[глⷡ҇а ѳ҃] Послѣ́дованїе быва́емое ѡ҆ ѡ҆брꙋче́нїи.

По бж҃е́ственной лїтꙋргі́и, сщ҃е́нникꙋ стоѧ́щꙋ въ ст҃и́лищи, предстоѧ́тъ хотѧ́щїи спрѧга́тисѧ пред̾ ст҃ы́ми две́рьми: мꙋ́жъ ᲂу҆́бѡ ѡ҆деснꙋ́ю, жена́ же ѡ҆шꙋ́юю. Лежа́тъ же на деснѣ́й странѣ̀ ст҃ы́ѧ трапе́зы пе́рстни и҆́хъ два̀, златы́й и҆ сре́брѧный, сре́брѧный ᲂу҆́бѡ ᲂу҆клонѧ́ѧсѧ къ десны̑мъ, златы́й же къ лѣ̑вымъ, бли́зъ дрꙋ́гъ дрꙋ́га. Сщ҃е́нникъ же назна́менꙋетъ главы̑ новоневѣ́стныхъ три́жды, и҆ дае́тъ и҆̀мъ свѣщы̀ возже́нны, и҆ вве́дъ ѧ҆̀ внꙋ́трь хра́ма, кади́тъ крⷭ҇тови́днѡ, и҆ глаго́летсѧ ѿ дїа́кона: Бл҃гословѝ влады́ко,

И҆ сщ҃е́нникъ: Бл҃гослове́нъ бг҃ъ на́шъ:

Ли́къ: а҆ми́нь.

Дїа́конъ: Ми́ромъ гдⷭ҇ꙋ помо́лимсѧ.

Ѡ҆ свы́шнемъ ми́рѣ, и҆ ѡ҆ сп҃се́нїи є҆ю̀:

Ѡ҆ ми́рѣ всегѡ̀ мі́ра, бл҃гостоѧ́нїи:

Ѡ҆ ст҃ѣ́мъ хра́мѣ се́мъ, и҆ съ вѣ́рою:

Ѡ҆ ст҃ѣ́йшемъ прави́тельствꙋющемъ сѷно́дѣ:

Ѡ҆ бл҃гочести́вѣйшемъ:

Ѡ҆ рабѣ̀ бж҃їи, (и҆́мⷬ҇къ), и҆ рабы́нѣ бж҃їей, (и҆́мⷬ҇къ), ны́нѣ ѡ҆брꙋча́ющихсѧ дрꙋ́гъ дрꙋ́гꙋ, и҆ ѡ҆ сп҃се́нїи и҆̀хъ, гдⷭ҇ꙋ помо́лимсѧ.

Ѡ҆ є҆́же пода́тисѧ и҆̀мъ ча́дѡмъ въ прїѧ́тїе ро́да, и҆ всѣ̑мъ ꙗ҆̀же ко сп҃се́нїю проше́нїємъ, гдⷭ҇ꙋ помо́лимсѧ.

Ѡ҆ є҆́же низпосла́тисѧ и҆̀мъ любвѝ соверше́ннѣй, ми́рнѣй, и҆ по́мощи, гдⷭ҇ꙋ помо́лимсѧ.

Ѡ҆ є҆́же сохрани́тисѧ и҆̀мъ въ є҆диномы́слїи и҆ тве́рдѣй вѣ́рѣ, гдⷭ҇ꙋ помо́лимсѧ.

Ѡ҆ є҆́же бл҃гослови́тисѧ и҆̀мъ въ непоро́чномъ жи́тельствѣ, гдⷭ҇ꙋ помо́лимсѧ.

Ꙗ҆́кѡ да гдⷭ҇ь бг҃ъ на́шъ да́рꙋетъ и҆̀мъ бра́къ че́стенъ, и҆ ло́же нескве́рное, гдⷭ҇ꙋ помо́лимсѧ.

Ѡ҆ и҆зба́витисѧ на́мъ ѿ всѧ́кїѧ ско́рби, гнѣ́ва и҆ нꙋ́жды:

Застꙋпѝ, сп҃сѝ, поми́лꙋй:

Прест҃ꙋ́ю, пречⷭ҇тꙋю, пребл҃гослове́ннꙋю:

Сщ҃е́нникъ: Ꙗ҆́кѡ подоба́етъ тебѣ̀ всѧ́каѧ сла́ва:

Та́же глаго́летъ мл҃твꙋ велегла́снѡ:

Бж҃е вѣ́чный, разстоѧ̑щаѧсѧ собра́вый въ соедине́нїе, и҆ сою́зъ любвѐ положи́вый и҆̀мъ неразрꙋши́мый: бл҃гослови́вый і҆саа́ка и҆ реве́ккꙋ, и҆ наслѣ́дники ѧ҆̀ твоегѡ̀ ѡ҆бѣтова́нїѧ показа́вый: са́мъ бл҃гословѝ и҆ рабы̑ твоѧ̑ сїѧ̑, (и҆́мⷬ҇къ), (и҆́мⷬ҇къ), наставлѧ́ѧ ѧ҆̀ на всѧ́кое дѣ́ло бл҃го́е. Ꙗ҆́кѡ млⷭ҇тивый и҆ чл҃вѣколю́бецъ бг҃ъ є҆сѝ, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.

Ли́къ: а҆ми́нь.

Сщ҃е́нникъ: Ми́ръ всѣ̑мъ.

Ли́къ: И҆ дꙋ́хови твоемꙋ̀.

Дїа́конъ: Главы̑ ва́шѧ гдⷭ҇еви приклони́те.

Ли́къ: Тебѣ̀ гдⷭ҇и.

Гдⷭ҇и бж҃е на́шъ, ѿ ꙗ҆зы̑къ пред̾ѡбрꙋчи́вый цр҃ковь дѣ́вꙋ чⷭ҇тꙋю, бл҃гословѝ ѡ҆брꙋче́нїе сїѐ, и҆ соединѝ, и҆ сохранѝ рабы̑ твоѧ̑ сїѧ̑ въ ми́рѣ и҆ є҆диномы́слїи.

Тебѣ́ бо подоба́етъ всѧ́каѧ сла́ва, че́сть и҆ поклоне́нїе, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.

Ли́къ: а҆ми́нь.

Та́же взе́мъ сщ҃е́нникъ пе́рстни, дае́тъ пе́рвѣе мꙋ́жꙋ златы́й, та́же сре́брѧный женѣ̀. И҆ глаго́летъ мꙋ́жꙋ:

Ѡ҆брꙋча́етсѧ ра́бъ бж҃їй, (и҆́мⷬ҇къ), рабѣ̀ бж҃їей, (и҆́мⷬ҇къ), во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, а҆ми́нь.

Та́же и҆ женѣ̀ глаго́летъ:

Ѡ҆брꙋча́етсѧ раба̀ бж҃їѧ, (и҆́мⷬ҇къ), рабꙋ̀ бж҃їю, (и҆́мⷬ҇къ), во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, а҆ми́нь.

