Акафист Пресвятей Богоро́дице в честь иконы Ея́ «Аз есмь с вами и никтоже на вы»

Кондак 1

Избра́нней от все́х родо́в Влады́чице Госпоже́ Де́ве Богоро́дице, принесе́м похва́льныя да́ры, я́коже и ны́не, аки и прежде, па́дших возставля́еши, немощны́х укрепля́еши, боля́щих исцеля́еши, от вра́г ви́димых и неви́димых избавля́еши, сумня́щихся вразумля́еши, уны­ва́ющих ободря́еши, ве́ровати в благода́тную си́лу святы́х ико́н Твои́х науча́еши и в благо­да́рности умиле́нным се́рдцем и усты́ пе́ти Тебе́ сподобля́еши: Ра́дуйся, Небе́сная Цари́це, Твои́ми словесы́ «Аз есмь с ва́ми и никто́же на вы́» благода́тную силу ве́рным да́рующая.

Икос 1

А́нгели на небеси́ воспева́ют вели­чие и всесоверше́нства Твоя́, о Ма́ти и Де́во, я́ко Всеми́лостиваго Бо́га и Спа́са родила́ еси́ нам, мы́ же на земли́, подража́юще им, гре́шными устна́ми дерза́ем славосло́вяще взыва́ти Тебе́ такова́я: Ра́дуйся, небе́сных непреста́н­ное удивле́ние; ра́дуйся, земны́х всера́достное поклоне́ние. Ра́дуйся, зло́бы и тьмы́ духо́вныя изгна́ние; ра́дуйся, притека́ющих к Тебе́ ми́ра и любви́ исполне́ние. Ра́дуйся, я́ко о поми́ловании нас, гре́шных, Сы́на Твоего́ умоля́еши; ра́дуйся, я́ко от ико́ны Твоея́ ми́лости нам источа́еши. Ра́дуйся, Небесная Цари́це, Твои́ми словесы́ «Аз есмь с ва́ми и никто́же на вы» бла­года́тную силу ве́рным да́рующая.

Кондак 2: Ви́дящи очи́ма духо́вныма гряду́щия времена́ стра́шнаго богобо́рчества, святы́й пра́ведный Иоа́нн Кроншта́дтский благослови́ написа́ние ико́ны святы́я Твоея́, Богома́ти, да бу́дет в по́мощь и заступле́ние все́м в ско́рби су́щим, припа́дающим в наде́жде спасе́ния и зову́щим Сы́ну Твоему́ и Бо́гу на́шему: Аллилу́иа.

Икос 2

Ра́зуму челове́ческому ико́на сия в просвеще́ние, я́ко не си́лою свое́ю прогоня́ем враго́в, но могу́ществом Бо́жиим и предста́тельством Богома́тере, источа́ющей от ико́н Свои́х чудеса́, да воспое́м Все́мощную Засту́пницу на́шу: Ра́дуйся, па́дающих и изнемога́ю­щих ско́рое подкрепле́ние; ра́дуйся, от бесо́в и злы́х челове́к наде́жное заступле́ние. Ра́дуйся, в час искуше́ний и недоуме́ний вразумле́ние; ра́дуйся, заблу́дшим пра́ваго пути́ нахожде́ние. Ра́дуйся, ересе́й и раско́лов искорене́ние; ра́дуйся, тьмы́ богобо́рчества ско́рое исчезнове́ние. Ра́дуйся, Небесная Цари́це, Твои́ми словесы́ «Аз есмь с ва́ми и никто́же на вы» бла­года́тную силу ве́рным да́рующая.

Кондак 3

Си́ла гоне́ния нечести́вых возста́ на христиа́ны и святы́ням их поруга́шася; прия́вший же святую ико́ну Твою, Богома́ти, пре­подобный Серафи́м Вы́рицкий моля́шеся пред нею. Да прибе́гши под кро́в Цари́цы Небе́сней, мона́шествующии и вси ве́рнии по́мощию Бо́жиею укрепля́емии, со тре́петом и любо́вию воспою́т Спаси́телю Бо́гу: Аллилу́иа.

