[глⷡ҇а к҃є] Мл҃тва над̾ пшени́цею ѡ҆скве́рншеюсѧ, и҆лѝ мꙋко́ю и҆лѝ ви́домъ нѣ́кїимъ.

Гдⷭ҇ꙋ помо́лимсѧ.

Гдⷭ҇и бж҃е на́шъ, и҆́же въ смотре́нїи твое́мъ, є҆́же по пло́ти, повелѣ́вый не входѧ́щымъ скверни́ти человѣ́ка, но всѧ̑ чи̑ста бы́ти чи̑стымъ: и҆́же сосꙋ́домъ и҆збра́ннымъ па́ѵломъ твои́мъ а҆пⷭ҇ломъ наꙋчи́вый на́съ вѣ́ровати, всѧ̑ тобо́ю созда̑нна добра̑ бы́ти, бж҃е́ственнымъ сло́вомъ, и҆ є҆́же къ тебѣ̀ моли́твою ѡ҆сщ҃а́ємаѧ: са́мъ и҆ ны́нѣ влⷣко, состражда́ѧй не́мощемъ на́шымъ, бл҃гословѝ пшени́цꙋ сїю̀ твое́ю бл҃года́тїю и҆ чл҃вѣколю́бїемъ, бл҃гослове́нїемъ, и҆ ѡ҆кропле́нїемъ воды̀ сеѧ̀, ѡ҆ и҆́мени твое́мъ ѡ҆сщ҃е́нныѧ, и҆ всѧ́кꙋю скве́рнꙋ, и҆лѝ сꙋмнѣ́нїе ѿ впа́дшагѡ въ ню̀ нечи́стагѡ ко́знїю дїа́волею, ѿженѝ ѿ мы́сли рабѡ́въ твои́хъ, и҆ да́ждь и҆̀мъ наде́ждею ꙗ҆́же въ тѧ̀, и҆ ᲂу҆вѣре́нїемъ твои́хъ щедрѡ́тъ, сеѧ̀ причасти́тисѧ прича́стїѧ, во бл҃годаре́нїе ст҃а́гѡ твоегѡ̀ и҆́мене неѡсꙋждє́ннымъ сохрани́тисѧ.

Ꙗ҆́кѡ ты̀ є҆сѝ бл҃гословлѧ́ѧй и҆ ѡ҆сщ҃а́ѧй всѧ́чєскаѧ, и҆ тебѣ̀ сла́вꙋ возсыла́емъ со безнача́льнымъ твои́мъ ѻ҆ц҃е́мъ, и҆ съ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.