Минея, 28 Июля, Кано́н святи́телю Питири́му
Глас 2
Песнь 1
Ирмос: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть:/ препросла́вленный Госпо́дь сла́вно бо просла́вися.
Припев: Святи́телю о́тче Питири́ме, моли́ Бо́га о на́с.
Христе́, Све́те и́стинный, ра́зум мой просвети́ и се́рдце очи́сти,/ да просла́влю па́мять уго́дника Твоего́, Богоно́снаго Питири́ма.
Припев: Святи́телю о́тче Питири́ме, моли́ Бо́га о на́с.
О́тче преподо́бне Питири́ме,/ огнезра́чному Престо́лу в Вы́шних предстоя́ и Трисо́лнечными светлостьми́ озаря́емь,/ просвети́ глубину́ зол мои́х,/ я́ко да и аз пою́: сла́вно бо просла́вися.
Сла́ва Отцу́ и Сы́ну и Свято́му Ду́ху.
Я́коже Моисе́й Богови́дец дре́вле спасе́ Изра́иля от руки́ фарао́новы,/ та́ко и ты, Богоно́сне о́тче, свободи́ мя от рабо́ты врагу́,/ да, ра́дуяся, сла́влю Бо́га, ди́внаго во святы́х Свои́х.
И ны́не и при́сно и во ве́ки веко́в. Ами́нь.
Богородичен: Влады́чице и Ма́ти Изба́вителя,/ предста́тельством Твои́м умоли́ Сы́на Твоего́,/ да потреби́т живу́щий во мне грех/ и изведе́т мя в свобо́ду сла́вы чад Свои́х.
Песнь 3
Ирмос: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.
Припев: Святи́телю о́тче Питири́ме, моли́ Бо́га о на́с.
Я́коже дре́вле пра́ведная А́нна свое́ ча́до,/ вдал еси́ себе́ сама́го, о́тче Питири́ме, в дар Бо́гу./ Утверди́ и мене́ на ка́мени за́поведей Его́, да зову́:/ несть свят, я́ко Бог наш.
Припев: Святи́телю о́тче Питири́ме, моли́ Бо́га о на́с.
О́тче Питири́ме, моли́твами твои́ми утверди́ ум и се́рдце на́ше во Го́споде,/ возвы́си рог христиа́н правосла́вных,/ да заградя́тся уста́ враго́в ве́ры и возвесели́мся о спасе́нии свое́м.
Сла́ва Отцу́ и Сы́ну и Свято́му Ду́ху.
У цельбоно́снаго гро́ба но́ваго чудотво́рца да не хва́лится си́льный си́лою свое́ю,/ да не хва́лится му́дрый му́дростию свое́ю,/ да не хва́лится бога́тый бога́тством свои́м,/ но о сем да хва́лится хва́ляйся,/ е́же разуме́ти и зна́ти Го́спода и стяжа́ти бога́тство благода́ти Его́.
И ны́не и при́сно и во ве́ки веко́в. Ами́нь.
Богородичен: Пречи́стая Де́во, Неискусобра́чная Ма́ти,/ непло́дную ду́шу мою́ и безча́дную плодоно́сну покажи́ благода́тию Сы́на Твоего́,/ моли́твами но́ваго чудотво́рца Питири́ма, да зову́ и аз со все́ми ве́рными:/ несть свят, я́коже Бог наш.
Седален, глас 2
А́ще и за́йде пре́жде под зе́млю те́ло твое́,/ но, я́ко со́лнце из о́блак, возсия́, луча́ми благода́ти блиста́яся./ Те́мже па́мять твою́ соверша́юще, святи́телю, со стра́хом покланя́емся/ и, я́ко о́бщему отцу́, те́пле мо́лимся:/ изба́ви ны, ча́да твоя́, от бед и ну́ждных обстоя́ний.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Упова́ние христиа́н, Пресвята́я Де́во,/ Его́же родила́ еси́ па́че ума́ и сло́ва, умоли́, смоле́бника Питири́ма прии́мши,/ оставле́ние прегреше́ний и жития́ исправле́ние пода́ти нам,/ да пое́м Тя при́сно, возвели́чившую род наш.
Песнь 4
Ирмос: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.
Припев: Святи́телю о́тче Питири́ме, моли́ Бо́га о на́с.
От ю́ности чистото́ю де́вства А́нгелом в житии́ поревнова́л еси́,/ спасе́нию челове́ков послужи́л еси́, о́тче Питири́ме,/ и к Бо́гу взыва́л еси́, вопия́:/ сла́ва си́ле Твое́й, Го́споди.
