Минея, 25 Ноября.
Глас 8
Песнь 1
Ирмос: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко Еди́н сла́вно просла́вися.
Припев: Священному́чениче Пéтре, моли́ Бо́га о на́с.
Во светле́йших селе́ниих житие́ име́я,/ просвеще́ние ми пода́ждь/ моли́твами твои́ми, Пе́тре всеблаже́нне.
Припев: Священному́чениче Пéтре, моли́ Бо́га о на́с.
Зна́нию науче́н и свяще́нством украша́емь,/ всеблаже́нне Пе́тре,/ Христу́ прине́слся еси́ кро́вию.
Сла́ва Отцу́ и Сы́ну и Свято́му Ду́ху.
У́тварь упещре́нная,/ я́коже многоце́нное возложе́ние, Христо́ве Це́ркви/ от Бо́га дарова́лся еси́, блаже́нне.
И ны́не и при́сно и во ве́ки веко́в. Ами́нь.
Богородичен: Пречи́стая Богоро́дице,/ воплоще́нное, Присносу́щное и Пребоже́ственное Сло́во па́че естества́ ро́ждшую,/ пое́м Тя.
Песнь 3
Ирмос: Несть свят, я́ко Госпо́дь,/ и несть пра́веден, я́ко Бог наш,/ Его́же пое́т вся тварь:/ несть пра́веден, па́че Тебе́, Го́споди.
Припев: Священному́чениче Пéтре, моли́ Бо́га о на́с.
Возше́л еси́, е́здя, я́ко на колесни́це,/ твое́ю кро́вию, прему́дре, к Небе́сным,/ иде́же предте́ча наш Христо́с вни́де, еди́н безгре́шный.
Припев: Священному́чениче Пéтре, моли́ Бо́га о на́с.
Жизнь тле́нную оста́вил еси́/ и жизнь безсме́ртную обре́л еси́, блаже́нне,/ иде́же венцено́сец лику́еши, моля́ спасти́ся душа́м на́шим.
Сла́ва Отцу́ и Сы́ну и Свято́му Ду́ху.
Я́коже фи́никс процве́л еси́ благопло́днейший,/ я́ко ма́слина плодоро́дна яви́лася еси́, Богодохнове́нне, во дво́рех Госпо́дних,/ я́ко сми́рна и лива́н и я́ко ми́ро благово́ннейшее.
И ны́не и при́сно и во ве́ки веко́в. Ами́нь.
Богородичен: Я́ко две́ри спаси́тельныя и рай кра́сный,/ Све́та присносу́щнаго о́блак,/ су́щу святу́ю Де́ву воспое́м вси, глаго́люще Ей: ра́дуйся.
Седален, глас 8
От вы́шняго суда́ Христо́ва предста́тельствова ста́ду,/ на па́житех благожи́зненных упа́сл еси́ всему́дрыми твои́ми догма́ты,/ отгна́в А́рия, я́ко во́лка некро́ткаго,/ вше́дшаго в них безбо́жными уче́нии./ Те́мже и ду́шу твою́ положи́л еси́ за них,/ па́стырь наре́клся еси́, я́ко рече́ Госпо́дь,/ иера́рше Пе́тре блаже́нне,/ моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.
Песнь 4
Ирмос: Из горы́ приосене́нныя, Сло́ве, проро́к,/ еди́ныя Богоро́дицы,/ хотя́ща воплоти́тися, Богови́дно усмотри́,/ и со стра́хом славосло́вяше си́лу Тво́ю.
Припев: Священному́чениче Пéтре, моли́ Бо́га о на́с.
Доброде́телей ше́ствовав стезе́ю, о́тче,/ пости́гл еси́ оби́тели вы́шния, Богоно́сне,/ свяще́нства пома́занием укра́шен и муче́ния сия́я кро́вию.
Припев: Священному́чениче Пéтре, моли́ Бо́га о на́с.
Ту́чами пото́ков твои́х крове́й, блаже́нне,/ угаси́л еси́ пещь пре́лести/ и гоня́щих погуби́л еси́ мрак, священному́чениче достосла́вне.
