Минея, 7 Февраля, Канон святителя
Глас 4
Песнь 1
Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.
Припев: Святи́телю, о́тче Парфéние, моли́ Бо́га о на́с.
Уясня́ют доброде́телей благода́тию дне́сь все́х на́с, в све́тлое торжество́ му́драго святи́теля, я́коже зарю́, испуща́я светоно́сная чуде́с сия́ния.
Припев: Святи́телю, о́тче Парфéние, моли́ Бо́га о на́с.
На го́ру безстра́стия, преподо́бне, возне́сл еси́ у́м и, во мра́к писа́ний вше́д, невеще́ственнаго, Парфе́ние, све́та, преподо́бне, испо́лнен яви́лся еси́, сла́вне.
Сла́ва Отцу́ и Сы́ну и Свято́му Ду́ху.
Ору́жие, я́ко вои́стинну извле́к, и́же е́сть глаго́л Бо́жий, вра́жию уязви́л еси́ кре́пость, святи́телю Парфе́ние, те́мже победи́тельная на де́моны ты́ прия́л еси́.
И ны́не и при́сно и во ве́ки веко́в. Ами́нь.
Богородичен: Роди́тель в раи́ бы́сть за́висть сме́рти челове́ком, его́же, ро́ждься, Де́во, из Тебе́ Сы́н Бо́жий Оте́чь с шу́мом потреби́, безсме́ртие пода́в ро́ду на́шему.
Песнь 3
Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.
Припев: Святи́телю, о́тче Парфéние, моли́ Бо́га о на́с.
Я́коже фи́никс цветоно́сен, доброде́тели на земли́, преподо́бне, безсме́ртия плоды́ на небесе́х скры́л еси́
Припев: Святи́телю, о́тче Парфéние, моли́ Бо́га о на́с.
Хра́м тя́ все́х Бо́гу живу́щая в тебе́ показа́ благода́ть себе́, преподо́бне, ея́же ра́ди просла́вился еси́, Парфе́ние.
Сла́ва Отцу́ и Сы́ну и Свято́му Ду́ху.
Пречестны́м от Бо́га архиере́йства укра́шься, сла́вне, одея́нием, священноде́йственник досто́ин Того́ яви́лся еси́ благосты́ни.
И ны́не и при́сно и во ве́ки веко́в. Ами́нь.
Богородичен: Разруши́ся кля́твы на́шея средогра́дие, Чи́стая Влады́чице, па́че ума́ Рождество́м Твои́м, и Боже́ственному естеству́ совокупи́хомся.
Седален, глас 3
Испо́лнь Ду́ха Боже́ственнаго сы́й, де́лы просия́ благоче́стия, свяще́нне чудотво́рче Парфе́ние, от ле́сти челове́ки обрати́л еси́, боля́щих стра́сти исцеля́я. О́тче преподо́бне, Христа́ Бо́га моли́ спасти́ся душа́м на́шим.
Песнь 4
Ирмос: Вознесе́на Тя́ ви́девши Це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.
Припев: Святи́телю, о́тче Парфéние, моли́ Бо́га о на́с.
Та́ин неизглаго́ланных насла́ждься Бо́жиих, треблаже́нне, науча́яся боже́ственно Того́ сокрове́нным, те́мже и ра́зума ре́ки, Парфе́ние, источи́л еси́.
Припев: Святи́телю, о́тче Парфéние, моли́ Бо́га о на́с.
Ве́сь взе́мся, богоно́се, мы́слию к небеси́ боже́ственне, сла́ву ви́дел еси́ мы́сленно неизрече́нную, те́мже и равноа́нгелен на земли́ яви́лся еси́, Парфе́ние.
Сла́ва Отцу́ и Сы́ну и Свято́му Ду́ху.
Весели́тся со а́нгелы вся́ тва́рь, я́же па́че ума́ зря́щи соверша́ема, о́тче, тобо́ю зна́мения, те́мже и вино́внаго си́м воспева́ет, я́ко Бо́га си́льна.
И ны́не и при́сно и во ве́ки веко́в. Ами́нь.
Богородичен: Я́ко пресла́вна и неизглаго́ланна, Богоро́дице, но́ваго Твоего́ Рождества́ и́стинно су́ть, Чи́стая, та́инства стра́шна и ужа́сна, в ни́хже мы́сль и у́м побежда́ется, Пречи́стая.
Песнь 5
Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.
Припев: Святи́телю, о́тче Парфéние, моли́ Бо́га о на́с.
Пома́зался еси́ вои́стинну еле́ем Ду́ха, Парфе́ние, по достоя́нию служи́ти Го́споду, сла́вою тя́ украси́вшему.
Припев: Святи́телю, о́тче Парфéние, моли́ Бо́га о на́с.
Глубину́ испыта́я писа́ния, пресла́вне, многоце́нный би́сер — Христа́ — избра́в, Его́же ста́ду разда́л еси́.
Сла́ва Отцу́ и Сы́ну и Свято́му Ду́ху.
Я́ко име́я от Бо́га неистощи́му благода́ть, му́дре, пресла́вна источа́еши чудеса́ все́м, чудотво́рче Парфе́ние.
И ны́не и при́сно и во ве́ки веко́в. Ами́нь.
Богородичен: Да кропи́т не́бо весе́лие и благода́ть на земли́, воздаде́ бо Ей ны́не весе́лие в высоту́, Еди́ну Богороди́тельницу.
Песнь 6
Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.
Припев: Святи́телю, о́тче Парфéние, моли́ Бо́га о на́с.
Тру́бит вселе́нней все́й, Парфе́ние, богоно́сное твое́ житие́, кра́сных чуде́с дарова́нии, пресла́вне, веща́нием Ду́ха.