И҆ є҆гда̀ рече́тъ на є҆ди́номъ ко́емждо три́жды, твори́тъ крⷭ҇тъ пе́рстнемъ на глава́хъ и҆́хъ: и҆ налага́етъ ѧ҆̀ на десны́хъ и҆́хъ пе́рстѣхъ. Та́же и҆змѣнѧ́етъ пе́рстни новоневѣ́стныхъ воспрїе́мникъ.

Сщ҃е́нникъ же глаго́летъ мл҃твꙋ:

Гдⷭ҇ꙋ помо́лимсѧ.

Гдⷭ҇и бж҃е на́шъ, ѻ҆́трокꙋ патрїа́рха а҆враа́ма сше́ствовавый въ средорѣ́чїи, посыла́ѧ ᲂу҆невѣ́стити господи́нꙋ є҆гѡ̀ і҆саа́кꙋ женꙋ̀, и҆ хода́тайствомъ водоноше́нїѧ ѡ҆брꙋчи́ти реве́ккꙋ ѿкры́вый: са́мъ бл҃гословѝ ѡ҆брꙋче́нїе рабѡ́въ твои́хъ, сегѡ̀ (и҆́мⷬ҇къ), и҆ сеѧ̀ (и҆́мⷬ҇къ), и҆ ᲂу҆твердѝ є҆́же ᲂу҆ ни́хъ глаго́ланное сло́во: ᲂу҆твердѝ ѧ҆̀ є҆́же ѿ тебѐ ст҃ы́мъ соедине́нїемъ: ты́ бо и҆з̾ нача́ла созда́лъ є҆сѝ мꙋ́жескїй по́лъ и҆ же́нскїй, и҆ ѿ тебѐ сочетава́етсѧ мꙋ́жꙋ жена̀, въ по́мощь и҆ въ воспрїѧ́тїе ро́да человѣ́ча. са́мъ ᲂу҆́бѡ гдⷭ҇и бж҃е на́шъ, посла́вый и҆́стинꙋ въ наслѣ́дїе твоѐ, и҆ ѡ҆бѣтова́нїе твоѐ на рабы̑ твоѧ̑ ѻ҆тцы̀ на́шѧ, въ ко́емждо ро́дѣ и҆ ро́дѣ и҆збра̑нныѧ твоѧ̑: при́зри на раба̀ твоего̀ (и҆́мⷬ҇къ), и҆ на рабꙋ̀ твою̀ (и҆́мⷬ҇къ), и҆ ᲂу҆твердѝ ѡ҆брꙋче́нїе и҆́хъ въ вѣ́рѣ и҆ є҆диномы́слїи, и҆ и҆́стинѣ, и҆ любвѝ. ты́ бо гдⷭ҇и показа́лъ є҆сѝ да́тисѧ ѡ҆брꙋче́нїю и҆ ᲂу҆твержда́тисѧ во все́мъ. Пе́рстнемъ даде́сѧ вла́сть і҆ѡ́сифꙋ во є҆гѵ́птѣ: пе́рстнемъ просла́висѧ данїи́лъ во странѣ̀ вавѷлѡ́нстѣй: пе́рстнемъ ꙗ҆ви́сѧ и҆́стина ѳама́ры: пе́рстнемъ ѻ҆ц҃ъ на́шъ нбⷭ҇ный ще́дръ бы́сть на сн҃а своего̀: дади́те бо, глаго́летъ, пе́рстень на десни́цꙋ є҆гѡ̀, и҆ закла́вше тельца̀ ᲂу҆пита́ннаго, ꙗ҆́дше возвесели́мсѧ. сама̀ десни́ца твоѧ̀ гдⷭ҇и, мѡѷсе́а воѡрꙋжѝ въ чермнѣ́мъ мо́ри: сло́вомъ бо твои́мъ и҆́стиннымъ нб҃са̀ ᲂу҆тверди́шасѧ и҆ землѧ̀ ѡ҆снова́сѧ, и҆ десни́ца ра̑бъ твои́хъ бл҃гослови́тсѧ сло́вомъ твои́мъ держа́внымъ, и҆ мы́шцею твое́ю высо́кою. са́мъ ᲂу҆́бѡ и҆ ны́нѣ влⷣко, бл҃гословѝ пе́рстней положе́нїе сїѐ бл҃гослове́нїемъ нбⷭ҇нымъ: и҆ а҆́гг҃лъ тво́й да пред̾и́детъ пред̾ ни́ми всѧ̑ дни̑ живота̀ и҆́хъ.

Ꙗ҆́кѡ ты̀ є҆сѝ бл҃гословлѧ́ѧй и҆ ѡ҆сщ҃а́ѧй всѧ́чєскаѧ: и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

А҆́бїе дїа́конъ є҆ктенїю̀:

Поми́лꙋй на́съ бж҃е:

Є҆щѐ мо́лимсѧ ѡ҆ бл҃гочести́вѣйшемъ, самодержа́внѣйшемъ, вели́комъ гдⷭ҇рѣ на́шемъ і҆мпера́торѣ нїкола́ѣ а҆леѯа́ндровичѣ всеѧ̀ рѡссі́и.

Є҆щѐ мо́лимсѧ ѡ҆ сꙋпрꙋ́гѣ є҆гѡ̀, бл҃гочести́вѣйшей гдⷭ҇рнѣ, і҆мператрі́цѣ а҆леѯа́ндрѣ ѳео́дѡровнѣ: ѡ҆ ма́тери є҆гѡ̀, бл҃гочести́вѣйшей гдⷭ҇рнѣ, і҆мператрі́цѣ марі́и ѳео́дѡровнѣ: ѡ҆ наслѣ́дникѣ є҆гѡ̀, бл҃говѣ́рномъ гдⷭ҇рѣ, цесаре́вичѣ и҆ вели́комъ кн҃зѣ а҆леѯі́и нїкола́евичѣ, и҆ ѡ҆ все́мъ ца́рствꙋющемъ до́мѣ.

Є҆щѐ мо́лимсѧ ѡ҆ ст҃ѣ́йшемъ прави́тельствꙋющемъ сѷно́дѣ.

Є҆щѐ мо́лимсѧ ѡ҆ все́мъ и҆́хъ хрⷭ҇толюби́вомъ во́инствѣ.

Є҆щѐ мо́лимсѧ ѡ҆ рабѣ́хъ бж҃їихъ (и҆́мⷬ҇къ), и҆ (и҆́мⷬ҇къ), ѡ҆брꙋча́ющихсѧ дрꙋ́гъ дрꙋ́гꙋ.

Ли́къ: Гдⷭ҇и поми́лꙋй, три́жды.

Є҆щѐ мо́лимсѧ за всю̀ бра́тїю:

Возгла́съ: Ꙗ҆́кѡ млⷭ҇тивъ, и҆ чл҃вѣколю́бецъ бг҃ъ є҆сѝ, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Та́же ѿпꙋ́стъ.