Сла́ва Отцу́ и Сы́ну и Свято́му Ду́ху.
Но́вый Петр не́кий нам яви́лся еси́,/ и́стинно апо́стольскими сия́я дарова́нии,/ священноде́тель же и свиде́тель страсте́й Влады́ки твоего́, всебога́те.
И ны́не и при́сно и во ве́ки веко́в. Ами́нь.
Богородичен: Всех до́брых исполне́ние ро́ждши,/ испо́лни на́ша, Де́во, моле́ния,/ грехо́в нам избавле́ния прося́щи,/ и просвеще́ния, и ве́лия ми́лости.
Песнь 5
Ирмос: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.
Припев: Священному́чениче Пéтре, моли́ Бо́га о на́с.
На ка́мень возше́д ве́ры, страстоте́рпче,/ неукло́нен пребы́л еси́ во искуше́нии сопроти́вных.
Припев: Священному́чениче Пéтре, моли́ Бо́га о на́с.
Ору́жием пла́менным Ду́ха Свята́го, иера́рше,/ А́рия вредосло́вца Боже́ственным судо́м закла́л еси́.
Сла́ва Отцу́ и Сы́ну и Свято́му Ду́ху.
Кре́постию укрепля́емь, сла́вне, Спа́совою,/ вра́жию си́лу и кре́пость попра́л еси́.
И ны́не и при́сно и во ве́ки веко́в. Ами́нь.
Богородичен: Де́ву по рождестве́, пое́м Тя, Богоро́дице,/ Ты бо Бо́га Сло́ва пло́тию ми́ру родила́ еси́.
Песнь 6
Ирмос: Ри́зу мне пода́ждь све́тлу,/ одея́йся све́том я́ко ри́зою,/ многоми́лостиве Христе́, Бо́же наш.
Припев: Священному́чениче Пéтре, моли́ Бо́га о на́с.
Целому́дренно и пра́ведно Бо́гу ты жи́тельствовав,/ коне́ц блаже́нный от Него́ прия́л еси́, всеблаже́нне Пе́тре.
Припев: Священному́чениче Пéтре, моли́ Бо́га о на́с.
Всесоверше́нную же́ртву и прия́тну,/ тебе́ сама́го прине́сл еси́, Пе́тре ди́вный,/ же́ртва тебе́ ра́ди бы́вшему Бо́гу.
Сла́ва Отцу́ и Сы́ну и Свято́му Ду́ху.
Слове́с духо́вных испо́лнився,/ Ду́хом дви́жимь орга́н был еси́,/ песнопоя́, Богоглаго́ливе, неизрече́нная.
И ны́не и при́сно и во ве́ки веко́в. Ами́нь.
Богородичен: Еди́на сло́вом пло́тию Сло́во ро́ждшая,/ изба́ви, мо́лимся, сете́й вра́жиих ду́ши на́ша.
Песнь 7
Ирмос: О́троцы благочести́вии в Вавило́не/ о́бразу злато́му не поклони́шася,/ но посреде́ пе́щи о́гненныя, ороша́еми,/ песнь воспе́ваху, глаго́люще:/ превозноси́мый отце́в и нас Бо́же, благослове́н еси́.
Припев: Священному́чениче Пéтре, моли́ Бо́га о на́с.
Житие́м Боголе́пным укра́шен/ и Боже́ственным све́том просвеща́емь,/ небе́сных в нехо́дная вшел еси́, веселя́ся и вопия́, му́дре, Сотво́ршему:/ благослове́н Бог оте́ц на́ших.
Припев: Священному́чениче Пéтре, моли́ Бо́га о на́с.
Я́ко да пресве́тло благоугоди́ши Христу́ Бо́гу, Богоблаже́нне,/ в ру́ки беззако́нных тя сама́го пре́дал еси́ во́лею, поя́, пребога́те:/ благослове́н Бог оте́ц на́ших.
Сла́ва Отцу́ и Сы́ну и Свято́му Ду́ху.
