Акафист Пресвятей Богоро́дице в честь иконы Ея́ «Благода́тное Не́бо»

Кондак 1

Избра́нней от все́х родо́в Бо́жией Ма́тери и Цари́це, Благода́тным Не́бом на́ми имену́емой, те́лу на́шему и душа́м спасе́ние подаю́щей, благода́рственное прино́сим пе́ние, Богороди́тельнице. Ты́ же, я́ко иму́щая милосе́рдие неизрече́нное, от вся́ких на́с бе́д и грехо́в свободи́, да зове́м Ти́: Ра́дуйся, благода́тное не́бо, ра́дость и спасе́ние нам да́рующая.

Икос 1

А́нгели и пра́ведных ду́ши удиви́шася, егда́ предста́ла еси́ пре́д Сы́ном Твои́м и Бо́гом и мно́гим моле́нием хода́тайствовала о лю́дех, во гресе́х пребыва́ющих. Мы́ же, очи́ма ве́ры толи́кое Твое́ благоутро́бие зря́ще, со умиле́нием взыва́ем Тебе́ си́це: Ра́дуйся, моли́твы все́х христиа́н прие́млющая; ра́дуйся, и са́мых отча́янных гре́шников моле́ния не отверга́ю­щая. Ра́дуйся, к Сы́ну Твоему́ о ни́х предста́­тельствующая; ра́дуйся, неча́янную ра́дость спасе́ния и́м подаю́щая. Ра́дуйся, предста́тель­ством Твои́м ве́сь ми́р спаса́ющая; ра́дуйся, вся́ на́ша печа́ли утоля́ющая. Ра́дуйся, житие́ на́ше добре устроя́ющая; ра́дуйся, избавле́ние от грехо́в все́м челове́ком прине́сшая. Ра́дуйся, Ра́дость всему́ ми́ру роди́вшая; ра́дуйся, е́же ка́ко ни еди́наго же научи́вшая. Ра́дуйся, бла­года́тное не́бо, ра́дость и спасе́ние на́м да́рую­щая.

Кондак 2

Ви́дящи Пречи́стая лю́ди гре́шныя, с ве́рою и упова́нием пред честно́ю Ея́ ико́ною долу поверга́ющихся и сле́зно моля́щихся о гресе́х свои́х, внима́ет моле́нию и́х, да вси́, зря́ще Ма́тернее Ея́ милосе́рдие, на небеси́ и на земли́ вопию́т Бо́гу: Аллилу́ия.

Икос 2

Ра́зум челове́ческий вои́стину превосхо́дит любо́вь Твоя́ к роду христиа́нскому, о не́мже мо́лишися Сы́ну Твоему́ и Бо́гу, мы́ же, зря́ще Тя́, неотсту́пную предста́тельницу за́ на́с гре́шных, со́ слеза́ми вопие́м Ти́: Ра́дуйся, засту́пнице усе́рдная ро́да христиа́нскаго, от Бо́га нам дарова́нная; ра́дуйся, путеводи́тельнице на́ша, к небе́сному оте́честву на́с возводя́щая. Ра́дуйся, ве́рных огражде́ние и прибе́жище; ра́дуйся, по́моще призыва́ющих и́мя Твое́ свято́е. Ра́дуйся, презре́нных и отве́рженных от ро́ва поги́бели исхища́ющая; ра́дуйся, те́х на пу́ть пра́вый обраща́ющая. Ра́дуйся, непреста́нное уны́ние и мра́к душе́вный отгоня́ющая; ра́дуйся, оста́вленных врачми́ на Свой всемо́щные ру́це прие́млющая. Ра́дуйся, благода́тное не́бо, ра́дость и спасе́ние нам да́рующая.

Кондак 3

Си́ла благода́ти преизоби́лова та́мо, иде́же умно́жися гре́х, да ра́дуются на небеси́ вси́ а́нгели о гре́шницех ка́ющихся, пою́ще пред престо́лом Бо́жиим: Аллилу́ия.

