҆ по́йдꙋ посре́дѣ ᲃѣ́ни ᲃме́ртныѧ, не ᲂу҆бою́сѧ зла̀, ꙗ҆́кѡ ты̀ съ мно́ю є҆сѝ: Же́ꙁлъ тво́й и҆ па́лица твоѧ̀, та́мѧ ᲂу҆тѣши́ста.

Ꙋ҆гото́валъ є҆сѝ пре́до мно́ю тра́пеꙁꙋ ᲃъпроти́въ ᲃтꙋжа́ющымъ ми. Ꙋ҆масти́лъ є҆сѝ Е҆ле́ꙍмъ главꙋ̀ мою̀, и҆ ча́ша твоѧ̀ ᲂу҆поѧ́ющаѧ мѧ̀, ꙗ҆́кѡ держа́вна.

И҆ млⷭ҇ть твоѧ̀ пожене́тъ мѧ̀ всѧ̀ днѝ живота̀ мое́гѡ, и҆ всели́тимисѧ въ до́мъ Гд҃ень въ долготꙋ̀ дні́й.

Ѱало́мъ Дави́довъ, въ є҆динꙋ̀ ѿ Сꙋббꙍ́тъ, кг҃.

Гд҃нѧ є҆́стъ землѧ̀, и҆ и҆сполне́нїе є҆ѧ̀, вселе́ннаѧ и҆ всѝ живꙋ́щїи на не́й.

То́й на морѧ́хъ ѡ҆снова́лъ ю҆̀ є҆́сть и҆ на рѣка́хъ ᲂу҆гото́валъ ю҆̀ є҆́сть.

Кто̀ вꙁы́детъ на го́рꙋ Гд҃ню; и҆лѝ кто̀ ᲃта́нетъ на мѣ́стѣ ᲃт҃ѣ́мъ є҆гѡ̀;

Непови́нный рꙋка́ма и҆ чи́стый ᲃе́рдцемъ, и҆́же не прїѧ́тъ на ᲃꙋ́е дш҃ѧ̀ свое́ѧ и҆ не клѧ́тсѧ ле́стїю и҆́скреннемꙋ ᲃвое́мꙋ:

Се́й прі́йметъ блⷭ҇ве́нїе ѿ Гд҃а и҆ млⷭ҇тыню ѿ Бг҃а ᲃп҃са свое́гѡ.

Се́й ро́дъ и҆́щꙋщихъ Гд҃а, и҆́щꙋщихъ лица̀ Бг҃а І҆а́кꙍвлѧ.

Въꙁмѣ́те врата̀ Кнѧ́ꙁи ва́ша, и҆ въꙁмѣ́тесѧ вра́та вѣ́чнаѧ: и҆ вни́детъ Ца́рь ᲃла́вы.

Кто̀ є҆́сть се́й Ца́рь ᲃла́вы; Гд҃ь крѣ́покъ и҆ ᲃи́ленъ, Гд҃ь ᲃи́ленъ въ бра́ни.

Въꙁмѣ́те вра́та Кнѧ́ꙁи ва́ша, и҆ въꙁмѣ́тесѧ вра́та вѣ́чнаѧ: и҆ вни́детъ Ца́рь ᲃла́вы.

Кто̀ є҆́сть се́й Ца́рь ᲃла́вы; Гд҃ь ᲃи́ламъ, то́й є҆́сть Ца́рь ᲃла́вы.

Ѱало́мъ Дави́довъ, рє҃і

Вѣ́ровахъ, тѣ́мже и҆ въꙁгл҃а́хъ: а҆́ꙁъ же смири́хсѧ зѣ́лѡ.

А҆́ꙁъ же рѣ́хъ во и҆стꙋпле́нїи мое́мъ: всѧ́къ человѣ́къ ло́жь.

Что̀ въꙁда́мъ Гд҃еви ѡ҆ всѣ́хъ, ꙗ҆̀же въꙁда́лъ ми є҆́стъ;

Ча́шꙋ ᲃпⷭ҇нїѧ прїймꙋ̀ и҆ и҆мѧ̀ Гд҃не приꙁовꙋ̀:

Моли́твы моѧ̀ Гд҃еви въꙁда́мъ пре́дъ всѣ́ми людъмѝ є҆гѡ̀.

Че́стна̀ пре́дъ Гд҃емъ ᲃме́рть преподо́бныхъ є҆гѡ̀.

Ѽ, Гд҃и, а҆́ꙁъ ра́бъ тво́й, а҆́ꙁъ ра́бъ тво́й и҆ ᲃы́нъ рабы́ни твое́ѧ: Расто́рглъ є҆сѝ ᲂу҆́ꙁы моѧ̀.

Тебѣ̀ пожрꙋ̀ же́ртвꙋ хва́лы, и҆ въ и҆мѧ̀ Гн҃е приꙁовꙋ̀.

Моли́твы моѧ̀ Гд҃еви въꙁда́мъ пре́дъ всѣ́ми людъмѝ є҆гѡ̀,

Въ дво́рѣхъ До́мꙋ Гд҃нѧ, посре́дѣ тебѣ̀, І҆ерⷭ҇ли́ме.

Сла́ва: И҆ нн҃ѣ: А҆ллилꙋ́їа, три́жды. Тропа́ръ, Гла́съ, ѕ҃.

Беꙁꙁакѡ́нїѧ моѧ̀ ᲂу҆множи́шасѧ Гд҃и: но ты̀ ми ᲃі́ѧ пре́ꙁри, и҆ Причаще́нїемъ Прчⷭ҇тыхъ ти Та́инъ, мно́жество беꙁчисле́нныхъ ми грѣхѡ́въ ѻ҆чи́сти, селе́нїе въ мнѣ̀ себѣ̀ Ѻ҆т҃цꙋ́же и҆ ᲃт҃о́мꙋ ти Дх҃ви сътворѧ́ѧ: є҆ди́нъ бо є҆сѝ беꙁгрѣ́шенъ и҆ многоми́лостивъ.

Сла́ва:

Къ Прича́стїю ᲃт҃ы́хъ ти и҆ Бжⷭ҇тве́нныхъ Та́инъ Гд҃и, ка́кѡ дерꙁнꙋ̀ ѡ҆каѧ́нный приближи́тисѧ съ досто́йными, и҆лѝ пристꙋпи́ти съ непоро́чными; ѡ҆де́жда бо мѧ̀ ѡ҆блича́етъ, ꙗ҆́кѡ нѣ́сть бра́чна: и҆ бою́сѧ да не навлекꙋ̀ ѡ҆сꙋжде́нїѧ дш҃ѝ мое́й, ра́ди недосто́инства: но ты благоꙋтро́бный Хє҃ Бе҃ мо́й, ѡ҆чи́сти ᲃкве́рнꙋ дш҃а̀ мое́ѧ, и҆ досто́йно мѧ̀ сто́мꙋ ти Жерто́вникꙋ, слꙋжи́ти ᲃътворѝ ꙗ҆́кѡ є҆ди́нъ ми́лостивъ.

И҆ нн҃ѣ.

Ꙍ҆ Мр҃їе пренепоро́чнаѧ Дв҃о, Богороди́телнице чⷭ҇таѧ: ѡ҆скверне́нагѡ мно́гими грѣха́ми, Пречи́стою ти и҆ всемо́щною Моли́твою, ѿ всѧ́кїѧ ѡ҆чи́сти ᲃкве́рны, ᲃлꙋжи́телѧ же ᲃт҃а́гѡ Жерто́вника, и҆ Прчⷭ҇тагѡ Тѣ́ла и҆ чⷭ҇тныѧ Крвѐ Сн҃а твое́гѡ, досто́йна мѧ̀ бы́ти сътворѝ Прича́стника: всѧ̀ бо ты̀ ꙗ҆́кѡ Ма́ти Зижди́телѧ, мо́жеши, є҆дина̀ въ жена́хъ блⷭ҇ве́ннаѧ.

Та́жъ ѱало́мъ, н҃.

Поми́лꙋй мѧ̀, Бж҃е, по вели́цѣй млⷭ҇ти твое́й.

Канꙍ́нъ къ причаще́нїю Сщ҃е́нникѡмъ,

И҆́же съ всѧ́кимъ внима́нїемъ въ ᲂу҆миле́нїи благоговѣ́нно, ѽ благочести́вый І҆ере́ю чтѝ.

Гла́съ, и҃. Пѣ́снь а҃. И҆́рмосъ.

Пои́мъ Гв҃и, І҆и҃лѧ дре́вле ѿ работы̀ види́магѡ Фараꙍ́на пресла́внѡ и҆ꙁбави́вшомꙋ, и҆ Моѷсе́ꙍвымъ жеꙁло́мъ, ꙗ҆́кѡ посꙋ́хꙋ скво́ꙁѣ че́рмное мо́ре, пречꙋ́днѡ прове́дшомꙋ, на́съ же ѿ ле́сти мысле́ннагѡ Фараꙍ́на, на коне́цъ вѣ́кѡвъ, свое́ю чⷭ҇тною Кро́вїю ᲃпⷭ҇шомꙋ, ꙗ҆́кѡ прослави́сѧ.

Се́рдце чⷭ҇то съꙁи́жди въ мнѣ̀, Бж҃е:

Вѣ́рою несꙋмнѣ́нною, съ стра́хомъ ѡ҆ба́че, надѣѧ́сѧ на ᲃловеса̀ твоѧ̀ сі́ѧ: грѧдꙋ́щагѡ къ мнѣ̀ не и҆ꙁженꙋ̀ во́нъ, дерꙁа́ю приближи́тисѧ, и҆ слꙋжи́ти ᲃт҃о́мꙋ ти Жерто́вникꙋ: но а҆́ще и҆ не досто́инъ є҆́смъ, ты̀ мѧ̀ са́мъ ꙗ҆́кѡ благоꙋтро́бенъ, ᲃт҃ы́мъ твои́мъ досто́йнѡ слꙋжи́ти ꙗ҆вѝ Та́йнамъ.

Не ѿве́ржи менѐ ѿ лица̀ твое́гѡ и҆ Дх҃а твое́гѡ ᲃⷮ:

Никто́же досто́инъ нарещи́сѧ мо́жетъ пре́дъ твои́мъ вели́чествомъ, (всѧ̀ бо пра́вда на́ша ꙗ҆́коже рꙋ́бище пове́ржено, є҆́стъ пре́дъ тобо́ю,) а҆́ще не твоѧ̀ благода́ть тꙋнѐ ѡ҆правди́тъ на́съ. Са́мъ ᲂу҆́бѡ человѣкѡлю́бче, по благоꙋтро́бїю твое́мꙋ, сътворѝ мѧ̀ досто́йнѡ ᲃт҃ы́мъ твои́мъ ᲃлꙋжи́ти Та́йнамъ.

Сла́ва:

Сщ҃енникъ ᲃы́й въ вѣ́ки, по чи́ну Мелхиседе́кову, Хє҃ Сп҃се мой: себѣ̀ же́ртвꙋ жи́вꙋ є҆дино́ю Ѿ҆цꙋ свое́мꙋ, на Крестномъ Жерто́вницѣ, ѡ҆ на́съ прине́слъ є҆сѝ и҆́же и҆ на́ми всегда̀ приноше́нъ беꙁкро́внѣ хотѧ̀ бы́ти въ ᲃпⷭ҇нїе вѣ́рнымъ, ᲂу҆ста́вилъ є҆си на́съ слꙋжи́ти ᲃт҃омꙋ твое́мꙋ Жерто́вникꙋ: тѣ́мъ же и҆ нн҃ѣ досто́йнѡ, сподобѝ мѧ̀ ᲃлꙋжи́ти ᲃт҃ы́мъ твои́мъ Та́йнамъ.

И҆ нн҃ѣ:

Дв҃о Прчⷭ҇аѧ Ма́рїе Бц҃е, Бг҃а сло́ва неиꙁрече́ннѡ пло́тїю ѿ Дх҃а ᲃт҃гѡ заче́ншаѧ, и҆ бе́ꙁъ и҆стлѣ́нїѧ Двⷭ҇тва̀, въ ᲃпⷭ҇нїе вѣ́рнымъ ро́ждшаѧ: тогѡ̀ ꙗ҆́кѡ благосе́рдагѡ, приле́жнѡ Ма́терски мл҃ѝ, да досто́йнѡ мѧ̀ твои́хъ ра́ди всепрїѧ́тныхъ Моли́твъ сподоби́тъ, ᲃт҃ымъ свои́мъ слꙋжи́ти Та́йнамъ.

Пѣ́снь, г҃. И҆рмо́съ.

Да ᲂу҆тверди́тсѧ ᲃе́рдце моѐ ѡ҆ тебѣ̀ Хє҃ Сп҃се, да въꙁнесе́тсѧ ро́гъ мо́й ѡ҆ Бꙁ҃ѣ мое́мъ, и҆ да ѿверꙁꙋ́тсѧ ᲂу҆ста̀ моѧ̀, на пѣ́нїе твое́ѧ хва́лы: въꙁвесели́хъбосѧ ѡ҆ ᲃпⷭ҇нїи твое́мъ, ꙗ҆́кѡ ра́ꙁꙋмѡвъ Гд҃ь ты є҆сѝ, и҆ Бг҃ъ ᲂу҆готова́ѧй начина́нїѧ своѧ̀, и҆ нѣ́сть Ст҃а па́че тебѣ̀ Гд҃и.

Се́рдце чи́сто съꙁи́жди въ мнѣ̀:

Не на досто́инство моѐ є҆гѡ́же не и҆́мамъ, но на пꙋчинꙋ̀ твое́гѡ благоꙋтро́бїѧ вꙁира́ѧ, дерꙁа́ю приближи́тисѧ къ ᲃт҃о́мꙋ ти Жерто́вникꙋ, и҆ слꙋжи́ти ᲃт҃ы́мъ твои́мъ Та́йнамъ. Ты́ ᲂу҆́бѡ Сп҃се ꙗ҆́кѡ благоꙋтро́бенъ, створѝ мѧ̀ досто́йнѡ беꙁъкро́внꙋю тебѣ̀ принестѝ Же́ртвꙋ.

Не ѿвержѝ менѐ ѿ лица̀ твое́гѡ и҆ Дх҃а:

А҆ще всѧ́къ живы́й не ѡ҆правди́тсѧ пре́дъ тобо́ю, Влады́кѡ человѣ́кѡлю́бче: ка́кѡ а҆́ꙁъ недосто́йный, и҆де́же А҆́гг҃ли прини́кнꙋти жела́ютъ, вънитѝ и҆ слꙋжи́ти стра́шномꙋ ти Жерто́вникꙋ дерꙁнꙋ̀; но ты́ мѧ̀ сподобѝ досто́йнѡ беꙁкро́внꙋю ти, и҆ всест҃ꙋ́ю принестѝ Же́ртвꙋ.

Сла́ва:

Не по мое́мꙋ досто́инствꙋ, но по твое́мꙋ благоꙋтро́бїю, ꙗ҆́коже сподоби́лъ мѧ̀ є҆сѝ въ чи́нꙋ ᲃщ҃енныхъ твои́хъ слꙋ́гъ вчислѧ́тисѧ: ᲃи́це и҆ ᲃт҃о́мꙋ ти предста́ти Жерто́вникꙋ сподобѝ: ѡ҆ мои́хъ же съгрѣше́нїихъ, и҆ ѡ҆ лю́дскихъ невѣ́ждествїихъ, слове́снꙋю и҆ беꙁкро́внꙋю ти принестѝ Же́ртвꙋ.

И҆ нн҃ѣ:

Въ ᲂу҆тро́бѣ свое́й беꙁсѣ́меннѡ пресꙋществе́ннагѡ заче́ншаѧ, и҆ нескаꙁа́ннѡ носи́вшаѧ Тво́рца тва́ри, Бц҃е Прчⷭ҇таѧ, и҆ пло́тїю неиꙁрече́ннѡ роди́вшаѧ, тогѡ̀ молѝ, да є҆́же не ѡ҆сꙋжде́ннѡ ми ᲃщ҃еннодѣйствова́ти ᲃщ҃е́ннаѧ є҆гѡ̀ Та́инства, и҆ досто́йнѡ принестѝ є҆мꙋ̀ беꙁъкро́внꙋю же́ртвꙋ.

Сѣда́ленъ, Гла́съ, в҃.

Да чⷭ҇тою ᲃо́вѣстїю и҆ вѣ́рою несꙋмнѣ́нною, ᲃт҃мꙋ твое́мꙋ предста́въ Жерто́вникꙋ, съединю́сѧ не ѡ҆сꙋжде́ннѡ сты́мъ твои́мъ Та́йнамъ, и҆́миже ѡ҆божа́етъ и҆ ѿ грѣ́хъ ѡ҆чища́етсѧ, пребога́тꙋю да́нꙋю премꙋ́дрымъ твои́мъ А҆по́столѡмъ благода́тъ, дарꙋ́й ми Хє҃ Бє҃ и҆ поми́лꙋй мѧ̀.

Сла́ва: И҆ нн҃ѣ:

Пренепоро́чнаѧ Дв҃о чⷭ҇таѧ, съ всѣ́ми ᲃт҃ы́ми, моли́сѧ Сн҃ꙋ и҆ Бг҃ꙋ твое́мꙋ, дарова́ти мои́мъ сгрѣше́нїемъ проще́нїе, и҆ прича́стника мѧ̀ досто́йна Бжⷭ҇тве́ннымъ свои́мъ ꙗ҆ви́ти Та́йнамъ. да тогѡ̀ ꙗ҆́кѡ Бг҃а ᲃла́влю въ вѣ́ки, тебѣ̀ же ꙗ҆́кѡ Бж҃їю Ма́теръ беꙁъпреста́ннѡ велича́емъ.

Пѣ́снь, д҃. И҆рмо́съ.

Оу҆слыша́в Проро́к, прихо́дъ тво́й Хє҃ ᲂу҆боѧ́сѧ: а҆́ꙁъ же вѣ́рою пречꙋ́днаѧ твоѧ̀ раꙁꙋмѣ́въ дѣ́ла, трепе́тнѡ ᲂу҆дивлѧ́юсѧ. ѿ ю́га бо на ᲃпⷭ҇нїе вѣ́рнымъ прише́лъ є҆сѝ, въ гнѣ́вѣ помѧнꙋ́ти млⷭ҇ть: и҆ сегѡ̀ ра́ди тебѣ̀ съ А҆вва́кꙋмомъ Бо́же ра́дꙋѧсѧ въпїю̀, ᲂу҆чинѝ но́ꙁѣ моѝ на съверше́нїе; да просла́влю твоѐ Бжⷭ҇тво̀, и҆ въспою̀: си́лѣ твое́й сла́ва человѣкѡлю́бче.

Се́рдце чи́сто ᲃъꙁи́жди въ мнѣ̀ Бж҃е:

Не въ хлѣ́бе, ни съ хлѣ́бомъ, ни подъ хлѣ́бомъ Тѣ́ло: ни въ Винѣ̀, ни съ Вино́мъ, ни подъ Вино́мъ Кро́въ бы́ти: но сꙋщество̀ Хлѣ́ба въ само́е твоѐ Тѣ́ло Сп҃се, и҆ сꙋщество̀ Вина̀ въ самꙋ́ю Прчⷭ҇тꙋю и҆́стиннꙋю твою̀ Кро́въ премѣнѧ́тисѧ вѣ́рꙋю; подъ ѡ҆бо́ихъ же ви́ды, є҆дина́гѡ тѧ̀ цѣ́ла Богочеловѣ́ка и҆сповѣдꙋ́ю, є҆мꙋ́же и҆ молю́сѧ, досто́йнѡ мѧ̀ слꙋжи́ти и҆ причасти́тисѧ ᲃподобѝ.

Не ѿвержѝ менѐ ѿ лица̀ твое́гѡ.

Не ѡ҆́браꙁъ тѣ́ла, ни́же ѡ҆́браꙁъ крвѐ, но само́е и҆́стинное, ѡ҆дш҃евле́ное и҆ ѡ҆бж҃е́ное тѣ́ло, и҆ Бжⷭ҇тве́ннꙋю и҆ꙁъ Ре́бръ и҆стекшꙋю ти Сп҃се мо́й Кро́въ, въ Прчⷭ҇тыхъ твои́хъ Е҆ѵхари́стїи Та́йнахъ бы́ти вѣ́рꙋю, и҆ тве́рдѡ и҆сповѣдꙋ́ю: и҆́мже молю́сѧ, досто́йнѡ мѧ̀ слꙋжи́ти, и҆ Причасти́тисѧ Хє҃ мо́й, ꙗ҆́кѡ Бг҃ъ млⷭ҇ти́въ и҆ благоꙋтро́бенъ сподобѝ.

Сла́ва:

Не Тѣ́лꙋ съ нб҃съ сходи́ти, но хлѣ́ба сꙋществꙋ̀, въ ѡ҆́ное на нб҃сѝ ᲃꙋ́щее, и҆ Вина̀ въ Пребжⷭ҇тве́ннꙋю твою̀ Хє҃ мо́й прчⷭ҇тꙋю Кро́въ, Бжⷭ҇тве́нными ти словесы̀, дѣ́йствомъ же Прⷭ҇тагѡ Дх҃а, вы́шше сло́ва и҆ ра́ꙁꙋма, премѣнѧ́тисѧ и҆сповѣдꙋ́ю: Ты́ бо ѡ҆бы́чными є҆стества̀ ꙗ҆́же сꙋ́тъ вы́шше є҆стⷭ҇тва̀ твори́ши: и҆́мъ же мѧ̀ нн҃ѣ слꙋжи́ти и҆ досто́йнѡ Причасти́тисѧ, ᲃп҃се мой сподобѝ.

И҆ нн҃ѣ:

Того́жде є҆дина́гѡ, нераꙁдѣ́лнѣ цѣ́лагѡ въ Та́йнахъ на Прⷭ҇то́лѣ, подъ види́мыми Ви́ды невиди́мѡ покрове́ннагѡ Ха҃ Бг҃а, и҆стебѐ Дв҃о Богороди́телнице въплоще́ннагѡ, и҆́же и҆ на Нб҃сѝ ѡ҆де́снꙋю Ѿца̀, съ ни́мъ и҆ съ Дх҃омъ ᲃлави́мый, Бжⷭ҇тве́ннѡ сѣди́тъ, тве́рдѡ бы́ти вѣ́рꙋю и҆ и҆сповѣдꙋ́ю. є҆мꙋ́же мѧ̀ ты, ꙗ҆́кѡ щедрѡ́тъ и҆ милосе́рдїѧ Мт҃и, те́плыми ти Моли́твами, слꙋжи́ти и҆ досто́йнѡ причасти́тисѧ ᲃподобѝ.

Пѣ́снь, є҃. И҆рмосъ.

Ѿ но́щи Дх҃омъ къ свѣ́тꙋ твои́хъ живода́телныхъ повелѣ́нїй, ᲂу҆треню́ю Бж҃е, и҆ мл҃ю́сѧ те́плѣ, росо́ю ꙗ҆́же ѿ тебѣ̀ и҆сцѣлѝ недꙋгꙋ́ющꙋю грѣха́ми дꙋ́шꙋ мою̀, и҆ ᲃтра́хъ тво́й Бжⷭ҇тве́нный въсадѝ въ ᲃе́рдце моѐ, да прїймꙋ̀ дх҃ъ ᲃпⷭ҇нїѧ твое́гѡ, є҆гѡ́же да́лъ є҆сѝ на землѝ: кро́мѣ бо тебѣ̀ и҆́нагѡ Бг҃а не ꙁна́ю: и҆ И҆мѧ̀ твоѐ ᲃт҃о́е и҆менꙋ́ю.

Се́рдце чⷭ҇то съꙁи́жди въ мнѣ̀ Бж҃е:

Ꙗ҆́кѡ сама́гѡ Бг҃а всеси́лна, на нб҃сѝ и҆ на землѝ, и҆ всю́дꙋ тѧ̀ Хє҃ сꙋ́ща и҆сповѣдꙋ́ю: ꙗ҆́коже Бг҃а и҆ человѣ́ка на нб҃сѝ то́чїю ѡ҆де́снꙋю Ѿца̀, и҆ на землѝ въ Та́йнахъ Причаще́нїѧ, бы́ти вѣ́рꙋю. и҆́мъже мѧ̀ недосто́йнагѡ, досто́йнѡ ꙗ҆́кѡ бла́гъ слꙋжи́ти сътворѝ, и҆ Причасти́тисѧ ꙗ҆́кѡ человѣкѡлю́бецъ неѡ҆сꙋжде́ннѡ сподобѝ, вели́кїѧ ра́ди твое́ѧ млⷭ҇ти.

Не ѿвержѝ менѐ ѿ лица̀ твое́гѡ:

Вѣ́рою тве́рдѡ ᲂу҆вѣщава́юсѧ, подъ види́мыми Хлѣ́ба и҆ Вина̀ ви́ды, и҆́стинное бы́ти Тѣ́ло, и҆ и҆стиннꙋю Сп҃си́телнꙋю ти Хє҃ Сп҃се мо́й Кро́въ ꙗ҆́кѡже А҆по́столѡмъ свои́мъ подава́ѧ ре́клъ є҆сѝ, ꙗ҆́же мѧ̀ въ же́ртвꙋ благопрїѧ́тꙋ Ѿцꙋ̀ твое́мꙋ, ѡ҆ моихъ съгрѣш́нїихъ, и҆ ѡ҆ лю́дскихъ невѣ́ждествїихъ, неѡсꙋжде́ннѡ принестѝ сподобѝ, вели́кїѧ ра́ди твое́ѧ ми́лости.

Сла́ва:

Пресꙋществе́нїѧ бжⷭ҇тве́нныхъ ти Та́инъ, Ѻ҆́браꙁа не свѣ́мъ Гд҃и, ни́же є҆́же ка́кѡ премѣне́нїе си́хъ быва́етъ и҆спытꙋю: Ѻ҆́браꙁъ бо є҆́стъ неисповѣди́мый: но ꙗ҆́кѡ ᲃловесы̀ твои́ми, и҆ наи́тїемъ ᲃт҃а́гѡ Дх҃а, ѿ таинстве́ннагѡ твое́гѡ є҆́же въ Дв҃ѣй въплоще́нїѧ навы́къ, тве́рдѡ ᲂу҆вѣрѧ́юсѧ, ꙗ҆́кѡ ты є҆сѝ въ Та́йнахъ Причаще́нїѧ, веществе́ннѣ Хᲃ҃ Бг҃ъ и҆ человѣ́къ, прише́дый въ мі́ръ спⷭ҇тѝ на́съ, вели́кїѧ ради твое́ѧ млⷭ҇ти.

И҆ нн҃ѣ:

Пло́ть и҆́же ѿ Дв҃ы прїѧ́лъ, и҆ на ᲃме́рть въда́лъ є҆сѝ, на Нб҃са̀ же въꙁне́съ, ѡ҆де́снꙋю Ѿца̀ съпосади́лъ є҆сѝ, тꙋ́южде є҆динꙋ̀ и҆ подъ ви́домъ Хлѣ́ба на Прⷭ҇то́лѣ, ꙗ҆́коже и҆ ѿ Прчⷭ҇тыхъ ти Ра́нъ и҆сте́кшꙋю Кро́въ, подъ ви́домъ Вина̀ въ Бжⷭ҇тве́нной Ча́ши, по и҆ꙁрече́нїи Бжⷭ҇тве́нныхъ ти слове́съ, дѣ́йствомъ Прⷭ҇та́гѡ Дх҃а бы́ти вѣ́рꙋю, ꙗ҆́же досто́йнѡ ᲃщ҃еннодѣйствова́ти, и҆ тѣ́мъ неѡсꙋжде́ннѡ Причасти́тисѧ сподобѝ мѧ̀ Хрⷭ҇те, вели́кїѧ ра́ди твое́ѧ ми́лости.

Пѣ́снь, ѕ҃. И҆рмо́съ.

И҆ꙁъ чре́ва а҆́да грѣхо́внагѡ, ѿ глꙋбины̀ ᲃе́рдца, пꙋчи́ною жите́йскою погрꙋжа́емъ, ꙗ҆́кѡ ѿ Ки́та І҆ꙍ́на, въпїю̀ ти млⷭ҇рде Хє҃ Бж҃е, ѿ тлѧ̀ ᲃтра́стїй, и҆ ѿ ро́ва преиспо́днѧгѡ зѡ́лъ мои́хъ, живо́тъ мо́й въꙁведѝ, І҆и҃се Царю̀ си́ламъ: да приложꙋ̀ є҆́же досто́йнѡ, съ гла́сомъ хвале́нїѧ и҆ и҆сповѣда́нїѧ, въ твое́й Це́ркви беꙁкро́внꙋю Же́ртвꙋ пожрѣ́ти тебѣ̀.

Се́рдце чⷭ҇то съꙁи́жди:

А҆́ще и҆ пресꙋществꙋ́етсѧ Хлѣ́бъ и҆ Вино̀, но сꙋщества̀ свое́гѡ не ѡ҆ничтожева́ютъ, ни́же и҆́ное прїе́млютъ: но своѐ ᲃꙋщество̀ въ Тѣ́ло Хв҃о, и҆ чⷭ҇тнꙋю є҆гѡ̀ Кро́вь, неиꙁрече́ннѡ пременѧ́ютъ: и҆ ᲂу҆жѐ къ томꙋ̀ не Хлѣ́бъ, ни́же Вино̀ є҆́стъ, но въ ѡ҆бо́ихъ є҆ди́нъ Хᲃ҃ цѣ́лый, то́чїю Ви́ды Хлѣ́ба и҆ Вина̀, ꙗ҆́же непремѣ́нны пребыва́ютъ, покрове́нный. въ снѣ́дъ и҆ ᲃпⷭ҇нїе вѣ́рнымъ предле́житъ.

Не ѿвержѝ менѐ ѿ лица̀ твое́гѡ:

А҆́ще и҆ всегда̀ раꙁдраблѧ́етсѧ, и҆ вѣ́рнымъ раꙁдава́етсѧ: но цѣ́лъ и҆ є҆ди́нъ Хᲃ҃ въ Та́йнахъ, по все́й вселе́ной на Прⷭ҇то́лѣхъ нераꙁдѣли́мъ пребыва́етъ: и҆ всегда̀ да̀ ꙗ҆до́мъ, нико́гдаже ᲃнѣда́емъ, ни́же и҆стощева́емъ быва́етъ: но ѡ҆сща́етъ, и҆ просвѣща́етъ, вѣ́рою и҆ чⷭ҇тымъ ᲃе́рдцемъ Причаща́ющихсѧ: и҆ благода́ть свою̀ Бжⷭ҇твеннꙋю подае́тъ, неиꙁрече́ннѡ тѣ́мъ съвокꙋплѧ́ѧсѧ. на снѣ́дь бо и҆ ᲃпⷭ҇нїе вѣ́рнымъ предле́житъ.

Сла́ва:

Ꙗ҆́кѡже человѣ́ка себѣ̀ съвокꙋплѧ́ѧ Сп҃се, тѣ́ломъ Бжⷭ҇тво̀ своѐ покры́лъ є҆сѝ: си́це и҆ нн҃ѣ, да на́съ пло́ть ѿ пло́тїй, и҆ ко́сть ѿ ко́стїй твои́хъ сътвори́ши, въ Та́йнахъ и҆́стиннꙋю пло́ть и҆ Кро́вь твою̀ въ ᲃп҃си́телнꙋю ᲃнѣ́дь и҆ пи́тїе, вѣ́рнымъ предлага́еши: види́мыми Хлѣ́ба и҆ Вина̀ ви́ды покры́въ. и҆́мъже и҆ менѐ досто́йнѡ Причасти́тисѧ сподобѝ.

И҆ нн҃ѣ:

Бц҃е Мт҃и живота̀, Хлѣ́бъ жи́ꙁни вѣ́чныѧ, Тѣ́ло ᲃп҃си́телное Ха҃ Бг҃а мое́гѡ, и҆ Ча́шꙋ беꙁъсме́ртїѧ Кро́вь є҆гѡ̀ Бжⷭ҇тве́ннꙋю, твои́ми Ма́терними приле́жными мольба́ми, досто́йнѡ мѧ̀, (въ ѡ҆ставле́нїе грѣхѡвъ, въ и҆сполне́нїе премꙋ́дрости, въ преспѣѧ́нїе въ добродѣ́телехъ, и҆ въ приѡбрете́нїе жи́ꙁни вѣ́чныѧ) прїѧ́ти нн҃ѣ, ꙗ҆́кѡ человѣ́колюби́ваѧ, сподобѝ. на сѐ бо въ пѝщꙋ вѣ́рнымъ предле́житъ.

Конда́къ, Гла́съ, и҃.

Превѣ́чнаѧ Бж҃аѧ Премꙋ́дрость, ѿ Двⷭ҇тве́нныѧ ᲂу҆тро́бы пло́тскїй ᲃебѣ́ съꙁда́вши хра́мъ, ᲃебѐ во́лею всегда̀ закала́етъ, въ снѣ́дь вѣ́рнымъ предлагающи, и҆ въ Ча́ши Бжⷭ҇стве́ннꙋю свою̀ че́рплетъ Пречⷭ҇тꙋю Кро́вь: въпїю́щи: Ꙗ҆дѣ́те, сі́ѧ бо є҆́стъ моѧ̀ Пло́ть, А҆́гглⷭ҇кое въи́стиннꙋ бра́шнѡ: и҆ Пі́йте ѿ не́ѧ вѣ́рнїи всѝ, сі́ѧ бо моѧ̀ и҆́стиннаѧ грѣхочисти́телнаѧ є҆́стъ Кро́вь, и҆ꙁъ Бжⷭ҇твенныхъ мои́хъ Ре́бръ и҆сте́кшаѧ, Нбⷭ҇ное въи́стиннꙋ пи́тїе: и҆́мъже мы Причаща́ющесѧ, въ вѣ́рѣ, ᲂу҆твержда́емсѧ.

И҆́косъ.

Хра́мъ себѣ̀, Ѿцꙋ̀ же и҆ Прⷭ҇томꙋ твое́мꙋ Дх҃ви сътвори́ти въ вѣ́рныхъ свои́хъ хотѧ̀ Хє҃ Бж҃е, не то́чїю до пло́ти, и҆ да́же до Креста̀ и҆ ᲃме́рти смири́лсѧ є҆сѝ: но и҆ Пло́ть ᲃвою̀ ѡ҆боже́ннꙋю, и҆ ѡ҆дш҃евле́ннꙋю, и҆ Кро́вь животворѧ́щꙋю, въ ᲃпⷭ҇телнꙋю ᲃнѣ́дь и҆ пи́ті́е вѣ́рнымъ да́лъ є҆сѝ, и҆ нн҃ѣ ᲃщ҃еннослꙋжи́телъми твои́ми, всегда̀ подава́еши. Тѣ́мъ же и҆ а҆́ꙁъ недосто́йный премно́гомꙋ твое́мꙋ, є҆́же къ намъ ᲂу҆ди́вльсѧ млⷭ҇рдїю, моле́бнѡ тебѣ̀ въпїю̀: І҆и҃се Бо́же въплоще́нный, недосто́йнагѡ мѧ̀, досто́йнѡ ᲃт҃о́мꙋ ти жерто́вникꙋ слꙋжи́ти сътворѝ. І҆и҃се ѿ Трⷪ҇ца є҆ди́не, непрело́жнѡ въчл҃вчивыйсѧ, и҆ꙁволѝ мѧ̀ неѡсꙋжде́ннѡ ᲃщ҃еннодѣйствова́ти Бжⷭ҇тве́ннаѧ твоѧ̀ та́инства: І҆и҃се Бо́же пребога́тый, да́же до послѣ́днеѧ смири́выйсѧ нищеты̀, ѡ҆чи́сти мѧ̀ ѿ со́вѣсти лꙋка́выѧ. І҆и҃се Бо́же пло́тїю и҆ꙁволи́вый на́съ дѣ́лѧ прода́нъ, ᲃвѧꙁа́нъ, бїенъ, и҆ къ А҆́ннѣ и҆ Каїа́фѣ веде́нъ бы́ти, чⷭ҇тое мѧ̀ твое́мꙋ пребыва́нїю сътворѝ въселе́нїе. І҆и҃се Бж҃їе беꙁъстра́стное ᲃло́во, Ра́ны, Заꙋше́нїѧ, Ѽплева́нїѧ, и҆ поно́снаѧ ᲂу҆ничиже́нїѧ, ѿ І҆оѵде́ѵꙵ волею претерпѣ́вый, благоиꙁволѝ ми неѡсꙋжде́ннѡ ᲃт҃ы́мъ твои́мъ Причасти́тисѧ Та́йнамъ. І҆и҃се Ца́рꙋ вѣ́кѡвъ, те́рнїемъ вѣнча́нный и҆ въ Хлами́дꙋ нарꙋга́нїѧ ѡ҆блече́нный, сътворѝ мѧ̀ ᲃебѣ̀, Ѿцꙋ̀ же и҆ свое́мꙋ Дх҃ви, Та́инъ твои́хъ Причаще́нїемъ, досто́йное бы́ти пребыва́нїе. І҆и҃се сꙋдїѐ Пра́ведный, непра́веднѡ ѿ Піла́та ѡ҆сꙋжде́нный, и҆ ѡ҆́цтомъ съ же́лчїю напое́ный, да́ждъ ми не въ сꙋ́дъ, но въ ᲃпⷭ҇нїе Тѣ́ло твоѐ ꙗ҆́сти, и҆ пи́ти Бжⷭ҇тве́ннꙋю твою̀ Кро́вь. І҆и҃се Бо́же беꙁъсм҃ртный, гво́ꙁдъми на Крестѣ̀ пригвожде́нный и҆ ᲂу҆мерщвле́нный, ᲂу҆мерщвле́нꙋю грѣха́ми дꙋ́шꙋ мою̀, животворѧ́щимъ твое́гѡ Тѣ́ла и҆ Крвѐ Причаще́нїемъ ѡ҆живѝ. І҆и҃се животда́вче, пло́тїю на Крестѣ̀ ᲂу҆ме́рый, и҆ Ко́пїемъ прободе́ный: тꙋ́южде є҆динꙋ̀ Бжⷭ҇тве́ннꙋю твою̀ пло́ть, и҆ Кро́въ и҆́ꙁъ Ре́бръ и҆сте́кшꙋю, въ ѡ҆ставле́нїе грѣхѡ́въ, и҆ въ жи́ꙁнь вѣ́чнꙋю сподобѝ мѧ̀ прїѧ́ти. І҆и҃се съ Ѿц҃емъ и҆ Дх҃омъ є҆диносꙋ́щный, съ Креста́ же пло́тїю снѧ́тый, и҆ въ гро́бѣ ꙗ҆́кѡ ме́ртвъ положе́ный, менѐ ᲃтра́стьми пло́тскими мі́рꙋ пригвожде́нагѡ, и҆ на Крестѣ̀ высокоꙋ́мїѧ, въꙁнесе́нагѡ, ᲃътогѡ̀ съне́мъ, и҆ въ гро́бѣ смире́нномꙋ́дрїѧ положи́въ, ка́менемъ є҆́же въ тѧ̀ тве́рдыѧ вѣ́ры привалѝ, Чтⷭ҇нагѡ ти ра́ди Тѣ́ла, и҆ ᲃт҃ы́ѧ Крвѐ Причаще́нїемъ, є҆гѡ́же мѧ̀ молю́сѧ сподобѝ. І҆и҃се Бо́же Всеси́лне, въ а҆́дъ съше́дый и҆ пра́ведныхъ дш҃а̀ ѿ и҆стлѣ́нїѧ свободи́вый, и҆ менѐ въ а҆́дѣ нечꙋ́вствїѧ и҆ раꙁлѣне́нїѧ погрꙋже́ннагѡ, Причаще́нїемъ Прчⷭ҇тыхъ ти Та́инъ, къ ра́ꙁꙋмꙋ треꙁве́нїѧ, на высотꙋ̀ бг҃видѣ́нїѧ въꙁведѝ. І҆и҃се Бо́же живото́мъ и҆ ᲃме́ртїю владычествꙋ́ѧй, самовла́стнѡ же и҆ꙁъ ме́ртвыхъ въскр҃сы́й, на Нб҃са въꙁнесы́йсѧ, и҆ ѡ҆де́снꙋю Бг҃а Ѿца̀ пло́тїю сѣды́й, и҆ Бжⷭ҇тво́мъ ве́ꙁде сы́й, грѣхо́мъ ᲂу҆ме́ршагѡ, животворѧ́щагѡ ти радѝ Тѣ́ла и҆ Крвѐ Причаще́нїѧ ѡ҆живѝ, и҆ свѣ́тꙋ твое́мꙋ прича́стника мѧ̀ сътворѝ, да вѣ́рою ᲂу҆твержда́юсѧ.

Пѣ́снь, з҃. И҆рмо́съ.

Трі́ехъ Ѻ҆трѡ́къ несꙋмѣ́ннаѧ вѣ́ра, мꙋчи́телѧ го́рдагѡ беꙁбо́жное велѣ́нїе, благочⷭ҇тнѡ попра́вши, въ пе́щи ѡ҆́гнь на хла́дъ преложѝ, и҆ неврежде́ннѡ въ не́мъ ликоствꙋ́ющихъ, а҆кѝ въ свѣ́тѣ є҆ди́нѣми ᲂу҆сты̀ съгла́снѡ пресла́внаѧ дѣ́ющемꙋ чꙋдеса̀ пѣ́ти, и҆ тогѡ̀ Блⷭ҇ви́ти чꙋ́днѡ наꙋчѝ: ѡте́цъ на́шихъ Бо́же Блсⷭ҇венъ є҆сѝ.

Се́рдце чи́сто соꙁи́жди въ мнѣ́ Бж҃е.

Бра́шно є҆́смъ вѣ́рныхъ, Хє҃ въ Та́йнахъ въпіе́ши, вѣ́рꙋй и҆ снѣ́си мѧ̀: небѡ̀ а҆́ꙁъ въ тѧ̀, ꙗ҆́кѡ тлѣ́ннаѧ твое́гѡ Тѣ́ла, преложꙋ́сѧ пи́ща, но ты въ мѧ̀ претвори́шисѧ, и҆ ѡ҆божи́ши мѧ̀ Причащенїемъ. тѣ́мъ же и҆ а҆́ꙁъ ᲂу҆серднѡ молю̀ тѧ̀: Тѣ́ла твое́гѡ прⷭ҇та́гѡ, и҆ Крвѐ Бжⷭ҇твенныѧ, сподобѝ мѧ̀ рꙋка́ма досто́йнѡ коснꙋ́тисѧ, и҆ въ спⷭ҇нїе ᲂу҆сты̀ прїѧ́ти, и҆ тебѣ̀ сла́вити, ѡ҆ц҃емъ Бг҃а въ вѣ́ки.

Не ѿвержѝ менѐ ѿ лица̀ твое́гѡ:

Нераꙁдѣ́лнагѡ ра́ди съедине́нїѧ, Бг҃а и҆ человѣ́ка, ꙗ҆́коже на нб҃сѝ, си́це и҆ въ Бжⷭ҇тве́нныхъ Та́йнахъ, и҆́стиннѡ вѣ́рꙋю тѧ̀ бы́ти Хє҃ мо́й: просвѣща́ющагѡ, ѡ҆сщ҃а́ющагѡ же, и҆ ᲃебѣ̀ ᲃъвокꙋплѧ́ющагѡ, вѣ́рою и҆ чⷭ҇тымъ ᲃе́рдцемъ тѣ́мъ Причаща́ющихсѧ: и҆́мже и҆ менѐ въ приѡбрѣте́нїе вѣ́чныѧ жи́ꙁни, сподобѝ Причасти́тисѧ, и҆ тебѣ̀ сла́вити Ѿц҃емъ Бг҃а въ вѣ́ки.

Сла́ва:

Хлѣ́бъ живота̀ вѣ́чнагѡ Тѣ́ло твоѐ, подъ види́мымъ ви́домъ Хлѣ́ба веществе́ннагѡ: и҆ Ча́шꙋ беꙁсм҃ртїѧ Кро́вь твою̀ ᲃп҃си́телнꙋю, подъ ви́домъ Вина̀ є҆стестве́ннагѡ, ꙗ҆́кѡ ми́лостивъ Хє҃ ᲃп҃се, въ ѡ҆ставле́нїе мои́хъ прегрѣше́нїй, сподобѝ мѧ̀ досто́йно прїѧ́ти и҆ сла́вити тѧ̀ Ѿце́мъ Бг҃а въ вѣ́ки.

И҆ нн҃ѣ:

Хлѣ́бъ є҆го́же въ Бжⷭ҇тве́нныхъ ꙗ҆́мы Та́йнахъ, Хлѣ́бъ є҆́стъ рꙋко́ю Дх҃а ᲃт҃агѡ въ чре́вѣ Дв҃ыѧ въѡбраже́ный, и҆ ѻ҆гне́мъ ᲃтра́стїй на ѻ҆́лтари Кре́стномъ и҆спе́ченый. Хлѣ́бъ А҆́гглⷭ҇кїй въ снѣ́дь вѣ́рнымъ дае́тсѧ: є҆гоже мѧ̀ Хє҃ досто́йнѡ сподобѝ ꙗ҆́сти, и҆ Ча́шꙋ твою̀ ᲃп҃си́телнꙋю испи́ти, тебѣ̀ же сла́вити Ѿце́мъ Бг҃а въ вѣ́ки.

Пѣ́снь, и҃. И҆рмо́съ.

Въ пе́щъ ѡ҆́гненꙋю и҆́ногда къ дѣ́темъ Е҆вре́ѷскимъ съше́дшагѡ ᲃло́ва, и҆ пла́мень на хла́дъ пречꙋ́днѡ прело́жшагѡ Гд҃а, въ послѣ́днѧѧ же лѣ́та, въ чре́во Дв҃ыѧ все́лшагосѧ Бг҃а, и҆ на́съ ѿ работы̀ вра́жїѧ пло́тїю свое́ю пресла́внѡ свободи́вшагѡ, ꙗ҆́кѡ тво́рца и҆ зижди́телѧ, по́йте всѧ̀ дѣ́ла, и҆ превоꙁноси́те въ всѧ̀ вѣ́ки.

Се́рдце чи́сто съꙁи́жди въ мнѐ Бж҃е:

Подъ ви́домъ пше́ничнагѡ въ ква́сѣ хлѣ́ба, само́е Тѣ́ло твоѐ, ꙗ҆́коже ре́клъ є҆сѝ Хрⷭ҇те, подъ ви́домъ же Вина̀ ѿ плода́ ло́ꙁнагѡ, самꙋ́ю Пречи́стꙋю ти Кро́вь: подъ ѡ҆бо́ихъ же нераꙁдѣ́лными ви́ды, є҆дина́гѡ тѧ̀ Богочлове́ка цѣ́ла, вѣ́рнымъ въ сп҃се́нїе бы́ти вѣ́рꙋю, и҆ вѣ́рнѡ въпїю̀, Гд҃а въспѣва́йте лю́дїе, и҆ превоꙁноси́те въ всѧ̀ вѣ́ки.

Не ѿвержѝ менѐ ѿ лица̀ твое́гѡ.

Хлѣ́бъ прїи́мъ Хрⷭ҇то́съ є҆стестве́нный, Пречи́стыма свои́ма рꙋка́ма, и҆ ѿ пло́да ло́ꙁнагѡ Вино̀, ᲃловесы́ же свои́ми Бжⷭ҇тве́нными преестестве́ннѡ въ Тѣ́ло, и҆ Кро́вь стою̀ тѧ̀ претвори́въ, Ꙋ҆́ченикѡмъ подадѐ въпїѧ̀: Ꙗ҆ди́те и҆ пі́йте, въ ѡ҆ставле́нїе прегрѣ́ше́нїй: є҆́же и҆ нн҃ѣ на Прⷭ҇то́лѣ тво́ритъ, всегда̀ ᲃщ҃еннослꙋжи́телъми свои́ми: є҆́гѡ̀ же блⷭ҇вѧ́тъ людїе, и҆ превоꙁносѧ́тъ въ всѧ̀ вѣ́ки.

Сла́ва:

Сло́во Бж҃їе поне́же и҆́стинное, дѣйстви́телъное же є҆́стъ, и҆ всемо́щное, ѡ҆́браꙁъ же непостыжи́мый: бе́ꙁъ и҆спыта́нїѧ вѣ́рꙋю, ꙗ҆́кѡ Хлѣ́бъ и҆ Вино̀ водо́ю растворе́нное, премѣнѧ́етъ въ Тѣ́ло и҆ Кро́вь ᲃвою̀ Хᲃ҃ Бг҃ъ, Дх҃омъ Прⷭ҇ты́мъ, и҆́мъ же и҆ ѿ ᲃт҃ы́ѧ Бц҃а, са́мъ собо́ю, и҆ въ само́мъ ᲃебѣ̀ плоть съста́ви, є҆гѡ́же блⷭ҇вѧ́тъ лю́дїе, и҆ превоꙁнѡ́сѧтъ въ всѧ̀ вѣ́ки.

И҆ нн҃ѣ:

Роди́ла є҆сѝ Прчⷭ҇таѧ Дв҃о, не человѣ́ка про́ста, но Бг҃а и҆́стиннагѡ: ни́же Бг҃а на́га, но въплоще́нна ѿ Прчⷭ҇тыхъ твои́хъ Кро́вїй, тогѡ̀ ᲂу҆́бѡ ꙗ҆́кѡ Сн҃а и҆ Бг҃а молѝ, да мѧ̀ нн҃ѣ досто́йнѡ, въ ѡ҆ставле́нїе грѣхѡ́въ, въ жи́ꙁнь вѣ́чнꙋю, сподоби́тъ Тѣ́ло своѐ ᲃт҃о́е ꙗ҆́сти, и҆ Кро́вь Бжⷭ҇тве́ннꙋю пи́ти. є҆гѡ́же блⷭ҇вѧ́тъ лю́дїе и҆ превоꙁносѧ́тъ въ всѧ̀ вѣ́ки.

Пѣ́снь, ѳ҃. И҆рмо́съ.

Е҆ввꙋ̀ ѿ ребра̀ Ада́ма первоꙁда́ннагѡ съꙁда́вый, и҆ тогѡ̀ беꙁъ вре́да цѣ́ла съхани́вый: въ послѣ́днѧѧ лѣ́та Дх҃омъ ᲃт҃ымъ, ѿ тебѣ̀ Дв҃о всечⷭ҇таѧ, пло́ть себѣ̀ заимствова̀, и҆ ключѧ̀ Двⷭ҇тва̀ въ рождествѣ̀ ꙗ҆́коже пре́жде Ржⷭ҇тва̀ не вреди́въ, неиꙁрече́ннѡ па́че ᲂу҆ма̀ роди́сѧ, є҆гѡ́же ꙗ҆́кѡ Бг҃а и҆ зижди́телѧ велича́юще, тебѣ̀ Бц҃е непреста́нными гла́сы превоꙁно́симъ, и҆ благоче́стнѡ ᲂу҆блажа́емъ.

Се́рдце чⷭ҇то съꙁи́жди въ мнѣ̀:

Ꙗ҆́коже по є҆стествꙋ̀ чре́ꙁъ ꙗ҆де́нїе Хлѣ́бъ, чре́ꙁъ пи́тїе Вино̀ и҆ вода̀ въ пло́ть и҆ Кро́вь ꙗ҆дꙋ́щагѡ, и҆ пі́ющагѡ, прелага́етсѧ, и҆ не быва́етъ и҆́наѧ, то́чїю та́ѧжде пе́рваѧ є҆гѡ̀ пло́тъ: си́це и҆ на прⷭ҇тлѣ, Хлѣ́бѣ и҆ Вино̀ водо́ю растворе́нное, приꙁыва́нїемъ и҆ наше́ствїемъ ᲃт҃а́гѡ Дх҃а, вы́шше є҆стⷭ҇тва̀, въ Тѣ́ло и҆ Кро́вь Хв҃ꙋ прелага́етсѧ, и҆ не два̀, но є҆ди́нъ и҆ то́йжде є҆́стъ Хрⷭ҇то́съ Бг҃ъ въ вѣ́ки блⷭ҇ве́нный, и҆ препросла́вленный.

Не ѿверꙁѝ менѐ:

Си́це вѣ́рꙋю, и҆ си́це несꙋмнѣ́ннѡ, ꙗ҆́коже предъреко́хъ, ѡ҆ Та́йнахъ Бжⷭ҇тве́ннагѡ ти Причаще́нїѧ, ѽ Хрⷭ҇те мой и҆сповѣдꙋ́ю: и҆́мъже мѧ̀ досто́йнѡ, въ и҆стребле́нїе мнѡ́гихъ ми съгрѣше́ний, въ ѡ҆чище́нїе и҆ ѡ҆сш҃енїе, въ стѣ́нꙋ и҆ по́мощъ, въ въꙁраже́нїе ᲃъпроти́вныхъ, и҆ въ ѡ҆брꙋче́нїе бꙋ́дꙋщагѡ живота̀ и҆ Ца́рствїѧ, ᲃподобѝ Причасти́тисѧ: въ вѣ́ки во є҆сѝ Бг҃ъ блⷭ҇ве́нный, и҆ препрославе́нный.

Сла́ва:

Прича́стїе Прчⷭ҇тагѡ ти Тѣ́ла Гд҃и, да бꙋ́детъ ми ᲂу҆́гль, стра́стнаѧ дш҃ѝ попалѧ́ѧй движе́нїѧ, и҆ ѡ҆чища́ѧй ᲃе́рдце моѐ, ѡ҆бще́нїе же чⷭ҇тныѧ ти Крвѐ, весе́лїѧ дх҃о́внагѡ да и҆спо́лнитъ ᲃе́рдце моѐ, и҆ ᲂу҆́мъ твои́мъ радова́нїемъ: и҆ твое́мꙋ Ѿцꙋ̀ съ тобо́ю и҆ Дх҃омъ ᲃт҃ы́мъ, да сътво́ритъ въ мнѣ̀ досто́йное пребыва́нїе въ вѣ́ки бо блⷭ҇ве́нъ Бг҃ъ є҆сѝ, и҆ препросла́вленъ.

И҆ нн҃ѣ:

Пренепоро́чнаѧ Дв҃о, Мт҃и Царѧ̀ вы́шнихъ ᲃи́лъ, прибѣ́жище и҆ покро́въ, ᲃтѣ́но по́мощи и҆ застꙋпле́нїе, къ тебѣ̀ вѣ́рнѡ притѣка́ющимъ, молю́сѧ ᲂу҆серднѡ, недосто́йный ра́бъ тво́й, съсꙋ́дъ мѧ̀ и҆ꙁбра́ненъ, твои́ми Мтр҃ними Моли́твами, Прича́стїю Прчⷭ҇тныхъ и҆ Бжⷭ҇тве́нныхъ Та́инъ, твое́гѡ Сн҃а и҆ Бг҃а нн҃ѣ покажѝ. то́й бо въ вѣ́ки є҆́стъ блⷭ҇ве́нный и҆ препросла́вленый.

Та́же, Досто́йннѡ є҆́стъ: Трⷭ҇то́е: и҆ по Ѿче на́шъ: Ꙗ҆́кѡ Твоѐ є҆́стъ:

Тропа́ръ, Гла́съ, и҃.

Е҆гда̀ ᲃла́внїи Ꙋ҆́ч҃ници, на ᲂу҆мове́нїи вече́рѧ просвѣща́хꙋсѧ, тогда̀ І҆ꙋ́да злочести́вый, ᲃребролю́бїемъ недꙋгова́въ помра́чишесѧ, и҆ беꙁꙁако́ннымъ сꙋдїѧ́мъ, тебѣ̀ Пра́веднагѡ сꙋдїю̀ предае́тъ. Зрѝ и҆мѣ́нїемъ люби́телю, си́хъ ра́ди несы́тство стѧжа́вшагѡ, и҆ ᲂу҆давле́нїю въда́вшагосѧ, бѣжѝ несы́таѧ дш҃а̀. Ꙋ҆́ч҃телю тако́ваѧ дерꙁнꙋ́вшаѧ. И҆́же ѡ҆ всѣ́хъ благїй, Гд҃и сла́ва тебѣ̀.

Гд҃и поми́лꙋй, м҃.

и҆ Покло́нѡвъ, єі҃. и҆лѝ комꙋ́ждѡ проти́вꙋ си́лѣ. По се́мъ Моли́твы порѧ́дꙋ. И҆ а҆́бїе настоѧ́шїѧ стіхѝ.

Хотѧ́й ꙗ҆́сти члове́че Тѣ́ло Влады́чнее.

Съ стра́хомъ пристꙋпѝ, да не ѡ҆пали́шисѧ, ѻ҆́гнь бо є҆́стъ.

Бжⷭ҇тве́ннꙋю же пїѧ̀ Кро́вь въ ѡ҆бще́нїи.

Пе́рвое премѣни́сѧ тѧ̀ ѡ҆скорби́вшимъ.

Та́же дерꙁа́ѧ таинстве́нное ꙗ҆́ждъ бра́шнѡ.

И҆́ныи ᲃтіхѝ.

Пре́дъ Прича́стїемъ Стра́шныѧ Же́ртвы.

Животворѧ́щагѡ Тѣ́ла Влады́чнѧ.

Си́мъ помоли́сѧ ѡ҆́браꙁомъ съ тре́петомъ.

А҆́ще же въꙁмо́жнѡ и҆ съ слеꙁа́ми.

Моли́тва, а҃. ст҃гѡ Васи́лїѧ Вели́кагѡ.

Влады́кѡ Гд҃и І҆и҃ᲃ Хє҃ Бо́же на́шъ, и҆сто́чниче жиꙁни и҆ беꙁсме́ртїа: всеѧ̀ тва́ри види́мыѧ и҆ невиди́мыѧ ᲃъдѣ́телю: беꙁнача́лный: премно́гїѧ ра́ди бла́гости, въ послѣ́днѧѧ днѝ въ пло́ть ѡ҆болкі́йсѧ, и҆ Распны́йсѧ, и҆ погребы́йсѧ за́ны неблагода́рныѧ, и҆ злонра́вныѧ: и҆ свое́ю Кро́вїю ѡ҆бнови́вый растлѣ́вшее грѣхо́мъ є҆тество̀ на́ше.

