Месяца июля в 15-й день
Святаго равноапостольнаго Великаго князя Владимира, нареченнаго во святом Крещении Василия
На малей вечерни
На Го́споди, воззва́х: поставим стихов 4
и поем стихиры, глас 1.
Подобен: Небе́сных чино́в:
Десни́цею Всевы́шняго укрепле́н, / вели́кий кня́же Влади́мире, / и́дольскую пре́лесть отри́нул еси́, сла́вне, / и, святы́м Креще́нием просвети́вся, / све́том позна́ния Христо́ва / зе́млю на́шу озари́л еси́. (2)
Нача́льника на́шего во благоче́стии христиа́нстем, / прииди́те, восхва́лим, лю́дие росси́йстии, / присносла́внаго вели́каго кня́зя Влади́мира, / и́долы попра́вшего / и святы́м Креще́нием / зе́млю Ру́сскую просвети́вшаго.
Светоно́сная твоя́ па́мять, / равноапо́столе, / днесь возсия́ нам всера́достно, / веселя́щи ду́ши и сердца́ / твоего́ Богоразу́мия добро́тою, / вели́кий кня́же Влади́мире.
Слава, глас 6. Самогласен: Днесь страна́ на́ша, / я́ко но́ваго царя́ Константи́на, тя стяжа́вши, / све́тло ликовству́ет, / вели́кий кня́же Влади́мире, / ра́достно па́мять твою́ торжеству́ющи, / мы же, ча́да твоя́, моле́бно вопие́м ти: / моли́ся, равноапо́столе, ко Го́споду / спасти́ и просвети́ти ду́ши на́ша.
И ныне, Богородичен, глас тойже: Никто́же, притека́яй к Тебе́, / посра́млен от Тебе́ исхо́дит, / Пречи́стая Богоро́дице Де́во, / но про́сит благода́ти / и прие́млет дарова́ние к поле́зному проше́нию.
На стиховне стихиры, глас 2.
Подобен: До́ме Евфра́фов:
От земны́х к Небе́сным прише́л еси́, ра́дуяся, / вели́кий кня́же Влади́мире, / и, по́честь восприе́м от Христа́ Бо́га, / Тому́ моли́ся / спасти́ся душа́м на́шим.
Стих: Вознесо́х избра́ннаго / от люде́й Мои́х.
Луча́ми Богоразу́мия просвети́вся, / и́долы попра́л еси́, / равноапо́столе, / Христо́ву же ве́ру / во оте́чествии твое́м насади́л еси́.
Стих: Еле́ем святы́м Мои́м / пома́зах его́.
Ста́до твое́ соблюди́, / его́же ко Христо́ву позна́нию приве́л еси́, / вели́кий кня́же Влади́мире, / и держа́ву Росси́йскую / в ми́ре сохраня́й при́сно.
Слава, и ныне, глас 8. Самогласен: Прииди́те, возра́дуемся, / Засту́пницу ро́да на́шего воспева́юще днесь, / Пречи́стую Де́ву Богоро́дицу, / Е́йже вели́кий князь Влади́мир / храм прече́стен созда́ / и десяти́ну тому́ от име́ний свои́х дая́ше, / ему́же подража́юще, / вме́сто десяти́ны пе́сни хвале́бныя Ей принесе́м, / зову́ще и глаго́люще: / Пала́то Сло́ва / и све́тлый Черто́же всех Царя́, / сподо́би нас, смире́нных, покро́ва Твоего́ / и бу́ди нам Помо́щница / во спасе́ние душ на́ших.
Тропарь, глас 4:
Уподо́бился еси́ купцу́, и́щущему до́браго би́сера, / славнодержа́вный Влади́мире, / на высоте́ стола́ сидя́ ма́тере градо́в, богоспаса́емого Ки́ева: / испыту́я же и посыла́я к Ца́рскому гра́ду уве́дети правосла́вную ве́ру, / и обре́л еси́ безце́нный би́сер – Христа́, / избра́вшаго тя, я́ко втора́го Па́вла, / и оттря́сшаго слепоту́ во святе́й купе́ли, / душе́вную, вку́пе и теле́сную. / Те́мже пра́зднуем твое́ успе́ние, / лю́дие твои́ су́ще, / моли́ спасти́ся держа́вы твоея́ Росси́йския нача́льником и мно́жеству владо́мых.
На велицей вечерни
Блаже́н муж: 1-й антифон.
На Го́споди, воззва́х: стихиры на 8, глас 4.
Подобен: Я́ко до́бля:
Вторы́й ты был еси́ Константи́н / сло́вом и де́лом: / он во христиа́нское вре́мя роди́ся / и мно́га ле́та во е́ллинстве сотвори́л есть. / Ты же от варя́г роди́вся, / но возлюби́л еси́ возлюби́вшаго тя Христа́, / к Нему́же возше́л еси́, ра́дуяся. / Его́же моля́ не преста́й о чту́щих па́мять твою́. (2)
Весели́тся ве́чно, све́тло сия́ющи, гора́ Сина́йская, / Моисе́йским освяти́вшися зако́ном, / Неви́димаго ви́девши, / све́тло же сия́я, весели́тся и ра́дуется / вели́кий град твой, Васи́лие, / не я́ко во мра́це, / но я́ко в Ду́се, Сы́на со Отце́м ви́дя в себе́ сла́вима. / Его́же моли́ / спасти́ и просвети́ти ду́ши на́ша. (2)
Я́коже оте́ц духо́вно, царь же чу́вственно / Росси́йским лю́дем был еси́, Васи́лие: / и́стинный же пропове́датель, я́ко апо́стол Христо́в, / провозвести́л еси́ спаси́тельное Креще́ние / и, тем све́тло просвети́в, освяти́л еси́ лю́ди твоя́ / во всех страна́х ца́рствия твоего́, блаже́нне. (2)
Ко́рень правове́рия ты был еси́, Васи́лие, / напое́н же Ду́хом Пресвяты́м, / возрасти́вый нам ве́тви богосажде́нныя, / цвет благоуха́ния источа́ющия, / Бори́са чу́днаго и Гле́ба, ревни́теля благоче́стию, / кипя́щия всем ве́рным оби́льно чудесы́. / С ни́миже предстоя́ Христу́, / моли́ся спасти́ и просвети́ти ду́ши на́ша. (2)
Слава, глас 8: Прииди́те, стеце́мся вси / в честне́й па́мяти отца́ Росси́йскаго / и наста́вника на́шего Влади́мира: / сей бо от варя́г роди́ся, / и возлюби́ возлюби́вшаго его́ Христа́, / к Нему́же взы́де, ра́дуяся, / с прама́терию свое́ю Еле́ною. / Вся бо лю́ди своя́ научи́ ве́ровати / и покланя́тися в Тро́ице еди́ному Бо́гу, / и́долы же разруши́в, попра́ / и израсти́ нам своя́ честны́я ле́торасли, / Рома́на и Дави́да. / Те́мже и мы, све́тло ны́не пе́сньми па́мять их ве́рно чту́ще, / любо́вию пра́зднуем: / да мо́лятся о нас ко Го́споду, / во́инству на́шему пода́ти побе́ды на пога́ныя враги́, / и умири́ти весь мир, и спасти́ ду́ши на́ша.
И ныне, Богородичен: Царь Небе́сный / за человеколю́бие на земли́ яви́ся, / и с челове́ки поживе́, / от Де́вы бо Чи́стыя плоть прие́мый / и из Нея́ проше́дый с восприя́тием. / Еди́н есть Сын, сугу́б естество́м, / но не Ипоста́сию. / Те́мже соверше́нна Того́ Бо́га / и соверше́нна Челове́ка вои́стину пропове́дающе, / испове́дуем Христа́ Бо́га на́шего, / Его́же моли́, Ма́ти Безневе́стная, / поми́ловатися душа́м на́шим.
Вход. Прокимен дне. И чтения.
Царств тре́тиих чте́ние
Ста Соломо́н пред лице́м же́ртвенника Госпо́дня пред всем собо́ром Изра́илевым, и возде́в ру́це свои́ на не́бо, и рече́: Го́споди Бо́же Изра́илев, несть бог, я́коже Ты, на небеси́ горе́ и на земли́ до́ле. А́ще бо не́бо и не́бо небесе́ не довле́ют Тебе́, ка́ко дом сей, его́же созда́х и́мени Твоему́? Оба́че да при́зриши на моли́тву мою́, Го́споди Бо́же Изра́илев, услы́шати моле́ния и моли́тву, е́юже раб Твой мо́лится пред Тобо́ю к Тебе́ днесь. Да бу́дут о́чи Твои́ отве́рсты на дом сей день и нощь, на ме́сто сие́, о не́мже глаго́лал еси́: бу́дет И́мя Мое́ та́мо, е́же услы́шати моли́тву, е́юже мо́лится раб Твой на ме́сте сем во дни и но́щи. И послу́шати мольбы́ раба́ Твоего́ и люде́й Твои́х Изра́иля. И ели́ка а́ще помо́лятся к Тебе́ на ме́сте сем, и Ты услы́шиши на ме́сте жили́ща Твоего́ на Небеси́, и сотвори́ши, и ми́лостив бу́деши им.
Проро́чества Иса́иина чте́ние
Да возра́дуется душа́ моя́ о Го́споде: облече́ бо мя в ри́зу спасе́ния, и оде́ждою весе́лия оде́я мя, я́ко жениху́, возложи́ мне вене́ц, я́ко неве́сту, украси́ мя красото́ю. И я́ко земля́, растя́щая цвет свой, и я́ко вертогра́д се́мена своя́ прозяба́ет, та́ко возсия́ет Госпо́дь пра́вду и ра́дость пред все́ми язы́ки. Сио́на ра́ди не умо́лкну, и Иерусали́ма ра́ди не попущу́, до́ндеже у́бо изы́дет, я́ко свет, пра́вда моя́, спасе́ние же мое́, я́ко свеща́, разжже́тся. И у́зрят язы́цы пра́вду твою́ и вси ца́рие зе́мстии сла́ву твою́, и нареку́тся и́менем твои́м но́вым, е́же Госпо́дь имену́ет е́. И бу́деши вене́ц добро́ты в руце́ Госпо́дни, и диади́ма ца́рствия в руце́ Бо́га твоего́. И ктому́ не нарече́шися оста́влен, и земля́ твоя́ ктому́ не нарече́тся пуста́, тебе́ бо нарече́тся во́ля моя́, и земля́ твоя́ вселе́нная, я́ко благоволи́т Госпо́дь в тебе́, и земля́ твоя́ насели́тся. И я́ко живы́й ю́ноша с де́вою, та́ко поживу́т сы́нове твои́ с тобо́ю. И бу́дет, и́мже о́бразом возвесели́тся жени́х о неве́сте, та́ко возвесели́тся Госпо́дь о тебе́.
Проро́чества Иса́иина чте́ние
Свети́ся, свети́ся, Иерусали́ме, прии́де бо твой свет, и сла́ва Госпо́дня на тебе́ возсия́. Я́ко се тьма покры́ет зе́млю, и мрак на язы́ки, на тебе́ же яви́тся Госпо́дь, и сла́ва Его́ на тебе́ у́зрится. И по́йдут ца́рие све́том твои́м, и язы́цы све́тлостию восто́ка твоего́. Возведи́ о́крест о́чи твои́, и виждь со́бранная ча́да твоя́: прии́дут вси сы́нове твои́ издале́ча, и дще́ри твои́ на ра́менех во́змутся. Тогда́ у́зриши, и возра́дуешися, и убои́шися, и ужа́снешися се́рдцем, егда́ преложи́т на тя бога́тство мо́ря, и язы́к, и люде́й. И прии́дут ти стада́ велблу́д, и покры́ют тя велблу́ды Мадиа́мстии и Гефа́рстии, вси от Савы́ прии́дут, нося́ще тебе́ зла́то и лива́н, принесу́т тебе́ и ка́мень че́стен, и спасе́ние от Го́спода благовозвестя́т. И вся о́вцы Кида́рския соберу́тся тебе́, и овни́ Навео́фстии прии́дут тебе́, и вознесу́тся прия́тная на же́ртвенник Мой, и дом моли́твы Моея́ просла́вится. Ки́и суть, и́же я́ко о́блацы летя́т и я́ко го́лубие со птенцы́ свои́ми? Со Мно́ю есть Сио́н, Мене́ о́строви ожида́ша и корабли́ фарси́йстии в пе́рвых, е́же привести́ ча́да твоя́ издале́ча, и сребро́ и зла́то их с ни́ми, за И́мя Госпо́дне Свято́е и за е́же Свято́му Изра́илеву сла́вну бы́ти. И созиждут сы́нове иноро́днии сте́ны твоя́, и ца́рие их предста́нут тебе́, за гнев бо Мой порази́х тя и за ми́лость Мою́ возлюби́х тя. И отве́рзутся врата́ твоя́, Иерусали́ме, вы́ну день и нощь, и не затворя́тся, е́же ввести́ к тебе́ си́лу язы́ков и ца́ри их ведо́мыя. Язы́цы бо и ца́рие, и́же тебе́ не порабо́тают, поги́бнут, и язы́цы запусте́нием запусте́ют. И сла́ва Лива́нова к тебе́ прии́дет в кипари́се, и пе́вке, и ке́дре вку́пе, просла́вити ме́сто свято́е Мое́, и ме́сто ног Мои́х просла́влю. И по́йдут к тебе́ боя́щеся, сы́нове смири́вших тя и прогне́вавших тя, и покло́нятся следа́м ног твои́х вси прогне́вавшии тя, и нарече́шися град Госпо́день, Сио́н Свята́го Изра́илева. За е́же бы́ти тебе́ оста́влену и возненави́дену, и не бе помога́яй тебе́, и положу́ тя в ра́дость ве́чную, весе́лие родо́м родо́в. И изссе́ши млеко́ язы́ков, и бога́тство царе́й сне́си, и разуме́еши, я́ко Аз Госпо́дь, спаса́яй тя и избавля́яй тя, Бог Изра́илев.
