[глⷡ҇а ѳ҃] Мл҃тва въ причаще́нїи гро́здїѧ въ ѕ҃-й де́нь а҆́ѵгꙋста.

Гдⷭ҇ꙋ помо́лимсѧ. Гдⷭ҇и поми́лꙋй.

Бл҃гословѝ гдⷭ҇и пло́дъ се́й ло́зный но́вый, и҆́же бл҃горастворе́нїемъ воздꙋ́шнымъ, и҆ ка́плѧми дожде́вными, и҆ тишино́ю вре́менною, въ се́й зрѣ́лѣйшїй прїитѝ ча́съ бл҃говоли́вый: да бꙋ́детъ въ на́съ ѿ тогѡ̀ рожде́нїѧ ло́знагѡ причаща́ющихсѧ въ весе́лїе, и҆ приноси́ти тебѣ̀ да́ръ во ѡ҆чище́нїе грѣхѡ́въ, сщ҃е́ннымъ и҆ ст҃ы́мъ тѣ́ломъ хрⷭ҇та̀ твоегѡ̀: съ ни́мже бл҃гослове́нъ є҆сѝ, со прест҃ы́мъ, и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

Вѣ́домо же бꙋ́ди, ꙗ҆́кѡ сїѧ̀ мл҃тва глаго́летсѧ над̾ гро́здїемъ, и҆дѣ́же вїногра́ды, и҆ прино́сѧтсѧ на бл҃гослове́нїе во хра́мъ въ се́й шесты́й де́нь а҆́ѵгꙋста. Здѣ́ же въ вели́цѣй рѡссі́и, и҆дѣ́же не ѡ҆брѣта́ютсѧ вїногра́ды, прино́сѧтсѧ въ се́й де́нь ко хра́мꙋ ꙗ҆́блѡка, и҆ глаго́летсѧ мл҃тва ѡ҆ приносѧ́щихъ нача́тки ѻ҆воще́й, є҆́йже нача́ло:

Влⷣко гдⷭ҇и бж҃е на́шъ: Та́кожде и҆ и҆́но ѻ҆во́щїе да прино́ситсѧ ко́еждо во своѐ вре́мѧ ко хра́мꙋ на бл҃гослове́нїе, и҆ мл҃тва глаго́летсѧ над̾ ни́ми та́же.