Субботние службы Октоиха для приходского клироса

Предлагаемая вниманию клирошан публикация субботних служб богослужебного Октоиха давно назрела. Это вызвано прежде всего тем, что во многих приходских храмах, помимо воскресно-праздничных служб, субботние службы также являются обязательными в расписании храмового богослужения. Однако именно субботние службы в том виде, в котором они изложены в Октоихе, вызывают наибольшее затруднение у храмовых уставщиков, чтецов и клирошан. В чём же конкретно проявляются эти трудности?

1. Отметим прежде всего то, что субботнее богослужение никогда не совершается в той очередности, как оно изложено в Октоихе. Октоих содержит в одном разделе (суббота) две разные службы – всем святым (аще «Бог Господь») и заупокойную (аще «Аллилуиа»). Устав не позволяет соединять оба варианта, поэтому при составлении каждой конкретной службы уставщик или регент должен переместить ряд текстов из одного эпизода службы в другой – из цикла стихир на «Господи, воззвах» в стиховны вечерни или из хвалитных в стиховны утрени. Нужно достаточно хорошо знать 12-ю и 13-ю главы Типикона («О службе субботней…»), чтобы запомнить все перестановки, и применять их, не отвлекаясь во время службы на чтение Типикона или Богослужебных указаний.

2. В субботнем богослужении присутствует очень важный элемент, именуемый в просторечии «Отдание гласа». Заключается он в том, что в стихирах на

«Господи, воззвах» и в тропаре рядовому святому на вечерни поются воскресные Богородичны гласа недели. Однако в контекст службы тропарный Богородичен «уходящего гласа» не помещен, что нелогично.

3. Если в субботу служится празднуемый святой, то устав предписывает петь перед каноном святого Богородичный канон воскресного Октоиха текущего гласа. Однако ирмосы указанного канона в воскресной службе выражены только инципитами (первыми словами), что вынуждает искать нужный ирмос в других богослужебных книгах.

4. Имеет место терминологическая неточность в субботних службах различных гласов. Например, устав предписывает петь на стиховне заупокойной службы один мученичен и два мертвена. В службе 5-го гласа тексты даны в другом соотношении – два мученична и один мертвен. Какой стих следует петь перед вторым мученичным – остается только догадываться. Да и сам термин «мученичны» достаточно точно в уставе обозначает особую категорию песнопений (стихиры на «Господи, воззвах», 4-я, 5-я, 6-я и на стиховне 1-я). Но в службе 3-го гласа термин «мученичны» заменен термином «мученикам», что некорректно – термин «мученикам» использован в предыдущем цикле стихир (первые три на «Господи, воззвах»).

Все перечисленные причины затрудняют проведение службы по современной редакции Октоиха.

В данной публикации предпринята попытка упорядочить субботние службы Октоиха для приходского клироса с учетом замечаний, приведенных выше.

Каждая суббота своего гласа представлена двумя вариантами служб (всем святым и за упокой). В этих службах тексты уже размещены в том порядке, который определен уставом для каждого из двух вариантов. Хор должен просто петь все так, как написано в одном из вариантов.

В публикации учтена устойчивая практика чтения на аллилуйной утрени не 1-го, а 2-го канона (заупокойного). Устав полагает чтение 2-го канона на повечерии, однако в современной приходской практике чин повечерия как правило не служится, и поэтому 2-й канон часто читается на утрени вместо 1-го, как наиболее подходящий по содержанию к заупокойной тематике службы.

Терминология обозначения жанра мученичных стихир приведена в соответствие с уставной терминологией.

Богородичны воскресные (тропарные), положенные при отдании гласа, выписаны наряду в конце вечерни каждой «всехсвятской» субботы.

Приложение включает в себя последование 17-й кафисмы в том виде, как полагает петь ее устав на заупокойной службе на две статии. Далее изложены остальные неизменяемые тексты заупокойной службы, вплоть до канона.

Изложена в кратком варианте схема-устав празднуемого святого в субботний день.

Венчает работу изложение ирмосов Богородичных канонов воскресного Октоиха – тех самых ирмосов, которыми следует открывать каждую песнь канона при празднуемом святом.

В заключение – сердечная благодарность тем пользователям православного Интернета, чьи выкладки отдельных текстов Октоиха существенно ускорили работу над публикацией.¹

Евгений Кустовский

Субботняя служба всем святым

(аще Бог Господь)

По предначинательном псалме стихословим кафисму 18-ю².

На Го́споди, воззва́х: стихиры святаго Минеи на 6 (каждая стихира по дважды).

Стих: А́ще беззако́ния на́зриши, Го́споди, Го́споди, кто постои́т?/ Я́ко у Тебе́ очище́ние есть.

Стихира святаго 1-я.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,/ упова́ душа́ моя́ на Го́спода.

Таяжде стихира.

Стих: От стра́жи у́тренния до но́щи, от стра́жи у́тренния/ да упова́ет Изра́иль на Го́спода.

Стихира святаго 2-я.

Стих: Я́ко у Го́спода ми́лость и мно́гое у Него́ избавле́ние:/ и Той изба́вит Изра́иля от всех беззако́ний его́.

Таяжде стихира.

Стих: Хвали́те Го́спода вси язы́цы,/ похвали́те Его́ вси лю́дие.

Стихира святаго 3-я.

Стих: Я́ко утверди́ся ми́лость Его́ на нас,/ и и́стина Госпо́дня пребыва́ет во век.

Таяжде стихира.

Слава: святаго Минеи.

И ныне: Догматик, глас 1: Всеми́рную сла́ву:

Аще же несть святому Славы, Слава, и ныне, Богородичен догматик, глас 1:

Всеми́рную Сла́ву,/ от челове́к прозя́бшую,/ и Влады́ку ро́ждшую,/ Небе́сную Дверь воспои́м Мари́ю Де́ву,/ безпло́тных песнь, и ве́рных удобре́ние./ Сия́ бо яви́ся Не́бо, и храм Божества́:/ Сия́ прегражде́ние вражды́ разруши́вши,/ мир введе́, и Ца́рствие отве́рзе./ Сию́ у́бо иму́ще ве́ры утвержде́ние,/ побо́рника и́мамы из Нея́ ро́ждшагося Го́спода,/ дерза́йте у́бо, дерза́йте, лю́дие Бо́жии:/ и́бо Той победи́т враги́,// я́ко Всеси́лен.

Входа несть. Све́те ти́хий:

Прокимен, глас 7: Бо́же, Засту́пник мой еси́ Ты,/ и ми́лость Твоя́ предвари́т мя.

Стих: Изми́ мя от враг мои́х, Бо́же, и от востаю́щих на мя изба́ви мя.

И абие, Сподо́би Го́споди: Ектения просительная.

На стиховне стихиры мученичны, глас 1:

Моли́твами, Го́споди, всех святы́х и Богоро́дицы,/ Твой мир даждь нам, и поми́луй нас,// я́ко еди́н Щедр.

Стих: К Тебе́ возведо́х о́чи мои́, живу́щему на небеси́. Се я́ко о́чи раб в руку́ госпо́дий свои́х, я́ко о́чи рабы́ни в руку́ госпожи́ своея́. Та́ко о́чи на́ши ко Го́споду Бо́гу на́шему,/ до́ндеже уще́дрит ны.

Е́же на суди́щи ва́ше испове́дание святи́и,/ де́монов оплева́ си́лу,/ и от пре́лести челове́ки свободи́./ Те́мже и глава́м усека́емым, взыва́сте:/ да бу́дет Го́споди, же́ртва душ на́ших благоприя́тна пред Тобо́ю,/ я́ко Тебе́ возлюби́вше,/ неради́хом о вре́менней жи́зни,// Человеколю́бче.

Стих: Поми́луй нас, Го́споди, поми́луй нас, я́ко по мно́гу испо́лнихомся уничиже́ния. Наипа́че напо́лнися душа́ на́ша поноше́ния гобзу́ющих/ и уничиже́ния го́рдых.

О до́брыя ва́шея ку́пли, святи́и!/ я́ко кро́ви да́сте, и небеса́ насле́довасте:/ и вре́менно искуси́вшеся, ве́чно ра́дуетеся./ Вои́стинну добра́ ва́ша ку́пля:/ тле́нная бо оста́вльше, нетле́нная восприя́сте,/ и со А́нгелы ликовству́юще,// пое́те непреста́нно Тро́ицу Единосу́щную.

Слава: святаго Минеи, И ныне: Богородичен по гласу Славы, от менших.

Аще же несть, Слава, и ныне, Богородичен, глас 1:

Вои́стинну па́че ума́ чу́дная Твоя́ вели́чия,/ Рождества́ Твоего́, Богоневе́сто,/ я́же пропове́даша/ проро́цы вси вся пресла́вная:/ зача́тие и рождество́, Всепе́тая, недомы́сленно и несказа́нно,// и́мже мир спасл есть, я́ко Милосе́рд.

Таже, Ны́не отпуща́еши:

По Трисвятом: Тропарь святаго Минеи. Слава, и ныне, Богородичен воскресный, глас 1:

Гаврии́лу веща́вшу Тебе́, Де́во, ра́дуйся,/ со гла́сом воплоща́шеся всех Влады́ка/ в Тебе́, святе́м киво́те,/ я́коже рече́ пра́ведный Дави́д,/ яви́лася еси́ ши́ршая небе́с,/ поноси́вши Зижди́теля Твоего́./ Сла́ва Все́льшемуся в Тя,/ сла́ва Проше́дшему из Тебе́,// сла́ва Свободи́вшему нас рождество́м Твои́м.

Ектения сугубая и отпуст.

На Бог Госпо́дь: тропарь святаго Минеи, дважды. Слава, и ныне, Богородичен воскресен по гласу тропаря.

И стихословится кафисма 16, на 3 славы.

По стихословии ектения малая, и чтутся седальны мученичны:

Страда́ния похвало́ю, и вене́чною по́честию, сла́внии страстоте́рпцы, оде́явшеся Тобо́ю, Го́споди, терпе́нием у́бо ран беззако́нных победи́ша, и си́лою Боже́ственною от небе́с побе́ду прия́ша; тех моли́твами и нас свободи́ от неви́димаго врага́, Спа́се, и спаси́ нас.

Стих: Ди́вен Бог во святы́х Свои́х, Бог Изра́илев.

Я́ко до́брии во́ини единому́дренно ве́ровавше, преще́ния мучи́телей не убоя́стеся, святи́и, приидо́сте усе́рдно ко Христу́, взе́мше Честны́й Крест; и, сконча́вше тече́ние, с небесе́ побе́ду прия́сте. Сла́ва Укре́пльшему вы; сла́ва Венча́вшему вы; сла́ва Де́йствующему ва́ми всем исце́ления.

Стих: Ду́ши их во благи́х водворя́тся.

В месте светле, в лице праведных упокой, Спасе, к Тебе́ преставльшихся, на Тя бо упование, Человеколюбче, возложиша. Приими́ моление о отцех и чадех, имже совершаем память, и оправди́ тех, яко Многомилостив.

Слава, и ныне, Богородичен: Гаврии́лу веща́вшу Тебе́, Де́во, ра́дуйся, со гла́сом воплоща́шеся всех Влады́ка в Тебе́, святе́м киво́те, я́коже рече́ пра́ведный Дави́д, яви́лася еси́ ши́ршая небе́с, поноси́вши Зижди́теля Твоего́. Сла́ва Все́льшемуся в Тя, сла́ва Проше́дшему из Тебе́, сла́ва Свободи́вшему нас рождество́м Твои́м.

И стихословится кафисма 17, на 3 славы.

По стихословии ектения малая, и чтутся седальны мученичны:

Ра́нами святы́х, и́же по Тебе́ пострада́ша, умоле́н бу́ди, Го́споди, и вся на́ша боле́зни и стра́сти исцели́, Человеколю́бче, мо́лимся.

Стих: Мно́ги ско́рби пра́ведным, и от всех их изба́вит я́ Госпо́дь.

Му́ченики Христо́вы мо́лим вси, и любо́вию прии́дем к ним с ве́рою: си́и бо о на́шем спасе́нии про́сят, и си́и вси источа́ют исцеле́ний благода́ть, си́и полки́ отгоня́ют бесо́вския, я́ко сохра́нницы ве́ры.

Стих: Блаже́ни, я́же избра́л и прия́л еси́, Го́споди.

Сме́ртную держа́ву, Христе́, упраздни́в, и нетле́ние земны́м источи́л еси́; и и́же в Тя ве́рующии не умира́ют, но живу́т вы́ну о Тебе́. Те́мже упоко́й, Го́споди, ду́ши раб Твои́х, и учини́ их со святы́ми Твои́ми, моли́твами Богоро́дицы да́руй тем проще́ние и воскресе́ние.

Слава, и ныне, Богородичен: Еди́на кре́пкая и те́плая Предста́тельнице ро́да челове́ческого, Богоро́дице Де́во, непреста́нно моли́ со проро́ки и му́ченики, со святи́тели же и по́стники и преподо́бными, Его́же родила́ еси́ па́че естества́ Бо́га Сло́ва, спасти́ вся́ческая.

Посем псалом 50. И поем канона три:

Канон святаго Минеи со ирмосом на 6, ирмос по дважды, посем канон святаго храма или обители на 4, и канон во Октоихе святым мученикам, и святителям и преподобным на 4³.

Аще храм Владычний, поем каноны сице:

Канон храма или обители на 6, ирмос по дважды, канон святаго Минеи на 4, канон во Октоихе всем святым на 4.

Песнь 1

Ирмос: Столпо́м о́гненным:

Припев: Вси святи́и, моли́те Бо́га о нас.

Щито́м благоче́стия огра́ждшеся боже́ственнии страда́льцы, устреми́шася к боре́нию; погуби́ша же врага́ всю си́лу, пою́ще песнь побе́дную Христу́, укре́пльшему их.

Упасо́сте, боже́ственнии па́стырие, ста́до Бо́жие на па́жити та́йней, во́лки отгна́вше па́лицею слове́с свяще́нных; и всели́стеся ра́дующеся во огра́ду небе́сную, иде́же есть Вели́кий Па́стырь.

И́же стра́сти поще́нием и боле́зньми умертви́вше пло́ти, боже́ственным манове́нием, живете́ по сме́рти, преподо́бнии; нас ра́ди ме́ртва бы́вшаго, Христа́ всегда́ моли́те уще́дрити нас.

Слава: Мертв быв, и ме́ртвым дарова́л еси́ боже́ственный Твой живо́т, и безсме́ртную жизнь, и́же ве́рою преше́дшия от жития́ тле́ннаго, Ца́рствия Твоего́ сотвори́ прича́стники, я́ко Благоутро́бен, и еди́н Многоми́лостив.

И ныне: И́же любо́вию Христо́вою уязвля́еми му́ченицы, и венча́вшияся от Бо́га жены́, Тебе́, Всенепоро́чную и до́брую в жена́х вси преподо́бнии почита́ют, ра́дующеся ве́рно, я́ко Цари́цу Всечестну́ю.

Песнь 3

Ирмос: Да утверди́тся се́рдце:

Припев: Вси святи́и, моли́те Бо́га о нас.

Мно́гия му́ки претерпе́вше, и благи́х мно́гих сподо́бистеся, мно́жество му́ченик свяще́нное; те́мже моли́твами ва́шими зол мои́х безме́рное мно́жество очи́стите.

Свяще́ннии, оде́явшеся пра́ведною благода́тию, и весе́лие кра́сное преподо́бных собо́р стяжа́вше, невеще́ственным служи́телем уподо́бишася.

Христо́вы проро́цы, боже́ственнии му́ченицы, свяще́нных жен сосло́вие, и́же пострада́вше му́жески и в посте́ просла́вистеся; и́хже моли́твами ми́лости Твоя́, Спа́се, всем да́руй.

Слава: И́же от земли́, Христе́, челове́ка руко́ю Твое́ю созда́в во́лею, и яже от нас вся верою преставльшияся рабы́ Твоя́ небесных благ сподоби.

И ныне: Богороди́тельнице Неискусобра́чная, проше́ния всех принеси́ Соде́телю на́шему Бо́гу, ро́ждшемуся от утро́бы Твоея́, я́ко да обря́щем соверше́нное лю́тых избавле́ние.

Катавасия: Да утверди́тся се́рдце мое́ в во́ли Твое́й, Христе́ Бо́же,/ И́же над вода́ми не́бо утвержде́й второ́е,// и основа́вый на вода́х зе́млю, Всеси́льне.

Ектения малая.

Седален святаго Минеи, с Богородичным его.

Песнь 4

Ирмос: Услы́шах, Го́споди, слух Твой:

Припев: Вси святи́и, моли́те Бо́га о нас.

Претерпе́вше, му́ченицы, вся́кия ра́ны, нра́вом до́блественным, я́коже овча́та непоро́чная Христу́ приведо́стеся, за всех закла́вшемуся Животу́.

Уста́ боже́ственная бы́вше, святи́телие, Бо́жиим сло́вом науча́еми, ду́ши изба́виша от уст льсти́ваго; и́хже благочестному́дренне почита́ем.

Кре́пцы Боже́ственным Ду́хом бы́вше отцы́ боже́ственнии, кре́пко победи́сте духо́в лука́вствия, преподо́бнии, благода́тию.

Слава: Умертви́ся, Животе́ наш, во́лею на дре́ве, и́же ве́рою преше́дшия живота́ сподо́би ве́чнаго, Человеколю́бче.

И ныне: Не отверго́шася Го́спода же́нский лик, стра́ждуще му́жески, и не победи́шася теле́сными сластьми́, святи́и, Споспе́шницу Тя иму́ще, Пречи́стая.

Песнь 5

Ирмос: Све́тлый нам возсия́ свет:

Припев: Вси святи́и, моли́те Бо́га о нас.

Вооружи́вшеся благоче́стием, не уя́звлени яви́стеся му́ченицы, борца́ стрела́ми, и победоно́сцы благода́тию бы́вше, венцы́ получи́сте.

Пома́за ма́стию боже́ственною Госпо́дь свяще́нники Своя́, упа́сшия в преподо́бии ве́рных мно́жества, и наста́вльшия ко огра́де небе́сней.

Священному́ченицы свяще́ннейшии, преподо́бнии вси, и́же Ду́ха уста́вы соблю́дше, и Ца́рствию прича́стницы бы́вше, боже́ственно прославля́етеся.

Слава: И́хже ны́не преста́вил еси́ повеле́нием Твои́м, Влады́ко Го́споди, сподо́би Ца́рствия Твоего́ со святы́ми, вся презира́я им дре́вняя согреше́ния.

И ныне: И́же посто́м и страда́нием сла́ву обре́тше небе́сную жены́, Пречи́стая, Тебе́ Предста́тельницу иму́ще, зми́еву держа́ву разруши́ша.

Песнь 6

Ирмос: Проро́ка Ио́ну подража́я:

Припев: Вси святи́и, моли́те Бо́га о нас.

Умерщвле́ни бы́вше ран мно́гих наведе́ньми, жизнь и́стинную насле́довасте вку́пе, моля́щеся спасти́ся всем нам, святи́и му́ченицы.

Денни́цы светоза́рныя позна́ни бы́сте на земли́, благоче́стия све́том озари́сте ве́рныя, пресла́внии Христо́вы ору́жницы, и святи́телие прему́дрии. Стра́нни яви́стеся на земли́, и гра́ждане небе́снии, богоно́снии по́стницы, умертви́вше пло́ти мудрова́ния воздержа́нием и смире́нием.

Слава: Невече́рнему Твоему́ све́ту, и сла́дости и́стинней, я́же преста́вил еси́ ве́рныя, покажи́ прича́стники, Человеколю́бче, и святы́х собо́ром сих сопричти́.

И ныне: И́же пострада́вшия кре́пко, и пости́вшияся те́пле, Тобо́ю псало́мски во след приведо́шася Христу́, Всепе́тая Богороди́тельнице, вся́ческих Царю́.

Катавасия: Проро́ка Ио́ну подража́я, вопию́:/ живо́т мой, Бла́же, свободи́ из тли,// и спаси́ мя, Спа́се ми́ра, зову́ща: сла́ва Тебе́.

Ектения малая.

Кондак и икос святаго Минеи.

Песнь 7

Ирмос: Су́щим в пещи́ отроко́м:

Припев: Вси святи́и, моли́те Бо́га о нас.

Искуси́вшеся я́ко зла́то во огни́ му́ченицы все́ми му́ками, светле́йше вся́каго зла́та в любви́ Боже́ственней яви́шася, и в сокро́вищах небе́сных сохране́ни бы́ша.

Я́ко свяще́нницы, я́ко боже́ственни слуги́ бы́вше, вси святи́телие свяще́ннии, принесо́сте Бо́гу же́ртвы безкро́вныя, и лю́ди упа́сше, иде́же Вели́кий Па́стырь, всели́стеся.

Не покори́вшеся страсте́м пло́ти, безстра́стием я́ко в ри́зу та́йну преподо́бнии обле́кшеся, сожи́телие А́нгелом яви́шася; и́хже моли́твами, Христе́, изба́ви нас от искуше́ний.

Слава: Иде́же пи́ща есть та́йная, иде́же сия́ет свет лица́ Твоего́, Христе́, я́же от нас преста́вльшияся в ве́ре, Благода́телю, всели́, сла́вити благоче́стно Твою́ благосты́ню.

И ныне: Тебе́, Всесвята́я, Пречи́стая, святы́е жены́ иму́ще добро́ту, лику́ют со А́нгелы ра́достно и Бо́га Сло́ва сла́вят ро́ждшагося пло́тию из Тебе́, за милосе́рдие мно́гое.

Песнь 8

Ирмос: Его́же ужаса́ются А́нгели:

Припев: Вси святи́и, моли́те Бо́га о нас.

Львов зия́ния преидо́ша невре́дно, и коно́бов вре́ния претеко́ша кре́пко му́ченицы вси, прохлажда́еми огне́м Боже́ственнаго Ду́ха пресла́вно.

Дая́ проро́ком Свои́м предве́дети да́льняя, и святи́тели Твоя́ умудри́л еси́ свяще́нно; тех моли́твами, Христе́ Бо́же, просвети́ сердца́ ве́рно пою́щих Тя.

Распе́нше себе́, преподо́бнии, ми́рови, живо́т преми́рный насле́довасте по́стницы, с су́щими от ве́ка все́х Бо́гу угоди́вшими преподо́бно и пра́ведно.

Благослови́м Отца́ и Сы́на и Свята́го Ду́ха, Го́спода.

И́же созда́вый челове́ка от земли́ богоде́льно, я́же от земли́ преста́вил еси́ ве́рныя, я́ко Благ, пи́щи ра́йския сподо́би, вся презира́я, я́же от них соде́янная.

И ныне: До́брую и Непоро́чную, Чи́стая в жена́х, жены́ пострада́вшия зна́юще Тя я́ве, Де́во, моли́твы творя́т с Тобо́ю к Бо́гу, спасти́ся от бед рабо́м Твои́м.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Катавасия: Его́же ужаса́ются А́нгели, и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,// и превозноси́те во вся ве́ки.

Таже, поем Честне́йшую:

Песнь 9

Ирмос: Живоприе́мный исто́чник:

Припев: Вси святи́и, моли́те Бо́га о нас.

Свяще́нных му́ченик почти́м свяще́нная боре́ния ра́дующеся, страда́ния же и ра́ны, пригвожде́ния и изгна́ния, и заколе́ние блаже́нное, и́мже Христу́ насле́дницы яви́шася.

Я́ко свяще́нницы Бо́жии, облеко́шася в пра́вду, боже́ственнии уго́дницы; я́ко в преподо́бии пожи́вше, и́же в посте́ я́ве сконча́вшиися, ра́дуются, Христа́ велича́юще.

Уста́ Боже́ственная Госпо́дня бы́вше, проро́цы вси, всем Его́ провозвести́ша свет; с ни́миже ны́не веселя́тся и жены́, кре́пко подвиза́вшияся, и посто́м Бо́гу угоди́вшия.

Слава: И́же все́ми ца́рствующая си́ло, Твоего́ Ца́рствия покажи́ прича́стники, со святы́ми Твои́ми, я́же от земли́ преста́вил еси́, и я́же соде́янная и́ми, Бо́же, всех пре́зри премно́гою бла́гостию Твое́ю.

И ныне: Я́же Свет ро́ждшая Боже́ственный, Безле́тный, вся моя́ разреши́ ле́тная прегреше́ния, Твои́ми мольба́ми, и ум мой просвети́, омрача́емый при́сно ле́ностию, да Тя пою́ и ве́рно велича́ю.

Катавасия: Живоприе́мный исто́чник приснотеку́щий,/ светоно́сный свети́льник благода́ти,/ храм одушевле́нный, сень пречи́стую,/ небесе́ и земли́ простра́ннейшую,// Богоро́дицу, ве́рнии, велича́ем.

Таже, Досто́йно есть: и ектения малая.

Светилен глаголем прежде святаго Минеи.

Слава: И́же и ме́ртвыми и живы́ми облада́яй я́ко Бог, и святы́ми Твои́ми всю зе́млю просвети́вый, Соде́телю всех, пою́щия Тя спаса́й.

И ныне, Богородичен: Мы о Тебе́ хва́лимся, Богоро́дице, и к Бо́гу Тя и́мамы предста́тельство, простри́ ру́ку Твою́ необори́мую, и сокруши́ враги́ на́ша, Твои́м низпосли́ рабо́м по́мощь от Свята́го.

И абие псалмы хвалитныя, и прочая.

На стиховне стихиры мученикам, глас 1:

Страстоте́рпцы Христо́вы,/ прииди́те, лю́дие, вси почти́м,/ пе́ньми и пе́сньми духо́вными,/ просве́щники ми́ра, и пропове́дники ве́ры:/ исто́чники приснотеку́щия,/ от ни́хже истека́ют ве́рным исцеле́ния./ Тех моли́твами, Христе́ Бо́же наш,/ мир ми́ру Твоему́ да́руй,// и душа́м на́шим ве́лию ми́лость.

Стих: Испо́лнихомся зау́тра ми́лости Твоея́, Го́споди, и возра́довахомся и возвесели́хомся, во вся́ дни́ на́ша возвесели́хомся, за дни́, в ня́же смирил́ ны́ еси́, ле́та, в ня́же ви́дехом зла́я: и при́зри на рабы́ Твоя́, и на дела́ Твоя́,́ / и наста́ви сы́ны их.

Си́и во́ини Царя́ Вели́каго/ проти́вишася повеле́нием мучи́телевым,/ до́блественне неради́ша о му́ках,/ и лесть всю попра́вше,/ досто́йне венча́ни бы́ша./ Про́сят от Спа́са ми́ра,// и душа́м на́шим ве́лия ми́лости.

Стих: И бу́ди све́тлость Го́спода Бо́га на́шего на нас, и дела́ рук на́ших испра́ви на нас,/ и де́ло рук на́ших испра́ви.

Вас, прехва́льнии му́ченицы,/ ни скорбь, ни теснота́, ни глад, ни гоне́ние,/ ниже́ ра́ны, ни я́рость звере́й,/ ни мечь, ниже́ огнь претя́й/ разлучи́ти от Бо́га возмого́ша:/ любо́вию же па́че я́же к Нему́,/ я́ко в чужди́х подви́гшеся телесе́х,/ естество́ забы́вше, и смерть презре́сте./ Те́мже и досто́йно трудо́в ва́ших мзду прия́ли есте́,/ Небе́сному Ца́рствию насле́дницы бы́вше:// Христу́ моли́теся о душа́х на́ших.

Слава: святаго Минеи, И ныне: Богородичен по гласу Славы, от менших.

Аще же несть, Слава, и ныне, Богородичен, глас 1:

Ра́дуйся от нас, Свята́я Богоро́дице Де́во,/ Чи́стый Сосу́де всея́ вселе́нныя:/ Свеще́ неугаси́мая,/ Вмести́лище Невмести́маго, Хра́ме необори́мый./ Ра́дуйся, из Нея́же роди́ся А́гнец Бо́жий,// взе́мляй грехи́ всего́ ми́ра.

Таже, Бла́го есть:

Трисвятое, по О́тче наш: тропарь святаго Минеи.

Слава, и ныне, Богородичен по гласу тропаря от менших, в конец утрени.

Ектения сугубая и час первый.

Блаженны, глас 1:

Блаже́ни миротво́рцы,/ я́ко ти́и сы́нове Бо́жии нареку́тся.

Сне́дию изведе́ из рая́ враг Ада́ма:/ Кресто́м же введе́ Христо́с вонь разбо́йника, / помяни́ мя, Го́споди, вопию́ща,// егда́ прии́деши во Ца́рствии Твое́м.

Блаже́ни изгна́ни пра́вды ра́ди,/ я́ко тех есть Ца́рство Небе́сное.

Страда́лец мно́жество безчи́сленное,/ святи́телей, и прему́дрых жен,/ и проро́к пресла́вных,/ мо́лят Тя, Иису́се Бо́же:/ пода́ждь нам оставле́ние прегреше́ний,// и ве́лию ми́лость.

Блаже́ни есте́, егда́ поно́сят вам,/ и изжену́т, и реку́т всяк зол глаго́л, на вы лжу́ще Мене́ ра́ди.

И́же тече́ние соверши́вше,/ свяще́ннейшии Христо́вы страда́льцы,/ со святи́тели свяще́нными и проро́ки,// сподо́бистеся во гра́де небе́снем жи́ти, со А́нгелы веселя́щеся.

Ра́дуйтеся и весели́теся,/ я́ко мзда ва́ша мно́га на небесе́х.

Во све́те, Христе́, учини́ невече́рнем,/ я́же преста́вил еси́,/ прегреше́ния их презре́в, я́ко Ще́дрый Бог:// да Твою́ сла́вим, Благода́телю, безчи́сленную ми́лость.

Сла́ва Отцу́ и Сы́ну/ и Свято́му Ду́ху.

Отцу́ поклони́мся, и Сы́на славосло́вим,/ и Пресвята́го Ду́ха вси ве́рнии воспои́м:/ помяни́ нас зову́щих,// Единосу́щная Тро́ице, Еди́нице Бо́же.

И ны́не и при́сно/ и во ве́ки веко́в. Ами́нь.

Я́ко пала́ту простра́нную, и престо́л сла́вы, и о́блак све́тел,/ песносло́вим Тя, Чи́стая, и мо́лим:/ разори́ о́блак мра́чный от душ на́ших,// боже́ственными моли́твами Твои́ми.

На литургии всем святым 15

Поем тропари и кондаки на входе сице:

В храме святаго:

Тропарь всем святым, глас 2: Апо́столи, му́ченицы и проро́цы,/

святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о нас Того́, я́ко Бла́га, моли́те,// спасти́ся, мо́лимся, душа́м на́шим.

Тропарь святаго Минеи.

Кондак святаго Минеи.

Слава, кондак, глас 8:

Со святы́ми упоко́й,/ Христе́, души́ ра́б Твои́х,/ иде́же не́сть боле́знь, ни печа́ль,/ ни воздыха́ние, //но жи́знь безконе́чная.

И ныне, глас тойже:

Я́ко нача́тки естества́, Насади́телю тва́ри,/ вселе́нная прино́сит Ти, Го́споди, богоно́сныя му́ченики;/ тех моли́твами в ми́ре глубо́це// Це́рковь Твою́, жи́тельство Твое́ Богоро́дицею соблюди́, Многоми́лостиве.

В храме Господском или Богородичном:

Тропарь храма Христова или Богородицы.

Тропарь всем святым: Апо́столи, му́ченицы и проро́цы:

Тропарь святаго Минеи.

Кондак святаго Минеи.

Слава: Со святы́ми упоко́й:

И ныне, глас 8: Я́ко нача́тки естества́:

Прокимен, глас 8: Весели́теся о Го́споде,/ и ра́дуйтеся, пра́веднии.

Стих: Блаже́ни, и́хже оста́вишася беззако́ния, и и́хже прикры́шася греси́.

Аллилуиа, глас 4: Воззва́ша пра́веднии, и Госпо́дь услы́ша их.

Стих: Мно́ги ско́рби пра́ведным, и от всех их изба́вит я́ Госпо́дь.

Причастен: Ра́дуйтеся, пра́веднии, о Го́споде, пра́вым подоба́ет похвала́.

На Го́споди, воззва́х: стихиры святаго Минеи, 3.

Стих: А́ще беззако́ния на́зриши, Го́споди, Го́споди, кто постои́т?/ Я́ко у Тебе́ очище́ние есть.

Стихира святаго 1-я.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,/ упова́ душа́ моя́ на Го́спода.

Стихира святаго 2-я.

Стих: От стра́жи у́тренния до но́щи, от стра́жи у́тренния/ да упова́ет Изра́иль на Го́спода.

Стихира святаго 3-я.

Таже поем мученичны гласа, 3, глас 1:

Стих: Я́ко у Го́спода ми́лость и мно́гое у Него́ избавле́ние:/ и Той изба́вит Изра́иля от всех беззако́ний его́.

Моли́твами, Го́споди, всех святы́х и Богоро́дицы,/ Твой мир даждь нам, и поми́луй нас,// я́ко еди́н Щедр.

Стих: Хвали́те Го́спода вси язы́цы,/ похвали́те Его́ вси лю́дие.

Е́же на суди́щи ва́ше испове́дание святи́и,/ де́монов оплева́ си́лу,/ и от пре́лести челове́ки свободи́./ Те́мже и глава́м усека́емым, взыва́сте:/ да бу́дет Го́споди, же́ртва душ на́ших благоприя́тна пред Тобо́ю,/ я́ко Тебе́ возлюби́вше,/ неради́хом о вре́менней жи́зни,// Человеколю́бче.

Стих: Я́ко утверди́ся ми́лость Его́ на нас,/ и и́стина Госпо́дня пребыва́ет во век.

О до́брыя ва́шея ку́пли, святи́и!/ я́ко кро́ви да́сте, и небеса́ насле́довасте:/ и вре́менно искуси́вшеся, ве́чно ра́дуетеся./ Вои́стинну добра́ ва́ша ку́пля:/ тле́нная бо оста́вльше, нетле́нная восприя́сте,/ и со А́нгелы ликовству́юще,// пое́те непреста́нно Тро́ицу Единосу́щную.

Слава, и ныне, Богородичен, глас 1:

Всеми́рную Сла́ву,/ от челове́к прозя́бшую,/ и Влады́ку ро́ждшую,/ Небе́сную Дверь воспои́м Мари́ю Де́ву,/ безпло́тных песнь, и ве́рных удобре́ние./ Сия́ бо яви́ся Не́бо, и храм Божества́:/ Сия́ прегражде́ние вражды́ разруши́вши,/ мир введе́, и Ца́рствие отве́рзе./ Сию́ у́бо иму́ще ве́ры утвержде́ние,/ побо́рника и́мамы из Нея́ ро́ждшагося Го́спода,/ дерза́йте у́бо, дерза́йте, лю́дие Бо́жии:/ и́бо Той победи́т враги́,// я́ко Всеси́лен.

Входа несть. Прокимен дне, таже: Сподо́би, Го́споди:

На стиховне поем мученичен и два мертвена, глас 1:

Мученичен: Прехва́льнии му́ченицы,/ вас ни земля́ потаи́ла

есть,/ но не́бо прия́т вы,/ и отверзо́шася вам ра́йския две́ри,/ и внутрь бы́вше дре́ва живо́тнаго наслажда́етеся:/ Христу́ моли́теся,// дарова́ти душа́м на́шим мир и ве́лию ми́лость.

Стих: Блаже́ни, я́же избра́л/ и прия́л еси́, Го́споди.

Покоин: Ка́я жите́йская сла́дость/ пребыва́ет печа́ли неприча́стна?/ Ка́я ли сла́ва стои́т на земли́ непрело́жна?/ Вся се́ни немощне́йша, и вся со́ний преле́стнейша:/ во еди́н час вся сия́ смерть прие́млет./ Но во све́те, Христе́, лица́ Твоего́,/ и в наслажде́нии Твоея́ красоты́,// я́же избра́л еси́, упоко́й я́ко Человеколю́бец.

Стих: Ду́ши их/ во благи́х водворя́тся.

Мертвен: Никто́же безгре́шен,/ никто́же от челове́к быв,/ то́кмо Ты Еди́не Безсме́ртне:/ те́мже рабы́ Твоя, я́ко Бог Ще́дрый,/ во све́те со а́нгельскими ликостоя́нии Твои́ми учини́,/ благоутро́бием Твои́м,/ презира́я беззако́ния,// и подая́ им проще́ние.

Слава: святаго Минеи, И ныне: Богородичен по гласу Славы.

Аще же несть, Слава, и ныне, Богородичен, глас 1:

Вои́стинну па́че ума́ чу́дная Твоя́ вели́чия,/ Рождества́ Твоего́, Богоневе́сто,/ я́же пропове́даша/ проро́цы вси вся пресла́вная:/ зача́тие и рождество́ Всепе́тая недомы́сленно и несказа́нно,// и́мже мир спасл есть, я́ко Милосе́рд.

Таже, Ны́не отпуща́еши:

По Трисвятом: Тропари, глас 2:

Апо́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о нас Того́, я́ко Бла́га моли́те// спасти́ся, мо́лимся, душа́м на́шим.

Слава:

Помяни́, Го́споди, я́ко Благ, рабы́ Твоя́,/ и ели́ка в житии́ согреши́ша, прости́;/ никто́же бо безгре́шен, то́кмо Ты,// моги́й и преста́вленным да́ти поко́й.

И ныне:

Ма́ти Свята́я неизрече́ннаго Све́та,/ а́нгельскими Тя пе́сньми почита́юще// благоче́стно велича́ем.

Аллилуиа, во глас 2-й, таже тропарь: Апо́столи, му́ченицы: дважды.

Слава: Помяни́, Го́споди: И ныне: Ма́ти Свята́я:

Посем кафисма 16.

Ектения малая обычная, и глаголем седальны мученичны:

Я́ко до́брии во́ини единому́дренно ве́ровавше, преще́ния мучи́телей не убоя́стеся, святи́и, приидо́сте усе́рдно ко Христу́, взе́мше Честны́й Крест; и, сконча́вше тече́ние, с небесе́ побе́ду прия́сте. Сла́ва Укре́пльшему вы; сла́ва Венча́вшему вы; сла́ва Де́йствующему ва́ми всем исце́ления.

Ра́нами святы́х, и́же по Тебе́ пострада́ша, умоле́н бу́ди, Го́споди, и вся на́ша боле́зни и стра́сти исцели́, Человеколю́бче, мо́лимся.

Стих: Ди́вен Бог во святы́х Свои́х, Бог Изра́илев.

Му́ченики Христо́вы мо́лим вси, и любо́вию прии́дем к ним с ве́рою: си́и бо о на́шем спасе́нии про́сят, и си́и вси источа́ют исцеле́ний благода́ть, си́и полки́ отгоня́ют бесо́вския, я́ко сохра́нницы ве́ры.

Стих: Блаже́ни, я́же избра́л и прия́л еси́, Го́споди.

Сме́ртную держа́ву, Христе́, упраздни́в, и нетле́ние земны́м источи́л еси́; и и́же в Тя ве́рующии не умира́ют, но живу́т вы́ну о Тебе́. Те́мже упоко́й, Го́споди, ду́ши раб Твои́х, и учини́ их со святы́ми Твои́ми, моли́твами Богоро́дицы да́руй тем проще́ние и воскресе́ние.

Слава, и ныне, Богородичен: Еди́на кре́пкая и те́плая Предста́тельнице ро́да челове́ческаго, Богоро́дице Де́во, непреста́нно моли́ со проро́ки и му́ченики, со святи́тели же и по́стники и преподо́бными, Его́же родила́ еси́ па́че естества́ Бо́га Сло́ва, спасти́ вся́ческая.

Глаголем и непорочны на 2 статии, с припевы их (зри сия в приложении).

И прочая до канона вся за упокой, зри в приложении.

Каноны же поем сице:

Канон святаго Минеи со ирмосом на 6, ирмос по дважды, посем канон святаго храма или обители на 4, и канон во Октоихе второй, за упокой, на 4⁴.

Аще храм Владычний, поем каноны сице:

Канон храма или обители на 6, ирмос по дважды, канон святаго Минеи на 4, канон во Октоихе, второй, на 4.

Канон усопшим, глас 1⁵:

Песнь 1

Ирмос: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая проти́вныя сотре́,// изра́ильтяном путь глубины́ новосоде́лавшая.

Припев: Ди́вен Бог во святы́х Свои́х, Бог Изра́илев.

Врата́ сме́рти и вереи́, Твое́ю сме́ртию сокруши́л еси́, Безсме́ртне, врата́ отве́рзи, Влады́ко, па́че ума́ безсме́ртия усо́пшим, моли́твами страстоте́рпец Твои́х.

Припев: Упоко́й, Го́споди, ду́ши усо́пших раб Твои́х.

Да боже́ственнаго живота́ сподо́бимся, соше́л еси́ к сме́рти, тоя́ же испрове́рг сокро́вища, нас отту́ду извле́кл еси́: ны́не же, Жизнода́вче, преста́вленныя упоко́й.

Слава: Ты мое́ тле́нное же и ме́ртвенное восприи́м, в нетле́ние обле́кл еси́, и к безконе́чному житию́ и блаже́нному возне́сл еси́, иде́же я́ко Щедр, и́хже прия́л еси́, упоко́й.

И ныне: Ро́ждшую Е́же от Бо́га Бо́жие Сло́во, ве́рнии воспои́м: Та бо Всечи́стая путь жи́зни уме́ршим бысть, Ю́же я́ко Богоприе́мницу и Богоро́дицу просла́вим.

Песнь 3

Ирмос: Еди́не, ве́дый челове́ческаго существа́ не́мощь/ и ми́лостивно в не́ вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й:// одушевле́нный хра́ме неизрече́нныя сла́вы Твоея́, Человеколю́бче.

Припев: Ди́вен Бог во святы́х Свои́х, Бог Изра́илев.

Я́ко еди́н Благ сый, я́ко еди́н Многоми́лостив, я́же благоче́стно к Тебе́ отше́дшия, в небе́сных селе́ниих упоко́й, иде́же неизрече́нная ра́дость и наслажде́ние, и иде́же собо́р му́ченический весели́тся.

Припев: Упоко́й, Го́споди, ду́ши усо́пших раб Твои́х.

Ты еди́н яви́лся еси́ на земли́, Спа́се мой, безгре́шен, И́же грехи́ ми́ра взе́мляй я́ко Милосе́рд: от ми́ра сего́ преста́вльшихся ве́рою, ду́ши упоко́й во дво́рех святы́х Твои́х, в сла́дости ра́йстей, Человеколю́бче.

Сла́ва: Сме́рти держа́ву низло́ж, живо́т неконча́емый всем ве́рным источи́л еси́, Влады́ко: в том у́бо учини́ благоче́стно отше́дшия, презира́я безме́рная прегреше́ния, и проща́я грехи́ их, Человеколю́бче.

И ныне: Без се́мене зача́т, Чи́стая, Сло́во Присносу́щное, пло́тски к на́м прише́дшее, и сме́рти кре́пость разори́вшее, и ме́ртвым воскресе́ние и жизнь ве́чную Свои́м милосе́рдием да́рующее.

Катавасия: Еди́не, ве́дый: (зри в начале песни)

Ектения малая, обычная.

Кондак, икос и седален с Богородичным святаго Минеи.

Песнь 4

Ирмос: Го́ру Тя́, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву/ провозглаша́ше Свято́му// во спасе́ние на́ше и обновле́ние.

Припев: Ди́вен Бог во святы́х Свои́х, Бог Изра́илев.

Умертви́в ад непобеди́мою Твое́ю си́лою, вмене́н был еси́ в ме́ртвых, еди́н сый свобо́дь, Христе́, ду́ши свободи́ благочести́вых, и е́же в нем осужде́ния, святы́х му́ченик мольба́ми.

Припев: Упоко́й, Го́споди, ду́ши усо́пших раб Твои́х.

И́же всех сый, я́ко Влады́ка, противодосто́йную и́же от Ада́ма Твоего́ заколе́ния, изба́ву дал еси́ и це́ну; те́мже мо́лимся Твои́м щедро́там, преста́вльшияся упоко́й, согреше́ний подая́ оставле́ние.

Слава: Прия́л еси́, Спа́се мой, е́же во гро́бе положе́ние, и я́же во гробе́х жи́ти осужде́нныя мертвецы́, я́ко Бог воскреси́л еси́. Ны́не же жи́зни присносу́щныя сподо́би преста́вленныя, я́ко еди́н Человеколю́бец.

И ныне: Спасе́ся ро́д челове́ческий Рождество́м Твои́м: Ты́ бо родила́ еси́ нам Ипоста́сный Живо́т, сме́рти потребле́ние, и к жи́зни соде́ловающий восхо́д, Богороди́тельнице Пренепоро́чная Влады́чице.

Песнь 5

Ирмос: Просвети́вый сия́нием/ прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия// правосла́вно пою́щих Тя.

Припев: Ди́вен Бог во святы́х Свои́х, Бог Изра́илев.

Исцеля́яй от я́да сме́ртнаго, смерть прия́т, и сме́рти жа́ло притупи́л еси́: но Сам упоко́й, и́хже прия́л еси́, Жизнода́вче, му́ченик мольба́ми.

Припев: Упоко́й, Го́споди, ду́ши усо́пших раб Твои́х.

Умерщвле́ния и тле́ния челове́ки свободи́вый, ду́ши ве́рно преста́вленных учини́ во дво́рех святы́х Твои́х, отню́дуже отбеже́ вся́ка скорбь, и весе́лие водворя́ется.

Слава: Рай у́бо с Тобо́ю пове́шенному, я́ко отве́рзл еси́; ны́не приими́ ду́ши, Влады́ко, к Тебе́ ве́рою преста́вльшияся, подая́ им в Це́ркви пе́рвенец водвори́тися.

И ныне: Избавля́ющи на Тя наде́жды держа́ву иму́щих, к приста́нищу Боже́ственныя во́ли ти́хо наста́ви, Ма́терним Твои́м дерзнове́нием к Сы́ну Твоему́, Благослове́нная Всенепоро́чная.

Песнь 6

Ирмос: Обы́де нас после́дняя бе́здна,/ несть избавля́яй,/ вмени́хомся, я́ко о́вцы заколе́ния,/ спаси́ лю́ди Твоя́, Бо́же наш,// Ты бо кре́пость немощству́ющих и исправле́ние.

Припев: Ди́вен Бог во святы́х Свои́х, Бог Изра́илев.

Я́ко Милосе́рд, преста́вленным да́руй прегреше́ний проще́ние, и ве́чное наслажде́ние подая́, иде́же сия́ет лица́ Твоего́ све́тлость, и озаря́ет страстоте́рпцы Твоя́.

Припев: Упоко́й, Го́споди, ду́ши усо́пших раб Твои́х.

И́же кро́вию от ребр Твои́х исте́кшею мир искупи́л еси́, ве́рою усо́пшия у́бо, Христе́, изба́ви честны́ми страстьми́ Твои́ми: Ты бо це́ну за всех Себе́ дал еси́.

И́же созда́вый мя рука́ма пречи́стыми пе́рвее и дух дарова́вый, и к земли́ низпа́дша зле, па́ки обнови́вый красне́йше, ны́не ду́ши преста́вльшихся Сам упоко́й.

Слава: Черто́гу Твоему́ светоно́сному, Го́споди, всели́ти сподо́би, я́же в ве́ре к Тебе́ усо́пшия, тех презира́я прегреше́ния, я́ко Благ, и Милосе́рд, и Многоми́лостив.

И ныне: Пое́м Тя, Благослове́нная Чи́стая, Ея́же ра́ди нам возсия́ су́щим во тьме и се́ни сме́ртней, пра́вды незаходи́мое Со́лнце: Ты бо на́шего спасе́ния Хода́таица была́ еси́.

Катавасия: Обы́де нас после́дняя бе́здна:

Ектения малая, за упокой.

Кондак, глас 8:

Со святы́ми упоко́й,/ Христе́, души́ ра́б Твои́х,/ иде́же не́сть боле́знь, ни печа́ль,/ ни воздыха́ние, //но жи́знь безконе́чная.

Икос:

Сам Еди́н еси́ Безсме́ртный,/ сотвори́вый и созда́вый челове́ка,/ земни́и у́бо от земли́ созда́хомся/ и в зе́млю ту́южде по́йдем,/ я́коже повеле́л еси́,/ созда́вый мя и реки́й ми:/ я́ко земля́ еси́ и в зе́млю оты́деши,/ а́може вси челове́цы по́йдем,/ надгро́бное рыда́ние творя́ще песнь:// Аллилу́иа, Аллилу́иа, Аллилу́иа.

Песнь 7

Ирмос: Тебе́, у́мную, Богоро́дице, пе́щь,/ разсмотря́ем, ве́рнии,/ я́коже бо о́троки спасе́ три́, Превозноси́мый,/ ми́р обнови́, во чре́ве Твое́м всеце́л,// хва́льный отце́в Бо́г и препросла́влен.

Припев: Ди́вен Бог во святы́х Свои́х, Бог Изра́илев.

Сия́нии пречи́стыя сла́вы Твоея́ озари́тися, Христе́, подава́й от бу́ри мирски́я к Тебе́ отше́дшим, и тех сподо́би с му́ченики взыва́ти Тебе́: хвали́мый отце́в Бо́же, благослове́н еси́.

Припев: Упоко́й, Го́споди, ду́ши усо́пших раб Твои́х.

Нов Ада́м вои́стинну быв, Ада́мов Соде́телю, И́же кля́тву бо Ада́мову еди́н потреби́л еси́. Те́мже мо́лимся Тебе́: преста́вленныя упоко́й в сла́дости ра́йстей, Христе́, я́ко еди́н Милосе́рд.

Слава: И́же на́шу есте́ственную не́мощь еди́н све́дый, я́ко Бог, Благ же и Ми́лостив, вся и́хже преста́вил еси́, иде́же свет незаходи́мый присеща́ет лица́ Твоего́, учини́, Христе́, хвали́мый отце́в Бо́же и препросла́влен.

И ныне: Зако́на се́ни, и дре́вняя гада́ния Твои́м преидо́ша Рождество́м, Богома́ти, Ты бо нам Боже́ственныя благода́ти Свет возсия́ла еси́; И́мже дре́вних изба́вихомся долго́в, Чи́стая, воспева́юще Бо́га препросла́вленнаго.

Песнь 8

Ирмос: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,// по́йте и превозноси́те во вся ве́ки.

Припев: Ди́вен Бог во святы́х Свои́х, Бог Изра́илев.

Скве́рну всю Твои́х рабо́в усо́пших, Твоего́ человеколю́бия росо́ю отмы́в, Тя пе́сньми воспева́ти сподо́би: благослови́те, вся дела́ Госпо́дня, Го́спода, по́йте и превозноси́те Его́ во вся ве́ки.

Припев: Упоко́й, Го́споди, ду́ши усо́пших раб Твои́х.

Предстоя́тели, Спа́се, десны́я, ве́рою оправда́в моли́твами страстоте́рпец, я́же преста́вил еси́ ве́рныя, покажи́ пою́щия: благослови́те, вся дела́ Госпо́дня, Го́спода, по́йте и превозноси́те Его́ во вся ве́ки.

Благослови́м Отца́ и Сы́на и Свята́го Ду́ха, Го́спода.

И́же сме́рти и живота́ име́яй вся́кую власть, я́же ве́рою усо́пшия Твоего́ сия́ния улучи́ти благоволи́, взыва́ющия: благослови́те, вся дела́ Госпо́дня, Го́спода, по́йте и превозноси́те Его́ во вся ве́ки.

И ныне: Спасе́ния Хода́таица нам была́ еси́, Всенепоро́чная, и в непреходи́мыя ве́ки пребыва́ния же и све́тлости: Тебе́, Де́во Чи́стая, при́сно вся дела́ благослови́м, и превозно́сим во вся ве́ки.

Посем: Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Катавасия: В пещи́ о́троцы Изра́илевы:

Таже, песнь Богородицы: Вели́чит душа́ Моя́ Го́спода:

Песнь 9

Ирмос: О́браз чи́стаго Рождества́ Твоего́/ огнепали́мая купина́ показа́ неопа́льная;/ и ны́не на нас напа́стей свире́пеющую угаси́ти, мо́лимся, пещь,/ да Тя, Богоро́дице,// непреста́нно велича́ем.

Припев: Ди́вен Бог во святы́х Свои́х, Бог Изра́илев.

Пощади́, я́ко Бог человеколюби́в, и ми́лостив, Твое́ созда́ние, и упоко́й в селе́ниих святы́х Твои́х, иде́же му́ченицы вси веселя́тся, ве́рою преста́вленыя от вре́менных, Многоми́лостиве.

Припев: Упоко́й, Го́споди, ду́ши усо́пших раб Твои́х.

Име́яй ми́лостей бе́здну препобежда́ющую рабо́в Твои́х прегреше́ния, и́хже прие́м избра́, упоко́й в не́дрех Авраа́млих, Человеколю́бче, и с Ла́зарем во свет Твой всели́.

Слава: Изба́витель и Спас быв ро́ду челове́ческому, распя́тия ра́ди, я́же ны́не от нас преста́вил еси́, я́ко Благода́тель, наслажде́ния боже́ственнаго сподо́би, и живота́ нетле́ннаго, и весе́лия, и све́тлости.

И ныне: О я́же па́че ума́ чуде́с Твои́х! Ты бо Де́во еди́на всем, и́же под со́лнцем, подала́ еси́ разуме́ти нове́йшее чу́до, Пречи́стая, Твоего́ рождества́ недоуме́ннаго: те́мже Тя вси велича́ем.

Катавасия: О́браз чи́стаго Рождества́:

Таже, Досто́йно есть: И ектения, и ексапостиларий Октоиха:

И́же и ме́ртвыми и живы́ми облада́яй я́ко Бог, и святы́ми Твои́ми всю зе́млю просвети́вый, Соде́телю всех, пою́щия Тя спаса́й.

Слава, и ныне, Богородичен: Мы о Тебе́ хва́лимся, Богоро́дице, и к Бо́гу Тя и́мамы предста́тельство, простри́ ру́ку Твою́ необори́мую, и сокруши́ враги́ на́ша, Твои́м низпосли́ рабо́м по́мощь от Свята́го.

На хвалитех стихиры мученикам, глас 1:

Хвали́те Его́ на си́лах Его́,/ хвали́те Его́ по мно́жеству вели́чествия Его́.

Страстоте́рпцы Христо́вы,/ прииди́те, лю́дие, вси почти́м,/ пе́ньми и пе́сньми духо́вными,/ просве́щники ми́ра, и пропове́дники ве́ры:/ исто́чники приснотеку́щия,/ от ни́хже истека́ют ве́рным исцеле́ния./ Тех моли́твами, Христе́ Бо́же наш,/ мир ми́ру Твоему́ да́руй,// и душа́м на́шим ве́лию ми́лость.

Хвали́те Его́ во гла́се тру́бнем,/ хвали́те Его́ во псалти́ри и гу́слех.

Си́и во́ини Царя́ Вели́каго/ проти́вишася повеле́нием мучи́телевым,/ до́блественне неради́ша о му́ках,/ и лесть всю попра́вше,/ досто́йне венча́ни бы́ша./ Про́сят от Спа́са ми́ра,// и душа́м на́шим ве́лия ми́лости.

Хвали́те Его́ в тимпа́не и ли́це,/ хвали́те Его́ во стру́нах и орга́не.

Вас, прехва́льнии му́ченицы,/ ни скорбь, ни теснота́, ни глад, ни гоне́ние,/ ниже́ ра́ны, ни я́рость звере́й,/ ни мечь, ниже́ огнь претя́й/ разлучи́ти от Бо́га возмого́ша:/ любо́вию же па́че я́же к Нему́,/ я́ко в чужди́х подви́гшеся телесе́х,/ естество́ забы́вше, и смерть презре́сте./ Те́мже и досто́йно трудо́в ва́ших мзду прия́ли есте́,/ Небе́сному Ца́рствию насле́дницы бы́вше:// Христу́ моли́теся о душа́х на́ших.

Хвали́те Его́ в кимва́лех доброгла́сных, хвали́те Его́ в кимва́лех восклица́ния./ Вся́кое дыха́ние да хва́лит Го́спода.

Весели́теся, му́ченицы, о Го́споде,/ я́ко по́двигом до́брым подвиза́стеся,/ и проти́вистеся царе́м, и мучи́тели победи́сте:/ огня́ и меча́ не устраши́стеся,/ и звере́й ди́виих снеда́ющих телеса́ ва́ша./ Христу́ со А́нгелы песнь возсыла́юще,/ с небесе́ венцы́ прия́сте:/ испроси́те дарова́ти мир ми́ру,// и душа́м на́шим ве́лию ми́лость.

Слава, мертвен: Де́лом, Спа́се мой, явля́еши,/ я́ко Ты еси́ всех Воскресе́ние,/ сло́вом, Сло́ве, Ла́заря от ме́ртвых возста́вил еси́./ Егда́ же ме́ртвии от гробо́в воскресо́ша,/ и врата́ а́дова смято́шася,/ тогда́ челове́ком смерть сон явля́шеся./ Но И́же на спасе́ние Своего́ созда́ния,/ а не на осужде́ние прише́дый,/ и́хже избра́л еси́,// упоко́й, я́ко Человеколю́бец.

И ныне, Богородичен: Ра́дуйся от нас, Свята́я Богоро́дице Де́во,/ Чи́стый Сосу́де всея́ вселе́нныя:/ Свеще́ неугаси́мая, Вмести́лище Невмести́маго,/ Хра́ме необори́мый./ Ра́дуйся, из Нея́же роди́ся А́гнец Бо́жий,// взе́мляй грехи́ всего́ ми́ра.

Посем, чтец: Сла́ва Тебе́, показа́вшему нам свет.

И чтет славословие великое.

На стиховне стихиры покойны, глас 1.

Подобен: Прехва́льнии му́ченицы:

Тебе́, Спа́се, мо́лимся,/ Твоего́ сла́дкаго прича́стия преста́вльшихся сподо́би,/ и всели́ во оби́телех преподо́бных/ со святы́ми Твои́ми,/ и в небе́сная жили́ща,/ благоутро́бием Твои́м презря́ беззако́ния,// и подая́ сим поко́й.

Стих: Блаже́ни, я́же избра́л/ и прия́л еси́, Го́споди.

Па́че ви́димых Твоя́, Спа́се, обеща́ния,/ я́же о́ко не ви́де, и у́хо не слы́ша,/ и на се́рдце челове́ка никогда́же взы́де:/ мо́лим Тя Влады́ко,/ сла́дкаго Твоего́ прича́стия получи́ти сподо́би,/ к Тебе́ преста́вльшияся,// и пода́ждь им ве́чную жизнь.

Стих: Ду́ши их/ во благи́х водворя́тся.

О Кресте́ Твое́м веселя́щеся,/ о Кресте́ Твое́м наде́ющеся раби́ Твои́,/ к Тебе́ преста́вишася, Человеколю́бче:/ и́мже ны́не избавле́ние тех прегреше́ний,/ Крест Твой да́руй,/ и Кровь пролия́нную за мирски́й живо́т,/ благосе́рдием Твои́м проща́я согреше́ния,// и просвеща́я све́том лица́ Твоего́.

Стих: И па́мять их/ в род и род.

Никто́же безгре́шен,/ никто́же от челове́к быв,/ то́кмо Ты, Еди́не Безсме́ртне:/ те́мже рабы́ Твоя, я́ко Бог Ще́дрый,/ во све́те со а́нгельскими ликостоя́нии Твои́ми учини́,/ благоутро́бием Твои́м,/ презира́я беззако́ния,// и подая́ им проще́ние.

Слава: святаго Минеи, И ныне: Богородичен по гласу Славы.

