Молитвы в понедельник

Молитва в понедельник по Заутрени преподобнаго Кирилла.¹

К Вам, яко заступником и хранителем живота моего, аз окаянный и многогрешный (имя рек) припадаю, моляся и прося Вашей милости: видци Божия величества, святии Ангели,² престол честный Пресвятыя Троица страшно обьстояще и не изреченною светлостию Божественныа славы облистаеми! Молите всемилостиваго и всещедраго человеколюбца Бога избавити мя от всякаго зла, приходящаго на мя.³ Михáиле святый и великый Архистратиже, первый поклонниче⁴ Святыя Троица, приставниче и хранителю роду человеческому, осиявый чюдесы вселеную! И мне подай дневное пребывание преити богоугодно, не искусно⁵ от злых помысл и дел злокозненых; отверзи ушию моего слуха, да слышю и разумею Божия словеса благая и душеполезная и да прозрю внутренима очима и еще тме сущи греховной обдержащи мя, в ней же проходя во вся дни живота моего, прогневах благаго и незлобиваго и длъготерпеливаго Творца моего и Владыку. Ему же предстояще со страхом, небесныа Силы не вещественными усты трисвятую всылающе песнь, молите за мя, по вся часы съгрешающаго. Да не поясть мене мечь ярости Господня: зело бо превьзыдоша безакония моя главу мою,⁶ яко бремя тяжко отяготеша выи моей.⁷ И еще помяну минувшее время живота моего, убо преступника себе сведаю: разумею бо ся паче всякаго человека злая и не подобная и не милая Богу съделах дела, и боюся, егда како огнь с небесе съшед, сожжет мя или преисподняя пропасть жива пожрет мя. Съведый же долготерпение и пучину человеколюбия Божия, не отчаю себе, яко не наводит казни на достойнаго мучения, но ожидаеть моего покаяния. Святый Гаврииле, радости ходатаю и спасению благовестниче, скорби пременителю и всякаго зла погубителю! Буди мне помощник в год, егда побежаемь буду от страсти, посети святым ти посещением, освети ми душю, омеркъшую многыми грехы, укрепи мя творити добрая дела. Вопию к Тебе воплем великым и, моляся, припадаю Ти: не презри мене раба Твоего, но скоро потщися, даже не постыгнеть мене конець, даже смерть не варить и не въсхытит окаянныа ми душа, и еще зле стражющу в скверных обычаех, и поимеши мя не готова от жития и поставиши мя без ответа пред Судящимь по делом комуждо.⁸ Но, яко имеа к Богу дерзновение о всех молитися, и мне отпуст прегрешением испроси. Святый Уриле! Виждь беду мою и брань вражию, ею же побежаемь есмь присно, на помощь Тя призываю: вари ⁹ в заступление мое, да ся ощутить мой ум от сна греховнаго. Дивлю бо ся себе, како окрадень¹⁰ есмь плотскыми похотьми¹¹ и обретаюся в делех, их же ненавижу, и, не подобная мысля, акы рукама разоряю благодать Божию,¹² ожидающу моего обращения. Увы мне, како не имам твердо основание покаянию! Да кто даст очима моима слезы, да ся плачю к милостивому Богу, да послеть Свою милость и исторгнеть мя из моря житийскаго, волнующагося волнами греховными,¹³ в нем же погружаемь есмь, не приемлю обязания и исцеления скорым покаянием.¹⁴ Сведый узы моа, и не хощу изрешитися из них, запинающи ми телесной слабости. ¹⁵ Святый Рафаиле! Подвигни легеона¹⁶ святых Ангел, да помолять Владыку и Господа за убогую и смиренную ми душю, кающася о прежь содеянных ми зол. Веде бо свое естество, тленно суще¹⁷ и скоро погыбающее: да како не постигну вечера, и порадуется враг мой о мне, глаголя: се человек суете уподобися и дние его, яко сень преидоша. Но, Господи Iсусе Христе, Сыне Божий! Припадая, молю Ти ся: призри на мя и помилуй мя, изведи душю мою из темници беззаконныа, преже даже¹⁸ не отъиду отселе и прииду на суд страшный. Приими Господи молящих Тя¹⁹ за ны, святыа Ангелы и Архангелы, Херувимы и Серафимы, Силы и Власти, Престоли и Господьства, Начала высокая, обонадесять легеона²⁰ иже окрест престола Твоего предстояще, за весь мир молять Тя: тех молитвами и Пречистыа Матере Твоея Владычиця нашея Богородиця, избави мя студа²¹ онаго и тмы кромешняя и не усыпающаго червия ядовитаго, и не угасающаго пламени. Ты бо еси Агнець Божий, вземляй грехы всего мира, распныйся на кресте нашего ради спасения и принесыйся на жерътву за ны грешныя.²² Вонми молитву мою и посли Ангела свята, хранителя душам и телом: да тем наставляемь, избавлюся от всех видимых и не видимых враг и сподоблюся получити Твою славу²³ со всеми угодившими Тебе от века. Яко Ты еси Бог нашь и к Тебе прибегаю и на Тя надеюся. Аще бо и съгреших много паче всех человек,²⁴ но от Тебе не отступих, ни руку моею к иному Богу воздех; но Тебе молюся, Господи Iсусе Христе, и Тя благословлю и Тебе кланяюся в Троици Единому Богу Отцу и Сыну и Святому Духу и ныне и присно и в веки веком. Аминь.