Припев: Святи́телю о́тче Питири́ме, моли́ Бо́га о на́с.
Я́коже А́нгел во пло́ти, горе́л еси́, свя́те, огне́м любве́ Христо́вы/ и вруче́нныя тебе́ лю́ди позна́нием Сы́на Бо́жия просвети́л еси́, зову́щия:/ сла́ва си́ле Твое́й, Го́споди.
Сла́ва Отцу́ и Сы́ну и Свято́му Ду́ху.
А́нгеле земны́й и челове́че Небе́сный, испроси́ и нам, гре́шным, спасе́ние у Христа́ Бо́га,/ да и мы ку́пно с тобо́ю зове́м:/ сла́ва си́ле Твое́й, Го́споди.
И ны́не и при́сно и во ве́ки веко́в. Ами́нь.
Богородичен: О Ма́ти Сло́ва и Де́во, сохрани́ ны непоро́чны от страсте́й безче́стных,/ да Христу́, все́льшуся в нас, пое́м:/ сла́ва си́ле Твое́й, Го́споди.
Песнь 5
Ирмос: Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, бо́га не зна́ю.
Припев: Святи́телю о́тче Питири́ме, моли́ Бо́га о на́с.
Све́том Твои́м всю вселе́нную озари́вый,/ просвети́ тьму мою́, Го́споди,/ мрак души́ моея́ разжени́,/ в честне́й па́мяти уго́дника Твоего́ Питири́ма.
Припев: Святи́телю о́тче Питири́ме, моли́ Бо́га о на́с.
Свети́льник сый Со́лнца Пра́веднаго,/ озара́яся при́сно Све́том невече́рним, о́тче наш Питири́ме,/ облиста́й ум и се́рдце на́ше,/ да, ра́дующеся, Спа́су на́шему пое́м:/ ино́го, ра́зве Тебе́, Бо́га не зна́ем.
Сла́ва Отцу́ и Сы́ну и Свято́му Ду́ху.
Что Тебе́ принесе́м, Христе́ Спа́се наш,/ ки́я пе́сни воспое́м благосе́рдию Твоему́,/ я́ко возсия́л еси́ нам свет спасе́ния,/ избавле́ние от беззако́ний на́ших чудесы́ мно́гими святи́теля Питири́ма.
И ны́не и при́сно и во ве́ки веко́в. Ами́нь.
Богородичен: Ма́ти Свята́я, Богоро́дице, ро́ждшая Свет Непристу́пный,/ не пре́зри моле́ния недосто́йных чад Твои́х, во тьме грехо́в су́щих,/ но просвети́ нас све́том богове́дения, да, у́тренююще, сла́вим Тя.
Песнь 6
Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.
Припев: Святи́телю о́тче Питири́ме, моли́ Бо́га о на́с.
Бе́здна зол мои́х смуща́ет мя/ и низво́дит мя во глубину́ отча́яния,/ но Ты, Бо́же, пучи́на ми́лости сый неисчерпа́емая,/ даждь ми ру́ку по́мощи, я́ко Петро́ви,/ предста́тельством ми́лостиваго уго́дника Питири́ма, и спаси́ мя.
Припев: Святи́телю о́тче Питири́ме, моли́ Бо́га о на́с.
Бе́здно ми́лости и щедро́т, Го́споди,/ уще́дри ны, поги́бшее созда́ние Твое́,/ укроти́ во́лны страсте́й на́ших/ и в приста́нище спасе́ния ны возведи́,/ моли́тв ра́ди святи́теля Питири́ма.
Сла́ва Отцу́ и Сы́ну и Свято́му Ду́ху.
О́тче наш Питири́ме, служи́телю ве́рный Ми́лостиваго Бо́га,/ умоли́ Его́ благосты́ню, да и́миже весть судьба́ми спасе́т ны, погиба́ющия,/ и яви́т нам всемогу́щую по́мощь по твоему́ предста́тельству.
И ны́не и при́сно и во ве́ки веко́в. Ами́нь.
Богородичен: Пресвята́я Влады́чице, Ма́ти милосе́рдия,/ обыше́дше, обыдо́ша нас врази́ ве́ры на́шея, и несть заступа́ющаго, и погиба́ем,/ пото́цы бо беззако́ний премого́ша ны, и отчаява́емся,/ но Ты Ма́терними Твои́ми щедро́тами приклони́ Сы́на Твоего́ на ми́лость,/ да спасе́т ны от бед, я́коже от ки́та Ио́ну.