Са́мъ беꙁъсме́ртный Царю̀, Влады́кѡ человѣкѡлю́бче, прїймѝ и҆ менѐ грѣ́шнагѡ покаѧ́нїе, и҆ приклонѝ ᲂу҆́хо твоѐ мнѣ̀, и҆ ᲂу҆слы́ши гл҃ы̀ моѧ̀. Съгрѣши́хъ бо Гд҃и, съгрѣши́хъ на нб҃о и҆ пре́дъ тобо́ю: и҆ нѣ́смъ досто́инъ въꙁрѣ́ти на высотꙋ̀ ᲃла́вы твое́ѧ. прогнѣва́хъ бо твою̀ благость, твоѧ̀ за́повѣди престꙋпи́въ, и҆ не послꙋша́въ твои́хъ повелѣ́нїй.

Но ты Гд҃и, неꙁлоби́въ ᲃы́й долготерпе́ливъ и҆ многомлⷭ҇тивъ, не преда́лъ є҆сѝ менѐ поги́бнꙋти съ беꙁꙁако́ньми мои́ми, мое́гѡ всѧ́чески о҆жида́ѧ ѡ҆браще́ниѧ. Ты́бо ре́клъ є҆сѝ человѣкѡлю́бче Прⷪ҇ро́комъ свои́м: хотѣ́нїемъ не хощꙋ̀ см҃рти грѣ́шника, но є҆́же ѡ҆брати́тисѧ и҆ жи́вꙋ бы́ти є҆мꙋ̀.

Не хо́щеши бо Влады́кѡ съꙁда́нїѧ рꙋ́къ свои́хъ погꙋби́ти, ни́же благоволи́ши ѡ҆ поги́бели чл҃чстѣй: но хо́щеши всѣ́мъ ᲃпⷭ҇ти́сѧ, и҆ въ ра́ꙁꙋмъ и҆́стинный прїйтѝ: тѣ́мже и҆ а҆́ꙁъ, а҆́ще и҆ не досто́инъ є҆́смь нб҃а и҆ землѣ̀, и҆ тоѧ̀ самовре́менныѧ жи́ꙁни, всегѡ̀ себѣ̀ повинꙋ́въ грѣхꙋ̀, и҆ сла́стемъ поработи́въ, и҆ тво́й ѡ҆скверни́въ Ѻ҆́браꙁъ. но творе́нїе твоѐ и҆ съꙁда́нїе твоѐ бы́въ, не ѿчаѧва́юсѧ ᲃвое́гѡ ᲃпⷭ҇нїѧ ѡ҆каѧ́нный: на твое́же беꙁъчисле́нное благоꙋтро́бїе надѣѧ́сѧ прихождꙋ̀.

Прїймѝ ᲂу҆́бѡ и҆ менѐ человѣкѡлю́бче Гд҃и, ꙗ҆́коже блꙋ́дницꙋ, ꙗ҆́кѡ Раꙁбо́йника: ꙗ҆́кѡ Мытарѧ̀, и҆ ꙗ҆́кѡ блꙋ́днагѡ ᲃн҃а.

И҆ въꙁмѝ моѐ тѧ́жкое бре́мѧ беꙁꙁако́нїй, грѣхѝ вꙁемлѧ́й мі́ра, и҆ не́дꙋги чл҃ческїѧ и҆сцѣлева́ѧй: трꙋжда́ющихсѧ и҆ ѡ҆бремене́нныхъ къ себѣ̀ приꙁыва́ѧй.

Не прише́дый приꙁва́ти Пра́ведныѧ, но грѣ́шныѧ на покаѧ́нїе: ѡ҆чи́сти мѧ̀ ѿ всѧ́кїѧ скве́рны пло́ти и҆ дꙋ́ха, и҆ наꙋчѝ мѧ̀ съверша́ти ᲃт҃ы́ню въ ᲃтра́сѣ твое́мъ, ꙗ҆́кѡ да чи́стымъ свѣдѣ́нїемъ ᲃо́вѣсти мое́ѧ, ᲃт҃ы́нь твои́хъ ча́сть прїемлѧ̀, съединю́сѧ ᲃт҃о́мꙋ Тѣ́лꙋ твое́мꙋ и҆ Крвѝ и҆ и҆мѣ́ю тебѣ̀ въ мнѣ̀ живꙋ́ща, и҆ пребыва́юща ᲃъ Ѿц҃емъ, и҆ съ ᲃт҃ы́мъ Дх҃омъ.

Е҆́й Гд҃и І҆и҃ᲃ Хє҃ Бо́же мо́й, да не въ сꙋ́дъ ми бꙋ́детъ Прича́стїе Прчⷭ҇тыхъ и҆ животворѧ́щихъ Та́инъ Твои́хъ. ни́же да не́мощенъ бꙋ́дꙋ, дш҃е́ю и҆ тѣ́ломъ, поне́же недосто́йнѣ тѣ́мъ Причаща́юсѧ.

Но да́ждъ ми да́же до послѣ́днѧгѡ и҆ꙁдыха́нїѧ неѡ҆сꙋжде́ннѡ въспрїйма́ти ча́сть ᲃт҃ы́нь твои́хъ, въ Дх҃а ᲃт҃агѡ Прича́стїе: въ напꙋ́тїе живота̀ вѣ́чнагѡ, и҆ въ благопрїѧ́тенъ ѿвѣ́тъ на ᲃтра́шномъ сꙋ́дѣ твое́мъ.

Ꙗ҆́ко да и҆ а҆́ꙁ съ всѣ́ми и҆ꙁбра́нными твои́ми, съѡбщи́телъ бꙋ́дꙋ нетлѣ́нныхъ твои́хъ бла́гъ, ꙗ҆́же ᲂу҆готова́лъ є҆сѝ въ вѣ́ки вѣкѡ́въ. А҆ми́нь.

Моли́тва, в҃. ᲃт҃а́гѡ Ѿца̀ на́шегѡ І҆ꙍа́нна Златоꙋ́стагѡ.

Гд҃и Бо́же мо́й, вѣ́мъ ꙗ҆́кѡ нѣ́смъ досто́инъ, ни́же дово́ленъ, да подъ крѡ́въ вни́деши хра́ма дш҃а̀ мое́ѧ, зане́же ве́съ пꙋ́стъ и҆ па́лсѧ є҆́стъ: и҆ не и҆́маши въ мнѣ̀ мѣ́ста досто́йна є҆́же главꙋ̀ подъклони́ти: но ꙗ҆́коже съ высоты̀ на́съ дѣ́лѧ смири́лсѧ є҆сѝ, смири́сѧ и҆ нн҃ѣ мое́мꙋ смире́нїю.

И҆ ꙗ҆́коже въспрїѧ́лъ є҆сѝ въ Верте́пѣ и҆ въ Ꙗ҆́слехъ ско́тїихъ въꙁлещѝ, си́це въспрїймѝ и҆ въ ꙗ҆́слехъ беꙁслове́сныѧ дш҃а̀ мое́ѧ и҆ въ скве́рное ми тѣ́ло внїитѝ.

И҆ ꙗ҆́коже не неᲂу҆достои́лъ є҆сѝ вни́ти, и҆ ᲃъве́черѧти съ грѣ́шники въ домꙋ̀ Сі́мона прокаже́ннагѡ, та́кѡ и҆ꙁво́ли вни́ти и҆ въ хра́мъ смире́нныѧ ми и҆ прокаже́нныѧ и҆ грѣ́шныѧ дш҃а̀.

И҆ ꙗ҆́кѡже не ѿринꙋ́лъ є҆сѝ подо́бныѧ ми грѣ́шныѧ блꙋ́дница прише́дшїѧ и҆ прикоснꙋ́вшїѧсѧ тебѣ̀, ᲃи́це ᲂу҆млⷭ҇рди́сѧ и҆ ѡ҆ мнѣ̀ грѣ́шномъ, приходѧ́щомъ и҆ прикаса́ющомсѧ тебѣ̀.

И҆ ꙗ҆́коже не въꙁгнꙋша́лсѧ є҆сѝ скве́рныхъ є҆ѧ̀ ᲂу҆́стъ и҆ смра́дныхъ лобыꙁа́ющихъ, та́кѡ и҆ мои́хъ не въꙁгнꙋша́йсѧ сквернѣ́йшихъ ѡ҆́ноѧ ᲂу҆́стъ, и҆ нечи́стшихъ: ни́же ме́рꙁскихъ мои́хъ и҆ нечи́стыхъ ᲂу҆сте́нъ, и҆ грѣ́шнагѡ ми ꙗ҆ꙁы́ка.

Но да бꙋ́детъ ᲂу҆́гль Прчⷭ҇тагѡ твое́гѡ Тѣ́ла и҆ чⷭ҇тныѧ ти Крвѐ, въ ѡ҆сщ҃е́нїе, просвѣще́нїе, и҆ здра́вїе ѡ҆каѧ́нной мое́й дш҃ѝ и҆ тѣ́лꙋ: въ ѡ҆блегче́нїе тѧ́жестїй мно́гихъ ми съгрѣше́нїй: въ съблюде́нїе ѿ всѧ́кихъ дїѧ́волскихъ дѣ́йствъ: на прогна́нїе злы́хъ, и҆ на въꙁбране́нїе лꙋка́вагѡ мое́гѡ ѡ҆бы́чаѧ: въ ᲂу҆мерщвле́нїе стра́стемъ: въ снабдѣ́нїе за́повѣдїй твои́хъ: въ приложе́нїе Бжⷭ҇тве́нныѧ ти благода́ти, и҆ твое́гѡ Ца́рства присвое́нїе. Не ꙗ҆́кѡ бо пренебрегі́й прихождꙋ̀ къ тебѣ̀ Гд҃и Бо́же мо́й, но надеѧ́сѧ на неиꙁрече́ннꙋю ти бла́гость.

И҆ ꙗ҆́кѡ да не на мно́ꙁѣ ᲂу҆дале́нъ Прича́стїѧ твое́гѡ, снѣде́нъ ѿ мы́слнагѡ во́лка бꙋ́дꙋ. тѣ́мъ же молю́тисѧ: ꙗ҆́кѡ є҆ди́нъ сы́й ᲃт҃ъ Влады́кѡ, ѡ҆ст҃ѝ ми дꙋ́шꙋ и҆ тѣ́ло, ᲂу҆́мъ и҆ ᲃе́рдце, чревеса̀ и҆ ᲂу҆тро́бы: и҆ всегѡ̀ мѧ̀ ѡ҆бновѝ: и҆ въкоренѝ ᲃтра́хъ тво́й въ ᲂу҆десе́хъ мои́хъ: и҆ ѡ҆сщ҃енїе твоѐ неѿе́млемѡ ѿ менѐ сътворѝ.

И҆ бꙋ́ди ми помо́щникъ и҆ застꙋ́пникъ, ѡ҆кормлѧ́ѧ въ ми́рѣ живо́тъ мо́й, сподоблѧ́ѧ мѧ̀ и҆ ѡ҆де́снꙋю тебѣ̀ стоѧ́нїѧ: Моли́твами и҆ моле́нїемъ Прчⷭ҇тыѧ ти Мт҃ре, и҆ беꙁпло́тныхъ твои́хъ слꙋжи́телїй, и҆ Прчⷭ҇тыхъ си́лъ, и҆ всѣ́хъ ст҃ы́хъ ѿ вѣ́ка тебѣ̀ благоꙋгоди́вшихъ, А҆минь.

Моли́тва, Тре́тѧѧ. ᲃт҃гѡ І҆ꙍа́нна Дама́скина.

Влады́кѡ Гд҃и І҆и҃се Хє҃ Бо́же на́шъ, є҆ди́не и҆мѣ́ѧй вла́стъ ѡ҆ставлѧ́ти грѣхѝ, ꙗ҆́кѡ бла́гъ и҆ человѣкѡлю́бецъ преꙁрѝ ми, въ вѣдѣ́нїи и҆ невидѣ́нїи мно́ю съгрѣше́ннаѧ. И҆ сподобѝ мѧ̀ неѡсꙋжде́ннѡ Причасти́тисѧ Бжⷭ҇тве́нныхъ, Пресла́вныхъ, Пречⷭ҇тыхъ, и҆ животворѧ́щихъ твои́хъ Та́инъ: не въ тѧ́жесть, ни въ мꙋ́кꙋ, ни въ приложе́нїе грѣхѡ́въ. Но въ ѡ҆чище́ниїе, ѡ҆сщ҃е́нїе, и҆ въ ѡ҆брꙋче́нїе бꙋ́дꙋщагѡ живота̀ и҆ Ца́рствїѧ: въ стѣнꙋ̀, и҆ по́мощъ, и҆ въ въꙁраже́нїе съпроти́вныхъ: въ и҆стребле́нїе мнѡ́гихъ ми съгрѣше́нїй. Ты́бо є҆сѝ Бг҃ъ млⷭ҇ти, и҆ щедрѡ́тъ, и҆ человѣ́кѡлю́бїѧ, и҆ тебѣ̀ ᲃла́вꙋ, въꙁсыла́емъ ᲃъ Ѿце́мъ и҆ ᲃт҃ы́мъ Дх҃омъ, нн҃ѣ и҆ при́снѡ, и҆ въ вѣ́ки вѣкѡ́въ. А҆ми́нь.

Моли́тва, Четве́ртаѧ. ᲃт҃гѡ І҆ꙍа́нна Златоꙋ́стагѡ.

Бо́же ѡ҆сла́би, ѡ҆стави, ᲂу҆щедрѝ, простѝ ми съгрѣше́нїѧ моѧ̀, є҆ли́ка ти съгрѣши́хъ, и҆лѝ сло́вомъ, и҆лѝ дѣ́ломъ, и҆лѝ помышле́нїемъ: во́лею, и҆лѝ нево́лею: ра́ꙁꙋмомъ, и҆лѝ нераꙁꙋ́мїемъ: всѧ̀ ми простѝ ꙗ҆́кѡ благѣ и҆ человѣкѡлю́бецъ.

Моли́твами же Прчⷭ҇тыѧ ти Мт҃ре, ᲂу҆́мныхъ ти слꙋжи́телїй, и҆ ᲃт҃ыхъ ᲃи́лъ, и҆ всѣ́хъ ᲃт҃ыхъ ѿ вѣ́ка тебѣ̀ благоꙋгоди́вшихъ, неѡсꙋжде́ннѡ благоволѝ прїѧ́ти ми ᲃт҃о́е и҆ Прчⷭ҇тое ти Тѣ́ло, и҆ Че́стнꙋю Кро́вь, въ и҆сцѣле́нїе дш҃ѝ же, и҆ тѣ́лꙋ: и҆ въ ѡ҆чище́нїе лꙋка́выхъ ми помышле́нїй. Ꙗ҆́кѡ твоѐ є҆́стъ Ца́рство и҆ ᲃи́ла, и҆ ᲃла́ва, Ѿца̀, и҆ Сн҃а, и҆ ᲃт҃гѡ Дх҃а, нн҃ѣ и҆ при́снѡ, и҆ въ вѣ́ки вѣкѡ́въ. А҆ми́нь.

Моли́тва, Пѧ́таѧ. того́жъ.

Гд҃и І҆и҃се Хє҃ Бо́же мой, ѡ҆сла́би, ѡ҆ста́ви, ᲂу҆млⷭ҇рди́сѧ, и҆ простѝ ми грѣ́шномꙋ, и҆ непотре́бномꙋ и҆ недосто́йномꙋ, рабꙋ̀ твое́мꙋ грѣхопаде́нїѧ, ᲃо́блаꙁны и҆ съгрѣше́нїѧ моѧ̀, є҆ли́ка ти ѿ ю҆́ности мое́ѧ, и҆ да́же до настоѧ́щагѡ днѐ и҆ ча́са ᲃъгрѣши́хъ, а҆́ще въ ра́ꙁꙋмѣ и҆ нераꙁꙋ́мїи, а҆́ще въ словесе́хъ и҆лѝ дѣ́лехъ, и҆лѝ въ по́мыслехъ, и҆лѝ въ раꙁмышле́нїихъ и҆ начина́нїихъ, и҆ всѣ́хъ мои́хъ чꙋ́вствахъ.

И҆ Моли́твами беꙁъсѣ́меннѡ ро́ждшїѧ тѧ̀, Прчⷭ҇тыѧ и҆ при́снѡ Дв҃ы Мр҃їи Мт҃ре твое́ѧ, є҆дины́ѧ непосты́дныѧ наде́жды, и҆ предста́телства, и҆ ᲃпⷭ҇нїѧ, ᲃподобѝ мѧ̀ неѡсꙋжде́ннѡ Причасти́тисѧ, Прчⷭ҇тымъ беꙁъсме́ртнымъ, животворѧ́щимъ и҆ стра́шнымъ твои́мъ Та́йнамъ, въ ѡ҆ставле́нїе грѣхѡ́въ и҆ въ жи́ꙁнъ вѣ́чнꙋю: въ ѡ҆сщ҃е́нїе, просвѣще́нїе, крѣ́пость, исцѣле́нїе, и҆ здра́вїе дш҃ѧ̀ же и҆ тѣ́ла, и҆ въ потребле́нїе, и҆ всеконе́чное погꙋбле́нїе лꙋка́выхъ мои́хъ мы́слей, помышле́нїй, предпрїѧ́тїй и҆ но́щныхъ мечта́нїй, те́мныхъ и҆ лꙋка́выхъ дꙋ́хѡвъ: ꙗ҆́кѡ твоѐ є҆́стъ Ца́рство, ᲃи́ла, ᲃла́ва, чⷭ҇ть, и҆ поклоне́нїе съ Ѿце́мъ и҆ ᲃт҃ы́мъ твои́мъ Дх҃омъ, нн҃ѣ и҆ при́снѡ, и҆ въ вѣ́ки вѣ́кѡвъ. А҆ми́нь.

Моли́тва, Ше́стаѧ. Ст҃а́гѡ Сѵмеѡ́на Метафра́ста.

Е҆ди́не чⷭ҇тый и҆ нетлѣ́нный Гд҃и, за неиꙁрече́нное млⷭ҇рдїе человѣкѡлю́бїѧ, на́ше въспрїи́мый сꙋщество̀, ѿ чи́стыхъ и҆ Двⷭ҇тве́нныхъ кро́вїй, па́че є҆́стества ро́ждшїѧ тѧ̀, Дх҃а Бжⷭ҇тве́ннагѡ наше́ствїемъ, и҆ благоволе́нїемъ Ѿца̀ прⷭ҇носꙋ́щнагѡ, Хє҃ І҆и҃се, Премꙋ́дрости Бжїѧ, ми́рѣ, и҆ си́ло: Пло́тїю своею̀ животво́рныѧ и҆ ᲃп҃се́нныѧ Стрⷭ҇ти и҆ꙁволи́вый въспрїѧ́ти: Распѧ́тїе, Кре́стъ, Гво́ꙁдїѧ, Ко́пїе, Сме́рть: ᲂу҆мертвѝ ми дш҃етлѣ́нныѧ стра́сти тѣле́сныѧ.

Погребе́нїемъ свои́мъ а҆́дова плѣни́вый Ца́рствїѧ, погребѝ моѧ̀, благи́ми по́мыслы, лꙋка́ваѧ съветова́нїѧ, лꙋка́вства дꙋ́хи раꙁорѝ.

Тридне́внымъ свои́мъ и҆ Богоно́снымъ Въскрⷭ҇нїемъ па́дшагѡ Пра́ѿца въꙁста́вивый, въꙁста́ви мѧ̀ грѣхо́мъ попо́лꙁшагосѧ, ѡ҆́браꙁы ми покаѧ́нїѧ предлага́ѧ.

Пресла́внымъ свои́мъ Въꙁнесе́нїемъ пло́тское ѡ҆божи́вый въспрїѧ́тїе, и҆ сі́е де́снымъ ѿца̀ сѣда́лищемъ почты́й, де́снꙋю ᲃп҃са́емыхъ ча́сть полꙋчи́ти.

Сни́тїемъ Ꙋ҆тѣши́телѧ твое́гѡ Дх҃а съсꙋ́ды че́стны, сщ҃е́нныѧ ᲃвоѧ̀ Ꙋ҆́ченики ᲃъдѣла́вый, прїѧ́телище и҆ менѐ тогѡ̀ покажѝ прише́ствїѧ. Хотѧ́й па́ки прїйтѝ сꙋди́ти вселе́ннѣй пра́вдою, благоволѝ и҆ менѐ ᲂу҆стрѣ́сти тѧ̀ на ѡ҆́блацѣ́хъ Сꙋдїю̀ и҆ ᲃъꙁда́телѧ мое́гѡ, съ всѣ́ми ᲃт҃ы́ми твои́ми, ꙗ҆́кѡ да беꙁконе́чнѡ ᲃлавословлю̀ и҆ пою̀ тебѣ̀, ᲃъ беꙁнача́льнымъ ти Ѻ҆́ц҃емъ, и҆ Прⷭ҇ты́мъ, благи́мъ и҆ животворѧ́щимъ є҆диносꙋ́щнымъ ти Дх҃омъ, нн҃ѣ и҆ при́снѡ, и҆ въ вѣ́ки вѣко́въ. А҆ми́нь.

Моли́тва, з҃. І҆ꙍа́нна Дама́скина.

Пре́дъ две́рми Хра́ма твое́гѡ предъста́въ, лю́тыхъ помышле́ний не ѿстꙋпа́ю. Но ты Хє҃ Бж҃е, Мытарѧ̀ ѡправди́вый, Ханане́ю помилова́вый, и҆ Раꙁбо́йникꙋ Раѧ̀ две́ри ѿверꙁы́й: ѿверꙁѝ ми ᲂу҆тро́бы человѣкѡлю́бїѧ твое́гѡ, прїймѝ мѧ̀ приходѧ́ща и҆ прикаса́ющасѧ тебѣ̀, ꙗ҆́коже блꙋ́дницꙋ и҆ кровоточи́вꙋю. Ѽ̀наѧ бо ᲂу҆́бѡ кра́ѧ Ри́ꙁы твое́ѧ коснꙋ́вшисѧ ᲂу҆до́бъ и҆сцѣле́нїе прїѧ́ть. Сі́ѧ же Прчⷭ҇тоѝ но́ꙁѣ ᲂу҆де́ржавши, раꙁдрѣше́нїе грѣхѡ́въ понесѐ. А҆́ꙁъ же ѡ҆каѧ́нный всецѣ́лое твоѐ Тѣ́ло дерꙁа́ѧ въспрїѧ́ти, да не ѡ҆па́ленъ бꙋ́дꙋ, но прїймѝ мѧ̀ ꙗ҆́коже ѡ҆́ныѧ, и҆ просвѣтѝ моѧ̀ дш҃е́внаѧ чꙋ́вства, попалѧ́ѧ моѧ̀ грѣхѡ́въ преклоне́нїѧ: Моли́твами беꙁъсѣ́меннѡ ро́ждшїѧ тѧ̀, и҆ Нбⷭ҇ныхъ ᲃи́лъ: ꙗ҆́кѡ блⷭ҇ве́нъ є҆сѝ въ вѣ́ки вѣкѡ́въ. А҆ми́нь.

Моли́тва, Ѽсмаѧ. ᲃт҃а́гѡ І҆ꙍа́нна Златоꙋ́стагѡ.

Нѣ́смъ дово́ленѣ Влады́кѡ Гд҃и да вні́йдеши подъ крѡ́въ дш҃а̀ мое́ѧ: но поне́же хо́щещи ты ꙗ҆́кѡ человѣ́кѡлю́бецъ жи́ти въ мнѣ̀, дерꙁа́ѧ да пристꙋплю̀ повелева́еши, ѿверꙁꙋ̀ две́ри ꙗ҆́же ты съꙁда́лъ є҆сѝ, и҆ вънїйдѝ съ человѣкѡлю́бїемъ ꙗ҆́коже ре́клъ є҆сѝ внїйдѝ и҆ просвѣтѝ ѡ҆мраче́нный мой по́мыслъ: Вѣ́рꙋю ꙗ҆́кѡ ᲃі́ѧ ᲃътвори́ши, небо̀ блꙋ́дницꙋ съ слеꙁа́ми прише́дшꙋю къ тебѣ̀ ѿгна́лъ є҆сѝ, ни́же Мытарѧ̀ ѿложи́лъ є҆сѝ пока́ѧвшасѧ, ни́же Раꙁбо́йника поꙁна́вша Ца́рство твоѐ ѿгна́лъ є҆сѝ и҆́же бѣ: но ѿ покаѧ́нїѧ тебѣ̀ прише́дшїѧ всѧ̀, въ ли́цѣ твои́хъ дрꙋ́гѡвъ въчини́лъ є҆сѝ, є҆ди́нъ сы́й блⷭ҇ве́нный всегда̀, нн҃ѣ и҆ въ беꙁконе́чныѧ вѣ́ки. А҆ми́нь.

Моли́тва, ѳ҃. Ст҃гѡ Вели́кагѡ Васи́лїѧ.

Вѣ́мъ Гд҃и, ꙗ҆́кѡ недосто́йнѣ Причаща́юсѧ Прчⷭ҇томꙋ ти Тѣ́лꙋ, и҆ Чтⷭ҇ной Крвѝ твое́й: и҆ пови́ненъ є҆́смъ, и҆ въ ѡ҆сꙋжде́нїе себѣ̀ ꙗ҆́мъ и҆ пїю̀, не раꙁсꙋжда́ѧ Тѣ́ла и҆ Крвѐ тебѣ̀ Ха҃ и҆ Бг҃а мое́гѡ: но на щедрѡты̀ твоѧ̀ надѣѧ́сѧ прихождꙋ̀ къ тебѣ̀ ре́кшомꙋ. Ꙗ҆ды́й мою̀ Пло́ть, и҆ пїѧ́й мою̀ Кро́вь, въ мнѣ̀ пребыва́етъ, и҆ а҆́ꙁъ въ не́мъ. Ꙋ҆млⷭ҇рди́сѧ ᲂу҆́бѡ ѡ҆ мнѣ̀ Гд҃и, и҆ не ѡ҆бличѝ менѐ грѣ́шнагѡ. но сътворѝ съ мно́ю по млⷭ҇ти твое́й. и҆ да бꙋ́дꙋтъ ми ᲃт҃а́ѧ сі́ѧ въ просвѣще́нїе, и҆ въ спⷭ҇нїе, въ и҆сцѣле́нїе, и҆ въ сохране́нїе: въ ѡ҆чище́нїе, и҆ въ ѡ҆сщ҃е́нїе дш҃ѝ и҆ тѣ́ла: на ѿгна́нїе всѧ́кагѡ мечта́ниѧ, и҆ лꙋка́вагѡ дѣѧ́нїѧ, и҆ дѣ́йства дїѧ́волскагѡ, мы́сленнѣ въ ᲂу҆десѣ́хъ мои́хъ дѣйствꙋ́емагѡ: въ дерꙁнове́нїе и҆ любо́въ, ꙗ҆́же къ тебѣ̀: въ и҆справле́нїе жи́тїѧ и҆ крѣ́пости: въ въꙁраще́нїе добродѣ́тели и҆ соверше́нїѧ: въ и҆сполне́нїе за́повѣдїй: въ Дх҃а ᲃт҃агѡ прича́стїе: въ напꙋ́тїе живота̀ вѣ́чнагѡ: въ ѿвѣ́тъ благопрїѧ́тенъ, на стра́шномъ ᲃꙋ́дѣ твое́мъ: не въ сꙋ́дъ и҆лѝ въ ѡ҆сꙋжде́нїе.

Моли́тва, і҃. Ст҃гѡ І҆ꙍа́нна Златоꙋ́стагѡ.

Вѣ́рꙋю Гд҃и, и҆ и҆сповѣдꙋ́ю, ꙗ҆́кѡ ты є҆сѝ Хᲃ҃ ᲃн҃ъ Бг҃а жива́гѡ, прише́дый въ мі́ръ грѣ́шныхъ ᲃпⷭ҇тѝ, ѿ нихъ же пе́рвый є҆́смъ а҆́ꙁъ. Вѣ́рꙋю ꙗ҆́кѡ є҆́же прїемлю̀, въи́стиннꙋ є҆́стъ само́е Прчⷭ҇тое Тѣ́ло твоѐ, и҆ сама́ѧ чⷭ҇тнаѧ Кро́вь твоѧ̀. Тѣ́мже мл҃ютисѧ, поми́лꙋй мѧ̀, простѝ ми и҆ ѡ҆сла́би прегрѣше́нїѧ моѧ̀, во́лнаѧ и҆ нево́лнаѧ: ꙗ҆́же съдѣѧ́хъ ᲃло́вомъ, и҆лѝ дѣ́ломъ, вѣде́нїемъ, и҆лѝ невѣдѣ́нїемъ, ра́ꙁꙋмомъ, и҆ мы́слїю, и҆ сподобѝ мѧ̀ неосꙋжде́ннѡ причасти́тисѧ Прчⷭ҇тыхъ ти та́инъ, въ ѡ҆ставле́нїе грѣхѡ́въ и҆ въ жи́ꙁнь вѣ́чнꙋю: А҆ми́нь.

Моли́тва, аі҃. Ст҃гѡ Сѵмеѡ́на Метафра́ста. ꙗ҆́кѡ въ ѻ҆́браꙁѣ И҆сповѣда́ющихъсѧ. къ ᲃт҃мꙋ Причащенїю.

Ꙗ҆́кѡ на ᲃтра́шномъ и҆ нелицепрїе́мномъ твое́мъ ᲃꙋди́лищи, предъста́ти тебѣ̀ и҆́мамъ Хє҃ Бж҃е, и҆стѧꙁа́нїе подъемлѧ̀ и҆ сло́во творѧ̀ ѡ҆ съдѣѧ́нныхъ мно́ю злы́хъ: си́це дне́сь, пре́жде да́же не прїйтѝ дне́ви ѡ҆сꙋжде́нїѧ мое́гѡ, ᲂу҆́ ᲃт҃а́гѡ твое́гѡ Ѻ҆́лтарѧ предъстою̀ пре́дъ тобо́ю, и҆ пре́дъ ᲃтра́шными и҆ ᲃт҃ы́ми А҆́гг҃лы твои́ми, преклоне́нъ свое́ю со́вѣстїю, предъносѧ̀ лꙋка́ваѧ и҆ скве́рнаѧ и҆ беꙁꙁако́ннаѧ моѧ̀ дѣѧ́нїѧ, поꙁорствꙋ́ѧ сі́ѧ, и҆ ѡ҆блича́ѧ ᲂу҆ничижа́ю.

Ви́ждъ ᲂу҆́бѡ Гд҃и ѡ҆каѧ́нство моѐ, и҆ ѡ҆ста́ви всѧ̀ ᲃгрѣше́нїѧ моѧ̀. Ви́ждъ ꙗ҆́кѡ ᲂу҆множи́сѧ па́че вла́съ главы̀ мое́ѧ беꙁꙁако́нїѧ моѧ̀.

Кое́гѡ бо не съдѣѧ́хъ зла̀; кое́гѡ ᲃъгрѣше́нїѧ не ᲃътвори́хъ: кое́гѡ зла̀ не въѡбраꙁи́хъ въ дш҃ѝ мое́й; ᲂу҆же́бо и҆ дѣ́лы съдѣ́ѧхъ, блꙋ́дъ, прелюбодѣ́йство, превоꙁноше́нїе, горды́ню, ᲂу҆коре́нїе, ᲃꙋро́вство, доса́ды, непоко́рство, по́клепъ, лжꙋ̀, злотече́нїе, ᲂу҆ничиже́нїе, клѧтвопрестꙋпле́нїе, ѡ҆болга́нїе, заклина́нїе, хꙋлꙋ̀, праꙁносло́вїе, раждеже́нїе, ᲃмѣ́хъ, пїѧ́нство, ѡ҆бъѧде́нїе, чревобѣ́сїе, нена́висть, за́висть, ᲃребролю́бие, любоимѣ́нїе, лихои́мство, ᲃлаволю́бїе, многостѧжа́нїе, самолю́бїе, хище́нїе, непра́вдꙋ, ᲃкверноприбы́тчество, мшелои́мство, ревнова́нїе, клѧ́ветꙋ, беꙁꙁако́нїе, непослꙋша́нїе, мы́сли ᲃкве́рныѧ: и҆ по́мыслы нечи́стыѧ и҆ раꙁслабле́нныѧ, хꙋ́лныѧ же и҆ нескаꙁа́нныѧ.

Всѧ́кое моѐ чꙋ́вство, и҆ всѧ́кїй ᲂу҆́дъ ѡ҆скверни́хъ, растли́хъ, непотре́бенъ ᲃътвори́хъ.

Дѣла́телище бы́хъ всѧ́чески дїѧ́волꙋ. и҆ вѣ́мъ Гд҃и, ꙗ҆́кѡ беꙁꙁакѡ́нїѧ моѧ̀ превꙁыйдѡ́ша гла́вꙋ мою̀: но беꙁъмѣ́рнѡ є҆́стъ мно́жество щедрѡ́тъ твои́хъ, и҆ млⷭ҇ть неиꙁрече́нна неꙁлоби́выѧ твое́ѧ блгⷭ҇ти, и҆ нѣ́сть грѣ́хъ робѣжда́ющъ человѣкѡлю́бїе твоѐ.

Тѣ́мъ же пречꙋ́дный Ца́рю, неꙁлоби́ве Гд҃и, ᲂу҆дивѝ и҆ на мнѣ̀ грѣ́шномъ млⷭ҇ти твоѧ̀: покажѝ блгⷭ҇ти твое́ѧ си́лꙋ: ꙗ҆вѝ крѣ́постъ благоꙋтро́бнагѡ млⷭ҇рдїѧ твое́гѡ. ѡ҆браща́ющасѧ прїймѝ мѧ̀ грѣ́шнагѡ: приймѝ мѧ̀ ꙗ҆́коже прїѧ́лъ є҆сѝ блꙋ́днаго, Мытарѧ̀, Раꙁбо́йника, Мана́ссїю, и҆ блꙋ́дницꙋ, прїймѝ мѧ̀ пресъгрѣши́вша вы́шше мѣ́́ры, ᲃло́вомъ, и҆ дѣ́ломъ, и҆ помышле́нїемъ, и҆ беꙁъме́стнымъ похотѣ́нїемъ, и҆ беꙁъслове́снымъ жела́нїемъ.

И҆ ꙗ҆́коже въ є҆динна́десѧтый ча́съ прише́дшихъ прїѧ́лъ є҆сѝ, ничто́же досто́йнѡ съдѣла́вшихъ, та́кѡ прїймѝ и҆ менѐ грѣ́шнагѡ.

Мно́гѡ бо съгрѣши́хъ и҆ мно́гѡ беꙁꙁаконова́хъ и҆ ѡ҆скверни́хсѧ: мно́гѡ прогнѣва́хъ Дх҃ъ тво́й ᲃт҃ы́й, и҆ ѡ҆горчи́хъ человѣкѡлю́бнꙋю ᲂу҆тро́бꙋ твою̀, и҆ ᲃло́вомъ, и҆ дѣ́ломъ, и҆ помышле́нїемъ: въ но́щи, и҆ въ днѝ, во́лею, и҆ нево́лею: ꙗ҆вле́ннѣ, и҆ не ꙗ҆вле́ннѣ.

И҆ вѣ́мъ ꙗ҆́кѡ ꙗ҆́вѣ предста́виши всѧ̀ грѣхѝ моѧ̀ пре́до мно́ю, тако́вы же мно́ю съдѣѧ́шасѧ: и҆ и҆стѧ́жеши ᲃло́во съ мно́ю, ѡ҆ и҆́хъ же ра́ꙁꙋмомъ и҆ нера́ꙁꙋмнѣ беꙁмѣ́рнѡ съгрѣши́хъ.

Но Гд҃и, Гд҃и, да не пра́веднымъ сꙋ́домъ твои́мъ, ни́же ꙗ҆́ростїю твое́ю ѡ҆бличи́ши мѧ̀: ни́же гнѣ́вомъ твои́мъ нака́жеши мѧ̀.

Поми́лꙋй мѧ̀ Гд҃и ꙗ҆́кѡ не то́кмѡ не́мощенъ є҆́смъ, но и҆ твоѐ съꙁда́нїе є҆́смъ а҆́ꙁъ.

Ты ᲂу҆́бѡ Гд҃и ᲂутверди́лъ є҆сѝ на мнѣ̀ рꙋ́кꙋ твою̀, а҆́ꙁъ же лꙋка́вое пре́дъ тобо́ю ᲃътвори́хъ.

Тебѣ̀ є҆ди́номꙋ ᲃъгрѣши́хъ: но мл҃ю̀ тѧ̀, не вни́ди въ сꙋ́дъ съ рабо́мъ твои́мъ. и҆ а҆́ще беꙁꙁакѡ́нїѧ на́ꙁриши Гд҃и, Гд҃и, кто̀ посто́итъ; а҆́ꙁъ бо є҆́смъ бе́ꙁдна ᲃъгрѣше́нїй, и҆ нѣ́смъ досто́инъ ни́же дово́ленъ въꙁрѣ́ти, и҆ ви́дѣти высотꙋ̀ Нбⷭ҇нꙋю, ѿ мно́жества грѣхѡ́въ мои́хъ и҆́мже нѣ́сть числа̀. Всѧ́кое бо злодѣѧ́нїе, и҆ ᲂу҆мышле́нїе, и҆ ᲂу҆хищре́нїе ᲃатани́нѡ, и҆ коварство, растлѣ́нїѧ, и҆ раꙁли́чнаѧ и҆стица́нїѧ, ᲂу҆мѧгче́нїѧ, дѣторастлѣ́нїѧ, ᲂу҆ничиже́нїѧ, злопомнѣ́ниѧ, съвѣтова́нїѧ къ грѣхꙋ̀, клѧтвопрестꙋпле́нїѧ, наскака́нїѧ, ᲃкокта́нїѧ, и҆ и҆́ныѧ беꙁмѣ́рныѧ ᲃтра́сти не ѿстꙋпи́ша ѿ менѐ.

Ко́ими несъдержи́мъ бы́хъ злы́ми; ко́ими не растли́хъсѧ съгрѣше́нъми; всѧ́къ грѣ́хъ ᲃъдѣѧ́хъ, всѧ́къ грѣ́хъ вложи́хъ въ дꙋ́шꙋ мою̀. Непотре́бенъ бы́хъ тебѣ̀ Бг҃ꙋ мое́мꙋ и҆ человѣ́кѡмъ. Кто̀ въꙁста́витъ мѧ̀ въ толи́кихъ злы́хъ па́дшагѡ съгрѣше́нїихъ; Гд҃и Бо́же мо́й на тѧ̀ ᲂу҆пова́хъ. А҆́ще є҆́стъ ми ᲃпⷭ҇нїѧ ᲂу҆пова́нїе; а҆́ще ѡ҆долѣва́етъ человѣкѡлю́бїе твоѐ множествꙋ̀ беꙁꙁакѡ́нїй мои́хъ; бꙋ́ди ми ᲃп҃си́тель, и҆ застꙋ́пникъ. И҆ по множествꙋ̀ щедрѡ́тъ твои́хъ и҆ ми́лости твое́й, ѡ҆сла́би, ѡ҆ста́ви, и҆ простѝ ми всѧ̀ є҆ли́ка ти съгрѣши́хъ.

Ꙗ҆́кѡ мно́гихъ зѡ́лъ и҆сполни́сѧ дш҃а̀ моѧ̀: и҆ нѣ́стъ въ мнѣ̀ ᲃпⷭ҇ниѧ наде́жда. Поми́лꙋй мѧ̀ Бж҃е, поми́лꙋй мѧ̀, по вели́цѣй млⷭ҇ти твое́й. Не въꙁда́ждъ ми по дѣ́ломъ мои́мъ, и҆ не посрамѝ менѐ по дѣѧ́нїемъ мои́мъ: но ѡ҆брати́въ ᲃп҃сѝ и҆ и҆ꙁба́ви дꙋ́шꙋ мою̀ ѿ съвоꙁраста́ющихъ є҆́й зѡ́лъ, и҆ лю́тыхъ приложе́нїй. ᲃп҃сѝ мѧ̀ Гд҃и млⷭ҇ти твое́ѧ ра́ди: ꙗ҆́кѡ да и҆де́же ᲂу҆множи́сѧ грѣ́хъ, преиꙁобилꙋ́етъ благода́ть твоѧ̀, и҆ въсхвалю̀ и҆ просла́влю тѧ̀ всѧ̀ днѝ живота̀ мое́гѡ. Ты̀ бо є҆сѝ Бг҃ъ ка́ющихсѧ, и҆ ᲃп҃съ съгрѣша́ющихъ, и҆ тебѣ̀ ᲃла́вꙋ въꙁсыла́емъ, съ беꙁнача́льнымъ ти Ѿце́мъ, и҆ съ Прⷭ҇тымъ и҆ благи́мъ и҆ животворѧ́щимъ ти Дх҃омъ, нн҃ѣ и҆ при́снѡ, и҆ въ вѣ́ки вѣкѡ́въ. А҆ми́нь.

Моли́тва, ві҃. того́жъ.

Ѿтче, Сн҃е, и҆ дш҃е ᲃт҃ы́й, Трⷪ҇це ᲃт҃а́ѧ: блгⷭ҇ти неистощи́маѧ въ всѣ́хъ текꙋ́щаѧ, доброто̀ многорачи́телнаѧ не имꙋ́щаѧ сы́тости, вѣ́рою єди́ною ᲃп҃сѝ мѧ̀, и҆ чре́ꙁъ наде́ждꙋ, ѽ Свѣ́те трисїѧ́телный, ѽ Трⷪ҇це Прⷭ҇та́ѧ: Трⷪ҇це Ли́ци, и҆ є҆дини́це ᲃꙋщество́мъ: и҆сто́чниче Премꙋ́дрости, и҆ ѡ҆сщ҃енїѧ пода́телю, вѣ́рою є҆ди́ною ᲃп҃сѝ мѧ̀, и҆ чре́ꙁъ наде́ждꙋ. ѽ Ѻ҆гню̀ чисти́телный съгрѣше́нїемъ, дꙋ́шꙋ мою̀ ѡ҆чи́сти ѿ прегрѣше́нїй дш҃ѝ мое́й ѡ҆мы́й невѣдѣ́нїѧ: дꙋ́шꙋ мою̀ и҆схитѝ ѿ ѡ҆скверне́нїй: дꙋ́шꙋ мою̀ ᲂу҆держѝ ѿ помышле́нїй: ᲂу҆́мъ же въ царѝ надъ раꙁꙋмѣ́нъмѧ: ᲃтра́стемъ мѧ̀ покажѝ всеси́лна царѧ̀: ᲂу҆мнꙋю свѣ́щꙋ въсїѧ́й ᲃе́рдцꙋ мое́мꙋ: свободѝ ѿ тмы̀ грѣха̀: просвѣтѝ и҆ ᲂу҆красѝ помраче́ннагѡ: ѡ҆́комъ въꙁрѝ на́мѧ ми́лостивнымъ: ѡ҆чи́сти и҆ ᲂу҆блажѝ потемне́ннагѡ, ѽ Ѿтче, Сн҃е, и҆ дш҃е, Трⷪ҇це ᲃт҃а́ѧ, ты́ ми пода́ждъ А҆́гг҃ла ᲃвѣтонѡ́сна, ᲂу҆́мꙋ поспѣ́шника, пѣстꙋна̀ и҆ предста́телѧ: дш҃ѝ мое́й храни́телѧ и҆ пло́ти: во́жда направлѧ́юща мѧ̀ къ ᲃпⷭ҇нїю.

Ты́ мѧ̀ зе́мнагѡ, сътворѝ ѡ҆сщ҃е́нна. Ты́ мѧ̀ ᲂу҆странѝ зе́мныхъ мꙋдрова́нїй. Ты́ ми и҆ссꙋшѝ зло́бныѧ пото́ки. Ты́ ми и҆сточѝ сле́ꙁныѧ тꙋ́чѧ: Бг҃ъ бо є҆сѝ млⷭ҇тивъ, и҆ благода́тель, не злопрїѧ́тенъ всѣ́мъ беꙁꙁаконова́вшимъ: всепристꙋ́пенъ всѣ́мъ съгрѣши́вшимъ: долготерпе́ливъ всѣ́мъ ѿве́ргшимсѧ: непра́веднымъ ѡ҆ст҃ова́нный: ненепоро́чнымъ просвѣтова́нный: и҆сповѣда́нїе ᲂу҆ста́вилъ є҆сѝ ᲃп҃се́нїѧ: пода́лъ є҆сѝ покаѧ́нїѧ ѡ҆́браꙁы, и҆ мнѣ̀ гню́сномꙋ и҆ ѡ҆скверне́нномꙋ, мнѣ̀ лꙋка́вомꙋ и҆ ѡ҆каѧ́нномꙋ, мнѣ̀ те́мномꙋ и҆ ѡ҆скверне́нномꙋ: и҆́бѡ беꙁꙁаконнова́хъ дре́внихъ множа́е, прогнѣва́хъ тѧ̀ и҆ раꙁдражи́хъ зѣ́лѡ, па́че числа̀ беꙁчисле́нныхъ звѣ́ꙁдъ, па́че числа̀ пѣ́ска мо́рскагѡ съгрѣши́хъ ти.

Нѣ́стъ ви́да злобы̀ злѣ́йша: нѣ́стъ стꙋ́да злобы̀ лꙋка́вша, є҆гѡ́же не съдѣѧ́хъ ѡ҆каѧ́нный а҆́ꙁъ, на всѧ́кое вре́мѧ и҆ мѣ́сто: дш҃ею по́мысломъ и҆ ᲃловесы̀, и҆ дѣѧ́нъми. ᲂу҆множи́шасѧ мое́ѧ злобы̀ ме́рꙁости: ᲂу҆множи́шасѧ моѧ̀ тма́ми злодѣ́йства: ᲂу҆множи́шасѧ мои́хъ прегрѣше́нїй бремена̀, а҆кѝ желѣ́ꙁны, мнѣ́нїемъ съгорче́нами є҆́стъ вы́ѧ ю҆́ꙁами не и҆ꙁбѣ́жными, стѧгнꙋ́тъ є҆́смь ᲃе́рдцемъ, ни въꙁникнꙋ́ти главꙋ̀ мою̀ могꙋ̀, ни ѡ҆сла́ба ми є҆́стъ въ ᲃо́вѣсти. недосто́йнѣ высотꙋ̀ нбⷭ҇нꙋю зрю̀: чл҃чское зрю̀ видѣ́нїе: събе́сѣдꙋю бли́жнемꙋ: недосто́йнѣ зе́мнꙋю настꙋпа́ю пе́рстъ.

Твою̀ бо раждего́хъ ꙗ҆́рость въконе́цъ: гнѣ́въ распли́хъ стра́шный беꙁмѣ́стнѣ: прогнѣва́хъ тѧ̀ и҆ раꙁдажи́хъ зѣ́лѡ: пре́дъ тобо́ю всѧ́кꙋ ме́рꙁость сътвори́хъ.

Ни є҆дино́же въсхотѣ́хъ твои́хъ чисто́тныхъ хотѣ́нїй: ни є҆динꙋ̀ же въжделѣ́хъ твои́хъ въжделѣ́нныхъ сꙋде́бъ: ни є҆дино́же съхрани́хъ твои́хъ премꙋ́дрыхъ повелѣ́нїй: ни є҆ди́нъже ᲂу҆держа́хъ твои́хъ держа́вныхъ гл҃ъ. и҆ нн҃ѣ прекланѧ́ю ти ᲃе́рдца мое́гѡ колѣ́нѣ: прекланѧ́ю главꙋ̀ ѡ҆мраче́ннꙋю: вы́ю ѡ҆скверне́ннꙋю. Твое́й блгⷭ҇ти вы́ю мою̀ прекланѧ́ю: твое́й блгⷭ҇ти моле́нїе приношꙋ̀. ᲃъгрѣши́хъ беꙁꙁаконова́хъ и҆ блаꙁнствова́хъ согрѣши́хъ неправдова́хъ и҆ престꙋпи́хъ за́повѣди твоѧ̀: согрѣши́хъ неправдова́хъ и҆ ѡ҆сꙋди́хъ: согрѣши́хъ ѿверго́хъсѧ и҆ не ᲂу҆стыдѣ́хъсѧ.

Но моле́нїе творю̀ твое́й блгⷭ҇ти: но мо́лбꙋ приношꙋ̀ твое́мꙋ неꙁло́бїю: но молю̀ твоѐ кра́йнее благоꙋтро́бїе: но молю̀ и҆ въпїю̀, ᲃп҃сѝ и҆ ѡ҆чи́сти мѧ̀, ѡ҆ста́ви мно́жествѡ мои́хъ съгрѣше́нїй: ѡ҆ста́ви лю́таѧ мои́хъ долгѡ́въ: ѡ҆ста́ви мно́гаѧ мои́хъ ѡ҆скверне́нїй: ѡ҆ста́ви всѧ̀ мои́хъ ме́рꙁостїй.

Да не съкрꙋши́ши мѧ̀ съ грѣхѝ: да не ᲂу҆мори́ши мѧ̀ съ беꙁꙁако́нъми: да не съ по́мыслы злы́ми съвъсхити́ши мѧ̀: да не съжже́ши мѧ̀ съ ме́рꙁостъми да не тра́пеꙁы и҆ꙁверже́ши мѧ̀ беꙁсме́ртныѧ: да не ѿчꙋжди́ши мѧ̀ ра́дости ᲃт҃ыхъ: да не ѡ҆тщеши́ши мѧ̀ ᲃпⷭ҇нїѧ мое́гѡ.

Креще́нїѧ да́ръ пода́ждъ ми и҆ вто́рагѡ покаѧ́нїѧ пода́ждъ ми ѡ҆́браꙁъ Бжⷭ҇тве́нный и҆ вели́кїй.

Пе́рвый бо ѡ҆калѧ́хъ грѣха́ми: пе́рвый ѡ҆скверни́хъ ме́рꙁѡстъми.

Дарꙋ́й ми покаѧ́нїе Влады́кѡ: ᲃподобѝ ᲃщ҃е́ннагѡ Причаще́нїѧ, и҆ хлѣ́ба живота̀, и҆ Ча́ши Крвѐ Богото̀чныѧ, въ ѡ҆чище́нїе мои́хъ съгрѣше́нїй: въ и҆ꙁбавле́нїе, и҆ въ ᲃпⷭ҇нїе: въ ча́съ же коне́чный и҆ го́ркїй и҆ сме́ртный: въ ча́съ тѧ́жкїй и҆ бо́лѣꙁнный: въ ча́съ те́мный и҆ помраче́нный, ᲃп҃сѝ ᲂу҆щедрѝ, ѡ҆чи́сти мѧ̀: дꙋ́шꙋ кро́ткѡ раꙁлꙋчѝ ѿ пло́ти мое́ѧ ѡ҆скверне́нныѧ. дꙋ́шꙋ те́мнꙋю покажѝ просвѣтова́ннꙋ: ѿ лꙋкавыхъ и҆ꙁба́ви бѣ́сѡвъ.

Рꙋкописа́нїѧ всѧ́ческаѧ ᲃъгрѣше́нїй, писа́нїѧ мои́хъ долгѡ́въ раꙁдерѝ: раꙁсы́пли въ а҆́довꙋ про́пасть: расторгнѝ, и҆спепелѝ, съжеꙁѝ до конца̀.

Кро́тки ᲃвѣ́тлы послѝ А҆́гглы тогда̀, ѿража́ющїѧ по́лки бѣсѡ́въ, дꙋ́шꙋ въсхища́ющїѧ ѿ мꙋче́нїѧ: дꙋ́шꙋ ᲂу҆щедрѧ́ющїѧ ѡ҆каѧ́ннꙋю. го́рѣ въꙁносѧ́щїѧ кро́мѣ съгрѣше́нїй, го́рѣ въꙁносѧ́щїѧ поклони́тисѧ Прⷭ҇то́лꙋ ѻ҆гнеѡ́браꙁномꙋ, и҆ просвѣтова́нномꙋ: причита́ющи та́мѡ всѣ́мъ ᲃп҃са́емымъ: ᲃподоблѧ́ющи ра́дости ᲃт҃ы́хъ.

Прїймѝ ходота́ѧ блгⷭ҇ть твою̀: да́ждъ ми блгⷭ҇ть твою̀ ходота́ѧ и҆ꙁрѧ́дна: благода́тїю, неꙁло́бїе, млⷭ҇рдїе, и҆ кра́йнее благоꙋтробїе.

Прїймѝ ходота́ѧ вто́рагѡ превы́шшꙋю мі́ра красова́нїе, Мт҃ръ Дв҃ꙋ Ѻ҆трокови́цꙋ, Бжⷭ҇тве́ннꙋю Лѣ́ствицꙋ, и҆ же́ꙁлъ, ѡ҆дш҃евле́нный Прⷭ҇то́лъ.

Прїймѝ ходота́ѧ Чи́нъ молнїелꙋ́чный, Прⷭ҇то́ли, Херꙋві́ми, Серафі́ми ѻ҆гне́нныѧ, Гд҃тва, Си́лы, Вла́сти, Нача́ла, А҆рхагг҃лы же и҆ А҆́гг҃лы.

Прїймѝ ходота́ѧ ᲃвѣ́тлагѡ и҆ ᲃвѣтоно́снагѡ Предте́чꙋ твое́гѡ ѡ҆свѧще́ннагѡ пре́жде пеле́нъ: Проповѣ́дника и҆ Богоглаголи́ва: прежде Влады́ки въсїѧ́вшагѡ ᲃꙋ́щымъ въ тмѣ̀.

Прїймѝ ходота́ѧ Ли́ки Ст҃ы́хъ, Ли́ки Прⷪ҇рѡ́къ, Патрїа́рхъ, Ѿц҃ъ, А҆по́столъ же, Мꙋ́ченикъ вѣнценѡ́сныхъ, и҆ всѧ̀ со́нмы ᲃт҃ы́хъ и҆ ᲃвѣтонѡ́сныхъ.

Прїймѝ ходота́ѧ Ма́рїю Е҆гѵптѧны́ню, человѣ́ка ѿ землѧ̀, нб҃ошестве́нна ѻ҆ба́че.

Прїймѝ ходота́ѧ Ѻ҆нꙋ́фрїѧ Вели́кагѡ, тѣ́ло ѡ҆бнажи́вшагѡ, Бжⷭ҇тве́нною же ѡ҆де́ждою, дѣ́лы благи́ми ѡ҆болче́нна ᲃтра́ннѡ.

Бг҃ъ бо є҆сѝ млрⷭ҇дый и҆ благода́телный: Бг҃ъ кро́ткїй законопрестꙋ́пълшымъ: Бг҃ъ подаѧ́й ѡ҆ставле́нїе ᲃъгрѣше́нїй: Бг҃ъ дарꙋ́ѧй всѣ́мъ ᲃпⷭ҇нїе. мнѣ́же покажѝ всю̀ блгⷭ҇ть твою̀: мнѣ̀ и҆ꙁлі́й ᲃтрꙋ́ю благоꙋтро́бїѧ твое́гѡ. и҆бѡ̀ законопрестꙋпи́хъ всѣ́хъ множа́е: ѿ ложе́снъ самѣ́хъ: до нн҃ѣшнѧгѡ ми вре́мене. Сп҃сѝ мѧ̀ чре́ꙁъ досто́инство моѐ и҆ чре́ꙁъ наде́ждꙋ, блгⷭ҇тїю и҆ благосты́нею твое́ю є҆ди́ною.

Ꙗ҆́кѡ да блⷭ҇влю̀ тѧ̀ и҆ любо́вїю велича́ю.

Ꙗ҆́кѡ да благодарю̀ и҆ пою̀ тѧ̀ благоче́стнѡ, въ вѣ́цѣ же бꙋ́дꙋщомъ ᲃп҃са́емъ, ꙗ҆́кѡ да блⷭ҇венна блⷭ҇влю̀ Влады́кꙋ, є҆го́же блⷭ҇вѧ́тъ Нбⷭ҇ныѧ Си́лы въ вѣ́ки всѧ̀ несочте́нныѧ. А҆ми́нь.

Моли́тва, гі҃. ᲃт҃гѡ Сѵмеѡ́на но́вагѡ Богосло́ва, ѿ Бжⷭ҇твенныхъ раче́нїй.

Ѿ ᲃкве́рныхъ ᲂу҆́сте́нъ, ѿ ме́рꙁскагѡ ᲃе́рдца, ѿ нечи́стагѡ ꙗ҆ꙁы́ка, ѿ дш҃а̀ ѡ҆скверне́нны, прїймѝ моле́нїе Хрⷭ҇те мой, и҆ не пре́ꙁрѣвъ ми ни слове́съ, ни ѡ҆́браꙁа, ни де́рꙁкости, да́ждъ ми дерꙁнове́ннѣ гл҃а́ти, ꙗ҆́же хощꙋ̀ Хє҃ мо́й, па́че же и҆ наꙋчѝ мѧ̀, что́ми досто́итъ твори́ти, и҆ гл҃а́ти. Съгрѣши́хъ па́че блꙋ́дница, ꙗ҆́же ᲂу҆вѣ́дѣвши гдѐ ѡ҆бита́еши, Мѵ́ра кꙋпи́вши, прїйде де́рꙁостнѡ пома́ꙁати но́ꙁѣ тебѣ̀ Влады́ки Ха҃ и҆ Бг҃а мое́гѡ. Ꙗ҆́коже ѡ҆́ныѧ не ѿгна́лъ є҆сѝ прише́дшїѧ ѿ ᲃе́рдца, ни менѐ ѿринѝ ᲃло́ве: твои́же ми да́ждъ но́ꙁѣ и҆ держа́ти и҆ лобыꙁа́ти, и҆ ᲃтрꙋ́ѧми ᲃле́ꙁными ꙗ҆́кѡ многоцѣ́ннымъ Мѵ́ромъ ᲂу҆серднѡ пома́ꙁати.

