[глⷡ҇а л҃д] Мл҃тва, є҆́же бл҃гослови́ти нѡ́выѧ покро́вцы, къ покрове́нїю ст҃ы́хъ та̑инъ слꙋжа́щыѧ.

Дїа́конꙋ ре́кшꙋ: Гдⷭ҇ꙋ помо́лимсѧ.

И҆ кли́рꙋ: Гдⷭ҇и поми́лꙋй.

І҆ере́й чте́тъ мл҃твꙋ сїю̀:

Гдⷭ҇и бж҃е вседержи́телю, ѡ҆дѣѧ́йсѧ свѣ́томъ ꙗ҆́кѡ ри́зою, ѡ҆блага́ѧй не́бо ѻ҆́блаки, и҆ покрыва́ѧй вода́ми превы́спрєннѧѧ своѧ̑, при́зри ны́нѣ, смире́ннѡ мо́лимъ тѧ̀, на прилѣ́жное моле́нїе на́ше, и҆ низпослѝ нбⷭ҇ное твоѐ бл҃гослове́нїе на покро́вцы сїѧ̑ [и҆лѝ на покро́вецъ се́й] и҆ бл҃гословѝ, ѡ҆чи́сти и҆ ѡ҆ст҃ѝ ѧ҆̀ [и҆лѝ є҆го̀] во є҆́же бы́ти и҆̀мъ [и҆лѝ є҆мꙋ̀] достѡ́йнымъ [и҆лѝ досто́йнꙋ] къ покрове́нїю ст҃ы́хъ и҆ бж҃е́ственныхъ та̑инъ тѣ́ла и҆ кро́ве хрⷭ҇та̀ твоегѡ̀, съ ни́мже бл҃гослове́нъ є҆сѝ, съ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ, и҆ при́снѡ, и҆ во вѣ́ки вѣкѡ́въ.

Ли́къ: а҆ми́нь.

І҆ере́й же кропи́тъ покро́вцы водо́ю сщ҃е́нною, глаго́лѧ то́жде, є҆́же и҆ над̾ ѕвѣздо́ю, сі́есть:

Ѡ҆сщ҃а́ютсѧ покро́вцы сїѧ̑ [и҆лѝ ѡ҆сщ҃а́етсѧ покро́вецъ се́й] бл҃года́тїю прест҃а́гѡ дх҃а, ѡ҆кропле́нїемъ воды̀ сеѧ̀ сщ҃е́нныѧ во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, а҆ми́нь. Три́жды.