В туюжде неделю вечера

на Го́споди воззва́х: поставим стихов 10, и поем 4 стихиры Осмогласника умилительны, со стиховны вечерни и утрени; и Триоди 3, подобны господина Иосифа. Глас 1.

Подобен: Прехва́льнии му́ченицы:

Стих: Аще беззако́ния на́зриши, Го́споди, Го́споди, кто постои́т? / я́ко у Тебе очище́ние есть.

Обнища́в бога́тый, Христе́, / челове́ки обогати́л еси́ безсме́ртием и све́тлостию. / Те́мже обнища́вшаго сластьми́ жития́, / доброде́тельми мя обогати́, / и убо́гому Ла́зарю сочини́, / бога́таго мя муче́ния избавля́я, // и гее́ны предлежа́щия мне.

Стих: Имене ра́ди Твоего́ потерпе́х Тя Го́споди, потерпе́ душа́ моя́ в сло́во Твое́, / упова́ душа́ моя́ на Го́спода.

Зло́бою обогати́хся лю́те, и сла́дость возлюби́х, / и су́щих в житии́ наслади́хся сласте́й, Го́споди, / и огню́ гее́ны подсужде́н бы́х; / гла́дом та́юща умо́м, я́ко Ла́заря презира́ема, / пред враты́ Боже́ственных дея́ний пове́ржена, // уще́дри мя, Влады́ко.

Ина стихира, глас тойже:

Подобен: О́блак Тя:

Стих: От стра́жи у́тренния до но́щи, от стра́жи у́тренния, / да упова́ет Изра́иль на Го́спода.

Шесту́ю от честны́х посто́в седми́цу, усе́рдно начина́юще, / Го́сподеви предпра́зднственное пе́ние ва́ий принесе́м ве́рнии; / Гряду́щему во сла́ве, си́лою Божества́ во Иерусали́м, умертви́ти сме́рть. / Те́мже угото́вим благоче́стно побе́дныя о́бразы, / ве́тви доброде́тельныя, // Оса́нна вопию́ще Творцу́ все́х.

И Минеи 3. Аще имать святый, Сла́ва: стихиру самогласну.

Аще ли несть, Сла́ва, и ны́не, Богородичен во глас Минеи, от менших.

Вход. Све́те ти́хий:

Прокимен великий, глас 8:

Дал еси́ достоя́ние / боя́щимся Тебе́ Го́споди.

На стиховне самогласен дне, глас 1:

Чу́ден Спа́сов нас ра́ди человеколюби́вый нрав, / хотя́щих у́бо бы́ти ра́зум, / я́ко настоя́щих стяжа́в, / Ла́зарево и бога́таго житие́ обличи́. / Обою́ коне́ц смотря́юще: / о́ваго у́бо бежи́м немилосе́рдия и безчелове́чия, / о́ваго же поревну́им терпе́нию и веледу́шию, / во е́же с ним во авраа́млих нед́рах гре́емым вопи́ти: // Правосу́де Го́споди, сла́ва Тебе́.

Стих: К Тебе́ воздвиго́х о́чи мои́, живу́щему на небеси́. Се я́ко о́чи раб в руку́ госпо́дий свои́х, я́ко о́чи рабы́ни в руку́ госпожи́ своея́; та́ко о́чи на́ши ко Го́споду Бо́гу на́шему, / до́ндеже уще́дрит ны.

Паки таяжде стихира.

Стих: Поми́луй нас, Го́споди, поми́луй нас, я́ко по мно́гу испо́лнихомся уничиже́ния; наипа́че напо́лнися душа́ на́ша поноше́ния гобзу́ющих / и уничиже́ния го́рдых.

Мученичен:

Моли́твами, Го́споди, всех святы́х и Богоро́дицы, / Твой мир даждь нам, и поми́луй нас, // я́ко еди́н Щедр.

Сла́ва: святаго Минеи, аще есть. И ны́не: Богородичен, по гласу Минеи.

Аще же ни, Сла́ва, и ны́не: Богородичен, глас тойже:

Небе́сных чино́в ра́дование, / на земли́ челове́ков кре́пкое предста́тельство, / Пречи́стая Де́во, / спаси́ ны и́же к Тебе́ прибега́ющия, / я́ко на Тя упова́ние // по Бо́зе, Богоро́дице, возложи́хом.

Зде чтет предстоятель, аще изволит, по обычаю, акафист Страстем Христовым.

Посем: Ны́не отпуща́еши: И прочее последование, яко в сыропустную неделю указуяся.

И престают зде Недели Триоди Постной, Цветоносия и Страстей Христовых ради, с тем конец книги сей, и Богу слава.