Тропарь, глас 4*
Апо́столов первопресто́льницы,/ и вселе́нныя учи́телие,/ Влады́ку всех моли́те/ мир вселе́нней дарова́ти// и душа́м на́шим ве́лию ми́лость.
Перевод: Первенствующие из Апостолов и вселенские учителя, Владыку всего молите мир вселенной даровать и душам нашим великую милость.
Кондак, глас 2*
Тве́рдыя и боговеща́нныя пропове́датели,/ верх апо́столов Твои́х, Го́споди,/ прия́л еси́ в наслажде́ние благи́х Твои́х и поко́й:/ боле́зни бо о́нех и смерть прия́л еси́ па́че вся́каго всепло́дия,// Еди́не, све́дый серде́чная.
Перевод: Непоколебимых и Богогласных проповедников, высших из учеников Твоих, Господи, Ты принял в наслаждение благ Твоих и покой; ибо труды их и смерть признал Ты высшими всякой жертвы, Один, знающий то, что в сердцах.
Молитва первоверховным апостолам Петру и Павлу*
О, пресла́внии апо́столи Пе́тре и Па́вле, ду́ши за Христа́ преда́вшии и кро́вию ва́шею па́жить Его́ удобри́вшии! Услы́шите чад ва́ших моли́твы и воздыха́ния, се́рдцем сокруше́нным ны́не приноси́мыя. Се бо беззако́ньми омрачи́хомся, и того́ ра́ди беда́ми я́коже ту́чами обложи́хомся, еле́а же до́браго жития́ обнища́хом зело́, и не возмо́жем проти́витися волко́м хи́щным, и́же расхища́ти насле́дие Бо́жие де́рзостно тща́тся. О си́льнии! Понеси́те не́мощи на́ша, не отлуча́йтеся ду́хом от нас, да не разлучи́мся в коне́ц от любве́ Бо́жия, но кре́пким заступле́нием ва́шим нас защити́те, да поми́лует Госпо́дь всех нас моли́тв ва́ших ра́ди, да истреби́т же рукописа́ние безме́рных грехо́в на́ших и да сподо́бит со все́ми святы́ми блаже́ннаго Ца́рствия и бра́ка А́гнца Своего́, Ему́же честь, и сла́ва, и благодаре́ние, и поклоне́ние, во ве́ки веко́в. Ами́нь.
Молитва 2-я первоверховным апостолам Петру и Павлу
О, святи́и апо́столи Пе́тре и Па́вле, не отлуча́йтеся ду́хом от нас, гре́шных раб Бо́жиих (имена), да не разлучи́мся вконе́ц от любве́ Бо́жия, но кре́пким заступле́нием ва́шим нас защити́те, да поми́лует Госпо́дь всех нас моли́тв ва́ших ра́ди, да истреби́т же рукописа́ние безме́рных грехо́в на́ших, и да сподо́бит со все́ми святы́ми блаже́ннаго Ца́рствия и бра́ка А́гнца Своего́, Ему́же честь и сла́ва, и благодаре́ние и поклоне́ние во ве́ки веко́в. Ами́нь.
Молитва 3-я первоверховным апостолам Петру и Павлу
О, верхо́внии апо́столе: Пе́тре, ве́ры Христо́вой тве́рдый изобрази́телю, и Па́вле, сладковеща́тельная ла́стовица уче́ния Госпо́дня! Зрим вас, а́ки многотеку́щую реку́ сказа́ний Христо́вых слове́с, истека́ющую от и́стинных недр Бо́жиих и всю глубину́ кла́дезя и́стин богооткрове́нных пред на́ми, жа́ждущими их, открыва́ющую. Зрим вас, а́ки свети́ла, с небесе́ то́ки теплоты́ любве́ боже́ственныя нам уясня́ющия: ублажа́ем вас, прие́мших труды́ и по́ты, во е́же все́яти уче́ний боже́ственных се́мена: целу́ем стопы́ ва́ша, обтека́вшия вся концы́ земли́, и в тре́пете грехо́внем зрим главы́ ва́ша, смире́нно преклоне́нныя к пречи́стым стопа́м Госпо́дним: еди́наго кре́стным путе́м (пове́шением) и друга́го ме́чным усече́нием. Уми́льно про́сим вас, святи́и апо́столи, сотвори́те и нас в бу́ести грехо́вней преклоне́нными пред Учи́телем на́шим Го́сподом, сотвори́те го́рдости на́шей главы́ усекнове́ние уче́нием богооткрове́нным: глад душе́вный наш да утоли́т Госпо́дь бра́шном, указу́емым с сама́го не́ба, я́коже Петру́: — ты же, Па́вле, богонасы́щенный Христо́вых слове́с, потщи́ся и нас до тре́тьяго небесе́ возвести́ твои́ми непреста́нными о нас ко Го́споду моли́твами, да и мы та́мо просла́вим с ли́ки а́нгельскими и апо́стольскими ди́внаго во святы́х свои́х Отца́ вся́ческих и Его́ же посла́л в мир спаса́яй и наставля́яй к жи́зни ве́чной, Го́спода Иису́са Христа́, и единосу́щнаго Им Свята́го Ду́ха. Ами́нь.