А҆́ще ᲂу҆́бѡ хотѧ́тъ въ то́жде вре́мѧ вѣнча́тисѧ, вхо́дѧтъ во хра́мъ со свѣща́ми возжже́нными, пред̾идꙋ́щꙋ сщ҃е́нникꙋ съ кади́льницею, и҆ пою́щꙋ ѱало́мъ рк҃з, си́це: Лю́дїе же на кі́йждо сті́хъ глаго́лютъ:

Сла́ва тебѣ̀ бж҃е на́шъ, сла́ва тебѣ̀.

Бл҃же́ни всѝ боѧ́щїисѧ гдⷭ҇а.

Сла́ва тебѣ̀ бж҃е на́шъ, сла́ва тебѣ̀.

Ходѧ́щїи въ пꙋте́хъ є҆гѡ̀.

Сла́ва тебѣ̀ бж҃е на́шъ, сла́ва тебѣ̀.

Трꙋды̀ плодѡ́въ твои́хъ снѣ́си.

Сла́ва тебѣ̀ бж҃е на́шъ, сла́ва тебѣ̀.

Бл҃же́нъ є҆сѝ, и҆ добро̀ тебѣ̀ бꙋ́детъ.

Сла́ва тебѣ̀ бж҃е на́шъ, сла́ва тебѣ̀.

Жена̀ твоѧ̀ ꙗ҆́кѡ лоза̀ плодови́та, во страна́хъ до́мꙋ твоегѡ̀.

Сла́ва тебѣ̀ бж҃е на́шъ, сла́ва тебѣ̀.

Сы́нове твоѝ ꙗ҆́кѡ новосаждє́нїѧ ма̑слична, ѻ҆́крестъ трапе́зы твоеѧ̀.

Сла́ва тебѣ̀ бж҃е на́шъ, сла́ва тебѣ̀.

Сѐ та́кѡ бл҃гослови́тсѧ человѣ́къ боѧ́йсѧ гдⷭ҇а.

Сла́ва тебѣ̀ бж҃е на́шъ, сла́ва тебѣ̀.

Бл҃гослови́тъ тѧ̀ гдⷭ҇ь ѿ сїѡ́на, и҆ ᲂу҆́зриши бл҃га̑ѧ і҆ерⷭ҇ли́ма всѧ̑ дни̑ живота̀ твоегѡ̀.

Сла́ва тебѣ̀ бж҃е на́шъ, сла́ва тебѣ̀.

И҆ ᲂу҆́зриши сы́ны сынѡ́въ твои́хъ: ми́ръ на і҆и҃лѧ.

Сла́ва тебѣ̀ бж҃е на́шъ, сла́ва тебѣ̀.

Посе́мъ глаго́летъ і҆ере́й поꙋчи́тельное сло́во, сказꙋ́ѧ и҆̀мъ, что̀ є҆́сть сꙋпрꙋ́жества та́йна: и҆ ка́кѡ въ сꙋпрꙋ́жествѣ бг҃оꙋго́днѡ и҆ че́стнѡ жи́тельствовати и҆́мꙋтъ. По сконча́нїи же сло́ва, вопроша́етъ і҆ере́й жениха̀ глаго́лѧ:

И҆́маши ли, (и҆́мⷬ҇къ) произволе́нїе бл҃го́е и҆ непринꙋжде́нное, и҆ крѣ́пкꙋю мы́сль, поѧ́ти себѣ̀ въ женꙋ̀ сїю̀, (и҆́мⷬ҇къ), ю҆́же здѣ̀ пред̾ тобо́ю ви́диши;

И҆ ѿвѣща́етъ жени́хъ, глаго́лѧ:

И҆́мамъ, честны́й ѻ҆́тче.

І҆ере́й па́ки:

Не ѡ҆бѣща́лсѧ ли є҆сѝ и҆но́й невѣ́стѣ;

Жени́хъ: Не ѡ҆бѣща́хсѧ, честны́й ѻ҆́тче.

И҆ а҆́бїе і҆ере́й, зрѧ̀ къ невѣ́стѣ, вопроша́етъ ю҆̀, глаго́лѧ:

И҆́маши ли произволе́нїе бл҃го́е и҆ непринꙋжде́нное, и҆ тве́рдꙋю мы́сль, поѧ́ти себѣ̀ въ мꙋ́жа сего̀ (и҆́мⷬ҇къ), є҆го́же пред̾ тобо́ю здѣ̀ ви́диши;

И҆ ѿвѣща́етъ невѣ́ста, глаго́лющи:

И҆́мамъ, честны́й ѻ҆́тче.

І҆ере́й па́ки:

Не ѡ҆бѣща́ласѧ ли є҆сѝ и҆но́мꙋ мꙋ́жꙋ:

И҆ ѿвѣща́етъ невѣ́ста:

Не ѡ҆бѣща́хсѧ, честны́й ѻ҆́тче.

Та́же глаго́летъ дїа́конъ:

Бл҃гословѝ влады́ко.

Сщ҃е́нникъ: Бл҃гослове́но црⷭ҇тво:

Ли́къ: а҆ми́нь.

Дїа́конъ є҆ктенїю̀:

Ми́ромъ гдⷭ҇ꙋ помо́лимсѧ.

Ѡ҆ свы́шнемъ ми́рѣ:

Ѡ҆ ми́рѣ всегѡ̀ мі́ра:

Ѡ҆ ст҃ѣ́мъ хра́мѣ се́мъ:

Ѡ҆ ст҃ѣ́йшемъ прави́тельствꙋющемъ сѷно́дѣ:

Ѡ҆ бл҃гочести́вѣйшемъ:

Ѡ҆ рабѣ́хъ бж҃їихъ, (и҆́мⷬ҇къ), (и҆́мⷬ҇къ), ны́нѣ сочетава́ющихсѧ дрꙋ́гъ дрꙋ́гꙋ въ бра́ка ѻ҆бще́нїе, и҆ ѡ҆ сп҃се́нїи и҆́хъ, гдⷭ҇ꙋ помо́лимсѧ.

Ѡ҆ є҆́же бл҃гослови́тисѧ бра́кꙋ семꙋ̀, ꙗ҆́коже въ ка́нѣ галїле́йстѣй, гдⷭ҇ꙋ помо́лимсѧ.

Ѡ҆ є҆́же пода́тисѧ и҆̀мъ цѣломꙋ́дрїю, и҆ плодꙋ̀ чре́ва на по́льзꙋ, гдⷭ҇ꙋ помо́лимсѧ.

Ѡ҆ є҆́же. возвесели́тисѧ и҆̀мъ видѣ́нїемъ сынѡ́въ и҆ дще́рей, гдⷭ҇ꙋ помо́лимсѧ.

Ѡ҆ є҆́же дарова́тисѧ и҆̀мъ бл҃гоча́дїѧ воспрїѧ́тїю, и҆ незазо́рномꙋ пребыва́нїю, гдⷭ҇ꙋ помо́лимсѧ.

Ѡ҆ є҆́же дарова́ти и҆̀мже и҆ на́мъ всѧ̑ ко сп҃се́нїю прошє́нїѧ, гдⷭ҇ꙋ помо́лимсѧ.

