Минея, 10 Февраля.
Глас 6
Песнь 1
Ирмос: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу, побе́дную песнь пои́м, вопия́ше.
Припев: Священному́чениче Харала́мпие, моли́ Бо́га о на́с.
С ли́ки ше́ствуя ве́село в мы́сленных Небе́сных се́лех/ и сия́я све́том невече́рним,/ изба́ви мя от страсте́й моли́твами твои́ми, му́дре, я́ко да пою́ тя.
Припев: Священному́чениче Харала́мпие, моли́ Бо́га о на́с.
Светоно́сная твоя́ па́мять со́лнечная облиста́ет дарова́ния/ и просвеща́ет ве́рно в ней чту́щия тя,/ ра́дости пресве́тлыя вои́стинну,/ му́чениче тезоимени́те.
Сла́ва Отцу́ и Сы́ну и Свято́му Ду́ху.
Крове́й твои́х ка́плями сла́ное неве́рия мо́ре потопи́л еси́,/ река́ благоче́стия был еси́,/ Христо́ву напоя́ющи вои́стинну Це́рковь при́сно.
И ны́не и при́сно и во ве́ки веко́в. Ами́нь.
Богородичен: Грехо́в бу́ря, и помышле́ний проти́вныя во́лны,/ и страсте́й наше́ствия на мне преидо́ша,/ но Твое́ю, Богоро́дице Де́во,/ держа́вною моли́твою спаси́ мя.
Песнь 3
Ирмос: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.
Припев: Священному́чениче Харала́мпие, моли́ Бо́га о на́с.
Несть отню́д изрещи́ чуде́с мно́жества, я́же соде́лал еси́,/ еще́ в жи́зни ходя́ и к Бо́гу преше́д,/ страстоте́рпче му́чениче досточу́дне.
Припев: Священному́чениче Харала́мпие, моли́ Бо́га о на́с.
Си́лою Боже́ственною укре́плься,/ некре́пкую на́глость беззако́нных низложи́л еси́,/ я́коже во́ин кре́пок, Харала́мпие страда́льче,/ я́ко ору́жник Боже́ственнаго ополче́ния.
Сла́ва Отцу́ и Сы́ну и Свято́му Ду́ху.
Крове́й исте́кшия то́ки твоего́ телесе́/ весь нече́стия пла́мень и лю́тое запале́ние угаси́ша,/ сла́дости же пото́к тебе́ исхода́таиша.
И ны́не и при́сно и во ве́ки веко́в. Ами́нь.
Богородичен: Святы́х Свята́го Бо́га родила́ еси́, Всесвята́я,/ свя́тости храм я́вльшися чист и дверь, е́юже Еди́н Христо́с про́йде,/ спаса́яй челове́чество.
Седален, глас 3
Столп незы́блен Це́ркве,/ свети́льник неугаси́мый вселе́нныя, страстоте́рпче, яви́лся еси́, Харала́мпие,/ и, просия́в со́лнца светле́е, и́дольскую отгоня́еши тьму́,/ му́чениче сла́вне,/ Христа́ Бо́га моли́ дарова́ти нам ве́лию ми́лость.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Боже́ственная была́ еси́ ски́ния Сло́ва,/ Еди́на Всечи́стая Де́во Ма́ти,/ чистото́ю А́нгелы превозше́дшая,/ па́че всех мене́ персть бы́вша, оскверне́на плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.
Песнь 4
Ирмос: Христо́с моя́ си́ла,/ Бог и Госпо́дь,/ честна́я Це́рковь/ Боголе́пно пое́т, взыва́ющи,/ от смы́сла чи́ста о Го́споде пра́зднующи.
Припев: Священному́чениче Харала́мпие, моли́ Бо́га о на́с.
Красе́н был еси́, пома́зався кро́вию честна́го муче́ния/ и добро́тами сего́ украси́вся, Харала́мпие,/ страда́льцев украше́ние и утвержде́ние.
Припев: Священному́чениче Харала́мпие, моли́ Бо́га о на́с.
Де́монская ка́пища твои́м сокруши́л еси́, страстоте́рпче, му́жеством,/ храм тебе́ сама́го Свята́го Ду́ха и терпе́ния нело́жнаго столп показа́л еси́ и о́браз.
Сла́ва Отцу́ и Сы́ну и Свято́му Ду́ху.