Икос 3

Иму́щи к ро́ду христиа́нскому Ма́­тернее милосе́рдие, все́м с ве́рою и упова́нием прибега́ющим к Тебе́ подае́ши ру́ку по́мощи, Влады́чице, да вси́ еди́ным се́рдцем и еди́ными усты́ славосло́вие Тебе́ прино́сят сицева́я: Ра́дуйся, я́ко Тобо́ю к на́м нисхо́дит Бо́жие благоволе́ние; ра́дуйся, я́ко во все́х беда́х и обстоя́ниих на́ших прино́сиши Сы́ну Твоему́ усе́рдныя о на́с моли́твы. Ра́дуйся, я́ко на́ша моли́твы прия́тными Бо́гу соде́ловаеши; ра́дуйся, я́ко от ви́димых враго́в нас избавля́еши. Ра́дуйся, я́ко сердца́ злы́х челове́к умягча́еши; ра́дуйся, я́ко от клеветы́, досажде́ния и укоре́ния нас изыма́еши. Ра́дуйся, я́ко Тобо́ю вся́ блага́я жела́ния на́ша исполня́ются; ра́дуйся, я́ко мно́го мо́жет моли́тва Твоя́ пре́д Сы́ном Твои́м и Бо́гом. Ра́дуйся, благода́тное не́бо, ра́дость и спасе́ние на́м да́рующая.

Кондак 4

Пре́д честно́ю ико́ною Твое́ю, Цари́це Небе́сная, склоняем коле́на ду́ш и теле́с на́ших и со умиле́нием дерзнове́нно мо́лимся Ти́: спаси́ на́с, о Ма́ти милосе́рдия, да не поги́бнем до конца́ во гресе́х на́ших; Ты́ бо еси́ все́м гре́шником еди́на наде́жда и прибе́жище: преклони́ся у́бо на ми́лость, блага́я Ма́ти, и умоли́ о на́с Сы́на Твоего́ и Творца́ на́шего́, да непреста́нно зове́м Ему́: Аллилу́ия.

Икос 4

Слы́шавше небожи́телие, я́ко моли́твами Твои́ми пре́д Сы́ном Твои́м проще́ние грехо́в и спасе́ние на земли́ су́щим гре́шни­ком да́руются, прославляют Тя́, благосе́рдную Цари́цу небесе́ и земли́. И мы́, гре́шнии, уве́девше таково́е Твое́ заступле́ние о на́с, гре́ш­ных, недоумева́ем, ка́ко благохвали́ти Тя́ возмо́жем по достоя́нию, и от глубины́ се́рдца на́шего́ умиле́нно воспева́ем Ти́ си́це: Ра́дуйся, спору́чнице спасе́ния гре́шных; ра́дуйся, взыс­ка́ние поги́бших. Ра́дуйся, неча́янная гре́шных ра́досте; ра́дуйся, па́дших воста́ние. Ра́дуйся, предста́тельнице к Бо́гу, ми́р от бе́д спаса́ющая; ра́дуйся, я́ко гла́са моли́тв Твои́х бе́си трепе́щут. Ра́дуйся, я́ко а́нгели сему́ ра́дуются; ра́дуйся, я́ко и на́с, земноро́дных, си́ла моли́тв Твои́х весе́лия исполняет. Ра́дуйся, я́ко те́ми от ти́ны грехо́в на́с изъима́еши; ра́дуйся, я́ко пла́мень страсте́й на́ших угаса́еши. Ра́дуйся, благода́т­ное не́бо, ра́дость и спасе́ние на́м да́рующая.

Кондак 5

Боготе́чную звезду́ чудотво́рную ико́ну Ма́тере Твоея́ показа́л еси́ на́м, Господи, и́бо, взира́юще на о́браз Ея́ теле́сныма очи́ма, умо́м и се́рдцем к Первообра́зной возвыша́емся, и Ею́ к Тебе́ востека́ем, пою́ще: Аллилу́ия.

Икос 5

Ви́девше а́нгели, храни́телие хрис­тиа́н, я́ко Бо́жия Ма́терь споспешеству́ет и́м в наставле́нии те́х, заступле́нии и спасе́нии, потща́шася си́це возопи́ти честне́йшей херуви́м и сла́внейшей без сравне́ния серафи́м: Ра́дуйся, с Сы́ном Твои́м и Бо́гом ве́чно ца́рствую­щая; ра́дуйся, Ему́ всегда́ о ро́де христиа́нском моле́ния принося́щая. Ра́дуйся, в христиа́нстей ве́ре и благоче́стии наста́внице; ра́дуйся, упова́ющим на Тя́ непосты́дный коне́ц жи́зни да́рующая. Ра́дуйся, Ма́терним Твои́м предста́тельством от ве́чнаго муче́ния нас избавля́ющая; ра́дуйся, хода́тайством к Сы́ну Твоему́ жи́зни ве́чныя сподобля́ющая. Ра́дуйся, бла­года́тное небо, ра́дость и спасе́ние на́м да́рую­щая.