Ѡ҆ є҆́же и҆зба́витисѧ и҆̀мже и҆ на́мъ ѿ всѧ́кїѧ ско́рби:

Застꙋпѝ, сп҃сѝ, поми́лꙋй:

Прест҃ꙋ́ю, пречⷭ҇тꙋю, пребл҃гослове́ннꙋю:

Сщ҃е́нникъ возгла́снѡ:

Ꙗ҆́кѡ подоба́етъ тебѣ̀ всѧ́каѧ сла́ва:

Ли́къ: а҆ми́нь.

Дїа́конъ: Гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Сщ҃е́нникъ мл҃твꙋ сїю̀ велегла́снѡ:

Бж҃е пречⷭ҇тый, и҆ всеѧ̀ тва́ри содѣ́телю, ребро̀ пра́ѻтца а҆да́ма за твоѐ чл҃вѣколю́бїе въ женꙋ̀ преѡбрази́вый, и҆ бл҃гослови́вый ѧ҆̀, и҆ рекі́й: расти́тесѧ и҆ мно́житесѧ и҆ ѡ҆блада́йте земле́ю, и҆ ѻ҆бою̀ є҆ю̀ є҆ди́нъ ᲂу҆́дъ показа́вый сопрѧже́нїемъ: сегѡ́ бо ра́ди ѡ҆ста́витъ человѣ́къ ѻ҆тца̀ своего̀ и҆ ма́терь, и҆ прилѣпи́тсѧ женѣ̀ свое́й, и҆ бꙋ́дета два̀ въ пло́ть є҆ди́нꙋ, и҆ ꙗ҆̀же бг҃ъ спрѧжѐ, человѣ́къ да не разлꙋча́етъ. и҆́же раба̀ твоего̀ а҆враа́ма бл҃гослови́вый и҆ разве́рзый ложесна̀ са̑ррина, и҆ ѻ҆тца̀ мно́жества ꙗ҆зы́кѡвъ сотвори́вый: и҆́же і҆саа́ка реве́кцѣ дарова́вый, и҆ рождество̀ є҆ѧ̀ бл҃гослови́вый: и҆́же і҆а́кѡва рахи́лѣ сочета́вый, и҆ и҆з̾ негѡ̀ двана́десѧть патрїа́рхѡвъ показа́вый: и҆́же і҆ѡ́сифа и҆ а҆сене́ѳꙋ спрѧгі́й, пло́дъ дѣтотворе́нїѧ и҆̀мъ, є҆фре́ма и҆ манассі́ю дарова́вый: и҆́же заха́рїю и҆ є҆лїсаве́тъ прїе́мый, и҆ предте́чꙋ рожде́нїе и҆̀мъ показа́вый: и҆́же ѿ ко́рене і҆ессе́ова по пло́ти и҆зрасти́вый приснодв҃ꙋ, и҆ и҆з̾ неѧ̀ воплоти́выйсѧ, и҆ роди́выйсѧ во сп҃се́нїе ро́да человѣ́ческагѡ, и҆́же за неизрече́нный тво́й да́ръ и҆ мно́гꙋю бл҃гость, прише́дый въ ка́нꙋ галїле́йскꙋю, и҆ та́мошнїй бра́къ бл҃гослови́вый: да ꙗ҆ви́ши, ꙗ҆́кѡ твоѧ̀ во́лѧ є҆́сть зако́нное сꙋпрꙋ́жество, и҆ є҆́же и҆з̾ негѡ̀ чадотворе́нїе. са́мъ влⷣко прест҃ы́й, прїимѝ моле́нїе на́съ рабѡ́въ твои́хъ, ꙗ҆́коже та́мѡ, и҆ здѣ̀ прише́дъ неви́димымъ твои́мъ предста́тельствомъ, бл҃гословѝ бра́къ се́й, и҆ пода́ждь рабѡ́мъ твои̑мъ си̑мъ, (и҆́мⷬ҇къ), и҆ (и҆́мⷬ҇къ), живо́тъ ми́ренъ, долгоде́нствїе, цѣломꙋ́дрїе, дрꙋ́гъ ко дрꙋ́гꙋ любо́вь въ сою́зѣ ми́ра, сѣ́мѧ долгожи́зненное, ѡ҆ ча́дѣхъ бл҃года́ть, неꙋвѧда́емый сла́вы вѣне́цъ. сподо́би ѧ҆̀ ви́дѣти ча̑да ча́дѡвъ, ло́же є҆ю̀ ненавѣ́тно соблюдѝ, и҆ да́ждь и҆́ма ѿ росы̀ нбⷭ҇ныѧ свы́ше, и҆ ѿ тꙋ́ка земна́гѡ: и҆спо́лни до́мы и҆́хъ пшени́цы, вїна̀ и҆ є҆ле́а и҆ всѧ́кїѧ благосты́ни, да преподаю́тъ и҆ тре́бꙋющымъ, да́рꙋѧ кꙋ́пнѡ и҆ сꙋ́щымъ съ ни́ма всѧ̑ ꙗ҆̀же ко сп҃се́нїю прошє́нїѧ.

Ꙗ҆́кѡ бг҃ъ млⷭ҇ти, и҆ щедро́тъ, и҆ чл҃вѣколю́бїѧ є҆сѝ, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ, и҆ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.

Ли́къ: а҆ми́нь.

Дїа́конъ: Гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Сщ҃е́нникъ, мл҃твꙋ сїю̀ велегла́снѡ:

Бл҃гослове́нъ є҆сѝ гдⷭ҇и бж҃е на́шъ, и҆́же та́йнагѡ и҆ чи́стагѡ бра́ка свѧщеннодѣйстви́телю, и҆ тѣле́снагѡ законоположи́телю, нетлѣ́нїѧ храни́телю, жите́йскихъ благі́й строи́телю: са́мъ и҆ ны́нѣ влⷣко, въ нача́лѣ созда́вый человѣ́ка, и҆ положи́вый є҆го̀ ꙗ҆́кѡ царѧ̀ тва́ри, и҆ рекі́й: не добро̀ бы́ти человѣ́кꙋ є҆ди́номꙋ на землѝ, сотвори́мъ є҆мꙋ̀ помо́щника по немꙋ̀: и҆ взе́мъ є҆ди́но ѿ ре́бръ є҆гѡ̀, созда́лъ є҆сѝ женꙋ̀, ю҆́же ви́дѣвъ а҆да́мъ, речѐ: сїѧ̀ ны́нѣ ко́сть ѿ косте́й мои́хъ, и҆ пло́ть ѿ пло́ти моеѧ̀: сїѧ̀ нарече́тсѧ жена̀, ꙗ҆́кѡ ѿ мꙋ́жа своегѡ̀ взѧта̀ бы́сть сїѧ̀. сегѡ̀ ра́ди ѡ҆ста́витъ человѣ́къ ѻ҆тца̀ своего̀ и҆ ма́терь, и҆ прилѣпи́тсѧ женѣ̀ свое́й, и҆ бꙋ́дета два̀ въ пло́ть є҆ди́нꙋ: и҆ ꙗ҆̀же бг҃ъ сопрѧжѐ, человѣ́къ да не разлꙋча́етъ. са́мъ и҆ ны́нѣ влⷣко гдⷭ҇и бж҃е на́шъ, низпослѝ бл҃года́ть твою̀ нбⷭ҇нꙋю на рабы̑ твоѧ̑ сїѧ̑, (и҆́мⷬ҇къ), (и҆́мⷬ҇къ): и҆ да́ждь рабѣ̀ се́й во все́мъ повинова́тисѧ мꙋ́жꙋ, и҆ рабꙋ̀ твоемꙋ̀ семꙋ̀ бы́ти во главꙋ̀ жены̀, ꙗ҆́кѡ да поживꙋ́тъ по во́ли твое́й. Бл҃гословѝ ѧ҆̀ гдⷭ҇и бж҃е на́шъ, ꙗ҆́коже бл҃гослови́лъ є҆сѝ а҆враа́ма и҆ са́ррꙋ: Бл҃гословѝ ѧ҆̀ гдⷭ҇и бж҃е на́шъ, ꙗ҆́коже бл҃гослови́лъ є҆сѝ і҆саа́ка и҆ реве́ккꙋ: Бл҃гословѝ ѧ҆̀ гдⷭ҇и бж҃е на́шъ, ꙗ҆́коже бл҃гослови́лъ є҆сѝ і҆а́кѡва, и҆ всѧ̑ патрїа́рхи: Бл҃гословѝ ѧ҆̀ гдⷭ҇и бж҃е на́шъ, ꙗ҆́коже бл҃гослови́лъ є҆сѝ і҆ѡ́сифа и҆ а҆сене́ѳꙋ: Бл҃гословѝ ѧ҆̀ гдⷭ҇и бж҃е на́шъ, ꙗ҆́коже бл҃гослови́лъ є҆сѝ мѡѷсе́а и҆ сепфѡ́рꙋ: Бл҃гословѝ ѧ҆̀ гдⷭ҇и бж҃е на́шъ, ꙗ҆́коже бл҃гослови́лъ є҆сѝ і҆ѡакі́ма и҆ а҆́ннꙋ: Бл҃гословѝ ѧ҆̀ гдⷭ҇и бж҃е на́шъ, ꙗ҆́коже бл҃гослови́лъ є҆сѝ заха́рїю и҆ є҆лїсаве́тъ. Сохранѝ ѧ҆̀ гдⷭ҇и бж҃е на́шъ, ꙗ҆́коже сохрани́лъ є҆сѝ нѡ́ѧ въ ковче́зѣ: сохранѝ ѧ҆̀ гдⷭ҇и бж҃е на́шъ, ꙗ҆́коже сохрани́лъ є҆сѝ і҆ѡ́нꙋ во чре́вѣ ки́товѣ. Сохранѝ ѧ҆̀ гдⷭ҇и бж҃е на́шъ, ꙗ҆́коже сохрани́лъ є҆сѝ ст҃ы̑ѧ трѝ ѻ҆́троки ѿ ѻ҆гнѧ̀, низпосла́вый и҆̀мъ ро́сꙋ съ нб҃сѐ: и҆ да прїи́детъ на нѧ̀ ра́дость ѻ҆́наѧ, ю҆́же и҆мѧ́ше бл҃же́ннаѧ є҆ле́на, є҆гда̀ ѡ҆брѣ́те чⷭ҇тны́й крⷭ҇тъ. Помѧнѝ ѧ҆̀ гдⷭ҇и бж҃е на́шъ, ꙗ҆́коже помѧнꙋ́лъ є҆сѝ є҆нѡ́ха, си́ма, и҆лїю̀. Помѧнѝ ѧ҆̀ гдⷭ҇и бж҃е на́шъ, ꙗ҆́коже помѧнꙋ́лъ є҆сѝ ст҃ы̑ѧ твоѧ̑ четы́редесѧть мꙋ́ченики, низпосла́вый и҆̀мъ съ нб҃сѐ вѣнцы̀. Помѧнѝ бж҃е и҆ воспита́вшыѧ и҆́хъ роди́тели: занѐ мл҃твы роди́телей ᲂу҆твержда́ютъ ѡ҆снова̑нїѧ домѡ́въ. Помѧнѝ гдⷭ҇и бж҃е на́шъ, рабы̑ твоѧ̑ ᲂу҆невѣ́стившыѧсѧ, сше́дшыѧсѧ въ ра́дость сїю̀. Помѧнѝ гдⷭ҇и бж҃е на́шъ раба̀ твоего̀, (и҆́мⷬ҇къ), и҆ рабꙋ̀ твою̀, (и҆́мⷬ҇къ), и҆ бл҃гословѝ ѧ҆̀. Да́ждь и҆̀мъ пло́дъ чре́ва, доброча́дїе, є҆диномы́слїе дꙋ́шъ и҆ тѣле́съ: возвы́си ѧ҆̀ ꙗ҆́кѡ ке́дры лїва̑нскїѧ, ꙗ҆́кѡ ло́зꙋ бл҃горо́згнꙋю. Да́рꙋй и҆́мъ сѣ́мѧ кла́сѧно, да всѧ́кое самодово́льство и҆мꙋ́ще, и҆з̾ѡби́лꙋютъ на всѧ́кое дѣ́ло бл҃го́е, и҆ тебѣ̀ бл҃гоꙋго́дное: и҆ да ᲂу҆́зрѧтъ сы́ны сынѡ́въ свои́хъ, ꙗ҆́кѡ новосаждє́нїѧ ма̑сличнаѧ ѻ҆́крестъ трапе́зы и҆́хъ: и҆ бл҃гоꙋгоди́вше пред̾ тобо́ю, возсїѧ́ютъ ꙗ҆́кѡ свѣти̑ла на нб҃сѝ, въ тебѣ̀ гдⷭ҇ѣ на́шемъ. съ тобо́ю же сла́ва, держа́ва, че́сть и҆ поклоне́нїе, безнача́льномꙋ твоемꙋ̀ ѻ҆ц҃ꙋ̀, и҆ животворѧ́щемꙋ твоемꙋ̀ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.

Ли́къ: а҆ми́нь.

Дїа́конъ: Гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

И҆ па́ки сщ҃е́нникъ мл҃твꙋ сїю̀ глаго́летъ велегла́снѡ:

Бж҃е ст҃ы́й, созда́вый ѿ пе́рсти человѣ́ка, и҆ ѿ ребра̀ є҆гѡ̀ возсозда́вый женꙋ̀, и҆ спрѧгі́й є҆мꙋ̀ помо́щника по немꙋ̀, за є҆́же та́кѡ го́дно бы́сть твоемꙋ̀ вели́чествꙋ, не є҆ди́номꙋ бы́ти человѣ́кꙋ на землѝ: са́мъ и҆ ны́нѣ влⷣко, низпослѝ рꙋ́кꙋ твою̀ ѿ ст҃а́гѡ жили́ща твоегѡ̀, и҆ сочета́й раба̀ твоего̀ сего̀, (и҆́мⷬ҇къ), и҆ рабꙋ̀ твою̀ сїю̀, (и҆́мⷬ҇къ), занѐ ѿ тебѐ сочетава́етсѧ мꙋ́жꙋ жена̀. сопрѧзѝ ѧ҆̀ въ є҆диномꙋ́дрїи, вѣнча́й ѧ҆̀ въ пло́ть є҆ди́нꙋ, да́рꙋй и҆́ма пло́дъ чре́ва, бл҃гоча́дїѧ воспрїѧ́тїе.