Ѻ҆мы́й мѧ̀ ᲃлеꙁа́ми мои́ми, ѡ҆чи́сти мѧ̀ и҆́ми ᲃло́ве. Ꙍ҆ста́ви съгрѣше́нїѧ моѧ̀, и҆ млⷭ҇ть ми пода́ждъ, вѣ́си зо́лъ мно́жествѡ, вѣ́си и҆ ᲃтрꙋ́пы моѧ̀, и҆ ꙗ҆́ꙁвы моѧ̀ зри́ши. Но и҆ вѣ́рꙋ вѣ́си, и҆ проиꙁволе́ние зри́ши, и҆ въꙁдыха́нїѧ ᲃлы́шиши, не таи́тсѧ тебѣ̀ Бо́же мо́й и҆ Тво́рче мо́й, и҆ и҆ꙁбави́телю мо́й, ни ка́плѧ ᲃле́ꙁнаѧ, ни́же ка́плѣ ча́сть нѣ́каѧ, и҆ ни движе́нїе ᲃерде́чное. Не ᲃъдѣѧ́нное моѐ ви́дѣша ѻ҆́цѣ твоѝ. Въ кни́гахъ же твои́хъ и҆ є҆щѐ несъдѣла́ннаѧ напи́сана тебѣ̀ сꙋ́тъ.

Ви́ждъ смире́нїе моѐ: ви́ждъ трꙋ́дъ мо́й є҆ли́къ, и҆ грѣхѝ всѧ̀ ѡ҆ста́ви ми Бо́же всѧ́ческихъ.

Ꙗ҆́кѡ да чⷭ҇тымъ ᲃе́рдцемъ и҆ пристра́шною мы́слїю, и҆ дш҃е́ю съкрꙋше́нною, Прчⷭ҇тыхъ твои́хъ причащꙋ́сѧ и҆ нескве́рныхъ Та́инъ. И҆́миже ѡ҆живлѧ́етсѧ и҆ ѡ҆божа́етсѧ всѧ́къ пїѧ́й и҆ ꙗ҆ды́й чⷭ҇тымъ ᲃе́рдцемъ.

Ты́бо ре́клъ є҆сѝ Влады́кѡ мо́й: всѧ́къ ꙗ҆ды́й мою̀ Пло́ть, и҆ пїѧ́й мою̀ Кро́вь, въ мнѣ̀ пребыва́етъ, и҆ а҆́ꙁъ въ не́мъ.

И҆́стиннѡ Сло́во всѧ́кѡ Влады́ки и҆ Бг҃а мое́гѡ. Бжⷭ҇тве́нныхъ бо и҆ Боготворѧ́щихъ приѡбщи́выйсѧ благода́тїй, не са́мъ є҆́стъ, но съ тобо́ю Хє҃ мо́й, ᲃвѣ́томъ трисолне́чнымъ просвѣща́ющимъ мі́ръ, ᲂу҆́бѡ да не є҆ди́нъ бꙋ́дꙋ, да не кро́мѣ тебѣ̀ животда́вца, дыха́нїѧ мое́гѡ, живота̀ мое́гѡ, радова́нїѧ мое́гѡ, мі́рскагѡ ᲃп҃се́нїѧ: ᲃегѡ̀ ра́ди къ тебѣ̀ пристꙋпи́хъ, ꙗ҆́коже зри́ши, съ ᲃлеꙁа́ми, и҆ ᲃе́рдцемъ съкрꙋше́ннымъ, и҆ꙁбавле́нїѧ мои́мъ съгрѣше́нїемъ просѧ̀ прїѧ́ти ми, и҆ твои́хъ животда́телныхъ и҆ непоро́чныхъ Та́инствъ причасти́тисѧ не ѡ҆сꙋжденнѡ. ꙗ҆́кѡ да пребыва́еши, ꙗ҆́коже ре́клъ є҆сѝ, съ мно́ю треѡкаѧ́ннымъ. ꙗ҆́кѡ да не кро́мѣ твое́ѧ благода́ти ѡ҆брѣ́тъ мѧ̀ пре́лестникъ, въсхити́тъ мѧ̀ лъсти́внѡ, и҆ прелсти́въ ѿведе́тъ ѿ Боготво́рныхъ ти ᲃлове́съ.

Сегѡ̀ ра́ди припада́ю, и҆ те́плѣ въпїю́ти, ꙗ҆́коже блꙋ́днагѡ прїѧ́лъ є҆сѝ, и҆ блꙋ́дницꙋ прише́дшꙋю, та́кѡ прїймѝ и҆ менѐ блꙋ́днагѡ и҆ скве́рнагѡ ще́дре, дш҃е́ю съкрꙋше́нною нн҃ѣ къ тебѣ̀ приходѧ́ща.

Вѣ́мъ ᲃп҃се ꙗ҆́кѡ никто́же съгрѣшѝ тебѣ̀, ꙗ҆́коже а҆́ꙁъ. Ни́же съдѣла̀ дѣѧ́нїѧ, ꙗ҆́коже а҆́ꙁъ съдѣла́хъ, но се па́ки вѣ́мъ, ꙗ҆́кѡ невели́чествѡ съгрѣше́нїй, ни́же прегрѣше́нїй мно́жествѡ, превосхо́дитъ Бг҃а мое́гѡ мно́гое человѣкѡлю́бїе. Но милова́нїемъ млⷭ҇ти те́плѣ ка́ющыхъсѧ чи́стиши и҆ свѣ́тлиши, и҆ ᲃвѣ́тъ твори́ши прича́стники ѡ҆бе́щники Бжⷭ҇тва твое́гѡ съдѣлова́ѧ и҆́хъ неꙁави́стнѡ, и҆ стра́нное А҆́гглⷭ҇кимъ и҆ человѣ́ческимъ мы́слемъ бе́сѣдꙋеши и҆́мъ многа́жды, ꙗ҆́коже дрꙋ́гомъ свои́мъ и҆́скрнимъ.

Сі́ѧ де́рꙁостна мѧ̀ тво́рѧтъ, сі́ѧ и҆ въпрѣрѧ́ютъ мѧ̀ Хє҃ мо́й, и҆ надѣѧ́сѧ на тоѧ̀ бога́тыѧ ꙗ҆́же къ намъ благода́ти, ра́дꙋѧсѧ въкꙋ́пѣ и҆ трепеща̀, ѻ҆гне́ви причаща́юсѧ, трава̀ ᲃы́й (и҆ стра́ннѡ чꙋ́до), ѡ҆роша́емъ непа́лнѡ, ꙗ҆́коже кꙋпина̀ дре́вле неѡпа́лнѡ горѧ́щаѧ.

Тѣ́мъже благода́рнымъ сло́вомъ, благода́рнымъ и҆ ᲃе́рдцемъ, благода́рными ᲂу҆десы̀ и҆ дш҃ѧ̀ и҆ тѣ́ла мое́гѡ, покланѧ́юсѧ, велича́ю, и҆ сла́влю тѧ̀ Хє҃ мо́й: ꙗ҆́кѡ блⷭ҇ве́на ᲃꙋ́ща, нн҃ѣ же, и҆ въ вѣ́ки вѣкѡ́въ. А҆ми́нь.

Се пристꙋпа́ю къ Бжⷭ҇тве́нномꙋ Причаще́нїю.

Съдѣ́телю да не ѡ҆пали́ши мѧ̀ Причаще́нїемъ.

Ѻ҆́гнь бо є҆сѝ недосто́йныѧ попалѧ́ѧй.

Но ᲂу҆́бѡ ѡ҆чи́сти мѧ̀ ѿ всѧ́кїѧ ᲃкве́рны.

Та́жъ.

Вече́ри твое́й та́йной, дне́съ Сн҃е Бж҃їй прича́стника мѧ̀ прїмѝ небо̀ врагѡ́мъ твои́мъ та́йнꙋ повѣ́мъ: ни лобꙁа́нїѧ ти да́мъ ꙗ҆́кѡ І҆ꙋ́да, но ꙗ҆́кѡ раꙁбо́йникъ, и҆сповѣда́ѧсѧ въпїю̀ ти, помѧнѝ мѧ̀ Гд҃и въ Ца́рствїи твое́мъ.

И҆ па́ки ᲃтіхѝ сі́ѧ.

Боготворѧ́щꙋю Кро́вь, ᲂу҆жасни́сѧ чл҃че зрѧ̀.

Ѻ҆́гнь бо є҆́стъ недосто́йныѧ попалѧ́ѧй.

Бжⷭ҇тве́нное Тѣ́ло и҆ ѡ҆божа́етъ мѧ̀ и҆ пита́етъ.

Ѽбж҃а́етъ Дх҃ъ, ᲂу҆́мъ же пита́етъ ᲃтра́ннѡ.

Та́же Тропарѝ.

Ꙋ҆слади́лъ мѧ̀ є҆сѝ любо́вїю Хє҃, и҆ и҆ꙁмѣни́лъ мѧ̀ є҆сѝ твои́мъ раче́нїемъ. но попалѝ ѡ҆гне́мъ невеществе́ннымъ грѣхѝ моѧ̀, и҆ насыти́тисѧ є҆́же въ тебѣ̀ наслажде́нїѧ ᲃподобѝ: да ѡ҆сі́ю дво́ю ликꙋ́ѧ въꙁвелича́ю бла́же прише́ствїѧ твоѧ̀.

Въ свѣ́тлостехъ ᲃт҃ы́хъ твои́хъ, ка́кѡ вні́йдꙋ недосто́йный; а҆́ще бо дерꙁнꙋ̀ съвнїйтѝ въ Невѣ́стникъ, ѡ҆де́жда мѧ̀ ѡ҆блича́етъ, ꙗ҆́кѡ нѣ́сть бра́чна, и҆ свѧꙁа́нъ и҆ꙁверже́нъ бꙋ́дꙋ ѿ А҆́гг҃лѡвъ ѡ҆чи́сти Гд҃и скве́рнꙋ дш҃а̀ мое́ѧ и҆ ᲃп҃сѝ мѧ̀ ꙗ҆́кѡ человѣкѡлю́бецъ.

Та́же Моли́тва.

Влады́кѡ человѣкѡлю́бче, Гд҃и І҆и҃се Хє҃ Бо́же мо́й. да не въ сꙋ́дъ ми бꙋ́дꙋтъ ᲃт҃а́ѧ сі́ѧ, за є҆́же недосто́йнꙋ ми бы́ти: но въ ѡ҆чище́нїе и҆ ѡ҆сщ҃е́нїе дш҃ѝ же и҆ тѣ́лꙋ, и҆ въ ѡ҆брꙋче́нїе бꙋ́дꙋщїѧ жи́ꙁни и҆ Ца́рства. Мнѣ́бо прилѣплѧ́тисѧ тебѣ̀ Бв҃и мое́мꙋ благѡ є҆стъ и҆ полага́ти въ тебѣ̀ Гд҃ѣ мое́мъ наде́ждꙋ ᲃп҃се́нїѧ мое́гѡ.

И҆ па́ки.

Вече́ри твое́й та́йной: Сі́ѧже си́це сконча́въ, въ ᲃвоѐ вре́мѧ съ ᲃтра́хомъ и҆ тре́петомъ, и҆ тве́рдою вѣ́рою причасти́тсѧ Бжⷭ҇твенномꙋ Тѣ́лꙋ и҆ Крвѐ Гд҃не́й.

Е҆гда́же полꙋчи́ши Прест҃о́е Причаще́нїе:

Животворѧ́щихъ Таинстве́нныхъ дарова́нїй.

Въспо́й а҆́бїе, и҆ въꙁблагодарѝ велмѝ, И҆ сі́ѧ те́плѣ ѿ дш҃а̀ Бг҃ꙋ глаголѝ.

Сла́ва тебѣ̀ Бж҃е, ᲃла́ва тебѣ̀ Бж҃е, ᲃла́ва тебѣ̀ Бо́же ᲃп҃се мо́й.

По съверше́нїи же Бжⷭ҇тве́нныѧ Лѵтꙋ́ргїи не и҆сходѧ̀ и҆ꙁъ Ѻ҆́лтарѧ ѽ І҆ере́ю, съ всѧ́кимъ ᲃмѣре́нїемъ, благода́рною же дш҃е́ю и҆ ᲃе́рдцемъ, сі́ѧ Моли́твы благодарстве́нныѧ внима́телнѡ чтѝ.

Моли́тва, а҃. Ст҃гѡ Васи́лїѧ Вели́кагѡ.

Благодарꙋ̀ тѧ̀ Гд҃и Бо́же мо́й, ꙗ҆́кѡ не ѿрынꙋ́лъ мѧ̀ є҆сѝ грѣ́шнагѡ, но ѡ҆бе́щника бы́ти мѧ̀ ᲃщ҃е́нїй твои́хъ сподоби́лъ є҆сѝ. Благодарꙋ́тѧ, ꙗ҆́кѡ недосто́йнагѡ менѐ причасти́тисѧ Прчⷭ҇тымъ твои́мъ и҆ Нбⷭ҇нымъ да́рѡмъ сподоби́лъ є҆сѝ.

Но Влады́кѡ человѣкѡлю́бче, на́съ дѣ́лѧ ᲂу҆ме́рый же и҆ Въскресы́й, и҆ дарова́вый намъ ᲃтра́шныѧ сі́ѧ и҆ животво́рныѧ Та́йны, въ благодѣѧ́нїе и҆ ᲃщ҃е́нїе дш҃ъ и҆ тѣле́съ на́шихъ: да́ждъ бы́ти си́мъ и҆ мнѣ̀ въ и҆сцѣле́нїе дш҃ѝ и҆ тѣ́лꙋ, въ ѿгна́нїе всѧ́кагѡ съпроти́внагѡ, въ просвѣщенїе ѻ҆́чїю ᲃе́рдца мое́гѡ, въ смире́нїе дш҃е́вныхъ ми ᲃи́лъ, въ вѣ́рꙋ непосты́днꙋ, въ любо́въ нелицемѣ́рнꙋ, въ и҆сполне́нїе премꙋ́дрости, въ съблюде́нїе за́повѣдїй твои́хъ, въ приложе́нїе Бжⷭ҇тве́нныѧ ти благода́ти, и҆ въ твое́гѡ Ца́рствїѧ присвое́нїе.

Ꙗ҆́кѡ давъ ᲃт҃ы́ни твое́й тѣ́ми съхранѧ́емъ, твою̀ благода́ть помина́ю всегда̀: и҆ не ктомꙋ̀ себѣ̀ живꙋ̀, но тебѣ̀ на́шемꙋ Влады́цѣ и҆ благода́телю, и҆ та́кѡ сегѡ̀ жи́тїѧ и҆ꙁъше́дъ, ѡ҆ наде́ждѣ живота̀ вѣ́чнагѡ, въ при́снѡсꙋ́щный дойдꙋ̀ поко́й, и҆де́же є҆́стъ праꙁднꙋ́ющихъ гла́съ беꙁконе́чный, и҆ непреходи́маѧ ᲃла́дость, зрѧ́щихъ твое́гѡ лица̀ добротꙋ̀ неиꙁрече́ннꙋю. Ты́бо є҆сѝ и҆́стинное жела́нїе, и҆ неиꙁрече́нное весе́лїе любѧ́щихъ тѧ̀ Хрⷭ҇те Бо́же на́шъ, и҆ тебѣ̀ сла́витъ всѧ̀ тва́ръ въ вѣ́ки. А҆ми́нь.

Моли́тва, в҃. того́жъ.

Влады́кѡ Хє҃ Бж҃е, Цр҃ꙋ вѣ́кѡвъ и҆ ᲃъдѣ́телю всѣ́хъ, благодарꙋ̀ тѧ̀ ѡ҆ всѣ́хъ ꙗ҆́же ми є҆сѝ да́лъ, благи́хъ, и҆ ѡ҆ причаще́нїи Прчⷭ҇тыхъ и҆ животворѧ́щихъ твои́хъ Та́инъ.

Молю́тисѧ ᲂу҆́бѡ благі́й человѣкѡлю́бче, ᲃъхранѝ мѧ̀ подъ кро́вомъ твои́мъ, и҆ въ сѣ́ни кры́лꙋ твое́ю: и҆ дарꙋ́й ми чⷭ҇тою ᲃо́вѣстїю да́же до послѣ́днѧгѡ и҆ꙁдыха́нїѧ досто́йнѡ причаща́тисѧ ᲃщ҃е́нїй твои́хъ, въ ѡ҆ставле́нїе грѣхѡ́въ, и҆ въ жи́ꙁнь вѣ́чнꙋю. Ты́бо є҆сѝ хлѣ́бъ живо́тный, и҆сто́чникъ ᲃт҃ы́ни, пода́тель благи́хъ. и҆ тебѣ̀ ᲃла́вꙋ въꙁсыла́емъ ᲃъ беꙁнача́лнымъ ти Ѻ҆ц҃емъ, и҆ съ Прⷭ҇ты́мъ, благи́мъ и҆ животворѧ́щимъ твои́мъ Дх҃омъ, нн҃ѣ и҆ при́снѡ, и҆ въ вѣ́ки вѣкѡ́въ. А҆ми́нь.

Моли́тва, г҃. Метафра́ста ᲃтіха́ми.

Да́вый въ пи́щꙋ мнѣ̀ Плоть ᲃвою̀ во́лею. Ѻ҆́гнь сы́й, ѡ҆палѧ́ѧй недосто́йныѧ. Да не ѡ҆пали́ши мѧ̀ ᲃъдѣ́телю мо́й. Но па́че вни́ди въ ᲂу҆́ды моѧ̀ дѣйстве́ннѣ, и҆ въ всѧ̀ ᲃъста́вы. Въ ᲂу҆тро́бꙋ и҆ ᲃе́рдце.

Попалѝ те́рнїе всѣ́хъ мои́хъ съгрѣше́нїй. Дщ҃ꙋ ѡ҆чи́сти: ѡ҆ст҃ѝ всѧ̀ помышле́нїѧ. Съста́вы ᲂу҆твердѝ съ ко́стъми въкꙋ́пѣ.

Чꙋ́вствїй просветѝ про̀стꙋю пѧтери́цꙋ. Всегѡ̀ мѧ̀ пригвоꙁдѝ ᲃтрахꙋ твое́мꙋ.

Прⷭ҇нѡ покрыва́й и҆ съблюда́й, и҆ ᲃъхранѝ мѧ̀ ѿ всѧ́кагѡ дѣ́ла и҆ сло́ва дш҃етлѣ́нна.

Ѻ҆чи́сти, ѡ҆мы́й, ᲂу҆пра́ви мѧ̀. Ꙋдобрѝ, въраꙁꙋмѝ, и҆ просвѣтѝ мѧ̀.

Покажѝ мѧ̀ вселе́нїе твое́гѡ є҆дина́гѡ всест҃а̀гѡ Дх҃а. И҆ да не ктомꙋ̀ въмѣсти́лище бꙋ́дꙋ грѣхꙋ̀.

Но тебѣ̀ хра́мъ, во́ньде въхо́домъ причаще́нїѧ, ꙗ҆́коже ѡ҆гнѧ̀ да бѣжи́тъ мѧ̀ всѧ́кое злодѣ́йство, и҆ всѧ́каѧ стра́сть.

Моли́тве́нники ти приношꙋ̀ всѧ̀ ᲃт҃ыѧ: Чинонача́лїѧ беꙁъпло́тныхъ: ᲃт҃а́гѡ Предте́чꙋ твое́гѡ, и҆ премꙋ́дрыѧ А҆по́столы: къ си́мъ же Прчⷭ҇тꙋю ти Мт҃ръ.

И҆́хъ же мо́лбы прїймѝ млⷭ҇рде Хє҃ мо́й. И҆менѐ твое́гѡ ᲃлꙋжи́телѧ, ᲃвѣ́тꙋ ᲃн҃а съдѣла́й.

Ты́ бо є҆сѝ са́мъ бла́же дш҃а́мъ на́шимъ ѡ҆сщ҃енїе и҆ свѣ́тлостъ.

И҆ тебѣ̀ подо́бнѡ ꙗ҆́кѡ Бг҃ꙋ и҆ Влады́цѣ, ᲃла́вꙋ всѝ въꙁсыла́емъ на всѧ́къ дн҃ь. А҆ми́нь.

Моли́тва, д҃. Ст҃гѡ Кѵри́лла А҆леѯандрі́йскагѡ.

Тѣ́ло твоѐ ст҃о́е Гд҃и І҆и҃се Хє҃ Бо́же мо́й, да бꙋ́детъ ми въ живо́тъ, и҆ ѡ҆сщ҃енїе: и҆ Кро́вь твоѧ̀ чⷭ҇тнаѧ въ ѡ҆ставле́нїе грѣхѡ́въ, и҆ въ жи́ꙁнь вѣ́чнꙋю. И҆ на стра́шномъ твое́мъ сꙋ́дѣ поста́ви мѧ̀ ѡ҆де́снꙋю тебѣ̀. Бꙋ́ди же ми Е҆ѵхари́стїѧ сі́ѧ въ ра́достъ и҆ здра́вїе, и҆ въ и҆сцѣле́нїе дш҃ѝ и҆ тѣ́лꙋ. Ꙗ҆́кѡ блⷭ҇в́нъ є҆сѝ въ вѣ́ки. А҆ми́нь.

Моли́тва, є҃.

Всест҃а́ѧ Влады́чце Бц҃е, ᲃвѣ́те помраче́нныѧ ми дш҃а̀: наде́ждо, покро́ве, прибѣ́жище, ᲂу҆тѣше́нїе и҆ радова́нїе моѐ. Благодарꙋ̀ тѧ̀, ꙗ҆́кѡ ᲃподоби́ла мѧ̀ єсѝ недосто́йнагѡ, прича́стника бы́ти Пречⷭ҇томꙋ Тѣ́лꙋ и҆ чⷭ҇тной Крвѝ Сн҃а твое́гѡ. Но ро́ждшаѧ и҆́стинный свѣ́т, просвѣтѝ ми ᲂу҆́мныѧ ѡ҆́цѣ ᲃе́рдца. и҆сто́чникъ беꙁъсме́ртїѧ ро́ждшаѧ, ѡ҆животворѝ мѧ̀ ᲂу҆мерщвленнагѡ грѣхо́мъ. Ми́лостивагѡ Бг҃а любоблагосе́рдаѧ Мт҃и, поми́лꙋй мѧ̀: и҆ да́ждъ ᲂу҆миле́нїе и҆ ᲃъкрꙋше́нїе въ ᲃе́рдци мое́мъ, и҆ ᲃмире́нїе въ мы́слехъ мои́хъ, и҆ въꙁведе́нїе ѿ плѣне́нїѧ по́мыслѡвъ мои́хъ. И҆ сподобѝ мѧ̀ да́же до послѣ́днѧгѡ и҆ꙁдыха́нїѧ не ѡ҆сꙋжде́ннѡ прїйма́ти Пречи́стыхъ Та́инъ ѡ҆сщ҃е́нїе, въ и҆сцѣле́нїе дш҃ѝ же и҆ тѣ́лꙋ. И҆ пода́ждъ ми Влады́чице сле́ꙁы покаѧ́нїѧ и҆ и҆сповѣда́нїѧ, въ є҆́же пѣ́ти и҆ сла́вити тѧ̀ всѧ̀ днѝ живота̀ мое́гѡ ꙗ҆́кѡ блⷭ҇ве́нна и҆ препросла́вленна є҆сѝ въ вѣ́ки. А҆ми́нь.

Та́же: Досто́йнѡ є҆́стъ: и҆ Трⷭ҇то́е: и҆ по Ѿче на́шъ: Тро́паръ: и҆́же и҆ꙁво́лиши. Сла́ва: И҆ нн҃ѣ: Бг҃род.: Гд҃и поми́лꙋй, гⷤ. Гд҃и блⷭ҇вѝ.

И҆ ѿпꙋ́стъ.

Сщ҃е́нникъ Парохїѧ́лный, до́лженъ є҆́стъ всѧ́кѡ тща́тисѧ. да ни є҆ди́нъ Хрⷭ҇тїѧни́нъ ѿ сꙋ́щихъ въ Паро́хїи є҆гѡ̀, на и҆схо́дѣ ѿ жи́тїѧ сегѡ̀ лише́нъ бꙋ́детъ Бжⷭ҇тве́ннагѡ Причаще́нїѧ животворѧ́щихъ Та́инъ Тѣ́ла и҆ Крвѐ Гд҃а на́шегѡ І҆и҃ᲃ Ха҃. А҆́ще бо нерадѣ́нїѧ ра́ди є҆гѡ̀ лише́нъ бꙋ́детъ кто̀ си́цевагѡ бла́га, и҆ тѧ́жко сме́ртнѡ согрѣ́шитъ, и҆ винѣ̀ и҆ꙁверже́нїѧ подлѣга́ти бꙋ́детъ. Но ᲂу҆́бѡ да си́цевыѧ тѧ́жкїѧ бѣды̀ и҆ꙁбѣ́гнетъ.

Въ пе́рвыхъ до́лженъ є҆́стъ Бжⷭ҇тве́нныѧ Та́йны въ Це́ркви свое́й всегда̀ на Прⷭ҇тлѣ по Ꙋ҆ста́вꙋ въ Слꙋже́бницѣ положе́нномъ ѡ҆ ᲃт҃о́мъ А҆́гнцѣ, въ ᲃт҃ы́й вели́кїй Четверто́къ закала́емомъ, ѡ҆сщ҃е́нны и҆ ѡ҆па́снѡ храни́мы и҆мѣ́ти: и҆бѡ̀ не всегда̀ мо́жетъ І҆ере́ѷ, но ни́же досто́итъ є҆мꙋ̀ Лѵтꙋргїса́ти, є҆гда̀ нꙋ́жда настꙋ́питъ причаще́нїѧ: Бжⷭ҇тве́нными же Та́йнами ᲂу҆жѐ съверше́ннѡ ѡ҆сщ҃е́нными всегда̀ нꙋ́ждѣ належа́щой, и҆ꙁрѧ́днѣе же бо́лныхъ ско́рѡ причасти́ти и҆ досто́итъ и҆ мо́жетъ.

Вто́рое, въ Це́ркви ча́стѡ да нака́ꙁꙋетъ свои́хъ Парохїѧ́нъ, ꙗ҆́кѡ да приклю́чшейсѧ бо́лѣꙁнѣ кото́ромꙋ ѿ ни́хъ, а҆́бїе є҆мꙋ̀ въꙁвѣ́стѧтъ ꙗ҆́кѡ да вре́меннѡ ѡ҆ до́лжномъ дш҃е́вномъ врачева́нїи є҆гѡ̀ тща́нїе сътво́ритъ.

Тре́тїе, са́мъ на всѧ́къ ча́съ, во дни́же и҆ въ но́щи, чⷭ҇тымъ и҆ треꙁве́ннымъ жи́тїемъ гото́въ да бꙋ́детъ, и҆ не лѣни́въ, во́нъже ча́съ и҆ꙁвѣстѧ́тъ є҆мꙋ̀ ѡ҆ бо́лномъ є҆́же посѣти́ти є҆гѡ̀, и҆сповѣда́ти же и҆ Бжⷭ҇тве́нными Та́йнами причасти́ти.

Четве́ртое, до́лженъ є҆́стъ не ѡ҆жида́ѧ приꙁыва́нїѧ, вѣ́сть прїимъ ѡ҆ раꙁболѣ́нїи Парохїѧнина свое́гѡ, а҆́бїе и҆тѝ и҆ посѣти́ти, и҆ словесы̀ Богодꙋхнове́нными ᲂу҆тѣша́ти, и҆ нака́ꙁоватъ є҆гѡ̀, є҆́же исповѣда́нїемъ ᲃт҃ы́мъ ѡ҆чи́стити со́вѣсть свою̀, и҆ причасти́тисѧ Бжⷭ҇тве́ннымъ и҆ животворѧ́щимъ Та́йнамъ, а҆́ще и҆ не зѣлѡ̀ болѣ́ꙁненъ ни́же въ бѣдѣ̀ ᲃме́ртной бꙋ́детъ: па́чеже а҆́ще самъ бо́лный сегѡ̀ жела́ти бꙋ́детъ, І҆ере́ѷ ника́коже да ѿрече́тсѧ.

К семꙋ̀ и҆ сі́ѧ да вѣ́сть І҆ере́ѷ и҆ ѡ҆па́снѡ да съхрани́тъ, ꙗ҆́кѡ до́лженъ є҆́стъ Парохїѧ́нъ сво́ихъ въ Це́ркви ᲂу҆чи́ти, ꙗ҆́кѡ да и҆дꙋ́щꙋ є҆мꙋ̀ съ Бжⷭ҇тве́нными Та́йнами къ бо́лномꙋ, ко́ждѡ и҆́хъ че́сть Богоподо́бꙋю Хв҃и въ Бжⷭ҇тве́нныхъ Та́йнахъ веществе́ннѣ сꙋ́щомꙋ ѿкрове́нїемъ гла́въ, и҆ колѣнопреклоне́нїемъ до землѣ̀, че́стнѡ всегда̀ да ѿдадѧ́тъ.

Ꙗ҆́кѡ не досто́итъ є҆мꙋ̀ въ Бжⷭ҇тве́нными Та́йнами въ со́блаꙁнь и҆́нѣмъ къ недосто́йнымъ и҆тѝ, ꙗ҆ко́вїи сꙋ́тъ ꙗ҆́вѣ недосто́йнїи, сі́естъ, проклѧ́тїи, ѿлꙋче́нїи, и҆ запрѣще́нїи, и҆ ꙗ҆́вно грѣ́шници, и҆́же сꙋ́тъ наро́дныѧ блꙋ́дницѧ, нало́жницѧ и҆мꙋ́щїи, лихвои́мцѣ, чародѣ́е, хꙋ́лници, и҆ и҆́нїи си́цевїи ꙗ҆́вѣ согрѣша́ющїи, а҆́ще не пе́рвѣе ᲃт҃ы́мъ и҆сповѣда́нїемъ себѣ̀ ѡ҆чи́стѧтъ, и҆ ꙗ҆́вной ѡ҆бѣ́дѣ по за́конꙋ доблесътво́рѧтъ.

Пе́рвѣе коего́ждѡ бо́лнагѡ І҆ере́ѷ до́лженъ є҆́стъ и҆сповѣдати, и҆ къ и҆сповѣда́нномꙋ ᲂу҆жѐ съ Бжⷭ҇тве́нными Та́йнами и҆тѝ и҆ причасти́ти: ра́ꙁвѣ а҆́ще нꙋ́жда сме́ртнаѧ належа́ти бꙋ́детъ, то съ Бжⷭ҇твенными Та́йнами да и҆де́тъ, и҆ и҆сповѣда́въ да прича́ститъ.

А҆́ще бо́лный причасти́всѧ Бжⷭ҇тве́ннымъ Та́йнамъ, дні́й коли́кѡ поживе́тъ и҆ па́ки въ бѣдѣ̀ сме́ртной бы́въ, въжделѣ́етъ Бжⷭ҇тве́нное Причаще́нїе, ника́коже І҆ере́ѷ да ѿрица́етсѧ, и҆ па́ки причасти́ти є҆гѡ̀, и҆ а҆́ще слꙋ́читсѧ и҆ многа́жды пото́мъ.

Въ бѣдѣ̀ сме́ртной сꙋ́щихъ и҆ по ꙗ҆де́нїи досто́итъ причасти́ти. Всѣ́же про́чїи бо́лнїи не ᲃꙋ́щїи въ бѣдѣ̀ сме́ртной, ѿ благоговѣ́нства же причасти́тисѧ Бжⷭ҇тве́ннымъ Та́йнамъ жела́ющїи пре́жде всѧ́кагѡ ꙗ҆де́нїѧ и҆ пи́тїѧ да причастѧ́тсѧ, и҆ ни́же врачева́нїѧ кое́го ли́бѡ пре́дъ ᲃт҃ы́мъ Причаще́нїемъ ника́коже да вкꙋ́сѧтъ.

Немогꙋ́щимъ всегда́шнѧгѡ ра́ди блева́нїѧ ничто́же ᲂу҆держа́ти въ себѣ̀ ѿ вкꙋша́емыхъ, да не пода́еть І҆ере́ѷ Бжⷭ҇тве́нное Причаще́нїе беꙁче́стїѧ ра́ди: доблѣ́стъ бо си́цевымъ немогꙋ́щимъ, є҆́же ѡ҆чи́стивши со́вѣстъ свою̀ ᲃт҃ы́мъ и҆сповѣда́нїемъ, ѿ ᲃе́рдца жела́ти Бжⷭ҇тве́нное Причаще́нїе. Та́кожде и҆ и҆стꙋпи́вшымъ ᲂу҆ма̀ да не пода́стъ, да не ᲂу҆ничиже́нїе нѣ́кое наведе́тсѧ Бжⷭ҇твнымъ та́йнамъ.

Къ бо́лномꙋ до́лженъ є҆́стъ І҆ере́ѷ Бжⷭ҇тве́нныѧ Та́йны ѿ Це́ркве въ до́мъ и҆де́же лежи́тъ, съ всѧ́кимъ Благоговѣ́нїемъ и҆ стра́хомъ, си́мъ ѡ҆́браꙁомъ понестѝ.

Въ пе́рвыхъ, чтⷭ҇нагѡ ра́ди провожде́нїѧ Бжⷭ҇тве́нныхъ Та́инъ, да съꙁыва́етъ ѿ благоговѣ́нныхъ мꙋ́жей, свои́хъ Парохїѧ́нъ ближа́йшихъ, и҆́же и҆лѝ съ ᲃвѣща́ми да предидꙋ́тъ, и҆лѝ беꙁъ свѣща̀ да послѣдꙋ́ютъ.

Да повели́тъ же до́мъ въ не́мъ же и҆ ѡ҆́дръ, на не́мъ же бо́лный лежи́тъ ѡ҆чисти́ти, и҆ Ѳѵмїѧ́момъ, и҆лѝ и҆́нымъ благово́нъ:емъ покади́ти, и҆ Тра́пеꙁꙋ поста́вити прѧ́мѡ бо́лнагѡ ѡ҆́дра, чи́стымъ ѡ҆брꙋ́сомъ покрове́ннꙋ, и҆ на не́й свѣти́лникъ съ ᲃвѣще́ю горѧ́щею, въ є҆́же на то́й поставле́ннымъ бы́ти Бжⷭ҇тве́ннымъ Та́йнамъ.

Са́мъ же І҆ере́ѷ ᲂу҆мы́въ рꙋ́цѣ, да и҆де́тъ къ Це́ркви, и҆ вше́дъ вню̀ и҆ ѡ҆бы́чнѡ покло́нъсѧ, ѿкрове́нною гла́вою да вхо́дитъ въ Ѻ҆́лтаръ, покло́нъжесѧ ѿкрове́нною гла́вою да вхо́дитъ въ Ѻ҆́лтаръ, покло́нъжесѧ ни́ꙁкѡ Бжⷭ҇тве́ннымъ Та́йнамъ, да ѡ҆блече́тсѧ въ Е҆пітра́хиль и҆ Фелѡ́нъ, и҆ на Бжⷭ҇твенной тра́пеꙁѣ раꙁви́въ А҆нтими́съ, и҆ благоговѣ́ннѡ покло́нъсѧ, да вꙁе́млетъ съ всѧ́кимъ благоговѣ́нїемъ съсꙋ́дъ вне́мъже Бж҃естве́нныѧ сꙋ́тъ Та́йны, и҆ положи́въ ѧ҆̀ на А҆нтими́сѣ, да ѿкры́етъ, и҆ ни́ꙁкѡ покло́нъсѧ, да въꙁме́тъ ча́сть и҆ вло́житъ въ ᲃт҃ꙋ́ю Чашꙋ; и҆ влѣѧ́въ ма́лѡ ѿ Вина̀, и҆ вложи́въ Ло́жицꙋ, да покры́етъ покро́вцемъ че́стнымъ: съсꙋ́дъ же Бжⷭ҇тве́нныхъ Та́инъ покры́въ, да поло́житъ па́ки на свое́мъ мѣ́стѣ, и҆ покло́нъсѧ ни́ꙁкѡ ѿверꙁе́ннымъ сꙋ́щимъ Ца́рскимъ две́ремъ, вꙁе́мъ благоговѣ́ннѡ ᲃт҃ы́й Поти́ръ съ Бжⷭ҇тве́нными Та́йнами, непокрове́нною гла́вою да и҆де́тъ, съ всѧ́кимъ благоговѣ́нїемъ и҆ стра́хомъ, гл҃ѧ̀ въ себѣ̀.

Поми́лꙋй мѧ̀ Бо́же по вели́цей млⷭ҇ти: Гд҃и не ꙗ҆́ростїю твое́ю: и҆ про́чаѧ покаѧ́телныѧ ѱалмы̀. пре́дъ и҆дꙋ́щимъ є҆мꙋ̀ съ горѧ́щими ᲃвѣща́ми. въ но́щи же, съ лѣта́рнѧми и҆лѝ походнѧ́ми: по не́мъ же да и҆де́тъ є҆ди́нъ ѿ кли́рикъ носѧ̀ съсꙋ́дъ съ ᲃщ҃е́нною водо́ю и҆ съ кропи́лцемъ, и҆ Кни́гꙋ сі́ю Тре́бникъ, и҆ покро́вецъ чⷭ҇тенъ, въ є҆́же подъсла́ти на Тра́пеꙁѣ подъ Бжⷭ҇тве́нными Та́йнами.

А҆́щеже дале́кое ше́ствїе и҆лѝ ꙗ҆жде́нїе къ бо́лномꙋ на и҆́нꙋю ве́сь и҆́матъ твори́ти І҆ере́ѷ, да тщи́тсѧ и҆мѣ́ти ᲃъсꙋ́децъ чⷭ҇тный на сі́е и҆́стое сътворе́нный, и҆лѝ ᲃребрѧ́ный, и҆лѝ цѣно́вый, съ покрыва́ломъ крѣ́пкѡ заключа́ющимсѧ. въ то́мъ же ᲃъсꙋ́дцѣ да бꙋ́детъ дво́е ѡ҆предѣле́нїе въ є҆́же в҆ъ є҆дино́мъ бы́ти Бжⷭ҇тве́ннымъ Та́йнамъ, въ дрꙋго́мъ же Ло́жици: и҆ Пи́рꙋ ѿ шолко́вагѡ пла́та ᲃъшве́нꙋ вне́йже ᲃъсꙋ́дцꙋ предърече́нномꙋ вмѣсти́тисѧ вѣꙁмощѝ. Вꙁе́мъ же Е҆пітра́хиль на себѣ̀, и҆ по предположе́нномꙋ ᲂу҆ста́вꙋ, въложи́въ въ сосꙋ́дъ Бжⷭ҇тве́нныѧ Та́йны, и҆ крѣ́пкѡ свѧꙁа́въ, да свѣ́ситъ ѧ҆̀ на вы́и свое́й, ꙗ҆́кѡ лежа́ти и҆́мъ на пе́рсехъ є҆гѡ̀. Кли́рикъ же є҆гѡ̀ да въꙁме́тъ Фелѡ́нъ и҆ Тре́бникъ, Вино̀ же и҆ во́дꙋ ᲃщ҃е́ннꙋю: Кивѡ́тъ же ма́лый да и҆́матъ, въ не́мъ же ᲃт҃ы́й Поти́ръ ᲃъкрове́нный бꙋ́детъ, є҆́же не коснꙋ́тисѧ є҆мꙋ̀ рꙋцѣ̀ несщ҃е́нной, и҆ та́кѡ да и҆детъ пѣ́шъ и҆лѝ на конѝ, и҆лѝ на колесни́ци къ бо́лномꙋ. А҆́щеже ско́рыѧ ра́ди нꙋ́жды на конѝ къ бо́лномꙋ бѣжи́тъ и҆ не мо́жетъ кли́рика съ събо́ю вꙁѧ́ти, ни́же Фелѡ́нъ, ни во́дꙋ ᲃщ҃еннꙋю ни́же Поти́ръ, понѐ ма́лѡ Вина̀ въ сосꙋ́децъ ма́лый да вꙁі́маетъ внѧ́дро своѐ и҆ Покро́вец чⷭ҇тный, и҆ во влага́лищи рече́нномꙋ ѡ҆брꙋ́сомъ покрове́нной распросте́ръ Покро́вец, сне́млетъ зъ се́бе Бжⷭ҇тве́нныѧ Та́йны, и҆ положи́въ ѧ҆̀ на Покро́вци покло́нсѧ ни́ꙁкѡ, вꙁе́млетъ Винѡ̀ и҆ положи́въ на Тра́пеꙁѣ по ни́жей положе́нномꙋ ᲂу҆ста́вꙋ, пристꙋ́питъ къ бо́лномꙋ, и҆ ѡ҆па́снѡ и҆спыта́въ, и҆ съверше́ннѡ и҆сповѣда́въ є҆гѡ̀ и҆ раꙁдрѣши́въ и҆ Моли́твы проче́тъ покло́нъсѧ ѿкры́въ съсꙋ́децъ, Ло́жицею вꙁе́млетъ Бжⷭ҇тве́нныѧ Та́йны, и҆ влїѧ́въ ма́лѡ Вина̀ въ Ло́жицꙋ, поддержа̀ лѣ́вою рꙋко́ю Покро́вецъ подъ Бжⷭ҇твенными Та́йнами, ѡ҆браща́етсѧ къ бо́лномꙋ, и҆ Причаща́етъ є҆гѡ̀ по ни́же написа́нномꙋ ᲂу҆ка́ꙁꙋ.

Входѧ̀ І҆ере́ѷ въ до́мъ бо́лнагѡ, всѣ́мъ въ домꙋ̀ сꙋ́щимъ колѣ́нѣ на землѣ̀ прекло́ншимъ, да рече́тъ въ ᲂу҆слыша́нїе всѣ́мъ:

Ми́ръ до́мꙋ семꙋ̀, и҆ всѣ́мъ живꙋ́щимъ въ не́мъ.

И҆ распросте́ръ на Тра́пеꙁѣ предрече́нный Покро́вецъ да поло́житъ на не́мъ Бжⷭ҇тве́нныѧ Та́йны, и҆ ни́ꙁко покло́нъсѧ, да въꙁе́млетъ Кропи́це и҆ кро́питъ ᲃщ҃е́нною водо́ю бо́лнагѡ и҆ ве́съ домъ, глаголѧ̀:

Ꙍ҆кропи́ши мѧ̀ и҆ссо́помъ и҆ ѡ҆чищꙋ́сѧ, ѡ҆мы́еши мѧ̀ и҆ па́че снѣ́га ᲂу҆бѣлю́сѧ.

И҆ а҆́бїе Гл҃етъ.

Тропа́ръ се́й, Гла́съ, а҃.

Сп҃сѝ Гд҃и лю́ди своѧ̀, и҆ блⷭ҇вѝ достоѧ́нїе твоѐ, и҆ послѝ благода́ть свою̀ на до́мъ се́й, посѣща́ющꙋю, покрыва́ющꙋю, и҆ и҆ꙁбавлѧ́ющꙋю ѿ всѧ́кагѡ зла́гѡ ѡ҆бстоѧ́нїѧ всѣ́хъ живꙋ́щихъ въ не́мъ, Моли́тва́ми Бц҃а и҆ всѣ́хъ ᲃт҃ы́хъ твои́хъ.

По се́мъ а҆́бїе да пристꙋ́питъ къ бо́лномꙋ въ є҆́же и҆спыта́ти и҆ поꙁна́ти, а҆́ще до́брѣ приꙋготовле́нъ є҆́стъ къ прїѧ́тїю Бжⷭ҇тве́нныхъ Та́инъ, и҆ а҆́ще не и҆́матъ кое́гѡ грѣха̀ забве́нїемъ, и҆лѝ како́вѣмъ ли́бо и҆́нѣмъ бꙋ́ди ѡ҆́браꙁомъ не и҆сповѣда́нна: а҆́ще же и҆́матъ, да и҆сповѣ́сть: и҆ послꙋша́въ є҆гѡ̀ І҆ере́ѷ, да раꙁдрѣши́тъ въкра́тцѣ, и҆ꙁре́къ пе́рвѣе сі́е и҆сповѣда́нїе, и҆ по не́мъ бо́лный а҆́ще мо́жетъ, а҆́ще ли не мо́жетъ и҆́нъ кто̀ ѿ лица̀ бо́лнагѡ, и҆ са́мъ І҆ере́ѷ да гл҃тъ.

И҆сповѣда́юсѧ Гд҃ꙋ Бг҃ꙋ Вседержи́телю, Пречⷭ҇то́й Дв҃ѣ Бц҃и, ᲃт҃ы́мъ Нбⷭ҇нымъ ᲃи́ламъ, всѣ́мъ ᲃт҃ы́мъ, и҆ тебѣ̀ ѿче че́стный всѣ́хъ грѣхѡ́въ мои́хъ, и҆́хъ же ѿ Креще́нїѧ мое́гѡ да́же до дне́шнѧгѡ днѐ и҆ ча́са съгрѣши́хъ, дѣ́ломъ, и҆ сло́вомъ, помышле́нїемъ, и҆ по́хотїю, во́лею и҆ нево́лею, ра́ꙁꙋмомъ и҆ нераꙁꙋ́мїемъ, зрѣ́нїемъ, слꙋ́хомъ, ѡ҆бонѧ́нїемъ, вкꙋ́сомъ, ѡ҆сѧꙁа́нїемъ, и҆ всѣ́ми мои́ми чꙋ́вствы внѣ́шными и҆ внꙋ́трными, дш҃е́вными и҆ тѣле́сными, въ днѝ и҆ въ но́щи, и҆ на всѧ́къ ча́съ, и҆́ми же Гд҃а Бг҃а мое́гѡ тѧ́жкѡ прогнѣва́хъ, и҆ ка́ѧсѧ жалѣ́ю си, и҆ ви́нна себѣ̀ Бг҃ꙋ мое́мꙋ представлѧ́ю: и҆ молю̀ Пречⷭ҇тꙋю Дв҃ꙋ Бц҃ꙋ Мр҃ію, и҆ всѣ́хъ ᲃт҃ы́хъ, да помо́лѧтсѧ ѡ҆ мнѣ̀ Гд҃ꙋ Бг҃ꙋ мое́мꙋ, та́кожде и҆ тебѣ̀ ѿче чⷭ҇тный, и҆ да прости́ши и҆ раꙁдрѣши́ши мѧ̀ ᲃи́лою ѿ Ха҃ тебѣ̀ да́нною.

Сконча́въ же сі́е и҆сповѣда́нїе, раꙁдрѣша́етъ є҆гѡ̀ І҆ере́ѷ симѝ словесы̀.

Гд҃ь и҆ Бг҃ъ на́шъ І҆и҃ᲃ Хᲃ҃, свое́ю благода́тїю и҆ человѣкѡлю́бїемъ, да прости́тъ ти и҆ ѿпꙋсти́тъ всѧ̀ ᲃъгрѣше́нїѧ твоѧ̀, ꙗ҆́же согрѣши́лъ є҆сѝ въ все́мъ жи́тїи твое́мъ ра́бе Бж҃їй, И҆мⷬ҇къ: да́же до нн҃ѣшнѧгѡ днѐ и҆ ча́са.

И҆ а҆́ꙁъ недостойный І҆ере́ѷ, вла́стїю мнѣ̀ ѿ Ха҃ да́нною, проща́ю и҆ раꙁдрѣша́ю тѧ̀ ѿ всѣ́хъ грѣхѡ́въ твои́хъ, и҆́хъ же ᲃъгрѣши́лъ є҆сѝ въ все́мъ жи́тїи твое́мъ, да́же до нн҃ѣшнѧгѡ днѐ и҆ ча́са, ꙗ҆́кѡ да бꙋ́деши проще́нъ и҆ раꙁдрѣше́нъ въ нн҃ѣшнемъ и҆ въ бꙋ́дꙋщомъ вѣ́цѣ, въ И҆мѧ̀ Ѿца̀ и҆ Сн҃а, и҆ ᲃт҃а́гѡ Дх҃а. А҆ми́нь.

Вѣ́стно же бꙋ́ди, ꙗ҆́кѡ а҆́ще не и҆́матъ что̀ исповѣ́сти вто́рое бо́лный, пе́рвѣе всѧ̀ съверше́ннѣ и҆сповѣда́въ, ѡ҆ба́че пре́дъ ᲃт҃ы́мъ Причаще́нїемъ да гл҃етъ сі́е и҆сповѣда́нїе по пре́дъ ᲂу҆каꙁа́нномꙋ, и҆ да раꙁдрѣши́тъ є҆гѡ̀ І҆ере́ѷ. Сверши́въ же и҆сповѣда́нїе и҆ раꙁдрѣше́нїе, а҆́ще бо́лный бли́ꙁь є҆́стъ ᲃме́рти и҆ ᲂу҆жѐ скончева́етсѧ, а҆́бїе поклони́всѧ ни́ꙁкѡ Бжⷭ҇тве́ннымъ Та́йнамъ, да вꙁе́млетъ ѧ҆̀, и҆ ѡ҆бра́щъсѧ къ бо́лномꙋ да гл҃етъ:

Съ стра́хомъ Бж҃їимъ и҆ съ вѣ́рою пристꙋпѝ.

Кли́рикъ же глаголе́тъ:

Блⷭ҇ве́нъ грѧды́й въ И҆мѧ̀ Гд҃не, Бг҃ъ Гд҃ь и҆ ꙗ҆ви́сѧ намъ.

И҆ а҆́бїе гл҃етъ І҆ере́ѷ сі́е ѿ лица̀ бо́лнагѡ, и҆ по не́мъ бо́лный а҆́ще мо́жетъ.

Вѣ́рꙋю Гд҃и І҆и҃ᲃ Хє҃ Бо́же мо́й, и҆ и҆сповѣдꙋ́ю, ꙗ҆́кѡ сі́е є҆́стъ и҆́стинное само́е Бжⷭ҇тве́нное Тѣ́ло твоѐ, и҆ и҆́стиннаѧ ᲃама́ѧ Бжⷭ҇тве́ннаѧ Кро́вь твоѧ̀, и҆́хъ же молю̀ тѧ̀, сподобѝ мѧ̀ досто́йнѡ прїѧ́ти, въ ѡ҆ставле́нїе грѣхѡ́въ мои́хъ и҆ въ жи́ꙁнъ вѣ́чнꙋю въ Ца́рствїи твое́мъ Нбⷭ҇номъ, ꙗ҆́кѡ блⷭ҇венъ є҆сѝ въ вѣ́ки. А҆ми́нь.

И҆ а҆́бїе подложи́въ Покро́вецъ подъ ᲂу҆ста̀ бо́лнагѡ, причаща́етъ є҆гѡ̀ Ло́жицею, ѡ҆бы́чнѡ, гл҃ѧ:

Че́стное и҆ Пресвѧто́е Тѣ́ло и҆ Кро́вь Гд҃а на́шегѡ І҆и҃ᲃ Ха҃, преподае́тсѧ рабꙋ̀ Бж҃їю, И҆мⷬ҇къ: въ ѡ҆ставле́нїе грѣ́хѡвъ и҆ въ жи́ꙁнь вѣ́чнꙋю. А҆ми́нь.

По причаще́нїи же ѡ҆те́ръ покро́вцемъ ᲂу҆ста̀ є҆гѡ̀, чте́тъ ни́жей положе́ныѧ благода́рныѧ Моли́твы ѿ лица̀ бо́лнагѡ. А҆́ще же не а҆́бїе ᲃкончева́етсѧ бо́лный, не вꙁима́ѧ І҆ере́ѷ Бжⷭ҇тве́нныѧ Та́йны, гл҃етъ пре́жде съ ᲂу҆миле́нїемъ Моли́твы сі́ѧ ѿ лица̀ бо́лнагѡ, начина́ѧ ѡ҆бы́чнѡ.

Блⷭ҇ве́нъ Бг҃ъ на́шъ: Цр҃ю Нбⷭ҇ный: Трⷭ҇то́е Прⷭ҇та́ѧ Трⷪ҇це: по Ѿче на́шъ: Ꙗ҆́кѡ твоѐ є҆́стъ Ца́рство: Гд҃и поми́лꙋй: ві҃. Прїйдѣ́те поклонѣ́мсѧ, гⷤ. Таⷤ. Вѣ́рꙋю въ є҆ди́нагѡ Бг҃а:

Посе́мъ:

Вече́ри твое́й та́йной, дне́сь ᲃн҃е Бж҃їй Прича́стника мѧ̀ прїймѝ, небо̀ врагѡ́мъ твои́мъ Та́йны твое́ѧ повѣ́мъ, ни лобꙁа́нїѧ ти да́мъ ꙗ҆́кѡ І҆ꙋ́да: но ꙗ҆́кѡ раꙁбо́йникъ и҆сповѣда́ѧсѧ въпїю̀ ти: Помѧнѝ мѧ̀ Гд҃и, є҆гда̀ прїйдеши въ Ца́рствїи си.

Моли́тва, ѿ лица̀ бо́лнагѡ.

Ꙍ҆чи́сти мѧ̀ Гд҃и ѿ грѣхѡ́въ мои́хъ, грѣ́шныхъ ра́ди пролїѧ́вый Кро́вь свою̀. Влады́кѡ ты вѣ́си ꙗ҆́кѡ недосто́инъ є҆́смъ а҆́ꙁъ не то́чїю пристꙋпи́ти къ тебѣ̀, но ни́же въꙁдѣ́ти на нб҃о, и҆ на́ зе́млю: но поне́же ты са́мъ ре́клъ є҆сѝ, ꙗ҆ды́й мою̀ Пло́тъ, и҆ пїѧ́й мою̀ Кро́вь, въ мнѣ̀ пребыва́етъ и҆ а҆́ꙁъ въ не́мъ: сегѡ̀ ра́ди дерꙁа́ѧ прихождꙋ̀ къ тебѣ̀ млⷭ҇тве, и҆ приле́жнѡ молю́сѧ, млⷭ҇ти́въ бꙋдѝ мнѣ̀ грѣ́шномꙋ, и҆ досто́йна мѧ̀ Прича́стїю ᲃт҃ы́нь твои́хъ сътворѝ: млⷭ҇тивъ бо и҆ человѣкѡлю́бецъ Бг҃ъ є҆сѝ, и҆ тебѣ̀ ᲃла́вꙋ воꙁсылаемъ съ Ѿце́мъ и҆ ᲃт҃ы́мъ Дх҃омъ, нн҃ѣ и҆ при́снѡ, и҆ въ вѣ́ки вѣкѡ́въ. А҆ми́нь.

Моли́тва, в҃. подо́бнаѧ пе́рвой.

Гд҃и Бо́же мо́й, вѣ́мъ ꙗ҆́кѡ нѣ́смь досто́инъ, ни́же дово́ленъ да подъ кро́въ вни́деши хра́ма дш҃а̀ мое́ѧ, занѐ ве́сь пꙋ́стъ, и҆ па́дшїйсѧ є҆́стъ: и҆ не и҆́маши въ мнѣ̀ мѣ́ста досто́йна и҆де́же главꙋ̀ подклони́ти: но поне́же ты хо́щеши бы́ти съ мно́ю, на щедроты̀ твоѧ̀ надѣѧ́всѧ прихождꙋ̀ къ тебѣ̀ повелѝ ᲂу҆́бѡ дверю̀ ѿверстѝ недосто́йныхъ мои́хъ ᲂу҆́стъ, да тебѣ̀ є҆дина́гѡ насыщꙋ́сѧ. вънидѝ въ мѧ̀, и҆ ѡ҆чи́сти мѧ̀ ѿ всѧ́кїѧ ᲃкве́рны пло́ти и҆ дх҃а. бꙋ́ди ми помо́щникъ и҆ застꙋ́пникъ, и҆ сподобѝ мѧ̀ ѡ҆де́снꙋю тебѣ̀ ста́ти: молитва́ми и҆ моле́нїемъ Прчⷭ҇тыѧ Влады́чицы на́шеѧ Бц҃ы, и҆ при́снѡ Дв҃ы Мр҃їи, и҆ всѣ́хъ ᲃт҃ы́хъ ѿ вѣ́ка тебѣ̀ ᲂу҆годи́вшихъ, ꙗ҆́кѡ блⷭ҇ве́нна є҆сѝ въ вѣ́ки. А҆ми́нь.

Посе́мъ покло́нъсѧ І҆ере́ѷ Бжⷭ҇тве́ннымъ Та́йнамъ, въꙁе́млетъ ѧ҆̀, и҆ ѡ҆бра́щъсѧ къ бо́лномꙋ, гл҃етъ:

Со стра́хомъ Бж҃їимъ и҆ ве́рою пристꙋпѝ: и҆ проч.: ꙗ҆́кожъ предрече́сѧ. и҆ а҆́бїе І҆ере́ѷ гл҃етъ сі́е, и҆ недꙋ́жный по не́мъ.

Вѣ́рꙋю Гд҃и и҆ и҆сповѣдꙋ́ю ꙗ҆́кѡ ты є҆сѝ Хᲃ҃ Сн҃ъ Бг҃а жива́гѡ, прише́дый въ мі́ръ грѣ́шныхъ ᲃпⷭ҇тѝ, ѿ ни́хъ же пе́рвый є҆́смъ а҆́ꙁъ.

Вѣ́рꙋю Гд҃и І҆и҃ᲃ Хє҃ Бо́же мой, и҆ и҆сповѣдꙋ́ю, ꙗ҆́кѡ сі́е є҆́стъ и҆́стинное само́е Бжⷭ҇тве́нное Тѣ́ло твоѐ, и҆ и҆́стиннаѧ сама́ѧ Бжⷭ҇тве́ннаѧ Кро́вь твоѧ̀, и҆́хже молю̀ тѧ̀, сподобѝ мѧ̀ досто́йнѡ прїѧ́ти, во ѡ҆ставле́нїе грѣхѡ́въ мои́хъ и҆ въ жи́ꙁнъ вѣ́чнꙋю въ ца́рствїи твое́мъ небѣ́сномъ, ꙗ҆кѡ блⷭ҇венъ є҆сѝ въ вѣ́ки. А҆ми́нь.

