Послания старца Филофея

Государя великого князя дьяку, господину Михаилу Григорьевичу твой нищей богомолец старец Филофей Бога молит и челом бьет.

Прислал ты, государь мой, ко мне свою грамоту, а в ней писано, чтобы мне внутрь в неи твои список истолковати. И тебе, моему государю, ведомо, что яз селской человек, учился буквам, а еллинскых борзостей не текох, а риторских астроном не читах, ни с мудрыми философы в беседе не бывал; учюся книгам благодатного Закона, аще бы мощно моя грешная душа очистити от грех, о сем молю милостивого Бога, господа нашего Иисуса Христа и пречистую Богоматерь и всех святых, Богу угодивших, избавити мя вечного мучения. А еже писал ты о числах летных, еже в Бытейскых книгах, Моисеом написаных, о «Шестодневнике», о миротворении, гронографы же, пять дней мимотекшеи, начаша от первого Адама и до ныне; латина же ныне, вся мимотекше преже бывшая лета, начинают от Рожества Христова, чтут лета; да в том несть разньстваа никоегоже. Глаголет бо апостол: «Бысть первый человек от земля перстен, вторый человек – Господь с небесе».¹ И пакы рече: «Бысть первый человек Адам в душю живу, вторый же Адам – в дух животворящ».²

И о сем тщатся философи, год есть сугуб – солнечный и лунный; солнечный содержит 365 дней, лунный же 354; от сего является, яко год солнечный болши лунного 11 дний, по тому в то лето солнцу и луне потемнение не узрится. И кто прилежнейше подщится, по «Шестокрылу»³ считают дробныа часы, то обрящет, в который час быти потемнению луне и солнцу; но о сем подщание и подвиг велик, а приобретения мало.

А што писал о преходных звездах, знамение водное наследят, тогда всеа вселенныа градовом и царством и странам вкупе всем земнородным пременение; божественое же Писание о сем ясно глаголет: «Святым Духом всяка твар обновляется»,⁴ обращающеся на первое, равномощен бо есть Отцу и Слову, а не от звезд сие бывает.

А звезды зодейные 12 и планит 7, не чювствены, ни животны сут, но точию невещественого огня существо. В первый день Богом сътворен есть, иже рече Богь: «Да будет свет»,⁵ – и ничтоже ино свет, токмо огнь. И егда въсхоте разлучити свет от тмы, тогда повеле спрятание тому огню быти, и бысть тма. И разлучи Бог межу светом и межу тмою, и нарече Бог свет день, а тму нарече нощь,⁶ и ничтоже ино нощ, токмо света отъятие. В вторый день твердь, в третий день сушу, моря, садовиа, траву, семена, пол вод возводит на твердь. Того ради, еже хотяше сътворити светилникы, в четвертый же день от того огня, иже свет нарече, сътвори две светиле велице: светило великое в освещение дни, еже есть солнце, светило меншее в просвещение нощи, еже есть луна, таже звезды, яко мудрый златарь ово на сосуды, ово же на златици разсыпа.

И нарече 12 звезд, иже глаголются от нас зодеи, иже суть пути солнцу и луне. Солнце же шествие имея воединои зодеи днии 30 и часов 5 и пакы в другую зодею исходит, и тако в двунадесяти зодеях семо и овамо преходя, сътворяет год. Луну же полну сътвори, яко 15 дний, аще бо луне единого дни сътворене, то пакость бы велика была светилником между собою, частаа отемнениа. Луна же обходит 12 зодеи в двадесят и девять дней и в пол дни и пол часа и пятую часть часа.

А о седми планитах и о двунадесят зодеях, и о прочих звездах, и о злых часех, и о нарожении человечьстем в которую звезду, или час зол или добр, и получаа с частком, и богатству и нищете, и в нарожении добродетелем и злобам, и долголетству жития, и скращениа смертию, – сиа вся кощуны суть и басни. Первие от халдей⁷ сие написася, иже к суете ума своего столп зиждуще и на высоте бывше, и о звездах съблазнишася. Бог же, видя безумие их съвет их разсыпа и дело раздруши, и писание их отверже. От них же еллини писание приаша, и тыа планиты и прочаа звезды богы нарекоша, и отступиша от сътворшего вся и твари поклонишася; о них же пророк Давид глаголаше: «Рече безумен в сердци своем: несть Бога. Растлеша и омрачишася в начинаниих своих».⁸ По еллинех же еретицы прияша а насеяша горкыа плевелы по среде пшеницы в православной христианской вере, на прелщение малоумных человек, верующе в злыа дни и часы, да о сем и покаания не приемлют, мнящеся, яко истина сут, и в день судный страшен ответ приимут и с еретикы осужени будут, пременивше свет на тму и истину на лжу. Аще бы злыа дни и часы сътворил Бог, почто грешных мучити ему? Бог имат винен быти, яко злая человеки народил.