Сла́ва Отцу́ и Сы́ну и Свято́му Ду́ху.
Кропи́л еси́ сыноположе́ния во́ду ста́ду твоему́, нече́стия скве́рну омыва́я уче́нии твои́ми, Парфе́ние, и просвеща́я све́том благода́ти.
И ны́не и при́сно и во ве́ки веко́в. Ами́нь.
Богородичен: Ра́зума нетле́ннаго пло́д прозябла́ еси́, Богороди́тельнице, ми́ру, при́сно живы́й Хода́тай нетле́ния явля́емь ве́рою и любо́вию чту́щим Тя́.
Кондак, глас 3
Чуде́с прия́л еси́ Боже́ственную благода́ть,/ Богомудре священне Парфение,/ чудотворче Богоносе,/ вся ве́рных стра́сти очища́я, ду́хи лука́вства, о́тче, изгоня́я,/ сего́ ра́ди тя воспеваем,/ я́ко велия таи́нника Божия благода́ти.
Песнь 7
Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.
Припев: Святи́телю, о́тче Парфéние, моли́ Бо́га о на́с.
Ду́ха в тебе́ все́льшаяся Боже́ственная благода́ть, му́дре, хра́м и це́рковь тя́ сла́вы я́ко вои́стинну устро́и, Парфе́ние: в ню́же Оте́ц, и Сы́н, и Са́м Уте́шитель всели́ся.
Припев: Святи́телю, о́тче Парфéние, моли́ Бо́га о на́с.
Огне́м Боже́ственным нече́стия попали́л еси́, преподо́бне, всю́ терно́вную ле́сть на земли́ и все́ял еси́ ста́ду твоему́ Боже́ственная уче́ния, присноживо́тны плоды́ принося́щая.
Сла́ва Отцу́ и Сы́ну и Свято́му Ду́ху.
У́дицею язы́ка из глубины́ пре́лести, Парфе́ние, дре́вле твое́ ста́до извле́кл еси́ к жи́зни; ны́не же, о́тче, моли́твами твои́ми уловля́еши от вся́каго ро́да ры́бна благода́тию.
И ны́не и при́сно и во ве́ки веко́в. Ами́нь.
Богородичен: Ви́деша а́нгели, Богороди́тельнице, стра́нно Рождество́м Твои́м естество́ тле́нное ро́да пе́рстнаго, к нетле́нному па́ки прите́кшее житию́ и сла́ве небе́сней.
Песнь 8
Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.
Припев: Святи́телю, о́тче Парфéние, моли́ Бо́га о на́с.
Жезло́м ве́ры, му́дре, е́ллинския хра́мы разори́л еси́ и хра́мы воздви́гл еси́, преподо́бне, Спа́су и Бо́гу на́шему, в ни́хже же́ртвы чи́сты прине́сл еси́, поя́ Ему́: благослови́те, вся́ дела́ Госпо́дня, Го́спода.
Припев: Святи́телю, о́тче Парфéние, моли́ Бо́га о на́с.
Заколе́ние благово́нно са́м себе́ прине́сл еси́, му́дре, воздержа́ния огне́м уха́ние возпосла́л еси́ непоро́чно в Боже́ственный и непристу́пный же́ртвенник Бо́жий, поя́, Парфе́ние: благослови́те, вся́ дела́ Госпо́дня, Го́спода.
Сла́ва Отцу́ и Сы́ну и Свято́му Ду́ху.
Име́я Боже́ственную благода́ть от Бо́га, о́тче Парфе́ние, источа́еши исцеле́ния приступа́ющим к тебе́, преподо́бне, очища́я неду́ги и отгоня́ кре́пко де́монов полки́, вино́внаго си́м пе́ти я́ко Бо́га, науча́я при́сно.
И ны́не и при́сно и во ве́ки веко́в. Ами́нь.
Богородичен: И́же естество́м Непристу́пный везде́, Сы́н и Сло́во Бо́жие, в Тя́ все́лься, Чи́стая, и оде́явся, Пресвята́я, в на́ш о́браз, я́ко Милосе́рд, яви́ся, благопристу́пен пло́тию, и поживе́ с на́ми. Сего́ ра́ди любо́вию Тя́ чту́, и пою́, и хвалю́.
Песнь 9
Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.
Припев: Святи́телю, о́тче Парфéние, моли́ Бо́га о на́с.
Тиме́ние оттря́с и́стинно плотски́х страсте́й, треблаже́нне, всего́ себе́ к Боже́ственней пресели́ жи́зни и наслажде́нию невеще́ственному, иде́же, лику́я, назира́еши ны́.
Припев: Святи́телю, о́тче Парфéние, моли́ Бо́га о на́с.
Цве́ты мы́сленныя, богоно́сне, я́ко в наслажде́нии нетле́нне во святе́й твое́й па́мяти, чуде́с добро́ту пожина́юще, разли́чно исплете́н вене́ц, де́йствия обно́сим.
Сла́ва Отцу́ и Сы́ну и Свято́му Ду́ху.
Ты́, прете́к, я́же в ми́ре, и с небе́сными, о богоно́сне, безпло́тными ли́ки лику́я, о́тче Парфе́ние, о на́с моли́ся, творя́щих твою́ па́мять ве́рно.
И ны́не и при́сно и во ве́ки веко́в. Ами́нь.
Богородичен: Пою́ Твою́ благода́ть, Де́во, и велича́ю Твою́ сла́ву, Ты́ бо просвеще́ние души́ мое́й еси́ вои́стинну и утеше́ние, ско́рая по́мощь, и спасе́ние, и заступле́ние.