Молитва первоверховному апостолу Петру**
О, святы́й Пе́тре, вели́кий апо́столе, самови́дче и сотаи́нниче Бо́жий, всемо́щною десни́цею Учи́теля твоего́ прия́тый из вод волну́ющихся и кра́йняго потопле́ния свобо́ждшийся! Не забу́ди и нас убо́гих, в ти́не грехо́вней погря́зших и волна́ми жите́йскаго мо́ря обурева́емых: пода́ждь нам твою́ ру́ку кре́пкую, помози́ нам и удержи́ нас от потопле́ния во страсте́х, похоте́х, лжах и клевета́х. Сотвори́ и ты с на́ми ми́лость, тебе́ от Го́спода явле́нную, да не в сомне́нии и малове́рии изги́бнем. Научи́ нас, учи́телю наш, пролива́ти сле́зы покая́ния, да пла́чем го́рько о дея́ниих на́ших в ве́це сем. И а́ще твоя́ сле́зы, в покая́ние излия́нныя, ми́лостию Свое́ю покры́ Госпо́дь и Учи́тель твой, испроси́ и нам, со дерзнове́нием апо́стольским, проще́ния во гресе́ ежеча́снаго. Град сей, ко святы́м стопа́м твои́м пове́рженный, сохрани́ и от прилуча́ющихся ко́зней лука́вых врага́ спасе́ния на́шего огради́; воздви́гни твои́ преподо́бнии ру́це ко Го́споду за наро́д наш, да ти́хое и безмо́лвное житие́ поживе́м в ве́це сем до часа́, в о́ньже и́мать призва́ти нас Влады́ка Госпо́дь, наш Судия́ нелицеприя́тный. Ты же, о всехва́льный апо́столе, не отве́ржи во́пля на́шего и стена́ния к тебе́, но заступи́ нас пред Христо́м, твои́м Учи́телем, да непреста́нно сла́вим Его́ милосе́рдие к нам, со Отце́м и Святы́м Ду́хом, во ве́ки веко́в. Ами́нь.
Личное прошение
О, святы́й вели́кий апо́столе Пе́тре! Не отве́ржи мя, раба́ твоего́ (имя) и стена́ния моего́ к тебе́. При́зри на мя, су́щаго в боле́знех и печа́лех, испроси́ у Христа́, Учи́теля твоего́, (содержание прошения), да непреста́нно сла́вим Его́ милосе́рдие к нам, со Отце́м и Святы́м Ду́хом, во ве́ки веко́в. Ами́нь.
Молитва первоверховному апостолу Павлу
О, святый верховный апостоле Павле, сосуде избранный Христов, небесных таин сказателю, всех языков учителю, церковная трубо, пресловущий витие, многия беды за имя Христово претерпевый, море измеривый и землю обшедый и нас от лести идольския обративый! Тя молю и к тебе вопию: не гнушайся мене сквернаго (имя), возстави падшаго греховною леностию, якоже в Листрех храмаго от чрева матерня возставил еси; и якоже Евтиха мертва бывша оживил еси, воскреси и мене от мертвых дел; и якоже молитвою твоею основание темницы некогда потрясл еси и узники разрешил еси, сице исторгни мя творити волю Божию. Вся бо можеши данною ти властию от Христа Бога, Емуже подобает всякая слава, честь и поклонение, со Безначальным Его Отцем, и со Пресвятым и Благим и Животворящим Его Духом, ныне и присно и во веки веков. Аминь.
Краткое житие первоверховного апостола Петра
День памяти 29 июня/12 июля
Прежде апостольства был рыбаком, а затем вместе с братом, апостолом Андреем, был первым призван Господом в число учеников. При взятии первосвященниками Иисуса под стражу, отрекся от Господа, однако искупил свой грех слезным раскаянием и, исповедав свою веру и любовь ко Христу, удостоился стать основанием всей христианской Церкви. Имел различные благодатные дарования — исцелил хромого, расслабленного, воскресил умершую, именем Иисуса изгонял бесов. Принял мученическую смерть в Риме. Апостолу Петру молятся о благоустроении церковном, исцелении от различных недугов, о помощи в рыбной ловле.
Краткое житие первоверховного апостола Павла
День памяти 29 июня/12 июля
Быв посещён Господом, из гонителя христиан сделался пламенным проповедником Христовой веры. Обратил множество язычников, исцелил множество больных, основал многие церкви по всему Средиземноморью. 14 его пастырских посланий вошли в состав Нового Завета. В них апостол Павел являет примеры истинно пастырской заботы о своих духовных детях, любви к ним и попечения об их спасении. Не раз претерпевал муки за Слово Божие, подвергался заточениям. Принял мученическую смерть в Риме. Апостолу Павлу молятся о твердом стоянии в вере, об обращении неверующих и умножении веры, о добром пастырствовании, о любви между пастырями и пасомыми.
- Глас в Словаре.
Комментировать