На литии стихира храма,
таже святаго, глас 2:
Днесь возсия́ благочести́ваго кня́зя Влади́мира па́мять, / я́ко ми́ро излия́нное: / Христа́ бо возлюби́в, и́долы преоби́дев, / це́ркви Распе́ншемуся нас ра́ди на земли́ воздви́же / и на Небесе́х прия́т Ца́рство и вене́ц.
Вторы́й ты бысть Константи́н сло́вом и де́лом: / научи́лся еси́ правове́рию / и просвети́л еси́ зе́млю Ру́сскую святы́м Креще́нием / повеле́нием возлюби́вшаго тя Бо́га. / К Нему́же взы́де, ра́дуяся, / Его́же и моли́, Христа́, Влади́мире, непреста́нно / о чту́щих любо́вию па́мять твою́.
Слава, глас 6: Прииди́те, стеце́мся вси ве́рно / в честне́й па́мяти отца́ Росси́йскаго, / наста́вника на́шего Васи́лия: /сей бо, отне́леже рожде́н бысть, / возлюби́ возлю́бльшаго и́ Христа́, / к Нему́же и взы́де, ра́дуяся, с прама́терию Еле́ною. / Тем и мы любе́зно пра́зднуем, / моля́щеся моли́тися о нас ко Го́споду, / умири́ти мир и спасти́ ду́ши на́ша.
И ныне, Богородичен: Творе́ц и Изба́витель мой, Пречи́стая, / Христо́с Госпо́дь из Твои́х ложе́сн проше́д, / в мя Оболки́йся, / пе́рвыя кля́твы Ада́ма свободи́. / Те́мже Ти, Всечи́стая, / я́ко Бо́жии Ма́тери же и Де́ве, / вои́стинну вопие́м немо́лчно: / ра́дуйся А́нгельски, ра́дуйся, Влады́чице, / Предста́тельство и Покро́ве, / и Спасе́ние душ на́ших.
На стиховне стихиры, глас 8.
Подобен: О, пресла́внаго чудесе́:
О, пресла́внаго чудесе́! / Велича́вый ра́зум погубля́ется днесь / и рыда́ют вся лука́вая во́инства, / ви́дяще ветвь су́щу вседи́чну, / си́лою Бо́жиею богонасажде́нну, и прославля́ему, / и све́тло венчава́ему от Бо́га, / вели́каго Васи́лия, / на́шего ве́рнаго нача́льника.
Стих: Вознесо́х избра́ннаго / от люде́й Мои́х.
Ди́вная чуде́с пучи́на, / жестосе́рдия бо ра́зумом / и́же вотще́ шата́хуся, / от лица́ днесь Васи́лиева / веселя́тся в честне́й Це́ркви, / и ца́рствует Христо́с Бог, / обре́т его́, я́ко Па́вла пре́жде, / и поста́ви кня́зя ве́рна на земли́ Свое́й, / просвети́вшаго лю́ди своя́ честны́м Креще́нием.
Стих: Еле́ем святы́м Мои́м / пома́зах его́.
Ра́дуйся, Росси́йская похвало́. / Ра́дуйся, ве́рным прави́телю. / Ра́дуйся, Боже́ственный Влади́мире, нача́льниче наш. / Ра́дуйся, ве́ры забра́ло. / Ра́дуйся, чу́до чудесе́м пресла́вное / и притека́ющим приста́нище ти́хое. / Ра́дуйся, всесвяты́й ка́меню ве́ры / и моле́бниче о пою́щих тя / и велича́ющих ве́рно.
Слава, глас тойже: Нача́льника благоче́стия, / и пропове́дника ве́ры, / и князе́й росси́йских верхо́внаго, / днесь, Росси́йстии собо́ри, соше́дшеся, / восхва́лим вели́каго Влади́мира, / апо́столом ра́внаго, / хвала́ми и пе́сньми духо́вными венча́ем его́, глаго́люще: / ра́дуйся, Христо́в во́ине прехра́брый, / я́ко томи́теля врага́ до конца́ погуби́в / и нас от ле́сти его́ изба́вив, / приве́л еси́ Царю́ Христу́ Бо́гу. / Но, о преблаже́нне и всехва́льне, / мир моли́ пода́ти оте́честву на́шему / и на пога́ныя побе́ды, / Це́ркви благостоя́ние / и душа́м на́шим ве́лию ми́лость.
И ныне, Богородичен: Влады́чице, приими́ моли́твы раб Твои́х / и изба́ви нас / от вся́кия ну́жды и печа́ли.
Тропарь, глас 4:
Уподо́бился еси́ купцу́, и́щущему до́браго би́сера, / славнодержа́вный Влади́мире, / на высоте́ стола́ сидя́ ма́тере градо́в, богоспаса́емого Ки́ева: / испыту́я же и посыла́я к Ца́рскому гра́ду уве́дети правосла́вную ве́ру, / обре́л еси́ безце́нный би́сер – Христа́, / избра́вшаго тя, я́ко втора́го Па́вла, / и оттря́сшаго слепоту́ во святе́й купе́ли, / душе́вную, вку́пе и теле́сную. / Те́мже пра́зднуем твое́ успе́ние, / лю́дие твои́ су́ще, / моли́ спасти́ся держа́вы твоея́ Росси́йския нача́льником и мно́жеству владо́мых.
Ин тропарь, глас 1:
Я́ко нача́льнику Креще́ния / и ко́реню ве́ры / Боже́ственныя, / и́долов разруши́телю, / блаже́нне кня́же Васи́лие равноапо́стольне, вопие́м ти: / сла́ва вразу́мльшему тя Христу́ Бо́гу,
/ сла́ва освяти́вшему тя Креще́нием Свои́м, / сла́ва просвети́вшему тобо́ю всю страну́
Ру́сскую.
Ин тропарь, глас 8:
Правове́рия наста́вниче / и всея́ Руси́ просвети́телю, / благочести́вый вели́кий кня́же Влади́мире, / святы́м Креще́нием всех просвети́л еси́ / и це́ркви мно́ги сла́вны укра́сил еси́, / о прему́дре Васи́лие, / Христа́ Бо́га моли́ спасти́ся душа́м на́шим.
На утрени
На Бог Госпо́дь:
тропарь святаго дважды, глас 4:
Уподо́бился еси́ купцу́, и́щущему до́браго би́сера, / славнодержа́вный Влади́мире, / на высоте́ стола́ сидя́ ма́тере градо́в, богоспаса́емого Ки́ева: / испыту́я же и посыла́я к Ца́рскому гра́ду уве́дети правосла́вную ве́ру, / обре́л еси́ безце́нный би́сер – Христа́, / избра́вшаго тя, я́ко втора́го Па́вла, / и оттря́сшаго слепоту́ во святе́й купе́ли, / душе́вную, вку́пе и теле́сную. / Те́мже пра́зднуем твое́ успе́ние, / лю́дие твои́ су́ще, / моли́ спасти́ся держа́вы твоея́ Росси́йския нача́льником и мно́жеству владо́мых.
Слава, и ныне, Богородичен: Е́же от ве́ка утае́ное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́емь, / и Крест во́лею нас ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.
По 1-й стихологии седален, глас 1:
Я́ко нача́льнику и ко́реню ве́ры и и́долов разруши́телю, / блаже́нне кня́же, равноапо́стольне Влади́мире, вопие́м ти: / моли́ Христа́ Бо́га грехо́в оставле́ние дарова́ти / пра́зднующим любо́вию святу́ю па́мять твою́. (2)
Слава, и ныне, Богородичен: Наста́ви нас на путь покая́ния, укло́ньшияся при́сно к безпу́тием зол / и Преблага́го прогне́вавшия Го́спода, / Неискусобра́чная благослове́нная Мари́е, прибе́жище отча́янных челове́ков, / Бо́жие жили́ще.
По 2-й стихологии седален, глас 8:
Научи́вся неизрече́нною от Бо́га вы́шнею му́дростию, / бога́тно к ра́зуму ве́ры Его́ дости́гл еси́ и к добро́те Его́ ско́ро прите́кл еси́. / Те́мже изъясни́л еси́ у́мныя твоя́ о́чи / и к ра́зуму возве́л еси́ благоче́стия ве́ры. / Того́ ра́ди пра́зднующе, глаго́лем: / благослове́н Бог, просвети́вый све́том разу́мным се́рдце твое́, / свети́льниче све́тлый Васи́лие, / моли́ Христа́ Бо́га грехо́в оставле́ние дарова́ти / чту́щим любо́вию святу́ю па́мять твою́. (2)
Слава, и ныне, Богородичен: Грехо́вный мрак покрыва́ет мя, и сту́дная моя́ дела́ без воздержа́ния вы́ну, / и со́вестное томле́ние непреста́нно му́чит мя. / Увы́ мне, где у́бо ны́не скры́юся? / К кому́ ли прите́к, па́ки обря́щу по́мощь? / То́кмо к Тебе́, Богома́тери, припа́даю и молю́ся Ти: / моли́ вы́ну спасти́ся душа́м на́шим.
Полиелей, тоже величание:
Велича́ем тя, / святы́й равноапо́стольный кня́же Влади́мире, / и чтим святу́ю па́мять твою́, / и́долы попра́вшаго / и всю Росси́йскую зе́млю святы́м Креще́нием просвети́вшаго.
Псалом избранный
Лик 1: Блаже́н муж, боя́йся Го́спода. 2: В за́поведех Его́ восхо́щет зело́. 1: Сла́ва и бога́тство в дому́ его́. 2: И пра́вда его́ пребыва́ет в век ве́ка. 1: В па́мять ве́чную бу́дет пра́ведник. 2: Пра́ведник я́ко фи́никс процвете́т, я́ко кедр, и́же на Лива́не, умно́жится. 1: Возвесели́тся пра́ведник о Го́споде, и упова́ет на Него́. 2: Се́ устна́м мои́м не возбраню́, Го́споди. 1: Ты разуме́л еси́ пра́вду мою́, и и́стину мою́. 2: И язы́к мой поучи́тся пра́вде Твое́й, весь день хвале́ Твое́й. 1: Свет возсия́ пра́веднику, и пра́вым се́рдцем весе́лие. 2: Род пра́вых благослови́тся. 1: Сла́вою и че́стью венча́л еси́ его́. 2: Я́ко Ты благослови́ши пра́ведника, Го́споди. 1: Я́ко ору́жием благоволе́ния венча́л еси́ нас. 2: В ни́хже посети́ нас Восто́к с высоты́. 1: Яви́тися во тьме и се́ни сме́ртней седя́щим. 2: Напра́вить но́ги на́ша на путь ми́ра.
Сла́ва, и ны́не: Аллилу́иа, трижды.
По полиелеи седален, глас 4:
Ско́рое и тве́рдое стяжа́л еси́ тща́ние ко и́стинней ве́ре Христо́ве, / и, обре́т купе́ль Богомы́сленную и духо́вную, ско́ро прите́кл еси́ любо́вию, / скве́рну прегреше́ний очи́стив, лю́ди твоя́ освяти́л еси́. / Моли́ся Христу́ Бо́гу спасти́ся душа́м на́шим.
Слава: Ско́ро предвари́, кня́же, ве́рных наста́вниче: / врази́ бо ху́лят и претя́т нам, Христо́в уго́дниче. / Погуби́ ве́рою твое́ю борю́щияся с на́ми, / да навы́кнут и ти́и сла́вити твою́ па́мять, / нас же, пою́щих тя, спаса́й от вся́каго гне́ва.
И ныне, Богородичен: Сло́во О́тчее, Христа́ Бо́га на́шего, / от Тебе́ воплоти́вшагося позна́хом, Богоро́дице Де́во, / еди́на Чи́стая, еди́на Благослове́нная, / тем, непреста́нно Тя воспева́юще, велича́ем.
Степенна, 1-й антифон 4-го гласа:
От ю́ности моея́ / мно́зи бо́рют мя стра́сти, / но Сам мя заступи́, / и спаси́, Спа́се мой. Ненави́дящии Сио́на, / посрами́теся от Го́спода, / я́ко трава́ бо огне́м / бу́дете изсо́хше.
Сла́ва, и ны́не: Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.
Прокимен, глас 4:
Вознесо́х избра́ннаго / от люде́й Мои́х. Стих: И́бо рука́ Моя́ засту́пит его́ и мы́шца Моя́ укрепи́т его́.
Другий прокимен: Вся́кое дыха́ние / да хва́лит Го́спода. Стих: Хвали́те Бо́га во святы́х Его́, хвали́те Его́ в утверже́нии си́лы Его́.