А сие, честный человече, разумей, яко от царя царевич родится, а от князя князь, и аще и не достижет малым чим отчаа славы и чести, но земледелец не бывает, ни за земледелцев царие дщерей не дают, ни у них за своа сынове дщерей взимают, но все то состоится по неведомым судбам вся строящего бога.

А о звездном течении и о солнци, и о луне да весть твоя честность, яко не самы тыа звезды двизаемы суть, ниже чювствены или животны и зрят ни на чтоже (но огнь невеществен ничтоже весть, ниже знает), но преносимы суть от аггельских невидимых сил. Самовидец сему богоизбранный съсуд апостол Павел, иже третины тверди не дошед,⁹ посреде самех звезд быв, и тамо виде самыа тыа аггельскиа силы, како непрестанно служение имеют человека ради: ови солнце носят, друзии луну, иные звезды, овы въздуха правят ветры, облакы, громы, от последних земля воды возносят облаком, и лице земли напаяют на ращение плодом, на весну и жатву аггели, на есен и зиму. Сего ради показа Господь апостолу, како непрестанно служение имут аггели человека ради, да научит его непрестанно тещи на проповедь спасения ради человечского и не лениву быти; он же видев тамо неизреченнаа видениа, в своих посланиих глаголет: «Не вси ли суть служебнии дуси, на службу посылаеми за хотящих наследовати спасение?»¹⁰ – и пакы глаголет, яко: «Сама тварь свободитца от работы тлениа в свободу славы чад Божиих».¹¹ Видиши ли, любимиче, како тварию зовет аггелы, чада же Божиа – человекы, свобожение аггелское глаголет, еже от службы своеа престанут в последнии день?

О царствах же и о странах пременение – не от звезд сие приходит, но от все дающего Бога; о сем пророк Исаия глаголет: «Аще послушаете мене – блага земли снесте, аще ли не послушаете – оружие вы пояст! – уста бо господня глаголаша сиа».¹² И пакы въпросиша апостоли: «Господи, аще в лето се устраяеши царство Израилево?» Иисус же рече: «Несть ваше разумети времен и лет, яже Отец положи своею областию».¹³ Да внемли, Господа ради, в которую звезду стали христианскаа царства, еже ныне вси попрани от неверных, якоже пророк глаголет: «Кто даст на расхыщение Израиля – не Бог ли, емуже съгрешиша?»¹⁴ Девятдесят лет, како греческое царство разорися¹⁵ и не созижется: сия вся случися грех ради наших, понеже они предаша православную гречскую веру в латынство. И не дивися, избранниче Божий, яко латыни глаголют: наше царство ромейское недвижимо пребывает, аще быхом не праве веровали, не бы Господь снабдел нас. Не подобает нам внимати прелестем их, воистину суть еретици, своею волею отпадше от православныа христианскиа веры, паче же опресночного ради служениа. Беша с нами в соединении семсот лет и 70, а егда отпадоша правыа веры семсот и 35 лет,¹⁶ во аполинариеву ересь впадше, прелщени Карулом царем и папою Формосом. Глаголют о опресноце, яко за чистоту и безстрастие, но сие лжут, съкрывающе внутрь себе диавола. Аполинарий¹⁷ же своим учением повеле опресночнаа служити за сию вину, глаголет бо сице, яко не прият плоти человечскиа от пречистыа девы господь наш Иисус Христос, но з готовою небесною плотию, яко трубою, девичьскою утробою прошед, ниже душа человечьскиа приат, но вместо душа Дух святый в нем пребывает, до тем лстят незлобивых душа и неутверженых. Увы горкиа прелести и отпадения от Бога жива! Аще плоти человечскиа не приат Спас, то и падшего Адама и всех от него рожденных человек плоть не обожися, и, аще ли душа человечскиа не приал Господь, то и ныне душа человечскиа не изведены от адскых.