Икос 3

Иму́щи ве́лия чудеса́, и́мже не́сть чис­ла́, являла Пресвята́я Де́ва чрез святу́ю ико́ну Свою́ по́мощь все́м с ве́рою и любо́вию прите­ка́ющим и зову́щим к Не́й такова́я: Ра́дуйся, Цари́це Небесная; ра́дуйся, Ма́ти Го́спода Вы́шняго. Ра́дуйся, обилие чудес источа́ющая; ра́дуйся, нече́стие богобо́рчества облича́ющая. Ра́дуйся, моля́щихся с ве́рою ско́рое слы́ша­ние; ра́дуйся, мяту́щихся ду́ш на́ших оти́шие. Ра́дуйся, Небесная Цари́це, Твои́ми словесы́ «Аз есмь с ва́ми и никто́же на вы» бла­года́тную силу ве́рным да́рующая.

Кондак 4

Бу́ря богобо́рческого нече́стия про­несла́сь, оскверни́вши святы́ни, и попусти́ Госпо́дь на лю́ди на́ша вра́жие наше́ствие, да скорбя́ми очи́стятся и слеза́ми омы́ются и да, вразуми́вшись, пока́ются и, возопию́т Спаса́ю­щему Бо́гу: Аллилу́иа.

Икос 4

Слы́шаша ско́рби людски́я, преподо́бный Серафи́м, и́же в ке́лье свое́й по́двиг Саро́вского ста́рца подъя́вши, де́нно и но́щно усе́рдно пре́д ико́ною Богоро́дицы вопия́ тако­ва́я: Ра́дуйся, гре́шников к покая́нию предуготовля́еши; ра́дуйся, ка́ющихся гре́шников не отверга́ющая. Ра́дуйся, Сы́на Твоего́ и Бо́га на́­шего умилостивля́еши; Ра́дуйся, ско́рбь на́шу в ра́дость претворя́ющая. Ра́дуйся, от враг ви́димых и неви́димых избавля́ющая; ра́дуйся, от на́глыя смерти спаса́ющая. Ра́дуйся, Небесная Цари́це, Твои́ми словесы́ «Аз есмь с ва́ми и никто́же на вы» бла­года́тную силу ве́рным да́рующая.

Кондак 5

Боготе́чную благода́ть видя, исте­ка́ющую от святы́я ико́ны Богома́тере, лю́дие стека́хуся в селе́ние Вы́рицу и приима́ху ду́ш и теле́с исцеле́ние, в ра́дости вопию́ще Бо́гу Сы́ну Пресвяты́я Пречи́стыя и Преблагослове́нныя Де́вы Мари́и: Аллилу́иа.

Икос 5

Видим ве́лию благода́тную силу исцеле́ния и вспоможе́ния, ю́же прия́ла от Сы́на Твоего́ и Бо́га На́шего́, Блага́я Ма́ти, и ми́лостиво ниспосыла́еши все́м, приходя́щим к Тебе́ и взыва́ющим Ти́ такова́я: Ра́дуйся, уме́ршаго отроча́ти воскреше́ние; ра́дуйся, неисце́льных боле́зней врачева́ние. Ра́дуйся, теле́с на́ших здра́вие; ра́дуйся, душ на́ших спасе́ние. Ра́дуйся, от уз грехо́вных свобожде́ние; ра́дуйся, к Го́рнему ми́ру восхожде́ние. Ра́дуйся, Небесная Цари́це, Твои́ми словесы́ «Аз есмь с ва́ми и никто́же на вы» бла­года́тную силу ве́рным да́рующая.

