[глⷡ҇а л҃з] Чи́нъ бл҃гослове́нїѧ и҆лѝ ѡ҆сщ҃е́нїѧ но́выхъ сщ҃е́нническихъ ѻ҆де́ждъ:
сі́есть стїхарѧ̀, є҆пїтрахи́лѧ, по́ѧса, по́рꙋчей и҆ фелѡ́ни.
Пред̾ црⷭ҇кими врата́ми на пригото́вленномъ столѣ̀ полага́ютсѧ нѡ́выѧ ѻ҆дє́жды, къ ѡ҆сщ҃е́нїю принесє́нныѧ, і҆ере́й же въ є҆пїтрахи́ли и҆ фелѡ́ни съ кади́льницею, и҆схо́дитъ въ црⷭ҇кїѧ двє́ри, и҆ покади́въ крⷭ҇тоѡбра́знѡ ѻ҆дє́жды, ѻ҆бы́чнѡ начина́етъ:
Бл҃гослове́нъ бг҃ъ на́шъ: Чте́цъ: А҆ми́нь: Цр҃ю̀ нбⷭ҇ный: Трист҃о́е. Ѻ҆́ч҃е на́шъ: І҆ере́й же: Ꙗ҆́кѡ твоѐ є҆́сть црⷭ҇тво: Чте́цъ: Гдⷭ҇и поми́лꙋй, в҃і. Сла́ва, и҆ ны́нѣ: Прїиди́те, поклони́мсѧ: три́жды.
И҆ ѱало́мъ рл҃в:
Сѐ что̀ добро̀, и҆лѝ что̀ красно̀, но є҆́же жи́ти бра́тїи вкꙋ́пѣ; Ꙗ҆́кѡ мѵ́ро на главѣ̀, сходѧ́щее на брадꙋ̀, брадꙋ̀ а҆арѡ́ню, сходѧ́щее на ѻ҆мє́ты ѻ҆де́жды є҆гѡ̀: Ꙗ҆́кѡ роса̀ а҆ермѡ́нскаѧ, сходѧ́щаѧ на го́ры сїѡ́нскїѧ. ꙗ҆́кѡ та́мѡ заповѣ́да гдⷭ҇ь бл҃гослове́нїе и҆ живо́тъ до вѣ́ка.
Сла́ва, и҆ ны́нѣ: А҆ллилꙋ́їа, три́жды.
Дїа́конъ: Гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
І҆ере́й чте́тъ мл҃твꙋ сїю̀:
Гдⷭ҇и бж҃е вседержи́телю, и҆знача́ла полє́знаѧ человѣ́ческомꙋ ро́дꙋ всѧ̑ дѣ́йствꙋѧй, хра́мы рꙋко́ю человѣ́ческою сотворє́ннаѧ и҆́мени твоемꙋ̀ ст҃о́мꙋ созда́ти, и҆ ты̑ѧ въ сла́вꙋ свою̀ ѡ҆сщ҃а́ти, и҆ мѣ́сто селе́нїѧ сла́вы твоеѧ̀ нарица́ти восхотѣ́вый; и҆ рабо́мъ твои́мъ мѡѷсе́омъ ѡ҆дѣѧ̑нїѧ а҆рхїерє́йскаѧ, і҆ерє́йскаѧ же и҆ леѵі̑тскаѧ, и҆ и҆на̑ѧ разли̑чнаѧ ᲂу҆крашє́нїѧ въ бл҃голѣ́пїе и҆ красотꙋ̀ ст҃и́лища и҆ ѻ҆лтарѧ̀ твоегѡ̀ бы́ти повелѣ́вый: ᲂу҆слы́ши млⷭ҇тивнѡ ны́нѣ молє́нїѧ на̑ша, и҆ ѻ҆дє́жды сїѧ̑ [и҆менꙋ́етъ и҆̀хъ], въ че́сть и҆ сла́вꙋ прест҃а́гѡ и҆́мене твоегѡ̀, въ ᲂу҆краше́нїе же и҆ бл҃голѣ́пїе слꙋжи́телємъ ст҃а́гѡ твоегѡ̀ ѻ҆лтарѧ̀, и҆ ст҃ы́хъ твои́хъ та̑инъ ᲂу҆гото́влєнныѧ, мно́ю смире́ннымъ и҆ недосто́йнымъ рабо́мъ твои́мъ бл҃гословѝ, ѡ҆чи́сти и҆ ѡ҆ст҃ѝ, ꙗ҆́кѡ да къ слꙋже́нїю ст҃ы̑мъ твои̑мъ та́йнамъ, и҆ ко всѧ́комꙋ славосло́вїю прест҃а́гѡ и҆́мене твоегѡ̀ достѡ́йны бы́ти ꙗ҆вѧ́тсѧ, и҆ сщ҃є́ннымъ слꙋжи́телємъ твои̑мъ тѣ́ми ѡ҆дѣва́ющымсѧ, да бꙋ́дꙋтъ въ и҆збавле́нїе и҆ покро́въ ѿ всѣ́хъ ко́зней и҆ собла́знѡвъ вра́жїихъ, въ твое́ же бл҃гоꙋгожде́нїе, и҆ досто́йное слꙋже́нїе ст҃ы̑мъ твои̑мъ та́йнамъ, и҆ въ снабдѣ́нїе твоеѧ̀ бл҃года́ти и҆ млⷭ҇рдїѧ: бл҃года́тїю и҆ щедро́тами, и҆ чл҃вѣколю́бїемъ є҆диноро́днагѡ твоегѡ̀ сн҃а, съ ни́мже бл҃гослове́нъ є҆сѝ, съ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: а҆ми́нь.