Кондак, глас 8
Мона́хов наста́вника изря́дна и святи́теля всем лю́дем ми́лостива,/ чудотво́рца преди́вна и моли́твенника о нас неусы́пна,/ соше́дшеся, воспои́м Питири́ма, Тамбо́вския земли́ похвалу́.
Икос
Воспои́м днесь, ве́рнии, святи́теля вели́каго в пе́снех и пе́ниих духо́вных:/ ра́дуйся, о́тче Богоно́сне Питири́ме, Смоле́нския земли́ о́трасль пречестна́я,/ во гра́де Вя́зьме благода́тию Бо́жиею напое́нная и, я́ко крин, процве́тшая,/ Тамбо́вскую же страну́ плоды́ доброде́телей обогати́вшая;/ ра́дуйся, па́стырю до́брый, насажде́нием и́стинныя ве́ры и све́том благоче́стия тьму нече́стия разгна́вый;/ ра́дуйся, спаси́тельными труды́ твои́ми и по́двиги мно́ги неве́рныя обрати́вый и ко Христу́ приведы́й;/ ра́дуйся, чу́дную ико́ну Богома́тере гра́ду Тамбо́ву в насле́дие оста́вивый,/ от нея́же многоразли́чная исцеле́ния источа́ются;/ ра́дуйся, свои́ма рука́ма ископа́вый кла́дязи воды́ неисчерпа́емыя,/ ю́же с ве́рою пию́щии прие́млют неду́гов исцеле́ние и от душепа́губных страсте́й свобожде́ние;/ ра́дуйся, посеще́нием твои́м со дру́ги твои́ми, святи́телем Митрофа́ном и Боголюби́вым Васи́лием,/ Тамбо́вския де́бри и леса́ облагоуха́вый;/ ра́дуйся, тем нача́ло и́ноческаго жития́ та́мо положи́вый,/ в ми́ре же живу́щим о́браз и́стинныя дру́жбы показа́вый;/ ра́дуйся, Тамбо́вския земли́ похвало́.
Песнь 7
Ирмос: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огни́ вве́ржени, ороша́еми, поя́ху:/ благослове́н еси́, Бо́же оте́ц на́ших.
Припев: Святи́телю о́тче Питири́ме, моли́ Бо́га о на́с.
Го́споди Бо́же наш, Любы́ неизрече́нная,/ челове́ка пе́рстнаго па́че зла́та и сребра́ о́бразом Твои́м украси́л еси́,/ вся́кими дарова́нии и чудесы́ мно́гими обогати́л еси́./ Те́мже, па́мять чудотво́рца Твоего́ Питири́ма соверша́юще, вопие́м Ти:/ благослове́н еси́, Бо́же оте́ц на́ших.
Припев: Святи́телю о́тче Питири́ме, моли́ Бо́га о на́с.
Преподо́бне о́тче Питири́ме,/ о́браз Созда́теля своего́ в души́ твое́й от страсте́й очи́стив и любо́вию Бо́жиею распаля́емь,/ пре́дал еси́ себе́ на служе́ние во́ли Его́, всегда́ взыва́я:/ благослове́н еси́, Бо́же оте́ц на́ших.
Сла́ва Отцу́ и Сы́ну и Свято́му Ду́ху.
Я́коже дре́вле о́троцы благочести́вии в Вавило́не,/ и́стинную ве́ру во стране́ Тамбо́встей, о́тче Питири́ме, утверди́л еси́ и нече́стие обличи́л еси́,/ всегда́ тружда́яся, благовеству́я, моля́ся и поя́:/ благослове́н Бог оте́ц на́ших.
И ны́не и при́сно и во ве́ки веко́в. Ами́нь.
Богородичен: Пресвята́я Влады́чице Богоро́дице,/ о́браз Твой честны́й гра́ду Тамбо́ву в благослове́ние и покро́в держа́вен/ рука́ма святи́теля Питири́ма дарова́ла еси́,/ да славосло́вим Тобо́ю Держа́внаго Христа́, Бо́га на́шего.
Песнь 8
Ирмос: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода,/ и превозноси́те во вся ве́ки.
Припев: Святи́телю о́тче Питири́ме, моли́ Бо́га о на́с.