Кондак 6

Пропове́дуя ско́рое отше́ствие свое́ от юдо́ли сея́ многоско́рбныя и многомяте́жныя, ста́рец скры́ местонахожде́ние святы́я ико́ны Богоро́дицы, иде́же в любви к Всеми́лостивому Бо́гу, в Тро́ице сла́вимому, возопиют: Аллилу́иа.

Икос 6

Возсиява́я ра́дость в ско́рби су́щей игу́мении, разруше́нную дре́внюю оби́тель свята́го Гео́ргия прия́вшей и си́лами свои́ми возоб­нови́ти не могу́щей, дарова́ ей ве́лию ми́лость: яви́ла еси́, Госпоже́ Влады́чице, пречу́дно свя­ту́ю ико́ну Твою́, да с тре́петом и любо́вию воспою́т Е́й такова́я: Ра́дуйся, никогда́же нас по́­мощи Ма́терняя лиша́ющая; ра́дуйся, любя­щих Тя́ боже́ственною любо́вию покрыва́ющая. Ра́дуйся, нестрое́ния жите́йскаго мо́ря ско́ро разреша́ющая; Ра́дуйся, А́з е́смь с ва́ми – при­ходя́щим к Тебе́ возвеща́ющая. Ра́дуйся, и никто́же на вы́ – ободря́ющая; ра́дуйся, су́щих в печа́ли и ско́рби не оставля́ющая. Ра́дуйся, Небесная Цари́це, Твои́ми словесы́ «Аз есмь с ва́ми и никто́же на вы» бла­года́тную силу ве́рным да́рующая.

Кондак 7

Хотя́щии спасе́ния лю́дие узре́ша ико́ну, а́ки Саму́ Цари́цу Небе́сную, прише́дшую со святы́ми апо́столы Иоа́нном и Иа́ковом в оби́тель свята́го Гео́ргия на пра́здник Пох­валы́ Пресвяты́я Богоро́дицы, и возопи́ша во умиле́нии ко Го́споду: Аллилу́иа.

Икос 7

Но́вую яви́ла еси́ ми́лость, Богоро́дице Де́во, чудотво́рною ико́ною Твое́ю, чудесы́ от нея́ источа́я, помога́я все́м с ве́рою к ней притека́ющим и зову́щим Ти́ обра́дованно такова́я: Ра́дуйся, Сы́на Твоего́ и Бо́га о нас умоля́ющая; ра́дуйся, ка́ющихся гре́шников зело́ лю́бящая. Ра́дуйся, враго́в Бо́жиих гро́зно наказу́ющая; ра́дуйся, сыно́в противле́ния вразумля́ющая. Ра́дуйся, по́лчищ бесо́вских от Руси́ святы́я измета́ющая; ра́дуйся, боголюби́вых чад Свои́х защища́ющая. Ра́дуйся, Небе́сная Цари́це, Твои́ми словесы́ «А́з е́смь с ва́ми и никто́же на вы́» бла­года́тную силу ве́рным да́рующая.

Кондак 8

Стра́нно чу́до попече́ния о Свя́то-Гео́ргиевской оби́тели ви́дим, живу́щия бо в не́й и тружда́ющиеся и на моли́тву в ню́ приходя́щия прия́ла еси́, в по́двизех мона́шеских укрепля́я, от бе́д и скорбе́й избавля́я и науча́я все́х Спаса́ющему Тобо́ю Христу́ Бо́гу пе́ти: Аллилу́иа.

Икос 8

Все́м вразумле́ние яви́ла еси́ гроз­ным наказа́нием послу́шницы, та́йно бежа́ти из оби́тели хотя́щей, и пока́явшейся ми́лость яви́ла еси́, да навы́кнут в ча́с ско́рбных обстоя́ний прибега́ти к ико́не Твое́й святе́й, уми́льно взыва́я Тебе́ такова́я: Ра́дуйся, соверше́ние без­рассу́дных посту́пков пресека́ющая; ра́дуйся, хотя́щим жа́ти спасе́ние помога́ющая. Ра́дуйся, в по́двизех мона́шеских укрепля́ющая; ра́дуйся, па́дающих ско́рое возведе́ние. Ра́дуйся, Хода́таице на́шего спасе́ния; ра́дуйся, защи́та на́ша и в доброде́телех вспоможе́ние. Ра́дуйся, Небе́сная Цари́це, Твои́ми словесы́ «Аз есмь с ва́ми и никто́же на вы» бла­года́тную силу ве́рным да́рующая.