І҆ере́й: Ми́ръ всѣ̑мъ.
Ли́къ: И҆ дꙋ́хови твоемꙋ̀.
Дїа́конъ: Главы̑ ва́шѧ гдⷭ҇еви приклони́те.
Ли́къ: Тебѣ̀ гдⷭ҇и.
І҆ере́й же, прекло́нь главꙋ̀, чте́тъ та́йнѡ мл҃твꙋ сїю̀:
Влⷣко бж҃е вседержи́телю, всѣ́хъ бл҃ги́хъ пода́телю и҆ ѡ҆сщ҃е́нїѧ и҆сто́чниче, при́зри ны́нѣ на мл҃твꙋ на́шꙋ, и҆ ѻ҆дє́жды сїѧ̑ [и҆менꙋ́етъ и҆̀хъ] въ ᲂу҆краше́нїе и҆ бл҃голѣ́пїе сщ҃е́нныхъ слꙋжи́телей твои́хъ соѡрꙋжє́нныѧ, бл҃года́тїю прест҃а́гѡ твоегѡ̀ дх҃а, ѡ҆кропле́нїемъ воды̀ сеѧ̀ сщ҃е́нныѧ бл҃гослове́нны, ст҃ы и҆ ѡ҆сщ҃е́нны, и҆ всѣ́хъ тѣ́ми ѡ҆дѣ́ющихсѧ достѡ́йны ст҃ы̑мъ твои̑мъ та́йнамъ слꙋжи́ти, и҆ тебѣ̀ бл҃гоꙋгожда́ти всегда̀ сотворѝ.
И҆ возглаша́етъ: Ꙗ҆́кѡ ты̀ є҆сѝ ѡ҆сщ҃е́нїе на́ше, и҆ тебѣ̀ сла́вꙋ возсыла́емъ со є҆диноро́днымъ твои́мъ сн҃омъ, и҆ съ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: а҆ми́нь.
І҆ере́й же взе́мъ сщ҃е́ннꙋю во́дꙋ, кропи́тъ є҆́ю предлежа́щыѧ ѻ҆дє́жды, глаго́лѧ:
Ѡ҆сщ҃а́ютсѧ ѻ҆дє́жды сїѧ̑ [и҆менꙋ́етъ и҆̀хъ] бл҃года́тїю всест҃а́гѡ дх҃а, ѡ҆кропле́нїемъ воды̀ сеѧ̀ сщ҃е́нныѧ, во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, а҆ми́нь. Три́жды.
И҆ а҆́ще а҆́бїе лїтꙋргиса́ти и҆́мать, не творѧ̀ ѿпꙋ́ста, са́мъ і҆ере́й вно́ситъ и҆̀хъ во ст҃ы́й ѻ҆лта́рь, ѡ҆блача́етсѧ въ нѧ̀, и҆ слꙋ́житъ: а҆́ще же слꙋжи́ти не и҆́мать, сотвори́въ ѻ҆бы́чный дневны́й ѿпꙋ́стъ, вно́ситъ ѧ҆̀ въ ѻ҆лта́рь, и҆ на ст҃о́й трапе́зѣ полага́етъ.