Молитва в понедельник по часех, преподобнаго Кирила.

К Тебе, Вседержителю, Пресвятый Царю припадая, молюся и тружаюся душею, милости прошю! Руце Твои сотвориста мя и живот даровал ми еси; злокозненный же враг, безстудием нашед на мя, въскрежета на мя зубы²⁵ своими, и стрелою безаконною устрели мя, греховным же мечем зле порази мя: много же брався со мною, и преможе мя.²⁶ Впадох в сети прегрешения, аки зверь на уловление, и уловиша мя.²⁷ Ощутих язву не исцельну, взысках врача на земли, и не обретох. Но к Тебе возпущаю глаголы молебныя от душа: Владыко Господи Творче всех, Боже Отче Правителю душ наших! Съгреших на небо и пред Тобою: не посли гнева, достойнаго по делом моим, да не буду, яко риза, молем изьядена, или яко железо ржею скончеваемо. Се бо беззакония моа нападоша на мя, и греси мои покрыша главу мою, и бысть ми полудне, акы полунощи. Первие брашна въздыхание ми прииде, и все житие мое печалию въсхыщено бысть, и страх же в сердци ми вселися, яко взыскал еси²⁸ беззаконие мое, и вся грехы моя изследил еси, наведе на мя искушение, и гнев велик възложи на мя. И того ради не могу возникнути²⁹ к Тебе, ни руку въздети на высоту. Но моляся непрестанно, день дне избавления прошу: послух³⁰ бо ми есть на небесех верен, единочадный Твой Сын Господь наш Iсус Христос, Его же посла спасти грешных. Той бо рече: просите и дасться вам. Господи Боже мой!³¹ Да внидет пред Тя молитва моя; приклони ухо твое к молению моему.³² Помяни Господи, яко персть есмь; измерен ми живот, положена же лета и изочтени месяци; в преполовении ³³ дний моих не погуби мене, да не возвращуся в землю тмы вечныа, идеже несть света, ни жизни³⁴ вечныя человеком; да не изсушит геена крови моей, но дай же ми время покаянию. Яко не требуеши смерти грешника; милостив бо еси человеколюбец, имеяй пучину щедрот и обретаяся близь скорбящих, дая должьная³⁵ прошения рабом своим. Iсусе Благодетелю, заре Отча, свете не прекосновенный! Просвети омраченнеи ми очи и дай же прощение многих ми грехов: молитвами святых Твоих небесных сил³⁶ Ангел, Архангел, Начал, Престол и Господьств, Херувим, Серафим и Пречистыя Твоеа Матере Госпожи нашеа Богородица и всех Святых Твоих, их же молитвами помилуй Отче и Сыне и Святый Ду́ше. Яко Ты еси Бог мой и аз раб Твой, ³⁷ у Тебе милости прошю, всегда ныне и присно и в веки веком. Аминь.