Кондак 6

Ди́вная дела́ милосе́рдия Твоего́, лю́дем явле́нная, предаде́ пи́смени святи́тель Дими́трий Росто́вский в науче́ние и утеше́ние все́м ве́рным, да и ти́и, во гресе́х, беда́х, ско́рбех и озло́блении су́ще, на вся́к де́нь пре́д честны́м Твои́м о́бразом, Благода́тное Не́бо име­ну́емым, коле́на преклоняют и, избы́вше бе́д, печа́лей и напа́стей, вопию́т Бо́гу: Аллилу́ия.

Икос 6

Возсия́ на́м, я́ко пресве́тлая заря, чудотво́рная ико́на Твоя́, Богома́ти, прогоня́ющи тьму́ бе́д и скорбе́й от все́х с любо́вию вопию́щих Ти си́це: Ра́дуйся, цели́тельнице на́ша в боле́знех теле́сных; ра́дуйся, блага́я уте́шительнице в печа́лех на́ших душе́вных. Ра́дуйся, ско́рбь на́шу в ра́дость претворя́ю­щая; ра́дуйся, ненаде́ющихся несумне́нною наде́ждою возвеселяющая. Ра́дуйся, а́лчущих пита́тельнице; ра́дуйся, наги́х одея́ние. Ра́дуйся, вдо́в уте́шительнице; ра́дуйся, безма́терних сиро́т незри́мая воспита́тельнице. Ра́дуйся, благода́тное не́бо, ра́дость и спасе́ние нам да́рующая.

Кондак 7

Хотя́ Законода́вец правосу́дный Госпо́дь Са́м бы́ти зако́на исполни́тель и яви́ти милосе́рдия Своего́ бездну, преклони́ся на усе́рдное моление Твое́, преблагослове́нная Ма́ти Де́во, о лю́дех во гресе́х пребыва́ющих и ми́лостей бо́жиих ча́ющих, глаго́ля: «Зако́н повеле­ва́ет, да сы́н чти́т ма́терь. Аз Сы́н Тво́й, Ты́ же Ма́ти Моя, Аз Тя́ до́лжен чти́ти, послу́шая Твоего́ моле́ния, бу́ди у́бо, я́ко же хо́щеши. О ни́хже мо́лишися – проща́ются им греси́ Тебе́ ра́ди». Мы́ же, ви́дяще такову́ю си́лу моли́твы Хода́таицы на́шея о проще́нии согреше́ний на́ших, просла́вим милосе́рдие и неизрече́нное благоутро́бие Ея́, зову́ще: Аллилу́ия.

Икос 7

Но́вое ди́вное и сла́вное зна́мение все́м ве́рным яви́ся, я́ко не то́кмо Ма́тери Твоея́, но и пречи́стому́ Ея ли́ку, на дске́ изображе́н­ному, си́лу чудотворе́ния дарова́л еси́, Го́споди; сему́ та́инству дивя́щеся, во умиле́нии се́рдца вопие́м к Ней такова́я: Ра́дуйся, прему́дрости и бла́гости Бо́жия открове́ние; ра́дуйся, ве́ры утвержде́ние. Ра́дуйся, благода́ти явле́ние; ра́дуйся, душеполе́зных зна́ний дарова́ние. Ра́дуйся, сло́во прему́дрости прося́щим да́ру­ющая; ра́дуйся, несмы́сленных разу́мными соде́лывающая. Ра́дуйся, благода́тное не́бо, ра́­дость и спасе́ние на́м да́рующая.

Кондак 8

Ви́дяще сла́вная дела́ и многоразли́чную прему́дрость Бо́жию в ми́ре и жи́зни на́шей, предста́тельством Твои́м пред Бо́гом над на́ми соверша́ющаяся, о Не́бо благода́тное, Пречи́стая Влады́чице, устрани́мся земны́я суеты́ и изли́шних жите́йских попечений, и у́м и се́рдце на́ше на небе́са возведе́м, пою́ще Бо́гу: Аллилу́ия.

