[глⷡ҇а м҃в] Чи́нъ бл҃гослове́нїѧ и҆ ѡ҆сщ҃е́нїѧ і҆кѡ́ны прест҃ы́ѧ бцⷣы, є҆ди́ныѧ и҆лѝ мно́гихъ.
Начина́етъ же і҆ере́й всѐ по пред̾ꙋка́занномꙋ на бл҃гослове́нїи ѡ҆́браза хрⷭ҇то́ва, да́же до ѱалма̀,
и҆́же здѣ̀ чте́тсѧ, м҃д.
Ѿры́гнꙋ се́рдце моѐ сло́во бл҃го, глаго́лю а҆́зъ дѣла̀ моѧ̑ цр҃е́ви: ѧ҆зы́къ мо́й тро́сть кни́жника скоропи́сца. Красе́нъ добро́тою па́че сынѡ́въ человѣ́ческихъ, и҆злїѧ́сѧ бл҃года́ть во ᲂу҆стна́хъ твои́хъ: сегѡ̀ ра́ди бл҃гослови́ тѧ бг҃ъ во вѣ́къ. Препоѧ́ши ме́чь тво́й по бедрѣ̀ твое́й си́льне, красото́ю твое́ю, и҆ добро́тою твое́ю, и҆ налѧцы̀ и҆ ᲂу҆спѣва́й, и҆ црⷭ҇твꙋй, и҆́стины ра́ди, и҆ кро́тости, и҆ пра́вды, и҆ наста́витъ тѧ̀ ди́внѡ десни́ца твоѧ̀. Стрѣ́лы твоѧ̑ и҆з̾ѡщре́ны си́льне: лю́дїе под̾ тобо́ю падꙋ́тъ въ се́рдцы вра̑гъ царе́выхъ. Прⷭ҇то́лъ тво́й бж҃е въ вѣ́къ вѣ́ка: же́злъ пра́вости: же́злъ црⷭ҇твїѧ твоегѡ̀. Возлюби́лъ є҆сѝ пра́вдꙋ, и҆ возненави́дѣлъ є҆сѝ беззако́нїе: сегѡ̀ ра́ди пома́за тѧ̀ бж҃е бг҃ъ тво́й є҆ле́емъ ра́дости, па́че прича̑стникъ твои́хъ. Смѵ́рна, и҆ ста́кти, и҆ кассі́а ѿ ри́зъ твои́хъ, ѿ тѧ́жестей слоно́выхъ, и҆з̾ ни́хже возвесели́ша тѧ̀. Дщє́ри царе́й въ че́сти твое́й, предста̀ цр҃и́ца ѡ҆деснꙋ́ю тебѐ, въ ри́захъ позлаще́нныхъ ѡ҆дѣ́ѧна, преиспещре́на. Слы́ши дщѝ, и҆ ви́ждь, и҆ приклонѝ ᲂу҆́хо твоѐ, и҆ забꙋ́ди лю́ди твоѧ̑, и҆ до́мъ ѻ҆ц҃а̀ твоегѡ̀. И҆ возжела́етъ ца́рь добро́ты твоеѧ̀, занѐ то́й є҆́сть гдⷭ҇ь тво́й, и҆ поклони́шисѧ є҆мꙋ̀. И҆ дщѝ тѵ́рова съ да́ры, лицꙋ̀ твоемꙋ̀ помо́лѧтсѧ бога́тїи лю́дстїи. Всѧ̀ сла́ва дще́ре цр҃е́вы внꙋ́трь, рѧ́сны златы́ми ѡ҆дѣ́ѧна и҆ преиспещре́на. Приведꙋ́тсѧ цр҃ю̀ дѣ̑вы въ слѣ́дъ є҆ѧ̀, и҆́скрєннїѧ є҆ѧ̀ приведꙋ́тсѧ тебѣ̀: Приведꙋ́тсѧ въ весе́лїй и҆ ра́дованїи, введꙋ́тсѧ въ хра́мъ цр҃е́въ. Вмѣ́стѡ ѻ҆тє́цъ твои́хъ бы́ша сы́нове твоѝ: поста́виша ѧ҆̀ кнѧ́зи по все́й землѝ. Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ. сегѡ̀ ра́ди лю́дїе и҆сповѣ́дѧтсѧ тебѣ̀ въ вѣ́къ, и҆ во вѣ́къ вѣ́ка.
Сла́ва, и҆ ны́нѣ: А҆ллилꙋ́їа, три́жды.
