Поклонение Пречистым пяти язвам Христовым и Пресвятой Богородице

Воставше от сна, абие Богу до земли поклонившеся и ум свой обративше к нему, глаголем от всего сердца:

Слава Тебе, Христу Богу нашему премилосердному, не погубившему нас со беззаконми нашими, но даже доселе грехом нашим потерпевшему. Поклон.

Сподоби, Господи, в день сей и вся дни живота нашего без греха сохранитися нам, и даждь нам, Господи, да ни словом, ни делом, ни помышлением, прогневаем Тя, Создателя нашего, но вся дела наша и словеса, и помышления да будут во славу Пресвятого Имени Твоего. Поклон.

Боже, милостив буди нам грешным, во всей жизни нашей, во исходе нашем и по кончине нашей не остави нас. Поклон.

Возведше умная своя очеса ко Христу, на кресте распятому, глаголем сице:

Слава Тебе, Христу Богу нашему премилосердому, пострадавшему за нас, и претерпевшему заплевание и раны, тернов венец и трость, крест, гвоздие и копие, смерть и погребение. Поклон.

Поклоняемся вольному Твоему за ны страданию, Господи, лобызаем пречистые Твоя язвы, благодарим толикую Твою любовь и милость, яко душу Твою за нас на кресте положил еси; даждь нам, Господи наш, да возлюбим Тя всем сердцем нашим, всею душею, всею мыслию, всею крепостию и всем помышлением нашим. Поклон.

Иисусе наш сладчайший!

Поклоняемся пречистой, пресвятой и животворящей язве Твоей, яко в десной Ти руце, и молим тя, Господа нашего, ея ради сподоби нас одесную Тебе стати. Поклон.

Поклоняемся пречистой, пресвятой и животворящей язве Твоей, яже в шуей Ти руце, и молим Тя, Господа нашего, ея ради от всяких грехопадений лютых и от части шуия избави нас. Поклон.

Поклоняемся пречистой, пресвятой и животворящей язве Твоей, яже в десной Ти нозе, и молим Тя, Господа нашего, ея ради настави нас на путь правый покаяния. Поклон.

Поклоняемся пречистой, пресвятой и животворящей язве Твоей, яже в шуей Ти нозе, и молим Тя, Господа нашего, ея ради от всякого пути лукава возбрани ногам нашим. Поклон.

Поклоняемся пречистой, пресвятой и животворящей язве Твоей, яже во пречистых ребрах Твоих и в прободенном Ти сердце, отнюдуж истече кровь и вода во искупление наше, и молим Тя, Господа нашего, ея ради сокруши окаменение наше, порази жестокое наше сердце, сотри е страхом Твоим святым, уязви е любовию Твоею, да Тебе, Господа нашего, возлюбим всем сердцем нашим, всею душею, всею мыслию, всею крепостию, и всем помышлением нашим, и даждь нам, Господи наш, до кончины живота нашего, всегда поминати спасительная страсти Твоя и покланятися им, и да текут от сокрушенного нашего сердца источники слезные, омывающие греховную скверну. Поклон.

Слава вольному Твоему за ны страданию, Господи!

Слава погребению Твоему и воскресению, и на небеса вознесению.

Слава премилосердному Твоему о нас смотрению и строению, не остави нас, Создателю наш, ныне и во век будущий. Аминь.

О премилосерднейший Иисусе!

О паче меда и сота сладчайший Христе! О сладосте наша! О желание наше! О радование наше! О милостивый Боже наш, не до конца на нас грешных гневающийся!

Молим Тя, в вертограде даже до поту крове каплющия капли молящегося к Богу Отцу Своему.

Молим Тя, от Иуды за тридесять сребренников проданного и от Иудей оплеванного, посмеянного и к столпу привязанного, люте по ланите ударенного, неповинне на смерть осужденного, и тернием венчанного, в багряницу одеянного, и крест на Голгофу гору понесшего, на нем распятого, в руце и нозе железным гвоздием пробитого, а в ребро копием прободенного, с разбойники повешенного, оцтом и желчию напоенного. Молим Тя, на смутную болезненно страждущую и утробою растерзающуюся Матерь Твою, под крестом стоящую, зрящего. Молим Тя, в руце Своему Отцу дух предавшего, егда рекл еси: Отче Мой, в руце Твои предаю дух Мой. Молим Тя, от Иосифа и Никодима в гробе каменном положенного. Помилуй нас, Боже, по велицей милости Твоей. Помилуй нас, не хотящих лености ради нимало спострадати великому страданию Твоему. Помилуй нас чрез кровь Твою от ребр истекшую. Помилуй нас чрез страсти Твоя, через горькое вкушение оцта и желчи, чрез смерть Твою крестную. Молим Тя, даждь нам память смертную, а от смерти наглой сохрани нас, и в час исхода души нашея, приими ю в руце Твои пресвятые, сквозе гвоздием пробитые, и помяни нас, Господи, егда приидеши во царствии си, идеже царствуеши со Отцем и Святым Духом, ныне и присно и во веки веков, аминь.