Кондак 9

Вся́кое естество́ восхваля́ет Тя́, Го́с­поди, Тебе́ Созда́теля, Искупи́теля, Царя́ и гряду́щаго Судию́ живы́х и ме́ртвых благодаря́ще, я́ко дарова́л еси́ Ма́терь Твою в наде́жное прибе́жище и заступле́ние все́м вопию́щим Тебе́, И́стинному Бо́гу: Аллилу́иа.

Икос 9

Вети́и велере́чивыя удиви́шася, слы́шаще гла́с Бо́жий и Богоро́дицы: “Аз есмь с вами и никто́же на вы”. Мы́ же, наде́ющеся на во́лю святу́ю и соверше́нную Бо́жию, да поч­ти́м Тя́, Пречи́стая, зва́нии си́ми: Ра́дуйся, Блага́го Царя́ блага́я Мати; ра́дуйся, я́ко тщи́шися ове́ц Христо́вых собра́ти. Ра́дуйся, си́рых и стра́нных Защи́тнице; ра́дуйся, все́х оби́димых Покрови́тельнице. Ра́дуйся, медото́чная моля́­щихся сла́досте; ра́дуйся, даро́в и благ ве́чных Пода́тельнице. Ра́дуйся, Небе́сная Цари́це, Твои́ми словесы́ «Аз есмь с ва́ми и никто́же на вы» бла­года́тную силу ве́рным да́рующая.

Кондак 10

Спасти́ хотя́ мир, неизрече́нное чу́до обре́тения святы́я ико́ны Твоея́, Влады́чице, возвестила все́м градом и ве́сем; ве́рнии же в торжестве́ и славе ви́дяще в оби́тель гря­ду́щую Тя́, в ра́дости возопи́ша Триеди́ному Бо́гу: Аллилу́иа.

Икос 10

Стена еси́ и чистото́ неопи́санная, милосе́рдие неизрече́нное и побе́до всепобеж­да́ющая, Богоизбра́нная Отрокови́це; при́зри на ны, смире́нно вы́ну моля́щиися пред ико́ною Твое́ю и воспева́ющии Ти́, Благода́тная, си́це: Ра́дуйся, ми́лости неиссяка́емы́й исто́чниче; ра́дуйся, духо́вную жа́жду все́м утоля́ющая. Ра́дуйся, милосе́рдая о нас, гре́шных, Предста́тельнице; ра́дуйся, непреста́нно за ны Христу́ Бо́гу моля́щаяся. Ра́дуйся, спасе́ния на́шего наде́ждо и прибе́жище; ра́дуйся, ми́лостивая о нас пред Бо́гом Хода́таице. Ра́дуйся, Небе́сная Цари́це, Твои́ми словесы́ «Аз есмь с ва́ми и никто́же на вы» бла­года́тную силу ве́рным да́рующая.

Кондак 11

Пе́ние благода́рственное прино́сим Ти́, раби́ Твои́, Богоро́дице Де́во, гре́шнии и непотре́бнии, оба́че Ты́ заступа́еши все́х, при­бега́ющих к Тебе́ и вопию́щих Бо́гу; Аллилу́иа.