Аще же несть, Слава, и ныне, Богородичен, глас 1:

Христа́ умоли́, Твое́ рожде́ние, Ма́ти Де́во,/ согреше́ний проще́ние дарова́ти рабо́м Твои́м,/ Тебе́ Богоро́дицу пропове́давшим вои́стинну,/ и сло́вом благочести́вым благослови́вшим,/ и све́тлости святы́х и весе́лия// сподо́би во Ца́рствии Твое́м.

По Бла́го есть: тропари: Апо́столи, му́ченицы: якоже на вечерни указуяся.

Блаженны, глас 1:

Блаже́ни миротво́рцы,/ я́ко ти́и сы́нове Бо́жии нареку́тся.

Сне́дию изведе́ из рая́ враг Ада́ма:/ Кресто́м же введе́ Христо́с вонь разбо́йника, / помяни́ мя, Го́споди, вопию́ща,// егда́ прии́деши во Ца́рствии Твое́м.

Блаже́ни изгна́ни пра́вды ра́ди,/ я́ко тех есть Ца́рство Небе́сное.

Страда́лец мно́жество безчи́сленное,/ святи́телей, и прему́дрых жен,/ и проро́к пресла́вных,/ мо́лят Тя, Иису́се Бо́же:/ пода́ждь нам оставле́ние прегреше́ний,// и ве́лию ми́лость.

Блаже́ни есте́, егда́ поно́сят вам,/ и изжену́т, и реку́т всяк зол глаго́л, на вы лжу́ще Мене́ ра́ди.

И́же тече́ние соверши́вше,/ свяще́ннейшии Христо́вы страда́льцы,/ со святи́тели свяще́нными и проро́ки,// сподо́бистеся во гра́де небе́снем жи́ти, со А́нгелы веселя́щеся.

Ра́дуйтеся и весели́теся,/ я́ко мзда ва́ша мно́га на небесе́х.

Во све́те, Христе́, учини́ невече́рнем,/ я́же преста́вил еси́,/ прегреше́ния их презре́в, я́ко Ще́дрый Бог:// да Твою́ сла́вим, Благода́телю, безчи́сленную ми́лость.

Сла́ва Отцу́ и Сы́ну/ и Свято́му Ду́ху.

Отцу́ поклони́мся, и Сы́на славосло́вим,/ и Пресвята́го Ду́ха вси ве́рнии воспои́м:/ помяни́ нас зову́щих,// Единосу́щная Тро́ице, Еди́нице Бо́же.

И ны́не и при́сно/ и во ве́ки веко́в. Ами́нь.

Я́ко пала́ту простра́нную, и престо́л сла́вы, и о́блак све́тел,/ песносло́вим Тя, Чи́стая, и мо́лим:/ разори́ о́блак мра́чный от душ на́ших,// боже́ственными моли́твами Твои́ми.

На входе тропари субботы, глас 2:

Апо́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о нас Того́, я́ко Бла́га моли́те// спасти́ся, мо́лимся, душа́м на́шим.

Помяни́, Го́споди, я́ко Благ, рабы́ Твоя́,/ и ели́ка в житии́ согреши́ша, прости́;/ никто́же бо безгре́шен, то́кмо Ты,// моги́й и преста́вленным да́ти поко́й.

Слава, кондак, глас 8:

Со святы́ми упоко́й,/ Христе́, души́ ра́б Твои́х,/ иде́же не́сть боле́знь, ни печа́ль,/ ни воздыха́ние, //но жи́знь безконе́чная.

И ныне, глас тойже:

Тебе́ и Сте́ну, и Приста́нище и́мамы,/ и Моли́твенницу благоприя́тну к Бо́гу,// Его́же родила́ еси́, Богоро́дице Безневе́стная, ве́рных спасе́ние.

Прокимен рядовой, глас 8:

Весели́теся о Го́споде,/ и ра́дуйтеся, пра́веднии.

Стих: Блаже́ни, и́хже оста́вишася беззако́ния, и и́хже прикры́шася греси́.

И за упокой глас 6:

Ду́ши их во благи́х водворя́тся.

Аллилуиа, глас 4. Стих: Мно́ги ско́рби пра́ведным, и от всех их изба́вит я́ Госпо́дь. Стих за упокой: Блаже́ни, я́же избра́л и прия́л еси́, Го́споди, и па́мять их в род и род.

Причастен рядовой: Ра́дуйтеся, пра́веднии, о Го́споде, пра́вым подоба́ет похвала́.

И за упокой: Блаже́ни, я́же избра́л и прия́л еси́, Го́споди, и па́мять их в род и род.

Субботняя служба всем святым

(аще Бог Господь)

По предначинательном псалме стихословим кафисму 18-ю⁶

На Го́споди, воззва́х: стихиры святаго Минеи на 6 (каждая стихира по дважды).

Стих: А́ще беззако́ния на́зриши, Го́споди, Го́споди, кто постои́т?/ Я́ко у Тебе́ очище́ние есть.

Стихира святаго 1-я.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,/ упова́ душа́ моя́ на Го́спода.

Таяжде стихира.

Стих: От стра́жи у́тренния до но́щи, от стра́жи у́тренния/ да упова́ет Изра́иль на Го́спода.

Стихира святаго 2-я.

Стих: Я́ко у Го́спода ми́лость и мно́гое у Него́ избавле́ние:/ и Той изба́вит Изра́иля от всех беззако́ний его́.

Таяжде стихира.

Стих: Хвали́те Го́спода вси язы́цы,/ похвали́те Его́ вси лю́дие.

Стихира святаго 3-я.

Стих: Я́ко утверди́ся ми́лость Его́ на нас,/ и и́стина Госпо́дня пребыва́ет во век.

Таяжде стихира.

Слава: святаго Минеи,

И ныне: Догматик, глас 2: Пре́йде сень:

Аще же несть святому Славы, Слава, и ныне: Богородичен воскресный, глас 2:

Пре́йде се́нь зако́нная,/ благода́ти прише́дши:/ я́коже бо купина́ не сгара́ше опаля́ема,/ та́ко Де́ва родила́ еси́,/ и Де́ва пребыла́ еси́./ Вме́сто столпа́ о́гненнаго,/ пра́ведное возсия́ Со́лнце:/ вме́сто Моисе́я, Христо́с,// спасе́ние душ на́ших.

Входа несть. Све́те ти́хий:

Прокимен, глас 7: Бо́же, Засту́пник мой еси́ Ты,/ и ми́лость Твоя́ предвари́т мя.

Стих: Изми́ мя от враг мои́х, Бо́же, и от востаю́щих на мя изба́ви мя.

И абие, Сподо́би, Го́споди: Ектения просительная.

На стиховне стихиры мученичны, глас 2:

И́же земны́я сла́сти не возлюби́вше, страстоте́рпцы,/ небе́сным благи́м сподо́бишася,/ и А́нгелом согра́ждане бы́ша:// Го́споди, моли́твами их поми́луй, и спаси́ нас.

Стих: К Тебе́ возведо́х о́чи мои́, живу́щему на небеси́. Се я́ко о́чи раб в руку́ госпо́дий свои́х, я́ко о́чи рабы́ни в руку́ госпожи́ своея́. Та́ко о́чи на́ши ко Го́споду Бо́гу на́шему,/ до́ндеже уще́дрит ны.

Святы́м му́чеником моля́щимся о на́с,/ и Христа́ пою́щим,/ вся́ка пре́лесть преста́, и челове́ческий ро́д ве́рою спаса́ется.

Стих: Поми́луй нас, Го́споди, поми́луй нас, я́ко по мно́гу испо́лнихомся уничиже́ния. Наипа́че напо́лнися душа́ на́ша поноше́ния гобзу́ющих/ и уничиже́ния го́рдых.

Ли́цы му́ченичестии проти́вишася мучи́телем, глаго́люще:/ мы во́инствуем Царю́ си́лам:/ а́ще и огню́ и му́кам предадите́ нас,// не отмета́емся Тро́ическия си́лы.

Слава: святаго Минеи, И ныне: Богородичен по гласу Славы, от менших.

Аще же несть, Слава, и ныне, Богородичен, глас 2:

Спаси́ от бед рабы́ Твоя, Богоро́дице Де́во,/ я́ко вси́ по Бо́зе к Тебе́ прибега́ем,// я́ко к неруши́мей стене́ и предста́тельству.

Таже, Ны́не отпуща́еши:

По Трисвятом: Тропарь святаго Минеи. Слава, и ныне, Богородичен воскресный, глас 2:

Вся, па́че смы́сла,/ вся пресла́вная Твоя́, Богоро́дице, та́инства,/ чистоте́ запеча́танной и де́вству храни́му,/ Ма́ти позна́лася еси́ нело́жна,/ Бо́га ро́ждши И́стиннаго.// Того́ моли́ спасти́ся душа́м на́шим.

Ектения сугубая и отпуст.

На Бог Госпо́дь: тропарь святаго Минеи, дважды. Слава, и ныне, Богородичен воскресен по гласу тропаря.

И стихословится кафисма 16, на 3 славы.

По стихословии ектения малая, и глаголем седальны мученичны:

Тебе́, одева́ющаго не́бо о́блаки, иму́ще святи́и одея́ние в ми́ре, му́ки от беззако́нник претерпе́ша, и пре́лесть и́́дольскую упраздни́ша. Тех моли́твами и нас свободи́, Спа́се, от неви́димаго врага́, и спаси́ нас.

Стих: Ди́вен Бог во святы́х Свои́х, Бог Изра́илев.

Апосто́ли, му́ченицы и проро́цы, святи́телие, преподо́бнии и пра́веднии, до́бре по́двиг соверши́вшии, и ве́ру соблю́дшии, дерзнове́ние иму́ще ко Спа́су, о нас Того́, я́ко Бла́га, моли́те, спасти́ся, мо́лимся, душа́м на́шим.

Стих: Ду́ши их во благи́х водворя́тся.

И́же ме́ртвыми и живы́ми, я́ко Бог, облада́яй все́ми, вла́стию, Животода́вче, приими́ моле́ние раб Твои́х: покажи́ Твое́ милосе́рдие, Человеколю́бче, и пода́ждь оставле́ние душа́м, я́же преста́вил еси́ наде́ждею в Тя, благоутро́бия ра́ди, я́ко Благ.

Слава, и ныне: Вся, па́че смы́сла,/ вся пресла́вная Твоя́, Богоро́дице, та́инства,/ чистоте́ запечата́нной и де́вству храни́му,/ Ма́ти позна́лася еси́ нело́жна,/ Бо́га ро́ждши И́стиннаго.// Того́ моли́ спасти́ся душа́м на́шим.

И стихословится кафисма 17, на 3 славы.

По стихословии ектения малая, и чтутся седальны мученичны:

И́же просвети́вый святы́я Твоя́ па́че зла́та, и просла́вивый преподо́бныя Твоя́, я́ко Благ, от ни́хже умоле́н быва́я, Христе́ Бо́же, жизнь на́шу умири́, я́ко Человеколю́бец, и моли́тву испра́ви, я́ко кади́ло, еди́не во святы́х почива́яй.

Стих: Ди́вен Бог во святы́х Свои́х, Бог Изра́илев.

Страстоте́рпцы Госпо́дни, блаже́нна земля́, напи́вшаяся крове́й ва́ших, и свя́ти хра́мы прие́мшии телеса́ ва́ша; на суди́щи бо врага́ обличи́сте, и Христа́ со дерзнове́нием пропове́дасте. Того́, я́ко Бла́га, моли́те спасти́, мо́лимся, ду́ши на́ша.

Стих: Блаже́ни, я́же избра́л и прия́л еси́, Го́споди.

Помяни́, Го́споди, я́ко Благ, ду́ши раб Твои́х, и ели́ка в житии́ согреши́ша, прости́: никто́же бо безгре́шен, то́кмо Ты, моги́й и преста́вленным да́ти поко́й.

Слава, и ныне: Богоро́дице Де́во Мари́е, ро́ждшая Христа́ Изба́вителя и Спа́са, моли́ся Того́ благосты́ни, со апо́столы, и му́ченики, и проро́ки, с преподо́бными же и священному́ченики, очище́ние грехо́в дарова́ти нам, и ве́лию ми́лость.

Посем псалом 50. И поем канона три:

Канон святаго Минеи со ирмосом на 6, ирмос по дважды, посем канон святаго храма или обители на 4, и канон во Октоихе святым мученикам, и святителям, и преподобным на 4⁷.

Аще храм Владычний, поем каноны сице:

Канон храма или обители на 6, ирмос по дважды, канон святаго Минеи на 4, канон во Октоихе всем святым на 4.

Песнь 1

Ирмос: Моисе́йскую песнь восприи́мши:

Припев: Вси святи́и, моли́те Бо́га о нас.

Изгна́ния лю́тая, и уране́ния зе́льная, терпели́вно подъя́сте, страда́льцы, вся́кую пре́лесть от коне́ц си́лою Боже́ственною отгна́сте.

Бо́жии служи́телие и святи́телие, све́том мы́сленным облиста́юще я́ве, к све́ту благоче́стия наста́виша всех благочести́вых исполне́ния.

Гордый ум смиривше, преподобнии, к добрей земли́ преидосте; вознесшеся же божественными образы, и всем смиренным помогаете присно.

Слава: Светле́йшаго све́та и ве́чнаго весе́лия, яви́ прича́стники, я́ко Бог, я́же преста́вил еси́ от привре́менных, рабы́ Твоя́ ве́рныя, Преблаги́й Бо́же наш.

И ныне: Поще́нием кре́пко подви́гшеся, и терпели́вно низложи́ша врага́ честны́я жены́, Тебе́, Богороди́тельнице, предстоя́т, ра́дующеся.

Песнь 3

Ирмос: Непло́дствовавший мой ум:

Припев: Вси святи́и, моли́те Бо́га о нас.

Разже́гшеся огне́м любве́ Христо́вы, о страстоте́рпцы, мук разжже́ния угаси́сте, ороше́нием Вседе́теля Ду́ха.

Святе́йшии Христо́вы святи́телие, и честни́и преподо́бных собо́ри, о всех нас Человеколю́бца Бо́га умоли́те.

Свяще́ннейший лик боже́ственных проро́к возвели́чися, и жен мно́жество пострада́вших кре́пко, сла́ву улучи́ша.

Слава: Умертви́вся, Христе́, на кресте́, дарова́л еси́ уме́ршим безсме́ртие; его́же улучи́ти сподо́би, к Тебе́ отше́дшия ве́рою.

И ныне: Со все́ми проро́ки, и жена́ми свяще́нными, ны́не приле́жно Бо́га моли́, Де́во, ро́ждшагося из Тебе́, уще́дрити нас.

Катавасия: Непло́дствовавший мой ум,/ плодоно́сен, Бо́же, покажи́ ми,/ Де́лателю до́брых, Насади́телю благи́х,// благоутро́бием Твои́м.

Ектения малая.

Седален святаго Минеи, Слава, и ныне: Богородичен.

Песнь 4

Ирмос: Е́же от Де́вы Твое́ рождество́:

Припев: Вси святи́и, моли́те Бо́га о нас.

И́же Христо́вым страсте́м, богосла́внии страстоте́рпцы, уподо́бльшеся до́бре, распростира́еми, ра́довахуся мно́гими му́ками, на ве́чная воздая́ния взира́юще; и́хже получи́вше, ублажа́ются при́сно.

Зако́ны соблюда́юще Ду́ха, первосвяще́нницы, прему́дренно упасо́сте лю́ди, я́ко ко́рмчии преизря́днии, на боже́ственне приста́нищи, и преложи́вшеся от жите́йских молв, к тишине́ преидо́сте живота́.

На земли́ прише́льцы яви́стеся, преложи́вше, отцы́, жизнь ва́шу на небеса́, я́коже пи́шет, благочестному́дренне, и плотски́я стра́сти обузда́вше боле́зньми воздержа́ния, си́лою Христо́вою.

И́хже преве́л еси́, Влады́ко, от вре́меннаго жития́ многочи́сленное мно́жество, в правосла́вней послужи́вшия Тебе́, Сло́ве, ве́ре, всех спаса́емых мно́жеством сочета́в, ве́чнаго сподо́би живота́.

Слава: Ме́ртвости боже́ственныя жела́юще, жизнь безконе́чную хода́тайствующе вои́стину, Тобо́ю, Пречи́стая Влады́чице Богороди́тельнице, честны́я жены́ сподо́бишася тоя́, моля́ще Сы́на Твоего́ и Бо́га о нас.

И ныне: Го́ру присе́нную зрит Тя доброде́тельми проро́к Авваку́м, Богоро́дице, из Нея́же яви́ся Бог неизрече́нно, доброде́телию покры́в небеса́, и род челове́ческий из истле́ния спасы́й.

Песнь 5

Ирмос: Мглу души́ моея́, Спа́се:

Припев: Вси святи́и, моли́те Бо́га о нас.

Тебе́ возлюби́вше, Ще́дре, возненави́деша вся мирска́я, до́блии страстоте́рпцы, примеси́вшеся му́кам, отверже́нием пло́ти.

Святи́телие, проро́цы, преподо́бнии богоно́сцы, духо́вными луча́ми просвеща́ете мир, тьму разоря́юще страсте́й.

Преподо́бнии отцы́, проро́цы и первосвяще́нницы, и присносла́вныя жены́, о нас Тебе́, Влады́це всех, мо́лятся приле́жно.

Слава: Мо́лим Тя, Сло́ве, и́хже от нас прия́л еси́, ли́ку избра́нных Твои́х сопричта́в, прича́стники покажи́ лу́чшаго живота́.

И ныне: Пречи́стая Де́во Ма́ти, похвало́ му́чеников, и преподо́бных, и пра́ведных, от вся́каго изми́ нас мучи́тельства лука́ваго.

Песнь 6

Ирмос: Во глубине́ грехо́вней содержи́мь:

Припев: Вси святи́и, моли́те Бо́га о нас.

Кре́постию се́рдца страда́льцы проти́ву врагу́ ополчи́вшеся, того́ низложи́ша, и прия́ша побе́ды венцы́ от Бо́га; и ны́не приле́жно мо́лятся о все́х земноро́дных.

Бо́жия святи́тели почти́м ве́рно, и преподо́бныя Его́ ублажи́м, спаса́еми мольба́ми и́х, от вся́каго гне́ва и ско́рби, и вра́жия наве́та.

Пострада́ же́н боже́ственный ли́к, и в посте́ Бо́гу угоди́, и получи́ Ца́рство Небе́сное; те́х моли́твами уще́дри, Бо́же, Тво́й ми́р.

Сла́ва: И́же созда́вый, Жизнода́вче Христе́, челове́ка от земли́, и́хже от на́с престав́и Человеколю́бец еси́, упоко́й, оставле́ние подая́ и́м злы́х, я́ко Милосе́рд.

И ныне: Свята́я Богоро́дице, освяти́ на́ша помышле́ния и ум укрепи́, и спаси́ нас от стрел лука́ваго неуя́звленных, сла́вящих, Всепе́тая, Твоя́ вели́чия.

Катавасия: Во глубине́ грехо́вней содержи́мь есмь, Спа́се,/ и в пучи́не жите́йстей обурева́емь:/ но я́коже Ио́ну от зве́ря,// и мене́ от страсте́й возведи́, и спаси́ мя.

Ектения малая.

Кондак и икос святаго Минеи.

Песнь 7

Ирмос: Херуви́мы подража́юще о́троцы: Припев: Вси святи́и, моли́те Бо́га о нас.

Терпе́нием низложи́ша свя́ти и врага́, терпя́ще вся́ко искуше́ние лю́тых муче́ний, я́ко вои́стинну Бо́га возлюби́ша, пострада́вшаго за грехи́ на́ша. Те́х моли́твами спаси́ все́х на́с, Сло́ве, от напа́стей и бе́д, Тебе́ сла́вящих.

Светозра́чнии святи́телие, и преподо́бнии, и проро́цы, и священному́ченик достосла́вное мно́жество, и же́н святы́х свяще́нное сосло́вие, во страда́нии и в посте́ возсия́вшее му́жески, при́сно о на́с моле́ния твори́те к Бо́гу, я́ко да поми́лует на́с.

Му́ченик мно́жество мо́лит Тя́, Христе́ Благода́телю, от все́х печа́лей и скорбе́й, и лю́тых напа́стей, и все́х прегреше́ний, и от вре́да спаси́ мя́, Сло́ве, поги́бшаго.

Сла́ва: Отню́дуже боле́знь отбеже́, и воздыха́ние, и печа́ль, иде́же све́т сия́ет Твоего́ лица́, Христе́, и иде́же святы́х собо́ры ны́не лику́ют, учини́ все́х преста́вльшихся души́ к Тебе́, Человеколю́бче, прегреше́ния и́х вся́ презре́в, я́ко еди́н Ми́лостив.

И ны́не: С му́ченики, Пречи́стая, и с преподо́бными отцы́ и проро́ки все́ми, со святы́ми жена́ми во святы́х Еди́наго почива́ющаго умоли́, все́х освяти́ти на́с, святы́ми гла́сы Тя́ славосло́вящих, Чи́стая, во вся́ ве́ки.

Песнь 8

Ирмос: В купине́ Моисе́ю:

Припев: Вси святи́и, моли́те Бо́га о нас.

Тече́ние кро́ве ва́шея, страстоте́рпцы Госпо́дни, освяти́ всю тварь, и изсуши́ я́ве излия́ние пре́лести, и ве́рных ду́ши напои́ бога́тно.

Яви́ся лик по́стнический, святи́телей же собо́р и жен святы́х, и проро́к сла́вных, единоче́стен А́нгелом, а́нгельски на земли́ ду́хом пожи́вше.

Изба́вите всех нас, страстоно́сцы Госпо́дни, первосвяще́нницы, и проро́цы, и преподо́бных мно́жество, и жен святы́х, от стрел вра́жиих, вас восхваля́ющих.

Благослови́м Отца́ и Сы́на и Свята́го Ду́ха, Го́спода.

И́хже от нас, Спа́се, прия́л еси́, в не́дрех Авраа́мовых учини́, и со все́ми избра́нными упоко́й, подая́ грехо́в их всем разреше́ние, я́ко Всеще́др.

И ныне: Богороди́тельнице Чи́стая, со все́ми святы́ми проро́ки, и му́ченики, и преподо́бными, и святы́ми жена́ми, и священному́ченики, уще́дрити нас Спа́са моли́.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Катавасия: В купине́ Моисе́ю Де́вы чу́до,/ на Сина́йстей горе́ прообрази́вшаго иногда́,/ по́йте, благослови́те,// и превозноси́те во вся ве́ки.

Таже, поем Честне́йшую:

Песнь 9

Ирмос: Преесте́ственно пло́тию Заче́ншую:

Припев: Вси святи́и, моли́те Бо́га о нас.

Кре́пцы на стра́сти, си́льни на враги́ я́вльшеся, страстоте́рпцы, взя́сте побе́ду пострада́вше зако́нно, и венча́стеся от Бо́га.

Я́ко Бо́жии священноде́лателие, и Па́стыря До́браго подо́бницы бы́вше, упасо́сте Того́ о́вцы преподо́бне, первосвяще́нницы богосла́внии.

С преподо́бными, по́стники и проро́ки свяще́нными почти́м жен пострада́вших мно́жество и посто́м низложи́вших врага́.

Слава: Пресла́вное мно́жество святы́х Твои́х, Христе́, непреста́нно мо́лят Тя, и́хже преста́вил еси́ в ве́ре, Го́споди, прича́стники яви́ ве́чнаго живота́.

И ныне: Щедролюби́ваго Бо́га ро́ждшая пло́тию, со святы́ми все́ми моли́ Того́ при́сно, от бед нас спасти́, Ма́ти Де́во Чи́стая.

Катавасия: Преесте́ственно пло́тию Заче́ншую во чре́ве,/ от Отца́ безле́тно предвозсия́вшее Сло́во,// в пе́снех немо́лчных велича́ем ве́рнии.

Таже, Досто́йно есть: и ектения малая.

Светилен глаголем прежде святаго Минеи.

Слава: И́же и ме́ртвыми и живы́ми облада́яй я́ко Бог, и святы́ми Твои́ми всю зе́млю просвети́вый, Соде́телю всех, пою́щия Тя спаса́й.

И ныне, Богородичен: Мы о Тебе́ хва́лимся, Богоро́дице, и к Бо́гу Тя и́мамы предста́тельство, простри́ ру́ку Твою́ необори́мую, и сокруши́ враги́ на́ша, Твои́м низпосли́ рабо́м по́мощь от Свята́го.

И абие псалмы хвалитныя, и прочая.

На стиховне стихиры мученикам, глас 2:

По Христе́ пострада́вше да́же до сме́рти,/ о страстоте́рпцы му́ченицы,/ ду́ши у́бо и́мате на небесе́х в руце́ Бо́жией,/ и по ми́ру всему́ почита́еми суть мо́щи ва́ша./ Святи́телие покланя́ются, и лю́дие вси, ра́дующеся, согла́сно вопие́м:// сон че́стен пред Го́сподем смерть преподо́бных Его́.

Стих: Испо́лнихомся зау́тра ми́лости Твоея́, Го́споди, и возра́довахомся и возвесели́хомся, во вся дни на́ша возвесели́хомся, за дни, в ня́же смири́л ны еси́, ле́та, в ня́же ви́дехом зла́я: и при́зри на рабы́ Твоя́, и на дела́ Твоя́,/ и наста́ви сы́ны их.

Всяк град и страна́ чтут мо́щи ва́ша,/ о страстоно́сцы му́ченицы:/ вы бо зако́нно пострада́вше,/ венцы́ небе́сныя прия́сте,/ и сего́ ра́ди святи́телем есте́ похвала́// и Це́рквам благоле́пие.

Стих: И бу́ди све́тлость Го́спода Бо́га на́шего на нас, и дела́ рук на́ших испра́ви на нас,/ и де́ло рук на́ших испра́ви.

Крест Христо́в взе́мше, святи́и му́ченицы, ору́жие непобеди́мое,/ всю диа́волю си́лу упраздни́ша,/ и прия́ша венцы́ небе́сныя, стена́ нам бы́ша,// о нас при́сно моля́щеся.

Слава: святаго Минеи, И ныне: Богородичен по гласу Славы.

Аще же несть, Слава, и ныне, Богородичен, глас 2:

Прииди́те, Ма́терь Све́та/ пе́сньми немо́лчными вси просла́вим,/ Та бо роди́ спасе́ние на́ше:/ и, ра́дуйся! принесе́м,/ я́ко еди́ной ро́ждшей всех нача́льнейшаго,/ И́же пре́жде век Бо́га./ Ра́дуйся, Я́же Е́ву ро́ждшую па́ки назда́вшая,// ра́дуйся, Пречи́стая Де́во Неискусобра́чная.

Таже, Бла́го есть:

Трисвятое, по О́тче наш: тропарь святаго Минеи.

Слава, и ныне, Богородичен по гласу тропаря от менших, в конец утрени.

Ектения сугубая и час первый.

Блаженны, глас 2:

Блаже́ни миротво́рцы,/ я́ко ти́и сы́нове Бо́жии нареку́тся.

Глас Ти прино́сим разбо́йничь, и мо́лимся:// помяни́ нас, Го́споди, во Ца́рствии Твое́м.

Блаже́ни изгна́ни пра́вды ра́ди,/ я́ко тех есть Ца́рство Небе́сное.

Христо́вым страсте́м уподо́бльшеся, му́ченицы,// стра́сти челове́ческия разли́чныя при́сно исцеля́ете.

Блаже́ни есте́, егда́ поно́сят вам,/ и изжену́т, и реку́т всяк зол глаго́л, на вы лжу́ще Мене́ ра́ди.

Со проро́ки, апо́столы, со преподо́бными учи́тели,// Соде́телю всех до́бре угоди́ша.

Радуйтеся и веселитеся,/ яко мзда ваша многа на небесех.

Со все́ми святы́ми Твои́ми,/ я́ко Человеколю́бец, Го́споди,/ вся и́же ве́рою преста́вльшияся,// учини́ рабы́ Твоя́, мо́лимся.

Сла́ва Отцу́ и Сы́ну/ и Свято́му Ду́ху.

О Тро́ице Пресу́щная,/ чту́щих Тя уще́дри,/ от пре́лести вра́жия и се́тей,// всех избавля́ющи при́сно.

И ны́не и при́сно/ и во ве́ки веко́в. Ами́нь.

Мольбы́ раб Твои́х не пре́зри, Всенепоро́чная,// спаса́ющи нас от вся́ких бед и скорбе́й.

Тропари и кондаки на входе:

В храме святаго:

Тропарь всем святым, глас 2: Апо́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о нас Того́, я́ко Бла́га, моли́те,// спасти́ся, мо́лимся, душа́м на́шим.

Тропарь святаго Минеи.

Кондак святаго Минеи.

Слава, кондак, глас 8:

Со святыми упокой,/ Христе, души раб Твоих,/ идеже несть болезнь, ни печаль,/ ни воздыхание, //но жизнь безконе́чная.

И ныне, глас тойже:

Я́ко нача́тки естества́, Насади́телю тва́ри,/ вселе́нная прино́сит Ти, Го́споди, богоно́сныя му́ченики;/ тех моли́твами в ми́ре глубо́це// Це́рковь Твою́, жи́тельство Твое́ Богоро́дицею соблюди́, Многоми́лостиве.

В храме Господском или Богородичном:

Тропарь храма Христова или Богородицы.

Тропарь всем святым: Апо́столи, му́ченицы и проро́цы:

Тропарь святаго Минеи.

Кондак святаго Минеи.

Слава: Со святы́ми упоко́й:

И ныне, глас 8: Я́ко нача́тки естества́:

Прокимен, глас 8: Весели́теся о Го́споде,/ и ра́дуйтеся, пра́веднии.

Стих: Блаже́ни, и́хже оста́вишася беззако́ния, и и́хже прикры́шася греси́.

Аллилуиа, глас 4: Воззва́ша пра́веднии, и Госпо́дь услы́ша их.

Стих: Мно́ги ско́рби пра́ведным, и от всех их изба́вит я́ Госпо́дь.

Причастен: Радуйтеся, праведнии, о Господе, правым подобает похвала.́

На Го́споди, воззва́х: стихиры святаго Минеи, 3.

Стих: А́ще беззако́ния на́зриши, Го́споди, Го́споди, кто постои́т?/ Я́ко у Тебе́ очище́ние есть.

Стихира святаго 1-я.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,/ упова́ душа́ моя́ на Го́спода.

Стихира святаго 2-я.

Стих: От стра́жи у́тренния до но́щи, от стра́жи у́тренния/ да упова́ет Изра́иль на Го́спода.

Стихира святаго 3-я.

Таже поем мученичны гласа, 3, глас 2:

Стих: Я́ко у Го́спода ми́лость и мно́гое у Него́ избавле́ние:/ и Той изба́вит Изра́иля от всех беззако́ний его́.

И́же земны́я сла́сти не возлюби́вше страстоте́рпцы,/ небе́сным благи́м сподо́бишася,/ и А́нгелом согра́ждане бы́ша:// Го́споди, моли́твами их поми́луй, и спаси́ нас.

Стих: Хвали́те Го́спода вси язы́цы,/ похвали́те Его́ вси лю́дие.

Святы́м му́чеником моля́щимся о нас,/ и Христа́ пою́щим,/ вся́ка пре́лесть преста́,// и челове́ческий род ве́рою спаса́ется.

Стих: Я́ко утверди́ся ми́лость Его́ на нас,/ и и́стина Госпо́дня пребыва́ет во век.

Ли́цы му́ченичестии проти́вишася мучи́телем, глаго́люще:/ мы во́инствуем Царю́ си́лам:/ а́ще и огню́ и му́кам предадите́ нас,// не отмета́емся Тро́ическия си́лы.

Слава, и ныне, Богородичен, глас 2:

Пре́йде сень зако́нная,/ благода́ти прише́дши:/ я́коже бо купина́ не сгара́ше, опаля́ема,/ та́ко Де́ва родила́ еси́/ и Де́ва пребыла́ еси́./ Вме́сто столпа́ о́гненнаго/ пра́ведное возсия́ Со́лнце,/ вме́сто Моисе́я – Христо́с,// спасе́ние душ на́ших.

Входа несть. Све́те ти́хий:

Прокимен дне, глас 7: Бо́же, Засту́пник мой еси́ Ты,/ и ми́лость Твоя́ предвари́т мя.

Таже, Сподо́би, Го́споди:

На стиховне поем мученичен и два мертвена, глас 2:

Мученичен: Ве́лия сла́ва, ю́же стяжа́сте, святи́и, ве́рою:/ не то́кмо бо в страда́ниих врага́ победи́ли есте́,/ но и по сме́рти ду́хи прого́ните,/ неду́жныя исцеля́ете,/ душ и теле́с вра́чеве:/ моли́теся ко Го́споду,// поми́ловатися душа́м на́шим.

Стих: Блаже́ни, я́же избра́л/ и прия́л еси́, Го́споди.

Мертвен: Я́ко цвет увяда́ет,/ и я́ко сень ми́мо гряде́т,/ и разруша́ется всяк челове́к:/ па́ки же глася́щей трубе́,/ ме́ртвии я́ко в тру́се вси восста́нут/ ко Твоему́ сре́тению, Христе́ Бо́же./ Тогда́, Влады́ко, и́хже преста́вил еси́ от нас,// во святы́х Твои́х учини́ кро́вех ду́хи раб Твои́х.

Стих: Ду́ши их/ во благи́х водворя́тся.

Мертвен: Увы́ мне, коли́к по́двиг и́мать душа́ разлуча́ющися от телесе́!/ Увы́ мне, тогда́ коли́ко слези́т,/ и несть, и́же поми́лует ю́!/ Ко А́нгелом о́чи возводя́щи, безде́льно мо́лится:/ к челове́ком ру́це простира́ющи, и не и́мать помога́ющаго./ Те́мже, возлю́бленная моя́ бра́тие,/ разуме́вше кра́ткую на́шу жизнь,/ преста́вленным поко́я от Христа́ про́сим,// и душа́м на́шим ве́лию ми́лость.

Слава, и ныне, Богородичен, глас 2:

Спаси́ от бед рабы́ Твоя, Богородице Дево,/ яко вси по Бозе к Тебе́ прибегаем,// яко к нерушимей стене́ и предстательству.

Таже, Ны́не отпуща́еши:

По Трисвятом: тропари, глас 2:

Апо́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о нас Того́, я́ко Бла́га моли́те// спасти́ся, мо́лимся, душа́м на́шим.

Слава:

Помяни́, Го́споди, я́ко Благ, рабы́ Твоя́,/ и ели́ка в житии́ согреши́ша, прости́;/ никто́же бо безгре́шен, то́кмо Ты,// моги́й и преста́вленным да́ти поко́й.

И ныне:

Ма́ти Свята́я неизрече́ннаго Све́та,/ а́нгельскими Тя пе́сньми почита́юще// благоче́стно велича́ем.

Аллилуиа, во глас 2-й, таже тропарь: Апо́столи, му́ченицы: дважды.

Слава: Помяни́, Го́споди: И ныне: Ма́ти Свята́я:

Посем кафисма 16.

Ектения малая обычная, и глаголем седальны мученичны:

Апосто́ли, му́ченицы и проро́цы, святи́телие, преподо́бнии и пра́веднии, до́бре по́двиг соверши́вшии, и ве́ру соблю́дшии, дерзнове́ние иму́ще ко Спа́су, о нас Того́, я́ко Бла́га, моли́те, спасти́ся, мо́лимся, душа́м на́шим.

И́же просвети́вый святы́я Твоя́ па́че зла́та, и просла́вивый преподо́бныя Твоя́, я́ко Благ, от ни́хже умоле́н быва́я, Христе́ Бо́же, жизнь на́шу умири́, я́ко Человеколю́бец, и моли́тву испра́ви, я́ко кади́ло, еди́не во святы́х почива́яй.

Стих: Ди́вен Бог во святы́х Свои́х, Бог Изра́илев.

Страстоте́рпцы Госпо́дни, блаже́нна земля́, напи́вшаяся крове́й ва́ших, и свя́ти хра́мы прие́мшии телеса́ ва́ша; на суди́щи бо врага́ обличи́сте, и Христа́ со дерзнове́нием пропове́дасте. Того́, я́ко Бла́га, моли́те спасти́, мо́лимся, ду́ши на́ша.

Стих: Блаже́ни, я́же избра́л и прия́л еси́, Го́споди.

Помяни́, Го́споди, я́ко Благ, ду́ши раб Твои́х, и ели́ка в житии́ согреши́ша, прости́: никто́же бо безгре́шен, то́кмо Ты, моги́й и преста́вленным да́ти поко́й.

Слава, и ныне: Богоро́дице Де́во Мари́е, ро́ждшая Христа́ Изба́вителя и Спа́са, моли́ся Того́ благосты́ни, со апо́столы, и му́ченики, и проро́ки, с преподо́бными же и священному́ченики, очище́ние грехо́в дарова́ти нам, и ве́лию ми́лость.

Глаголем и непорочны на 2 статии, с припевы их (зри сия в приложении).

И прочая до канона вся за упокой, зри в приложении.

Каноны же поем сице:

Канон святаго Минеи со ирмосом на 6, ирмос по дважды, посем канон святаго храма или обители на 4, и канон во Октоихе второй, за упокой, на 4⁸.

Аще храм Владычний, поем каноны сице:

Канон храма или обители на 6, ирмос по дважды, канон святаго Минеи на 4, канон во Октоихе, второй, на 4.

Канон усопшим, глас 2:

Песнь 1

Ирмос: Непроходи́мое волня́щееся мо́ре/ Бо́жиим Свои́м веле́нием изсуши́вшему/ и пешеше́ствовати сквозе́ е́ изра́ильтеския лю́ди наста́вльшему,// Го́сподеви пои́м, сла́вно бо просла́вися.

Припев: Ди́вен Бог во святы́х Свои́х, Бог Изра́илев.

Сме́ртию Твое́ю попра́в смерть, боже́ственныя жи́зни источи́л еси́ присносу́щие: е́же пода́ждь, Бла́же, душа́м усо́пших, му́ченик Твои́х мольба́ми, оставле́ние прегреше́ний да́руя.

Припев: Упоко́й, Го́споди, ду́ши усо́пших раб Твои́х.

И́же бога́тую ми́лость при́сно источа́я, благоче́стно при́сно прие́млющим Тя, в дому́ Твое́м, Христе́, в ди́вней Твое́й ски́нии, ме́сто ослабле́ния пода́ждь, Влады́ко, рабо́м Твои́м, я́ко благоутро́бен.

Слава: Крепча́йший на смерть был еси́, Христе́: те́мже ту связа́в, нас изба́вил еси́, и ны́не изба́ви от сея́ тле́ния⁹ усо́пшия, я́ко Благ, и Твоего́ сия́ния прича́стие да́руй.

И ныне: Утве́рждши коле́блемый ум мой, Ма́ти Бо́жия, укрепи́ боже́ственными повеле́ньми Ро́ждшагося из Твоего́ освяще́ннаго чре́ва, и упраздни́вшаго, Влады́чице, а́дово мра́чное ца́рство.

Песнь 3

Ирмос: На камени мя веры утвердив,/ разширил еси́ уста́ моя́ на враги́ моя́./ Возвесели́ бо ся дух мой, внегда́ пе́ти:/ несть свят, я́коже Бог наш,// и несть пра́веден па́че Тебе́, Го́споди.

Припев: Ди́вен Бог во святы́х Свои́х, Бог Изра́илев.

Твоея́ красоты́ сия́нием озари́тися в ве́ре усо́пшим благоволи́, с му́ченики Твои́ми, И́же бога́тый в ми́лости: Ты бо еси́ Бог наш, и несть пра́веден па́че Тебе́ Го́споди.

Припев: Упоко́й, Го́споди, ду́ши усо́пших раб Твои́х.

На ме́сте прохлажде́ния, в не́дрех Авраа́мовых, избра́ннаго Твоего́, сподо́би водворя́тися рабо́м Твои́м, я́ко Щедр, Тебе́ вопию́щим: Ты бо еси́ Бог наш, и несть пра́веден па́че Тебе́, Го́споди.

Слава: В черто́зех небе́сных водворя́тися, с му́дрыми де́вами совше́дшими Влады́ко, приими́ рабы́ Твоя́ свещено́сцы, и́хже преста́вил еси́ Твое́ю во́лею от вре́менных, Еди́не Человеколю́бче.

И ныне: Умерщвлена мя и к земли́ возвращена воздвигнула еси, рождши Жизнода́вца, и возвела́ еси́ мя из а́да преиспо́днейшаго, Богоро́дицу Тя ве́рою сла́вящаго, и почита́ющаго, Пречи́стая, Тебе́ Всепе́тую.

Катавасия: На ка́мени мя ве́ры:

Ектения малая, обычная.

Кондак, икос и седален с Богородичным святаго Минеи.

Песнь 4

Ирмос: Пою́ Тя, слу́хом бо, Го́споди, услы́шах, и ужасо́хся:/ до мене́ бо и́деши, мене́ ища́ заблу́ждшаго./ Тем мно́гое Твое́ снизхожде́ние, е́же на мя,// прославля́ю, Многоми́лостиве.

Припев: Ди́вен Бог во святы́х Свои́х, Бог Изра́илев.

Упова́нием и любо́вию пожи́вшия, и умо́м правосла́вным, я́же па́че ума́ сла́вы Твоея́ сподо́би рабы́ Твоя́, Христе́, мно́гим Твои́м человеколю́бием, и избра́нных му́ченик мольба́ми.

Припев: Упоко́й, Го́споди, ду́ши усо́пших раб Твои́х.

Я́ко имы́й сла́дости приснотеку́щий пото́к, при́сно напоя́еши избра́нныя, Го́споди: с ни́миже и ны́не преста́вленныя, Христе́, к Те́бе, неизрече́нным Твои́м милосе́рдием пита́еши при вода́х оставле́ния.

Слава: Ты живы́ми госпо́дствуеши, Влады́ко, и ме́ртвыми владе́еши. Ты в земли́ персть су́щую си́лою Твое́ю воскреси́ши. Те́мже к Тебе́ преше́дшия во дво́рех Твои́х, Спа́се, всели́.

И ныне: Исцели́ла еси́ Е́вино сокруше́ние, и дре́внее окая́нство: Зижди́теля бо родила́ еси́, могу́щаго испра́вити нас прегреше́ньми пове́рженых, Богороди́тельнице еди́на Ма́ти Де́во.

Песнь 5

Ирмос: Све́та Пода́телю/ и веко́в Тво́рче, Го́споди,/ во све́те Твои́х повеле́ний наста́ви нас:// ра́зве бо Тебе́, ино́го бо́га не зна́ем.

Припев: Ди́вен Бог во святы́х Свои́х, Бог Изра́илев.

Умерщвле́ных нас, и положе́ных во тли, возве́л еси́ от мра́чных а́довых сокро́вищ, и восхи́тил еси́, Бла́же, и сочета́в святы́х А́нгел в́оинством.

Припев: Упоко́й, Го́споди, ду́ши усо́пших раб Твои́х.

За е́же спасти́ нас я́ко прише́л еси́, Христе́, приими́ ны́не и́же благоче́стно к Тебе́ преста́вленныя, я́ко еди́н Благ, на ло́нех Авраа́ма, и с Ла́зарем тех всели́.

Слава: Разреши́л еси́, Влады́ко, ле́тную мою́ и до́лгую брань, Тебе́ пре́жде Хода́таю, и Моли́твеннику примире́ния бы́вшу: и ны́не Твоя́ рабы́ уще́дрив упоко́й.

И ныне: Под кро́вом Твои́м, Ма́ти Бо́жия, и́же наде́ющиися на Тя спаса́ются: Жизнода́вца бо родила́ еси́ нам, животворя́щаго вся во́лею.

Песнь 6

Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:// от тли, Бо́же, мя возведи́.

Припев: Ди́вен Бог во святы́х Свои́х, Бог Изра́илев.

Неизрече́нныя, и боже́ственныя све́тлости, иде́же му́ченичестии ли́цы, сподо́би, я́же от земли́ преста́вил еси́, вседе́тельною Твое́ю во́лею, Человеколю́бче. Дважды.

Слава: Озари́тися добро́тою сла́вы Твоея́ сподоби́, оста́вльшия житие́, и к све́ту Твоему́ неизрече́нному, Влады́ко, преше́дшия упоко́й.

И ныне: Избавля́ющи усе́рдно яви́ся призыва́ющия Тя, Пречи́стая Влады́чице, Я́же Бо́га ро́ждшая живото́м и сме́ртию облада́юща.

Катавасия: В бе́здне грехо́вней:

Ектения малая, за упокой.

Кондак, глас 8:

Икос: Со святыми упокой,/ Христе, души раб Твоих,/ идеже несть болезнь, ни печаль,/ ни воздыха́ние, //но жизнь безконе́чная.

Сам Еди́н еси́ Безсме́ртный,/ сотвори́вый и созда́вый челове́ка,/ земни́и у́бо от земли́ созда́хомся/ и в зе́млю ту́южде по́йдем,/ я́коже повеле́л еси́,/ созда́вый мя и реки́й ми:/ я́ко земля́ еси́ и в зе́млю оты́деши,/ а́може вси челове́цы по́йдем,/ надгро́бное рыда́ние творя́ще песнь:// Аллилу́иа, Аллилу́иа, Аллилу́иа.

Песнь 7

Ирмос: Богопроти́вное веле́ние беззако́ннующаго мучи́теля/ высо́к пла́мень вознесло́ есть./ Христо́с же простре́ богочести́вым отроко́м ро́су духо́вную,// сый благослове́н и препросла́влен.

Припев: Ди́вен Бог во святы́х Свои́х, Бог Изра́илев.

И́же везде́ сый, низше́л еси́, Го́споди, е́же спасти́ и́же дре́вле прельща́емый челове́чь род. Те́мже Тя му́ченицы мо́лят: сих, я́же преста́вил еси́ от земли́, в земли́ кро́тких, Спа́се, упоко́й.

Припев: Упоко́й, Го́споди, ду́ши усо́пших раб Твои́х.

Ме́ртвости умерщвле́ние оттря́сл еси́ в ме́ртвых свобо́дь быв, Сам еди́н Христе́: и ны́не умерщвле́ния грехо́внаго, Влады́ко, изба́ви рабы́ Твоя́, явля́я их насле́дники Ца́рствия Твоего́.

Слава: Мно́гим Твои́м и неизрече́нным милосе́рдием, и неизме́рною бе́здною человеколю́бия Твоего́, Христе́, прегреше́ний у́бо оставле́ние преста́вленным да́ждь, и благода́тию Твое́ю очище́ны сих яви́.

И ныне: Свети́льник была́ еси́ Боже́ственныя сла́вы, сия́ние нося́щи, Де́во, ду́хом, и пло́тию нам я́вляшагося, и а́дову мглу све́тлостию Божества́ Своего́ потре́бльша, Богора́дованная.

Песнь 8

Ирмос: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:// благослови́те, вся́ дела́ Госпо́дня, Го́спода.

Припев: Ди́вен Бо́г во святы́х Свои́х, Бо́г Изра́илев.

Показа́л еси́ нам враго́в смерть, схожде́нием Твои́м я́ко Безсме́ртен, Боже́ственною же си́лою Твое́ю, вхо́ды яви́л еси́ живота́, Безсме́ртне, его́же му́ченицы Твои́ ны́не досто́йно получи́ша.

Припев: Упоко́й, Го́споди, ду́ши усо́пших раб Твои́х.

Добро́ты у́мныя Твоея́ наслади́тися преста́вленным сподо́би, студ греха́ злообра́знаго очища́я, я́ко Человеколю́бец: еди́н бо Ты, Влады́ко, яви́лся еси́ греха́ отчужде́н.

Благослови́м Отца́ и Сы́на и Свята́го Ду́ха, Го́спода.

Испра́вил еси́ нас, Христе́, па́дшия в персть сме́ртную, сме́ртию Твое́ю живо́т да́руя, и пи́щу безконе́чную, и ра́дость присносу́щную, ея́же ны́не преста́вленныя сподо́би, я́ко Ми́лостив.

И ныне: Ве́лия и стра́шна есть та́йна, Богома́ти, Твоего́ рождества́: Бо́га бо родила́ еси́, Его́же смерть не претерпе́, и гроб не растли́. Те́мже Тя, Пречи́стая, вси язы́цы сла́вим.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Катавасия: Пещь иногда́ о́гненная:

Таже, поем Честне́йшую:

Песнь 9

Ирмос: Я́же пре́жде со́лнца свети́льника Бо́га возсия́вшаго,/ пло́тски к нам прише́дшаго из боку́ Деви́чу,/ неизрече́нно воплоти́вшая, благослове́нная Всечи́стая,// Тя, Богоро́дице, велича́ем.

Припев: Ди́вен Бог во святы́х Свои́х, Бог Изра́илев.

Име́яй власть живы́ми и ме́ртвыми, живота́ Нача́льниче, от земли́ к Тебе́ преше́дшим, насле́дие небе́сное пода́ждь, Влады́ко, и све́тлость святы́х, и пресла́вных страстоте́рпец Твои́х.

Припев: Упоко́й, Го́споди, ду́ши усо́пших раб Твои́х.

Сло́во сый, Е́же дре́вле бы́ти ми подая́, живонача́льнейшее, и Е́же до́бре бы́ти па́ки да́руя, в не́дрех жела́нных Авраа́ма пра́отца, преста́вльшияся рабы́ Твоя́, я́ко Ми́лостив, всели́.

Слава: Весь еси́, Спа́се мой, сла́дость светови́днейшая, весь еси́ жела́ние ненасыща́емое: пото́ки Твоея́ пи́щи, и водо́ю оставле́ния усо́пшия напо́й, непреста́нно Тебе́ сла́вящия.

И ныне: Тя, Богоро́дице, достойно ве́рнии ны́не ублажа́ем, богодохнове́нным словесе́м Твои́м после́дующе: Ты бо еди́на земны́м Бо́га родила́ еси́, сме́рти разо́ршаго силу́, Ма́ти Де́во.

Катавасия: Я́же пре́жде со́лнца:

Таже, Досто́йно есть: Ектения малая, обычная.

И ексапостиларий Октоиха:

И́же и ме́ртвыми и живы́ми облада́яй я́ко Бог, и святы́ми Твои́ми всю зе́млю просвети́вый, Соде́телю всех, пою́щия Тя спаса́й.

Слава, и ныне, Богородичен: Мы о Тебе́ хва́лимся, Богоро́дице, и к Бо́гу Тя и́мамы предста́тельство, простри́ ру́ку Твою́ необори́мую, и сокруши́ враги́ на́ша, Твои́м низпосли́ рабо́м по́мощь от Свята́го.

Посем псалмы хвалитныя.

На хвалитех стихиры мученикам, глас 2:

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

По Христе́ пострада́вше да́же до сме́рти,/ о страстоте́рпцы му́ченицы,/ ду́ши у́бо и́мате на небесе́х в руце́ Бо́жией,/ и по ми́ру всему́ почита́еми суть мо́щи ва́ша./ Святи́телие покланя́ются,/ и лю́дие вси, ра́дующеся, согла́сно вопие́м:// сон че́стен пред Го́сподем смерть преподо́бных Его́.

Стих: Хвали́те Его́ во гла́се тру́бнем,/ хвали́те Его́ во псалти́ри и гу́слех.

По Христе́ пострада́вше да́же до сме́рти,/ о страстоте́рпцы му́ченицы,/ ду́ши у́бо и́мате на небесе́х в руце́ Бо́жией,/ и по ми́ру всему́ почита́еми суть мо́щи ва́ша./ Святи́телие покланя́ются,/ и лю́дие вси, ра́дующеся, согла́сно вопие́м:// сон че́стен пред Го́сподем смерть преподо́бных Его́.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Всяк град и страна́ чтут мощи ваша,/ о страстоносцы мученицы:/ вы бо законно пострадавше,/ венцы́ небесныя приясте,/и сего́ ради святителем есте́ похвала//и Церквам благолепие.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния./ Вся́кое дыха́ние да хва́лит Го́спода.

Крест Христо́в взе́мше, святи́и му́ченицы,/ ору́жие непобеди́мое,/ всю диа́волю си́лу упраздни́ша,/ и прия́ша венцы́ небе́сныя,/ стена́ нам бы́ша,// о нас при́сно моля́щеся.

Слава:

Мертвен: Увы́ мне, коли́к по́двиг и́мать душа́ разлуча́ющися от телесе́!/ Увы́ мне, тогда́ коли́ко слези́т,/ и несть, и́же поми́лует ю́!/ Ко А́нгелом о́чи возводя́щи, безде́льно мо́лится:/ к челове́ком ру́це простира́ющи, и не и́мать помога́ющаго./ Те́мже, возлю́бленная моя́ бра́тие,/ разуме́вше кра́ткую на́шу жизнь,/ преста́вленным поко́я от Христа́ про́сим,// и душа́м на́шим ве́лия ми́лости.

И ныне:

Богородичен: Прииди́те, Ма́терь Све́та пе́сньми немо́лчными вси просла́вим,/ Та бо роди́ спасе́ние на́ше:/ и ра́дуйся! принесе́м, я́ко еди́ной ро́ждшей всех нача́льнейшаго,/ И́же пре́жде век Бо́га./ Ра́дуйся, Я́же Е́ву ро́ждшую па́ки назда́вшая,// ра́дуйся, Пречи́стая Де́во Неискусобра́чная.

На стиховне стихиры покойны, глас 2.

Подобен: Егда́ от Дре́ва Тя:

Стремле́ние сме́ртное и тлю Твое́ю живоно́сною сме́ртию низложи́л еси́, Влады́ко:/ всем же источи́л еси́ живо́т ве́чный,/ и земны́м уме́ршим воста́ние дарова́./ Те́мже мо́лимся Тебе́, Спа́се:/ и́же ве́рою к Тебе́ преста́вльшияся упоко́й,// и нетле́нней Твое́й сла́ве сих сподо́би, Человеколю́бче.

Стих: Блаже́ни, я́же избра́л/ и прия́л еси́, Го́споди.

Мертвен: Да челове́ки о́бщники Боже́ственнаго Твоего́ Ца́рствия соде́лаеши, Христе́,/ распя́тие претерпе́л еси́,/и сме́рть во́льную прия́т./ Сего́ ра́ди мо́лимся:/ Твои́м милосе́рдием прича́стники яви́ Ца́рствия Твоего́,/ ве́рою к Тебе́ преста́вльшияся,// и сла́дкия добро́ты Твоея́ си́х сподо́би, Человеколю́бче.

Стих: Ду́ши их/ во благи́х водворя́тся.

Мертвен: Спасти́ Твое́ созда́ние восхоте́в,/ смотре́ния же вои́стинну стра́шное та́инство,/ ра́дуяся соверши́л еси́, я́ко Преблаги́й:/ и цено́ю искупи́л еси́ весь мир честно́ю Твое́ю Кро́вию./ Те́мже мо́лимся:/ и́же ве́рою к Тебе́ преста́вльшияся,// со все́ми святы́ми избавле́ния сподо́би.

Стих: И па́мять их/ в род и род.

Гро́зному, тре́петному, и стра́шному Престо́лу Твоему́, Христе́, предстоя́ще,/ я́же от ве́ка уме́ршии/ ожида́ют пра́веднаго изрече́ния Твоего́,/ и боже́ственное прие́млют правосу́дие./ Тогда́ у́бо упоко́й, Спа́се, рабы́ Твоя́,/ ве́рою к Тебе́ преста́вльшияся,// иде́же святы́х ли́цы, и ра́дость есть неизглаго́ланная.

Слава, и ныне, Богородичен, глас 2:

Егда́ плотска́го соу́за/ хо́щет душа́ моя́ от жития́ разлучи́тися,/ тогда́ ми предста́ни, Влады́чице,/ и безпло́тных враго́в сове́ты разори́,/ и сих че́люсти сокруши́,/ и́щущих пожре́ти мя неща́дно:/ я́ко да невозбра́нно пройду́ на возду́се стоя́щия кня́зи тьмы,// Богоневе́стная.

По Бла́го есть: тропари: Апо́столи, му́ченицы: якоже на вечерни указуяся.

Блаженны, глас 2:

Блаже́ни миротво́рцы,/ я́ко ти́и сы́нове Бо́жии нареку́тся. Глас Ти прино́сим разбо́йничь, и мо́лимся:// помяни́ нас,

Го́споди, во Ца́рствии Твое́м.

Блаже́ни изгна́ни пра́вды ра́ди,/ я́ко тех есть Ца́рство Небе́сное.

Христо́вым страсте́м уподо́бльшеся, му́ченицы,// стра́сти челове́ческия разли́чныя при́сно исцеля́ете.

Блаже́ни есте́, егда́ поно́сят вам,/ и изжену́т, и реку́т всяк зол глаго́л, на вы лжу́ще Мене́ ра́ди.

Со проро́ки, апо́столы, со преподо́бными учи́тели,// Соде́телю всех до́бре угоди́ша.

Радуйтеся и веселитеся,/ яко мзда ваша многа на небесех.

Со все́ми святы́ми Твои́ми,/ я́ко Человеколю́бец, Го́споди,/ вся и́же ве́рою преста́вльшияся,// учини́ рабы́ Твоя́, мо́лимся.

Сла́ва Отцу́ и Сы́ну/ и Свято́му Ду́ху.

О Тро́ице Пресу́щная,/ чту́щих Тя уще́дри,/ от пре́лести вра́жия и се́тей,// всех избавля́ющи при́сно. И ны́не и при́сно/ и во ве́ки веко́в. Ами́нь.

Мольбы́ раб Твои́х не пре́зри, Всенепоро́чная,// спаса́ющи нас от вся́ких бед и скорбе́й.

На входе тропари субботы, глас 2:

Апо́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о нас Того́, я́ко Бла́га моли́те// спасти́ся, мо́лимся, душа́м на́шим.

Помяни́, Го́споди, я́ко Благ, рабы́ Твоя́,/ и ели́ка в житии́ согреши́ша, прости́;/ никто́же бо безгре́шен, то́кмо Ты,// моги́й и преста́вленным да́ти поко́й.

Слава, кондак, глас 8:

Со святыми упокой,/ Христе, души раб Твоих,/ идеже несть болезнь, ни печаль,/ ни воздыхание, //но жизнь безконе́чная.

И ныне, глас тойже:

Тебе́ и Сте́ну, и Приста́нище и́мамы,/ и Моли́твенницу благоприя́тну к Бо́гу,// Его́же родила́ еси́, Богоро́дице Безневе́стная, ве́рных спасе́ние.

Прокимен рядовой, глас 8:

Весели́теся о Го́споде,/ и ра́дуйтеся, пра́веднии.

Стих: Блаже́ни, и́хже оста́вишася беззако́ния, и и́хже прикры́шася греси́.

И за упокой глас 6:

Ду́ши их во благи́х водворя́тся.

Аллилуиа, глас 4. Стих: Мно́ги ско́рби пра́ведным, и от всех их изба́вит я́ Госпо́дь. Стих за упокой: Блаже́ни, я́же избра́л и прия́л еси́, Го́споди, и па́мять их в род и род.

Причастен рядовой: Радуйтеся, праведнии, о Господе, правым подобает похвала́.

И за упокой: Блаже́ни, я́же избра́л и прия́л еси́, Го́споди, и па́мять их в род и род.

Субботняя служба всем святым

(аще Бог Господь)

По предначинательном псалме стихословим кафисму 18-ю¹⁰.

На Го́споди, воззва́х: стихиры святаго Минеи на 6 (каждая стихира по дважды).

Стих: А́ще беззако́ния на́зриши, Го́споди, Го́споди, кто постои́т?/ Я́ко у Тебе́ очище́ние есть.

Стихира святаго 1-я.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,/ упова́ душа́ моя́ на Го́спода.

Таяжде стихира.