Да хто не содрогнется, ниже въсплачется о таковых прелестеи и отпадения, гръдостию буйства своего еретичьскым учением последоваша и богоубийственеи чете жидом, яко же и при распятии Господни обещници беша с ними, о них же еуггелист глаголет: «Воини же гемонови ругающеся ему, прегыбающе колени свои и глаголюще: “Радуйся, царю июдейскыи!”».¹⁸ Воини гемонови – Пилатови слугы, понеже Пилат от латын бяше, от Понта¹⁹ града Римскиа области, тако и ныне в своем молении не прекланяют свою главу, токмо колени мало надгыбают латыни. О них же Давид издалеча духом святым прозрев, яко от лица Иисусова рече: «В поношение безумному дал мя еси».²⁰ Воистину людие буи, а не мудри, аще убо великого Рима стены и столпове, и трекровныа полаты не пленены, но душа их от диавола пленены быша опреснок ради. Аще убо Агарины внуци²¹ греческое царство приаша, но веры не повредиша, ниже насилствуют греком от веры отступати, инако же ромейское царство неразрушимо, яко Господь в римскую власть написася.²²

Наша же христианскаа тайна сице съдержит о священнем причащении. Приступиша ученици ко Иисусу, глаголюще: «Господи, где хощеши уготоваем ти ясти пасху?» Он же рече им: «Се входящема вама во град, срящет вы человек, в скудели воду нося; последуйте ему и дому владыце рцете: “Учитель глаголет, у тебе сътворю пасху со ученикы моими”».²³ Дому есть владыка отец Ивана Богослова Зеведей, сему повеле Иисус надвое сътворити: едину по обычаю законному, еже опреснок, другую же тайную, иже хлеб съвершен квасную. Сего ради тайная вечеря глаголется,²⁴ понеже в жидох от 11 до 14²⁵ не обретается квасной хлеб в домех. Да первее законную пасху ядоша по обычаю, опреснок и агнец з горчицею, стояще опоясани и жезлы подпирающеся, клобукы на главах их. По ядении же сед, учаше их, еже не старийшенствовати, таже о предателстве вносит слово, и, по сем волиа воду во умывалницу, и нача нозе умывати учеником, образ дасть им святого крещениа. По сих же пакы возлеже и повели представити хлеб и вино точию, начат жалостнаа словеса простирати, възвед убо божественаа свои очи на небо и рече: «Отче, прииде час, прослави сына своего, да и сын твой прославит тя, яко дал еси ему власть всякой плоти, да все, еже дал ми еси, и аз дам им живот вечный. Иже есть живот вечный, да знают тебе единого истинного Бога, и егоже посла Иисуса Христа; и аз прославих тебе на земли и дело съвръших, и ныне прослави мя, Отче, славою, иже имех у тебе преже сложениа мира».²⁶ И паки рече ко учеником: «Аз есмь виноград, вы же рождье, иже пребудет в мне и аз в нем».²⁷ И паки возвед очи свои и рече: «Отче, святи их во имя твое, зане аз свящюся сам, да будут и сии освящени воистинну, и не о сих молю токмо, но и о верующих словесем их в мя; да вси бо едино будут, яко же, Отче, аз в тебе, и ты в мне, да и ти в нас будут».²⁸ Разумей же обое зде, еже молится о онех, освятив их во святых тайнах, да научит свящати архиереа и священики у святыа трапезы; идеже чин действа, ту и слуга поставляти подобает священнодейству. И ту, абие приим предложенный хлеб на святых своих пречистых руках и воздвиг горе, показуя Богу Отцу, благодарив, преломив, дасть святым своим учеником и апостолом, рек: «Приимете и ядите, се есть тело мое, еже за вы ломимое и за многы во оставление грехов».²⁹ По ядении же приим чашу от плода лозного иже есть вино, и растворив с теплою водою, и сию дасть учеником глаголя: «Пиите от неа вси, се есть кровь моа Нового Завета, еже за вы изливаема и за многы во оставление грехов».³⁰ Обаче учеником дааше, тоже и сам ядяше и пиаше с ними. По сих же паки глаголеть: «Желанием въжделех ясти сию пасху с вами, прежде даже не прииму мук; отселе уже не имам пити от плода винограда, но ново испию с вами в царствии Отца моего»,³¹ – и, по сем, «въспевше, изыдоша в гору Елеонскую».³²

Видиши ли, христолюбче, какова есть священьства тайна и божественого причастия начало, еже убо сам их освяти и научи священиа действовати? Зри, любимиче, якоже испи вино, с водою растворив, такоже и на кресте от своих божественых ребр два источника, кровь и воду, источи. Да и сие внемли, господа ради, како в тридесят лет възраста своего по всяко лето яде Спас законную пасху, а ни единою не рече: «Желанием вжелах ясти пасху сию», но токмо о сей новеи благодатнеи вечери тайней, еже устрои смотрение нашему спасению.

