1/14 Предпразднство Сретения Господа Бога и Спаса нашего Иисуса Христа. Мученика Трифона (250).

Тропарь предпразднству, глас 1

Небе́сный лик небе́сных а́нгел,/ прини́к на зе́млю, Прише́дша зрит, я́ко Младе́нца/ носи́ма ко хра́му, Перворожде́нна всея́ тва́ри, от Ма́тере Неискусому́жныя:/ предпра́зднственную у́бо с на́ми пою́т песнь, ра́дующеся.

Кондак, глас 6

Со Отце́м Сло́во сый неви́димо,/ ны́не у́бо ви́димь е́сть пло́тию,/ неизрече́нно от Де́вы роди́ся/ и на руку́ ста́рчу дае́тся святи́телю./ Поклони́мся Тому́,/ и́стинному Бо́гу на́шему.

Тропарь мученику Трифону, глас 4

Му́ченик Твой, Го́споди, Три́фон... (общий мученику).

Ин тропарь, глас 4

Пи́щи Боже́ственныя, треблаже́нне,/ наслажда́яся на Небесе́х неоску́дно,/ сла́вящих пе́сньми па́мять твою́, покры́й/ и сохрани́ от вся́кия ну́жды,/ отжени́ вредя́щих ни́вам живо́тных,/ да тебе́ от любве́ вопие́м всегда́:/ ра́дуйся, Три́фоне, му́чеников укрепле́ние.

Кондак, глас 8

Тро́ическою тве́рдостию/ многобо́жие разруши́л еси́ от коне́ц, всесла́вне,/ че́стен во Христе́ быв, и, победи́в мучи́тели во Христе́ Спаси́теле,/ вене́ц прия́л еси́ му́ченичества твоего́/ и дарова́ния Боже́ственных исцеле́ний,/ я́ко непобеди́м.

Величание

Велича́ем тя,/ страстоте́рпче святы́й Три́фоне,/ и чтим честна́я страда́ния твоя́,/ я́же за Христа́/ претерпе́л еси́.