На высоту́ возне́сше ру́це, сла́вне,/ тьмы предста́теле твоя́ ре́бра строга́ху ноготьми́,/ ве́чное и́стинно исхода́таивше тебе́ наслажде́ние.
И ны́не и при́сно и во ве́ки веко́в. Ами́нь.
Богородичен: Кре́пость моя́ и пе́ние мое́, Христо́с Бог, из Тебе́ возсия́вый,/ премно́жеством, Чи́стая, бла́гости изба́ви ны пе́рваго преступле́ния.
Песнь 5
Ирмос: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя веде́ти, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.
Припев: Священному́чениче Харала́мпие, моли́ Бо́га о на́с.
Боже́ственную страсть/ нас ра́ди стра́сти претерпе́вшаго тве́рдо, му́чениче Христо́в, подража́в,/ терпи́ши во все́м те́ле, сла́вне,/ гвозде́й пригвожде́ния до́блественне.
Припев: Священному́чениче Харала́мпие, моли́ Бо́га о на́с.
Безслове́сие гони́телей,/ Сло́во, Собезнача́льное Отцу́, исправля́я, прему́дре,/ сло́во безслове́сным я́ве влага́ет,/ разреши́ти от юз тя повелева́юща.
Сла́ва Отцу́ и Сы́ну и Свято́му Ду́ху.
Рожны́ пронзе́н, уязви́л еси́ се́рдце лю́таго земноро́дных бори́теля/ копие́м му́жества и терпе́ния твоего́,/ Богому́дре страстоте́рпче досточу́дне.
И ны́не и при́сно и во ве́ки веко́в. Ами́нь.
Богородичен: Боже́ственным сия́нием Твои́м, Блага́я, омраче́нную мою́ ду́шу сластьми́ просвети́,/ и ко спасе́ния стезя́м наста́ви,/ я́же Еди́на, Спа́са Христа́ ро́ждшая.
Песнь 6
Ирмос: Жите́йское мо́ре,/ воздвиза́емое зря/ напа́стей бу́рею/ к ти́хому приста́нищу Твоему́ прите́к, вопию́ Ти:/ возведи́ от тли живо́т мои́,/ Многоми́лостиве.
Припев: Священному́чениче Харала́мпие, моли́ Бо́га о на́с.
Свети́льник был еси́, страда́ний твои́х све́том просвеща́я концы́:/ испове́дуеши и́мя Христо́во пред мучи́тели,/ страстоте́рпче Христо́в пресла́вне.
Припев: Священному́чениче Харала́мпие, моли́ Бо́га о на́с.
Боже́ственныя распаля́емь огне́м любве́,/ росо́ю ве́ры злоче́ствующих угаси́л еси́ запале́ние,/ Христо́ва чудеса́ неве́рным показу́я, досточу́дне.
Сла́ва Отцу́ и Сы́ну и Свято́му Ду́ху.
Жи́зни жела́я безсме́ртныя,/ плотска́я, Харала́мпие, умертви́л еси́ стра́стная движе́ния/ и моли́твою ме́ртвыя возста́вил еси́, воспева́ющия во всех тя просла́вльшаго.
И ны́не и при́сно и во ве́ки веко́в. Ами́нь.
Богородичен: Страсте́й мя коле́блющася сопроти́вными прило́ги, Ма́ти Бо́жия, утверди́,/ я́ко безстра́стия ро́ждши Исто́чник,/ к Тебе́ бо прибего́х, челове́ком вели́кому прибе́жищу.
Кондак, глас 8
Подо́бствовав благода́тию свяще́нства, сла́вне,/ Це́рковь све́тло украси́л еси́ Боже́ственным страда́нием,/ е́же за Христа́ прия́л еси́ до́блественно, ра́дуяся, Харала́мпие,/ честны́й свети́льниче всеми́рный, осиява́яй концы́,/ я́ко непобеди́мый.
Икос
Па́стыря, Христа́ Бо́га на́шего, я́ко А́гнца, на зе́млю благоволи́вшаго приити́,/ грехи́ взе́млющаго и неду́ги всех поне́сшаго, равнообразова́в, му́чениче свя́те,/ ду́шу за о́вцы положи́л еси́, возвеща́я Его́ стра́сти./ Тем днесь вси пое́м тя пе́сньми, я́ко непобеди́ма.
Песнь 7
Ирмос: О́троцы в Вавило́не/ пе́щнаго пла́мене не убоя́шася,/ но, посреде́ пла́мене вве́ржени, ороша́еми, поя́ху:/ благослове́н еси́, Го́споди Бо́же оте́ц на́ших.