О сих убо преуспокоивше слово, мала некаа словеса изречем о нынешнем православном царствии пресветлейшего и высокостолнейшего государя нашего, иже в всей поднебесной единого христианом царя и броздодръжателя святых Божиих престол, святыа вселенскиа апостолскиа церкве, иже вместо римской и костянтинополской, иже есть в богоспасном граде Москве святого и славного Успения пречистые Богородица, иже едина в вселеннеи паче солнца светится. Да веси, христолюбче и боголюбче, яко вся христианская царства приидоша в конец и снидошася во едино царство нашего государя, по пророческим книгам, то есть Ромеиское царство³³: два убо Рима падоша, а третий стоит, а четвертому не быти.³⁴ Многажды и апостол Павел поминает Рима в посланиих, в толкованиих глаголет: «Рим – весь мир».³⁵ Уже бо христианской церкви исполнися блаженого Давида глагол: «Се покой мой в век века, зде вселюся, яко изволих и».³⁶ По великому же Богослову: «Жена облъчена в солнце, и луна под ногама ея, и чадо в руку еа, и абие изыде змий от бездны, имеа глав 7 и сем венец на главах ему, и хотяше чадо жены пожрети. И даны быша жене криле великого орла, да бежит в пустыню, змий же изо уст своих испусти воду, яко реку, да ю в реце потопит».³⁷ Воду же глаголют неверие, видиши ли, избранниче Божий, яко вся христианскаа царства потопишася от неверных, токмо единого государя нашего царство едино благодатию Христовою стоит. Подобает царствующему дръжати сие с великым опасением и к Богу обращением, не уповати на злато и богатство изчезновение, но уповати на все дающего Бога. А звезды, якоже и преже рекох, не помогут ничим, ни придадут ни уймут. Глаголет убо връховный апостол Петр в соборном Послании: «Един день пред Господом, яко тысяща лет, а тысяща лет, яко един день, – не опоздит Господь обета, еже обеща, но долго тръпит, не хотя некиа погубити, хотя всех в покаание вместити».³⁸ Видиши ли, боголюбче, яко в руце его дыхание всех сущих, глаголет бо, яко: «Еще единою потрясу не токмо землею, но и небом».³⁹ Понеже и апостолом еще не свершенным, выше силы не велел пытати: богословесный же наперсник во «Откровении» своем глаголет: «В последнее время спасаа, спаси душу свою, да не умрем второю смертию, геонскою,⁴⁰ но обратимся ко всемогущему спасти нас господу с молбами прилежными, и теплыми слезами приплачемся пред ним, яко да смилится обратити ярость свою от нас, и помилует нас, и сподобит нас услышати сладкый блаженый и въжделенный его глас: “Приидите, благословленнии, Отца моего наследуйте уготованное вам царство преже сложениа миру”».⁴¹

Буди, спасаяся и здравствуя о Христе.

Иже от вышняа и от всемощные вся содръжащиа десница Божиа, имьже царие царствуют и имьж велицыи величаются и силнии пишут правду тебе, пресветлейшему и высокостолнейшему государю великому князю, православному христианьскому царю и всех владыце, броздодержателю святых Божиих престол, святыа вселенскые соборные апостольскые церкви Пречистые Богородицы, честного и славного еа Успения иж вместо римские и константинопольские просиавшу, – старого убо Рима церкви падеся неверием аполинариевы ереси, второго Рима, Константинова града церкви, Агаряне внуцы секирами и оскордъми разсекоша двери, сиа же ныне третиого, нового Рима, дръжавного твоего царствиа святая соборная апостольскаа церкви, иж в концых вселенныа в православной христианьстей вере во всей поднебесней паче солнца светится, – и да весть твоа держава, благочестивый царю, яко вся царства православные христианьские веры снидошася в твое едино царство: един ты во всей поднебесной христианом царь.