Стих: От стра́жи у́тренния до но́щи, от стра́жи у́тренния/ да упова́ет Изра́иль на Го́спода.

Стихира святаго 2-я.

Стих: Я́ко у Го́спода ми́лость и мно́гое у Него́ избавле́ние:/ и Той изба́вит Изра́иля от всех беззако́ний его́.

Таяжде стихира.

Стих: Хвали́те Го́спода вси язы́цы,/ похвали́те Его́ вси лю́дие.

Стихира святаго 3-я.

Стих: Я́ко утверди́ся ми́лость Его́ на нас,/ и и́стина Госпо́дня пребыва́ет во век.

Таяжде стихира.

Слава: святаго Минеи,

И ныне: Догматик, глас 3: Ка́ко не диви́мся:

Аще же несть святому Славы, Слава, и ныне, Богородичен воскресный, глас 3:

Ка́ко не диви́мся/ Богому́жному рождеству́ Твоему́, Пречестна́я?/ Искуше́ния бо му́жескаго не прие́мши, Всенепоро́чная,/ родила́ еси́ без отца́ Сы́на пло́тию,/ пре́жде век от Отца́ рожде́ннаго без ма́тере,/ ника́коже претерпе́вшаго измене́ния,/ или́ смеше́ния, или́ разделе́ния:/ но обою́ существу́ сво́йство це́ло сохра́ньшаго./ Те́мже, Ма́ти Де́во Влады́чице,/ Того́ моли́ спасти́ся душа́м,// правосла́вно Богоро́дицу испове́дающих Тя.

Входа несть. Све́те ти́хий:

Прокимен, глас 7: Бо́же, Засту́пник мой еси́ Ты,/ и ми́лость Твоя́ предвари́т мя.

Стих: Изми́ мя от враг мои́х, Бо́же, и от востаю́щих на мя изба́ви мя.

И абие, Сподо́би, Го́споди: Ектения просительная.

На стиховне стихиры мученичны, глас 3:

Ве́лия Креста́ Твоего́, Го́споди, си́ла:/ водрузи́ся бо на ме́сте, и де́йствует в ми́ре,/ и показа́ от ры́барей апо́столы,/ и от язы́к му́ченики,// да мо́лятся о душа́х на́ших.

Стих: К Тебе́ возведо́х о́чи мои́, живу́щему на небеси́. Се я́ко о́чи раб в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему,/ до́ндеже уще́дрит ны.

Ве́лия му́ченик Твои́х Христе́ си́ла:/ во гробе́х бо лежа́ще ду́хи прого́нят:/ и упраздни́ша вра́жию вла́сть,// ве́рою Тро́ическою подви́гшеся по благоче́стии.

Стих: Поми́луй нас, Го́споди, поми́луй нас, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих:/ и уничиже́ния го́рдых.

Проро́цы, и апо́столи Христо́вы, и му́ченицы,/ научи́ша ны пе́ти Тро́ицу Единосу́щную,/ и просвети́ша язы́ки прельще́ныя,// и прича́стники А́нгелом сотвори́ша сы́ны челове́ческия.

Слава: святаго Минеи, И ныне: Богородичен по гласу Славы, от менших.

Аще же несть Славы в Минее, Слава, и ныне, Богородичен, глас 3:

В жена́х Свята́я Богоро́дице/ Ма́ти Безневе́стная,/ моли́, Его́же родила́ еси́,/ Царя́ и Бо́га на́шего,// да спасе́т ны, я́ко Человеколю́бец.

Таже, Ны́не отпуща́еши:

По Трисвятом: Тропарь святаго Минеи.

Слава, и ныне, Богородичен воскресный, глас 3:

Тя, хода́тайствовавшую спасе́ние ро́да на́шего,/ воспева́ем, Богоро́дице Де́во:/ пло́тию бо, от Тебе́ восприя́тою, Сын Твой и Бог наш,/ Кресто́м восприи́м страсть,// изба́ви нас от тли я́ко Человеколю́бец.

На Бог Госпо́дь: тропарь святаго Минеи, дважды. Слава, и ныне, Богородичен воскресен по гласу тропаря.

И стихословится кафисма 16, на 3 славы.

По стихословии ектения малая, и чтутся седальны мученичны:

Благоду́шное терпе́ния ва́шего победи́ ко́зни злонача́льнаго врага́, страстоте́рпцы всехва́льнии: сего́ ра́ди ве́чнаго сподо́бистеся блаже́нства, но моли́теся Го́сподеви христолюби́вых люде́й спасти́ ста́до, му́ченицы су́ще и́стиннии.

Стих: Ди́вен Бог во святы́х Свои́х, Бог Изра́илев.

Сия́ете ве́рою пресве́тлая свети́ла, святи́и, неду́гующих вра́чеве, страстоте́рпцы прехва́льнии, мучи́телей у́бо ран не убоя́стеся, и́дольское злоче́стие низложи́сте, побе́ду иму́ще непобеди́мую, Крест и́стинный.

Слава, и ныне: Тя, хода́тайствовавшую спасе́ние ро́да на́шего, воспева́ем, Богоро́дице Де́во: пло́тию бо, от Тебе́ восприя́тою, Сын Твой и Бог наш, Кресто́м восприи́м страсть, изба́ви нас от тли, я́ко Человеколю́бец.

И стихословится кафисма 17, на 3 славы.

По стихословии ектения малая, и чтутся седальны:

Вооружи́вшеся всеору́жеством Христо́вым, и обо́лкшеся во ору́жие ве́ры, полки́ вра́жия страда́льчески низложи́сте, усе́рдно бо упова́нием жи́зни, претерпе́сте вся мучи́телей преще́ния же и ра́ны, те́мже и венцы́ прия́сте, му́ченицы Христо́вы терпеливоду́шнии.

Стих: Ди́вен Бог во святы́х Свои́х, Бог Изра́илев.

Страстоте́рпцы святи́и, моли́те ми́лостиваго Бо́га, да прегреше́ний оставле́ние пода́ст душа́м на́шим.

Стих: Блаже́ни, я́же избра́л и прия́л еси́, Го́споди.

Егда́ сло́вом Твои́м предста́нем безме́здному Твоему́ суди́щу, Го́споди, не посрами́ в Тя ве́ровавших, Спа́се наш: вси бо согреши́хом, но Тебе́ не отступи́хом. Те́мже мо́лим Тя, в селе́ниих пра́ведных Твои́х, Христе́, и́хже прия́л еси́, упоко́й, еди́н бо еси́ безгре́шен.

Слава, и ныне: Проро́цы пропове́даша, апо́столи научи́ша, му́ченицы испове́даша, и мы ве́ровахом, Богоро́дицу Тя вои́стинну су́щую. Те́мже и велича́ем Рождество́ Твое́, Пречи́стая.

Посем псалом 50.

И поем канона три:

Канон святаго Минеи со ирмосом на 6, ирмос по дважды, посем канон святаго храма или обители на 4, и канон во Октоихе святым мученикам, и святителям и преподобным на 4¹¹.

Аще храм Владычний, поем каноны сице:

Канон храма или обители на 6, ирмос по дважды, канон святаго Минеи на 4, канон во Октоихе всем святым на 4.

Песнь 1

Ирмос: Ди́вно, сла́вно творя́й чудеса́:

Припев: Вси святи́и, моли́те Бо́га о нас.

Муче́ния сла́ву, прему́дрии, обрето́сте, вси страда́льцы, муче́ния многообра́зная до́блественне претерпе́сте, страстоте́рпцы: те́мже сла́вими есте́ при́сно.

Превы́шший иму́ще живо́т яви́стеся, боже́ственнии служи́телие, прему́дрии священнотаи́нницы вопло́щшагося Сло́ва, упа́сше до́бре Госпо́дне ста́до си́лою Боже́ственною.

Распе́ншеся ми́рови, преподо́бнии, плотски́х всех сласте́й отверго́стеся, и сосу́ди Ду́ха я́вльшеся, ду́хи преле́стныя Боже́ственною си́лою погуби́сте вку́пе.

Слава: И́же от земли́ повеле́нием Твои́м, Го́споди, ве́рою благоче́стною, Ще́дре, преста́вльшияся, жи́зни безконе́чныя и све́та невече́рняго сподо́бив, упоќой, я́ко Благ.

И ныне: Я́ко Бо́га ро́ждшую пло́тию, Пречи́стая, нра́вом благоче́стным чтим Тя непреста́нно, с честны́ми жена́ми, посто́м просия́вшими, и страда́ньми врага́ низложи́вшими.

Песнь 3

Ирмос: Непло́дная душе́ и безча́дная:

Припев: Вси святи́и, моли́те Бо́га о нас.

Си́лою Бо́жиею укрепля́еми, му́ченицы сла́внии, пагуборо́дную си́лу, и́же в зло́бе си́льнаго врага́, до конца́ погуби́сте, и побе́дныя прия́сте боже́ственныя венцы́.

И́же преподо́бныя, Влады́ко, яви́л еси́ врага́ победи́тели, и святи́тели пома́занием пресвяты́м освяти́вый, Христе́, тех мольба́ми освяти́ и просвети́ пою́щия Тя.

Со проро́ки все́ми восхва́лим жен боже́ственных лик, я́же в посте́ просия́вшия, и ве́рою пострада́вшия, и многоко́зненнаго зми́я попра́вшия.

Слава: И́хже от нас преста́вил еси́ Боже́ственною во́лею, Христе́, со святы́ми учини́, я́же в житии́ презре́в, Ще́дре, тех прегреше́ния, мо́лимся, моли́твами святы́х Твои́х.

И ныне: И́же спасе́ни, Пречи́стая, Твои́м святы́м Рождество́м, глас Гаврии́лов вопие́м Ти ве́рно, е́же ра́дуйся, и мо́лимся: Твои́ми моли́твами, прегреше́ний проще́ние всем нам испроси́.

Катавасия: Непло́дная душе́ и безча́дная,/ стяжи́ плод благосла́вный,/ веселя́щися возопи́й:/ утверди́хся Тобо́ю, Бо́же,// несть свят, несть пра́веден, па́че Тебе́, Го́споди.

Ектения малая.

Седален святаго Минеи. Слава, и ныне, Богородичен его.

Песнь 4

Ирмос: Приосене́нную го́ру Авваку́м:

Припев: Вси святи́и, моли́те Бо́га о нас.

Якоже овчата приведостеся вси волею заклавшеся, якоже агнцы, мудрии страдальцы, Агнцу на Древе Крестнем благоизволившему Божию Сло́ву заклатися за род человеческий.

Со преподо́бными почти́м благосла́вныя первосвяще́нники, свети́льники бы́вшия ве́рным, е́реси же разруши́вшия, и страсте́й тьму глубо́кую, и к Незаходи́мому Све́ту ве́рою прело́жшияся.

Красото́ю слове́с, богогла́снии проро́цы просвеща́ют ве́рных ду́ши, по́двигов же светлостьми́, и чуде́с восто́ками озаря́ют сердца́ богоно́сныя жены́.

Слава: И́же житие́ оста́вльшия, преми́рней сла́ве прича́стники покажи́, Сло́ве Бо́жий, прегреше́ний избавле́ние сим да́руяй, Бла́же, я́же соде́яша на земли́ в ра́зуме и не в ра́зуме.

И ныне: Му́чеников сла́ву, святи́телей и преподо́бных боже́ственное удобре́ние, и вер́ных утвержде́ние, проро́ков оглаше́ние, Всепе́тую воспои́м Госпо́дню Ма́терь.

Песнь 5

Ирмос: Све́том Твои́м невече́рним, Христе́:

Припев: Вси святи́и, моли́те Бо́га о нас.

Ра́ны ва́ша и я́звы, врагу́ у́бо яви́шася я́звы неисце́льныя: я́звы же ны́не исцеля́ют всех ве́рных страда́льцы Госпо́дни.

Воспои́м преподо́бных мно́жество, и ублажи́м святи́тели Христо́вы, и почти́м проро́ки Его́, ны́не о нас при́сно моля́щияся.

Бо́га, вопло́щшася нас ра́ди, лю́бящя всесла́вныя жены́, нра́вом пра́вым пострада́вша, и пости́вшася, на небесе́х ны́не пребыва́ют.

Слава: В ра́йстей, Го́споди, пи́щи, во стране́ живы́х, Христе́, иде́же сия́ет Твой свет, всели́, я́же преста́вил еси́ от земли́, ве́рныя Твоя́ рабы́.

И ныне: Из Тебе́, Пречи́стая, Бог воплоти́ся, и вы́шшую Тя А́нгел показа́ ны́не, тва́рей же всех преиму́щую, Влады́чице: те́мже Тя воспева́ем.

Песнь 6

Ирмос: Глубина́ страсте́й воста́:

Припев: Вси святи́и, моли́те Бо́га о нас.

Свети́льники честны́я Це́ркве, А́гнца и Па́стыря свяще́ннейшии, всесла́внии Христо́вы страда́льцы да почту́тся свяще́нными пе́сньми.

Вознесеся преподобных собор, вознесый Бога во смирении; и прославися множество святителей в делех добрых, прославивших Святую Троицу.

Чуде́с показа́нии боже́ственных, и боле́зней терпе́нием соверше́нным, беззако́ннующих враг, свяще́нных жен лик уязви́, му́жески до́блествовавше.

Слава: В ве́ре, и́хже от земли́ прия́л еси́, святы́х сопричти́ собо́ром, и в не́дрех ве́рнаго Авраа́ма учини́, Христе́, при́сно сла́вити Твое́ мно́гое благоутро́бие.

И ныне: Му́чеников, проро́ков и преподо́бных, и всех от ве́ка пра́ведных похвала́, Ты еси́, Пречи́стая: те́мже гла́сы я́ве ра́достными чтим Тя с ни́ми, Богоро́дице.

Катавасия: Глубина́ страсте́й воста́ на мя,/ и бу́ря проти́вных ве́тров:/ но предвари́в мя Ты спаси́, Спа́се,/ и изба́ви от тли,// я́ко спасл еси́ от зве́ря проро́ка.

Ектения малая.

Кондак и икос святаго Минеи.

Песнь 7

Ирмос: Трие́ о́троцы в пещи́:

Припев: Вси святи́и, моли́те Бо́га о нас.

Стоя́ще посреде́ огня́, пресла́внии страстоте́рпцы Госпо́дни, боже́ственную ро́су приима́сте с небесе́, и умертви́вшеся му́ками, многоко́зненнаго врага́ ме́ртва соде́ласте.

Боже́ственнии святи́телие, я́ко кора́бль испра́вивше Це́рковь Христо́ву, непотопля́ему ту соблюдо́ша, пре́лести избе́гше вои́стинну злых волн.

Умертви́вше плоть свяще́нными по́двиги, по́стницы и́стиннии, безстра́стия насле́довасте живо́т несостаре́ющийся, пою́ще: благослове́н еси́, Го́споди Бо́же оте́ц на́ших.

Слава: Не покажи́ пови́нны на суде́ рабы́ Твоя́, я́же преста́вил еси́ ве́рныя, но упоко́й, Сло́ве, во све́тлости святы́х Твои́х, пе́ти благоутро́бие Твое́.

И ныне: Му́чеников и преподо́бных, и проро́ков, Всенепоро́чная, и святы́х жен, и всех первосвяще́нников священнопожи́вших, Ты еси́ сла́ва вои́стинну, с ни́миже чтим Тя.

Песнь 8

Ирмос: А́нгельми немо́лчно в вы́шних:

Припев: Вси святи́и, моли́те Бо́га о нас.

Нанесе́нием ран, и боле́зней приложе́ньми обдержи́ми зело́, не отверго́стеся и́стиннаго живота́, Госпо́дни страстоте́рпцы, ни истука́нным пода́сте по́чести, пре́лести лука́вей.

Свети́ла, я́коже на све́щницех положе́ни, честны́х доброде́телей, всех озари́сте ду́ши, вся́ку тьму отгна́вше, страстоте́рпцы священноде́йственнии, небе́сным умово́м сожи́телие.

Достохва́льнии проро́цы, и преподо́бных сосло́вие, и жен всех благогове́йных мно́жество достосла́вное, да воспое́тся досто́йно, о нас моля́щеся Спа́су и Бо́гу.

Благослови́м Отца́ и Сы́на и Свята́го Ду́ха, Го́спода.

Ты И́же живы́ми обладая́й, я́же от земли́ преста́вил еси́ ве́рныя, со святы́ми во све́те лица́ Твоего́ учини́, проще́ние прегреше́ний, мно́гаго ра́ди, Спа́се, милосе́рдия подая́ сим.

И ныне: Многопе́тая Де́ва, проро́ков оглаше́ние, святи́телей и страда́льцев, и преподо́бных удобре́ние, и жен святы́х ра́дость, да пое́тся по до́лгу во ве́ки.

Таже: Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Катавасия: А́нгельми немо́лчно в вы́шних сла́вимаго Бо́га,/ Небеса́ небе́с, земля́, и го́ры, и хо́лми, и глубина́,/ и весь род челове́ческий,/ пе́сньми Того́ я́ко Созда́теля и Изба́вителя благослови́те,// и превозноси́те во вся ве́ки.

Таже, Честне́йшую:

Песнь 9

Ирмос: На Сина́йстей горе́:

Припев: Вси святи́и, моли́те Бо́га о нас.

Якоже овчата приведостеся заклавшемуся нас ради, и божественныя лики Ангел исполнисте радости, страстотерпцы Христовы. Темже молитвами вашими всех утвердите, и от врага́ вредныя прелести всех избавите.

Я́ко свети́льницы, живо́тное сло́во иму́ще, просвети́сте ду́ши, первосвяще́нницы Христо́вы свяще́ннейшии, Божественныя сла́вы прича́стницы: я́ко огнь прии́мше Ду́ха, преподо́бнии, стра́сти попали́сте, и и́дольское разжиза́ние погуби́сте.

Со проро́ки святы́ми почти́м преподо́бных мно́жество, пре́жде зако́на и в зако́не возсия́вших житие́м чи́стым, жен же святы́х ли́ки восхва́лим, и возопии́м: Го́споди, молитва́ми их спаси́ всех нас.

Слава: Погребе́ние Твое́, Христе́, и воскресе́ние, всем бысть живо́т. Сего́ ра́ди дерза́юще вопие́м Ти: со все́ми избра́нными ве́рныя, я́же прия́л еси́ рабы́ Твоя́, упоко́й, сих согреше́ния вся проща́я, я́ко Бог Преблаги́й.

И ныне: Стра́шно ме́сто сие́, возопи́, егда́ Иа́ков Твое́ воображе́ние в ле́ствице ви́де, Богоро́дице, нело́жне: му́чеников сла́во, и преподо́бных похвало́, А́нгелов украше́ние и всех проро́ков, и ве́рных спасе́ние.

Катавасия: На Сина́йстей горе́ ви́де Тя в купине́ Моисе́й,/ неопа́льно Огнь Божества́ заче́ншую во чре́ве:/ Дании́л же Тя ви́де го́ру несеко́мую,/ жезл прозя́бший, Иса́ия взыва́ше// от ко́рене Дави́дова.

Таже, Досто́йно есть: и ектения малая.

Светилен глаголем прежде святаго Минеи.

Слава: И́же и ме́ртвыми и живы́ми облада́яй я́ко Бог, и святы́ми Твои́ми всю зе́млю просвети́вый, Соде́телю всех, пою́щия Тя спаса́й.

И ныне, Богородичен: Мы о Тебе́ хва́лимся, Богоро́дице, и к Бо́гу Тя и́мамы предста́тельство, простри́ ру́ку Твою́ необори́мую, и сокруши́ враги́ на́ша, Твои́м низпосли́ рабо́м по́мощь от Свята́го.

И абие псалмы хвалитныя, и прочая.

На стиховне стихиры мученикам, глас 3:

Святы́х му́ченик па́мять,/ прииди́те, лю́дие, вси почти́м,/ я́ко позо́р бы́ша А́нгелом и челове́ком/ и побе́ды венцы́ от Христа́ прия́ша,// и мо́лятся о душа́х на́ших.

Стих: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся, во вся дни на́ша возвесели́хомся, за дни в ня́же смири́л ны еси́, ле́та, в ня́же ви́дехом зла́я. И при́зри на рабы́ Твоя́, и на дела́ Твоя́,/ и наста́ви сы́ны их.

Царе́й и мучи́телей страх отри́нуша Христо́вы во́ини,/ и благодерзнове́нно и му́жески Того́ испове́даша,/ вся́ческих Го́спода Бо́га и Царя́ на́шего,// и мо́лятся о душа́х на́ших.

Стих: И бу́ди све́тлость Го́спода Бо́га на́шего на нас, и дела́ рук на́ших испра́ви на нас,/ и де́ло рук на́ших испра́ви.

Си́лы святы́х А́нгел удиви́шася му́ченическим страда́нием,/я́ко пло́тию сме́ртною обложе́ни, о му́ках неради́ша,/ подо́бницы бы́вше страсте́м Спа́са Христа́, // и мо́лятся о душа́х на́ших.

Слава: святаго Минеи, И ныне: Богородичен по гласу Славы, от менших.

Аще же несть, Слава, и ныне, Богородичен, глас 3:

Без се́мене зачала́ еси́ от Ду́ха Свята́го,/ и славосло́вяще воспева́ем Тя:// ра́дуйся, Пресвята́я Де́во.

Таже, Бла́го есть:

Трисвятое, по О́тче наш: тропарь святаго Минеи.

Слава, и ныне, Богородичен по гласу тропаря от менших, в конец утрени.

Ектения сугубая и час первый.

Блаженны, глас 3:

Блаже́ни миротво́рцы,/ я́ко ти́и сы́нове Бо́жии нареку́тся. Отве́ргша, Христе́, за́поведь Твою́,/ пра́отца Ада́ма из рая́ изгна́л еси́;/ разбо́йника же, Ще́дре, испове́давша Тя на кресте́,/ вонь всели́л еси́, зову́ща:/ помяни́ мя, Спа́се,// во Ца́рствии Твое́м.

Блаже́ни изгна́ни пра́вды ра́ди,/ я́ко тех есть Ца́рство Небе́сное.

О́гненным ра́нам примеша́ющеся,/ страстоте́рпцы Христо́вы,/ ро́су небе́сную обрето́сте,/ прохлажда́ющую же и укрепля́ющую вас/ терпе́ти плотски́я го́рькия боле́зни;// те́мже облегчева́ете вся́ку боле́знь при́сно от душ на́ших.

Блаже́ни есте́, егда́ поно́сят вам,/ и изжену́т, и реку́т всяк зол глаго́л, на вы лжу́ще Мене́ ра́ди.

Святи́телие свяще́ннии, проро́цы сла́внии,/ преподо́бных мно́жество, и жен боже́ственных собо́р,/ пострада́вших ве́рою,/ и низложи́вших пре́лесть вра́жию,/ небе́сную сла́ву получи́ша.// И́хже моли́твами, Спа́се, уще́дри рабы́ Твоя́.

Радуйтеся и веселитеся,/ яко мзда ваша многа на небесех.

Иде́же сия́ет Твой свет,/ во хра́мех избра́нных Твои́х, Бо́же,/ иде́же пи́ща присносу́щная,/ я́же от нас ве́рою преста́вленныя учини́, Иису́се,/ презря́ их, Спа́се, согреше́ния;// да Тя, Влады́ко, приле́жно сла́вим.

Сла́ва Отцу́ и Сы́ну/ и Свято́му Ду́ху.

Отцу́ и Сы́ну и Ду́ху Боже́ственному покланя́емся ве́рнии/ Тро́ице Несозда́нней, в Трие́х Ли́цех и во Еди́ном Божестве́,/ при́сно от безпло́тных сил,// в трие́х свяще́ниих славосло́вимей ве́рно.

И ны́не и при́сно/ и во ве́ки веко́в. Ами́нь.

Просвеще́ние и очище́ние,/ из Тебе́ яви́ся всех Изба́витель,/ Богора́дованная Влады́чице,/ Его́же приле́жно моли́ в бу́дущий Суд Стра́шный,/ осужде́ния вся́каго нас изба́вити,// Пречи́стая, ве́рно всегда́ пою́щих Тя.

Поем тропари и кондаки на входе сице:

В храме святаго:

Тропарь всем святым, глас 2: Апо́столи, му́ченицы и проро́цы,/

святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о нас Того́, я́ко Бла́га, моли́те,// спасти́ся, мо́лимся, душа́м на́шим.

Тропарь святаго Минеи.

Кондак святаго Минеи.

Слава, кондак, глас 8:

Со святыми упокой,/ Христе, души раб Твоих,/ идеже несть болезнь, ни печаль,/ ни воздыхание, //но жизнь безконе́чная.

И ныне, глас тойже: Я́ко нача́тки естества́, Насади́телю тва́ри,/ вселе́нная прино́сит Ти, Го́споди, богоно́сныя му́ченики;/ тех моли́твами в ми́ре глубо́це// Це́рковь Твою́, жи́тельство Твое́ Богоро́дицею соблюди́, Многоми́лостиве.

В храме Господском или Богородичном:

Тропарь храма Христова или Богородицы.

Тропарь всем святым: Апо́столи, му́ченицы и проро́цы:

Тропарь святаго Минеи.

Кондак святаго Минеи.

Слава: Со святы́ми упоко́й:

И ныне, глас 8: Я́ко нача́тки естества́:

Прокимен, глас 8: Весели́теся о Го́споде,/ и ра́дуйтеся, пра́веднии.

Стих: Блаже́ни, и́хже оста́вишася беззако́ния, и и́хже прикры́шася греси́.

Аллилуиа, глас 4: Воззва́ша пра́веднии, и Госпо́дь услы́ша их. Стих: Мно́ги ско́рби пра́ведным, и от всех их изба́вит я́ Госпо́дь.

Причастен: Ра́дуйтеся, пра́веднии, о Го́споде, пра́вым подоба́ет похвала́.

На Го́споди, воззва́х: стихиры святаго Минеи, 3.

Стих: А́ще беззако́ния на́зриши, Го́споди, Го́споди, кто постои́т?/ Я́ко у Тебе́ очище́ние есть.

Стихира святаго 1-я.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,/ упова́ душа́ моя́ на Го́спода.

Стихира святаго 2-я.

Стих: От стра́жи у́тренния до но́щи, от стра́жи у́тренния/ да упова́ет Изра́иль на Го́спода.

Стихира святаго 3-я.

Таже поем мученичны гласа, 3, глас 3:

Стих: Я́ко у Го́спода ми́лость и мно́гое у Него́ избавле́ние:/ и Той изба́вит Изра́иля от всех беззако́ний его́.

Велия Креста́ Твоего, Господи, сила:/ водрузися бо на месте, и де́йствует в ми́ре,/ и показа́ от ры́барей апо́столы, и от язы́к му́ченики,// да мо́лятся о душа́х на́ших.

Стих: Хвали́те Го́спода вси язы́цы,/ похвали́те Его́ вси лю́дие.

Ве́лия му́ченик Твои́х, Христе́, си́ла:/ во гробе́х бо лежа́ще ду́хи прого́нят,/ и упраздни́ша вра́жию власть,// ве́рою Тро́ическою подви́гшеся по благоче́стии.

Стих: Я́ко утверди́ся ми́лость Его́ на нас,/ и и́стина Госпо́дня пребыва́ет во век.

Проро́цы, и апо́столи Христо́вы, и му́ченицы,/ научи́ша ны пе́ти Тро́ицу Единосу́щную,/ и просвети́ша язы́ки прельще́ныя,// и прича́стники А́нгелом сотвори́ша сы́ны челове́ческия.

Слава, и ныне, Богородичен, глас 3:

Ка́ко не диви́мся/ Богому́жному рождеству́ Твоему́, Пречестна́я?/ Искуше́ния бо му́жескаго не прие́мши, Всенепоро́чная,/ родила́ еси́ без отца́ Сы́на пло́тию,/ пре́жде век от Отца́ рожде́ннаго без ма́тере,/ ника́коже претерпе́вшаго измене́ния,/ или́ смеше́ния, или́ разделе́ния:/ но обою́ существу́ сво́йство це́ло сохра́ньшаго./ Те́мже, Ма́ти Де́во Влады́чице,/ Того́ моли́ спасти́ся душа́м,// правосла́вно Богоро́дицу испове́дающих Тя.

Входа несть. Све́те ти́хий:

Прокимен дне, глас 7: Бо́же, Засту́пник мой еси́ Ты,/ и ми́лость Твоя́ предвари́т мя.

Таже, Сподо́би, Го́споди:

На стиховне поем мученичен и два мертвена, глас 3:

Мученичен: Му́ченицы Твои́, Го́споди/ ве́рою утверди́вшеся,/ и наде́ждею укре́пльшеся,/ любо́вию Креста́ Твоего́ душе́вне соедини́вшеся,/ вра́жие мучи́тельство разруши́ша,/ и улучи́ша венцы́:// со безпло́тными мо́лятся о душа́х на́ших.

Стих: Блаже́ни, я́же избра́л/ и прия́л еси́, Го́споди.

Мертвен: Все́ су́етие челове́ческое,/ ели́ко не пребу́дет по сме́рти:/ не пребу́дет бога́тство, ни сни́дет сла́ва:/ наше́дши бо сме́рть, вся́ сия́ погуби́т./ Те́мже Христу́ Безсме́ртному Царю́ возопии́м преста́вленныя от на́с упоко́й иде́же все́х е́сть веселя́щихся жили́ще у Тебе́.

Стих: Ду́ши их/ во благи́х водворя́тся.

Мертвен: Челове́цы, что всу́е мяте́мся?/ Путь кра́ток есть, и́мже тече́м,/ дым есть житие́, па́ра и персть и пе́пел:/ вма́ле явля́ется, и вско́ре погиба́ет./ Те́мже Христу́ Безсме́ртному Царю́ возопии́м:/ преста́вленныя от нас упоко́й,// иде́же всех есть веселя́щихся жили́ще у Тебе́.

Слава, и ныне, Богородичен:

В жена́х Свята́я Богоро́дице,/ Ма́ти Безневе́стная,/ моли́, Его́же родила́ еси́,/ Царя́ и Бо́га на́шего,// да спасе́т ны́, я́ко Человеколю́бец.

Таже, Ны́не отпуща́еши:

По Трисвятом: тропари, глас 2:

Апо́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о нас Того́, я́ко Бла́га моли́те// спасти́ся, мо́лимся, душа́м на́шим.

Слава:

Помяни́, Го́споди, я́ко Благ, рабы́ Твоя́,/ и ели́ка в житии́ согреши́ша, прости́;/ никто́же бо безгре́шен, то́кмо Ты,// моги́й и преста́вленным да́ти поко́й.

И ныне:

Ма́ти Свята́я неизрече́ннаго Све́та,/ а́нгельскими Тя пе́сньми почита́юще// благоче́стно велича́ем.

Аллилуиа, во глас 2-й, таже тропарь: Апо́столи, му́ченицы: дважды.

Слава: Помяни́, Го́споди: И ныне: Ма́ти Свята́я:

Посем кафисма 16.

Ектения малая обычная, и глаголем седальны мученичны:

Сия́ете ве́рою, пресве́тлая свети́ла святи́и, неду́гующих вра́чеве, страстоте́рпцы прехва́льнии, мучи́телей у́бо ран не убоя́стеся, и́дольское злоче́стие низложи́сте, побе́ду иму́ще непобеди́мую, Крест и́стинный.

Вооружи́вшеся всеору́жеством Христо́вым, и обо́лкшеся во ору́жие ве́ры, полки́ вра́жия страда́льчески низложи́сте, усе́рдно бо упова́нием жи́зни, претерпе́сте вся мучи́телей преще́ния же и ра́ны, те́мже и венцы́ прия́сте, му́ченицы Христо́вы терпеливоду́шнии.

Стих: Ди́вен Бог во святы́х Свои́х, Бог Изра́илев.

Страстоте́рпцы святи́и, моли́те ми́лостиваго Бо́га, да прегреше́ний оставле́ние пода́ст душа́м на́шим.

Стих: Блаже́ни, я́же избра́л и прия́л еси́, Го́споди.

Егда́ сло́вом Твои́м предста́нем безме́здному Твоему́ суди́щу, Го́споди, не посрами́ в Тя ве́ровавших, Спа́се наш: вси бо согреши́хом, но Тебе́ не отступи́хом. Те́мже мо́лим Тя, в селе́ниих пра́ведных Твои́х, Христе́, и́хже прия́л еси́, упоко́й, еди́н бо еси́ безгре́шен.

Слава, и ныне: Проро́цы пропове́даша, апо́столи научи́ша, му́ченицы испове́даша, и мы ве́ровахом, Богоро́дицу Тя вои́стинну су́щую. Те́мже и велича́ем Рождество́ Твое́, Пречи́стая.

Глаголем и непорочны на 2 статии, с припевы их (зри сия в приложении).

И прочая до канона вся за упокой, зри в приложении.

Каноны же поем сице:

Канон святаго Минеи со ирмосом на 6, ирмос по дважды, посем канон святаго храма или обители на 4, и канон во Октоихе второй, за упокой, на 4¹².

Аще храм Владычний, поем каноны сице:

Канон храма или обители на 6, ирмос по дважды, канон святаго Минеи на 4, канон во Октоихе, второй, на 4.

Канон усопшим, глас 3:

Песнь 1

Ирмос: Пресека́емое мо́ре жезло́м дре́вле/ Изра́иль про́йде, я́ко по пусты́ни,/ и крестообра́зно я́ве предуготовля́ет стези́./ Сего́ ра́ди пои́м во хвале́нии Чу́дному Бо́гу на́шему,// я́ко просла́вися.

Припев: Ди́вен Бог во святы́х Свои́х, Бог Изра́илев.

Погребе́нием Твои́м смерть умертви́в, и низложи́в а́дово мучи́тельство, на небеса́ Предте́ча нам возше́дый, страстоте́рпческий лик совозне́сл еси́. Ны́не же ду́ши упоко́й преста́вленныя к Тебе́, Христе́.

Припев: Упоко́й, Го́споди, ду́ши усо́пших раб Твои́х.

И́же боже́ственныя му́ченики укрепля́яй, и те́ми пре́лесть потреби́вый, мольба́ми их, я́ко Бог, сконча́вшимся я́же о Тебе́, Спа́се, безсме́ртие и блаже́нное насле́дие улучи́ти благоволи́.

Слава: За рабы́, Влады́ко, Твою́ Кровь закла́вся излия́л еси́, я́ко Щедр, долг же за них воздая́: сего́ ра́ди, Милосе́рде, Тебе́ мо́лим, преста́вленныя рабы́ Твоя́ к Тебе́ упоко́й.

И ныне: Чи́стую воспои́м Богоро́дицу, Бо́га ро́ждшую, сме́ртию Свое́ю смерть на́шу испрове́ргшаго, и жизнь источи́вшаго нестаре́ющуюся, и во ве́ки пребыва́ющее блаже́нство.

Песнь 3

Ирмос: И́же от не су́щих вся приведы́й,/ сло́вом созида́емая,/ соверша́емая Ду́хом,/ Вседержи́телю Вы́шний,// в любви́ Твое́й утверди́ мене́.

Припев: Ди́вен Бог во святы́х Свои́х, Бог Изра́илев.

Созда́вый мя от земли́, и к земли́ возвраще́на окая́ннаго обнови́вый светле́е, ду́ши усо́пших упоко́й моли́твами му́ченик.

Припев: Упоко́й, Го́споди, ду́ши усо́пших раб Твои́х.

Страстоте́рпец му́ченик, бие́ньми же и вяза́ньми, ра́нами и я́звами, умоле́н быва́я, ду́ши раб Твои́х во святы́х селе́ниих учини́, Ще́дре.

Слава: Изба́ви, Человеколю́бче, рабы́ Твоя́ гее́нны, огня́ же и мра́чных селе́ний а́да, и́же ве́рою, Влады́ко, усо́пшия, Твое́ю наде́ждею.

И ныне: Свяще́ннейшая, я́ко Ма́ти Зижди́теля тва́ри су́щи, сме́рти разо́ршаго си́лу, Богоро́дице Пречи́стая, и нетле́ние нам дарова́вшаго.

Катавасия: И́же от не су́щих:

Ектения малая, обычная.

Кондак, икос и седален с Богородичным святаго Минеи.

Песнь 4

Ирмос: Положи́л еси́ к нам тве́рдую любо́вь, Го́споди:/ Единоро́днаго бо Твоего́ Сы́на/ за ны на смерть дал еси́./ Те́мже Ти зове́м, благодаря́ще:// сла́ва си́ле Твое́й, Го́споди.

Припев: Ди́вен Бог во святы́х Свои́х, Бог Изра́илев.

Во гроб за ны ми́лостивно всели́вся, Влады́ко, гро́бы истощи́л еси́ я́ко Бог, и победоно́сцы явль му́ченики, в ме́сте ослабле́ния усо́пшия рабы́ Твоя́ учини́.

Припев: Упоко́й, Го́споди, ду́ши усо́пших раб Твои́х.

И́же страда́лец кре́пкия по́двиги, и ра́ны, и удо́в отсече́ния, я́же за Тя претерпе́ша, Влады́ко, ра́дуяся прие́мый, и я́же прия́л еси́, изба́ви от муче́ния.

Слава: И́же манове́нием Свои́м живота́ име́я уме́рение, безконе́чныя Твоея́ жи́зни и нетле́нныя сла́вы сподо́би, я́же к Тебе́ преста́вил еси́, грехо́вное разо́рь средогра́дие.

И ныне: Ма́ти вои́стинну и Де́ва яви́лася еси́ Всенепоро́чная, зача́тие и рождество́ и́стинно к де́вству еди́на сочета́вши: Бо́га бо родила́ еси́, сме́рти разо́ршаго си́лу.

Песнь 5

Ирмос: К Тебе́ у́тренюю, все́х Творцу́,/ преиму́щему вся́к у́м ми́рови,/ зане́ све́т повеле́ния Твоя́,// в ни́хже наста́ви мя́.

Припев: Ди́вен Бог во святы́х Свои́х, Бог Изра́илев.

В Це́ркви пе́рвенец, Бла́же, преше́дшия от нас, му́ченик ра́ди, и честны́х страда́лец мольба́ми, с пра́ведными причти́.

Припев: Упоко́й, Го́споди, ду́ши усо́пших раб Твои́х.

За избавле́ние мно́гих прегреше́ний Пресвяту́ю Кровь Твою́, Христе́, излия́л еси́; и ны́не му́ченик Твои́х, Спа́се, мольба́ми, благоче́стно усо́пшия упоко́й.

Слава: Упра́ви, Сло́ве, отше́дших ду́ши в ве́чное ме́сто сла́дости Твоея́, я́же па́че ума́, и святы́х боже́ственныя све́тлости сподо́би.

И ныне: Тебе́ Де́ву, Ю́же па́че сло́ва во чре́ве необыме́нное Сло́во заче́ншую, ме́ртвым жизнь даю́щаго, досто́йно блажи́м.

Песнь 6

Ирмос: Возведи́ от тли мя, Го́споди Бо́же мой,/ Ио́на вопия́ше,/ и аз вопию́ Ти:/ из глубины́ изба́ви мя, Спа́се, мно́гих мои́х зол// и к све́ту Твоему́, молю́ся, наста́ви.

Припев: Ди́вен Бог во святы́х Свои́х, Бог Изра́илев. Преложи́ на ра́дость в ве́ре усо́пших рыда́ние, моли́твами страстоте́рпец, препоясу́я их благоле́пне, Христе́, весе́лием, и к све́ту Твоему́ направля́я и наставля́я.

Припев: Упоко́й, Го́споди, ду́ши усо́пших раб Твои́х.

Упоко́й, Бо́же, мно́жеством щедро́т Твои́х у патриа́рхов в не́дре преста́вленыя, иде́же свет сия́ет све́тлый Твоего́ лица́, Христе́, презира́я их вся прегреше́ния.

Слава: Удиви́ на отше́дших отсю́ду, и лю́тых жития́ изба́вленых, чу́дную ми́лость, Христе́, человеколю́бия Твоего́, и ра́дости Твоея́ насы́ти, и кро́тости.

И ныне: Ме́ртвости и тли, и сме́рти изба́вихомся, пресла́вным Рождество́м Твои́м, Богома́ти: Ты бо нам родила́ еси́, Чи́стая, нетле́ния Исто́чник, и Твои́м све́том мир весь просвети́ла еси́.

Катавасия: Возведи́ от тли мя:

Ектения малая, за упокой.

Кондак, глас 8:

Со святы́ми упоко́й,/ Христе́, души́ ра́б Твои́х,/ иде́же не́сть боле́знь, ни печа́ль,/ ни воздыха́ние, //но жи́знь безконе́чная.

Икос:

Сам Еди́н еси́ Безсме́ртный,/ сотвори́вый и созда́вый челове́ка,/ земни́и у́бо от земли́ созда́хомся/ и в зе́млю ту́южде по́йдем,/ я́коже повеле́л еси́,/ созда́вый мя и реки́й ми:/ я́ко земля́ еси́ и в зе́млю оты́деши,/ а́може вси челове́цы по́йдем,/ надгро́бное рыда́ние творя́ще песнь:// Аллилу́иа, Аллилу́иа, Аллилу́иа.

Песнь 7

Ирмос: Я́коже дре́вле благочести́выя три о́троки/ ороси́л еси́ в пла́мени халде́йстем,/ све́тлым Божества́ огне́м и нас озари́,/ благослове́н еси́, взыва́ющия,// Бо́же оте́ц на́ших.

Припев: Ди́вен Бог во святы́х Свои́х, Бог Изра́илев.

И́же всем живонача́льная, вина́ же и си́ла твори́тельная, Сло́ве Бо́жий, обеща́нныя му́чеником пи́щи сподо́би ду́ши преста́вленных раб Твои́х. Благослове́н еси́, Бо́же оте́ц на́ших.

Припев: Упоко́й, Го́споди, ду́ши усо́пших раб Твои́х.

О телесе́х у́бо я́ко тле́нных, до́блественне неради́ша сла́внии му́ченицы, Христе́: ны́не же со дерзнове́нием мо́лятся к Тебе́: ду́ши поко́й преста́вленных раб Твои́х. Оте́ц на́ших Бо́же, благослове́н еси́.

Слава: Тро́стию кре́стною подписа́л еси́ оставле́ние грехо́в всем ве́рным, Ему́же ны́не ду́ши, я́же преста́вил еси́ к Тебе́, причасти́тися сподо́би, и весе́лием пе́ти Тя: оте́ц на́ших Бо́же, благослове́н еси́.

И ныне: Сло́во О́тчее, И́же вся во́лею содева́яй, естество́ челове́ческое погребе́ное страстьми́, я́ко Бог обнови́: благослове́н, Пречи́стая, плод Твоего́ чре́ва.

Песнь 8

Ирмос: Служи́ти живо́му Бо́гу/ в Вавило́не о́троки претерпе́вше,/ о мусики́йских орга́нех неради́ша,/ и посреде́ пла́мене стоя́ще, боголе́пную песнь воспева́ху, глаго́люще:// благослови́те, вся дела́ Госпо́дня, Го́спода.

Припев: Ди́вен Бог во святы́х Свои́х, Бог Изра́илев.

Сый сокро́вище безсме́ртия, Ты Живонача́льниче, ме́ртвым нетле́ние провозвести́л еси́, е́же Твои́м му́чеником, Христе́, благоче́стно ве́рою Тебе́ пою́щим дарова́л еси́: благослови́те, вся дела́ Госпо́дня, Го́спода.

Припев: Упоко́й, Го́споди, ду́ши усо́пших раб Твои́х.

Му́дростию духо́вною, и терпе́нием дел кре́пции страда́льцы о му́ках неради́ша, душа́м преста́вленным от Христа́ оставле́ния про́сят, зову́ще: благослови́те, вся дела́ Госпо́дня, Го́спода.

Благослови́м Отца́ и Сы́на и Свята́го Ду́ха, Го́спода:

Очи́сти, Бла́же, копие́м ребр Твои́х растерза́в рукописа́ние к Тебе́ преста́вленных, и средогра́дие отъе́м прегреше́ний, песносло́вити Тя прие́м их, Спа́се, благоволи́: благослови́те, вся дела́ Госпо́дня, Го́спода.

И ныне: О́блак Тя мы́сленный претру́ждшимся жа́ждею умерщвле́ния, Де́во Чи́стая, ве́мы, во́ду жи́ву оставле́ния источа́ющу, и ме́ртвым безсме́ртие всем подаю́щую, ве́рою при́сно зову́щим: благослови́те, вся дела́ Госпо́дня, Го́спода.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Катавасия: Служи́ти живо́му Бо́гу:

Таже, Честне́йшую:

Песнь 9

Ирмос: Купино́ю и огне́м пропи́санную в Сина́и/ законополо́жнику Моисе́ю,/ и Бо́жий во чре́ве неопа́льно заче́ншую Огнь,/ Всесве́тлую и Негаси́мую Свещу́,// су́щую Богоро́дицу пе́сньми, чту́ще, велича́ем.

Припев: Ди́вен Бог во святы́х Свои́х, Бог Изра́илев.

Ны́не я́ко еди́н Благ, и Человеколю́бец Бог, преста́вленныя к Тебе́, му́ченик мольба́ми, в стране́ кро́тких земли́ всели́, разреше́ние прегреше́ний подая́, Ми́лостиве, сим, да непреста́нно пе́сньми Тя велича́ем.

Припев: Упоко́й, Го́споди, ду́ши усо́пших раб Твои́х.

Во святы́х селе́ниих, в не́дрех Авраа́ма, я́же прия́л еси́, Христе́, причти́ с пра́ведными Твои́ми: иде́же сия́ет свет лица́ Твоего́ неизрече́нный и Боже́ственный, и пребыва́ющее во ве́ки вои́стинну присносу́щное ра́дование.

Слава: Блаже́нныя Твоея́ жи́зни, и ве́чных благ непреста́нныя пи́щи, весе́лия и́стиннаго сподо́би рабы́ Твоя́, я́же преста́вил еси́ во́лею, Жизнода́вче, в ме́сте зла́чне, на вода́х поко́йных.

И ныне: Я́ко святы́й ковче́г, и свиде́ния ски́ния Законода́вца Бо́га, прия́ла еси́ во утро́бе, Всенепоро́чная, Зижди́теля Твоего́, изрече́ние дре́вния кля́твы, и зако́н сме́рти Свое́ю сме́ртию испрове́ргшаго.

Катавасия: Купино́ю и огне́м пропи́санную:

Таже, Досто́йно есть: Ектения малая, обычная.

И ексапостиларий Октоиха:

И́же и ме́ртвыми и живы́ми облада́яй я́ко Бог, и святы́ми Твои́ми всю зе́млю просвети́вый, Соде́телю всех, пою́щия Тя спаса́й.

Слава, и ныне, Богородичен: Мы о Тебе́ хва́лимся, Богоро́дице, и к Бо́гу Тя и́мамы предста́тельство, простри́ ру́ку Твою́ необори́мую, и сокруши́ враги́ на́ша, Твои́м низпосли́ рабо́м по́мощь от Свята́го.

Посем псалмы хвалитныя.

На хвалитех стихиры мученикам, глас 3:

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Святы́х му́ченик па́мять,/ прииди́те, лю́дие, вси почти́м,/ я́ко позо́р бы́ша А́нгелом и челове́ком/ и побе́ды венцы́ от Христа́ прия́ша,// и мо́лятся о душа́х на́ших.

Стих: Хвали́те Его́ во гла́се тру́бнем,/ хвали́те Его́ во псалти́ри и гу́слех.

Царе́й и мучи́телей страх отри́нуша Христо́вы во́ини,/ и благодерзнове́нно и му́жески Того́ испове́даша,/ вся́ческих Го́спода Бо́га и Царя́ на́шего,// и мо́лятся о душа́х на́ших.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Си́лы святы́х А́нгел удиви́шася му́ченическим страда́нием,/ я́ко пло́тию сме́ртною обложе́ни, о му́ках неради́ша,/ подо́бницы бы́вше страсте́м Спа́са Христа́,// и мо́лятся о душа́х на́ших.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния./ Вся́кое дыха́ние да хва́лит Го́спода.

Яко светила в мире сияете,/ и по смерти, святии мученицы,/по́двигом до́брым подви́гшеся:/ и иму́ще дерзнове́ние, Христа́ умоли́те,// поми́ловатися душа́м на́шим.

Слава:

Мертвен: Челове́цы, что всу́е мяте́мся?/ Путь кра́ток есть, теце́м:/ дым есть житие́, па́ра, персть и пе́пел:/ вма́ле явля́ется, и вско́ре погиба́ет./ Те́мже Христу́ Безсме́ртному Царю́ возопии́м:/ преста́вленныя от нас упоко́й,// иде́же всех есть веселя́щихся жили́ще у Тебе́.

И ныне:

Без се́мене зачала́ еси́ от Ду́ха Свята́го,/ и славосло́вяще воспева́ем Тя́:// ра́дуйся, Пресвята́я Де́во.

На стиховне стихиры мертвены, глас 3.

Сла́влю Крест Твой Честны́й, и́мже живо́т дарова́ся,/ и пи́щи наслажде́ние,/ ве́рою и любо́вию Тя пою́щим, еди́не Многоми́лостиве./ Те́мже вопие́м Ти, Христе́ Бо́же:/ преста́вльшияся от нас упоко́й,// иде́же всех есть веселя́щихся жили́ще у Тебе́.

Стих: Блаже́ни, я́же избра́л/ и прия́л еси́, Го́споди.

Еди́не Ми́лостиве и Благоутро́бне,/ име́яй непостижи́мую бла́гости пучи́ну,/ све́дый естество́ челове́ческое, е́же соде́лал еси́,/ Тя мо́лим, Христе́ Бо́же,/ преста́вленныя от нас упоко́й,// иде́же есть всех веселя́щихся жили́ще у Тебе́.

Стих: Ду́ши их/ во благи́х водворя́тся.

Усну́в во гро́бе я́ко Челове́к,/ си́лою же непобеди́мою я́ко Бог воскреси́л еси́,/ я́же во гробе́х спя́щия,/ немо́лчныя пе́сни Тебе́ принося́щия./ Те́мже мо́лим Тя, Христе́ Бо́же:/ преста́вленныя от нас упоко́й,// иде́же есть всех веселя́щихся жили́ще у Тебе́.

Слава, и ныне, Богородичен:

Свещу́ разу́мную Тя, нося́щую свет Божества́,/ совоку́пльшася дебельству́ челове́ческаго существа́,/ Богоро́дице, вси ве́мы:/ Твоего́ моли́ Сы́на и Бо́га,/ преста́вленныя от нас упоко́ити,// иде́же есть всех веселя́щихся ра́дование.

По Бла́го есть: тропари: Апо́столи, му́ченицы: якоже на вечерни указуяся.

Ектения сугубая и час первый.

Блаженны, глас 3:

Блаже́ни миротво́рцы,/ я́ко ти́и сы́нове Бо́жии нареку́тся.

Отве́ргша, Христе́, за́поведь Твою́,/ пра́отца Ада́ма из рая́ изгна́л еси́;/ разбо́йника же, Ще́дре, испове́давша Тя на Кресте́,/ вонь всели́л еси́, зову́ща:/ помяни́ мя, Спа́се,// во Ца́рствии Твое́м.

Блаже́ни изгна́ни пра́вды ра́ди,/ я́ко тех есть Ца́рство Небе́сное.

О́гненным ра́нам примеша́ющеся,/ страстоте́рпцы Христо́вы,/ ро́су небе́сную обрето́сте,/ прохлажда́ющую же и укрепля́ющую вас/ терпе́ти плотски́я го́рькия боле́зни;// те́мже облегчева́ете вся́ку боле́знь при́сно от душ на́ших.

Блаже́ни есте́, егда́ поно́сят вам,/ и изжену́т, и реку́т всяк зол глаго́л, на вы лжу́ще Мене́ ра́ди.

Святи́телие свяще́ннии, проро́цы сла́внии,/ преподо́бных мно́жество, и жен боже́ственных собо́р,/ пострада́вших ве́рою,/ и низложи́вших пре́лесть вра́жию,/ небе́сную сла́ву получи́ша.// И́хже моли́твами, Спа́се, уще́дри рабы́ Твоя́.

Ра́дуйтеся и весели́теся,/ я́ко мзда ва́ша мно́га на небесе́х.

Иде́же сия́ет Твой свет,/ во хра́мех избра́нных Твои́х, Бо́же,/ иде́же пи́ща присносу́щная,/ я́же от нас ве́рою преста́вленныя учини́, Иису́се,/ презря́ их, Спа́се, согреше́ния;/ да Тя, Влады́ко, приле́жно сла́вим.

Сла́ва Отцу́ и Сы́ну/ и Свято́му Ду́ху.

Отцу́ и Сыну и Духу Божественному покланяемся, вернии,/Тро́ице Несозда́нней, в Трие́х Ли́цех и во Еди́ном Божестве́,/ при́сно от безпло́тных сил,/ в трие́х свяще́ниих славосло́вимей ве́рно.

И ны́не и при́сно/ и во ве́ки веко́в. Ами́нь.

Просвеще́ние и очище́ние/ из Тебе́ яви́ся всех Изба́витель,/ Богора́дованная Влады́чице,/ Его́же приле́жно моли́ в бу́дущий Суд Стра́шный,/ осужде́ния вся́каго нас изба́вити,/ Пречи́стая, ве́рно всегда́ пою́щих Тя.

На входе тропари субботы, глас 2:

Апо́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о нас Того́, я́ко Бла́га моли́те// спасти́ся, мо́лимся, душа́м на́шим.

Помяни́, Го́споди, я́ко Благ, рабы́ Твоя́,/ и ели́ка в житии́ согреши́ша, прости́;/ никто́же бо безгре́шен, то́кмо Ты,// моги́й и преста́вленным да́ти поко́й.

Слава, кондак, глас 8:

Со святыми упокой,/ Христе, души раб Твоих,/ идеже несть болезнь, ни печаль,/ ни воздыхание, //но жизнь безконе́чная.

И ныне, глас тойже:

Тебе́ и Сте́ну, и Приста́нище и́мамы,/ и Моли́твенницу благоприя́тну к Бо́гу,// Его́же родила́ еси́, Богоро́дице Безневе́стная, ве́рных спасе́ние.

Прокимен рядовой, глас 8:

Весели́теся о Го́споде,/ и ра́дуйтеся, пра́веднии.

Стих: Блажени, ихже оставишася беззакония, и ихже прикрышася греси.

И за упокой глас 6:

Ду́ши их во благи́х водворя́тся.

Аллилуиа, глас 4. Стих: Мно́ги ско́рби пра́ведным, и от всех их изба́вит я́ Госпо́дь.

Стих за упокой: Блаже́ни, я́же избра́л и прия́л еси́, Го́споди, и па́мять их в род и род.

Причастен рядовой: Радуйтеся, праведнии, о Господе, правымподобает похвала́.

И за упокой: Блаже́ни, я́же избра́л и прия́л еси́, Го́споди, и па́мять их в род и род.

Субботняя служба всем святым

(аще Бог Господь)

По предначинательном псалме стихословим кафисму 18-ю¹³.

На Го́споди, воззва́х: стихиры святаго Минеи на 6 (каждая стихира по дважды).

Стих: А́ще беззако́ния на́зриши, Го́споди, Го́споди, кто постои́т?/ Я́ко у Тебе́ очище́ние есть.

Стихира святаго 1-я.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,/ упова́ душа́ моя́ на Го́спода.

Таяжде стихира.

Стих: От стра́жи у́тренния до но́щи, от стра́жи у́тренния/ да упова́ет Изра́иль на Го́спода.

Стихира святаго 2-я.

Стих: Я́ко у Го́спода ми́лость и мно́гое у Него́ избавле́ние:/ и Той изба́вит Изра́иля от всех беззако́ний его́.

Таяжде стихира.

Стих: Хвали́те Го́спода вси язы́цы,/ похвали́те Его́ вси лю́дие.

Стихира святаго 3-я.

Стих: Я́ко утверди́ся ми́лость Его́ на нас,/ и и́стина Госпо́дня пребыва́ет во век.

Таяжде стихира.

Слава: святаго Минеи,

И ныне: Догматик, глас 4: И́же Тебе́ ра́ди:

Аще же несть святому Славы, Слава, и ныне, Богородичен воскресный, глас 4:

И́же Тебе́ ра́ди Богооте́ц проро́к Дави́д/ пе́сненно о Тебе́ провозгласи́/ вели́чия Тебе́ Сотво́ршему:/ предста́ Цари́ца одесну́ю Тебе́./ Тя бо Ма́терь, Хода́таицу живота́ показа́,/ без отца́ из Тебе́ вочелове́читися благоволи́вый Бог,/ да Свой па́ки обнови́т о́браз, истле́вший страстьми́,/ и заблу́ждшее горохи́щное обре́т овча́,/ на ра́мо восприи́м, ко Отцу́ принесе́т,/ и Своему́ хоте́нию,/ с Небе́сными совокупи́т Си́лами,/ и спасе́т, Богоро́дице, мир,// Христо́с име́яй ве́лию и бога́тую ми́лость.

Входа несть. Све́те ти́хий:

Прокимен, глас 7: Бо́же, Засту́пник мой еси́ Ты,/ и ми́лость Твоя́ предвари́т мя.

Стих: Изми́ мя от враг мои́х, Бо́же, и от востаю́щих на мя изба́ви мя.

И абие, Сподо́би, Го́споди: Ектения просительная.

На стиховне стихиры мученичны, глас 4:

Же́ртвы одушевле́нныя,/ всесожже́ния слове́сная,/ му́ченицы Госпо́дни,/ заколе́ния соверше́нная Бо́гу,/ Бо́га зна́юща, и Богом зна́ема овча́та,/ и́хже огра́да волко́м невходи́ма,/ моли́теся и о нас, упасе́нным бы́ти с ва́ми// на воде́ упокое́ния.

Стих: К Тебе́ возведо́х о́чи мои́, живу́щему на небеси́. Се я́ко о́чи раб в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему,/ до́ндеже уще́дрит ны.

Честна́ смерть святы́х Твои́х, Го́споди:/ мече́м бо и огне́м, и душе́ю сокруше́нною/ пролия́ша кро́ви своя́,/ упова́ние иму́ще на Тя,/ восприя́ти трудо́в мзду,/ и претерпе́вше прия́ша от Тебе́, Спа́се,// ве́лию ми́лость.

Стих: Поми́луй нас, Го́споди, поми́луй нас, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих:/ и уничиже́ния го́рдых.

Иму́ще дерзнове́ние ко Спа́су, святи́и,/ моли́те непреста́нно за ны гре́шныя,/ оставле́ния прегреше́ний прося́ще,// и душа́м на́шим ве́лия ми́лости.

Слава: святаго Минеи, И ныне: Богородичен по гласу Славы, от менших.

Аще же несть Славы в Минее, Слава, и ныне, Богородичен, глас 4:

Свеще́ неугаси́мая,/ Престо́ле пра́ведный,/ Пречи́стая Влады́чице,// моли́ спасти́ся душа́м на́шим.

Таже, Ны́не отпуща́еши:

По Трисвятом: Тропарь святаго Минеи.

Слава, и ныне, Богородичен воскресный, глас 4:

Е́же от ве́ка утае́ное/ и А́нгелом несве́домое та́инство,/ Тобо́ю, Богоро́дице, су́щим на земли́ яви́ся Бог,/ в несли́тном соедине́нии воплоща́ем/ и, Крест во́лею нас ра́ди восприи́м,/и́мже воскреси́в первозда́ннаго,// спасе́ от сме́рти души́ на́ша.

На Бог Госпо́дь: тропарь святаго Минеи, дважды. Слава, и ныне, Богородичен воскресен по гласу тропаря.

И стихословится кафисма 16, на 3 славы.