И҆ а҆́бїе подложи́въ Покро́вецъ подъ ᲂу҆ста̀ болна́гѡ, Причаща́етъ є҆гѡ̀ Ло́жицею ѡ҆бы́чнѡ, глаголѧ̀:

Чтⷭ҇ное и҆ прⷭ҇тое Тѣ́ло и҆ Кро́вь Гд҃а на́шегѡ І҆и҃ᲃ Ха҃, преподае́тсѧ рабꙋ̀ Бж҃ію Имⷬ҇къ: въ ѡ҆ставле́нїе грѣхѡ́въ и҆ въ жи́ꙁнь вѣ́чнꙋю. А҆ми́нь.

И҆ по ᲃт҃о́мъ Причаще́нїи гл҃етъ Моли́твы сі́ѧ.

Моли́тва, Ст҃гѡ Кѵрі́лла А҆леѯандрі́йскагѡ благода́рнаѧ ѿ лица̀ бо́лнагѡ.

Тѣ́ло твоѐ ᲃт҃о́е Гд҃и І҆и҃се Хє҃ Бо́же мой, да бꙋ́детъ ми въ живо́тъ, и҆ ѡ҆сщ҃е́нїе, и҆ Кро́вь твоѧ̀ чⷭ҇тнаѧ въ ѡ҆ставле́нїе грѣ́хѡвъ, и҆ въ жи́ꙁнъ вѣ́чнꙋю, и҆ на стра́шномъ твое́мъ ᲃꙋ́дѣ поста́ви мѧ̀ ѡ҆де́снꙋю тебѣ̀, бꙋ́ди же ми благодаре́нїе сі́е, въ ра́достъ и҆ весе́лїе, и҆ въ и҆сцѣле́нїе дш҃ѝ и҆ тѣ́лꙋ мое́мꙋ: ꙗ҆́кѡ блⷭ҇ве́нъ є҆сѝ въ вѣ́ки. А҆ми́нь.

Моли́тва, І҆ѡа́нна Златоꙋ́стагѡ благода́рнаа.

Влады́кѡ Хє҃ Бж҃е, Царю̀ вѣ́кѡвъ, и҆ содѣ́телю всѣ́хъ, благодарꙋ̀ тѧ̀ ѡ҆ всѣ́хъ и҆́хже ми є҆сѝ дарова́лъ благи́хъ, и҆ ѡ҆ причаще́нїи Прчⷭ҇тыхъ и҆ животворѧ́щихъ твои́хъ Та́инъ, и҆ молю̀ тѧ̀ благі́й человѣкѡлю́бче, сохранѝ мѧ̀ подъ кро́вомъ твои́мъ, и҆ въ сѣ́ни кры́лꙋ твое́ю: и҆ дарꙋ́й ми чⷭ҇тою со́вестїю, да́же до послѣ́днѧгѡ и҆ꙁдыха́нїѧ, досто́йнѡ причаща́тисѧ ᲃщ҃е́нїй твои́хъ, въ ѡ҆ставле́нїе грѣхѡ́въ, и҆ въ жи́ꙁнь вѣ́чнꙋю.

Ты̀ бо є҆сѝ хлѣ́бъ живо́тный, исто́чникъ ᲃт҃ы́ни, и҆ пода́тель благи́хъ: и҆ тебѣ̀ ᲃла́вꙋ въꙁсыла́емъ, съ беꙁнача́лнымъ ти Ѿце́мъ, и҆ съ прⷭ҇ты́мъ и҆ благи́мъ и҆ животворѧ́щимъ ти Дх҃омъ, нн҃ѣ и҆ при́снѡ, и҆ въ вѣ́ки вѣко́въ. А҆ми́нь.

Моли́тва, къ Прⷭ҇тѣ́й Бц҃и благодарнаѧ по Причаще́нїи.

Ꙍ҆ Преблⷭ҇веннаѧ Гпⷭ҇же Бц҃е, ᲂу҆молѝ Сн҃а твое́гѡ и҆ Бг҃а на́шегѡ, и҆ꙁбави́тимисѧ ѿ всѧ́кагѡ зла̀, тобо́ю бо Сн҃а Бж҃їѧ поꙁна́хъ, и҆ сподоби́хсѧ прича́стникомъ бы́ти чⷭ҇тнагѡ Тѣ́ла и҆ Прⷭ҇тыѧ Крвѐ є҆гѡ̀, наде́ждꙋ и҆мѣ́ѧ дойтѝ твои́ми Моли́тва́ми жи́ꙁни вѣ́чныѧ, и҆ сла́вити Ѿца̀ и҆ Сн҃а, и҆ Ст҃а́гѡ Дх҃а, въ беꙁконе́чныѧ вѣ́ки вѣкѡ́въ, А҆мн́нь.

Та́же, Сла́ва: И҆ нн҃ѣ: И҆ ѿпꙋ́стъ.

Та́йна Ст҃а́гѡ Покаѧ́нїѧ, въꙁвраще́нїѧ ра́ди къ Бж҃їей благода́ти по Кр҃ше́нїи ᲃт҃о́мъ въ грѣсе́хъ па́дшихсѧ, человѣ́кѡвъ, ѿ Ха҃ Бг҃а ᲂу҆ста́влена є҆́стъ: тѣ́мъ же є҆ли́кѡ ча́стѣе ᲂу҆потреблѧ́етсѧ, и҆ по є҆ли́кꙋ бо́лшїѧ ве́щи прислꙋша́ютъ къ право́мꙋ и҆ досто́йномꙋ є҆ѧ̀ дѣйствова́нїю и҆ прїѧ́тїю, по толи́кꙋ ѡ҆па́снѣе строе́на бы́ти и҆ма́тъ.

Къ съставле́нїю же Та́йны ᲃіѧ̀, трѝ ве́щи прислꙋша́ютъ, сі́естъ. Мате́рїѧ, и҆лѝ Ве́щъ: Фо́рма, сі́естъ, ѡ҆́браꙁъ, и҆лѝ съверше́нїе: и҆ слꙋжи́тель. Ѿда́лнѧѧ ᲂу҆́бѡ Мате́рїѧ, и҆лѝ ве́щъ, сꙋ́тъ грѣхѝ: прибли́жнѧѧ же, ᲃъкрꙋше́нїе ᲃерде́чное, И҆сповѣдь, и҆ довлетворе́нїе ка́ющагосѧ. Фо́рма, и҆лѝ ᲃъверше́нїю, ᲃꙋ́тъ раꙁдрѣша́телнаѧ словеса̀, сі́естъ: А҆́ꙁъ проща́ю и҆ раꙁдрѣша́ю тѧ̀ И҆́мⷬ҇къ: ѿ всѣ́хъ грѣхѡ́въ твои́хъ, въ и҆мѧ̀ Ѿца̀, и҆ Сн҃а, и҆ ᲃт҃агѡ Дх҃а. А҆ми́нь.

Слꙋжи́тель же, є҆́стъ, ᲃщ҃е́нникъ, и҆мы́й вла́сть раꙁдрѣше́нїѧ, и҆лѝ себѣ̀ нале́жнꙋю, ꙗ҆́коже є҆́стъ Парохїѧ́лней, во свое́й Парохїи, и҆лѝ врꙋче́ннꙋю ѿ Е҆пⷭ҇кпа въ все́й є҆гѡ̀ Е҆па́рхїю, и҆лѝ ѿ Парохїѧ́лнагѡ ᲃщ҃е́нника въ свое́й є҆гѡ̀ то́чїю Паро́хїи. Нꙋ́ждѣ же ᲃме́ртной належа́щой, и҆ несꙋ́щꙋ тꙋ̀ прислꙋша́ющагѡ и҆сповѣ́дника, кі́йждѡ ᲃщ҃е́нникъ ѿ всѣ́хъ грѣхѡ́въ, и҆ всѧ́кїѧ Церко́вныѧ ка́ꙁни, сі́естъ, ѿ клѧ́твы, запрѣще́нїѧ, и҆ ѿлꙋче́нїѧ, и҆ про́чїихъ, раꙁдрѣши́ти мо́жетъ. Слꙋжи́телю же ᲃт҃ы́ѧ та́йны сеѧ̀, подоба́етъ бы́ти бла́гꙋ, сі́естъ добродѣ́телнꙋ накаꙁа́нꙋ, сі́естъ, наꙋче́нꙋ, мꙋ́дрꙋ же, и҆ раꙁсꙋ́днꙋ, и҆ є҆́же и҆мѣ́тъ молча́нїю, сі́естъ: нико́лиже нико́мꙋже на и҆́сповѣди слы́шаннаѧ ѿкры́ти. Сїѧ̀ ᲂу҆́бѡ, и҆ и҆́наѧ къ семꙋ̀ прислꙋша́ющаѧ Исповѣ́дници, сі́естъ дх҃о́вници, є҆́же наꙋчи́тисѧ и҆ добрѣ навы́кнꙋти, то́щное тща́нїе твори́ти до́лжни ᲃꙋ́тъ.

Во пе́рвыхъ же да вѣ́сть и҆ памѧтствꙋ́етъ І҆ере́ѷ, ꙗ҆́кѡ ѻ҆́нъ ᲃꙋдїѝ, кꙋ́пнѡ же и҆ вра́ча ѻ҆́браꙁъ на себѣ̀ но́ситъ; Бж҃їѧ же пра́вды, кꙋ́пнѡ же и҆ млⷭ҇рдїѧ ᲃтрои́тель є҆́стъ, ѿ Бг҃а ᲂу҆ста́вленый, въ є҆́же ꙗ҆́кѡ ходота́й посре́дѣ Бг҃а и҆ человѣ́ка, ѡ҆ Бж҃їей чⷭ҇ти, и҆ дш҃ѣ́вномъ ᲃпⷭ҇нїи съвѣтова́ти, и҆ посредствова́ти.

Да ᲂу҆́бѡ пра́во сꙋди́ти. и҆ раꙁсꙋжда́ти ра́ꙁнствїе ме́ждꙋ прокаже́нїемъ и҆ прокаде́нїемъ, и҆ ꙗ҆́коже хи́трый вра́чъ дш҃е́вныѧ не́дꙋги мꙋ́дрѣ цѣли́ти, и҆ комꙋ́ждѡ прили́чнаѧ врачева́нїѧ подава́ти ᲂу҆мѣ́ти въꙁмо́жетъ: по є҆ли́кѡ є҆мꙋ̀ мо́щнѡ є҆́стъ, бо́лше къ семꙋ̀ накаꙁа́нїе вѣ́ждетво же, и҆ мꙋ́дростъ притѧжа́ти, потоли́кꙋ да тщи́тсѧ, ѡ҆́вѡ приле́жнымъ и҆ всегда́шними къ Бг҃ꙋ Моли́твами, ѡ҆́воже ѿ достовѣ́рныхъ ᲂу҆чи́телїй писа́нїѧ, и҆ꙁрѧ́днѣеже ѿ ᲂу҆че́нїѧ Це́ркве ᲃт́ои Восто́чнои, сі́естъ, ѿ Пра́вилъ собо́ровыхъ, и҆ Номокано́нѡвъ, и҆ Богонѡ́сныхъ ѿц҃ъ Пра́вилъ же и҆ ᲂу҆че́нїй, и҆ мꙋ́дрыхъ и҆ накаꙁа́нныхъ дꙋхо́вныхъ сꙋде́й въпрошенїй и҆ совѣтова́нїй.

Да навы́кнетъ же и҆ ᲂу҆мѣ́етъ, паде́жи со́вѣсти, и҆ запрѣще́нїѧ А҆рхїере́ѵꙵскїѧ ка́ѧ сꙋ́тъ: и҆ всѧ̀ прислꙋша́ющаѧ къ раꙁсꙋжде́нїю и҆ раꙁдрѣше́нїю и҆́хъ, къ семꙋ̀ же, свое́гѡ Е҆пⷭ҇па и҆ є҆гѡ̀ Це́ркве ᲂу҆ста́вы, и҆ сі́ѧ ѡ҆па́снѡ да соблюда́етъ.

Во коне́цъ же, всѐ накаꙁа́нїе Та́йнѣ се́й приглꙋша́ющее, да и҆ꙁвы́кнетъ, и҆ и҆́наѧ къ право́мꙋ є҆ѧ̀ строе́нїю.

Въ ᲃлꙋже́нїи же ᲃт҃ы́ѧ Та́йны сеѧ̀, дꙋхо́вникъ си́це до́лженъ є҆́стъ всѧ́кѡ ᲂу҆правлѧ́ти сеѧ̀ въ все́мъ, ꙗ҆́кѡ же ни́жей ᲂу҆ставоположи́сѧ.

Сщ҃е́нникъ Парохїѧ́лный до́лженъ є҆́стъ всѧ́кимъ ᲂу҆си́лїемъ тща́нїе твори́ти, да всѝ Парохїѧ́не є҆гѡ̀ Та́йною ᲃт҃гѡ Покаѧ́нїѧ ча́стѡ ѡ҆чи́стѧтъ со́вѣстъ свою̀, а҆ понѐ въ четы́ри ᲃт҃ы́ѧ По́сты чре́ꙁъ го́дище, и҆сповѣда́юще грѣхѝ своѧ̀: и҆бѡ̀ а҆́ще неради́ти ѡ҆ се́мъ бꙋ́детъ, и҆ лю́ди Бж҃їѧ въ грѣха́хъ ѡ҆бетшава́ти, и҆ въ дш҃е́вныхъ ра́нахъ растлѣва́тисѧ ѡ҆ста́витъ: не то́чїю тѧ́жкѡ ᲃме́ртнѡ са́мъ согрѣши́тъ, но и҆ гнѣ́въ Бжїй: и҆ на себѣ̀ и҆ на ни́хъ наведе́т, но ᲂу҆́бѡ да си́цевыѧ тѧ́жкїѧ бѣды̀ и҆ꙁбѣ́гнетъ, ча́стѡ да нака́ꙁꙋетъ людиѝ въ Це́ркви, и҆ꙁрѧ́днѣе же въ ᲃт҃а́ѧ четы́ри го́дищныѧ По́сты, ꙗ҆́кѡ да всѝ смири́вшесѧ пре́дъ Бо́гомъ, ѡ҆чи́стѧтъ и҆сповѣда́нїемъ ᲃт҃ы́мъ грѣхѝ своѧ̀, и҆ не то́чїю до́мꙋ Влады́ка и҆ Жена̀ є҆гѡ̀, но и҆ ча́да, и҆ всѧ̀ чѐлѧдъ до́мꙋ є҆гѡ̀, є҆ди́нъ по є҆дино́мꙋ да и҆сповѣдѧ́тсѧ.

Къ семꙋ̀ ᲂу҆чи́ти и҆хъ до́лженъ є҆́стъ, ꙗ҆́кѡ да кі́йждѡ и҆́хъ пре́дъ ᲃт҃ы́мъ исповѣда́нїемъ до́брѣ со́вѣсть свою̀ и҆стѧ́юꙁꙋетъ и҆ и҆счита́етъ, и҆ всѧ̀ грѣхѝ своѧ̀ воспомѧне́тъ, и҆ съ всѧ́кимъ смире́нїемъ и҆ съкрꙋше́нїемъ ᲃе́рдца болѣꙁнꙋ́ѧ и҆ жалѣ́ѧ си ѡ҆ грѣсе́хъ свои́хъ, да пристꙋ́питъ, и҆ про́стѡ ꙗ҆́коже сі́ѧ са́мъ содѣѧ̀, не воспомина́ѧ чю́ждыѧ грѣхѝ то́кмѡ своѧ̀, ни́же и҆мена̀ ли́цъ: предложе́нїе же и҆мѣ́ѧ є҆́же ктомꙋ̀ невоꙁврати́тисѧ къ грѣхѡ́мъ, и҆ тве́рдꙋю наде́ждꙋ и҆ вѣ́рꙋ, ꙗ҆́кѡ раꙁдрѣше́нїемъ І҆ре́ѷскимъ проще́нїе ѿ Бг҃а всѣ́хъ грѣхѡ́въ свои́хъ прїйметъ.

Сщ҃е́нникъ Парохїѧ́лный къ є҆́же и҆сповѣда́ти когѡ̀ зва́нъ сы́й, ско́рымъ и҆ нелѣни́вымъ, па́че же ᲂу҆се́рднымъ да предста́витъ себѣ̀, и҆ пре́жде да́же къ слꙋха́нїю и҆сповѣда́нїѧ пристꙋ́питъ, (а҆́ще вре́мѧ толи́кое и҆мѣ́ти мо́жетъ,) да вни́детъ въ клѣ́ть свою̀ и҆ те́плыми мл҃е́нъми по́мощъ Бж҃їю да приꙁоветъ, въ є҆́же досто́йнѡ, пра́вѣ же и҆ ᲃт҃ѡ, въ по́лꙁꙋ и҆ ᲃпⷭ҇нїе себѣ̀ и҆ ка́ющомꙋсѧ слꙋже́нїе сі́е соверши́ти воꙁмо́жетъ.

Сію̀ Моли́твꙋ съ всѧ́кимъ внима́ниемъ и҆ ᲂу҆миле́нїемъ, гл҃ѧ̀.

Моли́тва ѿ І҆ере́ѧ Та́йнѡ гл҃е́ма ѡ҆ себѣ̀ и҆ ѡ҆ ка́ющихъсѧ.

Благоꙋтро́бный и҆ ми́лостивый Бж҃е, и҆стѧꙁа́ѧй ᲃе́рдца и҆ ᲂу҆тро́бы, и҆ та́йнаѧ человѣ́ческаѧ є҆ди́нъ свѣды́й: ни́бѡ є҆́стъ ве́щъ неѧвле́нна пре́дъ ѡ҆чи́ма твои́ма. ᲃвѣ́дый ꙗ҆́же ѡ҆ мнѣ̀, да не ѡ҆мерꙁи́ши мѧ̀, ни́же лица̀ твое́гѡ ѿврати́ши ѿ менѐ: но преꙁрѝ моѧ̀ съгрѣше́нїѧ въ покаѧ́нїе: и҆ ѡ҆мы́й ми нечистотꙋ̀ тѣле́снꙋю, и҆ скве́рнꙋ дш҃е́внꙋю, и҆ всегѡ̀ мѧ̀ ѡ҆ст҃ѝ всесоверше́нною си́лою твое́ю невиди́мою, и҆ десни́цею дх҃вною, да не свобо́дꙋ и҆́нѣмъ воꙁвѣща́ѧ и҆ ᲃі́ю подава́ѧ, вѣ́рою и҆сповѣди́мою твое́гѡ неиꙁрече́ннагѡ человѣкѡлю́бїѧ, са́мъ же ꙗ҆́кѡ рабъ грѣха̀, не искꙋ́сенъ бꙋ́дꙋ.

Ни Влады́кѡ, є҆ди́не бла́гїй и҆ человѣ́колюби́вый, да не воꙁвращꙋ́сѧ смѣре́нъ и҆ посрамле́нъ ѿ тебѣ̀: но послѝ ми ᲃи́лꙋ съ высоты̀ ᲃт҃ы́ѧ сла́вы твое́ѧ, и҆ сло́во прѣмꙋ́дрости и҆ ᲂу҆́мъ раꙁꙋ́менъ: дарꙋ́й ми благода́тъ раꙁсꙋжденїѧ дх҃ѡвъ, и҆ ᲂу҆крѣпѝ мѧ̀ къ слꙋ́жбѣ предлежа́щеѧ пресла́вныѧ вели́кїѧ и҆ нбⷭ҇ныѧ сеѧ̀ та́йны, и҆ въ ѡ҆браꙁѝ Ха҃ твое́гѡ въ ᲂу҆десе́хъ мои́хъ. хотѧ́щихъ же рабѡ́въ твои́хъ, породи́тисѧ мно́ю недосто́йнымъ и҆ ѡ҆каѧ́ннымъ рабо́мъ твои́мъ покаѧ́нїемъ ᲃт҃ы́мъ, и҆ и҆сповѣда́нїемъ грѣхѡ́въ свои́хъ, не ѿринѝ ѿ твое́гѡ лица̀.

Но сподобѝ и҆́хъ ѡбрѣстѝ благода́ть ᲂу҆ тебѣ̀, и҆ млⷭ҇ть привлещѝ твое́гѡ человѣкѡлю́бїѧ. покры́й и҆́хъ благода́тїю твое́ю, и҆ ᲂукрѣпѝ и҆́хъ въ предложе́нїи се́мъ, да́ждъ и҆́мъ сокрꙋше́нїе ᲃерде́чное, и҆ дш҃е́вное ᲂу҆миле́нїе, и҆ воспомина́нїе всѣ́хъ грѣхѡ́въ, и҆спра́ви и҆́хъ со́вѣстъ: да во смире́нїи глꙋбо́цѣ, вѣ́рою, и҆ наде́ждою проще́нїѧ, тебѣ̀ пре́дъ мои́мъ недосто́инствомъ и҆́стиннѡ и҆сповѣдѧ́тъ всѧ̀ согрѣше́нїѧ, и҆ ѡ҆бли́чатъ беꙁꙁакѡ́нїѧ своѧ̀, ꙗ҆́коже посрамле́нїю досто́йнаѧ: ѿверꙁѝ слꙋ́ха и҆́хъ, въ є҆́же благопрїѧтнѡ сты́шати, и҆ внима́тельнѡ прїѧ́ти, ꙗ҆́же хощꙋ̀ и҆́мъ гл҃а́ти: и҆ ѡ҆ставле́нїѧ всѣ́хъ грѣхѡ́въ ѿ твое́ѧ благода́ти мои́мъ недосто́инствомъ сподобѝ соверше́ннѡ прїѧ́ти. но ниꙁложѝ и҆́хъ, но насадѝ ᲃажде́нїе и҆́стинны, въ ᲃт҃о́й ᲃобѡ́рной А҆́пⷭ҇лской твое́й Це́ркви, въ є҆́же плодоноси́ти и҆́мъ пло́дъ пра́вды и҆ ᲃт҃ы́нѣ, во всѧ́комъ благоче́стїи и҆ чⷭ҇тности: въкоренѝ въ ᲃе́рдце и҆хъ ᲃтра́хъ тво́й, и҆ тѣ́мъ ᲂу҆крѣпѝ и҆́хъ, є҆́же ктомꙋ̀ не работа́ти и҆мъ грехꙋ̀: но тебѣ̀ на́шемꙋ Влады́цѣ и҆ благода́телю, и҆ преспѣва́ти въ заповѣде́хъ твои́хъ всегда̀, и҆ во всѣ́хъ добродѣ́телехъ: и҆ въ покаѧ́нїи и҆ чⷭ҇той со́вѣсти ᲃла́вити тебѣ̀ беꙁнача́лнагѡ Ѿца̀ съ є҆диноро́днымъ ти ᲃн҃омъ, и҆ съ Прⷭ҇ты́мъ и҆ благи́мъ и҆ животворѧ́щимъ ти дх҃омъ, нн҃ѣ́ и҆ при́снѡ и҆ въ вѣ́ки вѣкѡ́въ. А҆ми́нь.

В це́ркви же а҆ нѐ на ѡ҆со́бномъ коі́мъ мѣ́стѣ и҆сповѣда́нїѧ ѡ҆ба́че да тщи́тсѧ на подо́бномъ и҆ видо́чномъ мѣ́стѣ соверши́ти.

Въ це́рковъ же вше́дъ І҆ере́ѷ, да поста́витъ ᲃтоле́ц пре́дъ ца́рскими две́рми чтⷭ҇нѡ покрове́нный, и҆ на не́мъ Бжⷭ҇тве́нное Е҆ѵⷢ҇лїе и҆ Кре́стъ: себе́же ра́ди ѿ де́сныѧ стра́ны ѡ҆со́бное сѣда́лище да и҆́матъ, є҆́же по сконча́нїи пре́дъ исповѣда́телныхъ моли́твъ сѣ́сти на не́мъ, и҆ ꙗ҆́кѡ ᲃꙋдїѧ̀ бж҃їй, послꙋша́ти и҆сповѣда́нїе, накаꙁати, Е҆пітимиса́ти же и҆ раꙁдрѣша́ти ка́ющагосѧ.

Къ соверше́нїю сеѧ̀ ᲃт҃ы́ѧ та́йны довлѣ́етъ І҆ере́еви Е҆пітра́хилъ то́чїю на себѣ̀ воꙁлага́ти: бо́лшіѧ же ра́ди є҆ѧ̀ че́сти а҆́ще и҆ꙁво́литъ, и҆ въ Фелꙍ́нъ ѡ҆блещисѧ мо́жетъ: Нꙋ́ждѣ же настоѧ́щей, и҆ си́хъ ѡ҆боихъ ᲃщ҃е́нныхъ ѡ҆де́ждъ кро́мѣ, ᲃі́ю та́йнꙋ соверши́ти мо́жетъ.

А҆́ще невѣ́жа є҆́стъ ка́ѧйсѧ, да нака́жетъ и҆ наꙋ́читъ є҆гѡ̀ І҆ере́ѷ є҆́же смире́ннымъ и҆ ᲃе́рдцемъ и҆ ѡ҆браꙁомъ, и҆ съ стра́хомъ Бж҃їимъ, ꙗ҆́коже досто́итъ грѣ́шникꙋ къ Бг҃ꙋ пристꙋпи́ти, и҆ є҆́же три́жды знамена́тисѧ Кре́стнымъ зна́менїемъ, до землѣ̀ поклоне́нїе творѧ̀, и҆ пе́рси ꙗ҆́кѡ Мыта́ръ бїѧ̀.

Ка́ющагосѧ І҆ере́ѷ, (а҆́ще не вѣ́сть) да вопроша́етъ, кто̀, и҆ кое́гѡ чи́на, ᲃа́на же, и҆лѝ досто́инства є҆́стъ: дре́вле ли и҆сповѣда́лсѧ є҆́стъ: А҆́ще Е҆пїтимїю нало́женꙋю є҆мꙋ̀ ѿ дх҃о́вника и҆сполни́лъ є҆́стъ: а҆́ще по ᲂу҆ста́вꙋ Церко́вномꙋ чи́ннѡ и҆ соверше́ннѡ исповѣда́лсѧ є҆́стъ: а҆́ще ᲃовѣ́сть свою̀ подолгꙋ̀ пе́рвѣе до́брѣ и҆спыта́лъ и҆ исчита́лъ є҆́стъ.

А҆́ще не є҆́стъ свѧ́ꙁаный клѧ́твою, ѿлꙋче́нїемъ же, и҆лѝ запрѣще́нїемъ кои́мъ А҆рхїере́ѷскимъ: А҆́ще же въ кое́мъ ѿ си́хъ трїе́хъ свѧꙁа́нъ обрѧ́щетсѧ бы́ти, ника́коже да дерꙁне́тъ раꙁдрѣши́ти є҆гѡ̀, но да ѿшае́тъ є҆гѡ̀, къ свѧꙁа́вшомꙋ є҆гѡ̀ А҆рхїере́ю, и҆лѝ ᲃа́мъ ѿ негѡ̀ пре́жде да тщи́тсѧ къ си́цевомꙋ раꙁдрѣше́нїю притѧжа́ти вла́сть: и҆ ᲃі́ю притѧжа́въ, да раꙁдрѣши́тъ є҆гѡ̀.

А҆́ще І҆ере́іѷ по пра́вѣ лица̀ поꙁна́етъ ꙗ҆́кѡ ка́ѧйсѧ не ᲂу҆мѣ́етъ нача́тки христїѧ́нскїѧ вѣ́ры, сі́естъ: Вѣ́рꙋю въ є҆ди́нагѡ Бг҃а: Ѿче на́шъ: Бц҃е Дв҃о: Десѧтосло́вїе Прикаꙁа́нїй Бж҃їихъ, и҆спросивъ да наꙋ́читъ є҆гѡ̀ въкра́тцѣ, (а҆́ще вре́мѧ на сі́е и҆́матъ) ѡ҆ чле́нахъ вѣ́ры, и҆ ѡ҆ и҆́ныхъ къ ᲃпⷭ҇нїю нꙋ́ждныхъ, и҆ невѣ́жество є҆гѡ̀ по є҆ли́кꙋ мо́жетъ да и҆спра́витъ: и҆ да повели́тъ є҆мꙋ̀ ꙗ҆́кѡ да всѧ́кѡ въско́рѣ сі́ѧ до́брѣ наꙋ́читсѧ: и҆лѝ вмѣ́стѡ Е҆піти́мїи да нало́житъ є҆мꙋ̀, є҆́же и҆ꙁъ ᲂу҆чи́ти ѧ҆̀.

Посе́мъ ка́ѧйсѧ И҆сповѣда́нїе ѡ҆бы́чное славе́нскимъ, и҆лѝ сво́йстве́ннымъ ꙗ҆ꙁы́комъ да гл҃етъ, сі́естъ: И҆сповѣда́юсѧ Гд҃ꙋ Бг҃ꙋ: и҆ проч.: всѐ до конца̀, ꙗ҆́коже ни́жей на свое́мъ мѣ́стѣ поло́жено є҆́стъ, и҆ а҆́бїе грѣхѝ своѧ̀ всѧ̀ порѧ́дꙋ да и҆сповѣда́етъ, помага́ющꙋ ємꙋ̀ сщ҃е́нникꙋ поели́кꙋ потре́ба ᲂу҆ка́жетъ. да не ѡ҆блича́етъ же І҆ере́ѷ ка́ющагосѧ пре́жде и҆сповѣда́нїѧ всѣ́хъ грѣхѡ́въ, и҆ ни вчесо́мъ да препина́етъ є҆мꙋ̀, ра́ꙁвѣ а҆́ще лꙋ́чшагѡ ра́ди ᲂу҆раꙁꙋмѣ́нїѧ восхо́щетъ нѣ́что въпраша́ти: къ семꙋ̀ къ благонаде́ждїю да воꙁбꙋжда́етъ ка́ющагосѧ, и҆ любо́внѣ накаꙁꙋ́етъ, ꙗ҆́кѡ да всѧ̀ грѣхѝ своѧ̀ чи́ннѡ и҆ соверше́ннѡ и҆сповѣстъ ѿложи́въ дш҃егꙋ́бное бꙋ́ее ѡ҆́ное стыдѣ́нїе, є҆ю́же нѣ́цїи дїѧ́волскою хи́тростїю запѧ́ти, грѣхѝ своѧ̀ пре́дъ дꙋхо́вникомъ ᲂу҆таева́ютъ и҆ и҆сповѣда́ти не смѣ́ютъ.

А҆́ще ка́ѧйсѧ число̀, ви́дъ, и҆ ѡ҆коли́чности грѣхѡ́въ къ ᲂу҆раꙁꙋмѣ́нїю прили́чныѧ и҆ потре́бныѧ не и҆ꙁѡбраꙁи́тъ, І҆ере́ѷ мꙋ́дрѣ и҆ раꙁсꙋ́днѣ да вопроша́етъ є҆гѡ̀: но ᲂу҆́бѡ да блюде́тсѧ любопы́тнѣ и҆ непотре́бнѣ въпраша́ти, и҆ꙁрѧднѣе же Ю҆́ныхъ ѡ҆бое́го по́лꙋ, и҆ и҆́ныхъ: да не беꙁстꙋ́днѣ ѡ҆не́мъ же не вѣ́даютъ впраша́ѧ, соблаꙁни́тъ ихъ, и҆ нераꙁсꙋ́днымъ впроше́ниемъ согрѣша́ть наꙋ́читъ.

Послꙋша́въ ᲂу҆́бѡ І҆ере́ѷ внима́телнѣ всѐ и҆сповѣда́нїе грѣхѡ́въ ка́ющагосѧ, и҆ мꙋ́дрѣ вели́чествѡ и҆ множество̀ и҆́хъ раꙁсꙋди́въ, по тѧ́жести и҆́хъ, по са́нꙋ же, и҆ чи́нꙋ ка́ющагосѧ, благоꙋтро́бнѣ ѿче́скою любо́вїю поели́кꙋ нꙋ́жда и҆стѧꙁа́ти бꙋ́детъ, да ѡ҆бли́читъ и҆ нака́жетъ є҆гѡ̀, и҆ къ жалѣ́нїю си и҆ ᲂу҆миле́нїю, и҆ сокрꙋше́нїю ᲃерде́чномꙋ дѣ́телными словесы̀ сегѡ̀ привестѝ, и҆ къ и҆справле́нїю жи́тїѧ и҆ само́мꙋ ᲃебѣ̀ лꙋ́чшагѡ внима́нїѧ привлещѝ, и҆ цѣ́лбы на грѣхѡ́вныѧ ꙗ҆́ꙁвы прили́чныѧ є҆мꙋ̀ пода́ти да тщи́тсѧ: Вконе́цъ же дш҃еспаси́телнꙋю подоба́ющꙋю Е҆піти́мїю, поели́кꙋ дх҃ъ ᲃт҃ы́й: и҆ раꙁсꙋжде́нїе є҆гѡ̀ ᲂу҆сꙋ́дитъ да прило́житъ, въꙁглѧ́дъ ѡ҆ба́че и҆мый на досто́инство, ᲃа́нъ, чинъ, пло́ть же и҆ лѣ́та, и҆ на ᲂу҆строе́нїе ка́ющагосѧ.

Да блюде́тъ же І҆ере́іѷ ѡ҆па́снѡ є҆́же тѧ́жкихъ ра́ди грѣхѡ́въ не налага́ти ле́гкꙋю Е҆піти́мїю, да нѐ ниꙁхожде́нїѧ ра́ди грѣхѡ́въ, чꙋ́ждимъ грѣхѡ́мъ прича́стникъ бꙋ́детъ: а҆́ще же сегѡ̀ ᲂу҆бѣжа́ти хо́щет, сі́е всѧ́кѡ да внима́етъ и҆ блюде́тъ, ꙗ҆́кѡ да налага́емаѧ Епіти́мїѧ, не точїю вра́чевство бꙋ́детъ къ обновле́нїю и҆ исправленїю жи́тїѧ, и҆ не́дꙋга грѣхо́внагѡ и҆сцѣле́нїе: но и҆ за бы́вшїѧ грѣхѝ ка́ꙁнь.

Да тщи́тжесѧ ᲂу҆́бо І҆ере́ѷ, поели́кꙋ воꙁмо́жнѡ є҆́же сопроти́вныѧ грѣхѡ́мъ Е҆піти́мїѧ подаѧ́ти, сі́естъ: ꙗ҆́коже лакѡ́мымъ и҆скꙋпы́мъ, млⷭ҇тню: блꙋ́дникѡмъ по́стъ и҆ воꙁдержа́нїе, и҆ и҆́ныѧ тѣ́ла ᲂу҆мерщвле́нїѧ, и҆ ᲂу҆трꙋжде́нїѧ го́рдымъ же, къ смире́нїю прислꙋша́ющаѧ ѡ҆бꙋче́нїѧ, си́мъ же ѡ҆́браꙁомъ и҆ и҆́нымъ про́чїимъ, коемꙋ́ждѡ проти́вѡ согрѣше́нїю є҆гѡ̀.

Неча́сто же и҆сповѣда́ющимсѧ, и҆ ᲂу҆добъ въ грѣ́хъ въпада́ющимъ, да совѣтꙋ́етъ є҆́же ча́стѡ, сі́естъ: є҆дино́ю въ кі́йждѡ Мцⷭ҇е, и҆лѝ въ нѣ́кїѧ пра́ꙁдникъ вели́кїѧ и҆сповѣда́тисѧ, и҆ а҆́ще досто́инъ бꙋ́дет̀ и҆ причасти́тисѧ.

Е҆піти́мїѧ пѣ́нѧжныѧ себѣ̀ дх҃о́вници да не присвоѧ́ютъ, и҆ ѿ ка́ющихсѧ ничто́же ꙗ҆́коже за воꙁдаѧ́нїе слꙋже́нїѧ свое́го, ника́коже да вꙁы́щꙋтъ, ни́же вꙁе́млютъ.

Та́йныхъ и҆ съкрове́нныхъ ра́ди грѣ́ховъ, а҆́ще и҆ тѧжча́йшїѧ бꙋ́дꙋтъ ꙗ҆́внꙋю Е҆піти́мїю І҆ере́ї ника́коже налага́ти да дерꙁне́тъ.

Ꙍ҆па́снѡ да блюде́тъ на и҆́ное вре́мѧ ѿлага́ти раꙁдрѣше́нїе. Да не раꙁдрѣша́етъ ᲂу҆́бѡ несꙋ́щыхъ досто́йныхъ приѧ́тїа си́цевагѡ Бжїѧгѡ благодѣѧ́нїѧ: ꙗ҆́кові́ю сꙋ́тъ, и҆́же ни є҆ди́но зна́менїе жалѣ́нїѧ ѡ҆ грѣсѣ́хъ свои́хъ пока́ꙁютъ, и҆ и҆́же нена́висти и҆ враждова́нїѧ ѿлага́ти, и҆ чꙋ́ждыѧ ве́щи, и҆лѝ восхище́нныѧ (си́лнѣ сꙋ́ще воꙁда́ти,) воꙁврати́ти и҆ ѿда́ти нехотѧ́тъ: и҆лѝ вины̀ къ грехѡ́мъ бли́жнемꙋ подава́ти преста́ти нехотѧ́щїи, и҆лѝ и҆́же и҆ноѡ́браꙁнаѧ согрѣше́нїѧ своѧ̀ ѡ҆ста́вити, и҆ жи́тїе своѐ ѕло́е въ лꙋ́чшее премѣни́ти не и҆ꙁволѧ́ютъ: и҆ и҆́же на роднꙋ́ю соблаꙁнꙋ содѣѧ́ша, до́ндеже ꙗ҆́вѣ не пока́ютсѧ, и҆ довлесотво́рѧтъ, и҆ со́блаꙁнꙋ бы́вшꙋю и҆спраꙁнѧ́тъ: та́кожде въ клѧ́твѣ и҆ ѿлꙋче́нїи ѿ Е҆пⷭ҇копа ᲃꙋ́щїи, и҆лѝ в̀ грѣха́хъ Е҆пⷭ҇кпови къ раꙁдрѣше́нїю соблюде́нныхъ, си́цевїи да не раꙁдрѣше́ни бꙋ́дꙋтъ.

А҆́ще же и҆сповѣда́етсѧ ктѡ̀ въ бѣдѣ̀ ᲃме́ртной сы́й, да бꙋ́детъ раꙁдрѣше́нъ ѿ всѣ́хъ грѣхѡ́въ, и҆ ѿ клѧ́твы и҆ ѿлꙋче́нїй, и҆ ѿ Е҆пⷭ҇кпови соблюде́нныхъ грѣхѡ́въ. (въ си́цевое бо вре́мѧ всѧ́кое ѿложе́нїе и҆ соблюде́нїе ᲂу҆стꙋпꙋ́етъ) но ᲂу҆́бѡ во пе́рвыхъ а҆́ще комꙋ̀ чи́мъ до́лженъ є҆́стъ, (а҆́ще си́ленъ є҆́стъ воꙁда́ти) да до́вле сотво́ритъ.

А҆́ще же въ бо́лѣꙁни ѡ҆́ной си́цевый не ᲂу҆мре́тъ, да повели́тъ є҆мꙋ̀ І҆ере́ѷ то́щное тща́нїе ᲃотвори́ти, є҆́же воско́рѣ предста́ти Е҆пⷭ҇кпови ѿ не́го же проклѧ́тъ и҆лѝ ѿлꙋче́нъ є҆́стъ, и҆лѝ въ грѣха́хъ є҆мꙋ̀ но раꙁдрѣще́нїю соблюде́нныхъ ѡ҆брѣта́етсѧ, въ долꙁѣ̀ и҆ ѡ҆бвине́нїи да и҆спра́витсѧ, и҆ довлесотво́ритъ, и҆ ѿ не́гѡ проще́нїѧ да сподоби́тсѧ.

А҆́ще бо́лнагѡ гла́съ и҆ гл҃нїе въ само́мъ и҆сповѣда́нїи, и҆лѝ пре́дъ зача́тїемъ И҆сповѣда́нїѧ преста́нетъ, помава́нїемъ и҆лѝ и҆́ними кои́ми зна́менїи, по є҆ли́кꙋ воꙁмо́жетъ І҆ере́ѷ грѣхѝ ка́юшагосѧ да тщи́тсѧ поꙁна́ти: ꙗ҆́же и҆лѝ поеди́номꙋ кого́ждѡ, и҆лѝ ро́днѣ поꙁна́въ, и҆лѝ а҆́ще пре́жде преста́тїѧ глаго́ла да раꙁдрѣше́нъ бꙋ́детъ.

Да вѣ́сть же и҆ ᲃі́е І҆ере́ѷ, ꙗ҆́кѡ бо́лнымъ вели́кой и҆ тѧ́жкои Е҆піти́мїи налага́ти не подоба́етъ: но то́чїю заповѣ́стниімъ и҆ повелѣ́ти, да є҆гда̀ здра́ви бꙋ́дꙋтъ во своѐ вре́мѧ испо́лнѧтъ.

А҆ доне́лѣже болъꙁнꙋ́ютъ, по тѧ́жести недꙋ́га, кра́ткꙋю моли́твꙋ, и҆лѝ ле́гкое нѣ́кое довлетворе́нїе да нало́житъ, є҆́же а҆́ще прїѧ́тѡ ѿ ни́хъ бꙋ́детъ да раꙁдрѣша́тсѧ.

Зрѝ ѽ І҆ере́ю, и҆ ѡ҆па́снѡ сі́е сохранѝ.

А҆́ще є҆диною мнѡ́го приклю́читсѧ бы́ти ка́ющихсѧ, да ника́коже всѣ́хъ въкꙋ́пѣ и҆сповѣда́ти дерꙁне́ши, нѣ́стъ бо се́й ᲃт҃ы́ѧ Каѳоли́ческїѧ Це́ркви ѡ҆бы́чай, но чꙋ́ждый и҆ растлѣ́нный, па́чеже Е҆рети́ческїй: но ѡ҆блегче́нїѧ ра́ди свое́гѡ си трꙋ́да, всѣ́хъ внача́лѣ собра́въ въ Це́рквъ, поꙋче́нїе сотворѝ къ ни́мъ, є҆́же собо́лѣꙁнїю ᲃе́рдца въ глꙋбо́комъ ᲃмире́нїи и҆ съ вѣ́рою прїѧ́тїѧ ѡ҆ставле́нїѧ грѣхѡ́въ пристꙋпа́ти кѣ ᲃт҃о́мꙋ И҆сповѣда́нїю, и҆ є҆́же ничто́же ᲂу҆таева́ти, но соверше́ннѣ всѧ̀ согрѣше́нїѧ своѧ̀ кі́йждѡ да и҆сповѣ́сть: соверши́вже поꙋче́нїе а҆́бїе начина́й по ни́жей положе́нномꙋ чи́нꙋ, и҆ по рѧ́дꙋ проче́тъ Трⷭ҇тое: Ѿче на́шъ: поми́лꙋй мѧ̀ Бж҃е, и҆ Моли́твы пе́рвыѧ, повелѝ всѣ́мъ и҆ꙁы́йти и҆́ꙁъ це́ркви, и҆ пре́дъ це́рковїю благоговѣ́инѡ молѧ́шесѧ и҆ воспомина́юще согрѣше́нїѧ своѧ̀ ста́ти, и҆ та́кѡ по є҆ди́номꙋ приꙁовѝ є҆́же входи́ти въ Це́рковъ и҆ И҆сповѣда́ти грѣхѝ своѧ̀: Ты́же І҆ере́ю кого́ждѡ и҆хъ до́брѣ ѡ҆ все́мъ и҆ соверше́ннѣ и҆спыта́въ, и҆ ѡ҆со́бнѣ поꙋчи́въ накаꙁа́въ же, и҆ Е҆піти́мїю наложи́въ и҆ моли́твꙋ вто́рꙋю проче́тъ, соверше́ннѣ раꙁдрѣшѝ.

Въ коне́ц, поне́же І҆ере́е навсегда̀ и҆ не на кое́мждѡ мѣ́стѣ съ собо́й Кни́гꙋ ᲃі́ю и҆мѣ́ти и҆ носи́ти могꙋ́тъ, и҆ꙁ неѧ́же въ на́глой наше́дшой нꙋ́ждѣ ᲃме́ртной, и҆лѝ въ бра́ни, и҆лѝ и҆́нѣмъ кои́мъ ѻ҆́браꙁомъ приклю́чшейсѧ, ка́ющагосѧ и҆ грѣхѝ своѧ̀ И҆сповѣда́ющагѡ раꙁдрѣши́ти до́лженъ є҆́стъ, ᲃегѡ̀ ра́ди всѧ́кѡ всѝ до́лжни сꙋ́тъ подъ грѣхо́мъ ᲃме́ртнымъ, и҆ лю́тою ка́ꙁнїю беꙁъ всѧ́кагѡ и҆ꙁвѣ́та, на па́мѧть и҆ и҆ꙁꙋчи́ти и҆ ᲂу҆мѣ́ти Фо́рмꙋ, сі́естъ, ᲃоверше́нїе Та́йны ᲃеѧ̀: ꙗ҆́же є҆́стъ сі́ѧ.

Гд҃ь и҆ Бг҃ъ на́шъ І҆и҃ᲃ Хᲃ҃, благода́тїю и҆ щедрѡта́ми ᲃвое́гѡ человѣкѡлю́бїѧ, да прости́тъ ти ча́до, И҆мⷬ҇къ всѧ̀ согрѣше́нїѧ твоѧ̀: и҆ А҆́ꙁъ недосто́йный І҆ере́ѷ вла́стїю є҆гѡ̀ мнѣ̀ да́нною, проща́ю и҆ раꙁдрѣша́ю тѧ̀ И҆мⷬ҇къ ѿ всѣ́хъ гѣхо́въ твои́хъ въ и҆мѧ̀ Ѿца̀ 🕂 и҆ Сн҃а 🕂 и҆ Ст҃а́гѡ 🕂 Дх҃а. А҆ми́нь.

Хотѧ́й И҆сповѣда́тисѧ, и҆ и҆́стиннѡ ка́ѧтисѧ грѣхѡ́въ свои́хъ, предꙋготова́въ себѣ̀ до́брѣ, и҆ и҆ꙁщита́въ ѡ҆па́снѡ свою̀ ᲃо́вѣсть, и҆ въспомѧнꙋ́въ всѧ̀ согрѣше́нїѧ и҆ зла́ѧ дѣѧ́нїѧ своѧ̀, ꙗ҆́же сопроти́въ Бг҃а и҆ бли́жнѧгѡ свое́гѡ съдѣѧ̀: себе́же сама́гѡ ᲂу҆мили́въ и҆ ᲃе́рдце своѐ сокрꙋши́въ, жалѧѧ̀ си, и҆ ᲃерде́чнѣ болѣꙁнꙋ́ѧ, ꙗ҆́кѡ грѣха́ми и҆ злы́ми дѣ́лы свои́ми, ѝ престꙋпле́нїемъ ᲃт҃ы́хъ Бжⷭ҇тве́нныхъ за́повѣдїй, преблага́гѡ Бг҃а ᲃоꙁда́телѧ и҆ благодѣ́телѧ свое́гѡ прогнѣва̀, и҆ благода́ть є҆́гѡ̀ тѣ́ми ѿ себѣ̀ прогна̀, и҆ꙁвѣ́стнѡ предлага́етъ покаѧ́нїемъ преблага́гѡ Бг҃а, є҆го́же злы́ми ᲃвои́ми дѣ́лы прогнѣва̀ примири́ти. и҆ є҆́же по повелѣ́нїю є҆гѡ̀, И҆сповѣда́ти пре́дъ ᲂу҆ста́вленнымъ ѿ не́гѡ Сꙋди́ю І҆ере́емъ, вла́сть свѧꙁа́ти и҆ раꙁдрѣша́ти и҆мꙋ́щомꙋ всѧ̀ съгрѣше́нїѧ своѧ̀: наде́ждꙋ тве́рдꙋ, и҆ вѣ́рꙋ несꙋмѣ́ннꙋ и҆мѣ́ѧ, ꙗ҆́кѡ И҆сповѣда́нїемъ всѣ́хъ свои́хъ грѣхѡ́въ, раꙁдрѣше́нїемъ же І҆ере́ѷскимъ Бж҃їѧгѡ млⷭ҇рдїѧ, и҆ ѡ҆ставле́нїѧ грѣхѡ́въ вои́стиннꙋ сподоби́тсѧ, съ стра́хомъ и҆ тре́петомъ прихо́дитъ къ І҆ере́ю: и҆ пристꙋпи́въ къ немꙋ̀ (А҆́ще въ Це́ркви пре́дъ ᲃт҃ыми Ца́рскими вра́ты, пре́дъ ᲃт҃ы́мъ Е҆ѵⷢ҇лїемъ на нало́и поставле́нномъ: а҆́щеже на и҆́номъ ѡ҆со́бномъ мѣ́стѣ, пре́дъ И҆ко́ною та́мѡ сꙋ́щею) Лице́мъ къ Восто́кꙋ до́лꙋ зрѧ̀, да стои́тъ. І҆ере́ѷ же гл҃етъ къ не́мꙋ.

Поклони́сѧ Бг҃ꙋ грѣ́шныѧ на покаѧ́нїе приꙁыва́ющомꙋ, къ не́мꙋже прибѣ́глъ є҆сѝ.

Ка́ѧйжесѧ въ глꙋбо́комъ смире́нїи, и҆ сокрꙋше́нїи ᲃе́рдца покланѧ́етсѧ, Триⷤ, до землѝ, и҆ ꙗ҆́кѡ Мы́таръ бїѧ̀ пе́рси своѧ̀ съ слеꙁа́ми въ бо́лѣꙁни ᲃе́рдца, гл҃етъ:

Бж҃е, ми́лостивъ бꙋ́ди мнѣ̀ грѣш.:

И҆ ста́въ съ всѧ́кимъ благоговѣ́нїемъ и҆ стра́хѡмъ Бж҃їимъ до́лꙋ ѻ҆́цѣ а҆́ки ѡ҆сꙋжде́нникъ прекло́нь, и҆ ника́коже къ высотѣ̀, ни́же на І҆ере́ѧ зрѧ̀, знамена́етъ себѣ̀ Кре́стнымъ зна́менїемъ є҆дино́щи, гл҃ѧ̀:

Въ и҆мѧ̀ Ѿца̀ и҆ Сн҃а и҆ Ст҃а́гѡ Дх҃а. А҆ми́нь.

И҆ согнꙋ́въ рꙋ́цѣ къ пе́рсемъ, гл҃етъ: къ І҆ере́ю.

Блⷭ҇вѝ ѿче ᲃт҃ы́й и҆ помоли́сѧ ѡ҆ мнѣ̀ грѣ́шномъ.

И҆ а҆́бїе па́дъ на́ зе́млю, съ ᲂу҆миле́нїемъ и҆ слеꙁа́ми въ согбе́нномъ ᲃе́рдци, приле́жнѡ послꙋша́етъ Моли́твы ѿ І҆ере́ѧ. Гл҃емыѧ. І҆ере́ѷ же Блⷭ҇влѧ́ѧ є҆гѡ̀ рꙋко́ю, начина́етъ ѡ҆бы́чнѡ, глаголѧ̀:

Блⷭ҇ве́нъ Бг҃ъ на́шъ: и҆ а҆́бїе чте́тъ, Трⷭ҇то́е: Прⷭ҇та́ѧ Трⷪ҇це. Ѿче на́шъ: Ꙗ҆́кѡ твоѐ є҆́стъ Ца́рство: Гд҃и поми́лꙋй, ві҃. Прїйдѣ́те поклони́мсѧ, гⷤ: и҆ Ѱл҃омъ, н҃. поми́лꙋй мѧ̀ Бж҃е. ве́съ до конца̀: и҆ по Ѱалмѣ̀, гл҃етъ: Гд҃ꙋ помо́лимсѧ: Ка́ѧйжесѧ, гл҃етъ: Гд҃и поми́лꙋй. (а҆́щеже невѣ́жда є҆́стъ самъ І҆ере́ѷ, гл҃етъ.)

И҆ а҆́бїе чтетъ Моли́твꙋ ᲃі́ю.

Гд҃и Бо́же ᲃпⷭ҇нїѧ на́шегѡ, ми́лостивый и҆ ще́дрый, долготерпели́вый и҆ мно́гѡми́лостивый: преклони́вый Нб҃са, и҆ соше́дый на ᲃпⷭ҇нїе Ро́да человѣ́ческагѡ: не хотѧ́й ᲃме́рти грѣ́шника, но ѡ҆браще́нїѧ въ живо́тъ: ты Влады́кѡ молѧ́щомꙋсѧ рабꙋ̀ твое́мꙋ, И҆мⷬ҇къ: пода́ждъ мѣ́сто и҆ вре́мѧ и҆́стиннагѡ Покаѧ́нїѧ: ᲃвѣды́й грѣхѝ, и҆ ѡ҆чища́ѧй беꙁꙁакѡ́нїѧ: ѡ҆ста́ви и҆ ѿпꙋстѝ є҆мꙋ̀ всѧ̀ согрѣше́нїѧ є҆гѡ̀, во́лнаѧ и҆ нево́лнаѧ: съ є҆динѝ є҆гѡ̀ ᲃт҃о́мꙋ твое́мꙋ дх҃ꙋ, и҆ причтѝ є҆гѡ̀ твое́й Бжⷭ҇тве́нной благода́ти и҆ милосе́рдїю, и҆ не ѿе́млемѡ ѿ негѡ̀ ктомꙋ̀ сотворѝ:

Ꙗ҆́кѡ твоѧ̀ держа́ва и҆ твоѐ є҆́стъ Ца́рство, и҆ ᲃи́ла и҆ ᲃла́ва Ѿца̀ и҆ Сн҃а и҆ ᲃт҃гѡ Дх҃а, нн҃ѣ и҆ при́снѡ, и҆ въ вѣ́ки вѣкѡ́въ. А҆ми́нь.

И҆ а҆́бїе чте́тъ и҆ вто́рꙋю Моли́твꙋ съ ᲂу҆миле́нїемъ, рекъ. Гд҃ꙋ помоли́мсѧ, и҆ Гд҃и поми́лꙋй.

Влады́кѡ Гд҃и Бо́же на́шъ, не хотѧ́й ᲃме́рти грѣ́шныхъ но ѡ҆браще́нїѧ и҆ живота̀ и҆хъ жела́ѧй, прїемлѧ́й всѧ̀ грѣ́шныѧ въ покаѧ́нїи къ тебѣ̀ припада́ющїѧ, прїймѝ и҆ нн҃ѣ сегѡ̀ раба̀ твоѐгѡ И҆мⷬ҇къ: ка́ющагосѧ ѡ҆ свои́хъ согрѣше́нїихъ, и҆ да́ждъ є҆мꙋ̀ сокрꙋше́нїе ᲃерде́чное, и҆ и҆спра́ви є҆гѡ̀ со́вѣстъ, да благонаде́жднѡ и҆сповѣ́сть своѧ̀ прегрѣше́нїѧ пре́дъ ᲃла́вою стра́шнагѡ Прⷭ҇то́ла твое́гѡ, и҆ мои́мъ недосто́инствомъ: и҆ да прославлѧ́етсѧ въ не́мъ посе́мъ пречⷭ҇тное и҆ великолѣ́пое и҆мѧ̀ твоѐ, Ѿца̀ и҆ Сн҃а и҆ ᲃт҃а́гѡ Дх҃а, нн҃ѣ и҆ при́снѡ, и҆ въ вѣ́ки вѣкѡ́въ. А҆ми́нь.

Вѣ́стнѡ ти бꙋ́ди ѽ І҆ере́ю, ꙗ҆́кѡ а҆́ще ча́стѡ ѡ҆бы́че ка́ѧйсѧ И҆сповѣда́тисѧ доблѣ́стъ є҆динꙋ̀ моли́твꙋ ѿ пре́дъ положе́нныхъ прочестѝ. ᲃконча́в же Моли́твы воꙁдвиꙁа́етъ І҆ере́ѷ ка́ющагосѧ ѿ землѧ̀, гл҃ѧ̀:

Востанѝ спѧ́й; и҆ въскрⷭ҇нѝ ѿ ме́ртвыхъ, и҆ просвѣ́титъ тѧ̀ Хᲃ҃.

Ка́ѧйжесѧ вста́въ, и҆ ꙗ҆́коже ѡ҆сꙋжде́нникъ стоѧ̀, и҆ помышлѧ́ѧ себѣ̀ ѡ҆́номꙋ стра́шномꙋ Прⷭ҇тлꙋ и҆ сꙋ́дищꙋ Бж҃ію предста́ти, съ стра́хѡмъ и҆ тре́петомъ ѻ҆́цѣ до́лꙋ, и҆ рꙋ́цѣ къ пе́рсемъ согбе́ннѣ, а҆кѝ свѧꙁа́нѣ и҆мы́й, болѣꙁне́ннымъ и҆ сокрꙋше́ннымъ ᲃе́рдцемъ, въ глꙋбо́цѣмъ смире́нїи, а҆́щеже мо́щнѡ и҆ съ слеꙁа́ми, и҆ ᲂу҆се́рдїемъ соверше́ннымъ, и҆ тве́рдымъ предложе́нїемъ, є҆́же по и҆сповѣда́нїи се́мъ, ктомꙋ̀ не воꙁврати́тисѧ къ грѣхѡ́мъ: но благода́тїю Хв҃ою ᲂу҆твержде́нъ, ᲂу҆клони́тсѧ ѿ зла̀, и҆ твори́ти благо́е. І҆ере́ѷ же ꙗ҆́коже Бж҃їй ᲃꙋдїѧ̀ на пре́дъ ᲂу҆готова́нномъ себѣ̀ ѿ де́сныѧ стра́ны ᲃт҃гѡ Е҆ѵⷢ҇лїѧ ᲃтолцѣ̀ ᲃѣдѧ̀, вокра́тцѣ ꙗ҆́коже ᲃи́ла Дх҃а ᲃт҃гѡ, ᲂу҆премꙋдрѝ є҆гѡ̀, къ ка́ющомꙋсѧ твори́ти сло́во, и҆на́кѡ, и҆лѝ си́цевымъ ѡ҆́браꙁомъ.