Икос 11

Светопода́тельную свещу́ иму́ще Тя́, Пресвята́я Ма́ти и Де́во, я́ко просвеща́еши нас све́том Сы́на Твоего́ и дарова́ла еси́ нам ико́ну Свою́ победи́тельную, да не преткне́мся в нощи́ после́дних време́н, но, храни́мии Тобо́ю, пора­бо́таем Го́споду во све́те Его́, упова́юще на Тя́ и зову́ще такова́я: Ра́дуйся, язв грехо́вных Цели́тельнице; ра́дуйся, в Ца́рствие Бо́жие Путеводи́тельнице. Ра́дуйся, на руце́х Твои́х носи́вшая Нося́щаго вся́; ра́дуйся, златы́я врата́ Небе́снаго Ца́рствия. Ра́дуйся, све́том Сы́на Твоего́ нас просвеща́ющая; ра́дуйся, зре́нием ико́ны Твоея́ нас услажда́ющая. Ра́дуйся, Небе́сная Цари́це, Твои́ми словесы́ «Аз есмь с ва́ми и никто́же на вы» бла­года́тную силу ве́рным да́рующая.

Кондак 12

Благода́ть да́ти восхоте́в лю́дем Твои́м, дарова́ла еси́, Влады́чице, нам ико́ну Свою́ и с не́ю обетова́ние: «Аз есмь с ва́ми и никто́же на вы», Его́же не возмо́жет никогда́же и никто́же из враг на́ших ви́димых и неви́димых преступи́ти, да, име́я промы́шление таково́е боже́ственное о нас, вопие́м Всеми́лостивому Бо́гу: Аллилу́иа.

Икос 12

Пою́ще чудеса́ Твоя́, Всемо́щная Влады́чице, ве́мы Тя́, те́плую и любвеоби́льную Засту́пницу, к Не́йже вси притека́ющии да не посра́млени бу́дут, но всегда́ Тобо́ю храни́ми, вопию́т Ти́ сицева́я: Ра́дуйся, в ско́рбех су́щих отра́до; ра́дуйся, упова́ющих на Го́спода Бо́га огра́до. Ра́дуйся, Ея́же враги́ на́ша трепе́щут; ра́дуйся, я́ко иму́щий ико́ну Твою́ ликовству́ют. Ра́дуйся, сла́вящих Тя́ прославля́ющая; ра́дуйся, зе́млю Ру́сскую и все́х, я́же в ми́ре Хрис­товом, зело́ заступа́ющая. Ра́дуйся, Небе́сная Цари́це, Твои́ми словесы́ «Аз есмь с ва́ми и никто́же на вы» бла­года́тную силу ве́рным да́рующая.

Кондак 13

О Пресвята́я, Пречи́стая, Пребла­гослове́нная Богоро́дице Де́во Мари́е, Всеми́лостивая Ма́ти Бо́жия, воззри́ на ско́рбныя ду́ши на́ша и умилосе́рдися, Пречи́стая, вознеси́ Твою́ многомо́щную моли́тву к пра́ведному Судии́ о поми́ловании нас, гре́шных. При́зри на ны, Всепе́тая Богоро́дице, возсия́й просвеще́ние сердца́м омраче́нным и озари́ ста́до Твое́, Пречи́стая, да спаса́емии Тобо́ю, ра́достно вос­пое́м Бо́гу: Аллилу́иа.