По стихословии ектения малая, и чтутся седальны мученичны:

Днесь а́нгельская во́инства в па́мять страстоте́рпец приидо́ша, ве́рных мы́сли просвети́ти, и вселе́нную благода́тию уясни́ти: от ни́хже, Бо́же, умоле́н быва́я, да́руй нам ве́лию ми́лость.

Стих: Ди́вен Бог во святы́х Свои́х, Бог Изра́илев.

Кресто́м вооружи́вшеся, стратоте́рпцы Твои́, Христе́ Бо́же наш, победи́ша ко́зни началозло́бнаго врага́, возсия́ша я́ко свети́ла, челове́ки наставля́юще, даю́т исцеле́ния ве́рою прося́щим. Тех мольба́ми спаси́ ду́ши на́ша.

Слава, и ныне: Е́же от ве́ка утае́ное и А́нгелом несве́домое та́инство, Тобо́ю, Богоро́дице, су́щим на земли́ яви́ся Бог, в несли́тном соедине́нии воплоща́ем и, Крест во́лею нас ра́ди восприи́м, и́мже воскреси́в первозда́ннаго, спасе́ от сме́рти ду́ши на́ша.

И стихословится кафисма 17, на 3 славы.

По втором стихословии ектения малая и седальны мученичны:

Му́ченицы Твои́, Го́споди, вострада́ниихсвои́х венцы́ прия́ша нетле́нныя от Тебе́, Бо́га на́шего: иму́ще бо кре́пость Твою́, мучи́телей низложи́ша, сокруши́ша и де́монов немощны́я де́рзости. Тех моли́твами спаси́ ду́ши на́ша.

Стих: Мно́ги ско́рби пра́ведным, и от всех их изба́вит я́ Госпо́дь.

И́же во всем ми́ре му́ченик Твои́х, я́ко багряни́цею и ви́ссом кровьми́ Це́рковь Твоя́ украси́вшися, те́ми вопие́т Ти, Христе́ Бо́же: лю́дем Твои́м щедро́ты Твоя́ низпосли́, мир жи́тельству Твоему́ да́руй, и душа́м на́шим ве́лию ми́лость.

Стих: Блаже́ни, я́же избра́л, и прия́л еси́, Го́споди, и па́мять их в род и род.

Ду́ши, я́же преста́вил еси́, Спа́се, от вре́менных, упоко́й, я́ко Благоутро́бен и всеси́лен, и еди́н Человеколю́бец, прости́, я́ко Щедр, соде́янная и́ми, и поми́луй, Ми́лостиве, дела́ рук Твои́х, моли́твами Богоро́дицы, еди́не Человеколю́бче.

Слава, и ныне: Чи́стая Всенепоро́чная и Неискусому́жная, Я́же еди́на безле́тнаго Сы́на и Сло́ва Бо́жия в ле́то ро́ждшая, Сего́ со святы́ми, и честны́ми патриа́рхи, и му́ченики, и проро́ки, и преподо́бными моли́ дарова́ти нам очище́ние и ве́лию ми́лость.

Посем псалом 50.

И поем канона три:

Канон святаго Минеи со ирмосом на 6, ирмос по дважды, посем канон святаго храма или обители на 4, и канон во Октоихе святым мученикам, и святителям и преподобным на 4¹⁴.

Аще храм Владычний, поем каноны сице:

Канон храма или обители на 6, ирмос по дважды, канон святаго Минеи на 4, канон во Октоихе всем святым на 4.

Песнь 1

Ирмос: Триста́ты кре́пкия:

Припев: Вси святи́и, моли́те Бо́га о нас.

Светле́ется при́сно честна́я Це́рковь, по́двиги све́тлыми Госпо́дних страда́лец, и Христа́ возсия́вшаго Со́лнца от Де́вы, и тьму разгна́вшаго пре́лести, сла́вит почита́ющи.

Восхва́лим ве́рно Христо́вы святи́тели, изря́дныя лю́ди упа́сшия до́бре, и све́тло да похва́лим собо́р весь преподо́бно пожи́вших, и теле́сныя сла́сти умертви́вших ду́хом.

Кре́пость от Бо́га жена́м дарова́ся, в посте́ и кре́пком страда́нии врага́ попра́вшим благода́тию: тех моли́твами, Го́споди, и проро́к святы́х Твои́х, ми́лости Твоя́ всем низпосли́.

Слава: Оправда́й, Христе́, рабы́ Твоя́, я́же пра́ведным промышле́нием, от жития́ тле́нного к нетле́нней жи́зни преве́л еси́: со все́ми же Твои́ми пра́ведными ликовствова́ти сподо́би, тех пезира́я прегреше́ния.

И ныне: Избавля́я нас от осужде́ния пе́рваго, Сын Бо́жий, благоизво́ли, Чи́стая, и Сын бы́ти Твой. Те́мже и всыни́вшеся Тебе́ ра́ди, Небе́снаго благослови́м Отца́, пою́ще Тебе́.

Песнь 3

Ирмос: Лук си́льных изнемо́же:

Припев: Вси святи́и, моли́те Бо́га о нас.

Я́коже а́гнцы добропобе́днии му́ченицы, заколе́ни бы́вше, Христу́ принесо́шася, закла́вшемуся А́гнцу и Сло́ву Бо́жию за всех избавле́ние.

Уста́ Бо́жия бы́вше священнотаи́нницы, от недосто́йных изведо́ша досто́йныя, уче́ньми свяще́нными просвеща́юще.

Обре́те преподо́бных сосло́вие, воздержа́ния ра́ди пи́щу неиждива́емую, наслади́вшеся зре́ньми и боже́ственными восхожде́ньми.

Слава: Вся, Христе́, я́же в ве́ре преста́вил еси́, мольба́ми всех святы́х Твои́х, упоко́й, презре́в я́же соде́янная в житии́ тех прегреше́ния.

И ныне: Хвалу́ Бо́гу принесе́м, от Де́вы ро́ждшемуся пло́тию, и жен ли́ки а́нгельским ли́ком совоку́пльшему.

Катавасия: Лук си́льных изнемо́же,/ и немощству́ющии препоя́сашася си́лою,// сего́ ра́ди утверди́ся в Го́споде се́рдце мое́.

Ектения малая.

Седален святаго Минеи. Слава, и ныне, Богородичен.

Песнь 4

Ирмос: Седя́й в сла́ве:

Припев: Вси святи́и, моли́те Бо́га о нас.

Свяще́ннейшее просла́вися му́чеников сосло́вие, свяще́нно просла́виша у́ды свои́ми Го́спода, от всех А́нгел сла́вимаго: и мо́лятся изба́витися нам от вся́кия ско́рби.

Ум невеще́ственнаго светозаре́ния сия́ющ, иму́ще, боже́ственнии святи́телие, нощь вся́кия пре́лести разруши́сте, и неле́стным наставле́нием наста́висте богоизбра́нное ста́до Христо́во к ра́зуму.

Украси́ся преподо́бных многочи́сленное мно́жество, и возвели́чися боже́ственных жен еди́нственное торжество́, и проро́к почте́ся собо́р святы́й, со а́нгельскими собо́ры соедини́вся ра́дуяся.

Слава: А́нгелом согра́ждане бы́вше, святи́и му́ченицы, усо́пшим всем испроси́те ослабле́ние, и рая́ боже́ственнаго вселе́ние, и прегреше́ний коне́чное избавле́ние.

И ныне: И́же Де́ву Тя сохрани́в по рождестве́ нетле́нну, де́вы вся Тебе́ обстоя́щия просла́ви: с ни́миже непреста́нно моли́ся, спасти́ся от вся́кия ско́рби и напа́сти душа́м на́шим.

Песнь 5

Ирмос: Ты, Го́споди мой, Свет:

Припев: Вси святи́и, моли́те Бо́га о нас.

Возноси́ми на крест и колесы́ сокруша́еми, ссеца́еми же на у́ды кре́пции му́ченицы, Бо́гу яви́шася не отсе́чени.

Спаси́телие ве́рным, святи́телие, бы́вше, приведо́сте А́гнцу и Влады́це, и́хже пасти́ преподо́бне вве́ристеся.

Мяте́жей мирски́х отлучи́вшеся, преподо́бнии, умири́сте сердца́ от страсте́й, и всех Бо́гу сы́нове бы́сте.

Слава: Боже́ственнии проро́цы, и жен сосло́вие Бо́гу угоди́вшии, пре́жде усо́пшим проси́те поко́й.

И ныне: Бог в Тя всели́вся, Пречи́стая Де́во, соде́ла челове́ки Своея́ сла́вы боже́ственная жили́ща.

Песнь 6

Ирмос: Приидо́х во глубины́ морски́я:

Припев: Вси святи́и, моли́те Бо́га о нас.

Я́ко прече́стно ка́мение, му́ченицы, по земли́ прему́дро валя́ющеся, злоче́стия зда́ние все низверго́сте, и хра́мы Бо́жия бы́сте.

От руки́ наси́льственныя спаса́ете подру́чники вся, святи́телие, пра́веднии и преподо́бнии, и́же о Христе́ ста́до соблюда́юще: сего́ ра́ди ублажа́етеся.

Рече́нием проро́ческим после́дующе, жен мно́жество, во страда́ниих же и в посте́, от Жены́ Де́вы возсия́вшему Бо́гу Сло́ву угоди́ша.

Слава: Всем животе́ уме́ршим, я́же от нас в ве́ре преше́дшия к Тебе́, Зижди́телю, во све́те со святы́ми Твои́ми, Многоми́лостиве, сподо́би.

И ныне: Усты́, и язы́ком, и се́рдцем испове́даю Тя, Отрокови́це, Бо́га на́шего Чи́стую Ма́терь, и Твои́м хода́тайством изба́ви мя ве́чнаго осужде́ния.

Катавасия: Приидо́х во глубины́ морски́я,/ и потопи́ла мя есть бу́ря мно́гих грехо́в,/ но я́ко Бог из глубины́/ возведи́ живо́т мой,// Многоми́лостиве.

Ектения малая.

Кондак и икос святаго Минеи.

Песнь 7

Ирмос: Авраа́мстии иногда́ в Вавило́не:

Припев: Вси святи́и, моли́те Бо́га о нас.

Влады́ки Христа́ освяще́нныя сосу́ды, Це́ркве забра́ла и столпы́ Госпо́дни му́ченики в весе́лии души́ воспои́м согла́сно.

Святи́телие Христо́вы и преподо́бных всех лик боже́ственный ра́дуется с вы́шними си́лами: тех моли́твами, Христе́, спаса́й пою́щия Тя.

Терпе́ние благо́е жен, преподо́бне и страда́льне просия́вших и ве́рою по́стничествовавших, Е́ву послуша́нием уязви́вшаго низложи́.

Слава: Ты И́же а́да разруши́вый и смерть попра́вый Твое́ю сме́ртию, я́же преста́вил еси́ в ве́ре упоко́й, и рая́ покажи́ жи́тели.

И ныне: Пла́мень, и́же купину́ дре́вле не опаля́ющий, ви́дя законополо́жник, науча́шеся о́бразу Рождества́ Твоего́, Богороди́тельнице Де́во, при́сно Благослове́нная.

Песнь 8

Ирмос: Изба́вителю всех, Всеси́льне:

Припев: Вси святи́и, моли́те Бо́га о нас.

Святи́телие, проро́цы, и му́ченицы, свяще́нный по́двиг сконча́вшии, свяще́нное улучи́ша водворе́ние со А́нгелы: с ни́миже про́сят очище́ния нам всем и ве́лия ми́лости.

Просвети́вшеся ду́хом преподо́бнии, бесо́вскую тьму погуби́ша; с ни́миже священному́ченицы, и святи́телие, проро́цы с пра́ведными, Бо́га во хвале́нии сла́вят.

И́же пре́жде безу́мием хваля́йся погуби́ти зе́млю и мо́ре, жена́ми всегда́ попира́ется, страда́нием же и посто́м послужи́вшими Бо́гу со усе́рдием.

Благослови́м Отца́ и Сы́на и Свята́го Ду́ха, Го́спода:

О всех, Христе́, мо́лимся Ти, ве́рою усо́пших, я́ко Милосе́рд сих к лико́м причти́ спаса́емых, непреста́нно вопию́щих: вся дела́, благослови́те, Госпо́дня, Го́спода.

И ныне: Ми́лости Твоея́ сподо́би мя, Благоми́лостивное Сло́во ро́ждшая, Богороди́тельнице Влады́чице, и вопию́ща мя спаси́: вся дела́, благослови́те, Госпо́дня, Го́спода.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Катавасия: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:// вся дела́, благослови́те, по́йте Го́спода.

Таже, поем: Честне́йшую:

Песнь 9

Ирмос: Е́ва у́бо неду́гом:

Припев: Вси святи́и, моли́те Бо́га о нас.

Ви́девше Боже́ственныя да́ры му́ченицы, и по́чести прие́млюще вели́ких свои́х боле́зней, ра́дуются Христа́ велича́юще, сих вои́стину возвели́чившаго, и победоно́сцы показа́вшаго.

Я́ко святи́тельствующе лю́дем, поста́влени бы́вше святи́телие богопропове́дницы, я́ко просвети́вшеся посто́м, со́лнца светле́йше, преподо́бнии, просия́сте, ве́рных озаря́юще дел вели́ких явле́нием.

Со священному́ченики ку́пно, и со все́ми проро́ки, ублажи́м вся преподо́бныя и пра́ведники, и жены́ све́тло угоди́вшия, тех мольба́ми, Христе́, вопию́ще: изба́ви гее́нны ду́ши на́ша.

Слава: Ея́же сподо́бишася ра́дости святи́и, и́же до́бре Тебе́, Христе́ угоди́вшии, тоя́ преста́вльшияся к Тебе́ ве́рою сподо́би, тех презира́я согреше́ния, Го́споди еди́не Многоми́лостиве.

И ныне: Я́вльшися вы́шних Херуви́м, Всенепоро́чная, превы́шши, я́ко ро́ждши Содержи́теля вся́ческих, вы́шши ум мой соде́лай, на стра́сти плотски́я укрепля́ющи мя, Влады́чняя твори́ти хоте́ния.

Катавасия: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови благослове́ние процвела́ еси́.// Тем Тя вси велича́ем.

Таже, Досто́йно есть: и ектения малая.

Светилен глаголем прежде святаго Минеи.

Слава: И́же и ме́ртвыми и живы́ми облада́яй я́ко Бог, и святы́ми Твои́ми всю зе́млю просвети́вый, Соде́телю всех, пою́щия Тя спаса́й.

И ныне, Богородичен: Мы о Тебе́ хва́лимся, Богоро́дице, и к Бо́гу Тя и́мамы предста́тельство, простри́ ру́ку Твою́ необори́мую, и сокруши́ враги́ на́ша, Твои́м низпосли́ рабо́м по́мощь от Свята́го.

И абие псалмы хвалитныя, и прочая.

На стиховне стихиры мученикам, глас 4:

Кто не ужаса́ется зря, святи́и му́ченицы,/ по́двига до́браго, и́мже подвиза́стеся?/ Ка́ко во пло́ти су́ще, безпло́тнаго врага́ победи́сте,/ Христа́ испове́дающе,/ и Кресто́м вооружи́вшеся?/ Те́мже досто́йно яви́стеся бесо́в прогони́тели,/ и ва́рваров победи́тели,// непреста́нно моля́щеся спасти́ся душа́м на́шим.

Стих: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся, во вся дни на́ша возвесели́хомся, за дни в ня́же смири́л ны еси́, ле́та, в ня́же ви́дехом зла́я. И при́зри на рабы́ Твоя́, и на дела́ Твоя́,/ и наста́ви сы́ны их.

А́нгелом соприча́стницы бы́сте, святи́и му́ченицы,/ на суди́щи Христа́ му́жески пропове́давше:/ вся бо я́же в ми́ре оста́висте кра́сная я́ко не су́ща,/ ве́ру же я́ко наде́жду тве́рду удержа́сте;/ те́мже и лесть отгна́вше,/ источа́ете ве́рным исцеле́ний дарова́ния,// непреста́нно моля́щеся спасти́ся душа́м на́шим.

Стих: И бу́ди све́тлость Го́спода Бо́га на́шего на нас, и дела́ рук на́ших испра́ви на нас,/ и де́ло рук на́ших испра́ви.

Честна́ смерть святы́х Твои́х, Го́споди,/ мече́м бо и огне́м, и душе́ю сокруше́нною/ пролия́ша кровь свою́,/ упова́ние иму́ще на Тя,/ восприя́ти трудо́в мзду:// претерпе́ша бо и прия́ша от Тебе́, Спа́се, ве́лию ми́лость.

Слава: святаго Минеи, И ныне: Богородичен по гласу Славы, от менших.

Аще же несть, Слава, и ныне, Богородичен, глас 4:

Еди́на Чи́стая и Пречи́стая Де́во,/ Я́же Бо́га безсе́менно ро́ждшая,// моли́ спасти́ся душа́м на́шим.

Таже, Бла́го есть:

Трисвятое, по О́тче наш: тропарь святаго Минеи.

Слава, и ныне, Богородичен по гласу тропаря от менших, в конец утрени.

Ектения сугубая и час первый.

Блаженны, глас 4:

Блаже́ни миротво́рцы,/ я́ко ти́и сы́нове Бо́жии нареку́тся.

Дре́вом Ада́м рая́ бысть изселе́н,/ Дре́вом же Кре́стным разбо́йник в рай всели́ся./ Ов у́бо вкуш, за́поведь отве́рже Сотво́ршаго,/ ов же сраспина́емь,/ Бо́га испове́да тая́щагося,/ помяни́ мя, вопия́, во Ца́рствии Твое́м.

Блажени изгнани правды ради,/ яко тех есть Царство Небесное.

Распала́ющеся Христо́вою любо́вию,/ святи́и му́ченицы,/ злоче́стия огнь ороше́нием по́двиг угаси́сте,/ и свети́льницы многосве́тлии Це́ркве яви́стеся,/ отгоня́юще бла́гостию тьму неду́гов и скорбе́й от душ на́ших./ Те́мже до́лжно похваля́ем вас.

Блаже́ни есте́, егда́ поно́сят вам,/ и изжену́т, и реку́т всяк зол глаго́л, на вы лжу́ще Мене́ ра́ди.

Святи́телие свяще́ннии,/ и проро́ков боже́ственное сосло́вие,/ и преподо́бных ли́цы, и жен святы́х еди́нственное торжество́,/ Бо́гу угоди́вше доброде́тельными дея́нии, и просла́вишася./ Тех ублажа́ем, мольба́ми их моля́ще,/ получи́ти ве́чный живо́т и просвеще́ние.

Радуйтеся и веселитеся,/ яко мзда ваша многа на небесех.

Иде́же сия́ет Твой свет,/ и иде́же ли́цы святы́х ра́дуются,/ отню́дуже отбеже́ воздыха́ние и боле́знь,/ учини́ рабы́ Твоя́ пре́жде сконча́вшияся,/ и оста́вльшия житие́ многоболе́зненное,/ пе́ти Твою́ неизрече́нную, Христе́, благосты́ню,/ презре́в их прегреше́ния,/ я́же на земли́ соде́яша.

Слава: Неразлу́чная Тро́ице,/ Я́же во Отце́ и Сы́не и Ду́се соединя́ема/ вся́чески, не слива́ема со́бствы,/ Еди́нице Триипоста́сная,/ уме́ршия ве́рно у Тебе́ поко́й,/ мольба́ми святы́х Твои́х му́ченик,/ оте́ц же и честны́х проро́к,/ подаю́щи очище́ние душа́м на́шим.

И ныне: Его́же роди́ Оте́ц пре́жде денни́цы,/ Сло́во зачала́ еси́,/ и родила́ еси́ пло́тию,/ бы́вша Челове́ка соверше́нна,/ двема́ познава́ема де́йствы, Пречи́стая, и во́лема./ Того́ у́бо моли́, я́ко Зижди́теля и Го́спода,/ уще́дрити нас, Тебе́ пою́щих,/ Отрокови́це Богоневе́стная.

Поем тропари и кондаки на входе сице:

В храме святаго:

Тропарь всем святым, глас 2: Апо́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о на́с Того́, я́ко Бла́га, моли́те,// спасти́ся, мо́лимся, душа́м на́шим.

Тропарь и кондак святаго Минеи.

Слава, кондак, глас 8:

Со святы́ми упоко́й,/ Христе́, души́ ра́б Твои́х,/ иде́же не́сть боле́знь, ни печа́ль,/ ни воздыха́ние, //но жи́знь безконе́чная.

И ныне, глас тойже:

Я́ко нача́тки естества́, Насади́телю тва́ри,/ вселе́нная прино́сит Ти, Го́споди, богоно́сныя му́ченики;/ тех моли́твами в ми́ре глубо́це// Це́рковь Твою́, жи́тельство Твое́ Богоро́дицею соблюди́, Многоми́лостиве.

В храме Господском или Богородичном:

Тропарь храма Христова или Богородицы.

Тропарь всем святым: Апо́столи, му́ченицы и проро́цы:

Тропарь и кондак святаго Минеи.

Слава: Со святы́ми упоко́й:

И ныне, глас 8: Я́ко нача́тки естества́:

Прокимен, глас 8: Весели́теся о Го́споде,/ и ра́дуйтеся, пра́веднии.

Сти́х: Блаже́ни, и́хже оста́вишася беззако́ния, и и́хже прикры́шася греси́.

Аллилуиа, глас 4: Воззва́ша пра́веднии, и Госпо́дь услы́ша их.

Стих: Мно́ги ско́рби пра́ведным, и от все́х и́х изба́вит я́ Госпо́дь.

Причастен: Ра́дуйтеся, пра́веднии, о Го́споде, пра́вым подоба́ет похвала́.

На Го́споди, воззва́х: стихиры святаго Минеи, 3.

Стих: А́ще беззако́ния на́зриши, Го́споди, Го́споди, кто постои́т?/ Я́ко у Тебе́ очище́ние есть.

Стихира святаго 1-я.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,/ упова́ душа́ моя́ на Го́спода.

Стихира святаго 2-я.

Стих: От стра́жи у́тренния до но́щи, от стра́жи у́тренния/ да упова́ет Изра́иль на Го́спода.

Стихира святаго 3-я.

Таже поем мученичны гласа, 3, глас 4:

Стих: Я́ко у Го́спода ми́лость и мно́гое у Него́ избавле́ние:/ и Той изба́вит Изра́иля от всех беззако́ний его́.

Же́ртвы одушевле́нныя,/ всесожже́ния слове́сная,/ му́ченицы Госпо́дни,/ заколе́ния соверше́нная Бо́гу,/ Бо́га зна́юща, и Бо́гом зна́ема овча́та,/ и́хже огра́да волко́м невходи́ма,/ моли́теся и о нас, упасе́нным бы́ти с ва́ми// на воде́ упокое́ния.

Стих: Хвали́те Го́спода вси язы́цы,/ похвали́те Его́ вси лю́дие.

Честна́ смерть святы́х Твои́х, Го́споди:/ мече́м бо и огне́м, и душе́ю сокруше́нною/ пролия́ша кро́ви своя́,/ упова́ние иму́ще на Тя,/ восприя́ти трудо́в мзду,/ и претерпе́вше прия́ша от Тебе́, Спа́се,// ве́лию ми́лость.

Стих: Я́ко утверди́ся ми́лость Его́ на нас,/ и и́стина Госпо́дня пребыва́ет во век.

Иму́ще дерзнове́ние ко Спа́су, святи́и,/ моли́те непреста́нно за ны гре́шныя,/ оставле́ния прегреше́ний прося́ще,// и душа́м на́шим ве́лия ми́лости.

Слава, и ныне, Богородичен, глас 4:

И́же Тебе́ ра́ди Богооте́ц проро́к Дави́д/ пе́сненно о Тебе́ провозгласи́/ вели́чия Тебе́ Сотво́ршему:/ предста́ Цари́ца одесну́ю Тебе́./ Тя бо Ма́терь, Хода́таицу живота́ показа́,/ без отца́ из Тебе́ вочелове́читися благоволи́вый Бог,/ да Свой па́ки обнови́т о́браз, истле́вший страстьми́,/ и заблу́ждшее горохи́щное обре́т овча́,/ на ра́мо восприи́м, ко Отцу́ принесе́т,/ и Своему́ хоте́нию,/ с Небе́сными совокупи́т Си́лами,/ и спасе́т, Богоро́дице, мир,// Христо́с име́яй ве́лию и бога́тую ми́лость.

Входа несть. Све́те ти́хий:

Прокимен дне, глас 7: Бо́же, Засту́пник мой еси́ Ты,/ и ми́лость Твоя́ предвари́т мя.

Таже, Сподо́би, Го́споди:

Посем ектения просительная.

На стиховне поем два мученична и един мертвен, глас 4:

Прославля́яйся в па́мятех святы́х Твои́х, Христе́ Бо́же,/ и от них умоле́н быва́я,// низпосли́ нам ве́лию ми́лость.

Стих: Блаже́ни, я́же избра́л// и прия́л еси́, Го́споди.

Мученичен: И́же святы́х му́ченик прие́мый терпе́ние,/ и от нас приими́ пе́ние, Человеколю́бче,// да́руй нам тех моли́твами ве́лию ми́лость.

Стих: Ду́ши их/ во благи́х водворя́тся.

Мертвен: Со ду́хи пра́ведных сконча́вшихся/ ду́ши раб Твои́х, Спа́се, упоко́й,/ сохраня́я их во блаже́нней жи́зни,// я́же у Тебе́, Человеколю́бче.

Слава, и ныне, Богородичен:

Свеще́ неугаси́мая,/ Престо́ле пра́ведный,/ Пречи́стая Влады́чице,// моли́ спасти́ся душа́м на́шим.

Таже, Ны́не отпуща́еши:

По Трисвятом: тропари, глас 2:

Апо́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о нас Того́, я́ко Бла́га моли́те// спасти́ся, мо́лимся, душа́м на́шим.

Слава:

Помяни́, Го́споди, я́ко Благ, рабы́ Твоя́,/ и ели́ка в житии́ согреши́ша, прости́;/ никто́же бо безгре́шен, то́кмо Ты,// моги́й и преста́вленным да́ти поко́й.

И ныне:

Ма́ти Свята́я неизрече́ннаго Све́та,/ а́нгельскими Тя пе́сньми почита́юще// благоче́стно велича́ем.

Аллилуиа, во глас 2-й, таже тропарь: Апо́столи, му́ченицы: дважды.

Слава: Помяни́, Го́споди: И ныне: Ма́ти Свята́я:

Посем кафисма 16.

Ектения малая обычная, и глаголем седальны мученичны:

Кресто́м вооружи́вшеся, стратоте́рпцы Твои́, Христе́ Бо́же наш, победи́ша ко́зни началозло́бнаго врага́, возсия́ша я́ко свети́ла, челове́ки наставля́юще, даю́т исцеле́ния ве́рою прося́щим. Тех мольба́ми спаси́ ду́ши на́ша.

Му́ченицы Твои́, Го́споди, во страда́ниих свои́х венцы́ прия́ша нетле́нныя от Тебе́, Бо́га на́шего: иму́ще бо кре́пость Твою́, мучи́телей низложи́ша, сокруши́ша и де́монов немощны́я де́рзости. Тех моли́твами спаси́ ду́ши на́ша.

Стих: Ди́вен Бог во святы́х Свои́х, Бог Изра́илев.

И́же во всем ми́ре му́ченик Твои́х, я́ко багряни́цею и ви́ссом кровьми́ Це́рковь Твоя́ украси́вшися, те́ми вопие́т Ти, Христе́ Бо́же: лю́дем Твои́м щедро́ты Твоя́ низпосли́, мир жи́тельству Твоему́ да́руй, и душа́м на́шим ве́лию ми́лость.

Стих: Блаже́ни, я́же избра́л, и прия́л еси́, Го́споди, и па́мять их в род и род.

Ду́ши, я́же преста́вил еси́, Спа́се, от вре́менных, упоко́й, я́ко Благоутро́бен и Всеси́лен, и еди́н Человеколю́бец, прости́, я́ко Щедр, соде́янная и́ми, и поми́луй, Ми́лостиве, дела́ рук Твои́х, моли́твами Богоро́дицы, еди́не Человеколю́бче.

Слава, и ныне: Чи́стая Всенепоро́чная и Неискусому́жная, Я́же еди́на безле́тнаго Сы́на и Сло́ва Бо́жия в ле́то ро́ждшая, Сего́ со святы́ми и честны́ми патриа́рхи, и му́ченики, и проро́ки, и преподо́бными моли́, дарова́ти нам очище́ние и ве́лию ми́лость.

Глаголем и непорочны на 2 статии, с припевы их (зри сия в приложении).

И прочая до канона вся за упокой, зри в приложении.

Каноны же поем сице:

Канон святаго Минеи со ирмосом на 6, ирмос по дважды, посем канон святаго храма или обители на 4, и канон во Октоихе второй, за упокой, на 4¹⁵.

Аще храм Владычний, поем каноны сице:

Канон храма или обители на 6, ирмос по дважды, канон святаго Минеи на 4, канон во Октоихе, второй, на 4.

Канон усопшим, глас 4:

Песнь 1

Ирмос: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма// Амали́кову си́лу в пусты́ни победи́л есть.

Припев: Ди́вен Бог во святы́х Свои́х, Бог Изра́илев.

Держа́й за десну́ю ру́ку ра́б Твои́х, наста́вити и́х на па́жить безсме́ртную, Спа́се, на зре́ние добро́ты Твоея́ страстоно́сцы му́ченики умоле́н быва́я.

Припев: Упоко́й, Го́споди, ду́ши усо́пших раб Твои́х.

Неизрече́нную и блаже́нную сла́ву Твою́, преста́вльшияся ве́рою насле́довати сподо́би, Христе́, презира́я прегреше́ния их, и оправда́я благода́тию, излия́нием Твоея́ Кро́ве.

Слава: Ме́ртвостию Твое́ю живоно́сною умертви́теля умертви́л еси́, Христе́ Бо́же, и́хже прия́т, и и́мже Твою́ воздая́ жизнь, Сам ны́не упоко́й ве́рныя рабы́ Твоя́.

И ныне: Красе́н превысоча́йшими добро́тами, я́ко Бо́жий Сын: а я́ко из Тебе́, Де́во, воплоти́выйся и на дре́ве пове́шен быв, добро́ты не име́яше, смерть за всех прия́т.

Песнь 3

Ирмос: Не му́дростию и си́лою/ и бога́тством хва́лимся,/ но Тобо́ю О́тчею Ипоста́сною Му́дростию, Христе́,/ несть бо свят, па́че Тебе́,// Человеколю́бче.

Припев: Ди́вен Бог во святы́х Свои́х, Бог Изра́илев.

Победи́вше и́дольскую пре́лесть му́ченицы, Влады́ку и Бо́га ны́не мо́лят, дарова́ти пре́жде сконча́вшимся боже́ственный поко́й.

Припев: Упоко́й, Го́споди, ду́ши усо́пших раб Твои́х.

Обраща́ющееся ору́жие премину́ти благоволи́, и дре́ва живо́тнаго подо́бно прича́стие улучи́ти, я́же преста́вил еси́ рабы́ Твоя́, Влады́ко.

Слава: В раи́, Христе́, пи́щи водвори́тися рабо́м Твои́м сподо́би, иде́же глас чист пра́зднующих, согреше́ний оставле́ние тем да́руя.

И ныне: Боже́ственному рождеству́ де́вство сочета́ла еси́ Пречи́стая: Зижди́теля бо вся́ческих несказа́нно родила́ еси́, Его́же хоте́нию вся повину́ются.

Катавасия: Не му́дростию и си́лою:

Ектения малая, обычная.

Кондак, икос и седален с Богородичным святаго Минеи.

Песнь 4

Ирмос: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:// сла́ва си́ле Твое́й, Го́споди.

Припев: Ди́вен Бог во святы́х Свои́х, Бог Изра́илев.

Я́вльшеся му́ченицы, я́ко свети́льницы, не́бо просвеща́ют церко́вное, и́же и у Спа́са Христа́ про́сят дарова́ти усо́пшим ослабле́ние.

Припев: Упоко́й, Го́споди, ду́ши усо́пших раб Твои́х.

Жезл си́лы иму́ще Крест Твой раби́ Твои́, мирско́е мо́ре проидо́ша; и́хже всели́ в го́ру Твою́, Го́споди, в не́йже соде́лал еси́ святы́ню.

Слава: В селе́ния вои́стину возлю́бленная, я́же избра́л еси́, Влады́ко, и я́же прия́л еси́ рабы́ Твоя́, благоволи́ всели́тися, я́ко Милосе́рд, иде́же пра́ведных ду́си.

И ныне: И́же ме́ртвыми и живы́ми облада́яй, вопло́щься, я́ко челове́к из Тебе́, Богома́ти, смерть претерпе́ пло́тию Безсме́ртный, разруши́в сме́рти си́лу.

Песнь 5

Ирмос: Ты, Го́споди мой, Свет/ в мир прише́л еси́,/ Свет Святы́й, обраща́яй/ из мра́чна неве́дения// ве́рою воспева́ющия Тя.

Припев: Ди́вен Бог во святы́х Свои́х, Бог Изра́илев.

Ты, Го́споди, Твоего́ влады́чествия просла́вил еси́ му́ченики; те́хже ра́ди пре́жде усо́пшия упоко́й, я́ко Благоутро́бен.

Припев: Упоко́й, Го́споди, ду́ши усо́пших раб Твои́х.

Нереши́мый живо́т, кра́сное ра́дование, и непрестаю́щее весе́лие, прежде уме́ршим пода́ждь, Многоми́лостиве.

Слава: Еди́не Бла́же, и Исто́чниче бла́гости, упоко́й и́же в ве́ре и Твое́м позна́нии житие́ сконча́вших.

И ныне: Пое́м Тя, Богома́ти, Е́юже су́щим во тьме возсия́ неизрече́нный и непристу́пный Свет, и любо́вию блажи́м.

Песнь 6

Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися,/ ра́ди ми́лости от ребр Твои́х// исте́кшею Кро́вию.

Припев: Ди́вен Бог во святы́х Свои́х, Бог Изра́илев.

Копие́, боже́ственная Твоя́ ре́бра пробо́дшее, обраща́ющееся ору́жиеувидевше, Спасе, да отступит от раб Твоихмольбами страстотерпец Твоих.

Припев: Упоко́й, Го́споди, ду́ши усо́пших раб Твои́х.

На дре́ве пове́шен быв, Спа́се мой, рай отве́рзл еси́; в ве́ре у́бо преста́вленныя вонь всели́, я́ко Щедр, и Твоея́ жи́зни прича́стники покажи́.

Слава: Па́жити живо́тныя сподо́би наслади́тися, и́же к Тебе́, Влады́ко, благоче́стно преходя́щия сме́ртию, и с преподо́бными и́же от ве́ка сопричти́.

И ныне: Сло́во, я́ко Бог Сый неви́димь, и вопло́щься ви́димь бысть, от Де́вы Отрокови́цы Неискусому́жныя, и сме́ртию Свое́ю смерть разруши́.

Катавасия: Пожру́ Ти со гла́сом:

Ектения малая, за упокой.

Кондак, глас 8:

Икос:

Со святы́ми упоко́й,/ Христе́, души́ ра́б Твои́х,/ иде́же не́сть боле́знь, ни печа́ль,/ ни воздыхан́ие, //но жи́знь безконе́чная.

Сам Еди́н еси́ Безсме́ртный,/ сотвори́вый и созда́вый челове́ка,/ земни́и у́бо от земли́ созда́хомся/ и в зе́млю ту́южде по́йдем,/ я́коже повеле́л еси́,/ созда́вый мя и реки́й ми:/ я́ко земля́ еси́ и в зе́млю оты́деши,/ а́може вси челове́цы по́йдем,/ надгро́бное рыда́ние творя́ще песнь:// Аллилу́иа, Аллилу́иа, Аллилу́иа.

Песнь 7

Ирмос: В пещи́ Авраа́мстии/ о́троцы перси́дстей,/ любо́вию благоче́стия па́че,/ не́жели пла́менем опаля́еми, взыва́ху:// благослове́н еси́ в хра́ме сла́вы Твоея́, Го́споди.

Припев: Ди́вен Бог во святы́х Свои́х, Бог Изра́илев.

Терпе́ние же и пожда́ние, и кро́ви всех му́ченик, избавле́ние прие́м, благоче́стно усо́пшия у Тебе́ упоко́й, я́ко Ми́лостив и Благопремени́тель.

Припев: Упоко́й, Го́споди, ду́ши усо́пших раб Твои́х.

Причета́вый к перворо́дным, и пра́ведным Твои́м, Спа́се, ду́ши раб Твои́х к Тебе́ преста́вленныя, сподо́би непреста́нно Тебе́ наслажда́тися, все́ми владу́щаго.

Слава: С весе́лием и со дерзнове́нием и све́тлостию, Сло́ве Бо́жий Изба́вителю, благоволи́ я́ко Бог на о́блацех сре́сти Тя, и́хже Ты прия́л еси́ ны́не я́ко Ми́лостив.

И ныне: Благослове́нная Богороди́тельнице Де́во Ма́ти, ра́дуйся: Тебе́ бо ра́ди бысть вои́стинну сме́рти потребле́ние, живо́т же неразори́мый уме́ршим дарова́ся.

Песнь 8

Ирмос: Ру́це распросте́р Дании́л,/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели/ о́троцы, взыва́юще:// благослови́те, вся дела́ Госпо́дня, Го́спода.

Припев: Ди́вен Бог во святы́х Свои́х, Бог Изра́илев.

Му́чеников прие́мля моле́ния, и ми́лование к единоплеме́нному, ду́ши упоко́й, Влады́ко, в ве́ре Твое́й усо́пших, грехи́ презря́ сих вопию́щих Ти: вся дела́, благослови́те, Госпо́дня, Го́спода.

Припев: Упоко́й, Го́споди, ду́ши усо́пших раб Твои́х.

Мертв со беззако́нникома вмени́вся, ме́ртвым источи́л еси́ жизнь безсме́ртную, преста́вленныя у́бо рабы́ Твоя́ о наде́жди воскресе́ния, Ца́рствие Твое́ улучи́ти сподо́би, Спа́се, Тебе́ вопию́щих: вся дела́, благослови́те, Госпо́дня, Го́спода.

Благослови́м Отца́ и Сы́на и Свята́го Ду́ха, Го́спода.

Вои́стину приснотеку́щий Исто́чниче бла́гости, в небе́сных селе́ниих сконча́вшияся рабы́ Твоя́, и житие́ тле́нное оста́вльшия, кро́тко, Спа́се, примири́, Тебе́ вопию́щия: вся дела́, благослови́те, Госпо́дня, Го́спода.

И ныне: Еди́на Ты яви́лася еси́ на земли́, Де́во Пречи́стая, и Ма́ти безму́жная: Бо́га бо родила́ еси́, Влады́чице, па́че сло́ва и смы́сла, и ве́чную жизнь ме́ртвым источи́ла еси́. Те́мже вси Тя благослови́м, Мари́е Богоневе́сто.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Катавасия: Ру́це распросте́р Дании́л:

Таже, Честне́йшую:

Песнь 9

Ирмос: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови благослове́ние процвела́ еси́.// Тем Тя вси велича́ем.

Припев: Ди́вен Бог во святы́х Свои́х, Бог Изра́илев.

Дал еси́ и́стинным страда́льцем, и му́чеником дерзнове́ние моли́ти Тя, Го́споди; даждь же ве́рою преста́вльшимся, боже́ственное тех ра́ди избавле́ние, в ме́сто селе́ния свята́го всели́тися да́руя.

Припев: Упоко́й, Го́споди, ду́ши усо́пших раб Твои́х.

Манове́нием вседе́тельным, И́же вся́ческая поле́зне соде́ловая, живы́ми име́я о́бласть, и ме́ртвыми госпо́дствуя, я́ко Всеси́лен, учини́, я́же преста́вил еси́ рабы Твоя на вода́х поко́йных.

Слава: И́же естество́м Сый, я́ко Благ, И́же бога́тый в ми́лостех и в бла́гости, изба́ви от тьмы кроме́шния, призыва́ющия Твое́ и́мя, ве́рою оправда́в и благода́тию, сих просвети́, я́ко Человеколю́бец.

И ныне: О́бразы, Всенепоро́чная, Твоего́ рожде́ства проро́цы пропове́даша, и́нако же друзи́и пресла́вно Тебе́ нарица́ния слага́юще: Живо́т бо во а́де су́щим родила́ еси́, держа́ву сме́рти разруша́ющий.

Таже, Досто́йно есть: Ектения малая, обычная.

И ексапостиларий Октоиха:

И́же и ме́ртвыми и живы́ми облада́яй я́ко Бог, и святы́ми Твои́ми всю зе́млю просвети́вый, Соде́телю всех, пою́щия Тя спаса́й.

Слава, и ныне, Богородичен: Мы о Тебе́ хва́лимся, Богоро́дице, и к Бо́гу Тя и́мамы предста́тельство, простри́ ру́ку Твою́ необори́мую, и сокруши́ враги́ на́ша, Твои́м низпосли́ рабо́м по́мощь от Свята́го.

Посем псалмы хвалитныя.

На хвалитех стихиры мученикам, глас 4:

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Кто не ужаса́ется зря, святи́и му́ченицы,/ по́двига до́браго, и́мже подвиза́стеся?/ Ка́ко во пло́ти су́ще, безпло́тнаго врага́ победи́сте,/ Христа́ испове́дающе,/ и Кресто́м вооружи́вшеся?/ Те́мже досто́йно яви́стеся бесо́в прогони́тели,/ и ва́рваров победи́тели,// непреста́нно моля́щеся спасти́ся душа́м на́шим.

Стих: Хвали́те Его́ во гла́се тру́бнем,/ хвали́те Его́ во псалти́ри и гу́слех.

А́нгелом соприча́стницы бы́сте, святи́и му́ченицы,/ на суди́щи Христа́ му́жески пропове́давше:/ вся́ бо я́же в ми́ре оста́висте кра́сная я́ко не су́ща,/ ве́ру же я́ко наде́жду тве́рду удержа́сте./ Те́мже и ле́сть отгна́вше,/ источа́ете ве́рным исцеле́ний дарова́ния,// непреста́нно моля́щеся спасти́ся душа́м на́шим.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Ка́ко ва́шим подвиго́м не удиви́мся, святи́и му́ченицы?/ Я́ко те́лом умира́ющим обложе́ни,/ безпло́тныя враги́ победи́сте,/ не устраши́ша вас мучи́тельская преще́ния,/ ни ужаси́ша вас мук приложе́ния,// вои́стинну досто́йно от Христа́ просла́вистеся.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния./ Вся́кое дыха́ние да хва́лит Го́спода.

Честна́ смерть святы́х Твои́х, Го́споди,/ мече́м бо и огне́м, и душе́ю сокруше́нною/ пролия́ша кро́вь свою́,/ упова́ние иму́ще на Тя,/ восприя́ти трудо́в мзду:// претерпе́ша бо и прия́ша от Тебе́, Спа́се, ве́лию ми́лость.

Стих: Блаже́ни, я́же избра́л, и прия́л еси́, Го́споди,/ и па́мять их в род и род.

Мертвен: В поко́ищи Твое́м, Го́споди,/ иде́же вси святи́и Твои́ почива́ют,/ усо́пшия рабы́ Твоя́ поко́й,// я́ко еди́н Сый Человеколю́бец.

Слава: Где есть ми́ра пристра́стие?/ Где есть привре́менное мечта́ние?/ Где есть зла́то и сребро́?/ Где есть рабо́в мно́жество и молва́?/ Вся прах, вся пе́пел, вся сень!/ Но прииди́те, возопии́м Безсме́ртному Царю́:/ Го́споди, ве́чных Твои́х благ сподо́би преста́вльшияся от нас,// и упоко́й ты́я в нестаре́емом блаже́нстве.

И ныне: Еди́на Чи́стая и Пречи́стая Де́во,/ Я́же Бо́га безсе́менно ро́ждшая,// моли́ спасти́ся душа́м на́шим.

На стиховне стихиры покойны, глас 4.

Вои́стинну стра́шно есть та́инство сме́ртное:/ ка́ко душа́ от те́ла ну́ждею разлуча́ется,/ от соста́в и сочета́ния есте́ственнаго соу́за/ Боже́ственным хоте́нием разделя́ется?/ Те́мже Тебе́ мо́лимся:/ преста́вленыя упоко́й в кро́ве пра́ведных Твои́х,// Жизнода́вче Человеколю́бче.

Стих: Блаже́ни, я́же избра́л/ и прия́л еси́, Го́споди.

Со́н явля́ется, ве́рующим в Тя смерть,/ Тебе́, положе́ну во гро́бе, все́ми владу́щему,/ и сме́ртную держа́ву разо́ршему,/ и упраздни́вшему ея́ наси́лие многоле́тное./ Те́мже Ти мо́лимся:/ преста́вленыя учини́ в ра́дости святы́х Твои́х,// и в пра́ведных све́тлости.

Стих: Ду́ши их/ во благи́х водворя́тся.

Ты пра́вда же и освяще́ние нам был еси́,/ и душа́м избавле́ние:/ Отцу́ бо приве́л еси́ опра́вданы и изба́влены,/ восприе́м на́ше до́лжное запреще́ние./ И ны́не мо́лим Тя:/ преста́вленыя упоко́й в ра́дости и све́тлости святы́х Твои́х,// Благода́телю и Человеколю́бче.

Слава, и ныне, Богородичен:

Словесе́м после́дующе богоглаго́ливых проро́к,/ Богоро́дицу Тя, Всенепоро́чная, му́дрствуем:/ Бо́га бо родила́ еси́ воплоти́вшагося недомы́сленно,/ изба́вльшаго нас плене́нных согреше́нии./ Его́же ны́не моли́, Пречи́стая,// преста́вленыя рабы́ Твоя́ Свои́м просвети́ти озаре́нием.

По Бла́го есть: тропари: Апо́столи, му́ченицы: якоже на вечерни указуяся.

Ектения сугубая и час первый.

Блаженны, глас 4:

Блаже́ни миротво́рцы,/ я́ко ти́и сы́нове Бо́жии нареку́тся.

Дре́вом Ада́м рая́ бысть изселе́н,/ Дре́вом же Кре́стным разбо́йник в рай всели́ся./ Ов у́бо вкуш, за́поведь отве́рже Сотво́ршаго,/ ов же сраспина́емь,/ Бо́га испове́да тая́щагося,/ помяни́ мя, вопия́, во Ца́рствии Твое́м.

Блаже́ни изгна́ни пра́вды ра́ди,/ я́ко тех есть Ца́рство Небе́сное.

Распала́ющеся Христо́вою любо́вию,/ святи́и му́ченицы,/ злоче́стия о́гнь ороше́нием по́двиг угаси́сте,/ и свети́льницы многосве́тлии Це́ркве яви́стеся,/ отгоня́юще бла́гостию тьму́ неду́гов и скорбе́й от ду́ш на́ших./ Те́мже до́лжно похваля́ем ва́с.

Блаже́ни есте́, егда́ поно́сят вам,/ и изжену́т, и реку́т всяк зол глаго́л, на вы лжу́ще Мене́ ра́ди.

Святи́телие свяще́ннии,/ и проро́ков боже́ственное сосло́вие,/ и преподо́бных ли́цы, и жен святы́х еди́нственное торжество́,/ Бо́гу угоди́вше доброде́тельными дея́нии, и просла́вишася./ Тех ублажа́ем, мольба́ми их моля́ще,/ получи́ти ве́чный живо́т и просвеще́ние.

Ра́дуйтеся и весели́теся,/ я́ко мзда ва́ша мно́га на небесе́х.

Иде́же сия́ет Твой свет/ и иде́же ли́цы святы́х ра́дуются,/ отню́дуже отбеже́ воздыха́ние и боле́знь,/ учини́ рабы́ Твоя́ пре́жде сконча́вшияся/ и оста́вльшия житие́ многоболе́зненное,/ пе́ти Твою́ неизрече́нную, Христе́, благосты́ню,/ презре́в их прегреше́ния,/ я́же на земли́ соде́яша.

Сла́ва Отцу́ и Сы́ну/ и Свято́му Ду́ху.

Неразлу́чная Тро́ице,/ Я́же во Отце́ и Сы́не и Ду́се соединя́ема/ вся́чески не слива́ема со́бствы,/ Еди́нице Триипоста́сная,/ уме́ршия ве́рно у Тебе́ поко́й,/ мольба́ми святы́х Твои́х му́ченик,/ оте́ц же и честны́х проро́к,/ подаю́щи очище́ние душа́м на́шим.

И ны́не и при́сно/ и во ве́ки веко́в. Ами́нь.

Его́же роди́ Оте́ц пре́жде денни́цы,/ Сло́во зачала́ еси́,/ и родила́ еси́ пло́тию,/ бы́вша Челове́ка соверше́нна,/ двема́ познава́ема де́йствы, Пречи́стая, и во́лема./ Того́ у́бо моли́, я́ко Зижди́теля и Го́спода,/ уще́дрити нас, Тебе́ пою́щих,/ Отрокови́це Богоневе́стная.

На входе тропари субботы, глас 2:

Апо́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о нас Того́, я́ко Бла́га моли́те// спасти́ся, мо́лимся, душа́м на́шим.

Помяни́, Го́споди, я́ко Благ, рабы́ Твоя́,/ и ели́ка в житии́ согреши́ша, прости́;/ никто́же бо безгре́шен, то́кмо Ты,// моги́й и преста́вленным да́ти поко́й.

Слава, кондак, глас 8:

Со святы́ми упоко́й,/ Христе́, души́ ра́б Твои́х,/ иде́же не́сть боле́знь, ни печа́ль,/ ни воздыха́ние, //но жи́знь безконе́чная.

И ныне, глас тойже:

Тебе́ и Сте́ну, и Приста́нище и́мамы,/ и Моли́твенницу благоприя́тну к Бо́гу,// Его́же родила́ еси́, Богоро́дице Безневе́стная, ве́рных спасе́ние.

Прокимен рядовой, глас 8:

Весели́теся о Го́споде,/ и ра́дуйтеся, пра́веднии.

Стих: Блаже́ни, и́хже оста́вишася беззако́ния, и и́хже прикры́шася греси́.

И за упокой глас 6:

Ду́ши их во благи́х водворя́тся.

Аллилуиа, глас 4. Стих: Мно́ги ско́рби пра́ведным, и от всех их изба́вит я́ Госпо́дь.

Стих за упокой: Блаже́ни, я́же избра́л и прия́л еси́, Го́споди, и па́мять их в род и род.

Причастен рядовой: Радуйтеся, праведнии, о Господе, правымподобает похвала́.

И за упокой: Блаже́ни, я́же избра́л и прия́л еси́, Го́споди, и па́мять их в род и род.

Субботняя служба всем святым

(аще Бог Господь)

По предначинательном псалме стихословим кафисму 18-ю¹⁶.

На Го́споди, воззва́х: стихиры святаго Минеи на 6 (каждая стихира по дважды).

Стих: А́ще беззако́ния на́зриши, Го́споди, Го́споди, кто постои́т?/ Я́ко у Тебе́ очище́ние есть.

Стихира святаго 1-я.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,/ упова́ душа́ моя́ на Го́спода.

Таяжде стихира.

Стих: От стра́жи у́тренния до но́щи, от стра́жи у́тренния/ да упова́ет Изра́иль на Го́спода.

Стихира святаго 2-я.

Стих: Я́ко у Го́спода ми́лость и мно́гое у Него́ избавле́ние:/ и Той изба́вит Изра́иля от всех беззако́ний его́.

Таяжде стихира.

Стих: Хвали́те Го́спода вси язы́цы,/ похвали́те Его́ вси лю́дие.

Стихира святаго 3-я.

Стих: Я́ко утверди́ся ми́лость Его́ на нас,/ и и́стина Госпо́дня пребыва́ет во век.

Таяжде стихира.

Слава: святаго Минеи,

И ныне: Догматик, глас 5: В Чермне́м мо́ри:

Аще же несть святому Славы, Слава, и ныне, Богородичен воскресный, глас 5:

В Чермне́м мо́ри/ Неискусобра́чныя Неве́сты/ о́браз написа́ся иногда́:/ та́мо Моисе́й, раздели́тель воды́,/ зде же Гаврии́л, служи́тель чудесе́;/ тогда́ глубину́ ше́ствова немо́кренно Изра́иль,/ ны́не же Христа́ роди́ безсе́менно Де́ва;/ мо́ре по проше́ствии Изра́илеве пребы́сть непрохо́дно,/ Непоро́чная по рождестве́ Емману́илеве пребы́сть нетле́нна./ Сый, и пре́жде Сый,/ явле́йся я́ко Челове́к,// Бо́же, поми́луй нас.

Входа несть. Све́те ти́хий:

Прокимен, глас 7: Бо́же, Засту́пник мой еси́ Ты,/ и ми́лость Твоя́ предвари́т мя.

Стих: Изми́ мя от враг мои́х, Бо́же, и от востаю́щих на мя изба́ви мя.

И абие, Сподо́би, Го́споди: Ектения просительная.

На стиховне стихиры мученичны, глас 5:

Щито́м ве́ры обо́лкшеся,/ и зна́мением кре́стным себе́ укре́пльше,/ к му́кам му́жески вда́шася,/ и диа́волю горды́ню и лесть упраздни́ша/ святи́и Твои́, Го́споди./ Тех моли́твами я́ко Всеси́льный Бог,/ ми́ру мир низпосли́,// и душа́м на́шим ве́лию ми́лость.

Стих: К Тебе́ возведо́х о́чи мои́, живу́щему на небеси́. Се я́ко о́чи раб в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему,/ до́ндеже уще́дрит ны.

Таяжде стихира.

Стих: Поми́луй нас, Го́споди, поми́луй нас, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих:/ и уничиже́ния го́рдых.

О земны́х всех небре́гше,/ и на му́ки му́жески дерзну́вше,/ блаже́нных наде́жд не погреши́сте,/ но Небе́сному Ца́рствию насле́дницы бы́сте,/ прехва́льнии му́ченицы,/ иму́ще дерзнове́ние к Человеколю́бцу Бо́гу,/ ми́ру мир проси́те,// и душа́м на́шим ве́лию ми́лость.

Слава, и ныне, Богородичен:

Обра́дованная, хода́тайствуй Твои́ми моли́твами,/ и испроси́ душа́м на́шим мно́жество щедро́т,// и очище́ние мно́гих прегреше́ний, мо́лимся.

Таже, Ны́не отпуща́еши:

По Трисвятом: Тропарь святаго Минеи.

Слава, и ныне, Богородичен воскресный, глас 5:

Ра́дуйся, две́ре Госпо́дня непроходи́мая;/ ра́дуйся, стено́ и покро́ве притека́ющих к Тебе́;/ ра́дуйся, необурева́емое приста́нище и Неискусобра́чная,/ ро́ждшая пло́тию Творца́ Твоего́ и Бо́га,/ моля́щи не оскудева́й о воспева́ющих,// и кла́няющихся Рождеству́ Твоему́.

На Бог Госпо́дь: тропарь святаго Минеи, дважды. Слава, и ныне, Богородичен воскресен по гласу тропаря.

И стихословится кафисма 16, на 3 славы.

По стихословии ектения малая, и чтутся седальны мученичны:

Сия́ет днесь па́мять страстоте́рпец, и́мать бо и от небе́с зарю́: лик а́нгельский торжеству́ет, и род челове́ческий спра́зднует. Те́мже мо́лятся Го́сподеви, поми́ловатися душа́м на́шим.

Стих: Ди́вен Бог во святы́х Свои́х, Бог Изра́илев.

Чудеса́ святы́х Твои́х му́ченик, сте́ну неразори́му нам дарова́л еси́, Христе́ Бо́же: тех моли́твами ве́рныя лю́ди Твоя́ утверди́, я́ко еди́н Благ и Человеколю́бец.

Слава, и ныне: Ра́дуйся, две́ре Госпо́дня непроходи́мая; ра́дуйся, стено́ и покро́ве притека́ющих к Тебе́; ра́дуйся, необурева́емое приста́нище, и Неискусобра́чная, ро́ждшая пло́тию Творца́ Твоего́ и Бога, моля́щи не оскудева́й о воспева́ющих, и кла́няющихся рождеству́ Твоему́.

И стихословится кафисма 17, на 3 славы.

По втором стихословии ектения малая и седальны мученичны:

Го́споди, ча́ше страсте́й Твои́х страстоте́рпцы Твои́ поревнова́вше, оста́виша жите́йскую красоту́, и бы́ша А́нгелом соприча́стницы. Тех мольба́ми пода́ждь душа́м на́шим мир, Христе́ Боже, и ве́лию ми́лость.

Стих: Ди́вен Бог во святы́х Свои́х, Бог Изра́илев.

Святы́х му́ченик исправле́нием Небе́сныя Си́лы преудиви́шася, ка́ко в те́ле ме́ртвеннем подви́гшеся до́бре, безпло́тнаго врага́ си́лою кре́стною победи́ша неви́димо: и мо́лятся Го́сподеви, поми́ловатися душа́м на́шим.

Стих: Блаже́ни, я́же избра́л и прия́л еси́, Го́споди, и па́мять их в род и род.

Поко́й, Спа́се наш, с пра́ведными рабы́ Твоя́, и тех всели́ во дворы́ Твоя́, я́коже пи́сано есть, презира́я вся согреше́ния их, я́ко Благ, во́льная и нево́льная, и вся я́же в ве́дении и не в ве́дении, Человеколю́бче.

Слава, и ныне: От Де́вы возсия́вый ми́ру, Христе́ Бо́же, сы́ны све́та То́ю показа́вый, поми́луй нас.

Посем псалом 50.

И поем канона три:

Канон святаго Минеи со ирмосом на 6, ирмос по дважды, посем канон святаго храма или обители на 4, и канон во Октоихе святым мученикам, и святителям и преподобным на 4¹⁷.

Аще храм Владычний, поем каноны сице:

Канон храма или обители на 6, ирмос по дважды, канон святаго Минеи на 4, канон во Октоихе всем святым на 4.

Песнь 1

Ирмос: Зе́млю, на ню́же не возсия́:

Припев: Вси святи́и, моли́те Бо́га о нас.

Телеса́ предаю́ще некро́тким судия́м, претепе́сте нестерпи́мыя ра́ны, до́блии страда́льцы, ча́юще прия́ти по́чести свы́ше, и введе́ вас Христо́с в ве́чныя оби́тели, ра́дующихся и пою́щих побе́дную песнь.

Преподо́бнии, и пра́веднии, и святи́телие благосла́внии, соверши́вше повеле́ния Бо́жия, упасо́ша лю́ди, и до́бре наста́виша к воде́ ра́зума, и пото́ки сла́дости досто́йно восприя́ша, источа́юще благода́тию исцеле́ний ре́ки.

Напра́ви мя, Го́споди, к приста́нищем живота́, моли́твами проро́к пресла́вных, прему́дрых первосвяти́телей, и свяще́нных жен пострада́вших кре́пко, и посто́м врага́ попра́вших, му́жеским умо́м, боже́ственною Тебе́ благода́тию я́вльшагося на земли́.

Слава: Тебе́ мо́лим, Благопреме́ннаго Бо́га: упоко́й в не́дрех Авраа́мовых рабы́ Твоя́, Христе́, я́же к Тебе́ преста́вил еси́ от жите́йскаго мяте́жа, и сподо́би их све́та ве́чнаго, тех согреше́ния презира́я, я́ко Благ.

И ныне: Ра́дуйся, Тебе́ зове́м, ро́ждшей Ра́дость, Всепе́тая: просвети́ на́ша умы́ и ду́ши, и к стезя́м ра́зума всех напра́ви, и прегреше́ний всем очище́ние да́ти моли́, еди́на Богоневе́сто, Сы́на Твоего́ и Бо́га.