Се ча́до предложи́лъ є҆сѝ пока́ѧтисѧ, и҆ исповѣда́ти Гд҃ви грѣхѝ твоѧ̀: вѣ́ждъ же и҆ꙁвѣ́стнѡ, ꙗ҆́кѡ са́мъ Хᲃ҃ ᲃп҃си́тель на́шъ всѧ̀ сокрове́нныѧ ᲃерде́цъ человѣ́ческихъ та́йны вѣды́й, невиди́мѡ предстои́тъ, прїемлѧ̀ и҆сповѣда́нїе твоѐ: тѣ́мъ же ᲂу҆́бѡ ничто́же ѿ твои́хъ согрѣше́нїй да не сокры́еши ѿ менѐ стыдѣ́нїѧ ра́ди, и҆лѝ бо́ѧꙁни кое́ѧ: но неѡбинꙋ́ѧсѧ всѧ̀ ᲃи́це ꙗ҆́коже что зло̀ содѣла́лъ є҆сѝ, и҆ ꙗ҆́коже памѧтствꙋ́еши, про́стѣ, ничто́же прилага́ѧ, ни́же чꙋ́ждаѧ согрѣше́нїѧ воспомина́ѧ, порѧ́днѣ въ сокрꙋше́нномъ и҆ болѣꙁне́нномъ ᲃе́рдци и҆сповѣ́ждъ.

И҆мѣ́йже тве́рдое предложе́нїе, є҆́же по и҆сповѣда́нїю се́мъ ᲂу҆клони́тисѧ ѿ зла̀ и҆ по́мощїю Бж҃їею твори́ти благо́е. къ си́мже тве́рдѡ вѣ́рꙋй, ꙗ҆́кѡ Хᲃ҃ Гд҃ь мно́ю а҆́ще и҆ недосто́йнымъ І҆ере́емъ и҆ намѣ́стникомъ, и҆ ᲃꙋдїе́мъ свои́мъ, ѻ҆́браꙁъ є҆гѡ̀ на себѣ̀ носѧ́щимъ, є҆мꙋ́же да́лъ є҆́стъ вла́стъ свѧꙁа́ти и҆ раꙁдрѣша́ти, раꙁдрѣши́тъ тѧ̀ ѿ всѣ́хъ грѣхѡ́въ твои́хъ.

А҆́ще ᲂу҆́бѡ сі́ѧ сохрани́ши въи́стиннꙋ прїймеши грѣхѡ́въ твои́хъ всѣ́хъ ѡ҆ставле́нїе: а҆́ще же сокры́еши что̀ ѿ злы́хъ дѣ́лъ твои́хъ, и҆ неисповѣда́нна ѡ҆ста́виши, не то́чїю ѡ҆ставле́нїе грѣхѡ́въ не сподоби́шисѧ, но къ нн҃ѣшнимъ твои́мъ грѣхѡ́мъ приложи́ши себѣ̀ грѣ́хъ ст҃отатства.

А҆́ще же приложи́ши что̀, є҆го́же не сотвори́лъ є҆сѝ, то неисповѣда́нїе но лꙋка́вство пре́дъ Бо́гомъ сотвори́ши, и҆ къ грѣхѡ́мъ грѣ́хъ приложи́ши: та́кожде и҆ предложе́нїе до́брое, є҆́же пока́ѧтисѧ, и҆ Вѣ́рꙋ прїѧ́тїѧ мно́ю грѣхѡ́въ ѡ҆ставле́нїе, а҆́ще не и҆́маши, грѣхѝ къ грѣхѡ́мъ приложи́въ, ꙗ҆́кѡ рꙋга́тель Бжⷭ҇тве́нной Та́йнѣ ѡ҆сꙋжде́нъ ѿи́деши.

Ѽпа́снѡ ᲂу҆́бѡ сі́ѧ внемлѝ и҆ соблюдѝ, поне́же бо въ враче́бницꙋ прише́лъ є҆сѝ, да нѐ не и҆сцѣ́ленъ ѿи́деши.

Сконча́в же ᲃло́во. повелѣва́етъ ка́ющомꙋсѧ гл҃ти сі́е (а҆́щеже невѣ́жда є҆́стъ ка́ѧйсѧ, са́мъ І҆ере́іѷ предво́дитъ є҆мꙋ̀ ѻ҆́нъ же по не́мъ гл҃етъ):

И҆сповѣда́юсѧ Гд҃ꙋ Бг҃ꙋ вседержи́телю, и҆ Преблⷭ҇ве́нной при́снѡ Дв҃ѣ Мр҃їю Бц҃и, всѣ́мъ Нбⷭ҇нымъ ᲃи́ламъ, и҆ всѣ́мъ ᲃт҃ы́мъ, и҆ тебѣ̀ Ѿче чⷭ҇тный всѣ́хъ грѣхѡ́въ мои́хъ, и҆́хже злѣ̀ содѣѧ́хъ, мы́слїю, ᲃло́вомъ, дѣ́ломъ, и҆ всѣ́ми мои́ми чꙋ́вствы.

И҆ а҆́бїе начина́етъ ка́ѧйсѧ а҆́ще є҆́стъ раꙁꙋ́менъ порѧ́дꙋ, и҆сповѣда́ти всѧ̀ грѣхѝ своѧ̀, ничто́же прилага́ѧ, и҆лѝ ᲂу҆таева́ѧ, но про́стѡ ꙗ҆́коже са́мъ содѣѧ̀ и҆́хъ и҆ ꙗ҆́коже памѧтствова́ти и҆́хъ мо́жетъ, каковѣ́мъ ѡ҆́браꙁомъ, многокра́тнѡ, съ каковы́мъ лице́мъ, на каково́мъ мѣ́стѣ, и҆ коегѡ̀ днѧ̀, не воспомина́ѧ чꙋ́ждаѧ согрѣше́нїѧ и҆ дѣѧ́нїѧ, ни́же и҆мена̀, ни по́вѣсти каковы́ѧ ли́бѡ неприслꙋша́ющїѧ къ и҆ꙁъѧвле́нїю свое́го си грѣха̀, но то́чїю самы́мъ собо́ю и҆лѝ съ и҆́нѣмъ нѣ́кїимъ содѣѧ́ннаѧ подро́бнꙋ всѧ̀ вели́каѧ, и҆ ма́лаѧ и҆сповѣда́етъ. І҆ере́ѷ же ᲃѣды́й съ всѧ́кимъ внима́нїемъ приле́жнѡ послꙋша́етъ и҆сповѣда́нїе ка́ющагосѧ, є҆гда́же исповѣ́стъ всѧ̀.

А҆́ще ᲂу҆раꙁꙋмѣ́етъ, ꙗ҆́кѡ потре́бнѡ є҆́стъ и҆стѧꙁова́ти что ѿ негѡ̀ ѡ҆па́снѣе соверше́ннагѡ ра́ди и҆сповѣда́нїѧ, и҆лѝ ᲂу҆раꙁꙋмѣ́нїѧ ра́ди грѣхо́внагѡ вѣ́да, да и҆спыта́етъ, и҆ да и҆стѧ́ꙁꙋетъ до́брѣ ка́ющагосѧ.

А҆́ще же невѣ́жда є҆́стъ ка́ѧйсѧ и҆ не вѣды́й ка́кѡ и҆сповѣда́ти порѧ́днѣ своѧ̀ грѣхѝ: са́мъ І҆ере́ѷ до́лженъ є҆́стъ Рꙋ́скимъ ꙗ҆ꙁы́комъ, и҆стѧꙁа́ти и҆ и҆спытова́ти є҆гѡ̀ ѡ҆ба́че мꙋ́дрѣ и҆ раꙁсꙋ́днѣ со́блаꙁны ра́ди. Е҆гда́же всѐ соверше́ннѣ и҆сповѣ́сть всѧ̀ согрѣше́нїѧ своѧ̀ ка́ѧйсѧ, си́цевый коне́цъ да сотвори́тъ са́мъ и҆лѝ пре́дъ гл҃ищꙋ І҆ере́ю, по немъ гл҃ѧ̀:

Сихъ всѣ́хъ, и҆ и҆́ныхъ беꙁчисле́нныхъ мои́хъ грѣхѡ́въ, ꙗ҆́же множества̀ ра́ди воспомѧнꙋ́ти, и҆ поꙁна́ти ѧ҆̀ до себѣ̀ не воꙁмого́хъ, ка́юсѧ и҆ пови́нна себѣ̀ Гд҃ꙋ Бг҃ꙋ мое́мꙋ бы́ти представлѧ́ю: и҆ молю̀ Прⷭ҇тꙋю Дв҃ꙋ Бц҃ꙋ, и҆ всѧ̀ Нбⷭ҇ныѧ ᲃи́лы, да помолѧ́тсѧ ѡ҆ мнѣ̀ грѣ́шномъ Гд҃ꙋ Бг҃ꙋ мое́мꙋ: та́кожде и҆ тебѣ̀ Ѿче чⷭ҇тный, и҆ прошꙋ̀ тѧ̀ ꙗ҆́кѡ и҆мꙋ́щагѡ ѿ Ха҃ Бг҃а да́ннꙋю вла́сть ѡ҆ставлѧ́ти грѣхѝ да раꙁдрѣши́ши мѧ̀, и҆ прости́ши и҆ Е҆піти́мїю подасѝ ми за всѧ̀ моѧ̀ согрѣше́нїѧ; жа́лꙋю бо и҆ и҆́мамъ во́лю ка́ѧтисѧ Бж҃їею по́мощїю.

І҆ере́ѷ же поꙋчи́въ є҆гѡ̀ жи́тїю Богоꙋго́дномꙋ, и҆ ѻ҆́браꙁы пода́въ є҆мꙋ̀ ка́кѡ ѡ҆грѣба́ти, и҆ блюсти́сѧ грѣхѡ́въ, и҆ ка́кѡ ᲃтра́хъ Бж҃їй въ себѣ̀ стѧжава́ти налага́етъ є҆мꙋ̀ Е҆піти́мїю, ᲃи́рѣчъ Покꙋ́тꙋ, по раꙁсꙋжде́нїю числа̀ и҆ вели́чества грѣхѡ́въ, и҆ по си́лѣ ка́ющагосѧ, є҆́же воꙁмощѝ є҆мꙋ̀ и҆сполни́ти пода́емое: сі́естъ, и҆лѝ Ми́лостиню твори́ти; и҆лѝ Пости́тисѧ: и҆лѝ Моли́твы твори́ти. Къ смире́нїю же и҆ ѡ҆бꙋꙁда́нїю сверѣ́пыѧ Пло́ти, при а҆́лчбѣ и҆ жа́ждѣ, власѧ́ный Хіто́нъ, и҆лѝ По́ѧсъ: и҆лѝ Бро́нѧ желѣ́ꙁнаѧ: и҆лѝ Поѧ́съ желѣ́ꙁный: Покло́ны до землѧ̀ съ Моли́твою І҆и҃совою, и҆лѝ Мытаре́вою: ни́ꙁꙋ и҆лѝ беꙁъпосте́лное лѣга́нїе: до Полꙋ́нощное Бдѣ́нное на моли́твахъ стоѧ́нїе, въ понедѣ́локъ, Сре́дꙋ, и҆ Пѧ́токъ, ве́черъ, и҆лѝ въ полꙋ́дне є҆дино́щи ᲃꙋхоѧде́нїе, и҆ и҆́наѧ подо́бнаѧ ꙗ҆́же мꙋ́дромꙋ раꙁсꙋжде́нїю І҆ере́ѷскомꙋ подле́жатъ, ѡ҆́ва совѣтова́ти ѡ҆́ва же налага́ти. Вѣ́ждъ ᲂу҆́бѡ ѽ І҆ере́ю, ꙗ҆́кѡ ни є҆ди́нагѡ ка́ющагосѧ кро́ме Е҆піти́мїи досто́итъ ти по и҆́сповѣди ѿпꙋща́ти, но кое́мꙋждѡ по мѣ́рѣ грѣхѡ́въ наложѝ Е҆пити́мїю, а҆́ще и҆ ма́лыѧ бꙋ́дꙋтъ грѣхѝ Покаѧ́нїе бо соверше́нное въ трѡ́хъ си́хъ ча́стехъ соверша́етсѧ: сі́естъ, въ сокрꙋше́нїи ᲃе́рдца, ꙗ҆́же є҆́стъ Пе́рваѧ: въ и҆́сповѣди пре́дъ І҆ере́емъ грѣхѡ́въ, ꙗ҆́же є҆́стъ Вто́раѧ: и҆ въ довлетворе́нїи, ꙗ҆́же є҆́стъ Тре́тѧѧ ча́сть: Несꙋ́щиже є҆́дины́ѧ ѿ си́хъ не мо́жетъ бы́ти та́йна Покаѧ́нїѧ соверше́нна: и҆ сегѡ̀ ра́ди ни́же ѡставле́нїе грѣхѡ́въ бꙋ́детъ. тѣ́мже ᲂу҆́бѡ а҆́ще и҆ малы́й прости́телный, ᲃи́рѣчъ, повседне́вныи грѣхѝ бꙋ́дꙋтъ, вмѣ́сто Е҆піти́мїи наложѝ Гд҃ню моли́твꙋ, сі́естъ, Ѿче на́шъ, є҃, и҆лѝ і҃, кра́тъ: и҆лѝ, Вѣ́рꙋю въ є҆ди́нагѡ Бг҃а: и҆лѝ Бц҃е Дв҃о: и҆лѝ поми́лꙋй мѧ̀ Бж҃е: и҆лѝ Моли́твꙋ І҆и҃совꙋ стокра́тъ прогл҃а́ти: и҆лѝ є҆ли́кѡ раꙁсꙋжде́нїе твоѐ бꙋ́детъ: та́кожде и҆ Поклѡ́ны и҆лѝ въ по́стный дн҃ь є҆ди́нъ воꙁдержа́тисѧ ѿ Ры́бъ, и҆лѝ и҆́нагѡ ꙗ҆де́нїѧ, и҆ пи́тїѧ кое́гѡ. По накаꙁа́нїи же, и҆ по прїѧ́тїи Е҆піти́мїи ка́ѧйсѧ па́дъ на зе́млю ᲃо слеꙁа́ми приле́жнѡ послꙋша́етъ моли́твꙋ, и҆ коне́чное раꙁдрѣше́нїе ѿ І҆ере́ѧ быва́емое, тве́рдѡ вѣ́рꙋѧ, ꙗ҆́кѡ чре́ꙁъ І҆ере́ѧ ᲃа́мъ Хᲃ҃ Бг҃ъ раꙁдрѣша́етъ и҆ проща́етъ є҆гѡ̀ ѿ всѣ́хъ грѣхѡ́въ, и҆ благода́ть свою̀ подае́тъ є҆мꙋ̀.

І҆ере́ѷ же въста́въ, съ всѧ́кимъ внима́нїемъ, и҆ тое́гожде вѣ́рою и҆мѣ́ѧ во́лю мы́сли съпрѧже́нною є҆́же по да́нной є҆мꙋ̀ вла́сти раꙁдрѣши́ти ѿ всѣ́хъ грѣхѡ́въ ка́ющагосѧ. Чте́тъ пре́жде со мно́гимъ ᲂу҆миле́нїемъ и҆ а҆́ще воꙁмо́жнѡ и҆ ᲃо слеꙁа́ми Моли́твꙋ Сі́ю.

Влады́кѡ мнѡгоми́лостиве Гд҃и И҆и҃се Хє҃ Бо́же на́шъ. Верхо́вномꙋ Твое́мꙋ А҆по́столꙋ Петрꙋ̀ и҆ про́чїимъ А҆по́столѡмъ твои́мъ ключа̀ Ца́рствїѧ Нбⷭ҇нагѡ върꙋчи́вый, и҆ твое́ю благода́тїю въ се́й и҆́мъ да́тисѧ въсхотѣ́вый вла́сти, въ є҆́же свѧꙁа́нымъ бы́ти и҆ на нб҃сѝ, є҆ли́ка ѿ ни́хъ на землѝ свѧ́ꙁана сꙋ́тъ, и҆ раꙁдрѣше́нномъ бы́ти та́кожде на Нб҃сѝ, є҆ли́ка ѿ ни́хъ на землѝ раꙁдрѣше́на сꙋ́тъ: Наслѣ́дники же на́съ хꙋды́хъ и҆ недосто́йныхъ неиꙁрече́ннымъ твои́мъ человѣкѡлю́бїемъ да́нныѧ и҆́мъ вла́сти сподоби́вый бы́ти, въ є҆́же и҆ намъ т́акожде вѧꙁа́ти и҆ рѣша́ти въ люде́хъ твои́хъ прилꙋча́ющаѧсѧ.

Са́мъ пребла́гїй Царю̀ мно́ю смире́ннымъ и҆ непотре́бнымъ рабо́мъ твои́мъ: простѝ рабꙋ̀ твое́мꙋ, И҆мⷬ҇къ: а҆́ще что̀ въ настоѧ́щомъ жи́тїи ꙗ҆́кѡ человѣ́къ согрѣши́лъ є҆́стъ, и҆ ѿпꙋстѝ є҆мꙋ̀ всѧ̀ є҆ли́ка сло́вомъ и҆лѝ дѣ́ломъ, и҆лѝ помышле́ниемъ согрѣшѝ раꙁдрѣши́въ є҆мꙋ̀ и҆ належа́щїй каковѣ́мъ любѡ̀ бꙋ́ди ѻ҆́браꙁомъ сою́ꙁъ. Твоѐ бо є҆́стъ є҆́же ми́ловати и҆ спаса́ти на́съ Хє҃ Бо́же на́шъ, и҆ тебѣ̀ ᲃла́вꙋ воꙁсыла́емъ съ беꙁнача́льнымъ ти Ѿцемъ, и҆ съ прⷭ҇ты́мъ благи́мъ и҆ животворѧ́щимъ ти Дх҃омъ, нн҃ѣ и҆ при́снѡ, и҆ въ вѣ́ки вѣкѡ́въ. А҆ми́нь.

По Моли́твѣ же раꙁдрѣша́етъ І҆ере́іѷ ка́ющагосѧ ни́ꙁꙋ лежа́щагѡ ᲃи́це, гл҃ѧ̀:

Фо́рма, и҆лѝ ᲃъверше́нїе Та́йны ᲃт҃гѡ Покаѧ́нїѧ.

Гд҃ь и҆ Бг҃ъ на́шъ І҆и҃ᲃ Хᲃ҃ благода́тїю и҆ щедрота́ми свое́гѡ человѣкѡлю́бїѧ да прости́тъ ти ча́дѡ И҆мⷬ҇къ: всѧ согрѣше́нїѧ твоѧ̀: и҆ а҆́ꙁъ недосто́йный І҆ере́ѷ, вла́стїю є҆гѡ̀ мнѣ̀ да́нною, проща́ю и҆ раꙁдрѣша́ю тѧ̀ ѿ всѣ́хъ грѣхѡ́въ твои́хъ въ и҆мѧ̀ Ѿца̀ 🕂 и҆ Сн҃а 🕂 и҆ ᲃт҃гѡ 🕂 Дх҃а. А҆ми́нь.

Коне́цъ же раꙁдрѣше́нїѧ сегѡ̀ гл҃ѧ̀ І҆ере́ѷ, знамена́етъ Крестаѡ́браꙁнѡ десни́цею ка́ющагѡсѧ: и҆ ѿпꙋща́етъ є҆гѡ̀ съ ми́ромъ, гл҃ѧ̀:

И҆дѝ въ ми́рѣ, и҆ ктомꙋ̀ не согрѣша́й.

А҆́ще слꙋ́читсѧ ка́ющомꙋсѧ въ каково́й лю́бѡ бꙋ́ди клѧ́твѣ, и҆лѝ ѿлꙋче́нїи Це́ркѡ́вномъ бы́ти, І҆ере́ѷ а҆́ще и҆́матъ соверше́ннꙋю ѿ свое́го Е҆пⷭ҇кпа вла́сть на раꙁдрѣше́нїе ᲃи́хъ, сі́е раꙁдрѣше́нїе да гл҃етъ:

Гд҃ь и҆ Бг҃ъ на́шъ І҆и҃ᲃ Хᲃ҃, ключа̀ Ца́рствїа Нбⷭ҇нагѡ А҆по́столѡмъ свои́мъ врꙋчи́вый, и҆ да́вый и҆́мъ всю̀ вла́сть свое́ю благода́тїю, є҆́же вѧꙁа́ти и҆ раꙁдрѣша́ти ѿ всѣ́хъ грѣхѡ́въ человѣ́ки на землѝ: то́й са́мъ неиꙁрече́нныѧ ра́ди млⷭ҇ти свое́ѧ, да прости́тъ и҆ раꙁдрѣши́тъ тѧ̀: и҆ А҆́ꙁъ всеси́лною є҆гѡ̀ вла́стїю, и҆ ᲃт҃ы́хъ А҆по́столъ є҆гѡ̀ Петра̀ и҆ Па́вла, и҆ про́чїихъ, и҆ Преѡсвѧще́ннагѡ Митрополи́та на́шегѡ, И҆мⷬ҇къ: и҆лѝ, Боголюби́вагѡ Е҆пⷭ҇копа на́шегѡ, И҆мⷬ҇къ: мнѣ̀ а҆́ще и҆ недосто́йномꙋ да́нною, проща́ю и҆ раꙁдрѣша́ю тѧ̀ ча́дѡ, И҆мⷬ҇къ: ѿ сою́ꙁъ и҆ ѿ всѣ́хъ грѣхо́въ твои́хъ, и҆ приѡбща́ю тѧ̀ Бжⷭ҇тве́ннымъ Церко́внымъ Та́йнамъ, и҆ соедине́нїю вѣ́рныхъ совокꙋплѧ́ю тѧ̀ въ и҆мѧ̀ Ѿца̀ 🕂 и҆ Сн҃а 🕂 и҆ ᲃт҃гѡ 🕂 Дх҃а. А҆ми́нь.

Зрѝ ѽ І҆ере́ю, и҆ ѡ҆па́снѡ съблюдѝ: а҆́ще ѡ҆со́бныѧ вла́сти ѿ свое́гѡ си Е҆пⷭ҇кпа на раꙁдрѣше́нїе клѧ́твъ, и҆ ѿлꙋченїй и҆ запрѣще́нїй Церко́вныхъ не и҆́маши, ника́коже да дерꙁне́ши си́цевагѡ раꙁдрѣша́ти, и҆́бѡ и҆ то́й не рлꙁдрѣше́нъ ѿ тебѣ̀ ꙗ҆́кѡ ѿ неимꙋ́щагѡ си́цевыѧ вла́сти ѿи́детъ, и҆ ты въ ѡ҆сꙋжде́нїе сме́ртнагѡ грѣха̀ ѡ҆ста́нешисѧ, и҆ ка́ꙁни и҆ꙁверже́нїѧ подпа́днеши. И҆мы́й же си́цевꙋю вла́сть вѣ́ждъ, ꙗ҆́кѡ не всегда̀ є҆гда̀ слꙋ́читсѧ ѿ Е҆пⷭ҇па проклѧ́тагѡ раꙁдрѣша́ти мо́жеши: но то́чїю є҆гда̀ ти и҆ме́ннѡ повелѣ́ннѡ и҆ вла́сть да́на ти бꙋ́детъ ѡ҆́нсицꙋ є҆динагѡ, и҆лѝ нѣ́кїихъ мнѡ́гихъ раꙁдрѣ́шати. При само́мъ же ча́сѣ ᲃме́рти и҆ не и҆мы́й си́цевꙋю ѡ҆со́бнꙋю вла́стъ І҆ере́ѷ, раꙁдрѣ́ша́ти въ клѧ́твѣ и҆ ѿлꙋче́нїю сꙋ́щагѡ и҆ ка́ющагосѧ, мо́жетъ: то́чїю си́цевымъ ѡ҆́браꙁомъ, а҆́ще ка́ѧйсѧ бли́ꙁь сме́рти си́й, ѡ҆бѣ́тъ клѧтве́нный пре́дъ тобо́ю сътво́ритъ, ꙗ҆́кѡ а҆́ще въꙁдви́гнетъ є҆гѡ̀ Бг҃ъ ѿ бо́лѣꙁни, попече́нїе сътво́ритъ ѡ҆ погрѣше́нїнъ свое́мъ, є҆гѡ́же ра́ди проклѧ́тъ, и҆лѝ ѿлꙋче́нъ бы́сть, и҆ ꙗ҆́кѡ покаѧ́нїѧ пло́дъ сътво́ритъ: и҆ ѿ не́гоже проклѧ́тъ, и҆лѝ ѿлꙋче́нъ бы́сть, проще́нїѧ и҆ раꙁдрѣше́нїѧ притѧжа́ти тща́тисѧ бꙋ́детъ. И҆бѡ̀ а҆́ще ᲂу҆мре́тъ раꙁдреше́нъ є҆́стъ: а҆́ще же не ᲂу҆мре́тъ не раꙁдрѣши́мъ ѿ клѧ́твы превыва́етъ, и҆ сегѡ̀ ра́ди ѿ клѧ́вшагѡ є҆гѡ̀ и҆лѝ ѿлꙋчи́вшагѡ, всѧ́кѡ раꙁдрѣше́ннꙋ є҆мꙋ̀ подоба́етъ бы́ти.

Сꙋпрꙋ́жества и҆лѝ За́коннлгѡ Бра́ка Та́йна ѿ Ха҃ Бг҃а ᲂу҆ста́влена є҆́стъ, въ ᲂу҆множе́нїе Ро́да человѣ́ческагѡ, и҆ въспит́анїе ча́дъ къ сла́вѣ Бж҃їей, въ нераꙁрѣши́мый съю́ꙁъ любвѐ и҆ дрꙋ́жества, и҆ въꙁаи́мнꙋю по́мощъ, и҆ въ є҆́же ѿгрѣба́тисѧ грѣха̀ любодѣѧ́нїѧ.

Ве́щъ сеѧ̀ Та́йны, є҆́стъ Мꙋ́жъ и҆ Жена̀, въ приѡбще́нїе Бра́ка чⷭ҇тнѡ кро́мѣ всѧ́кагѡ препѧ́тїѧ Пра́вилнагѡ съвокꙋпи́тисѧ и҆ꙁволѧ́ющїи, Фо́рма, сі́естъ, Ꙍ҆браꙁъ, и҆лѝ съверше́нїе є҆ѧ̀, сꙋ́тъ словеса̀ съвокꙋплѧ́ющихсѧ, и҆ꙁволе́нїе и҆хъ внꙋ́трнее пре́дъ І҆ере́емъ и҆ꙁвѣща́ющаѧ, сі́естъ, прїемлю̀ себѣ̀ а҆́ꙁъ тебѣ̀ въ сꙋпрꙋ́жницꙋ и҆лѝ въ женꙋ̀; и҆ прїемлю̀ себѣ̀ а҆́ꙁъ тебѣ̀ въ сꙋпрꙋ́жника, и҆лѝ въ мꙋ́жа.

Да ᲂу҆́бѡ чⷭ҇тнѡ и҆ беꙁъ всѧ́кагѡ препѧ́тїѧ Пра́вилнагѡ Та́йна Бра́ка сѣверши́тсѧ, Парохїѧ́лный І҆ереѷ сі́ѧ то́щнѡ всѧ́кѡ да съхрани́тъ.

Вѣ́стъ прїи́мъ ѡ҆ хотѧ́щихъ Бра́кꙋ съчета́тисѧ, въ пе́рвыхъ да ᲂу҆вѣ́стъ, кто̀ и҆ како́вѣ сꙋ́тъ: и҆ а҆́ще нѣ́стъ ме́ждꙋ и҆ма̀ препѧ́тїе коѐ Пра́вилное, сі́естъ, а҆́ще себѣ̀ въ сро́дствѣ дх҃о́вномъ, сі́естъ, въ кꙋмо́вствѣ, и҆лѝ пло́тскомъ ᲃро́дствѣ не сꙋ́тъ прибли́жними. А҆ще свои́мъ во́лнымъ проиꙁволенїемъ, а не принꙋжде́ни ѿ роди́телїй и҆лѝ сро́дникъ, и҆лѝ ѿ гпⷭ҇дїй свои́хъ, и҆ а҆́ще чⷭ҇тнѡ по достоѧ́нїю Та́йны сеѧ̀ съчета́тисѧ хотѧ́тъ: А҆́ще во́ꙁрастъ подо́бный и҆мꙋ́тъ; Ю҆но́ша ᲂу҆́бѡ понѐ да и҆ма́тъ лѣ́тъ пѧтна́десѧтъ, дв҃и́ца же двана́десѧтъ. и҆ ѡ҆́ба да ᲂу҆мѣ́ета и҆сповѣда́нїе Вѣ́ры, сі́естъ, Вѣ́рꙋю въ є҆ди́нагѡ Бг҃а, и҆ Моли́твꙋ Гд҃ню; сі́естъ, Ѿче на́шъ: Бц҃е Дв҃о: И҆ десѧтосло́вїе, сі́естъ, де́сѧтъ Бжїихъ заповѣдїй. А҆́ще же не ꙋмѣ́ютъ, ника́к же да дерꙁне́тъ вѣнча́ти и҆́хъ, до́ндеже сі́ѧ всѧ̀ до́брѣ на па́мѧть и҆ꙁꙋ́чатъ, и҆́бѡ посе́мъ ча́да своѧ̀ сегѡ̀ ᲂу҆чи́ти до́лжни сꙋ́тъ.

Да вѣ́сть ᲂу҆́бѡ и҆ ѿ достовѣ́рныхъ ᲂу҆чи́телїй да навы́кнетъ І҆ере́ѷ, ка́ѧ сꙋ́тъ препѧ́тїѧ къ съставле́нїю За́коннагѡ Бра́ка, и҆ ка́ѧ съчета́ный раꙁво́дитъ, и҆ ка́ѧ сꙋ́тъ ᲃро́дства ©ᲃте́пени, си́це тѣле́снагѡ, ꙗ҆́коже и҆ дх҃о́внагѡ, ꙗ҆́же ѿ©ᲃт҃гѡ Крещенїѧ, та́кожде ка́ѧ сꙋ́тъ ѿ Бра́чнагѡ съю́ꙁа, сі́естъ сва́тства.

Да навы́кнетъ ᲂу҆́бѡ въ пе́рвыхъ до́брѣ всѧ Пра́вила ꙗ҆́же ѡ҆ за́конныхъ Бра́цѣхъ, и҆ ᲂу҆ста́вы ©ᲃт҃ы́ѧ ꙗ́҆же ѡ҆ си́хъ, и҆ꙁрѧ́днѣе же ꙗ҆́же Събо́ры , А҆ми́нь ᲃт҃ы́ѧ Вселе́нскїѧ и҆ Помѣ́стныѧ ᲂу҆ста́виша и҆ храни́ти повелѣ́ша: и҆ да тщи́тсѧ є́҆же въ Паро́хїи є҆гѡ̀, ѡ҆па́снѡ и҆ съверше́ннѡ сі́ѧ храни́мы бы́ти.

И҆ꙁрѧ́днѡ же да вѣ́сть І҆ере́ѷ, ꙗ҆́кѡ Сꙋпрꙋ́жества ме́ждꙋ въсхища́ющимъ и҆ въсхище́нною, є҆гда̀ сама̀ въсхище́ннаѧ въ вла́сти въсхити́вшагѡ ю҆̀ пребыва́етъ, та́кожде и҆ потае́нные, и҆ всѧ̀ про́чаѧ Сꙋпрꙋ́жества, ꙗ҆́же не съ блⷭ҇ве́нїемъ Церко́внымъ, и҆ чи́ннымъ ѿ свое́гѡ си Па́стырѧ, сі́естъ, ѿ Е҆пⷭ҇па, и҆лѝ ѿ тое́и Паро́хїи Сщ҃е́нника, вѣнча́нїемъ при дво́хъ и҆лѝ трі́ехъ понѐ свѣди́телїй съверша́емаѧ, по©ᲃобо́рномꙋ ᲂу҆ставле́нїю, и҆ ©ᲃт҃ы́хъ Ѿц҃ъ ᲂу҆че́нїю, не зако́нна, па́че же беꙁꙁако́нна, и҆ ничто́же сꙋ́тъ.

Па́стыръ же свойстве́нный є҆́стъ, и҆́мже вѣнча́ни, и҆ блⷭ҇ве́ни бы́ти и҆мꙋ́тъ новобра́чнїи, ᲃщ҃е́нникъ въ є҆гѡ́же Паро́хїи жени́хъ є҆́стъ. Но ᲂу҆́бѡ въ нѣ́кїихъ стра́нахъ, въ є҆го́же невѣ́ста пое́млетсѧ, (а҆́ще не ѡ҆́ба ѿ є҆дины́ѧ ᲃꙋ́тъ Паро́хїи,) ᲃе́й вѣнча́етъ: по дре́внемꙋ ᲂу҆бѡ все́мъ како́вый гдѐ ѡ҆бы́чай съдержи́тсѧ, си́це да быва́етъ.

Да ѡ҆па́снѡ блюде́тсѧ І҆ере́ѷ, є҆́же не ᲂу҆до́бъ въ съпрѧже́нїе бра́ка вѣнча́ти бѣгꙋнѡ́въ, и҆ прише́лцѡвъ, и҆ не и҆мꙋ́шихъ свое́ѧ си ѡ҆сѣ́длостни: ни́же тѣ́хъ и҆́же пре́же въ сꙋпрꙋ́жествѣ пожи́ша, ꙗ҆́же сꙋ́тъ, во́инскїѧ же́ны, и҆лѝ плѣне́нныхъ, и҆ странствꙋ́ющихъ, ра́ꙁвѣ а҆́ще пе́рвѣй ѡ҆па́сное ѡ҆ си́хъ всѣ́хъ сътвори́въ и҆спыта́нїе, и҆ свое́мꙋ си Па́стырꙋ ве́щь и҆ꙁвѣсти́въ, и҆ ѿ негѡ̀ блⷭ҇ве́нїе вꙁе́мъ къ є҆́же си́цевое съпрѧже́нїе вѣнча́ти, и҆ блⷭ҇ви́ти.

Пре́жде да́же ѡ҆брꙋч́енїе и҆ вѣнча́нїе бꙋ́детъ, до́лженъ є҆́стъ, Парохїѧ́лный ᲃщ҃е́нникъ, три́жды въ Пра́ꙁдничныѧ днѝ по собѣ̀ и҆дꙋ́щїѧ, ѡ҆ хотѧ́щихѣ жени́тисѧ въ Це́ркви по Бжⷭ҇твенной Лѵтꙋ́ргїи пре́жде ѿпꙋ́ста въꙁвѣсти́ти люде́мъ.

А҆́ще же ю҆но́ша и҆ деви́ца, не є҆дино́и сꙋ́тъ Паро́хїи, и҆ꙁвѣще́нїе въ ѡ҆бо́ихъ Паро́хїѧхъ да бꙋ́детъ, сі́е же три́жды І҆ере́ѷ сътвори́въ, а҆́ще ни є҆дино̀ пра́вилное преспѧ́тїе къ съпрѧже́нїю и҆хъ ѡ҆брѧ́щетсѧ, да вѣнча́етъ и҆́хъ невоꙁбра́ннѡ: А҆́ще же за́конное каково̀ препѧ́тїе бꙋ́детъ, ника́коже да дерꙁне́тъ блⷭ҇ви́ти и҆́хъ.

А҆́ще же когда̀ и҆ꙁвѣ́стное приключи́тсѧ бы́ти непщева́нїе, сі́естъ, подойꙁре́нїе, и҆лѝ и҆́на какова̀ ва́жнаѧ вина̀, раꙁсꙋжде́нїю Е҆пⷭ҇пскомꙋ се́ѧ да подлежа́тъ. А҆́ще ꙗ҆́кѡ ѿ за́висти и҆ лꙋка́вства нѣ́кїихъ ли́цъ препѧ́то бы́ти мо́жетъ сꙋпрꙋ́жество, а҆́ще мно́гаѧ и҆ꙁвѣще́нїѧ предвари́ли бы́ша, блⷭ҇ве́нїемъ и҆ и҆ꙁволе́нїемъ Е҆пⷭ҇па свое́гѡ, и҆лѝ є҆дино̀ и҆ꙁвѣще́иїе да бꙋ́детъ, и҆лѝ понѐ при двои́хъ и҆лѝ трі́ехъ ᲃвѣди́телїй І҆ере́ѷ да ѡ҆брꙋ́читъ, и҆лѝ и҆ вѣнча́етъ посе́мъ же пре́жде съверше́нїѧ Сꙋпрꙋ́жества, сі́естъ, съвокꙋпле́нїѧ тѣле́снагѡ, и҆ Бра́ка, и҆ꙁвѣще́нїѧ въ Це́ркви да съверша́тсѧ, да а҆́ще сꙋ́тъ препѧ́тїѧ како́ваѧ ᲂу҆до́бїе ѡ҆ткрове́ны бꙋ́дꙋтъ: ра́ꙁвѣ то́чїю а҆́ще Е҆пⷭ҇кпъ и҆на́кѡ вы́ти раꙁсꙋ́дитъ.

Къ съверше́нїю же и҆ꙁвѣще́нїй, І҆ере́ѷ ника́коже да пристꙋ́питъ, доне́лиже и҆ꙁвѣ́стнѡ и҆ꙁвѣще́нъ бꙋ́детъ ѡ҆ во́лномъ съиꙁволенїи ѡ҆бои́хъ въ сꙋпрꙋ́жествѡ съвокꙋпи́тисѧ хотѧ́щихъ: и҆ сегѡ̀ ра́ди са́мъ собо́ю ѡ҆бои́хъ до́брѣ да въпро́ситъ, и҆ ѿ ни́хъ ѡ҆ семъ да и҆ꙁвѣсти́тсѧ. А҆́ще въ дво́хъ Мцⷭ҇ехъ по съверше́нїю и҆ꙁвѣще́нїй, не вѣнча́ннѣ бꙋ́дꙋтъ, и҆ꙁвѣще́нїѧ да повторѧ́тсѧ, ра́ꙁвѣ а҆́ще Е҆пⷭ҇пъ и҆на́кѡ повели́тъ.

И҆ꙁвѣще́нїе же си́цевымъ ѡ҆́браꙁомъ да бꙋ́детъ, по Бжⷭ҇тве́нной Лѵтꙋ́ргїи а҆́бїе пре́жде ѿпꙋ́ста І҆ере́ѷ ста́въ на А҆мбѡ́нѣ, си́це рꙋ́скимъ ꙗ҆ꙁы́комъ лю́ди да напомина́етъ.

Вѣ́домо неха́й бꙋ́детъ всѣ́мъ ва́мъ Правосла́вныи Хрїстїѧ́не, кото́рыи тꙋ́тъ въ то́мъ домꙋ̀ Бж҃омъ ѡ҆бе́цными є҆стѐ, и҆́жъ И҆мⷬ҇къ: младе́нецъ И҆мⷬ҇къ: Па́нна, зъ тогѡ̀ и҆ тогѡ̀ до́мꙋ, и҆ Паро́хїю, за по́мочꙋ Бж҃їею, замышлѧ́ютъ въ ста́нъ Малже́нскїй встꙋпи́ти, пре́тожъ напомина́емъ ва́съ всѣ́хъ въ ѡ҆́бецъ, и҆ ко́ждогѡ зъ ѡ҆со́бна, а҆бы̀ є҆слѝ кто̀ вѣ́даетъ ꙗ҆кꙋ́ю, покре́бностъ, а҆́лбѡ повинова́цство, а҆́лбѡ дх҃овный звѧ́ꙁокъ, а҆́лбѡ ꙗ҆кꙋ́ю ко́лвекъ и҆́ншꙋю перешко́дꙋ межю̀ ни́ми бы́ти, кото́раѧ бы и҆́мъ зъ собо́ю въ Малже́нство встꙋпи́ти заборонѧ́ла, ѡ҆́нꙋю зъ пови́нности намъ ꙗ҆́кѡ найрыхлѣ́й ѡ҆ꙁнайми́ли, и҆ ѡ҆ то́мъ напомина́емѡ ра́ꙁъ пе́ршїй, є҆слѝ є҆́стъ пе́ршїй: а҆́лбѡ дрꙋ́гїй, є҆слѝ є҆́стъ© дрꙋ́гїй а҆́лбѡ тре́тїй, є҆слѝ тре́тїй ра́ꙁъ чи́нитсѧ ѡ҆бвѣще́нїе.

Да нака́жетъ же І҆ере́ѷ ѡ҆брꙋчи́вшихсѧ да пре́жде вѣнча́нїѧ и҆ бл҃словенїѧ Церко́внагѡ въ є҆дино́мъ домꙋ̀ не пребыва́ютъ, ни́же тѣле́снѣ съвокꙋплѧ́ютсѧ. Вѣнча́нїе же и҆ бра́чное благослове́нїе, ни ѿ когѡ̀ прїѧ́ти и҆́мъ досто́итъ, то́чїю ѿ сама́гѡ свое́гѡ си Парохїѧ́лнагѡ ᲃщ҃е́нника, и҆лѝ ѿ и҆́нагѡ Сщ҃е́нника, поꙁволе́нїе ѿ негѡ̀ и҆мꙋ́щагѡ, а҆́ще ѡ҆́ба є҆дино́и сꙋ́тъ Паро́хіи.

Вѣнча́нїе и҆ блⷭ҇венїе сꙋпрꙋ́жества, въ Це́ркви досто́итъ съверша́тисѧ пре́дъ людмѝ.

В домꙋ́же а҆́ще благосло́вныѧ ра́ди нѣ́кїѧ вины̀ бы́ти приклю́читсѧ, та́йнѡ ника́коже да не ᲃъверши́тъ кро́мѣ свѣди́телїй чⷭ҇тныхъ.

Пре́жде вѣнчанїѧ и҆ блⷭ҇ве́нїѧ Бра́чнагѡ, да нака́жетъ І҆ере́ѷ и҆ повели́тъ Женихꙋ̀, и҆ Невѣ́стѣ, И҆́сповѣдь сътвори́ти всѣ́хъ грѣхѡ́въ свои́хъ, и҆ а҆́ще мо́щнѡ є҆́стъ приꙋготовлѧ́ти себѣ̀ По́стомъ и҆ Моли́твами и҆ къ ᲃт҃о́мꙋ Причаще́нїю и҆ є҆́же къ Та́йнѣ Сꙋпрꙋ́жества ᲃт҃олѣпнѡ и҆ благоче́стнѡ, ꙗ҆́коже подоба́етъ Хрⷭ҇тїѧ́номъ пристꙋпи́ти.

Да не дерꙁне́тъ ника́коже І҆ере́ѷ подъ пра́вилною ка́ꙁнїю и҆ подъ грѣхѡ́мъ ©ᲃме́ртнымъ, нико́гоже вѣча́ти по ѡ҆бѣ́дѣ, ни́же ве́черъ, но по ра́нꙋ ничто́же ꙗ҆́дшихъ, ни́же пи́вшнхъ, а҆́бїе по Бжⷭ҇твенной Лѵтꙋ́ргїи, и҆лѝ понѐ по Часѣ́хъ, пре́дъ ᲂу҆готовле́нныхъ, и҆ ᲂу҆жѐ и҆сповѣда́нныхъ сꙋ́щихъ, и҆ ᲂу҆мѣ́ющихъ, Вѣ́рꙋю въ є҆дина́гѡ Бг҃а: Ѿче на́шъ; Бц҃е Дв҃о: И҆ десѧтосло́вїе Бж҃їе: да вѣнчаетъ.

Въ коне́цъ же, да вѣ́сть І҆ере́ѷ, и҆ до́брѣ памѧтствꙋ́етъ, ꙗ҆́кѡ ѿ днѧ̀ ді҃ Ное́брїѧ Мцⷭ҇а, сі́естъ, ѿ днѧ̀ ᲃт҃а́гѡ А҆пⷭ҇тола Філи́ппа да́же до ѕ҃ днѧ̀ І҆анꙋа́рїа, Мцⷭ҇а: сі́естъ до Пра́ꙁдника Богоѧвле́нїѧ: и҆ ѿ Мѧсопꙋ́стныѧ Недѣ́ли Вели́кагѡ По́ста, да́же до Ѳѡмино́и Недѣ́ли: и҆ ѿ Недѣ́ли всѣ́хъ ᲃт҃ы́хъ, да́же до днѧ̀ к҃ѳ Мцⷭ҇а І҆ю́нѧ: сі́естъ, до Пра́ꙁдника ᲃт҃ы́хъ Апⷭ҇лъ Петра̀ и҆ Па́вла: и҆ ѿ пе́рвагѡ днѧ̀ А҆́вгꙋста, до є҃і Днѧ̀, того́жъ Мцⷭ҇а; сі́естъ до Оᲂу҆спенїѧ Прⷭ҇ты́ѧ Бц҃а, Вѣнча́нїѧ и҆ блⷭ҇венїѧ бра́чнаѧ ѿ Це́ркве запрѣще́нна и҆ ᲂу҆держа́на сꙋ́тъ: да никто́же ᲂу҆́бѡ ѿ І҆ереѷ дерꙁне́тъ въ сі́ѧ днѝ кого̀ въ сꙋпрꙋ́жество вѣнча́ти, подъ лю́тою Пра́вилною ка́ꙁнїю па́чеже подъ и҆ꙁверже́нїемъ, ни́же да съ и҆ꙁво́литъ, и҆лѝ блⷭ҇ви́тъ перено́сины, и҆ пи́ры бра́чныѧ твори́ти въ ты́ѧ днѝ.

Бра́къ же и҆ ᲂу҆чрежде́нїе на не́мъ съ всѧ́кою ти́хостїю и҆ подоба́ющею Хрⷭ҇тїѧ́нѡмъ чⷭ҇тностїю въ ᲃла́вꙋ Бж҃їю да быва́етъ, не коꙁлогласова́нїемъ дїѧ́волскимъ, ни плѧса́нїи и҆ пїѧ́нствы, ꙗ҆же Хрⷭ҇тїѧ́нѡмъ ѿрече́нна сꙋ́тъ: Сꙋпрꙋ́жествѡ бо, и҆лѝ За́конный Бра́къ. є҆́стъ ве́щъ ᲃт҃аѧ, тѣ́мъ же и҆ ᲃт҃о ᲃі́ю ᲃъверша́ти досто́итъ.

Сі́ѧ всѧ̀ предположе́ннаѧ ᲂу҆ченїѧ ѿ Пра́вилъ Богонѡ́сныхъ Ѿц҃ъ, и҆ и҆́хъ ᲂу҆ченїй събра́ннаѧ кі́йждѡ Парохїѧ́лный сщ҃енни́къ всѧ́кѡ съ ѡ҆пасе́нїемъ всѧ́кимъ храни́ти до́лженъ є҆́стъ.

Сте́пени по ро́дствꙋ раꙁсꙋжда́етсѧ, ᲃи́це ꙗ҆́коже ѿц҃ъ и҆ ᲃн҃ъ, є҆ди́нъ є҆́ста ᲃте́пень, ѿц҃ъ бо родѝ ᲃн҃а, и҆ є҆́стъ є҆дино̀ ро́дство.

Бра́тїѧ же є҆ли́кѡ и́҆хъ а҆́ще бꙋ́детъ, вто́рагѡ сте́пене ме́ждꙋ собо́ю сꙋ́тъ, и҆́бѡ въ кое́мждѡ ро́дствѣ два̀ то́чїю прїемле́тасѧ.

Мꙋ́жъ и҆ Жена̀ не съставлѧ́ютъ ра́ꙁныхъ сте́пеней, но сꙋ́тъ всегда̀ є҆ди́нъ и҆ то́йжде ᲃте́пень, поне́же дрꙋ́гъ дрꙋ́га не ражда́етъ, ни́же ѿ є҆ди́нагѡ ѿца сꙋ́тъ рожде́ни.

Внима́и до́брѣ сі́а начерта́нїѧ.

Никто́же мо́жетъ свою̀ сестрꙋ̀ въ женꙋ̀ себѣ̀ поѧ́ти, поне́же є҆́стъ втора́гѡ ᲃте́пени, сі́естъ: Пе́тръ родѝ Геѡ́ргїѧ, и҆ Марїю, се два̀ рожденїѧ, и҆ два̀ сте́пене. сі́ю ᲂу҆́бѡ сегѡ̀ ра́ди поѧ́ти себѣ̀ не мо́жета.

Сте́пени Два̀ не быва́етъ

Никто́же мо́жетъ брата́нкꙋ свою̀ сі́естъ, дще́ръ бра́та свое́гѡ ро́днагѡ въ женꙋ̀ себѣ̀ поѧ́ти, поне́же сꙋ́тъ тре́тїѧгѡ ᲃте́пенѝ, сі́естъ: Пе́тръ родѝ Геꙍ́ргїѧ и҆ І҆ꙍа́нна. и҆ сꙋ́тъ два̀ рожде́нїѧ: І҆ꙍа́нъ родѝ Мари́нꙋ, се тре́тее рожде́нїе, и҆ тре́тїй ᲃте́пень. Мари́на ᲂу҆́бѡ Геꙍ́ргїеви є҆́стъ брата́нною. Геꙍ́ргїй же Мари́нѣ ᲃтры́й, ᲃегѡ̀ ра́ди поѧ́тисѧ не мо́жета.

Сте́пень Тре́тїй не быва́етъ

Никто́же мо́жетъ ᲃтры́йнꙋю ᲃестрꙋ̀ ᲃвою̀ ᲃебѣ̀ въ женꙋ̀ поѧ́ти, поне́же пе́ршїи нари́цаютсѧ ᲃтры́йнїи бра́тїѧ, и҆ сꙋ́тъ четве́ртагѡ ᲃте́пенѝ: сі́естъ. Пе́тръ родѝ Геꙍ́ргїѧ и҆ І҆ꙍа́нна бра́тїю ро́днꙋю, и҆же сꙋ́тъ дво́хъ сте́пенїй, ѿ Геꙍ́ргиѧ роди́сѧ Фома̀, ѿ І҆оа́нна же Ма́рїѧ, и҆́же нарица́ютсѧ пе́ршие ᲃты́йнїи бра́тїѧ, сі́естъ: стры́йнїи роднїи братїѧ, и҆ сꙋ́тъ четве́ртагѡ сте́пене, и҆бѡ̀ четы́ри рожде́нїѧ сꙋ́тъ, и҆ сегѡ̀ ра́ди поѧ́тисѧ не мо́жета.

Сте́пень Четве́ртый не быва́етъ

Никто́же поѧ́ти себѣ̀ въ женꙋ̀ мо́жетъ пе́ршей стры́йнои свое́й сестры̀ дще́ръ, поне́же пѧ́тагѡ сꙋ́тъ ᲃте́пене, ѿ Геѡ́ргїѧ бо роди́сѧ Фома̀, ѿ І҆оа́нна же бра́та є҆гѡ̀ ро́днагѡ Ма́рїѧ: и҆же сꙋ́тъ четве́ртагѡ ᲃте́пене, ѿ Ма́рїи же И҆ри́на роди́сѧ, и҆ сі́ѧ є҆́стъ пѧ́тагѡ ᲃте́пене, и҆ сегѡ̀ ᲂу҆́бо ра́ди Ѳома̀ съ Ири́ною поѧ́тисѧ не мо́жета.

Сте́пень Пѧ́тый не быва́етъ

Никто́же мо́жетъ поѧ́ти ᲃебѣ̀ въ женꙋ̀ ᲃтры́йнꙋю ᲃестрꙋ̀, понеже сꙋ́тъ ше́стагѡ ᲃте́пене: Геꙍ́ргїй бо и҆ І҆ꙍа́нъ, и҆́же сꙋ́тъ ро́днїи бра́тїѧ, сꙋ́тъ два̀ Сте́пени, ᲃн҃о́ве же и҆́хъ Фѡма̀ и҆ Ма́рїа, нарица́емїи пе́ршїи ᲃтры́йнїи бра́тїѧ, сꙋ́тъ дрꙋ́гїе два̀ ᲃте́пени, и҆ ᲃе ᲃꙋ́тъ четы́ри Сте́пени: ᲃн҃о́ве же ѿ ᲃи́хъ ро́ждшїисѧ, сі́естъ; Діми́трїй, є҆го́же родѝ Фꙍма̀, и҆ А҆́нна и҆́же родѝ Ма́рїѧ ᲃъставаѧ́ютъ ше́стый ᲃте́пенъ, и҆ сегѡ̀ ра́ди поѧ́тисѧ немо́жета.

Сте́пень Ше́стый не быва́етъ

Никто́же мо́жетъ поѧ́ти себѣ̀ въ женꙋ̀ вто́рыѧ ᲃтры́йныѧ ᲃестры̀ дще́ръ, поне́же є҆́стъ є҆мꙋ̀ въ се́дмомъ ᲃте́пени. Бра́тїѧ бо ро́днїи въ вто́ромъ себѣ̀ сꙋ́тъ ᲃте́пени, рожде́нїи же ѿ ни́хъ, въ четве́ртомъ сꙋ́тъ ᲃте́пени: ѿ си́хъ рожде́нїй, сі́естъ: вто́рыи ᲃтры́йнїи бра́тїѧ, ше́стагѡ сꙋ́тъ ᲃте́пене, дще́ръ же є҆дина́гѡ вто́рагѡ стры́йнагѡ бра́та є҆́стъ ᲃе́дмагѡ Сте́пене, и҆ сегѡ̀ ра́ди Діми́трїй дще́ръ свое́ѧ вто́рыѧ ᲃтры́йныѧ ᲃестры̀ А҆́нны, поѧ́ти не мо́жетъ.

Сте́пень Се́мый не быва́етъ

Мо́жетъ кі́йждѡ поѧ́ти себѣ̀ въ женꙋ̀ тре́тїю ᲃтрыйнꙋю сестрꙋ̀, поне́же є҆́стъ въ ѡ҆́смомъ сте́пени поне́же вто́рыи стры́инїи бра́тїѧ въ ше́стомъ сꙋ́тъ сте́пени, тре́тїй же въ ѡ҆́смомъ, и҆ сегѡ̀ ра́ди могꙋ́тъ поѧ́ти себѣ̀ въ сꙋпрꙋ́жество.

Степень Ѻ҆́смый быва́етъ

Мо́жетъ кі́йждѡ поѧ́ти себѣ̀ въ женꙋ̀ внꙋ́чкꙋ вто́рой стры́йнои се́стры свое́и, поне́же подо́бнѣ є҆́стъ ѻ҆́смагѡ сте́пене, и҆бѡ̀ вто́рыи стрыйнїи бра́тїѧ, сꙋ́тъ ше́стагѡ сте́пене, внꙋ́чка же є҆стъ ѡ҆́смомъ сте́пени.

Степень Ѻ҆́смый быва́етъ

Довлѣ́ютъ сі́ѧ ѡ҆ сро́дствѣ є҆́же ѿ крвѐ.

Никто́же мо́жетъ поѧ́ти себѣ̀ въ женꙋ̀ ма́теръ и҆ дще́ръ. А҆́ще поѧ́лъ є́стъ женꙋ̀ имꙋ́щꙋю дще́ръ. По ᲃме́рти жены̀ ᲃвое́ѧ ма́тере тое́ѧ дще́ри, дще́ръ поѧ́ти не мо́жетъ, ни́же а҆́ще дще́ръ поѧ́тъ ᲂу҆ иѣ́кїѧ жены̀, по ᲃме́рти жены̀ сво́ѧ ма́теръ ᲂу҆ме́ршеѧ жены̀ свое́ѧ поѧ́ти въ женꙋ̀ себѣ̀ не мо́жетъ, поне́же ма́ти и҆ дще́ръ є҆дина́гѡ є҆́стъ Сте́пене, мꙋ́жъ же и҆ жена̀ не тво́рѧтъ Сте́пене.

Пе́рвый Сте́пенъ не быва́етъ

Никто́же мо́жетъ поѧ́ти въ женꙋ̀ себѣ̀ внꙋ́чкꙋ жены̀ свое́ѧ, сі́естъ ба́бкꙋ и҆ внꙋ́чкꙋ поне́же два̀ сте́пени сꙋ́тъ. Ма́ти бо и҆ дще́ръ, а҃ ᲃте́пень є҆́стъ, внꙋ́чка же, сі́естъ, дще́ръ дще́ре є҆ѧ̀, два̀ є҆́ста ᲃте́пене.

Вторы́й Сте́пенъ не быва́етъ

Никто́же мо́жетъ поѧ́ти себѣ̀ въ женꙋ̀ пра́внꙋчкꙋ жены̀ свое́ѧ, сі́естъ ба́бкꙋ, и҆ пра́внꙋчкꙋ, поне́же сꙋ́тъ г҃ сте́пени.

Тре́тїй Сте́пенъ не быва́етъ

Никто́же мо́жетъ поѧ́ти себѣ̀ въ женꙋ̀ прапра́внꙋчкꙋ жены̀ свое́ѧ, сі́естъ ба́бкꙋ, и҆ прапра́внꙋчкꙋ, поне́же сꙋ́тъ д҃ сте́пени.

Сте́пенъ Четве́ртый не быва́етъ

Никто́же мо́жетъ поѧ́ти ᲃебѣ̀ въ женꙋ̀ двѣ́ ᲃе́стры, поне́же вто́рагѡ сꙋ́тъ ᲃте́пене.

Вторы́й Сте́пенъ не быва́етъ

Никто́же мо́жетъ поѧ́ти себѣ̀ въ женꙋ̀ ᲃестре́ницꙋ жены̀ свое́ѧ: сі́естъ, те́ткꙋ и҆ ᲃестре́ницꙋ.