Господи! аще и всегда распинаем Тя грехами нашими, Ты же умирая не отвращаешися от нас, но преклонь главу прощаеши нас, к Себе призывая.

Покланяемся страстем Твоим, Христе!

Покланяемся страстем Твоим, Христе!

Покланяемся страстем Твоим, Христе, и Святому Воскресению Твоему.

Что день молитву сию чти, да в наглой смерти не даст Христос Господь никогда умрети.

Приидите, поклонимся Царице нашей Богородице.

Приидите, поклонимся Деве Марии Царице нашей Богородице.

Приидите, поклонимся и припадем к Самой Госпоже Деве Марии Царице нашей Богородице.

Покланяемся Тебе, Пресвятая Богородице, Твоим рождеством явльшая нам свет истинный, Царице небу и земли, надежде ненадеждных, помощнице немощным, ходатаице всем грешным, Ты нас покрый и заступи от всех бед и нужд душевных и телесных: и буди нам, молимся, заступница святыми Твоими молитвами.

Покланяемся Твоему благословенному зачатию и рождению от святых Ти родителей, от Иоакима и Анны, молим Тя, Госпоже наша, даждь нам житие безгрешно зачати, и родити плоды покаяния.

Покланяемся Твоему введению в церковь Господню, трилетствовавшая Отроковице, и молим Тя, свете наш, церковь нас соделай Святому Духу молитвами Твоими.

Покланяемся благовещению Твоему, пречистая Богородице Дево, егда действием Святого Духа со гласом Архангельским зачала еси Слово Отчее, и молим Тя, свете наш, нам отчаянным благовести спасение.

Покланяемся рождению Твоему, егда воплотила и родила еси Христа Спаса миру, и явилася еси Матерь Богу, от всея твари славима и превозносима, и молим Тя, свете наш, являй Себе Матерь милосерду ныне и во век будущий.

Покланяемся очищению Твоему нескверная, неблазная, нетленная, пречистая, и молим Тя, свете наш, очисти нас от всякие скверны плоти и духа молитвами Твоими.

Покланяемся и почитаем болезни Твоя, яже претерпела еси во время вольные страсти Сына Твоего, егда собыстся Симеоново проречение: Тебе же самой душу оружие пройдет, и молим Тя, свете наш, болезни душевные и телесные избави нас.

Покланяемся Тебе, Госпоже, воспоминающе радость Твою, юже имела еси во время воскресения Сына Твоего, и молим Тя, свете наш, радости духовные не лиши нас.

Покланяемся честному и славному успению Твоему, и молим Тя, свете наш, усни страсти наша плотские помощию Твоею.

О Пресвятая Владычице Богородице! Приими сие малое моление, и принеси е Сыну Твоему и Богу нашему, да спасет и просветит Тебе ради души наша.

На Твой пресвятый образ взирая, яко истинную Самую Тя зрим сущую Богородицу, верою сердечною и любовию от души припадаем, и покланяемся с предвечным и на руку Твою держимым Младенцем Господом нашим Иисусом Христом.

О Пресвятая Госпоже наша, Царице небесная, преславная Владычице, Дево Богородице, печальных всех праведное утешение, и всем уповающим на Тя живот и воскресение: приклони, о Госпоже, Пречистые Своя ушеса к молитве нашей, приносимой Тебе от нас непотребных и недостойных рабов Твоих (имя-рек).

О Мати наша милосердая! яви на нас милость Свою в печали сущих, и во гресех всегда прибывающих, и не призри нас многогрешных рабов Твоих (имя-рек).