Молитва в понедельник по Вечерни преподобнаго Кирила.³⁸

Владыко Господи, всеа видимыа и не видимыа твари Содетелю, Боже сил, веком Творче, сътворивый времена и лета, измеривый день и нощь часами, разлучивый свет от тмы, и видев яко добро и бысть вечер, его же и мене смиреннаго сподобил еси достигнути и до последняго часа дне сего, в онь же вечернюю службу всылаю Ти! Исправи молитву мою, яко кадило пред Тобою; утверди нозе мои в заповедех Твоих и руку моею въздеяние освяти; очисти уста моа словес Твоих чистотою и вложи страх Твой в сердце мое; покрый душю мою сению Святаго Духа; утверди уды моа, на зло подвизающаяся, и не остави мене без Твоего заступлениа. Ты бо съвеси немощь естества моего, яко хуже паучины³⁹ обретаюся к Твоему угожению. Господи Исусе Христе Сыне Божий, преблагий Господи! Помози моеи худости. Рекый благословесными усты Своими: воззови Мя, избавлю тя, и ныне зову и вопию не престая: не предажь мене желанию сатанину, да не буду причастник пагубе, да не съвратит⁴⁰ уст моих от славословиа Твоего и да не стану⁴¹ в радость врагу, и похвалится о мне глаголя: где есть Бог твой. Ты еси Бог мой, имея пучину человеколюбиа и не отлучаяся⁴² николиже от Своих раб, по даруа прошения любящим Тя: приими мое сего часа моление, да на всяк день и час приношу Ти пение⁴³, каяся о прежь мимошедших днех живота моего, в ня же уподобихся не разумным скотом ядением и питием и всеми похотьми скверными, ими же далече бых от Тебе ⁴⁴. Създание руку Твоею есмь и тварь, врагу поработихся, иже и доныне злохытрием крадеть мя, хотя мя потопити в глубине греховней. Вари⁴⁵ в заступление мое и рци души моей: спасение твое есмь Аз. Да исповедят уста моа множество милости Твоеа, яко помилова и спасе мя грешника, и въсхвалю има Твое в векы. И тако мя отпусти от телесе моего, ангельскым огражая заступлениемь душю мою, и препроводи не искусну от злых мытарь, приседящих у врат небесных: да и десныя Ти страны причастник буду⁴⁶, со всеми угожьшими Ти: молитвами и молением Пречистыа Богородиця и Святаго Пророка Предотечи Крестителя Твоего Иоанна и всех святых. Яко благословен еси и прославлен с Отцем и с Святым Духом и ныне и присно и в веки веком. Аминь.

Молитва в понедельник по Вечерни святому Предотечи. ⁴⁷

От пустаго житиа исходящи, к Тебе прибегаю, раб Твой (имя рек) и Твоея милости прошю: не презри мене, Пророче и Предотече, осквернена. Простираю руце мои: не отрини мене страстнаго, но тихою си милостию на мя человеколюбне призри. Се бо сластьми осквернихся и, помыслив прежняя владычества, врага совещавающаго послушах и гласа Бога моего ослушахся, образа доброту омрачих и персть нань воставих. Сего ради, молю ти ся Предотече: молебник ми тепл явися к Христу Спасу Зижителю; достойными плоды покаяниа покажи умиленныа ми молитвы; малое воздыхание мое приими и руку моею воздеяние исправи; в день осужениа избави мя и Судию милостива сотвори. Тебе бо имам заступника и молю, яко помощника и надеждю к Богу: постри ми рабу твоему рубу, крестившую Христа Бога моего. Ужасаюся и трепещю будущаго судища, но под Твою милость прибегаю и простираю к Тебе очи мои: не отрини мене раба твоего, Предотече! Всенощными си молитвами избави мя присно от злых грехов, держащих мя; песньми бдяща сотвори славити Христа, Его же крестил еси. Тому подобает всяка слава, честь и поклонение Отцу и Сыну и Святому Духу и ныне и присно и в векы. Аминь.

Примечания:

При издании молитв св. Кирилла, были использованы:

Три рукописи Соловецкой библиотеки

а) сборник под № 802, состоящий из статей разнаго содержания, написанных в XV и XVI в., в 4-ю долю, на 202 стр; здесь помещены 21 молитва св. Кирилла на л. 171–201: все молитвы названы именем Кирилла Туровскаго, или Кирилла преподобнаго, Кирилла священноинока;

б) Большой Требник дачи Новгор. Митроп. Макария под № 1085, написаный в 1505 г., в лист, на 712 листах: молитвы св. Кирилла, в числе 21, занимают здесь 684–712 стр;

в) Следованная Псалтырь, принадлежавшая св. Филиппу Митрополиту, написанная в XVI в. в 4 долю на 547 стр: здесь помещены четыре молитвы св. Кирилла: по одной молитве после каждаго молебнаго канона Святой Троице, св. Крестителю, св. Апостолам и всем Святым;

Две рукописи Волоколамскаго Монастыря

г) Сборник под № 109, состоящий из разных молитв и написанный в конце XV или начале XVI в., в 4 долю, на 258 стр: здесь, на стр. 46–138, находится 50 молитв, которыя названы именем Кирилла грешнаго, мниха недостойнаго, кроме 8 молитв, не означенных ни чьим именем;

д) Сборник под № 413, написанный в XVI в, в 4-ю долю, на 788 стр: здесь помещено 12 молитв с именем преподобнаго Кирилла или Кирилла священноинока, на стр. 648–686. За основание текста молитв мы принимаем список их в сборн. Солов. № 802, как более исправный сравнительно с другими списками и будем указывать на замечательныя разности, заключающияся как в этих списках, так и в печатном издании (см. статью «От издателя»). Молитвы же, не находящияся в этом списке, будут напечатаны по рукописи Волокол. № 109.