Икос 8

Вся́ в вы́шних пребыва́еши, и ни́жних ника́коже отступи́ла еси́, премилосе́рдная Цари́це небесе́ и земли́. А́ще бо по успе́нии Твое́м и взошла́ еси́ на небе́са с пречи́стою Твое́ю пло́тию, оба́че и гре́шныя земли́ не оста́вила еси́, явля́ющися прича́стница промышле́ния Сы́на Твоего́ о ро́де христиа́нском, сего́ ра́ди Тя́ по до́лгу ублажа́ем: Ра́дуйся, сия́нием пречи́стыя души́ Твоея́ всю зе́млю просвети́вшая; ра́дуйся, чистото́ю телесе́ Твоего́ вся́ небе́са возвесели́вшая. Ра́дуйся, о все́м ми́ре усе́рдная предста́тельнице; ра́дуйся, все́х на́с при́ кресте́ Сы́на Твоего́ усынови́вшая. Ра́дуйся, всегда́ Ма́тернюю любо́вь к на́м явля́ющая; ра́дуйся, в ско́рбех утеша́ющая. Ра́дуйся, все́х даро́в духо́вных и теле́сных незави́стная пода́­тельнице; ра́дуйся, бла́г вре́менных и ве́чных хода́таице. Ра́дуйся, две́ри ца́рствия Христо́ва ве́рным отверза́ющая; ра́дуйся, и на земли́ чи́стаго весе́лия сердца́ на́ша исполня́ющая. Ра́дуйся, благода́тное не́бо, ра́дость и спасе́ние на́м да́рующая.

Кондак 9

Все естество́ а́нгельское удиви́ся делу Твоего́ милосе́рдия, Го́споди, я́ко толи́ко тве́рдую и те́плую Засту́пницу и Помо́щницу ро́ду христиа́нскому дарова́л еси́, на́м неви́димо спребыва́ющу, слы́шашу же Тебе́ пою́щих: Аллилу́ия.

Икос 9

Вети́йство челове́ческое не возмо́­жет по достоя́нию благохвали́ти Тя́, Пресвята́я Богоро́дице, и воспе́ти неисче́тная чудеса́ Твоя́, от ико́ны Твоея́ явля́емая, и́миже правосла́вныя лю́ди от бе́д, напа́стей и вся́каго зла́ сохра­ня́еши. Мы́ же, до́бре ве́дуще о мно́гих чудот­во́рных явле́ниих Твоего́ честна́го ли́ка бы́вших и поклоне́нием ему́ потре́бная ко вре́менней и ве́чней жи́зни прие́млюще, с весе́лием Богоро́дице взыва́ем: Ра́дуйся, я́ко от свяще́ннаго ли́ка Твоего́ чудеса де́ются; ра́дуйся, я́ко утаи́ся прему́дрость и благода́ть сия́ от му́дрых и разу́мных ве́ка сего́. Ра́дуйся, я́ко откры́ся та младе́нцем в ве́ре; ра́дуйся, я́ко прославля́ющих Тя́ прославля́еши. Ра́дуйся, я́ко отвер­га́ющих Тя́ пред все́ми посрамля́еши; ра́дуйся, я́ко от вся́каго зла прибега́ющих к Тебе́ избав­ля́еши. Ра́дуйся, я́ко вся́ боле́зни челове́ческия душе́вныя и теле́сныя ми́лостивно врачу́еши; ра́дуйся, я́ко пра́ведный гне́в Бо́жий на нас Твои́м моле́нием ско́ро утоля́еши. Ра́дуйся, я́ко Ты́ еси́ ти́хое пристанище все́м с ве́рою к Тебе́ притека́ющим; ра́дуйся, кораблю хотя́щих спасти́ся. Ра́дуйся, благода́тное не́бо, ра́дость и спасе́ние на́м да́рующая.