Евангелие от Иоанна, зачало 36
Рече́ Госпо́дь ко прише́дшым к Нему́ иуде́ем: Аз есмь дверь: Мно́ю а́ще кто вни́дет, спасе́тся, и вни́дет, и изы́дет, и па́жить обря́щет. Тать не прихо́дит, ра́зве да укра́дет, и убие́т, и погуби́т: аз приидо́х, да живо́т и́мут и ли́шше и́мут. Аз есмь па́стырь до́брый: па́стырь до́брый ду́шу свою́ полага́ет за о́вцы. А нае́мник, и́же несть па́стырь, ему́же не суть о́вцы своя́, ви́дит во́лка гряду́ща и оставля́ет о́вцы, и бе́гает, и волк расхи́тит их, и распу́дит о́вцы. А нае́мник бежи́т, я́ко нае́мник есть и неради́т о овца́х. Аз есмь па́стырь до́брый, и зна́ю Моя́, и зна́ют Мя Моя. Я́коже зна́ет Мя Оте́ц, и Аз зна́ю Отца́, и ду́шу Мою́ полага́ю за о́вцы. И и́ны о́вцы и́мам, я́же не суть от двора́ сего́, и ты́я Ми подоба́ет привести́: и глас Мой услы́шат, и бу́дет еди́но ста́до, и еди́н па́стырь.
По 50-м псалме
Слава: Моли́твами свята́го равноапо́стольнаго вели́каго кня́зя Влади́мира, / Ми́лостиве, очи́сти / мно́жества согреше́ний на́ших.
И ныне: Моли́твами Богоро́дицы, / Ми́лостиве, очи́сти / мно́жества согреше́ний на́ших.
Таже, глас 6: Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.
И стихира, глас 8:
Апо́столом ревни́теля Влади́мира, / преблаже́ннаго отца́ и учи́теля, соше́дшеся, восхва́лим, / и́мже Христа́ Бо́га позна́хом / и, от тьмы к све́ту приближа́ющеся, / о́чи и сердца́ просвеща́ем, / в па́мять его́ ликовству́юще, ку́пно весели́мся, / обре́тше его́ вожда́ правове́рна в Ца́рствие Небе́сное.
Канон Богородицы со ирмосом на 6: Мно́гими содержи́м напа́стьми: писан сего месяца в 5-й день. И святаго два канона на 8.
Канон, глас 8. Песнь 1
Ирмос: Посе́ченый несеко́маго пресече́, / и ви́де со́лнце зе́млю, ю́же не ви́де; / лю́таго врага́ вода́ потопи́, / и непроходи́мое про́йде Изра́иль. / Песнь же воспева́шеся: / Го́сподеви пои́м, сла́вно бо просла́вися.
Собезнача́льное Сло́во Бо́жие, И́же дре́вле четы́рем стихи́ям Творе́ц / и те́ми весь мир сотвори́вый, свя́занную страстьми́ ду́шу мою́ разреши́, / я́ко да воспою́, лику́я, сла́внаго кня́зя Васи́лия.
От выспрь соше́д, Влады́ко, невеще́ственно на духо́вную го́ру, / свы́ше прося́щим от Тебе́ оби́льну све́тлость душа́м посли́ / достодо́лжно похвали́ти чу́днаго кня́зя Васи́лия.
Богородичен: Ма́терем и де́вам похвала́ Ты, Влады́чице, / ро́ждшая Жизнь, Творца́ ми́рови, ма́терских же боле́зней не ощути́ла еси́, / но Ма́ти у́бо и Де́ва пребыла́ еси́. / Те́мже, хва́ляще Тя, ра́дуйся, вопие́м Ти.
Другий канон, глас 6. Песнь 1
Ирмос: Я́ко по су́ху, пешеше́ствовав Изра́иль / по бе́здне стопа́ми, / гони́теля фарао́на / ви́дя потопля́ема, / Бо́гу побе́дную песнь пои́м, вопия́ше.
Прииди́те, ве́рнии, песнь духо́вную возопие́м и просла́вим Христа́, / И́же све́тло просла́вил есть честна́го Влади́мира, вели́каго кня́зя.
И́же се́мя се́ющему да́руя, / Ты и мне да́руй сло́во, Да́телю благи́х, / разреша́я ми соу́з язы́ка, и обнови́, Спа́се, к славословле́нию ве́рно.
И́же во́лею, а не ну́ждею к Тебе́ всех призыва́еши, / я́коже дре́вле Моисе́я и Иса́ию, / та́кожде и ны́не в се́рдце возгласи́л еси́ ве́рнаго и достохва́льнаго кня́зя.
Богородичен: Укра́шена добро́тою доброде́телей, Богома́ти Чи́стая, / Бо́га и́стиннаго зачала́ еси́, / нас Боже́ственными доброде́тельми просвети́вшаго.
Катавасия: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.
Ирмос: Утверди́ся се́рдце мое́ во Го́споде, / вознесе́ся рог мой в Бо́зе мое́м, / разшири́шася на враги́ моя́ уста́ моя́, / возвесели́хся о спасе́нии Твое́м.
Я́ко труба́ богогла́сная, возгласи́ язы́к твой, блаже́нне, духо́вный, / провозглаша́яй всем конце́м земли́ Росси́йския Христо́во правове́рное Креще́ние, / и́мже просвеще́н быв, мир весь просвети́л еси́.
Сия́ет днесь, Васи́лие, пресла́вная па́мять твоя́, / ю́же пра́зднуют христоимени́тии лю́дие, / тебе́ похваля́юще, своего́ пра́отца, / и́хже к све́ту разу́мному приве́л еси́.
Богородичен: Сень зако́на пре́йде рождество́м Твои́м, Богоро́дице, благода́ти прише́дши, / О́тчу Сло́ву, Христу́ Бо́гу на́шему, / Его́же позна́в, сла́вный князь Це́рковь Твою́ све́тло украси́л есть.
Ин. Ирмос: Несть свят, / я́коже Ты, Го́споди Бо́же мой, / вознесы́й рог ве́рных Твои́х, Бла́же, / и утверди́вый нас на ка́мени / испове́дания Твоего́.
И́же Па́вла просвети́вый и избра́нна сотвори́вый, / та́ко и Васи́лия ны́не, о́тца Росси́йскаго очны́й неду́г отто́ргнул еси́, Ми́лостиве, / Твои́м Креще́нием.
Константи́на ве́рнаго подо́бник яви́лся еси́, Христа́ в се́рдцы твое́м прии́м, / и Его́ за́поведем, я́коже апо́стол, всю зе́млю Росси́йскую научи́л еси́.
Боже́ственною си́лою ты возмога́я безбо́жнаго Перу́на, ку́чу бесо́вскую сокруши́л еси́ / и, ко о́паши ко́нстей того привяза́в, / повеле́л еси́ во́ином разби́ти и́дола.
Богородичен: Сень святу́ю обре́т, Мари́ю Де́ву, / Бо́жий сосу́д, Влади́мир, князь вели́кий, апо́стола Па́вла ревни́тель, / сей це́рковь Боже́ственную в Тоя́ и́мя воздви́гл есть.
Катавасия: Твоя́ песносло́вцы, Богоро́дице, / живы́й и незави́стный Исто́чниче, / лик себе́ совоку́пльшия, духо́вно утверди́, / в Боже́ственней Твое́й сла́ве / венце́в сла́вы сподо́би.
Ин кондак, глас 8:
Изря́дному воево́де и правове́рному, / благода́рственная воспису́ет ти вся Русь, Васи́лие, иму́щи тя нача́льника и засту́пника, / я́ко изба́вил еси́ нас от вся́кия скве́рны и ле́сти, те́мже ти вопие́м: / ра́дуйся, вели́кий кня́же Влади́мире преблаже́нне.
Ин кондак, глас 4:
Оте́ческу пре́лесть, и́долы, я́ко су́етни, отве́рг, / Христа́, всех и́стиннаго Бо́га, Царя́ и Благода́теля, позна́л еси́. / Те́мже и лю́ди, изря́дны Тому́, святы́м Креще́нием просвети́л еси́, / пресла́вне Влади́мире. / Сего́ ра́ди почита́ем тя, / я́ко Тро́ице служи́теля, / Христа́ моли́ дарова́ти нам ве́лию ми́лость.
Ин икос: И́же от тьмы нече́стия уклони́лся еси́ / и невече́рняго Сия́ния, Христа́, дости́гл еси́, / отню́дуже и омраче́нныя безбо́жием Боже́ственною любве́ ба́нею освяти́л еси́, / Тро́ицу сла́вити во Еди́нем Божестве́ пресве́тло научи́л еси́, всеблаже́нне Влади́мире. / Но, я́ко име́я дерзнове́ние к Бо́гу, / многообра́зных зол изба́витися нам Христа́ моли́ / и дарова́ти нам ве́лию ми́лость.
Седален, глас 2:
В моли́твах бдяй при́сно ра́достною душе́ю, Васи́лие, / того́ ра́ди поче́рпл еси́ Ду́ха прему́дрости от исто́чника, сходя́щаго свы́ше. / Тем ве́рою просия́в, я́ко со́лнце, моля́ся Христу́ непреста́нно, / ускори́, Ще́дрый, и потщи́ся спасти́ от прегреше́ний мир.
Слава, и ныне, Богородичен: Богоро́дице Безневе́стная Чи́стая, я́же без се́мене ро́ждшая всех Влады́ку, / Того́ со А́нгелы моли́ изба́витися нам от вся́каго недоуме́ния / и да́ти умиле́ние и свет душа́м на́шим / и согреше́ний очище́ние, я́же еди́на вско́ре заступа́ющи.
Песнь 4
Ирмос: Проро́к Авваку́м у́мныма очи́ма / прови́де, Го́споди, прише́ствие Твое́, / тем и вопия́ше: / от ю́га прии́дет Бог. / Сла́ва си́ле Твое́й, сла́ва снизхожде́нию Твоему́.
Све́тло бысть и сла́дко по о́блаце, и́мже покрыва́шеся Небе́сное со́лнце; / весела́ же и ра́достна весна́ по зи́мней ско́рби; / ты же по о́блаце и́дольскаго мра́ка / Креще́нием, я́ко со́лнце све́тлое, возсия́л еси́ нам, Васи́лие.
Па́вел фарисе́й, к Дама́ску гряды́й, / ма́лым блеща́нием вели́каго Све́та ослепле́н, Креще́нием же просвети́ся, / ему́же ты подо́бник был еси́, сла́вне, / Корсу́ня доше́д, очны́й мрак отгна́л еси́.
Богородичен: Ты яви́лася еси́, Де́во, ко́рень ненапое́н, прозяба́я отпуще́ние, / плод светоно́сный ро́ждши, Христа́ Бо́га на́шего; / дря́хлующую страстьми́ ду́шу мою́ просвети́ / и испроси́ грехо́в оставле́ние.
Ин. Ирмос: Христо́с моя́ си́ла, / Бог и Госпо́дь, / честна́я Це́рковь / боголе́пно пое́т, взыва́ющи, / от смы́сла чи́ста о Го́споде пра́зднующи.
Чу́до стра́шное, и пресла́вное, и неизглаго́ланное соверша́ет Влады́ка Христо́с: / обновля́ет бо Боже́ственным Креще́нием всю Росси́йскую зе́млю / и просвеща́ет кня́зя Васи́лия.
Све́тло прииди́те и достоле́пно возгласи́те, / сы́нове росси́йстии, ко отцу́ на́шему Влади́миру, / и па́мять его́ ве́рно вси да пра́зднуем све́тло.
О́тчее нече́стие отгна́л еси́, / всечестны́я же твоея́ прама́тере правове́рную ве́ру возлюби́л еси́, / ра́вне апо́столом Христо́вым, кня́же вели́кий Влади́мире.
Богородичен: Я́ко дверь, приводя́щую к Боже́ственному вхо́ду рая́ све́тлаго, / я́ко мы́сленное ме́сто свяще́ния, / я́ко добро́ту Иа́ковлю, Де́ву ублажа́ем.
Катавасия: Седя́й в Сла́ве / на Престо́ле Божества́ / во о́блаце ле́гце, / прии́де Иису́с Пребоже́ственный, / Нетле́нною Дла́нию / и спасе́ зову́щия: / сла́ва, Христе́, си́ле Твое́й.
Песнь 5
Ирмос: Го́споди Бо́же наш, мир даждь нам, / Го́споди Бо́же наш, стяжи́ ны, / Го́споди, ра́зве Тебе́, ино́го не ве́мы, / И́мя Твое́ имену́ем.
Ра́дуйся и красу́йся ду́хом, Росси́йский царю́ Васи́лие, / изря́дныя бо ве́тви богоса́дныя ко Христу́ прине́сл еси́, / богоизря́дный твой плод, Бори́са сла́внаго и Гле́ба благочести́ваго, / с ни́миже предстоя́ Христу́, о нас моли́ся.
Ди́вный прорече́ Иса́ия на Иерусали́м: /бу́дет я́ве гора́ Госпо́дня и дом на верх гор. / Пра́ведне же на тебе́ разуме́хом благода́ть Ду́ха: / дом бо Влады́це созда́л еси́ на версе́х гор.
Богородичен: Пропове́дует о Тебе́ чу́дный Иса́ия Ду́хом, / Де́вою хотя́щу роди́ти Христа́ без се́мене, / Дави́д же, Твой пра́дед, ди́вно провозвести́ Твоя́ вели́чествия: / спасе́ бо нас, я́ко Ми́лостив.
Ин. Ирмос: Бо́жиим све́том Твои́м, Бла́же, / у́тренюющих Ти ду́ши любо́вию озари́, молю́ся, / Тя ве́дети, Сло́ве Бо́жий, / и́стиннаго Бо́га, / от мра́ка грехо́внаго взыва́юща.
Днесь А́нгели Бо́жии ра́дуются све́тло на Небесе́х в па́мять твою́ святу́ю: / спасл бо еси́ нас от вся́каго лука́вства / и жертв бесо́вских лю́ди мно́ги изба́вил еси́ и всю зе́млю Росси́йскую.