Сей Кондак читается трижды, затем 1-й Икос и 1-й Кондак

Молитва

О Всеблага́я Засту́пнице ро́да христиа́нского, Ма́ти вся́ держа́щаго десни́цею Свое́ю Христа́ Бо́га на́шего! Изле́й на ны ми́лости и щедро́ты Его́, и да не убои́мся и не устраши́мся вра́г ви́димых и неви́димых, я́ко рекла́ еси́ упова́ющим на Тя́: «Аз есмь с ва́ми и никто́же на вы». Сохрани́ и́стинную святу́ю Правосла́вную Це́рковь и оби́тель на́шу от раско́лов и ересе́й и поло­жи́ нача́ло покая́ния люде́й ру́сских. Возвра­ти́ Святу́ю Русь на дарова́нный ей Бо́гом пу́ть неповрежде́нной ве́ры, да напо́лнится фими­а́мом молитв и расцвете́т, а́ки кри́н се́льный; да поживе́м во благочестии и чистоте́, всегда́ хранимы́ Тобо́ю от искуше́ния анти́христова, наше́ствия иноплеме́нных, междоусо́бныя бра́ни, тру́са, огня, гла́да и мо́ра, от напра́сныя сме́рти, плене́ния и раздо́ров семе́йных; мона́шеское житие́ укрепи́ и спаси́ ны́, Пречи́стая, я́ко упова́ем на Тя́ по рече́нному Тобо́ю: «Аз есмь с ва́ми и никто́же на вы». Моли́ся о на́с, Пресвята́я Влады́чице Богоро́дице, ко Го́споду Бо́гу на́шему, ми́лующему и спаса́ющему, да не лиши́т ны защи́ты и Ца́рствия Своего́ присво­е́ния, И́же и Са́м рече́ ве́рным Свои́м: «Аз есмь с ва́ми и никто́же на вы». Ему́же сла́ва, держа́ва, че́сть и поклонение, си́ла и вели́чие подоба́ет, Отцу́, и Сы́ну, и Свято́му Ду́ху, ны́не и при́сно и во ве́ки веко́в. Ами́нь.

Тропарь, глас 6-й

При́зри на ны, Всепе́тая Богоро́дице,/ возсия́й просвеще́ние сердца́м омраче́нным,/ и оза­ри́ ста́до Твое́, Пречи́стая;/ ели́ко бо хо́щеши и мо́жеши,/ я́ко Ма́ти су́щи Зижди́теля Твоего́:/ и возопи́й моля́щимся Ти́:/ Аз есмь с ва́ми и никто́же на вы.

Кондак, глас 6-й

Влады́чице Чи́стая, при́зри, Богоро́дице,/ ви́ждь на́ших я́зв боле́зни,/ и умилосе́рдися, Пречи́стая,/ и исцели́ со́вестное жже́ние,/ Твое́ю ми́лостию ороша́ющи/ и вопию́щи рабо́м Твои́м:/ Аз есмь с ва́ми и никто́же на вы.

Величание

Велича́ем Тя́, Пресвята́я Де́во, Богоизбра́н­ная Отрокови́це, и чти́м о́браз Тво́й святы́й, и́мже то́чиши исцеле́ния все́м с ве́рою прите­ка́ющим.

Ико́на «Аз есмь с вами и никто́же на вы» написана мо­нахинями Леушинского монастыря по благословению о. Иоанна Кронштадтского, который называл ее «Спасительница России». Впоследствии он благословил этой иконой будущего́ иеросх. Серафи́ма (Вырицкого) и пред­сказал ему грядущие на Россию бедствия ... Предсказал также, что не скоро, но свет православия в России вос­сияет и она возродится православным царем. Выполняя благословение о. Иоанна, вырицкий молитвенник со­вершил в 1937 г. свое первое моли́твенное предстояние в 1000 дней и ночей. Множество чудес творилось от сей иконы. Однажды по моли́тве старца перед этой иконой ожило умершее дитя́. Слух об этом широко распростра­нился, и когда власти, узнав, постановили изъять икону, о. Серафи́м передал ее́ своему духовному чаду – мо­нахине Варсонофии, которая тайно хранила ее у себя в Петербурге. Перед своей смертью мать Варсонофия пе­редала икону схииг. Херувиму. После того как в 1962 го­ду образ Божией Матери «Аз есмь с вами и никтоже на вы» был привезен на Украину, перед ним, как бы прини­мая молитвенную эстафету, молится 1000 ночей схиигумения Александра. Сейчас икона находится в Свято-Гео­ргиевском женском монастыре Черниговской епархии. Праздник ей установлен в день Похвалы Божией Ма́тери (пятую субботу Великого Поста).