Дїа́конъ: Гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
І҆ере́й же чте́тъ мл҃твꙋ сїю̀:
Гдⷭ҇и бж҃е на́шъ, и҆́же сопредвѣ́чномꙋ и҆ є҆диносꙋ́щномꙋ твоемꙋ̀ сн҃ꙋ и҆ сло́вꙋ, ѿ пречⷭ҇тыѧ приснодв҃ы мр҃і́и воплоти́тисѧ и҆зво́лилъ є҆сѝ, и҆ сїю̀ бцⷣꙋ ржⷭ҇тво́мъ є҆гѡ̀ пречⷭ҇тымъ и҆з̾ неѧ̀ содѣ́лавъ, предста́тельницꙋ, помо́щницꙋ и҆ моли́твенницꙋ всѣ̑мъ вѣ̑рнымъ сотвори́лъ є҆сѝ: при́зри ны́нѣ на на́съ смире́ннѡ молѧ́щихъ ти сѧ и҆ бцⷣꙋ сїю̀ и҆́стиннѡ и҆менꙋ́ющихъ, и҆ бы́ти вѣ́рꙋющихъ, и҆ сїю̀ въ мольбꙋ̀ къ тебѣ̀ вѣ́рнѡ призыва́ющихъ, и҆ мл҃твами є҆ѧ̀ ᲂу҆слы́шаны сотворѝ прошє́нїѧ и҆ мольбы̑ на́шѧ, и҆ низпослѝ бл҃года́ть прест҃а́гѡ твоегѡ̀ дх҃а на і҆кѡ́нꙋ сїю̀, ю҆́же рабѝ твоѝ въ че́сть и҆ па́мѧть є҆ѧ̀ соѡрꙋжи́ша, и҆ бл҃гословѝ и҆ ѡ҆ст҃ѝ ю҆̀ нбⷭ҇нымъ твои́мъ бл҃гослове́нїемъ: и҆ пода́ждь є҆́й си́лꙋ и҆ крѣ́пость чꙋдотво́рнагѡ дѣ́йствїѧ. Сотворѝ ю҆̀ враче́бницꙋ и҆ цѣльба́мъ и҆сто́чникъ, всѣ̑мъ въ болѣ́знехъ къ не́й притека́ющымъ, и҆ бцⷣы ра́ди ѿ тебѐ по́мощи просѧ́щымъ: и҆ всѣ́хъ и҆́же пред̾ се́ю і҆кѡ́ною пребл҃гослове́ннꙋю дв҃ꙋ, и҆ мт҃рь гдⷭ҇а на́шегѡ і҆и҃са хрⷭ҇та̀, возлю́бленнагѡ сн҃а твоегѡ̀, досто́йнѡ чти́ти, и҆ ꙗ҆́кѡ предста́тельницꙋ ро́да хрⷭ҇тїа́нскагѡ въ мольбꙋ̀ къ тебѣ̀ и҆ въ по́мощь въ бѣда́хъ и҆ нꙋ́ждахъ свои́хъ призыва́ти бꙋ́дꙋтъ, и҆зба́вꙋ, застꙋпле́нїе и҆ ско́рꙋю по́мощь полꙋчи́ти сподо́би: согрѣше́нїємъ же ѡ҆ставле́нїе и҆̀мъ млⷭ҇тивнѡ пода́ждь, и҆ бл҃года́ть проси́мꙋю ѿ тебѐ ско́рѡ прїѧ́ти и҆ млⷭ҇ть ѡ҆брѣстѝ ѿ твоегѡ̀ чл҃вѣколю́бїѧ жела́ннꙋю, црⷭ҇твїѧ прича́стники бы́ти сотворѝ: щедро́тами и҆з̾ неѧ̀ пло́тїю ро́ждшагѡсѧ є҆диноро́днагѡ сн҃а твоегѡ̀, воплоще́ннагѡ бг҃а и҆ сп҃са на́шегѡ і҆и҃са хрⷭ҇та̀, съ ни́мже тебѣ̀ подоба́етъ всѧ́каѧ сла́ва, че́сть и҆ поклоне́нїе, и҆ съ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: а҆ми́нь.
І҆ере́й: Ми́ръ всѣ̑мъ.
Ли́къ: И҆ дꙋ́хови твоемꙋ̀.
Дїа́конъ: Главы̑ ва́шѧ гдⷭ҇еви приклони́те.
Ли́къ: Тебѣ̀ гдⷭ҇и.