Песнь 3

Ирмос: Дви́жимое се́рдце мое́:

Припев: Вси святи́и, моли́те Бо́га о нас.

Па́лицами бие́мо не пощаде́сте те́ло, и мечи́ секо́мо, всехва́льнии ору́жницы, укрепля́еми наде́ждею му́ченицы ве́чных красо́т.

Святи́тельства оде́жду просвети́сте, ви́ды доброде́тельными упа́сше Христо́во ста́до на па́житех живо́тных.

Плоть умерщвля́юще воздержа́нием, преподо́бнии, жи́зни боже́ственней причасти́шася. Тех, Христе́, свяще́нными моли́твами от бед изба́ви нас.

Слава: Усо́пшим та́мошний поко́й, Человеколю́бче, пода́ждь, я́же соде́яша на земли́, до́лги отпуща́я, я́ко Благ.

И ныне: Благослове́нную в жена́х Тя, я́ко ви́де, сосло́вие же́нское пострада́, и Твоему́ Сы́ну, Де́во Ма́ти, приведе́ся.

Катавасия: Дви́жимое се́рдце мое́, Го́споди,/ волна́ми жите́йскими,/ утверди́ в приста́нище ти́хое,// наставля́я, я́ко Бог.

Ектения малая.

Седален святаго Минеи. Слава, и ныне, Богородичен.

Песнь 4

Ирмос: Услы́шах, Го́споди, слух Твой:

Припев: Вси святи́и, моли́те Бо́га о нас.

Си́лою Твое́ю, Го́споди, страстоте́рпцы вра́жию си́лу попра́ша, и кре́пость бы́ша ве́рным, и вели́кое утвержде́ние.

Преподо́бнии вси ра́достию ра́дуются, и одева́ются свяще́нницы боже́ственнии в пра́вду, я́коже в ри́зу.

Воспои́м вси богоглаго́ливыя Бо́жия проро́ки, и почти́м жен сосло́вие, я́же до́бре тече́ние сконча́вшия.

Слава: К приста́нищу Твоего́ Ца́рствия, Влады́ко, устреми́в, упоко́й, и́хже преста́вил еси́ от мяте́жа и бу́ри настоя́щаго жития́.

И ныне: Безле́тный бысть ны́не под ле́том из Тебе́, Де́во: Того́ моли́ разруши́ти вся души́ моея́ ле́тная прегреше́ния.

Песнь 5

Ирмос: Окая́нную ду́шу мою́:

Припев: Вси святи́и, моли́те Бо́га о нас.

Исцеле́ние неду́гующим источа́ют ко́сти му́ченик: не сокруши́вшеся бо зло́бою, и на́ша обновля́ют сокруше́ния, вся же ко́сти злоче́стия я́ко прах истни́ша.

Зако́ны Твоя́ соблюда́юще святи́телие упасо́ша лю́ди, и наста́виша, Ще́дре, к животу́ бу́дущему; преподо́бнии же умертви́ша страсте́й мучи́тельство соверше́нным умо́м.

Да почту́тся проро́цы и с ни́ми вси пра́ведницы ве́рою, и да похва́лятся преподо́бно пожи́вшии, и му́ками просвети́вшиися на земли́ боже́ственныя жены́, я́ко рабы́ Христо́вы.

Слава: Я́же от земли́ прия́т, в небе́сных учини́ селе́ниих ве́рныя рабы́ Твоя́, тех презира́я прегреше́ния, за премно́гую бла́гость, Христе́, воплоще́йся нас ра́ди земны́х.

И ныне: Пое́м Тя, Де́во, Ея́же ра́ди яви́ся Бог су́щим на земли́, челове́к быв, вопию́ще: ра́дуйся, земле́ благоплодови́тая, плодонося́щая Клас та́йны, пита́ющ вся́кое ды́хание.

Песнь 6

Ирмос: Я́коже проро́ка от зве́ря:

Припев: Вси святи́и, моли́те Бо́га о нас.

Телеса́ преда́вше на ра́ны боже́ственнии му́ченицы, мучи́телей рука́м, веселя́хуся душе́ю: боже́ственное бо зря́ху вои́стинну присносу́щное ра́дование и боже́ственная воздая́ния.

Сла́ва прему́дрым святи́телем и преподо́бным Ты еси́, Христе́: моли́твами их Твоя́ лю́ди уще́дри, и́хже Свое́ю Кро́вию стяжа́л еси́, я́ко Человеколю́бец.

От Тебе́, Го́споди, просвеща́ющеся умо́м проро́цы, проявля́ют я́сно да́льняя я́коже близ: жены́ же си́лою Твое́ю держа́ву вра́жию разруши́ша, страда́нием и посто́м.

Слава: Преста́вленыя от нас ве́рныя рабы́ Твоя́, лико́м избра́нных сопричта́в, Бла́же, упоко́й, Го́споди, вся тех согреше́ния презира́я за милосе́рдие.

И ныне: Созда́вый в нача́тце Е́ву, Го́споди, Де́вы в ложесна́ вшед, на́ше соде́ловаеши обновле́ние, в ра́бий о́браз обо́лкся, И́же Влады́ка вся́ческих.

Катавасия: Я́коже проро́ка от зве́ря изба́вил еси́, Го́споди,/ и мене́ из глубины́ несодержи́мых страсте́й/ возведи́, молю́ся:// да приложу́ призре́ти ми ко хра́му свято́му Твоему́.

Ектения малая.

Кондак и икос святаго Минеи.

Песнь 7

Ирмос: Огня́ гаси́лище отроко́в моли́тва:

Припев: Вси святи́и, моли́те Бо́га о нас.

Вы разжиза́еми лю́тых муче́ний огне́м, любле́ние тепле́йшее, му́ченицы сла́внии, показа́сте ко Го́споду, прохлажда́юще вас по́мыслом благочести́вым.

Прему́дростию Ду́ха украси́вшеся, прему́дрии, и све́тло пожи́сте, священноде́йствующе благода́ти Ева́нгелия, и я́ко Бо́жия служи́тели похваля́ем вас.

Вы, умертви́вше плоть боле́зньми мно́гими, жи́зни сподо́бистеся бу́дущия, преподо́бнии, моля́щеся сию́ получи́ти нам умерщвле́ным страсте́й приложе́ньми.

Блаже́нный лик Бо́жиих проро́к, и жен собо́р, подви́гшияся посто́м, и страда́нием низложи́вшия врага́, да похва́лятся ве́рно.

Слава: Ме́ртвым приобщи́вся всех жизнь, Сло́ве, ны́не оста́вльших жития́ мяте́ж, ко приста́нищу Твоему́ боже́ственному упра́ви, согреше́ния их презира́я, Бла́же.

И ныне: И́же Богоро́дицу Тя му́дрствующии ра́зумом пра́вым, огня́ ве́чнаго и тьмы да изба́вимся хода́тайством Твои́м, Влады́чице, и неви́димых враг борю́щих нас.

Песнь 8

Ирмос: А́нгелов со́нм, челове́ков собо́р:

Припев: Вси святи́и, моли́те Бо́га о нас.

Преплы́вше муче́ний пучи́ну окормле́нием Сло́ва, страда́льцы, крове́й тече́нием погрузи́сте вся полки́ льсти́ваго, и живете́ во ве́ки.

Прему́дрии бы́вше священноде́лателие, свяще́нно на воде́ правосла́вия вам вве́ренное ста́до препита́сте, вои́стинну сла́дости кра́сных пото́ков наслажда́етеся во ве́ки.

Свети́ла преподо́бнии ве́рным яви́стеся, я́ко соверши́вше дела́ све́та, и к Боже́ственней све́тлости преста́вистеся, тьмы нас свободи́ти моли́теся Влады́це.

Весели́ся, сосло́вие же́нское, по́честей исполне́ние вся́ких прие́мшее ра́нами, и лик ра́дуйся проро́ческий, и пра́ведных, угоди́вших Христу́ во ве́ки.

Благослови́м Отца́ и Сы́на и Свята́го Ду́ха, Го́спода.

Ору́жие обраща́ющееся ны́не, даждь, Влады́ко, невозбра́нно проити́, преста́вленым от жития́ рабо́м Твои́м: внутрь рая́ тех вселя́я, я́ко еди́н Ми́лостив.

И ныне: Я́ко врата́ вводя́щая к боже́ственному вхо́ду, я́ко добровосхо́дную ле́ствицу Бо́жию, я́ко спаса́ющимся незаблу́дную Наста́вницу, обра́дованную воспои́м Де́ву Мари́ю.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Катавасия: А́нгелов сонм, челове́ков собо́р,/ Царя́ и Зижди́теля всех,/ свяще́нницы, по́йте, благослови́те, леви́ти,// лю́дие, превозноси́те во вся ве́ки.

Таже, поем: Честне́йшую:

Песнь 9

Ирмос: Я́ко сотвори́ Тебе́ вели́чия Си́льный:

Припев: Вси святи́и, моли́те Бо́га о нас.

Священноде́йственнии па́стырие, проро́к святы́х лик, пра́ведных неизче́тное мно́жество, му́чеников собо́р, свяще́нными пе́сньми да ублажа́ются, моля́щеся спасти́ся душа́м на́шим.

Я́ко чу́дный по́стничествовав преподо́бных собо́р прему́дренно, чуде́с показа́ньми мно́гими ны́не удиви́ся. Тех мольба́ми, ди́вный Го́споди, удиви́ на всех ми́лости Твоя́.

Со священному́ченики сконча́вшими тече́ние до́бре, жен безчи́сленное мно́жество пострада́вшее и пости́вшееся, любо́вию да ублажа́ется ве́рно, со а́нгельскими ли́ки пребыва́ющее.

Слава: Святы́х всех мно́жество мо́лит Тя, Сло́ве: упоко́й мно́жества я́же в ве́ре от земли́ пре́ставленыя, за мно́жество ми́лости, я́же соде́яная и́ми в житии́, презира́я согреше́ния.

И ныне: Умовре́дно грехи́ соде́ях мно́ги, Де́во, муче́ния ожида́ю про́чее, от него́же мя изба́ви, несумне́нным се́рдцем к Тебе́ приходя́щаго, и боже́ственный покро́в Твой призыва́юща.

Катавасия: Я́ко сотвори́ Тебе́ вели́чия Си́льный,/ Де́ву явль Тя чи́сту по рождестве́,/ я́ко ро́ждшую без се́мене Своего́ Творца́:// тем Тя, Богоро́дице, велича́ем.

Таже, Досто́йно есть: и ектения малая.

Светилен глаголем прежде святаго Минеи.

Слава: И́же и ме́ртвыми и живы́ми облада́яй я́ко Бог, и святы́ми Твои́ми всю зе́млю просвети́вый, Соде́телю всех, пою́щия Тя спаса́й.

И ныне, Богородичен: Мы о Тебе́ хва́лимся, Богоро́дице, и к Бо́гу Тя и́мамы предста́тельство, простри́ ру́ку Твою́ необори́мую, и сокруши́ враги́ на́ша, Твои́м низпосли́ рабо́м по́мощь от Свята́го.

И абие псалмы хвалитныя, и прочая.

На стиховне стихиры мученикам, глас 5:

Благослове́но во́инство Небе́снаго Царя́:/ а́ще бо и земноро́дни бе́ша страстоте́рпцы,/ но а́нгельский сан тща́хуся дости́гнути,/ о телесе́х неради́вше,/ и страсте́й ра́ди, безпло́тных сподо́бишася че́сти./ Те́мже моли́твами их, Го́споди,// спаси́ ду́ши на́ша.

Стих: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся, во вся дни на́ша возвесели́хомся, за дни в ня́же смири́л ны еси́, ле́та, в ня́же ви́дехом зла́я. И при́зри на рабы́ Твоя́, и на дела́ Твоя́,/ и наста́ви сы́ны их.

Страстоно́сцы Твои́, Го́споди,/ чино́м а́нгельским уподо́бльшеся, я́ко безпло́тнии,/ му́ки претерпе́ша,/ и единомы́сленно упова́ние иму́ще,/ обеща́нных благ наслажде́ние.// Моли́твами их, Христе́ Бо́же, поми́луй на́с.

Стих: И бу́ди све́тлость Го́спода Бо́га на́шего на нас, и дела́ рук на́ших испра́ви на нас,/ и де́ло рук на́ших испра́ви.

Святи́и му́ченицы,/ на земли́ подви́гшеся,/ мраз претерпе́ша, и огню́ преда́шася,/ вода́ их прия́т./ Тех есть глас:/ проидо́хом сквозе́ огнь и во́ду,/ и изведе́ ны в поко́й.// Тех моли́твами, Бо́же, поми́луй нас.

Слава: святаго Минеи, И ныне: Богородичен по гласу Славы, от менших.

Аще же несть, Слава, и ныне, Богородичен, глас 5:

О́ле окая́нная душе́!/ Ки́й отве́т и́маши рещи́ Судии́ во он час,/ егда́ престо́ли поста́вятся на суде́,/ и Судия́ прии́дет от небе́с,/ соше́д со тьма́ми а́нгельскими?/ Егда́ ся́дет на суди́щи,/ прю́ сотвори́ти с рабы́ непотре́бными, подо́бными мне́,/что́ отвеща́ти и́маши?/ Что́же принести́ тогда́?/ Пои́стинне ничто́же,/ у́м и те́ло оскверни́вши твое́./ Те́мже припади́ к Де́ве,/и зови́ непреста́нно,// пода́ти тебе́ бога́тно грехо́в проще́ние.

Таже, Бла́го есть:

Трисвятое, по О́тче наш: тропарь святаго Минеи.

Слава, и ныне, Богородичен по гласу тропаря от менших, в конец утрени.

Ектения сугубая и час первый.

Блаженны, глас 5:

Блаже́ни миротво́рцы,/ я́ко ти́и сы́нове Бо́жии нареку́тся.

Разбо́йник на кресте́ Бо́га Тя́ бы́ти ве́ровав, Христе́, / испове́да Тя́ чи́сте от се́рдца,/ помяни́ мя́, Го́споди, вопия́, / во Ца́рствии Твое́м.

Блаже́ни изгна́ни пра́вды ра́ди,/ я́ко тех есть Ца́рство Небе́сное.

Началозло́бнаго врага́, уме́рше, му́ченицы, погуби́сте,/ и взыдо́сте к вы́шним,/ венча́вшеся боже́ственными побе́дами,/ и Царю́ всех Бо́гу предста́сте.

Блаже́ни есте́, егда́ поно́сят вам,/ и изжену́т, и реку́т всяк зол глаго́л, на вы лжу́ще Мене́ ра́ди.

Свяще́нства све́том святи́телие просвеща́еми просла́вишася,/ и преподо́бных мно́жество/ присносу́щный получи́ша живо́т,/ те́мже ублажа́еми суть.

Ра́дуйтеся и весели́теся,/ я́ко мзда́ ва́ша мно́га на небесе́х.

С ли́ки избра́нных на ме́сте, Влады́ко, ослабле́ния,/ и́хже преста́вил еси́,/ всели́, Сло́ве, презре́в, Христе́,/ я́же на земли́ тех согреше́ния.

Слава: О Тро́ице Честна́я!/ Святи́телей и му́ченик честны́х по́двиги умоле́на бу́ди,/ ве́рою уме́рших душа́м спасе́ние да́руй,/ и ве́лию милость.

И ныне: Я́же невмести́маго все́ми,/ Богора́дованная вмести́ла еси́,/ и ро́ждши па́че естества́ и сло́ва,/ Того́ ми́лостива бы́ти всем, Влады́чице, умоли́.

Поем тропари и кондаки на входе сице:

В храме святаго:

Тропарь всем святым, глас 2: Апо́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о на́с Того́, я́ко Бла́га, моли́те,// спасти́ся, мо́лимся, душа́м на́шим.

Тропарь и кондак святаго Минеи.

Слава, кондак, глас 8:

Со святыми упокой,/ Христе, души раб Твоих,/ идеже несть болезнь, ни печаль,/ ни воздыхание, //но жизнь безконе́чная.

И ныне, глас тойже: Я́ко нача́тки естества́, Насади́телю тва́ри,/ вселе́нная прино́сит Ти, Го́споди, богоно́сныя му́ченики;/ тех моли́твами в ми́ре глубо́це// Це́рковь Твою́, жи́тельство Твое́ Богоро́дицею соблюди́, Многоми́лостиве.

В храме Господском или Богородичном:

Тропарь храма Христова или Богородицы.

Тропарь всем святым: Апо́столи, му́ченицы и проро́цы:

Тропарь и кондак святаго Минеи.

Слава: Со святы́ми упоко́й:

И ныне, глас 8: Я́ко нача́тки естества́:

Прокимен, глас 8: Весели́теся о Го́споде,/ и ра́дуйтеся, пра́веднии.

Стих: Блаже́ни, и́хже оста́вишася беззако́ния, и и́хже прикры́шася греси́.

Аллилуиа, глас 4: Воззва́ша пра́веднии, и Госпо́дь услы́ша их. Стих: Мно́ги ско́рби пра́ведным, и от всех их изба́вит я́ Госпо́дь.

Причастен: Ра́дуйтеся, пра́веднии, о Го́споде, пра́вым подоба́ет похвала́.

На Го́споди, воззва́х: стихиры святаго Минеи, 3.

Стих: А́ще беззако́ния на́зриши, Го́споди, Го́споди, кто постои́т?/ Я́ко у Тебе́ очище́ние есть.

Стихира святаго 1-я.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,/ упова́ душа́ моя́ на Го́спода.

Стихира святаго 2-я.

Стих: От стра́жи у́тренния до но́щи, от стра́жи у́тренния/ да упова́ет Изра́иль на Го́спода.

Стихира святаго 3-я.

Таже поем мученичны гласа, 3, глас 5:

Стих: Я́ко у Го́спода ми́лость и мно́гое у Него́ избавле́ние:/ и Той изба́вит Изра́иля от всех беззако́ний его́.

Щито́м ве́ры обо́лкшеся,/ и зна́мением крестным себе́ укре́пльше,/ к му́кам му́жески вда́шася,/ и диа́волю горды́ню и лесть упраздни́ша/ святи́и Твои́, Го́споди./ Тех моли́твами я́ко Всеси́льный Бог,/ ми́ру мир низпосли́,// и душа́м на́шим ве́лию ми́лость.

Стих: Хвали́те Го́спода, вси язы́цы,/ похвали́те Его́, вси лю́дие.

Паки таяжде стихира.

Стих: Я́ко утверди́ся ми́лость Его́ на нас,/ и и́стина Госпо́дня пребыва́ет во век.

О земны́х всех небре́гше,/ и на му́ки му́жески дерзну́вше,/ блаже́нных наде́жд не погреши́сте,/ но Небе́сному Ца́рствию насле́дницы бы́сте,/ прехва́льнии му́ченицы,/ иму́ще дерзнове́ние к Человеколю́бцу Бо́гу,/ ми́ру ми́р проси́те,// и душа́м на́шим ве́лию ми́лость.

Слава, и ныне, Богородичен, глас 5:

В Чермне́м мо́ри/ Неискусобра́чныя Неве́сты/ о́браз написа́ся иногда́:/ та́мо Моисе́й, раздели́тель воды́,/ зде же Гаврии́л, служи́тель чудесе́;/ тогда́ глубину́ ше́ствова немо́кренно Изра́иль,/ ны́не же Христа́ роди́ безсе́менно Де́ва;/ мо́ре по проше́ствии Изра́илеве пребы́сть непрохо́дно,/ Непоро́чная по рождестве́ Емману́илеве пребы́сть нетле́нна./ Сый, и пре́жде Сый,/ явле́йся я́ко Челове́к,// Бо́же, поми́луй нас.

Входа несть. Све́те ти́хий:

Прокимен дне, глас 7: Бо́же, Засту́пник мой еси́ Ты,/ и ми́лость Твоя́ предвари́т мя.

Таже, Сподо́би, Го́споди:

Посем ектения просительная.

На стиховне поем два мученична и един мертвен, глас 5:

Моли́те за ны, святи́и му́ченицы,/ да изба́вимся от беззако́ний на́ших:// вам бо дана́ бысть благода́ть моли́тися о нас.

Стих: Ди́вен Бог во святы́х Свои́х,/ Бог Изра́илев.

Несы́тною любо́вию души́,/ Христа́ не отверго́стеся, святи́и му́ченицы;/ лю́тыя и разли́чныя ра́ны страсте́й претерпе́сте,/мучи́телей горды́ню низложи́сте,/ непрекло́нну и невреди́му ве́ру сохра́ньше,/ на небеса́ преста́вистеся./ Те́мже и дерзнове́ние иму́ще к Нему́,//проси́те дарова́ти на́м ве́лию ми́лость.

Стих: Ду́ши их/ во благи́х водворя́тся.

Помяну́х проро́ка вопию́ща:/ аз есмь земля́ и пе́пел,/ и па́ки разсмотри́х во гробе́х,/ и ви́дех ко́сти обнаже́нныя,/ и рех у́бо: кто есть царь, или́ во́ин,/ или́ бога́т, или́ нищ, или́ пра́ведник, или́ гре́шник?/ Но упоко́й, Го́споди, с пра́ведными рабы́ Твоя́,// я́ко Человеколю́бец.

Слава, и ныне, Богородичен:

Обра́дованная, хода́тайствуй Твои́ми моли́твами,/ и испроси́ душа́м на́шим мно́жество щедро́т,// и очище́ние мно́гих прегреше́ний, мо́лимся.

Таже, Ны́не отпуща́еши:

По Трисвятом: тропари, глас 2:

Апо́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о нас Того́, я́ко Бла́га моли́те// спасти́ся, мо́лимся, душа́м на́шим.

Слава:

Помяни́, Го́споди, я́ко Благ, рабы́ Твоя́,/ и ели́ка в житии́ согреши́ша, прости́;/ никто́же бо безгре́шен, то́кмо Ты,// моги́й и преста́вленным да́ти поко́й.

И ныне:

Ма́ти Свята́я неизрече́ннаго Све́та,/ а́нгельскими Тя пе́сньми почита́юще// благоче́стно велича́ем.

Аллилуиа, во глас 2-й, таже тропарь: Апо́столи, му́ченицы: дважды.

Слава: Помяни́, Го́споди: И ныне: Ма́ти Свята́я:

Посем кафисма 16.

Ектения малая обычная, и глаголем седальны мученичны:

Чудеса́ святы́х Твои́х му́ченик сте́ну неразори́му нам дарова́л еси́, Христе́ Бо́же: тех моли́твами ве́рныя лю́ди Твоя́ утверди́, я́ко еди́н Благ и Человеколю́бец.

Го́споди, ча́ше страсте́й Твои́х страстоте́рпцы Твои́ поревнова́вше, оста́виша жите́йскую красоту́, и бы́ша А́нгелом соприча́стницы. Тех мольба́ми пода́ждь душа́м на́шим мир, Христе́ Боже, и ве́лию ми́лость.

Стих: Ди́вен Бог во святы́х Свои́х, Бог Изра́илев.

Святы́х му́ченик исправле́нием Небе́сныя Си́лы преудиви́шася, ка́ко в те́ле ме́ртвеннем подви́гшеся до́бре, безпло́тнаго врага́ си́лою кре́стною победи́ша неви́димо: и мо́лятся Го́сподеви, поми́ловатися душа́м на́шим.

Стих: Блаже́ни, я́же избра́л и прия́л еси́, Го́споди, и па́мять их в род и род.

Поко́й, Спа́се наш, с пра́ведными рабы́ Твоя́, и тех всели́ во дворы́ Твоя́, я́коже пи́сано есть, презира́я вся согреше́ния их, я́ко Благ, во́льная и нево́льная, и вся я́же в ве́дении и не в ве́дении, Человеколю́бче.

Слава, и ныне: От Де́вы возсия́вый ми́ру, Христе́ Бо́же, сы́ны све́та То́ю показа́вый, поми́луй нас.

Глаголем и непорочны на 2 статии, с припевы их (зри сия в приложении).

И прочая до канона вся за упокой, зри в приложении.

Каноны же поем сице:

Канон святаго Минеи со ирмосом на 6, ирмос по дважды, посем канон святаго храма или обители на 4, и канон во Октоихе второй, за упокой, на 4¹⁸.

Аще храм Владычний, поем каноны сице:

Канон храма или обители на 6, ирмос по дважды, канон святаго Минеи на 4, канон во Октоихе, второй, на 4.

Канон усопшим, глас 5:

Песнь 1

Ирмос: Спаси́телю Бо́гу,/ в мо́ри лю́ди немо́крыми нога́ми наста́вльшему,/ и фарао́на со всево́инством пото́пльшему,// Тому́ Еди́ному пои́м, я́ко просла́вися.

Припев: Ди́вен Бог во святы́х Свои́х, Бог Изра́илев.

Боже́ственною любо́вию страстоте́рпцы Христо́вы мучи́телей горды́ню попра́ша; преста́вленным же ве́рою ми́лостивное про́сят оставле́ние и поко́й.

Припев: Упоко́й, Го́споди, ду́ши усо́пших раб Твои́х.

Во святы́х селе́ниих, во дво́рех Твои́х, Христе́, преста́вленныя всели́, И́же долг за них пролия́вый Кровь Твою́, Влады́ко, пречестне́йшую.

Слава: Прему́дрость Бо́жия, И́же изве́стно начерта́ние все нося́й Роди́телево; и́хже прия́т, Ще́дре, Сам упоко́й, подава́я им присносу́щное блаже́нство.

И ныне: Светоно́сная сень, златови́дный ковче́г, Боже́ственное Сло́во обдержа́щи воплоще́нное нас ра́ди, и разори́вшее сме́ртную си́лу, яви́лася еси́, Всенепоро́чная.

Песнь 3

Ирмос: Утверди́ ны, Бо́же Спа́се,/ Твое́ю си́лою,/ и воздви́гни рог Твоея́ Це́ркве,// правове́рно хва́лящих Тя.

Припев: Ди́вен Бог во святы́х Свои́х, Бог Изра́илев.

Му́жески подви́гшеся страда́льцы, мучи́тельским стремле́нием проти́ву ста́ша, и мо́лятся о усо́пших Христу́.

Припев: Упоко́й, Го́споди, ду́ши усо́пших раб Твои́х.

Зако́ны Твои́ми воспита́вшихся, преста́вльшихся, Преблаги́й, в све́тлых Твои́х селе́ниих прие́мь, упоко́й.

Слава: Ми́лостивый Еди́не Бо́же, я́же избра́л еси́, сподо́би святы́х све́тлостей, презира́я тех согреше́ния.

И ныне: Пое́м Твое́ Рождество́, Чи́стая, и́мже пе́рваго осужде́ния и кля́твы изба́вихомся, и от сме́рти свободи́хомся.

Катавасия: Утверди́ ны, Бо́же Спа́се:

Ектения малая, обычная.

Кондак и икос святаго Минеи.

Таже, седален с Богородичным его.

Песнь 4

Ирмос: Услы́шах, Го́споди,/ из гро́ба Твое́ воста́ние,// и просла́вих Твою́ непобеди́мую си́лу.

Припев: Ди́вен Бог во святы́х Свои́х, Бог Изра́илев.

Соприсносу́щна Тя Отцу́ испове́давше благоче́стно му́ченицы, Христе́, убие́ни бы́ша, и вопию́т Ти: изба́ви, и́хже прия́л еси́, рабы́ Твоя́.

Припев: Упоко́й, Го́споди, ду́ши усо́пших раб Твои́х.

И́же в мертвеце́х бы́вый еди́н свобо́дь мертве́ц, Христе́, и мертвеце́м жизнь ве́чную да́руя, поко́й даждь ны́не преста́вленым рабо́м Твои́м.

Слава: Прише́дый во е́же спасти́ заблу́ждшия, Христе́, ра́йскаго сподо́би вселе́ния, я́же преста́вил еси́ в ве́ре, оправда́вый благода́тию.

И ныне: Осени́ Тя Вы́шняго, Отрокови́це, си́ла, в Тебе́ рай соде́ла живо́тный, дре́во иму́щий посреде́, Хода́тая и Го́спода.

Песнь 5

Ирмос: У́тренююще вопие́м Ти:/ Го́споди, спаси́ ны,/ Ты бо еси́ Бог наш,// ра́зве бо Тебе́, ино́го не зна́ем.

Припев: Ди́вен Бог во святы́х Свои́х, Бог Изра́илев.

Му́ченик прие́м, Го́споди, моле́ния, ду́ши, я́же преста́вил еси́, со избра́нными Ти причти́.

Припев: Упоко́й, Го́споди, ду́ши усо́пших раб Твои́х.

Предре́кл еси́, не узре́ти сме́рти ве́рующим в Тя; те́мже, Влады́ко, усо́пшия упоко́й.

Слава: Красоты́ до́му Твоего́, Го́споди, Твоя́ рабы́ улучи́ти сподо́би, и сла́дкаго прича́стия.

И ныне: Сло́во, Е́же Отцу́ соприсносу́щное, от Де́вы вопло́щься, умертви́ сме́ртию смерть.

Песнь 6

Ирмос: Обы́де мя бе́здна,/ гроб мне кит бысть,/ аз же возопи́х к Тебе́ Человеколю́бцу,// и спасе́ мя десни́ца Твоя́, Го́споди.

Припев: Ди́вен Бог во святы́х Свои́х, Бог Изра́илев.

Во́инство му́ченик Твои́х, вы́шним си́лам подо́бящеся, Христе́, мо́лят Тя, пода́ждь, Человеколю́бче, преста́вленным е́же от Тебе́ наслажде́ние.

Припев: Упоко́й, Го́споди, ду́ши усо́пших раб Твои́х.

В ме́стех прохлажде́ния, в ме́стех святы́х све́тлости, в ме́стех ослабле́ния, Христе́, я́ко Человеколю́бец, и́хже прия́л еси́, учини́ рабы́ Твоя́.

Слава: Очи́сти рабы́ Твоя́, и тем согреше́ний проще́ние пода́ждь, Человеколю́бче, и жи́зни сподо́би нетле́нней, и блаже́нному насле́дию.

И ныне: Зача́тия безсе́меннаго Твоего́, кто сло́вом изрещи́ мо́жет чудесе́, Всенепоро́чная? Бо́га бо родила́ еси́, за милосе́рдие к нам прише́дша.

Катавасия: Обы́де мя бе́здна:

Ектения малая, за упокой.

Кондак, глас 8:

Со святы́ми упоко́й,/ Христе́, души́ ра́б Твои́х,/ иде́же не́сть боле́знь, ни печа́ль,/ ни воздыхан́ие, //но жи́знь безконе́чная.

Икос:

Сам Еди́н еси́ Безсме́ртный,/ сотвори́вый и созда́вый челове́ка,/ земни́и у́бо от земли́ созда́хомся/ и в зе́млю ту́южде по́йдем,/ я́коже повеле́л еси́,/ созда́вый мя и реки́й ми:/ я́ко земля́ еси́ и в зе́млю оты́деши,/ а́може вси челове́цы по́йдем,/ надгро́бное рыда́ние творя́ще песнь:// Аллилу́иа, Аллилу́иа, Аллилу́иа.

Песнь 7

Ирмос: В пещи́ о́гненней/ песносло́вцы спасы́й о́троки,// благослове́н Бог оте́ц на́ших.

Припев: Ди́вен Бог во святы́х Свои́х, Бог Изра́илев.

Ны́не непристу́пнаго све́та насы́титися, подаждь, Спа́се, преста́вленым, мольба́ми страстоте́рпец Твои́х.

Припев: Упоко́й, Го́споди, ду́ши усо́пших раб Твои́х.

В Це́ркви пе́рвенец, Христе́, в ве́ре сконча́вшихся, Ще́дре, сопричти́. Слава: Укра́шены оде́ждами нетле́ния Твоя́ рабы́, преста́вленыя к Тебе́, Спа́се, упоко́й.

И ныне: Ток сме́ртнаго существа́ отсе́кла еси́, Пречи́стая, Жизнь без се́мене заче́нши, Всенепоро́чная.

Песнь 8

Ирмос: Из Отца́ пре́жде век рожде́ннаго Сына и Бога,/ и в после́дняя ле́та воплоще́ннаго от Де́вы Ма́тере,/ свяще́нницы, по́йте,// лю́дие, превозноси́те во вся ве́ки.

Припев: Ди́вен Бог во святы́х Свои́х, Бог Изра́илев.

И́же святы́х му́ченик по́двиги прие́мый, и тех ра́ди упокоя́яй в ве́ре Твое́й усо́пшия, Тебе́, Спа́се, пое́м, и превозно́сим во вся ве́ки.

Припев: Упоко́й, Го́споди, ду́ши усо́пших раб Твои́х.

Преми́рныя Твоея́ сла́вы сия́нием озаря́тися, я́же от нас преста́вленыя сподо́би, я́ко благоутро́бен, Тебе́, Спа́се, пою́щия и превознося́щия во вся ве́ки.

Благослови́м Отца́ и Сы́на и Свята́го Ду́ха, Го́спода.

С ли́ки святы́х, и́хже преста́вил еси́, учини́, и Авраа́му, в не́дрех с Ла́зарем причти́ Тебе́, Спа́се, пою́щих, и превознося́щих во вся ве́ки.

И ны́не: Укра́шена добро́тою чистоты́, Де́во Ма́ти, добротво́рнаго благоле́пия жили́ще бы́вши; те́мже Тя́ пое́м, и превозно́сим Чи́стую во вся́ ве́ки.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Катавасия: Из Отца́ пре́жде век:

Таже, Честне́йшую:

Песнь 9

Ирмос: Тя, па́че ума́ и словесе́ Ма́терь Бо́жию,/ в ле́то Безле́тнаго/ неизрече́нно ро́ждшую,// ве́рнии единому́дренно велича́ем.

Припев: Ди́вен Бог во святы́х Свои́х, Бог Изра́илев.

Страда́ний свяще́нных му́ченицы, воздая́ния прие́мше, дарова́ти Тя ны́не мо́лят, ве́рою преста́вленым, Спа́се, ослабле́ние.

Припев: Упоко́й, Го́споди, ду́ши усо́пших раб Твои́х.

Умерщвле́ние претерпе́л еси́, еди́не Спа́се безсме́ртне, И́же воскресе́ние ме́ртвым подая́ я́ко благоутро́бен, и безсме́ртия све́тлость.

Слава: Испра́вил еси́ нас па́дших в смерть, и на живо́т ве́чный наде́ятися научи́л еси́, его́же улучи́ти Твои́м рабо́м, Спа́се, да́руй.

И ныне: Зако́на се́ни преидо́ша рождество́м Твои́м, и́стина возсия́, благода́ть дарова́ся, Богоро́дице; те́мже Тя велича́ем.

Катавасия: Тя, па́че ума́:

Таже, Досто́йно есть: Ектения малая, обычная.

И ексапостиларий Октоиха:

И́же и ме́ртвыми и живы́ми облада́яй я́ко Бог, и святы́ми Твои́ми всю зе́млю просвети́вый, Соде́телю всех, пою́щия Тя спаса́й.

Слава, и ныне, Богородичен: Мы о Тебе́ хва́лимся, Богоро́дице, и к Бо́гу Тя и́мамы предста́тельство, простри́ ру́ку Твою́ необори́мую, и сокруши́ враги́ на́ша, Твои́м низпосли́ рабо́м по́мощь от Свята́го.

Посем псалмы хвалитныя.

На хвалитех стихиры мученикам, глас 5:

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Благослове́но во́инство Небе́снаго Царя́:/ а́ще бо и земноро́дни бе́ша страстоте́рпцы,/ но а́нгельский сан тща́хуся дости́гнути,/ о телесе́х неради́вше,/ и страсте́й ра́ди безпло́тных сподо́бишася че́сти./ Те́мже моли́твами их, Го́споди,// спаси́ ду́ши на́ша.

Стих: Хвали́те Его́ во гла́се тру́бнем,/ хвали́те Его́ во псалти́ри и гу́слех.

Страстоно́сцы Твои́, Го́споди,/ чино́м а́нгельским уподо́бльшеся, я́ко безпло́тнии,/ му́ки претерпе́ша,/ и единомы́сленно упова́ние иму́ще,/ обеща́нных бла́г наслажде́ние.// Моли́твами их, Христе́ Бо́же, поми́луй нас.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Святи́и му́ченицы,/ на земли́ подви́гшеся,/ мраз претерпе́ша, и огню́ преда́шася,/ вода́ их прия́т./ Тех есть глас:/ проидо́хом сквозе́ огнь и во́ду,/ и изведе́ ны в поко́й.// Тех моли́твами, Бо́же, поми́луй нас.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния./ Вся́кое дыха́ние да хва́лит Го́спода.

В му́ках су́ще святи́и,/ ра́дующеся вопия́ху:/ ку́пля нам суть сия́ ко Влады́це./ Вме́сто быва́ющих ран на телесе́х,/ све́тлое одея́ние в воскресе́ние процвете́т нам,/ за безче́стие венцы́, за у́зы темни́чныя рай,/ и за е́же со злоде́и осужде́ние,/ е́же со А́нгелы житие́.// Моли́твами их, Го́споди, спаси́ ду́ши на́ша.

Стих: Блаже́ни, я́же избра́л, и прия́л еси́, Го́споди,/ и па́мять их в род и род.

Ты́ созда́вый мя, Го́споди,/ и положи́ на мне ру́ку Твою́,/ и запове́дав ми рекл еси́:/ в зе́млю па́ки по́йдеши./ Наста́ви мя на пра́вый путь Твой,/ проща́я мне прегреше́ния./ Осла́би ми, и спаси́ мя,// молю́ся, я́ко Человеколю́бец.

Слава, и ныне, Богородичен:

О́ле окая́нная душе́!/ Кий отве́т и́маши рещи́ Судии́ во он час,/ егда́ престо́ли поста́вятся на суде́,/ и Судия́ прии́дет от небе́с,/ соше́д со тьма́ми а́нгельскими?/ Егда́ ся́дет на суди́щи,/ прю сотвори́ти с рабы́ непотре́бными, подо́бными мне,/ что отвеща́ти и́маши?/ Что́же принести́ тогда́?/ Пои́стинне ничто́же,/ ум и те́ло оскверни́вши твое́./ Те́мже припади́ к Де́ве,/ и зови́ непреста́нно,// пода́ти тебе́ бога́тно грехо́в проще́ние.

На стиховне стихиры покойны, глас 5:

Све́том лица́ Твоего́, Христе́,/ преста́вленыя я́ко Щедр просвети́./ Всели́ я́ в ме́сто зла́чно,/ при вода́х Твоего́ чи́стаго и Боже́ственнаго поко́я,/ в жела́емых не́дрех Авраа́ма пра́отца,/ иде́же свет Твой чи́сте сия́ет,/ и пролива́ются исто́чницы благосты́ни,/ иде́же лику́ют я́сно веселя́щеся/ пра́ведных всех собо́ри о Твое́й бла́гости./ С ни́миже учини́ рабы́ Твоя́,// подая́ им ве́лию ми́лость.

Стих: Блаже́ни, я́же избра́л/ и прия́л еси́, Го́споди.

Пе́ти всесоста́вными гла́сы,/ славосло́вити же Твою́ держа́ву, благоволи́, Ще́дре,/ преста́вльшияся от привре́менных к Тебе́ Влады́це всех и Бо́гу на́шему,/ подая́ красото́ю Твое́ю освеща́тися,/ и сла́дкаго и кра́снаго прича́стия Твоего́,/ восприя́ти же и наслажда́тися чисте́йше,/ иде́же о́крест престо́ла Твоего́ лику́ют А́нгели,/ и святы́х ли́цы ра́достно обстоя́т./ С ни́миже Твои́м рабо́м поко́й пода́ждь,// и ве́лию ми́лость.

Стих: Ду́ши их/ во благи́х водворя́тся.

Иде́же проро́ков лик,/ апо́столов и му́чеников чи́нове,/ и вси и́же от ве́ка оправди́вшиися/ Твое́ю спаси́тельною стра́стию и Кро́вию,/ е́юже искупи́л еси́ плене́наго челове́ка,/ та́мо ве́рою усо́пшия упоко́й, я́ко Человеколю́бец,/ проща́яй согреше́ния:/ еди́н бо безгре́шен на земли́ пожи́л еси́ Свят вои́стинну,/ еди́н во уме́рших свобо́дь./ Те́мже Твои́м рабо́м поко́й пода́ждь,// и ве́лию ми́лость.

Слава, и ныне, Богородичен:

Зако́ном грехо́вным/ на́с, порабоще́нных, свободи́ла еси́, Влады́чице,/ в ложесна́х Законода́вца и Царя́ Христа́/ заче́нши, еди́на Де́во Ма́ти,/ И́мже оправда́емся ту́не, и благода́тию./ Его́же ны́не моли́, ду́ши ве́дущих Тя Богома́терь,/ написа́ти в кни́зе живо́тней,/ я́ко да хода́тайством Твои́м спа́сшеся, Всенепоро́чная,/ Сы́на Твоего́ любе́зное избавле́ние полу́чим,/ Тому́ покланя́ющеся,// подаю́щему ми́рови ве́лию ми́лость.

По Бла́го есть: тропари: Апо́столи, му́ченицы: якоже на вечерни указуяся.

Ектения сугубая и час первый.

Блаженны, глас 5:

Блаже́ни миротво́рцы,/ я́ко ти́и сы́нове Бо́жии нареку́тся. Разбо́йник на кресте́ Бо́га Тя бы́ти ве́ровав, Христе́,/ испове́да Тя чи́сте от се́рдца,/ помяни́ мя, Го́споди, вопия́,/ во Ца́рствии Твое́м.

Блаже́ни изгна́ни пра́вды ра́ди,/ я́ко тех есть Ца́рство Небе́сное.

Началозло́бнаго врага́, уме́рше, му́ченицы, погуби́сте,/ и взыдо́сте к вы́шним,/ венча́вшеся боже́ственными побе́дами,/ и Царю́ всех Бо́гу предста́сте.

Блаже́ни есте́, егда́ поно́сят вам,/ и изжену́т, и реку́т всяк зол глаго́л, на вы лжу́ще Мене́ ра́ди.

Свяще́нства све́том святи́телие просвеща́еми просла́вишася,/ и преподо́бных мно́жество/ присносу́щный получи́ша живо́т,/ те́мже ублажа́еми суть.

Ра́дуйтеся и весели́теся,/ я́ко мзда ва́ша мно́га на небесе́х.

С ли́ки избра́нных на ме́сте, Влады́ко, ослабле́ния,/ и́хже преста́вил еси́,/ всели́, Сло́ве, презре́в, Христе́,/ я́же на земли́ тех согреше́ния.

Слава: О Тро́ице Честна́я!/ Святи́телей и му́ченик честны́х по́двиги умоле́на бу́ди,/ ве́рою уме́рших душа́м спасе́ние да́руй,/ и ве́лию ми́лость.

И ныне: Я́же невмести́маго все́ми,/ Богора́дованная, вмести́ла еси́, / и рождши паче естества́ и слова,/ Того́ милостива быти всем, Влады́чице, умоли́.

На входе тропари субботы, глас 2:

Апо́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о нас Того́, я́ко Бла́га моли́те// спасти́ся, мо́лимся, душа́м на́шим.

Помяни́, Го́споди, я́ко Благ, рабы́ Твоя́,/ и ели́ка в житии́ согреши́ша, прости́;/ никто́же бо безгре́шен, то́кмо Ты,// моги́й и преста́вленным да́ти поко́й.

Слава, кондак, глас 8:

Со святы́ми упоко́й,/ Христе́, души́ ра́б Твои́х,/ иде́же не́сть боле́знь, ни печа́ль,/ ни воздыха́ние, //но жи́знь безконе́чная.

И ныне, глас тойже:

Тебе́ и Сте́ну, и Приста́нище и́мамы,/ и Моли́твенницу благоприя́тну к Бо́гу,// Его́же родила́ еси́, Богоро́дице Безневе́стная, ве́рных спасе́ние.

Прокимен рядовой, глас 8:

Весели́теся о Го́споде,/ и ра́дуйтеся, пра́веднии.

Стих: Блаже́ни, и́хже оста́вишася беззако́ния, и и́хже прикры́шася греси́.

И за упокой глас 6:

Ду́ши их во благи́х водворя́тся.

Аллилуиа, глас 4. Стих: Мно́ги ско́рби пра́ведным, и от всех их изба́вит я́ Госпо́дь.

Стих за упокой: Блаже́ни, я́же избра́л и прия́л еси́, Го́споди, и па́мять их в род и род.

Причастен рядовой: Радуйтеся, праведнии, о Господе, правым подобает похвала́.

И за упокой: Блаже́ни, я́же избра́л и прия́л еси́, Го́споди, и па́мять их в род и род.

Субботняя служба всем святым

(аще Бог Господь)

По предначинательном псалме стихословим кафисму 18-ю¹⁹.

На Го́споди, воззва́х: стихиры святаго Минеи на 6 (каждая стихира по дважды).

Стих: А́ще беззако́ния на́зриши, Го́споди, Го́споди, кто постои́т?/ Я́ко у Тебе́ очище́ние есть.

Стихира святаго 1-я.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,/ упова́ душа́ моя́ на Го́спода.

Таяжде стихира.

Стих: От стра́жи у́тренния до но́щи, от стра́жи у́тренния/ да упова́ет Изра́иль на Го́спода.

Стихира святаго 2-я.

Стих: Я́ко у Го́спода ми́лость и мно́гое у Него́ избавле́ние:/ и Той изба́вит Изра́иля от всех беззако́ний его́.

Таяжде стихира.

Стих: Хвали́те Го́спода вси язы́цы,/ похвали́те Его́ вси лю́дие.

Стихира святаго 3-я.

Стих: Я́ко утверди́ся ми́лость Его́ на нас,/ и и́стина Госпо́дня пребыва́ет во век.

Таяжде стихира.

Слава: святаго Минеи,

И ныне: Догматик, глас 6: Кто Тебе́ не ублажи́т:

Аще же несть святому Славы, Слава, и ныне, Богородичен воскресный, глас 6:

Кто Тебе́ не ублажи́т, Пресвята́я Де́во?/ Кто ли не воспое́т Твоего́ пречи́стаго Рождества́?/ Безле́тно бо от Отца́ возсия́вый Сын Единоро́дный,/ То́йже от Тебе́ Чи́стыя про́йде,/ неизрече́нно вопло́щься:/ естество́м Бог Сый/ и естество́м быв Челове́к нас ра́ди;/ не во двою́ Лицу́ разделя́емый,/ но во двою́ естеству́/ несли́тно познава́емый./ Того́ моли́, Чи́стая Всеблаже́нная,// поми́ловатися душа́м на́шим.

Входа несть. Све́те ти́хий:

Прокимен, глас 7: Бо́же, Засту́пник мой еси́ Ты,/ и ми́лость Твоя́ предвари́т мя.

Стих: Изми́ мя от враг мои́х, Бо́же, и от востаю́щих на мя изба́ви мя.

И абие, Сподо́би, Го́споди: Ектения просительная.

На стиховне стихиры мученичны, глас 6:

Му́ченицы Твои́, Го́споди,/ не отверго́шася Тебе́,/ ни отступи́ша от за́поведей Твои́х.// Тех моли́твами поми́луй нас.

Стих: К Тебе́ возведо́х о́чи мои́, живу́щему на небеси́. Се я́ко о́чи раб в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему,/ до́ндеже уще́дрит ны.

И паки тойже мученичен.

Стих: Поми́луй нас, Го́споди, поми́луй нас, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих:/ и уничиже́ния го́рдых.

Страстоте́рпцы му́ченицы,/ небе́снии гра́ждане,/ на земли́ пострада́вше,/ мно́гия му́ки терпе́ша./ Моли́твами их, Го́споди, и моле́нием// всех нас сохрани́.

Слава, и ныне, Богородичен:

Моли́твами ро́ждшия Тя, Христе́,/ му́ченик Твои́х, и апо́стол, и проро́к, и святи́телей,/ преподо́бных, и пра́ведных, и всех святы́х,// усо́пшия рабы́ Твоя́ упоко́й.

Таже, Ны́не отпуща́еши:

По Трисвятом: Тропарь святаго Минеи.

Слава, и ныне, Богородичен воскресный, глас 6:

Благослове́нную нареки́й Твою́ Ма́терь,/ прише́л еси́ на страсть во́льным хоте́нием,/ возсия́в на Кресте́, взыска́ти хотя́ Ада́ма,/ глаго́ля А́нгелом:/ сра́дуйтеся Мне, я́ко обре́теся поги́бшая дра́хма./ Вся му́дре устро́ивый// Бо́же наш, сла́ва Тебе́.

На Бог Госпо́дь: тропарь святаго Минеи, дважды. Слава, и ныне, Богородичен воскресен по гласу тропаря.

И стихословится кафисма 16, на 3 славы.

По стихословии ектения малая, и чтутся седальны мученичны:

Свет пра́ведным всегда́ Ты, Го́споди: святи́и бо о Тебе́ просвети́вшеся, сия́ют при́сно я́ко свети́ла, свети́льник нечести́вых угаси́вше; и́хже моли́твами, Спа́се наш, Ты просвети́ свети́льник мой, и спаси́ мя.

Стих: Ди́вен Бог во святы́х Свои́х, Бог Изра́илев.

Страда́льческий по́двиг претерпе́вше святи́и, и по́чести побе́дныя от Тебе́ прия́ша, упраздни́ша помышле́ния беззако́нных, и прия́ша венцы́ нетле́нныя. Те́ми, Бо́же, умоле́н быва́я, да́руй нам ве́лию ми́лость.

Слава, и ныне: И́же благослове́нную нареки́й Твою́ Ма́терь, прише́л еси́ на страсть во́льным хоте́нием, возсия́в на Кресте́, взыска́ти хотя́ Ада́ма, глаго́ля А́нгелом: сра́дуйтеся Мне, я́ко обре́теся поги́бшая дра́хма. Вся му́дре устро́ивый Бо́же наш, сла́ва Тебе́.

И стихословится кафисма 17, на 3 славы.

По втором стихословии ектения малая и седальны мученичны:

Страда́льческое стоя́ние в по́двизе, и мучи́тельския ра́ны на му́ченицех, и стоя́ху ли́цы безпло́тных, по́чести держа́ще побе́дныя; удиви́ша му́дрии мучи́телей, и царе́й прему́дрии; низложи́ша отсту́пника испове́данием Христо́вым. Укрепи́вый их, Го́споди, сла́ва Тебе́.

Стих: Ди́вен Бог во святы́х Свои́х, Бог Изра́илев.

Го́споди, святы́х Твои́х па́мять днесь показа́ся, я́ко рай, и́же во Еде́ме, в ней бо ра́дуется вся тварь, и подае́ши нам тех мольба́ми мир и ве́лию ми́лость.

Стих: Мно́ги ско́рби пра́ведным, и от всех их изба́вит я́ Госпо́дь.

Мертвен: Вои́стинну суета́ вся́ческая, житие́ же сень и сон, и́бо всу́е мяте́тся всяк земноро́дный, я́коже рече́ Писа́ние: егда́ мир приобря́щем, тогда́ во гроб всели́мся, иде́же вку́пе ца́рие и убо́зии. Те́мже, Христе́ Бо́же, преста́вленныя упоко́й, я́ко Человеколю́бец.

Слава, и ныне: От се́рдца воздыха́ния и от утро́бы приношу́ Ти, Твое́, Всенепоро́чная, молю́ благопремени́тельное заступле́ние: поми́луй всестра́стную мою́ ду́шу, умоли́ многоми́лостиваго Бо́га изба́вити мя суда́, и е́зера о́гненнаго, еди́на Благослове́нная.

Посем псалом 50.

И поем канона три:

Канон святаго Минеи со ирмосом на 6, ирмос по дважды, посем канон святаго храма или обители на 4, и канон во Октоихе святым мученикам, и святителям и преподобным на 4²⁰.

Аще храм Владычний, поем каноны сице:

Канон храма или обители на 6, ирмос по дважды, канон святаго Минеи на 4, канон во Октоихе всем святым на 4.

Песнь 1

Ирмос: Чу́вственный фарао́н потопле́н бысть: Припев: Вси святи́и, моли́те Бо́га о нас.

Све́тлым умо́м те́мныя осветисте, злочести́выя же мучи́тели, му́ченицы, посрами́вше, победоно́сцы бы́ша я́ве, и к невече́рнему све́ту преидо́ша.

Святи́телие Христо́вы, и преподо́бных лик, и проро́к, и пра́ведных всех еди́нственное торжество́, доброде́тельными красота́ми блиста́ющеся, внидо́ша к небе́сным селе́нием.

Жен вся́ко мно́жество присво́ившеся Христо́ви, Е́ву лю́тым прельще́нием умори́вшаго попра́ша труды́ му́жескими, ублажа́ются боже́ственными пе́сньми.

Слава: И́же от земли́ в нача́ле созда́в челове́ка, Христе́, ду́ши Твои́х раб упоко́й, мо́лимся, во оби́телех пра́ведных и в ме́стех ослабле́ния, я́ко Пребла́г.

И ныне: Свяще́ннейши, Чи́стая, Херуви́м и Серафи́м, яви́лася еси́ ро́ждши Творца́ тва́ри. Его́же непреста́нно моли́, уще́дрити рабы́ Твоя́ Тебе́ сла́вящия.

Песнь 3

Ирмос: На тве́рдем ве́ры Твоея́ ка́мени:

Припев: Вси святи́и, моли́те Бо́га о нас.

Теле́сным примеси́вшеся боле́знем страда́льцы, на неболе́зненное взира́ху воздая́ние ра́дующеся; и ны́не утоля́ют на́ша боле́зни мно́гия благода́тию.

Ра́зумом тве́рдым отгоня́юще зве́ри лука́выя, боже́ственнии святи́телие, изба́виша неврежде́нны от зло́б те́х, Христо́ва боже́ственная воспита́ния.

Во́лею и́гу Госпо́дню подвозше́дый лик преподо́бных, умертви́в мудрова́ние плотско́е, и живо́т ве́чный восприя́т.

Сла́ва: Изба́ви, Христе́, огня́ ве́чнаго, благоче́стно от жития́ преста́вльшияся, и оставле́ние да́ждь долго́в и́х, Бла́же, и ве́чное наслажде́ние.

И ныне: Я́же Христа́ возлюби́вшия жены́, Тебе́ Того́ неизрече́нно ро́ждшую, Всесвята́я Влады́чице, ра́достною мы́слию обстоя́ще ликовству́ют.

Катавасия: На тве́рдем ве́ры Твоея́ ка́мени/ помышле́ние утверди́в души́ моея́,/ утверди́, Го́споди, Тя бо и́мам, Бла́же,// прибе́жище и утвержде́ние.

Ектения малая.

Седален святаго Минеи. Слава, и ныне, Богородичен.

Песнь 4

Ирмос: Услы́шах слух Твой, и убоя́хся: Припев: Вси святи́и, моли́те Бо́га о нас.

Стояще зряху гордаго страстотерпцы, пред ногами их попираема: и вся́ческих Зиждителя благодарственно славляху.

Глаго́л светлостьми́ святи́телие вооружи́вшеся, к све́ту разуме́ния, челове́ки от тьмы ересе́й спасо́ша.

Я́ко у́глие яви́шася, к Бо́гу те́плым разуме́нием, и стра́сти попали́вше веще́ственныя преподо́бнии, вельми́ прославля́ются.

Слава: Живы́ми Ты, Го́споди, и ме́ртвыми облада́я, и́хже преста́вил еси́, упоко́й со все́ми благоугоди́вшими Тебе́, Влады́ко.

И ныне: Госпо́дь, Пречи́стая, из Тебе́ неизрече́нно в плоть облеки́йся, жен сосло́вие му́жественне подвиза́вшихся прия́т.

Песнь 5

Ирмос: Свет возсия́вый ми́ру, Христе́:

Припев: Вси святи́и, моли́те Бо́га о нас.

Истка́ную от вы́шния благода́ти, обле́кшеся во оде́жду, страда́льцы, врага́ обнажи́сте.

Со святы́ми проро́ки почти́м первосвяще́нники богому́дрыя, и преподо́бныя Бо́гу благоугоди́вшия.

Во псалме́х и пе́снех восхва́лим жен сосло́вие, я́ко Бо́гу до́бре угоди́вшия.

Слава: В селе́ниих пра́ведных Твои́х, Го́споди, Твоя́ рабы́ учини́, презира́я тех я́же в житии́ согреше́ния.

И ныне: Избавля́ющи нас вся́каго вра́жия вре́да, яви́лася еси́, Влады́чице, моля́щи Христа́ еди́наго Благоутро́бнаго.

Песнь 6

Ирмос: Ки́том пожре́н грехо́вным:

Припев: Вси святи́и, моли́те Бо́га о нас.

Крове́й боже́ственных тече́нием мы́сленныя враги́ погрузи́сте, ве́рных же се́рдца, страстоте́рпцы, напои́сте.

Распе́нше себе́ ми́ру и страсте́м, преподо́бнии, и прему́дрии святите́лие, боже́ственныя сла́вы сподо́бистеся.

Проро́ков лик, и честны́х жен собо́р, до́бре подвиза́вшихся по до́лгу ублажа́ем.

Слава: Поко́й, Бо́же, преждеусо́пших ду́ши со избра́нными Твои́ми, презира́я тех прегреше́ния.

И ныне: Пло́тию роди́вшая Христа́, пло́ти моея́ стра́сти умертви́, и оживи́, Де́во, ду́шу мою́ хода́тайством Твои́м.

Катавасия: Ки́том пожре́н грехо́вным,/ вопию́ Тебе́, Христе́:/ я́ко проро́ка// из истле́ния мя свободи́.

Ектения малая.

Кондак и икос святаго Минеи.

Песнь 7

Ирмос: Преподо́бных Твои́х отроко́в песнь:

Припев: Вси святи́и, моли́те Бо́га о нас.

Христо́вы страстоте́рпцы, угаси́вшия пла́мень лю́таго безбо́жия ту́чами крове́й, пе́сньми почти́м.

Благосла́внии иера́рси, зи́му ересе́й разруши́вше, и к весне́ боже́ственней ра́дующеся преидо́ша.

Терпе́нием бога́тую Ду́ха благода́ть насле́довасте, по́стницы, и мно́жество бесо́в погуби́сте.

Слава: Рая́ пи́щи Твоея́ насле́довати сподо́би, Ще́дре, ве́рою преста́вленныя от жития́, Многоми́лостиве.

И ныне: И́же Тебе́ Де́ву показа́вый, Чи́стая, и по рождестве́, святы́х жен ли́ки Тебе́ после́довавшия спасл есть.

Песнь 8

Ирмос: Преподо́бнии Твои́ о́троцы:

Припев: Вси святи́и, моли́те Бо́га о нас.

До́блественне муче́ний треволне́нием ураня́еми, боже́ственнии му́ченицы, благода́тию проше́дше в тишину́ глубо́кую, вы́шняго Ца́рствия достиго́ша.

Преподо́бнии, всему́дрии святи́телие, просия́вше я́ко со́лнце, просвеща́ют вселе́нную уче́ний луча́ми, и исцеле́ний светлостьми́.

Сла́внии проро́цы, и первосвяще́нницы, преподо́бнии вси, и пра́веднии, му́ченик мно́жества, и жен, ста́до ва́ше все сохрани́те от бесо́в непоколеби́мо.

Благослови́м Отца́ и Сы́на и Свята́го Ду́ха, Го́спода.

Воспое́м я́же от ве́ка пра́ведныя, и богоглаго́ливыя проро́ки, и возопие́м со умиле́нием: тех, Сло́ве, моли́твами в ве́ре усо́пшия упоко́й.