Тре́тїй Сте́пенъ не быва́етъ

Никто́же мо́жетъ поѧ́ти себѣ̀ въ женꙋ̀ вели́кꙋю те́ткꙋ и҆ пра́внꙋчкꙋ, поне́же є҆́стъ четве́тагѡ Сте́пене.

Четве́ртый Сте́пенъ не быва́етъ

Никто́же мо́жетъ поѧ́ти себѣ̀ въ женꙋ̀ двѣ ᲃтры́йные се́стры, поне́же четве́ртагѡ сꙋ́тъ Сте́пени.

Четве́ртый Сте́пенъ не быва́етъ

Никто́же мо́жетъ поѧ́ти себѣ̀ въ женꙋ̀ малꙋ́ю те́ткꙋ, и҆ внꙋ́чкꙋ ᲃтрыйнꙋю, сі́естъ сестры̀ стры́йнои жены̀ своѐѧ дще́ръ, поне́же є҆́стъ пѧ́тагѡ сте́пене.

Пѧ́тый Сте́пенъ не быва́етъ

Никто́же мо́жетъ поѧ́ти себѣ̀ въ женꙋ̀ дво́хъ вто́рыхъ ᲃтры́йныхъ ᲃе́стръ, поне́же сꙋ́тъ ше́стагѡ ᲃте́пене.

Ше́стый Сте́пенъ не быва́етъ

Нове́лла Четве́ртыѧ Кни́ги Константи́на Гарменопꙋ́ла, Ти́тла, Ше́стаѧ.

Запреща́етъ Це́рковъ ᲃт҃аѧ: є҆дино́мꙋ мꙋ́жꙋ поѧ́ти въ женꙋ̀ двѣ̀ вто́рые ᲃтры́йные ᲃе́стры, небо̀ є҆́стъ ꙗ҆́коже нѣ́цїи мнѧ́тъ бы́ти се́дмый ᲃте́пень ро́дства, и҆лѝ ᲃва́тства, но ше́стый є҆́стъ, и҆бо̀ мꙋ́жъ и҆ жена̀ є҆ди́нъ сте́пень съставлѧ́ют. и҆ сі́е въпроше́нѡ є҆́стъ, и҆ и҆ꙁда́ный є҆́стъ За́конъ Е҆мманꙋи́ла Царѧ̀, и҆ ѡ҆прѣделѧ́етъ николи́же семꙋ̀ бы́ти.

Е҆щѐ и҆на́кѡ.

Пе́тръ поѧ́лъ є҆́стъ себѣ̀ въ же́ны двѣ̀ вто́рые стры́йные се́стры, вто́рый ᲂу҆́бѡ Бра́къ є҆́стъ зѣ́лѡ беꙁмѣ́стный, и҆ всѧ́кѡ беꙁꙁако́нный, и҆́же и҆ раꙁлꙋчѝ и҆ раꙁдрѣшѝ: Ка́кѡ бо мо́жетъ бы́вый и҆́ногда мꙋ́жъ є҆ди́ныѧ вто́рыѧ стры́йныѧ ᲃестры̀, и҆ шва́геръ вто́рыѧ, да нн҃ѣ бꙋ́детъ мꙋ́жъ є҆ѧ̀, повнегда̀ ѿ пе́рвыѧ раꙁдреши́тсѧ и҆лѝ ᲃме́ртїю, и҆лѝ раꙁдреше́ниемъ Церко́внымъ.

Ѿ раꙁсꙋжде́нїѧ ᲃт҃ѣ́шагѡ Патрїа́рха А҆нтіꙍхі́йскагѡ Гд҃на Валсамо́на, а҆́ще мо́жетъ є҆ди́нъ поѧ́ти себѣ̀ въ женꙋ̀ двѣ̀ вто́рые стры́йные се́стры, на концѝ, гл҃ет.

Вѣ́мъ За́коннѡ и҆ пра́веднѡ ᲃи́лою Церко́вною запрѣще́ннѡ бы́ти, є҆дино́мꙋ мꙋ́жꙋ поѧ́ти ᲃебѣ̀ въ же́ны двѣ̀ вто́рые стры́йные се́стры и҆ съпроти́внѡ. А҆́ще же что̀ си́цево приклю́читсѧ бы́ти, кро́мѣ всѧ́кагѡ закоснѣ́нїѧ да раꙁлꙋча́тсѧ и҆ Е҆піти́мїею да и҆спра́вѧтсѧ.

Е҆ди́нъ мꙋ́жъ поѧ́ти себѣ въ женꙋ̀ мо́жетъ дще́ръ вто́рыѧ стры́йныѧ ᲃестры̀ жены̀ свое́ѧ, поне́же є҆́стъ ᲃе́дмагѡ ᲃте́пене.

Се́дмый Сте́пенъ быва́етъ

Поне́же ᲂу҆́бѡ предвъспомѧнꙋ́хомъ трѝ те́тки вели́каѧ же те́тка гл҃етсѧ сестра̀ дѣ́днаѧ, и҆лѝ ба́бнаѧ. мала́ѧ ᲂу҆́бѡ те́тка, гл҃етсѧ стры́йнаѧ пе́ршаѧ сестра̀ ѿчѧ, и҆лѝ мтр҃нѧѧ.

Е҆щѐ и҆на́кѡ.

Стры́й тро́йчнѡ прїе́млетсѧ, и҆лѝ про́стѣ гл҃етсѧ ᲃтры́й, бра́тъ ѿчїй, и҆лѝ мтр҃нїй, и҆́же є҆́стъ тре́тїѧгѡ ᲃте́пене къ свое́мꙋ брата́ннꙋ, и҆лѝ вели́кїй стры́й, и҆́же є҆́стъ бра́тъ дѣ́довъ, и҆лѝ ба́бинъ, и҆́же є҆́стъ четве́ртагѡ ᲃте́пене къ ᲃн҃ꙋ внꙋ́кꙋ брата́нка свое́гѡ, и҆лѝ малы́й стры́й, ꙗ҆́коже є҆́стъ пе́ршїй стрые́чный бра́тъ ѿца̀ и҆лѝ мтр҃е мое́ѧ, и҆ се́й є҆́стъ пѧ́тагѡ сте́пене къ мнѣ̀.

Ѿц҃ъ и҆ ᲃн҃ъ не пое́млютъ въ Бра́къ мт҃ръ и҆ дще́ръ поне́же ᲃꙋ́тъ два̀ ᲃте́пени.

Вто́рый Сте́пень не быва́ет

Ѿц҃ъ и҆ ᲃн҃ъ не пое́млютъ въ Бра́къ ба́бкꙋ и҆ внꙋ́чкꙋ є҆ѧ̀ поне́же сꙋ́тъ тре́тїѧгѡ ᲃте́пене.

Тре́тїй Сте́пень не быва́ет

Ѿц҃ъ и҆ ᲃн҃ъ не пое́млютъ себѣ̀ въ Бра́къ ба́бкꙋ и҆ пра́внꙋчкꙋ є҆ѧ̀, поне́же сꙋ́тъ четве́ртагѡ ᲃте́пене.

Четве́ртый Сте́пень не быва́ет

Ѿц҃ъ и҆ ᲃн҃ъ не пое́млютъ праба́бкꙋ и҆ прапра́внꙋчкꙋ, поне́же сꙋ́тъ пѧ́тагѡ ᲃте́пене.

Пѧ́тый Сте́пень не быва́ет

Ѿц҃ъ и҆ ᲃн҃ъ двѣ̀ ро́дны се́стры не пое́млета себѣ̀ въ бра́къ.

Тре́тїй Сте́пень не быва́ет

Ѿц҃ъ и҆ ᲃн҃ъ не мо́жета те́ткꙋ про́стꙋю и҆ внꙋ́чкꙋ є҆ѧ̀ поѧ́ти.

Четве́ртый Сте́пень не быва́ет

Ѿц҃ъ и҆ ᲃн҃ъ не мо́жета поѧ́ти себѣ̀ въ Бра́къ двѣ пе́ршїе ᲃтры́йные ᲃе́стры.

Пѧ́тый Сте́пень не быва́ет

Ѿц҃ъ и҆ ᲃн҃ъ поѧ́ти себѣ̀ въ Бра́къ мо́жета ме́ншꙋю те́ткꙋ и҆ внꙋ́чкꙋ.

Ше́стый Сте́пень быва́ет

Ѿц҃ъ и҆ ᲃн҃ъ не пое́млета ᲃебѣ̀ въ бра́къ двѣ̀ вто́рые се́стры ᲃтры́йные.

Се́дмый Сте́пень не быва́ет

Вонтпли́вость. Въпро́съ.

Чесо̀ ра́ди прости́хомъ ѿцꙋ и҆ ᲃн҃ови поѧ́ти въ бра́къ малꙋ́ю те́ткꙋ и҆ внꙋ́чкꙋ, двѣ́ же вто́рые ᲃтры́йные ᲃе́стры не проща́емъ.

Ѿвѣ́тъ.

Поне́же ѿц҃ъ и҆ ᲃн҃ъ поемлю́ще въ бра́къ малꙋ́ю те́ткꙋ и҆ внꙋ́чкꙋ, сꙋ́тъ є҆щѐ въмѣ́стѣ ѿца и҆ ᲃн҃а дво́хъ же вто́рыхъ ᲃтры́йныхъ се́стръ поѧ́тїе тво́рѧтъ ѿца и҆ ᲃн҃а швагра́ми, и҆ въ пе́рвомъ ᲂу҆́бѡ не слива́ютсѧ и҆мена̀, а҆ и҆де́же и҆мена̀ слива́ютсѧ, бра́къ не съставлѧ́етсѧ.

Ѿц҃ъ и҆ ᲃн҃ъ не пое́млютъ вели́кꙋю те́ткꙋ и҆ внꙋ́чкꙋ.

Пѧ́тый Сте́пень не быва́ет

Дѣ́дъ и҆ внꙋ́къ не мо́жета поѧ́ти себѣ̀ въ Бра́къ мт҃ръ и҆ дще́ръ є҆ѧ̀.

Третїй Сте́пень не быва́ет

Дѣ́дъ и҆ внꙋ́къ не пое́млета въ Бра́къ ба́бкꙋ, и҆ внꙋ́чкꙋ.

Четве́ртый Сте́пень не быва́ет

Дѣ́дъ и҆ внꙋ́къ не мо́жета поѧ́ти въ Бра́къ пра́бабкꙋ и҆ правнꙋ́чкꙋ є҆ѧ̀.

Пѧ́тый Сте́пень не быва́ет

Ни́же дѣ́дъ и҆ внꙋ́къ, мо́жета двѣ̀ се́стры поѧ́ти себѣ̀ въ Бра́къ.

Четве́ртый Сте́пень не быва́ет

Ни́же дѣ́дъ и҆ внꙋ́къ те́ткꙋ про́стꙋю и҆ сестрѣ́ницꙋ є҆ѧ̀ въ бра́къ себѣ̀ поѧ́ти могꙋ́тъ

Пѧ́тый Сте́пень не быва́ет

Дѣ́дъ ᲂу҆́бѡ и҆ внꙋ̀къ пое́млютъ себѣ̀ въ Бра́къ вели́кꙋю те́ткꙋ и҆ внꙋ́чкꙋ є҆ѧ̀.

Ше́стый Сте́пень быва́ет

Дѣ́дъ и҆ внꙋ́къ пое́млютъ малꙋ́ю те́ткꙋ и҆ внꙋ́чкꙋ.

Се́дмый Сте́пень быва́ет

Дѣ́дъ и҆ внꙋ́къ не пое́млютъ дво́хъ пе́рвыхъ стры́йныхъ се́стръ въ Бра́къ себѣ̀.

Ше́стый Сте́пень не быва́етъ да не бꙋ́детъ себѣ̀ шва́гры

Пра́дѣдъ и҆ пра́внꙋкъ, двѣ̀ пе́рвые стры́йные се́стры не пое́млютъ, да и҆ ты́е не бꙋ́дꙋтъ себѣ̀ шва́гры.

Се́дмый Сте́пень не быва́ет

Прадѣдъ и҆ пра́внꙋкъ пое́млютъ те́ткꙋ про́стꙋю и҆ внꙋ́чкꙋ є҆ѧ̀.

Ше́стый Сте́пень быва́ет

Два бра́та двѣ се́стры не пое́млютъ

Четве́ртый Сте́пень не быва́ет

Два бра́та про́стꙋю те́ткꙋ ѝ сестреницꙋ не пое́млютъ.

Пѧ́тый Сте́пень не быва́ет

Два бра́та, двѣ пе́ршїе стры́йные се́стры не пое́млета.

Ше́стый Сте́пень не быва́ет

Два бра́та малꙋ́ю те́ткꙋ, и҆ сестре́ницꙋ пое́млета.

Се́дмый Сте́пень быва́ет

Два бра́та двѣ вто́рые, стры́йные се́стры пое́млета.

Ѻ҆́смый Сте́пень быва́ет

Два бра́та ма́теръ и҆ дще́ръ не поемлета.

Сте́пенъ г҃ не быва́етъ

Два бра́та не пое́млета ба́бꙋ и҆ внꙋ́чкꙋ.

Сте́пенъ Четве́ртый не быва́етъ

Два бра́та не пое́млета пра́бабꙋ и҆ пра́внꙋчкꙋ.

Сте́пенъ Пѧ́тый не быва́етъ

Два бра́та не пое́млета вели́кꙋю те́ткꙋ и҆ внꙋ́чкꙋ.

Сте́пенъ Ше́стый не быва́етъ

Стры́й и҆ брата́ничъ пое́млета те́ткꙋ и҆ сестре́ницꙋ.

Сте́пенъ Ше́стый быва́етъ

А҆́ще же стры́й пое́млетъ сестре́ницꙋ, брата́ничъ не пое́млетъ те́ткꙋ сли́тїѧ ра́ди и҆ме́нъ.

Сте́пенъ Ше́стый не быва́етъ

Стры́й и҆ брата́ничъ, двѣ̀ пе́рвые стры́йные се́стры кро́мѣ всѧ́кагѡ препѧ́тїѧ пое́млета.

Сте́пенъ Се́дмый быва́етъ

Сїѧ довлѣ́итъ ѡ҆ съро́дствѣ є҆́же ѡ҆ дво́хъ ро́дствахъ.

Рцѣ́мъ ᲂу҆́бѡ ѡ҆ ѻ҆́номъ ᲃро́дствѣ є҆́же съставлѧ́етсѧ ѿ тре́хъ ро́дствахъ. сі́е съставлѧ́етсѧ ѿ тре́хъ ро́дствахъ, ꙗ҆́же сꙋ́тъ сі́ѧ, ꙗ҆́коже въ при́тчи, и҆́нъ ро́дъ є҆́смъ а҆́ꙁъ, и҆ и҆́нъ моѧ̀ жена̀, и҆ бра́тъ єѧ̀, и҆ и҆́нъ жена̀ бра́та жены̀ мое́ѧ. А҆́ще ᲂу҆́бѡ ᲂу҆мре́тъ моѧ̀ жена̀, могꙋ̀ поѧ́ти себѣ̀ въ женꙋ̀ сестрꙋ̀ жены̀ бра́та жены̀ мое́ѧ. сі́естъ: Пе́тръ поѧ́лъ є҆́стъ себѣ̀ Ма́рїю, и҆мѣ́вшꙋю бра́та Геꙍ́ргїѧ, и҆́же нарица́етсѧ шва́геръ петро́въ, се́й Геꙍ́ргїй и҆мѣ́лъ є҆́стъ женꙋ̀ Ѳеодѡ́рꙋ, и҆мѣ́ющꙋю сестрꙋ̀ А҆́ннꙋ, и҆ се́ѧ є҆́стъ сва́ха Геꙍ́ргїева, и҆́же въ шва́геръ Петро́въ. Ꙋ҆ме́ршей же Ма́рїи женѣ̀ Петро́вой, Пе́тръ поѧ́ти себѣ̀ въ женꙋ̀ ѡ҆́нꙋю А҆́ннꙋ мо́жетъ.

Четве́ртый Сте́пень быва́етъ

Женꙋ̀ же шва́гра мое́гѡ не могꙋ̀ а҆́ꙁъ поѧ́ти, но бра́тъ мо́й ро́дный пое́млетъ ю҆̀.

Вто́рый Сте́пень не быва́етъ

Но пое́млетъ ю҆̀ мо́й ро́дный бра́тъ.

Четве́ртый Сте́пень быва́етъ

Женꙋ̀ па́серба мое́гѡ а҆́ꙁъ ᲂу҆́бѡ не поемлю̀.

Пе́рвый Сте́пень не быва́етъ

Бра́тъ моѝ ро́дный пое́млетъ женꙋ̀ па́серба мое́гѡ.

Трети́й Сте́пень быва́етъ

Ма́чеха не мо́жетъ поѧ́ти себѣ̀ въ мꙋ́жа па́сербици свое́й бы́вшагѡ мꙋ́жа.

Пе́рвый Сте́пень не быва́етъ

Ꙋ҆ме́ршей мое́й женѣ̀ могꙋ̀ поѧ́ти ᲃебѐ въ женꙋ̀ бы́вшꙋю и҆́ногда женꙋ̀ стры́ѧ жены̀ мое́ѧ ᲂу҆ме́ршеѧ.

Трети́й Сте́пень быва́етъ

Ꙋ҆́мершей мое́й женѣ̀ могꙋ̀ поѧ́ти въ женꙋ̀ себѣ̀ па́сербицꙋ шва́гра мое́гѡ.

Трети́й Сте́пень быва́етъ

И҆ма́мъ сестры̀ мое́ѧ мꙋ́жа, мнѣ́же шва́гра, и҆ поемлю̀ въ женꙋ̀ себѣ̀ бра́та є҆гѡ̀ женꙋ̀.

Четве́ртый Сте́пень быва́етъ

Мꙋ́жъ дще́ре мое́ѧ и҆мѣ́лъ бѧ́ше ᲂу҆ бра́та свое́гѡ женꙋ̀, сі́естъ братовꙋ́ю: сі́юже а҆́ꙁъ въ женꙋ̀ себѣ̀ поѧ́ти не могꙋ̀.

Трети́й Сте́пень не быва́етъ

Сестрꙋ̀ же ро́днꙋю жены̀ бра́та зѧ́тѧ мое́гѡ кро́мѣ всѧ́кагѡ препѧ́тїѧ поѧ́ти могꙋ̀.

Пѧ́тый Сте́пень быва́етъ

Шва́геръ мо́й є҆го́же а҆́ꙁъ ᲃестрꙋ̀ поѧ́хъ, мо́жетъ поѧ́ти Бра́та мое́гѡ ро́днагѡ жены̀ ро́днꙋю ᲃестрꙋ̀.

Ше́стый Сте́пень быва́етъ

Два̀ шва́гры двѣ̀ ᲃе́стры ро́дные поѧ́ти себѣ̀ въ же́ны могꙋ́тъ.

Четве́ртый Сте́пень быва́етъ

Двѐ шва́гры поѧ́ти себѣ̀ въ же́ны могꙋ́тъ двѐ пе́рвые ᲃтры́йные ᲃе́стры.

Ше́стый Сте́пень быва́етъ

Дще́ръ І҆ꙍа́нова сестре́ница пе́рвой жены̀ є҆гѡ̀ за два̀ бра́та ро́днаѧ въ бра́къ и҆де́та.

Ше́стый Сте́пень быва́етъ

Стрый и҆ мꙋ́жъ брата́ницы є҆гѡ̀, двѣ̀ се́стры поѧ́ти мо́жета.

Пѧ́тый Сте́пень быва́етъ

Сі́ѧ довлѣ́ютъ ѡ҆ тре́хъ Ро́дствахъ.

Ст҃о́е Креще́нїе є҆́стъ Бжⷭ҇твенное рожде́нїе, и҆ дш҃ѝ ѡбновле́нїе. и҆́же ᲂу҆́бѡ а҆́ще Креще́нъ бꙋ́детъ въ и҆мѧ̀ Ѿца̀, и҆ Сн҃а, и҆ ᲃт҃а́гѡ Дх҃а, въ трѝ погрꙋже́нїѧ ꙗ҆́коже ᲃт҃ы́е А҆́пⷭ҇ли наꙋча́ютъ, ѡ҆чище́нъ всѣ́хъ грѣхѡ́въ, и҆ пло́тскихъ по́мыслѡвъ, и҆сходѧ̀ ѿ ᲃп҃си́телныѧ ба́ни, а҆́бїе въспрїемлемъ ѿ є҆ди́нѧгѡ вѣ́рнагѡ человѣ́ка, и҆́же до́лженъ є҆́стъ къ благоче́стїю наставлѧ́ти є҆гѡ̀, и҆ є҆́стъ свѣди́телъ Креще́нїѧ є҆гѡ̀. И҆ сицевый человѣ́къ нарица́етсѧ въспрїе́мникъ, и҆ ѿц҃ъ дх҃о́вный Крще́нномꙋ, и҆ бо́лшїй є҆́стъ не́жели ѿц҃ъ роди́вый є҆гѡ̀ по пло́ти. ѡ҆́въ ᲂу҆́бѡ къ пло́тскимъ слꙋ́житъ є҆мꙋ̀: се́йже къ дхо́внымъ. посредствꙋ́ющꙋ же дх҃ови ст҃о́мꙋ, ѿц҃ъ дх҃о́вный креще́ннагѡ быва́етъ бра́тъ пло́тскомꙋ є҆гѡ̀ ѿцꙋ̀, и҆ сꙋ́тъ съ ни́мъ въ вто́ромъ сте́пени, съ ᲃн҃омъ же є҆го́же въспрїѧ́лъ є҆́стъ, въ пе́рвомъ сте́пени є҆́стъ, и҆ є҆ли́кѡ и҆́хъ ѿ негѡ̀ въспрїемле́ми сꙋ́тъ, въ пе́рвомъ ᲃте́пени чи́слѧтсѧ съ ни́мъ, є҆ли́ци же ᲂу҆́бѡ ѿ негѡ̀ не сꙋ́тъ въспрїемле́мы, въ тре́темъ сте́пени съ ни́мъ, ꙗ҆́коже ᲃн҃ове бра́та є҆гѡ̀. И҆ ᲃн҃о́ве въгпрїе́мника съ тѣ́ми и҆́же сꙋ́тъ въспрїемле́ми ѿ не́гѡ, сꙋ́тъ въ вто́ромъ ᲃте́пени дрꙋ́гъ къ дрꙋ́гꙋ: поне́же є҆ди́нъ же ѿц҃ъ родѝ и҆́хъ, си́хъ ᲂу҆́бѡ тѣле́снѣ,ѡ҆́вѣхъ же дх҃о́внѣ. є҆ли́цѣхъ же не въспрїѧ́тъ, сꙋ́тъ въ четве́ртомъ ᲃте́пени къ ѡ҆́нѣхъ, поне́же ᲃꙋ́тъ ᲃн҃о́ве дво́хъ бра́тїй. ᲃи́цевїи ᲂу҆́бѡ ниꙁходѧ́щїи запрѣща́ютсѧ да́же до ᲃе́дмагѡ ᲃте́пене, и҆ въ ѡ҆́смомъ раꙁдрѣша́ютсѧ.

А҆́ще и҆ нѣ́цїи и҆на́кѡ раꙁꙋмѣ́ютъ, пра́вила ра́ди є҆́же ᲃъдержи́тсѧ въ ше́стой Ѳе́мѣ, десѧ́тои главы̀, пѧ́тагѡ ти́тла, Кни́ꙁѣ ки҃, Василико́нъ, є҆́же нѣ́кїѧ то́чїю раꙁдѣлѧ́етъ и҆мена̀: си́це толкꙋ́ѧ: Бо́лшее є҆́стъ дх҃о́вное не́жели пло́тское съро́дство, сегѡ̀ ра́ди никто́же мо́жетъ поѧ́ти себѣ̀ въ женꙋ̀ сі́ю ю҆́же ѿ ᲃт҃а́гѡ Креще́нїѧ въспрїѧ́тъ, ни́же мт҃ръ є҆ѧ̀ и҆лѝ дще́ръ, ни́же ᲃн҃ъ є҆гѡ̀. ᲃи́це Канѡ́нъ: ᲃегѡ̀ ра́ди да́же до си́хъ то́чїю и҆ме́нъ заключа́ютъ, сі́е дх҃о́вное ᲃъро́дство нѣ́цїи, къ чесо́мꙋ ѿвѣща́ютъ пе́рвїи, ꙗ҆́кѡ си́хъ то́чїю за́конъ чи́слитъ, не да ѿлꙋ́читъ про́чїихъ ниꙁходѧ́щихъ да́же до сте́пене ᲃедма́гѡ, но да пока́жетъ сі́е ᲃъро́дсто не протѧꙁа́тъ си́цеваѧ словеса̀, ᲃегѡ̀ проше́нѡ є҆́стъ ко́ждѡ хотѧ́щомꙋ поѧ́ти себѣ̀ въ женꙋ̀ кро́мѣ всѧ́кагѡ препѧ́тїѧ сестрꙋ̀ кꙋ́ма свое́гѡ.

И҆́накѡ къ семꙋ̀ ѡ҆ ᲃт҃о́мъ Креще́нїи

Соро́дства протѧꙁа́ющаѧсѧ ѿ ᲃт҃а́гѡ Креще́нїѧ ѿ ᲂу҆сыновле́нїѧ, сꙋ́тъ всѧ̀ ра́вна, и҆ ни въ чесо́мъ ра́ꙁнъствїе и҆мꙋ́тъ. ѡ҆бо́е бо въ ѻ҆́смомъ ᲃте́пени раꙁреша́етасѧ, ꙗ҆́коже и҆ ѡ҆́наѧ ꙗ҆́де сꙋ́тъ ѿ крвѐ.

Сте́пени же сматрѧ́юще ѡ҆брѣра́етсѧ нѣ́кое неꙋдо́бство: є҆́же и҆столкова́ти и҆ и҆ꙁъѧсни́ти подоба́етъ. Въ соро́дствѣ ѿ крвѐ бо ѿц҃ъ къ всѣ́мъ бра́тїѧмъ, сі́естъ къ свои́мъ си ᲃн҃омъ, є҆́стъ пе́рвагѡ сте́пене. Дх҃о́вный же ѿц҃ъ, къ сн҃ови є҆го́же въспрїѧ́тъ ѿ ᲃт҃ы́ѧ кꙋ́пели, и҆лѝ къ ѡ҆́номꙋ є҆го́же въ сн҃а мѣ́сто прїѧ́тъ, є҆́стъ пе́рвагѡ ᲃте́пене, къ бра́тїѧмъ же є҆гѡ̀, є҆́стъ тре́тїѧгѡ, и҆бѡ̀ не сꙋ́тъ є҆мꙋ̀ и҆ ті́и ча́да, и҆бѡ̀ сі́и и҆́мꙋтъ и҆́нагѡ Ѿца̀ ро́ждшагѡ и҆́хъ.

Дх҃о́вный ᲂу҆́бѡ ѿц҃ъ къ немꙋ̀ же въспрїѧ́тъ є҆́стъ пе́рвагѡ ᲃте́пене: ᲃн҃ъ же дх҃о́вный къ пло́тскимъ свои́мъ бра́тїѧмъ, є҆́стъ, вто́рагѡ ᲃте́пене: и҆ си́це дх҃о́вный ѿц҃ъ (ꙗ҆́коже рече́сѧ) къ пло́тскимъ бра́тїѧмъ ᲃн҃а свое́гѡ дх҃о́внагѡ є҆́стъ, тре́тїѧгѡ ᲃте́пенъ, къ ѿцꙋ́же пло́тскомꙋ ᲃн҃а ᲃвое́гѡ дх҃овнагѡ є҆́стъ вто́рагѡ ᲃте́пене, поне́же въ бра́та ємꙋ̀ вмѣнѧ́етсѧ. ᲃн҃ъ же къ ѡ҆бо́ихъ є҆́стъ пе́рвагѡ ᲃте́пене. Пло́тстїи же ᲃн҃о́ве Ѿца̀ дх҃о́внагѡ, къ дх҃о́вномꙋ свое́мꙋ бра́тꙋ, сꙋ́тъ вто́рагѡ ᲃте́пене: къ ѿцꙋ̀ же є҆гѡ̀ тре́тїѧгѡ ᲃте́пене: сего́же ра́ди непроще́ннѡ є҆́стъ сы́нови въспрїе́млющагѡ, поѧ́ти въ женꙋ̀ сестрꙋ̀ пло́тскꙋю въспрїемлемагѡ, поне́же є҆́стъ четве́ртагѡ ᲃте́пене, ни́же сестрꙋ̀ бра́та въспрїемлющагѡ, поне́же въмѣне́но бы было̀ ꙗ҆́кѡ пое́млетъ внꙋ́чкꙋ свое́гѡ. но ᲂу҆́бѡ сі́е быва́етъ по все́й Е҆па́рхїи Кѡнстантинопо́лской, є҆́стъ бо Пѧ́тагѡ ᲃте́пене, въ Болга́рской же землѝ съдержи́тсѧ.

Пра́вило нг҃. Ст҃гѡ Вселе́нскагѡ ᲃъбо́ра ѕ҃-гѡ.

Поне́же бо́лшее є҆́стъ дх҃о́вное соро́дство, не́жели совокꙋпле́нїе пло́тское, ᲂу҆видѣ́хѡмъ ᲂу҆́бѡ ꙗ҆́кѡ въ нѣ́кїихъ мѣ́стахъ, нѣ́цїи и҆́же воспрїѧ́ша ᲃн҃ы ѿ ᲃт҃а́гѡ и҆ сп҃си́телнагѡ Креще́нїѧ, съчетава́ютсѧ въ бра́къ съ мт҃рѧми и҆́хъ, ᲂу҆жѐ ѡ҆вдовѣ́вшыми, повелѣва́емъ данѐ ктомꙋ̀ си́цево что̀ быва́етъ.

А҆́щеже кото́рїи по се́мъ Пра́вилѣ ѡ҆бличени бꙋ́дꙋтъ сі́е твори́ти, въ пе́рвыхъ ᲂу҆́бѡ си́цевїи да раꙁлꙋ́чатсѧ ѿ си́цевагѡ ᲃꙋпрꙋ́жества, по се́мъ подле́жатъ Е҆піти́мїи блꙋ́дникѡвъ.

Дѣ́йство ᲃъбо́рное.

Знамена́й: ꙗ҆́кѡ въ сокро́вищи ᲃт҃о́й Книгохрани́телници напи́сано бѣ̀ начерта́нїе си́цево ѿ ᲃло́ва до ᲃло́ва. Мцⷭ҇а Ма́ѧ зі҃. днѧ Лꙋны̀: И҆нді́кта єі҃ Сѣдѧ́щꙋ на пе́рвомъ мѣ́стѣ Патрїа́рхꙋ Нікола́ю ст҃ѣ́йшомꙋ и҆ вселе́нскомꙋ въ Ѳомаи́тѣ, съ сидѧ́щымъ Сенато́рѡмъ благоро́днымъ, и҆ Гражда́нскимъ ᲃꙋдїѧ́мъ, И҆мⷬ҇къ: и҆ благочести́вымъ Митрополи́томъ И҆мⷬ҇къ: чтⷭ҇ный и҆ пречтⷭ҇ный Григо́рїй Ѯерꙋ́съ принесѐ нѣ́кое писа́нїе, въ нн҃ѣшнїй Собѡ́ръ, сі́естъ, въ себѣ̀ и҆мꙋ́щее. Ма́рїѧ и҆мѣ́вши ᲃн҃а нарече́ннагѡ Кѡнстанти́на, воспрїѧ́ла є҆́стъ ѿ ᲃт҃а́гѡ Креще́нїѧ И҆ри́нꙋ. Кѡнстанти́нъ, Ѳеѡ́дора, И҆ри́на же родѝ Ѳеѡдо́рꙋ. и҆ по се́мъ Ѳеѡдо́ра родѝ А҆́ннꙋ.

Ѳеѡ́доръ же хотѧ̀ за́коннымъ сꙋпрꙋ́жествомъ съпрѧщи́сѧ съ А҆́нною, вопроша́етъ: а҆́ще досто́итъ сі́е твори́ти. Проча́но же є҆́стъ пре́дъ ᲃобо́ромъ, нг҃ Пра́виломъ, и҆́же въ Трꙋ́ллѣ бы́вшагѡ ᲃт҃агѡ и҆ Вселе́нскагѡ ᲃобо́ра Ше́стагѡ, и҆ Ше́стое ѳе́ма десѧ́тои гла́вы, Пѧ́тои Ти́тлы, Кни́ги ки҃, є҆́же си́цесѧ и҆́матъ ча́сти. И҆́же кото́рꙋю въспрі́йметъ ѿ ᲃт҃агѡ Креще́нїѧ, не мо́жетъ ю҆̀ по се́мъ поѧ́ти себѣ̀ въ женꙋ̀, поне́же ᲂу҆жѐ є҆́стъ є҆мꙋ̀ дще́ръ: ни́же мт҃ръ є҆ѧ̀, и҆лѝ дще́ръ, ни́же ᲃн҃ъ є҆гѡ̀. Ничто́же бо мо́жетъ и҆́ное дх҃о́вное раꙁъположе́нїе (и҆лѝ завѣща́нїе) и҆ пра́ведное препѧ́тїе ᲃꙋпрꙋ́жества, ꙗ҆́коже си́цевый ᲃою́зъ. и҆́мже посредствꙋ́ющꙋ Бг҃ꙋ дш҃ѧ̀ и҆́хъ съпрѧга́ютсѧ. и҆ и҆ꙁрече́ннѡ є҆́стъ рече́нное ᲃꙋпрꙋ́жество не проще́ннѡ бы́ти, поне́же ѿно́ситсѧ къ пѧ́тый ᲃте́пенъ. и҆ по ѡ҆бдержа́нїю сегѡ̀ Пра́вила дх҃о́вное соро́дство превосхо́дитъ, є҆стестве́ннагѡ, сі́естъ тѣле́снагѡ. Сі́е та́кожде да содержи́мо бꙋ́детъ. и҆ въ ᲂу҆сн҃овле́нїи раꙁсꙋжде́нѡ є҆́стъ: поне́же съро́дство є҆́же ѿ не́гѡ є҆́стъ ѿ Бг҃а и҆ ѿ ѡ҆сщ҃е́нїѧ Бжⷭ҇тве́нныхъ моли́твъ. (и҆лѝ но́во ᲃъставле́нномꙋ Пра́вилꙋ, и҆лѝ за́конꙋ) ᲃвѣтлѣ́йшагѡ Царѧ̀, Гд҃на Два̀ премꙋ́драгѡ.

Сте́пенъ Пѧ́тый не бывает

Въ четве́ртыѧ Кни́ги Кѡнстанті́на Гарменопꙋ́ла Ти́тла ше́стаѧ.

Въ съро́дствѣ є҆́же ᲃъставлѧ́етсѧ ѿ ᲃт҃а́гѡ Креще́нїѧ и҆ ѿ ᲂу҆сыновле́нїѧ, то́йжде ᲃте́пень вꙁыска́ти и҆ма́мы, є҆го́же вꙁыскꙋ́емъ и҆ въ соро́дствѣ и҆́же ѿ крвѐ Гл҃етъ бо нг҃ Канѡ́нъ ᲃт҃а́гѡ ᲃъбо́рꙋ и҆́же въ Трꙋ́ллѣ, бо́лшее бы́ти дх҃овное ᲃъро́дство, не́жели съвокꙋпле́нїе пло́тское.

А҆́ще же за́конъ да́же до тре́тїѧгѡ и҆лѝ четве́ртагѡ ᲃте́пене сі́е запрѣти́лъ є҆́стъ. сі́естъ, да никто́же пое́млетъ ни́же ᲃн҃а, ни́же ма́теръ, и҆лѝ сестрꙋ̀ тогѡ̀ є҆го́же въспрїѧ́лъ є҆́стъ, и҆лѝ въ ᲃн҃а мѣ́сто прїѧ́лъ є҆́стъ: гл҃етъ бо, и҆́же а҆́ще когѡ̀ въспрїе́млетъ ѿ Ст҃гѡ Кр҃еще́нїѧ: и҆ проч.:

Ѿ Въпро́сѡвъ и҆ Ѿвѣ́тѡвъ Ст҃ѣйшагѡ Патрїа́рхи А҆леѯандѣ́йскагѡ Гд҃на Ма́рка, и҆ А҆нтіꙍхі́йскагѡ Гд҃на Ѳео́дѡра Валсамо́на, А҆леѯандрѣ́йскомꙋ въпроша́ющꙋ, и҆ А҆нт́ꙍхі́йскомꙋ ѿвѣща́ющꙋ.

Въпро́съ мѕ҃.

Съро́дство Кмо́трѡвъ да́же до кое́гѡ сте́пене препина́етсѧ.

Ѿтвѣ́тъ.

Пѧтдесѧ́тъ тре́тїй Канѡ́нъ ᲃт҃а́гѡ Вселе́нскагѡ Събо́ра ше́стагѡ, бы́вшагѡ въ Вели́кой Пола́тѣ Трꙋ́ллѣ, запрѣща́етъ въспрїемникѡмъ и҆лѝ кмо́трѡмъ съчета́тисѧ въ ᲃꙋпрꙋ́жество съ ма́тірѧми ᲃвои́хъ сыно́въ, и҆́хъ же въспрїѧ́ша ѿ ᲃт҃а́гѡ Креще́нїѧ, и҆ по раꙁлꙋче́нїи ѿ си́цевагѡ зла̀, вълага́етъ и҆́хъ въ є҆піти́мїи блꙋ́дникѡвъ. Послѣ́днее же Ѳе́ма десѧ́тыѧ глави́ꙁны пѧ́тои Ти́тлы, Кни́ги ки҃ Василико́нъ, сі́естъ: Ца́рскихъ, бо́лшꙋю и҆стѧ́ꙁꙋетъ є҆піти́мїю. Поне́же ᲂу҆́бѡ и҆ пре́дъ рече́нный Канѡ́нъ, и҆ За́конъ приве́денный и҆ꙁвѣствꙋ́етъ бо́лшее бы́ти дх҃о́вное ᲃъро́дство не́жели теле́сное съвокꙋпле́нїе: сегѡ̀ ра́ди сътворе́ннѡ є҆́стъ писа́нїе ᲃъбо́рное въ вре́мѧ ᲃт҃ѣ́йшагѡ Патрїа́рхи Гд҃нѧ Нікола́ѧ, Мцⷭ҇а Ма́ѧ, И҆нді́кта єі҃. на Вопро́съ ѡ҆́нагѡ прече́стнагѡ Григо́рїѧ ѯе́ро ѡ҆пределѧ́ющее тѣми́жде предѣ́лы стѧгнꙋ́тисѧ и҆ раꙁширѧ́тисѧ дх҃о́вному съро́дствꙋ, съста́вленномꙋ ѿ кмо́трства и҆ ᲂу҆сыновле́нїѧ, и҆́миже ѡ҆пределѧ́ютсѧ и҆ теле́снаѧ ᲃъро́дства.

Ѿ ѡ҆́смои Главиꙁны, ᲃті́хїи вто́рой, Гд҃на Матѳе́ѧ Власта́рїѧ.

Поне́же по Канѡ́нꙋ ѝ За́конꙋ, бо́льшее є҆́сть дх҃о́вное, не́жели тѣле́сное ᲃъро́дство; сегѡ̀ ра́ди нѣ́цїи и҆ꙁвѣствꙋ́ютъ до́лжнымъ бы́ти ᲃи́цевымъ ᲃъро́дствомъ ᲃвѧꙁа́нїи, храни́ти запрѣще́нныѧ ᲃте́пени да́же до ѡ҆́смагѡ, по всемꙋ̀, ꙗ҆́коже и҆ въ ᲃъро́дствѣ крвѐ. ѿ мнѡ́гихъ же сі́е не бы́сть и҆ꙁвѣствова́ннѡ, но то́чїю препина́ти ѡ҆́наѧ лица̀, ꙗ҆́же въ пре́дъ рече́нномъ за́конѣ съдержа́тсѧ ᲂу҆тверди́ша.

Е҆ще и҆на́кѡ

Съро́дство ѿ ст҃а́го Креще́нїѧ съблюда́етсѧ ме́ждꙋ ѡ҆́бѣма двѣ́ма кмо́трами, и҆ ниꙁходѧ́щихъ ѿ ни́хъ, а҆ не ме́ждꙋ про́чїимъ ро́дствомъ, сі́есть, ме́ждꙋ воꙁходѧ́щихъ и҆ побо́чныхъ, сі́есть, ѿцѧ̀, дѣды̀, пра́дѣды, бра́тїѧ, ᲃтры́ѧ, и҆ брата́ничовъ, ꙗ҆́коже нѣ́цїи мнѧ́т. Междꙋ̀ двѣ́ма бо ѡ҆́нѣма лицѡ́ма Дх҃ъ ᲃт҃ы́й; посредствова̀, а҆ не пло́ть: и҆ сегѡ̀ ра́ди си́цево є҆стъ ᲃъро́дство дх҃о́вное, а҆ не тѣле́сное. Сн҃о́ве ᲂу҆́бѡ кмо́тровъ, а҆́ще и҆ ѿ є҆дина́го и҆ того́жде воспрїемника сꙋ́тъ Креще́ны, и҆лѝ ни, запрѣща́ютсѧ съчета́тисѧ въ сꙋпрꙋ́жество, а҆́ще мꙋ́жескагѡ по́лꙋ сꙋ́ть, а҆́ще же́нска, да́же до се́дмагѡ ᲃте́пене ниꙁходѧ́ще, и҆ проща́ютсѧ въ ѡ҆́смомъ. И҆ сегѡ̀ ра́ди проще́нѡ є҆́стъ кое́мꙋждо хотѧ́щомꙋ поѧ́ти въ женꙋ̀ кмо́тра свое́гѡ женꙋ̀.

И҆ ꙁнамена́й до́бре, ꙗ҆́кѡ лицѧ̀ сꙋ́щаѧ ѿ бо́кꙋ не препина́ютсѧ къ ᲃꙋпрꙋ́жествꙋ креще́нїемъ. И҆ сі́е и҆ꙁвѣствꙋ́ю ѿ десѧ́тагѡ ѿвѣ́та ᲃтѣ́йшагѡ И҆раклі́йскагѡ Гд҃ина Ніки́ты, и҆́же сотворѝ къ чтⷭ҇но́мꙋ Е҆пⷭ҇копꙋ Гд҃нꙋ Константи́нꙋ, и҆́же си́цевый є҆́стъ.

Нѣ́каѧ жена̀ вдова̀, и҆́менемъ Ѳеодѡ́ра, и́мѣ̀ сестрꙋ̀ Ма́рїю, ꙗ҆́же родѝ два̀ сн҃а мꙋ́жескагѡ по́лꙋ, Геѡ́ргїѧ и҆ Діми́трїѧ, въспрїѧла же є҆́сть Ѳеодѡ́ра ѿ ᲃт҃а́гѡ Креще́нїѧ Константи́на Во́ина. Ннѣ же сестра̀ вдови́ца ѡ҆́ныѧ, Ма́рїѧ хо́щетъ поѧ́ти въ женꙋ̀ дще́рь Константи́новꙋ є҆дино́мꙋ ѿ сынѡ́въ свои́хъ. Досто́итъ ли и҆лѝ ни?

Ѿтветъ є҆́стъ си́цевый:

Не запрѣще́ннѡ Ма́рїи дще́ръ константи́новꙋ, (є҆го́же сестра̀ єѝ, Ѳео́дѡра, въспрїѧ́ла є҆́стъ ѿ ᲃт҃агѡ Креще́нїѧ) ᲃъпрѧщѝ Сы́нови свое́мꙋ, и҆ бы́ти си́цевомꙋ ᲃꙋпрꙋ́жествꙋ.

Сте́пень Пѧ́тый быва́ет

Внима́й до́брѣ начерта́нїѧмъ ст҃а́гѡ Креще́нїѧ.

Степень вторый не быва́ет

Сте́пень Тре́тїй не быва́ет

Сте́пень Четвертый не быва́ет

Сте́пень Пѧ́тый не быва́ет

Сте́пень Ше́стый не быва́ет

Сте́пень Се́дмый, не бывает

Сте́пень Ѻ҆́смый бывает

Ꙋ҆сн҃овле́ние ᲂу҆́бо быва́емое въспрїе́мничества ра́ди храни́мо бы́ти гл҃емъ, ꙗ҆́кѡ же и҆ ѿ крвѐ ᲃро́дство ѿ ст҃ыхъ Кано́нѡвъ, и҆ ѿ благочести́выхъ з́аконовъ, є҆́же къ ᲃꙋпрꙋ́жескимъ сꙋ́тъ ᲃте́пеней и҆ наслѣ́дїа ѿц҃ъ. Гл҃етъ бо За́конъ: не могꙋ̀ поѧ́ти себѣ̀ въ женꙋ̀ те́ткꙋ по ѿцѣ̀ и҆лѝ по ма́тери, а҆́ще бы былѝ и҆ во ᲂу҆сн҃овле́нїе прїѧ́ты, ꙗ҆́же сꙋ́ть въмѣ́сто ма́тере, ꙗ҆́же не́гли ѿ дѣ́да мое́го въ ᲂу҆сыновле́нїе прїѧ́ти бы́ша, и҆ въмѣ́сто сестры̀ бы́ша ѿцꙋ̀ мое́мꙋ, мнѣ́же ᲂу҆́бо сꙋ́ть те́тки, ни́же ᲂу҆сн҃овле́нный ѿц҃ъ дще́рь ᲃн҃овню, ни́же рожде́ннꙋю и҆ꙁ неѧ̀, ни́же ᲂу҆сн҃овле́нный ᲃн҃ъ женꙋ̀ ᲂу҆сн҃овле́ннагѡ Ѿца̀ сво́егѡ и҆лѝ ма́терь и҆лѝ сестрꙋ̀ є҆́гѡ, и҆лѝ дще́рь дще́ри є҆гѡ̀.

Нове́лла же, Царѧ̀ Лва̀ премꙋ́драгѡ, запрѣща́ѧ ᲂу҆сн҃овле́ннымъ ѿцемъ спрѧга́тисѧ въ сꙋпрꙋ́жество съ ча́ды ᲂу҆сн҃овле́нныхъ свои́хъ, наво́дитъ. Др́вле ᲂу҆́бѡ, поне́же быва́ше ᲂу҆сн҃овле́нїе нераꙁꙋ́мное, си́це быва́ше: нн҃ѣ же, поне́же быва́етъ, подоба́ющимъ сою́ꙁомъ пра́веднымъ и҆ ᲃт҃ы́ми Моли́твами. И҆ сі́и ᲂу҆́бѡ ᲂу҆ста́влены быва́ютъ вмѣ́сто ѿце́въ сі́и же вмѣ́сто ᲃн҃ѡ́въ, ни едино̀ ѿрече́нїе ѡ҆ставлѧ́етсѧ въ є҆́же совокꙋплѧ́тисѧ ᲃн҃ѡ́мъ ᲂу҆сн҃овле́ннымъ съ дще́рьми є҆стестве́нными ᲂу҆сыновле́ннагѡ ѿца̀: ни́же и҆ꙁменѧ́ти и҆мѧ̀ бра́тства въ спрѧже́нїе, си́це: ꙗ҆́кѡ да въмѣ́сто бра́тїи нары́чютсѧ зѧ́ти.

И҆́накѡ и҆ ѡ҆ то́мжде.

Е҆дина́кѡ и҆ та́ѧжде раꙁꙋмѣ́й ѡ҆ Кр҃е́щенїи, ꙗ҆́коже и҆ ѡ҆ ᲂу҆сн҃овле́нїи: ᲂу҆сн҃овле́нїе же гл҃ю̀, ѻ҆́ное быва́емое ᲃт҃о Моли́тва́ми. Но сі́е вѣ́стнѡ бꙋ́ди, ꙗ҆́кѡ соро́дство ѿ ᲃт҃го Креще́нїѧ не въво́дитсѧ въ наслѣ́дїе, ᲂу҆сн҃овле́нїе же въво́дитсѧ.

Сїѧ довлѣ́ютъ ѡ҆ ᲂу҆сн҃овленїи.

Бра́тїю твори́ти, [рехомъ] Не проще́но бы́ти ѿ з́аконовъ, ᲂу҆сн҃овленїе бо и҆ꙁѡбрѣто́хомъ ве́щей ра́ди воспрїе́мничества: поне́же и҆́ногда прилꙋча́етсѧ намъ не имѣ́ти ча́дъ.

Бра́тїю же ᲂу҆мышлѧ́ти и҆ ᲂу҆ставлѧ́ти намъ ни є҆дина̀ вина̀ и҆ꙁвѣ́стнаѧ въво́дитъ. за́конъ же прїе́млетъ ꙗ҆́же сꙋ́ть раꙁꙋ́мнаѧ, ѿмѣта́етъ же не сꙋ́щихъ си́цеваѧ, ᲃи́це ꙗ҆́кѡ а҆́ще что̀ си́цево сътворе́нѡ бꙋ́детъ, въмѣне́нѡ бꙋ́детъ ꙗ҆́коже бы не было̀ сътворе́но: сщ҃е́нникъ же каꙁни́мъ бꙋ́детъ, и҆ ᲃꙋпрꙋ́жество бꙋ́детъ ме́ждꙋ и҆́ми, и҆ въ лица́хъ ꙗ҆́же сꙋ́ть прибли́жно и҆ подо́бне въ да́льнихъ. А҆́ще же бꙋ́детъ ѻ҆́нъ то́йжде и҆́же ᲃътво́реныи є҆́стъ бра́тъ, а҆́ще сꙋпрꙋ́жество ᲃътво́рено є҆́стъ, ꙗ҆́ве не запрѣща́етсѧ. А҆́ще же та́йнымъ растлѣ́нїемъ ᲃъста́вленѡ є҆́стъ, до́лжны сꙋ́ть є҆піти́мїи подлѣга́ти, моли́твы ра́ди ꙗ҆́же бы́сть внегда̀ братїѧ бы́ша; но ᲂу҆́бѡ сꙋпрꙋ́жество не воꙁбранѧ́етсѧ.

Ѿ четве́ртои Кни́ги, и҆ ѕ҃ титлы, Кѡнстанти́на Гарменопꙋ́ла

Ѻ҆́браꙁъ братотворенїѧ въмѣнѧ́етсѧ ꙗ҆́коже и҆ не бы́ти є҆мꙋ̀ сътворе́нꙋ, и҆ къ ᲃꙋпрꙋ́жествꙋ не препина́етъ: и҆́бо положе́нїе не подража́етъ є҆стества̀, никто́же бо ражда́етъ себѣ̀ бра́та.

Е҆щѐ и҆́накѡ.

Ѻ҆́браꙁъ и҆лѝ ᲃлꙋ́жба братотворе́нїѧ ни въ что́же въмѣнѧ́етсѧ въ Це́ркви: сегѡ̀ ра́ди ᲃщ҃е́нника, творѧ́щагѡ ᲃі́ю, ѿлꙋча́емъ на вре́мѧ ѿ сщ҃еннодѣ́йствїѧ. И҆ и҆́хъ же ѻ҆́нъ и҆менова̀ бра́тїю, съпритѧꙁа́емъ въ сꙋпрꙋ́жество. Гл҃етъ бо за́конъ, не мо́жетъ кто̀ роди́ти са́мъ себѣ̀ бра́та, ᲃы́на же мо́жетъ.

Довлѣ́ютъ сі́ѧ ѡ҆ братотворе́нїи.

За́конъ и҆ꙁвѣствꙋ́етъ, ꙗ҆́кѡ въ сꙋпрꙋ́жествѣ, не то́чїю въꙁыска́ти подоба́етъ а҆́ще проще́но є҆́стъ, но ᲂу҆́бѡ и҆ а҆́ще є҆́стъ че́стнѡ. Во ѻ҆́нѣхъ ᲂу҆́бѡ ᲃро́дствахъ, ꙗ҆́же заво́дѧтсѧ ѿ крвѐ и҆ ѿ ᲃт҃а́гѡ Кр҃еще́нїѧ, и҆ ѿ ᲂу҆сн҃овле́нїѧ, до́лжни є҆смы̀ въꙁыска́ти сте́пени. Въ си́хъ ᲂу҆́бѡ, ꙗ҆́же превосхо́дѧтъ ᲃте́пень ᲃе́дмый, проще́ны быва́ютъ: въ ѡ҆́нѣхъ же, ꙗ҆́же ᲃꙋ́тъ ѿ дво́хъ и҆лѝ тре́хъ ро́дствахъ, до́лжны є҆смы̀ храни́ти ꙗ҆́же рѣ́хѡмъ къ препѧ́тїю, и҆лѝ ꙗ҆́же и҆мꙋ́тъ ᲃли́тїѧ, сі́есть, ᲃлѣва́ютъ и҆мена̀ съро́дства̀ ме́ждꙋ собо́ю. Въ ѡ҆́вѣхъ ᲂу҆́бѡ сꙋпрꙋ́жествахъ ꙗ҆́же сꙋ́ть внѣ̀ ᲃъро́дства, въꙁыска́ти подоба́етъ че́стное: бо́лее ᲂу҆́бѡ и҆ꙁъѧснѧ́ющее дѣ́ло гл҃емъ: ꙗ҆́кѡ а҆́ще ᲃꙋпрꙋ́жество предложе́ное ѿ дворо́дныхъ и҆ съдержа́тисѧ бꙋ́детъ вънꙋ́тръ ше́стагѡ ᲃте́пени, кро́мѣ всѧ́кагѡ и҆́нагѡ и҆спыта́нїѧ запреще́ннѡ є҆́стъ. А҆́ще же ѿ треро́дныхъ, превыша́етъ четве́ртый ᲃте́пень, проще́но быва́етъ.

Ѿ Кни́ги Ѻ҆́смыѧ ᲃті́хїи вто́рой. Гд҃на Матѳе́ѧ, и҆ ѿ Ти́тла ше́стыѧ Четве́ртыѧ Кни́ги Кѡнстанти́на Гарменопꙋ́ла, ѡ҆ сꙋпрꙋ́жествахъ запрѣще́нныхъ, а҆́ще и҆ не посредствꙋ́етъ съро́дство.

И҆ногда̀ и҆ кро́ме всѧ́кагѡ ᲃъро́дства, ѡ҆́вѣхъ ра́ди и҆́хъ же предрѣ́хѡмъ ви́нъ, запрѣща́етсѧ ᲃꙋпрꙋ́жество, сі́естъ:

Бы́вый ѡ҆болга́ный, ꙗ҆́кѡ прелюбодѣйствова̀ нѣ́кꙋю женꙋ̀, а҆́ще и҆ не ꙗ҆́вѣ покаꙁа́но бы́сть сѐ, не мо́жетъ же поѧ́ти ю҆̀ въ сꙋпрꙋ́жницꙋ ᲃебѣ̀.

Ни́же па́робокъ и҆лѝ на́ймитъ женꙋ̀ господи́на ᲃвое́го, по ᲃме́рти є҆гѡ̀, дае́тъ бо подꙁо́ръ, ꙗ҆́кѡ прелюбодѣйствова̀ съ не́ю є҆щѐ жи́вꙋ є҆мꙋ̀ ᲃꙋ́щꙋ.

Ни́же рабѝ пое́млютъ въ ᲃꙋпрꙋ́жество госпожѝ свое́ѧ, да не дадѧ́тъ подъꙁо́ръ пре́жде бы́вшагѡ прелюбодеѧ́нїѧ.

Вда́вшаѧсѧ бра́кꙋ беꙁꙁако́нно, мо́жетъ ᲃвободи́ти ᲃебѣ̀ ѿ ᲃпрѧже́нїѧ ѡ҆нагѡ и҆ за и҆́нагѡ мꙋ́жа за́коннагѡ посѧга́ти, подо́бнѣже а҆́ще мꙋ́жъ бꙋ́детъ.

Ча́да ражда́ющаѧсѧ ѿ запрѣще́нныхъ ᲃꙋпрꙋ́жествъ ни́же и҆мѧ̀ прелюбодѣ́йчищее досто́йни ᲃꙋ́ть и҆мѣ́ти, ни́же наслѣ́дники ᲃꙋ́ть и҆мѣ́нїй ѿц҃ъ ᲃвои́хъ.

Никто́же мо́жетъ поѧ́ти себѣ̀ въ женꙋ̀ дще́рь въ жены̀ свое́ѧ, ю҆́же ѿлꙋчѝ ѿ себѣ̀, и҆ по раꙁлꙋче́нїи ѡ҆на̀ родѝ ю҆̀ съ и҆́нѣмъ мꙋ́жемъ.

Никто́же мо́жетъ поѧ́ти ѡ҆брꙋ́чницꙋ ѿца̀ ᲃвое́го и҆ бра́та ᲃвое́гѡ ро́днагѡ, а҆́ще и҆ не съверше́ннѡ бѣ̀ сꙋпрꙋ́жествѡ.

Ни є҆ди́нъ ѿц҃ъ мо́жетъ поѧ́ти въ женꙋ̀ себѣ̀ дще́рь свою̀ и҆́же ѿ любодеѧ́нїѧ родѝ.

Никто́же поемле́тъ сестрꙋ̀ свою̀ ѿ любодеѧ́нїѧ рожде́ннꙋю.

Бра́тъ и҆ сестра̀ не съчетава́ютсѧ съпрꙋ́жествꙋ, а҆́ще и҆ ѿ ра́ꙁныхъ рожде́ни сꙋ́ть, сі́есть, ѿ є҆дина́гѡ Ѿца̀ и҆ дво́хъ ма́терей, и҆лѝ ѿ є҆ди́ныѧ ма́тере, ѿ дво́хъ же ѿце́въ, поне́же сꙋ́ть вто́рагѡ сте́пене.

Е҆ли́ко и҆́хъ Креще́ни ᲃꙋ́ть ѿ є҆ди́нагѡ и҆ того́жде въспрїе́мника, а҆́ще бꙋ́дꙋтъ и҆ ра́ꙁныхъ ѿце́въ ча́да, не мо́гꙋтъ же ᲂу҆́бѡ дрꙋ́гъ дрꙋ́га въ ᲃꙋпрꙋ́жество поѧ́ти.