Рыда́ет бесо́вское мно́жество и те́мное собо́рище, / ви́дяще на земли́ попира́емы и́долы, и́же на поги́бель воздви́женныя челове́ком, / и́хже Бо́жиим повеле́нием, Васи́лие, сокруши́л еси́.
Ра́дуйся и весели́ся, ра́бе Христо́в, / кня́же вели́кий и му́дрый, моле́бниче о душа́х на́ших:
/ тобо́ю бо мы вси изба́влени есмы́ бесо́вския ле́сти. / Те́мже – ра́дуйся – вопие́м ти.
Богородичен: Чистото́ю сия́ющи издале́ча, / Боже́ственное угото́вание Влады́чне, Всепе́тая, бы́вши: / Ты бо еди́на показа́лася еси́ Ма́ти су́щи Бо́гу / и рука́ми я́ко Младе́нца Того́ носи́вши.
Катавасия: Ужасо́шася вся́ческая / о Боже́ственней сла́ве Твое́й: / Ты бо, Неискусобра́чная Де́во, / име́ла еси́ во утро́бе над все́ми Бо́га / и родила́ еси́ Безле́тнаго Сы́на, / всем воспева́ющим Тя / мир подава́ющая.
Песнь 6
Ирмос: Я́ко во́ды морски́я, Человеколю́бче, / волна́ми жите́йскими обурева́юся. / Те́мже, я́ко Ио́на, та́ко вопию́ Ти: / возведи́ от тли живо́т мой, Благоутро́бне Го́споди.
Благоче́стия ревни́тель сла́внаго царя́ Константи́на ты был еси́, Васи́лие, / просвети́вшаго Креще́нием е́ллинский род, / ты же духо́вною ба́нею лю́ди твоя́ пресве́тло обнови́л еси́.
Ослади́в любо́вию Христо́вою ду́шу и разу́мныя прие́м криле́, / прелете́л еси́ и́дольский мрак и разгна́л еси́ тьму злове́рия, блаже́нне, / всели́вся в черто́г Спа́са всех Бо́га.
Богородичен: Благоду́шствует Це́рковь Росси́йская днесь и правове́рных собо́ри / в па́мять пресве́тлую Васи́лия, ублажа́юще Твое́ безсе́менное рождество́, Де́во, / и, приле́жно Сы́ну Твоему́ моля́щеся, зову́т: / Тя велича́ем.
Ин. Ирмос: Жите́йское мо́ре, / воздвиза́емое зря напа́стей бу́рею, / к ти́хому приста́нищу Твоему́ прите́к, вопию́ Ти: / возведи́ от тли живо́т мой, / Многоми́лостиве.
Си́лою Бо́жиею попра́н есть сатана́ душегу́бец и ле́стныя его́ же́ртвы: / побе́дника бо яви́л нам есть Христо́с, Васи́лия, ве́рнаго кня́зя, / сокруши́ти и поврещи́ того́ под но́ги на́ша.
Спасе́ пре́жде Госпо́дь руко́ю Моисе́овою Изра́иля от рабо́ты, / То́йже и ны́не руко́ю Васи́лия, ве́рнаго кня́зя, / всех нас от ле́сти и́дольския спасл есть.
Досто́йно ти взыва́ем и вопие́м вси: / ра́дуйся, всече́стне преблаже́нне, тя бо изба́вителя с Бо́гом, Васи́лие, и́мамы. / Не пре́зри рабо́в твои́х, но при́сно сохраня́й нас.
Богородичен: Обрето́хом, Пречи́стая, Тобо́ю спасе́ние, Де́во Препе́тая: / Его́же жела́ют А́нгели на Небесе́х ви́дети, / Сей ны́не ви́дится в не́дрех Твои́х Младе́нец, Бог наш.
Катавасия: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.
Кондак, глас 8:
Подо́бствовав вели́кому апо́столу Па́влу, / в седи́нах, всесла́вне Влади́мире, / вся, я́ко младе́нческая, мудрова́ния, я́же о и́долех тща́ния, оста́вль, / я́ко муж соверше́нный, украси́лся еси́ Боже́ственнаго Креще́ния багряни́цею, / и ны́не, Спа́су Христу́ в весе́лии предстоя́, / моли́ спасти́ся держа́вы Росси́йския нача́льником и мно́жеству владо́мых.
Икос: Просвети́вый дре́вле Изра́иля Моисе́йским зако́ном, / просвети́л же еси́ мир явле́нием Твоего́ прише́ствия, Христе́ Бо́же, / богогла́сныя Твоя́ ученики́ посла́л еси́ пропове́дати по страна́м / е́же от Де́вы безсе́менное рождество́ Твое́ / и тем повеле́л еси́ крести́ти во И́мя Отца́, и Сы́на, и Свята́го Ду́ха. / Обветша́вшу же ви́дя страну́ Росси́йскую грехо́м, / Дух Твой посла́л еси́ в крепкоразу́мнаго ду́шу сла́внаго Влади́мира, / позна́ти Тебе́ Еди́наго от Тро́ицы Христа́ Бо́га, / и Твои́м Креще́нием просвети́ти избра́нныя Твоя́ / и от Тебе́ поруче́нныя ему́ лю́ди, и привести́ к Тебе́ ве́рою вопию́щия: / изба́ви Твое́ достоя́ние от сопроти́вных пога́н, / росси́йския нача́льники и мно́жество владо́мых.
Песнь 7
Ирмос: Халде́йския пе́щи / всепа́губную си́лу угаси́вше / о́бразом А́нгела снизше́дшаго, / Зижди́телю ю́ноши взыва́ху: / благослове́н еси́ и хва́льный, Бо́же оте́ц на́ших.
Пра́отчи богоистка́нныя мя ри́зы враг душегу́бец обнажи́л есть, / Иису́с же Безнача́льный, явле́йся пло́тию, очи́стив водо́ю Ду́ха, па́ки мне подаде́ ю́, / Его́же позна́в, сла́вне Влади́мире, весели́шися, вопия́: / благослове́н Бог оте́ц на́ших.
Моисе́йский сохрани́в зако́н, Дании́л Боговиде́ния сподо́бися; / пра́отеческия же ты попра́в и́долы, / не я́ко во мра́це, но в бо́льшей сла́ве, разу́мно узре́л еси́ Христа́ со Отце́м и Ду́хом, / Креще́нием же просвеще́н, весели́шися, вопия́: / благослове́н Бог оте́ц на́ших.
Богородичен: Боже́ственныя обнажи́ оде́жды враг, прельсти́в первозда́ннаго пра́деда Твоего́, Де́во, / из боку́ же Твое́ю чи́стою и неискусобра́чною прише́д Спас, сла́дкий мой Иису́с, / на Него́же поте́к, а́ки на Ада́ма, но о Бо́га образи́ся и сокруши́ся лю́те. / Мы же Сы́ну Твоему́ зове́м: / благослове́н Бог оте́ц на́ших.
Ин. Ирмос: Росода́тельну у́бо пещь / соде́ла А́нгел / преподо́бным отроко́м, / халде́и же опаля́ющее / веле́ние Бо́жие мучи́теля увеща́ вопи́ти: / благослове́н еси́, Бо́же оте́ц на́ших.
Еле́ны ты но́выя любо́вию извести́лся еси́, внук быв преблаже́нныя О́льги, / Константи́н же Вели́кий но́вый яви́лся еси́, Христу́, Васи́лие, вопия́: / благослове́н еси́, Бо́же оте́ц на́ших.
Лю́тый льстец двиза́шеся на христиа́ны воева́ти, / Превели́кий же Госпо́дь в Корсу́не тя просвеща́ет, / и Креще́нию Боже́ственному сподобля́ет, / и Ца́рствие Небе́сное тебе́ дарова́л есть.
Обветша́вшую лесть бесо́вскую прогна́л еси́, я́ко вели́кий Христо́в учени́к, / обнови́в, просвети́л еси́ всех нас вопи́ти Го́сподеви немо́лчно: / благослове́н Бог оте́ц на́ших.
Богородичен: От родо́в Тя всех избра́л есть Бог Преве́чный пре́жде век / и, в после́дния дни плоть прие́м от Тебе́, / соверше́н вку́пе яви́ся Бог и Челове́к, Присноде́во.
Катавасия: Не послужи́ша тва́ри Богому́дрии, / па́че Созда́вшаго, / но о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог благослове́н еси́.
Песнь 8
Ирмос: Покрыва́яй вода́ми превы́спренняя Своя́, / полага́яй мо́рю преде́л песо́к / и содержа́й вся, / Тя пое́т со́лнце, Тя сла́вит луна́, / Тебе́ прино́сит песнь вся тварь, / я́ко Соде́телю всех во ве́ки.
Род пра́ведных благослови́тся, Боже́ственная веща́ша уста́, е́же на тебе́ сбы́стся, блаже́нне: / се́мя бо святоле́пное и богоизбра́нное прине́сл еси́ Христу́, / непобеди́мыя му́ченики, и́миже просвети́л еси́ зе́млю Росси́йскую, / и́хже похваля́юще с тобо́ю, превозно́сим Христа́ во ве́ки.
Ма́ти всех градо́в вои́стинну ца́рства твоего́ град яви́ся Ки́ев, / в не́мже Христо́с пре́жде со Отце́м и Ду́хом просла́вися / твое́ю прама́терию и тобо́ю, блаже́нне, / иде́же му́жественное твое́ те́ло лежи́т све́тло в це́ркви Влады́чицы, / мы же, лю́дие твои́, хва́ляще, пое́м Христа́ во ве́ки.
Богородичен: Безнача́льное сия́ние и Сло́во О́тчее пропове́даша нело́жно проро́честии гла́си, / из Тебе́ хотя́щаго без тли роди́тися Емману́ила, / Бо́га же и Челове́ка, кре́пкое язы́ков ча́яние, / Ему́же я́ко Ма́ти моли́ся спасти́ся нам.
Ин. Ирмос: Из пла́мене преподо́бным ро́су источи́л еси́, / и пра́веднаго же́ртву водо́ю попали́л еси́: / вся бо твори́ши, Христе́, то́кмо е́же хоте́ти. / Тя превозно́сим во вся ве́ки.
От безбо́жных и́долов всех нас изба́вил еси́, / ко Христу́ же Бо́гу приве́л еси́, о́тче, ве́рных князе́й, / наказа́теля стад твои́х, Христа́ пою́щих во ве́ки.
Константи́н новый ты извести́лся еси́ во всей Росси́йстей земли́, блаже́нне Васи́лие: / ты бо и́мя Христо́во изъясни́л еси́, / Его́же превозно́сим во ве́ки.
Царю́ ве́чному ны́не ты предстои́ши и десни́цею Его́ венча́н еси́, / моли́ся Ему́ за недосто́йныя рабы́ твоя́, / я́ко да пое́м Его́ и превозно́сим во ве́ки.
Богородичен: О́блак Сло́ва Ты еси́, Препе́тая, и свеща́ со́лнечная, / колесни́ца многоце́нная, деви́ческое возвыше́ние, гора́ ту́чная и усыре́нная, / пребыва́еши Пречи́стая Де́ва Господоимени́тая.
Катавасия: О́троки благочести́выя в пещи́ / Рождество́ Богоро́дичо спасло́ есть, / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте дела́ / и превозноси́те Его́ во вся ве́ки.
Песнь 9
Ирмос: Ужасе́ся о сем Не́бо, / и земли́ удиви́шася концы́, / я́ко Бог яви́ся челове́ком пло́тски / и чре́во Твое́ быстъ простра́ннейшее Небе́с. / Тем Тя, Богоро́дицу, / А́нгелов и челове́к чинонача́лия велича́ют.
Дави́д обре́теся пре́жде Изра́илю держа́вный царь и лю́ди спасе́, / бо́ги иноязы́чныя низложи́в, Ду́хом Бо́жия Сы́на пропове́да; / ты же в Тро́ице позна́л еси́ Бо́га, блаже́нне Васи́лие, Его́же велича́ем.
Да торжеству́ют днесь ве́село па́мять твою́ / святоле́пно в це́ркви Бо́жия Ма́тере богоизбра́ннии лю́дие, ю́же любе́зно украси́л еси́, / в па́мять ве́чную твоего́ преставле́ния, не́бо земно́е, / в не́мже почива́я, ожида́еши всестра́шныя трубы́ Арха́нгеловы, блаже́нне. / Тем тя при́сно велича́ем.
Богородичен: Ду́хом Боже́ственным распала́еми, вси ро́ди, любо́вию блажи́м Тя, Богоро́дице: / Ты бо кля́тву прама́тере разруши́ла еси́. / Приле́жно же пое́м Бо́жия Сло́ва, / Того́ бо, неопа́льно во чре́ве Твое́м прие́мши, родила́ еси́ пло́тию. / К Нему́же моли́ся, / изба́витися ве́рному Твоему́ ста́ду от вся́кия ну́жды и печа́ли.
Ин. Ирмос: Бо́га / челове́ком невозмо́жно ви́дети, / на Него́ же не сме́ют чи́ни А́нгельстии взира́ти; / Тобо́ю же, Всечи́стая, яви́ся челове́ком / Сло́во воплоще́нно, / Его́же велича́юще, / с Небе́сными во́и / Тя ублажа́ем.
Сла́док, я́коже фи́никс высо́к израща́емь, / и, цвет творя́ ма́сличный, ве́тви многопло́дныя, / ты быва́еши ви́нное израще́ние, ки́сти две созре́лы – му́ченики принося́, / Рома́на и Дави́да честны́я.
