[глⷡ҇а к҃з] Чи́нъ мл҃твенный на поставле́нїе крⷭ҇та̀ на ве́рхъ кро́ва новосозда́нныѧ цр҃кве.

Взе́мъ і҆ере́й є҆пїтрахи́ль на себѐ, и҆ покади́въ крⷭ҇тъ ѳѷмїа́момъ бл҃гослове́ннымъ, начина́етъ ѻ҆бы́чнѡ:

Бл҃гослове́нъ бг҃ъ на́шъ. Ли́къ: Трист҃о́е. и҆ по Ѻ҆́ч҃е на́шъ: І҆ере́й: Ꙗ҆́кѡ твоѐ є҆́сть црⷭ҇тво: И҆ а҆́бїе пою́тъ, и҆лѝ чтꙋ́тъ тропарѝ сїѧ̑, гла́съ а҃: Сп҃сѝ, гдⷭ҇и, лю́ди твоѧ̑: Сла́ва: Вознесы́йсѧ на крⷭ҇тъ во́лею: И҆ ны́нѣ: Предста́тельство хрⷭ҇тїа́нъ: Посе́мъ ре́кшꙋ дїа́конꙋ: Гдⷭ҇ꙋ помо́лимсѧ, и҆ кли́рꙋ: Гдⷭ҇и поми́лꙋй.

Чте́тъ і҆ере́й мл҃твꙋ сїю̀:

Гдⷭ҇и вседержи́телю бж҃е ѻ҆тє́цъ на́шихъ, жезло́мъ мѡѷсе́овымъ, и҆ дре́вомъ ѻ҆́нымъ, на не́мже ѕмїю̀ мѣ́дѧнꙋю въ пꙋсты́ни, ѿ ᲂу҆грызе́нїѧ ѕмїє́въ и҆збавлѧ́ѧ лю́ди, привѧза́ти повелѣ́лъ є҆сѝ, ѡ҆́бразъ чⷭ҇тна́гѡ и҆ животворѧ́щагѡ крⷭ҇та̀ возлю́бленнагѡ сн҃а твоегѡ̀ гдⷭ҇а на́шегѡ і҆и҃са хрⷭ҇та̀ проѡбрази́вый, и҆́мже дїа́волѧ си́ла ᲂу҆праздни́сѧ, и҆ ѕмі́емъ ѻ҆́нымъ дре́внимъ вселꙋка́вымъ ᲂу҆грызе́нный и҆ ᲂу҆мерщвле́нный ро́дъ на́шъ ѡ҆животвори́сѧ: смире́ннѡ твоемꙋ̀ безмѣ́рномꙋ чл҃вѣколю́бїю припа́дающе, мо́лимсѧ и҆ ми́ли сѧ дѣ́емъ, послѝ ны́нѣ бл҃гослове́нїе твоѐ нбⷭ҇ное, и҆ бл҃гословѝ зна́менїе сїѐ крⷭ҇тное, и҆ да́ждь є҆мꙋ̀ си́лꙋ и҆ крѣ́пость бл҃гослове́ннагѡ ѻ҆́нагѡ, кро́вїю сн҃а твоегѡ̀ ѡ҆кропле́ннагѡ дре́ва, во є҆́же бы́ти хра́мꙋ семꙋ̀, и҆́мени твоемꙋ̀ созда́нномꙋ, покро́въ держа́венъ, тве́рдое ѡ҆гражде́нїе, ѿ всѧ́кагѡ ѕла́гѡ ѡ҆бстоѧ́нїѧ всегда́шнее и҆збавле́нїе, бл҃голѣ́пїе же и҆ ᲂу҆краше́нїе, и҆ зна́менїе ви̑димымъ и҆ неви̑димымъ врагѡ́мъ стра́шное и҆ ᲂу҆жа́сное, всѣ́хъ же въ хра́мъ се́й съ вѣ́рою входѧ́щихъ, и҆ на нѐ взира́ющихъ, и҆ распѧ́томꙋ на крⷭ҇тѣ̀ сн҃ꙋ твоемꙋ̀ кла́нѧющихсѧ бл҃гословѝ, и҆ си́лою крⷭ҇тною ѡ҆гради́въ, неврежде́нныхъ ѿ всѧ́кагѡ ѕла̀ всегда̀ соблюдѝ. крⷭ҇тъ бо є҆́сть красота̀ цр҃ко́внаѧ, царє́мъ держа́ва, вѣ̑рнымъ ᲂу҆твержде́нїе, па́ѵлова похвала̀, бѣсѡ́въ же ꙗ҆́зва. є҆́й, гдⷭ҇и бж҃е на́шъ, всѣ́хъ вѣ́рою на зна́менїе сїѐ взира́ющихъ, и҆ сп҃си́тельнꙋю гдⷭ҇а на́шегѡ і҆и҃са хрⷭ҇та̀ сн҃а твоегѡ̀ сме́рть воспомина́ющихъ, и҆ тебѣ̀ прилѣ́жнѡ молѧ́щихсѧ, млⷭ҇тивнѡ ᲂу҆слы́ши и҆ чл҃вѣколю́бнѣ поми́лꙋй: здра́вїе же съ долгоде́нствїемъ да́рꙋй, и҆ црⷭ҇твїѧ твоегѡ̀ сподо́би, бл҃года́тїю, и҆ щедро́тами, и҆ чл҃вѣколю́бїемъ є҆диноро́днагѡ сн҃а твоегѡ̀, съ ни́мже бл҃гослове́нъ є҆сѝ со прест҃ы́мъ, и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.

Ли́къ: а҆ми́нь.

І҆ере́й же взе́мъ сщ҃е́ннꙋю во́дꙋ, кропи́тъ є҆́ю крⷭ҇тъ, глаго́лѧ:

Бл҃гословлѧ́етсѧ и҆ ѡ҆сщ҃а́етсѧ зна́менїе сїѐ крⷭ҇тное, бл҃года́тїю ст҃а́гѡ дх҃а, ѡ҆кропле́нїемъ воды̀ сеѧ̀ сщ҃е́нныѧ, во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, а҆ми́нь.

А҆́бїе же пое́тсѧ конда́къ се́й, гла́съ д҃:

Вознесы́йсѧ на крⷭ҇тъ во́лею тезоимени́томꙋ твоемꙋ̀ но́вомꙋ жи́тельствꙋ щедрѡ́ты твоѧ̑ да́рꙋй, хрⷭ҇тѐ бж҃е: возвеселѝ си́лою твое́ю, бл҃говѣ́рнаго і҆мпера́тора на́шего нїкола́ѧ а҆леѯа́ндровича, побѣ̑ды даѧ̀ є҆мꙋ̀ на сꙋпоста́ты, посо́бїе и҆мꙋ́щꙋ твоѐ ѻ҆рꙋ́жїе ми́ра, непобѣди́мꙋю побѣ́дꙋ.

Посе́мъ твори́тъ ѻ҆бы́чный ѿпꙋ́стъ хра́мꙋ: дѣ́лателїе же взе́мше крⷭ҇тъ, поставлѧ́ютъ є҆го̀ на свое́мъ мѣ́стѣ верхꙋ̀ цр҃кве.