И҆́же а҆́ще ᲃы́на ᲃвое́гѡ є҆стестве́ннагѡ, ѿ Ст҃гѡ Креще́нїѧ воспрїѧ́лъ, раꙁлꙋча́етсѧ ѿ свое́ѧ є҆мꙋ̀ жены̀, поне́же ᲃотворѝ ю҆̀ ᲃебѣ̀ дхо́внꙋю ᲃестрꙋ̀.

Сщ҃е́нникъ, не сꙋ́щꙋ и҆́номꙋ сщ҃е́нникꙋ, креща́етъ своѐ си ча́до, ꙗ҆́кѡ сщ҃е́нникъ, и҆ не раꙁлꙋча́етсѧ съ свое́ю є҆мꙋ̀ жено́ю: поне́же и҆́нъ кто̀ воспрїѧлъ є҆́стъ ча́до є҆гѡ̀ ѿ Ст҃гѡ Креще́нїѧ: се́й же сщ҃е́нникъ нико́е же заво́дитъ съро́дство дх҃о́вное ѿ сегѡ̀, ꙗ҆́коже про́чее не є҆дино̀ соро́дство, съ и҆́неми ча́ды свое́ѧ паро́хїи и҆́хже креща́етъ, ѿ ни́хъ мо́жетъ, є҆го́же въсхо́щетъ, поѧ́ти свои́мъ сы́номъ въ жены̀ и҆ дще́рѧмъ въ мꙋ́жа.

Вопро́съ:

Нѣ́кїй человѣ́къ ᲂу҆твердѝ ѡ҆брꙋче́нїемъ, сꙋпрꙋ́жество, є҆́же и҆мѣѧ́ше заводи́ти съ нѣ́кою жено́ю: ᲂу҆мре́же пре́жде да́же вѣнча́нъ бы́сть и҆ пре́жде да́же не сни́тисѧ и҆́ма. Достои́тъ ли бра́тꙋ є҆гѡ̀ ѡ҆́нꙋю женꙋ̀ поѧ́ти.

Ѿтвѣ́тъ ᲃт҃а́гѡ Патрїа́рхи А҆нтїꙍхїйскагѡ Гд҃на Ѳео́дора Вальсамо́на.

До́брое нѣ́стъ добро́, а҆́ще недо́брѣ соста́влено бꙋ́детъ. а҆́ще ᲂу҆́бѡ ѡ҆брꙋче́нїе соста́висѧ по чи́нꙋ, є҆го́же соста́ви Нове́лла свѣтлѣ́йшагѡ Царѧ̀ Гд҃на А҆ле́ѯїѧ Комни́на съ ѡ҆бы́чными, сі́есть, ст҃ы́ми Моли́твами, и҆мѣ́ющей женѣ̀ ві҃ лѣтъ, мꙋ́жꙋ же ді҃ и҆спо́лнъ, не мо́жетъ поѧ́ти ю҆̀ въ сꙋпрꙋ́жницꙋ бра́тъ є҆гѡ̀: си́це бо соверше́нно ѡ҆брꙋче́нїе є҆́стъ, въ все́мъ ра́внѡ вѣнча́нїю и҆ съверше́нномꙋ съпрꙋ́жествꙋ. а҆́ще же сътворе́но є҆́стъ и҆́накѡ, сі́есть, по ѡ҆бы́чаю, ю҆́же нн҃ѣ соде́ржатъ по всѣ́мъ стра́намъ полꙋ́нощнымъ и҆ въсто́чнымъ, (сі́есть, кро́мѣ моли́твъ, не сꙋ́щꙋ мꙋ́жꙋ) мо́жетъ ᲂу҆́бѡ тогда̀ съпрѧщи́сѧ за́конно бра́тъ є҆гѡ̀ съ не́ю.

Коне́цъ въ ᲃла́вꙋ Бж҃їю.

По Бжⷭ҇тве́нной Лѵтꙋ́ргїи, ᲃщ҃е́нникꙋ стоѧ́щꙋ въ ст҃и́лищи, прихо́дита хотѧ́щаѧ ѡ҆бꙋчи́тисѧ въ Па́пертъ, и҆ ста́нета пре́дъ Церко́вными две́рми: Мꙋ́жъ ᲂу҆́бѡ ѿ де́сныѧ стра́ны, Жена̀ же ѿ шꙋ́еѧ. І҆ере́ѷ же ѡ҆болче́нъ въ сщ҃е́нныѧ ѡ҆де́жды, сі́естъ въ Е҆пітра́хиль и҆ Фелѡ́нъ, и҆схо́дитъ и҆ꙁъ Ѻ҆́лтарѧ, и҆ вꙁе́мъ ѿ рꙋ́кꙋ є҆ю̀ Пе́рстенѧ два̀, Зла́тый и҆ Сребрѧ́ный, полага́етъ ѧ҆̀ на де́сней стра́не ᲃт҃ы́ѧ Тра́пеꙁы, Сре́брѧный ᲂу҆клонѧ́ѧсѧ къ де́снымъ, Зла́тый же къ шꙋ́имъ, є҆ди́нъ дрꙋга́гѡ бли́ꙁъ. И҆ и҆ꙁше́дъ па́ки І҆ереѷ, знамена́етъ гла́вы новоневѣ́стныхъ, гⷤ. И҆ дае́тъ и҆́ма ᲃвѣща̀ воꙁже́нна, и҆ въве́дъ ѧ҆̀ внꙋ́трь въ Це́рковъ, поставлѧ́етъ ѧ҆̀ пре́дъ ᲃт҃ы́ми две́рми, мꙋ́жа ѡ҆де́снꙋю, женꙋ́же ѡ҆шꙋю́ю, и҆ покади́въ ѧ҆̀ крестао́браꙁно, и҆ ѿда́въ Кади́лницꙋ, а҆́бїе въпраша́етъ, жениха̀ пе́рвѣе Рꙋ́скимъ ꙗ҆ꙁы́комъ, глаголѧ̀:

Ма́ешъ И҆мⷬ҇къ: не ѿмѣ́нный и҆ стате́чный ᲂу҆мы́слъ зарꙋчи́ти собѣ̀ тепе́ръ тꙋ́ю И҆мⷬ҇къ: кото́рꙋю тꙋ́тъ пере́дъ собо́ю ви́дишъ въ ᲃта́нъ малже́нскїй, а҆ гды̀ томꙋ̀ ча́съ бꙋ́детъ, понѧ́ти є҆ѝ ᲃобѣ̀ за малжо́нкꙋ.

Жени́хъ же ѿвѣщава́ет:

Ма́ю веле́бный ѿче.

Пото́мъ же въпраша́етъ Невѣ́стꙋ, глаголѧ̀:

Ма́ешъ И҆мⷬ҇къ: не ѿмѣ́нный стате́чный ᲂу҆́мыслъ зарꙋчи́ти собѣ̀ тепе́ръ тогѡ̀ И҆мⷬ҇къ: кото́рогѡ тꙋ́тъ пере́дъ собо́ю ви́дишъ въ ᲃта́нъ малже́нскїй, а҆ гды̀ томꙋ̀ ча́съ бꙋ́детъ, понѧ́ти є҆гѡ̀ ᲃобѣ̀ за малжо́нка.

Ѻ҆на́же ѿвѣща́ет:

Ма́ю веле́бный ѿче.

Посе́мъ па́ки въпраша́етъ Жениха̀ глаголѧ̀:

Не шлюбова́лесь и҆́ншой кото́рой шлю́бꙋ малже́нскогѡ;

Ѻ҆́нъ же ѿтвѣща́етъ:

Не шлюбова́лемъ веле́бный ѿче.

Пото́мъ же Невѣ́стꙋ въпраша́етъ, глаголѧ̀:

Не шлюбова́сь и҆́ншомꙋ кото́ромꙋ шлю́бꙋ малже́нскогѡ;

Ѻ҆́нъ же ѿтвѣща́етъ:

Не шлюбова́ламъ веле́бный ѿче.

Па́ки въпраша́етъ Жениха̀ глаголѧ̀:

Ѻ҆бѣцꙋ́ешъ И҆мⷬ҇къ: комꙋ̀ и҆́ншомꙋ шлю́бꙋ малже́нскогѡ ѡ҆про́чъ тоею И҆мⷬ҇къ: а҆́жъ до є҆ѝ ᲃме́рти не шлюбова́ти.

Жени́хъ же ѿвѣщава́ет:

Ѻ҆бѣцꙋ́ю веле́бный ѿче.

Посе́мъ Невѣ́стꙋ въпраша́етъ, глаголѧ̀:

Ѻ҆бѣцꙋ́ешъ И҆мⷬ҇къ: комꙋ̀ и҆́ншомꙋ шлю́бꙋ малже́нскогѡ ѡ҆про́чъ томꙋ̀ И҆мⷬ҇къ: а҆́жъ до є҆гѡ̀ ᲃме́рти не шлюбова́ти.

Ѻ҆́нъ же ѿтвѣща́етъ:

Ѻ҆бѣцꙋ́ю веле́бный ѿче.

Блюдѝ и҆ ѡ҆па́снѡ съхранѝ сі́е ѽ І́ере́ю. А҆́ще оди́нъ ѿ ни́хъ ничто́же на твоѧ̀ въпроше́нїѧ ѿвѣща́етъ, и҆лѝ а҆́ще рече́тъ ꙗ҆́кѡ не хощꙋ̀: да ни ка́коже дерꙁне́ши ѡ҆брꙋчи́ти и҆́хъ: но а҆́бїе престанѝ, и҆́маже повелѝ ѿ и҆тѝ въ своѧ̀ си. И҆ сі́е па́ки ви́ждъ и҆ съхранѝ ꙗ҆́кѡ се́ѧ въпроше́нїѧ то́чїю бы́ти и҆мꙋ́тъ, є҆гда̀ не а҆́бїе вѣнча́ютсѧ новоневѣ́стныи, не ѿлага́емо быва́етъ Вѣнча́нїе и҆хъ въ и҆́нѡ вре́мѧ. Е҆гда́же а҆́бїе по Ꙍ҆брꙋче́нїи и҆ Вѣнча́нїе а҆́бїе быва́етъ, тогда̀ ᲃі́ѧ въпроше́нїѧ не твори́тъ І҆ере́ѷ, но то́чїю по сконча́нїю Ꙍ҆брꙋче́нїѧ, Въпро́сы ꙗ҆́же пре́дъ Вѣнча́нїемъ тво́ритъ.

Дїа́конъ же а҆́бїе гл҃етъ:

Блⷭ҇вѝ, Влады́кѡ.

Сщ҃енникъ:

Благослове́нъ Бг҃ъ на́шъ всегда̀, нн҃ѣ и҆ при́сно, и҆ въ вѣ́ки вѣкѡ́въ.

Пѣвцѝ же пою́тъ:

А҆ми́нь.

Дїа́конъ:

Ми́ромъ Гд҃ꙋ помоли́мсѧ.

Ли́къ:

Гд҃и поми́лꙋй.

Ꙍ҆ съвы́шнѣмъ ми́рѣ и҆ ѡ҆ сп҃се́нїи дш҃ъ на́шихъ, Гд҃ꙋ помоли́мсѧ.

Ꙍ҆ ми́рѣ всегѡ̀ ми́ра, благостоѧ́нїи ᲃт҃ы́хъ Бж҃їихъ Це́ркве́й и҆ съедине́нїи всѣ́хъ, Гд҃ꙋ помоли́мсѧ.

Ꙍ҆ ᲃт҃ѣ́мъ хра́ме се́мъ и҆ съ вѣ́рою, и҆ благоговѣ́нїемъ и҆ стра́хомъ Бж҃їимъ входѧ́щихъ въ онь, Гд҃ꙋ помоли́мсѧ.

Ꙍ҆ А҆рхїепкⷭ҇пѣ на́шемъ И҆мⷬ҇къ: че́стномъ преꙁви́терствѣ є҆́же ѡ̀ Хрⷭ҇тѣ́ Дїѧ́конствѣ и҆ все́мъ при́чтѣ и҆ лю́дехъ, Гд҃ꙋ помоли́мсѧ.

Ꙍ҆ вели́комъ Королѣ̀ на́шемъ и҆ благочести́выхъ Гпⷭ҇дре́хъ Кн҃ꙁе́хъ и҆ Панѣ́хъ на́шихъ, и҆ все́й пола́тѣ и҆ во́ехъ и҆́хъ, Гд҃ꙋ помоли́мсѧ.

Ꙍ҆ рабѣ́хъ Бж҃їихъ, Имⷬ҇къ: нн҃ѣ ѡ҆брꙋча́ющихсѧ дрꙋ́гъ дрꙋ́гꙋ, и҆ ѡ҆ спⷭ҇нїи и҆́хъ, Гд҃ꙋ помоли́мсѧ.

Ꙍ҆ є҆́же пода́тисѧ и҆́мъ ча́да въ въсприѧ́тїе рѡ́да, и҆ всѧ ꙗ҆́же къ сп҃се́нїю проше́нїѧ, Гд҃ꙋ помоли́мсѧ.

Ꙍ҆ є҆́же ниспосла́тисѧ и҆́ма любвѝ ᲃъверше́нной, ми́рной, и҆ по́мощи, Гд҃ꙋ помоли́мсѧ.

Ꙍ҆ є҆́же съхрани́тисѧ и҆ благослови́тисѧ и҆́мъ въ съедине́нїи и҆ тве́рдой вѣ́рѣ, Гд҃ꙋ помоли́мсѧ.

Ꙍ҆ є҆́же съхрани́тисѧ и҆́ма въ непоро́чномъ жи́тїи и҆ пребыва́нїи, Гд҃ꙋ помоли́мсѧ.

Ꙗ҆́кѡ да Гд҃ь Бг҃ъ на́шъ дарꙋ́етъ и҆́ма Бра́къ че́стенъ, и҆ ло́же нескве́рное, Гд҃ꙋ помоли́мсѧ.

Ꙍ҆ и҆ꙁба́витисѧ и҆́мъ и҆ намъ ѿ всѧ́коѧ ско́рби, гнѣ́ва и҆ нꙋ́жда, Гд҃ꙋ помоли́мсѧ.

Прⷭ҇тꙋ́ю, чи́стꙋю, Преблагослове́ннꙋю, ᲃла́внꙋю Влады́чицꙋ на́шꙋ Бц҃ꙋ и҆ при́снѡ Дв҃ꙋ Мр҃їю съ всѣ́ми ᲃт҃ы́ми помѧнꙋ́вше, самѝ себѣ̀ и҆ дрꙋ́гъ дрꙋ́га, и҆ ве́сь живо́тъ на́шъ Христꙋ̀ Бо́гꙋ предади́мъ.

І҆ере́ѷ же въꙁглаша́етъ:

Ꙗ҆́кѡ подоба́етъ ти всѧ́каѧ ᲃла́ва, чⷭ҇ть, и҆ поклоне́нїе, Ѿцꙋ и҆ Сн҃ꙋ, и҆ ᲃт҃о́мꙋ Дх҃ꙋ, нн҃ѣ и҆ прⷭ҇но, и҆ въ вѣ́ки вѣкѡ́въ.

Ли́къ:

А҆ми́нь.

Дїѧ́конъ:

Гд҃ꙋ помоли́мсѧ.

Ли́къ:

Гд҃и, поми́лꙋй.

І҆ере́ѷ же велегла́сно гл҃етъ Моли́твꙋ сі́ю:

Бо́же вѣ́чный, растоѧ́щаѧсѧ съвокꙋплѧ́ѧй въ єди́нство, и҆ съю́ꙁъ любвѐ положи́вый нераꙁдрꙋши́мый: благослови́вый І҆саа́ка и҆ Реве́ккꙋ, и҆ наслѣ́дники тѣ́хъ свое́мꙋ ѡ҆бѣтова́нїю покаꙁа́вый: са́мъ благословѝ и҆ рабы̀ твоѧ̀ сі́ѧ, наставлѧ́ѧ и҆́хъ на всѧ́кое дѣ́ло благое.

Ꙗ҆́кѡ ми́лостивый и҆ человѣкѡлю́бецъ Бг҃ъ є҆сѝ, и҆ тебѣ̀ ᲃла́вꙋ воꙁсыла́емъ, Ѿцꙋ, и҆ Сн҃ꙋ, и҆ Свѧто́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

Свѧще́нникъ:

Ми́ръ всемъ.

Ли́къ:

И҆ дꙋ́хови твоемꙋ́.

Дїѧ́конъ:

Гла́вы ва́ша Го́сподеви приклони́те.

Ли́къ:

Тебѣ̀ Го́споди.

И҆ прекланѧ́ютъ гла́вы ᲃвоѧ̀ ѡ҆брꙋчающаѧсѧ, и҆ всѝ предстоѧ́щїи лю́дїе, доне́лиже І҆ере́ѷ прочте́тъ Моли́твꙋ сі́ю въ та́йнѣ.

Гд҃и Бо́же на́шъ, ѿ ꙗ҆ꙁы́къ пре́дъ ѡ҆брꙋчи́вый Це́рковь Дв҃ꙋ чи́стꙋю, благословѝ ѡ҆брꙋче́нїе ᲃі́е, и҆ съединѝ, и҆ ᲃъхранѝ рабы̀ твоѧ̀ ᲃі́ѧ въ ми́рѣ и҆ съедине́нїи.

и҆ Въꙁглашаетъ:

Тебѣ̀ бо подоба́етъ всѧ́каѧ ᲃла́ва, че́сть и҆ поклоне́нїе, Ѿцꙋ, и҆ Сн҃ꙋ, и҆ ᲃт҃о́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

Вꙁе́мъ ᲃщ҃е́ннникъ пе́рстнѧ, ѿ ст҃ы́ѧ Тра́пеꙁы, подае́тъ Зла́тый ᲂу҆́бѡ женихꙋ̀, Сребрѧ́ный же невѣ́стѣ, си́мъ ѻ҆́браꙁомъ. зла́тымъ ᲂу҆́бѡ Креста̀  Ѻ҆́браꙁ творѧ̀ три́жды надъ гла́вою жениха̀, и҆ влага́етъ пе́рстень на четве́ртый пе́рстъ де́сныѧ рꙋкѝ є҆гѡ̀, глаголѧ̀:

Ꙍ҆брꙋча́етъ ра́бъ Бо́жїй, Имⷬ҇къ:, рабꙋ̀ Бж҃їю Имⷬ҇къ:, въ и҆мѧ̀ Ѿца̀, и҆ Сн҃а, и҆ ᲃт҃а́гѡ Дх҃а: нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

Знамена́въ же та́кожде пе́рстенемъ гла́вꙋ невѣ́стѣ три́жды, влага́етъ є҆гѡ̀ на четве́ртый пе́рстъ де́сныѧ рꙋкѝ є҆ѧ̀ глаголѧ̀:

Ꙍ҆брꙋча́етъ раба̀ Бж҃їѧ, Имⷬ҇къ:, раба̀ Бж҃їѧгѡ Имⷬ҇къ:, въ и҆мѧ̀ Ѿца̀, и҆ Сн҃а, и҆ ᲃт҃а́гѡ Дх҃а: нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

А҆́бїе же ᲃщ҃е́нникъ гл҃етъ Моли́твꙋ сі́ю, Дїѧ́конꙋ ре́кшꙋ.

Гд҃ꙋ помо́лимсѧ.

Ли́къ:

Гд҃и, поми́лꙋй.

Гд҃и Бо́же на́шъ, ѡ҆тро́кꙋ Патрїѧ́рха Авраа́ма съшествова́вый въ Месопота́мїю, посыла́ѧ ᲂу҆невести́ти Гд҃на є҆гѡ̀ І҆саа́кꙋ женꙋ̀, и҆ ходата́йствомъ водоноше́нїѧ ѡ҆брꙋчи́ти Реве́ккꙋ ѿкры́вый. Са́мъ блⷭ҇вѝ ѡ҆брꙋче́нїе ра́бѡ́въ твои́хъ, ᲃи́хъ Имⷬ҇къ:, и҆ ᲂу҆твердѝ є҆́же ᲂу҆ни́хъ глагола́нное сло́во: и҆ꙁвѣстѝ и҆́хъ є҆́же ѿ тебѣ̀ ᲃт҃ы́мъ ᲃъедине́нїемъ: Ты́ бо и҆ꙁънача́ла съꙁда́лъ є҆сѝ мꙋ́жескїй полъ и҆ же́нскїй, и҆ ѿ тебѣ̀ съчетава́етсѧ мꙋ́жеви жена̀, въ по́мощь и҆ въ воспрїѧ́тїе ро́да чл҃ча. самъ ᲂу҆́бѡ Гд҃и Бо́же на́шъ, посла́вый и҆́стиннꙋ въ наслѣ́дїе твоѐ, и҆ ѡ҆бѣтова́нїе твоѐ на ѿца̀ на́ша, въ ко́емждо ро́дѣ и҆ ро́дѣ и҆ꙁбра́нныѧ твоѧ̀. При́ꙁри и҆ на раба̀ твое́гѡ Имⷬ҇къ:, и҆ на рабꙋ̀ Твою̀ Имⷬ҇къ:, и҆ ᲂу҆твердѝ ѡ҆брꙋче́нїе и҆́хъ въ вѣ́ре и҆ съедине́нїи, и҆ и҆́стине, и҆ любвѝ. Ты бо Гд҃и покаꙁа́лъ є҆сѝ даѧ́ти ѡ҆брꙋче́нїе и҆ ᲂу҆твержда́тисѧ въ все́мъ. Пе́рстенѧ ра́ди да́стсѧ вла́сть І҆ѡ́сифꙋ въ Е҆гѵ́птѣ: пе́рстенѧ ра́ди прослави́сѧ Данїи́лъ въ стра́нѣ Вавѵлѡ́нстѣй: Пе́рстнѧ ра́ди ꙗ҆ви́сѧ и҆́стина Ѳама́рѣ: Пе́рстенѧ ра́ди Ѿц҃ъ на́шъ Небѣ́сный ще́дръ бы́сть на Сн҃а свое́гѡ: дади́те бо, речѐ, пе́рстень на десни́цꙋ є҆гѡ̀, и҆ закла́вше те́лецъ ᲂу҆пита́ннаго, ꙗ҆́дше въꙁвесели́мсѧ. Сі́ѧ десни́ца твоѧ̀, Гд҃и, Мѡ́ѷсеѧ въѡрꙋжѝ въ Че́рмномъ Мо́ри; сло́вомъ бо твои́мъ и҆́стиннымъ Небѣса̀ ᲂу҆тверди́шасѧ и҆ землѧ̀ ѡ҆снова́на, бы́стъ и҆ десни́ца рабъ твои́хъ блⷭ҇ви́тсѧ сло́вомъ ти держа́внымъ, и҆ мы́шцею высо́кою: ᲃа́мъ ᲂу҆́бѡ и҆ нн҃ѣ, Влады́кѡ, блⷭ҇вѝ Пе́рстней положе́нїе ᲃі́е блⷭ҇ве́нїемъ нбⷭ҇нымъ: и҆ А҆́нгг҃елъ Гд҃нь да предъи́детъ пре́дъ ни́ми въ всѧ̀ днѝ живота̀ и҆́хъ.

Ꙗ҆́кѡ Ты є҆сѝ блⷭ҇влѧ́й и҆ ᲃт҃ѧ́й всѧ́ческаѧ, и҆ тебѣ̀ ᲃла́вꙋ воꙁсыла́емъ, Ѿцꙋ, и҆ Сн҃ꙋ, и҆ ᲃт҃о́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ. А҆ми́нь.

А҆́бїе дїѧ́конъ гд҃е́тъ Е҆кте́нїѧ сі́ѧ.

Поми́лꙋй на́съ, Бж҃е, по вели́цей млⷭ҇ти твое́й, мо́лимъ ти сѧ̀, ᲂу҆слы́ши и҆ поми́лꙋй.

Е҆щѐ мо́лимсѧ ѡ҆ вели́комъ Королѣ̀ на́шемъ Имⷬ҇къ:

Е҆щѐ мо́лимсѧ ѡ҆ А҆́рхїепⷭ҇копѣ на́шемъ Имⷬ҇къ:

Е҆щѐ мо́лимсѧ ѡ҆ рабѣ́хъ Бж҃їихъ Имⷬ҇къ: ѡ҆брꙋча́ющихсѧ дрꙋ́гъ дрꙋ́гꙋ, рцѣ́мъ всѝ Гд҃и ᲂу҆слы́ши и҆ поми́лꙋй.

Е҆щѐ мо́лимсѧ за всѧ̀ бра́тїѧ на́ша и҆ за всѧ̀ Правосла́вныѧ Хрїстиѧ́ны.

Въꙁгласъ:

Ꙗ҆́кѡ ми́лостивъ и҆ человѣкѡлю́бецъ Бг҃ъ є҆сѝ, и҆ тебѣ̀ ᲃла́вꙋ въꙁсыла́емъ, Ѿцꙋ̀, и҆ ᲃн҃ꙋ, и҆ ᲃт҃о́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ. А҆ми́нь.

Та́же ѿпꙋ́стъ.

А҆́ще же въсхотѧ́тъ а҆́бїе по ѡ҆брꙋче́нїи вѣнча́тисѧ, ѿстꙋ́пѧтъ ма́ло ѿ Ца́рскихъ две́рїи къ Па́перти, доне́лѣже посре́дѣ Це́ркве поста́витсѧ ᲃтоле́цъ на сїѐ приꙋготовле́нный, пре́дъ столце́мъ же си́мъ постила́етсѧ на землѝ Ко́връ, и҆лѝ и҆́ное тка́телство но́вое же и҆ чⷭ҇то, на не́мъ же ᲃтоѧ́ти и҆мꙋ́тъ новобра́чнїи, ᲃи́мъ же ᲂу҆строе́номъ, пре́дъ и҆дꙋ́ща І҆ере́ю свѣщено́сца съ свѣще́ма горѧ́щема, са́мъ же и҆лѝ Дїѧ́конъ а҆́ще є҆́стъ съ кади́лницею и҆де́тъ: прише́дшꙋ же и҆де́же Жени́хъ съ Невѣ́стою стои́та, и҆ покади́въ ꙗ҆́, и҆де́тъ пре́дъ ни́ма и҆ свѣщено́сцамъ пре́дъ и҆дꙋ́щимъ, по ни́хъ же и҆дꙋ́тъ новобра́чнїи, ѿ свои́хъ ᲃи дрꙋ́гѡвъ и҆лѝ ᲃрѡ́дникъ провожда́еми по ѡ҆бы́чаю, пѣвцѝ же пою́тъ, ѱало́мъ, се́й рк҃ꙁ, начина́юще си́це: Сла́ва тебѣ Бо́же на́шъ, сла́ва тебѣ̀. Въ гре́ческомъ по кое́мждѡ ᲃтіхꙋ̀, пою́тъ сі́е.

Сла́ва тебѣ̀ Бо́же на́шъ, ᲃла́ва тебѣ̀.

Блаже́ни всѝ боѧ́щїисѧ Гд҃а.

Сла́ва тебѣ̀ Бо́же на́шъ, ᲃла́ва тебѣ̀.

Ходѧ́щїи въ пꙋте́хъ є҆гѡ̀.

Сла́ва тебѣ̀ Бо́же на́шъ, ᲃла́ва тебѣ̀.

Трꙋды̀ пло́довъ свои́хъ снѣ́си.

Сла́ва тебѣ̀ Бо́же на́шъ, ᲃла́ва тебѣ̀.

Блаже́нъ є҆сѝ, и҆ добро̀ тебѣ̀ бꙋ́детъ.

Сла́ва тебѣ̀ Бо́же на́шъ, ᲃла́ва тебѣ̀.

Жена̀ твоѧ̀ ꙗ҆́кѡ лоꙁа̀ плодови́та, въ стра́нахъ до́мꙋ твое́гѡ.

Сла́ва тебѣ̀ Бо́же на́шъ, ᲃла́ва тебѣ̀.

Сынѡ́ве твоѝ ꙗ҆́кѡ лѣтора́сли масли́чна, ѻ҆́крестъ тра́пеꙁы твое́ѧ.

Сла́ва тебѣ̀ Бо́же на́шъ, ᲃла́ва тебѣ̀.

Сѐ та́кѡ блⷭ҇ви́тсѧ человѣ́къ боѧ́йсѧ Гд҃а.

Сла́ва тебѣ̀ Бо́же на́шъ, ᲃла́ва тебѣ̀.

Блⷭ҇ви́тъ тѧ̀ Гд҃ь ѿ Сїо́на, и҆ ᲂу҆́ꙁриши блага́ѧ І҆ерⷭ҇ли́мꙋ всѧ̀ днѝ живота̀ твое́гѡ.

Сла́ва тебѣ̀ Бо́же на́шъ, ᲃла́ва тебѣ̀.

И҆ ᲂу҆ꙁриши ᲃыны̀ ᲃынѡ́въ твои́хъ: ми́ръ на І҆и҃лѧ.

Сла́ва тебѣ̀ Бо́же на́шъ, ᲃла́ва тебѣ̀.

Прише́дшимъ же новобра́чнымъ предприꙋготова́нный посре́дѣ Це́ркве столе́цъ, ста́нета ѡ҆́ба на ко́врѣ, Жени́хъ ᲂу҆́бѡ ѿ де́сныѧ, Невѣ́ста же ѿ шꙋ́еѧ стра́ны, зрѧ́ща къ въсто́кꙋ. І҆ере́ѷ же вше́дъ въ ѻ҆́лтаръ, и҆ въꙁложи́въ ᲃщ҃е́нныѧ вѣнца̀, на Кре́стъ, въ десни́цю ᲂу҆́бѡ ᲃт҃о́е вꙁе́млетъ Е҆ѵⷢ҇лїе, въ шꙋи́ци же Кре́стъ съ вѣнцы̀, и҆ и҆ꙁше́дъ поставлѧ́етъ ѡ҆бо́ѧ, на предърече́нномъ ᲃтолцѝ. Ста́въ же пре́дъ ст҃ы́ми две́рми бли́ꙁь предложе́ннагѡ столца̀ зрѧ̀ къ новобра́чнымъ, тво́ритъ къ ни́ма поꙋчи́телное сло́во, пока́ꙁꙋѧ и҆́ма что є҆́стъ ᲃꙋпрꙋ́жества Та́йна, чесо̀ ра́ди Бо́гомъ ᲂу҆ста́влена є҆́стъ, и҆ ка́кѡ въ ᲃꙋпрꙋ́жествѣ Богоꙋго́днѡ и҆ чⷭ҇тнѡ жителствова́ти и҆́мꙋтъ, и҆ про́чаѧ по да́нной є҆́мꙋ Дх҃а ᲃт҃а́гѡ благода́ти.

По сконча́нїи же ᲃло́ва, въпраша́етъ І҆ере́ѷ Жениха̀ Рꙋ́скимъ ꙗ҆ꙁы́комъ, глаголѧ̀:

Ма́ешъ Имⷬ҇къ: во́лю до́брꙋю и҆ непримꙋшо́нꙋю, и҆ поставлене́ный ᲂу҆́мыслъ, понѧ́ти ᲃобѣ́ за малжо́нкꙋ тꙋ́ю, Имⷬ҇къ: кото́рꙋю тꙋ́тъ пре́дъ собо́ю ви́дишъ.

И҆ ѿвѣща́етъ жени́хъ, глаголѧ:

Ма́ю, велебны́й ѿче.

І҆ере́ѷ па́ки:

Не шлюбова́лсѧ и҆́ншой кото́рой вѣ́ры малже́нскои.

Жени́хъ ѿвѣща́етъ:

Не шлюбова́лемъ.

И҆ абїе І҆ере́ѷ, зрѧ къ невѣ́сте, вопрошаетъ ю҆̀, гл҃ѧ̀:

Ма́ешъ Имⷬ҇къ: во́лю до́брꙋю и҆ непримꙋшо́нꙋю, и҆ поставлене́ный ᲂу҆́мыслъ, понѧ́ти ᲃобѣ́ за малжо́нка тогѡ̀ Имⷬ҇къ: кото́рогѡ пре́дъ собо́ю тꙋ́тъ ви́дишъ.

И҆ ѿвеща́етъ невѣ́ста, гл҃ѧ:

Ма́ю, велебны́й ѿче.

І҆ере́ѷ па́ки въпраша́етъ ю҆̀:

Не шлюбова́лась комꙋ̀ и҆́ншомꙋ вѣ́ры малже́нскои.

И҆ ѿвеща́етъ невѣ́ста:

Не шлюбова́ламъ.

(Зрѝ ѽ І҆ере́ю и҆ внима́й ѡ҆па́снѡ, а҆́ще жени́хъ, и҆лѝ невѣ́ста не ѿвѣща́етъ ти на въпроше́нїе твоѐ ᲃі́е, и҆лѝ є҆ди́нъ ѿ ни́хъ, рече́тъ, ꙗ҆́кѡ не хощꙋ̀: да ника́коже дерꙁне́ши вѣнча́ти и҆́хъ, подъ и҆ꙁверже́нїемъ ѿ ᲃа́на твое́гѡ: но а҆́бїе преста́ни, и҆ повелѝ и҆́ма и҆тѝ въ своѧ̀ си.) а҆́ще же къ всѧ́комꙋ въпроше́нїю съи́ꙁволителнѣ беꙁъ прекосло́вїѧ ѿвѣща́ета ѡ҆́ба, преднаписа́нное Послѣдова́нїе по ᲂу҆ка́ꙁꙋ всѐ съвершѝ.

Зрѝ ѽ І҆ере́ю, и҆ то́щно и҆ сі́е съхранѝ.

А҆́ще не ѡ҆брꙋче́ни бы́ша новобра́чнїи нико́лиже по преднаписа́нномꙋ Церко́вномꙋ ᲂу҆ста́вꙋ, и҆ а҆́ще нѣ́кїѧ ра́ди и҆ благосло́вныѧ вины̀ не хо́щеши съверши́ти ѡ҆брꙋче́нїе, но а҆́бїе вѣнча́еши, по сконча́нїи предрече́нныхъ Въпро́сѡвъ и҆ Ѿвѣ́тѡвъ, вꙁемлѝ пе́рстенѧ ѿ ѡ҆бо́ю, ѝ положи́въ ѧ҆̀ на Бжⷭ҇тве́нномъ Е҆ѵⷢ҇лїи, а҆́бїе начнѝ ѡ҆бы́чнѡ:

Блⷭ҇ве́нъ Бг҃ъ на́шъ:

И҆ по А҆ми́нѣ Дїѧ́конъ глаго́летъ:

Гд҃ꙋ помоли́мсѧ,

Ли́къ:

Гд҃и поми́лꙋй.

І҆ере́ѷ же чте́тъ Моли́твꙋ сі́ю:

Гд҃и Бо́же на́шъ, ѿ ꙗ҆ꙁы́къ пре́дъ ѡ҆брꙋчи́вый Це́ркѡвъ Дв҃ꙋ чи́стꙋю, блⷭ҇вѝ ѡ҆брꙋче́нїе сі́е, и҆ съединѝ и҆ съхранѝ рабы̀ твоеѧ̀ сі́ѧ въ ми́рѣ и҆ съедине́нїи: тебѣ́ бо подоба́етъ всѧ́каѧ сла́ва чⷭ҇ть и҆ поклоне́нїе, съ Ѿце́мъ и҆ ᲃт҃ы́мъ Дх҃омъ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

Сконча́въ же Моли́твꙋ, вꙁемлѝ пе́рвѣе Невѣ́стинъ пе́рстень, и҆ сътвори́въ три́жды зна́менїе Креста̀ пе́рстенемъ надъ гла́вою Жениха̀, влага́й є҆гѡ̀ на четве́ртый пе́рстъ де́сныѧ є҆гѡ̀ рꙋкѝ, глаголѧ̀:

Ꙍ҆брꙋча́етъ ра́бъ Бж҃їй, Имⷬ҇къ: рабꙋ̀ Бж҃їю Имⷬ҇къ:, въ И҆мѧ̀ Ѿца̀, и҆ Сн҃а, и҆ ᲃт҃а́гѡ Дх҃а: нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

Пото́мъ же вꙁемъ Жени́шинъ пе́рстень и҆ тѣ́мъ три́жды Кре́стное зна́менїе надъ гла́вою невѣ́сты сътвори́въ влага́й є҆гѡ̀ на четве́ртый пе́рстъ де́сныѧ рꙋкѝ є҆ѧ̀, глаголѧ̀:

Ꙍ҆брꙋча́етъ раба̀ Бж҃їѧ, Имⷬ҇къ:, раба̀ Бж҃їѧгѡ Имⷬ҇къ:, въ И҆мѧ̀ Ѿца̀, и҆ Сн҃а, и҆ ᲃт҃а́гѡ Дх҃а: нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

И҆ а҆́бїе ре́кшꙋ Дїѧ́конꙋ:

Гд҃ꙋ помоли́мсѧ,

и҆ Ли́кꙋ:

Гд҃и поми́лꙋй.

І҆ере́ѷ чте́тъ Моли́твꙋ сі́ю.

Гд҃и Бо́же на́шъ, ѡ҆тро́кꙋ Патрїѧ́рха Авраа́ма съшествова́вый въ Месопота́мїю, посыла́ѧ ᲂу҆невести́ти Гд҃на є҆гѡ̀ І҆саа́кꙋ женꙋ̀, и҆ ходата́йствомъ водоноше́нїѧ ѡ҆брꙋчи́ти Реве́ккꙋ ѿкры́вый. самъ блⷭ҇вѝ ѡ҆брꙋче́нїе ра́бѡ́въ твои́хъ, ᲃи́хъ Имⷬ҇къ:, и҆ ᲂу҆твердѝ є҆́же ᲂу҆ни́хъ глагола́нное сло́во: и҆ꙁвѣстѝ и҆́хъ є҆́же ѿ тебѣ̀ ᲃт҃ы́мъ ᲃъедине́нїемъ: Ты́ бо и҆ꙁънача́ла съꙁда́лъ є҆сѝ мꙋ́жескїй по́лъ и҆ же́нскїй, и҆ ѿ тебѣ̀ съчетава́етсѧ мꙋ́жеви жена̀, въ по́мощь и҆ въ воспрїѧ́тїе ро́да чл҃ча. Са́мъ ᲂу҆́бѡ Гд҃и Бо́же на́шъ, посла́вый и҆́стиннꙋ въ наслѣ́дїе твоѐ, и҆ ѡ҆бѣтова́нїе твоѐ на ѿца̀ на́ша, въ ко́емждо ро́дѣ и҆ ро́дѣ и҆ꙁбра́нныѧ твоѧ̀. При́ꙁри и҆ на раба̀ твое́гѡ Имⷬ҇къ:, и҆ на рабꙋ̀ Твою̀ Имⷬ҇къ:, и҆ ᲂу҆твердѝ ѡ҆брꙋче́нїе и҆́хъ въ вѣ́ре и҆ съедине́нїи, и҆ и҆́стине, и҆ любвѝ. Ты бо Гд҃и покаꙁа́лъ є҆сѝ даѧ́ти ѡ҆брꙋче́нїе и҆ ᲂу҆твержда́тисѧ въ все́мъ. Пе́рстенѧ ра́ди да́стсѧ вла́сть І҆ѡ́сифꙋ въ Е҆гѵ́птѣ: пе́рстенѧ ра́ди прослави́сѧ Данїи́лъ въ стра́нѣ Вавѵлѡ́нстѣй: Пе́рстенѧ ра́ди ꙗ҆ви́сѧ и҆́стина Ѳама́рѣ: Пе́рстенѧ ра́ди Ѿц҃ъ на́шъ Небѣ́сный ще́дръ бы́сть на Сн҃а свое́гѡ: дади́те бо, речѐ, пе́рстень на десни́цꙋ є҆гѡ̀, и҆ закла́вше те́лецъ ᲂу҆пита́ннаго, ꙗ҆́дше въꙁвесели́мсѧ. Сі́ѧ десни́ца твоѧ̀, Гд҃и, Мѡ́ѷсеѧ въѡрꙋжѝ въ Че́рмномъ Мо́ри; сло́вомъ бо твои́мъ и҆́стиннымъ Небеса̀ ᲂу҆тверди́шасѧ и҆ землѧ̀ ѡ҆снова́на, бы́стъ и҆ десни́ца ра́бъ твои́хъ блⷭ҇ви́тсѧ сло́вомъ ти держа́внымъ, и҆ мы́шцею высо́кою: ᲃа́мъ ᲂу҆́бѡ и҆ нн҃ѣ, Влады́кѡ, блⷭ҇вѝ Пе́рстней положе́нїе ᲃі́е блⷭ҇ве́нїемъ нбⷭ҇нымъ: и҆ А҆́нгг҃елъ Гд҃нь да предъи́детъ пре́дъ ни́ми въ всѧ̀ днѝ живота̀ и҆́хъ.

Ꙗ҆́кѡ ты̀ є҆сѝ блⷭ҇влѧ́й и҆ ᲃт҃ѧ́й всѧ́ческаѧ, и҆ тебѣ̀ ᲃла́вꙋ воꙁсыла́емъ, Ѿцꙋ̀, и҆ Сн҃ꙋ, и҆ ᲃт҃о́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

И҆ а҆́бїе начина́етъ порѧ́дꙋ всѐ вѣнча́нїе съверша́ти.

А҆́ще же бы́стъ ѡ҆брꙋче́нїе пре́жде, ничто́же ѿ си́хъ пре́дъ ᲂу҆каꙁа́ныхъ тво́ритъ и҆ гл҃етъ, но по Въпро́сахъ и҆ Ѿвѣ́тахъ, а҆́бїе Вѣнча́нїе начина́ет.

Ре́кшꙋ Дїѧ́конꙋ.

Благословѝ, Влады́кѡ.

І҆ере́ѷ же:

Благослове́но Ца́рство Ѿца̀ и҆ Сн҃а, и҆ Свѧта́го Дх҃а, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

Дїѧ́конъ же глаголе́тъ Е҆кте́нїѧ сі́ѧ.

Ми́ромъ Гд҃ꙋ помоли́мсѧ.

Ꙍ҆ свы́шнемъ ми́рѣ и҆ сп҃се́нїи дш҃ъ на́шихъ, Гд҃ꙋ помоли́мсѧ.

Ꙍ҆ ми́рѣ всегѡ̀ мі́ра, благостоѧ́нїи ᲃт҃ы́хъ Бж҃їихъ Це́ркве́й и҆ съедине́нїи всѣ́хъ, Гд҃ꙋ помоли́мсѧ.

Ꙍ҆ ст҃омъ хра́ме се́мъ и҆ съ вѣ́рою, благогове́нїемъ и҆ стра́хомъ Бо́жїимъ входѧ́щихъ въ ѻ҆́нь, Гд҃ꙋ помоли́мсѧ.

Ꙍ҆ Вели́комъ Королѣ̀ на́шемъ, Имⷬ҇къ:

Ꙍ҆ А҆рхїепи́скопе на́шемъ, че́стномъ Пресви́тере:

Ꙍ҆ рабѣ́хъ Бж҃їихъ, Имⷬ҇къ, нн҃ѣ съчетава́ющихсѧ дрꙋ́гъ дрꙋ́гꙋ въ бра́ка приѡбще́нїе, и҆ ѡ҆ сп҃се́нїи и҆́хъ, Гд҃ꙋ помоли́мсѧ.

Ꙍ҆ є҆́же блⷭ҇ви́тисѧ бра́кꙋ семꙋ̀, ꙗ҆́коже въ Канегале́и, Гд҃ꙋ помоли́мсѧ.

Ꙍ҆ є҆́же съхрани́ти и҆́ма дрꙋ́гъ дрꙋ́гꙋ благода́тїю Хв҃ою вѣ́рꙋ, любо́въ же и҆ че́сть ᲃꙋпрꙋ́жескагѡ ᲃъю́ꙁа неꙁаꙁо́рнѡ и҆ нераꙁдрѣши́мѡ, Гд҃ꙋ помоли́мсѧ.

Ꙍ҆ є҆́же ми́рнѡ и҆ благоче́стнѡ пребы́ти и҆́ма въ нераꙁрѣши́момъ ᲃъю́ꙁѣ ᲃꙋпрꙋ́жескагѡ съжи́телства, благода́тїю Хв҃ою, Гд҃ꙋ помоли́мсѧ.

Ꙍ҆ є҆́же пода́тисѧ и҆́ма цѣломꙋ́дрїе, и҆ пло́дъ чре́ва на по́лꙁꙋ, Гд҃ꙋ помоли́мсѧ.

Ꙍ҆ є҆́же въꙁвесели́тисѧ и҆́ма ѡ҆ свидѣ́нїи ᲃыно́въ и҆ дще́рїй, Гд҃ꙋ помоли́мсѧ.

Ꙍ҆ є҆́же дарова́тисѧ и҆́ма благоча́дїѧ въспрїѧ́тїе, и҆ не заꙁо́рное пребыва́нїе, Гд҃ꙋ помоли́мсѧ.

Ꙍ҆ є҆́же дарова́тисѧ и҆́ма и҆ намъ, всѧ̀ ꙗ҆́же къ ᲃп҃се́нїю проше́нїѧ, Гд҃ꙋ помоли́мсѧ.

Ꙍ҆ и҆ꙁба́витисѧ и́мъ, и҆ намъ ѿ всѧ́коѧ ско́рби, гнѣ́ва и҆ нꙋ́жды, Гд҃ꙋ помоли́мсѧ.

Застꙋпѝ, сп҃сѝ, поми́лꙋй и҆ съхранѝ и҆́хъ и҆ на́съ, Бо́же, твое́ю благода́тїю.

Пресвѧтꙋ́ю, пречи́стꙋю, Преблⷭ҇ове́ннꙋю, ᲃла́внꙋю Влады́чицꙋ:

Сщ҃енникъ, въꙁглаша́етъ:

Ꙗ҆́кѡ подоба́етъ тебѣ̀ всѧ́каѧ сла́ва, чⷭ҇тъ, и҆ поклоне́нїе, Ѿцꙋ, и҆ Сн҃ꙋ, и҆ ᲃт҃о́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

Дїѧ́конъ:

Гд҃ꙋ помоли́мсѧ.

Ли́къ:

Го́споди, поми́лꙋй.

І҆ере́ѷ Моли́твꙋ сїю̀ велегла́снѡ:

Бо́же Прчⷭ҇тый, и҆ всѧ́коѧ тва́ри съꙁда́телю, ребро̀ Пра́ѿца А҆да́ма за твоѐ человѣкѡлю́бїе въ женꙋ̀ преобраꙁи́вый и҆ блⷭ҇ви́вый и҆́хъ и҆ реки́й: Растѣ́тесѧ и҆ множи́тесѧ, и҆ ѡ҆блада́йте земле́ю, и҆ ѡ҆бои́хъ и҆́хъ є҆ди́нъ ᲂу҆́дъ покаꙁа́вый съпрѧже́нїемъ: сегѡ̀ бо ра́ди ѡ҆ста́витъ человѣ́къ ѿца̀ свое́гѡ и҆ ма́терь, и҆ прилѣпи́тсѧ женѣ̀ свое́й, и҆ бꙋ́дета ѡ҆́ба въ пло́ть є҆динꙋ̀: И҆ и҆́хъ же Бг҃ъ съпрѧжѐ, человѣ́къ да не раꙁлꙋча́етъ. Раба̀ твое́гѡ, А҆враа́ма, блⷭ҇ви́вый, и҆ раꙁверꙁы́й ложесна̀ Са́ррина, и҆ ѿца̀ мнѡ́гимъ ꙗ҆ꙁы́комъ сътвори́вый; И҆саа́ка Реве́цѣ дарова́вый, и҆ Рожⷭ҇тво̀ єѧ̀ блⷭ҇ви́вый; и҆ и҆ꙁъ не́гѡ двана́десѧте Патрїа́рховъ покаꙁа́вый: І҆о́сифа и҆ А҆сене́фꙋ съпрѧгі́й, пло́дъ и҆́ма дѣтотворе́нїѧ, Ефре́ма и҆ Мана́ссїю дарова́вый: Заха́рїю и҆ Е҆лисаве́ѳꙋ прїи́мый: и҆ Предте́чꙋ рожде́нїе и҆́ма покаꙁа́вый: ѿ ко́рене І҆ессе́ꙍва по пло́ти и҆ꙁрасти́вый при́снѡ Дв҃ꙋю, и҆ и҆́ꙁъ неѧ̀ въплоти́выйсѧ, и҆ роди́вый на спⷭ҇нїе ро́да человѣ́ческагѡ: за неиꙁрече́нное твоѐ дарова́нїе и҆ мнѡ́гꙋю бла́гость, прише́дый въ Канагалїле́ю и҆ ᲃꙋ́щїй та́мѡ Бра́къ блⷭ҇ви́вый; ꙗ҆́кѡ да ꙗ҆ви́ши, ꙗ҆́кѡ твоѧ̀ во́лѧ є҆́стъ За́конное ᲃꙋпрꙋ́жество, и҆ є҆́же и҆ꙁъ не́гѡ чадотворе́нїе. Са́мъ, Влады́кѡ Прⷭ҇ты́й, прїймѝ моле́нїе на́съ, рабо́въ твои́хъ, и҆ ꙗ҆́коже та́мѡ, и҆ здѐ прише́дъ неви́димымъ твои́мъ предста́тельствомъ, блⷭ҇вѝ бра́къ се́й, и҆ пода́ждъ рабѡ́мъ твои́мъ си́мъ, Имⷬ҇къ: живо́тъ ми́ренъ, долготꙋ̀ дні́й, цѣломꙋ́дрїе, дрꙋ́гъ къ дрꙋ́гꙋ любо́въ въ ᲃъю́ꙁе ми́ра, ᲃѣ́мѧ долгоживо́тнѡ, ꙗ҆́же ѡ҆ ча́дѣхъ благода́ть, неꙋвѧда́емый ᲃла́вы вѣне́цъ. Сподо́би и҆́хъ ви́дѣти ча́да ча́дѡвъ, ло́же и҆́хъ ненавѣ́тнѡ съблюдѝ, и҆ да́ждь и҆́ма ѿ росы̀ Нбⷭ҇ныѧ ᲃъвы́ше, и҆ ѿ тꙋ́ка зе́мнагѡ: И҆сполнѝ дѡ́мы и҆́хъ Пшени́ца, Вина̀ и҆ Є҆ле́а и҆ всѧ́коѧ блгⷭ҇ты́ни, да преподаю́тъ и҆ требꙋ́ющимъ, дарꙋ́ѧ кꙋ́пно и҆ сꙋ́щимъ ᲃъ ни́ма всѧ ꙗ҆́же къ ᲃпⷭ҇нїю проше́нїѧ.

Ꙗ҆́кѡ Бг҃ъ ми́лостїй и҆ щедрѡ́тъ, и҆ человѣкѡлю́бїѧ є҆сѝ, и҆ тебѣ̀ ᲃла́вꙋ воꙁсыла́емъ съ беꙁнача́льнымъ твои́мъ Ѿце́мъ, и҆ съ Пресвѧты́мъ, и҆ благи́мъ, и҆ животворѧ́щимъ ти Дх҃омъ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

Дїѧ́конъ:

Гд҃ꙋ помоли́мсѧ.

Ли́къ:

Го́споди, поми́лꙋй.

І҆ере́ѷ же Моли́твꙋ сі́ю велегла́сно глаголе́тъ.

Блⷭ҇ве́нъ є҆сѝ Гд҃и Бо́же на́шъ, та́йнагѡ и҆ чи́стагѡ бра́ка ᲃщ҃еннѡ дѣйстве́нниче, и҆ тѣле́снагѡ законополо́жниче, нетле́нїѧ храни́телю, жите́йскихъ бла́гъ строи́телю. Са́мъ Влады́кѡ, въ нача́лѣ съꙁда́вый человѣ́ка и҆ постави́вый є҆гѡ̀ ꙗ҆́кѡ Царѧ̀ тва́ри, и҆ рекі́й: не добро̀ человѣ́кꙋ є҆ди́номꙋ бы́ти на землѝ, сътвори́мъ є҆мꙋ̀ помо́щницꙋ по не́мꙋ: и҆ вꙁемъ є҆дино̀ ѿ ре́бръ є҆гѡ̀, съꙁда́лъ є҆сѝ женꙋ̀, ю҆́же ви́девъ Ада́мъ, речѐ: ᲃе нн҃ѣ ко́стъ ѿ ко́сте́й мои́хъ, и҆ пло́ть ѿ пло́ти мое́ѧ; та нарече́тсѧ жена̀, ꙗ҆́кѡ ѿ мꙋ́жа свое́гѡ вꙁѧ́та бы́сть ᲃїѧ. Сегѡ̀ ра́ди ѡ҆ста́витъ человѣ́къ ѿца̀ свое́гѡ и҆ ма́теръ свою̀, и҆ прилѣ́питсѧ къ женѣ̀ свое́й, и҆ бꙋ́дета ѡ҆́ба въ пло́ть є҆динꙋ̀; и҆ и҆́хъ же Бг҃ъ ᲃъпрѧжѐ, человѣ́къ да не раꙁлꙋча́етъ. И҆ нн҃ѣ, Гд҃и Бо́же на́шъ, ниꙁпослѝ благода́ть твою̀ Нбⷭ҇нꙋю на рабы̀ твоѧ̀ сі́ѧ, Имⷬ҇къ: и҆ да́ждь ѿрокови́ци се́й въ все́мъ повинова́тисѧ мꙋ́жеви, и҆ рабꙋ̀ твое́мꙋ ᲃемꙋ̀ бы́ти въ главꙋ̀ женѣ̀; ꙗ҆́кѡ да поживꙋ́тъ по во́ли твое́й: Блⷭ҇вѝ и҆́хъ, Гд҃и Бо́же на́шъ, ꙗ҆́коже блⷭ҇ви́лъ є҆сѝ А҆враа́ма и҆ Са́ррꙋ: Блⷭ҇вѝ и҆́хъ Гд҃и Бо́же на́шъ, ꙗ҆́коже блⷭ҇ви́лъ є҆сѝ И҆саа́ка и҆ Реве́ккꙋ; Блⷭ҇вѝ и҆́хъ, Гд҃и Бо́же на́шъ, ꙗ҆́коже блⷭ҇ви́лъ є҆сѝ І҆а́кѡва и҆ всѧ̀ Патрїа́рхи; Блⷭ҇вѝ и҆́хъ Гд҃и Бо́же на́шъ, ꙗ҆́коже блⷭ҇ви́лъ є҆сѝ И҆о́сифа и҆ А҆сене́фꙋ; Блⷭ҇вѝ и҆́хъ Гд҃и Бо́же на́шъ, ꙗ҆́коже блⷭ҇ви́лъ є҆сѝ Мѡѷсе́ѧ и҆ Сепфѡ́рꙋ; Блⷭ҇вѝ и҆́хъ Гд҃и Бо́же на́шъ, ꙗ҆́коже блⷭ҇ви́лъ є҆сѝ Иꙍаки́ма и҆ А́ннꙋ: Блⷭ҇вѝ и҆́хъ Гд҃и Бо́же на́шъ, ꙗ҆́коже блⷭ҇ви́лъ є҆сѝ Заха́рїю и҆ Е҆лисаве́ѳꙋ. Сохранѝ и҆́хъ Гд҃и Бо́же на́шъ, ꙗ҆́коже съхрани́лъ є҆сѝ Нѡ́ѧ въ Ковче́ꙁѣ; Съхранѝ и҆́хъ Гд҃и Бо́же на́шъ, ꙗ҆́коже съхрани́лъ є҆сѝ І҆ѡ́нꙋ въ чре́вѣ Ки́товѣ: Съхранѝ и҆́хъ Гд҃и Бо́же на́шъ, ꙗ҆́коже съхрани́лъ є҆сѝ ᲃт҃ыѧ трѝ Ѻ҆тро́ки ѿ ѡ҆гнѧ̀, ниꙁпосла́въ и҆́мъ ро́сꙋ съ небесѐ; Да прі́йдетъ на́нѧ ра́дость ѡ҆́наѧ, ю҆́же и҆мѣ̀ блаже́ннаѧ Е҆ле́на, є҆гда̀ ѡ҆брѣтѐ чⷭ҇тны́й Кре́стъ. Помѧнѝ и҆́хъ Гд҃и Бо́же на́шъ, ꙗ҆́коже помѧнꙋ́лъ є҆сѝ Е҆но́ха, Си́ма, и҆ И҆лїю̀: Помѧнѝ и҆́хъ Гд҃и Бо́же на́шъ, ꙗ҆́коже помѧнꙋ́лъ є҆сѝ ᲃт҃ы́ѧ твоѧ̀ четыридесѧ́тъ Мꙋ́ченики, ниꙁпосла́въ и҆́мъ съ небесѐ вѣнца̀: Помѧнѝ, Бо́же, и҆ въспита́вшаѧ и҆́хъ роди́телѧ, занѐ моли́твы роди́телей ᲂу҆твержда́ютъ ѡ҆снова́нїѧ до́мѡвъ. Помѧнѝ, Гд҃и рабы̀ твоѧ̀ ᲂу҆невѣсти́вшїѧсѧ, и҆ съше́дшїѧсѧ въ ра́дость сі́ю. Помѧнѝ, Гд҃и Бо́же на́шъ, раба̀ твое́гѡ, Имⷬ҇къ:, и҆ рабꙋ̀ Твою̀, Имⷬ҇къ:, и҆ благословѝ и҆́хъ. Да́ждь и҆́мъ плѡ́дъ чре́ва, доброча́дїе, є҆диномы́слїе дꙋша́мъ и҆ тѣлесе́мъ. Въꙁвысѝ и҆́хъ ꙗ҆́коже Ке́дры Лива́нскїѧ, ꙗ҆́кѡ Виногра́дъ благовѣ́твенъ. Да́рꙋй и҆́ма сѣ́мѧ кла́сѧнѡ, да всѧ́кѡ дово́льствѡ и҆мѣ́юще, и҆ꙁѡбилꙋ́ютъ на всѧ́кое дѣ́ло благо́е и҆ тебѣ̀ благоꙋго́дное; и҆ да ᲂу҆́ꙁрѧтъ ᲃыны̀ ᲃынѡ́въ свои́хъ, ꙗ҆́кѡ новора́сли ма́сличныѧ ѻ҆́крестъ тра́пе́ꙁы свое́ѧ, и҆ благоꙋгоди́вше пре́дъ тобо́ю, въꙁсїѧ́ютъ ꙗ҆́коже ᲃвѣти́ла на небесѝ, ѡ҆ въ тебѣ́, Гд҃ѣ на́шемъ. съ ни́мъ же ᲃла́ва, держа́ва, чⷭ҇тъ и҆ поклоне́нїе, беꙁнача́льномꙋ твое́мꙋ Ѿцꙋ̀, и҆ животворѧ́щомꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

По моли́твѣ же а҆́бїе І҆ере́ѷ вꙁемъ шꙋи́цею свое́ю десни́цꙋ Женихо́вꙋ, десни́цню же десни́цꙋ Невѣ́стинꙋ, и҆ ѡ҆бо́ѧ ᲃꙋпрѧ́гъ въкꙋ́пѣ, подъе́млетъ Е҆питра́хилѧ конецъ, и҆ а҆кѝ ѡ҆бвѧ́ꙁꙋѧ крестаѻ́браꙁнѡ ѡ҆бвива́етъ ѧ҆̀ тѣ́мъ, и҆ си́це придержа̀, повелѣва́етъ и҆́ма ѡ҆бѣ́тъ дрꙋ́гъ дрꙋ́гꙋ твори́ти пре́дъ Бо́гомъ, словесѝ си́ми бра́къ за́конный съставлѧ́ющими: въ пе́рвехъ Жени́хъ по є҆дино́мꙋ словесѝ І҆ере́ю предвѣща́ющꙋ, въ є҆́же ᲂу҆слыша́тисѧ и҆ ѿ І҆ере́ѧ и҆ ѿ предстоѧ́щихъ, ᲃвойстве́ннымъ Рꙋ́скимъ ꙗ҆ꙁы́комъ гл҃етъ, ре́кшꙋ І҆ере́ю: мо́въ за мно́ю:

Ꙗ҆́ И҆мⷬ҇къ: берꙋ̀ собѣ̀ тебѣ̀ И҆мⷬ҇къ: замалжо́нкꙋ: и҆ шлюбꙋ́ю тобѣ̀, ми́лостъ, вѣ́рꙋ, и҆ ᲂу҆чти́востъ малже́нскꙋю, а҆ и҆́жъ тебѣ̀ не ѡ҆пꙋщꙋ̀ а҆́жъ до сме́рти: та́жъ ми Бо́же въ Трⷪ҇ци ᲃт҃о́й є҆ди́ный помоꙁѝ, и҆ всѝ ᲃт҃ы́и.