Ли́цы князе́й ны́не благоро́дных предстоя́т, / от Тебе́ благоче́стие нося́ще, с людьми́ ве́рными хва́ляще тя: / наста́вниче и ско́рый засту́пниче, помина́й всех нас, / я́ко да в ми́ре тобо́ю живо́т обря́щем.
Лю́дие Росси́йстии, прииди́те, сни́дитеся в честне́й це́ркви Влади́мира свята́го, / нарече́ннаго Васи́лия, преблаже́ннаго вели́каго кня́зя, уго́дника Христо́ва пресла́внаго, / и приими́те живо́т и спасе́ние, благода́ть и ве́лию ми́лость.
Богородичен: Бо́га, Де́во, Ты родила́ еси́ на земли́, / во пло́ти соедине́ние бысть Безпло́тное, / во еди́ней Ипоста́си и во двою́ естеству́, / да спасе́т всех нас, кла́няющихся ве́рно, я́ко Богоро́дице Пречи́стей.
Катавасия: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная, / Богоро́дице Чи́стая Присноде́во.
Светилен.
Подобен: Жены́, услы́шите:
Свети́льницы, просвети́вше вселе́нную всю благоче́стием и ве́рою, / вы яви́стеся вои́стинну, боговенча́нне Влади́мире с прама́терию Еле́ною сла́вною. / Вас возлюби́вшаго Христа́ и мы славосло́вим, ди́внаго во святы́х. (2)
Слава: В Руси́ днесь учи́тель яви́ся, Христо́ву Правосла́вную ве́ру возлюби́в, / изъя́т лю́ди своя́ от тьмы неве́дения и приведе́ ко све́ту Богоразу́мия. / Сего́ ра́ди показа́ся наста́вник и нача́льник Бо́жия благода́ти.
И ныне, Богородичен: Во двою́ во́лю и естеству́, Пренепоро́чная, / во еди́ной же Ипоста́си ражда́еши Бо́га неизрече́нно, / нас ра́ди обнища́вшего до распя́тия хоте́нием / и дарова́вшаго нам бога́тство Боже́ственное, Богома́ти Де́во.
На хвалитех стихиры на 4, глас 4.
Подобен: Дал еси́ зна́мение:
Ору́жие кре́пкое / кня́зю на́шему дал еси́, Го́споди, / Крест Твой честны́й, / и́мже поживе́ на земли́ пра́ведно, / просия́в благоче́стием, / и Ца́рству Небе́сному сподо́бися милосе́рдием Твои́м. / Те́мже Твое́ человеколю́бное смотре́ние сла́вим, / Иису́се Всеси́льне, / Спа́се душ на́ших. (2)
Дал еси́, Человеколю́бче, / благочести́вому Твоему́ уго́днику / Соломо́нову му́дрость, Дави́дову кро́тость / и апо́стольское правосла́вие, / я́ко царе́й Царь и госпо́дствующих всех Госпо́дь. / Те́мже Твое́ человеколю́бное смотре́ние сла́вим, / Иису́се Всеси́льне, / Спа́се душ на́ших.
Пе́рвый повину́л еси́ багряни́цу, / приснопо́мнимый кня́же, во́лею Христу́, / Того́ позна́в Бо́га / и я́ко Царя́ всех Благоде́теля, / побе́ды творя́ вся́кому нача́лу / и вла́сти належа́щим. / Отсю́ду тебе́, христолю́бче, ца́рство испра́вил есть / Иису́с Человеколю́бец, / Спас душ на́ших.
Слава, глас 2: Не от челове́к зва́ние прия́л еси́, / но я́ко чу́дный Па́вел, / прия́л же па́че, сла́вне, сие́ свы́ше, / Влади́мире апо́столе, от Христа́ Бо́га. / И́бо зна́мением Креста́ огради́вся / и тем уловле́н быв, / я́ко предо́брая лови́тва,/ сим победи́тель на ви́димыя и неви́димыя враги́ яви́лся еси́ непобеди́м. / Те́мже мо́лим тя, / я́ко моли́твенника те́пла, земноро́днии, / по достоя́нию па́мять твою́ почита́юще, / со дерзнове́нием проси́ти нам просвеще́ние, и очище́ние, / и ве́лию ми́лость.
И ныне, Богородичен. Славословие великое. И отпуст.
На литургии
Блаженны от обою канонов: 1-го, песнь 3-я на 4, и 2-го, песнь 6-я на 4.
Тропарь святаго, глас 4:
Уподо́бился еси́ купцу́, и́щущему до́браго би́сера, / славнодержа́вный Влади́мире, / на высоте́ стола́ сидя́ ма́тере градо́в, богоспаса́емого Ки́ева: / испыту́я же и посыла́я к Ца́рскому гра́ду уве́дети правосла́вную ве́ру, / обре́л еси́ безце́нный би́сер – Христа́, / избра́вшаго тя, я́ко втора́го Па́вла, / и оттря́сшаго слепоту́ во святе́й купе́ли, / душе́вную, вку́пе и теле́сную. / Те́мже пра́зднуем твое́ успе́ние, / лю́дие твои́ су́ще, / моли́ спасти́ся держа́вы твоея́ Росси́йския нача́льником и мно́жеству владо́мых.
Кондак, глас 8:
Подо́бствовав вели́кому апо́столу Па́влу, / в седи́нах, всесла́вне Влади́мире, / вся, я́ко младе́нческая, мудрова́ния, я́же о и́долех тща́ния, оста́вль, / я́ко муж соверше́нный, украси́лся еси́ Боже́ственнаго Креще́ния багряни́цею, / и ны́не, Спа́су Христу́ в весе́лии предстоя́, / моли́ спасти́ся держа́вы Росси́йския нача́льником и мно́жеству владо́мых.
Прокимен глас 3:
По́йте Бо́гу на́шему, по́йте, / по́йте Царе́ви на́шему, по́йте. Стих: Вси язы́цы, восплещи́те рука́ми, воскли́кните Бо́гу гла́сом ра́дования.
Апостол к Галатам, зачало 200
Бра́тие, сказу́ю вам, Благовествова́ние благовеще́нное от Мене́, я́ко несть по челове́ку. Ни бо аз от челове́ка прия́х е́, ниже́ научи́хся, но явле́нием Иису́с Христо́вым. Слы́шасте бо мое́ житие́ иногда́ в жидо́встве, я́ко попремно́гу гони́х Це́рковь Бо́жию и разруша́х ю́, и преспева́х в жидо́встве па́че мно́гих све́рстник мои́х в ро́де мое́м, и́злиха ревни́тель сый оте́ческих мои́х преда́ний. Егда́ же благоволи́ Бог, Избра́вый мя от чре́ва ма́тере моея́ и призва́вый благода́тию Свое́ю, яви́ти Сы́на Своего́ во мне, да благовеству́ю Его́ во язы́цех, а́бие не приложи́хся пло́ти и кро́ви, ни взыдо́х во Иерусали́м к пре́дним мене́ апо́столом, но идо́х во Арави́ю, и па́ки возврати́хся в Дама́ск. Пото́м же по трие́х ле́тех взыдо́х во Иерусали́м согля́дати Петра́, и пребы́х у него́ дний пятьна́десять. Ино́го же от апо́стол не ви́дех, то́кмо Иа́кова бра́та Госпо́дня.
Аллилуиа, глас 6
Стих: Вознесо́х избра́ннаго от люде́й Мои́х. Стих: И́бо рука́ Моя́ засту́пит его́ и мы́шца Моя́ укрепи́т его́.
Евангелие от Иоанна, зачало 35, от полу
Рече́ Госпо́дь ко прише́дшым к Нему́ иуде́ем: ами́нь, ами́нь глаго́лю вам, не входя́й две́рьми во двор о́вчий, но прела́зя и́нуде, той тать есть и разбо́йник. А входя́й две́рьми па́стырь есть овца́м. Сему́ две́рник отверза́ет, и о́вцы глас его́ слы́шат, и своя́ о́вцы глаша́ет по и́мени, и изго́нит их. И егда́ своя́ о́вцы иждене́т, пред ни́ми хо́дит, и о́вцы по нем и́дут, я́ко ве́дят глас его́. По чужде́м же не и́дут, но бежа́т от него́, я́ко не зна́ют чужда́го гла́са. Сию́ при́тчу рече́ им Иису́с, они́ же не разуме́ша, что бя́ше, я́же глаго́лаше им. Рече́ же па́ки им Иису́с: ами́нь, ами́нь глаго́лю вам, я́ко Аз есмь дверь овца́м. Вси, ели́ко их прии́де пре́жде Мене́, та́тие суть и разбо́йницы, но не послу́шаша их о́вцы. Аз есмь дверь: Мно́ю а́ще кто вни́дет, спасе́тся, и вни́дет, и изы́дет, и па́жить обря́щет.
Причастен:
В па́мять ве́чную бу́дет пра́ведник, / от слу́ха зла не убои́тся. / Аллилу́иа, трижды.
Святых Отец Вселенских шести соборов
Вестно буди, яко в сий 16-й день, аще случится неделя, служба поется святых отец в сию неделю; аще же в среду или вторник, поется служба их в мимошедшую неделю; аще же в четверток, поется служба их в приидущую неделю. Память совершаем святых Вселенских Шести Соборов; прилучившагося же святаго поем на повечерии.
В субботу на малей вечерни стихиры воскре́сны и Богородице, по обычаю.
На велицей вечерни
По обычном псалме пое́м: Блаже́н муж: кафизму всю.
На Го́споди, воззва́х:
стихиры воскре́сны 4 и отце́в 6, глас 6.
Подобен: Отча́янная:
Из чре́ва роди́лся еси́ пре́жде денни́цы, / от Отца́ безма́терен пре́жде век; / а́ще и А́рий тварь Тя, а не Бо́га сла́вит, / де́рзостию смеша́я Тя, Зижди́теля, тва́рем безу́мно, / вещество́ огня́ ве́чнаго себе́ сокро́вищствуяй. / Но Собо́р, и́же в Нике́и, / Сы́на Бо́жия Тя пропове́да, Го́споди, / Отцу́ и Ду́ху сопресто́льна. (2)
Раздра́нную Христо́ву ри́зу / и растерза́нную пе́сиими че́люстьми / му́дре сши́сте, честни́ и отцы́, / зре́ти наготу́ Сего́ ника́коже терпя́ще, / я́коже Сим и Иа́феф оте́ческую дре́вле, / посрами́сте несмы́сленнаго / и того́ единомы́сленники, / А́рия, гне́ву тезоимени́таго. (2)
Македо́няны, и несториа́ны, / и евтихи́аны, и диоско́ряны, / аполлинариа́ны же, и савеллиа́ны, и севи́ряны, / во́лки тя́жкия, прише́дшия в ко́жах о́вчиих, / дале́че от ста́да Спа́сова / я́коже и́стиннии па́стырие отгна́сте, / на́ги от кож о́вчиих треокая́нныя поста́вльше изря́дне. / Те́мже вы ублажа́ем. (2)
Слава, глас 6. Самогласен: Та́йныя днесь Ду́ха трубы́, / Богоно́сныя отцы́, восхва́лим, / воспе́вшия посреде́ Це́ркве / песнь сли́чную Богосло́вия, / Тро́ицу Еди́ну непреме́нную, / Существо́ же и Божество́, / низложи́тели А́риевы / и правосла́вных побо́рники, / моля́щийся всегда Го́сподеви / поми́ловатися душа́м на́шим.
И ныне, Богородичен первый, гласа. Вход. Прокимен дне. Чтения три.
Бытия чтение
Слы́шав Авра́м, я́ко плене́н бысть Лот, брата́нич его́, сочте́ свои́х си домоча́дец три́ста и осмна́десять и погна́ во след их да́же до Да́на. И нападе́ на ня но́щию сам и о́троцы его́ с ним; и порази́ их, и гони́ их до Хова́ла, е́же есть ошу́юю Дама́ска. И возврати́ вся́каго коня́ Содо́мскаго, и Ло́та, брата́нича своего́, возврати́, и вся име́ния его́, и жены́, и лю́ди. Изы́де же царь Содо́мский в сре́тение ему́, повнегда́ возврати́тися ему́ от се́ча ходоллогомо́рскаго и с царьми́, и́же с ним, во удо́ль Сави́ну, сие́ же бя́ше по́ле царе́во. И Мелхиседе́к, царь Сали́мский, изнесе́ хле́бы и вино́, бя́ше же свяще́нник Бо́га Вы́шняго. И благослови́ Авра́ма, и рече́: благослове́н Авра́м Бо́гу Вы́шнему, И́же созда́ Не́бо и зе́млю, и благослове́н Бог Вы́шний, И́же предаде́ враги́ твоя́ под ру́ки тебе́.
Втораго закона чтение
Во днех о́нех рече́ Моисе́й к сыно́м Изра́илевым: ви́дите, преда́х пред лице́м ва́шим зе́млю, вше́дше, насле́дуйте ю, ю́же кля́тся Госпо́дь отце́м ва́шим, Авраа́му, и Исаа́ку, и Иа́кову, да́ти им и се́мени их по них. И реко́х к вам во вре́мя о́но, глаго́ля: не возмогу́ еди́н води́ти вас. Госпо́дь Бог ваш умно́жил вы есть, и се есте́ днесь, я́ко зве́зды небе́сныя, мно́жеством. Госпо́дь Бог оте́ц на́ших да приложи́т вам, я́ко да бу́дете ты́сящами сугу́бо, и да благослови́т вас, я́коже глаго́ла вам. И взях от вас му́жи му́дры, и све́домы, и смы́сленны, и поста́вих их владе́ти над ва́ми, тысященача́льники, и стонача́льники, и пятьдесятонача́льники, и десятонача́льники, и письмоводи́тели судия́м ва́шим. И запове́дах судия́м ва́шим во вре́мя о́но, глаго́ля: разслу́шайте посреде́ бра́тий ва́ших и суди́те пра́ведно посреде́ му́жа, и посреде́ бра́та его́, и посреде́ прише́льца его́. Да не позна́ете лица́ в суде́, ма́лому и вели́кому су́диши и не устыди́шися лица́ челове́ческа, я́ко суд Бо́жий есть.
