Служба в Неделю первую Великого поста (Торжество Православия)

Служба в Неделю первую Великаго поста. Неде́ля пе́рвая свята́го поста́, в ню́же Правосла́вие воспомина́ется. Бде́ние обы́чное.

Поста́вим стихи́ 4 и пое́м сти́хи подо́бныя, творе́ние Никола́я, глас 1. Подо́бен: Небе́сных чино́в.

Ны́не благоче́стия све́тлость всем распростре́ся, разгоня́ющи ле́сть нече́стия, я́ко о́блак, просвеща́ющи же сердца́ благочести́вых. Прииди́те вси припаде́м, благочестивому́дренно честны́м ико́нам Христо́вым покланя́ющеся, правосла́внии.

Священнообра́зными ико́нами ны́не украша́ется, я́ко неве́ста укра́шена, Христо́ва Це́рковь и всех созыва́ет духо́вно пра́здновати. Сни́демся во единомы́слии и ве́ре, ра́достно велича́юще Го́спода.

Ми́ре ве́сь, весели́ся, се бо Госпо́дь низложи́ с высоты́ нече́стия держа́ву неизрече́нным промышле́нием, и смире́ннии вознесо́хомся дне́сь к ве́ре Правосла́вия, благочести́вою цари́цею наставля́еми.

К первообра́зному но́сится, глаго́лет Васи́лий, че́сть ико́ны; сего́ ра́ди в любви́ почита́ем ико́ны Спа́са Христа́ и святы́х всех, да сих собра́вше, никогда́же ны́не злоче́стием отведе́мся.

Сла́ва, и ны́не, богоро́дичен. Подо́бен: Безнача́льным и Боже́ственным естество́м Неви́димый, Челове́к ви́ден бы́сть, Отрокови́це, от чи́стых Твои́х крове́й за кра́йнее благоутро́бие. Его́же пло́ти написа́вше подо́бие, че́стно покланя́емся вси ве́рнии и благоче́стно велича́ем.

На стихо́вне, глас 2. Подо́бен: До́ме Евфра́фов. Губи́тельства тлетво́рнаго избе́гше злосла́вных, Правосла́вия сия́нием сердца́ми просвети́мся, ве́рнии, Бо́га сла́вяще.

Стих: Принеси́те Го́сподеви сла́ву и че́сть.

Ариева нечи́стая упраздни́ся пре́лесть, Македо́ния, Петра́, Севи́ра же и Пи́рра, и све́тит Свет Трисо́лнечный.

Стих: Поклони́теся Ему́ во дворе́ святе́м Его́.

Не ктому́ злочести́вых похваля́ется мра́чное уче́ние, Бог бо правосла́вным, изволе́нием Феодо́ры, жезл кре́пости дае́т.

Сла́ва, и ны́не, богоро́дичен. Подо́бен: Вознесла́ еси́ смире́нных рог, Богоро́дице, ро́ждшая Бо́га Сло́ва, те́мже ве́рно Тя вси чту́ще, велича́ем.

Тропа́рь: Пречисто́му о́бразу Твоему́... И быва́ет отпу́ст.

По обы́чном стихосло́вии, Го́споди воззва́х.., на глас осмогла́сника. Поста́вим стихо́в 10 и пое́м стихи́ры воскре́сны 3, и восто́чны [Анато́лиевы] 3, и трио́ди подо́бны 4, глас 6: Всю отложи́вше. Тя Непостижи́маго, пре́жде денни́цы безнача́льно из невеще́ственнаго возсия́вшаго безпло́тнаго же чре́ва Роди́телева, проро́цы, Го́споди, Твои́м Ду́хом вдохнове́ни, прореко́ша Отроча́ бы́ти, из Неискусобра́чныя воплоща́ема, челове́ком совокупля́ема и су́щими на земли́ зри́ма; и́миже, я́ко Ще́дрый, просвеще́ния сподо́би Твоего́, воспева́ющих неизрече́нное и честно́е Твое́ Воскресе́ние.

Подо́бен: Сло́вом Тя пропове́давшии богоглаго́ливии проро́цы и де́лы поче́тшии, безконе́чную жизнь приплоди́ша, тва́ри бо, Влады́ко, па́че Тебе́, Соде́теля, служи́ти не претерпе́вше, ми́ра всего́ ева́нгельски отврати́шася и сообра́зни бы́ша Стра́сти Твое́й, ю́же провозвести́ша; и́хже моли́твами сподо́би непоро́чно прейти́ воздержа́ния по́прище, еди́не Многоми́лостиве.

Естество́м неопи́санный Боже́ственным Твои́м сый, на после́дняя, Влады́ко, вопло́щься, изво́лил еси́ описова́тися, пло́ти бо прия́тием и сво́йства вся сея́ взял еси́. Те́мже вид Твой образова́ния опису́ющии любе́зно целу́ем, к Твое́й любви́ возвыша́еми, и исцеле́ний благода́ть почерпа́ем из него́, апо́стольским после́дующе боже́ственным преда́нием.

Пречестно́е украше́ние Христо́ва Це́рковь честны́х прия́т и святы́х ико́н Спа́са Христа́, и Богома́тере, и всех святы́х светле́йшее возставле́ние, и́мже просвеща́ется, и красу́ется благода́тию, и со́нмище отлага́ет ерети́ческое изгоня́щи; и ра́дующися сла́вит Человеколю́бца Бо́га, ея́ ра́ди претерпе́вша Стра́сти во́льныя.

Сла́ва, глас 2: Благода́ть возсия́ и́стины, прообразу́емая дре́вле сено́вно, ны́не явле́нно сконча́ся; се бо Це́рковь воплоще́нным о́бразом Христо́вым, я́ко прекра́сною у́тварию облачи́тся, ски́нии свиде́ния о́браз пронапису́ющи, и правосла́вную ве́ру содержа́щи, да Его́же почита́ем, Сего́ и о́браз держа́ще, не прельща́емся. Да облеку́тся в студ си́це не ве́рующии: нам бо сла́ва – зрак Воплоти́вшагося благоче́стно покланя́емый, не боготвори́мый. Той облобыза́юще, ве́рнии, возопии́м: Бо́же, спаси́ лю́ди Твоя́ и благослови́ достоя́ние Твое́.

И ны́не, богоро́дичен 1-й гла́са. На лити́и же, я́ко обы́чно, стихи́ра хра́ма. Сла́ва, глас 2: Ра́дуйтеся, проро́цы честни́и, зако́н Госпо́день до́бре учини́вшии, и ве́рою я́вльшиися необори́мии столпи́ неукло́ннии, вы бо и хода́таи яви́стеся Но́ваго Заве́та Христо́ва, и преста́вившеся на небеса́, Того́ моли́те умири́ти мир и спасти́ ду́ши на́ша.

И ны́не, богоро́дичен, глас то́йже: Все упова́ние мое́:.

На стихо́вне осмогла́сника. Сла́ва, глас 2: Из нече́стия во благоче́стие преше́дше и све́том ра́зума просвети́вшеся, псало́мски рука́ми воспле́щим, благода́рственно хвалу́ Бо́гу принося́ще, и на стена́х, и дсках, и на свяще́нных сосу́дех начерта́нным свяще́нным образо́м Христо́вым, и Пречи́стыя, и всех святы́х, че́стно поклони́мся, отлага́юще злоче́стную злосла́вных ве́ру, (че́сть бо о́браза, я́коже глаго́лет Васи́лий, на Первообра́зное прехо́дит,) прося́ще моли́твами Пречи́стыя Твоея́ Ма́тере, Христе́ Бо́же наш, и всех святы́х, дарова́ти нам ве́лию ми́лость.

И ны́не, богоро́дичен: О, чудесе́ но́ваго:.

Тропа́рь: Богоро́дице Де́во, ра́дуйся.., два́жды. И пра́здника: Пречи́стому о́бразу Твоему́.., еди́ножды. И про́чее после́дование бде́ния.

На Бог Госпо́дь.., тропа́рь воскре́сен, два́жды. Сла́ва, настоя́щий, глас 2: Пречи́стому о́бразу Твоему́ покланя́емся, Благи́й, прося́ще проще́ния прегреше́ний на́ших, Христе́ Бо́же: во́лею бо благоволи́л еси́ пло́тию взы́ти на Крест, да изба́виши, я́же созда́л еси́, от рабо́ты вра́жия. Тем благода́рственно вопие́м Ти: ра́дости испо́лнил еси́ вся, Спа́се наш, прише́дый спасти́ мир.

И ны́не, богоро́дичен: Вся, па́че смы́сла, вся пресла́вная Твоя́, Богоро́дице, та́инства, чистоте́ запеча́танной и де́вству храни́му, Ма́ти позна́лася еси́ нело́жна, Бо́га ро́ждши Истиннаго. Того́ моли́ спасти́ся душа́м на́шим.

И обы́чное стихосло́вие: и про́чее после́дование. Кано́ны: воскре́сный, и Богоро́дицы, и трио́ди на 6. Творе́ние господи́на Феофа́на, его́же краестро́чие: Дне́сь благоче́стия богосве́тлая прии́де заря́.

Пе́снь 1, глас 4.

Ирмо́с: Мо́ря чермну́ю:

Пле́щуще с весе́лием дне́сь, ве́рнии, возопии́м: ко́ль чу́дна дела́ Твоя́, Христе́, и вели́ка си́ла, на́ше единомы́слие и согла́сие соде́лавый!

Де́нь ра́достный, богому́дреннии, прииди́те соверши́м, ны́не не́бо и земля́ весели́тся, и а́нгелов чи́ни, и челове́ков собра́ния изря́дно пра́зднующе.

Преве́лие благодея́ние ви́дяще, рука́ми воспле́щим: разстоя́щияся у́ды Христо́вы, совоку́плены во еди́нство, и Бо́га похва́лим, мир пода́вшаго.

Да́шася Це́ркви дне́сь победи́тельная богодви́жным манове́нием и сове́том Михаи́ла же и Феодо́ры, благоче́стно ве́ру содержа́щих царе́й на́ших.

Богоро́дичен: Ору́жия злочести́вых исчезо́ша я́ве ересе́й: храм бо Твой, Пречи́стая Чи́стая, во образе́х украша́емый всеблаголе́пно зря́ще, ны́не всесвяще́нно ра́дуемся.

Катава́сия: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Пе́снь 3.

Ирмо́с: Весели́тся о Тебе́:

Не ктому́ нечести́вых еретико́в ны́не бро́вь взе́млется, Бо́жия бо си́ла Правосла́вие удержа́ла е́сть.

Облацы проро́честии животворя́щую с небесе́ дне́сь ро́су нам да кропя́т на воста́ние ве́ры.

Благогла́сно та́йныя апо́столов Христо́вых трубы́ па́че естества́ да вопию́т честны́х образо́в исправле́ние.

Воспои́м Христа́, показа́вшаго нам цари́цу благочести́вую, христолюби́вую, с боговенча́нною о́траслию.

Богоро́дичен: Селе́ние Твое́ свяще́нное дости́гше ве́рнии, Пречи́стая, светови́дною благода́тию ны́не озари́тися мо́лимся.

Катава́сия: Весели́тся о Тебе́ Це́рковь Твоя́, Христе́, зову́щи: Ты моя́ кре́пость, Го́споди, и прибе́жище, и утвержде́ние.

Седа́лен, глас 1. Подо́бен: Лик а́нгельский. Боже́ственный Твой зрак, во о́бразе образу́юще, Христе́, я́сно вопие́м рождество́, чудеса́ неизглаго́ланная, во́льное распя́тие. Отону́дуже бе́сове отго́нятся стра́хом и злосла́внии в посупле́нии рыда́ют, я́ко сих соприча́стницы.

Сла́ва: Зра́ками проро́ков, апо́столов ви́дами, му́чеников свяще́нных, и святы́х всех ико́нами и изображе́нми свяще́нно красу́ется: Жениха́ же мы́сленнаго и Неве́сты украша́ется у́мными красова́нми, ма́ти – вы́шний Сио́н.

И ны́не, богоро́дичен: Любо́вию, Чи́стая, Твою́ святу́ю ико́ну почита́ющим, и Бо́жию Тя и́стинную Ма́терь согла́сно возвеща́ющим, и ве́рно покланя́ющимся Ти, Храни́тельница яви́лася еси́ и держа́вное Предста́тельство, отвраща́ющи вся́кое лю́тое дале́че сих, я́ко вся могу́щая.

Пе́снь 4.

Ирмо́с: Вознесе́на Тя:

Наи́тием Боже́ственным Уте́шителя Твой храм освяти́, и прише́ствием Сего́ ерети́ческую пре́лесть отжени́, Сло́ве Бо́жий Многоми́лостиве.

Ну́жднейшаго изба́вивый злоче́стия Твоя́ лю́ди, покажи́ благоче́стия ре́вностию разжже́ны и ве́рою взыва́ющия: сла́ва си́ле Твое́й, Го́споди.

Священнообра́зными изображе́нми образо́в Христо́вых зря́ще и Богоро́дицы сия́ющая Боже́ственная селе́ния, священноле́пно ра́дуемся.

Цари́ца по обоему́ укра́шена, и́стиннаго возжеле́вши Христо́ва Ца́рства, Сего́ написа́ о́браз пречи́стый и святы́х изображе́ния.

Богоро́дичен: Воплоще́нна роди́вши Боже́ственнаго Сло́ва, Боголе́пное освяще́ние, Благода́тная, Сего́ показа́ла еси́, те́мже Твой храм светови́дный обновля́ем.

Катава́сия: Вознесе́на Тя ви́девши Це́рковь на Кресте́, Со́лнце Пра́ведное, ста в чи́не свое́м, досто́йно взыва́ющи: сла́ва си́ле Твое́й, Го́споди.

Пе́снь 5.

Ирмо́с: Ты, Го́споди, мой:

Положи́, Го́споди, Твое́й Це́ркви утвержде́ние, непрекло́нней пребы́ти в век ве́ка от смяте́ний ересе́й.

Во всю зе́млю све́тлость возсия́ свы́ше да́ннаго ве́рным весе́лия и Боже́ственнаго заступле́ния.

Еди́не Благи́й и Исто́чниче бла́гости, Ты возвы́си правосла́вных царе́й рог, чту́щих о́браз Твой.

Свет незаходи́мый нам благоче́стия возсия́ веле́нием богодухнове́нным ве́рных па́стырей и ма́нием богому́дрым.

Богоро́дичен: Обнови́ нам дре́внее благоле́пие, Пречи́стая Богома́ти, и дом Твой сей освяти́ Твое́ю благода́тию.

Катава́сия: Ты, Го́споди, мой Свет, в мир прише́л еси́, Свет Святы́й, обраща́яй из мра́чна неве́дения ве́рою воспева́ющия Тя.

Пе́снь 6.

Ирмо́с: Пожру́ Ти:

Пи́шется и почита́ется ве́рно покланя́емый о́браз Влады́ки, и прие́млет па́ки Це́рковь дерзнове́ние, благоче́стно Спа́са прославля́ющи.

Обнажа́ется се́тования и тмы ересе́й Христо́ва Це́рковь, и но́сит ри́зу весе́лия, и Боже́ственною и светоно́сною покрыва́ется благода́тию.

Благосла́вия дре́вняго осия́ния получи́ правосла́вных Собо́р Феодо́ры манове́нием цари́цы и ея́ сы́на благочести́ваго Михаи́ла самоде́ржца.

Богоро́дичен: Дре́вле сведе́ния Повеле́вый бы́ти ски́нии, я́ко в Ски́нии слове́сней, в Тебе́ живе́т Еди́н Препросла́вленный, прославля́яй храм Твой, Де́во, чудесы́.

Катава́сия: Пожру́ Ти со гла́сом хвале́ния, Го́споди, Це́рковь вопие́т Ти, от бесо́вския кро́ве очи́щшися, ра́ди ми́лости от ребр Твои́х исте́кшею кро́вию.

Конда́к, глас 2. Самогла́сен: Неопи́санное Сло́во Отчее, из Тебе́, Богоро́дице, описа́ся воплоща́емь, и оскве́рншийся о́браз в дре́внее вообрази́в, Боже́ственною добро́тою смеси́. Но испове́дающе спасе́ние, де́лом и сло́вом, сие́ вообража́ем.

Икос: Сие́ смотре́ния та́инство, дре́вле проро́цы богови́дно вдохнове́ни бы́вше, нас ра́ди в концы́ веко́в дости́гших предвозвести́ша, получи́вше сего́ сия́ния. Ра́зум у́бо Боже́ственный от него́ взе́мше, Еди́наго Го́спода Бо́га зна́ем, в Трие́х Ипоста́сех Покланя́емаго, и Тому́ еди́ному служа́ще, еди́ну ве́ру и еди́но креще́ние иму́ще, во Христа́ облеко́хомся, но испове́дающе спасе́ние, де́лом и сло́вом сие́ вообража́ем.

Синакса́рь. Стихи́: Неле́потно измета́емы ико́ны, Ра́дуюся, ле́потно покланя́емы ви́дя.

В сий де́нь, в неде́лю пе́рвую святы́х посто́в Правосла́вия, си́речь возставле́ние святы́х и честны́х ико́н Це́рковь Христо́ва пра́здновати прия́т, бы́вшее от Михаи́ла и Феодо́ры, святы́я и блаже́ннейшия цари́цы, и свята́го Мефо́дия, патриа́рха Константино́польскаго. Бы́сть же си́це:

Льву́ Иса́вру, из ослятогоне́ния и свинопа́ственнаго жития́ ски́птры ца́рствия удержа́вшу, по Бо́жию попуще́нию. Во святы́х Ге́рман тогда́ корми́ла церко́вная объе́м, а́бие призыва́ется от о́наго и слы́шит: «я́ко мне мни́тся, влады́ко, святы́м ико́нам ничто́же ра́знствовати от и́долов. Повели́ у́бо ели́ко ско́ро извести́ сия́ от среды́. Аще и́стиннии су́ть святы́х зра́цы, но вы́шше да пове́сятся, да не со грехи́ валя́ющеся, сия́ всегда́ оскверня́ем, целу́юще». Патриа́рх же толи́кия ме́рзости царя́ отвраща́ше: «не ты ли, – глаго́ля, – о царю́, беснова́ти у́бо не́коему не́когда на святы́я ико́ны слы́шим, Ко́нону же бы́ти его́ проименова́нию?» Он же: «но аз, – глаго́лет, – еще́ младе́нец сый нарица́хся». Не повину́ющуся же у́бо послу́шати его́ патриа́рху, изгна́ его́ и единому́дренна себе́ возпоставля́ет Анаста́сия, и та́ко тогда́ со святы́ми ико́нами бра́нь нача́ явля́ти. Глаго́лется же, евре́ем пре́жде такову́ю не́нависть ему́ подложи́ти, от не́коего волше́бства предре́кшим на ца́рство возведе́ние, внегда́ убо́г сый, с ни́ми ослятогоне́нием жи́ти веществова́ше. Оному же зле житие́ отто́ргшу, из о́наго сурове́йший ски́мен, Копрони́м Константи́н, нача́льства, наипа́че же на святы́я ико́ны беснова́ния прее́мник быва́ет. И что подоба́ет глаго́лати, ели́ка и якова́ и сей беззако́нный соде́ла, но оба́че и о́ному сту́днейше сконча́вшуся. От хаза́ры сын о́наго на ца́рство поставля́ется, поне́же и той е́же жи́ти зле изме́ри.

Ири́на и Константи́н нача́льства насле́дницы быва́ют. Си́и от Тара́сия, святе́йшаго патриа́рха, наставля́еми, седьмы́й Собо́р собира́ют и святы́я ико́ны па́ки Христо́ва Це́рковь прие́млет. Сим же ца́рство отло́жшим, от Ге́ника Ники́фор возво́дится. Та́же Ставри́кий, по сем Михаи́л Рагкаве́й, боже́ственныя ико́ны чту́ще. Михаи́ла зверови́дный Лев Армени́н прее́млет, и́же от мона́ха не́коего затво́рника и злочести́ваго, ле́стию растле́вся, второ́е иконобо́рство воздвиза́ет, и па́ки безле́потна Бо́жия Це́рковь показу́ется. Сего́ аморре́й прее́млет Михаи́л, того́же па́ки сын Фео́фил, на ико́ны неи́стовство про́чия во вторы́х полага́юще. Сей у́бо Фео́фил, мно́гия от святы́х оте́ц томле́нием и му́кам разли́чным преда́в о ико́нах честны́х, пра́вду тогда́ наипа́че усвоя́ше, я́ко взыска́ше: а́ще кто е́сть во гра́де, крамоло́ю друго́му быва́емь; ни еди́наго на мно́ги дни, я́ко глаго́лют, обрести́. И двана́десяте лет самодово́льствовав, и чре́вным неду́гом объя́т быв, расто́ргнутися хотя́ше от живота́: уста́ его́ презе́льно отверзо́шася, я́коже и саме́м утро́бам вну́тренним яви́тися. Цари́ца же Феодо́ра боле́зненна о приключи́вшемся бы́вши, едва́ ко сну обраща́ется, и во сне ви́де Пречи́стую Богоро́дицу, Младе́нца объе́мшу Преве́чнаго, обстои́му пресве́тлыми а́нгелы, Фео́фила же, сея́ му́жа, от тех бие́ма и уничижа́ема. Яко у́бо оты́де от нея́ сон, и Фео́фил ма́ло в себе́ прише́д, возопи́: «увы́ мне окая́нному, святы́х ра́ди ико́н бие́н е́смь!» Абие полага́ет верху́ его́ цари́ца Богоро́дичный о́браз, моля́щися Сей со слеза́ми. Фео́фил у́бо си́це имы́й, ви́дев не́коего от предстоя́щих нося́ща енко́лпий [нане́дренник], похи́тив от него́, облобыза́ше. И а́бие на ико́ны шата́вшаяся уста́ и безсту́дно зи́нувый горта́нь, в пе́рвый чин устроя́шеся, и от содержа́щия беды́ и ну́жды преста́ и усну́, бы́ти испове́дав добро́ святы́я ико́ны почита́ти. Изне́сши у́бо цари́ца от свои́х ковче́жцов святы́я и честны́я о́бразы лобыза́ти и все́ю душе́ю почита́ти Фео́фила устроя́ше. По ма́ле у́бо исчеза́ет от жития́ сего́ Фео́фил.

Феодо́ра же, су́щих во изгна́ниих и в темни́цах всех воззва́вши, свобо́дне пребыва́ти повеле́. И низверга́ется у́бо от патриа́ршескаго престо́ла Иоа́нн, и́же и Анни́с, волхвонача́льник и бесонача́льник наипа́че, не́жели патриа́рх. Христо́в же испове́дник Мефо́дий восхо́дит на престо́л, мно́га пострада́в пре́жде и во гро́бе жив затворе́н бы́сть.

Сим же та́ко иму́щим, посеще́ние не́кое быва́ет Боже́ственное Иоанни́кию Вели́кому, во Оли́мбовех гора́х обучева́ющемуся. Вели́кий у́бо по́стник Арсаа́кий, прише́д к нему́, глаго́ла: «Бог мя к тебе́ посла́, я́ко да к преподо́бному му́жу Иса́ии затво́рнику в Никомиди́ю прише́дше, от него́ научи́мся, ели́ка су́ть любо́вна Бо́гу и прикла́дна его́ Це́ркви». И у́бо к преподо́бному Иса́ии прише́дше, слы́шат от него́: «та́ко глаго́лет Госпо́дь: се прибли́жися коне́ц враго́м Моего́ изображе́ния. Вы у́бо к цари́це Феодо́ре, но и к патриа́рху Мефо́дию ше́дше, рцы́те си́це: оста́ви вся не свяще́нныя, и та́ко со а́нгелы же́ртву Мне принесе́ши, зра́ка Моего́ о́браз и Креста́ почита́й». Сия́ услы́шавше, в Константи́нь град а́бие достига́ют, и рече́нная Мефо́дию патриа́рху и избра́нным всем Бо́жиим возвеща́ют. Собра́вшеся же, к цари́це прихо́дят и поко́рну сию́ во всех обрета́ют, от оте́ц бо бя́ше благочести́ва и боголюби́ва. Абие у́бо цари́ца Богоро́дичный о́браз на вы́и обве́шаемый изне́сши, всем зря́щим, лобза́ше, глаго́лющи: «а́ще кто сим не покланя́ется и не целу́ет любе́зне, не служе́бне, не я́ко бо́ги, но я́ко о́бразы, Первообра́зных ра́ди любве́: бу́ди про́клятъ». Они́ же ве́лиею ра́достию возра́довашася. Проти́ву же про́сит и сия́ от них, я́ко дабы́ моле́ние о му́же ея́ Фео́филе сотвори́ли. Они́ же, ве́ру ея́ ви́девше, а́ще и отрица́ющеся, оба́че же повину́ются. Ибо во святы́х Мефо́дий патриа́рх лю́ди вся собра́в, и приче́т ве́сь, и архиере́и в вели́кую Бо́жию це́рковь, та́мо прихо́дят. В ни́хже бя́ху избра́ннии си́и: из Оли́мба вели́кий Иоанни́кий, и Арсаа́кий, Навкра́тий же, и ученицы́ Фео́дора Студи́та, и вели́каго села́ Феофа́н, и Фео́дор пи́саннии, и испове́дницы Михаи́л Святогра́дец и Синге́л, и ини́и мно́жайшии. Моле́ние всено́щное к Бо́гу сотворя́ют о Фео́филе, всем моля́щимся со слеза́ми и протяже́нным моле́нием. И сие́ во всю пе́рвую седми́цу посто́в соверша́шеся, и само́й цари́це Феодо́ре, подо́бне с жена́ми и про́чими людьми́ содева́ющи. Сим же, си́це иму́щим, Феодо́ра цари́ца о у́тре озаря́ющим пятка́ на сон обра́щшися, возмне́ обрести́ся у столпа́ кре́стнаго, и не́которыя с шу́мом проходи́ти пу́ть, разли́чная мучи́тельная ору́дия нося́щия ви́де, посреде́ же сих ведо́ма свя́зана и царя́ Фео́фила, созади́ свя́заныма рука́ма. Сего́ же позна́вши, после́доваше и та с веду́щими. Егда́ же до Ме́дяных врат достиго́ша, ви́де преесте́ственным виде́нием Му́жа не́коего, седя́ща пред о́бразом Христо́вым, его́же проти́ву Фео́фила поста́виша. Сего́ же нога́м прикосну́вшися цари́ца, о царе́ моля́шеся. Он же едва́ отве́рзл уста́: «ве́лия твоя́ ве́ра, же́но! – глаго́лет, – разуме́й у́бо, я́ко слез ра́ди твои́х и ве́ры, еще́ же и ра́ди проше́ния и моле́ния рабо́в Мои́х и свяще́нников Мои́х, проще́ние даю́ му́жу твоему́ Фео́филу». Та́же глаго́лет веду́щим: «разреши́те его́ и предади́те жене́ его́». Она́ же, взе́мши сего́, отступи́, веселя́щися и ра́дующися, и а́бие ю сон оста́ви. Сия́ у́бо Феодо́ра цари́ца ви́де.

Патриа́рх же Мефо́дий, моли́твам и моле́нием быва́емым о нем, хартию́ но́ву взем, написа́ в ней всех еретико́в царе́й имена́, вчини́в и того́ Фео́фила, и под свято́ю трапе́зою, взем вся, положи́. О пятце́ же ви́дит и той не́коего а́нгела стра́шна вели́каго, входя́ща во храм, и к нему́ прише́дша рещи́, глаго́лется: «услы́шася моле́ние твое́, епи́скопе, и проще́ние получи́ ца́рь Фео́фил; не ктому́ у́бо про́чее о сем стужа́й Божеству́». Он же, искуша́я, а́ще и́стинно е́сть ви́димое, от ме́ста своего́ сшед, и ха́ртию взем, и разви́в, обре́те, – о Бо́жиих суде́б! – загла́жено от Бо́га вся́чески Фео́филово и́мя.

Сие́ уве́девши цари́ца, преобра́довася зело́, и к патриа́рху посыла́ет, вся лю́ди собра́ти с честны́ми кресты́ и со святы́ми о́бразы в вели́кую це́рковь, я́ко да у́тварь святы́х образо́в сей отда́стся и но́вое Бо́жие чу́до всем позна́но бу́дет. И у́бо всем вско́ре в це́рковь собра́вшимся со свеща́ми, и цари́ца с сы́ном прии́де. И лити́и та́мо бы́вшей, со святы́ми ико́нами, и боже́ственными и честны́ми древесы́ Кре́стными, и свяще́нным и боже́ственным Ева́нгелием, да́же и до глаго́лемаго по́прища изыдо́ша, «Го́споди поми́луй» взыва́юще. И та́ко па́ки в це́рковь возврати́вшеся, Боже́ственную Литурги́ю соверши́ша. Возста́вленным святы́м и честны́м ико́нам от предрече́нных святы́х муже́й, пропове́данным у́бо благочести́вым и правосла́вящим; проти́вным же и нече́ствующим, и святы́х ико́н че́сти не прие́млющим, отреченным и преда́нным прокля́тию. И отто́ле определи́ша си́и святи́и испове́дницы, ле́тному си́це сему́ свяще́нному торжеству́ быва́ти, да не когда́ и па́ки в то́жде злоче́стие впаде́м.

Неизме́нный Образе Отчий, моли́твами святы́х Твои́х испове́дников, поми́луй нас. Ами́нь.

Пе́снь 7.

Ирмо́с: В пещи́ авраа́мстии:

Да сликовству́ет церко́вной све́тлости любо́вию боже́ственною а́нгельское во́инство, богому́дренно воспева́ющее: благослове́н еси́ в хра́ме сла́вы Твоея́, Го́споди.

Це́рковь перворожде́нных и торжество́ ра́дуется, зря́ще ны́не боже́ственныя лю́ди, единому́дренно воспева́ющия: благослове́н еси́ в хра́ме сла́вы Твоея́, Го́споди.

Изба́влени пре́жде мра́чныя е́реси ма́нием Феодо́ры достоле́пныя цари́цы, воспева́ем: благослове́н еси́ в хра́ме сла́вы Твоея́, Го́споди.

Богоро́дичен: Па́че вы́шних ликостоя́ний вознесла́ся еси́, Всечи́стая, еди́на бы́вши Ма́ти Вседе́теля. Ра́дующеся у́бо, взыва́ем: благослове́нна Ты еси́ в жена́х, Всенепоро́чная Влады́чице.

Катава́сия: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Пе́снь 8.

Ирмо́с: Ру́це распросте́р:

Зако́ны Це́ркве оте́ческия сохраня́юще, о́бразы пи́шем и лобза́им усты́ и се́рдцем и хоте́нием Христо́вы и Его́ святы́х, зову́ще: благослови́те, вся дела́ Госпо́дня, Го́спода.

На Первообра́зное я́ве о́браза по́честь и поклоне́ние вознося́ще, чтим, богоглаго́ливых уче́нием после́дующе, и Христу́ ве́рою зове́м: благослови́те, вся дела́ Госпо́дня, Го́спода.

Ум озари́вши просвеще́нием Боже́ственнаго Ду́ха честна́я цари́ца, плоды́ богому́дренныя иму́щи, благоле́пие возлюби́ Це́ркве Христо́вы и красоту́, благословя́щи ку́пно с ве́рными Иису́са Богочелове́ка.

Богоро́дичен: Луча́ми Све́та у́мнаго освеща́емый Боже́ственный дом Твой, осеня́ет ны́не всех о́блаком Ду́ха и освяща́ет ве́рныя, согла́сно пою́щия: благослови́те, вся дела́ Госпо́дня, Го́спода.

Катава́сия: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся дела́ Госпо́дня, Го́спода.

Пе́снь 9.

Ирмо́с: Ка́мень нерукосе́чный:

Священнописа́ньми образо́в укра́шеную зря́ще па́ки честну́ю Це́рковь, со благогове́нием вси притеце́м и Бо́гу возопии́м: Тебе́ велича́ем, Трисвяты́й.

Че́сть и сла́ву стяжа́вши Це́рковь – Крест Твой, и честны́я ико́ны, и святы́х изображе́ния, с весе́лием, Влады́ко, и ра́достию велича́ет Тя.

Освети́ Боже́ственною Твое́ю сла́вою лю́ди на́ши, Ще́дрый, и ополче́нми а́нгельскими и всеору́жествы сия́ огради́, язы́ков свире́пство покаря́я им, Влады́ко.

Богоро́дичен: Взя́тся прама́тере Евы осужде́ние, Богоро́дице, я́ко Ты всех Влады́ку несказа́нно, Чи́стая, родила́ еси́, Его́же и ны́не подо́бие на ико́нах целу́ем.

Катава́сия: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся – Христо́с, совокупи́вый разстоя́щаяся естества́. Тем, веселя́щеся, Тя, Богоро́дице, велича́ем.

Ексапостила́рий у́тренний воскре́сный, еди́ножды. И настоя́щий. Подо́бен: Со ученики́ взы́дем. Сла́ва: Взыгра́йте, восплещи́те, с весе́лием воспо́йте: ко́ль чу́дная и стра́нная Твоя́, Христе́, вопию́ще, дела́! И кто возмо́жет изрещи́, Спа́се, могу́тства, Тебе́, на́ше единомы́слие и согла́сие во еди́ну соедини́вшаго Це́рковь?

И ны́не, богоро́дичен: Ору́жия ны́не оскуде́ша вражде́бныя е́реси и па́мять ея́ исчезе́ с шу́мом: храм бо Твой, Всечи́стая, всеблаголе́пно зря́ще укра́шенный благода́тьми честны́х ико́н, ра́дости исполня́емся вси.

На хвали́тех стихи́ры воскре́сны 4, и восто́чен [Анато́лиев] 1, и трио́ди подо́бны три, глас 4. Подо́бен: Дал еси́ зна́мение. В Тебе́ ны́не ра́дуется Це́рковь, Человеколю́бче, Женисе́ и Созда́теле свое́м, сию́ во́лею боголе́пною от и́дольския ле́сти изба́вльшем и Себе́ обручи́вшем честно́ю кро́вию, све́тло прие́млющи свяще́нное возставле́ние ико́н, и, ра́дующися, Тя пое́т и сла́вит ве́рно.

Стих: Испове́мся Тебе́, Го́споди, всем се́рдцем мои́м,:

Пло́ти изображе́ние Твое́ возставля́юще, Го́споди, любе́зно лобыза́ем, вели́кое та́инство смотре́ния Твоего́ изъясня́юще: не мне́нием бо, я́коже глаго́лют богобо́рнии де́ти Ма́нентовы, нам яви́лся еси́, Человеколю́бче, но и́стиною и естество́м пло́ти, Тобо́ю возводи́ми к Твое́й любви́ и жела́нию.

Стих: Возвеселю́ся и возра́дуюся о Тебе́:

Де́нь ра́достный и весе́лия испо́лненный яви́ся дне́сь: све́тлость бо догма́т и́стиннейших блиста́ет, и сия́ет Це́рковь Христо́ва, укра́шена возставле́нми ико́н святы́х ны́не и изображе́ний сия́нми, и единомы́слие быва́ет ве́рных богопочте́нное.

Та́же глаго́лем стих, глас 6: Воскресни́, Го́споди, Бо́же мой, да вознесе́тся рука́ Твоя́, не забу́ди убо́гих Твои́х до конца́.

И пое́м самогла́сен дне, глас 6: Моисе́й во вре́мя воздержа́ния зако́н прия́т и лю́ди привлече́; Илия́ пости́вся, небеса́ заключи́; трие́ же о́троцы авраа́мстии мучи́теля беззако́ннующа поще́нием победи́ша. Имже и нас, Спа́се, сподо́би Воскресе́ние улучи́ти, си́це вопию́щих: Святы́й Бо́же, Святы́й Кре́пкий, Святы́й Безсме́ртный, поми́луй нас.

Сла́ва: па́ки то́йже. И ны́не: Преблагослове́нна еси́, Богоро́дице... Славосло́вие вели́кое. [Ектении́] и отпу́ст. Сла́ва, и ны́не. Сти́хира ева́нгельская и час 1-й.

Блаже́нны гла́са на 6 и от кано́на дне, пе́снь 6-я, на 4. Проки́мен, глас 4, пе́снь отце́в: Благослове́н еси́, Го́споди Бо́же оте́ц на́ших,* и хва́льно и просла́влено и́мя Твое́ во ве́ки. Стих: Яко пра́веден еси́ о всех, я́же сотвори́л еси́ нам. Апо́стол к Евре́ем, зача́ло 329, от полу́. Аллилу́ия, глас 4: Моисе́й и Ааро́н во иере́ех Его́, и Саму́ил в призыва́ющих и́мя Его́. Стих: Призыва́ху Го́спода, и Той послу́шаше их. Ева́нгелие от Иоа́нна, зача́ло 5. Прича́стен: Хвали́те Го́спода с небе́с, [хвали́те Его́ в вы́шних]. Други́й: Ра́дуйтеся, пра́веднии, о Го́споде, [пра́вым подоба́ет похвала́].

На трапе́зе же яди́м варе́ние со еле́ем, а не ры́бы. Аще же прилучи́тся, пие́м вино́, уста́вленное в сла́ву Бо́жию, по две ча́ши; та́кожде и в ве́чер по две.