И ныне: Всю Тя бли́жнюю добро́ту Бо́га, Де́́во, лик же́нский возлюби́, и во след Тебе́ приведо́шася Влады́це всех, согла́сно блажа́ще Тя, Пречи́стая.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Катавасия: Преподо́бнии Твои́ о́троцы/ в пещи́ Херуви́ми подража́ху,/ Трисвяту́ю песнь воспева́юще:// благослови́те, по́йте и превозноси́те во вся ве́ки.

Таже, поем: Честне́йшую:

Песнь 9

Ирмос: Е́же ра́дуйся от А́нгела прии́мшая:

Припев: Вси святи́и, моли́те Бо́га о нас.

Овча́та чи́стая приведо́стеся ко Влады́це, страстоте́рпцы му́ченицы, Того́ моли́те спасти́ ду́ши на́ша.

Я́ко па́стырие на зла́це благоче́стия, святи́телие, ве́рныя упасо́сте, и ны́не во огра́ду боже́ственную всели́стеся.

Со святы́ми святи́тели, и проро́ки, и со жена́ми кре́пко пострада́вшими, и преподо́бных ли́ки да ублажи́м.

Слава: Ему́же причаща́ются весе́лию присносу́щному святы́х собо́ри, сподо́би преста́вленных улучи́ти, Многоми́лостиве.

И ныне: Свет ро́ждшая, Де́во, просвети́ ду́шу мою́, тьму отгоня́ющи греха́ и ле́ности моея́.

Катавасия: Е́же ра́дуйся/ от А́нгела прии́мшая,/ и ро́ждшая Созда́теля Твоего́,// Де́во, спаси́ Тя велича́ющия.

Таже, Досто́йно есть: и ектения малая.

Светилен глаголем прежде святаго Минеи.

Слава: И́же и ме́ртвыми и живы́ми облада́яй я́ко Бог, и святы́ми Твои́ми всю зе́млю просвети́вый, Соде́телю всех, пою́щия Тя спаса́й.

И ныне: Мы о Тебе́ хва́лимся, Богоро́дице, и к Бо́гу Тя и́мамы предста́тельство, простри́ ру́ку Твою́ необори́мую, и сокруши́ враги́ на́ша, Твои́м низпосли́ рабо́м по́мощь от Свята́го.

И абие псалмы хвалитныя, и прочая.

На стиховне стихиры мученикам, глас 6:

Го́споди, в па́мять святы́х Твои́х,/ вся тварь пра́зднует,/ небеса́ ра́дуются со А́нгелы,/ и земля́ весели́тся с челове́ки.// Тех моли́твами поми́луй нас.

Стих: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся, во вся дни на́ша возвесели́хомся, за дни в ня́же смири́л ны еси́, ле́та, в ня́же ви́дехом зла́я. И при́зри на рабы́ Твоя́, и на дела́ Твоя́,/ и наста́ви сы́ны их.

Го́споди, а́ще не бы́хом святы́я Твоя́ име́ли моли́твенники,/ и благосты́ню Твою́ ми́лующую нас,/ ка́ко сме́ли бы́хом, Спа́се, пе́ти Тя,/ Его́же славосло́вят непреста́нно А́нгели?// Сердцеве́дче, пощади́ ду́ши на́ша.

Стих: И бу́ди све́тлость Го́спода Бо́га на́шего на нас, и дела́ рук на́ших испра́ви на нас,/ и де́ло рук на́ших испра́ви.

Па́мять му́ченик,/ ра́дость боя́щимся Го́спода:/ пострада́вше бо Христа́ ра́ди,/ венцы́ от Него́ прия́ша,// и ны́не со дерзнове́нием мо́лятся о душа́х на́ших.

Слава: святаго Минеи, И ныне: Богородичен по гласу Славы, от менших.

Аще же несть, Слава, и ныне, Богородичен, глас 6:

Бо́га, из Тебе́ воплоти́вшагося,/ разуме́хом, Богоро́дице Де́во.// Того́ моли́ о спасе́нии душ на́ших.

Таже, Бла́го есть:

Трисвятое, по О́тче наш: тропарь святаго Минеи.

Слава, и ныне, Богородичен по гласу тропаря от менших, в конец утрени.

Ектения сугубая и час первый.

Блаженны, глас 6:

Блаже́ни миротво́рцы,/ я́ко ти́и сы́нове Бо́жии нареку́тся.

Помяни́ мя, Бо́же Спа́се мой,/ егда́ прии́деши во Ца́рствии Твое́м,/ и спаси́ мя,/ я́ко еди́н Человеколю́бец.

Блаже́ни изгна́ни пра́вды ра́ди,/ я́ко тех есть Ца́рство Небе́сное.

Огня́ и меча́, и звере́й ди́виих/ устремле́ния свире́паго,/ страстоте́рпцы сла́внии, не убоя́вшеся,/ присносу́щнаго живота́ сподо́бистеся.

Блаже́ни есте́, егда́ поно́сят вам,/ и изжену́т, и реку́т всяк зол глаго́л, на вы лжу́ще Мене́ ра́ди.

И́же проро́ки и учи́тели,/ и преподо́бныя, и пра́ведныя/ просла́вивый, Человеколю́бче;/ тех моли́твами спаси́ ду́ши на́ша.

Ра́дуйтеся и весели́теся,/ я́ко мзда ва́ша мно́га на небесе́х.

Со все́ми святы́ми и пра́ведными/ учини́, Сло́ве,/ и́хже в ве́ре преста́вил еси́ от вре́менных,/ я́ко да сла́вим Тя.

Слава: Отца́ и Сы́на славосло́вим,/ и Свята́го Ду́ха, глаго́люще:/ Тро́ице Свята́я,/ спаси́ ду́ши на́ша.

И ныне: Блаже́нна в роде́х всех яви́лася еси́:/ Бо́га бо вои́стинну блаже́ннаго несказа́нно родила́ еси́, Пречи́стая.

Поем тропари и кондаки на входе сице:

В храме святаго:

Тропа́рь все́м святы́м, гла́с 2: Апо́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о на́с Того́, я́ко Бла́га, моли́те,// спасти́ся, мо́лимся, душа́м на́шим.

Тропарь и кондак святаго Минеи.

Слава, кондак, глас 8:

Со святы́ми упоко́й,/ Христе́, души́ ра́б Твои́х,/ иде́же не́сть боле́знь, ни печа́ль,/ ни воздыха́ние,//но жи́знь безконе́чная.

И ныне, глас тойже:

Я́ко нача́тки естества́, Насади́телю тва́ри,/ вселе́нная прино́сит Ти, Го́споди, богоно́сныя му́ченики;/ тех моли́твами в ми́ре глубо́це// Це́рковь Твою́, жи́тельство Твое́ Богоро́дицею соблюди́, Многоми́лостиве.

В храме Господском или Богородичном:

Тропарь храма Христова или Богородицы.

Тропарь всем святым: Апо́столи, му́ченицы и проро́цы:

Тропарь и кондак святаго Минеи.

Слава: Со святы́ми упоко́й:

И ныне, глас 8: Я́ко нача́тки естества́:

Прокимен, глас 8: Весели́теся о Го́споде,/ и ра́дуйтеся, пра́веднии.

Стих: Блаже́ни, и́хже оста́вишася беззако́ния, и и́хже прикры́шася греси́.

Аллилуиа, глас 4: Воззва́ша пра́веднии, и Госпо́дь услы́ша их. Стих: Мно́ги ско́рби пра́ведным, и от всех их изба́вит я́ Госпо́дь.

Причастен: Радуйтеся, праведнии, о Господе, правым подобает похвала.

На Го́споди, воззва́х: стихиры святаго Минеи, 3.

Стих: А́ще беззако́ния на́зриши, Го́споди, Го́споди, кто постои́т?/ Я́ко у Тебе́ очище́ние есть.

Стихира святаго 1-я.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,/ упова́ душа́ моя́ на Го́спода.

Стихира святаго 2-я.

Стих: От стра́жи у́тренния до но́щи, от стра́жи у́тренния/ да упова́ет Изра́иль на Го́спода.

Стихира святаго 3-я.

Таже поем мученичны гласа, 3, глас 6:

Стих: Я́ко у Го́спода ми́лость, и мно́гое у Него́ избавле́ние:/ и Той изба́вит Изра́иля от всех беззако́ний его́.

Му́ченицы Твои́, Го́споди, не отверго́шася Тебе,/ ни отступи́ша от за́поведей Твоих.// Тех моли́твами поми́луй нас.

Стих: Хвали́те Го́спода, вси язы́цы,/ похвали́те Его́, вси лю́дие.

Паки таяжде стихира.

Стих: Я́ко утверди́ся ми́лость Его́ на нас,/ и и́стина Госпо́дня пребыва́ет во век.

Страстоте́рпцы му́ченицы,/ небе́снии гра́ждане,/ на земли́ пострада́вше,/ мно́гия му́ки терпе́ша./ Моли́твами их, Го́споди, и моле́нием// всех нас сохрани́.

Слава, и ныне, Богородичен:

Кто Тебе́ не ублажи́т, Пресвята́я Де́во?/ Кто ли не воспое́т Твоего́ пречи́стаго Рождества́?/ Безле́тно бо от Отца́ возсия́вый Сын Единоро́дный,/ То́йже от Тебе́ Чи́стыя про́йде,/ неизрече́нно вопло́щься:/ естество́м Бог Сый/ и естество́м быв Челове́к нас ра́ди;/ не во двою́ Лицу́ разделя́емый,/ но во двою́ естеству́/ несли́тно познава́емый./ Того́ моли́, Чи́стая Всеблаже́нная,// поми́ловатися душа́м на́шим.

Входа несть. Све́те ти́хий:

Прокимен дне, глас 7: Бо́же, Засту́пник мой еси́ Ты,/ и ми́лость Твоя́ предвари́т мя.

Таже, Сподо́би, Го́споди:

Посем ектения просительная.

На стиховне поем два мученична и един мертвен, глас 6:

Страда́вшии Тебе́ ра́ди, Христе́,/ мно́гия му́ки претерпе́ша,/ и соверше́нныя венцы́ прия́ша на небесе́х,// да мо́лятся о душа́х на́ших.

Стих: Ди́вен Бог во святы́х Свои́х,/ Бог Изра́илев.

Крест Твой, Го́споди,/ му́чеником бысть ору́жие непобеди́мое:/ ви́дяху бо предлежа́щую смерть,/ и предзря́ще бу́дущую жизнь,/ упова́нием е́же на Тя укрепля́хуся,// тех моли́твами поми́луй нас.

Стих: Ду́ши их/ во благи́х водворя́тся.

Нача́ток ми и соста́в/ зижди́тельное Твое́ бысть повеле́ние:/ восхоте́в бо от неви́димаго и ви́димаго естества́,/ жи́ва мя соста́вити,/ от земли́ у́бо те́ло созда́в,/ дал же ми еси́ ду́шу/ Боже́ственным Твои́м и животворя́щим вдохнове́нием./ Те́мже, Спа́се, рабы́ Твоя́ во стране́ живы́х,// и в кро́вех пра́ведных упоко́й.

Слава, и ныне, Богородичен:

Моли́твами ро́ждшия Тя, Христе́,/ му́ченик Твои́х, и апо́стол, и проро́к, и святи́телей,/ преподо́бных, и пра́ведных, и всех святы́х,// усо́пшия рабы́ Твоя́ упоко́й.

Таже, Ны́не отпуща́еши:

По Трисвятом: тропари, глас 2:

Апо́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о нас Того́, я́ко Бла́га, моли́те// спасти́ся, мо́лимся, душа́м на́шим.

Слава:

Помяни́, Го́споди, я́ко Благ, рабы́ Твоя́,/ и ели́ка в житии́ согреши́ша, прости́;/ никто́же бо безгре́шен, то́кмо Ты,// моги́й и преста́вленным да́ти поко́й.

И ныне:

Ма́ти Свята́я неизрече́ннаго Све́та,/ а́нгельскими Тя пе́сньми почита́юще// благоче́стно велича́ем.

Аллилуиа, во глас 2-й, таже тропарь: Апо́столи, му́ченицы: дважды.

Слава: Помяни́, Го́споди: И ныне: Ма́ти Свята́я:

Посем кафисма 16.

Ектения малая обычная, и глаголем седальны мученичны:

Страда́льческий по́двиг претерпе́вше святи́и, и по́чести побе́дныя от Тебе́ прия́ша, упраздни́ша помышле́ния беззако́нных, и прия́ша венцы́ нетле́нныя. Те́ми, Бо́же, умоле́н быва́я, да́руй нам ве́лию ми́лость.

Страда́льческое стоя́ние в по́двизе, и мучи́тельския ра́ны на му́ченицех, и стоя́ху ли́цы безпло́тных, по́чести держа́ще побе́дныя; удиви́ша му́дрии мучи́телей, и царе́й прему́дрии; низложи́ша отсту́пника испове́данием Христо́вым. Укрепи́вый их, Го́споди, сла́ва Тебе́.

Стих: Ди́вен Бог во святы́х Свои́х, Бог Изра́илев.

Го́споди, святы́х Твои́х па́мять днесь показа́ся, я́ко рай, и́же во Еде́ме, в ней бо ра́дуется вся тварь, и подае́ши нам тех мольба́ми мир и ве́лию ми́лость.

Стих: Мно́ги ско́рби пра́ведным, и от всех их изба́вит я́ Госпо́дь.

Мертвен: Вои́стинну суета́ вся́ческая, житие́ же сень и сон, и́бо всу́е мяте́тся всяк земноро́дный, я́коже рече́ Писа́ние: егда́ мир приобря́щем, тогда́ во гроб всели́мся, иде́же вку́пе ца́рие и убо́зии. Те́мже, Христе́ Бо́же, преста́вленныя упоко́й, я́ко Человеколю́бец.

Слава, и ныне: От се́рдца воздыха́ния и от утро́бы приношу́ Ти, Твое́, Всенепоро́чная, молю́ благопремени́тельное заступле́ние: поми́луй всестра́стную мою́ ду́шу, умоли́ многоми́лостиваго Бо́га изба́вити мя суда́, и е́зера о́гненнаго, еди́на Благослове́нная.

Глаголем и непорочны на 2 статии, с припевы их (зри сия в приложении).

И прочая до канона вся за упокой, зри в приложении.

Посем псалом 50.

Каноны же поем сице:

Канон святаго Минеи со ирмосом на 6, ирмос по дважды, посем канон святаго храма или обители на 4, и канон во Октоихе второй, за упокой²¹.

Аще храм Владычний, поем каноны сице:

Канон храма или обители на 6, ирмос по дважды, канон святаго Минеи на 4, канон во Октоихе, второй.

Канон усопшим, глас 6:

Песнь 1

Ирмос: Я́ко по су́ху пешеше́ствовав Изра́иль,/ по бе́здне стопа́ми,/ гони́теля фарао́на ви́дя потопля́ема,// Бо́гу побе́дную песнь пои́м, вопия́ше.

Припев: Ди́вен Бог во святы́х Свои́х, Бог Изра́илев.

В небе́сных черто́зех, внегда́ до́блии му́ченицы мо́лят Тя, Христе́: и́хже от земли́ преста́вил еси́ ве́рныя, ве́чных благ получи́ти сподо́би.

Припев: Поко́й, Го́споди, ду́ши усо́пших раб Твои́х.

Украси́вый вся́ческая, живо́тное смеше́нное мя челове́ка, посреде́ смире́ния же вку́пе и вели́чества созда́л еси́; те́мже раб Твои́х ду́ши, Спа́се, упоко́й.

Слава: Рая́ жи́теля, и де́лателя в нача́ле мя учини́л еси́: преступи́вша же Твою́ за́поведь изри́нул еси́. Те́мже рабо́в Твои́х ду́ши, Спа́се, упоко́й.

И ныне: И́же от ребра́ созда́вый Е́ву пе́рвее на́шу прама́терь, из пречи́стаго Твоего́ чре́ва в плоть одева́ется; е́юже сме́рти кре́пость, Чи́стая, разруши́л есть.

Песнь 3

Ирмос: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени// испове́дания Твоего́.

Припев: Ди́вен Бог во святы́х Свои́х, Бог Изра́илев.

Зако́нно пострада́вше Твои́ му́ченицы, Жизнода́вче, и венцы́ побе́ды украси́вшеся от Тебе́, приле́жно преста́вльшимся ве́рным ве́чное хода́тайствуют поче́стие.

Припев: Поко́й, Го́споди, ду́ши усо́пших раб Твои́х.

Наказа́в пре́жде мно́гими чудесы́ и зна́меньми мене́ заблу́ждшаго, напосле́док Самого́ Себе́ истощи́л еси́, я́ко сострада́телен; и поиска́в обре́л, и спасл еси́.

Слава: От теку́щаго непостоя́тельныя тли, к Тебе́ прише́дшия, в селе́ниих ве́чных всели́тися ра́достно сподо́би, Бла́же, оправда́в ве́рою же и благода́тию.

И ныне: Несть непоро́чны, я́коже Ты, Пречи́стая Богома́ти: еди́на бо от ве́ка и́стиннаго Бо́га зачала́ еси́ во чре́ве, сме́рти разруши́вшаго си́лу.

Катавасия: Несть свят:

Ектения малая, обычная.

Кондак и икос святаго Минеи.

Таже, седален с Богородичным его.

Песнь 4

Ирмос: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т взыва́ющи,// от смы́сла чи́ста, о Го́споде пра́зднующи.

Припев: Ди́вен Бог во святы́х Свои́х, Бог Изра́илев.

Прему́дрости бо́льшее явля́я позна́ние, и о даре́х многосоверше́нную, Влады́ко, благосты́ню, му́ченическия ли́ки А́нгелом сочета́л еси́.

Припев: Поко́й, Го́споди, ду́ши усо́пших раб Твои́х. Пречи́стую сла́ву Твою́ получи́ти сподо́би к Тебе́ преста́вленным, иде́же, Христе́, веселя́щихся есть жили́ще, и глас чи́стаго ра́дования.

Слава: Поющия приими́ Божественною державою Твоею, ихже от земли́ прия́т, ча́да све́ту тех соде́лав, грехо́вную мглу очища́я, Многоми́лостиве.

И ныне: Прия́телище пречи́стое, це́рковь непоро́чную, ковче́г всесвя́т, де́вственное ме́сто свяще́ния, Тебе́ добро́ту Иа́ковлю Влады́ка избра́л есть.

Песнь 5

Ирмос: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий, и́стиннаго Бо́га,// от мра́ка грехо́внаго взыва́юща.

Припев: Ди́вен Бог во святы́х Свои́х, Бог Изра́илев.

Я́ко всепло́дие свяще́нное, и я́ко нача́ток челове́ческаго естества́ му́ченицы, просла́вленному прине́сшеся Бо́гу, нам спасе́ние при́сно хода́тайствуют.

Припев: Поко́й, Го́споди, ду́ши усо́пших раб Твои́х.

Небе́снаго пребыва́ния, и разда́яния дарова́ний сподо́би, Го́споди, пре́жде усо́пшия верны́я рабы́ Твоя́, подая́ прегреше́ний избавле́ние.

Слава: И́же Еди́н естество́м Животво́рец, И́же бла́гости вои́стинну неизсле́димая пучи́на, сконча́вшияся Ца́рствия Твоего́ сподо́би, Ще́дре, Еди́не безсме́ртне.

И ныне: Кре́пость и пе́ние, И́же из Тебе́, Влады́чице, ми́ру рожде́йся, и спасе́ние бысть поги́бшим, И́же от а́довых врат избавля́я ве́рою Тебе́ блажа́щия.

Песнь 6

Ирмос: Жите́йское мо́ре/ воздвиза́емое зря напа́стей бу́рею,/ к ти́хому приста́нищу Твоему́ прите́к вопию́ Ти:// возведи́ от тли живо́т мой, Многоми́лостиве.

Припев: Ди́вен Бог во святы́х Свои́х, Бог Изра́илев.

На Кресте́ пригвожда́емь, му́ченическия ли́ки к Себе́ собра́л еси́, подо́бящияся стра́сти Твое́й, Бла́же. Те́мже Тя мо́лим: к Тебе́ преста́вленныя упоко́й.

Припев: Поко́й, Го́споди, ду́ши усо́пших раб Твои́х.

Неизрече́нною сла́вою Твое́ю, егда́ прии́деши стра́шно суди́ти ми́ру всему́ на о́блацех, благоволи́, Изба́вителю, све́тло сре́сти Тебе́, я́же от земли́ прия́л еси́ ве́рныя рабы́ Твоя́.

Слава: Исто́чник жи́зни сый, Влады́ко, в му́жестве боже́ственнем, окова́нныя изводя́ рабы́ Твоя́, я́же к Тебе́ ве́рно отше́дшия, в пи́щи ра́йстей всели́.

И ны́не: В зе́млю возврати́хомся, преступи́вше Бо́жию за́поведь; Тебе́ же ра́ди, Де́во, на небеса́ от земли́ вознесо́хомся, тлю́ сме́ртную оттря́сше.

Катавасия: Жите́йское мо́ре:

Ектения малая, за упокой.

Кондак, глас 8:

Икос: Со святы́ми упоко́й,/ Христе́, души́ ра́б Твои́х,/ иде́же не́сть боле́знь, ни печа́ль,/ ни воздыха́ние, //но жи́знь безконе́чная.

Сам Еди́н еси́ Безсме́ртный,/ сотвори́вый и созда́вый челове́ка,/ земни́и у́бо от земли́ созда́хомся/ и в зе́млю ту́южде по́йдем,/ я́коже повеле́л еси́,/ созда́вый мя и реки́й ми:/ я́ко земля́ еси́ и в зе́млю оты́деши,/ а́може вси челове́цы по́йдем,/ надгро́бное рыда́ние творя́ще песнь:// Аллилу́иа, Аллилу́иа, Аллилу́иа.

Песнь 7

Ирмос: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее веле́ние Бо́жие,/ мучи́теля увеща́ вопи́ти:// благослове́н еси́, Бо́же оте́ц на́ших.

Припев: Ди́вен Бог во святы́х Свои́х, Бог Изра́илев.

Изба́вльшиися Твое́ю Кро́вию му́ченицы, пе́рваго преступле́ния, окропи́вшеся же свое́ю кро́вию, прообразу́ют я́ве Твое́ заколе́ние, благослове́н еси́, Бо́же оте́ц на́ших.

Припев: Поко́й, Го́споди, ду́ши усо́пших раб Твои́х.

Свире́пеющую смерть умертви́л еси́, Сло́ве Живонача́льнейший, в ве́ре же Твое́й усо́пшия приими́ Тебе́ пою́щия, Христе́, и глаго́лющия: благослове́н Бог оте́ц на́ших.

Слава: Воодуши́в мя, челове́ка, вдохнове́нием Боже́ственным, Богонача́льнейший Влады́ко, преста́вленныя Ца́рствия Твоего́ сподо́би пе́ти Тебе́, Спа́се: благослове́н Бог оте́ц на́ших.

И ныне: Превы́шши всех тва́рей, Пренепоро́чная, была́ еси́, заче́нши Бо́га сокруши́вшаго сме́ртная врата́, и вереи́ сте́ршаго. Те́мже Тя, Чи́стая, песносло́вим ве́рнии, я́ко Богома́терь.

Песнь 8

Ирмос: Из пла́мене преподо́бным ро́су источи́л еси́,/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти.// Тя превозно́сим во вся ве́ки.

Припев: Ди́вен Бог во святы́х Свои́х, Бог Изра́илев.

Кре́пко по́двиги показу́юще, побе́ды венцы́ прия́сте, му́ченицы страстоте́рпцы Христо́ви, зову́ще: Тя превозноси́м Го́спода во ве́ки.

Припев: Поко́й, Го́споди, ду́ши усо́пших раб Твои́х.

Свяще́нно ве́рныя жите́йская оста́вльшия, и к Тебе́ Влады́це отлучи́вшияся приими́ кро́тко, и упоко́й, я́ко Милосе́рд, Тя превознося́щих Го́спода во ве́ки.

Благослови́м Отца́ и Сы́на и Свята́го Ду́ха, Го́спода.

Ны́не в земли́ кро́тких, всем водворя́тися пре́жде усо́пшим, Спа́се, благоволи́, ве́рою Твое́ю оправда́в и благода́тию, Тя превознося́щих Го́спода во ве́ки.

И ныне: Блажи́м Тя вси, Преблаже́нная, я́ко Сло́во вои́стинну су́щее блаже́нное ро́ждшую, плоть бы́вшее нас ра́ди. Его́же превозно́сим во вся ве́ки.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Катавасия: Из пла́мене преподо́бным:

Таже, Честне́йшую:

Песнь 9

Ирмос: Бо́га челове́ком не возмо́жно ви́дети,/ на Него́же не сме́ют чи́ни а́нгельстии взира́ти;/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,// с небе́сными во́и Тя ублажа́ем.

Припев: Ди́вен Бог во святы́х Свои́х, Бог Изра́илев.

Наде́жда му́чеников ли́ки укрепи́, и к Твое́й любви́ распале́нием впери́, бу́дущий сим предвообрази́вши непоколеби́мый вои́стинну поко́й; его́же преста́вленныя, Бла́же, ве́рныя сподо́би.

Припев: Поко́й, Го́споди, ду́ши усо́пших раб Твои́х.

Све́тлое Твое́, Христе́, и Боже́ственное улучи́ти сия́ние ве́рою преста́вленным благоволи́, и́же в ло́нех Авраа́мовех поко́й, я́ко еди́н Ми́лостив, тем да́руя, и ве́чнаго сподобля́я блаже́нства.

Слава: И́же Сый естество́м Благ и Милосе́рд, и хоти́тель ми́лостей, и благоутро́бия пучи́на, и́хже от ме́ста сего́ озлобле́ния, и се́ни сме́ртныя преста́вил еси́, иде́же сия́ет Твой свет, Спа́се, тех учини́.

И ныне: Сень святу́ю, Чи́стая, ве́мы Тя, и ковче́г, и скрижа́ли зако́на и благода́ти: Тебе́ бо ра́ди оставле́ние дарова́ся, оправда́ным Кро́вию воплоще́ннаго из Твоего́ чре́ва, Всенепоро́чная.

Катавасия: Бо́га челове́ком:

Таже, Досто́йно есть: Ектения малая, обычная.

И ексапостиларий Октоиха:

И́же и ме́ртвыми и живы́ми облада́яй я́ко Бог, и святы́ми Твои́ми всю зе́млю просвети́вый, Соде́телю всех, пою́щия Тя спаса́й.

Слава, и ныне, Богородичен: Мы о Тебе́ хвалимся, Богородице, и к Богу Тя имамы предстательство, простри́ руку Твою́ необоримую и сокруши́ враги́ на́ша, Твои́м низпосли́ рабо́м по́мощь от Свята́го.

Посем псалмы хвалитныя.

На хвалитех стихиры мученикам, глас 6:

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Го́споди, в па́мять святы́х Твои́х,/ вся тварь пра́зднует,/ небеса́ ра́дуются со А́нгелы,/ и земля́ весели́тся с челове́ки.// Тех моли́твами поми́луй нас.

Стих: Хвали́те Его́ во гла́се тру́бнем,/ хвали́те Его́ во псалти́ри и гу́слех.

Го́споди, а́ще не бы́хом святы́я Твоя́ име́ли моли́твенники,/ и благосты́ню Твою́ ми́лующую нас,/ ка́ко сме́ли бы́хом, Спа́се, пе́ти Тя,/ Его́же славосло́вят непреста́нно А́нгели?// Сердцеве́дче, пощади́ ду́ши на́ша.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Па́мять му́ченик,/ ра́дость боя́щимся Го́спода:/ пострада́вше бо Христа́ ра́ди,/ венцы́ от Него́ прия́ша,// и ны́не со дерзнове́нием мо́лятся о душа́х на́ших.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния./ Вся́кое дыха́ние да хва́лит Го́спода.

Избранныя удиви́ святыя Бог наш,/ радуйтеся и веселитеся, вси раби́ Его́,/ вам бо угото́вал есть венцы́ и Ца́рствие Свое́:// но мо́лим вы, и нас не забу́дите.

Стих: Блаже́ни, я́же избра́л, и прия́л еси́, Го́споди,/ и па́мять их в род и род.

Боле́знь Ада́му бысть,/ дре́ва вкуше́ние дре́вле во Еде́ме,/ егда́ змий яд отры́гну:/ того́ бо ра́ди вни́де смерть всеро́дная снеда́ющи челове́ка./ Но прише́д Влады́ка, низложи́ зми́я,/ и воскресе́ние нам дарова́./ К Нему́же у́бо возопии́м:/ пощади́, Спа́се, и и́хже прия́л еси́,// со святы́ми упоко́й, я́ко Человеколю́бец.

Слава, и ныне, Богородичен:

Бо́га из Тебе́ воплоти́вшагося/ разуме́хом, Богоро́дице Де́во.// Того́ моли́ о спасе́нии душ на́ших.

На стиховне стихиры покойны, глас 6.

Подобен: Все отло́жше:

Име́яй непостижи́мое е́же о нас благоутро́бие,/ и исто́чник неистощи́мый Боже́ственныя бла́гости,/ Многоми́лостиве,/ и́же к Тебе́, Влады́ко, преше́дшия,/ на земли́ живы́х всели́,/ в селе́ния возлю́бленная и жела́емая,/ одержа́ние да́руя, всегда́ пребыва́ющее./ Ты бо за всех пролия́л еси́ Кровь Твою́, Спа́се,// и живоно́сною цено́ю мир искупи́л еси́.

Стих: Блаже́ни, я́же избра́л/ и прия́л еси́, Го́споди.

Умерщвле́ние претерпе́л еси́ животворя́щее во́лею/ и живо́т источи́л еси́,/ и пи́щу присносу́щную ве́рным дал еси́,/ в не́йже учини́ усо́пшия о упова́нии воскресе́ния,/ тех согреше́ния вся проща́я благода́тию,/ я́ко еди́н безгре́шен,/ и еди́н Благ и Человеколю́бец:/ да все́ми пое́тся Твое́ и́мя, Христе́,// и спаси́тельное сла́вим человеколю́бие Твое́.

Стих: Ду́ши их/ во благи́х водворя́тся.

Живыми господствующа, Богоначальною властию,/ и ме́ртвыми влады́чествующа,/ Тебе́, Христе́, зна́юще мо́лимся,/ ве́рныя рабы́ Твоя́,/ к Тебе́ еди́ному Благода́телю отше́дшия,/ тех упоко́й со избра́нными Твои́ми, Человеколю́бче,/ на ме́сте утеше́ния,/ во святы́х све́тлостех:/ Воли́тель бо ми́лости еси́,/ и спаса́еши я́ко Бог,// и́хже по о́бразу Твоему́ созда́л еси́, еди́не Многоми́лостиве.

Слава, и ныне, Богородичен:

Яви́лася еси́ пребыва́лище боголе́пно, Пречи́стая:/ Бо́га бо вмести́ла еси́,/ и Христа́ родила́ еси́, Неискусобра́чная Ма́ти Де́во,/ во двою́ существу́, во еди́ной же Ипоста́си./ Того́ умоли́, Чи́стая, Единоро́днаго Пе́рвенца,/ Тя Де́ву Непоро́чную, и по рождестве́ сохра́ньшаго,/ ду́ши упоко́ити ве́рою усо́пших во све́те,// и в нетле́ннем блаже́нстве.

По Бла́го есть: тропари: Апо́столи, му́ченицы: якоже на вечерни указуяся.

Ектения сугубая и час первый.

Блаженны, глас 6:

Блаже́ни миротво́рцы,/ я́ко ти́и сы́нове Бо́жии нареку́тся. Помяни́ мя, Бо́же Спа́се мой,/ егда́ прии́деши во Ца́рствии Твое́м,/ и спаси́ мя,/ я́ко еди́н Человеколю́бец.

Блаже́ни изгна́ни пра́вды ра́ди,/ я́ко тех есть Ца́рство Небе́сное.

Огня́ и меча́, и звере́й ди́виих/ устремле́ния свире́паго,/ страстоте́рпцы сла́внии, не убоя́вшеся,/ присносу́щнаго живота́ сподо́бистеся.

Блаже́ни есте́, егда́ поно́сят вам,/ и изжену́т, и реку́т всяк зол глаго́л, на вы лжу́ще Мене́ ра́ди.

И́же проро́ки и учи́тели,/ и преподо́бныя и пра́ведныя/ просла́вивый, Человеколю́бче;/ тех моли́твами спаси́ ду́ши на́ша.

Ра́дуйтеся и весели́теся,/ я́ко мзда ва́ша мно́га на небесе́х.

Со все́ми святы́ми и пра́ведными/ учини́, Сло́ве,/ и́хже в ве́ре преста́вил еси́ от вре́менных,/ я́ко да сла́вим Тя.

Слава: Отца́ и Сы́на славосло́вим,/ и Свята́го Ду́ха, глаго́люще:/ Тро́ице Свята́я,/ спаси́ ду́ши на́ша.

И ныне: Блаже́нна в роде́х всех яви́лася еси́:/ Бо́га бо вои́стинну блаже́ннаго несказа́нно родила́ еси́, Пречи́стая.

На входе тропари субботы, глас 2:

Апо́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о нас Того́, я́ко Бла́га моли́те// спасти́ся, мо́лимся, душа́м на́шим.

Помяни́, Го́споди, я́ко Благ, рабы́ Твоя́,/ и ели́ка в житии́ согреши́ша, прости́;/ никто́же бо безгре́шен, то́кмо Ты,// моги́й и преста́вленным да́ти поко́й.

Слава, кондак, глас 8:

Со святыми упокой,/ Христе, души раб Твоих,/ идеже несть болезнь, ни печаль,/ ни воздыхание, //но жизнь безконе́чная.

И ныне, глас тойже:

Тебе́ и Сте́ну, и Приста́нище и́мамы,/ и Моли́твенницу благоприя́тну к Бо́гу,// Его́же родила́ еси́, Богоро́дице Безневе́стная, ве́рных спасе́ние.

Прокимен рядовой, глас 8:

Весели́теся о Го́споде,/ и ра́дуйтеся, пра́веднии.

Стих: Блаже́ни, и́хже оста́вишася беззако́ния, и и́хже прикры́шася греси́.

И за упокой глас 6:

Ду́ши их во благи́х водворя́тся.

Аллилуиа, глас 4. Стих: Мно́ги ско́рби пра́ведным, и от всех их изба́вит я́ Госпо́дь.

Стих за упокой: Блаже́ни, я́же избра́л и прия́л еси́, Го́споди, и па́мять их в род и род.

Причастен рядовой: Радуйтеся, праведнии, о Господе, правым подобает похвала́.

И за упокой: Блаже́ни, я́же избра́л и прия́л еси́, Го́споди, и па́мять их в род и род.

Субботняя служба всем святым

(аще Бог Господь)

По предначинательном псалме стихословим кафисму 18-ю²².

На Го́споди, воззва́х: стихиры святаго Минеи на 6 (каждая стихира по дважды).

Стих: А́ще беззако́ния на́зриши, Го́споди, Го́споди, кто постои́т?/ Я́ко у Тебе́ очище́ние есть.

Стихира святаго 1-я.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,/ упова́ душа́ моя́ на Го́спода.

Таяжде стихира.

Стих: От стра́жи у́тренния до но́щи, от стра́жи у́тренния/ да упова́ет Изра́иль на Го́спода.

Стихира святаго 2-я.

Стих: Я́ко у Го́спода ми́лость и мно́гое у Него́ избавле́ние:/ и Той изба́вит Изра́иля от всех беззако́ний его́.

Таяжде стихира.

Стих: Хвали́те Го́спода вси язы́цы,/ похвали́те Его́ вси лю́дие.

Стихира святаго 3-я.

Стих: Я́ко утверди́ся ми́лость Его́ на нас,/ и и́стина Госпо́дня пребыва́ет во век.

Таяжде стихира.

Слава: святаго Минеи,

И ныне: Догматик, глас 7: Ма́ти у́бо позна́лася еси́:

Аще же несть святому Славы, Слава, и ныне, Богородичен воскресный, глас 7:

Ма́ти у́бо позна́лася еси́,/ па́че естества́, Богоро́дице,/ пребыла́ же еси́ Де́ва,/ па́че сло́ва и ра́зума,/ и чудесе́ рождества́ Твоего́ сказа́ти язы́к не мо́жет./ Пресла́вну бо су́щу зача́тию, Чи́стая,/ непости́жен есть о́браз рожде́ния,/ иде́же бо хо́щет Бог, побежда́ется естества́ чин./ Те́мже, Тя вси Ма́терь Бо́жию ве́дуще,/ мо́лим Ти ся приле́жно:// моли́ спасти́ся душа́м на́шим.

Входа несть. Све́те ти́хий:

Прокимен, глас 7: Бо́же, Засту́пник мой еси́ Ты,/ и ми́лость Твоя́ предвари́т мя.

Стих: Изми́ мя от враг мои́х, Бо́же, и от востаю́щих на мя изба́ви мя.

И абие, Сподо́би, Го́споди: Ектения просительная.

На стиховне стихиры мученичны, глас 7:

Спа́се, не постыди́ мене́,/ егда́ прии́деши суди́ти ми́ру всему́,// сту́дная дела́ сотво́ршаго.

Стих: К Тебе́ возведо́х о́чи мои́, живу́щему на небеси́. Се я́ко о́чи раб в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему,/ до́ндеже уще́дрит ны.

Сла́ва Тебе́, Христе́ Бо́же,/ апо́столов похвало́, и му́чеников весе́лие;// и́хже про́поведь, Тро́ица Единосу́щная.

Стих: Поми́луй нас, Го́споди, поми́луй нас, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих:/ и уничиже́ния го́рдых.

Святи́и му́ченицы,/ и́же до́бре страда́вше, и венча́вшеся,/ моли́теся ко Го́споду,// спасти́ся душа́м на́шим.

Слава, и ныне, Богородичен:

Я́же еди́на Невмести́маго прие́мши,/ и ро́ждши Бо́га Сло́ва воплоще́нна,// моли́ спасти́ся душа́м на́шим.

Таже, Ны́не отпуща́еши:

По Трисвятом: Тропарь святаго Минеи.

Слава, и ныне, Богородичен воскресный, глас 7:

Я́ко на́шего воскресе́ния сокро́вище,/ на Тя наде́ющияся, Всепе́тая,/ от ро́ва и глубины́ прегреше́ний возведи́,/ Ты бо пови́нныя греху́ спасла́ еси́,/ ро́ждшая Спасе́ние на́ше:/ Я́же пре́жде рождества́ Де́ва, и в рождестве́ Де́ва,// и по рождестве́ па́ки пребыва́еши Де́ва.

На Бог Госпо́дь: тропарь святаго Минеи, дважды. Слава, и ныне, Богородичен воскресен по гласу тропаря.

И стихословится кафисма 16, на 3 славы.

По стихословии ектения малая, и чтутся седальны мученичны:

Святи́и, моли́теся, оставле́ние да́ти нам прегреше́ний на́ших, и ча́емых лю́тых изба́витися нам, и го́рькия сме́рти, мо́лимся.

Стих: Ди́вен Бог во святы́х Свои́х, Бог Изра́илев.

Святи́и Твои́, Го́споди, на земли́ подви́гшеся, врага́ попра́ша, и и́дольскую лесть упраздни́ша; те́мже и венцы́ от Тебе́ прия́ша, Человеколю́бца Влады́ки, и ми́лостиваго Бога, подаю́щаго ми́ру ве́лию ми́лость.

Слава, и ныне: Я́ко нашего воскресения сокровище, на Тя надеющияся, Всепетая, от рова и глубины́ прегрешений возведи, Ты бо повинныя греху́ спасла́ еси, рождшая Спасение наше. Яже прежде рождества́ Дева, и в рождестве́ Дева, и по рождестве́ паки пребываеши Дева.

И стихословится кафисма 17, на 3 славы.

По втором стихословии ектения малая и седальны мученичны:

Ра́дуйтеся, пра́веднии, и да веселя́тся небе́сная: на земли́ бо му́ченицы подви́гшеся, врага́ попра́ша, и лесть и́дольскую упраздни́ша: да взыгра́ется Це́рковь, победи́тельная пра́зднующи Подвигополо́жнику и еди́ному Победотво́рцу Христу́ Бо́гу, подаю́щему ми́рови ве́лию ми́лость.

Стих: Ди́вен Бог во святы́х Свои́х, Бог Изра́илев.

Му́ченицы Твои́, Го́споди, врага́ победи́ша, и лесть и́дольскую посрами́ша, вооружи́вшеся Креста́ Твоего́ си́лою; те́мже и со А́нгелы воспева́юще зову́т побе́дную песнь, славосло́вяще Тебе́, Христе́. Тех моли́твами пода́ждь душа́м на́шим очище́ние и ве́лию ми́лость.

Стих: Мно́ги ско́рби пра́ведным, и от всех их изба́вит я́ Госпо́дь.

Во стране́ живу́щих, Го́споди, и в селе́ниих пра́ведных Твои́х учини́ ду́хи, и́мже сотворя́ем па́мять, Человеколю́бче, и а́ще что согреши́ша в житии́ су́ще, я́ко Ми́лостив и Благопремени́тель Бог, прости́, подая́ ми́рови ве́лию ми́лость.

Слава, и ныне: Неискусобра́чная Отрокови́це Всенепоро́чная, от Твои́х крове́й воплоще́ннаго Бо́га на́шего, при́сно со проро́ки, и святи́тели, и му́ченики, моли́ спасти́ся душа́м на́шим.

Посем псалом 50.

И поем канона три:

Канон святаго Минеи со ирмосом на 6, ирмос по дважды, посем канон святаго храма или обители на 4, и канон во Октоихе святым мученикам, и святителям и преподобным на 4²³.

Аще храм Владычний, поем каноны сице:

Канон храма или обители на 6, ирмос по дважды, канон святаго Минеи на 4, канон во Октоихе всем святым на 4.

Песнь 1

Ирмос: Поспе́шествовавшему Бо́гу во Еги́пте:

Припев: Вси святи́и, моли́те Бо́га о нас.

Лик му́ченик нельсти́вых вся пре́лести победи́ борца́, лику́ет ра́дуяся пред лице́м Созда́вшаго и́.

Святи́телие Христо́вы, и преподо́бнии вси подви́гшиися, пи́щи сподо́бишася ве́чныя благода́тию.

Изба́ви нас, Христе́, от вся́кия я́рости моле́нием проро́к, и преподо́бных, и жен свяще́нных, и спаси́ ду́ши на́ша.

Слава: Созда́вый мя от земли́, Сло́ве, в зе́млю па́ки возврати́тися ми повеле́л еси́; упоко́й, я́же в ве́ре преста́вил еси́.

И ныне: Пречи́стая Ма́ти, Я́же Бо́га Пресвято́е Сло́во ро́ждшая, очи́сти вся, любо́вию Тя сла́вящия.

Песнь 3

Ирмос: Небеса́ утверди́вый сло́вом:

Припев: Вси святи́и, моли́те Бо́га о нас.

Сокруша́еми ка́мением, и в ров вмета́еми, сокруши́сте всю льсти́ваго си́лу, и не сокруше́ни умо́м, му́ченицы, пребы́сте.

Заре́ю боже́ственных уче́ний, и доброде́телей луча́ми, прему́дрии святи́телие, ве́рныя просвеща́юще, и ересе́й мглу всю отгна́сте.

Умертви́вшеся ми́ру преподо́бнии Твои́, Сло́ве, преми́рную вои́стину жизнь насле́доваша; и́хже ра́ди, Ще́дре, всех нас уще́дри.

Слава: О преста́вльшихся в ве́ре и наде́жди мо́лимся вси Благо́му Влады́це, поми́ловати их в час суда́.

И ныне: Не истощи́в недр О́тчих Сло́во, во не́дрех Твои́х, Пречи́стая, Младе́нец держи́мь яви́ся, нача́ло от Тебе́ прие́м Безнача́льный.

Катавасия: Небеса́ утверди́вый сло́вом/ и земно́е основа́ние укрепи́вый на вода́х мно́гих,/ утверди́ мой ум, в во́лю Твою́,// Человеколю́бче.

Ектения малая.

Седален святаго Минеи. Слава, и ныне, Богородичен.

Песнь 4

Ирмос: Плотско́е прише́ствие Твое́, Христе:

Припев: Вси святи́и, моли́те Бо́га о нас.

Укрепля́еми е́же ко Го́споду любо́вию му́ченицы, обнемощи́ша вра́жию си́лу: те́мже ублажа́ются.

Я́ко овча́та Па́стыря и а́гнцы, блаже́ннии иера́рси, слове́сному ста́ду предста́сте Боже́ственною благода́тию.

Многосве́тлыя я́ко зве́зды, доброде́тели све́тлостию, озари́сте ве́рных исполне́ние, преподо́бнии отцы́ на́ши.

Слава: Еди́нственное торжество́ кре́пких жен и сосло́вие святы́х проро́к, улучи́ша небе́сныя бла́гости.

И ныне: Моли́, Его́же родила́ еси́ Сы́на, Всепе́тая, искуше́ний вся́ческих и скорбе́й изба́витися рабо́м Твои́м.

Песнь 5

Ирмос: У́тренюет дух мой к Тебе́, Бо́же:

Припев: Вси святи́и, моли́те Бо́га о нас.

О я́звах плотски́х неради́вше кре́пции страда́льцы, и я́звы всех исцеля́ете и стра́сти, боже́ственными ва́шими я́звами.

Прия́сте власть реши́ти и вяза́ти на земли́, святи́телие Христо́вы; те́мже на́ша грехо́вныя плени́цы нереши́мыя разреши́те.

Умо́м чи́стым Бо́гу соедини́вшеся ли́цы по́стничестии, проро́к, и пра́ведных, и жен честны́х лику́ют, ра́дующеся ликова́нием неразори́мым.

Слава: Я́ко еди́н сый многоми́лостив, ве́рою, Христе́, преста́вленыя от жития́, рая́ сотвори́ жи́тели, Человеколю́бче.

И ныне: Черто́г неразори́мь я́вльшися Бо́гу, моли́ Того́, Всесвята́я Де́во, черто́га мя мы́сленнаго жи́теля соде́лати.

Песнь 6

Ирмос: Ио́на из чре́ва а́дова вопия́ше:

Припев: Вси святи́и, моли́те Бо́га о нас.

Низложи́сте вра́жия возвыше́ния, возвыша́еми к Бо́гу в страда́ниих, всесла́внии ору́жницы, и гра́ждане небе́снии бы́сте.

Ересе́й зи́му отгоня́юще, Христо́вы и́стиннии святи́телие, к весне́ и́стинней мно́жество благочести́вых приведо́ша.

Кре́постию Твое́ю, Христе́, преподо́бных мно́жество, и проро́к, и жен святы́х, оправда́шася, и незаходи́маго све́та наслажда́ются.

Слава: Преста́вил еси́, Ще́дре, от вре́менных рабы́ Твоя; но сия́ ве́чнаго весе́лия, и живота́ и́стиннаго прича́стники сподо́би.

И ныне: Освяти́, Всесвята́я Де́во, рабы́ Твоя́, Пресвято́е Сло́во пло́тию ро́ждшая, Его́же пое́т вся́кое дыха́ние, освяща́ющи.

Катавасия: Ио́на из чре́ва а́дова вопия́ше:/ возведи́ от тли живо́т мой./ Мы же Тебе́ вопие́м:// Всеси́льне Спа́се, поми́луй нас.

Ектения малая.

Кондак и икос святаго Минеи.

Песнь 7

Ирмос: В пещи́ су́ще халде́йстей:

Припев: Вси святи́и, моли́те Бо́га о нас.

Тече́нии кро́вными страстоте́рпцы, нече́стия угаси́ша пла́мень, пою́ще: оте́ц на́ших Бо́же, благослове́н еси́.

Иера́рхи восхваля́ем, просвети́тели ми́ра бы́вшия, пою́ще: оте́ц на́ших Бо́же, благослове́н еси́.

Песньми да почту́тся проро́к и преподо́бных святы́й собо́р, пою́щих: оте́ц на́ших Бо́же, благослове́н еси́.

Слава: Изба́ви гее́нны, я́же прия́л еси́, Христе́ Ще́дрый, ве́рныя рабы́ Твоя́, вопию́щия: оте́ц на́ших Бо́же, благослове́н еси́.

И ныне: Я́ко А́нгел честне́йшую, Богоро́дицу песносло́вим, вопию́ще: оте́ц на́ших Бо́же, благослове́н еси́.

Песнь 8

Ирмос: В пещи́ о́троки подража́юще:

Припев: Вси святи́и, моли́те Бо́га о нас.

Хра́мы и́дольския разверго́сте, всесла́внии: и хра́мы созда́сте себе́ Ду́ху, страстоте́рпцы, хра́брски тече́ние сконча́вше.

Яви́стеся, я́ко цве́ти благоуха́ннии, святи́телие, ра́зумом ду́ши ве́рных веселя́ще благоче́стия; те́мже досто́йно блажи́ми есте́.

Зе́млю всю проше́дше преподо́бнии, и Бо́жии прише́льцы проро́цы бы́сте, вы́шнее соблюда́юще наслажде́ние, и сла́ву при́сно пребыва́ющую.

Благослови́м Отца́ и Сы́на и Свята́го Ду́ха, Го́спода.

Я́ко живы́х и ме́ртвых, Сло́ве Го́споди, и́же ве́рою усо́пшия рабы́ Твоя́, лико́м сочета́й спаса́емых всех, я́ко еди́н Человеколю́бец.

И ныне: Жен всех сосло́вие, посто́м и страда́нием взыска́вших Го́спода, мо́лится непреста́нно боже́ственному лицу́ Твоему́, Пречи́стая.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Катавасия: В пещи́ о́троки подража́юще,/ духо́вную ро́су прие́мшии, ве́рою зове́м:// благослови́те, дела́ Госпо́дня, Го́спода.

Таже, поем: Честне́йшую:

Песнь 9

Ирмос: Па́че естества́ Ма́терь:

Припев: Вси святи́и, моли́те Бо́га о нас.

Свяще́нных му́ченик, и проро́к, и пра́ведных, от ве́ка до́бре жи́вших, моли́твами их, Христе́, ду́ши на́ша поми́луй.

Я́ко служи́тели Влады́це, священнотаи́нницы я́вльшеся, совокупи́стеся слуга́м небе́сным; с ни́миже о нас моле́ния принеси́те.

С жена́ми блаже́нное сконча́вшия тече́ние, почти́м по́стническия ли́ки святы́я; я́ко да тех моли́твами улучи́м свяще́ние.

Слава: Ея́же сподо́бишася сла́вы, святы́х всех ликостоя́ния, Христе́, преста́вленыя сподо́би причасти́тися, правосла́вно Тебе́ послужи́вшия.

И ныне: Грехолюби́в сый, суди́ща стра́шнаго трепе́щу, Ро́ждшагося из Тебе́, Чи́стая, в Не́мже мя, я́ко Блага́я, неосужде́на соблюди́.

Катавасия: Па́че естества́ Ма́терь, и по естеству́ Де́ву,/ еди́ну в жена́х Благослове́нную,// пе́сньми ве́рнии Богоро́дицу велича́ем.

Таже, Досто́йно есть: и ектения малая.

Светилен глаголем прежде святаго Минеи.

Слава: И́же и ме́ртвыми и живы́ми облада́яй я́ко Бог, и святы́ми Твои́ми всю зе́млю просвети́вый, Соде́телю всех, пою́щия Тя спаса́й.

И ныне: Мы о Тебе́ хва́лимся, Богоро́дице, и к Бо́гу Тя и́мамы предста́тельство, простри́ ру́ку Твою́ необори́мую, и сокруши́ враги́ на́ша, Твои́м низпосли́ рабо́м по́мощь от Свята́го.

И абие псалмы хвалитныя, и прочая.

На стиховне стихиры мученикам, глас 7:

Па́мять святы́х Твои́х страстоте́рпец пра́зднующе,/ Тебе́ пое́м, Христе́, вопию́ще:// Го́споди, сла́ва Тебе́.

Стих: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся, во вся дни на́ша возвесели́хомся, за дни в ня́же смири́л ны еси́, ле́та, в ня́же ви́дехом зла́я. И при́зри на рабы́ Твоя́, и на дела́ Твоя́,/ и наста́ви сы́ны их.

Посреде́ суди́ща законопресту́пных,/ ра́дующеся, вопия́ху, Христе́, страстоте́рпцы:// Го́споди, сла́ва Тебе́.

Стих: И бу́ди све́тлость Го́спода Бо́га на́шего на нас, и дела́ рук на́ших испра́ви на нас,/ и де́ло рук на́ших испра́ви.

Еди́но ды́шуще, и ко Еди́ному взира́юще/ страстоте́рпцы му́ченицы,/ еди́н пу́ть живота́ обре́тше,/ е́же за Христа́ сме́рть,/ ревну́юще дру́г дру́га кончи́не./ О́ле чудесе́, я́ко сокро́вища му́ки предвосхища́ху!/ Дру́г ко дру́гу глаго́лаху:/ я́ко а́ще не ны́не у́мрем, у́мрем же вся́ко,/ и бытию́ до́лжная послу́жим,/сотвори́м ну́жду любоче́стием,/ о́бщее свое́ изво́ливше,/ сме́ртию живо́т ку́пим.// Моли́твами и́х, Бо́же, поми́луй на́с.

Слава: святаго Минеи, И ныне: Богородичен по гласу Славы, от менших.

Аще же несть, Слава, и ныне, Богородичен, глас 7:

Моли́, Де́во, со апо́столы и му́ченики,/ обрести́ на суде́ преста́вльшимся// ве́лию ми́лость.

Таже, Бла́го есть:

Трисвятое, по О́тче наш: тропарь святаго Минеи.

Слава, и ныне, Богородичен по гласу тропаря от менших, в конец утрени.

Ектения сугубая и час первый.

Блаженны, глас 7:

Блаже́ни миротво́рцы,/ я́ко ти́и сы́нове Бо́жии нареку́тся.

Красе́н бе́ и до́бр в сне́дь,/ и́же мене́ умертви́вый пло́д;/ Христо́с е́сть дре́во живо́тное,/ от Него́же яды́й не умира́ю,/ но вопию́ с разбо́йником:/ помяни́ мя́, Го́споди, во Ца́рствии Твое́м.

Блаже́ни изгна́ни пра́вды ра́ди,/ я́ко тех есть Ца́рство Небе́сное.

Сконча́вше до́брый по́двиг,/ и ве́ру соблю́дше,/ венцы́ нетле́нныя от Бо́га прия́ли есте́,/ и сла́вы Его́ сподо́бистеся,/ му́ченицы всехва́льнии,/ А́нгелом сожи́телие.

Блаже́ни есте́, егда́ поно́сят вам,/ и изжену́т, и реку́т всяк зол глаго́л, на вы лжу́ще Мене́ ра́ди.

Священноде́йственных и преподо́бных собо́ри,/ и проро́к, и честны́х жен сосло́вие да почти́тся свяще́нно,/ во хра́мех перворо́дных ны́не живу́ще в ра́дости,/ и соводворя́ющеся со безпло́тными чи́нми.

Радуйтеся и веселитеся,/ яко мзда ваша многа на небесех.

Учини́ в хра́мех святы́х,/ я́же преста́вил еси́ от нас, Сло́ве Бо́жий,/ тех презре́в душе́вная согреше́ния,/ в ве́дении и неве́дении соде́яная на земли́, и уще́дри рабы́ Твоя́.

Слава: Раби́ Твои́, о Тро́ице Свята́я,/ умира́ющии к Тебе́ прихо́дят,/ изба́витися от стра́шных о́нех мук,/ и улучи́ти про́сят благи́х сла́вы святы́я Твоея́, в час су́дный.

И ныне: Всели́ся в Твое́й утро́бе, Всесвята́я Чиста́я,/ О́тчее сия́ние,/ и прельще́ныя вра́жиим злым сове́том, и впа́дшия во тлю,/ па́ки обнови́л есть.

Поем тропари и кондаки на входе сице:

В храме святаго:

Тропарь всем святым, глас 2: Апо́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о на́с Того́, я́ко Бла́га, моли́те,// спасти́ся, мо́лимся, душа́м на́шим.

Тропарь и кондак святаго Минеи.

Слава, кондак, глас 8:

Со святыми упокой,/ Христе, души раб Твоих,/ идеже несть болезнь, ни печаль,/ ни воздыхание, //но жизнь безконе́чная.

И ныне, глас тойже:

Я́ко нача́тки естества́, Насади́телю тва́ри,/ вселе́нная прино́сит Ти, Го́споди, богоно́сныя му́ченики;/ тех моли́тва ми в ми́ре глубо́це// Це́рковь Твою́, жи́тельство Твое́ Богоро́дицею соблюди́, Многоми́лостиве.

В храме Господском или Богородичном:

Тропарь храма Христова или Богородицы.

Тропарь всем святым: Апо́столи, му́ченицы и проро́цы:

Тропарь и кондак святаго Минеи.

Слава: Со святы́ми упоко́й:

И ныне, глас 8: Я́ко нача́тки естества́:

Прокимен, глас 8: Весели́теся о Го́споде,/ и ра́дуйтеся, пра́веднии.

Стих: Блаже́ни, и́хже оста́вишася беззако́ния, и и́хже прикры́шася греси́.

Аллилуиа, глас 4: Воззва́ша пра́веднии, и Госпо́дь услы́ша их.

Стих: Мно́ги ско́рби пра́ведным, и от всех их изба́вит я́ Госпо́дь.

Причастен: Ра́дуйтеся, пра́веднии, о Го́споде, пра́вым подоба́ет похвала́.

На Го́споди, воззва́х: стихиры святаго Минеи, 3.

Стих: А́ще беззако́ния на́зриши, Го́споди, Го́споди, кто постои́т?/ Я́ко у Тебе́ очище́ние есть.

Стихира святаго 1-я.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,/ упова́ душа́ моя́ на Го́спода.

Стихира святаго 2-я.

Стих: От стра́жи у́тренния до но́щи, от стра́жи у́тренния/ да упова́ет Изра́иль на Го́спода.

Стихира святаго 3-я.

Таже поем мученичны гласа, 3, глас 7:

Стих: Я́ко у Го́спода ми́лость и мно́гое у Него́ избавле́ние:/ и Той изба́вит Изра́иля от всех беззако́ний его́.

Спа́се, не постыди́ мене́,/ егда́ прии́деши суди́ти ми́ру всему́,// сту́дная дела́ сотво́ршаго.

Стих: Хвали́те Го́спода вси язы́цы,/ похвали́те Его́ вси лю́дие. Сла́ва Тебе́, Христе́ Бо́же,/ апо́столов похвало́ и му́чеников весе́лие;// и́хже про́поведь, Тро́ица Единосу́щная.

Стих: Я́ко утверди́ся ми́лость Его́ на нас,/ и и́стина Госпо́дня пребыва́ет во век.

Святи́и му́ченицы,/ и́же до́бре страда́вше, и венча́вшеся,/ моли́теся ко Го́споду,// спасти́ся душа́м на́шим.

Слава, и ныне, Богородичен, глас 7:

Ма́ти у́бо позна́лася еси́,/ па́че естества́, Богоро́дице,/ пребыла́ же еси́ Де́ва,/ па́че сло́ва и ра́зума,/ и чудесе́ рождества́ Твоего́ сказа́ти язы́к не мо́жет./ Пресла́вну бо су́щу зача́тию,

Чи́стая,/ непости́жен есть о́браз рожде́ния,/ иде́же бо хо́щет Бог, побежда́ется естества́ чин./ Те́мже, Тя вси Ма́терь Бо́жию ве́дуще,/ мо́лим Ти ся приле́жно:// моли́ спасти́ся душа́м на́шим.

Входа несть. Све́те ти́хий:

Прокимен, глас 7: Бо́же, Засту́пник мой еси́ Ты,/ и ми́лость Твоя́ предвари́т мя.

Стих: Изми́ мя от враг мои́х, Бо́же, и от востаю́щих на мя изба́ви мя.

И абие, Сподо́би, Го́споди: Ектения просительная.

На стиховне поем мученичны и мертвены, глас 7²⁴:

Неради́вше о всех земны́х, святи́и му́ченицы,/ и на суди́щи Христа́ му́жески пропове́давше,/ воздая́ние мук от Него́ прия́сте:/ но я́ко иму́ще дерзнове́ние,/ Того́ умоли́те я́ко Бо́га Всеси́льна,/ ду́ши на́ша спасти́,// прибега́ющия к ва́м, мо́лимся.

Стих: Ди́вен Бог во святы́х Свои́х,/ Бог Изра́илев.

Всехва́льнии му́ченицы,/ овча́та духо́вная, всесожже́ния слове́сная,/ же́ртва прия́тна благоуго́дна Бо́гу,/ вас ни земля́ потаи́ла есть, но не́бо прия́т вы,/ А́нгелом соприча́стницы бы́сте./ С ни́миже моли́те, мо́лим вы,/ Спа́са и Бо́га на́шего,// умири́ти мир, и спасти́ ду́ши на́ша.

Стих: Блаже́ни, я́же избра́л/ и прия́л еси́, Го́споди.

По образу Твоему́ и по подобию создавый, Господи,/ исперва челове́ка,/ и в раи́ поста́вил еси́ владе́ти Твои́ми творе́нии,/ за́вистию же диа́волею прельще́н быв, я́ди причасти́ся,/ за́поведей Твои́х престу́пник быв./ Те́мже па́ки в зе́млю, от нея́же взят бысть,/ осуди́ его́ возврати́тися, Го́споди,// и испроси́ти поко́й.

Стих: Ду́ши их/ во благи́х водворя́тся.

Упоко́й, Спа́се на́ш, Жизнода́вче,/ я́же преста́вил еси́ бра́тию на́шу от вре́менных, зову́щия:// Го́споди, сла́ва Тебе́.

Слава, и ныне, Богородичен:

Я́же еди́на Невмести́маго прие́мши,/ и ро́ждши Бо́га Сло́ва воплоще́нна,// моли́ спасти́ся душа́м на́шим.

Таже, Ны́не отпуща́еши:

По Трисвятом: тропари, глас 2:

Апостоли, мученицы и пророцы,/ святителие, преподобниии праведнии,/ добре подвиг совершившии и веру соблюдшии,/ дерзнове́ние иму́ще ко Спа́су,/ о нас Того́, я́ко Бла́га моли́те// спасти́ся, мо́лимся, душа́м на́шим.

Слава: Помяни́, Го́споди, я́ко Благ, рабы́ Твоя́,/ и ели́ка в житии́ согреши́ша, прости́;/ никто́же бо безгре́шен, то́кмо Ты,// моги́й и преста́вленным да́ти поко́й.

И ныне: Ма́ти Свята́я неизрече́ннаго Све́та,/ а́нгельскими Тя пе́сньми почита́юще// благоче́стно велича́ем.

Аллилуиа, во глас 2-й, таже тропарь: Апо́столи, му́ченицы: дважды.

Слава: Помяни́, Го́споди: И ныне: Ма́ти Свята́я:

Посем кафисма 16.

Ектения малая обычная, и глаголем седальны мученичны:

Святи́и Твои́, Го́споди, на земли́ подви́гшеся, врага́ попра́ша, и и́дольскую лесть упраздни́ша; те́мже и венцы́ от Тебе́ прия́ша, Человеколю́бца Влады́ки, и ми́лостиваго Бога, подаю́щаго ми́ру ве́лию ми́лость.

Ра́дуйтеся, пра́веднии, и да веселя́тся небе́сная: на земли́ бо му́ченицы подви́гшеся, врага́ попра́ша, и лесть и́дольскую упраздни́ша: да взыгра́ется Це́рковь, победи́тельная пра́зднующи Подвигополо́жнику и еди́ному Победотво́рцу Христу́ Бо́гу, подаю́щему ми́рови ве́лию ми́лость.

Стих: Ди́вен Бог во святы́х Свои́х, Бог Изра́илев.

Му́ченицы Твои́, Го́споди, врага́ победи́ша, и лесть и́дольскую посрами́ша, вооружи́вшеся Креста́ Твоего́ си́лою; те́мже и со А́нгелы воспева́юще зову́т побе́дную песнь, славосло́вяще Тебе́, Христе́. Тех моли́твами пода́ждь душа́м на́шим очище́ние и ве́лию ми́лость.

Стих: Мно́ги ско́рби пра́ведным, и от всех их изба́вит я́ Госпо́дь.

Во стране́ живу́щих, Го́споди, и в селе́ниих пра́ведных Твои́х учини́ ду́хи, и́мже сотворя́ем па́мять, Человеколю́бче, и а́ще что согреши́ша в житии́ су́ще, я́ко Ми́лостив и Благопремени́тель Бог, прости́, подая́ ми́рови ве́лию ми́лость.

Слава, и ныне: Неискусобра́чная Отрокови́це Всенепоро́чная, от Твои́х крове́й воплоще́ннаго Бо́га на́шего, при́сно со проро́ки, и святи́тели, и му́ченики, моли́ спасти́ся душа́м на́шим.

Глаголем и непорочны на 2 статии, с припевы их (зри сия в приложении).

И прочая до канона вся за упокой, зри в приложении.

Посем псалом 50.

Каноны же поем сице:

Канон святаго Минеи со ирмосом на 6, ирмос по дважды, посем канон святаго храма или обители на 4, и канон во Октоихе вторый, за упокой²⁵.

Аще храм Владычний, поем каноны сице:

Канон храма или обители на 6, ирмос по дважды, канон святаго Минеи на 4, и канон во Октоихе, вторый.

Канон усопшим, глас 7:

Песнь 1

Ирмос: Ма́нием Твои́м на земны́й о́браз преложи́ся/ пре́жде удоборазлива́емое водно́е естество́, Го́споди./ Те́мже, немо́кренно пешеше́ствовав, Изра́иль// пое́т Тебе́ песнь побе́дную.

Припев: Ди́вен Бог во святы́х Свои́х, Бог Изра́илев.

Добро́та украше́нная доброде́тельными о́бразы, и боже́ственное возложе́ние разли́чными красота́ми, сия́юще благоче́стием, му́ченицы, Христу́ Бо́гу принесо́стеся.

Припев: Поко́й, Го́споди, ду́ши усо́пших раб Твои́х.

Зарю́ непристу́пнаго и трисо́лнечнаго сия́ния улучи́ти сподо́би преста́вльшияся рабы Твоя́, Многоми́лостиве Го́споди, отню́дуже отбеже́ вся́ка боле́знь, и печа́ль, и воздыха́ние.

Слава: Умерщвле́нием осужде́ное естество́, Живо́т Ипоста́сный, Жизнода́вче Сам сый Христе́, воздви́гл еси́; те́мже, я́ко еди́н Щедр, ве́рою к Тебе́ преста́вльшияся, упоко́й.

И ныне: Испра́вила еси́, Пречи́стая, прама́тернее паде́ние, ро́ждши Го́спода Сло́ва, сию́ воскреси́вшаго, и су́щим во гробе́х вдохну́вша живо́т, вла́стию Боже́ственною.

Песнь 3

Ирмос: В нача́ле небеса́ всеси́льным сло́вом Твои́м/ утвержде́й, Го́споди Спа́се,/ и Вседе́тельным и Бо́жиим Ду́хом всю си́лу их,// на недви́жимем мя ка́мени испове́дания Твоего́ утверди́.

Припев: Ди́вен Бог во святы́х Свои́х, Бог Изра́илев.

Ю́ношеско и кре́пко терпе́ние, му́жественне показа́ша му́ченик ли́цы: ран бо устремле́ние подъя́ша, и муче́ний я́звы, нетле́нныя Твоея́ сла́вы, Спа́се, жела́юще, и красоты́.

Припев: Поко́й, Го́споди, ду́ши усо́пших раб Твои́х.

В ве́чный Твой живо́т, я́же в наде́жди усо́пших, Ми́лостиве, приими́ ду́ши: и жела́емых и боже́ственных, Влады́ко, недр боже́ственнаго Авраа́ма внутрь всели́, и с Ла́зарем блаже́нным сопричти́.

Слава: Соше́дый с небе́с, во е́же спасти́ род челове́ческий, Благоутро́бный Спа́се, невеще́ственнаго све́та, и боже́ственныя сла́вы Твоея́ насыща́тися и ра́дости, благоче́стно преста́вленныя, Твои́м милосе́рдием сподо́би.

И ныне: Зако́ни естества́ разреши́шася в Тебе́, Непостижи́мое Сло́во заче́ншей, Чи́стая; и зако́н нам Боже́ственный даде́ся, всем оставле́ние подая́ отчаява́емым прегреше́ньми, благода́тию Боже́ственныя любве́.

Катавасия: В нача́ле небеса́:

Ектения малая, обычная.

Кондак и икос святаго Минеи.

Таже, седален с Богородичным его.

Песнь 4

Ирмос: О́тча не́дра не оста́вль/ и соше́д на зе́млю, Христе́ Бо́же,/ та́йну услы́шах смотре́ния Твоего́// и просла́вих Тя, еди́не Человеколю́бче.

Припев: Ди́вен Бог во святы́х Свои́х, Бог Изра́илев.

Страда́льческия боле́зни терпели́вно показа́вше, Христе́, му́ченицы, венцы́ увязо́шася пра́вды Твоея́, и сла́вят Твою́ си́лу.

Припев: Поко́й, Го́споди, ду́ши усо́пших раб Твои́х.

Пачеесте́ственныя све́тлости Твоея́ преста́вленыя благоче́стно сподо́би, егда́ прии́деши во сла́ве Твое́й со А́нгелы Твои́ми, Всеще́дре и Многоми́лостиве.

Слава: Трисве́тлыя зари́, Бла́же, и еди́нственнаго облиста́ния Божества́ наслади́тися сподо́би пре́жде отше́дшия, и сла́вящия Тя, Человеколю́бче. И ныне: И́же О́тча не́дра не оста́вль, в Деви́ческих не́дрех Христо́с водвори́ся, и сме́рти изба́вил есть Тебе́ блажа́щия, Богома́ти, еди́на Всепе́тая.

Песнь 5

Ирмос: Го́споди Бо́же мой,/ от но́щи у́треневав Тебе́ молю́ся:/ пода́ждь ми оставле́ние прегреше́ний мои́х,/ и к све́ту Твои́х повеле́ний// пути́ моя́ напра́ви, молю́ся.

Припев: Ди́вен Бог во святы́х Свои́х, Бог Изра́илев.

Ме́ртвостию живоно́сною, истка́нною муче́ний ра́ди, всехва́льнии му́ченицы оде́яни све́тло, душа́м пре́жде усо́пшим боже́ственный испроси́те поко́й.

Припев: Поко́й, Го́споди, ду́ши усо́пших раб Твои́х.

От неизнури́мых сокро́вищ, пролива́яй благоутро́бие, Спа́се, ду́ши я́же преста́вил еси́, с перворо́дными Твои́ми в жили́щах небе́сных благоволи́ водвори́тися.

Слава: Тяготу́ отложи́вшия, и от уз разреши́вшияся, и к вы́шнему животу́ рабы́ Твоя́ преше́дшия, Христе́, наслажда́тися Твои́х святы́х све́тлостей Спа́се, благоизво́ли.

И ныне: Влады́чице Богома́ти, моих согреше́ний разреше́ние пода́ждь, и да́руй ми проще́ние грехо́в мои́х, Я́же Жизнь Ипоста́сную ми́ру ро́ждши, Всенепоро́чная.

Песнь 6

Ирмос: Пла́вающаго в молве́ жите́йских попече́ний,/ с корабле́м потопля́ема грехи́,/ и душетле́нному зве́рю примета́ема,/ я́ко Ио́на, Христе́, вопию́ Ти:// из смертоно́сныя глубины́ возведи́ мя.

Припев: Ди́вен Бог во святы́х Свои́х, Бог Изра́илев.

Лик му́ченический, неудо́бь носи́мыя боле́зни кре́пко претерпе́вший, неболе́зненныя сла́дости насле́дова, пра́вды венцы́ от Живоно́сныя Десни́цы прие́м.

Припев: Поко́й, Го́споди, ду́ши усо́пших раб Твои́х.

Лик му́ченический, неудо́бь носи́мыя боле́зни кре́пко претерпе́вший, неболе́зненныя сла́дости насле́дова, пра́вды венцы́ от Живоно́сныя Десни́цы прие́м.

Слава: С пра́ведными, иде́же святы́х ли́цы, и иде́же све́тлость преподо́бных и ве́чныя жи́зни наслажде́ние, пре́жде усо́пшия Твоя́ рабы́ учини́, Ми́лостиве, я́ко Бог безсме́ртен.

И ныне: И́же во́лею Боже́ственною и соде́тельною си́лою, вся составле́й от небытия́, из утро́бы Твоея́, Чи́стая, произы́де, и су́щия во тьме сме́ртней богонача́льными блиста́ньми просвети́л есть.

Катавасия: Пла́вающаго в молве́:

Ектения малая, за упокой.

Кондак, глас 8:

Со святы́ми упоко́й,/ Христе́, души́ ра́б Твои́х,/ иде́же не́сть боле́знь, ни печа́ль,/ ни воздыха́ние, //но жи́знь безконе́чная.

Икос:

Сам Еди́н еси́ Безсме́ртный,/ сотвори́вый и созда́вый челове́ка,/ земни́и у́бо от земли́ созда́хомся/ и в зе́млю ту́южде по́йдем,/ я́коже повеле́л еси́,/ созда́вый мя и реки́й ми:/ я́ко земля́ еси́ и в зе́млю оты́деши,/ а́може вси челове́цы по́йдем,/ надгро́бное рыда́ние творя́ще песнь:// Аллилу́иа, Аллилу́иа, Аллилу́иа.

Песнь 7

Ирмос: Пещь о́троцы огнепа́льну/ дре́вле росоточа́щу, показа́ша,/ Еди́наго Бо́га воспева́юще и глаго́люще:// превозноси́мый отце́в Бог, и препросла́влен.

Припев: Ди́вен Бог во святы́х Свои́х, Бог Изра́илев.

Венцы́ нося́ще ли́цы му́ченик, Царя́ Христа́ я́сно обстоя́т мы́сленно, со а́нгельскими ликостоя́ньми, благослове́н еси́, зову́ще, Бо́же оте́ц на́ших.

Припев: Поко́й, Го́споди, ду́ши усо́пших раб Твои́х.

Ты сме́рти и живота́ власть име́яй, Ще́дре, пи́щи божественныя сподо́би я́же в ве́ре Твое́й, Спа́се, преложе́нныя, благослове́н еси́, зову́щия, Бо́же оте́ц на́ших.

Слава: Просвеща́я све́том невеще́ственнаго светоли́тия, Христе́, ду́ши, я́же преста́вил еси́, в селе́нии́х небе́сных всели́, славосло́вити Тя непреста́нно со уго́дники Твои́ми.

И ныне: И́же пре́жде без ма́тере из Отца́, ны́не же без отца́ из Тебе́, Де́во, Христо́с неизрече́нно роди́ся, нас ра́ди Челове́к в плоть обо́лкся; благослове́н, Пречи́стая, плод Твоего́ чре́ва.

Песнь 8

Ирмос: Еди́наго Безнача́льнаго Царя́ Сла́вы,/ Его́же благословя́т Небе́сныя Си́лы/ и трепе́щут чи́ни а́нгельстии,/ по́йте, свяще́нницы,// лю́дие, превозноси́те Его́ во ве́ки.

Припев: Ди́вен Бог во святы́х Свои́х, Бог Изра́илев.

К небе́сней зря́ще сла́ве, му́ченицы, Христо́ва прише́ствия, о земне́й неради́ша сла́ве, пою́ще благоче́стно Того́ я́ко Царя́, во вся ве́ки.

Припев: Поко́й, Го́споди, ду́ши усо́пших раб Твои́х.

И́же земну́ю разруши́вый хра́мину, е́же о наде́жди жи́зни усо́пшим небе́сную хра́мину пода́ждь, в пра́ведных селе́ниих си́х упоко́й во вся́ ве́ки.

Благослови́м Отца́ и Сы́на и Свята́го Ду́ха, Го́спода.

Ме́ртвым воскресе́ние, я́ко Бог подава́яй, И́же исто́чник жи́зни имы́й; Ты напо́й пи́щными пото́ки, я́ко еди́н Благ, пре́жде усо́пшия, во вся ве́ки.

И ныне: Свет непристу́пный, Богоро́дице Де́во, во чре́ве Твое́м прие́мши неизрече́нно, просвети́ла еси́ су́щия во тьме жития́́, сла́вити благоче́стно Христа́, проше́дшаго из Тебе́ несказа́нно.

Хвалим, благословим, покланяемся Господеви, поюще и превозносяще во вся ве́ки.

Катавасия: Еди́наго Безнача́льнаго Царя́ Сла́вы:

Таже, поем песнь Богородицы: Величи́т душа́ Моя́ Го́спода:

Песнь 9

Ирмос: Мати Божия и Дева,/ рождшая и девствующая паки,/не естества́ де́ло, но Бо́жия снизхожде́ния,/ тем я́ко еди́ну Бо́жиих чуде́с сподо́бльшуюся,// Тя при́сно велича́ем.

Припев: Ди́вен Бог во святы́х Свои́х, Бог Изра́илев.

Явле́нно до́блии му́ченицы просвеща́ют мир, ве́ры су́ще столпи́, Це́рквам непоколеби́мая тверды́ня, и предгра́дия благоче́стия; тех по достоя́нию ве́рнии ублажа́ем.

Припев: Поко́й, Го́споди, ду́ши усо́пших раб Твои́х.

Изба́ви огня́ ве́чнаго, Влады́ко, от нас преста́вльшияся; ребр Твои́х копие́м грехо́вное рукописа́ние растерзав́ сих, я́ко еди́н Человеколю́бец, и святы́х све́тлости сподо́би.

Слава: Я́ко Благ Бог, и Человеколю́бец естество́м, я́ко Ми́лостив и Щедр, я́ко живота́ безсме́ртнаго Сый сокро́вище неистощи́мое, Спа́се, ве́рою пре́жде усо́пшия нетле́нныя сла́дости Твоея́ сподо́би.

И ныне: Зако́на се́ни, и пре́ждняя гада́ния Твои́м рождество́м преидо́ша, и́бо исполне́ние зако́на и проро́ков Христо́с бысть. Его́же во двою́ существу́ пою́ще, Тебе́, Присноде́ву Чи́стую, ублажа́ем.

Катавасия: Ма́ти Бо́жия и Де́ва:

Таже, Досто́йно есть: Ектения малая, обычная.

И ексапостиларий Октоиха:

И́же и ме́ртвыми и живы́ми облада́яй я́ко Бог, и святы́ми Твои́ми всю зе́млю просвети́вый, Соде́телю всех, пою́щия Тя спаса́й.

Слава, и ныне, Богородичен: Мы о Тебе́ хвалимся, Богородице, и к Богу Тя и́мамы предста́тельство, простри́ ру́ку Твою́ необори́мую и сокруши́ враги́ на́ша, Твои́м низпосли́ рабо́м по́мощь от Свята́го.

Посем псалмы хвалитныя.

На хвалитех стихиры мученикам, глас 7:

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Па́мять святы́х Твои́х страстоте́рпец пра́зднующе,/ Тебе́ пое́м, Христе́, вопию́ще:// Го́споди, сла́ва Тебе́.

Стих: Хвали́те Его́ во гла́се тру́бнем,/ хвали́те Его́ во псалти́ри и гу́слех.

Паки таяжде стихира.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Посреде́ суди́ща законопресту́пных,/ ра́дующеся, вопия́ху, Христе́, страстоте́рпцы:// Го́споди, сла́ва Тебе́.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния./ Вся́кое дыха́ние да хва́лит Го́спода.

Еди́но ды́шуще, и ко Еди́ному взира́юще/ страстоте́рпцы му́ченицы,/ еди́н пу́ть живота́ обре́тше,/ е́же за Христа́ сме́рть,/ ревну́юще дру́г дру́га кончи́не./ О́ле чудесе́, я́ко сокро́вища му́ки предвосхища́ху!/ Дру́г ко дру́гу глаго́лаху:/ я́ко а́ще не ны́не у́мрем, у́мрем же вся́ко,/ и бытию́ до́лжная послу́жим,/сотвори́м ну́жду любоче́стием,/ о́бщее свое́ изво́ливше,/ сме́ртию живо́т ку́пим.// Моли́твами и́х, Бо́же, поми́луй на́с.

Стих: Блаже́ни, я́же избра́л, и прия́л еси́, Го́споди,/ и па́мять их в род и род.

Во стране́ пра́ведных Твои́х, Ми́лостиве,/ ве́рою к Тебе́ преста́вленныя от вре́менных,// учини́, Человеколю́бче.

Слава, и ныне, Богородичен:

Моли́, Де́во, со апо́столы и му́ченики,/ обрести́ на суде́ преста́вльшимся// ве́лию ми́лость.

На стиховне стихиры покойны, глас 7:

Умерщвле́н ви́ден был еси́ на Кресте́,/ еди́не безсме́ртне,/ и во гро́бе, я́ко мертв, положе́н был еси́,/ умерщвле́ния и тли сме́ртныя челове́ки избавля́я./ Но я́ко пучи́на милосе́рдия Сый неистощи́мая,/ и исто́чник благосты́ни,// ду́ши Твои́х ра́б, от на́с преста́вленых, упоко́й.

Стих: Блаже́ни, я́же избра́л/ и прия́л еси́, Го́споди.

Нетле́нною Твое́ю добро́тою,/ и сла́достию красоты́, и Боже́ственнаго Твоего́ све́та луча́ми просвеща́тися сподо́би,/ к Тебе́ преста́вльшияся, Бла́же,/ в невеще́ственнем светоли́тии светоявле́ния Твоего́,/ со А́нгелы ликовству́ющия о́крест Тебе́, Влады́ки,// и Царя́ сла́вы, и Го́спода.

Стих: Ду́ши их/ во благи́х водворя́тся.

Я́ко неиждива́емое име́я даро́в великоле́пие,/ я́ко сокро́вище неоску́дное бога́тыя благосты́ни,/ к Тебе́ преста́вльшияся,/ я́ко Бог всели́ в страна́х избра́нных Твои́х,/ на ме́сте ослабле́ния, в дому́ сла́вы Твоея́,/ в пи́щи ра́йстей, в де́вственнем черто́зе,// я́ко Милосе́рд.

Слава, и ныне, Богородичен:

Зако́на исполне́ние родила́ еси́,/ Изба́вителя пло́тию бы́вшаго:/ не бо бысть су́щим пре́жде в зако́не оправда́ние,/ Христос же нас ради распятся и оправда. / Яко убо имущая дерзнове́ние,/ я́ко Ма́ти, моли́ Сы́на Твоего́ Благоутро́бнаго,// ду́ши упокои́ти благоче́стно от нас преста́вленных, Всепе́тая.

По Бла́го есть: тропари: Апо́столи, му́ченицы: якоже на вечерни указуяся.

Ектения сугубая и час первый.

Блаженны, глас 7:

Блаже́ни миротво́рцы,/ я́ко ти́и сы́нове Бо́жии нареку́тся. Красе́н бе и добр в снедь,/ и́же мене́ умертви́вый плод;/ Христо́с есть дре́во живо́тное,/ от Него́же яды́й не умира́ю,/ но вопию́ с разбо́йником:/ помяни́ мя, Го́споди, во Ца́рствии Твое́м.

Блаже́ни изгна́ни пра́вды ра́ди,/ я́ко тех есть Ца́рство Небе́сное.

Сконча́вше до́брый по́двиг,/ и ве́ру соблю́дше,/ венцы́ нетле́нныя от Бо́га прия́ли есте́,/ и сла́вы Его́ сподо́бистеся,/ му́ченицы всехва́льнии,/ А́нгелом сожи́телие.

Блаже́ни есте́, егда́ поно́сят вам,/ и изжену́т, и реку́т всяк зол глаго́л, на вы лжу́ще Мене́ ра́ди.

Священноде́йственных и преподо́бных собо́ри,/ и проро́к, и честны́х жен сосло́вие да почти́тся свяще́нно,/ во хра́мех перворо́дных ны́не живу́ще в ра́дости,/ и соводворя́ющеся со безпло́тными чи́нми.

Радуйтеся и веселитеся,/ яко мзда ваша многа на небесех.

Учини́ в хра́мех святы́х,/ я́же преста́вил еси́ от нас, Сло́ве Бо́жий,/ тех презре́в душе́вная согреше́ния,/ в ве́дении и неве́дении соде́яная на земли, уще́дри рабы́ Твоя́.

Слава: Раби́ Твои́, о Тро́ице Свята́я,/ умира́ющии к Тебе́ прихо́дят,/ изба́витися от стра́шных о́нех мук,/ и улучи́ти про́сят благи́х сла́вы святы́я Твоея́, в час су́дный.

И ныне: Всели́ся в Твое́й утробе, Всесвята́я Чиста́я,/ О́тчее сия́ние,/ и прельще́ныя вра́жиим злым сове́том, и впа́дшия во тлю,/ па́ки обнови́л есть.

На входе тропари субботы, глас 2:

Апо́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о нас Того́, я́ко Бла́га моли́те// спасти́ся, мо́лимся, душа́м на́шим.

Помяни́, Го́споди, я́ко Благ, рабы́ Твоя́,/ и ели́ка в житии́ согреши́ша, прости́;/ никто́же бо безгре́шен, то́кмо Ты,// моги́й и преста́вленным да́ти поко́й.

Слава, кондак, глас 8:

Со святы́ми упоко́й,/ Христе́, души́ ра́б Твои́х,/ иде́же не́сть боле́знь, ни печа́ль,/ ни воздыха́ние, //но жи́знь безконе́чная.

И ныне, глас тойже:

Тебе́ и Сте́ну, и Приста́нище и́мамы,/ и Моли́твенницу благоприя́тну к Бо́гу,// Его́же родила́ еси́, Богоро́дице Безневе́стная, ве́рных спасе́ние.

Прокимен рядовой, глас 8:

Весели́теся о Го́споде,/ и ра́дуйтеся, пра́веднии.

Стих: Блаже́ни, и́хже оста́вишася беззако́ния, и и́хже прикры́шася греси́.

И за упокой глас 6:

Ду́ши их во благи́х водворя́тся.

Аллилуиа, глас 4. Стих: Мно́ги ско́рби пра́ведным, и от всех их изба́вит я́ Госпо́дь.

Стих за упокой: Блаже́ни, я́же избра́л и прия́л еси́, Го́споди, и па́мять их в род и род.

Причастен рядовой: Радуйтеся, праведнии, о Господе, правым подобает похвала́.

И за упокой: Блаже́ни, я́же избра́л и прия́л еси́, Го́споди, и па́мять их в род и род.

Субботняя служба всем святым

(аще Бог Господь)

По предначинательном псалме стихословим кафисму 18-ю²⁶.

На Го́споди, воззва́х: стихиры святаго Минеи на 6 (каждая стихира по дважды).

Стих: А́ще беззако́ния на́зриши, Го́споди, Го́споди, кто постои́т?/ Я́ко у Тебе́ очище́ние есть.

Стихира святаго 1-я.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,/ упова́ душа́ моя́ на Го́спода.

Таяжде стихира.

Стих: От стра́жи у́тренния до но́щи, от стра́жи у́тренния/ да упова́ет Изра́иль на Го́спода.

Стихира святаго 2-я.

Стих: Я́ко у Го́спода ми́лость и мно́гое у Него́ избавле́ние:/ и Той изба́вит Изра́иля от всех беззако́ний его́.

Таяжде стихира.

Стих: Хвали́те Го́спода вси язы́цы,/ похвали́те Его́ вси лю́дие.

Стихира святаго 3-я.

Стих: Я́ко утверди́ся ми́лость Его́ на нас,/ и и́стина Госпо́дня пребыва́ет во век.

Таяжде стихира.

Слава: святаго Минеи,

И ныне: Догматик, глас 8: Ца́рь Небе́сный:

Аще же несть святому Славы, Слава, и ныне, Богородичен воскресный, глас 8:

Царь Небе́сный/ за человеколю́бие на земли́ яви́ся,/ и с челове́ки поживе́,/ от Де́вы бо Чи́стыя плоть прие́мый,/ и из Нея́ проше́дый с восприя́тием,/ еди́н есть Сын, сугу́б естество́м,/ но не Ипоста́сию./ Те́мже, соверше́нна Того́ Бо́га,/ и соверше́нна Челове́ка вои́стинну пропове́дающе,/ испове́дуем Христа́ Бо́га на́шего:/ Его́же моли́, Ма́ти Безневе́стная,// поми́ловатися душа́м на́шим.

Входа несть. Све́те ти́хий:

Прокимен, глас 7: Бо́же, Засту́пник мой еси́ Ты,/ и ми́лость Твоя́ предвари́т мя.

Стих: Изми́ мя от враг мои́х, Бо́же, и от востаю́щих на мя изба́ви мя.

И абие, Сподо́би, Го́споди: Ектения просительная.

На стиховне стихиры мученичны, глас 8:

Му́ченицы Госпо́дни,/ вся́ко ме́сто освяща́ете,/ и вся́к неду́г уврачу́ете:/ и ны́не моли́те,/ изба́витися от се́тей вра́жиих// душа́м на́шим, мо́лим вы́.

Стих: К Тебе́ возведо́х о́чи мои́, живу́щему на небеси́. Се я́ко о́чи раб в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему,/ до́ндеже уще́дрит ны.

Му́ченицы Твои́, Го́споди,/ забы́вше жите́йская,/ и небре́гше о муче́ниих, бу́дущия ра́ди жи́зни,/ тоя́ насле́дницы яви́шася,/ те́мже и со А́нгелы ра́дуются.// Тех моли́твами, да́руй лю́дем Твои́м ве́лию ми́лость.

Стих: Поми́луй нас, Го́споди, поми́луй нас, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих:/ и уничиже́ния го́рдых.

А́ще ка́я доброде́тель,/ и а́ще ка́я похвала́, подоба́ет святы́м?/ Мече́м бо преклони́ша вы́и,/ Тебе́ ра́ди, прекло́ньшаго небеса́ и соше́дшаго;/ излия́ша кро́ви своя́,/ Тебе́ ра́ди истощи́вшаго Себе́, и зрак ра́бий прие́мша,/ смири́шася да́же до сме́рти,/ нищету́ Твою́ подража́юще./ И́хже моли́твами, по мно́жеству щедро́т Твои́х,// Бо́же, поми́луй нас.

Слава, и ныне, Богородичен:

Чи́стая Де́во,/ Сло́ва врата́, Бо́га на́шего Ма́ти,// моли́ спасти́ся нам.

Таже, Ны́не отпуща́еши:

По Трисвятом: Тропарь святаго Минеи.

Слава, и ныне, Богородичен воскресный, глас 8:

И́же нас ра́ди рожде́йся от Де́вы/ и, распя́тие претерпе́в, Благи́й,/ испрове́ргий сме́ртию смерть/ и воскресе́ние явле́й я́ко Бог,/ не пре́зри, я́же созда́л еси́ руко́ю Твое́ю,/ яви́ человеколю́бие Твое́, Ми́лостиве./ Приими́ ро́ждшую Тя, Богоро́дицу, моля́щуюся за ны,// и спаси́, Спа́се наш, лю́ди отча́янныя.

На Бог Госпо́дь: тропарь святаго Минеи, дважды. Слава, и ныне, Богородичен воскресен по гласу тропаря.

И стихословится кафисма 16, на 3 славы.

По стихословии ектения малая, и чтутся седальны мученичны:

Свети́ла у́мная яви́стеся, святи́и му́ченицы, мглу бо пре́лести упраздни́сте ве́рою, и душе́вныя свещи́ ва́ша просвети́сте, и с Женихо́м со сла́вою внидо́сте в небе́сный черто́г. И ны́не мо́лим вы, моли́теся спасти́ся душа́м на́шим.

Стих: Ди́вен Бог во святы́х Свои́х, Бог Изра́илев.

Воздержа́нием страсте́й огнепа́льныя испепели́вше зра́ки и движе́ния, Христо́вы му́ченицы, прия́ша благода́ть, неду́ги отгоня́ти немощству́ющих, и живу́ще и по конце́ чудоде́йствовати. Вои́стинну чу́до пресла́вное, я́ко ко́сти на́ги источа́ют исцеле́ния: сла́ва Еди́ному Бо́гу на́шему.

Слава, и ныне: И́же нас ра́ди рожде́йся от Де́вы и, распя́тие претерпе́в, Благи́й, испрове́ргий сме́ртию смерть и воскресе́ние явле́й я́ко Бог, не пре́зри, я́же созда́л еси́ руко́ю Твое́ю, яви́ человеколю́бие Твое́, Ми́лостиве. Приими́ ро́ждшую Тя Богоро́дицу, моля́щуюся за ны, и спаси́, Спа́се наш, лю́ди отча́янныя.

И стихословится кафисма 17, на 3 славы.

По втором стихословии ектения малая и седальны:

Проро́цы, му́ченицы Христо́вы, и святи́телие, и́же по́двиг до́брый благочестному́дренно зако́нно сконча́вше, и прии́мше венцы́ неувяда́емыя от Бо́га, непреста́нно моли́те о нас Его́ бла́гость, я́ко да да́рует нам прегреше́ний проще́ние, я́ко Бог Благоуве́тлив.

Стих: Блаже́ни, я́же избра́л и прия́л еси́, Го́споди.

Мертвен: Преста́вльшияся благоче́стно от вре́менных, в селе́ниих избра́нных с пра́ведными сопричти́, Влады́ко, тех упокоева́я на ме́сте пра́зднующих, и в сла́дости неконча́емей ра́йстей, я́ко Благ, во́льная прегреше́ния и нево́льная их, за кра́йнюю бла́гость прости́вый, Человеколю́бче.

Стих: Ду́ши их во благи́х водворя́тся.

Мертвен: Глубино́ю му́дрости человеколю́бно вся стро́яй, и поле́зное всем подава́яй, Еди́не Соде́телю, упоко́й, Го́споди, ду́ши раб Твои́х: на Тя бо упова́ние возложи́ша, Творца́ и Зижди́теля и Бо́га на́шего.

Слава, и ныне: Тебе́ и Сте́ну, и Приста́нище и́мамы, и Моли́твенницу благоприя́тну к Бо́гу, Его́же родила́ еси́, Богоро́дице Безневе́стная, ве́рных спасе́ние.

Псалом 50.

И поем канона три:

Канон святаго Минеи со ирмосом на 6, ирмос по дважды, посем канон святаго храма или обители на 4, и канон во Октоихе святым мученикам, и святителям и преподобным на 4²⁷.

Аще храм Владычний, поем каноны сице:

Канон храма или обители на 6, ирмос по дважды, канон святаго Минеи на 4, канон во Октоихе всем святым на 4.

Песнь 1

Ирмос: Пои́м Го́сподеви, прове́дшему лю́ди:

Припев: Вси святи́и, моли́те Бо́га о нас.

Честни́и би́серие яви́стеся, вене́ц просвеща́юще честны́я Це́ркве, страстоте́рпцы Христо́вы до́блественнейшии.

Облиста́ша догма́т доброде́телей боже́ственными светлостьми́ прему́дрии святи́телие, и ве́рных сердца́ просвети́ша.

Тебе́ в проро́цех и в преподо́бных чу́днаго мо́лим, Сло́ве: тех мольба́ми спаси́ нас.

Слава: Егда́ суд пра́ведный прии́деши сотвори́ти, Пра́веднейший; неосужде́нно, Сло́ве, тех мольба́ми спаси́ нас.

И ныне: Го́спода ро́ждшую Тя све́дый, же́нский лик Тебе́ во след, Де́во, страда́льчествовав, Тому́ приведе́ся.

Песнь 3

Ирмос: Утвержде́й в нача́ле небеса́:

Припев: Вси святи́и, моли́те Бо́га о нас.

Ме́рзкия же́ртвы страда́льцы крепча́йшею мы́слию оттря́сше, же́ртва чисте́йша Сло́ву поже́ршемуся бы́ша.

Обновля́юще словесы́ священноде́тельными обетша́вшая вся́кими страстьми́, Обнови́вшаго мир боже́ственнии ученицы́ яви́стеся.

Я́же проро́ком пре́жде явле́нно, да́нная благода́ть Всесвята́го Ду́ха, по́стники в после́дняя боже́ственных дарова́ний испо́лни.

Слава: Лико́м святы́х сочета́й, Бо́же, ве́рно от жития́ преше́дшия, и рая́ жи́тели сотвори́, за неизрече́нную ми́лость.

И ныне: И́же ника́коже вмеща́емый Иису́с и Госпо́дь, нетесновме́стно в Твое́ всели́ся освяще́нное чре́во, Пречи́стая Де́во Всепе́тая.

Катавасия: Утвержде́й в нача́ле небеса́/ и зе́млю основа́вый на вода́х мно́гих,// утверди́ мя к пе́нию славосло́вия Твоего́, Го́споди.

Ектения малая.

Седален святаго Минеи. Слава, и ныне, Богородичен.

Песнь 4

Ирмос: Услы́шах, Го́споди:

Припев: Вси святи́и, моли́те Бо́га о нас.

Преше́дше по́прище муче́ния, теплото́ю духо́вною, страда́льцы богоблаже́ннии, веще́ственную пре́лесть попали́сте.

Преподо́бныя Твоя́, Го́споди, и святи́тели све́тло просла́вил еси́; тех боже́ственными мольба́ми, прича́стника мя сла́вы Твоея́ сотвори́.

Е́же Боже́ственнаго Ду́ха вдохнове́ние, проро́ки просвети́вшее, жена́м кре́пость дарова́, враго́в погубля́ти шата́ния.

Слава: Сликовствова́ти сподо́би со все́ми святы́ми, я́же преста́вил еси́, Преблаги́й, рабы́ Твоя́, в селе́ниих святы́х Твои́х, умоле́н быва́яй.

И ныне: Зако́на Боже́ственнаго Пода́теля, естества́ зако́на вы́ше родила́ еси́, возсозида́юща, Всенепоро́чная, челове́ческое естество́ попо́лзшееся.

Песнь 5

Ирмос: Просвети́ нас повеле́нии Твои́ми:

Припев: Вси святи́и, моли́те Бо́га о нас.

Претерпе́ша я́звы плотски́я боже́ственнии му́ченицы, и сего́ ра́ди я́звы на́ша при́сно исцеля́ют, уязвля́юще де́моны.

Святи́и Бо́жии святи́тели, моли́те со все́ми преподо́бными Христа́, грехо́в оставле́ние дарова́ти нам.

Плоть ра́нами и обуче́нием изнури́вше, жены́ преподо́бныя, Человеколю́бче, в наде́ждах благи́х сподо́бишася.

Слава: Смерть погуби́в, сме́ртию Твое́ю, Безсме́ртне, уме́ршия в наде́жди и жи́зни, ве́рныя Твоя́ рабы́ я́ко Человеколю́бец упоко́й.

И ныне: Упраздни́ла еси́, Чи́стая, пра́отец осужде́ние, всех оправда́вшаго пло́тию ро́ждши Иису́са еди́наго Го́спода.

Песнь 6

Ирмос: Очи́сти мя, Спа́се:

Припев: Вси святи́и, моли́те Бо́га о нас.

Гное́нии ва́шими честны́ми душ исцеля́ете неду́ги, святи́и му́ченицы, и согни́тия теле́с при́сно отъе́млете, уязвля́юще лука́вых де́монов мно́жество.

Преподо́бных лик, святи́телей же сосло́вие, и жен свяще́нных боже́ственное сочета́ние, тве́рдо страда́льчествовавше, на небесе́х наслажде́ния насле́доваша.

Умертви́вше по́стницы плоть, живот улучи́сте; па́сше же до́бре Христо́во ста́до, святи́телие прему́дрии, безсме́ртныя сла́вы по кончи́не сподо́бистеся.

Слава: Живы́х, Сло́ве, живо́т, и уме́рших поко́й сый, я́же от нас Боже́ственным Твои́м манове́нием, преста́вленыя рабы́ Твоя́, Авраа́ма в не́дра уго́дника Твоего́ всели́.

И ныне: Всели́ся в Тя, Чи́стая, О́тчее сия́ние, и невеще́ственными заря́ми Своего́ Божества́, тьму разруши́ многобо́жия, и мир просвети́.

Катавасия: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,// Бо́же спасе́ния моего́.

Ектения малая.

Кондак и икос святаго Минеи.

Песнь 7

Ирмос: О́троцы богочести́вии:

Припев: Вси святи́и, моли́те Бо́га о нас.

Разруши́вше опло́т злоче́стия вяза́ньми свяще́нными ва́шими, всехва́льнии, мои́х согреше́ний бре́мя расточи́те, и вопию́ща, му́ченицы, спаси́те: благослове́н Бог оте́ц на́ших.

Ту́чами свяще́нных ва́ших крове́й, ересе́й огнь угаси́сте, и пла́менем, святи́телие прему́дрии, попали́сте нече́стия пре́лести пле́велы, и ве́рных ду́ши просвети́сте.

По́стницы воздержа́нием пло́ти умертви́вше, живу́т по сме́рти; проро́к же пра́ведных лик, и сочета́ние же́нское страда́льчествовавшее просла́вися. Тех моли́твами, Христе́, от бед изба́ви нас.

Слава: Всех в наде́жди жи́зни усо́пших ду́ши, Христе́, упоко́й, презира́яй я́же в житии́ тех согреше́ния, за мно́гое благоутро́бие Твое́, Благоутро́бне еди́не Спа́се, отце́в Бо́же, благослове́н еси́.

И ныне: Вся я́ко Чи́стая восприя́ла еси́ во утро́бу Сло́во воплоща́емо; Того́ моли́, Пречи́стая, прегреше́ний очи́стити мя души́ и те́ла, к Тебе́ чи́стою ве́рою притека́ющаго.

Песнь 8

Ирмос: Богоглаго́ливии о́троцы: Припев: Вси святи́и, моли́те Бо́га о нас.

Хра́мы и́дольския низложи́сте страда́льчествующе, и себе́ Тро́ицы Боже́ственныя хра́мы созда́сте, страстоте́рпцы Госпо́дни, А́нгелом собесе́дницы.

Свяще́нницы Твои́, Христе́, в пра́вду обле́кшеся преподо́бно с су́щими от ве́ка ны́не ра́дуются, Твою́ добро́ту зря́ще Боже́ственную ясне́йше.

Свяще́ннейших моли́твами проро́к Твои́х, и жен присносла́вных, су́щих от ве́ка пра́ведных, ми́лости Твоя́, Сло́ве, ми́ру Твоему́ да́руй.

Благослови́м Отца́ и Сы́на и Свята́го Ду́ха, Го́спода.

Правосу́де, егда́ хо́щеши суди́ти, я́же от нас прия́л еси́, неосужде́ны соблюди́, презре́в тех согреше́ния, Влады́ко.

И ныне: Я́вльшися, Де́во, души́ моея́ темне́йшия о́блаки просвеще́нием Твои́м отжени́, пра́вды Со́лнца ро́ждшая.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Катава́сия: Богоглаго́ливии о́троцы в пещи́/со огне́м пла́мень попира́юще, поя́ху:// благослови́те, дела́ Госпо́дня, Го́спода.

Таже, поем: Честне́йшую:

Песнь 9

Ирмос: Тя Неискусобра́чную Ма́терь:

Припев: Вси святи́и, моли́те Бо́га о нас.

Стоя́ху му́ченицы пред непра́ведными суди́щи, всю непра́вду благода́тию Христо́вою осуди́вше, и я́же от них держи́мыя изъе́млюще, и венцы́ пра́вды прие́млюще.

Яви́стеся я́коже корми́ла Це́ркве, кора́бль весь благоче́стно напра́вивше Бо́жиих за́поведей, вси первосвященнонача́льницы и па́стырие блаже́ннии: сего́ ра́ди я́ко окорми́тели вас чтим.

Собо́р мо́лит Тя, Го́споди, проро́к, и преподо́бных, сосло́вие жен страда́льчествовавших светле́йше, и возсия́вших во обуче́нии, Человеколю́бче, моли́т Тя, щедро́ты Твоя́ нам да́руй.

Слава: Ея́же сподо́бишася че́сти и сла́вы ве́чныя, вси святи́и Христо́вы; я́же ве́рно отше́дшия жития́ су́етнаго, причасти́тися рабы́ Твоя́ сподо́би, Ми́лостиве, моли́твами святы́х Твои́х.

И ныне: Нося́щи Исполне́ние благи́х во объя́тиих, Всенепоро́чная, испо́лни нас мольбы́ раб Твои́х, и я́же к Бо́гу ше́ствия на́ша испра́ви, доброде́тельне укрепля́ющи жи́тельствовати.

Катавасия: Тя Неискусобра́чную Ма́терь Бо́га Вы́шняго,/ Тя па́че ума́ ро́ждшую сло́вом вои́стинну Бо́га,/ вы́шшую пречи́стых сил,// немо́лчными славословле́нии велича́ем.

Таже, Досто́йно есть: и ектения малая.

Светилен глаголем прежде святаго Минеи.

Слава: И́же и ме́ртвыми и живы́ми облада́яй я́ко Бог, и святы́ми Твои́ми всю зе́млю просвети́вый, Соде́телю всех, пою́щия Тя спаса́й.

И ныне: Мы о Тебе́ хва́лимся, Богоро́дице, и к Бо́гу Тя и́мамы предста́тельство, простри́ ру́ку Твою́ необори́мую, и сокруши́ враги́ на́ша, Твои́м низпосли́ рабо́м по́мощь от Свята́го.

И абие псалмы хвалитныя, и прочая.

На стиховне стихиры мученикам, глас 8:

Вельми́ подвиза́стеся, святи́и,/ му́ки беззако́нных претерпе́сте до́блественне,/ и Христа́ испове́давше пред цари́,/ и па́ки преста́вльшеся от жития́,/ си́лы де́йствуете в ми́ре,/ и немощны́я исцеля́ете от страсте́й их, святи́и,// моля́ще спасти́ся душа́м на́шим.

Стих: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся, во вся дни на́ша возвесели́хомся, за дни в ня́же смири́л ны еси́, ле́та, в ня́же ви́дехом зла́я. И при́зри на рабы́ Твоя́, и на дела́ Твоя́,/ и наста́ви сы́ны их.

Му́ченицы Христо́вы непобеди́мии,/ победи́вше пре́лесть си́лою кре́стною,/ наслажда́етеся благода́ти ве́чныя жи́зни:/ мучи́телей преще́ния не убоя́стеся,/ му́ками ураня́еми весели́стеся;/ и ны́не кро́ви ва́ша бы́ша исцеле́ния душа́м на́шим,// моли́те спасти́ся душа́м на́шим.

Стих: И бу́ди све́тлость Го́спода Бо́га на́шего на нас, и дела́ рук на́ших испра́ви на нас,/ и де́ло рук на́ших испра́ви.

Во броня́ ве́ры обо́лкшеся до́бре,/ и о́бразом кре́стным вооружи́вше себе́,/ во́ини благомо́щнии яви́стеся:/ мучи́телем му́жески проти́вистеся,/ и диа́волю пре́лесть низложи́сте,/ побе́дницы бы́вше, венце́в сподо́бистеся,/ моля́щеся при́сно о нас,// во е́же спасти́ся нам.

Слава: святаго Минеи, И ныне: Богородичен по гласу Славы, от менших.

Аще же несть, Слава, и ныне, Богородичен, глас 8:

Аз, Де́во Свята́я Богоро́дице,/ к покро́ву Твоему́ прибега́ю,/ вем, я́ко обря́щу Тобо́ю спасе́ние:// мо́жеши бо, Чи́стая, помощи́ мне.

Таже, Бла́го есть:

Трисвятое, по О́тче наш: тропарь святаго Минеи.

Слава, и ныне, Богородичен по гласу тропаря от менших, в конец утрени.

Блаженны, глас 8:

Блаже́ни миротво́рцы,/ я́ко ти́и сы́нове Бо́жии нареку́тся.

Помяни́ нас, Христе́ Спа́се ми́ра,/ я́коже разбо́йника помяну́л еси́ на дре́ве,/ и сподо́би всех, еди́не Ще́дре,/ Небе́снаго Ца́рствия Твоего́.

Блаже́ни изгна́ни пра́вды ра́ди,/ я́ко тех есть Ца́рство Небе́сное.

Всем боле́знем кре́пко приобща́ющеся,/ я́звами ва́шими святы́ми, страстоте́рпцы,/ уязви́сте вся тьмы бесо́в,/ Боже́ственною благода́тию.

Блаже́ни есте́, егда́ поно́сят вам,/ и изжену́т, и реку́т всяк зол глаго́л, на вы лжу́ще Мене́ ра́ди.

Преподо́бнии Христо́вы, и боже́ственнии святи́телие,/ собо́р проро́ческий, и всех святы́х пра́ведных,/ небе́сное получи́ша насле́дие,/ и́хже по достоя́нию да ублажи́м.

Ра́дуйтеся и весели́теся,/ я́ко мзда́ ва́ша мно́га на небесе́х.

Всех ве́рно от жития́ преста́вленных/ учини́, Бо́же, в страна́х пра́ведных;/ и рая́ покажи́ насле́дники,/ боголе́пно песносло́вящих Тя.

Слава: Пе́ние Ти, Тро́ице, приношу́ коне́чное:/ и́хже от земли́ преста́вила еси́ в ве́ре,/ святы́х сподо́би селе́ния,/ и мене́ блу́днаго поми́луй.

И ныне: Всех до́брых Исполне́ние ро́ждши,/ испо́лни на́ша, Де́во, моле́ния,/ согреше́ний нам оставле́ния прося́щи,/ и просвеще́ния и ве́лия ми́лости.

Поем тропари и кондаки на входе сице:

В храме святаго:

Тропарь всем святым, глас 2: Апо́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о на́с Того́, я́ко Бла́га, моли́те,// спасти́ся, мо́лимся, душа́м на́шим.

Тропарь и кондак святаго Минеи.

Слава, кондак, глас 8:

Со святы́ми упоко́й,/ Христе́, души́ ра́б Твои́х,/ иде́же не́сть боле́знь, ни печа́ль,/ ни воздыха́ние, //но жи́знь безконе́чная.

И ныне, глас тойже:

Я́ко нача́тки естества́, Насади́телю тва́ри,/ вселе́нная прино́сит Ти, Го́споди, богоно́сныя му́ченики;/ тех моли́твами в ми́ре глубо́це// Це́рковь Твою́, жи́тельство Твое́ Богоро́дицею соблюди́, Многоми́лостиве.

В храме Господском или Богородичном:

Тропарь храма Христова или Богородицы.

Тропарь всем святым: Апо́столи, му́ченицы и проро́цы:

Тропарь и кондак святаго Минеи. Слава: Со святы́ми упоко́й:

И ныне, глас 8: Я́ко нача́тки естества́:

Прокимен, глас 8: Весели́теся о Го́споде,/ и ра́дуйтеся, пра́веднии.

Стих: Блаже́ни, и́хже оста́вишася беззако́ния, и и́хже прикры́шася греси́.

Аллилуиа, глас 4: Воззва́ша пра́веднии, и Госпо́дь услы́ша их.

Стих: Мно́ги ско́рби пра́ведным, и от всех их изба́вит я́ Госпо́дь.

Причастен: Ра́дуйтеся, пра́веднии, о Го́споде, пра́вым подоба́ет похвала́.

На Го́споди, воззва́х: стихиры святаго Минеи, 3.

Стих: А́ще беззако́ния на́зриши, Го́споди, Го́споди, кто постои́т?/ Я́ко у Тебе́ очище́ние есть.

Стихира святаго 1-я.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,/ упова́ душа́ моя́ на Го́спода.

Стихира святаго 2-я.

Стих: От стра́жи у́тренния до но́щи, от стра́жи у́тренния/ да упова́ет Изра́иль на Го́спода.

Стихира святаго 3-я.

Таже поем мученичны гласа, 3, глас 8:

Стих: Я́ко у Го́спода ми́лость и мно́гое у Него́ избавле́ние:/ и Той изба́вит Изра́иля от всех беззако́ний его́.

Му́ченицы Госпо́дни,/ вся́ко ме́сто освяща́ете,/ и вся́к неду́г уврачу́ете:/ и ны́не моли́те,/ изба́витися от се́тей вра́жиих// душа́м на́шим, мо́лим вы.

Стих: Хвали́те Го́спода вси язы́цы,/ похвали́те Его́ вси лю́дие. Му́ченицы Твои́, Го́споди,/ забы́вше жите́йская,/ и небре́гше о муче́ниих, бу́дущия ра́ди жи́зни,/ тоя́ насле́дницы яви́шася,/ те́мже и со А́нгелы ра́дуются.// Тех моли́твами, да́руй лю́дем Твои́м ве́лию ми́лость.

Стих: Я́ко утверди́ся ми́лость Его́ на нас,/ и и́стина Госпо́дня пребыва́ет во век.

А́ще ка́я доброде́тель,/ и а́ще ка́я похвала́, подоба́ет святы́м?/ Мече́м бо преклони́ша вы́и,/ Тебе́ ра́ди, прекло́ньшаго небеса́ и соше́дшаго;/ излия́ша кро́ви своя́,/ Тебе́ ра́ди истощи́вшаго Себе́, и зрак ра́бий прие́мша,/ смири́шася да́же до сме́рти,/ нищету́ Твою́ подража́юще./ И́хже моли́твами, по мно́жеству щедро́т Твои́х,// Бо́же, поми́луй нас.

Слава, и ныне, Богородичен, глас 8:

Царь Небесный/ за человеколюбие на земли́ явися,/ и с человеки поживе,/ от Девы бо Чистыя плоть приемый,/ и из Нея́ проше́дый с восприя́тием,/ еди́н есть Сын, сугу́б естество́м,/ но не Ипоста́сию./ Те́мже, соверше́нна Того́ Бо́га,/ и соверше́нна Челове́ка вои́стинну пропове́дающе,/ испове́дуем Христа́ Бо́га на́шего:/ Его́же моли́, Ма́ти Безневе́стная,// поми́ловатися душа́м на́шим.

Входа несть. Све́те ти́хий:

Прокимен, глас 7: Бо́же, Засту́пник мой еси́ Ты,/ и ми́лость Твоя́ предвари́т мя.

Стих: Изми́ мя от враг мои́х, Бо́же, и от востаю́щих на мя изба́ви мя.

И абие, Сподо́би, Го́споди: Ектения просительная.

На стиховне поем мученичен един и два мертвена, глас 8:

Му́ченицы Госпо́дни,/ моли́те Бо́га на́шего,/ и испроси́те душа́м на́шим мно́жество щедро́т,// и очище́ние мно́гих прегреше́ний, мо́лимся.

Стих: Блаже́ни, я́же избра́л/ и прия́л еси́, Го́споди.

Пла́чу и рыда́ю,/ егда́ помышля́ю смерть,/ и ви́жду во гробе́х лежа́щую,/ по о́бразу Бо́жию созда́нную на́шу красоту́,/ безобра́зну и безсла́вну,/ не иму́щую ви́да./ О́ле чудесе́,/ что е́же о нас сие́ бысть та́инство!/ Ка́ко преда́хомся тле́нию?/ Ка́ко припряго́хомся сме́рти?/ Вои́стинну Бо́жиим повеле́нием,/ я́коже есть пи́сано,// подаю́щаго преста́вльшимся упокое́ние.

Стих: Ду́ши их/ во благи́х водворя́тся.

Смерть Твоя́, Го́споди,/ безсме́ртия бысть хода́таица:/ а́ще бы не во гро́бе положе́н был еси́,/ не бы рай отве́рзлся./ Те́мже преста́вльшихся упоко́й,// я́ко Человеколю́бец.

Слава, и ныне, Богородичен:

Чи́стая Де́во,/ Сло́ва врата́, Бо́га на́шего Ма́ти,// моли́ спасти́ся нам.

Таже, Ны́не отпуща́еши:

По Трисвятом: тропари, глас 2:

Апо́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о нас Того́, я́ко Бла́га моли́те// спасти́ся, мо́лимся, душа́м на́шим.

Слава: Помяни́, Го́споди, я́ко Благ, рабы́ Твоя́,/ и ели́ка в житии́ согреши́ша, прости́;/ никто́же бо безгре́шен, то́кмо Ты,// моги́й и преста́вленным да́ти поко́й.

И ныне: Ма́ти Свята́я неизрече́ннаго Све́та,/ а́нгельскими Тя пе́сньми почита́юще// благоче́стно велича́ем.

Аллилуиа, во глас 2-й, таже тропарь: Апо́столи, му́ченицы: дважды.

Слава: Помяни́, Го́споди: И ныне: Ма́ти Свята́я:

Посем кафисма 16.

Ектения малая обычная, и глаголем седальны мученичны:

Воздержа́нием страсте́й огнепа́льныя испепели́вше зра́ки и движе́ния, Христо́вы му́ченицы, прия́ша благода́ть, неду́ги отгоня́ти немощству́ющих, и живу́ще и по конце́ чудоде́йствовати. Вои́стинну чу́до пресла́вное, я́ко ко́сти на́ги источа́ют исцеле́ния: сла́ва Еди́ному Бо́гу на́шему.

Проро́цы, му́ченицы Христо́вы, и святи́телие, и́же по́двиг до́брый благочестному́дренно зако́нно сконча́вше, и прии́мше венцы́ неувяда́емыя от Бо́га, непреста́нно моли́те о нас Его́ бла́гость, я́ко да да́рует нам прегреше́ний проще́ние, я́ко Бог Благоуве́тлив.

Стих: Блаже́ни, я́же избра́л и прия́л еси́, Го́споди.

Мертвен: Преста́вльшияся благоче́стно от вре́менных, в селе́ниих избра́нных с пра́ведными сопричти́, Влады́ко, тех упокоева́я на ме́сте пра́зднующих, и в сла́дости неконча́емей ра́йстей, я́ко Благ, во́льная прегреше́ния и нево́льная их за кра́йнюю бла́гость прости́вый, Человеколю́бче.

Стих: Ду́ши их во благи́х водворя́тся.

Мертвен: Глубино́ю му́дрости человеколю́бно вся стро́яй, и поле́зное всем подава́яй, Еди́не Соде́телю, упоко́й, Го́споди, ду́ши раб Твои́х: на Тя бо упова́ние возложи́ша, Творца́ и Зижди́теля и Бо́га на́шего.

Слава, и ныне: Тебе́ и Сте́ну, и Приста́нище и́мамы, и Моли́твенницу благоприя́тну к Бо́гу, Его́же родила́ еси́, Богоро́дице Безневе́стная, ве́рных спасе́ние.

Глаголем и непорочны на 2 статии, с припевы их (зри сия в приложении).

И прочая до канона вся за упокой, зри в приложении.

Посем псалом 50.

Каноны же поем сице:

Канон святаго Минеи со ирмосом на 6, ирмос по дважды, посем канон святаго храма или обители на 4, и канон во Октоихе вторый, за упокой, на 4²⁸.

Аще храм Владычний, поем каноны сице:

Канон храма или обители на 6, ирмос по дважды, канон святаго Минеи на 4, и канон во Октоихе, вторый, на 4.

Канон усопшим, глас 8:

Песнь 1

Ирмос: Во́ду проше́д я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.

Припев: Ди́вен Бог во святы́х Свои́х, Бог Изра́илев.

Сме́ртию смерть Христо́ву, и страстьми́ страсть подража́вше честну́ю, му́ченицы вси, боже́ственныя и блаже́нныя жи́зни получи́ша.

Припев: Поко́й, Го́споди, ду́ши усо́пших раб Твои́х.

Ю́ности прегреше́ния презря́, и грехи́ превосходя́, Христе́ Спа́се, пре́жде усо́пшия рабы́ Твоя́ со избра́нными Твои́ми сопричти́.

Слава: Ю́же получи́ша сла́ву же и ра́дость, и́же блаже́нное стяжа́вше пребыва́ние, пода́ждь бога́тно Твои́м рабо́м, я́же прия́л еси́ Многоми́лостиве.

И ныне: Зачала́ еси́ Сло́во О́тчее, пло́ти соеди́ншееся по Ипоста́си, Е́же из Тебе́, Всенепоро́чная Отрокови́це, ад Боже́ственною си́лою упраздни́вшее.

Песнь 3

Ирмос: Небе́снаго кру́га/ Верхотво́рче Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,// Еди́не Человеколю́бче.

Припев: Ди́вен Бог во святы́х Свои́х, Бог Изра́илев.

Очи́стившеся дре́вняго прароди́тельнаго паде́ния, креще́нием и па́ки порожде́нием, струя́ми же крове́й свои́х окропи́вшеся, Христу́, блаже́ннии, сца́рствуете.

Припев: Поко́й, Го́споди, ду́ши усо́пших раб Твои́х.

И́же мертв во́лею поло́жься во гро́бе, и живу́щия во гробе́х взыва́яй, Спа́се, благоволи́, я́же от нас прия́л еси́, в селе́ниих пра́ведных Твои́х сим водворя́тися.

Слава: Благоутро́бием Боже́ственныя Твоея́, Владыко, и соесте́ственне разумева́емыя бла́гости, умоле́н быва́я, грехо́в разреше́ние пода́в рабо́м Твои́м, Спа́се, упоко́й.

И ныне: Вопло́щься из чре́ва Твоего́, и быв Челове́к, И́же изря́дне сый еди́н Человеколю́бец, спаса́ет челове́ка от врат сме́ртных, Богома́ти Пречи́стая еди́на Всепе́тая.

Катавасия: Небе́снаго кру́га:

Ектения малая, обычная.

Кондак и икос святаго Минеи.

Песнь 4

Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:// си́ле Твое́й сла́ва, Человеколю́бче.

Припев: Ди́вен Бог во святы́х Свои́х, Бог Изра́илев.

Да Твоея́, Влады́ко, сла́вы у́зрят, и све́тлость Твою́ светода́тельную на небесе́х получа́т све́тло, всяк вид муче́ний носи́ти претерпе́ша, му́ченицы боже́ственнии, Тебе́, Христе́, пою́ще: си́ле Твое́й сла́ва, Человеколю́бче.

Припев: Поко́й, Го́споди, ду́ши усо́пших раб Твои́х.

Мно́ги оби́тели у Тебе́, Спа́се, суть, по достоя́нию всем разделя́емы, по ме́ре доброде́телей. Ты́я у́бо, Ще́дре, испо́лнити сих сподо́би, я́же ве́рою преста́вльшияся, благоче́стно Тебе́ вопию́щия: си́ле Твое́й сла́ва,

Человеколю́бче.

Слава: Ра́вен нам Челове́к яви́лся еси́, Безсме́ртне, всем ра́вно смерть претерпе́л еси́, и жи́зни показа́л еси́ путь: ея́же преста́вльшияся сподо́би, я́ко Человеколю́бец, проще́ние согреше́ний я́ко Влады́ка подава́я, и све́та прича́стие да́руй.

И ныне: Ты ве́рных похвала́ еси́, Безневе́стная, Ты предста́тельница, и Ты прибе́жище христиа́н, стена́́ и приста́нище, к Сы́ну Твоему́ мольбы́ но́сиши, Всенепоро́чная, и спаса́еши от бед, и́же ве́рою и любо́вию Богоро́дицу Чи́стую Тя ве́дущия.

Песнь 5

Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма окая́ннаго,/ но обрати́ мя, и к све́ту за́поведей Твои́х// пути́ моя́ напра́ви, молю́ся.

Припев: Ди́вен Бог во святы́х Свои́х, Бог Изра́илев.

Несказа́нныя Твоея́ сла́вы, и е́же па́че сло́ва Твоего́ блаже́нства, в селе́ниих святы́х, иде́же глас красе́н пра́зднующих, преста́вленныя к безстра́стней жи́зни уще́дрив, сподо́би, еди́не Человеколю́бче.

Припев: Поко́й, Го́споди, ду́ши усо́пших раб Твои́х.

Иде́же чи́ни а́нгельстии, иде́же пра́ведных собо́ри ра́дуются, Авраа́ма в не́дрех всели́, Спа́се, рабы́ Твоя́, и со дерзнове́нием стра́шному и боже́ственному Престо́лу предста́ти благоволи́, Благоутро́бне.

Слава: Очище́ние нам яви́лся еси́, пра́вда же и избавле́ние, и я́звою Твое́ю на́ша не́мощи уврачева́л еси́. Ты у́бо, Ще́дре, я́ко Благ, преста́вльшияся в сла́дости ра́йстей учини́́.

И ныне: Ми́лостивно, Ми́лостиве, челове́чества ме́ру восприя́л еси́, И́же боже́ственныя сла́вы превы́шшими украша́яй возвыше́ньми, от деви́ческих ложе́сн пло́ть прие́м одушевле́ну, слове́сну, е́юже сме́рть погуби́л еси́.

Песнь 6

Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,// Бо́же спасе́ния моего́.

Припев: Ди́вен Бог во святы́х Свои́х, Бог Изра́илев.

Му́ченицы Твои́, Спа́се, мно́гия му́ки претерпе́ша, любо́вию Твое́ю душа́ми уязви́вшеся святи́и, Твоея́ жела́юще присносу́щныя сла́вы и сла́дкаго Твоего́ прича́стия.

Припев: Поко́й, Го́споди, ду́ши усо́пших раб Твои́х.

Чре́во врага́ сме́ртию растерза́л еси́, Спа́се, и вся я́же в нем ю́зники воскреси́л еси́, живо́т дарова́вый; его́же преста́вленныя, Благоде́телю, сподо́би.

Слава: Слез и воздыха́ния су́щия во а́де рабы́ Твоя́ свободи́, Спа́се: я́ко еди́н бо Благоутро́бен, отъя́л еси́ вся́кую сле́зу от вся́каго лица́, ве́рно благосло́вящих Тя.

И ныне: И́же естество́м Cоде́тель, соде́тельствуется в ложесна́х Твои́х, по́лный я́ко Бог, истощава́ется, Всенепоро́чная; еди́н Безсме́ртный, за всех спасе́ние умира́ет сме́ртию.

Катавасия: Очи́сти мя, Спа́се:

Ектения малая, за упокой.

Кондак, глас 8:

Икос: Со святы́ми упоко́й,/ Христе́, души́ ра́б Твои́х,/ иде́же не́сть боле́знь, ни печа́ль,/ ни воздыхан́ие, //но жи́знь безконе́чная.

Сам Еди́н еси́ Безсме́ртный,/ сотвори́вый и созда́вый челове́ка,/ земни́и у́бо от земли́ созда́хомся/ и в зе́млю ту́южде по́йдем,/ я́коже повеле́л еси́,/ созда́вый мя и реки́й ми:/ я́ко земля́ еси́ и в зе́млю оты́деши,/ а́може вси челове́цы по́йдем,/ надгро́бное рыда́ние творя́ще песнь:// Аллилу́иа, Аллилу́иа, Аллилу́иа.

Песнь 7

Ирмос: О́троцы евре́йстии в пещи́/ попра́ша пла́мень дерзнове́нно,/ и на ро́су огнь преложи́ша, вопию́ще:// благослове́н еси́, Го́споди Бо́же, во ве́ки.

Припев: Ди́вен Бог во святы́х Свои́х, Бог Изра́илев.

Все жела́ние му́чеников простре́ся ко Еди́ному Влады́це, любо́вию Тому́ соединя́емое, и пою́щее: благослове́н еси́, Го́споди Бо́же, во веки.

Припев: Поко́й, Го́споди, ду́ши усо́пших раб Твои́х.

Подае́ши ве́рою преставльшимся све́тлость Боже́ственнаго Ца́рствия, нетле́ния оде́жду да́руяй вопию́щим: благослове́н еси́, Го́споди Бо́же, во ве́ки.

Слава: Испо́лни ра́дости и весе́лия, я́же преста́вил еси́ рабы́ Твоя́,

Ще́дре, сподо́бивый их взыва́ти Тебе́ и пе́ти: благослове́н еси́, Го́споди Бо́же, во ве́ки.

И ныне: Разреша́я Е́вину кля́тву, в пренепоро́чную всели́лся еси́ Де́ву, благослове́ния исто́чник источа́я вопию́щим: благослове́н, Пречи́стая, плод Твоего́ чре́ва.

Песнь 8

Ирмос: Мусики́йским орга́ном согласу́ющим/ и лю́дем безчи́сленным покланя́ющимся о́бразу в Деи́ре,/ три о́троцы не повину́вшеся,/ Го́спода воспева́ху,// и славосло́вляху во вся ве́ки.

Припев: Ди́вен Бог во святы́х Свои́х, Бог Изра́илев.

Землены́я по́двиги проше́дше, небе́сныя прия́ша венцы́ му́ченицы и́стиннии, вопию́ще Ти́ непреста́нно: Го́спода по́йте, и превозноси́те во вся́ ве́ки.

Припев: Поко́й, Го́споди, ду́ши усо́пших раб Твои́х.

Соше́д в ров преиспо́днейший, и́же во гробе́х живу́щия воскреси́л еси́ живонача́льною дла́нию, и по́дал еси́ рабо́м Твои́м, ве́рою пре́жде усо́пшим поко́й, Ще́дре.

Благослови́м Отца́ и Сы́на и Свята́го Ду́ха, Го́спода.

Я́ко исто́чник жи́зни присносу́щныя, я́ко сла́дости сый пото́к, рабы́ Твоя́ благоче́стно к Тебе́ преста́вленыя сподо́би пе́ти, и славосло́вити Тя во вся ве́ки.

И ныне: Мари́е Де́во Богоро́дице, Я́же Бо́га Спа́са челове́ком ро́ждшая теле́сно, спаса́й ве́рою пою́щия Твое́ Рождество́, и превознося́щия во вся ве́ки.

Хва́лим, благослови́м, покланя́емся Го́сподеви, пою́ще и превознося́ще во вся́ ве́ки.

Катавасия: Мусики́йским орга́ном согласу́ющим:

Таже, песнь Богородицы: Вели́чит душа́ Моя́ Го́спода:

Песнь 9

Ирмос: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к.// Те́мже Пречи́стую Богоро́дицу ве́рнии велича́ем.

Припев: Ди́вен Бог во святы́х Свои́х, Бог Изра́илев.

Иму́ще, му́ченицы Христо́вы, непобеди́мую кре́пость, и неодоле́емую, уничижи́сте мучи́телей безбо́жное веле́ние, и Ца́рствия Небе́снаго я́ве сподо́бистеся, просвеща́еми Тро́ичными заря́ми, достохва́льнии.

Припев: Поко́й, Го́споди, ду́ши усо́пших раб Твои́х.

Разруши́ся ад го́рький, разруши́вшу Ти его́, Человеколю́бче, и воскреси́вшу я́же от ве́ка та́мо спя́щия; но и ны́не я́ко Благ преше́дшия к Тебе́, Благоутро́бне, невече́рняго све́та Твоего́ сподо́би.

Слава: Весь еси́, Спа́се, сла́дость: весь еси́ жела́ние, и любо́вь вои́стинну ненасы́тная: весь еси́ добро́та несказа́нная; преста́вльшияся у́бо к Тебе́, Твоея́ красоты́ наслажда́тися благоволи́, и Боже́ственныя добро́ты Твоея́ сподо́би.

И ныне: Спаси́ мя, Ма́ти Бо́жия, ро́ждшая Христа́ Спа́са моего́, Бо́га и Челове́ка, сугу́ба естество́м, не ипоста́сию: единоро́дна у́бо от Отца́, из Тебе́ же перворо́дна всея́ тва́ри; Его́же в сугу́бом естестве́ велича́ем.

Катавасия: Устраши́ся всяк слух:

Таже, Досто́йно есть: Ектения малая, обычная.

И ексапостиларий Октоиха:

И́же и ме́ртвыми и живы́ми облада́яй я́ко Бог, и святы́ми Твои́ми всю зе́млю просвети́вый, Соде́телю всех, пою́щия Тя спаса́й.

Слава, и ныне, Богородичен: Мы о Тебе́ хва́лимся, Богоро́дице, и к Бо́гу Тя и́мамы предста́тельство, простри́ ру́ку Твою́ необори́мую и сокруши́ враги́ на́ша, Твои́м низпосли́ рабо́м по́мощь от Свята́го.

Посем псалмы хвалитныя.

На хвалитех стихиры мученикам, глас 8:

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Вельми́ подвиза́стеся святи́и,/ му́ки беззако́нных претерпе́сте до́блественне,/ и Христа́ испове́давше пред цари́,/ и па́ки преста́вльшеся от жития́,/ си́лы де́йствуете в ми́ре,/ и немощны́я исцеля́ете от страсте́й их, святи́и,// моля́ще спасти́ся душа́м на́шим.

Стих: Хвали́те Его́ во гла́се тру́бнем,/ хвали́те Его́ во псалти́ри и гу́слех.

Таяжде стихира.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Му́ченицы Христо́вы непобеди́мии,/ победи́вше пре́лесть си́лою кре́стною,/ наслажда́етеся благода́ти ве́чныя жи́зни:/ мучи́телей преще́ния не убоя́стеся,/ му́ками ураня́еми весели́стеся;/ и ны́не кро́ви ва́ша бы́ша исцеле́ния душа́м на́шим,// моли́те спасти́ся душа́м на́шим.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния./ Вся́кое дыха́ние да хва́лит Го́спода.

Во броня́ ве́ры обо́лкшеся до́бре,/ и о́бразом кре́стным вооружи́вше себе́,/ во́ини благомо́щнии яви́стеся:/ мучи́телем му́жески проти́вистеся,/ и диа́волю пре́лесть низложи́сте,/ побе́дницы бы́вше, венце́в сподо́бистеся,/ моля́щеся при́сно о нас,// во е́же спасти́ся нам.

Стих: Блаже́ни, я́же избра́л, и прия́л еси́, Го́споди,/ и па́мять их в род и род.

Безме́рна есть блу́дно живу́щим му́ка,/ скре́жет зубо́в, и плачь неуте́шимый,/ гее́нна о́гненная, и тьма кроме́шная,/ и червь неусыпа́емый,/ сле́зы недействи́тельны, и суд неми́лостивый./ Сего́ ра́ди пре́жде конца́ возопии́м, глаго́люще:/ Влады́ко Христе́, я́же избра́л еси́,// со избра́нными Твои́ми упоко́й.

Слава, и ныне, Богородичен:

Аз, Де́во Свята́я Богоро́дице,/ к покро́ву Твоему́ прибега́ю,/ вем, я́ко обря́щу Тобо́ю спасе́ние:// мо́жеши бо, Чи́стая, помощи́ мне.

На стиховне стихиры мертвены, глас 8:

Ца́рское ми подписа́в свобожде́ние,/ ша́ры червле́ными,/ пе́рсты Твоя́ окровави́в Влады́ко,/ и обагри́в Твое́ю Кро́вию./ Те́мже Тя ве́рою мо́лим:/ с перворо́дными Твои́ми причти́,/ и пра́ведных Твои́х ра́дости сподо́би улучи́ти,// преше́дшия к Тебе́ Благоутро́бному.

Стих: Блаже́ни, я́же избра́л/ и прия́л еси́, Го́споди. Свяще́нствовав я́ко челове́к,/ закла́н быв я́ко а́гнец,/ приноше́ние приноси́лся еси́ Отцу́,/ челове́ка от тли изыма́я,/ преста́вльшияся у́бо я́ко Человеколю́бец,/ в живу́щих стране́ учини́,/ иде́же пото́цы сла́дости пролива́ются,// иде́же исто́чницы присносу́щества истека́ют.

Стих: Ду́ши их/ во благи́х водворя́тся.

Глубино́ю му́дрости/ неизрече́нныя Твоея́ пределополага́еши живо́т,/ и прови́диши бу́дущая,/ и к жи́зни друго́й преселя́еши рабы́ Твоя́,/ я́же прия́л еси́ у́бо, учини́ на вода́х упокое́ния,/ во све́тлости святы́х, Го́споди,// иде́же глас ра́дования и хвале́ния.

Стих: И па́мять их/ в род и род.

Сло́во Сый неви́димый,/ Единора́сленный Отцу́ и Ду́ху созра́чный,/ мене́ ра́ди челове́ка пло́тию яви́лся еси́,/ я́ко Ми́лостив у́бо и Человеколю́бец,/ я́же от жития́ преше́дшия,/ благоле́пия Твоего́ и красоты́ добро́тами,// тех просвети́, Живонача́льнейший.

Слава, и ныне, Богородичен:

Я́ко заче́нши Безнача́льное Сло́во Бо́га Отца́,/ Ма́терним Твои́м дерзнове́нием приле́жно моли́, Богороди́тельнице,/ учини́ти рабы́ Твоя́,/ иде́же ликова́ние пра́ведных непреста́нное/ веселя́щихся и хва́лящих Тя,/ иде́же све́тлость ве́чнующая,// и сла́дкий глас пра́зднующаго.

По Бла́го есть: тропари: Апо́столи, му́ченицы: якоже на вечерни указуяся.

Ектения сугубая и час первый.

В субботу на литургии

Блаженны, глас 8:

Блаже́ни миротво́рцы,/ я́ко ти́и сы́нове Бо́жии нареку́тся. Помяни́ нас, Христе́ Спа́се ми́ра,/ я́коже разбо́йника помяну́л еси́ на дре́ве,/ и сподо́би всех, еди́не Ще́дре,/ Небе́снаго

Ца́рствия Твоего́.

Блаже́ни изгна́ни пра́вды ра́ди,/ я́ко тех есть Ца́рство Небе́сное.

Всем боле́знем кре́пко приобща́ющеся,/ я́звами ва́шими святы́ми, страстоте́рпцы,/ уязви́сте вся тьмы бесо́в,/ Боже́ственною благода́тию.

Блаже́ни есте́, егда́ поно́сят вам,/ и изжену́т, и реку́т всяк зол глаго́л, на вы лжу́ще Мене́ ра́ди.

Преподо́бнии Христо́вы, и боже́ственнии святи́телие,/ собо́р проро́ческий, и всех святы́х пра́ведных,/ небе́сное получи́ша насле́дие,/ и́хже по достоя́нию да ублажи́м.

Ра́дуйтеся и весели́теся,/ я́ко мзда ва́ша мно́га на небесе́х.

Всех ве́рно от жития́ преста́вленных/ учини́, Бо́же, в страна́х пра́ведных;/ и рая́ покажи́ насле́дники,/ боголе́пно песносло́вящих Тя.

Слава: Пе́ние Ти, Тро́ице, приношу́ коне́чное:/ и́хже от земли́ преста́вила еси́ в ве́ре,/ святы́х сподо́би селе́ния,/ и мене́ блу́днаго поми́луй.

И ныне: Всех до́брых Исполне́ние ро́ждши,/ испо́лни на́ша, Де́во, моле́ния,/ согреше́ний нам оставле́ния прося́щи,/ и просвеще́ния, и ве́лия ми́лости.

На входе тропари субботы, глас 2:

Апо́столи, му́ченицы и проро́цы,/ святи́телие, преподо́бнии и пра́веднии,/ до́бре по́двиг соверши́вшии и ве́ру соблю́дшии,/ дерзнове́ние иму́ще ко Спа́су,/ о нас Того́, я́ко Бла́га моли́те// спасти́ся, мо́лимся, душа́м на́шим.

Помяни́, Го́споди, я́ко Благ, рабы́ Твоя́,/ и ели́ка в житии́ согреши́ша, прости́;/ никто́же бо безгре́шен, то́кмо Ты,// моги́й и преста́вленным да́ти поко́й.

Слава, кондак, глас 8:

Со святы́ми упоко́й,/ Христе́, души́ ра́б Твои́х,/ иде́же не́сть боле́знь, ни печа́ль,/ ни воздыха́ние, //но жи́знь безконе́чная.

И ныне, глас тойже:

Тебе́ и Сте́ну, и Приста́нище и́мамы,/ и Моли́твенницу благоприя́тну к Бо́гу,// Его́же родила́ еси́, Богоро́дице Безневе́стная, ве́рных спасе́ние.

Прокимен рядовой, глас 8:

Весели́теся о Го́споде,/ и ра́дуйтеся, пра́веднии.

Стих: Блаже́ни, и́хже оста́вишася беззако́ния, и и́хже прикры́шася греси́.

И за упокой глас 6:

Ду́ши их во благи́х водворя́тся.

Аллилуиа, глас 4. Стих: Мно́ги ско́рби пра́ведным, и от всех их изба́вит я́ Госпо́дь.

Стих за упокой: Блаже́ни, я́же избра́л и прия́л еси́, Го́споди, и па́мять их в род и род.

Причастен рядовой: Радуйтеся, праведнии, о Господе, правым подобает похвала́.

И за упокой: Блаже́ни, я́же избра́л и прия́л еси́, Го́споди, и па́мять их в род и род.

ПРИЛОЖЕНИЕ

Последование 17-й кафисмы,

како пети ю на заупокойной утрени на две статии.

Статия 1

Поем первый стих, во глас 5:

Блажени непорочнии в путь,/ ходящии в законе Господни.

Припев: Благослове́н еси́, Го́споди:

Посем и второй Стих:

Блаже́ни испыта́ющии свиде́ния Его́,/ всем се́рдцем взы́щут Его́. И паки припев: Благослове́н еси́, Го́споди:

И глаголем прочие стихи первой статии, с темже припевом:

Не де́лающии бо беззако́ния, в путе́х Его́ ходи́ша. Ты запове́дал еси́ за́поведи Твоя́ сохрани́ти зело́.

Дабы́ испра́вилися путие́ мои́, сохрани́ти оправда́ния Твоя́. Тогда́ не постыжу́ся, внегда́ призре́ти ми на вся за́поведи Твоя́.

Испове́мся Тебе́ в пра́вости се́рдца, внегда́ научи́ти ми ся судьба́м пра́вды Твоея́.

Оправда́ния Твоя́ сохраню́, не оста́ви мене́ до зела́.

В чесо́м испра́вит юне́йший путь свой; внегда́ сохрани́ти словеса́ Твоя́. Всем се́рдцем мои́м взыска́х Тебе́, не отри́ни мене́ от за́поведей Твои́х. В се́рдце мое́м скрых словеса́ Твоя́, я́ко да не согрешу́ Тебе́.

Благослове́н еси́ Го́споди: научи́ мя оправда́нием Твои́м. Устна́ма мои́ма возвести́х вся судьбы́ уст Твои́х.

На пути́ свиде́ний Твои́х наслади́хся, я́ко о всяко́м бога́тстве. В за́поведех Твои́х поглумлю́ся, и уразуме́ю пути́ Твоя́.

Во оправда́ниих Твои́х поучу́ся, не забу́ду слове́с Твои́х. Возда́ждь рабу́ Твоему́: живи́ мя, и сохраню́ словеса́ Твоя́. Откры́й о́чи мои́, и уразуме́ю чудеса́ от зако́на Твоего́.

Пришле́ц аз есмь на земли́: не скрый от мене́ за́поведи Твоя́. Возлюби́ душа́ моя́ возжела́ти судьбы́ Твоя́ на вся́кое вре́мя. Запрети́л еси́ го́рдым: про́кляти уклоня́ющиися от за́поведей Твои́х. Отыми́ от мене́ поно́с и уничиже́ние, я́ко свиде́ний Твои́х взыска́х.

И́бо седо́ша кня́зи, и на мя клевета́ху, раб же Твой глумля́шеся во оправда́ниих Твои́х:

И́бо свиде́ния Твоя́ поуче́ние мое́ есть, и сове́ти мои́ оправда́ния Твоя́. Прильпе́ земли́ душа́ моя́: живи́ мя по словеси́ Твоему́.

Пути́ моя́ возвести́х, и услы́шал мя еси́: научи́ мя оправда́нием Твои́м: Путь оправда́ний Твои́х вразуми́ ми, и поглумлю́ся в чудесе́х Твои́х.

Воздрема́ душа́ моя́ от уны́ния: утверди́ мя в словесе́х Твои́х. Путь непра́вды отста́ви от мене́, и зако́ном Твои́м поми́луй мя. Путь и́стины изво́лих, и судьбы́ Твоя́ не забы́х.

Прилепи́хся свиде́нием Твои́м, Го́споди, не посрами́ мене́. Путь за́поведей Твои́х теко́х, егда́ расшири́л еси́ се́рдце мое́.

Законоположи́ мне, Го́споди, путь оправда́ний Твои́х, и взыщу́ и́ вы́ну: Вразуми́ мя, и испыта́ю зако́н Твой, и сохраню́ и́ всем се́рдцем мои́м.

Наста́ви мя на стезю́ за́поведей Твои́х, я́ко ту́ю восхоте́х. Приклони́ се́рдце мое́ во свиде́ния Твоя́, а не в лихои́мство. Отврати́ о́чи мои́, е́же не ви́дети суеты́, в пути́ Твое́м живи́ мя. Поста́ви рабу́ Твоему́ сло́во Твое́ в страх Твой.

Отыми́ поноше́ние мое́, е́же непщева́х: я́ко судьбы́ Твоя́ бла́ги. Се возжела́х за́поведи Твоя́, в пра́вде Твое́й живи́ мя.

И да прии́дет на мя ми́лость Твоя́ Го́споди, спасе́ние Твое́ по словеси́ Твоему́.

И отвеща́ю поноша́ющим ми сло́во: я́ко упова́х на словеса́ Твоя́.

И не отыми́ от уст мои́х словесе́ и́стинна до зела́, я́ко на судьбы́ Твоя́ упова́х.

И сохраню́ за́кон Твой вы́ну, в век и в век ве́ка. И хожда́х в широте́, я́ко за́поведи Твоя́ взыска́х.

И глаго́лах о свиде́ниих Твои́х пред цари́, и не стыдя́хся: И поуча́хся в за́поведех Твои́х, я́же возлюби́х зело́:

И воздвиго́х ру́це мои́ к за́поведем Твои́м, я́же возлюби́х, и глумля́хся во оправда́ниих Твои́х.

Помяни́ словеса́ Твоя́ рабу́ Твоему́, и́хже упова́ние дал ми еси́. То мя уте́ши во смире́нии мое́м, я́ко сло́во Твое́ живи́ мя.

Го́рдии законопреступова́ху до зела́: от зако́на же Твоего́ не уклони́хся.

Помяну́х судьбы́ Твоя́ от ве́ка, Го́споди, и уте́шихся. Печа́ль прия́т мя от гре́шник, оставля́ющих зако́н Твой.

Пе́та бя́ху мне оправда́ния Твоя́, на ме́сте прише́льствия моего́. Помяну́х в нощи́ и́мя Твое́, Го́споди, и сохрани́х зако́н Твой.

Сей бысть мне, я́ко оправда́ний Твои́х взыска́х.

Часть моя́ еси́, Го́споди, рех сохрани́ти зако́н Твой.

Помоли́хся лицу́ Твоему́ всем се́рдцем мои́м: поми́луй мя по словеси́ Твоему́.

Помы́слих пути́ Твоя́, и возврати́х но́зе мои́ во свиде́ния Твоя́. Угото́вихся и не смути́хся сохрани́ти за́поведи Твоя́.

У́жя гре́шник обяза́шася мне, и зако́на Твоего́ не забы́х. Полу́нощи воста́х испове́датися Тебе́ о судьба́х пра́вды Твоея́.

Прича́стник аз есмь всем боя́щимся Тебе́, и храня́щим за́поведи Твоя́.

Ми́лости Твоея́, Го́споди, испо́лнь земля́: оправда́нием Твои́м научи́ мя́.

Бла́гость сотвори́л еси́ с рабо́м Твои́м, Го́споди, по словеси́ Твоему́.

Бла́гости, и наказа́нию и ра́зуму научи́ мя́, я́ко за́поведем Твои́м ве́ровах.

Пре́жде да́же не смири́ти ми ся, аз прегреши́х: сего́ ра́ди сло́во Твое́ сохрани́х.

Бла́г еси́ Ты́, Го́споди, и бла́гостию Твое́ю научи́ мя́ оправда́нием Твои́м.

Умно́жися на мя непра́вда го́рдых, аз же всем се́рдцем мои́м испыта́ю за́поведи Твоя́.

Усыри́ся я́ко млеко́ се́рдце их, аз же зако́ну Твоему́ поучи́хся. Бла́го мне, я́ко смири́л мя еси́, я́ко да научу́ся оправда́нием Твои́м. Благ мне зако́н уст Твои́х, па́че ты́сящ зла́та и сребра́.

Ру́це Твои́ сотвори́сте мя, и созда́сте мя: вразуми́ мя, и научу́ся за́поведем Твои́м.

Боя́щиися Тебе́ у́зрят мя и возвеселя́тся, я́ко на словеса́ Твоя́ упова́х.

Разуме́х, Го́споди, я́ко пра́вда судьбы́ Твоя́, и вои́стинну смири́л мя́ еси́.

Бу́ди же ми́лость Твоя́, да уте́шит мя по словеси́ Твоему́ рабу́ Твоему́.

Да прии́дут мне щедро́ты Твоя́, и жив бу́ду, я́ко зако́н Твой поуче́ние мое́ есть.

Да постыдя́тся го́рдии, я́ко непра́ведно беззако́нноваша на мя, аз же поглумлю́ся в за́поведех Твои́х.

Да обратя́т мя боя́щиися Тебе́, и ве́дящии свиде́ния Твоя́.

Буди сердце мое́ непорочно во оправданиих Твоих, яко да не постыжуся.

Исчеза́ет во спасе́ние Твое́ душа́ моя́, на словеса́ Твоя́ упова́х. Исчезо́ша о́чи мои́ в сло́во Твое́, глаго́люще: когда́ уте́шиши мя? Зане́ бых, я́ко мех на сла́не: оправда́ний Твои́х не забы́х.

Колико есть дней раба́ Твоего?Когда́ сотвориши ми от гонящих мя суд?

Пове́даша мне законопресту́пницы глумле́ния, но не я́ко зако́н Твой, Го́споди.

Вся за́поведи Твоя́ и́стина: непра́ведно погна́ша мя, помози́ ми. Вма́ле не сконча́ша мене́ на земли́: аз же не оста́вих за́поведей Твои́х. По ми́лости Твое́й живи́ мя, и сохраню́ свиде́ния уст Твои́х.

Во век, Го́споди, сло́во Твое́ пребыва́ет на Небеси́.

В род и род и́стина Твоя́. Основа́л еси́ зе́млю, и пребыва́ет. Учине́нием Твои́м пребыва́ет день, я́ко вся́ческая рабо́тна Тебе́.

Припеваем же последние два стиха трижды, с припевы:

Я́ко а́ще бы не зако́н Твой поуче́ние мое́ был,/ тогда́ у́бо поги́бл бых во смире́нии мое́м. Благослове́н еси́, Го́споди:

Во век не забу́ду оправда́ний Твои́х,/ я́ко в них оживи́л мя еси́. Благослове́н еси́, Го́споди:

Ектения малая, заупокойная. Посем начинаем вторую статию.

Статия 2

Твой есмь аз, спаси́ мя,/ я́ко оправда́ний Твои́х взыска́х.

Припев: Спа́се, спаси́ мя.

Мене́ жда́ша гре́шницы погуби́ти мя,/ свиде́ния Твоя́ разуме́х.

И паки припев: Спа́се, спаси́ мя.

И прочие стихи второй статии, с темже припевом:

Вся́кия кончи́ны ви́дех коне́ц, широка́ за́поведь Твоя́ зело́.

Коль возлюби́х зако́н Твой, Го́споди, весь день поуче́ние мое́ есть. Па́че враг мои́х умудри́л мя еси́ за́поведию Твое́ю, я́ко в век моя́ есть. Па́че всех уча́щих мя разуме́х, я́ко свиде́ния Твоя́ поуче́ние мое́ есть. Па́че ста́рец разуме́х, я́ко за́поведи Твоя́ взыска́х.

От вся́каго пути́ лука́ва возбрани́х нога́м мои́м, я́ко да сохраню́ словеса́ Твоя́.

От суде́б Твои́х не уклони́хся, я́ко Ты законоположи́л ми еси́. Коль сладка́ горта́ни моему́ словеса́ Твоя́, па́че ме́да усто́м мои́м.

От за́поведей Твои́х разуме́х, сего́ ра́ди возненави́дех всяк путь непра́вды.

Свети́льник нога́ма мои́ма зако́н Твой, и свет стезя́м мои́м. Кля́хся и поста́вих сохрани́ти судьбы́ пра́вды Твоея́.

Смири́хся до зела́, Го́споди, живи́ мя по словеси́ Твоему́.

Во́льная уст мои́х благоволи́ же, Го́споди, и судьба́м Твои́м научи́ мя. Душа́ моя́ в руку́ Твое́ю вы́ну, и зако́на Твоего́ не забы́х.

Положи́ша гре́шницы сеть мне, и от за́поведей Твои́х не заблуди́х. Насле́довах свиде́ния Твоя́ во век, я́ко ра́дование се́рдца моего́ суть. Приклони́х се́рдце мое́ сотвори́ти оправда́ния Твоя́ в век за воздая́ние. Законопресту́пныя возненави́дех, зако́н же Твой возлюби́х.

Помо́щник мой и Засту́пник мой еси́ Ты, на словеса́ Твоя́ упова́х. Уклони́теся от мене́ лука́внующии, и испыта́ю за́поведи Бо́га моего́.

Заступи́ мя по словеси́ Твоему́, и жив бу́ду, и не посрами́ мене́ от ча́яния моего́.

Помози́ ми, и спасу́ся, и поучу́ся во оправда́ниих Твои́х вы́ну.

Уничижи́л еси́ вся отступа́ющия от оправда́ний Твои́х, я́ко непра́ведно помышле́ние их.

Преступа́ющия непщева́х вся гре́шныя земли́, сего́ ра́ди возлюби́х свиде́ния Твоя́.

Пригвозди́ стра́ху Твоему́ пло́ти моя́, от суде́б бо Твои́х убоя́хся. Сотвори́х суд и пра́вду, не преда́ждь мене́ оби́дящим мя.

Восприими́ раба́ Твоего́ во бла́го, да не оклевета́ют мене́ го́рдии. О́чи мои́ исчезо́сте во спасе́ние Твое́, и в сло́во пра́вды Твоея́.

Сотвори́ с рабо́м Твои́м по ми́лости Твое́й, и оправда́нием Твои́м научи́ мя́.

Раб Твой есмь аз: вразуми́ мя, и уве́м свиде́ния Твоя́. Вре́мя сотвори́ти Го́сподеви: разори́ша зако́н Твой.

Сего́ ра́ди возлюби́х за́поведи Твоя́ па́че зла́та и топа́зия.

Сего́ ра́ди ко всем за́поведем Твои́м направля́хся, всяк путь непра́вды возненави́дех.

Ди́вна свиде́ния Твоя́, сего́ ра́ди испыта́ я́ душа́ моя́. Явле́ние слове́с Твои́х просвеща́ет и вразумля́ет младе́нцы.

Уста́ моя́ отверзо́х, и привлеко́х дух, я́ко за́поведей Твои́х жела́х. При́зри на мя и поми́луй мя, по суду́ лю́бящих и́мя Твое́.

Стопы́ моя́ напра́ви по словеси́ Твоему́, и да не облада́ет мно́ю вся́кое беззако́ние.

Изба́ви мя от клеветы́ челове́ческия, и сохраню́ за́поведи Твоя́. Лице́ Твое́ просвети́ на раба́ Твоего́, и научи́ мя оправда́нием Твои́м.

Исхо́дища водна́я изведо́сте о́чи мои́, поне́же не сохрани́х зако́на Твоего́.

Пра́веден еси́, Го́споди, и пра́ви суди́ Твои́. Запове́дал еси́ пра́вду свиде́ния Твоя́ и и́стину зело́.

Иста́яла мя есть ре́вность Твоя́, я́ко забы́ша словеса́ Твоя́ врази́ мои́. Разжже́но сло́во Твое́ зело́, и раб Твой возлюби́ е́.

Юне́йший аз есмь и уничиже́н, оправда́ний Твои́х не забы́х. Пра́вда Твоя́ пра́вда во век, и зако́н Твой и́стина.

Ско́рби и ну́жди обрето́ша мя, за́поведи Твоя́ поуче́ние мое́. Пра́вда свиде́ния Твоя́ в век, вразуми́ мя, и жив бу́ду.

Воззва́х всем се́рдцем мо́им, услы́ши мя, Го́споди, оправда́ния Твоя́ взыщу́.

Воззва́х Ти, спаси́ мя, и сохраню́ свиде́ния Твоя́. Предвари́х в безго́дии и воззва́х, на словеса́ Твоя́ уповах́. Предвари́сте о́чи мои́ ко у́тру, поучи́тися словесе́м Твои́м.

Гла́с мо́й услы́ши, Го́споди, по ми́лости Твое́й: по судьбе́ Твое́й живи́ мя́.

Прибли́жишася гоня́щии мя беззако́нием, от зако́на же Твоего́ удали́шася.

Близ еси́ Ты, Го́споди, и вси путие́ Твои́ и́стина.

Испе́рва позна́х от свиде́ний Твои́х, я́ко в век основа́л я́ еси́. Виждь смире́ние мое́ и изми́ мя, я́ко зако́на Твоего́ не забы́х. Суди́ суд мой и изба́ви мя, словесе́ ра́ди Твоего́ живи́ мя.

Дале́че от гре́шник спасе́ние, я́ко оправда́ний Твои́х не взыска́ша. Щедро́ты Твоя́ мно́ги, Го́споди, по судьбе́ Твое́й живи́ мя.

Мно́зи изгоня́щии мя́ и стужа́ющии ми́, от свиде́ний Твои́х не уклони́хся.

Ви́дех неразумева́ющия и иста́ях, я́ко слове́с Твои́х не сохрани́ша.

Ви́ждь, я́ко за́поведи Твоя́ возлюби́х, Го́споди, по ми́лости Твое́й живи́ мя́.

Нача́ло слове́с Твои́х и́стина, и во век вся судьбы́ пра́вды Твоея́. Кня́зи погна́ша мя ту́не, и от слове́с Твои́х убоя́ся се́рдце мое́.

Возра́дуюся аз о словесе́х Твои́х, я́ко обрета́яй коры́сть мно́гу.

Непра́вду возненави́дех и омерзи́х, зако́н же Твой возлюби́х. Седмери́цею днем хвали́х Тя о судьба́х пра́вды Твоея́.

Мир мног лю́бящим зако́н Твой, и несть им собла́зна.

Ча́ях спасе́ния Твоего́, Го́споди, и за́поведи Твоя́ возлюби́х. Сохрани́ душа́ моя́ свиде́ния Твоя́ и возлюби́ я́ зело́.

Сохрани́х за́поведи Твоя́ и свиде́ния Твоя́, я́ко вси путие́ мои́ пред Тобо́ю, Го́споди.

Да прибли́жится моле́ние мое́ пред Тя, Го́споди, по словеси́ Твоему́ вразуми́ мя.

Да внидет прошение мое́ пред Тя, Господи, по словеси́ Твоему́ избави мя.

Отры́гнут устне́ мои́ пе́ние, егда́ научи́ши мя оправда́нием Твои́м. Провеща́ет язы́к мой словеса́ Твоя́, я́ко вся за́поведи Твоя́ пра́вда. Да бу́дет рука́ Твоя́ е́же спасти́ мя, я́ко за́поведи Твоя́ изво́лих.

Возжела́х спасе́ние Твое́, Го́споди, и зако́н Твой поуче́ние мое́ есть.

Припеваем же последние два стиха трижды, с припевы:

Жива́ бу́дет душа́ моя́ и восхва́лит Тя,/ и судьбы́ Твоя́ помо́гут мне.

Припев: Спа́се, спаси́ мя.

Заблуди́х, я́ко овч́а поги́бшее,/ взыщи́ раба́ Твоего́, я́ко за́поведей Твои́х не забы́х.

Припев: Спа́се, спаси́ мя.

По непорочнах тропари мертвении.

Глас 5:

Благослове́н еси́, Го́споди,/ научи́ мя оправда́нием Твои́м. Святы́х лик обре́те исто́чник жи́зни и дверь ра́йскую,/ да обря́щу и аз путь покая́нием,/ поги́бшее овча́ аз есмь,// воз-

зови́ мя, Спа́се, и спаси́ мя.

Благослове́н еси́, Го́споди,/ научи́ мя оправда́нием Твои́м. А́гнца Бо́жия пропове́давше,/ и закла́ни бы́вше, я́коже а́гнцы,/ и к жи́зни нестаре́емей, святи́и,/ и присносу́щней преста́вльшеся,/ Того́ приле́жно, му́ченицы, моли́те// долго́в

разреше́ние нам дарова́ти.

Благослове́н еси́, Го́споди,/ научи́ мя оправда́нием Твои́м. В путь у́зкий хо́ждшии приско́рбный,/ вси в житии́ крест, я́ко яре́м, взе́мшии/ и Мне после́довавшии ве́рою,/ прииди́те наслади́теся,/ и́хже угото́вах вам по́честей// и венце́в

небе́сных.

Благослове́н еси́, Го́споди,/ научи́ мя оправда́нием Твои́м. О́браз есмь неизрече́нныя Твоея́ сла́вы,/ а́ще и я́звы ношу́ прегреше́ний:/ уще́дри Твое́ созда́ние, Влады́ко,/ и очи́сти Твои́м благоутро́бием,/ и возжеле́нное Оте́чество пода́ждь

ми,// рая́ па́ки жи́теля мя сотворя́я.

Благослове́н еси́, Го́споди,/ научи́ мя оправда́нием Твои́м. Дре́вле у́бо от не су́щих созда́вый мя/ и о́бразом Твои́м Боже́ственным почты́й,/ преступле́нием же за́поведи/ па́ки мя возврати́вый в зе́млю, от нея́же взят бых:/ на е́же по подо́бию

возведи́// дре́внею добро́тою возобрази́тися.

Благослове́н еси́, Го́споди,/ научи́ мя оправда́нием Твои́м. Упоко́й, Бо́же, рабы́ Твоя́/ и учини́ я́ в раи́,/ иде́же ли́цы святы́х, Го́споди,/ и пра́ведницы сия́ют, я́ко свети́ла,/ усо́пшия рабы́ Твоя́ упоко́й,// презира́я их вся согреше́ния.

Сла́ва Отцу́ и Сы́ну и Свято́му Ду́ху.

Трисия́тельное Еди́наго Божества́ благоче́стно пое́м, вопию́ще:/ Свят еси́, О́тче Безнача́льный,/ Собезнача́льный Сы́не и Боже́ственный Ду́ше,/ просвети́ нас, ве́рою Тебе́ служа́щих,// и ве́чнаго огня́ исхити́.

И ны́не и при́сно и во ве́ки веко́в. Ами́нь.

Радуйся, Чистая, Бога плотию рождшая во спасение всех,/Е́юже род челове́ческий обре́те спасе́ние,/ Тобо́ю да обря́щем рай,// Богоро́дице Чи́стая, Благослове́нная.

Аллилуиа, Аллилуиа, Аллилуиа, слава Тебе, Боже. (Трижды)

Посем ектения о усопших: Па́ки и па́ки:

По последнем возглашении: Го́споду помо́лимся: мы же отвещаем: Го́споди, поми́луй (40), дóндеже скончает священник молитву: Бо́же духо́в:

И по возгласе седален, глас 5:

Поко́й, Спа́се наш,/ с пра́ведными рабы́ Твоя́/ и сия́ всели́ во дворы́ Твоя́,/ я́коже есть пи́сано:/ презира́я, я́ко Благ, прегреше́ния их/ во́льная и нево́льная// и вся я́же в ве́дении и не в ве́дении, Человеколю́бче.

Слава, и ныне, Богородичен: От Де́вы возсия́вый ми́ру, Христе́ Бо́же,// сы́ны све́та То́ю показа́вый, поми́луй нас.

Псалом 50.

И поем каноны, иже в книге сей во своих гласех писаны суть.

Краткая схема-устав

«О святем, имущем полиелей, аще случится в субботу»

В пяток вечера, на велицей вечерни:

По предначинательном псалме поем: Блаже́н муж: 1-й антифон.

На Го́споди, воззва́х: стихиры святаго на 8. Сла́ва: святаго. И ны́не: Богородичен догматик гласа Недели.

Вход, Све́те ти́хий: Прокимен субботы: Бо́же, Засту́пник мой еси́ Ты: Паремии святаго.

На литии стихира храма. Сла́ва: святаго, И ны́не: Богородичен 2-й по гласу Славы.

На стиховне стихиры святаго. Сла́ва: святаго, И ны́не: Богородичен 2-й по гласу Славы. По Ны́не отпуща́еши: тропарь святаго, Сла́ва, и ны́не: Богородичен воскресен гласа Недели. И отпуст.

(Аще служим бдение: на благословении хлебов тропарь святому дважды и Бого́родице Де́во: единожды. И прочее бдения.)

На утрени:

На Бог Госпо́дь: тропарь святаго дважды. Сла́ва, и ны́не: Богородичен воскресен гласа Недели.

И стихословим кафисмы 16-ю и 17-ю, с ектениями. По нихже глаголем седальны святаго, с Богородичными наряду.

И до канона вся полиелейная служба Минеи. Каноны же поем сице:

Аще храм святаго, поем прежде Богородичный канон воскресного Октоиха гласа со ирмосом на 6, ирмос по дважды. И святаго, на 8.

Аще ли храм Христов, или Богородицы, поем канон храма на 6, и святаго на 8. (В предпразднство и попразднство поем прежде канон праздника на 6 и святаго на 8)

По 3-й и 6-й песни канона вся Минеи. Катавасия рядовая, по уставу.

По 9-й песни светилен Минеи с Богородичным его.

На хвалитех все стихиры Минеи, иже наряду указаны суть.

По великом славословии тропарь святаго. Сла́ва и ны́не: Богородичен воскресен гласа Недели.

Ектении, и отпуст.

На литургии:

Блаженны от канона святаго, песнь 3 и 6. На входе тропари:

В храме Христове

В храме Богородицы

В храме святаго

Тропарь храма

Тропарь храма

Тропарь празднуемого святаго

Тропарь святаго

Тропарь святаго

Слава: Кондак праздн. святаго

Слава: Кондак святаго

Слава: Кондак святаго

Иныне: Предстат́ ельствохристиан́:

Иныне: Предстат́ ельствохристиан́:

И ныне: Кондак храма

Прокимен, Апостол, Аллилуиа, Евангелие и причастный стих празднуемого святаго, аще бдение. Аще ли полиелей, присовокупляем и субботы.

Ирмосы Богородичных канонов воскресного Октоиха

имиже предваряем в субботу канон празднуемаго святаго

Глас 1

Песнь 1: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая проти́вныя сотре́,// изра́ильтяном путь глубины́ новосоде́лавшая.

Песнь 3: Еди́не, ве́дый челове́ческаго существа́ не́мощь/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й,// одушевле́нный хра́ме неизрече́нныя сла́вы Твоея́, Человеколю́бче.

Песнь 4: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву/ провозглаша́ше Свято́му// во спасе́ние на́ше и обновле́ние.

Песнь 5: Просвети́вый сия́нием/ прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ богоразу́мия// правосла́вно пою́щих Тя.

Песнь 6: Обы́де на́с после́дняя бе́здна,/ не́сть избавля́яй,/вмени́хомся, я́ко о́вцы заколе́ния,/ спаси́ лю́ди Твоя́, Бо́же на́ш,// Ты́ бо кре́пость немощству́ющих и исправле́ние.

Песнь 7: Тебе́, у́мную, Богоро́дице, пещь,/ разсмотря́ем, ве́рнии,/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,// хва́льный отце́в Бог и препросла́влен.

Песнь 8: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,// по́йте и превозноси́те во вся ве́ки.

Песнь 9: О́браз чи́стаго рождества́ Твоего́/ огнепали́мая купина́ показа́ неопа́льная;/ и ны́не на нас напа́стей свире́пеющую угаси́ти, мо́лимся, пещь,/ да Тя, Богоро́дице,// непреста́нно велича́ем.

Глас 2

Песнь 1: Нетре́ну, необы́чну,/ немо́кренно морску́ю ше́ствовав стезю́,/ избра́нный вопия́ше Изра́иль:// Го́сподеви пои́м, я́ко просла́вися.

Песнь 3: Лук сокруши́ся си́льных/ держа́вою Твое́ю, Христе́,/ и си́лою немощству́ющии// препоя́сашася.

Песнь 4: Услы́шах, Го́споди,/ сла́вное Твое́ смотре́ние/ и просла́вих, Человеколю́бче,// непостижи́мую Твою́ си́лу.

Песнь 5: Угль Иса́ии проявле́йся,/ Со́лнце из де́вственныя утро́бы/ возсия́ во тьме заблу́ждшим,// богоразу́мия просвеще́ние да́руя.

Песнь 6: Глас глаго́л моле́бных/ от боле́зненныя, Влады́ко, души́ услы́шав,/ от лю́тых мя изба́ви:// еди́н бо еси́ на́шего спасе́ния вино́вен.

Песнь 7: Вети́и яви́шася о́троцы любому́дрейшии дре́вле,/ от богоприя́тныя бо души́, богосло́вяще устна́ми, поя́ху:/ Пребоже́ственный отце́в и наш Бо́же,// благослове́н еси́.

Песнь 8: О подо́бии зла́те небре́гше треблаже́ннии ю́ноши,/неизме́нный и живы́й Бо́жий о́браз ви́девше,/ среди́ огня́ воспева́ху:/ осуществова́нная да пое́т Го́спода вся́ тва́рь// и превозно́сит во вся́ ве́ки.

Песнь 9: Весь еси́ жела́ние, весь сла́дость,/ Сло́ве Бо́жий, Де́вы Сы́не,/ Бо́же бого́в, Го́споди, святы́х Пресвяты́й,// тем Тя вси с Ро́ждшею велича́ем.

Глас 3

Песнь 1: Песнь но́вую пои́м, лю́дие,/ от Де́вы ро́ждшемуся во спасе́ние на́ше/ и еди́но Сотво́ршему с небе́сными земна́я,// я́ко просла́вися.

Песнь 3: Лук сокруши́л еси́ вра́жий/ и щиты́ стерл еси́ кре́постию, Влады́ко Христе́,/ утвержде́ние на́ше,// Свят еси́, Го́споди.

Песнь 4: Стра́нна и неизрече́нна рождества́ Твоего́ та́йна!/ услы́шах слух Твой, и убоя́хся,/ и, веселя́ся, вопию́ Ти:// си́ле Твое́й сла́ва, Человеколю́бче.

Песнь 5: На земли́ Неви́димый яви́лся еси́/ и челове́ком во́лею сожи́л еси́, Непостижи́мый,/ и, к Тебе́ у́тренююще,// воспева́ем Тя, Человеколю́бче.

Песнь 6: Селе́ния Ио́на е́же в преиспо́днем а́де/ есте́ственный о́браз быв, вопия́ше:/ возведи́ от тли живо́т мой,// Человеколю́́бче.

Песнь 7: Го́рдый мучи́тель, но дете́й бысть игра́лище,/ я́коже бо персть, попра́вше седмери́чный пла́мень, поя́ху:/ благослове́н еси́, Го́споди,// Бо́же оте́ц на́ших.

Песнь 8: Веще́ственнаго огня́ пла́мень/ Невеще́ственным увяди́ша богозри́мии о́троцы и поя́ху:// благослови́те, вся дела́ Госпо́дня, Го́спода.

Песнь 9: Сла́дкою пречи́стаго Твоего́ Рождества́/ стрело́ю уязвле́ни, Чи́стая,/ Твое́й достожела́нней добро́те дивя́щеся,/ пе́сньми а́нгельскими// досто́йно Тя я́ко Ма́терь Бо́жию велича́ем.

Глас 4

Песнь 1: Триста́ты кре́пкия,/ Рожде́йся от Де́вы,/ безстра́стия во глубине́/ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́// побе́дное воспою́ пе́ние.

Песнь 3: С высоты́ снизше́л еси́ во́лею на зе́млю/ превы́шше вся́каго нача́ла/ и смире́нное возне́сл еси́/ из а́да преиспо́дняго/ естество́ челове́ческое,/ несть бо свят, па́че Тебе́,//

Человеколю́бче.

Песнь 4: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/нетле́нною дла́нию и спасе́ зову́щия:// сла́ва, Христе́, си́ле Твое́й.

Песнь 5: Ны́не воста́ну, проро́чески рече́ Бог,/ ны́не просла́влюся, ны́не вознесу́ся,/ па́дшаго прие́м от Де́вы/ и к све́ту у́мному// вознося́й Моего́ Божества́.

Песнь 6: Приидо́х во глубины́ морски́я,/ и потопи́ла мя есть бу́ря мно́гих грехо́в,/ но, я́ко Бог, из глубины́/ возведи́ живо́т мой,// Многоми́лостиве.

Песнь 7: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:/ благослове́н еси́, Го́споди,// Бо́же оте́ц на́ших.

Песнь 8: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:// вся дела́, благослови́те, по́йте Го́спода.

Песнь 9: Сокрове́нное Бо́жие неизрече́нное/ в Тебе́ соверша́ется я́вственное та́инство,/ Де́во Пречи́стая,/ и́бо Бог из Тебе́ воплоти́ся за милосе́рдие.// Те́мже Тя я́ко Богоро́дицу велича́ем.

Глас 5

Песнь 1: Коня́ и вса́дника в мо́ре Чермно́е/ сокруша́яй бра́ни мы́шцею высо́кою/ Христо́с истрясе́, Изра́иля же спасе́,// побе́дную песнь пою́ща.

Песнь 3: Водрузи́вый на ничесо́мже зе́млю повеле́нием Твои́м/ и пове́сивый неодержи́мо тяготе́ющую/ на недви́жимем, Христе́, ка́мени за́поведей Твои́х,// Це́рковь Твою́ утверди́, еди́не Бла́же и Человеколю́бче.

Песнь 4: Боже́ственное Твое́ разуме́в истоща́ние прозорли́во,/ Авваку́м, Христе́, со тре́петом вопия́ше Тебе́:/ во спасе́ние люде́й Твои́х// спасти́ пома́занныя Твоя́ прише́л еси́.

Песнь 5: Одея́йся све́том, я́ко ри́зою,/ к Тебе́ у́тренюю и Тебе́ зову́:/ ду́шу мою́ просвети́ омраче́нную, Христе́,// я́ко еди́н Благоутро́бен.

Песнь 6: Неи́стовствующееся бу́рею душетле́нною,/ Влады́ко Христе́, страсте́й мо́ре укроти́/ и от тли возведи́ мя,// я́ко Благоутро́бен.

Песнь 7: Превозноси́мый отце́в Госпо́дь/ пла́мень угаси́, о́троки ороси́,/ согла́сно пою́щия:// Бо́же, благослове́н еси́.

Песнь 8: Тебе́, Вседе́телю,/ в пещи́ о́троцы, всеми́рный лик спле́тше, поя́ху:/ дела́ вся́кая, Го́спода по́йте// и превозноси́те во вся ве́ки.

Песнь 9: Иса́ие, лику́й, Де́ва име́ во чре́ве/ и роди́ Сы́на Емману́ила,/ Бо́га же и Челове́ка, Восто́к и́мя Ему́,// Его́же велича́юще, Де́ву ублажа́ем.

Глас 6

Песнь 1: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на ви́дя потопля́ема,// Бо́гу побе́дную песнь пои́м, вопия́ше.

Песнь 3: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени// испове́дания Твоего́.

Песнь 4: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,// от смы́сла чи́ста о Го́споде пра́зднующи.

Песнь 5: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий, и́стиннаго Бо́га,// от мра́ка грехо́внаго взыва́юща.

Песнь 6: Жите́йское мо́ре,/ воздвиза́емое зря́ напа́стей бу́рею,/ к ти́хому приста́нищу Твоему́ прите́к, вопию́ Ти:// возведи́ от тли живо́т мой, Многоми́лостиве.

Песнь 7: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее веле́ние Бо́жие/ мучи́теля увеща́ вопи́ти:// благослове́н еси́, Бо́же оте́ц на́ших.

Песнь 8: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти.// Тя превозно́сим во вся ве́ки.

Песнь 9: Бо́га челове́ком невозмо́жно ви́дети,/ на Него́же не сме́ют чи́ни а́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,// с небе́сными во́и Тя ублажа́ем.

Глас 7

Песнь 1: Ма́нием Твои́м на земны́й о́браз преложи́ся/ пре́жде удоборазлива́емое водно́е естество́, Го́споди./ Те́мже, немо́кренно пешеше́ствовав, Изра́иль// пое́т Тебе́ песнь побе́дную.

Песнь 3: В нача́ле небеса́ всеси́льным сло́вом Твои́м/ утвержде́й, Го́споди Спа́се,/ и Вседе́тельным и Бо́жиим Ду́хом всю си́лу их,// на недви́жимем мя ка́мени испове́дания Твоего́ утверди́.

Песнь 4: О́тча не́дра не оста́вль/ и соше́д на зе́млю, Христе́ Бо́же,/ та́йну услы́шах смотре́ния Твоего́// и просла́вих Тя, еди́не Человеколю́бче.

Песнь 5: Нощь не светла́ неве́рным, Христе́,/ ве́рным же просвеще́ние в сла́дости слове́с Твои́х./ Сего́ ра́ди к Тебе́ у́тренюю// и воспева́ю Твое́ Божество́.

Песнь 6: Пла́вающаго в молве́ жите́йских попече́ний,/ с корабле́м потопля́ема грехи́/ и душетле́нному зве́рю примета́ема,/ я́ко Ио́на, Христе́, вопию́ Ти:// из смертоно́сныя глубины́ возведи́ мя.

Песнь 7: Пещь о́троцы огнепа́льну,/ дре́вле росоточа́щу, показа́ша,/ Еди́наго Бо́га воспева́юще и глаго́люще:// превозноси́мый отце́в Бог и препросла́влен.

Песнь 8: Неопа́льная огню́ в Сина́и/ прича́щшаяся купина́ Бо́га яви́/ медленноязы́чному и гугни́вому Моисе́ови,/ и о́троки ре́вность Бо́жия три непребори́мыя во огни́ певцы́ показа́:/ вся дела́ Госпо́дня, Го́спода по́йте// и превозноси́те во вся ве́ки.

Песнь 9: Ма́ти Бо́жия и Де́ва,/ ро́ждшая и де́вствующая па́ки,/ не естества́ де́ло, но Бо́жия снизхожде́ния:/ тем, я́ко еди́ну, Бо́жиих чуде́с сподо́бльшуюся,// Тя при́сно велича́ем.

Глас 8

Песнь 1: Пои́м Го́сподеви,/ прове́дшему лю́ди Своя́ сквозе́

Чермно́е мо́ре,// я́ко Еди́н сла́вно просла́вися.

Песнь 3: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,// и пое́т Тя дух мой.

Песнь 4: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́.

Песнь 5: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,// ра́зве Тебе́, ино́го не ве́мы.

Песнь 6: Ри́зу мне пода́ждь све́тлу,/ одея́йся све́том, я́ко ри́зою,// Многоми́лостиве Христе́ Бо́же наш.

Песнь 7: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:// отце́в Бо́же, благослове́н еси́.

Песнь 8: Царя́ Небе́снаго,/ Его́же пою́т во́и а́нгельстии,// хвали́те и превозноси́те во вся ве́ки.

Песнь 9: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,/ с безпло́тными ли́ки Тя велича́юще.