Слово о небесных силах

От небытия в бытие благыи человеколюбец Бог сотворити мира сего (восхоте). первие помысли небесныя силы. и помышления делом исполнил есть. чинов всех десять устрои и коемуждо чину начальника и воеводу. и от них овы постави на славословие. иже поют сице. свят свят Господь Саваоф. едини же от них стоят беспрестани пред Богом. инии же беспрестани служат Богу. а шествие их есть скорее молнии. суть же овии от них на соблюдение посылаеми. иже хранители суть душам человеческим. а друзии на помощь посылаеми. а друзии на казнь согрешающим. зрака же ангельска и красоты их не возможно есть исповедати человечи усты. Бога же ангели не видят. точию славу и ту по участию¹. бе же старей ангелом нареченный сатанаил. воевода первый. и взавидев Божией славе. помысли в себе глаголя. поставлю престол мой над звездами. и буду подобен Вышнему. да мя славит чин сущий подо мною. Бог же ведый. яко се помысли. преда Михáилу старейшинство. ту абие сверже сатану Господь за гордость помысла его. по нем же спадоша. иже бе под ним десят(ый) чин. яко песок просунушася с небеси. и проразишася в преисподняя. друзии же на земли осташа. друзии же на воздусе повеси архангельский глас. архистратиг бо Михáил. сый начальник и воевода небесных сил. иного чина сый старейшина. виде отступника спадша с чином своим. звучным гласом врепким и страшным рече. вонмем и гласом силы похвалим Господа. рек вонмем. яко сотворени есми на службу от Него. стояще пред Богом. рек вонмем. с трепетом служаще Богу. яко свет бысте. ныне же от света обличистеся и бысте тма. рек вонмем. яко сии загордевша и отпадоша и погибоша. мы же вонмем. яко Божии служители страшныя Его силы. от тогоже гласа абие повешени быша демони на воздусе превыше. иже погрязоша в преисподняя суть яко глуси. не сведят бо ничтоже яже в мире. а иже от них падоша на земли. то тии ходят по земли. делающи злая своими прелестьми. висящии же ничтоже (сами) могут пакости сотворити. (что попустит Бог) то и творят. сам убо сатана старейшина чину естеством бе благ. исперва не лукав бе. Бог же преда ему землю на соблюдение. и не могий терпети чести. емуже Творец вдаст. и самовластною волею совратися от естества. и воздвижеся помыслом на сотворшаго и́ Бога. супротивитися ему мысля. и бысть первый отступник. отпаде от благости. и превлече с собою свой чин. иже бе под ним. и погубиша власть силы. и уже бо оттоле не бе им надежи власти. якоже в Евангелии пишет. яко ни над свиньями власти не имут аще не Божиим попущением на что. аще же Божиим попущением. то пременяются мечты творяще. а емуже есть быти. того не ведят. указуют бо им ангели посылаеми от Бога искушати своих угодников. да тем честнейши явятся. бесове же прорицают и к чародеем и к волшебником. то не все прямо бывает. понеже бо мнением ркут предняя. иногда же прельщающе неверныя. влекуще во свою погибель. лестьми и кознми мутяще. и лжами смущают ум им. аще бо нечто улучат мнением в правду. то горши в зло совратят их. тем тому не подобает веровати. но яве се убо есть. яко по падении ангелом тем несть уже покаяния. такоже человеком по смерти. спадший же той сатана наречеся противник Божий. в негоже место постави Господь старейшину Михáила. спадший же чин нарекошася демони. от нихъже отъят Господь славу и честь бывшюю на них. и преложи я в дух чермности темныя. и по воздуху облетати им повеле. в падшаго место чина десятаго умысли Бог сотворити человека. да тех светлость и венци предасть правоверным. иже нарицатися (имут) чин десятый. якоже бо ны указует божественное писание глаголя. иже пострадаша за имя своего Владыки святии пророци и апостоли и святители и преподобнии. лик мученическый. то тии улучиша обетования от Спаса. о нихъже великый апостол Павел глаголет. яко велика томления и искушения святии подъяша. но яко и чюдес делатели сподобишася быти. или в раках лежаще мироточат. или костию. или портиною. или власом бесы изгонят. но сии послушествовани быша верою. рече апостол Павел². но не прияша обещания. но токмо обетования улучиша славы тоя неизреченныя веньца прияти. якоже свидетельствует глаголя. Богу о нас нечто лучее прозревшу большее. да не без нас совершатся. Богу убо наипаче о человечестем роде промышляющу. ожидающу последних. да того ради грешницы трепещут дни того. вонже имать судити Бог. яко геене и мукам страшным предани будут. праведницы же радуются о дни том суднем. имъже приимше обетования. ждут совершения. да совершени от владыки Христа. в ангельский чин вступят. и Господу предстанут. суть же еретици глаголющи. яко диявол Адаму не поклонися. и за то отпаде. то несть тако. диявол убо первие отпаде. Адам же последи создан бысть. вторая тварь Божия. на се бо всяк человек создан. да славит Бога душею. а телом покланяется Ему. ангели бо на небеси поют Бога. а человеци на земли славят. вся бо розна суть дела ангелом со человеки. молитва же едино ест дело ангелом и человеком. тело же токмо лишше человеком. а душа ангельска подобия не видима и безплотна есть. неосяжема всех исполнена состав человечь. развее мужства и женства. светлы же паче солнца седмерицею. таковии суть посылаеми души человечестии. но не таковии изо всех исходят. омрачают бо ся злыми делы. и сами ся погубляют неправдами.