Кондак 10

Спасти́ хотя́ще ду́ши своя от ве́чныя сме́рти, мы́, недосто́йная ча́да Твоя́, прекло́ньше коле́на своя́ пред пречи́стым Твои́м о́бразом, мо́лим Тя́, Небе́сная Цари́це и мило­се́рдная Ма́ти спасе́ния на́шего́: сотвори́ на́с прича́стники ве́чнаго блаже́нства в Небе́сном Ца́рствии Сы́на Твоего́, пою́щих Спаси́телю Бо́гу: Аллилу́ия.

Икос 10

Стена́ необори́мая и приста́нище небу́рное Ты́ еси́, Богоро́дице Де́во, все́м к Тебе́ притека́ющим, те́мже и на́с огради́ и покры́й от все́х вра́г ви́димых и неви́димых, да с ве́рою и умиле́нием поклоня́ющеся пречестне́й и цельбоно́сней ико́не Твоея́, ра́достно вопие́м Ти́: Ра́дуйся, сохраня́ти и спаса́ти все́х призыва́ю­щих Тя́ обеща́вшая; ра́дуйся, к Сы́ну Твоему́ и Бо́гу моли́твы ве́рных принося́щая. Ра́дуйся, и Сама́ непреста́нно у престо́ла Его́ моля́щаяся о нас; ра́дуйся, благода́ть Твои́м ико́нам дарова́в­шая. Ра́дуйся, всю вселе́нную луча́ми те́х оза­ряющая; ра́дуйся, рода христиа́нскаго похвало́ и непосты́дное упова́ние. Ра́дуйся, благода́тное не́бо, ра́дость и спасе́ние на́м да́рующая!

Кондак 11

Пе́ние всеумиле́нное принося́ще Ти́, недосто́йнии, про́сим Тебе́, Де́во Богоро́дице: не пре́зри гла́са рабов Твои́х, к Тебе́ бо в напа́стех и ско́рбех прибега́ем и пре́д Тобо́ю в беда́х на́­ших сле́зы пролива́ем, пою́ще: Аллилу́ия.

Икос 11

Светоза́рная свеща́ су́щим во тьме́ греха́ и юдо́ли пла́ча яви́ся преди́вная ико́на Твоя́, Пречи́стая Влады́чице: все́м бо прите­ка́ющим к ней струи́ исцеле́ний излива́ет и чуде́с заря́ми сердца́ ве́рных весели́т, подвиза́ющи взыва́ти си́це: Ра́дуйся, Боже́ственный Све́т неизрече́нно роди́вшая; ра́дуйся, тьму сме́ртную рождество́м Твои́м просвети́вшая. Ра́дуйся, страны́ на́шея неусыпная покрови́тельнице; ра́дуйся, ве́рных па́стырей Це́ркве ободря́ющая и вразумля́ющая. Ра́дуйся, люде́й правосла́вных храни́тельнице; ра́дуйся, богобоя́зненных и́ноков и и́нокинь при́сное утеше́ние. Ра́дуйся, ка́ющихся пред Бо́гом гре́шников непосты́дная засту́пнице; ра́дуйся, ра́дости небе́сныя все́м на́м пода́тельнице. Ра́дуйся, все́х христиа́н те́плая хода́таице; ра́дуйся, о лю́дех Твои́х при́сная моли́твеннице. Ра́дуйся, благода́тное не́бо, ра́дость и спасе́ние на́м да́рующая.

Кондак 12

Благода́ть боже́ственную испроси́ на́м у Сы́на Твоего́ и Бо́га, простри́ на́м ру́ку по́мощи, отжени́ от нас вся́каго врага́ и супос­та́та, умири́ на́шу жи́знь, да не поги́бнем лю́те без покая́ния, но приими́ на́с в ве́чныя кро́вы, Богороди́тельнице, да ра́дующеся пое́м Бо́гу, Тобо́ю на́с спаса́ющему: Аллилу́ия.