Ꙗ҆́кѡ твоѧ̀ держа́ва, и҆ твоѐ є҆́сть црⷭ҇тво, и҆ си́ла, и҆ сла́ва, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ.

Ли́къ: а҆ми́нь.

И҆ по а҆ми́нѣ, прїе́мъ сщ҃е́нникъ вѣнцы̀, вѣнча́етъ пе́рвѣе жениха̀, глаго́лѧ:

Вѣнча́етсѧ ра́бъ бж҃їй, (и҆́мⷬ҇къ) рабѣ̀ бж҃їей, (и҆́мⷬ҇къ) во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, а҆ми́нь.

Та́же вѣнча́етъ и҆ невѣ́стꙋ, глаго́лѧ:

Вѣнча́етсѧ раба̀ бж҃їѧ, (и҆́мⷬ҇къ), рабꙋ̀ бж҃їю, (и҆́мⷬ҇къ), во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а.

Та́же бл҃гословлѧ́етъ ѧ҆̀ три́жды, глаго́лѧ три́жды:

Гдⷭ҇и бж҃е на́шъ, сла́вою и҆ че́стїю вѣнча́й ѧ҆̀.

Та́же прокі́менъ а҆пⷭ҇ла, гла́съ и҃:

Положи́лъ є҆сѝ на глава́хъ и҆́хъ вѣнцы̀, ѿ ка́меней чⷭ҇тны́хъ, живота̀ проси́ша ᲂу҆ тебѐ, и҆ да́лъ є҆сѝ и҆̀мъ.

Сті́хъ: Ꙗ҆́кѡ да́си и҆̀мъ бл҃гослове́нїе въ вѣ́къ вѣ́ка, возвесели́ши ѧ҆̀ ра́достїю съ лице́мъ твои́мъ.

А҆по́столъ ко є҆фесе́ємъ, зача́ло с҃л.

Бра́тїе бл҃годарѧ́ще всегда̀ ѡ҆ всѣ́хъ, ѡ҆ и҆́мени гдⷭ҇а на́шегѡ і҆и҃са хрⷭ҇та̀, бг҃ꙋ и҆ ѻ҆ц҃ꙋ̀: Повинꙋ́ющесѧ дрꙋ́гъ дрꙋ́гꙋ въ стра́сѣ бж҃їи. Жєны̀ свои̑мъ мꙋжє́мъ повинꙋ́йтесѧ, ꙗ҆́коже гдⷭ҇ꙋ: занѐ мꙋ́жъ глава̀ є҆́сть жены̀, ꙗ҆́коже и҆ хрⷭ҇то́съ глава̀ цр҃кве, и҆ то́й є҆́сть сп҃си́тель тѣ́ла. Но ꙗ҆́коже цр҃ковь повинꙋ́етсѧ хрⷭ҇тꙋ̀, та́кожде и҆ жєны̀ свои̑мъ мꙋжє́мъ во все́мъ. Мꙋ́жїе, люби́те своѧ̑ жєны̀, ꙗ҆́коже и҆ хрⷭ҇то́съ возлюбѝ цр҃ковь, и҆ себѐ предадѐ за ню̀: Да ѡ҆свѧти́тъ ю҆̀, ѡ҆чи́стивъ ба́нею водно́ю въ глаго́лѣ. Да предста́витъ ю҆̀ себѣ̀ сла́внꙋ цр҃ковь, не и҆мꙋ́щꙋ скве́рны, и҆лѝ поро́ка, и҆лѝ нѣ́что ѿ таковы́хъ: но да є҆́сть свѧта̀ и҆ непоро́чна. Та́кѡ до́лжни сꙋ́ть мꙋ́жїе люби́ти своѧ̑ жєны̀, ꙗ҆́кѡ своѧ̑ тѣлеса̀: любѧ́й бо свою̀ женꙋ̀, себѐ сама́го лю́битъ. Никто́же бо когда̀ свою̀ пло́ть возненави́дѣ, но пита́етъ и҆ грѣ́етъ ю҆̀, ꙗ҆́коже и҆ гдⷭ҇ь цр҃ковь: занѐ ᲂу҆́ди є҆смы̀ тѣ́ла є҆гѡ̀, ѿ пло́ти є҆гѡ̀, и҆ ѿ косте́й є҆гѡ̀. Сегѡ̀ ра́ди ѡ҆ста́витъ человѣ́къ ѻ҆тца̀ своего̀ и҆ ма́терь, и҆ прилѣпи́тсѧ къ женѣ̀ свое́й, и҆ бꙋ́дета два̀ въ пло́ть є҆ди́нꙋ: Та́йна сїѧ̀ вели́ка є҆́сть: а҆́зъ же глаго́лю во хрⷭ҇та̀, и҆ во цр҃ковь. Ѻ҆ба́че и҆ вы̀ по є҆ди́номꙋ, кі́йждо свою̀ женꙋ̀ си́це да лю́битъ, ꙗ҆́коже и҆ себѐ: а҆ жена̀ да бои́тсѧ своегѡ̀ мꙋ́жа.

А҆ллилꙋ́їа.

Сті́хъ: Ты̀ гдⷭ҇и сохрани́ши ны̀ и҆ соблюде́ши ны̀ ѿ ро́да сегѡ̀, и҆ во вѣ́къ.

Дїа́конъ: Премꙋ́дрость, про́сти ᲂу҆слы́шимъ:

Є҆ѵⷢ҇лїе ѿ і҆ѡа́нна, зача́ло ѕ҃.