Втораго закона чтение
Во днех о́нех рече́ Моисе́й к сыно́м Изра́илевым: се Го́спода Бо́га твоего́ не́бо и не́бо небесе́, земля́ и вся, ели́ка суть на ней. Оба́че отцы́ ва́ша произво́ли Госпо́дь люби́ти их и избра́ се́мя их по них, вас, па́че всех язы́к, в день сей. И обре́жите жестокосе́рдие ва́ше, и вы́я ва́ша не ожесточи́те ктому́. И́бо Госпо́дь Бог ваш, Сей Бог бого́в и Госпо́дь господе́й, Бог вели́кий, и кре́пкий, и стра́шный, И́же не диви́тся лицу́, ниже́ взе́млет дар. Творя́й суд прише́льцу, и си́ру, и вдови́це и лю́бит прише́льца, да́ти ему́ хлеб и ри́зу. И возлюби́те прише́льца, прише́льцы бо бе́сте в земли́ Еги́петстей. Го́спода Бо́га твоего́ да убои́шися, и Тому́ еди́ному послу́жиши, и к Нему́ прилепи́шися, и И́менем Его́ клене́шися. Той хвала́ твоя́, и Той Бог твой, и́же сотвори́л ти есть вели́кая и сла́вная сия́, я́же ви́десте о́чи твои́.
На литии стихира храма
Слава, глас 3: Апо́стольских преда́ний / изве́стнии храни́телие бы́сте, святи́и отцы́, / Святы́я бо Тро́ицы единосу́щное правосла́вно пропове́давше, / А́риево хуле́ние собо́рне низложи́сте, / с ни́мже и Македо́ния духобо́рца обличи́вше, / осуди́сте Несто́рия, / Евти́хия и Диоско́ра, / Саве́ллия же и Севи́ра безгла́внаго. / И́хже пре́лести испроси́те изба́витися нам / и нескве́рну на́шему житию́ / в ве́ре сохрани́тися, мо́лимся.
И ныне, Богородичен: Без се́мене от Боже́ственнаго Ду́ха / во́лею же О́тчею зачала́ еси́ Сы́на Бо́жия, / от Отца́ без ма́тере пре́жде век су́ща, / нас же ра́ди, из Тебе́ без отца́ бы́вша, пло́тию родила́ еси́ / и Младе́нца млеко́м пита́ла еси́. / Те́мже не преста́й моли́ти / изба́витися от бед душа́м на́шим.
На стиховне Октоиха
Слава, глас 4: Моле́бную па́мять днесь Богоно́сных отце́в, / от всея́ вселе́нныя собра́вшихся / во све́тлем гра́де Нике́йстем, / правосла́вных собра́ния, / благоче́ствующе ве́рно, пра́зднуем. / Си́и бо лю́таго А́рия безбо́жное веле́ние благочестному́дренне низложи́ша, / и от Собо́рныя Це́ркве собо́рне того́ изгна́ша, / и я́сно Сы́на Бо́жия Единосу́щна и Соприсносу́щна, / пре́жде век Су́ща, / всех научи́ша испове́дати во изображе́нии ве́ры, / изве́стно и благоче́стно сие́ изложи́вше. / Те́мже и мы, Боже́ственным их повеле́нием после́дствующе, / изве́стно ве́рующе, слу́жим / со Отце́м Сы́ну и Ду́ху Всесвято́му во Еди́ном Божестве́, / Тро́ице Единосу́щней.
И ныне, Богородичен: При́зри на моле́ния Твои́х раб, Всенепоро́чная, / утоля́ющи лю́тая на ны воста́ния, / вся́кия ско́рби нас изменя́ющи. / Тя бо, Еди́ну, тве́рдое и изве́стное Утвержде́ние и́мамы, / и Твое́ предста́тельство стяжа́хом. / Да не постыди́мся, Влады́чице, Тя призыва́ющии, / потщи́ся на умоле́ние, Тебе́ ве́рно вопию́щих: / ра́дуйся, Влады́чице, всех По́моще, / Ра́досте и Покро́ве, и Спасе́ние душ на́ших.
На благословении хле́бов тропарь: Богоро́дице Де́во: дважды.
И тропарь отцев, глас 8:
Препросла́влен еси́, Христе́ Бо́же наш, / свети́ла на земли́ отцы́ на́ша основа́вый / и те́ми ко и́стинней ве́ре вся ны наста́вивый, / Многоблагоутро́бне, сла́ва Тебе́. (Единожды).
На утрени
На Бог Госпо́дь: тропарь воскресный, дважды.
Слава, тропарь отцев, глас 8:
Препросла́влен еси́, Христе́ Бо́же наш, / свети́ла на земли́ отцы́ на́ша основа́вый / и те́ми ко и́стинней ве́ре вся ны наста́вивый, / Многоблагоутро́бне, сла́ва Тебе́. (Единожды).
И ныне, Богородичен: И́же нас ра́ди рожде́йся от Де́вы / и распя́тие претерпе́в, Благи́й, / испрове́ргий сме́ртию смерть и воскресе́ние явле́й я́ко Бог, / не пре́зри, я́же созда́л еси́ руко́ю Твое́ю. / Яви́ человеколю́бие Твое́, Ми́лостиве. / Приими́ ро́ждшую Тя Богоро́дицу, моля́щуюся за ны. / И спаси́, Спа́се наш, лю́ди отча́янныя.
По кафизмах седальны Октоиха.
Канон воскресный со ирмосом на 4, и Богородицы на 2, и отцев на 8.
Творение священнаго и вселенскаго
Патриарха кир Германа, глас 6.
Песнь 1
Ирмос: Я́ко по су́ху, пешеше́ствовав Изра́иль / по бе́здне стопа́ми, / гони́теля фарао́на / ви́дя потопля́ема, / Бо́гу побе́дную песнь пои́м, вопия́ше.
И́же от Нике́и, я́коже от не́коего небесе́, / всю́ду возгреме́вше Сло́во Жива́го Отца́ и Сего́ показа́вше враги́, гро́мом избие́ны, / свяще́нными словесы́ да почту́тся.
Духобо́рцев дух лука́вый Святы́м Ду́хом Христо́с от Своея́ Це́ркве дале́че отгна́, / вторы́м де́йством Собо́ра совокупи́в.
Христобо́рца пре́лесть изгна́ Несто́рия Кири́лл, Собо́ра нача́льник, / и́же я́сно Де́ву Мари́ю испове́да, Бо́гу Ма́терь Чи́стую.
Богородичен: Несозда́нныя Тро́ицы Еди́наго Христа́ во двою́ естеству́ и хоте́нию, Чи́стая, ражда́еши, / соедине́ние челове́ком и А́нгелом Тебе́ ра́ди соде́лавшаго.
Другий канон святых отцев,
глас 8. Песнь 1
Ирмос: Колесницегони́теля фарао́ня погрузи́ / чудотворя́й иногда́ / Моисе́йский жезл, крестообра́зно порази́в, / и раздели́в мо́ре, / Изра́иля же беглеца́, пешехо́дца спасе́, / песнь Бо́гови воспева́юща.
Оте́ц благочести́вое собра́ние, сте́кшееся иногда́ на Евти́ха, / вои́стинну Спа́са пропове́да в неразде́льных естества́х сугу́бых, / Боже́ственнаго отца́ Кири́лла уче́нием ше́ствующее я́ве и пребыва́ющее.
Число́ шестьсо́т тридеся́тое благочести́вейших муже́й, / Евти́хову пре́лесть и Севи́рову е́ресь низло́жше, / достиго́ша воспе́ти си́це: / Христа́ во двою́ существу́ пропове́дуем, / ше́ствующе рече́нием Кири́лла блаже́ннаго.
И́же не пропове́дует, во двою́ естеству́ и де́йствиих Христа́, Сло́во О́тчее, / прии́мет ана́фему, / четве́ртый бо Собо́р святы́х оте́ц единому́дренно си́це пропове́да. / Вси у́бо их да ублажи́м.
Богородичен: Пресла́вная о Тебе́ возглаго́лашася в ро́дех родо́в, / Я́же Бо́га Сло́ва во чре́ве вмести́вшая, чиста́ же пребы́вши, Богоро́дице Мари́е, / тем Тя вси почита́ем, по Бо́зе Предста́тельницу на́шу.
Катавасия: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.
Песнь 3
Ирмос: Несть свят, / я́коже Ты, Го́споди Бо́же мой, / вознесы́й рог ве́рных Твои́х, Бла́же, / и утверди́вый нас на ка́мени / испове́дания Твоего́.
Тва́ри служи́тель я́влься А́рий безу́мный, / и Македо́ний па́ки ме́рзок я́влься, / в гее́нне о́гненней ра́вно му́чатся со е́ллины.
Седмию́ Собо́ры свяще́нными святы́х оте́ц / честну́ю Це́рковь уясни́л еси́, Христе́, / я́коже седми́х свети́ льник све́том пре́лести тьму прогна́в дале́че.
Ста́до Твое́, Сло́ве, погубля́ет многообра́зная кра́ста ерети́к, / па́стырие же Твои́х слове́сных ове́ц уче́нием сие́ премени́ша.
Богородичен: Еди́наго родила́ еси́, Пречи́стая, / от Несозда́нныя Тро́ицы во двою́ существу́ и хоте́нию, / Его́же о́бразу честно́му покланя́емся, благода́ти исполня́еми.
Ин. Ирмос: Утвержде́й в нача́ле Небеса́ ра́зумом, / и зе́млю на вода́х основа́вый, / на ка́мени мя, Христе́, за́поведей Твои́х утверди́, / я́ко несть свят, па́че Тебе́ / Еди́не Человеколю́бче.
И́же Севи́ра безсту́дно прекло́ншеся словесе́м, я́да смертото́чнаго испо́лненным, / посрами́теся при́сно, отлуча́ющеся вси Це́ркве, / я́коже во́лцы и пси хи́щнии.
Лико́вственницы и ве́рнии, Вседе́теля и Спа́са / во двою́ неразде́льных существа́х и хоте́ниих сугу́бых и де́йствиих почита́ем, / те́мже Севи́ра пре́лести вконе́ц отвраща́емся.
Прииди́те, Севи́ра и Иа́кова неблагополу́чных пре́лесть, / с си́ми Феодо́сия, Диоско́ра отме́щем я́ве, / четве́ртый же Собо́р благочести́вых оте́ц воспое́м пе́сньми Боже́ственными.
Богородичен: Херуви́м и Серафи́м яви́лася еси́ вы́шши, Богоро́дице: / Ты бо еди́на прия́ла еси́ Невмести́маго Бо́га во Твое́м чре́ве, Нескве́рная. / Те́мже Тя, вси ве́рнии, пе́сньми, Чи́стая, ублажа́ем.
Катавасия: Твоя́ песносло́вцы, Богоро́дице, / живы́й и незави́стный Исто́чниче, / лик себе́ совоку́пльшия, духо́вно утверди́, / в Боже́ственней Твое́й сла́ве / венце́в сла́вы сподо́би.
Кондак и икос воскресный,
таже седален отцев, глас 4.
Подобен: Ско́ро предвари́:
Свети́льницы пресве́тлии и́стины Христо́вы ми́ру яви́стеся на земли́, / вои́стинну блаже́ннейший, отцы́ Боговеща́ннии, / изсуши́вше е́реси ху́льных языковре́дий / и угаси́вше пламенови́дная злосла́вных смуще́ния: / те́мже, я́ко святи́телие Христо́вы, моли́теся спасти́ся нам. (2)
Слава, и ныне, Богородичен: Обнови́ла еси́, Чи́стая, Боже́ственным Рождество́м Твои́м / истле́вшее во страсте́х земноро́дных ме́ртвенное существо́ / и воздви́гла еси́ вся от сме́рти к животу́ нетле́ния. / Те́мже Тя по до́лгу блажи́м вси, Де́во Препросла́вленная, я́коже прорекла́ еси́.
Песнь 4
Ирмос: Христо́с моя́ си́ла, / Бог и Госпо́дь, / честна́я Це́рковь / боголе́пно пое́т, взыва́ющи, / от смы́сла чи́ста, о Го́споде пра́зднующи.
Врази́ Твои́ возшуме́ша, и ненави́дящии Тя главу́ воздвиго́ша, Спа́се, вма́ле, / но а́бие падо́ша, не терпя́ще гла́са труб духо́вных.
Со́лнца Со́лнцы сугу́бо озари́ша, / Сын и Дух от Отца́, несозда́ни, Собезнача́льни: / Обои́м Оте́ц Еди́н вино́вен ве́руется.
Седмь у́бо духо́в, и́же почи́ша на Христе́, Иса́ия сие́ рече́, / на седми́х же Собо́рех почи́ Христо́с со Отце́м и Боже́ственным Ду́хом.
Богородичен: Бо́га родила́ еси́, плоть носи́вшаго, / от чи́стых Твои́х крове́й, Отрокови́це Чи́стая, / Его́же, сугу́ба естество́м, во Ипоста́си же еди́ней, отцы́ пропове́даша.
Ин. Ирмос: Ты моя́ кре́пость Го́споди, / Ты моя́ и си́ла, / Ты мой Бог, Ты мое́ ра́дование, / не оста́вль не́дра О́тча, / и на́шу нищету́ посети́в. / Тем с проро́ком Авваку́мом зову́ Ти: / си́ле Твое́й сла́ва, Человеколю́бче.
Рцы нам, безу́мный Севи́ре и су́етный: / еди́но естество́ сло́жно безнача́льно, свет Сло́во О́тчее и Сы́на? / А́ще бо си́це рече́ши, и друго́е естество́ знамена́л еси́: / плоть бо и Сло́во, не еди́но существо́, но сугу́бо су́щее, окая́нне.
Еди́но ре́кши естество́ Сло́ва, наведе́ вопло́щшееся естество́ челове́чества, / кроме́ измене́ния вся́чески и смеше́ния, / александри́ом учи́тель же и председа́тель, / я́сно два естества́ и хоте́ния науча́я правосла́вно му́дрствовати хотя́щих.
Два естества́ Христо́ва вси пропове́даем неслия́нно, / вся́кое нече́стие Евти́хия, ве́рнии, а́бие и Диоско́ра безу́мнаго попира́юще, / после́дуем преде́лу святы́х оте́ц и Кири́лла Боже́ственнаго рече́нием.
Богородичен: Херуви́мское носи́ло Ты, Богома́ти Чи́стая, / Ты вмести́лище, Ты и прия́телище Сло́ва О́тча и Бо́га, / от пречи́стых ложе́сн в плоть обле́кшагося. / Те́мже, во двою́ существу́ из Тебе́ Вопло́щшемуся покланя́ющеся, непреста́нно сла́вим.
Катавасия: Седя́й в Сла́ве / на Престо́ле Божества́ / во о́блаце ле́гце, / прии́де Иису́с Пребоже́ственный, / Нетле́нною Дла́нию / и спасе́ зову́щия: / сла́ва, Христе́, си́ле Твое́й.
Песнь 5
Ирмос: Бо́жиим све́том Твои́м, Бла́же, / у́тренюющих Ти ду́ши любо́вию озари́, молю́ся, / Тя ве́дети, Сло́ве Бо́жий, / и́стиннаго Бо́га, / от мра́ка грехо́внаго взыва́юща.
Боже́ственный виногра́д Христо́в, и́же от Еги́пта пренесе́н, / те́мнаго отча́янна губи́теля зве́рие пе́рвее пояда́ху, / пра́щею же святы́х оте́ц дале́че отгна́шася.
Боже́ственным сия́нием трисия́нным ум просве́щше, / честни́и отцы́ Еди́наго пропове́даша Честны́я Тро́ицы Христа́ Го́спода, / сугу́ба естествы́ и хоте́нии.
Троичен: В ве́щных, я́коже в серафи́мских, му́дрыми отцы́, о Тро́ице, / Це́рковь онебеси́ся, Трисвяту́ю песнь при́сно Тебе́ пою́щи, / собира́ет Тро́ическое Твое́ Еди́но Божество́.
Богородичен: Ма́ти и раба́ Твоего́ Сы́на бы́ла еси́, Чи́стая, / и́бо И́же из Тебе́ пре́жде Тебе́ бя́ше, я́ко Соде́тель Твой, / Его́же во двою́ существу́ познава́ем и соединя́ем Сло́вом Ипоста́сным.
Ин. Ирмос: Вску́ю мя отри́нул еси́ / от лица́ Твоего́, Све́те Незаходи́мый, / и покры́ла мя есть чужда́я тьма, окая́ннаго; / но обрати́ мя, / и к све́ту за́поведей Твои́х / пути́ моя́ напра́ви, молю́ся.
О Севи́ре! Есте́ств Христо́вых не слива́й лю́те, законопресту́пне, / и́бо жри́телие и преблаже́ннии учи́телие вси, / во двою́ существу́ и во Еди́ном Христо́вом Лице́ провозвести́вше, всем изложи́ша.
Прия́т естество́ челове́ческое я́ве Безнача́льный, О́тчее Сло́во, / я́ко Человеколю́бец, хотя́ уще́дрити нас, поги́бших. / Те́мже Того́ пропове́дую во двою́ существу́ и хоте́нию.
Низложи́в Севи́ра четве́ртый Собо́р и Диоско́ра, Христа́ ху́лящия, / извеща́я сви́ток Лео́нта, первоседа́льника Ри́мскаго, зело́ до́бре, / сугу́ба естества́ Спа́сова несеко́мо явля́я.
Богородичен: Ма́тернее дерзнове́ние, е́же к Сы́ну Твоему́ иму́щи, Всечи́стая, / сро́днаго промышле́ния, е́же о нас, не пре́зри, мо́лимся, / я́ко Тебе́ и еди́ну, христиа́не, ко Влады́це очище́ние ми́лостивно предлага́ем.
Катавасия: Ужасо́шася вся́ческая / о Боже́ственней сла́ве Твое́й: / Ты бо, Неискусобра́чная Де́во, / име́ла еси́ во утро́бе над все́ми Бо́га / и родила́ еси́ Безле́тнаго Сы́на, / всем воспева́ющим Тя / мир подава́ющая.
Песнь 6
Ирмос: Жите́йское мо́ре, / воздвиза́емое зря напа́стей бу́рею, / к ти́хому приста́нищу Твоему́ прите́к, вопию́ Ти: / возведи́ от тли живо́т мой, / Многоми́лостиве.
Бог богов Госпо́дь, – Дави́д, пре́жде воспе́в, глаго́ла / и призва́ от восто́к, от коне́ц всея́ земли́, да́же до за́пад их, / Вселе́нския Собо́ры оте́ц назна́менуя.
Седмь столпо́в утверди́ прему́дрость Бо́жия, / Твою́ Це́рковь, Влады́ко, седмочи́сленными Собо́ры свяще́нных оте́ц / неукло́нну соблюда́ему от вся́ких ересе́й.
Стыд лица́ да покры́ет Евти́хия и Диоско́ра, слия́ние буесло́вивших естества́ Христо́ва: / не в привиде́нии бо, но во обоже́нии естество́ земноро́дных прия́т.
Богородичен: Да во́змется Несто́рий во евре́йския те́мныя собо́ры, / и язы́к же отсече́тся ху́льный: / Бо́га бо роди́ Де́ва Мари́я, Плотоно́сца нам.
Ин. Ирмос: Очи́сти мя, Спа́се, / мно́га бо беззако́ния моя́, / и из глубины́ зол возведи́, молю́ся: / к Тебе́ бо возопи́х, / и услы́ши мя, / Бо́же спасе́ния моего́.
Два посла́ния Кири́лла, я́же ко Си́нгелу по́сланная иногда́, / восто́ку преоблада́ющу, облича́ют Севи́рову всю пре́лесть, / благоче́стно Христа́ пропове́дующая.
Кири́лл Христа́ пропове́дует во двою́ естеству́ и де́йствиих сугу́бых, / Севи́ра несмы́сленнаго е́ресь отсеца́я. / Те́мже вси во уче́ниих того́ пребу́дем.
Богородичен: Де́ву Тя и Чи́стую Пресла́вную, Богороди́тельнице Мари́е, / благочести́вии, вои́стину пропове́дуем, / загражда́юще безсту́дная уста́ Несто́рия и Диоско́ра зломы́слие.
Катавасия: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.
Кондак, глас 8.
Подобен: Я́ко нача́тки:
Апо́стол пропове́дание и оте́ц догма́ты / Це́ркве еди́ну ве́ру запечатле́ша, / я́же и ри́зу нося́щи и́стины, истка́нну от е́же свы́ше Богосло́вия, / исправля́ет и сла́вит благоче́стия вели́кое та́инство.
Икос: Высо́ким пропове́данием Бо́жию Це́рковь услы́шим, вопию́щу: / жа́ждай, да гряде́т ко мне и пие́т ча́шу, ю́же держу́, / ча́ша есть прему́дрости. / Сие́ питие́ и́стины сло́вом почерпо́х, во́ду пролива́ющую не прекосло́вия, / но испове́дания, ю́же пия́, ны́нешний Изра́иль Бо́га зрит, веща́юща: / ви́дите, ви́дите, я́ко Сам Аз есмь и не пременя́юся: / Аз Бог пе́рвый, Аз же и по сих, и ра́зве Мене́, несть ино́го отню́д. / Отсю́ду причаща́ющийся насы́тятся / и восхва́лят благоче́стия вели́кое та́инство.
Песнь 7
Ирмос: Росода́тельну у́бо пещь / соде́ла А́нгел / преподо́бным отроко́м, / халде́и же опаля́ющее / веле́ние Бо́жие мучи́теля увеща́ вопи́ти: / благослове́н еси́, Бо́же оте́ц на́ших.
Вавило́нскаго у́бо зми́я разрази́ Дании́л пе́рвее, / моли́твами же оте́ц прося́деся лю́тый еги́петский змий, / я́ве А́рий, пояда́ющий Христо́во ста́до.
Непроще́ным нече́стием негодова́ волк Македо́ний, / прирази́вся Ду́ху, обожа́ющему челове́ки / и вся ба́нею Креще́ния на пе́рвую добро́ту вообража́ющу ве́рныя.
Диоско́р, и Евти́х, и Севи́р Левиафа́м, / трие́, слива́ющии и смеша́ющии Христо́ва существа́ смеше́нием у́мным, / к Тро́ице Честне́й прирази́шася де́рзостию.
Богородичен: Плотска́го Твоего́ зра́ка о́браз, Влады́ко, че́стно облобыза́ем, / и Ма́тере Твоея́, и святы́х всех, / по́честь ве́дяще пра́вым по́мыслом преходи́ти до́бре к первообра́зному.
Ин. Ирмос: Бо́жия снизхожде́ния / огнь устыде́ся в Вавило́не иногда́. / Сего́ ра́ди о́троцы в пещи́ ра́дованною ного́ю, / я́ко во цве́тнице лику́юще поя́ху: / благослове́н еси́, Бо́же оте́ц на́ших.
Во двою́ у́бо естеству́ и де́йствиях испове́дающе Христа́, / несли́тне, непрело́жне, пре́лесть Севи́ра побежда́ем, / те́мже, пло́ти прия́тием страсть претерпе́вшему, вопие́м Ему́: / благослове́н Бог оте́ц на́ших.
Еди́наго разуме́ем, И́же на дре́ве и в не́дрех Оте́ческих, / я́ко Бо́га в Вы́шних и во гро́бе, я́ко совокупле́нна пло́тию. / Ему́же пое́м, согла́сно взыва́юще: / благослове́н еси́, Бо́же оте́ц на́ших.
А́риево истоща́ние, пресече́ние же, Бо́га умаля́ющаго, ве́рнии, / соединомы́слие а́бие Саве́ллиево, / Тро́ическия враги́ возненави́девше, Тро́ице возопие́м: / благослове́н Бог оте́ц на́ших.
Троичен: Всех у́бо Госпо́дь, Еди́наго же то́чию Единоро́днаго Сы́на, / правосла́вно Отца́ богосло́вяще, Тя возвеща́ем, / и Еди́н ве́дяще Твой исходя́щий Дух, прав, сра́слен и Соприсносу́щен.
Катавасия: Не послужи́ша тва́ри Богому́дрии, / па́че Созда́вшаго, / но о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог благослове́н еси́.
Песнь 8
Ирмос: Из пла́мене преподо́бным ро́су источи́л еси́, / и пра́веднаго же́ртву водо́ю попали́л еси́: / вся бо твори́ши, Христе́, то́кмо е́же хоте́ти. / Тя превозно́сим во вся ве́ки.
Я́коже еди́наго ко́рене о́трасли Богоса́дны, Сын и Дух возсия́вше: / и́бо Оте́ц Единовино́вен есть, Безле́тный, Безле́тным Ли́цам Единоче́стен.
Из чре́ва невеще́ственна безле́тно возсия́л еси́, / Единосу́щное Сло́во Отцу́ и Ду́ху, / но нас ра́ди в ле́тнюю всели́ся веще́ственную утро́бу еди́ныя Богоро́дицы.
Разжже́нныя стре́лы огне́м духо́вным / в студе́ная сердца́ враго́в вонзо́шася еретико́в и на смерть удави́ша их / совокупле́нии оте́ц седмочи́сленных и Боже́ственных.
Богородичен: Не ли́цы Еди́наго Христа́ сла́вим, не смеше́нием существа́ Сего́ соединя́ем: / Еди́н бо Сый и То́йже Лице́м, раздвоя́ется естествы́, / Де́во, Твой Сын и Соде́тель.
Ин. Ирмос: Седмери́цею пещь халде́йский мучи́тель / Богочести́вым неи́стовно разжже́, / си́лою же лу́чшею спасе́ны сия́ ви́дев, / Творцу́ и Изба́вителю вопия́ше: / о́троцы, благослови́те, / свяще́нницы, воспо́йте, / лю́дие, превозноси́те во вся ве́ки.
Да постыдя́тся ли́ца, и да заградя́тся уста́, / не пропове́дающих во двою́ естеству́ / несеко́мо, непрело́жно же и несли́тно, Еди́наго Сы́на: / благочести́вии бо мы прославля́ем, / и́нако у́бо и и́нако, де́йствовати же и хоте́ти Христу́, / не у́бо ли́цы, но во двои́х естества́х.
И́же Иа́кова иму́щии Кенто́на назва́ние, того́жде и́мя себе́ напису́ющии, отвеща́йте нам: / а́ще в назва́нии его́ вы в купе́ли крести́стеся дре́вле? / Те́мже сих ра́ди благода́ти Христа́ отступи́сте вои́стинну, / во́лею со лжи́вым сим безсту́дствующе.
В Халкидо́не Собо́р четве́ртый Диоско́ра, Евти́ха же и Севи́ра лю́тых низложи́ / и до конца́ отсече́ терно́вную их пре́лесть, / слия́тельную суще́ств Спа́совых, от Це́ркве Христа́ и Влады́ки; / с не́юже правосла́вящии, возненави́дим сих.
Троичен: Трисве́тлую Божества́ еди́нственную сия́ющую зарю́ от Еди́наго Триипоста́снаго Естества́: / Роди́теля Безнача́льна, сра́слена же Сло́ва О́тча и сца́рствующий Единосу́щный Дух, / де́ти, благослови́те, свяще́нницы, воспо́йте, / лю́дие, превозноси́те Его́ во вся ве́ки.
Богородичен: Богороди́тельнице Пречи́стая, души́ моея́ я́звы и грехо́вныя собла́зны очи́сти, / исто́чником омыва́ющи из ребр Сы́на Твоего́ и и́же из них исте́кшими струя́ми, / к Тебе́ бо взыва́ю, и к Тебе́ прибега́ю, и Тебе́ призыва́ю, Богоблагода́тную.
Катавасия: О́троки благочести́выя в пещи́ / Рождество́ Богоро́дичо спасло́ есть, / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте дела́ / и превозноси́те Его́ во вся ве́ки.
Песнь 9
Ирмос: Бо́га / челове́ком невозмо́жно ви́дети, / на Него́ же не сме́ют чи́ни А́нгельстии взира́ти; / Тобо́ю же, Всечи́стая, яви́ся челове́ком / Сло́во воплоще́нно, / Его́же велича́юще, / с Небе́сными во́и / Тя ублажа́ем.
Не подоба́ет приложи́ти или́ оста́вити что Свяще́ннаго Преда́ния правосла́вныя на́шея ве́ры: / в не́йже бо ве́рно крести́хомся, / а и́же приложи́тели сея́ ве́ры впра́вду пре́дани бу́дут преще́нию прокля́тия.
Ра́достию се́рдца вси взыгра́им, свяще́нныя Собо́ры оте́ц совоку́пльше: / тех бо ра́ди свет ви́дехом правосла́вия. / Свети́льницы бо яви́шася, вся наставля́юще к пра́вым уче́ния обре́тением.
Душа́м испро́сим очище́ние и благоче́стно житие́ препроводи́ти потщи́мся, / я́ко да прича́стницы бу́дем святы́м отце́м, / и́же скры́ша пра́вых уче́ний бога́тство нам, ча́дом их.
Богородичен: Бог от боку́ Твое́ю возсия́, Ма́ти Бо́жия, и челове́ческий род обожи́, / и сла́вы Своея́ сподо́би, и насле́дники вся показа́, / и́же Тя Богоро́дицу вои́стинну при́сно пропове́дающия.
Ин. Ирмос: Ужасе́ся о сем Не́бо, / и земли́ удиви́шася концы́, / я́ко Бог яви́ся челове́ком пло́тски, / и чре́во Твое́ бысть простра́ннейшее Небе́с. / Тем Тя, Богоро́дицу, / А́нгелов и челове́к чинонача́лия велича́ют.
Преше́д Севи́р Христо́ву благосла́вную Це́рковь льсти́вый, / и отмще́ние сове́том оте́ц благочести́вых хуле́ния ра́ди и хитростносло́вия своего́ прия́т пра́ведно, / и отрева́ется учи́телей сосло́вия, осужде́нный.
Естества́ Христо́ва что слива́еши и смеше́ние вво́диши и сли́тие, / Кре́стную страсть и погребе́ние прилага́яй безстра́стному Божеству́ / Единоро́днаго Сло́ва Бо́жия, о окая́нне Севи́ре? / Те́мже вели́каго твоего́ хуле́ния гнуша́емся.
Богородичен: Бро́ви и де́рзость вку́пе вражде́бных рожде́йся от Де́вы низложи́ / и сове́ты злосло́вящих Соде́теля, / ве́рных же Собо́р утверди́ непоколе́блем, я́ко Бог, / рог вознесы́й и ве́рою укрепи́вый, да Тя вси велича́ем.
Катавасия: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная, / Богоро́дице Чи́стая Присноде́во.
Светилен.
Подобен: Жены́, услы́шите:
Оте́ц Боже́ственных днесь па́мять пра́зднующе, моле́ньми тех мо́лим, Всеще́дре: / вся́каго вре́да ересе́й изба́ви лю́ди Твоя́, Го́споди, / и вся сподо́би Отца́, Сло́во сла́вити и Всесвята́го Ду́ха.
Богородичен. Подобен: Ра́дуйся, Бо́жия пала́то. / Ра́дуйся, горо́ присе́нная. / Ра́дуйся, Неопали́мая купино́. / Ра́дуйся, престо́ле сла́вы. / Ра́дуйся, Боже́ственная трапе́зо. / Ра́дуйся, ру́чко всезла́тая. / Ра́дуйся, свети́льниче всесве́тлый. / Ра́дуйся, ле́гкий о́блаче, Де́во Ма́ти Мари́е.
На хвалитех стихиры воскресны 4 и отцев 4,
глас 6. Подобен: Все отло́жше:
Все собра́вше душе́вное худо́жество, / и Боже́ственным Ду́хом сразсмотри́вше, / Небе́сный и честны́й Симво́л ве́ры / честни́и отцы́ богопи́санне начерта́ша, / в не́мже я́вственнейше / ро́ждшему Собезнача́льнаго Сло́ва науча́ют / и всеи́стинно Единосу́щнаго, / апо́стольским после́дующе я́ве уче́нием, / благосла́внии и пребога́тии, / вои́стинну и Богому́дрии. (2)
Стих: Благослове́н еси́, Го́споди, Бо́же оте́ц на́ших, / и хва́льно и просла́влено И́мя Твое́ во ве́ки.
Все прие́мше, у́мное сия́ние Свята́го Ду́ха, / преесте́ственное благосло́вие / кра́ткими глаго́лы и мно́гим ра́зумом / богодухнове́нно провеща́ша, / я́ко Христо́вы пропове́дницы, / Ева́нгельских предста́телие уче́ний, блаже́ннии, / и благочести́вых преда́ний, / свы́ше прие́мше сих открове́ние я́ве / и просве́щшеся, изложи́ша ве́ру Богонауче́нную.
Стих: Собери́те Ему́ / преподо́бныя Его́.
Все собра́вше па́стырское иску́сство / и я́рость подви́гше ны́не пра́веднейшую, / отмсти́тельне тя́жкия отгна́ша и па́губныя во́лки, / пра́щею Ду́ха изве́ргше от церко́внаго исполне́ния, / па́дшия я́ко к сме́рти / и я́ко неисце́льно неду́говавшия, / Боже́ственнии па́стырие, / я́ко раби́ и́стиннейшии Христо́вы, / и Боже́ственнаго пропове́дания таи́нницы свяще́ннейший.
Слава, глас 8. Георгия Никомидийскаго:
Святы́х отце́в лик, / от коне́ц вселе́нный сте́кшийся, / Отца́, и Сы́на, и Ду́ха Свята́го / Еди́но Существо́ научи́ша и естество́, / и та́йну Богосло́вия я́сно преда́ша Це́ркви. / И́хже похваля́юще, ве́рою ублажи́м, глаго́люще: / о Боже́ственный по́лче, / Богоглаго́ливии ору́жницы ополче́ния Госпо́дня, / зве́зды многосве́тлыя мы́сленныя тве́рди, / таи́нственнаго Сио́на необори́мии столпи́, / миродохнове́ннии цве́ти ра́йстии, / всезлата́я уста́ Сло́ва, / нике́йская похвало́, вселе́нныя украше́ние, / приле́жно моли́теся о душа́х на́ших.
И ныне: Преблагослове́нна еси́, Богоро́дице Де́во: Славословие великое.
По трисвятом тропарь воскресный точию: Ектении. И отпуст. И оглашение Студитово. И исхождение в притвор. Сла́ва, и ны́не, стихира Евангельская. И час 1-й. И конечный отпуст. На часех тропарь воскресный: Сла́ва, отцев: И ны́не, Богородичен часов. По О́тче наш: кондак воскресный.
На литургии
Блаженны Октоиха на 6 и отцев, песнь 3-я на 4.
По входе тропарь воскресный
и отцев, глас 8:
Препросла́влен еси́, Христе́ Бо́же наш, / свети́ла на земли́ отцы́ на́ша основа́вый / и те́ми ко и́стинней ве́ре вся ны наста́вивый, / Многоблагоутро́бне, сла́ва Тебе́.
Таже кондак воскресный. Сла́ва, кондак отцев, глас 8.
Подобен: Я́ко нача́тки:
Апо́стол пропове́дание и оте́ц догма́ты / Це́ркве еди́ну ве́ру запечатле́ша, / я́же и ри́зу нося́щи и́стины, истка́нну от е́же свы́ше Богосло́вия, / исправля́ет и сла́вит благоче́стия вели́кое та́инство.
И ны́не, храма Богородицы, или Предста́тельство христиа́н:
Прокимен гласа.
И отцев песнь глас 4:
Благослове́н еси́, Го́споди Бо́же оте́ц на́ших, и хва́льно и просла́влено И́мя Твое́ во ве́ки.
Апостол дне.
И отцев, ко Евреем, зачало 334
Бра́тие, помина́йте наста́вники ва́ша, и́же глаго́лаша вам сло́во Бо́жие: и́хже взира́юще на сконча́ние жи́тельства, подража́йте ве́ре их. Иису́с Христо́с вчера́ и днесь то́йже, и во ве́ки. В науче́ния стра́нна и разли́чна не прилага́йтеся: добро́ бо благода́тию утвержда́ти сердца́, а не бра́шны, от ни́хже не прия́ша по́льзы ходи́вшии в них. И́мамы же олта́рь, от него́же не и́мут вла́сти я́сти служа́щии се́ни. И́хже бо кровь живо́тных вно́сится во свята́я за грехи́ первосвяще́нником, сих телеса́ сжига́ются вне ста́на. Те́мже Иису́с, да освяти́т лю́ди свое́ю кро́вию, вне врат пострада́ти изво́лил. Те́мже у́бо да исхо́дим к нему́ вне ста́на, поноше́ние его́ нося́ще. Не и́мамы бо зде пребыва́ющаго гра́да, но гряду́щаго взыску́ем. Тем у́бо прино́сим же́ртву хвале́ния вы́ну Бо́гу, си́речь плод усте́н испове́дающихся и́мени Его́. Благотворе́ния же и обще́ния не забыва́йте: таковы́ми бо же́ртвами благоугожда́ется Бог.
Аллилуия, гласа. И отцев, глас 1
Стих: Бог бого́в Госпо́дь глаго́ла, и призва́ зе́млю от восто́к со́лнца до за́пад. Стих: Собери́те Ему́ преподо́бныя Его́, завеща́ющия заве́т Его́ о же́ртвах.
Евангелие дне.
И отцев, от Иоанна, зачало 56
Во вре́мя о́но, возведе́ Иису́с о́чи Свои́ на не́бо и рече́: О́тче, прии́де час, просла́ви Сы́на Твоего́, да и Сын Твой просла́вит Тя. Я́коже дал еси́ Ему́ власть вся́кия пло́ти, да вся́ко, е́же дал еси́ Ему́, даст им живо́т ве́чный: Се же есть живо́т ве́чный, да зна́ют Тебе́ еди́наго и́стиннаго Бо́га, и Его́же посла́л еси́ Иису́с Христа́. Аз просла́вих Тя на земли́, де́ло соверши́х, е́же дал еси́ Мне да сотворю́. И ны́не просла́ви Мя Ты, О́тче, у тебе́ Самого́ сла́вою, ю́же име́х у тебе́ пре́жде мир не бысть. Яви́х и́мя Твое́ челове́ком, и́хже дал еси́ Мне от ми́ра: Твои́ бе́ша, и Мне их дал еси́, и сло́во Твое́ сохрани́ша: Ны́не разуме́ша, я́ко вся, ели́ка дал еси́ Мне, от Тебе́ суть. Я́ко глаго́лы, и́хже дал еси́ Мне, дах им, и ти́и прия́ша, и разуме́ша вои́стинну, я́ко от Тебе́ изыдо́х, и ве́роваша, я́ко Ты Мя посла́. Аз о сих молю́: не о всем ми́ре молю́, но о тех, и́хже дал еси́ Мне, я́ко Твои́ суть: И Моя́ вся Твоя́ суть, и Твоя́ Моя́, и просла́вихся в них: И ктому́ несмь в ми́ре, и си́и в ми́ре суть, и Аз к Тебе́ гряду́. О́тче Святы́й, соблюди́ их во и́мя Твое́, и́хже дал еси́ Мне, да бу́дут еди́но, я́коже и Мы. Егда́ бех с ни́ми в ми́ре, Аз соблюда́х их во и́мя Твое́: и́хже дал еси́ Мне, сохрани́х, и никто́же от них поги́бе, то́кмо сын поги́бельный, да сбу́дется Писа́ние. Ны́не же к Тебе́ гряду́, и сия́ глаго́лю в ми́ре, да и́мут ра́дость Мою́ испо́лнену в себе́.
Причастен:
Хвали́те Го́спода с Небе́с, / хвали́те Его́ в вы́шних. И отцев: Ра́дуйтеся, пра́веднии, о Го́споде, / пра́вым подоба́ет похвала́. / Аллилу́иа, трижды.