О Мати наша прекрасная! Всех благих Ты еси вина, смертных человек оживление и погибших избавление, приими недостойное наше сие моление падших и многогрешных рабов Твоих (имя-рек,) в час сей горького и плачевного и болезненного нашего прошения, яко дерзаем ныне глаголати к Тебе пресвятей Госпоже Царице Богородице сие моление, и радостное со Ангелом приглашение сицево: Богородице Дево радуйся, благодатная Марие, яко зачала еси плотию Сына Божия. Радуйся, яко Его во чреве Твоем носила еси. Радуйся, яко Его родила еси. Радуйся, яко сосцы питала еси. Радуйся, яко Ему волстви покланялися. Радуйся, яко Христа в церкви по триех днех обрела еси. Радуйся, яко Христос воскресе из мертвых и взыде на небеса. Радуйся, яко Ты Сама на небо взята еси. Радуйся, яко Ты девством ангелов славою святых превосходиши. Радуйся, яко Ты на земли мир твориши. Радуйся, яко Тебе жители небеснии вси послушны суть. Радуйся, яко Ты еже хощеши, у Сына Твоего Христа Бога нашего испросити можеши. Радуйся, яко сподобилася еси быти близ Пресвятые Троицы. Радуйся, яко Ты Мати людей озлобленных, иже к Тебе прибегают. Радуйся, яко Твоя радость во век не скончается. Радуйся благодатная, Господь с Тобою.

О Пресвятая Госпоже Владычице Дево Богородице! Приими недостойную молитву нашу, и сохрани нас от наглые смерти, и даруй нам прежде покаяние.

Ангеле Христов, хранителю наш святый, не отступай от нас злых ради дел наших, но моли Бога о нас грешных, яко да простит нам Создатель и Бог наш, вся, елика пред Ним согрешихом, и да укрепит нас прочее время живота нашего без порока прейти. Ты же нас, о хранителю наш! В сей день и нощь силою твоею покрый и невредимых соблюди от всякого зла, яко да неврежденны от диавольских искушений, возлегая и востая от смиренного нам ложа, достойно возхвалим имя Бога нашего, Отца и Сына и Святого Духа, яко благословенно есть, ныне и присно, и во веки веков, Аминь.

О Тебе радуется, Благодатная, всякая тварь, ангельский собор и человеческий род, освященный Храме и Раю словесный, девственная похвало, из Неяже Бог воплотися и Младенец бысть, прежде век сый Бог наш, ложесна бо Твоя престол сотвори и чрево Твое пространне небес содела: о Тебе радуется, Благодатная, всякая тварь, слава Тебе.

Слава Тебе, Мати Божия, верных прибежище и избавление в лютых содержимых, и души нашея божественное утешение. Всеокаянные души наша, о Богоблагодатная! Уязвленные стрелянии ратника, Твоему всесильному предстательству поручаем, яже соблюдай, покрывай и спасай от бесовских козней невредимы, да зовем Ти: Радуйся, Невесто Неневестная! Преславная Приснодево. Мати Христа Бога, принеси нашу молитву Сыну Твоему и Богу нашему, да спасет Тобою души наша. Вся Ангелов воинства, Предтече Господень, Апостолов двоенадесятнице, святии вси с Богородицею сотворите молитву, во еже спастися нам.

Упование наше Отец, прибежище наше Сын, покров наш Дух святый, Троице Святая, слава Тебе. Достойно есть, яко воистину, блажити Тя, Богородицу, Присноблаженную и Пренепорочную, и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.

Слава и ныне.

Господи помилуй, трижды. Благослови.

Господи Иисусе Христе, Сыне Божий, молитв ради Пречистые Твоея Матере, силою Честного и Животворящего Креста, святых небесных сил безплотных, и преподобных и богоносных отец наших, и всех святых, помилуй и спаси нас грешных, яко Благ и Человеколюбец.

Ослаби, остави, прости Боже прегрешения наша, вольная невольная, яже в слове и в деле, яже в ведении и не в ведении, яже во дни и в нощи, яже во уме и в помышлении, вся нам прости, яко Благ и Человеколюбец.

Исповедание грехов повседневное.

Иcповедуем Тебе, Господу Богу нашему и Творцу, во Святей Троице единому, славимому и покланяемому, Отцу и Сыну и Святому Духу, вся наша грехи, яже содеяхом во вся дни живота нашего, и на всякий час, и в настоящее время, делом, и словом, помышлением, зрением, слухом, обонянием, вкусом, осязанием, и всеми нашими чувствы, душевными и телесными: имиже Тебе, Бога нашего и Творца, прогневахом и ближнего нашего онеправдовахом, о сих жалеюще, повинных себе Тебе, Богу нашему, представляем и имеем волю каятися: точию, Господи Боже наш, помози нам, со слезами смиренно молим Тя, прешедшая же согрешения наша милосердием Твоим прости нам, и разреши от всех сих, яко Благ и Человеколюбец. Аминь.