І҆ере́й же чте́тъ мл҃твꙋ сїю̀ та́йнѡ:
Влⷣко бж҃е ѻ҆́ч҃е вседержи́телю, и҆зво́ливый є҆ди́нꙋ ѿ всегѡ̀ ро́да человѣ́ча, чи́стꙋю голꙋби́цꙋ и҆ нескве́рнꙋю а҆́гницꙋ, приснодв҃ꙋ мр҃і́ю въ мт҃рь є҆диноро́дномꙋ твоемꙋ̀ сн҃ꙋ и҆збра́ти, и҆ въ жили́ще є҆мꙋ̀ наи́тїемъ прест҃а́гѡ дх҃а ѡ҆ст҃и́ти, вы́шшꙋю же и҆ чⷭ҇тнѣ́йшꙋю херꙋві́мѡвъ и҆ серафі́мѡвъ, и҆ всеѧ̀ тва́ри сла́внѣйшꙋю, хода́таицꙋ и҆ мл҃твенницꙋ человѣ́ческомꙋ ро́дꙋ сотвори́лъ ю҆̀ є҆сѝ: тоѧ̀ мл҃твами и҆ предста́тельствомъ і҆кѡ́нꙋ сїю̀, въ че́сть и҆ па́мѧть є҆ѧ̀, и҆ въ сла́вꙋ и҆з̾ неѧ̀ рожде́ннагѡ є҆диноро́днагѡ и҆ є҆диносꙋ́щнагѡ твоегѡ̀ сн҃а, и҆ тебѐ безнача́льнагѡ є҆гѡ̀ ѻ҆ц҃а̀, и҆ прест҃а́гѡ и҆ животворѧ́щагѡ твоегѡ̀ дх҃а соста́вленнꙋю, бл҃года́тїю твое́ю въ ѡ҆кропле́нїи воды̀ сеѧ̀ сщ҃е́нныѧ, бл҃гословѝ и҆ ѡ҆ст҃ѝ, и҆ ꙗ҆вѝ ю҆̀ всѣ̑мъ вѣ́рою пред̾ не́ю молѧ́щымъ ти сѧ, цѣле́бницꙋ дꙋше́вныхъ недꙋ́гѡвъ и҆ тѣле́сныхъ, и҆ ѿ всѣ́хъ вра́жїихъ навѣ́тѡвъ свобожде́нїе и҆ покро́въ держа́венъ, и҆ мольба́мъ бл҃гопрїѧ̑тнымъ ᲂу҆ тебѐ бы́ти сотворѝ.
И҆ возглаша́етъ: Щедро́тами є҆диноро́днагѡ сн҃а твоегѡ̀, и҆з̾ неѧ̀ пло́тїю рожде́ннагѡ, гдⷭ҇а на́шегѡ і҆и҃са хрⷭ҇та̀, съ ни́мже бл҃гослове́нъ є҆сѝ, съ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: а҆ми́нь.
І҆ере́й же кропи́тъ і҆кѡ́нꙋ, глаго́лѧ:
Ѡ҆сщ҃а́етсѧ і҆кѡ́на сїѧ̀ бл҃года́тїю прест҃а́гѡ дх҃а, ѡ҆кропле́нїемъ воды̀ сеѧ̀ сщ҃е́нныѧ, во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, а҆ми́нь. Три́жды.
И҆ а҆́бїе пою́тъ тропарѝ сїѧ̑ бг҃оро́дичны, гла́съ а҃:
Под̾ твою̀ млⷭ҇ть прибѣга́емъ бцⷣе дв҃о, мл҃твъ на́шихъ не пре́зри въ ско́рбехъ: но ѿ бѣ́дъ и҆зба́ви на́съ, є҆ди́на чⷭ҇таѧ и҆ бл҃гослове́ннаѧ.
Бцⷣе дв҃о ра́дꙋйсѧ, бл҃года́тнаѧ мр҃і́е, гдⷭ҇ь съ тобо́ю, бл҃гослове́нна ты̀ въ жена́хъ, и҆ бл҃гослове́нъ пло́дъ чре́ва твоегѡ̀, ꙗ҆́кѡ сп҃са родила̀ є҆сѝ дꙋ́шъ на́шихъ.
Сла́ва, гла́съ а҃:
Ѿ ст҃ы́ѧ твоеѧ̀ і҆кѡ́ны, пречⷭ҇таѧ бцⷣе, цѣльбы̑ и҆ и҆сцѣлє́нїѧ подава́ютсѧ незави́стнѡ всѣ̑мъ, вѣ́рою къ не́й притека́ющымъ, и҆ твоѐ застꙋпле́нїе ѿ се́рдца призыва́ющымъ. тѣ́мъ и҆ моѧ̑ не́мѡщи посѣтѝ дв҃о, и҆ дꙋшє́вныѧ и҆ тѣлє́сныѧ ꙗ҆́звы млⷭ҇тивнѡ ᲂу҆врачꙋ́й.
И҆ ны́нѣ, гла́съ то́йже:
Любо́вїю, чⷭ҇таѧ дв҃о, твою̀ ст҃ꙋ́ю і҆кѡ́нꙋ почита́ющымъ, и҆ бж҃їю тѧ̀ и҆́стиннꙋю мт҃рь согла́снѡ возвѣща́ющымъ, и҆ вѣ́рнѡ покланѧ́ющымъ ти сѧ, храни́тельница ꙗ҆ви́сѧ, и҆ держа́внаѧ предста́тельница, всѧ́кое ѕло̀ ѿ си́хъ ᲂу҆далѧ́ющи, ꙗ҆́кѡ всѧ̑ могꙋ́щаѧ.
Посе́мъ: Досто́йно є҆́сть:
И҆ лобза́вше ѡ҆́бразъ, твори́тъ і҆ере́й ѿпꙋ́стъ ѻ҆бы́чный. Вѣ́стно же бꙋ́ди, ꙗ҆́кѡ а҆́ще і҆кѡ́на бꙋ́детъ ѿ пра́здникѡвъ бг҃оро́дичныхъ, по ѡ҆сщ҃е́нїи є҆ѧ̀ а҆́бїе тропа́рь и҆ конда́къ пра́здничный пое́мъ, пото́мъ же сїѧ̑ преднапи̑санныѧ тропарѝ.