Во вре́мѧ ѻ҆́но, бра́къ бы́сть въ ка́нѣ галїле́йстѣй, и҆ бѣ̀ ма́ти і҆и҃сова тꙋ̀. Зва́нъ же бы́сть і҆и҃съ и҆ ᲂу҆ченицы̀ є҆гѡ̀ на бра́къ. И҆ не доста́вшꙋ вїнꙋ̀, глаго́ла ма́ти і҆и҃сова къ немꙋ̀: вїна̀ не и҆́мꙋтъ. Глаго́ла є҆́й і҆и҃съ: что̀ є҆́сть мнѣ̀ и҆ тебѣ̀, же́но; не ᲂу҆̀ прїи́де ча́съ мо́й. Глаго́ла мт҃и є҆гѡ̀ слꙋга́мъ: є҆́же а҆́ще глаго́летъ ва́мъ, сотвори́те. Бѣ́хꙋ же тꙋ̀ водоно́сы ка́менни ше́сть, лежа́ще по ѡ҆чище́нїю і҆ꙋде́йскꙋ, вмѣстѧ́щыѧ по двѣма̀ и҆лѝ трїе́мъ мѣ́рамъ. Глаго́ла и҆̀мъ і҆и҃съ: напо́лните водоно́сы воды̀. и҆ напо́лниша и҆̀хъ до верха̀. И҆ глаго́ла и҆̀мъ: почерпи́те ны́нѣ, и҆ принеси́те а҆рхїтрїкли́нови. и҆ принесо́ша. Ꙗ҆́коже вкꙋсѝ а҆рхїтрїкли́нъ вїна̀ бы́вшагѡ ѿ воды̀, [и҆ не вѣ́дѧше ѿкꙋ́дꙋ є҆́сть: слꙋги̑ же вѣ́дѧхꙋ поче́рпшїи во́дꙋ: ] пригласѝ жениха̀ а҆рхїтрїкли́нъ, И҆ глаго́ла є҆мꙋ̀: всѧ́къ человѣ́къ пре́жде до́брое вїно̀ полага́етъ, и҆ є҆гда̀ ᲂу҆пїю́тсѧ, тогда̀ хꙋ́ждшее: ты́ же соблю́лъ є҆сѝ до́брое вїно̀ досе́лѣ. Сѐ сотворѝ нача́токъ зна́менїємъ і҆и҃съ въ ка́нѣ галїле́йстѣй, и҆ ꙗ҆вѝ сла́вꙋ свою̀, и҆ вѣ́роваша въ него̀ ᲂу҆ч҃нцы̀ є҆гѡ̀.

Дїа́конъ: Рце́мъ всѝ ѿ всеѧ̀ дꙋшѝ и҆ ѿ всегѡ̀ помышле́нїѧ на́шегѡ рце́мъ.

Гдⷭ҇и вседержи́телю бж҃е:

Поми́лꙋй на́съ бж҃е:

Є҆щѐ мо́лимсѧ ѡ҆ ми́лости, жи́зни, ми́рѣ, здра́вїи, сп҃се́нїи, посѣще́нїи рабѡ́въ бж҃їихъ, (и҆́мⷬ҇къ), и҆ помина́етъ и҆̀хже хо́щетъ.

Возгла́съ: Ꙗ҆́кѡ млⷭ҇тивъ:

Дїа́конъ: Гдⷭ҇ꙋ помо́лимсѧ.

Ли́къ: Гдⷭ҇и поми́лꙋй:

Сщ҃е́нникъ мл҃твꙋ сїю̀:

Гдⷭ҇и бж҃е на́шъ, во сп҃си́тельномъ твое́мъ смотре́нїи, сподо́бивый въ ка́нѣ галїле́йстѣй, чⷭ҇тны́й показа́ти бра́къ твои́мъ прише́ствїемъ, са́мъ ны́нѣ рабы̑ твоѧ̑, (и҆́мⷬ҇къ), и҆ (и҆́мⷬ҇къ) ꙗ҆̀же бл҃говоли́лъ є҆сѝ сочетава́тисѧ дрꙋ́гъ дрꙋ́гꙋ, въ ми́рѣ и҆ є҆диномы́слїи сохранѝ: чⷭ҇тны́й и҆́хъ бра́къ покажѝ, нескве́рное и҆́хъ ло́же соблюдѝ, непоро́чное и҆́хъ сожи́тельство пребыва́ти бл҃говолѝ, и҆ сподо́би ѧ҆̀ въ ста́рости масти́тѣй дости́гнꙋти, чи́стымъ се́рдцемъ дѣ́лающѧ за́пѡвѣди твоѧ̑.

Ты́ бо є҆сѝ бг҃ъ на́шъ, бг҃ъ є҆́же ми́ловати и҆ сп҃са́ти, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ, и҆ всест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.

Ли́къ: а҆ми́нь.

Дїа́конъ: Застꙋпѝ, сп҃сѝ, поми́лꙋй и҆ сохранѝ на́съ бж҃е, твое́ю бл҃года́тїю.

Ли́къ: Гдⷭ҇и поми́лꙋй.

Днѐ всегѡ̀ соверше́нна, свѧ́та:

Ли́къ: Пода́й гдⷭ҇и.

А҆́гг҃ла ми́рна:

Проще́нїѧ и҆ ѡ҆ставле́нїѧ грѣхѡ́въ:

До́брыхъ и҆ поле́зныхъ дꙋша́мъ:

Про́чее вре́мѧ живота̀ на́шегѡ:

Хрⷭ҇тїа́нскїѧ кончи́ны живота̀ на́шегѡ:

Соедине́нїе вѣ́ры и҆ прича́стїе ст҃а́гѡ дх҃а:

Ли́къ: Тебѣ̀ гдⷭ҇и.

Сщ҃е́нникъ возглаша́етъ:

И҆ сподо́би на́съ влⷣко, со дерзнове́нїемъ неѡсꙋжде́ннѡ смѣ́ти призыва́ти тебѐ нбⷭ҇наго бг҃а ѻ҆ц҃а̀, и҆ глаго́лати:

И҆ лю́дїе: Ѻ҆́ч҃е на́шъ: ве́сь до конца̀.

Сщ҃е́нникъ возглаша́етъ: Ꙗ҆́кѡ твоѐ є҆́сть црⷭ҇тво:

Ми́ръ всѣ̑мъ.

Главы̑ ва́шѧ гдⷭ҇еви приклони́те.

Та́же прино́ситсѧ ѻ҆́бщаѧ ча́ша, и҆ бл҃гословлѧ́етъ ю҆̀ сщ҃е́нникъ, и҆ глаго́летъ мл҃твꙋ сїю̀:

Дїа́конъ: Гдⷭ҇ꙋ помо́лимсѧ.

Бж҃е, всѧ̑ сотвори́вый крѣ́постїю твое́ю, и҆ ᲂу҆тверди́вый вселе́ннꙋю, и҆ ᲂу҆краси́вый вѣне́цъ всѣ́хъ сотворе́нныхъ ѿ тебѐ, и҆ ча́шꙋ ѻ҆́бщꙋю сїю̀ подава́ѧй сочетава́ющымсѧ ко ѻ҆бще́нїю бра́ка, бл҃гословѝ бл҃гослове́нїемъ дх҃о́внымъ.

Возгла́снѡ: Ꙗ҆́кѡ бл҃гослови́сѧ твоѐ и҆́мѧ, и҆ просла́висѧ твоѐ црⷭ҇тво:

Ли́къ: а҆ми́нь.

Та́же взе́мъ сщ҃е́нникъ въ рꙋ́кꙋ ѻ҆́бщꙋю ча́шꙋ, преподае́тъ и҆̀мъ три́жды: пе́рвѣе мꙋ́жꙋ, и҆ пото́мъ женѣ̀: И҆ а҆́бїе прїе́мъ ѧ҆̀ сщ҃е́нникъ, кꙋ́мꙋ держа́щꙋ созадѝ вѣнцы̀, ѡ҆браща́етъ ꙗ҆́кѡ ѡ҆́бразомъ крꙋ́га.