Подобает тебе, царю, сие держати со страхом Божиим, убойся Бога, давшего ти сия, не уповай на злато, и богатство, и славу: вся бо сиа зде собрана и на земли зде остают. Помяни, царю, оного блаженного, иж скипетр в руце и венец царствиа на своей главе нося, глаголаше: «Богатство, аще течет, не прилагайте сердца»;⁴² премудрый же Соломон рече: «Богатьство и злато не во скровищих знается, но егда помогает требующим»;⁴³ апостол же Павел, сим последуа, глаголет: «Корень всем злым – сребролюбие»,⁴⁴ – не не имети велит, но не прилагати упования ниже сердца к нему, но уповати на все дающего Бога. Вся убо твоя к Богу чистая вера и любовь – ко святым Божиим церквам; но и еще, царю, исправи две заповеди.

Еже во твоем царствии не пологают человецы на себе право знамения честного креста, о нихъж издалеча проведый апостол Павел глаголаше: «Преже писах вам, ныне же плача глаголю о вразех креста Христова, имже конець пагуба».⁴⁵

Второе: да исполниши святые соборные церкви епископы, да не вдовьствует святая Божиа церкви при твоем царствии! Не преступай, царю, заповеди, еже положиша твои прадеды – великий Константин, и блаженный святый Владимир, и великий богоизбранный Ярослав и прочии блаженнии святии, ихьж корень и до тебе. Не обиди, царю, святых Божиих церквей и честных монастырей, еже данное Богови в наследие вечных благ на память последнему роду, о сем убо святый великий Пятый собор страшное запрещение положи.

О третьей же пишу и плача горце глаголю, яко да искорениши из своего православного царствия сий горкий плевел, о немьж и ныне свидетельствует пламень жупелного горящего огня в содомскых стогнах, о немже пророк Исаия, рыдая, глаголаше: «Слышите слово Божие, князи содомстии, и внушите глагол Божий, людие гоморьстии: “Что ми тук жертв ваших и приношений ваших, исполнен есмь всесожжений. Аще принесете ми кадило – мерзостно ми есть, и праздников ваших ненавидит душа моя!”»⁴⁶ Да слыши, благочестивый царю, яко пророк не мертвым погибшим содомляном таковая глаголаше, но живым человеком, творящым дела их. Писано бо есть: «Преступаяй от своеа жены раздирает плоть свою, а творяй содомъская, убивает плод своего чрева».⁴⁷ Богь сотворил человека и семя в нем на чадородие, мы ж сами свои семена даем во убийство и в жрътву диаволу. Да сия мерзость умножися не токмо в миръскых, но и в прочих, о нихже помолчю, чтый ж да разумеет. Увы мне, како долго терпит милостивый о нас не судя! Убо сия писах, но паче рыдая горце сам аз окаянный о своих согрешениих, но боюся молчати, аки он раб, сокрывый талант.⁴⁸

Аз бо грешный и грубый во всех и невежа в премудрости, яко ж Валаамово осля⁴⁹ безсловесное словесного учаше, и скотина пророка наказоваше, яко да не зазриши о сих, благочестивый царю, яж дерзнух писати твоему величеству. И ныне молю тя и паки премолю: еж выше писах, внимай Господа ради, яко вся христианскаа царства снидошася в твое царство, посем чаем царства, емуж несть конца.

Сия ж писах ти, любя, и взывая, и моля щедротами Божиими, яко да премениши скупость на шедроты и немилосердие на милость. Утеши плачющых и вопиющых день и нощь, избави обидимых из руки обидящых. «Не обидите, – рече Господь, – сих менших, верующих в мя, ибо аггели их видят всегда лице отца моего, иж есть на небесех».⁵⁰ «Блажен, – рече, – разумеваяи на нища и убога, в день лют избавит его Господь».⁵¹ Господь сохранит его и живит и, и ублажит его на земли, и не предаст его в рукы врагом, Господь помощь ти.

Да аще добро устроиши свое царство – будеши сын света и гражанин вышнего Иерусалима, якоже выше писах ти и ныне глаголю: блюди и внемли, благочестивый царю, яко вся христианская царьства снидошася в твое едино, яко два Рима падоша, а третей стоит, а четвертому не быти. Уже твое христианьское царство инем не останется,⁵² по великому Богослову, а христианской церкви исполнися блаженного Давыда глагол: «Се покой мой в век века, зде вселюся, яко изволих его».⁵³ Святый Ипполит рече: «Егда узрим обстоим Рим перскими вои, и перси на нас с скифаны сходящас на брани, тогда неблазнено познаем, яко той есть Антихрист». Бог же мира, и любви, и долголетъства, и здравия, молитвами пречистые Богоматере и святых чюдотворьцев и всех святых – да исполнит твое державно царство!