Сконча́въ же сі́ѧ а҆́бїе І҆ере́ѷ, Невѣ́стѣ повелѣва́етъ гл҃а́ти, ᲃа́мъ предвѣща́ѧ ᲃловеса̀ ᲃі́ѧ, ѡ҆на́ же та́кожде ᲂу҆раꙁꙋми́телнѣ І҆ере́ю ре́кшꙋ, мо́въ за мно́ю:

Ꙗ҆ И҆мⷬ҇къ: берꙋ собѣ̀ тебѣ̀ И҆мⷬ҇къ: за малжо́нка: и҆ шлюбꙋ́ю тобѣ̀, ми́лостъ, вѣ́рꙋ, и҆ ᲂу҆чти́востъ, и҆ послꙋше́нство малже́нское, а҆ и҆́жъ тебѣ̀ не ѡ҆пꙋщꙋ̀ а҆́жъ до сме́рти: та́къ ми Бо́же въ Трⷪ҇ци ᲃт҃о́й є҆ди́ный помоꙁѝ, и҆ всѝ ᲃт҃ы́и.

А҆́ще же ᲃі́ѧ беꙁъ преткнове́нїѧ ѡ҆́ба и҆ꙁрекꙋ́тъ ᲂу҆раꙁꙋми́телнѣ, І҆ере́ѷ шꙋи́цею придержа̀ гл҃ѧ̀:

Е҆же Бг҃ъ съчета̀, человѣ́къ да не раꙁлꙋча́етъ.

Се́же ре́къ, раꙁрѣша́етъ рꙋ́цѣ є҆́ю, и҆ и҆спꙋсти́въ Е҆пітрахи́ль, пре́днѧѧ съверша́етъ Моли́твы.

Зрѝ ѽ І́ерѐю и҆ ѡ҆па́снѡ съхранѝ.

А҆́ще є҆ди́нъ ѿ новобра́чныхъ предрече́ннаѧ ѡ҆бѣто́внаѧ словеса̀, бе́ꙁъ ни́хъ же За́конный Бра́къ съста́витисѧ ника́коже мо́жетъ, да ника́коже дерꙁне́ши вѣнча́ти ѧ҆̀: но а҆́бїе престанѝ, и҆́маже въсвоѧ́си ѿ и҆тѝ повелѝ. А҆́ще же ѡ҆́ба и҆ꙁрекꙋ́тъ, вꙁе́мъ ᲃт҃о́е Е҆ѵⷢ҇лїе, да́ждъ и҆́ма лобꙁа́ти є҆̀, пе́рвѣе Женихꙋ̀, пото́мже Невѣ́стѣ.

Дїѧ́конъ же глаголе́тъ:

Гд҃ꙋ помоли́мсѧ.

Ли́къ:

Го́споди, поми́лꙋй.

І҆ере́ѷ же Моли́твꙋ сі́ю глаголе́тъ велегла́сно.

Бо́же ᲃт҃ы́й, съꙁда́вый ѿ пе́рсти человѣ́ка, и҆ ѿ ребра̀ съꙁда́вый женꙋ̀, и҆ спрѧги́й є҆мꙋ̀ помо́щницꙋ по не́мъ, зане́же та́кѡ ᲂу҆го́днѡ бы́сть твое́мꙋ вели́чествꙋ, не само́мꙋ бы́ти человѣ́кꙋ на землѝ: Са́мъ и҆ нн҃ѣ, Влады́кѡ, послѝ рꙋ́кꙋ твою̀ ѿ ᲃта́гѡ жили́ща твое́гѡ, и҆ съчета́й раба̀ твое́гѡ сегѡ̀, Имⷬ҇къ, и҆ рабꙋ̀ твою̀ ᲃию̀, Имⷬ҇къ:, занѐ ѿ тебѣ̀ ᲃъчетава́етсѧ мꙋ́жеви жена̀. Съпрѧзѝ и҆́хъ въ є҆диномꙋ́дрїи, Венча́й и҆́хъ въ пло́ть є҆динꙋ̀, дарꙋ́й и҆́ма плѡ́дъ чре́ва, благоча́дїѧ приѧ́тїе.

Ꙗ҆́кѡ твоѧ̀ держа́ва и҆ твоѐ є҆́стъ Ца́рство, и҆ ᲃи́ла, и҆ ᲃла́ва, Ѿца̀, и҆ Сн҃а, и҆ ᲃт҃а́гѡ Дх҃а, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

И҆ по моли́твѣ, вꙁе́мъ І҆ере́ѷ Вѣне́цъ є҆ди́нъ съ Креста̀.

Дїѧ́конꙋ ре́кшꙋ:

Го́сподꙋ помоли́мсѧ,

Пѣвце́мъ же:

Го́споди, поми́лꙋй.

Знамена́етъ Жениха̀ крестаѡ́браꙁнѡ Вѣнце́мъ, и҆ да́в є҆мꙋ̀ лобꙁа́ти Вѣне́цъ: полага́етъ на главѣ̀ є҆гѡ̀ глаголѧ̀:

Вѣнча́етсѧ ра́бъ Бж҃їй, Имⷬ҇къ: въ И҆мѧ̀ Ѿца̀, и҆ Сн҃а, и҆ ᲃта́гѡ Дх҃а.

И҆ вꙁе́мъ вто́рый Вѣне́цъ, знамена́етъ тѣ́мъ и҆ Невѣ́стꙋ, и҆ давъ є҆́й лобꙁа́ти то́й, полага́етъ є҆гѡ̀ на главѣ̀ є҆ѧ̀, глаголѧ̀:

Вѣнча́етсѧ раба̀ Бж҃їѧ, Имⷬ҇къ: въ И҆мѧ̀ Ѿца̀, и҆ Сн҃а, и҆ ᲃта́гѡ Дх҃а.

Посе́мъ благословлѧ́етъ и҆́хъ десни́цею три́жды глаголѧ̀:

Гд҃и Бо́же на́шъ, ᲃла́вою и҆ че́стїю венча́й и҆́хъ.

Дїѧ́конъ:

Во́нмемъ.

І҆ере́ѷ:

Ми́ръ все́мъ.

Ли́къ:

И҆ дх҃ови твое́мꙋ́.

Дїѧ́конъ:

Премꙋ́дростъ во́нмѣмъ.

Та́же Проки́менъ Гла́съ и҃.

Положи́лъ є҆сѝ на гла́вахъ и҆́хъ Вѣ́нца, ѿ ка́мене чⷭ҇тна́гѡ, живота̀ проси́ста ᲂу҆ тебѣ̀, и҆ да́лъ є҆сѝ и҆́ма.

Стихъ:

Ꙗ҆́кѡ дасѝ и҆́ма блⷭ҇ве́нїе въ вѣ́къ вѣ́ка, въꙁвесели́ши и҆́хъ ра́достїю съ лице́мъ твои́мъ.

Дїѧ́конъ:

Премꙋ́дрость.

Чте́цъ, Надписа́нїе А҆пⷭ҇тола глаголе́т:

К Е҆фесе́ѡмъ посла́нїе Ст҃гѡ Апо́стола Па́вла чте́нїе.

Дїѧ́конъ:

Во́нмѣмъ.

Чте́цъ же чте́тъ. А҆по́столъ, Гла́ва, є҃. Зача́ло, ᲃа҃.

Бра́тїе, благодарѧ́ще всегда̀ ѡ҆ всѣ́хъ, ѡ҆ И҆мени Гд҃а на́шегѡ І҆и҃ᲃ Ха҃, Бг҃а и҆ Ѿца̀: Повинꙋ́ющесѧ дрꙋ́гъ дрꙋ́гꙋ въ стра́сѣ Бж҃їи. Же́ны свои́мъ мꙋже́мъ повинꙋ́йтесѧ, а҆кѝ Гд҃ꙋ: Занѐ мꙋ́жъ є҆́стъ глава̀ женѣ̀, ꙗ҆́коже и҆ Хᲃ҃ глава̀ Це́ркве: и҆ то́й є҆́стъ ᲃп҃си́тель тѣ́ла. Но ꙗ҆́коже Це́рковь повинꙋ́етсѧ Х҃, та́кожде и҆ же́ны свои́мъ мꙋже́мъ въ все́мъ. Мꙋ́жїе, люби́те своѧ̀ же́ны, ꙗ҆́коже и҆ Хᲃ҃ въꙁлюбѝ Це́рковь, и҆ ᲃебѐ предадѐ заню̀: Да ѡ҆свѧти́тъ ю҆̀, ѡ҆чисти́въ ба́нею во́дною въ гл҃ѣ̀. Да предста́витъ ю҆̀ себѣ̀ ᲃла́внꙋ Це́рковь, не и҆мꙋ́щꙋю ᲃкве́рны, и҆лѝ поро́ка, и҆лѝ нѣ́что тако́вѡ: но да є҆́стъ ᲃт҃а и҆ непоро́чна. Та́кѡ до́лжни сꙋ́ть мꙋ́жїе люби́ти своѧ̀ же́ны, ꙗ҆́кѡ своѧ̀ тѣлеса̀. Любѧ́й свою̀ женꙋ̀, себѣ̀ лю́битъ. Никто́же бо когда̀ свою̀ плѡ́ть въꙁненави́дѣ, но пита́етъ и҆ гре́етъ ю҆̀, ꙗ҆́коже и҆ Гд҃ь Це́рковь: Ꙗ҆́кѡ ᲂу҆́ди є҆смы̀ тѣ́ла є҆гѡ̀, ѿ пло́ти є҆гѡ̀, и҆ ѿ ко́стїй є҆гѡ̀. Сегѡ̀ ра́ди ѡ҆ста́витъ человѣ́къ ѿца̀ свое́гѡ и҆ ма́теръ, и҆ прилѣ́питсѧ къ женѣ̀ свое́й, и҆ бꙋ́дета два̀ въ пло́ть є҆динꙋ̀. Та́йна ᲃі́ѧ ве́лїѧ є҆́стъ: А҆́ꙁъ же гл҃ю въ Ха҃ и҆ въ Це́рковь. Ѻ҆ба́че и҆ вы̀ по є҆дино́мꙋ, ко́ждо свою̀ женꙋ̀ си́це да лю́битъ, ꙗ҆́коже и҆ себѣ̀, а жена̀ да бои́тсѧ свое́гѡ мꙋ́жа.

І҆ере́ѷ:

Ми́ръ ти.

Дїѧ́конъ:

Премꙋ́дрость во́нмѣмъ.

Чте́цъ: Ѱалѡ́мъ Дави́довъ.: А҆ллилꙋ́їа.

Гла́съ є҃: Сти́хъ:

Ты̀ Гд҃и ᲃъхрани́ши ны и҆ съблюде́ши ны ѿ ро́да сего́, и҆ въ вѣ́къ.

Дїѧ́конъ:

Премꙋ́дрость, про́сти, ᲂу҆слы́шимъ ст҃а́го Ева́нгелїѧ.

І҆ере́ѷ:

Ѿ ст҃а́го І҆ꙍа́нна Ева́нгелїѧ чте́нїе.

Дїѧ́конъ:

Во́нмѣмъ.

І҆ере́ѷ же чте́тъ ѿ Гла́вы вто́рыа. Зачало ше́стое.

Въ вре́мѧ ѡ҆́нѡ, Бра́къ бы́сть въ Канагалїле́и, и҆ бѣ̀ Ма́ти І҆и҃сова та́мѡ. Зва́нъ же бы́сть и҆ І҆и҃ᲃ и҆ Оу҆́ченици є҆гѡ̀ на Бра́къ. И҆ недоста́вшꙋ винꙋ̀, гл҃а̀ Мт҃и І҆и҃сова къ не́мꙋ: вина̀ не и҆́мꙋтъ. Гл҃а̀ є҆́й І҆и҃ᲃ: что мнѣ и҆ тебѣ̀, же́но; Не ᲂу҆́ при́йде ча́съ мо́й. Гл҃а̀ Ма́ти є҆гѡ̀ слꙋга́мъ: є҆́же а҆́ще рече́тъ ва́мъ, ᲃътвори́те. Бѧ́хꙋ же та́мѡ водонѡ́сы ка́менни ше́сть, лежа́щїи по ѡ҆чище́нїю І҆оѵде́йскꙋ, въмѣща́ющїи по двѣ́ма и҆лѝ трїе́мъ мѣ́рамъ. Гл҃а̀ и҆́мъ І҆и҃ᲃ: наполни́те водонѡ́сы водо́ю: и҆ наполни́ша и҆́хъ да́же до верха̀. И҆ гл҃а̀ и҆́мъ: почерпѣ́те нн҃ѣ, и҆ принесѣ́те А҆рхїтрикли́нови, и҆ принесѡ́ша. Ꙗ҆́коже ᲂу҆́бѡ вкꙋсѝ А҆рхїтрикли́нъ вина̀ бы́вшагѡ ѿ воды̀, и҆ не вѣдѧ́ше ѿкꙋ́дꙋ є҆́стъ: слꙋ́ги же вѣдѧ́хꙋ поче́рпшїи во́дꙋ; пригласѝ жениха̀ А҆рхїтрикли́нъ. И҆ гл҃а̀ є҆мꙋ̀: Всѧ́къ человѣ́къ пре́жде до́брое вино̀ полага́етъ, и҆ є҆гда̀ ᲂу҆пі́ютсѧ, тогда̀ хꙋ́ждшее: ты́же съблю́лъ є҆сѝ до́брое вино̀ да́же досе́лѣ. Се́й сътворѝ нача́токъ зна́менїемъ І҆и҃ᲃ въ Канѣгалиле́йстѣй, и҆ ꙗ҆вѝ ᲃла́вꙋ Свою̀, и҆ вѣрова́ша въ о҆́нъ Оу҆́ченицы є҆гѡ̀.

Пѣвцѝ поютъ:

Сла́ва тебѣ̀, Гд҃и.

Дїѧ́конъ:

Рцѣ́мъ всѝ.

Ѿ всеѧ̀ дш҃а̀ и҆ ѿ всегѡ̀ помышле́нїѧ на́шегѡ:

Гд҃и Вседержи́телю, Бо́же ѡ҆ц҃ъ на́шихъ, мо́лимъ.

Поми́лꙋй на́съ, Бж҃е, по вели́цей ми́лости твое́й.

Е҆щѐ мо́лимсѧ ѡ҆ рабѣ́хъ Бж҃їихъ: И҆мⷬ҇къ:

И҆ помина́етъ и҆́хже хо́щетъ.

Возглаша́етъ:

Ꙗ҆́кѡ ми́лостивъ и҆ человѣкѡлю́бецъ Бг҃ъ є҆сѝ, и҆ тебѣ̀ ᲃла́вꙋ въꙁсыла́емъ, Ѿцꙋ, и҆ Сн҃ꙋ, и҆ ᲃт҃о́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

Дїѧ́конъ:

Гд҃ꙋ помоли́мсѧ.

Ли́къ:

Го́споди, поми́лꙋй.

І҆ере́ѷ глаго́летъ Молитвꙋ сїю велегла́снѡ:

Гд҃и Бо́же на́шъ, въ ᲃп҃си́тельномъ твое́мъ смотре́нїи, сподо́бивый въ Канѣгалїле́йстѣй, че́стный покаꙁа́ти Бра́къ ᲃвои́мъ прише́ствїемъ: Са́мъ и҆ нн҃ѣ рабы̀ твоѧ̀, сі́ѧ, Имⷬ҇къ: и҆́хъ же благоиꙁволи́лъ є҆сѝ съчета́тисѧ дрꙋ́гъ дрꙋ́гꙋ, въ ми́рѣ и҆ съедине́нїи съхранѝ, чⷭ҇тны́й и҆́хъ Бра́къ покажѝ, нескве́рное и҆́хъ ло́же съблюдѝ, непоро́чное и҆́хъ съжи́тельство пребыва́ти благоволѝ. И҆ сподобѝ и҆́хъ въ ста́рости масти́тѣ дости́гнꙋти, чи́стымъ ᲃе́рдцемъ дѣла́ющихъ за́повѣди твоѧ̀.

Ты́ бо є҆сѝ Бг҃ъ на́шъ, Бг҃ъ є҆́же ми́ловати и҆ спаса́ти, и҆ тебѣ̀ ᲃла́вꙋ въꙁсыла́емъ, съ беꙁнача́льнымъ твои́мъ Ѿце́мъ, и҆ всест҃ы́мъ, и҆ благи́мъ, и҆ животворѧ́щимъ ти Дꙋ́хомъ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

Дїѧ́конъ:

Застꙋпѝ, ᲃп҃сѝ, поми́лꙋй.

Днѐ всегѡ̀ съверше́нна, ᲃта̀, ми́рна и҆:

А҆гг҃ла ми́рна, вѣ́рна наста́вника, храни́телѧ:

Ми́лости и҆ оставле́нїѧ грѣ́хо́въ и҆ прегрѣше́нїй:

До́брыхъ и҆ поле́ꙁныхъ дш҃а́мъ на́шимъ:

Про́чее вре́мѧ живота̀ на́шего въ ми́рѣ и:

Хрїстїѧ́нскїѧ кончины̀ живота̀ на́шегѡ:

Съедине́нїе вѣ́ры и҆ прича́стїе ᲃт҃а́гѡ Дх҃а и҆:

Сщ҃енникъ въꙁглаша́етъ:

И҆ сподобѝ на́съ, Влады́кѡ, съ дерꙁнове́нїемъ, неѡсꙋжде́ннѡ ᲃмѣ́ти приꙁыва́ти тебѣ̀, Нбⷭ҇нагѡ Бо́га Ѿца̀, и҆ глаго́лати.

Лю́дїе же всѝ гл҃ю́тъ Моли́твꙋ Гд҃ню, ꙗ҆́же є҆́стъ. Ѿче на́шъ: Ве́съ до конца̀.

І҆ере́ѷ же въꙁглаша́етъ.

Ꙗ҆́кѡ твоѐ є҆́стъ Ца́рство, и҆ ᲃи́ла, и҆ ᲃла́ва, Ѿца̀, и҆ Сн҃а, и҆ ᲃт҃а́гѡ Дх҃а, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

І҆ере́ѷ:

Ми́ръ все́мъ.

Ли́къ:

И҆ дх҃ови твое́мꙋ.

Дїѧ́конъ:

Гла́вы ва́ша Го́сподеви приклони́те.

Ли́къ:

Тебѣ̀ Го́споди.

І҆ере́ѷ же, Моли́твꙋ сі́ю прекло́нь гла́вꙋ, и҆ новобра́чнымъ гла́вы прекло́ншимъ чте́тъ въта́йнѣ.

Бж҃е, всѧ̀ сътвори́вый крѣ́постїю твое́ю, и҆ ᲂу҆тверди́вый вселе́ннꙋю, и҆ ᲂу҆краси́вый вѣне́цъ всѣ́мъ сътворе́ннымъ ѿ тебѣ̀: и҆ ра́бъ твои́хъ ᲃи́хъ, И҆мⷬ҇къ: вѣнча́вшихъсѧ въ приѡбще́нїе Бра́ка, блⷭ҇ве́нїемъ твои́мъ дꙋхо́внымъ.

и҆ Въꙁглаша́етъ:

Ꙗ҆́кѡ блⷭ҇ви́сѧ твоѐ И҆мѧ̀, и҆ просла́висѧ твоѐ Ца́рство, Ѿца̀, и҆ Сн҃а, и҆ ᲃт҃а́гѡ Дх҃а, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

Сконча́въ же Моли́твꙋ а҆́бїе пое́млетъ ѧ҆̀ ᲃщ҃енникъ, ᲃро́дникꙋ, и҆лѝ дрꙋ́гꙋ Женихо́вꙋ держа́щꙋ ᲃъꙁа́ди Вѣнца̀, и҆ ѡ҆браща́етсѧ ᲃъ ни́ма въ ѡ҆́браꙁъ крꙋ́га, поѧ̀ съ людмѝ Тропа́ръ: сі́ѧ, на Глаⷭ҇, є҃.

Вѣ́стнѡ ти бꙋ́ди ѽ І҆ере́ю ꙗ҆́кѡ сі́е ѡ҆браще́нїе крꙋ́жное благосло́вныхъ ра́ди ви́нъ ѡ҆ставлѧ́етсѧ, и҆ не быва́етъ, но а҆́бїе по Моли́твѣ пою́тсѧ тропарѝ всѣ́мъ на свои́хъ мѣ́стахъ стоѧ́щимъ.

И҆са́їѧ, ликꙋ́й, Дв҃аѧ бо прїѧ́ть въ чре́вѣ, и҆ породѝ Сн҃а Е҆мманꙋи́ла: Бг҃а и҆ человѣ́ка, Въсто́къ И҆мѧ̀ є҆мꙋ̀: є҆го́же велича́юще, Дв҃ꙋ ᲂу҆блажа́емъ.

Вто́рый Тропа́ръ, Гла́съ з҃.

Ст҃і́и Мꙋ́ченицы, до́брѣ ᲃтрада́вшїи, и҆ вѣнча́вшїисѧ, моли́тесѧ къ Гв҃и, поми́ловатисѧ дш҃а́мъ на́шимъ.

Тре́тїй Тропа́ръ Гла́съ то́йжде.

Сла́ва тебѣ̀, Хє҃ Бж҃е, А҆по́столѡмъ похва́ла, Мꙋ́ченикѡмъ радова́нїе, и҆́хъ жеже про́повѣдь, Тро́ица Е҆диносꙋ́щнаѧ.

Та́же вꙁима́етъ Вѣнца̀, пе́рвѣе съ Жениха̀, и҆ знамена́ѧ є҆гѡ̀ тѣ́мъ крестаѻбра́ꙁнѡ глаголе́тъ:

Въꙁвели́ченъ бꙋ́ди жени́ше ꙗ҆́коже А҆враа́мъ, и҆ блⷭ҇венъ бꙋ́ди ꙗ҆́коже І҆саа́къ, и҆ ᲂу҆мнѡ́жисѧ ꙗ҆́коже І҆а́кꙍвъ, ходѧ̀ въ ми́рѣ, и҆ дѣла́ѧ въ пра́вдѣ за́повѣди Бж҃їѧ.

Съ Невѣ́сты же снима́ѧ и҆ знамена́ѧ ю҆̀ вѣнце́мъ, глаголе́тъ:

И҆ ты̀, невѣ́стѡ, въꙁвели́чена бꙋ́ди ꙗ҆́коже Са́рра, и҆ въꙁвесели́сѧ ꙗ҆́коже Реве́кка, и҆ ᲂу҆мно́жисѧ ꙗ҆́коже Рахи́ль, веселѧ́щисѧ свое́мꙋ мꙋ́жеви, хранѧ́щи ᲂу҆ста́вы за́кона: занѐ та́кѡ благоволи́лъ є҆́стъ Бг҃ъ.

Та́же гл҃етъ Дїѧ́конъ:

Гд҃ꙋ помоли́мсѧ.

Ли́къ:

Гд҃и, поми́лꙋй.

Сщ҃енникъ же глаголе́тъ Моли́твꙋ сі́ю:

Бо́же Бо́же на́шъ, прише́дый въ Ка́нѣгалиле́йской, и҆ та́мѡ сꙋ́щїй Бра́къ блⷭ҇ви́вый, Блⷭ҇вѝ и҆ рабы̀ твоѧ̀ сі́ѧ, твои́мъ про́мысломъ въ приѡбще́нїе Бра́ка ᲃъчета́вшаѧсѧ: Блⷭ҇вѝ и҆́хъ въхѡ́ды и҆ и҆схѡ́ды, ᲂу҆мнѡ́жи въ благи́хъ жи́тїе и҆́хъ: воспрїймѝ вѣнца̀ и҆́хъ въ Ца́рствїи твое́мъ: нескве́рны, и҆ непоро́чны, и҆ ненавѣ́тны съблюда́ѧ въ вѣ́ки вѣкѡ́въ.

Ли́къ:

А҆ми́нь.

І҆ере́ѷ:

Ми́ръ всѣ́мъ.

Ли́къ:

И҆ дх҃ови твое́мꙋ.

Дїѧ́конъ:

Гла́вы ва́ша Гв҃и преклони́те.

Ли́къ:

Тебѣ̀ Гд҃и.

Сщ҃енникъ гл҃етъ Моли́твꙋ ᲃі́ю:

Ѿц҃ъ, Сн҃ъ, и҆ Дх҃ъ ᲃт҃ы́й, всест҃а́ѧ, и҆ є҆диносꙋ́щнаѧ, и҆ живонача́льнаѧ Тро́ица, є҆дино̀ Бжⷭ҇ство̀ и҆ Ца́рство, да блⷭ҇ви́тъ ва́съ, и҆ да пода́стъ ва́мъ долгожи́тїе, благоча́дствѡ, преспѣѧ́нїе живота̀ и҆ вѣ́рѣ, и҆ да и҆спо́лнитъ ва́съ всѧ́ческихъ и҆́же на землѝ благы́хъ: И҆ да сподо́битъ ва́съ и҆ ѡ҆бѣща́нныхъ бла́гъ въспрїѧ́тїѧ, Моли́твами Прчⷭ҇тыѧ Бц҃ы, и҆ всѣ́хъ ст҃ы́х

Ли́къ:

А҆ми́нь.

Посе́мъ прихо́дитъ І҆ере́ѷ и҆ поꙁдравлѧ́етъ и҆́хъ, и҆ а҆́бїе тво́ритъ Ѿпꙋстъ.

Ре́кшꙋ Дїа́конꙋ:

Премꙋ́дрость.

Пѣвце́мъ же:

Чтⷭ҇нѣ́йшꙋю Херꙋви́мъ.

І҆ере́ѷ:

Сла́ва тебѣ̀, Бж҃е, ᲂу҆пова́нїе на́ше.

Ли́къ:

Сла́ва: И҆ нн҃ѣ: Гд҃и, поми́лꙋй, гⷤ. Блⷭ҇вѝ.

І҆ере́ѷ:

Въ Ка́нагалиле́и прише́ствїемъ свои́мъ че́стенъ Бра́къ покаꙁа́вый, Хᲃ҃, и҆́стинный Бг҃ъ на́шъ, Моли́твами Прчⷭ҇тыѧ свое́ѧ Мт҃ре, ᲃт҃ы́хъ ᲃла́вныхъ и҆ всехва́льныхъ А҆по́столъ, ᲃт҃ы́хъ Боговѣнча́нныхъ Ца́рей и҆ равноапⷭ҇лныхъ, Константи́на и҆ Е҆ле́ны, Ст҃а́гѡ Великомꙋ́ченика Проко́пїѧ, и҆ всѣ́хъ ᲃт҃ы́хъ, поми́лꙋетъ и҆ ᲃп҃се́тъ на́съ, ꙗ҆́кѡ бла́гъ и҆ человѣкѡлю́бецъ.

Сі́ѧ Моли́твы чтꙋ́тсѧ та́мѡ и҆де́же да́же до ѻ҆́смагѡ днѧ въ Вѣнца́хъ не сне́мающе хо́дѧт. Но и҆де́же а҆́бїе сне́млютсѧ по пре́дъ ᲂу҆каꙁа́нномꙋ, не тре́бѣ є҆́стъ честѝ ѧ҆̀.

Гд҃и Бо́же на́шъ, вѣне́цъ лѣ́та блⷭ҇ви́вый, и҆ сі́ѧ Вѣ́нца въꙁложи́ти преда́вый За́кономъ Бра́ка, съчетава́ющимсѧ дрꙋ́гъ дрꙋ́гꙋ, и҆ мꙁдꙋ̀ а҆кѝ ѿдаѧ̀ и҆́мъ целомꙋ́дрїѧ: занѐ чи́сти къ и҆́же ѿ тебѣ̀ ᲂу҆ законоположе́нномꙋ Бра́кꙋ съчета́шасѧ: Са́мъ и҆ въ раꙁдрешѣ́нїи си́хъ вѣнце́въ, съчета́вшихсѧ дрꙋ́гъ дрꙋ́гꙋ блⷭ҇вѝ, и҆ съвокꙋпле́нїе и҆́хъ нерастерꙁа́емо съблюдѝ: да благодарѧ́тъ вы́нꙋ всесвѧто́е И҆мѧ̀ твоѐ, Ѿца̀, и҆ Сн҃а, и҆ ᲃт҃а́гѡ Дх҃а, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

І҆ере́ѷ:

Ми́ръ все́мъ.

Ли́къ:

И҆ дꙋ́хови твоемꙋ̀.

Дїѧ́конъ:

Гла́вы ва́ша Гд҃ви преклони́те.

Ли́къ:

Тебѣ̀ Го́споди.

Съгла́снаѧ дости́гше рабѝ твоѝ, Гд҃и, и҆ послѣдова́нїе съверши́вше бы́вшагѡ въ Канегалиле́и Бра́ка, и҆ съпрѧ́тавше ꙗ҆́же въ не́мъ зна́менїѧ, ᲃла́вꙋ ти въꙁсыла́ютъ, Ѿцꙋ, и҆ Сн҃ꙋ, и҆ ᲃт҃о́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

И҆ быва́етъ Ѿпꙋстъ.

[Вѣ́стнѡ же бꙋ́ди ꙗ҆́кѡ не всю́ды се́й ѡ҆бы́чай съдержи́тсѧ, но то́чїю въ нѣ́кїихъ Це́рквахъ: тѣ́мъ же ᲂу҆́бѡ ка́ѧждѡ Це́рковъ въ все́мъ сво́й дре́внїй съдержи́тъ ѡ҆бы́чай.]

Прише́дши же новобра́чнаѧ невѣ́ста къ Це́ркви, ста́нетъ внѣ̀ двере́й пре́дъ Це́рквїю, І҆ере́ѷ же ста́въ въ две́рехъ Церко́вныхъ ѡ҆дѣѧ́нъ въ Е҆пітра́хиль и҆ Фелѡ́нъ, гл҃етъ къ не́й:

Внидѝ ча́до въ дворы̀ Гд҃нѧ, и҆ всѧ́кимъ благоговѣ́нїемъ и҆ стра́хѡмъ Бж҃їимъ посѣща́ющагѡ Це́рковъ є҆гѡ̀, ꙗ҆́кѡ да прі́ймеши ѿ не́гѡ млⷭ҇ть, и҆ благода́ть пре́дъ ни́мъ ѡ҆брѧ́щеши, въ И҆мѧ̀ Ѿца̀ и҆ Сн҃а и҆ ᲃт҃а́гѡ Дх҃а. А҆ми́нь.

И҆ а҆́бїе въхо́дитъ І҆ере́ї въ Це́рковъ и҆ по не́мъ Невѣ́ста съ свои́ми дрꙋ́ги. ᲃта́в же І҆ере́ѷ въ Церко́вныхъ две́рехъ, Невѣ́ста же пре́дъ ни́мъ въ Па́перти, начина́етъ ѡ҆бы́чнѡ, Блⷭ҇ве́нъ Бг҃ъ на́шъ: Трⷭ҇то́е: Ѿче на́шъ: Ꙗ҆ко твоѐ є҆́стъ Ца́рство: Гд҃и поми́лꙋй: ві҃. Сла́ва: И҆ нн҃ѣ: Прїйдѣ́те поклони́мсѧ, гⷤ. и҆ Ѱалѡ́мъ ѯѕ҃.

Бж҃е, ᲂу҆щедрѝ ны и҆ блⷭ҇вѝ ны: просвѣтѝ лицѐ твоѐ на́ны и҆ поми́лꙋй ны:

Поꙁна́ти на землѝ пꙋть тво́й, въ всѣ́хъ ꙗ҆ꙁы́цѣхъ ᲃпⷭ҇нїе твоѐ.

Да и҆сповѣ́дѧ́тсѧ тебѣ̀ лю́дїе, Бж҃е, да и҆сповѣдѧ́тсѧ тебѣ̀ лю́дїе всѝ.

Да въꙁвеселѧ́тсѧ и҆ въꙁра́дꙋютсѧ ꙗ҆ꙁы́цы: ꙗ҆́кѡ сꙋ́ди́ши лю́демъ правото́ю, и҆ ꙗ҆ꙁы́ки на землѝ наста́виши.

Да и҆сповѣ́дѧтсѧ тебѣ̀ лю́дїе, Бж҃е, да и҆сповѣ́дѧтсѧ тебѣ̀ лю́дїе всѝ.

Землѧ̀ дадѐ пло́дъ сво́й: блгⷭ҇ви́ ны, Бж҃е, Бо́же на́шъ,

Блⷭ҇ви́ ны, Бж҃е: и҆ да ᲂу҆боѧ́тсѧ є҆гѡ̀ всѝ ко́нци землѧ̀.

И҆ посе́мъ ᲃтихѝ ᲃі́ѧ ѿ Ѱалма̀ пѧ́тагѡ.

Гл҃ы̀ моѧ̀ внꙋшѝ, Гд҃и, раꙁꙋмѣ́й зва́нїе моѐ.

Вонмѝ гла́сꙋ моли́твы мое́ѧ, Царю̀ мо́й и҆ Бо́же мо́й.

Ꙗ҆́кѡ къ тебѣ̀ помолю́сѧ, Гд҃и, заꙋ́тра ᲂу҆слы́ши гла́съ мо́й.

Заꙋ́тра предста́нꙋ тѝ, и҆ ᲂу҆ꙁри́ши мѧ̀:

А҆́ꙁъ же въ мнѡ́жествѣ млⷭ҇ти твое́ѧ вни́дꙋ въ до́мъ тво́й, поклоню́сѧ къ Це́ркви ᲃт҃ѣ́й твое́й, въ стра́сѣ твое́мъ.

Гд҃и, наста́ви мѧ̀ пра́вдою твое́ю, и҆ и҆спра́ви пре́дъ тобо́ю пꙋть мо́й.

И҆ а҆́бїе гл҃етъ Моли́твꙋ сі́ю надъ Невѣ́стою прекло́ншею гла́вꙋ, ре́къ:

Гд҃ꙋ помоли́мсѧ:

и҆ Пѣвцемъ:

Гд҃и, поми́лꙋй.

Бо́же Бо́же на́шъ, въ Пррⷪ҇цѣхъ гл҃а́вый, и҆ пре́дъвъꙁвѣсти́вый просвѣще́нїе ра́ꙁꙋма твое́гѡ, бы́ти въ послѣ́днѧѧ рѡ́ды всѣ́мъ ꙗ҆ꙁы́кѡмъ: Не хотѧ́й никомꙋ́же ѿ съꙁда́нныхъ тобо́ю человѣ́къ, беꙁъ прича́стїѧ бы́ти твое́гѡ ᲃп҃се́нїѧ, за́коны положи́лъ є҆сѝ ᲃъсꙋ́домъ твои́мъ и҆ꙁбра́ннымъ А҆по́столомъ Па́вломъ, въ вѣ́рѣ живꙋ́щимъ мꙋ́жемъ же и҆ жена́мъ, є҆́же всѐ въ ᲃла́вꙋ твою҃ твори́ти, и҆ ѡ҆́вѣмъ ᲂу҆́бѡ, є҆́же непокрове́нною гла́вою приноси́ти хва́лꙋ и҆ ᲃлавосло́вїе Прⷭ҇то́мꙋ И҆́мени твое́мꙋ: Си́мъ же покрове́нною гла́вою, въ благоговѣ́нїи и҆́ цѣломꙋ́дрїи до́брѣ ᲂу҆́творѧ́юще ᲃебѐ дѣ́лы благи́ми, вѣ́рою ᲂу҆твержде́ны хвале́нїѧ и҆ мо́лбы съ благодаре́нїемъ приноси́ти ᲃла́вѣ твое́й: Са́мъ ᲂу҆́бѡ Влады́кѡ человѣ́кѡлю́бче, блⷭ҇вѝ рабꙋ̀ твою̀ ᲃі́ю, И҆мⷬ҇къ: и҆ ᲂу҆красѝ главꙋ̀ є҆ѧ̀ красото́ю тебѣ̀ благоꙋго́дною, ꙗ҆́кѡ да по твои́мъ за́повѣдемъ жителствꙋ́ѧ, и҆ въ всѣ́хъ добродѣ́телехъ по благоꙋгожде́нїю твое́мꙋ преспѣва́ѧ, въ цѣломꙋ́дрїи себѣ̀ съблюде́тъ, и҆ кꙋ́пнѡ съ свои́мъ ѿ тебѣ̀ да́ннымъ є҆́й ᲃꙋпрꙋ́жникѡмъ, вѣ́чнаѧ твоѧ̀ блага́ѧ полꙋ́читъ. Млⷭ҇тивъ бо и҆ человѣ́кѡлюби́въ Бг҃ъ є҆сѝ, и҆ тебѣ̀ ᲃла́вꙋ въꙁсыла́емъ, Ѿцꙋ̀, и҆ Сн҃ꙋ, и҆ ᲃт҃о́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нъ.

Посе́мъ І҆ере́ѷ десни́цею благословлѧ́етъ главꙋ̀ є҆ѧ̀ и҆ въꙁлага́етъ на не́и ᲃава́нъ, гл҃ѧ̀:

Да покры́етъ тѧ̀ Гд҃ъ кро́вомъ кри́лꙋ свое́ю, и҆ съхрани́тъ тѧ̀ ѿ всѧ́кагѡ зла̀ въ всѧ̀ днѝ живота̀ твое́гѡ, и҆ да́стъ ти въ ми́рѣ и҆ благоде́нствїи ви́дѣти ᲃн҃ы̀ ᲃынѡ́въ твои́хъ, да́же до тре́тїагѡ и҆ четве́ртагѡ рѡ́да, въкꙋ́пѣ съ мꙋ́жемъ твои́мъ.

И҆ а҆́бїе кро́питъ ю҆̀ ᲃщ҃енною водо́ю, гл҃ѧ̀:

Ꙍ҆кропле́нїемъ воды̀ ᲃеѧ̀ ᲃщ҃енныѧ да сни́детъ и҆ пребꙋ́детъ на тебѣ̀ блⷭ҇ве́нїе Ѿца̀ и҆ Сн҃а и҆ Ст҃гѡ Дх҃а, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

І҆ере́ѷ:

Сла́ва ти Бо́же ᲂу҆пова́нїе на́ше, ᲃла́ва ти.

Ли́къ:

Сла́ва: И҆ нн҃ѣ: Гд҃и поми́лꙋй, гⷤ: Блⷭ҇вѝ.

І҆ере́ѷ же тво́ритъ ѿпꙋ́стъ дне́вный ѡ҆бы́чный, и҆ по ѿпꙋ́стѣ глаголе́тъ къ Невѣ́стѣ, десни́цею благословлѧ́ѧ ю҆̀.

И҆дѝ въ ми́рѣ и҆ приле́жнѡ ᲃъблюдѝ всѧ̀ за́повѣди Гд҃нѧ, въ стра́сѣ є҆гѡ̀ въ всѧ̀ днѝ живота̀ твое́гѡ, повинꙋ́ѧсѧ мꙋ́жеви твое́мꙋ повелѣ́нїю Гд҃ню, въ И҆мѧ̀ Ѿца̀ и҆ Сн҃а и҆ ᲃт҃гѡ Дх҃а: А҆ми́нь.

И҆ та́кѡ благодарѧ́ще Гд҃а, ѿхо́дѧтъ въ своѧ̀ ᲃи.

Вше́дшима и҆́ма въ Це́рковъ, и҆ ста́вшима посре́дъ Це́ркве, пре́дъ проꙋготова́ннымъ Третра́подомъ, Жени́хъ ѡ҆де́снꙋю, Невѣ́ста же ѡ҆шꙋю́ю на просте́ртомъ Ко́ври. І҆ере́ѷ съ Е҆ѵⷢ҇лїемъ, и҆ Кресто́мъ съ вѣнцы̀ на не́мъ, ничто́же поѧ̀ и҆схо́дитъ и҆ꙁъ Ѻ҆́лтарѧ, и҆ поста́вивъ сі́ѧ на Тетра́подѣ, тво́ритъ къ ни́ма поꙋчи́телное ᲃло́во, и҆ въпраша́етъ и҆́хъ ꙗ҆́коже вы́шше, [ᲃе́же всѐ и҆щѝ наꙁа́дѣ на листѣ тч҃з.]⁴⁵ А҆́бїе начина́етъ І҆ере́ѷ ѡ҆бы́чнѡ.

Блⷭ҇ве́нъ Бг҃ъ на́шъ: Та́же Трⷭ҇то́е: по Ѿче на́шъ: Тропа́ръ дне́вный. Посе́мъ Дїа́конъ гл҃етъ Е҆ктенїю:

Ми́ромъ Гд҃ꙋ помоли́мсѧ.

Ꙍ҆ свы́шнемъ ми́рѣ и҆ ᲃп҃се́нїи дш҃ъ на́шихъ:

Ꙍ҆ ᲃт҃ѣ́мъ хра́ме семъ и҆ съ вѣ́рою:

Ꙍ҆ Вели́комъ Королѣ̀ на́шемъ, Имⷬ҇къ:

Ꙍ҆ рабѣ́хъ Бж҃їихъ, Имⷬ҇къ, и҆ є҆́же ѡ҆ Бꙁ҃ѣ покро́вѣ, и҆ съжи́тельствѣ и҆́хъ, Гд҃ꙋ помоли́мсѧ.

Застꙋпѝ, ᲃп҃сѝ, поми́лꙋй и҆ съхранѝ и҆́хъ и҆ на́съ, Бж҃е:

Пресвѧтꙋ́ю, чи́стꙋю, Преблⷭ҇ове́ннꙋю, ᲃла́внꙋю Влады́чицꙋ на́шꙋ:

Ꙗ҆́кѡ подоба́етъ ти всѧ́каѧ ᲃла́ва, чⷭ҇тъ:

Та́же гл҃етъ Дїѧ́конъ:

Гд҃ꙋ помоли́мсѧ.

Ли́къ:

Го́споди, поми́лꙋй.

І҆ере́ѷ же Моли́твꙋ сїю.

Бо́же вѣ́чный, растоѧ́щаѧсѧ съвокꙋплѧ́ѧй въ єди́нство, и҆ съю́ꙁъ любвѐ положи́вый нераꙁдрꙋши́мый: благослови́вый І҆саа́ка и҆ Реве́ккꙋ, и҆ наслѣ́дники тѣ́хъ свое́мꙋ ѡ҆бѣтова́нїю покаꙁа́вый: са́мъ благословѝ и҆ рабы̀ твоѧ̀ сі́ѧ, наставлѧ́ѧ и҆́хъ на всѧ́кое дѣ́ло благо́е.

Ꙗ҆́кѡ ми́лостивый и҆ человѣкѡлю́бецъ Бг҃ъ є҆сѝ, и҆ тебѣ̀ ᲃла́вꙋ воꙁсыла́емъ, Ѿцꙋ̀, и҆ ᲃн҃ꙋ, и҆ Свѧто́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

І҆ере́ѷ:

Ми́ръ всѣ́мъ.

Ли́къ:

И҆ Дх҃ови твое́мꙋ.

Дїѧ́конъ:

Гла́вы ва́ша Гд҃ви приклони́те.

Ли́къ:

Тебѣ̀ Гд҃и.

І҆ере́ѷ Моли́твꙋ:

Гд҃и Бо́же на́шъ, ѿ ꙗ҆ꙁы́къ пре́дъ ѡ҆брꙋчи́вый Це́рковь Дв҃ꙋ чи́стꙋю, благословѝ ѡ҆брꙋче́нїе ᲃі́е, и҆ съединѝ, и҆ ᲃъхранѝ рабы̀ твоѧ̀ ᲃі́ѧ въ ми́рѣ и҆ съедине́нїи.

Тебѣ̀ бо подоба́етъ всѧ́каѧ ᲃла́ва, че́сть и҆ поклоне́нїе, Ѿцꙋ̀, и҆ Сн҃ꙋ, и҆ ᲃт҃о́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

И҆ вꙁе́мъ ᲃщ҃е́нникъ пе́рстни ѿ ѡ҆бо́ю, полага́етъ ѧ҆̀ на Бжⷭ҇тве́нномъ Е҆ѵⷢ҇лїи, и҆ а҆́бїе вꙁе́мъ пе́рвѣе и҆́же ѿ Невѣ́сты тво́ритъ тѣ́мъ Креста̀ зна́менїе надъ гла́вою Жениха̀, и҆ влага́ѧ є҆гѡ̀ на пе́рстъ де́сныѧ рꙋкѝ є҆гѡ̀ глаголѧ̀:

Ꙍ҆брꙋча́етъ ра́бъ Бж҃їй, Имⷬ҇къ: рабꙋ̀ Бж҃їю Имⷬ҇къ:, въ И҆мѧ̀ Ѿца̀, и҆ Сн҃а, и҆ ᲃт҃а́гѡ Дх҃а.

И҆ вꙁе́мъ пе́рстень Женихѡ́въ та́кожде знамена́ѧ тѣ́мъ главꙋ̀ є҆ѧ̀, и҆ на пе́рстъ де́сныѧ рꙋкѝ є҆ѧ̀, влага́ѧ, глаголе́тъ:

Ꙍ҆брꙋча́етъ раба̀ Бж҃їѧ, Имⷬ҇къ:, раба̀ Бж҃їѧгѡ Имⷬ҇къ:, въ И҆мѧ̀ Ѿца̀, и҆ Сн҃а, и҆ ᲃт҃а́гѡ Дх҃а.

Посе́мъ Дїѧ́конъ гл҃етъ:

Гд҃ꙋ помоли́мсѧ.

Ли́к:

Гд҃и поми́лꙋй.

І҆ере́ѷ же чте́тъ Моли́твꙋ сі́ю.

Влады́кѡ Гд҃и Бо́же на́шъ, всѣ́хъ щадѧ́й, и҆ ѡ҆ всѣ́хъ промышлѧ́ѧй: та́йнаѧ вѣды́й человѣ́ческаѧ, и́ всѣ́хъ раꙁꙋмѣ́нїе и҆мѣ́ѧй, ѡ҆чи́сти грѣхѝ на́ша, и҆ беꙁꙁакѡ́нїѧ простѝ свои́хъ рабѡ́въ, приꙁыва́ѧ и҆́хъ на покаѧ́нїе, подаѧ̀ и҆́мъ проще́нїе съгрѣшенїй, грѣхѡ́въ ѡ҆чище́нїе: ѡ҆ставленїе беꙁꙁакѡ́нїй во́лныхъ же и҆ не во́лныхъ, ᲃвѣды́й не́мощное человѣ́ческагѡ є҆стества̀, зижди́телю и҆ ᲃъꙁда́телю.

Раа́вꙋ блꙋ́дницꙋ прости́вый, и҆ Мытаре́во покаѧ́нїе прїи́мый, не помѧнѝ грѣхѡ́въ на́шихъ невѣдѣ́нїѧ ѿ ю҆́ности: А҆́ще бо беꙁꙁакѡ́нїѧ на́ꙁриши Гд҃и, Гд҃и, кто̀ посто́итъ, и҆лѝ ка́ѧ пло́ть ѡ҆правди́тсѧ пре́дъ тобо́ю: Ты̀ бо є҆ди́нъ є҆сѝ Пра́веденъ, беꙁгрѣ́шенъ, Ст҃ъ, многѡми́лостивъ, благоꙋтро́бенъ, и҆ ка́ѧйсѧ ѡ҆ злоба́хъ человѣ́ческихъ.

Ты Влады́кѡ присвои́вый рабы̀ твоѧ̀ сі́ѧ, И҆мⷬ҇къ: съединѝ дрꙋ́гъ дрꙋ́гꙋ любо́вїю: дарꙋ́й и҆́ма Мытаре́во ѡ҆браще́нїе: блꙋ́дницѧ сле́ꙁы, Раꙁбо́йниче и҆сповѣда́нїе: да покаѧ́нїемъ ѿ всегѡ̀ ᲃе́рдца свое́гѡ, въсъедине́нїю и҆ ми́рѣ за́повѣди твоѧ̀ творѧ́ще, сподобѧ́тсѧ и́ нбⷭ҇нагѡ твое́гѡ Ца́рствїѧ.

Ꙗ҆́ко ты є҆сѝ строи́тель всѧ́ческихъ, и҆ тебѣ̀ ᲃла́вꙋ воꙁсыла́емъ, Ѿцꙋ, и҆ Сн҃ꙋ, и҆ Свѧто́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

І҆ере́ѷ:

Ми́ръ всѣ́мъ.

Ли́къ:

И҆ Дх҃ови твое́мꙋ.

Дїѧ́конъ:

Гла́вы ва́ша Гд҃ви приклони́те.

Ли́къ:

Тебѣ̀ Гд҃и.

І҆ере́ѷ Моли́твꙋ сі́ю.

Гд҃и І҆и҃ᲃ Хє҃ ᲃло́ве Бж҃їй, въꙁнесы́йсѧ на чⷭ҇тномъ и҆ животворѧ́щомъ Крестѣ̀, и҆ є҆́же на́ны рꙋкописа́нїе растерꙁа́вый, и́ наси́лїѧ дїа́волѧ и҆ꙁбавле́й на́съ, ѡ҆чи́сти беꙁꙁакѡ́нїѧ рабѡ́въ твои́хъ: занѐ зно́ѧ и҆ тѧготы̀ дне́вныѧ и҆ пло́тскагѡ распа́ленїѧ не въꙁмо́гше понестѝ, въ вто́рое приѡбще́нїе Бра́ка схо́дѧтсѧ: ꙗ҆́коже законоположи́лъ є҆сѝ ᲃъсꙋ́домъ и҆ꙁбра́нїѧ твое́гѡ Па́вломъ А҆по́столомъ, рекі́й на́съ ра́ди ᲃмире́нныхъ, є҆́же лꙋ́чше є҆́стъ ѡ҆ Гд҃ѣ посага́ти не́жели раждиꙁа́тисѧ: ᲃа́мъ ꙗ҆́кѡ бла́гъ и҆ человѣкѡлю́бецъ поми́лꙋй и҆ простѝ, ѡ҆чи́сти, ѡ҆сла́би, ѡ҆ста́ви долгѝ на́ша: ꙗ҆́кѡ ты́ є҆си не́дꙋги на́ша на ра́мена вꙁе́мый: нѣ́сть бо никто́же беꙁгрѣ́шенъ, а҆́ще и҆ єди́нъ дн҃ь жи́тїе є҆гѡ̀ є҆́стъ, и҆лѝ кро́мѣ поро́ка, то́кмѡ Ты є҆ди́нъ є҆сѝ пло́ть носѧ́й беꙁгрѣшнѡ, и҆ вѣ́чное намъ дарова́вый беꙁъстра́стїе.

Ꙗ҆́кѡ ты́ є҆́си Бг҃ъ на́шъ, Бг҃ъ ка́ющихсѧ, и҆ тебѣ̀ ᲃла́вꙋ въꙁсыла́емъ Ѿцꙋ, и҆ Сн҃ꙋ, и҆ Свѧто́мꙋ Дх҃ꙋ, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

Дїѧ́конъ:

Гд҃ꙋ помоли́мсѧ.

Ли́къ:

Го́споди, поми́лꙋй.

І҆ере́ѷ, Моли́твꙋ ᲃі́ю:

Бо́же ᲃт҃ы́й, съꙁда́вый ѿ пе́рсти человѣ́ка, и҆ ѿ ребра̀ съꙁда́вый женꙋ̀, и҆ спрѧги́й є҆мꙋ̀ помо́щницꙋ по не́мъ, зане́же та́кѡ ᲂу҆го́днѡ бы́сть твое́мꙋ вели́чествꙋ, не само́мꙋ бы́ти человѣ́кꙋ на землѝ: Са́мъ и҆ нн҃ѣ, Влады́кѡ, послѝ рꙋ́кꙋ твою̀ ѿ ᲃт҃а́гѡ жили́ща твое́гѡ, и҆ съчета́й раба̀ твое́гѡ ᲃегѡ̀, Имⷬ҇къ, и҆ рабꙋ̀ твою̀ сию̀, Имⷬ҇къ:, занѐ ѿ тебѣ̀ ᲃъчетава́етсѧ мꙋ́жеви жена̀. Съпрѧꙁѝ и҆́хъ въ є҆диномꙋ́дрїи, Венча́й и҆́хъ въ пло́ть є҆динꙋ̀, дарꙋ́й и҆́ма плѡ́дъ чре́ва, благоча́дїѧ приѧ́тїе.

Ꙗ҆́кѡ твоѧ̀ держа́ва и҆ твоѐ є҆́стъ Ца́рство, и҆ ᲃи́ла, и҆ ᲃла́ва, Ѿца̀, и҆ Сн҃а, и҆ ᲃт҃а́гѡ Дх҃а, нн҃ѣ и҆ при́снѡ, и҆ въ вѣ́ки вѣкѡ́въ.

Ли́къ:

А҆ми́нь.

И҆ по моли́твѣ, вꙁе́мъ І҆ере́ѷ Вѣне́цъ є҆ди́нъ съ Креста̀.

Дїѧ́конꙋ ре́кшꙋ:

Го́сподꙋ помоли́мсѧ.

Пѣвце́мъ же:

Го́споди, поми́лꙋй.

Знамена́етъ Жениха̀ крестаѻ́браꙁнѡ Вѣнце́мъ, и҆ да́в є҆мꙋ̀ лобꙁа́ти Вѣне́цъ: полага́етъ на главѣ̀ є҆гѡ̀ глаголѧ̀:

Вѣнча́етсѧ ра́бъ Бж҃їй, Имⷬ҇къ: въ И҆мѧ̀ Ѿца̀, и҆ Сн҃а, и҆ ᲃта́гѡ Дх҃а.

И҆ вꙁе́мъ вто́рый Вѣне́цъ, знамена́етъ тѣ́мъ и҆ Невѣ́стꙋ, и҆ да́въ є҆́й лобꙁа́ти то́й, полага́етъ є҆гѡ̀ на главѣ̀ є҆ѧ̀, глаголѧ̀:

Вѣнча́етсѧ раба̀ Бж҃їѧ, Имⷬ҇къ: въ И҆мѧ̀ Ѿца̀, и҆ Сн҃а, и҆ ᲃта́гѡ Дх҃а.

Посе́мъ благословлѧ́етъ и҆́хъ десни́цею три́жды глаголѧ̀:

Гд҃и Бо́же на́шъ, ᲃла́вою и҆ че́стїю венча́й и҆́хъ.

Дїѧ́конъ:

Во́нмемъ.

І҆ере́ѷ:

Ми́ръ всѣ́мъ.

Ли́къ:

И҆ дх҃ови твоемꙋ́.

Дїѧ́конъ:

Премꙋ́дростъ во́нмѣмъ.

Та́же Проки́менъ Гла́съ и҃:

Положи́лъ є҆сѝ на гла́вахъ и҆́хъ Вѣ́нца, ѿ ка́мене чⷭ҇тна́гѡ, живота̀ проси́ста ᲂу҆ тебѣ̀, и҆ да́лъ є҆сѝ и҆́ма.

Стихъ:

Ꙗ҆́кѡ дасѝ и҆́ма блⷭ҇ве́нїе въ вѣ́къ вѣ́ка, въꙁвесели́ши и҆́хъ ра́достїю съ лице́мъ твои́мъ.

Дїѧ́конъ:

Премꙋ́дрость.

Чте́цъ, Надписа́нїе А҆пⷭ҇тола глаголе́т: