Прошения и молитва для благодарственного молебна по случаю окончания школы

На мирной ектении:

Миром Господу помолимся.

…

О еже милостивно нынешнее благодарение и мольбу всех зде начальствующих, учащих и учившихся в пренебесный Свой жертвенник прияти и благоутробно помиловати нас, Господу помолимся.

О еже не возгнушатися благодарением нашим, во смирении сердца приносимом, о благодеяниих в научении книжнем и приобретении навыка во искусстве избраннем, Господу помолимся.

О еже преуспевати рабом Твоим сим премудростию и разумом, Православную же веру в чистоте хранити, целомудрием и благочестием себе украшати и искусство свое во благое делание обратити, Господу помолимся.

О еже ныне услышати глас моления нас, недостойных рабов Своих, да, добре во здравии поживше, намерения и желания наша во благое исполним, славу Церкви и пользу Отечеству нашему принесем, Господу помолимся.

О избавитися нам от всякия скорби:

Заступи, спаси, помилуй:

Пресвятyю, Пречиcтую, Преблагословeнную, слaвную Владычицу нaшу Богородицу и Приснодеву Марию со всеми святыми помянyвше, сaми себе и дрyг дрyга, и вeсь живот нaш Христу Богу предадим.

Возглaс: Яко подобает Тебе всякая слава, честь и поклонение Отцу и Сыну и Святому Духу ныне и присно, и во веки веков.

Лик: Аминь.

На сугубой ектении:

Помилуй нас, Боже, по велицей милости Твоей:

…

Благодаряще со страхом и трепетом, яко раби непотребнии, Твоему благоутробию, Спасе и премудрости Подателю, о Твоих благодеяниих, яже излиял еси изобильно на рабех Твоих, всех зде начальствующих, учащих и учившихся, и припадаем, и славословие Тебе яко Богу приносим, и умиленно вопием: избави от всех бед рабы Твоя, и всегда яко Милостив исполни во благих желание всех нас, прилежно молимся Ти, услыши и помилуй.

Еще молимся Господу Богу нашему, призревшему милостивно на рабов сих, и низпославшему им духа премудрости, разума и благочестия, и подавшему им силу и крепость к приятию полезнаго учения, еже преуспевати им в навыке искусства избраннаго во славу Пресвятаго Его Имени, рцем вси: Господи, услыши и милостивно помилуй.

Призри, Человеколюбче Господи, милостивым Твоим оком на рабы Твоя, ко Твоему благоутробию верою припадающия и, услышав моление их, грядущия труды и дела их благослови, поспешство же Твое ко благополучному совершению благих намерений их сотвори, молим Ти ся, Преблагий Спасе, услыши и помилуй.

О еже отгнати от рабов Твоих сих вся душетленныя страсти и худыя обычаи, в сердца их ревность ко исполнению заповедей Христовых утвердити, здравие и долголетие им даровати, молим Ти ся, Преблагий Господи, услыши и помилуй.

Еще молимся о милости, жизни, мире, здравии, спасении, посещении, прощении и оставлении грехов рабов Божиих, зде начальствующих, учащих и учащихся.

Возглас: Услыши ны, Боже, Спасителю наш:

Молитва

Владыко Господи Боже наш, Творче всех и премудрости Подателю, Иже от небытия во еже быти приведый всяческая, создавый человека по образу Твоему и по подобию и всяким Твоим дарованием украсивый, даяй просящему премудрость и разум, и не презираяй согрешающаго, но полагаяй на спасение покаяние!

Ты убо, Вседержителю Вышний, призвал еси нас в мир сей и предал еси нам имение Твое, темже и вручил еси комуждо противу силы его талант мног, да умножим его в житии нашем. Благодарим Тя, яко подал еси рабом Твоим сим, зде учившимся, силу и премудрость к приятию полезнаго учения и приобретению навыка во искусстве избраннем к славе Церкви нашей и пользе Отечеству и народу его. Избави их, Преблагий Спасе, от пути ложнаго, сохрани их в Православной вере, во всяком благочестии и чистоте, да преуспеют в доброделании и плод мног принесут, и кийждо от них да услышит глас Твой: о мале был еси верен, над многими тя поставлю, вниди в радость Господа Своего. Тебе бо подобает всякая слава, честь и поклонение, Отцу и Сыну и Святому Духу, ныне и присно, и во веки веков. Аминь.