И҆ пое́тъ сщ҃е́нникъ, и҆лѝ лю́дїе настоѧ́щыѧ тропарѝ, во гла́съ є҃:

И҆са́їе ликꙋ́й, дв҃а, и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ человѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆блажа́емъ.

И҆ні́и, гла́съ з҃:

Ст҃і́и мꙋ́чєницы, до́брѣ страда́льчествовавшїи, и҆ вѣнча́вшїисѧ, моли́тесѧ ко гдⷭ҇ꙋ поми́ловатисѧ дꙋша́мъ на́шымъ.

Сла́ва тебѣ̀ хрⷭ҇тѐ бж҃е, а҆по́столѡмъ похвало̀, мꙋ́ченикѡвъ ра́дованїе, и҆́хже про́повѣдь, трⷪ҇ца є҆диносꙋ́щнаѧ.

Та́же взе́мъ вѣне́цъ жениха̀, глаго́летъ:

Возвели́чисѧ женишѐ ꙗ҆́коже а҆враа́мъ, и҆ бл҃гослови́сѧ ꙗ҆́коже і҆саа́къ, и҆ ᲂу҆мно́жисѧ ꙗ҆́коже і҆а́кѡвъ, ходѧ́й въ ми́рѣ, и҆ дѣ́лаѧй въ пра́вдѣ за́пѡвѣди бж҃їѧ.

И҆ внегда̀ взѧ́ти вѣне́цъ невѣ́сты, глаго́летъ:

И҆ ты̀ невѣ́сто, возвели́чисѧ ꙗ҆́коже са́рра, и҆ возвесели́сѧ ꙗ҆́коже реве́кка, и҆ ᲂу҆мно́жисѧ ꙗ҆́коже рахи́ль. веселѧ́щисѧ ѡ҆ свое́мъ мꙋ́жѣ, хранѧ́щи предѣ́лы зако́на, занѐ та́кѡ бл҃говолѝ бг҃ъ.

Дїа́конъ: Гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

Сщ҃е́нникъ мл҃твꙋ:

Бж҃е бж҃е на́шъ, прише́дый въ ка́нꙋ галїле́йскꙋю, и҆ та́мошнїй бра́къ бл҃гослови́вый, бл҃гословѝ и҆ рабы̑ твоѧ̑ сїѧ̑, твои́мъ про́мысломъ ко ѻ҆бще́нїю бра́ка сочета́вшыѧсѧ: бл҃гословѝ и҆́хъ вхо́ды и҆ и҆схо́ды, ᲂу҆мно́жи во бл҃ги́хъ живо́тъ и҆́хъ: воспрїимѝ вѣнцы̀ и҆́хъ въ црⷭ҇твїи твое́мъ, нескве́рны, и҆ непоро́чны, и҆ ненавѣ́тны соблюда́ѧй, во вѣ́ки вѣкѡ́въ.

Ли́къ: а҆ми́нь.

Сщ҃е́нникъ: Ми́ръ всѣ̑мъ.

Главы̑ ва́шѧ гдⷭ҇еви приклони́те.

И҆ мо́литсѧ сщ҃е́нникъ:

Ѻ҆ц҃ъ, сн҃ъ, и҆ ст҃ы́й дх҃ъ, всест҃а́ѧ, и҆ є҆диносꙋ́щнаѧ, и҆ живонача́льнаѧ трⷪ҇ца, є҆ди́но бж҃ество̀ и҆ црⷭ҇тво, да бл҃гослови́тъ ва́съ, и҆ да пода́стъ ва́мъ долгожи́тїе, бл҃гоча́дїе, преспѣ́ѧнїе живота̀ и҆ вѣ́ры, и҆ да и҆спо́лнитъ ва́съ всѣ́хъ сꙋ́щихъ на землѝ бл҃ги́хъ: да сподо́битъ ва́съ и҆ ѡ҆бѣща́нныхъ бла́гъ воспрїѧ́тїѧ, мл҃твами ст҃ы́ѧ бцⷣы, и҆ всѣ́хъ ст҃ы́хъ, а҆ми́нь.

Та́же вхо́дѧтъ, и҆ поздравлѧ́ютъ и҆̀хъ, и҆ цѣлова́нїе дрꙋ́гъ дрꙋ́га, и҆ быва́етъ ѿ сщ҃е́нника соверше́нный ѿпꙋ́стъ.

Ре́кшꙋ дїа́конꙋ: Премꙋ́дрость.

Ли́къ: Чⷭ҇тнѣ́йшꙋю херꙋві̑мъ:

Сщ҃е́нникъ ѿпꙋ́стъ:

И҆́же въ ка́нѣ галїле́йстѣй прише́ствїемъ свои́мъ че́стенъ бра́къ показа́вый, хрⷭ҇то́съ и҆́стинный бг҃ъ на́шъ, мл҃твами пречⷭ҇тыѧ своеѧ̀ мт҃ре, ст҃ы́хъ сла́вныхъ и҆ всехва́льныхъ а҆пⷭ҇лъ, ст҃ы́хъ бг҃овѣнча́нныхъ царе́й и҆ равноапⷭ҇лѡвъ, кѡнстанті́на и҆ є҆ле́ны, ст҃а́гѡ великомч҃нка проко́пїа, и҆ всѣ́хъ ст҃ы́хъ, поми́лꙋетъ и҆ сп҃се́тъ на́съ, ꙗ҆́кѡ бл҃гъ и҆ чл҃вѣколю́бецъ.

Гдⷭ҇и бж҃е на́шъ, вѣне́цъ лѣ́та бл҃гослови́вый, и҆ сїѧ̑ вѣнцы̀ возложи́ти преда́вый зако́номъ бра́ка, сочетава́ющымсѧ дрꙋ́гъ дрꙋ́гꙋ, и҆ мздꙋ̀ а҆́ки ѿдаѧ̀ и҆́мъ цѣломꙋ́дрїѧ: занѐ чи́сти ко и҆́же ѿ тебѐ ᲂу҆законоположе́нномꙋ бра́кꙋ сочета́шасѧ: са́мъ и҆ въ разрѣше́нїи си́хъ вѣнцє́въ, сочета́вшихсѧ дрꙋ́гъ дрꙋ́гꙋ бл҃гословѝ, и҆ сочета́нїе и҆́хъ нерастерза́емо соблюдѝ: да бл҃годарѧ́тъ вы́нꙋ всест҃о́е и҆́мѧ твоѐ, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Сщ҃е́нникъ: Ми́ръ всѣ̑мъ.

Согла̑снаѧ дости́гше рабѝ твоѝ гдⷭ҇и, и҆ послѣ́дованїе соверши́вше въ ка́нѣ галїле́йстѣй бра́ка, и҆ спрѧ́тавше ꙗ҆̀же въ не́мъ зна́мєнїѧ, сла́вꙋ тебѣ̀ возсыла́ютъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

И҆ ѿпꙋ́стъ.