Припев: Священному́чениче Харала́мпие, моли́ Бо́га о на́с.
Приобща́яся му́кам и огне́м опаля́емь, страстоте́рпче Христо́в,/ я́ко зла́то чи́сто, быв/ и свяще́нно возложе́ние Христо́во был еси́.
Припев: Священному́чениче Харала́мпие, моли́ Бо́га о на́с.
Моли́тв твои́х росо́ю пребеззако́ннующих пещь угасе́, му́дре,/ и изба́влен был еси́, песнопоя́ Сотво́ршему:/ благослове́н еси́, Го́споди Бо́же оте́ц на́ших.
Сла́ва Отцу́ и Сы́ну и Свято́му Ду́ху.
Ополче́нием страда́ний дре́во яви́лся еси́ высокора́слено,/ соосеня́ющо ве́рныя от пла́меннаго греха́, зову́щия:/ благослове́н еси́, Го́споди Бо́же оте́ц на́ших.
И ны́не и при́сно и во ве́ки веко́в. Ами́нь.
Богородичен: Ра́дость прие́мшая в Пречи́стем чре́ве Твое́м, Богоро́дице Чи́стая,/ весе́лия се́рдце мое́ испо́лни,/ печа́ль отгоня́щи страсте́й, Присноде́во.
Песнь 8
Ирмос: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́,/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.
Припев: Священному́чениче Харала́мпие, моли́ Бо́га о на́с.
Тече́нии крове́й нака́паемь, ран добро́тою украша́емь,/ победи́тельным благоле́пно венце́м удо́брен, Бо́гу предста́л еси́, му́чениче.
Припев: Священному́чениче Харала́мпие, моли́ Бо́га о на́с.
Мук о́блацы не покры́ша му́жества твоего́, му́чениче, и до́блестей,/ гони́телей не омрачи́ сопротивле́ние твоего́ пресве́тлаго, Богому́дре,/ терпе́ния.
Сла́ва Отцу́ и Сы́ну и Свято́му Ду́ху.
Свяще́нник же и му́ченик непобеди́м,/ во́ин добль и столп непоколеби́м,/ утвержде́ние ве́рных, нече́стия противобо́рец,/ вои́стинну яви́лся еси́, Богому́дре страстоте́рпче.
И ны́не и при́сно и во ве́ки веко́в. Ами́нь.
Богородичен: Вся́ческая сотвори́вый Боже́ственным хоте́нием,/ восхоте́в, во чре́ве Твое́м всели́ся, Чи́стая, истле́вшия ны обнови́ти хотя́./ Его́же превозно́сим во вся ве́ки.
Песнь 9
Ирмос: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти./ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.
Припев: Священному́чениче Харала́мпие, моли́ Бо́га о на́с.
Ни о́гнь, ни меч, но ниже́ смерть,/ ни гоне́ние, ни ско́рбь, ни глад,/ ниже́ беда́, ни мук вся́ких умышле́ние/ возмо́же от любве́ Бо́жия вои́стинну отлучи́ти тя сотво́ршаго,/ страда́льче досточу́дне.
Припев: Священному́чениче Харала́мпие, моли́ Бо́га о на́с.
Строга́ньми ногте́й умерщвле́ния совле́к ри́зы,/ оде́ждами от крове́й тебе́, страстоте́рпче, украси́л еси́,/ те́мже со дерзнове́нием, му́чениче непобеди́ме,/ всех Влады́це и Бо́гу, ра́дуяся, предстои́ши.
Сла́ва Отцу́ и Сы́ну и Свято́му Ду́ху.
Ра́дости полна́ и Боже́ственныя све́тлости пода́тельна, Харала́мпие, па́мять твоя́ ми́ру возсия́,/ страсте́й зи́му отгоня́щи, вся просвеща́ющи,/ ю́же пра́зднующе, обрета́ем прегреше́ний очище́ние моли́твами твои́ми.
И ны́не и при́сно и во ве́ки веко́в. Ами́нь.
Богородичен: Страсте́й бу́ря смуща́ет мя,/ и сласте́й погружа́ет треволне́ние, Всенепоро́чная,/ Ко́рмчия Христа́ ро́ждшая, ру́ку ми по́мощи простри́/ и спаси́ мя, Еди́на спасе́ние ве́рно блажа́щих Тя.
Комментировать