Икос 12

Пою́ще ди́вная Твоя́ чудеса́, уми́льно припа́даем пред пречи́стым о́бразом Твои́м и, благогове́йно лобыза́юще его́, немо́лчными пе́сньми воспева́ем Тя́, преди́вная Цари́це небесе́ и земли́, и про́сим Тя́, Влады́чице, услы́ши на́ше моле́ние в ча́с се́й и благода́ть Сы́на Твоего́ на́м низпосли́, с любо́вию вопию́щим Тебе́: Ра́дуйся, Ми́лостей Сы́на Твоего́ и Бо́га на́с сподобля́ющая; ра́дуйся, десну́ю ча́сть моли́твами Твои́ми на́м гре́шным уготовля́ющая. Ра́дуйся, изнемога́ющих от уны́ния и печа́ли ско́рая уте́шительнице; ра́дуйся, гре́шником ка́ю­щимся спасе́ние подаю́щая. Ра́дуйся, и нерас­ка́янных гре́шников к покая́нию обраща́ющая; ра́дуйся, все́х по́моще, скорбным вдови́цам и си́рым помога́ющая. Ра́дуйся, а́лчущих и жа́ж­дущих пра́вды к Бо́гу приводя́щая; ра́дуйся, ро́да христиа́нскаго засту́пнице усе́рдная. Ра́дуйся, Це́ркве Правосла́вныя неруши́мая сте­на́ и не́бо благода́тное; ра́дуйся, страны́ на́шея покро́ве и защище́ние. Ра́дуйся, благода́тное не́бо, ра́дость и спасе́ние на́м да́рующая!

Кондак 13

О Всепе́тая Ма́ти, невмести́маго Бо́га во чре́ве вмести́вшая и ра́дость всему́ ми́ру роди́вшая! Ны́нешнее прие́мши пе́ние, вся́ на́ша печа́ли на ра́дость приложи́, от вся́кия изба́ви напа́сти все́х и бу́дущия изми́ му́ки о Тебе́ вопию́щих: Аллилу́ия.

Сей Кондак читается трижды, затем 1-й Икос и 1-й Кондак

Молитва

О Пресвята́я и Преблагослове́нная Ма́ти Сладча́йшаго Го́спода на́шего Иису́са Христа́! Припа́даем и поклоня́емся пред святою ико́ною Твое́ю и смире́нно мо́лим Тя́, всесильная рода на́шего́ засту́пнице, помози́ на́м немощ­ны́м и гре́шным и сподо́би нас Твоего́ Ма́терняго заступле́ния и благопопече́ния, спаси́ и сохрани́, Влады́чице, под кровом ми́лости Твоея́ Це́рковь Святу́ю, гра́д се́й, хра́м се́й, страну́ на́шу и все́х на́с, припа́дающих к Тебе́ с ве́рою и любо́вию и умиле́нно прося́щих со слеза́ми Твоего́ заступле́ния. О ми́лостивая Ма́ти, умилосе́рдися на ны, обурева́емыя грехми́ мно́гими, простри́ ко Христу́ Го́споду богоприи́мнии ру́це Твои́ и предста́тельствуй за ны пре́д бла́гостию Его́, прося́щи проще́ния прегреше́ний на́ших, благоче́стнаго ми́рнаго жития́, благи́я христиа́нския кончи́ны и до́браго отве́та на Стра́шнем Суди́щи Его́, да спаса́еми всеси́льными Твои́ми к Нему́ моли́твами, блаже́нство ра́йское унасле́дуем, и со все́ми святы́ми воспое́м пречестно́е и великоле́пое и́мя достопокланя́емыя Тро́ицы, Отца́ и Сы́на и Свята́го Ду́ха, и Твое́ ве́лие к на́м милосе́рдие во ве́ки веко́в. Ами́нь.

Тропарь, глас 6

Что́ Тя́ нарече́м, о Благода́тная?/ Не́бо, я́ко возсия́ла еси́ Со́лнце пра́вды;/ ра́й, я́ко прозяб­ла́ еси́ Цве́т нетле́ния;/ Де́ву, я́ко пребыла́ еси́ нетле́нна;/ чи́стую Ма́терь, я́ко име́ла еси́ на святы́х Твои́х объя́тиях Сы́на, все́х Бо́га./ Того моли́ спасти́ся душа́м на́шим.

Предание говорит, что икона «Благодатное Не­бо» раньше находилась в городе Смоленске и приве­зена оттуда в Москву великою княгиней Софией Витовтовною, дочерью литовского князя Витовта (конец 14-го и начало 15-го столетия), когда она сделалась суп­ругою великого московского князя Василия Дмитриевича (1389–1425). Празднование этому́ о́бразу совершается 6 марта /19 марта и еще в неделю Все́х Святы́х.