Го́споди Бо́же мой,/ пла́мень огненный дре́вле в росу о́троком благочести́вым преложи́вый,/ пла́мень страсте́й мои́х угаси́ росо́ю моли́тв благочести́ваго святи́теля Питири́ма,/ да Тя превозношу́ с ним и аз во вся ве́ки.
Припев: Святи́телю о́тче Питири́ме, моли́ Бо́га о на́с.
О́тче наш Питири́ме,/ слез твои́х тече́ньми о́гненная искуше́ния страсте́й и по́хотей плотски́х угаси́л еси́/ и, я́ко во цве́тнице, в чи́стем се́рдце твое́м при́сно ликовствова́л еси́:/ вся дела́, благослови́те, пойте Господа.
Сла́ва Отцу́ и Сы́ну и Свято́му Ду́ху.
Чи́стою боголюби́вою душе́ю со А́нгелы огнезра́чному Престо́лу Бо́га ны́не предстоя́,/ и отту́ду незаходи́мыми заря́ми облистава́емь,/ и чудесы́ мно́гими нам сия́я,/ просвети́, о́тче Питири́ме, облежа́щую нас тьму неве́рия и суеве́рия,/ да пое́м и благослови́м ди́внаго во святы́х Свои́х Бо́га во ве́ки.
И ны́не и при́сно и во ве́ки веко́в. Ами́нь.
Богородичен: Я́коже огне́м пе́щным, страстьми́ пали́мый, зову́ Ти блу́дный аз:/ Влады́чице Чи́стая, Ма́ти Всемогу́щаго,/ спаси́ и изба́ви мя от о́гненнаго осужде́ния.
Песнь 9
Ирмос: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.
Припев: Святи́телю о́тче Питири́ме, моли́ Бо́га о на́с.
Отца́ Безнача́льнаго Сло́ве, Сы́не Единоро́дный,/ челове́ка па́дшаго хотя́ обнови́ти, Сын Де́вы яви́лся еси́,/ и, грехи́ всего́ ми́ра взем, на Крест возне́сл еси́,/ и отту́ду распросте́ртыма дла́ньма расточе́нная ча́да Бо́жия собра́л еси́;/ те́мже и мы, днесь сою́зом любве́ Твоея́ связу́еми/ и ди́внаго уго́дника Твоего́ Питири́ма па́мять соверша́юще,/ Ро́ждшую Тя велича́ем.
Припев: Святи́телю о́тче Питири́ме, моли́ Бо́га о на́с.
Воплоще́нному Сы́ну Бо́жию подража́я,/ па́че ине́х смири́л еси́ себе́, преподо́бне о́тче Питири́ме,/ те́мже и любо́вь Бо́жию стяжа́л еси́/ и заблу́ждшая ча́да Бо́жия приве́л еси́ ко Отцу́ Небе́сному,/ сла́вити Его́ благосе́рдие.
Сла́ва Отцу́ и Сы́ну и Свято́му Ду́ху.
Испо́лнь любве́ Христо́вы, о́тче наш Питири́ме,/ сло́вом и житие́м па́ству твою́ поуча́л еси́/ си́рыя призира́ти, ни́щия пита́ти, скорбя́щия утеша́ти./ Помоли́ся Спа́су Христу́,/ да и мы днесь в па́мять твою́ украси́м себе́ сострада́нием и ми́лостынями,/ я́коже ча́да Бо́жия возлю́бленная.
И ны́не и при́сно и во ве́ки веко́в. Ами́нь.
Богородичен: Ма́ти Свята́я, Безму́жная Де́во,/ во чре́ве Твое́м Бо́га и Челове́ка воеди́но совокупи́вшая,/ да́руй и нам, расточе́нным, соедини́тися во еди́нем Христе́, Сы́не Твое́м,/ на Не́мже утверди́ся Це́рковь, Тя велича́ющая.
Светилен
Свети́ла на небеси́ Утверди́вый/ яви́ тя Це́ркви Свое́й но́вую звезду́ пресве́тлую,/ ду́ха светлостьми́ и чуде́с сия́нии нас озаря́ющую и нечести́выя посрамля́ющую,/ неусы́пный предста́телю наш, святи́телю о́тче Питири́ме.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Ма́ти Пречи́стая, ро́ждшая Свет неизрече́нный,/ сы́ны Све́та покажи́ ны и зри́тели блаже́нства Небе́снаго бы́ти сподо́би,/ да, ра́дующеся, с Тобо́ю и преподо́бным Питири́мом зове́м:/ Светода́вче Христе́ Бо́же наш, сла́ва Тебе́.
Комментировать