Весь просвеще́н, сподо́бился еси́ ви́дети Христа́,/ тебе́ показу́юща свою́ ри́зу, лю́те расте́рзану, истка́нную свы́ше, преподо́бне,/ благослове́н еси́, вопи́я, Бо́же оте́ц на́ших.
И ны́не и при́сно и во ве́ки веко́в. Ами́нь.
Богородичен: Вся, я́ко чиста́, прия́ла еси́ во утро́бе Твое́й Сло́во воплоща́емо,/ но Того́ моли́ очи́стити ми прегреше́ний ду́шу и те́ло, Пречи́стая,/ к Тебе́ чи́стою ве́рою прири́щущаго.
Песнь 8
Ирмос: На горе́ святе́й просла́вльшася/ и в купине́ огне́м/ Присноде́вы Моисе́ови та́йну я́вльшаго,/ Го́спода по́йте/ и превозноси́те во вся ве́ки.
Припев: Священному́чениче Пéтре, моли́ Бо́га о на́с.
Жиру́ющую соску́тал еси́ па́губу/ А́риева зле́йшаго хуле́ния, от ве́рных собо́рища отсе́к/ и отгна́в церко́вных, Богому́дре, огра́д.
Припев: Священному́чениче Пéтре, моли́ Бо́га о на́с.
Первостоя́тель ли́ка А́нгельскаго Петр яви́ся,/ Боже́ственный верхо́вник, столп же му́чеников был еси́,/ всему́дре Пе́тре Богоно́се,/ и священноде́йствитель Боже́ственных та́инств.
Сла́ва Отцу́ и Сы́ну и Свято́му Ду́ху.
Научи́вся от Боже́ственнаго вдохнове́ния бу́дущих ра́зуму, Богоглаго́ливе,/ и е́же от земли́ проуве́дев твое́ преставле́ние муче́нием/ к вы́шних Го́споду сла́вы Христу́ во ве́ки вся.
И ны́не и при́сно и во ве́ки веко́в. Ами́нь.
Богородичен: Во утро́бу Де́вы все́льшагося/ и от Нея́ стра́шно и па́че сло́ва дре́вняго Ада́ма обно́вльшаго,/ Го́спода по́йте и превозноси́те во вся ве́ки.
Песнь 9
Ирмос: Проявле́нное на горе́ законополо́жнику во огни́ и купине́/ рождество́ Присноде́вы/ в на́ше ве́рных спасе́ние,/ пе́сньми немо́лчными велича́ем.
Припев: Священному́чениче Пéтре, моли́ Бо́га о на́с.
Предопределе́ннаго свяще́нно иера́ршествовати,/ и свяще́нства коне́ц благосла́вно прии́мша,/ и Христо́ву подража́вша страсть, Петра́ чу́днаго воспои́м.
Припев: Священному́чениче Пéтре, моли́ Бо́га о на́с.
Жезло́м укре́пльшася си́лы Госпо́дни,/ и свяще́нствовавша, и свяще́нствованна,/ и Христу́ прине́сшагося же́ртва, Петра́ Богоно́снаго воспои́м.
Припев: Священному́чениче Пéтре, моли́ Бо́га о на́с.
Всесмеше́ннаго заре́ю Тро́ичною,/ и светле́йшаго ея́ насла́ждшася сия́ния,/ и нам спасе́ния прося́ща, Петра́ Богоприя́тнаго воспои́м.
Сла́ва Отцу́ и Сы́ну и Свято́му Ду́ху.
Дае́ши оби́льно души́ мое́й спасе́ние,/ я́ко первосвяще́нник бо и́маши власть вяза́ти и реши́ти прегреше́ний вины́,/ твои́ми моле́нии, свяще́ннейший.
И ны́не и при́сно и во ве́ки веко́в. Ами́нь.
Богородичен: Ты еси́, Богоро́дице, ору́жие на́ше и стена́,/ Ты еси́ заступле́ние к Тебе́ прибега́ющих,/ Тебе́ и ны́не на моли́тву подвиза́ем,/ да изба́вимся от враг на́ших.